𑁬. 𑀦𑀚𑀻𑀭𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀙𑀝𑁆𑀞𑁂 𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀻𑀢𑀺 𑀅𑀢𑀻𑀢𑀩𑀼𑀤𑁆𑀥𑀸𑀦𑀁 𑀬𑀸𑀯𑀚𑁆𑀚𑀤𑀺𑀯𑀲𑀸 𑀦𑀸𑀫𑀕𑁄𑀢𑁆𑀢𑀁 𑀓𑀣𑀺𑀬𑀢𑀺, 𑀢𑀲𑁆𑀫𑀸 𑀦 𑀚𑀻𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀧𑁄𑀭𑀸𑀡𑀸 𑀧𑀦 ‘‘𑀅𑀤𑁆𑀥𑀸𑀦𑁂 𑀕𑀘𑁆𑀙𑀦𑁆𑀢𑁂 𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀚𑀻𑀭𑀡𑀲𑀪𑀸𑀯𑁄 𑀧𑀦 𑀦 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀆𑀮𑀲𑁆𑀬𑀦𑁆𑀢𑀺 𑀆𑀮𑀲𑀺𑀬𑀁, 𑀬𑁂𑀦 𑀞𑀺𑀢𑀝𑁆𑀞𑀸𑀦𑁂 𑀞𑀺𑀢𑁄𑀯, 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺, 𑀢𑁂𑀮𑁂𑀧𑀺 𑀉𑀢𑁆𑀢𑀭𑀦𑁆𑀢𑁂 𑀞𑀺𑀢𑀺𑀁 𑀦 𑀓𑀭𑁄𑀢𑀺. 𑀧𑀫𑀸𑀤𑁄𑀢𑀺 𑀦𑀺𑀤𑁆𑀤𑀸𑀬 𑀯𑀸 𑀓𑀺𑀮𑁂𑀲𑀯𑀲𑁂𑀦 𑀯𑀸 𑀧𑀫𑀸𑀤𑁄. 𑀅𑀦𑀼𑀝𑁆𑀞𑀸𑀦𑀦𑁆𑀢𑀺 𑀓𑀫𑁆𑀫𑀲𑀫𑀬𑁂 𑀓𑀫𑁆𑀫𑀓𑀭𑀡𑀯𑀻𑀭𑀺𑀬𑀸𑀪𑀸𑀯𑁄. 𑀅𑀲𑀁𑀬𑀫𑁄𑀢𑀺 𑀲𑀻𑀮𑀲𑀜𑁆𑀜𑀫𑀸𑀪𑀸𑀯𑁄 𑀯𑀺𑀲𑁆𑀲𑀝𑁆𑀞𑀸𑀘𑀸𑀭𑀢𑀸. 𑀦𑀺𑀤𑁆𑀤𑀸𑀢𑀺 𑀲𑁄𑀧𑁆𑀧𑀩𑀳𑀼𑀮𑀢𑀸. 𑀢𑀸𑀬 𑀕𑀘𑁆𑀙𑀦𑁆𑀢𑁄𑀧𑀺 𑀞𑀺𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀦𑀺𑀤𑁆𑀤𑀸𑀬𑀢𑀺, 𑀧𑀕𑁂𑀯 𑀦𑀺𑀧𑀦𑁆𑀦𑁄. 𑀢𑀦𑁆𑀤𑀻𑀢𑀺 𑀅𑀢𑀺𑀘𑁆𑀙𑀸𑀢𑀸𑀤𑀺𑀯𑀲𑁂𑀦 𑀆𑀕𑀦𑁆𑀢𑀼𑀓𑀸𑀮𑀲𑀺𑀬𑀁. 𑀢𑁂 𑀙𑀺𑀤𑁆𑀤𑁂𑀢𑀺 𑀢𑀸𑀦𑀺 𑀙 𑀙𑀺𑀤𑁆𑀤𑀸𑀦𑀺 𑀯𑀺𑀯𑀭𑀸𑀦𑀺. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦. 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑀺𑀯𑀚𑁆𑀚𑀬𑁂𑀢𑀺 𑀯𑀚𑁆𑀚𑁂𑀬𑁆𑀬 𑀚𑀳𑁂𑀬𑁆𑀬. 𑀙𑀝𑁆𑀞𑀁.