𑁭. 𑀇𑀲𑁆𑀲𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀢𑁆𑀢𑀫𑁂 𑀲𑀢𑁆𑀣𑀫𑀮𑀦𑁆𑀢𑀺 𑀫𑀮𑀕𑁆𑀕𑀳𑀺𑀢𑀲𑀢𑁆𑀣𑀁. 𑀓𑀺𑀁 𑀲𑀼 𑀳𑀭𑀦𑁆𑀢𑀁 𑀯𑀸𑀭𑁂𑀦𑁆𑀢𑀻𑀢𑀺 𑀓𑀁 𑀳𑀭𑀦𑁆𑀢𑀁 𑀦𑀺𑀲𑁂𑀥𑁂𑀦𑁆𑀢𑀺. 𑀯𑀲𑁄𑀢𑀺 𑀆𑀡𑀸𑀧𑀯𑀢𑁆𑀢𑀦𑀁. 𑀇𑀢𑁆𑀣𑀻𑀢𑀺 𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑀪𑀡𑁆𑀟𑀢𑁆𑀢𑀸 ‘‘𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫𑀁, 𑀯𑀭𑀪𑀡𑁆𑀟’’𑀦𑁆𑀢𑀺 𑀆𑀳. 𑀅𑀣 𑀯𑀸 𑀲𑀩𑁆𑀩𑁂𑀧𑀺 𑀩𑁄𑀥𑀺𑀲𑀢𑁆𑀢𑀸 𑀘 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀫𑀸𑀢𑀼𑀓𑀼𑀘𑁆𑀙𑀺𑀬𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 ‘‘𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫’’𑀦𑁆𑀢𑀺 𑀆𑀳. 𑀓𑁄𑀥𑁄 𑀲𑀢𑁆𑀣𑀫𑀮𑀦𑁆𑀢𑀺 𑀓𑁄𑀥𑁄 𑀫𑀮𑀕𑁆𑀕𑀳𑀺𑀢𑀲𑀢𑁆𑀣𑀲𑀤𑀺𑀲𑁄, 𑀧𑀜𑁆𑀜𑀸𑀲𑀢𑁆𑀣𑀲𑁆𑀲 𑀯𑀸 𑀫𑀮𑀦𑁆𑀢𑀺 𑀲𑀢𑁆𑀣𑀫𑀮𑀁. 𑀅𑀩𑁆𑀩𑀼𑀤𑀦𑁆𑀢𑀺 𑀯𑀺𑀦𑀸𑀲𑀓𑀸𑀭𑀡𑀁, 𑀘𑁄𑀭𑀸 𑀮𑁄𑀓𑀲𑁆𑀫𑀺𑀁 𑀯𑀺𑀦𑀸𑀲𑀓𑀸𑀢𑀺 𑀅𑀢𑁆𑀣𑁄. 𑀳𑀭𑀦𑁆𑀢𑁄𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄. 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀳𑀺 𑀧𑀝𑁆𑀞𑀧𑀺𑀢𑀓𑀸𑀮𑁂𑀬𑁂𑀯 𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀺. 𑀢𑁂𑀲𑀁 𑀢𑀸𑀦𑀺 𑀳𑀭𑀦𑁆𑀢𑁄 𑀲𑀫𑀡𑁄 𑀧𑀺𑀬𑁄 𑀳𑁄𑀢𑀺, 𑀅𑀦𑀸𑀳𑀭𑀦𑁆𑀢𑁂 𑀧𑀼𑀜𑁆𑀜𑀳𑀸𑀦𑀺𑀁 𑀦𑀺𑀲𑁆𑀲𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀲𑀢𑁆𑀢𑀫𑀁.