𑁯. 𑀘𑀽𑀴𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀸 𑀧𑀦, 𑀪𑀦𑁆𑀢𑁂, 𑀪𑀕𑀯𑀸𑀢𑀺 𑀇𑀤𑀁 𑀧𑀭𑀺𑀩𑁆𑀩𑀸𑀚𑀓𑁄 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀸𑀫𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀲𑀸𑀮𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳.

𑁨𑁭𑁧. 𑀢𑀁𑀬𑁂𑀯𑁂𑀢𑁆𑀣 𑀧𑀝𑀺𑀪𑀸𑀢𑀽𑀢𑀺 𑀲𑀘𑁂 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄, 𑀢𑀼𑀬𑁆𑀳𑁂𑀯𑁂𑀢𑁆𑀣 𑀏𑀓𑁄 𑀧𑀜𑁆𑀳𑁄 𑀏𑀓𑀁 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀼. 𑀬𑀣𑀸 𑀫𑀁 𑀧𑀝𑀺𑀪𑀸𑀲𑁂𑀬𑁆𑀬𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀫𑀫 𑀥𑀫𑁆𑀫𑀤𑁂𑀲𑀦𑀸 𑀉𑀧𑀝𑁆𑀞𑀳𑁂𑀬𑁆𑀬, 𑀏𑀢𑁂𑀦 𑀳𑀺 𑀓𑀸𑀭𑀡𑁂𑀦 𑀓𑀣𑀸𑀬 𑀲𑀫𑀼𑀝𑁆𑀞𑀺𑀢𑀸𑀬 𑀲𑀼𑀔𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀦𑁆𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂𑀢𑀺 𑀲𑁄 𑀓𑀺𑀭 𑀢𑀁 𑀤𑀺𑀲𑁆𑀯𑀸 𑁋 ‘‘𑀲𑀘𑁂 𑀪𑀕𑀯𑀸 𑀇𑀥 𑀅𑀪𑀯𑀺𑀲𑁆𑀲𑀸, 𑀅𑀬𑀫𑁂𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄𑀢𑀺 𑀤𑀻𑀧𑀲𑀳𑀲𑁆𑀲𑀁 𑀯𑀺𑀬 𑀉𑀚𑁆𑀚𑀮𑀸𑀧𑁂𑀢𑁆𑀯𑀸 𑀅𑀚𑁆𑀚 𑀫𑁂 𑀧𑀸𑀓𑀝𑀁 𑀅𑀓𑀭𑀺𑀲𑁆𑀲𑀸’’𑀢𑀺 𑀤𑀲𑀩𑀮𑀁𑀬𑁂𑀯 𑀅𑀦𑀼𑀲𑁆𑀲𑀭𑀺. 𑀢𑀲𑁆𑀫𑀸 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀳𑁄 𑀦𑀽𑀦𑀸𑀢𑀺 𑀅𑀦𑀼𑀲𑁆𑀲𑀭𑀡𑀢𑁆𑀣𑁂 𑀦𑀺𑀧𑀸𑀢𑀤𑁆𑀯𑀬𑀁. 𑀢𑁂𑀦 𑀢𑀲𑁆𑀲 𑀪𑀕𑀯𑀦𑁆𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀳𑁄 𑀦𑀽𑀦 𑀪𑀕𑀯𑀸 𑀅𑀳𑁄 𑀦𑀽𑀦 𑀲𑀼𑀕𑀢𑁄’’𑀢𑀺. 𑀬𑁄 𑀇𑀫𑁂𑀲𑀦𑁆𑀢𑀺 𑀬𑁄 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁. 𑀲𑀼𑀓𑀼𑀲𑀮𑁄𑀢𑀺 𑀲𑀼𑀝𑁆𑀞𑀼 𑀓𑀼𑀲𑀮𑁄 𑀦𑀺𑀧𑀼𑀡𑁄 𑀙𑁂𑀓𑁄. 𑀲𑁄 𑀪𑀕𑀯𑀸 𑀅𑀳𑁄 𑀦𑀽𑀦 𑀓𑀣𑁂𑀬𑁆𑀬, 𑀲𑁄 𑀲𑀼𑀕𑀢𑁄 𑀅𑀳𑁄 𑀦𑀽𑀦 𑀓𑀣𑁂𑀬𑁆𑀬, 𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀅𑀦𑁂𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀧𑀸𑀓𑀝𑀸𑀦𑀻𑀢𑀺, 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀢𑀲𑁆𑀲 𑀯𑀸𑀳𑀁 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪𑀸𑀢𑀺 𑀬𑁄 𑀳𑀺 𑀮𑀸𑀪𑀻 𑀳𑁄𑀢𑀺, 𑀲𑁄 ‘‘𑀧𑀼𑀩𑁆𑀩𑁂 𑀢𑁆𑀯𑀁 𑀔𑀢𑁆𑀢𑀺𑀬𑁄 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀚𑀸𑀦𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀲𑀼𑀲𑁆𑀲𑀽𑀲𑀢𑀺. 𑀅𑀮𑀸𑀪𑀻 𑀧𑀦 𑁋 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀻𑀲𑀓𑀫𑁆𑀧𑀫𑁂𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳 𑁋 ‘‘𑀢𑀲𑁆𑀲 𑀯𑀸𑀳𑀁 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀬𑁆𑀬’’𑀦𑁆𑀢𑀺.

𑀲𑁄 𑀯𑀸 𑀫𑀁 𑀅𑀧𑀭𑀦𑁆𑀢𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀺𑀦𑁄 𑀳𑀺 𑀅𑀦𑀸𑀕𑀢𑀁𑀲𑀜𑀸𑀡𑀁 𑀇𑀚𑁆𑀛𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀇𑀢𑀭𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀥𑀫𑁆𑀫𑀁 𑀢𑁂 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀅𑀬𑀁 𑀓𑀺𑀭 𑀅𑀢𑀻𑀢𑁂 𑀤𑁂𑀲𑀺𑀬𑀫𑀸𑀦𑁂𑀧𑀺 𑀦 𑀩𑀼𑀚𑁆𑀛𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀤𑁂𑀲𑀺𑀬𑀫𑀸𑀦𑁂𑀧𑀺 𑀦 𑀩𑀼𑀚𑁆𑀛𑀺𑀲𑁆𑀲𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀲𑀡𑁆𑀳𑀲𑀼𑀔𑀼𑀫𑀁 𑀧𑀘𑁆𑀘𑀬𑀸𑀓𑀸𑀭𑀁 𑀤𑁂𑀲𑁂𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀓𑀺𑀁 𑀧𑀦 𑀢𑀁 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀏𑀢𑀁 𑀧𑀕𑁂𑀯 𑀦 𑀩𑀼𑀚𑁆𑀛𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀧𑀦𑀲𑁆𑀲 𑀯𑀸𑀲𑀦𑀸𑀬 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀤𑀺𑀲𑁆𑀯𑀸 𑀪𑀕𑀯𑀸 𑀏𑀯𑀫𑀸𑀳.

𑀧𑀁𑀲𑀼𑀧𑀺𑀲𑀸𑀘𑀓𑀦𑁆𑀢𑀺 𑀅𑀲𑀼𑀘𑀺𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀧𑀺𑀲𑀸𑀘𑀁. 𑀲𑁄 𑀳𑀺 𑀏𑀓𑀁 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀳𑁄𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑀸 𑀓𑀺𑀭 𑀬𑀓𑁆𑀔𑀺𑀦𑀻 𑀤𑁆𑀯𑁂 𑀤𑀸𑀭𑀓𑁂 𑀣𑀽𑀧𑀸𑀭𑀸𑀫𑀤𑁆𑀯𑀸𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀳𑀸𑀭𑀧𑀭𑀺𑀬𑁂𑀲𑀦𑀢𑁆𑀣𑀁 𑀦𑀕𑀭𑀁 𑀕𑀢𑀸. 𑀤𑀸𑀭𑀓𑀸 𑀏𑀓𑀁 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀆𑀳𑀁𑀲𑀼, 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀫𑀸𑀢𑀸 𑀅𑀦𑁆𑀢𑁄 𑀦𑀕𑀭𑀁 𑀧𑀯𑀺𑀝𑁆𑀞𑀸, 𑀢𑀲𑁆𑀲𑀸 𑀯𑀤𑁂𑀬𑁆𑀬𑀸𑀣 ‘𑀬𑀁 𑀯𑀸 𑀢𑀁 𑀯𑀸 𑀮𑀤𑁆𑀥𑀓𑀁, 𑀕𑀳𑁂𑀢𑁆𑀯𑀸 𑀲𑀻𑀖𑀁 𑀕𑀘𑁆𑀙, 𑀤𑀸𑀭𑀓𑀸 𑀢𑁂 𑀚𑀺𑀖𑀘𑁆𑀙𑀺𑀢𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’’𑀢𑀺. 𑀢𑀫𑀳𑀁 𑀓𑀣𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺? 𑀇𑀤𑀁, 𑀪𑀦𑁆𑀢𑁂, 𑀕𑀡𑁆𑀳𑀣𑀸𑀢𑀺 𑀏𑀓𑀁 𑀫𑀽𑀮𑀔𑀡𑁆𑀟𑀁 𑀅𑀤𑀁𑀲𑀼. 𑀣𑁂𑀭𑀲𑁆𑀲 𑀅𑀦𑁂𑀓𑀸𑀦𑀺 𑀬𑀓𑁆𑀔𑀲𑀳𑀲𑁆𑀲𑀸𑀦𑀺 𑀧𑀜𑁆𑀜𑀸𑀬𑀺𑀁𑀲𑀼, 𑀲𑁄 𑀤𑀸𑀭𑀓𑁂𑀳𑀺 𑀤𑀺𑀦𑁆𑀦𑀲𑀜𑁆𑀜𑀸𑀡𑁂𑀦 𑀢𑀁 𑀬𑀓𑁆𑀔𑀺𑀦𑀺𑀁 𑀅𑀤𑁆𑀤𑀲 𑀯𑀺𑀭𑀽𑀧𑀁 𑀩𑀻𑀪𑀘𑁆𑀙𑀁 𑀓𑁂𑀯𑀮𑀁 𑀯𑀻𑀣𑀺𑀬𑀁 𑀕𑀩𑁆𑀪𑀫𑀮𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀁. 𑀤𑀺𑀲𑁆𑀯𑀸 𑀢𑀫𑀢𑁆𑀣𑀁 𑀓𑀣𑁂𑀲𑀺. 𑀓𑀣𑀁 𑀫𑀁 𑀢𑁆𑀯𑀁 𑀧𑀲𑁆𑀲𑀲𑀻𑀢𑀺 𑀯𑀼𑀢𑁆𑀢𑁂 𑀫𑀽𑀮𑀔𑀡𑁆𑀟𑀁 𑀤𑀲𑁆𑀲𑁂𑀲𑀺, 𑀲𑀸 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺. 𑀏𑀯𑀁 𑀧𑀁𑀲𑀼𑀧𑀺𑀲𑀸𑀘𑀓𑀸 𑀏𑀓𑀁 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑀸 𑀳𑁄𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀲 ‘‘𑀧𑀁𑀲𑀼𑀧𑀺𑀲𑀸𑀘𑀓𑀫𑁆𑀧𑀺 𑀦 𑀧𑀲𑁆𑀲𑀸𑀫𑀻’’𑀢𑀺 𑀆𑀳. 𑀦 𑀧𑀓𑁆𑀔𑀸𑀬𑀢𑀻𑀢𑀺 𑀦 𑀤𑀺𑀲𑁆𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺.

𑁨𑁭𑁨. 𑀤𑀻𑀖𑀸𑀧𑀺 𑀔𑁄 𑀢𑁂 𑀏𑀲𑀸𑀢𑀺 𑀉𑀤𑀸𑀬𑀺 𑀏𑀲𑀸 𑀢𑀯 𑀯𑀸𑀘𑀸 𑀤𑀻𑀖𑀸𑀧𑀺 𑀪𑀯𑁂𑀬𑁆𑀬, 𑀏𑀯𑀁 𑀯𑀤𑀦𑁆𑀢𑀲𑁆𑀲 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀧𑀯𑀢𑁆𑀢𑁂𑀬𑁆𑀬, 𑀦 𑀘 𑀅𑀢𑁆𑀣𑀁 𑀤𑀻𑀧𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀅𑀫𑀽𑀮𑀓𑀁 𑀦𑀺𑀭𑀢𑁆𑀣𑀓𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀁 𑀯𑀡𑁆𑀡𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀯𑀺𑀲𑀪𑀸𑀕𑀯𑀡𑁆𑀡𑁂 𑀭𑀢𑁆𑀢𑀓𑀫𑁆𑀩𑀮𑁂 𑀞𑀧𑀺𑀢𑁄. 𑀏𑀯𑀁𑀯𑀡𑁆𑀡𑁄 𑀅𑀢𑁆𑀢𑀸 𑀳𑁄𑀢𑀻𑀢𑀺 𑀇𑀤𑀁 𑀲𑁄 𑀲𑀼𑀪𑀓𑀺𑀡𑁆𑀳𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂 𑀲𑀦𑁆𑀥𑀸𑀬 𑁋 ‘‘𑀅𑀫𑁆𑀳𑀸𑀓𑀁 𑀫𑀢𑀓𑀸𑀮𑁂 𑀅𑀢𑁆𑀢𑀸 𑀲𑀼𑀪𑀓𑀺𑀡𑁆𑀳𑀤𑁂𑀯𑀮𑁄𑀓𑁂 𑀔𑀦𑁆𑀥𑀸 𑀯𑀺𑀬 𑀚𑁄𑀢𑁂𑀢𑀻’’𑀢𑀺 𑀯𑀤𑀢𑀺.

𑁨𑁭𑁩. 𑀅𑀬𑀁 𑀇𑀫𑁂𑀲𑀁 𑀉𑀪𑀺𑀦𑁆𑀦𑀦𑁆𑀢𑀺 𑀲𑁄 𑀓𑀺𑀭 𑀬𑀲𑁆𑀫𑀸 𑀫𑀡𑀺𑀲𑁆𑀲 𑀩𑀳𑀺 𑀆𑀪𑀸 𑀦 𑀦𑀺𑀘𑁆𑀙𑀭𑀢𑀺, 𑀔𑀚𑁆𑀚𑁄𑀧𑀦𑀓𑀲𑁆𑀲 𑀅𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀦𑀺𑀘𑁆𑀙𑀭𑀢𑀺, 𑀫𑀳𑀸𑀔𑀚𑁆𑀚𑁄𑀧𑀦𑀓𑀲𑁆𑀲 𑀧𑀦 𑀔𑀴𑀫𑀡𑁆𑀟𑀮𑀫𑀢𑁆𑀢𑀫𑁆𑀧𑀺 𑀦𑀺𑀘𑁆𑀙𑀭𑀢𑀺𑀬𑁂𑀯, 𑀢𑀲𑁆𑀫𑀸 𑀏𑀯𑀫𑀸𑀳.

𑀯𑀺𑀤𑁆𑀥𑁂𑀢𑀺 𑀉𑀩𑁆𑀩𑀺𑀤𑁆𑀥𑁂, 𑀫𑁂𑀖𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀯𑀮𑀸𑀳𑀓𑁂𑀢𑀺 𑀅𑀧𑀕𑀢𑀫𑁂𑀖𑁂. 𑀤𑁂𑀯𑁂𑀢𑀺 𑀆𑀓𑀸𑀲𑁂. 𑀑𑀲𑀥𑀺𑀢𑀸𑀭𑀓𑀸𑀢𑀺 𑀲𑀼𑀓𑁆𑀓𑀢𑀸𑀭𑀓𑀸. 𑀲𑀸 𑀳𑀺 𑀬𑀲𑁆𑀫𑀸 𑀢𑀲𑁆𑀲𑀸 𑀉𑀤𑀬𑀢𑁄 𑀧𑀝𑁆𑀞𑀸𑀬 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀑𑀲𑀥𑀸𑀦𑀺 𑀕𑀡𑁆𑀳𑀦𑁆𑀢𑀺𑀧𑀺 𑀧𑀺𑀯𑀦𑁆𑀢𑀺𑀧𑀺, 𑀢𑀲𑁆𑀫𑀸 ‘‘𑀑𑀲𑀥𑀺𑀢𑀸𑀭𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀤𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑀦𑁆𑀢𑀺 𑀅𑀪𑀺𑀦𑁆𑀦𑁂 𑀅𑀟𑁆𑀠𑀭𑀢𑁆𑀢𑀲𑀫𑀬𑁂. 𑀇𑀫𑀺𑀦𑀸 𑀕𑀕𑀦𑀫𑀚𑁆𑀛𑁂 𑀞𑀺𑀢𑀘𑀦𑁆𑀤𑀁 𑀤𑀲𑁆𑀲𑁂𑀢𑀺. 𑀅𑀪𑀺𑀤𑁄 𑀫𑀚𑁆𑀛𑀦𑁆𑀳𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀢𑁄 𑀔𑁄𑀢𑀺 𑀬𑁂 𑀅𑀦𑀼𑀪𑁄𑀦𑁆𑀢𑀺, 𑀢𑁂𑀳𑀺 𑀩𑀳𑀼𑀢𑀭𑀸, 𑀩𑀳𑀽 𑀘𑁂𑀯 𑀩𑀳𑀼𑀢𑀭𑀸 𑀘𑀸𑀢𑀺 𑀅𑀢𑁆𑀣𑁄. 𑀆𑀪𑀸 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀑𑀪𑀸𑀲𑀁 𑀦 𑀯𑀴𑀜𑁆𑀚𑀦𑁆𑀢𑀺, 𑀅𑀢𑁆𑀢𑀦𑁄 𑀲𑀭𑀻𑀭𑁄𑀪𑀸𑀲𑁂𑀦𑁂𑀯 𑀆𑀮𑁄𑀓𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀺.

𑁨𑁭𑁪. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑁄 ‘‘𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑁄, 𑀧𑀼𑀘𑁆𑀙𑀸𑀫𑀽𑀴𑁆𑀳𑁄 𑀧𑀦 𑀚𑀸𑀢𑁄, 𑀢𑀲𑁆𑀫𑀸 𑀦𑀁 𑀪𑀕𑀯𑀸 𑀢𑀁 𑀧𑀼𑀘𑁆𑀙𑀁 𑀲𑀭𑀸𑀧𑁂𑀦𑁆𑀢𑁄 𑀓𑀺𑀁 𑀧𑀦, 𑀉𑀤𑀸𑀬𑀺, 𑀅𑀢𑁆𑀣𑀺 𑀏𑀓𑀦𑁆𑀢𑀲𑀼𑀔𑁄 𑀮𑁄𑀓𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀓𑀸𑀭𑀯𑀢𑀻𑀢𑀺 𑀓𑀸𑀭𑀡𑀯𑀢𑀻. 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀢𑀧𑁄𑀕𑀼𑀡𑀦𑁆𑀢𑀺 𑀅𑀘𑁂𑀮𑀓𑀧𑀸𑀴𑀺𑀁 𑀲𑀦𑁆𑀥𑀸𑀬𑀸𑀳, 𑀲𑀼𑀭𑀸𑀧𑀸𑀦𑀯𑀺𑀭𑀢𑀻𑀢𑀺 𑀅𑀢𑁆𑀣𑁄.

𑁨𑁭𑁫. 𑀓𑀢𑀫𑀸 𑀧𑀦 𑀲𑀸, 𑀪𑀦𑁆𑀢𑁂, 𑀆𑀓𑀸𑀭𑀯𑀢𑀻 𑀧𑀝𑀺𑀧𑀤𑀸 𑀏𑀓𑀦𑁆𑀢𑀲𑀼𑀔𑀲𑁆𑀲𑀸𑀢𑀺 𑀓𑀲𑁆𑀫𑀸 𑀧𑀼𑀘𑁆𑀙𑀢𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀬𑀁 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀲𑀼𑀔𑀁 𑀯𑀤𑀸𑀫, 𑀧𑀝𑀺𑀧𑀤𑀁 𑀧𑀦 𑀓𑀸𑀮𑁂𑀦 𑀲𑀼𑀔𑀁 𑀓𑀸𑀮𑁂𑀦 𑀤𑀼𑀓𑁆𑀔𑀁 𑀯𑀤𑀸𑀫. 𑀏𑀓𑀦𑁆𑀢𑀲𑀼𑀔𑀲𑁆𑀲 𑀔𑁄 𑀧𑀦 𑀅𑀢𑁆𑀢𑀦𑁄 𑀧𑀝𑀺𑀧𑀤𑀸𑀬𑀧𑀺 𑀏𑀓𑀦𑁆𑀢𑀲𑀼𑀔𑀸𑀬 𑀪𑀯𑀺𑀢𑀩𑁆𑀩𑀁. 𑀅𑀫𑁆𑀳𑀸𑀓𑀁 𑀓𑀣𑀸 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀲𑀢𑁆𑀣𑀼 𑀓𑀣𑀸𑀯 𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺. 𑀇𑀤𑀸𑀦𑀺 𑀲𑀢𑁆𑀣𑀸𑀭𑀁𑀬𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀸 𑀧𑀼𑀘𑁆𑀙𑀢𑀺.

𑀏𑀢𑁆𑀣 𑀫𑀬𑀁 𑀅𑀦𑀲𑁆𑀲𑀸𑀫𑀸𑀢𑀺 𑀏𑀢𑀲𑁆𑀫𑀺𑀁 𑀓𑀸𑀭𑀡𑁂 𑀫𑀬𑀁 𑀅𑀦𑀲𑁆𑀲𑀸𑀫. 𑀓𑀲𑁆𑀫𑀸 𑀧𑀦 𑀏𑀯𑀫𑀸𑀳𑀁𑀲𑀼? 𑀢𑁂 𑀓𑀺𑀭 𑀧𑀼𑀩𑁆𑀩𑁂 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺, 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀧𑀦 𑀓𑀸𑀮𑁂 𑀓𑀲𑀺𑀡𑀧𑀭𑀺𑀓𑀫𑁆𑀫𑀫𑁆𑀧𑀺 𑀦 𑀚𑀸𑀦𑀺𑀁𑀲𑀼, 𑀢𑀢𑀺𑀬𑀚𑁆𑀛𑀸𑀦𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀧𑀜𑁆𑀘 𑀧𑀼𑀩𑁆𑀩𑀪𑀸𑀕𑀥𑀫𑁆𑀫𑁂 𑀧𑀦 ‘‘𑀆𑀓𑀸𑀭𑀯𑀢𑀻 𑀧𑀝𑀺𑀧𑀤𑀸’’𑀢𑀺 𑀉𑀕𑁆𑀕𑀳𑁂𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑀁 ‘‘𑀏𑀓𑀦𑁆𑀢𑀲𑀼𑀔𑁄 𑀮𑁄𑀓𑁄’’𑀢𑀺 𑀉𑀕𑁆𑀕𑀡𑁆𑀳𑀺𑀁𑀲𑀼. 𑀢𑀲𑁆𑀫𑀸 𑀏𑀯𑀫𑀸𑀳𑀁𑀲𑀼. 𑀉𑀢𑁆𑀢𑀭𑀺𑀢𑀭𑀦𑁆𑀢𑀺 𑀇𑀢𑁄 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀉𑀢𑁆𑀢𑀭𑀺𑀢𑀭𑀁 𑀧𑀝𑀺𑀧𑀤𑀁 𑀯𑀸 𑀢𑀢𑀺𑀬𑀚𑁆𑀛𑀸𑀦𑀢𑁄 𑀉𑀢𑁆𑀢𑀭𑀺𑀢𑀭𑀁 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀯𑀸 𑀦 𑀚𑀸𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀲𑀤𑁆𑀤𑁂 𑀓𑀢𑁆𑀯𑀸𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀲𑀤𑁆𑀤𑀁 𑀓𑀸𑀢𑀼𑀁 𑀆𑀭𑀤𑁆𑀥𑁂 𑀦𑀺𑀲𑁆𑀲𑀤𑁆𑀤𑁂 𑀓𑀢𑁆𑀯𑀸.

𑁨𑁭𑁬. 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀽𑀢𑀺 𑀏𑀢𑁆𑀣 𑀤𑁆𑀯𑁂 𑀲𑀘𑁆𑀙𑀺𑀓𑀺𑀭𑀺𑀬𑀸 𑀧𑀝𑀺𑀮𑀸𑀪𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀧𑀘𑁆𑀘𑀓𑁆𑀔𑀲𑀘𑁆𑀙𑀺𑀓𑀺𑀭𑀺𑀬𑀸 𑀘. 𑀢𑀢𑁆𑀣 𑀢𑀢𑀺𑀬𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑀮𑁄𑀓𑁂 𑀢𑁂𑀲𑀁 𑀤𑁂𑀯𑀸𑀦𑀁 𑀲𑀫𑀸𑀦𑀸𑀬𑀼𑀯𑀡𑁆𑀡𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀬𑀁 𑀧𑀝𑀺𑀮𑀸𑀪𑀲𑀘𑁆𑀙𑀺𑀓𑀺𑀭𑀺𑀬𑀸 𑀦𑀸𑀫. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑁂𑀦 𑀲𑀼𑀪𑀓𑀺𑀡𑁆𑀳𑀮𑁄𑀓𑀁 𑀕𑀦𑁆𑀢𑁆𑀯𑀸 𑀢𑁂𑀳𑀺 𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀮𑁆𑀮𑀧𑀢𑀺 𑀲𑀸𑀓𑀘𑁆𑀙𑀁 𑀆𑀧𑀚𑁆𑀚𑀢𑀺, 𑀅𑀬𑀁 𑀧𑀘𑁆𑀘𑀓𑁆𑀔𑀲𑀘𑁆𑀙𑀺𑀓𑀺𑀭𑀺𑀬𑀸 𑀦𑀸𑀫. 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑀢𑀺𑀬𑀚𑁆𑀛𑀸𑀦𑀁 𑀆𑀓𑀸𑀭𑀯𑀢𑀻 𑀧𑀝𑀺𑀧𑀤𑀸 𑀦𑀸𑀫. 𑀢𑀜𑁆𑀳𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀦𑁂𑀯 𑀲𑀓𑁆𑀓𑀸 𑀲𑀼𑀪𑀓𑀺𑀡𑁆𑀳𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀁, 𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀼𑀁. 𑀇𑀢𑀺 𑀤𑀼𑀯𑀺𑀥𑀫𑁆𑀧𑁂𑀢𑀁 𑀲𑀘𑁆𑀙𑀺𑀓𑀺𑀭𑀺𑀬𑀁 𑀲𑀦𑁆𑀥𑀸𑀬 𑁋 ‘‘𑀏𑀢𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀏𑀓𑀦𑁆𑀢𑀲𑀼𑀔𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀽’’𑀢𑀺 𑀆𑀳.

𑁨𑁭𑁭. 𑀉𑀤𑀜𑁆𑀘𑀦𑀺𑀓𑁄𑀢𑀺 𑀉𑀤𑀓𑀯𑀸𑀭𑀓𑁄. 𑀅𑀦𑁆𑀢𑀭𑀸𑀬𑀫𑀓𑀸𑀲𑀻𑀢𑀺 𑀬𑀣𑀸 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀢𑀺, 𑀏𑀯𑀁 𑀉𑀧𑀤𑁆𑀤𑀼𑀢𑀫𑀓𑀸𑀲𑀺 𑀬𑀣𑀸 𑀢𑀁 𑀉𑀧𑀦𑀺𑀲𑁆𑀲𑀬𑀯𑀺𑀧𑀦𑁆𑀦𑀁. 𑀅𑀬𑀁 𑀓𑀺𑀭 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀫𑀓𑀸𑀲𑀺. 𑀅𑀣𑀲𑁆𑀲 𑀏𑀓𑁄 𑀲𑀳𑀸𑀬𑀓𑁄 𑀪𑀺𑀓𑁆𑀔𑀼 𑀲𑀸𑀲𑀦𑁂 𑀅𑀦𑀪𑀺𑀭𑀢𑁄, ‘‘𑀆𑀯𑀼𑀲𑁄, 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑁂 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀺𑀳𑀺𑀪𑀸𑀯𑀸𑀬 𑀯𑀡𑁆𑀡𑀁 𑀅𑀪𑀸𑀲𑀺. 𑀇𑀢𑀭𑁄 𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀯𑀺𑀩𑁆𑀪𑀫𑀺. 𑀢𑁂𑀦𑀲𑁆𑀲 𑀓𑀫𑁆𑀫𑀼𑀦𑀸 𑀇𑀤𑀸𑀦𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀧𑀩𑁆𑀩𑀚𑁆𑀚𑀸𑀬 𑀅𑀦𑁆𑀢𑀭𑀸𑀬𑁄 𑀚𑀸𑀢𑁄. 𑀪𑀕𑀯𑀢𑀸 𑀧𑀦𑀲𑁆𑀲 𑀧𑀼𑀭𑀺𑀫𑀲𑀼𑀢𑁆𑀢𑀁 𑀅𑀢𑀺𑀭𑁂𑀓𑀪𑀸𑀡𑀯𑀸𑀭𑀫𑀢𑁆𑀢𑀁, 𑀇𑀤𑀁 𑀪𑀸𑀡𑀯𑀸𑀭𑀫𑀢𑁆𑀢𑀦𑁆𑀢𑀺 𑀏𑀢𑁆𑀢𑀓𑀸𑀬 𑀢𑀦𑁆𑀢𑀺𑀬𑀸 𑀥𑀫𑁆𑀫𑁄 𑀓𑀣𑀺𑀢𑁄, 𑀏𑀓𑀤𑁂𑀲𑀦𑀸𑀬𑀧𑀺 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑁄 𑀦 𑀚𑀸𑀢𑁄, 𑀅𑀦𑀸𑀕𑀢𑁂 𑀧𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀦𑀸𑀕𑀢𑁂 𑀧𑀘𑁆𑀘𑀬𑀪𑀸𑀯𑀜𑁆𑀘𑀲𑁆𑀲 𑀤𑀺𑀲𑁆𑀯𑀸 𑀪𑀕𑀯𑀸 𑀥𑀭𑀫𑀸𑀦𑁄 𑀏𑀓𑀁 𑀪𑀺𑀓𑁆𑀔𑀼𑀫𑁆𑀧𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀫𑁆𑀳𑀺 𑀏𑀢𑀤𑀕𑁆𑀕𑁂 𑀦 𑀞𑀧𑁂𑀲𑀺. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 𑁋 ‘‘𑀅𑀦𑀸𑀕𑀢𑁂 𑀅𑀬𑀁 𑀫𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀲𑁄 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀥𑀫𑁆𑀫𑀸𑀲𑁄𑀓𑀭𑀸𑀚𑀓𑀸𑀮𑁂 𑀧𑀸𑀝𑀮𑀺𑀧𑀼𑀢𑁆𑀢𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀳𑀼𑀢𑁆𑀯𑀸 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀦𑀁 𑀅𑀕𑁆𑀕𑁄 𑀅𑀳𑁄𑀲𑀺. 𑀣𑁂𑀭𑀲𑁆𑀲 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀝𑀺𑀮𑀪𑀺𑀁𑀲𑀼, 𑀣𑁂𑀭𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀸𑀘𑀭𑀺𑀬𑁄 𑀳𑀼𑀢𑁆𑀯𑀸 𑀯𑀢𑁆𑀢𑀦𑀺𑀲𑁂𑀦𑀸𑀲𑀦𑁂 𑀆𑀯𑀲𑀺, 𑀢𑀺𑀁𑀲𑀬𑁄𑀚𑀦𑀫𑀢𑁆𑀢𑀸 𑀅𑀝𑀯𑀻 𑀏𑀓𑀁 𑀧𑀥𑀸𑀦𑀖𑀭𑀁 𑀅𑀳𑁄𑀲𑀺. 𑀣𑁂𑀭𑁄 𑀆𑀓𑀸𑀲𑁂 𑀘𑀫𑁆𑀫𑀔𑀡𑁆𑀟𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀪𑀺𑀓𑁆𑀔𑀸𑀘𑀸𑀭𑀫𑁆𑀧𑀺 𑀅𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺, 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀫𑁂𑀯 𑀕𑀦𑁆𑀢𑁆𑀯𑀸 𑀤𑀸𑀦𑀫𑀤𑀁𑀲𑀼. 𑀥𑀫𑁆𑀫𑀸𑀲𑁄𑀓𑀭𑀸𑀚𑀸 𑀣𑁂𑀭𑀲𑁆𑀲 𑀕𑀼𑀡𑀁 𑀲𑀼𑀢𑁆𑀯𑀸 𑀤𑀝𑁆𑀞𑀼𑀓𑀸𑀫𑁄 𑀢𑀺𑀓𑁆𑀔𑀢𑁆𑀢𑀼𑀁 𑀧𑀳𑀺𑀡𑀺. 𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀁 𑀤𑀫𑁆𑀫𑀻𑀢𑀺 𑀏𑀓𑀯𑀸𑀭𑀫𑁆𑀧𑀺 𑀦 𑀕𑀢𑁄𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.