𑁧𑁦. 𑀯𑁂𑀔𑀦𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑁂𑀔𑀦𑀲𑀲𑀼𑀢𑁆𑀢𑀁. 𑀢𑀢𑁆𑀣 𑀯𑁂𑀔𑀦𑀲𑁄𑀢𑀺 𑀅𑀬𑀁 𑀓𑀺𑀭 𑀲𑀓𑀼𑀮𑀼𑀤𑀸𑀬𑀺𑀲𑁆𑀲 𑀆𑀘𑀭𑀺𑀬𑁄, 𑀲𑁄 ‘‘𑀲𑀓𑀼𑀮𑀼𑀤𑀸𑀬𑀻 𑀧𑀭𑀺𑀩𑁆𑀩𑀸𑀚𑀓𑁄 𑀧𑀭𑀫𑀯𑀡𑁆𑀡𑀧𑀜𑁆𑀳𑁂 𑀧𑀭𑀸𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀫𑀬𑀸 𑀲𑁄 𑀲𑀸𑀥𑀼𑀓𑀁 𑀉𑀕𑁆𑀕𑀳𑀸𑀧𑀺𑀢𑁄, 𑀢𑁂𑀦𑀸𑀧𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑀺𑀢𑀁, 𑀓𑀣𑀁 𑀦𑀼 𑀔𑁄 𑀧𑀭𑀸𑀚𑀺𑀢𑁄, 𑀳𑀦𑁆𑀤𑀸𑀳𑀁 𑀲𑀬𑀁 𑀕𑀦𑁆𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀧𑀭𑀫𑀯𑀡𑁆𑀡𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀕𑀳𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀁 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀪𑀕𑀯𑀸, 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀦 𑀞𑀺𑀢𑀓𑁄𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑀢𑁆𑀣 𑀧𑀼𑀭𑀺𑀫𑀲𑀤𑀺𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁨𑁮𑁦. 𑀧𑀜𑁆𑀘 𑀔𑁄 𑀇𑀫𑁂𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀅𑀕𑀸𑀭𑀺𑀬𑁄𑀧𑀺 𑀏𑀓𑀘𑁆𑀘𑁄 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀏𑀓𑀘𑁆𑀘𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 𑀘 𑀏𑀓𑀘𑁆𑀘𑁄 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀏𑀓𑀘𑁆𑀘𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀅𑀬𑀁 𑀧𑀦 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀲𑁄 𑀇𑀫𑀸𑀬 𑀓𑀣𑀸𑀬 𑀓𑀣𑀺𑀬𑀫𑀸𑀦𑀸𑀬 𑀅𑀢𑁆𑀢𑀦𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀲𑁆𑀲𑀢𑀺, 𑀏𑀯𑀫𑀲𑁆𑀲𑀸𑀬𑀁 𑀤𑁂𑀲𑀦𑀸 𑀲𑀧𑁆𑀧𑀸𑀬𑀸 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀓𑀸𑀫𑀕𑁆𑀕𑀲𑀼𑀔𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀅𑀥𑀺𑀧𑁆𑀧𑁂𑀢𑀁.

𑁨𑁮𑁧. 𑀧𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀚𑀸𑀦𑀦𑀪𑀸𑀯𑀁 𑀧𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀺. 𑀦𑀸𑀫𑀓𑀁𑀬𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺 𑀦𑀺𑀭𑀢𑁆𑀣𑀓𑀯𑀘𑀦𑀫𑀢𑁆𑀢𑀫𑁂𑀯 𑀲𑀫𑁆𑀧𑀚𑁆𑀚𑀢𑀺. 𑀢𑀺𑀝𑁆𑀞𑀢𑀼 𑀧𑀼𑀩𑁆𑀩𑀦𑁆𑀢𑁄 𑀢𑀺𑀝𑁆𑀞𑀢𑀼 𑀅𑀧𑀭𑀦𑁆𑀢𑁄𑀢𑀺 𑀬𑀲𑁆𑀫𑀸 𑀢𑀼𑀬𑁆𑀳𑀁 𑀅𑀢𑀻𑀢𑀓𑀣𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀦𑀢𑁆𑀣𑀺, 𑀅𑀦𑀸𑀕𑀢𑀓𑀣𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀢𑀺𑀝𑁆𑀞𑀢𑀽𑀢𑀺 𑀆𑀳. 𑀲𑀼𑀢𑁆𑀢𑀩𑀦𑁆𑀥𑀦𑁂𑀳𑀻𑀢𑀺 𑀲𑀼𑀢𑁆𑀢𑀫𑀬𑀩𑀦𑁆𑀥𑀦𑁂𑀳𑀺. 𑀢𑀲𑁆𑀲 𑀳𑀺 𑀆𑀭𑀓𑁆𑀔𑀢𑁆𑀣𑀸𑀬 𑀳𑀢𑁆𑀣𑀧𑀸𑀤𑁂𑀲𑀼 𑀘𑁂𑀯 𑀕𑀻𑀯𑀸𑀬 𑀘 𑀲𑀼𑀢𑁆𑀢𑀓𑀸𑀦𑀺 𑀩𑀦𑁆𑀥𑀦𑁆𑀢𑀺. 𑀢𑀸𑀦𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀫𑀳𑀮𑁆𑀮𑀓𑀓𑀸𑀮𑁂 𑀧𑀦𑀲𑁆𑀲 𑀢𑀸𑀦𑀺 𑀲𑀬𑀁 𑀯𑀸 𑀧𑀽𑀢𑀻𑀦𑀺 𑀳𑀼𑀢𑁆𑀯𑀸 𑀫𑀼𑀜𑁆𑀘𑀦𑁆𑀢𑀺, 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀳𑀭𑀦𑁆𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀤𑀳𑀭𑀲𑁆𑀲 𑀓𑀼𑀫𑀸𑀭𑀲𑁆𑀲 𑀲𑀼𑀢𑁆𑀢𑀩𑀦𑁆𑀥𑀦𑀸𑀦𑀁 𑀅𑀚𑀸𑀦𑀦𑀓𑀸𑀮𑁄 𑀯𑀺𑀬 𑀅𑀯𑀺𑀚𑁆𑀚𑀸𑀬 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀚𑀸𑀦𑀦𑀁, 𑀦 𑀳𑀺 𑀲𑀓𑁆𑀓𑀸 𑀅𑀯𑀺𑀚𑁆𑀚𑀸𑀬 𑀧𑀼𑀭𑀺𑀫𑀓𑁄𑀝𑀺 𑀜𑀸𑀢𑀼𑀁, 𑀫𑁄𑀘𑀦𑀓𑀸𑀮𑁂 𑀚𑀸𑀦𑀦𑀲𑀤𑀺𑀲𑀁 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀸𑀩𑀦𑁆𑀥𑀦𑀲𑁆𑀲 𑀧𑀫𑁄𑀓𑁆𑀔𑁄 𑀚𑀸𑀢𑁄𑀢𑀺 𑀚𑀸𑀦𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑁂𑀔𑀦𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.