𑁮. 𑀲𑀫𑀡𑀫𑀼𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀫𑀡𑀫𑀼𑀡𑁆𑀟𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀉𑀕𑁆𑀕𑀸𑀳𑀫𑀸𑀦𑁄𑀢𑀺 𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀸𑀫𑀁. 𑀲𑀼𑀫𑀦𑁄𑀢𑀺 𑀧𑀓𑀢𑀺𑀦𑀸𑀫𑀁. 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀧𑀦 𑀉𑀕𑁆𑀕𑀳𑀺𑀢𑀼𑀁 𑀉𑀕𑁆𑀕𑀸𑀳𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 𑀉𑀕𑁆𑀕𑀸𑀳𑀫𑀸𑀦𑁄𑀢𑀺 𑀦𑀁 𑀲𑀜𑁆𑀚𑀸𑀦𑀦𑁆𑀢𑀺. 𑀲𑀫𑀬𑀁 𑀧𑀯𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑀬𑀧𑁆𑀧𑀯𑀸𑀤𑀓𑀁. 𑀢𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀘𑀗𑁆𑀓𑀻𑀢𑀸𑀭𑀼𑀓𑁆𑀔𑀧𑁄𑀓𑁆𑀔𑀭𑀲𑀸𑀢𑀺𑀧𑁆𑀧𑀪𑀼𑀢𑀬𑁄 𑀩𑁆𑀭𑀸𑀳𑁆𑀫𑀡𑀸 𑀦𑀺𑀕𑀡𑁆𑀞𑀸𑀘𑁂𑀮𑀓𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 𑀘 𑀧𑀩𑁆𑀩𑀚𑀺𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀆𑀭𑀸𑀫𑁄 𑀲𑀫𑀬𑀧𑁆𑀧𑀯𑀸𑀤𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑁂𑀯 𑀢𑀺𑀦𑁆𑀤𑀼𑀓𑀸𑀘𑀻𑀭𑀲𑀗𑁆𑀔𑀸𑀢𑀸𑀬 𑀢𑀺𑀫𑁆𑀩𑀭𑀽𑀲𑀓𑀭𑀼𑀓𑁆𑀔𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀢𑀺𑀦𑁆𑀤𑀼𑀓𑀸𑀘𑀻𑀭𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀞𑀫𑀁 𑀏𑀓𑀸 𑀲𑀸𑀮𑀸 𑀅𑀳𑁄𑀲𑀺, 𑀧𑀘𑁆𑀙𑀸 𑀫𑀳𑀸𑀧𑀼𑀜𑁆𑀜𑀁 𑀧𑁄𑀝𑁆𑀞𑀧𑀸𑀤𑀧𑀭𑀺𑀩𑁆𑀩𑀸𑀚𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀲𑀸𑀮𑀸 𑀓𑀢𑀸, 𑀢𑀲𑁆𑀫𑀸 𑀢𑀫𑁂𑀯 𑀏𑀓𑀁 𑀲𑀸𑀮𑀁 𑀉𑀧𑀸𑀤𑀸𑀬 𑀮𑀤𑁆𑀥𑀦𑀸𑀫𑀯𑀲𑁂𑀦 𑀏𑀓𑀲𑀸𑀮𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀫𑀮𑁆𑀮𑀺𑀓𑀸𑀬 𑀧𑀦 𑀧𑀲𑁂𑀦𑀤𑀺𑀭𑀜𑁆𑀜𑁄 𑀤𑁂𑀯𑀺𑀬𑀸 𑀉𑀬𑁆𑀬𑀸𑀦𑀪𑀽𑀢𑁄 𑀲𑁄 𑀧𑀼𑀧𑁆𑀨𑀨𑀮𑀲𑀜𑁆𑀙𑀦𑁆𑀦𑁄 𑀆𑀭𑀸𑀫𑁄𑀢𑀺 𑀓𑀢𑁆𑀯𑀸 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀢𑀲𑁆𑀫𑀺𑀁 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂. 𑀧𑀝𑀺𑀯𑀲𑀢𑀻𑀢𑀺 𑀯𑀸𑀲𑀨𑀸𑀲𑀼𑀢𑀸𑀬 𑀯𑀲𑀢𑀺. 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲 𑀤𑀺𑀯𑀸 𑀦𑀸𑀫 𑀫𑀚𑁆𑀛𑀦𑁆𑀳𑀸𑀢𑀺𑀓𑁆𑀓𑀫𑁄, 𑀢𑀲𑁆𑀫𑀺𑀁 𑀤𑀺𑀯𑀲𑀲𑁆𑀲𑀧𑀺 𑀤𑀺𑀯𑀸𑀪𑀽𑀢𑁂 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀦𑀺𑀓𑁆𑀔𑀫𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀮𑁆𑀮𑀻𑀦𑁄𑀢𑀺 𑀢𑀢𑁄 𑀢𑀢𑁄 𑀭𑀽𑀧𑀸𑀤𑀺𑀕𑁄𑀘𑀭𑀢𑁄 𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀮𑀻𑀦𑁄, 𑀛𑀸𑀦𑀭𑀢𑀺𑀲𑁂𑀯𑀦𑀯𑀲𑁂𑀦 𑀏𑀓𑀻𑀪𑀸𑀯𑀁 𑀕𑀢𑁄. 𑀫𑀦𑁄𑀪𑀸𑀯𑀦𑀻𑀬𑀸𑀦𑀦𑁆𑀢𑀺 𑀫𑀦𑀯𑀟𑁆𑀠𑀦𑀓𑀸𑀦𑀁, 𑀬𑁂 𑀆𑀯𑀚𑁆𑀚𑀢𑁄 𑀫𑀦𑀲𑀺𑀓𑀭𑁄𑀢𑁄 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀳𑁄𑀢𑀺 𑀉𑀦𑁆𑀦𑀫𑀢𑀺 𑀯𑀟𑁆𑀠𑀢𑀺. 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑀸. 𑀅𑀬𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄𑀢𑀺 𑀅𑀬𑀁 𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑁄 𑀏𑀓𑁄 𑀲𑀸𑀯𑀓𑁄. 𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀢𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀧𑀢𑁆𑀣𑀬𑀫𑀸𑀦𑁄 𑀆𑀳. 𑀧𑀢𑁆𑀣𑀦𑀸𑀓𑀸𑀭𑀡𑀁 𑀧𑀦 𑀲𑀦𑁆𑀤𑀓𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀯.

𑁨𑁬𑁧. 𑀏𑀢𑀤𑀯𑁄𑀘𑀸𑀢𑀺 𑀤𑀦𑁆𑀤𑀧𑀜𑁆𑀜𑁄 𑀅𑀬𑀁 𑀕𑀳𑀧𑀢𑀺, 𑀥𑀫𑁆𑀫𑀓𑀣𑀸𑀬 𑀦𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀯𑀓𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀫𑀜𑁆𑀜𑀫𑀸𑀦𑁄 𑀏𑀢𑀁 ‘‘𑀘𑀢𑀽𑀳𑀺 𑀔𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀧𑀜𑁆𑀜𑀧𑁂𑀫𑀻𑀢𑀺 𑀤𑀲𑁆𑀲𑁂𑀫𑀺 𑀞𑀧𑁂𑀫𑀺. 𑀲𑀫𑁆𑀧𑀦𑁆𑀦𑀓𑀼𑀲𑀮𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀓𑀼𑀲𑀮𑀁. 𑀧𑀭𑀫𑀓𑀼𑀲𑀮𑀦𑁆𑀢𑀺 𑀉𑀢𑁆𑀢𑀫𑀓𑀼𑀲𑀮𑀁. 𑀅𑀬𑁄𑀚𑁆𑀛𑀦𑁆𑀢𑀺 𑀯𑀸𑀤𑀬𑀼𑀤𑁆𑀥𑁂𑀦 𑀬𑀼𑀚𑁆𑀛𑀺𑀢𑁆𑀯𑀸 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀘𑀮𑀁 𑀦𑀺𑀓𑁆𑀓𑀫𑁆𑀧𑀁 𑀣𑀺𑀭𑀁. 𑀦 𑀓𑀭𑁄𑀢𑀻𑀢𑀺 𑀅𑀓𑀭𑀡𑀫𑀢𑁆𑀢𑀫𑁂𑀯 𑀯𑀤𑀢𑀺, 𑀏𑀢𑁆𑀣 𑀧𑀦 𑀲𑀁𑀯𑀭𑀧𑁆𑀧𑀳𑀸𑀦𑀁 𑀯𑀸 𑀧𑀝𑀺𑀲𑁂𑀯𑀦𑀧𑁆𑀧𑀳𑀸𑀦𑀁 𑀯𑀸 𑀦 𑀯𑀤𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑁂𑀯 𑀅𑀪𑀺𑀦𑀦𑁆𑀤𑀻𑀢𑀺 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀚𑀸𑀦𑀺𑀢𑁆𑀯𑀸𑀧𑀺 𑀅𑀚𑀸𑀦𑀺𑀢𑁆𑀯𑀸𑀧𑀺 𑀬𑀁 𑀯𑀸 𑀢𑀁 𑀯𑀸 𑀯𑀤𑀦𑁆𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀦𑀸𑀪𑀺𑀦𑀦𑁆𑀤𑀺. 𑀦 𑀧𑀝𑀺𑀓𑁆𑀓𑁄𑀲𑀻𑀢𑀺 𑀲𑀸𑀲𑀦𑀲𑁆𑀲 𑀅𑀦𑀼𑀮𑁄𑀫𑀁 𑀯𑀺𑀬 𑀧𑀲𑀦𑁆𑀦𑀸𑀓𑀸𑀭𑀁 𑀯𑀺𑀬 𑀯𑀤𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀦 𑀧𑀝𑀺𑀲𑁂𑀥𑁂𑀢𑀺.

𑁨𑁬𑁨. 𑀬𑀣𑀸 𑀉𑀕𑁆𑀕𑀸𑀳𑀫𑀸𑀦𑀲𑁆𑀲𑀸𑀢𑀺 𑀬𑀣𑀸 𑀢𑀲𑁆𑀲 𑀯𑀘𑀦𑀁, 𑀏𑀯𑀁 𑀲𑀦𑁆𑀢𑁂 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀓𑀼𑀫𑀸𑀭𑁄 𑀅𑀬𑁄𑀚𑁆𑀛𑀲𑀫𑀡𑁄 𑀣𑀺𑀭𑀲𑀫𑀡𑁄 𑀪𑀯𑀺𑀲𑁆𑀲𑀢𑀺, 𑀫𑀬𑀁 𑀧𑀦 𑀏𑀯𑀁 𑀦 𑀯𑀤𑀸𑀫𑀸𑀢𑀺 𑀤𑀻𑀧𑁂𑀢𑀺. 𑀓𑀸𑀬𑁄𑀢𑀺𑀧𑀺 𑀦 𑀳𑁄𑀢𑀻𑀢𑀺 𑀲𑀓𑀓𑀸𑀬𑁄 𑀧𑀭𑀓𑀸𑀬𑁄𑀢𑀺𑀧𑀺 𑀯𑀺𑀲𑁂𑀲𑀜𑀸𑀡𑀁 𑀦 𑀳𑁄𑀢𑀺. 𑀅𑀜𑁆𑀜𑀢𑁆𑀭 𑀨𑀦𑁆𑀤𑀺𑀢𑀫𑀢𑁆𑀢𑀸𑀢𑀺 𑀧𑀘𑁆𑀘𑀢𑁆𑀣𑀭𑀡𑁂 𑀯𑀮𑀺𑀲𑀫𑁆𑀨𑀲𑁆𑀲𑁂𑀦 𑀯𑀸 𑀫𑀗𑁆𑀕𑀼𑀮𑀤𑀝𑁆𑀞𑁂𑀦 𑀯𑀸 𑀓𑀸𑀬𑀨𑀦𑁆𑀤𑀦𑀫𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀓𑀸𑀬𑁂𑀦 𑀓𑀭𑀡𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺. 𑀢𑀫𑁆𑀧𑀺 𑀘 𑀓𑀺𑀮𑁂𑀲𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯 𑀳𑁄𑀢𑀺. 𑀯𑀸𑀘𑀸𑀢𑀺𑀧𑀺 𑀦 𑀳𑁄𑀢𑀻𑀢𑀺 𑀫𑀺𑀘𑁆𑀙𑀸𑀯𑀸𑀘𑀸 𑀲𑀫𑁆𑀫𑀸𑀯𑀸𑀘𑀸𑀢𑀺𑀧𑀺 𑀦𑀸𑀦𑀢𑁆𑀢𑀁 𑀦 𑀳𑁄𑀢𑀺. 𑀭𑁄𑀤𑀺𑀢𑀫𑀢𑁆𑀢𑀸𑀢𑀺 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀧𑀭𑁂𑀢𑀲𑁆𑀲 𑀧𑀦 𑀭𑁄𑀤𑀺𑀢𑀫𑀢𑁆𑀢𑀁 𑀳𑁄𑀢𑀺. 𑀢𑀫𑁆𑀧𑀺 𑀓𑀺𑀮𑁂𑀲𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯. 𑀲𑀗𑁆𑀓𑀧𑁆𑀧𑁄𑀢𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄𑀢𑀺𑀧𑀺 𑀦𑀸𑀦𑀢𑁆𑀢𑀁 𑀦 𑀳𑁄𑀢𑀺. 𑀯𑀺𑀓𑀽𑀚𑀺𑀢𑀫𑀢𑁆𑀢𑀸𑀢𑀺 𑀯𑀺𑀓𑀽𑀚𑀺𑀢𑀫𑀢𑁆𑀢𑀁 𑀭𑁄𑀤𑀦𑀳𑀲𑀺𑀢𑀫𑀢𑁆𑀢𑀁 𑀳𑁄𑀢𑀺. 𑀤𑀳𑀭𑀓𑀼𑀫𑀸𑀭𑀓𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀅𑀢𑀻𑀢𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀢𑀺, 𑀦𑀺𑀭𑀬𑀢𑁄 𑀆𑀕𑀢𑀸 𑀦𑀺𑀭𑀬𑀤𑀼𑀓𑁆𑀔𑀁 𑀲𑀭𑀺𑀢𑁆𑀯𑀸 𑀭𑁄𑀤𑀦𑁆𑀢𑀺, 𑀤𑁂𑀯𑀮𑁄𑀓𑀢𑁄 𑀆𑀕𑀢𑀸 𑀳𑀲𑀦𑁆𑀢𑀺, 𑀢𑀫𑁆𑀧𑀺 𑀓𑀺𑀮𑁂𑀲𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯 𑀳𑁄𑀢𑀺. 𑀆𑀚𑀻𑀯𑁄𑀢𑀺 𑀫𑀺𑀘𑁆𑀙𑀸𑀚𑀻𑀯𑁄 𑀲𑀫𑁆𑀫𑀸𑀚𑀻𑀯𑁄𑀢𑀺𑀧𑀺 𑀦𑀸𑀦𑀢𑁆𑀢𑀁 𑀦 𑀳𑁄𑀢𑀺. 𑀅𑀜𑁆𑀜𑀢𑁆𑀭 𑀫𑀸𑀢𑀼𑀣𑀜𑁆𑀜𑀸𑀢𑀺 𑀣𑀜𑁆𑀜𑀘𑁄𑀭𑀤𑀸𑀭𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀫𑀸𑀢𑀭𑀺 𑀔𑀻𑀭𑀁 𑀧𑀸𑀬𑀦𑁆𑀢𑀺𑀬𑀸 𑀅𑀧𑀺𑀯𑀺𑀢𑁆𑀯𑀸 𑀅𑀜𑁆𑀜𑀯𑀺𑀳𑀺𑀢𑀓𑀸𑀮𑁂 𑀧𑀺𑀝𑁆𑀞𑀺𑀧𑀲𑁆𑀲𑁂𑀦 𑀆𑀕𑀦𑁆𑀢𑁆𑀯𑀸 𑀣𑀜𑁆𑀜𑀁 𑀧𑀺𑀯𑀦𑁆𑀢𑀺. 𑀏𑀢𑁆𑀢𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀫𑀺𑀘𑁆𑀙𑀸𑀚𑀻𑀯𑁄 𑀦𑀢𑁆𑀣𑀺. 𑀅𑀬𑀫𑁆𑀧𑀺 𑀓𑀺𑀮𑁂𑀲𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁬𑁩. 𑀏𑀯𑀁 𑀧𑀭𑀺𑀩𑁆𑀩𑀸𑀚𑀓𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀲𑀬𑀁 𑀲𑁂𑀓𑁆𑀔𑀪𑀽𑀫𑀺𑀬𑀁 𑀫𑀸𑀢𑀺𑀓𑀁 𑀞𑀧𑁂𑀦𑁆𑀢𑁄 𑀘𑀢𑀽𑀳𑀺 𑀔𑁄 𑀅𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀥𑀺𑀕𑀬𑁆𑀳 𑀢𑀺𑀝𑁆𑀞𑀢𑀻𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀦 𑀓𑀸𑀬𑁂𑀦 𑀧𑀸𑀧 𑀓𑀫𑁆𑀫𑀦𑁆𑀢𑀺𑀆𑀤𑀻𑀲𑀼 𑀦 𑀓𑁂𑀯𑀮𑀁 𑀅𑀓𑀭𑀡𑀫𑀢𑁆𑀢𑀫𑁂𑀯, 𑀪𑀕𑀯𑀸 𑀧𑀦 𑀏𑀢𑁆𑀣 𑀲𑀁𑀯𑀭𑀧𑁆𑀧𑀳𑀸𑀦𑀧𑀝𑀺𑀲𑀗𑁆𑀔𑀸 𑀧𑀜𑁆𑀜𑀧𑁂𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀦 𑀘𑁂𑀯 𑀲𑀫𑁆𑀧𑀦𑁆𑀦𑀓𑀼𑀲𑀮𑀦𑁆𑀢𑀺𑀆𑀤𑀺 𑀧𑀦 𑀔𑀻𑀡𑀸𑀲𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀅𑀲𑁂𑀓𑁆𑀔𑀪𑀽𑀫𑀺𑀬𑀁 𑀫𑀸𑀢𑀺𑀓𑀁 𑀞𑀧𑁂𑀦𑁆𑀢𑁄 𑀤𑀲𑀳𑀺 𑀔𑁄 𑀅𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀻𑀡𑀺 𑀧𑀤𑀸𑀦𑀺 𑀦𑀺𑀲𑁆𑀲𑀸𑀬 𑀤𑁆𑀯𑁂 𑀧𑀞𑀫𑀘𑀢𑀼𑀓𑁆𑀓𑀸 𑀞𑀧𑀺𑀢𑀸, 𑀏𑀓𑀁 𑀧𑀤𑀁 𑀦𑀺𑀲𑁆𑀲𑀸𑀬 𑀤𑁆𑀯𑁂 𑀧𑀘𑁆𑀙𑀺𑀫𑀘𑀢𑀼𑀓𑁆𑀓𑀸. 𑀅𑀬𑀁 𑀲𑁂𑀓𑁆𑀔𑀪𑀽𑀫𑀺𑀬𑀁 𑀫𑀸𑀢𑀺𑀓𑀸.

𑁨𑁬𑁪. 𑀇𑀤𑀸𑀦𑀺 𑀢𑀁 𑀯𑀺𑀪𑀚𑀦𑁆𑀢𑁄 𑀓𑀢𑀫𑁂 𑀘 𑀣𑀧𑀢𑀺 𑀅𑀓𑀼𑀲𑀮𑀲𑀻𑀮𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀭𑀸𑀕𑀦𑁆𑀢𑀺 𑀅𑀝𑁆𑀞𑀯𑀺𑀥𑀁 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀁. 𑀲𑀤𑁄𑀲𑀦𑁆𑀢𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀤𑁆𑀯𑀬𑀁. 𑀲𑀫𑁄𑀳𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀤𑁆𑀯𑀬𑀫𑁆𑀧𑀺 𑀯𑀝𑁆𑀝𑀢𑀺, 𑀲𑀩𑁆𑀩𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺𑀧𑀺. 𑀫𑁄𑀳𑁄 𑀲𑀩𑁆𑀩𑀸𑀓𑀼𑀲𑀮𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀇𑀢𑁄𑀲𑀫𑀼𑀝𑁆𑀞𑀸𑀦𑀸𑀢𑀺 𑀇𑀢𑁄 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀦𑀁 𑀉𑀧𑁆𑀧𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀇𑀢𑁄𑀲𑀫𑀼𑀝𑁆𑀞𑀸𑀦𑀸.

𑀓𑀼𑀳𑀺𑀦𑁆𑀢𑀺 𑀓𑀢𑀭𑀁 𑀞𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀢𑁆𑀣𑁂𑀢𑁂𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀪𑀼𑀫𑁆𑀫𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀜𑁆𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀅𑀓𑀼𑀲𑀮𑀲𑀻𑀮𑀁 𑀅𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀅𑀓𑀼𑀲𑀮𑀲𑀻𑀮𑀦𑁆𑀢𑀺 𑀘 𑀤𑀼𑀲𑁆𑀲𑀻𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀓𑀼𑀲𑀮𑀸𑀦𑀁 𑀲𑀻𑀮𑀸𑀦𑀁 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀏𑀢𑁆𑀣 𑀬𑀸𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀨𑀮𑀧𑀢𑁆𑀢𑁂 𑀧𑀦 𑀢𑁂 𑀦𑀺𑀭𑁄𑀥𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺.

𑁨𑁬𑁫. 𑀯𑀻𑀢𑀭𑀸𑀕𑀦𑁆𑀢𑀺𑀆𑀤𑀻𑀳𑀺 𑀅𑀝𑁆𑀞𑀯𑀺𑀥𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀫𑁂𑀯 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀓𑀼𑀲𑀮𑀲𑀻𑀮𑀁 𑀲𑀫𑀼𑀝𑁆𑀞𑀸𑀢𑀺.

𑀲𑀻𑀮𑀯𑀸 𑀳𑁄𑀢𑀻𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀕𑀼𑀡𑀲𑀫𑁆𑀧𑀦𑁆𑀦𑁄 𑀘. 𑀦𑁄 𑀘 𑀲𑀻𑀮𑀫𑀬𑁄𑀢𑀺 𑀅𑀮𑀫𑁂𑀢𑁆𑀢𑀸𑀯𑀢𑀸, 𑀦𑀢𑁆𑀣𑀺 𑀇𑀢𑁄 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀏𑀯𑀁 𑀲𑀻𑀮𑀫𑀬𑁄 𑀦 𑀳𑁄𑀢𑀺. 𑀬𑀢𑁆𑀣𑀲𑁆𑀲 𑀢𑁂𑀢𑀺 𑀅𑀭𑀳𑀢𑁆𑀢𑀨𑀮𑁂 𑀪𑀼𑀫𑁆𑀫𑀁. 𑀅𑀭𑀳𑀢𑁆𑀢𑀨𑀮𑀜𑁆𑀳𑀺 𑀧𑀢𑁆𑀯𑀸 𑀅𑀓𑀼𑀲𑀮𑀲𑀻𑀮𑀁 𑀅𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺.

𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀏𑀢𑁆𑀣 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀨𑀮𑀧𑀢𑁆𑀢𑁂 𑀧𑀦 𑀢𑁂 𑀦𑀺𑀭𑁄𑀥𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺.

𑁨𑁬𑁬. 𑀓𑀸𑀫𑀲𑀜𑁆𑀜𑀸𑀤𑀻𑀲𑀼 𑀓𑀸𑀫𑀲𑀜𑁆𑀜𑀸 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑀳𑀚𑀸𑀢𑀸, 𑀇𑀢𑀭𑀸 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀤𑁆𑀯𑀬𑁂𑀦 𑀲𑀳𑀚𑀸𑀢𑀸.

𑀧𑀞𑀫𑀁 𑀛𑀸𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀨𑀮𑀧𑀞𑀫𑀚𑁆𑀛𑀸𑀦𑀁. 𑀏𑀢𑁆𑀣𑁂𑀢𑁂𑀢𑀺 𑀅𑀦𑀸𑀕𑀸𑀫𑀺𑀨𑀮𑁂 𑀪𑀼𑀫𑁆𑀫𑀁. 𑀅𑀦𑀸𑀕𑀸𑀫𑀺𑀨𑀮𑀜𑁆𑀳𑀺 𑀧𑀢𑁆𑀯𑀸 𑀅𑀓𑀼𑀲𑀮𑀲𑀗𑁆𑀓𑀧𑁆𑀧𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺.

𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀏𑀢𑁆𑀣 𑀬𑀸𑀯 𑀅𑀦𑀸𑀕𑀸𑀫𑀺𑀫𑀕𑁆𑀕𑀸 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀨𑀮𑀧𑀢𑁆𑀢𑁂 𑀧𑀦 𑀢𑁂 𑀦𑀺𑀭𑁄𑀥𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸𑀤𑀬𑁄 𑀳𑀺 𑀢𑀺𑀲𑁆𑀲𑁄𑀧𑀺 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀳𑀚𑀸𑀢𑀲𑀜𑁆𑀜𑀸𑀯.

𑁨𑁬𑁭. 𑀏𑀢𑁆𑀣𑁂𑀢𑁂𑀢𑀺 𑀅𑀭𑀳𑀢𑁆𑀢𑀨𑀮𑁂 𑀪𑀼𑀫𑁆𑀫𑀁. 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀁 𑀅𑀭𑀳𑀢𑁆𑀢𑀨𑀮𑀜𑁆𑀳𑀺 𑀧𑀸𑀧𑀼𑀡𑀺𑀢𑁆𑀯𑀸 𑀓𑀼𑀲𑀮𑀲𑀗𑁆𑀓𑀧𑁆𑀧𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀏𑀢𑁆𑀣 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀨𑀮𑀧𑀢𑁆𑀢𑁂 𑀧𑀦 𑀢𑁂 𑀦𑀺𑀭𑁄𑀥𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀫𑀡𑀫𑀼𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.