𑁭. 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁭. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀫𑁄𑀭𑀦𑀺𑀯𑀸𑀧𑁂𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀫𑁄𑀭𑀸𑀦𑀁 𑀅𑀪𑀬𑀁 𑀖𑁄𑀲𑁂𑀢𑁆𑀯𑀸 𑀪𑁄𑀚𑀦𑀁 𑀅𑀤𑀁𑀲𑀼. 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀫𑁄𑀭𑀦𑀺𑀯𑀸𑀧𑁄𑀢𑀺 𑀲𑀗𑁆𑀔𑀁 𑀕𑀢𑀁. 𑀅𑀦𑁆𑀦𑀪𑀸𑀭𑁄𑀢𑀺 𑀏𑀓𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀸𑀫𑀁. 𑀢𑀣𑀸 𑀯𑀭𑀥𑀭𑁄𑀢𑀺. 𑀅𑀜𑁆𑀜𑁂 𑀘𑀸𑀢𑀺 𑀦 𑀓𑁂𑀯𑀮𑀁 𑀇𑀫𑁂 𑀢𑀬𑁄, 𑀅𑀜𑁆𑀜𑁂𑀧𑀺 𑀅𑀪𑀺𑀜𑁆𑀜𑀸𑀢𑀸 𑀩𑀳𑀽 𑀧𑀭𑀺𑀩𑁆𑀩𑀸𑀚𑀓𑀸. 𑀅𑀧𑁆𑀧𑀲𑀤𑁆𑀤𑀲𑁆𑀲 𑀯𑀡𑁆𑀡𑀯𑀸𑀤𑀻𑀢𑀺 𑀇𑀥 𑀅𑀧𑁆𑀧𑀲𑀤𑁆𑀤𑀯𑀺𑀦𑀻𑀢𑁄𑀢𑀺 𑀅𑀯𑀢𑁆𑀯𑀸𑀯 𑀇𑀤𑀁 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀦 𑀳𑀺 𑀪𑀕𑀯𑀸 𑀅𑀜𑁆𑀜𑁂𑀦 𑀯𑀺𑀦𑀻𑀢𑁄𑀢𑀺.

𑁨𑁩𑁮. 𑀧𑀼𑀭𑀺𑀫𑀸𑀦𑀻𑀢𑀺 𑀳𑀺𑀬𑁆𑀬𑁄𑀤𑀺𑀯𑀲𑀁 𑀉𑀧𑀸𑀤𑀸𑀬 𑀧𑀼𑀭𑀺𑀫𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀧𑀭𑀁 𑀧𑀼𑀭𑀺𑀫𑀢𑀭𑀸𑀦𑀺. 𑀓𑀼𑀢𑀽𑀳𑀮𑀲𑀸𑀮𑀸𑀬𑀦𑁆𑀢𑀺 𑀓𑀼𑀢𑀽𑀳𑀮𑀲𑀸𑀮𑀸 𑀦𑀸𑀫 𑀧𑀘𑁆𑀘𑁂𑀓𑀲𑀸𑀮𑀸 𑀦𑀢𑁆𑀣𑀺, 𑀬𑀢𑁆𑀣 𑀧𑀦 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦𑀸𑀦𑀸𑀯𑀺𑀥𑀁 𑀓𑀣𑀁 𑀧𑀯𑀢𑁆𑀢𑁂𑀦𑁆𑀢𑀺, 𑀲𑀸 𑀩𑀳𑀽𑀦𑀁 𑁋 ‘‘𑀅𑀬𑀁 𑀓𑀺𑀁 𑀯𑀤𑀢𑀺, 𑀅𑀬𑀁 𑀓𑀺𑀁 𑀯𑀤𑀢𑀻’’𑀢𑀺 𑀓𑀼𑀢𑀽𑀳𑀮𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄 ‘‘𑀓𑀼𑀢𑀽𑀳𑀮𑀲𑀸𑀮𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀓𑁄𑀢𑀽𑀳𑀮𑀲𑀸𑀮𑀸’’𑀢𑀺𑀧𑀺 𑀧𑀸𑀞𑁄. 𑀮𑀸𑀪𑀸𑀢𑀺 𑀬𑁂 𑀏𑀯𑀭𑀽𑀧𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀤𑀝𑁆𑀞𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀥𑀫𑁆𑀫𑀓𑀣𑀁 𑀯𑀸 𑀦𑁂𑀲𑀁 𑀲𑁄𑀢𑀼𑀁 𑀮𑀪𑀦𑁆𑀢𑀺, 𑀢𑁂𑀲𑀁 𑀅𑀗𑁆𑀕𑀫𑀕𑀥𑀸𑀦𑀁 𑀇𑀫𑁂 𑀮𑀸𑀪𑀸𑀢𑀺 𑀅𑀢𑁆𑀣𑁄.

𑀲𑀗𑁆𑀖𑀺𑀦𑁄𑀢𑀺𑀆𑀤𑀻𑀲𑀼 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀲𑀗𑁆𑀖𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀗𑁆𑀖𑀺𑀦𑁄. 𑀲𑁆𑀯𑁂𑀯 𑀕𑀡𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀕𑀡𑀺𑀦𑁄. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦 𑀢𑀲𑁆𑀲 𑀕𑀡𑀲𑁆𑀲 𑀆𑀘𑀭𑀺𑀬𑀸𑀢𑀺 𑀕𑀡𑀸𑀘𑀭𑀺𑀬𑀸. 𑀜𑀸𑀢𑀸𑀢𑀺 𑀧𑀜𑁆𑀜𑀸𑀢𑀸 𑀧𑀸𑀓𑀝𑀸. 𑀬𑀣𑀸𑀪𑀼𑀘𑁆𑀘𑀕𑀼𑀡𑁂𑀳𑀺 𑀘𑁂𑀯 𑀅𑀬𑀣𑀸𑀪𑀽𑀢𑀕𑀼𑀡𑁂𑀳𑀺 𑀘 𑀲𑀫𑀼𑀕𑁆𑀕𑀢𑁄 𑀬𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀬𑀲𑀲𑁆𑀲𑀺𑀦𑁄. 𑀧𑀽𑀭𑀡𑀸𑀤𑀻𑀦𑀜𑁆𑀳𑀺 ‘‘𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀲𑁄 𑀲𑀫𑀼𑀕𑁆𑀕𑀢𑁄, 𑀢𑀣𑀸𑀕𑀢𑀲𑁆𑀲 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀻𑀳𑀺 𑀬𑀣𑀸𑀪𑀽𑀢𑀕𑀼𑀡𑁂𑀳𑀺. 𑀢𑀺𑀢𑁆𑀣𑀓𑀭𑀸𑀢𑀺 𑀮𑀤𑁆𑀥𑀺𑀓𑀭𑀸. 𑀲𑀸𑀥𑀼𑀲𑀫𑁆𑀫𑀢𑀸𑀢𑀺 𑀇𑀫𑁂 𑀲𑀸𑀥𑀽 𑀲𑀼𑀦𑁆𑀤𑀭𑀸 𑀲𑀧𑁆𑀧𑀼𑀭𑀺𑀲𑀸𑀢𑀺 𑀏𑀯𑀁 𑀲𑀫𑁆𑀫𑀢𑀸. 𑀩𑀳𑀼𑀚𑀦𑀲𑁆𑀲𑀸𑀢𑀺 𑀅𑀲𑁆𑀲𑀼𑀢𑀯𑀢𑁄 𑀘𑁂𑀯 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀺𑀪𑀸𑀯𑀺𑀦𑁄 𑀘 𑀧𑀡𑁆𑀟𑀺𑀢𑀚𑀦𑀲𑁆𑀲. 𑀢𑀢𑁆𑀣 𑀢𑀺𑀢𑁆𑀣𑀺𑀬𑀸 𑀩𑀸𑀮𑀚𑀦𑀲𑁆𑀲 𑀏𑀯𑀁 𑀲𑀫𑁆𑀫𑀢𑀸, 𑀢𑀣𑀸𑀕𑀢𑁄 𑀧𑀡𑁆𑀟𑀺𑀢𑀚𑀦𑀲𑁆𑀲. 𑀇𑀫𑀺𑀦𑀸 𑀦𑀬𑁂𑀦 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀲𑀗𑁆𑀖𑀻𑀢𑀺𑀆𑀤𑀻𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀅𑀝𑁆𑀞𑀢𑀺𑀁𑀲 𑀆𑀭𑀫𑁆𑀫𑀡𑀸𑀦𑀺 𑀯𑀺𑀪𑀚𑀦𑁆𑀢𑁄 𑀩𑀳𑀽𑀦𑀺 𑀦𑀺𑀩𑁆𑀩𑀸𑀦𑀑𑀢𑀭𑀡𑀢𑀺𑀢𑁆𑀣𑀸𑀦𑀺 𑀅𑀓𑀸𑀲𑀺, 𑀢𑀲𑁆𑀫𑀸 ‘‘𑀢𑀺𑀢𑁆𑀣𑀓𑀭𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁂 𑀲𑀩𑁆𑀩𑁂𑀧𑀺 𑀢𑀢𑁆𑀣 𑀑𑀲𑀝𑀸𑀢𑀺? 𑀉𑀧𑀝𑁆𑀞𑀸𑀓𑀭𑀓𑁆𑀔𑀡𑀢𑁆𑀣𑀜𑁆𑀘𑁂𑀯 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀜𑁆𑀘. 𑀢𑁂𑀲𑀜𑁆𑀳𑀺 𑀏𑀯𑀁 𑀳𑁄𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑀸 𑀲𑀫𑀡𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀢𑁂 𑀘 𑀭𑀓𑁆𑀔𑀺𑀲𑁆𑀲𑀸𑀫. 𑀲𑀫𑀡𑀲𑁆𑀲 𑀘 𑀕𑁄𑀢𑀫𑀲𑁆𑀲 𑀉𑀧𑀝𑁆𑀞𑀸𑀓𑁂 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀅𑀫𑁆𑀳𑀸𑀓𑀫𑁆𑀧𑀺 𑀉𑀧𑀝𑁆𑀞𑀸𑀓𑀸 𑀅𑀫𑁆𑀳𑀸𑀓𑀁 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀬𑀢𑁆𑀣 𑀬𑀢𑁆𑀣 𑀪𑀕𑀯𑀸 𑀑𑀲𑀭𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀩𑁆𑀩𑁂 𑀑𑀲𑀭𑀦𑁆𑀢𑀺.

𑁨𑁩𑁯. 𑀯𑀸𑀤𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀯𑀸𑀤𑁂 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸. 𑀅𑀧𑀓𑁆𑀓𑀦𑁆𑀢𑀸𑀢𑀺, 𑀅𑀧𑀕𑀢𑀸, 𑀓𑁂𑀘𑀺 𑀤𑀺𑀲𑀁 𑀧𑀓𑁆𑀓𑀦𑁆𑀢𑀸, 𑀓𑁂𑀘𑀺 𑀕𑀺𑀳𑀺𑀪𑀸𑀯𑀁 𑀧𑀢𑁆𑀢𑀸, 𑀓𑁂𑀘𑀺 𑀇𑀫𑀁 𑀲𑀸𑀲𑀦𑀁 𑀆𑀕𑀢𑀸. 𑀲𑀳𑀺𑀢𑀁 𑀫𑁂𑀢𑀺 𑀫𑀬𑁆𑀳𑀁 𑀯𑀘𑀦𑀁 𑀲𑀳𑀺𑀢𑀁 𑀲𑀺𑀮𑀺𑀝𑁆𑀞𑀁, 𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀳𑀺𑀢𑀁 𑀢𑁂𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀅𑀲𑀳𑀺𑀢𑀁. 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀬𑀁 𑀢𑀼𑀬𑁆𑀳𑀁 𑀤𑀻𑀖𑀭𑀢𑁆𑀢𑀸𑀘𑀺𑀡𑁆𑀡𑀯𑀲𑁂𑀦 𑀲𑀼𑀧𑁆𑀧𑀕𑀼𑀡𑀁, 𑀢𑀁 𑀫𑀬𑁆𑀳𑀁 𑀏𑀓𑀯𑀘𑀦𑁂𑀦𑁂𑀯 𑀯𑀺𑀧𑀭𑀸𑀯𑀢𑁆𑀢𑀁 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀁, 𑀦 𑀓𑀺𑀜𑁆𑀘𑀺 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄𑀢𑀺 𑀫𑀬𑀸 𑀢𑀯 𑀯𑀸𑀤𑁂 𑀤𑁄𑀲𑁄 𑀆𑀭𑁄𑀧𑀺𑀢𑁄. 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬𑀸𑀢𑀺 𑀤𑁄𑀲𑀫𑁄𑀘𑀦𑀢𑁆𑀣𑀁 𑀘𑀭 𑀯𑀺𑀘𑀭, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻𑀢𑀺 𑀅𑀣 𑀲𑀬𑀁 𑀧𑀳𑁄𑀲𑀺, 𑀇𑀤𑀸𑀦𑁂𑀯 𑀦𑀺𑀩𑁆𑀩𑁂𑀞𑁂𑀳𑀺. 𑀥𑀫𑁆𑀫𑀓𑁆𑀓𑁄𑀲𑁂𑀦𑀸𑀢𑀺 𑀲𑀪𑀸𑀯𑀓𑁆𑀓𑁄𑀲𑁂𑀦.

𑁨𑁪𑁦. 𑀢𑀁 𑀦𑁄 𑀲𑁄𑀲𑁆𑀲𑀸𑀫𑀸𑀢𑀺 𑀢𑀁 𑀅𑀫𑁆𑀳𑀸𑀓𑀁 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫. 𑀔𑀼𑀤𑁆𑀤𑀫𑀥𑀼𑀦𑁆𑀢𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀓𑀢𑀁 𑀤𑀡𑁆𑀟𑀓𑀫𑀥𑀼𑀁. 𑀅𑀦𑁂𑀮𑀓𑀦𑁆𑀢𑀺 𑀦𑀺𑀤𑁆𑀤𑁄𑀲𑀁 𑀅𑀧𑀕𑀢𑀫𑀘𑁆𑀙𑀺𑀓𑀡𑁆𑀟𑀓𑀁. 𑀧𑀻𑀴𑁂𑀬𑁆𑀬𑀸𑀢𑀺 𑀤𑀤𑁂𑀬𑁆𑀬. 𑀧𑀘𑁆𑀘𑀸𑀲𑀻𑀲𑀫𑀸𑀦𑀭𑀽𑀧𑁄𑀢𑀺 𑀧𑀽𑀭𑁂𑀢𑁆𑀯𑀸 𑀦𑀼 𑀔𑁄 𑀦𑁄 𑀪𑁄𑀚𑀦𑀁 𑀤𑀲𑁆𑀲𑀢𑀻𑀢𑀺 𑀪𑀸𑀚𑀦𑀳𑀢𑁆𑀣𑁄 𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀲𑁆𑀲. 𑀲𑀫𑁆𑀧𑀬𑁄𑀚𑁂𑀢𑁆𑀯𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑀁 𑀯𑀺𑀯𑀸𑀤𑀁 𑀓𑀢𑁆𑀯𑀸.

𑁨𑁪𑁧. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀮𑀸𑀫𑀓𑀮𑀸𑀫𑀓𑁂𑀦. 𑀧𑀯𑀺𑀯𑀺𑀢𑁆𑀢𑁄𑀢𑀺 𑀇𑀤𑀁 𑀧𑀭𑀺𑀩𑁆𑀩𑀸𑀚𑀓𑁄 𑀓𑀸𑀬𑀯𑀺𑀯𑁂𑀓𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀪𑀕𑀯𑀸 𑀧𑀦 𑀢𑀻𑀳𑀺 𑀯𑀺𑀯𑁂𑀓𑁂𑀳𑀺 𑀯𑀺𑀯𑀺𑀢𑁆𑀢𑁄𑀯.

𑁨𑁪𑁨. 𑀓𑁄𑀲𑀓𑀸𑀳𑀸𑀭𑀸𑀧𑀻𑀢𑀺 𑀤𑀸𑀦𑀧𑀢𑀻𑀦𑀁 𑀖𑀭𑁂 𑀅𑀕𑁆𑀕𑀪𑀺𑀓𑁆𑀔𑀸𑀞𑀧𑀦𑀢𑁆𑀣𑀁 𑀔𑀼𑀤𑁆𑀤𑀓𑀲𑀭𑀸𑀯𑀸 𑀳𑁄𑀦𑁆𑀢𑀺, 𑀤𑀸𑀦𑀧𑀢𑀺𑀦𑁄 𑀅𑀕𑁆𑀕𑀪𑀢𑁆𑀢𑀁 𑀯𑀸 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀧𑀩𑁆𑀩𑀚𑀺𑀢𑁂 𑀲𑀫𑁆𑀧𑀢𑁆𑀢𑁂 𑀢𑀁 𑀪𑀢𑁆𑀢𑀁 𑀢𑀲𑁆𑀲 𑀤𑁂𑀦𑁆𑀢𑀺. 𑀢𑀁 𑀲𑀭𑀸𑀯𑀓𑀁 𑀓𑁄𑀲𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀬𑁂 𑀘 𑀏𑀓𑁂𑀦𑁂𑀯 𑀪𑀢𑁆𑀢𑀓𑁄𑀲𑀓𑁂𑀦 𑀬𑀸𑀧𑁂𑀦𑁆𑀢𑀺, 𑀢𑁂 𑀓𑁄𑀲𑀓𑀸𑀳𑀸𑀭𑀸𑀢𑀺. 𑀩𑁂𑀮𑀼𑀯𑀸𑀳𑀸𑀭𑀸𑀢𑀺 𑀩𑁂𑀮𑀼𑀯𑀫𑀢𑁆𑀢𑀪𑀢𑁆𑀢𑀸𑀳𑀸𑀭𑀸. 𑀲𑀫𑀢𑀺𑀢𑁆𑀢𑀺𑀓𑀦𑁆𑀢𑀺 𑀑𑀝𑁆𑀞𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀮𑁂𑀔𑀸𑀲𑀫𑀁. 𑀇𑀫𑀺𑀦𑀸 𑀥𑀫𑁆𑀫𑁂𑀦𑀸𑀢𑀺 𑀇𑀫𑀺𑀦𑀸 𑀅𑀧𑁆𑀧𑀸𑀳𑀸𑀭𑀢𑀸𑀥𑀫𑁆𑀫𑁂𑀦. 𑀏𑀢𑁆𑀣 𑀧𑀦 𑀲𑀩𑁆𑀩𑀸𑀓𑀸𑀭𑁂𑀦𑁂𑀯 𑀪𑀕𑀯𑀸 𑀅𑀦𑀧𑁆𑀧𑀸𑀳𑀸𑀭𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀧𑀥𑀸𑀦𑀪𑀽𑀫𑀺𑀬𑀁 𑀙𑀩𑁆𑀩𑀲𑁆𑀲𑀸𑀦𑀺 𑀅𑀧𑁆𑀧𑀸𑀳𑀸𑀭𑁄𑀯 𑀅𑀳𑁄𑀲𑀺, 𑀯𑁂𑀭𑀜𑁆𑀚𑀸𑀬𑀁 𑀢𑀬𑁄 𑀫𑀸𑀲𑁂 𑀧𑀢𑁆𑀣𑁄𑀤𑀦𑁂𑀦𑁂𑀯 𑀬𑀸𑀧𑁂𑀲𑀺 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑁂 𑀢𑀬𑁄 𑀫𑀸𑀲𑁂 𑀪𑀺𑀲𑀫𑀼𑀴𑀸𑀮𑁂𑀳𑁂𑀯 𑀬𑀸𑀧𑁂𑀲𑀺. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀅𑀧𑁆𑀧𑀸𑀳𑀸𑀭𑁄 𑀅𑀳𑁄𑀲𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀬𑀤𑀺 𑀢𑁂 𑀇𑀫𑀺𑀦𑀸 𑀥𑀫𑁆𑀫𑁂𑀦 𑀲𑀓𑁆𑀓𑀭𑁂𑀬𑁆𑀬𑀼𑀁, 𑀫𑀬𑀸 𑀳𑀺 𑀢𑁂 𑀯𑀺𑀲𑁂𑀲𑀢𑀭𑀸. 𑀅𑀜𑁆𑀜𑁄 𑀘𑁂𑀯 𑀧𑀦 𑀥𑀫𑁆𑀫𑁄 𑀅𑀢𑁆𑀣𑀺, 𑀬𑁂𑀦 𑀫𑀁 𑀢𑁂 𑀲𑀓𑁆𑀓𑀭𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀁𑀲𑀼𑀓𑀽𑀮𑀺𑀓𑀸𑀢𑀺 𑀲𑀫𑀸𑀤𑀺𑀦𑁆𑀦𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀸. 𑀮𑀽𑀔𑀘𑀻𑀯𑀭𑀥𑀭𑀸𑀢𑀺 𑀲𑀢𑁆𑀣𑀲𑀼𑀢𑁆𑀢𑀮𑀽𑀔𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑀬𑀫𑀸𑀦𑀸. 𑀦𑀦𑁆𑀢𑀓𑀸𑀦𑀻𑀢𑀺 𑀅𑀦𑁆𑀢𑀯𑀺𑀭𑀳𑀺𑀢𑀸𑀦𑀺 𑀯𑀢𑁆𑀣𑀔𑀡𑁆𑀟𑀸𑀦𑀺, 𑀬𑀤𑀺 𑀳𑀺 𑀦𑁂𑀲𑀁 𑀅𑀦𑁆𑀢𑁄 𑀪𑀯𑁂𑀬𑁆𑀬, 𑀧𑀺𑀮𑁄𑀢𑀺𑀓𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬𑀼𑀁. 𑀉𑀘𑁆𑀘𑀺𑀦𑀺𑀢𑁆𑀯𑀸𑀢𑀺 𑀨𑀸𑀮𑁂𑀢𑁆𑀯𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀧𑀳𑀸𑀬 𑀣𑀺𑀭𑀝𑁆𑀞𑀸𑀦𑀫𑁂𑀯 𑀕𑀳𑁂𑀢𑁆𑀯𑀸. 𑀅𑀮𑀸𑀩𑀼𑀮𑁄𑀫𑀲𑀸𑀦𑀻𑀢𑀺 𑀅𑀮𑀸𑀩𑀼𑀮𑁄𑀫𑀲𑀤𑀺𑀲𑀲𑀼𑀢𑁆𑀢𑀸𑀦𑀺 𑀲𑀼𑀔𑀼𑀫𑀸𑀦𑀻𑀢𑀺 𑀤𑀻𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀲𑀢𑁆𑀣𑀸 𑀘𑀻𑀯𑀭𑀲𑀦𑁆𑀢𑁄𑀲𑁂𑀦 𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀅𑀢𑀺𑀫𑀼𑀢𑁆𑀢𑀓𑀲𑀼𑀲𑀸𑀦𑀢𑁄 𑀳𑀺𑀲𑁆𑀲 𑀧𑀼𑀡𑁆𑀡𑀤𑀸𑀲𑀺𑀬𑀸 𑀧𑀸𑀭𑀼𑀧𑀺𑀢𑁆𑀯𑀸 𑀧𑀸𑀢𑀺𑀢𑀲𑀸𑀡𑀧𑀁𑀲𑀼𑀓𑀽𑀮𑀁 𑀕𑀳𑀡𑀤𑀺𑀯𑀲𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀧𑀁𑀲𑀼𑀓𑀽𑀮𑀁 𑀕𑀡𑁆𑀳𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺.

𑀧𑀺𑀡𑁆𑀟𑀧𑀸𑀢𑀺𑀓𑀸𑀢𑀺 𑀅𑀢𑀺𑀭𑁂𑀓𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸. 𑀲𑀧𑀤𑀸𑀦𑀘𑀸𑀭𑀺𑀦𑁄𑀢𑀺 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀲𑀧𑀤𑀸𑀦𑀘𑀸𑀭𑀸. 𑀉𑀜𑁆𑀙𑀸𑀲𑀓𑁂 𑀯𑀢𑁂 𑀭𑀢𑀸𑀢𑀺 𑀉𑀜𑁆𑀙𑀸𑀘𑀭𑀺𑀬𑀲𑀗𑁆𑀔𑀸𑀢𑁂 𑀪𑀺𑀓𑁆𑀔𑀽𑀦𑀁 𑀧𑀓𑀢𑀺𑀯𑀢𑁂 𑀭𑀢𑀸, 𑀉𑀘𑁆𑀘𑀦𑀻𑀘𑀖𑀭𑀤𑁆𑀯𑀸𑀭𑀝𑁆𑀞𑀸𑀬𑀺𑀦𑁄 𑀳𑀼𑀢𑁆𑀯𑀸 𑀓𑀩𑀭𑀫𑀺𑀲𑁆𑀲𑀓𑀁 𑀪𑀢𑁆𑀢𑀁 𑀲𑀁𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀖𑀭𑀦𑁆𑀢𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑀉𑀫𑁆𑀫𑀸𑀭𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀖𑀭𑀁, 𑀇𑀥 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀅𑀥𑀺𑀧𑁆𑀧𑁂𑀢𑀁. 𑀏𑀢𑁆𑀢𑀸𑀯𑀢𑀸 𑀘 𑀲𑀢𑁆𑀣𑀸 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑁂𑀦 𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀅𑀧𑁆𑀧𑀸𑀳𑀸𑀭𑀢𑀸𑀬 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀧𑀦 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀦𑀺𑀫𑀦𑁆𑀢𑀦𑀁 𑀦 𑀲𑀸𑀤𑀬𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺.

𑀭𑀼𑀓𑁆𑀔𑀫𑀽𑀮𑀺𑀓𑀸𑀢𑀺 𑀙𑀦𑁆𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀸. 𑀅𑀩𑁆𑀪𑁄𑀓𑀸𑀲𑀺𑀓𑀸𑀢𑀺 𑀙𑀦𑁆𑀦𑀜𑁆𑀘 𑀭𑀼𑀓𑁆𑀔𑀫𑀽𑀮𑀜𑁆𑀘 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀸. 𑀅𑀝𑁆𑀞𑀫𑀸𑀲𑁂𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑀺𑀓𑁂 𑀫𑀸𑀲𑁂. 𑀅𑀦𑁆𑀢𑁄𑀯𑀲𑁆𑀲𑁂 𑀧𑀦 𑀘𑀻𑀯𑀭𑀸𑀦𑀼𑀕𑁆𑀕𑀳𑀢𑁆𑀣𑀁 𑀙𑀦𑁆𑀦𑀁 𑀧𑀯𑀺𑀲𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀲𑀢𑁆𑀣𑀸 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑁂𑀦 𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑁄 𑀧𑀦𑀲𑁆𑀲 𑀙𑀩𑁆𑀩𑀲𑁆𑀲𑀺𑀓𑀫𑀳𑀸𑀧𑀥𑀸𑀦𑁂𑀦 𑀘 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑁂𑀦 𑀘 𑀤𑀻𑀧𑁂𑀢𑀩𑁆𑀩𑁄. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀙𑀦𑁆𑀦𑀁 𑀦 𑀧𑀸𑀯𑀺𑀲𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺.

𑀆𑀭𑀜𑁆𑀜𑀺𑀓𑀸𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀆𑀭𑀜𑁆𑀜𑀺𑀓𑀗𑁆𑀕𑀸. 𑀲𑀗𑁆𑀖𑀫𑀚𑁆𑀛𑁂 𑀑𑀲𑀭𑀦𑁆𑀢𑀻𑀢𑀺 𑀅𑀩𑀤𑁆𑀥𑀲𑀻𑀫𑀸𑀬 𑀓𑀣𑀺𑀢𑀁, 𑀩𑀤𑁆𑀥𑀲𑀻𑀫𑀸𑀬𑀁 𑀧𑀦 𑀯𑀲𑀦𑁆𑀢𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀬𑁂𑀯 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀲𑀢𑁆𑀣𑀸 𑀦𑁄 𑀧𑀯𑀺𑀯𑀺𑀢𑁆𑀢𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, ‘‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀺𑀬𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁧𑁬𑁨; 𑁫𑁬𑁫) 𑀏𑀯𑀜𑁆𑀳𑀺𑀲𑁆𑀲 𑀧𑀯𑀺𑀯𑁂𑀓𑁄 𑀧𑀜𑁆𑀜𑀸𑀬𑀢𑀺. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀢𑀣𑀸𑀭𑀽𑀧𑁂 𑀓𑀸𑀮𑁂 𑀧𑀝𑀺𑀲𑀮𑁆𑀮𑀺𑀬𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺. 𑀫𑀫𑀁 𑀲𑀸𑀯𑀓𑀸𑀢𑀺 𑀫𑀁 𑀲𑀸𑀯𑀓𑀸.

𑁨𑁪𑁪. 𑀲𑀦𑀺𑀤𑀸𑀦𑀦𑁆𑀢𑀺 𑀲𑀧𑁆𑀧𑀘𑁆𑀘𑀬𑀁. 𑀓𑀺𑀁 𑀧𑀦 𑀅𑀧𑁆𑀧𑀘𑁆𑀘𑀬𑀁 𑀦𑀺𑀩𑁆𑀩𑀸𑀦𑀁 𑀦 𑀤𑁂𑀲𑁂𑀢𑀻𑀢𑀺. 𑀦𑁄 𑀦 𑀤𑁂𑀲𑁂𑀢𑀺, 𑀲𑀳𑁂𑀢𑀼𑀓𑀁 𑀧𑀦 𑀢𑀁 𑀤𑁂𑀲𑀦𑀁 𑀓𑀢𑁆𑀯𑀸 𑀤𑁂𑀲𑁂𑀢𑀺, 𑀦𑁄 𑀅𑀳𑁂𑀢𑀼𑀓𑀦𑁆𑀢𑀺. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀧𑀼𑀭𑀺𑀫𑀲𑁆𑀲𑁂𑀯𑁂𑀢𑀁 𑀯𑁂𑀯𑀘𑀦𑀁, 𑀲𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀯𑀢𑀸𑀢𑀺 𑀏𑀢𑁆𑀣 𑀯𑀢𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑁨𑁪𑁫. 𑀅𑀦𑀸𑀕𑀢𑀁 𑀯𑀸𑀤𑀧𑀣𑀦𑁆𑀢𑀺 𑀅𑀚𑁆𑀚 𑀞𑀧𑁂𑀢𑁆𑀯𑀸 𑀲𑁆𑀯𑁂 𑀯𑀸 𑀧𑀼𑀦𑀤𑀺𑀯𑀲𑁂 𑀯𑀸 𑀅𑀟𑁆𑀠𑀫𑀸𑀲𑁂 𑀯𑀸 𑀫𑀸𑀲𑁂 𑀯𑀸 𑀲𑀁𑀯𑀘𑁆𑀙𑀭𑁂 𑀯𑀸 𑀢𑀲𑁆𑀲 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀉𑀧𑀭𑀺 𑀆𑀕𑀫𑀦𑀯𑀸𑀤𑀧𑀣𑀁. 𑀦 𑀤𑀓𑁆𑀔𑀢𑀻𑀢𑀺 𑀬𑀣𑀸 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑁄 𑀅𑀢𑁆𑀢𑀦𑁄 𑀦𑀺𑀕𑁆𑀕𑀳𑀡𑀢𑁆𑀣𑀁 𑀆𑀕𑀢𑀓𑀸𑀭𑀡𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀤𑀦𑁆𑀢𑁄 𑀦 𑀅𑀤𑁆𑀤𑀲, 𑀏𑀯𑀁 𑀦 𑀤𑀓𑁆𑀔𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀓𑀸𑀭𑀡𑁂𑀦. 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀬𑁆𑀬𑀼𑀦𑁆𑀢𑀺 𑀫𑀫 𑀓𑀣𑀸𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑁂 𑀅𑀢𑁆𑀢𑀦𑁄 𑀓𑀣𑀁 𑀧𑀯𑁂𑀲𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀦 𑀔𑁄 𑀧𑀦𑀸𑀳𑀁, 𑀉𑀤𑀸𑀬𑀻𑀢𑀺, 𑀉𑀤𑀸𑀬𑀺, 𑀅𑀳𑀁 𑀅𑀫𑁆𑀩𑀝𑁆𑀞𑀲𑁄𑀡𑀤𑀡𑁆𑀟𑀓𑀽𑀝𑀤𑀦𑁆𑀢𑀲𑀘𑁆𑀘𑀓𑀦𑀺𑀕𑀡𑁆𑀞𑀸𑀤𑀻𑀳𑀺 𑀲𑀤𑁆𑀥𑀺𑀁 𑀫𑀳𑀸𑀯𑀸𑀤𑁂 𑀯𑀢𑁆𑀢𑀫𑀸𑀦𑁂𑀧𑀺 𑁋 ‘‘𑀅𑀳𑁄 𑀯𑀢 𑀫𑁂 𑀏𑀓𑀲𑀸𑀯𑀓𑁄𑀧𑀺 𑀉𑀧𑀫𑀁 𑀯𑀸 𑀓𑀸𑀭𑀡𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀤𑀤𑁂𑀬𑁆𑀬𑀸’’𑀢𑀺 𑀏𑀯𑀁 𑀲𑀸𑀯𑀓𑁂𑀲𑀼 𑀅𑀦𑀼𑀲𑀸𑀲𑀦𑀺𑀁 𑀦 𑀧𑀘𑁆𑀘𑀸𑀲𑀻𑀲𑀸𑀫𑀺. 𑀫𑀫𑀬𑁂𑀯𑀸𑀢𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀲𑀸𑀯𑀓𑀸 𑀫𑀫𑀬𑁂𑀯 𑀅𑀦𑀼𑀲𑀸𑀲𑀦𑀺𑀁 𑀑𑀯𑀸𑀤𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺.

𑁨𑁪𑁬. 𑀢𑁂𑀲𑀸𑀳𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀫𑀻𑀢𑀺 𑀢𑁂𑀲𑀁 𑀅𑀳𑀁 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀕𑀡𑁆𑀳𑀸𑀫𑀺 𑀲𑀫𑁆𑀧𑀸𑀤𑁂𑀫𑀺 𑀧𑀭𑀺𑀧𑀽𑀭𑁂𑀫𑀺, 𑀅𑀜𑁆𑀜𑀁 𑀧𑀼𑀝𑁆𑀞𑁄 𑀅𑀜𑁆𑀜𑀁 𑀦 𑀩𑁆𑀬𑀸𑀓𑀭𑁄𑀫𑀺, 𑀅𑀫𑁆𑀩𑀁 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀯𑀺𑀬 𑀮𑀩𑀼𑀚𑀁 𑀯𑀸 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀯𑀺𑀬. 𑀏𑀢𑁆𑀣 𑀘 ‘‘𑀅𑀥𑀺𑀲𑀻𑀮𑁂 𑀲𑀫𑁆𑀪𑀸𑀯𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀩𑀼𑀤𑁆𑀥𑀲𑀻𑀮𑀁 𑀦𑀸𑀫 𑀓𑀣𑀺𑀢𑀁, ‘‘𑀅𑀪𑀺𑀓𑁆𑀓𑀦𑁆𑀢𑁂 𑀜𑀸𑀡𑀤𑀲𑁆𑀲𑀦𑁂 𑀲𑀫𑁆𑀪𑀸𑀯𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, ‘‘𑀅𑀥𑀺𑀧𑀜𑁆𑀜𑀸𑀬 𑀲𑀫𑁆𑀪𑀸𑀯𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸, ‘‘𑀬𑁂𑀦 𑀤𑀼𑀓𑁆𑀔𑁂𑀦𑀸’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀲𑀘𑁆𑀘𑀩𑁆𑀬𑀸𑀓𑀭𑀡𑀧𑀜𑁆𑀜𑀸. 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘 𑀲𑀘𑁆𑀘𑀩𑁆𑀬𑀸𑀓𑀭𑀡𑀧𑀜𑁆𑀜𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀜𑁆𑀜𑀸 𑀅𑀥𑀺𑀧𑀜𑁆𑀜𑀁 𑀪𑀚𑀢𑀺.

𑁨𑁪𑁭. 𑀇𑀤𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀦𑁆𑀢𑁄 𑀧𑀼𑀦 𑀘𑀧𑀭𑀁 𑀉𑀤𑀸𑀬𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀢𑀺 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀲𑀗𑁆𑀔𑀸𑀢𑀜𑁆𑀘𑁂𑀯 𑀅𑀪𑀺𑀜𑁆𑀜𑀸𑀧𑀸𑀭𑀫𑀻𑀲𑀗𑁆𑀔𑀸𑀢𑀜𑁆𑀘 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸.

𑀲𑀫𑁆𑀫𑀧𑁆𑀧𑀥𑀸𑀦𑁂𑀢𑀺 𑀉𑀧𑀸𑀬𑀧𑀥𑀸𑀦𑁂. 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀁 𑀚𑀦𑁂𑀢𑀺. 𑀯𑀸𑀬𑀫𑀢𑀻𑀢𑀺 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀯𑀻𑀭𑀺𑀬𑀁 𑀧𑀯𑀢𑁆𑀢𑁂𑀢𑀺. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀘𑀺𑀢𑁆𑀢𑀁 𑀉𑀓𑁆𑀔𑀺𑀧𑀢𑀺. 𑀧𑀤𑀳𑀢𑀻𑀢𑀺 𑀉𑀧𑀸𑀬𑀧𑀥𑀸𑀦𑀁 𑀓𑀭𑁄𑀢𑀺. 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀯𑀟𑁆𑀠𑀺𑀬𑀸 𑀧𑀭𑀺𑀧𑀽𑀭𑀡𑀢𑁆𑀣𑀁. 𑀅𑀧𑀺𑀘𑁂𑀢𑁆𑀣 𑁋 ‘‘𑀬𑀸 𑀞𑀺𑀢𑀺, 𑀲𑁄 𑀅𑀲𑀫𑁆𑀫𑁄𑀲𑁄…𑀧𑁂… 𑀬𑀁 𑀯𑁂𑀧𑀼𑀮𑁆𑀮𑀁, 𑀲𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻’’𑀢𑀺 (𑀯𑀺𑀪. 𑁪𑁦𑁬) 𑀏𑀯𑀁 𑀧𑀼𑀭𑀺𑀫𑀁 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀲𑁆𑀲 𑀅𑀢𑁆𑀣𑁄𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑁂𑀳𑀺 𑀧𑀦 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀓𑀺𑀁 𑀓𑀣𑀺𑀢𑀁? 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀲𑀸𑀯𑀓𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀓𑀣𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀢𑁆𑀣 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀆𑀯𑀼𑀲𑁄, 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼, 𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺. 𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺. 𑀉𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁪𑁫).

𑀏𑀢𑁆𑀣 𑀘 𑀧𑀸𑀧𑀓𑀸 𑀅𑀓𑀼𑀲𑀮𑀸𑀢𑀺 𑀮𑁄𑀪𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀘𑁂𑀯 𑀫𑀕𑁆𑀕𑁄 𑀘, 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸𑀯. 𑀫𑀕𑁆𑀕𑁄 𑀧𑀦 𑀲𑀓𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀫𑀸𑀦𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀓𑁄 𑀦𑀸𑀫 𑀦𑀢𑁆𑀣𑀺. 𑀲𑁄 𑀳𑀺 𑀨𑀮𑀲𑁆𑀲 𑀧𑀘𑁆𑀘𑀬𑀁 𑀤𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀢𑀺. 𑀧𑀼𑀭𑀺𑀫𑀲𑁆𑀫𑀺𑀫𑁆𑀧𑀺 𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯 𑀕𑀳𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀦 𑀬𑀼𑀢𑁆𑀢𑀁.

𑀢𑀢𑁆𑀣 ‘‘𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀅𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 ‘‘𑀫𑀳𑀸𑀘𑁂𑀢𑀺𑀬𑀜𑁆𑀘 𑀫𑀳𑀸𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀸 𑀪𑀡𑁆𑀟𑀕𑀸𑀳𑀓𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀚𑀦𑀧𑀤𑀢𑁄 𑀫𑀳𑀸𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀧𑀭𑀺𑀯𑁂𑀡𑀁 𑀧𑀸𑀯𑀺𑀲𑀺. 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂 𑀘𑁂𑀢𑀺𑀬𑀁 𑀯𑀦𑁆𑀤𑀫𑀸𑀦𑁂 𑀘𑁂𑀢𑀺𑀬𑀁 𑀯𑀦𑁆𑀤𑀦𑀢𑁆𑀣𑀸𑀬 𑀦 𑀦𑀺𑀓𑁆𑀔𑀫𑀺. 𑀓𑀲𑁆𑀫𑀸? 𑀔𑀻𑀡𑀸𑀲𑀯𑀸𑀦𑀜𑁆𑀳𑀺 𑀢𑀻𑀲𑀼 𑀭𑀢𑀦𑁂𑀲𑀼 𑀫𑀳𑀦𑁆𑀢𑀁 𑀕𑀸𑀭𑀯𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑁂 𑀫𑀦𑀼𑀲𑁆𑀲𑀸𑀦𑀁 𑀲𑀸𑀬𑀫𑀸𑀲𑀪𑀼𑀢𑁆𑀢𑀯𑁂𑀮𑀸𑀬𑀁 𑀲𑀸𑀫𑀡𑁂𑀭𑀫𑁆𑀧𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺. 𑀲𑀸𑀫𑀡𑁂𑀭𑁄 𑁋 ‘‘𑀓𑀺𑀁 𑀦𑀼 𑀔𑁄 𑀣𑁂𑀭𑁄 𑀅𑀯𑁂𑀮𑀸𑀬 𑀏𑀓𑀓𑁄𑀯 𑀕𑀘𑁆𑀙𑀢𑀺, 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑁄 𑀦𑀺𑀓𑁆𑀔𑀫𑀺. 𑀣𑁂𑀭𑁄 𑀅𑀦𑀸𑀯𑀚𑁆𑀚𑀦𑁂𑀦 𑀢𑀲𑁆𑀲 𑀆𑀕𑀫𑀦𑀁 𑀅𑀚𑀸𑀦𑀦𑁆𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀳𑀺. 𑀲𑀸𑀫𑀡𑁂𑀭𑁄𑀧𑀺 𑀅𑀦𑀼𑀧𑀤𑀁𑀬𑁂𑀯 𑀆𑀭𑀼𑀴𑁆𑀳𑁄.

𑀫𑀳𑀸𑀣𑁂𑀭𑁄 𑀫𑀳𑀸𑀘𑁂𑀢𑀺𑀬𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀳𑀝𑁆𑀞𑀧𑀳𑀝𑁆𑀞𑁄 𑀘𑁂𑀢𑀺𑀬𑀁 𑀯𑀦𑁆𑀤𑀢𑀺. 𑀲𑀸𑀫𑀡𑁂𑀭𑁄 𑀣𑁂𑀭𑀲𑁆𑀲 𑀯𑀦𑁆𑀤𑀦𑀸𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀉𑀧𑀚𑁆𑀛𑀸𑀬𑁄 𑀫𑁂 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀦𑁆𑀤𑀢𑀺, 𑀓𑀺𑀁 𑀦𑀼 𑀔𑁄 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀧𑀽𑀚𑀁 𑀓𑀭𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁄 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀞𑀺𑀢𑁄. 𑀲𑀸𑀫𑀡𑁂𑀭𑁄 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑀺. 𑀣𑁂𑀭𑁄 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀓𑀤𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀁 𑀯𑀦𑁆𑀤𑀦𑀓𑀸𑀮𑁂, 𑀪𑀦𑁆𑀢𑁂. 𑀅𑀢𑀺𑀯𑀺𑀬 𑀧𑀲𑀦𑁆𑀦𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀣 𑀓𑀺𑀁 𑀦𑀼 𑀔𑁄 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀧𑀽𑀚𑁂𑀬𑁆𑀬𑀸𑀣𑀸𑀢𑀺? 𑀆𑀫 𑀲𑀸𑀫𑀡𑁂𑀭 𑀇𑀫𑀲𑁆𑀫𑀺𑀁 𑀘𑁂𑀢𑀺𑀬𑁂 𑀯𑀺𑀬 𑀅𑀜𑁆𑀜𑀢𑁆𑀭 𑀏𑀢𑁆𑀢𑀓𑀁 𑀥𑀸𑀢𑀽𑀦𑀁 𑀦𑀺𑀥𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀏𑀯𑀭𑀽𑀧𑀁 𑀅𑀲𑀤𑀺𑀲𑀁 𑀫𑀳𑀸𑀣𑀽𑀧𑀁 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀓𑁄 𑀦 𑀧𑀽𑀚𑁂𑀬𑁆𑀬𑀸𑀢𑀺. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀅𑀥𑀺𑀯𑀸𑀲𑁂𑀣, 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀢𑀸𑀯𑀤𑁂𑀯 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀧𑀼𑀧𑁆𑀨𑀸𑀦𑀺 𑀧𑀭𑀺𑀲𑁆𑀲𑀸𑀯𑀦𑀁 𑀧𑀽𑀭𑁂𑀢𑁆𑀯𑀸 𑀫𑀳𑀸𑀣𑁂𑀭𑁂 𑀤𑀓𑁆𑀔𑀺𑀡𑀫𑀼𑀔𑀢𑁄 𑀧𑀘𑁆𑀙𑀺𑀫𑀁 𑀫𑀼𑀔𑀁 𑀅𑀲𑀫𑁆𑀧𑀢𑁆𑀢𑁂𑀬𑁂𑀯 𑀆𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀧𑀭𑀺𑀲𑁆𑀲𑀸𑀯𑀦𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀧𑀽𑀚𑁂𑀣, 𑀪𑀦𑁆𑀢𑁂,’’𑀢𑀺 𑀆𑀳. 𑀣𑁂𑀭𑁄 ‘‘𑀅𑀢𑀺𑀫𑀦𑁆𑀤𑀸𑀦𑀺 𑀦𑁄 𑀲𑀸𑀫𑀡𑁂𑀭 𑀧𑀼𑀧𑁆𑀨𑀸𑀦𑀻’’𑀢𑀺 𑀆𑀳. 𑀕𑀘𑁆𑀙𑀣, 𑀪𑀦𑁆𑀢𑁂, 𑀪𑀕𑀯𑀢𑁄 𑀕𑀼𑀡𑁂 𑀆𑀯𑀚𑁆𑀚𑀺𑀢𑁆𑀯𑀸 𑀧𑀽𑀚𑁂𑀣𑀸𑀢𑀺.

𑀣𑁂𑀭𑁄 𑀧𑀘𑁆𑀙𑀺𑀫𑀫𑀼𑀔𑀦𑀺𑀲𑁆𑀲𑀺𑀢𑁂𑀦 𑀲𑁄𑀧𑀸𑀡𑁂𑀦 𑀆𑀭𑀼𑀬𑁆𑀳 𑀓𑀼𑀘𑁆𑀙𑀺𑀯𑁂𑀤𑀺𑀓𑀸𑀪𑀽𑀫𑀺𑀬𑀁 𑀧𑀼𑀧𑁆𑀨𑀧𑀽𑀚𑀁 𑀓𑀸𑀢𑀼𑀁 𑀆𑀭𑀤𑁆𑀥𑁄. 𑀯𑁂𑀤𑀺𑀓𑀸𑀪𑀽𑀫𑀺𑀬𑀁 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀧𑀢𑀺𑀢𑁆𑀯𑀸 𑀤𑀼𑀢𑀺𑀬𑀪𑀽𑀫𑀺𑀬𑀁 𑀚𑀡𑁆𑀡𑀼𑀧𑀫𑀸𑀡𑁂𑀦 𑀑𑀥𑀺𑀦𑀸 𑀧𑀽𑀭𑀬𑀺𑀁𑀲𑀼. 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀧𑀸𑀤𑀧𑀺𑀝𑁆𑀞𑀺𑀓𑀧𑀦𑁆𑀢𑀺𑀁 𑀧𑀽𑀚𑁂𑀲𑀺. 𑀲𑀸𑀧𑀺 𑀧𑀭𑀺𑀧𑀽𑀭𑀺. 𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀜𑀢𑁆𑀯𑀸 𑀳𑁂𑀝𑁆𑀞𑀺𑀫𑀢𑀮𑁂 𑀯𑀺𑀓𑀺𑀭𑀦𑁆𑀢𑁄 𑀅𑀕𑀫𑀸𑀲𑀺. 𑀲𑀩𑁆𑀩𑀁 𑀘𑁂𑀢𑀺𑀬𑀗𑁆𑀕𑀡𑀁 𑀧𑀭𑀺𑀧𑀽𑀭𑀺. 𑀢𑀲𑁆𑀫𑀺𑀁 𑀧𑀭𑀺𑀧𑀼𑀡𑁆𑀡𑁂 ‘‘𑀲𑀸𑀫𑀡𑁂𑀭 𑀧𑀼𑀧𑁆𑀨𑀸𑀦𑀺 𑀦 𑀔𑀻𑀬𑀦𑁆𑀢𑀻’’𑀢𑀺 𑀆𑀳. 𑀧𑀭𑀺𑀲𑁆𑀲𑀸𑀯𑀦𑀁, 𑀪𑀦𑁆𑀢𑁂, 𑀅𑀥𑁄𑀫𑀼𑀔𑀁 𑀓𑀭𑁄𑀣𑀸𑀢𑀺. 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀘𑀸𑀮𑁂𑀲𑀺, 𑀢𑀤𑀸 𑀧𑀼𑀧𑁆𑀨𑀸𑀦𑀺 𑀔𑀻𑀡𑀸𑀦𑀺. 𑀧𑀭𑀺𑀲𑁆𑀲𑀸𑀯𑀦𑀁 𑀲𑀸𑀫𑀡𑁂𑀭𑀲𑁆𑀲 𑀤𑀢𑁆𑀯𑀸 𑀲𑀤𑁆𑀥𑀺𑀁 𑀳𑀢𑁆𑀣𑀺𑀧𑀸𑀓𑀸𑀭𑁂𑀦 𑀘𑁂𑀢𑀺𑀬𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑁂𑀡𑀁 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀸𑀯 𑀫𑀳𑀺𑀤𑁆𑀥𑀺𑀓𑁄 𑀯𑀢𑀸𑀬𑀁 𑀲𑀸𑀫𑀡𑁂𑀭𑁄, 𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑀁 𑀇𑀤𑁆𑀥𑀸𑀦𑀼𑀪𑀸𑀯𑀁 𑀭𑀓𑁆𑀔𑀺𑀢𑀼’’𑀦𑁆𑀢𑀺. 𑀢𑀢𑁄 ‘‘𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀲𑀸𑀫𑀡𑁂𑀭𑀫𑀸𑀳 𑁋 ‘‘𑀲𑀸𑀫𑀡𑁂𑀭 𑀢𑁆𑀯𑀁 𑀇𑀤𑀸𑀦𑀺 𑀫𑀳𑀺𑀤𑁆𑀥𑀺𑀓𑁄, 𑀏𑀯𑀭𑀽𑀧𑀁 𑀧𑀦 𑀇𑀤𑁆𑀥𑀺𑀁 𑀦𑀸𑀲𑁂𑀢𑁆𑀯𑀸 𑀧𑀘𑁆𑀙𑀺𑀫𑀓𑀸𑀮𑁂 𑀓𑀸𑀡𑀧𑁂𑀲𑀓𑀸𑀭𑀺𑀬𑀸 𑀳𑀢𑁆𑀣𑁂𑀦 𑀫𑀤𑁆𑀤𑀺𑀢𑀓𑀜𑁆𑀚𑀺𑀬𑀁 𑀧𑀺𑀯𑀺𑀲𑁆𑀲𑀲𑀻’’𑀢𑀺. 𑀤𑀳𑀭𑀓𑀪𑀸𑀯𑀲𑁆𑀲 𑀦𑀸𑀫𑁂𑀲 𑀤𑁄𑀲𑁄𑀬𑀁, 𑀲𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀣𑀸𑀬𑀁 𑀲𑀁𑀯𑀺𑀚𑁆𑀚𑀺𑀢𑁆𑀯𑀸 𑁋 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀫𑁂, 𑀪𑀦𑁆𑀢𑁂, 𑀆𑀘𑀺𑀓𑁆𑀔𑀣𑀸’’𑀢𑀺 𑀦 𑀬𑀸𑀘𑀺, 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀓𑀺𑀁 𑀯𑀤𑀢𑀻𑀢𑀺 𑀢𑀁 𑀧𑀦 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀅𑀕𑀫𑀸𑀲𑀺.

𑀣𑁂𑀭𑁄 𑀫𑀳𑀸𑀘𑁂𑀢𑀺𑀬𑀜𑁆𑀘 𑀫𑀳𑀸𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀲𑀸𑀫𑀡𑁂𑀭𑀁 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀼𑀝𑁂𑀴𑀺𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀦 𑀕𑀘𑁆𑀙𑀢𑀺, ‘‘𑀓𑀢𑀭𑀁 𑀕𑀸𑀫𑀁 𑀧𑀯𑀺𑀲𑀣, 𑀪𑀦𑁆𑀢𑁂,’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀦 ‘‘𑀇𑀤𑀸𑀦𑀺 𑀫𑁂 𑀉𑀧𑀚𑁆𑀛𑀸𑀬𑁄 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀉𑀧𑀚𑁆𑀛𑀸𑀬𑀲𑁆𑀲 𑀘 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀣𑁂𑀭𑁄 𑀲𑀩𑁆𑀩𑀓𑀸𑀮𑀁 𑀑𑀯𑀤𑀢𑀺 𑁋 ‘‘𑀲𑀸𑀫𑀡𑁂𑀭 𑀫𑀸 𑀏𑀯𑀫𑀓𑀸𑀲𑀺, 𑀧𑀼𑀣𑀼𑀚𑁆𑀚𑀦𑀺𑀤𑁆𑀥𑀺 𑀦𑀸𑀫 𑀘𑀮𑀸 𑀅𑀦𑀺𑀩𑀤𑁆𑀥𑀸, 𑀅𑀲𑀧𑁆𑀧𑀸𑀬𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀮𑀪𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀪𑀺𑀚𑁆𑀚𑀢𑀺, 𑀲𑀦𑁆𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀳𑀻𑀦𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀲𑀦𑁆𑀣𑀫𑁆𑀪𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀲𑀸𑀫𑀡𑁂𑀭𑁄 ‘‘𑀓𑀺𑀁 𑀓𑀣𑁂𑀢𑀺 𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑁄’’𑀢𑀺 𑀲𑁄𑀢𑀼𑀁 𑀦 𑀇𑀘𑁆𑀙𑀢𑀺, 𑀢𑀣𑁂𑀯 𑀓𑀭𑁄𑀢𑀺. 𑀣𑁂𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑁂𑀢𑀺𑀬𑀯𑀦𑁆𑀤𑀦𑀁 𑀓𑀭𑁄𑀦𑁆𑀢𑁄 𑀓𑀫𑁆𑀫𑀼𑀩𑀺𑀦𑁆𑀤𑀼𑀯𑀺𑀳𑀸𑀭𑀁 𑀦𑀸𑀫 𑀕𑀢𑁄. 𑀢𑀢𑁆𑀣 𑀯𑀲𑀦𑁆𑀢𑁂𑀧𑀺 𑀣𑁂𑀭𑁂 𑀲𑀸𑀫𑀡𑁂𑀭𑁄 𑀢𑀣𑁂𑀯 𑀓𑀭𑁄𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑀸 𑀧𑁂𑀲𑀓𑀸𑀭𑀥𑀻𑀢𑀸 𑀅𑀪𑀺𑀭𑀽𑀧𑀸 𑀧𑀞𑀫𑀯𑀬𑁂 𑀞𑀺𑀢𑀸 𑀓𑀫𑁆𑀫𑀩𑀺𑀦𑁆𑀤𑀼𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀤𑀼𑀫𑀲𑁆𑀲𑀭𑀁 𑀑𑀭𑀼𑀬𑁆𑀳 𑀕𑀸𑀬𑀫𑀸𑀦𑀸 𑀧𑀼𑀧𑁆𑀨𑀸𑀦𑀺 𑀪𑀜𑁆𑀚𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀸𑀫𑀡𑁂𑀭𑁄 𑀧𑀤𑀼𑀫𑀲𑁆𑀲𑀭𑀫𑀢𑁆𑀣𑀓𑁂𑀦 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑁄 𑀧𑀦 𑀲𑀺𑀮𑁂𑀲𑀺𑀓𑀸𑀬 𑀓𑀸𑀡𑀫𑀘𑁆𑀙𑀺𑀓𑀸 𑀯𑀺𑀬 𑀢𑀲𑁆𑀲𑀸 𑀕𑀻𑀢𑀲𑀤𑁆𑀤𑁂 𑀩𑀚𑁆𑀛𑀺. 𑀢𑀸𑀯𑀤𑁂𑀯𑀲𑁆𑀲 𑀇𑀤𑁆𑀥𑀺 𑀅𑀦𑁆𑀢𑀭𑀳𑀺𑀢𑀸, 𑀙𑀺𑀦𑁆𑀦𑀧𑀓𑁆𑀔𑀓𑀸𑀓𑁄 𑀯𑀺𑀬 𑀅𑀳𑁄𑀲𑀺. 𑀲𑀦𑁆𑀢𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀧𑀦 𑀢𑀢𑁆𑀣𑁂𑀯 𑀉𑀤𑀓𑀧𑀺𑀝𑁆𑀞𑁂 𑀅𑀧𑀢𑀺𑀢𑁆𑀯𑀸 𑀲𑀺𑀫𑁆𑀩𑀮𑀺𑀢𑀽𑀮𑀁 𑀯𑀺𑀬 𑀧𑀢𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀤𑀼𑀫𑀲𑀭𑀢𑀻𑀭𑁂 𑀅𑀝𑁆𑀞𑀸𑀲𑀺. 𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀫𑀳𑀸𑀣𑁂𑀭𑁄 ‘‘𑀧𑀕𑁂𑀯𑁂𑀢𑀁 𑀫𑀬𑀸 𑀤𑀺𑀝𑁆𑀞𑀁, 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀦 𑀦𑀺𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀲𑀸𑀫𑀡𑁂𑀭𑁄 𑀕𑀦𑁆𑀢𑁆𑀯𑀸 𑀧𑀤𑀼𑀫𑀲𑀭𑀢𑀻𑀭𑁂 𑀅𑀝𑁆𑀞𑀸𑀲𑀺 𑀢𑀲𑁆𑀲𑀸 𑀧𑀘𑁆𑀘𑀼𑀢𑁆𑀢𑀭𑀡𑀁 𑀆𑀕𑀫𑀬𑀫𑀸𑀦𑁄. 𑀲𑀸𑀧𑀺 𑀲𑀸𑀫𑀡𑁂𑀭𑀁 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀜𑁆𑀘 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀞𑀺𑀢𑀜𑁆𑀘 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀏𑀲 𑀫𑀁 𑀦𑀺𑀲𑁆𑀲𑀸𑀬 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀜𑀢𑁆𑀯𑀸 ‘‘𑀧𑀝𑀺𑀓𑁆𑀓𑀫 𑀲𑀸𑀫𑀡𑁂𑀭𑀸’’𑀢𑀺 𑀆𑀳. 𑀲𑁄 𑀧𑀝𑀺𑀓𑁆𑀓𑀫𑀺. 𑀇𑀢𑀭𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂,’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀸 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂 𑀆𑀦𑀺𑀲𑀁𑀲𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀫𑀸𑀦𑀸𑀧𑀺 𑀢𑀲𑁆𑀲 𑀉𑀓𑁆𑀓𑀡𑁆𑀞𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑁋 ‘‘𑀅𑀬𑀁 𑀫𑀫 𑀓𑀸𑀭𑀡𑀸 𑀏𑀯𑀭𑀽𑀧𑀸𑀬 𑀇𑀤𑁆𑀥𑀺𑀬𑀸 𑀧𑀭𑀺𑀳𑀻𑀦𑁄, 𑀦 𑀤𑀸𑀦𑀺 𑀬𑀼𑀢𑁆𑀢𑀁 𑀧𑀭𑀺𑀘𑁆𑀘𑀚𑀺𑀢𑀼’’𑀦𑁆𑀢𑀺 𑀇𑀥𑁂𑀯 𑀢𑀺𑀝𑁆𑀞𑀸𑀢𑀺 𑀯𑀢𑁆𑀯𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑁂𑀧𑀺 𑀆𑀕𑀦𑁆𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀑𑀯𑀤𑀫𑀸𑀦𑀸 𑀯𑀘𑀦𑀁 𑀅𑀕𑁆𑀕𑀡𑁆𑀳𑀦𑁆𑀢𑀁 𑀆𑀳𑀁𑀲𑀼 𑁋 ‘‘𑀢𑁆𑀯𑀁 𑀅𑀫𑁆𑀳𑁂 𑀉𑀘𑁆𑀘𑀓𑀼𑀮𑀸𑀢𑀺 𑀲𑀮𑁆𑀮𑀓𑁆𑀔𑁂𑀲𑀺, 𑀫𑀬𑀁 𑀧𑁂𑀲𑀓𑀸𑀭𑀸. 𑀲𑀓𑁆𑀔𑀺𑀲𑁆𑀲𑀲𑀺 𑀧𑁂𑀲𑀓𑀸𑀭𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺 𑀲𑀸𑀫𑀡𑁂𑀭𑁄 𑀆𑀳 𑁋 ‘‘𑀉𑀧𑀸𑀲𑀓 𑀕𑀺𑀳𑀺𑀪𑀽𑀢𑁄 𑀦𑀸𑀫 𑀧𑁂𑀲𑀓𑀸𑀭𑀓𑀫𑁆𑀫𑀁 𑀯𑀸 𑀓𑀭𑁂𑀬𑁆𑀬 𑀦𑀴𑀓𑀸𑀭𑀓𑀫𑁆𑀫𑀁 𑀯𑀸, 𑀓𑀺𑀁 𑀇𑀫𑀺𑀦𑀸 𑀲𑀸𑀝𑀓𑀫𑀢𑁆𑀢𑁂𑀦 𑀮𑁄𑀪𑀁 𑀓𑀭𑁄𑀣𑀸’’𑀢𑀺. 𑀧𑁂𑀲𑀓𑀸𑀭𑁄 𑀉𑀤𑀭𑁂 𑀩𑀤𑁆𑀥𑀲𑀸𑀝𑀓𑀁 𑀤𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀥𑀻𑀢𑀭𑀁 𑀅𑀤𑀸𑀲𑀺.

𑀲𑁄 𑀧𑁂𑀲𑀓𑀸𑀭𑀓𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑁂𑀲𑀓𑀸𑀭𑁂𑀳𑀺 𑀲𑀤𑁆𑀥𑀺𑀁 𑀲𑀸𑀮𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀜𑁆𑀜𑁂𑀲𑀁 𑀇𑀢𑁆𑀣𑀺𑀬𑁄 𑀧𑀸𑀢𑁄𑀯 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀳𑀭𑀺𑀁𑀲𑀼, 𑀢𑀲𑁆𑀲 𑀪𑀭𑀺𑀬𑀸 𑀦 𑀢𑀸𑀯 𑀆𑀕𑀘𑁆𑀙𑀢𑀺. 𑀲𑁄 𑀇𑀢𑀭𑁂𑀲𑀼 𑀓𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑁂𑀲𑀼 𑀢𑀲𑀭𑀁 𑀯𑀝𑁆𑀝𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀸 𑀧𑀘𑁆𑀙𑀸 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑁄 ‘‘𑀅𑀢𑀺𑀘𑀺𑀭𑁂𑀦 𑀆𑀕𑀢𑀸𑀲𑀻’’𑀢𑀺 𑀢𑀚𑁆𑀚𑁂𑀲𑀺. 𑀫𑀸𑀢𑀼𑀕𑀸𑀫𑁄 𑀘 𑀦𑀸𑀫 𑀅𑀧𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑀁 𑀅𑀢𑁆𑀢𑀦𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀁 𑀜𑀢𑁆𑀯𑀸 𑀤𑀸𑀲𑀁 𑀯𑀺𑀬 𑀲𑀮𑁆𑀮𑀓𑁆𑀔𑁂𑀢𑀺. 𑀢𑀲𑁆𑀫𑀸 𑀲𑀸 𑀏𑀯𑀫𑀸𑀳 𑁋 ‘‘𑀅𑀜𑁆𑀜𑁂𑀲𑀁 𑀖𑀭𑁂 𑀤𑀸𑀭𑀼𑀧𑀡𑁆𑀡𑀮𑁄𑀡𑀸𑀤𑀻𑀦𑀺 𑀲𑀦𑁆𑀦𑀺𑀳𑀺𑀢𑀸𑀦𑀺, 𑀩𑀸𑀳𑀺𑀭𑀢𑁄 𑀆𑀳𑀭𑀺𑀢𑁆𑀯𑀸 𑀤𑀸𑀬𑀓𑀸 𑀧𑁂𑀲𑀦𑀢𑀓𑀸𑀭𑀓𑀸𑀧𑀺 𑀅𑀢𑁆𑀣𑀺, 𑀅𑀳𑀁 𑀧𑀦 𑀏𑀓𑀺𑀓𑀸𑀯, 𑀢𑁆𑀯𑀫𑁆𑀧𑀺 𑀫𑀬𑁆𑀳𑀁 𑀖𑀭𑁂 𑀇𑀤𑀁 𑀅𑀢𑁆𑀣𑀺 𑀇𑀤𑀁 𑀦𑀢𑁆𑀣𑀻𑀢𑀺 𑀦 𑀚𑀸𑀦𑀸𑀲𑀺. 𑀲𑀘𑁂 𑀇𑀘𑁆𑀙𑀲𑀺, 𑀪𑀼𑀜𑁆𑀚, 𑀦𑁄 𑀘𑁂 𑀇𑀘𑁆𑀙𑀲𑀺, 𑀫𑀸 𑀪𑀼𑀜𑁆𑀚𑀸’’𑀢𑀺. 𑀲𑁄 ‘‘𑀦 𑀓𑁂𑀯𑀮𑀜𑁆𑀘 𑀉𑀲𑁆𑀲𑀽𑀭𑁂 𑀪𑀢𑁆𑀢𑀁 𑀆𑀳𑀭𑀲𑀺, 𑀯𑀸𑀘𑀸𑀬𑀧𑀺 𑀫𑀁 𑀖𑀝𑁆𑀝𑁂𑀲𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀁 𑀧𑀳𑀭𑀡𑀁 𑀅𑀧𑀲𑁆𑀲𑀦𑁆𑀢𑁄 𑀢𑀫𑁂𑀯 𑀢𑀲𑀭𑀤𑀡𑁆𑀟𑀓𑀁 𑀢𑀲𑀭𑀢𑁄 𑀮𑀼𑀜𑁆𑀘𑀺𑀢𑁆𑀯𑀸 𑀔𑀺𑀧𑀺. 𑀲𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀈𑀲𑀓𑀁 𑀧𑀭𑀺𑀯𑀢𑁆𑀢𑀺. 𑀢𑀲𑀭𑀤𑀡𑁆𑀟𑀓𑀲𑁆𑀲 𑀘 𑀓𑁄𑀝𑀺 𑀦𑀸𑀫 𑀢𑀺𑀔𑀺𑀡𑀸 𑀳𑁄𑀢𑀺, 𑀲𑀸 𑀢𑀲𑁆𑀲𑀸 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀅𑀓𑁆𑀔𑀺𑀓𑁄𑀝𑀺𑀬𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀯𑁂𑀕𑁂𑀦 𑀅𑀓𑁆𑀔𑀺𑀁 𑀅𑀕𑁆𑀕𑀳𑁂𑀲𑀺, 𑀪𑀺𑀦𑁆𑀦𑀝𑁆𑀞𑀸𑀦𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺. 𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀉𑀧𑀚𑁆𑀛𑀸𑀬𑀲𑁆𑀲 𑀯𑀘𑀦𑀁 𑀅𑀦𑀼𑀲𑁆𑀲𑀭𑀺 𑁋 ‘‘𑀇𑀤𑀁 𑀲𑀦𑁆𑀥𑀸𑀬 𑀫𑀁 𑀉𑀧𑀚𑁆𑀛𑀸𑀬𑁄 ‘𑀅𑀦𑀸𑀕𑀢𑁂 𑀓𑀸𑀮𑁂 𑀓𑀸𑀡𑀧𑁂𑀲𑀓𑀸𑀭𑀺𑀬𑀸 𑀳𑀢𑁆𑀣𑁂𑀳𑀺 𑀫𑀤𑁆𑀤𑀺𑀢𑀓𑀜𑁆𑀚𑀺𑀬𑀁 𑀧𑀺𑀯𑀺𑀲𑁆𑀲𑀲𑀻’𑀢𑀺 𑀆𑀳, 𑀇𑀤𑀁 𑀣𑁂𑀭𑁂𑀦 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺, 𑀅𑀳𑁄 𑀤𑀻𑀖𑀤𑀲𑁆𑀲𑀻 𑀅𑀬𑁆𑀬𑁄’’𑀢𑀺 𑀫𑀳𑀸𑀲𑀤𑁆𑀤𑁂𑀦 𑀭𑁄𑀤𑀺𑀢𑀼𑀁 𑀆𑀭𑀪𑀺. 𑀢𑀫𑁂𑀦𑀁 𑀅𑀜𑁆𑀜𑁂 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀭𑁄𑀤𑀺, 𑀅𑀓𑁆𑀔𑀺 𑀦𑀸𑀫 𑀪𑀺𑀦𑁆𑀦𑀁 𑀦 𑀲𑀓𑁆𑀓𑀸 𑀭𑁄𑀤𑀦𑁂𑀦 𑀧𑀝𑀺𑀧𑀸𑀓𑀢𑀺𑀓𑀁 𑀓𑀸𑀢𑀼’’𑀦𑁆𑀢𑀺 𑀆𑀳𑀁𑀲𑀼. 𑀲𑁄 ‘‘𑀦𑀸𑀳𑀫𑁂𑀢𑀫𑀢𑁆𑀣𑀁 𑀭𑁄𑀤𑀸𑀫𑀺, 𑀅𑀧𑀺𑀘 𑀔𑁄 𑀇𑀫𑀁 𑀲𑀦𑁆𑀥𑀸𑀬 𑀭𑁄𑀤𑀸𑀫𑀻’’𑀢𑀺 𑀲𑀩𑁆𑀩𑀁 𑀧𑀝𑀺𑀧𑀸𑀝𑀺𑀬𑀸 𑀓𑀣𑁂𑀲𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

𑀅𑀧𑀭𑀫𑁆𑀧𑀺 𑀯𑀢𑁆𑀣𑀼 𑁋 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀓𑀮𑁆𑀬𑀸𑀡𑀺𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑀯𑀺𑀫𑀕𑁆𑀕𑁂𑀦 𑀫𑀳𑀸𑀫𑀕𑁆𑀕𑀁 𑀑𑀢𑀭𑀫𑀸𑀦𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀛𑀸𑀫𑀔𑁂𑀢𑁆𑀢𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀏𑀓𑀁 𑀫𑀦𑀼𑀲𑁆𑀲𑀁 𑀅𑀤𑁆𑀤𑀲𑀁𑀲𑀼. 𑀢𑀲𑁆𑀲 𑀲𑀭𑀻𑀭𑀁 𑀫𑀲𑀺𑀫𑀓𑁆𑀔𑀺𑀢𑀁 𑀯𑀺𑀬 𑀅𑀳𑁄𑀲𑀺. 𑀫𑀲𑀺𑀫𑀓𑁆𑀔𑀺𑀢𑀁𑀬𑁂𑀯 𑀏𑀓𑀁 𑀓𑀸𑀲𑀸𑀯𑀁 𑀓𑀘𑁆𑀙𑀁 𑀧𑀻𑀴𑁂𑀢𑁆𑀯𑀸 𑀦𑀺𑀯𑀢𑁆𑀣𑀁, 𑀑𑀮𑁄𑀓𑀺𑀬𑀫𑀸𑀦𑁄 𑀛𑀸𑀫𑀔𑀸𑀡𑀼𑀓𑁄 𑀯𑀺𑀬 𑀔𑀸𑀬𑀢𑀺. 𑀲𑁄 𑀤𑀺𑀯𑀲𑀪𑀸𑀕𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑀟𑁆𑀠𑀚𑁆𑀛𑀸𑀬𑀫𑀸𑀦𑀸𑀦𑀁 𑀤𑀸𑀭𑀽𑀦𑀁 𑀓𑀮𑀸𑀧𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀯𑀺𑀧𑁆𑀧𑀓𑀺𑀡𑁆𑀡𑁂𑀳𑀺 𑀓𑁂𑀲𑁂𑀳𑀺 𑀓𑀼𑀫𑁆𑀫𑀕𑁆𑀕𑁂𑀦 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀔𑁂 𑀅𑀝𑁆𑀞𑀸𑀲𑀺. 𑀲𑀸𑀫𑀡𑁂𑀭𑀸 𑀤𑀺𑀲𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑀬𑀫𑀸𑀦𑀸, 𑁋 ‘‘𑀆𑀯𑀼𑀲𑁄, 𑀢𑀼𑀬𑁆𑀳𑀁 𑀧𑀺𑀢𑀸 𑀢𑀼𑀬𑁆𑀳𑀁 𑀫𑀳𑀸𑀧𑀺𑀢𑀸 𑀢𑀼𑀬𑁆𑀳𑀁 𑀫𑀸𑀢𑀼𑀮𑁄’’𑀢𑀺 𑀳𑀲𑀫𑀸𑀦𑀸 𑀕𑀦𑁆𑀢𑁆𑀯𑀸 ‘‘𑀓𑁄𑀦𑀸𑀫𑁄 𑀢𑁆𑀯𑀁 𑀉𑀧𑀸𑀲𑀓𑀸’’𑀢𑀺 𑀦𑀸𑀫𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀦𑀸𑀫𑀁 𑀧𑀼𑀘𑁆𑀙𑀺𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀤𑀸𑀭𑀼𑀓𑀮𑀸𑀧𑀁 𑀙𑀟𑁆𑀟𑁂𑀢𑁆𑀯𑀸 𑀯𑀢𑁆𑀣𑀁 𑀲𑀁𑀯𑀺𑀥𑀸𑀬 𑀦𑀺𑀯𑀸𑀲𑁂𑀢𑁆𑀯𑀸 𑀫𑀳𑀸𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸 ‘‘𑀢𑀺𑀝𑁆𑀞𑀣 𑀢𑀸𑀯, 𑀪𑀦𑁆𑀢𑁂,’’𑀢𑀺 𑀆𑀳. 𑀫𑀳𑀸𑀣𑁂𑀭𑀸 𑀅𑀝𑁆𑀞𑀁𑀲𑀼.

𑀤𑀳𑀭𑀲𑀸𑀫𑀡𑁂𑀭𑀸 𑀆𑀕𑀦𑁆𑀢𑁆𑀯𑀸 𑀫𑀳𑀸𑀣𑁂𑀭𑀸𑀦𑀁 𑀲𑀫𑁆𑀫𑀼𑀔𑀸𑀧𑀺 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺. 𑀉𑀧𑀸𑀲𑀓𑁄 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀁 𑀧𑀲𑁆𑀲𑀺𑀢𑁆𑀯𑀸 𑀧𑀭𑀺𑀳𑀲𑀣, 𑀏𑀢𑁆𑀢𑀓𑁂𑀦𑁂𑀯 𑀫𑀢𑁆𑀣𑀓𑀁 𑀧𑀢𑁆𑀢𑀫𑁆𑀳𑀸𑀢𑀺 𑀫𑀸 𑀲𑀮𑁆𑀮𑀓𑁆𑀔𑁂𑀣. 𑀅𑀳𑀫𑁆𑀧𑀺 𑀧𑀼𑀩𑁆𑀩𑁂 𑀢𑀼𑀫𑁆𑀳𑀸𑀤𑀺𑀲𑁄𑀯 𑀲𑀫𑀡𑁄 𑀅𑀳𑁄𑀲𑀺𑀁. 𑀢𑀼𑀫𑁆𑀳𑀸𑀓𑀁 𑀧𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺, 𑀅𑀳𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀅𑀳𑁄𑀲𑀺𑀁, 𑀆𑀓𑀸𑀲𑀁 𑀕𑀳𑁂𑀢𑁆𑀯𑀸 𑀧𑀣𑀯𑀺𑀁 𑀓𑀭𑁄𑀫𑀺, 𑀧𑀣𑀯𑀺𑀁 𑀆𑀓𑀸𑀲𑀁. 𑀤𑀽𑀭𑀁 𑀕𑀡𑁆𑀳𑀺𑀢𑁆𑀯𑀸 𑀲𑀦𑁆𑀢𑀺𑀓𑀁 𑀓𑀭𑁄𑀫𑀺, 𑀲𑀦𑁆𑀢𑀺𑀓𑀁 𑀤𑀽𑀭𑀁. 𑀘𑀓𑁆𑀓𑀯𑀸𑀴𑀲𑀢𑀲𑀳𑀲𑁆𑀲𑀁 𑀔𑀡𑁂𑀦 𑀯𑀺𑀦𑀺𑀯𑀺𑀚𑁆𑀛𑀸𑀫𑀺. 𑀳𑀢𑁆𑀣𑁂 𑀫𑁂 𑀧𑀲𑁆𑀲𑀣, 𑀇𑀤𑀸𑀦𑀺 𑀫𑀓𑁆𑀓𑀝𑀳𑀢𑁆𑀣𑀲𑀤𑀺𑀲𑀸, 𑀅𑀳𑀁 𑀇𑀫𑁂𑀳𑁂𑀯 𑀳𑀢𑁆𑀣𑁂𑀳𑀺 𑀇𑀥 𑀦𑀺𑀲𑀺𑀦𑁆𑀦𑁄𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀭𑀸𑀫𑀲𑀺𑀁. 𑀇𑀫𑁂𑀲𑀁𑀬𑁂𑀯 𑀧𑀸𑀤𑀸𑀦𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀸𑀤𑀓𑀣𑀮𑀺𑀓𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺𑀁. 𑀏𑀯𑀭𑀽𑀧𑀸 𑀫𑁂 𑀇𑀤𑁆𑀥𑀺 𑀧𑀫𑀸𑀤𑁂𑀦 𑀅𑀦𑁆𑀢𑀭𑀳𑀺𑀢𑀸, 𑀢𑀼𑀫𑁆𑀳𑁂 𑀫𑀸 𑀧𑀫𑀚𑁆𑀚𑀺𑀢𑁆𑀣. 𑀧𑀫𑀸𑀤𑁂𑀦 𑀳𑀺 𑀏𑀯𑀭𑀽𑀧𑀁 𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀫𑀜𑁆𑀜𑁂𑀯 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣, 𑀪𑀦𑁆𑀢𑁂,’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀑𑀯𑀸𑀤𑀫𑀤𑀸𑀲𑀺. 𑀢𑁂 𑀢𑀲𑁆𑀲 𑀓𑀣𑁂𑀦𑁆𑀢𑀲𑁆𑀲𑁂𑀯 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀫𑀸𑀦𑀸 𑀢𑀺𑀁𑀲𑀚𑀦𑀸 𑀢𑀢𑁆𑀣𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺. 𑀏𑀯𑀫𑁆𑀧𑀺 𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀦𑁆𑀢𑀺 𑀘𑁂𑀢𑁆𑀣 ‘‘𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀁, 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁, 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀦𑁆𑀢𑀺. 𑀢𑀢𑁆𑀣 𑀬𑁂 𑀓𑀺𑀮𑁂𑀲𑀸 𑀯𑀺𑀚𑁆𑀚𑀫𑀸𑀦𑀸 𑀉𑀧𑁆𑀧𑀸𑀤𑀸𑀤𑀺𑀲𑀫𑀗𑁆𑀕𑀺𑀦𑁄, 𑀇𑀤𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀓𑀫𑁆𑀫𑁂 𑀧𑀦 𑀚𑀯𑀺𑀢𑁂 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀯𑀺𑀧𑀸𑀓𑁄 𑀪𑀼𑀢𑁆𑀯𑀸 𑀯𑀺𑀕𑀢𑀁 𑀦𑀸𑀫. 𑀓𑀫𑁆𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀪𑀯𑀺𑀢𑁆𑀯𑀸 𑀯𑀺𑀕𑀢𑀁 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺, 𑀏𑀯𑀁 𑀓𑀢𑁂 𑀑𑀓𑀸𑀲𑁂 𑀯𑀺𑀧𑀸𑀓𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀑𑀓𑀸𑀲𑀓𑀭𑀡𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀇𑀤𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺 𑀦𑀸𑀫. 𑀢𑁂 𑀅𑀢𑀻𑀢𑀸𑀤𑀺𑀪𑁂𑀤𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀅𑀦𑀼𑀲𑀬𑀺𑀢𑀓𑀺𑀮𑁂𑀲𑀸 𑀧𑀦 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀅𑀢𑀻𑀢𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀧𑀺 𑀳𑀺 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀺, 𑀅𑀦𑀸𑀕𑀢𑀔𑀦𑁆𑀥𑁂𑀲𑀼, 𑀧𑀘𑁆𑀘𑀼𑀧𑁆𑀧𑀦𑁆𑀦𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀧𑀺 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀺. 𑀇𑀤𑀁 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋 ‘‘𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀼 𑀅𑀲𑀫𑀼𑀕𑁆𑀖𑀸𑀢𑀺𑀢𑀓𑀺𑀮𑁂𑀲𑀸 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀻’’𑀢𑀺.

𑀅𑀧𑀭𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁, 𑀆𑀭𑀫𑁆𑀫𑀡𑀸𑀥𑀺𑀕𑀳𑀺𑀢𑀼𑀧𑁆𑀧𑀦𑁆𑀦𑀁, 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁 𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺. 𑀢𑀢𑁆𑀣 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀁𑀬𑁂𑀯 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀲𑀓𑀺𑀁 𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀆𑀭𑀫𑁆𑀫𑀡𑁂 𑀦𑀺𑀫𑀺𑀢𑁆𑀢𑁂 𑀕𑀳𑀺𑀢𑁂 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂 𑀓𑀺𑀮𑁂𑀲𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀆𑀭𑀫𑁆𑀫𑀡𑀲𑁆𑀲 𑀅𑀥𑀺𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀓𑀺𑀁? 𑀬𑀣𑀸 𑀔𑀻𑀭𑀭𑀼𑀓𑁆𑀔𑀲𑁆𑀲 𑀓𑀼𑀞𑀸𑀭𑀺𑀬𑀸 𑀆𑀳𑀢𑀸𑀳𑀢𑀝𑁆𑀞𑀸𑀦𑁂 𑀔𑀻𑀭𑀁 𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀁. 𑀇𑀤𑀁 𑀆𑀭𑀫𑁆𑀫𑀡𑀸𑀥𑀺𑀕𑀳𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀲𑀫𑀸𑀧𑀢𑁆𑀢𑀺𑀬𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸 𑀧𑀦 𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸. 𑀬𑀣𑀸 𑀓𑀺𑀁? 𑀬𑀣𑀸 𑀲𑀘𑁂 𑀔𑀻𑀭𑀭𑀼𑀓𑁆𑀔𑁂 𑀓𑀼𑀞𑀸𑀭𑀺𑀬𑀸 𑀆𑀳𑀦𑁂𑀬𑁆𑀬𑀼𑀁, 𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀔𑀻𑀭𑀁 𑀦 𑀦𑀺𑀓𑁆𑀔𑀫𑁂𑀬𑁆𑀬𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀁. 𑀇𑀤𑀁 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀢𑀺𑀢𑀓𑀺𑀮𑁂𑀲𑀸 𑀧𑀦 𑀪𑀯𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀤𑀁 𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫.

𑀇𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀦 𑀫𑀕𑁆𑀕𑀯𑀚𑁆𑀛𑀁, 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀸𑀥𑀺𑀕𑀳𑀺𑀢𑀼𑀧𑁆𑀧𑀦𑁆𑀦𑀁 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁 𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀫𑀕𑁆𑀕𑀯𑀚𑁆𑀛𑀁. 𑀫𑀕𑁆𑀕𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀏𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺. 𑀲𑁄 𑀬𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀳𑀜𑁆𑀘𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀔𑀻𑀡𑀁 𑀔𑁂𑀧𑁂𑀢𑀺, 𑀦𑀺𑀭𑀼𑀤𑁆𑀥𑀁 𑀦𑀺𑀭𑁄𑀥𑁂𑀢𑀺, 𑀯𑀺𑀕𑀢𑀁 𑀯𑀺𑀕𑀫𑁂𑀢𑀺 𑀅𑀢𑁆𑀣𑀗𑁆𑀕𑀢𑀁 𑀅𑀢𑁆𑀣𑀗𑁆𑀕𑀫𑁂𑀢𑀺. 𑀅𑀢𑀻𑀢𑀁 𑀬𑀁 𑀦𑀢𑁆𑀣𑀺, 𑀢𑀁 𑀧𑀚𑀳𑀢𑀺. 𑀳𑀜𑁆𑀘𑀺 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀅𑀚𑀸𑀢𑀁 𑀧𑀚𑀳𑀢𑀺, 𑀅𑀦𑀺𑀩𑁆𑀩𑀢𑁆𑀢𑀁, 𑀅𑀦𑀼𑀧𑁆𑀧𑀦𑁆𑀦𑀁, 𑀅𑀧𑀸𑀢𑀼𑀪𑀽𑀢𑀁 𑀧𑀚𑀳𑀢𑀺. 𑀅𑀦𑀸𑀕𑀢𑀁 𑀬𑀁 𑀦𑀢𑁆𑀣𑀺, 𑀢𑀁 𑀧𑀚𑀳𑀢𑀺, 𑀳𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀭𑀢𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀁, 𑀫𑀽𑀴𑁆𑀳𑁄 𑀫𑁄𑀳𑀁, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀁, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀁, 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀁, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀁, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀁 𑀧𑀚𑀳𑀢𑀺. 𑀓𑀡𑁆𑀳𑀲𑀼𑀓𑁆𑀓𑀥𑀫𑁆𑀫𑀸 𑀬𑀼𑀕𑀦𑀤𑁆𑀥𑀸 𑀲𑀫𑀫𑁂𑀯 𑀯𑀢𑁆𑀢𑀦𑁆𑀢𑀺. 𑀲𑀁𑀓𑀺𑀮𑁂𑀲𑀺𑀓𑀸 𑀫𑀕𑁆𑀕𑀪𑀸𑀯𑀦𑀸 𑀳𑁄𑀢𑀺…𑀧𑁂… 𑀢𑁂𑀦 𑀳𑀺 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀦𑀢𑁆𑀣𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀦𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀦𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺. 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸…𑀧𑁂… 𑀅𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺. 𑀬𑀣𑀸 𑀓𑀣𑀁 𑀯𑀺𑀬, 𑀲𑁂𑀬𑁆𑀬𑀣𑀸𑀧𑀺 𑀢𑀭𑀼𑀡𑁄 𑀭𑀼𑀓𑁆𑀔𑁄 𑀅𑀚𑀸𑀢𑀨𑀮𑁄…𑀧𑁂… 𑀅𑀧𑀸𑀢𑀼𑀪𑀽𑀢𑀸𑀬𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺.

𑀇𑀢𑀺 𑀧𑀸𑀴𑀺𑀬𑀁 𑀅𑀚𑀸𑀢𑀨𑀮𑀭𑀼𑀓𑁆𑀔𑁄 𑀆𑀕𑀢𑁄, 𑀚𑀸𑀢𑀨𑀮𑀭𑀼𑀓𑁆𑀔𑁂𑀦 𑀧𑀦 𑀤𑀻𑀧𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀲𑀨𑀮𑁄 𑀢𑀭𑀼𑀡𑀫𑁆𑀩𑀭𑀼𑀓𑁆𑀔𑁄, 𑀢𑀲𑁆𑀲 𑀨𑀮𑀸𑀦𑀺 𑀫𑀦𑀼𑀲𑁆𑀲𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼𑀁, 𑀲𑁂𑀲𑀸𑀦𑀺 𑀧𑀸𑀢𑁂𑀢𑁆𑀯𑀸 𑀧𑀘𑁆𑀙𑀺𑀬𑁄 𑀧𑀽𑀭𑁂𑀬𑁆𑀬𑀼𑀁. 𑀅𑀣𑀜𑁆𑀜𑁄 𑀧𑀼𑀭𑀺𑀲𑁄 𑀢𑀁 𑀨𑀭𑀲𑀼𑀦𑀸 𑀙𑀺𑀦𑁆𑀤𑁂𑀬𑁆𑀬, 𑀢𑁂𑀦𑀲𑁆𑀲 𑀦𑁂𑀯 𑀅𑀢𑀻𑀢𑀸𑀦𑀺 𑀨𑀮𑀸𑀦𑀺 𑀦𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀦 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀦𑀸𑀲𑀺𑀢𑀸𑀦𑀺. 𑀅𑀢𑀻𑀢𑀸𑀦𑀺 𑀳𑀺 𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀪𑀼𑀢𑁆𑀢𑀸𑀦𑀺, 𑀅𑀦𑀸𑀕𑀢𑀸𑀦𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀺, 𑀦 𑀲𑀓𑁆𑀓𑀸 𑀦𑀸𑀲𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀲𑁄 𑀙𑀺𑀦𑁆𑀦𑁄, 𑀢𑀤𑀸 𑀨𑀮𑀸𑀦𑀺𑀬𑁂𑀯 𑀦𑀢𑁆𑀣𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺𑀧𑀺 𑀅𑀦𑀸𑀲𑀺𑀢𑀸𑀦𑀺. 𑀲𑀘𑁂 𑀧𑀦 𑀭𑀼𑀓𑁆𑀔𑁄 𑀅𑀘𑁆𑀙𑀺𑀦𑁆𑀦𑁄, 𑀅𑀣𑀲𑁆𑀲 𑀧𑀣𑀯𑀻𑀭𑀲𑀜𑁆𑀘 𑀆𑀧𑁄𑀭𑀲𑀜𑁆𑀘 𑀆𑀕𑀫𑁆𑀫 𑀬𑀸𑀦𑀺 𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼𑀁, 𑀢𑀸𑀦𑀺 𑀦𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀳𑀺 𑀅𑀚𑀸𑀢𑀸𑀦𑁂𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀦𑁂𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀦𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺, 𑀏𑀯𑀫𑁂𑀯 𑀫𑀕𑁆𑀕𑁄 𑀦𑀸𑀧𑀺 𑀅𑀢𑀻𑀢𑀸𑀤𑀺𑀪𑁂𑀤𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦𑀸𑀧𑀺 𑀦 𑀧𑀚𑀳𑀢𑀺. 𑀬𑁂𑀲𑀜𑁆𑀳𑀺 𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀔𑀦𑁆𑀥𑁂𑀲𑀼 𑀅𑀧𑀭𑀺𑀜𑁆𑀜𑀸𑀢𑁂𑀲𑀼 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀫𑀕𑁆𑀕𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀔𑀦𑁆𑀥𑀸𑀦𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀢𑁂 𑀓𑀺𑀮𑁂𑀲𑀸 𑀅𑀚𑀸𑀢𑀸𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀭𑀼𑀡𑀧𑀼𑀢𑁆𑀢𑀸𑀬 𑀇𑀢𑁆𑀣𑀺𑀬𑀸 𑀧𑀼𑀦 𑀅𑀯𑀺𑀚𑀸𑀬𑀦𑀢𑁆𑀣𑀁, 𑀩𑁆𑀬𑀸𑀥𑀺𑀢𑀸𑀦𑀁 𑀭𑁄𑀕𑀯𑀽𑀧𑀲𑀫𑀦𑀢𑁆𑀣𑀁 𑀧𑀻𑀢𑀪𑁂𑀲𑀚𑁆𑀚𑁂𑀳𑀺 𑀘𑀸𑀧𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀏𑀯𑀁 𑀫𑀕𑁆𑀕𑁄 𑀬𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀦 𑀘 𑀫𑀕𑁆𑀕𑁄 𑀓𑀺𑀮𑁂𑀲𑁂 𑀦 𑀧𑀚𑀳𑀢𑀺. 𑀬𑁂 𑀧𑀦 𑀫𑀕𑁆𑀕𑁄 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦 𑀓𑁂𑀯𑀮𑀜𑁆𑀘 𑀫𑀕𑁆𑀕𑁄 𑀓𑀺𑀮𑁂𑀲𑁂𑀬𑁂𑀯 𑀧𑀚𑀳𑀢𑀺, 𑀓𑀺𑀮𑁂𑀲𑀸𑀦𑀁 𑀧𑀦 𑀅𑀧𑁆𑀧𑀳𑀻𑀦𑀢𑁆𑀢𑀸 𑀬𑁂 𑀘 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀸, 𑀢𑁂𑀧𑀺 𑀧𑀚𑀳𑀢𑀺𑀬𑁂𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 (𑀘𑀽𑀴𑀦𑀺. 𑁬) 𑀯𑀺𑀢𑁆𑀣𑀸𑀭𑁄. 𑀇𑀢𑀺 𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀺𑀦𑁆𑀦𑀢𑁄 𑀯𑀼𑀝𑁆𑀞𑀸𑀢𑀺. 𑀪𑀯𑀯𑀲𑁂𑀦 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀧𑀸𑀬𑀪𑀯𑀢𑁄 𑀯𑀼𑀝𑁆𑀞𑀸𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀲𑀼𑀕𑀢𑀺𑀪𑀯𑁂𑀓𑀤𑁂𑀲𑀢𑁄, 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀲𑀼𑀕𑀢𑀺𑀓𑀸𑀫𑀪𑀯𑀢𑁄, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀭𑀽𑀧𑀸𑀭𑀽𑀧𑀪𑀯𑀢𑁄 𑀯𑀼𑀝𑁆𑀞𑀸𑀢𑀺. 𑀲𑀩𑁆𑀩𑀪𑀯𑁂𑀳𑀺 𑀯𑀼𑀝𑁆𑀞𑀸𑀢𑀺𑀬𑁂𑀯𑀸𑀢𑀺𑀧𑀺 𑀯𑀤𑀦𑁆𑀢𑀺.

𑀅𑀣 𑀫𑀕𑁆𑀕𑀓𑁆𑀔𑀡𑁂 𑀓𑀣𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀸𑀬 𑀪𑀸𑀯𑀦𑀸 𑀳𑁄𑀢𑀺, 𑀓𑀣𑀁 𑀯𑀸 𑀉𑀧𑁆𑀧𑀦𑁆𑀦𑀸𑀦𑀁 𑀞𑀺𑀢𑀺𑀬𑀸𑀢𑀺. 𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸𑀬𑁂𑀯. 𑀫𑀕𑁆𑀕𑁄 𑀳𑀺 𑀧𑀯𑀢𑁆𑀢𑀫𑀸𑀦𑁄 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀅𑀦𑀸𑀕𑀢𑀧𑀼𑀩𑁆𑀩𑀜𑁆𑀳𑀺 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀯𑀸 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀺𑀢𑁆𑀯𑀸 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺 ‘‘𑀅𑀦𑀸𑀕𑀢𑀝𑁆𑀞𑀸𑀦𑀁 𑀆𑀕𑀢𑀫𑁆𑀳𑀸, 𑀅𑀦𑀦𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀸𑀫𑀸’’𑀢𑀺. 𑀬𑀸 𑀘𑀲𑁆𑀲 𑀧𑀯𑀢𑁆𑀢𑀺, 𑀅𑀬𑀫𑁂𑀯 𑀞𑀺𑀢𑀺 𑀦𑀸𑀫𑀸𑀢𑀺 𑀞𑀺𑀢𑀺𑀬𑀸 𑀪𑀸𑀯𑁂𑀢𑀻𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀇𑀤𑁆𑀥𑀺𑀧𑀸𑀤𑁂𑀲𑀼 𑀲𑀗𑁆𑀔𑁂𑀧𑀓𑀣𑀸 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁧𑁮𑁫 𑀆𑀤𑀬𑁄) 𑀯𑀼𑀢𑁆𑀢𑀸. 𑀉𑀧𑀲𑀫𑀫𑀸𑀦𑀁 𑀕𑀘𑁆𑀙𑀢𑀺, 𑀓𑀺𑀮𑁂𑀲𑀽𑀧𑀲𑀫𑀢𑁆𑀣𑀁 𑀯𑀸 𑀕𑀘𑁆𑀙𑀢𑀻𑀢𑀺 𑀉𑀧𑀲𑀫𑀕𑀸𑀫𑀻. 𑀲𑀫𑁆𑀩𑀼𑀚𑁆𑀛𑀫𑀸𑀦𑀸 𑀕𑀘𑁆𑀙𑀢𑀺, 𑀫𑀕𑁆𑀕𑀲𑀫𑁆𑀩𑁄𑀥𑀢𑁆𑀣𑀸𑀬 𑀯𑀸 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑁄𑀥𑀕𑀸𑀫𑀻.

𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸𑀤𑀻𑀦𑀺 𑀲𑀩𑁆𑀩𑀸𑀲𑀯𑀲𑀁𑀯𑀭𑁂 𑀯𑀼𑀢𑁆𑀢𑀸𑀦𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑀸𑀬𑀁 𑀩𑁄𑀥𑀺𑀧𑀓𑁆𑀔𑀺𑀬𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸.

𑁨𑁪𑁮. 𑀯𑀺𑀫𑁄𑀓𑁆𑀔𑀓𑀣𑀸𑀬𑀁 𑀯𑀺𑀫𑁄𑀓𑁆𑀔𑁂𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑀸, 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦. 𑀓𑁄 𑀧𑀦𑀸𑀬𑀁 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀦𑀸𑀫? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀲𑀼𑀝𑁆𑀞𑀼 𑀫𑀼𑀘𑁆𑀘𑀦𑀝𑁆𑀞𑁄, 𑀆𑀭𑀫𑁆𑀫𑀡𑁂 𑀘 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀫𑀼𑀘𑁆𑀘𑀦𑀝𑁆𑀞𑁄, 𑀧𑀺𑀢𑀼𑀅𑀗𑁆𑀓𑁂 𑀯𑀺𑀲𑁆𑀲𑀝𑁆𑀞𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀤𑀸𑀭𑀓𑀲𑁆𑀲 𑀲𑀬𑀦𑀁 𑀯𑀺𑀬 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀧𑀘𑁆𑀙𑀺𑀫𑀯𑀺𑀫𑁄𑀓𑁆𑀔𑁂 𑀦𑀢𑁆𑀣𑀺, 𑀧𑀼𑀭𑀺𑀫𑁂𑀲𑀼 𑀲𑀩𑁆𑀩𑁂𑀲𑀼 𑀅𑀢𑁆𑀣𑀺. 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀅𑀚𑁆𑀛𑀢𑁆𑀢𑀓𑁂𑀲𑀸𑀤𑀻𑀲𑀼 𑀦𑀻𑀮𑀓𑀲𑀺𑀡𑀸𑀤𑀺𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀁 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁, 𑀢𑀤𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻. 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸𑀧𑀺 𑀦𑀻𑀮𑀓𑀲𑀺𑀡𑀸𑀤𑀻𑀦𑀺 𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺. 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢 𑀩𑀳𑀺𑀤𑁆𑀥𑀸𑀯𑀢𑁆𑀣𑀼𑀓𑁂𑀲𑀼 𑀓𑀲𑀺𑀡𑁂𑀲𑀼 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀢𑁆𑀢𑀸𑀭𑀺𑀧𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀚𑁆𑀛𑀢𑁆𑀢𑀁 𑀦 𑀭𑀽𑀧𑀲𑀜𑁆𑀜𑀻, 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀲𑀼 𑀅𑀦𑀼𑀧𑁆𑀧𑀸𑀤𑀺𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀲𑁆𑀲 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁 𑀲𑀼𑀪𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀺, 𑀬𑁄 𑀧𑀦 𑀲𑀼𑀯𑀺𑀲𑀼𑀤𑁆𑀥𑀁 𑀲𑀼𑀪𑀓𑀲𑀺𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀳𑀭𑀢𑀺, 𑀲𑁄 𑀬𑀲𑁆𑀫𑀸 𑀲𑀼𑀪𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀯𑀁 𑀤𑁂𑀲𑀦𑀸 𑀓𑀢𑀸. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀦 ‘‘𑀓𑀣𑀁 𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄. 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺…𑀧𑁂… 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦, 𑀫𑀼𑀤𑀺𑀢𑀸𑀲𑀳𑀕𑀢𑁂𑀦, 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁧𑁨) 𑀯𑀼𑀢𑁆𑀢𑀁.

𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀅𑀝𑁆𑀞𑀫𑁄 𑀯𑀺𑀫𑁄𑀓𑁆𑀔𑁄𑀢𑀺 𑀅𑀬𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀩𑁆𑀩𑀲𑁄 𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀫𑁄 𑀉𑀢𑁆𑀢𑀫𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫.

𑁨𑁪𑁯. 𑀅𑀪𑀺𑀪𑀸𑀬𑀢𑀦𑀓𑀣𑀸𑀬𑀁 𑀅𑀪𑀺𑀪𑀸𑀬𑀢𑀦𑀸𑀦𑀻𑀢𑀺 𑀅𑀪𑀺𑀪𑀯𑀦𑀓𑀸𑀭𑀡𑀸𑀦𑀺. 𑀓𑀺𑀁 𑀅𑀪𑀺𑀪𑀯𑀦𑁆𑀢𑀺? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀧𑀺 𑀆𑀭𑀫𑁆𑀫𑀡𑀸𑀦𑀺𑀧𑀺. 𑀢𑀸𑀦𑀺 𑀳𑀺 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀅𑀪𑀺𑀪𑀯𑀦𑁆𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀜𑀸𑀡𑀼𑀢𑁆𑀢𑀭𑀺𑀢𑀸𑀬 𑀆𑀭𑀫𑁆𑀫𑀡𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀧𑀦 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀦𑀸𑀫 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀜𑁆𑀘 𑀦𑀻𑀮𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑁂𑀲𑁂 𑀯𑀸 𑀧𑀺𑀢𑁆𑀢𑁂 𑀯𑀸 𑀅𑀓𑁆𑀔𑀺𑀢𑀸𑀭𑀓𑀸𑀬 𑀯𑀸 𑀓𑀭𑁄𑀢𑀺, 𑀧𑀻𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑁂𑀤𑁂 𑀯𑀸 𑀙𑀯𑀺𑀬𑀸 𑀯𑀸 𑀳𑀢𑁆𑀣𑀢𑀮𑀧𑀸𑀤𑀢𑀮𑁂𑀲𑀼 𑀯𑀸 𑀅𑀓𑁆𑀔𑀻𑀦𑀁 𑀧𑀻𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺, 𑀮𑁄𑀳𑀺𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑀁𑀲𑁂 𑀯𑀸 𑀮𑁄𑀳𑀺𑀢𑁂 𑀯𑀸 𑀚𑀺𑀯𑁆𑀳𑀸𑀬 𑀯𑀸 𑀅𑀓𑁆𑀔𑀻𑀦𑀁 𑀭𑀢𑁆𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺, 𑀑𑀤𑀸𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀫𑁆𑀳𑀺 𑀯𑀸 𑀤𑀦𑁆𑀢𑁂 𑀯𑀸 𑀦𑀔𑁂 𑀯𑀸 𑀅𑀓𑁆𑀔𑀻𑀦𑀁 𑀲𑁂𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀢𑀁 𑀧𑀦 𑀲𑀼𑀦𑀻𑀮𑀁 𑀲𑀼𑀧𑀻𑀢𑀓𑀁 𑀲𑀼𑀮𑁄𑀳𑀺𑀢𑀓𑀁 𑀲𑀼𑀑𑀤𑀸𑀢𑀁 𑀦 𑀳𑁄𑀢𑀺, 𑀅𑀲𑀼𑀯𑀺𑀲𑀼𑀤𑁆𑀥𑀫𑁂𑀯 𑀳𑁄𑀢𑀺.

𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀬𑀲𑁆𑀲𑁂𑀢𑀁 𑀧𑀭𑀺𑀓𑀫𑁆𑀫𑀁 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀁 𑀧𑀦 𑀩𑀳𑀺𑀤𑁆𑀥𑀸, 𑀲𑁄 𑀏𑀯𑀁 𑀅𑀚𑁆𑀛𑀢𑁆𑀢𑀁 𑀧𑀭𑀺𑀓𑀫𑁆𑀫𑀲𑁆𑀲 𑀩𑀳𑀺𑀤𑁆𑀥𑀸 𑀘 𑀅𑀧𑁆𑀧𑀦𑀸𑀬 𑀯𑀲𑁂𑀦 𑁋 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀢𑁆𑀢𑀸𑀦𑀻𑀢𑀺 𑀅𑀯𑀟𑁆𑀠𑀺𑀢𑀸𑀦𑀺. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀲𑀼𑀯𑀡𑁆𑀡𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀤𑀼𑀩𑁆𑀩𑀡𑁆𑀡𑀸𑀦𑀺 𑀯𑀸, 𑀧𑀭𑀺𑀢𑁆𑀢𑀯𑀲𑁂𑀦𑁂𑀯 𑀇𑀤𑀫𑀪𑀺𑀪𑀸𑀬𑀢𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺 𑀬𑀣𑀸 𑀦𑀸𑀫 𑀲𑀫𑁆𑀧𑀦𑁆𑀦𑀕𑀳𑀡𑀺𑀓𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 ‘‘𑀓𑀺𑀫𑁂𑀢𑁆𑀣 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀏𑀓𑀓𑀩𑀴𑀫𑁂𑀯 𑀓𑀭𑁄𑀢𑀺, 𑀏𑀯𑀫𑁂𑀯𑀁 𑀜𑀸𑀡𑀼𑀢𑁆𑀢𑀭𑀺𑀓𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 𑁋 ‘‘𑀓𑀺𑀫𑁂𑀢𑁆𑀣 𑀧𑀭𑀺𑀢𑁆𑀢𑀓𑁂 𑀆𑀭𑀫𑁆𑀫𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀦𑀸𑀬𑀁 𑀫𑀫 𑀪𑀸𑀭𑁄’’𑀢𑀺 𑀢𑀸𑀦𑀺 𑀭𑀽𑀧𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀧𑀦𑀲𑁆𑀲 𑀆𑀪𑁄𑀕𑁄 𑀓𑀣𑀺𑀢𑁄, 𑀲𑁄 𑀘 𑀔𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲, 𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁. 𑀏𑀯𑀁𑀲𑀜𑁆𑀜𑀻 𑀳𑁄𑀢𑀻𑀢𑀺 𑀆𑀪𑁄𑀕𑀲𑀜𑁆𑀜𑀸𑀬𑀧𑀺 𑀛𑀸𑀦𑀲𑀜𑁆𑀜𑀸𑀬𑀧𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀅𑀪𑀺𑀪𑀯𑀲𑀜𑁆𑀜𑀸 𑀳𑀺𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀅𑀢𑁆𑀣𑀺, 𑀆𑀪𑁄𑀕𑀲𑀜𑁆𑀜𑀸 𑀧𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲𑁂𑀯.

𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀯𑀟𑁆𑀠𑀺𑀢𑀧𑁆𑀧𑀫𑀸𑀡𑀸𑀦𑀺, 𑀫𑀳𑀦𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 𑀬𑀣𑀸 𑀫𑀳𑀕𑁆𑀖𑀲𑁄 𑀧𑀼𑀭𑀺𑀲𑁄 𑀏𑀓𑀁 𑀪𑀢𑁆𑀢𑀯𑀟𑁆𑀠𑀺𑀢𑀓𑀁 𑀮𑀪𑀺𑀢𑁆𑀯𑀸 ‘‘𑀅𑀜𑁆𑀜𑀸𑀧𑀺 𑀳𑁄𑀢𑀼, 𑀅𑀜𑁆𑀜𑀸𑀧𑀺 𑀳𑁄𑀢𑀼, 𑀓𑀺𑀫𑁂𑀲𑀸 𑀫𑀬𑁆𑀳𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑀁 𑀦 𑀫𑀳𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 ‘‘𑀓𑀺𑀫𑁂𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀦𑀬𑀺𑀤𑀁 𑀅𑀧𑁆𑀧𑀫𑀸𑀡𑀁, 𑀦 𑀫𑀬𑁆𑀳𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀓𑀭𑀡𑁂 𑀪𑀸𑀭𑁄 𑀅𑀢𑁆𑀣𑀻’’𑀢𑀺 𑀢𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀮𑀸𑀪𑀺𑀢𑀸𑀬 𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀯𑀺𑀭𑀳𑀺𑀢𑁄. 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀬𑀲𑁆𑀲 𑀧𑀭𑀺𑀓𑀫𑁆𑀫𑀫𑁆𑀧𑀺 𑀦𑀺𑀫𑀺𑀢𑁆𑀢𑀫𑁆𑀧𑀺 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀦𑁆𑀦𑀁, 𑀲𑁄 𑀏𑀯𑀁 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀲𑁆𑀲 𑀘𑁂𑀯 𑀅𑀧𑁆𑀧𑀦𑀸𑀬 𑀘 𑀯𑀲𑁂𑀦 𑁋 ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀢𑁆𑀣𑀸𑀪𑀺𑀪𑀸𑀬𑀢𑀦𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀧𑀭𑀺𑀢𑁆𑀢𑀁 𑀯𑀺𑀢𑀓𑁆𑀓𑀘𑀭𑀺𑀢𑀯𑀲𑁂𑀦 𑀆𑀕𑀢𑀁, 𑀅𑀧𑁆𑀧𑀫𑀸𑀡𑀁 𑀫𑁄𑀳𑀘𑀭𑀺𑀢𑀯𑀲𑁂𑀦, 𑀲𑀼𑀯𑀡𑁆𑀡𑀁 𑀤𑁄𑀲𑀘𑀭𑀺𑀢𑀯𑀲𑁂𑀦, 𑀤𑀼𑀩𑁆𑀩𑀡𑁆𑀡𑀁 𑀭𑀸𑀕𑀘𑀭𑀺𑀢𑀯𑀲𑁂𑀦. 𑀏𑀢𑁂𑀲𑀜𑁆𑀳𑀺 𑀏𑀢𑀸𑀦𑀺 𑀲𑀧𑁆𑀧𑀸𑀬𑀸𑀦𑀺. 𑀲𑀸 𑀘 𑀦𑁂𑀲𑀁 𑀲𑀧𑁆𑀧𑀸𑀬𑀢𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀘𑀭𑀺𑀬𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸.

𑀧𑀜𑁆𑀘𑀫𑀅𑀪𑀺𑀪𑀸𑀬𑀢𑀦𑀸𑀤𑀻𑀲𑀼 𑀦𑀻𑀮𑀸𑀦𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀻𑀮𑀯𑀡𑁆𑀡𑀸𑀦𑀻𑀢𑀺 𑀯𑀡𑁆𑀡𑀯𑀲𑁂𑀦. 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀻𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦. 𑀅𑀧𑀜𑁆𑀜𑀸𑀬𑀫𑀸𑀦𑀯𑀺𑀯𑀭𑀸𑀦𑀺 𑀅𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀸𑀦𑀺 𑀏𑀓𑀦𑀻𑀮𑀸𑀦𑁂𑀯 𑀳𑀼𑀢𑁆𑀯𑀸 𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀻𑀮𑀦𑀺𑀪𑀸𑀲𑀸𑀦𑀻𑀢𑀺 𑀇𑀤𑀁 𑀧𑀦 𑀑𑀪𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀻𑀮𑁄𑀪𑀸𑀲𑀸𑀦𑀺 𑀦𑀻𑀮𑀧𑀪𑀸𑀬𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑁂𑀲𑀁 𑀲𑀼𑀯𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀼𑀤𑁆𑀥𑀯𑀡𑁆𑀡𑀯𑀲𑁂𑀦𑁂𑀯 𑀳𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀉𑀫𑀸𑀧𑀼𑀧𑁆𑀨𑀦𑁆𑀢𑀺 𑀏𑀢𑀜𑁆𑀳𑀺 𑀧𑀼𑀧𑁆𑀨𑀁 𑀲𑀺𑀦𑀺𑀤𑁆𑀥𑀁 𑀫𑀼𑀤𑀼𑀁 𑀤𑀺𑀲𑁆𑀲𑀫𑀸𑀦𑀫𑁆𑀧𑀺 𑀦𑀻𑀮𑀫𑁂𑀯 𑀳𑁄𑀢𑀺. 𑀕𑀺𑀭𑀺𑀓𑀡𑁆𑀡𑀺𑀓𑀧𑀼𑀧𑁆𑀨𑀸𑀤𑀻𑀦𑀺 𑀧𑀦 𑀤𑀺𑀲𑁆𑀲𑀫𑀸𑀦𑀸𑀦𑀺 𑀲𑁂𑀢𑀥𑀸𑀢𑀼𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀇𑀤𑀫𑁂𑀯 𑀕𑀳𑀺𑀢𑀁, 𑀦 𑀢𑀸𑀦𑀺. 𑀩𑀸𑀭𑀸𑀡𑀲𑁂𑀬𑁆𑀬𑀓𑀦𑁆𑀢𑀺 𑀩𑀸𑀭𑀸𑀡𑀲𑀺𑀬𑀁 𑀪𑀯𑀁. 𑀢𑀢𑁆𑀣 𑀓𑀺𑀭 𑀓𑀧𑁆𑀧𑀸𑀲𑁄𑀧𑀺 𑀫𑀼𑀤𑀼, 𑀲𑀼𑀢𑁆𑀢𑀓𑀦𑁆𑀢𑀺𑀓𑀸𑀬𑁄𑀧𑀺 𑀢𑀦𑁆𑀢𑀯𑀸𑀬𑀸𑀧𑀺 𑀙𑁂𑀓𑀸, 𑀉𑀤𑀓𑀫𑁆𑀧𑀺 𑀲𑀼𑀘𑀺 𑀲𑀺𑀦𑀺𑀤𑁆𑀥𑀁, 𑀢𑀲𑁆𑀫𑀸 𑀯𑀢𑁆𑀣𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀳𑁄𑀢𑀺, 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀫𑀝𑁆𑀞𑀁 𑀫𑀼𑀤𑀼 𑀲𑀺𑀦𑀺𑀤𑁆𑀥𑀁 𑀔𑀸𑀬𑀢𑀺. 𑀧𑀻𑀢𑀸𑀦𑀻𑀢𑀺𑀆𑀤𑀻𑀲𑀼 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀦𑀻𑀮𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀦𑀻𑀮𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸’’𑀢𑀺𑀆𑀤𑀺𑀓𑀁 𑀧𑀦𑁂𑀢𑁆𑀣 𑀓𑀲𑀺𑀡𑀓𑀭𑀡𑀜𑁆𑀘𑁂𑀯 𑀧𑀭𑀺𑀓𑀫𑁆𑀫𑀜𑁆𑀘 𑀅𑀧𑁆𑀧𑀦𑀸𑀯𑀺𑀥𑀸𑀦𑀜𑁆𑀘 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯.

𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀢𑀺 𑀇𑀢𑁄 𑀧𑀼𑀩𑁆𑀩𑁂𑀲𑀼 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀢𑁂 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸𑀯 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀇𑀫𑁂𑀲𑀼 𑀧𑀦 𑀅𑀝𑁆𑀞𑀲𑀼 𑀅𑀪𑀺𑀪𑀸𑀬𑀢𑀦𑁂𑀲𑀼 𑀘𑀺𑀡𑁆𑀡𑀯𑀲𑀻𑀪𑀸𑀯𑀸𑀬𑁂𑀯 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀸 𑀦𑀸𑀫.

𑁨𑁫𑁦. 𑀓𑀲𑀺𑀡𑀓𑀣𑀸𑀬𑀁 𑀲𑀓𑀮𑀝𑁆𑀞𑁂𑀦 𑀓𑀲𑀺𑀡𑀸𑀦𑀺, 𑀢𑀤𑀸𑀭𑀫𑁆𑀫𑀡𑀸𑀦𑀁 𑀥𑀫𑁆𑀫𑀸𑀦𑀁 𑀔𑁂𑀢𑁆𑀢𑀝𑁆𑀞𑁂𑀦 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀸 𑀆𑀬𑀢𑀦𑀸𑀦𑀺. 𑀉𑀤𑁆𑀥𑀦𑁆𑀢𑀺 𑀉𑀧𑀭𑀺 𑀕𑀕𑀦𑀢𑀮𑀸𑀪𑀺𑀫𑀼𑀔𑀁. 𑀅𑀥𑁄𑀢𑀺 𑀳𑁂𑀝𑁆𑀞𑀸 𑀪𑀽𑀫𑀺𑀢𑀮𑀸𑀪𑀺𑀫𑀼𑀔𑀁. 𑀢𑀺𑀭𑀺𑀬𑀦𑁆𑀢𑀺 𑀔𑁂𑀢𑁆𑀢𑀫𑀡𑁆𑀟𑀮𑀫𑀺𑀯 𑀲𑀫𑀦𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀏𑀓𑀘𑁆𑀘𑁄 𑀳𑀺 𑀉𑀤𑁆𑀥𑀫𑁂𑀯 𑀓𑀲𑀺𑀡𑀁 𑀯𑀟𑁆𑀠𑁂𑀢𑀺, 𑀏𑀓𑀘𑁆𑀘𑁄 𑀅𑀥𑁄, 𑀏𑀓𑀘𑁆𑀘𑁄 𑀲𑀫𑀦𑁆𑀢𑀢𑁄. 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀏𑀯𑀁 𑀧𑀲𑀸𑀭𑁂𑀢𑀺 𑀆𑀮𑁄𑀓𑀫𑀺𑀯 𑀭𑀽𑀧𑀤𑀲𑁆𑀲𑀦𑀓𑀸𑀫𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺 𑀉𑀤𑁆𑀥𑀁𑀅𑀥𑁄𑀢𑀺𑀭𑀺𑀬’’𑀦𑁆𑀢𑀺. 𑀅𑀤𑁆𑀯𑀬𑀦𑁆𑀢𑀺 𑀤𑀺𑀲𑀸𑀅𑀦𑀼𑀤𑀺𑀲𑀸𑀲𑀼 𑀅𑀤𑁆𑀯𑀬𑀁. 𑀇𑀤𑀁 𑀧𑀦 𑀏𑀓𑀲𑁆𑀲 𑀅𑀜𑁆𑀜𑀪𑀸𑀯𑀸𑀦𑀼𑀧𑀕𑀫𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀉𑀤𑀓𑀁 𑀧𑀯𑀺𑀝𑁆𑀞𑀲𑁆𑀲 𑀲𑀩𑁆𑀩𑀤𑀺𑀲𑀸𑀲𑀼 𑀉𑀤𑀓𑀫𑁂𑀯 𑀳𑁄𑀢𑀺 𑀅𑀦𑀜𑁆𑀜𑀁, 𑀏𑀯𑀫𑁂𑀯𑀁 𑀧𑀣𑀯𑀻𑀓𑀲𑀺𑀡𑀁 𑀧𑀣𑀯𑀻𑀓𑀲𑀺𑀡𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑁄 𑀓𑀲𑀺𑀡𑀲𑀫𑁆𑀪𑁂𑀤𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑁆𑀧𑀫𑀸𑀡𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀢𑀲𑁆𑀲 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀘𑁂𑀢𑀲𑀸 𑀨𑀭𑀦𑁆𑀢𑁄 𑀲𑀓𑀮𑀫𑁂𑀯 𑀨𑀭𑀢𑀺, 𑀅𑀬𑀫𑀲𑁆𑀲 𑀆𑀤𑀺, 𑀇𑀤𑀁 𑀫𑀚𑁆𑀛𑀦𑁆𑀢𑀺 𑀧𑀫𑀸𑀡𑀁 𑀕𑀡𑁆𑀳𑀸𑀢𑀻𑀢𑀺. 𑀯𑀺𑀜𑁆𑀜𑀸𑀡𑀓𑀲𑀺𑀡𑀦𑁆𑀢𑀺 𑀘𑁂𑀢𑁆𑀣 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀁. 𑀢𑀢𑁆𑀣 𑀓𑀲𑀺𑀡𑀯𑀲𑁂𑀦 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂, 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀯𑀲𑁂𑀦 𑀢𑀢𑁆𑀣 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑁂 𑀉𑀤𑁆𑀥𑀁𑀅𑀥𑁄𑀢𑀺𑀭𑀺𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀬𑁂𑀦 𑀧𑀦𑁂𑀢𑀸𑀦𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸𑀦𑁂𑀯. 𑀇𑀥𑀸𑀧𑀺 𑀘𑀺𑀡𑁆𑀡𑀯𑀲𑀺𑀪𑀸𑀯𑁂𑀦𑁂𑀯 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀇𑀢𑁄 𑀅𑀦𑀦𑁆𑀢𑀭𑁂𑀲𑀼 𑀘𑀢𑀽𑀲𑀼 𑀛𑀸𑀦𑁂𑀲𑀼. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀯.

𑁨𑁫𑁨. 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀧𑀦 𑀭𑀽𑀧𑀻𑀢𑀺𑀆𑀤𑀻𑀦𑀫𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀏𑀢𑁆𑀣 𑀲𑀺𑀢𑀫𑁂𑀢𑁆𑀣 𑀧𑀝𑀺𑀩𑀤𑁆𑀥𑀦𑁆𑀢𑀺 𑀏𑀢𑁆𑀣 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁂 𑀓𑀸𑀬𑁂 𑀦𑀺𑀲𑁆𑀲𑀺𑀢𑀜𑁆𑀘 𑀧𑀝𑀺𑀩𑀤𑁆𑀥𑀜𑁆𑀘. 𑀲𑀼𑀪𑁄𑀢𑀺 𑀲𑀼𑀦𑁆𑀤𑀭𑁄. 𑀚𑀸𑀢𑀺𑀫𑀸𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀆𑀓𑀭𑀲𑀫𑀼𑀝𑁆𑀞𑀺𑀢𑁄. 𑀲𑀼𑀧𑀭𑀺𑀓𑀫𑁆𑀫𑀓𑀢𑁄𑀢𑀺 𑀲𑀼𑀝𑁆𑀞𑀼 𑀓𑀢𑀧𑀭𑀺𑀓𑀫𑁆𑀫𑁄 𑀅𑀧𑀦𑀻𑀢𑀧𑀸𑀲𑀸𑀡𑀲𑀓𑁆𑀔𑀭𑁄. 𑀅𑀘𑁆𑀙𑁄𑀢𑀺 𑀢𑀦𑀼𑀘𑁆𑀙𑀯𑀺. 𑀯𑀺𑀧𑁆𑀧𑀲𑀦𑁆𑀦𑁄𑀢𑀺 𑀲𑀼𑀝𑁆𑀞𑀼 𑀯𑀺𑀧𑁆𑀧𑀲𑀦𑁆𑀦𑁄. 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄𑀢𑀺 𑀥𑁄𑀯𑀦 𑀯𑁂𑀥𑀦𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀲𑀫𑁆𑀧𑀦𑁆𑀦𑁄. 𑀦𑀻𑀮𑀦𑁆𑀢𑀺𑀆𑀤𑀻𑀳𑀺 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀢𑀸𑀤𑀺𑀲𑀜𑁆𑀳𑀺 𑀆𑀯𑀼𑀢𑀁 𑀧𑀸𑀓𑀝𑀁 𑀳𑁄𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀏𑀯𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀫𑀡𑀺 𑀯𑀺𑀬 𑀳𑀺 𑀓𑀭𑀚𑀓𑀸𑀬𑁄. 𑀆𑀯𑀼𑀢𑀲𑀼𑀢𑁆𑀢𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀪𑀺𑀓𑁆𑀔𑀼. 𑀳𑀢𑁆𑀣𑁂 𑀓𑀭𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑁄 ‘‘𑀅𑀬𑀁 𑀔𑁄 𑀫𑀡𑀻’’𑀢𑀺 𑀫𑀡𑀺𑀦𑁄 𑀆𑀯𑀺𑀪𑀽𑀢𑀓𑀸𑀮𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑀲𑁆𑀲 𑀆𑀯𑀺𑀪𑀽𑀢𑀓𑀸𑀮𑁄. ‘‘𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 𑀆𑀯𑀼𑀢’’𑀦𑁆𑀢𑀺 𑀲𑀼𑀢𑁆𑀢𑀲𑁆𑀲 𑀆𑀯𑀺𑀪𑀽𑀢𑀓𑀸𑀮𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀤𑀸𑀭𑀫𑁆𑀫𑀡𑀸𑀦𑀁 𑀨𑀲𑁆𑀲𑀧𑀜𑁆𑀘𑀫𑀓𑀸𑀦𑀁 𑀯𑀸 𑀲𑀩𑁆𑀩𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲𑁂𑀯 𑀯𑀸 𑀆𑀯𑀺𑀪𑀽𑀢𑀓𑀸𑀮𑁄𑀢𑀺.

𑀓𑀺𑀁 𑀧𑀦𑁂𑀢𑀁 𑀜𑀸𑀡𑀲𑁆𑀲 𑀆𑀯𑀺𑀪𑀽𑀢𑀁, 𑀧𑀼𑀕𑁆𑀕𑀮𑀲𑁆𑀲𑀸𑀢𑀺. 𑀜𑀸𑀡𑀲𑁆𑀲, 𑀢𑀲𑁆𑀲 𑀧𑀦 𑀆𑀯𑀺𑀪𑀸𑀯𑀢𑁆𑀢𑀸 𑀧𑀼𑀕𑁆𑀕𑀮𑀲𑁆𑀲 𑀆𑀯𑀺𑀪𑀽𑀢𑀸𑀯 𑀳𑁄𑀦𑁆𑀢𑀺. 𑀇𑀤𑀜𑁆𑀘 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀅𑀪𑀺𑀜𑁆𑀜𑀸𑀯𑀸𑀭𑁂 𑀆𑀭𑀤𑁆𑀥𑁂 𑀏𑀢𑀲𑁆𑀲 𑀅𑀦𑁆𑀢𑀭𑀸𑀯𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀥𑁂𑀯 𑀤𑀲𑁆𑀲𑀺𑀢𑀁. 𑀬𑀲𑁆𑀫𑀸 𑀘 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀓𑀢𑀲𑀫𑁆𑀫𑀲𑀦𑀲𑁆𑀲 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀪𑁂𑀭𑀯𑀲𑀤𑁆𑀤𑀁 𑀲𑀼𑀡𑀦𑁆𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀸 𑀪𑁂𑀭𑀯𑁂 𑀔𑀦𑁆𑀥𑁂 𑀅𑀦𑀼𑀲𑁆𑀲𑀭𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀪𑁂𑀭𑀯𑀭𑀽𑀧𑀁 𑀧𑀲𑁆𑀲𑀢𑁄 𑀪𑀬𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀓𑀢𑀲𑀫𑁆𑀫𑀲𑀦𑀲𑁆𑀲, 𑀢𑀲𑁆𑀫𑀸 𑀅𑀪𑀺𑀜𑁆𑀜𑀸𑀧𑀢𑁆𑀢𑀲𑁆𑀲 𑀪𑀬𑀯𑀺𑀦𑁄𑀤𑀓𑀳𑁂𑀢𑀼𑀲𑀫𑁆𑀧𑀸𑀤𑀦𑀢𑁆𑀣𑀫𑁆𑀧𑀺 𑀇𑀤𑀁 𑀇𑀥𑁂𑀯 𑀤𑀲𑁆𑀲𑀺𑀢𑀁. 𑀇𑀥𑀸𑀧𑀺 𑀅𑀭𑀳𑀢𑁆𑀢𑀯𑀲𑁂𑀦𑁂𑀯 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁫𑁩. 𑀫𑀦𑁄𑀫𑀬𑀺𑀤𑁆𑀥𑀺𑀬𑀁 𑀘𑀺𑀡𑁆𑀡𑀯𑀲𑀺𑀢𑀸𑀬. 𑀢𑀢𑁆𑀣 𑀫𑀦𑁄𑀫𑀬𑀦𑁆𑀢𑀺 𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁. 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀦𑁆𑀢𑀺 𑀲𑀩𑁆𑀩𑁂𑀳𑀺 𑀅𑀗𑁆𑀕𑁂𑀳𑀺 𑀘 𑀧𑀘𑁆𑀘𑀗𑁆𑀕𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁. 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀲𑀡𑁆𑀞𑀸𑀦𑀯𑀲𑁂𑀦 𑀅𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀁. 𑀇𑀤𑁆𑀥𑀺𑀫𑀢𑀸 𑀦𑀺𑀫𑁆𑀫𑀺𑀢𑀭𑀽𑀧𑀜𑁆𑀳𑀺 𑀲𑀘𑁂 𑀇𑀤𑁆𑀥𑀺𑀫𑀸 𑀑𑀤𑀸𑀢𑁄, 𑀢𑀫𑁆𑀧𑀺 𑀑𑀤𑀸𑀢𑀁. 𑀲𑀘𑁂 𑀅𑀯𑀺𑀤𑁆𑀥𑀓𑀡𑁆𑀡𑁄, 𑀢𑀫𑁆𑀧𑀺 𑀅𑀯𑀺𑀤𑁆𑀥𑀓𑀡𑁆𑀡𑀦𑁆𑀢𑀺 𑀏𑀯𑀁 𑀲𑀩𑁆𑀩𑀸𑀓𑀸𑀭𑁂𑀳𑀺 𑀢𑁂𑀦 𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓𑀦𑁆𑀢𑀺𑀆𑀤𑀺 𑀉𑀧𑀫𑀢𑁆𑀢𑀬𑀫𑁆𑀧𑀺 𑀢𑀁 𑀲𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁. 𑀫𑀼𑀜𑁆𑀚𑀲𑀤𑀺𑀲𑀸 𑀏𑀯 𑀳𑀺 𑀢𑀲𑁆𑀲 𑀅𑀦𑁆𑀢𑁄 𑀈𑀲𑀺𑀓𑀸 𑀳𑁄𑀢𑀺. 𑀓𑁄𑀲𑀲𑀤𑀺𑀲𑁄𑀬𑁂𑀯 𑀅𑀲𑀺, 𑀯𑀝𑁆𑀝𑀸𑀬 𑀓𑁄𑀲𑀺𑀬𑀸 𑀯𑀝𑁆𑀝𑀁 𑀅𑀲𑀺𑀫𑁂𑀯 𑀧𑀓𑁆𑀔𑀺𑀧𑀦𑁆𑀢𑀺, 𑀧𑀢𑁆𑀣𑀝𑀸𑀬 𑀧𑀢𑁆𑀣𑀝𑀁.

𑀓𑀭𑀡𑁆𑀟𑀸𑀢𑀺 𑀇𑀤𑀫𑁆𑀧𑀺 𑀅𑀳𑀺𑀓𑀜𑁆𑀘𑀼𑀓𑀲𑁆𑀲 𑀦𑀸𑀫𑀁, 𑀦 𑀯𑀺𑀮𑀻𑀯𑀓𑀭𑀡𑁆𑀟𑀓𑀲𑁆𑀲. 𑀅𑀳𑀺𑀓𑀜𑁆𑀘𑀼𑀓𑁄 𑀳𑀺 𑀅𑀳𑀺𑀦𑀸 𑀲𑀤𑀺𑀲𑁄𑀯 𑀳𑁄𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀧𑀼𑀭𑀺𑀲𑁄 𑀅𑀳𑀺𑀁 𑀓𑀭𑀡𑁆𑀟𑀸 𑀉𑀤𑁆𑀥𑀭𑁂𑀬𑁆𑀬𑀸’’𑀢𑀺 𑀳𑀢𑁆𑀣𑁂𑀦 𑀉𑀤𑁆𑀥𑀭𑀫𑀸𑀦𑁄 𑀯𑀺𑀬 𑀤𑀲𑁆𑀲𑀺𑀢𑁄, 𑀅𑀣 𑀔𑁄 𑀘𑀺𑀢𑁆𑀢𑁂𑀦𑁂𑀯𑀲𑁆𑀲 𑀉𑀤𑁆𑀥𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀅𑀳𑀺 𑀦𑀸𑀫 𑀲𑀚𑀸𑀢𑀺𑀬𑀁 𑀞𑀺𑀢𑁄, 𑀓𑀝𑁆𑀞𑀦𑁆𑀢𑀭𑀁 𑀯𑀸 𑀭𑀼𑀓𑁆𑀔𑀦𑁆𑀢𑀭𑀁 𑀯𑀸 𑀦𑀺𑀲𑁆𑀲𑀸𑀬, 𑀢𑀘𑀢𑁄 𑀲𑀭𑀻𑀭𑀦𑀺𑀓𑁆𑀓𑀟𑁆𑀠𑀦𑀧𑀬𑁄𑀕𑀲𑀗𑁆𑀔𑀸𑀢𑁂𑀦 𑀣𑀸𑀫𑁂𑀦, 𑀲𑀭𑀻𑀭𑀁 𑀔𑀸𑀤𑀫𑀸𑀦𑀁 𑀯𑀺𑀬 𑀧𑀼𑀭𑀸𑀡𑀢𑀘𑀁 𑀚𑀺𑀕𑀼𑀘𑁆𑀙𑀦𑁆𑀢𑁄𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀬𑀫𑁂𑀯 𑀓𑀜𑁆𑀘𑀼𑀓𑀁 𑀚𑀳𑀸𑀢𑀺, 𑀦 𑀲𑀓𑁆𑀓𑀸 𑀢𑀢𑁄 𑀅𑀜𑁆𑀜𑁂𑀦 𑀉𑀤𑁆𑀥𑀭𑀺𑀢𑀼𑀁. 𑀢𑀲𑁆𑀫𑀸 𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀡𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀫𑀼𑀜𑁆𑀚𑀸𑀤𑀺𑀲𑀤𑀺𑀲𑀁 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀭𑀻𑀭𑀁, 𑀈𑀲𑀺𑀓𑀸𑀤𑀺𑀲𑀤𑀺𑀲𑀁 𑀦𑀺𑀫𑁆𑀫𑀺𑀢𑀭𑀽𑀧𑀦𑁆𑀢𑀺 𑀇𑀤𑀫𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁. 𑀦𑀺𑀫𑁆𑀫𑀸𑀦𑀯𑀺𑀥𑀸𑀦𑀁 𑀧𑀦𑁂𑀢𑁆𑀣 𑀧𑀭𑀢𑁄 𑀘 𑀇𑀤𑁆𑀥𑀺𑀯𑀺𑀥𑀸𑀤𑀺𑀧𑀜𑁆𑀘𑀅𑀪𑀺𑀜𑁆𑀜𑀸𑀓𑀣𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀫𑀸𑀫𑀢𑁆𑀢𑀫𑁂𑀯 𑀳𑀺 𑀇𑀥 𑀅𑀥𑀺𑀓𑀁.

𑀢𑀢𑁆𑀣 𑀙𑁂𑀓𑀓𑀼𑀫𑁆𑀪𑀓𑀸𑀭𑀸𑀤𑀬𑁄 𑀯𑀺𑀬 𑀇𑀤𑁆𑀥𑀺𑀯𑀺𑀥𑀜𑀸𑀡𑀮𑀸𑀪𑀻 𑀪𑀺𑀓𑁆𑀔𑀼 𑀤𑀝𑁆𑀞𑀩𑁆𑀩𑁄. 𑀲𑀼𑀧𑀭𑀺𑀓𑀫𑁆𑀫𑀓𑀢𑀫𑀢𑁆𑀢𑀺𑀓𑀸𑀤𑀬𑁄 𑀯𑀺𑀬 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀤𑀝𑁆𑀞𑀩𑁆𑀩𑀁. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀪𑀸𑀚𑀦𑀯𑀺𑀓𑀢𑀺𑀆𑀤𑀺𑀓𑀭𑀡𑀁 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀓𑀼𑀩𑁆𑀩𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀥𑀸𑀧𑀺 𑀘𑀺𑀡𑁆𑀡𑀯𑀲𑀺𑀢𑀸𑀯𑀲𑁂𑀦𑁂𑀯 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀇𑀢𑁄 𑀧𑀭𑀸𑀲𑀼 𑀘𑀢𑀽𑀲𑀼 𑀅𑀪𑀺𑀜𑁆𑀜𑀸𑀲𑀼.

𑁨𑁫𑁫. 𑀢𑀢𑁆𑀣 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀉𑀧𑀫𑀸𑀬𑀁 𑀲𑀗𑁆𑀔𑀥𑀫𑁄𑀢𑀺 𑀲𑀗𑁆𑀔𑀥𑀫𑀓𑁄. 𑀅𑀧𑁆𑀧𑀓𑀲𑀺𑀭𑁂𑀦𑁂𑀯𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑁂𑀦𑁂𑀯. 𑀯𑀺𑀜𑁆𑀜𑀸𑀧𑁂𑀬𑁆𑀬𑀸𑀢𑀺 𑀚𑀸𑀦𑀸𑀧𑁂𑀬𑁆𑀬. 𑀢𑀢𑁆𑀣 𑀏𑀯𑀁 𑀘𑀸𑀢𑀼𑀤𑁆𑀤𑀺𑀲𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑁂 𑀲𑀗𑁆𑀔𑀥𑀫𑀓𑁂 ‘‘𑀲𑀗𑁆𑀔𑀲𑀤𑁆𑀤𑁄 𑀅𑀬’’𑀦𑁆𑀢𑀺 𑀯𑀯𑀢𑁆𑀣𑀸𑀧𑁂𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀢𑀲𑁆𑀲 𑀲𑀗𑁆𑀔𑀲𑀤𑁆𑀤𑀲𑁆𑀲 𑀆𑀯𑀺𑀪𑀽𑀢𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 𑀤𑀽𑀭𑀲𑀦𑁆𑀢𑀺𑀓𑀪𑁂𑀤𑀸𑀦𑀁 𑀤𑀺𑀩𑁆𑀩𑀸𑀦𑀜𑁆𑀘𑁂𑀯 𑀫𑀸𑀦𑀼𑀲𑀓𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀆𑀯𑀺𑀪𑀽𑀢𑀓𑀸𑀮𑁄 𑀤𑀝𑁆𑀞𑀩𑁆𑀩𑁄.

𑁨𑁫𑁬. 𑀘𑁂𑀢𑁄𑀧𑀭𑀺𑀬𑀜𑀸𑀡-𑀉𑀧𑀫𑀸𑀬𑀁 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀡𑁆𑀟𑀦𑀓𑀚𑀸𑀢𑀺𑀓𑁄𑀢𑀺 𑀬𑀼𑀯𑀸𑀧𑀺 𑀲𑀫𑀸𑀦𑁄 𑀦 𑀅𑀮𑀲𑀺𑀬𑁄 𑀓𑀺𑀮𑀺𑀝𑁆𑀞𑀯𑀢𑁆𑀣𑀲𑀭𑀻𑀭𑁄, 𑀅𑀣 𑀔𑁄 𑀫𑀡𑁆𑀟𑀦𑀓𑀧𑀓𑀢𑀺𑀓𑁄, 𑀤𑀺𑀯𑀲𑀲𑁆𑀲 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀦𑁆𑀳𑀸𑀬𑀺𑀢𑁆𑀯𑀸 𑀲𑀼𑀤𑁆𑀥𑀯𑀢𑁆𑀣-𑀧𑀭𑀺𑀤𑀳𑀦-𑀅𑀮𑀗𑁆𑀓𑀸𑀭𑀓𑀭𑀡𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀲𑀓𑀡𑀺𑀓𑀦𑁆𑀢𑀺 𑀓𑀸𑀴𑀢𑀺𑀮𑀓𑀯𑀗𑁆𑀓-𑀫𑀼𑀔𑀤𑀽𑀲𑀺𑀧𑀻𑀴𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀦 𑀲𑀤𑁄𑀲𑀁. 𑀢𑀢𑁆𑀣 𑀬𑀣𑀸 𑀢𑀲𑁆𑀲 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀼𑀔𑀤𑁄𑀲𑁄 𑀧𑀸𑀓𑀝𑁄 𑀳𑁄𑀢𑀺, 𑀏𑀯𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑁂𑀲𑀁 𑀲𑁄𑀴𑀲𑀯𑀺𑀥𑀁 𑀘𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀉𑀧𑀫𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀫𑀳𑀸𑀅𑀲𑁆𑀲𑀧𑀼𑀭𑁂 𑀯𑀼𑀢𑁆𑀢𑀫𑁂𑀯.

𑁨𑁫𑁯. 𑀅𑀬𑀁 𑀔𑁄 𑀉𑀤𑀸𑀬𑀺 𑀧𑀜𑁆𑀘𑀫𑁄 𑀥𑀫𑁆𑀫𑁄𑀢𑀺 𑀏𑀓𑀽𑀦𑀯𑀻𑀲𑀢𑀺 𑀧𑀩𑁆𑀩𑀸𑀦𑀺 𑀧𑀝𑀺𑀧𑀤𑀸𑀯𑀲𑁂𑀦 𑀏𑀓𑀁 𑀥𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀘𑀫𑁄 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁭 𑀆𑀤𑀬𑁄) 𑀏𑀓𑀸𑀤𑀲 𑀧𑀩𑁆𑀩𑀸𑀦𑀺 𑀧𑀼𑀘𑁆𑀙𑀸𑀯𑀲𑁂𑀦 𑀏𑀓𑀥𑀫𑁆𑀫𑁄 𑀓𑀢𑁄, 𑀏𑀯𑀫𑀺𑀥 𑀏𑀓𑀽𑀦𑀯𑀻𑀲𑀢𑀺 𑀧𑀩𑁆𑀩𑀸𑀦𑀺 𑀧𑀝𑀺𑀧𑀤𑀸𑀯𑀲𑁂𑀦 𑀏𑀓𑁄 𑀥𑀫𑁆𑀫𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀫𑁂𑀲𑀼 𑀘 𑀧𑀦 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀩𑁆𑀩𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀘 𑀆𑀲𑀯𑀓𑁆𑀔𑀬𑀜𑀸𑀡𑁂 𑀘 𑀅𑀭𑀳𑀢𑁆𑀢𑀯𑀲𑁂𑀦 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀲𑁂𑀲𑁂𑀲𑀼 𑀘𑀺𑀡𑁆𑀡𑀯𑀲𑀺𑀪𑀸𑀯𑀯𑀲𑁂𑀦. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.