𑀢𑀣𑀸𑀕𑀢𑀯𑀸𑀭𑀅𑀝𑁆𑀞𑀫𑀦𑀬𑀯𑀡𑁆𑀡𑀦𑀸

𑁧𑁩. 𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮𑀦𑁆𑀢𑀺𑀆𑀤𑀻𑀲𑀼 𑀘 𑀦𑀦𑁆𑀤𑀻𑀢𑀺 𑀧𑀼𑀭𑀺𑀫𑀢𑀡𑁆𑀳𑀸. 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀫𑀽𑀮𑀦𑁆𑀢𑀺𑀆𑀤𑀺. 𑀇𑀢𑀺𑀯𑀺𑀤𑀺𑀢𑁆𑀯𑀸𑀢𑀺 𑀢𑀁 𑀧𑀼𑀭𑀺𑀫𑀪𑀯𑀦𑀦𑁆𑀤𑀺𑀁 ‘‘𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀫𑀽𑀮’’𑀦𑁆𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸. 𑀪𑀯𑀸𑀢𑀺 𑀓𑀫𑁆𑀫𑀪𑀯𑀢𑁄. 𑀚𑀸𑀢𑀻𑀢𑀺 𑀯𑀺𑀧𑀸𑀓𑀓𑁆𑀔𑀦𑁆𑀥𑀸. 𑀢𑁂 𑀳𑀺 𑀬𑀲𑁆𑀫𑀸 𑀚𑀸𑀬𑀦𑁆𑀢𑀺, 𑀢𑀲𑁆𑀫𑀸 ‘‘𑀚𑀸𑀢𑀻’’𑀢𑀺 𑀯𑀼𑀢𑁆𑀢𑀸. 𑀚𑀸𑀢𑀺𑀲𑀻𑀲𑁂𑀦 𑀯𑀸 𑀅𑀬𑀁 𑀤𑁂𑀲𑀦𑀸. 𑀏𑀢𑀫𑁆𑀧𑀺 ‘‘𑀇𑀢𑀺 𑀯𑀺𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀢𑁆𑀣𑁄 ‘‘𑀓𑀫𑁆𑀫𑀪𑀯𑀢𑁄 𑀉𑀧𑀧𑀢𑁆𑀢𑀺𑀪𑀯𑁄 𑀳𑁄𑀢𑀻𑀢𑀺 𑀏𑀯𑀜𑁆𑀘 𑀚𑀸𑀦𑀺𑀢𑁆𑀯𑀸’’𑀢𑀺. 𑀪𑀽𑀢𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲. 𑀚𑀭𑀸𑀫𑀭𑀡𑀦𑁆𑀢𑀺 𑀚𑀭𑀸 𑀘 𑀫𑀭𑀡𑀜𑁆𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀦 𑀉𑀧𑀧𑀢𑁆𑀢𑀺𑀪𑀯𑁂𑀦 𑀪𑀽𑀢𑀲𑁆𑀲 𑀲𑀢𑁆𑀢𑀲𑁆𑀲 𑀔𑀦𑁆𑀥𑀸𑀦𑀁 𑀚𑀭𑀸𑀫𑀭𑀡𑀁 𑀳𑁄𑀢𑀻𑀢𑀺 𑀏𑀯𑀜𑁆𑀘 𑀚𑀸𑀦𑀺𑀢𑁆𑀯𑀸𑀢𑀺.

𑀏𑀢𑁆𑀢𑀸𑀯𑀢𑀸 𑀬𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀲𑀫𑁆𑀫𑀲𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀧𑀝𑀺𑀯𑁂𑀥𑀸 𑀫𑀜𑁆𑀜𑀦𑀸𑀦𑀁 𑀅𑀪𑀸𑀯𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑀼𑀲𑀗𑁆𑀔𑁂𑀧𑀁 𑀢𑀺𑀲𑀦𑁆𑀥𑀺𑀁 𑀢𑀺𑀬𑀤𑁆𑀥𑀁 𑀯𑀻𑀲𑀢𑀸𑀓𑀸𑀭𑀁 𑀢𑀫𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀧𑀦 𑀏𑀢𑁆𑀢𑀸𑀯𑀢𑀸 𑀏𑀲 𑀲𑀩𑁆𑀩𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀏𑀢𑁆𑀣 𑀳𑀺 𑀦𑀦𑁆𑀤𑀻𑀢𑀺 𑀅𑀬𑀁 𑀏𑀓𑁄 𑀲𑀗𑁆𑀔𑁂𑀧𑁄. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀘𑀦𑀢𑁄 𑀤𑀼𑀓𑁆𑀔𑀁 𑀤𑀼𑀢𑀺𑀬𑁄, 𑀪𑀯𑀸 𑀚𑀸𑀢𑀻𑀢𑀺 𑀯𑀘𑀦𑀢𑁄 𑀪𑀯𑁄 𑀢𑀢𑀺𑀬𑁄, 𑀚𑀸𑀢𑀺𑀚𑀭𑀸𑀫𑀭𑀡𑀁 𑀘𑀢𑀼𑀢𑁆𑀣𑁄. 𑀏𑀯𑀁 𑀢𑀸𑀯 𑀘𑀢𑁆𑀢𑀸𑀭𑁄 𑀲𑀗𑁆𑀔𑁂𑀧𑀸 𑀯𑁂𑀤𑀺𑀢𑀩𑁆𑀩𑀸, 𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀤𑀼𑀓𑁆𑀔𑀸𑀦𑀁 𑀧𑀦 𑀅𑀦𑁆𑀢𑀭𑀁 𑀏𑀓𑁄 𑀲𑀦𑁆𑀥𑀺, 𑀤𑀼𑀓𑁆𑀔𑀲𑁆𑀲 𑀘 𑀪𑀯𑀲𑁆𑀲 𑀘 𑀅𑀦𑁆𑀢𑀭𑀁 𑀤𑀼𑀢𑀺𑀬𑁄, 𑀪𑀯𑀲𑁆𑀲 𑀘 𑀚𑀸𑀢𑀺𑀬𑀸 𑀘 𑀅𑀦𑁆𑀢𑀭𑀁 𑀢𑀢𑀺𑀬𑁄. 𑀏𑀯𑀁 𑀘𑀢𑀼𑀦𑁆𑀦𑀁 𑀅𑀗𑁆𑀕𑀼𑀮𑀻𑀦𑀁 𑀅𑀦𑁆𑀢𑀭𑀲𑀤𑀺𑀲𑀸 𑀘𑀢𑀼𑀲𑀗𑁆𑀔𑁂𑀧𑀦𑁆𑀢𑀭𑀸 𑀢𑀬𑁄 𑀲𑀦𑁆𑀥𑀻 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀦𑀦𑁆𑀤𑀻𑀢𑀺 𑀅𑀢𑀻𑀢𑁄 𑀅𑀤𑁆𑀥𑀸, 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀦𑀸𑀕𑀢𑁄, 𑀤𑀼𑀓𑁆𑀔𑀜𑁆𑀘 𑀪𑀯𑁄 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺 𑀏𑀯𑀁 𑀢𑀬𑁄 𑀅𑀤𑁆𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑀻𑀢𑁂 𑀧𑀦 𑀧𑀜𑁆𑀘𑀲𑀼 𑀆𑀓𑀸𑀭𑁂𑀲𑀼 𑀦𑀦𑁆𑀤𑀻𑀯𑀘𑀦𑁂𑀦 𑀢𑀡𑁆𑀳𑀸 𑀏𑀓𑀸 𑀆𑀕𑀢𑀸, 𑀢𑀸𑀬 𑀅𑀦𑀸𑀕𑀢𑀸𑀧𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀉𑀧𑀸𑀤𑀸𑀦𑀪𑀯𑀸 𑀧𑀘𑁆𑀘𑀬𑀮𑀓𑁆𑀔𑀡𑁂𑀦 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀚𑀸𑀢𑀺𑀚𑀭𑀸𑀫𑀭𑀡𑀯𑀘𑀦𑁂𑀦 𑀧𑀦 𑀬𑁂𑀲𑀁 𑀔𑀦𑁆𑀥𑀸𑀦𑀁 𑀢𑀚𑁆𑀚𑀸𑀢𑀺𑀚𑀭𑀸𑀫𑀭𑀡𑀁, 𑀢𑁂 𑀯𑀼𑀢𑁆𑀢𑀸 𑀬𑁂𑀯𑀸𑀢𑀺 𑀓𑀢𑁆𑀯𑀸 𑀆𑀬𑀢𑀺𑀁 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺.

𑀏𑀯𑀫𑁂𑀢𑁂 ‘‘𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸. 𑀇𑀥 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥𑀽𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀧𑀼𑀭𑁂𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸. 𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀫𑀼𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥 𑀓𑀫𑁆𑀫𑀪𑀯𑀲𑁆𑀫𑀺𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸. 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀇𑀥 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀮𑀓𑁆𑀔𑀡𑀸 𑀯𑀻𑀲𑀢𑀺 𑀆𑀓𑀸𑀭𑀸 𑀇𑀥 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 ‘‘𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮𑀦𑁆𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀪𑀯𑀸 𑀚𑀸𑀢𑀺, 𑀪𑀽𑀢𑀲𑁆𑀲 𑀚𑀭𑀸𑀫𑀭𑀡’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸 𑀏𑀲 𑀲𑀩𑁆𑀩𑁄𑀧𑀺 𑀘𑀢𑀼𑀲𑀗𑁆𑀔𑁂𑀧𑁄 𑀢𑀺𑀲𑀦𑁆𑀥𑀺 𑀢𑀺𑀬𑀤𑁆𑀥𑁄 𑀯𑀻𑀲𑀢𑀸𑀓𑀸𑀭𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀢𑀲𑁆𑀫𑀸 𑀢𑀺𑀳, 𑀪𑀺𑀓𑁆𑀔𑀯𑁂…𑀧𑁂… 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀤𑀸𑀫𑀻𑀢𑀺 𑀏𑀢𑁆𑀣 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁 𑀓𑀢𑁆𑀯𑀸 𑀧𑀤𑀬𑁄𑀚𑀦𑀸𑀬 𑀅𑀢𑁆𑀣𑀦𑀺𑀕𑀫𑀦𑀁 𑀓𑀭𑀺𑀲𑁆𑀲𑀸𑀫. 𑀢𑀲𑁆𑀫𑀸 𑀢𑀺𑀳𑀸𑀢𑀺 𑀢𑀲𑁆𑀫𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀓𑀸𑀭𑀳𑀓𑀸𑀭𑀸 𑀳𑀺 𑀦𑀺𑀧𑀸𑀢𑀸. 𑀲𑀩𑁆𑀩𑀲𑁄𑀢𑀺 𑀅𑀦𑀯𑀲𑁂𑀲𑀯𑀘𑀦𑀫𑁂𑀢𑀁. 𑀢𑀡𑁆𑀳𑀸𑀦𑀦𑁆𑀢𑀺 𑀦𑀦𑁆𑀤𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀲𑀩𑁆𑀩𑀢𑀡𑁆𑀳𑀸𑀦𑀁. 𑀔𑀬𑀸𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂𑀦 𑀅𑀘𑁆𑀘𑀦𑁆𑀢𑀓𑁆𑀔𑀬𑀸. 𑀯𑀺𑀭𑀸𑀕𑀸𑀤𑀻𑀦𑀺 𑀔𑀬𑀯𑁂𑀯𑀘𑀦𑀸𑀦𑁂𑀯. 𑀬𑀸 𑀳𑀺 𑀢𑀡𑁆𑀳𑀸 𑀔𑀻𑀡𑀸, 𑀯𑀺𑀭𑀢𑁆𑀢𑀸𑀧𑀺 𑀢𑀸 𑀪𑀯𑀦𑁆𑀢𑀺 𑀦𑀺𑀭𑀼𑀤𑁆𑀥𑀸𑀧𑀺 𑀘𑀢𑁆𑀢𑀸𑀧𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀧𑀺. 𑀔𑀬𑀸𑀢𑀺 𑀯𑀸 𑀘𑀢𑀼𑀫𑀕𑁆𑀕𑀓𑀺𑀘𑁆𑀘𑀲𑀸𑀥𑀸𑀭𑀡𑀫𑁂𑀢𑀁. 𑀢𑀢𑁄 𑀧𑀞𑀫𑀫𑀕𑁆𑀕𑁂𑀦 𑀯𑀺𑀭𑀸𑀕𑀸, 𑀤𑀼𑀢𑀺𑀬𑁂𑀦 𑀦𑀺𑀭𑁄𑀥𑀸, 𑀢𑀢𑀺𑀬𑁂𑀦 𑀘𑀸𑀕𑀸, 𑀘𑀢𑀼𑀢𑁆𑀣𑁂𑀦 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀸𑀳𑀺 𑀯𑀸 𑀢𑀡𑁆𑀳𑀸𑀳𑀺 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑁂𑀬𑁆𑀬, 𑀢𑀸𑀲𑀁 𑀔𑀬𑀸. 𑀬𑀸𑀳𑀺 𑀧𑀣𑀯𑀺𑀁 𑀫𑀜𑁆𑀜𑁂𑀬𑁆𑀬, 𑀢𑀸𑀲𑀁 𑀯𑀺𑀭𑀸𑀕𑀸. 𑀬𑀸𑀳𑀺 𑀧𑀣𑀯𑀺𑀬𑀸 𑀫𑀜𑁆𑀜𑁂𑀬𑁆𑀬, 𑀢𑀸𑀲𑀁 𑀦𑀺𑀭𑁄𑀥𑀸. 𑀬𑀸𑀳𑀺 𑀧𑀣𑀯𑀺𑀢𑁄 𑀫𑀜𑁆𑀜𑁂𑀬𑁆𑀬, 𑀢𑀸𑀲𑀁 𑀘𑀸𑀕𑀸. 𑀬𑀸𑀳𑀺 𑀧𑀣𑀯𑀺𑀁 𑀫𑁂𑀢𑀺 𑀫𑀜𑁆𑀜𑁂𑀬𑁆𑀬, 𑀢𑀸𑀲𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀸. 𑀬𑀸𑀳𑀺 𑀯𑀸 𑀧𑀣𑀯𑀺𑀁 𑀫𑀜𑁆𑀜𑁂𑀬𑁆𑀬, 𑀢𑀸𑀲𑀁 𑀔𑀬𑀸…𑀧𑁂… 𑀬𑀸𑀳𑀺 𑀧𑀣𑀯𑀺𑀁 𑀅𑀪𑀺𑀦𑀦𑁆𑀤𑁂𑀬𑁆𑀬, 𑀢𑀸𑀲𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸, 𑀦 𑀓𑀺𑀜𑁆𑀘𑀺 𑀯𑀺𑀭𑀼𑀚𑁆𑀛𑀢𑀺.

𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀲𑀩𑁆𑀩𑀲𑁂𑀝𑁆𑀞𑀁. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑁄𑀥𑀺𑀁. 𑀅𑀣 𑀯𑀸 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀜𑁆𑀘 𑀩𑁄𑀥𑀺𑀁. 𑀩𑁄𑀥𑀻𑀢𑀺 𑀭𑀼𑀓𑁆𑀔𑁄𑀧𑀺 𑀫𑀕𑁆𑀕𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺. ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀯. 𑁧; 𑀉𑀤𑀸. 𑁧) 𑀘 ‘‘𑀅𑀦𑁆𑀢𑀭𑀸 𑀘 𑀩𑁄𑀥𑀺𑀁 𑀅𑀦𑁆𑀢𑀭𑀸 𑀘 𑀕𑀬’’𑀦𑁆𑀢𑀺 (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫) 𑀘 𑀆𑀕𑀢𑀝𑁆𑀞𑀸𑀦𑁂𑀳𑀺 𑀭𑀼𑀓𑁆𑀔𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀘𑀽𑀴𑀦𑀺. 𑁧𑁨𑁧) 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁭) 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀦𑀁. 𑀇𑀥 𑀧𑀦 𑀪𑀕𑀯𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀧𑀭𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑀲𑀸𑀯𑀓𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀳𑁄𑀢𑀺 𑀦 𑀳𑁄𑀢𑀻𑀢𑀺. 𑀦 𑀳𑁄𑀢𑀺. 𑀓𑀲𑁆𑀫𑀸? 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀓𑀲𑁆𑀲𑀘𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀫𑁂𑀯 𑀤𑁂𑀢𑀺, 𑀓𑀲𑁆𑀲𑀘𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀓𑀲𑁆𑀲𑀘𑀺 𑀙 𑀅𑀪𑀺𑀜𑁆𑀜𑀸, 𑀓𑀲𑁆𑀲𑀘𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀓𑀲𑁆𑀲𑀘𑀺 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁂𑀯 𑀤𑁂𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺 𑀅𑀪𑀺𑀲𑁂𑀓𑁄 𑀯𑀺𑀬 𑀭𑀜𑁆𑀜𑁄 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀺𑀬𑀪𑀸𑀯𑀁. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀦 𑀳𑁄𑀢𑀻𑀢𑀺.

𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀪𑀺𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺, 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀯𑀤𑀸𑀫𑀻𑀢𑀺 𑀇𑀢𑀺 𑀯𑀤𑀸𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺, 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀻𑀢𑀺. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀢𑀣𑀸𑀕𑀢𑁄𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺…𑀧𑁂… 𑀧𑀣𑀯𑀺𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮𑀁, 𑀪𑀯𑀸 𑀚𑀸𑀢𑀺, 𑀪𑀽𑀢𑀲𑁆𑀲 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸𑀢𑀺. 𑀢𑀢𑁆𑀣 𑀇𑀢𑀺 𑀯𑀺𑀤𑀺𑀢𑁆𑀯𑀸𑀢𑀺 𑀇𑀢𑀺𑀓𑀸𑀭𑁄 𑀓𑀸𑀭𑀡𑀢𑁆𑀣𑁄. 𑀢𑁂𑀦 𑀇𑀫𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀯𑀺𑀤𑀺𑀢𑀢𑁆𑀢𑀸 𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀲𑁆𑀫𑀸 𑀘 𑀏𑀯𑀫𑀺𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑀺𑀤𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀬𑀸 𑀦𑀦𑁆𑀤𑀻𑀢𑀺 𑀯𑀼𑀢𑁆𑀢𑀢𑀡𑁆𑀳𑀸 𑀲𑀩𑁆𑀩𑀧𑁆𑀧𑀓𑀸𑀭𑀸, 𑀲𑀸 𑀧𑀳𑀻𑀦𑀸, 𑀢𑀸𑀲𑀜𑁆𑀘 𑀢𑀣𑀸𑀕𑀢𑁄 𑀲𑀩𑁆𑀩𑀲𑁄 𑀢𑀡𑁆𑀳𑀸𑀦𑀁 𑀔𑀬𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀢𑀲𑁆𑀫𑀸 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺…𑀧𑁂… 𑀧𑀣𑀯𑀺𑀁 𑀦𑀸𑀪𑀺𑀦𑀦𑁆𑀤𑀢𑀻𑀢𑀺 𑀯𑀤𑀸𑀫𑀻𑀢𑀺 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀦 𑀫𑀜𑁆𑀜𑀢𑀺 𑀦𑀸𑀪𑀺𑀦𑀦𑁆𑀤𑀢𑀻𑀢𑀺 𑀯𑀤𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀯𑀸 𑀬𑀲𑁆𑀫𑀸 ‘‘𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑀺𑀤𑀺𑀢𑁆𑀯𑀸 𑀲𑀩𑁆𑀩𑀲𑁄 𑀢𑀡𑁆𑀳𑀸 𑀔𑀬𑀁 𑀕𑀢𑀸, 𑀢𑀲𑁆𑀫𑀸 𑀢𑀺𑀳, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀩𑁆𑀩𑀲𑁄 𑀢𑀡𑁆𑀳𑀸𑀦𑀁 𑀔𑀬𑀸…𑀧𑁂… 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀤𑀸𑀫𑀺. 𑀲𑁄 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺…𑀧𑁂… 𑀦𑀸𑀪𑀺𑀦𑀦𑁆𑀤𑀢𑀻𑀢𑀺. 𑀬𑀢𑁆𑀣 𑀬𑀢𑁆𑀣 𑀳𑀺 𑀬𑀲𑁆𑀫𑀸𑀢𑀺 𑀅𑀯𑀢𑁆𑀯𑀸 𑀢𑀲𑁆𑀫𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀢𑀢𑁆𑀣 𑀬𑀲𑁆𑀫𑀸𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁, 𑀅𑀬𑀁 𑀲𑀸𑀲𑀦𑀬𑀼𑀢𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀇𑀤𑀫𑀯𑁄𑀘 𑀪𑀕𑀯𑀸𑀢𑀺 𑀇𑀤𑀁 𑀦𑀺𑀤𑀸𑀦𑀸𑀯𑀲𑀸𑀦𑀢𑁄 𑀧𑀪𑀼𑀢𑀺 𑀬𑀸𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀤𑀸𑀫𑀻𑀢𑀺 𑀲𑀓𑀮𑀲𑀼𑀢𑁆𑀢𑀦𑁆𑀢𑀁 𑀪𑀕𑀯𑀸 𑀧𑀭𑁂𑀲𑀁 𑀧𑀜𑁆𑀜𑀸𑀬 𑀅𑀮𑀩𑁆𑀪𑀡𑁂𑀬𑁆𑀬𑀧𑀢𑀺𑀝𑁆𑀞𑀁 𑀧𑀭𑀫𑀕𑀫𑁆𑀪𑀻𑀭𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 𑀏𑀓𑁂𑀦 𑀧𑀼𑀣𑀼𑀚𑁆𑀚𑀦𑀯𑀸𑀭𑁂𑀦 𑀏𑀓𑁂𑀦 𑀲𑁂𑀓𑁆𑀔𑀯𑀸𑀭𑁂𑀦 𑀘𑀢𑀽𑀳𑀺 𑀔𑀻𑀡𑀸𑀲𑀯𑀯𑀸𑀭𑁂𑀳𑀺 𑀤𑁆𑀯𑀻𑀳𑀺 𑀢𑀣𑀸𑀕𑀢𑀯𑀸𑀭𑁂𑀳𑀻𑀢𑀺 𑀅𑀝𑁆𑀞𑀳𑀺 𑀫𑀳𑀸𑀯𑀸𑀭𑁂𑀳𑀺 𑀏𑀓𑀫𑁂𑀓𑀲𑁆𑀫𑀺𑀜𑁆𑀘 𑀯𑀸𑀭𑁂 𑀧𑀣𑀯𑀻𑀆𑀤𑀻𑀳𑀺 𑀘𑀢𑀼𑀯𑀻𑀲𑀢𑀺𑀬𑀸 𑀅𑀦𑁆𑀢𑀭𑀯𑀸𑀭𑁂𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸 𑀤𑁆𑀯𑁂𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑀸𑀬 𑀢𑀦𑁆𑀢𑀺𑀬𑀸 𑀅𑀯𑁄𑀘.

𑀏𑀯𑀁 𑀯𑀺𑀘𑀺𑀢𑁆𑀭𑀦𑀬𑀤𑁂𑀲𑀦𑀸𑀯𑀺𑀮𑀸𑀲𑀬𑀼𑀢𑁆𑀢𑀁 𑀧𑀦𑁂𑀢𑀁 𑀲𑀼𑀢𑁆𑀢𑀁 𑀓𑀭𑀯𑀺𑀓𑀭𑀼𑀤𑀫𑀜𑁆𑀚𑀼𑀦𑀸 𑀓𑀡𑁆𑀡𑀲𑀼𑀔𑁂𑀦 𑀧𑀡𑁆𑀟𑀺𑀢𑀚𑀦𑀳𑀤𑀬𑀸𑀦𑀁 𑀅𑀫𑀢𑀸𑀪𑀺𑀲𑁂𑀓𑀲𑀤𑀺𑀲𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀪𑀸𑀲𑀫𑀸𑀦𑀲𑁆𑀲𑀸𑀧𑀺. 𑀦 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺 𑀢𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀇𑀤𑀁 𑀪𑀕𑀯𑀢𑁄 𑀯𑀘𑀦𑀁 𑀦𑀸𑀦𑀼𑀫𑁄𑀤𑀺𑀁𑀲𑀼. 𑀓𑀲𑁆𑀫𑀸? 𑀅𑀜𑁆𑀜𑀸𑀡𑀓𑁂𑀦. 𑀢𑁂 𑀓𑀺𑀭 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀺𑀁𑀲𑀼, 𑀢𑀲𑁆𑀫𑀸 𑀦𑀸𑀪𑀺𑀦𑀦𑁆𑀤𑀺𑀁𑀲𑀼. 𑀢𑁂𑀲𑀜𑁆𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀏𑀯𑀁 𑀯𑀺𑀘𑀺𑀢𑁆𑀭𑀦𑀬𑀤𑁂𑀲𑀦𑀸𑀯𑀺𑀮𑀸𑀲𑀬𑀼𑀢𑁆𑀢𑀫𑁆𑀧𑀺 𑀏𑀢𑀁 𑀲𑀼𑀢𑁆𑀢𑀁 𑀖𑀦𑀧𑀼𑀣𑀼𑀮𑁂𑀦 𑀤𑀼𑀲𑁆𑀲𑀧𑀝𑁆𑀝𑁂𑀦 𑀫𑀼𑀔𑁂 𑀩𑀦𑁆𑀥𑀁 𑀓𑀢𑁆𑀯𑀸 𑀧𑀼𑀭𑀢𑁄 𑀞𑀧𑀺𑀢𑀫𑀦𑀼𑀜𑁆𑀜𑀪𑁄𑀚𑀦𑀁 𑀯𑀺𑀬 𑀅𑀳𑁄𑀲𑀺. 𑀦𑀦𑀼 𑀘 𑀪𑀕𑀯𑀸 𑀅𑀢𑁆𑀢𑀦𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀧𑀭𑁂 𑀜𑀸𑀧𑁂𑀢𑀼𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄. 𑀲𑁄 𑀓𑀲𑁆𑀫𑀸 𑀬𑀣𑀸 𑀢𑁂 𑀦 𑀚𑀸𑀦𑀦𑁆𑀢𑀺, 𑀢𑀣𑀸 𑀤𑁂𑀲𑁂𑀲𑀻𑀢𑀺. 𑀯𑀼𑀢𑁆𑀢𑀫𑀺𑀤𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑀯𑀺𑀘𑀸𑀭𑀡𑀸𑀬𑀁 𑀏𑀯 ‘‘𑀫𑀸𑀦𑀪𑀜𑁆𑀚𑀦𑀢𑁆𑀣𑀁 𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀦𑁆𑀢𑀺 𑀤𑁂𑀲𑀦𑀁 𑀆𑀭𑀪𑀻’’𑀢𑀺, 𑀢𑀲𑁆𑀫𑀸 𑀦 𑀬𑀺𑀥 𑀧𑀼𑀦 𑀯𑀢𑁆𑀢𑀩𑁆𑀩𑀫𑀢𑁆𑀣𑀺, 𑀏𑀯𑀁 𑀫𑀸𑀦𑀪𑀜𑁆𑀚𑀦𑀢𑁆𑀣𑀁 𑀤𑁂𑀲𑀺𑀢𑀜𑁆𑀘 𑀧𑀦𑁂𑀢𑀁 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀢𑀁𑀬𑁂𑀯 𑀓𑀺𑀭 𑀧𑀣𑀯𑀺𑀁 𑀤𑀺𑀝𑁆𑀞𑀺𑀕𑀢𑀺𑀓𑁄𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀲𑁂𑀓𑁆𑀔𑁄𑀧𑀺 𑀅𑀭𑀳𑀸𑀧𑀺 𑀢𑀣𑀸𑀕𑀢𑁄𑀧𑀺 𑀲𑀜𑁆𑀚𑀸𑀦𑀸𑀢𑀺. 𑀓𑀺𑀦𑁆𑀦𑀸𑀫𑀺𑀤𑀁 𑀓𑀣𑀁 𑀦𑀸𑀫𑀺𑀤𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀸 𑀧𑀼𑀩𑁆𑀩𑁂 𑀫𑀬𑀁 𑀪𑀕𑀯𑀢𑀸 𑀓𑀣𑀺𑀢𑀁 𑀬𑀁𑀓𑀺𑀜𑁆𑀘𑀺 𑀔𑀺𑀧𑁆𑀧𑀫𑁂𑀯 𑀚𑀸𑀦𑀸𑀫, 𑀇𑀤𑀸𑀦𑀺 𑀧𑀦𑀺𑀫𑀲𑁆𑀲 𑀫𑀽𑀮𑀧𑀭𑀺𑀬𑀸𑀬𑀲𑁆𑀲 𑀅𑀦𑁆𑀢𑀁 𑀯𑀸 𑀓𑁄𑀝𑀺𑀁 𑀯𑀸 𑀦 𑀚𑀸𑀦𑀸𑀫 𑀦 𑀧𑀲𑁆𑀲𑀸𑀫, 𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀅𑀧𑁆𑀧𑀫𑁂𑀬𑁆𑀬𑀸 𑀅𑀢𑀼𑀮𑀸𑀢𑀺 𑀉𑀤𑁆𑀥𑀝𑀤𑀸𑀞𑀸 𑀯𑀺𑀬 𑀲𑀧𑁆𑀧𑀸 𑀦𑀺𑀫𑁆𑀫𑀤𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀲𑀓𑁆𑀓𑀘𑁆𑀘𑀁 𑀆𑀕𑀫𑀁𑀲𑀼.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀇𑀫𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄, 𑀢𑁂 𑀦𑀸𑀫 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸 𑀢𑀣𑀸 𑀫𑀸𑀦𑀫𑀤𑀫𑀢𑁆𑀢𑀸 𑀪𑀕𑀯𑀢𑀸 𑀫𑀽𑀮𑀧𑀭𑀺𑀬𑀸𑀬𑀤𑁂𑀲𑀦𑀸𑀬 𑀦𑀺𑀳𑀢𑀫𑀸𑀦𑀸 𑀓𑀢𑀸’’𑀢𑀺, 𑀅𑀬𑀜𑁆𑀘𑀭𑀳𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸. 𑀅𑀣 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀥𑀫𑁆𑀫𑀲𑀪𑀸𑀬𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺. 𑀢𑁂 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀅𑀳𑀁 𑀇𑀫𑁂 𑀏𑀯𑀁 𑀫𑀸𑀦𑀧𑀕𑁆𑀕𑀳𑀺𑀢𑀲𑀺𑀭𑁂 𑀯𑀺𑀘𑀭𑀦𑁆𑀢𑁂 𑀦𑀺𑀳𑀢𑀫𑀸𑀦𑁂 𑀅𑀓𑀸𑀲𑀺’’𑀦𑁆𑀢𑀺. 𑀢𑀢𑁄 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀤𑀁 𑀅𑀢𑀻𑀢𑀁 𑀆𑀦𑁂𑀲𑀺 𑁋

𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀩𑀸𑀭𑀸𑀡𑀲𑀺𑀬𑀁 𑀧𑀝𑀺𑀯𑀲𑀢𑀺 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀝𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄, 𑀲𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀫𑀸𑀡𑀯𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀢𑀺. 𑀧𑀡𑁆𑀟𑀺𑀢𑀸 𑀫𑀸𑀡𑀯𑀓𑀸 𑀩𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑀺 𑀮𑀳𑀼𑀜𑁆𑀘, 𑀲𑀼𑀝𑁆𑀞𑀼 𑀘 𑀉𑀧𑀥𑀸𑀭𑁂𑀦𑁆𑀢𑀺, 𑀕𑀳𑀺𑀢𑀜𑁆𑀘 𑀢𑁂𑀲𑀁 𑀦 𑀯𑀺𑀦𑀲𑁆𑀲𑀢𑀺. 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀆𑀘𑀭𑀺𑀬𑀫𑀼𑀝𑁆𑀞𑀺𑀁 𑀅𑀓𑀢𑁆𑀯𑀸 𑀖𑀝𑁂 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑁄 𑀯𑀺𑀬 𑀲𑀩𑁆𑀩𑀫𑁆𑀧𑀺 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑁂 𑀫𑀸𑀡𑀯𑀓𑁂 𑀏𑀢𑀤𑀯𑁄𑀘 ‘‘𑀏𑀢𑁆𑀢𑀓𑀫𑀺𑀤𑀁 𑀲𑀺𑀧𑁆𑀧𑀁 𑀤𑀺𑀝𑁆𑀞𑀥𑀫𑁆𑀫𑀲𑀫𑁆𑀧𑀭𑀸𑀬𑀳𑀺𑀢’’𑀦𑁆𑀢𑀺. 𑀢𑁂 𑀫𑀸𑀡𑀯𑀓𑀸 𑁋 ‘‘𑀬𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀚𑀸𑀦𑀸𑀢𑀺, 𑀫𑀬𑀫𑁆𑀧𑀺 𑀢𑀁 𑀚𑀸𑀦𑀸𑀫, 𑀫𑀬𑀫𑁆𑀧𑀺 𑀤𑀸𑀦𑀺 𑀆𑀘𑀭𑀺𑀬𑀸 𑀏𑀯𑀸’’𑀢𑀺 𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁄 𑀧𑀪𑀼𑀢𑀺 𑀆𑀘𑀭𑀺𑀬𑁂 𑀅𑀕𑀸𑀭𑀯𑀸 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀸 𑀯𑀺𑀳𑀭𑀺𑀁𑀲𑀼. 𑀆𑀘𑀭𑀺𑀬𑁄 𑀜𑀢𑁆𑀯𑀸 ‘‘𑀓𑀭𑀺𑀲𑁆𑀲𑀸𑀫𑀺 𑀦𑁂𑀲𑀁 𑀫𑀸𑀦𑀦𑀺𑀕𑁆𑀕𑀳’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀢𑁂 𑀫𑀸𑀡𑀯𑀓𑁂 𑀆𑀳 ‘‘𑀢𑀸𑀢𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀓𑀘𑁆𑀘𑀺𑀢𑁆𑀣 𑀲𑀫𑀢𑁆𑀣𑀸 𑀓𑀣𑁂𑀢𑀼’’𑀦𑁆𑀢𑀺. 𑀢𑁂 ‘‘𑀧𑀼𑀘𑁆𑀙𑀣 𑀆𑀘𑀭𑀺𑀬, 𑀧𑀼𑀘𑁆𑀙𑀣 𑀆𑀘𑀭𑀺𑀬𑀸’’𑀢𑀺 𑀲𑀳𑀲𑀸𑀯 𑀆𑀳𑀁𑀲𑀼, 𑀬𑀣𑀸 𑀢𑀁 𑀲𑀼𑀢𑀫𑀤𑀫𑀢𑁆𑀢𑀸. 𑀆𑀘𑀭𑀺𑀬𑁄 𑀆𑀳 𑁋

‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸;

𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄, 𑀲 𑀪𑀽𑀢𑀧𑀘𑀦𑀺𑀁 𑀧𑀘𑀻’’𑀢𑀺. (𑀚𑀸. 𑁧.𑁧𑁦.𑁧𑁯𑁦) 𑁋

𑀯𑀺𑀲𑁆𑀲𑀚𑁆𑀚𑁂𑀣 𑀢𑀸𑀢𑀸 𑀇𑀫𑀁 𑀧𑀜𑁆𑀳𑀦𑁆𑀢𑀺.

𑀢𑁂 𑀘𑀺𑀦𑁆𑀢𑁂𑀢𑁆𑀯𑀸 𑀅𑀚𑀸𑀦𑀫𑀸𑀦𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀆𑀘𑀭𑀺𑀬𑁄 𑀆𑀳 ‘‘𑀅𑀮𑀁 𑀢𑀸𑀢𑀸 𑀕𑀘𑁆𑀙𑀣𑀚𑁆𑀚, 𑀲𑁆𑀯𑁂 𑀓𑀣𑁂𑀬𑁆𑀬𑀸𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀳𑀼𑀢𑁆𑀯𑀸 𑀦 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀆𑀤𑀺𑀁, 𑀦 𑀅𑀦𑁆𑀢𑀫𑀤𑁆𑀤𑀲𑀁𑀲𑀼. 𑀆𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀆𑀭𑁄𑀘𑁂𑀲𑀼𑀁 ‘‘𑀦 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀸𑀫𑀸’’𑀢𑀺. 𑀆𑀘𑀭𑀺𑀬𑁄 𑀢𑁂𑀲𑀁 𑀦𑀺𑀕𑁆𑀕𑀳𑀢𑁆𑀣𑀸𑀬 𑀇𑀫𑀁 𑀕𑀸𑀣𑀫𑀪𑀸𑀲𑀺 𑁋

‘‘𑀩𑀳𑀽𑀦𑀺 𑀦𑀭𑀲𑀻𑀲𑀸𑀦𑀺, 𑀮𑁄𑀫𑀲𑀸𑀦𑀺 𑀩𑁆𑀭𑀳𑀸𑀦𑀺 𑀘;

𑀕𑀻𑀯𑀸𑀲𑀼 𑀧𑀝𑀺𑀫𑀼𑀓𑁆𑀓𑀸𑀦𑀺, 𑀓𑁄𑀘𑀺𑀤𑁂𑀯𑁂𑀢𑁆𑀣 𑀓𑀡𑁆𑀡𑀯𑀸’’𑀢𑀺. (𑀚𑀸. 𑁧.𑁧𑁦.𑁧𑁯𑁧) 𑁋

𑀕𑀸𑀣𑀸𑀬𑀢𑁆𑀣𑁄 𑁋 𑀩𑀳𑀽𑀦𑀺 𑀦𑀭𑀸𑀦𑀁 𑀲𑀻𑀲𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀘 𑀢𑀸𑀦𑀺 𑀮𑁄𑀫𑀲𑀸𑀦𑀺 𑀲𑀩𑁆𑀩𑀸𑀦𑀺 𑀘 𑀫𑀳𑀦𑁆𑀢𑀸𑀦𑀺 𑀕𑀻𑀯𑀸𑀬𑀫𑁂𑀯 𑀘 𑀞𑀧𑀺𑀢𑀸𑀦𑀺, 𑀦 𑀢𑀸𑀮𑀨𑀮𑀁 𑀯𑀺𑀬 𑀳𑀢𑁆𑀣𑁂𑀦 𑀕𑀳𑀺𑀢𑀸𑀦𑀺, 𑀦𑀢𑁆𑀣𑀺 𑀢𑁂𑀲𑀁 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀦𑀸𑀦𑀸𑀓𑀭𑀡𑀁. 𑀏𑀢𑁆𑀣 𑀧𑀦 𑀓𑁄𑀘𑀺𑀤𑁂𑀯 𑀓𑀡𑁆𑀡𑀯𑀸𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀓𑀡𑁆𑀡𑀯𑀸𑀢𑀺 𑀧𑀜𑁆𑀜𑀯𑀸. 𑀓𑀡𑁆𑀡𑀘𑁆𑀙𑀺𑀤𑁆𑀤𑀁 𑀧𑀦 𑀦 𑀓𑀲𑁆𑀲𑀘𑀺 𑀦𑀢𑁆𑀣𑀺, 𑀢𑀁 𑀲𑀼𑀢𑁆𑀯𑀸 𑀢𑁂 𑀫𑀸𑀡𑀯𑀓𑀸 𑀫𑀗𑁆𑀓𑀼𑀪𑀽𑀢𑀸 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀅𑀗𑁆𑀕𑀼𑀮𑀺𑀬𑀸 𑀪𑀽𑀫𑀺𑀁 𑀯𑀺𑀮𑀺𑀔𑀦𑁆𑀢𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀅𑀣 𑀦𑁂𑀲𑀁 𑀅𑀳𑀺𑀭𑀺𑀓𑀪𑀸𑀯𑀁 𑀧𑀲𑁆𑀲𑀺𑀢𑁆𑀯𑀸 𑀆𑀘𑀭𑀺𑀬𑁄 ‘‘𑀉𑀕𑁆𑀕𑀡𑁆𑀳𑀣 𑀢𑀸𑀢𑀸 𑀧𑀜𑁆𑀳’’𑀦𑁆𑀢𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀓𑀸𑀮𑁄𑀢𑀺 𑀧𑀼𑀭𑁂𑀪𑀢𑁆𑀢𑀓𑀸𑀮𑁄𑀧𑀺 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑁄𑀧𑀻𑀢𑀺 𑀏𑀯𑀫𑀸𑀤𑀺. 𑀪𑀽𑀢𑀸𑀦𑀻𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀫𑁂𑀢𑀁. 𑀓𑀸𑀮𑁄 𑀳𑀺 𑀪𑀽𑀢𑀸𑀦𑀁 𑀦 𑀘𑀫𑁆𑀫𑀫𑀁𑀲𑀸𑀤𑀻𑀦𑀺 𑀔𑀸𑀤𑀢𑀺, 𑀅𑀧𑀺𑀘 𑀔𑁄 𑀦𑁂𑀲𑀁 𑀆𑀬𑀼𑀯𑀡𑁆𑀡𑀩𑀮𑀸𑀦𑀺 𑀔𑁂𑀧𑁂𑀦𑁆𑀢𑁄 𑀬𑁄𑀩𑁆𑀩𑀜𑁆𑀜𑀁 𑀫𑀤𑁆𑀤𑀦𑁆𑀢𑁄 𑀆𑀭𑁄𑀕𑁆𑀬𑀁 𑀯𑀺𑀦𑀸𑀲𑁂𑀦𑁆𑀢𑁄 𑀖𑀲𑀢𑀺 𑀔𑀸𑀤𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸𑀢𑀺 𑀏𑀯𑀁 𑀖𑀲𑀦𑁆𑀢𑁄 𑀘 𑀦 𑀓𑀺𑀜𑁆𑀘𑀺 𑀯𑀚𑁆𑀚𑁂𑀢𑀺, 𑀲𑀩𑁆𑀩𑀸𑀦𑁂𑀯 𑀖𑀲𑀢𑀺. 𑀦 𑀓𑁂𑀯𑀮𑀜𑁆𑀘 𑀪𑀽𑀢𑀸𑀦𑀺𑀬𑁂𑀯, 𑀅𑀧𑀺𑀘 𑀔𑁄 𑀲𑀳𑀢𑁆𑀢𑀦𑀸 𑀅𑀢𑁆𑀢𑀸𑀦𑀫𑁆𑀧𑀺 𑀖𑀲𑀢𑀺. 𑀧𑀼𑀭𑁂𑀪𑀢𑁆𑀢𑀓𑀸𑀮𑁄 𑀳𑀺 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑀁 𑀦 𑀧𑀸𑀧𑀼𑀡𑀸𑀢𑀺. 𑀏𑀲 𑀦𑀬𑁄 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑀸𑀤𑀻𑀲𑀼. 𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄𑀢𑀺 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁄 𑀳𑀺 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀓𑀸𑀮𑀁 𑀔𑁂𑀧𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀓𑀸𑀮𑀖𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀲 𑀪𑀽𑀢𑀧𑀘𑀦𑀺𑀁 𑀧𑀘𑀻𑀢𑀺 𑀲𑁄 𑀬𑀸𑀬𑀁 𑀢𑀡𑁆𑀳𑀸 𑀅𑀧𑀸𑀬𑁂𑀲𑀼 𑀪𑀽𑀢𑁂 𑀧𑀘𑀢𑀺, 𑀢𑀁 𑀜𑀸𑀡𑀕𑁆𑀕𑀺𑀦𑀸 𑀧𑀘𑀺 𑀤𑀬𑁆𑀳𑀺 𑀪𑀲𑁆𑀫𑀫𑀓𑀸𑀲𑀺, 𑀢𑁂𑀦 ‘‘𑀪𑀽𑀢𑀧𑀘𑀦𑀺𑀁 𑀧𑀘𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀚𑀦𑀺’’𑀦𑁆𑀢𑀺𑀧𑀺 𑀧𑀸𑀞𑁄. 𑀚𑀦𑀺𑀓𑀁 𑀦𑀺𑀩𑁆𑀩𑀢𑁆𑀢𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀅𑀣 𑀢𑁂 𑀫𑀸𑀡𑀯𑀓𑀸 𑀤𑀻𑀧𑀲𑀳𑀲𑁆𑀲𑀸𑀮𑁄𑀓𑁂𑀦 𑀯𑀺𑀬 𑀭𑀢𑁆𑀢𑀺𑀁 𑀲𑀫𑀯𑀺𑀲𑀫𑀁 𑀆𑀘𑀭𑀺𑀬𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀧𑀸𑀓𑀝𑀁 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀫𑀬𑀁 𑀬𑀸𑀯𑀚𑀻𑀯𑀁 𑀕𑀼𑀭𑀼𑀯𑀸𑀲𑀁 𑀯𑀲𑀺𑀲𑁆𑀲𑀸𑀫, 𑀫𑀳𑀦𑁆𑀢𑀸 𑀏𑀢𑁂 𑀆𑀘𑀭𑀺𑀬𑀸 𑀦𑀸𑀫, 𑀫𑀬𑀜𑁆𑀳𑀺 𑀩𑀳𑀼𑀲𑁆𑀲𑀼𑀢𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀬𑀧𑀺 𑀅𑀢𑁆𑀣𑀁 𑀦 𑀚𑀸𑀦𑀸𑀫𑀸’’𑀢𑀺 𑀦𑀺𑀳𑀢𑀫𑀸𑀦𑀸 𑀧𑀼𑀩𑁆𑀩𑀲𑀤𑀺𑀲𑀫𑁂𑀯 𑀆𑀘𑀭𑀺𑀬𑀲𑁆𑀲 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀅𑀳𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑁂𑀦 𑀲𑀫𑀬𑁂𑀦 𑀢𑁂𑀲𑀁 𑀆𑀘𑀭𑀺𑀬𑁄 𑀅𑀳𑁄𑀲𑀺𑀁, 𑀇𑀫𑁂 𑀪𑀺𑀓𑁆𑀔𑀽 𑀫𑀸𑀡𑀯𑀓𑀸. 𑀏𑀯𑀁 𑀧𑀼𑀩𑁆𑀩𑁂𑀧𑀸𑀳𑀁 𑀇𑀫𑁂 𑀏𑀯𑀁 𑀫𑀸𑀦𑀧𑀕𑁆𑀕𑀳𑀺𑀢𑀲𑀺𑀭𑁂 𑀯𑀺𑀘𑀭𑀦𑁆𑀢𑁂 𑀦𑀺𑀳𑀢𑀫𑀸𑀦𑁂 𑀅𑀓𑀸𑀲𑀺𑀦𑁆𑀢𑀺.

𑀇𑀫𑀜𑁆𑀘 𑀚𑀸𑀢𑀓𑀁 𑀲𑀼𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀧𑀼𑀩𑁆𑀩𑁂𑀧𑀺 𑀫𑀬𑀁 𑀫𑀸𑀦𑁂𑀦𑁂𑀯 𑀉𑀧𑀳𑀢𑀸𑀢𑀺 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀦𑀺𑀳𑀢𑀫𑀸𑀦𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀓𑀫𑁆𑀫𑀝𑁆𑀞𑀸𑀦𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀢𑀢𑁄 𑀪𑀕𑀯𑀸 𑀏𑀓𑀁 𑀲𑀫𑀬𑀁 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀯𑁂𑀲𑀸𑀮𑀺𑀁 𑀧𑀢𑁆𑀯𑀸 𑀕𑁄𑀢𑀫𑀓𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁄 𑀇𑀫𑁂𑀲𑀁 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀜𑀸𑀡𑀧𑀭𑀺𑀧𑀸𑀓𑀁 𑀯𑀺𑀤𑀺𑀢𑁆𑀯𑀸 𑀇𑀫𑀁 𑀕𑁄𑀢𑀫𑀓𑀲𑀼𑀢𑁆𑀢𑀁 𑀓𑀣𑁂𑀲𑀺 𑁋

‘‘𑀅𑀪𑀺𑀜𑁆𑀜𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀦𑁄 𑀅𑀦𑀪𑀺𑀜𑁆𑀜𑀸𑀬, 𑀲𑀦𑀺𑀤𑀸𑀦𑀸𑀳𑀁…𑀧𑁂… 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀦𑁄 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀁. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀥𑀫𑁆𑀫𑀁 𑀤𑁂𑀲𑀬𑀢𑁄…𑀧𑁂… 𑀦𑁄 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀁. 𑀓𑀭𑀡𑀻𑀬𑁄 𑀑𑀯𑀸𑀤𑁄, 𑀓𑀭𑀡𑀻𑀬𑀸 𑀅𑀦𑀼𑀲𑀸𑀲𑀦𑀻. 𑀅𑀮𑀜𑁆𑀘 𑀧𑀦 𑀯𑁄, 𑀪𑀺𑀓𑁆𑀔𑀯𑁂, 𑀢𑀼𑀝𑁆𑀞𑀺𑀬𑀸 𑀅𑀮𑀁 𑀅𑀢𑁆𑀢𑀫𑀦𑀢𑀸𑀬 𑀅𑀮𑀁 𑀲𑁄𑀫𑀦𑀲𑁆𑀲𑀸𑀬. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣𑀸’’𑀢𑀺 (𑀅. 𑀦𑀺. 𑁩.𑁧𑁨𑁬).

𑀇𑀤𑀜𑁆𑀘 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀢𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁𑀬𑁂𑀯𑀸𑀲𑀦𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀏𑀯𑀸𑀬𑀁 𑀤𑁂𑀲𑀦𑀸 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀝𑁆𑀞𑀫𑀕𑀫𑀸𑀲𑀻𑀢𑀺.

𑀢𑀣𑀸𑀕𑀢𑀯𑀸𑀭𑀅𑀝𑁆𑀞𑀫𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.