𑁮. 𑀧𑀞𑀫𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑁄 𑀫𑀮𑁆𑀬𑀥𑀭𑁄 𑀲𑀼𑀯𑀢𑁆𑀣𑁄𑀢𑀺 𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀲𑀧𑀭𑀺𑀯𑀸𑀭𑀸 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬𑀁 𑀅𑀜𑁆𑀜𑀢𑀭𑀁 𑀯𑀺𑀳𑀸𑀭𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀕𑁄𑀘𑀭𑀕𑀸𑀫𑁂 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑀥𑁄𑀯𑀦𑀁 𑀧𑀸𑀤𑀩𑁆𑀪𑀜𑁆𑀚𑀦𑀢𑁂𑀮𑀁 𑀫𑀜𑁆𑀘𑀧𑀻𑀞𑀁 𑀧𑀘𑁆𑀘𑀢𑁆𑀣𑀭𑀡𑀁 𑀧𑀤𑀻𑀧𑀺𑀬𑀜𑁆𑀘 𑀉𑀧𑀦𑁂𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀣𑁂𑀭𑀸 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁦𑁯𑁪. ‘‘𑀅𑀮𑀗𑁆𑀓𑀢𑁄 𑀫𑀮𑁆𑀬𑀥𑀭𑁄 𑀲𑀼𑀯𑀢𑁆𑀣𑁄, 𑀲𑀼𑀓𑀼𑀡𑁆𑀟𑀮𑀻 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼;

𑀆𑀫𑀼𑀢𑁆𑀢𑀳𑀢𑁆𑀣𑀸𑀪𑀭𑀡𑁄 𑀬𑀲𑀲𑁆𑀲𑀻, 𑀤𑀺𑀩𑁆𑀩𑁂 𑀯𑀺𑀫𑀸𑀦𑀫𑁆𑀳𑀺 𑀬𑀣𑀸𑀧𑀺 𑀘𑀦𑁆𑀤𑀺𑀫𑀸.

𑁧𑁦𑁯𑁫. ‘‘𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁, 𑀅𑀝𑁆𑀞𑀝𑁆𑀞𑀓𑀸 𑀲𑀺𑀓𑁆𑀔𑀺𑀢𑀸 𑀲𑀸𑀥𑀼𑀭𑀽𑀧𑀸;

𑀤𑀺𑀩𑁆𑀩𑀸 𑀘 𑀓𑀜𑁆𑀜𑀸 𑀢𑀺𑀤𑀲𑀘𑀭𑀸 𑀉𑀴𑀸𑀭𑀸, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺.

𑁧𑁦𑁯𑁬. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄𑀧𑀺 𑀢𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁧𑁦𑁯𑁭. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁯𑁮. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀤𑀺𑀲𑁆𑀯𑀸𑀦 𑀲𑀫𑀡𑁂 𑀲𑀻𑀮𑀯𑀦𑁆𑀢𑁂;

𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑁂 𑀬𑀲𑀲𑁆𑀲𑀻, 𑀩𑀳𑀼𑀲𑁆𑀲𑀼𑀢𑁂 𑀢𑀡𑁆𑀳𑀓𑁆𑀔𑀬𑀽𑀧𑀧𑀦𑁆𑀦𑁂;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁦𑁯𑁯. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁦𑁯𑁪. 𑀢𑀢𑁆𑀣 𑀲𑀼𑀓𑀼𑀡𑁆𑀟𑀮𑀻𑀢𑀺 𑀲𑀼𑀦𑁆𑀤𑀭𑁂𑀳𑀺 𑀓𑀼𑀡𑁆𑀟𑀮𑁂𑀳𑀺 𑀅𑀮𑀗𑁆𑀓𑀢𑀓𑀡𑁆𑀡𑁄. ‘‘𑀲𑀓𑀼𑀡𑁆𑀟𑀮𑀻’’𑀢𑀺𑀧𑀺 𑀧𑀸𑀞𑁄, 𑀲𑀤𑀺𑀲𑀁 𑀓𑀼𑀡𑁆𑀟𑀮𑀁 𑀲𑀓𑀼𑀡𑁆𑀟𑀮𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀓𑀼𑀡𑁆𑀟𑀮𑀻, 𑀬𑀼𑀢𑁆𑀢𑀓𑀼𑀡𑁆𑀟𑀮𑀻 𑀅𑀜𑁆𑀜𑀫𑀜𑁆𑀜𑀜𑁆𑀘 𑀢𑀼𑀬𑁆𑀳𑀜𑁆𑀘 𑀅𑀦𑀼𑀘𑁆𑀙𑀯𑀺𑀓𑀓𑀼𑀡𑁆𑀟𑀮𑀻𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽𑀢𑀺 𑀲𑀫𑁆𑀫𑀸𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼. 𑀆𑀫𑀼𑀢𑁆𑀢𑀳𑀢𑁆𑀣𑀸𑀪𑀭𑀡𑁄𑀢𑀺 𑀧𑀝𑀺𑀫𑀼𑀓𑁆𑀓𑀅𑀗𑁆𑀕𑀼𑀮𑀺𑀬𑀸𑀤𑀺𑀳𑀢𑁆𑀣𑀸𑀪𑀭𑀡𑁄.

𑁧𑁦𑁯𑁮. 𑀢𑀡𑁆𑀳𑀓𑁆𑀔𑀬𑀽𑀧𑀧𑀦𑁆𑀦𑁂𑀢𑀺 𑀢𑀡𑁆𑀳𑀓𑁆𑀔𑀬𑀁 𑀅𑀭𑀳𑀢𑁆𑀢𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀉𑀧𑀕𑀢𑁂, 𑀅𑀥𑀺𑀕𑀢𑀯𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀞𑀫𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.