𑁩. 𑀨𑀮𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀦𑁆𑀢𑀺 𑀨𑀮𑀤𑀸𑀬𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀅𑀓𑀸𑀮𑁂 𑀅𑀫𑁆𑀩𑀨𑀮𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀺. 𑀲𑁄 𑀆𑀭𑀸𑀫𑀧𑀸𑀮𑀁 𑀆𑀳 𑁋 ‘‘𑀫𑀬𑁆𑀳𑀁 𑀔𑁄, 𑀪𑀡𑁂, 𑀅𑀫𑁆𑀩𑀨𑀮𑁂𑀲𑀼 𑀇𑀘𑁆𑀙𑀸 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀫𑀸 𑀅𑀫𑁆𑀩𑀸𑀦𑀺 𑀫𑁂 𑀆𑀦𑁂𑀢𑁆𑀯𑀸 𑀤𑁂𑀳𑀻’’𑀢𑀺. ‘‘𑀤𑁂𑀯, 𑀦𑀢𑁆𑀣𑀺 𑀅𑀫𑁆𑀩𑁂𑀲𑀼 𑀅𑀫𑁆𑀩𑀨𑀮𑀁, 𑀅𑀧𑀺𑀘𑀸𑀳𑀁 𑀢𑀣𑀸 𑀓𑀭𑁄𑀫𑀺, 𑀲𑀘𑁂 𑀤𑁂𑀯𑁄 𑀓𑀺𑀜𑁆𑀘𑀺 𑀓𑀸𑀮𑀁 𑀆𑀕𑀫𑁂𑀢𑀺, 𑀬𑀣𑀸 𑀅𑀫𑁆𑀩𑀸 𑀦 𑀘𑀺𑀭𑀲𑁆𑀲𑁂𑀯 𑀨𑀮𑀁 𑀕𑀡𑁆𑀳𑀦𑁆𑀢𑀻’’𑀢𑀺. ‘‘𑀲𑀸𑀥𑀼, 𑀪𑀡𑁂, 𑀢𑀣𑀸 𑀓𑀭𑁄𑀳𑀻’’𑀢𑀺. 𑀆𑀭𑀸𑀫𑀧𑀸𑀮𑁄 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂𑀲𑀼 𑀧𑀁𑀲𑀼𑀁 𑀅𑀧𑀦𑁂𑀢𑁆𑀯𑀸 𑀢𑀸𑀤𑀺𑀲𑀁 𑀧𑀁𑀲𑀼𑀁 𑀆𑀓𑀺𑀭𑀺, 𑀢𑀸𑀤𑀺𑀲𑀜𑁆𑀘 𑀉𑀤𑀓𑀁 𑀆𑀲𑀺𑀜𑁆𑀘𑀺, 𑀬𑀣𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀫𑁆𑀩𑀭𑀼𑀓𑁆𑀔𑀸 𑀲𑀘𑁆𑀙𑀺𑀦𑁆𑀦𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀅𑀣 𑀦𑀁 𑀧𑀁𑀲𑀼𑀁 𑀅𑀧𑀦𑁂𑀢𑁆𑀯𑀸 𑀨𑀸𑀭𑀼𑀲𑀓𑀓𑀲𑀝𑀫𑀺𑀲𑁆𑀲𑀓𑀁 𑀧𑀸𑀓𑀢𑀺𑀓𑀁 𑀧𑀁𑀲𑀼𑀁 𑀆𑀓𑀺𑀭𑀺𑀢𑁆𑀯𑀸 𑀲𑀸𑀥𑀼𑀓𑀁 𑀉𑀤𑀓𑀁 𑀅𑀤𑀸𑀲𑀺. 𑀢𑀤𑀸 𑀅𑀫𑁆𑀩𑀭𑀼𑀓𑁆𑀔𑀸 𑀦 𑀘𑀺𑀭𑁂𑀦𑁂𑀯 𑀓𑁄𑀭𑀓𑀺𑀢𑀸 𑀧𑀮𑁆𑀮𑀯𑀺𑀢𑀸 𑀓𑀼𑀝𑀫𑀮𑀓𑀚𑀸𑀢𑀸 𑀳𑀼𑀢𑁆𑀯𑀸 𑀧𑀼𑀧𑁆𑀨𑀺𑀁𑀲𑀼, 𑀅𑀣 𑀲𑀮𑀸𑀝𑀼𑀓𑀚𑀸𑀢𑀸 𑀳𑀼𑀢𑁆𑀯𑀸 𑀨𑀮𑀸𑀦𑀺 𑀕𑀡𑁆𑀳𑀺𑀁𑀲𑀼. 𑀢𑀢𑁆𑀣𑁂𑀓𑀲𑁆𑀫𑀺𑀁 𑀅𑀫𑁆𑀩𑀭𑀼𑀓𑁆𑀔𑁂 𑀧𑀞𑀫𑀢𑀭𑀁 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀫𑀦𑁄𑀲𑀺𑀮𑀸𑀘𑀼𑀡𑁆𑀡𑀧𑀺𑀜𑁆𑀚𑀭𑀯𑀡𑁆𑀡𑀸𑀦𑀺 𑀲𑀫𑁆𑀧𑀦𑁆𑀦𑀕𑀦𑁆𑀥𑀭𑀲𑀸𑀦𑀺 𑀧𑀭𑀺𑀡𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀢𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀭𑀜𑁆𑀜𑁄 𑀤𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀸𑀦𑀺 𑀅𑀫𑁆𑀩𑀸𑀦𑀺 𑀅𑀕𑁆𑀕𑀨𑀮𑀪𑀽𑀢𑀸𑀦𑀺 𑀇𑀫𑀲𑁆𑀲 𑀅𑀬𑁆𑀬𑀲𑁆𑀲 𑀤𑀲𑁆𑀲𑀸𑀫𑀺, 𑀓𑀸𑀫𑀁 𑀫𑀁 𑀭𑀸𑀚𑀸 𑀳𑀦𑀢𑀼 𑀯𑀸 𑀧𑀩𑁆𑀩𑀸𑀚𑁂𑀢𑀼 𑀯𑀸, 𑀭𑀜𑁆𑀜𑁄 𑀳𑀺 𑀤𑀺𑀦𑁆𑀦𑁂 𑀤𑀺𑀝𑁆𑀞𑀥𑀫𑁆𑀫𑁂 𑀧𑀽𑀚𑀸𑀫𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑀓𑀁 𑀨𑀮𑀁, 𑀅𑀬𑁆𑀬𑀲𑁆𑀲 𑀤𑀺𑀦𑁆𑀦𑁂 𑀧𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀅𑀧𑀭𑀺𑀫𑀸𑀡𑀁 𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀦𑀺 𑀨𑀮𑀸𑀦𑀺 𑀣𑁂𑀭𑀲𑁆𑀲 𑀤𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀭𑀸𑀚𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 ‘‘𑀯𑀻𑀫𑀁𑀲𑀣 𑀢𑀸𑀯, 𑀪𑀡𑁂, 𑀬𑀣𑀸𑀬𑀁 𑀆𑀳𑀸’’𑀢𑀺. 𑀣𑁂𑀭𑁄 𑀧𑀦 𑀢𑀸𑀦𑀺 𑀨𑀮𑀸𑀦𑀺 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺. 𑀪𑀕𑀯𑀸 𑀢𑁂𑀲𑀼 𑀏𑀓𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀏𑀓𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲, 𑀏𑀓𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀤𑀢𑁆𑀯𑀸 𑀏𑀓𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺. 𑀧𑀼𑀭𑀺𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁.

𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀥𑀻𑀭𑁄 𑀯𑀢𑀸𑀬𑀁 𑀧𑀼𑀭𑀺𑀲𑁄, 𑀬𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀼𑀜𑁆𑀜𑀧𑀲𑀼𑀢𑁄 𑀅𑀳𑁄𑀲𑀺, 𑀅𑀢𑁆𑀢𑀦𑁄 𑀧𑀭𑀺𑀲𑁆𑀲𑀫𑀜𑁆𑀘 𑀞𑀸𑀦𑀕𑀢𑀫𑁂𑀯 𑀅𑀓𑀸𑀲𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀲𑁆𑀲 𑀏𑀓𑀁 𑀕𑀸𑀫𑀯𑀭𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀘 𑀤𑀢𑁆𑀯𑀸 ‘‘𑀬𑀁 𑀢𑀬𑀸 𑀪𑀡𑁂 𑀅𑀫𑁆𑀩𑀨𑀮𑀤𑀸𑀦𑁂𑀦 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀢𑀢𑁄 𑀫𑁂 𑀧𑀢𑁆𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀤𑁂𑀫𑀺, 𑀤𑁂𑀯, 𑀬𑀣𑀸𑀲𑀼𑀔𑀁 𑀧𑀢𑁆𑀢𑀺𑀁 𑀕𑀡𑁆𑀳𑀸𑀳𑀻’’𑀢𑀺 𑀅𑀯𑁄𑀘. 𑀆𑀭𑀸𑀫𑀧𑀸𑀮𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺, 𑀢𑀲𑁆𑀲 𑀲𑁄𑀴𑀲𑀬𑁄𑀚𑀦𑀺𑀓𑀁 𑀓𑀦𑀓𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺 𑀲𑀢𑁆𑀢𑀲𑀢𑀓𑀽𑀝𑀸𑀕𑀸𑀭𑀧𑀝𑀺𑀫𑀡𑁆𑀟𑀺𑀢𑀁. 𑀢𑀁 𑀤𑀺𑀲𑁆𑀯𑀸 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀼𑀘𑁆𑀙𑀺 𑁋

𑁧𑁦𑁬𑁦. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀲𑁄𑀴𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 𑀲𑀼𑀪𑀸.

𑁧𑁦𑁬𑁧. ‘‘𑀢𑀢𑁆𑀣𑀘𑁆𑀙𑀲𑀺 𑀧𑀺𑀯𑀲𑀺 𑀔𑀸𑀤𑀲𑀺 𑀘, 𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁;

𑀅𑀝𑁆𑀞𑀝𑁆𑀞𑀓𑀸 𑀲𑀺𑀓𑁆𑀔𑀺𑀢𑀸 𑀲𑀸𑀥𑀼𑀭𑀽𑀧𑀸, 𑀤𑀺𑀩𑁆𑀩𑀸 𑀘 𑀓𑀜𑁆𑀜𑀸 𑀢𑀺𑀤𑀲𑀘𑀭𑀸 𑀉𑀴𑀸𑀭𑀸;

𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺.

𑁧𑁦𑁬𑁨. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁦𑁬𑁩. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁬𑁪. ‘‘𑀨𑀮𑀤𑀸𑀬𑀻 𑀨𑀮𑀁 𑀯𑀺𑀧𑀼𑀮𑀁 𑀮𑀪𑀢𑀺, 𑀤𑀤𑀫𑀼𑀚𑀼𑀕𑀢𑁂𑀲𑀼 𑀧𑀲𑀦𑁆𑀦𑀫𑀸𑀦𑀲𑁄;

𑀲𑁄 𑀳𑀺 𑀧𑀫𑁄𑀤𑀢𑀺 𑀲𑀕𑁆𑀕𑀕𑀢𑁄 𑀢𑀺𑀤𑀺𑀯𑁂, 𑀅𑀦𑀼𑀪𑁄𑀢𑀺 𑀘 𑀧𑀼𑀜𑁆𑀜𑀨𑀮𑀁 𑀯𑀺𑀧𑀼𑀮𑀁.

𑁧𑁦𑁬𑁫. ‘‘𑀢𑀯𑁂𑀯𑀸𑀳𑀁 𑀫𑀳𑀸𑀫𑀼𑀦𑀺, 𑀅𑀤𑀸𑀲𑀺𑀁 𑀘𑀢𑀼𑀭𑁄 𑀨𑀮𑁂.

𑁧𑁦𑁬𑁬. ‘‘𑀢𑀲𑁆𑀫𑀸 𑀳𑀺 𑀨𑀮𑀁 𑀅𑀮𑀫𑁂𑀯 𑀤𑀸𑀢𑀼𑀁, 𑀦𑀺𑀘𑁆𑀘𑀁 𑀫𑀦𑀼𑀲𑁆𑀲𑁂𑀦 𑀲𑀼𑀔𑀢𑁆𑀣𑀺𑀓𑁂𑀦;

𑀤𑀺𑀩𑁆𑀩𑀸𑀦𑀺 𑀯𑀸 𑀧𑀢𑁆𑀣𑀬𑀢𑀸 𑀲𑀼𑀔𑀸𑀦𑀺, 𑀫𑀦𑀼𑀲𑁆𑀲𑀲𑁄𑀪𑀕𑁆𑀕𑀢𑀫𑀺𑀘𑁆𑀙𑀢𑀸 𑀯𑀸.

𑁧𑁦𑁬𑁭. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀲𑁄𑀧𑀺𑀲𑁆𑀲 𑀩𑁆𑀬𑀸𑀓𑀸𑀲𑀺;

𑁧𑁦𑁬𑁧. 𑀢𑀢𑁆𑀣 𑀅𑀝𑁆𑀞𑀝𑁆𑀞𑀓𑀸𑀢𑀺 𑀏𑀓𑁂𑀓𑀲𑁆𑀫𑀺𑀁 𑀓𑀽𑀝𑀸𑀕𑀸𑀭𑁂 𑀅𑀝𑁆𑀞𑀝𑁆𑀞𑀓𑀸 𑀘𑀢𑀼𑀲𑀝𑁆𑀞𑀺𑀧𑀭𑀺𑀫𑀸𑀡𑀸. 𑀲𑀸𑀥𑀼𑀭𑀽𑀧𑀸𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀻𑀮𑀸𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀺𑀓𑁆𑀔𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀼𑀦𑁆𑀤𑀭𑀲𑀪𑀸𑀯𑀸. 𑀤𑀺𑀩𑁆𑀩𑀸 𑀘 𑀓𑀜𑁆𑀜𑀸𑀢𑀺 𑀤𑁂𑀯𑀘𑁆𑀙𑀭𑀸𑀬𑁄. 𑀢𑀺𑀤𑀲𑀘𑀭𑀸𑀢𑀺 𑀢𑀺𑀤𑀲𑁂𑀲𑀼 𑀲𑀼𑀔𑀸𑀘𑀸𑀭𑀸 𑀲𑀼𑀔𑀯𑀺𑀳𑀸𑀭𑀺𑀦𑀺𑀬𑁄. 𑀉𑀴𑀸𑀭𑀸𑀢𑀺 𑀉𑀴𑀸𑀭𑀯𑀺𑀪𑀯𑀸.

𑁧𑁦𑁬𑁪. 𑀨𑀮𑀤𑀸𑀬𑀻𑀢𑀺 𑀅𑀢𑁆𑀢𑀦𑀸 𑀅𑀫𑁆𑀩𑀨𑀮𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀨𑀮𑀦𑁆𑀢𑀺 𑀧𑀼𑀜𑁆𑀜𑀨𑀮𑀁. 𑀯𑀺𑀧𑀼𑀮𑀦𑁆𑀢𑀺 𑀫𑀳𑀦𑁆𑀢𑀁 𑀮𑀪𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀤𑀦𑁆𑀢𑀺 𑀤𑀤𑀦𑁆𑀢𑁄 𑀤𑀸𑀦𑀳𑁂𑀢𑀼. 𑀉𑀚𑀼𑀕𑀢𑁂𑀲𑀽𑀢𑀺 𑀉𑀚𑀼𑀧𑀝𑀺𑀧𑀦𑁆𑀦𑁂𑀲𑀼. 𑀲𑀕𑁆𑀕𑀕𑀢𑁄𑀢𑀺 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀲𑀕𑁆𑀕𑀁 𑀕𑀢𑁄, 𑀢𑀢𑁆𑀣𑀸𑀧𑀺 𑀢𑀺𑀤𑀺𑀯𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀦𑀼𑀪𑁄𑀢𑀺 𑀘 𑀧𑀼𑀜𑁆𑀜𑀨𑀮𑀁 𑀯𑀺𑀧𑀼𑀮𑀁 𑀬𑀣𑀸𑀳𑀁, 𑀏𑀯𑀁 𑀅𑀜𑁆𑀜𑁄𑀧𑀻𑀢𑀺 𑀅𑀢𑁆𑀣𑁄.

𑁧𑁦𑁬𑁬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀘𑀢𑀼𑀦𑁆𑀦𑀁 𑀨𑀮𑀸𑀦𑀁 𑀤𑀸𑀦𑀫𑀢𑁆𑀢𑁂𑀦 𑀈𑀤𑀺𑀲𑀻 𑀲𑀫𑁆𑀧𑀢𑁆𑀢𑀺 𑀅𑀥𑀺𑀕𑀢𑀸, 𑀢𑀲𑁆𑀫𑀸. 𑀅𑀮𑀫𑁂𑀯 𑀬𑀼𑀢𑁆𑀢𑀫𑁂𑀯. 𑀦𑀺𑀘𑁆𑀘𑀦𑁆𑀢𑀺 𑀲𑀩𑁆𑀩𑀓𑀸𑀮𑀁. 𑀤𑀺𑀩𑁆𑀩𑀸𑀦𑀻𑀢𑀺 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸𑀦𑀺. 𑀫𑀦𑀼𑀲𑁆𑀲𑀲𑁄𑀪𑀕𑁆𑀕𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀪𑀕𑀪𑀸𑀯𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀨𑀮𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.