𑁧𑁦. 𑀧𑀞𑀫𑀦𑀸𑀕𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑀼𑀲𑀼𑀓𑁆𑀓𑀔𑀦𑁆𑀥𑀁 𑀅𑀪𑀺𑀭𑀼𑀬𑁆𑀳 𑀦𑀸𑀕𑀦𑁆𑀢𑀺 𑀦𑀸𑀕𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀉𑀧𑀕𑀢𑁄. 𑀢𑀢𑁆𑀣 𑀅𑀤𑁆𑀤𑀲 𑀅𑀜𑁆𑀜𑀢𑀭𑀁 𑀤𑁂𑀯𑀧𑀼𑀢𑁆𑀢𑀁 𑀲𑀩𑁆𑀩𑀲𑁂𑀢𑀁 𑀫𑀳𑀦𑁆𑀢𑀁 𑀤𑀺𑀩𑁆𑀩𑀦𑀸𑀕𑀁 𑀅𑀪𑀺𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀢𑀸 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁, 𑀲𑀩𑁆𑀩𑀸 𑀤𑀺𑀲𑀸 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀑𑀪𑀸𑀲𑀬𑀫𑀸𑀦𑀁. 𑀤𑀺𑀲𑁆𑀯𑀸 𑀬𑁂𑀦 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑀢𑁄 𑀑𑀭𑀼𑀬𑁆𑀳 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀅𑀣 𑀣𑁂𑀭𑁄 𑁋

𑁯𑁬𑁧. ‘‘𑀲𑀼𑀲𑀼𑀓𑁆𑀓𑀔𑀦𑁆𑀥𑀁 𑀅𑀪𑀺𑀭𑀼𑀬𑁆𑀳 𑀦𑀸𑀕𑀁, 𑀅𑀓𑀸𑀘𑀺𑀦𑀁 𑀤𑀦𑁆𑀢𑀺𑀁 𑀩𑀮𑀺𑀁 𑀫𑀳𑀸𑀚𑀯𑀁;

𑀅𑀪𑀺𑀭𑀼𑀬𑁆𑀳 𑀕𑀚𑀯𑀭𑀁 𑀲𑀼𑀓𑀧𑁆𑀧𑀺𑀢𑀁, 𑀇𑀥𑀸𑀕𑀫𑀸 𑀯𑁂𑀳𑀸𑀬𑀲𑀁 𑀅𑀦𑁆𑀢𑀮𑀺𑀓𑁆𑀔𑁂.

𑁯𑁬𑁨. ‘‘𑀦𑀸𑀕𑀲𑁆𑀲 𑀤𑀦𑁆𑀢𑁂𑀲𑀼 𑀤𑀼𑀯𑁂𑀲𑀼 𑀦𑀺𑀫𑁆𑀫𑀺𑀢𑀸, 𑀅𑀘𑁆𑀙𑁄𑀤𑀓𑀸 𑀧𑀤𑀼𑀫𑀺𑀦𑀺𑀬𑁄 𑀲𑀼𑀨𑀼𑀮𑁆𑀮𑀸;

𑀧𑀤𑀼𑀫𑁂𑀲𑀼 𑀘 𑀢𑀽𑀭𑀺𑀬𑀕𑀡𑀸 𑀧𑀯𑀚𑁆𑀚𑀭𑁂, 𑀇𑀫𑀸 𑀘 𑀦𑀘𑁆𑀘𑀦𑁆𑀢𑀺 𑀫𑀦𑁄𑀳𑀭𑀸𑀬𑁄.

𑁯𑁬𑁩. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄, 𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀦𑀫𑀼𑀔𑁂𑀦 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺.

𑁯𑁬𑁧. 𑀢𑀢𑁆𑀣 𑀲𑀼𑀲𑀼𑀓𑁆𑀓𑀔𑀦𑁆𑀥𑀦𑁆𑀢𑀺 𑀲𑀼𑀝𑁆𑀞𑀼 𑀲𑁂𑀢𑀔𑀦𑁆𑀥𑀁. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲 𑀦𑀸𑀕𑀲𑁆𑀲 𑀘𑀢𑁆𑀢𑀸𑀭𑁄 𑀧𑀸𑀤𑀸, 𑀯𑀢𑁆𑀣𑀺𑀓𑁄𑀲𑀁, 𑀫𑀼𑀔𑀧𑁆𑀧𑀤𑁂𑀲𑁄, 𑀉𑀪𑁄 𑀓𑀡𑁆𑀡𑀸, 𑀯𑀸𑀮𑀥𑀻𑀢𑀺 𑀏𑀢𑁆𑀢𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀩𑁆𑀩𑁄 𑀓𑀸𑀬𑁄 𑀲𑁂𑀢𑁄𑀯, 𑀔𑀦𑁆𑀥𑀧𑁆𑀧𑀤𑁂𑀲𑀲𑁆𑀲 𑀧𑀦 𑀲𑀸𑀢𑀺𑀲𑀬𑀁 𑀥𑀯𑀮𑀢𑀭𑀢𑀸𑀬 𑀯𑀼𑀢𑁆𑀢𑀁 ‘‘𑀲𑀼𑀲𑀼𑀓𑁆𑀓𑀔𑀦𑁆𑀥’’𑀦𑁆𑀢𑀺. 𑀦𑀸𑀕𑀦𑁆𑀢𑀺 𑀤𑀺𑀩𑁆𑀩𑀁 𑀳𑀢𑁆𑀣𑀺𑀦𑀸𑀕𑀁. 𑀅𑀓𑀸𑀘𑀺𑀦𑀦𑁆𑀢𑀺 𑀦𑀺𑀤𑁆𑀤𑁄𑀲𑀁, 𑀲𑀩𑀮𑀮𑀯𑀗𑁆𑀓𑀢𑀺𑀮𑀓𑀸𑀤𑀺𑀙𑀯𑀺𑀤𑁄𑀲𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀆𑀚𑀸𑀦𑀻𑀬’’𑀦𑁆𑀢𑀺𑀧𑀺 𑀧𑀸𑀴𑀺, 𑀆𑀚𑀸𑀦𑀻𑀬𑀮𑀓𑁆𑀔𑀡𑀽𑀧𑁂𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀦𑁆𑀢𑀺𑀦𑁆𑀢𑀺 𑀯𑀺𑀧𑀼𑀮𑀭𑀼𑀘𑀺𑀭𑀤𑀦𑁆𑀢𑀯𑀦𑁆𑀢𑀁. 𑀩𑀮𑀺𑀦𑁆𑀢𑀺 𑀩𑀮𑀯𑀦𑁆𑀢𑀁 𑀫𑀳𑀸𑀩𑀮𑀁. 𑀫𑀳𑀸𑀚𑀯𑀦𑁆𑀢𑀺 𑀅𑀢𑀺𑀚𑀯𑀁 𑀲𑀻𑀖𑀕𑀸𑀫𑀺𑀁. 𑀧𑀼𑀦 𑀅𑀪𑀺𑀭𑀼𑀬𑁆𑀳𑀸𑀢𑀺 𑀏𑀢𑁆𑀣 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀅𑀪𑀺𑀭𑀼𑀬𑁆𑀳𑀁 𑀆𑀭𑁄𑀳𑀦𑀻𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀧𑀦 𑀣𑁂𑀭𑁂𑀦 𑀧𑀼𑀝𑁆𑀞𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋

𑁯𑁬𑁫. ‘‘𑀅𑀝𑁆𑀞𑁂𑀯 𑀫𑀼𑀢𑁆𑀢𑀧𑀼𑀧𑁆𑀨𑀸𑀦𑀺, 𑀓𑀲𑁆𑀲𑀧𑀲𑁆𑀲 𑀫𑀳𑁂𑀲𑀺𑀦𑁄;

𑀣𑀽𑀧𑀲𑁆𑀫𑀺𑀁 𑀅𑀪𑀺𑀭𑁄𑀧𑁂𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁯𑁬𑁬. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺;

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑁄𑀚𑀦𑀺𑀓𑁂 𑀓𑀦𑀓𑀣𑀽𑀧𑁂 𑀯𑀡𑁆𑀝𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀕𑀘𑁆𑀙𑀫𑀽𑀮𑁂 𑀧𑀢𑀺𑀢𑀸𑀦𑀺 𑀅𑀝𑁆𑀞 𑀫𑀼𑀢𑁆𑀢𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀧𑀽𑀚𑀦𑀯𑀲𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀪𑀺𑀭𑁄𑀧𑁂𑀲𑀺𑀁 𑀧𑀽𑀚𑁂𑀲𑀺𑀁.

𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀬𑁄𑀚𑀦𑀺𑀓𑁂 𑀓𑀦𑀓𑀣𑀽𑀧𑁂 𑀘 𑀓𑀸𑀭𑀺𑀢𑁂 𑀲𑀧𑀭𑀺𑀯𑀸𑀭𑁄 𑀓𑀺𑀓𑀻 𑀓𑀸𑀲𑀺𑀭𑀸𑀚𑀸 𑀘 𑀦𑀸𑀕𑀭𑀸 𑀘 𑀦𑁂𑀕𑀫𑀸 𑀘 𑀚𑀸𑀦𑀧𑀤𑀸 𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀼𑀧𑁆𑀨𑀧𑀽𑀚𑀁 𑀓𑀭𑁄𑀦𑁆𑀢𑀺. 𑀢𑁂𑀲𑀼 𑀢𑀣𑀸 𑀓𑀭𑁄𑀦𑁆𑀢𑁂𑀲𑀼 𑀧𑀼𑀧𑁆𑀨𑀸𑀦𑀺 𑀫𑀳𑀕𑁆𑀖𑀸𑀦𑀺 𑀤𑀼𑀮𑁆𑀮𑀪𑀸𑀦𑀺 𑀘 𑀅𑀳𑁂𑀲𑀼𑀁. 𑀅𑀣𑁂𑀓𑁄 𑀉𑀧𑀸𑀲𑀓𑁄 𑀫𑀸𑀮𑀸𑀓𑀸𑀭𑀯𑀻𑀣𑀺𑀬𑀁 𑀯𑀺𑀘𑀭𑀺𑀢𑁆𑀯𑀸 𑀏𑀓𑀫𑁂𑀓𑁂𑀦 𑀓𑀳𑀸𑀧𑀡𑁂𑀦 𑀏𑀓𑀫𑁂𑀓𑀫𑁆𑀧𑀺 𑀧𑀼𑀧𑁆𑀨𑀁 𑀅𑀮𑀪𑀦𑁆𑀢𑁄 𑀅𑀝𑁆𑀞 𑀓𑀳𑀸𑀧𑀡𑀸𑀦𑀺 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀸𑀭𑀸𑀫𑀁 𑀕𑀦𑁆𑀢𑁆𑀯𑀸 𑀫𑀸𑀮𑀸𑀓𑀸𑀭𑀁 𑀆𑀳 ‘‘𑀇𑀫𑁂𑀳𑀺 𑀅𑀝𑁆𑀞𑀳𑀺 𑀓𑀳𑀸𑀧𑀡𑁂𑀳𑀺 𑀅𑀝𑁆𑀞 𑀧𑀼𑀧𑁆𑀨𑀸𑀦𑀺 𑀤𑁂𑀳𑀻’’𑀢𑀺. ‘‘𑀦𑀢𑁆𑀣𑀬𑁆𑀬𑁄 𑀧𑀼𑀧𑁆𑀨𑀸𑀦𑀺, 𑀲𑀫𑁆𑀫𑀤𑁂𑀯 𑀉𑀧𑀥𑀸𑀭𑁂𑀢𑁆𑀯𑀸 𑀑𑀘𑀺𑀦𑀺𑀢𑁆𑀯𑀸 𑀤𑀺𑀦𑁆𑀦𑀸𑀦𑀻’’𑀢𑀺. ‘‘𑀅𑀳𑀁 𑀑𑀮𑁄𑀓𑁂𑀢𑁆𑀯𑀸 𑀕𑀡𑁆𑀳𑀸𑀫𑀻’’𑀢𑀺. ‘‘𑀬𑀤𑀺 𑀏𑀯𑀁, 𑀆𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀕𑀯𑁂𑀲𑀸𑀳𑀻’’𑀢𑀺. 𑀲𑁄 𑀧𑀯𑀺𑀲𑀺𑀢𑁆𑀯𑀸 𑀕𑀯𑁂𑀲𑀦𑁆𑀢𑁄 𑀧𑀢𑀺𑀢𑀸𑀦𑀺 𑀅𑀝𑁆𑀞 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀫𑀸𑀮𑀸𑀓𑀸𑀭𑀁 𑀆𑀳 ‘‘𑀕𑀡𑁆𑀳, 𑀢𑀸𑀢, 𑀓𑀳𑀸𑀧𑀡𑀸𑀦𑀻’’𑀢𑀺. ‘‘𑀢𑀯 𑀧𑀼𑀜𑁆𑀜𑁂𑀦 𑀮𑀤𑁆𑀥𑀸𑀦𑀺, 𑀦𑀸𑀳𑀁 𑀓𑀳𑀸𑀧𑀡𑀸𑀦𑀺 𑀕𑀡𑁆𑀳𑀸𑀫𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀦𑀸𑀳𑀁 𑀫𑀼𑀥𑀸 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀳𑀸𑀧𑀡𑀸𑀦𑀺 𑀢𑀲𑁆𑀲 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀼𑀦𑀧𑀺 𑀤𑁂𑀯𑀮𑁄𑀓𑁂, 𑀧𑀼𑀦𑀧𑀺 𑀤𑁂𑀯𑀮𑁄𑀓𑁂𑀢𑀺 𑀏𑀯𑀁 𑀅𑀧𑀭𑀸𑀧𑀭𑀁 𑀤𑁂𑀯𑁂𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀫𑀲𑁆𑀫𑀺𑀫𑁆𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀸𑀯𑀢𑀺𑀁𑀲𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀺. 𑀢𑀁 𑀲𑀦𑁆𑀥𑀸𑀬 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀅𑀤𑁆𑀤𑀲 𑀅𑀜𑁆𑀜𑀢𑀭𑀁 𑀤𑁂𑀯𑀧𑀼𑀢𑁆𑀢’’𑀦𑁆𑀢𑀺𑀆𑀤𑀺.

𑀢𑀁 𑀧𑀦𑁂𑀢𑀁 𑀧𑀯𑀢𑁆𑀢𑀺𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀦𑀸𑀕𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.