𑁮. 𑀯𑀺𑀲𑀸𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀅𑀝𑁆𑀞𑀫𑁂 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀦𑀢𑁆𑀢𑀸 𑀓𑀸𑀮𑀗𑁆𑀓𑀢𑀸 𑀳𑁄𑀢𑀻𑀢𑀺 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀧𑀼𑀢𑁆𑀢𑀲𑁆𑀲 𑀥𑀻𑀢𑀸 𑀓𑀼𑀫𑀸𑀭𑀺𑀓𑀸 𑀓𑀸𑀮𑀗𑁆𑀓𑀢𑀸 𑀳𑁄𑀢𑀺. 𑀲𑀸 𑀓𑀺𑀭 𑀯𑀢𑁆𑀢𑀲𑀫𑁆𑀧𑀦𑁆𑀦𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀫𑀳𑀸𑀉𑀧𑀸𑀲𑀺𑀓𑀸𑀬 𑀕𑁂𑀳𑀁 𑀧𑀯𑀺𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀯𑁂𑀬𑁆𑀬𑀸𑀯𑀘𑁆𑀘𑀁 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀜𑁆𑀘 𑀅𑀧𑁆𑀧𑀫𑀢𑁆𑀢𑀸 𑀅𑀓𑀸𑀲𑀺, 𑀅𑀢𑁆𑀢𑀦𑁄 𑀧𑀺𑀢𑀸𑀫𑀳𑀺𑀬𑀸 𑀘𑀺𑀢𑁆𑀢𑀸𑀦𑀼𑀓𑀽𑀮𑀁 𑀧𑀝𑀺𑀧𑀚𑁆𑀚𑀺. 𑀢𑁂𑀦 𑀯𑀺𑀲𑀸𑀔𑀸 𑀕𑁂𑀳𑀢𑁄 𑀩𑀳𑀺 𑀕𑀘𑁆𑀙𑀦𑁆𑀢𑀻 𑀲𑀩𑁆𑀩𑀁 𑀢𑀲𑁆𑀲𑀸𑀬𑁂𑀯 𑀪𑀸𑀭𑀁 𑀓𑀢𑁆𑀯𑀸 𑀕𑀘𑁆𑀙𑀢𑀺, 𑀭𑀽𑀧𑁂𑀦 𑀘 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸, 𑀇𑀢𑀺 𑀲𑀸 𑀢𑀲𑁆𑀲𑀸 𑀯𑀺𑀲𑁂𑀲𑀢𑁄 𑀧𑀺𑀬𑀸 𑀫𑀦𑀸𑀧𑀸 𑀅𑀳𑁄𑀲𑀺. 𑀲𑀸 𑀭𑁄𑀕𑀸𑀪𑀺𑀪𑀽𑀢𑀸 𑀓𑀸𑀮𑀫𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀦𑀢𑁆𑀢𑀸 𑀓𑀸𑀮𑀗𑁆𑀓𑀢𑀸 𑀳𑁄𑀢𑀺 𑀧𑀺𑀬𑀸 𑀫𑀦𑀸𑀧𑀸’’𑀢𑀺. 𑀅𑀣 𑀫𑀳𑀸𑀉𑀧𑀸𑀲𑀺𑀓𑀸 𑀢𑀲𑁆𑀲𑀸 𑀫𑀭𑀡𑁂𑀦 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀸𑀭𑁂𑀢𑁆𑀯𑀸 ‘‘𑀅𑀧𑀺 𑀦𑀸𑀫 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑀓𑀸𑀮𑁂 𑀘𑀺𑀢𑁆𑀢𑀲𑁆𑀲𑀸𑀤𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲𑀸𑀧𑀺 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄.

𑀪𑀕𑀯𑀸 𑀯𑀺𑀲𑀸𑀔𑀸𑀬 𑀯𑀝𑁆𑀝𑀸𑀪𑀺𑀭𑀢𑀺𑀁 𑀚𑀸𑀦𑀦𑁆𑀢𑁄 𑀉𑀧𑀸𑀬𑁂𑀦 𑀲𑁄𑀓𑀢𑀦𑀼𑀓𑀭𑀡𑀢𑁆𑀣𑀁 ‘‘𑀇𑀘𑁆𑀙𑁂𑀬𑁆𑀬𑀸𑀲𑀺 𑀢𑁆𑀯𑀁 𑀯𑀺𑀲𑀸𑀔𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀯𑀢𑀺𑀓𑀸𑀢𑀺 𑀬𑀢𑁆𑀢𑀓𑀸. 𑀢𑀤𑀸 𑀓𑀺𑀭 𑀲𑀢𑁆𑀢 𑀚𑀦𑀓𑁄𑀝𑀺𑀬𑁄 𑀲𑀸𑀯𑀢𑁆𑀣𑀺𑀬𑀁 𑀧𑀝𑀺𑀯𑀲𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 ‘‘𑀓𑀻𑀯𑀩𑀳𑀼𑀓𑀸 𑀧𑀦 𑀯𑀺𑀲𑀸𑀔𑁂 𑀲𑀸𑀯𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑀸 𑀤𑁂𑀯𑀲𑀺𑀓𑀁 𑀓𑀸𑀮𑀁 𑀓𑀭𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀯𑀺𑀲𑀸𑀔𑀸 ‘‘𑀤𑀲𑀧𑀺, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀻𑀡𑀻𑀢𑀺 𑀢𑀬𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀯𑀺𑀯𑀺𑀢𑁆𑀢𑀸𑀢𑀺 𑀅𑀲𑀼𑀜𑁆𑀜𑀸.

𑀅𑀣 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀧𑀺 𑀦𑀼 𑀢𑁆𑀯𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀅𑀦𑀮𑁆𑀮𑀯𑀢𑁆𑀣𑀸 𑀯𑀸 𑀪𑀯𑁂𑀬𑁆𑀬𑀸𑀲𑀺 𑀅𑀦𑀮𑁆𑀮𑀓𑁂𑀲𑀸 𑀯𑀸’’𑀢𑀺 𑀆𑀳. 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑀬𑀸 𑀲𑀩𑁆𑀩𑀓𑀸𑀮𑀁 𑀲𑁄𑀓𑀸𑀪𑀺𑀪𑀽𑀢𑀸𑀬 𑀫𑀢𑀸𑀦𑀁 𑀧𑀼𑀢𑁆𑀢𑀸𑀤𑀻𑀦𑀁 𑀅𑀫𑀗𑁆𑀕𑀮𑀽𑀧𑀘𑀸𑀭𑀯𑀲𑁂𑀦 𑀉𑀤𑀓𑁄𑀭𑁄𑀳𑀡𑁂𑀦 𑀅𑀮𑁆𑀮𑀯𑀢𑁆𑀣𑀸𑀬 𑀅𑀮𑁆𑀮𑀓𑁂𑀲𑀸𑀬 𑀏𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀺𑀓𑀸 𑀲𑀁𑀯𑁂𑀕𑀚𑀸𑀢𑀸 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀬𑀯𑀢𑁆𑀣𑀼𑀁 𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀦𑀺𑀯𑀢𑁆𑀢𑀪𑀸𑀯𑀁 𑀲𑀢𑁆𑀣𑀼 𑀆𑀭𑁄𑀘𑁂𑀦𑁆𑀢𑀻 ‘‘𑀅𑀮𑀁 𑀫𑁂, 𑀪𑀦𑁆𑀢𑁂, 𑀢𑀸𑀯𑀩𑀳𑀼𑀓𑁂𑀳𑀺 𑀧𑀼𑀢𑁆𑀢𑁂𑀳𑀺 𑀘 𑀦𑀢𑁆𑀢𑀸𑀭𑁂𑀳𑀺 𑀘𑀸’’𑀢𑀺 𑀆𑀳.

𑀅𑀣𑀲𑁆𑀲𑀸 𑀪𑀕𑀯𑀸 ‘‘𑀤𑀼𑀓𑁆𑀔𑀁 𑀦𑀸𑀫𑁂𑀢𑀁 𑀧𑀺𑀬𑀯𑀢𑁆𑀣𑀼𑀦𑀺𑀫𑀺𑀢𑁆𑀢𑀁, 𑀬𑀢𑁆𑀢𑀓𑀸𑀦𑀺 𑀧𑀺𑀬𑀯𑀢𑁆𑀣𑀽𑀦𑀺, 𑀢𑀢𑁆𑀢𑀓𑀸𑀦𑀺 𑀤𑀼𑀓𑁆𑀔𑀸𑀦𑀺. 𑀢𑀲𑁆𑀫𑀸 𑀲𑀼𑀔𑀓𑀸𑀫𑁂𑀦 𑀤𑀼𑀓𑁆𑀔𑀧𑁆𑀧𑀝𑀺𑀓𑀽𑀮𑁂𑀦 𑀲𑀩𑁆𑀩𑀲𑁄 𑀧𑀺𑀬𑀯𑀢𑁆𑀣𑀼𑀢𑁄 𑀘𑀺𑀢𑁆𑀢𑀁 𑀯𑀺𑀯𑁂𑀘𑁂𑀢𑀩𑁆𑀩’’𑀦𑁆𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 ‘‘𑀬𑁂𑀲𑀁 𑀔𑁄 𑀯𑀺𑀲𑀸𑀔𑁂 𑀲𑀢𑀁 𑀧𑀺𑀬𑀸𑀦𑀺, 𑀲𑀢𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑀁 𑀧𑀺𑀬𑀸𑀦𑀻𑀢𑀺 𑀲𑀢𑀁 𑀧𑀺𑀬𑀸𑀬𑀺𑀢𑀩𑁆𑀩𑀯𑀢𑁆𑀣𑀽𑀦𑀺. ‘‘𑀲𑀢𑀁 𑀧𑀺𑀬’’𑀦𑁆𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀏𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲, 𑀢𑀸𑀯 𑀲𑀗𑁆𑀔𑁆𑀬𑀸 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀸, 𑀢𑀲𑁆𑀫𑀸 ‘‘𑀬𑁂𑀲𑀁 𑀤𑀲 𑀧𑀺𑀬𑀸𑀦𑀺, 𑀤𑀲 𑀢𑁂𑀲𑀁 𑀤𑀼𑀓𑁆𑀔𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀕𑀢𑀸. 𑀓𑁂𑀘𑀺 𑀧𑀦 ‘‘𑀬𑁂𑀲𑀁 𑀤𑀲 𑀧𑀺𑀬𑀸𑀦𑀁, 𑀤𑀲 𑀦𑁂𑀲𑀁 𑀤𑀼𑀓𑁆𑀔𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑀲𑁆𑀫𑀸 𑀧𑀦 𑀯𑀻𑀲𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀢𑀁, 𑀢𑀸𑀯 𑀲𑀗𑁆𑀔𑁆𑀬𑀸 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀸𑀯, 𑀢𑀲𑁆𑀫𑀸 𑀢𑀢𑁆𑀣𑀸𑀧𑀺 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀢𑀁𑀬𑁂𑀯 𑀕𑀳𑁂𑀢𑁆𑀯𑀸 ‘‘𑀬𑁂𑀲𑀁 𑀔𑁄 𑀯𑀺𑀲𑀸𑀔𑁂 𑀲𑀢𑀁 𑀧𑀺𑀬𑀸𑀦𑀺, 𑀲𑀢𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀕𑀢𑀸. 𑀲𑀩𑁆𑀩𑁂𑀲𑀫𑁆𑀧𑀺 𑀘 ‘‘𑀬𑁂𑀲𑀁 𑀏𑀓𑀁 𑀧𑀺𑀬𑀁, 𑀏𑀓𑀁 𑀢𑁂𑀲𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀸𑀞𑁄, 𑀦 𑀧𑀦 𑀤𑀼𑀓𑁆𑀔𑀲𑁆𑀲𑀸𑀢𑀺. 𑀏𑀢𑀲𑁆𑀫𑀺𑀜𑁆𑀳𑀺 𑀧𑀓𑁆𑀔𑁂 𑀏𑀓𑀭𑀲𑀸 𑀏𑀓𑀚𑁆𑀛𑀸𑀲𑀬𑀸 𑀘 𑀪𑀕𑀯𑀢𑁄 𑀤𑁂𑀲𑀦𑀸 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑀸𑀯 𑀧𑀸𑀴𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀲𑁄𑀓𑀧𑀭𑀺𑀤𑁂𑀯𑀸𑀤𑀺𑀓𑀁 𑀘𑁂𑀢𑀲𑀺𑀓𑀁 𑀓𑀸𑀬𑀺𑀓𑀜𑁆𑀘 𑀤𑀼𑀓𑁆𑀔𑀁 𑀧𑀺𑀬𑀯𑀢𑁆𑀣𑀼𑀦𑀺𑀫𑀺𑀢𑁆𑀢𑀁 𑀧𑀺𑀬𑀯𑀢𑁆𑀣𑀼𑀫𑁆𑀳𑀺 𑀲𑀢𑀺 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀺𑀢𑁆𑀯𑀸 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀜𑀸𑀢𑀺𑀪𑁄𑀕𑀭𑁄𑀕𑀲𑀻𑀮𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀳𑀺 𑀨𑀼𑀝𑁆𑀞𑀲𑁆𑀲 𑀅𑀦𑁆𑀢𑁄 𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀩𑀸𑀮𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀧𑀮𑀓𑁆𑀔𑀡𑀸 𑀬𑁂 𑀓𑁂𑀘𑀺 𑀫𑀼𑀤𑀼𑀫𑀚𑁆𑀛𑀸𑀤𑀺𑀪𑁂𑀤𑁂𑀦 𑀬𑀸𑀤𑀺𑀲𑀸 𑀢𑀸𑀤𑀺𑀲𑀸 𑀲𑁄𑀓𑀸 𑀯𑀸 𑀢𑁂𑀳𑀺𑀬𑁂𑀯 𑀨𑀼𑀝𑁆𑀞𑀲𑁆𑀲 𑀲𑁄𑀓𑀼𑀤𑁆𑀤𑁂𑀳𑀓𑀲𑀫𑀼𑀝𑁆𑀞𑀸𑀧𑀺𑀢𑀯𑀘𑀻𑀯𑀺𑀧𑁆𑀧𑀮𑀸𑀧𑀮𑀓𑁆𑀔𑀡𑀸 𑀧𑀭𑀺𑀤𑁂𑀯𑀺𑀢𑀸 𑀯𑀸 𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀧𑀝𑀺𑀳𑀢𑀓𑀸𑀬𑀲𑁆𑀲 𑀓𑀸𑀬𑀧𑀻𑀴𑀦𑀮𑀓𑁆𑀔𑀡𑀸 𑀤𑀼𑀓𑁆𑀔𑀸 𑀯𑀸 𑀢𑀣𑀸 𑀅𑀯𑀼𑀢𑁆𑀢𑀢𑁆𑀣𑀲𑁆𑀲 𑀯𑀺𑀓𑀧𑁆𑀧𑀦𑀢𑁆𑀣𑁂𑀦 𑀯𑀸𑀲𑀤𑁆𑀤𑁂𑀦 𑀕𑀳𑀺𑀢𑀸 𑀤𑁄𑀫𑀦𑀲𑁆𑀲𑀽𑀧𑀸𑀬𑀸𑀲𑀸𑀤𑀬𑁄 𑀯𑀸 𑀦𑀺𑀲𑁆𑀲𑀬𑀪𑁂𑀤𑁂𑀦 𑀘 𑀅𑀦𑁂𑀓𑀭𑀽𑀧𑀸 𑀦𑀸𑀦𑀸𑀯𑀺𑀥𑀸 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀤𑀺𑀲𑁆𑀲𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀺, 𑀲𑀩𑁆𑀩𑁂𑀧𑀺 𑀏𑀢𑁂 𑀧𑀺𑀬𑀁 𑀧𑀺𑀬𑀚𑀸𑀢𑀺𑀓𑀁 𑀲𑀢𑁆𑀢𑀁 𑀲𑀗𑁆𑀔𑀸𑀭𑀜𑁆𑀘 𑀧𑀝𑀺𑀘𑁆𑀘 𑀦𑀺𑀲𑁆𑀲𑀸𑀬 𑀆𑀕𑀫𑁆𑀫 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀧𑀪𑀯𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀲𑁆𑀫𑀺𑀁 𑀧𑀦 𑀬𑀣𑀸𑀯𑀼𑀢𑁆𑀢𑁂 𑀧𑀺𑀬𑀯𑀢𑁆𑀣𑀼𑀫𑁆𑀳𑀺 𑀧𑀺𑀬𑁂 𑀅𑀲𑀦𑁆𑀢𑁂 𑀧𑀺𑀬𑀪𑀸𑀯𑀓𑀭𑁂 𑀙𑀦𑁆𑀤𑀭𑀸𑀕𑁂 𑀧𑀳𑀻𑀦𑁂 𑀦 𑀓𑀤𑀸𑀘𑀺𑀧𑀺 𑀏𑀢𑁂 𑀪𑀯𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀺𑀬𑀢𑁄 𑀚𑀸𑀬𑀢𑀻 𑀲𑁄𑀓𑁄…𑀧𑁂… 𑀧𑁂𑀫𑀢𑁄 𑀚𑀸𑀬𑀢𑀻 𑀲𑁄𑀓𑁄’’𑀢𑀺 𑀘 𑀆𑀤𑀺 (𑀥. 𑀧. 𑁨𑁧𑁨-𑁨𑁧𑁩). 𑀢𑀣𑀸 ‘‘𑀧𑀺𑀬𑀧𑁆𑀧𑀪𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸, 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑁂𑀳𑀻’’𑀢𑀺 𑀘 𑀆𑀤𑀺 (𑀲𑀼. 𑀦𑀺. 𑁮𑁬𑁯). 𑀏𑀢𑁆𑀣 𑀘 ‘‘𑀧𑀭𑀺𑀤𑁂𑀯𑀺𑀢𑀸 𑀯𑀸 𑀤𑀼𑀓𑁆𑀔𑀸 𑀯𑀸’’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, ‘‘𑀧𑀭𑀺𑀤𑁂𑀯𑀺𑀢𑀸𑀦𑀺 𑀯𑀸 𑀤𑀼𑀓𑁆𑀔𑀸𑀦𑀺 𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀪𑀢𑁆𑀢𑀺𑀮𑁄𑀧𑁄 𑀯𑀸 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀫𑀸 𑀳𑀺 𑀢𑁂 𑀲𑀼𑀔𑀺𑀦𑁄 𑀯𑀻𑀢𑀲𑁄𑀓𑀸𑀢𑀺 𑀬𑀲𑁆𑀫𑀸 𑀧𑀺𑀬𑀧𑁆𑀧𑀪𑀽𑀢𑀸 𑀲𑁄𑀓𑀸𑀤𑀬𑁄 𑀬𑁂𑀲𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀏𑀯 𑀲𑀼𑀔𑀺𑀦𑁄 𑀯𑀻𑀢𑀲𑁄𑀓𑀸 𑀦𑀸𑀫. 𑀓𑁂 𑀧𑀦 𑀢𑁂? 𑀬𑁂𑀲𑀁 𑀧𑀺𑀬𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂 𑀬𑁂𑀲𑀁 𑀅𑀭𑀺𑀬𑀸𑀦𑀁 𑀲𑀩𑁆𑀩𑀲𑁄 𑀯𑀻𑀢𑀭𑀸𑀕𑀢𑁆𑀢𑀸 𑀓𑀢𑁆𑀣𑀘𑀺𑀧𑀺 𑀲𑀢𑁆𑀢𑀮𑁄𑀓𑁂 𑀲𑀗𑁆𑀔𑀸𑀭𑀮𑁄𑀓𑁂 𑀘 𑀧𑀺𑀬𑀁 𑀧𑀺𑀬𑀪𑀸𑀯𑁄 ‘‘𑀧𑀼𑀢𑁆𑀢𑁄’’𑀢𑀺 𑀯𑀸 ‘‘𑀪𑀸𑀢𑀸’’𑀢𑀺 𑀯𑀸 ‘‘𑀪𑀕𑀺𑀦𑀻’’𑀢𑀺 𑀯𑀸 ‘‘𑀪𑀭𑀺𑀬𑀸’’𑀢𑀺 𑀯𑀸 𑀧𑀺𑀬𑀁 𑀧𑀺𑀬𑀸𑀬𑀦𑀁 𑀧𑀺𑀬𑀪𑀸𑀯𑁄 𑀦𑀢𑁆𑀣𑀺, 𑀲𑀗𑁆𑀔𑀸𑀭𑀮𑁄𑀓𑁂𑀧𑀺 ‘‘𑀏𑀢𑀁 𑀫𑀫 𑀲𑀦𑁆𑀢𑀓𑀁, 𑀇𑀫𑀺𑀦𑀸𑀳𑀁 𑀇𑀫𑀁 𑀦𑀸𑀫 𑀲𑀼𑀔𑀁 𑀮𑀪𑀸𑀫𑀺 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀬𑀁 𑀧𑀺𑀬𑀸𑀬𑀦𑀁 𑀧𑀺𑀬𑀪𑀸𑀯𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀢𑁆𑀣𑀬𑀸𑀦𑁄, 𑀧𑀺𑀬𑀁 𑀦 𑀓𑀬𑀺𑀭𑀸𑀣 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺 𑀬𑀲𑁆𑀫𑀸 𑀘 𑀲𑀼𑀔𑀺𑀦𑁄 𑀦𑀸𑀫 𑀯𑀻𑀢𑀲𑁄𑀓𑀸, 𑀯𑀻𑀢𑀲𑁄𑀓𑀢𑁆𑀢𑀸𑀯 𑀓𑀢𑁆𑀣𑀘𑀺𑀧𑀺 𑀯𑀺𑀲𑀬𑁂 𑀧𑀺𑀬𑀪𑀸𑀯𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀬𑀣𑀸𑀯𑀼𑀢𑁆𑀢𑀲𑁄𑀓𑀸𑀪𑀸𑀯𑁂𑀦 𑀘 𑀅𑀲𑁄𑀓𑀁 𑀅𑀲𑁄𑀓𑀪𑀸𑀯𑀁 𑀭𑀸𑀕𑀭𑀚𑀸𑀤𑀺𑀯𑀺𑀕𑀫𑀦𑁂𑀦 𑀯𑀺𑀭𑀚𑀁 𑀯𑀺𑀭𑀚𑀪𑀸𑀯𑀁 𑀅𑀭𑀳𑀢𑁆𑀢𑀁, 𑀲𑁄𑀓𑀲𑁆𑀲 𑀭𑀸𑀕𑀭𑀚𑀸𑀤𑀻𑀦𑀜𑁆𑀘 𑀅𑀪𑀸𑀯𑀳𑁂𑀢𑀼𑀪𑀸𑀯𑀢𑁄 𑀯𑀸 ‘‘𑀅𑀲𑁄𑀓𑀁 𑀯𑀺𑀭𑀚’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑀬𑀸𑀦𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀲𑁆𑀲 𑀯𑀲𑁂𑀦 𑀙𑀦𑁆𑀤𑀚𑀸𑀢𑁄 𑀓𑀢𑁆𑀣𑀘𑀺 𑀮𑁄𑀓𑁂 𑀭𑀽𑀧𑀸𑀤𑀺𑀥𑀫𑁆𑀫𑁂 𑀅𑀦𑁆𑀢𑀫𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀧𑀺 𑀧𑀺𑀬𑀁 𑀧𑀺𑀬𑀪𑀸𑀯𑀁 𑀯𑀺𑀬𑀸𑀬𑀦𑀁 𑀦 𑀓𑀬𑀺𑀭𑀸𑀣 𑀦 𑀉𑀧𑁆𑀧𑀸𑀤𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸, 𑀧𑀕𑁂𑀯 𑀅𑀥𑀫𑁆𑀫𑀸’’𑀢𑀺 (𑀫. 𑀦𑀺. 𑁧.𑁨𑁪𑁦).

𑀅𑀝𑁆𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.