𑁮. 𑀧𑀸𑀝𑀮𑀺𑀕𑀸𑀫𑀺𑀬𑀯𑀕𑁆𑀕𑁄

𑁧. 𑀧𑀞𑀫𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀧𑀸𑀝𑀮𑀺𑀕𑀸𑀫𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 𑀅𑀫𑀢𑀥𑀸𑀢𑀼𑀲𑀦𑁆𑀦𑀺𑀲𑁆𑀲𑀺𑀢𑀸𑀬 𑀅𑀲𑀗𑁆𑀔𑀢𑀥𑀸𑀢𑀼𑀬𑀸 𑀧𑀯𑁂𑀤𑀦𑀯𑀲𑁂𑀦 𑀧𑀯𑀢𑁆𑀢𑀸𑀬. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀥𑀫𑁆𑀫𑀤𑁂𑀲𑀦𑀸𑀬. 𑀲𑀦𑁆𑀤𑀲𑁆𑀲𑁂𑀢𑀻𑀢𑀺 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀺. 𑀲𑀫𑀸𑀤𑀧𑁂𑀢𑀻𑀢𑀺 𑀢𑀫𑁂𑀯 𑀅𑀢𑁆𑀣𑀁 𑀢𑁂 𑀪𑀺𑀓𑁆𑀔𑀽 𑀕𑀡𑁆𑀳𑀸𑀧𑁂𑀢𑀺. 𑀲𑀫𑀼𑀢𑁆𑀢𑁂𑀚𑁂𑀢𑀻𑀢𑀺 𑀢𑀤𑀢𑁆𑀣𑀕𑀳𑀡𑁂 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀢𑁂𑀚𑁂𑀢𑀺 𑀚𑁄𑀢𑁂𑀢𑀺. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀦𑀺𑀩𑁆𑀩𑀸𑀦𑀕𑀼𑀡𑁂𑀳𑀺 𑀲𑀫𑁆𑀫𑀤𑁂𑀯 𑀲𑀩𑁆𑀩𑀧𑁆𑀧𑀓𑀸𑀭𑁂𑀳𑀺 𑀢𑁄𑀲𑁂𑀢𑀺.

𑀅𑀣 𑀯𑀸 𑀲𑀦𑁆𑀤𑀲𑁆𑀲𑁂𑀢𑀻𑀢𑀺 ‘‘𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀫𑀳𑀸𑀯. 𑁮) 𑀦𑀬𑁂𑀦𑁂𑀯 𑀲𑀩𑁆𑀩𑀣𑀸 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀢𑁂𑀲𑀁 𑀢𑁂𑀲𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀲𑀫𑁆𑀫𑀸 𑀤𑀲𑁆𑀲𑁂𑀢𑀺. 𑀲𑀫𑀸𑀤𑀧𑁂𑀢𑀻𑀢𑀺 ‘‘𑀇𑀫𑀺𑀦𑀸 𑀅𑀭𑀺𑀬𑀫𑀕𑁆𑀕𑁂𑀦 𑀢𑀁 𑀅𑀥𑀺𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀅𑀥𑀺𑀕𑀫𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀢𑀢𑁆𑀣 𑀪𑀺𑀓𑁆𑀔𑀽 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑁂 𑀓𑀭𑁄𑀦𑁆𑀢𑁄 𑀲𑀫𑁆𑀫𑀸 𑀆𑀤𑀧𑁂𑀢𑀺 𑀕𑀡𑁆𑀳𑀸𑀧𑁂𑀢𑀺. 𑀲𑀫𑀼𑀢𑁆𑀢𑁂𑀚𑁂𑀢𑀻𑀢𑀺 𑀏𑀢𑀁 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀦𑁆𑀢𑀺 ‘‘𑀫𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀧𑀫𑀸𑀤𑀁 𑀅𑀦𑁆𑀢𑀭𑀸𑀯𑁄𑀲𑀸𑀦𑀁 𑀆𑀧𑀚𑁆𑀚𑀣, 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀯𑀻𑀭𑀺𑀬𑀯𑀢𑁄 𑀦𑀬𑀺𑀤𑀁 𑀤𑀼𑀓𑁆𑀓𑀭𑀁, 𑀢𑀲𑁆𑀫𑀸 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀺𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀸𑀬 𑀉𑀝𑁆𑀞𑀳𑀣 𑀖𑀝𑀬𑀣 𑀯𑀸𑀬𑀫𑁂𑀬𑁆𑀬𑀸𑀣𑀸’’𑀢𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀉𑀲𑁆𑀲𑀸𑀳𑁂𑀢𑀺, 𑀢𑀢𑁆𑀣 𑀯𑀸 𑀘𑀺𑀢𑁆𑀢𑀁 𑀯𑁄𑀤𑀧𑁂𑀢𑀺. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 ‘‘𑀫𑀤𑀦𑀺𑀫𑁆𑀫𑀤𑀦𑁄 𑀧𑀺𑀧𑀸𑀲𑀯𑀺𑀦𑀬𑁄 𑀆𑀮𑀬𑀲𑀫𑀼𑀕𑁆𑀖𑀸𑀢𑁄’’𑀢𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦), 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 (𑀲𑀁. 𑀦𑀺. 𑁪.𑁩𑁬𑁭; 𑀇𑀢𑀺𑀯𑀼. 𑁪𑁪), 𑀅𑀲𑀗𑁆𑀔𑀢𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁬𑁭), 𑀅𑀫𑀢𑀜𑁆𑀘 𑀲𑀦𑁆𑀢𑀦𑁆𑀢𑀺𑀆𑀤𑀺𑀦𑀸 𑀘 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 (𑀲𑀁. 𑀦𑀺. 𑁪.𑁪𑁦𑁯) 𑀦𑀺𑀩𑁆𑀩𑀸𑀦𑀸𑀦𑀺𑀲𑀁𑀲𑀧𑁆𑀧𑀓𑀸𑀲𑀦𑁂𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀁 𑀢𑁄𑀲𑁂𑀦𑁆𑀢𑁄 𑀳𑀸𑀲𑁂𑀦𑁆𑀢𑁄 𑀲𑀫𑁆𑀧𑀳𑀁𑀲𑁂𑀢𑀺 𑀲𑀫𑀲𑁆𑀲𑀸𑀲𑁂𑀢𑀺.

𑀢𑁂𑀥𑀸𑀢𑀺 𑀢𑁂 𑀇𑀥. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 ‘‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀅𑀬𑀁 𑀦𑁄 𑀅𑀢𑁆𑀣𑁄 𑀅𑀥𑀺𑀕𑀦𑁆𑀢𑀩𑁆𑀩𑁄’’𑀢𑀺 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀸𑀬 𑀤𑁂𑀲𑀦𑀸𑀬 𑀅𑀢𑁆𑀣𑀺𑀓𑀸 𑀳𑀼𑀢𑁆𑀯𑀸. 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸 𑀅𑀦𑀜𑁆𑀜𑀯𑀺𑀳𑀺𑀢𑀸 𑀢𑀁 𑀤𑁂𑀲𑀦𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀕𑀢𑀫𑁂𑀯 𑀓𑀢𑁆𑀯𑀸. 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀲𑀩𑁆𑀩𑁂𑀦 𑀓𑀸𑀭𑀓𑀘𑀺𑀢𑁆𑀢𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀤𑁂𑀲𑀦𑀁 𑀆𑀯𑀚𑁆𑀚𑁂𑀢𑁆𑀯𑀸, 𑀢𑀕𑁆𑀕𑀢𑀫𑁂𑀯 𑀆𑀪𑁄𑀕𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀲𑀩𑁆𑀩𑀲𑁆𑀫𑀸 𑀘𑀺𑀢𑁆𑀢𑀢𑁄 𑀤𑁂𑀲𑀦𑀁 𑀲𑀫𑁆𑀫𑀸 𑀅𑀦𑀼 𑀅𑀦𑀼 𑀆𑀳𑀭𑀺𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑁂𑀲𑁂𑀦𑁆𑀢𑀲𑁆𑀲 𑀬𑁂𑀳𑀺 𑀘𑀺𑀢𑁆𑀢𑁂𑀳𑀺 𑀤𑁂𑀲𑀦𑀸 𑀓𑀢𑀸, 𑀲𑀩𑁆𑀩𑀲𑁆𑀫𑀸 𑀘𑀺𑀢𑁆𑀢𑀢𑁄 𑀧𑀯𑀢𑁆𑀢𑀁 𑀤𑁂𑀲𑀦𑀁 𑀩𑀳𑀺 𑀕𑀦𑁆𑀢𑀼𑀁 𑀅𑀤𑁂𑀦𑁆𑀢𑁄 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀅𑀦𑀼 𑀅𑀦𑀼 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀆𑀳𑀭𑀺𑀢𑁆𑀯𑀸 𑀬𑀣𑀸𑀤𑁂𑀲𑀺𑀢𑀤𑁂𑀲𑀺𑀢𑀁 𑀤𑁂𑀲𑀦𑀁 𑀲𑀼𑀝𑁆𑀞𑀼 𑀉𑀧𑀥𑀸𑀭𑁂𑀢𑁆𑀯𑀸. 𑀑𑀳𑀺𑀢𑀲𑁄𑀢𑀸𑀢𑀺 𑀅𑀯𑀳𑀺𑀢𑀲𑁄𑀢𑀸, 𑀲𑀼𑀝𑁆𑀞𑀼 𑀉𑀧𑀺𑀢𑀲𑁄𑀢𑀸. 𑀑𑀳𑀺𑀢𑀲𑁄𑀢𑀸𑀢𑀺 𑀯𑀸 𑀅𑀯𑀺𑀓𑁆𑀔𑀺𑀢𑁆𑀢𑀲𑁄𑀢𑀸. 𑀢𑀫𑁂𑀯 𑀉𑀧𑀮𑀩𑁆𑀪𑀫𑀸𑀦𑁄𑀧𑀺 𑀳𑀺 𑀲𑀯𑀦𑁂 𑀅𑀯𑀺𑀓𑁆𑀔𑁂𑀧𑁄 𑀲𑀢𑀺𑀲𑀁𑀯𑀭𑁄 𑀯𑀺𑀬 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀲𑁄𑀢𑀺𑀦𑁆𑀤𑁆𑀭𑀺𑀬𑁂𑀧𑀺 𑀯𑀢𑁆𑀢𑀼𑀫𑀭𑀳𑀢𑀻𑀢𑀺. 𑀏𑀢𑁆𑀣 𑀘 ‘‘𑀅𑀝𑁆𑀞𑀺𑀁 𑀓𑀢𑁆𑀯𑀸’’𑀢𑀺𑀆𑀤𑀻𑀳𑀺 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀧𑁆𑀧𑀭𑀪𑀸𑀯𑀢𑁄 𑀲𑀯𑀦𑁂 𑀆𑀤𑀭𑀤𑀻𑀧𑀦𑁂𑀦 𑀲𑀓𑁆𑀓𑀘𑁆𑀘𑀲𑀯𑀦𑀁 𑀤𑀲𑁆𑀲𑁂𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀲𑁆𑀲𑀸 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀓𑀣𑀸𑀬 𑀲𑀯𑀦𑁂 𑀆𑀤𑀭𑀓𑀸𑀭𑀺𑀢𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀦𑀺𑀩𑁆𑀩𑀸𑀦𑀲𑁆𑀲 𑀢𑀩𑁆𑀩𑀺𑀥𑀼𑀭𑀥𑀫𑁆𑀫𑀤𑁂𑀲𑀦𑀸𑀫𑀼𑀔𑁂𑀦 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀪𑀸𑀯𑀯𑀺𑀪𑀸𑀯𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀅𑀢𑁆𑀣𑀻𑀢𑀺 𑀯𑀺𑀚𑁆𑀚𑀢𑀺, 𑀧𑀭𑀫𑀢𑁆𑀣𑀢𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀯𑁂𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀮𑀧𑀦𑀁. 𑀦𑀦𑀼 𑀘 𑀉𑀤𑀸𑀦𑀁 𑀦𑀸𑀫 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀸𑀧𑀺𑀢𑁄 𑀯𑀸 𑀥𑀫𑁆𑀫𑀲𑀁𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑁄 𑀯𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑁄 𑀉𑀤𑀸𑀳𑀸𑀭𑁄, 𑀢𑀣𑀸 𑀘𑁂𑀯 𑀏𑀢𑁆𑀢𑀓𑁂𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀁, 𑀇𑀥 𑀓𑀲𑁆𑀫𑀸 𑀪𑀕𑀯𑀸 𑀉𑀤𑀸𑀦𑁂𑀦𑁆𑀢𑁄 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺? 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀸𑀧𑀦𑀢𑁆𑀣𑀁. 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀳𑀺 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀉𑀧𑁆𑀧𑀦𑁆𑀦𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀇𑀥 𑀦𑀺𑀩𑁆𑀩𑀸𑀦𑀯𑀚𑁆𑀚𑁄 𑀲𑀩𑁆𑀩𑁄 𑀲𑀪𑀸𑀯𑀥𑀫𑁆𑀫𑁄 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑁄𑀯 𑀉𑀧𑀮𑀩𑁆𑀪𑀢𑀺, 𑀦 𑀧𑀘𑁆𑀘𑀬𑀦𑀺𑀭𑀧𑁂𑀓𑁆𑀔𑁄. 𑀅𑀬𑀁 𑀧𑀦 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀓𑀢𑀫𑀧𑀘𑁆𑀘𑀬𑁂 𑀉𑀧𑀮𑀩𑁆𑀪𑀢𑀻𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑁂 𑀘 𑀲𑀜𑁆𑀜𑀸𑀧𑁂𑀢𑀼𑀓𑀸𑀫𑁄 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦’’𑀦𑁆𑀢𑀺𑀆𑀤𑀺𑀫𑀸𑀳, 𑀦 𑀏𑀓𑀦𑁆𑀢𑀢𑁄𑀯 𑀢𑁂 𑀧𑀝𑀺𑀕𑁆𑀕𑀸𑀳𑀓𑁂 𑀓𑀢𑁆𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀤𑀸𑀬𑀢𑀦𑀦𑁆𑀢𑀺 𑀢𑀁 𑀓𑀸𑀭𑀡𑀁. 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀫𑀕𑁆𑀕𑀨𑀮𑀜𑀸𑀡𑀸𑀤𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀢𑁄 𑀭𑀽𑀧𑀸𑀤𑀻𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀸𑀦𑀻𑀢𑀺 𑀓𑀸𑀭𑀡𑀝𑁆𑀞𑁂𑀦 ‘‘𑀆𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀁 𑀧𑀯𑁂𑀤𑁂𑀲𑀺.

𑀢𑀢𑁆𑀭𑀸𑀬𑀁 𑀥𑀫𑁆𑀫𑀦𑁆𑀯𑀬𑁄 𑁋 𑀇𑀥 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀲𑀗𑁆𑀔𑀢𑀸𑀬𑀧𑀺 𑀥𑀸𑀢𑀼𑀬𑀸 𑀪𑀯𑀺𑀢𑀩𑁆𑀩𑀁 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀪𑀸𑀯𑀥𑀫𑁆𑀫𑀸𑀦𑀁. 𑀬𑀣𑀸 𑀳𑀺 𑀤𑀼𑀓𑁆𑀔𑁂 𑀯𑀺𑀚𑁆𑀚𑀫𑀸𑀦𑁂 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀁 𑀲𑀼𑀔𑀫𑁆𑀧𑀺 𑀯𑀺𑀚𑁆𑀚𑀢𑀺𑀬𑁂𑀯, 𑀢𑀣𑀸 𑀉𑀡𑁆𑀳𑁂 𑀯𑀺𑀚𑁆𑀚𑀫𑀸𑀦𑁂 𑀲𑀻𑀢𑀫𑁆𑀧𑀺 𑀯𑀺𑀚𑁆𑀚𑀢𑀺, 𑀧𑀸𑀧𑀥𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀮𑁆𑀬𑀸𑀡𑀥𑀫𑁆𑀫𑀸𑀧𑀺 𑀯𑀺𑀚𑁆𑀚𑀦𑁆𑀢𑀺 𑀏𑀯. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀬𑀣𑀸𑀧𑀺 𑀤𑀼𑀓𑁆𑀔𑁂 𑀯𑀺𑀚𑁆𑀚𑀦𑁆𑀢𑁂, 𑀲𑀼𑀔𑀁 𑀦𑀸𑀫𑀧𑀺 𑀯𑀺𑀚𑁆𑀚𑀢𑀺;

𑀏𑀯𑀁 𑀪𑀯𑁂 𑀯𑀺𑀚𑁆𑀚𑀫𑀸𑀦𑁂, 𑀯𑀺𑀪𑀯𑁄𑀧𑀺 𑀇𑀘𑁆𑀙𑀺𑀢𑀩𑁆𑀩𑀓𑁄.

‘‘𑀬𑀣𑀸𑀧𑀺 𑀉𑀡𑁆𑀳𑁂 𑀯𑀺𑀚𑁆𑀚𑀦𑁆𑀢𑁂, 𑀅𑀧𑀭𑀁 𑀯𑀺𑀚𑁆𑀚𑀢𑀺 𑀲𑀻𑀢𑀮𑀁;

𑀏𑀯𑀁 𑀢𑀺𑀯𑀺𑀥𑀕𑁆𑀕𑀺 𑀯𑀺𑀚𑁆𑀚𑀦𑁆𑀢𑁂, 𑀦𑀺𑀩𑁆𑀩𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀓𑀁.

‘‘𑀬𑀣𑀸𑀧𑀺 𑀧𑀸𑀧𑁂 𑀯𑀺𑀚𑁆𑀚𑀦𑁆𑀢𑁂, 𑀓𑀮𑁆𑀬𑀸𑀡𑀫𑀧𑀺 𑀯𑀺𑀚𑁆𑀚𑀢𑀺;

𑀏𑀯𑀫𑁂𑀯 𑀚𑀸𑀢𑀺 𑀯𑀺𑀚𑁆𑀚𑀦𑁆𑀢𑁂, 𑀅𑀚𑀸𑀢𑀺𑀫𑀧𑀺 𑀇𑀘𑁆𑀙𑀺𑀢𑀩𑁆𑀩𑀓’’𑀦𑁆𑀢𑀺𑀆𑀤𑀺. (𑀩𑀼. 𑀯𑀁. 𑁨.𑁧𑁦-𑁧𑁨) 𑁋

𑀅𑀧𑀺𑀘 𑀦𑀺𑀩𑁆𑀩𑀸𑀦𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀯𑀺𑀘𑀸𑀭𑀡𑀁 𑀧𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀏𑀯𑀁 𑀪𑀕𑀯𑀸 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀁 𑀲𑀫𑁆𑀫𑀼𑀔𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀩𑁆𑀩𑀺𑀥𑀼𑀭𑀥𑀫𑁆𑀫𑀸𑀧𑁄𑀳𑀦𑀫𑀼𑀔𑁂𑀦𑀲𑁆𑀲 𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁, ‘‘𑀬𑀢𑁆𑀣 𑀦𑁂𑀯 𑀧𑀣𑀯𑀻 𑀦 𑀆𑀧𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀥𑀼𑀭𑀲𑀪𑀸𑀯𑀁 𑀬𑀣𑀸 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀓𑀢𑁆𑀣𑀘𑀺 𑀦𑀢𑁆𑀣𑀺, 𑀢𑀣𑀸 𑀢𑀢𑁆𑀣𑀧𑀺 𑀲𑀩𑁆𑀩𑁂 𑀲𑀗𑁆𑀔𑀢𑀥𑀫𑁆𑀫𑀸. 𑀦 𑀳𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀲𑀫𑁄𑀥𑀸𑀦𑀁 𑀲𑀫𑁆𑀪𑀯𑀢𑀺. 𑀢𑀢𑁆𑀭𑀸𑀬𑀁 𑀅𑀢𑁆𑀣𑀯𑀺𑀪𑀸𑀯𑀦𑀸 𑁋 𑀬𑀢𑁆𑀣 𑀬𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂 𑀬𑀲𑁆𑀲𑀁 𑀅𑀲𑀗𑁆𑀔𑀢𑀥𑀸𑀢𑀼𑀬𑀁 𑀦𑁂𑀯 𑀓𑀓𑁆𑀔𑀴𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼 𑀅𑀢𑁆𑀣𑀺, 𑀦 𑀧𑀕𑁆𑀖𑀭𑀡𑀮𑀓𑁆𑀔𑀡𑀸 𑀆𑀧𑁄𑀥𑀸𑀢𑀼, 𑀦 𑀉𑀡𑁆𑀳𑀮𑀓𑁆𑀔𑀡𑀸 𑀢𑁂𑀚𑁄𑀥𑀸𑀢𑀼, 𑀦 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸 𑀯𑀸𑀬𑁄𑀥𑀸𑀢𑀼 𑀅𑀢𑁆𑀣𑀺. 𑀇𑀢𑀺 𑀘𑀢𑀼𑀫𑀳𑀸𑀪𑀽𑀢𑀸𑀪𑀸𑀯𑀯𑀘𑀦𑁂𑀦 𑀬𑀣𑀸 𑀲𑀩𑁆𑀩𑀲𑁆𑀲𑀧𑀺 𑀉𑀧𑀸𑀤𑀸𑀭𑀽𑀧𑀲𑁆𑀲 𑀅𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸. 𑀏𑀯𑀁 𑀅𑀦𑀯𑀲𑁂𑀲𑀢𑁄 𑀓𑀸𑀫𑀭𑀽𑀧𑀪𑀯𑀲𑁆𑀲 𑀢𑀢𑁆𑀣 𑀅𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑀢𑁄. 𑀦 𑀳𑀺 𑀫𑀳𑀸𑀪𑀽𑀢𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀏𑀓𑀯𑁄𑀓𑀸𑀭𑀪𑀯𑁄 𑀯𑀸 𑀲𑀫𑁆𑀪𑀯𑀢𑀻𑀢𑀺.

𑀇𑀤𑀸𑀦𑀺 𑀅𑀭𑀽𑀧𑀲𑀪𑀸𑀯𑀢𑁆𑀢𑁂𑀧𑀺 𑀦𑀺𑀩𑁆𑀩𑀸𑀦𑀲𑁆𑀲 𑀅𑀭𑀽𑀧𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀢𑀢𑁆𑀣 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁, ‘‘𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁…𑀧𑁂… 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑁆𑀢𑀺 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑁂𑀦 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑁄 𑀢𑀺𑀯𑀺𑀥𑁄𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀤𑀕𑁆𑀕𑁂𑀦 𑀘 𑀦𑀺𑀩𑁆𑀩𑀸𑀦𑁂 𑀓𑀸𑀫𑀮𑁄𑀓𑀸𑀤𑀻𑀦𑀁 𑀅𑀪𑀸𑀯𑁄 𑀳𑁄𑀢𑀺, 𑀢𑀤𑀕𑁆𑀕𑁂𑀦 𑀢𑀢𑁆𑀣 𑀇𑀥𑀮𑁄𑀓𑀧𑀭𑀮𑁄𑀓𑀸𑀦𑀫𑁆𑀧𑀺 𑀅𑀪𑀸𑀯𑁄𑀢𑀺 𑀆𑀳 𑁋 ‘‘𑀦𑀸𑀬𑀁 𑀮𑁄𑀓𑁄 𑀦 𑀧𑀭𑀮𑁄𑀓𑁄’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 ‘‘𑀇𑀢𑁆𑀣𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑁄 𑀇𑀥𑀮𑁄𑀓𑁄’’𑀢𑀺 𑀘 𑀮𑀤𑁆𑀥𑀯𑁄𑀳𑀸𑀭𑁄 𑀔𑀦𑁆𑀥𑀸𑀤𑀺𑀮𑁄𑀓𑁄, 𑀬𑁄 𑀘 ‘‘𑀢𑀢𑁄 𑀅𑀜𑁆𑀜𑀣𑀸 𑀧𑀭𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺 𑀘 𑀮𑀤𑁆𑀥𑀯𑁄𑀳𑀸𑀭𑁄 𑀔𑀦𑁆𑀥𑀸𑀤𑀺𑀮𑁄𑀓𑁄, 𑀢𑀤𑀼𑀪𑀬𑀫𑁆𑀧𑀺 𑀢𑀢𑁆𑀣 𑀦𑀢𑁆𑀣𑀻𑀢𑀺. 𑀦 𑀉𑀪𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀢𑀺 𑀬𑀲𑁆𑀫𑀸 𑀭𑀽𑀧𑀕𑀢𑁂 𑀲𑀢𑀺 𑀢𑀫𑁄 𑀦𑀸𑀫 𑀲𑀺𑀬𑀸, 𑀢𑀫𑀲𑁆𑀲 𑀘 𑀯𑀺𑀥𑀫𑀦𑀢𑁆𑀣𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀳𑀺 𑀯𑀢𑁆𑀢𑀺𑀢𑀩𑁆𑀩𑀁. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀦 𑀬𑀢𑁆𑀣 𑀭𑀽𑀧𑀕𑀢𑀫𑁂𑀯 𑀦𑀢𑁆𑀣𑀺, 𑀓𑀼𑀢𑁄 𑀢𑀢𑁆𑀣 𑀢𑀫𑁄. 𑀢𑀫𑀲𑁆𑀲 𑀯𑀸 𑀯𑀺𑀥𑀫𑀦𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀢𑀲𑁆𑀫𑀸 𑀘𑀦𑁆𑀤𑀺𑀫𑀸 𑀲𑀽𑀭𑀺𑀬𑁄 𑀘𑀸𑀢𑀺 𑀉𑀪𑁄𑀧𑀺 𑀢𑀢𑁆𑀣 𑀦𑀺𑀩𑁆𑀩𑀸𑀦𑁂 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀆𑀮𑁄𑀓𑀲𑀪𑀸𑀯𑀢𑀁𑀬𑁂𑀯 𑀦𑀺𑀩𑁆𑀩𑀸𑀦𑀲𑁆𑀲 𑀤𑀲𑁆𑀲𑁂𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀅𑀦𑀪𑀺𑀲𑀫𑁂𑀢𑀸𑀯𑀻𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀤𑀺𑀫𑀢𑀺𑀲𑀁𑀲𑀸𑀭𑁂 𑀲𑀼𑀧𑀺𑀦𑀦𑁆𑀢𑁂𑀧𑀺 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀧𑀭𑀫𑀕𑀫𑁆𑀪𑀻𑀭𑀁 𑀅𑀢𑀺𑀤𑀼𑀤𑁆𑀤𑀲𑀁 𑀲𑀡𑁆𑀳𑀲𑀼𑀔𑀼𑀫𑀁 𑀅𑀢𑀓𑁆𑀓𑀸𑀯𑀘𑀭𑀁 𑀅𑀘𑁆𑀘𑀦𑁆𑀢𑀲𑀦𑁆𑀢𑀁 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀁 𑀅𑀢𑀺𑀧𑀡𑀻𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀯𑀺𑀪𑀸𑀯𑁂𑀦𑁆𑀢𑁄 𑀧𑀞𑀫𑀁 𑀢𑀸𑀯 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦’’𑀦𑁆𑀢𑀺 𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑀸 𑀢𑁂𑀲𑀁 𑀅𑀜𑁆𑀜𑀸𑀡𑀸𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 ‘‘𑀬𑀢𑁆𑀣 𑀦𑁂𑀯 𑀧𑀣𑀯𑀻 …𑀧𑁂… 𑀦 𑀉𑀪𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸’’𑀢𑀺 𑀢𑀤𑀜𑁆𑀜𑀥𑀫𑁆𑀫𑀸𑀧𑁄𑀳𑀦𑀫𑀼𑀔𑁂𑀦 𑀢𑀁 𑀯𑀺𑀪𑀸𑀯𑁂𑀢𑀺 𑀥𑀫𑁆𑀫𑀭𑀸𑀚𑀸. 𑀢𑁂𑀦 𑀧𑀣𑀯𑀻𑀆𑀤𑀺𑀲𑀩𑁆𑀩𑀲𑀗𑁆𑀔𑀢𑀥𑀫𑁆𑀫𑀯𑀺𑀥𑀼𑀭𑀲𑀪𑀸𑀯𑀸 𑀬𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼, 𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳, ‘‘𑀢𑀢𑁆𑀭𑀸𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀆𑀕𑀢𑀺𑀁 𑀯𑀤𑀸𑀫𑀻’’𑀢𑀺.

𑀢𑀢𑁆𑀣 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁. 𑀅𑀧𑀺𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁂. 𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀲𑀗𑁆𑀔𑀸𑀭𑀧𑀯𑀢𑁆𑀢𑁂 𑀓𑀼𑀢𑁄𑀘𑀺 𑀓𑀲𑁆𑀲𑀘𑀺 𑀆𑀕𑀢𑀺𑀁 𑀦 𑀯𑀤𑀸𑀫𑀺 𑀬𑀣𑀸𑀧𑀘𑁆𑀘𑀬𑀁 𑀢𑀢𑁆𑀣 𑀥𑀫𑁆𑀫𑀫𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄. 𑀏𑀯𑀁 𑀢𑀲𑁆𑀫𑀺𑀫𑁆𑀧𑀺 𑀆𑀬𑀢𑀦𑁂 𑀦𑀺𑀩𑁆𑀩𑀸𑀦𑁂 𑀓𑀼𑀢𑁄𑀘𑀺 𑀆𑀕𑀢𑀺𑀁 𑀆𑀕𑀫𑀦𑀁 𑀦𑁂𑀯 𑀯𑀤𑀸𑀫𑀺 𑀆𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀢𑀸𑀬 𑀅𑀪𑀸𑀯𑀢𑁄. 𑀦 𑀕𑀢𑀺𑀦𑁆𑀢𑀺 𑀓𑀢𑁆𑀣𑀘𑀺 𑀕𑀫𑀦𑀁 𑀦 𑀯𑀤𑀸𑀫𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀢𑀸𑀬 𑀅𑀪𑀸𑀯𑀢𑁄. 𑀦 𑀳𑀺 𑀢𑀢𑁆𑀣 𑀲𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀜𑀸𑀡𑁂𑀦 𑀆𑀭𑀫𑁆𑀫𑀡𑀓𑀭𑀡𑀁 𑀆𑀕𑀢𑀺𑀕𑀢𑀺𑀬𑁄 𑀲𑀫𑁆𑀪𑀯𑀦𑁆𑀢𑀺, 𑀦𑀸𑀧𑀺 𑀞𑀺𑀢𑀺𑀘𑀼𑀢𑀽𑀧𑀧𑀢𑁆𑀢𑀺𑀬𑁄 𑀯𑀤𑀸𑀫𑀺. ‘‘𑀢𑀤𑀸𑀧𑀳’’𑀦𑁆𑀢𑀺𑀧𑀺 𑀧𑀸𑀴𑀺. 𑀢𑀲𑁆𑀲𑀢𑁆𑀣𑁄 𑁋 𑀢𑀫𑁆𑀧𑀺 𑀆𑀬𑀢𑀦𑀁 𑀕𑀸𑀫𑀦𑁆𑀢𑀭𑀢𑁄 𑀕𑀸𑀫𑀦𑁆𑀢𑀭𑀁 𑀯𑀺𑀬 𑀦 𑀆𑀕𑀦𑁆𑀢𑀩𑁆𑀩𑀢𑀸𑀬 𑀦 𑀆𑀕𑀢𑀺, 𑀦 𑀕𑀦𑁆𑀢𑀩𑁆𑀩𑀢𑀸𑀬 𑀦 𑀕𑀢𑀺, 𑀧𑀣𑀯𑀻𑀧𑀩𑁆𑀩𑀢𑀸𑀤𑀺 𑀯𑀺𑀬 𑀅𑀧𑀢𑀺𑀝𑁆𑀞𑀸𑀦𑀢𑀸𑀬 𑀦 𑀞𑀺𑀢𑀺, 𑀅𑀧𑀘𑁆𑀘𑀬𑀢𑁆𑀢𑀸 𑀯𑀸 𑀉𑀧𑁆𑀧𑀸𑀤𑀸𑀪𑀸𑀯𑁄, 𑀢𑀢𑁄 𑀅𑀫𑀢𑀲𑀪𑀸𑀯𑀢𑁆𑀢𑀸 𑀘𑀯𑀦𑀸𑀪𑀸𑀯𑁄, 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀪𑀸𑀯𑀢𑁄 𑀘𑁂𑀯 𑀢𑀤𑀼𑀪𑀬𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀞𑀺𑀢𑀺𑀬𑀸 𑀘 𑀅𑀪𑀸𑀯𑀢𑁄 𑀦 𑀞𑀺𑀢𑀺𑀁 𑀦 𑀘𑀼𑀢𑀺𑀁 𑀦 𑀉𑀧𑀧𑀢𑁆𑀢𑀺𑀁 𑀯𑀤𑀸𑀫𑀺. 𑀓𑁂𑀯𑀮𑀁 𑀧𑀦 𑀢𑀁 𑀅𑀭𑀽𑀧𑀲𑀪𑀸𑀯𑀢𑁆𑀢𑀸 𑀅𑀧𑀘𑁆𑀘𑀬𑀢𑁆𑀢𑀸 𑀘 𑀦 𑀓𑀢𑁆𑀣𑀘𑀺 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀅𑀧𑁆𑀧𑀢𑀺𑀝𑁆𑀞𑀁. 𑀢𑀢𑁆𑀣 𑀧𑀯𑀢𑁆𑀢𑀸𑀪𑀸𑀯𑀢𑁄 𑀧𑀯𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀘 𑀅𑀧𑁆𑀧𑀯𑀢𑁆𑀢𑀁. 𑀅𑀭𑀽𑀧𑀲𑀪𑀸𑀯𑀢𑁆𑀢𑁂𑀧𑀺 𑀯𑁂𑀤𑀦𑀸𑀤𑀬𑁄 𑀯𑀺𑀬 𑀓𑀲𑁆𑀲𑀘𑀺𑀧𑀺 𑀆𑀭𑀫𑁆𑀫𑀡𑀲𑁆𑀲 𑀅𑀦𑀸𑀮𑀫𑁆𑀩𑀦𑀢𑁄 𑀉𑀧𑀢𑁆𑀣𑀫𑁆𑀪𑀦𑀺𑀭𑀧𑁂𑀓𑁆𑀔𑀢𑁄 𑀘 𑀅𑀦𑀸𑀭𑀫𑁆𑀫𑀡𑀫𑁂𑀯 𑀢𑀁 ‘‘𑀆𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀁. 𑀅𑀬𑀜𑁆𑀘 𑀏𑀯𑀲𑀤𑁆𑀤𑁄 𑀅𑀧𑁆𑀧𑀢𑀺𑀝𑁆𑀞𑀫𑁂𑀯 𑀅𑀧𑁆𑀧𑀯𑀢𑁆𑀢𑀫𑁂𑀯𑀸𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀬𑀤𑀺𑀤𑀁 ‘‘𑀅𑀧𑁆𑀧𑀢𑀺𑀝𑁆𑀞’’𑀦𑁆𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀯𑀡𑁆𑀡𑀺𑀢𑀁 𑀣𑁄𑀫𑀺𑀢𑀁 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀁 𑀦𑀺𑀩𑁆𑀩𑀸𑀦𑀁, 𑀏𑀲𑁄 𑀏𑀯 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑀁 𑀢𑀤𑀥𑀺𑀕𑀫𑁂 𑀲𑀢𑀺 𑀲𑀩𑁆𑀩𑀤𑀼𑀓𑁆𑀔𑀸𑀪𑀸𑀯𑀢𑁄. 𑀢𑀲𑁆𑀫𑀸 ‘‘𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄’’𑀢𑀺 𑀅𑀬𑀫𑁂𑀯 𑀢𑀲𑁆𑀲 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀤𑀼𑀢𑀺𑀬𑁂 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀦𑀺𑀩𑁆𑀩𑀸𑀦𑀲𑁆𑀲 𑀧𑀓𑀢𑀺𑀬𑀸 𑀕𑀫𑁆𑀪𑀻𑀭𑀪𑀸𑀯𑀢𑁄 𑀤𑀼𑀤𑁆𑀤𑀲𑀪𑀸𑀯𑀤𑀻𑀧𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑀢𑁆𑀣 𑀤𑀼𑀤𑁆𑀤𑀲𑀦𑁆𑀢𑀺 𑀲𑀪𑀸𑀯𑀕𑀫𑁆𑀪𑀻𑀭𑀢𑁆𑀢𑀸 𑀅𑀢𑀺𑀲𑀼𑀔𑀼𑀫𑀲𑀡𑁆𑀳𑀲𑀪𑀸𑀯𑀢𑁆𑀢𑀸 𑀘 𑀅𑀦𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀤𑀼𑀤𑁆𑀤𑀲𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀢𑀜𑁆𑀳𑀺 𑀢𑁂, 𑀫𑀸𑀕𑀡𑁆𑀟𑀺𑀬, 𑀅𑀭𑀺𑀬𑀁 𑀧𑀜𑁆𑀜𑀸𑀘𑀓𑁆𑀔𑀼 𑀦𑀢𑁆𑀣𑀺, 𑀬𑁂𑀦 𑀢𑁆𑀯𑀁 𑀆𑀭𑁄𑀕𑁆𑀬𑀁 𑀚𑀸𑀦𑁂𑀬𑁆𑀬𑀸𑀲𑀺, 𑀦𑀺𑀩𑁆𑀩𑀸𑀦𑀫𑁆𑀧𑀺 𑀧𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺 (𑀫. 𑀦𑀺. 𑁨.𑁨𑁧𑁮). 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀤𑀼𑀤𑁆𑀤𑀲𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺𑀆𑀤𑀺 (𑀫𑀳𑀸𑀯. 𑁮; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭). 𑀅𑀦𑀢𑀦𑁆𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂𑀲𑀼, 𑀓𑀸𑀫𑀸𑀤𑀻𑀲𑀼 𑀘 𑀪𑀯𑁂𑀲𑀼 𑀦𑀫𑀦𑀢𑁄 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁄 𑀲𑀢𑁆𑀢𑀸𑀦𑀜𑁆𑀘 𑀢𑀢𑁆𑀣 𑀦𑀫𑀦𑀢𑁄 𑀢𑀡𑁆𑀳𑀸 𑀦𑀢𑀸 𑀦𑀸𑀫, 𑀦𑀢𑁆𑀣𑀺 𑀏𑀢𑁆𑀣 𑀦𑀢𑀸𑀢𑀺 𑀅𑀦𑀢𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀦𑀦𑁆𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸 𑀅𑀦𑁆𑀢𑀯𑀺𑀭𑀳𑀺𑀢𑀁, 𑀅𑀘𑀯𑀦𑀥𑀫𑁆𑀫𑀁 𑀦𑀺𑀭𑁄𑀥𑀁 𑀅𑀫𑀢𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀅𑀦𑀦𑁆𑀢’’𑀦𑁆𑀢𑀺 𑀧𑀤𑀲𑁆𑀲 ‘‘𑀅𑀧𑁆𑀧𑀫𑀸𑀡’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀏𑀢𑁆𑀣 𑀘 ‘‘𑀤𑀼𑀤𑁆𑀤𑀲’’𑀦𑁆𑀢𑀺 𑀇𑀫𑀺𑀦𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑁂𑀳𑀺 𑀘𑀺𑀭𑀓𑀸𑀮𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸𑀦𑀁 𑀅𑀧𑀘𑁆𑀘𑀬𑀪𑀸𑀯𑀦𑀸 𑀦 𑀲𑀼𑀓𑀭𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀓𑀺𑀘𑁆𑀙𑁂𑀦 𑀅𑀥𑀺𑀕𑀫𑀦𑀻𑀬𑀢𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀲𑀘𑁆𑀘𑀁 𑀲𑀼𑀤𑀲𑁆𑀲𑀦𑀦𑁆𑀢𑀺 𑀇𑀫𑀺𑀦𑀸𑀧𑀺 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀢𑀢𑁆𑀣 𑀲𑀘𑁆𑀘𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀲𑀦𑁆𑀢𑀲𑀪𑀸𑀯𑀸𑀪𑀸𑀯𑀢𑁄 𑀏𑀓𑀦𑁆𑀢𑁂𑀦𑁂𑀯 𑀲𑀦𑁆𑀢𑀢𑁆𑀢𑀸 𑀅𑀯𑀺𑀧𑀭𑀻𑀢𑀝𑁆𑀞𑁂𑀦 𑀲𑀘𑁆𑀘𑀁. 𑀦 𑀳𑀺 𑀢𑀁 𑀲𑀼𑀤𑀲𑁆𑀲𑀦𑀁 𑀦 𑀲𑀼𑀔𑁂𑀦 𑀧𑀲𑁆𑀲𑀺𑀢𑀩𑁆𑀩𑀁, 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁂 𑀲𑀫𑀸𑀦𑁂𑀦𑁆𑀢𑁂𑀳𑀺𑀧𑀺 𑀓𑀲𑀺𑀭𑁂𑀦𑁂𑀯 𑀲𑀫𑀥𑀺𑀕𑀦𑁆𑀢𑀩𑁆𑀩𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢’’𑀦𑁆𑀢𑀺 (𑀫𑀳𑀸𑀯. 𑁮; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭).

𑀧𑀝𑀺𑀯𑀺𑀤𑁆𑀥𑀸 𑀢𑀡𑁆𑀳𑀸 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦𑀦𑁆𑀢𑀺 𑀢𑀜𑁆𑀘 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀅𑀪𑀺𑀲𑀫𑁂𑀦𑁆𑀢𑁂𑀦 𑀯𑀺𑀲𑀬𑀢𑁄 𑀓𑀺𑀘𑁆𑀘𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 𑀆𑀭𑀫𑁆𑀫𑀡𑀧𑁆𑀧𑀝𑀺𑀯𑁂𑀥𑁂𑀦 𑀅𑀲𑀫𑁆𑀫𑁄𑀳𑀧𑁆𑀧𑀝𑀺𑀯𑁂𑀥𑁂𑀦 𑀘 𑀧𑀝𑀺𑀯𑀺𑀤𑁆𑀥𑀁, 𑀬𑀣𑀸𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀤𑀼𑀓𑁆𑀔𑀲𑀘𑁆𑀘𑀁, 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀫𑀕𑁆𑀕𑀲𑀘𑁆𑀘𑀜𑁆𑀘 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀏𑀯𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀅𑀲𑀫𑁆𑀫𑁄𑀳𑀢𑁄 𑀘 𑀧𑀝𑀺𑀯𑀺𑀤𑁆𑀥𑀸 𑀢𑀡𑁆𑀳𑀸 𑀳𑁄𑀢𑀺. 𑀏𑀯𑀜𑁆𑀘 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀬𑀣𑀸𑀪𑀽𑀢𑀁 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀪𑀯𑀸𑀤𑀻𑀲𑀼 𑀦𑀢𑀪𑀽𑀢𑀸 𑀢𑀡𑁆𑀳𑀸 𑀦𑀢𑁆𑀣𑀺, 𑀢𑀤𑀪𑀸𑀯𑁂 𑀲𑀩𑁆𑀩𑀲𑁆𑀲𑀧𑀺 𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀅𑀪𑀸𑀯𑁄, 𑀢𑀢𑁄𑀯 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺 𑀏𑀯𑀁 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀯𑀲𑁂𑀲𑀯𑀝𑁆𑀝𑀤𑀼𑀓𑁆𑀔𑀯𑀽𑀧𑀲𑀫𑀳𑁂𑀢𑀼𑀪𑀽𑀢𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑁆𑀲 𑀆𑀦𑀼𑀪𑀸𑀯𑀁 𑀧𑀓𑀸𑀲𑁂𑀲𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀢𑀢𑀺𑀬𑁂 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀢𑀤𑀸 𑀓𑀺𑀭 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀁𑀲𑀸𑀭𑀲𑁆𑀲 𑀆𑀤𑀻𑀦𑀯𑀁 𑀧𑀓𑀸𑀲𑁂𑀢𑁆𑀯𑀸 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀓𑀢𑀸𑀬 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀲𑀁𑀲𑀸𑀭𑁄 𑀪𑀕𑀯𑀢𑀸 𑀅𑀯𑀺𑀚𑁆𑀚𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀳𑁂𑀢𑀼𑀓𑁄 𑀧𑀓𑀸𑀲𑀺𑀢𑁄, 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀢𑀤𑀼𑀧𑀲𑀫𑀲𑁆𑀲 𑀦 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀬𑀺𑀤𑀁 𑀅𑀳𑁂𑀢𑀼𑀓𑀁, 𑀓𑀣𑀁 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀻’’𑀢𑀺. 𑀅𑀣 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀁 𑀬𑀣𑀸𑀯𑀼𑀢𑁆𑀢𑀁 𑀧𑀭𑀺𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀺𑀫𑀢𑀺𑀯𑀺𑀥𑀫𑀦𑀢𑁆𑀣𑀜𑁆𑀘𑁂𑀯 𑀇𑀥 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 ‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀯, 𑀦𑀢𑁆𑀣𑀺 𑀳𑀺 𑀧𑀭𑀫𑀢𑁆𑀣𑀢𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑀪𑀸𑀯𑀢𑁆𑀢𑀸’’𑀢𑀺 𑀮𑁄𑀓𑀸𑀬𑀢𑀺𑀓𑀸𑀤𑀬𑁄 𑀯𑀺𑀬 𑀯𑀺𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀩𑀳𑀺𑀤𑁆𑀥𑀸 𑀘 𑀧𑀼𑀣𑀼𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀫𑀺𑀘𑁆𑀙𑀸𑀯𑀸𑀤𑀪𑀜𑁆𑀚𑀦𑀢𑁆𑀣𑀜𑁆𑀘 𑀇𑀫𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀤𑀻𑀧𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀦𑁆𑀢𑀺 𑀲𑀩𑁆𑀩𑀸𑀦𑀺𑀧𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀯𑁂𑀤𑀦𑀸𑀤𑀬𑁄 𑀯𑀺𑀬 𑀳𑁂𑀢𑀼𑀧𑀘𑁆𑀘𑀬𑀲𑀫𑀯𑀸𑀬𑀲𑀗𑁆𑀔𑀸𑀢𑀸𑀬 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸 𑀦 𑀚𑀸𑀢𑀁 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀚𑀸𑀢𑀁, 𑀓𑀸𑀭𑀡𑁂𑀦 𑀯𑀺𑀦𑀸, 𑀲𑀬𑀫𑁂𑀯 𑀯𑀸 𑀦 𑀪𑀽𑀢𑀁 𑀦 𑀧𑀸𑀢𑀼𑀪𑀽𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀪𑀽𑀢𑀁, 𑀏𑀯𑀁 𑀅𑀚𑀸𑀢𑀢𑁆𑀢𑀸 𑀅𑀪𑀽𑀢𑀢𑁆𑀢𑀸 𑀘 𑀬𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦 𑀓𑀢𑀦𑁆𑀢𑀺 𑀅𑀓𑀢𑀁, 𑀚𑀸𑀢𑀪𑀽𑀢𑀓𑀢𑀲𑀪𑀸𑀯𑁄 𑀘 𑀦𑀸𑀫𑀭𑀽𑀧𑀸𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀳𑁄𑀢𑀺, 𑀦 𑀅𑀲𑀗𑁆𑀔𑀢𑀲𑀪𑀸𑀯𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀲𑀗𑁆𑀔𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀮𑁄𑀫𑀢𑁄 𑀯𑀸 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀦𑁆𑀢𑀺 𑀲𑀗𑁆𑀔𑀢𑀁, 𑀢𑀣𑀸 𑀦 𑀲𑀗𑁆𑀔𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀭𑀳𑀺𑀢𑀦𑁆𑀢𑀺 𑀅𑀲𑀗𑁆𑀔𑀢𑀦𑁆𑀢𑀺. 𑀏𑀯𑀁 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀪𑀸𑀯𑁂 𑀧𑀝𑀺𑀲𑀺𑀤𑁆𑀥𑁂 ‘‘𑀲𑀺𑀬𑀸 𑀦𑀼 𑀔𑁄 𑀏𑀓𑁂𑀦𑁂𑀯 𑀓𑀸𑀭𑀡𑁂𑀦 𑀓𑀢’’𑀦𑁆𑀢𑀺 𑀆𑀲𑀗𑁆𑀓𑀸𑀬 ‘‘𑀦 𑀬𑁂𑀦 𑀓𑁂𑀦𑀘𑀺 𑀓𑀢’’𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀧𑀘𑁆𑀘𑀬𑀫𑁆𑀧𑀺 𑀲𑀫𑀸𑀦𑀁 ‘‘𑀲𑀬𑀫𑁂𑀯 𑀦𑀼 𑀔𑁄 𑀇𑀤𑀁 𑀪𑀽𑀢𑀁 𑀧𑀸𑀢𑀼𑀪𑀽𑀢’’𑀦𑁆𑀢𑀺 𑀆𑀲𑀗𑁆𑀓𑀸𑀬 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀬𑀜𑁆𑀘𑁂𑀢𑀲𑁆𑀲 𑀅𑀲𑀗𑁆𑀔𑀢𑀸𑀓𑀢𑀸𑀪𑀽𑀢𑀪𑀸𑀯𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀚𑀸𑀢𑀺𑀥𑀫𑁆𑀫𑀢𑁆𑀢𑀸’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁂𑀢𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀲𑀸𑀢𑁆𑀣𑀓𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 ‘‘𑀢𑀬𑀺𑀤𑀁 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂’’𑀢𑀺 𑀧𑀭𑀫𑀢𑁆𑀣𑀢𑁄 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀧𑀓𑀸𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀉𑀤𑀸𑀦𑁂𑀦𑁆𑀢𑁂𑀦 𑀪𑀕𑀯𑀢𑀸, ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀮𑀧𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 𑀲𑀢𑁆𑀣𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀬𑀤𑀺 𑀅𑀚𑀸𑀢𑀸𑀤𑀺𑀲𑀪𑀸𑀯𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀦 𑀅𑀪𑀯𑀺𑀲𑁆𑀲 𑀦 𑀲𑀺𑀬𑀸, 𑀇𑀥 𑀮𑁄𑀓𑁂 𑀚𑀸𑀢𑀸𑀤𑀺𑀲𑀪𑀸𑀯𑀲𑁆𑀲 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀦𑀯𑀲𑁂𑀲𑀯𑀽𑀧𑀲𑀫𑁄 𑀦 𑀧𑀜𑁆𑀜𑀸𑀬𑁂𑀬𑁆𑀬 𑀦 𑀉𑀧𑀮𑀩𑁆𑀪𑁂𑀬𑁆𑀬 𑀦 𑀲𑀫𑁆𑀪𑀯𑁂𑀬𑁆𑀬. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸 𑀅𑀦𑀯𑀲𑁂𑀲𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺. 𑀢𑁂𑀦𑁂𑀢𑁆𑀣 𑀲𑀩𑁆𑀩𑀲𑁆𑀲𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀧𑁆𑀧𑀯𑀢𑁆𑀢𑀺 𑀅𑀧𑀕𑀫𑁄 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀺.

𑀏𑀯𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑁆𑀯𑀬𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀬𑀲𑁆𑀫𑀸 𑀘 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀏𑀢𑁆𑀣 𑀘 𑀬𑀲𑁆𑀫𑀸 ‘‘𑀅𑀧𑀘𑁆𑀘𑀬𑀸 𑀥𑀫𑁆𑀫𑀸, 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁭, 𑁮), 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦𑀁, 𑀬𑀢𑁆𑀣 𑀦𑁂𑀯 𑀧𑀣𑀯𑀻 (𑀉𑀤𑀸. 𑁭𑁧), 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀤𑀼𑀤𑁆𑀤𑀲𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 (𑀫𑀳𑀸𑀯. 𑁮; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭), 𑀅𑀲𑀗𑁆𑀔𑀢𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀲𑀗𑁆𑀔𑀢𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺𑀆𑀤𑀻𑀳𑀺 (𑀲𑀁. 𑀦𑀺. 𑁪.𑁩𑁬𑁬-𑁩𑁬𑁭) 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺, ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀘 𑀲𑀼𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀲𑀫𑁆𑀪𑀯𑁄 𑀲𑀩𑁆𑀩𑀮𑁄𑀓𑀁 𑀅𑀦𑀼𑀓𑀫𑁆𑀧𑀫𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄, 𑀢𑀲𑁆𑀫𑀸 𑀬𑀤𑀺𑀧𑀺 𑀢𑀢𑁆𑀣 𑀅𑀧𑀘𑁆𑀘𑀓𑁆𑀔𑀓𑀸𑀭𑀻𑀦𑀫𑁆𑀧𑀺 𑀯𑀺𑀜𑁆𑀜𑀽𑀦𑀁 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀦𑀢𑁆𑀣𑀺𑀬𑁂𑀯. 𑀬𑁂 𑀧𑀦 𑀧𑀭𑀦𑁂𑀬𑁆𑀬𑀩𑀼𑀤𑁆𑀥𑀺𑀦𑁄 𑀧𑀼𑀕𑁆𑀕𑀮𑀸, 𑀢𑁂𑀲𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀢𑁆𑀣𑀁 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸 𑁋 𑀬𑀣𑀸 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀬 𑀲𑀉𑀢𑁆𑀢𑀭𑀸𑀦𑀁 𑀓𑀸𑀫𑀸𑀦𑀁 𑀭𑀽𑀧𑀸𑀤𑀻𑀦𑀜𑁆𑀘 𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀁 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀢𑀁𑀲𑀪𑀸𑀯𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑁂𑀦 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑁂𑀦 𑀦𑀺𑀲𑁆𑀲𑀭𑀡𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀜𑁆𑀘𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀲𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀧𑀺 𑀅𑀦𑀼𑀮𑁄𑀫𑀜𑀸𑀡𑀁 𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀣𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀜𑀸𑀡𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦. 𑀇𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀲𑁆𑀲 𑀘 𑀜𑀸𑀡𑀲𑁆𑀲 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂 𑀅𑀲𑀫𑀢𑁆𑀣𑀪𑀸𑀯𑀢𑁄 𑀢𑁂𑀲𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀓𑀭𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀢𑀤𑀼𑀪𑀬𑀯𑀺𑀧𑀭𑀻𑀢𑀲𑀪𑀸𑀯𑁂𑀦 𑀆𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀢𑀣𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀇𑀤𑀁 𑀦𑀺𑀩𑁆𑀩𑀸𑀦𑀧𑀤𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀚𑁄𑀢𑀓𑀁 𑀯𑀘𑀦𑀁 𑀅𑀯𑀺𑀧𑀭𑀻𑀢𑀢𑁆𑀣𑀁 𑀪𑀕𑀯𑀢𑀸 𑀪𑀸𑀲𑀺𑀢𑀢𑁆𑀢𑀸. 𑀬𑀜𑁆𑀳𑀺 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀅𑀯𑀺𑀧𑀭𑀻𑀢𑀢𑁆𑀣𑀁 𑀧𑀭𑀫𑀢𑁆𑀣𑀁 𑀬𑀣𑀸 𑀢𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 (𑀅. 𑀦𑀺. 𑁩.𑁧𑁩𑁭; 𑀫𑀳𑀸𑀦𑀺. 𑁨𑁭), 𑀢𑀣𑀸 𑀦𑀺𑀩𑁆𑀩𑀸𑀦𑀲𑀤𑁆𑀤𑁄 𑀓𑀢𑁆𑀣𑀘𑀺 𑀯𑀺𑀲𑀬𑁂 𑀬𑀣𑀸𑀪𑀽𑀢𑀧𑀭𑀫𑀢𑁆𑀣𑀯𑀺𑀲𑀬𑁄 𑀉𑀧𑀘𑀸𑀭𑀫𑀢𑁆𑀢𑀯𑀼𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑁂𑀬𑁆𑀬𑀣𑀸𑀧𑀺 𑀲𑀻𑀳𑀲𑀤𑁆𑀤𑁄. 𑀅𑀣 𑀯𑀸 𑀅𑀢𑁆𑀣𑁂𑀯 𑀧𑀭𑀫𑀢𑁆𑀣𑀢𑁄 𑀅𑀲𑀗𑁆𑀔𑀢𑀸 𑀥𑀸𑀢𑀼, 𑀇𑀢𑀭𑀢𑀩𑁆𑀩𑀺𑀧𑀭𑀻𑀢𑀯𑀺𑀦𑀺𑀫𑀼𑀢𑁆𑀢𑀲𑀪𑀸𑀯𑀢𑁆𑀢𑀸 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀻𑀥𑀸𑀢𑀼 𑀯𑁂𑀤𑀦𑀸𑀢𑀺. 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀬𑀼𑀢𑁆𑀢𑀺𑀢𑁄𑀧𑀺 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀘𑀢𑀼𑀢𑁆𑀣𑁂 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀢𑀤𑀸 𑀓𑀺𑀭 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀓𑀢𑀸𑀬 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀢𑀸𑀯 𑀪𑀕𑀯𑀢𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀆𑀦𑀼𑀪𑀸𑀯𑁄 𑀧𑀓𑀸𑀲𑀺𑀢𑁄, 𑀅𑀥𑀺𑀕𑀫𑀽𑀧𑀸𑀬𑁄 𑀧𑀦𑀲𑁆𑀲𑀸 𑀦 𑀪𑀸𑀲𑀺𑀢𑁄, 𑀓𑀣𑀁 𑀦𑀼 𑀔𑁄 𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 𑀅𑀫𑁆𑀳𑁂𑀳𑀺 𑀅𑀬𑀁 𑀅𑀥𑀺𑀕𑀦𑁆𑀢𑀩𑁆𑀩𑀸’’𑀢𑀺. 𑀅𑀣 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀁 𑀬𑀣𑀸𑀯𑀼𑀢𑁆𑀢𑀧𑀭𑀺𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀓𑀢𑁆𑀣𑀘𑀺 𑀅𑀦𑀺𑀲𑁆𑀲𑀺𑀢𑀲𑁆𑀲 𑀧𑀲𑁆𑀲𑀤𑁆𑀥𑀓𑀸𑀬𑀘𑀺𑀢𑁆𑀢𑀲𑁆𑀲 𑀯𑀻𑀣𑀺𑀧𑀝𑀺𑀧𑀦𑁆𑀦𑀯𑀺𑀧𑀲𑁆𑀲𑀦𑀲𑁆𑀲 𑀅𑀭𑀺𑀬𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑀢𑁄 𑀢𑀡𑁆𑀳𑀸𑀧𑀳𑀸𑀦𑁂𑀦 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀦𑁆𑀢𑀺 𑀭𑀽𑀧𑀸𑀤𑀺𑀲𑀗𑁆𑀔𑀸𑀭𑁂 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀳𑁄𑀢𑀺. 𑀅𑀧𑁆𑀧𑀳𑀻𑀦𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀲𑁆𑀲 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀲𑀼𑀔𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀫𑀫 𑀯𑁂𑀤𑀦𑀸, 𑀅𑀳𑀁 𑀯𑁂𑀤𑀺𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀸𑀳𑀯𑀲𑁂𑀦 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀢𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀘𑀮𑀦𑀁 𑀓𑀫𑁆𑀧𑀦𑀁, 𑀅𑀯𑀓𑁆𑀔𑀮𑀺𑀢𑀁 𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀻𑀢𑀺 𑀬𑁄 𑀧𑀦 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀯𑀺𑀳𑀭𑀢𑀺, 𑀢𑀲𑁆𑀲 𑀢𑀁 𑀅𑀦𑀺𑀲𑁆𑀲𑀺𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀁 𑀘𑀮𑀺𑀢𑀁 𑀅𑀯𑀓𑁆𑀔𑀮𑀺𑀢𑀁, 𑀯𑀺𑀧𑁆𑀨𑀦𑁆𑀤𑀺𑀢𑀁 𑀯𑀸 𑀦𑀢𑁆𑀣𑀺 𑀓𑀸𑀭𑀡𑀲𑁆𑀲 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸.

𑀘𑀮𑀺𑀢𑁂 𑀅𑀲𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂 𑀘𑀮𑀺𑀢𑁂 𑀅𑀲𑀢𑀺 𑀬𑀣𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀸𑀳𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀢𑀣𑀸 𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀁 𑀉𑀲𑁆𑀲𑀼𑀓𑁆𑀓𑀦𑁆𑀢𑀲𑁆𑀲. 𑀧𑀲𑁆𑀲𑀤𑁆𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀳𑀚𑀸𑀢𑀸𑀦𑀁 𑀓𑀸𑀬𑀘𑀺𑀢𑁆𑀢𑀸𑀦𑀁 𑀲𑀸𑀭𑀫𑁆𑀪𑀓𑀭𑀓𑀺𑀮𑁂𑀲𑀯𑀽𑀧𑀲𑀫𑀺𑀦𑀻 𑀤𑀼𑀯𑀺𑀥𑀸𑀧𑀺 𑀧𑀲𑁆𑀲𑀤𑁆𑀥𑀺 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀦𑀢𑀺 𑀦 𑀳𑁄𑀢𑀻𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀬𑀼𑀢𑁆𑀢𑀸𑀬 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀅𑀦𑀯𑀚𑁆𑀚𑀲𑀼𑀔𑀸𑀥𑀺𑀝𑁆𑀞𑀸𑀦𑀁 𑀲𑀫𑀸𑀥𑀺𑀁 𑀯𑀟𑁆𑀠𑁂𑀢𑁆𑀯𑀸 𑀢𑀁 𑀧𑀜𑁆𑀜𑀸𑀬 𑀲𑀫𑀯𑀸𑀬𑀓𑀭𑀡𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀬𑁄𑀚𑁂𑀢𑁆𑀯𑀸 𑀫𑀕𑁆𑀕𑀧𑀭𑀫𑁆𑀧𑀭𑀸𑀬 𑀓𑀺𑀮𑁂𑀲𑁂 𑀔𑁂𑀧𑁂𑀦𑁆𑀢𑀲𑁆𑀲 𑀓𑀸𑀫𑀪𑀯𑀸𑀤𑀻𑀲𑀼 𑀦𑀫𑀦𑀢𑁄 ‘‘𑀦𑀢𑀻’’𑀢𑀺 𑀮𑀤𑁆𑀥𑀦𑀸𑀫𑀸 𑀢𑀡𑁆𑀳𑀸 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀅𑀦𑀯𑀲𑁂𑀲𑀢𑁄 𑀦 𑀳𑁄𑀢𑀺, 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑀢𑁆𑀢𑀸 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀦𑀢𑀺𑀬𑀸 𑀅𑀲𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀡𑁆𑀳𑀸𑀬 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀪𑀯𑀸𑀤𑀺𑀅𑀢𑁆𑀣𑀸𑀬 𑀆𑀮𑀬𑀦𑀺𑀓𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑁂 𑀅𑀲𑀢𑀺. 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀇𑀥 𑀆𑀕𑀢𑀺 𑀆𑀕𑀫𑀦𑀁 𑀘𑀼𑀢𑀺𑀯𑀲𑁂𑀦 𑀕𑀢𑀺 𑀇𑀢𑁄 𑀧𑀭𑀮𑁄𑀓𑀕𑀫𑀦𑀁 𑀧𑁂𑀘𑁆𑀘𑀪𑀸𑀯𑁄 𑀦 𑀳𑁄𑀢𑀺 𑀦 𑀧𑀯𑀢𑁆𑀢𑀢𑀺. 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀆𑀕𑀢𑀺𑀬𑀸 𑀘 𑀕𑀢𑀺𑀬𑀸 𑀘 𑀅𑀲𑀢𑀺. 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀻𑀢𑀺 𑀅𑀧𑀭𑀸𑀧𑀭𑀁 𑀘𑀯𑀦𑀼𑀧𑀧𑀚𑁆𑀚𑀦𑀁 𑀦 𑀳𑁄𑀢𑀺 𑀦 𑀧𑀯𑀢𑁆𑀢𑀢𑀺. 𑀅𑀲𑀢𑀺 𑀳𑀺 𑀓𑀺𑀮𑁂𑀲𑀯𑀝𑁆𑀝𑁂 𑀓𑀫𑁆𑀫𑀯𑀝𑁆𑀝𑀁 𑀧𑀘𑁆𑀙𑀺𑀦𑁆𑀦𑀫𑁂𑀯, 𑀧𑀘𑁆𑀙𑀺𑀦𑁆𑀦𑁂 𑀘 𑀢𑀲𑁆𑀫𑀺𑀁 𑀓𑀼𑀢𑁄 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀲𑀫𑁆𑀪𑀯𑁄. 𑀢𑁂𑀦𑀸𑀳 𑁋 ‘‘𑀘𑀼𑀢𑀽𑀧𑀧𑀸𑀢𑁂 𑀅𑀲𑀢𑀺 𑀦𑁂𑀯𑀺𑀥 𑀦 𑀳𑀼𑀭’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀩𑀸𑀳𑀺𑀬𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀪𑀕𑀯𑀸 𑀇𑀥𑀸𑀧𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀯𑀲𑁂𑀲𑀢𑁄 𑀯𑀝𑁆𑀝𑀤𑀼𑀓𑁆𑀔𑀯𑀽𑀧𑀲𑀫𑀳𑁂𑀢𑀼𑀪𑀽𑀢𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑁆𑀲 𑀆𑀦𑀼𑀪𑀸𑀯𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑁂𑀢𑀺.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀧𑀜𑁆𑀘𑀫𑁂 𑀫𑀮𑁆𑀮𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸𑀢𑀺 𑀕𑀼𑀡𑀫𑀳𑀢𑁆𑀢𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀳𑀺 𑀫𑀳𑀢𑀸. 𑀲𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦𑀧𑀺 𑀫𑀳𑀸 𑀢𑀢𑁆𑀣 𑀲𑀩𑁆𑀩𑀧𑀘𑁆𑀙𑀺𑀫𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀪𑀸𑀯𑀢𑁄, 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀧𑀺 𑀫𑀳𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀢𑁆𑀢𑀸. 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀢𑁄 𑀧𑀝𑁆𑀞𑀸𑀬 𑀳𑀺 𑀆𑀕𑀢𑀸𑀕𑀢𑀸 𑀪𑀺𑀓𑁆𑀔𑀽 𑀦 𑀧𑀓𑁆𑀓𑀫𑀺𑀁𑀲𑀼. 𑀘𑀼𑀦𑁆𑀤𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲. 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢𑀲𑁆𑀲. 𑀲𑁄 𑀓𑀺𑀭 𑀅𑀟𑁆𑀠𑁄 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑁄 𑀪𑀕𑀯𑀢𑁄 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀫𑁆𑀩𑀯𑀦𑁂 𑀲𑀢𑁆𑀣𑀼𑀯𑀲𑀦𑀸𑀦𑀼𑀘𑁆𑀙𑀯𑀺𑀓𑀁 𑀕𑀦𑁆𑀥𑀓𑀼𑀝𑀺𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀉𑀧𑀝𑁆𑀞𑀸𑀦𑀲𑀸𑀮𑀸𑀓𑀼𑀝𑀺𑀫𑀡𑁆𑀟𑀧𑀘𑀗𑁆𑀓𑀫𑀦𑀸𑀤𑀺𑀓𑁂 𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀬𑀼𑀢𑁆𑀢𑀁 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀯𑀸𑀬𑀁 𑀯𑀺𑀳𑀭𑀢𑀺 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀅𑀫𑁆𑀩𑀯𑀦𑁂’’𑀢𑀺.

𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸. ‘‘𑀲𑀽𑀓𑀭𑀫𑀤𑁆𑀤𑀯𑀦𑁆𑀢𑀺 𑀲𑀽𑀓𑀭𑀲𑁆𑀲 𑀫𑀼𑀤𑀼𑀲𑀺𑀦𑀺𑀤𑁆𑀥𑀁 𑀧𑀯𑀢𑁆𑀢𑀫𑀁𑀲’’𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀲𑀽𑀓𑀭𑀫𑀤𑁆𑀤𑀯𑀦𑁆𑀢𑀺 𑀦 𑀲𑀽𑀓𑀭𑀫𑀁𑀲𑀁, 𑀲𑀽𑀓𑀭𑁂𑀳𑀺 𑀫𑀤𑁆𑀤𑀺𑀢𑀯𑀁𑀲𑀓𑀴𑀻𑀭𑁄’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 ‘‘𑀲𑀽𑀓𑀭𑁂𑀳𑀺 𑀫𑀤𑁆𑀤𑀺𑀢𑀧𑁆𑀧𑀤𑁂𑀲𑁂 𑀚𑀸𑀢𑀁 𑀅𑀳𑀺𑀙𑀢𑁆𑀢𑀓’’𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀲𑀽𑀓𑀭𑀫𑀤𑁆𑀤𑀯𑀁 𑀦𑀸𑀫 𑀏𑀓𑀁 𑀭𑀲𑀸𑀬𑀦’’𑀦𑁆𑀢𑀺 𑀪𑀡𑀺𑀁𑀲𑀼. 𑀢𑀜𑁆𑀳𑀺 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 ‘‘𑀅𑀚𑁆𑀚 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀘𑀺𑀭𑀢𑀭𑀁 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀲𑀢𑁆𑀣𑀼 𑀘𑀺𑀭𑀚𑀻𑀯𑀺𑀢𑀼𑀓𑀫𑁆𑀬𑀢𑀸𑀬 𑀅𑀤𑀸𑀲𑀻𑀢𑀺 𑀯𑀤𑀦𑁆𑀢𑀺.

𑀢𑁂𑀦 𑀫𑀁 𑀧𑀭𑀺𑀯𑀺𑀲𑀸𑀢𑀺 𑀢𑁂𑀦 𑀫𑀫𑀁 𑀪𑁄𑀚𑁂𑀳𑀺. 𑀓𑀲𑁆𑀫𑀸 𑀪𑀕𑀯𑀸 𑀏𑀯𑀫𑀸𑀳? 𑀧𑀭𑀸𑀦𑀼𑀤𑁆𑀤𑀬𑀢𑀸𑀬. 𑀢𑀜𑁆𑀘 𑀓𑀸𑀭𑀡𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀫𑁂𑀯. 𑀢𑁂𑀦 𑀅𑀪𑀺𑀳𑀝𑀪𑀺𑀓𑁆𑀔𑀸𑀬 𑀧𑀭𑁂𑀲𑀁 𑀅𑀧𑀭𑀺𑀪𑁄𑀕𑀸𑀭𑀳𑀢𑁄 𑀘 𑀢𑀣𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀲𑀽𑀓𑀭𑀫𑀤𑁆𑀤𑀯𑁂 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀤𑁂𑀯𑀢𑀸 𑀑𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀢𑀲𑁆𑀫𑀸 𑀢𑀁 𑀅𑀜𑁆𑀜𑁄 𑀓𑁄𑀘𑀺 𑀲𑀫𑁆𑀫𑀸 𑀚𑀻𑀭𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀧𑀭𑀽𑀧𑀯𑀸𑀤𑀫𑁄𑀘𑀦𑀢𑁆𑀣𑀁 ‘‘𑀦𑀸𑀳𑀁 𑀢𑀁, 𑀘𑀼𑀦𑁆𑀤, 𑀧𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀲𑀻𑀳𑀦𑀸𑀤𑀁 𑀦𑀤𑀺. 𑀬𑁂 𑀳𑀺 𑀧𑀭𑁂 𑀉𑀧𑀯𑀤𑁂𑀬𑁆𑀬𑀼𑀁 ‘‘𑀅𑀢𑁆𑀢𑀦𑀸 𑀧𑀭𑀺𑀪𑀼𑀢𑁆𑀢𑀸𑀯𑀲𑁂𑀲𑀁 𑀦𑁂𑀯 𑀪𑀺𑀓𑁆𑀔𑀽𑀦𑀁, 𑀦 𑀅𑀜𑁆𑀜𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀅𑀤𑀸𑀲𑀺, 𑀆𑀯𑀸𑀝𑁂 𑀦𑀺𑀔𑀡𑀸𑀧𑁂𑀢𑁆𑀯𑀸 𑀯𑀺𑀦𑀸𑀲𑁂𑀲𑀻’’𑀢𑀺, ‘‘𑀢𑁂𑀲𑀁 𑀯𑀘𑀦𑁄𑀓𑀸𑀲𑁄 𑀫𑀸 𑀳𑁄𑀢𑀽’’𑀢𑀺 𑀧𑀭𑀽𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀲𑀻𑀳𑀦𑀸𑀤𑀁 𑀦𑀤𑀺.

𑀢𑀢𑁆𑀣 𑀲𑀤𑁂𑀯𑀓𑁂𑀢𑀺𑀆𑀤𑀻𑀲𑀼 𑀲𑀳 𑀤𑁂𑀯𑁂𑀳𑀻𑀢𑀺 𑀲𑀤𑁂𑀯𑀓𑁄, 𑀲𑀳 𑀫𑀸𑀭𑁂𑀦𑀸𑀢𑀺 𑀲𑀫𑀸𑀭𑀓𑁄, 𑀲𑀳 𑀩𑁆𑀭𑀳𑁆𑀫𑀼𑀦𑀸𑀢𑀺 𑀲𑀩𑁆𑀭𑀳𑁆𑀫𑀓𑁄, 𑀲𑀳 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀻𑀢𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻, 𑀧𑀚𑀸𑀢𑀢𑁆𑀢𑀸 𑀧𑀚𑀸, 𑀲𑀳 𑀤𑁂𑀯𑀫𑀦𑀼𑀲𑁆𑀲𑁂𑀳𑀻𑀢𑀺 𑀲𑀤𑁂𑀯𑀫𑀦𑀼𑀲𑁆𑀲𑀸. 𑀢𑀲𑁆𑀫𑀺𑀁 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬. 𑀢𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀜𑁆𑀘, 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁, 𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀧𑀤𑁂𑀳𑀺 𑀑𑀓𑀸𑀲𑀮𑁄𑀓𑀯𑀲𑁂𑀦, 𑀤𑁆𑀯𑀻𑀳𑀺 𑀧𑀚𑀸𑀯𑀲𑁂𑀦 𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀭𑁄 𑀦𑀬𑁄 𑁋 𑀲𑀤𑁂𑀯𑀓𑀯𑀘𑀦𑁂𑀦 𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄, 𑀲𑀫𑀸𑀭𑀓𑀯𑀘𑀦𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄, 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁄, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀘𑀦𑁂𑀦 𑀘𑀢𑀼𑀧𑀭𑀺𑀲𑀯𑀲𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄, 𑀅𑀯𑀲𑁂𑀲𑀲𑀢𑁆𑀢𑀮𑁄𑀓𑁄 𑀯𑀸 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀼𑀢𑁆𑀢𑀸𑀯𑀺𑀲𑁆𑀲𑀸𑀢𑀺 𑀪𑀼𑀢𑁆𑀢𑀯𑀢𑁄. 𑀔𑀭𑁄𑀢𑀺 𑀨𑀭𑀼𑀲𑁄. 𑀆𑀩𑀸𑀥𑁄𑀢𑀺 𑀯𑀺𑀲𑀪𑀸𑀕𑀭𑁄𑀕𑁄. 𑀧𑀩𑀸𑀴𑁆𑀳𑀸𑀢𑀺 𑀩𑀮𑀯𑀢𑀺𑀬𑁄. 𑀫𑀸𑀭𑀡𑀦𑁆𑀢𑀺𑀓𑀸𑀢𑀺 𑀫𑀭𑀡𑀦𑁆𑀢𑀸 𑀫𑀭𑀡𑀲𑀫𑀻𑀧𑀧𑀸𑀧𑀦𑀲𑀫𑀢𑁆𑀣𑀸. 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀲𑀻𑀢𑀺 𑀲𑀢𑀺𑀁 𑀉𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀅𑀯𑀺𑀳𑀜𑁆𑀜𑀫𑀸𑀦𑁄𑀢𑀺 𑀯𑁂𑀤𑀦𑀸𑀦𑀼𑀯𑀢𑁆𑀢𑀦𑀯𑀲𑁂𑀦 𑀅𑀲𑀮𑁆𑀮𑀓𑁆𑀔𑀺𑀢𑀥𑀫𑁆𑀫𑁄 𑀯𑀺𑀬 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀦𑀁 𑀅𑀓𑀭𑁄𑀦𑁆𑀢𑁄 𑀅𑀧𑀻𑀴𑀺𑀬𑀫𑀸𑀦𑁄 𑀅𑀤𑀼𑀓𑁆𑀔𑀺𑀬𑀫𑀸𑀦𑁄 𑀯𑀺𑀬 𑀅𑀥𑀺𑀯𑀸𑀲𑁂𑀲𑀺. 𑀪𑀕𑀯𑀢𑁄 𑀳𑀺 𑀯𑁂𑀴𑀼𑀯𑀕𑀸𑀫𑀓𑁂𑀬𑁂𑀯 𑀢𑀸 𑀯𑁂𑀤𑀦𑀸 𑀉𑀧𑁆𑀧𑀦𑁆𑀦𑀸, 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢𑀸 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑀸 𑀦 𑀉𑀧𑁆𑀧𑀚𑁆𑀚𑀺𑀁𑀲𑀼 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀫𑀸𑀧𑀢𑁆𑀢𑀻𑀳𑀺 𑀧𑀝𑀺𑀧𑀡𑀸𑀫𑀦𑀢𑁄. 𑀢𑀁 𑀤𑀺𑀯𑀲𑀁 𑀧𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀓𑀸𑀫𑁄 ‘‘𑀓𑁄𑀝𑀺𑀲𑀳𑀲𑁆𑀲𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀦𑁆𑀢𑀸𑀦𑀁 𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑀸𑀦𑀁 𑀅𑀧𑀭𑀺𑀫𑀺𑀢𑀓𑀸𑀮𑀁 𑀉𑀧𑀘𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀫𑁆𑀧𑀺 𑀪𑀯𑁂 𑀲𑀢𑀺 𑀏𑀯𑀭𑀽𑀧𑀸 𑀯𑁂𑀤𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑁂𑀲’’𑀦𑁆𑀢𑀺 𑀲𑀢𑁆𑀢𑀸𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀲𑀫𑀸𑀧𑀢𑁆𑀢𑀺𑀁 𑀦 𑀲𑀫𑀸𑀧𑀚𑁆𑀚𑀺, 𑀢𑁂𑀦 𑀯𑁂𑀤𑀦𑀸 𑀔𑀭𑀸 𑀯𑀢𑁆𑀢𑀺𑀁𑀲𑀼. 𑀆𑀬𑀸𑀫𑀸𑀢𑀺 𑀏𑀳𑀺 𑀬𑀸𑀫.

𑀘𑀼𑀦𑁆𑀤𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸𑀢𑀺𑀆𑀤𑀺𑀓𑀸 𑀅𑀧𑀭𑀪𑀸𑀕𑁂 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀞𑀧𑀺𑀢𑀸 𑀕𑀸𑀣𑀸. 𑀢𑀢𑁆𑀣 𑀪𑀼𑀢𑁆𑀢𑀲𑁆𑀲 𑀘 𑀲𑀽𑀓𑀭𑀫𑀤𑁆𑀤𑀯𑁂𑀦𑀸𑀢𑀺 𑀪𑀼𑀢𑁆𑀢𑀲𑁆𑀲 𑀉𑀤𑀧𑀸𑀤𑀺, 𑀦 𑀧𑀦 𑀪𑀼𑀢𑁆𑀢𑀧𑀘𑁆𑀘𑀬𑀸. 𑀬𑀤𑀺 𑀳𑀺 𑀅𑀪𑀼𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀺𑀲𑁆𑀲𑀸, 𑀅𑀢𑀺𑀔𑀭𑁄 𑀅𑀪𑀯𑀺𑀲𑁆𑀲𑀸, 𑀲𑀺𑀦𑀺𑀤𑁆𑀥𑀪𑁄𑀚𑀦𑀁 𑀧𑀦 𑀪𑀼𑀢𑁆𑀢𑀢𑁆𑀢𑀸 𑀢𑀦𑀼𑀓𑀸 𑀯𑁂𑀤𑀦𑀸 𑀅𑀳𑁄𑀲𑀺, 𑀢𑁂𑀦𑁂𑀯 𑀧𑀤𑀲𑀸 𑀕𑀦𑁆𑀢𑀼𑀁 𑀅𑀲𑀓𑁆𑀔𑀺. 𑀏𑀢𑁂𑀦 𑀬𑁆𑀯𑀸𑀬𑀁 ‘‘𑀬𑀲𑁆𑀲 𑀢𑀁 𑀧𑀭𑀺𑀪𑀼𑀢𑁆𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀲𑁆𑀲𑀸’’𑀢𑀺 𑀲𑀻𑀳𑀦𑀸𑀤𑁄 𑀦𑀤𑀺𑀢𑁄, 𑀢𑀲𑁆𑀲 𑀲𑀸𑀢𑁆𑀣𑀓𑀢𑀸 𑀤𑀲𑁆𑀲𑀺𑀢𑀸. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀝𑁆𑀞𑀸𑀦𑁂 𑀕𑀚𑁆𑀚𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀬𑀲𑁆𑀫𑀸 𑀢𑀁 𑀧𑀭𑀺𑀪𑀼𑀢𑁆𑀢𑀁 𑀪𑀕𑀯𑀢𑁄 𑀦 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀲𑀺, 𑀓𑀫𑁆𑀫𑁂𑀦 𑀧𑀦 𑀮𑀤𑁆𑀥𑁄𑀓𑀸𑀲𑁂𑀦 𑀉𑀧𑁆𑀧𑀸𑀤𑀺𑀬𑀫𑀸𑀦𑀁 𑀯𑀺𑀓𑀸𑀭𑀁 𑀅𑀧𑁆𑀧𑀫𑀢𑁆𑀢𑀢𑀸𑀬 𑀉𑀧𑀲𑀫𑁂𑀦𑁆𑀢𑁄 𑀲𑀭𑀻𑀭𑁂 𑀩𑀮𑀁 𑀉𑀧𑁆𑀧𑀸𑀤𑁂𑀲𑀺, 𑀬𑁂𑀦 𑀬𑀣𑀸 𑀯𑀓𑁆𑀔𑀫𑀸𑀦𑀁 𑀢𑀺𑀯𑀺𑀥𑀁 𑀧𑀬𑁄𑀚𑀦𑀁 𑀲𑀫𑁆𑀧𑀸𑀤𑁂𑀲𑀺, 𑀢𑀲𑁆𑀫𑀸 𑀲𑀫𑁆𑀫𑀤𑁂𑀯 𑀢𑀁 𑀧𑀭𑀺𑀡𑀸𑀫𑀁 𑀕𑀢𑀁, 𑀫𑀸𑀭𑀡𑀦𑁆𑀢𑀺𑀓𑀢𑁆𑀢𑀸 𑀧𑀦 𑀯𑁂𑀤𑀦𑀸𑀦𑀁 𑀅𑀯𑀺𑀜𑁆𑀜𑀸𑀢𑀁 𑀅𑀧𑀸𑀓𑀝𑀁 𑀅𑀳𑁄𑀲𑀻𑀢𑀺. 𑀯𑀺𑀭𑀺𑀘𑁆𑀘𑀫𑀸𑀦𑁄𑀢𑀺 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀮𑁄𑀳𑀺𑀢𑀯𑀺𑀭𑁂𑀘𑀦𑁄𑀯 𑀲𑀫𑀸𑀦𑁄. 𑀅𑀯𑁄𑀘𑀸𑀢𑀺 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀏𑀯𑀫𑀸𑀳.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀁 𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 𑀓𑀼𑀲𑀺𑀦𑀸𑀭𑀁 𑀅𑀕𑀫𑀸𑀲𑀺, 𑀓𑀺𑀁 𑀅𑀜𑁆𑀜𑀢𑁆𑀣 𑀦 𑀲𑀓𑁆𑀓𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀦𑁆𑀢𑀺? 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀁 𑀦𑀸𑀫 𑀦 𑀓𑀢𑁆𑀣𑀘𑀺 𑀦 𑀲𑀓𑁆𑀓𑀸, 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀲𑀺 𑁋 𑀫𑀬𑀺 𑀓𑀼𑀲𑀺𑀦𑀸𑀭𑀁 𑀕𑀢𑁂 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀤𑁂𑀲𑀦𑀸𑀬 (𑀤𑀻. 𑀦𑀺. 𑁨.𑁨𑁪𑁧) 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀺, 𑀢𑀸𑀬 𑀬𑀸 𑀤𑁂𑀯𑀮𑁄𑀓𑁂 𑀅𑀦𑀼𑀪𑀯𑀺𑀢𑀩𑁆𑀩𑀲𑀤𑀺𑀲𑀸 𑀲𑀫𑁆𑀧𑀢𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀫𑀬𑀸 𑀅𑀦𑀼𑀪𑀽𑀢𑀸, 𑀢𑀁 𑀤𑁆𑀯𑀻𑀳𑀺 𑀪𑀸𑀡𑀯𑀸𑀭𑁂𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀢𑁆𑀯𑀸 𑀩𑀳𑀽 𑀚𑀦𑀸 𑀓𑀼𑀲𑀮𑀁 𑀓𑀢𑁆𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀲𑀼𑀪𑀤𑁆𑀤𑁄𑀧𑀺 𑀓𑀢𑁆𑀣 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀧𑀭𑀺𑀬𑁄𑀲𑀸𑀦𑁂 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀫𑀬𑀺 𑀥𑀭𑀦𑁆𑀢𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀘𑁆𑀙𑀺𑀫𑀲𑀸𑀯𑀓𑁄 𑀦𑀸𑀫 𑀪𑀯𑀺𑀲𑁆𑀲𑀢𑀺. 𑀅𑀜𑁆𑀜𑀢𑁆𑀣 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀥𑀸𑀢𑀼𑀦𑀺𑀫𑀺𑀢𑁆𑀢𑀁 𑀫𑀳𑀸𑀓𑀮𑀳𑁄 𑀪𑀯𑀺𑀲𑁆𑀲𑀢𑀺, 𑀮𑁄𑀳𑀺𑀢𑀁 𑀦𑀤𑀻 𑀯𑀺𑀬 𑀲𑀦𑁆𑀤𑀺𑀲𑁆𑀲𑀢𑀺. 𑀓𑀼𑀲𑀺𑀦𑀸𑀭𑀸𑀬𑀁 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀤𑁄𑀡𑀩𑁆𑀭𑀸𑀳𑁆𑀫𑀡𑁄 𑀢𑀁 𑀯𑀺𑀯𑀸𑀤𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀸𑀢𑀼𑀬𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀢𑀻𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀓𑀸𑀭𑀡𑀸𑀦𑀺 𑀧𑀲𑁆𑀲𑀦𑁆𑀢𑁄 𑀪𑀕𑀯𑀸 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀓𑀼𑀲𑀺𑀦𑀸𑀭𑀁 𑀅𑀕𑀫𑀸𑀲𑀺.

𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀺𑀮𑀦𑁆𑀢𑁄𑀲𑁆𑀫𑀻𑀢𑀺 𑀧𑀭𑀺𑀲𑁆𑀲𑀦𑁆𑀢𑁄 𑀅𑀲𑁆𑀫𑀺. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀯𑁂𑀤𑀦𑀸𑀦𑀁 𑀩𑀮𑀯𑀪𑀸𑀯𑀁 𑀏𑀯 𑀤𑀲𑁆𑀲𑁂𑀢𑀺. 𑀪𑀕𑀯𑀸 𑀳𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀤𑀸 𑀧𑀤𑀲𑀸 𑀅𑀕𑀫𑀸𑀲𑀺, 𑀅𑀜𑁆𑀜𑁂𑀲𑀁 𑀧𑀦 𑀬𑀣𑀸 𑀧𑀤𑀼𑀤𑁆𑀥𑀸𑀭𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀣𑀸 𑀯𑁂𑀤𑀦𑀸 𑀢𑀺𑀔𑀺𑀡𑀸 𑀔𑀭𑀸 𑀓𑀝𑀼𑀓𑀸 𑀯𑀢𑁆𑀢𑀺𑀁𑀲𑀼. 𑀢𑁂𑀦𑁂𑀯𑀸𑀳 ‘‘𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺.

𑀇𑀤𑀸𑀦𑀻𑀢𑀺 𑀅𑀥𑀼𑀦𑀸. 𑀮𑀼𑀴𑀺𑀢𑀦𑁆𑀢𑀺 𑀫𑀤𑁆𑀤𑀺𑀢𑀁 𑀯𑀺𑀬 𑀆𑀓𑀼𑀮𑀁. 𑀆𑀯𑀺𑀮𑀦𑁆𑀢𑀺 𑀆𑀮𑀼𑀮𑀁. 𑀅𑀘𑁆𑀙𑁄𑀤𑀓𑀸𑀢𑀺 𑀢𑀦𑀼𑀧𑀲𑀦𑁆𑀦𑀲𑀮𑀺𑀮𑀸. 𑀲𑀸𑀢𑁄𑀤𑀓𑀸𑀢𑀺 𑀫𑀥𑀼𑀭𑀢𑁄𑀬𑀸. 𑀲𑀻𑀢𑁄𑀤𑀓𑀸𑀢𑀺 𑀲𑀻𑀢𑀮𑀚𑀮𑀸. 𑀲𑁂𑀢𑁄𑀤𑀓𑀸𑀢𑀺 𑀦𑀺𑀓𑁆𑀓𑀤𑁆𑀤𑀫𑀸. 𑀉𑀤𑀓𑀜𑁆𑀳𑀺 𑀲𑀪𑀸𑀯𑀢𑁄 𑀲𑁂𑀢𑀯𑀡𑁆𑀡𑀁, 𑀪𑀽𑀫𑀺𑀯𑀲𑁂𑀦 𑀓𑀤𑁆𑀤𑀫𑀸𑀯𑀺𑀮𑀢𑀸𑀬 𑀘 𑀅𑀜𑁆𑀜𑀸𑀤𑀺𑀲𑀁 𑀳𑁄𑀢𑀺, 𑀓𑀓𑀼𑀥𑀸𑀧𑀺 𑀦𑀤𑀻 𑀯𑀺𑀫𑀮𑀯𑀸𑀮𑀺𑀓𑀸 𑀲𑀫𑁄𑀓𑀺𑀡𑁆𑀡𑀸 𑀲𑁂𑀢𑀯𑀡𑁆𑀡𑀸 𑀲𑀦𑁆𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁂𑀢𑁄𑀤𑀓𑀸’’𑀢𑀺. 𑀲𑀼𑀧𑀢𑀺𑀢𑁆𑀣𑀸𑀢𑀺 𑀲𑀼𑀦𑁆𑀤𑀭𑀢𑀺𑀢𑁆𑀣𑀸. 𑀭𑀫𑀡𑀻𑀬𑀸𑀢𑀺 𑀫𑀦𑁄𑀳𑀭𑀪𑀽𑀫𑀺𑀪𑀸𑀕𑀢𑀸𑀬 𑀭𑀫𑀺𑀢𑀩𑁆𑀩𑀸 𑀬𑀣𑀸𑀯𑀼𑀢𑁆𑀢𑀉𑀤𑀓𑀲𑀫𑁆𑀧𑀢𑁆𑀢𑀺𑀬𑀸 𑀘 𑀫𑀦𑁄𑀭𑀫𑀸.

𑀓𑀺𑀮𑀦𑁆𑀢𑁄𑀲𑁆𑀫𑀺 𑀘𑀼𑀦𑁆𑀤𑀓, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀢𑀣𑀸𑀕𑀢𑀲𑁆𑀲 𑀳𑀺 𑁋

‘‘𑀓𑀸𑀴𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀳𑀢𑁆𑀣𑀺𑀓𑀼𑀮𑁂𑀲𑀼 𑀓𑀸𑀴𑀸𑀯𑀓𑀲𑀗𑁆𑀔𑀸𑀢𑀸𑀦𑀁 𑀬𑀁 𑀤𑀲𑀦𑁆𑀦𑀁 𑀧𑀓𑀢𑀺𑀳𑀢𑁆𑀣𑀻𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲𑀸𑀢𑀺 𑀏𑀯𑀁 𑀤𑀲𑀕𑀼𑀡𑀺𑀢𑀸𑀬 𑀕𑀡𑀦𑀸𑀬 𑀧𑀓𑀢𑀺𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀩𑀮𑀧𑁆𑀧𑀫𑀸𑀡𑀁 𑀲𑀭𑀻𑀭𑀩𑀮𑀁. 𑀢𑀁 𑀲𑀩𑁆𑀩𑀫𑁆𑀧𑀺 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀘𑀗𑁆𑀕𑀯𑀸𑀭𑁂 𑀧𑀓𑁆𑀔𑀺𑀢𑁆𑀢𑀉𑀤𑀓𑀁 𑀯𑀺𑀬 𑀧𑀭𑀺𑀓𑁆𑀔𑀬𑀁 𑀕𑀢𑀁. 𑀧𑀸𑀯𑀸𑀬 𑀢𑀺𑀕𑀸𑀯𑀼𑀢𑁂 𑀓𑀼𑀲𑀺𑀦𑀸𑀭𑀸. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀧𑀜𑁆𑀘𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀪𑀕𑀯𑀸 𑀓𑀼𑀲𑀺𑀦𑀸𑀭𑀁 𑀧𑀸𑀧𑀼𑀡𑀻𑀢𑀺 𑀏𑀯𑀁 ‘‘𑀭𑁄𑀕𑁄 𑀦𑀸𑀫 𑀲𑀩𑁆𑀩𑀁 𑀆𑀭𑁄𑀕𑁆𑀬𑀁 𑀫𑀤𑁆𑀤𑀦𑁆𑀢𑁄 𑀆𑀕𑀘𑁆𑀙𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀁𑀯𑁂𑀕𑀓𑀭𑀁 𑀯𑀸𑀘𑀁 𑀪𑀸𑀲𑀦𑁆𑀢𑁄 ‘‘𑀓𑀺𑀮𑀦𑁆𑀢𑁄𑀲𑁆𑀫𑀺, 𑀘𑀼𑀦𑁆𑀤𑀓, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑀲𑀻𑀳𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀓𑀸𑀫𑀪𑁄𑀕𑀻𑀲𑁂𑀬𑁆𑀬𑀸 𑀧𑁂𑀢𑀲𑁂𑀬𑁆𑀬𑀸 𑀢𑀣𑀸𑀕𑀢𑀲𑁂𑀬𑁆𑀬𑀸 𑀲𑀻𑀳𑀲𑁂𑀬𑁆𑀬𑀸𑀢𑀺 𑀘𑀢𑀲𑁆𑀲𑁄 𑀲𑁂𑀬𑁆𑀬𑀸. 𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀓𑀸𑀫𑀪𑁄𑀕𑀻 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀓𑀸𑀫𑀪𑁄𑀕𑀻𑀲𑁂𑀬𑁆𑀬𑀸. ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀧𑁂𑀢𑀸 𑀉𑀢𑁆𑀢𑀸𑀦𑀸 𑀲𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀧𑁂𑀢𑀲𑁂𑀬𑁆𑀬𑀸. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀢𑀣𑀸𑀕𑀢𑀲𑁂𑀬𑁆𑀬𑀸. ‘‘𑀲𑀻𑀳𑁄, 𑀪𑀺𑀓𑁆𑀔𑀯𑁂, 𑀫𑀺𑀕𑀭𑀸𑀚𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀲𑀻𑀳𑀲𑁂𑀬𑁆𑀬𑀸. 𑀅𑀬𑀜𑁆𑀳𑀺 𑀢𑁂𑀚𑀼𑀲𑁆𑀲𑀤𑀇𑀭𑀺𑀬𑀸𑀧𑀣𑀢𑁆𑀢𑀸 𑀉𑀢𑁆𑀢𑀫𑀲𑁂𑀬𑁆𑀬𑀸 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻’’𑀢𑀺. 𑀧𑀸𑀤𑁂 𑀧𑀸𑀤𑀦𑁆𑀢𑀺 𑀤𑀓𑁆𑀔𑀺𑀡𑀧𑀸𑀤𑁂 𑀯𑀸𑀫𑀧𑀸𑀤𑀁. 𑀅𑀘𑁆𑀘𑀸𑀥𑀸𑀬𑀸𑀢𑀺 𑀅𑀢𑀺𑀆𑀥𑀸𑀬, 𑀕𑁄𑀧𑁆𑀨𑀓𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑁆𑀯𑀸. 𑀕𑁄𑀧𑁆𑀨𑀓𑁂𑀦 𑀳𑀺 𑀕𑁄𑀧𑁆𑀨𑀓𑁂, 𑀚𑀸𑀡𑀼𑀦𑀸 𑀚𑀸𑀡𑀼𑀫𑁆𑀳𑀺 𑀲𑀗𑁆𑀖𑀝𑁆𑀝𑀺𑀬𑀫𑀸𑀦𑁂 𑀅𑀪𑀺𑀡𑁆𑀳𑀁 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁂𑀬𑁆𑀬𑀸 𑀨𑀸𑀲𑀼𑀓𑀸 𑀦 𑀳𑁄𑀢𑀺. 𑀬𑀣𑀸 𑀧𑀦 𑀦 𑀲𑀗𑁆𑀖𑀝𑁆𑀝𑁂𑀢𑀺, 𑀏𑀯𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑀺𑀢𑁂 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀲𑁂𑀬𑁆𑀬𑀸 𑀨𑀸𑀲𑀼𑀓𑀸 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀦𑀺𑀧𑀚𑁆𑀚𑀺.

𑀕𑀦𑁆𑀢𑁆𑀯𑀸𑀦 𑀩𑀼𑀤𑁆𑀥𑁄𑀢𑀺 𑀇𑀫𑀸 𑀕𑀸𑀣𑀸 𑀅𑀧𑀭𑀪𑀸𑀕𑁂 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀞𑀧𑀺𑀢𑀸. 𑀢𑀢𑁆𑀣 𑀦𑀤𑀺𑀓𑀦𑁆𑀢𑀺 𑀦𑀤𑀺𑀁. 𑀅𑀧𑁆𑀧𑀝𑀺𑀫𑁄𑀥 𑀮𑁄𑀓𑁂𑀢𑀺 𑀅𑀧𑁆𑀧𑀝𑀺𑀫𑁄 𑀇𑀥 𑀇𑀫𑀲𑁆𑀫𑀺𑀁 𑀲𑀤𑁂𑀯𑀓𑁂 𑀮𑁄𑀓𑁂. 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘𑀼𑀤𑀢𑀸𑀭𑀻𑀢𑀺 𑀕𑀢𑁆𑀢𑀸𑀦𑀁 𑀲𑀻𑀢𑀺𑀓𑀭𑀡𑀯𑀲𑁂𑀦 𑀦𑁆𑀳𑀢𑁆𑀯𑀸 𑀘 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀘 𑀦𑀤𑀺𑀢𑁄 𑀉𑀢𑁆𑀢𑀭𑀺. 𑀢𑀤𑀸 𑀓𑀺𑀭 𑀪𑀕𑀯𑀢𑀺 𑀦𑁆𑀳𑀸𑀬𑀦𑁆𑀢𑁂 𑀅𑀦𑁆𑀢𑁄𑀦𑀤𑀺𑀬𑀁 𑀫𑀘𑁆𑀙𑀓𑀘𑁆𑀙𑀧𑀸, 𑀉𑀤𑀓𑀁, 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀯𑀦𑀲𑀡𑁆𑀟𑁄, 𑀲𑀩𑁆𑀩𑁄 𑀘 𑀲𑁄 𑀪𑀽𑀫𑀺𑀪𑀸𑀕𑁄𑀢𑀺 𑀲𑀩𑁆𑀩𑀁 𑀲𑀼𑀯𑀡𑁆𑀡𑀯𑀡𑁆𑀡𑀫𑁂𑀯 𑀅𑀳𑁄𑀲𑀺. 𑀧𑀼𑀭𑀓𑁆𑀔𑀢𑁄𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀪𑀸𑀯𑀢𑁄 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀧𑀽𑀚𑀸𑀲𑀫𑁆𑀫𑀸𑀦𑀯𑀲𑁂𑀦 𑀧𑀼𑀭𑀓𑁆𑀔𑀢𑁄. 𑀪𑀺𑀓𑁆𑀔𑀼𑀕𑀡𑀲𑁆𑀲 𑀫𑀚𑁆𑀛𑁂𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂. 𑀢𑀤𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀯𑁂𑀤𑀦𑀸𑀦𑀁 𑀅𑀥𑀺𑀫𑀢𑁆𑀢𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 𑀆𑀲𑀦𑁆𑀦𑀸 𑀳𑀼𑀢𑁆𑀯𑀸 𑀲𑀫𑀦𑁆𑀢𑀢𑁄 𑀧𑀭𑀺𑀯𑀸𑀭𑁂𑀢𑁆𑀯𑀸𑀯 𑀕𑀘𑁆𑀙𑀦𑁆𑀢𑀺. 𑀲𑀢𑁆𑀣𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀲𑀢𑁆𑀢𑀸𑀦𑀁 𑀅𑀦𑀼𑀲𑀸𑀲𑀦𑀢𑁄 𑀲𑀢𑁆𑀣𑀸. 𑀧𑀯𑀢𑁆𑀢𑀸 𑀪𑀕𑀯𑀸 𑀇𑀥 𑀥𑀫𑁆𑀫𑁂𑀢𑀺 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀪𑀕𑀯𑀸 𑀇𑀥 𑀲𑀻𑀮𑀸𑀤𑀺𑀲𑀸𑀲𑀦𑀥𑀫𑁆𑀫𑁂 𑀧𑀯𑀢𑁆𑀢𑀸, 𑀥𑀫𑁆𑀫𑁂 𑀯𑀸 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀸 𑀧𑀯𑀢𑁆𑀢𑁂𑀢𑀸. 𑀅𑀫𑁆𑀩𑀯𑀦𑀦𑁆𑀢𑀺 𑀢𑀲𑁆𑀲𑀸 𑀏𑀯 𑀦𑀤𑀺𑀬𑀸 𑀢𑀻𑀭𑁂 𑀅𑀫𑁆𑀩𑀯𑀦𑀁. 𑀆𑀫𑀦𑁆𑀢𑀬𑀺 𑀘𑀼𑀦𑁆𑀤𑀓𑀦𑁆𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀔𑀡𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀤𑀓𑀲𑀸𑀝𑀺𑀓𑀁 𑀧𑀻𑀴𑁂𑀦𑁆𑀢𑁄 𑀑𑀳𑀻𑀬𑀺, 𑀘𑀼𑀦𑁆𑀤𑀓𑀢𑁆𑀣𑁂𑀭𑁄 𑀲𑀫𑀻𑀧𑁂 𑀅𑀳𑁄𑀲𑀺. 𑀢𑀲𑁆𑀫𑀸 𑀢𑀁 𑀪𑀕𑀯𑀸 𑀆𑀫𑀦𑁆𑀢𑀬𑀺. 𑀧𑀫𑀼𑀔𑁂 𑀦𑀺𑀲𑀻𑀤𑀻𑀢𑀺 𑀯𑀢𑁆𑀢𑀲𑀻𑀲𑁂𑀦 𑀲𑀢𑁆𑀣𑀼 𑀧𑀼𑀭𑀢𑁄 𑀦𑀺𑀲𑀻𑀤𑀺 ‘‘𑀓𑀺𑀁 𑀦𑀼 𑀔𑁄 𑀲𑀢𑁆𑀣𑀸 𑀆𑀡𑀸𑀧𑁂𑀢𑀻’’𑀢𑀺. 𑀏𑀢𑁆𑀢𑀸𑀯𑀢𑀸 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀏𑀯𑀁 𑀅𑀦𑀼𑀧𑁆𑀧𑀢𑁆𑀢𑀁 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺.

𑀉𑀧𑀤𑀳𑁂𑀬𑁆𑀬𑀸𑀢𑀺 𑀉𑀧𑁆𑀧𑀸𑀤𑁂𑀬𑁆𑀬, 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀉𑀧𑁆𑀧𑀸𑀤𑀓𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀲𑀺𑀬𑀸 𑀅𑀧𑀺 𑀪𑀯𑁂𑀬𑁆𑀬. 𑀅𑀮𑀸𑀪𑀸𑀢𑀺 𑀬𑁂 𑀅𑀜𑁆𑀜𑁂𑀲𑀁 𑀤𑀸𑀦𑀁 𑀤𑀤𑀦𑁆𑀢𑀸𑀦𑀁 𑀤𑀸𑀦𑀸𑀦𑀺𑀲𑀁𑀲𑀲𑀗𑁆𑀔𑀸𑀢𑀸 𑀮𑀸𑀪𑀸 𑀳𑁄𑀦𑁆𑀢𑀺, 𑀢𑁂 𑀅𑀮𑀸𑀪𑀸. 𑀤𑀼𑀮𑁆𑀮𑀤𑁆𑀥𑀦𑁆𑀢𑀺 𑀧𑀼𑀜𑁆𑀜𑀯𑀺𑀲𑁂𑀲𑁂𑀦 𑀮𑀤𑁆𑀥𑀫𑁆𑀧𑀺 𑀫𑀦𑀼𑀲𑁆𑀲𑀢𑁆𑀢𑀁 𑀤𑀼𑀮𑁆𑀮𑀤𑁆𑀥𑀁. 𑀬𑀲𑁆𑀲 𑀢𑁂𑀢𑀺 𑀬𑀲𑁆𑀲 𑀢𑀯. 𑀉𑀢𑁆𑀢𑀡𑁆𑀟𑀼𑀮𑀁 𑀯𑀸 𑀅𑀢𑀺𑀓𑀺𑀮𑀺𑀦𑁆𑀦𑀁 𑀯𑀸 𑀓𑁄 𑀢𑀁 𑀚𑀸𑀦𑀸𑀢𑀺, 𑀓𑀻𑀤𑀺𑀲𑀫𑁆𑀧𑀺 𑀧𑀘𑁆𑀙𑀺𑀫𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀤𑁆𑀥𑀸 𑀢𑁂𑀦 𑀬𑀁 𑀯𑀸 𑀢𑀁 𑀯𑀸 𑀤𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀮𑀸𑀪𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸 𑀤𑀸𑀦𑀸𑀦𑀺𑀲𑀁𑀲𑀲𑀗𑁆𑀔𑀸𑀢𑀸 𑀮𑀸𑀪𑀸. 𑀲𑀼𑀮𑀤𑁆𑀥𑀦𑁆𑀢𑀺 𑀢𑀼𑀬𑁆𑀳𑀁 𑀫𑀦𑀼𑀲𑁆𑀲𑀢𑁆𑀢𑀁 𑀲𑀼𑀮𑀤𑁆𑀥𑀁. 𑀲𑀫𑁆𑀫𑀼𑀔𑀸𑀢𑀺 𑀲𑀫𑁆𑀫𑀼𑀔𑀢𑁄, 𑀦 𑀅𑀦𑀼𑀲𑁆𑀲𑀯𑁂𑀦 𑀦 𑀧𑀭𑀫𑁆𑀧𑀭𑀸𑀬𑀸𑀢𑀺 𑀅𑀢𑁆𑀣𑁄. 𑀫𑁂𑀢𑀦𑁆𑀢𑀺 𑀫𑁂 𑀏𑀢𑀁 𑀫𑀬𑀸 𑀏𑀢𑀁. 𑀤𑁆𑀯𑁂𑀫𑁂𑀢𑀺 𑀤𑁆𑀯𑁂 𑀇𑀫𑁂. 𑀲𑀫𑀲𑀫𑀨𑀮𑀸𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀲𑀫𑀸𑀦𑀨𑀮𑀸.

𑀦𑀦𑀼 𑀘 𑀬𑀁 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀁 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀓𑀸𑀮𑁂 𑀤𑀸𑀦𑀁, 𑀇𑀤𑀁 𑀧𑀦 𑀘𑀼𑀦𑁆𑀤𑀲𑁆𑀲 𑀤𑀸𑀦𑀁 𑀔𑀻𑀡𑀸𑀲𑀯𑀓𑀸𑀮𑁂, 𑀓𑀲𑁆𑀫𑀸 𑀏𑀢𑀸𑀦𑀺 𑀲𑀫𑀨𑀮𑀸𑀦𑀻𑀢𑀺? 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀢𑀸𑀬 𑀲𑀫𑀸𑀧𑀢𑁆𑀢𑀺𑀲𑀫𑀢𑀸𑀬 𑀅𑀦𑀼𑀲𑁆𑀲𑀭𑀡𑀲𑀫𑀢𑀸𑀬 𑀘. 𑀪𑀕𑀯𑀸 𑀳𑀺 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀉𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀘𑀼𑀦𑁆𑀤𑁂𑀦 𑀤𑀺𑀦𑁆𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀏𑀯𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀢𑀸𑀬𑀧𑀺 𑀲𑀫𑀨𑀮𑀸𑀦𑀺. 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀤𑀺𑀯𑀲𑁂 𑀘 𑀅𑀕𑁆𑀕𑀫𑀕𑁆𑀕𑀲𑁆𑀲 𑀳𑁂𑀢𑀼𑀪𑀽𑀢𑀸 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺, 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀧𑀺 𑀲𑀩𑁆𑀩𑀸 𑀢𑀸 𑀲𑀫𑀸𑀧𑀚𑁆𑀚𑀺. 𑀏𑀯𑀁 𑀲𑀫𑀸𑀧𑀢𑁆𑀢𑀺𑀲𑀫𑀢𑀸𑀬𑀧𑀺 𑀲𑀫𑀨𑀮𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀲 𑀘𑁂𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀅𑀧𑁆𑀧𑀫𑀸𑀡𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀧𑁆𑀧𑀫𑀸𑀡𑁄 𑀢𑀲𑁆𑀲 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄’’𑀢𑀺𑀆𑀤𑀺. 𑁋

𑀲𑀼𑀚𑀸𑀢𑀸 𑀘 𑀅𑀧𑀭𑀪𑀸𑀕𑁂 𑀅𑀲𑁆𑀲𑁄𑀲𑀺 ‘‘𑀦 𑀓𑀺𑀭 𑀲𑀸 𑀭𑀼𑀓𑁆𑀔𑀤𑁂𑀯𑀢𑀸, 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭𑁂𑀲, 𑀢𑀁 𑀓𑀺𑀭 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀲𑀢𑁆𑀢𑀲𑀢𑁆𑀢𑀸𑀳𑀁 𑀓𑀺𑀭𑀲𑁆𑀲 𑀢𑁂𑀦 𑀬𑀸𑀧𑀦𑀸 𑀅𑀳𑁄𑀲𑀻’’𑀢𑀺. 𑀢𑀲𑁆𑀲𑀸 𑀇𑀤𑀁 𑀲𑀼𑀢𑁆𑀯𑀸 ‘‘𑀮𑀸𑀪𑀸 𑀯𑀢 𑀫𑁂’’𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀺𑀬𑀸 𑀩𑀮𑀯𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀘𑀼𑀦𑁆𑀤𑀲𑁆𑀲𑀧𑀺 𑀅𑀧𑀭𑀪𑀸𑀕𑁂 ‘‘𑀅𑀯𑀲𑀸𑀦𑀧𑀺𑀡𑁆𑀟𑀧𑀸𑀢𑁄 𑀓𑀺𑀭 𑀫𑀬𑀸 𑀤𑀺𑀦𑁆𑀦𑁄, 𑀥𑀫𑁆𑀫𑀲𑀻𑀲𑀁 𑀓𑀺𑀭 𑀫𑀬𑀸 𑀕𑀳𑀺𑀢𑀁, 𑀫𑀬𑁆𑀳𑀁 𑀓𑀺𑀭 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀢𑁆𑀣𑀸 𑀅𑀢𑁆𑀢𑀦𑀸 𑀘𑀺𑀭𑀓𑀸𑀮𑀸𑀪𑀺𑀧𑀢𑁆𑀣𑀺𑀢𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀮𑀸𑀪𑀸 𑀯𑀢 𑀫𑁂’’𑀢𑀺 𑀅𑀦𑀼𑀲𑁆𑀲𑀭𑀢𑁄 𑀩𑀮𑀯𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀏𑀯𑀁 𑀅𑀦𑀼𑀲𑁆𑀲𑀭𑀡𑀲𑀫𑀢𑀸𑀬𑀧𑀺 𑀲𑀫𑀨𑀮𑀸𑀦𑀺 𑀤𑁆𑀯𑁂𑀧𑀺 𑀧𑀺𑀡𑁆𑀟𑀧𑀸𑀢𑀤𑀸𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀆𑀬𑀼𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀤𑀻𑀖𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀁. 𑀉𑀧𑀘𑀺𑀢𑀦𑁆𑀢𑀺 𑀧𑀲𑀼𑀢𑀁 𑀉𑀧𑁆𑀧𑀸𑀤𑀺𑀢𑀁. 𑀬𑀲𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀧𑀭𑀺𑀯𑀸𑀭𑀲𑀁𑀯𑀢𑁆𑀢𑀦𑀺𑀓𑀁. 𑀆𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀲𑁂𑀝𑁆𑀞𑀪𑀸𑀯𑀲𑀁𑀯𑀢𑁆𑀢𑀦𑀺𑀓𑀁.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀢𑀜𑁆𑀘𑁂𑀯 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀘 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀢𑀺𑀯𑀺𑀥𑀫𑁆𑀧𑀺 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀘 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀬𑀸 𑀘 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀉𑀧𑀘𑀻𑀬𑀢𑀺, 𑀫𑀳𑀧𑁆𑀨𑀮𑀢𑀭𑀜𑁆𑀘 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸𑀬 𑀩𑀳𑀼𑀮𑀻𑀓𑀢𑀸𑀬 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀺𑀩𑀳𑀼𑀮𑁄 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀜𑁆𑀘 𑀪𑀸𑀯𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀢𑀲𑁆𑀲 𑀤𑀸𑀦𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺 𑀧𑀼𑀜𑁆𑀜𑀁 𑀅𑀪𑀺𑀯𑀟𑁆𑀠𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀁𑀬𑀫𑀢𑁄𑀢𑀺 𑀲𑀻𑀮𑀲𑀁𑀬𑀫𑁂𑀦 𑀲𑀁𑀬𑀫𑀦𑁆𑀢𑀲𑁆𑀲, 𑀲𑀁𑀯𑀭𑁂 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀧𑀜𑁆𑀘𑀯𑀺𑀥𑀯𑁂𑀭𑀁 𑀦 𑀧𑀯𑀟𑁆𑀠𑀢𑀺, 𑀅𑀤𑁄𑀲𑀧𑀥𑀸𑀦𑀢𑁆𑀢𑀸 𑀯𑀸 𑀅𑀥𑀺𑀲𑀻𑀮𑀲𑁆𑀲 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀬𑀁𑀫𑀦𑁆𑀢𑁄 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑁄 𑀔𑀦𑁆𑀢𑀺𑀩𑀳𑀼𑀮𑀢𑀸𑀬 𑀓𑁂𑀦𑀘𑀺 𑀯𑁂𑀭𑀁 𑀦 𑀓𑀭𑁄𑀢𑀺, 𑀓𑀼𑀢𑁄 𑀢𑀲𑁆𑀲 𑀉𑀧𑀘𑀬𑁄. 𑀢𑀲𑁆𑀫𑀸 𑀢𑀲𑁆𑀲 𑀲𑀁𑀬𑀫𑀢𑁄 𑀲𑀁𑀬𑀫𑀦𑁆𑀢𑀲𑁆𑀲, 𑀲𑀁𑀬𑀫𑀳𑁂𑀢𑀼 𑀯𑀸 𑀯𑁂𑀭𑀁 𑀦 𑀘𑀻𑀬𑀢𑀺. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀓𑀼𑀲𑀮𑁄 𑀧𑀦 𑀜𑀸𑀡𑀲𑀫𑁆𑀧𑀦𑁆𑀦𑁄 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑀁 𑀛𑀸𑀦𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀧𑀸𑀧𑀓𑀁 𑀮𑀸𑀫𑀓𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀅𑀓𑀼𑀲𑀮𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀚𑀳𑀸𑀢𑀺 𑀧𑀭𑀺𑀘𑁆𑀘𑀚𑀢𑀺. 𑀲𑁄 𑀢𑀫𑁂𑀯 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂𑀲𑀼 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑀁 𑀧𑀸𑀧𑀓𑀁 𑀮𑀸𑀫𑀓𑀁 𑀅𑀓𑀼𑀲𑀮𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀚𑀳𑀸𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀲𑁄 𑀏𑀯𑀁 𑀧𑀸𑀧𑀓𑀁 𑀧𑀚𑀳𑀺𑀢𑁆𑀯𑀸 𑀭𑀸𑀕𑀸𑀤𑀻𑀦𑀁 𑀔𑀬𑀸 𑀅𑀦𑀯𑀲𑁂𑀲𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦, 𑀢𑀢𑁄 𑀧𑀭𑀁 𑀔𑀦𑁆𑀥𑀦𑀺𑀩𑁆𑀩𑀸𑀦𑁂𑀦 𑀘 𑀦𑀺𑀩𑁆𑀩𑀼𑀢𑁄 𑀳𑁄𑀢𑀻𑀢𑀺 𑀏𑀯𑀁 𑀪𑀕𑀯𑀸 𑀘𑀼𑀦𑁆𑀤𑀲𑁆𑀲 𑀘 𑀤𑀓𑁆𑀔𑀺𑀡𑀲𑀫𑁆𑀧𑀢𑁆𑀢𑀺𑀁, 𑀅𑀢𑁆𑀢𑀦𑁄 𑀘 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀸𑀝𑀮𑀺𑀕𑀸𑀫𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀙𑀝𑁆𑀞𑁂 𑀫𑀕𑀥𑁂𑀲𑀽𑀢𑀺 𑀫𑀕𑀥𑀭𑀝𑁆𑀞𑁂. 𑀫𑀳𑀢𑀸𑀢𑀺 𑀇𑀥𑀸𑀧𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀲𑀗𑁆𑀔𑁆𑀬𑀢𑁆𑀢𑀸 𑀕𑀡𑀦𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀧𑀸𑀝𑀮𑀺𑀕𑀸𑀫𑁄𑀢𑀺 𑀏𑀯𑀁𑀦𑀸𑀫𑀓𑁄 𑀫𑀕𑀥𑀭𑀝𑁆𑀞𑁂 𑀏𑀓𑁄 𑀕𑀸𑀫𑁄. 𑀢𑀲𑁆𑀲 𑀓𑀺𑀭 𑀕𑀸𑀫𑀲𑁆𑀲 𑀫𑀸𑀧𑀦𑀤𑀺𑀯𑀲𑁂 𑀕𑀸𑀫𑀕𑁆𑀕𑀳𑀡𑀝𑁆𑀞𑀸𑀦𑁂 𑀤𑁆𑀯𑁂 𑀢𑀬𑁄 𑀧𑀸𑀝𑀮𑀗𑁆𑀓𑀼𑀭𑀸 𑀧𑀣𑀯𑀺𑀢𑁄 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀢𑁂𑀦 𑀢𑀁 ‘‘𑀧𑀸𑀝𑀮𑀺𑀕𑀸𑀫𑁄’’𑀢𑁆𑀯𑁂𑀯 𑀯𑁄𑀳𑀭𑀺𑀁𑀲𑀼. 𑀢𑀤𑀯𑀲𑀭𑀻𑀢𑀺 𑀢𑀁 𑀧𑀸𑀝𑀮𑀺𑀕𑀸𑀫𑀁 𑀅𑀯𑀲𑀭𑀺 𑀅𑀦𑀼𑀧𑀸𑀧𑀼𑀡𑀺. 𑀓𑀤𑀸 𑀧𑀦 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀁 𑀅𑀦𑀼𑀧𑀸𑀧𑀼𑀡𑀺? 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀕𑀳𑁂 𑀯𑀲𑀦𑁆𑀢𑁄 𑀢𑀢𑁆𑀣 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀘 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀯𑀲𑀺𑀢𑁆𑀯𑀸 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀢𑁆𑀣 𑀢𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀯𑀲𑀺𑀢𑁆𑀯𑀸 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀧𑀸𑀝𑀮𑀺𑀕𑀸𑀫𑀁 𑀅𑀦𑀼𑀧𑀸𑀧𑀼𑀡𑀺.

𑀧𑀸𑀝𑀮𑀺𑀕𑀸𑀫𑀺𑀬𑀸𑀢𑀺 𑀧𑀸𑀝𑀮𑀺𑀕𑀸𑀫𑀯𑀸𑀲𑀺𑀦𑁄 𑀉𑀧𑀸𑀲𑀓𑀸. 𑀢𑁂 𑀓𑀺𑀭 𑀪𑀕𑀯𑀢𑁄 𑀧𑀞𑀫𑀤𑀲𑁆𑀲𑀦𑁂𑀦 𑀓𑁂𑀘𑀺 𑀲𑀭𑀡𑁂𑀲𑀼, 𑀓𑁂𑀘𑀺 𑀲𑀻𑀮𑁂𑀲𑀼, 𑀓𑁂𑀘𑀺 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑀸𑀲𑀓𑀸’’𑀢𑀺. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀧𑀸𑀝𑀮𑀺𑀕𑀸𑀫𑁂 𑀓𑀺𑀭 𑀅𑀚𑀸𑀢𑀲𑀢𑁆𑀢𑀼𑀦𑁄 𑀮𑀺𑀘𑁆𑀙𑀯𑀺𑀭𑀸𑀚𑀽𑀦𑀜𑁆𑀘 𑀫𑀦𑀼𑀲𑁆𑀲𑀸 𑀓𑀸𑀮𑁂𑀦 𑀓𑀸𑀮𑀁 𑀕𑀦𑁆𑀢𑁆𑀯𑀸 𑀕𑁂𑀳𑀲𑀸𑀫𑀺𑀓𑁂 𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀫𑀸𑀲𑀫𑁆𑀧𑀺 𑀅𑀟𑁆𑀠𑀫𑀸𑀲𑀫𑁆𑀧𑀺 𑀯𑀲𑀦𑁆𑀢𑀺. 𑀢𑁂𑀦 𑀧𑀸𑀝𑀮𑀺𑀕𑀸𑀫𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀦𑀺𑀘𑁆𑀘𑀼𑀧𑀤𑁆𑀤𑀼𑀢𑀸 ‘‘𑀏𑀢𑁂𑀲𑀜𑁆𑀘𑁂𑀯 𑀆𑀕𑀢𑀓𑀸𑀮𑁂 𑀯𑀲𑀦𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀧𑀲𑁆𑀲𑁂 𑀇𑀲𑁆𑀲𑀭𑀸𑀦𑀁 𑀪𑀡𑁆𑀟𑀧𑁆𑀧𑀝𑀺𑀲𑀸𑀫𑀦𑀝𑁆𑀞𑀸𑀦𑀁, 𑀏𑀓𑀧𑀲𑁆𑀲𑁂 𑀯𑀲𑀦𑀝𑁆𑀞𑀸𑀦𑀁, 𑀏𑀓𑀧𑀲𑁆𑀲𑁂 𑀆𑀕𑀦𑁆𑀢𑀼𑀓𑀸𑀦𑀁 𑀅𑀤𑁆𑀥𑀺𑀓𑀫𑀦𑀼𑀲𑁆𑀲𑀸𑀦𑀁, 𑀏𑀓𑀧𑀲𑁆𑀲𑁂 𑀤𑀮𑀺𑀤𑁆𑀤𑀸𑀦𑀁 𑀓𑀧𑀡𑀫𑀦𑀼𑀲𑁆𑀲𑀸𑀦𑀁, 𑀏𑀓𑀧𑀲𑁆𑀲𑁂 𑀕𑀺𑀮𑀸𑀦𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀲𑀩𑁆𑀩𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀅𑀖𑀝𑁆𑀝𑁂𑀢𑁆𑀯𑀸 𑀯𑀲𑀦𑀧𑁆𑀧𑀳𑁄𑀦𑀓𑀁 𑀦𑀕𑀭𑀫𑀚𑁆𑀛𑁂 𑀫𑀳𑀸𑀲𑀸𑀮𑀁 𑀓𑀸𑀭𑁂𑀲𑀼𑀁, 𑀢𑀲𑁆𑀲𑀸 𑀦𑀸𑀫𑀁 𑀆𑀯𑀲𑀣𑀸𑀕𑀸𑀭𑀦𑁆𑀢𑀺. 𑀢𑀁 𑀤𑀺𑀯𑀲𑀜𑁆𑀘 𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀳𑀢𑁆𑀣𑀓𑀫𑁆𑀫𑀲𑀼𑀥𑀸𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀁 𑀲𑀼𑀲𑀚𑁆𑀚𑀺𑀢𑀁 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀢𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀧𑀝𑁆𑀞𑀸𑀬 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀤𑀁 𑀆𑀯𑀲𑀣𑀸𑀕𑀸𑀭𑀁 𑀅𑀢𑀺𑀯𑀺𑀬 𑀫𑀦𑁄𑀭𑀫𑀁 𑀲𑀲𑁆𑀲𑀺𑀭𑀺𑀓𑀁, 𑀓𑁂𑀦 𑀦𑀼 𑀔𑁄 𑀧𑀞𑀫𑀁 𑀧𑀭𑀺𑀪𑀼𑀢𑁆𑀢𑀁 𑀅𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀅𑀲𑁆𑀲𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁, 𑀢𑀲𑁆𑀫𑀺𑀁𑀬𑁂𑀯 𑀘 𑀔𑀡𑁂 ‘‘𑀪𑀕𑀯𑀸 𑀢𑀁 𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀅𑀲𑁆𑀲𑁄𑀲𑀼𑀁. 𑀢𑁂𑀦 𑀢𑁂 𑀉𑀧𑁆𑀧𑀦𑁆𑀦𑀧𑀻𑀢𑀺𑀲𑁄𑀫𑀦𑀲𑁆𑀲𑀸 ‘‘𑀅𑀫𑁆𑀳𑁂𑀳𑀺 𑀪𑀕𑀯𑀸 𑀕𑀦𑁆𑀢𑁆𑀯𑀸𑀧𑀺 𑀆𑀦𑁂𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀧𑀦 𑀲𑀬𑀫𑁂𑀯 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑁄, 𑀅𑀚𑁆𑀚 𑀫𑀬𑀁 𑀪𑀕𑀯𑀦𑁆𑀢𑀁 𑀇𑀥 𑀯𑀲𑀸𑀧𑁂𑀢𑁆𑀯𑀸 𑀧𑀞𑀫𑀁 𑀧𑀭𑀺𑀪𑀼𑀜𑁆𑀚𑀸𑀧𑁂𑀲𑁆𑀲𑀸𑀫 𑀢𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀁, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀆𑀕𑀢𑁂 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀆𑀕𑀢𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀁 𑀫𑀗𑁆𑀕𑀮𑀁 𑀯𑀤𑀸𑀧𑁂𑀲𑁆𑀲𑀸𑀫, 𑀥𑀫𑁆𑀫𑀁 𑀓𑀣𑀸𑀧𑁂𑀲𑁆𑀲𑀸𑀫. 𑀇𑀢𑀺 𑀢𑀻𑀳𑀺 𑀭𑀢𑀦𑁂𑀳𑀺 𑀧𑀭𑀺𑀪𑀼𑀢𑁆𑀢𑁂 𑀧𑀘𑁆𑀙𑀸 𑀅𑀫𑁆𑀳𑀸𑀓𑀜𑁆𑀘 𑀧𑀭𑁂𑀲𑀜𑁆𑀘 𑀧𑀭𑀺𑀪𑁄𑀕𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀦𑁄 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀏𑀢𑀤𑀢𑁆𑀣𑀫𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑀲𑁆𑀫𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂 𑀪𑀕𑀯𑀸, 𑀆𑀯𑀲𑀣𑀸𑀕𑀸𑀭’’𑀦𑁆𑀢𑀺.

𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀓𑀺𑀜𑁆𑀘𑀸𑀧𑀺 𑀢𑀁 𑀢𑀁 𑀤𑀺𑀯𑀲𑀫𑁂𑀯 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀲𑀼𑀲𑀚𑁆𑀚𑀺𑀢𑀁 𑀲𑀼𑀧𑀝𑀺𑀚𑀕𑁆𑀕𑀺𑀢𑀁, 𑀩𑀼𑀤𑁆𑀥𑀸𑀭𑀳𑀁 𑀧𑀦 𑀓𑀢𑁆𑀯𑀸 𑀦 𑀧𑀜𑁆𑀜𑀢𑁆𑀢𑀁, ‘‘𑀩𑀼𑀤𑁆𑀥𑀸 𑀦𑀸𑀫 𑀅𑀭𑀜𑁆𑀜𑀚𑁆𑀛𑀸𑀲𑀬𑀸 𑀅𑀭𑀜𑁆𑀜𑀸𑀭𑀸𑀫𑀸, 𑀅𑀦𑁆𑀢𑁄𑀕𑀸𑀫𑁂 𑀯𑀲𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸, 𑀢𑀲𑁆𑀫𑀸 𑀪𑀕𑀯𑀢𑁄 𑀭𑀼𑀘𑀺𑀁 𑀚𑀸𑀦𑀺𑀢𑁆𑀯𑀸𑀯 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼, 𑀇𑀤𑀸𑀦𑀺 𑀪𑀕𑀯𑀢𑁄 𑀭𑀼𑀘𑀺𑀁 𑀚𑀸𑀦𑀺𑀢𑁆𑀯𑀸 𑀢𑀣𑀸 𑀧𑀜𑁆𑀜𑀸𑀧𑁂𑀢𑀼𑀓𑀸𑀫𑀸 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀲𑀩𑁆𑀩𑀲𑀦𑁆𑀣𑀭𑀺𑀁 𑀆𑀯𑀲𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸𑀢𑀺 𑀬𑀣𑀸 𑀲𑀩𑁆𑀩𑀫𑁂𑀯 𑀲𑀦𑁆𑀣𑀢𑀁 𑀳𑁄𑀢𑀺, 𑀏𑀯𑀁 𑀢𑀁 𑀲𑀦𑁆𑀣𑀭𑀺𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀢𑀸𑀯 ‘‘𑀕𑁄𑀫𑀬𑀁 𑀦𑀸𑀫 𑀲𑀩𑁆𑀩𑀫𑀗𑁆𑀕𑀮𑁂𑀲𑀼 𑀯𑀢𑁆𑀢𑀢𑀻’’𑀢𑀺 𑀲𑀼𑀥𑀸𑀧𑀭𑀺𑀓𑀫𑁆𑀫𑀓𑀢𑀫𑁆𑀧𑀺 𑀪𑀽𑀫𑀺𑀁 𑀅𑀮𑁆𑀮𑀕𑁄𑀫𑀬𑁂𑀦 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸 𑀧𑀭𑀺𑀲𑀼𑀓𑁆𑀔𑀪𑀸𑀯𑀁 𑀜𑀢𑁆𑀯𑀸 𑀬𑀣𑀸 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀧𑀤𑀁 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀳𑀺 𑀮𑀺𑀫𑁆𑀧𑁂𑀢𑁆𑀯𑀸 𑀉𑀧𑀭𑀺 𑀦𑀸𑀦𑀸𑀯𑀡𑁆𑀡𑀓𑀝𑀲𑀸𑀭𑀓𑁂 𑀲𑀦𑁆𑀣𑀭𑀺𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀫𑀳𑀸𑀧𑀺𑀝𑁆𑀞𑀺𑀓𑀓𑁄𑀚𑀯𑀸𑀤𑀺𑀁 𑀓𑀢𑁆𑀯𑀸 𑀳𑀢𑁆𑀣𑀢𑁆𑀣𑀭𑀡𑀸𑀤𑀻𑀳𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀅𑀢𑁆𑀣𑀭𑀡𑁂𑀳𑀺 𑀲𑀦𑁆𑀣𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑀩𑁆𑀩𑁄𑀓𑀸𑀲𑀁 𑀲𑀦𑁆𑀣𑀭𑀸𑀧𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑀲𑀦𑁆𑀣𑀭𑀺𑀁 𑀆𑀯𑀲𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸’’𑀢𑀺.

𑀆𑀲𑀦𑀸𑀦𑀜𑁆𑀳𑀺 𑀫𑀚𑁆𑀛𑀝𑁆𑀞𑀸𑀦𑁂 𑀢𑀸𑀯 𑀫𑀗𑁆𑀕𑀮𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀫𑀳𑀸𑀭𑀳𑀁 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀬𑀁 𑀬𑀁 𑀫𑀼𑀤𑀼𑀓𑀜𑁆𑀘 𑀫𑀦𑁄𑀭𑀫𑀜𑁆𑀘 𑀧𑀘𑁆𑀘𑀢𑁆𑀣𑀭𑀡𑀁, 𑀢𑀁 𑀢𑀁 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸 𑀉𑀪𑀢𑁄𑀮𑁄𑀳𑀺𑀢𑀓𑀁 𑀫𑀦𑀼𑀜𑁆𑀜𑀤𑀲𑁆𑀲𑀦𑀁 𑀉𑀧𑀥𑀸𑀦𑀁 𑀉𑀧𑀤𑀳𑀺𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀭𑀚𑀢𑀢𑀸𑀭𑀓𑀸𑀯𑀺𑀘𑀺𑀢𑁆𑀢𑀁 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀤𑀸𑀫𑀧𑀼𑀧𑁆𑀨𑀤𑀸𑀫𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲𑀳𑀢𑁆𑀣𑁂 𑀞𑀸𑀦𑁂 𑀧𑀼𑀧𑁆𑀨𑀚𑀸𑀮𑀁 𑀓𑀸𑀭𑁂𑀢𑁆𑀯𑀸 𑀢𑀺𑀁𑀲𑀳𑀢𑁆𑀣𑀫𑀢𑁆𑀢𑀝𑁆𑀞𑀸𑀦𑀁 𑀧𑀝𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀮𑁆𑀮𑀗𑁆𑀓𑀅𑀧𑀲𑁆𑀲𑀬𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑁂𑀢𑀧𑀘𑁆𑀘𑀢𑁆𑀣𑀭𑀡𑁂𑀳𑀺 𑀧𑀘𑁆𑀘𑀢𑁆𑀣𑀭𑀸𑀧𑁂𑀢𑁆𑀯𑀸 𑀲𑀸𑀮𑀸𑀬 𑀧𑀸𑀘𑀻𑀦𑀧𑀲𑁆𑀲𑀁 𑀅𑀢𑁆𑀢𑀦𑁄 𑀦𑀺𑀲𑀚𑁆𑀚𑀸𑀬𑁄𑀕𑁆𑀕𑀁 𑀓𑀸𑀭𑁂𑀲𑀼𑀁. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸’’𑀢𑀺.

𑀉𑀤𑀓𑀫𑀡𑀺𑀓𑀦𑁆𑀢𑀺 𑀫𑀳𑀸𑀓𑀼𑀘𑁆𑀙𑀺𑀓𑀁 𑀉𑀤𑀓𑀘𑀸𑀝𑀺𑀁. 𑀏𑀯𑀁 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘 𑀬𑀣𑀸𑀭𑀼𑀘𑀺𑀬𑀸 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀲𑁆𑀲𑀦𑁆𑀢𑀺, 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀲𑁆𑀲𑀦𑁆𑀢𑀻𑀢𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀫𑀡𑀺𑀯𑀡𑁆𑀡𑀲𑁆𑀲 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀯𑀸𑀲𑀢𑁆𑀣𑀸𑀬 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀘𑁂𑀯 𑀉𑀤𑀓𑀯𑀸𑀲𑀘𑀼𑀡𑁆𑀡𑀸𑀦𑀺 𑀘 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀤𑀮𑀺𑀧𑀡𑁆𑀡𑁂𑀳𑀺 𑀧𑀺𑀤𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀧𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺.

𑀢𑁂𑀮𑀧𑁆𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀭𑀚𑀢𑀲𑀼𑀯𑀡𑁆𑀡𑀸𑀤𑀺𑀫𑀬𑀤𑀡𑁆𑀟𑀤𑀻𑀧𑀺𑀓𑀸𑀲𑀼 𑀬𑁄𑀥𑀓𑀭𑀽𑀧𑀯𑀺𑀮𑀸𑀲𑀔𑀘𑀺𑀢𑀭𑀽𑀧𑀓𑀸𑀤𑀻𑀦𑀁 𑀳𑀢𑁆𑀣𑁂 𑀞𑀧𑀺𑀢𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀓𑀧𑀮𑁆𑀮𑀺𑀓𑀸𑀲𑀼 𑀢𑁂𑀮𑀧𑁆𑀧𑀤𑀻𑀧𑀁 𑀚𑀸𑀮𑀬𑀺𑀢𑁆𑀯𑀸. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀏𑀢𑁆𑀣 𑀧𑀦 𑀢𑁂 𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀦 𑀓𑁂𑀯𑀮𑀁 𑀆𑀯𑀲𑀣𑀸𑀕𑀸𑀭𑀫𑁂𑀯, 𑀅𑀣 𑀔𑁄 𑀲𑀓𑀮𑀲𑁆𑀫𑀺𑀫𑁆𑀧𑀺 𑀕𑀸𑀫𑁂 𑀯𑀻𑀣𑀺𑀬𑁄 𑀲𑀚𑁆𑀚𑀸𑀧𑁂𑀢𑁆𑀯𑀸 𑀥𑀚𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂𑀲𑀼 𑀧𑀼𑀡𑁆𑀡𑀖𑀝𑁂 𑀓𑀤𑀮𑀺𑀬𑁄 𑀘 𑀞𑀧𑀸𑀧𑁂𑀢𑁆𑀯𑀸 𑀲𑀓𑀮𑀕𑀸𑀫𑀁 𑀤𑀻𑀧𑀫𑀸𑀮𑀸𑀳𑀺 𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀭𑀓𑀁 𑀯𑀺𑀬 𑀓𑀢𑁆𑀯𑀸 ‘‘𑀔𑀻𑀭𑀧𑀓𑁂 𑀤𑀸𑀭𑀓𑁂 𑀔𑀻𑀭𑀁 𑀧𑀸𑀬𑁂𑀣, 𑀤𑀳𑀭𑀓𑀼𑀫𑀸𑀭𑁂 𑀮𑀳𑀼𑀁 𑀮𑀳𑀼𑀁 𑀪𑁄𑀚𑁂𑀢𑁆𑀯𑀸 𑀲𑀬𑀸𑀧𑁂𑀣, 𑀉𑀘𑁆𑀘𑀸𑀲𑀤𑁆𑀤𑀁 𑀫𑀸 𑀓𑀭𑀺𑀢𑁆𑀣, 𑀅𑀚𑁆𑀚 𑀏𑀓𑀭𑀢𑁆𑀢𑀺𑀁 𑀲𑀢𑁆𑀣𑀸 𑀅𑀦𑁆𑀢𑁄𑀕𑀸𑀫𑁂 𑀯𑀲𑀺𑀲𑁆𑀲𑀢𑀺, 𑀩𑀼𑀤𑁆𑀥𑀸 𑀦𑀸𑀫 𑀅𑀧𑁆𑀧𑀲𑀤𑁆𑀤𑀓𑀸𑀫𑀸 𑀳𑁄𑀦𑁆𑀢𑀻’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀬𑀁 𑀤𑀡𑁆𑀟𑀤𑀻𑀧𑀺𑀓𑀸 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ‘‘𑀬𑀲𑁆𑀲 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺 𑀏𑀯𑀁 𑀓𑀺𑀭 𑀢𑁂𑀳𑀺 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀪𑀕𑀯𑀸 𑀮𑀸𑀔𑀸𑀭𑀲𑁂𑀦 𑀢𑀺𑀦𑁆𑀢𑀭𑀢𑁆𑀢𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀯𑀡𑁆𑀡𑀁 𑀭𑀢𑁆𑀢𑀤𑀼𑀧𑀝𑁆𑀝𑀁 𑀓𑀢𑁆𑀢𑀭𑀺𑀬𑀸 𑀧𑀤𑀼𑀫𑀁 𑀓𑀦𑁆𑀢𑁂𑀦𑁆𑀢𑁄 𑀯𑀺𑀬, 𑀲𑀁𑀯𑀺𑀥𑀸𑀬 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀫𑀗𑁆𑀕𑁂𑀦 𑀧𑀤𑀼𑀫𑀓𑀮𑀸𑀧𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬, 𑀯𑀺𑀚𑁆𑀚𑀼𑀮𑀢𑀸𑀲𑀲𑁆𑀲𑀺𑀭𑀺𑀓𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑁂𑀦 𑀕𑀚𑀓𑀼𑀫𑁆𑀪𑀁 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑁄 𑀯𑀺𑀬, 𑀭𑀢𑀦𑀲𑀢𑀼𑀩𑁆𑀩𑁂𑀥𑁂 𑀲𑀼𑀯𑀡𑁆𑀡𑀕𑁆𑀖𑀺𑀓𑁂 𑀧𑀯𑀸𑀴𑀚𑀸𑀮𑀁 𑀔𑀺𑀧𑀫𑀸𑀦𑁄 𑀯𑀺𑀬, 𑀫𑀳𑀢𑀺 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀭𑀢𑁆𑀢𑀓𑀫𑁆𑀩𑀮𑀓𑀜𑁆𑀘𑀼𑀓𑀁 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬, 𑀕𑀘𑁆𑀙𑀦𑁆𑀢𑀁 𑀧𑀼𑀡𑁆𑀡𑀘𑀦𑁆𑀤𑀁 𑀭𑀢𑁆𑀢𑀯𑀮𑀸𑀳𑀓𑁂𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀯𑀺𑀬, 𑀓𑀜𑁆𑀘𑀦𑀕𑀺𑀭𑀺𑀫𑀢𑁆𑀣𑀓𑁂 𑀲𑀼𑀧𑀓𑁆𑀓𑀮𑀸𑀔𑀸𑀭𑀲𑀁 𑀧𑀭𑀺𑀲𑀺𑀜𑁆𑀘𑀦𑁆𑀢𑁄 𑀯𑀺𑀬, 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀫𑀢𑁆𑀣𑀓𑀁 𑀯𑀺𑀚𑁆𑀚𑀼𑀮𑀢𑀸𑀚𑀸𑀮𑁂𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬, 𑀲𑀓𑀮𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀫𑀳𑀸𑀧𑀣𑀯𑀺𑀁 𑀘𑀸𑀮𑁂𑀢𑁆𑀯𑀸 𑀕𑀳𑀺𑀢𑀦𑀺𑀕𑁆𑀭𑁄𑀥𑀧𑀮𑁆𑀮𑀯𑀲𑀫𑀸𑀦𑀯𑀡𑁆𑀡𑀁 𑀲𑀼𑀭𑀢𑁆𑀢𑀯𑀭𑀧𑀁𑀲𑀼𑀓𑀽𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀯𑀦𑀕𑀳𑀦𑀢𑁄 𑀦𑀺𑀓𑁆𑀔𑀦𑁆𑀢𑀓𑁂𑀲𑀭𑀲𑀻𑀳𑁄 𑀯𑀺𑀬, 𑀲𑀫𑀦𑁆𑀢𑀢𑁄 𑀉𑀤𑀬𑀧𑀩𑁆𑀩𑀢𑀓𑀽𑀝𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬, 𑀩𑀸𑀮𑀲𑀽𑀭𑀺𑀬𑁄 𑀯𑀺𑀬 𑀘 𑀅𑀢𑁆𑀢𑀦𑀸 𑀦𑀺𑀲𑀺𑀦𑁆𑀦𑀘𑀸𑀭𑀼𑀫𑀡𑁆𑀟𑀧𑀢𑁄 𑀦𑀺𑀓𑁆𑀔𑀫𑀺.

𑀅𑀣𑀲𑁆𑀲 𑀓𑀸𑀬𑀢𑁄 𑀫𑁂𑀖𑀫𑀼𑀔𑀢𑁄 𑀯𑀺𑀚𑁆𑀚𑀼𑀓𑀮𑀸𑀧𑀸 𑀯𑀺𑀬 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀧𑀭𑀺𑀲𑁂𑀓𑀧𑀺𑀜𑁆𑀚𑀭𑀧𑀢𑁆𑀢𑀧𑀼𑀧𑁆𑀨𑀨𑀮𑀲𑀸𑀔𑀸𑀯𑀺𑀝𑀧𑁂 𑀯𑀺𑀬 𑀲𑀫𑀦𑁆𑀢𑀢𑁄 𑀭𑀼𑀓𑁆𑀔𑁂 𑀓𑀭𑀺𑀁𑀲𑀼. 𑀢𑀸𑀯𑀤𑁂𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀲𑀺. 𑀢𑁂 𑀘 𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸 𑀅𑀳𑁂𑀲𑀼𑀁 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀧𑀯𑀺𑀯𑀺𑀢𑁆𑀢𑀸 𑀅𑀲𑀁𑀲𑀝𑁆𑀞𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀢𑁆𑀢𑀸𑀭𑁄 𑀯𑀘𑀦𑀓𑁆𑀔𑀫𑀸 𑀘𑁄𑀤𑀓𑀸 𑀧𑀸𑀧𑀕𑀭𑀳𑀺𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸. 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀪𑀕𑀯𑀸 𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄, 𑀦𑀓𑁆𑀔𑀢𑁆𑀢𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀧𑀼𑀡𑁆𑀡𑀘𑀦𑁆𑀤𑁄, 𑀭𑀢𑁆𑀢𑀧𑀤𑀼𑀫𑀯𑀦𑀲𑀡𑁆𑀟𑀫𑀚𑁆𑀛𑀕𑀢𑀸 𑀯𑀺𑀬 𑀲𑀼𑀯𑀡𑁆𑀡𑀦𑀸𑀯𑀸, 𑀧𑀯𑀸𑀴𑀯𑁂𑀤𑀺𑀓𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀸𑀲𑀸𑀤𑁄 𑀯𑀺𑀭𑁄𑀘𑀺𑀢𑁆𑀣. 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑀸 𑀧𑀦 𑀫𑀳𑀸𑀣𑁂𑀭𑀸 𑀫𑁂𑀖𑀯𑀡𑁆𑀡𑀁 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀡𑀺𑀯𑀫𑁆𑀫𑀯𑀫𑁆𑀫𑀺𑀢𑀸 𑀯𑀺𑀬 𑀫𑀳𑀸𑀦𑀸𑀕𑀸 𑀧𑀭𑀺𑀯𑀸𑀭𑀬𑀺𑀁𑀲𑀼 𑀯𑀦𑁆𑀢𑀭𑀸𑀕𑀸 𑀪𑀺𑀦𑁆𑀦𑀓𑀺𑀮𑁂𑀲𑀸 𑀯𑀺𑀚𑀝𑀺𑀢𑀚𑀝𑀸 𑀙𑀺𑀦𑁆𑀦𑀩𑀦𑁆𑀥𑀦𑀸 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀅𑀮𑀕𑁆𑀕𑀸.

𑀇𑀢𑀺 𑀪𑀕𑀯𑀸 𑀲𑀬𑀁 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑁂𑀳𑀺, 𑀯𑀻𑀢𑀤𑁄𑀲𑁄 𑀯𑀻𑀢𑀤𑁄𑀲𑁂𑀳𑀺, 𑀯𑀻𑀢𑀫𑁄𑀳𑁄 𑀯𑀻𑀢𑀫𑁄𑀳𑁂𑀳𑀺, 𑀦𑀺𑀢𑁆𑀢𑀡𑁆𑀳𑁄 𑀦𑀺𑀢𑁆𑀢𑀡𑁆𑀳𑁂𑀳𑀺, 𑀦𑀺𑀓𑁆𑀓𑀺𑀮𑁂𑀲𑁄 𑀦𑀺𑀓𑁆𑀓𑀺𑀮𑁂𑀲𑁂𑀳𑀺, 𑀲𑀬𑀁 𑀩𑀼𑀤𑁆𑀥𑁄 𑀅𑀦𑀼𑀩𑀼𑀤𑁆𑀥𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀧𑀢𑁆𑀢𑀧𑀭𑀺𑀯𑀸𑀭𑀺𑀢𑀁 𑀯𑀺𑀬 𑀓𑁂𑀲𑀭𑀁, 𑀓𑁂𑀲𑀭𑀧𑀭𑀺𑀯𑀸𑀭𑀺𑀢𑀸 𑀯𑀺𑀬 𑀓𑀡𑁆𑀡𑀺𑀓𑀸, 𑀅𑀝𑁆𑀞𑀦𑀸𑀕𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸, 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸, 𑀲𑁂𑀦𑀗𑁆𑀕𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸, 𑀫𑀭𑀼𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀳𑀸𑀭𑀺𑀢𑀫𑀳𑀸𑀩𑁆𑀭𑀳𑁆𑀫𑀸, 𑀢𑀸𑀭𑀸𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀧𑀼𑀡𑁆𑀡𑀘𑀦𑁆𑀤𑁄, 𑀅𑀦𑀼𑀧𑀫𑁂𑀦 𑀩𑀼𑀤𑁆𑀥𑀯𑁂𑀲𑁂𑀦 𑀅𑀧𑀭𑀺𑀫𑀸𑀡𑁂𑀦 𑀩𑀼𑀤𑁆𑀥𑀯𑀺𑀮𑀸𑀲𑁂𑀦 𑀧𑀸𑀝𑀮𑀺𑀕𑀸𑀫𑀺𑀦𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀅𑀣𑀲𑁆𑀲 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀢𑀣𑀸 𑀧𑀘𑁆𑀙𑀺𑀫𑀓𑀸𑀬𑀢𑁄 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀯𑀸𑀫𑀧𑀲𑁆𑀲𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀉𑀧𑀭𑀺𑀓𑁂𑀲𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑁂𑀲𑀸𑀯𑀝𑁆𑀝𑁂𑀳𑀺 𑀫𑁄𑀭𑀕𑀻𑀯𑀭𑀸𑀚𑀯𑀡𑁆𑀡𑀸 𑀅𑀲𑀺𑀢𑀸 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀸 𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀬𑀁 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀤𑀦𑁆𑀢𑀢𑁄 𑀅𑀓𑁆𑀔𑀻𑀦𑀁 𑀲𑁂𑀢𑀝𑁆𑀞𑀸𑀦𑀢𑁄, 𑀦𑀔𑀸𑀦𑀁 𑀫𑀁𑀲𑀯𑀺𑀫𑀼𑀢𑁆𑀢𑀝𑁆𑀞𑀸𑀦𑀢𑁄 𑀑𑀤𑀸𑀢𑀸 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀭𑀢𑁆𑀢𑀧𑀻𑀢𑀯𑀡𑁆𑀡𑀸𑀦𑀁 𑀲𑀫𑁆𑀪𑀺𑀦𑁆𑀦𑀝𑁆𑀞𑀸𑀦𑀢𑁄 𑀫𑀜𑁆𑀚𑁂𑀝𑁆𑀞𑀯𑀡𑁆𑀡𑀸 𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀪𑀲𑁆𑀲𑀭𑀸 𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀁𑀲𑀼. 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀯𑀺𑀥𑀸𑀯𑀫𑀸𑀦𑀸 𑀓𑀜𑁆𑀘𑀦𑀤𑀡𑁆𑀟𑀤𑀻𑀧𑀺𑀓𑀸𑀤𑀻𑀳𑀺 𑀦𑀺𑀘𑁆𑀙𑀭𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀫𑀸𑀦𑀸 𑀫𑀳𑀸𑀧𑀤𑀻𑀧𑀚𑀸𑀮𑀸 𑀯𑀺𑀬, 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀢𑁄 𑀦𑀺𑀓𑁆𑀔𑀦𑁆𑀢𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀘 𑀤𑀺𑀲𑁄𑀤𑀺𑀲𑀁 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀬𑀸𑀳𑀺 𑀲𑀩𑁆𑀩𑁂 𑀤𑀺𑀲𑀸𑀪𑀸𑀕𑀸 𑀲𑀼𑀯𑀡𑁆𑀡𑀘𑀫𑁆𑀧𑀓𑀧𑀼𑀧𑁆𑀨𑁂𑀳𑀺 𑀯𑀺𑀓𑀺𑀭𑀺𑀬𑀫𑀸𑀦𑀸 𑀯𑀺𑀬, 𑀲𑀼𑀯𑀡𑁆𑀡𑀖𑀝𑀢𑁄 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀳𑀺 𑀆𑀲𑀺𑀜𑁆𑀘𑀺𑀬𑀫𑀸𑀦𑀸 𑀯𑀺𑀬, 𑀧𑀲𑀸𑀭𑀺𑀢𑀲𑀼𑀯𑀡𑁆𑀡𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑀺𑀬, 𑀯𑁂𑀭𑀫𑁆𑀪𑀯𑀸𑀢𑁂𑀦 𑀲𑀫𑀼𑀤𑁆𑀥𑀢𑀓𑀺𑀁𑀲𑀼𑀓𑀓𑀡𑀺𑀓𑀸𑀭𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀘𑀼𑀡𑁆𑀡𑀲𑀫𑁄𑀓𑀺𑀡𑁆𑀡𑀸 𑀯𑀺𑀬, 𑀘𑀻𑀦𑀧𑀺𑀝𑁆𑀞𑀘𑀼𑀡𑁆𑀡𑀲𑀫𑁆𑀧𑀭𑀺𑀭𑀜𑁆𑀚𑀺𑀢𑀸 𑀯𑀺𑀬 𑀘 𑀯𑀺𑀭𑁄𑀘𑀺𑀁𑀲𑀼.

𑀪𑀕𑀯𑀢𑁄𑀧𑀺 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀲𑀫𑀼𑀚𑁆𑀚𑀮𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀲𑀭𑀻𑀭𑀁 𑀅𑀩𑁆𑀪𑀫𑀳𑀺𑀓𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀲𑀫𑀼𑀚𑁆𑀚𑀮𑀦𑁆𑀢𑀢𑀸𑀭𑀓𑀸𑀯𑀪𑀸𑀲𑀺𑀢𑀁 𑀯𑀺𑀬, 𑀕𑀕𑀦𑀢𑀮𑀁 𑀯𑀺𑀓𑀲𑀺𑀢𑀁 𑀯𑀺𑀬 𑀧𑀤𑀼𑀫𑀯𑀦𑀁, 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 𑀯𑀺𑀬 𑀬𑁄𑀚𑀦𑀲𑀢𑀺𑀓𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄, 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀲𑀽𑀭𑀺𑀬𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀺𑀫𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀓𑁆𑀓𑀯𑀢𑁆𑀢𑀻𑀦𑀁 𑀤𑁆𑀯𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀲𑀺𑀭𑀺𑀬𑀸 𑀲𑀺𑀭𑀺𑀁 𑀅𑀪𑀺𑀪𑀯𑀫𑀸𑀦𑀁 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣, 𑀬𑀣𑀸 𑀢𑀁 𑀤𑀲𑀳𑀺 𑀧𑀸𑀭𑀫𑀻𑀳𑀺 𑀤𑀲𑀳𑀺 𑀉𑀧𑀧𑀸𑀭𑀫𑀻𑀳𑀺 𑀤𑀲𑀳𑀺 𑀧𑀭𑀫𑀢𑁆𑀣𑀧𑀸𑀭𑀫𑀻𑀳𑀻𑀢𑀺 𑀲𑀫𑁆𑀫𑀤𑁂𑀯 𑀧𑀭𑀺𑀧𑀽𑀭𑀺𑀢𑀸𑀳𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀢𑀸𑀳𑀺 𑀅𑀮𑀗𑁆𑀓𑀢𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀺𑀦𑁆𑀦𑁂𑀦 𑀤𑀸𑀦𑁂𑀦 𑀭𑀓𑁆𑀔𑀺𑀢𑁂𑀦 𑀲𑀻𑀮𑁂𑀦 𑀓𑀢𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑀫𑁄𑀲𑀭𑀺𑀢𑁆𑀯𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀑𑀓𑀸𑀲𑀁 𑀅𑀮𑀪𑀫𑀸𑀦𑁂𑀦 𑀲𑀫𑁆𑀩𑀸𑀥𑀧𑁆𑀧𑀢𑁆𑀢𑀁 𑀯𑀺𑀬 𑀦𑀺𑀩𑁆𑀩𑀢𑁆𑀢𑀺𑀢𑀁 𑀦𑀸𑀯𑀸𑀲𑀳𑀲𑁆𑀲𑀪𑀡𑁆𑀟𑀁 𑀏𑀓𑀁 𑀦𑀸𑀯𑀁 𑀆𑀭𑁄𑀧𑀦𑀓𑀸𑀮𑁄 𑀯𑀺𑀬, 𑀲𑀓𑀝𑀲𑀳𑀲𑁆𑀲𑀪𑀡𑁆𑀟𑀁 𑀏𑀓𑀁 𑀲𑀓𑀝𑀁 𑀆𑀭𑁄𑀧𑀦𑀓𑀸𑀮𑁄 𑀯𑀺𑀬, 𑀧𑀜𑁆𑀘𑀯𑀻𑀲𑀢𑀺𑀬𑀸 𑀕𑀗𑁆𑀕𑀸𑀦𑀁 𑀲𑀫𑁆𑀪𑀺𑀦𑁆𑀦𑀫𑀼𑀔𑀤𑁆𑀯𑀸𑀭𑁂 𑀏𑀓𑀢𑁄 𑀭𑀸𑀲𑀺𑀪𑀽𑀢𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺.

𑀇𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀑𑀪𑀸𑀲𑀫𑀸𑀦𑀲𑁆𑀲𑀧𑀺 𑀪𑀕𑀯𑀢𑁄 𑀧𑀼𑀭𑀢𑁄 𑀅𑀦𑁂𑀓𑀸𑀦𑀺 𑀤𑀡𑁆𑀟𑀤𑀻𑀧𑀺𑀓𑀸𑀲𑀳𑀲𑁆𑀲𑀸𑀦𑀺 𑀉𑀓𑁆𑀔𑀺𑀧𑀺𑀁𑀲𑀼. 𑀢𑀣𑀸 𑀧𑀘𑁆𑀙𑀢𑁄 𑀯𑀸𑀫𑀧𑀲𑁆𑀲𑁂 𑀤𑀓𑁆𑀔𑀺𑀡𑀧𑀲𑁆𑀲𑁂 𑀚𑀸𑀢𑀺𑀓𑀼𑀲𑀼𑀫𑀘𑀫𑁆𑀧𑀓𑀯𑀦𑀫𑀸𑀮𑀺𑀓𑀸𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀩𑀓𑀼𑀮𑀲𑀺𑀦𑁆𑀤𑀼𑀯𑀸𑀭𑀸𑀤𑀺𑀧𑀼𑀧𑁆𑀨𑀸𑀦𑀺 𑀘𑁂𑀯 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀲𑀼𑀕𑀦𑁆𑀥𑀘𑀼𑀡𑁆𑀡𑀸𑀦𑀺 𑀘 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀯𑀺𑀲𑁆𑀲𑀝𑁆𑀞𑀸 𑀲𑀮𑀺𑀮𑀯𑀼𑀝𑁆𑀞𑀺𑀬𑁄 𑀯𑀺𑀬 𑀯𑀺𑀧𑁆𑀧𑀓𑀺𑀭𑀺𑀁𑀲𑀼. 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀦𑀺𑀕𑁆𑀖𑁄𑀲𑀸 𑀘 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀸𑀲𑀁𑀬𑀼𑀢𑁆𑀢𑀸 𑀣𑀼𑀢𑀺𑀖𑁄𑀲𑀸 𑀘 𑀲𑀩𑁆𑀩𑀸 𑀤𑀺𑀲𑀸 𑀧𑀽𑀭𑀬𑀫𑀸𑀦𑀸 𑀫𑀼𑀔𑀲𑀫𑁆𑀪𑀸𑀲𑀸 𑀯𑀺𑀬 𑀅𑀳𑁂𑀲𑀼𑀁. 𑀤𑁂𑀯𑀲𑀼𑀧𑀡𑁆𑀡𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀸𑀦𑀁 𑀅𑀓𑁆𑀔𑀻𑀦𑀺 𑀅𑀫𑀢𑀧𑀸𑀦𑀁 𑀯𑀺𑀬 𑀮𑀪𑀺𑀁𑀲𑀼. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀧𑀤𑀲𑀳𑀲𑁆𑀲𑁂𑀳𑀺 𑀕𑀫𑀦𑀯𑀡𑁆𑀡𑀦𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀭𑀺𑀬𑀁 𑀫𑀼𑀔𑀫𑀢𑁆𑀢𑀁 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁄, 𑀓𑀫𑁆𑀧𑀬𑀦𑁆𑀢𑁄 𑀯𑀲𑀼𑀦𑁆𑀥𑀭𑀁;

𑀅𑀳𑁂𑀞𑀬𑀦𑁆𑀢𑁄 𑀧𑀸𑀡𑀸𑀦𑀺, 𑀬𑀸𑀢𑀺 𑀮𑁄𑀓𑀯𑀺𑀦𑀸𑀬𑀓𑁄.

‘‘𑀤𑀓𑁆𑀔𑀺𑀡𑀁 𑀧𑀞𑀫𑀁 𑀧𑀸𑀤𑀁, 𑀉𑀤𑁆𑀥𑀭𑀦𑁆𑀢𑁄 𑀦𑀭𑀸𑀲𑀪𑁄;

𑀕𑀘𑁆𑀙𑀦𑁆𑀢𑁄 𑀲𑀺𑀭𑀺𑀲𑀫𑁆𑀧𑀦𑁆𑀦𑁄, 𑀲𑁄𑀪𑀢𑁂 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

‘‘𑀕𑀘𑁆𑀙𑀢𑁄 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀳𑁂𑀝𑁆𑀞𑀸 𑀧𑀸𑀤𑀢𑀮𑀁 𑀫𑀼𑀤𑀼;

𑀲𑀫𑀁 𑀲𑀫𑁆𑀨𑀼𑀲𑀢𑁂 𑀪𑀽𑀫𑀺𑀁, 𑀭𑀚𑀲𑀸𑀦𑀼𑀧𑀮𑀺𑀫𑁆𑀧𑀢𑀺.

‘‘𑀦𑀺𑀦𑁆𑀦𑀁 𑀞𑀸𑀦𑀁 𑀉𑀦𑁆𑀦𑀫𑀢𑀺, 𑀕𑀘𑁆𑀙𑀦𑁆𑀢𑁂 𑀮𑁄𑀓𑀦𑀸𑀬𑀓𑁂;

𑀉𑀦𑁆𑀦𑀢𑀜𑁆𑀘 𑀲𑀫𑀁 𑀳𑁄𑀢𑀺, 𑀧𑀣𑀯𑀻 𑀘 𑀅𑀘𑁂𑀢𑀦𑀸.

‘‘𑀧𑀸𑀲𑀸𑀡𑀸 𑀲𑀓𑁆𑀔𑀭𑀸 𑀘𑁂𑀯, 𑀓𑀣𑀮𑀸 𑀔𑀸𑀡𑀼𑀓𑀡𑁆𑀝𑀓𑀸;

𑀲𑀩𑁆𑀩𑁂 𑀫𑀕𑁆𑀕𑀸 𑀯𑀺𑀯𑀚𑁆𑀚𑀦𑁆𑀢𑀺, 𑀕𑀘𑁆𑀙𑀦𑁆𑀢𑁂 𑀮𑁄𑀓𑀦𑀸𑀬𑀓𑁂.

‘‘𑀦𑀸𑀢𑀺𑀤𑀽𑀭𑁂 𑀉𑀤𑁆𑀥𑀭𑀢𑀺, 𑀦𑀘𑁆𑀘𑀸𑀲𑀦𑁆𑀦𑁂 𑀘 𑀦𑀺𑀓𑁆𑀔𑀺𑀧𑀁;

𑀅𑀖𑀝𑁆𑀝𑀬𑀦𑁆𑀢𑁄 𑀦𑀺𑀬𑁆𑀬𑀸𑀢𑀺, 𑀉𑀪𑁄 𑀚𑀸𑀡𑀽 𑀘 𑀕𑁄𑀧𑁆𑀨𑀓𑁂.

‘‘𑀦𑀸𑀢𑀺𑀲𑀻𑀖𑀁 𑀧𑀓𑁆𑀓𑀫𑀢𑀺, 𑀲𑀫𑁆𑀧𑀦𑁆𑀦𑀘𑀭𑀡𑁄 𑀫𑀼𑀦𑀺;

𑀦 𑀘𑀸𑀧𑀺 𑀲𑀡𑀺𑀓𑀁 𑀬𑀸𑀢𑀺, 𑀕𑀘𑁆𑀙𑀫𑀸𑀦𑁄 𑀲𑀫𑀸𑀳𑀺𑀢𑁄.

‘‘𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀤𑀺𑀲𑀜𑁆𑀘 𑀯𑀺𑀤𑀺𑀲𑀁 𑀢𑀣𑀸;

𑀦 𑀧𑁂𑀓𑁆𑀔𑀫𑀸𑀦𑁄 𑀲𑁄 𑀬𑀸𑀢𑀺, 𑀬𑀼𑀕𑀫𑀢𑁆𑀢𑀁𑀯𑀧𑁂𑀓𑁆𑀔𑀢𑀺.

‘‘𑀦𑀸𑀕𑀯𑀺𑀓𑁆𑀓𑀦𑁆𑀢𑀘𑀸𑀭𑁄 𑀲𑁄, 𑀕𑀫𑀦𑁂 𑀲𑁄𑀪𑀢𑁂 𑀚𑀺𑀦𑁄;

𑀘𑀸𑀭𑀼𑀁 𑀕𑀘𑁆𑀙𑀢𑀺 𑀮𑁄𑀓𑀕𑁆𑀕𑁄, 𑀳𑀸𑀲𑀬𑀦𑁆𑀢𑁄 𑀲𑀤𑁂𑀯𑀓𑁂.

‘‘𑀉𑀲𑀪𑀭𑀸𑀚𑀸𑀯 𑀲𑁄𑀪𑀦𑁆𑀢𑁄, 𑀘𑀸𑀭𑀼𑀘𑀸𑀭𑀻𑀯 𑀓𑁂𑀲𑀭𑀻;

𑀢𑁄𑀲𑀬𑀦𑁆𑀢𑁄 𑀩𑀳𑀽 𑀲𑀢𑁆𑀢𑁂, 𑀕𑀸𑀫𑀁 𑀲𑁂𑀝𑁆𑀞𑁄 𑀉𑀧𑀸𑀕𑀫𑀻’’𑀢𑀺. 𑁋

𑀯𑀡𑁆𑀡𑀓𑀸𑀮𑁄 𑀦𑀸𑀫 𑀓𑀺𑀭𑁂𑀲. 𑀏𑀯𑀁𑀯𑀺𑀥𑁂𑀲𑀼 𑀓𑀸𑀮𑁂𑀲𑀼 𑀪𑀕𑀯𑀢𑁄 𑀲𑀭𑀻𑀭𑀯𑀡𑁆𑀡𑁂 𑀯𑀸 𑀕𑀼𑀡𑀯𑀡𑁆𑀡𑁂 𑀯𑀸 𑀥𑀫𑁆𑀫𑀓𑀣𑀺𑀓𑀲𑁆𑀲 𑀣𑀸𑀫𑁄𑀬𑁂𑀯 𑀧𑀫𑀸𑀡𑀁, 𑀘𑀼𑀡𑁆𑀡𑀺𑀬𑀧𑀤𑁂𑀳𑀺 𑀕𑀸𑀣𑀸𑀩𑀦𑁆𑀥𑁂𑀳𑀺 𑀬𑀢𑁆𑀢𑀓𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁. ‘‘𑀤𑀼𑀓𑁆𑀓𑀣𑀺𑀢’’𑀦𑁆𑀢𑀺 𑀯𑀸 ‘‘𑀅𑀢𑀺𑀢𑁆𑀣𑁂𑀦 𑀧𑀓𑁆𑀔𑀦𑁆𑀤𑁄’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑁄. 𑀅𑀧𑀭𑀺𑀫𑀸𑀡𑀯𑀡𑁆𑀡𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑁂𑀲𑀁 𑀩𑀼𑀤𑁆𑀥𑀸𑀧𑀺 𑀅𑀦𑀯𑀲𑁂𑀲𑀢𑁄 𑀯𑀡𑁆𑀡𑀁 𑀯𑀢𑁆𑀢𑀼𑀁 𑀅𑀲𑀫𑀢𑁆𑀣𑀸. 𑀲𑀓𑀮𑀫𑁆𑀧𑀺 𑀳𑀺 𑀓𑀧𑁆𑀧𑀁 𑀯𑀡𑁆𑀡𑁂𑀦𑁆𑀢𑀸 𑀧𑀭𑀺𑀬𑁄𑀲𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸𑀢𑀺. 𑀇𑀫𑀺𑀦𑀸 𑀲𑀺𑀭𑀺𑀯𑀺𑀮𑀸𑀲𑁂𑀦 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀁 𑀧𑀸𑀝𑀮𑀺𑀕𑀸𑀫𑀁 𑀧𑀸𑀯𑀺𑀲𑀺, 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀚𑀦𑁂𑀦 𑀧𑀼𑀧𑁆𑀨𑀕𑀦𑁆𑀥𑀥𑀽𑀫𑀯𑀸𑀲𑀘𑀼𑀡𑁆𑀡𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀆𑀯𑀲𑀣𑀸𑀕𑀸𑀭𑀁 𑀧𑀸𑀯𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸𑀢𑀺 𑀬𑀤𑀺𑀧𑀺 𑀪𑀕𑀯𑀢𑁄 𑀧𑀸𑀤𑁂 𑀭𑀚𑁄𑀚𑀮𑁆𑀮𑀁 𑀦 𑀉𑀧𑀮𑀺𑀫𑁆𑀧𑀢𑀺, 𑀢𑁂𑀲𑀁 𑀧𑀦 𑀉𑀧𑀸𑀲𑀓𑀸𑀦𑀁 𑀓𑀼𑀲𑀮𑀸𑀪𑀺𑀯𑀼𑀤𑁆𑀥𑀺𑀁 𑀆𑀓𑀗𑁆𑀔𑀦𑁆𑀢𑁄 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑀢𑁆𑀣𑀜𑁆𑀘 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑀺. 𑀅𑀧𑀺𑀘 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀁 𑀦𑀸𑀫 𑀲𑀻𑀢𑀁 𑀓𑀸𑀢𑀩𑁆𑀩𑀫𑁆𑀧𑀺 𑀳𑁄𑀢𑀻𑀢𑀺 𑀏𑀢𑀤𑀢𑁆𑀣𑀫𑁆𑀧𑀺 𑀪𑀕𑀯𑀸 𑀦𑁆𑀳𑀸𑀦𑀧𑀸𑀤𑀥𑁄𑀯𑀦𑀸𑀤𑀻𑀦𑀺 𑀓𑀭𑁄𑀢𑀺𑀬𑁂𑀯. 𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀪𑀕𑀯𑀦𑁆𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸. 𑀢𑀢𑁆𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀜𑁆𑀘𑁂𑀯 𑀉𑀧𑀸𑀲𑀓𑀸𑀦𑀜𑁆𑀘 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀯𑁄𑀤𑀓𑀁 𑀓𑀢𑁆𑀯𑀸 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀫𑀚𑁆𑀚𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀧𑀻𑀞𑁂 𑀞𑀧𑀺𑀢𑀸 𑀭𑀢𑁆𑀢𑀲𑀼𑀯𑀡𑁆𑀡𑀖𑀦𑀧𑀝𑀺𑀫𑀸 𑀯𑀺𑀬 𑀅𑀢𑀺𑀯𑀺𑀭𑁄𑀘𑀺𑀢𑁆𑀣.

𑀅𑀬𑀁 𑀧𑀦𑁂𑀢𑁆𑀣 𑀧𑁄𑀭𑀸𑀡𑀸𑀦𑀁 𑀯𑀡𑁆𑀡𑀪𑀡𑀦𑀫𑀕𑁆𑀕𑁄 𑁋

‘‘𑀕𑀦𑁆𑀢𑁆𑀯𑀸𑀦 𑀫𑀡𑁆𑀟𑀮𑀫𑀸𑀴𑀁, 𑀦𑀸𑀕𑀯𑀺𑀓𑁆𑀓𑀦𑁆𑀢𑀘𑀸𑀭𑀡𑁄;

𑀑𑀪𑀸𑀲𑀬𑀦𑁆𑀢𑁄 𑀮𑁄𑀓𑀕𑁆𑀕𑁄, 𑀦𑀺𑀲𑀻𑀤𑀺 𑀯𑀭𑀫𑀸𑀲𑀦𑁂.

‘‘𑀢𑀳𑀺𑀁 𑀦𑀺𑀲𑀺𑀦𑁆𑀦𑁄 𑀦𑀭𑀤𑀫𑁆𑀫𑀲𑀸𑀭𑀣𑀺,

𑀤𑁂𑀯𑀸𑀢𑀺𑀤𑁂𑀯𑁄 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄;

𑀩𑀼𑀤𑁆𑀥𑀸𑀲𑀦𑁂 𑀫𑀚𑁆𑀛𑀕𑀢𑁄 𑀯𑀺𑀭𑁄𑀘𑀢𑀺,

𑀲𑀼𑀯𑀡𑁆𑀡𑀦𑀺𑀓𑁆𑀔𑀁 𑀯𑀺𑀬 𑀧𑀡𑁆𑀟𑀼𑀓𑀫𑁆𑀩𑀮𑁂.

‘‘𑀦𑁂𑀓𑁆𑀔𑀁 𑀚𑀫𑁆𑀩𑁄𑀦𑀤𑀲𑁆𑀲𑁂𑀯, 𑀦𑀺𑀓𑁆𑀔𑀺𑀢𑁆𑀢𑀁 𑀧𑀡𑁆𑀟𑀼𑀓𑀫𑁆𑀩𑀮𑁂;

𑀯𑀺𑀭𑁄𑀘𑀢𑀺 𑀯𑀻𑀢𑀫𑀮𑁄, 𑀫𑀡𑀺𑀯𑁂𑀭𑁄𑀘𑀦𑁄 𑀬𑀣𑀸.

‘‘𑀫𑀳𑀸𑀲𑀸𑀮𑁄𑀯 𑀲𑀫𑁆𑀨𑀼𑀮𑁆𑀮𑁄, 𑀫𑁂𑀭𑀼𑀭𑀸𑀚𑀸𑀯𑀮𑀗𑁆𑀓𑀢𑁄;

𑀲𑀼𑀯𑀡𑁆𑀡𑀬𑀽𑀧𑀲𑀗𑁆𑀓𑀸𑀲𑁄, 𑀧𑀤𑀼𑀫𑁄 𑀓𑁄𑀓𑀦𑀤𑁄 𑀬𑀣𑀸.

‘‘𑀚𑀮𑀦𑁆𑀢𑁄 𑀤𑀻𑀧𑀭𑀼𑀓𑁆𑀔𑁄𑀯, 𑀧𑀩𑁆𑀩𑀢𑀕𑁆𑀕𑁂 𑀬𑀣𑀸 𑀲𑀺𑀔𑀻;

𑀤𑁂𑀯𑀸𑀦𑀁 𑀧𑀸𑀭𑀺𑀙𑀢𑁆𑀢𑁄𑀯, 𑀲𑀩𑁆𑀩𑀨𑀼𑀮𑁆𑀮𑁄 𑀯𑀺𑀭𑁄𑀘𑀢𑀻’’𑀢𑀺.

𑀧𑀸𑀝𑀮𑀺𑀕𑀸𑀫𑀺𑀬𑁂 𑀉𑀧𑀸𑀲𑀓𑁂 𑀆𑀫𑀦𑁆𑀢𑁂𑀲𑀻𑀢𑀺 𑀬𑀲𑁆𑀫𑀸 𑀢𑁂𑀲𑀼 𑀉𑀧𑀸𑀲𑀓𑁂𑀲𑀼 𑀩𑀳𑀽 𑀚𑀦𑀸 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀸, 𑀢𑀲𑁆𑀫𑀸 𑀧𑀞𑀫𑀁 𑀢𑀸𑀯 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀆𑀤𑀻𑀦𑀯𑀁 𑀧𑀓𑀸𑀲𑁂𑀢𑁆𑀯𑀸 𑀧𑀘𑁆𑀙𑀸 𑀲𑀻𑀮𑀲𑀫𑁆𑀧𑀤𑀸𑀬 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑀼𑀁, ‘‘𑀧𑀜𑁆𑀘𑀺𑀫𑁂 𑀕𑀳𑀧𑀢𑀬𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀆𑀫𑀦𑁆𑀢𑁂𑀲𑀺.

𑀢𑀢𑁆𑀣 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀲𑀻𑀮𑀯𑀺𑀧𑀦𑁆𑀦𑁄𑀢𑀺 𑀯𑀺𑀧𑀦𑁆𑀦𑀲𑀻𑀮𑁄 𑀪𑀺𑀦𑁆𑀦𑀲𑀁𑀯𑀭𑁄. 𑀏𑀢𑁆𑀣 𑀘 ‘‘𑀤𑀼𑀲𑁆𑀲𑀻𑀮𑁄’’𑀢𑀺 𑀧𑀤𑁂𑀦 𑀧𑀼𑀕𑁆𑀕𑀮𑀲𑁆𑀲 𑀲𑀻𑀮𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀲𑁄 𑀧𑀦𑀲𑁆𑀲 𑀲𑀻𑀮𑀸𑀪𑀸𑀯𑁄 𑀤𑀼𑀯𑀺𑀥𑁄 𑀅𑀲𑀫𑀸𑀤𑀸𑀦𑁂𑀦 𑀯𑀸 𑀲𑀫𑀸𑀤𑀺𑀦𑁆𑀦𑀲𑁆𑀲 𑀪𑁂𑀤𑁂𑀦 𑀯𑀸𑀢𑀺. 𑀢𑁂𑀲𑀼 𑀧𑀼𑀭𑀺𑀫𑁄 𑀦 𑀢𑀣𑀸 𑀲𑀸𑀯𑀚𑁆𑀚𑁄, 𑀬𑀣𑀸 𑀤𑀼𑀢𑀺𑀬𑁄 𑀲𑀸𑀯𑀚𑁆𑀚𑀢𑀭𑁄. 𑀬𑀣𑀸𑀥𑀺𑀧𑁆𑀧𑁂𑀢𑀸𑀤𑀻𑀦𑀯𑀦𑀺𑀫𑀺𑀢𑁆𑀢𑀁 𑀲𑀻𑀮𑀸𑀪𑀸𑀯𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀤𑀲𑁆𑀲𑁂𑀢𑀼𑀁, ‘‘𑀲𑀻𑀮𑀯𑀺𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 ‘‘𑀤𑀼𑀲𑁆𑀲𑀻𑀮𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀫𑀸𑀤𑀸𑀥𑀺𑀓𑀭𑀡𑀦𑁆𑀢𑀺 𑀧𑀫𑀸𑀤𑀓𑀸𑀭𑀡𑀸. 𑀇𑀤𑀜𑁆𑀘 𑀲𑀼𑀢𑁆𑀢𑀁 𑀕𑀳𑀝𑁆𑀞𑀸𑀦𑀁 𑀯𑀲𑁂𑀦 𑀆𑀕𑀢𑀁, 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯. 𑀕𑀳𑀝𑁆𑀞𑁄 𑀳𑀺 𑀬𑁂𑀦 𑀲𑀺𑀧𑁆𑀧𑀝𑁆𑀞𑀸𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀬𑀤𑀺 𑀓𑀲𑀺𑀬𑀸 𑀬𑀤𑀺 𑀯𑀸𑀡𑀺𑀚𑁆𑀚𑀸𑀬 𑀬𑀤𑀺 𑀕𑁄𑀭𑀓𑁆𑀔𑁂𑀦, 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀧𑀫𑀢𑁆𑀢𑁄 𑀢𑀁 𑀢𑀁 𑀬𑀣𑀸𑀓𑀸𑀮𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣𑀲𑁆𑀲 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺. 𑀫𑀸𑀖𑀸𑀢𑀓𑀸𑀮𑁂 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀤𑀡𑁆𑀟𑀯𑀲𑁂𑀦 𑀫𑀳𑀢𑀺𑀁 𑀪𑁄𑀕𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺. 𑀧𑀩𑁆𑀩𑀚𑀺𑀢𑁄 𑀤𑀼𑀲𑁆𑀲𑀻𑀮𑁄 𑀧𑀫𑀸𑀤𑀓𑀸𑀭𑀡𑀸 𑀲𑀻𑀮𑀢𑁄 𑀩𑀼𑀤𑁆𑀥𑀯𑀘𑀦𑀢𑁄 𑀛𑀸𑀦𑀢𑁄 𑀲𑀢𑁆𑀢𑀅𑀭𑀺𑀬𑀥𑀦𑀢𑁄 𑀘 𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺.

𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀕𑀳𑀝𑁆𑀞𑀲𑁆𑀲 ‘‘𑀅𑀲𑀼𑀓𑁄 𑀅𑀫𑀼𑀓𑀓𑀼𑀮𑁂 𑀚𑀸𑀢𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀧𑀭𑀺𑀘𑁆𑀘𑀢𑁆𑀢𑀇𑀥𑀮𑁄𑀓𑀧𑀭𑀮𑁄𑀓𑁄 𑀲𑀮𑀸𑀓𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀤𑁂𑀢𑀻’’𑀢𑀺 𑀧𑀭𑀺𑀲𑀫𑀚𑁆𑀛𑁂 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀧𑀩𑁆𑀩𑀚𑀺𑀢𑀲𑁆𑀲 ‘‘𑀅𑀲𑀼𑀓𑁄 𑀦𑀸𑀫 𑀣𑁂𑀭𑁄 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀸𑀲𑀓𑁆𑀔𑀺 𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑀼𑀁, 𑀦 𑀩𑀼𑀤𑁆𑀥𑀯𑀘𑀦𑀁 𑀕𑀳𑁂𑀢𑀼𑀁, 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀳𑀺 𑀚𑀻𑀯𑀢𑀺, 𑀙𑀳𑀺 𑀅𑀕𑀸𑀭𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀏𑀯𑀁 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺.

𑀅𑀯𑀺𑀲𑀸𑀭𑀤𑁄𑀢𑀺 𑀕𑀳𑀝𑁆𑀞𑁄 𑀢𑀸𑀯 𑀅𑀯𑀲𑁆𑀲𑀁 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 ‘‘𑀓𑁄𑀘𑀺 𑀫𑀫 𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀢𑀺, 𑀅𑀣 𑀫𑀁 𑀦𑀺𑀦𑁆𑀤𑀺𑀲𑁆𑀲𑀢𑀺, 𑀭𑀸𑀚𑀓𑀼𑀮𑀲𑁆𑀲 𑀯𑀸 𑀤𑀲𑁆𑀲𑁂𑀲𑁆𑀲𑀢𑀻’’𑀢𑀺 𑀲𑀪𑀬𑁄 𑀉𑀧𑀲𑀗𑁆𑀓𑀫𑀢𑀺, 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀦𑀺𑀲𑀻𑀤𑀢𑀺, 𑀯𑀺𑀲𑀸𑀭𑀤𑁄 𑀳𑀼𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 𑀩𑀳𑀼𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀦𑁆𑀦𑀺𑀧𑀢𑀺𑀢𑁂 ‘‘𑀅𑀯𑀲𑁆𑀲𑀁 𑀓𑁄𑀘𑀺 𑀫𑀫 𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀢𑀺, 𑀅𑀣 𑀫𑁂 𑀉𑀧𑁄𑀲𑀣𑀫𑁆𑀧𑀺 𑀧𑀯𑀸𑀭𑀡𑀫𑁆𑀧𑀺 𑀞𑀧𑁂𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀘𑀸𑀯𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀢𑀻’’𑀢𑀺 𑀲𑀪𑀬𑁄 𑀉𑀧𑀲𑀗𑁆𑀓𑀫𑀢𑀺, 𑀯𑀺𑀲𑀸𑀭𑀤𑁄 𑀳𑀼𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀓𑀘𑁆𑀘𑁄 𑀧𑀦 𑀤𑀼𑀲𑁆𑀲𑀻𑀮𑁄𑀧𑀺 𑀲𑀫𑀸𑀦𑁄 𑀲𑀼𑀲𑀻𑀮𑁄 𑀯𑀺𑀬 𑀘𑀭𑀢𑀺, 𑀲𑁄𑀧𑀺 𑀅𑀚𑁆𑀛𑀸𑀲𑀬𑁂𑀦 𑀫𑀗𑁆𑀓𑀼 𑀳𑁄𑀢𑀺𑀬𑁂𑀯.

𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻𑀢𑀺 𑀤𑀼𑀲𑁆𑀲𑀻𑀮𑀲𑁆𑀲 𑀳𑀺 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀤𑀼𑀲𑁆𑀲𑀻𑀮𑀓𑀫𑁆𑀫𑀸𑀦𑀺 𑀲𑀫𑀸𑀤𑀸𑀬 𑀧𑀯𑀢𑁆𑀢𑀺𑀢𑀝𑁆𑀞𑀸𑀦𑀸𑀦𑀺 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀲𑁄 𑀉𑀫𑁆𑀫𑀻𑀮𑁂𑀢𑁆𑀯𑀸 𑀇𑀥𑀮𑁄𑀓𑀁, 𑀦𑀺𑀫𑀻𑀮𑁂𑀢𑁆𑀯𑀸 𑀧𑀭𑀮𑁄𑀓𑀁 𑀧𑀲𑁆𑀲𑀢𑀺. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀓𑀫𑁆𑀫𑀸𑀦𑀼𑀭𑀽𑀧𑀁 𑀉𑀧𑀝𑁆𑀞𑀳𑀦𑁆𑀢𑀺, 𑀲𑀢𑁆𑀢𑀺𑀲𑀢𑁂𑀦 𑀧𑀳𑀭𑀺𑀬𑀫𑀸𑀦𑁄 𑀯𑀺𑀬 𑀅𑀕𑁆𑀕𑀺𑀚𑀸𑀮𑀸𑀪𑀺𑀖𑀸𑀢𑁂𑀦 𑀛𑀸𑀬𑀫𑀸𑀦𑁄 𑀯𑀺𑀬 𑀘 𑀳𑁄𑀢𑀺. 𑀲𑁄 ‘‘𑀯𑀸𑀭𑁂𑀣, 𑀯𑀸𑀭𑁂𑀣𑀸’’𑀢𑀺 𑀯𑀺𑀭𑀯𑀦𑁆𑀢𑁄𑀯 𑀫𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺.

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸. 𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑀸. 𑀅𑀣 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀸. 𑀧𑀭𑀁 𑀫𑀭𑀡𑀸𑀢𑀺 𑀘𑀼𑀢𑀺𑀢𑁄 𑀉𑀤𑁆𑀥𑀁. 𑀅𑀧𑀸𑀬𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀭𑀬𑀯𑁂𑀯𑀘𑀦𑀁. 𑀦𑀺𑀭𑀬𑁄 𑀳𑀺 𑀲𑀕𑁆𑀕𑀫𑁄𑀓𑁆𑀔𑀳𑁂𑀢𑀼𑀪𑀽𑀢𑀸 𑀧𑀼𑀜𑁆𑀜𑀲𑀗𑁆𑀔𑀸𑀢𑀸 𑀅𑀬𑀸 𑀅𑀧𑁂𑀢𑀢𑁆𑀢𑀸, 𑀲𑀼𑀔𑀸𑀦𑀁 𑀯𑀸 𑀅𑀬𑀲𑁆𑀲, 𑀆𑀕𑀫𑀦𑀲𑁆𑀲 𑀯𑀸 𑀅𑀪𑀸𑀯𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺, 𑀤𑁄𑀲𑀩𑀳𑀼𑀮𑀢𑀸𑀬 𑀯𑀸 𑀤𑀼𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀸 𑀕𑀢𑀻𑀢𑀺 𑀤𑀼𑀕𑁆𑀕𑀢𑀺. 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀓𑀢𑀓𑀸𑀭𑀺𑀦𑁄𑀢𑀺 𑀯𑀺𑀦𑀺𑀧𑀸𑀢𑁄, 𑀯𑀺𑀦𑀲𑁆𑀲𑀦𑁆𑀢𑀸 𑀯𑀸 𑀏𑀢𑁆𑀣 𑀦𑀺𑀧𑀢𑀦𑁆𑀢𑀺 𑀲𑀫𑁆𑀪𑀺𑀚𑁆𑀚𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀸𑀢𑀺 𑀯𑀺𑀦𑀺𑀧𑀸𑀢𑁄. 𑀦𑀢𑁆𑀣𑀺 𑀏𑀢𑁆𑀣 𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄𑀢𑀺 𑀦𑀺𑀭𑀬𑁄.

𑀅𑀣 𑀯𑀸 𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀳𑀺 𑀅𑀧𑀸𑀬𑁄 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸, 𑀦 𑀤𑀼𑀕𑁆𑀕𑀢𑀺 𑀫𑀳𑁂𑀲𑀓𑁆𑀔𑀸𑀦𑀁 𑀦𑀸𑀕𑀭𑀸𑀚𑀸𑀤𑀻𑀦𑀁 𑀲𑀫𑁆𑀪𑀯𑀢𑁄. 𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑀁 𑀤𑀻𑀧𑁂𑀢𑀺. 𑀲𑁄 𑀳𑀺 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸, 𑀤𑀼𑀓𑁆𑀔𑀲𑁆𑀲 𑀘 𑀕𑀢𑀺𑀪𑀽𑀢𑀢𑁆𑀢𑀸, 𑀦 𑀢𑀼 𑀯𑀺𑀦𑀺𑀧𑀸𑀢𑁄 𑀅𑀲𑀼𑀭𑀲𑀤𑀺𑀲𑀁 𑀅𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀧𑁂𑀢𑀫𑀳𑀺𑀤𑁆𑀥𑀺𑀓𑀸𑀦𑀫𑁆𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀯𑀺𑀦𑀺𑀧𑀸𑀢𑀕𑁆𑀕𑀳𑀡𑁂𑀦 𑀅𑀲𑀼𑀭𑀓𑀸𑀬𑀁 𑀤𑀻𑀧𑁂𑀢𑀺. 𑀲𑁄 𑀳𑀺 𑀬𑀣𑀸𑀯𑀼𑀢𑁆𑀢𑁂𑀦𑀝𑁆𑀞𑁂𑀦 ‘‘𑀅𑀧𑀸𑀬𑁄’’ 𑀘𑁂𑀯 ‘‘𑀤𑀼𑀕𑁆𑀕𑀢𑀺’’ 𑀘 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀫𑀼𑀲𑁆𑀲𑀬𑁂𑀳𑀺 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 ‘‘𑀯𑀺𑀦𑀺𑀧𑀸𑀢𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀦𑀺𑀭𑀬𑀕𑁆𑀕𑀳𑀡𑁂𑀦 𑀅𑀯𑀻𑀘𑀺𑀆𑀤𑀺𑀓𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀦𑀺𑀭𑀬𑀫𑁂𑀯 𑀤𑀻𑀧𑁂𑀢𑀺. 𑀉𑀧𑀧𑀚𑁆𑀚𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀢𑀺.

𑀆𑀦𑀺𑀲𑀁𑀲𑀓𑀣𑀸 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀻𑀮𑀯𑀸𑀢𑀺 𑀲𑀫𑀸𑀤𑀸𑀦𑀯𑀲𑁂𑀦 𑀲𑀻𑀮𑀯𑀸. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀧𑀼𑀡𑁆𑀡𑀜𑁆𑀘 𑀓𑀢𑁆𑀯𑀸 𑀲𑀻𑀮𑀲𑁆𑀲 𑀲𑀫𑀸𑀤𑀸𑀦𑁂𑀦 𑀲𑀻𑀮𑀲𑀫𑁆𑀧𑀦𑁆𑀦𑁄. 𑀪𑁄𑀕𑀓𑁆𑀔𑀦𑁆𑀥𑀦𑁆𑀢𑀺 𑀪𑁄𑀕𑀭𑀸𑀲𑀺𑀁. 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀦𑁆𑀢𑀺 𑀏𑀢𑁆𑀣 𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀺, 𑀲𑀕𑁆𑀕𑀕𑁆𑀕𑀳𑀡𑁂𑀦 𑀤𑁂𑀯𑀕𑀢𑀺 𑀏𑀯. 𑀢𑀢𑁆𑀣 𑀲𑀼𑀦𑁆𑀤𑀭𑀸 𑀕𑀢𑀺 𑀲𑀼𑀕𑀢𑀺, 𑀭𑀽𑀧𑀸𑀤𑀻𑀳𑀺 𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄, 𑀲𑁄 𑀲𑀩𑁆𑀩𑁄𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺.

𑀧𑀸𑀝𑀮𑀺𑀕𑀸𑀫𑀺𑀬𑁂 𑀉𑀧𑀸𑀲𑀓𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀅𑀜𑁆𑀜𑀸𑀬𑀧𑀺 𑀧𑀸𑀴𑀺𑀫𑀼𑀢𑁆𑀢𑀸𑀬 𑀥𑀫𑁆𑀫𑀓𑀣𑀸𑀬 𑀘𑁂𑀯 𑀆𑀯𑀲𑀣𑀸𑀦𑀼𑀫𑁄𑀤𑀦𑀓𑀣𑀸𑀬 𑀘. 𑀢𑀤𑀸 𑀳𑀺 𑀪𑀕𑀯𑀸 𑀬𑀲𑁆𑀫𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀢𑀢𑁆𑀣 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀁 𑀫𑀸𑀧𑁂𑀦𑁆𑀢𑁂𑀦 𑀅𑀜𑁆𑀜𑁂𑀲𑀼 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀬𑁂 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀓𑀼𑀝𑀼𑀫𑁆𑀩𑀺𑀓𑀸, 𑀢𑁂 𑀆𑀦𑁂𑀢𑁆𑀯𑀸 𑀥𑀦𑀥𑀜𑁆𑀜𑀖𑀭𑀯𑀢𑁆𑀣𑀼𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀘𑁂𑀯 𑀧𑀭𑀺𑀳𑀸𑀭𑀜𑁆𑀘 𑀤𑀸𑀧𑁂𑀢𑁆𑀯𑀸 𑀦𑀺𑀯𑁂𑀲𑀺𑀬𑀦𑁆𑀢𑀺. 𑀢𑀲𑁆𑀫𑀸 𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬 𑀯𑀺𑀲𑁂𑀲𑀢𑁄 𑀲𑀻𑀮𑀕𑀭𑀼𑀓𑀸 𑀲𑀩𑁆𑀩𑀕𑀼𑀡𑀸𑀦𑀜𑁆𑀘 𑀲𑀻𑀮𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀢𑁂𑀲𑀁 𑀧𑀞𑀫𑀁 𑀲𑀻𑀮𑀸𑀦𑀺𑀲𑀁𑀲𑁂 𑀧𑀓𑀸𑀲𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬, 𑀧𑀣𑀯𑁄𑀚𑀁 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬, 𑀫𑀳𑀸𑀚𑀫𑁆𑀩𑀼𑀁 𑀫𑀢𑁆𑀣𑀓𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬, 𑀬𑁄𑀚𑀦𑀺𑀓𑀫𑀥𑀼𑀓𑀡𑁆𑀟𑀁 𑀘𑀓𑁆𑀓𑀬𑀦𑁆𑀢𑁂𑀦 𑀧𑀻𑀴𑁂𑀢𑁆𑀯𑀸 𑀫𑀥𑀼𑀭𑀲𑀁 𑀧𑀸𑀬𑀫𑀸𑀦𑁄 𑀯𑀺𑀬 𑀧𑀸𑀝𑀮𑀺𑀕𑀸𑀫𑀺𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀁 𑀧𑀓𑀺𑀡𑁆𑀡𑀓𑀓𑀣𑀁 𑀓𑀣𑁂𑀦𑁆𑀢𑁄 ‘‘𑀆𑀯𑀸𑀲𑀤𑀸𑀦𑀁 𑀦𑀸𑀫𑁂𑀢𑀁 𑀕𑀳𑀧𑀢𑀬𑁄 𑀫𑀳𑀦𑁆𑀢𑀁 𑀧𑀼𑀜𑁆𑀜𑀁, 𑀢𑀼𑀫𑁆𑀳𑀸𑀓𑀁 𑀆𑀯𑀸𑀲𑁄 𑀫𑀬𑀸 𑀧𑀭𑀺𑀪𑀼𑀢𑁆𑀢𑁄, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀘 𑀧𑀭𑀺𑀪𑀼𑀢𑁆𑀢𑁄, 𑀫𑀬𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀘 𑀧𑀭𑀺𑀪𑀼𑀢𑁆𑀢𑁂 𑀧𑀦 𑀥𑀫𑁆𑀫𑀭𑀢𑀦𑁂𑀦𑀧𑀺 𑀧𑀭𑀺𑀪𑀼𑀢𑁆𑀢𑁄𑀬𑁂𑀯 𑀳𑁄𑀢𑀺. 𑀏𑀯𑀁 𑀢𑀻𑀳𑀺 𑀭𑀢𑀦𑁂𑀳𑀺 𑀧𑀭𑀺𑀪𑀼𑀢𑁆𑀢𑁂 𑀅𑀧𑀭𑀺𑀫𑁂𑀬𑁆𑀬𑁄 𑀘 𑀯𑀺𑀧𑀸𑀓𑁄, 𑀅𑀧𑀺𑀘 𑀆𑀯𑀸𑀲𑀤𑀸𑀦𑀲𑁆𑀫𑀺𑀁 𑀤𑀺𑀦𑁆𑀦𑁂 𑀲𑀩𑁆𑀩𑀤𑀸𑀦𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺, 𑀪𑀽𑀫𑀝𑁆𑀞𑀓𑀧𑀡𑁆𑀡𑀲𑀸𑀮𑀸𑀬 𑀯𑀸 𑀲𑀸𑀔𑀸𑀫𑀡𑁆𑀟𑀧𑀲𑁆𑀲 𑀯𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢𑀲𑁆𑀲 𑀆𑀦𑀺𑀲𑀁𑀲𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸. 𑀆𑀯𑀸𑀲𑀤𑀸𑀦𑀸𑀦𑀼𑀪𑀸𑀯𑁂𑀦 𑀳𑀺 𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀲𑁆𑀲𑀧𑀺 𑀲𑀫𑁆𑀧𑀻𑀴𑀺𑀢𑀕𑀩𑁆𑀪𑀯𑀸𑀲𑁄 𑀦𑀸𑀫 𑀦 𑀳𑁄𑀢𑀺, 𑀤𑁆𑀯𑀸𑀤𑀲𑀳𑀢𑁆𑀣𑁄 𑀑𑀯𑀭𑀓𑁄 𑀯𑀺𑀬𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺 𑀅𑀲𑀫𑁆𑀩𑀸𑀥𑁄𑀯 𑀳𑁄𑀢𑀻’’𑀢𑀺 𑀏𑀯𑀁 𑀦𑀸𑀦𑀸𑀦𑀬𑁂𑀳𑀺 𑀯𑀺𑀘𑀺𑀢𑁆𑀢𑀁 𑀩𑀳𑀼𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑁋

‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀺, 𑀢𑀢𑁄 𑀯𑀸𑀴𑀫𑀺𑀕𑀸𑀦𑀺 𑀘;

𑀲𑀭𑀻𑀲𑀧𑁂 𑀘 𑀫𑀓𑀲𑁂, 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄.

‘‘𑀢𑀢𑁄 𑀯𑀸𑀢𑀸𑀢𑀧𑁄 𑀖𑁄𑀭𑁄, 𑀲𑀜𑁆𑀚𑀸𑀢𑁄 𑀧𑀝𑀺𑀳𑀜𑁆𑀜𑀢𑀺;

𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘, 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀁.

‘‘𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

‘‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂;

𑀢𑁂𑀲𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘.

‘‘𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. (𑀘𑀽𑀴𑀯. 𑁨𑁯𑁫) 𑁋

𑀏𑀯𑀁 𑀅𑀬𑀫𑁆𑀧𑀺 𑀆𑀯𑀸𑀲𑀤𑀸𑀦𑁂 𑀆𑀦𑀺𑀲𑀁𑀲𑁄𑀢𑀺 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀢𑀺𑀭𑁂𑀓𑀢𑀭𑀁 𑀤𑀺𑀬𑀟𑁆𑀠𑀬𑀸𑀫𑀁 𑀆𑀯𑀸𑀲𑀤𑀸𑀦𑀸𑀦𑀺𑀲𑀁𑀲𑀓𑀣𑀁 𑀓𑀣𑁂𑀲𑀺. 𑀢𑀢𑁆𑀣 𑀇𑀫𑀸 𑀕𑀸𑀣𑀸 𑀢𑀸𑀯 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀸, 𑀧𑀓𑀺𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀸 𑀧𑀦 𑀲𑀗𑁆𑀕𑀳𑀁 𑀦𑀸𑀭𑁄𑀳𑀢𑀺. 𑀲𑀦𑁆𑀤𑀲𑁆𑀲𑁂𑀢𑁆𑀯𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸 𑀤𑁆𑀯𑁂 𑀬𑀸𑀫𑀸 𑀕𑀢𑀸. 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀣𑀸𑀢𑀺 𑀬𑀲𑁆𑀲 𑀕𑀫𑀦𑀲𑁆𑀲 𑀢𑀼𑀫𑁆𑀳𑁂 𑀓𑀸𑀮𑀁 𑀫𑀜𑁆𑀜𑀣, 𑀕𑀫𑀦𑀓𑀸𑀮𑁄 𑀢𑀼𑀫𑁆𑀳𑀸𑀓𑀁, 𑀕𑀘𑁆𑀙𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑁂 𑀉𑀬𑁆𑀬𑁄𑀚𑁂𑀲𑀻𑀢𑀺? 𑀅𑀦𑀼𑀓𑀫𑁆𑀧𑀸𑀬. 𑀢𑀺𑀬𑀸𑀫𑀭𑀢𑁆𑀢𑀺𑀜𑁆𑀳𑀺 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀸𑀦𑀁 𑀢𑁂𑀲𑀁 𑀲𑀭𑀻𑀭𑁂 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁂𑀧𑀺 𑀘 𑀯𑀺𑀧𑁆𑀧𑀪𑀸𑀢𑀲𑀬𑀦𑀦𑀺𑀲𑀚𑁆𑀚𑀸𑀬 𑀑𑀓𑀸𑀲𑁄 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀇𑀢𑀺 𑀉𑀪𑀬𑀸𑀦𑀼𑀓𑀫𑁆𑀧𑀸𑀬 𑀉𑀬𑁆𑀬𑁄𑀚𑁂𑀲𑀻𑀢𑀺. 𑀲𑀼𑀜𑁆𑀜𑀸𑀕𑀸𑀭𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑀁 𑀲𑀼𑀜𑁆𑀜𑀸𑀕𑀸𑀭𑀁 𑀦𑀸𑀫 𑀢𑀢𑁆𑀣 𑀦𑀢𑁆𑀣𑀺. 𑀢𑁂𑀦 𑀓𑀺𑀭 𑀕𑀳𑀧𑀢𑀬𑁄 𑀢𑀲𑁆𑀲𑁂𑀯 𑀆𑀯𑀲𑀣𑀸𑀕𑀸𑀭𑀲𑁆𑀲 𑀏𑀓𑀧𑀲𑁆𑀲𑁂 𑀧𑀝𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀫𑀜𑁆𑀘𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑀁 𑀅𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀭𑀚𑀢𑀢𑀸𑀭𑀓𑀸𑀕𑀦𑁆𑀥𑀫𑀸𑀮𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀁 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀢𑁂𑀮𑀧𑁆𑀧𑀤𑀻𑀧𑀁 𑀆𑀭𑁄𑀧𑁂𑀲𑀼𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑀢𑁆𑀣𑀸 𑀥𑀫𑁆𑀫𑀸𑀲𑀦𑀢𑁄 𑀯𑀼𑀝𑁆𑀞𑀸𑀬 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑀼𑀓𑀸𑀫𑁄 𑀇𑀥 𑀦𑀺𑀧𑀚𑁆𑀚𑁂𑀬𑁆𑀬, 𑀏𑀯𑀁 𑀦𑁄 𑀇𑀤𑀁 𑀆𑀯𑀲𑀣𑀸𑀕𑀸𑀭𑀁 𑀪𑀕𑀯𑀢𑀸 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸𑀧𑀺 𑀢𑀤𑁂𑀯 𑀲𑀦𑁆𑀥𑀸𑀬 𑀢𑀢𑁆𑀣 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀸𑀯𑀺𑀲𑀻’’𑀢𑀺. 𑀢𑀢𑁆𑀣 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀥𑀫𑁆𑀫𑀸𑀲𑀦𑀸 𑀅𑀕𑀫𑀸𑀲𑀺, 𑀏𑀢𑁆𑀢𑀓𑁂 𑀞𑀸𑀦𑁂 𑀕𑀫𑀦𑀁 𑀦𑀺𑀧𑁆𑀨𑀦𑁆𑀦𑀁. 𑀥𑀫𑁆𑀫𑀸𑀲𑀦𑀁 𑀧𑀢𑁆𑀯𑀸 𑀣𑁄𑀓𑀁 𑀅𑀝𑁆𑀞𑀸𑀲𑀺, 𑀇𑀤𑀁 𑀢𑀢𑁆𑀣 𑀞𑀸𑀦𑀁. 𑀪𑀕𑀯𑀸 𑀤𑁆𑀯𑁂 𑀬𑀸𑀫𑁂 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺, 𑀏𑀢𑁆𑀢𑀓𑁂 𑀞𑀸𑀦𑁂 𑀦𑀺𑀲𑀚𑁆𑀚𑀸 𑀦𑀺𑀧𑁆𑀨𑀦𑁆𑀦𑀸. 𑀉𑀧𑀸𑀲𑀓𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀥𑀫𑁆𑀫𑀸𑀲𑀦𑀢𑁄 𑀑𑀭𑀼𑀬𑁆𑀳 𑀬𑀣𑀸𑀯𑀼𑀢𑁆𑀢𑁂 𑀞𑀸𑀦𑁂 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀏𑀯𑀁 𑀢𑀁 𑀞𑀸𑀦𑀁 𑀪𑀕𑀯𑀢𑀸 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀢𑁆𑀢𑀁 𑀅𑀳𑁄𑀲𑀻𑀢𑀺.

𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀢𑀺 𑀲𑀼𑀦𑀺𑀥𑁄 𑀘 𑀯𑀲𑁆𑀲𑀓𑀸𑀭𑁄 𑀘 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀸. 𑀫𑀕𑀥𑀫𑀳𑀸𑀫𑀢𑁆𑀢𑀸𑀢𑀺 𑀫𑀕𑀥𑀭𑀜𑁆𑀜𑁄 𑀫𑀳𑀸𑀅𑀫𑀘𑁆𑀘𑀸, 𑀫𑀕𑀥𑀭𑀝𑁆𑀞𑁂 𑀯𑀸 𑀫𑀳𑀸𑀫𑀢𑁆𑀢𑀸 𑀫𑀳𑀢𑀺𑀬𑀸 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑀸𑀢𑀺 𑀫𑀳𑀸𑀫𑀢𑁆𑀢𑀸. 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀻𑀢𑀺 𑀧𑀸𑀝𑀮𑀺𑀕𑀸𑀫𑀲𑀗𑁆𑀔𑀸𑀢𑁂 𑀪𑀽𑀫𑀺𑀧𑀤𑁂𑀲𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺. 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬𑀸𑀢𑀺 𑀮𑀺𑀘𑁆𑀙𑀯𑀺𑀭𑀸𑀚𑀽𑀦𑀁 𑀆𑀬𑀫𑀼𑀔𑀧𑁆𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁. 𑀲𑀳𑀲𑁆𑀲𑀲𑀳𑀲𑁆𑀲𑁂𑀯𑀸𑀢𑀺 𑀏𑀓𑁂𑀓𑀯𑀕𑁆𑀕𑀯𑀲𑁂𑀦 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀳𑀼𑀢𑁆𑀯𑀸. 𑀯𑀢𑁆𑀣𑀽𑀦𑀻𑀢𑀺 𑀖𑀭𑀯𑀢𑁆𑀣𑀽𑀦𑀺. 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀦𑁆𑀢𑀺 𑀭𑀜𑁆𑀜𑁄 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀜𑁆𑀘 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁 𑀯𑀢𑁆𑀣𑀼𑀯𑀺𑀚𑁆𑀚𑀸𑀧𑀸𑀞𑀓𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺. 𑀢𑁂 𑀓𑀺𑀭 𑀅𑀢𑁆𑀢𑀦𑁄 𑀲𑀺𑀧𑁆𑀧𑀸𑀦𑀼𑀪𑀸𑀯𑁂𑀦 𑀳𑁂𑀝𑁆𑀞𑀸𑀧𑀣𑀯𑀺𑀬𑀁 𑀢𑀺𑀁𑀲𑀳𑀢𑁆𑀣𑀫𑀢𑁆𑀢𑁂 𑀞𑀸𑀦𑁂 ‘‘𑀇𑀥 𑀦𑀸𑀕𑀕𑁆𑀕𑀸𑀳𑁄, 𑀇𑀥 𑀬𑀓𑁆𑀔𑀕𑁆𑀕𑀸𑀳𑁄, 𑀇𑀥 𑀪𑀽𑀢𑀕𑁆𑀕𑀸𑀳𑁄, 𑀇𑀥 𑀧𑀸𑀲𑀸𑀡𑁄 𑀯𑀸 𑀔𑀸𑀡𑀼𑀓𑁄 𑀯𑀸 𑀅𑀢𑁆𑀣𑀻’’𑀢𑀺 𑀚𑀸𑀦𑀦𑁆𑀢𑀺. 𑀢𑁂 𑀢𑀤𑀸 𑀲𑀺𑀧𑁆𑀧𑀁 𑀚𑀧𑁆𑀧𑁂𑀢𑁆𑀯𑀸 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑀦𑁆𑀢𑀬𑀫𑀸𑀦𑀸 𑀯𑀺𑀬 𑀫𑀸𑀧𑁂𑀦𑁆𑀢𑀺.

𑀅𑀣 𑀯𑀸 𑀦𑁂𑀲𑀁 𑀲𑀭𑀻𑀭𑁂 𑀤𑁂𑀯𑀢𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁 𑀘𑀺𑀢𑁆𑀢𑀁 𑀦𑀸𑀫𑁂𑀦𑁆𑀢𑀺. 𑀢𑀸 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀯𑀢𑁆𑀣𑀼𑀫𑁆𑀳𑀺 𑀕𑀳𑀺𑀢𑀫𑀢𑁆𑀢𑁂 𑀧𑀝𑀺𑀯𑀺𑀕𑀘𑁆𑀙𑀦𑁆𑀢𑀺. 𑀲𑀤𑁆𑀥𑀓𑀼𑀮𑀸𑀦𑀁 𑀲𑀤𑁆𑀥𑀸 𑀤𑁂𑀯𑀢𑀸 𑀢𑀣𑀸 𑀓𑀭𑁄𑀦𑁆𑀢𑀺, 𑀅𑀲𑁆𑀲𑀤𑁆𑀥𑀓𑀼𑀮𑀸𑀦𑀁 𑀅𑀲𑁆𑀲𑀤𑁆𑀥𑀸 𑀤𑁂𑀯𑀢𑀸. 𑀓𑀺𑀁𑀓𑀸𑀭𑀡𑀸? 𑀲𑀤𑁆𑀥𑀸𑀦𑀜𑁆𑀳𑀺 𑀏𑀯𑀁 𑀳𑁄𑀢𑀺 ‘‘𑀇𑀥 𑀫𑀦𑀼𑀲𑁆𑀲𑀸 𑀦𑀺𑀯𑁂𑀲𑀦𑀁 𑀫𑀸𑀧𑁂𑀦𑁆𑀢𑀸 𑀧𑀞𑀫𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀗𑁆𑀕𑀮𑀁 𑀯𑀤𑀸𑀧𑁂𑀲𑁆𑀲𑀦𑁆𑀢𑀺, 𑀅𑀣 𑀫𑀬𑀁 𑀲𑀻𑀮𑀯𑀦𑁆𑀢𑀸𑀦𑀁 𑀤𑀲𑁆𑀲𑀦𑀁 𑀥𑀫𑁆𑀫𑀓𑀣𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀅𑀦𑀼𑀫𑁄𑀤𑀦𑀁 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫, 𑀫𑀦𑀼𑀲𑁆𑀲𑀸 𑀘 𑀤𑀸𑀦𑀁 𑀤𑀢𑁆𑀯𑀸 𑀅𑀫𑁆𑀳𑀸𑀓𑀁 𑀧𑀢𑁆𑀢𑀺𑀁 𑀤𑀲𑁆𑀲𑀦𑁆𑀢𑀻’’𑀢𑀺. 𑀅𑀲𑁆𑀲𑀤𑁆𑀥𑀸 𑀤𑁂𑀯𑀢𑀸𑀧𑀺 ‘‘𑀅𑀢𑁆𑀢𑀦𑁄 𑀇𑀘𑁆𑀙𑀸𑀦𑀼𑀭𑀽𑀧𑀁 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁, 𑀓𑀣𑀜𑁆𑀘 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀢𑀣𑀸 𑀓𑀭𑁄𑀦𑁆𑀢𑀺.

𑀢𑀸𑀯𑀢𑀺𑀁𑀲𑁂𑀳𑀻𑀢𑀺 𑀬𑀣𑀸 𑀳𑀺 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀏𑀓𑀁 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀁, 𑀏𑀓𑀲𑁆𑀫𑀺𑀜𑁆𑀘 𑀯𑀺𑀳𑀸𑀭𑁂 𑀏𑀓𑀁 𑀩𑀳𑀼𑀲𑁆𑀲𑀼𑀢𑀁 𑀪𑀺𑀓𑁆𑀔𑀼𑀁 𑀉𑀧𑀸𑀤𑀸𑀬 ‘‘𑀅𑀲𑀼𑀓𑀓𑀼𑀮𑁂 𑀫𑀦𑀼𑀲𑁆𑀲𑀸 𑀧𑀡𑁆𑀟𑀺𑀢𑀸, 𑀅𑀲𑀼𑀓𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀩𑀳𑀼𑀲𑁆𑀲𑀼𑀢𑀸’’𑀢𑀺 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁, 𑀯𑀺𑀲𑁆𑀲𑀓𑀫𑁆𑀫𑀜𑁆𑀘 𑀤𑁂𑀯𑀧𑀼𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀢𑀸𑀯𑀢𑀺𑀁𑀲𑀸 𑀧𑀡𑁆𑀟𑀺𑀢𑀸’’𑀢𑀺 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄. 𑀢𑁂𑀦𑀸𑀳 ‘‘𑀢𑀸𑀯𑀢𑀺𑀁𑀲𑁂𑀳𑀻’’𑀢𑀺. 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀦𑀸 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀯𑀺𑀬 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀦𑀕𑀭𑀁 𑀫𑀸𑀧𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀬𑀸𑀯𑀢𑀸, 𑀆𑀦𑀦𑁆𑀤, 𑀅𑀭𑀺𑀬𑀁 𑀆𑀬𑀢𑀦𑀦𑁆𑀢𑀺 𑀬𑀢𑁆𑀢𑀓𑀁 𑀅𑀭𑀺𑀬𑀫𑀦𑀼𑀲𑁆𑀲𑀸𑀦𑀁 𑀑𑀲𑀭𑀡𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀺. 𑀬𑀸𑀯𑀢𑀸 𑀯𑀡𑀺𑀧𑁆𑀧𑀣𑁄𑀢𑀺 𑀬𑀢𑁆𑀢𑀓𑀁 𑀯𑀸𑀡𑀺𑀚𑀸𑀦𑀁 𑀆𑀳𑀝𑀪𑀡𑁆𑀟𑀲𑁆𑀲 𑀭𑀸𑀲𑀺𑀯𑀲𑁂𑀦 𑀓𑀬𑀯𑀺𑀓𑁆𑀓𑀬𑀝𑁆𑀞𑀸𑀦𑀁 𑀦𑀸𑀫, 𑀯𑀸𑀡𑀺𑀚𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀅𑀢𑁆𑀣𑀺. 𑀇𑀤𑀁 𑀅𑀕𑁆𑀕𑀦𑀕𑀭𑀦𑁆𑀢𑀺 𑀢𑁂𑀲𑀁 𑀅𑀭𑀺𑀬𑀸𑀬𑀢𑀦𑀯𑀡𑀺𑀧𑁆𑀧𑀣𑀸𑀦𑀁 𑀇𑀤𑀁 𑀦𑀕𑀭𑀁 𑀅𑀕𑁆𑀕𑀁 𑀪𑀯𑀺𑀲𑁆𑀲𑀢𑀺 𑀚𑁂𑀝𑁆𑀞𑀓𑀁 𑀧𑀸𑀫𑁄𑀓𑁆𑀔𑀁. 𑀧𑀼𑀝𑀪𑁂𑀤𑀦𑀦𑁆𑀢𑀺 𑀪𑀡𑁆𑀟𑀧𑀼𑀝𑀪𑁂𑀤𑀦𑀝𑁆𑀞𑀸𑀦𑀁, 𑀪𑀡𑁆𑀟𑀪𑀡𑁆𑀟𑀺𑀓𑀸𑀦𑀁 𑀫𑁄𑀘𑀦𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀮𑀤𑁆𑀥𑀪𑀡𑁆𑀟𑀫𑁆𑀧𑀺 𑀳𑀺 𑀇𑀥𑁂𑀯 𑀮𑀪𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀢𑁆𑀣 𑀯𑀺𑀓𑁆𑀓𑀬𑀁 𑀅𑀕𑀘𑁆𑀙𑀦𑁆𑀢𑀸𑀧𑀺 𑀇𑀥𑁂𑀯 𑀯𑀺𑀓𑁆𑀓𑀬𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀇𑀥𑁂𑀯 𑀧𑀼𑀝𑀁 𑀪𑀺𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀬𑀸𑀦𑀫𑁆𑀧𑀺 𑀳𑀺 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑀺, 𑀲𑀪𑀸𑀬𑀁 𑀏𑀓𑀦𑁆𑀢𑀺 𑀏𑀯𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀢𑀢𑁆𑀣 𑀉𑀝𑁆𑀞𑀳𑀺𑀲𑁆𑀲𑀦𑁆𑀢𑀺. 𑀢𑀸𑀦𑀺 𑀲𑀪𑀸𑀯𑀸𑀦𑀺 𑀆𑀬𑀸𑀦𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀕𑁆𑀕𑀺𑀢𑁄 𑀯𑀸𑀢𑀺𑀆𑀤𑀻𑀲𑀼 𑀲𑀫𑀼𑀘𑁆𑀘𑀬𑀢𑁆𑀣𑁄 𑀯𑀸𑀲𑀤𑁆𑀤𑁄, 𑀅𑀕𑁆𑀕𑀺𑀦𑀸 𑀘 𑀉𑀤𑀓𑁂𑀦 𑀘 𑀫𑀺𑀣𑀼𑀪𑁂𑀤𑁂𑀦 𑀘 𑀦𑀲𑁆𑀲𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀳𑀺 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀅𑀕𑁆𑀕𑀺𑀦𑀸 𑀦𑀲𑁆𑀲𑀺𑀲𑁆𑀲𑀢𑀺, 𑀦𑀺𑀩𑁆𑀩𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀕𑀗𑁆𑀕𑀸 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀢𑀺, 𑀏𑀓𑁄 𑀇𑀫𑀺𑀦𑀸 𑀅𑀓𑀣𑀺𑀢𑀁 𑀅𑀫𑀼𑀲𑁆𑀲, 𑀅𑀫𑀼𑀦𑀸 𑀅𑀓𑀣𑀺𑀢𑀁 𑀇𑀫𑀲𑁆𑀲 𑀯𑀤𑀦𑁆𑀢𑀸𑀦𑀁 𑀧𑀺𑀲𑀼𑀡𑀯𑀸𑀘𑀸𑀦𑀁 𑀯𑀲𑁂𑀦 𑀪𑀺𑀦𑁆𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀪𑁂𑀤𑁂𑀦 𑀯𑀺𑀦𑀲𑁆𑀲𑀺𑀲𑁆𑀲𑀢𑀺. 𑀏𑀯𑀁 𑀯𑀢𑁆𑀯𑀸 𑀪𑀕𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀕𑀗𑁆𑀕𑀸𑀢𑀻𑀭𑀁 𑀕𑀦𑁆𑀢𑁆𑀯𑀸 𑀓𑀢𑀫𑀼𑀔𑀥𑁄𑀯𑀦𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀆𑀕𑀫𑀬𑀫𑀸𑀦𑁄 𑀦𑀺𑀲𑀻𑀤𑀺.

𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀧𑀺 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑀝𑁆𑀞𑀸𑀓𑁄, 𑀲𑁄 𑀅𑀫𑁆𑀳𑁂 𑀉𑀧𑀕𑀢𑁂 𑀧𑀼𑀘𑁆𑀙𑀺𑀲𑁆𑀲𑀢𑀺 ‘𑀲𑀢𑁆𑀣𑀸 𑀓𑀺𑀭 𑀧𑀸𑀝𑀮𑀺𑀕𑀸𑀫𑀁 𑀅𑀕𑀫𑀸𑀲𑀺, 𑀓𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀣, 𑀦 𑀉𑀧𑀲𑀗𑁆𑀓𑀫𑀺𑀢𑁆𑀣𑀸’𑀢𑀺. ‘𑀉𑀧𑀲𑀗𑁆𑀓𑀫𑀺𑀫𑁆𑀳𑀸’𑀢𑀺 𑀘 𑀯𑀼𑀢𑁆𑀢𑁂 ‘𑀦𑀺𑀫𑀦𑁆𑀢𑀬𑀺𑀢𑁆𑀣, 𑀦 𑀦𑀺𑀫𑀦𑁆𑀢𑀬𑀺𑀢𑁆𑀣𑀸’𑀢𑀺 𑀧𑀼𑀘𑁆𑀙𑀺𑀲𑁆𑀲𑀢𑀺. ‘𑀦 𑀦𑀺𑀫𑀦𑁆𑀢𑀬𑀺𑀫𑁆𑀳𑀸’𑀢𑀺 𑀘 𑀯𑀼𑀢𑁆𑀢𑁂 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀺, 𑀇𑀤𑀜𑁆𑀘𑀸𑀧𑀺 𑀫𑀬𑀁 𑀅𑀓𑀢𑀝𑁆𑀞𑀸𑀦𑁂 𑀦𑀕𑀭𑀁 𑀫𑀸𑀧𑁂𑀫, 𑀲𑀫𑀡𑀲𑁆𑀲 𑀔𑁄 𑀧𑀦 𑀕𑁄𑀢𑀫𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀓𑀸𑀴𑀓𑀡𑁆𑀡𑀺𑀲𑀢𑁆𑀢𑀸 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀢𑀁 𑀫𑀬𑀁 𑀦𑀕𑀭𑀫𑀗𑁆𑀕𑀮𑀁 𑀯𑀸𑀘𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸’’𑀢𑀺𑀆𑀤𑀺.

𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑁂 𑀓𑀸𑀮𑁂. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀕𑀸𑀫𑀧𑀯𑁂𑀲𑀦𑀦𑀻𑀳𑀸𑀭𑁂𑀦 𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸.

𑀲𑀻𑀮𑀯𑀦𑁆𑀢𑁂𑀢𑁆𑀣𑀸𑀢𑀺 𑀲𑀻𑀮𑀯𑀦𑁆𑀢𑁄 𑀏𑀢𑁆𑀣 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂. 𑀲𑀜𑁆𑀜𑀢𑁂𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀜𑁆𑀜𑀢𑁂. 𑀢𑀸𑀲𑀁 𑀤𑀓𑁆𑀔𑀺𑀡𑀫𑀸𑀤𑀺𑀲𑁂𑀢𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀢𑀸𑀲𑀁 𑀖𑀭𑀤𑁂𑀯𑀢𑀸𑀦𑀁 𑀆𑀤𑀺𑀲𑁂𑀬𑁆𑀬 𑀧𑀢𑁆𑀢𑀺𑀁 𑀤𑀤𑁂𑀬𑁆𑀬. 𑀧𑀽𑀚𑀺𑀢𑀸 𑀧𑀽𑀚𑀬𑀦𑁆𑀢𑀻𑀢𑀺 ‘‘𑀇𑀫𑁂 𑀫𑀦𑀼𑀲𑁆𑀲𑀸 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸𑀧𑀺 𑀦 𑀳𑁄𑀦𑁆𑀢𑀺, 𑀏𑀯𑀫𑁆𑀧𑀺 𑀦𑁄 𑀧𑀢𑁆𑀢𑀺𑀁 𑀤𑁂𑀦𑁆𑀢𑀻’’𑀢𑀺 𑀆𑀭𑀓𑁆𑀔𑀁 𑀲𑀼𑀲𑀁𑀯𑀺𑀳𑀺𑀢𑀁 𑀓𑀭𑁄𑀦𑁆𑀢𑀺 𑀲𑀼𑀝𑁆𑀞𑀼 𑀆𑀭𑀓𑁆𑀔𑀁 𑀓𑀭𑁄𑀦𑁆𑀢𑀺. 𑀫𑀸𑀦𑀺𑀢𑀸 𑀫𑀸𑀦𑀬𑀦𑁆𑀢𑀻𑀢𑀺 𑀓𑀸𑀮𑀸𑀦𑀼𑀓𑀸𑀮𑀁 𑀩𑀮𑀺𑀓𑀫𑁆𑀫𑀓𑀭𑀡𑁂𑀦 𑀫𑀸𑀦𑀺𑀢𑀸 ‘‘𑀏𑀢𑁂 𑀫𑀦𑀼𑀲𑁆𑀲𑀸 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸𑀧𑀺 𑀦 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀘𑀢𑀼𑀧𑀜𑁆𑀘𑀙𑀫𑀸𑀲𑀦𑁆𑀢𑀭𑀁 𑀦𑁄 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺 𑀫𑀸𑀦𑁂𑀦𑁆𑀢𑀺 𑀉𑀧𑁆𑀧𑀦𑁆𑀦𑀧𑀭𑀺𑀲𑁆𑀲𑀬𑀁 𑀳𑀭𑀦𑁆𑀢𑀺. 𑀢𑀢𑁄 𑀦𑀦𑁆𑀢𑀺 𑀢𑀢𑁄 𑀢𑀁 𑀧𑀡𑁆𑀟𑀺𑀢𑀚𑀸𑀢𑀺𑀓𑀁 𑀧𑀼𑀭𑀺𑀲𑀁. 𑀑𑀭𑀲𑀦𑁆𑀢𑀺 𑀉𑀭𑁂 𑀞𑀧𑁂𑀢𑁆𑀯𑀸 𑀯𑀟𑁆𑀠𑀺𑀢𑀁, 𑀬𑀣𑀸 𑀫𑀸𑀢𑀸 𑀑𑀭𑀲𑀁 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀢𑀺, 𑀉𑀧𑁆𑀧𑀦𑁆𑀦𑀧𑀭𑀺𑀲𑁆𑀲𑀬𑀳𑀭𑀡𑀢𑁆𑀣𑀫𑁂𑀯𑀲𑁆𑀲 𑀬𑀣𑀸 𑀯𑀸𑀬𑀫𑀢𑀺, 𑀏𑀯𑀁 𑀅𑀦𑀼𑀓𑀫𑁆𑀧𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻𑀢𑀺 𑀲𑀼𑀦𑁆𑀤𑀭𑀸𑀦𑀺 𑀧𑀲𑁆𑀲𑀢𑀺.

𑀅𑀦𑀼𑀫𑁄𑀤𑀺𑀢𑁆𑀯𑀸𑀢𑀺 𑀢𑁂𑀳𑀺 𑀢𑀤𑀸 𑀧𑀲𑀼𑀢𑀧𑀼𑀜𑁆𑀜𑀲𑁆𑀲 𑀅𑀦𑀼𑀫𑁄𑀤𑀦𑀯𑀲𑁂𑀦 𑀢𑁂𑀲𑀁 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸. 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀧𑀺 ‘‘𑀬𑀸 𑀢𑀢𑁆𑀣 𑀤𑁂𑀯𑀢𑀸 𑀆𑀲𑀼𑀁, 𑀢𑀸𑀲𑀁 𑀤𑀓𑁆𑀔𑀺𑀡𑀫𑀸𑀤𑀺𑀲𑁂’’𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀤𑁂𑀯𑀢𑀸𑀦𑀁 𑀧𑀢𑁆𑀢𑀺𑀁 𑀅𑀤𑀁𑀲𑀼. 𑀢𑀁 𑀕𑁄𑀢𑀫𑀤𑁆𑀯𑀸𑀭𑀁 𑀦𑀸𑀫 𑀅𑀳𑁄𑀲𑀻𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀬𑁂𑀦 𑀤𑁆𑀯𑀸𑀭𑁂𑀦 𑀪𑀕𑀯𑀸 𑀦𑀺𑀓𑁆𑀔𑀫𑀺, 𑀢𑀁 𑀕𑁄𑀢𑀫𑀤𑁆𑀯𑀸𑀭𑀁 𑀦𑀸𑀫 𑀅𑀳𑁄𑀲𑀺. 𑀕𑀗𑁆𑀕𑀸𑀬 𑀧𑀦 𑀉𑀢𑁆𑀢𑀭𑀡𑀢𑁆𑀣𑀁 𑀅𑀦𑁄𑀢𑀺𑀡𑁆𑀡𑀢𑁆𑀢𑀸 𑀕𑁄𑀢𑀫𑀢𑀺𑀢𑁆𑀣𑀁 𑀦𑀸𑀫 𑀦𑀸𑀳𑁄𑀲𑀺. 𑀧𑀽𑀭𑀸𑀢𑀺 𑀧𑀼𑀡𑁆𑀡𑀸. 𑀲𑀫𑀢𑀺𑀢𑁆𑀢𑀺𑀓𑀸𑀢𑀺 𑀢𑀝𑀲𑀫𑀁 𑀉𑀤𑀓𑀲𑁆𑀲 𑀢𑀺𑀢𑁆𑀢𑀸 𑀪𑀭𑀺𑀢𑀸. 𑀓𑀸𑀓𑀧𑁂𑀬𑁆𑀬𑀸𑀢𑀺 𑀢𑀻𑀭𑁂 𑀞𑀺𑀢𑀓𑀸𑀓𑁂𑀳𑀺 𑀧𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀉𑀤𑀓𑀸. 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀉𑀪𑀢𑁄𑀓𑀽𑀮𑀲𑀫𑀁 𑀧𑀭𑀺𑀧𑀼𑀡𑁆𑀡𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀉𑀴𑀼𑀫𑁆𑀧𑀦𑁆𑀢𑀺 𑀧𑀸𑀭𑀕𑀫𑀦𑀢𑁆𑀣𑀸𑀬 𑀤𑀸𑀭𑀽𑀦𑀺 𑀲𑀗𑁆𑀖𑀸𑀝𑁂𑀢𑁆𑀯𑀸 𑀆𑀡𑀺𑀬𑁄 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀁. 𑀓𑀼𑀮𑁆𑀮𑀦𑁆𑀢𑀺 𑀯𑁂𑀴𑀼𑀤𑀡𑁆𑀟𑀸𑀤𑀺𑀓𑁂 𑀯𑀮𑁆𑀮𑀺𑀆𑀤𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀓𑀢𑀁.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀫𑀳𑀸𑀚𑀦𑀲𑁆𑀲 𑀕𑀗𑁆𑀕𑁄𑀤𑀓𑀫𑀢𑁆𑀢𑀲𑁆𑀲𑀧𑀺 𑀓𑁂𑀯𑀮𑀁 𑀢𑀭𑀺𑀢𑀼𑀁 𑀅𑀲𑀫𑀢𑁆𑀣𑀢𑀁, 𑀅𑀢𑁆𑀢𑀦𑁄 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀢𑀺𑀕𑀫𑁆𑀪𑀻𑀭𑀯𑀺𑀢𑁆𑀣𑀢𑀁 𑀲𑀁𑀲𑀸𑀭𑀫𑀳𑀡𑁆𑀡𑀯𑀁 𑀢𑀭𑀺𑀢𑁆𑀯𑀸 𑀞𑀺𑀢𑀪𑀸𑀯𑀜𑁆𑀘 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀅𑀡𑁆𑀡𑀯𑀦𑁆𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀬𑁄𑀚𑀦𑀫𑀢𑁆𑀢𑀁 𑀕𑀫𑁆𑀪𑀻𑀭𑀲𑁆𑀲 𑀘 𑀯𑀺𑀢𑁆𑀣𑀢𑀲𑁆𑀲 𑀘 𑀉𑀤𑀓𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀭𑀦𑁆𑀢𑀺 𑀲𑀭𑀺𑀢𑁆𑀯𑀸 𑀕𑀫𑀦𑀢𑁄 𑀇𑀥 𑀦𑀤𑀻 𑀅𑀥𑀺𑀧𑁆𑀧𑁂𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀕𑀫𑁆𑀪𑀻𑀭𑀯𑀺𑀢𑁆𑀣𑀢𑀁 𑀲𑀁𑀲𑀸𑀭𑀡𑁆𑀡𑀯𑀁 𑀢𑀡𑁆𑀳𑀸𑀲𑀭𑀺𑀢𑀜𑁆𑀘 𑀢𑀭𑀦𑁆𑀢𑀺, 𑀢𑁂 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑁂𑀢𑀼𑀁 𑀓𑀢𑁆𑀯𑀸𑀦 𑀯𑀺𑀲𑀚𑁆𑀚 𑀧𑀮𑁆𑀮𑀮𑀸𑀦𑀺 𑀅𑀦𑀸𑀫𑀲𑀺𑀢𑁆𑀯𑀸𑀯 𑀉𑀤𑀓𑀪𑀭𑀺𑀢𑀸𑀦𑀺 𑀦𑀺𑀦𑁆𑀦𑀝𑁆𑀞𑀸𑀦𑀸𑀦𑀺, 𑀅𑀬𑀁 𑀧𑀦 𑀇𑀤𑀁 𑀅𑀧𑁆𑀧𑀫𑀢𑁆𑀢𑀓𑀁 𑀉𑀤𑀓𑀁 𑀢𑀭𑀺𑀢𑀼𑀓𑀸𑀫𑁄 𑀓𑀼𑀮𑁆𑀮𑀜𑁆𑀳𑀺 𑀚𑀦𑁄 𑀧𑀩𑀦𑁆𑀥𑀢𑀺 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑀼𑀁 𑀆𑀬𑀸𑀲𑀁 𑀆𑀧𑀚𑁆𑀚𑀢𑀺. 𑀢𑀺𑀡𑁆𑀡𑀸 𑀫𑁂𑀥𑀸𑀯𑀺𑀦𑁄 𑀚𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀸𑀬 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀯𑀺𑀦𑀸 𑀏𑀯 𑀓𑀼𑀮𑁆𑀮𑁂𑀦 𑀢𑀺𑀡𑁆𑀡𑀸 𑀧𑀭𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸𑀢𑀺.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑁆𑀯𑀺𑀥𑀸𑀧𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀢𑁆𑀢𑀫𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄𑀢𑀺 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑀁 𑀤𑀻𑀖𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀕𑀘𑁆𑀙𑀦𑁆𑀢𑁄 𑀳𑁄𑀢𑀺. 𑀦𑀸𑀕𑀲𑀫𑀸𑀮𑁂𑀦𑀸𑀢𑀺 𑀏𑀯𑀁𑀦𑀸𑀫𑀓𑁂𑀦 𑀣𑁂𑀭𑁂𑀦. 𑀧𑀘𑁆𑀙𑀸𑀲𑀫𑀡𑁂𑀦𑀸𑀢𑀺 𑀅𑀬𑀁 𑀢𑀤𑀸 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀢𑁂𑀦 𑀦𑀁 𑀧𑀘𑁆𑀙𑀸𑀲𑀫𑀡𑀁 𑀓𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀪𑀕𑀯𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀸 𑀉𑀧𑀝𑁆𑀞𑀸𑀓𑀸 𑀅𑀳𑁂𑀲𑀼𑀁, 𑀢𑀢𑁄 𑀧𑀭𑀁 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀙𑀸𑀬𑀸𑀯 𑀉𑀧𑀝𑁆𑀞𑀸𑀲𑀺. 𑀅𑀬𑀁 𑀧𑀦 𑀅𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀓𑀸𑀮𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀬𑀲𑁆𑀫𑀢𑀸 𑀦𑀸𑀕𑀲𑀫𑀸𑀮𑁂𑀦 𑀧𑀘𑁆𑀙𑀸𑀲𑀫𑀡𑁂𑀦𑀸’’𑀢𑀺. 𑀤𑁆𑀯𑀺𑀥𑀸𑀧𑀣𑀦𑁆𑀢𑀺 𑀤𑁆𑀯𑀺𑀥𑀸𑀪𑀽𑀢𑀁 𑀫𑀕𑁆𑀕𑀁. ‘‘𑀤𑁆𑀯𑁂𑀥𑀸𑀧𑀣’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀢𑀢𑁆𑀣 𑀓𑀢𑀧𑀭𑀺𑀘𑀬𑀢𑁆𑀢𑀸 𑀉𑀚𑀼𑀪𑀸𑀯𑀜𑁆𑀘𑀲𑁆𑀲 𑀲𑀦𑁆𑀥𑀸𑀬 𑀯𑀤𑀢𑀺 ‘‘𑀅𑀬𑀁, 𑀪𑀦𑁆𑀢𑁂 𑀪𑀕𑀯𑀸, 𑀧𑀦𑁆𑀣𑁄’’𑀢𑀺.

𑀪𑀕𑀯𑀸 𑀧𑀦 𑀢𑀤𑀸 𑀢𑀲𑁆𑀲 𑀲𑀧𑀭𑀺𑀲𑁆𑀲𑀬𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁 𑀫𑀕𑁆𑀕𑀁 𑀕𑀦𑁆𑀢𑀼𑀓𑀸𑀫𑁄 ‘‘𑀅𑀬𑀁, 𑀦𑀸𑀕𑀲𑀫𑀸𑀮, 𑀧𑀦𑁆𑀣𑁄’’𑀢𑀺 𑀆𑀳. ‘‘𑀲𑀧𑀭𑀺𑀲𑁆𑀲𑀬𑁄’’𑀢𑀺 𑀘 𑀯𑀼𑀢𑁆𑀢𑁂 𑀅𑀲𑀤𑁆𑀤𑀳𑀺𑀢𑁆𑀯𑀸 ‘‘𑀪𑀕𑀯𑀸 𑀦 𑀢𑀢𑁆𑀣 𑀧𑀭𑀺𑀲𑁆𑀲𑀬𑁄’’𑀢𑀺 𑀯𑀤𑁂𑀬𑁆𑀬, 𑀢𑀤𑀲𑁆𑀲 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸𑀢𑀺 ‘‘𑀲𑀧𑀭𑀺𑀲𑁆𑀲𑀬𑁄’’𑀢𑀺 𑀦 𑀓𑀣𑁂𑀲𑀺. 𑀢𑀺𑀓𑁆𑀔𑀢𑁆𑀢𑀼𑀁 ‘‘𑀅𑀬𑀁 𑀧𑀦𑁆𑀣𑁄, 𑀇𑀫𑀺𑀦𑀸 𑀕𑀘𑁆𑀙𑀸𑀫𑀸’’𑀢𑀺 𑀯𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 ‘‘𑀦 𑀪𑀕𑀯𑀸 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀦𑁆𑀢𑀼𑀁 𑀇𑀘𑁆𑀙𑀢𑀺, 𑀅𑀬𑀫𑁂𑀯 𑀘 𑀉𑀚𑀼𑀫𑀕𑁆𑀕𑁄, 𑀳𑀦𑁆𑀤𑀸𑀳𑀁 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀼 𑀧𑀢𑁆𑀢𑀘𑀻𑀯𑀭𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀦 𑀤𑀼𑀓𑁆𑀔𑀲𑀁𑀯𑀢𑁆𑀢𑀦𑀺𑀓𑁂𑀦 𑀓𑀫𑁆𑀫𑀼𑀦𑀸 𑀘𑁄𑀤𑀺𑀬𑀫𑀸𑀦𑁄 𑀪𑀕𑀯𑀢𑁄 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀯 𑀧𑀓𑁆𑀓𑀸𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀢𑀢𑁆𑀣𑁂𑀯 𑀙𑀫𑀸𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀸𑀫𑀻’’𑀢𑀺. 𑀢𑀢𑁆𑀣 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀫𑀕𑁆𑀕𑁂 𑀙𑀫𑀸𑀬𑀁 𑀧𑀣𑀯𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀤𑀁 𑀯𑁄 𑀪𑀕𑀯𑀸 𑀧𑀢𑁆𑀢𑀘𑀻𑀯𑀭𑀁, 𑀲𑀘𑁂 𑀇𑀘𑁆𑀙𑀣, 𑀕𑀡𑁆𑀳𑀣, 𑀬𑀤𑀺 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀫𑀕𑁆𑀕𑀁𑀬𑁂𑀯 𑀕𑀦𑁆𑀢𑀼𑀓𑀸𑀫𑀢𑁆𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀸𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀢𑀤𑀸 𑀓𑀺𑀭 𑀧𑀜𑁆𑀘𑀲𑀢𑀸 𑀧𑀼𑀭𑀺𑀲𑀸 𑀮𑀼𑀤𑁆𑀤𑀸 𑀮𑁄𑀳𑀺𑀢𑀧𑀸𑀡𑀺𑀦𑁄 𑀭𑀸𑀚𑀸𑀧𑀭𑀸𑀥𑀺𑀦𑁄 𑀳𑀼𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀺𑀓𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸 ‘‘𑀧𑀸𑀭𑀺𑀧𑀦𑁆𑀣𑀺𑀓𑀪𑀸𑀯𑁂𑀦 𑀭𑀜𑁆𑀜𑁄 𑀆𑀬𑀧𑀣𑀁 𑀧𑀘𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀫𑀕𑁆𑀕𑀲𑀫𑀻𑀧𑁂 𑀅𑀭𑀜𑁆𑀜𑁂 𑀢𑀺𑀝𑁆𑀞𑀦𑁆𑀢𑀺. 𑀢𑁂 𑀣𑁂𑀭𑀁 𑀢𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀫𑀡𑁄 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀆𑀕𑀘𑁆𑀙𑀢𑀺, 𑀅𑀯𑀴𑀜𑁆𑀚𑀺𑀢𑀩𑁆𑀩𑀁 𑀫𑀕𑁆𑀕𑀁 𑀯𑀴𑀜𑁆𑀚𑁂𑀢𑀺, 𑀅𑀫𑁆𑀳𑀸𑀓𑀁 𑀅𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀳𑀦𑁆𑀤 𑀦𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀕𑀳𑀦𑀝𑁆𑀞𑀸𑀦𑀢𑁄 𑀯𑁂𑀕𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀳𑀲𑀸 𑀣𑁂𑀭𑀁 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑀜𑁆𑀘𑀲𑁆𑀲 𑀪𑀺𑀦𑁆𑀤𑀺𑀢𑁆𑀯𑀸 𑀘𑀻𑀯𑀭𑀁 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀢𑁆𑀢𑀸 ‘‘𑀢𑀁 𑀦 𑀳𑀦𑀸𑀫, 𑀇𑀢𑁄 𑀧𑀝𑁆𑀞𑀸𑀬 𑀇𑀫𑀲𑁆𑀲 𑀫𑀕𑁆𑀕𑀲𑁆𑀲 𑀧𑀭𑀺𑀲𑁆𑀲𑀬𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄…𑀧𑁂… 𑀯𑀺𑀧𑁆𑀨𑀸𑀮𑁂𑀲𑀼’’𑀦𑁆𑀢𑀺.

𑀪𑀕𑀯𑀸𑀧𑀺 ‘‘𑀅𑀬𑀁 𑀢𑁂𑀦 𑀫𑀕𑁆𑀕𑁂𑀦 𑀕𑀢𑁄 𑀘𑁄𑀭𑁂𑀳𑀺 𑀩𑀸𑀥𑀺𑀢𑁄 𑀫𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀇𑀤𑀸𑀦𑁂𑀯 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀦𑀸𑀕𑀲𑀫𑀸𑀮𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀸 𑀕𑀢𑀫𑀕𑁆𑀕𑀫𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄…𑀧𑁂… 𑀲𑀗𑁆𑀖𑀸𑀝𑀺𑀜𑁆𑀘 𑀯𑀺𑀧𑁆𑀨𑀸𑀮𑁂𑀲𑀼’’𑀦𑁆𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀦𑀸𑀕𑀲𑀫𑀸𑀮𑀲𑁆𑀲 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀔𑁂𑀫𑀦𑁆𑀢𑀫𑀕𑁆𑀕𑀕𑀫𑀦𑀁, 𑀅𑀢𑁆𑀢𑀦𑁄 𑀘 𑀔𑁂𑀫𑀦𑁆𑀢𑀫𑀕𑁆𑀕𑀕𑀫𑀦𑀁 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀤𑁆𑀥𑀺𑀁 𑀘𑀭𑀦𑁆𑀢𑀺 𑀲𑀳 𑀘𑀭𑀦𑁆𑀢𑁄. 𑀏𑀓𑀢𑁄 𑀯𑀲𑀦𑁆𑀢𑀺 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀲𑀳 𑀯𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀺𑀲𑁆𑀲𑁄 𑀅𑀜𑁆𑀜𑀚𑀦𑁂𑀦 𑀯𑁂𑀤𑀕𑀽𑀢𑀺 𑀯𑁂𑀤𑀺𑀢𑀩𑁆𑀩𑀝𑁆𑀞𑁂𑀦 𑀯𑁂𑀤𑀲𑀗𑁆𑀔𑀸𑀢𑁂𑀦 𑀘𑀢𑀼𑀲𑀘𑁆𑀘𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀕𑀢𑀢𑁆𑀢𑀸 𑀅𑀥𑀺𑀕𑀢𑀢𑁆𑀢𑀸, 𑀯𑁂𑀤𑀲𑁆𑀲 𑀯𑀸 𑀲𑀓𑀮𑀲𑁆𑀲 𑀜𑁂𑀬𑁆𑀬𑀲𑁆𑀲 𑀧𑀸𑀭𑀁 𑀕𑀢𑀢𑁆𑀢𑀸 𑀯𑁂𑀤𑀕𑀽. 𑀅𑀢𑁆𑀢𑀦𑁄 𑀳𑀺𑀢𑀸𑀳𑀺𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑁄, 𑀅𑀯𑀺𑀤𑁆𑀯𑀸 𑀩𑀸𑀮𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀅𑀜𑁆𑀜𑁂𑀦 𑀚𑀦𑁂𑀦 𑀫𑀺𑀲𑁆𑀲𑁄 𑀲𑀳𑀘𑀭𑀡𑀫𑀢𑁆𑀢𑁂𑀦 𑀫𑀺𑀲𑁆𑀲𑁄. 𑀯𑀺𑀤𑁆𑀯𑀸 𑀧𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀢𑁂𑀦 𑀯𑁂𑀤𑀕𑀽𑀪𑀸𑀯𑁂𑀦 𑀯𑀺𑀤𑁆𑀯𑀸 𑀚𑀸𑀦𑀦𑁆𑀢𑁄 𑀧𑀸𑀧𑀓𑀁 𑀅𑀪𑀤𑁆𑀤𑀓𑀁 𑀅𑀢𑁆𑀢𑀦𑁄 𑀤𑀼𑀓𑁆𑀔𑀸𑀯𑀳𑀁 𑀧𑀚𑀳𑀸𑀢𑀺, 𑀧𑀸𑀧𑀓𑀁 𑀯𑀸 𑀅𑀓𑀮𑁆𑀬𑀸𑀡𑀧𑀼𑀕𑁆𑀕𑀮𑀁 𑀧𑀚𑀳𑀸𑀢𑀺. 𑀬𑀣𑀸 𑀓𑀺𑀁? 𑀓𑁄𑀜𑁆𑀘𑁄 𑀔𑀻𑀭𑀧𑀓𑁄𑀯 𑀦𑀺𑀦𑁆𑀦𑀕𑀦𑁆𑀢𑀺 𑀬𑀣𑀸 𑀓𑁄𑀜𑁆𑀘𑀲𑀓𑀼𑀡𑁄 𑀉𑀤𑀓𑀫𑀺𑀲𑁆𑀲𑀺𑀢𑁂 𑀔𑀻𑀭𑁂 𑀉𑀧𑀦𑀻𑀢𑁂 𑀯𑀺𑀦𑀸 𑀢𑁄𑀬𑀁 𑀔𑀻𑀭𑀫𑀢𑁆𑀢𑀲𑁆𑀲𑁂𑀯 𑀧𑀺𑀯𑀦𑀢𑁄 𑀔𑀻𑀭𑀧𑀓𑁄 𑀦𑀺𑀦𑁆𑀦𑀝𑁆𑀞𑀸𑀦𑀕𑀫𑀦𑁂𑀦 𑀦𑀺𑀦𑁆𑀦𑀕𑀲𑀗𑁆𑀔𑀸𑀢𑀁 𑀉𑀤𑀓𑀁 𑀧𑀚𑀳𑀸𑀢𑀺 𑀯𑀚𑁆𑀚𑁂𑀢𑀺, 𑀏𑀯𑀁 𑀧𑀡𑁆𑀟𑀺𑀢𑁄 𑀓𑀺𑀭 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑁂𑀳𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀳𑀪𑀽𑀢𑁄𑀧𑀺 𑀆𑀘𑀸𑀭𑁂𑀦 𑀢𑁂 𑀧𑀚𑀳𑀸𑀢𑀺, 𑀦 𑀓𑀤𑀸𑀘𑀺𑀧𑀺 𑀲𑀫𑁆𑀫𑀺𑀲𑁆𑀲𑁄 𑀳𑁄𑀢𑀺.