𑁧𑁦. 𑀤𑀼𑀢𑀺𑀬𑀤𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀤𑀲𑀫𑁂 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄𑀬𑁂𑀯 𑀬𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀧𑀘𑁆𑀘𑀓𑁆𑀔𑀁, 𑀢𑁂𑀲𑀁 𑀢𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, 𑀬𑁂𑀧𑀺 𑀘 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂𑀳𑀺 𑀓𑀢𑁂𑀦 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀡𑁂𑀦 𑀣𑁂𑀭𑁂 𑀕𑀸𑀭𑀯𑀭𑀳𑀺𑀢𑀸 𑀧𑀼𑀣𑀼𑀚𑁆𑀚𑀦𑀸, 𑀢𑁂𑀲𑀁 𑀣𑁂𑀭𑁂 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀜𑁆𑀘 𑀆𑀫𑀦𑁆𑀢𑁂𑀲𑀺. 𑀢𑀢𑁆𑀣 𑀢𑀢𑁆𑀭𑀸𑀢𑀺 𑀯𑀘𑀦𑀲𑀜𑁆𑀜𑀸𑀧𑀦𑁂 𑀦𑀺𑀧𑀸𑀢𑀫𑀢𑁆𑀢𑀁. 𑀔𑁄𑀢𑀺 𑀅𑀯𑀥𑀸𑀭𑀡𑁂. 𑀢𑁂𑀲𑀼 ‘‘𑀢𑀢𑁆𑀭𑀸’’𑀢𑀺 𑀇𑀫𑀺𑀦𑀸 ‘‘𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻’’𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀯𑀼𑀘𑁆𑀘𑀫𑀸𑀦𑀢𑀁𑀬𑁂𑀯 𑀚𑁄𑀢𑁂𑀢𑀺. ‘‘𑀔𑁄’’𑀢𑀺 𑀧𑀦 𑀇𑀫𑀺𑀦𑀸 𑀆𑀫𑀦𑁆𑀢𑁂𑀲𑀺𑀬𑁂𑀯, 𑀦𑀸𑀲𑁆𑀲 𑀆𑀫𑀦𑁆𑀢𑀦𑁂 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀆𑀭𑀸𑀫𑁂. 𑀔𑁄𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑁂 𑀦𑀺𑀧𑀸𑀢𑁄. 𑀆𑀫𑀦𑁆𑀢𑁂𑀲𑀻𑀢𑀺 𑀅𑀪𑀸𑀲𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀪𑀺𑀓𑁆𑀔𑀽𑀬𑁂𑀯 𑀆𑀫𑀦𑁆𑀢𑁂𑀲𑀻𑀢𑀺? 𑀚𑁂𑀝𑁆𑀞𑀢𑁆𑀢𑀸 𑀲𑁂𑀝𑁆𑀞𑀢𑁆𑀢𑀸 𑀆𑀲𑀦𑁆𑀦𑀢𑁆𑀢𑀸 𑀲𑀩𑁆𑀩𑀓𑀸𑀮𑀁 𑀲𑀦𑁆𑀦𑀺𑀳𑀺𑀢𑀢𑁆𑀢𑀸 𑀥𑀫𑁆𑀫𑀤𑁂𑀲𑀦𑀸𑀬 𑀯𑀺𑀲𑁂𑀲𑀢𑁄 𑀪𑀸𑀚𑀦𑀪𑀽𑀢𑀢𑁆𑀢𑀸 𑀘.

𑀪𑀺𑀓𑁆𑀔𑀯𑁄𑀢𑀺 𑀢𑁂𑀲𑀁 𑀆𑀫𑀦𑁆𑀢𑀦𑀸𑀓𑀸𑀭𑀤𑀲𑁆𑀲𑀦𑀁. 𑀪𑀤𑀦𑁆𑀢𑁂𑀢𑀺 𑀆𑀫𑀦𑁆𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀭𑀯𑁂𑀦 𑀲𑀢𑁆𑀣𑀼 𑀧𑀝𑀺𑀯𑀘𑀦𑀤𑀸𑀦𑀁. 𑀢𑀢𑁆𑀣 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀤𑀦𑁆𑀢𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀮𑀧𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀯𑀤𑀦𑁆𑀢𑀸 𑀢𑁂 𑀧𑀘𑁆𑀘𑀸𑀮𑀧𑀦𑁆𑀢𑀺. 𑀅𑀧𑀺𑀘 ‘‘𑀪𑀺𑀓𑁆𑀔𑀯𑁄’’𑀢𑀺 𑀇𑀫𑀺𑀦𑀸 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀲𑁄𑀫𑁆𑀫𑀳𑀤𑀬𑀦𑀺𑀲𑁆𑀲𑀺𑀢𑀧𑀼𑀩𑁆𑀩𑀗𑁆𑀕𑀫𑁂𑀦 𑀯𑀘𑀦𑁂𑀦 𑀢𑁂 𑀪𑀺𑀓𑁆𑀔𑀽 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀼𑀔𑀸𑀪𑀺𑀫𑀼𑀔𑁂 𑀓𑀭𑁄𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀇𑀫𑀺𑀦𑀸 𑀲𑀢𑁆𑀣𑀭𑀺 𑀆𑀤𑀭𑀩𑀳𑀼𑀫𑀸𑀦𑀕𑀸𑀭𑀯𑀤𑀻𑀧𑀦𑀯𑀘𑀦𑁂𑀦 𑀢𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀲𑀼𑀲𑁆𑀲𑀽𑀲𑀢𑀁 𑀑𑀯𑀸𑀤𑀧𑁆𑀧𑀝𑀺𑀕𑁆𑀕𑀳𑀕𑀸𑀭𑀯𑀪𑀸𑀯𑀜𑁆𑀘 𑀧𑀝𑀺𑀯𑁂𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀯𑀘𑀦𑀁 𑀧𑀢𑀺𑀅𑀲𑁆𑀲𑁄𑀲𑀼𑀁 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀲𑀼𑀁. 𑀏𑀢𑀤𑀯𑁄𑀘𑀸𑀢𑀺 𑀪𑀕𑀯𑀸 𑀏𑀢𑀁 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀲𑀓𑀮𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀤𑀩𑁆𑀩𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀮𑁆𑀮𑀧𑀼𑀢𑁆𑀢𑀲𑁆𑀲𑀸𑀢𑀺𑀆𑀤𑀺 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀏𑀢𑀫𑀢𑁆𑀣𑀦𑁆𑀢𑀺𑀆𑀤𑀻𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺, 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀕𑀸𑀣𑀸𑀲𑀼 𑀧𑀦 𑀅𑀬𑁄𑀖𑀦𑀳𑀢𑀲𑁆𑀲𑀸𑀢𑀺 𑀅𑀬𑁄 𑀳𑀜𑁆𑀜𑀢𑀺 𑀏𑀢𑁂𑀦𑀸𑀢𑀺 𑀅𑀬𑁄𑀖𑀦𑀁, 𑀓𑀫𑁆𑀫𑀸𑀭𑀸𑀦𑀁 𑀅𑀬𑁄𑀓𑀽𑀝𑀁 𑀅𑀬𑁄𑀫𑀼𑀝𑁆𑀞𑀺 𑀘. 𑀢𑁂𑀦 𑀅𑀬𑁄𑀖𑀦𑁂𑀦 𑀳𑀢𑀲𑁆𑀲 𑀧𑀳𑀢𑀲𑁆𑀲. 𑀓𑁂𑀘𑀺 𑀧𑀦 ‘‘𑀅𑀬𑁄𑀖𑀦𑀳𑀢𑀲𑁆𑀲𑀸𑀢𑀺 𑀖𑀦𑀅𑀬𑁄𑀧𑀺𑀡𑁆𑀟𑀁 𑀳𑀢𑀲𑁆𑀲𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀏𑀯-𑀲𑀤𑁆𑀤𑁄 𑀘𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢𑀁. 𑀚𑀮𑀢𑁄 𑀚𑀸𑀢𑀯𑁂𑀤𑀲𑁄𑀢𑀺 𑀛𑀸𑀬𑀫𑀸𑀦𑀲𑁆𑀲 𑀅𑀕𑁆𑀕𑀺𑀲𑁆𑀲. 𑀅𑀦𑀸𑀤𑀭𑁂 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀦𑀼𑀧𑀼𑀩𑁆𑀩𑀽𑀧𑀲𑀦𑁆𑀢𑀲𑁆𑀲𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀉𑀧𑀲𑀦𑁆𑀢𑀲𑁆𑀲 𑀯𑀺𑀚𑁆𑀛𑀸𑀢𑀲𑁆𑀲 𑀦𑀺𑀭𑀼𑀤𑁆𑀥𑀲𑁆𑀲. 𑀬𑀣𑀸 𑀦 𑀜𑀸𑀬𑀢𑁂 𑀕𑀢𑀻𑀢𑀺 𑀬𑀣𑀸 𑀢𑀲𑁆𑀲 𑀕𑀢𑀺 𑀦 𑀜𑀸𑀬𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀬𑁄𑀫𑀼𑀝𑁆𑀞𑀺𑀓𑀽𑀝𑀸𑀤𑀺𑀦𑀸 𑀫𑀳𑀢𑀸 𑀅𑀬𑁄𑀖𑀦𑁂𑀦 𑀳𑀢𑀲𑁆𑀲 𑀲𑀁𑀳𑀢𑀲𑁆𑀲, 𑀓𑀁𑀲𑀪𑀸𑀚𑀦𑀸𑀤𑀺𑀕𑀢𑀲𑁆𑀲 𑀯𑀸 𑀚𑀮𑀫𑀸𑀦𑀲𑁆𑀲 𑀅𑀕𑁆𑀕𑀺𑀲𑁆𑀲, 𑀢𑀣𑀸 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀤𑁆𑀤𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀉𑀧𑀲𑀦𑁆𑀢𑀲𑁆𑀲 𑀲𑀼𑀯𑀽𑀧𑀲𑀦𑁆𑀢𑀲𑁆𑀲 𑀤𑀲𑀲𑀼 𑀤𑀺𑀲𑀸𑀲𑀼 𑀦 𑀓𑀢𑁆𑀣𑀘𑀺 𑀕𑀢𑀺 𑀧𑀜𑁆𑀜𑀸𑀬𑀢𑀺 𑀧𑀘𑁆𑀘𑀬𑀦𑀺𑀭𑁄𑀥𑁂𑀦 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀦𑀺𑀭𑀼𑀤𑁆𑀥𑀢𑁆𑀢𑀸.

𑀏𑀯𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀏𑀯𑀁 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀜𑀸𑀬𑁂𑀦 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀧𑀼𑀩𑁆𑀩𑀗𑁆𑀕𑀫𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀘𑀢𑀽𑀳𑀺𑀧𑀺 𑀉𑀧𑀸𑀤𑀸𑀦𑁂𑀳𑀺 𑀆𑀲𑀯𑁂𑀳𑀺 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀢𑀢𑁄 𑀏𑀯 𑀓𑀸𑀫𑀧𑀩𑀦𑁆𑀥𑀲𑀗𑁆𑀔𑀸𑀢𑀁 𑀓𑀸𑀫𑁄𑀖𑀁 𑀪𑀯𑁄𑀖𑀸𑀤𑀺𑀪𑁂𑀤𑀁 𑀅𑀯𑀲𑀺𑀝𑁆𑀞𑀁 𑀑𑀖𑀜𑁆𑀘 𑀢𑀭𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀓𑀸𑀫𑀩𑀦𑁆𑀥𑁄𑀖𑀢𑀸𑀭𑀺𑀦𑀁 𑀲𑀼𑀝𑁆𑀞𑀼 𑀧𑀝𑀺𑀧𑀲𑁆𑀲𑀫𑁆𑀪𑀺𑀢𑀲𑀩𑁆𑀩𑀓𑀺𑀮𑁂𑀲𑀯𑀺𑀧𑁆𑀨𑀦𑁆𑀤𑀺𑀢𑀢𑁆𑀢𑀸 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀯𑀸𑀢𑁂𑀳𑀺 𑀘 𑀅𑀓𑀫𑁆𑀧𑀦𑀻𑀬𑀢𑀸𑀬 𑀅𑀘𑀮𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀲𑀩𑁆𑀩𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔𑀁 𑀧𑀢𑁆𑀢𑀸𑀦𑀁 𑀅𑀥𑀺𑀕𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀕𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑀸𑀲𑀼 𑀕𑀢𑀻𑀲𑀼 𑀅𑀬𑀁 𑀦𑀸𑀫𑀸𑀢𑀺 𑀧𑀜𑁆𑀜𑀧𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁆𑀢𑀸 𑀧𑀜𑁆𑀜𑀸𑀧𑁂𑀢𑀼𑀁 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺, 𑀬𑀣𑀸𑀯𑀼𑀢𑁆𑀢𑀚𑀸𑀢𑀯𑁂𑀤𑁄 𑀯𑀺𑀬 𑀅𑀧𑀜𑁆𑀜𑀢𑁆𑀢𑀺𑀓𑀪𑀸𑀯𑀫𑁂𑀯 𑀳𑀺 𑀲𑁄 𑀕𑀢𑁄𑀢𑀺 𑀅𑀢𑁆𑀣𑁄.

𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀧𑀸𑀝𑀮𑀺𑀕𑀸𑀫𑀺𑀬𑀯𑀕𑁆𑀕𑀯𑀡𑁆𑀡𑀦𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀲𑀼𑀯𑀺𑀫𑀼𑀢𑁆𑀢𑀪𑀯𑀸𑀤𑀸𑀦𑁄, 𑀤𑁂𑀯𑀤𑀸𑀦𑀯𑀫𑀸𑀦𑀺𑀢𑁄;

𑀧𑀘𑁆𑀙𑀺𑀦𑁆𑀦𑀢𑀡𑁆𑀳𑀸𑀲𑀦𑁆𑀢𑀸𑀦𑁄, 𑀧𑀻𑀢𑀺𑀲𑀁𑀯𑁂𑀕𑀤𑀻𑀧𑀦𑁄.

𑀲𑀤𑁆𑀥𑀫𑁆𑀫𑀤𑀸𑀦𑀦𑀺𑀭𑀢𑁄, 𑀉𑀧𑀸𑀤𑀸𑀦𑀓𑁆𑀔𑀬𑀸𑀯𑀳𑁄;

𑀢𑀢𑁆𑀣 𑀢𑀢𑁆𑀣 𑀉𑀤𑀸𑀦𑁂 𑀬𑁂, 𑀉𑀤𑀸𑀦𑁂𑀲𑀺 𑀯𑀺𑀦𑀸𑀬𑀓𑁄.

𑀢𑁂 𑀲𑀩𑁆𑀩𑁂 𑀏𑀓𑀢𑁄 𑀓𑀢𑁆𑀯𑀸, 𑀆𑀭𑁄𑀧𑁂𑀦𑁆𑀢𑁂𑀳𑀺 𑀲𑀗𑁆𑀕𑀳𑀁;

𑀉𑀤𑀸𑀦𑀫𑀺𑀢𑀺 𑀲𑀗𑁆𑀕𑀻𑀢𑀁, 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀬𑀁.

𑀢𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁;

𑀦𑀺𑀲𑁆𑀲𑀸𑀬 𑀬𑀸 𑀲𑀫𑀸𑀭𑀤𑁆𑀥𑀸, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀫𑀬𑀸.

𑀲𑀸 𑀢𑀢𑁆𑀣 𑀧𑀭𑀫𑀢𑁆𑀣𑀸𑀦𑀁, 𑀲𑀼𑀢𑁆𑀢𑀦𑁆𑀢𑁂𑀲𑀼 𑀬𑀣𑀸𑀭𑀳𑀁;

𑀧𑀓𑀸𑀲𑀦𑀸 𑀧𑀭𑀫𑀢𑁆𑀣𑀤𑀻𑀧𑀦𑀻 𑀦𑀸𑀫 𑀦𑀸𑀫𑀢𑁄.

𑀲𑀫𑁆𑀧𑀢𑁆𑀢𑀸 𑀧𑀭𑀺𑀦𑀺𑀝𑁆𑀞𑀸𑀦𑀁, 𑀅𑀦𑀸𑀓𑀼𑀮𑀯𑀺𑀦𑀺𑀘𑁆𑀙𑀬𑀸;

𑀘𑀢𑀼𑀢𑁆𑀢𑀺𑀁𑀲𑀧𑁆𑀧𑀫𑀸𑀡𑀸𑀬, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑀢𑁄.

𑀇𑀢𑀺 𑀢𑀁 𑀲𑀗𑁆𑀔𑀭𑁄𑀦𑁆𑀢𑁂𑀦, 𑀬𑀁 𑀢𑀁 𑀅𑀥𑀺𑀕𑀢𑀁 𑀫𑀬𑀸;

𑀧𑀼𑀜𑁆𑀜𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

𑀑𑀕𑀸𑀳𑀺𑀢𑁆𑀯𑀸 𑀯𑀺𑀲𑀼𑀤𑁆𑀥𑀸𑀬, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸;

𑀲𑀩𑁆𑀩𑁂𑀧𑀺 𑀤𑁂𑀳𑀺𑀦𑁄 𑀳𑁄𑀦𑁆𑀢𑀼, 𑀯𑀺𑀫𑀼𑀢𑁆𑀢𑀺𑀭𑀲𑀪𑀸𑀕𑀺𑀦𑁄.

𑀘𑀺𑀭𑀁 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁;

𑀢𑀲𑁆𑀫𑀺𑀁 𑀲𑀕𑀸𑀭𑀯𑀸 𑀦𑀺𑀘𑁆𑀘𑀁, 𑀳𑁄𑀦𑁆𑀢𑀼 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄.

𑀲𑀫𑁆𑀫𑀸 𑀯𑀲𑁆𑀲𑀢𑀼 𑀓𑀸𑀮𑁂𑀦, 𑀤𑁂𑀯𑁄𑀧𑀺 𑀚𑀕𑀢𑀻𑀧𑀢𑀺;

𑀲𑀤𑁆𑀥𑀫𑁆𑀫𑀦𑀺𑀭𑀢𑁄 𑀮𑁄𑀓𑀁, 𑀥𑀫𑁆𑀫𑁂𑀦𑁂𑀯 𑀧𑀲𑀸𑀲𑀢𑀽𑀢𑀺.

𑀩𑀤𑀭𑀢𑀺𑀢𑁆𑀣𑀯𑀺𑀳𑀸𑀭𑀯𑀸𑀲𑀺𑀦𑀸 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦

𑀓𑀢𑀸𑀉𑀤𑀸𑀦𑀲𑁆𑀲 𑀅𑀝𑁆𑀞𑀓𑀣𑀸 𑀲𑀫𑀢𑁆𑀢𑀸.