𑁭. 𑀘𑀽𑀴𑀯𑀕𑁆𑀕𑁄

𑁧. 𑀧𑀞𑀫𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀘𑀽𑀴𑀯𑀕𑁆𑀕𑀲𑁆𑀲 𑀧𑀞𑀫𑁂 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀦𑁆𑀢𑀺 𑀏𑀢𑁆𑀣 𑀪𑀤𑁆𑀤𑀺𑀬𑁄𑀢𑀺 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀦𑀸𑀫𑀁, 𑀓𑀸𑀬𑀲𑁆𑀲 𑀧𑀦 𑀭𑀲𑁆𑀲𑀢𑁆𑀢𑀸 ‘‘𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄’’𑀢𑀺 𑀦𑀁 𑀲𑀜𑁆𑀚𑀸𑀦𑀦𑁆𑀢𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀭𑀽𑀧𑁂𑀦 𑀅𑀧𑀸𑀲𑀸𑀤𑀺𑀓𑁄 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄. 𑀲𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀢𑀤𑀸 𑀲𑁂𑀓𑁆𑀔𑀸 𑀪𑀺𑀓𑁆𑀔𑀽 𑀬𑁂𑀪𑀼𑀬𑁆𑀬𑁂𑀦 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀦𑁆𑀢𑀺, 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀦𑁆𑀢𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺. 𑀲𑁄 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀧𑀽𑀭𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀢𑀺, 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑁂 𑀖𑀝𑁂𑀦𑁆𑀢𑀸 𑀯𑀸𑀬𑀫𑀦𑁆𑀢𑀸 𑀅𑀧𑁆𑀧𑁂𑀓𑀘𑁆𑀘𑁂 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀅𑀧𑁆𑀧𑁂𑀓𑀘𑁆𑀘𑁂 𑀅𑀦𑀸𑀕𑀸𑀫𑀺𑀨𑀮𑀁, 𑀅𑀧𑁆𑀧𑁂𑀓𑀘𑁆𑀘𑁂 𑀅𑀭𑀳𑀢𑁆𑀢𑀁, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀙𑀴𑀪𑀺𑀜𑁆𑀜𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀘𑁆𑀙𑀦𑁆𑀢𑀺. 𑀢𑁂 𑀤𑀺𑀲𑁆𑀯𑀸 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄𑀧𑀺 𑀲𑁂𑀔𑁄 𑀲𑀫𑀸𑀦𑁄 𑀓𑀸𑀮𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀓𑀮𑁆𑀮𑀢𑀜𑁆𑀘 𑀲𑀮𑁆𑀮𑁂𑀔𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀲𑀫𑁆𑀫𑁄𑀤𑀫𑀸𑀦𑁄 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀺. 𑀲𑁄𑀧𑀺𑀲𑁆𑀲 𑀅𑀚𑁆𑀛𑀸𑀲𑀬𑀲𑁆𑀲 𑀅𑀦𑀼𑀭𑀽𑀧𑀁 𑀓𑀣𑀁 𑀓𑀣𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺.

𑀢𑀢𑁆𑀣 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀇𑀢𑀺𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸, 𑀇𑀢𑀺𑀧𑀺 𑀤𑀼𑀓𑁆𑀔𑀸, 𑀇𑀢𑀺𑀧𑀺 𑀅𑀦𑀢𑁆𑀢𑀸’’𑀢𑀺 𑀏𑀯𑀁 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀸𑀤𑀺𑀧𑀓𑀸𑀲𑀦𑀺𑀬𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬. 𑀲𑀦𑁆𑀤𑀲𑁆𑀲𑁂𑀢𑀻𑀢𑀺 𑀢𑀸𑀦𑀺𑀬𑁂𑀯 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺 𑀉𑀤𑀬𑀩𑁆𑀩𑀬𑀸𑀤𑀺𑀓𑁂 𑀘 𑀲𑀫𑁆𑀫𑀸 𑀤𑀲𑁆𑀲𑁂𑀢𑀺, 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑀺. 𑀲𑀫𑀸𑀤𑀧𑁂𑀢𑀻𑀢𑀺 𑀢𑀢𑁆𑀣 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀁 𑀯𑀺𑀧𑀲𑁆𑀲𑀦𑀁 𑀲𑀫𑁆𑀫𑀸 𑀆𑀤𑀧𑁂𑀢𑀺, 𑀬𑀣𑀸 𑀯𑀻𑀣𑀺𑀧𑀝𑀺𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀏𑀯𑀁 𑀕𑀡𑁆𑀳𑀸𑀧𑁂𑀢𑀺. 𑀲𑀫𑀼𑀢𑁆𑀢𑁂𑀚𑁂𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀸𑀬 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀩𑁆𑀩𑀬𑀸𑀤𑀻𑀲𑀼 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀬𑀣𑀸𑀓𑀸𑀮𑀁 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑀼𑀧𑁂𑀓𑁆𑀔𑀡𑁂𑀳𑀺 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀦𑀼𑀧𑀯𑀢𑁆𑀢𑀦𑁂𑀦 𑀪𑀸𑀯𑀦𑀁 𑀫𑀚𑁆𑀛𑀺𑀫𑀁 𑀯𑀻𑀣𑀺𑀁 𑀑𑀢𑀸𑀭𑁂𑀢𑁆𑀯𑀸 𑀬𑀣𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀲𑀽𑀭𑀁 𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀯𑀳𑀢𑀺, 𑀏𑀯𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑁂𑀦 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀲𑀫𑁆𑀫𑀸 𑀉𑀢𑁆𑀢𑁂𑀚𑁂𑀢𑀺, 𑀯𑀺𑀲𑀤𑀸𑀧𑀦𑀯𑀲𑁂𑀦 𑀯𑁄𑀤𑀧𑁂𑀢𑀺. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀢𑀣𑀸 𑀧𑀯𑀢𑁆𑀢𑀺𑀬𑀫𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀲𑀫𑀧𑁆𑀧𑀯𑀢𑁆𑀢𑀪𑀸𑀯𑀦𑀸𑀯𑀲𑁂𑀦 𑀘𑁂𑀯 𑀉𑀧𑀭𑀺𑀮𑀤𑁆𑀥𑀩𑁆𑀩𑀪𑀸𑀯𑀦𑀸𑀩𑀮𑁂𑀦 𑀘 𑀘𑀺𑀢𑁆𑀢𑀁 𑀲𑀫𑁆𑀫𑀸 𑀧𑀳𑀁𑀲𑁂𑀢𑀺, 𑀮𑀤𑁆𑀥𑀲𑁆𑀲𑀸𑀤𑀯𑀲𑁂𑀦 𑀯𑀸 𑀲𑀼𑀝𑁆𑀞𑀼 𑀢𑁄𑀲𑁂𑀢𑀺. 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻𑀢𑀺 𑀬𑀣𑀸 𑀬𑀣𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀣𑀸 𑀢𑀣𑀸 𑀢𑀣𑀮𑀓𑁆𑀔𑀡𑀁 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀣𑁂𑀭𑀲𑁆𑀲 𑀘 𑀤𑁂𑀲𑀦𑀸𑀦𑀼𑀪𑀸𑀯𑁂𑀦, 𑀅𑀢𑁆𑀢𑀦𑁄 𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑁂 𑀅𑀦𑀼𑀧𑀯𑀢𑁆𑀢𑀦𑁆𑀢𑁂 𑀓𑀸𑀫𑀸𑀲𑀯𑀸𑀤𑀻𑀲𑀼 𑀓𑀜𑁆𑀘𑀺 𑀆𑀲𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀯 𑀅𑀦𑀯𑀲𑁂𑀲𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺, 𑀅𑀭𑀳𑀢𑁆𑀢𑀨𑀮𑀁 𑀲𑀘𑁆𑀙𑀸𑀓𑀸𑀲𑀻𑀢𑀺 𑀅𑀢𑁆𑀣𑁄.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀲𑁆𑀲 𑀅𑀜𑁆𑀜𑀸𑀭𑀸𑀥𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀉𑀤𑁆𑀥𑀦𑁆𑀢𑀺 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀘. 𑀅𑀥𑁄𑀢𑀺 𑀓𑀸𑀫𑀥𑀸𑀢𑀼𑀬𑀸. 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑁂. 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑀸 𑀅𑀧𑀭𑀪𑀸𑀕𑁂 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀻𑀳𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀯𑀺𑀫𑀼𑀢𑁆𑀢𑁄. 𑀏𑀢𑁆𑀣 𑀘 𑀉𑀤𑁆𑀥𑀁 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀏𑀢𑁂𑀦 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀧𑀳𑀸𑀦𑀁 𑀤𑀲𑁆𑀲𑁂𑀢𑀺. 𑀅𑀥𑁄 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀏𑀢𑁂𑀦 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀧𑀳𑀸𑀦𑀁. 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀏𑀢𑁂𑀦 𑀅𑀯𑀲𑀺𑀝𑁆𑀞𑀲𑀩𑁆𑀩𑀸𑀓𑀼𑀲𑀮𑀧𑀳𑀸𑀦𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀓𑀸𑀮𑀕𑁆𑀕𑀳𑀡𑀁. 𑀅𑀥𑁄𑀢𑀺 𑀅𑀢𑀻𑀢𑀓𑀸𑀮𑀕𑁆𑀕𑀳𑀡𑀁. 𑀉𑀪𑀬𑀕𑁆𑀕𑀳𑀡𑁂𑀦𑁂𑀯 𑀢𑀤𑀼𑀪𑀬𑀧𑀝𑀺𑀲𑀁𑀬𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸 𑀕𑀳𑀺𑀢𑁄 𑀳𑁄𑀢𑀺, 𑀢𑀢𑁆𑀣 𑀅𑀦𑀸𑀕𑀢𑀓𑀸𑀮𑀕𑁆𑀕𑀳𑀡𑁂𑀦 𑀅𑀦𑀸𑀕𑀢𑀓𑁆𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀕𑀳𑀺𑀢𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀥𑀻𑀢𑀺 𑀓𑀸𑀫𑀪𑁂𑀤𑀸𑀤𑀺𑀓𑁂 𑀲𑀩𑁆𑀩𑀲𑁆𑀫𑀺𑀁 𑀪𑀯𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀦𑀸𑀕𑀢𑁄 𑀅𑀢𑀻𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺 𑀏𑀯𑀁 𑀢𑀺𑀬𑀤𑁆𑀥𑀲𑀗𑁆𑀕𑀳𑀺𑀢𑁂 𑀲𑀩𑁆𑀩𑀲𑁆𑀫𑀺𑀁 𑀪𑀯𑁂 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺.

𑀅𑀬𑀁𑀳𑀫𑀲𑁆𑀫𑀻𑀢𑀺 𑀅𑀦𑀸𑀦𑀼𑀧𑀲𑁆𑀲𑀻𑀢𑀺 𑀬𑁄 𑀏𑀯𑀁 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀲𑁄 𑀭𑀽𑀧𑀯𑁂𑀤𑀦𑀸𑀤𑀻𑀲𑀼 ‘‘𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀅𑀳𑀫𑀲𑁆𑀫𑀻’’𑀢𑀺 𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀦𑀸𑀯𑀲𑁂𑀦 𑀏𑀯𑀁 𑀦𑀸𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀢𑀣𑀸 𑀤𑀲𑁆𑀲𑀦𑁂 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀅𑀬𑀁𑀳𑀫𑀲𑁆𑀫𑀻𑀢𑀺 𑀅𑀦𑀸𑀦𑀼𑀧𑀲𑁆𑀲𑀻𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀅𑀥𑀺𑀕𑀫𑀼𑀧𑀸𑀬𑀤𑀻𑀧𑀦𑀁. 𑀢𑀺𑀬𑀤𑁆𑀥𑀲𑀗𑁆𑀕𑀳𑀺𑀢𑁂 𑀢𑁂𑀪𑀽𑀫𑀓𑁂 𑀲𑀗𑁆𑀔𑀸𑀭𑁂 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀦𑀲𑀪𑀸𑀯𑀸𑀬 𑀫𑀜𑁆𑀜𑀦𑀸𑀬 𑀅𑀦𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂 𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀬𑀸 𑀧𑀼𑀩𑁆𑀩𑀪𑀸𑀕𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀯𑀺𑀧𑀲𑁆𑀲𑀦𑀸, 𑀲𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀏𑀯𑀁 𑀯𑀺𑀫𑀼𑀢𑁆𑀢𑁄 𑀉𑀤𑀢𑀸𑀭𑀺 𑀑𑀖𑀁, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀏𑀯𑀁 𑀤𑀲𑀳𑀺 𑀲𑀁𑀬𑁄𑀚𑀦𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀘 𑀲𑀩𑁆𑀩𑀣𑀸 𑀯𑀺𑀫𑀼𑀢𑁆𑀢𑁄 𑀅𑀭𑀳𑀸 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀦𑀢𑁄 𑀧𑀼𑀩𑁆𑀩𑁂 𑀲𑀼𑀧𑀺𑀦𑀦𑁆𑀢𑁂𑀧𑀺 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀓𑀸𑀫𑁄𑀖𑁄 𑀪𑀯𑁄𑀖𑁄 𑀤𑀺𑀝𑁆𑀞𑁄𑀖𑁄 𑀅𑀯𑀺𑀚𑁆𑀚𑁄𑀖𑁄𑀢𑀺 𑀇𑀫𑀁 𑀘𑀢𑀼𑀩𑁆𑀩𑀺𑀥𑀁 𑀑𑀖𑀁, 𑀲𑀁𑀲𑀸𑀭𑀫𑀳𑁄𑀖𑀫𑁂𑀯 𑀯𑀸 𑀅𑀧𑀼𑀦𑀩𑁆𑀪𑀯𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀸𑀬 𑀉𑀤𑀢𑀸𑀭𑀺 𑀉𑀢𑁆𑀢𑀺𑀡𑁆𑀡𑁄, 𑀉𑀢𑁆𑀢𑀭𑀺𑀢𑁆𑀯𑀸 𑀧𑀸𑀭𑁂 𑀞𑀺𑀢𑁄𑀢𑀺 𑀅𑀢𑁆𑀣𑁄.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀤𑀼𑀢𑀺𑀬𑁂 𑀲𑁂𑀔𑀁 𑀫𑀜𑁆𑀜𑀫𑀸𑀦𑁄𑀢𑀺 ‘‘𑀲𑁂𑀔𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀲𑀺𑀓𑁆𑀔𑀢𑀻𑀢𑀺 𑀲𑁂𑀔𑁄. 𑀓𑀺𑀁 𑀲𑀺𑀓𑁆𑀔𑀢𑀺? 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜𑀜𑁆𑀘. 𑀅𑀣 𑀯𑀸 𑀲𑀺𑀓𑁆𑀔𑀦𑀁 𑀲𑀺𑀓𑁆𑀔𑀸, 𑀲𑀸 𑀏𑀢𑀲𑁆𑀲 𑀲𑀻𑀮𑀦𑁆𑀢𑀺 𑀲𑁂𑀔𑁄. 𑀲𑁄 𑀳𑀺 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀢𑁆𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑁆𑀢𑀸 𑀘 𑀏𑀓𑀦𑁆𑀢𑁂𑀦 𑀲𑀺𑀓𑁆𑀔𑀦𑀲𑀻𑀮𑁄, 𑀦 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑁄 𑀅𑀲𑁂𑀔𑁄 𑀯𑀺𑀬 𑀢𑀢𑁆𑀣 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀼𑀲𑁆𑀲𑀼𑀓𑁆𑀓𑁄, 𑀦𑀸𑀧𑀺 𑀯𑀺𑀲𑁆𑀲𑀝𑁆𑀞𑀲𑀺𑀓𑁆𑀔𑁄 𑀧𑀘𑀼𑀭𑀚𑀦𑁄 𑀯𑀺𑀬 𑀢𑀢𑁆𑀣 𑀅𑀦𑀥𑀺𑀫𑀼𑀢𑁆𑀢𑁄. 𑀅𑀣 𑀯𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄, 𑀢𑀢𑁆𑀣 𑀯𑀸 𑀪𑀯𑁄𑀢𑀺 𑀲𑁂𑀔𑁄. 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬𑀸𑀢𑀺 𑀧𑀫𑀸𑀡𑀢𑁄 𑀉𑀢𑁆𑀢𑀭𑀺, 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀥𑀺𑀓𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀆𑀬𑀲𑁆𑀫𑀸 𑀳𑀺 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄 𑀧𑀞𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀧𑀞𑀫𑁄𑀯𑀸𑀤𑁂𑀦 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀆𑀲𑀯𑀓𑁆𑀔𑀬𑀧𑁆𑀧𑀢𑁆𑀢𑁄. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀦 𑀢𑀲𑁆𑀲 𑀢𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀅𑀦𑀸𑀯𑀚𑁆𑀚𑀦𑁂𑀦 𑀅𑀚𑀸𑀦𑀺𑀢𑁆𑀯𑀸 ‘‘𑀲𑁂𑀔𑁄𑀬𑁂𑀯𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀅𑀧𑁆𑀧𑀁 𑀬𑀸𑀘𑀺𑀢𑁄 𑀩𑀳𑀼𑀁 𑀤𑀤𑀫𑀸𑀦𑁄 𑀉𑀴𑀸𑀭𑀧𑀼𑀭𑀺𑀲𑁄 𑀯𑀺𑀬 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀆𑀲𑀯𑀓𑁆𑀔𑀬𑀸𑀬 𑀥𑀫𑁆𑀫𑀁 𑀓𑀣𑁂𑀢𑀺𑀬𑁂𑀯. 𑀆𑀬𑀲𑁆𑀫𑀸𑀧𑀺 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄 ‘‘𑀓𑀢𑀓𑀺𑀘𑁆𑀘𑁄 𑀤𑀸𑀦𑀸𑀳𑀁, 𑀓𑀺𑀁 𑀇𑀫𑀺𑀦𑀸 𑀑𑀯𑀸𑀤𑁂𑀦𑀸’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀲𑀤𑁆𑀥𑀫𑁆𑀫𑀕𑀸𑀭𑀯𑁂𑀦 𑀧𑀼𑀩𑁆𑀩𑁂 𑀯𑀺𑀬 𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀢𑀺𑀬𑁂𑀯. 𑀢𑀁 𑀤𑀺𑀲𑁆𑀯𑀸 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀬𑁂𑀯 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀬𑀣𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀢𑀲𑁆𑀲 𑀓𑀺𑀮𑁂𑀲𑀓𑁆𑀔𑀬𑀁 𑀚𑀸𑀦𑀸𑀢𑀺, 𑀢𑀣𑀸 𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀯.

𑀕𑀸𑀣𑀸𑀬𑀁 𑀧𑀦 𑀅𑀘𑁆𑀙𑁂𑀘𑁆𑀙𑀺 𑀯𑀝𑁆𑀝𑀦𑁆𑀢𑀺 𑀅𑀦𑀯𑀲𑁂𑀲𑀢𑁄 𑀓𑀺𑀮𑁂𑀲𑀯𑀝𑁆𑀝𑀁 𑀲𑀫𑀼𑀘𑁆𑀙𑀺𑀦𑁆𑀤𑀺, 𑀙𑀺𑀦𑁆𑀦𑁂 𑀘 𑀓𑀺𑀮𑁂𑀲𑀯𑀝𑁆𑀝𑁂 𑀓𑀫𑁆𑀫𑀯𑀝𑁆𑀝𑀫𑁆𑀧𑀺 𑀙𑀺𑀦𑁆𑀦𑀫𑁂𑀯. 𑀩𑁆𑀬𑀕𑀸 𑀦𑀺𑀭𑀸𑀲𑀦𑁆𑀢𑀺 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀦𑀢𑁆𑀣𑀺 𑀏𑀢𑁆𑀣 𑀆𑀲𑀸𑀢𑀺 𑀦𑀺𑀭𑀸𑀲𑀁, 𑀦𑀺𑀩𑁆𑀩𑀸𑀦𑀁. 𑀢𑀁 𑀦𑀺𑀭𑀸𑀲𑀁 𑀯𑀺𑀲𑁂𑀲𑁂𑀦 𑀅𑀕𑀸 𑀅𑀥𑀺𑀕𑀢𑁄𑀢𑀺 𑀩𑁆𑀬𑀕𑀸, 𑀅𑀕𑁆𑀕𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀧𑀼𑀦 𑀅𑀥𑀺𑀕𑀫𑀓𑀸𑀭𑀡𑁂𑀦 𑀯𑀺𑀦𑀸 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑀪𑀽𑀢𑀸, 𑀢𑀸𑀬 𑀧𑀳𑀻𑀦𑀸𑀬 𑀅𑀧𑁆𑀧𑀳𑀻𑀦𑁄 𑀦𑀸𑀫 𑀓𑀺𑀮𑁂𑀲𑁄 𑀦𑀢𑁆𑀣𑀺, 𑀢𑀲𑁆𑀫𑀸𑀲𑁆𑀲 𑀢𑀡𑁆𑀳𑀸𑀧𑀳𑀸𑀦𑀁 𑀲𑀯𑀺𑀲𑁂𑀲𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑀼𑀓𑁆𑀔𑀸 𑀲𑀭𑀺𑀢𑀸 𑀦 𑀲𑀦𑁆𑀤𑀢𑀻’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀘𑀢𑀼𑀢𑁆𑀣𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁂𑀦 𑀯𑀺𑀬 𑀫𑀳𑀸𑀦𑀤𑀺𑀬𑁄 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀼𑀧𑁆𑀧𑀸𑀤𑁂𑀦 𑀅𑀦𑀯𑀲𑁂𑀲𑀢𑁄 𑀯𑀺𑀲𑀼𑀓𑁆𑀔𑀸 𑀯𑀺𑀲𑁄𑀲𑀺𑀢𑀸 𑀢𑀡𑁆𑀳𑀸𑀲𑀭𑀺𑀢𑀸 𑀦𑀤𑀻 𑀦 𑀲𑀦𑁆𑀤𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀦 𑀧𑀯𑀢𑁆𑀢𑀢𑀺. 𑀢𑀡𑁆𑀳𑀸 𑀳𑀺 ‘‘𑀲𑀭𑀺𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀲𑀭𑀺𑀢𑀸𑀦𑀺 𑀲𑀺𑀦𑁂𑀳𑀺𑀢𑀸𑀦𑀺 𑀘, 𑀲𑁄𑀫𑀦𑀲𑁆𑀲𑀸𑀦𑀺 𑀪𑀯𑀦𑁆𑀢𑀺 𑀚𑀦𑁆𑀢𑀼𑀦𑁄’’𑀢𑀺 (𑀥. 𑀧. 𑁩𑁪𑁧), ‘‘𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸’’𑀢𑀺 (𑀥. 𑀲. 𑁧𑁦𑁬𑁫; 𑀫𑀳𑀸𑀦𑀺. 𑁩) 𑀘. 𑀙𑀺𑀦𑁆𑀦𑀁 𑀯𑀝𑁆𑀝𑀁 𑀦 𑀯𑀢𑁆𑀢𑀢𑀻𑀢𑀺 𑀏𑀯𑀁 𑀓𑀺𑀮𑁂𑀲𑀯𑀝𑁆𑀝𑀲𑀫𑀼𑀘𑁆𑀙𑁂𑀤𑁂𑀦 𑀙𑀺𑀦𑁆𑀦𑀁 𑀯𑀝𑁆𑀝𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀅𑀯𑀺𑀧𑀸𑀓𑀥𑀫𑁆𑀫𑀢𑀜𑁆𑀘 𑀆𑀧𑀸𑀤𑀦𑁂𑀦 𑀉𑀧𑀘𑁆𑀙𑀺𑀦𑁆𑀦𑀁 𑀓𑀫𑁆𑀫𑀯𑀝𑁆𑀝𑀁 𑀦 𑀯𑀢𑁆𑀢𑀢𑀺 𑀦 𑀧𑀯𑀢𑁆𑀢𑀢𑀺. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀬𑀤𑁂𑀢𑀁 𑀲𑀩𑁆𑀩𑀲𑁄 𑀓𑀺𑀮𑁂𑀲𑀯𑀝𑁆𑀝𑀸𑀪𑀸𑀯𑀢𑁄 𑀓𑀫𑁆𑀫𑀯𑀝𑁆𑀝𑀲𑁆𑀲 𑀅𑀧𑁆𑀧𑀯𑀢𑁆𑀢𑀦𑀁, 𑀲𑁄 𑀆𑀬𑀢𑀺𑀁 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀏𑀓𑀁𑀲𑁂𑀦𑁂𑀯 𑀅𑀦𑀼𑀧𑁆𑀧𑀸𑀤𑁄 𑀏𑀯 𑀲𑀓𑀮𑀲𑁆𑀲𑀸𑀧𑀺 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀧𑀭𑀺𑀘𑁆𑀙𑁂𑀤𑁄 𑀧𑀭𑀺𑀯𑀝𑀼𑀫𑀪𑀸𑀯𑁄𑀢𑀺.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀞𑀫𑀲𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀢𑀢𑀺𑀬𑁂 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀅𑀢𑀺𑀯𑁂𑀮𑀦𑁆𑀢𑀺 𑀯𑁂𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀲𑀢𑁆𑀢𑀸𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀢𑀸𑀬 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀆𑀤𑀻𑀦𑀯𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀲𑁆𑀲𑀸𑀤𑀫𑁂𑀯 𑀲𑀭𑀺𑀢𑁆𑀯𑀸 𑀲𑀚𑁆𑀚𑀦𑀯𑀲𑁂𑀦 𑀲𑀢𑁆𑀢𑀸, 𑀆𑀲𑀢𑁆𑀢𑀸 𑀮𑀕𑁆𑀕𑀸𑀢𑀺 𑀅𑀢𑁆𑀣𑁄. 𑀭𑀢𑁆𑀢𑀸𑀢𑀺 𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀓𑀭𑀡𑁂𑀦 𑀙𑀦𑁆𑀤𑀭𑀸𑀕𑁂𑀦 𑀭𑀢𑁆𑀢𑀸 𑀲𑀸𑀭𑀢𑁆𑀢𑀸. 𑀕𑀺𑀤𑁆𑀥𑀸𑀢𑀺 𑀅𑀪𑀺𑀓𑀗𑁆𑀔𑀦𑀲𑀪𑀸𑀯𑁂𑀦 𑀅𑀪𑀺𑀚𑁆𑀛𑀦𑁂𑀦 𑀕𑀺𑀤𑁆𑀥𑀸 𑀕𑁂𑀥𑀁 𑀆𑀧𑀦𑁆𑀦𑀸. 𑀕𑀥𑀺𑀢𑀸𑀢𑀺 𑀭𑀸𑀕𑀫𑀼𑀘𑁆𑀙𑀺𑀢𑀸 𑀯𑀺𑀬 𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁂𑀦 𑀢𑀢𑁆𑀣 𑀧𑀝𑀺𑀩𑀤𑁆𑀥𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀓𑀺𑀮𑁂𑀲𑀯𑀲𑁂𑀦 𑀯𑀺𑀲𑀜𑁆𑀜𑀻𑀪𑀽𑀢𑀸 𑀯𑀺𑀬 𑀅𑀦𑀜𑁆𑀜𑀓𑀺𑀘𑁆𑀘𑀸 𑀫𑀼𑀘𑁆𑀙𑀁 𑀫𑁄𑀳𑀁 𑀆𑀧𑀦𑁆𑀦𑀸. 𑀅𑀚𑁆𑀛𑁄𑀧𑀦𑁆𑀦𑀸𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀯𑀺𑀬 𑀓𑀢𑁆𑀯𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑀸. 𑀲𑀫𑁆𑀫𑀢𑁆𑀢𑀓𑀚𑀸𑀢𑀸𑀢𑀺 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀸 𑀅𑀧𑁆𑀧𑀲𑀼𑀔𑀯𑁂𑀤𑀦𑀸𑀬 𑀲𑀫𑁆𑀫𑀢𑁆𑀢𑀓𑀸 𑀲𑀼𑀝𑁆𑀞𑀼 𑀫𑀢𑁆𑀢𑀓𑀸 𑀚𑀸𑀢𑀸. ‘‘𑀲𑀫𑁆𑀫𑁄𑀤𑀓𑀚𑀸𑀢𑀸’’𑀢𑀺𑀧𑀺 𑀧𑀸𑀞𑁄, 𑀚𑀸𑀢𑀲𑀫𑁆𑀫𑁄𑀤𑀦𑀸 𑀉𑀧𑁆𑀧𑀦𑁆𑀦𑀧𑀳𑀁𑀲𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 𑀢𑁂𑀲𑀁 𑀢𑀡𑁆𑀳𑀸𑀥𑀺𑀧𑀦𑁆𑀦𑀢𑀁𑀬𑁂𑀯 𑀯𑀤𑀢𑀺. 𑀏𑀢𑁆𑀣 𑀘 𑀧𑀞𑀫𑀁 ‘‘𑀓𑀸𑀫𑁂𑀲𑀽’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑀺 ‘‘𑀓𑀸𑀫𑁂𑀲𑀽’’𑀢𑀺 𑀯𑀘𑀦𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀤𑀥𑀺𑀫𑀼𑀢𑁆𑀢𑀺𑀤𑀻𑀧𑀦𑀢𑁆𑀣𑀁. 𑀢𑁂𑀦 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀓𑀸𑀫𑀕𑀼𑀡𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸 𑀢𑀤𑀸 𑀯𑀺𑀳𑀭𑀺𑀁𑀲𑀽𑀢𑀺 𑀤𑀲𑁆𑀲𑁂𑀢𑀺.

𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀲𑀩𑁆𑀩𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀉𑀲𑁆𑀲𑀯𑀁 𑀖𑁄𑀲𑁂𑀢𑁆𑀯𑀸 𑀬𑀣𑀸𑀯𑀺𑀪𑀯𑀁 𑀆𑀧𑀸𑀦𑀪𑀽𑀫𑀺𑀁 𑀲𑀚𑁆𑀚𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀸 𑀧𑀺𑀯𑀦𑁆𑀢𑀸 𑀆𑀯𑀺 𑀘𑁂𑀯 𑀭𑀳𑁄 𑀘 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀘𑀸𑀭𑁂𑀦𑁆𑀢𑀸 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀺𑀁𑀲𑀼. 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀕𑁂𑀳𑁂 𑀆𑀭𑀸𑀫𑀼𑀬𑁆𑀬𑀸𑀦𑀸𑀤𑀻𑀲𑀼 𑀘 𑀫𑀦𑀼𑀲𑁆𑀲𑁂 𑀉𑀲𑁆𑀲𑀯𑀁 𑀖𑁄𑀲𑁂𑀢𑁆𑀯𑀸 𑀓𑀸𑀫𑀦𑀺𑀦𑁆𑀦𑁂 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀡𑁆𑀳𑀲𑀼𑀔𑀼𑀫𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽…𑀧𑁂… 𑀓𑀸𑀫𑁂𑀲𑀼 𑀯𑀺𑀳𑀭𑀦𑁆𑀢𑀻’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀆𑀧𑀸𑀦𑀪𑀽𑀫𑀺𑀭𑀫𑀡𑀻𑀬𑁂𑀲𑀼 𑀫𑀳𑀸𑀧𑀭𑀺𑀴𑀸𑀳𑁂𑀲𑀼 𑀅𑀦𑁂𑀓𑀸𑀦𑀢𑁆𑀣𑀸𑀦𑀼𑀩𑀦𑁆𑀥𑁂𑀲𑀼 𑀖𑁄𑀭𑀸𑀲𑀬𑁆𑀳𑀓𑀝𑀼𑀓𑀨𑀮𑁂𑀲𑀼 𑀓𑀸𑀫𑁂𑀲𑀼 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀓𑀸𑀫𑀸𑀦𑀜𑁆𑀘𑁂𑀯 𑀓𑀺𑀮𑁂𑀲𑀸𑀦𑀜𑁆𑀘 𑀆𑀤𑀻𑀦𑀯𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀓𑀸𑀫𑁂𑀲𑀼 𑀲𑀢𑁆𑀢𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀭𑀢𑁆𑀢𑀸 𑀫𑀢𑁆𑀢𑀸 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀲𑀁𑀬𑀼𑀢𑁆𑀢𑀸. 𑀓𑀸𑀫𑀲𑀗𑁆𑀕𑀲𑀢𑁆𑀢𑀸𑀢𑀺 𑀢𑀸𑀬𑁂𑀯 𑀓𑀸𑀫𑀲𑀢𑁆𑀢𑀺𑀬𑀸 𑀯𑀢𑁆𑀣𑀼𑀓𑀸𑀫𑁂𑀲𑀼 𑀭𑀸𑀕𑀲𑀗𑁆𑀕𑁂𑀦 𑀘𑁂𑀯 𑀤𑀺𑀝𑁆𑀞𑀺𑀫𑀸𑀦𑀤𑁄𑀲𑀅𑀯𑀺𑀚𑁆𑀚𑀸𑀲𑀗𑁆𑀕𑁂𑀳𑀺 𑀘 𑀲𑀢𑁆𑀢𑀸 𑀆𑀲𑀢𑁆𑀢𑀸. 𑀲𑀁𑀬𑁄𑀚𑀦𑁂 𑀯𑀚𑁆𑀚𑀫𑀧𑀲𑁆𑀲𑀫𑀸𑀦𑀸𑀢𑀺 𑀓𑀫𑁆𑀫𑀯𑀝𑁆𑀝𑀁 𑀯𑀺𑀧𑀸𑀓𑀯𑀝𑁆𑀝𑁂𑀦, 𑀪𑀯𑀸𑀤𑀺𑀓𑁂 𑀯𑀸 𑀪𑀯𑀦𑁆𑀢𑀭𑀸𑀤𑀻𑀳𑀺, 𑀲𑀢𑁆𑀢𑁂 𑀯𑀸 𑀤𑀼𑀓𑁆𑀔𑁂𑀳𑀺 𑀲𑀁𑀬𑁄𑀚𑀦𑀢𑁄 𑀩𑀦𑁆𑀥𑀦𑀢𑁄 𑀲𑀁𑀬𑁄𑀚𑀦𑀦𑀸𑀫𑀓𑁂 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀚𑀸𑀢𑁂 𑀲𑀁𑀬𑁄𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀢𑀸𑀬 𑀯𑀝𑁆𑀝𑀤𑀼𑀓𑁆𑀔𑀫𑀽𑀮𑀪𑀸𑀯𑀸𑀤𑀺𑀓𑀁 𑀯𑀚𑁆𑀚𑀁 𑀤𑁄𑀲𑀁 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸. 𑀦 𑀳𑀺 𑀚𑀸𑀢𑀼 𑀲𑀁𑀬𑁄𑀚𑀦𑀲𑀗𑁆𑀕𑀲𑀢𑁆𑀢𑀸, 𑀑𑀖𑀁 𑀢𑀭𑁂𑀬𑁆𑀬𑀼𑀁 𑀯𑀺𑀧𑀼𑀮𑀁 𑀫𑀳𑀦𑁆𑀢𑀦𑁆𑀢𑀺 𑀏𑀯𑀁 𑀆𑀤𑀻𑀦𑀯𑀤𑀲𑁆𑀲𑀦𑀸𑀪𑀸𑀯𑁂𑀦 𑀲𑀁𑀬𑁄𑀚𑀦𑀲𑀪𑀸𑀯𑁂𑀲𑀼 𑀲𑀗𑁆𑀕𑁂𑀲𑀼, 𑀲𑀁𑀬𑁄𑀚𑀦𑀲𑀗𑁆𑀔𑀸𑀢𑁂𑀳𑀺 𑀯𑀸 𑀲𑀗𑁆𑀕𑁂𑀳𑀺 𑀢𑁂𑀲𑀁 𑀯𑀺𑀲𑀬𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀲𑀢𑁆𑀢𑀸 𑀯𑀺𑀧𑀼𑀮𑀯𑀺𑀲𑀬𑀢𑀸𑀬 𑀅𑀦𑀸𑀤𑀺𑀓𑀸𑀮𑀢𑀸𑀬 𑀘 𑀯𑀺𑀧𑀼𑀮𑀁 𑀯𑀺𑀢𑁆𑀣𑀺𑀡𑁆𑀡𑀁 𑀫𑀳𑀦𑁆𑀢𑀜𑁆𑀘 𑀓𑀸𑀫𑀸𑀤𑀺𑀑𑀖𑀁, 𑀲𑀁𑀲𑀸𑀭𑁄𑀖𑀫𑁂𑀯 𑀯𑀸 𑀦 𑀓𑀤𑀸𑀘𑀺 𑀢𑀭𑁂𑀬𑁆𑀬𑀼𑀁, 𑀏𑀓𑀁𑀲𑁂𑀦𑁂𑀯 𑀢𑀲𑁆𑀲 𑀑𑀖𑀲𑁆𑀲 𑀧𑀸𑀭𑀁 𑀦 𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀲𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀘𑀢𑀼𑀢𑁆𑀣𑁂 𑀅𑀦𑁆𑀥𑀻𑀓𑀢𑀸𑀢𑀺 𑀓𑀸𑀫𑀸 𑀦𑀸𑀫 𑀅𑀦𑀦𑁆𑀥𑀫𑁆𑀧𑀺 𑀅𑀦𑁆𑀥𑀁 𑀓𑀭𑁄𑀦𑁆𑀢𑀺.

𑀬𑀣𑀸𑀳 𑁋

‘‘𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭’’𑀦𑁆𑀢𑀺. (𑀇𑀢𑀺𑀯𑀼. 𑁮𑁮; 𑀫𑀳𑀸𑀦𑀺. 𑁫; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁮) 𑁋

𑀢𑀲𑁆𑀫𑀸 𑀓𑀸𑀫𑁂𑀦 𑀅𑀦𑀦𑁆𑀥𑀸𑀧𑀺 𑀅𑀦𑁆𑀥𑀸 𑀓𑀢𑀸𑀢𑀺 𑀅𑀦𑁆𑀥𑀻𑀓𑀢𑀸. 𑀲𑁂𑀲𑀁 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀢𑁆𑀣 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀧𑀯𑀢𑁆𑀢𑀺 𑀪𑀺𑀓𑁆𑀔𑀽𑀳𑀺 𑀤𑀺𑀲𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑀺𑀢𑀸, 𑀇𑀥 𑀪𑀕𑀯𑀢𑀸 𑀲𑀸𑀫𑀁𑀬𑁂𑀯 𑀤𑀺𑀝𑁆𑀞𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀘𑀺𑀭𑀯𑀢𑀺𑀬𑀁 𑀦𑀤𑀺𑀬𑀁 𑀫𑀘𑁆𑀙𑀩𑀦𑁆𑀥𑁂𑀳𑀺 𑀑𑀟𑁆𑀟𑀺𑀢𑀁 𑀓𑀼𑀫𑀺𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀩𑀳𑀽 𑀫𑀘𑁆𑀙𑁂 𑀧𑀲𑁆𑀲𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀏𑀓𑀁 𑀔𑀻𑀭𑀧𑀓𑀁 𑀯𑀘𑁆𑀙𑀁 𑀕𑁄𑀭𑀯𑀁 𑀓𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀣𑀜𑁆𑀜𑀧𑀺𑀧𑀸𑀲𑀸𑀬 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀫𑀸𑀢𑀼 𑀅𑀦𑁆𑀢𑀭𑀲𑀢𑁆𑀣𑀺𑀬𑀁 𑀫𑀼𑀔𑀁 𑀉𑀧𑀦𑁂𑀦𑁆𑀢𑀁 𑀧𑀲𑁆𑀲𑀺. 𑀅𑀣 𑀪𑀕𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀧𑀘𑁆𑀙𑀺𑀫𑀁 𑀯𑀢𑁆𑀣𑀼𑀤𑁆𑀯𑀬𑀁 𑀧𑀼𑀭𑀺𑀫𑀲𑁆𑀲 𑀉𑀧𑀫𑀸𑀦𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀓𑀸𑀫𑀦𑁆𑀥𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀅𑀦𑁆𑀥𑀸 𑀯𑀺𑀘𑀓𑁆𑀔𑀼𑀓𑀸 𑀓𑀢𑀸. 𑀚𑀸𑀮𑀲𑀜𑁆𑀙𑀦𑁆𑀦𑀸𑀢𑀺 𑀲𑀓𑀢𑁆𑀢𑀪𑀸𑀯𑀧𑀭𑀢𑁆𑀢𑀪𑀸𑀯𑁂𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑁂𑀲𑀼, 𑀢𑀦𑁆𑀦𑀺𑀲𑁆𑀲𑀺𑀢𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀢𑀻𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂𑀲𑀼 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀅𑀧𑀭𑀸𑀧𑀭𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑁆𑀢𑁄𑀕𑀥𑀸𑀦𑀁 𑀅𑀦𑀢𑁆𑀣𑀸𑀯𑀳𑀢𑁄 𑀘 𑀚𑀸𑀮𑀪𑀽𑀢𑀸𑀬 𑀢𑀡𑁆𑀳𑀸𑀬 𑀲𑀼𑀔𑀼𑀫𑀘𑁆𑀙𑀺𑀤𑁆𑀤𑁂𑀦 𑀚𑀸𑀮𑁂𑀦 𑀧𑀭𑀺𑀯𑀼𑀢𑁄 𑀯𑀺𑀬 𑀉𑀤𑀓𑀭𑀳𑀤𑁄 𑀲𑀜𑁆𑀙𑀦𑁆𑀦𑀸 𑀧𑀮𑀺𑀕𑀼𑀡𑁆𑀞𑀺𑀢𑀸 𑀅𑀚𑁆𑀛𑁄𑀢𑁆𑀣𑀝𑀸. 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀙𑀤𑀦𑁂𑀦 𑀲𑁂𑀯𑀸𑀮𑀧𑀡𑀓𑁂𑀦 𑀯𑀺𑀬 𑀉𑀤𑀓𑀁 𑀙𑀸𑀤𑀺𑀢𑀸, 𑀧𑀝𑀺𑀘𑁆𑀙𑀦𑁆𑀦𑀸 𑀧𑀺𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑀺𑀯𑀸𑀭𑀺𑀢𑀓𑀼𑀲𑀮𑀘𑀺𑀢𑁆𑀢𑀸𑀘𑀸𑀭𑀢𑀁 𑀤𑀲𑁆𑀲𑁂𑀢𑀺.

𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀩𑀤𑁆𑀥𑀸𑀢𑀺 𑀓𑀺𑀮𑁂𑀲𑀫𑀸𑀭𑁂𑀦 𑀤𑁂𑀯𑀧𑀼𑀢𑁆𑀢𑀫𑀸𑀭𑁂𑀦 𑀘 𑀩𑀤𑁆𑀥𑀸. 𑀬𑀤𑀕𑁆𑀕𑁂𑀦 𑀳𑀺 𑀓𑀺𑀮𑁂𑀲𑀫𑀸𑀭𑁂𑀦 𑀩𑀤𑁆𑀥𑀸, 𑀢𑀤𑀕𑁆𑀕𑁂𑀦 𑀤𑁂𑀯𑀧𑀼𑀢𑁆𑀢𑀫𑀸𑀭𑁂𑀦𑀧𑀺 𑀩𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄;

𑀢𑁂𑀦 𑀢𑀁 𑀩𑀸𑀥𑀬𑀺𑀲𑁆𑀲𑀸𑀫𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺. (𑀲𑀁. 𑀦𑀺. 𑁧.𑁧𑁫𑁧; 𑀫𑀳𑀸𑀯. 𑁩𑁩);

𑀦𑀫𑀼𑀘𑀺 𑀓𑀡𑁆𑀳𑁄 𑀧𑀫𑀢𑁆𑀢𑀩𑀦𑁆𑀥𑀽𑀢𑀺 𑀢𑀻𑀡𑀺 𑀫𑀸𑀭𑀲𑁆𑀲 𑀦𑀸𑀫𑀸𑀦𑀺. 𑀤𑁂𑀯𑀧𑀼𑀢𑁆𑀢𑀫𑀸𑀭𑁄𑀧𑀺 𑀳𑀺 𑀓𑀺𑀮𑁂𑀲𑀫𑀸𑀭𑁄 𑀯𑀺𑀬 𑀅𑀦𑀢𑁆𑀣𑁂𑀦 𑀧𑀫𑀢𑁆𑀢𑁂 𑀲𑀢𑁆𑀢𑁂 𑀩𑀦𑁆𑀥𑀢𑀻𑀢𑀺 𑀧𑀫𑀢𑁆𑀢𑀩𑀦𑁆𑀥𑀼. ‘‘𑀧𑀫𑀢𑁆𑀢𑀸 𑀩𑀦𑁆𑀥𑀦𑁂 𑀩𑀤𑁆𑀥𑀸’’𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀢𑁆𑀣 𑀩𑀦𑁆𑀥𑀦𑁂𑀢𑀺 𑀓𑀸𑀫𑀕𑀼𑀡𑀩𑀦𑁆𑀥𑀦𑁂𑀢𑀺 𑀅𑀢𑁆𑀣𑁄. 𑀩𑀤𑁆𑀥𑀸𑀢𑀺 𑀦𑀺𑀬𑀫𑀺𑀢𑀸. 𑀬𑀣𑀸 𑀓𑀺𑀁? 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂 𑀬𑀣𑀸 𑀦𑀸𑀫 𑀫𑀘𑁆𑀙𑀩𑀦𑁆𑀥𑀓𑁂𑀦 𑀑𑀟𑁆𑀟𑀺𑀢𑀲𑁆𑀲 𑀓𑀼𑀫𑀺𑀦𑀲𑁆𑀲 𑀫𑀼𑀔𑁂 𑀧𑀯𑀺𑀝𑁆𑀞𑀸 𑀫𑀘𑁆𑀙𑀸 𑀢𑁂𑀦 𑀩𑀤𑁆𑀥𑀸 𑀳𑀼𑀢𑁆𑀯𑀸 𑀫𑀭𑀡𑀫𑀦𑁆𑀯𑁂𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀏𑀯𑀫𑁂𑀯 𑀫𑀸𑀭𑁂𑀦 𑀑𑀟𑁆𑀟𑀺𑀢𑁂𑀦 𑀓𑀸𑀫𑀕𑀼𑀡𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀇𑀫𑁂 𑀲𑀢𑁆𑀢𑀸 𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀺. 𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 𑀫𑀸𑀢𑀭𑀁 𑀬𑀣𑀸 𑀔𑀻𑀭𑀧𑀸𑀬𑀻 𑀢𑀭𑀼𑀡𑀯𑀘𑁆𑀙𑁄 𑀅𑀢𑁆𑀢𑀦𑁄 𑀫𑀸𑀢𑀭𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺, 𑀦 𑀅𑀜𑁆𑀜𑀁 𑀏𑀯𑀁 𑀫𑀸𑀭𑀩𑀦𑁆𑀥𑀦𑀩𑀤𑁆𑀥𑀸 𑀲𑀢𑁆𑀢𑀸 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀸 𑀫𑀭𑀡𑀫𑁂𑀯 𑀅𑀦𑁆𑀯𑁂𑀦𑁆𑀢𑀺 𑀅𑀦𑀼𑀕𑀘𑁆𑀙𑀦𑁆𑀢𑀺, 𑀦 𑀅𑀚𑀭𑀁 𑀅𑀫𑀭𑀡𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀧𑀭𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀧𑀜𑁆𑀘𑀫𑁂 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄𑀢𑀺 𑀆𑀬𑀲𑁆𑀫𑀸 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄 𑀏𑀓𑀤𑀺𑀯𑀲𑀁 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀕𑀸𑀫𑀦𑁆𑀢𑀭𑁂𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑁆𑀯𑀸 𑀢𑀫𑁆𑀧𑀺 𑀯𑀸𑀫𑀁𑀲𑁂 𑀞𑀧𑁂𑀢𑁆𑀯𑀸 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀅𑀢𑁆𑀢𑀦𑁄 𑀲𑀢𑀺𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀬 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀧𑀤𑁂 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑁄 𑀘 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀲𑀁𑀫𑀺𑀲𑁆𑀲𑁄. 𑀓𑀲𑁆𑀫𑀸? 𑀅𑀲𑀁𑀲𑀝𑁆𑀞𑀯𑀺𑀳𑀸𑀭𑀺𑀢𑀸𑀬. 𑀅𑀧𑀺𑀘 𑀢𑀲𑁆𑀲𑀸𑀬𑀲𑁆𑀫𑀢𑁄 𑀭𑀽𑀧𑀁 𑀧𑀭𑀺𑀪𑀽𑀢𑀁 𑀧𑀭𑀺𑀪𑀯𑀝𑁆𑀞𑀸𑀦𑀻𑀬𑀁 𑀧𑀼𑀣𑀼𑀚𑁆𑀚𑀦𑀸 𑀑𑀳𑀻𑀴𑁂𑀦𑁆𑀢𑀺. 𑀣𑁂𑀭𑁄 𑀢𑀁 𑀚𑀸𑀦𑀺𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙𑀢𑀺 ‘‘𑀫𑀸 𑀇𑀫𑁂 𑀫𑀁 𑀦𑀺𑀲𑁆𑀲𑀸𑀬 𑀅𑀧𑀼𑀜𑁆𑀜𑀁 𑀧𑀲𑀯𑀺𑀁𑀲𑀽’’𑀢𑀺. 𑀏𑀯𑀁 𑀢𑁂 𑀪𑀺𑀓𑁆𑀔𑀽 𑀘 𑀣𑁂𑀭𑁄 𑀘 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄’’𑀢𑀺𑀆𑀤𑀺.

𑀢𑀢𑁆𑀣 𑀤𑀼𑀩𑁆𑀩𑀡𑁆𑀡𑀦𑁆𑀢𑀺 𑀯𑀺𑀭𑀽𑀧𑀁. 𑀢𑁂𑀦𑀲𑁆𑀲 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑀼𑀤𑁆𑀤𑀲𑀺𑀓𑀦𑁆𑀢𑀺 𑀅𑀧𑀸𑀲𑀸𑀤𑀺𑀓𑀤𑀲𑁆𑀲𑀦𑀁. 𑀢𑁂𑀦𑀲𑁆𑀲 𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀆𑀓𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀑𑀓𑁄𑀝𑀺𑀫𑀓𑀦𑁆𑀢𑀺 𑀭𑀲𑁆𑀲𑀁. 𑀇𑀫𑀺𑀦𑀸 𑀆𑀭𑁄𑀳𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑀽𑀢𑀭𑀽𑀧𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽𑀳𑀺 𑀑𑀳𑀻𑀴𑀺𑀢𑀭𑀽𑀧𑀁. 𑀧𑀼𑀣𑀼𑀚𑁆𑀚𑀦𑀸 𑀏𑀓𑀘𑁆𑀘𑁂 𑀙𑀩𑁆𑀩𑀕𑁆𑀕𑀺𑀬𑀸𑀤𑀬𑁄 𑀢𑀲𑁆𑀲𑀸𑀬𑀲𑁆𑀫𑀢𑁄 𑀕𑀼𑀡𑀁 𑀅𑀚𑀸𑀦𑀦𑁆𑀢𑀸 𑀳𑀢𑁆𑀣𑀓𑀡𑁆𑀡𑀘𑀽𑀴𑀺𑀓𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑀸 𑀧𑀭𑀸𑀫𑀲𑀦𑁆𑀢𑀸 𑀓𑀻𑀴𑀦𑁆𑀢𑀸 𑀧𑀭𑀺𑀪𑀯𑀦𑁆𑀢𑀺, 𑀦 𑀅𑀭𑀺𑀬𑀸, 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸 𑀯𑀸.

𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀓𑀲𑁆𑀫𑀸 𑀆𑀫𑀦𑁆𑀢𑁂𑀲𑀺? 𑀣𑁂𑀭𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀢𑀼𑀁. 𑀏𑀯𑀁 𑀓𑀺𑀭 𑀪𑀕𑀯𑀢𑁄 𑀅𑀳𑁄𑀲𑀺 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀫 𑀧𑀼𑀢𑁆𑀢𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑀁 𑀦 𑀚𑀸𑀦𑀦𑁆𑀢𑀺, 𑀢𑁂𑀦 𑀢𑀁 𑀧𑀭𑀺𑀪𑀯𑀦𑁆𑀢𑀺, 𑀢𑀁 𑀦𑁂𑀲𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀪𑀯𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀇𑀫𑀲𑁆𑀲 𑀕𑀼𑀡𑁂 𑀪𑀺𑀓𑁆𑀔𑀽𑀦𑀁 𑀧𑀓𑀸𑀲𑁂𑀢𑁆𑀯𑀸 𑀧𑀭𑀺𑀪𑀯𑀢𑁄 𑀦𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺.

𑀧𑀲𑁆𑀲𑀣 𑀦𑁄𑀢𑀺 𑀧𑀲𑁆𑀲𑀣 𑀦𑀼. 𑀦 𑀘 𑀲𑀸 𑀲𑀫𑀸𑀧𑀢𑁆𑀢𑀺 𑀲𑀼𑀮𑀪𑀭𑀽𑀧𑀸, 𑀬𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀲𑀫𑀸𑀧𑀦𑁆𑀦𑀧𑀼𑀩𑁆𑀩𑀸𑀢𑀺 𑀭𑀽𑀧𑀲𑀫𑀸𑀧𑀢𑁆𑀢𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀏𑀯𑀁 𑀧𑀪𑁂𑀤𑀸 𑀲𑀸𑀯𑀓𑀲𑀸𑀥𑀸𑀭𑀡𑀸 𑀬𑀸 𑀓𑀸𑀘𑀺 𑀲𑀫𑀸𑀧𑀢𑁆𑀢𑀺𑀬𑁄 𑀦𑀸𑀫, 𑀢𑀸𑀲𑀼 𑀏𑀓𑀸𑀧𑀺 𑀲𑀫𑀸𑀧𑀢𑁆𑀢𑀺 𑀦 𑀲𑀼𑀮𑀪𑀭𑀽𑀧𑀸, 𑀤𑀼𑀮𑁆𑀮𑀪𑀸, 𑀦𑀢𑁆𑀣𑀺𑀬𑁂𑀯 𑀲𑀸 𑀢𑁂𑀦 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁂𑀦 𑀪𑀺𑀓𑁆𑀔𑀼𑀦𑀸 𑀅𑀲𑀫𑀸𑀧𑀦𑁆𑀦𑀧𑀼𑀩𑁆𑀩𑀸. 𑀏𑀢𑁂𑀦𑀲𑁆𑀲 𑀬𑀁 𑀯𑀼𑀢𑁆𑀢𑀁. ‘‘𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺, 𑀢𑀢𑁆𑀣 𑀫𑀳𑀺𑀤𑁆𑀥𑀺𑀓𑀢𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀳𑀸𑀦𑀼𑀪𑀸𑀯𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀘𑀢𑁆𑀣𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣 𑀘 𑀪𑀕𑀯𑀸 ‘‘𑀏𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸, ‘‘𑀪𑀺𑀓𑁆𑀔𑀯𑁂, 𑀅𑀬𑀁 𑀪𑀺𑀓𑁆𑀔𑀼 𑀦 𑀬𑁄 𑀯𑀸 𑀲𑁄 𑀯𑀸 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄𑀢𑀺 𑀪𑀺𑀓𑁆𑀔𑀽𑀦𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀆𑀕𑀘𑁆𑀙𑀢𑀻𑀢𑀺 𑀘 𑀏𑀢𑁆𑀢𑀓𑁂𑀦 𑀦 𑀑𑀜𑁆𑀜𑀸𑀢𑀩𑁆𑀩𑁄, 𑀅𑀣 𑀔𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀁𑀓𑀺𑀜𑁆𑀘𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀢𑁂𑀦 𑀅𑀦𑀼𑀧𑁆𑀧𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀁 𑀓𑀢𑁆𑀯𑀸 𑀑𑀮𑁄𑀓𑁂𑀣, 𑀢𑀁 𑀯𑁄 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀲𑁆𑀲𑁂𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸𑀫𑀳𑀸𑀦𑀼𑀪𑀸𑀯𑀢𑀸𑀤𑀺𑀪𑁂𑀤𑀁 𑀕𑀼𑀡𑀭𑀸𑀲𑀺𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀦𑁂𑀮𑀗𑁆𑀕𑁄𑀢𑀺 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀦𑀸𑀲𑁆𑀲 𑀏𑀮𑀦𑁆𑀢𑀺 𑀦𑁂𑀮𑀁. 𑀓𑀺𑀁 𑀧𑀦 𑀢𑀁? 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀁. 𑀢𑀜𑁆𑀳𑀺 𑀦𑀺𑀤𑁆𑀤𑁄𑀲𑀝𑁆𑀞𑁂𑀦 𑀇𑀥 ‘‘𑀦𑁂𑀮’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀦𑁂𑀮𑀁 𑀧𑀥𑀸𑀦𑀪𑀽𑀢𑀁 𑀅𑀗𑁆𑀕𑀁 𑀏𑀢𑀲𑁆𑀲𑀸𑀢𑀺 𑀦𑁂𑀮𑀗𑁆𑀕𑁄. 𑀲𑁄 𑀬𑀁 ‘‘𑀭𑀣𑁄’’𑀢𑀺 𑀯𑀓𑁆𑀔𑀢𑀺, 𑀢𑁂𑀦 𑀲𑀫𑁆𑀩𑀦𑁆𑀥𑁄, 𑀢𑀲𑁆𑀫𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀗𑁆𑀕𑁄𑀢𑀺 𑀅𑀢𑁆𑀣𑁄. 𑀅𑀭𑀳𑀢𑁆𑀢𑀨𑀮𑀲𑀻𑀮𑀜𑁆𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀲𑁂𑀢𑁄 𑀧𑀘𑁆𑀙𑀸𑀤𑁄 𑀏𑀢𑀲𑁆𑀲𑀸𑀢𑀺 𑀲𑁂𑀢𑀧𑀘𑁆𑀙𑀸𑀤𑁄. 𑀧𑀘𑁆𑀙𑀸𑀤𑁄𑀢𑀺 𑀭𑀣𑀲𑁆𑀲 𑀉𑀧𑀭𑀺 𑀅𑀢𑁆𑀣𑀭𑀺𑀢𑀩𑁆𑀩𑀓𑀫𑁆𑀩𑀮𑀸𑀤𑀺. 𑀲𑁄 𑀧𑀦 𑀲𑀼𑀧𑀭𑀺𑀲𑀼𑀤𑁆𑀥𑀥𑀯𑀮𑀪𑀸𑀯𑁂𑀦 𑀲𑁂𑀢𑁄 𑀯𑀸 𑀳𑁄𑀢𑀺 𑀭𑀢𑁆𑀢𑀦𑀻𑀮𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑁄. 𑀇𑀥 𑀧𑀦 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀼𑀧𑀭𑀺𑀲𑀼𑀤𑁆𑀥𑀪𑀸𑀯𑀁 𑀉𑀧𑀸𑀤𑀸𑀬 ‘‘𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀅𑀜𑁆𑀜𑀢𑁆𑀭𑀸𑀧𑀺 ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄’’𑀢𑀺. 𑀏𑀓𑁄 𑀲𑀢𑀺𑀲𑀗𑁆𑀔𑀸𑀢𑁄 𑀅𑀭𑁄 𑀏𑀢𑀲𑁆𑀲𑀸𑀢𑀺 𑀏𑀓𑀸𑀭𑁄. 𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀭𑀣𑁄𑀢𑀺 𑀣𑁂𑀭𑀲𑁆𑀲 𑀅𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀅𑀦𑀻𑀖𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁, 𑀔𑁄𑀪𑀯𑀺𑀭𑀳𑀺𑀢𑀁 𑀬𑀸𑀦𑀁 𑀯𑀺𑀬 𑀓𑀺𑀮𑁂𑀲𑀧𑀭𑀺𑀔𑁄𑀪𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀬𑀦𑁆𑀢𑀦𑁆𑀢𑀺 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀆𑀕𑀘𑁆𑀙𑀦𑁆𑀢𑀁. 𑀙𑀺𑀦𑁆𑀦𑀲𑁄𑀢𑀦𑁆𑀢𑀺 𑀧𑀘𑁆𑀙𑀺𑀦𑁆𑀦𑀲𑁄𑀢𑀁. 𑀧𑀓𑀢𑀺𑀭𑀣𑀲𑁆𑀲 𑀳𑀺 𑀲𑀼𑀔𑀧𑀯𑀢𑁆𑀢𑀦𑀢𑁆𑀣𑀁 𑀅𑀓𑁆𑀔𑀲𑀻𑀲𑁂𑀲𑀼 𑀦𑀸𑀪𑀺𑀬𑀜𑁆𑀘 𑀉𑀧𑀮𑀺𑀢𑁆𑀢𑀸𑀦𑀁 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀲𑁄𑀢𑁄 𑀲𑀯𑀦𑀁 𑀲𑀦𑁆𑀤𑀦𑀁 𑀳𑁄𑀢𑀺, 𑀢𑁂𑀦 𑀲𑁄 𑀅𑀘𑁆𑀙𑀺𑀦𑁆𑀦𑀲𑁄𑀢𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀧𑀦 𑀙𑀢𑁆𑀢𑀺𑀁𑀲𑀢𑀺𑀬𑀸 𑀲𑁄𑀢𑀸𑀦𑀁 𑀅𑀦𑀯𑀲𑁂𑀲𑀢𑁄 𑀧𑀳𑀻𑀦𑀢𑁆𑀢𑀸 𑀙𑀺𑀦𑁆𑀦𑀲𑁄𑀢𑁄 𑀦𑀸𑀫 𑀳𑁄𑀢𑀺, 𑀢𑀁 𑀙𑀺𑀦𑁆𑀦𑀲𑁄𑀢𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀩𑀦𑁆𑀥𑀦𑀦𑁆𑀢𑀺 𑀅𑀩𑀦𑁆𑀥𑀦𑁄. 𑀭𑀣𑀽𑀧𑀢𑁆𑀣𑀭𑀲𑁆𑀲 𑀳𑀺 𑀅𑀓𑁆𑀔𑁂𑀦 𑀲𑀤𑁆𑀥𑀺𑀁 𑀦𑀺𑀘𑁆𑀘𑀮𑀪𑀸𑀯𑀓𑀭𑀡𑀢𑁆𑀣𑀁 𑀩𑀳𑀽𑀦𑀺 𑀩𑀦𑁆𑀥𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀦 𑀲𑁄 𑀲𑀩𑀦𑁆𑀥𑀦𑁄. 𑀅𑀬𑀁 𑀧𑀦 𑀲𑀩𑁆𑀩𑀲𑀁𑀬𑁄𑀚𑀦𑀩𑀦𑁆𑀥𑀦𑀸𑀦𑀁 𑀅𑀦𑀯𑀲𑁂𑀲𑀢𑁄 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀅𑀩𑀦𑁆𑀥𑀦𑁄, 𑀢𑀁 𑀅𑀩𑀦𑁆𑀥𑀦𑀁. 𑀧𑀲𑁆𑀲𑀸𑀢𑀺 𑀪𑀕𑀯𑀸 𑀣𑁂𑀭𑀲𑁆𑀲 𑀕𑀼𑀡𑁂𑀳𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀯𑀤𑀢𑀺.

𑀇𑀢𑀺 𑀲𑀢𑁆𑀣𑀸 𑀆𑀬𑀲𑁆𑀫𑀦𑁆𑀢𑀁 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀁 𑀅𑀭𑀳𑀢𑁆𑀢𑀨𑀮𑀲𑀻𑀲𑁂𑀦 𑀲𑀼𑀘𑀓𑁆𑀓𑀁, 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀉𑀢𑁆𑀢𑀭𑀘𑁆𑀙𑀤𑀁, 𑀲𑀽𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀲𑁆𑀯𑀸𑀭𑀁, 𑀓𑀺𑀮𑁂𑀲𑀧𑀭𑀺𑀔𑁄𑀪𑀸𑀪𑀸𑀯𑁂𑀦 𑀅𑀧𑀭𑀺𑀔𑁄𑀪𑀁, 𑀢𑀡𑁆𑀳𑀽𑀧𑀮𑁂𑀧𑀸𑀪𑀸𑀯𑁂𑀦 𑀅𑀦𑀼𑀧𑀮𑁂𑀧𑀁, 𑀲𑀁𑀬𑁄𑀚𑀦𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀩𑀦𑁆𑀥𑀦𑀁 𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀼𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀙𑀝𑁆𑀞𑁂 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄𑀢𑀺 𑀏𑀢𑁆𑀣 𑀓𑁄𑀡𑁆𑀟𑀜𑁆𑀜𑁄𑀢𑀺 𑀢𑀲𑁆𑀲𑀸𑀬𑀲𑁆𑀫𑀢𑁄 𑀕𑁄𑀢𑁆𑀢𑀢𑁄 𑀆𑀕𑀢𑀦𑀸𑀫𑀁. 𑀲𑀸𑀯𑀓𑁂𑀲𑀼 𑀧𑀦 𑀲𑀩𑁆𑀩𑀧𑀞𑀫𑀁 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀻𑀢𑀺 𑀪𑀕𑀯𑀢𑀸 ‘‘𑀅𑀜𑁆𑀜𑀸𑀲𑀺 𑀯𑀢, 𑀪𑁄, 𑀓𑁄𑀡𑁆𑀟𑀜𑁆𑀜𑁄’’𑀢𑀺 (𑀫𑀳𑀸𑀯. 𑁧𑁭; 𑀲𑀁. 𑀦𑀺. 𑁫.𑁧𑁦𑁮𑁧) 𑀯𑀼𑀢𑁆𑀢𑀉𑀤𑀸𑀦𑀯𑀲𑁂𑀦 𑀣𑁂𑀭𑁄 𑀲𑀸𑀲𑀦𑁂 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀢𑀡𑁆𑀳𑀸 𑀲𑀗𑁆𑀔𑀻𑀬𑀢𑀺 𑀧𑀳𑀻𑀬𑀢𑀺 𑀏𑀢𑁆𑀣𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁄, 𑀦𑀺𑀩𑁆𑀩𑀸𑀦𑀁. 𑀢𑀲𑁆𑀫𑀺𑀁 𑀢𑀡𑁆𑀳𑀸𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑀺. 𑀢𑀡𑁆𑀳𑀸 𑀯𑀸 𑀲𑀗𑁆𑀔𑀻𑀬𑀢𑀺 𑀧𑀳𑀻𑀬𑀢𑀺 𑀏𑀢𑁂𑀦𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁄, 𑀅𑀭𑀺𑀬𑀫𑀕𑁆𑀕𑁄. 𑀢𑀲𑁆𑀲 𑀨𑀮𑀪𑀽𑀢𑀸, 𑀧𑀭𑀺𑀬𑁄𑀲𑀸𑀦𑀪𑀽𑀢𑀸 𑀯𑀸 𑀯𑀺𑀫𑀼𑀢𑁆𑀢𑀻𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺. 𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀩𑀳𑀼𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀇𑀥𑀸𑀧𑀺 𑀏𑀯𑀫𑀓𑀸𑀲𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀅𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀁 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀲𑁆𑀲 𑀫𑀽𑀮𑀁 𑀙𑀫𑀸 𑀦𑀢𑁆𑀣𑀻𑀢𑀺 𑀬𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀢𑀪𑀸𑀯𑀭𑀼𑀓𑁆𑀔𑀫𑀽𑀮𑀪𑀽𑀢𑀸 𑀅𑀯𑀺𑀚𑁆𑀚𑀸, 𑀢𑀲𑁆𑀲𑀸𑀯 𑀧𑀢𑀺𑀝𑁆𑀞𑀸 𑀳𑁂𑀢𑀼𑀪𑀽𑀢𑀸 𑀆𑀲𑀯𑀦𑀻𑀯𑀭𑀡𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑀸 𑀙𑀫𑀸 𑀧𑀣𑀯𑀻 𑀘 𑀦𑀢𑁆𑀣𑀺 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸. 𑀧𑀡𑁆𑀡𑀸 𑀦𑀢𑁆𑀣𑀺 𑀓𑀼𑀢𑁄 𑀮𑀢𑀸𑀢𑀺 𑀦𑀢𑁆𑀣𑀺 𑀮𑀢𑀸 𑀓𑀼𑀢𑁄 𑀧𑀡𑁆𑀡𑀸𑀢𑀺 𑀧𑀤𑀲𑀫𑁆𑀩𑀦𑁆𑀥𑁄. 𑀫𑀸𑀦𑀸𑀢𑀺𑀫𑀸𑀦𑀸𑀤𑀺𑀧𑀪𑁂𑀤𑀸 𑀲𑀸𑀔𑀸𑀧𑀲𑀸𑀔𑀸𑀤𑀺𑀲𑀗𑁆𑀔𑀸𑀢𑀸 𑀮𑀢𑀸𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀏𑀯 𑀫𑀤𑀧𑁆𑀧𑀫𑀸𑀤𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀧𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀡𑁆𑀡𑀸 𑀦𑀢𑁆𑀣𑀺 𑀓𑀼𑀢𑁄 𑀮𑀢𑀸𑀢𑀺 𑀭𑀼𑀓𑁆𑀔𑀗𑁆𑀓𑀼𑀭𑀲𑁆𑀲 𑀯𑀟𑁆𑀠𑀫𑀸𑀦𑀲𑁆𑀲 𑀧𑀞𑀫𑀁 𑀧𑀡𑁆𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀧𑀘𑁆𑀙𑀸 𑀲𑀸𑀔𑀸𑀧𑀲𑀸𑀔𑀸𑀲𑀗𑁆𑀔𑀸𑀢𑀸 𑀮𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀅𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀅𑀢𑁆𑀢𑀪𑀸𑀯𑀭𑀼𑀓𑁆𑀔𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀬𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀫𑀽𑀮𑀁, 𑀢𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀆𑀲𑀯𑀸𑀤𑀺 𑀘 𑀦𑀢𑁆𑀣𑀺. 𑀫𑀽𑀮𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀫𑀽𑀮𑀓𑀸𑀭𑀡𑀢𑁆𑀢𑀸 𑀩𑀻𑀚𑀝𑁆𑀞𑀸𑀦𑀺𑀬𑀁 𑀓𑀫𑁆𑀫𑀁 𑀢𑀤𑀪𑀸𑀯𑁄𑀧𑀺 𑀕𑀳𑀺𑀢𑁄𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀢𑀺 𑀘 𑀓𑀫𑁆𑀫𑀩𑀻𑀚𑁂 𑀢𑀁𑀦𑀺𑀫𑀺𑀢𑁆𑀢𑁄 𑀯𑀺𑀜𑁆𑀜𑀸𑀡𑀗𑁆𑀓𑀼𑀭𑁄, 𑀯𑀺𑀜𑁆𑀜𑀸𑀡𑀗𑁆𑀓𑀼𑀭𑀦𑀺𑀫𑀺𑀢𑁆𑀢𑀸 𑀘 𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀧𑀢𑁆𑀢𑀲𑀸𑀔𑀸𑀤𑀬𑁄 𑀦 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀲𑁆𑀲 𑀫𑀽𑀮𑀁 𑀙𑀫𑀸 𑀦𑀢𑁆𑀣𑀺, 𑀧𑀡𑁆𑀡𑀸 𑀦𑀢𑁆𑀣𑀺 𑀓𑀼𑀢𑁄 𑀮𑀢𑀸’’𑀢𑀺.

𑀢𑀁 𑀥𑀻𑀭𑀁 𑀩𑀦𑁆𑀥𑀦𑀸 𑀫𑀼𑀢𑁆𑀢𑀦𑁆𑀢𑀺 𑀢𑀁 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀬𑁄𑀕𑁂𑀦 𑀯𑀺𑀚𑀺𑀢𑀫𑀸𑀭𑀢𑁆𑀢𑀸 𑀥𑀻𑀭𑀁, 𑀢𑀢𑁄 𑀏𑀯 𑀲𑀩𑁆𑀩𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀩𑀦𑁆𑀥𑀦𑀢𑁄 𑀫𑀼𑀢𑁆𑀢𑀁. 𑀓𑁄 𑀢𑀁 𑀦𑀺𑀦𑁆𑀤𑀺𑀢𑀼𑀫𑀭𑀳𑀢𑀻𑀢𑀺 𑀏𑀢𑁆𑀣 𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀓𑀺𑀮𑁂𑀲𑀯𑀺𑀧𑁆𑀧𑀫𑀼𑀢𑁆𑀢𑀁 𑀲𑀻𑀮𑀸𑀤𑀺𑀅𑀦𑀼𑀢𑁆𑀢𑀭𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀓𑁄 𑀦𑀸𑀫 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀦𑀺𑀦𑁆𑀤𑀺𑀢𑀼𑀁 𑀕𑀭𑀳𑀺𑀢𑀼𑀁 𑀅𑀭𑀳𑀢𑀺 𑀦𑀺𑀦𑁆𑀤𑀸𑀦𑀺𑀫𑀺𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀤𑁂𑀯𑀸𑀧𑀺 𑀦𑀁 𑀧𑀲𑀁𑀲𑀦𑁆𑀢𑀻𑀢𑀺 𑀅𑀜𑁆𑀜𑀤𑀢𑁆𑀣𑀼 𑀤𑁂𑀯𑀸 𑀲𑀓𑁆𑀓𑀸𑀤𑀬𑁄 𑀕𑀼𑀡𑀯𑀺𑀲𑁂𑀲𑀯𑀺𑀤𑀽, 𑀅𑀧𑀺𑀲𑀤𑁆𑀤𑁂𑀦 𑀫𑀦𑀼𑀲𑁆𑀲𑀸𑀧𑀺 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀬𑁄 𑀧𑀲𑀁𑀲𑀦𑁆𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀩𑁆𑀭𑀳𑁆𑀫𑀼𑀦𑀸𑀧𑀺 𑀧𑀲𑀁𑀲𑀺𑀢𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸𑀧𑀺 𑀅𑀜𑁆𑀜𑁂𑀳𑀺𑀧𑀺 𑀩𑁆𑀭𑀳𑁆𑀫𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀳𑀺𑀧𑀺 𑀧𑀲𑀁𑀲𑀺𑀢𑁄 𑀣𑁄𑀫𑀺𑀢𑁄𑀬𑁂𑀯𑀸𑀢𑀺.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀧𑀜𑁆𑀘𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀧𑀳𑀸𑀦𑀦𑁆𑀢𑀺 𑀧𑀧𑀜𑁆𑀘𑁂𑀦𑁆𑀢𑀺 𑀬𑀢𑁆𑀣 𑀲𑀬𑀁 𑀉𑀧𑁆𑀧𑀦𑁆𑀦𑀸, 𑀢𑀁 𑀲𑀦𑁆𑀢𑀸𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑀺 𑀘𑀺𑀭𑀁 𑀞𑀧𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸, 𑀓𑀺𑀮𑁂𑀲𑀸. 𑀯𑀺𑀲𑁂𑀲𑀢𑁄 𑀭𑀸𑀕𑀤𑁄𑀲𑀫𑁄𑀳𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀭𑀸𑀕𑁄 𑀧𑀧𑀜𑁆𑀘𑁄, 𑀤𑁄𑀲𑁄 𑀧𑀧𑀜𑁆𑀘𑁄, 𑀫𑁄𑀳𑁄 𑀧𑀧𑀜𑁆𑀘𑁄, 𑀢𑀡𑁆𑀳𑀸 𑀧𑀧𑀜𑁆𑀘𑁄, 𑀤𑀺𑀝𑁆𑀞𑀺 𑀧𑀧𑀜𑁆𑀘𑁄, 𑀫𑀸𑀦𑁄 𑀧𑀧𑀜𑁆𑀘𑁄’’𑀢𑀺. 𑁋

𑀅𑀧𑀺𑀘 𑀲𑀁𑀓𑀺𑀮𑁂𑀲𑀝𑁆𑀞𑁄 𑀧𑀧𑀜𑁆𑀘𑀝𑁆𑀞𑁄, 𑀓𑀘𑀯𑀭𑀝𑁆𑀞𑁄 𑀧𑀧𑀜𑁆𑀘𑀝𑁆𑀞𑁄. 𑀢𑀢𑁆𑀣 𑀭𑀸𑀕𑀧𑀧𑀜𑁆𑀘𑀲𑁆𑀲 𑀲𑀼𑀪𑀲𑀜𑁆𑀜𑀸 𑀦𑀺𑀫𑀺𑀢𑁆𑀢𑀁, 𑀤𑁄𑀲𑀧𑀧𑀜𑁆𑀘𑀲𑁆𑀲 𑀆𑀖𑀸𑀢𑀯𑀢𑁆𑀣𑀼, 𑀫𑁄𑀳𑀧𑀧𑀜𑁆𑀘𑀲𑁆𑀲 𑀆𑀲𑀯𑀸, 𑀢𑀡𑁆𑀳𑀸𑀧𑀧𑀜𑁆𑀘𑀲𑁆𑀲 𑀯𑁂𑀤𑀦𑀸, 𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑁆𑀲 𑀲𑀜𑁆𑀜𑀸, 𑀫𑀸𑀦𑀧𑀧𑀜𑁆𑀘𑀲𑁆𑀲 𑀯𑀺𑀢𑀓𑁆𑀓𑁄 𑀦𑀺𑀫𑀺𑀢𑁆𑀢𑀁. 𑀢𑁂𑀳𑀺 𑀧𑀧𑀜𑁆𑀘𑁂𑀳𑀺 𑀲𑀳𑀕𑀢𑀸 𑀲𑀜𑁆𑀜𑀸 𑀧𑀧𑀜𑁆𑀘𑀲𑀜𑁆𑀜𑀸. 𑀧𑀧𑀜𑁆𑀘𑀲𑀜𑁆𑀜𑀸𑀦𑀁 𑀲𑀗𑁆𑀔𑀸 𑀪𑀸𑀕𑀸 𑀓𑁄𑀝𑁆𑀞𑀸𑀲𑀸 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸. 𑀅𑀢𑁆𑀣𑀢𑁄 𑀲𑀤𑁆𑀥𑀺𑀁 𑀦𑀺𑀫𑀺𑀢𑁆𑀢𑁂𑀳𑀺 𑀢𑀁𑀢𑀁𑀧𑀧𑀜𑁆𑀘𑀲𑁆𑀲 𑀧𑀓𑁆𑀔𑀺𑀬𑁄 𑀓𑀺𑀮𑁂𑀲𑀕𑀡𑁄. 𑀲𑀜𑁆𑀜𑀸𑀕𑀳𑀡𑀜𑁆𑀘𑁂𑀢𑁆𑀣 𑀢𑀲𑁆𑀲 𑀦𑁂𑀲𑀁 𑀲𑀸𑀥𑀸𑀭𑀡𑀳𑁂𑀢𑀼𑀪𑀸𑀯𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺 (𑀲𑀼. 𑀦𑀺. 𑁮𑁮𑁦). 𑀢𑁂𑀲𑀁 𑀧𑀳𑀸𑀦𑀁, 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀦𑀦𑁆𑀢𑀺 𑀅𑀢𑁆𑀣𑁄.

𑀢𑀤𑀸 𑀳𑀺 𑀪𑀕𑀯𑀸 𑀅𑀢𑀻𑀢𑀸𑀲𑀼 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀲𑀼 𑀅𑀢𑁆𑀢𑀦𑁄 𑀚𑀸𑀢𑀻𑀲𑀼 𑀅𑀦𑀢𑁆𑀣𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑁂 𑀓𑀺𑀮𑁂𑀲𑁂 𑀇𑀫𑀲𑁆𑀫𑀺𑀁 𑀘𑀭𑀺𑀫𑀪𑀯𑁂 𑀅𑀭𑀺𑀬𑀫𑀕𑁆𑀕𑁂𑀦 𑀩𑁄𑀥𑀺𑀫𑀡𑁆𑀟𑁂 𑀲𑀯𑀸𑀲𑀦𑁂 𑀧𑀳𑀻𑀦𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀢𑁆𑀢𑀲𑀦𑁆𑀢𑀸𑀦𑀜𑁆𑀘 𑀓𑀺𑀮𑁂𑀲𑀘𑀭𑀺𑀢𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀲𑀁𑀓𑀺𑀮𑀺𑀝𑁆𑀞𑀁 𑀓𑀜𑁆𑀚𑀺𑀬𑀧𑀼𑀡𑁆𑀡𑀮𑀸𑀩𑀼𑀁 𑀯𑀺𑀬 𑀢𑀓𑁆𑀓𑀪𑀭𑀺𑀢𑀘𑀸𑀝𑀺𑀁 𑀯𑀺𑀬 𑀯𑀲𑀸𑀧𑀻𑀢𑀧𑀺𑀮𑁄𑀢𑀺𑀓𑀁 𑀯𑀺𑀬 𑀘 𑀤𑀼𑀩𑁆𑀩𑀺𑀦𑀺𑀫𑁄𑀘𑀺𑀬𑀁 𑀤𑀺𑀲𑁆𑀯𑀸 ‘‘𑀏𑀯𑀁 𑀕𑀳𑀦𑀁 𑀦𑀸𑀫𑀺𑀤𑀁 𑀓𑀺𑀮𑁂𑀲𑀯𑀝𑁆𑀝𑀁 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀁 𑀫𑀬𑁆𑀳𑀁 𑀅𑀦𑀯𑀲𑁂𑀲𑀁 𑀧𑀳𑀻𑀦𑀁, 𑀅𑀳𑁄 𑀲𑀼𑀧𑁆𑀧𑀳𑀻𑀦’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀧𑀻𑀢𑀺𑀧𑀸𑀫𑁄𑀚𑁆𑀚𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀧𑀳𑀸𑀦𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺.

𑀢𑀢𑁆𑀣 𑀬𑀲𑁆𑀲 𑀧𑀧𑀜𑁆𑀘𑀸 𑀞𑀺𑀢𑀺 𑀘 𑀦𑀢𑁆𑀣𑀻𑀢𑀺 𑀬𑀲𑁆𑀫𑀸 𑀪𑀕𑀯𑀸 𑀅𑀢𑁆𑀢𑀸𑀦𑀫𑁂𑀯 𑀧𑀭𑀁 𑀯𑀺𑀬 𑀓𑀢𑁆𑀯𑀸 𑀦𑀺𑀤𑁆𑀤𑀺𑀲𑀢𑀺 𑀢𑀲𑁆𑀫𑀸 𑀬𑀲𑁆𑀲 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀯𑀼𑀢𑁆𑀢𑀮𑀓𑁆𑀔𑀡𑀸 𑀧𑀧𑀜𑁆𑀘𑀸, 𑀢𑁂𑀳𑀺 𑀓𑀢𑀸 𑀲𑀁𑀲𑀸𑀭𑁂 𑀞𑀺𑀢𑀺 𑀘 𑀦𑀢𑁆𑀣𑀺. 𑀦𑁂𑀢𑁆𑀢𑀺𑀬𑀁 𑀧𑀦 ‘‘𑀞𑀺𑀢𑀺 𑀦𑀸𑀫 𑀅𑀦𑀼𑀲𑀬𑁄’’𑀢𑀺 (𑀦𑁂𑀢𑁆𑀢𑀺. 𑁨𑁭) 𑀯𑀼𑀢𑁆𑀢𑀁. 𑀅𑀦𑀼𑀲𑀬𑁄 𑀳𑀺 𑀪𑀯𑀧𑀯𑀢𑁆𑀢𑀺𑀬𑀸 𑀫𑀽𑀮𑀦𑁆𑀢𑀺. 𑀲𑀢𑁆𑀢𑁂 𑀲𑀁𑀲𑀸𑀭𑁂 𑀧𑀧𑀜𑁆𑀘𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸. ‘‘𑀧𑀧𑀜𑁆𑀘𑀝𑁆𑀞𑀺𑀢𑀻’’𑀢𑀺 𑀘 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀧𑀧𑀜𑁆𑀘𑀸𑀦𑀁 𑀞𑀺𑀢𑀺 𑀯𑀺𑀚𑁆𑀚𑀫𑀸𑀦𑀢𑀸 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑁂𑀤𑁄 𑀧𑀧𑀜𑁆𑀘𑀝𑁆𑀞𑀺𑀢𑀺, 𑀧𑀧𑀜𑁆𑀘𑀸 𑀏𑀯 𑀯𑀸 𑀅𑀯𑀲𑀺𑀝𑁆𑀞𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀯𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑀢𑁄 𑀯𑀝𑁆𑀝𑀲𑁆𑀲 𑀞𑀺𑀢𑀺 𑀧𑀧𑀜𑁆𑀘𑀝𑁆𑀞𑀺𑀢𑀺, 𑀲𑀸 𑀬𑀲𑁆𑀲 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀦𑀢𑁆𑀣𑀺. 𑀲𑀦𑁆𑀤𑀸𑀦𑀁 𑀧𑀮𑀺𑀖𑀜𑁆𑀘 𑀯𑀻𑀢𑀺𑀯𑀢𑁆𑀢𑁄𑀢𑀺 𑀬𑁄 𑀩𑀦𑁆𑀥𑀦𑀝𑁆𑀞𑁂𑀦 𑀲𑀦𑁆𑀢𑀸𑀦𑀲𑀤𑀺𑀲𑀢𑁆𑀢𑀸 ‘‘𑀲𑀦𑁆𑀤𑀸𑀦’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄, 𑀦𑀺𑀩𑁆𑀩𑀸𑀦𑀦𑀕𑀭𑀧𑀯𑁂𑀲𑀦𑀺𑀲𑁂𑀥𑀦𑀢𑁄 𑀧𑀮𑀺𑀖𑀲𑀤𑀺𑀲𑀢𑁆𑀢𑀸 𑀧𑀮𑀺𑀖𑀲𑀗𑁆𑀔𑀸𑀢𑀁 𑀅𑀯𑀺𑀚𑁆𑀚𑀜𑁆𑀘 𑀯𑀻𑀢𑀺𑀯𑀢𑁆𑀢𑁄 𑀲𑀯𑀸𑀲𑀦𑀧𑀳𑀸𑀦𑁂𑀦 𑀯𑀺𑀲𑁂𑀲𑀢𑁄 𑀅𑀢𑀺𑀓𑁆𑀓𑀦𑁆𑀢𑁄. 𑀅𑀧𑀭𑁂 𑀧𑀦 𑀓𑁄𑀥𑀁 ‘‘𑀲𑀦𑁆𑀤𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑁄 𑀳𑀺 ‘‘𑀧𑀭𑀸𑀪𑀺𑀲𑀚𑁆𑀚𑀦𑀻’’𑀢𑀺 𑀯𑀼𑀢𑁆𑀢𑁄𑀢𑀺.

𑀢𑀁 𑀦𑀺𑀢𑁆𑀢𑀡𑁆𑀳𑀁 𑀫𑀼𑀦𑀺𑀁 𑀘𑀭𑀦𑁆𑀢𑀦𑁆𑀢𑀺 𑀢𑀁 𑀲𑀩𑁆𑀩𑀣𑀸𑀧𑀺 𑀢𑀡𑁆𑀳𑀸𑀪𑀸𑀯𑁂𑀦 𑀦𑀺𑀢𑁆𑀢𑀡𑁆𑀳𑀁, 𑀉𑀪𑀬𑀮𑁄𑀓𑀫𑀼𑀦𑀦𑀢𑁄 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀫𑀼𑀦𑀦𑀢𑁄 𑀘 𑀫𑀼𑀦𑀺𑀁, 𑀏𑀓𑀦𑁆𑀢𑁂𑀦𑁂𑀯 𑀲𑀩𑁆𑀩𑀲𑀢𑁆𑀢𑀳𑀺𑀢𑀢𑁆𑀣𑀁 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀦𑀸𑀦𑀸𑀲𑀫𑀸𑀧𑀢𑁆𑀢𑀺𑀘𑀸𑀭𑁂𑀳𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀜𑀸𑀡𑀘𑀸𑀭𑁂𑀦 𑀘 𑀘𑀭𑀦𑁆𑀢𑀁. 𑀦𑀸𑀯𑀚𑀸𑀦𑀸𑀢𑀺 𑀲𑀤𑁂𑀯𑀓𑁄𑀧𑀺 𑀮𑁄𑀓𑁄𑀢𑀺 𑀲𑀩𑁆𑀩𑁄 𑀲𑀧𑀜𑁆𑀜𑀚𑀸𑀢𑀺𑀓𑁄 𑀲𑀢𑁆𑀢𑀮𑁄𑀓𑁄 𑀲𑀤𑁂𑀯𑀓𑁄𑀧𑀺 𑀲𑀩𑁆𑀭𑀳𑁆𑀫𑀓𑁄𑀧𑀺 𑀦 𑀓𑀤𑀸𑀘𑀺𑀧𑀺 𑀅𑀯𑀚𑀸𑀦𑀸𑀢𑀺 𑀦 𑀧𑀭𑀺𑀪𑁄𑀢𑀺, 𑀅𑀣 𑀔𑁄 𑀅𑀬𑀫𑁂𑀯 𑀮𑁄𑀓𑁂 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄 𑀧𑀯𑀭𑁄𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀧𑀽𑀚𑀸𑀲𑀓𑁆𑀓𑀸𑀭𑀦𑀺𑀭𑀢𑁄 𑀳𑁄𑀢𑀻𑀢𑀺.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀅𑀝𑁆𑀞𑀫𑁂 𑀅𑀚𑁆𑀛𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀅𑀚𑁆𑀛𑀢𑁆𑀢𑀲𑀤𑁆𑀤𑁄 ‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁦𑁪) 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑁂 𑀆𑀕𑀢𑁄. ‘‘𑀅𑀚𑁆𑀛𑀢𑁆𑀢𑀸 𑀥𑀫𑁆𑀫𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁨𑁦), 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁩-𑁩𑁭𑁪) 𑀦𑀺𑀬𑀓𑀚𑁆𑀛𑀢𑁆𑀢𑁂. ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁮𑁭) 𑀯𑀺𑀲𑀬𑀚𑁆𑀛𑀢𑁆𑀢𑁂, 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀨𑀮𑀲𑀫𑀸𑀧𑀢𑁆𑀢𑀺 𑀳𑀺 𑀩𑀼𑀤𑁆𑀥𑀸𑀦𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁 𑀦𑀸𑀫. ‘‘𑀢𑁂𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁮𑁮) 𑀕𑁄𑀘𑀭𑀚𑁆𑀛𑀢𑁆𑀢𑁂. 𑀇𑀥𑀸𑀧𑀺 𑀕𑁄𑀘𑀭𑀚𑁆𑀛𑀢𑁆𑀢𑁂𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀅𑀚𑁆𑀛𑀢𑁆𑀢𑀦𑁆𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀪𑀽𑀢𑁂 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀫𑀼𑀔𑀦𑁆𑀢𑀺 𑀅𑀪𑀺𑀫𑀼𑀔𑀁. 𑀲𑀽𑀧𑀝𑁆𑀞𑀺𑀢𑀸𑀬𑀸𑀢𑀺 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀸𑀬 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸. 𑀲𑀢𑀺𑀲𑀻𑀲𑁂𑀦 𑀘𑁂𑀢𑁆𑀣 𑀛𑀸𑀦𑀁 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀅𑀚𑁆𑀛𑀢𑁆𑀢𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀧𑀝𑀺𑀮𑀤𑁆𑀥𑀁 𑀉𑀴𑀸𑀭𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺.

𑀅𑀬𑀜𑁆𑀳𑀺 𑀣𑁂𑀭𑁄 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀏𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀢𑁄 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀸𑀭𑀫𑀚𑁆𑀛𑀁 𑀑𑀢𑀭𑀺𑀢𑁆𑀯𑀸 𑀪𑀕𑀯𑀢𑀺 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁂 ‘‘𑀅𑀓𑀸𑀮𑁄 𑀢𑀸𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺 𑀕𑀦𑁆𑀥𑀓𑀼𑀝𑀺𑀬𑀸 𑀅𑀯𑀺𑀤𑀽𑀭𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀁 𑀢𑀣𑀸𑀦𑀺𑀲𑀺𑀦𑁆𑀦𑀁 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀬𑁂𑀯 𑀧𑀲𑁆𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄…𑀧𑁂… 𑀲𑀽𑀧𑀝𑁆𑀞𑀺𑀢𑀸𑀬𑀸’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀯𑀲𑁂𑀦 𑀅𑀥𑀺𑀕𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀫𑀸𑀧𑀚𑁆𑀚𑀦𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀲𑁆𑀲 𑀲𑀺𑀬𑀸 𑀲𑀩𑁆𑀩𑀤𑀸 𑀲𑀢𑀺, 𑀲𑀢𑀢𑀁 𑀓𑀸𑀬𑀕𑀢𑀸 𑀉𑀧𑀝𑁆𑀞𑀺𑀢𑀸𑀢𑀺 𑀬𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀏𑀓𑀤𑀺𑀯𑀲𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀦𑀸𑀫𑀭𑀽𑀧𑀪𑁂𑀤𑁂𑀦 𑀤𑀼𑀯𑀺𑀥𑁂𑀧𑀺 𑀓𑀸𑀬𑁂 𑀕𑀢𑀸 𑀓𑀸𑀬𑀸𑀭𑀫𑁆𑀫𑀡𑀸 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀯𑀲𑁂𑀦 𑀲𑀢𑀢𑀁 𑀦𑀺𑀭𑀦𑁆𑀢𑀭𑀁 𑀲𑀸𑀢𑀘𑁆𑀘𑀸𑀪𑀺𑀬𑁄𑀕𑀯𑀲𑁂𑀦 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀲𑀺𑀬𑀸.

𑀅𑀬𑀁 𑀓𑀺𑀭𑀸𑀬𑀲𑁆𑀫𑀸 𑀧𑀞𑀫𑀁 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀲𑁄 𑀅𑀧𑀭𑀪𑀸𑀕𑁂𑀧𑀺 𑀬𑁂𑀪𑀼𑀬𑁆𑀬𑁂𑀦 𑀢𑀫𑁂𑀯 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀣𑁂𑀯 𑀘 𑀯𑀺𑀧𑀲𑁆𑀲𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀲𑁆𑀯𑀸𑀬𑀁 𑀬𑁂𑀦 𑀯𑀺𑀥𑀺𑀦𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀬𑀲𑁆𑀲 𑀲𑀺𑀬𑀸 𑀲𑀩𑁆𑀩𑀤𑀸 𑀲𑀢𑀺, 𑀲𑀢𑀢𑀁 𑀓𑀸𑀬𑀕𑀢𑀸 𑀉𑀧𑀝𑁆𑀞𑀺𑀢𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀉𑀧𑀝𑁆𑀞𑀸𑀦𑀸𑀓𑀸𑀭𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸, 𑀦 𑀪𑀯𑀺𑀲𑁆𑀲𑀢𑀺 𑀦 𑀘 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳.

𑀢𑀲𑁆𑀲𑀢𑁆𑀣𑁄 𑀤𑁆𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑁄 𑀲𑀫𑁆𑀫𑀲𑀦𑀢𑁄 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀲𑀫𑁆𑀫𑀲𑀦𑀓𑀸𑀮𑀯𑀲𑁂𑀦 𑀘𑀸𑀢𑀺. 𑀢𑁂𑀲𑀼 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀢𑀸𑀯 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀅𑀢𑀻𑀢𑀓𑀸𑀮𑁂 𑀫𑀫 𑀓𑀺𑀮𑁂𑀲𑀓𑀫𑁆𑀫𑀁 𑀦𑁄 𑀘𑀲𑁆𑀲 𑀦 𑀪𑀯𑁂𑀬𑁆𑀬 𑀘𑁂, 𑀇𑀫𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀅𑀬𑀁 𑀅𑀢𑁆𑀢𑀪𑀸𑀯𑁄 𑀦𑁄 𑀘 𑀫𑁂 𑀲𑀺𑀬𑀸 𑀦 𑀫𑁂 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀫𑁂 𑀅𑀢𑀻𑀢𑁂 𑀓𑀫𑁆𑀫𑀓𑀺𑀮𑁂𑀲𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀢𑀁𑀦𑀺𑀫𑀺𑀢𑁆𑀢𑁄 𑀏𑀢𑀭𑀳𑀺 𑀅𑀬𑀁 𑀫𑁂 𑀅𑀢𑁆𑀢𑀪𑀸𑀯𑁄 𑀧𑀯𑀢𑁆𑀢𑀢𑀺. 𑀦 𑀪𑀯𑀺𑀲𑁆𑀲𑀢𑀺 𑀦 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀝𑀺𑀧𑀓𑁆𑀔𑀸𑀥𑀺𑀕𑀫𑁂𑀦 𑀓𑀺𑀮𑁂𑀲𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀫𑁂, 𑀆𑀬𑀢𑀺𑀁 𑀯𑀺𑀧𑀸𑀓𑀯𑀝𑁆𑀝𑀁 𑀦 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀦 𑀫𑁂 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀓𑀸𑀮𑀢𑁆𑀢𑀬𑁂 𑀓𑀫𑁆𑀫𑀓𑀺𑀮𑁂𑀲𑀳𑁂𑀢𑀼𑀓𑀁 𑀇𑀤𑀁 𑀫𑀬𑁆𑀳𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀔𑀦𑁆𑀥𑀧𑀜𑁆𑀘𑀓𑀁, 𑀦 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀓𑀁, 𑀬𑀣𑀸 𑀘 𑀫𑀬𑁆𑀳𑀁, 𑀏𑀯𑀁 𑀲𑀩𑁆𑀩𑀲𑀢𑁆𑀢𑀸𑀦𑀦𑁆𑀢𑀺 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀁 𑀧𑀓𑀸𑀲𑀺𑀢𑀁 𑀳𑁄𑀢𑀺.

𑀲𑀫𑁆𑀫𑀲𑀦𑀓𑀸𑀮𑀯𑀲𑁂𑀦 𑀧𑀦 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀬𑀲𑁆𑀫𑀸 𑀇𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀁, 𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀁, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸, 𑀏𑀯𑀁 𑀬𑀤𑀺 𑀅𑀬𑀁 𑀅𑀢𑁆𑀢𑀸 𑀦𑀸𑀫 𑀦𑀸𑀧𑀺 𑀔𑀦𑁆𑀥𑀧𑀜𑁆𑀘𑀓𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀦𑁄 𑀘𑀲𑁆𑀲 𑀦𑁄 𑀘 𑀲𑀺𑀬𑀸 𑀦 𑀪𑀯𑁂𑀬𑁆𑀬, 𑀏𑀯𑀁, 𑀪𑀦𑁆𑀢𑁂, 𑀦𑁄 𑀘 𑀫𑁂 𑀲𑀺𑀬𑀸 𑀫𑀫 𑀲𑀦𑁆𑀢𑀓𑀁 𑀦𑀸𑀫 𑀓𑀺𑀜𑁆𑀘𑀺 𑀦 𑀪𑀯𑁂𑀬𑁆𑀬. 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑀺 𑀅𑀢𑁆𑀢𑀦𑀺𑀬𑁂 𑀪𑀯𑀺𑀢𑀩𑁆𑀩𑀁 𑀬𑀣𑀸 𑀘𑀺𑀤𑀁 𑀦𑀸𑀫𑀭𑀽𑀧𑀁 𑀏𑀢𑀭𑀳𑀺 𑀘 𑀅𑀢𑀻𑀢𑁂 𑀘 𑀅𑀢𑁆𑀢𑀢𑁆𑀢𑀦𑀺𑀬𑀁 𑀲𑀼𑀜𑁆𑀜𑀁, 𑀏𑀯𑀁 𑀦 𑀪𑀯𑀺𑀲𑁆𑀲𑀢𑀺 𑀦 𑀫𑁂 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂𑀧𑀺 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀢𑀸 𑀦𑀸𑀫 𑀦 𑀓𑁄𑀘𑀺 𑀦 𑀫𑁂 𑀪𑀯𑀺𑀲𑁆𑀲𑀢𑀺 𑀦 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀏𑀯 𑀓𑀺𑀜𑁆𑀘𑀺 𑀧𑀮𑀺𑀩𑁄𑀥𑀝𑁆𑀞𑀸𑀦𑀺𑀬𑀁 𑀦 𑀫𑁂 𑀪𑀯𑀺𑀲𑁆𑀲𑀢𑀺 𑀆𑀬𑀢𑀺𑀫𑁆𑀧𑀺 𑀅𑀢𑁆𑀢𑀦𑀺𑀬𑀁 𑀦𑀸𑀫 𑀦 𑀫𑁂 𑀓𑀺𑀜𑁆𑀘𑀺 𑀪𑀯𑀺𑀲𑁆𑀲𑀢𑀻𑀢𑀺. 𑀇𑀫𑀺𑀦𑀸 𑀢𑀻𑀲𑀼 𑀓𑀸𑀮𑁂𑀲𑀼 ‘‘𑀅𑀳’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 ‘‘𑀫𑀫’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀘 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀘𑀢𑀼𑀓𑁆𑀓𑁄𑀝𑀺𑀓𑀸 𑀲𑀼𑀜𑁆𑀜𑀢𑀸 𑀧𑀓𑀸𑀲𑀺𑀢𑀸 𑀳𑁄𑀢𑀺.

𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀺 𑀢𑀢𑁆𑀣 𑀲𑁄𑀢𑀺 𑀏𑀯𑀁 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀁 𑀲𑀼𑀜𑁆𑀜𑀢𑀁 𑀢𑀢𑁆𑀣 𑀲𑀗𑁆𑀔𑀸𑀭𑀕𑀢𑁂 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀅𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀸𑀯𑀺𑀳𑀸𑀭𑀯𑀲𑁂𑀦 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀻 𑀲𑀫𑀸𑀦𑁄. 𑀓𑀸𑀮𑁂𑀦𑁂𑀯 𑀢𑀭𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀲𑁄 𑀏𑀯𑀁 𑀯𑀺𑀧𑀲𑁆𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑁄 𑀬𑁄𑀕𑀸𑀯𑀘𑀭𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑀕𑀢𑀓𑀸𑀮𑁂𑀦 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁂𑀦 𑀖𑀝𑀺𑀢𑀓𑀸𑀮𑁂𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑁂𑀦 𑀲𑀓𑀮𑀲𑁆𑀲 𑀪𑀯𑀢𑁆𑀢𑀬𑀲𑁆𑀲 𑀲𑀁𑀢𑀦𑀦𑀢𑁄 𑀯𑀺𑀲𑀢𑁆𑀢𑀺𑀓𑀸𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀢𑀭𑁂𑀬𑁆𑀬, 𑀯𑀺𑀢𑀭𑀺𑀢𑁆𑀯𑀸 𑀢𑀲𑁆𑀲𑀸 𑀧𑀭𑀢𑀻𑀭𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀪𑀕𑀯𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀅𑀝𑁆𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀤𑀧𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀦𑀯𑀫𑁂 𑀫𑀮𑁆𑀮𑁂𑀲𑀽𑀢𑀺 𑀫𑀮𑁆𑀮𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀯𑀲𑁂𑀦 ‘‘𑀫𑀮𑁆𑀮𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀲𑀼 𑀫𑀮𑁆𑀮𑁂𑀲𑀼, 𑀬𑀁 𑀮𑁄𑀓𑁂 ‘‘𑀫𑀮𑁆𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀘𑀺 𑀧𑀦 ‘‘𑀫𑀸𑀮𑁂𑀲𑀽’’𑀢𑀺 𑀧𑀞𑀦𑁆𑀢𑀺. 𑀘𑀸𑀭𑀺𑀬𑀁 𑀘𑀭𑀫𑀸𑀦𑁄𑀢𑀺 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀫𑀳𑀸𑀫𑀡𑁆𑀟𑀮𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁄. 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸𑀢𑀺 𑀅𑀧𑀭𑀺𑀘𑁆𑀙𑁂𑀤𑀕𑀼𑀡𑁂𑀦 𑀫𑀳𑀦𑁆𑀢𑁂𑀦 𑀲𑀫𑀡𑀕𑀡𑁂𑀦. 𑀢𑀤𑀸 𑀳𑀺 𑀪𑀕𑀯𑀢𑁄 𑀫𑀳𑀸𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀣𑀽𑀡𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀫𑀚𑁆𑀛𑀺𑀫𑀤𑁂𑀲𑀲𑁆𑀲 𑀅𑀯𑀥𑀺𑀝𑁆𑀞𑀸𑀦𑁂 𑀫𑀮𑁆𑀮𑀤𑁂𑀲𑁂 𑀣𑀽𑀡𑀦𑀸𑀫𑀓𑁄 𑀩𑁆𑀭𑀸𑀳𑁆𑀫𑀡𑀩𑀳𑀼𑀮𑀢𑀸𑀬 𑀩𑁆𑀭𑀸𑀳𑁆𑀫𑀡𑀕𑀸𑀫𑁄. 𑀢𑀤𑀯𑀲𑀭𑀻𑀢𑀺 𑀢𑀁 𑀅𑀯𑀲𑀭𑀺, 𑀣𑀽𑀡𑀕𑀸𑀫𑀫𑀕𑁆𑀕𑀁 𑀧𑀸𑀧𑀼𑀡𑀻𑀢𑀺 𑀅𑀢𑁆𑀣𑁄. 𑀅𑀲𑁆𑀲𑁄𑀲𑀼𑀦𑁆𑀢𑀺 𑀲𑀼𑀡𑀺𑀁𑀲𑀼, 𑀲𑁄𑀢𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀯𑀘𑀦𑀦𑀺𑀕𑁆𑀖𑁄𑀲𑀸𑀦𑀼𑀲𑀸𑀭𑁂𑀦 𑀚𑀸𑀦𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀔𑁄𑀢𑀺 𑀧𑀤𑀧𑀽𑀭𑀡𑁂, 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀢𑀢𑁆𑀣 𑀅𑀯𑀥𑀸𑀭𑀡𑀢𑁆𑀣𑁂𑀦 𑀅𑀲𑁆𑀲𑁄𑀲𑀼𑀁𑀬𑁂𑀯, 𑀦 𑀢𑁂𑀲𑀁 𑀲𑀯𑀦𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀤𑀧𑀽𑀭𑀡𑁂𑀦 𑀧𑀤𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑁆𑀢𑀫𑀢𑁆𑀢𑀫𑁂𑀯. 𑀣𑀽𑀡𑁂𑀬𑁆𑀬𑀓𑀸𑀢𑀺 𑀣𑀽𑀡𑀕𑀸𑀫𑀯𑀸𑀲𑀺𑀦𑁄. 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀁 𑀅𑀡𑀦𑁆𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑀸, 𑀫𑀦𑁆𑀢𑁂 𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀳𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀩𑁆𑀩𑀘𑀦𑀁, 𑀅𑀭𑀺𑀬𑀸 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀕𑀳𑀧𑀢𑀺𑀓𑀸𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑁂 𑀯𑀚𑁆𑀚𑁂𑀢𑁆𑀯𑀸 𑀬𑁂 𑀓𑁂𑀘𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀸 𑀯𑀼𑀘𑁆𑀘𑀦𑁆𑀢𑀺, 𑀯𑀺𑀲𑁂𑀲𑀢𑁄 𑀯𑁂𑀲𑁆𑀲𑀸. 𑀩𑁆𑀭𑀸𑀳𑁆𑀫𑀡𑀸 𑀘 𑀕𑀳𑀧𑀢𑀺𑀓𑀸 𑀘 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸.

𑀇𑀤𑀸𑀦𑀺 𑀬𑀫𑀢𑁆𑀣𑀁 𑀢𑁂 𑀅𑀲𑁆𑀲𑁄𑀲𑀼𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀺𑀢𑀧𑀸𑀧𑀢𑁆𑀢𑀸 ‘‘𑀲𑀫𑀡𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀫𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁩𑁪). 𑀪𑀕𑀯𑀸 𑀘 𑀅𑀦𑀼𑀢𑁆𑀢𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀲𑀫𑀺𑀢𑀧𑀸𑀧𑁄. 𑀢𑁂𑀦𑀲𑁆𑀲 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑀫𑁂𑀢𑀁 𑀦𑀸𑀫𑀁, 𑀬𑀤𑀺𑀤𑀁 𑀲𑀫𑀡𑁄𑀢𑀺. 𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀢𑁆𑀣𑁂 𑀦𑀺𑀧𑀸𑀢𑁄. 𑀪𑁄𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀸𑀦𑀁 𑀚𑀸𑀢𑀺𑀲𑀫𑀼𑀤𑀸𑀕𑀢𑀁 𑀆𑀮𑀧𑀦𑀫𑀢𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄’’𑀢𑀺 (𑀥. 𑀧. 𑁩𑁯𑁬). 𑀕𑁄𑀢𑀫𑁄𑀢𑀺 𑀕𑁄𑀢𑁆𑀢𑀯𑀲𑁂𑀦 𑀪𑀕𑀯𑀢𑁄 𑀧𑀭𑀺𑀓𑀺𑀢𑁆𑀢𑀦𑀁. 𑀢𑀲𑁆𑀫𑀸 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄’’𑀢𑀺 𑀲𑀫𑀡𑁄 𑀓𑀺𑀭, 𑀪𑁄, 𑀕𑁄𑀢𑀫𑀕𑁄𑀢𑁆𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀇𑀤𑀁 𑀧𑀦 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁. 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀓𑁆𑀔𑀻𑀡𑀁𑀬𑁂𑀯 𑀢𑀁 𑀓𑀼𑀮𑀁 𑀧𑀳𑀸𑀬 𑀦𑁂𑀓𑁆𑀔𑀫𑁆𑀫𑀸𑀥𑀺𑀕𑀫𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀤𑀧𑀸𑀦𑀁 𑀢𑀺𑀡𑀲𑁆𑀲 𑀘 𑀪𑀼𑀲𑀲𑁆𑀲 𑀘 𑀬𑀸𑀯 𑀫𑀼𑀔𑀢𑁄 𑀧𑀽𑀭𑁂𑀲𑀼𑀦𑁆𑀢𑀺 𑀧𑀸𑀦𑀻𑀬𑀓𑀽𑀧𑀁 𑀢𑀺𑀡𑁂𑀦 𑀘 𑀪𑀼𑀲𑁂𑀦 𑀘 𑀫𑀼𑀔𑀧𑁆𑀧𑀫𑀸𑀡𑁂𑀦 𑀯𑀟𑁆𑀠𑁂𑀲𑀼𑀁, 𑀢𑀺𑀡𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀽𑀧𑀁 𑀧𑀺𑀤𑀳𑀺𑀁𑀲𑀽𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀓𑀺𑀭 𑀕𑀸𑀫𑀲𑁆𑀲 𑀩𑀳𑀺 𑀪𑀕𑀯𑀢𑁄 𑀆𑀕𑀫𑀦𑀫𑀕𑁆𑀕𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀺𑀪𑁄𑀕𑀪𑀽𑀢𑁄 𑀏𑀓𑁄 𑀉𑀤𑀧𑀸𑀦𑁄 𑀅𑀳𑁄𑀲𑀺. 𑀢𑀁 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀓𑀽𑀧𑀢𑀴𑀸𑀓𑀸𑀤𑀻𑀦𑀺 𑀉𑀤𑀓𑀝𑁆𑀞𑀸𑀦𑀸𑀦𑀺 𑀢𑀤𑀸 𑀯𑀺𑀲𑀼𑀓𑁆𑀔𑀸𑀦𑀺 𑀦𑀺𑀭𑀼𑀤𑀓𑀸𑀦𑀺 𑀅𑀳𑁂𑀲𑀼𑀁. 𑀅𑀣 𑀣𑀽𑀡𑁂𑀬𑁆𑀬𑀓𑀸 𑀭𑀢𑀦𑀢𑁆𑀢𑀬𑁂 𑀅𑀧𑁆𑀧𑀲𑀦𑁆𑀦𑀸 𑀫𑀘𑁆𑀙𑁂𑀭𑀧𑀓𑀢𑀸 𑀪𑀕𑀯𑀢𑁄 𑀆𑀕𑀫𑀦𑀁 𑀲𑀼𑀢𑁆𑀯𑀸 ‘‘𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀲𑀲𑀸𑀯𑀓𑁄 𑀇𑀫𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀁 𑀯𑀲𑁂𑀬𑁆𑀬, 𑀲𑀩𑁆𑀩𑀁 𑀇𑀫𑀁 𑀚𑀦𑀁 𑀅𑀢𑁆𑀢𑀦𑁄 𑀯𑀘𑀦𑁂 𑀞𑀧𑁂𑀬𑁆𑀬, 𑀢𑀢𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄 𑀧𑀢𑀺𑀝𑁆𑀞𑀁 𑀦 𑀮𑀪𑁂𑀬𑁆𑀬𑀸’’𑀢𑀺 𑀢𑀢𑁆𑀣 𑀪𑀕𑀯𑀢𑁄 𑀅𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀦𑁆𑀢𑀸 ‘‘𑀇𑀫𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑀢𑁆𑀣 𑀉𑀤𑀓𑀁 𑀦𑀢𑁆𑀣𑀺, 𑀅𑀫𑀼𑀁 𑀉𑀤𑀧𑀸𑀦𑀁 𑀅𑀧𑀭𑀺𑀪𑁄𑀕𑀁 𑀓𑀭𑀺𑀲𑁆𑀲𑀸𑀫, 𑀏𑀯𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀲𑀸𑀯𑀓𑁄 𑀇𑀫𑀁 𑀕𑀸𑀫𑀁 𑀦 𑀧𑀯𑀺𑀲𑀺𑀲𑁆𑀲𑀢𑀻’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀲𑀩𑁆𑀩𑁂 𑀕𑀸𑀫𑀯𑀸𑀲𑀺𑀦𑁄 𑀲𑀢𑁆𑀢𑀸𑀳𑀲𑁆𑀲 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀘𑀸𑀝𑀺𑀆𑀤𑀻𑀦𑀺 𑀧𑀽𑀭𑁂𑀢𑁆𑀯𑀸 𑀉𑀤𑀧𑀸𑀦𑀁 𑀢𑀺𑀡𑁂𑀦 𑀘 𑀪𑀼𑀲𑁂𑀦 𑀘 𑀧𑀺𑀤𑀳𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀤𑀧𑀸𑀦𑀁 𑀢𑀺𑀡𑀲𑁆𑀲 𑀘 𑀪𑀼𑀲𑀲𑁆𑀲 𑀘 𑀬𑀸𑀯 𑀫𑀼𑀔𑀢𑁄 𑀧𑀽𑀭𑁂𑀲𑀼𑀁, ‘𑀫𑀸 𑀢𑁂 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀧𑀸𑀦𑀻𑀬𑀁 𑀅𑀧𑀁𑀲𑀽’’’𑀢𑀺.

𑀢𑀢𑁆𑀣 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸𑀢𑀺 𑀫𑀼𑀡𑁆𑀟𑁂 ‘‘𑀫𑀼𑀡𑁆𑀟𑀸’’𑀢𑀺 𑀲𑀫𑀡𑁂 ‘‘𑀲𑀫𑀡𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑁂𑀬𑁆𑀬, 𑀢𑁂 𑀧𑀦 𑀔𑀼𑀁𑀲𑀦𑀸𑀥𑀺𑀧𑁆𑀧𑀸𑀬𑁂𑀦 𑀳𑀻𑀴𑁂𑀦𑁆𑀢𑀸 𑀏𑀯𑀫𑀸𑀳𑀁𑀲𑀼. 𑀫𑀸𑀢𑀺 𑀧𑀝𑀺𑀲𑁂𑀥𑁂, 𑀫𑀸 𑀅𑀧𑀁𑀲𑀼 𑀫𑀸 𑀧𑀺𑀯𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫𑀸𑀢𑀺 𑀫𑀕𑁆𑀕𑀢𑁄 𑀅𑀧𑀲𑀓𑁆𑀓𑀺𑀢𑁆𑀯𑀸. 𑀏𑀢𑀫𑁆𑀳𑀸𑀢𑀺 𑀬𑁄 𑀉𑀤𑀧𑀸𑀦𑁄 𑀢𑁂𑀳𑀺 𑀢𑀣𑀸 𑀓𑀢𑁄, 𑀢𑀫𑁂𑀯 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳. 𑀓𑀺𑀁 𑀧𑀦 𑀪𑀕𑀯𑀸 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀧𑁆𑀧𑀓𑀸𑀭𑀁 𑀅𑀦𑀸𑀯𑀚𑁆𑀚𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀏𑀢𑀫𑁆𑀳𑀸 𑀉𑀤𑀧𑀸𑀦𑀸 𑀧𑀸𑀦𑀻𑀬𑀁 𑀆𑀳𑀭𑀸’’𑀢𑀺, 𑀉𑀤𑀸𑀳𑀼 𑀆𑀯𑀚𑁆𑀚𑀺𑀢𑁆𑀯𑀸 𑀚𑀸𑀦𑀦𑁆𑀢𑁄𑀢𑀺? 𑀚𑀸𑀦𑀦𑁆𑀢𑁄 𑀏𑀯 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀢𑁂 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀸𑀢𑀼𑀁 𑀏𑀯𑀫𑀸𑀳, 𑀦 𑀧𑀸𑀦𑀻𑀬𑀁 𑀧𑀸𑀢𑀼𑀓𑀸𑀫𑁄. 𑀢𑁂𑀦𑁂𑀯𑁂𑀢𑁆𑀣 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑁂 𑀯𑀺𑀬 ‘‘𑀧𑀺𑀧𑀸𑀲𑀺𑀢𑁄𑀲𑁆𑀫𑀻’’𑀢𑀺 (𑀤𑀻. 𑀦𑀺. 𑁨.𑁧𑁯𑁧) 𑀦 𑀯𑀼𑀢𑁆𑀢𑀁. 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀧𑀦 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀅𑀚𑀸𑀦𑀦𑁆𑀢𑁄 𑀣𑀽𑀡𑁂𑀬𑁆𑀬𑀓𑁂𑀳𑀺 𑀓𑀢𑀁 𑀯𑀺𑀧𑁆𑀧𑀓𑀸𑀭𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀇𑀤𑀸𑀦𑀺 𑀲𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀇𑀤𑀸𑀦𑀻𑀢𑀺 𑀅𑀥𑀼𑀦𑀸, 𑀅𑀫𑁆𑀳𑀸𑀓𑀁 𑀆𑀕𑀫𑀦𑀯𑁂𑀮𑀸𑀬𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀲𑁄, 𑀪𑀦𑁆𑀢𑁂, 𑀉𑀤𑀧𑀸𑀦𑁄𑀢𑀺 𑀧𑀞𑀦𑁆𑀢𑀺. 𑀣𑁂𑀭𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 ‘‘𑀦 𑀔𑁄 𑀢𑀣𑀸𑀕𑀢𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀘𑁆𑀘𑀦𑀻𑀓𑀸 𑀓𑀸𑀢𑀩𑁆𑀩𑀸, 𑀓𑀸𑀭𑀡𑀁 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀤𑀲𑁆𑀲𑀺𑀦𑀸’’𑀢𑀺 𑀫𑀳𑀸𑀭𑀸𑀚𑀤𑀢𑁆𑀢𑀺𑀬𑀁 𑀪𑀕𑀯𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀤𑀧𑀸𑀦𑀁 𑀅𑀕𑀫𑀸𑀲𑀺. 𑀕𑀘𑁆𑀙𑀦𑁆𑀢𑁂 𑀣𑁂𑀭𑁂 𑀉𑀤𑀧𑀸𑀦𑁂 𑀉𑀤𑀓𑀁 𑀧𑀭𑀺𑀧𑀼𑀡𑁆𑀡𑀁 𑀳𑀼𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀲𑀫𑀦𑁆𑀢𑀢𑁄 𑀲𑀦𑁆𑀤𑀢𑀺, 𑀲𑀩𑁆𑀩𑀁 𑀢𑀺𑀡𑀁 𑀪𑀼𑀲𑀜𑁆𑀘 𑀉𑀧𑁆𑀮𑀯𑀺𑀢𑁆𑀯𑀸 𑀲𑀬𑀫𑁂𑀯 𑀅𑀧𑀕𑀘𑁆𑀙𑀺. 𑀢𑁂𑀦 𑀘 𑀲𑀦𑁆𑀤𑀫𑀸𑀦𑁂𑀦 𑀲𑀮𑀺𑀮𑁂𑀦 𑀉𑀧𑀭𑀽𑀧𑀭𑀺 𑀯𑀟𑁆𑀠𑀦𑁆𑀢𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀲𑀩𑁆𑀩𑁂𑀯 𑀧𑁄𑀓𑁆𑀔𑀭𑀡𑀻𑀆𑀤𑀬𑁄 𑀚𑀮𑀸𑀲𑀬𑀸 𑀯𑀺𑀲𑀼𑀓𑁆𑀔𑀸 𑀧𑀭𑀺𑀧𑀽𑀭𑀺𑀁𑀲𑀼, 𑀢𑀣𑀸 𑀧𑀭𑀺𑀔𑀸𑀓𑀼𑀲𑀼𑀩𑁆𑀪𑀦𑀺𑀦𑁆𑀦𑀸𑀤𑀻𑀦𑀺 𑀘. 𑀲𑀩𑁆𑀩𑁄 𑀕𑀸𑀫𑀧𑁆𑀧𑀤𑁂𑀲𑁄 𑀫𑀳𑁄𑀖𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 𑀫𑀳𑀸𑀯𑀲𑁆𑀲𑀓𑀸𑀮𑁂 𑀯𑀺𑀬 𑀅𑀳𑁄𑀲𑀺. 𑀓𑀼𑀫𑀼𑀤𑀼𑀧𑁆𑀧𑀮𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀸𑀤𑀻𑀦𑀺 𑀚𑀮𑀚𑀧𑀼𑀧𑁆𑀨𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀓𑀲𑀫𑀸𑀦𑀸𑀦𑀺 𑀉𑀤𑀓𑀁 𑀲𑀜𑁆𑀙𑀸𑀤𑀺𑀁𑀲𑀼. 𑀲𑀭𑁂𑀲𑀼 𑀳𑀁𑀲𑀓𑁄𑀜𑁆𑀘𑀘𑀓𑁆𑀓𑀯𑀸𑀓𑀓𑀸𑀭𑀡𑁆𑀟𑀯𑀩𑀓𑀸𑀤𑀬𑀸 𑀏 𑀉𑀤𑀓𑀲𑀓𑀼𑀡𑀺𑀓𑀸 𑀯𑀲𑁆𑀲𑀫𑀸𑀦𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀁𑀲𑀼. 𑀣𑀽𑀡𑁂𑀬𑁆𑀬𑀓𑀸 𑀢𑀁 𑀫𑀳𑁄𑀖𑀁 𑀢𑀣𑀸 𑀉𑀢𑁆𑀢𑀭𑀦𑁆𑀢𑀁 𑀲𑀫𑀦𑁆𑀢𑀢𑁄 𑀯𑀻𑀘𑀺𑀢𑀭𑀗𑁆𑀕𑀲𑀫𑀸𑀓𑀼𑀮𑀁 𑀧𑀭𑀺𑀬𑀦𑁆𑀢𑀢𑁄 𑀲𑀫𑀼𑀝𑁆𑀞𑀳𑀫𑀸𑀦𑀁 𑀭𑀼𑀘𑀺𑀭𑀁 𑀨𑁂𑀡𑀩𑀼𑀩𑁆𑀩𑀼𑀴𑀓𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀏𑀯𑀁 𑀲𑀫𑁆𑀫𑀦𑁆𑀢𑁂𑀲𑀼𑀁 ‘‘𑀫𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀤𑀓𑀼𑀧𑀘𑁆𑀙𑁂𑀤𑀁 𑀓𑀸𑀢𑀼𑀁 𑀯𑀸𑀬𑀫𑀺𑀫𑁆𑀳𑀸, 𑀅𑀬𑀁 𑀧𑀦 𑀫𑀳𑁄𑀖𑁄 𑀢𑀲𑁆𑀲 𑀆𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀅𑀪𑀺𑀯𑀟𑁆𑀠𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀔𑁄 𑀅𑀬𑀁 𑀢𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄. 𑀫𑀳𑀺𑀤𑁆𑀥𑀺𑀓𑁄 𑀳𑀺 𑀲𑁄 𑀫𑀳𑀸𑀦𑀼𑀪𑀸𑀯𑁄. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀣𑀸 𑀬𑀁 𑀫𑀳𑁄𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀕𑀸𑀫𑀫𑁆𑀧𑀺 𑀑𑀢𑁆𑀣𑀭𑁂𑀬𑁆𑀬. 𑀳𑀦𑁆𑀤 𑀫𑀬𑀁 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀅𑀘𑁆𑀘𑀬𑀁 𑀤𑁂𑀲𑁂𑀦𑁆𑀢𑀸 𑀔𑀫𑀸𑀧𑁂𑀬𑁆𑀬𑀸𑀫𑀸’’𑀢𑀺.

𑀢𑁂 𑀲𑀩𑁆𑀩𑁂𑀯 𑀏𑀓𑀚𑁆𑀛𑀸𑀲𑀬𑀸 𑀳𑀼𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 𑀕𑀡𑀻𑀪𑀽𑀢𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀲𑀼𑀁, 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀲𑀼𑀁. 𑀏𑀯𑀁 𑀧𑀦 𑀓𑀢𑁆𑀯𑀸 𑀲𑀩𑁆𑀩𑁂𑀯 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀥 𑀫𑀬𑀁, 𑀪𑁄 𑀕𑁄𑀢𑀫, 𑀪𑁄𑀢𑁄 𑀘𑁂𑀯 𑀕𑁄𑀢𑀫𑀲𑁆𑀲 𑀕𑁄𑀢𑀫𑀲𑀸𑀯𑀓𑀸𑀦𑀜𑁆𑀘 𑀉𑀤𑀓𑀧𑁆𑀧𑀝𑀺𑀲𑁂𑀥𑀁 𑀓𑀸𑀭𑀬𑀺𑀫𑁆𑀳, 𑀅𑀫𑀼𑀓𑀲𑁆𑀫𑀺𑀁 𑀉𑀤𑀧𑀸𑀦𑁂 𑀢𑀺𑀡𑀜𑁆𑀘 𑀪𑀼𑀲𑀜𑁆𑀘 𑀧𑀓𑁆𑀔𑀺𑀧𑀺𑀫𑁆𑀳. 𑀲𑁄 𑀧𑀦 𑀉𑀤𑀧𑀸𑀦𑁄 𑀅𑀘𑁂𑀢𑀦𑁄𑀧𑀺 𑀲𑀫𑀸𑀦𑁄 𑀲𑀘𑁂𑀢𑀦𑁄 𑀯𑀺𑀬 𑀪𑁄𑀢𑁄 𑀕𑀼𑀡𑀁 𑀚𑀸𑀦𑀦𑁆𑀢𑁄 𑀯𑀺𑀬 𑀲𑀬𑀫𑁂𑀯 𑀲𑀩𑁆𑀩𑀁 𑀢𑀺𑀡𑀁 𑀪𑀼𑀲𑀁 𑀅𑀧𑀦𑁂𑀢𑁆𑀯𑀸 𑀲𑀼𑀯𑀺𑀲𑀼𑀤𑁆𑀥𑁄 𑀚𑀸𑀢𑁄, 𑀲𑀩𑁆𑀩𑁄𑀧𑀺 𑀘𑁂𑀢𑁆𑀣 𑀦𑀺𑀦𑁆𑀦𑀧𑁆𑀧𑀤𑁂𑀲𑁄 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀧𑀭𑀺𑀧𑀼𑀡𑁆𑀡𑁄 𑀭𑀫𑀡𑀻𑀬𑁄𑀯 𑀚𑀸𑀢𑁄, 𑀉𑀤𑀓𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑀸 𑀧𑀭𑀺𑀢𑀼𑀝𑁆𑀞𑀸. 𑀫𑀬𑀁 𑀧𑀦 𑀫𑀦𑀼𑀲𑁆𑀲𑀸𑀧𑀺 𑀲𑀫𑀸𑀦𑀸 𑀪𑁄𑀢𑁄 𑀕𑀼𑀡𑁂 𑀦 𑀚𑀸𑀦𑀺𑀫𑁆𑀳, 𑀬𑁂 𑀫𑀬𑀁 𑀏𑀯𑀁 𑀅𑀓𑀭𑀺𑀫𑁆𑀳, 𑀲𑀸𑀥𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀓𑀭𑁄𑀢𑀼, 𑀬𑀣𑀸𑀬𑀁 𑀫𑀳𑁄𑀖𑁄 𑀇𑀫𑀁 𑀕𑀸𑀫𑀁 𑀦 𑀑𑀢𑁆𑀣𑀭𑁂𑀬𑁆𑀬, 𑀅𑀘𑁆𑀘𑀬𑁄 𑀦𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁, 𑀢𑀁 𑀦𑁄 𑀪𑀯𑀁 𑀕𑁄𑀢𑀫𑁄 𑀅𑀘𑁆𑀘𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀅𑀘𑁆𑀘𑀬𑀁 𑀤𑁂𑀲𑁂𑀲𑀼𑀁. 𑀪𑀕𑀯𑀸𑀧𑀺 ‘‘𑀢𑀕𑁆𑀖 𑀢𑀼𑀫𑁆𑀳𑁂 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁, 𑀢𑀁 𑀯𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺 𑀢𑁂𑀲𑀁 𑀅𑀘𑁆𑀘𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀢𑀁 𑀜𑀢𑁆𑀯𑀸 𑀉𑀢𑁆𑀢𑀭𑀺 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀭𑀡𑀸𑀤𑀻𑀲𑀼 𑀧𑀢𑀺𑀝𑁆𑀞𑀺𑀢𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀲𑀁 𑀧𑀦 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀁𑀬𑁂𑀯 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀧𑀢𑁆𑀢𑁂𑀦 𑀧𑀸𑀦𑀻𑀬𑀁 𑀆𑀤𑀸𑀬 𑀪𑀕𑀯𑀢𑁄 𑀉𑀧𑀦𑀸𑀫𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀯𑀁, 𑀪𑀦𑁆𑀢𑁂𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄’’𑀢𑀺𑀆𑀤𑀺.

𑀢𑀢𑁆𑀣 𑀫𑀼𑀔𑀢𑁄 𑀑𑀯𑀫𑀺𑀢𑁆𑀯𑀸𑀢𑀺 𑀲𑀩𑁆𑀩𑀁 𑀢𑀁 𑀢𑀺𑀡𑀸𑀤𑀺𑀁 𑀫𑀼𑀔𑁂𑀦 𑀙𑀟𑁆𑀟𑁂𑀢𑁆𑀯𑀸. 𑀯𑀺𑀲𑁆𑀲𑀦𑁆𑀤𑀦𑁆𑀢𑁄 𑀫𑀜𑁆𑀜𑁂𑀢𑀺 𑀧𑀼𑀩𑁆𑀩𑁂 𑀤𑀻𑀖𑀭𑀚𑁆𑀚𑀼𑀓𑁂𑀦 𑀉𑀤𑀧𑀸𑀦𑁂𑀦 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀉𑀤𑀓𑁄𑀖𑁄 𑀪𑀕𑀯𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀕𑀢𑀓𑀸𑀮𑁂 𑀫𑀼𑀔𑁂𑀦 𑀯𑀺𑀲𑁆𑀲𑀦𑁆𑀤𑀦𑁆𑀢𑁄 𑀯𑀺𑀬 𑀲𑀫𑀢𑀺𑀢𑁆𑀢𑀺𑀓𑁄 𑀓𑀸𑀓𑀧𑁂𑀬𑁆𑀬𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀇𑀤𑀜𑁆𑀘 𑀣𑁂𑀭𑀲𑁆𑀲 𑀕𑀢𑀓𑀸𑀮𑁂 𑀉𑀤𑀓𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀲𑀓𑀮𑀁 𑀦𑀺𑀦𑁆𑀦𑀝𑁆𑀞𑀸𑀦𑀁 𑀉𑀤𑀓𑁂𑀦 𑀧𑀭𑀺𑀧𑀼𑀡𑁆𑀡𑀁 𑀅𑀳𑁄𑀲𑀻𑀢𑀺. 𑀅𑀬𑀁 𑀧𑀦𑀺𑀤𑁆𑀥𑀺 𑀦 𑀩𑀼𑀤𑁆𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑁂𑀦, 𑀦𑀸𑀧𑀺 𑀤𑁂𑀯𑀸𑀦𑀼𑀪𑀸𑀯𑁂𑀦, 𑀅𑀣 𑀔𑁄 𑀪𑀕𑀯𑀢𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀧𑀭𑀺𑀢𑁆𑀢𑀤𑁂𑀲𑀦𑀢𑁆𑀣𑀁 𑀭𑀸𑀚𑀕𑀳𑀢𑁄 𑀯𑁂𑀲𑀸𑀮𑀺𑀕𑀫𑀦𑁂 𑀯𑀺𑀬. 𑀓𑁂𑀘𑀺 𑀧𑀦 ‘‘𑀣𑀽𑀡𑁂𑀬𑁆𑀬𑀓𑀸𑀦𑀁 𑀪𑀕𑀯𑀢𑀺 𑀧𑀲𑀸𑀤𑀚𑀦𑀦𑀢𑁆𑀣𑀁 𑀢𑁂𑀲𑀁 𑀅𑀢𑁆𑀣𑀓𑀸𑀫𑀸𑀳𑀺 𑀤𑁂𑀯𑀢𑀸𑀳𑀺 𑀓𑀢’’𑀦𑁆𑀢𑀺. 𑀅𑀧𑀭𑁂 ‘‘𑀉𑀤𑀧𑀸𑀦𑀲𑁆𑀲 𑀳𑁂𑀝𑁆𑀞𑀸 𑀯𑀲𑀦𑀓𑀦𑀸𑀕𑀭𑀸𑀚𑀸 𑀏𑀯𑀫𑀓𑀸𑀲𑀻’’𑀢𑀺. 𑀲𑀩𑁆𑀩𑀁 𑀢𑀁 𑀅𑀓𑀸𑀭𑀡𑀁, 𑀬𑀣𑀸 𑀪𑀕𑀯𑀢𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦𑀬𑁂𑀯 𑀢𑀣𑀸 𑀉𑀤𑀓𑀼𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀤𑀻𑀧𑀺𑀢𑀢𑁆𑀢𑀸.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀅𑀥𑀺𑀝𑁆𑀞𑀸𑀦𑁂𑀦 𑀯𑀺𑀦𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀦𑀺𑀧𑁆𑀨𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀓𑀺𑀁 𑀓𑀬𑀺𑀭𑀸 𑀉𑀤𑀧𑀸𑀦𑁂𑀦, 𑀆𑀧𑀸 𑀘𑁂 𑀲𑀩𑁆𑀩𑀤𑀸 𑀲𑀺𑀬𑀼𑀦𑁆𑀢𑀺 𑀬𑀲𑁆𑀲 𑀲𑀩𑁆𑀩𑀓𑀸𑀮𑀁 𑀲𑀩𑁆𑀩𑀢𑁆𑀣 𑀘 𑀆𑀧𑀸 𑀘𑁂 𑀬𑀤𑀺 𑀲𑀺𑀬𑀼𑀁 𑀬𑀤𑀺 𑀉𑀧𑀮𑀩𑁆𑀪𑁂𑀬𑁆𑀬𑀼𑀁 𑀬𑀤𑀺 𑀆𑀓𑀗𑁆𑀔𑀸𑀫𑀢𑁆𑀢𑀧𑀝𑀺𑀩𑀤𑁆𑀥𑁄, 𑀢𑁂𑀲𑀁 𑀮𑀸𑀪𑁄, 𑀢𑁂𑀦 𑀉𑀤𑀧𑀸𑀦𑁂𑀦 𑀓𑀺𑀁 𑀓𑀬𑀺𑀭𑀸 𑀓𑀺𑀁 𑀓𑀭𑁂𑀬𑁆𑀬, 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀬 𑀫𑀽𑀮𑀢𑁄 𑀙𑁂𑀢𑁆𑀯𑀸, 𑀓𑀺𑀲𑁆𑀲 𑀧𑀭𑀺𑀬𑁂𑀲𑀦𑀁 𑀘𑀭𑁂𑀢𑀺 𑀬𑀸𑀬 𑀢𑀡𑁆𑀳𑀸𑀬 𑀯𑀺𑀦𑀺𑀩𑀤𑁆𑀥𑀸 𑀲𑀢𑁆𑀢𑀸 𑀅𑀓𑀢𑀧𑀼𑀜𑁆𑀜𑀸 𑀳𑀼𑀢𑁆𑀯𑀸 𑀇𑀘𑁆𑀙𑀺𑀢𑀸𑀮𑀸𑀪𑀤𑀼𑀓𑁆𑀔𑁂𑀦 𑀯𑀺𑀳𑀜𑁆𑀜𑀦𑁆𑀢𑀺, 𑀢𑀲𑁆𑀲𑀸 𑀢𑀡𑁆𑀳𑀸𑀬 𑀫𑀽𑀮𑀁, 𑀫𑀽𑀮𑁂 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 𑀫𑀸𑀤𑀺𑀲𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀓𑀺𑀲𑁆𑀲 𑀓𑁂𑀦 𑀓𑀸𑀭𑀡𑁂𑀦 𑀧𑀸𑀦𑀻𑀬𑀧𑀭𑀺𑀬𑁂𑀲𑀦𑀁, 𑀅𑀜𑁆𑀜𑀁 𑀯𑀸 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀁 𑀘𑀭𑁂𑀬𑁆𑀬. ‘‘𑀫𑀽𑀮𑀢𑁄 𑀙𑁂𑀢𑁆𑀢𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀡𑁆𑀳𑀸𑀬 𑀫𑀽𑀮𑀁 𑀫𑀽𑀮𑁂𑀬𑁂𑀯 𑀯𑀸 𑀙𑁂𑀤𑀓𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑀽𑀮𑀢𑁄 𑀙𑁂𑀢𑁆𑀢𑀸𑀢𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀢𑀡𑁆𑀳𑀸𑀬 𑀙𑁂𑀤𑀓𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀩𑁄𑀥𑀺𑀬𑀸 𑀫𑀽𑀮𑀪𑀽𑀢𑀫𑀳𑀸𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀫𑀺𑀢𑀁 𑀲𑀓𑀮𑀁 𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀅𑀢𑁆𑀢𑀦𑁄 𑀅𑀘𑀺𑀦𑁆𑀢𑁂𑀢𑁆𑀯𑀸 𑀮𑁄𑀓𑀳𑀺𑀢𑀢𑁆𑀣𑀫𑁂𑀯 𑀧𑀭𑀺𑀡𑀸𑀫𑀦𑀯𑀲𑁂𑀦 𑀧𑀭𑀺𑀧𑀽𑀭𑁂𑀦𑁆𑀢𑁄 𑀫𑀽𑀮𑀢𑁄 𑀧𑀪𑀼𑀢𑀺 𑀢𑀡𑁆𑀳𑀸𑀬 𑀙𑁂𑀢𑁆𑀢𑀸, 𑀲𑁄 𑀢𑀡𑁆𑀳𑀸𑀳𑁂𑀢𑀼𑀓𑀲𑁆𑀲 𑀇𑀘𑁆𑀙𑀺𑀢𑀸𑀮𑀸𑀪𑀲𑁆𑀲 𑀅𑀪𑀸𑀯𑀢𑁄 𑀓𑀺𑀲𑁆𑀲 𑀓𑁂𑀦 𑀓𑀸𑀭𑀡𑁂𑀦 𑀉𑀤𑀓𑀧𑀭𑀺𑀬𑁂𑀲𑀦𑀁 𑀘𑀭𑁂𑀬𑁆𑀬, 𑀇𑀫𑁂 𑀧𑀦 𑀣𑀽𑀡𑁂𑀬𑁆𑀬𑀓𑀸 𑀅𑀦𑁆𑀥𑀩𑀸𑀮𑀸 𑀇𑀫𑀁 𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑀸 𑀏𑀯𑀫𑀓𑀁𑀲𑀽𑀢𑀺.

𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀢𑁂𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀤𑀲𑀫𑁂 𑀭𑀜𑁆𑀜𑁄 𑀉𑀢𑁂𑀦𑀲𑁆𑀲𑀸𑀢𑀺 𑀉𑀢𑁂𑀦𑀲𑁆𑀲 𑀦𑀸𑀫 𑀭𑀜𑁆𑀜𑁄, 𑀬𑁄 ‘‘𑀯𑀚𑁆𑀚𑀺𑀭𑀸𑀚𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀉𑀬𑁆𑀬𑀸𑀦𑀕𑀢𑀲𑁆𑀲𑀸𑀢𑀺 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀉𑀬𑁆𑀬𑀸𑀦𑀁 𑀕𑀢𑀲𑁆𑀲. 𑀅𑀦𑀸𑀤𑀭𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁, ‘‘𑀅𑀦𑁆𑀢𑁂𑀧𑀼𑀭’’𑀦𑁆𑀢𑀺 𑀧𑀦 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁂𑀧𑁂𑀢𑀁 𑀲𑀸𑀫𑀺𑀯𑀘𑀦𑀁 𑀳𑁄𑀢𑀺. 𑀓𑀸𑀮𑀗𑁆𑀓𑀢𑀸𑀦𑀻𑀢𑀺 𑀅𑀕𑁆𑀕𑀺𑀤𑀟𑁆𑀠𑀸𑀦𑀺 𑀳𑀼𑀢𑁆𑀯𑀸 𑀫𑀢𑀸𑀦𑀺 𑀳𑁄𑀦𑁆𑀢𑀺. 𑀲𑀸𑀫𑀸𑀯𑀢𑀻𑀧𑀫𑀼𑀔𑀸𑀦𑀻𑀢𑀺 𑀏𑀢𑁆𑀣 𑀓𑀸 𑀧𑀦𑀸𑀬𑀁 𑀲𑀸𑀫𑀸𑀯𑀢𑀻, 𑀓𑀣𑀜𑁆𑀘 𑀤𑀟𑁆𑀠𑀸𑀢𑀺? 𑀯𑀼𑀘𑁆𑀘𑀢𑁂, 𑀪𑀤𑁆𑀤𑀯𑀢𑀺𑀬𑀁 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀖𑁄𑀲𑀓𑀲𑁂𑀝𑁆𑀞𑀺𑀦𑀸 𑀥𑀻𑀢𑀼𑀝𑁆𑀞𑀸𑀦𑁂 𑀞𑀧𑀺𑀢𑀸 𑀧𑀜𑁆𑀘𑀲𑀢𑀇𑀢𑁆𑀣𑀺𑀧𑀭𑀺𑀯𑀸𑀭𑀸 𑀭𑀜𑁆𑀜𑁄 𑀉𑀢𑁂𑀦𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀫𑁂𑀢𑁆𑀢𑀸𑀯𑀺𑀳𑀸𑀭𑀩𑀳𑀼𑀮𑀸 𑀅𑀭𑀺𑀬𑀲𑀸𑀯𑀺𑀓𑀸 𑀲𑀸𑀫𑀸𑀯𑀢𑀻 𑀦𑀸𑀫. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀸𑀫𑀸𑀯𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀓𑀣𑀸 𑀥𑀫𑁆𑀫𑀧𑀤𑀯𑀢𑁆𑀣𑀼𑀫𑁆𑀳𑀺 (𑀥. 𑀧. 𑀅𑀝𑁆𑀞. 𑁧.𑁨𑁦 𑀲𑀸𑀫𑀸𑀯𑀢𑀻𑀯𑀢𑁆𑀣𑀼) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀕𑀡𑁆𑀟𑀺𑀬𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀽𑀦𑀁 𑁋

‘‘𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘,

𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀁;

𑀓𑀺𑀫𑁂𑀯𑀺𑀤𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁,

𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂’’𑀢𑀺. (𑀲𑀼. 𑀦𑀺. 𑁮𑁪𑁧) 𑁋

𑀪𑀕𑀯𑀢𑀸 𑀤𑁂𑀲𑀺𑀢𑀁 𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀲𑀢𑁆𑀣𑀭𑀺 𑀩𑀤𑁆𑀥𑀸𑀖𑀸𑀢𑀸 𑀫𑀸𑀕𑀡𑁆𑀟𑀺𑀬𑀸 𑀅𑀧𑀭𑀪𑀸𑀕𑁂 𑀭𑀜𑁆𑀜𑀸 𑀉𑀢𑁂𑀦𑁂𑀦 𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑀺𑀢𑀸 𑀪𑀕𑀯𑀢𑁄 𑀓𑁄𑀲𑀫𑁆𑀩𑀺𑀁 𑀉𑀧𑀕𑀢𑀪𑀸𑀯𑀁, 𑀲𑀸𑀫𑀸𑀯𑀢𑀻𑀧𑀫𑀼𑀔𑀸𑀦𑀜𑁆𑀘 𑀧𑀜𑁆𑀘𑀦𑁆𑀦𑀁 𑀇𑀢𑁆𑀣𑀺𑀲𑀢𑀸𑀦𑀁 𑀉𑀧𑀸𑀲𑀺𑀓𑀸𑀪𑀸𑀯𑀁 𑀜𑀢𑁆𑀯𑀸 ‘‘𑀆𑀕𑀢𑁄 𑀦𑀸𑀫 𑀲𑀫𑀡𑁄 𑀕𑁄𑀢𑀫𑁄 𑀇𑀫𑀁 𑀦𑀕𑀭𑀁, 𑀤𑀸𑀦𑀺𑀲𑁆𑀲 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀇𑀫𑀸𑀧𑀺 𑀢𑀲𑁆𑀲 𑀉𑀧𑀝𑁆𑀞𑀸𑀬𑀺𑀓𑀸, 𑀇𑀫𑀸𑀲𑀫𑁆𑀧𑀺 𑀲𑀸𑀫𑀸𑀯𑀢𑀻𑀧𑀫𑀼𑀔𑀸𑀦𑀜𑁆𑀘 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁂𑀓𑀧𑀭𑀺𑀬𑀸𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀢𑀸𑀲𑀜𑁆𑀘 𑀅𑀦𑀢𑁆𑀣𑀁 𑀓𑀸𑀢𑀼𑀁 𑀯𑀸𑀬𑀫𑀺𑀢𑁆𑀯𑀸𑀧𑀺 𑀅𑀲𑀓𑁆𑀓𑁄𑀦𑁆𑀢𑀻 𑀧𑀼𑀦𑁂𑀓𑀤𑀺𑀯𑀲𑀁 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑀻 𑀘𑀽𑀴𑀧𑀺𑀢𑀼 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀲𑀸𑀫𑀸𑀯𑀢𑀺𑀬𑀸 𑀧𑀸𑀲𑀸𑀤𑀁 𑀕𑀦𑁆𑀢𑁆𑀯𑀸 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀢𑁂𑀮𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 𑀤𑀼𑀲𑁆𑀲𑀸𑀦𑀺 𑀢𑁂𑀮𑀘𑀸𑀝𑀻𑀲𑀼 𑀢𑁂𑀫𑁂𑀢𑁆𑀯𑀸 𑀣𑀫𑁆𑀪𑁂 𑀯𑁂𑀞𑁂𑀢𑁆𑀯𑀸 𑀢𑀸 𑀲𑀩𑁆𑀩𑀸 𑀏𑀓𑀢𑁄 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀩𑀳𑀺 𑀬𑀦𑁆𑀢𑀁 𑀤𑀢𑁆𑀯𑀸 𑀤𑀡𑁆𑀟𑀤𑀻𑀧𑀺𑀓𑀸𑀳𑀺 𑀕𑁂𑀳𑁂 𑀅𑀕𑁆𑀕𑀺𑀁 𑀤𑀤𑀫𑀸𑀦𑁄 𑀑𑀢𑀭𑀺𑀢𑁆𑀯𑀸 𑀕𑀘𑁆𑀙𑀢𑀽’’𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑁄 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀯𑀢𑁆𑀣𑀸𑀦𑀺 𑀢𑁂𑀮𑀘𑀸𑀝𑀻𑀲𑀼 𑀢𑁂𑀫𑁂𑀢𑁆𑀯𑀸 𑀣𑀫𑁆𑀪𑁂 𑀯𑁂𑀞𑁂𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀲𑀸𑀫𑀸𑀯𑀢𑀻𑀧𑀫𑀼𑀔𑀸 𑀇𑀢𑁆𑀣𑀺𑀬𑁄 ‘‘𑀓𑀺𑀁 𑀏𑀢𑀁 𑀘𑀽𑀴𑀧𑀺𑀢𑀸’’𑀢𑀺 𑀯𑀤𑀦𑁆𑀢𑀺𑀬𑁄 𑀉𑀧𑀲𑀗𑁆𑀓𑀫𑀺𑀁𑀲𑀼. ‘‘𑀅𑀫𑁆𑀫𑀸, 𑀭𑀸𑀚𑀸 𑀤𑀴𑁆𑀳𑀺𑀓𑀫𑁆𑀫𑀢𑁆𑀣𑀸𑀬 𑀇𑀫𑁂 𑀣𑀫𑁆𑀪𑁂 𑀢𑁂𑀮𑀧𑀺𑀮𑁄𑀢𑀺𑀓𑀸𑀳𑀺 𑀩𑀦𑁆𑀥𑀸𑀧𑁂𑀢𑀺, 𑀭𑀸𑀚𑀕𑁂𑀳𑁂 𑀦𑀸𑀫 𑀲𑀼𑀬𑀼𑀢𑁆𑀢𑀤𑀼𑀬𑀼𑀢𑁆𑀢𑀁 𑀤𑀼𑀚𑁆𑀚𑀸𑀦𑀁, 𑀫𑀸 𑀫𑁂 𑀲𑀦𑁆𑀢𑀺𑀓𑁂 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀢𑀸 𑀆𑀕𑀢𑀸 𑀕𑀩𑁆𑀪𑁂𑀲𑀼 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀩𑀳𑀺 𑀬𑀦𑁆𑀢𑀓𑀁 𑀤𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀕𑁆𑀕𑀺𑀁 𑀤𑁂𑀦𑁆𑀢𑁄 𑀑𑀢𑀭𑀺. 𑀲𑀸𑀫𑀸𑀯𑀢𑀻 𑀢𑀸𑀲𑀁 𑀑𑀯𑀸𑀤𑀁 𑀅𑀤𑀸𑀲𑀺, ‘‘𑀅𑀫𑁆𑀫𑀸, 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀯𑀺𑀘𑀭𑀦𑁆𑀢𑀻𑀦𑀁 𑀏𑀯𑀫𑁂𑀯 𑀅𑀕𑁆𑀕𑀺𑀦𑀸 𑀛𑀸𑀫𑀢𑁆𑀢𑀪𑀸𑀯𑀸𑀦𑀁 𑀩𑀼𑀤𑁆𑀥𑀜𑀸𑀡𑁂𑀦𑀧𑀺 𑀧𑀭𑀺𑀘𑁆𑀙𑁂𑀤𑁄 𑀦 𑀲𑀼𑀓𑀭𑁄, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺. 𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀥𑀺𑀕𑀢𑀨𑀮𑀸𑀬 𑀯𑀺𑀜𑁆𑀜𑀸𑀢𑀲𑀸𑀲𑀦𑀸𑀬 𑀔𑀼𑀚𑁆𑀚𑀼𑀢𑁆𑀢𑀭𑀸𑀬 𑀅𑀭𑀺𑀬𑀲𑀸𑀯𑀺𑀓𑀸𑀬 𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸𑀬 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀦𑀺𑀬𑀸𑀫𑁂𑀦𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺𑀬𑀸 𑀲𑀦𑁆𑀢𑀺𑀓𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀅𑀥𑀺𑀕𑀢𑀸 𑀅𑀦𑁆𑀢𑀭𑀦𑁆𑀢𑀭𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀕𑁂𑀳𑁂 𑀛𑀸𑀬𑀦𑁆𑀢𑁂 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀺𑀬𑁄 𑀓𑀸𑀘𑀺 𑀤𑀼𑀢𑀺𑀬𑀨𑀮𑀁, 𑀓𑀸𑀘𑀺 𑀢𑀢𑀺𑀬𑀨𑀮𑀁 𑀧𑀸𑀧𑀼𑀡𑀺𑀢𑁆𑀯𑀸 𑀓𑀸𑀮𑀫𑀓𑀁𑀲𑀼. 𑀅𑀣 𑀪𑀺𑀓𑁆𑀔𑀽 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀪𑀕𑀯𑀢𑁄 𑀆𑀭𑁄𑀘𑁂𑀢𑁆𑀯𑀸 𑀢𑀸𑀲𑀁 𑀅𑀪𑀺𑀲𑀫𑁆𑀧𑀭𑀸𑀬𑀁 𑀧𑀼𑀘𑁆𑀙𑀺𑀁𑀲𑀼. 𑀪𑀕𑀯𑀸 𑀘 𑀢𑀸𑀲𑀁 𑀅𑀭𑀺𑀬𑀨𑀮𑀸𑀥𑀺𑀕𑀫𑀁 𑀪𑀺𑀓𑁆𑀔𑀽𑀦𑀁 𑀅𑀪𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀉𑀢𑁂𑀦𑀲𑁆𑀲…𑀧𑁂… 𑀅𑀦𑀺𑀧𑁆𑀨𑀮𑀸 𑀓𑀸𑀮𑀗𑁆𑀓𑀢𑀸’’𑀢𑀺.

𑀢𑀢𑁆𑀣 𑀅𑀦𑀺𑀧𑁆𑀨𑀮𑀸𑀢𑀺 𑀦 𑀦𑀺𑀧𑁆𑀨𑀮𑀸, 𑀲𑀫𑁆𑀧𑀢𑁆𑀢𑀲𑀸𑀫𑀜𑁆𑀜𑀨𑀮𑀸 𑀏𑀯 𑀓𑀸𑀮𑀗𑁆𑀓𑀢𑀸. 𑀢𑀸 𑀧𑀦 𑀨𑀮𑀸𑀦𑀺 𑀧𑀝𑀺𑀮𑀪𑀦𑁆𑀢𑀺𑀬𑁄 𑀲𑀸𑀫𑀸𑀯𑀢𑀺𑀬𑀸 𑁋

‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

‘‘𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁮𑁫; 𑀦𑁂𑀢𑁆𑀢𑀺. 𑁨𑁯) 𑁋

𑀕𑀸𑀣𑀸𑀳𑀺 𑀑𑀯𑀤𑀺𑀬𑀫𑀸𑀦𑀸 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀺𑀬𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀤𑀼𑀢𑀺𑀬𑀢𑀢𑀺𑀬𑀨𑀮𑀸𑀦𑀺 𑀧𑀝𑀺𑀮𑀪𑀺𑀁𑀲𑀼. 𑀔𑀼𑀚𑁆𑀚𑀼𑀢𑁆𑀢𑀭𑀸 𑀧𑀦 𑀆𑀬𑀼𑀲𑁂𑀲𑀲𑁆𑀲 𑀅𑀢𑁆𑀣𑀺𑀢𑀸𑀬, 𑀧𑀼𑀩𑁆𑀩𑁂 𑀢𑀸𑀤𑀺𑀲𑀲𑁆𑀲 𑀓𑀫𑁆𑀫𑀲𑁆𑀲 𑀅𑀓𑀢𑀢𑁆𑀢𑀸 𑀘 𑀢𑀢𑁄 𑀧𑀸𑀲𑀸𑀤𑀢𑁄 𑀩𑀳𑀺 𑀅𑀳𑁄𑀲𑀺. ‘‘𑀤𑀲𑀬𑁄𑀚𑀦𑀦𑁆𑀢𑀭𑁂 𑀧𑀓𑁆𑀓𑀸𑀫𑀻’’𑀢𑀺 𑀘 𑀯𑀤𑀦𑁆𑀢𑀺. 𑀅𑀣 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀯𑀢 𑀅𑀭𑀺𑀬𑀲𑀸𑀯𑀺𑀓𑀸𑀦𑀁 𑀏𑀯𑀭𑀽𑀧𑀁 𑀫𑀭𑀡’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀬𑀤𑀺𑀧𑀺 𑀢𑀸𑀲𑀁 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀬𑀼𑀢𑁆𑀢𑀁, 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀲𑁆𑀲 𑀧𑀦 𑀬𑀼𑀢𑁆𑀢𑀫𑁂𑀯 𑀢𑀸𑀳𑀺 𑀮𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂 𑀦𑀺𑀩𑀤𑁆𑀥𑀁 𑀪𑀼𑀜𑁆𑀚𑀦𑁆𑀢𑀺. 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀢𑁂 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀲𑀼 𑀲𑀢𑁆𑀢 𑀚𑀦𑀸 𑀳𑀺𑀫𑀯𑀦𑁆𑀢𑀁 𑀕𑀘𑁆𑀙𑀦𑁆𑀢𑀺, 𑀏𑀓𑁄 𑀦𑀤𑀻𑀢𑀻𑀭𑀲𑀫𑀻𑀧𑁂 𑀏𑀓𑀲𑁆𑀫𑀺𑀁 𑀢𑀺𑀡𑀕𑀳𑀦𑁂 𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀲𑀻𑀤𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀕𑀢𑁂𑀲𑀼 𑀢𑀸𑀳𑀺 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑁄 𑀢𑀢𑁆𑀣 𑀕𑀢𑁄. 𑀢𑀸 𑀇𑀢𑁆𑀣𑀺𑀬𑁄 𑀤𑀺𑀯𑀲𑀪𑀸𑀕𑀁 𑀉𑀤𑀓𑁂 𑀓𑀻𑀴𑀺𑀢𑁆𑀯𑀸 𑀲𑀻𑀢𑀧𑀻𑀴𑀺𑀢𑀸 𑀯𑀺𑀲𑀺𑀩𑁆𑀩𑀺𑀢𑀼𑀓𑀸𑀫𑀸 𑀢𑀁 𑀢𑀺𑀡𑀕𑀳𑀦𑀁 𑀉𑀧𑀭𑀺 𑀯𑀺𑀲𑀼𑀓𑁆𑀔𑀢𑀺𑀡𑀲𑀜𑁆𑀙𑀦𑁆𑀦𑀁 ‘‘𑀢𑀺𑀡𑀭𑀸𑀲𑀻’’𑀢𑀺 𑀲𑀜𑁆𑀜𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀢𑀺𑀡𑁂𑀲𑀼 𑀛𑀸𑀬𑀺𑀢𑁆𑀯𑀸 𑀧𑀢𑀦𑁆𑀢𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 ‘‘𑀭𑀜𑁆𑀜𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀛𑀸𑀬𑀢𑀺, 𑀢𑀁 𑀭𑀸𑀚𑀸 𑀜𑀢𑁆𑀯𑀸 𑀅𑀫𑁆𑀳𑁂 𑀦𑀸𑀲𑁂𑀲𑁆𑀲𑀢𑀺, 𑀲𑀼𑀤𑀟𑁆𑀠𑀁 𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸 𑀇𑀢𑁄 𑀘𑀺𑀢𑁄 𑀘 𑀤𑀸𑀭𑀼𑀆𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀭𑀸𑀲𑀺𑀁 𑀓𑀢𑁆𑀯𑀸 𑀆𑀮𑀺𑀫𑁆𑀧𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀛𑀸𑀬𑀺𑀲𑁆𑀲𑀢𑀻’’𑀢𑀺 𑀧𑀓𑁆𑀓𑀫𑀺𑀁𑀲𑀼. 𑀢𑀸 𑀧𑀞𑀫𑀁 𑀅𑀲𑀜𑁆𑀘𑁂𑀢𑀦𑀺𑀓𑀸 𑀳𑀼𑀢𑁆𑀯𑀸 𑀇𑀤𑀸𑀦𑀺 𑀓𑀫𑁆𑀫𑀼𑀦𑀸 𑀩𑀚𑁆𑀛𑀺𑀁𑀲𑀼. 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀲𑀘𑁂 𑀤𑀸𑀭𑀽𑀦𑀁 𑀲𑀓𑀝𑀲𑀳𑀲𑁆𑀲𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀆𑀮𑀺𑀫𑁆𑀧𑁂𑀦𑁆𑀢𑀸 𑀉𑀲𑀼𑀫𑀸𑀓𑀸𑀭𑀫𑀢𑁆𑀢𑀫𑁆𑀧𑀺 𑀕𑀸𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀝𑁆𑀞𑀸𑀬 𑀬𑀣𑀸𑀲𑀼𑀔𑀁 𑀅𑀕𑀫𑀸𑀲𑀺. 𑀢𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀅𑀢𑁆𑀢𑀪𑀸𑀯𑀲𑀢𑁂 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀕𑁂𑀳𑁂 𑀛𑀸𑀬𑀫𑀸𑀦𑁂 𑀛𑀸𑀬𑀺𑀁𑀲𑀼. 𑀇𑀤𑀁 𑀢𑀸𑀲𑀁 𑀧𑀼𑀩𑁆𑀩𑀓𑀫𑁆𑀫𑀁.

𑀬𑀲𑁆𑀫𑀸 𑀧𑀦 𑀢𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀭𑀺𑀬𑀨𑀮𑀸𑀦𑀺 𑀲𑀘𑁆𑀙𑀸𑀓𑀁𑀲𑀼, 𑀭𑀢𑀦𑀢𑁆𑀢𑀬𑀁 𑀧𑀬𑀺𑀭𑀼𑀧𑀸𑀲𑀺𑀁𑀲𑀼, 𑀢𑀲𑁆𑀫𑀸 𑀢𑀢𑁆𑀣 𑀅𑀦𑀸𑀕𑀸𑀫𑀺𑀦𑀺𑀬𑁄 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑀧𑀦𑁆𑀦𑀸, 𑀇𑀢𑀭𑀸 𑀓𑀸𑀘𑀺 𑀢𑀸𑀯𑀢𑀺𑀁𑀲𑁂𑀲𑀼, 𑀓𑀸𑀘𑀺 𑀬𑀸𑀫𑁂𑀲𑀼, 𑀓𑀸𑀘𑀺 𑀢𑀼𑀲𑀺𑀢𑁂𑀲𑀼, 𑀓𑀸𑀘𑀺 𑀦𑀺𑀫𑁆𑀫𑀸𑀦𑀭𑀢𑀻𑀲𑀼, 𑀓𑀸𑀘𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀼 𑀉𑀧𑀧𑀦𑁆𑀦𑀸.

𑀭𑀸𑀚𑀸𑀧𑀺 𑀔𑁄 𑀉𑀢𑁂𑀦𑁄 ‘‘𑀲𑀸𑀫𑀸𑀯𑀢𑀺𑀬𑀸 𑀕𑁂𑀳𑀁 𑀓𑀺𑀭 𑀛𑀸𑀬𑀢𑀻’’𑀢𑀺 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀆𑀕𑀘𑁆𑀙𑀦𑁆𑀢𑁄𑀧𑀺 𑀢𑀁 𑀧𑀤𑁂𑀲𑀁 𑀢𑀸𑀲𑀼 𑀤𑀟𑁆𑀠𑀸𑀲𑀼𑀬𑁂𑀯 𑀲𑀫𑁆𑀧𑀸𑀧𑀼𑀡𑀺. 𑀆𑀕𑀦𑁆𑀢𑁆𑀯𑀸 𑀧𑀦 𑀕𑁂𑀳𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀩𑀮𑀯𑀤𑁄𑀫𑀦𑀲𑁆𑀲𑁄 𑀫𑀸𑀕𑀡𑁆𑀟𑀺𑀬𑀸𑀬 𑀢𑀣𑀸 𑀓𑀸𑀭𑀺𑀢𑀪𑀸𑀯𑀁 𑀉𑀧𑀸𑀬𑁂𑀦 𑀜𑀢𑁆𑀯𑀸 𑀅𑀭𑀺𑀬𑀲𑀸𑀯𑀺𑀓𑀸𑀲𑀼 𑀓𑀢𑀸𑀧𑀭𑀸𑀥𑀓𑀫𑁆𑀫𑀼𑀦𑀸 𑀘𑁄𑀤𑀺𑀬𑀫𑀸𑀦𑁄 𑀢𑀲𑁆𑀲𑀸 𑀭𑀸𑀚𑀸𑀡𑀁 𑀓𑀸𑀭𑁂𑀲𑀺 𑀲𑀤𑁆𑀥𑀺𑀁 𑀜𑀸𑀢𑀓𑁂𑀳𑀺. 𑀏𑀯𑀁 𑀲𑀸 𑀲𑀧𑀭𑀺𑀚𑀦𑀸 𑀲𑀫𑀺𑀢𑁆𑀢𑀩𑀦𑁆𑀥𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀲𑀸𑀫𑀸𑀯𑀢𑀻𑀧𑀫𑀼𑀔𑀸𑀦𑀁 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀅𑀕𑁆𑀕𑀺𑀫𑁆𑀳𑀺 𑀅𑀦𑀬𑀩𑁆𑀬𑀲𑀦𑀸𑀧𑀢𑁆𑀢𑀺𑀳𑁂𑀢𑀼𑀁, 𑀫𑀸𑀕𑀡𑁆𑀟𑀺𑀬𑀸𑀬 𑀘 𑀲𑀫𑀺𑀢𑁆𑀢𑀩𑀦𑁆𑀥𑀯𑀸𑀬 𑀭𑀸𑀚𑀸𑀡𑀸𑀬 𑀅𑀦𑀬𑀩𑁆𑀬𑀲𑀦𑀸𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀫𑁄𑀳𑀲𑀫𑁆𑀩𑀦𑁆𑀥𑀦𑁄 𑀮𑁄𑀓𑁄, 𑀪𑀩𑁆𑀩𑀭𑀽𑀧𑁄𑀯 𑀤𑀺𑀲𑁆𑀲𑀢𑀻𑀢𑀺 𑀬𑁄 𑀇𑀥 𑀲𑀢𑁆𑀢𑀮𑁄𑀓𑁄 𑀪𑀩𑁆𑀩𑀭𑀽𑀧𑁄𑀯 𑀳𑁂𑀢𑀼𑀲𑀫𑁆𑀧𑀦𑁆𑀦𑁄 𑀯𑀺𑀬 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺, 𑀲𑁄𑀧𑀺 𑀫𑁄𑀳𑀲𑀫𑁆𑀩𑀦𑁆𑀥𑀦𑁄 𑀫𑁄𑀳𑁂𑀦 𑀧𑀮𑀺𑀕𑀼𑀡𑁆𑀞𑀺𑀢𑁄 𑀅𑀢𑁆𑀢𑀳𑀺𑀢𑀸𑀳𑀺𑀢𑀁 𑀅𑀚𑀸𑀦𑀦𑁆𑀢𑁄 𑀳𑀺𑀢𑁂 𑀦 𑀧𑀝𑀺𑀧𑀚𑁆𑀚𑀢𑀺, 𑀅𑀳𑀺𑀢𑀁 𑀤𑀼𑀓𑁆𑀔𑀸𑀯𑀳𑀁 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀆𑀘𑀺𑀦𑀸𑀢𑀺. ‘‘𑀪𑀯𑀭𑀽𑀧𑁄𑀯 𑀤𑀺𑀲𑁆𑀲𑀢𑀻’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀅𑀬𑀁 𑀮𑁄𑀓𑁄 𑀫𑁄𑀳𑀲𑀫𑁆𑀩𑀦𑁆𑀥𑀦𑁄 𑀫𑁄𑀳𑁂𑀦 𑀧𑀮𑀺𑀕𑀼𑀡𑁆𑀞𑀺𑀢𑁄, 𑀢𑀢𑁄 𑀏𑀯 𑀪𑀯𑀭𑀽𑀧𑁄𑀯 𑀲𑀲𑁆𑀲𑀢𑀲𑀪𑀸𑀯𑁄 𑀯𑀺𑀬𑀲𑁆𑀲 𑀅𑀢𑁆𑀢𑀸 𑀤𑀺𑀲𑁆𑀲𑀢𑀺, 𑀅𑀚𑀭𑀸𑀫𑀭𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀅𑀓𑀢𑁆𑀢𑀩𑁆𑀩𑀸𑀦𑀺 𑀓𑀭𑁄𑀢𑀺.

𑀉𑀧𑀥𑀺𑀩𑀦𑁆𑀥𑀦𑁄 𑀩𑀸𑀮𑁄, 𑀢𑀫𑀲𑀸 𑀧𑀭𑀺𑀯𑀸𑀭𑀺𑀢𑁄. 𑀲𑀲𑁆𑀲𑀢𑁄𑀭𑀺𑀯 𑀔𑀸𑀬𑀢𑀻𑀢𑀺 𑀦 𑀓𑁂𑀯𑀮𑀜𑁆𑀘 𑀫𑁄𑀳𑀲𑀫𑁆𑀩𑀦𑁆𑀥𑀦𑁄 𑀏𑀯, 𑀅𑀧𑀺𑀘 𑀔𑁄 𑀉𑀧𑀥𑀺𑀩𑀦𑁆𑀥𑀦𑁄𑀧𑀺 𑀅𑀬𑀁 𑀅𑀦𑁆𑀥𑀩𑀸𑀮𑀮𑁄𑀓𑁄 𑀅𑀯𑀺𑀚𑁆𑀚𑀸𑀢𑀫𑀲𑀸 𑀧𑀭𑀺𑀯𑀸𑀭𑀺𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂𑀦 𑀜𑀸𑀡𑁂𑀦 𑀅𑀯𑀺𑀧𑀭𑀻𑀢𑀁 𑀓𑀸𑀫𑁂 𑀘 𑀔𑀦𑁆𑀥𑁂 𑀘 ‘‘𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺 𑀧𑀲𑁆𑀲𑁂𑀬𑁆𑀬, 𑀢𑀲𑁆𑀲 𑀅𑀪𑀸𑀯𑀢𑁄 𑀬𑀲𑁆𑀫𑀸 𑀩𑀸𑀮𑁄 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀅𑀜𑁆𑀜𑀸𑀡𑀢𑀫𑀲𑀸 𑀲𑀫𑀦𑁆𑀢𑀢𑁄 𑀧𑀭𑀺𑀯𑀸𑀭𑀺𑀢𑁄 𑀦𑀺𑀯𑀼𑀢𑁄, 𑀢𑀲𑁆𑀫𑀸 𑀲𑁄 𑀓𑀸𑀫𑀽𑀧𑀥𑀺 𑀓𑀺𑀮𑁂𑀲𑀽𑀧𑀥𑀺 𑀔𑀦𑁆𑀥𑀽𑀧𑀥𑀻𑀢𑀺 𑀇𑀫𑁂𑀲𑀁 𑀉𑀧𑀥𑀻𑀦𑀁 𑀯𑀲𑁂𑀦 𑀘 𑀉𑀧𑀥𑀺𑀩𑀦𑁆𑀥𑀦𑁄, 𑀢𑀢𑁄 𑀏𑀯 𑀘𑀲𑁆𑀲 𑀲𑁄𑀧𑀥𑀺𑀲𑁆𑀲 𑀧𑀲𑁆𑀲𑀢𑁄 𑀲𑀲𑁆𑀲𑀢𑁄 𑀯𑀺𑀬 𑀦𑀺𑀘𑁆𑀘𑁄 𑀲𑀩𑁆𑀩𑀓𑀸𑀮𑀪𑀸𑀯𑀻 𑀯𑀺𑀬 𑀔𑀸𑀬𑀢𑀺. ‘‘𑀅𑀲𑀲𑁆𑀲𑀢𑀺𑀭𑀺𑀯 𑀔𑀸𑀬𑀢𑀻’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀅𑀢𑁆𑀢𑀸 𑀲𑀩𑁆𑀩𑀓𑀸𑀮𑀁 𑀯𑀺𑀚𑁆𑀚𑀢𑀺 𑀉𑀧𑀮𑀩𑁆𑀪𑀢𑀻𑀢𑀺 𑀅𑀜𑁆𑀜𑁄 𑀅𑀲𑀲𑁆𑀲𑀢𑀺 𑀅𑀦𑀺𑀘𑁆𑀘𑁄𑀢𑀺 𑀮𑁄𑀓𑀲𑁆𑀲 𑀲𑁄 𑀉𑀧𑀥𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀏𑀓𑀤𑁂𑀲𑁄 𑀯𑀺𑀬 𑀔𑀸𑀬𑀢𑀺, 𑀉𑀧𑀝𑁆𑀞𑀳𑀢𑀻𑀢𑀺 𑀅𑀢𑁆𑀣𑁄. 𑀭𑀓𑀸𑀭𑁄 𑀳𑀺 𑀧𑀤𑀲𑀦𑁆𑀥𑀺𑀓𑀭𑁄. 𑀧𑀲𑁆𑀲𑀢𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦𑀦𑁆𑀢𑀺 𑀬𑁄 𑀧𑀦 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀢𑀺, 𑀢𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀬𑀣𑀸𑀪𑀽𑀢𑀁 𑀧𑀲𑁆𑀲𑀢𑁄 𑀚𑀸𑀦𑀢𑁄 𑀧𑀝𑀺𑀯𑀺𑀚𑁆𑀛𑀢𑁄 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁 𑀦𑀢𑁆𑀣𑀺, 𑀬𑁂𑀦 𑀲𑀁𑀲𑀸𑀭𑁂 𑀩𑀚𑁆𑀛𑁂𑀬𑁆𑀬. 𑀢𑀣𑀸 𑀅𑀧𑀲𑁆𑀲𑀦𑁆𑀢𑁄 𑀏𑀯 𑀳𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀝𑁆𑀞𑀺𑀆𑀤𑀺𑀩𑀦𑁆𑀥𑀦𑁂𑀳𑀺 𑀲𑀁𑀲𑀸𑀭𑁂 𑀩𑀤𑁆𑀥𑁄 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸.