𑁬. 𑀚𑀘𑁆𑀘𑀦𑁆𑀥𑀯𑀕𑁆𑀕𑁄

𑁧. 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀚𑀘𑁆𑀘𑀦𑁆𑀥𑀯𑀕𑁆𑀕𑀲𑁆𑀲 𑀧𑀞𑀫𑁂 𑀯𑁂𑀲𑀸𑀮𑀺𑀬𑀦𑁆𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻𑀢𑀺 𑀓𑀤𑀸 𑀧𑀸𑀯𑀺𑀲𑀺? 𑀉𑀓𑁆𑀓𑀸𑀘𑁂𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀲𑀸𑀮𑀺𑀁 𑀕𑀢𑀓𑀸𑀮𑁂. 𑀪𑀕𑀯𑀸 𑀳𑀺 𑀯𑁂𑀴𑀼𑀯𑀕𑀸𑀫𑀓𑁂 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑁂 𑀯𑀺𑀳𑀸𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀢𑁆𑀢𑀸𑀳𑀫𑁂𑀯 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀦𑀸𑀴𑀓𑀕𑀸𑀫𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀫𑀸𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀢𑁆𑀣𑀸 𑀘𑀼𑀦𑁆𑀤𑁂𑀦 𑀆𑀪𑀢𑀸 𑀢𑀲𑁆𑀲 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀥𑀸𑀢𑀼𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀕𑀢𑀓𑀸𑀮𑁂 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀪𑀕𑀯𑀸 𑀢𑀲𑁆𑀲𑀧𑀺 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀕𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀉𑀓𑁆𑀓𑀸𑀘𑁂𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀕𑀗𑁆𑀕𑀸𑀢𑀻𑀭𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀓𑁆𑀓𑀸𑀘𑁂𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀲𑀸𑀮𑀺𑀁 𑀅𑀕𑀫𑀸𑀲𑀺. 𑀏𑀯𑀁 𑀕𑀢𑁄 𑀪𑀕𑀯𑀸 ‘‘𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀓𑁆𑀓𑀸𑀘𑁂𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀲𑀸𑀮𑀺𑀁 𑀕𑀢𑀓𑀸𑀮𑁂’’𑀢𑀺.

𑀦𑀺𑀲𑀻𑀤𑀦𑀦𑁆𑀢𑀺 𑀇𑀥 𑀘𑀫𑁆𑀫𑀓𑁆𑀔𑀡𑁆𑀟𑀁 𑀅𑀥𑀺𑀧𑁆𑀧𑁂𑀢𑀁. 𑀘𑀸𑀧𑀸𑀮𑀁 𑀘𑁂𑀢𑀺𑀬𑀦𑁆𑀢𑀺 𑀧𑀼𑀩𑁆𑀩𑁂 𑀘𑀸𑀧𑀸𑀮𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀯𑀲𑀺𑀢𑀝𑁆𑀞𑀸𑀦𑀁 ‘‘𑀘𑀸𑀧𑀸𑀮𑀘𑁂𑀢𑀺𑀬’’𑀦𑁆𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀢𑁆𑀣 𑀪𑀕𑀯𑀢𑁄 𑀓𑀢𑀯𑀺𑀳𑀸𑀭𑁄𑀧𑀺 𑀢𑀸𑀬 𑀭𑀼𑀴𑁆𑀳𑀺𑀬𑀸 ‘‘𑀘𑀸𑀧𑀸𑀮𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀤𑁂𑀦𑀁 𑀘𑁂𑀢𑀺𑀬𑀦𑁆𑀢𑀺 𑀏𑀯𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑁆𑀢𑀫𑁆𑀩𑀦𑁆𑀢𑀺 𑀓𑀺𑀓𑀺𑀲𑁆𑀲 𑀓𑀺𑀭 𑀓𑀸𑀲𑀺𑀭𑀜𑁆𑀜𑁄 𑀥𑀻𑀢𑀭𑁄 𑀲𑀢𑁆𑀢 𑀓𑀼𑀫𑀸𑀭𑀺𑀬𑁄 𑀲𑀁𑀯𑁂𑀕𑀚𑀸𑀢𑀸 𑀭𑀸𑀚𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀢𑁆𑀣 𑀧𑀥𑀸𑀦𑀁 𑀧𑀤𑀳𑀺𑀁𑀲𑀼, 𑀢𑀁 𑀞𑀸𑀦𑀁 ‘‘𑀲𑀢𑁆𑀢𑀫𑁆𑀩𑀁 𑀘𑁂𑀢𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀩𑀳𑀼𑀧𑀼𑀢𑁆𑀢𑀦𑁆𑀢𑀺 𑀩𑀳𑀼𑀧𑀸𑀭𑁄𑀳𑁄 𑀏𑀓𑁄 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄, 𑀢𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑀁 𑀤𑁂𑀯𑀢𑀁 𑀩𑀳𑀽 𑀫𑀦𑀼𑀲𑁆𑀲𑀸 𑀧𑀼𑀢𑁆𑀢𑁂 𑀧𑀢𑁆𑀣𑁂𑀦𑁆𑀢𑀺, 𑀢𑀤𑀼𑀧𑀸𑀤𑀸𑀬 𑀢𑀁 𑀞𑀸𑀦𑀁 ‘‘𑀩𑀳𑀼𑀧𑀼𑀢𑁆𑀢𑀁 𑀘𑁂𑀢𑀺𑀬’’𑀦𑁆𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑀸𑀭𑀦𑁆𑀤𑀤𑀦𑁆𑀢𑀺 𑀲𑀸𑀭𑀦𑁆𑀤𑀤𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀯𑀲𑀺𑀢𑀝𑁆𑀞𑀸𑀦𑀁. 𑀇𑀢𑀺 𑀲𑀩𑁆𑀩𑀸𑀦𑁂𑀯 𑀢𑀸𑀦𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂 𑀤𑁂𑀯𑀢𑀸𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀘𑁂𑀢𑀺𑀬𑀯𑁄𑀳𑀸𑀭𑁂𑀦 𑀯𑁄𑀳𑀭𑀺𑀢𑀸𑀦𑀺, 𑀪𑀕𑀯𑀢𑁄 𑀯𑀺𑀳𑀸𑀭𑁂 𑀓𑀢𑁂𑀧𑀺 𑀘 𑀢𑀣𑁂𑀯 𑀧𑀜𑁆𑀜𑀸𑀬𑀦𑁆𑀢𑀺. 𑀭𑀫𑀡𑀻𑀬𑀸𑀢𑀺 𑀏𑀢𑁆𑀣 𑀯𑁂𑀲𑀸𑀮𑀺𑀬𑀸 𑀢𑀸𑀯 𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀼𑀕𑁆𑀕𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀮𑀪𑀧𑀘𑁆𑀘𑀬𑀢𑀸𑀬 𑀘 𑀭𑀫𑀡𑀻𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀳𑀸𑀭𑀸𑀦𑀁 𑀧𑀦 𑀦𑀕𑀭𑀢𑁄 𑀦𑀸𑀢𑀺𑀤𑀽𑀭𑀢𑀸𑀬 𑀦𑀸𑀘𑁆𑀘𑀸𑀲𑀦𑁆𑀦𑀢𑀸𑀬 𑀕𑀫𑀦𑀸𑀕𑀫𑀦𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀸𑀓𑀺𑀡𑁆𑀡𑀯𑀺𑀳𑀸𑀭𑀝𑁆𑀞𑀸𑀦𑀢𑀸𑀬 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸 𑀧𑀯𑀺𑀯𑁂𑀓𑀧𑀢𑀺𑀭𑀽𑀧𑀢𑀸𑀬 𑀘 𑀭𑀫𑀡𑀻𑀬𑀢𑀸 𑀤𑀝𑁆𑀞𑀩𑁆𑀩𑀸. 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺 𑀏𑀢𑁆𑀣 𑀇𑀤𑁆𑀥𑀺𑀧𑀸𑀤𑀧𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀪𑀸𑀯𑀺𑀢𑀸𑀢𑀺 𑀯𑀟𑁆𑀠𑀺𑀢𑀸. 𑀩𑀳𑀼𑀮𑀻𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸. 𑀬𑀸𑀦𑀻𑀓𑀢𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀧𑀢𑀺𑀝𑁆𑀞𑀝𑁆𑀞𑁂𑀦 𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀅𑀥𑀺𑀝𑁆𑀞𑀺𑀢𑀸. 𑀧𑀭𑀺𑀘𑀺𑀢𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸 𑀲𑀼𑀯𑀟𑁆𑀠𑀺𑀢𑀸. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸, 𑀅𑀢𑀺𑀯𑀺𑀬 𑀲𑀫𑁆𑀫𑀸 𑀦𑀺𑀧𑁆𑀨𑀸𑀤𑀺𑀢𑀸𑀢𑀺.

𑀏𑀯𑀁 𑀅𑀦𑀺𑀬𑀫𑁂𑀦 𑀓𑀣𑁂𑀢𑁆𑀯𑀸 𑀧𑀼𑀦 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, ‘‘𑀢𑀣𑀸𑀕𑀢𑀲𑁆𑀲 𑀔𑁄’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀁. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬 𑀥𑀭𑁂𑀬𑁆𑀬. 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸𑀢𑀺 ‘‘𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄 𑀯𑀸’’𑀢𑀺 (𑀤𑀻. 𑀦𑀺. 𑁨.𑁭; 𑀅. 𑀦𑀺. 𑁭.𑁭𑁪) 𑀯𑀼𑀢𑁆𑀢𑀁 𑀯𑀲𑁆𑀲𑀲𑀢𑀢𑁄 𑀅𑀢𑀺𑀭𑁂𑀓𑀁 𑀯𑀸. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀩𑀼𑀤𑁆𑀥𑀸𑀦𑀁 𑀅𑀝𑁆𑀞𑀸𑀦𑁂 𑀕𑀚𑁆𑀚𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑁂𑀯 𑀳𑀺 𑀯𑁂𑀴𑀼𑀯𑀕𑀸𑀫𑀓𑁂 𑀉𑀧𑁆𑀧𑀦𑁆𑀦𑀁 𑀫𑀸𑀭𑀡𑀦𑁆𑀢𑀺𑀓𑀁 𑀯𑁂𑀤𑀦𑀁 𑀤𑀲 𑀫𑀸𑀲𑁂 𑀯𑀺𑀓𑁆𑀔𑀫𑁆𑀪𑁂𑀲𑀺, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀇𑀫𑀁 𑀪𑀤𑁆𑀤𑀓𑀧𑁆𑀧𑀫𑁂𑀯 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺. 𑀓𑀲𑁆𑀫𑀸 𑀧𑀦 𑀦 𑀞𑀺𑀢𑁄𑀢𑀺? 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀁 𑀦𑀸𑀫 𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀅𑀪𑀺𑀪𑀼𑀬𑁆𑀬𑀢𑀺, 𑀩𑀼𑀤𑁆𑀥𑀸 𑀘 𑀧𑀦 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀁 𑀅𑀧𑁆𑀧𑀢𑁆𑀯𑀸 𑀧𑀜𑁆𑀘𑀫𑁂 𑀆𑀬𑀼𑀓𑁄𑀝𑁆𑀞𑀸𑀲𑁂 𑀩𑀳𑀼𑀚𑀦𑀲𑁆𑀲 𑀧𑀺𑀬𑀫𑀦𑀸𑀧𑀓𑀸𑀮𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁂𑀲𑀼 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀅𑀧𑀭𑀺𑀯𑀸𑀭𑁂𑀦 𑀏𑀓𑀓𑁂𑀦𑁂𑀯 𑀞𑀸𑀢𑀩𑁆𑀩𑀁 𑀳𑁄𑀢𑀺, 𑀤𑀳𑀭𑀲𑀸𑀫𑀡𑁂𑀭𑀧𑀭𑀺𑀯𑀸𑀭𑁂𑀦 𑀯𑀸. 𑀢𑀢𑁄 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀧𑀭𑀺𑀲𑀸’’𑀢𑀺 𑀳𑀻𑀴𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀦 𑀞𑀺𑀢𑁄𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁄 𑀧𑀦 𑀦 𑀭𑀼𑀘𑁆𑀘𑀢𑀺, ‘‘𑀆𑀬𑀼𑀓𑀧𑁆𑀧𑁄’’𑀢𑀺 𑀇𑀤𑀫𑁂𑀯 𑀅𑀝𑁆𑀞𑀓𑀣𑀸𑀬 𑀦𑀺𑀬𑀫𑀺𑀢𑀁.

𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂𑀢𑀺 𑀣𑀽𑀮𑁂 𑀲𑀜𑁆𑀜𑀼𑀧𑁆𑀧𑀸𑀤𑀦𑁂. 𑀣𑀽𑀮𑀲𑀜𑁆𑀜𑀼𑀧𑁆𑀧𑀸𑀤𑀦𑀜𑁆𑀳𑁂𑀢𑀁, ‘‘𑀢𑀺𑀝𑁆𑀞𑀢𑀼 𑀪𑀕𑀯𑀸 𑀓𑀧𑁆𑀧’’𑀦𑁆𑀢𑀺 𑀲𑀓𑀮𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀬𑀸𑀘𑀦𑀸𑀬 𑀬𑀤𑀺𑀤𑀁 ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀲𑀫𑀢𑁆𑀣𑀢𑀸𑀯𑀺𑀪𑀸𑀯𑀦𑀁. 𑀑𑀪𑀸𑀲𑁂𑀢𑀺 𑀧𑀸𑀓𑀝𑀯𑀘𑀦𑁂. 𑀧𑀸𑀓𑀝𑀜𑁆𑀘𑁂𑀢𑀁 𑀯𑀘𑀦𑀁 𑀧𑀭𑀺𑀬𑀸𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀚𑀼𑀓𑀫𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁.

𑀩𑀳𑀼𑀚𑀦𑀳𑀺𑀢𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲 𑀳𑀺𑀢𑀢𑁆𑀣𑀸𑀬. 𑀩𑀳𑀼𑀚𑀦𑀲𑀼𑀔𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲 𑀲𑀼𑀔𑀢𑁆𑀣𑀸𑀬. 𑀮𑁄𑀓𑀸𑀦𑀼𑀓𑀫𑁆𑀧𑀸𑀬𑀸𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘. 𑀓𑀢𑀭𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲? 𑀬𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀢𑀺, 𑀅𑀫𑀢𑀧𑀸𑀦𑀁 𑀧𑀺𑀯𑀢𑀺, 𑀢𑀲𑁆𑀲. 𑀪𑀕𑀯𑀢𑁄 𑀳𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀤𑁂𑀲𑀦𑀸𑀬 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀧𑁆𑀧𑀫𑀼𑀔𑀸 𑀅𑀝𑁆𑀞𑀸𑀭𑀲 𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀁𑀲𑀼. 𑀏𑀯𑀁 𑀬𑀸𑀯 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀺𑀦𑀬𑀦𑀸 𑀥𑀫𑁆𑀫𑀧𑀝𑀺𑀯𑀺𑀤𑁆𑀥𑀲𑀢𑁆𑀢𑀸𑀦𑀁 𑀕𑀡𑀦𑀸 𑀦𑀢𑁆𑀣𑀺, 𑀫𑀳𑀸𑀲𑀫𑀬𑀲𑀼𑀢𑁆𑀢𑀁 𑀫𑀗𑁆𑀕𑀮𑀲𑀼𑀢𑁆𑀢𑀁 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀲𑀫𑀘𑀺𑀢𑁆𑀢𑀲𑀼𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀤𑁂𑀲𑀦𑀸𑀓𑀸𑀮𑁂 𑀅𑀪𑀺𑀲𑀫𑀬𑀧𑁆𑀧𑀢𑁆𑀢𑀲𑀢𑁆𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀏𑀢𑀲𑁆𑀲 𑀅𑀧𑀭𑀺𑀫𑀸𑀡𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀪𑀕𑀯𑀢𑁄 𑀞𑀸𑀦𑀁 𑀚𑀸𑀢𑀁. 𑀏𑀯𑀁 𑀅𑀦𑀸𑀕𑀢𑁂𑀧𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀦 𑀓𑁂𑀯𑀮𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁𑀬𑁂𑀯, 𑀅𑀯𑀲𑁂𑀲𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀕𑀯𑀢𑁄 𑀞𑀸𑀦𑀁 𑀳𑁄𑀢𑀺. 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁂 𑀧𑀦 𑀫𑀕𑁆𑀕𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀪𑀩𑁆𑀩𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀫𑁆𑀧𑀺 𑀅𑀢𑁆𑀣𑀢𑁆𑀣𑀸𑀬 𑀳𑀺𑀢𑀢𑁆𑀣𑀸𑀬 𑀲𑀼𑀔𑀢𑁆𑀣𑀸𑀬 𑀪𑀕𑀯𑀸 𑀢𑀺𑀝𑁆𑀞𑀢𑀽𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀢𑁆𑀣𑀸𑀬𑀸𑀢𑀺 𑀇𑀥𑀮𑁄𑀓𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀸𑀬. 𑀳𑀺𑀢𑀸𑀬𑀸𑀢𑀺 𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀳𑀺𑀢𑀢𑁆𑀣𑀸𑀬. 𑀲𑀼𑀔𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀥𑀸𑀢𑀼𑀲𑀼𑀔𑀢𑁆𑀣𑀸𑀬. 𑀧𑀼𑀭𑀺𑀫𑀁 𑀧𑀦 𑀳𑀺𑀢𑀲𑀼𑀔𑀕𑁆𑀕𑀳𑀡𑀁 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀏𑀢𑁆𑀣 𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀚𑁆𑀛𑁄𑀢𑁆𑀣𑀝𑀘𑀺𑀢𑁆𑀢𑁄 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀧𑀼𑀣𑀼𑀚𑁆𑀚𑀦𑁄 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀏𑀯𑀫𑁂𑀯 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀫𑀸𑀭𑁄 𑀳𑀺 𑀬𑀲𑁆𑀲 𑀓𑁂𑀘𑀺 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺. 𑀬𑀲𑁆𑀲 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑀲𑁆𑀲 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀣𑁂𑀭𑀲𑁆𑀲 𑀘 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑁂𑀦𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀲𑀺. 𑀲𑁄 𑀧𑀦 𑀘𑀺𑀢𑁆𑀢𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻𑀢𑀺? 𑀪𑁂𑀭𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀲𑀸𑀯𑁂𑀢𑀺, 𑀢𑀢𑁄 𑀲𑀢𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑀫𑀼𑀔𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 𑀳𑀤𑀬𑀁 𑀫𑀤𑁆𑀤𑀢𑀺, 𑀢𑀢𑁄 𑀯𑀺𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀣𑁂𑀭𑀲𑁆𑀲 𑀧𑀦𑁂𑀲 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑀼𑀁 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀪𑁂𑀭𑀯𑀸𑀭𑀫𑁆𑀫𑀡𑀁 𑀧𑀦 𑀤𑀲𑁆𑀲𑁂𑀢𑀺. 𑀢𑀁 𑀤𑀺𑀲𑁆𑀯𑀸 𑀣𑁂𑀭𑁄 𑀦𑀺𑀫𑀺𑀢𑁆𑀢𑁄𑀪𑀸𑀲𑀁 𑀦 𑀧𑀝𑀺𑀯𑀺𑀚𑁆𑀛𑀺. 𑀚𑀸𑀦𑀦𑁆𑀢𑁄𑀬𑁂𑀯 𑀪𑀕𑀯𑀸 𑀓𑀺𑀫𑀢𑁆𑀣𑀁 𑀬𑀸𑀯𑀢𑀢𑀺𑀬𑀁 𑀆𑀫𑀦𑁆𑀢𑁂𑀲𑀺? 𑀧𑀭𑀢𑁄 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀬𑀸𑀘𑀺𑀢𑁂 ‘‘𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥’’𑀦𑁆𑀢𑀺 𑀤𑁄𑀲𑀸𑀭𑁄𑀧𑀦𑁂𑀦 𑀲𑁄𑀓𑀢𑀦𑀼𑀓𑀭𑀡𑀢𑁆𑀣𑀁. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 ‘‘𑀅𑀬𑀁 𑀫𑀬𑀺 𑀅𑀢𑀺𑀯𑀺𑀬 𑀲𑀺𑀦𑀺𑀤𑁆𑀥𑀳𑀤𑀬𑁄, 𑀲𑁄 𑀧𑀭𑀢𑁄 𑀪𑀽𑀫𑀺𑀘𑀸𑀮𑀓𑀸𑀭𑀡𑀜𑁆𑀘 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀜𑁆𑀘 𑀲𑀼𑀢𑁆𑀯𑀸 𑀫𑀫 𑀘𑀺𑀭𑀝𑁆𑀞𑀸𑀦𑀁 𑀬𑀸𑀘𑀺𑀲𑁆𑀲𑀢𑀺, 𑀅𑀣𑀸𑀳𑀁 ‘𑀓𑀺𑀲𑁆𑀲 𑀢𑁆𑀯𑀁 𑀧𑀼𑀭𑁂𑀢𑀭𑀁 𑀦 𑀬𑀸𑀘𑀲𑀻’𑀢𑀺 𑀢𑀲𑁆𑀲𑁂𑀯 𑀲𑀻𑀲𑁂 𑀤𑁄𑀲𑀁 𑀧𑀸𑀢𑁂𑀲𑁆𑀲𑀸𑀫𑀺, 𑀲𑀢𑁆𑀢𑀸 𑀘 𑀅𑀢𑁆𑀢𑀦𑁄 𑀅𑀧𑀭𑀸𑀥𑁂𑀦 𑀦 𑀢𑀣𑀸 𑀯𑀺𑀳𑀜𑁆𑀜𑀦𑁆𑀢𑀺, 𑀢𑁂𑀦𑀲𑁆𑀲 𑀲𑁄𑀓𑁄 𑀢𑀦𑀼𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀕𑀘𑁆𑀙 𑀢𑁆𑀯𑀁, 𑀆𑀦𑀦𑁆𑀤𑀸𑀢𑀺 𑀬𑀲𑁆𑀫𑀸 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀇𑀥𑀸𑀕𑀢𑁄, 𑀢𑀲𑁆𑀫𑀸, 𑀆𑀦𑀦𑁆𑀤, 𑀕𑀘𑁆𑀙 𑀢𑁆𑀯𑀁 𑀬𑀣𑀸𑀭𑀼𑀘𑀺𑀢𑀁 𑀞𑀸𑀦𑀁 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀢𑁂𑀦𑁂𑀯𑀸𑀳 𑁋 ‘‘𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺.

𑀫𑀸𑀭𑁄 𑀧𑀸𑀧𑀺𑀫𑀸𑀢𑀺 𑀏𑀢𑁆𑀣 𑀲𑀢𑁆𑀢𑁂 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀦𑁆𑀢𑁄 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀧𑀸𑀧𑀺𑀫𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑁄 𑀳𑀺 𑀧𑀸𑀧𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘𑀧𑀸𑀧𑀺𑀫𑀸’𑀢𑀺 𑀯𑀼𑀘𑁆𑀘𑀢𑀺. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸𑀢𑀺 𑀅𑀬𑀜𑁆𑀳𑀺 𑀪𑀕𑀯𑀢𑀺 𑀩𑁄𑀥𑀺𑀫𑀡𑁆𑀟𑁂 𑀲𑀢𑁆𑀢 𑀲𑀢𑁆𑀢𑀸𑀳𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀯𑀺𑀳𑀭𑀦𑁆𑀢𑁂 𑀅𑀢𑁆𑀢𑀦𑁄 𑀥𑀻𑀢𑀸𑀲𑀼 𑀆𑀕𑀦𑁆𑀢𑁆𑀯𑀸 𑀇𑀘𑁆𑀙𑀸𑀯𑀺𑀖𑀸𑀢𑀁 𑀧𑀢𑁆𑀯𑀸 𑀕𑀢𑀸𑀲𑀼 𑀅𑀬𑀁 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀪𑀕𑀯𑀸 𑀬𑀤𑀢𑁆𑀣𑀁 𑀢𑀼𑀫𑁆𑀳𑁂𑀳𑀺 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀲𑁄 𑀯𑁄 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀧𑀝𑀺𑀯𑀺𑀤𑁆𑀥𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀓𑀺𑀁 𑀢𑁂 𑀮𑁄𑀓𑀯𑀺𑀘𑀭𑀡𑁂𑀦𑀸’’𑀢𑀺 𑀯𑀢𑁆𑀯𑀸 𑀬𑀣𑀸 𑀅𑀚𑁆𑀚 𑀏𑀯𑀫𑁂𑀯 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀬𑀸𑀘𑀺. 𑀪𑀕𑀯𑀸 𑀘𑀲𑁆𑀲 ‘‘𑀦 𑀢𑀸𑀯𑀸𑀳’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀢𑀁 𑀲𑀦𑁆𑀥𑀸𑀬 𑀇𑀤𑀸𑀦𑀺 ‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀯𑀺𑀬𑀢𑁆𑀢𑀸𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀯𑀲𑁂𑀦 𑀩𑁆𑀬𑀢𑁆𑀢𑀸. 𑀯𑀺𑀦𑀻𑀢𑀸𑀢𑀺 𑀢𑀣𑁂𑀯 𑀓𑀺𑀮𑁂𑀲𑀯𑀺𑀦𑀬𑀦𑁂𑀦 𑀯𑀺𑀦𑀻𑀢𑀸. 𑀯𑀺𑀲𑀸𑀭𑀤𑀸𑀢𑀺 𑀲𑀸𑀭𑀚𑁆𑀚𑀓𑀭𑀸𑀦𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀻𑀦𑀁 𑀧𑀳𑀸𑀦𑁂𑀦 𑀯𑀺𑀲𑀸𑀭𑀤𑀪𑀸𑀯𑀁 𑀧𑀢𑁆𑀢𑀸. 𑀩𑀳𑀼𑀲𑁆𑀲𑀼𑀢𑀸𑀢𑀺 𑀢𑁂𑀧𑀺𑀝𑀓𑀯𑀲𑁂𑀦 𑀩𑀳𑀼 𑀲𑀼𑀢𑀫𑁂𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀫𑁂𑀯 𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀥𑀭𑀸. 𑀅𑀣 𑀯𑀸 𑀩𑀳𑀼𑀲𑁆𑀲𑀼𑀢𑀸𑀢𑀺 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑀸 𑀘𑁂𑀯 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑀸 𑀘. 𑀥𑀫𑁆𑀫𑀥𑀭𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀘𑁂𑀯 𑀧𑀝𑀺𑀯𑁂𑀥𑀥𑀫𑁆𑀫𑀸𑀦𑀜𑁆𑀘 𑀥𑀸𑀭𑀡𑀢𑁄 𑀥𑀫𑁆𑀫𑀥𑀭𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸𑀢𑀺 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀪𑀽𑀢𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑀸. 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸𑀢𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑀼𑀘𑁆𑀙𑀯𑀺𑀓𑀁 𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸. 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄𑀢𑀺 𑀲𑀮𑁆𑀮𑁂𑀔𑀺𑀓𑀁 𑀢𑀲𑁆𑀲𑀸 𑀧𑀝𑀺𑀧𑀤𑀸𑀬 𑀅𑀦𑀼𑀭𑀽𑀧𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀥𑀫𑁆𑀫𑀁 𑀘𑀭𑀡𑀲𑀻𑀮𑀸. 𑀲𑀓𑀁 𑀆𑀘𑀭𑀺𑀬𑀓𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀆𑀤𑀺𑀢𑁄 𑀓𑀣𑁂𑀲𑁆𑀲𑀦𑁆𑀢𑀺, 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦 𑀧𑀭𑁂 𑀉𑀕𑁆𑀕𑀡𑁆𑀳𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀲𑁂𑀲𑁆𑀲𑀦𑁆𑀢𑀻𑀢𑀺 𑀯𑀸𑀘𑁂𑀲𑁆𑀲𑀦𑁆𑀢𑀺, 𑀧𑀸𑀴𑀺𑀁 𑀲𑀫𑁆𑀫𑀸 𑀯𑀸𑀘𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀻𑀢𑀺 𑀧𑀚𑀸𑀦𑀸𑀧𑁂𑀲𑁆𑀲𑀦𑁆𑀢𑀺, 𑀧𑀓𑀸𑀲𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀻𑀢𑀺 𑀧𑀓𑀸𑀭𑁂𑀦 𑀞𑀧𑁂𑀲𑁆𑀲𑀦𑁆𑀢𑀺. 𑀯𑀺𑀯𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀯𑀝𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀯𑀺𑀪𑀚𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀁 𑀉𑀢𑁆𑀢𑀸𑀦𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀓𑁂𑀦 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀬𑀸𑀯𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸. 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀩𑁄𑀥𑁂𑀲𑁆𑀲𑀦𑁆𑀢𑀺, 𑀧𑀓𑀸𑀲𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 ‘‘𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀳𑀺 𑀙𑀳𑀺 𑀧𑀤𑁂𑀳𑀺 𑀙 𑀅𑀢𑁆𑀣𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀆𑀤𑀺𑀢𑁄 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀙 𑀩𑁆𑀬𑀜𑁆𑀚𑀦𑀧𑀤𑀸𑀦𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀁𑀯𑀡𑁆𑀡𑀦𑀸𑀦𑀬𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑁂𑀢𑁆𑀢𑀺𑀬𑀁 ‘‘𑀤𑁆𑀯𑀸𑀤𑀲𑀧𑀤𑀸𑀦𑀺 𑀲𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘𑀸’’𑀢𑀺 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭).

𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀤𑁆𑀥𑀦𑁆𑀢𑀺 𑀲𑀫𑀺𑀤𑁆𑀥𑀁 𑀛𑀸𑀦𑀼𑀧𑁆𑀧𑀸𑀤𑀯𑀲𑁂𑀦. 𑀨𑀻𑀢𑀦𑁆𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀁 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀁 𑀅𑀪𑀺𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦. 𑀯𑀺𑀢𑁆𑀣𑀸𑀭𑀺𑀓𑀦𑁆𑀢𑀺 𑀯𑀺𑀢𑁆𑀣𑀢𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀧𑀢𑀺𑀝𑁆𑀞𑀳𑀦𑀯𑀲𑁂𑀦. 𑀩𑀸𑀳𑀼𑀚𑀜𑁆𑀜𑀦𑁆𑀢𑀺 𑀩𑀳𑀽𑀳𑀺 𑀜𑀸𑀢𑀁 𑀧𑀝𑀺𑀯𑀺𑀤𑁆𑀥𑀁 𑀩𑀳𑀼𑀚𑀦𑀸𑀪𑀺𑀲𑀫𑀬𑀯𑀲𑁂𑀦. 𑀧𑀼𑀣𑀼𑀪𑀽𑀢𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑀯𑀲𑁂𑀦 𑀧𑀼𑀣𑀼𑀮𑀪𑀸𑀯𑀧𑁆𑀧𑀢𑁆𑀢𑀁. 𑀓𑀣𑀁? 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀦𑁆𑀢𑀺 𑀬𑀢𑁆𑀢𑀓𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀅𑀢𑁆𑀣𑀺, 𑀢𑁂𑀳𑀺 𑀲𑀩𑁆𑀩𑁂𑀳𑀺 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀦𑀺𑀭𑀼𑀲𑁆𑀲𑀼𑀓𑁆𑀓𑁄 𑀮𑀻𑀦𑀯𑀻𑀭𑀺𑀬𑁄. ‘‘𑀢𑁆𑀯𑀜𑁆𑀳𑀺, 𑀧𑀸𑀧𑀺𑀫, 𑀲𑀢𑁆𑀢𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑀦𑀢𑁄 𑀧𑀝𑁆𑀞𑀸𑀬 ‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄’𑀢𑀺 𑀯𑀺𑀭𑀯𑀦𑁆𑀢𑁄 𑀆𑀳𑀺𑀡𑁆𑀟𑀺𑀢𑁆𑀣, 𑀅𑀚𑁆𑀚 𑀤𑀸𑀦𑀺 𑀧𑀝𑁆𑀞𑀸𑀬 𑀯𑀺𑀕𑀢𑀼𑀲𑁆𑀲𑀸𑀳𑁄 𑀳𑁄𑀳𑀺, 𑀫𑀸 𑀫𑀬𑁆𑀳𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀯𑀸𑀬𑀸𑀫𑀁 𑀓𑀭𑁄𑀳𑀻’’𑀢𑀺 𑀯𑀤𑀢𑀺. 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀻𑀢𑀺 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑀺 𑀧𑀚𑀳𑀺. 𑀢𑀢𑁆𑀣 𑀦 𑀪𑀕𑀯𑀸 𑀳𑀢𑁆𑀣𑁂𑀦 𑀮𑁂𑀟𑁆𑀟𑀼𑀁 𑀯𑀺𑀬 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺, 𑀢𑁂𑀫𑀸𑀲𑀫𑀢𑁆𑀢𑀫𑁂𑀯 𑀧𑀦 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀦 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀑𑀲𑁆𑀲𑀚𑀻’’𑀢𑀺, ‘‘𑀯𑁄𑀲𑁆𑀲𑀚𑁆𑀚𑀻’’𑀢𑀺𑀧𑀺 𑀧𑀸𑀞𑁄.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀓𑀧𑁆𑀧𑀁 𑀯𑀸 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀢𑀢𑁆𑀢𑀓𑀁 𑀓𑀸𑀮𑀁 𑀅𑀝𑁆𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀁 𑀫𑀸𑀭𑀲𑁆𑀲 𑀬𑀸𑀘𑀦𑀸𑀬 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺? 𑀦 𑀪𑀕𑀯𑀸 𑀫𑀸𑀭𑀲𑁆𑀲 𑀬𑀸𑀘𑀦𑀸𑀬 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺, 𑀦𑀸𑀧𑀺 𑀣𑁂𑀭𑀲𑁆𑀲 𑀆𑀬𑀸𑀘𑀦𑀸𑀬 𑀦 𑀑𑀲𑁆𑀲𑀚𑀺𑀲𑁆𑀲𑀢𑀺, 𑀢𑁂𑀫𑀸𑀲𑀢𑁄 𑀧𑀦 𑀧𑀭𑀁 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀸𑀦𑀁 𑀅𑀪𑀸𑀯𑀢𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺. 𑀞𑀸𑀦𑀜𑁆𑀳𑀺 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀬𑀸𑀯𑀤𑁂𑀯 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀢𑁆𑀣𑀁, 𑀢𑁂 𑀅𑀲𑀢𑀺 𑀯𑀺𑀦𑁂𑀬𑁆𑀬𑀚𑀦𑁂 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦 𑀞𑀲𑁆𑀲𑀦𑁆𑀢𑀺. 𑀬𑀤𑀺 𑀘 𑀫𑀸𑀭𑀲𑁆𑀲 𑀬𑀸𑀘𑀦𑀸𑀬 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬, 𑀧𑀼𑀭𑁂𑀢𑀭𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬. 𑀩𑁄𑀥𑀺𑀫𑀡𑁆𑀟𑁂𑀧𑀺 𑀳𑀺 𑀫𑀸𑀭𑁂𑀦 𑀬𑀸𑀘𑀺𑀢𑀁, 𑀦𑀺𑀫𑀺𑀢𑁆𑀢𑁄𑀪𑀸𑀲𑀓𑀭𑀡𑀫𑁆𑀧𑀺 𑀣𑁂𑀭𑀲𑁆𑀲 𑀲𑁄𑀓𑀢𑀦𑀼𑀓𑀭𑀡𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀧𑀺𑀘 𑀩𑀼𑀤𑁆𑀥𑀩𑀮𑀤𑀻𑀧𑀦𑀢𑁆𑀣𑀁 𑀦𑀺𑀫𑀺𑀢𑁆𑀢𑁄𑀪𑀸𑀲𑀓𑀭𑀡𑀁. 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄𑀬𑁂𑀯 𑀢𑀺𑀝𑁆𑀞𑀦𑁆𑀢𑀸𑀧𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸𑀯 𑀢𑀺𑀝𑁆𑀞𑀦𑁆𑀢𑀺, 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀸𑀧𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺.

𑀫𑀳𑀸𑀪𑀽𑀫𑀺𑀘𑀸𑀮𑁄𑀢𑀺 𑀫𑀳𑀦𑁆𑀢𑁄 𑀧𑀣𑀯𑀻𑀓𑀫𑁆𑀧𑁄. 𑀢𑀤𑀸 𑀓𑀺𑀭 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣. 𑀪𑀺𑀁𑀲𑀦𑀓𑁄𑀢𑀺 𑀪𑀬𑀚𑀦𑀓𑁄. 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀽𑀢𑀺 𑀤𑁂𑀯𑀪𑁂𑀭𑀺𑀬𑁄 𑀦𑀤𑀺𑀁𑀲𑀼, 𑀤𑁂𑀯𑁄 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀺, 𑀅𑀓𑀸𑀮𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼, 𑀔𑀡𑀺𑀓𑀯𑀲𑁆𑀲𑀁 𑀯𑀲𑁆𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀲𑀗𑁆𑀔𑀸𑀭𑀯𑀺𑀲𑀗𑁆𑀔𑀸𑀭𑀸𑀦𑀁 𑀯𑀺𑀲𑁂𑀲𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀅𑀦𑀯𑀲𑁂𑀲𑀲𑀗𑁆𑀔𑀸𑀭𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀲𑀗𑁆𑀔𑀸𑀭𑀕𑀫𑀦𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀓𑀲𑁆𑀫𑀸 𑀉𑀤𑀸𑀦𑁂𑀲𑀺? 𑀓𑁄𑀘𑀺 𑀦𑀸𑀫 𑀯𑀤𑁂𑀬𑁆𑀬 ‘‘𑀫𑀸𑀭𑁂𑀦 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 ‘𑀧𑀭𑀺𑀦𑀺𑀩𑁆𑀩𑀸𑀢𑀼, 𑀪𑀦𑁆𑀢𑁂’𑀢𑀺 𑀉𑀧𑀤𑁆𑀤𑀼𑀢𑁄 𑀪𑀬𑁂𑀦 𑀪𑀕𑀯𑀸 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀻’’𑀢𑀺. ‘‘𑀢𑀲𑁆𑀲𑁄𑀓𑀸𑀲𑁄 𑀫𑀸 𑀳𑁄𑀢𑀼, 𑀪𑀻𑀢𑀲𑁆𑀲 𑀉𑀤𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀏𑀢𑀲𑁆𑀲 𑀤𑀻𑀧𑀦𑀢𑁆𑀣𑀁 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀢𑁄 𑀢𑁂𑀫𑀸𑀲𑀫𑀢𑁆𑀢𑁂𑀦𑁂𑀯 𑀘 𑀧𑀦 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲 𑀦𑀺𑀧𑁆𑀨𑀚𑁆𑀚𑀦𑀢𑁄 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀫𑀬𑀸 𑀧𑀭𑀺𑀳𑀝𑁄𑀬𑀁 𑀤𑀼𑀓𑁆𑀔𑀪𑀸𑀭𑁄 𑀦 𑀘𑀺𑀭𑀲𑁆𑀲𑁂𑀯 𑀦𑀺𑀓𑁆𑀔𑀺𑀧𑀺𑀬𑀢𑀻𑀢𑀺 𑀧𑀲𑁆𑀲𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀕𑀼𑀡𑀧𑀘𑁆𑀘𑀯𑁂𑀓𑁆𑀔𑀡𑁂 𑀢𑀲𑁆𑀲 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺, 𑀢𑁂𑀦 𑀧𑀻𑀢𑀺𑀯𑁂𑀕𑁂𑀦 𑀉𑀤𑀸𑀦𑁂𑀲𑀻𑀢𑀺 𑀬𑀼𑀢𑁆𑀢𑀁 𑀯𑀺𑀬. 𑀏𑀓𑀦𑁆𑀢𑁂𑀦 𑀳𑀺 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀚𑁆𑀛𑀸𑀲𑀬𑁄 𑀲𑀢𑁆𑀣𑀸 𑀫𑀳𑀸𑀓𑀭𑀼𑀡𑀸𑀬 𑀩𑀮𑀓𑁆𑀓𑀸𑀭𑁂𑀦 𑀯𑀺𑀬 𑀲𑀢𑁆𑀢𑀳𑀺𑀢𑀢𑁆𑀣𑀁 𑀮𑁄𑀓𑁂 𑀲𑀼𑀘𑀺𑀭𑀁 𑀞𑀺𑀢𑁄. 𑀢𑀣𑀸 𑀳𑀺 𑀤𑁂𑀯𑀲𑀺𑀓𑀁 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀲𑀫𑀸𑀧𑀢𑁆𑀢𑀺𑀬𑁄 𑀯𑀴𑀜𑁆𑀚𑁂𑀢𑀺, 𑀲𑁄𑀤𑀸𑀦𑀺 𑀫𑀳𑀸𑀓𑀭𑀼𑀡𑀸𑀥𑀺𑀓𑀸𑀭𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑁄 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀲𑀺. 𑀢𑁂𑀦𑁂𑀯 𑀳𑀺 𑀪𑀕𑀯𑀢𑁄 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀯𑀺𑀬 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀧𑀺 𑀲𑀭𑀻𑀭𑀸𑀪𑀸 𑀯𑀺𑀲𑁂𑀲𑀢𑁄 𑀯𑀺𑀧𑁆𑀧𑀲𑀦𑁆𑀦𑀸 𑀧𑀭𑀺𑀲𑀼𑀤𑁆𑀥𑀸 𑀧𑀪𑀲𑁆𑀲𑀭𑀸 𑀅𑀳𑁄𑀲𑀻𑀢𑀺.

𑀕𑀸𑀣𑀸𑀬 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀢𑀼𑀮𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀢𑀼𑀮𑀁, 𑀓𑀸𑀫𑀸𑀯𑀘𑀭𑀓𑀫𑁆𑀫𑀁. 𑀦 𑀢𑀼𑀮𑀁 𑀅𑀢𑀼𑀮𑀁, 𑀢𑀼𑀮𑀁 𑀯𑀸 𑀲𑀤𑀺𑀲𑀫𑀲𑁆𑀲 𑀅𑀜𑁆𑀜𑀁 𑀮𑁄𑀓𑀺𑀬𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀅𑀢𑀼𑀮𑀁, 𑀫𑀳𑀕𑁆𑀕𑀢𑀓𑀫𑁆𑀫𑀁. 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀯𑀸 𑀢𑀼𑀮𑀁, 𑀅𑀭𑀽𑀧𑀸𑀯𑀘𑀭𑀁 𑀅𑀢𑀼𑀮𑀁. 𑀅𑀧𑁆𑀧𑀯𑀺𑀧𑀸𑀓𑀁 𑀯𑀸 𑀢𑀼𑀮𑀁, 𑀩𑀳𑀼𑀯𑀺𑀧𑀸𑀓𑀁 𑀅𑀢𑀼𑀮𑀁. 𑀲𑀫𑁆𑀪𑀯𑀦𑁆𑀢𑀺 𑀲𑀫𑁆𑀪𑀯𑀲𑁆𑀲 𑀳𑁂𑀢𑀼𑀪𑀽𑀢𑀁, 𑀉𑀧𑀧𑀢𑁆𑀢𑀺𑀚𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀭𑀡𑀓𑀁. 𑀅𑀯𑀲𑁆𑀲𑀚𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀫𑀼𑀦𑀻𑀢𑀺 𑀩𑀼𑀤𑁆𑀥𑀫𑀼𑀦𑀺. 𑀅𑀚𑁆𑀛𑀢𑁆𑀢𑀭𑀢𑁄𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀭𑀢𑁄. 𑀲𑀫𑀸𑀳𑀺𑀢𑁄𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀲𑁂𑀦 𑀲𑀫𑀸𑀳𑀺𑀢𑁄. 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀸𑀢𑀺 𑀓𑀯𑀘𑀁 𑀯𑀺𑀬 𑀅𑀪𑀺𑀦𑁆𑀤𑀺. 𑀅𑀢𑁆𑀢𑀲𑀫𑁆𑀪𑀯𑀦𑁆𑀢𑀺 𑀅𑀢𑁆𑀢𑀦𑀺 𑀲𑀜𑁆𑀚𑀸𑀢𑀁 𑀓𑀺𑀮𑁂𑀲𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀲𑀯𑀺𑀧𑀸𑀓𑀝𑁆𑀞𑁂𑀦 𑀲𑀫𑁆𑀪𑀯𑀁, 𑀪𑀯𑀸𑀪𑀯𑀸𑀪𑀺𑀲𑀗𑁆𑀔𑀭𑀡𑀝𑁆𑀞𑁂𑀦 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀁 𑀢𑀼𑀮𑀸𑀢𑀼𑀮𑀲𑀗𑁆𑀔𑀸𑀢𑀁 𑀮𑁄𑀓𑀺𑀬𑀓𑀫𑁆𑀫𑀜𑁆𑀘 𑀑𑀲𑁆𑀲𑀚𑀺, 𑀲𑀗𑁆𑀕𑀸𑀫𑀲𑀻𑀲𑁂 𑀫𑀳𑀸𑀬𑁄𑀥𑁄 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀲𑀫𑁆𑀪𑀯𑀁 𑀓𑀺𑀮𑁂𑀲𑀜𑁆𑀘 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄 𑀳𑀼𑀢𑁆𑀯𑀸 𑀅𑀪𑀺𑀦𑁆𑀤𑀻’’𑀢𑀺.

𑀅𑀣 𑀯𑀸 𑀢𑀼𑀮𑀦𑁆𑀢𑀺 𑀢𑀼𑀮𑁂𑀦𑁆𑀢𑁄 𑀢𑀻𑀭𑁂𑀦𑁆𑀢𑁄. 𑀅𑀢𑀼𑀮𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀪𑀯𑀜𑁆𑀘. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀪𑀯𑀕𑀸𑀫𑀺𑀓𑀁 𑀓𑀫𑁆𑀫𑀁. 𑀅𑀯𑀲𑁆𑀲𑀚𑀺 𑀫𑀼𑀦𑀻𑀢𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸, 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀼𑀮𑁂𑀦𑁆𑀢𑁄 𑀩𑀼𑀤𑁆𑀥𑀫𑀼𑀦𑀺 𑀪𑀯𑁂 𑀆𑀤𑀻𑀦𑀯𑀁, 𑀦𑀺𑀩𑁆𑀩𑀸𑀦𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀢𑀁 𑀔𑀦𑁆𑀥𑀸𑀦𑀁 𑀫𑀽𑀮𑀪𑀽𑀢𑀁 𑀪𑀯𑀲𑀗𑁆𑀔𑀸𑀭𑀓𑀫𑁆𑀫𑀁 ‘‘𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁨.𑁮𑁧; 𑀅. 𑀦𑀺. 𑁪.𑁨𑁩𑁩) 𑀏𑀯𑀁 𑀯𑀼𑀢𑁆𑀢𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀅𑀯𑀲𑁆𑀲𑀚𑀺. 𑀓𑀣𑀁 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄, 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯𑀁. 𑀲𑁄 𑀳𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀚𑁆𑀛𑀢𑁆𑀢𑀭𑀢𑁄, 𑀲𑀫𑀣𑀯𑀲𑁂𑀦 𑀲𑀫𑀸𑀳𑀺𑀢𑁄𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀪𑀸𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁, 𑀅𑀢𑁆𑀢𑀦𑀺 𑀲𑀫𑁆𑀪𑀯𑀢𑁆𑀢𑀸 ‘‘𑀅𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀩𑁆𑀩𑀁 𑀓𑀺𑀮𑁂𑀲𑀚𑀸𑀮𑀁 𑀅𑀪𑀺𑀦𑁆𑀤𑀺, 𑀓𑀺𑀮𑁂𑀲𑀸𑀪𑀸𑀯𑁂𑀦𑁂𑀯 𑀓𑀫𑁆𑀫𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀯𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀯𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀓𑀫𑁆𑀫𑀁 𑀧𑀚𑀳𑀺. 𑀇𑀢𑀺 𑀩𑁄𑀥𑀺𑀫𑀽𑀮𑁂𑀬𑁂𑀯 𑀅𑀯𑀲𑁆𑀲𑀝𑁆𑀞𑀪𑀯𑀲𑀗𑁆𑀔𑀸𑀭𑁄 𑀪𑀕𑀯𑀸 𑀯𑁂𑀔𑀫𑀺𑀲𑁆𑀲𑀓𑁂𑀦 𑀯𑀺𑀬 𑀚𑀭𑀲𑀓𑀝𑀁 𑀲𑀫𑀸𑀧𑀢𑁆𑀢𑀺𑀯𑁂𑀔𑀫𑀺𑀲𑁆𑀲𑀓𑁂𑀦 𑀅𑀢𑁆𑀢𑀪𑀸𑀯𑀁 𑀬𑀸𑀧𑁂𑀦𑁆𑀢𑁄𑀧𑀺 ‘‘𑀇𑀢𑁄 𑀢𑁂𑀫𑀸𑀲𑀢𑁄 𑀉𑀤𑁆𑀥𑀁 𑀲𑀫𑀸𑀧𑀢𑁆𑀢𑀺𑀯𑁂𑀔𑀫𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁂𑀦 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀻𑀢𑀺.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀢𑁆𑀢𑀚𑀝𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀼𑀢𑀺𑀬𑁂 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀢𑀺 𑀧𑀸𑀲𑀸𑀤𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀩𑀳𑀺, 𑀦 𑀯𑀺𑀳𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲. 𑀲𑁄 𑀓𑀺𑀭 𑀧𑀸𑀲𑀸𑀤𑁄 𑀮𑁄𑀳𑀧𑀸𑀲𑀸𑀤𑁄 𑀯𑀺𑀬 𑀲𑀫𑀦𑁆𑀢𑀸 𑀘𑀢𑀼𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀭𑀺𑀯𑀼𑀢𑁄 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁄. 𑀢𑁂𑀲𑀼 𑀧𑀸𑀘𑀻𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀩𑀳𑀺 𑀧𑀸𑀲𑀸𑀤𑀘𑁆𑀙𑀸𑀬𑀸𑀬𑀁 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀚𑀝𑀺𑀮𑀸𑀢𑀺 𑀚𑀝𑀸𑀯𑀦𑁆𑀢𑁄 𑀢𑀸𑀧𑀲𑀯𑁂𑀲𑀥𑀸𑀭𑀺𑀦𑁄. 𑀦𑀺𑀕𑀡𑁆𑀞𑀸𑀢𑀺 𑀲𑁂𑀢𑀧𑀝𑀦𑀺𑀕𑀡𑁆𑀞𑀭𑀽𑀧𑀥𑀸𑀭𑀺𑀦𑁄. 𑀏𑀓𑀲𑀸𑀝𑀓𑀸𑀢𑀺 𑀏𑀓𑀲𑀸𑀝𑀓𑀦𑀺𑀕𑀡𑁆𑀞𑀸 𑀯𑀺𑀬 𑀏𑀓𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀳𑀢𑁆𑀣𑁂 𑀩𑀦𑁆𑀥𑀺𑀢𑁆𑀯𑀸 𑀢𑁂𑀦𑀸𑀧𑀺 𑀲𑀭𑀻𑀭𑀲𑁆𑀲 𑀧𑀼𑀭𑀺𑀫𑀪𑀸𑀕𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀘𑀭𑀡𑀓𑀸. 𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸𑀢𑀺 𑀧𑀭𑀽𑀴𑁆𑀳𑀓𑀘𑁆𑀙𑀮𑁄𑀫𑀸 𑀧𑀭𑀽𑀴𑁆𑀳𑀦𑀔𑀸 𑀧𑀭𑀽𑀴𑁆𑀳𑀅𑀯𑀲𑁂𑀲𑀮𑁄𑀫𑀸 𑀘, 𑀓𑀘𑁆𑀙𑀸𑀤𑀻𑀲𑀼 𑀤𑀻𑀖𑀮𑁄𑀫𑀸 𑀤𑀻𑀖𑀦𑀔𑀸 𑀘𑀸𑀢𑀺 𑀅𑀢𑁆𑀣𑁄. 𑀔𑀸𑀭𑀺𑀯𑀺𑀯𑀺𑀥𑀫𑀸𑀤𑀸𑀬𑀸𑀢𑀺 𑀯𑀺𑀯𑀺𑀥𑀁 𑀔𑀸𑀭𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸. 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀯𑀺𑀳𑀸𑀭𑀲𑁆𑀲 𑀅𑀯𑀺𑀤𑀽𑀭𑀫𑀕𑁆𑀕𑁂𑀦 𑀦𑀕𑀭𑀁 𑀧𑀯𑀺𑀲𑀦𑁆𑀢𑀺.

𑀭𑀸𑀚𑀸𑀳𑀁, 𑀪𑀦𑁆𑀢𑁂, 𑀧𑀲𑁂𑀦𑀤𑀺 𑀓𑁄𑀲𑀮𑁄𑀢𑀺 𑀅𑀳𑀁, 𑀪𑀦𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄, 𑀫𑀬𑁆𑀳𑀁 𑀦𑀸𑀫𑀁 𑀢𑀼𑀫𑁆𑀳𑁂 𑀚𑀸𑀦𑀸𑀣𑀸𑀢𑀺. 𑀓𑀲𑁆𑀫𑀸 𑀧𑀦 𑀭𑀸𑀚𑀸 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀏𑀯𑀭𑀽𑀧𑀸𑀦𑀁 𑀦𑀕𑁆𑀕𑀦𑀺𑀲𑁆𑀲𑀺𑀭𑀻𑀓𑀸𑀦𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺? 𑀲𑀗𑁆𑀕𑀡𑁆𑀳𑀦𑀢𑁆𑀣𑀸𑀬. 𑀏𑀯𑀜𑁆𑀳𑀺𑀲𑁆𑀲 𑀅𑀳𑁄𑀲𑀺 ‘‘𑀲𑀘𑀸𑀳𑀁 𑀏𑀢𑁆𑀢𑀓𑀫𑁆𑀧𑀺 𑀏𑀢𑁂𑀲𑀁 𑀦 𑀓𑀭𑀺𑀲𑁆𑀲𑀸𑀫𑀺, 𑀫𑀬𑀁 𑀧𑀼𑀢𑁆𑀢𑀤𑀸𑀭𑀁 𑀧𑀳𑀸𑀬 𑀏𑀢𑀲𑁆𑀲𑀢𑁆𑀣𑀸𑀬 𑀤𑀼𑀩𑁆𑀪𑁄𑀚𑀦𑀤𑀼𑀓𑁆𑀔𑀲𑁂𑀬𑁆𑀬𑀸𑀤𑀻𑀦𑀺 𑀅𑀦𑀼𑀪𑁄𑀫, 𑀅𑀬𑀁 𑀅𑀫𑁆𑀳𑀸𑀓𑀁 𑀦𑀺𑀧𑀘𑁆𑀘𑀓𑀸𑀭𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀢𑁂 𑀅𑀫𑁆𑀳𑁂 ‘𑀑𑀘𑀭𑀓𑀸’𑀢𑀺 𑀚𑀦𑁄 𑀅𑀕𑁆𑀕𑀳𑁂𑀢𑁆𑀯𑀸 ‘𑀧𑀩𑁆𑀩𑀚𑀺𑀢𑀸’𑀇𑀘𑁆𑀘𑁂𑀯 𑀲𑀜𑁆𑀚𑀸𑀦𑀺𑀲𑁆𑀲𑀢𑀺, 𑀓𑀺𑀁 𑀇𑀫𑀲𑁆𑀲 𑀪𑀽𑀢𑀢𑁆𑀣𑀓𑀣𑀦𑁂𑀦𑀸𑀢𑀺 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀲𑀼𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦 𑀓𑀣𑁂𑀬𑁆𑀬𑀼𑀁, 𑀏𑀯𑀁 𑀓𑀢𑁂 𑀧𑀦 𑀅𑀦𑀺𑀕𑀽𑀳𑀺𑀢𑁆𑀯𑀸 𑀓𑀣𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀧𑀺𑀘 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀚𑀸𑀦𑀦𑀢𑁆𑀣𑀫𑁆𑀧𑀺 𑀏𑀯𑀫𑀓𑀸𑀲𑀻𑀢𑀺. 𑀭𑀸𑀚𑀸 𑀓𑀺𑀭 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄𑀧𑀺 𑀓𑀢𑀺𑀧𑀬𑀓𑀸𑀮𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀦 𑀲𑀤𑁆𑀤𑀳𑀺. 𑀢𑁂𑀦𑀲𑁆𑀲 𑀏𑀯𑀁 𑀅𑀳𑁄𑀲𑀺 ‘‘𑀬𑀤𑀺 𑀪𑀕𑀯𑀸 𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀫𑀬𑀸 𑀇𑀫𑁂𑀲𑀁 𑀦𑀺𑀧𑀘𑁆𑀘𑀓𑀸𑀭𑀁 𑀓𑀢𑁆𑀯𑀸 ‘𑀇𑀫𑁂 𑀅𑀭𑀳𑀦𑁆𑀢𑁄’𑀢𑀺 𑀯𑀼𑀢𑁆𑀢𑁂 𑀦𑀸𑀦𑀼𑀚𑀸𑀦𑁂𑀬𑁆𑀬, 𑀅𑀣 𑀫𑀁 𑀅𑀦𑀼𑀯𑀢𑁆𑀢𑀦𑁆𑀢𑁄 𑀅𑀦𑀼𑀚𑀸𑀦𑁂𑀬𑁆𑀬, 𑀓𑀼𑀢𑁄 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀸’’𑀢𑀺. 𑀏𑀯𑀁 𑀲𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀚𑀸𑀦𑀦𑀢𑁆𑀣𑀁 𑀢𑀣𑀸 𑀅𑀓𑀸𑀲𑀺. 𑀪𑀕𑀯𑀸 𑀧𑀦 ‘‘𑀉𑀚𑀼𑀓𑀫𑁂𑀯 ‘𑀦 𑀇𑀫𑁂 𑀲𑀫𑀡𑀸 𑀑𑀘𑀭𑀓𑀸’𑀢𑀺 𑀯𑀼𑀢𑁆𑀢𑁂 𑀬𑀤𑀺𑀧𑀺 𑀭𑀸𑀚𑀸 𑀲𑀤𑁆𑀤𑀳𑀢𑀺, 𑀫𑀳𑀸𑀚𑀦𑁄 𑀧𑀦 𑀢𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀦 𑀲𑀤𑁆𑀤𑀳𑁂𑀬𑁆𑀬, 𑀲𑀫𑀡𑁄 𑀕𑁄𑀢𑀫𑁄 ‘𑀭𑀸𑀚𑀸 𑀅𑀢𑁆𑀢𑀦𑁄 𑀓𑀣𑀁 𑀲𑀼𑀡𑀸𑀢𑀻’𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀼𑀔𑀸𑀭𑀼𑀴𑁆𑀳𑀁 𑀓𑀣𑁂𑀢𑀻’𑀢𑀺 𑀯𑀤𑁂𑀬𑁆𑀬, 𑀢𑀤𑀲𑁆𑀲 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀅𑀜𑁆𑀜𑁄 𑀘 𑀕𑀼𑀴𑁆𑀳𑀓𑀫𑁆𑀫𑀁 𑀯𑀺𑀯𑀝𑀁 𑀓𑀢𑀁 𑀪𑀯𑁂𑀬𑁆𑀬, 𑀲𑀬𑀫𑁂𑀯 𑀭𑀸𑀚𑀸 𑀢𑁂𑀲𑀁 𑀑𑀘𑀭𑀓𑀪𑀸𑀯𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀸𑀫𑀪𑁄𑀕𑀺𑀦𑀸𑀢𑀺 𑀇𑀫𑀺𑀦𑀸 𑀧𑀦 𑀭𑀸𑀕𑀸𑀪𑀺𑀪𑀯𑀁, 𑀉𑀪𑀬𑁂𑀦𑀸𑀧𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀦𑁆𑀢𑀺 𑀧𑀼𑀢𑁆𑀢𑁂𑀳𑀺 𑀲𑀫𑁆𑀩𑀸𑀥𑀲𑀬𑀦𑀁. 𑀏𑀢𑁆𑀣 𑀘 𑀧𑀼𑀢𑁆𑀢𑀲𑀻𑀲𑁂𑀦 𑀤𑀸𑀭𑀧𑀭𑀺𑀕𑁆𑀕𑀳𑀁, 𑀧𑀼𑀢𑁆𑀢𑀤𑀸𑀭𑁂𑀲𑀼 𑀉𑀧𑁆𑀧𑀺𑀮𑀸𑀯𑀺𑀢𑁂𑀦 𑀢𑁂𑀲𑀁 𑀖𑀭𑀸𑀯𑀸𑀲𑀸𑀤𑀺𑀳𑁂𑀢𑀼 𑀲𑁄𑀓𑀸𑀪𑀺𑀪𑀯𑁂𑀦 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺. 𑀓𑀸𑀲𑀺𑀓𑀘𑀦𑁆𑀤𑀦𑀦𑁆𑀢𑀺 𑀲𑀡𑁆𑀳𑀘𑀦𑁆𑀤𑀦𑀁, 𑀓𑀸𑀲𑀺𑀓𑀯𑀢𑁆𑀣𑀜𑁆𑀘 𑀘𑀦𑁆𑀤𑀦𑀜𑁆𑀘𑀸𑀢𑀺 𑀯𑀸 𑀅𑀢𑁆𑀣𑁄. 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀦𑁆𑀢𑀺 𑀯𑀡𑁆𑀡𑀕𑀦𑁆𑀥𑀢𑁆𑀣𑀸𑀬 𑀫𑀸𑀮𑀸, 𑀲𑀼𑀕𑀦𑁆𑀥𑀪𑀸𑀯𑀢𑁆𑀣𑀸𑀬 𑀕𑀦𑁆𑀥𑀁, 𑀙𑀯𑀺𑀭𑀸𑀕𑀓𑀭𑀡𑀢𑁆𑀣𑀸𑀬 𑀯𑀺𑀮𑁂𑀧𑀦𑀁 𑀥𑀸𑀭𑁂𑀦𑁆𑀢𑁂𑀦. 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺 𑀲𑀼𑀯𑀡𑁆𑀡𑀜𑁆𑀘𑁂𑀯 𑀅𑀯𑀲𑀺𑀝𑁆𑀞𑀥𑀦𑀜𑁆𑀘. 𑀲𑀸𑀤𑀺𑀬𑀦𑁆𑀢𑁂𑀦𑀸𑀢𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁂𑀦. 𑀲𑀩𑁆𑀩𑁂𑀦𑀧𑀺 𑀓𑀸𑀫𑁂𑀲𑀼 𑀅𑀪𑀺𑀕𑀺𑀤𑁆𑀥𑀪𑀸𑀯𑀫𑁂𑀯 𑀧𑀓𑀸𑀲𑁂𑀢𑀺.

𑀲𑀁𑀯𑀸𑀲𑁂𑀦𑀸𑀢𑀺 𑀲𑀳𑀯𑀸𑀲𑁂𑀦. 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 ‘‘𑀅𑀬𑀁 𑀧𑁂𑀲𑀮𑁄 𑀯𑀸 𑀤𑀼𑀲𑁆𑀲𑀻𑀮𑁄 𑀯𑀸’’𑀢𑀺 𑀲𑀁𑀯𑀲𑀦𑁆𑀢𑁂𑀦 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀳 𑀯𑀲𑀦𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑁄. 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀦 𑀇𑀢𑁆𑀢𑀭𑀦𑁆𑀢𑀺 𑀢𑀜𑁆𑀘 𑀲𑀻𑀮𑀁 𑀤𑀻𑀖𑁂𑀦 𑀓𑀸𑀮𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀇𑀢𑁆𑀢𑀭𑁂𑀦. 𑀓𑀢𑀺𑀧𑀬𑀤𑀺𑀯𑀲𑁂 𑀳𑀺 𑀲𑀜𑁆𑀜𑀢𑀸𑀓𑀸𑀭𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸𑀓𑀸𑀭𑁄 𑀘 𑀳𑀼𑀢𑁆𑀯𑀸 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀁. 𑀫𑀦𑀲𑀺 𑀓𑀭𑁄𑀢𑀸 𑀦𑁄 𑀅𑀫𑀦𑀲𑀺 𑀓𑀭𑁄𑀢𑀸𑀢𑀺 𑀢𑀫𑁆𑀧𑀺 ‘‘𑀲𑀻𑀮𑀫𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀫𑀦𑀲𑀺 𑀓𑀭𑁄𑀦𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀦 𑀇𑀢𑀭𑁂𑀦. 𑀧𑀜𑁆𑀜𑀯𑀢𑀸𑀢𑀺 𑀢𑀫𑁆𑀧𑀺 𑀲𑀧𑁆𑀧𑀜𑁆𑀜𑁂𑀦𑁂𑀯 𑀧𑀡𑁆𑀟𑀺𑀢𑁂𑀦. 𑀩𑀸𑀮𑁄 𑀳𑀺 𑀫𑀦𑀲𑀺 𑀓𑀭𑁄𑀦𑁆𑀢𑁄𑀧𑀺 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀁𑀯𑁄𑀳𑀸𑀭𑁂𑀦𑀸𑀢𑀺 𑀓𑀣𑀦𑁂𑀦.

‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀯𑁄𑀳𑀸𑀭𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀯𑀸𑀡𑀺𑀚𑁄 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄’’𑀢𑀺. (𑀲𑀼. 𑀦𑀺. 𑁬𑁧𑁯) 𑁋

𑀏𑀢𑁆𑀣 𑀳𑀺 𑀯𑀸𑀡𑀺𑀚𑁆𑀚𑀁 𑀯𑁄𑀳𑀸𑀭𑁄 𑀦𑀸𑀫. ‘‘𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑁄𑀳𑀸𑀭𑀸’’𑀢𑀺 (𑀤𑀻. 𑀦𑀺. 𑁩.𑁩𑁧𑁩) 𑀏𑀢𑁆𑀣 𑀘𑁂𑀢𑀦𑀸. ‘‘𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁫) 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺. ‘‘𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑁄 𑀯𑁄𑀳𑀭𑁂𑀬𑁆𑀬𑀸’’𑀢𑀺 (𑀲𑀁. 𑀦𑀺. 𑁧.𑁨𑁫) 𑀏𑀢𑁆𑀣 𑀓𑀣𑀸 𑀯𑁄𑀳𑀸𑀭𑁄. 𑀇𑀥𑀸𑀧𑀺 𑀲𑁄 𑀏𑀯 𑀅𑀥𑀺𑀧𑁆𑀧𑁂𑀢𑁄. 𑀏𑀓𑀘𑁆𑀘𑀲𑁆𑀲 𑀳𑀺 𑀲𑀫𑁆𑀫𑀼𑀔𑀸𑀓𑀣𑀸 𑀧𑀭𑀫𑁆𑀫𑀼𑀔𑀸𑀓𑀣𑀸𑀬 𑀦 𑀲𑀫𑁂𑀢𑀺, 𑀧𑀭𑀫𑁆𑀫𑀼𑀔𑀸𑀓𑀣𑀸 𑀲𑀫𑁆𑀫𑀼𑀔𑀸𑀓𑀣𑀸𑀬, 𑀢𑀣𑀸 𑀧𑀼𑀭𑀺𑀫𑀓𑀣𑀸 𑀧𑀘𑁆𑀙𑀺𑀫𑀓𑀣𑀸𑀬, 𑀧𑀘𑁆𑀙𑀺𑀫𑀓𑀣𑀸 𑀘 𑀧𑀼𑀭𑀺𑀫𑀓𑀣𑀸𑀬. 𑀲𑁄 𑀓𑀣𑁂𑀦𑁆𑀢𑁄𑀬𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 ‘‘𑀅𑀲𑀼𑀘𑀺 𑀏𑀲𑁄 𑀧𑀼𑀕𑁆𑀕𑀮𑁄’’𑀢𑀺. 𑀲𑀼𑀘𑀺𑀲𑀻𑀮𑀲𑁆𑀲 𑀧𑀦 𑀧𑀼𑀭𑀺𑀫𑀁 𑀧𑀘𑁆𑀙𑀺𑀫𑁂𑀦, 𑀧𑀘𑁆𑀙𑀺𑀫𑀜𑁆𑀘 𑀧𑀼𑀭𑀺𑀫𑁂𑀦, 𑀲𑀫𑁆𑀫𑀼𑀔𑀸 𑀓𑀣𑀺𑀢𑀜𑁆𑀘 𑀧𑀭𑀫𑁆𑀫𑀼𑀔𑀸 𑀓𑀣𑀺𑀢𑁂𑀦, 𑀧𑀭𑀫𑁆𑀫𑀼𑀔𑀸 𑀓𑀣𑀺𑀢𑀜𑁆𑀘 𑀲𑀫𑁆𑀫𑀼𑀔𑀸 𑀓𑀣𑀺𑀢𑁂𑀦 𑀲𑀫𑁂𑀢𑀺, 𑀢𑀲𑁆𑀫𑀸 𑀓𑀣𑁂𑀦𑁆𑀢𑁂𑀦 𑀲𑀓𑁆𑀓𑀸 𑀲𑀼𑀘𑀺𑀪𑀸𑀯𑁄 𑀚𑀸𑀦𑀺𑀢𑀼𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀁𑀯𑁄𑀳𑀸𑀭𑁂𑀦 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀣𑀸𑀫𑁄𑀢𑀺 𑀜𑀸𑀡𑀣𑀸𑀫𑁄. 𑀬𑀲𑁆𑀲 𑀳𑀺 𑀜𑀸𑀡𑀣𑀸𑀫𑁄 𑀦𑀢𑁆𑀣𑀺, 𑀲𑁄 𑀉𑀧𑁆𑀧𑀦𑁆𑀦𑁂𑀲𑀼 𑀉𑀧𑀤𑁆𑀤𑀯𑁂𑀲𑀼 𑀕𑀳𑁂𑀢𑀩𑁆𑀩𑀕𑀳𑀡𑀁 𑀓𑀢𑁆𑀢𑀩𑁆𑀩𑀓𑀭𑀡𑀁 𑀅𑀧𑀲𑁆𑀲𑀦𑁆𑀢𑁄 𑀅𑀤𑁆𑀯𑀸𑀭𑀺𑀓𑀁 𑀖𑀭𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀘𑀭𑀢𑀺. 𑀢𑁂𑀦𑀸𑀳 𑁋 ‘‘𑀆𑀧𑀤𑀸𑀲𑀼 𑀔𑁄, 𑀫𑀳𑀸𑀭𑀸𑀚,𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀲𑀸𑀓𑀘𑁆𑀙𑀸𑀬𑀸𑀢𑀺 𑀲𑀳𑀓𑀣𑀸𑀬. 𑀤𑀼𑀧𑁆𑀧𑀜𑁆𑀜𑀲𑁆𑀲 𑀳𑀺 𑀓𑀣𑀸 𑀉𑀤𑀓𑁂 𑀕𑁂𑀡𑁆𑀟𑀼 𑀯𑀺𑀬 𑀉𑀧𑁆𑀮𑀯𑀢𑀺, 𑀧𑀜𑁆𑀜𑀯𑀢𑁄 𑀓𑀣𑁂𑀦𑁆𑀢𑀲𑁆𑀲 𑀧𑀝𑀺𑀪𑀸𑀦𑀁 𑀅𑀦𑀦𑁆𑀢𑀁 𑀳𑁄𑀢𑀺. 𑀉𑀤𑀓𑀯𑀺𑀧𑁆𑀨𑀦𑁆𑀤𑀦𑁂𑀦𑁂𑀯 𑀳𑀺 𑀫𑀘𑁆𑀙𑁄 𑀔𑀼𑀤𑁆𑀤𑀓𑁄 𑀫𑀳𑀦𑁆𑀢𑁄 𑀯𑀸𑀢𑀺 𑀧𑀜𑁆𑀜𑀸𑀬𑀢𑀺.

𑀇𑀢𑀺 𑀪𑀕𑀯𑀸 𑀭𑀜𑁆𑀜𑁄 𑀉𑀚𑀼𑀓𑀫𑁂𑀯 𑀢𑁂 ‘‘𑀇𑀫𑁂 𑀦𑀸𑀫𑀸’’𑀢𑀺 𑀅𑀯𑀢𑁆𑀯𑀸 𑀅𑀭𑀳𑀦𑁆𑀢𑀸𑀦𑀁 𑀅𑀦𑀭𑀳𑀦𑁆𑀢𑀸𑀦𑀜𑁆𑀘 𑀚𑀸𑀦𑀦𑀽𑀧𑀸𑀬𑀁 𑀧𑀓𑀸𑀲𑁂𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀸𑀬 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘 𑀅𑀪𑀺𑀧𑁆𑀧𑀲𑀦𑁆𑀦𑁄 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀧𑀲𑀸𑀤𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂 𑀬𑀸𑀣𑀸𑀯𑀢𑁄 𑀪𑀕𑀯𑀢𑁄 𑀆𑀭𑁄𑀘𑁂𑀦𑁆𑀢𑁄 ‘‘𑀏𑀢𑁂, 𑀪𑀦𑁆𑀢𑁂, 𑀫𑀫 𑀧𑀼𑀭𑀺𑀲𑀸 𑀘𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀭𑀸𑀢𑀺 𑀅𑀧𑀩𑁆𑀩𑀚𑀺𑀢𑀸 𑀏𑀯 𑀧𑀩𑁆𑀩𑀚𑀺𑀢𑀭𑀽𑀧𑁂𑀦 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀦𑁆𑀢𑀸 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀢𑁆𑀢𑀸. 𑀑𑀘𑀭𑀓𑀸𑀢𑀺 𑀳𑁂𑀝𑁆𑀞𑀸 𑀘𑀭𑀓𑀸. 𑀘𑀭𑀸 𑀳𑀺 𑀧𑀩𑁆𑀩𑀢𑀫𑀢𑁆𑀣𑀓𑁂𑀦 𑀘𑀭𑀦𑁆𑀢𑀸𑀧𑀺 𑀳𑁂𑀝𑁆𑀞𑀸 𑀘𑀭𑀓𑀸𑀯 𑀦𑀺𑀳𑀻𑀦𑀓𑀫𑁆𑀫𑀢𑁆𑀢𑀸. 𑀅𑀣 𑀯𑀸 𑀑𑀘𑀭𑀓𑀸𑀢𑀺 𑀘𑀭𑀧𑀼𑀭𑀺𑀲𑀸. 𑀑𑀘𑀭𑀺𑀢𑁆𑀯𑀸𑀢𑀺 𑀅𑀯𑀘𑀭𑀺𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁂𑀲𑁂 𑀢𑀁 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀑𑀲𑀸𑀭𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀺, 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀭𑀚𑁄𑀚𑀮𑁆𑀮𑀦𑁆𑀢𑀺 𑀭𑀚𑀜𑁆𑀘 𑀫𑀮𑀜𑁆𑀘. 𑀧𑀯𑀸𑀳𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀯𑀺𑀓𑁆𑀔𑀸𑀮𑀦𑀯𑀲𑁂𑀦 𑀅𑀧𑀦𑁂𑀢𑁆𑀯𑀸. 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽𑀢𑀺 𑀅𑀮𑀗𑁆𑀓𑀸𑀭𑀲𑀢𑁆𑀣𑁂 𑀯𑀼𑀢𑁆𑀢𑀯𑀺𑀥𑀺𑀦𑀸 𑀓𑀧𑁆𑀧𑀓𑁂𑀳𑀺 𑀙𑀺𑀦𑁆𑀦𑀓𑁂𑀲𑀫𑀲𑁆𑀲𑀽. 𑀓𑀸𑀫𑀕𑀼𑀡𑁂𑀳𑀻𑀢𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺, 𑀓𑀸𑀫𑀩𑀦𑁆𑀥𑀦𑁂𑀳𑀺 𑀯𑀸 𑀲𑀫𑀧𑁆𑀧𑀺𑀢𑀸𑀢𑀺 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀸 𑀅𑀮𑁆𑀮𑀻𑀦𑀸. 𑀲𑀫𑀗𑁆𑀕𑀺𑀪𑀽𑀢𑀸𑀢𑀺 𑀲𑀳𑀪𑀽𑀢𑀸. 𑀧𑀭𑀺𑀘𑀸𑀭𑁂𑀲𑁆𑀲𑀦𑁆𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀦𑁆𑀢𑀢𑁄 𑀘𑀸𑀭𑁂𑀲𑁆𑀲𑀦𑁆𑀢𑀺 𑀓𑀻𑀴𑀸𑀧𑁂𑀲𑁆𑀲𑀦𑁆𑀢𑀺 𑀯𑀸.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑁂𑀲𑀁 𑀭𑀸𑀚𑀧𑀼𑀭𑀺𑀲𑀸𑀦𑀁 𑀅𑀢𑁆𑀢𑀦𑁄 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀧𑀩𑁆𑀩𑀚𑀺𑀢𑀯𑁂𑀲𑁂𑀦 𑀮𑁄𑀓𑀯𑀜𑁆𑀘𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀧𑀭𑀸𑀥𑀻𑀦𑀢𑀸𑀧𑀭𑀯𑀜𑁆𑀘𑀦𑀢𑀸𑀧𑀝𑀺𑀓𑁆𑀔𑁂𑀧𑀯𑀺𑀪𑀸𑀯𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀦 𑀯𑀸𑀬𑀫𑁂𑀬𑁆𑀬 𑀲𑀩𑁆𑀩𑀢𑁆𑀣𑀸𑀢𑀺 𑀤𑀽𑀢𑁂𑀬𑁆𑀬𑀑𑀘𑀭𑀓𑀓𑀫𑁆𑀫𑀸𑀤𑀺𑀓𑁂 𑀲𑀩𑁆𑀩𑀲𑁆𑀫𑀺𑀁 𑀧𑀸𑀧𑀥𑀫𑁆𑀫𑁂 𑀇𑀫𑁂 𑀭𑀸𑀚𑀧𑀼𑀭𑀺𑀲𑀸 𑀯𑀺𑀬 𑀧𑀩𑁆𑀩𑀚𑀺𑀢𑁄 𑀦 𑀯𑀸𑀬𑀫𑁂𑀬𑁆𑀬, 𑀯𑀸𑀬𑀸𑀫𑀁 𑀉𑀲𑁆𑀲𑀸𑀳𑀁 𑀦 𑀓𑀭𑁂𑀬𑁆𑀬, 𑀲𑀩𑁆𑀩𑀢𑁆𑀣 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸𑀬𑀸𑀫𑀁 𑀅𑀓𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀧𑀼𑀜𑁆𑀜𑀲𑁆𑀫𑀺𑀁𑀬𑁂𑀯 𑀯𑀸𑀬𑀫𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀸𑀜𑁆𑀜𑀲𑁆𑀲 𑀧𑀼𑀭𑀺𑀲𑁄 𑀲𑀺𑀬𑀸𑀢𑀺 𑀧𑀩𑁆𑀩𑀚𑀺𑀢𑀭𑀽𑀧𑁂𑀦 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁂𑀯𑀓𑀧𑀼𑀭𑀺𑀲𑁄 𑀦 𑀲𑀺𑀬𑀸. 𑀓𑀲𑁆𑀫𑀸? 𑀏𑀯𑀭𑀽𑀧𑀲𑁆𑀲𑀧𑀺 𑀑𑀘𑀭𑀓𑀸𑀤𑀺𑀧𑀸𑀧𑀓𑀫𑁆𑀫𑀲𑁆𑀲 𑀓𑀢𑁆𑀢𑀩𑁆𑀩𑀢𑁆𑀢𑀸. 𑀦𑀸𑀜𑁆𑀜𑀁 𑀦𑀺𑀲𑁆𑀲𑀸𑀬 𑀚𑀻𑀯𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 𑀧𑀭𑀁 𑀇𑀲𑁆𑀲𑀭𑀸𑀤𑀺𑀁 𑀦𑀺𑀲𑁆𑀲𑀸𑀬 ‘‘𑀢𑀧𑁆𑀧𑀝𑀺𑀩𑀤𑁆𑀥𑀁 𑀫𑁂 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀏𑀯𑀁𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀦 𑀚𑀻𑀯𑀺𑀓𑀁 𑀧𑀯𑀢𑁆𑀢𑁂𑀬𑁆𑀬, 𑀅𑀢𑁆𑀢𑀤𑀻𑀧𑁄 𑀅𑀢𑁆𑀢𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄 𑀏𑀯 𑀪𑀯𑁂𑀬𑁆𑀬. 𑀅𑀣 𑀯𑀸 𑀅𑀦𑀢𑁆𑀣𑀸𑀯𑀳𑀢𑁄 ‘‘𑀑𑀘𑀭𑀡’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀓𑀢𑁆𑀢𑀸 𑀅𑀜𑁆𑀜𑀁 𑀅𑀓𑀼𑀲𑀮𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀦 𑀚𑀻𑀯𑁂𑀬𑁆𑀬. 𑀥𑀫𑁆𑀫𑁂𑀦 𑀦 𑀯𑀡𑀺𑀁 𑀘𑀭𑁂𑀢𑀺 𑀥𑀦𑀸𑀤𑀺𑀅𑀢𑁆𑀣𑀸𑀬 𑀥𑀫𑁆𑀫𑀁 𑀦 𑀓𑀣𑁂𑀬𑁆𑀬. 𑀬𑁄 𑀳𑀺 𑀥𑀦𑀸𑀤𑀺𑀳𑁂𑀢𑀼 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑁄 𑀥𑀫𑁆𑀫𑁂𑀦 𑀯𑀸𑀡𑀺𑀚𑁆𑀚𑀁 𑀓𑀭𑁄𑀢𑀺 𑀦𑀸𑀫, 𑀏𑀯𑀁 𑀥𑀫𑁆𑀫𑁂𑀦 𑀢𑀁 𑀦 𑀘𑀭𑁂𑀬𑁆𑀬. 𑀅𑀣 𑀯𑀸 𑀥𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀓𑁄𑀲𑀮𑀭𑀜𑁆𑀜𑁄 𑀧𑀼𑀭𑀺𑀲𑁄 𑀯𑀺𑀬 𑀑𑀘𑀭𑀓𑀸𑀤𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀧𑀭𑁂𑀳𑀺 𑀅𑀦𑀸𑀲𑀗𑁆𑀓𑀦𑀻𑀬𑀢𑀸𑀬 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀲𑀫𑀸𑀤𑀸𑀦𑀸𑀤𑀻𑀦𑀺 𑀅𑀦𑀼𑀢𑀺𑀝𑁆𑀞𑀦𑁆𑀢𑁄 𑀥𑀫𑁆𑀫𑁂𑀦 𑀯𑀸𑀡𑀺𑀚𑁆𑀚𑀁 𑀓𑀭𑁄𑀢𑀺 𑀦𑀸𑀫. 𑀬𑁄𑀧𑀺 𑀇𑀥 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑁄𑀧𑀺 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀲𑁄𑀧𑀺 𑀥𑀫𑁆𑀫𑁂𑀦 𑀯𑀸𑀡𑀺𑀚𑁆𑀚𑀁 𑀓𑀭𑁄𑀢𑀺 𑀦𑀸𑀫, 𑀏𑀯𑀁 𑀥𑀫𑁆𑀫𑁂𑀦 𑀯𑀸𑀡𑀺𑀚𑁆𑀚𑀁 𑀦 𑀘𑀭𑁂, 𑀦 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀢𑀢𑀺𑀬𑁂 𑀅𑀢𑁆𑀢𑀦𑁄 𑀅𑀦𑁂𑀓𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀳𑀻𑀦𑁂𑀢𑀺 𑀮𑁄𑀪𑀤𑁄𑀲𑀫𑁄𑀳𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀧𑀮𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀬𑀸- 𑀲𑀸𑀞𑁂𑀬𑁆𑀬𑀣𑀫𑁆𑀪𑀲𑀸𑀭𑀫𑁆𑀪𑀫𑀸𑀦𑀸𑀢𑀺𑀫𑀸𑀦𑀫𑀤𑀧𑀫𑀸𑀤𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀢𑀺𑀯𑀺𑀥𑀸𑀓𑀼𑀲𑀮𑀫𑀽𑀮𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀯𑀺𑀲𑀫- 𑀲𑀜𑁆𑀜𑀸𑀯𑀺𑀢𑀓𑁆𑀓𑀧𑀧𑀜𑁆𑀘𑀘𑀢𑀼𑀩𑁆𑀩𑀺𑀥𑀯𑀺𑀧𑀮𑁆𑀮𑀸𑀲𑀆𑀲𑀯𑀑𑀖𑀬𑁄𑀕𑀕𑀦𑁆𑀣𑀸𑀕𑀢𑀺𑀕𑀫𑀦𑀢𑀡𑁆𑀳𑀼𑀧𑀸𑀤𑀸𑀦𑀧𑀜𑁆𑀘𑀯𑀺𑀥- 𑀘𑁂𑀢𑁄𑀔𑀺𑀮𑀧𑀜𑁆𑀘𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑀦𑀻𑀯𑀭𑀡𑀸𑀪𑀺𑀦𑀦𑁆𑀤𑀦𑀙𑀯𑀺𑀯𑀸𑀤- 𑀫𑀽𑀮𑀢𑀡𑁆𑀳𑀸𑀓𑀸𑀬𑀲𑀢𑁆𑀢𑀸𑀦𑀼𑀲𑀬𑀅𑀝𑁆𑀞𑀫𑀺𑀘𑁆𑀙𑀢𑁆𑀢𑀦𑀯- 𑀢𑀡𑁆𑀳𑀸𑀫𑀽𑀮𑀓𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀤𑀺𑀧𑁆𑀧𑀪𑁂𑀤𑁂 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀦𑀸𑀤𑀺𑀓𑀸𑀮𑀧𑀯𑀢𑁆𑀢𑁂 𑀤𑀺𑀬𑀟𑁆𑀠𑀲𑀳𑀲𑁆𑀲𑀓𑀺𑀮𑁂𑀲𑁂 𑀢𑀁𑀲𑀳𑀕𑀢𑁂 𑀘𑀸𑀧𑀺 𑀅𑀦𑁂𑀓𑁂 𑀧𑀸𑀧𑀓𑁂 𑀮𑀸𑀫𑀓𑁂 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀲𑀳 𑀯𑀸𑀲𑀦𑀸𑀬 𑀩𑁄𑀥𑀺𑀫𑀽𑀮𑁂𑀬𑁂𑀯 𑀧𑀳𑀻𑀦𑁂 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑁂 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 ‘‘𑀅𑀬𑀫𑁆𑀧𑀺 𑀫𑁂 𑀓𑀺𑀮𑁂𑀲𑁄 𑀧𑀳𑀻𑀦𑁄, 𑀅𑀬𑀫𑁆𑀧𑀺 𑀫𑁂 𑀓𑀺𑀮𑁂𑀲𑁄 𑀧𑀳𑀻𑀦𑁄’’𑀢𑀺 𑀅𑀦𑀼𑀧𑀤𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀅𑀦𑁂𑀓𑁂 𑀘 𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑀸, 𑀘𑀢𑁆𑀢𑀸𑀭𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺, 𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀧𑀜𑁆𑀘 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀜𑀸𑀡𑀸𑀦𑀺, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀲𑀜𑁆𑀜𑀸, 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺, 𑀙 𑀕𑀸𑀭𑀯𑀸, 𑀙 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀙 𑀲𑀢𑀢𑀯𑀺𑀳𑀸𑀭𑀸, 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺, 𑀙 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀧𑀜𑁆𑀜𑀸, 𑀙 𑀅𑀪𑀺𑀜𑁆𑀜𑀸, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸, 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀲𑀢𑁆𑀢 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀸, 𑀲𑀢𑁆𑀢 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀤𑁂𑀲𑀦𑀸, 𑀲𑀢𑁆𑀢 𑀔𑀻𑀡𑀸𑀲𑀯𑀩𑀮𑀤𑁂𑀲𑀦𑀸, 𑀅𑀝𑁆𑀞 𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀤𑁂𑀲𑀦𑀸, 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺, 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸𑀢𑀺𑀓𑁆𑀓𑀫𑀸, 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀺, 𑀅𑀝𑁆𑀞 𑀅𑀓𑁆𑀔𑀡𑀤𑁂𑀲𑀦𑀸, 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸, 𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀤𑁂𑀲𑀦𑀸, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸, 𑀦𑀯 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀦𑀯 𑀲𑀢𑁆𑀢𑀸𑀯𑀸𑀲𑀤𑁂𑀲𑀦𑀸, 𑀦𑀯 𑀆𑀖𑀸𑀢𑀧𑁆𑀧𑀝𑀺𑀯𑀺𑀦𑀬𑀸, 𑀦𑀯 𑀲𑀜𑁆𑀜𑀸, 𑀦𑀯 𑀦𑀸𑀦𑀢𑁆𑀢𑀸𑀦𑀺, 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸, 𑀤𑀲 𑀦𑀸𑀣𑀓𑀭𑀡𑀸 𑀥𑀫𑁆𑀫𑀸, 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸, 𑀤𑀲 𑀲𑀫𑁆𑀫𑀢𑁆𑀢𑀸𑀦𑀺, 𑀤𑀲 𑀅𑀭𑀺𑀬𑀯𑀸𑀲𑀸, 𑀤𑀲 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀤𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑀸, 𑀤𑁆𑀯𑀸𑀤𑀲 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑀸, 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑀸, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀧𑀦𑁆𑀦𑀭𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀲𑁄𑀴𑀲𑀯𑀺𑀥𑀸 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀲𑁄𑀴𑀲 𑀅𑀧𑀭𑀦𑁆𑀢𑀧𑀦𑀻𑀬𑀸 𑀥𑀫𑁆𑀫𑀸, 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀧𑀲𑁆𑀲𑀦𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀧𑀜𑁆𑀜𑀸𑀲 𑀉𑀤𑀬𑀩𑁆𑀩𑀬𑀜𑀸𑀡𑀸𑀦𑀺, 𑀧𑀭𑁄𑀧𑀜𑁆𑀜𑀸𑀲 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀫𑀳𑀸𑀯𑀚𑀺𑀭𑀜𑀸𑀡𑀁, 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀧𑀯𑀺𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀤𑁂𑀲𑀦𑀸𑀜𑀸𑀡𑀸𑀦𑀺, 𑀢𑀣𑀸 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀤𑀺𑀯𑀺𑀪𑀸𑀯𑀦𑀜𑀸𑀡𑀸𑀦𑀺 𑀘𑀸𑀢𑀺 𑀏𑀯𑀫𑀸𑀤𑀺𑀓𑁂 𑀅𑀦𑁂𑀓𑁂 𑀅𑀢𑁆𑀢𑀦𑁄 𑀓𑀼𑀲𑀮𑁂 𑀅𑀦𑀯𑀚𑁆𑀚𑀥𑀫𑁆𑀫𑁂 𑀅𑀦𑀦𑁆𑀢𑀓𑀸𑀮𑀁 𑀧𑀸𑀭𑀫𑀺𑀧𑀭𑀺𑀪𑀸𑀯𑀦𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀘 𑀧𑀸𑀭𑀺𑀧𑀽𑀭𑀺𑀁 𑀯𑀼𑀤𑁆𑀥𑀺𑀁 𑀕𑀢𑁂 ‘‘𑀇𑀫𑁂𑀧𑀺 𑀅𑀦𑀯𑀚𑁆𑀚𑀥𑀫𑁆𑀫𑀸 𑀫𑀬𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀇𑀫𑁂𑀧𑀺 𑀅𑀦𑀯𑀚𑁆𑀚𑀥𑀫𑁆𑀫𑀸 𑀫𑀬𑀺 𑀲𑀁𑀯𑀺𑀚𑁆𑀚𑀦𑁆𑀢𑀻’’𑀢𑀺 𑀭𑀼𑀘𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑀸𑀪𑀺𑀫𑀼𑀔𑁂 𑀩𑀼𑀤𑁆𑀥𑀕𑀼𑀡𑁂 𑀯𑀕𑁆𑀕𑀯𑀕𑁆𑀕𑁂 𑀧𑀼𑀜𑁆𑀚𑀧𑀼𑀜𑁆𑀚𑁂 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀢𑁂 𑀘 𑀔𑁄 𑀲𑀧𑀤𑁂𑀲𑀢𑁄 𑀏𑀯, 𑀦 𑀦𑀺𑀧𑁆𑀧𑀤𑁂𑀲𑀢𑁄. 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑁂 𑀪𑀕𑀯𑀢𑀸𑀧𑀺 𑀅𑀦𑀼𑀧𑀤𑀁 𑀅𑀦𑀯𑀲𑁂𑀲𑀢𑁄 𑀫𑀦𑀲𑀺 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀪𑀸𑀯𑀢𑁄.

𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺.

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫 𑀲𑀳𑀲𑁆𑀲𑀢𑁄’’𑀢𑀺.

𑀢𑀤𑀸 𑀳𑀺 𑀪𑀕𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀞𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀕𑀢𑁂𑀲𑀼 𑀫𑀳𑀸𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀅𑀢𑀻𑀢𑀚𑀸𑀢𑀺𑀯𑀺𑀲𑀬𑀁 𑀜𑀸𑀡𑀁 𑀧𑁂𑀲𑁂𑀲𑀺. 𑀅𑀣𑀲𑁆𑀲 𑀢𑀸𑀦𑀺 𑀦𑀺𑀭𑀦𑁆𑀢𑀭𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀧𑁆𑀧𑀪𑁂𑀤𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀲𑁄 ‘‘𑀏𑀯𑀁 𑀫𑀳𑀦𑁆𑀢𑀲𑁆𑀲 𑀦𑀸𑀫 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀫𑀽𑀮𑀪𑀽𑀢𑀸 𑀇𑀫𑁂 𑀓𑀺𑀮𑁂𑀲𑀸’’𑀢𑀺 𑀓𑀺𑀮𑁂𑀲𑀯𑀺𑀲𑀬𑀁 𑀜𑀸𑀡𑀸𑀘𑀸𑀭𑀁 𑀧𑁂𑀲𑁂𑀢𑁆𑀯𑀸 𑀢𑁂 𑀧𑀳𑀸𑀦𑀫𑀼𑀔𑁂𑀦 𑀅𑀦𑀼𑀧𑀤𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀇𑀫𑁂 𑀯𑀢 𑀓𑀺𑀮𑁂𑀲𑀸 𑀅𑀦𑀯𑀲𑁂𑀲𑀢𑁄 𑀫𑀬𑁆𑀳𑀁 𑀲𑀼𑀝𑁆𑀞𑀼 𑀧𑀳𑀻𑀦𑀸’’𑀢𑀺 𑀧𑀼𑀦 𑀢𑁂𑀲𑀁 𑀧𑀳𑀸𑀦𑀓𑀭𑀁 𑀲𑀸𑀓𑀸𑀭𑀁 𑀲𑀧𑀭𑀺𑀯𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀭𑀺𑀬𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑁂𑀤𑁂 𑀅𑀢𑁆𑀢𑀦𑁄 𑀲𑀻𑀮𑀸𑀤𑀺𑀅𑀦𑀯𑀚𑁆𑀚𑀥𑀫𑁆𑀫𑁂 𑀫𑀦𑀲𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀦𑁂𑀓𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀳𑀻𑀦𑁂 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀅𑀦𑁂𑀓𑁂 𑀘 𑀓𑀼𑀲𑀮𑁂 𑀥𑀫𑁆𑀫𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀢𑁂’’𑀢𑀺.

𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀧𑀻𑀢𑀺𑀲𑁄𑀫𑀦𑀲𑁆𑀲𑀼𑀤𑁆𑀤𑁂𑀲𑀪𑀽𑀢𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀅𑀳𑀼 𑀧𑀼𑀩𑁆𑀩𑁂𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀭𑀸𑀕𑀸𑀤𑀺𑀓𑁄 𑀓𑀺𑀮𑁂𑀲𑀕𑀡𑁄 𑀫𑀬𑁆𑀳𑀁 𑀲𑀦𑁆𑀢𑀸𑀦𑁂 𑀅𑀳𑀼 𑀆𑀲𑀺, 𑀦 𑀇𑀫𑀲𑁆𑀫𑀺𑀁 𑀓𑀺𑀮𑁂𑀲𑀕𑀡𑁂 𑀓𑁄𑀘𑀺𑀧𑀺 𑀓𑀺𑀮𑁂𑀲𑁄 𑀦𑀸𑀳𑁄𑀲𑀺. 𑀢𑀤𑀸 𑀦𑀸𑀳𑀽𑀢𑀺 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀲𑁄 𑀓𑀺𑀮𑁂𑀲𑀕𑀡𑁄 𑀦 𑀅𑀳𑀼 𑀦 𑀆𑀲𑀺, 𑀢𑀢𑁆𑀣 𑀅𑀡𑀼𑀫𑀢𑁆𑀢𑁄𑀧𑀺 𑀓𑀺𑀮𑁂𑀲𑁄 𑀅𑀕𑁆𑀕𑀫𑀕𑁆𑀕𑀓𑁆𑀔𑀡𑁂 𑀅𑀧𑁆𑀧𑀳𑀻𑀦𑁄 𑀦𑀸𑀫 𑀦𑀢𑁆𑀣𑀺. ‘‘𑀢𑀢𑁄 𑀦𑀸𑀳𑀽’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑀢𑁄 𑀧𑀭𑀁 𑀦𑀸𑀲𑀻𑀢𑀺 𑀅𑀢𑁆𑀣𑁄. 𑀦𑀸𑀳𑀼 𑀧𑀼𑀩𑁆𑀩𑁂𑀢𑀺 𑀬𑁄 𑀘𑀸𑀬𑀁 𑀫𑀫 𑀅𑀧𑀭𑀺𑀫𑀸𑀡𑁄 𑀅𑀦𑀯𑀚𑁆𑀚𑀥𑀫𑁆𑀫𑁄 𑀏𑀢𑀭𑀳𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀢𑁄 𑀉𑀧𑀮𑀩𑁆𑀪𑀢𑀺, 𑀲𑁄𑀧𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑀢𑁄 𑀧𑀼𑀩𑁆𑀩𑁂 𑀦 𑀅𑀳𑀼 𑀦 𑀆𑀲𑀺. 𑀢𑀤𑀸 𑀅𑀳𑀽𑀢𑀺 𑀬𑀤𑀸 𑀧𑀦 𑀫𑁂 𑀅𑀕𑁆𑀕𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀤𑀸 𑀲𑀩𑁆𑀩𑁄𑀧𑀺 𑀫𑁂 𑀅𑀦𑀯𑀚𑁆𑀚𑀥𑀫𑁆𑀫𑁄 𑀆𑀲𑀺. 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑀸 𑀩𑀼𑀤𑁆𑀥𑀸𑀦𑀁 𑀳𑀢𑁆𑀣𑀕𑀢𑀸 𑀏𑀯 𑀳𑁄𑀦𑁆𑀢𑀺.

𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺, 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀻𑀢𑀺 𑀬𑁄 𑀧𑀦 𑀲𑁄 𑀅𑀦𑀯𑀚𑁆𑀚𑀥𑀫𑁆𑀫𑁄 𑀅𑀭𑀺𑀬𑀫𑀕𑁆𑀕𑁄 𑀫𑀬𑁆𑀳𑀁 𑀩𑁄𑀥𑀺𑀫𑀡𑁆𑀟𑁂 𑀉𑀧𑁆𑀧𑀦𑁆𑀦𑁄, 𑀬𑁂𑀦 𑀲𑀩𑁆𑀩𑁄 𑀓𑀺𑀮𑁂𑀲𑀕𑀡𑁄 𑀅𑀦𑀯𑀲𑁂𑀲𑀁 𑀧𑀳𑀻𑀦𑁄, 𑀲𑁄 𑀬𑀣𑀸 𑀫𑀬𑁆𑀳𑀁 𑀫𑀕𑁆𑀕𑀓𑁆𑀔𑀡𑀢𑁄 𑀧𑀼𑀩𑁆𑀩𑁂 𑀦 𑀘𑀸𑀳𑀼 𑀦 𑀘 𑀅𑀳𑁄𑀲𑀺, 𑀏𑀯𑀁 𑀅𑀢𑁆𑀢𑀦𑀸 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑀸𑀪𑀸𑀯𑀢𑁄 𑀢𑁂 𑀓𑀺𑀮𑁂𑀲𑀸 𑀯𑀺𑀬 𑀅𑀬𑀫𑁆𑀧𑀺 𑀦 𑀘 𑀪𑀯𑀺𑀲𑁆𑀲𑀢𑀺 𑀅𑀦𑀸𑀕𑀢𑁂 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂𑀧𑀺 𑀦 𑀯𑀺𑀚𑁆𑀚𑀢𑀺 𑀦 𑀉𑀧𑀮𑀩𑁆𑀪𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀪𑀸𑀯𑀢𑁄. 𑀦 𑀳𑀺 𑀅𑀭𑀺𑀬𑀫𑀕𑁆𑀕𑁄 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀦 𑀧𑀸𑀭𑀁 𑀤𑀺𑀕𑀼𑀡𑀁 𑀬𑀦𑁆𑀢𑀻’’𑀢𑀺.

𑀇𑀢𑀺 𑀪𑀕𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀦𑀯𑀲𑁂𑀲𑀁 𑀧𑀳𑀻𑀦𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀢𑁂 𑀅𑀧𑀭𑀺𑀫𑀸𑀡𑁂 𑀅𑀦𑀯𑀚𑁆𑀚𑀥𑀫𑁆𑀫𑁂 𑀘 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀅𑀢𑁆𑀢𑀼𑀧𑀦𑀸𑀬𑀺𑀓𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀧𑀼𑀭𑀺𑀫𑀸𑀬 𑀓𑀣𑀸𑀬 𑀧𑀼𑀭𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀫𑁂𑀯 𑀓𑀣𑀺𑀢𑀁, 𑀧𑀘𑁆𑀙𑀺𑀫𑀤𑁆𑀯𑀬𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀓𑀸𑀲𑀺𑀢𑀢𑁆𑀢𑀸 𑀧𑀓𑀸𑀲𑀺𑀢𑀫𑁂𑀯 𑀳𑁄𑀢𑀻𑀢𑀺.

𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀘𑀢𑀼𑀢𑁆𑀣𑁂 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀢𑀺 𑀏𑀢𑁆𑀣 𑀢𑀭𑀦𑁆𑀢𑀺 𑀏𑀢𑁂𑀦 𑀲𑀁𑀲𑀸𑀭𑁄𑀖𑀦𑁆𑀢𑀺 𑀢𑀺𑀢𑁆𑀣𑀁, 𑀦𑀺𑀩𑁆𑀩𑀸𑀦𑀫𑀕𑁆𑀕𑁄. 𑀇𑀥 𑀧𑀦 𑀯𑀺𑀧𑀭𑀻𑀢𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀢𑀣𑀸 𑀕𑀳𑀺𑀢𑀤𑀺𑀝𑁆𑀞𑀺𑀤𑀲𑁆𑀲𑀦𑀁 ‘‘𑀢𑀺𑀢𑁆𑀣’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀺𑀁 𑀲𑀲𑁆𑀲𑀢𑀸𑀤𑀺𑀦𑀸𑀦𑀸𑀓𑀸𑀭𑁂 𑀢𑀺𑀢𑁆𑀣𑁂 𑀦𑀺𑀬𑀼𑀢𑁆𑀢𑀸𑀢𑀺 𑀦𑀸𑀦𑀸𑀢𑀺𑀢𑁆𑀣𑀺𑀬𑀸, 𑀦𑀕𑁆𑀕𑀦𑀺𑀕𑀡𑁆𑀞𑀸𑀤𑀺𑀲𑀫𑀡𑀸 𑀘𑁂𑀯 𑀓𑀞𑀓𑀮𑀸𑀧𑀸𑀤𑀺𑀩𑁆𑀭𑀸𑀳𑁆𑀫𑀡𑀸 𑀘 𑀧𑁄𑀓𑁆𑀔𑀭𑀲𑀸𑀢𑀸𑀤𑀺𑀧𑀭𑀺𑀩𑁆𑀩𑀸𑀚𑀓𑀸 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸. 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀘 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸 𑀘𑀸𑀢𑀺 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸.

‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀺𑀦𑀸 𑀧𑀲𑁆𑀲𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀧𑀲𑁆𑀲𑀢𑀺, 𑀢𑀣𑀸 𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸𑀢𑀺 𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀦𑀸𑀦𑀸 𑀅𑀦𑁂𑀓𑀯𑀺𑀥𑀸 𑀤𑀺𑀝𑁆𑀞𑀺𑀬𑁄 𑀏𑀢𑁂𑀲𑀦𑁆𑀢𑀺 𑀦𑀸𑀦𑀸𑀤𑀺𑀝𑁆𑀞𑀺𑀓𑀸. 𑀲𑀲𑁆𑀲𑀢𑀸𑀤𑀺𑀯𑀲𑁂𑀦𑁂𑀯 𑀔𑀫𑀦𑀁 𑀔𑀦𑁆𑀢𑀺, 𑀭𑁄𑀘𑀦𑀁 𑀭𑀼𑀘𑀺, 𑀅𑀢𑁆𑀣𑀢𑁄 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀺𑀦𑀸 (𑀉𑀤𑀸. 𑁫𑁫) 𑀧𑀯𑀢𑁆𑀢𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘. 𑀢𑀣𑀸 𑀦𑀸𑀦𑀸 𑀔𑀦𑁆𑀢𑀺𑀬𑁄 𑀏𑀢𑁂𑀲𑀦𑁆𑀢𑀺 𑀦𑀸𑀦𑀸𑀔𑀦𑁆𑀢𑀺𑀓𑀸, 𑀦𑀸𑀦𑀸 𑀭𑀼𑀘𑀺𑀬𑁄 𑀏𑀢𑁂𑀲𑀦𑁆𑀢𑀺 𑀦𑀸𑀦𑀸𑀭𑀼𑀘𑀺𑀓𑀸. 𑀤𑀺𑀝𑁆𑀞𑀺𑀕𑀢𑀺𑀓𑀸 𑀳𑀺 𑀧𑀼𑀩𑁆𑀩𑀪𑀸𑀕𑁂 𑀢𑀣𑀸 𑀢𑀣𑀸 𑀘𑀺𑀢𑁆𑀢𑀁 𑀭𑁄𑀘𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀘 𑀧𑀘𑁆𑀙𑀸 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀅𑀣 𑀯𑀸 ‘‘𑀅𑀦𑀺𑀘𑁆𑀘𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀢𑀣𑀸 𑀢𑀣𑀸 𑀤𑀲𑁆𑀲𑀦𑀯𑀲𑁂𑀦 𑀤𑀺𑀝𑁆𑀞𑀺, 𑀔𑀫𑀦𑀯𑀲𑁂𑀦 𑀔𑀦𑁆𑀢𑀺, 𑀭𑀼𑀘𑁆𑀘𑀦𑀯𑀲𑁂𑀦 𑀭𑀼𑀘𑀻𑀢𑀺 𑀏𑀯𑀁 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀤𑀺𑀝𑁆𑀞𑀺 𑀏𑀯 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀸𑀦𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀸𑀢𑀺 𑀲𑀲𑁆𑀲𑀢𑀸𑀤𑀺𑀧𑀭𑀺𑀓𑀧𑁆𑀧𑀯𑀲𑁂𑀦 𑀦𑀸𑀦𑀸𑀯𑀺𑀥𑀁 𑀤𑀺𑀝𑁆𑀞𑀺𑀬𑀸 𑀦𑀺𑀲𑁆𑀲𑀬𑀁 𑀯𑀢𑁆𑀣𑀼𑀁 𑀓𑀸𑀭𑀡𑀁, 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀫𑁂𑀯 𑀯𑀸 𑀦𑀺𑀲𑁆𑀲𑀬𑀁 𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸, 𑀢𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀬𑁄𑀧𑀺 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀅𑀪𑀺𑀦𑀺𑀯𑁂𑀲𑀸𑀓𑀸𑀭𑀸𑀦𑀁 𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺.

𑀲𑀦𑁆𑀢𑀻𑀢𑀺 𑀅𑀢𑁆𑀣𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀏𑀓𑁂𑀢𑀺 𑀏𑀓𑀘𑁆𑀘𑁂. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀕𑀫𑁂𑀦 𑀲𑀫𑀡𑀸, 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸, 𑀮𑁄𑀓𑁂𑀦 𑀯𑀸 𑀲𑀫𑀡𑀸𑀢𑀺 𑀘 𑀩𑁆𑀭𑀸𑀳𑁆𑀫𑀡𑀸𑀢𑀺 𑀘 𑀏𑀯𑀁 𑀕𑀳𑀺𑀢𑀸. 𑀏𑀯𑀁𑀯𑀸𑀤𑀺𑀦𑁄𑀢𑀺 𑀏𑀯𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀓𑀸𑀭𑁂𑀦 𑀯𑀤𑀦𑁆𑀢𑀻𑀢𑀺 𑀏𑀯𑀁𑀯𑀸𑀤𑀺𑀦𑁄. 𑀏𑀯𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀏𑀢𑁂𑀲𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺𑀦𑁄. 𑀢𑀢𑁆𑀣 𑀤𑀼𑀢𑀺𑀬𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄 𑀤𑀲𑁆𑀲𑀺𑀢𑁄, 𑀧𑀞𑀫𑁂𑀦 𑀢𑁂𑀲𑀁 𑀬𑀣𑀸𑀪𑀺𑀦𑀺𑀯𑁂𑀲𑀁 𑀧𑀭𑁂𑀲𑀁 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀯𑁄𑀳𑀸𑀭𑁄.

𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀏𑀢𑁆𑀣 𑀮𑁄𑀓𑁄𑀢𑀺 𑀅𑀢𑁆𑀢𑀸. 𑀲𑁄 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀁 𑀧𑀸𑀧𑀁 𑀢𑀩𑁆𑀩𑀺𑀧𑀸𑀓𑀸, 𑀲𑀬𑀁 𑀯𑀸 𑀓𑀸𑀭𑀓𑀸𑀤𑀺𑀪𑀸𑀯𑁂𑀦 𑀅𑀪𑀺𑀬𑀼𑀢𑁆𑀢𑁂𑀳𑀺 𑀮𑁄𑀓𑀺𑀬𑀢𑀻𑀢𑀺 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁆𑀯𑀸𑀬𑀁 𑀲𑀲𑁆𑀲𑀢𑁄 𑀅𑀫𑀭𑁄 𑀦𑀺𑀘𑁆𑀘𑁄 𑀥𑀼𑀯𑁄𑀢𑀺 𑀬𑀤𑀺𑀤𑀁 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀇𑀤𑀫𑁂𑀯 𑀲𑀘𑁆𑀘𑀁 𑀅𑀯𑀺𑀧𑀭𑀻𑀢𑀁, 𑀅𑀜𑁆𑀜𑀁 𑀧𑀦 𑀅𑀲𑀲𑁆𑀲𑀢𑁄𑀢𑀺𑀆𑀤𑀺 𑀧𑀭𑁂𑀲𑀁 𑀤𑀲𑁆𑀲𑀦𑀁 𑀫𑁄𑀖𑀁 𑀫𑀺𑀘𑁆𑀙𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀘𑀢𑁆𑀢𑀸𑀭𑁄𑀧𑀺 𑀲𑀲𑁆𑀲𑀢𑀯𑀸𑀤𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀅𑀲𑀲𑁆𑀲𑀢𑁄𑀢𑀺 𑀦 𑀲𑀲𑁆𑀲𑀢𑁄, 𑀅𑀦𑀺𑀘𑁆𑀘𑁄 𑀅𑀥𑀼𑀯𑁄 𑀘𑀯𑀦𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. ‘‘𑀅𑀲𑀲𑁆𑀲𑀢𑁄’’𑀢𑀺 𑀲𑀲𑁆𑀲𑀢𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀉𑀘𑁆𑀙𑁂𑀤𑁄 𑀤𑀻𑀧𑀺𑀢𑁄𑀢𑀺 𑀲𑀢𑁆𑀢𑀧𑀺 𑀉𑀘𑁆𑀙𑁂𑀤𑀯𑀸𑀤𑀸 𑀤𑀻𑀧𑀺𑀢𑀸 𑀳𑁄𑀦𑁆𑀢𑀺.

𑀅𑀦𑁆𑀢𑀯𑀸𑀢𑀺 𑀲𑀧𑀭𑀺𑀬𑀦𑁆𑀢𑁄 𑀧𑀭𑀺𑀯𑀝𑀼𑀫𑁄 𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀫𑀸𑀡𑁄, 𑀦 𑀲𑀩𑁆𑀩𑀕𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀭𑀻𑀭𑀧𑀭𑀺𑀫𑀸𑀡𑁄 𑀅𑀗𑁆𑀕𑀼𑀝𑁆𑀞𑀧𑀭𑀺𑀫𑀸𑀡𑁄 𑀅𑀯𑀬𑀯𑀧𑀭𑀺𑀫𑀸𑀡𑁄 𑀧𑀭𑀫𑀸𑀡𑀼𑀧𑀭𑀺𑀫𑀸𑀡𑁄 𑀅𑀢𑁆𑀢𑀸𑀢𑀺 𑀏𑀯𑀫𑀸𑀤𑀺𑀯𑀸𑀤𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀅𑀦𑀦𑁆𑀢𑀯𑀸𑀢𑀺 𑀅𑀧𑀭𑀺𑀬𑀦𑁆𑀢𑁄, 𑀲𑀩𑁆𑀩𑀕𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀓𑀧𑀺𑀮𑀓𑀡𑀸𑀤𑀸𑀤𑀺𑀯𑀸𑀤𑀸 𑀤𑀻𑀧𑀺𑀢𑀸 𑀳𑁄𑀦𑁆𑀢𑀺.

𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀬𑀁 𑀲𑀭𑀻𑀭𑀁, 𑀢𑀤𑁂𑀯 𑀚𑀻𑀯𑀲𑀗𑁆𑀔𑀸𑀢𑀁 𑀯𑀢𑁆𑀣𑀼, 𑀬𑀜𑁆𑀘 𑀚𑀻𑀯𑀲𑀗𑁆𑀔𑀸𑀢𑀁 𑀯𑀢𑁆𑀣𑀼, 𑀢𑀤𑁂𑀯 𑀲𑀭𑀻𑀭𑀦𑁆𑀢𑀺 𑀚𑀻𑀯𑀜𑁆𑀘 𑀲𑀭𑀻𑀭𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀢𑁂𑀦 𑀆𑀚𑀻𑀯𑀓𑀸𑀦𑀁 𑀯𑀺𑀬 ‘‘𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀅𑀬𑀁 𑀯𑀸𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀇𑀫𑀺𑀦𑀸 𑀧𑀦 ‘‘𑀅𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀅𑀬𑀁 𑀯𑀸𑀤𑁄 𑀤𑀲𑁆𑀲𑀺𑀢𑁄.

𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀏𑀢𑁆𑀣 𑀢𑀣𑀸𑀕𑀢𑁄𑀢𑀺 𑀲𑀢𑁆𑀢𑁄. 𑀢𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀓𑀸𑀭𑀓𑀯𑁂𑀤𑀓𑀸𑀤𑀺𑀲𑀗𑁆𑀔𑀸𑀢𑀁, 𑀦𑀺𑀘𑁆𑀘𑀥𑀼𑀯𑀸𑀤𑀺𑀲𑀗𑁆𑀔𑀸𑀢𑀁 𑀯𑀸 𑀢𑀣𑀸𑀪𑀸𑀯𑀁 𑀕𑀢𑁄𑀢𑀺 𑀢𑀣𑀸𑀕𑀢𑁄𑀢𑀺 𑀯𑁄𑀳𑀭𑀢𑀺, 𑀲𑁄 𑀫𑀭𑀡𑀢𑁄 𑀇𑀥𑀓𑀸𑀬𑀲𑁆𑀲 𑀪𑁂𑀤𑀢𑁄 𑀧𑀭𑀁 𑀉𑀤𑁆𑀥𑀁 𑀳𑁄𑀢𑀺, 𑀅𑀢𑁆𑀣𑀺 𑀲𑀁𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀲𑁆𑀲𑀢𑀕𑁆𑀕𑀸𑀳𑀫𑀼𑀔𑁂𑀦 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸 𑀅𑀝𑁆𑀞 𑀘 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀦 𑀳𑁄𑀢𑀻𑀢𑀺 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺. 𑀏𑀢𑁂𑀦 𑀉𑀘𑁆𑀙𑁂𑀤𑀯𑀸𑀤𑁄 𑀤𑀲𑁆𑀲𑀺𑀢𑁄. 𑀳𑁄𑀢𑀺 𑀘 𑀦 𑀘 𑀳𑁄𑀢𑀻𑀢𑀺 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘𑀸𑀢𑀺. 𑀏𑀢𑁂𑀦 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸 𑀲𑀢𑁆𑀢 𑀲𑀜𑁆𑀜𑀻𑀯𑀸𑀤𑀸 𑀘 𑀤𑀲𑁆𑀲𑀺𑀢𑀸. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑁂 𑀓𑀺𑀭 𑀤𑀺𑀝𑁆𑀞𑀺𑀕𑀢𑀺𑀓𑀸 𑀦𑀸𑀦𑀸𑀤𑁂𑀲𑀢𑁄 𑀆𑀕𑀦𑁆𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀧𑀝𑀺𑀯𑀲𑀦𑁆𑀢𑀸 𑀏𑀓𑀤𑀸 𑀲𑀫𑀬𑀧𑁆𑀧𑀯𑀸𑀤𑀓𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀕𑁆𑀕𑀬𑁆𑀳 𑀅𑀜𑁆𑀜𑀯𑀸𑀤𑁂 𑀔𑀼𑀁𑀲𑁂𑀦𑁆𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂 𑀪𑀡𑁆𑀟𑀦𑀚𑀸𑀢𑀸’’𑀢𑀺𑀆𑀤𑀺.

𑀢𑀢𑁆𑀣 𑀪𑀡𑁆𑀟𑀦𑀁 𑀦𑀸𑀫 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄. 𑀪𑀡𑁆𑀟𑀦𑀚𑀸𑀢𑀸𑀢𑀺 𑀚𑀸𑀢𑀪𑀡𑁆𑀟𑀦𑀸. 𑀓𑀮𑀳𑁄𑀢𑀺 𑀓𑀮𑀳𑁄 𑀏𑀯, 𑀓𑀮𑀲𑁆𑀲 𑀯𑀸 𑀳𑀦𑀦𑀢𑁄 𑀓𑀮𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀺𑀭𑀼𑀤𑁆𑀥𑀯𑀸𑀤𑀁 𑀆𑀧𑀦𑁆𑀦𑀸𑀢𑀺 𑀯𑀺𑀯𑀸𑀤𑀸𑀧𑀦𑁆𑀦𑀸. 𑀫𑀫𑁆𑀫𑀖𑀝𑁆𑀝𑀦𑀢𑁄 𑀫𑀼𑀔𑀫𑁂𑀯 𑀲𑀢𑁆𑀢𑀻𑀢𑀺 𑀫𑀼𑀔𑀲𑀢𑁆𑀢𑀺, 𑀨𑀭𑀼𑀲𑀯𑀸𑀘𑀸. 𑀨𑀮𑀽𑀧𑀘𑀸𑀭𑁂𑀦 𑀯𑀺𑀬 𑀳𑀺 𑀓𑀸𑀭𑀡𑀁 𑀓𑀸𑀭𑀡𑀽𑀧𑀘𑀸𑀭𑁂𑀦 𑀨𑀮𑀫𑁆𑀧𑀺 𑀯𑁄𑀳𑀭𑀺𑀬𑀢𑀺 𑀬𑀣𑀸 𑀢𑀁 ‘‘𑀲𑀼𑀔𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀧𑀸𑀧𑀓𑀫𑁆𑀫𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 𑀘. 𑀢𑀸𑀳𑀺 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀚𑁆𑀛𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀏𑀤𑀺𑀲𑁄 𑀥𑀫𑁆𑀫𑁄𑀢𑀺 𑀥𑀫𑁆𑀫𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀏𑀤𑀺𑀲𑁄 𑀏𑀯𑀭𑀽𑀧𑁄, 𑀬𑀣𑀸 𑀫𑀬𑀸 𑀯𑀼𑀢𑁆𑀢𑀁 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺. 𑀦𑁂𑀤𑀺𑀲𑁄 𑀥𑀫𑁆𑀫𑁄𑀢𑀺 𑀦 𑀏𑀤𑀺𑀲𑁄 𑀥𑀫𑁆𑀫𑁄, 𑀬𑀣𑀸 𑀢𑀬𑀸 𑀯𑀼𑀢𑁆𑀢𑀁 ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺, 𑀏𑀯𑀁 𑀲𑁂𑀲𑀧𑀤𑁂𑀳𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀲𑁄 𑀘 𑀢𑀺𑀢𑁆𑀣𑀺𑀬𑀸𑀦𑀁 𑀯𑀺𑀯𑀸𑀤𑁄 𑀲𑀓𑀮𑀦𑀕𑀭𑁂 𑀧𑀸𑀓𑀝𑁄 𑀚𑀸𑀢𑁄. 𑀅𑀣 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸 𑀢𑀁 𑀲𑀼𑀢𑁆𑀯𑀸 ‘‘𑀅𑀢𑁆𑀣𑀺 𑀦𑁄 𑀇𑀤𑀁 𑀓𑀣𑀸𑀧𑀸𑀪𑀢𑀁, 𑀬𑀁 𑀦𑀽𑀦 𑀫𑀬𑀁 𑀇𑀫𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀬𑁆𑀬𑀸𑀫, 𑀅𑀧𑁆𑀧𑁂𑀯 𑀦𑀸𑀫 𑀢𑀁 𑀦𑀺𑀲𑁆𑀲𑀸𑀬 𑀲𑀢𑁆𑀣𑀼 𑀲𑀡𑁆𑀳𑀲𑀼𑀔𑀼𑀫𑀁 𑀥𑀫𑁆𑀫𑀤𑁂𑀲𑀦𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀢𑁂 𑀧𑀘𑁆𑀙𑀸𑀪𑀢𑁆𑀢𑀁 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽’’𑀢𑀺𑀆𑀤𑀺.

𑀢𑀁 𑀲𑀼𑀢𑁆𑀯𑀸 𑀪𑀕𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀥𑀫𑁆𑀫𑀲𑁆𑀲 𑀅𑀬𑀣𑀸𑀪𑀽𑀢𑀧𑀚𑀸𑀦𑀦𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁆𑀥𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀯𑀺𑀭𑀳𑁂𑀦 𑀅𑀦𑁆𑀥𑀸. 𑀢𑁂𑀦𑀸𑀳 ‘‘𑀅𑀘𑀓𑁆𑀔𑀼𑀓𑀸’’𑀢𑀺. 𑀧𑀜𑁆𑀜𑀸 𑀳𑀺 𑀇𑀥 ‘‘𑀘𑀓𑁆𑀔𑀽’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀁 𑀦 𑀚𑀸𑀦𑀦𑁆𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀢𑁆𑀣𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀇𑀥𑀮𑁄𑀓𑀢𑁆𑀣𑀁 𑀧𑀭𑀮𑁄𑀓𑀢𑁆𑀣𑀁 𑀦 𑀚𑀸𑀦𑀦𑁆𑀢𑀺, 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀯𑀼𑀤𑁆𑀥𑀺𑀁 𑀅𑀩𑁆𑀪𑀼𑀤𑀬𑀁 𑀦𑀸𑀯𑀩𑀼𑀚𑁆𑀛𑀦𑁆𑀢𑀺, 𑀧𑀭𑀫𑀢𑁆𑀣𑁂 𑀧𑀦 𑀦𑀺𑀩𑁆𑀩𑀸𑀦𑁂 𑀓𑀣𑀸𑀯𑀓𑀸. 𑀬𑁂 𑀳𑀺 𑀦𑀸𑀫 𑀧𑀯𑀢𑁆𑀢𑀺𑀫𑀢𑁆𑀢𑁂𑀧𑀺 𑀲𑀫𑁆𑀫𑀽𑀴𑁆𑀳𑀸, 𑀢𑁂 𑀓𑀣𑀁 𑀦𑀺𑀯𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺. 𑀅𑀦𑀢𑁆𑀣𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀬𑀤𑀕𑁆𑀕𑁂𑀦 𑀢𑁂 𑀅𑀢𑁆𑀣𑀁 𑀦 𑀚𑀸𑀦𑀦𑁆𑀢𑀺, 𑀢𑀤𑀕𑁆𑀕𑁂𑀦 𑀅𑀦𑀢𑁆𑀣𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺. 𑀬𑀲𑁆𑀫𑀸 𑀥𑀫𑁆𑀫𑀁 𑀦 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀅𑀥𑀫𑁆𑀫𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺. 𑀢𑁂 𑀳𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀺𑀢𑀸𑀬 𑀥𑀫𑁆𑀫𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑀺, 𑀅𑀥𑀫𑁆𑀫𑀫𑁆𑀧𑀺 𑀅𑀓𑀼𑀲𑀮𑀁 𑀓𑀼𑀲𑀮𑀁 𑀓𑀭𑁄𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀥𑀫𑁆𑀫𑀸𑀥𑀫𑁆𑀫𑁂𑀲𑀼 𑀏𑀯, 𑀅𑀣 𑀔𑁄 𑀢𑀲𑁆𑀲 𑀯𑀺𑀧𑀸𑀓𑁂𑀲𑀼𑀧𑀺 𑀲𑀫𑁆𑀫𑀽𑀴𑁆𑀳𑀸. 𑀢𑀣𑀸 𑀳𑀺 𑀢𑁂 𑀓𑀫𑁆𑀫𑀫𑁆𑀧𑀺 𑀯𑀺𑀧𑀸𑀓𑀁 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀺, 𑀯𑀺𑀧𑀸𑀓𑀫𑁆𑀧𑀺 𑀓𑀫𑁆𑀫𑀁 𑀓𑀢𑁆𑀯𑀸. 𑀢𑀣𑀸 𑀥𑀫𑁆𑀫𑀁 𑀲𑀪𑀸𑀯𑀥𑀫𑁆𑀫𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺, 𑀅𑀥𑀫𑁆𑀫𑀁 𑀅𑀲𑀪𑀸𑀯𑀥𑀫𑁆𑀫𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺. 𑀏𑀯𑀁𑀪𑀽𑀢𑀸 𑀘 𑀲𑀪𑀸𑀯𑀥𑀫𑁆𑀫𑀁 𑀅𑀲𑀪𑀸𑀯𑀥𑀫𑁆𑀫𑀜𑁆𑀘, 𑀅𑀲𑀪𑀸𑀯𑀥𑀫𑁆𑀫𑀁 𑀲𑀪𑀸𑀯𑀥𑀫𑁆𑀫𑀜𑁆𑀘 𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀺.

𑀇𑀢𑀺 𑀪𑀕𑀯𑀸 𑀢𑀺𑀢𑁆𑀣𑀺𑀬𑀸𑀦𑀁 𑀫𑁄𑀳𑀤𑀺𑀝𑁆𑀞𑀺𑀧𑀝𑀺𑀮𑀸𑀪𑀪𑀸𑀯𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀯𑁂𑀓𑀮𑁆𑀮𑀢𑁄 𑀅𑀦𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀚𑀘𑁆𑀘𑀦𑁆𑀥𑀽𑀧𑀫𑀸𑀬 𑀧𑀓𑀸𑀲𑁂𑀢𑀼𑀁 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀪𑀽𑀢𑀁, 𑀅𑀢𑀻𑀢𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀁. 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀅𑀳𑁄𑀲𑀻𑀢𑀺 𑀧𑀼𑀭𑀸𑀢𑀦𑁄 𑀦𑀸𑀫𑀕𑁄𑀢𑁆𑀢𑁂𑀳𑀺 𑀮𑁄𑀓𑁂 𑀅𑀧𑀸𑀓𑀝𑁄 𑀏𑀓𑁄 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀭𑀸𑀚𑀸 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀻𑀢𑀺 𑀢𑀲𑁆𑀲 𑀓𑀺𑀭 𑀭𑀜𑁆𑀜𑁄 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁 𑀅𑀢𑁆𑀢𑀦𑁄 𑀑𑀧𑀯𑀬𑁆𑀳𑀁 𑀳𑀢𑁆𑀣𑀺𑀁 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀪𑀤𑁆𑀤𑀓𑀁 𑀯𑀢, 𑀪𑁄, 𑀳𑀢𑁆𑀣𑀺𑀬𑀸𑀦𑀁 𑀤𑀲𑁆𑀲𑀦𑀻𑀬’’𑀦𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀏𑀓𑁄 𑀚𑀘𑁆𑀘𑀦𑁆𑀥𑁄 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀸𑀚𑀸𑀦𑀺𑀬𑀸 𑀔𑁄 𑀇𑀫𑁂 𑀅𑀦𑁆𑀥𑀸 𑀬𑁂 𑀏𑀯𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀦 𑀮𑀪𑀦𑁆𑀢𑀺 𑀤𑀝𑁆𑀞𑀼𑀁. 𑀬𑀁𑀦𑀽𑀦𑀸𑀳𑀁 𑀇𑀫𑀺𑀲𑁆𑀲𑀸 𑀲𑀸𑀯𑀢𑁆𑀣𑀺𑀬𑀸 𑀬𑀢𑁆𑀢𑀓𑀸 𑀚𑀘𑁆𑀘𑀦𑁆𑀥𑀸 𑀲𑀩𑁆𑀩𑁂 𑀢𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀏𑀓𑀤𑁂𑀲𑀁 𑀏𑀓𑀤𑁂𑀲𑀁 𑀳𑀢𑁆𑀣𑁂𑀦 𑀨𑀼𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺. 𑀓𑁂𑀴𑀺𑀲𑀻𑀮𑁄 𑀭𑀸𑀚𑀸 𑀏𑀓𑁂𑀦 𑀧𑀼𑀭𑀺𑀲𑁂𑀦 𑀲𑀸𑀯𑀢𑁆𑀣𑀺𑀬𑀸 𑀲𑀩𑁆𑀩𑁂 𑀚𑀘𑁆𑀘𑀦𑁆𑀥𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀬𑀣𑀸 𑀏𑀓𑁂𑀓𑁄 𑀚𑀘𑁆𑀘𑀦𑁆𑀥𑁄 𑀲𑀻𑀲𑀸𑀤𑀺𑀓𑀁 𑀏𑀓𑁂𑀓𑀁𑀬𑁂𑀯 𑀳𑀢𑁆𑀣𑀺𑀲𑁆𑀲 𑀅𑀗𑁆𑀕𑀁 𑀨𑀼𑀲𑀺𑀢𑁆𑀯𑀸 ‘𑀳𑀢𑁆𑀣𑀻 𑀫𑀬𑀸 𑀤𑀺𑀝𑁆𑀞𑁄’𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀲𑀺, 𑀢𑀣𑀸 𑀓𑀭𑁄𑀳𑀻’’𑀢𑀺. 𑀲𑁄 𑀧𑀼𑀭𑀺𑀲𑁄 𑀢𑀣𑀸 𑀅𑀓𑀸𑀲𑀺. 𑀅𑀣 𑀭𑀸𑀚𑀸 𑀢𑁂 𑀚𑀘𑁆𑀘𑀦𑁆𑀥𑁂 𑀧𑀘𑁆𑀘𑁂𑀓𑀁 𑀧𑀼𑀘𑁆𑀙𑀺 ‘‘𑀓𑀻𑀤𑀺𑀲𑁄, 𑀪𑀡𑁂, 𑀳𑀢𑁆𑀣𑀻’’𑀢𑀺. 𑀢𑁂 𑀅𑀢𑁆𑀢𑀦𑀸 𑀤𑀺𑀝𑁆𑀞𑀤𑀺𑀝𑁆𑀞𑀸𑀯𑀬𑀯𑀫𑁂𑀯 𑀳𑀢𑁆𑀣𑀺𑀁 𑀓𑀢𑁆𑀯𑀸 𑀯𑀤𑀦𑁆𑀢𑀸 ‘‘𑀏𑀤𑀺𑀲𑁄 𑀳𑀢𑁆𑀣𑀻, 𑀦𑁂𑀤𑀺𑀲𑁄 𑀳𑀢𑁆𑀣𑀻’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀭𑁄𑀦𑁆𑀢𑀸 𑀳𑀢𑁆𑀣𑀸𑀤𑀻𑀳𑀺 𑀉𑀧𑀓𑁆𑀓𑀫𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁 𑀅𑀓𑀁𑀲𑀼. 𑀭𑀸𑀚𑀸 𑀲𑀧𑀭𑀺𑀚𑀦𑁄 𑀢𑁂𑀲𑀁 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀨𑀸𑀲𑀼𑀓𑁂𑀳𑀺 𑀪𑀺𑀚𑁆𑀚𑀫𑀸𑀦𑁂𑀳𑀺 𑀳𑀤𑀬𑁂𑀦 𑀉𑀕𑁆𑀕𑀢𑁂𑀦 𑀫𑀳𑀸𑀳𑀲𑀺𑀢𑀁 𑀳𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀭𑀸𑀚𑀸…𑀧𑁂… 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’’𑀢𑀺.

𑀢𑀢𑁆𑀣 𑀅𑀫𑁆𑀪𑁄𑀢𑀺 𑀆𑀮𑀧𑀦𑀁. 𑀬𑀸𑀯𑀢𑀓𑀸𑀢𑀺 𑀬𑀢𑁆𑀢𑀓𑀸. 𑀚𑀘𑁆𑀘𑀦𑁆𑀥𑀸𑀢𑀺 𑀚𑀸𑀢𑀺𑀬𑀸 𑀅𑀦𑁆𑀥𑀸, 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀘𑀓𑁆𑀔𑀼𑀓𑀸. 𑀏𑀓𑀚𑁆𑀛𑀦𑁆𑀢𑀺 𑀏𑀓𑀢𑁄. 𑀪𑀡𑁂𑀢𑀺 𑀅𑀩𑀳𑀼𑀫𑀸𑀦𑀸𑀮𑀸𑀧𑁄. 𑀳𑀢𑁆𑀣𑀺𑀁 𑀤𑀲𑁆𑀲𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀳𑀢𑁆𑀣𑀺𑀁 𑀲𑀬𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀳𑀺. 𑀲𑁄 𑀘 𑀲𑀼𑀲𑀺𑀓𑁆𑀔𑀺𑀢𑀢𑁆𑀢𑀸 𑀅𑀧𑀭𑀺𑀧𑁆𑀨𑀦𑁆𑀤𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀤𑀺𑀝𑁆𑀞𑁄 𑀦𑁄 𑀳𑀢𑁆𑀣𑀻𑀢𑀺 𑀳𑀢𑁆𑀣𑁂𑀦 𑀧𑀭𑀸𑀫𑀲𑀦𑀁 𑀤𑀲𑁆𑀲𑀦𑀁 𑀓𑀢𑁆𑀯𑀸 𑀆𑀳𑀁𑀲𑀼. 𑀢𑁂𑀦 𑀧𑀼𑀭𑀺𑀲𑁂𑀦 𑀲𑀻𑀲𑀁 𑀧𑀭𑀸𑀫𑀲𑀸𑀧𑁂𑀢𑁆𑀯𑀸 ‘‘𑀏𑀤𑀺𑀲𑁄 𑀳𑀢𑁆𑀣𑀻’’𑀢𑀺 𑀲𑀜𑁆𑀜𑀸𑀧𑀺𑀢𑀢𑁆𑀢𑀸 𑀢𑀸𑀤𑀺𑀲𑀁𑀬𑁂𑀯 𑀦𑀁 𑀳𑀢𑁆𑀣𑀺𑀁 𑀲𑀜𑁆𑀚𑀸𑀦𑀦𑁆𑀢𑀸 𑀚𑀘𑁆𑀘𑀦𑁆𑀥𑀸 ‘‘𑀏𑀤𑀺𑀲𑁄 𑀤𑁂𑀯 𑀳𑀢𑁆𑀣𑀻 𑀲𑁂𑀬𑁆𑀬𑀣𑀸𑀧𑀺 𑀓𑀼𑀫𑁆𑀪𑁄’’𑀢𑀺 𑀯𑀤𑀺𑀁𑀲𑀼. 𑀓𑀼𑀫𑁆𑀪𑁄𑀢𑀺 𑀘 𑀖𑀝𑁄𑀢𑀺 𑀅𑀢𑁆𑀣𑁄. 𑀔𑀻𑀮𑁄𑀢𑀺 𑀦𑀸𑀕𑀤𑀦𑁆𑀢𑀔𑀻𑀮𑁄. 𑀲𑁄𑀡𑁆𑀟𑁄𑀢𑀺 𑀳𑀢𑁆𑀣𑁄. 𑀦𑀗𑁆𑀕𑀮𑀻𑀲𑀸𑀢𑀺 𑀦𑀗𑁆𑀕𑀮𑀲𑁆𑀲 𑀲𑀺𑀭𑀲𑁆𑀲 𑀈𑀲𑀸. 𑀓𑀸𑀬𑁄𑀢𑀺 𑀲𑀭𑀻𑀭𑀁. 𑀓𑁄𑀝𑁆𑀞𑁄𑀢𑀺 𑀓𑀼𑀲𑀽𑀮𑁄. 𑀧𑀸𑀤𑁄𑀢𑀺 𑀚𑀗𑁆𑀖𑁄. 𑀣𑀽𑀡𑁄𑀢𑀺 𑀣𑀫𑁆𑀪𑁄. 𑀦𑀗𑁆𑀕𑀼𑀝𑁆𑀞𑀦𑁆𑀢𑀺 𑀯𑀸𑀴𑀲𑁆𑀲 𑀉𑀭𑀺𑀫𑀧𑁆𑀧𑀤𑁂𑀲𑁄. 𑀯𑀸𑀮𑀥𑀻𑀢𑀺 𑀯𑀸𑀮𑀲𑁆𑀲 𑀅𑀕𑁆𑀕𑀧𑁆𑀧𑀤𑁂𑀲𑁄. 𑀫𑀼𑀝𑁆𑀞𑀻𑀳𑀺 𑀲𑀁𑀲𑀼𑀫𑁆𑀪𑀺𑀁𑀲𑀽𑀢𑀺 𑀫𑀼𑀝𑁆𑀞𑀺𑀬𑁄 𑀩𑀦𑁆𑀥𑀺𑀢𑁆𑀯𑀸 𑀧𑀳𑀭𑀺𑀁𑀲𑀼, 𑀫𑀼𑀝𑁆𑀞𑀺𑀖𑀸𑀢𑀁 𑀅𑀓𑀁𑀲𑀼. 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻𑀢𑀺 𑀓𑁂𑀴𑀺𑀲𑀻𑀮𑀢𑁆𑀢𑀸 𑀲𑁄 𑀭𑀸𑀚𑀸 𑀢𑁂𑀦 𑀚𑀘𑁆𑀘𑀦𑁆𑀥𑀸𑀦𑀁 𑀓𑀮𑀳𑁂𑀦 𑀅𑀢𑁆𑀢𑀫𑀦𑁄 𑀧𑀳𑀸𑀲𑁂𑀦 𑀕𑀳𑀺𑀢𑀫𑀦𑁄 𑀅𑀳𑁄𑀲𑀺.

𑀏𑀯𑀫𑁂𑀯 𑀔𑁄𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀬𑀣𑀸 𑀢𑁂 𑀚𑀘𑁆𑀘𑀦𑁆𑀥𑀸 𑀅𑀘𑀓𑁆𑀔𑀼𑀓𑀸 𑀏𑀓𑀗𑁆𑀕𑀤𑀲𑁆𑀲𑀺𑀦𑁄 𑀅𑀦𑀯𑀲𑁂𑀲𑀢𑁄 𑀳𑀢𑁆𑀣𑀺𑀁 𑀅𑀧𑀲𑁆𑀲𑀺𑀢𑁆𑀯𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀸𑀯𑀬𑀯𑀫𑀢𑁆𑀢𑀁 𑀳𑀢𑁆𑀣𑀺𑀲𑀜𑁆𑀜𑀸𑀬 𑀇𑀢𑀭𑁂𑀳𑀺 𑀤𑀺𑀝𑁆𑀞𑀁 𑀅𑀦𑀦𑀼𑀚𑀸𑀦𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀁 𑀆𑀧𑀦𑁆𑀦𑀸 𑀓𑀮𑀳𑀁 𑀅𑀓𑀁𑀲𑀼, 𑀏𑀯𑀫𑁂𑀯 𑀇𑀫𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀲𑀓𑁆𑀓𑀸𑀬𑀲𑁆𑀲 𑀏𑀓𑀤𑁂𑀲𑀁 𑀭𑀽𑀧𑀯𑁂𑀤𑀦𑀸𑀤𑀺𑀁 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀤𑀲𑁆𑀲𑀦𑁂𑀦 𑀬𑀣𑀸𑀤𑀺𑀝𑁆𑀞𑀁 ‘‘𑀅𑀢𑁆𑀢𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀢𑀲𑁆𑀲 𑀲𑀲𑁆𑀲𑀢𑀸𑀤𑀺𑀪𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀤𑀦𑁆𑀢𑀺, 𑀬𑀣𑀸𑀪𑀽𑀢𑀁 𑀧𑀦 𑀅𑀢𑁆𑀣𑀸𑀦𑀢𑁆𑀣𑀁 𑀥𑀫𑁆𑀫𑀸𑀥𑀫𑁆𑀫𑀜𑁆𑀘 𑀦 𑀚𑀸𑀦𑀦𑁆𑀢𑀺. 𑀢𑀲𑁆𑀫𑀸 𑀅𑀦𑁆𑀥𑀸 𑀅𑀘𑀓𑁆𑀔𑀼𑀓𑀸 𑀚𑀘𑁆𑀘𑀦𑁆𑀥𑀧𑀝𑀺𑀪𑀸𑀕𑀸𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑀺𑀢𑁆𑀣𑀺𑀬𑀸𑀦𑀁 𑀥𑀫𑁆𑀫𑀲𑀪𑀸𑀯𑀁 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀚𑀘𑁆𑀘𑀦𑁆𑀥𑀸𑀦𑀁 𑀯𑀺𑀬 𑀳𑀢𑁆𑀣𑀺𑀫𑁆𑀳𑀺 𑀬𑀣𑀸𑀤𑀲𑁆𑀲𑀦𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁, 𑀢𑀢𑁆𑀣 𑀘 𑀯𑀺𑀯𑀸𑀤𑀸𑀧𑀢𑁆𑀢𑀺𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀇𑀫𑁂𑀲𑀼 𑀓𑀺𑀭 𑀲𑀚𑁆𑀚𑀦𑁆𑀢𑀺, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀇𑀥𑁂𑀓𑀘𑁆𑀘𑁂 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀲𑀫𑀡𑀸, 𑀚𑀸𑀢𑀺𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀲𑀼 𑀇𑀫𑁂𑀲𑀼 𑀏𑀯 𑀅𑀲𑀸𑀭𑁂𑀲𑀼 𑀤𑀺𑀝𑁆𑀞𑀺𑀕𑀢𑁂𑀲𑀼 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀯𑀲𑁂𑀦, 𑀇𑀫𑁂𑀲𑀼 𑀯𑀸 𑀭𑀽𑀧𑀸𑀤𑀻𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀏𑀯𑀁 𑀅𑀦𑀺𑀘𑁆𑀘𑁂𑀲𑀼 𑀤𑀼𑀓𑁆𑀔𑁂𑀲𑀼 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀲𑀼 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀦𑀁 𑀯𑀲𑁂𑀦 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀲𑀚𑁆𑀚𑀦𑁆𑀢𑀺 𑀓𑀺𑀭. 𑀅𑀳𑁄 𑀦𑁂𑀲𑀁 𑀲𑀫𑁆𑀫𑁄𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀭𑀲𑀤𑁆𑀤𑁄 𑀘𑁂𑀢𑁆𑀣 𑀅𑀭𑀼𑀘𑀺𑀲𑀽𑀘𑀦𑀢𑁆𑀣𑁄. 𑀢𑁂𑀦 𑀢𑀢𑁆𑀣 𑀲𑀗𑁆𑀕𑀓𑀸𑀭𑀡𑀸𑀪𑀸𑀯𑀫𑁂𑀯 𑀤𑀻𑀧𑁂𑀢𑀺. 𑀦 𑀓𑁂𑀯𑀮𑀁 𑀲𑀚𑁆𑀚𑀦𑁆𑀢𑀺 𑀏𑀯, 𑀅𑀣 𑀔𑁄 𑀯𑀺𑀕𑁆𑀕𑀬𑁆𑀳 𑀦𑀁 𑀯𑀺𑀯𑀤𑀦𑁆𑀢𑀺 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺, 𑀅𑀳𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀦𑀼𑀬𑁄𑀕𑀯𑀲𑁂𑀦 𑀯𑀺𑀕𑁆𑀕𑀬𑁆𑀳 𑀯𑀺𑀯𑀤𑀦𑁆𑀢𑀺 𑀯𑀺𑀯𑀸𑀤𑀁 𑀆𑀧𑀚𑁆𑀚𑀦𑁆𑀢𑀺. 𑀦𑀦𑁆𑀢𑀺 𑀘𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀣 𑀯𑀸 𑀯𑀺𑀕𑁆𑀕𑀬𑁆𑀳 𑀦𑀦𑁆𑀢𑀺 𑀦𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀫𑁂𑀯 𑀯𑀸 𑀯𑀺𑀧𑀭𑀻𑀢𑀤𑀲𑁆𑀲𑀦𑀢𑁆𑀢𑀸 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀁 𑀕𑀳𑁂𑀢𑁆𑀯𑀸 𑀯𑀺𑀯𑀤𑀦𑁆𑀢𑀺 𑀯𑀺𑀲𑁂𑀲𑀢𑁄 𑀯𑀤𑀦𑁆𑀢𑀺, 𑀅𑀢𑁆𑀢𑀦𑁄 𑀏𑀯 𑀯𑀸𑀤𑀁 𑀯𑀺𑀲𑀺𑀝𑁆𑀞𑀁 𑀅𑀯𑀺𑀧𑀭𑀻𑀢𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺. 𑀬𑀣𑀸 𑀓𑀺𑀁? 𑀚𑀦𑀸 𑀏𑀓𑀗𑁆𑀕𑀤𑀲𑁆𑀲𑀺𑀦𑁄 𑀬𑀣𑁂𑀯 𑀚𑀘𑁆𑀘𑀦𑁆𑀥𑀚𑀦𑀸 𑀳𑀢𑁆𑀣𑀺𑀲𑁆𑀲 𑀏𑀓𑁂𑀓𑀗𑁆𑀕𑀤𑀲𑁆𑀲𑀺𑀦𑁄 ‘‘𑀬𑀁 𑀬𑀁 𑀅𑀢𑁆𑀢𑀦𑀸 𑀨𑀼𑀲𑀺𑀢𑁆𑀯𑀸 𑀜𑀸𑀢𑀁, 𑀢𑀁 𑀢𑀤𑁂𑀯 𑀳𑀢𑁆𑀣𑀻’’𑀢𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀕𑁆𑀕𑀬𑁆𑀳 𑀯𑀺𑀯𑀤𑀺𑀁𑀲𑀼, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀅𑀢𑁆𑀣𑁄. 𑀇𑀯𑀲𑀤𑁆𑀤𑁄 𑀘𑁂𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀧𑀜𑁆𑀘𑀫𑁂 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀳𑁂𑀢𑁆𑀯𑀸 𑀢𑀁 𑀲𑀲𑁆𑀲𑀢𑀁 𑀦𑀺𑀘𑁆𑀘𑀦𑁆𑀢𑀺 𑀅𑀜𑁆𑀜𑁂𑀧𑀺 𑀘 𑀢𑀣𑀸 𑀕𑀸𑀳𑁂𑀦𑁆𑀢𑀸 𑀯𑁄𑀳𑀭𑀦𑁆𑀢𑀺. 𑀬𑀣𑀸𑀳 𑁋

‘‘𑀭𑀽𑀧𑀁 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘 𑀲𑀲𑁆𑀲𑀢𑁄 𑀘𑀸𑀢𑀺 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀲𑀲𑁆𑀲𑀢𑁄 𑀘𑀸𑀢𑀺 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺.

𑀅𑀣 𑀯𑀸 𑀅𑀢𑁆𑀢𑀸𑀢𑀺 𑀅𑀳𑀗𑁆𑀓𑀸𑀭𑀯𑀢𑁆𑀣𑀼, 𑀮𑁄𑀓𑁄𑀢𑀺 𑀫𑀫𑀗𑁆𑀓𑀸𑀭𑀯𑀢𑁆𑀣𑀼, 𑀬𑀁 ‘‘𑀅𑀢𑁆𑀢𑀦𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀸𑀢𑀺 𑀯𑀸 𑀲𑀬𑀁, 𑀮𑁄𑀓𑁄𑀢𑀺 𑀧𑀭𑁄. 𑀅𑀢𑁆𑀢𑀸𑀢𑀺 𑀯𑀸 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀏𑀓𑁄 𑀔𑀦𑁆𑀥𑁄, 𑀇𑀢𑀭𑁄 𑀮𑁄𑀓𑁄. 𑀅𑀢𑁆𑀢𑀸𑀢𑀺 𑀯𑀸 𑀲𑀯𑀺𑀜𑁆𑀜𑀸𑀡𑀓𑁄 𑀔𑀦𑁆𑀥𑀲𑀦𑁆𑀢𑀸𑀦𑁄, 𑀅𑀯𑀺𑀜𑁆𑀜𑀸𑀡𑀓𑁄 𑀮𑁄𑀓𑁄. 𑀏𑀯𑀁 𑀢𑀁 𑀢𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀬𑀣𑀸𑀤𑀲𑁆𑀲𑀦𑀁 𑀤𑁆𑀯𑀺𑀥𑀸 𑀕𑀳𑁂𑀢𑁆𑀯𑀸 𑀢𑀤𑀼𑀪𑀬𑀁 ‘‘𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄’’𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺. 𑀏𑀢𑁂𑀦 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸 𑀤𑀲𑁆𑀲𑀺𑀢𑀸. 𑀅𑀲𑀲𑁆𑀲𑀢𑁄𑀢𑀺 𑀲𑀢𑁆𑀢𑀧𑀺 𑀉𑀘𑁆𑀙𑁂𑀤𑀯𑀸𑀤𑀸 𑀤𑀲𑁆𑀲𑀺𑀢𑀸. 𑀲𑀲𑁆𑀲𑀢𑁄 𑀘 𑀅𑀲𑀲𑁆𑀲𑀢𑁄 𑀘𑀸𑀢𑀺 𑀏𑀓𑀘𑁆𑀘𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀲𑀲𑁆𑀲𑀢𑁄, 𑀏𑀓𑀘𑁆𑀘𑁄 𑀅𑀲𑀲𑁆𑀲𑀢𑁄𑀢𑀺 𑀏𑀯𑀁 𑀲𑀲𑁆𑀲𑀢𑁄 𑀘 𑀅𑀲𑀲𑁆𑀲𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑁆𑀯𑁂𑀯 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀅𑀢𑁆𑀢𑀕𑀢𑀺𑀤𑀺𑀝𑁆𑀞𑀺𑀓𑀸𑀦𑀁 𑀯𑀺𑀬 𑀲𑀲𑁆𑀲𑀢𑁄 𑀘 𑀅𑀲𑀲𑁆𑀲𑀢𑁄 𑀘, 𑀲𑀺𑀬𑀸 𑀲𑀲𑁆𑀲𑀢𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀣𑀸𑀧𑀺 𑀇𑀫𑀺𑀦𑀸 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄 𑀤𑀲𑁆𑀲𑀺𑀢𑁄. 𑀦𑁂𑀯 𑀲𑀲𑁆𑀲𑀢𑁄 𑀦𑀸𑀲𑀲𑁆𑀲𑀢𑁄𑀢𑀺 𑀇𑀫𑀺𑀦𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑁄 𑀤𑀲𑁆𑀲𑀺𑀢𑁄. 𑀢𑁂 𑀳𑀺 𑀲𑀲𑁆𑀲𑀢𑀯𑀸𑀤𑁂 𑀅𑀲𑀲𑁆𑀲𑀢𑀯𑀸𑀤𑁂 𑀘 𑀤𑁄𑀲𑀁 𑀤𑀺𑀲𑁆𑀯𑀸 ‘‘𑀦𑁂𑀯 𑀲𑀲𑁆𑀲𑀢𑁄 𑀦𑀸𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀸 𑀯𑀺𑀯𑀤𑀦𑁆𑀢𑀺.

𑀲𑀬𑀁𑀓𑀢𑁄𑀢𑀺 𑀅𑀢𑁆𑀢𑀦𑀸 𑀓𑀢𑁄. 𑀬𑀣𑀸 𑀳𑀺 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀸 𑀘 𑀅𑀢𑁆𑀢𑀦𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀓𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀺 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀏𑀯𑀁 𑀅𑀢𑁆𑀢𑀸𑀯 𑀅𑀢𑁆𑀢𑀸𑀦𑀁 𑀢𑀲𑁆𑀲 𑀘 𑀉𑀧𑀪𑁄𑀕𑀪𑀽𑀢𑀁 𑀓𑀺𑀜𑁆𑀘𑀦𑀁 𑀧𑀮𑀺𑀩𑁄𑀥𑀲𑀗𑁆𑀔𑀸𑀢𑀁 𑀮𑁄𑀓𑀜𑁆𑀘 𑀓𑀭𑁄𑀢𑀺, 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀻𑀢𑀺 𑀅𑀢𑁆𑀢𑀮𑀤𑁆𑀥𑀺 𑀯𑀺𑀬 𑀅𑀬𑀫𑁆𑀧𑀺 𑀢𑁂𑀲𑀁 𑀮𑀤𑁆𑀥𑀺. 𑀧𑀭𑀁𑀓𑀢𑁄𑀢𑀺 𑀧𑀭𑁂𑀦 𑀓𑀢𑁄, 𑀅𑀢𑁆𑀢𑀢𑁄 𑀧𑀭𑁂𑀦 𑀇𑀲𑁆𑀲𑀭𑁂𑀦 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀧𑀚𑀸𑀧𑀢𑀺𑀦𑀸 𑀯𑀸 𑀓𑀸𑀮𑁂𑀦 𑀯𑀸 𑀧𑀓𑀢𑀺𑀬𑀸 𑀯𑀸 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀓𑀢𑁄, 𑀦𑀺𑀫𑁆𑀫𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀬𑀁𑀓𑀢𑁄 𑀘 𑀧𑀭𑀁𑀓𑀢𑁄 𑀘𑀸𑀢𑀺 𑀬𑀲𑁆𑀫𑀸 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀦𑀺𑀫𑁆𑀫𑀺𑀦𑀦𑁆𑀢𑀸 𑀇𑀲𑁆𑀲𑀭𑀸𑀤𑀬𑁄 𑀦 𑀓𑁂𑀯𑀮𑀁 𑀲𑀬𑀫𑁂𑀯 𑀦𑀺𑀫𑁆𑀫𑀺𑀦𑀦𑁆𑀢𑀺, 𑀅𑀣 𑀔𑁄 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀥𑀫𑁆𑀫𑀸𑀥𑀫𑁆𑀫𑀸𑀦𑀁 𑀲𑀳𑀓𑀸𑀭𑀻𑀓𑀸𑀭𑀡𑀁 𑀮𑀪𑀺𑀢𑁆𑀯𑀸𑀯, 𑀢𑀲𑁆𑀫𑀸 𑀲𑀬𑀁𑀓𑀢𑁄 𑀘 𑀧𑀭𑀁𑀓𑀢𑁄 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀏𑀓𑀘𑁆𑀘𑀸𑀦𑀁 𑀮𑀤𑁆𑀥𑀺. 𑀅𑀲𑀬𑀁𑀓𑀸𑀭𑁄 𑀅𑀧𑀭𑀁𑀓𑀸𑀭𑁄𑀢𑀺 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀬𑀁𑀓𑀸𑀭𑁄𑀢𑀺 𑀅𑀲𑀬𑀁𑀓𑀸𑀭𑁄, 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀭𑀓𑀸𑀭𑁄𑀢𑀺 𑀅𑀧𑀭𑀓𑀸𑀭𑁄. 𑀅𑀦𑀼𑀦𑀸𑀲𑀺𑀓𑀸𑀕𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀧𑀭𑀁𑀓𑀸𑀭𑁄’’𑀢𑀺. 𑀅𑀬𑀁 𑀉𑀪𑀬𑀢𑁆𑀣 𑀤𑁄𑀲𑀁 𑀤𑀺𑀲𑁆𑀯𑀸 𑀉𑀪𑀬𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀣 𑀓𑀣𑀁 𑀉𑀧𑁆𑀧𑀦𑁆𑀦𑁄𑀢𑀺 𑀆𑀳 𑁋 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀬𑀤𑀺𑀘𑁆𑀙𑀸𑀬 𑀲𑀫𑀼𑀧𑁆𑀧𑀦𑁆𑀦𑁄 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀯𑀺𑀦𑀸 𑀉𑀧𑁆𑀧𑀦𑁆𑀦𑁄𑀢𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀯𑀸𑀤𑁄 𑀤𑀲𑁆𑀲𑀺𑀢𑁄. 𑀢𑁂𑀦 𑀘 𑀅𑀳𑁂𑀢𑀼𑀓𑀯𑀸𑀤𑁄𑀧𑀺 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺.

𑀇𑀤𑀸𑀦𑀺 𑀬𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀢𑁆𑀢𑀸𑀦𑀁 𑀯𑀺𑀬 𑀲𑀼𑀔𑀤𑀼𑀓𑁆𑀔𑀫𑁆𑀧𑀺 𑀢𑀲𑁆𑀲 𑀕𑀼𑀡𑀪𑀽𑀢𑀁 𑀓𑀺𑀜𑁆𑀘𑀦𑀪𑀽𑀢𑀁 𑀯𑀸 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺, 𑀢𑁂𑀲𑀁 𑀢𑀁 𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 𑀧𑀦 𑀇𑀥 𑀚𑀘𑁆𑀘𑀦𑁆𑀥𑀽𑀧𑀫𑀸𑀬 𑀅𑀦𑀸𑀕𑀢𑀢𑁆𑀢𑀸 𑀢𑀁 𑀳𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄, 𑀢𑀣𑀸 𑀕𑀸𑀣𑀸𑀬.

𑀢𑀢𑁆𑀣 𑀅𑀦𑁆𑀢𑀭𑀸𑀯 𑀯𑀺𑀲𑀻𑀤𑀦𑁆𑀢𑀺, 𑀅𑀧𑀢𑁆𑀯𑀸𑀯 𑀢𑀫𑁄𑀕𑀥𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀢𑀲𑁆𑀲𑀢𑁆𑀣𑁄 𑁋 𑀏𑀯𑀁 𑀤𑀺𑀝𑁆𑀞𑀺𑀕𑀢𑁂𑀲𑀼 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀲𑀼 𑀆𑀲𑀚𑁆𑀚𑀫𑀸𑀦𑀸 𑀤𑀺𑀝𑁆𑀞𑀺𑀕𑀢𑀺𑀓𑀸 𑀓𑀸𑀫𑁄𑀖𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀑𑀖𑀸𑀦𑀁, 𑀲𑀁𑀲𑀸𑀭𑀫𑀳𑁄𑀖𑀲𑁆𑀲𑁂𑀯 𑀯𑀸 𑀅𑀦𑁆𑀢𑀭𑀸𑀯 𑀯𑁂𑀫𑀚𑁆𑀛𑁂 𑀏𑀯 𑀬𑀁 𑀢𑁂𑀲𑀁 𑀧𑀸𑀭𑀪𑀸𑀯𑁂𑀦 𑀧𑀢𑀺𑀝𑁆𑀞𑀝𑁆𑀞𑁂𑀦 𑀯𑀸 𑀑𑀕𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀢𑀤𑀥𑀺𑀕𑀫𑀽𑀧𑀸𑀬𑁄 𑀯𑀸 𑀅𑀭𑀺𑀬𑀫𑀕𑁆𑀕𑁄 𑀢𑀁 𑀅𑀧𑁆𑀧𑀢𑁆𑀯𑀸𑀯 𑀅𑀦𑀥𑀺𑀕𑀦𑁆𑀢𑁆𑀯𑀸𑀯 𑀯𑀺𑀲𑀻𑀤𑀦𑁆𑀢𑀺 𑀲𑀁𑀲𑀻𑀤𑀦𑁆𑀢𑀺. 𑀑𑀕𑀸𑀥𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸𑀢𑀺 𑀑𑀕𑀸𑀥𑁄, 𑀅𑀭𑀺𑀬𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀜𑁆𑀘. 𑀑𑀕𑀸𑀥𑀫𑁂𑀯𑁂𑀢𑁆𑀣 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 𑀑𑀕𑀥𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀑𑀕𑀥𑀁 𑀢𑀫𑁄𑀕𑀥𑀦𑁆𑀢𑀺 𑀧𑀤𑀯𑀺𑀪𑀸𑀕𑁄.

𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀢𑀢𑀺𑀬𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀙𑀝𑁆𑀞𑁂 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀤𑀺𑀝𑁆𑀞𑀺𑀢𑀡𑁆𑀳𑀸𑀫𑀸𑀦𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀢𑁂 𑀤𑀽𑀭𑀢𑁄 𑀯𑀚𑁆𑀚𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀬𑀣𑀸𑀪𑀽𑀢𑀁 𑀧𑀲𑁆𑀲𑀢𑁄 𑀘 𑀢𑀢𑁆𑀣 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀬 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀬𑀣𑀸𑀪𑀽𑀢𑀁 𑀅𑀧𑀲𑁆𑀲𑀢𑁄 𑀘 𑀬𑀣𑀸𑀓𑁆𑀓𑀫𑀁 𑀲𑀁𑀲𑀸𑀭𑀢𑁄 𑀅𑀢𑀺𑀯𑀢𑁆𑀢𑀦𑀸𑀦𑀢𑀺𑀯𑀢𑁆𑀢𑀦𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄.

𑀢𑀢𑁆𑀣 𑀅𑀳𑀗𑁆𑀓𑀸𑀭𑀧𑀲𑀼𑀢𑀸𑀬𑀁 𑀧𑀚𑀸𑀢𑀺 ‘‘𑀲𑀬𑀁𑀓𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀬𑀁𑀓𑀸𑀭𑀲𑀗𑁆𑀔𑀸𑀢𑀁 𑀅𑀳𑀗𑁆𑀓𑀸𑀭𑀁 𑀢𑀣𑀸𑀧𑀯𑀢𑁆𑀢𑀁 𑀤𑀺𑀝𑁆𑀞𑀺𑀁 𑀧𑀲𑀼𑀢𑀸 𑀅𑀦𑀼𑀬𑀼𑀢𑁆𑀢𑀸 𑀅𑀬𑀁 𑀧𑀚𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑁄 𑀲𑀢𑁆𑀢𑀓𑀸𑀬𑁄. 𑀧𑀭𑀁𑀓𑀸𑀭𑀽𑀧𑀲𑀁𑀳𑀺𑀢𑀸𑀢𑀺 𑀧𑀭𑁄 𑀅𑀜𑁆𑀜𑁄 𑀇𑀲𑁆𑀲𑀭𑀸𑀤𑀺𑀓𑁄 𑀲𑀩𑁆𑀩𑀁 𑀓𑀭𑁄𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀧𑀭𑀁𑀓𑀸𑀭𑀤𑀺𑀝𑁆𑀞𑀺𑀲𑀦𑁆𑀦𑀺𑀲𑁆𑀲𑀺𑀢𑀸 𑀢𑀸𑀬 𑀉𑀧𑀲𑀁𑀳𑀺𑀢𑀸𑀢𑀺 𑀧𑀭𑀁𑀓𑀸𑀭𑀽𑀧𑀲𑀁𑀳𑀺𑀢𑀸. 𑀏𑀢𑀤𑁂𑀓𑁂 𑀦𑀸𑀩𑁆𑀪𑀜𑁆𑀜𑀁𑀲𑀽𑀢𑀺 𑀏𑀢𑀁 𑀤𑀺𑀝𑁆𑀞𑀺𑀤𑁆𑀯𑀬𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀢𑁆𑀣 𑀤𑁄𑀲𑀤𑀲𑁆𑀲𑀺𑀦𑁄 𑀳𑀼𑀢𑁆𑀯𑀸 𑀦𑀸𑀦𑀼𑀚𑀸𑀦𑀺𑀁𑀲𑀼. 𑀓𑀣𑀁? 𑀲𑀢𑀺 𑀳𑀺 𑀲𑀬𑀁𑀓𑀸𑀭𑁂 𑀓𑀸𑀫𑀓𑀸𑀭𑀢𑁄 𑀲𑀢𑁆𑀢𑀸𑀦𑀁 𑀇𑀝𑁆𑀞𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀦 𑀅𑀦𑀺𑀝𑁆𑀞𑁂𑀦. 𑀦 𑀳𑀺 𑀓𑁄𑀘𑀺 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀇𑀘𑁆𑀙𑀢𑀺, 𑀪𑀯𑀢𑀺 𑀘 𑀅𑀦𑀺𑀝𑁆𑀞𑀁, 𑀢𑀲𑁆𑀫𑀸 𑀦 𑀲𑀬𑀁𑀓𑀸𑀭𑁄. 𑀧𑀭𑀁𑀓𑀸𑀭𑁄𑀧𑀺 𑀬𑀤𑀺 𑀇𑀲𑁆𑀲𑀭𑀳𑁂𑀢𑀼𑀓𑁄, 𑀲𑁆𑀯𑀸𑀬𑀁 𑀇𑀲𑁆𑀲𑀭𑁄 𑀅𑀢𑁆𑀢𑀢𑁆𑀣𑀁 𑀯𑀸 𑀓𑀭𑁂𑀬𑁆𑀬 𑀧𑀭𑀢𑁆𑀣𑀁 𑀯𑀸. 𑀢𑀢𑁆𑀣 𑀬𑀤𑀺 𑀅𑀢𑁆𑀢𑀢𑁆𑀣𑀁, 𑀅𑀢𑁆𑀢𑀦𑀸 𑀅𑀓𑀢𑀓𑀺𑀘𑁆𑀘𑁄 𑀲𑀺𑀬𑀸 𑀅𑀲𑀺𑀤𑁆𑀥𑀲𑁆𑀲 𑀲𑀸𑀥𑀦𑀢𑁄. 𑀅𑀣 𑀯𑀸 𑀧𑀭𑀢𑁆𑀣𑀁 𑀲𑀩𑁆𑀩𑁂𑀲𑀁 𑀳𑀺𑀢𑀲𑀼𑀔𑀫𑁂𑀯 𑀦𑀺𑀧𑁆𑀨𑀚𑁆𑀚𑁂𑀬𑁆𑀬, 𑀦 𑀅𑀳𑀺𑀢𑀁 𑀤𑀼𑀓𑁆𑀔𑀁 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀲𑁆𑀫𑀸 𑀇𑀲𑁆𑀲𑀭𑀯𑀲𑁂𑀦 𑀦 𑀧𑀭𑀁𑀓𑀸𑀭𑁄 𑀲𑀺𑀚𑁆𑀛𑀢𑀺. 𑀬𑀤𑀺 𑀘 𑀇𑀲𑁆𑀲𑀭𑀲𑀗𑁆𑀔𑀸𑀢𑀁 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑀁 𑀦𑀺𑀘𑁆𑀘𑀫𑁂𑀓𑀓𑀸𑀭𑀡𑀁 𑀧𑀯𑀢𑁆𑀢𑀺𑀬𑀸 𑀲𑀺𑀬𑀸, 𑀓𑀫𑁆𑀫𑁂𑀦 𑀉𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸, 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀓𑀸𑀭𑀡𑀲𑁆𑀲 𑀲𑀦𑁆𑀦𑀺𑀳𑀺𑀢𑀢𑁆𑀢𑀸. 𑀅𑀣𑀲𑁆𑀲 𑀅𑀜𑁆𑀜𑀫𑁆𑀧𑀺 𑀲𑀳𑀓𑀸𑀭𑀻𑀓𑀸𑀭𑀡𑀁 𑀇𑀘𑁆𑀙𑀺𑀢𑀁, 𑀢𑀜𑁆𑀜𑁂𑀯 𑀳𑁂𑀢𑀼, 𑀓𑀺𑀁 𑀇𑀲𑁆𑀲𑀭𑁂𑀦 𑀅𑀧𑀭𑀺𑀦𑀺𑀝𑁆𑀞𑀺𑀢𑀲𑀸𑀫𑀢𑁆𑀣𑀺𑀬𑁂𑀦 𑀧𑀭𑀺𑀓𑀧𑁆𑀧𑀺𑀢𑁂𑀦. 𑀬𑀣𑀸 𑀘 𑀇𑀲𑁆𑀲𑀭𑀳𑁂𑀢𑀼𑀓𑁄 𑀧𑀭𑀁𑀓𑀸𑀭𑁄 𑀦 𑀲𑀺𑀚𑁆𑀛𑀢𑀺, 𑀏𑀯𑀁 𑀧𑀚𑀸𑀧𑀢𑀺𑀧𑀼𑀭𑀺𑀲𑀧𑀓𑀢𑀺𑀩𑁆𑀭𑀳𑁆𑀫𑀓𑀸𑀮𑀸𑀤𑀺𑀳𑁂𑀢𑀼𑀢𑁄𑀧𑀺 𑀦 𑀲𑀺𑀚𑁆𑀛𑀢𑁂𑀯 𑀢𑁂𑀲𑀫𑁆𑀧𑀺 𑀅𑀲𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀦𑀢𑁄 𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑀤𑁂𑀓𑁂 𑀦𑀸𑀩𑁆𑀪𑀜𑁆𑀜𑀁𑀲𑀽’’𑀢𑀺. 𑀬𑁂 𑀧𑀦 𑀬𑀣𑀸𑀯𑀼𑀢𑁆𑀢𑁂 𑀲𑀬𑀁𑀓𑀸𑀭𑀧𑀭𑀁𑀓𑀸𑀭𑁂 𑀦𑀸𑀦𑀼𑀚𑀸𑀦𑀦𑁆𑀢𑀸𑀧𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂𑀧𑀺 𑀦 𑀦𑀁 𑀲𑀮𑁆𑀮𑀦𑁆𑀢𑀺 𑀅𑀤𑁆𑀤𑀲𑀼𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺𑀯𑀸𑀤𑀺𑀦𑁄𑀧𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀅𑀦𑀢𑀺𑀓𑁆𑀓𑀫𑀦𑀢𑁄 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸𑀦𑀁 𑀤𑀺𑀝𑁆𑀞𑀺𑀕𑀢𑀁 𑀢𑀢𑁆𑀣 𑀢𑀢𑁆𑀣 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀢𑁄 𑀯𑀺𑀚𑁆𑀛𑀦𑀝𑁆𑀞𑁂𑀦 ‘‘𑀲𑀮𑁆𑀮’’𑀦𑁆𑀢𑀺 𑀦 𑀧𑀲𑁆𑀲𑀺𑀁𑀲𑀼.

𑀏𑀢𑀜𑁆𑀘 𑀲𑀮𑁆𑀮𑀁 𑀧𑀝𑀺𑀓𑀘𑁆𑀘 𑀧𑀲𑁆𑀲𑀢𑁄𑀢𑀺 𑀬𑁄 𑀧𑀦 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑁄 𑀏𑀢𑀜𑁆𑀘 𑀢𑀺𑀯𑀺𑀥𑀁 𑀯𑀺𑀧𑀭𑀻𑀢𑀤𑀲𑁆𑀲𑀦𑀁 𑀅𑀜𑁆𑀜𑀜𑁆𑀘 𑀲𑀓𑀮𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀢𑁂𑀲𑀜𑁆𑀘 𑀦𑀺𑀲𑁆𑀲𑀬𑀪𑀽𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀧𑀺 𑀢𑀼𑀚𑁆𑀚𑀦𑀢𑁄 𑀤𑀼𑀭𑀼𑀤𑁆𑀥𑀸𑀭𑀢𑁄 𑀘 ‘‘𑀲𑀮𑁆𑀮’’𑀦𑁆𑀢𑀺 𑀧𑀝𑀺𑀓𑀘𑁆𑀘 𑀧𑀼𑀩𑁆𑀩𑁂𑀬𑁂𑀯 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀏𑀯𑀁 𑀧𑀲𑁆𑀲𑀢𑁄 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀏𑀓𑀦𑁆𑀢𑁂𑀦𑁂𑀯 𑀅𑀳𑀁 𑀓𑀭𑁄𑀫𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺. 𑀬𑀣𑀸 𑀘 𑀅𑀢𑁆𑀢𑀦𑁄 𑀓𑀸𑀭𑀓𑀪𑀸𑀯𑁄 𑀢𑀲𑁆𑀲 𑀦 𑀉𑀧𑀝𑁆𑀞𑀸𑀢𑀺, 𑀏𑀯𑀁 𑀧𑀭𑁄 𑀓𑀭𑁄𑀢𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺, 𑀓𑁂𑀯𑀮𑀁 𑀧𑀦 𑀅𑀦𑀺𑀘𑁆𑀘𑀲𑀗𑁆𑀔𑀸𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀲𑁆𑀲 𑀲𑀩𑁆𑀩𑀣𑀸𑀧𑀺 𑀤𑀺𑀝𑁆𑀞𑀺𑀫𑀸𑀦𑀸𑀪𑀸𑀯𑁄𑀯 𑀤𑀲𑁆𑀲𑀺𑀢𑁄. 𑀢𑁂𑀦 𑀘 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀲𑀁𑀲𑀸𑀭𑀲𑀫𑀢𑀺𑀓𑁆𑀓𑀫𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀇𑀤𑀸𑀦𑀺 𑀬𑁄 𑀤𑀺𑀝𑁆𑀞𑀺𑀕𑀢𑁂 𑀅𑀮𑁆𑀮𑀻𑀦𑁄, 𑀦 𑀲𑁄 𑀲𑀁𑀲𑀸𑀭𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀦𑀼𑀧𑁂𑀢𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀫𑀸𑀦𑀼𑀧𑁂𑀢𑀸 𑀅𑀬𑀁 𑀧𑀚𑀸𑀢𑀺 𑀅𑀬𑀁 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑀗𑁆𑀔𑀸𑀢𑀸 𑀧𑀚𑀸 𑀲𑀢𑁆𑀢𑀓𑀸𑀬𑁄 ‘‘𑀫𑀬𑁆𑀳𑀁 𑀤𑀺𑀝𑁆𑀞𑀺 𑀲𑀼𑀦𑁆𑀤𑀭𑀸, 𑀫𑀬𑁆𑀳𑀁 𑀆𑀤𑀸𑀦𑁄 𑀲𑀼𑀦𑁆𑀤𑀭𑁄’’𑀢𑀺 𑀅𑀢𑁆𑀢𑀦𑁄 𑀕𑀸𑀳𑀲𑁆𑀲 𑀲𑀁𑀧𑀕𑁆𑀕𑀳𑀮𑀓𑁆𑀔𑀡𑁂𑀦 𑀫𑀸𑀦𑁂𑀦 𑀉𑀧𑁂𑀢𑀸 𑀲𑀫𑀦𑁆𑀦𑀸𑀕𑀢𑀸. 𑀫𑀸𑀦𑀕𑀦𑁆𑀣𑀸 𑀫𑀸𑀦𑀯𑀺𑀦𑀺𑀩𑀤𑁆𑀥𑀸𑀢𑀺 𑀢𑀢𑁄 𑀏𑀯 𑀢𑁂𑀦 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀬𑀣𑀸 𑀢𑀁 𑀤𑀺𑀝𑁆𑀞𑀺𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀏𑀯𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀲𑁆𑀲 𑀕𑀦𑁆𑀣𑀺𑀢𑀢𑁆𑀢𑀸 𑀯𑀺𑀦𑀺𑀩𑀤𑁆𑀥𑀢𑁆𑀢𑀸 𑀘 𑀫𑀸𑀦𑀕𑀦𑁆𑀣𑀸 𑀫𑀸𑀦𑀯𑀺𑀦𑀺𑀩𑀤𑁆𑀥𑀸. 𑀤𑀺𑀝𑁆𑀞𑀻𑀲𑀼 𑀲𑀸𑀭𑀫𑁆𑀪𑀓𑀣𑀸, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀯𑀲𑁂𑀦 𑀅𑀢𑁆𑀢𑀦𑁄 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁂𑀦 𑀧𑀭𑁂𑀲𑀁 𑀤𑀺𑀝𑁆𑀞𑀻𑀲𑀼 𑀲𑀸𑀭𑀫𑁆𑀪𑀓𑀣𑀸 𑀯𑀺𑀭𑁄𑀥𑀓𑀣𑀸 𑀲𑀁𑀲𑀸𑀭𑀦𑀸𑀬𑀺𑀓𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀧𑁆𑀧𑀳𑀸𑀦𑀢𑁄 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀦 𑀅𑀢𑀺𑀓𑁆𑀓𑀫𑀢𑀻𑀢𑀺 𑀅𑀢𑁆𑀣𑁄.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀼𑀪𑀽𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀲𑀢𑁆𑀢𑀫𑁂 𑀲𑀼𑀪𑀽𑀢𑀻𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀲𑁄 𑀳𑀺 𑀆𑀬𑀲𑁆𑀫𑀸 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀉𑀧𑀘𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀉𑀴𑀸𑀭𑀯𑀺𑀪𑀯𑁂 𑀕𑀳𑀧𑀢𑀺𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀚𑀸𑀢𑁄, 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀬 𑀧𑀦 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀬𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀭𑀡𑀯𑀺𑀳𑀸𑀭𑀻𑀦𑀁 𑀬𑀤𑀺𑀤𑀁 𑀲𑀼𑀪𑀽𑀢𑀻’’𑀢𑀺 (𑀅. 𑀦𑀺. 𑁧.𑁨𑁦𑁧) 𑀅𑀭𑀡𑀯𑀺𑀳𑀸𑀭𑁂 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀲𑁄 𑀏𑀓𑀤𑀺𑀯𑀲𑀁 𑀲𑀸𑀬𑀦𑁆𑀳𑀲𑀫𑀬𑀁 𑀤𑀺𑀯𑀸𑀝𑁆𑀞𑀸𑀦𑀢𑁄 𑀯𑀺𑀳𑀸𑀭𑀗𑁆𑀕𑀡𑀁 𑀑𑀢𑀺𑀡𑁆𑀡𑁄 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀪𑀕𑀯𑀦𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀼𑀪𑀽𑀢𑀺…𑀧𑁂… 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺.

𑀢𑀢𑁆𑀣 𑀤𑀼𑀢𑀺𑀬𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀭𑀽𑀧𑀸𑀯𑀘𑀭𑀲𑀫𑀸𑀥𑀺 𑀲𑀩𑁆𑀩𑁄𑀧𑀺 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑀲𑀫𑀸𑀥𑀺 𑀏𑀯. 𑀇𑀥 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 ‘‘𑀅𑀯𑀺𑀢𑀓𑁆𑀓𑀲𑀫𑀸𑀥𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀳𑀺 𑀧𑀳𑀻𑀦𑀸 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀦 𑀢𑀸𑀯 𑀲𑀼𑀧𑁆𑀧𑀳𑀻𑀦𑀸 𑀅𑀘𑁆𑀘𑀦𑁆𑀢𑀧𑀳𑀸𑀦𑀸𑀪𑀸𑀯𑀢𑁄, 𑀅𑀭𑀺𑀬𑀫𑀕𑁆𑀕𑁂𑀦 𑀧𑀦 𑀧𑀳𑀻𑀦𑀸 𑀏𑀯 𑀧𑀼𑀦 𑀧𑀳𑀸𑀦𑀓𑀺𑀘𑁆𑀘𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀅𑀕𑁆𑀕𑀫𑀕𑁆𑀕𑀧𑀭𑀺𑀬𑁄𑀲𑀸𑀦𑀪𑀽𑀢𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀲𑀩𑁆𑀩𑁂𑀲𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀧𑀳𑀸𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑀺𑀲𑁂𑀲𑀢𑁄 ‘‘𑀅𑀯𑀺𑀢𑀓𑁆𑀓𑀲𑀫𑀸𑀥𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀧𑀕𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀥 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 ‘𑀅𑀯𑀺𑀢𑀓𑁆𑀓𑀲𑀫𑀸𑀥𑀻’𑀢𑀺 𑀅𑀥𑀺𑀧𑁆𑀧𑁂𑀢𑁄’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀲𑀼𑀪𑀽𑀢𑀺𑀲𑁆𑀲 𑀲𑀩𑁆𑀩𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀲𑀩𑁆𑀩𑀲𑀁𑀓𑀺𑀮𑁂𑀲𑀧𑀳𑀸𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀲𑁆𑀲 𑀯𑀺𑀢𑀓𑁆𑀓𑀸 𑀯𑀺𑀥𑀽𑀧𑀺𑀢𑀸𑀢𑀺 𑀬𑁂𑀦 𑀅𑀭𑀺𑀬𑀧𑀼𑀕𑁆𑀕𑀮𑁂𑀦, 𑀬𑀲𑁆𑀲 𑀯𑀸 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀲𑀩𑁆𑀩𑁂𑀧𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀯𑀺𑀥𑀽𑀧𑀺𑀢𑀸 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀲𑀦𑁆𑀢𑀸𑀧𑀺𑀢𑀸 𑀲𑀫𑀼𑀘𑁆𑀙𑀺𑀦𑁆𑀦𑀸. 𑀅𑀚𑁆𑀛𑀢𑁆𑀢𑀁 𑀲𑀼𑀯𑀺𑀓𑀧𑁆𑀧𑀺𑀢𑀸 𑀅𑀲𑁂𑀲𑀸𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀲𑀼𑀯𑀺𑀓𑀧𑁆𑀧𑀺𑀢𑀸 𑀲𑀼𑀝𑁆𑀞𑀼 𑀯𑀺𑀓𑀧𑁆𑀧𑀺𑀢𑀸 𑀅𑀲𑁂𑀲𑀢𑁄, 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀢𑀁 𑀲𑀗𑁆𑀕𑀫𑀢𑀺𑀘𑁆𑀘 𑀅𑀭𑀽𑀧𑀲𑀜𑁆𑀜𑀻𑀢𑀺 𑀏𑀢𑁆𑀣 𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀣 𑀯𑀸 𑀳𑁂𑀢𑀼𑀅𑀢𑁆𑀣𑁄 𑀢𑀁𑀲𑀤𑁆𑀤𑁄. 𑀬𑀲𑁆𑀫𑀸 𑀅𑀦𑀯𑀲𑁂𑀲𑁂𑀦 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀢𑀲𑁆𑀫𑀸 𑀭𑀸𑀕𑀲𑀗𑁆𑀕𑀸𑀤𑀺𑀓𑀁 𑀧𑀜𑁆𑀘𑀯𑀺𑀥𑀁 𑀲𑀗𑁆𑀕𑀁, 𑀲𑀩𑁆𑀩𑀫𑁆𑀧𑀺 𑀯𑀸 𑀓𑀺𑀮𑁂𑀲𑀲𑀗𑁆𑀕𑀁 𑀅𑀢𑀺𑀘𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀦𑀳𑁂𑀢𑀼 𑀭𑀽𑀧𑀲𑀪𑀸𑀯𑀸𑀪𑀸𑀯𑀢𑁄 𑀭𑀼𑀧𑁆𑀧𑀦𑀲𑀗𑁆𑀔𑀸𑀢𑀲𑁆𑀲 𑀘 𑀯𑀺𑀓𑀸𑀭𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄 𑀦𑀺𑀩𑁆𑀩𑀺𑀓𑀸𑀭𑀳𑁂𑀢𑀼𑀪𑀸𑀯𑀢𑁄 𑀯𑀸 ‘‘𑀅𑀭𑀽𑀧’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀳𑀺 𑀫𑀕𑁆𑀕𑀨𑀮𑀲𑀜𑁆𑀜𑀸𑀳𑀺 𑀅𑀭𑀽𑀧𑀲𑀜𑁆𑀜𑀻. 𑀘𑀢𑀼𑀬𑁄𑀕𑀸𑀢𑀺𑀕𑀢𑁄𑀢𑀺 𑀓𑀸𑀫𑀬𑁄𑀕𑁄 𑀪𑀯𑀬𑁄𑀕𑁄 𑀤𑀺𑀝𑁆𑀞𑀺𑀬𑁄𑀕𑁄 𑀅𑀯𑀺𑀚𑁆𑀚𑀸𑀬𑁄𑀕𑁄𑀢𑀺 𑀘𑀢𑁆𑀢𑀸𑀭𑁄 𑀬𑁄𑀕𑁂 𑀬𑀣𑀸𑀭𑀳𑀁 𑀘𑀢𑀽𑀳𑀺𑀧𑀺 𑀫𑀕𑁆𑀕𑁂𑀳𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑁄. 𑀦 𑀚𑀸𑀢𑀼 𑀫𑁂𑀢𑀻𑀢𑀺 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀚𑀸𑀢𑀼 𑀏𑀓𑀁𑀲𑁂𑀦𑁂𑀯 𑀧𑀼𑀦𑀩𑁆𑀪𑀯𑀸𑀬 𑀦 𑀏𑀢𑀺, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀦 𑀚𑀸𑀢𑀺 𑀫𑁂𑀢𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑁄 𑀏𑀯𑀢𑁆𑀣𑁄. 𑀇𑀢𑀺 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑀼𑀪𑀽𑀢𑀺𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀩𑁆𑀪 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑀡𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀅𑀝𑁆𑀞𑀫𑁂 𑀤𑁆𑀯𑁂 𑀧𑀽𑀕𑀸𑀢𑀺 𑀤𑁆𑀯𑁂 𑀕𑀡𑀸. 𑀅𑀜𑁆𑀜𑀢𑀭𑀺𑀲𑁆𑀲𑀸 𑀕𑀡𑀺𑀓𑀸𑀬𑀸𑀢𑀺 𑀅𑀜𑁆𑀜𑀢𑀭𑀸𑀬 𑀦𑀕𑀭𑀲𑁄𑀪𑀺𑀦𑀺𑀬𑀸. 𑀲𑀸𑀭𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀭𑀢𑁆𑀢𑀸. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀢𑀺 𑀓𑀺𑀮𑁂𑀲𑀯𑀲𑁂𑀦 𑀩𑀤𑁆𑀥𑀘𑀺𑀢𑁆𑀢𑀸. 𑀭𑀸𑀚𑀕𑀳𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀩𑀳𑀽 𑀥𑀼𑀢𑁆𑀢𑀧𑀼𑀭𑀺𑀲𑀸 𑀕𑀡𑀩𑀦𑁆𑀥𑀦𑁂𑀦 𑀯𑀺𑀘𑀭𑀦𑁆𑀢𑀸 𑀏𑀓𑀫𑁂𑀓𑀲𑁆𑀲 𑀏𑀓𑀫𑁂𑀓𑀁 𑀯𑁂𑀲𑀺𑀁 𑀆𑀦𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀙𑀡𑀓𑀻𑀴𑀁 𑀓𑀻𑀴𑀺𑀁𑀲𑀼. 𑀢𑀢𑁄 𑀧𑀭𑀫𑁆𑀧𑀺 𑀤𑁆𑀯𑁂 𑀢𑀬𑁄 𑀙𑀡𑀤𑀺𑀯𑀲𑁂 𑀢𑀁 𑀢𑀁𑀬𑁂𑀯 𑀯𑁂𑀲𑀺𑀁 𑀆𑀦𑁂𑀢𑁆𑀯𑀸 𑀙𑀡𑀓𑀻𑀴𑀁 𑀓𑀻𑀴𑀺𑀁𑀲𑀼. 𑀅𑀣𑀸𑀧𑀭𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀅𑀜𑁆𑀜𑁂𑀧𑀺 𑀥𑀼𑀢𑁆𑀢𑀸 𑀢𑀣𑁂𑀯 𑀙𑀡𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑀸 𑀯𑁂𑀲𑀺𑀬𑁄 𑀆𑀦𑁂𑀦𑁆𑀢𑀸 𑀧𑀼𑀭𑀺𑀫𑀥𑀼𑀢𑁆𑀢𑁂𑀳𑀺 𑀧𑀼𑀩𑁆𑀩𑁂 𑀆𑀦𑀻𑀢𑀁 𑀏𑀓𑀁 𑀯𑁂𑀲𑀺𑀁 𑀆𑀦𑁂𑀦𑁆𑀢𑀺. 𑀇𑀢𑀭𑁂 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀧𑀭𑀺𑀕𑁆𑀕𑀳𑁄’’𑀢𑀺 𑀆𑀳𑀁𑀲𑀼. 𑀢𑁂𑀧𑀺 𑀢𑀣𑁂𑀯 𑀆𑀳𑀁𑀲𑀼. ‘‘𑀏𑀯𑀁 𑀅𑀫𑁆𑀳𑀸𑀓𑀁 𑀧𑀭𑀺𑀕𑁆𑀕𑀳𑁄, 𑀅𑀫𑁆𑀳𑀸𑀓𑀁 𑀧𑀭𑀺𑀕𑁆𑀕𑀳𑁄’’𑀢𑀺 𑀓𑀮𑀳𑀁 𑀯𑀟𑁆𑀠𑁂𑀢𑁆𑀯𑀸 𑀧𑀸𑀡𑀺𑀧𑁆𑀧𑀳𑀸𑀭𑀸𑀤𑀻𑀦𑀺 𑀅𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀤𑁆𑀯𑁂 𑀧𑀽𑀕𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑀓𑁆𑀓𑀫𑀦𑁆𑀢𑀻𑀢𑀺 𑀧𑀳𑀭𑀦𑁆𑀢𑀺. 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀻𑀢𑀺 𑀩𑀮𑀯𑀽𑀧𑀓𑁆𑀓𑀫𑁂𑀳𑀺 𑀫𑀭𑀡𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀇𑀢𑀭𑁂𑀧𑀺 𑀫𑀭𑀡𑀫𑀢𑁆𑀢𑀁 𑀫𑀭𑀡𑀧𑁆𑀧𑀫𑀸𑀡𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀓𑀸𑀫𑁂𑀲𑀼 𑀕𑁂𑀥𑀁 𑀯𑀺𑀯𑀸𑀤𑀫𑀽𑀮𑀁 𑀲𑀩𑁆𑀩𑀸𑀦𑀢𑁆𑀣𑀫𑀽𑀮𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀅𑀦𑁆𑀢𑀤𑁆𑀯𑀬𑁂 𑀘 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀆𑀤𑀻𑀦𑀯𑀸𑀦𑀺𑀲𑀁𑀲𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀜𑁆𑀘 𑀧𑀢𑁆𑀢𑀦𑁆𑀢𑀺 𑀬𑀁 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀚𑀸𑀢𑀁 𑀧𑀢𑁆𑀢𑀁 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀸 𑀅𑀧𑀼𑀭𑀓𑁆𑀔𑀢𑁆𑀯𑀸 𑀯𑀸 𑀏𑀢𑀭𑀳𑀺 𑀮𑀤𑁆𑀥𑀁 𑀅𑀦𑀼𑀪𑀼𑀬𑁆𑀬𑀫𑀸𑀦𑀁. 𑀬𑀜𑁆𑀘 𑀧𑀢𑁆𑀢𑀩𑁆𑀩𑀦𑁆𑀢𑀺 𑀬𑀜𑁆𑀘 𑀓𑀸𑀫𑀕𑀼𑀡𑀚𑀸𑀢𑀫𑁂𑀯 ‘‘𑀪𑀼𑀜𑁆𑀚𑀺𑀢𑀩𑁆𑀩𑀸 𑀓𑀸𑀫𑀸, 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸 𑀓𑀸𑀫𑀸, 𑀆𑀲𑁂𑀯𑀺𑀢𑀩𑁆𑀩𑀸 𑀓𑀸𑀫𑀸, 𑀧𑀝𑀺𑀲𑁂𑀯𑀺𑀢𑀩𑁆𑀩𑀸 𑀓𑀸𑀫𑀸, 𑀬𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀲𑁄 𑀮𑁄𑀓𑀁 𑀯𑀟𑁆𑀠𑁂𑀢𑀺, 𑀬𑁄 𑀮𑁄𑀓𑀁 𑀯𑀟𑁆𑀠𑁂𑀢𑀺, 𑀲𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺 𑀤𑀺𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀸𑀬 𑀢𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀢𑁂𑀦 𑀓𑀫𑁆𑀫𑀼𑀦𑀸 𑀅𑀦𑀸𑀕𑀢𑁂 𑀧𑀢𑁆𑀢𑀩𑁆𑀩𑀁 𑀅𑀦𑀼𑀪𑀯𑀺𑀢𑀩𑁆𑀩𑀜𑁆𑀘. 𑀉𑀪𑀬𑀫𑁂𑀢𑀁 𑀭𑀚𑀸𑀦𑀼𑀓𑀺𑀡𑁆𑀡𑀦𑁆𑀢𑀺 𑀏𑀢𑀁 𑀉𑀪𑀬𑀁 𑀧𑀢𑁆𑀢𑀁 𑀧𑀢𑁆𑀢𑀩𑁆𑀩𑀜𑁆𑀘 𑀭𑀸𑀕𑀭𑀚𑀸𑀤𑀻𑀳𑀺 𑀅𑀦𑀼𑀓𑀺𑀡𑁆𑀡𑀁. 𑀲𑀫𑁆𑀧𑀢𑁆𑀢𑁂 𑀳𑀺 𑀯𑀢𑁆𑀣𑀼𑀓𑀸𑀫𑁂 𑀅𑀦𑀼𑀪𑀯𑀦𑁆𑀢𑁄 𑀭𑀸𑀕𑀭𑀚𑁂𑀦 𑀯𑁄𑀓𑀺𑀡𑁆𑀡𑁄 𑀳𑁄𑀢𑀺, 𑀢𑀢𑁆𑀣 𑀧𑀦 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀨𑀮𑁂 𑀆𑀬𑀢𑀺𑀁 𑀆𑀧𑀦𑁆𑀦𑁂 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀤𑁄𑀲𑀭𑀚𑁂𑀦 𑀯𑁄𑀓𑀺𑀡𑁆𑀡𑁄 𑀳𑁄𑀢𑀺, 𑀉𑀪𑀬𑀢𑁆𑀣𑀸𑀧𑀺 𑀫𑁄𑀳𑀭𑀚𑁂𑀦 𑀯𑁄𑀓𑀺𑀡𑁆𑀡𑁄 𑀳𑁄𑀢𑀺. 𑀓𑀲𑁆𑀲 𑀧𑀦𑁂𑀢𑀁 𑀭𑀚𑀸𑀦𑀼𑀓𑀺𑀡𑁆𑀡𑀦𑁆𑀢𑀺 𑀆𑀳 𑁋 ‘‘𑀆𑀢𑀼𑀭𑀲𑁆𑀲𑀸𑀦𑀼𑀲𑀺𑀓𑁆𑀔𑀢𑁄’’𑀢𑀺 𑀓𑀸𑀫𑀧𑀢𑁆𑀣𑀦𑀸𑀯𑀲𑁂𑀦 𑀓𑀺𑀮𑁂𑀲𑀸𑀢𑀼𑀭𑀲𑁆𑀲, 𑀢𑀲𑁆𑀲 𑀘 𑀨𑀮𑁂𑀦 𑀤𑀼𑀓𑁆𑀔𑀸𑀢𑀼𑀭𑀲𑁆𑀲 𑀘 𑀉𑀪𑀬𑀢𑁆𑀣𑀸𑀧𑀺 𑀧𑀝𑀺𑀓𑀸𑀭𑀸𑀪𑀺𑀮𑀸𑀲𑀸𑀬 𑀓𑀺𑀮𑁂𑀲𑀨𑀮𑁂 𑀅𑀦𑀼𑀲𑀺𑀓𑁆𑀔𑀢𑁄.

𑀢𑀣𑀸 𑀬𑀜𑁆𑀘 𑀧𑀢𑁆𑀢𑀦𑁆𑀢𑀺 𑀬𑀁 𑀅𑀘𑁂𑀮𑀓𑀯𑀢𑀸𑀤𑀺𑀯𑀲𑁂𑀦 𑀧𑀢𑁆𑀢𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀁. 𑀬𑀜𑁆𑀘 𑀧𑀢𑁆𑀢𑀩𑁆𑀩𑀦𑁆𑀢𑀺 𑀬𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 𑀅𑀧𑀸𑀬𑁂𑀲𑀼 𑀧𑀢𑁆𑀢𑀩𑁆𑀩𑀁 𑀨𑀮𑀁. 𑀉𑀪𑀬𑀫𑁂𑀢𑀁 𑀭𑀚𑀸𑀦𑀼𑀓𑀺𑀡𑁆𑀡𑀦𑁆𑀢𑀺 𑀢𑀤𑀼𑀪𑀬𑀁 𑀤𑀼𑀓𑁆𑀔𑀭𑀚𑀸𑀦𑀼𑀓𑀺𑀡𑁆𑀡𑀁. 𑀆𑀢𑀼𑀭𑀲𑁆𑀲𑀸𑀢𑀺 𑀓𑀸𑀬𑀓𑀺𑀮𑀫𑀣𑁂𑀦 𑀤𑀼𑀓𑁆𑀔𑀸𑀢𑀼𑀭𑀲𑁆𑀲. 𑀅𑀦𑀼𑀲𑀺𑀓𑁆𑀔𑀢𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁, 𑀢𑀲𑁆𑀲𑀸 𑀲𑀫𑀸𑀤𑀸𑀬𑀓𑁂 𑀧𑀼𑀕𑁆𑀕𑀮𑁂 𑀘 𑀅𑀦𑀼𑀲𑀺𑀓𑁆𑀔𑀢𑁄.

𑀬𑁂 𑀘 𑀲𑀺𑀓𑁆𑀔𑀸𑀲𑀸𑀭𑀸𑀢𑀺 𑀬𑁂𑀳𑀺 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀻𑀮𑀩𑁆𑀩𑀢𑀸𑀤𑀺𑀲𑀗𑁆𑀔𑀸𑀢𑀁 𑀲𑀺𑀓𑁆𑀔𑀁 𑀲𑀸𑀭𑀢𑁄 𑀕𑀳𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀲𑀁𑀲𑀸𑀭𑀲𑀼𑀤𑁆𑀥𑀻’’𑀢𑀺 𑀓𑀣𑀺𑀢𑀸. 𑀢𑁂𑀦𑀸𑀳 𑁋 𑀲𑀻𑀮𑀩𑁆𑀩𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀉𑀧𑀝𑁆𑀞𑀸𑀦𑀲𑀸𑀭𑀸𑀢𑀺. 𑀢𑀢𑁆𑀣 𑀬𑀁 ‘‘𑀦 𑀓𑀭𑁄𑀫𑀻’’𑀢𑀺 𑀑𑀭𑀫𑀢𑀺, 𑀢𑀁 𑀲𑀻𑀮𑀁, 𑀯𑀺𑀲𑀪𑁄𑀚𑀦𑀓𑀺𑀘𑁆𑀙𑀸𑀘𑀭𑀡𑀸𑀤𑀺𑀓𑀁 𑀯𑀢𑀁, 𑀲𑀸𑀓𑀪𑀓𑁆𑀔𑀢𑀸𑀤𑀺𑀚𑀻𑀯𑀺𑀓𑀸 𑀚𑀻𑀯𑀺𑀢𑀁, 𑀫𑁂𑀣𑀼𑀦𑀯𑀺𑀭𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀏𑀢𑁂𑀲𑀁 𑀅𑀦𑀼𑀢𑀺𑀝𑁆𑀞𑀦𑀁 𑀉𑀧𑀝𑁆𑀞𑀸𑀦𑀁, 𑀪𑀽𑀢𑀧𑀺𑀡𑁆𑀟𑀓𑀧𑀭𑀺𑀪𑀡𑁆𑀟𑀸𑀤𑀺𑀯𑀲𑁂𑀦 𑀔𑀦𑁆𑀥𑀤𑁂𑀯𑀲𑀺𑀯𑀸𑀤𑀺𑀧𑀭𑀺𑀘𑀭𑀡𑀁 𑀯𑀸 𑀉𑀧𑀝𑁆𑀞𑀸𑀦𑀁, 𑀏𑀯𑀫𑁂𑀢𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑀻𑀮𑀸𑀤𑀻𑀳𑀺 𑀲𑀁𑀲𑀸𑀭𑀲𑀼𑀤𑁆𑀥𑀺 𑀳𑁄𑀢𑀻𑀢𑀺 𑀢𑀸𑀦𑀺 𑀲𑀸𑀭𑀢𑁄 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀺𑀓𑁆𑀔𑀸𑀲𑀸𑀭𑀸 𑀲𑀻𑀮𑀩𑁆𑀩𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 ‘‘𑀉𑀧𑀝𑁆𑀞𑀸𑀦𑀲𑀸𑀭𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀓𑁄 𑀅𑀦𑁆𑀢𑁄𑀢𑀺 𑀅𑀬𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀯𑀲𑁂𑀦 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑁄 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑁆𑀧𑀣𑀪𑀽𑀢𑁄 𑀮𑀸𑀫𑀓𑀝𑁆𑀞𑁂𑀦 𑀘 𑀏𑀓𑁄 𑀅𑀦𑁆𑀢𑁄. 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄𑀢𑀺 𑀅𑀬𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀤𑀼𑀢𑀺𑀬𑁄 𑀯𑀼𑀢𑁆𑀢𑀦𑀬𑁂𑀦 𑀅𑀦𑁆𑀢𑁄.

𑀇𑀘𑁆𑀘𑁂𑀢𑁂 𑀉𑀪𑁄 𑀅𑀦𑁆𑀢𑀸𑀢𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀘 𑀇𑀢𑀺 𑀏𑀢𑁂 𑀉𑀪𑁄 𑀅𑀦𑁆𑀢𑀸. 𑀢𑁂 𑀘 𑀔𑁄 𑀏𑀢𑀭𑀳𑀺 𑀧𑀢𑁆𑀢𑁂, 𑀆𑀬𑀢𑀺𑀁 𑀧𑀢𑁆𑀢𑀩𑁆𑀩𑁂 𑀘 𑀓𑀺𑀮𑁂𑀲𑀤𑀼𑀓𑁆𑀔𑀭𑀚𑀸𑀦𑀼𑀓𑀺𑀡𑁆𑀡𑁂 𑀓𑀸𑀫𑀕𑀼𑀡𑁂 𑀅𑀢𑁆𑀢𑀧𑀭𑀺𑀢𑀸𑀧𑀦𑁂 𑀘 𑀅𑀮𑁆𑀮𑀻𑀦𑁂𑀳𑀺 𑀓𑀺𑀮𑁂𑀲𑀤𑀼𑀓𑁆𑀔𑀸𑀢𑀼𑀭𑀸𑀦𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑁂𑀳𑀺, 𑀲𑀬𑀜𑁆𑀘 𑀓𑀺𑀮𑁂𑀲𑀤𑀼𑀓𑁆𑀔𑀸𑀢𑀼𑀭𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀮𑀸𑀫𑀓𑀸 𑀉𑀧𑁆𑀧𑀣𑀪𑀽𑀢𑀸 𑀘𑀸𑀢𑀺 𑀅𑀦𑁆𑀢𑀸. 𑀓𑀝𑀲𑀺𑀯𑀟𑁆𑀠𑀦𑀸𑀢𑀺 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀪𑀺𑀓𑀗𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀓𑀝𑀲𑀺𑀲𑀗𑁆𑀔𑀸𑀢𑀸𑀦𑀁 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀦𑀁 𑀅𑀪𑀺𑀯𑀟𑁆𑀠𑀦𑀸. 𑀓𑀝𑀲𑀺𑀬𑁄 𑀤𑀺𑀝𑁆𑀞𑀺𑀁 𑀯𑀟𑁆𑀠𑁂𑀦𑁆𑀢𑀻𑀢𑀺 𑀢𑀸 𑀧𑀦 𑀓𑀝𑀲𑀺𑀬𑁄 𑀦𑀸𑀦𑀧𑁆𑀧𑀓𑀸𑀭𑀤𑀺𑀝𑁆𑀞𑀺𑀁 𑀯𑀟𑁆𑀠𑁂𑀦𑁆𑀢𑀺. 𑀯𑀢𑁆𑀣𑀼𑀓𑀸𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀳𑀺 𑀢𑁂 𑀧𑀚𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀲𑀳𑀓𑀸𑀭𑀻𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁩𑁮) 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀁 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀜𑁆𑀘 𑀕𑀡𑁆𑀳𑀸𑀧𑁂𑀦𑁆𑀢𑀺, 𑀅𑀢𑁆𑀢𑀧𑀭𑀺𑀢𑀸𑀧𑀦𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀧𑀦 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀳𑀓𑀸𑀭𑀻𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 ‘‘𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀲𑀼𑀤𑁆𑀥𑀺𑀅𑀪𑀺𑀮𑀸𑀲𑁂𑀦 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀧𑁂𑀦𑁆𑀢𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀦 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑁄 𑀧𑀸𑀓𑀝𑁄𑀬𑁂𑀯. 𑀏𑀯𑀁 𑀅𑀦𑁆𑀢𑀤𑁆𑀯𑀬𑀽𑀧𑀦𑀺𑀲𑁆𑀲𑀬𑁂𑀦 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀦𑀁 𑀤𑀺𑀝𑁆𑀞𑀺𑀯𑀟𑁆𑀠𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 𑀧𑀦 ‘‘𑀓𑀝𑀲𑀻𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀬𑀤𑀕𑁆𑀕𑁂𑀦 𑀢𑀢𑁄 𑀅𑀦𑁆𑀢𑀤𑁆𑀯𑀬𑀢𑁄 𑀲𑀁𑀲𑀸𑀭𑀲𑀼𑀤𑁆𑀥𑀺 𑀦 𑀳𑁄𑀢𑀺, 𑀢𑀤𑀕𑁆𑀕𑁂𑀦 𑀢𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀅𑀪𑀺𑀯𑀟𑁆𑀠𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀭𑁂 𑀧𑀦 ‘‘𑀓𑀝𑀲𑀺𑀯𑀟𑁆𑀠𑀦𑀸’’𑀢𑀺 𑀧𑀤𑀲𑁆𑀲 ‘‘𑀅𑀧𑀭𑀸𑀧𑀭𑀁 𑀚𑀭𑀸𑀫𑀭𑀡𑁂𑀳𑀺 𑀲𑀺𑀯𑀣𑀺𑀓𑀯𑀟𑁆𑀠𑀦𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑁂𑀳𑀺𑀧𑀺 𑀅𑀦𑁆𑀢𑀤𑁆𑀯𑀬𑀲𑁆𑀲 𑀲𑀁𑀲𑀸𑀭𑀲𑀼𑀤𑁆𑀥𑀺𑀳𑁂𑀢𑀼𑀪𑀸𑀯𑀸𑀪𑀸𑀯𑁄𑀬𑁂𑀯 𑀯𑀼𑀢𑁆𑀢𑁄, 𑀓𑀝𑀲𑀺𑀬𑀸 𑀧𑀦 𑀤𑀺𑀝𑁆𑀞𑀺𑀯𑀟𑁆𑀠𑀦𑀓𑀸𑀭𑀡𑀪𑀸𑀯𑁄 𑀯𑀢𑁆𑀢𑀩𑁆𑀩𑁄.

𑀏𑀢𑁂 𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀪𑀺𑀜𑁆𑀜𑀸𑀬𑀸𑀢𑀺 𑀢𑁂 𑀏𑀢𑁂 𑀬𑀣𑀸𑀯𑀼𑀢𑁆𑀢𑁂 𑀉𑀪𑁄𑀧𑀺 𑀅𑀦𑁆𑀢𑁂 𑀅𑀚𑀸𑀦𑀺𑀢𑁆𑀯𑀸 ‘‘𑀇𑀫𑁂 𑀅𑀦𑁆𑀢𑀸 𑀢𑁂 𑀘 𑀏𑀯𑀁𑀕𑀳𑀺𑀢𑀸 𑀏𑀯𑀁𑀅𑀦𑀼𑀝𑁆𑀞𑀺𑀢𑀸 𑀏𑀯𑀁𑀕𑀢𑀺𑀓𑀸 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺 𑀏𑀯𑀁 𑀅𑀚𑀸𑀦𑀦𑀳𑁂𑀢𑀼 𑀅𑀚𑀸𑀦𑀦𑀓𑀸𑀭𑀡𑀸. ‘‘𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀢𑀺𑀆𑀤𑀻𑀲𑀼 (𑀧𑀼. 𑀧. 𑁨𑁦𑁮; 𑀅. 𑀦𑀺. 𑁯.𑁪𑁩) 𑀯𑀺𑀬𑀲𑁆𑀲 𑀳𑁂𑀢𑀼𑀅𑀢𑁆𑀣𑀢𑀸 𑀤𑀝𑁆𑀞𑀩𑁆𑀩𑀸. 𑀑𑀮𑀻𑀬𑀦𑁆𑀢𑀺 𑀏𑀓𑁂𑀢𑀺 𑀏𑀓𑁂 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀯𑀲𑁂𑀦 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂𑀢𑀺 𑀏𑀓𑁂 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀓𑀸𑀫𑀲𑀼𑀔𑀫𑀦𑀼𑀬𑀼𑀢𑁆𑀢𑀸 𑀳𑀺 𑀯𑀻𑀭𑀺𑀬𑀲𑁆𑀲 𑀅𑀓𑀭𑀡𑀢𑁄 𑀓𑁄𑀲𑀚𑁆𑀚𑀯𑀲𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀢𑁄 𑀲𑀗𑁆𑀓𑁄𑀘𑀫𑀸𑀧𑀦𑁆𑀦𑀢𑀸 𑀑𑀮𑀻𑀬𑀦𑁆𑀢𑀺 𑀦𑀸𑀫, 𑀅𑀢𑁆𑀢𑀧𑀭𑀺𑀢𑀸𑀧𑀦𑀫𑀦𑀼𑀬𑀼𑀢𑁆𑀢𑀸 𑀧𑀦 𑀓𑁄𑀲𑀚𑁆𑀚𑀁 𑀧𑀳𑀸𑀬 𑀅𑀦𑀼𑀧𑀸𑀬𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑀁 𑀓𑀭𑁄𑀦𑁆𑀢𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑀺𑀓𑁆𑀓𑀫𑀦𑀢𑁄 𑀅𑀢𑀺𑀥𑀸𑀯𑀦𑁆𑀢𑀺 𑀦𑀸𑀫, 𑀢𑀤𑀼𑀪𑀬𑀁 𑀧𑀦 𑀢𑀢𑁆𑀣 𑀆𑀤𑀻𑀦𑀯𑀸𑀤𑀲𑁆𑀲𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀪𑁄 𑀅𑀦𑁆𑀢𑁂 𑀅𑀦𑀪𑀺𑀜𑁆𑀜𑀸𑀬 𑀑𑀮𑀻𑀬𑀦𑁆𑀢𑀺 𑀏𑀓𑁂 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂’’𑀢𑀺. 𑀢𑀢𑁆𑀣 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀯𑀲𑁂𑀦 𑀑𑀮𑀻𑀬𑀦𑁆𑀢𑀺, 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀯𑀲𑁂𑀦 𑀅𑀢𑀺𑀥𑀸𑀯𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀣 𑀯𑀸 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀑𑀮𑀻𑀬𑀦𑁆𑀢𑀺 𑀏𑀓𑁂, 𑀉𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂. 𑀕𑁄𑀲𑀻𑀮𑀸𑀤𑀺𑀯𑀲𑁂𑀦 𑀳𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀫𑀦𑀼𑀬𑀼𑀢𑁆𑀢𑀸 𑀏𑀓𑀘𑁆𑀘𑁂 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸, 𑀢𑀢𑁆𑀣 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻’’𑀢𑀺 𑀲𑀲𑁆𑀲𑀢𑀤𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑀸 𑀲𑀁𑀲𑀸𑀭𑁂 𑀑𑀮𑀻𑀬𑀦𑁆𑀢𑀺 𑀦𑀸𑀫, 𑀓𑀸𑀫𑀲𑀼𑀔𑀫𑀦𑀼𑀬𑀼𑀢𑁆𑀢𑀸 𑀧𑀦 𑀏𑀓𑀘𑁆𑀘𑁂 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀦𑁆𑀢𑀧𑁆𑀧𑁂𑀢𑀼𑀓𑀸𑀫𑀸 𑀮𑁄𑀓𑀸𑀬𑀢𑀺𑀓𑀸 𑀯𑀺𑀬 𑀢𑀤𑀦𑀼𑀕𑀼𑀡𑀁 𑀉𑀘𑁆𑀙𑁂𑀤𑀤𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑀸 𑀅𑀦𑀼𑀧𑀸𑀬𑁂𑀦 𑀯𑀝𑁆𑀝𑀼𑀧𑀘𑁆𑀙𑁂𑀤𑀲𑁆𑀲 𑀧𑀭𑀺𑀬𑁂𑀲𑀦𑀢𑁄 𑀅𑀢𑀺𑀥𑀸𑀯𑀦𑁆𑀢𑀺 𑀦𑀸𑀫. 𑀏𑀯𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦𑀧𑀺 𑀑𑀮𑀻𑀬𑀦𑀸𑀢𑀺𑀥𑀸𑀯𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀬𑁂 𑀘 𑀔𑁄 𑀢𑁂 𑀅𑀪𑀺𑀜𑁆𑀜𑀸𑀬𑀸𑀢𑀺 𑀬𑁂 𑀘 𑀔𑁄 𑀧𑀦 𑀅𑀭𑀺𑀬𑀧𑀼𑀕𑁆𑀕𑀮𑀸 𑀢𑁂 𑀬𑀣𑀸𑀯𑀼𑀢𑁆𑀢𑁂 𑀉𑀪𑁄 𑀅𑀦𑁆𑀢𑁂 ‘‘𑀇𑀫𑁂 𑀅𑀦𑁆𑀢𑀸 𑀏𑀯𑀁𑀕𑀳𑀺𑀢𑀸 𑀏𑀯𑀁𑀅𑀦𑀼𑀝𑁆𑀞𑀺𑀢𑀸 𑀏𑀯𑀁𑀕𑀢𑀺𑀓𑀸 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀯𑀺𑀧𑀲𑁆𑀲𑀦𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀫𑀚𑁆𑀛𑀺𑀫𑀧𑀝𑀺𑀧𑀤𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸. 𑀢𑀢𑁆𑀭 𑀘 𑀦𑀸𑀳𑁂𑀲𑀼𑀦𑁆𑀢𑀺 𑀢𑀢𑁆𑀭 𑀢𑀲𑁆𑀫𑀺𑀁 𑀅𑀦𑁆𑀢𑀤𑁆𑀯𑀬𑁂 𑀧𑀢𑀺𑀢𑀸 𑀦 𑀅𑀳𑁂𑀲𑀼𑀁, 𑀢𑀁 𑀅𑀦𑁆𑀢𑀤𑁆𑀯𑀬𑀁 𑀧𑀚𑀳𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀦 𑀘 𑀦𑀸𑀫𑀜𑁆𑀜𑀺𑀁𑀲𑀽𑀢𑀺 𑀢𑁂𑀦 𑀅𑀦𑁆𑀢𑀤𑁆𑀯𑀬𑀧𑀳𑀸𑀦𑁂𑀦 ‘‘𑀫𑀫 𑀇𑀤𑀁 𑀅𑀦𑁆𑀢𑀤𑁆𑀯𑀬𑀧𑀳𑀸𑀦𑀁, 𑀅𑀳𑀁 𑀅𑀦𑁆𑀢𑀤𑁆𑀯𑀬𑀁 𑀧𑀳𑀸𑀲𑀺𑀁, 𑀇𑀫𑀺𑀦𑀸 𑀅𑀦𑁆𑀢𑀤𑁆𑀯𑀬𑀧𑀳𑀸𑀦𑁂𑀦 𑀲𑁂𑀬𑁆𑀬𑁄’’𑀢𑀺𑀆𑀤𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀦𑀸𑀯𑀲𑁂𑀦 𑀦 𑀅𑀫𑀜𑁆𑀜𑀺𑀁𑀲𑀼 𑀲𑀩𑁆𑀩𑀫𑀜𑁆𑀜𑀦𑀸𑀦𑀁 𑀲𑀫𑁆𑀫𑀤𑁂𑀯 𑀧𑀳𑀻𑀦𑀢𑁆𑀢𑀸. 𑀏𑀢𑁆𑀣 𑀘 𑀅𑀕𑁆𑀕𑀨𑀮𑁂 𑀞𑀺𑀢𑁂 𑀅𑀭𑀺𑀬𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 ‘‘𑀢𑀢𑁆𑀭 𑀘 𑀦𑀸𑀳𑁂𑀲𑀼𑀁, 𑀢𑁂𑀦 𑀘 𑀦𑀸𑀫𑀜𑁆𑀜𑀺𑀁𑀲𑀽’’𑀢𑀺 𑀅𑀢𑀻𑀢𑀓𑀸𑀮𑀯𑀲𑁂𑀦 𑀅𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀅𑀥𑀺𑀧𑁆𑀧𑁂𑀢𑁂 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀬𑁂 𑀏𑀯𑀁 𑀧𑀳𑀻𑀦𑀲𑀩𑁆𑀩𑀫𑀜𑁆𑀜𑀦𑀸 𑀉𑀢𑁆𑀢𑀫𑀧𑀼𑀭𑀺𑀲𑀸, 𑀢𑁂𑀲𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀓𑀺𑀮𑁂𑀲𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺 𑀯𑀝𑁆𑀝𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬, 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀪𑁂𑀤𑀢𑁄 𑀉𑀤𑁆𑀥𑀁 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀅𑀧𑀜𑁆𑀜𑀢𑁆𑀢𑀺𑀓𑀪𑀸𑀯𑀫𑁂𑀯 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀧𑀸𑀢𑀺𑀥𑀸𑀯𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀦𑀯𑀫𑁂 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀦𑁆𑀢𑀺 𑀭𑀢𑁆𑀢𑀺𑀬𑀁 𑀅𑀦𑁆𑀥𑀓𑀸𑀭𑁂 𑀫𑀳𑀸𑀢𑀺𑀫𑀺𑀲𑀸𑀬𑀁. 𑀭𑀢𑁆𑀢𑀻𑀧𑀺 𑀳𑀺 𑀅𑀦𑁆𑀥𑀓𑀸𑀭𑀯𑀺𑀭𑀳𑀺𑀢𑀸 𑀳𑁄𑀢𑀺, 𑀬𑀸 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺 𑀚𑀼𑀡𑁆𑀳𑁄𑀪𑀸𑀲𑀺𑀢𑀸. 𑀅𑀦𑁆𑀥𑀓𑀸𑀭𑁄𑀧𑀺 ‘‘𑀢𑀺𑀫𑀺𑀲𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺 𑀅𑀩𑁆𑀪𑀫𑀳𑀺𑀓𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀺𑀢𑁂 𑀤𑁂𑀯𑁂. 𑀫𑀳𑀦𑁆𑀥𑀓𑀸𑀭𑁄 𑀳𑀺 ‘‘𑀢𑀺𑀫𑀺𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦 𑀅𑀫𑀸𑀯𑀲𑀻 𑀭𑀢𑁆𑀢𑀺 𑀤𑁂𑀯𑁄 𑀘 𑀫𑁂𑀖𑀧𑀝𑀮𑀲𑀜𑁆𑀙𑀦𑁆𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀦𑁆𑀢𑀺 𑀭𑀢𑁆𑀢𑀺𑀬𑀸 𑀅𑀦𑁆𑀥𑀓𑀸𑀭𑁂 𑀫𑀳𑀸𑀢𑀺𑀫𑀺𑀲𑀸𑀬’’𑀦𑁆𑀢𑀺. 𑀅𑀩𑁆𑀪𑁄𑀓𑀸𑀲𑁂𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀯𑀺𑀳𑀸𑀭𑀗𑁆𑀕𑀡𑁂. 𑀢𑁂𑀮𑀧𑁆𑀧𑀤𑀻𑀧𑁂𑀲𑀼 𑀛𑀸𑀬𑀫𑀸𑀦𑁂𑀲𑀽𑀢𑀺 𑀢𑁂𑀮𑀧𑀚𑁆𑀚𑁄𑀢𑁂𑀲𑀼 𑀚𑀮𑀫𑀸𑀦𑁂𑀲𑀼.

𑀦𑀦𑀼 𑀘 𑀪𑀕𑀯𑀢𑁄 𑀩𑁆𑀬𑀸𑀫𑀧𑁆𑀧𑀪𑀸 𑀧𑀓𑀢𑀺𑀬𑀸 𑀩𑁆𑀬𑀸𑀫𑀫𑀢𑁆𑀢𑀧𑁆𑀧𑀤𑁂𑀲𑀁 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀮𑁄𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀖𑀦𑀩𑀳𑀮𑀁 𑀩𑀼𑀤𑁆𑀥𑀸𑀮𑁄𑀓𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀻 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀓𑀸𑀬𑀧𑁆𑀧𑀪𑀸𑀧𑀺 𑀦𑀻𑀮𑀧𑀻𑀢𑀸𑀤𑀺𑀯𑀲𑁂𑀦 𑀙𑀩𑁆𑀩𑀡𑁆𑀡𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀓𑀢𑀺𑀬𑀸𑀯 𑀲𑀫𑀦𑁆𑀢𑀢𑁄 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀤𑁂𑀲𑀁 𑀑𑀪𑀸𑀲𑁂𑀦𑁆𑀢𑀻 𑀢𑀺𑀝𑁆𑀞𑀢𑀺, 𑀏𑀯𑀁 𑀩𑀼𑀤𑁆𑀥𑀸𑀮𑁄𑀓𑁂𑀦𑁂𑀯 𑀏𑀓𑁄𑀪𑀸𑀲𑀪𑀽𑀢𑁂 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑁄𑀓𑀸𑀲𑁂 𑀧𑀤𑀻𑀧𑀓𑀭𑀡𑁂 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀢𑀣𑀸𑀧𑀺 𑀧𑀼𑀜𑁆𑀜𑀢𑁆𑀣𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀽𑀚𑀸𑀓𑀭𑀡𑀢𑁆𑀣𑀁 𑀤𑁂𑀯𑀲𑀺𑀓𑀁 𑀢𑁂𑀮𑀧𑁆𑀧𑀤𑀻𑀧𑀁 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 𑀲𑀸𑀫𑀜𑁆𑀜𑀨𑀮𑁂𑀧𑀺 ‘‘𑀏𑀢𑁂 𑀫𑀡𑁆𑀟𑀮𑀫𑀸𑀮𑁂 𑀤𑀻𑀧𑀸 𑀛𑀸𑀬𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁫𑁯). ‘‘𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬’’𑀦𑁆𑀢𑀺 𑀇𑀤𑀫𑁆𑀧𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀲𑀪𑀸𑀯𑀓𑀺𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀦 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑁄𑀓𑀸𑀲𑀲𑁆𑀲 𑀅𑀦𑁆𑀥𑀓𑀸𑀭𑀪𑀸𑀯𑀢𑁄. 𑀧𑀽𑀚𑀸𑀓𑀭𑀡𑀢𑁆𑀣𑀫𑁂𑀯 𑀳𑀺 𑀢𑀤𑀸𑀧𑀺 𑀉𑀧𑀸𑀲𑀓𑁂𑀳𑀺 𑀧𑀤𑀻𑀧𑀸 𑀓𑀸𑀭𑀺𑀢𑀸.

𑀢𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀩𑀳𑀽 𑀉𑀧𑀸𑀲𑀓𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀤𑀸𑀦𑀸𑀦𑀺 𑀧𑀯𑀢𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑀸𑀦𑀺 𑀕𑀦𑁆𑀢𑁆𑀯𑀸 𑀲𑀬𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 𑀓𑁂𑀘𑀺 𑀫𑀦𑁄𑀪𑀸𑀯𑀦𑀻𑀬𑁂 𑀪𑀺𑀓𑁆𑀔𑀽 𑀧𑀬𑀺𑀭𑀼𑀧𑀸𑀲𑀦𑁆𑀢𑀸 𑀓𑁂𑀘𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀦𑁆𑀢𑀸 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀲𑀼𑀁. 𑀢𑁂 𑀲𑀸𑀬𑀦𑁆𑀳𑀲𑀫𑀬𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀢𑁆𑀣𑀭𑀺 𑀥𑀫𑁆𑀫𑀲𑀪𑀸𑀫𑀡𑁆𑀟𑀧𑀢𑁄 𑀧𑀝𑁆𑀞𑀸𑀬 𑀕𑀦𑁆𑀥𑀓𑀼𑀝𑀺𑀲𑀫𑀻𑀧𑁂 𑀅𑀚𑁆𑀛𑁄𑀓𑀸𑀲𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁂, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑁂 𑀉𑀧𑁄𑀲𑀣𑀯𑀺𑀲𑁄𑀥𑀦𑀢𑁆𑀣𑀜𑁆𑀘𑁂𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀩𑁆𑀭𑀽𑀳𑀦𑀢𑁆𑀣𑀜𑁆𑀘 𑀦𑀕𑀭𑀁 𑀅𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀯𑀲𑀺𑀢𑀼𑀓𑀸𑀫𑀸 𑀑𑀳𑀻𑀬𑀺𑀁𑀲𑀼. 𑀅𑀣 𑀢𑁂 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀽𑀚𑀸𑀓𑀭𑀡𑀢𑁆𑀣𑀁 𑀩𑀳𑀽 𑀢𑁂𑀮𑀧𑁆𑀧𑀤𑀻𑀧𑁂 𑀆𑀭𑁄𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀪𑀦𑁆𑀢𑁂, 𑀇𑀫𑁂 𑀢𑀺𑀢𑁆𑀣𑀺𑀬𑀸 𑀦𑀸𑀦𑀸𑀯𑀺𑀥𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺, 𑀢𑀣𑀸 𑀯𑁄𑀳𑀭𑀦𑁆𑀢𑀸 𑀘 𑀓𑀤𑀸𑀘𑀺 𑀲𑀲𑁆𑀲𑀢𑀁, 𑀓𑀤𑀸𑀘𑀺 𑀅𑀲𑀲𑁆𑀲𑀢𑀁, 𑀉𑀘𑁆𑀙𑁂𑀤𑀸𑀤𑀻𑀲𑀼 𑀅𑀜𑁆𑀜𑀢𑀭𑀦𑁆𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀅𑀝𑁆𑀞𑀢𑁆𑀯𑀸 𑀦𑀯𑀦𑀯𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 ‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀦𑁆𑀢𑀺 𑀉𑀫𑁆𑀫𑀢𑁆𑀢𑀓𑀲𑀤𑀺𑀲𑀸, 𑀢𑁂𑀲𑀁 𑀢𑀣𑀸 𑀅𑀪𑀺𑀦𑀺𑀯𑀺𑀝𑁆𑀞𑀸𑀦𑀁 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀩𑀳𑀽 𑀧𑀝𑀗𑁆𑀕𑀧𑀸𑀡𑀓𑀸 𑀧𑀢𑀦𑁆𑀢𑀸 𑀧𑀢𑀦𑁆𑀢𑀸 𑀢𑁂𑀲𑀼 𑀢𑁂𑀮𑀧𑁆𑀧𑀤𑀻𑀧𑁂𑀲𑀼 𑀦𑀺𑀧𑀢𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀅𑀥𑀺𑀧𑀸𑀢𑀓𑀸’’𑀢𑀺𑀆𑀤𑀺.

𑀢𑀢𑁆𑀣 𑀅𑀥𑀺𑀧𑀸𑀢𑀓𑀸𑀢𑀺 𑀧𑀝𑀗𑁆𑀕𑀧𑀸𑀡𑀓𑀸, 𑀬𑁂 ‘‘𑀲𑀮𑀪𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀳𑀺 𑀤𑀻𑀧𑀲𑀺𑀔𑀁 𑀅𑀥𑀺𑀧𑀢𑀦𑀢𑁄 ‘‘𑀅𑀥𑀺𑀧𑀸𑀢𑀓𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀆𑀧𑀸𑀢𑀧𑀭𑀺𑀧𑀸𑀢𑀦𑁆𑀢𑀺 𑀆𑀧𑀸𑀢𑀁 𑀧𑀭𑀺𑀧𑀸𑀢𑀁, 𑀆𑀧𑀢𑀺𑀢𑁆𑀯𑀸 𑀆𑀧𑀢𑀺𑀢𑁆𑀯𑀸 𑀧𑀭𑀺𑀧𑀢𑀺𑀢𑁆𑀯𑀸 𑀧𑀭𑀺𑀧𑀢𑀺𑀢𑁆𑀯𑀸, 𑀅𑀪𑀺𑀫𑀼𑀔𑀧𑀸𑀢𑀜𑁆𑀘𑁂𑀯 𑀧𑀭𑀺𑀩𑁆𑀪𑀫𑀺𑀢𑁆𑀯𑀸 𑀧𑀸𑀢𑀜𑁆𑀘 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀆𑀧𑀸𑀣𑁂 𑀧𑀭𑀺𑀧𑀸𑀢’’𑀦𑁆𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀆𑀧𑀸𑀣𑁂 𑀧𑀤𑀻𑀧𑀲𑁆𑀲 𑀅𑀢𑁆𑀢𑀦𑁄 𑀆𑀧𑀸𑀣𑀕𑀫𑀦𑁂 𑀲𑀢𑀺 𑀧𑀭𑀺𑀧𑀢𑀺𑀢𑁆𑀯𑀸 𑀧𑀭𑀺𑀧𑀢𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀬𑀦𑁆𑀢𑀺 𑀅𑀯𑀟𑁆𑀠𑀺𑀁 𑀤𑀼𑀓𑁆𑀔𑀁. 𑀩𑁆𑀬𑀲𑀦𑀦𑁆𑀢𑀺 𑀯𑀺𑀦𑀸𑀲𑀁. 𑀧𑀼𑀭𑀺𑀫𑀧𑀤𑁂𑀦 𑀳𑀺 𑀫𑀭𑀡𑀫𑀢𑁆𑀢𑀁 𑀤𑀼𑀓𑁆𑀔𑀁, 𑀧𑀘𑁆𑀙𑀺𑀫𑀧𑀤𑁂𑀦 𑀫𑀭𑀡𑀁 𑀢𑁂𑀲𑀁 𑀤𑀻𑀧𑁂𑀢𑀺. 𑀢𑀢𑁆𑀣 𑀓𑁂𑀘𑀺 𑀧𑀸𑀡𑀓𑀸 𑀲𑀳 𑀧𑀢𑀦𑁂𑀦 𑀫𑀭𑀺𑀁𑀲𑀼, 𑀓𑁂𑀘𑀺 𑀫𑀭𑀡𑀫𑀢𑁆𑀢𑀁 𑀤𑀼𑀓𑁆𑀔𑀁 𑀆𑀧𑀚𑁆𑀚𑀺𑀁𑀲𑀼.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀅𑀥𑀺𑀧𑀸𑀢𑀓𑀧𑀸𑀡𑀓𑀸𑀦𑀁 𑀅𑀢𑁆𑀢𑀳𑀺𑀢𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀢𑁆𑀢𑀼𑀧𑀓𑁆𑀓𑀫𑀯𑀲𑁂𑀦 𑀦𑀺𑀭𑀢𑁆𑀣𑀓𑀩𑁆𑀬𑀲𑀦𑀸𑀧𑀢𑁆𑀢𑀺𑀁 𑀯𑀺𑀤𑀺𑀢𑁆𑀯𑀸 𑀢𑁂𑀲𑀁 𑀯𑀺𑀬 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁂𑀦 𑀅𑀦𑀬𑀩𑁆𑀬𑀲𑀦𑀸𑀧𑀢𑁆𑀢𑀺𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀉𑀧𑀸𑀢𑀺𑀥𑀸𑀯𑀦𑁆𑀢𑀺 𑀦 𑀲𑀸𑀭𑀫𑁂𑀦𑁆𑀢𑀻𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀆𑀤𑀺𑀪𑁂𑀤𑀁 𑀲𑀸𑀭𑀁 𑀦 𑀏𑀦𑁆𑀢𑀺, 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀯𑀲𑁂𑀦 𑀦 𑀅𑀥𑀺𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀺𑀁 𑀧𑀦 𑀲𑀉𑀧𑀸𑀬𑁂 𑀲𑀸𑀭𑁂 𑀢𑀺𑀝𑁆𑀞𑀦𑁆𑀢𑁂𑀬𑁂𑀯 𑀯𑀺𑀫𑀼𑀢𑁆𑀢𑀸𑀪𑀺𑀮𑀸𑀲𑀸𑀬 𑀢𑀁 𑀉𑀧𑁂𑀦𑁆𑀢𑀸 𑀯𑀺𑀬 𑀳𑀼𑀢𑁆𑀯𑀸𑀧𑀺 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁂𑀦 𑀅𑀢𑀺𑀥𑀸𑀯𑀦𑁆𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 ‘‘𑀦𑀺𑀘𑁆𑀘𑀁 𑀲𑀼𑀪𑀁 𑀲𑀼𑀔𑀁 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀦𑀯𑀁 𑀦𑀯𑀁 𑀩𑀦𑁆𑀥𑀦𑀁 𑀩𑁆𑀭𑀽𑀳𑀬𑀦𑁆𑀢𑀻𑀢𑀺 𑀢𑀣𑀸 𑀕𑀡𑁆𑀳𑀦𑁆𑀢𑀸 𑀘 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀦𑀯𑀁 𑀦𑀯𑀁 𑀩𑀦𑁆𑀥𑀦𑀁 𑀩𑁆𑀭𑀽𑀳𑀬𑀦𑁆𑀢𑀺 𑀯𑀟𑁆𑀠𑀬𑀦𑁆𑀢𑀺. 𑀧𑀢𑀦𑁆𑀢𑀺 𑀧𑀚𑁆𑀚𑁄𑀢𑀫𑀺𑀯𑀸𑀥𑀺𑀧𑀸𑀢𑀓𑀸, 𑀤𑀺𑀝𑁆𑀞𑁂 𑀲𑀼𑀢𑁂 𑀇𑀢𑀺𑀳𑁂𑀓𑁂 𑀦𑀺𑀯𑀺𑀝𑁆𑀞𑀸𑀢𑀺 𑀏𑀯𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑀢𑁆𑀢𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑁂 𑀅𑀢𑁆𑀢𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑀺𑀤𑀲𑁆𑀲𑀦𑁂𑀦𑁂𑀯 𑀯𑀸 𑀤𑀺𑀝𑁆𑀞𑁂 𑀅𑀦𑀼𑀲𑁆𑀲𑀯𑀽𑀧𑀮𑀩𑁆𑀪𑀫𑀢𑁆𑀢𑁂𑀦𑁂𑀯 𑀘 𑀲𑀼𑀢𑁂 ‘‘𑀇𑀢𑀺𑀳 𑀏𑀓𑀦𑁆𑀢𑀢𑁄 𑀏𑀯𑀫𑁂𑀢’’𑀦𑁆𑀢𑀺 𑀦𑀺𑀯𑀺𑀝𑁆𑀞𑀸 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁂𑀦 ‘‘𑀲𑀲𑁆𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀪𑀺𑀦𑀺𑀯𑀺𑀝𑁆𑀞𑀸, 𑀏𑀓𑀦𑁆𑀢𑀳𑀺𑀢𑀁 𑀯𑀸 𑀦𑀺𑀲𑁆𑀲𑀭𑀡𑀁 𑀅𑀚𑀸𑀦𑀦𑁆𑀢𑀸 𑀭𑀸𑀕𑀸𑀤𑀻𑀳𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀁 𑀪𑀯𑀢𑁆𑀢𑀬𑀲𑀗𑁆𑀔𑀸𑀢𑀁 𑀅𑀗𑁆𑀕𑀸𑀭𑀓𑀸𑀲𑀼𑀁𑀬𑁂𑀯 𑀇𑀫𑁂 𑀯𑀺𑀬 𑀅𑀥𑀺𑀧𑀸𑀢𑀓𑀸 𑀇𑀫𑀁 𑀧𑀚𑁆𑀚𑁄𑀢𑀁 𑀧𑀢𑀦𑁆𑀢𑀺, 𑀦 𑀢𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀧𑁆𑀧𑀚𑁆𑀚𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀤𑀲𑀫𑁂 𑀬𑀸𑀯𑀓𑀻𑀯𑀦𑁆𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁. 𑀬𑀢𑁄𑀢𑀺 𑀬𑀤𑀸, 𑀬𑀢𑁄 𑀧𑀝𑁆𑀞𑀸𑀬, 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀸 𑀅𑀢𑁆𑀣𑁄. 𑀏𑀯𑀫𑁂𑀢𑀁, 𑀆𑀦𑀦𑁆𑀤𑀸𑀢𑀺, 𑀆𑀦𑀦𑁆𑀤, 𑀢𑀣𑀸𑀕𑀢𑁂 𑀉𑀧𑁆𑀧𑀦𑁆𑀦𑁂 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀲𑀸𑀯𑀓𑀸𑀦𑀁𑀬𑁂𑀯 𑀘 𑀮𑀸𑀪𑀲𑀓𑁆𑀓𑀸𑀭𑁄 𑀅𑀪𑀺𑀯𑀟𑁆𑀠𑀢𑀺, 𑀢𑀺𑀢𑁆𑀣𑀺𑀬𑀸 𑀧𑀦 𑀦𑀺𑀢𑁆𑀢𑁂𑀚𑀸 𑀯𑀺𑀳𑀢𑀧𑁆𑀧𑀪𑀸 𑀧𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀳𑁄𑀦𑁆𑀢𑀻𑀢𑀺 𑀬𑀁 𑀢𑀬𑀸 𑀯𑀼𑀢𑁆𑀢𑀁, 𑀏𑀢𑀁 𑀏𑀯𑀁, 𑀦 𑀏𑀢𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀳𑀺 𑀘𑀓𑁆𑀓𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁂𑀦 𑀮𑁄𑀓𑁄 𑀘𑀓𑁆𑀓𑀭𑀢𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀽𑀚𑀸𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀦 𑀧𑀯𑀢𑁆𑀢𑁂𑀢𑀺, 𑀘𑀓𑁆𑀓𑀭𑀢𑀦𑀫𑁂𑀯 𑀧𑀦 𑀲𑀩𑁆𑀩𑁄 𑀮𑁄𑀓𑁄 𑀲𑀩𑁆𑀩𑀪𑀸𑀯𑁂𑀳𑀺 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺. 𑀇𑀢𑀺 𑀯𑀝𑁆𑀝𑀸𑀦𑀼𑀲𑀸𑀭𑀺𑀧𑀼𑀜𑁆𑀜𑀫𑀢𑁆𑀢𑀦𑀺𑀲𑁆𑀲𑀦𑁆𑀤𑀲𑁆𑀲𑀧𑀺 𑀢𑀸𑀯 𑀫𑀳𑀦𑁆𑀢𑁄 𑀆𑀦𑀼𑀪𑀸𑀯𑁄, 𑀓𑀺𑀫𑀗𑁆𑀕𑀁 𑀧𑀦 𑀯𑀺𑀯𑀝𑁆𑀝𑀸𑀦𑀼𑀲𑀸𑀭𑀺𑀧𑀼𑀜𑁆𑀜𑀨𑀮𑀽𑀧𑀢𑁆𑀣𑀫𑁆𑀪𑀲𑁆𑀲 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑀲𑁆𑀲 𑀩𑀼𑀤𑁆𑀥𑀭𑀢𑀦𑀲𑁆𑀲 𑀥𑀫𑁆𑀫𑀭𑀢𑀦𑀲𑁆𑀲 𑀲𑀗𑁆𑀖𑀭𑀢𑀦𑀲𑁆𑀲 𑀘𑀸𑀢𑀺 𑀤𑀲𑁆𑀲𑁂𑀢𑀺.

𑀪𑀕𑀯𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀓𑁆𑀓𑀫𑁂𑀦 𑀮𑁄𑀓𑁂 𑀏𑀓𑀲𑀝𑁆𑀞𑀺𑀬𑀸 𑀅𑀭𑀳𑀦𑁆𑀢𑁂𑀲𑀼 𑀚𑀸𑀢𑁂𑀲𑀼 𑀲𑀝𑁆𑀞𑀺 𑀅𑀭𑀳𑀦𑁆𑀢𑁂 𑀚𑀦𑀧𑀤𑀘𑀸𑀭𑀺𑀓𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀭𑀼𑀯𑁂𑀮𑀁 𑀧𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀧𑁆𑀧𑀫𑀼𑀔𑁂 𑀲𑀳𑀲𑁆𑀲𑀚𑀝𑀺𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑀧𑁆𑀧𑀫𑀼𑀔𑀸𑀦𑀁 𑀅𑀗𑁆𑀕𑀫𑀕𑀥𑀯𑀸𑀲𑀻𑀦𑀁 𑀤𑁆𑀯𑀸𑀤𑀲 𑀦𑀳𑀼𑀢𑀸𑀦𑀺 𑀲𑀸𑀲𑀦𑁂 𑀑𑀢𑀸𑀭𑁂𑀢𑁆𑀯𑀸 𑀬𑀤𑀸 𑀭𑀸𑀚𑀕𑀳𑁂 𑀯𑀺𑀳𑀸𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀬𑀣𑀸 𑀬𑀣𑀸 𑀉𑀧𑀭𑀽𑀧𑀭𑀺 𑀉𑀴𑀸𑀭𑀮𑀸𑀪𑀲𑀓𑁆𑀓𑀸𑀭𑁄 𑀅𑀪𑀺𑀯𑀟𑁆𑀠𑀢𑀺, 𑀢𑀣𑀸 𑀢𑀣𑀸 𑀲𑀩𑁆𑀩𑀢𑀺𑀢𑁆𑀣𑀺𑀬𑀸𑀦𑀁 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺 𑀏𑀯.

𑀅𑀣𑁂𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀪𑀕𑀯𑀢𑁄 𑀘 𑀅𑀭𑀺𑀬𑀲𑀗𑁆𑀖𑀲𑁆𑀲 𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀓𑀣𑀁 𑀦𑀼 𑀔𑁄 𑀢𑀺𑀢𑁆𑀣𑀺𑀬𑀸𑀦’’𑀦𑁆𑀢𑀺 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀁 𑀆𑀯𑀚𑁆𑀚𑁂𑀲𑀺. 𑀅𑀣𑀲𑁆𑀲 𑀦𑁂𑀲𑀁 𑀲𑀩𑁆𑀩𑀣𑀸𑀧𑀺 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑁂𑀯 𑀉𑀧𑀝𑁆𑀞𑀸𑀲𑀺. 𑀲𑁄 ‘‘𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀦𑀸𑀫 𑀧𑀼𑀜𑁆𑀜𑀽𑀧𑀦𑀺𑀲𑁆𑀲𑀬𑀲𑁆𑀲 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀘 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁂 𑀪𑀕𑀯𑀢𑀺, 𑀅𑀭𑀺𑀬𑀲𑀗𑁆𑀖𑁂 𑀘 𑀥𑀭𑀦𑁆𑀢𑁂 𑀓𑀣𑀁 𑀇𑀫𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀏𑀯𑀁 𑀤𑀼𑀧𑁆𑀧𑀝𑀺𑀧𑀦𑁆𑀦𑀸 𑀅𑀓𑀢𑀧𑀼𑀜𑁆𑀜𑀸 𑀯𑀭𑀸𑀓𑀸 𑀮𑀸𑀪𑀺𑀦𑁄 𑀲𑀓𑁆𑀓𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀮𑀸𑀪𑀲𑀓𑁆𑀓𑀸𑀭𑀳𑀸𑀦𑀺𑀁 𑀦𑀺𑀲𑁆𑀲𑀸𑀬 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀣 𑀅𑀢𑁆𑀢𑀦𑁄 𑀧𑀭𑀺𑀯𑀺𑀢𑀓𑁆𑀓𑀁 ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀘 𑀢𑀁, ‘‘𑀆𑀦𑀦𑁆𑀤, 𑀢𑀬𑀸 𑀫𑀺𑀘𑁆𑀙𑀸 𑀧𑀭𑀺𑀯𑀺𑀢𑀓𑁆𑀓𑀺𑀢’’𑀦𑁆𑀢𑀺 𑀅𑀯𑀢𑁆𑀯𑀸 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑀁 𑀕𑀻𑀯𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀲𑀼𑀧𑀼𑀧𑁆𑀨𑀺𑀢𑀲𑀢𑀧𑀢𑁆𑀢𑀲𑀲𑁆𑀲𑀺𑀭𑀺𑀓𑀁 𑀫𑀳𑀸𑀫𑀼𑀔𑀁 𑀅𑀪𑀺𑀧𑁆𑀧𑀲𑀦𑁆𑀦𑀢𑀭𑀁 𑀓𑀢𑁆𑀯𑀸 ‘‘𑀏𑀯𑀫𑁂𑀢𑀁, 𑀆𑀦𑀦𑁆𑀤𑀸’’𑀢𑀺 𑀲𑀫𑁆𑀧𑀳𑀁𑀲𑀺𑀢𑁆𑀯𑀸 ‘‘𑀬𑀸𑀯𑀓𑀻𑀯𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀯𑀘𑀦𑀁 𑀧𑀘𑁆𑀘𑀦𑀼𑀫𑁄𑀤𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄…𑀧𑁂… 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘𑀸’’𑀢𑀺. 𑀅𑀣 𑀪𑀕𑀯𑀸 𑀢𑀲𑁆𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀅𑀢𑀻𑀢𑁂𑀧𑀺 𑀫𑀬𑀺 𑀅𑀦𑀼𑀧𑁆𑀧𑀦𑁆𑀦𑁂 𑀏𑀓𑀘𑁆𑀘𑁂 𑀦𑀻𑀘𑀚𑀦𑀸 𑀲𑀫𑁆𑀫𑀸𑀦𑀁 𑀮𑀪𑀺𑀢𑁆𑀯𑀸 𑀫𑀫 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀅𑀳𑁂𑀲𑀼𑀦𑁆𑀢𑀺 𑀩𑀸𑀯𑁂𑀭𑀼𑀚𑀸𑀢𑀓𑀁 (𑀚𑀸. 𑁧.𑁪.𑁧𑁫𑁩 𑀆𑀤𑀬𑁄) 𑀓𑀣𑁂𑀲𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀢𑀸𑀯 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀬𑀸𑀯 𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀧𑀦 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀢𑁂 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀦𑀺𑀧𑁆𑀧𑀪𑀸 𑀦𑀺𑀢𑁆𑀢𑁂𑀚𑀸𑀯 𑀳𑁄𑀦𑁆𑀢𑀺, 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀢𑁄 𑀘 𑀦 𑀫𑀼𑀘𑁆𑀘𑀦𑁆𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀑𑀪𑀸𑀲𑀢𑀺 𑀢𑀸𑀯 𑀲𑁄 𑀓𑀺𑀫𑀻𑀢𑀺 𑀲𑁄 𑀔𑀚𑁆𑀚𑀽𑀧𑀦𑀓𑀓𑀺𑀫𑀺 𑀢𑀸𑀯𑀤𑁂𑀯 𑀑𑀪𑀸𑀲𑀢𑀺 𑀚𑁄𑀢𑀢𑀺 𑀤𑀺𑀩𑁆𑀩𑀢𑀺. 𑀬𑀸𑀯 𑀦 𑀉𑀦𑁆𑀦𑀫𑀢𑁂 𑀧𑀪𑀗𑁆𑀓𑀭𑁄𑀢𑀺 𑀢𑀻𑀲𑀼𑀧𑀺 𑀫𑀳𑀸𑀤𑀻𑀧𑁂𑀲𑀼 𑀏𑀓𑀓𑁆𑀔𑀡𑁂 𑀆𑀮𑁄𑀓𑀓𑀭𑀡𑁂𑀦 ‘‘𑀧𑀪𑀗𑁆𑀓𑀭𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀲𑀽𑀭𑀺𑀬𑁄 𑀬𑀸𑀯 𑀦 𑀉𑀕𑁆𑀕𑀫𑀢𑀺 𑀦 𑀉𑀤𑁂𑀢𑀺. 𑀅𑀦𑀼𑀕𑁆𑀕𑀢𑁂 𑀳𑀺 𑀲𑀽𑀭𑀺𑀬𑁂 𑀮𑀤𑁆𑀥𑁄𑀓𑀸𑀲𑀸 𑀔𑀚𑁆𑀚𑀽𑀧𑀦𑀓𑀸 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀸𑀧𑀺 𑀓𑀡𑁆𑀝𑀓𑀨𑀮𑀲𑀤𑀺𑀲𑀸 𑀢𑀫𑀲𑀺 𑀯𑀺𑀚𑁆𑀚𑁄𑀢𑀦𑁆𑀢𑀺. 𑀲 𑀯𑁂𑀭𑁄𑀘𑀦𑀫𑁆𑀳𑀺 𑀉𑀕𑁆𑀕𑀢𑁂, 𑀳𑀢𑀧𑁆𑀧𑀪𑁄 𑀳𑁄𑀢𑀺 𑀦 𑀘𑀸𑀧𑀺 𑀪𑀸𑀲𑀢𑀻𑀢𑀺 𑀲𑀫𑀦𑁆𑀢𑀢𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀓𑀺𑀭𑀡𑀲𑀳𑀲𑁆𑀲𑁂𑀦 𑀯𑀺𑀭𑁄𑀘𑀦𑀲𑀪𑀸𑀯𑀢𑀸𑀬 𑀯𑁂𑀭𑁄𑀘𑀦𑀦𑀸𑀫𑀓𑁂 𑀆𑀤𑀺𑀘𑁆𑀘𑁂 𑀉𑀝𑁆𑀞𑀺𑀢𑁂 𑀲𑁄 𑀔𑀚𑁆𑀚𑀽𑀧𑀦𑀓𑁄 𑀳𑀢𑀧𑁆𑀧𑀪𑁄 𑀦𑀺𑀢𑁆𑀢𑁂𑀚𑁄 𑀓𑀸𑀴𑀓𑁄 𑀳𑁄𑀢𑀺, 𑀭𑀢𑁆𑀢𑀦𑁆𑀥𑀓𑀸𑀭𑁂 𑀯𑀺𑀬 𑀦 𑀪𑀸𑀲𑀢𑀺 𑀦 𑀤𑀺𑀩𑁆𑀩𑀢𑀺.

𑀏𑀯𑀁 𑀑𑀪𑀸𑀲𑀺𑀢𑀫𑁂𑀯 𑀢𑀓𑁆𑀓𑀺𑀓𑀸𑀦𑀦𑁆𑀢𑀺 𑀬𑀣𑀸 𑀢𑁂𑀦 𑀔𑀚𑁆𑀚𑀽𑀧𑀦𑀓𑁂𑀦 𑀲𑀽𑀭𑀺𑀬𑀼𑀕𑁆𑀕𑀫𑀦𑀢𑁄 𑀧𑀼𑀭𑁂𑀬𑁂𑀯 𑀑𑀪𑀸𑀲𑀺𑀢𑀁 𑀳𑁄𑀢𑀺, 𑀏𑀯𑀁 𑀢𑀓𑁆𑀓𑁂𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑁆𑀯𑀸 𑀧𑀭𑀺𑀓𑀧𑁆𑀧𑀦𑀫𑀢𑁆𑀢𑁂𑀦 𑀤𑀺𑀝𑁆𑀞𑀻𑀦𑀁 𑀕𑀳𑀡𑀢𑁄 ‘‘𑀢𑀓𑁆𑀓𑀺𑀓𑀸’’𑀢𑀺 𑀮𑀤𑁆𑀥𑀦𑀸𑀫𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀑𑀪𑀸𑀲𑀺𑀢𑀁 𑀅𑀢𑁆𑀢𑀦𑁄 𑀲𑀫𑀬𑀢𑁂𑀚𑁂𑀦 𑀤𑀻𑀧𑁂𑀢𑁆𑀯𑀸 𑀅𑀥𑀺𑀝𑁆𑀞𑀺𑀢𑀁 𑀢𑀸𑀯, 𑀬𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀦 𑀢𑀓𑁆𑀓𑀺𑀓𑀸 𑀲𑀼𑀚𑁆𑀛𑀦𑁆𑀢𑀺 𑀦 𑀘𑀸𑀧𑀺 𑀲𑀸𑀯𑀓𑀸𑀢𑀺 𑀬𑀤𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀤𑀺𑀝𑁆𑀞𑀺𑀕𑀢𑀺𑀓𑀸 𑀦 𑀲𑀼𑀚𑁆𑀛𑀦𑁆𑀢𑀺 𑀦 𑀲𑁄𑀪𑀦𑁆𑀢𑀺, 𑀦 𑀘𑀸𑀧𑀺 𑀢𑁂𑀲𑀁 𑀲𑀸𑀯𑀓𑀸 𑀲𑁄𑀪𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀯𑀺𑀳𑀢𑀲𑁄𑀪𑀸 𑀭𑀢𑁆𑀢𑀺𑀔𑀺𑀢𑁆𑀢𑀸 𑀯𑀺𑀬 𑀲𑀭𑀸 𑀦 𑀧𑀜𑁆𑀜𑀸𑀬𑀦𑁆𑀢𑁂𑀯. 𑀅𑀣 𑀯𑀸 𑀬𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯𑀤𑁂𑀯 𑀢𑀓𑁆𑀓𑀺𑀓𑀸𑀦𑀁 𑀑𑀪𑀸𑀲𑀺𑀢𑀁 𑀅𑀢𑁆𑀢𑀦𑁄 𑀲𑀫𑀬𑁂𑀦 𑀚𑁄𑀢𑀦𑀁 𑀩𑀸𑀮𑀮𑀸𑀧𑀦𑀁, 𑀦 𑀢𑀢𑁄 𑀧𑀭𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀦 𑀢𑀓𑁆𑀓𑀺𑀓𑀸 𑀲𑀼𑀚𑁆𑀛𑀦𑁆𑀢𑀺, 𑀦 𑀘𑀸𑀧𑀺 𑀲𑀸𑀯𑀓𑀸. 𑀢𑁂 𑀳𑀺 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑀯𑀺𑀦𑀬𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀭𑀳𑀺𑀢𑀸 𑀦 𑀲𑀁𑀲𑀸𑀭𑀢𑁄 𑀲𑀼𑀚𑁆𑀛𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀤𑀼𑀤𑁆𑀤𑀺𑀝𑁆𑀞𑀻 𑀦 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀭𑁂’’𑀢𑀺. 𑀢𑀓𑁆𑀓𑀺𑀓𑀸 𑀳𑀺 𑀅𑀬𑀸𑀣𑀸𑀯𑀮𑀤𑁆𑀥𑀺𑀓𑀢𑀸𑀬 𑀤𑀼𑀤𑁆𑀤𑀺𑀝𑁆𑀞𑀺𑀦𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑀤𑀺𑀝𑁆𑀞𑀺𑀓𑀸 𑀯𑀺𑀧𑀭𑀻𑀢𑀤𑀲𑁆𑀲𑀦𑀸 𑀢𑀁 𑀤𑀺𑀝𑁆𑀞𑀺𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀦 𑀓𑀤𑀸𑀘𑀺𑀧𑀺 𑀫𑀼𑀘𑁆𑀘𑀦𑁆𑀢𑀻𑀢𑀺.

𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀚𑀘𑁆𑀘𑀦𑁆𑀥𑀯𑀕𑁆𑀕𑀯𑀡𑁆𑀡𑀦𑀸.