𑁯. 𑀲𑀥𑀸𑀬𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀫𑀸𑀡𑀯𑀓𑀸𑀢𑀺 𑀢𑀭𑀼𑀡𑀸. 𑀧𑀞𑀫𑁂 𑀬𑁄𑀩𑁆𑀩𑀦𑁂 𑀞𑀺𑀢𑀸 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀓𑀸 𑀇𑀥𑀸𑀥𑀺𑀧𑁆𑀧𑁂𑀢𑀸.

𑀲𑀥𑀸𑀬𑀫𑀸𑀦𑀭𑀽𑀧𑀸𑀢𑀺 𑀉𑀧𑁆𑀧𑀡𑁆𑀟𑀦𑀚𑀸𑀢𑀺𑀓𑀁 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀁 𑀉𑀧𑁆𑀧𑀡𑁆𑀟𑁂𑀦𑁆𑀢𑀸 𑀲𑀥𑀦𑁆𑀢𑀺, 𑀢𑀤𑀢𑁆𑀣𑀯𑀘𑀦𑀲𑀻𑀮𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀲𑀥𑀦𑀁 𑀲𑀥𑁄, 𑀢𑀁 𑀆𑀘𑀺𑀓𑁆𑀔𑀦𑁆𑀢𑀻𑀢𑀺 𑀲𑀥𑀬𑀫𑀸𑀦𑀸𑀢𑀺 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀓𑀢𑁆𑀯𑀸 ‘‘𑀲𑀥𑀸𑀬𑀫𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀺𑀲𑁂𑀲𑀢𑁄 𑀲𑀲𑁂𑀥𑁂 𑀯𑀺𑀬 𑀅𑀢𑁆𑀢𑀸𑀦𑀁 𑀆𑀯𑀤𑀦𑁆𑀢𑀻𑀢𑀺 𑀲𑀥𑀸𑀬𑀫𑀸𑀦𑀸. 𑀢𑁂 𑀏𑀯𑀁 𑀲𑀪𑀸𑀯𑀢𑀸𑀬 ‘‘𑀲𑀥𑀸𑀬𑀫𑀸𑀦𑀭𑀽𑀧𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀤𑁆𑀤𑀸𑀬𑀫𑀸𑀦𑀭𑀽𑀧𑀸’’𑀢𑀺𑀧𑀺 𑀧𑀸𑀞𑁄, 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀪𑀕𑀯𑀢𑁄 𑀲𑀯𑀦𑀯𑀺𑀲𑀬𑁂 𑀢𑀁 𑀢𑀁 𑀫𑀼𑀔𑀸𑀭𑀼𑀴𑁆𑀳𑀁 𑀯𑀤𑀦𑁆𑀢𑀸 𑀅𑀢𑀺𑀬𑀦𑁆𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑁂𑀲𑀁 𑀯𑀸𑀘𑀸𑀬 𑀅𑀲𑀜𑁆𑀜𑀢𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀓𑀁 𑀥𑀫𑁆𑀫𑀲𑀁𑀯𑁂𑀕𑀯𑀲𑁂𑀦 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀧𑀭𑀺𑀫𑀼𑀝𑁆𑀞𑀸𑀢𑀺 𑀤𑀦𑁆𑀥𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑁄. 𑀧𑀡𑁆𑀟𑀺𑀢𑀸𑀪𑀸𑀲𑀸𑀢𑀺 𑀧𑀡𑁆𑀟𑀺𑀢𑀧𑀢𑀺𑀭𑀽𑀧𑀓𑀸 ‘‘𑀓𑁂 𑀅𑀜𑁆𑀜𑁂 𑀚𑀸𑀦𑀦𑁆𑀢𑀺, 𑀫𑀬𑀫𑁂𑀯𑁂𑀢𑁆𑀣 𑀚𑀸𑀦𑀸𑀫𑀸’’𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀅𑀢𑁆𑀢𑀸𑀦𑀫𑁂𑀯 𑀚𑀸𑀦𑀦𑁆𑀢𑀁 𑀓𑀢𑁆𑀯𑀸 𑀲𑀫𑀼𑀤𑀸𑀘𑀭𑀡𑀢𑁄. 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄𑀢𑀺 𑀬𑁂𑀲𑀁 𑀯𑀸𑀘𑀸 𑀏𑀯 𑀕𑁄𑀘𑀭𑁄 𑀯𑀺𑀲𑀬𑁄, 𑀢𑁂 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄, 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀲𑁆𑀲𑁂𑀯 𑀪𑀸𑀡𑀺𑀦𑁄 𑀅𑀢𑁆𑀣𑀲𑁆𑀲 𑀅𑀧𑀭𑀺𑀜𑁆𑀜𑀸𑀢𑀢𑁆𑀢𑀸. 𑀅𑀣 𑀯𑀸 𑀯𑀸𑀘𑀸𑀬 𑀅𑀕𑁄𑀘𑀭𑀁 𑀅𑀭𑀺𑀬𑀸𑀦𑀁 𑀓𑀣𑀸𑀬 𑀅𑀯𑀺𑀲𑀬𑀁 𑀫𑀼𑀲𑀸𑀯𑀸𑀤𑀁 𑀪𑀡𑀦𑁆𑀢𑀻𑀢𑀺 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄. 𑀅𑀣 𑀯𑀸 ‘‘𑀕𑁄𑀘𑀭𑀪𑀸𑀡𑀺𑀦𑁄’’𑀢𑀺 𑀏𑀢𑁆𑀣 𑀆𑀓𑀸𑀭𑀲𑁆𑀲 𑀭𑀲𑁆𑀲𑀪𑀸𑀯𑁄 𑀓𑀢𑁄. 𑀯𑀸𑀘𑀸𑀕𑁄𑀘𑀭𑀸, 𑀦 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀕𑁄𑀘𑀭𑀸 𑀪𑀸𑀡𑀺𑀦𑁄𑀯. 𑀓𑀣𑀁 𑀪𑀸𑀡𑀺𑀦𑁄? 𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁 𑀅𑀢𑁆𑀢𑀦𑁄 𑀬𑀸𑀯 𑀫𑀼𑀔𑀸𑀬𑀸𑀫𑀁 𑀬𑀸𑀯 𑀫𑀼𑀔𑀧𑁆𑀧𑀲𑀸𑀭𑀡𑀁 𑀇𑀘𑁆𑀙𑀦𑁆𑀢𑀺, 𑀢𑀸𑀯 𑀧𑀲𑀸𑀭𑁂𑀢𑁆𑀯𑀸 𑀪𑀸𑀡𑀺𑀦𑁄, 𑀧𑀭𑁂𑀲𑀼 𑀕𑀸𑀭𑀯𑁂𑀦, 𑀅𑀢𑁆𑀢𑀦𑁄 𑀅𑀯𑀺𑀲𑀬𑀢𑀸𑀬 𑀘 𑀫𑀼𑀔𑀲𑀗𑁆𑀓𑁄𑀘𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀸𑀘𑀸𑀕𑁄𑀘𑀭𑀸 𑀏𑀯 𑀳𑀼𑀢𑁆𑀯𑀸 𑀪𑀸𑀡𑀺𑀦𑁄, 𑀲𑀬𑀁 𑀅𑀚𑀸𑀦𑀺𑀢𑁆𑀯𑀸 𑀧𑀭𑀧𑀢𑁆𑀢𑀺𑀓𑀸 𑀏𑀯 𑀳𑀼𑀢𑁆𑀯𑀸 𑀯𑀢𑁆𑀢𑀸𑀭𑁄𑀢𑀺 𑀅𑀢𑁆𑀣𑁄. 𑀢𑀢𑁄 𑀏𑀯 𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁 𑀬𑁂𑀦 𑀯𑀘𑀦𑁂𑀦 𑀲𑀸𑀯𑁂𑀢𑀩𑁆𑀩𑀸, 𑀢𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀬𑀸𑀯𑀤𑁂𑀯 𑀅𑀢𑁆𑀢𑀦𑁄 𑀫𑀼𑀔𑀧𑁆𑀧𑀲𑀸𑀭𑀡𑀫𑀢𑁆𑀢𑀁 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀦 𑀦𑀻𑀢𑀸 𑀦 𑀢𑀁 𑀯𑀺𑀤𑀽𑀢𑀺 𑀬𑁂𑀦 𑀫𑀼𑀝𑁆𑀞𑀲𑁆𑀲𑀘𑁆𑀘𑀸𑀤𑀺𑀦𑀸 𑀦𑀺𑀮𑁆𑀮𑀚𑁆𑀚𑀪𑀸𑀯𑀁 𑀧𑀡𑁆𑀟𑀺𑀢𑀫𑀸𑀦𑀻𑀪𑀸𑀯𑀜𑁆𑀘 𑀦𑀻𑀢𑀸 ‘‘𑀫𑀬𑀫𑁂𑀯𑀁 𑀪𑀡𑀸𑀫𑀸’’𑀢𑀺, 𑀢𑀁 𑀢𑀣𑀸 𑀅𑀢𑁆𑀢𑀦𑁄 𑀪𑀡𑀦𑁆𑀢𑀲𑁆𑀲 𑀓𑀸𑀭𑀡𑀁 𑀦 𑀯𑀺𑀤𑀽, 𑀅𑀯𑀺𑀤𑁆𑀤𑀲𑀼𑀦𑁄 𑀅𑀲𑀽𑀭𑀸 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.