𑁧𑁦. 𑀘𑀽𑀴𑀧𑀦𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀘𑀽𑀴𑀧𑀦𑁆𑀣𑀓𑁄𑀢𑀺 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑀢𑁆𑀢𑀸 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 𑀘 𑀤𑀳𑀭𑀓𑀸𑀮𑁂 𑀮𑀤𑁆𑀥𑀯𑁄𑀳𑀸𑀭𑁂𑀦 𑀅𑀧𑀭𑀪𑀸𑀕𑁂𑀧𑀺 𑀅𑀬𑀫𑀸𑀬𑀲𑁆𑀫𑀸 ‘‘𑀘𑀽𑀴𑀧𑀦𑁆𑀣𑀓𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀕𑀼𑀡𑀯𑀺𑀲𑁂𑀲𑁂𑀳𑀺 𑀧𑀦 𑀙𑀴𑀪𑀺𑀜𑁆𑀜𑁄 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀦𑁄𑀫𑀬𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀦𑁆𑀢𑀸𑀦𑀁 𑀬𑀤𑀺𑀤𑀁 𑀘𑀽𑀴𑀧𑀦𑁆𑀣𑀓𑁄, 𑀘𑁂𑀢𑁄𑀯𑀺𑀯𑀝𑁆𑀝𑀓𑀼𑀲𑀮𑀸𑀦𑀁 𑀬𑀤𑀺𑀤𑀁 𑀘𑀽𑀴𑀧𑀦𑁆𑀣𑀓𑁄’’𑀢𑀺 𑀤𑁆𑀯𑀻𑀲𑀼 (𑀅. 𑀦𑀺. 𑁧.𑁧𑁯𑁯) 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄 𑀅𑀲𑀻𑀢𑀺𑀬𑀸 𑀫𑀳𑀸𑀲𑀸𑀯𑀓𑁂𑀲𑀼 𑀅𑀩𑁆𑀪𑀦𑁆𑀢𑀭𑁄.

𑀲𑁄 𑀏𑀓𑀤𑀺𑀯𑀲𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄 𑀲𑀫𑀸𑀧𑀢𑁆𑀢𑀻𑀳𑀺 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀉𑀧𑀸𑀲𑀓𑁂𑀲𑀼 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀅𑀦𑀸𑀕𑀢𑁂𑀲𑀼 𑀏𑀯 𑀯𑀺𑀳𑀸𑀭𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀢𑀺 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁂 ‘‘𑀅𑀓𑀸𑀮𑁄 𑀢𑀸𑀯 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺 𑀕𑀦𑁆𑀥𑀓𑀼𑀝𑀺𑀧𑀫𑀼𑀔𑁂 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺. 𑀲𑁄 𑀳𑀺 𑀢𑀤𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀘𑀽𑀴𑀧𑀦𑁆𑀣𑀓𑀲𑁆𑀲 𑀓𑀸𑀬𑀘𑀺𑀢𑁆𑀢𑀸𑀦𑀁 𑀲𑀫𑁆𑀫𑀸𑀧𑀡𑀺𑀳𑀺𑀢𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀚𑀸𑀦𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀅𑀜𑁆𑀜𑁄𑀧𑀺 𑀬𑁄 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑀸𑀳𑀺𑀢𑁄, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀧𑀸𑀤𑀸 𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀲𑁆𑀲 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀢𑀢𑁆𑀣 𑀧𑀸𑀢𑀼𑀪𑀸𑀯𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀞𑀺𑀢𑁂𑀦 𑀓𑀸𑀬𑁂𑀦𑀸𑀢𑀺 𑀓𑀸𑀬𑀤𑁆𑀯𑀸𑀭𑀺𑀓𑀲𑁆𑀲 𑀅𑀲𑀁𑀯𑀭𑀲𑁆𑀲 𑀧𑀳𑀸𑀦𑁂𑀦 𑀅𑀓𑀭𑀡𑁂𑀦 𑀲𑀫𑁆𑀫𑀸 𑀞𑀧𑀺𑀢𑁂𑀦 𑀘𑁄𑀧𑀦𑀓𑀸𑀬𑁂𑀦, 𑀢𑀣𑀸 𑀘𑀓𑁆𑀔𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀓𑀭𑀡𑁂𑀦 𑀲𑀼𑀝𑁆𑀞𑀼 𑀞𑀧𑀺𑀢𑁂𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀓𑀸𑀬𑁂𑀦, 𑀲𑀁𑀬𑀢𑀳𑀢𑁆𑀣𑀧𑀸𑀤𑀢𑀸𑀬 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀻𑀦𑀁 𑀅𑀪𑀸𑀯𑀢𑁄 𑀅𑀧𑀭𑀺𑀨𑀦𑁆𑀤𑀦𑁂𑀦 𑀞𑀺𑀢𑁂𑀦 𑀓𑀭𑀚𑀓𑀸𑀬𑁂𑀦 𑀘𑀸𑀢𑀺 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂𑀦𑀧𑀺 𑀓𑀸𑀬𑁂𑀦 𑀦𑀺𑀩𑁆𑀩𑀺𑀓𑀸𑀭𑀢𑀸𑀲𑀗𑁆𑀔𑀸𑀢𑁂𑀦 𑀦𑀺𑀘𑁆𑀘𑀮𑀪𑀸𑀯𑁂𑀦 𑀞𑀺𑀢𑁂𑀦. 𑀏𑀢𑁂𑀦𑀲𑁆𑀲 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘 𑀇𑀤𑀁 𑀓𑀭𑀡𑀯𑀘𑀦𑀁. 𑀞𑀺𑀢𑁂𑀦 𑀘𑁂𑀢𑀲𑀸𑀢𑀺 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀧𑀭𑀺𑀤𑀻𑀧𑀦𑁂𑀦 𑀲𑀫𑀸𑀥𑀺𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺. 𑀲𑀫𑀸𑀥𑀺 𑀳𑀺 𑀘𑀺𑀢𑁆𑀢𑀲𑁆𑀲 ‘𑀞𑀺𑀢𑀻’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀲𑀫𑀣𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀯𑀸 𑀏𑀓𑀕𑁆𑀕𑀢𑀸𑀬 𑀲𑀢𑀺 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀏𑀓𑁄𑀤𑀺𑀪𑀸𑀯𑀽𑀧𑀕𑀫𑀦𑁂𑀦 𑀞𑀺𑀢𑀁 𑀦𑀸𑀫 𑀳𑁄𑀢𑀺, 𑀦 𑀅𑀜𑁆𑀜𑀣𑀸. 𑀇𑀤𑀜𑁆𑀘 𑀬𑀣𑀸𑀯𑀼𑀢𑁆𑀢𑀓𑀸𑀬𑀘𑀺𑀢𑁆𑀢𑀸𑀦𑀁 𑀞𑀧𑀦𑀁 𑀲𑀫𑀸𑀤𑀳𑀦𑀁 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑁂𑀲𑀼 𑀘 𑀇𑀭𑀺𑀬𑀸𑀧𑀣𑁂𑀲𑀼 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀢𑀺𑀝𑁆𑀞𑀁 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀸𑀦𑁄’’𑀢𑀺. 𑀢𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀢𑁂𑀦 𑀢𑀺𑀝𑁆𑀞𑀦𑁆𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀲𑀬𑀸𑀦𑁄 𑀯𑀸 𑀢𑀤𑀜𑁆𑀜𑀺𑀭𑀺𑀬𑀸𑀧𑀣𑁄 𑀯𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀘𑀗𑁆𑀓𑀫𑀦𑀲𑁆𑀲𑀸𑀧𑀺 𑀇𑀥 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑀁 𑀲𑀢𑀺𑀁 𑀪𑀺𑀓𑁆𑀔𑀼 𑀅𑀥𑀺𑀝𑁆𑀞𑀳𑀸𑀦𑁄𑀢𑀺 𑀬𑀸𑀬 𑀧𑀕𑁂𑀯 𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁄 𑀓𑀸𑀬𑀘𑀺𑀢𑁆𑀢𑀤𑀼𑀝𑁆𑀞𑀼𑀮𑁆𑀮𑀪𑀸𑀯𑀽𑀧𑀲𑀫𑀦𑁂𑀦 𑀓𑀸𑀬𑀁 𑀘𑀺𑀢𑁆𑀢𑀜𑁆𑀘 𑀅𑀲𑀸𑀭𑀤𑁆𑀥𑀁 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑀸𑀬 𑀅𑀦𑀯𑀚𑁆𑀚𑀲𑀼𑀔𑀸𑀥𑀺𑀝𑁆𑀞𑀸𑀬 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘𑀺𑀢𑁆𑀢𑀁 𑀮𑀳𑀼𑀁 𑀫𑀼𑀤𑀼𑀁 𑀓𑀫𑁆𑀫𑀜𑁆𑀜𑀜𑁆𑀘 𑀓𑀢𑁆𑀯𑀸 𑀲𑀫𑁆𑀫𑀸 𑀞𑀧𑁂𑀦𑁆𑀢𑁄 𑀲𑀫𑀸𑀤𑀳𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀩𑁆𑀭𑀽𑀳𑁂𑀢𑀺 𑀫𑀢𑁆𑀣𑀓𑀜𑁆𑀘 𑀧𑀸𑀧𑁂𑀢𑀺, 𑀢𑀁 𑀏𑀯 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀩𑀳𑀽𑀧𑀓𑀸𑀭𑀁 𑀲𑀢𑀺𑀁 𑀪𑀺𑀓𑁆𑀔𑀼 𑀅𑀥𑀺𑀝𑁆𑀞𑀳𑀸𑀦𑁄 𑀲𑀻𑀮𑀯𑀺𑀲𑁄𑀥𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀯𑀺𑀲𑁂𑀲𑀸𑀥𑀺𑀕𑀫𑀸 𑀢𑀢𑁆𑀣 𑀢𑀢𑁆𑀣 𑀅𑀥𑀺𑀝𑁆𑀞𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀮𑀪𑁂𑀣 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀦𑁆𑀢𑀺 𑀲𑁄 𑀏𑀯𑀁 𑀲𑀢𑀺𑀆𑀭𑀓𑁆𑀔𑁂𑀦 𑀘𑁂𑀢𑀲𑀸 𑀓𑀫𑁆𑀫𑀝𑁆𑀞𑀸𑀦𑀁 𑀉𑀧𑀭𑀽𑀧𑀭𑀺 𑀯𑀟𑁆𑀠𑁂𑀦𑁆𑀢𑁄 𑀩𑁆𑀭𑀽𑀳𑁂𑀦𑁆𑀢𑁄 𑀨𑀸𑀢𑀺𑀁 𑀓𑀭𑁄𑀦𑁆𑀢𑁄 𑀧𑀼𑀩𑁆𑀩𑀸𑀧𑀭𑀺𑀬𑀁 𑀧𑀼𑀩𑁆𑀩𑀸𑀧𑀭𑀺𑀬𑀯𑀦𑁆𑀢𑀁 𑀧𑀼𑀩𑁆𑀩𑀸𑀧𑀭𑀪𑀸𑀕𑁂𑀦 𑀧𑀯𑀢𑁆𑀢𑀁 𑀉𑀴𑀸𑀭𑀼𑀴𑀸𑀭𑀢𑀭𑀸𑀤𑀺𑀪𑁂𑀤𑀯𑀺𑀲𑁂𑀲𑀁 𑀮𑀪𑁂𑀬𑁆𑀬.

𑀢𑀢𑁆𑀣 𑀤𑀼𑀯𑀺𑀥𑁄 𑀧𑀼𑀩𑁆𑀩𑀸𑀧𑀭𑀺𑀬𑀯𑀺𑀲𑁂𑀲𑁄 𑀲𑀫𑀣𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘𑀸𑀢𑀺. 𑀢𑁂𑀲𑀼 𑀲𑀫𑀣𑀯𑀲𑁂𑀦 𑀢𑀸𑀯 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀲𑀻𑀪𑀸𑀯𑁄, 𑀢𑀸𑀯 𑀧𑀯𑀢𑁆𑀢𑁄 𑀪𑀸𑀯𑀦𑀸𑀯𑀺𑀲𑁂𑀲𑁄 𑀧𑀼𑀩𑁆𑀩𑀸𑀧𑀭𑀺𑀬𑀯𑀺𑀲𑁂𑀲𑁄. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀦 𑀭𑀽𑀧𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀳𑀢𑁄, 𑀇𑀢𑀭𑀲𑁆𑀲 𑀦𑀸𑀫𑀥𑀫𑁆𑀫𑀧𑀭𑀺𑀕𑁆𑀕𑀳𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀸𑀥𑀺𑀕𑀫𑁄, 𑀢𑀸𑀯 𑀧𑀯𑀢𑁆𑀢𑁄 𑀪𑀸𑀯𑀦𑀸𑀯𑀺𑀲𑁂𑀲𑁄 𑀧𑀼𑀩𑁆𑀩𑀸𑀧𑀭𑀺𑀬𑀯𑀺𑀲𑁂𑀲𑁄. 𑀅𑀬𑀫𑁂𑀯 𑀘 𑀇𑀥𑀸𑀥𑀺𑀧𑁆𑀧𑁂𑀢𑁄.

𑀮𑀤𑁆𑀥𑀸𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀺𑀬𑀯𑀺𑀲𑁂𑀲𑀁 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀁 𑀅𑀭𑀳𑀢𑁆𑀢𑀁 𑀮𑀪𑀺𑀢𑁆𑀯𑀸. 𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂𑀢𑀺 𑀚𑀻𑀯𑀺𑀢𑀼𑀧𑀘𑁆𑀙𑁂𑀤𑀯𑀲𑁂𑀦 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀅𑀪𑀺𑀪𑀯𑀦𑀢𑁄 𑀫𑀘𑁆𑀘𑀼𑀭𑀸𑀚𑀲𑀗𑁆𑀔𑀸𑀢𑀲𑁆𑀲 𑀫𑀭𑀡𑀲𑁆𑀲 𑀯𑀺𑀲𑀬𑀪𑀽𑀢𑀁 𑀪𑀯𑀢𑁆𑀢𑀬𑀁 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀤𑀲𑁆𑀲𑀦𑀁 𑀅𑀕𑁄𑀘𑀭𑀁 𑀕𑀘𑁆𑀙𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀬𑀁 𑀅𑀯𑀼𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸.