𑁮. 𑀲𑀗𑁆𑀖𑀪𑁂𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀸𑀢𑀺 𑀅𑀪𑀺𑀫𑀸𑀭𑁂 𑀧𑀬𑁄𑀚𑁂𑀢𑁆𑀯𑀸 𑀦𑀸𑀴𑀸𑀕𑀺𑀭𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀺𑀮𑀁 𑀧𑀯𑀝𑁆𑀝𑁂𑀢𑁆𑀯𑀸 𑀪𑀕𑀯𑀢𑁄 𑀅𑀦𑀢𑁆𑀣𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀓𑁆𑀓𑀪𑁂𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀏𑀢𑀁 ‘‘𑀅𑀚𑁆𑀚𑀢𑀕𑁆𑀕𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀅𑀜𑁆𑀜𑀢𑁆𑀭𑁂𑀯 𑀪𑀕𑀯𑀢𑀸𑀢𑀺 𑀯𑀺𑀦𑀸 𑀏𑀯 𑀪𑀕𑀯𑀦𑁆𑀢𑀁, 𑀲𑀢𑁆𑀣𑀸𑀭𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀗𑁆𑀖𑀸𑀢𑀺 𑀯𑀺𑀦𑀸 𑀏𑀯 𑀪𑀺𑀓𑁆𑀔𑀼𑀲𑀗𑁆𑀖𑀁. 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀘𑀸𑀢𑀺 𑀪𑀕𑀯𑀢𑁄 𑀑𑀯𑀸𑀤𑀓𑀸𑀭𑀓𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀲𑀼𑀁 𑀓𑀢𑁆𑀯𑀸 𑀫𑀁 𑀅𑀦𑀼𑀯𑀢𑁆𑀢𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀯𑁂𑀡𑀺𑀓𑀁 𑀉𑀧𑁄𑀲𑀣𑀁 𑀲𑀗𑁆𑀖𑀓𑀫𑁆𑀫𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀪𑁂𑀤𑀓𑀭𑀸𑀦𑀁 𑀲𑀩𑁆𑀩𑁂𑀲𑀁 𑀤𑁂𑀯𑀤𑀢𑁆𑀢𑁂𑀦 𑀲𑀚𑁆𑀚𑀺𑀢𑀢𑁆𑀢𑀸 𑀏𑀓𑀁𑀲𑁂𑀦𑁂𑀯 𑀤𑁂𑀯𑀤𑀢𑁆𑀢𑁄 𑀅𑀚𑁆𑀚 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀺 𑀤𑁆𑀯𑀺𑀥𑀸 𑀓𑀭𑀺𑀲𑁆𑀲𑀢𑀺. ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 𑀳𑀺 𑀅𑀝𑁆𑀞𑀸𑀭𑀲𑀲𑀼 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀯𑀢𑁆𑀣𑀼𑀁 𑀤𑀻𑀧𑁂𑀢𑁆𑀯𑀸 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 ‘‘𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀯𑀺𑀲𑀼𑀁 𑀲𑀗𑁆𑀖𑀓𑀫𑁆𑀫𑁂 𑀓𑀢𑁂 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀜𑁆𑀘𑀳𑀺, 𑀉𑀧𑀸𑀮𑀺, 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑀓𑀫𑁆𑀫𑁂𑀦 𑀉𑀤𑁆𑀤𑁂𑀲𑁂𑀦 𑀯𑁄𑀳𑀭𑀦𑁆𑀢𑁄 𑀅𑀦𑀼𑀲𑁆𑀲𑀸𑀯𑀦𑁂𑀦 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮).

𑀢𑀢𑁆𑀣 𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂𑀦. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀜𑁆𑀘𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀤𑁆𑀤𑁂𑀲𑁂𑀦. 𑀯𑁄𑀳𑀭𑀦𑁆𑀢𑁄𑀢𑀺 𑀢𑀸𑀳𑀺 𑀢𑀸𑀳𑀺 𑀉𑀧𑁆𑀧𑀢𑁆𑀢𑀻𑀳𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 (𑀅. 𑀦𑀺. 𑁧𑁦.𑁩𑁭; 𑀘𑀽𑀴𑀯. 𑁩𑁫𑁨) 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑁄. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 ‘‘𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘, 𑀫𑀸𑀤𑀺𑀲𑁄 𑀦𑀸𑀫 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀕𑀸𑀳𑁂𑀬𑁆𑀬𑀸𑀢𑀺 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀬𑀼𑀢𑁆𑀢𑀁, 𑀓𑀺𑀫𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦.

𑀏𑀢𑁆𑀣 𑀘 𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀦 𑀧𑀼𑀩𑁆𑀩𑀪𑀸𑀕𑀸. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀳𑀺 𑀯𑁄𑀳𑀭𑀦𑁆𑀢𑁂𑀦 𑀢𑀢𑁆𑀣 𑀭𑀼𑀘𑀺𑀚𑀦𑀦𑀢𑁆𑀣𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀸𑀬 𑀕𑀸𑀳𑀺𑀢𑀸𑀬𑀧𑀺 𑀅𑀪𑀺𑀦𑁆𑀦𑁄𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦𑁂𑀯𑀁 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀁 𑀉𑀤𑁆𑀤𑁂𑀲𑀁 𑀯𑀸 𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀤𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀤𑁂𑀯𑀤𑀢𑁆𑀢𑁄 𑀘 𑀲𑀩𑁆𑀩𑀁 𑀲𑀗𑁆𑀖𑀪𑁂𑀤𑀲𑁆𑀲 𑀧𑀼𑀩𑁆𑀩𑀪𑀸𑀕𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 ‘‘𑀏𑀓𑀁𑀲𑁂𑀦𑁂𑀯 𑀅𑀚𑁆𑀚 𑀆𑀯𑁂𑀡𑀺𑀓𑀁 𑀉𑀧𑁄𑀲𑀣𑀁 𑀲𑀗𑁆𑀖𑀓𑀫𑁆𑀫𑀜𑁆𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀚𑁆𑀚𑀢𑀕𑁆𑀕𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑁂𑀦𑀸𑀳 𑁋 ‘‘𑀅𑀚𑁆𑀚, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺. 𑀬𑀢𑁄 𑀅𑀯𑁄𑀘𑀼𑀫𑁆𑀳𑀸 ‘‘𑀪𑁂𑀤𑀓𑀭𑀸𑀦𑀁 𑀲𑀩𑁆𑀩𑁂𑀲𑀁 𑀤𑁂𑀯𑀤𑀢𑁆𑀢𑁂𑀦 𑀲𑀚𑁆𑀚𑀺𑀢𑀢𑁆𑀢𑀸’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀼𑀧𑁆𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀁 𑀓𑀧𑁆𑀧𑀝𑁆𑀞𑀺𑀬𑀁 𑀅𑀢𑁂𑀓𑀺𑀘𑁆𑀙𑀁 𑀤𑁂𑀯𑀤𑀢𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀁 𑀲𑀗𑁆𑀖𑀪𑁂𑀤𑀓𑀫𑁆𑀫𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀬𑀣𑀸𑀓𑁆𑀓𑀫𑀁 𑀲𑀧𑁆𑀧𑀼𑀭𑀺𑀲𑀸𑀲𑀧𑁆𑀧𑀼𑀭𑀺𑀲𑀲𑀪𑀸𑀕𑀯𑀺𑀲𑀪𑀸𑀕𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀧𑀦 𑀲𑀼𑀓𑀼𑀲𑀮𑀸𑀢𑀺 𑀇𑀤𑀫𑀢𑁆𑀣𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀼𑀓𑀭𑀁 𑀲𑀸𑀥𑀼𑀦𑀸 𑀲𑀸𑀥𑀽𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀳𑀺𑀢𑀁 𑀲𑀸𑀥𑁂𑀢𑀻𑀢𑀺 𑀲𑀸𑀥𑀼, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄. 𑀢𑁂𑀦 𑀲𑀸𑀥𑀼𑀦𑀸 𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀦𑀸 𑀲𑀸𑀯𑀓𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀜𑁆𑀜𑁂𑀦 𑀯𑀸 𑀮𑁄𑀓𑀺𑀬𑀲𑀸𑀥𑀼𑀦𑀸 𑀲𑀸𑀥𑀼 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀳𑀺𑀢𑀲𑀼𑀔𑀸𑀯𑀳𑀁 𑀲𑀼𑀓𑀭𑀁 𑀲𑀼𑀔𑁂𑀦 𑀓𑀸𑀢𑀼𑀁 𑀲𑀓𑁆𑀓𑀸. 𑀲𑀸𑀥𑀼 𑀧𑀸𑀧𑁂𑀦 𑀤𑀼𑀓𑁆𑀓𑀭𑀦𑁆𑀢𑀺 𑀢𑀤𑁂𑀯 𑀧𑀦 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀸𑀥𑀼 𑀧𑀸𑀧𑁂𑀦 𑀤𑁂𑀯𑀤𑀢𑁆𑀢𑀸𑀤𑀺𑀦𑀸 𑀧𑀸𑀧𑀧𑀼𑀕𑁆𑀕𑀮𑁂𑀦 𑀤𑀼𑀓𑁆𑀓𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀦 𑀲𑁄 𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭𑀦𑁆𑀢𑀺 𑀧𑀸𑀧𑀁 𑀅𑀲𑀼𑀦𑁆𑀤𑀭𑀁 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀦𑀢𑁆𑀣𑀸𑀯𑀳𑀁 𑀧𑀸𑀧𑁂𑀦 𑀬𑀣𑀸𑀯𑀼𑀢𑁆𑀢𑀧𑀸𑀧𑀧𑀼𑀕𑁆𑀕𑀮𑁂𑀦 𑀲𑀼𑀓𑀭𑀁 𑀲𑀼𑀔𑁂𑀦 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀧𑀸𑀧𑀫𑀭𑀺𑀬𑁂𑀳𑀺 𑀤𑀼𑀓𑁆𑀓𑀭𑀦𑁆𑀢𑀺 𑀅𑀭𑀺𑀬𑁂𑀳𑀺 𑀧𑀦 𑀩𑀼𑀤𑁆𑀥𑀸𑀤𑀻𑀳𑀺 𑀢𑀁 𑀢𑀁 𑀧𑀸𑀧𑀁 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀁. 𑀲𑁂𑀢𑀼𑀖𑀸𑀢𑁄𑀬𑁂𑀯 𑀳𑀺 𑀢𑁂𑀲𑀦𑁆𑀢𑀺 𑀲𑀢𑁆𑀣𑀸 𑀤𑀻𑀧𑁂𑀢𑀺.

𑀅𑀝𑁆𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.