𑁭. 𑀓𑀗𑁆𑀔𑀸𑀭𑁂𑀯𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀓𑀗𑁆𑀔𑀸𑀭𑁂𑀯𑀢𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀲𑁄 𑀳𑀺 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀯𑀺𑀳𑀭𑀢𑀺, ‘‘𑀅𑀓𑀧𑁆𑀧𑀺𑀬𑀸 𑀫𑀼𑀕𑁆𑀕𑀸, 𑀦 𑀓𑀧𑁆𑀧𑀦𑁆𑀢𑀺 𑀫𑀼𑀕𑁆𑀕𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀅𑀓𑀧𑁆𑀧𑀺𑀬𑁄 𑀕𑀼𑀴𑁄’’𑀢𑀺 (𑀫𑀳𑀸𑀯. 𑁨𑁭𑁨) 𑀘 𑀆𑀤𑀺𑀦𑀸 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀲𑀗𑁆𑀔𑀸𑀢𑀓𑀗𑁆𑀔𑀸𑀩𑀳𑀼𑀮𑁄 𑀧𑀦 𑀳𑁄𑀢𑀺. 𑀢𑁂𑀦 𑀓𑀗𑁆𑀔𑀸𑀭𑁂𑀯𑀢𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀅𑀢𑁆𑀢𑀦𑀸 𑀅𑀥𑀺𑀕𑀢𑀁 𑀅𑀭𑀺𑀬𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀢𑀦𑁄 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄’’𑀢𑀺. 𑀫𑀕𑁆𑀕𑀧𑀜𑁆𑀜𑀸 𑀳𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑀸𑀬 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀲𑁄𑀴𑀲𑀯𑀢𑁆𑀣𑀼𑀓𑀸𑀬, ‘‘𑀩𑀼𑀤𑁆𑀥𑁂 𑀓𑀗𑁆𑀔𑀢𑀺…𑀧𑁂… 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀢𑀻’’𑀢𑀺 (𑀥. 𑀲. 𑁧𑁦𑁦𑁮) 𑀏𑀯𑀁 𑀯𑀼𑀢𑁆𑀢𑀸𑀬 𑀅𑀝𑁆𑀞𑀯𑀢𑁆𑀣𑀼𑀓𑀸𑀬, 𑀧𑀕𑁂𑀯 𑀇𑀢𑀭𑀸𑀲𑀦𑁆𑀢𑀺 𑀅𑀦𑀯𑀲𑁂𑀲𑀢𑁄 𑀲𑀩𑁆𑀩𑀓𑀗𑁆𑀔𑀸𑀦𑀁 𑀯𑀺𑀢𑀭𑀡𑀢𑁄 𑀲𑀫𑀢𑀺𑀓𑁆𑀓𑀫𑀦𑀢𑁄, 𑀅𑀜𑁆𑀜𑁂𑀳𑀺 𑀘 𑀅𑀢𑁆𑀢𑀦𑀸 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑁂𑀳𑀺 𑀅𑀘𑁆𑀘𑀦𑁆𑀢𑀯𑀺𑀲𑀼𑀚𑁆𑀛𑀦𑀢𑁄 ‘‘𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀻’’𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀜𑁆𑀳𑀺 𑀅𑀬𑀫𑀸𑀬𑀲𑁆𑀫𑀸 𑀤𑀻𑀖𑀭𑀢𑁆𑀢𑀁 𑀓𑀗𑁆𑀔𑀸𑀧𑀓𑀢𑀢𑁆𑀢𑀸 ‘‘𑀇𑀫𑀁 𑀫𑀕𑁆𑀕𑀥𑀫𑁆𑀫𑀁 𑀅𑀥𑀺𑀕𑀫𑁆𑀫 𑀇𑀫𑀸 𑀫𑁂 𑀓𑀗𑁆𑀔𑀸 𑀅𑀦𑀯𑀲𑁂𑀲𑀸 𑀧𑀳𑀻𑀦𑀸’’𑀢𑀺 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀦𑀺𑀲𑀻𑀤𑀺, 𑀦 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀁 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑁆𑀢𑀸 𑀢𑀲𑁆𑀲 𑀓𑀗𑁆𑀔𑀸𑀯𑀺𑀢𑀭𑀡𑀲𑁆𑀲.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑀯𑀲𑁂𑀲𑀓𑀗𑁆𑀔𑀸𑀯𑀺𑀢𑀭𑀡𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀸 𑀓𑀸𑀘𑀺 𑀓𑀗𑁆𑀔𑀸 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀇𑀥 𑀇𑀫𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀢𑀪𑀸𑀯𑁂 ‘‘𑀅𑀳𑀁 𑀦𑀼 𑀔𑁄𑀲𑁆𑀫𑀺 𑀦𑁄 𑀦𑀼 𑀔𑁄𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀳𑀼𑀭𑀁 𑀯𑀸, 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀉𑀧𑁆𑀧𑀚𑁆𑀚𑀦𑀓𑀸 𑀓𑀗𑁆𑀔𑀸. 𑀲𑀓𑀯𑁂𑀤𑀺𑀬𑀸 𑀯𑀸 𑀧𑀭𑀯𑁂𑀤𑀺𑀬𑀸 𑀯𑀸𑀢𑀺 𑀢𑀸 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑀅𑀢𑁆𑀢𑀪𑀸𑀯𑁂 𑀆𑀭𑀫𑁆𑀫𑀡𑀯𑀲𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀸𑀬 𑀧𑀯𑀢𑁆𑀢𑀺𑀬𑀸 𑀲𑀓𑀯𑁂𑀤𑀺𑀬𑀸 𑀯𑀸 𑀧𑀭𑀲𑁆𑀲 𑀅𑀢𑁆𑀢𑀪𑀸𑀯𑁂 𑀧𑀝𑀺𑀮𑀪𑀺𑀢𑀩𑁆𑀩𑀸𑀬 ‘‘𑀩𑀼𑀤𑁆𑀥𑁄 𑀦𑀼 𑀔𑁄, 𑀦𑁄 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀯𑀸 𑀧𑀭𑀲𑁆𑀫𑀺𑀁 𑀧𑀥𑀸𑀦𑁂 𑀉𑀢𑁆𑀢𑀫𑁂 𑀧𑀝𑀺𑀮𑀪𑀺𑀢𑀩𑁆𑀩𑀸𑀬 𑀧𑀯𑀢𑁆𑀢𑀺𑀬𑀸 𑀧𑀭𑀯𑁂𑀤𑀺𑀬𑀸 𑀯𑀸 𑀬𑀸 𑀓𑀸𑀘𑀺 𑀓𑀗𑁆𑀔𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀬𑁂 𑀛𑀸𑀬𑀺𑀦𑁄 𑀢𑀸 𑀧𑀚𑀳𑀦𑁆𑀢𑀺 𑀲𑀩𑁆𑀩𑀸, 𑀆𑀢𑀸𑀧𑀺𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀢𑀺 𑀬𑁂 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀛𑀸𑀬𑀺𑀦𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀧𑀸𑀭𑀺𑀧𑀽𑀭𑀺𑀬𑀸 𑀆𑀢𑀸𑀧𑀺𑀦𑁄 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸 𑀅𑀥𑀺𑀕𑀘𑁆𑀙𑀦𑁆𑀢𑀸 𑀲𑀤𑁆𑀥𑀸𑀦𑀼𑀲𑀸𑀭𑀻𑀆𑀤𑀺𑀧𑁆𑀧𑀪𑁂𑀤𑀸 𑀧𑀞𑀫𑀫𑀕𑁆𑀕𑀝𑁆𑀞𑀸 𑀧𑀼𑀕𑁆𑀕𑀮𑀸, 𑀢𑀸 𑀲𑀩𑁆𑀩𑀸 𑀓𑀗𑁆𑀔𑀸 𑀧𑀚𑀳𑀦𑁆𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺 𑀫𑀕𑁆𑀕𑀓𑁆𑀔𑀡𑁂. 𑀢𑀢𑁄 𑀧𑀭𑀁 𑀧𑀦 𑀢𑀸 𑀧𑀳𑀻𑀦𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀇𑀢𑁄 𑀅𑀜𑁆𑀜𑀁 𑀢𑀸𑀲𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀪𑀕𑀯𑀸 𑀛𑀸𑀦𑀫𑀼𑀔𑁂𑀦 𑀆𑀬𑀲𑁆𑀫𑀢𑁄 𑀓𑀗𑁆𑀔𑀸𑀭𑁂𑀯𑀢𑀲𑁆𑀲 𑀛𑀸𑀦𑀲𑀻𑀲𑁂𑀦 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀁 𑀣𑁄𑀫𑁂𑀦𑁆𑀢𑁄 𑀣𑁄𑀫𑀦𑀸𑀯𑀲𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑁂𑀦𑁂𑀯 𑀘 𑀦𑀁 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀛𑀸𑀬𑀻𑀦𑀁 𑀬𑀤𑀺𑀤𑀁 𑀓𑀗𑁆𑀔𑀸𑀭𑁂𑀯𑀢𑁄’’𑀢𑀺 (𑀅. 𑀦𑀺. 𑁧.𑁨𑁦𑁪) 𑀛𑀸𑀬𑀻𑀪𑀸𑀯𑁂𑀦 𑀏𑀢𑀤𑀕𑁆𑀕𑁂 𑀞𑀧𑁂𑀲𑀻𑀢𑀺.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.