𑁬. 𑀲𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀙𑀝𑁆𑀞𑁂 𑀅𑀯𑀦𑁆𑀢𑀻𑀲𑀽𑀢𑀺 𑀅𑀯𑀦𑁆𑀢𑀺𑀭𑀝𑁆𑀞𑁂. 𑀓𑀼𑀭𑀭𑀖𑀭𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀧𑀯𑀢𑁆𑀢𑁂 𑀧𑀩𑁆𑀩𑀢𑁂𑀢𑀺 𑀧𑀯𑀢𑁆𑀢𑀦𑀸𑀫𑀓𑁂 𑀧𑀩𑁆𑀩𑀢𑁂. ‘‘𑀧𑀧𑀸𑀢𑁂 𑀧𑀩𑁆𑀩𑀢𑁂’’𑀢𑀺𑀧𑀺 𑀧𑀞𑀦𑁆𑀢𑀺. 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄𑀢𑀺 𑀦𑀸𑀫𑁂𑀦 𑀲𑁄𑀡𑁄 𑀦𑀸𑀫, 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀸𑀲𑀓𑀪𑀸𑀯𑀧𑁆𑀧𑀝𑀺𑀯𑁂𑀤𑀦𑁂𑀦 𑀉𑀧𑀸𑀲𑀓𑁄, 𑀓𑁄𑀝𑀺𑀅𑀕𑁆𑀖𑀦𑀓𑀲𑁆𑀲 𑀓𑀡𑁆𑀡𑀧𑀺𑀴𑀦𑁆𑀥𑀦𑀲𑁆𑀲 𑀥𑀸𑀭𑀡𑁂𑀦 ‘‘𑀓𑁄𑀝𑀺𑀓𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑀼𑀝𑀺𑀓𑀡𑁆𑀡𑁄’’𑀢𑀺 𑀏𑀯𑀁 𑀅𑀪𑀺𑀜𑁆𑀜𑀸𑀢𑁄, 𑀦 𑀲𑀼𑀔𑀼𑀫𑀸𑀮𑀲𑁄𑀡𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀜𑁆𑀳𑀺 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑁄 𑀧𑀯𑀢𑁆𑀢𑁂 𑀧𑀩𑁆𑀩𑀢𑁂 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀣𑁂𑀭𑀁 𑀢𑀢𑁆𑀣 𑀯𑀲𑀸𑀧𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻’’𑀢𑀺.

𑀲𑁄 𑀓𑀸𑀮𑁂𑀦 𑀓𑀸𑀮𑀁 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀣𑁂𑀭𑁄 𑀘𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑁂𑀦 𑀲𑀁𑀯𑁂𑀕𑀩𑀳𑀼𑀮𑁄 𑀥𑀫𑁆𑀫𑀘𑀭𑀺𑀬𑀸𑀬 𑀉𑀲𑁆𑀲𑀸𑀳𑀚𑀸𑀢𑁄 𑀯𑀺𑀳𑀭𑀢𑀺. 𑀲𑁄 𑀏𑀓𑀤𑀸 𑀲𑀢𑁆𑀣𑁂𑀦 𑀲𑀤𑁆𑀥𑀺𑀁 𑀯𑀸𑀡𑀺𑀚𑁆𑀚𑀢𑁆𑀣𑀸𑀬 𑀉𑀚𑁆𑀚𑁂𑀦𑀺𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀝𑀯𑀺𑀬𑀁 𑀲𑀢𑁆𑀣𑁂 𑀦𑀺𑀯𑀺𑀝𑁆𑀞𑁂 𑀭𑀢𑁆𑀢𑀺𑀬𑀁 𑀚𑀦𑀲𑀫𑁆𑀩𑀸𑀥𑀪𑀬𑁂𑀦 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀦𑀺𑀤𑁆𑀤𑀁 𑀉𑀧𑀕𑀜𑁆𑀙𑀺. 𑀲𑀢𑁆𑀣𑁄 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀉𑀝𑁆𑀞𑀸𑀬 𑀕𑀢𑁄, 𑀦 𑀏𑀓𑁄𑀧𑀺 𑀲𑁄𑀡𑀁 𑀧𑀩𑁄𑀥𑁂𑀲𑀺, 𑀲𑀩𑁆𑀩𑁂𑀧𑀺 𑀯𑀺𑀲𑀭𑀺𑀢𑁆𑀯𑀸 𑀅𑀕𑀫𑀁𑀲𑀼. 𑀲𑁄 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀩𑀼𑀚𑁆𑀛𑀺𑀢𑁆𑀯𑀸 𑀉𑀝𑁆𑀞𑀸𑀬 𑀓𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑁄 𑀲𑀢𑁆𑀣𑁂𑀦𑁂𑀯 𑀕𑀢𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀯𑀝𑀭𑀼𑀓𑁆𑀔𑀁 𑀉𑀧𑀕𑀜𑁆𑀙𑀺. 𑀢𑀢𑁆𑀣 𑀅𑀤𑁆𑀤𑀲 𑀏𑀓𑀁 𑀫𑀳𑀸𑀓𑀸𑀬𑀁 𑀯𑀺𑀭𑀽𑀧𑀤𑀲𑁆𑀲𑀦𑀁 𑀕𑀘𑁆𑀙𑀦𑁆𑀢𑀁 𑀧𑀼𑀭𑀺𑀲𑀁 𑀅𑀝𑁆𑀞𑀺𑀢𑁄 𑀫𑀼𑀢𑁆𑀢𑀸𑀦𑀺 𑀅𑀢𑁆𑀢𑀦𑁄 𑀫𑀁𑀲𑀸𑀦𑀺 𑀲𑀬𑀫𑁂𑀯 𑀔𑀸𑀤𑀦𑁆𑀢𑀁, 𑀤𑀺𑀲𑁆𑀯𑀸𑀦 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀧𑁂𑀢𑁄𑀫𑁆𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀻’’𑀢𑀺. ‘‘𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑁂𑀦𑀸’’𑀢𑀺. ‘‘𑀓𑀺𑀁 𑀧𑀦 𑀢𑀁 𑀓𑀫𑁆𑀫’’𑀦𑁆𑀢𑀺. ‘‘𑀅𑀳𑀁 𑀧𑀼𑀩𑁆𑀩𑁂 𑀪𑀸𑀭𑀼𑀓𑀘𑁆𑀙𑀦𑀕𑀭𑀯𑀸𑀲𑀻 𑀓𑀽𑀝𑀯𑀸𑀡𑀺𑀚𑁄 𑀳𑀼𑀢𑁆𑀯𑀸 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀯𑀜𑁆𑀘𑁂𑀢𑁆𑀯𑀸 𑀔𑀸𑀤𑀺𑀁, 𑀲𑀫𑀡𑁂 𑀘 𑀪𑀺𑀓𑁆𑀔𑀸𑀬 𑀉𑀧𑀕𑀢𑁂 ‘𑀢𑀼𑀫𑁆𑀳𑀸𑀓𑀁 𑀫𑀁𑀲𑀁 𑀔𑀸𑀤𑀣𑀸’𑀢𑀺 𑀅𑀓𑁆𑀓𑁄𑀲𑀺𑀁, 𑀢𑁂𑀦 𑀓𑀫𑁆𑀫𑁂𑀦 𑀏𑀢𑀭𑀳𑀺 𑀇𑀫𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁄𑀡𑁄 𑀅𑀢𑀺𑀯𑀺𑀬 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺.

𑀢𑀢𑁄 𑀧𑀭𑀁 𑀕𑀘𑁆𑀙𑀦𑁆𑀢𑁄 𑀫𑀼𑀔𑀢𑁄 𑀧𑀕𑁆𑀖𑀭𑀺𑀢𑀓𑀸𑀴𑀮𑁄𑀳𑀺𑀢𑁂 𑀤𑁆𑀯𑁂 𑀧𑁂𑀢𑀤𑀸𑀭𑀓𑁂 𑀧𑀲𑁆𑀲𑀺𑀢𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺. 𑀢𑁂𑀧𑀺𑀲𑁆𑀲 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀣𑁂𑀲𑀼𑀁. 𑀢𑁂 𑀓𑀺𑀭 𑀪𑀸𑀭𑀼𑀓𑀘𑁆𑀙𑀦𑀕𑀭𑁂 𑀤𑀸𑀭𑀓𑀓𑀸𑀮𑁂 𑀕𑀦𑁆𑀥𑀯𑀸𑀡𑀺𑀚𑁆𑀚𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸 𑀅𑀢𑁆𑀢𑀦𑁄 𑀫𑀸𑀢𑀭𑀺 𑀔𑀻𑀡𑀸𑀲𑀯𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺𑀬𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀓𑀲𑁆𑀫𑀸 𑀲𑀫𑀡𑀸𑀦𑀁 𑀤𑁂𑀲𑀺, 𑀢𑀬𑀸 𑀤𑀺𑀦𑁆𑀦𑀁 𑀪𑁄𑀚𑀦𑀁 𑀪𑀼𑀜𑁆𑀚𑀦𑀓𑀲𑀫𑀡𑀸𑀦𑀁 𑀫𑀼𑀔𑀢𑁄 𑀓𑀸𑀴𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀽’’𑀢𑀺 𑀅𑀓𑁆𑀓𑁄𑀲𑀺𑀁𑀲𑀼. 𑀢𑁂 𑀢𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀤𑀸 𑀇𑀫𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀲𑁄𑀡𑁄 𑀅𑀢𑀺𑀯𑀺𑀬 𑀲𑀁𑀯𑁂𑀕𑀚𑀸𑀢𑁄 𑀅𑀳𑁄𑀲𑀺.

𑀲𑁄 𑀉𑀚𑁆𑀚𑁂𑀦𑀺𑀁 𑀕𑀦𑁆𑀢𑁆𑀯𑀸 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀓𑀼𑀮𑀖𑀭𑀁 𑀧𑀘𑁆𑀘𑀸𑀕𑀢𑁄 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀣𑁂𑀭𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀣𑁂𑀭𑁄𑀧𑀺𑀲𑁆𑀲 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀯𑀺𑀪𑀸𑀯𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀕𑀢𑁄 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀦𑀁 𑀉𑀧𑀕𑀢𑁄 𑀣𑁄𑀓𑀁𑀬𑁂𑀯 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀬𑀦𑀢𑀮𑁂 𑀦𑀺𑀲𑀚𑁆𑀚 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀼𑀁 𑀆𑀭𑀤𑁆𑀥𑁄. 𑀢𑀲𑁆𑀲 𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑁄, 𑀢𑁂 𑀘 𑀧𑁂𑀢𑀢𑁆𑀢𑀪𑀸𑀯𑁂 𑀅𑀦𑀼𑀲𑁆𑀲𑀭𑀢𑁄 𑀲𑀁𑀲𑀸𑀭𑀤𑀼𑀓𑁆𑀔𑀁 𑀅𑀢𑀺𑀯𑀺𑀬 𑀪𑀬𑀸𑀦𑀓𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺, 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀺. 𑀲𑁄 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀆𑀭𑁄𑀘𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑁄𑀡𑀲𑁆𑀲 𑀉𑀧𑀸𑀲𑀓𑀲𑁆𑀲 𑀓𑀼𑀝𑀺𑀓𑀡𑁆𑀡𑀲𑁆𑀲 𑀭𑀳𑁄𑀕𑀢𑀲𑁆𑀲…𑀧𑁂… 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺.

𑀢𑀢𑁆𑀣 𑀬𑀣𑀸 𑀬𑀣𑀸𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀘𑀺𑀓𑁆𑀔𑀢𑀺 𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺 𑀧𑀓𑀸𑀲𑁂𑀢𑀺, 𑀢𑁂𑀦 𑀢𑁂𑀦 𑀫𑁂 𑀉𑀧𑀧𑀭𑀺𑀓𑁆𑀔𑀢𑁄 𑀏𑀯𑀁 𑀳𑁄𑀢𑀺, 𑀬𑀤𑁂𑀢𑀁 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀅𑀓𑁆𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁. 𑀏𑀓𑀤𑀺𑀯𑀲𑀫𑁆𑀧𑀺 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀺𑀦𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁. 𑀲𑀗𑁆𑀔𑀮𑀺𑀔𑀺𑀢𑀦𑁆𑀢𑀺 𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲𑀁 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀁 𑀘𑀭𑀺𑀢𑀩𑁆𑀩𑀁. 𑀇𑀤𑀁 𑀦 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀏𑀓𑀦𑁆𑀢 𑀧𑀭𑀺𑀧𑀼𑀡𑁆𑀡𑀁…𑀧𑁂… 𑀘𑀭𑀺𑀢𑀼𑀁 𑀬𑀁𑀦𑀽𑀦𑀸𑀳𑀁 𑀓𑁂𑀲𑁂 𑀘𑁂𑀯 𑀫𑀲𑁆𑀲𑀽𑀦𑀺 𑀘 𑀑𑀳𑀸𑀭𑁂𑀢𑁆𑀯𑀸 𑀯𑁄𑀭𑁄𑀧𑁂𑀢𑁆𑀯𑀸 𑀓𑀸𑀲𑀸𑀬𑀭𑀲𑀧𑀻𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬𑀁. 𑀬𑀲𑁆𑀫𑀸 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀅𑀕𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀧𑀩𑁆𑀩𑀚𑁆𑀚𑀸𑀬 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 𑀅𑀦𑀕𑀸𑀭𑀺𑀬𑀸 𑀦𑀸𑀫. 𑀢𑀁 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑁂𑀬𑁆𑀬𑀁 𑀉𑀧𑀕𑀘𑁆𑀙𑁂𑀬𑁆𑀬𑀁, 𑀧𑀝𑀺𑀧𑀚𑁆𑀚𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀅𑀢𑁆𑀢𑀦𑀸 𑀭𑀳𑁄𑀯𑀺𑀢𑀓𑁆𑀓𑀺𑀢𑀁 𑀲𑁄𑀡𑁄 𑀉𑀧𑀸𑀲𑀓𑁄 𑀣𑁂𑀭𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑁄 ‘‘𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺 𑀆𑀳. 𑀣𑁂𑀭𑁄 𑀧𑀦 ‘‘𑀢𑀸𑀯𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀓𑀣’’𑀦𑁆𑀢𑀺 𑀉𑀧𑀥𑀸𑀭𑁂𑀢𑁆𑀯𑀸 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 ‘‘𑀤𑀼𑀓𑁆𑀓𑀭𑀁 𑀔𑁄’’𑀢𑀺𑀆𑀤𑀺𑀦𑀸 𑀧𑀩𑁆𑀩𑀚𑁆𑀚𑀸𑀙𑀦𑁆𑀤𑀁 𑀦𑀺𑀯𑀸𑀭𑁂𑀲𑀺.

𑀢𑀢𑁆𑀣 𑀏𑀓𑀪𑀢𑁆𑀢𑀦𑁆𑀢𑀺 ‘‘𑀏𑀓𑀪𑀢𑁆𑀢𑀺𑀓𑁄 𑀳𑁄𑀢𑀺 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁯𑁪; 𑀅. 𑀦𑀺. 𑁩.𑁭𑁧) 𑀏𑀯𑀁 𑀯𑀼𑀢𑁆𑀢𑀁 𑀯𑀺𑀓𑀸𑀮𑀪𑁄𑀚𑀦𑀯𑀺𑀭𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀏𑀓𑀲𑁂𑀬𑁆𑀬𑀦𑁆𑀢𑀺 𑀅𑀤𑀼𑀢𑀺𑀬𑀲𑁂𑀬𑁆𑀬𑀁. 𑀏𑀢𑁆𑀣 𑀘 𑀲𑁂𑀬𑁆𑀬𑀸𑀲𑀻𑀲𑁂𑀦 ‘‘𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁭; 𑁪𑁯) 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀓𑀸𑀬𑀯𑀺𑀯𑁂𑀓𑀁 𑀤𑀻𑀧𑁂𑀢𑀺, 𑀦 𑀏𑀓𑀸𑀓𑀺𑀦𑀸 𑀳𑀼𑀢𑁆𑀯𑀸 𑀲𑀬𑀦𑀫𑀢𑁆𑀢𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀲𑀺𑀓𑁆𑀔𑀢𑁆𑀢𑀬𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀸. 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀢𑁆𑀣𑁂𑀯𑀸𑀢𑀺 𑀕𑁂𑀳𑁂𑀬𑁂𑀯. 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀅𑀦𑀼𑀬𑀼𑀜𑁆𑀚𑀸𑀢𑀺 𑀦𑀺𑀘𑁆𑀘𑀲𑀻𑀮𑀉𑀧𑁄𑀲𑀣𑀲𑀻𑀮𑀸𑀤𑀺𑀪𑁂𑀤𑀁 𑀧𑀜𑁆𑀘𑀗𑁆𑀕𑀅𑀝𑁆𑀞𑀗𑁆𑀕𑀤𑀲𑀗𑁆𑀕𑀲𑀻𑀮𑀁, 𑀢𑀤𑀦𑀼𑀭𑀽𑀧𑀜𑁆𑀘 𑀲𑀫𑀸𑀥𑀺𑀧𑀜𑁆𑀜𑀸𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚. 𑀏𑀢𑀜𑁆𑀳𑀺 𑀉𑀧𑀸𑀲𑀓𑁂𑀦 𑀧𑀼𑀩𑁆𑀩𑀪𑀸𑀕𑁂 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀁 𑀩𑀼𑀤𑁆𑀥𑀲𑀸𑀲𑀦𑀁 𑀦𑀸𑀫. 𑀢𑁂𑀦𑀸𑀳 𑁋 ‘‘𑀓𑀸𑀮𑀬𑀼𑀢𑁆𑀢𑀁 𑀏𑀓𑀪𑀢𑁆𑀢𑀁 𑀏𑀓𑀲𑁂𑀬𑁆𑀬𑀁 𑀩𑁆𑀭𑀳𑁆𑀫𑀭𑀺𑀬’’𑀦𑁆𑀢𑀺.

𑀢𑀢𑁆𑀣 𑀓𑀸𑀮𑀬𑀼𑀢𑁆𑀢𑀦𑁆𑀢𑀺 𑀘𑀸𑀢𑀼𑀤𑁆𑀤𑀲𑀻𑀧𑀜𑁆𑀘𑀤𑀲𑀻𑀅𑀝𑁆𑀞𑀫𑀻𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀲𑀗𑁆𑀔𑀸𑀢𑁂𑀦 𑀓𑀸𑀮𑁂𑀦 𑀬𑀼𑀢𑁆𑀢𑀁, 𑀬𑀣𑀸𑀯𑀼𑀢𑁆𑀢𑀓𑀸𑀮𑁂 𑀯𑀸 𑀢𑀼𑀬𑁆𑀳𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀬𑀼𑀢𑁆𑀢𑀁 𑀧𑀢𑀺𑀭𑀽𑀧𑀁 𑀲𑀓𑁆𑀓𑀼𑀡𑁂𑀬𑁆𑀬𑀁, 𑀦 𑀲𑀩𑁆𑀩𑀓𑀸𑀮𑀁 𑀧𑀩𑁆𑀩𑀚𑁆𑀚𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀫𑁂𑀢𑀁 𑀜𑀸𑀡𑀲𑁆𑀲 𑀅𑀧𑀭𑀺𑀧𑀓𑁆𑀓𑀢𑁆𑀢𑀸 𑀢𑀲𑁆𑀲 𑀓𑀸𑀫𑀸𑀦𑀁 𑀤𑀼𑀧𑁆𑀧𑀳𑀸𑀦𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀬𑁄𑀕𑁆𑀬𑀁 𑀓𑀸𑀭𑀸𑀧𑁂𑀢𑀼𑀁 𑀯𑀤𑀢𑀺, 𑀦 𑀧𑀩𑁆𑀩𑀚𑁆𑀚𑀸𑀙𑀦𑁆𑀤𑀁 𑀦𑀺𑀯𑀸𑀭𑁂𑀢𑀼𑀁. 𑀧𑀩𑁆𑀩𑀚𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀧𑀩𑁆𑀩𑀚𑀺𑀢𑀼𑀁 𑀆𑀭𑀫𑁆𑀪𑁄 𑀉𑀲𑁆𑀲𑀸𑀳𑁄. 𑀧𑀝𑀺𑀧𑀲𑁆𑀲𑀫𑁆𑀪𑀻𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀭𑀺𑀧𑀓𑁆𑀓𑀢𑁆𑀢𑀸, 𑀲𑀁𑀯𑁂𑀕𑀲𑁆𑀲 𑀘 𑀦𑀸𑀢𑀺𑀢𑀺𑀓𑁆𑀔𑀪𑀸𑀯𑀢𑁄 𑀯𑀽𑀧𑀲𑀫𑀺. 𑀓𑀺𑀜𑁆𑀘𑀸𑀧𑀺 𑀧𑀝𑀺𑀧𑀲𑁆𑀲𑀫𑁆𑀪𑀺, 𑀣𑁂𑀭𑁂𑀦 𑀯𑀼𑀢𑁆𑀢𑀯𑀺𑀥𑀺𑀁 𑀧𑀦 𑀅𑀦𑀼𑀢𑀺𑀝𑁆𑀞𑀦𑁆𑀢𑁄 𑀓𑀸𑀮𑁂𑀦 𑀓𑀸𑀮𑀁 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀼𑀢𑀺𑀬𑀁 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺, 𑀣𑁂𑀭𑀲𑁆𑀲 𑀘 𑀆𑀭𑁄𑀘𑁂𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀣𑁂𑀭𑁄 𑀧𑀝𑀺𑀓𑁆𑀔𑀺𑀧𑀺. 𑀢𑀢𑀺𑀬𑀯𑀸𑀭𑁂 𑀧𑀦 𑀜𑀸𑀡𑀲𑁆𑀲 𑀧𑀭𑀺𑀧𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀤𑀸𑀦𑀺 𑀦𑀁 𑀧𑀩𑁆𑀩𑀸𑀚𑁂𑀢𑀼𑀁 𑀓𑀸𑀮𑁄’’𑀢𑀺 𑀣𑁂𑀭𑁄 𑀧𑀩𑁆𑀩𑀸𑀚𑁂𑀲𑀺, 𑀧𑀩𑁆𑀩𑀚𑀺𑀢𑀜𑁆𑀘 𑀢𑀁 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄𑀡𑁄…𑀧𑁂… 𑀉𑀧𑀲𑀫𑁆𑀧𑀸𑀤𑁂𑀲𑀻’’𑀢𑀺.

𑀢𑀢𑁆𑀣 𑀅𑀧𑁆𑀧𑀪𑀺𑀓𑁆𑀔𑀼𑀓𑁄𑀢𑀺 𑀓𑀢𑀺𑀧𑀬𑀪𑀺𑀓𑁆𑀔𑀼𑀓𑁄. 𑀢𑀤𑀸 𑀓𑀺𑀭 𑀪𑀺𑀓𑁆𑀔𑀽 𑀬𑁂𑀪𑀼𑀬𑁆𑀬𑁂𑀦 𑀫𑀚𑁆𑀛𑀺𑀫𑀤𑁂𑀲𑁂 𑀏𑀯 𑀯𑀲𑀺𑀁𑀲𑀼. 𑀢𑀲𑁆𑀫𑀸 𑀢𑀢𑁆𑀣 𑀓𑀢𑀺𑀧𑀬𑀸 𑀏𑀯 𑀅𑀳𑁂𑀲𑀼𑀁, 𑀢𑁂 𑀘 𑀏𑀓𑀲𑁆𑀫𑀺𑀁 𑀦𑀺𑀕𑀫𑁂 𑀏𑀓𑁄, 𑀏𑀓𑀲𑁆𑀫𑀺𑀁 𑀤𑁆𑀯𑁂𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀲𑀺𑀁𑀲𑀼. 𑀓𑀺𑀘𑁆𑀙𑁂𑀦𑀸𑀢𑀺 𑀤𑀼𑀓𑁆𑀔𑁂𑀦. 𑀓𑀲𑀺𑀭𑁂𑀦𑀸𑀢𑀺 𑀆𑀬𑀸𑀲𑁂𑀦. 𑀢𑀢𑁄 𑀢𑀢𑁄𑀢𑀺 𑀢𑀲𑁆𑀫𑀸 𑀢𑀲𑁆𑀫𑀸 𑀕𑀸𑀫𑀦𑀺𑀕𑀫𑀸𑀤𑀺𑀢𑁄. 𑀣𑁂𑀭𑁂𑀦 𑀳𑀺 𑀓𑀢𑀺𑀧𑀬𑁂 𑀪𑀺𑀓𑁆𑀔𑀽 𑀆𑀦𑁂𑀢𑁆𑀯𑀸 𑀅𑀜𑁆𑀜𑁂𑀲𑀼 𑀆𑀦𑀻𑀬𑀫𑀸𑀦𑁂𑀲𑀼 𑀧𑀼𑀩𑁆𑀩𑁂 𑀆𑀦𑀻𑀢𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀺𑀁𑀲𑀼, 𑀓𑀺𑀜𑁆𑀘𑀺 𑀓𑀸𑀮𑀁 𑀆𑀕𑀫𑁂𑀢𑁆𑀯𑀸 𑀧𑀼𑀦 𑀢𑁂𑀲𑀼 𑀆𑀦𑀻𑀬𑀫𑀸𑀦𑁂𑀲𑀼 𑀇𑀢𑀭𑁂 𑀧𑀓𑁆𑀓𑀫𑀺𑀁𑀲𑀼. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀆𑀦𑀬𑀦𑁂𑀦 𑀲𑀦𑁆𑀦𑀺𑀧𑀸𑀢𑁄 𑀘𑀺𑀭𑁂𑀦𑁂𑀯 𑀅𑀳𑁄𑀲𑀺, 𑀣𑁂𑀭𑁄 𑀘 𑀢𑀤𑀸 𑀏𑀓𑀯𑀺𑀳𑀸𑀭𑀻 𑀅𑀳𑁄𑀲𑀺. 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸𑀢𑀺 𑀢𑀤𑀸 𑀪𑀕𑀯𑀢𑀸 𑀧𑀘𑁆𑀘𑀦𑁆𑀢𑀤𑁂𑀲𑁂𑀧𑀺 𑀤𑀲𑀯𑀕𑁆𑀕𑁂𑀦𑁂𑀯 𑀲𑀗𑁆𑀖𑁂𑀦 𑀉𑀧𑀲𑀫𑁆𑀧𑀤𑀸 𑀅𑀦𑀼𑀜𑁆𑀜𑀸𑀢𑀸. 𑀇𑀢𑁄𑀦𑀺𑀤𑀸𑀦𑀜𑁆𑀳𑀺 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀧𑀜𑁆𑀘𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀧𑀘𑁆𑀘𑀦𑁆𑀢𑀤𑁂𑀲𑁂 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁…𑀧𑁂… 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸’’𑀢𑀺.

𑀯𑀲𑁆𑀲𑀁𑀯𑀼𑀝𑁆𑀞𑀲𑁆𑀲𑀸𑀢𑀺 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀧𑀞𑀫𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀼𑀲𑀺𑀢𑀯𑀢𑁄. 𑀈𑀤𑀺𑀲𑁄 𑀘 𑀈𑀤𑀺𑀲𑁄 𑀘𑀸𑀢𑀺 𑀏𑀯𑀭𑀽𑀧𑁄 𑀘 𑀏𑀯𑀭𑀽𑀧𑁄 𑀘, 𑀏𑀯𑀭𑀽𑀧𑀸𑀬 𑀦𑀸𑀫𑀓𑀸𑀬𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄, 𑀏𑀯𑀭𑀽𑀧𑀸𑀬 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀼𑀢𑁄𑀬𑁂𑀯 𑀫𑁂 𑀲𑁄 𑀪𑀕𑀯𑀸. 𑀦 𑀔𑁄 𑀫𑁂 𑀲𑁄 𑀪𑀕𑀯𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄𑀢𑀺 𑀏𑀢𑁂𑀦 𑀧𑀼𑀣𑀼𑀚𑁆𑀚𑀦𑀲𑀤𑁆𑀥𑀸𑀬 𑀏𑀯𑀁 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑀁 𑀅𑀚𑁆𑀛𑀺𑀝𑁆𑀞𑁄 𑀲𑁄𑀴𑀲 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀅𑀢𑁆𑀣𑀥𑀫𑁆𑀫𑀧𑁆𑀧𑀝𑀺𑀲𑀁𑀯𑁂𑀤𑀻 𑀳𑀼𑀢𑁆𑀯𑀸 𑀪𑀡𑀦𑁆𑀢𑁄 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀧𑀸𑀫𑁄𑀚𑁆𑀚𑀸𑀤𑀺𑀫𑀼𑀔𑁂𑀦 𑀲𑀫𑀸𑀳𑀺𑀢𑁄 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀏𑀢𑀤𑀢𑁆𑀣𑀫𑁂𑀯 𑀳𑀺𑀲𑁆𑀲 𑀪𑀕𑀯𑀢𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀸𑀲𑁄 𑀆𑀡𑀢𑁆𑀢𑁄𑀢𑀺 𑀯𑀤𑀦𑁆𑀢𑀺.

𑀓𑁂𑀘𑀺 𑀧𑀦𑀸𑀳𑀼 𑁋 ‘‘𑀦 𑀔𑁄 𑀫𑁂 𑀲𑁄 𑀪𑀕𑀯𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄’’𑀢𑀺 𑀇𑀤𑀁 𑀭𑀽𑀧𑀓𑀸𑀬𑀤𑀲𑁆𑀲𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀆𑀬𑀲𑁆𑀫𑀸 𑀳𑀺 𑀲𑁄𑀡𑁄 𑀧𑀩𑁆𑀩𑀚𑀺𑀢𑁆𑀯𑀸𑀯 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 ‘‘𑀉𑀧𑀸𑀲𑀓𑀸𑀧𑀺 𑀲𑁄𑀢𑀸𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀅𑀳𑀫𑁆𑀧𑀺 𑀲𑁄𑀢𑀸𑀧𑀦𑁆𑀦𑁄, 𑀓𑀺𑀫𑁂𑀢𑁆𑀣 𑀘𑀺𑀢𑁆𑀢’’𑀦𑁆𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀙𑀴𑀪𑀺𑀜𑁆𑀜𑁄 𑀳𑀼𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀲𑀺. 𑀅𑀭𑀺𑀬𑀲𑀘𑁆𑀘𑀤𑀲𑁆𑀲𑀦𑁂𑀦 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀓𑀸𑀬𑁄 𑀤𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀺. 𑀬𑁄 𑀫𑀁 𑀧𑀲𑁆𑀲𑀢𑀺, 𑀲𑁄 𑀥𑀫𑁆𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭).

𑀢𑀲𑁆𑀫𑀸𑀲𑁆𑀲 𑀥𑀫𑁆𑀫𑀓𑀸𑀬𑀤𑀲𑁆𑀲𑀦𑀁 𑀧𑀕𑁂𑀯 𑀲𑀺𑀤𑁆𑀥𑀁, 𑀧𑀯𑀸𑀭𑁂𑀢𑁆𑀯𑀸 𑀧𑀦 𑀭𑀽𑀧𑀓𑀸𑀬𑀁 𑀤𑀝𑁆𑀞𑀼𑀓𑀸𑀫𑁄 𑀅𑀳𑁄𑀲𑀻𑀢𑀺.

‘‘𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑀸𑀢𑀻’’𑀢𑀺𑀧𑀺 𑀧𑀸𑀞𑁄. ‘‘𑀪𑀦𑁆𑀢𑁂’’𑀢𑀺 𑀧𑀦 𑀮𑀺𑀔𑀦𑁆𑀢𑀺. 𑀢𑀣𑀸 ‘‘𑀲𑀸𑀥𑀼 𑀲𑀸𑀥𑀼, 𑀆𑀯𑀼𑀲𑁄 𑀲𑁄𑀡, 𑀕𑀘𑁆𑀙 𑀢𑁆𑀯𑀁, 𑀆𑀯𑀼𑀲𑁄 𑀲𑁄𑀡𑀸’’𑀢𑀺𑀧𑀺 𑀧𑀸𑀞𑁄. ‘‘𑀆𑀯𑀼𑀲𑁄’’𑀢𑀺 𑀧𑀦 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺. 𑀢𑀣𑀸 ‘‘𑀏𑀯𑀫𑀸𑀯𑀼𑀲𑁄𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄’’𑀢𑀺𑀧𑀺 𑀧𑀸𑀞𑁄. 𑀆𑀯𑀼𑀲𑁄𑀯𑀸𑀤𑁄𑀬𑁂𑀯 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀪𑀺𑀓𑁆𑀔𑀽𑀦𑀁 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀆𑀘𑀺𑀡𑁆𑀡𑁄. 𑀪𑀕𑀯𑀦𑁆𑀢𑀁 𑀧𑀸𑀲𑀸𑀤𑀺𑀓𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀓𑀘𑁆𑀘𑀺 𑀪𑀺𑀓𑁆𑀔𑀼 𑀔𑀫𑀦𑀻𑀬𑀦𑁆𑀢𑀺 𑀪𑀺𑀓𑁆𑀔𑀼 𑀇𑀤𑀁 𑀢𑀼𑀬𑁆𑀳𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀓𑀘𑁆𑀘𑀺 𑀔𑀫𑀦𑀻𑀬𑀁, 𑀓𑀺𑀁 𑀲𑀓𑁆𑀓𑀸 𑀔𑀫𑀺𑀢𑀼𑀁 𑀲𑀳𑀺𑀢𑀼𑀁 𑀧𑀭𑀺𑀳𑀭𑀺𑀢𑀼𑀁, 𑀓𑀺𑀁 𑀤𑀼𑀓𑁆𑀔𑀪𑀸𑀭𑁄 𑀦𑀸𑀪𑀺𑀪𑀯𑀢𑀺. 𑀓𑀘𑁆𑀘𑀺 𑀬𑀸𑀧𑀦𑀻𑀬𑀦𑁆𑀢𑀺 𑀓𑀺𑀁 𑀢𑀁𑀢𑀁𑀓𑀺𑀘𑁆𑀘𑁂𑀲𑀼 𑀬𑀸𑀧𑁂𑀢𑀼𑀁 𑀕𑀫𑁂𑀢𑀼𑀁 𑀲𑀓𑁆𑀓𑀸, 𑀦 𑀓𑀜𑁆𑀘𑀺 𑀅𑀦𑁆𑀢𑀭𑀸𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀘𑁆𑀘𑀺𑀲𑀺 𑀅𑀧𑁆𑀧𑀓𑀺𑀮𑀫𑀣𑁂𑀦𑀸𑀢𑀺 𑀅𑀦𑀸𑀬𑀸𑀲𑁂𑀦 𑀇𑀫𑀁 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀓𑀘𑁆𑀘𑀺 𑀆𑀕𑀢𑁄𑀲𑀺.

𑀏𑀢𑀤𑀳𑁄𑀲𑀻𑀢𑀺 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀁 ‘‘𑀬𑀲𑁆𑀲 𑀔𑁄 𑀫𑀁 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀘𑀺𑀢𑁆𑀢𑁂 𑀆𑀘𑀺𑀡𑁆𑀡𑀁 𑀅𑀳𑁄𑀲𑀺. 𑀏𑀓𑀯𑀺𑀳𑀸𑀭𑁂𑀢𑀺 𑀏𑀓𑀕𑀦𑁆𑀥𑀓𑀼𑀝𑀺𑀬𑀁. 𑀕𑀦𑁆𑀥𑀓𑀼𑀝𑀺 𑀳𑀺 𑀇𑀥 𑀯𑀺𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀯𑀢𑁆𑀣𑀼𑀦𑁆𑀢𑀺 𑀯𑀲𑀺𑀢𑀼𑀁.

𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀢𑁆𑀯𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀲𑀸𑀯𑀓𑀲𑀸𑀥𑀸𑀭𑀡𑀸 𑀲𑀩𑁆𑀩𑀸 𑀲𑀫𑀸𑀧𑀢𑁆𑀢𑀺𑀬𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁…𑀧𑁂… 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺, 𑀢𑀲𑁆𑀫𑀸 𑀆𑀬𑀲𑁆𑀫𑀸𑀧𑀺 𑀲𑁄𑀡𑁄 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀲𑀩𑁆𑀩𑀸 𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀦𑁆𑀢𑁄 ‘‘𑀩𑀳𑀼𑀤𑁂𑀯 𑀭𑀢𑁆𑀢𑀺𑀁…𑀧𑁂… 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀧𑀯𑀺𑀲𑀺𑀢𑁆𑀯𑀸 𑀘 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄 𑀘𑀻𑀯𑀭𑀁 𑀢𑀺𑀭𑁄𑀓𑀭𑀡𑀻𑀬𑀁 𑀓𑀢𑁆𑀯𑀸𑀧𑀺 𑀪𑀕𑀯𑀢𑁄 𑀧𑀸𑀤𑀧𑀲𑁆𑀲𑁂 𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀲𑀺. 𑀅𑀚𑁆𑀛𑁂𑀲𑀻𑀢𑀺 𑀆𑀡𑀸𑀧𑁂𑀲𑀺. 𑀧𑀝𑀺𑀪𑀸𑀢𑀼 𑀢𑀁 𑀪𑀺𑀓𑁆𑀔𑀼 𑀥𑀫𑁆𑀫𑁄 𑀪𑀸𑀲𑀺𑀢𑀼𑀦𑁆𑀢𑀺 𑀪𑀺𑀓𑁆𑀔𑀼 𑀢𑀼𑀬𑁆𑀳𑀁 𑀥𑀫𑁆𑀫𑁄 𑀪𑀸𑀲𑀺𑀢𑀼𑀁 𑀉𑀧𑀝𑁆𑀞𑀸𑀢𑀼 𑀜𑀸𑀡𑀫𑀼𑀔𑁂 𑀆𑀕𑀘𑁆𑀙𑀢𑀼, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀪𑀡𑀸𑀳𑀻𑀢𑀺 𑀅𑀢𑁆𑀣𑁄.

𑀲𑁄𑀴𑀲 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀻𑀢𑀺 𑀅𑀝𑁆𑀞𑀓𑀯𑀕𑁆𑀕𑀪𑀽𑀢𑀸𑀦𑀺 𑀓𑀸𑀫𑀲𑀼𑀢𑁆𑀢𑀸𑀤𑀻𑀦𑀺 𑀲𑁄𑀴𑀲 𑀲𑀼𑀢𑁆𑀢𑀸𑀦𑀺. 𑀲𑀭𑁂𑀦 𑀅𑀪𑀡𑀻𑀢𑀺 𑀲𑀼𑀢𑁆𑀢𑀼𑀲𑁆𑀲𑀸𑀭𑀡𑀲𑀭𑁂𑀦 𑀅𑀪𑀸𑀲𑀺, 𑀲𑀭𑀪𑀜𑁆𑀜𑀯𑀲𑁂𑀦 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂𑀢𑀺 𑀉𑀲𑁆𑀲𑀸𑀭𑀡𑀸𑀯𑀲𑀸𑀦𑁂. 𑀲𑀼𑀕𑁆𑀕𑀳𑀺𑀢𑀸𑀦𑀻𑀢𑀺 𑀲𑀫𑁆𑀫𑀸 𑀉𑀕𑁆𑀕𑀳𑀺𑀢𑀸𑀦𑀺. 𑀲𑀼𑀫𑀦𑀲𑀺𑀓𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀫𑀦𑀲𑀺 𑀓𑀢𑀸𑀦𑀺. 𑀏𑀓𑀘𑁆𑀘𑁄 𑀉𑀕𑁆𑀕𑀳𑀡𑀓𑀸𑀮𑁂 𑀲𑀫𑁆𑀫𑀸 𑀉𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀘𑁆𑀙𑀸 𑀲𑀚𑁆𑀛𑀸𑀬𑀸𑀤𑀺𑀯𑀲𑁂𑀦 𑀫𑀦𑀲𑀺 𑀓𑀭𑀡𑀓𑀸𑀮𑁂 𑀩𑁆𑀬𑀜𑁆𑀚𑀦𑀸𑀦𑀺 𑀯𑀸 𑀫𑀺𑀘𑁆𑀙𑀸 𑀭𑁄𑀧𑁂𑀢𑀺, 𑀧𑀤𑀧𑀘𑁆𑀙𑀸𑀪𑀝𑁆𑀞𑀁 𑀯𑀸 𑀓𑀭𑁄𑀢𑀺, 𑀦 𑀏𑀯𑀫𑀬𑀁. 𑀇𑀫𑀺𑀦𑀸 𑀧𑀦 𑀲𑀫𑁆𑀫𑀤𑁂𑀯 𑀬𑀣𑀼𑀕𑁆𑀕𑀳𑀺𑀢𑀁 𑀫𑀦𑀲𑀺 𑀓𑀢𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀼𑀫𑀦𑀲𑀺𑀓𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀫𑀦𑀲𑀺 𑀓𑀢𑀸𑀦𑀻’’𑀢𑀺. 𑀲𑀽𑀧𑀥𑀸𑀭𑀺𑀢𑀸𑀦𑀻𑀢𑀺 𑀅𑀢𑁆𑀣𑀢𑁄𑀧𑀺 𑀲𑀼𑀝𑁆𑀞𑀼 𑀉𑀧𑀥𑀸𑀭𑀺𑀢𑀸𑀦𑀺. 𑀅𑀢𑁆𑀣𑁂 𑀳𑀺 𑀲𑀼𑀝𑁆𑀝𑀼 𑀉𑀧𑀥𑀸𑀭𑀺𑀢𑁂 𑀲𑀓𑁆𑀓𑀸 𑀧𑀸𑀴𑀺𑀁 𑀲𑀫𑁆𑀫𑀸 𑀉𑀲𑁆𑀲𑀸𑀭𑁂𑀢𑀼𑀁. 𑀓𑀮𑁆𑀬𑀸𑀡𑀺𑀬𑀸𑀲𑀺 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀺𑀣𑀺𑀮𑀥𑀦𑀺𑀢𑀸𑀤𑀻𑀦𑀁 𑀬𑀣𑀸𑀯𑀺𑀥𑀸𑀦𑀯𑀘𑀦𑁂𑀦 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀸𑀬 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀆𑀲𑀺. 𑀯𑀺𑀲𑁆𑀲𑀝𑁆𑀞𑀸𑀬𑀸𑀢𑀺 𑀯𑀺𑀫𑀼𑀢𑁆𑀢𑀸𑀬. 𑀏𑀢𑁂𑀦𑀲𑁆𑀲 𑀯𑀺𑀫𑀼𑀢𑁆𑀢𑀯𑀸𑀤𑀺𑀢𑀁 𑀤𑀲𑁆𑀲𑁂𑀢𑀺. 𑀅𑀦𑁂𑀮𑀕𑀴𑀸𑀬𑀸𑀢𑀺 𑀏𑀮𑀸 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀢𑀁 𑀦 𑀧𑀕𑁆𑀖𑀭𑀢𑀻𑀢𑀺 𑀅𑀦𑁂𑀮𑀕𑀴𑀸, 𑀢𑀸𑀬 𑀦𑀺𑀤𑁆𑀤𑁄𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀦𑁂𑀮𑀕𑀴𑀸𑀬𑀸𑀢𑀺 𑀅𑀦𑁂𑀮𑀸𑀬 𑀘 𑀅𑀕𑀴𑀸𑀬 𑀘 𑀦𑀺𑀤𑁆𑀤𑁄𑀲𑀸𑀬 𑀅𑀕𑀴𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬, 𑀅𑀧𑀭𑀺𑀳𑀻𑀦𑀧𑀤𑀩𑁆𑀬𑀜𑁆𑀚𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀦𑀁 𑀪𑀕𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑀸𑀦𑀁 𑀬𑀤𑀺𑀤𑀁 𑀲𑁄𑀡𑁄 𑀓𑀼𑀝𑀺𑀓𑀡𑁆𑀡𑁄’’𑀢𑀺 (𑀅. 𑀦𑀺. 𑁧.𑁨𑁦𑁬) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀫𑀢𑁆𑀣𑀸𑀬.

𑀓𑀢𑀺𑀯𑀲𑁆𑀲𑁄𑀢𑀺 𑀲𑁄 𑀓𑀺𑀭 𑀫𑀚𑁆𑀛𑀺𑀫𑀯𑀬𑀲𑁆𑀲 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀞𑀺𑀢𑁄 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁄 𑀘 𑀧𑀭𑁂𑀲𑀁 𑀘𑀺𑀭𑀢𑀭𑀧𑀩𑁆𑀩𑀚𑀺𑀢𑁄 𑀯𑀺𑀬 𑀔𑀸𑀬𑀢𑀺. 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀧𑀼𑀘𑁆𑀙𑀢𑀻𑀢𑀺 𑀓𑁂𑀘𑀺, 𑀢𑀁 𑀅𑀓𑀸𑀭𑀡𑀁. 𑀏𑀯𑀁 𑀲𑀦𑁆𑀢𑁂 𑀲𑀫𑀸𑀥𑀺𑀲𑀼𑀔𑀁 𑀅𑀦𑀼𑀪𑀯𑀺𑀢𑀼𑀁 𑀬𑀼𑀢𑁆𑀢𑁄, 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀲𑁆𑀫𑀸 𑀧𑀫𑀸𑀤𑀫𑀸𑀧𑀦𑁆𑀦𑁄𑀢𑀺 𑀧𑀼𑀦 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀲𑀢𑁆𑀣𑀸 ‘‘𑀓𑀢𑀺𑀯𑀲𑁆𑀲𑁄𑀲𑀻’’𑀢𑀺 𑀢𑀁 𑀧𑀼𑀘𑁆𑀙𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀏𑀯𑀁 𑀘𑀺𑀭𑀁 𑀅𑀓𑀸𑀲𑀻’’𑀢𑀺.

𑀢𑀢𑁆𑀣 𑀓𑀺𑀲𑁆𑀲𑀸𑀢𑀺 𑀓𑀺𑀁 𑀓𑀸𑀭𑀡𑀸. 𑀏𑀯𑀁 𑀘𑀺𑀭𑀁 𑀅𑀓𑀸𑀲𑀻𑀢𑀺 𑀏𑀯𑀁 𑀘𑀺𑀭𑀸𑀬𑀺, 𑀓𑁂𑀦 𑀓𑀸𑀭𑀡𑁂𑀦 𑀏𑀯𑀁 𑀘𑀺𑀭𑀓𑀸𑀮𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀻𑀢𑀺 𑀅𑀢𑁆𑀣𑁄. 𑀘𑀺𑀭𑀁 𑀤𑀺𑀝𑁆𑀞𑁄 𑀫𑁂𑀢𑀺 𑀘𑀺𑀭𑁂𑀦 𑀘𑀺𑀭𑀓𑀸𑀮𑁂𑀦 𑀫𑀬𑀸 𑀤𑀺𑀝𑁆𑀞𑁄. 𑀓𑀸𑀫𑁂𑀲𑀽𑀢𑀺 𑀓𑀺𑀮𑁂𑀲𑀓𑀸𑀫𑁂𑀲𑀼 𑀘 𑀯𑀢𑁆𑀣𑀼𑀓𑀸𑀫𑁂𑀲𑀼 𑀘. 𑀆𑀤𑀻𑀦𑀯𑁄𑀢𑀺 𑀤𑁄𑀲𑁄. 𑀅𑀧𑀺 𑀘𑀸𑀢𑀺 𑀓𑀸𑀫𑁂𑀲𑀼 𑀆𑀤𑀻𑀦𑀯𑁂 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀤𑀺𑀝𑁆𑀞𑁂𑀧𑀺 𑀦 𑀢𑀸𑀯𑀸𑀳𑀁 𑀖𑀭𑀸𑀯𑀸𑀲𑀢𑁄 𑀦𑀺𑀓𑁆𑀔𑀫𑀺𑀢𑀼𑀁 𑀅𑀲𑀓𑁆𑀔𑀺𑀁. 𑀓𑀲𑁆𑀫𑀸? 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀉𑀘𑁆𑀘𑀸𑀯𑀘𑁂𑀳𑀺 𑀓𑀺𑀘𑁆𑀘𑀓𑀭𑀡𑀻𑀬𑁂𑀳𑀺 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 𑀅𑀕𑀸𑀭𑀺𑀬𑀪𑀸𑀯𑁄. 𑀢𑁂𑀦𑁂𑀯𑀸𑀳 𑁋 ‘‘𑀩𑀳𑀼𑀓𑀺𑀘𑁆𑀘𑁄 𑀩𑀳𑀼𑀓𑀭𑀡𑀻𑀬𑁄’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀓𑀸𑀫𑁂𑀲𑀼 𑀬𑀣𑀸𑀪𑀽𑀢𑀁 𑀆𑀤𑀻𑀦𑀯𑀤𑀲𑁆𑀲𑀺𑀦𑁄 𑀘𑀺𑀢𑁆𑀢𑀁 𑀘𑀺𑀭𑀸𑀬𑀺𑀢𑁆𑀯𑀸𑀧𑀺 𑀦 𑀧𑀢𑀺𑀝𑁆𑀞𑀸𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀤𑀼𑀫𑀧𑀮𑀸𑀲𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀯𑀺𑀦𑀺𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑀺𑀜𑁆𑀘 𑀲𑀫𑁆𑀫𑀤𑁂𑀯 𑀚𑀸𑀦𑀦𑁆𑀢𑁄 𑀧𑀯𑀢𑁆𑀢𑀺𑀬𑀁 𑀢𑀦𑁆𑀦𑀺𑀫𑀺𑀢𑁆𑀢𑁂 𑀘 𑀦 𑀓𑀤𑀸𑀘𑀺𑀧𑀺 𑀭𑀫𑀢𑀻𑀢𑀺 𑀇𑀤𑀫𑀢𑁆𑀣𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀮𑁄𑀓𑁂𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀗𑁆𑀔𑀸𑀭𑀮𑁄𑀓𑁂 ‘‘𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀆𑀤𑀻𑀦𑀯𑀁 𑀤𑁄𑀲𑀁 𑀧𑀜𑁆𑀜𑀸𑀬 𑀧𑀲𑁆𑀲𑀺𑀢𑁆𑀯𑀸. 𑀏𑀢𑁂𑀦 𑀯𑀺𑀧𑀲𑁆𑀲𑀦𑀸𑀯𑀸𑀭𑁄 𑀓𑀣𑀺𑀢𑁄. 𑀜𑀢𑁆𑀯𑀸 𑀥𑀫𑁆𑀫𑀁 𑀦𑀺𑀭𑀼𑀧𑀥𑀺𑀦𑁆𑀢𑀺 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀢𑁆𑀢𑀸 𑀦𑀺𑀭𑀼𑀧𑀥𑀺𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸𑀲𑀗𑁆𑀔𑀢𑀸𑀫𑀢𑀲𑀪𑀸𑀯𑀢𑁄 𑀫𑀕𑁆𑀕𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. ‘‘𑀤𑀺𑀲𑁆𑀯𑀸 𑀜𑀢𑁆𑀯𑀸’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 ‘‘𑀲𑀧𑁆𑀧𑀺𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀳𑁄𑀢𑀺, 𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀺, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀧𑀼. 𑀧. 𑁨𑁦𑁮; 𑀅. 𑀦𑀺. 𑁯.𑁪𑁨-𑁪𑁩) 𑀯𑀺𑀬 𑀳𑁂𑀢𑀼𑀅𑀢𑁆𑀣𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀭𑀺𑀬𑁄 𑀦 𑀭𑀫𑀢𑀻 𑀧𑀸𑀧𑁂𑀢𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄 𑀲𑀧𑁆𑀧𑀼𑀭𑀺𑀲𑁄 𑀅𑀡𑀼𑀫𑀢𑁆𑀢𑁂𑀧𑀺 𑀧𑀸𑀧𑁂 𑀦 𑀭𑀫𑀢𑀺. 𑀓𑀲𑁆𑀫𑀸? 𑀧𑀸𑀧𑁂 𑀦 𑀭𑀫𑀢𑀻 𑀲𑀼𑀘𑀻𑀢𑀺 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀢𑀸𑀬 𑀯𑀺𑀲𑀼𑀤𑁆𑀥𑀧𑀼𑀕𑁆𑀕𑀮𑁄 𑀭𑀸𑀚𑀳𑀁𑀲𑁄 𑀯𑀺𑀬 𑀉𑀓𑁆𑀓𑀸𑀭𑀝𑁆𑀞𑀸𑀦𑁂 𑀧𑀸𑀧𑁂 𑀲𑀁𑀓𑀺𑀮𑀺𑀝𑁆𑀞𑀥𑀫𑁆𑀫𑁂 𑀦 𑀭𑀫𑀢𑀺 𑀦𑀸𑀪𑀺𑀦𑀦𑁆𑀤𑀢𑀺. ‘‘𑀧𑀸𑀧𑁄 𑀦 𑀭𑀫𑀢𑀻 𑀲𑀼𑀘𑀺’’𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀧𑀸𑀧𑁄 𑀧𑀸𑀧𑀧𑀼𑀕𑁆𑀕𑀮𑁄 𑀲𑀼𑀘𑀺𑀁 𑀅𑀦𑀯𑀚𑁆𑀚𑀁 𑀯𑁄𑀤𑀸𑀦𑀥𑀫𑁆𑀫𑀁 𑀦 𑀭𑀫𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀕𑀸𑀫𑀲𑀽𑀓𑀭𑀸𑀤𑀬𑁄 𑀯𑀺𑀬 𑀉𑀓𑁆𑀓𑀸𑀭𑀝𑁆𑀞𑀸𑀦𑀁 𑀅𑀲𑀼𑀘𑀺𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀁𑀬𑁂𑀯 𑀭𑀫𑀢𑀻𑀢𑀺 𑀧𑀝𑀺𑀧𑀓𑁆𑀔𑀢𑁄 𑀤𑁂𑀲𑀦𑀁 𑀧𑀭𑀺𑀯𑀢𑁆𑀢𑁂𑀢𑀺.

𑀏𑀯𑀁 𑀪𑀕𑀯𑀢𑀸 𑀉𑀤𑀸𑀦𑁂 𑀉𑀤𑀸𑀦𑀺𑀢𑁂 𑀆𑀬𑀲𑁆𑀫𑀸 𑀲𑁄𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀯𑀘𑀦𑁂𑀦 𑀧𑀘𑁆𑀘𑀦𑁆𑀢𑀤𑁂𑀲𑁂 𑀧𑀜𑁆𑀘𑀯𑀕𑁆𑀕𑁂𑀦 𑀉𑀧𑀲𑀫𑁆𑀧𑀤𑀸𑀤𑀺𑀧𑀜𑁆𑀘𑀯𑀢𑁆𑀣𑀽𑀦𑀺 𑀬𑀸𑀘𑀺. 𑀪𑀕𑀯𑀸𑀧𑀺 𑀢𑀸𑀦𑀺 𑀅𑀦𑀼𑀚𑀸𑀦𑀻𑀢𑀺 𑀢𑀁 𑀲𑀩𑁆𑀩𑀁 𑀔𑀦𑁆𑀥𑀓𑁂 (𑀫𑀳𑀸𑀯. 𑁨𑁪𑁨 𑀆𑀤𑀬𑁄) 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.