𑁮. 𑀲𑀼𑀦𑁆𑀤𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀲𑀓𑁆𑀓𑀢𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀡𑁆𑀡𑀺𑀢𑁄𑀬𑁂𑀯. 𑀅𑀲𑀳𑀫𑀸𑀦𑀸𑀢𑀺 𑀦 𑀲𑀳𑀫𑀸𑀦𑀸, 𑀉𑀲𑀽𑀬𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀼𑀦𑁆𑀤𑀭𑀻𑀢𑀺 𑀢𑀲𑁆𑀲𑀸 𑀦𑀸𑀫𑀁. 𑀲𑀸 𑀓𑀺𑀭 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑀧𑀭𑀺𑀩𑁆𑀩𑀸𑀚𑀺𑀓𑀸𑀲𑀼 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀢𑁂𑀦𑁂𑀯 𑀲𑀸 ‘‘𑀲𑀼𑀦𑁆𑀤𑀭𑀻’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑀸 𑀘 𑀅𑀦𑀢𑀻𑀢𑀬𑁄𑀩𑁆𑀩𑀦𑀸 𑀅𑀲𑀁𑀬𑀢𑀲𑀫𑀸𑀘𑀸𑀭𑀸𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑁂 𑀲𑀼𑀦𑁆𑀤𑀭𑀺𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀧𑀸𑀧𑀓𑀫𑁆𑀫𑁂 𑀉𑀬𑁆𑀬𑁄𑀚𑁂𑀲𑀼𑀁. 𑀢𑁂 𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀲𑀬𑀁 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀳𑁂𑀝𑁆𑀞𑀸 𑀅𑀓𑁆𑀓𑁄𑀲𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀆𑀕𑀢𑀦𑀬𑁂𑀦 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀉𑀴𑀸𑀭𑀁 𑀅𑀧𑀭𑀺𑀫𑀺𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸 𑀇𑀲𑁆𑀲𑀸𑀧𑀓𑀢𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀫𑁆𑀫𑀦𑁆𑀢𑀬𑀺𑀁𑀲𑀼 𑁋 𑀫𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀝𑁆𑀞𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑀸, 𑀦 𑀦𑁄 𑀓𑁄𑀘𑀺 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀚𑀸𑀦𑀸𑀢𑀺, 𑀓𑀺𑀁 𑀦𑀺𑀲𑁆𑀲𑀸𑀬 𑀦𑀼 𑀔𑁄 𑀮𑁄𑀓𑁄 𑀲𑀫𑀡𑁂 𑀕𑁄𑀢𑀫𑁂 𑀅𑀪𑀺𑀧𑁆𑀧𑀲𑀦𑁆𑀦𑁄 𑀉𑀴𑀸𑀭𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀉𑀧𑀦𑁂𑀢𑀻𑀢𑀺? 𑀢𑀢𑁆𑀣𑁂𑀓𑁄 𑀆𑀳 𑁋 ‘‘𑀉𑀘𑁆𑀘𑀸𑀓𑀼𑀮𑀧𑁆𑀧𑀲𑀼𑀢𑁄 𑀅𑀲𑀫𑁆𑀪𑀺𑀦𑁆𑀦𑀸𑀬 𑀫𑀳𑀸𑀲𑀫𑁆𑀫𑀢𑀧𑁆𑀧𑀯𑁂𑀡𑀺𑀬𑀸 𑀚𑀸𑀢𑁄’’𑀢𑀺, 𑀅𑀧𑀭𑁄 ‘‘𑀅𑀪𑀺𑀚𑀸𑀢𑀺𑀬𑀁 𑀢𑀲𑁆𑀲 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀧𑀸𑀢𑀼𑀪𑀽𑀢𑀸𑀦𑀻’’𑀢𑀺, 𑀅𑀜𑁆𑀜𑁄 ‘‘𑀓𑀸𑀮𑀤𑁂𑀯𑀺𑀮𑀁 𑀯𑀦𑁆𑀤𑀸𑀧𑁂𑀢𑀼𑀁 𑀉𑀧𑀦𑀻𑀢𑀲𑁆𑀲 𑀧𑀸𑀤𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲 𑀚𑀝𑀸𑀲𑀼 𑀧𑀢𑀺𑀝𑁆𑀞𑀺𑀢𑀸’’𑀢𑀺, 𑀅𑀧𑀭𑁄 ‘‘𑀯𑀧𑁆𑀧𑀫𑀗𑁆𑀕𑀮𑀓𑀸𑀮𑁂 𑀚𑀫𑁆𑀩𑀼𑀘𑁆𑀙𑀸𑀬𑀸𑀬 𑀲𑀬𑀸𑀧𑀺𑀢𑀲𑁆𑀲 𑀯𑀻𑀢𑀺𑀓𑁆𑀓𑀦𑁆𑀢𑁂𑀧𑀺 𑀫𑀚𑁆𑀛𑀦𑁆𑀳𑀺𑀓𑁂 𑀚𑀫𑁆𑀩𑀼𑀘𑁆𑀙𑀸𑀬𑀸 𑀅𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀸’’𑀢𑀺, 𑀅𑀜𑁆𑀜𑁄 ‘‘𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺, 𑀅𑀧𑀭𑁄 ‘‘𑀚𑀺𑀡𑁆𑀡𑀸𑀢𑀼𑀭𑀫𑀢𑀧𑀩𑁆𑀩𑀚𑀺𑀢𑀲𑀗𑁆𑀔𑀸𑀢𑀦𑀺𑀫𑀺𑀢𑁆𑀢𑁂 𑀤𑀺𑀲𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀆𑀕𑀸𑀫𑀺𑀦𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄’’𑀢𑀺. 𑀏𑀯𑀁 𑀅𑀧𑀭𑀺𑀫𑀸𑀡𑀓𑀸𑀮𑁂 𑀲𑀫𑁆𑀪𑀢𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀪𑀕𑀯𑀢𑁄 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀁 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀁 𑀦𑀺𑀭𑀼𑀧𑀫𑀁 𑀲𑀮𑁆𑀮𑁂𑀔𑀧𑁆𑀧𑀝𑀺𑀧𑀤𑀁 𑀅𑀦𑀼𑀢𑁆𑀢𑀭𑀜𑁆𑀘 𑀜𑀸𑀡𑀧𑀳𑀸𑀦𑀲𑀫𑁆𑀧𑀤𑀸𑀤𑀺𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀅𑀚𑀸𑀦𑀦𑁆𑀢𑀸 𑀅𑀢𑁆𑀢𑀦𑀸 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀲𑀼𑀢𑀁 𑀥𑀭𑀫𑀸𑀦𑀁 𑀢𑀁 𑀢𑀁 𑀪𑀕𑀯𑀢𑁄 𑀩𑀳𑀼𑀫𑀸𑀦𑀓𑀸𑀭𑀡𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀩𑀳𑀼𑀫𑀸𑀦𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑀲𑁆𑀲𑀦𑁆𑀢𑀸 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀫𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀬𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀸𑀲𑁂𑀬𑁆𑀬𑀸𑀫𑀸’’𑀢𑀺. 𑀢𑁂𑀲𑀼 𑀏𑀓𑁄 𑀢𑀺𑀔𑀺𑀡𑀫𑀦𑁆𑀢𑀻 𑀏𑀯𑀫𑀸𑀳 𑁋 ‘‘𑀅𑀫𑁆𑀪𑁄 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀫𑀸𑀢𑀼𑀕𑀸𑀫𑀲𑀼𑀔𑁂 𑀅𑀲𑀢𑁆𑀢𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀅𑀬𑀜𑁆𑀘 𑀲𑀫𑀡𑁄 𑀕𑁄𑀢𑀫𑁄 𑀅𑀪𑀺𑀭𑀽𑀧𑁄 𑀤𑁂𑀯𑀲𑀫𑁄 𑀢𑀭𑀼𑀡𑁄, 𑀅𑀢𑁆𑀢𑀦𑁄 𑀲𑀫𑀭𑀽𑀧𑀁 𑀫𑀸𑀢𑀼𑀕𑀸𑀫𑀁 𑀮𑀪𑀺𑀢𑁆𑀯𑀸 𑀲𑀚𑁆𑀚𑁂𑀬𑁆𑀬. 𑀅𑀣𑀸𑀧𑀺 𑀦 𑀲𑀚𑁆𑀚𑁂𑀬𑁆𑀬, 𑀚𑀦𑀲𑁆𑀲 𑀧𑀦 𑀲𑀗𑁆𑀓𑀺𑀬𑁄 𑀪𑀯𑁂𑀬𑁆𑀬, 𑀳𑀦𑁆𑀤 𑀫𑀬𑀁 𑀲𑀼𑀦𑁆𑀤𑀭𑀺𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀢𑀣𑀸 𑀉𑀬𑁆𑀬𑁄𑀚𑁂𑀫, 𑀬𑀣𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀬𑀲𑁄 𑀧𑀣𑀯𑀺𑀬𑀁 𑀧𑀢𑁆𑀣𑀭𑁂𑀬𑁆𑀬𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀇𑀢𑀭𑁂 ‘‘𑀇𑀤𑀁 𑀲𑀼𑀝𑁆𑀞𑀼 𑀢𑀬𑀸 𑀘𑀺𑀦𑁆𑀢𑀺𑀢𑀁, 𑀏𑀯𑀜𑁆𑀳𑀺 𑀓𑀢𑁂 𑀲𑀫𑀡𑁄 𑀕𑁄𑀢𑀫𑁄 𑀅𑀬𑀲𑀓𑁂𑀦 𑀉𑀧𑀤𑁆𑀤𑀼𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺 𑀲𑀩𑁆𑀩𑁂𑀯 𑀏𑀓𑀚𑁆𑀛𑀸𑀲𑀬𑀸 𑀳𑀼𑀢𑁆𑀯𑀸 𑀢𑀣𑀸 𑀉𑀬𑁆𑀬𑁄𑀚𑁂𑀢𑀼𑀁 𑀲𑀼𑀦𑁆𑀤𑀭𑀺𑀬𑀸 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀲𑀸 𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀢𑀼𑀫𑁆𑀳𑁂 𑀏𑀓𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀆𑀳. 𑀢𑀺𑀢𑁆𑀣𑀺𑀬𑀸 𑀅𑀦𑀸𑀮𑀧𑀦𑁆𑀢𑀸 𑀆𑀭𑀸𑀫𑀧𑀭𑀺𑀬𑀦𑁆𑀢𑁂 𑀧𑀝𑀺𑀘𑁆𑀙𑀦𑁆𑀦𑁂 𑀞𑀸𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀆𑀮𑀧𑀦𑁆𑀢𑀻 𑀧𑀝𑀺𑀯𑀘𑀦𑀁 𑀅𑀮𑀪𑀺𑀢𑁆𑀯𑀸 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀅𑀧𑀭𑀚𑁆𑀛𑀁? 𑀓𑀲𑁆𑀫𑀸 𑀫𑁂 𑀧𑀝𑀺𑀯𑀘𑀦𑀁 𑀦 𑀤𑁂𑀣𑀸𑀢𑀺? 𑀢𑀣𑀸 𑀳𑀺 𑀧𑀦 𑀢𑁆𑀯𑀁 𑀅𑀫𑁆𑀳𑁂 𑀯𑀺𑀳𑁂𑀞𑀺𑀬𑀫𑀸𑀦𑁂 𑀅𑀚𑁆𑀛𑀼𑀧𑁂𑀓𑁆𑀔𑀲𑀻𑀢𑀺. 𑀓𑁄 𑀢𑀼𑀫𑁆𑀳𑁂 𑀯𑀺𑀳𑁂𑀞𑁂𑀢𑀻𑀢𑀺? ‘‘𑀓𑀺𑀁 𑀧𑀦 𑀢𑁆𑀯𑀁 𑀦 𑀧𑀲𑁆𑀲𑀲𑀺, 𑀲𑀫𑀡𑀁 𑀕𑁄𑀢𑀫𑀁 𑀅𑀫𑁆𑀳𑁂 𑀯𑀺𑀳𑁂𑀞𑁂𑀢𑁆𑀯𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑁂 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑀢𑁆𑀣 𑀫𑀬𑀸 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀢𑁆𑀯𑀁 𑀅𑀪𑀺𑀓𑁆𑀔𑀡𑀁 𑀚𑁂𑀢𑀯𑀦𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀏𑀯𑀜𑁆𑀘𑁂𑀯𑀜𑁆𑀘 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀆𑀳𑀁𑀲𑀼. 𑀲𑀸𑀧𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀪𑀕𑀯𑀢𑁄𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀉𑀲𑁆𑀲𑀳𑀲𑀻𑀢𑀺 𑀲𑀓𑁆𑀓𑁄𑀲𑀺. 𑀅𑀢𑁆𑀣𑀦𑁆𑀢𑀺 𑀳𑀺𑀢𑀁 𑀓𑀺𑀘𑁆𑀘𑀁 𑀯𑀸. 𑀓𑁆𑀬𑀸𑀳𑀦𑁆𑀢𑀺 𑀓𑀺𑀁 𑀅𑀳𑀁. 𑀬𑀲𑁆𑀫𑀸 𑀢𑁂 𑀢𑀺𑀢𑁆𑀣𑀺𑀬𑀸 𑀢𑀲𑁆𑀲𑀸 𑀅𑀜𑁆𑀜𑀸𑀢𑀓𑀸𑀧𑀺 𑀲𑀫𑀸𑀦𑀸 𑀧𑀩𑁆𑀩𑀚𑁆𑀚𑀲𑀫𑁆𑀩𑀦𑁆𑀥𑀫𑀢𑁆𑀢𑁂𑀦 𑀲𑀗𑁆𑀕𑀡𑁆𑀳𑀺𑀢𑀼𑀁 𑀜𑀸𑀢𑀓𑀸 𑀯𑀺𑀬 𑀳𑀼𑀢𑁆𑀯𑀸 ‘‘𑀉𑀲𑁆𑀲𑀳𑀲𑀺 𑀢𑁆𑀯𑀁 𑀪𑀕𑀺𑀦𑀺 𑀜𑀸𑀢𑀻𑀦𑀁 𑀅𑀢𑁆𑀣𑀁 𑀓𑀸𑀢𑀼’’𑀦𑁆𑀢𑀺 𑀆𑀳𑀁𑀲𑀼. 𑀢𑀲𑁆𑀫𑀸 𑀲𑀸𑀧𑀺 𑀫𑀺𑀕𑀁 𑀯𑀮𑁆𑀮𑀺 𑀯𑀺𑀬 𑀧𑀸𑀤𑁂 𑀮𑀕𑁆𑀕𑀸 𑀚𑀻𑀯𑀺𑀢𑀫𑁆𑀧𑀺 𑀫𑁂 𑀧𑀭𑀺𑀘𑁆𑀘𑀢𑁆𑀢𑀁 𑀜𑀸𑀢𑀻𑀦𑀁 𑀅𑀢𑁆𑀣𑀸𑀬𑀸𑀢𑀺 𑀆𑀳.

𑀢𑁂𑀦 𑀳𑀻𑀢𑀺 ‘‘𑀬𑀲𑁆𑀫𑀸 𑀢𑁆𑀯𑀁 ‘𑀚𑀻𑀯𑀺𑀢𑀫𑁆𑀧𑀺 𑀫𑁂 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢’𑀦𑁆𑀢𑀺 𑀯𑀤𑀲𑀺, 𑀢𑁆𑀯𑀜𑁆𑀘 𑀧𑀞𑀫𑀯𑀬𑁂 𑀞𑀺𑀢𑀸 𑀅𑀪𑀺𑀭𑀽𑀧𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀘, 𑀢𑀲𑁆𑀫𑀸 𑀬𑀣𑀸 𑀢𑀁 𑀦𑀺𑀲𑁆𑀲𑀸𑀬 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀬𑀲𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀣𑀸 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 ‘‘𑀅𑀪𑀺𑀓𑁆𑀔𑀡𑀁 𑀚𑁂𑀢𑀯𑀦𑀁 𑀕𑀘𑁆𑀙𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀲𑀼𑀁. 𑀲𑀸𑀧𑀺 𑀔𑁄 𑀩𑀸𑀮𑀸 𑀓𑀓𑀘𑀤𑀦𑁆𑀢𑀧𑀦𑁆𑀢𑀺𑀬𑀸 𑀧𑀼𑀧𑁆𑀨𑀸𑀯𑀮𑀺𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑀸 𑀯𑀺𑀬, 𑀧𑀪𑀺𑀦𑁆𑀦𑀫𑀤𑀁 𑀘𑀡𑁆𑀟𑀳𑀢𑁆𑀣𑀺𑀁 𑀲𑁄𑀡𑁆𑀟𑀸𑀬 𑀧𑀭𑀸𑀫𑀲𑀦𑁆𑀢𑀻 𑀯𑀺𑀬, 𑀦𑀮𑀸𑀝𑁂𑀦 𑀫𑀘𑁆𑀘𑀼𑀁 𑀕𑀡𑁆𑀳𑀦𑁆𑀢𑀻 𑀯𑀺𑀬 𑀢𑀺𑀢𑁆𑀣𑀺𑀬𑀸𑀦𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀢𑀫𑁆𑀩𑀽𑀮𑀫𑀼𑀔𑀯𑀸𑀲𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀦𑀓𑀸𑀮𑁂 𑀚𑁂𑀢𑀯𑀦𑀸𑀪𑀺𑀫𑀼𑀔𑀻 𑀕𑀘𑁆𑀙𑀦𑁆𑀢𑀻 ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁, 𑀅𑀳𑀜𑁆𑀳𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀢𑀺𑀢𑁆𑀣𑀺𑀬𑀸𑀭𑀸𑀫𑁂 𑀯𑀲𑀺𑀢𑁆𑀯𑀸 𑀧𑀸𑀢𑁄𑀯 𑀚𑁂𑀢𑀯𑀦𑀫𑀕𑁆𑀕𑀁 𑀑𑀢𑀭𑀺𑀢𑁆𑀯𑀸 𑀦𑀕𑀭𑀸𑀪𑀺𑀫𑀼𑀔𑀻 𑀆𑀕𑀘𑁆𑀙𑀦𑁆𑀢𑀻 ‘‘𑀓𑀺𑀁 𑀲𑀼𑀦𑁆𑀤𑀭𑀺 𑀓𑀳𑀁 𑀕𑀢𑀸𑀲𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑁆𑀯𑀸 𑀢𑀁 𑀓𑀺𑀮𑁂𑀲𑀭𑀢𑀺𑀬𑀸 𑀭𑀫𑀸𑀧𑁂𑀢𑁆𑀯𑀸 𑀆𑀕𑀢𑀸𑀫𑁆𑀳𑀻’’𑀢𑀺 𑀯𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀅𑀬𑁆𑀬𑀸𑀢𑀺 𑀔𑁄 𑀲𑀼𑀦𑁆𑀤𑀭𑀻 𑀧𑀭𑀺𑀩𑁆𑀩𑀸𑀚𑀺𑀓𑀸 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀅𑀪𑀺𑀓𑁆𑀔𑀡𑀁 𑀚𑁂𑀢𑀯𑀦𑀁 𑀅𑀕𑀫𑀸𑀲𑀻’’𑀢𑀺.

𑀢𑀺𑀢𑁆𑀣𑀺𑀬𑀸 𑀓𑀢𑀺𑀧𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀥𑀼𑀢𑁆𑀢𑀸𑀦𑀁 𑀓𑀳𑀸𑀧𑀡𑁂 𑀤𑀢𑁆𑀯𑀸 ‘‘𑀕𑀘𑁆𑀙𑀣, 𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀕𑀦𑁆𑀥𑀓𑀼𑀝𑀺𑀬𑀸 𑀅𑀯𑀺𑀤𑀽𑀭𑁂 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀣𑀸’’𑀢𑀺 𑀯𑀤𑀺𑀁𑀲𑀼. 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑀢𑁄 𑀢𑀺𑀢𑁆𑀣𑀺𑀬𑀸 ‘‘𑀲𑀼𑀦𑁆𑀤𑀭𑀺𑀁 𑀦 𑀧𑀲𑁆𑀲𑀸𑀫𑀸’’𑀢𑀺 𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 ‘‘𑀓𑀢𑁆𑀣 𑀧𑀦 𑀢𑀼𑀫𑁆𑀳𑁂 𑀧𑀭𑀺𑀲𑀗𑁆𑀓𑀣𑀸’’𑀢𑀺 𑀭𑀜𑁆𑀜𑀸 𑀯𑀼𑀢𑁆𑀢𑀸 𑀇𑀫𑁂𑀲𑀼 𑀤𑀺𑀯𑀲𑁂𑀲𑀼 𑀚𑁂𑀢𑀯𑀦𑁂 𑀯𑀲𑀢𑀺, 𑀢𑀢𑁆𑀣𑀲𑁆𑀲𑀸 𑀧𑀯𑀢𑁆𑀢𑀺𑀁 𑀦 𑀚𑀸𑀦𑀸𑀫𑀸𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙𑀣, 𑀦𑀁 𑀢𑀢𑁆𑀣 𑀯𑀺𑀘𑀺𑀦𑀣𑀸’’𑀢𑀺 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂 𑀕𑀳𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀯𑀺𑀘𑀺𑀦𑀦𑁆𑀢𑀸 𑀯𑀺𑀬 𑀳𑀼𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀁 𑀩𑁆𑀬𑀽𑀳𑀺𑀢𑁆𑀯𑀸 𑀢𑀲𑁆𑀲𑀸 𑀲𑀭𑀻𑀭𑀁 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 ‘𑀲𑀢𑁆𑀣𑀼𑀦𑀸 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀲𑁆𑀲𑀸𑀫𑀸’𑀢𑀺 𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀁𑀲𑀽’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸𑀧𑀺 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 ‘‘𑀢𑁂𑀦 𑀳𑀺 𑀕𑀘𑁆𑀙𑀣, 𑀦𑀕𑀭𑀁 𑀆𑀳𑀺𑀡𑁆𑀟𑀣𑀸’’𑀢𑀺 𑀆𑀳. 𑀢𑁂 𑀦𑀕𑀭𑀯𑀻𑀣𑀻𑀲𑀼 ‘‘𑀧𑀲𑁆𑀲𑀣 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀯𑀺𑀘𑀭𑀺𑀢𑁆𑀯𑀸 𑀧𑀼𑀦 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀲𑀼𑀦𑁆𑀤𑀭𑀺𑀬𑀸 𑀲𑀭𑀻𑀭𑀁 𑀆𑀫𑀓𑀲𑀼𑀲𑀸𑀦𑁂 𑀅𑀝𑁆𑀝𑀓𑀁 𑀆𑀭𑁄𑀧𑁂𑀢𑁆𑀯𑀸 𑀭𑀓𑁆𑀔𑀸𑀧𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀬𑁂𑀪𑀼𑀬𑁆𑀬𑁂𑀦 ‘‘𑀧𑀲𑁆𑀲𑀣 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀩𑀳𑀺𑀦𑀕𑀭𑁂 𑀘 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀤𑀸 𑀢𑁂 𑀅𑀜𑁆𑀜𑀺𑀁𑀲𑀼 𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 ‘𑀯𑁄𑀤𑀺𑀝𑁆𑀞𑀸 𑀔𑁄 𑀲𑀼𑀦𑁆𑀤𑀭𑀻’’’𑀢𑀺𑀆𑀤𑀺.

𑀢𑀢𑁆𑀣 𑀅𑀜𑁆𑀜𑀺𑀁𑀲𑀽𑀢𑀺 𑀚𑀸𑀦𑀺𑀁𑀲𑀼. 𑀯𑁄𑀤𑀺𑀝𑁆𑀞𑀸𑀢𑀺 𑀩𑁆𑀬𑀧𑀤𑀺𑀝𑁆𑀞𑀸, 𑀚𑁂𑀢𑀯𑀦𑀁 𑀆𑀕𑀘𑁆𑀙𑀦𑁆𑀢𑀻 𑀘 𑀕𑀘𑁆𑀙𑀦𑁆𑀢𑀻 𑀘 𑀯𑀺𑀲𑁂𑀲𑀢𑁄 𑀤𑀺𑀝𑁆𑀞𑀸, 𑀩𑀳𑀼𑀮𑀁 𑀤𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀔𑀸𑀓𑀽𑀧𑁂𑀢𑀺 𑀤𑀻𑀖𑀺𑀓𑀸𑀯𑀸𑀝𑁂. 𑀬𑀸 𑀲𑀸, 𑀫𑀳𑀸𑀭𑀸𑀚, 𑀲𑀼𑀦𑁆𑀤𑀭𑀻𑀢𑀺, 𑀫𑀳𑀸𑀭𑀸𑀚, 𑀬𑀸 𑀲𑀸 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀭𑀽𑀧𑀲𑀼𑀦𑁆𑀤𑀭𑀢𑀸𑀬 ‘‘𑀲𑀼𑀦𑁆𑀤𑀭𑀻’’𑀢𑀺 𑀧𑀸𑀓𑀝𑀸 𑀅𑀪𑀺𑀜𑁆𑀜𑀸𑀢𑀸 𑀧𑀭𑀺𑀩𑁆𑀩𑀸𑀚𑀺𑀓𑀸. 𑀲𑀸 𑀦𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀲𑀸 𑀅𑀫𑁆𑀳𑀸𑀓𑀁 𑀘𑀓𑁆𑀔𑀼 𑀯𑀺𑀬 𑀚𑀻𑀯𑀺𑀢𑀁 𑀯𑀺𑀬 𑀘 𑀧𑀺𑀬𑀸𑀬𑀺𑀢𑀩𑁆𑀩𑀸, 𑀇𑀤𑀸𑀦𑀺 𑀦 𑀤𑀺𑀲𑁆𑀲𑀢𑀺. 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀧𑀼𑀭𑀺𑀲𑁂 𑀆𑀡𑀸𑀧𑁂𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀅𑀢𑁆𑀢𑀦𑀸 𑀬𑀣𑀸𑀞𑀧𑀺𑀢𑀁. ‘‘𑀬𑀣𑀸𑀦𑀺𑀔𑀸𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀧𑀣𑀯𑀺𑀬𑀁 𑀦𑀺𑀔𑀸𑀢𑀧𑁆𑀧𑀓𑀸𑀭𑀦𑁆𑀢𑀺 𑀅𑀢𑁆𑀣𑁄.

𑀭𑀣𑀺𑀬𑀸𑀬 𑀭𑀣𑀺𑀬𑀦𑁆𑀢𑀺 𑀯𑀻𑀣𑀺𑀢𑁄 𑀯𑀻𑀣𑀺𑀁. 𑀯𑀻𑀣𑀻𑀢𑀺 𑀳𑀺 𑀯𑀺𑀦𑀺𑀯𑀺𑀚𑁆𑀛𑀦𑀓𑀭𑀘𑁆𑀙𑀸. 𑀲𑀺𑀗𑁆𑀖𑀸𑀝𑀓𑀦𑁆𑀢𑀺 𑀢𑀺𑀓𑁄𑀡𑀭𑀘𑁆𑀙𑀸. 𑀅𑀮𑀚𑁆𑀚𑀺𑀦𑁄𑀢𑀺 𑀦 𑀮𑀚𑁆𑀚𑀺𑀦𑁄, 𑀧𑀸𑀧𑀚𑀺𑀕𑀼𑀘𑁆𑀙𑀸𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀲𑁆𑀲𑀻𑀮𑀸𑀢𑀺 𑀦𑀺𑀲𑁆𑀲𑀻𑀮𑀸. 𑀧𑀸𑀧𑀥𑀫𑁆𑀫𑀸𑀢𑀺 𑀮𑀸𑀫𑀓𑀲𑀪𑀸𑀯𑀸 𑀦𑀺𑀳𑀻𑀦𑀸𑀘𑀸𑀭𑀸. 𑀫𑀼𑀲𑀸𑀯𑀸𑀤𑀺𑀦𑁄𑀢𑀺 𑀤𑀼𑀲𑁆𑀲𑀻𑀮𑀸 𑀲𑀫𑀸𑀦𑀸 ‘‘𑀲𑀻𑀮𑀯𑀦𑁆𑀢𑁄 𑀫𑀬’’𑀦𑁆𑀢𑀺 𑀅𑀮𑀺𑀓𑀯𑀸𑀤𑀺𑀢𑀸𑀬 𑀫𑀼𑀲𑀸𑀯𑀸𑀤𑀺𑀦𑁄. 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀢𑀺 ‘‘𑀫𑁂𑀣𑀼𑀦𑀧𑁆𑀧𑀝𑀺𑀲𑁂𑀯𑀺𑀢𑀸𑀬 𑀅𑀲𑁂𑀝𑁆𑀞𑀘𑀸𑀭𑀺𑀦𑁄 𑀇𑀫𑁂 𑀳𑀺 𑀦𑀸𑀫𑀸’’𑀢𑀺 𑀳𑀻𑀴𑁂𑀦𑁆𑀢𑀸 𑀯𑀤𑀦𑁆𑀢𑀺. 𑀥𑀫𑁆𑀫𑀘𑀸𑀭𑀺𑀦𑁄𑀢𑀺 𑀓𑀼𑀲𑀮𑀥𑀫𑁆𑀫𑀘𑀸𑀭𑀺𑀦𑁄. 𑀲𑀫𑀘𑀸𑀭𑀺𑀦𑁄𑀢𑀺 𑀓𑀸𑀬𑀓𑀫𑁆𑀫𑀸𑀤𑀺𑀲𑀫𑀘𑀸𑀭𑀺𑀦𑁄. 𑀓𑀮𑁆𑀬𑀸𑀡𑀥𑀫𑁆𑀫𑀸𑀢𑀺 𑀲𑀼𑀦𑁆𑀤𑀭𑀲𑀪𑀸𑀯𑀸, 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀺 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀫𑀲𑀤𑁆𑀤𑀬𑁄𑀕𑁂𑀦 𑀳𑀺 𑀏𑀢𑁆𑀣 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀸𑀕𑀢𑀓𑀸𑀮𑀯𑀘𑀦𑀁. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀪𑀸𑀯𑁄 𑀲𑀫𑀺𑀢𑀧𑀸𑀧𑀢𑀸. 𑀩𑁆𑀭𑀳𑁆𑀫𑀜𑁆𑀜𑀦𑁆𑀢𑀺 𑀲𑁂𑀝𑁆𑀞𑀪𑀸𑀯𑁄 𑀩𑀸𑀳𑀺𑀢𑀧𑀸𑀧𑀢𑀸. 𑀓𑀼𑀢𑁄𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀅𑀧𑀕𑀢𑀸𑀢𑀺 𑀅𑀧𑁂𑀢𑀸 𑀧𑀭𑀺𑀪𑀝𑁆𑀞𑀸. 𑀧𑀼𑀭𑀺𑀲𑀓𑀺𑀘𑁆𑀘𑀦𑁆𑀢𑀺 𑀫𑁂𑀣𑀼𑀦𑀧𑁆𑀧𑀝𑀺𑀲𑁂𑀯𑀦𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺.

𑀅𑀣 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀢𑁂 𑀫𑀦𑀼𑀲𑁆𑀲𑁂 𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀘𑁄𑀤𑁂𑀣𑀸’’𑀢𑀺 𑀯𑀢𑁆𑀯𑀸 ‘‘𑀅𑀪𑀽𑀢𑀯𑀸𑀤𑀻’’𑀢𑀺 𑀕𑀸𑀣𑀫𑀸𑀳. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸…𑀧𑁂… 𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣𑀸’’𑀢𑀺. 𑀢𑀢𑁆𑀣 𑀦𑁂𑀲𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀤𑁄 𑀘𑀺𑀭𑀁 𑀪𑀯𑀺𑀲𑁆𑀲𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀢𑀲𑁆𑀲 𑀅𑀬𑀲𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 𑀪𑀺𑀓𑁆𑀔𑀽 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀆𑀳.

𑀕𑀸𑀣𑀸𑀬𑀁 𑀅𑀪𑀽𑀢𑀯𑀸𑀤𑀻𑀢𑀺 𑀧𑀭𑀲𑁆𑀲 𑀤𑁄𑀲𑀁 𑀅𑀤𑀺𑀲𑁆𑀯𑀸𑀯 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀅𑀪𑀽𑀢𑁂𑀦 𑀅𑀢𑀘𑁆𑀙𑁂𑀦 𑀧𑀭𑀁 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁄. 𑀬𑁄 𑀯𑀸𑀧𑀺 𑀓𑀢𑁆𑀯𑀸𑀢𑀺 𑀬𑁄 𑀯𑀸 𑀧𑀦 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀦𑀸𑀳𑀁 𑀏𑀢𑀁 𑀓𑀭𑁄𑀫𑀻’’𑀢𑀺 𑀆𑀳. 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀻𑀢𑀺 𑀢𑁂 𑀉𑀪𑁄𑀧𑀺 𑀚𑀦𑀸 𑀇𑀢𑁄 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀭𑀬𑀽𑀧𑀕𑀫𑀦𑁂𑀦 𑀕𑀢𑀺𑀬𑀸 𑀲𑀫𑀸 𑀪𑀯𑀦𑁆𑀢𑀺. 𑀕𑀢𑀺𑀬𑁂𑀯 𑀳𑀺 𑀦𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀆𑀬𑀽 𑀧𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀸. 𑀩𑀳𑀼𑀓𑀜𑁆𑀳𑀺 𑀧𑀸𑀧𑀁 𑀓𑀢𑁆𑀯𑀸 𑀘𑀺𑀭𑀁 𑀦𑀺𑀭𑀬𑁂 𑀧𑀘𑁆𑀘𑀢𑀺, 𑀧𑀭𑀺𑀢𑁆𑀢𑀓𑀁 𑀓𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑀫𑁂𑀯 𑀓𑀸𑀮𑀁 𑀧𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀦𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀮𑀸𑀫𑀓𑀫𑁂𑀯 𑀓𑀫𑁆𑀫𑀁, 𑀢𑁂𑀦 𑀯𑀼𑀢𑁆𑀢𑀁 𑁋 𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣𑀸𑀢𑀺. ‘‘𑀧𑀭𑀢𑁆𑀣𑀸’’𑀢𑀺 𑀇𑀫𑀲𑁆𑀲 𑀧𑀦 𑀧𑀤𑀲𑁆𑀲 𑀧𑀼𑀭𑀢𑁄 ‘‘𑀧𑁂𑀘𑁆𑀘𑀸’’𑀢𑀺𑀧𑀤𑁂𑀦 𑀲𑀫𑁆𑀩𑀦𑁆𑀥𑁄, 𑀧𑁂𑀘𑁆𑀘 𑀧𑀭𑀢𑁆𑀣 𑀇𑀢𑁄 𑀕𑀦𑁆𑀢𑁆𑀯𑀸 𑀢𑁂 𑀦𑀺𑀳𑀻𑀦𑀓𑀫𑁆𑀫𑀸 𑀧𑀭𑀮𑁄𑀓𑁂 𑀲𑀫𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀢𑀺 𑀉𑀕𑁆𑀕𑀳𑁂𑀢𑁆𑀯𑀸. 𑀅𑀓𑀸𑀭𑀓𑀸𑀢𑀺 𑀅𑀧𑀭𑀸𑀥𑀲𑁆𑀲 𑀦 𑀓𑀸𑀭𑀓𑀸. 𑀦𑀬𑀺𑀫𑁂𑀳𑀺 𑀓𑀢𑀦𑁆𑀢𑀺 𑀏𑀯𑀁 𑀓𑀺𑀭 𑀦𑁂𑀲𑀫𑀳𑁄𑀲𑀺 𑁋 𑀇𑀫𑁂𑀳𑀺 𑀲𑀫𑀡𑁂𑀳𑀺 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀳𑀺 𑀅𑀤𑁆𑀥𑀸 𑀢𑀁 𑀧𑀸𑀧𑀓𑀫𑁆𑀫𑀁 𑀦 𑀓𑀢𑀁, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀉𑀕𑁆𑀖𑁄𑀲𑀺𑀢𑁆𑀯𑀸 𑀲𑀓𑀮𑀦𑀕𑀭𑀁 𑀆𑀳𑀺𑀡𑁆𑀟𑀺𑀁𑀲𑀼, 𑀬𑀲𑁆𑀫𑀸 𑀇𑀫𑁂 𑀅𑀫𑁆𑀳𑁂𑀲𑀼 𑀏𑀯𑀁 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀲𑀼𑀧𑀺 𑀦 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀺, 𑀔𑀦𑁆𑀢𑀺𑀲𑁄𑀭𑀘𑁆𑀘𑀜𑁆𑀘 𑀦 𑀯𑀺𑀚𑀳𑀦𑁆𑀢𑀺, 𑀓𑁂𑀯𑀮𑀁 𑀧𑀦 ‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀻’’𑀢𑀺 𑀥𑀫𑁆𑀫𑀁𑀬𑁂𑀯 𑀯𑀤𑀦𑁆𑀢𑀸 𑀲𑀧𑀦𑁆𑀢𑀺𑀬𑁂𑀯, 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀫𑁆𑀳𑁂 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂 𑀲𑀧𑀦𑁆𑀢𑀺, 𑀲𑀧𑀣𑀁 𑀓𑀭𑁄𑀦𑁆𑀢𑀸 𑀯𑀺𑀬 𑀯𑀤𑀦𑁆𑀢𑀺. 𑀅𑀣 𑀯𑀸 ‘‘𑀬𑁄 𑀯𑀸𑀧𑀺 𑀓𑀢𑁆𑀯𑀸 ‘𑀦 𑀓𑀭𑁄𑀫𑀺’ 𑀘𑀸𑀳𑀸’’𑀢𑀺 𑀯𑀤𑀦𑁆𑀢𑀸 𑀲𑀧𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀓𑀸𑀭𑀓𑀪𑀸𑀯𑀁 𑀩𑁄𑀥𑁂𑀢𑀼𑀁 𑀅𑀫𑁆𑀳𑀸𑀓𑀁 𑀲𑀧𑀣𑀁 𑀓𑀭𑁄𑀦𑁆𑀢𑀺 𑀇𑀫𑁂𑀢𑀺 𑀅𑀢𑁆𑀣𑁄.

𑀢𑁂𑀲𑀜𑁆𑀳𑀺 𑀫𑀦𑀼𑀲𑁆𑀲𑀸𑀦𑀁 𑀪𑀕𑀯𑀢𑀸 𑀪𑀸𑀲𑀺𑀢𑀕𑀸𑀣𑀸𑀬 𑀲𑀯𑀦𑀲𑀫𑀦𑀦𑁆𑀢𑀭𑀫𑁂𑀯 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀸𑀭𑀚𑁆𑀚𑀁 𑀑𑀓𑁆𑀓𑀫𑀺, 𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺 ‘‘𑀦𑀬𑀺𑀤𑀁 𑀅𑀫𑁆𑀳𑁂𑀳𑀺 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀁, 𑀲𑀼𑀢𑀁 𑀦𑀸𑀫 𑀢𑀣𑀸𑀧𑀺 𑀳𑁄𑀢𑀺, 𑀅𑀜𑁆𑀜𑀣𑀸𑀧𑀺 𑀳𑁄𑀢𑀺, 𑀏𑀢𑁂 𑀘 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀇𑀫𑁂𑀲𑀁 𑀅𑀦𑀢𑁆𑀣𑀓𑀸𑀫𑀸 𑀅𑀳𑀺𑀢𑀓𑀸𑀫𑀸, 𑀢𑀲𑁆𑀫𑀸 𑀢𑁂 𑀲𑀤𑁆𑀥𑀸𑀬 𑀦𑀬𑀺𑀤𑀁 𑀅𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑀁, 𑀤𑀼𑀚𑁆𑀚𑀸𑀦𑀸 𑀳𑀺 𑀲𑀫𑀡𑀸’’𑀢𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀢𑀢𑁄 𑀑𑀭𑀫𑀺𑀁𑀲𑀼.

𑀭𑀸𑀚𑀸𑀧𑀺 𑀬𑁂𑀳𑀺 𑀲𑀼𑀦𑁆𑀤𑀭𑀻 𑀫𑀸𑀭𑀺𑀢𑀸, 𑀢𑁂𑀲𑀁 𑀚𑀸𑀦𑀦𑀢𑁆𑀣𑀁 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺. 𑀅𑀣 𑀢𑁂 𑀥𑀼𑀢𑁆𑀢𑀸 𑀢𑁂𑀳𑀺 𑀓𑀳𑀸𑀧𑀡𑁂𑀳𑀺 𑀲𑀼𑀭𑀁 𑀧𑀺𑀯𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀭𑀺𑀁𑀲𑀼. 𑀢𑁂𑀲𑀼 𑀳𑀺 𑀏𑀓𑁄 𑀏𑀓𑀁 𑀆𑀳 𑁋 ‘‘𑀢𑁆𑀯𑀁 𑀲𑀼𑀦𑁆𑀤𑀭𑀺𑀁 𑀏𑀓𑀧𑁆𑀧𑀳𑀸𑀭𑁂𑀦 𑀫𑀸𑀭𑁂𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀔𑀺𑀧𑀺𑀢𑁆𑀯𑀸 𑀢𑀢𑁄 𑀮𑀤𑁆𑀥𑀓𑀳𑀸𑀧𑀡𑁂𑀳𑀺 𑀲𑀼𑀭𑀁 𑀧𑀺𑀯𑀲𑀺, 𑀳𑁄𑀢𑀼 𑀳𑁄𑀢𑀽’’𑀢𑀺. 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀲𑀼𑀢𑁆𑀯𑀸 𑀢𑁂 𑀥𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 ‘‘𑀢𑀼𑀫𑁆𑀳𑁂𑀳𑀺 𑀲𑀸 𑀫𑀸𑀭𑀺𑀢𑀸’’𑀢𑀺 𑀢𑁂 𑀥𑀼𑀢𑁆𑀢𑁂 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑁂𑀳𑀺 𑀫𑀸𑀭𑀸𑀧𑀺𑀢𑀸’’𑀢𑀺? ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀺𑀢𑁆𑀣𑀺𑀬𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀧𑀝𑀺𑀚𑀸𑀦𑀸𑀧𑁂𑀢𑁆𑀯𑀸, ‘‘𑀅𑀬𑀁 𑀲𑀼𑀦𑁆𑀤𑀭𑀻 𑀢𑀲𑁆𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀆𑀭𑁄𑀧𑁂𑀢𑀼𑀓𑀸𑀫𑁂𑀳𑀺 𑀅𑀫𑁆𑀳𑁂𑀳𑀺 𑀫𑀸𑀭𑀸𑀧𑀺𑀢𑀸, 𑀦𑁂𑀯 𑀕𑁄𑀢𑀫𑀲𑁆𑀲, 𑀦 𑀕𑁄𑀢𑀫𑀲𑀸𑀯𑀓𑀸𑀦𑀁 𑀤𑁄𑀲𑁄 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀫𑁂𑀯 𑀤𑁄𑀲𑁄𑀢𑀺 𑀏𑀯𑀁 𑀯𑀤𑀦𑁆𑀢𑀸 𑀦𑀕𑀭𑀁 𑀆𑀳𑀺𑀡𑁆𑀟𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀫𑀳𑀸𑀚𑀦𑁄 𑀲𑀫𑁆𑀫𑀤𑁂𑀯 𑀲𑀤𑁆𑀤𑀳𑀺. 𑀢𑀺𑀢𑁆𑀣𑀺𑀬𑀸𑀦𑀁 𑀥𑀺𑀓𑁆𑀓𑀸𑀭𑀁 𑀅𑀓𑀸𑀲𑀺, 𑀢𑀺𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑀯𑀥𑀤𑀡𑁆𑀟𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀫𑀳𑀸 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀢𑁆𑀢𑀫𑀦𑀸 𑀧𑀝𑀺𑀯𑁂𑀤𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽…𑀧𑁂… 𑀅𑀦𑁆𑀢𑀭𑀳𑀺𑀢𑁄 𑀲𑁄, 𑀪𑀦𑁆𑀢𑁂, 𑀲𑀤𑁆𑀤𑁄’’𑀢𑀺.

𑀓𑀲𑁆𑀫𑀸 𑀧𑀦 𑀪𑀕𑀯𑀸 ‘‘𑀢𑀺𑀢𑁆𑀣𑀺𑀬𑀸𑀦𑀁 𑀇𑀤𑀁 𑀓𑀫𑁆𑀫’’𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀦𑀸𑀭𑁄𑀘𑁂𑀲𑀺? 𑀅𑀭𑀺𑀬𑀸𑀦𑀁 𑀢𑀸𑀯 𑀆𑀭𑁄𑀘𑀦𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀦 ‘‘𑀬𑁂 𑀦 𑀲𑀤𑁆𑀤𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀦𑀸𑀭𑁄𑀘𑁂𑀲𑀺. 𑀅𑀧𑀺𑀘𑁂𑀢𑀁 𑀩𑀼𑀤𑁆𑀥𑀸𑀦𑀁 𑀅𑀦𑀸𑀘𑀺𑀡𑁆𑀡𑀁, 𑀬𑀁 𑀅𑀦𑀸𑀕𑀢𑀲𑁆𑀲 𑀈𑀤𑀺𑀲𑀲𑁆𑀲 𑀯𑀢𑁆𑀣𑀼𑀲𑁆𑀲 𑀆𑀘𑀺𑀓𑁆𑀔𑀦𑀁. 𑀧𑀭𑀸𑀦𑀼𑀤𑁆𑀤𑁂𑀲𑀺𑀓𑀫𑁂𑀯 𑀳𑀺 𑀪𑀕𑀯𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀯𑀺𑀪𑀸𑀯𑁂𑀢𑀺, 𑀓𑀫𑁆𑀫𑀜𑁆𑀘 𑀓𑀢𑁄𑀓𑀸𑀲𑀁 𑀦 𑀲𑀓𑁆𑀓𑀸 𑀦𑀺𑀯𑀢𑁆𑀢𑁂𑀢𑀼𑀦𑁆𑀢𑀺 𑀅𑀩𑁆𑀪𑀓𑁆𑀔𑀸𑀦𑀁 𑀢𑀦𑁆𑀦𑀺𑀫𑀺𑀢𑁆𑀢𑀜𑁆𑀘 𑀪𑀕𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑁆𑀢𑁄 𑀦𑀺𑀲𑀻𑀤𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂,

𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑀻 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄,

𑀬𑀢𑁆𑀣𑀝𑁆𑀞𑀺𑀢𑁄 𑀫𑀼𑀘𑁆𑀘𑁂𑀬𑁆𑀬 𑀧𑀸𑀧𑀓𑀫𑁆𑀫𑀸’’𑀢𑀺. (𑀥. 𑀧. 𑁧𑁨𑁭; 𑀫𑀺. 𑀧. 𑁪.𑁨.𑁪);

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀫𑀫𑁆𑀫𑀘𑁆𑀙𑁂𑀤𑀦𑀯𑀲𑁂𑀦𑀸𑀧𑀺 𑀩𑀸𑀮𑀚𑀦𑁂𑀳𑀺 𑀧𑀯𑀢𑁆𑀢𑀺𑀢𑀁 𑀤𑀼𑀭𑀼𑀢𑁆𑀢𑀯𑀘𑀦𑀁 𑀔𑀦𑁆𑀢𑀺𑀩𑀮𑀲𑀫𑀦𑁆𑀦𑀸𑀕𑀢𑀲𑁆𑀲 𑀥𑀻𑀭𑀲𑁆𑀲 𑀤𑀼𑀢𑁆𑀢𑀺𑀢𑀺𑀓𑁆𑀔𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀩𑀮𑀯𑀺𑀪𑀸𑀯𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀢𑀼𑀤𑀦𑁆𑀢𑀺 𑀯𑀸𑀘𑀸𑀬 𑀚𑀦𑀸 𑀅𑀲𑀜𑁆𑀜𑀢𑀸, 𑀲𑀭𑁂𑀳𑀺 𑀲𑀗𑁆𑀕𑀸𑀫𑀕𑀢𑀁𑀯 𑀓𑀼𑀜𑁆𑀚𑀭𑀦𑁆𑀢𑀺 𑀓𑀸𑀬𑀺𑀓𑀲𑀁𑀯𑀭𑀸𑀤𑀻𑀲𑀼 𑀓𑀲𑁆𑀲𑀘𑀺𑀧𑀺 𑀲𑀁𑀯𑀭𑀲𑁆𑀲 𑀅𑀪𑀸𑀯𑁂𑀦 𑀅𑀲𑀁𑀬𑀢𑀸 𑀅𑀯𑀺𑀦𑀻𑀢𑀸 𑀩𑀸𑀮𑀚𑀦𑀸 𑀲𑀭𑁂𑀳𑀺 𑀲𑀸𑀬𑀓𑁂𑀳𑀺 𑀲𑀗𑁆𑀕𑀸𑀫𑀕𑀢𑀁 𑀬𑀼𑀤𑁆𑀥𑀕𑀢𑀁 𑀓𑀼𑀜𑁆𑀚𑀭𑀁𑀯 𑀳𑀢𑁆𑀣𑀺𑀦𑀸𑀕𑀁 𑀧𑀝𑀺𑀬𑁄𑀥𑀸 𑀯𑀺𑀬 𑀯𑀸𑀘𑀸𑀲𑀢𑁆𑀢𑀻𑀳𑀺 𑀢𑀼𑀤𑀦𑁆𑀢𑀺 𑀯𑀺𑀚𑁆𑀛𑀦𑁆𑀢𑀺, 𑀅𑀬𑀁 𑀢𑁂𑀲𑀁 𑀲𑀪𑀸𑀯𑁄. 𑀲𑀼𑀢𑁆𑀯𑀸𑀦 𑀯𑀸𑀓𑁆𑀬𑀁 𑀨𑀭𑀼𑀲𑀁 𑀉𑀤𑀻𑀭𑀺𑀢𑀁, 𑀅𑀥𑀺𑀯𑀸𑀲𑀬𑁂 𑀪𑀺𑀓𑁆𑀔𑀼 𑀅𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀢𑀁 𑀧𑀦 𑀢𑁂𑀳𑀺 𑀩𑀸𑀮𑀚𑀦𑁂𑀳𑀺 𑀉𑀤𑀻𑀭𑀺𑀢𑀁 𑀪𑀸𑀲𑀺𑀢𑀁 𑀫𑀫𑁆𑀫𑀖𑀝𑁆𑀝𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀨𑀭𑀼𑀲𑀁 𑀯𑀸𑀓𑁆𑀬𑀁 𑀯𑀘𑀦𑀁 𑀅𑀪𑀽𑀢𑀁 𑀪𑀽𑀢𑀢𑁄 𑀦𑀺𑀩𑁆𑀩𑁂𑀞𑁂𑀦𑁆𑀢𑁄 𑀫𑀫 𑀓𑀓𑀘𑀽𑀧𑀫𑀑𑀯𑀸𑀤𑀁 (𑀫. 𑀦𑀺. 𑁧.𑁨𑁨𑁨 𑀆𑀤𑀬𑁄) 𑀅𑀦𑀼𑀲𑁆𑀲𑀭𑀦𑁆𑀢𑁄 𑀈𑀲𑀓𑀫𑁆𑀧𑀺 𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀲𑀁𑀲𑀸𑀭𑀲𑀪𑀸𑀯𑁄 𑀏𑀲𑁄’’𑀢𑀺 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀡𑀲𑀻𑀮𑁄 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑀬𑁂, 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀁 𑀞𑀢𑁆𑀯𑀸 𑀔𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦 𑀢𑀁 𑀓𑀫𑁆𑀫𑀁, 𑀬𑀁 𑀅𑀧𑀭𑀺𑀫𑀸𑀡𑀓𑀸𑀮𑀁 𑀲𑀓𑁆𑀓𑀘𑁆𑀘𑀁 𑀉𑀧𑀘𑀺𑀢𑀯𑀺𑀧𑀼𑀮𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀲𑀢𑁆𑀣𑀸 𑀏𑀯𑀁 𑀤𑀸𑀭𑀼𑀡𑀁 𑀅𑀪𑀽𑀢𑀩𑁆𑀪𑀓𑁆𑀔𑀸𑀦𑀁 𑀧𑀸𑀧𑀼𑀡𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀬𑀁 𑀲𑁄 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀅𑀢𑀻𑀢𑀚𑀸𑀢𑀺𑀬𑀁 𑀫𑀼𑀦𑀸𑀴𑀺 𑀦𑀸𑀫 𑀥𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀸𑀧𑀚𑀦𑀲𑁂𑀯𑀻 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑁄 𑀯𑀺𑀘𑀭𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀲𑀼𑀭𑀪𑀺𑀁 𑀦𑀸𑀫 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀁 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑀁 𑀧𑀲𑁆𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀢𑀲𑁆𑀲 𑀅𑀯𑀺𑀤𑀽𑀭𑁂𑀦 𑀕𑀘𑁆𑀙𑀢𑀺. 𑀥𑀼𑀢𑁆𑀢𑁄 ‘‘𑀅𑀩𑁆𑀭𑀳𑁆𑀫𑀘𑀸𑀭𑀻 𑀅𑀬𑀁 𑀲𑀫𑀡𑁄’’𑀢𑀺 𑀅𑀩𑁆𑀪𑀸𑀘𑀺𑀓𑁆𑀔𑀺. 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀤𑀸𑀦𑀺 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀧𑀺 𑀲𑀼𑀦𑁆𑀤𑀭𑀺𑀬𑀸 𑀓𑀸𑀭𑀡𑀸 𑀅𑀪𑀽𑀢𑀩𑁆𑀪𑀓𑁆𑀔𑀸𑀦𑀁 𑀧𑀸𑀧𑀼𑀡𑀺. 𑀬𑀣𑀸 𑀘𑁂𑀢𑀁, 𑀏𑀯𑀁 𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀤𑀻𑀦𑀁 𑀯𑀺𑀓𑀸𑀭𑀓𑀺𑀢𑁆𑀣𑀻𑀦𑀁 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀸𑀤𑀻𑀦𑀺 𑀤𑀼𑀓𑁆𑀔𑀸𑀦𑀺 𑀧𑀢𑁆𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑀸𑀦𑀺, 𑀬𑀸𑀦𑀺 ‘‘𑀓𑀫𑁆𑀫𑀧𑀺𑀮𑁄𑀢𑀺𑀓𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁩𑁯.𑁬𑁪-𑁯𑁬) 𑁋

‘‘𑀅𑀦𑁄𑀢𑀢𑁆𑀢𑀲𑀭𑀸𑀲𑀦𑁆𑀦𑁂, 𑀭𑀫𑀡𑀻𑀬𑁂 𑀲𑀺𑀮𑀸𑀢𑀮𑁂;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀦𑀸𑀦𑀸𑀕𑀦𑁆𑀥𑀯𑀦𑀦𑁆𑀢𑀭𑁂.

‘‘𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀧𑀭𑁂𑀢𑁄 𑀮𑁄𑀓𑀦𑀸𑀬𑀓𑁄;

𑀆𑀲𑀻𑀦𑁄 𑀩𑁆𑀬𑀸𑀓𑀭𑀻 𑀢𑀢𑁆𑀣, 𑀧𑀼𑀩𑁆𑀩𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑁄.

‘‘𑀲𑀼𑀡𑀸𑀣 𑀪𑀺𑀓𑁆𑀔𑀯𑁄 𑀫𑀬𑁆𑀳𑀁, 𑀬𑀁 𑀓𑀫𑁆𑀫𑀁 𑀧𑀓𑀢𑀁 𑀫𑀬𑀸;

𑀧𑀺𑀮𑁄𑀢𑀺𑀓𑀲𑁆𑀲 𑀓𑀫𑁆𑀫𑀲𑁆𑀲, 𑀩𑀼𑀤𑁆𑀥𑀢𑁆𑀢𑁂𑀧𑀺 𑀯𑀺𑀧𑀘𑁆𑀘𑀢𑀺.

𑁧. ‘‘𑀫𑀼𑀦𑀸𑀴𑀺 𑀦𑀸𑀫𑀳𑀁 𑀥𑀼𑀢𑁆𑀢𑁄, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼;

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀼𑀭𑀪𑀺𑀁, 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀩𑀳𑀽 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀤𑀼𑀓𑁆𑀔𑀁 𑀯𑁂𑀤𑁂𑀫𑀺 𑀯𑁂𑀤𑀦𑀁.

‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀫𑀬𑀸 𑀮𑀤𑁆𑀥𑀁, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸.

𑁨. ‘‘𑀲𑀩𑁆𑀩𑀸𑀪𑀺𑀪𑀼𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀦𑀦𑁆𑀤𑁄 𑀦𑀸𑀫𑀸𑀲𑀺 𑀲𑀸𑀯𑀓𑁄;

𑀢𑀁 𑀅𑀩𑁆𑀪𑀓𑁆𑀔𑀸𑀬 𑀦𑀺𑀭𑀬𑁂, 𑀘𑀺𑀭𑀁 𑀲𑀁𑀲𑀭𑀺𑀢𑀁 𑀫𑀬𑀸.

‘‘𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀫𑀦𑀼𑀲𑁆𑀲𑀪𑀸𑀯𑀁 𑀮𑀤𑁆𑀥𑀸𑀳𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀩𑀳𑀼𑀁 𑀮𑀪𑀺𑀁.

‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀫𑀫𑀁;

𑀅𑀩𑁆𑀪𑀸𑀘𑀺𑀓𑁆𑀔𑀺 𑀅𑀪𑀽𑀢𑁂𑀦, 𑀚𑀦𑀓𑀸𑀬𑀲𑁆𑀲 𑀅𑀕𑁆𑀕𑀢𑁄.

𑁩. ‘‘𑀩𑁆𑀭𑀸𑀳𑁆𑀫𑀡𑁄 𑀲𑀼𑀢𑀯𑀸 𑀆𑀲𑀺𑀁, 𑀅𑀳𑀁 𑀲𑀓𑁆𑀓𑀢𑀧𑀽𑀚𑀺𑀢𑁄;

𑀫𑀳𑀸𑀯𑀦𑁂 𑀧𑀜𑁆𑀘𑀲𑀢𑁂, 𑀫𑀦𑁆𑀢𑁂 𑀯𑀸𑀘𑁂𑀫𑀺 𑀫𑀸𑀡𑀯𑁂.

‘‘𑀢𑀢𑁆𑀣𑀸𑀕𑀢𑁄 𑀇𑀲𑀻 𑀪𑀻𑀫𑁄, 𑀧𑀜𑁆𑀘𑀸𑀪𑀺𑀜𑁆𑀜𑁄 𑀫𑀳𑀺𑀤𑁆𑀥𑀺𑀓𑁄;

𑀢𑀜𑁆𑀘𑀸𑀳𑀁 𑀆𑀕𑀢𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

‘‘𑀢𑀢𑁄𑀳𑀁 𑀅𑀯𑀘𑀁 𑀲𑀺𑀲𑁆𑀲𑁂, 𑀓𑀸𑀫𑀪𑁄𑀕𑀻 𑀅𑀬𑀁 𑀇𑀲𑀺;

𑀫𑀬𑁆𑀳𑀫𑁆𑀧𑀺 𑀪𑀸𑀲𑀫𑀸𑀦𑀲𑁆𑀲, 𑀅𑀦𑀼𑀫𑁄𑀤𑀺𑀁𑀲𑀼 𑀫𑀸𑀡𑀯𑀸.

‘‘𑀢𑀢𑁄 𑀫𑀸𑀡𑀯𑀓𑀸 𑀲𑀩𑁆𑀩𑁂, 𑀪𑀺𑀓𑁆𑀔𑀫𑀸𑀦𑀁 𑀓𑀼𑀮𑁂 𑀓𑀼𑀮𑁂;

𑀫𑀳𑀸𑀚𑀦𑀲𑁆𑀲 𑀆𑀳𑀁𑀲𑀼, 𑀓𑀸𑀫𑀪𑁄𑀕𑀻 𑀅𑀬𑀁 𑀇𑀲𑀺.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸 𑀇𑀫𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀮𑀪𑀼𑀁 𑀲𑀩𑁆𑀩𑁂, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸.

𑁪. ‘‘𑀯𑁂𑀫𑀸𑀢𑀼𑀪𑀸𑀢𑀺𑀓𑀁 𑀧𑀼𑀩𑁆𑀩𑁂, 𑀥𑀦𑀳𑁂𑀢𑀼 𑀳𑀦𑀺𑀁 𑀅𑀳𑀁;

𑀧𑀓𑁆𑀔𑀺𑀧𑀺𑀁𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀲𑀺𑀮𑀸𑀬 𑀘 𑀅𑀧𑀺𑀁𑀲𑀬𑀺𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀤𑁂𑀯𑀤𑀢𑁆𑀢𑁄 𑀲𑀺𑀮𑀁 𑀔𑀺𑀧𑀺;

𑀅𑀗𑁆𑀕𑀼𑀝𑁆𑀞𑀁 𑀧𑀺𑀁𑀲𑀬𑀻 𑀧𑀸𑀤𑁂, 𑀫𑀫 𑀧𑀸𑀲𑀸𑀡𑀲𑀓𑁆𑀔𑀭𑀸.

𑁫. ‘‘𑀧𑀼𑀭𑁂𑀳𑀁 𑀤𑀸𑀭𑀓𑁄 𑀳𑀼𑀢𑁆𑀯𑀸, 𑀓𑀻𑀴𑀫𑀸𑀦𑁄 𑀫𑀳𑀸𑀧𑀣𑁂;

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀫𑀕𑁆𑀕𑁂 𑀲𑀓𑀮𑀺𑀓𑀁 𑀔𑀺𑀧𑀺𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀯𑀥𑀢𑁆𑀣𑀁 𑀫𑀁 𑀤𑁂𑀯𑀤𑀢𑁆𑀢𑁄, 𑀅𑀪𑀺𑀫𑀸𑀭𑁂 𑀧𑀬𑁄𑀚𑀬𑀺.

𑁬. ‘‘𑀳𑀢𑁆𑀣𑀸𑀭𑁄𑀳𑁄 𑀧𑀼𑀭𑁂 𑀆𑀲𑀺𑀁, 𑀧𑀘𑁆𑀘𑁂𑀓𑀫𑀼𑀦𑀺𑀫𑀼𑀢𑁆𑀢𑀫𑀁;

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀢𑀁, 𑀆𑀲𑀸𑀤𑁂𑀲𑀺𑀁 𑀕𑀚𑁂𑀦𑀳𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀪𑀦𑁆𑀢𑁄 𑀦𑀸𑀴𑀸𑀕𑀺𑀭𑀻 𑀕𑀚𑁄;

𑀕𑀺𑀭𑀺𑀩𑁆𑀩𑀚𑁂 𑀧𑀼𑀭𑀯𑀭𑁂, 𑀤𑀸𑀭𑀼𑀡𑁄 𑀲𑀫𑀼𑀧𑀸𑀕𑀫𑀺.

𑁭. ‘‘𑀭𑀸𑀚𑀸𑀳𑀁 𑀧𑀢𑁆𑀣𑀺𑀯𑁄 𑀆𑀲𑀺𑀁, 𑀲𑀢𑁆𑀢𑀺𑀬𑀸 𑀧𑀼𑀭𑀺𑀲𑁂 𑀳𑀦𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀧𑀘𑁆𑀘𑀺𑀲𑀁 𑀪𑀼𑀲𑀁.

‘‘𑀓𑀫𑁆𑀫𑀼𑀦𑁄 𑀢𑀲𑁆𑀲 𑀲𑁂𑀲𑁂𑀦, 𑀲𑁄𑀤𑀸𑀦𑀺 𑀲𑀓𑀮𑀁 𑀫𑀫;

𑀧𑀸𑀤𑁂 𑀙𑀯𑀺𑀁 𑀧𑀓𑀧𑁆𑀧𑁂𑀲𑀺, 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺.

𑁮. ‘‘𑀅𑀳𑀁 𑀓𑁂𑀯𑀝𑁆𑀝𑀕𑀸𑀫𑀲𑁆𑀫𑀺𑀁, 𑀅𑀳𑀼𑀁 𑀓𑁂𑀯𑀝𑁆𑀝𑀤𑀸𑀭𑀓𑁄;

𑀫𑀘𑁆𑀙𑀓𑁂 𑀖𑀸𑀢𑀺𑀢𑁂 𑀤𑀺𑀲𑁆𑀯𑀸, 𑀚𑀦𑀬𑀺𑀁 𑀲𑁄𑀫𑀦𑀲𑁆𑀲𑀓𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀲𑀻𑀲𑀤𑀼𑀓𑁆𑀔𑀁 𑀅𑀳𑀽 𑀫𑀫;

𑀲𑀓𑁆𑀓𑀸 𑀘 𑀲𑀩𑁆𑀩𑁂 𑀳𑀜𑁆𑀜𑀺𑀁𑀲𑀼, 𑀬𑀤𑀸 𑀳𑀦𑀺 𑀯𑀺𑀝𑀝𑀽𑀪𑁄.

𑁯. ‘‘𑀨𑀼𑀲𑁆𑀲𑀲𑁆𑀲𑀸𑀳𑀁 𑀧𑀸𑀯𑀘𑀦𑁂, 𑀲𑀸𑀯𑀓𑁂 𑀧𑀭𑀺𑀪𑀸𑀲𑀬𑀺𑀁;

𑀬𑀯𑀁 𑀔𑀸𑀤𑀣 𑀪𑀼𑀜𑁆𑀚𑀣, 𑀫𑀸 𑀘 𑀪𑀼𑀜𑁆𑀚𑀣 𑀲𑀸𑀮𑀬𑁄.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀫𑀸𑀲𑀁 𑀔𑀸𑀤𑀺𑀢𑀁 𑀬𑀯𑀁;

𑀦𑀺𑀫𑀦𑁆𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺𑀁 𑀢𑀤𑀸.

𑁧𑁦. ‘‘𑀦𑀺𑀩𑁆𑀩𑀼𑀤𑁆𑀥𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀫𑀮𑁆𑀮𑀧𑀼𑀢𑁆𑀢𑀁 𑀦𑀺𑀳𑁂𑀞𑀬𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀺𑀝𑁆𑀞𑀺𑀤𑀼𑀓𑁆𑀔𑀁 𑀅𑀳𑀽 𑀫𑀫.

𑁧𑁧. ‘‘𑀢𑀺𑀓𑀺𑀘𑁆𑀙𑀓𑁄 𑀅𑀳𑀁 𑀆𑀲𑀺𑀁, 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀯𑀺𑀭𑁂𑀘𑀬𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀳𑁄𑀢𑀺 𑀧𑀓𑁆𑀔𑀦𑁆𑀤𑀺𑀓𑀸 𑀫𑀫.

𑁧𑁨. ‘‘𑀅𑀯𑀘𑀸𑀳𑀁 𑀚𑁄𑀢𑀺𑀧𑀸𑀮𑁄, 𑀓𑀲𑁆𑀲𑀧𑀁 𑀲𑀼𑀕𑀢𑀁 𑀢𑀤𑀸;

𑀓𑀼𑀢𑁄 𑀦𑀼 𑀩𑁄𑀥𑀺 𑀫𑀼𑀡𑁆𑀟𑀲𑁆𑀲, 𑀩𑁄𑀥𑀺 𑀧𑀭𑀫𑀤𑀼𑀮𑁆𑀮𑀪𑀸.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀘𑀭𑀺𑀁 𑀤𑀼𑀓𑁆𑀓𑀭𑀁 𑀩𑀳𑀼𑀁;

𑀙𑀩𑁆𑀩𑀲𑁆𑀲𑀸𑀦𑀼𑀭𑀼𑀯𑁂𑀮𑀸𑀬𑀁, 𑀢𑀢𑁄 𑀩𑁄𑀥𑀺𑀁 𑀅𑀧𑀸𑀧𑀼𑀡𑀺𑀁.

‘‘𑀦𑀸𑀳𑀁 𑀏𑀢𑁂𑀦 𑀫𑀕𑁆𑀕𑁂𑀦, 𑀧𑀸𑀧𑀼𑀡𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀓𑀼𑀫𑁆𑀫𑀕𑁆𑀕𑁂𑀦 𑀕𑀯𑁂𑀲𑀺𑀲𑁆𑀲𑀁, 𑀧𑀼𑀩𑁆𑀩𑀓𑀫𑁆𑀫𑁂𑀦 𑀯𑀸𑀭𑀺𑀢𑁄.

‘‘𑀧𑀼𑀜𑁆𑀜𑀧𑀸𑀧𑀧𑀭𑀺𑀓𑁆𑀔𑀻𑀡𑁄, 𑀲𑀩𑁆𑀩𑀲𑀦𑁆𑀢𑀸𑀧𑀯𑀚𑁆𑀚𑀺𑀢𑁄;

𑀅𑀲𑁄𑀓𑁄 𑀅𑀦𑀼𑀧𑀸𑀬𑀸𑀲𑁄, 𑀦𑀺𑀩𑁆𑀩𑀸𑀬𑀺𑀲𑁆𑀲𑀫𑀦𑀸𑀲𑀯𑁄.

‘‘𑀏𑀯𑀁 𑀚𑀺𑀦𑁄 𑀯𑀺𑀬𑀸𑀓𑀸𑀲𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀕𑁆𑀕𑀢𑁄;

𑀲𑀩𑁆𑀩𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀅𑀦𑁄𑀢𑀢𑁆𑀢𑀫𑀳𑀸𑀲𑀭𑁂’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁬𑁪-𑁯𑁬);

𑀅𑀝𑁆𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.