𑁧𑁦. 𑀲𑀸𑀭𑀺𑀧𑀼𑀢𑁆𑀢𑀉𑀧𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀅𑀢𑁆𑀢𑀦𑁄 𑀉𑀧𑀲𑀫𑀦𑁆𑀢𑀺 𑀲𑀸𑀯𑀓𑀧𑀸𑀭𑀫𑀻𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀁 𑀅𑀕𑁆𑀕𑀫𑀕𑁆𑀕𑁂𑀦 𑀅𑀢𑁆𑀢𑀦𑁄 𑀅𑀦𑀯𑀲𑁂𑀲𑀓𑀺𑀮𑁂𑀲𑀯𑀽𑀧𑀲𑀫𑀁.

𑀆𑀬𑀲𑁆𑀫𑀸 𑀳𑀺 𑀲𑀸𑀭𑀺𑀧𑀼𑀢𑁆𑀢𑁄 𑀅𑀦𑀼𑀧𑀲𑀦𑁆𑀢𑀓𑀺𑀮𑁂𑀲𑀸𑀦𑀁 𑀲𑀢𑁆𑀢𑀸𑀦𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀚𑀦𑀺𑀢𑀲𑀦𑁆𑀢𑀸𑀧𑀤𑀭𑀣𑀧𑀭𑀺𑀴𑀸𑀳𑀤𑀼𑀓𑁆𑀔𑀜𑁆𑀘𑁂𑀯 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁄𑀓𑀧𑀭𑀺𑀤𑁂𑀯𑀸𑀤𑀺𑀤𑀼𑀓𑁆𑀔𑀜𑁆𑀘 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 𑀅𑀢𑀻𑀢𑀸𑀦𑀸𑀕𑀢𑁂𑀧𑀺 𑀦𑁂𑀲𑀁 𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀁 𑀧𑀭𑀺𑀢𑀼𑀮𑁂𑀢𑁆𑀯𑀸 𑀓𑀭𑀼𑀡𑀸𑀬𑀫𑀸𑀦𑁄 𑀅𑀢𑁆𑀢𑀦𑀸𑀧𑀺 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀅𑀦𑀼𑀪𑀽𑀢𑀁 𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀁 𑀯𑀸 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀈𑀤𑀺𑀲𑀲𑁆𑀲 𑀦𑀸𑀫 𑀫𑀳𑀸𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀪𑀽𑀢𑀸 𑀓𑀺𑀮𑁂𑀲𑀸 𑀇𑀤𑀸𑀦𑀺 𑀫𑁂 𑀲𑀼𑀧𑁆𑀧𑀳𑀻𑀦𑀸’’𑀢𑀺 𑀅𑀢𑁆𑀢𑀦𑁄 𑀓𑀺𑀮𑁂𑀲𑀯𑀽𑀧𑀲𑀫𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀘 ‘‘𑀇𑀫𑁂 𑀏𑀢𑁆𑀢𑀓𑀸 𑀓𑀺𑀮𑁂𑀲𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀉𑀧𑀲𑀫𑀺𑀢𑀸, 𑀏𑀢𑁆𑀢𑀓𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦, 𑀏𑀢𑁆𑀢𑀓𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀏𑀢𑁆𑀢𑀓𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀉𑀧𑀲𑀫𑀺𑀢𑀸’’𑀢𑀺 𑀢𑀁𑀢𑀁𑀫𑀕𑁆𑀕𑀜𑀸𑀡𑁂𑀳𑀺 𑀑𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀉𑀧𑀲𑀫𑀺𑀢𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀢𑀦𑁄 𑀉𑀧𑀲𑀫𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄’’𑀢𑀺.

𑀅𑀧𑀭𑁂 ‘‘𑀣𑁂𑀭𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘𑀇𑀫𑀲𑁆𑀲 𑀯𑀢𑀸𑀬𑀁 𑀲𑀦𑁆𑀢𑀧𑀡𑀻𑀢𑀪𑀸𑀯𑁄 𑀅𑀘𑁆𑀘𑀦𑁆𑀢𑀲𑀦𑁆𑀢𑀸𑀬 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀢𑁄, 𑀲𑀬𑀜𑁆𑀘 𑀲𑀫𑁆𑀫𑀤𑁂𑀯 𑀓𑀺𑀮𑁂𑀲𑀯𑀽𑀧𑀲𑀫𑀢𑁄’𑀢𑀺 𑀏𑀯𑀁 𑀅𑀪𑀺𑀡𑁆𑀳𑀁 𑀉𑀧𑀲𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘‘𑀅𑀦𑀯𑀲𑁂𑀲𑀓𑀺𑀮𑁂𑀲𑀸𑀦𑀁 𑀉𑀧𑀲𑀫𑀧𑀭𑀺𑀬𑁄𑀲𑀸𑀦𑁂 𑀚𑀸𑀢𑀁 𑀅𑀕𑁆𑀕𑀨𑀮𑀫𑁂𑀯𑁂𑀢𑁆𑀣 𑀉𑀧𑀲𑀫𑁄 𑀦𑀸𑀫, 𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀦𑀺𑀲𑀺𑀦𑁆𑀦𑁄’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀬𑀤𑀺𑀤𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀫𑀳𑀸𑀧𑀜𑁆𑀜𑀢𑀸𑀤𑀺𑀳𑁂𑀢𑀼𑀪𑀽𑀢𑀁 𑀲𑀸𑀯𑀓𑁂𑀲𑀼 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀕𑁆𑀕𑀨𑀮𑀁 𑀯𑀸 𑀉𑀧𑀲𑀫𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀦𑀼𑀪𑀸𑀯𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀉𑀧𑀲𑀦𑁆𑀢𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀉𑀧𑀲𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀲𑀦𑁆𑀢𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀉𑀧𑀲𑀦𑁆𑀢𑀲𑀦𑁆𑀢𑀘𑀺𑀢𑁆𑀢𑁄. 𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑁂𑀦 𑀳𑀺 𑀉𑀧𑀲𑀦𑁆𑀢𑀓𑀺𑀮𑁂𑀲𑀢𑁆𑀢𑀸 𑀉𑀧𑀲𑀦𑁆𑀢𑀘𑀺𑀢𑁆𑀢𑀁 𑀦 𑀲𑀩𑁆𑀩𑀣𑀸 ‘‘𑀉𑀧𑀲𑀦𑁆𑀢𑀲𑀦𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀉𑀧𑀲𑀫𑀲𑁆𑀲 𑀅𑀦𑀘𑁆𑀘𑀦𑁆𑀢𑀺𑀓𑀪𑀸𑀯𑀢𑁄, 𑀦 𑀢𑀣𑀸 𑀅𑀕𑁆𑀕𑀫𑀕𑁆𑀕𑁂𑀦. 𑀢𑁂𑀦 𑀧𑀦 𑀅𑀘𑁆𑀘𑀦𑁆𑀢𑀫𑁂𑀯 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀭𑀳𑀢𑁄 𑀘𑀺𑀢𑁆𑀢𑀁 𑀧𑀼𑀦 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑀲𑀫𑁂𑀢𑀩𑁆𑀩𑀢𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀉𑀧𑀲𑀦𑁆𑀢𑀓𑀺𑀮𑁂𑀲𑀁 𑀳𑀼𑀢𑁆𑀯𑀸 𑀅𑀘𑁆𑀘𑀦𑁆𑀢𑀲𑀦𑁆𑀢𑀪𑀸𑀯𑀢𑁄𑀯 ‘‘𑀉𑀧𑀲𑀦𑁆𑀢𑀲𑀦𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀧𑀲𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀲𑀦𑁆𑀢𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀉𑀧𑀲𑀦𑁆𑀢𑀲𑀦𑁆𑀢𑀘𑀺𑀢𑁆𑀢𑁄’’𑀢𑀺. 𑀉𑀧𑀲𑀦𑁆𑀢𑀦𑁆𑀢𑀺 𑀯𑀸 𑀉𑀧𑀲𑀫𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀉𑀧𑀲𑀦𑁆𑀢𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀅𑀘𑁆𑀘𑀦𑁆𑀢𑀽𑀧𑀲𑀫𑁂𑀦 𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀲𑀢𑀺𑀧𑀺 𑀲𑀩𑁆𑀩𑁂𑀲𑀁 𑀔𑀻𑀡𑀸𑀲𑀯𑀸𑀦𑀁 𑀅𑀦𑀯𑀲𑁂𑀲𑀓𑀺𑀮𑁂𑀲𑀯𑀽𑀧𑀲𑀫𑁂 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀧𑀦 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀲𑀸𑀯𑀓𑁂𑀲𑀼 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀯𑀺𑀲𑁂𑀲𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀓𑀺𑀮𑁂𑀲𑀯𑀽𑀧𑀲𑀫𑁄𑀢𑀺 𑀤𑀲𑁆𑀲𑁂𑀢𑀼𑀁 𑀲𑀢𑁆𑀣𑀸 𑀉𑀧𑀲𑀦𑁆𑀢𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀆𑀳 ‘‘𑀉𑀧𑀲𑀦𑁆𑀢𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺.

𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀪𑀼𑀲𑀁 𑀤𑀴𑁆𑀳𑀁 𑀯𑀸 𑀲𑀦𑁆𑀢𑀁 𑀉𑀧𑀲𑀦𑁆𑀢𑀁, 𑀢𑁂𑀦 𑀉𑀧𑀲𑀦𑁆𑀢𑁂𑀦 𑀉𑀧𑀲𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀲𑀦𑁆𑀢𑀁 𑀉𑀧𑀲𑀦𑁆𑀢𑀲𑀦𑁆𑀢𑀁, 𑀢𑀸𑀤𑀺𑀲𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑀣𑀸 𑀳𑁂𑀲 𑀪𑀕𑀯𑀢𑀸 𑁋 ‘‘𑀲𑀸𑀭𑀺𑀧𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁯𑁩) 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀡𑁆𑀡𑀺𑀢𑁄 𑀣𑁄𑀫𑀺𑀢𑁄. 𑀦𑁂𑀢𑁆𑀢𑀺𑀘𑁆𑀙𑀺𑀦𑁆𑀦𑀲𑁆𑀲𑀸𑀢𑀺 𑀦𑁂𑀢𑁆𑀢𑀺 𑀯𑀼𑀘𑁆𑀘𑀢𑀺 𑀪𑀯𑀢𑀡𑁆𑀳𑀸 𑀲𑀁𑀲𑀸𑀭𑀲𑁆𑀲 𑀦𑀬𑀦𑀢𑁄, 𑀲𑀸 𑀦𑁂𑀢𑁆𑀢𑀺 𑀙𑀺𑀦𑁆𑀦𑀸 𑀏𑀢𑀲𑁆𑀲𑀸𑀢𑀺 𑀦𑁂𑀢𑁆𑀢𑀺𑀘𑁆𑀙𑀺𑀦𑁆𑀦𑁄. 𑀢𑀲𑁆𑀲 𑀦𑁂𑀢𑁆𑀢𑀺𑀘𑁆𑀙𑀺𑀦𑁆𑀦𑀲𑁆𑀲, 𑀧𑀳𑀻𑀦𑀢𑀡𑁆𑀳𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑁄 𑀲𑁄 𑀫𑀸𑀭𑀩𑀦𑁆𑀥𑀦𑀸𑀢𑀺 𑀲𑁄 𑀏𑀯𑀁𑀯𑀺𑀥𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀩𑁆𑀩𑀲𑁆𑀫𑀸 𑀫𑀸𑀭𑀩𑀦𑁆𑀥𑀦𑀢𑁄 𑀫𑀼𑀢𑁆𑀢𑁄, 𑀦 𑀢𑀲𑁆𑀲 𑀫𑀸𑀭𑀩𑀦𑁆𑀥𑀦𑀫𑁄𑀘𑀦𑀸𑀬 𑀓𑀭𑀡𑀻𑀬𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀢𑁆𑀢𑀦𑁄 𑀉𑀧𑀲𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀫𑁂𑀖𑀺𑀬𑀯𑀕𑁆𑀕𑀯𑀡𑁆𑀡𑀦𑀸.