𑁬. 𑀫𑀳𑀸𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀭𑀸𑀚𑀕𑀳𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀜𑁆𑀳𑀺 𑀫𑀳𑀸𑀫𑀦𑁆𑀥𑀸𑀢𑀼𑀫𑀳𑀸𑀕𑁄𑀯𑀺𑀦𑁆𑀤𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀭𑀸𑀚𑀕𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀤𑀼𑀭𑀪𑀺𑀪𑀯𑀦𑀻𑀬𑀢𑁆𑀢𑀸 𑀧𑀝𑀺𑀭𑀸𑀚𑀽𑀦𑀁 𑀕𑀳𑀪𑀽𑀢𑀦𑁆𑀢𑀺 𑀭𑀸𑀚𑀕𑀳’’𑀦𑁆𑀢𑀺𑀆𑀤𑀺𑀦𑀸 𑀅𑀜𑁆𑀜𑁂𑀦𑁂𑀢𑁆𑀣 𑀧𑀓𑀸𑀭𑁂𑀦 𑀯𑀡𑁆𑀡𑀬𑀦𑁆𑀢𑀺. 𑀓𑀺𑀦𑁆𑀢𑁂𑀳𑀺? 𑀦𑀸𑀫𑀫𑁂𑀢𑀁 𑀢𑀲𑁆𑀲 𑀦𑀕𑀭𑀲𑁆𑀲. 𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀓𑀸𑀮𑁂 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀕𑀭𑀁 𑀳𑁄𑀢𑀺, 𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀬𑀓𑁆𑀔𑀧𑀭𑀺𑀕𑁆𑀕𑀳𑀺𑀢𑀁 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂𑀢𑀺 𑀯𑁂𑀴𑀼𑀯𑀦𑀦𑁆𑀢𑀺 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀦𑀸𑀫𑀁. 𑀢𑀁 𑀓𑀺𑀭 𑀅𑀝𑁆𑀞𑀸𑀭𑀲𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀲𑀦𑀸𑀦𑀼𑀘𑁆𑀙𑀯𑀺𑀓𑀸𑀬 𑀫𑀳𑀢𑀺𑀬𑀸 𑀕𑀦𑁆𑀥𑀓𑀼𑀝𑀺𑀬𑀸 𑀅𑀜𑁆𑀜𑁂𑀳𑀺 𑀘 𑀧𑀸𑀲𑀸𑀤𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑀘𑀗𑁆𑀓𑀫𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀤𑀻𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀩𑀳𑀺 𑀯𑁂𑀴𑀽𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺 𑀦𑀻𑀮𑁄𑀪𑀸𑀲𑀁 𑀫𑀦𑁄𑀭𑀫𑀁, 𑀢𑁂𑀦 ‘‘𑀯𑁂𑀴𑀼𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀮𑀦𑁆𑀤𑀓𑀸𑀦𑀜𑁆𑀘𑁂𑀢𑁆𑀣 𑀦𑀺𑀯𑀸𑀧𑀁 𑀅𑀤𑀁𑀲𑀼, 𑀢𑀲𑁆𑀫𑀸 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀢𑀁 𑀉𑀬𑁆𑀬𑀸𑀦𑀁 𑀓𑀻𑀴𑀦𑀢𑁆𑀣𑀁 𑀧𑀯𑀺𑀝𑁆𑀞𑁄 𑀲𑀼𑀭𑀸𑀫𑀤𑀫𑀢𑁆𑀢𑁄 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑁄 𑀲𑀼𑀧𑀺, 𑀧𑀭𑀺𑀚𑀦𑁄𑀧𑀺𑀲𑁆𑀲 ‘‘𑀲𑀼𑀢𑁆𑀢𑁄 𑀭𑀸𑀚𑀸’’𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀧𑀮𑁄𑀪𑀺𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀓𑀸𑀫𑀺. 𑀅𑀣 𑀲𑀼𑀭𑀸𑀕𑀦𑁆𑀥𑁂𑀦 𑀅𑀜𑁆𑀜𑀢𑀭𑀲𑁆𑀫𑀸 𑀭𑀼𑀓𑁆𑀔𑀲𑀼𑀲𑀺𑀭𑀸 𑀓𑀡𑁆𑀳𑀲𑀧𑁆𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 ‘‘𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀓𑀮𑀦𑁆𑀤𑀓𑀯𑁂𑀲𑁂𑀦 𑀕𑀦𑁆𑀢𑁆𑀯𑀸 𑀓𑀡𑁆𑀡𑀫𑀽𑀮𑁂 𑀲𑀤𑁆𑀤𑀫𑀓𑀸𑀲𑀺. 𑀭𑀸𑀚𑀸 𑀧𑀝𑀺𑀩𑀼𑀚𑁆𑀛𑀺, 𑀓𑀡𑁆𑀳𑀲𑀧𑁆𑀧𑁄 𑀦𑀺𑀯𑀢𑁆𑀢𑁄. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀬 𑀓𑀸𑀴𑀓𑀸𑀬 𑀫𑀫 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀓𑀸𑀴𑀓𑀸𑀦𑀁 𑀦𑀺𑀯𑀸𑀧𑀁 𑀢𑀢𑁆𑀣 𑀧𑀝𑁆𑀞𑀧𑁂𑀲𑀺, 𑀅𑀪𑀬𑀖𑁄𑀲𑀜𑁆𑀘 𑀖𑁄𑀲𑀸𑀧𑁂𑀲𑀺. 𑀢𑀲𑁆𑀫𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀁 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁. 𑀓𑀮𑀦𑁆𑀤𑀓𑀸𑀢𑀺 𑀳𑀺 𑀓𑀸𑀴𑀓𑀸𑀦𑀁 𑀦𑀸𑀫𑀁, 𑀢𑀲𑁆𑀫𑀺𑀁 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂.

𑀫𑀳𑀸𑀓𑀲𑁆𑀲𑀧𑁄𑀢𑀺 𑀫𑀳𑀦𑁆𑀢𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀦𑁆𑀢𑁄 𑀓𑀲𑁆𑀲𑀧𑁄𑀢𑀺 𑀫𑀳𑀸𑀓𑀲𑁆𑀲𑀧𑁄, 𑀅𑀧𑀺𑀘 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀁 𑀉𑀧𑀸𑀤𑀸𑀬 𑀅𑀬𑀁 𑀫𑀳𑀸𑀣𑁂𑀭𑁄 ‘‘𑀫𑀳𑀸𑀓𑀲𑁆𑀲𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀺𑀧𑁆𑀧𑀮𑀺𑀕𑀼𑀳𑀸𑀬𑀦𑁆𑀢𑀺 𑀢𑀲𑁆𑀲𑀸 𑀓𑀺𑀭 𑀕𑀼𑀳𑀸𑀬 𑀤𑁆𑀯𑀸𑀭𑀲𑀫𑀻𑀧𑁂 𑀏𑀓𑁄 𑀧𑀺𑀧𑁆𑀧𑀮𑀺𑀭𑀼𑀓𑁆𑀔𑁄 𑀅𑀳𑁄𑀲𑀺, 𑀢𑁂𑀦 𑀲𑀸 ‘‘𑀧𑀺𑀧𑁆𑀧𑀮𑀺𑀕𑀼𑀳𑀸’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀲𑁆𑀲𑀁 𑀧𑀺𑀧𑁆𑀧𑀮𑀺𑀕𑀼𑀳𑀸𑀬𑀁. 𑀆𑀩𑀸𑀥𑀺𑀓𑁄𑀢𑀺 𑀆𑀩𑀸𑀥𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀩𑀸𑀥𑀺𑀓𑁄, 𑀩𑁆𑀬𑀸𑀥𑀺𑀓𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀺𑀢𑁄𑀢𑀺 𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀤𑀼𑀓𑁆𑀔𑀁 𑀲𑀜𑁆𑀚𑀸𑀢𑀁 𑀅𑀲𑁆𑀲𑀸𑀢𑀺 𑀤𑀼𑀓𑁆𑀔𑀺𑀢𑁄, 𑀤𑀼𑀓𑁆𑀔𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀩𑀸𑀴𑁆𑀳𑀕𑀺𑀮𑀸𑀦𑁄𑀢𑀺 𑀅𑀥𑀺𑀫𑀢𑁆𑀢𑀕𑁂𑀮𑀜𑁆𑀜𑁄, 𑀢𑀁 𑀧𑀦 𑀕𑁂𑀮𑀜𑁆𑀜𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀩𑁄𑀚𑁆𑀛𑀗𑁆𑀕𑀧𑀭𑀺𑀢𑁆𑀢𑀁 𑀅𑀪𑀸𑀲𑀺, 𑀢𑁂𑀦𑁂𑀯 𑀣𑁂𑀭𑀲𑁆𑀲 𑀲𑁄 𑀆𑀩𑀸𑀥𑁄 𑀯𑀽𑀧𑀲𑀫𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑁂 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀧𑀺𑀧𑁆𑀧𑀮𑀺𑀕𑀼𑀳𑀸𑀬𑀁 𑀯𑀺𑀳𑀭𑀢𑀺 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸…𑀧𑁂… 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺 𑀢𑁂, 𑀓𑀲𑁆𑀲𑀧, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀅𑀪𑀺𑀓𑁆𑀓𑀫𑁄’𑀢𑀺? ‘𑀦 𑀫𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁, 𑀩𑀸𑀴𑁆𑀳𑀸 𑀫𑁂 𑀪𑀦𑁆𑀢𑁂, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄’𑀢𑀺.

‘‘‘𑀲𑀢𑁆𑀢𑀺𑀫𑁂, 𑀓𑀲𑁆𑀲𑀧, 𑀩𑁄𑀚𑁆𑀛𑀗𑁆𑀕𑀸 𑀫𑀬𑀸 𑀲𑀫𑁆𑀫𑀤𑀓𑁆𑀔𑀸𑀢𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀔𑁄, 𑀓𑀲𑁆𑀲𑀧, 𑀫𑀬𑀸 𑀲𑀫𑁆𑀫𑀤𑀓𑁆𑀔𑀸𑀢𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀔𑁄, 𑀓𑀲𑁆𑀲𑀧, 𑀫𑀬𑀸 𑀲𑀫𑁆𑀫𑀤𑀓𑁆𑀔𑀸𑀢𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀓𑀲𑁆𑀲𑀧, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀫𑀬𑀸 𑀲𑀫𑁆𑀫𑀤𑀓𑁆𑀔𑀸𑀢𑀸 𑀪𑀸𑀯𑀺𑀢𑀸 𑀩𑀳𑀽𑀮𑀻𑀓𑀢𑀸 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺. ‘𑀢𑀕𑁆𑀖 𑀪𑀕𑀯𑀸 𑀩𑁄𑀚𑁆𑀛𑀗𑁆𑀕𑀸, 𑀢𑀕𑁆𑀖, 𑀲𑀼𑀕𑀢, 𑀩𑁄𑀚𑁆𑀛𑀗𑁆𑀕𑀸’’’𑀢𑀺.

‘‘𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺. 𑀯𑀼𑀝𑁆𑀞𑀳𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑀫𑁆𑀳𑀸 𑀆𑀩𑀸𑀥𑀸, 𑀢𑀣𑀸 𑀧𑀳𑀻𑀦𑁄 𑀘𑀸𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑁄 𑀆𑀩𑀸𑀥𑁄 𑀅𑀳𑁄𑀲𑀻’’𑀢𑀺.

𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀸𑀲𑀻’’𑀢𑀺.

𑀏𑀢𑀤𑀳𑁄𑀲𑀻𑀢𑀺 𑀧𑀼𑀩𑁆𑀩𑁂 𑀕𑁂𑀮𑀜𑁆𑀜𑀤𑀺𑀯𑀲𑁂𑀲𑀼 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀳𑀺 𑀉𑀧𑀦𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑁂 𑀏𑀯 𑀅𑀳𑁄𑀲𑀺. 𑀅𑀣𑀲𑁆𑀲 𑀢𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀺𑀢𑀲𑁆𑀲 𑀏𑀢𑀁 ‘‘𑀬𑀁𑀦𑀽𑀦𑀸𑀳𑀁 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑁂𑀬𑁆𑀬’’𑀦𑁆𑀢𑀺 𑀧𑀭𑀺𑀯𑀺𑀢𑀓𑁆𑀓𑁄 𑀅𑀳𑁄𑀲𑀺. 𑀧𑀜𑁆𑀘𑀫𑀢𑁆𑀢𑀸𑀦𑀺 𑀤𑁂𑀯𑀢𑀸𑀲𑀢𑀸𑀦𑀻𑀢𑀺 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀸 𑀧𑀜𑁆𑀘𑀲𑀢𑀸 𑀓𑀓𑀼𑀝𑀧𑀸𑀤𑀺𑀦𑀺𑀬𑁄 𑀅𑀘𑁆𑀙𑀭𑀸𑀬𑁄. 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀣𑁂𑀭𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀸𑀢𑀺 𑀧𑀜𑁆𑀘𑀧𑀺𑀡𑁆𑀟𑀧𑀸𑀢𑀲𑀢𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀚𑀦𑁂𑀳𑀺 𑀆𑀤𑀸𑀬 𑀅𑀦𑁆𑀢𑀭𑀸𑀫𑀕𑁆𑀕𑁂 𑀞𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀕𑀡𑁆𑀳𑀣, 𑀲𑀗𑁆𑀕𑀳𑀁 𑀦𑁄 𑀓𑀭𑁄𑀣𑀸’’𑀢𑀺 𑀯𑀤𑀫𑀸𑀦𑀸 𑀧𑀺𑀡𑁆𑀟𑀧𑀸𑀢𑀤𑀸𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀮𑀸𑀪𑀸𑀬𑀸’’𑀢𑀺.

𑀲𑀓𑁆𑀓𑁄 𑀓𑀺𑀭 𑀤𑁂𑀯𑀭𑀸𑀚𑀸 𑀣𑁂𑀭𑀲𑁆𑀲 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀢𑀸 𑀅𑀘𑁆𑀙𑀭𑀸𑀬𑁄 𑀉𑀬𑁆𑀬𑁄𑀚𑁂𑀲𑀺 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀅𑀬𑁆𑀬𑀲𑁆𑀲 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑁄𑀣𑀸’’𑀢𑀺. 𑀏𑀯𑀁 𑀳𑀺𑀲𑁆𑀲 𑀅𑀳𑁄𑀲𑀺 ‘‘𑀇𑀫𑀸𑀲𑀼 𑀲𑀩𑁆𑀩𑀸𑀲𑀼 𑀕𑀢𑀸𑀲𑀼 𑀓𑀤𑀸𑀘𑀺 𑀏𑀓𑀺𑀲𑁆𑀲𑀸𑀧𑀺 𑀳𑀢𑁆𑀣𑀢𑁄 𑀧𑀺𑀡𑁆𑀟𑀧𑀸𑀢𑀁 𑀣𑁂𑀭𑁄 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀢𑀁 𑀢𑀲𑁆𑀲𑀸 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀧𑀝𑀺𑀓𑁆𑀔𑀺𑀧𑀺 𑀣𑁂𑀭𑁄, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀧𑀺𑀡𑁆𑀟𑀧𑀸𑀢𑀁 𑀕𑀡𑁆𑀳𑀣, 𑀫𑀬𑁆𑀳𑀁 𑀧𑀺𑀡𑁆𑀟𑀧𑀸𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺𑀬𑁄 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀓𑀢𑀧𑀼𑀜𑁆𑀜𑀸 𑀫𑀳𑀸𑀪𑁄𑀕𑀸, 𑀅𑀳𑀁 𑀤𑀼𑀕𑁆𑀕𑀢𑀸𑀦𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀸 𑀦𑁄 𑀦𑀸𑀲𑁂𑀣, 𑀲𑀗𑁆𑀕𑀳𑀁 𑀦𑁄 𑀓𑀭𑁄𑀣𑀸’’𑀢𑀺 𑀯𑀤𑀦𑁆𑀢𑀺𑀬𑁄 𑀧𑀼𑀦𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀧𑀺 𑀅𑀧𑀕𑀦𑁆𑀢𑀼𑀁 𑀅𑀦𑀺𑀘𑁆𑀙𑀫𑀸𑀦𑀸 𑀬𑀸𑀘𑀦𑁆𑀢𑀺𑀬𑁄 ‘‘𑀦 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀚𑀸𑀦𑀸𑀣, 𑀅𑀧𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀅𑀘𑁆𑀙𑀭𑀁 𑀧𑀳𑀭𑀺. 𑀢𑀸 𑀣𑁂𑀭𑀲𑁆𑀲 𑀅𑀘𑁆𑀙𑀭𑀸𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀦𑁆𑀢𑀚𑁆𑀚𑀺𑀢𑀸 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀬𑁄 𑀧𑀮𑀸𑀬𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀘𑀫𑀢𑁆𑀢𑀸𑀦𑀺 𑀤𑁂𑀯𑀢𑀸𑀲𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺.

𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑁂 𑀏𑀓𑀁 𑀲𑀫𑀬𑀁, 𑀏𑀓𑀲𑁆𑀫𑀺𑀁 𑀓𑀸𑀮𑁂. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀦𑀺𑀯𑀸𑀲𑀦𑀁 𑀤𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸. 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻𑀢𑀺 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀧𑀸𑀯𑀺𑀲𑀺. 𑀤𑀮𑀺𑀤𑁆𑀤𑀯𑀺𑀲𑀺𑀔𑀸𑀢𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀸𑀦𑀁 𑀯𑀲𑀦𑁄𑀓𑀸𑀲𑁄. 𑀓𑀧𑀡𑀯𑀺𑀲𑀺𑀔𑀸𑀢𑀺 𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀧𑁆𑀧𑀢𑁆𑀢𑀺𑀬𑀸 𑀤𑀻𑀦𑀫𑀦𑀼𑀲𑁆𑀲𑀸𑀦𑀁 𑀯𑀸𑀲𑁄. 𑀧𑁂𑀲𑀓𑀸𑀭𑀯𑀺𑀲𑀺𑀔𑀸𑀢𑀺 𑀢𑀦𑁆𑀢𑀯𑀸𑀬𑀯𑀸𑀲𑁄. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸𑀢𑀺 𑀓𑀣𑀁 𑀅𑀤𑁆𑀤𑀲? ‘‘𑀆𑀩𑀸𑀥𑀸 𑀯𑀼𑀝𑁆𑀞𑀺𑀢𑁄 𑀫𑀫 𑀧𑀼𑀢𑁆𑀢𑁄 𑀓𑀲𑁆𑀲𑀧𑁄 𑀓𑀺𑀦𑁆𑀦𑀼 𑀔𑁄 𑀓𑀭𑁄𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀯𑁂𑀴𑀼𑀯𑀦𑁂 𑀦𑀺𑀲𑀺𑀦𑁆𑀦𑁄 𑀏𑀯 𑀪𑀕𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀅𑀤𑁆𑀤𑀲.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀬𑀸𑀬𑀁 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀜𑁆𑀘𑀳𑀺 𑀅𑀘𑁆𑀙𑀭𑀸𑀲𑀢𑁂𑀳𑀺 𑀉𑀧𑀦𑀻𑀢𑀁 𑀅𑀦𑁂𑀓𑀲𑀽𑀧𑀁 𑀅𑀦𑁂𑀓𑀩𑁆𑀬𑀜𑁆𑀚𑀦𑀁 𑀤𑀺𑀩𑁆𑀩𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀧𑀡𑀚𑀦𑀸𑀦𑀼𑀕𑁆𑀕𑀳𑀧𑁆𑀧𑀝𑀺𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀏𑀢𑀫𑀢𑁆𑀣𑀁 𑀚𑀸𑀦𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀧𑀭𑀫𑀧𑁆𑀧𑀺𑀘𑁆𑀙𑀢𑀸𑀤𑀲𑁆𑀲𑀦𑀫𑀼𑀔𑁂𑀦 𑀔𑀻𑀡𑀸𑀲𑀯𑀲𑁆𑀲 𑀢𑀸𑀤𑀻𑀪𑀸𑀯𑀸𑀦𑀼𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀅𑀦𑀜𑁆𑀜𑀧𑁄𑀲𑀺𑀦𑁆𑀢𑀺 𑀅𑀜𑁆𑀜𑀁 𑀧𑁄𑀲𑁂𑀢𑀻𑀢𑀺 𑀅𑀜𑁆𑀜𑀧𑁄𑀲𑀻, 𑀦 𑀅𑀜𑁆𑀜𑀧𑁄𑀲𑀻 𑀅𑀦𑀜𑁆𑀜𑀧𑁄𑀲𑀻, 𑀅𑀢𑁆𑀢𑀦𑀸 𑀧𑁄𑀲𑁂𑀢𑀩𑁆𑀩𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑁂𑀦 𑀅𑀤𑀼𑀢𑀺𑀬𑁄, 𑀏𑀓𑀓𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀣𑁂𑀭𑀲𑁆𑀲 𑀲𑀼𑀪𑀭𑀢𑀁 𑀤𑀲𑁆𑀲𑁂𑀢𑀺. 𑀣𑁂𑀭𑁄 𑀳𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀘 𑀧𑀺𑀡𑁆𑀟𑀧𑀸𑀢𑁂𑀦 𑀅𑀢𑁆𑀢𑀸𑀦𑀫𑁂𑀯 𑀧𑁄𑀲𑁂𑀦𑁆𑀢𑁄 𑀧𑀭𑀫𑀧𑁆𑀧𑀺𑀘𑁆𑀙𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺, 𑀅𑀜𑁆𑀜𑀁 𑀜𑀸𑀢𑀺𑀫𑀺𑀢𑁆𑀢𑀸𑀤𑀻𑀲𑀼 𑀓𑀜𑁆𑀘𑀺 𑀦 𑀧𑁄𑀲𑁂𑀢𑀺 𑀓𑀢𑁆𑀣𑀘𑀺 𑀅𑀮𑀕𑁆𑀕𑀪𑀸𑀯𑀢𑁄. 𑀅𑀣 𑀯𑀸 𑀅𑀜𑁆𑀜𑁂𑀦 𑀅𑀜𑁆𑀜𑀢𑀭𑁂𑀦 𑀧𑁄𑀲𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄 𑀅𑀦𑀜𑁆𑀜𑀧𑁄𑀲𑀻. 𑀬𑁄 𑀳𑀺 𑀏𑀓𑀲𑁆𑀫𑀺𑀁𑀬𑁂𑀯 𑀧𑀘𑁆𑀘𑀬𑀤𑀸𑀬𑀓𑁂 𑀧𑀝𑀺𑀩𑀤𑁆𑀥𑀘𑀢𑀼𑀧𑀘𑁆𑀘𑀬𑁄 𑀲𑁄 𑀅𑀦𑀜𑁆𑀜𑀧𑁄𑀲𑀻 𑀦𑀸𑀫 𑀦 𑀳𑁄𑀢𑀺 𑀏𑀓𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄. 𑀣𑁂𑀭𑁄 𑀧𑀦 ‘‘𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨’’𑀦𑁆𑀢𑀺 (𑀥. 𑀧. 𑁪𑁯) 𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦 𑀚𑀗𑁆𑀖𑀸𑀩𑀮𑀁 𑀦𑀺𑀲𑁆𑀲𑀸𑀬 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀓𑀼𑀮𑁂𑀲𑀼 𑀦𑀺𑀘𑁆𑀘𑀦𑀯𑁄 𑀳𑀼𑀢𑁆𑀯𑀸 𑀫𑀺𑀲𑁆𑀲𑀓𑀪𑀢𑁆𑀢𑁂𑀦 𑀬𑀸𑀧𑁂𑀢𑀺. 𑀢𑀣𑀸 𑀳𑀺 𑀦𑀁 𑀪𑀕𑀯𑀸 𑀘𑀦𑁆𑀤𑀽𑀧𑀫𑀧𑁆𑀧𑀝𑀺𑀧𑀤𑀸𑀬 𑀣𑁄𑀫𑁂𑀲𑀺. 𑀅𑀜𑁆𑀜𑀸𑀢𑀦𑁆𑀢𑀺 𑀅𑀪𑀺𑀜𑁆𑀜𑀸𑀢𑀁, 𑀬𑀣𑀸𑀪𑀼𑀘𑁆𑀘𑀕𑀼𑀡𑁂𑀳𑀺 𑀧𑀢𑁆𑀣𑀝𑀬𑀲𑀁, 𑀢𑁂𑀦𑁂𑀯 𑀯𑀸 𑀅𑀦𑀜𑁆𑀜𑀧𑁄𑀲𑀺𑀪𑀸𑀯𑁂𑀦 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀳𑀺 𑀜𑀸𑀢𑀁. 𑀅𑀣 𑀯𑀸 𑀅𑀜𑁆𑀜𑀸𑀢𑀦𑁆𑀢𑀺 𑀲𑀩𑁆𑀩𑀲𑁄 𑀧𑀳𑀻𑀦𑀢𑀡𑁆𑀳𑀢𑀸𑀬 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀓𑀸𑀫𑀦𑀳𑁂𑀢𑀼 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑀦𑀯𑀲𑁂𑀦 𑀦 𑀜𑀸𑀢𑀁. 𑀅𑀯𑀻𑀢𑀢𑀡𑁆𑀳𑁄 𑀳𑀺 𑀧𑀸𑀧𑀺𑀘𑁆𑀙𑁄 𑀓𑀼𑀳𑀓𑀢𑀸𑀬 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑀺. 𑀤𑀦𑁆𑀢𑀦𑁆𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑁂𑀲𑀼 𑀉𑀢𑁆𑀢𑀫𑀤𑀫𑀦𑁂𑀦 𑀤𑀦𑁆𑀢𑀁. 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀲𑀸𑀭𑁂 𑀅𑀯𑀝𑁆𑀞𑀺𑀢𑀁, 𑀅𑀲𑁂𑀓𑁆𑀔𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂 𑀯𑀸 𑀲𑀻𑀮𑀸𑀤𑀺𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀁. 𑀔𑀻𑀡𑀸𑀲𑀯𑀁 𑀯𑀦𑁆𑀢𑀤𑁄𑀲𑀦𑁆𑀢𑀺 𑀓𑀸𑀫𑀸𑀲𑀯𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀅𑀦𑀯𑀲𑁂𑀲𑀁 𑀧𑀳𑀻𑀦𑀢𑁆𑀢𑀸 𑀔𑀻𑀡𑀸𑀲𑀯𑀁. 𑀢𑀢𑁄 𑀏𑀯 𑀭𑀸𑀕𑀸𑀤𑀺𑀤𑁄𑀲𑀸𑀦𑀁 𑀲𑀩𑁆𑀩𑀲𑁄 𑀯𑀦𑁆𑀢𑀢𑁆𑀢𑀸 𑀯𑀦𑁆𑀢𑀤𑁄𑀲𑀁. 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑀁 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀯𑀤𑀸𑀫𑀻𑀢𑀺. 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁂𑀲𑀦𑀸𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.