𑁭. 𑀅𑀚𑀓𑀮𑀸𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀧𑀸𑀯𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀫𑀮𑁆𑀮𑀭𑀸𑀚𑀽𑀦𑀁 𑀦𑀕𑀭𑁂. 𑀅𑀚𑀓𑀮𑀸𑀧𑀓𑁂 𑀘𑁂𑀢𑀺𑀬𑁂𑀢𑀺 𑀅𑀚𑀓𑀮𑀸𑀧𑀓𑁂𑀦 𑀦𑀸𑀫 𑀬𑀓𑁆𑀔𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀅𑀚𑀓𑀮𑀸𑀧𑀓’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀻𑀓𑀢𑀝𑁆𑀞𑀸𑀦𑁂. 𑀲𑁄 𑀓𑀺𑀭 𑀬𑀓𑁆𑀔𑁄 𑀅𑀚𑁂 𑀓𑀮𑀸𑀧𑁂 𑀓𑀢𑁆𑀯𑀸 𑀩𑀦𑁆𑀥𑀦𑁂𑀦 𑀅𑀚𑀓𑁄𑀝𑁆𑀞𑀸𑀲𑁂𑀦 𑀲𑀤𑁆𑀥𑀺𑀁 𑀩𑀮𑀺𑀁 𑀧𑀝𑀺𑀘𑁆𑀙𑀢𑀺, 𑀦 𑀅𑀜𑁆𑀜𑀣𑀸, 𑀢𑀲𑁆𑀫𑀸 ‘‘𑀅𑀚𑀓𑀮𑀸𑀧𑀓𑁄’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀓𑁂𑀘𑀺 𑀧𑀦𑀸𑀳𑀼 𑁋 𑀅𑀚𑀓𑁂 𑀯𑀺𑀬 𑀲𑀢𑁆𑀢𑁂 𑀮𑀸𑀧𑁂𑀢𑀻𑀢𑀺 𑀅𑀚𑀓𑀮𑀸𑀧𑀓𑁄𑀢𑀺. 𑀢𑀲𑁆𑀲 𑀓𑀺𑀭 𑀲𑀢𑁆𑀢𑀸 𑀩𑀮𑀺𑀁 𑀉𑀧𑀦𑁂𑀢𑁆𑀯𑀸 𑀬𑀤𑀸 𑀅𑀚𑀲𑀤𑁆𑀤𑀁 𑀓𑀢𑁆𑀯𑀸 𑀩𑀮𑀺𑀁 𑀉𑀧𑀳𑀭𑀦𑁆𑀢𑀺, 𑀢𑀤𑀸 𑀲𑁄 𑀢𑀼𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀅𑀚𑀓𑀮𑀸𑀧𑀓𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑁄 𑀧𑀦 𑀬𑀓𑁆𑀔𑁄 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀢𑀢𑁆𑀣 𑀘 𑀲𑀦𑁆𑀦𑀺𑀳𑀺𑀢𑁄, 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸 𑀘𑀺𑀢𑁆𑀢𑀺𑀁 𑀓𑀭𑁄𑀦𑁆𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀩𑀮𑀺𑀁 𑀉𑀧𑀳𑀭𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑀓𑀮𑀸𑀧𑀓𑁂 𑀘𑁂𑀢𑀺𑀬𑁂’’𑀢𑀺. 𑀅𑀚𑀓𑀮𑀸𑀧𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂𑀢𑀺 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀯𑀺𑀫𑀸𑀦𑁂.

𑀢𑀤𑀸 𑀓𑀺𑀭 𑀲𑀢𑁆𑀣𑀸 𑀢𑀁 𑀬𑀓𑁆𑀔𑀁 𑀤𑀫𑁂𑀢𑀼𑀓𑀸𑀫𑁄 𑀲𑀸𑀬𑀦𑁆𑀳𑀲𑀫𑀬𑁂 𑀏𑀓𑁄 𑀅𑀤𑀼𑀢𑀺𑀬𑁄 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀅𑀚𑀓𑀮𑀸𑀧𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀤𑁄𑀯𑀸𑀭𑀺𑀓𑀁 𑀪𑀯𑀦𑀧𑀯𑀺𑀲𑀦𑀢𑁆𑀣𑀸𑀬 𑀬𑀸𑀘𑀺. 𑀲𑁄 ‘‘𑀓𑀓𑁆𑀔𑀴𑁄, 𑀪𑀦𑁆𑀢𑁂, 𑀅𑀚𑀓𑀮𑀸𑀧𑀓𑁄 𑀬𑀓𑁆𑀔𑁄, 𑀲𑀫𑀡𑁄𑀢𑀺 𑀯𑀸 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀸 𑀕𑀸𑀭𑀯𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀏𑀯 𑀚𑀸𑀦𑀸𑀣, 𑀫𑀬𑁆𑀳𑀁 𑀧𑀦 𑀢𑀲𑁆𑀲 𑀅𑀦𑀸𑀭𑁄𑀘𑀦𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀢𑀸𑀯𑀤𑁂𑀯 𑀬𑀓𑁆𑀔𑀲𑀫𑀸𑀕𑀫𑀁 𑀕𑀢𑀲𑁆𑀲 𑀅𑀚𑀓𑀮𑀸𑀧𑀓𑀲𑁆𑀲 𑀲𑀦𑁆𑀢𑀺𑀓𑀁 𑀯𑀸𑀢𑀯𑁂𑀕𑁂𑀦 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀅𑀦𑁆𑀢𑁄𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀚𑀓𑀮𑀸𑀧𑀓𑀲𑁆𑀲 𑀦𑀺𑀲𑀻𑀤𑀦𑀫𑀡𑁆𑀟𑀧𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀬𑀓𑁆𑀔𑀲𑁆𑀲 𑀑𑀭𑁄𑀥𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀸 𑀢𑀸𑀲𑀁 𑀓𑀸𑀮𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀸𑀯𑀸𑀬𑀁 𑀯𑀺𑀳𑀭𑀢𑀺 𑀅𑀚𑀓𑀮𑀸𑀧𑀓𑁂 𑀘𑁂𑀢𑀺𑀬𑁂 𑀅𑀚𑀓𑀮𑀸𑀧𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂’’𑀢𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀲𑀸𑀢𑀸𑀕𑀺𑀭𑀳𑁂𑀫𑀯𑀢𑀸 𑀅𑀚𑀓𑀮𑀸𑀧𑀓𑀲𑁆𑀲 𑀪𑀯𑀦𑀫𑀢𑁆𑀣𑀓𑁂𑀦 𑀬𑀓𑁆𑀔𑀲𑀫𑀸𑀕𑀫𑀁 𑀕𑀘𑁆𑀙𑀦𑁆𑀢𑀸 𑀅𑀢𑁆𑀢𑀦𑁄 𑀕𑀫𑀦𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑀸 𑀲𑀢𑁆𑀣𑀸𑀭𑀁 𑀅𑀚𑀓𑀮𑀸𑀧𑀓𑀲𑁆𑀲 𑀪𑀯𑀦𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀬𑀁, 𑀪𑀦𑁆𑀢𑁂, 𑀬𑀓𑁆𑀔𑀲𑀫𑀸𑀕𑀫𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑀸 𑀬𑀓𑁆𑀔𑀲𑀦𑁆𑀦𑀺𑀧𑀸𑀢𑁂 𑀅𑀚𑀓𑀮𑀸𑀧𑀓𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀺𑀁 𑀧𑀯𑁂𑀤𑀬𑀺𑀁𑀲𑀼 ‘‘𑀮𑀸𑀪𑀸 𑀢𑁂, 𑀆𑀯𑀼𑀲𑁄, 𑀅𑀚𑀓𑀮𑀸𑀧𑀓, 𑀬𑀲𑁆𑀲 𑀢𑁂 𑀪𑀯𑀦𑁂 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀲𑁆𑀲𑀼, 𑀥𑀫𑁆𑀫𑀜𑁆𑀘 𑀲𑀼𑀡𑀸𑀳𑀻’’𑀢𑀺. 𑀲𑁄 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀫𑀫 𑀪𑀯𑀦𑁂 𑀦𑀺𑀲𑀺𑀦𑁆𑀦𑀪𑀸𑀯𑀁 𑀓𑀣𑁂𑀦𑁆𑀢𑀻’’𑀢𑀺 𑀓𑁄𑀥𑀸𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 ‘‘𑀅𑀚𑁆𑀚 𑀫𑀬𑁆𑀳𑀁 𑀢𑁂𑀦 𑀲𑀫𑀡𑁂𑀦 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀓𑁆𑀔𑀲𑀦𑁆𑀦𑀺𑀧𑀸𑀢𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀫𑀢𑁆𑀢𑀁 𑀧𑀩𑁆𑀩𑀢𑀓𑀽𑀝𑀁 𑀅𑀓𑁆𑀓𑀫𑀺, 𑀢𑀁 𑀪𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀥𑀸 𑀅𑀳𑁄𑀲𑀺. 𑀲𑁂𑀲𑀁 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀆𑀴𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁪𑁬) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀚𑀓𑀮𑀸𑀧𑀓𑀲𑁆𑀲 𑀲𑀫𑀸𑀕𑀫𑁄 𑀳𑀺 𑀆𑀴𑀯𑀓𑀲𑀫𑀸𑀕𑀫𑀲𑀤𑀺𑀲𑁄𑀯 𑀞𑀧𑁂𑀢𑁆𑀯𑀸 𑀧𑀜𑁆𑀳𑀓𑀭𑀡𑀁 𑀯𑀺𑀲𑁆𑀲𑀚𑁆𑀚𑀦𑀁 𑀪𑀯𑀦𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀦𑀺𑀓𑁆𑀔𑀫𑀦𑀁 𑀧𑀯𑁂𑀲𑀦𑀜𑁆𑀘. 𑀅𑀚𑀓𑀮𑀸𑀧𑀓𑁄 𑀳𑀺 𑀆𑀕𑀘𑁆𑀙𑀦𑁆𑀢𑁄𑀬𑁂𑀯 ‘‘𑀏𑀢𑁂𑀳𑀺𑀬𑁂𑀯 𑀢𑀁 𑀲𑀫𑀡𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀸𑀢𑀫𑀡𑁆𑀟𑀮𑀸𑀤𑀺𑀓𑁂 𑀦𑀯𑀯𑀲𑁆𑀲𑁂 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀳𑀺 𑀪𑀕𑀯𑀢𑁄 𑀘𑀮𑀦𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀸𑀦𑀸𑀯𑀺𑀥𑀧𑁆𑀧𑀳𑀭𑀡𑀳𑀢𑁆𑀣𑁂 𑀅𑀢𑀺𑀯𑀺𑀬 𑀪𑀬𑀸𑀦𑀓𑀭𑀽𑀧𑁂 𑀪𑀽𑀢𑀕𑀡𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑀦𑁆𑀢𑁂𑀦𑁂𑀯 𑀘𑀭𑀦𑁆𑀢𑁄 𑀲𑀩𑁆𑀩𑀭𑀢𑁆𑀢𑀺𑀁 𑀦𑀸𑀦𑀧𑁆𑀧𑀓𑀸𑀭𑀁 𑀯𑀺𑀧𑁆𑀧𑀓𑀸𑀭𑀁 𑀓𑀢𑁆𑀯𑀸𑀧𑀺 𑀪𑀕𑀯𑀢𑁄 𑀓𑀺𑀜𑁆𑀘𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀘𑀮𑀦𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀓𑁂𑀯𑀮𑀁 𑀧𑀦 ‘‘𑀅𑀬𑀁 𑀲𑀫𑀡𑁄 𑀫𑀁 𑀅𑀦𑀸𑀧𑀼𑀘𑁆𑀙𑀸 𑀫𑀬𑁆𑀳𑀁 𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀢𑀻’’𑀢𑀺 𑀓𑁄𑀥𑀯𑀲𑁂𑀦 𑀧𑀚𑁆𑀚𑀮𑀺. 𑀅𑀣𑀲𑁆𑀲 𑀪𑀕𑀯𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀘𑀡𑁆𑀟𑀲𑁆𑀲 𑀓𑀼𑀓𑁆𑀓𑀼𑀭𑀲𑁆𑀲 𑀦𑀸𑀲𑀸𑀬 𑀧𑀺𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬, 𑀏𑀯𑀁 𑀲𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀘𑀡𑁆𑀟𑀢𑀭𑁄 𑀅𑀲𑁆𑀲, 𑀏𑀯𑀫𑁂𑀯𑀸𑀬𑀁 𑀬𑀓𑁆𑀔𑁄 𑀫𑀬𑀺 𑀇𑀥 𑀦𑀺𑀲𑀺𑀦𑁆𑀦𑁂 𑀘𑀺𑀢𑁆𑀢𑀁 𑀧𑀤𑀽𑀲𑁂𑀢𑀺, 𑀬𑀁𑀦𑀽𑀦𑀸𑀳𑀁 𑀩𑀳𑀺 𑀦𑀺𑀓𑁆𑀔𑀫𑁂𑀬𑁆𑀬’’𑀦𑁆𑀢𑀺 𑀲𑀬𑀫𑁂𑀯 𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻’’𑀢𑀺.

𑀢𑀢𑁆𑀣 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀦𑁆𑀢𑀺 𑀭𑀢𑁆𑀢𑀺𑀬𑀁 𑀅𑀦𑁆𑀥𑀓𑀭𑀡𑀢𑀫𑀲𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀯𑀺𑀭𑀳𑀺𑀢𑁂 𑀩𑀳𑀮𑀦𑁆𑀥𑀓𑀸𑀭𑁂𑀢𑀺 𑀅𑀢𑁆𑀣𑁄. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀓𑀺𑀭 𑀢𑀤𑀸 𑀅𑀦𑁆𑀥𑀓𑀸𑀭𑁄 𑀧𑀯𑀢𑁆𑀢𑀻𑀢𑀺. 𑀤𑁂𑀯𑁄𑀢𑀺 𑀫𑁂𑀖𑁄 𑀏𑀓𑀫𑁂𑀓𑀁 𑀨𑀼𑀲𑀺𑀢𑀓𑀁 𑀉𑀤𑀓𑀩𑀺𑀦𑁆𑀤𑀼𑀁 𑀧𑀸𑀢𑁂𑀢𑀺. 𑀅𑀣 𑀬𑀓𑁆𑀔𑁄 ‘‘𑀇𑀫𑀺𑀦𑀸 𑀲𑀤𑁆𑀤𑁂𑀦 𑀢𑀸𑀲𑁂𑀢𑁆𑀯𑀸 𑀇𑀫𑀁 𑀲𑀫𑀡𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀪𑀕𑀯𑀢𑁄 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀅𑀓𑁆𑀓𑀼𑀮𑁄’’𑀢𑀺𑀆𑀤𑀺𑀦𑀸 𑀢𑀁 𑀪𑀺𑀁𑀲𑀦𑀁 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀅𑀚𑀓𑀮𑀸𑀧𑀓𑁄’’𑀢𑀺𑀆𑀤𑀺. 𑀢𑀢𑁆𑀣 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀁, 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀊𑀭𑀼𑀢𑁆𑀣𑀫𑁆𑀪𑀓𑀲𑀭𑀻𑀭𑀲𑁆𑀲 𑀙𑀫𑁆𑀪𑀺𑀢𑀪𑀸𑀯𑀁. 𑀮𑁄𑀫𑀳𑀁𑀲𑀦𑁆𑀢𑀺 𑀮𑁄𑀫𑀸𑀦𑀁 𑀧𑀳𑀝𑁆𑀞𑀪𑀸𑀯𑀁, 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀪𑀬𑀼𑀧𑁆𑀧𑀢𑁆𑀢𑀺𑀫𑁂𑀯 𑀤𑀲𑁆𑀲𑁂𑀢𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀧𑀦𑀸𑀬𑀁 𑀏𑀯𑀫𑀥𑀺𑀧𑁆𑀧𑀸𑀬𑁄 𑀉𑀧𑀲𑀗𑁆𑀓𑀫𑀺, 𑀦𑀦𑀼 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀁 𑀯𑀺𑀧𑁆𑀧𑀓𑀸𑀭𑀁 𑀅𑀓𑀸𑀲𑀻𑀢𑀺? 𑀲𑀘𑁆𑀘𑀫𑀓𑀸𑀲𑀺, 𑀢𑀁 𑀧𑀦𑁂𑀲 ‘‘𑀅𑀦𑁆𑀢𑁄𑀪𑀯𑀦𑁂 𑀔𑁂𑀫𑀝𑁆𑀞𑀸𑀦𑁂 𑀣𑀺𑀭𑀪𑀽𑀫𑀺𑀬𑀁 𑀞𑀺𑀢𑀲𑁆𑀲 𑀦 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀅𑀲𑀓𑁆𑀔𑀺, 𑀇𑀤𑀸𑀦𑀺 𑀩𑀳𑀺 𑀞𑀺𑀢𑀁 𑀏𑀯𑀁 𑀪𑀺𑀁𑀲𑀸𑀧𑁂𑀢𑁆𑀯𑀸 𑀧𑀮𑀸𑀧𑁂𑀢𑀼𑀁 𑀲𑀓𑁆𑀓𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀉𑀧𑀲𑀗𑁆𑀓𑀫𑀺. 𑀅𑀬𑀜𑁆𑀳𑀺 𑀬𑀓𑁆𑀔𑁄 𑀅𑀢𑁆𑀢𑀦𑁄 𑀪𑀯𑀦𑀁 ‘‘𑀣𑀺𑀭𑀪𑀽𑀫𑀻’’𑀢𑀺 𑀫𑀜𑁆𑀜𑀢𑀺, ‘‘𑀢𑀢𑁆𑀣 𑀞𑀺𑀢𑀢𑁆𑀢𑀸 𑀅𑀬𑀁 𑀲𑀫𑀡𑁄 𑀦 𑀪𑀸𑀬𑀢𑀻’’𑀢𑀺 𑀘.

𑀢𑀺𑀓𑁆𑀔𑀢𑁆𑀢𑀼𑀁 ‘‘𑀅𑀓𑁆𑀓𑀼𑀮𑁄 𑀧𑀓𑁆𑀓𑀼𑀮𑁄’’𑀢𑀺 𑀅𑀓𑁆𑀓𑀼𑀮𑀧𑀓𑁆𑀓𑀼𑀮𑀺𑀓𑀁 𑀅𑀓𑀸𑀲𑀻𑀢𑀺 𑀢𑀬𑁄 𑀯𑀸𑀭𑁂 ‘‘𑀅𑀓𑁆𑀓𑀼𑀮𑁄 𑀧𑀓𑁆𑀓𑀼𑀮𑁄’’𑀢𑀺 𑀪𑀺𑀁𑀲𑀸𑀧𑁂𑀢𑀼𑀓𑀸𑀫𑀢𑀸𑀬 𑀏𑀯𑀭𑀽𑀧𑀁 𑀲𑀤𑁆𑀤𑀁 𑀅𑀓𑀸𑀲𑀺. 𑀅𑀦𑀼𑀓𑀭𑀡𑀲𑀤𑁆𑀤𑁄 𑀳𑀺 𑀅𑀬𑀁. 𑀢𑀤𑀸 𑀳𑀺 𑀲𑁄 𑀬𑀓𑁆𑀔𑁄 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀫𑀳𑀸𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀯𑀺𑀬 𑀘 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀅𑀲𑀦𑀺𑀲𑀢𑀲𑀤𑁆𑀤𑀲𑀗𑁆𑀖𑀸𑀝𑀁 𑀯𑀺𑀬 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀼𑀜𑁆𑀚𑀻𑀓𑀢𑀁 𑀳𑀼𑀢𑁆𑀯𑀸 𑀯𑀺𑀦𑀺𑀘𑁆𑀙𑀭𑀦𑁆𑀢𑀁 𑀤𑀺𑀲𑀸𑀕𑀚𑀸𑀦𑀁 𑀳𑀢𑁆𑀣𑀺𑀕𑀚𑁆𑀚𑀺𑀢𑀁, 𑀓𑁂𑀲𑀭𑀲𑀻𑀳𑀸𑀦𑀁 𑀲𑀻𑀳𑀦𑀺𑀦𑁆𑀦𑀸𑀤𑀁, 𑀬𑀓𑁆𑀔𑀸𑀦𑀁 𑀳𑀺𑀁𑀓𑀸𑀭𑀲𑀤𑁆𑀤𑀁, 𑀪𑀽𑀢𑀸𑀦𑀁 𑀅𑀝𑁆𑀝𑀳𑀸𑀲𑀁, 𑀅𑀲𑀼𑀭𑀸𑀦𑀁 𑀅𑀧𑁆𑀨𑁄𑀝𑀦𑀖𑁄𑀲𑀁, 𑀇𑀦𑁆𑀤𑀲𑁆𑀲 𑀤𑁂𑀯𑀭𑀜𑁆𑀜𑁄 𑀯𑀚𑀺𑀭𑀦𑀺𑀕𑁆𑀖𑀸𑀢𑀦𑀺𑀕𑁆𑀖𑁄𑀲𑀁, 𑀅𑀢𑁆𑀢𑀦𑁄 𑀕𑀫𑁆𑀪𑀻𑀭𑀢𑀸𑀬 𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀪𑀬𑀸𑀦𑀓𑀢𑀸𑀬 𑀘 𑀅𑀯𑀲𑁂𑀲𑀲𑀤𑁆𑀤𑀁 𑀅𑀯𑀳𑀲𑀦𑁆𑀢𑀫𑀺𑀯 𑀅𑀪𑀺𑀪𑀯𑀦𑁆𑀢𑀫𑀺𑀯 𑀘 𑀓𑀧𑁆𑀧𑀯𑀼𑀝𑁆𑀞𑀸𑀦𑀫𑀳𑀸𑀯𑀸𑀢𑀫𑀡𑁆𑀟𑀮𑀺𑀓𑀸𑀬 𑀯𑀺𑀦𑀺𑀕𑁆𑀖𑁄𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀳𑀤𑀬𑀁 𑀨𑀸𑀮𑁂𑀦𑁆𑀢𑀁 𑀯𑀺𑀬 𑀫𑀳𑀦𑁆𑀢𑀁 𑀧𑀝𑀺𑀪𑀬𑀦𑀺𑀕𑁆𑀖𑁄𑀲𑀁 𑀅𑀩𑁆𑀬𑀢𑁆𑀢𑀓𑁆𑀔𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀅𑀢𑁆𑀢𑀦𑁄 𑀬𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀺 ‘‘𑀏𑀢𑁂𑀦 𑀇𑀫𑀁 𑀲𑀫𑀡𑀁 𑀪𑀺𑀁𑀲𑀸𑀧𑁂𑀢𑁆𑀯𑀸 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀬𑀁 𑀬𑀁 𑀦𑀺𑀘𑁆𑀙𑀭𑀢𑀺, 𑀢𑁂𑀦 𑀢𑁂𑀦 𑀧𑀩𑁆𑀩𑀢𑀸 𑀧𑀧𑀝𑀺𑀓𑀁 𑀫𑀼𑀜𑁆𑀘𑀺𑀁𑀲𑀼, 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀓𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂𑀲𑀼 𑀭𑀼𑀓𑁆𑀔𑀮𑀢𑀸𑀕𑀼𑀫𑁆𑀩𑁂𑀲𑀼 𑀧𑀢𑁆𑀢𑀨𑀮𑀧𑀼𑀧𑁆𑀨𑀸𑀦𑀺 𑀲𑀻𑀤𑀬𑀺𑀁𑀲𑀼, 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁄𑀧𑀺 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀭𑀸𑀚𑀸 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺, 𑀪𑀼𑀫𑁆𑀫𑀤𑁂𑀯𑀢𑀸 𑀆𑀤𑀺𑀁 𑀓𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀢𑀸𑀦𑀫𑁆𑀧𑀺 𑀅𑀳𑀼𑀤𑁂𑀯 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄, 𑀧𑀕𑁂𑀯 𑀫𑀦𑀼𑀲𑁆𑀲𑀸𑀦𑀁. 𑀅𑀜𑁆𑀜𑁂𑀲𑀜𑁆𑀘 𑀅𑀧𑀤𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀦𑀁 𑀫𑀳𑀸𑀧𑀣𑀯𑀺𑀬𑀸 𑀉𑀦𑁆𑀤𑁆𑀭𑀺𑀬𑀦𑀓𑀸𑀮𑁄 𑀯𑀺𑀬 𑀫𑀳𑀢𑀻 𑀯𑀺𑀪𑀺𑀁𑀲𑀦𑀓𑀸 𑀅𑀳𑁄𑀲𑀺, 𑀲𑀓𑀮𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑀢𑀮𑁂 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁 𑀉𑀤𑀧𑀸𑀤𑀺. 𑀪𑀕𑀯𑀸 𑀧𑀦 𑀢𑀁 𑀲𑀤𑁆𑀤𑀁 ‘‘𑀓𑀺𑀫𑀻’’𑀢𑀺 𑀅𑀫𑀜𑁆𑀜𑀫𑀸𑀦𑁄 𑀦𑀺𑀘𑁆𑀘𑀮𑁄 𑀦𑀺𑀲𑀻𑀤𑀺, ‘‘𑀫𑀸 𑀓𑀲𑁆𑀲𑀘𑀺 𑀇𑀫𑀺𑀦𑀸 𑀅𑀦𑁆𑀢𑀭𑀸𑀬𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺.

𑀬𑀲𑁆𑀫𑀸 𑀧𑀦 𑀲𑁄 𑀲𑀤𑁆𑀤𑁄 ‘‘𑀅𑀓𑁆𑀓𑀼𑀮 𑀧𑀓𑁆𑀓𑀼𑀮’’ 𑀇𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀲𑀢𑁆𑀢𑀸𑀦𑀁 𑀲𑁄𑀢𑀧𑀣𑀁 𑀅𑀕𑀫𑀸𑀲𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀦𑀼𑀓𑀭𑀡𑀯𑀲𑁂𑀦 ‘‘𑀅𑀓𑁆𑀓𑀼𑀮𑁄 𑀧𑀓𑁆𑀓𑀼𑀮𑁄’’𑀢𑀺, 𑀬𑀓𑁆𑀔𑀲𑁆𑀲 𑀘 𑀢𑀲𑁆𑀲𑀁 𑀦𑀺𑀕𑁆𑀖𑁄𑀲𑀦𑀺𑀘𑁆𑀙𑀸𑀭𑀡𑀸𑀬𑀁 𑀅𑀓𑁆𑀓𑀼𑀮𑀧𑀓𑁆𑀓𑀼𑀮𑀓𑀭𑀡𑀁 𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 ‘‘𑀅𑀓𑁆𑀓𑀼𑀮𑀧𑀓𑁆𑀓𑀼𑀮𑀺𑀓𑀁 𑀅𑀓𑀸𑀲𑀻’’𑀢𑀺 𑀲𑀗𑁆𑀕𑀳𑀁 𑀆𑀭𑁄𑀧𑀬𑀺𑀁𑀲𑀼. 𑀓𑁂𑀘𑀺 𑀧𑀦 ‘‘𑀆𑀓𑀼𑀮𑀩𑁆𑀬𑀸𑀓𑀼𑀮 𑀇𑀢𑀺 𑀧𑀤𑀤𑁆𑀯𑀬𑀲𑁆𑀲 𑀧𑀭𑀺𑀬𑀸𑀬𑀸𑀪𑀺𑀥𑀸𑀦𑀯𑀲𑁂𑀦 𑀅𑀓𑁆𑀓𑀼𑀮𑁄 𑀩𑀓𑁆𑀓𑀼𑀮𑁄𑀢𑀺 𑀅𑀬𑀁 𑀲𑀤𑁆𑀤𑁄 𑀯𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺 𑀬𑀣𑀸 ‘‘𑀏𑀓𑀁 𑀏𑀓𑀓’’𑀦𑁆𑀢𑀺. 𑀬𑀲𑁆𑀫𑀸 𑀏𑀓𑀯𑀸𑀭𑀁 𑀚𑀸𑀢𑁄 𑀧𑀞𑀫𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀆𑀓𑀼𑀮𑁄𑀢𑀺 𑀆𑀤𑀺𑀅𑀢𑁆𑀣𑁄 𑀆𑀓𑀸𑀭𑁄, 𑀢𑀲𑁆𑀲 𑀘 𑀓𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀭𑀲𑁆𑀲𑀢𑁆𑀢𑀁 𑀓𑀢𑀦𑁆𑀢𑀺. 𑀤𑁆𑀯𑁂 𑀯𑀸𑀭𑁂 𑀧𑀦 𑀚𑀸𑀢𑁄 𑀩𑀓𑁆𑀓𑀼𑀮𑁄, 𑀓𑀼𑀮𑀲𑀤𑁆𑀤𑁄 𑀘𑁂𑀢𑁆𑀣 𑀚𑀸𑀢𑀺𑀧𑀭𑀺𑀬𑀸𑀬𑁄 𑀓𑁄𑀮𑀁𑀓𑁄𑀮𑁄𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀼𑀢𑁆𑀢𑀅𑀥𑀺𑀧𑁆𑀧𑀸𑀬𑀸𑀦𑀼𑀯𑀺𑀥𑀸𑀬𑀻 𑀘 𑀲𑀤𑁆𑀤𑀧𑁆𑀧𑀬𑁄𑀕𑁄𑀢𑀺 𑀧𑀞𑀫𑁂𑀦 𑀧𑀤𑁂𑀦 𑀚𑀮𑀸𑀩𑀼𑀚𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄, 𑀤𑀼𑀢𑀺𑀬𑁂𑀦 𑀅𑀡𑁆𑀟𑀚𑀆𑀲𑀻𑀯𑀺𑀲𑀓𑀡𑁆𑀳𑀲𑀧𑁆𑀧𑀸𑀤𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀲𑀻𑀳𑀸𑀤𑀺𑀓𑁄 𑀯𑀺𑀬 𑀆𑀲𑀻𑀯𑀺𑀲𑀸𑀤𑀺𑀓𑁄 𑀯𑀺𑀬 𑀘 ‘‘𑀅𑀳𑀁 𑀢𑁂 𑀚𑀻𑀯𑀺𑀢𑀳𑀸𑀭𑀓𑁄’’𑀢𑀺 𑀇𑀫𑀁 𑀅𑀢𑁆𑀣𑀁 𑀬𑀓𑁆𑀔𑁄 𑀧𑀤𑀤𑁆𑀯𑀬𑁂𑀦 𑀤𑀲𑁆𑀲𑁂𑀢𑀻𑀢𑀺 𑀅𑀜𑁆𑀜𑁂. 𑀅𑀧𑀭𑁂 𑀧𑀦 ‘‘𑀅𑀓𑁆𑀔𑀼𑀮𑁄 𑀪𑀓𑁆𑀔𑀼𑀮𑁄’’𑀢𑀺 𑀧𑀸𑀴𑀺𑀁 𑀯𑀢𑁆𑀯𑀸 ‘‘𑀅𑀓𑁆𑀔𑁂𑀢𑀼𑀁 𑀔𑁂𑀧𑁂𑀢𑀼𑀁 𑀯𑀺𑀦𑀸𑀲𑁂𑀢𑀼𑀁 𑀉𑀮𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀓𑁆𑀔𑀼𑀮𑁄, 𑀪𑀓𑁆𑀔𑀺𑀢𑀼𑀁 𑀔𑀸𑀤𑀺𑀢𑀼𑀁 𑀉𑀮𑀢𑀻𑀢𑀺 𑀪𑀓𑁆𑀔𑀼𑀮𑁄. 𑀓𑁄 𑀧𑀦𑁂𑀲𑁄? 𑀬𑀓𑁆𑀔𑀭𑀓𑁆𑀔𑀲𑀧𑀺𑀲𑀸𑀘𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑀸𑀦𑀁 𑀅𑀦𑀢𑁆𑀣𑀸𑀯𑀳𑁄’’𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀲𑁄 𑀢𑁂, 𑀲𑀫𑀡, 𑀧𑀺𑀲𑀸𑀘𑁄𑀢𑀺 ‘‘𑀅𑀫𑁆𑀪𑁄, 𑀲𑀫𑀡, 𑀢𑀯 𑀧𑀺𑀲𑀺𑀢𑀸𑀲𑀦𑁄 𑀧𑀺𑀲𑀸𑀘𑁄 𑀉𑀧𑀝𑁆𑀞𑀺𑀢𑁄’’𑀢𑀺 𑀫𑀳𑀦𑁆𑀢𑀁 𑀪𑁂𑀭𑀯𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀬𑀓𑁆𑀔𑁄 𑀯𑀤𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑁂𑀦 𑀬𑀓𑁆𑀔𑁂𑀦 𑀓𑀸𑀬𑀯𑀸𑀘𑀸𑀳𑀺 𑀧𑀯𑀢𑁆𑀢𑀺𑀬𑀫𑀸𑀦𑀁 𑀯𑀺𑀧𑁆𑀧𑀓𑀸𑀭𑀁. 𑀢𑁂𑀦 𑀘 𑀅𑀢𑁆𑀢𑀦𑁄 𑀅𑀦𑀪𑀺𑀪𑀯𑀦𑀻𑀬𑀲𑁆𑀲 𑀳𑁂𑀢𑀼𑀪𑀽𑀢𑀁 𑀮𑁄𑀓𑀥𑀫𑁆𑀫𑁂𑀲𑀼 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀢𑀸𑀬𑀁 𑀯𑁂𑀮𑀸𑀬𑀦𑁆𑀢𑀺 𑀢𑀲𑁆𑀲𑀁 𑀯𑀺𑀧𑁆𑀧𑀓𑀸𑀭𑀓𑀭𑀡𑀯𑁂𑀮𑀸𑀬𑀁. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀅𑀕𑀡𑁂𑀢𑁆𑀯𑀸 𑀅𑀲𑁆𑀲 𑀅𑀕𑀡𑀦𑀳𑁂𑀢𑀼𑀪𑀽𑀢𑀁 𑀥𑀫𑁆𑀫𑀸𑀦𑀼𑀪𑀸𑀯𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀤𑀸 𑀲𑀓𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀲𑀓𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀥𑀫𑁆𑀫𑁂𑀲𑀼. 𑀧𑀸𑀭𑀕𑀽𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀸𑀭𑀗𑁆𑀕𑀢𑁄, 𑀢𑀢𑁄𑀬𑁂𑀯 𑀢𑁂𑀲𑀁 𑀳𑁂𑀢𑀼𑀪𑀽𑀢𑁂 𑀲𑀫𑀼𑀤𑀬𑁂, 𑀢𑀤𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑁂 𑀦𑀺𑀭𑁄𑀥𑁂, 𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀘 𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀸𑀭𑀕𑀢𑁄. 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀏𑀯𑀁 𑀲𑀩𑁆𑀩𑀲𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀳𑁄𑀢𑀺, 𑀲𑀩𑁆𑀩𑀲𑁄 𑀲𑀓𑀅𑀢𑁆𑀢𑀪𑀸𑀯𑀸𑀯𑀩𑁄𑀥𑀦𑁂𑀧𑀺 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀮𑁄𑀓𑀲𑀫𑀼𑀤𑀬𑀜𑁆𑀘 𑀧𑀜𑁆𑀜𑀧𑁂𑀫𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫). 𑀅𑀣 𑀯𑀸 𑀲𑀓𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑁂𑀲𑀼, 𑀅𑀢𑁆𑀢𑀦𑁄 𑀥𑀫𑁆𑀫𑀸 𑀦𑀸𑀫 𑀅𑀢𑁆𑀣𑀓𑀸𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀻𑀮𑀸𑀤𑀺𑀥𑀫𑁆𑀫𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀆𑀤𑀬𑁄 𑀳𑀺 𑀯𑁄𑀤𑀸𑀦𑀥𑀫𑁆𑀫𑀸 𑀏𑀓𑀦𑁆𑀢𑀳𑀺𑀢𑀲𑀼𑀔𑀲𑀫𑁆𑀧𑀸𑀤𑀦𑁂𑀦 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀸 𑀦𑀸𑀫, 𑀦 𑀅𑀦𑀢𑁆𑀣𑀸𑀯𑀳𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀯𑀺𑀬 𑀅𑀲𑀓𑀥𑀫𑁆𑀫𑀸. 𑀧𑀸𑀭𑀕𑀽𑀢𑀺 𑀢𑁂𑀲𑀁 𑀲𑀻𑀮𑀸𑀤𑀻𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀕𑀢𑁄.

𑀢𑀢𑁆𑀣 𑀲𑀻𑀮𑀁 𑀢𑀸𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑀁. 𑀢𑁂𑀲𑀼 𑀮𑁄𑀓𑀺𑀬𑀁 𑀧𑀼𑀩𑁆𑀩𑀪𑀸𑀕𑀲𑀻𑀮𑀁. 𑀢𑀁 𑀲𑀗𑁆𑀔𑁂𑀧𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀦𑁂𑀓𑀧𑁆𑀧𑀪𑁂𑀤𑀁. 𑀮𑁄𑀓𑀼𑀢𑁆𑀢𑀭𑀁 𑀫𑀕𑁆𑀕𑀨𑀮𑀯𑀲𑁂𑀦 𑀤𑀼𑀯𑀺𑀥𑀁, 𑀅𑀢𑁆𑀣𑀢𑁄 𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀫𑁆𑀫𑀸𑀆𑀚𑀻𑀯𑀸. 𑀬𑀣𑀸 𑀘 𑀲𑀻𑀮𑀁, 𑀢𑀣𑀸 𑀲𑀫𑀸𑀥𑀺𑀧𑀜𑁆𑀜𑀸 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑀸. 𑀢𑀢𑁆𑀣 𑀮𑁄𑀓𑀺𑀬𑀲𑀫𑀸𑀥𑀺 𑀲𑀳 𑀉𑀧𑀘𑀸𑀭𑁂𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑁄. 𑀧𑀜𑁆𑀜𑀸𑀧𑀺 𑀮𑁄𑀓𑀺𑀬𑀸 𑀲𑀼𑀢𑀫𑀬𑀸, 𑀘𑀺𑀦𑁆𑀢𑀸𑀫𑀬𑀸, 𑀪𑀸𑀯𑀦𑀸𑀫𑀬𑀸 𑀘 𑀲𑀸𑀲𑀯𑀸, 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀘. 𑀯𑀺𑀫𑀼𑀢𑁆𑀢𑀺 𑀦𑀸𑀫 𑀨𑀮𑀯𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘, 𑀢𑀲𑁆𑀫𑀸 𑀲𑀸 𑀮𑁄𑀓𑀼𑀢𑁆𑀢𑀭𑀸𑀯. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀮𑁄𑀓𑀺𑀬𑀫𑁂𑀯, 𑀢𑀁 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀪𑀸𑀯𑀢𑁄. 𑀏𑀯𑀁 𑀏𑀢𑁂𑀲𑀁 𑀲𑀻𑀮𑀸𑀤𑀺𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁂𑀦 𑀅𑀦𑀯𑀲𑁂𑀲𑀢𑁄 𑀦𑀺𑀩𑁆𑀩𑀢𑁆𑀢𑀧𑀸𑀭𑀺𑀧𑀽𑀭𑀺𑀬𑀸 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀕𑀢𑁄𑀢𑀺 𑀲𑀓𑁂𑀲𑀼 𑀥𑀫𑁆𑀫𑁂𑀲𑀼 𑀧𑀸𑀭𑀕𑀽.

𑀅𑀣 𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀥𑀺𑀕𑀫𑁂𑀦 𑀲𑀻𑀮𑀲𑁆𑀫𑀺𑀁 𑀧𑀸𑀭𑀕𑀽. 𑀲𑁄 𑀳𑀺 ‘‘𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀯𑀼𑀢𑁆𑀢𑁄, 𑀲𑁄𑀢𑀸𑀧𑀦𑁆𑀦𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀲𑀓𑀤𑀸𑀕𑀸𑀫𑀻𑀧𑀺 𑀕𑀳𑀺𑀢𑁄 𑀳𑁄𑀢𑀺. 𑀅𑀦𑀸𑀕𑀸𑀫𑀺𑀨𑀮𑀸𑀥𑀺𑀕𑀫𑁂𑀦 𑀲𑀫𑀸𑀥𑀺𑀲𑁆𑀫𑀺𑀁 𑀧𑀸𑀭𑀕𑀽. 𑀲𑁄 𑀳𑀺 ‘‘𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀯𑀼𑀢𑁆𑀢𑁄. 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁂𑀦 𑀇𑀢𑀭𑁂𑀲𑀼 𑀢𑀻𑀲𑀼 𑀧𑀸𑀭𑀕𑀽. 𑀅𑀭𑀳𑀸 𑀳𑀺 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀅𑀕𑁆𑀕𑀪𑀽𑀢𑀸𑀬 𑀅𑀓𑀼𑀧𑁆𑀧𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀥𑀺𑀕𑀢𑀢𑁆𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀘 𑀧𑀭𑀺𑀬𑁄𑀲𑀸𑀦𑀕𑀫𑀦𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀲𑀼 𑀧𑀸𑀭𑀕𑀽 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀘𑀢𑀼𑀫𑀕𑁆𑀕𑀯𑀲𑁂𑀦 𑀧𑀭𑀺𑀜𑁆𑀜𑀸𑀤𑀺𑀲𑁄𑀴𑀲𑀯𑀺𑀥𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀓𑁂𑀲𑀼 𑀥𑀫𑁆𑀫𑁂𑀲𑀼 𑀧𑀸𑀭𑀕𑀢𑁄.

𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀢𑀤𑀸 𑀲𑁄 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑀢𑀸𑀬 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺. 𑀅𑀣 𑀏𑀢𑀁 𑀧𑀺𑀲𑀸𑀘𑀜𑁆𑀘, 𑀧𑀓𑁆𑀓𑀼𑀮𑀜𑁆𑀘𑀸𑀢𑀺𑀯𑀢𑁆𑀢𑀢𑀻𑀢𑀺 𑀢𑀢𑁄 𑀬𑀣𑀸𑀯𑀼𑀢𑁆𑀢𑀧𑀸𑀭𑀕𑀫𑀦𑀢𑁄 𑀅𑀣 𑀧𑀘𑁆𑀙𑀸, 𑀅𑀚𑀓𑀮𑀸𑀧𑀓, 𑀏𑀢𑀁 𑀢𑀬𑀸 𑀤𑀲𑁆𑀲𑀺𑀢𑀁 𑀧𑀺𑀲𑀺𑀢𑀸𑀲𑀦𑀢𑁆𑀣𑀫𑀸𑀕𑀢𑀁 𑀧𑀺𑀲𑀸𑀘𑀁 𑀪𑀬𑀚𑀦𑀦𑀢𑁆𑀣𑀁 𑀲𑀫𑀼𑀝𑁆𑀞𑀸𑀧𑀺𑀢𑀁 𑀅𑀓𑁆𑀓𑀼𑀮𑀧𑀓𑁆𑀓𑀼𑀮𑀺𑀓𑀜𑁆𑀘 𑀅𑀢𑀺𑀯𑀢𑁆𑀢𑀢𑀺, 𑀅𑀢𑀺𑀓𑁆𑀓𑀫𑀢𑀺, 𑀅𑀪𑀺𑀪𑀯𑀢𑀺, 𑀢𑀁 𑀦 𑀪𑀸𑀬𑀢𑀻𑀢𑀺 𑀅𑀢𑁆𑀣𑁄.

𑀅𑀬𑀫𑁆𑀧𑀺 𑀕𑀸𑀣𑀸 𑀅𑀭𑀳𑀢𑁆𑀢𑀫𑁂𑀯 𑀉𑀮𑁆𑀮𑀧𑀺𑀢𑁆𑀯𑀸 𑀓𑀣𑀺𑀢𑀸. 𑀅𑀣 𑀅𑀚𑀓𑀮𑀸𑀧𑀓𑁄 𑀅𑀢𑁆𑀢𑀦𑀸 𑀓𑀢𑁂𑀦 𑀢𑀣𑀸𑀭𑀽𑀧𑁂𑀦𑀧𑀺 𑀧𑀝𑀺𑀪𑀬𑀭𑀽𑀧𑁂𑀦 𑀯𑀺𑀪𑀺𑀁𑀲𑀦𑁂𑀦 𑀅𑀓𑀫𑁆𑀧𑀦𑀻𑀬𑀲𑁆𑀲 𑀪𑀕𑀯𑀢𑁄 𑀢𑀁 𑀢𑀸𑀤𑀺𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄𑀯𑀢𑀸𑀬’’𑀦𑁆𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀧𑁄𑀣𑀼𑀚𑁆𑀚𑀦𑀺𑀓𑀸𑀬 𑀲𑀤𑁆𑀥𑀸𑀬 𑀅𑀢𑁆𑀢𑀦𑀺 𑀦𑀺𑀯𑀺𑀝𑁆𑀞𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀉𑀧𑀸𑀲𑀓𑀢𑁆𑀢𑀁 𑀧𑀯𑁂𑀤𑁂𑀲𑀺.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.