𑁫. 𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀲𑀸𑀯𑀢𑁆𑀣𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀜𑁆𑀳𑀺 𑀲𑀯𑀢𑁆𑀣𑀲𑁆𑀲 𑀦𑀸𑀫 𑀇𑀲𑀺𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀫𑀸𑀧𑀺𑀢𑀢𑁆𑀢𑀸 𑀲𑀸𑀯𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀓𑀸𑀓𑀦𑁆𑀤𑀻, 𑀫𑀸𑀓𑀦𑁆𑀤𑀻𑀢𑀺. 𑀏𑀯𑀁 𑀢𑀸𑀯 𑀅𑀓𑁆𑀔𑀭𑀘𑀺𑀦𑁆𑀢𑀓𑀸. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦 𑀪𑀡𑀦𑁆𑀢𑀺 𑁋 𑀬𑀁𑀓𑀺𑀜𑁆𑀘𑀺 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀲𑀩𑁆𑀩𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀲𑀸𑀯𑀢𑁆𑀣𑀺. 𑀲𑀢𑁆𑀣𑀲𑀫𑀸𑀬𑁄𑀕𑁂 𑀘 𑀓𑀺𑀫𑁂𑀢𑁆𑀣 𑀪𑀡𑁆𑀟𑀫𑀢𑁆𑀣𑀻𑀢𑀺 𑀧𑀼𑀘𑁆𑀙𑀺𑀢𑁂 𑀲𑀩𑁆𑀩𑀫𑀢𑁆𑀣𑀻𑀢𑀺𑀧𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀲𑀸𑀯𑀢𑁆𑀣𑀻𑀢𑀺.

‘‘𑀲𑀩𑁆𑀩𑀤𑀸 𑀲𑀩𑁆𑀩𑀽𑀧𑀓𑀭𑀡𑀁, 𑀲𑀸𑀯𑀢𑁆𑀣𑀺𑀬𑀁 𑀲𑀫𑁄𑀳𑀺𑀢𑀁;

𑀢𑀲𑁆𑀫𑀸 𑀲𑀩𑁆𑀩𑀫𑀼𑀧𑀸𑀤𑀸𑀬, 𑀲𑀸𑀯𑀢𑁆𑀣𑀻𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁧𑁪);

𑀢𑀲𑁆𑀲𑀁 𑀲𑀸𑀯𑀢𑁆𑀣𑀺𑀬𑀁, 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀚𑁂𑀢𑀯𑀦𑁂𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀺𑀓𑁂 𑀚𑀺𑀦𑀸𑀢𑀻𑀢𑀺 𑀚𑁂𑀢𑁄, 𑀭𑀜𑁆𑀜𑀸 𑀯𑀸 𑀧𑀘𑁆𑀘𑀢𑁆𑀣𑀺𑀓𑀚𑀦𑁂 𑀚𑀺𑀢𑁂 𑀚𑀸𑀢𑁄𑀢𑀺 𑀚𑁂𑀢𑁄, 𑀫𑀗𑁆𑀕𑀮𑀓𑀫𑁆𑀬𑀢𑀸𑀬 𑀯𑀸 𑀢𑀲𑁆𑀲 𑀏𑀯𑀁 𑀦𑀸𑀫𑀫𑁂𑀯 𑀓𑀢𑀦𑁆𑀢𑀺 𑀚𑁂𑀢𑁄. 𑀯𑀦𑀬𑀢𑀻𑀢𑀺 𑀯𑀦𑀁, 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀪𑀢𑁆𑀢𑀺𑀁 𑀓𑀭𑁄𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀦𑀼𑀓𑁂 𑀇𑀢𑀺 𑀯𑀸 𑀯𑀦𑀁, 𑀦𑀸𑀦𑀸𑀯𑀺𑀥𑀓𑀼𑀲𑀼𑀫𑀕𑀦𑁆𑀥𑀲𑀫𑁆𑀫𑁄𑀤𑀫𑀢𑁆𑀢𑀓𑁄𑀓𑀺𑀮𑀸𑀤𑀺𑀯𑀺𑀳𑀗𑁆𑀕𑀯𑀺𑀭𑀼𑀢𑀸𑀮𑀸𑀧𑁂𑀳𑀺 𑀫𑀦𑁆𑀤𑀫𑀸𑀭𑀼𑀢𑀘𑀮𑀺𑀢𑀭𑀼𑀓𑁆𑀔𑀲𑀸𑀔𑀸𑀧𑀮𑁆𑀮𑀯𑀳𑀢𑁆𑀣𑁂𑀳𑀺 𑀘 ‘‘𑀏𑀣 𑀫𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀧𑀸𑀡𑀺𑀦𑁄 𑀬𑀸𑀘𑀢𑀺 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀚𑁂𑀢𑀲𑁆𑀲 𑀯𑀦𑀁 𑀚𑁂𑀢𑀯𑀦𑀁. 𑀢𑀜𑁆𑀳𑀺 𑀚𑁂𑀢𑁂𑀦 𑀓𑀼𑀫𑀸𑀭𑁂𑀦 𑀭𑁄𑀧𑀺𑀢𑀁 𑀲𑀁𑀯𑀤𑁆𑀥𑀺𑀢𑀁 𑀧𑀭𑀺𑀧𑀸𑀮𑀺𑀢𑀁. 𑀲𑁄𑀯 𑀢𑀲𑁆𑀲 𑀲𑀸𑀫𑀻 𑀅𑀳𑁄𑀲𑀺, 𑀢𑀲𑁆𑀫𑀸 𑀚𑁂𑀢𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀚𑁂𑀢𑀯𑀦𑁂.

𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀕𑀳𑀺𑀢𑀦𑀸𑀫𑀯𑀲𑁂𑀦 𑀲𑀼𑀤𑀢𑁆𑀢𑁄 𑀦𑀸𑀫 𑀲𑁄 𑀫𑀳𑀸𑀲𑁂𑀝𑁆𑀞𑀺, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀢𑀸𑀬 𑀧𑀦 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀬 𑀓𑀭𑀼𑀡𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀘 𑀦𑀺𑀘𑁆𑀘𑀓𑀸𑀮𑀁 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑀁 𑀤𑁂𑀢𑀺, 𑀢𑀲𑁆𑀫𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀆𑀭𑀫𑀦𑁆𑀢𑀺 𑀏𑀢𑁆𑀣 𑀧𑀸𑀡𑀺𑀦𑁄 𑀯𑀺𑀲𑁂𑀲𑁂𑀦 𑀧𑀩𑁆𑀩𑀚𑀺𑀢𑀸𑀢𑀺 𑀆𑀭𑀸𑀫𑁄, 𑀧𑀼𑀧𑁆𑀨𑀨𑀮𑀸𑀤𑀺𑀲𑁄𑀪𑀸𑀬 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀢𑀸𑀤𑀺𑀧𑀜𑁆𑀘𑀯𑀺𑀥𑀲𑁂𑀦𑀸𑀲𑀦𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀭𑀫𑀦𑁆𑀢𑀺 𑀅𑀪𑀺𑀭𑀫𑀦𑁆𑀢𑀺 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀯𑀸 𑀲𑀫𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀕𑀢𑁂𑀧𑀺 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑀁𑀬𑁂𑀯 𑀆𑀦𑁂𑀢𑁆𑀯𑀸 𑀭𑀫𑁂𑀢𑀻𑀢𑀺 𑀆𑀭𑀸𑀫𑁄. 𑀲𑁄 𑀳𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀚𑁂𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀢𑁄 𑀅𑀝𑁆𑀞𑀸𑀭𑀲𑀳𑀺 𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀓𑁄𑀝𑀺𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀺 𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀲𑁂𑀦𑀸𑀲𑀦𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀺 𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀯𑀺𑀳𑀸𑀭𑀫𑀳𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀯𑀁 𑀘𑀢𑀼𑀧𑀜𑁆𑀜𑀸𑀲𑀳𑀺𑀭𑀜𑁆𑀜𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑁄, 𑀢𑀲𑁆𑀫𑀸 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂.

𑀏𑀢𑁆𑀣 𑀘 ‘‘𑀚𑁂𑀢𑀯𑀦𑁂’’𑀢𑀺 𑀯𑀘𑀦𑀁 𑀧𑀼𑀭𑀺𑀫𑀲𑀸𑀫𑀺𑀧𑀭𑀺𑀓𑀺𑀢𑁆𑀢𑀦𑀁, ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺 𑀧𑀘𑁆𑀙𑀺𑀫𑀲𑀸𑀫𑀺𑀧𑀭𑀺𑀓𑀺𑀢𑁆𑀢𑀦𑀁. 𑀉𑀪𑀬𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀧𑀭𑀺𑀤𑀻𑀧𑀦𑁂𑀦 𑀧𑀼𑀜𑁆𑀜𑀓𑀸𑀫𑀸𑀦𑀁 𑀆𑀬𑀢𑀺𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁆𑀣𑀁. 𑀢𑀢𑁆𑀣 𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀸𑀲𑀸𑀤𑀓𑀭𑀡𑀯𑀲𑁂𑀦 𑀪𑀽𑀫𑀺𑀯𑀺𑀓𑁆𑀓𑀬𑀮𑀤𑁆𑀥𑀸 𑀅𑀝𑁆𑀞𑀸𑀭𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀅𑀦𑁂𑀓𑀓𑁄𑀝𑀺𑀅𑀕𑁆𑀖𑀦𑀓𑀸 𑀭𑀼𑀓𑁆𑀔𑀸 𑀘 𑀚𑁂𑀢𑀲𑁆𑀲 𑀧𑀭𑀺𑀘𑁆𑀘𑀸𑀕𑁄, 𑀘𑀢𑀼𑀧𑀜𑁆𑀜𑀸𑀲 𑀓𑁄𑀝𑀺𑀬𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲. 𑀇𑀢𑀺 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑀧𑀭𑀺𑀓𑀺𑀢𑁆𑀢𑀦𑁂𑀦 ‘‘𑀏𑀯𑀁 𑀧𑀼𑀜𑁆𑀜𑀓𑀸𑀫𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀜𑁆𑀜𑁂𑀧𑀺 𑀧𑀼𑀜𑁆𑀜𑀓𑀸𑀫𑁂 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂 𑀦𑀺𑀬𑁄𑀚𑁂𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀢𑀸𑀯 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, ‘‘𑀚𑁂𑀢𑀯𑀦𑁂’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀣 𑀚𑁂𑀢𑀯𑀦𑁂 𑀯𑀺𑀳𑀭𑀢𑀺, ‘‘𑀲𑀸𑀯𑀢𑁆𑀣𑀺𑀬’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀏𑀓𑀁 𑀲𑀫𑀬𑀁 𑀯𑀺𑀳𑀭𑀺𑀢𑀼𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀦𑀦𑀼 𑀅𑀯𑁄𑀘𑀼𑀫𑁆𑀳𑀸 ‘‘𑀲𑀫𑀻𑀧𑀢𑁆𑀣𑁂 𑀏𑀢𑀁 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺. 𑀢𑀲𑁆𑀫𑀸 𑀬𑀤𑀺𑀤𑀁 𑀲𑀸𑀯𑀢𑁆𑀣𑀺𑀬𑀸 𑀲𑀫𑀻𑀧𑁂 𑀚𑁂𑀢𑀯𑀦𑀁, 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 ‘‘𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂’’𑀢𑀺 𑀯𑀼𑀢𑁆𑀢𑁄. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀳𑀺𑀲𑁆𑀲 𑀲𑀸𑀯𑀢𑁆𑀣𑀺𑀯𑀘𑀦𑀁, 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀲𑁂𑀲𑀯𑀘𑀦𑀦𑁆𑀢𑀺.

𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄𑀢𑀺𑀆𑀤𑀻𑀲𑀼 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁. 𑀘𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀭𑀽𑀧𑀲𑀸𑀭𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑁄. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺 𑀧𑀽𑀚𑀸𑀯𑀘𑀦𑀁. 𑀕𑀼𑀡𑀯𑀺𑀲𑁂𑀲𑁂𑀳𑀺 𑀫𑀳𑀦𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺 𑀳𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄. 𑀭𑁂𑀯𑀢𑁄𑀢𑀺 𑀔𑀤𑀺𑀭𑀯𑀦𑀺𑀓𑀭𑁂𑀯𑀢𑁄, 𑀦 𑀓𑀗𑁆𑀔𑀸𑀭𑁂𑀯𑀢𑁄. 𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀪𑀕𑀯𑀸 𑀭𑀢𑁆𑀢𑀲𑀸𑀡𑀺𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀬𑀽𑀧𑁄, 𑀧𑀯𑀸𑀴𑀥𑀚𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀩𑁆𑀩𑀢𑁄, 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸, 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀘𑀓𑁆𑀓𑀯𑀢𑁆𑀢𑀺 𑀭𑀸𑀚𑀸, 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀕𑀦𑀫𑀚𑁆𑀛𑁂 𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀇𑀫𑁂 𑀅𑀕𑁆𑀕𑀲𑀸𑀯𑀓𑀸 𑀫𑀳𑀸𑀲𑀸𑀯𑀓𑀸 𑀘 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺𑀁𑀲𑀼.

𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀽 𑀢𑁂 𑀆𑀕𑀘𑁆𑀙𑀦𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀅𑀪𑀸𑀲𑀺. 𑀪𑀕𑀯𑀸 𑀳𑀺 𑀢𑁂 𑀆𑀬𑀲𑁆𑀫𑀦𑁆𑀢𑁂 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀧𑀭𑀫𑁂𑀦 𑀉𑀧𑀲𑀫𑁂𑀦 𑀲𑀫𑀦𑁆𑀦𑀸𑀕𑀢𑁂 𑀧𑀭𑀫𑀸𑀬 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑁂 𑀉𑀧𑀲𑀗𑁆𑀓𑀫𑀦𑁆𑀢𑁂 𑀧𑀲𑁆𑀲𑀺𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀢𑁂𑀲𑀁 𑀕𑀼𑀡𑀯𑀺𑀲𑁂𑀲𑀧𑀭𑀺𑀓𑀺𑀢𑁆𑀢𑀦𑀢𑁆𑀣𑀁 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘‘𑀏𑀢𑁂, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀆𑀕𑀘𑁆𑀙𑀦𑁆𑀢𑀺, 𑀏𑀢𑁂, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀧𑀲𑀸𑀤𑀯𑀲𑁂𑀦 𑀏𑀢𑀁 𑀆𑀫𑁂𑀟𑀺𑀢𑀁, 𑀧𑀲𑀁𑀲𑀸𑀯𑀲𑁂𑀦𑀸𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀁 𑀪𑀕𑀯𑀢𑀸 𑀢𑁂 𑀆𑀬𑀲𑁆𑀫𑀦𑁆𑀢𑁂 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀢𑁆𑀢𑁂. 𑀅𑀜𑁆𑀜𑀢𑀭𑁄𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑁄, 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀏𑀓𑁄 𑀪𑀺𑀓𑁆𑀔𑀼. 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑁄𑀢𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀚𑀸𑀢𑁄. 𑀲𑁄 𑀳𑀺 𑀉𑀴𑀸𑀭𑀪𑁄𑀕𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸 𑀧𑀩𑁆𑀩𑀚𑀺𑀢𑁄. 𑀢𑀲𑁆𑀲 𑀓𑀺𑀭 𑀏𑀯𑀁 𑀅𑀳𑁄𑀲𑀺 ‘‘𑀇𑀫𑁂 𑀮𑁄𑀓𑀺𑀬𑀸 𑀉𑀪𑀢𑁄𑀲𑀼𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀲𑀺𑀓𑁆𑀔𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀯𑀤𑀦𑁆𑀢𑀺, 𑀪𑀕𑀯𑀸 𑀘 𑀏𑀢𑁂 𑀆𑀬𑀲𑁆𑀫𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀤𑀢𑀺, 𑀳𑀦𑁆𑀤𑀸𑀳𑀁 𑀪𑀕𑀯𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀮𑀓𑁆𑀔𑀡𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀪𑀕𑀯𑀸 𑀢𑀤𑀸 𑀢𑁂 𑀣𑁂𑀭𑁂 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀅𑀪𑀸𑀲𑀺. 𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀳𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀩𑁆𑀩𑀘𑀦𑀁. 𑀅𑀭𑀺𑀬𑀸 𑀧𑀦 𑀩𑀸𑀳𑀺𑀢𑀧𑀸𑀧𑀢𑀸𑀬 𑀩𑁆𑀭𑀸𑀳𑁆𑀫𑀡𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀩𑀸𑀳𑀺𑀢𑀧𑀸𑀧𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀲𑀫𑀘𑀭𑀺𑀬𑀸 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁩𑁮𑁮). 𑀯𑀓𑁆𑀔𑀢𑀺 𑀘 ‘‘𑀩𑀸𑀳𑀺𑀢𑁆𑀯𑀸 𑀧𑀸𑀧𑀓𑁂 𑀥𑀫𑁆𑀫𑁂’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀩𑁆𑀭𑀸𑀳𑁆𑀫𑀡𑀲𑀤𑁆𑀤𑀲𑁆𑀲 𑀧𑀭𑀫𑀢𑁆𑀣𑀢𑁄 𑀲𑀺𑀔𑀸𑀧𑀢𑁆𑀢𑀫𑀢𑁆𑀣𑀁 𑀚𑀸𑀦𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀩𑀸𑀳𑀺𑀢𑁆𑀯𑀸𑀢𑀺 𑀩𑀳𑀺 𑀓𑀢𑁆𑀯𑀸, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀦𑀻𑀳𑀭𑀺𑀢𑁆𑀯𑀸 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀧𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀸𑀧𑀓𑁂 𑀥𑀫𑁆𑀫𑁂𑀢𑀺 𑀮𑀸𑀫𑀓𑁂 𑀥𑀫𑁆𑀫𑁂, 𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀥𑀫𑁆𑀫𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂, 𑀓𑀫𑁆𑀫𑀧𑀣𑀯𑀲𑁂𑀦 𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣𑁂, 𑀧𑀯𑀢𑁆𑀢𑀺𑀪𑁂𑀤𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀥𑀫𑁆𑀫𑁂𑀢𑀺 𑀅𑀢𑁆𑀣𑁄. 𑀬𑁂 𑀘𑀭𑀦𑁆𑀢𑀺 𑀲𑀤𑀸 𑀲𑀢𑀸𑀢𑀺 𑀬𑁂 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑀸𑀬 𑀲𑀩𑁆𑀩𑀓𑀸𑀮𑀁 𑀭𑀽𑀧𑀸𑀤𑀻𑀲𑀼 𑀙𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀲𑀢𑀢𑀯𑀺𑀳𑀸𑀭𑀯𑀲𑁂𑀦 𑀲𑀢𑀸 𑀲𑀢𑀺𑀫𑀦𑁆𑀢𑁄 𑀳𑀼𑀢𑁆𑀯𑀸 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀘𑀭𑀦𑁆𑀢𑀺. 𑀲𑀢𑀺𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀲𑀫𑁆𑀧𑀚𑀜𑁆𑀜𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀻𑀡𑀲𑀁𑀬𑁄𑀚𑀦𑀸𑀢𑀺 𑀘𑀢𑀽𑀳𑀺𑀧𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀤𑀲𑀯𑀺𑀥𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀭𑀺𑀓𑁆𑀔𑀻𑀡𑀲𑀁𑀬𑁄𑀚𑀦𑀸. 𑀩𑀼𑀤𑁆𑀥𑀸𑀢𑀺 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑁂𑀦 𑀩𑀼𑀤𑁆𑀥𑀸. 𑀢𑁂 𑀘 𑀧𑀦 𑀲𑀸𑀯𑀓𑀩𑀼𑀤𑁆𑀥𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀢𑀺 𑀢𑀺𑀯𑀺𑀥𑀸, 𑀢𑁂𑀲𑀼 𑀇𑀥 𑀲𑀸𑀯𑀓𑀩𑀼𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀯𑁂 𑀮𑁄𑀓𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑀸𑀢𑀺 𑀢𑁂 𑀲𑁂𑀝𑁆𑀞𑀢𑁆𑀣𑁂𑀦 𑀩𑁆𑀭𑀸𑀳𑁆𑀫𑀡𑀲𑀗𑁆𑀔𑀸𑀢𑁂 𑀥𑀫𑁆𑀫𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀸, 𑀩𑁆𑀭𑀸𑀳𑁆𑀫𑀡𑀪𑀽𑀢𑀲𑁆𑀲 𑀯𑀸 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀧𑀭𑀫𑀢𑁆𑀣𑀢𑁄 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫, 𑀦 𑀚𑀸𑀢𑀺𑀕𑁄𑀢𑁆𑀢𑀫𑀢𑁆𑀢𑁂𑀳𑀺, 𑀦 𑀚𑀝𑀸𑀥𑀸𑀭𑀡𑀸𑀤𑀺𑀫𑀢𑁆𑀢𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑀓𑀭𑀸 𑀥𑀫𑁆𑀫𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀸, 𑀦𑀸𑀦𑀚𑁆𑀛𑀸𑀲𑀬𑀢𑀸𑀬 𑀧𑀦 𑀲𑀢𑁆𑀢𑀸𑀦𑀁 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀅𑀪𑀺𑀮𑀸𑀧𑀦𑀸𑀦𑀢𑁆𑀢𑁂𑀦 𑀤𑁂𑀲𑀦𑀸𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.