𑁪. 𑀳𑀼𑀁𑀳𑀼𑀗𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀘𑀢𑀼𑀢𑁆𑀣𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂𑀢𑀺 𑀢𑀲𑁆𑀲 𑀓𑀺𑀭 𑀙𑀸𑀬𑀸𑀬𑀁 𑀅𑀚𑀧𑀸𑀮𑀸 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀢𑁂𑀦𑀲𑁆𑀲 ‘‘𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄’’𑀢𑁆𑀯𑁂𑀯 𑀦𑀸𑀫𑀁 𑀉𑀤𑀧𑀸𑀤𑀺. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀢𑀢𑁆𑀣 𑀯𑁂𑀤𑁂 𑀲𑀚𑁆𑀛𑀸𑀬𑀺𑀢𑀼𑀁 𑀅𑀲𑀫𑀢𑁆𑀣𑀸 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀬𑀼𑀢𑁆𑀢𑀸𑀦𑀺 𑀦𑀺𑀯𑁂𑀲𑀦𑀸𑀦𑀺 𑀓𑀢𑁆𑀯𑀸 𑀲𑀩𑁆𑀩𑁂 𑀯𑀲𑀺𑀁𑀲𑀼, 𑀢𑀲𑁆𑀫𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄𑀢𑀺 𑀦𑀸𑀫𑀁 𑀚𑀸𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀦 𑀚𑀧𑀦𑁆𑀢𑀻𑀢𑀺 𑀅𑀚𑀧𑀸, 𑀫𑀦𑁆𑀢𑀸𑀦𑀁 𑀅𑀦𑀚𑁆𑀛𑀸𑀬𑀓𑀸𑀢𑀺 𑀅𑀢𑁆𑀣𑁄, 𑀅𑀚𑀧𑀸 𑀮𑀦𑁆𑀢𑀺 𑀆𑀤𑀺𑀬𑀦𑁆𑀢𑀺 𑀦𑀺𑀯𑀸𑀲𑀁 𑀏𑀢𑁆𑀣𑀸𑀢𑀺 𑀅𑀚𑀧𑀸𑀮𑁄𑀢𑀺. 𑀬𑀲𑁆𑀫𑀸 𑀯𑀸 𑀫𑀚𑁆𑀛𑀦𑁆𑀳𑀺𑀓𑁂 𑀲𑀫𑀬𑁂 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂 𑀅𑀚𑁂 𑀅𑀢𑁆𑀢𑀦𑁄 𑀙𑀸𑀬𑀸𑀬 𑀧𑀸𑀮𑁂𑀢𑀺 𑀭𑀓𑁆𑀔𑀢𑀺, 𑀢𑀲𑁆𑀫𑀸 ‘𑀅𑀚𑀧𑀸𑀮𑁄’𑀢𑀺𑀲𑁆𑀲 𑀦𑀸𑀫𑀁 𑀭𑀽𑀴𑁆𑀳𑀦𑁆𑀢𑀺 𑀅𑀧𑀭𑁂. 𑀲𑀩𑁆𑀩𑀣𑀸𑀧𑀺 𑀦𑀸𑀫𑀫𑁂𑀢𑀁 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲, 𑀢𑀲𑁆𑀲 𑀲𑀫𑀻𑀧𑁂. 𑀲𑀫𑀻𑀧𑀢𑁆𑀣𑁂 𑀳𑀺 𑀏𑀢𑀁 𑀪𑀼𑀫𑁆𑀫𑀁 ‘‘𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂’’𑀢𑀺.

𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻𑀢𑀺 𑀢𑀢𑁆𑀭𑀧𑀺 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀩𑁄𑀥𑀺𑀭𑀼𑀓𑁆𑀔𑀢𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀏𑀲 𑀭𑀼𑀓𑁆𑀔𑁄 𑀳𑁄𑀢𑀺. 𑀲𑀢𑁆𑀢𑀸𑀳𑀦𑁆𑀢𑀺 𑀘 𑀇𑀤𑀁 𑀦 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀢𑁄 𑀅𑀦𑀦𑁆𑀢𑀭𑀲𑀢𑁆𑀢𑀸𑀳𑀁. 𑀪𑀕𑀯𑀸 𑀳𑀺 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀢𑁄 𑀅𑀧𑀭𑀸𑀦𑀺𑀧𑀺 𑀢𑀻𑀡𑀺 𑀲𑀢𑁆𑀢𑀸𑀳𑀸𑀦𑀺 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀪𑀕𑀯𑀢𑀺 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁂 ‘‘𑀦 𑀪𑀕𑀯𑀸 𑀯𑀼𑀝𑁆𑀞𑀸𑀢𑀺, 𑀓𑀺𑀦𑁆𑀦𑀼 𑀔𑁄 𑀅𑀜𑁆𑀜𑁂𑀧𑀺 𑀩𑀼𑀤𑁆𑀥𑀢𑁆𑀢𑀓𑀭𑀸 𑀥𑀫𑁆𑀫𑀸 𑀅𑀢𑁆𑀣𑀻’’𑀢𑀺 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀓𑀗𑁆𑀔𑀸 𑀉𑀤𑀧𑀸𑀤𑀺. 𑀅𑀣 𑀪𑀕𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀤𑁂𑀯𑀢𑀸𑀦𑀁 𑀓𑀗𑁆𑀔𑀁 𑀜𑀢𑁆𑀯𑀸 𑀓𑀗𑁆𑀔𑀸𑀯𑀺𑀥𑀫𑀦𑀢𑁆𑀣𑀁 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀲𑀁 𑀓𑀗𑁆𑀔𑀁 𑀯𑀺𑀥𑀫𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀢𑁄 𑀈𑀲𑀓𑀁 𑀧𑀸𑀘𑀻𑀦𑀦𑀺𑀲𑁆𑀲𑀺𑀢𑁂 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀞𑀢𑁆𑀯𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀉𑀧𑀘𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀩𑀮𑀸𑀥𑀺𑀕𑀫𑀝𑁆𑀞𑀸𑀦𑀁 𑀧𑀮𑁆𑀮𑀗𑁆𑀓𑀁 𑀩𑁄𑀥𑀺𑀭𑀼𑀓𑁆𑀔𑀜𑁆𑀘 𑀅𑀦𑀺𑀫𑀺𑀲𑁂𑀳𑀺 𑀘𑀓𑁆𑀔𑀽𑀳𑀺 𑀑𑀮𑁄𑀓𑀬𑀫𑀸𑀦𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀅𑀦𑀺𑀫𑀺𑀲𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁. 𑀅𑀣 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀞𑀺𑀢𑀝𑁆𑀞𑀸𑀦𑀲𑁆𑀲 𑀘 𑀅𑀦𑁆𑀢𑀭𑀸 𑀧𑀼𑀭𑀢𑁆𑀣𑀺𑀫𑀢𑁄 𑀘 𑀧𑀘𑁆𑀙𑀺𑀫𑀢𑁄 𑀘 𑀆𑀬𑀢𑁂 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀭𑀢𑀦𑀘𑀗𑁆𑀓𑀫𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁. 𑀢𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀤𑁂𑀯𑀢𑀸 𑀭𑀢𑀦𑀖𑀭𑀁 𑀫𑀸𑀧𑀬𑀺𑀁𑀲𑀼, 𑀢𑀢𑁆𑀣 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀲𑁂𑀲𑀢𑁄 𑀅𑀦𑀦𑁆𑀢𑀦𑀬𑀁 𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀭𑀢𑀦𑀖𑀭𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁. 𑀏𑀯𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀘𑀢𑁆𑀢𑀸𑀭𑀺 𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀜𑁆𑀘𑀫𑁂 𑀲𑀢𑁆𑀢𑀸𑀳𑁂 𑀩𑁄𑀥𑀺𑀭𑀼𑀓𑁆𑀔𑀢𑁄 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀫𑀽𑀮𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺.

𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀲𑀻𑀢𑀺 𑀢𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀥𑀺𑀢𑁄 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀯𑀼𑀝𑁆𑀞𑀳𑀺, 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘 𑀧𑀦 𑀢𑀢𑁆𑀣 𑀏𑀯𑀁 𑀦𑀺𑀲𑀺𑀦𑁆𑀦𑁂 𑀪𑀕𑀯𑀢𑀺 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀕𑀦𑁆𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀅𑀜𑁆𑀜𑀢𑀭𑁄’’𑀢𑀺𑀆𑀤𑀺. 𑀢𑀢𑁆𑀣 𑀅𑀜𑁆𑀜𑀢𑀭𑁄𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀦𑀪𑀺𑀜𑁆𑀜𑀸𑀢𑁄 𑀅𑀧𑀸𑀓𑀝𑁄 𑀏𑀓𑁄. 𑀳𑀼𑀁𑀳𑀼𑀗𑁆𑀓𑀚𑀸𑀢𑀺𑀓𑁄𑀢𑀺 𑀲𑁄 𑀓𑀺𑀭 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁄 𑀫𑀸𑀦𑀣𑀤𑁆𑀥𑁄 𑀫𑀸𑀦𑀯𑀲𑁂𑀦 𑀓𑁄𑀥𑀯𑀲𑁂𑀦 𑀘 𑀲𑀩𑁆𑀩𑀁 𑀅𑀯𑁄𑀓𑁆𑀔𑀚𑀸𑀢𑀺𑀓𑀁 𑀧𑀲𑁆𑀲𑀺𑀢𑁆𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀳𑀼𑀁𑀳𑀼’’𑀦𑁆𑀢𑀺 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺, 𑀢𑀲𑁆𑀫𑀸 ‘‘𑀳𑀼𑀁𑀳𑀼𑀗𑁆𑀓𑀚𑀸𑀢𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, ‘‘𑀳𑀼𑀳𑀼𑀓𑁆𑀓𑀚𑀸𑀢𑀺𑀓𑁄’’𑀢𑀺𑀧𑀺 𑀧𑀸𑀞𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄.

𑀬𑁂𑀦 𑀪𑀕𑀯𑀸𑀢𑀺 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀓𑀭𑀡𑀯𑀘𑀦𑀁. 𑀬𑁂𑀦 𑀯𑀸 𑀤𑀺𑀲𑀸𑀪𑀸𑀕𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀉𑀧𑀲𑀗𑁆𑀓𑀫𑀺. 𑀅𑀣 𑀯𑀸 𑀬𑁂𑀦𑀸𑀢𑀺 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀅𑀢𑁆𑀣𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀭𑁄𑀕𑀤𑀼𑀓𑁆𑀔𑀸𑀪𑀺𑀧𑀻𑀴𑀺𑀢𑀢𑁆𑀢𑀸 𑀆𑀢𑀼𑀭𑀓𑀸𑀬𑁂𑀳𑀺 𑀫𑀳𑀸𑀚𑀦𑁂𑀳𑀺 𑀫𑀳𑀸𑀦𑀼𑀪𑀸𑀯𑁄 𑀪𑀺𑀲𑀓𑁆𑀓𑁄 𑀯𑀺𑀬 𑀭𑁄𑀕𑀢𑀺𑀓𑀺𑀘𑁆𑀙𑀦𑀢𑁆𑀣𑀁, 𑀦𑀸𑀦𑀸𑀯𑀺𑀥𑀓𑀺𑀮𑁂𑀲𑀩𑁆𑀬𑀸𑀥𑀺𑀧𑀻𑀴𑀺𑀢𑀢𑁆𑀢𑀸 𑀆𑀢𑀼𑀭𑀘𑀺𑀢𑁆𑀢𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀓𑀺𑀮𑁂𑀲𑀩𑁆𑀬𑀸𑀥𑀺𑀢𑀺𑀓𑀺𑀘𑁆𑀙𑀦𑀢𑁆𑀣𑀁 𑀥𑀫𑁆𑀫𑀲𑁆𑀲𑀯𑀦𑀧𑀜𑁆𑀳𑀧𑀼𑀘𑁆𑀙𑀦𑀸𑀤𑀺𑀓𑀸𑀭𑀡𑁂𑀳𑀺 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄. 𑀢𑁂𑀦 𑀅𑀬𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑀼𑀓𑀸𑀫𑁄 𑀉𑀧𑀲𑀗𑁆𑀓𑀫𑀺.

𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀬𑀁 𑀞𑀸𑀦𑀁 𑀉𑀧𑀲𑀗𑁆𑀓𑀫𑀺, 𑀢𑀢𑁄𑀧𑀺 𑀪𑀕𑀯𑀢𑁄 𑀲𑀫𑀻𑀧𑀪𑀽𑀢𑀁 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀉𑀧𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑁄𑀤𑀻𑀢𑀺 𑀲𑀫𑀁 𑀲𑀫𑁆𑀫𑀸 𑀯𑀸 𑀫𑁄𑀤𑀺, 𑀪𑀕𑀯𑀸 𑀘𑀸𑀦𑁂𑀦, 𑀲𑁄𑀧𑀺 𑀪𑀕𑀯𑀢𑀸 ‘‘𑀓𑀘𑁆𑀘𑀺 𑀪𑁄𑀢𑁄 𑀔𑀫𑀦𑀻𑀬𑀁 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀯𑀲𑁂𑀦 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺. 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀲𑀫𑁆𑀫𑁄𑀤𑀦𑀸𑀭𑀳𑀁 𑀲𑀫𑁆𑀫𑁄𑀤𑀚𑀦𑀦𑀬𑁄𑀕𑁆𑀕𑀁. 𑀓𑀣𑀦𑁆𑀢𑀺 𑀓𑀣𑀸𑀲𑀮𑁆𑀮𑀸𑀧𑀁. 𑀲𑀸𑀭𑀡𑀻𑀬𑀦𑁆𑀢𑀺 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀁 𑀲𑀸𑀥𑀼𑀚𑀦𑁂𑀳𑀺 𑀧𑀯𑀢𑁆𑀢𑁂𑀢𑀩𑁆𑀩𑀁, 𑀓𑀸𑀮𑀦𑁆𑀢𑀭𑁂 𑀯𑀸 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀯𑀻𑀢𑀺𑀲𑀸𑀭𑁂𑀢𑁆𑀯𑀸𑀢𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸. 𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀏𑀓𑀲𑁆𑀫𑀺𑀁 𑀞𑀸𑀦𑁂, 𑀅𑀢𑀺𑀲𑀫𑁆𑀫𑀼𑀔𑀸𑀤𑀺𑀓𑁂 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂𑀢𑀺 𑀅𑀢𑁆𑀣𑁄. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀢𑀢𑁆𑀣 𑀓𑀺𑀢𑁆𑀢𑀸𑀯𑀢𑀸𑀢𑀺 𑀓𑀺𑀢𑁆𑀢𑀓𑁂𑀦 𑀧𑀫𑀸𑀡𑁂𑀦. 𑀦𑀽𑀢𑀺 𑀲𑀁𑀲𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀔𑁄𑀢𑀺 𑀧𑀤𑀧𑀽𑀭𑀡𑁂. 𑀪𑁄𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀚𑀸𑀢𑀺𑀲𑀫𑀼𑀤𑀸𑀕𑀢𑀁 𑀆𑀮𑀧𑀦𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄’’𑀢𑀺 (𑀫. 𑀦𑀺. 𑁨.𑁪𑁫𑁭; 𑀥. 𑀧. 𑁩𑁯𑁬). 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀓𑀣𑀁 𑀧𑀦𑀸𑀬𑀁 𑀩𑁆𑀭𑀸𑀳𑁆𑀫𑀡𑁄 𑀲𑀫𑁆𑀧𑀢𑀺𑀲𑀫𑀸𑀕𑀢𑁄 𑀪𑀕𑀯𑀢𑁄 𑀕𑁄𑀢𑁆𑀢𑀁 𑀚𑀸𑀦𑀸𑀢𑀻𑀢𑀺? 𑀦𑀸𑀬𑀁 𑀲𑀫𑁆𑀧𑀢𑀺𑀲𑀫𑀸𑀕𑀢𑁄, 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀓𑀭𑀡𑀓𑀸𑀮𑁂 𑀉𑀧𑀝𑁆𑀞𑀳𑀦𑁆𑀢𑁂𑀳𑀺 𑀧𑀜𑁆𑀘𑀯𑀕𑁆𑀕𑀺𑀬𑁂𑀳𑀺 𑀲𑀤𑁆𑀥𑀺𑀁 𑀘𑀭𑀫𑀸𑀦𑁄𑀧𑀺, 𑀅𑀧𑀭𑀪𑀸𑀕𑁂 𑀢𑀁 𑀯𑀢𑀁 𑀙𑀟𑁆𑀟𑁂𑀢𑁆𑀯𑀸 𑀉𑀭𑀼𑀯𑁂𑀮𑀸𑀬𑀁 𑀲𑁂𑀦𑀦𑀺𑀕𑀫𑁂 𑀏𑀓𑁄 𑀅𑀤𑀼𑀢𑀺𑀬𑁄 𑀳𑀼𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄𑀧𑀺 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀤𑀺𑀝𑁆𑀞𑀧𑀼𑀩𑁆𑀩𑁄 𑀘𑁂𑀯 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑁄 𑀘. 𑀢𑁂𑀦 𑀲𑁄 𑀧𑀼𑀩𑁆𑀩𑁂 𑀧𑀜𑁆𑀘𑀯𑀕𑁆𑀕𑀺𑀬𑁂𑀳𑀺 𑀕𑀬𑁆𑀳𑀫𑀸𑀦𑀁 𑀪𑀕𑀯𑀢𑁄 𑀕𑁄𑀢𑁆𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑁄, ‘‘𑀪𑁄 𑀕𑁄𑀢𑀫𑀸’’𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀬𑀢𑁄 𑀧𑀝𑁆𑀞𑀸𑀬 𑀯𑀸 𑀪𑀕𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀦𑁆𑀢𑁄 𑀅𑀦𑁄𑀫𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀺𑀢𑁄, 𑀢𑀢𑁄 𑀧𑀪𑀼𑀢𑀺 ‘‘𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄, 𑀦 𑀢𑀲𑁆𑀲 𑀕𑁄𑀢𑁆𑀢𑀚𑀸𑀦𑀦𑁂 𑀓𑀸𑀭𑀡𑀁 𑀕𑀯𑁂𑀲𑀺𑀢𑀩𑁆𑀩𑀁.

𑀩𑁆𑀭𑀸𑀳𑁆𑀫𑀡𑀓𑀭𑀡𑀸𑀢𑀺 𑀩𑁆𑀭𑀸𑀳𑁆𑀫𑀡𑀁 𑀓𑀭𑁄𑀦𑁆𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑀓𑀭𑀡𑀸, 𑀩𑁆𑀭𑀸𑀳𑁆𑀫𑀡𑀪𑀸𑀯𑀓𑀭𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀓𑀺𑀢𑁆𑀢𑀸𑀯𑀢𑀸𑀢𑀺 𑀏𑀢𑁂𑀦 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀭𑀺𑀫𑀸𑀡𑀁 𑀧𑀼𑀘𑁆𑀙𑀢𑀺. 𑀓𑀢𑀫𑁂 𑀘 𑀧𑀦𑀸𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀲𑀭𑀽𑀧𑀁 𑀧𑀼𑀘𑁆𑀙𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑁂𑀦 𑀧𑀼𑀝𑁆𑀞𑀲𑁆𑀲 𑀧𑀜𑁆𑀳𑀲𑁆𑀲 𑀲𑀺𑀔𑀸𑀧𑀢𑁆𑀢𑀁 𑀅𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺, 𑀦 𑀧𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀓𑀲𑁆𑀫𑀸? 𑀥𑀫𑁆𑀫𑀤𑁂𑀲𑀦𑀸𑀬 𑀅𑀪𑀸𑀚𑀦𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀦 𑀲𑀘𑁆𑀘𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀬𑀣𑀸 𑀘 𑀇𑀫𑀲𑁆𑀲, 𑀏𑀯𑀁 𑀉𑀧𑀓𑀲𑁆𑀲 𑀆𑀚𑀻𑀯𑀓𑀲𑁆𑀲 𑀩𑀼𑀤𑁆𑀥𑀕𑀼𑀡𑀧𑁆𑀧𑀓𑀸𑀲𑀦𑀁. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄 𑀳𑀺 𑀧𑀼𑀩𑁆𑀩𑀪𑀸𑀕𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀧𑀭𑁂𑀲𑀁 𑀲𑀼𑀡𑀦𑁆𑀢𑀸𑀦𑀫𑁆𑀧𑀺 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀁 𑀲𑀭𑀡𑀤𑀸𑀦𑀁 𑀯𑀺𑀬 𑀯𑀸𑀲𑀦𑀸𑀪𑀸𑀕𑀺𑀬𑀫𑁂𑀯 𑀚𑀸𑀢𑀁, 𑀦 𑀲𑁂𑀓𑁆𑀔𑀪𑀸𑀕𑀺𑀬𑀁, 𑀦 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀏𑀲𑀸 𑀳𑀺 𑀥𑀫𑁆𑀫𑀢𑀸𑀢𑀺.

𑀢𑀢𑁆𑀣 𑀬𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀬𑁄 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑀢𑀸𑀬 𑀩𑁆𑀭𑀸𑀳𑁆𑀫𑀡𑁄, 𑀦 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀢𑀸𑀬 𑀳𑀼𑀁𑀳𑀼𑀗𑁆𑀓𑀸𑀭𑀓𑀲𑀸𑀯𑀸𑀤𑀺𑀧𑀸𑀧𑀥𑀫𑁆𑀫𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀓𑁂𑀯𑀮𑀁 𑀚𑀸𑀢𑀺𑀫𑀢𑁆𑀢𑀓𑁂𑀦 𑀩𑁆𑀭𑀳𑁆𑀫𑀜𑁆𑀜𑀁 𑀧𑀝𑀺𑀚𑀸𑀦𑀸𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑀢𑁆𑀢𑀸 𑀳𑀼𑀁𑀳𑀼𑀗𑁆𑀓𑀸𑀭𑀧𑁆𑀧𑀳𑀸𑀦𑁂𑀦 𑀦𑀺𑀳𑀼𑀁𑀳𑀼𑀗𑁆𑀓𑁄, 𑀭𑀸𑀕𑀸𑀤𑀺𑀓𑀲𑀸𑀯𑀸𑀪𑀸𑀯𑁂𑀦 𑀦𑀺𑀓𑁆𑀓𑀲𑀸𑀯𑁄, 𑀪𑀸𑀯𑀦𑀸𑀦𑀼𑀬𑁄𑀕𑀬𑀼𑀢𑁆𑀢𑀘𑀺𑀢𑁆𑀢𑀢𑀸𑀬 𑀬𑀢𑀢𑁆𑀢𑁄, 𑀲𑀻𑀮𑀲𑀁𑀬𑀫𑁂𑀦 𑀯𑀸 𑀲𑀁𑀬𑀢𑀘𑀺𑀢𑁆𑀢𑀢𑀸𑀬 𑀬𑀢𑀢𑁆𑀢𑁄, 𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁂𑀳𑀺 𑀯𑁂𑀤𑁂𑀳𑀺 𑀅𑀦𑁆𑀢𑀁 𑀲𑀗𑁆𑀔𑀸𑀭𑀧𑀭𑀺𑀬𑁄𑀲𑀸𑀦𑀁 𑀦𑀺𑀩𑁆𑀩𑀸𑀦𑀁, 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀁 𑀕𑀢𑀢𑁆𑀢𑀸 𑀯𑁂𑀤𑀦𑁆𑀢𑀕𑀽. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀼𑀲𑀺𑀢𑀢𑁆𑀢𑀸 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄, 𑀥𑀫𑁆𑀫𑁂𑀦 𑀲𑁄 𑀩𑁆𑀭𑀳𑁆𑀫𑀯𑀸𑀤𑀁 𑀯𑀤𑁂𑀬𑁆𑀬 ‘‘𑀩𑁆𑀭𑀸𑀳𑁆𑀫𑀡𑁄 𑀅𑀳’’𑀦𑁆𑀢𑀺 𑀏𑀢𑀁 𑀯𑀸𑀤𑀁 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀯𑀤𑁂𑀬𑁆𑀬. 𑀬𑀲𑁆𑀲 𑀲𑀓𑀮𑀮𑁄𑀓𑀲𑀦𑁆𑀦𑀺𑀯𑀸𑀲𑁂𑀧𑀺 𑀓𑀼𑀳𑀺𑀜𑁆𑀘𑀺 𑀏𑀓𑀸𑀭𑀫𑁆𑀫𑀡𑁂𑀧𑀺 𑀭𑀸𑀕𑀼𑀲𑁆𑀲𑀤𑁄, 𑀤𑁄𑀲𑀼𑀲𑁆𑀲𑀤𑁄, 𑀫𑁄𑀳𑀼𑀲𑁆𑀲𑀤𑁄, 𑀫𑀸𑀦𑀼𑀲𑁆𑀲𑀤𑁄, 𑀤𑀺𑀝𑁆𑀞𑀼𑀲𑁆𑀲𑀤𑁄𑀢𑀺 𑀇𑀫𑁂 𑀉𑀲𑁆𑀲𑀤𑀸 𑀦𑀢𑁆𑀣𑀺, 𑀅𑀦𑀯𑀲𑁂𑀲𑀁 𑀧𑀳𑀻𑀦𑀸𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.