𑁯. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀳𑀸𑀬 𑀫𑀸𑀢𑀸𑀧𑀺𑀢𑀭𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀓𑀼𑀝𑀼𑀫𑁆𑀩𑀺𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀕𑀯𑀢𑁄, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀉𑀢𑁆𑀢𑀫𑀸𑀦𑀺 𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀧𑀡𑀺𑀥𑀸𑀦𑀫𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄𑀧𑀺 𑀢𑀢𑁆𑀣 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀦𑀺𑀝𑁆𑀞𑀺𑀢𑁂 𑀲𑀢𑁆𑀢𑀬𑁄𑀚𑀦𑀺𑀓𑁂 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀅𑀦𑁂𑀓𑀲𑀳𑀲𑁆𑀲𑁂𑀳𑀺 𑀤𑀻𑀧𑀭𑀼𑀓𑁆𑀔𑁂𑀳𑀺 𑀤𑀻𑀧𑀓𑀧𑀮𑁆𑀮𑀺𑀓𑀸𑀳𑀺 𑀘 ‘‘𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀉𑀴𑀸𑀭𑀁 𑀤𑀻𑀧𑀧𑀽𑀚𑀁 𑀅𑀓𑀸𑀲𑀺.

𑀏𑀯𑀁 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀝𑀼𑀫𑁆𑀩𑀺𑀓𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀦𑀺𑀝𑁆𑀞𑀺𑀢𑁂 𑀬𑁄𑀚𑀦𑀺𑀓𑁂 𑀓𑀦𑀓𑀣𑀽𑀧𑁂 𑀩𑀳𑀽 𑀓𑀁𑀲𑀧𑀸𑀢𑀺𑀬𑁄 𑀓𑀸𑀭𑁂𑀢𑁆𑀯𑀸 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑁂 𑀏𑀓𑁂𑀓𑀁 𑀕𑀼𑀴𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀬𑀸 𑀫𑀼𑀔𑀯𑀝𑁆𑀝𑀺𑀁 𑀨𑀼𑀲𑀸𑀧𑁂𑀦𑁆𑀢𑁄 𑀘𑁂𑀢𑀺𑀬𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀏𑀓𑀁 𑀫𑀳𑀢𑀺𑀁 𑀓𑀁𑀲𑀧𑀸𑀢𑀺𑀁 𑀓𑀸𑀭𑁂𑀢𑁆𑀯𑀸 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀳𑀲𑁆𑀲𑀯𑀝𑁆𑀝𑀺𑀬𑁄 𑀚𑀸𑀮𑀸𑀧𑁂𑀢𑁆𑀯𑀸 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀘𑁂𑀢𑀺𑀬𑀁 𑀅𑀦𑀼𑀧𑀭𑀺𑀬𑀸𑀬𑀺.

𑀏𑀯𑀁 𑀢𑀲𑁆𑀫𑀺𑀫𑁆𑀧𑀺 𑀅𑀢𑁆𑀢𑀪𑀸𑀯𑁂 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀩𑀸𑀭𑀸𑀡𑀲𑀺𑀬𑀁𑀬𑁂𑀯 𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀦𑁆𑀦𑀪𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀲𑀼𑀫𑀦𑀲𑁂𑀝𑁆𑀞𑀺𑀲𑁆𑀲 𑀦𑀸𑀫 𑀕𑁂𑀳𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀚𑀻𑀯𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀉𑀧𑀭𑀺𑀝𑁆𑀞𑀁 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀢𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀻𑀦𑀕𑀭𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀞𑀧𑀺𑀢𑀁 𑀏𑀓𑀁 𑀪𑀸𑀕𑀪𑀢𑁆𑀢𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀸𑀢𑀼𑀓𑀸𑀫𑁄 𑀆𑀭𑀪𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀅𑀢𑁆𑀢𑀦𑁄 𑀪𑀸𑀕𑀪𑀢𑁆𑀢𑀁 𑀢𑀢𑁆𑀣𑁂𑀯 𑀧𑀓𑁆𑀔𑀺𑀧𑀺. 𑀲𑁄 𑀢𑀁 𑀦𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁 𑀤𑀺𑀲𑁆𑀯𑀸 𑀭𑀢𑁆𑀢𑀺𑀁 𑀲𑀼𑀫𑀦𑀲𑁂𑀝𑁆𑀞𑀺𑀲𑁆𑀲 𑀙𑀢𑁆𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀅𑀳𑁄 𑀤𑀸𑀦𑀁 𑀧𑀭𑀫𑀤𑀸𑀦𑀁, 𑀉𑀧𑀭𑀺𑀝𑁆𑀞𑁂, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀫𑀳𑀸𑀲𑀤𑁆𑀤𑁂𑀦 𑀅𑀦𑀼𑀫𑁄𑀤𑀺. 𑀢𑀁 𑀲𑀼𑀢𑁆𑀯𑀸 𑀲𑀼𑀫𑀦𑀲𑁂𑀝𑁆𑀞𑀺 ‘‘𑀏𑀯𑀁 𑀤𑁂𑀯𑀢𑀸𑀬 𑀅𑀦𑀼𑀫𑁄𑀤𑀺𑀢𑀁 𑀇𑀤𑀫𑁂𑀯 𑀉𑀢𑁆𑀢𑀫𑀤𑀸𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀧𑀢𑁆𑀢𑀺𑀁 𑀬𑀸𑀘𑀺. 𑀅𑀦𑁆𑀦𑀪𑀸𑀭𑁄 𑀧𑀦 𑀢𑀲𑁆𑀲 𑀧𑀢𑁆𑀢𑀺𑀁 𑀅𑀤𑀸𑀲𑀺. 𑀢𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑀲𑁂𑀝𑁆𑀞𑀺 𑀢𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀢𑀼𑀬𑁆𑀳𑀁 𑀲𑀳𑀢𑁆𑀣𑁂𑀦 𑀓𑀫𑁆𑀫𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀢𑀺𑀭𑀽𑀧𑀁 𑀕𑁂𑀳𑀁 𑀓𑀢𑁆𑀯𑀸 𑀦𑀺𑀘𑁆𑀘𑀁 𑀯𑀲𑀸𑀳𑀻’’𑀢𑀺 𑀆𑀳.

𑀬𑀲𑁆𑀫𑀸 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑁄 𑀢𑀁𑀤𑀺𑀯𑀲𑀫𑁂𑀯 𑀉𑀴𑀸𑀭𑀢𑀭𑀯𑀺𑀧𑀸𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁𑀤𑀺𑀯𑀲𑀁 𑀲𑀼𑀫𑀦𑀲𑁂𑀝𑁆𑀞𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀦 𑀢𑀁 𑀆𑀤𑀭𑀯𑀲𑁂𑀦 𑀑𑀮𑁄𑀓𑁂𑀲𑀺. 𑀲𑁂𑀝𑁆𑀞𑀺 ‘‘𑀫𑀳𑀸𑀭𑀸𑀚, 𑀅𑀬𑀁 𑀑𑀮𑁄𑀓𑁂𑀢𑀩𑁆𑀩𑀬𑀼𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀤𑀸 𑀢𑁂𑀦 𑀓𑀢𑀧𑀼𑀜𑁆𑀜𑀁 𑀅𑀢𑁆𑀢𑀦𑀸𑀧𑀺𑀲𑁆𑀲 𑀲𑀳𑀲𑁆𑀲𑀁 𑀤𑀺𑀦𑁆𑀦𑀪𑀸𑀯𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀕𑁂𑀳𑀁 𑀓𑀢𑁆𑀯𑀸 𑀯𑀲𑀸’’𑀢𑀺 𑀕𑁂𑀳𑀝𑁆𑀞𑀸𑀦𑀫𑀲𑁆𑀲 𑀆𑀡𑀸𑀧𑁂𑀲𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀲𑁄𑀥𑀸𑀧𑁂𑀦𑁆𑀢𑀲𑁆𑀲 𑀫𑀳𑀦𑁆𑀢𑀺𑀬𑁄 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀉𑀝𑁆𑀞𑀳𑀺𑀁𑀲𑀼. 𑀢𑀸 𑀤𑀺𑀲𑁆𑀯𑀸 𑀲𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀲𑀩𑁆𑀩𑀁 𑀥𑀦𑀁 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀭𑀸𑀲𑀺𑀓𑀢𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀢𑀓𑀁 𑀥𑀦𑀁 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀓𑀲𑁆𑀲 𑀕𑁂𑀳𑁂 𑀅𑀢𑁆𑀣𑀻’’𑀢𑀺? ‘‘𑀦 𑀓𑀲𑁆𑀲𑀘𑀺, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀅𑀬𑀁 𑀅𑀦𑁆𑀦𑀪𑀸𑀭𑁄 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀫𑀳𑀸𑀥𑀦𑀲𑁂𑀝𑁆𑀞𑀺 𑀦𑀸𑀫 𑀳𑁄𑀢𑀽’’𑀢𑀺 𑀢𑀁𑀤𑀺𑀯𑀲𑀫𑁂𑀯 𑀢𑀲𑁆𑀲 𑀲𑁂𑀝𑁆𑀞𑀺𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀲𑀺.

𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀲𑀼𑀓𑁆𑀓𑁄𑀤𑀦𑀲𑀓𑁆𑀓𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀅𑀦𑀼𑀭𑀼𑀤𑁆𑀥𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸, 𑀲𑀢𑁆𑀣𑀼 𑀘𑀽𑀴𑀧𑀺𑀢𑀼 𑀧𑀼𑀢𑁆𑀢𑁄 𑀧𑀭𑀫𑀲𑀼𑀔𑀼𑀫𑀸𑀮𑁄 𑀫𑀳𑀸𑀧𑀼𑀜𑁆𑀜𑁄 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀅𑀮𑀗𑁆𑀓𑀢𑀦𑀸𑀝𑀓𑀺𑀢𑁆𑀣𑀻𑀳𑀺 𑀧𑀭𑀺𑀯𑀼𑀢𑁄 𑀤𑁂𑀯𑁄 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦 𑀉𑀲𑁆𑀲𑀸𑀳𑀺𑀢𑁂𑀳𑀺 𑀲𑀓𑁆𑀬𑀭𑀸𑀚𑀽𑀳𑀺 𑀲𑀢𑁆𑀣𑀼 𑀧𑀭𑀺𑀯𑀸𑀭𑀢𑁆𑀣𑀁 𑀧𑁂𑀲𑀺𑀢𑁂𑀳𑀺 𑀪𑀤𑁆𑀤𑀺𑀬𑀓𑀼𑀫𑀸𑀭𑀸𑀤𑀻𑀳𑀺 𑀅𑀦𑀼𑀧𑀺𑀬𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸, 𑀧𑀼𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀭𑀝𑁆𑀞𑁂 𑀧𑀸𑀘𑀻𑀦𑀯𑀁𑀲𑀤𑀸𑀬𑀁 𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀢𑁆𑀯𑀸 𑀅𑀝𑁆𑀞𑀫𑀁 𑀚𑀸𑀦𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀲𑀢𑁆𑀣𑀸 𑀅𑀝𑁆𑀞𑀫𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁 𑀓𑀣𑁂𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀸𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀁 𑀤𑁂𑀲𑁂𑀢𑀺. 𑀲𑁄 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁧.𑁪𑁨𑁧-𑁪𑁩𑁩) 𑁋

‘‘𑀲𑀼𑀫𑁂𑀥𑀁 𑀪𑀕𑀯𑀦𑁆𑀢𑀸𑀳𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀯𑀽𑀧𑀓𑀝𑁆𑀞𑀁 𑀯𑀺𑀳𑀭𑀦𑁆𑀢𑀁, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

‘‘𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀲𑀼𑀫𑁂𑀥𑀁 𑀮𑁄𑀓𑀦𑀸𑀬𑀓𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀫𑀬𑀸𑀘𑀳𑀁.

‘‘𑀅𑀦𑀼𑀓𑀫𑁆𑀧 𑀫𑀳𑀸𑀯𑀻𑀭, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀧𑀤𑀻𑀧𑀁 𑀢𑁂 𑀧𑀤𑀲𑁆𑀲𑀸𑀫𑀺, 𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀛𑀸𑀬𑀢𑁄.

‘‘𑀅𑀥𑀺𑀯𑀸𑀲𑁂𑀲𑀺 𑀲𑁄 𑀥𑀻𑀭𑁄, 𑀲𑀬𑀫𑁆𑀪𑀽 𑀯𑀤𑀢𑀁 𑀯𑀭𑁄;

𑀤𑀼𑀫𑁂𑀲𑀼 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸, 𑀬𑀦𑁆𑀢𑀁 𑀬𑁄𑀚𑀺𑀬𑀳𑀁 𑀢𑀤𑀸.

‘‘𑀲𑀳𑀲𑁆𑀲𑀯𑀝𑁆𑀝𑀺𑀁 𑀧𑀸𑀤𑀸𑀲𑀺𑀁, 𑀩𑀼𑀤𑁆𑀥𑀲𑁆𑀲 𑀮𑁄𑀓𑀩𑀦𑁆𑀥𑀼𑀦𑁄;

𑀲𑀢𑁆𑀢𑀸𑀳𑀁 𑀧𑀚𑁆𑀚𑀮𑀺𑀢𑁆𑀯𑀸𑀦, 𑀤𑀻𑀧𑀸 𑀯𑀽𑀧𑀲𑀫𑀺𑀁𑀲𑀼 𑀫𑁂.

‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀯𑀺𑀫𑀸𑀦𑀫𑀼𑀧𑀧𑀚𑁆𑀚𑀳𑀁.

‘‘𑀉𑀧𑀧𑀦𑁆𑀦𑀲𑁆𑀲 𑀤𑁂𑀯𑀢𑁆𑀢𑀁, 𑀩𑁆𑀬𑀫𑁆𑀳𑀁 𑀆𑀲𑀺 𑀲𑀼𑀦𑀺𑀫𑁆𑀫𑀺𑀢𑀁;

𑀲𑀫𑀦𑁆𑀢𑀢𑁄 𑀧𑀚𑁆𑀚𑀮𑀢𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀯𑀺𑀭𑁄𑀘𑁂𑀲𑀺𑀫𑀳𑀁 𑀢𑀤𑀸;

𑀲𑀩𑁆𑀩𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀢𑀺𑀁𑀲𑀓𑀧𑁆𑀧𑀸𑀦𑀺 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀦 𑀫𑀁 𑀓𑁂𑀘𑀻𑀢𑀺𑀫𑀜𑁆𑀜𑀦𑁆𑀢𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀅𑀝𑁆𑀞𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀤𑀺𑀯𑀸 𑀭𑀢𑁆𑀢𑀺𑀜𑁆𑀘 𑀧𑀲𑁆𑀲𑀸𑀫𑀺, 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀢𑀤𑀸.

‘‘𑀲𑀳𑀲𑁆𑀲𑀮𑁄𑀓𑀁 𑀜𑀸𑀡𑁂𑀦, 𑀧𑀲𑁆𑀲𑀸𑀫𑀺 𑀲𑀢𑁆𑀣𑀼 𑀲𑀸𑀲𑀦𑁂;

𑀤𑀺𑀩𑁆𑀩𑀘𑀓𑁆𑀔𑀼𑀫𑀦𑀼𑀧𑁆𑀧𑀢𑁆𑀢𑁄, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀺𑀢𑁄;

𑀢𑀲𑁆𑀲 𑀤𑀻𑀧𑁄 𑀫𑀬𑀸 𑀤𑀺𑀦𑁆𑀦𑁄, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀣 𑀦𑀁 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀬𑀤𑀺𑀤𑀁 𑀅𑀦𑀼𑀭𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁮𑁦, 𑁧𑁯𑁨).

𑀲𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀉𑀤𑀸𑀦𑀯𑀲𑁂𑀦 ‘‘𑀧𑀳𑀸𑀬 𑀫𑀸𑀢𑀸𑀧𑀺𑀢𑀭𑁄’’𑀢𑀺𑀆𑀤𑀺𑀓𑀸 𑀕𑀸𑀣𑀸 𑀅𑀪𑀸𑀲𑀺. 𑀓𑁂𑀘𑀺 𑀧𑀦 ‘‘𑀣𑁂𑀭𑀲𑁆𑀲 𑀧𑀩𑁆𑀩𑀚𑁆𑀚𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀜𑁆𑀘 𑀧𑀓𑀸𑀲𑁂𑀦𑁆𑀢𑁂𑀳𑀺 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀆𑀤𑀺𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀪𑀸𑀲𑀺𑀢𑀸. 𑀢𑀢𑁄 𑀧𑀭𑀸 𑀣𑁂𑀭𑀲𑁆𑀲 𑀅𑀭𑀺𑀬𑀯𑀁𑀲𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀸𑀥𑀺𑀢𑀘𑀺𑀢𑁆𑀢𑁂𑀦 𑀪𑀕𑀯𑀢𑀸 𑀪𑀸𑀲𑀺𑀢𑀸. 𑀇𑀢𑀭𑀸 𑀲𑀩𑁆𑀩𑀸𑀧𑀺 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀣𑁂𑀭𑁂𑀦𑁂𑀯 𑀪𑀸𑀲𑀺𑀢𑀸’’𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀲𑀩𑁆𑀩𑀣𑀸𑀧𑀺 𑀇𑀫𑀸 𑀕𑀸𑀣𑀸 𑀣𑁂𑀭𑁂𑀦 𑀪𑀸𑀲𑀺𑀢𑀸𑀧𑀺, 𑀣𑁂𑀭𑀁 𑀉𑀤𑁆𑀤𑀺𑀲𑁆𑀲 𑀪𑀸𑀲𑀺𑀢𑀸𑀧𑀺 𑀣𑁂𑀭𑀲𑁆𑀲 𑀘𑁂𑀢𑀸 𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀬𑁆𑀬𑀣𑀺𑀤𑀁 𑁋

𑁮𑁯𑁨. ‘‘𑀧𑀳𑀸𑀬 𑀫𑀸𑀢𑀸𑀧𑀺𑀢𑀭𑁄, 𑀪𑀕𑀺𑀦𑀻 𑀜𑀸𑀢𑀺𑀪𑀸𑀢𑀭𑁄;

𑀧𑀜𑁆𑀘 𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸, 𑀅𑀦𑀼𑀭𑀼𑀤𑁆𑀥𑁄𑀯 𑀛𑀸𑀬𑀢𑀺.

𑁮𑁯𑁩. ‘‘𑀲𑀫𑁂𑀢𑁄 𑀦𑀘𑁆𑀘𑀕𑀻𑀢𑁂𑀳𑀺, 𑀲𑀫𑁆𑀫𑀢𑀸𑀴𑀧𑁆𑀧𑀩𑁄𑀥𑀦𑁄;

𑀦 𑀢𑁂𑀦 𑀲𑀼𑀤𑁆𑀥𑀺𑀫𑀚𑁆𑀛𑀕𑀁, 𑀫𑀸𑀭𑀲𑁆𑀲 𑀯𑀺𑀲𑀬𑁂 𑀭𑀢𑁄.

𑁮𑁯𑁪. ‘‘𑀏𑀢𑀜𑁆𑀘 𑀲𑀫𑀢𑀺𑀓𑁆𑀓𑀫𑁆𑀫, 𑀭𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂;

𑀲𑀩𑁆𑀩𑁄𑀖𑀁 𑀲𑀫𑀢𑀺𑀓𑁆𑀓𑀫𑁆𑀫, 𑀅𑀦𑀼𑀭𑀼𑀤𑁆𑀥𑁄𑀯 𑀛𑀸𑀬𑀢𑀺.

𑁮𑁯𑁫. ‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀏𑀢𑁂 𑀘 𑀲𑀫𑀢𑀺𑀓𑁆𑀓𑀫𑁆𑀫, 𑀅𑀦𑀼𑀭𑀼𑀤𑁆𑀥𑁄𑀯 𑀛𑀸𑀬𑀢𑀺.

𑁮𑁯𑁬. ‘‘𑀧𑀺𑀡𑁆𑀟𑀧𑀸𑀢𑀫𑀢𑀺𑀓𑁆𑀓𑀦𑁆𑀢𑁄, 𑀏𑀓𑁄 𑀅𑀤𑀼𑀢𑀺𑀬𑁄 𑀫𑀼𑀦𑀺;

𑀏𑀲𑀢𑀺 𑀧𑀁𑀲𑀼𑀓𑀽𑀮𑀸𑀦𑀺 𑀅𑀦𑀼𑀭𑀼𑀤𑁆𑀥𑁄 𑀅𑀦𑀸𑀲𑀯𑁄.

𑁮𑁯𑁭. ‘‘𑀯𑀺𑀘𑀺𑀦𑀻 𑀅𑀕𑁆𑀕𑀳𑀻 𑀥𑁄𑀯𑀺, 𑀭𑀚𑀬𑀻 𑀥𑀸𑀭𑀬𑀻 𑀫𑀼𑀦𑀺;

𑀧𑀁𑀲𑀼𑀓𑀽𑀮𑀸𑀦𑀺 𑀫𑀢𑀺𑀫𑀸, 𑀅𑀦𑀼𑀭𑀼𑀤𑁆𑀥𑁄 𑀅𑀦𑀸𑀲𑀯𑁄.

𑁮𑁯𑁮. ‘‘𑀫𑀳𑀺𑀘𑁆𑀙𑁄 𑀘 𑀅𑀲𑀦𑁆𑀢𑀼𑀝𑁆𑀞𑁄, 𑀲𑀁𑀲𑀝𑁆𑀞𑁄 𑀬𑁄 𑀘 𑀉𑀤𑁆𑀥𑀢𑁄;

𑀢𑀲𑁆𑀲 𑀥𑀫𑁆𑀫𑀸 𑀇𑀫𑁂 𑀳𑁄𑀦𑁆𑀢𑀺, 𑀧𑀸𑀧𑀓𑀸 𑀲𑀁𑀓𑀺𑀮𑁂𑀲𑀺𑀓𑀸.

𑁮𑁯𑁯. ‘‘𑀲𑀢𑁄 𑀘 𑀳𑁄𑀢𑀺 𑀅𑀧𑁆𑀧𑀺𑀘𑁆𑀙𑁄, 𑀲𑀦𑁆𑀢𑀼𑀝𑁆𑀞𑁄 𑀅𑀯𑀺𑀖𑀸𑀢𑀯𑀸;

𑀧𑀯𑀺𑀯𑁂𑀓𑀭𑀢𑁄 𑀯𑀺𑀢𑁆𑀢𑁄, 𑀦𑀺𑀘𑁆𑀘𑀫𑀸𑀭𑀤𑁆𑀥𑀯𑀻𑀭𑀺𑀬𑁄.

𑁯𑁦𑁦. ‘‘𑀢𑀲𑁆𑀲 𑀥𑀫𑁆𑀫𑀸 𑀇𑀫𑁂 𑀳𑁄𑀦𑁆𑀢𑀺, 𑀓𑀼𑀲𑀮𑀸 𑀩𑁄𑀥𑀺𑀧𑀓𑁆𑀔𑀺𑀓𑀸;

𑀅𑀦𑀸𑀲𑀯𑁄 𑀘 𑀲𑁄 𑀳𑁄𑀢𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸.

𑁯𑁦𑁧. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀫𑀦𑁄𑀫𑀬𑁂𑀦 𑀓𑀸𑀬𑁂𑀦, 𑀇𑀤𑁆𑀥𑀺𑀬𑀸 𑀉𑀧𑀲𑀗𑁆𑀓𑀫𑀺.

𑁯𑁦𑁨. ‘‘𑀬𑀤𑀸 𑀫𑁂 𑀅𑀳𑀼 𑀲𑀗𑁆𑀓𑀧𑁆𑀧𑁄, 𑀢𑀢𑁄 𑀉𑀢𑁆𑀢𑀭𑀺 𑀤𑁂𑀲𑀬𑀺;

𑀦𑀺𑀧𑁆𑀧𑀧𑀜𑁆𑀘𑀭𑀢𑁄 𑀩𑀼𑀤𑁆𑀥𑁄, 𑀦𑀺𑀧𑁆𑀧𑀧𑀜𑁆𑀘𑀫𑀤𑁂𑀲𑀬𑀺.

𑁯𑁦𑁩. ‘‘𑀢𑀲𑁆𑀲𑀸𑀳𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁦𑁪. ‘‘𑀧𑀜𑁆𑀘𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺, 𑀬𑀢𑁄 𑀦𑁂𑀲𑀚𑁆𑀚𑀺𑀓𑁄 𑀅𑀳𑀁;

𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀬𑀢𑁄 𑀫𑀺𑀤𑁆𑀥𑀁 𑀲𑀫𑀽𑀳𑀢𑀁.

𑁯𑁦𑁫. ‘‘𑀦𑀸𑀳𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀞𑀺𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀅𑀦𑁂𑀚𑁄 𑀲𑀦𑁆𑀢𑀺𑀫𑀸𑀭𑀩𑁆𑀪, 𑀘𑀓𑁆𑀔𑀼𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑁄.

𑁯𑁦𑁬. ‘‘𑀅𑀲𑀮𑁆𑀮𑀻𑀦𑁂𑀦 𑀘𑀺𑀢𑁆𑀢𑁂𑀦, 𑀯𑁂𑀤𑀦𑀁 𑀅𑀚𑁆𑀛𑀯𑀸𑀲𑀬𑀺;

𑀧𑀚𑁆𑀚𑁄𑀢𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀘𑁂𑀢𑀲𑁄 𑀅𑀳𑀼.

𑁯𑁦𑁭. ‘‘𑀏𑀢𑁂 𑀧𑀘𑁆𑀙𑀺𑀫𑀓𑀸 𑀤𑀸𑀦𑀺, 𑀫𑀼𑀦𑀺𑀦𑁄 𑀨𑀲𑁆𑀲𑀧𑀜𑁆𑀘𑀫𑀸;

𑀦𑀸𑀜𑁆𑀜𑁂 𑀥𑀫𑁆𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂.

𑁯𑁦𑁮. ‘‘𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀸𑀯𑀸𑀲𑁄, 𑀤𑁂𑀯𑀓𑀸𑀬𑀲𑁆𑀫𑀺 𑀚𑀸𑀮𑀺𑀦𑀺;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁯𑁦𑁯. ‘‘𑀬𑀲𑁆𑀲 𑀫𑀼𑀳𑀼𑀢𑁆𑀢𑁂𑀦 𑀲𑀳𑀲𑁆𑀲𑀥𑀸, 𑀮𑁄𑀓𑁄 𑀲𑀁𑀯𑀺𑀤𑀺𑀢𑁄 𑀲𑀩𑁆𑀭𑀳𑁆𑀫𑀓𑀧𑁆𑀧𑁄;

𑀯𑀲𑀻 𑀇𑀤𑁆𑀥𑀺𑀕𑀼𑀡𑁂 𑀘𑀼𑀢𑀽𑀧𑀧𑀸𑀢𑁂, 𑀓𑀸𑀮𑁂 𑀧𑀲𑁆𑀲𑀢𑀺 𑀤𑁂𑀯𑀢𑀸 𑀲 𑀪𑀺𑀓𑁆𑀔𑀼.

𑁯𑁧𑁦. ‘‘𑀅𑀦𑁆𑀦𑀪𑀸𑀭𑁄 𑀧𑀼𑀭𑁂 𑀆𑀲𑀺𑀁, 𑀤𑀮𑀺𑀤𑁆𑀤𑁄 𑀖𑀸𑀲𑀳𑀸𑀭𑀓𑁄;

𑀲𑀫𑀡𑀁 𑀧𑀝𑀺𑀧𑀸𑀤𑁂𑀲𑀺𑀁, 𑀉𑀧𑀭𑀺𑀝𑁆𑀞𑀁 𑀬𑀲𑀲𑁆𑀲𑀺𑀦𑀁.

𑁯𑁧𑁧. ‘‘𑀲𑁄𑀫𑁆𑀳𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄, 𑀅𑀦𑀼𑀭𑀼𑀤𑁆𑀥𑁄𑀢𑀺 𑀫𑀁 𑀯𑀺𑀤𑀽;

𑀉𑀧𑁂𑀢𑁄 𑀦𑀘𑁆𑀘𑀕𑀻𑀢𑁂𑀳𑀺, 𑀲𑀫𑁆𑀫𑀢𑀸𑀴𑀧𑁆𑀧𑀩𑁄𑀥𑀦𑁄.

𑁯𑁧𑁨. ‘‘𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀢𑁆𑀣𑀸𑀭𑀁 𑀅𑀓𑀼𑀢𑁄𑀪𑀬𑀁;

𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁯𑁧𑁩. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀬𑀢𑁆𑀣 𑀫𑁂 𑀯𑀼𑀲𑀺𑀢𑀁 𑀧𑀼𑀭𑁂;

𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀅𑀝𑁆𑀞𑀸𑀲𑀺𑀁 𑀲𑀓𑁆𑀓𑀚𑀸𑀢𑀺𑀬𑀸.

𑁯𑁧𑁪. ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀦𑀼𑀲𑁆𑀲𑀺𑀦𑁆𑀤𑁄, 𑀅𑀳𑀁 𑀭𑀚𑁆𑀚𑀫𑀓𑀸𑀭𑀬𑀺𑀁;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀚𑀫𑁆𑀩𑀼𑀲𑀡𑁆𑀟𑀲𑁆𑀲 𑀇𑀲𑁆𑀲𑀭𑁄;

𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦, 𑀥𑀫𑁆𑀫𑁂𑀦 𑀅𑀦𑀼𑀲𑀸𑀲𑀬𑀺𑀁.

𑁯𑁧𑁫. ‘‘𑀇𑀢𑁄 𑀲𑀢𑁆𑀢 𑀢𑀢𑁄 𑀲𑀢𑁆𑀢, 𑀲𑀁𑀲𑀸𑀭𑀸𑀦𑀺 𑀘𑀢𑀼𑀤𑁆𑀤𑀲;

𑀦𑀺𑀯𑀸𑀲𑀫𑀪𑀺𑀚𑀸𑀦𑀺𑀲𑁆𑀲𑀁, 𑀤𑁂𑀯𑀮𑁄𑀓𑁂 𑀞𑀺𑀢𑁄 𑀢𑀤𑀸.

𑁯𑁧𑁬. ‘‘𑀧𑀜𑁆𑀘𑀗𑁆𑀕𑀺𑀓𑁂 𑀲𑀫𑀸𑀥𑀺𑀫𑁆𑀳𑀺, 𑀲𑀦𑁆𑀢𑁂 𑀏𑀓𑁄𑀤𑀺𑀪𑀸𑀯𑀺𑀢𑁂;

𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑀫𑁆𑀳𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑀼𑀚𑁆𑀛𑀺 𑀫𑁂.

𑁯𑁧𑁭. ‘‘𑀘𑀼𑀢𑀽𑀧𑀧𑀸𑀢𑀁 𑀚𑀸𑀦𑀸𑀫𑀺, 𑀲𑀢𑁆𑀢𑀸𑀦𑀁 𑀆𑀕𑀢𑀺𑀁 𑀕𑀢𑀺𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀛𑀸𑀦𑁂 𑀧𑀜𑁆𑀘𑀗𑁆𑀕𑀺𑀓𑁂 𑀞𑀺𑀢𑁄.

𑁯𑁧𑁮. ‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸…𑀧𑁂… 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁯𑁧𑁯. ‘‘𑀯𑀚𑁆𑀚𑀻𑀦𑀁 𑀯𑁂𑀴𑀼𑀯𑀕𑀸𑀫𑁂, 𑀅𑀳𑀁 𑀚𑀻𑀯𑀺𑀢𑀲𑀗𑁆𑀔𑀬𑀸;

𑀳𑁂𑀝𑁆𑀞𑀢𑁄 𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀁, 𑀦𑀺𑀩𑁆𑀩𑀸𑀬𑀺𑀲𑁆𑀲𑀁 𑀅𑀦𑀸𑀲𑀯𑁄’’𑀢𑀺.

𑀢𑀢𑁆𑀣 𑀧𑀳𑀸𑀬𑀸𑀢𑀺 𑀧𑀚𑀳𑀺𑀢𑁆𑀯𑀸. 𑀫𑀸𑀢𑀸𑀧𑀺𑀢𑀭𑁄𑀢𑀺 𑀫𑀸𑀢𑀭𑀜𑁆𑀘 𑀧𑀺𑀢𑀭𑀜𑁆𑀘. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀅𑀜𑁆𑀜𑁂 𑀓𑁂𑀘𑀺 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑁂𑀦 𑀯𑀸 𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑁂𑀦 𑀯𑀸 𑀅𑀪𑀺𑀪𑀽𑀢𑀸 𑀧𑀩𑁆𑀩𑀚𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸 𑀘 𑀓𑀺𑀘𑁆𑀘𑀦𑁆𑀢𑀭𑀧𑀲𑀼𑀢𑀸 𑀯𑀺𑀳𑀭𑀦𑁆𑀢𑀺, 𑀦 𑀏𑀯𑀁 𑀫𑀬𑀁. 𑀫𑀬𑀁 𑀧𑀦 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁, 𑀫𑀳𑀦𑁆𑀢𑀜𑁆𑀘 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀓𑀸𑀫𑁂𑀲𑀼 𑀦𑀺𑀭𑀧𑁂𑀓𑁆𑀔𑀸 𑀧𑀩𑁆𑀩𑀚𑀺𑀢𑀸𑀢𑀺. 𑀛𑀸𑀬𑀢𑀻𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀜𑁆𑀘𑀸𑀢𑀺, 𑀤𑀼𑀯𑀺𑀥𑀫𑁆𑀧𑀺 𑀛𑀸𑀦𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺.

𑀲𑀫𑁂𑀢𑁄 𑀦𑀘𑁆𑀘𑀕𑀻𑀢𑁂𑀳𑀻𑀢𑀺 𑀦𑀘𑁆𑀘𑁂𑀳𑀺 𑀘 𑀕𑀻𑀢𑁂𑀳𑀺 𑀘 𑀲𑀫𑀗𑁆𑀕𑀻𑀪𑀽𑀢𑁄, 𑀦𑀘𑁆𑀘𑀸𑀦𑀺 𑀧𑀲𑁆𑀲𑀦𑁆𑀢𑁄 𑀕𑀻𑀢𑀸𑀦𑀺 𑀲𑀼𑀡𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀫𑁆𑀫𑀢𑁄’’𑀢𑀺 𑀘 𑀧𑀞𑀦𑁆𑀢𑀺, 𑀦𑀘𑁆𑀘𑀕𑀻𑀢𑁂𑀳𑀺 𑀧𑀽𑀚𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀢𑀸𑀴𑀧𑁆𑀧𑀩𑁄𑀥𑀦𑁄𑀢𑀺 𑀲𑀫𑁆𑀫𑀢𑀸𑀴𑀲𑀤𑁆𑀤𑁂𑀳𑀺 𑀧𑀘𑁆𑀘𑀽𑀲𑀓𑀸𑀮𑁂 𑀧𑀩𑁄𑀥𑁂𑀢𑀩𑁆𑀩𑁄. 𑀦 𑀢𑁂𑀦 𑀲𑀼𑀤𑁆𑀥𑀺𑀫𑀚𑁆𑀛𑀕𑀦𑁆𑀢𑀺 𑀢𑁂𑀦 𑀓𑀸𑀫𑀪𑁄𑀕𑁂𑀦 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀦𑀸𑀥𑀺𑀕𑀘𑁆𑀙𑀺𑀁. 𑀫𑀸𑀭𑀲𑁆𑀲 𑀯𑀺𑀲𑀬𑁂 𑀭𑀢𑁄𑀢𑀺 𑀓𑀺𑀮𑁂𑀲𑀫𑀸𑀭𑀲𑁆𑀲 𑀯𑀺𑀲𑀬𑀪𑀽𑀢𑁂 𑀓𑀸𑀫𑀕𑀼𑀡𑁂 𑀭𑀢𑁄. ‘‘𑀓𑀺𑀮𑁂𑀲𑀫𑀸𑀭𑀲𑁆𑀲 𑀯𑀺𑀲𑀬𑀪𑀽𑀢𑁂𑀦 𑀓𑀸𑀫𑀕𑀼𑀡𑀪𑁄𑀕𑁂𑀦 𑀲𑀁𑀲𑀸𑀭𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄 𑀅𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀢𑀜𑁆𑀘 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑀦𑁆𑀢𑀺 𑀏𑀢𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀓𑀸𑀫𑀕𑀼𑀡𑀁. 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸, 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁄𑀖𑀦𑁆𑀢𑀺 𑀓𑀸𑀫𑁄𑀖𑀸𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀑𑀖𑀁.

𑀧𑀜𑁆𑀘 𑀓𑀸𑀫𑀕𑀼𑀡𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸 𑀲𑀤𑁆𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀦𑁄𑀭𑀫𑀸𑀢𑀺 𑀮𑁄𑀪𑀦𑀻𑀬𑀝𑁆𑀞𑁂𑀦 𑀫𑀦𑀁 𑀭𑀫𑀬𑀦𑁆𑀢𑀻𑀢𑀺 𑀫𑀦𑁄𑀭𑀫𑀸, 𑀫𑀦𑀸𑀧𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀓𑀢𑀫𑁂 𑀧𑀜𑁆𑀘 𑀫𑀦𑀸𑀧𑀺𑀬𑀸 𑀭𑀽𑀧𑀸, 𑀫𑀦𑀸𑀧𑀺𑀬𑀸 𑀲𑀤𑁆𑀤𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁩𑁨𑁮 𑀅𑀢𑁆𑀣𑀢𑁄 𑀲𑀫𑀸𑀦𑀁).

𑀧𑀺𑀡𑁆𑀟𑀧𑀸𑀢𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑀕𑁆𑀕𑀳𑀡𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀧𑀺𑀡𑁆𑀟𑀧𑀸𑀢𑀕𑁆𑀕𑀳𑀡𑀢𑁄 𑀦𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀓𑁄𑀢𑀺 𑀏𑀓𑀸𑀓𑀻 𑀅𑀧𑀘𑁆𑀙𑀸𑀲𑀫𑀡𑁄. 𑀅𑀤𑀼𑀢𑀺𑀬𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀢𑀡𑁆𑀳𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀤𑀼𑀢𑀺𑀬𑁄 𑀦𑀸𑀫. 𑀬𑀣𑀸𑀳 ‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀫𑀳𑀸𑀦𑀺. 𑁧𑁯𑁧). 𑀏𑀲𑀢𑀻𑀢𑀺 𑀧𑀭𑀺𑀬𑁂𑀲𑀢𑀺.

𑀯𑀺𑀘𑀺𑀦𑀻𑀢𑀺 𑀏𑀲𑀦𑁆𑀢𑁄𑀯 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀓𑁂 𑀧𑀁𑀲𑀼𑀓𑀽𑀮𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂 𑀯𑀺𑀘𑀺𑀦𑀺. 𑀅𑀕𑁆𑀕𑀳𑀻𑀢𑀺 𑀯𑀺𑀘𑀺𑀦𑀺𑀢𑁆𑀯𑀸 𑀅𑀲𑀼𑀘𑀺𑀫𑀓𑁆𑀔𑀺𑀢𑀫𑁆𑀧𑀺 𑀅𑀚𑀺𑀕𑀼𑀘𑁆𑀙𑀦𑁆𑀢𑁄 𑀕𑀡𑁆𑀳𑀺. 𑀥𑁄𑀯𑀻𑀢𑀺, 𑀯𑀺𑀓𑁆𑀔𑀸𑀮𑁂𑀲𑀺. 𑀭𑀚𑀬𑀻𑀢𑀺 𑀥𑁄𑀯𑀺𑀢𑁆𑀯𑀸 𑀕𑀳𑀺𑀢𑀁 𑀲𑀺𑀩𑁆𑀩𑀺𑀢𑁆𑀯𑀸 𑀓𑀧𑁆𑀧𑀺𑀬𑀭𑀚𑀦𑁂𑀦 𑀭𑀚𑀬𑀺. 𑀥𑀸𑀭𑀬𑀻𑀢𑀺 𑀭𑀚𑀺𑀢𑁆𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀥𑀸𑀭𑁂𑀲𑀺, 𑀦𑀺𑀯𑀸𑀲𑁂𑀲𑀺 𑀘𑁂𑀯 𑀧𑀸𑀭𑀼𑀧𑀺 𑀘.

𑀇𑀤𑀸𑀦𑀺 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀑𑀯𑀸𑀤𑀁 𑀢𑀲𑁆𑀲 𑀘 𑀅𑀢𑁆𑀢𑀦𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 ‘‘𑀫𑀳𑀺𑀘𑁆𑀙𑁄 𑀘 𑀅𑀲𑀦𑁆𑀢𑀼𑀝𑁆𑀞𑁄’’𑀢𑀺𑀆𑀤𑀺𑀓𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀫𑀳𑀺𑀘𑁆𑀙𑁄𑀢𑀺 𑀫𑀳𑀢𑀺𑀬𑀸 𑀧𑀘𑁆𑀘𑀬𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀉𑀴𑀸𑀭𑀼𑀴𑀸𑀭𑁂 𑀩𑀳𑀽 𑀘 𑀧𑀘𑁆𑀘𑀬𑁂 𑀇𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀦𑀺𑀲𑁆𑀲𑀦𑁆𑀢𑀼𑀝𑁆𑀞𑁄, 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑀸𑀤𑀺𑀦𑀸 𑀲𑀦𑁆𑀢𑁄𑀲𑁂𑀦 𑀯𑀺𑀭𑀳𑀺𑀢𑁄. 𑀲𑀁𑀲𑀝𑁆𑀞𑁄𑀢𑀺 𑀕𑀺𑀳𑀻𑀳𑀺 𑀘𑁂𑀯 𑀧𑀩𑁆𑀩𑀚𑀺𑀢𑁂𑀳𑀺 𑀘 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦 𑀲𑀁𑀲𑀝𑁆𑀞𑁄. 𑀉𑀤𑁆𑀥𑀢𑁄𑀢𑀺 𑀉𑀓𑁆𑀔𑀺𑀢𑁆𑀢𑁄. 𑀢𑀲𑁆𑀲𑀸𑀢𑀺 ‘‘𑀫𑀳𑀺𑀘𑁆𑀙𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀼𑀕𑁆𑀕𑀮𑀲𑁆𑀲. 𑀥𑀫𑁆𑀫𑀸𑀢𑀺 𑀫𑀳𑀺𑀘𑁆𑀙𑀢𑀸 𑀅𑀲𑀦𑁆𑀢𑁄𑀲𑁄, 𑀲𑀁𑀲𑀝𑁆𑀞𑀢𑀸 𑀯𑀺𑀓𑁆𑀔𑁂𑀧𑁄𑀢𑀺 𑀈𑀤𑀺𑀲𑀸. 𑀮𑀸𑀫𑀓𑀝𑁆𑀞𑁂𑀦 𑀧𑀸𑀧𑀓𑀸. 𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀫𑀮𑀻𑀦𑀪𑀸𑀯𑀓𑀭𑀡𑀢𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺.

𑀲𑀢𑁄 𑀘 𑀳𑁄𑀢𑀺 𑀅𑀧𑁆𑀧𑀺𑀘𑁆𑀙𑁄𑀢𑀺 𑀬𑀤𑀸 𑀧𑀦𑀸𑀬𑀁 𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑁄 𑀪𑀚𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀲𑀢𑀺𑀫𑀸 𑀘 𑀫𑀳𑀺𑀘𑁆𑀙𑀢𑀁 𑀧𑀳𑀸𑀬 𑀅𑀧𑁆𑀧𑀺𑀘𑁆𑀙𑁄 𑀘 𑀳𑁄𑀢𑀺. 𑀅𑀲𑀦𑁆𑀢𑁄𑀲𑀁 𑀧𑀳𑀸𑀬 𑀲𑀦𑁆𑀢𑀼𑀝𑁆𑀞𑁄, 𑀘𑀺𑀢𑁆𑀢𑀲𑁆𑀲 𑀯𑀺𑀖𑀸𑀢𑀓𑀭𑀁 𑀯𑀺𑀓𑁆𑀔𑁂𑀧𑀁 𑀧𑀳𑀸𑀬 𑀅𑀯𑀺𑀖𑀸𑀢𑀯𑀸 𑀅𑀯𑀺𑀓𑁆𑀔𑀺𑀢𑁆𑀢𑁄 𑀲𑀫𑀸𑀳𑀺𑀢𑁄, 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀧𑀯𑀺𑀯𑁂𑀓𑀭𑀢𑁄, 𑀯𑀺𑀯𑁂𑀓𑀸𑀪𑀺𑀭𑀢𑀺𑀬𑀸 𑀦𑀺𑀩𑁆𑀩𑀺𑀤𑀸𑀬 𑀥𑀫𑁆𑀫𑀧𑀻𑀢𑀺𑀬𑀸 𑀯𑀺𑀢𑁆𑀢𑁄 𑀲𑀼𑀫𑀦𑁄 𑀢𑀼𑀝𑁆𑀞𑀘𑀺𑀢𑁆𑀢𑁄, 𑀲𑀩𑁆𑀩𑀲𑁄 𑀓𑁄𑀲𑀚𑁆𑀚𑀧𑀳𑀸𑀦𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑁄.

𑀢𑀲𑁆𑀲 𑀏𑀯𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀲𑁆𑀲 𑀇𑀫𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀲𑀢𑁆𑀢𑀢𑀺𑀁𑀲𑀧𑁆𑀧𑀪𑁂𑀤𑀸 𑀢𑀺𑀯𑀺𑀥𑀯𑀺𑀧𑀲𑁆𑀲𑀦𑀸𑀲𑀗𑁆𑀕𑀳𑀸 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀓𑀼𑀲𑀮𑀸, 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀩𑁄𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀲𑁄 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀲𑁄 𑀆𑀲𑀯𑀸𑀦𑀁 𑀔𑁂𑀧𑀦𑁂𑀦 𑀅𑀕𑁆𑀕𑀫𑀕𑁆𑀕𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀅𑀦𑀸𑀲𑀯𑁄 𑀘 𑀳𑁄𑀢𑀺. 𑀇𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀫𑀢𑁆𑀣𑀓𑀁 𑀧𑀸𑀧𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬𑀸𑀢𑀺 ‘‘𑀅𑀧𑀺𑀘𑁆𑀙𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁩𑁦) 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀯𑀲𑁂𑀦 𑀆𑀭𑀤𑁆𑀥𑀁, 𑀢𑁂 𑀘 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁂𑀦 𑀞𑀺𑀢𑀁 𑀫𑀫 𑀲𑀗𑁆𑀓𑀧𑁆𑀧𑀁 𑀚𑀸𑀦𑀺𑀢𑁆𑀯𑀸. 𑀫𑀦𑁄𑀫𑀬𑁂𑀦𑀸𑀢𑀺 𑀫𑀦𑁄𑀫𑀬𑁂𑀦 𑀯𑀺𑀬, 𑀫𑀦𑀲𑀸 𑀦𑀺𑀫𑁆𑀫𑀺𑀢𑀲𑀤𑀺𑀲𑁂𑀦 𑀧𑀭𑀺𑀡𑀸𑀫𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀬𑀸𑀢𑀺 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀏𑀯𑀁 𑀧𑀯𑀢𑁆𑀢𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀬𑀸.

𑀬𑀤𑀸 𑀫𑁂 𑀅𑀳𑀼 𑀲𑀗𑁆𑀓𑀧𑁆𑀧𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀫𑀬𑁆𑀳𑀁 ‘‘𑀓𑀻𑀤𑀺𑀲𑁄 𑀦𑀼 𑀔𑁄 𑀅𑀝𑁆𑀞𑀫𑁄 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁄’’𑀢𑀺 𑀧𑀭𑀺𑀯𑀺𑀢𑀓𑁆𑀓𑁄 𑀅𑀳𑁄𑀲𑀺. 𑀢𑀢𑁄 𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬 𑀇𑀤𑁆𑀥𑀺𑀬𑀸 𑀉𑀧𑀲𑀗𑁆𑀓𑀫𑀻𑀢𑀺 𑀬𑁄𑀚𑀦𑀸. 𑀉𑀢𑁆𑀢𑀭𑀺 𑀤𑁂𑀲𑀬𑀻𑀢𑀺 ‘‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀦𑀺𑀧𑁆𑀧𑀧𑀜𑁆𑀘𑀭𑀢𑀺𑀦𑁄, 𑀦𑀸𑀬𑀁𑀥𑀫𑁆𑀫𑁄 𑀧𑀧𑀜𑁆𑀘𑀸𑀭𑀸𑀫𑀲𑁆𑀲 𑀧𑀧𑀜𑁆𑀘𑀭𑀢𑀺𑀦𑁄’’𑀢𑀺 (𑀅. 𑀦𑀺. 𑁮.𑁩𑁦) 𑀇𑀫𑀫𑀝𑁆𑀞𑀫𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁 𑀧𑀽𑀭𑁂𑀦𑁆𑀢𑁄 𑀉𑀧𑀭𑀺 𑀤𑁂𑀲𑀬𑀺. 𑀢𑀁 𑀧𑀦 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀧𑁆𑀧𑀧𑀜𑁆𑀘𑀭𑀢𑁄 𑀩𑀼𑀤𑁆𑀥𑁄, 𑀦𑀺𑀧𑁆𑀧𑀧𑀜𑁆𑀘𑀫𑀤𑁂𑀲𑀬𑀻’’𑀢𑀺. 𑀧𑀧𑀜𑁆𑀘𑀸 𑀦𑀸𑀫 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸, 𑀢𑁂𑀲𑀁 𑀯𑀽𑀧𑀲𑀫𑀢𑀸𑀬, 𑀢𑀤𑀪𑀸𑀯𑀢𑁄 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀦𑀺𑀧𑁆𑀧𑀧𑀜𑁆𑀘𑀸 𑀦𑀸𑀫. 𑀢𑀲𑁆𑀫𑀺𑀁 𑀦𑀺𑀧𑁆𑀧𑀧𑀜𑁆𑀘𑁂 𑀭𑀢𑁄 𑀅𑀪𑀺𑀭𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀬𑀣𑀸 𑀢𑀁 𑀧𑀸𑀧𑀼𑀡𑀸𑀫𑀺, 𑀢𑀣𑀸 𑀢𑀸𑀤𑀺𑀲𑀁 𑀥𑀫𑁆𑀫𑀁 𑀅𑀤𑁂𑀲𑀬𑀺, 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑁂𑀲𑀦𑀁 𑀧𑀓𑀸𑀲𑀬𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀲𑀸𑀳𑀁 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀢𑀲𑁆𑀲𑀸 𑀲𑀢𑁆𑀣𑀼 𑀤𑁂𑀲𑀦𑀸𑀬 𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀯𑀺𑀳𑀸𑀲𑀺𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑁂 𑀲𑀸𑀲𑀦𑁂 𑀭𑀢𑁄 𑀅𑀪𑀺𑀭𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸𑀭𑀸 𑀅𑀢𑁆𑀢𑀦𑁄 𑀲𑀫𑀸𑀕𑀫𑀁 𑀢𑁂𑀦 𑀲𑀸𑀥𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀆𑀭𑀤𑁆𑀥𑀯𑀻𑀭𑀺𑀬𑀢𑀁, 𑀓𑀸𑀬𑁂 𑀅𑀦𑀧𑁂𑀓𑁆𑀔𑀢𑀸𑀬 𑀲𑁂𑀬𑁆𑀬𑀲𑀼𑀔𑀧𑀲𑁆𑀲𑀲𑀼𑀔𑀸𑀦𑀁 𑀧𑀭𑀺𑀘𑁆𑀘𑀸𑀕𑀁, 𑀅𑀧𑁆𑀧𑀫𑀺𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀆𑀭𑀤𑁆𑀥𑀯𑀻𑀭𑀺𑀬𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀢𑁄 𑀦𑁂𑀲𑀚𑁆𑀚𑀺𑀓𑁄 𑀅𑀳𑀦𑁆𑀢𑀺 𑀬𑀢𑁄 𑀧𑀝𑁆𑀞𑀸𑀬 ‘‘𑀬𑁄𑀕𑀸𑀦𑀼𑀓𑀽𑀮𑀢𑀸 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀬𑀼𑀝𑁆𑀞𑀺𑀢𑀲𑀧𑁆𑀧𑀼𑀭𑀺𑀲𑀘𑀭𑀺𑀬𑀸 𑀲𑀮𑁆𑀮𑁂𑀔𑀯𑀼𑀢𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀕𑀼𑀡𑁂 𑀤𑀺𑀲𑁆𑀯𑀸 𑀦𑁂𑀲𑀚𑁆𑀚𑀺𑀓𑁄 𑀅𑀳𑁄𑀲𑀺𑀁 𑀢𑀸𑀦𑀺 𑀧𑀜𑁆𑀘𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺. 𑀬𑀢𑁄 𑀫𑀺𑀤𑁆𑀥𑀁 𑀲𑀫𑀽𑀳𑀢𑀦𑁆𑀢𑀺 𑀬𑀢𑁄 𑀧𑀝𑁆𑀞𑀸𑀬 𑀫𑀬𑀸 𑀦𑀺𑀤𑁆𑀤𑀸 𑀧𑀭𑀺𑀘𑁆𑀘𑀢𑁆𑀢𑀸 𑀢𑀸𑀦𑀺 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀸𑀦𑀺. ‘‘𑀣𑁂𑀭𑀲𑁆𑀲 𑀧𑀜𑁆𑀘𑀧𑀜𑁆𑀜𑀸𑀲𑀸𑀬 𑀯𑀲𑁆𑀲𑁂𑀲𑀼 𑀦𑁂𑀲𑀚𑁆𑀚𑀺𑀓𑀲𑁆𑀲 𑀲𑀢𑁄 𑀆𑀤𑀺𑀢𑁄 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀦𑀺𑀤𑁆𑀤𑀸 𑀦𑀸𑀳𑁄𑀲𑀺, 𑀢𑀢𑁄 𑀧𑀭𑀁 𑀲𑀭𑀻𑀭𑀓𑀺𑀮𑀫𑀣𑁂𑀦 𑀧𑀘𑁆𑀙𑀺𑀫𑀬𑀸𑀫𑁂 𑀦𑀺𑀤𑁆𑀤𑀸 𑀅𑀳𑁄𑀲𑀻’’𑀢𑀺 𑀯𑀤𑀦𑁆𑀢𑀺.

‘‘𑀦𑀸𑀳𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸’’ 𑀢𑀺𑀆𑀤𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀪𑀺𑀓𑁆𑀔𑀽𑀳𑀺 ‘‘𑀓𑀺𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀧𑀼𑀝𑁆𑀞𑁄 𑀧𑀭𑀺𑀦𑀺𑀩𑁆𑀩𑀸𑀦𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀦𑀸𑀳𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀞𑀺𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄𑀢𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀸 𑀲𑀩𑁆𑀩𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀲𑀩𑁆𑀩𑀧𑀘𑁆𑀙𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀞𑀺𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦𑀸𑀳𑀼 𑀦𑀸𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀬𑀲𑁆𑀫𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀓𑀸𑀬𑀲𑀗𑁆𑀔𑀸𑀭𑀸𑀢𑀺 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦𑀸𑀳𑁂𑀲𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀬 𑀏𑀚𑀸𑀬 𑀅𑀪𑀸𑀯𑀢𑁄 𑀅𑀦𑁂𑀚𑁄, 𑀲𑀫𑀸𑀥𑀺𑀲𑁆𑀫𑀺𑀁 𑀞𑀺𑀢𑀢𑁆𑀢𑀸 𑀯𑀸 𑀅𑀦𑁂𑀚𑁄. 𑀲𑀦𑁆𑀢𑀺𑀫𑀸𑀭𑀩𑁆𑀪𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀲𑀦𑁆𑀥𑀸𑀬. 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀘𑀢𑀼𑀢𑁆𑀣𑀚𑁆𑀛𑀸𑀦𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀫𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺.

𑀅𑀲𑀮𑁆𑀮𑀻𑀦𑁂𑀦𑀸𑀢𑀺 𑀅𑀮𑀻𑀦𑁂𑀦 𑀅𑀲𑀁𑀓𑀼𑀝𑀺𑀢𑁂𑀦 𑀲𑀼𑀯𑀺𑀓𑀲𑀺𑀢𑁂𑀦𑁂𑀯 𑀘𑀺𑀢𑁆𑀢𑁂𑀦. 𑀯𑁂𑀤𑀦𑀁 𑀅𑀚𑁆𑀛𑀯𑀸𑀲𑀬𑀻𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀫𑀸𑀭𑀡𑀦𑁆𑀢𑀺𑀓𑀁 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀲𑀺, 𑀦 𑀯𑁂𑀤𑀦𑀸𑀦𑀼𑀯𑀢𑁆𑀢𑀻 𑀳𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀲𑀫𑁆𑀧𑀭𑀺𑀯𑀢𑁆𑀢𑀺. 𑀧𑀚𑁆𑀚𑁄𑀢𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀘𑁂𑀢𑀲𑁄 𑀅𑀳𑀽𑀢𑀺 𑀬𑀣𑀸 𑀢𑁂𑀮𑀜𑁆𑀘 𑀧𑀝𑀺𑀘𑁆𑀘, 𑀯𑀝𑁆𑀝𑀺𑀜𑁆𑀘 𑀧𑀝𑀺𑀘𑁆𑀘 𑀧𑀚𑁆𑀚𑀮𑀦𑁆𑀢𑁄 𑀧𑀚𑁆𑀚𑁄𑀢𑁄 𑀧𑀤𑀻𑀧𑁄 𑀢𑁂𑀲𑀁 𑀧𑀭𑀺𑀓𑁆𑀔𑀬𑁂 𑀦𑀺𑀩𑁆𑀩𑀸𑀬𑀢𑀺. 𑀦𑀺𑀩𑁆𑀩𑀼𑀢𑁄 𑀘 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀦 𑀢𑀺𑀝𑁆𑀞𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀤𑀲𑁆𑀲𑀦𑀫𑁂𑀯 𑀕𑀘𑁆𑀙𑀢𑀺; 𑀏𑀯𑀁 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀫𑀸𑀦𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀢𑁂𑀲𑀁 𑀧𑀭𑀺𑀓𑁆𑀔𑀬𑁂 𑀦𑀺𑀩𑁆𑀩𑀸𑀬𑀢𑀺, 𑀦𑀺𑀩𑁆𑀩𑀼𑀢𑁄 𑀘 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀦 𑀢𑀺𑀝𑁆𑀞𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀤𑀲𑁆𑀲𑀦𑀫𑁂𑀯 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀦𑁆𑀢𑀺 𑀥𑀻𑀭𑀸 𑀬𑀣𑀸𑀬𑀁 𑀧𑀤𑀻𑀧𑁄’’𑀢𑀺 (𑀔𑀼. 𑀧𑀸. 𑁬.𑁧𑁫), ‘‘𑀅𑀘𑁆𑀘𑀻 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸’’𑀢𑀺 (𑀲𑀼. 𑀦𑀺. 𑁧𑁦𑁮𑁦) 𑀘 𑀆𑀤𑀺.

𑀏𑀢𑁂𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑁆𑀔𑀡𑁂 𑀲𑀢𑁆𑀣𑀼 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀢𑀸𑀬 𑀯𑀼𑀢𑁆𑀢𑀁. 𑀧𑀘𑁆𑀙𑀺𑀫𑀓𑀸 𑀢𑀢𑁄 𑀧𑀭𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀪𑀸𑀯𑀢𑁄. 𑀤𑀸𑀦𑀻𑀢𑀺 𑀏𑀢𑀭𑀳𑀺. 𑀨𑀲𑁆𑀲𑀧𑀜𑁆𑀘𑀫𑀸𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀓𑀝𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀣𑀸𑀬𑀫𑁆𑀧𑀺 𑀨𑀲𑁆𑀲𑀧𑀜𑁆𑀘𑀫𑀓𑀸𑀯 𑀆𑀤𑀺𑀢𑁄 𑀯𑀼𑀢𑁆𑀢𑀸. 𑀅𑀜𑁆𑀜𑁂 𑀥𑀫𑁆𑀫𑀸𑀢𑀺 𑀲𑀳 𑀦𑀺𑀲𑁆𑀲𑀬𑁂𑀦 𑀅𑀜𑁆𑀜𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀦 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀘𑁂𑀢𑀲𑀺𑀓𑀸. 𑀦𑀦𑀼 𑀢𑁂𑀧𑀺 𑀦 𑀪𑀯𑀺𑀲𑁆𑀲𑀦𑁆𑀢𑁂𑀯𑀸𑀢𑀺? 𑀲𑀘𑁆𑀘𑀁 𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀆𑀲𑀗𑁆𑀓𑀸𑀪𑀸𑀯𑀢𑁄 𑀧𑀦 𑀢𑁂 𑀲𑀦𑁆𑀥𑀸𑀬 ‘‘𑀦 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯. ‘‘𑀇𑀢𑀭𑁂 𑀧𑀦 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀺𑀬 𑀪𑀯𑀺𑀲𑁆𑀲𑀦𑁆𑀢𑀺 𑀦𑀼 𑀔𑁄’’𑀢𑀺 𑀲𑀺𑀬𑀸 𑀆𑀲𑀗𑁆𑀓𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀦𑀸𑀜𑁆𑀜𑁂 𑀥𑀫𑁆𑀫𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀸𑀯𑀸𑀲𑁄, 𑀤𑁂𑀯𑀓𑀸𑀬𑀲𑁆𑀫𑀺 𑀚𑀸𑀮𑀺𑀦𑀻𑀢𑀺, 𑀏𑀢𑁆𑀣 𑀚𑀸𑀮𑀺𑀦𑀻𑀢𑀺 𑀤𑁂𑀯𑀢𑀁 𑀆𑀮𑀧𑀢𑀺, 𑀤𑁂𑀯𑀢𑁂 𑀤𑁂𑀯𑀓𑀸𑀬𑀲𑁆𑀫𑀺𑀁 𑀤𑁂𑀯𑀲𑀫𑀽𑀳𑁂 𑀉𑀧𑀧𑀚𑁆𑀚𑀦𑀯𑀲𑁂𑀦 𑀧𑀼𑀦 𑀆𑀯𑀸𑀲𑁄 𑀆𑀯𑀲𑀦𑀁 𑀇𑀤𑀸𑀦𑀺 𑀫𑀬𑁆𑀳𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀯𑀺𑀓𑁆𑀔𑀻𑀡𑁄’’𑀢𑀺𑀆𑀤𑀺𑀦𑀸. 𑀲𑀸 𑀓𑀺𑀭 𑀤𑁂𑀯𑀢𑀸 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀣𑁂𑀭𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸, 𑀢𑀲𑁆𑀫𑀸 𑀇𑀤𑀸𑀦𑀺 𑀣𑁂𑀭𑀁 𑀚𑀺𑀡𑁆𑀡𑀁 𑀯𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀼𑀭𑀺𑀫𑀲𑀺𑀦𑁂𑀳𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀥𑁂𑀳𑀺, 𑀬𑀢𑁆𑀣 𑀢𑁂 𑀯𑀼𑀲𑀺𑀢𑀁 𑀧𑀼𑀭𑁂’’𑀢𑀺 𑀤𑁂𑀯𑀽𑀧𑀧𑀢𑁆𑀢𑀺𑀁 𑀬𑀸𑀘𑀺. 𑀅𑀣 ‘‘𑀤𑀸𑀦𑀺 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀣𑁂𑀭𑁄 𑀢𑀲𑁆𑀲𑀸 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀢𑀸 𑀯𑀺𑀳𑀢𑀸𑀲𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀅𑀣 𑀣𑁂𑀭𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀬𑀲𑁆𑀲 𑀫𑀼𑀳𑀼𑀢𑁆𑀢𑁂𑀦𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀔𑀻𑀡𑀸𑀲𑀯𑀪𑀺𑀓𑁆𑀔𑀼𑀦𑁄 𑀫𑀼𑀳𑀼𑀢𑁆𑀢𑀫𑀢𑁆𑀢𑁂𑀦 𑀏𑀯 𑀲𑀳𑀲𑁆𑀲𑀥𑀸 𑀲𑀳𑀲𑁆𑀲𑀧𑁆𑀧𑀓𑀸𑀭𑁄 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀧𑀪𑁂𑀤𑁄, 𑀮𑁄𑀓𑁄 𑀲𑀩𑁆𑀭𑀳𑁆𑀫𑀓𑀧𑁆𑀧𑁄 𑀲𑀳𑀩𑁆𑀭𑀳𑁆𑀫𑀮𑁄𑀓𑁄, 𑀲𑀁𑀯𑀺𑀤𑀺𑀢𑁄 𑀲𑀫𑁆𑀫𑀤𑁂𑀯 𑀯𑀺𑀤𑀺𑀢𑁄 𑀜𑀸𑀢𑁄 𑀧𑀘𑁆𑀘𑀓𑁆𑀔𑀁 𑀓𑀢𑁄, 𑀏𑀯𑀁 𑀇𑀤𑁆𑀥𑀺𑀕𑀼𑀡𑁂 𑀇𑀤𑁆𑀥𑀺𑀲𑀫𑁆𑀧𑀤𑀸𑀬 𑀘𑀼𑀢𑀽𑀧𑀧𑀸𑀢𑁂 𑀘 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁄 𑀲𑁄 𑀪𑀺𑀓𑁆𑀔𑀼 𑀉𑀧𑀕𑀢𑀓𑀸𑀮𑁂 𑀤𑁂𑀯𑀢𑀸 𑀧𑀲𑁆𑀲𑀢𑀺, 𑀦 𑀢𑀲𑁆𑀲 𑀤𑁂𑀯𑀢𑀸𑀦𑀁 𑀤𑀲𑁆𑀲𑀦𑁂 𑀧𑀭𑀺𑀳𑀸𑀦𑀻𑀢𑀺. 𑀣𑁂𑀭𑁂𑀦 𑀓𑀺𑀭 𑀚𑀸𑀮𑀺𑀦𑀺𑀬𑀸 𑀤𑁂𑀯𑀢𑀸𑀬 𑀧𑀝𑀺𑀯𑀘𑀦𑀤𑀸𑀦𑀯𑀲𑁂𑀦 ‘‘𑀦𑀢𑁆𑀣𑀺 𑀤𑀸𑀦𑀻’’𑀢𑀺 𑀕𑀸𑀣𑀸𑀬 𑀯𑀼𑀢𑁆𑀢𑀸𑀬 𑀪𑀺𑀓𑁆𑀔𑀽 𑀚𑀸𑀮𑀺𑀦𑀺𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀓𑀺𑀁 𑀦𑀼 𑀔𑁄 𑀣𑁂𑀭𑁄 𑀥𑀫𑁆𑀫𑀸𑀮𑀧𑀦𑀯𑀲𑁂𑀦 𑀓𑀺𑀜𑁆𑀘𑀺 𑀆𑀮𑀧𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀢𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀣𑁂𑀭𑁄 ‘‘𑀬𑀲𑁆𑀲 𑀫𑀼𑀳𑀼𑀢𑁆𑀢𑁂𑀦𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀅𑀦𑁆𑀦𑀪𑀸𑀭𑁄 𑀧𑀼𑀭𑁂𑀢𑀺 𑀏𑀯𑀁𑀦𑀸𑀫𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑁂. 𑀖𑀸𑀲𑀳𑀸𑀭𑀓𑁄𑀢𑀺 𑀖𑀸𑀲𑀫𑀢𑁆𑀢𑀲𑁆𑀲 𑀅𑀢𑁆𑀣𑀸𑀬 𑀪𑀢𑁆𑀢𑀺𑀁 𑀓𑀢𑁆𑀯𑀸 𑀚𑀻𑀯𑀦𑀓𑁄. 𑀲𑀫𑀡𑀦𑁆𑀢𑀺 𑀲𑀫𑀺𑀢𑀧𑀸𑀧𑀁. 𑀧𑀝𑀺𑀧𑀸𑀤𑁂𑀲𑀺𑀦𑁆𑀢𑀺 𑀧𑀝𑀺𑀫𑀼𑀔𑁄 𑀳𑀼𑀢𑁆𑀯𑀸 𑀧𑀸𑀤𑀸𑀲𑀺𑀁, 𑀧𑀲𑀸𑀤𑁂𑀦 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀆𑀳𑀸𑀭𑀤𑀸𑀦𑀁 𑀅𑀤𑀸𑀲𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀭𑀺𑀝𑁆𑀞𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁. 𑀬𑀲𑀲𑁆𑀲𑀺𑀦𑀦𑁆𑀢𑀺 𑀓𑀺𑀢𑁆𑀢𑀺𑀫𑀦𑁆𑀢𑀁 𑀧𑀢𑁆𑀣𑀝𑀬𑀲𑀁. 𑀇𑀫𑀸𑀬 𑀕𑀸𑀣𑀸𑀬 𑀬𑀸𑀯 𑀘𑀭𑀺𑀫𑀢𑁆𑀢𑀪𑀸𑀯𑀸 𑀉𑀴𑀸𑀭𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑁄𑀫𑁆𑀳𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄’’𑀢𑀺𑀆𑀤𑀺.

𑀇𑀢𑁄 𑀲𑀢𑁆𑀢𑀸𑀢𑀺 𑀇𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀤𑀺𑀩𑁆𑀩𑁂𑀦 𑀆𑀥𑀺𑀧𑀘𑁆𑀘𑁂𑀦 𑀲𑀢𑁆𑀢. 𑀢𑀢𑁄 𑀲𑀢𑁆𑀢𑀸𑀢𑀺 𑀢𑀢𑁄 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑁂𑀦 𑀲𑀢𑁆𑀢. 𑀲𑀁𑀲𑀸𑀭𑀸𑀦𑀺 𑀘𑀢𑀼𑀤𑁆𑀤𑀲𑀸𑀢𑀺 𑀘𑀢𑀼𑀤𑁆𑀤𑀲 𑀪𑀯𑀦𑁆𑀢𑀭𑀲𑀁𑀲𑀭𑀡𑀸𑀦𑀺. 𑀦𑀺𑀯𑀸𑀲𑀫𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀜𑁆𑀜𑀸𑀲𑀺𑀁. 𑀤𑁂𑀯𑀮𑁄𑀓𑁂 𑀞𑀺𑀢𑁄 𑀢𑀤𑀸𑀢𑀺 𑀢𑀜𑁆𑀘 𑀔𑁄 𑀦 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂, 𑀅𑀧𑀺 𑀘 𑀔𑁄 𑀬𑀤𑀸 𑀇𑀢𑁄 𑀅𑀦𑀦𑁆𑀢𑀭𑀸𑀢𑀻𑀢𑁂 𑀅𑀢𑁆𑀢𑀪𑀸𑀯𑁂 𑀤𑁂𑀯𑀮𑁄𑀓𑁂 𑀞𑀺𑀢𑁄, 𑀢𑀤𑀸 𑀅𑀜𑁆𑀜𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀢𑁆𑀢𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀦𑀁 𑀅𑀥𑀺𑀕𑀢𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘𑀗𑁆𑀕𑀺𑀓𑁂’’𑀢𑀺𑀆𑀤𑀺𑀦𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀧𑀜𑁆𑀘𑀗𑁆𑀕𑀺𑀓𑁂 𑀲𑀫𑀸𑀥𑀺𑀫𑁆𑀳𑀻𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀫𑁆𑀳𑀺. 𑀲𑁄 𑀳𑀺 𑀧𑀻𑀢𑀺𑀨𑀭𑀡𑀢𑀸, 𑀲𑀼𑀔𑀨𑀭𑀡𑀢𑀸, 𑀘𑁂𑀢𑁄𑀨𑀭𑀡𑀢𑀸, 𑀆𑀮𑁄𑀓𑀨𑀭𑀡𑀢𑀸, 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑀸𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀦𑁆𑀢𑁂𑀢𑀺 𑀧𑀝𑀺𑀧𑀓𑁆𑀔𑀯𑀽𑀧𑀲𑀫𑁂𑀦 𑀅𑀗𑁆𑀕𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑁂. 𑀏𑀓𑁄𑀤𑀺𑀪𑀸𑀯𑀺𑀢𑁂𑀢𑀺 𑀏𑀓𑁄𑀤𑀺𑀪𑀸𑀯𑀕𑀢𑁂, 𑀲𑀼𑀘𑀺𑀡𑁆𑀡𑁂 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑀫𑁆𑀳𑀻𑀢𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀮𑀤𑁆𑀥𑁂. 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑀼𑀚𑁆𑀛𑀺 𑀫𑁂𑀢𑀺 𑀏𑀯𑀁𑀯𑀺𑀥𑁂 𑀲𑀫𑀸𑀥𑀺𑀫𑁆𑀳𑀺 𑀲𑀫𑁆𑀧𑀸𑀤𑀺𑀢𑁂 𑀫𑀬𑁆𑀳𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀯𑀺𑀲𑀼𑀚𑁆𑀛𑀺, 𑀏𑀓𑀸𑀤𑀲𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺.

𑀘𑀼𑀢𑀽𑀧𑀧𑀸𑀢𑀁 𑀚𑀸𑀦𑀸𑀫𑀻𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀜𑁆𑀘 𑀉𑀧𑀧𑀢𑁆𑀢𑀺𑀜𑁆𑀘 𑀚𑀸𑀦𑀸𑀫𑀺, 𑀚𑀸𑀦𑀦𑁆𑀢𑁄 𑀘 ‘‘𑀇𑀫𑁂 𑀲𑀢𑁆𑀢𑀸 𑀅𑀫𑀼𑀫𑁆𑀳𑀸 𑀮𑁄𑀓𑀫𑁆𑀳𑀸 𑀆𑀕𑀦𑁆𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸, 𑀇𑀫𑀫𑁆𑀳𑀸 𑀘 𑀮𑁄𑀓𑀸 𑀕𑀦𑁆𑀢𑁆𑀯𑀸 𑀅𑀫𑀼𑀫𑁆𑀳𑀺 𑀮𑁄𑀓𑁂 𑀉𑀧𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀢𑁆𑀢𑀸𑀦𑀁 𑀆𑀕𑀢𑀺𑀁 𑀕𑀢𑀺𑀜𑁆𑀘 𑀚𑀸𑀦𑀸𑀫𑀺, 𑀚𑀸𑀦𑀦𑁆𑀢𑁄 𑀏𑀯 𑀘 𑀦𑁂𑀲𑀁 𑀇𑀢𑁆𑀣𑀪𑀸𑀯𑀁 𑀫𑀦𑀼𑀲𑁆𑀲𑀪𑀸𑀯𑀁 𑀢𑀢𑁄 𑀅𑀜𑁆𑀜𑀣𑀸𑀪𑀸𑀯𑀁 𑀅𑀜𑁆𑀜𑀣𑀸𑀢𑀺𑀭𑀘𑁆𑀙𑀸𑀦𑀪𑀸𑀯𑀜𑁆𑀘 𑀉𑀧𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀚𑀸𑀦𑀸𑀫𑀺. 𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀺 𑀧𑀜𑁆𑀘𑀗𑁆𑀕𑀺𑀓𑁂 𑀲𑀫𑀸𑀥𑀺𑀫𑁆𑀳𑀺 𑀲𑀫𑁆𑀧𑀸𑀤𑀺𑀢𑁂 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀛𑀸𑀦𑁂 𑀧𑀜𑁆𑀘𑀗𑁆𑀕𑀺𑀓𑁂 𑀞𑀺𑀢𑁄’’𑀢𑀺. 𑀢𑀢𑁆𑀣 𑀧𑀜𑁆𑀘𑀗𑁆𑀕𑀺𑀓𑁂 𑀛𑀸𑀦𑁂 𑀞𑀺𑀢𑁄 𑀧𑀢𑀺𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀏𑀯𑀁 𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀺𑀚𑁆𑀚𑀸𑀢𑁆𑀢𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀧𑁆𑀧𑀲𑀗𑁆𑀕𑁂𑀦 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀫𑁆𑀧𑀺 𑀢𑀢𑀺𑀬𑀯𑀺𑀚𑁆𑀚𑀁 𑀲𑀳 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀯𑀚𑁆𑀚𑀻𑀦𑀁 𑀯𑁂𑀴𑀼𑀯𑀕𑀸𑀫𑁂𑀢𑀺 𑀯𑀚𑁆𑀚𑀺𑀭𑀝𑁆𑀞𑀲𑁆𑀲 𑀯𑁂𑀴𑀼𑀯𑀕𑀸𑀫𑁂, 𑀯𑀚𑁆𑀚𑀺𑀭𑀝𑁆𑀞𑁂 𑀬𑀢𑁆𑀣 𑀧𑀘𑁆𑀙𑀺𑀫𑀯𑀲𑁆𑀲𑀁 𑀉𑀧𑀕𑀘𑁆𑀙𑀺 𑀯𑁂𑀴𑀼𑀯𑀕𑀸𑀫𑁂. 𑀳𑁂𑀝𑁆𑀞𑀢𑁄 𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀦𑁆𑀢𑀺 𑀢𑀢𑁆𑀣 𑀅𑀜𑁆𑀜𑀢𑀭𑀲𑁆𑀲 𑀯𑁂𑀴𑀼𑀕𑀼𑀫𑁆𑀩𑀲𑁆𑀲 𑀳𑁂𑀝𑁆𑀞𑀸. 𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺 𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.