𑁧𑁦. 𑀧𑀸𑀭𑀸𑀧𑀭𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑀫𑀡𑀲𑁆𑀲 𑀅𑀳𑀼 𑀘𑀺𑀦𑁆𑀢𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀧𑀸𑀭𑀸𑀧𑀭𑀺𑀬𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀇𑀫𑀲𑁆𑀲 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀆𑀕𑀢𑀫𑁂𑀯. 𑀢𑀸 𑀘 𑀕𑀸𑀣𑀸 𑀲𑀢𑁆𑀣𑀭𑀺 𑀥𑀭𑀦𑁆𑀢𑁂 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀕𑁆𑀕𑀡𑁆𑀳𑀦𑀘𑀺𑀦𑁆𑀢𑀸𑀬 𑀧𑀓𑀸𑀲𑀦𑀯𑀲𑁂𑀦 𑀪𑀸𑀲𑀺𑀢𑀸. 𑀇𑀫𑀸 𑀧𑀦 𑀅𑀧𑀭𑀪𑀸𑀕𑁂 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀅𑀢𑁆𑀢𑀦𑁄 𑀘 𑀧𑀭𑀺𑀦𑀺𑀩𑁆𑀩𑀸𑀦𑁂 𑀉𑀧𑀝𑁆𑀞𑀺𑀢𑁂 𑀢𑀤𑀸 𑀆𑀬𑀢𑀺𑀜𑁆𑀘 𑀪𑀺𑀓𑁆𑀔𑀽𑀦𑀁 𑀉𑀤𑁆𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀯𑀲𑁂𑀦 𑀪𑀸𑀲𑀺𑀢𑀸. 𑀢𑀢𑁆𑀣 𑁋

𑁯𑁨𑁦. ‘‘𑀲𑀫𑀡𑀲𑁆𑀲 𑀅𑀳𑀼 𑀘𑀺𑀦𑁆𑀢𑀸, 𑀧𑀼𑀧𑁆𑀨𑀺𑀢𑀫𑁆𑀳𑀺 𑀫𑀳𑀸𑀯𑀦𑁂;

𑀏𑀓𑀕𑁆𑀕𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲, 𑀧𑀯𑀺𑀯𑀺𑀢𑁆𑀢𑀲𑁆𑀲 𑀛𑀸𑀬𑀺𑀦𑁄’’𑀢𑀺. 𑁋

𑀅𑀬𑀁 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁄𑀯. 𑀅𑀬𑀁 𑀧𑀦 𑀲𑀫𑁆𑀩𑀦𑁆𑀥𑁄 𑁋 𑀲𑀢𑁆𑀣𑀭𑀺 𑀅𑀕𑁆𑀕𑀲𑀸𑀯𑀓𑁂𑀲𑀼 𑀏𑀓𑀘𑁆𑀘𑁂𑀲𑀼 𑀫𑀳𑀸𑀣𑁂𑀭𑁂𑀲𑀼 𑀘 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀅𑀢𑀻𑀢𑀲𑀢𑁆𑀣𑀼𑀓𑁂 𑀧𑀸𑀯𑀘𑀦𑁂 𑀲𑀼𑀩𑁆𑀩𑀘𑁂𑀲𑀼 𑀲𑀺𑀓𑁆𑀔𑀸𑀓𑀸𑀫𑁂𑀲𑀼 𑀪𑀺𑀓𑁆𑀔𑀽𑀲𑀼 𑀤𑀼𑀮𑁆𑀮𑀪𑁂𑀲𑀼, 𑀤𑀼𑀩𑁆𑀩𑀘𑁂𑀲𑀼 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀩𑀳𑀼𑀮𑁂𑀲𑀼 𑀪𑀺𑀓𑁆𑀔𑀽𑀲𑀼 𑀘 𑀚𑀸𑀢𑁂𑀲𑀼 𑀲𑀼𑀧𑀼𑀧𑁆𑀨𑀺𑀢𑁂 𑀫𑀳𑀦𑁆𑀢𑁂 𑀲𑀸𑀮𑀯𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀯𑀺𑀯𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀲𑁆𑀲 𑀛𑀸𑀬𑀦𑀲𑀻𑀮𑀲𑁆𑀲, 𑀲𑀫𑀺𑀢𑀧𑀸𑀧𑀢𑀸𑀬 𑀲𑀫𑀡𑀲𑁆𑀲, 𑀧𑀸𑀭𑀸𑀧𑀭𑀺𑀬𑀢𑁆𑀣𑁂𑀭𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀘𑀺𑀦𑁆𑀢𑀸 𑀯𑀻𑀫𑀁𑀲𑀸 𑀅𑀳𑁄𑀲𑀻𑀢𑀺 𑀇𑀢𑀭𑀸 𑁋

𑁯𑁨𑁧. ‘‘𑀅𑀜𑁆𑀜𑀣𑀸 𑀮𑁄𑀓𑀦𑀸𑀣𑀫𑁆𑀳𑀺, 𑀢𑀺𑀝𑁆𑀞𑀦𑁆𑀢𑁂 𑀧𑀼𑀭𑀺𑀲𑀼𑀢𑁆𑀢𑀫𑁂;

𑀇𑀭𑀺𑀬𑀁 𑀆𑀲𑀺 𑀪𑀺𑀓𑁆𑀔𑀽𑀦𑀁, 𑀅𑀜𑁆𑀜𑀣𑀸 𑀤𑀸𑀦𑀺 𑀤𑀺𑀲𑁆𑀲𑀢𑀺.

𑁯𑁨𑁨. ‘‘𑀲𑀻𑀢𑀯𑀸𑀢𑀧𑀭𑀺𑀢𑁆𑀢𑀸𑀡𑀁, 𑀳𑀺𑀭𑀺𑀓𑁄𑀧𑀻𑀦𑀙𑀸𑀤𑀦𑀁;

𑀫𑀢𑁆𑀢𑀝𑁆𑀞𑀺𑀬𑀁 𑀅𑀪𑀼𑀜𑁆𑀚𑀺𑀁𑀲𑀼, 𑀲𑀦𑁆𑀢𑀼𑀝𑁆𑀞𑀸 𑀇𑀢𑀭𑀻𑀢𑀭𑁂.

𑁯𑁨𑁩. ‘‘𑀧𑀡𑀻𑀢𑀁 𑀬𑀤𑀺 𑀯𑀸 𑀮𑀽𑀔𑀁, 𑀅𑀧𑁆𑀧𑀁 𑀯𑀸 𑀬𑀤𑀺 𑀯𑀸 𑀩𑀳𑀼𑀁;

𑀬𑀸𑀧𑀦𑀢𑁆𑀣𑀁 𑀅𑀪𑀼𑀜𑁆𑀚𑀺𑀁𑀲𑀼, 𑀅𑀕𑀺𑀤𑁆𑀥𑀸 𑀦𑀸𑀥𑀺𑀫𑀼𑀘𑁆𑀙𑀺𑀢𑀸.

𑁯𑁨𑁪. ‘‘𑀚𑀻𑀯𑀺𑀢𑀸𑀦𑀁 𑀧𑀭𑀺𑀓𑁆𑀔𑀸𑀭𑁂, 𑀪𑁂𑀲𑀚𑁆𑀚𑁂 𑀅𑀣 𑀧𑀘𑁆𑀘𑀬𑁂;

𑀦 𑀩𑀸𑀴𑁆𑀳𑀁 𑀉𑀲𑁆𑀲𑀼𑀓𑀸 𑀆𑀲𑀼𑀁, 𑀬𑀣𑀸 𑀢𑁂 𑀆𑀲𑀯𑀓𑁆𑀔𑀬𑁂.

𑁯𑁨𑁫. ‘‘𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑁂𑀲𑀼, 𑀓𑀦𑁆𑀤𑀭𑀸𑀲𑀼 𑀕𑀼𑀳𑀸𑀲𑀼 𑀘;

𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀦𑁆𑀢𑀸, 𑀯𑀺𑀳𑀁𑀲𑀼 𑀢𑀧𑁆𑀧𑀭𑀸𑀬𑀡𑀸.

𑁯𑁨𑁬. ‘‘𑀦𑀻𑀘𑀸 𑀦𑀺𑀯𑀺𑀝𑁆𑀞𑀸 𑀲𑀼𑀪𑀭𑀸, 𑀫𑀼𑀤𑀽 𑀅𑀣𑀤𑁆𑀥𑀫𑀸𑀦𑀲𑀸;

𑀅𑀩𑁆𑀬𑀸𑀲𑁂𑀓𑀸 𑀅𑀫𑀼𑀔𑀭𑀸, 𑀅𑀢𑁆𑀣𑀘𑀺𑀦𑁆𑀢𑀸𑀯𑀲𑀸𑀦𑀼𑀕𑀸.

𑁯𑁨𑁭. ‘‘𑀢𑀢𑁄 𑀧𑀸𑀲𑀸𑀤𑀺𑀓𑀁 𑀆𑀲𑀺, 𑀕𑀢𑀁 𑀪𑀼𑀢𑁆𑀢𑀁 𑀦𑀺𑀲𑁂𑀯𑀺𑀢𑀁;

𑀲𑀺𑀦𑀺𑀤𑁆𑀥𑀸 𑀢𑁂𑀮𑀥𑀸𑀭𑀸𑀯, 𑀅𑀳𑁄𑀲𑀺 𑀇𑀭𑀺𑀬𑀸𑀧𑀣𑁄.

𑁯𑁨𑁮. ‘‘𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀫𑀳𑀸𑀛𑀸𑀬𑀻 𑀫𑀳𑀸𑀳𑀺𑀢𑀸;

𑀦𑀺𑀩𑁆𑀩𑀼𑀢𑀸 𑀤𑀸𑀦𑀺 𑀢𑁂 𑀣𑁂𑀭𑀸, 𑀧𑀭𑀺𑀢𑁆𑀢𑀸 𑀤𑀸𑀦𑀺 𑀢𑀸𑀤𑀺𑀲𑀸.

𑁯𑁨𑁯. ‘‘𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁, 𑀧𑀜𑁆𑀜𑀸𑀬 𑀘 𑀧𑀭𑀺𑀓𑁆𑀔𑀬𑀸;

𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑀁, 𑀮𑀼𑀚𑁆𑀚𑀢𑁂 𑀚𑀺𑀦𑀲𑀸𑀲𑀦𑀁.

𑁯𑁩𑁦. ‘‘𑀧𑀸𑀧𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁, 𑀓𑀺𑀮𑁂𑀲𑀸𑀦𑀜𑁆𑀘 𑀬𑁄 𑀉𑀢𑀼;

𑀉𑀧𑀝𑁆𑀞𑀺𑀢𑀸 𑀯𑀺𑀯𑁂𑀓𑀸𑀬, 𑀬𑁂 𑀘 𑀲𑀤𑁆𑀥𑀫𑁆𑀫𑀲𑁂𑀲𑀓𑀸.

𑁯𑁩𑁧. ‘‘𑀢𑁂 𑀓𑀺𑀮𑁂𑀲𑀸 𑀧𑀯𑀟𑁆𑀠𑀦𑁆𑀢𑀸, 𑀆𑀯𑀺𑀲𑀦𑁆𑀢𑀺 𑀩𑀳𑀼𑀁 𑀚𑀦𑀁;

𑀓𑀻𑀴𑀦𑁆𑀢𑀺 𑀫𑀜𑁆𑀜𑁂 𑀩𑀸𑀮𑁂𑀳𑀺, 𑀉𑀫𑁆𑀫𑀢𑁆𑀢𑁂𑀳𑀺𑀯 𑀭𑀓𑁆𑀔𑀲𑀸.

𑁯𑁩𑁨. ‘‘𑀓𑀺𑀮𑁂𑀲𑁂𑀳𑀸𑀪𑀺𑀪𑀽𑀢𑀸 𑀢𑁂, 𑀢𑁂𑀦 𑀢𑁂𑀦 𑀯𑀺𑀥𑀸𑀯𑀺𑀢𑀸;

𑀦𑀭𑀸 𑀓𑀺𑀮𑁂𑀲𑀯𑀢𑁆𑀣𑀽𑀲𑀼, 𑀲𑀲𑀗𑁆𑀕𑀸𑀫𑁂𑀯 𑀖𑁄𑀲𑀺𑀢𑁂.

𑁯𑁩𑁩. ‘‘𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀤𑁆𑀥𑀫𑁆𑀫𑀁, 𑀅𑀜𑁆𑀜𑀫𑀜𑁆𑀜𑁂𑀳𑀺 𑀪𑀡𑁆𑀟𑀭𑁂;

𑀤𑀺𑀝𑁆𑀞𑀺𑀕𑀢𑀸𑀦𑀺 𑀅𑀦𑁆𑀯𑁂𑀦𑁆𑀢𑀸, 𑀇𑀤𑀁 𑀲𑁂𑀬𑁆𑀬𑁄𑀢𑀺 𑀫𑀜𑁆𑀜𑀭𑁂.

𑁯𑁩𑁪. ‘‘𑀥𑀦𑀜𑁆𑀘 𑀧𑀼𑀢𑁆𑀢𑀁 𑀪𑀭𑀺𑀬𑀜𑁆𑀘, 𑀙𑀟𑁆𑀟𑀬𑀺𑀢𑁆𑀯𑀸𑀦 𑀦𑀺𑀕𑁆𑀕𑀢𑀸;

𑀓𑀝𑀘𑁆𑀙𑀼𑀪𑀺𑀓𑁆𑀔𑀳𑁂𑀢𑀽𑀧𑀺, 𑀅𑀓𑀺𑀘𑁆𑀙𑀸𑀦𑀺 𑀦𑀺𑀲𑁂𑀯𑀭𑁂.

𑁯𑁩𑁫. ‘‘𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀢𑁆𑀯𑀸, 𑀲𑀬𑀦𑁆𑀢𑀼𑀢𑁆𑀢𑀸𑀦𑀲𑁂𑀬𑁆𑀬𑀓𑀸;

𑀓𑀣𑀸 𑀯𑀟𑁆𑀠𑁂𑀦𑁆𑀢𑀺 𑀧𑀝𑀺𑀩𑀼𑀤𑁆𑀥𑀸, 𑀬𑀸 𑀓𑀣𑀸 𑀲𑀢𑁆𑀣𑀼𑀕𑀭𑀳𑀺𑀢𑀸.

𑁯𑁩𑁬. ‘‘𑀲𑀩𑁆𑀩𑀓𑀸𑀭𑀼𑀓𑀲𑀺𑀧𑁆𑀧𑀸𑀦𑀺, 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸𑀦 𑀲𑀺𑀓𑁆𑀔𑀭𑁂;

𑀅𑀯𑀽𑀧𑀲𑀦𑁆𑀢𑀸 𑀅𑀚𑁆𑀛𑀢𑁆𑀢𑀁, 𑀲𑀸𑀫𑀜𑁆𑀜𑀢𑁆𑀣𑁄𑀢𑀺𑀅𑀘𑁆𑀙𑀢𑀺.

𑁯𑁩𑁭. ‘‘𑀫𑀢𑁆𑀢𑀺𑀓𑀁 𑀢𑁂𑀮𑀘𑀼𑀡𑁆𑀡𑀜𑁆𑀘, 𑀉𑀤𑀓𑀸𑀲𑀦𑀪𑁄𑀚𑀦𑀁;

𑀕𑀺𑀳𑀻𑀦𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀆𑀓𑀗𑁆𑀔𑀦𑁆𑀢𑀸 𑀩𑀳𑀼𑀢𑁆𑀢𑀭𑀁.

𑁯𑁩𑁮. ‘‘𑀤𑀦𑁆𑀢𑀧𑁄𑀦𑀁 𑀓𑀧𑀺𑀢𑁆𑀣𑀜𑁆𑀘, 𑀧𑀼𑀧𑁆𑀨𑀁 𑀔𑀸𑀤𑀦𑀺𑀬𑀸𑀦𑀺 𑀘;

𑀧𑀺𑀡𑁆𑀟𑀧𑀸𑀢𑁂 𑀘 𑀲𑀫𑁆𑀧𑀦𑁆𑀦𑁂, 𑀅𑀫𑁆𑀩𑁂 𑀆𑀫𑀮𑀓𑀸𑀦𑀺 𑀘.

𑁯𑁩𑁯. ‘‘𑀪𑁂𑀲𑀚𑁆𑀚𑁂𑀲𑀼 𑀬𑀣𑀸 𑀯𑁂𑀚𑁆𑀚𑀸, 𑀓𑀺𑀘𑁆𑀘𑀸𑀓𑀺𑀘𑁆𑀘𑁂 𑀬𑀣𑀸 𑀕𑀺𑀳𑀻;

𑀕𑀡𑀺𑀓𑀸𑀯 𑀯𑀺𑀪𑀽𑀲𑀸𑀬𑀁, 𑀇𑀲𑁆𑀲𑀭𑁂 𑀔𑀢𑁆𑀢𑀺𑀬𑀸 𑀬𑀣𑀸.

𑁯𑁪𑁦. ‘‘𑀦𑁂𑀓𑀢𑀺𑀓𑀸 𑀯𑀜𑁆𑀘𑀦𑀺𑀓𑀸, 𑀓𑀽𑀝𑀲𑀓𑁆𑀔𑀻 𑀅𑀧𑀸𑀝𑀼𑀓𑀸;

𑀩𑀳𑀽𑀳𑀺 𑀧𑀭𑀺𑀓𑀧𑁆𑀧𑁂𑀳𑀺, 𑀆𑀫𑀺𑀲𑀁 𑀧𑀭𑀺𑀪𑀼𑀜𑁆𑀚𑀭𑁂.

𑁯𑁪𑁧. ‘‘𑀮𑁂𑀲𑀓𑀧𑁆𑀧𑁂 𑀧𑀭𑀺𑀬𑀸𑀬𑁂, 𑀧𑀭𑀺𑀓𑀧𑁆𑀧𑁂𑀦𑀼𑀥𑀸𑀯𑀺𑀢𑀸;

𑀚𑀻𑀯𑀺𑀓𑀢𑁆𑀣𑀸 𑀉𑀧𑀸𑀬𑁂𑀦, 𑀲𑀗𑁆𑀓𑀟𑁆𑀠𑀦𑁆𑀢𑀺 𑀩𑀳𑀼𑀁 𑀥𑀦𑀁.

𑁯𑁪𑁨. ‘‘𑀉𑀧𑀝𑁆𑀞𑀸𑀧𑁂𑀦𑁆𑀢𑀺 𑀧𑀭𑀺𑀲𑀁, 𑀓𑀫𑁆𑀫𑀢𑁄 𑀦𑁄 𑀘 𑀥𑀫𑁆𑀫𑀢𑁄;

𑀥𑀫𑁆𑀫𑀁 𑀧𑀭𑁂𑀲𑀁 𑀤𑁂𑀲𑁂𑀦𑁆𑀢𑀺, 𑀮𑀸𑀪𑀢𑁄 𑀦𑁄 𑀘 𑀅𑀢𑁆𑀣𑀢𑁄.

𑁯𑁪𑁩. ‘‘𑀲𑀗𑁆𑀖𑀮𑀸𑀪𑀲𑁆𑀲 𑀪𑀡𑁆𑀟𑀦𑁆𑀢𑀺, 𑀲𑀗𑁆𑀖𑀢𑁄 𑀧𑀭𑀺𑀩𑀸𑀳𑀺𑀭𑀸;

𑀧𑀭𑀮𑀸𑀪𑁄𑀧𑀚𑀻𑀯𑀦𑁆𑀢𑀸, 𑀅𑀳𑀺𑀭𑀻𑀓𑀸 𑀦 𑀮𑀚𑁆𑀚𑀭𑁂.

𑁯𑁪𑁪. ‘‘𑀦𑀸𑀦𑀼𑀬𑀼𑀢𑁆𑀢𑀸 𑀢𑀣𑀸 𑀏𑀓𑁂, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀲𑀫𑁆𑀪𑀸𑀯𑀦𑀁𑀬𑁂𑀯𑀺𑀘𑁆𑀙𑀦𑁆𑀢𑀺, 𑀮𑀸𑀪𑀲𑀓𑁆𑀓𑀸𑀭𑀫𑀼𑀘𑁆𑀙𑀺𑀢𑀸.

𑁯𑁪𑁫. ‘‘𑀏𑀯𑀁 𑀦𑀸𑀦𑀧𑁆𑀧𑀬𑀸𑀢𑀫𑁆𑀳𑀺, 𑀦 𑀤𑀸𑀦𑀺 𑀲𑀼𑀓𑀭𑀁 𑀢𑀣𑀸;

𑀅𑀨𑀼𑀲𑀺𑀢𑀁 𑀯𑀸 𑀨𑀼𑀲𑀺𑀢𑀼𑀁, 𑀨𑀼𑀲𑀺𑀢𑀁 𑀯𑀸𑀦𑀼𑀭𑀓𑁆𑀔𑀺𑀢𑀼𑀁.

𑁯𑁪𑁬. ‘‘𑀬𑀣𑀸 𑀓𑀡𑁆𑀝𑀓𑀝𑁆𑀞𑀸𑀦𑀫𑁆𑀳𑀺, 𑀘𑀭𑁂𑀬𑁆𑀬 𑀅𑀦𑀼𑀧𑀸𑀳𑀦𑁄;

𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀦, 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂.

𑁯𑁪𑁭. ‘‘𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀓𑁂 𑀬𑁄𑀕𑀻, 𑀢𑁂𑀲𑀁 𑀯𑀢𑁆𑀢𑀫𑀦𑀼𑀲𑁆𑀲𑀭𑀁;

𑀓𑀺𑀜𑁆𑀘𑀸𑀧𑀺 𑀧𑀘𑁆𑀙𑀺𑀫𑁄 𑀓𑀸𑀮𑁄, 𑀨𑀼𑀲𑁂𑀬𑁆𑀬 𑀅𑀫𑀢𑀁 𑀧𑀤𑀁.

𑁯𑁪𑁮. ‘‘𑀇𑀤𑀁 𑀯𑀢𑁆𑀯𑀸 𑀲𑀸𑀮𑀯𑀦𑁂, 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄;

𑀩𑁆𑀭𑀸𑀳𑁆𑀫𑀡𑁄 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀇𑀲𑀺 𑀔𑀻𑀡𑀧𑀼𑀦𑀩𑁆𑀪𑀯𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀣𑁂𑀭𑁂𑀦𑁂𑀯 𑀪𑀸𑀲𑀺𑀢𑀸.

𑀢𑀢𑁆𑀣 𑀇𑀭𑀺𑀬𑀁 𑀆𑀲𑀺 𑀪𑀺𑀓𑁆𑀔𑀽𑀦𑀦𑁆𑀢𑀺 𑀧𑀼𑀭𑀺𑀲𑀼𑀢𑁆𑀢𑀫𑁂 𑀮𑁄𑀓𑀦𑀸𑀣𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀢𑀺𑀝𑁆𑀞𑀦𑁆𑀢𑁂 𑀥𑀭𑀦𑁆𑀢𑁂 𑀏𑀢𑀭𑀳𑀺 𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀅𑀜𑁆𑀜𑀣𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀪𑀺𑀓𑁆𑀔𑀽𑀦𑀁 𑀇𑀭𑀺𑀬𑀁 𑀘𑀭𑀺𑀢𑀁 𑀅𑀳𑁄𑀲𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀅𑀜𑁆𑀜𑀣𑀸 𑀤𑀸𑀦𑀺 𑀤𑀺𑀲𑁆𑀲𑀢𑀻𑀢𑀺 𑀇𑀤𑀸𑀦𑀺 𑀧𑀦 𑀢𑀢𑁄 𑀅𑀜𑁆𑀜𑀣𑀸 𑀪𑀺𑀓𑁆𑀔𑀽𑀦𑀁 𑀇𑀭𑀺𑀬𑀁 𑀤𑀺𑀲𑁆𑀲𑀢𑀺 𑀅𑀬𑀸𑀣𑀸𑀯𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀲𑀢𑁆𑀣𑀭𑀺 𑀥𑀭𑀦𑁆𑀢𑁂 𑀬𑁂𑀦𑀸𑀓𑀸𑀭𑁂𑀦 𑀪𑀺𑀓𑁆𑀔𑀽𑀦𑀁 𑀧𑀝𑀺𑀧𑀢𑁆𑀢𑀺 𑀅𑀳𑁄𑀲𑀺, 𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑀯𑀸𑀢𑀧𑀭𑀺𑀢𑁆𑀢𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀢𑁆𑀢𑀝𑁆𑀞𑀺𑀬𑀦𑁆𑀢𑀺 𑀢𑀁 𑀫𑀢𑁆𑀢𑀁 𑀧𑀬𑁄𑀚𑀦𑀁. 𑀬𑀸𑀯𑀤𑁂𑀯 𑀲𑀻𑀢𑀯𑀸𑀢𑀧𑀭𑀺𑀢𑁆𑀢𑀸𑀡𑀁, 𑀬𑀸𑀯𑀤𑁂𑀯 𑀳𑀺𑀭𑀻𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀓𑀣𑀁? 𑀲𑀦𑁆𑀢𑀼𑀝𑁆𑀞𑀸 𑀇𑀢𑀭𑀻𑀢𑀭𑁂 𑀬𑀲𑁆𑀫𑀺𑀁 𑀢𑀲𑁆𑀫𑀺𑀁 𑀳𑀻𑀦𑁂 𑀧𑀡𑀻𑀢𑁂 𑀯𑀸 𑀬𑀣𑀸𑀮𑀤𑁆𑀥𑁂 𑀧𑀘𑁆𑀘𑀬𑁂 𑀲𑀦𑁆𑀢𑁄𑀲𑀁 𑀆𑀧𑀦𑁆𑀦𑀸.

𑀧𑀡𑀻𑀢𑀦𑁆𑀢𑀺 𑀉𑀴𑀸𑀭𑀁 𑀲𑀧𑁆𑀧𑀺𑀆𑀤𑀺𑀦𑀸 𑀲𑀁𑀲𑀝𑁆𑀞𑀁, 𑀢𑀤𑀪𑀸𑀯𑁂𑀦 𑀮𑀽𑀔𑀁. 𑀅𑀧𑁆𑀧𑀦𑁆𑀢𑀺, 𑀘𑀢𑀼𑀧𑀜𑁆𑀘𑀸𑀮𑁄𑀧𑀫𑀢𑁆𑀢𑀫𑁆𑀧𑀺. 𑀩𑀳𑀼𑀁 𑀬𑀸𑀧𑀦𑀢𑁆𑀣𑀁 𑀅𑀪𑀼𑀜𑁆𑀚𑀺𑀁𑀲𑀽𑀢𑀺 𑀧𑀡𑀻𑀢𑀁 𑀩𑀳𑀼𑀁 𑀪𑀼𑀜𑁆𑀚𑀦𑁆𑀢𑀸𑀧𑀺 𑀬𑀸𑀧𑀦𑀫𑀢𑁆𑀢𑀫𑁂𑀯 𑀆𑀳𑀸𑀭𑀁 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀏𑀯 𑀅𑀕𑀺𑀤𑁆𑀥𑀸 𑀕𑁂𑀥𑀁 𑀅𑀦𑀸𑀧𑀦𑁆𑀦𑀸. 𑀦𑀸𑀥𑀺𑀫𑀼𑀘𑁆𑀙𑀺𑀢𑀸 𑀦 𑀅𑀚𑁆𑀛𑁄𑀲𑀺𑀢𑀸 𑀅𑀓𑁆𑀔𑀩𑁆𑀪𑀜𑁆𑀚𑀦𑀁 𑀯𑀺𑀬 𑀲𑀸𑀓𑀝𑀺𑀓𑀸, 𑀯𑀡𑀮𑁂𑀧𑀦𑀁 𑀯𑀺𑀬 𑀯𑀡𑀺𑀦𑁄 𑀅𑀪𑀼𑀜𑁆𑀚𑀺𑀁𑀲𑀼.

𑀚𑀻𑀯𑀺𑀢𑀸𑀦𑀁 𑀧𑀭𑀺𑀓𑁆𑀔𑀸𑀭𑁂, 𑀪𑁂𑀲𑀚𑁆𑀚𑁂 𑀅𑀣 𑀧𑀘𑁆𑀘𑀬𑁂𑀧𑀺 𑀚𑀻𑀯𑀺𑀢𑀸𑀦𑀁 𑀧𑀯𑀢𑁆𑀢𑀺𑀬𑀸 𑀧𑀭𑀺𑀓𑁆𑀔𑀸𑀭𑀪𑀽𑀢𑁂 𑀪𑁂𑀲𑀚𑁆𑀚𑀲𑀗𑁆𑀔𑀸𑀢𑁂 𑀧𑀘𑁆𑀘𑀬𑁂 𑀕𑀺𑀮𑀸𑀦𑀧𑀘𑁆𑀘𑀬𑁂. 𑀬𑀣𑀸 𑀢𑁂𑀢𑀺 𑀬𑀣𑀸 𑀢𑁂 𑀧𑀼𑀭𑀺𑀫𑀓𑀸 𑀪𑀺𑀓𑁆𑀔𑀽 𑀆𑀲𑀯𑀓𑁆𑀔𑀬𑁂 𑀉𑀲𑁆𑀲𑀼𑀓𑀸 𑀬𑀼𑀢𑁆𑀢𑀸 𑀆𑀲𑀼𑀁, 𑀢𑀣𑀸 𑀢𑁂 𑀭𑁄𑀕𑀸𑀪𑀺𑀪𑀽𑀢𑀸𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑁂 𑀩𑀸𑀴𑁆𑀳𑀁 𑀅𑀢𑀺𑀯𑀺𑀬 𑀉𑀲𑁆𑀲𑀼𑀓𑀸 𑀦𑀸𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑀢𑀧𑁆𑀧𑀭𑀸𑀬𑀡𑀸𑀢𑀺 𑀯𑀺𑀯𑁂𑀓𑀧𑀭𑀸𑀬𑀡𑀸 𑀯𑀺𑀯𑁂𑀓𑀧𑁄𑀡𑀸. 𑀏𑀯𑀁 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀁 𑀪𑀸𑀯𑀦𑀸𑀪𑀺𑀭𑀢𑀺𑀜𑁆𑀘 𑀤𑀲𑁆𑀲𑁂𑀦𑁆𑀢𑁂𑀦 𑀢𑁂𑀲𑀁 𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀸 𑀤𑀲𑁆𑀲𑀺𑀢𑀸.

𑀦𑀻𑀘𑀸𑀢𑀺 ‘‘𑀫𑀬𑀁 𑀧𑀁𑀲𑀼𑀓𑀽𑀮𑀺𑀓𑀸 𑀧𑀺𑀡𑁆𑀟𑀧𑀸𑀢𑀺𑀓𑀸’’𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀸𑀦𑀺 𑀅𑀓𑀢𑁆𑀯𑀸 𑀦𑀻𑀘𑀯𑀼𑀢𑁆𑀢𑀺𑀦𑁄, 𑀦𑀺𑀯𑀸𑀢𑀯𑀼𑀢𑁆𑀢𑀺𑀦𑁄𑀢𑀺 𑀅𑀢𑁆𑀣𑁄. 𑀦𑀺𑀯𑀺𑀝𑁆𑀞𑀸𑀢𑀺 𑀲𑀸𑀲𑀦𑁂 𑀦𑀺𑀯𑀺𑀝𑁆𑀞𑀲𑀤𑁆𑀥𑀸. 𑀲𑀼𑀪𑀭𑀸𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀪𑀸𑀯𑁂𑀦 𑀲𑀼𑀧𑁄𑀲𑀸. 𑀫𑀼𑀤𑀽𑀢𑀺 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀁 𑀲𑀓𑀮𑁂 𑀘 𑀩𑁆𑀭𑀳𑁆𑀫𑀘𑀭𑀺𑀬𑁂 𑀫𑀼𑀤𑀽, 𑀲𑀼𑀧𑀭𑀺𑀓𑀫𑁆𑀫𑀓𑀢𑀲𑀼𑀯𑀡𑁆𑀡𑀁 𑀯𑀺𑀬 𑀯𑀺𑀦𑀺𑀬𑁄𑀕𑀓𑁆𑀔𑀫𑀸. 𑀫𑀼𑀤𑀽𑀢𑀺 𑀯𑀸 𑀅𑀪𑀸𑀓𑀼𑀝𑀺𑀓𑀸 𑀉𑀢𑁆𑀢𑀸𑀦𑀫𑀼𑀔𑀸 𑀧𑀼𑀧𑁆𑀨𑀺𑀢𑀫𑀼𑀔𑁂𑀦 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺𑀦𑁄, 𑀲𑀼𑀢𑀺𑀢𑁆𑀣𑀁 𑀯𑀺𑀬 𑀲𑀼𑀔𑀸𑀯𑀳𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣𑀤𑁆𑀥𑀫𑀸𑀦𑀲𑀸𑀢𑀺 𑀅𑀓𑀣𑀺𑀦𑀘𑀺𑀢𑁆𑀢𑀸 𑀢𑁂𑀦 𑀲𑀼𑀩𑁆𑀩𑀘𑀪𑀸𑀯𑀫𑀸𑀳. 𑀅𑀩𑁆𑀬𑀸𑀲𑁂𑀓𑀸𑀢𑀺 𑀲𑀢𑀺𑀯𑀺𑀧𑁆𑀧𑀯𑀸𑀲𑀸𑀪𑀸𑀯𑀢𑁄 𑀓𑀺𑀮𑁂𑀲𑀩𑁆𑀬𑀸𑀲𑁂𑀓𑀭𑀳𑀺𑀢𑀸, 𑀅𑀦𑁆𑀢𑀭𑀦𑁆𑀢𑀭𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀸𑀤𑀻𑀳𑀺 𑀅𑀯𑁄𑀓𑀺𑀡𑁆𑀡𑀸𑀢𑀺 𑀅𑀢𑁆𑀣𑁄. 𑀅𑀫𑀼𑀔𑀭𑀸𑀢𑀺 𑀦 𑀫𑀼𑀔𑀭𑀸, 𑀦 𑀫𑀼𑀔𑁂𑀦 𑀔𑀭𑀸 𑀯𑀘𑀻𑀧𑀸𑀕𑀩𑁆𑀪𑀺𑀬𑀭𑀳𑀺𑀢𑀸𑀢𑀺 𑀯𑀸 𑀅𑀢𑁆𑀣𑁄. 𑀅𑀢𑁆𑀣𑀘𑀺𑀦𑁆𑀢𑀸𑀯𑀲𑀸𑀦𑀼𑀕𑀸𑀢𑀺 𑀳𑀺𑀢𑀘𑀺𑀦𑁆𑀢𑀸𑀯𑀲𑀸𑀦𑀼𑀕𑀸𑀳𑀺𑀢𑀘𑀺𑀦𑁆𑀢𑀸𑀯𑀲𑀺𑀓𑀸, 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀳𑀺𑀢𑀘𑀺𑀦𑁆𑀢𑀫𑁂𑀯 𑀅𑀦𑀼𑀧𑀭𑀺𑀯𑀢𑁆𑀢𑀦𑀓𑀸.

𑀢𑀢𑁄𑀢𑀺 𑀢𑀲𑁆𑀫𑀸 𑀦𑀻𑀘𑀯𑀼𑀢𑁆𑀢𑀸𑀤𑀺𑀳𑁂𑀢𑀼. 𑀧𑀸𑀲𑀸𑀤𑀺𑀓𑀦𑁆𑀢𑀺 𑀧𑀲𑀸𑀤𑀚𑀦𑀺𑀓𑀁 𑀧𑀝𑀺𑀧𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑀸𑀦𑀁 𑀲𑀼𑀡𑀦𑁆𑀢𑀸𑀦𑀜𑁆𑀘 𑀧𑀲𑀸𑀤𑀸𑀯𑀳𑀁. 𑀕𑀢𑀦𑁆𑀢𑀺 𑀅𑀪𑀺𑀓𑁆𑀓𑀦𑁆𑀢𑀧𑀝𑀺𑀓𑁆𑀓𑀦𑁆𑀢𑀧𑀭𑀺𑀯𑀢𑁆𑀢𑀦𑀸𑀤𑀺𑀕𑀫𑀦𑀁. 𑀕𑀢𑀦𑁆𑀢𑀺 𑀯𑀸 𑀓𑀸𑀬𑀯𑀸𑀘𑀸𑀧𑀯𑀢𑁆𑀢𑀺. 𑀪𑀼𑀢𑁆𑀢𑀦𑁆𑀢𑀺 𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑁄. 𑀦𑀺𑀲𑁂𑀯𑀺𑀢𑀦𑁆𑀢𑀺 𑀕𑁄𑀘𑀭𑀦𑀺𑀲𑁂𑀯𑀦𑀁. 𑀲𑀺𑀦𑀺𑀤𑁆𑀥𑀸 𑀢𑁂𑀮𑀥𑀸𑀭𑀸𑀯𑀸𑀢𑀺 𑀬𑀣𑀸 𑀅𑀦𑀺𑀯𑀢𑁆𑀢𑀺𑀢𑀸 𑀓𑀼𑀲𑀮𑀚𑀦𑀸𑀪𑀺𑀲𑀺𑀜𑁆𑀘𑀺𑀢𑀸 𑀲𑀯𑀦𑁆𑀢𑀻 𑀢𑁂𑀮𑀥𑀸𑀭𑀸 𑀅𑀯𑀺𑀘𑁆𑀙𑀺𑀦𑁆𑀦𑀸 𑀲𑀺𑀦𑀺𑀤𑁆𑀥𑀸 𑀫𑀝𑁆𑀞𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀳𑁄𑀢𑀺, 𑀏𑀯𑀁 𑀢𑁂𑀲𑀁 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑀸𑀦𑀁 𑀇𑀭𑀺𑀬𑀸𑀧𑀣𑁄 𑀅𑀘𑁆𑀙𑀺𑀤𑁆𑀤𑁄 𑀲𑀡𑁆𑀳𑁄 𑀫𑀝𑁆𑀞𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀅𑀳𑁄𑀲𑀺.

𑀫𑀳𑀸𑀛𑀸𑀬𑀻𑀢𑀺 𑀫𑀳𑀦𑁆𑀢𑁂𑀳𑀺 𑀛𑀸𑀦𑁂𑀳𑀺 𑀛𑀸𑀬𑀦𑀲𑀻𑀮𑀸, 𑀫𑀳𑀦𑁆𑀢𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀛𑀸𑀬𑀦𑁆𑀢𑀻𑀢𑀺 𑀫𑀳𑀸𑀛𑀸𑀬𑀻. 𑀢𑀢𑁄 𑀏𑀯 𑀫𑀳𑀸𑀳𑀺𑀢𑀸, 𑀫𑀳𑀦𑁆𑀢𑁂𑀳𑀺 𑀳𑀺𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀢𑁂 𑀣𑁂𑀭𑀸𑀢𑀺 𑀢𑁂 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀝𑀺𑀧𑀢𑁆𑀢𑀺𑀧𑀭𑀸𑀬𑀡𑀸 𑀣𑁂𑀭𑀸 𑀇𑀤𑀸𑀦𑀺 𑀧𑀭𑀺𑀦𑀺𑀩𑁆𑀩𑀼𑀢𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀢𑁆𑀢𑀸 𑀤𑀸𑀦𑀺 𑀢𑀸𑀤𑀺𑀲𑀸𑀢𑀺 𑀇𑀤𑀸𑀦𑀺 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀸𑀤𑀺𑀲𑀸 𑀢𑀣𑀸𑀭𑀽𑀧𑀸 𑀣𑁂𑀭𑀸 𑀧𑀭𑀺𑀢𑁆𑀢𑀸 𑀅𑀧𑁆𑀧𑀓𑀸 𑀓𑀢𑀺𑀧𑀬𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀦𑁆𑀢𑀺 𑀯𑀺𑀯𑀝𑁆𑀝𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸𑀦𑀁 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁. 𑀧𑀜𑁆𑀜𑀸𑀬 𑀘𑀸𑀢𑀺 𑀢𑀣𑀸𑀭𑀽𑀧𑀸𑀬 𑀧𑀜𑁆𑀜𑀸𑀬 𑀘. 𑀧𑀭𑀺𑀓𑁆𑀔𑀬𑀸𑀢𑀺 𑀅𑀪𑀸𑀯𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀧𑀜𑁆𑀜𑀸𑀧𑀺 𑀲𑀺𑀬𑀸 𑀅𑀦𑀯𑀚𑁆𑀚𑀥𑀫𑁆𑀫𑀸, 𑀩𑀳𑀼𑀓𑀸𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀦𑀲𑁆𑀲𑀸 𑀯𑀺𑀲𑀼𑀁 𑀕𑀳𑀡𑀁 𑀬𑀣𑀸 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀸𑀢𑀺. 𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭𑀯𑀭𑁂𑀳𑀺 𑀧𑀓𑀸𑀭𑀯𑀺𑀲𑁂𑀲𑁂𑀳𑀺 𑀉𑀧𑁂𑀢𑀁 𑀬𑀼𑀢𑁆𑀢𑀁 𑀚𑀺𑀦𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀮𑀼𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀧𑀸𑀧𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁, 𑀓𑀺𑀮𑁂𑀲𑀸𑀦𑀜𑁆𑀘 𑀬𑁄 𑀉𑀢𑀽𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀮𑁄𑀪𑀸𑀤𑀻𑀦𑀜𑁆𑀘 𑀓𑀺𑀮𑁂𑀲𑀸𑀦𑀁 𑀬𑁄 𑀉𑀢𑀼 𑀬𑁄 𑀓𑀸𑀮𑁄, 𑀲𑁄 𑀅𑀬𑀁 𑀯𑀢𑁆𑀢𑀢𑀻𑀢𑀺 𑀯𑀘𑀦𑀲𑁂𑀲𑁄. 𑀉𑀧𑀝𑁆𑀞𑀺𑀢𑀸 𑀯𑀺𑀯𑁂𑀓𑀸𑀬, 𑀬𑁂 𑀘 𑀲𑀤𑁆𑀥𑀫𑁆𑀫𑀲𑁂𑀲𑀓𑀸𑀢𑀺 𑀬𑁂 𑀧𑀦 𑀏𑀯𑀭𑀽𑀧𑁂 𑀓𑀸𑀮𑁂 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀢𑁆𑀣𑀸𑀬 𑀉𑀧𑀝𑁆𑀞𑀺𑀢𑀸 𑀆𑀭𑀤𑁆𑀥𑀯𑀻𑀭𑀺𑀬𑀸, 𑀢𑁂 𑀘 𑀲𑁂𑀲𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀓𑀸 𑀳𑁄𑀦𑁆𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸𑀘𑀸𑀭𑀸𑀧𑀺 𑀲𑀫𑀸𑀦𑀸 𑀇𑀤𑀸𑀦𑀺 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀇𑀭𑀺𑀬𑀸𑀧𑀣𑀲𑀡𑁆𑀞𑀸𑀧𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀯𑀺𑀥𑀸𑀦𑀁, 𑀫𑀳𑀸𑀧𑀮𑀺𑀩𑁄𑀥𑀽𑀧𑀘𑁆𑀙𑁂𑀤𑁄, 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀽𑀧𑀘𑁆𑀙𑁂𑀤𑁄𑀢𑀺 𑀏𑀯𑀫𑀸𑀤𑀺𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀺. 𑀢𑁂 𑀲𑁂𑀲𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀓𑀸, 𑀧𑀝𑀺𑀧𑀢𑁆𑀢𑀺𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺.

𑀢𑁂 𑀓𑀺𑀮𑁂𑀲𑀸 𑀧𑀯𑀟𑁆𑀠𑀦𑁆𑀢𑀸𑀢𑀺 𑀬𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑁂𑀳𑀺 𑀘 𑀢𑀤𑀸 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀫𑀺𑀢𑀸 𑀓𑀺𑀮𑁂𑀲𑀸, 𑀢𑁂 𑀏𑀢𑀭𑀳𑀺 𑀮𑀤𑁆𑀥𑁄𑀓𑀸𑀲𑀸 𑀪𑀺𑀓𑁆𑀔𑀽𑀲𑀼 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀸. 𑀆𑀯𑀺𑀲𑀦𑁆𑀢𑀺 𑀩𑀳𑀼𑀁 𑀚𑀦𑀦𑁆𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀭𑀳𑀺𑀢𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀁 𑀅𑀦𑁆𑀥𑀩𑀸𑀮𑀚𑀦𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀲𑀁 𑀓𑀭𑁄𑀦𑁆𑀢𑀸 𑀆𑀯𑀺𑀲𑀦𑁆𑀢𑀺 𑀲𑀦𑁆𑀢𑀸𑀦𑀁 𑀅𑀦𑀼𑀧𑀯𑀺𑀲𑀦𑁆𑀢𑀺. 𑀏𑀯𑀁𑀪𑀽𑀢𑀸 𑀘 𑀢𑁂 𑀓𑀻𑀴𑀦𑁆𑀢𑀺 𑀫𑀜𑁆𑀜𑁂 𑀩𑀸𑀮𑁂𑀳𑀺, 𑀉𑀫𑁆𑀫𑀢𑁆𑀢𑁂𑀳𑀺𑀯 𑀭𑀓𑁆𑀔𑀲𑀸, 𑀬𑀣𑀸 𑀦𑀸𑀫 𑀓𑁂𑀴𑀺𑀲𑀻𑀮𑀸 𑀭𑀓𑁆𑀔𑀲𑀸 𑀪𑀺𑀲𑀓𑁆𑀓𑀭𑀳𑀺𑀢𑁂 𑀉𑀫𑁆𑀫𑀢𑁆𑀢𑁂 𑀆𑀯𑀺𑀲𑀺𑀢𑁆𑀯𑀸 𑀢𑁂 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀦𑁆𑀢𑀸 𑀢𑁂𑀳𑀺 𑀓𑀻𑀴𑀦𑁆𑀢𑀺, 𑀏𑀯𑀁 𑀢𑁂 𑀓𑀺𑀮𑁂𑀲𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀺𑀲𑀓𑁆𑀓𑀭𑀳𑀺𑀢𑁂 𑀅𑀦𑁆𑀥𑀩𑀸𑀮𑁂 𑀪𑀺𑀓𑁆𑀔𑀽 𑀆𑀯𑀺𑀲𑀺𑀢𑁆𑀯𑀸 𑀢𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀁 𑀅𑀦𑀢𑁆𑀣𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑀺 𑀫𑀜𑁆𑀜𑁂, 𑀓𑀻𑀴𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑁂𑀦 𑀢𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀆𑀭𑀫𑁆𑀫𑀡𑀪𑀸𑀕𑁂𑀦. 𑀯𑀺𑀥𑀸𑀯𑀺𑀢𑀸𑀢𑀺 𑀯𑀺𑀭𑀽𑀧𑀁 𑀥𑀸𑀯𑀺𑀢𑀸 𑀅𑀲𑀸𑀭𑀼𑀧𑁆𑀧𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀸. 𑀓𑀺𑀮𑁂𑀲𑀯𑀢𑁆𑀣𑀽𑀲𑀽𑀢𑀺 𑀧𑀞𑀫𑀁 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑀓𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀓𑀺𑀮𑁂𑀲𑀸𑀯 𑀓𑀺𑀮𑁂𑀲𑀯𑀢𑁆𑀣𑀽𑀦𑀺, 𑀢𑁂𑀲𑀼 𑀓𑀺𑀮𑁂𑀲𑀯𑀢𑁆𑀣𑀽𑀲𑀼 𑀲𑀫𑀽𑀳𑀺𑀢𑁂𑀲𑀼. 𑀲𑀲𑀗𑁆𑀕𑀸𑀫𑁂𑀯 𑀖𑁄𑀲𑀺𑀢𑁂𑀢𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀫𑀡𑀺𑀫𑀼𑀢𑁆𑀢𑀸𑀤𑀺𑀓𑀁 𑀥𑀦𑀁 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 ‘‘𑀬𑀁 𑀬𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀬𑀲𑁆𑀲 𑀬𑀲𑁆𑀲 𑀳𑀢𑁆𑀣𑀕𑀢𑀁, 𑀢𑀁 𑀢𑀁 𑀢𑀲𑁆𑀲 𑀢𑀲𑁆𑀲𑁂𑀯 𑀳𑁄𑀢𑀽’’𑀢𑀺 𑀏𑀯𑀁 𑀓𑀸𑀫𑀖𑁄𑀲𑀦𑀸 𑀲𑀲𑀗𑁆𑀕𑀸𑀫𑀖𑁄𑀲𑀦𑀸 𑀦𑀸𑀫. 𑀢𑀢𑁆𑀣𑀸𑀬𑀫𑀢𑁆𑀣𑁄 𑁋 𑀓𑀺𑀮𑁂𑀲𑀯𑀢𑁆𑀣𑀽𑀲𑀼 ‘‘𑀬𑁄 𑀬𑁄 𑀓𑀺𑀮𑁂𑀲𑁄 𑀬𑀁 𑀬𑀁 𑀲𑀢𑁆𑀢𑀁 𑀕𑀡𑁆𑀳𑀸𑀢𑀺 𑀅𑀪𑀺𑀪𑀯𑀢𑀺, 𑀲𑁄 𑀲𑁄 𑀢𑀲𑁆𑀲 𑀢𑀲𑁆𑀲 𑀳𑁄𑀢𑀽’’𑀢𑀺 𑀓𑀺𑀮𑁂𑀲𑀲𑁂𑀦𑀸𑀧𑀢𑀺𑀦𑀸 𑀫𑀸𑀭𑁂𑀦 𑀲𑀲𑀗𑁆𑀕𑀸𑀫𑁂 𑀖𑁄𑀲𑀺𑀢𑁂 𑀯𑀺𑀬. 𑀢𑁂𑀳𑀺 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀅𑀪𑀺𑀪𑀽𑀢𑀸 𑀢𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀢𑁂𑀦 𑀢𑁂𑀦 𑀆𑀭𑀫𑁆𑀫𑀡𑀪𑀸𑀕𑁂𑀦 𑀯𑀺𑀥𑀸𑀯𑀺𑀢𑀸 𑀯𑁄𑀲𑀺𑀢𑀸𑀢𑀺.

𑀢𑁂 𑀏𑀯𑀁 𑀯𑀺𑀥𑀸𑀯𑀺𑀢𑀸 𑀓𑀺𑀁 𑀓𑀭𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀤𑁆𑀥𑀫𑁆𑀫𑀁, 𑀅𑀜𑁆𑀜𑀫𑀜𑁆𑀜𑁂𑀳𑀺 𑀪𑀡𑁆𑀟𑀭𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀁 𑀙𑀟𑁆𑀟𑁂𑀢𑁆𑀯𑀸 𑀆𑀫𑀺𑀲𑀓𑀺𑀜𑁆𑀚𑀓𑁆𑀔𑀳𑁂𑀢𑀼 𑀅𑀜𑁆𑀜𑀫𑀜𑁆𑀜𑁂𑀳𑀺 𑀪𑀡𑁆𑀟𑀭𑁂 𑀓𑀮𑀳𑀁 𑀓𑀭𑁄𑀦𑁆𑀢𑀻𑀢𑀺. 𑀤𑀺𑀝𑁆𑀞𑀺𑀕𑀢𑀸𑀦𑀻𑀢𑀺 ‘‘𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯 𑀅𑀢𑁆𑀣𑀺, 𑀦𑀢𑁆𑀣𑁂𑀯 𑀭𑀽𑀧𑀥𑀫𑁆𑀫𑀸’’𑀢𑀺, ‘‘𑀬𑀣𑀸 𑀧𑀼𑀕𑁆𑀕𑀮𑁄 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀏𑀯𑀁 𑀲𑀪𑀸𑀯𑀥𑀫𑁆𑀫𑀸𑀧𑀺 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀯𑁄𑀳𑀸𑀭𑀫𑀢𑁆𑀢𑀫𑁂𑀯𑀸’’𑀢𑀺 𑀘 𑀏𑀯𑀫𑀸𑀤𑀻𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀫𑀺𑀘𑁆𑀙𑀸𑀕𑀸𑀳𑁂 𑀅𑀦𑁆𑀯𑁂𑀦𑁆𑀢𑀸 𑀅𑀦𑀼𑀕𑀘𑁆𑀙𑀦𑁆𑀢𑀸 𑀇𑀤𑀁 𑀲𑁂𑀬𑁆𑀬𑁄 𑀇𑀤𑀫𑁂𑀯 𑀲𑁂𑀝𑁆𑀞𑀁, 𑀅𑀜𑁆𑀜𑀁 𑀫𑀺𑀘𑁆𑀙𑀸𑀢𑀺 𑀫𑀜𑁆𑀜𑀦𑁆𑀢𑀺.

𑀦𑀺𑀕𑁆𑀕𑀢𑀸𑀢𑀺 𑀕𑁂𑀳𑀢𑁄 𑀦𑀺𑀓𑁆𑀔𑀦𑁆𑀢𑀸. 𑀓𑀝𑀘𑁆𑀙𑀼𑀪𑀺𑀓𑁆𑀔𑀳𑁂𑀢𑀽𑀧𑀻𑀢𑀺 𑀓𑀝𑀘𑁆𑀙𑀼𑀫𑀢𑁆𑀢𑀪𑀺𑀓𑁆𑀔𑀸𑀦𑀺𑀫𑀺𑀢𑁆𑀢𑀫𑁆𑀧𑀺. 𑀢𑀁 𑀤𑀤𑀦𑁆𑀢𑀲𑁆𑀲 𑀕𑀳𑀝𑁆𑀞𑀲𑁆𑀲 𑀅𑀦𑀦𑀼𑀮𑁄𑀫𑀺𑀓𑀲𑀁𑀲𑀕𑁆𑀕𑀯𑀲𑁂𑀦 𑀅𑀓𑀺𑀘𑁆𑀘𑀸𑀦𑀺 𑀧𑀩𑁆𑀩𑀚𑀺𑀢𑁂𑀦 𑀅𑀓𑀢𑁆𑀢𑀩𑁆𑀩𑀸𑀦𑀺 𑀓𑀫𑁆𑀫𑀸𑀦𑀺 𑀦𑀺𑀲𑁂𑀯𑀭𑁂 𑀓𑀭𑁄𑀦𑁆𑀢𑀺.

𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀢𑁆𑀯𑀸𑀢𑀺 ‘‘𑀊𑀦𑀽𑀤𑀭𑁄 𑀫𑀺𑀢𑀸𑀳𑀸𑀭𑁄’’𑀢𑀺 (𑀣𑁂𑀭𑀕𑀸. 𑁯𑁮𑁨; 𑀫𑀺. 𑀧. 𑁬.𑁫.𑁧𑁦) 𑀯𑀼𑀢𑁆𑀢𑀯𑀘𑀦𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀉𑀤𑀭𑀧𑀽𑀭𑀁 𑀪𑀼𑀜𑁆𑀚𑀺𑀢𑁆𑀯𑀸. 𑀲𑀬𑀦𑁆𑀢𑀼𑀢𑁆𑀢𑀸𑀦𑀲𑁂𑀬𑁆𑀬𑀓𑀸𑀢𑀺 ‘‘𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 (𑀅. 𑀦𑀺. 𑁮.𑁯; 𑀯𑀺𑀪. 𑁫𑁧𑁯) 𑀯𑀼𑀢𑁆𑀢𑀯𑀺𑀥𑀸𑀦𑀁 𑀅𑀦𑀦𑀼𑀲𑁆𑀲𑀭𑀺𑀢𑁆𑀯𑀸 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀸 𑀲𑀬𑀦𑁆𑀢𑀺. 𑀬𑀸 𑀓𑀣𑀸 𑀲𑀢𑁆𑀣𑀼𑀕𑀭𑀳𑀺𑀢𑀸𑀢𑀺 𑀭𑀸𑀚𑀓𑀣𑀸𑀤𑀺𑀢𑀺𑀭𑀘𑁆𑀙𑀸𑀦𑀓𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀲𑀩𑁆𑀩𑀓𑀸𑀭𑀼𑀓𑀲𑀺𑀧𑁆𑀧𑀸𑀦𑀻𑀢𑀺 𑀲𑀩𑁆𑀩𑁂𑀳𑀺 𑀯𑁂𑀲𑁆𑀲𑀸𑀤𑀻𑀳𑀺 𑀓𑀸𑀭𑀼𑀓𑁂𑀳𑀺 𑀓𑀢𑁆𑀢𑀩𑁆𑀩𑀸𑀦𑀺 𑀪𑀢𑁆𑀢𑀢𑀸𑀮𑀯𑀡𑁆𑀝𑀓𑀭𑀡𑀸𑀤𑀻𑀦𑀺 𑀳𑀢𑁆𑀣𑀲𑀺𑀧𑁆𑀧𑀸𑀦𑀺. 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸𑀦𑀸𑀢𑀺 𑀲𑀓𑁆𑀓𑀘𑁆𑀘𑀁 𑀲𑀸𑀤𑀭𑀁 𑀓𑀢𑁆𑀯𑀸. 𑀅𑀯𑀽𑀧𑀲𑀦𑁆𑀢𑀸 𑀅𑀚𑁆𑀛𑀢𑁆𑀢𑀦𑁆𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑀸𑀪𑀸𑀯𑀢𑁄 𑀕𑀤𑁆𑀤𑀼𑀳𑀦𑀫𑀢𑁆𑀢𑀫𑁆𑀧𑀺 𑀲𑀫𑀸𑀥𑀸𑀦𑀸𑀪𑀸𑀯𑀢𑁄 𑀘 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀸, 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀸𑀫𑀜𑁆𑀜𑀢𑁆𑀣𑁄𑀢𑀺 𑀲𑀫𑀡𑀥𑀫𑁆𑀫𑁄. 𑀅𑀢𑀺𑀅𑀘𑁆𑀙𑀢𑀻𑀢𑀺 𑀢𑁂𑀲𑀁 𑀆𑀚𑀻𑀯𑀓𑀺𑀘𑁆𑀘𑀧𑀲𑀼𑀢𑀢𑀸𑀬 𑀏𑀓𑀤𑁂𑀲𑀫𑁆𑀧𑀺 𑀅𑀨𑀼𑀲𑀦𑀢𑁄 𑀯𑀺𑀲𑀼𑀁𑀬𑁂𑀯 𑀦𑀺𑀲𑀻𑀤𑀢𑀺, 𑀅𑀦𑀮𑁆𑀮𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑀢𑁆𑀢𑀺𑀓𑀦𑁆𑀢𑀺 𑀧𑀸𑀓𑀢𑀺𑀓𑀁 𑀯𑀸 𑀧𑀜𑁆𑀘𑀯𑀡𑁆𑀡𑀁 𑀯𑀸 𑀕𑀺𑀳𑀻𑀦𑀁 𑀯𑀺𑀦𑀺𑀬𑁄𑀕𑀓𑁆𑀔𑀫𑀁 𑀫𑀢𑁆𑀢𑀺𑀓𑀁. 𑀢𑁂𑀮𑀘𑀼𑀡𑁆𑀡𑀜𑁆𑀘𑀸𑀢𑀺 𑀧𑀸𑀓𑀢𑀺𑀓𑀁, 𑀅𑀪𑀺𑀲𑀗𑁆𑀔𑀢𑀁 𑀯𑀸 𑀢𑁂𑀮𑀜𑁆𑀘 𑀘𑀼𑀡𑁆𑀡𑀜𑁆𑀘. 𑀉𑀤𑀓𑀸𑀲𑀦𑀪𑁄𑀚𑀦𑀦𑁆𑀢𑀺 𑀉𑀤𑀓𑀜𑁆𑀘 𑀆𑀲𑀦𑀜𑁆𑀘 𑀪𑁄𑀚𑀦𑀜𑁆𑀘. 𑀆𑀓𑀗𑁆𑀔𑀦𑁆𑀢𑀸 𑀩𑀳𑀼𑀢𑁆𑀢𑀭𑀦𑁆𑀢𑀺 𑀩𑀳𑀼𑀁 𑀧𑀺𑀡𑁆𑀟𑀧𑀸𑀢𑀸𑀤𑀺𑀉𑀢𑁆𑀢𑀭𑀼𑀢𑁆𑀢𑀭𑀁 𑀆𑀓𑀗𑁆𑀔𑀦𑁆𑀢𑀸 ‘‘𑀅𑀫𑁆𑀳𑁂𑀳𑀺 𑀫𑀢𑁆𑀢𑀺𑀓𑀸𑀤𑀻𑀲𑀼 𑀤𑀺𑀦𑁆𑀦𑁂𑀲𑀼 𑀫𑀦𑀼𑀲𑁆𑀲𑀸 𑀤𑀴𑁆𑀳𑀪𑀢𑁆𑀢𑀺𑀓𑀸 𑀳𑀼𑀢𑁆𑀯𑀸 𑀩𑀳𑀼𑀁 𑀉𑀢𑁆𑀢𑀭𑀼𑀢𑁆𑀢𑀭𑀁 𑀘𑀢𑀼𑀧𑀘𑁆𑀘𑀬𑀚𑀸𑀢𑀁 𑀤𑀲𑁆𑀲𑀦𑁆𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀕𑀺𑀳𑀻𑀦𑀁 𑀉𑀧𑀦𑀸𑀫𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑀦𑁆𑀢𑁂 𑀧𑀼𑀦𑀦𑁆𑀢𑀺 𑀲𑁄𑀥𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑀦𑁆𑀢𑀧𑁄𑀦𑀁, 𑀤𑀦𑁆𑀢𑀓𑀝𑁆𑀞𑀁. 𑀓𑀧𑀺𑀢𑁆𑀣𑀦𑁆𑀢𑀺 𑀓𑀧𑀺𑀢𑁆𑀣𑀨𑀮𑀁. 𑀧𑀼𑀧𑁆𑀨𑀦𑁆𑀢𑀺 𑀲𑀼𑀫𑀦𑀘𑀫𑁆𑀧𑀓𑀸𑀤𑀺𑀧𑀼𑀧𑁆𑀨𑀁. 𑀔𑀸𑀤𑀦𑀻𑀬𑀸𑀦𑀻𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑁂𑀧𑀺 𑀔𑀚𑁆𑀚𑀓𑀯𑀺𑀲𑁂𑀲𑁂. 𑀧𑀺𑀡𑁆𑀟𑀧𑀸𑀢𑁂 𑀘 𑀲𑀫𑁆𑀧𑀦𑁆𑀦𑁂𑀢𑀺 𑀯𑀡𑁆𑀡𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑁂 𑀑𑀤𑀦𑀯𑀺𑀲𑁂𑀲𑁂. ‘‘𑀅𑀫𑁆𑀩𑁂 𑀆𑀫𑀮𑀓𑀸𑀦𑀺 𑀘𑀸’’𑀢𑀺 𑀘-𑀲𑀤𑁆𑀤𑁂𑀦 𑀫𑀸𑀢𑀼𑀮𑀼𑀗𑁆𑀕𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀨𑀮𑀸𑀦𑀺 𑀅𑀯𑀼𑀢𑁆𑀢𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀢𑁆𑀣 𑀕𑀺𑀳𑀻𑀦𑀁 𑀉𑀧𑀦𑀸𑀫𑁂𑀦𑁆𑀢𑀺 𑀆𑀓𑀗𑁆𑀔𑀦𑁆𑀢𑀸 𑀩𑀳𑀼𑀢𑁆𑀢𑀭𑀦𑁆𑀢𑀺 𑀬𑁄𑀚𑀦𑀸.

𑀪𑁂𑀲𑀚𑁆𑀚𑁂𑀲𑀼 𑀬𑀣𑀸 𑀯𑁂𑀚𑁆𑀚𑀸𑀢𑀺 𑀕𑀺𑀳𑀻𑀦𑀁 𑀪𑁂𑀲𑀚𑁆𑀚𑀧𑁆𑀧𑀬𑁄𑀕𑁂𑀲𑀼 𑀬𑀣𑀸 𑀯𑁂𑀚𑁆𑀚𑀸, 𑀢𑀣𑀸 𑀪𑀺𑀓𑁆𑀔𑀽 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀘𑁆𑀘𑀸𑀓𑀺𑀘𑁆𑀘𑁂 𑀬𑀣𑀸 𑀕𑀺𑀳𑀻𑀢𑀺 𑀕𑀳𑀝𑁆𑀞𑀸𑀦𑀁 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀓𑀺𑀘𑁆𑀘𑁂 𑀓𑀢𑁆𑀢𑀩𑁆𑀩𑁂 𑀕𑀺𑀳𑀻 𑀯𑀺𑀬. 𑀕𑀡𑀺𑀓𑀸𑀯 𑀯𑀺𑀪𑀽𑀲𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀲𑁆𑀲 𑀯𑀺𑀪𑀽𑀲𑀦𑁂 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄 𑀯𑀺𑀬. 𑀇𑀲𑁆𑀲𑀭𑁂 𑀔𑀢𑁆𑀢𑀺𑀬𑀸 𑀬𑀣𑀸𑀢𑀺 𑀇𑀲𑁆𑀲𑀭𑁂 𑀇𑀲𑁆𑀲𑀭𑀺𑀬𑀧𑀯𑀢𑁆𑀢𑀦𑁂 𑀬𑀣𑀸 𑀔𑀢𑁆𑀢𑀺𑀬𑀸, 𑀏𑀯𑀁 𑀓𑀼𑀮𑀧𑀢𑀻 𑀳𑀼𑀢𑁆𑀯𑀸 𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀦𑁂𑀓𑀢𑀺𑀓𑀸𑀢𑀺 𑀦𑀺𑀓𑀢𑀺𑀬𑀁 𑀦𑀺𑀬𑀼𑀢𑁆𑀢𑀸, 𑀅𑀫𑀡𑀺𑀁𑀬𑁂𑀯 𑀫𑀡𑀺𑀁, 𑀅𑀲𑀼𑀯𑀡𑁆𑀡𑀁𑀬𑁂𑀯 𑀲𑀼𑀯𑀡𑁆𑀡𑀁 𑀓𑀢𑁆𑀯𑀸 𑀧𑀝𑀺𑀭𑀽𑀧𑀲𑀸𑀘𑀺𑀬𑁄𑀕𑀦𑀺𑀭𑀢𑀸. 𑀯𑀜𑁆𑀘𑀦𑀺𑀓𑀸𑀢𑀺 𑀓𑀽𑀝𑀫𑀸𑀦𑀸𑀤𑀻𑀳𑀺 𑀯𑀺𑀧𑁆𑀧𑀮𑀫𑁆𑀩𑀓𑀸. 𑀓𑀽𑀝𑀲𑀓𑁆𑀔𑀻𑀢𑀺 𑀅𑀬𑀸𑀣𑀸𑀯𑀲𑀓𑁆𑀔𑀺𑀦𑁄. 𑀅𑀧𑀸𑀝𑀼𑀓𑀸𑀢𑀺 𑀯𑀸𑀫𑀓𑀸, 𑀅𑀲𑀁𑀬𑀢𑀯𑀼𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀩𑀳𑀽𑀳𑀺 𑀧𑀭𑀺𑀓𑀧𑁆𑀧𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀩𑀳𑀽𑀳𑀺 𑀫𑀺𑀘𑁆𑀙𑀸𑀚𑀻𑀯𑀧𑁆𑀧𑀓𑀸𑀭𑁂𑀳𑀺.

𑀮𑁂𑀲𑀓𑀧𑁆𑀧𑁂𑀢𑀺 𑀓𑀧𑁆𑀧𑀺𑀬𑀮𑁂𑀲𑁂 𑀓𑀧𑁆𑀧𑀺𑀬𑀧𑀝𑀺𑀭𑀽𑀧𑁂. 𑀧𑀭𑀺𑀬𑀸𑀬𑁂𑀢𑀺, 𑀧𑀘𑁆𑀘𑀬𑁂𑀲𑀼 𑀧𑀭𑀺𑀬𑀸𑀬𑀲𑁆𑀲 𑀬𑁄𑀕𑁂. 𑀧𑀭𑀺𑀓𑀧𑁆𑀧𑁂𑀢𑀺 𑀯𑀟𑁆𑀠𑀺𑀆𑀤𑀺𑀯𑀺𑀓𑀧𑁆𑀧𑀦𑁂, 𑀲𑀩𑁆𑀩𑀢𑁆𑀣 𑀯𑀺𑀲𑀬𑁂 𑀪𑀼𑀫𑁆𑀫𑀁. 𑀅𑀦𑀼𑀥𑀸𑀯𑀺𑀢𑀸𑀢𑀺 𑀫𑀳𑀺𑀘𑁆𑀙𑀢𑀸𑀤𑀻𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀅𑀦𑀼𑀥𑀸𑀯𑀺𑀢𑀸 𑀯𑁄𑀲𑀺𑀢𑀸. 𑀚𑀻𑀯𑀺𑀓𑀢𑁆𑀣𑀸 𑀚𑀻𑀯𑀺𑀓𑀧𑁆𑀧𑀬𑁄𑀚𑀦𑀸 𑀆𑀚𑀻𑀯𑀳𑁂𑀢𑀼𑀓𑀸. 𑀉𑀧𑀸𑀬𑁂𑀦𑀸𑀢𑀺 𑀧𑀭𑀺𑀓𑀣𑀸𑀤𑀺𑀦𑀸 𑀉𑀧𑀸𑀬𑁂𑀦 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀦𑀬𑁂𑀦. 𑀲𑀗𑁆𑀓𑀟𑁆𑀠𑀦𑁆𑀢𑀻𑀢𑀺 𑀲𑀁𑀳𑀭𑀦𑁆𑀢𑀺.

𑀉𑀧𑀝𑁆𑀞𑀸𑀧𑁂𑀦𑁆𑀢𑀺 𑀧𑀭𑀺𑀲𑀦𑁆𑀢𑀺 𑀧𑀭𑀺𑀲𑀸𑀬 𑀅𑀢𑁆𑀢𑀸𑀦𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀬𑀣𑀸 𑀧𑀭𑀺𑀲𑀸 𑀅𑀢𑁆𑀢𑀸𑀦𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀏𑀯𑀁 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀢𑁄𑀢𑀺 𑀓𑀫𑁆𑀫𑀳𑁂𑀢𑀼. 𑀢𑁂 𑀳𑀺 𑀅𑀢𑁆𑀢𑀦𑁄 𑀓𑀢𑁆𑀢𑀩𑁆𑀩𑀯𑁂𑀬𑁆𑀬𑀸𑀯𑀘𑁆𑀘𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀦𑁄 𑀘 𑀥𑀫𑁆𑀫𑀢𑁄𑀢𑀺 𑀥𑀫𑁆𑀫𑀦𑀺𑀫𑀺𑀢𑁆𑀢𑀁 𑀦𑁄 𑀘 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀬𑁄 𑀲𑀢𑁆𑀣𑀸𑀭𑀸 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀲𑀗𑁆𑀕𑀳𑁄 𑀅𑀦𑀼𑀜𑁆𑀜𑀸𑀢𑁄, 𑀢𑁂𑀦 𑀦 𑀲𑀗𑁆𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀮𑀸𑀪𑀢𑁄𑀢𑀺 𑀮𑀸𑀪𑀳𑁂𑀢𑀼, ‘‘𑀅𑀬𑁆𑀬𑁄 𑀩𑀳𑀼𑀲𑁆𑀲𑀼𑀢𑁄, 𑀪𑀸𑀡𑀓𑁄, ‘𑀥𑀫𑁆𑀫𑀓𑀣𑀺𑀓𑁄’𑀢𑀺 𑀏𑀯𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 𑀫𑀳𑀸𑀚𑀦𑁄 𑀫𑀬𑁆𑀳𑀁 𑀮𑀸𑀪𑀲𑀓𑁆𑀓𑀸𑀭𑁂 𑀉𑀧𑀦𑀬𑀺𑀲𑁆𑀲𑀢𑀻’’𑀢𑀺 𑀇𑀘𑁆𑀙𑀸𑀘𑀸𑀭𑁂 𑀞𑀢𑁆𑀯𑀸 𑀮𑀸𑀪𑀦𑀺𑀫𑀺𑀢𑁆𑀢𑀁 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀦𑁄 𑀘 𑀅𑀢𑁆𑀣𑀢𑁄𑀢𑀺 𑀬𑁄 𑀲𑁄 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀲𑀤𑁆𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀦 𑀧𑀢𑁆𑀢𑀩𑁆𑀩𑁄 𑀅𑀢𑁆𑀣𑁄, 𑀦 𑀢𑀁𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀳𑀺𑀢𑀦𑀺𑀫𑀺𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀗𑁆𑀖𑀮𑀸𑀪𑀲𑁆𑀲 𑀪𑀡𑁆𑀟𑀦𑁆𑀢𑀻𑀢𑀺 𑀲𑀗𑁆𑀖𑀮𑀸𑀪𑀳𑁂𑀢𑀼 𑀪𑀡𑁆𑀟𑀦𑁆𑀢𑀺 ‘‘𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀦 𑀢𑀼𑀬𑁆𑀳’’𑀦𑁆𑀢𑀺𑀆𑀤𑀺𑀦𑀸 𑀓𑀮𑀳𑀁 𑀓𑀭𑁄𑀦𑁆𑀢𑀺. 𑀲𑀗𑁆𑀖𑀢𑁄 𑀧𑀭𑀺𑀩𑀸𑀳𑀺𑀭𑀸𑀢𑀺, 𑀅𑀭𑀺𑀬𑀲𑀗𑁆𑀖𑀢𑁄 𑀩𑀳𑀺𑀪𑀽𑀢𑀸 𑀅𑀭𑀺𑀬𑀲𑀗𑁆𑀖𑁂 𑀢𑀤𑀪𑀸𑀯𑀢𑁄. 𑀧𑀭𑀮𑀸𑀪𑁄𑀧𑀚𑀻𑀯𑀦𑁆𑀢𑀸𑀢𑀺 𑀲𑀸𑀲𑀦𑁂 𑀮𑀸𑀪𑀲𑁆𑀲 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑁂𑀳𑀺 𑀧𑀭𑁂 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀲𑁂𑀓𑁆𑀔𑁂 𑀉𑀤𑁆𑀤𑀺𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸 𑀢𑀁 𑀧𑀭𑀮𑀸𑀪𑀁, 𑀧𑀭𑀢𑁄 𑀯𑀸 𑀤𑀸𑀬𑀓𑀢𑁄 𑀮𑀤𑁆𑀥𑀩𑁆𑀩𑀮𑀸𑀪𑀁 𑀉𑀧𑀚𑀻𑀯𑀦𑁆𑀢𑀸 𑀪𑀡𑁆𑀟𑀦𑀓𑀸𑀭𑀓𑀸 𑀪𑀺𑀓𑁆𑀔𑀽 𑀧𑀸𑀧𑀚𑀺𑀕𑀼𑀘𑁆𑀙𑀸𑀬 𑀅𑀪𑀸𑀯𑀢𑁄 𑀅𑀳𑀺𑀭𑀺𑀓𑀸 𑀲𑀫𑀸𑀦𑀸 𑀘 ‘‘𑀫𑀬𑀁 𑀧𑀭𑀮𑀸𑀪𑀁 𑀪𑀼𑀜𑁆𑀚𑀸𑀫, 𑀧𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀸’’𑀢𑀺𑀧𑀺 𑀦 𑀮𑀚𑁆𑀚𑀭𑁂 𑀦 𑀳𑀺𑀭𑀻𑀬𑀦𑁆𑀢𑀺.

𑀦𑀸𑀦𑀼𑀬𑀼𑀢𑁆𑀢𑀸𑀢𑀺 𑀲𑀫𑀡𑀓𑀭𑀡𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀦𑀼𑀬𑀼𑀢𑁆𑀢𑀸. 𑀢𑀣𑀸𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀩𑀦𑁆𑀥𑀦𑀓𑀸𑀭𑀓𑀸𑀤𑀬𑁄, 𑀢𑀣𑀸. 𑀏𑀓𑁂𑀢𑀺 𑀏𑀓𑀘𑁆𑀘𑁂. 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸𑀢𑀺 𑀓𑁂𑀯𑀮𑀁 𑀫𑀼𑀡𑁆𑀟𑀺𑀢𑀓𑁂𑀲𑀢𑀸𑀬 𑀫𑀼𑀡𑁆𑀟𑀸 𑀧𑀺𑀮𑁄𑀢𑀺𑀓𑀔𑀡𑁆𑀟𑁂𑀳𑀺 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 ‘‘𑀲𑀗𑁆𑀖𑀸𑀝𑀻’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀘𑀻𑀯𑀭𑁂𑀦 𑀧𑀸𑀭𑀼𑀢𑀲𑀭𑀻𑀭𑀸. 𑀲𑀫𑁆𑀪𑀸𑀯𑀦𑀁𑀬𑁂𑀯𑀺𑀘𑁆𑀙𑀦𑁆𑀢𑀺, 𑀮𑀸𑀪𑀲𑀓𑁆𑀓𑀸𑀭𑀫𑀼𑀘𑁆𑀙𑀺𑀢𑀸𑀢𑀺 𑀮𑀸𑀪𑀲𑀓𑁆𑀓𑀸𑀭𑀸𑀲𑀸𑀬 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀺𑀢𑀸 𑀳𑀼𑀢𑁆𑀯𑀸, ‘‘𑀧𑁂𑀲𑀮𑁄 𑀥𑀼𑀢𑀯𑀸𑀤𑁄 𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀯𑀸 𑀫𑀥𑀼𑀭𑀯𑀘𑀦𑀫𑀦𑀼𑀬𑀼𑀢𑁆𑀢𑀸 ‘‘𑀅𑀭𑀺𑀬𑁄’’𑀢𑀺 𑀘 𑀓𑁂𑀯𑀮𑀁 𑀲𑀫𑁆𑀪𑀸𑀯𑀦𑀁 𑀩𑀳𑀼𑀫𑀸𑀦𑀁𑀬𑁂𑀯 𑀇𑀘𑁆𑀙𑀦𑁆𑀢𑀺 𑀏𑀲𑀦𑁆𑀢𑀺, 𑀦 𑀢𑀦𑁆𑀦𑀺𑀫𑀺𑀢𑁆𑀢𑁂 𑀕𑀼𑀡𑁂𑀢𑀺 𑀅𑀢𑁆𑀣𑁄.

𑀏𑀯𑀦𑁆𑀢𑀺 ‘‘𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀬 𑀘 𑀧𑀭𑀺𑀓𑁆𑀔𑀬𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦. 𑀦𑀸𑀦𑀧𑁆𑀧𑀬𑀸𑀢𑀫𑁆𑀳𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑁂 𑀪𑁂𑀤𑀦𑀥𑀫𑁆𑀫𑁂 𑀧𑀬𑀸𑀢𑁂 𑀲𑀫𑀓𑀢𑁂, 𑀦𑀸𑀦𑀧𑁆𑀧𑀓𑀸𑀭𑁂𑀦 𑀯𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀧𑀬𑀸𑀢𑀼𑀁 𑀧𑀯𑀢𑁆𑀢𑀺𑀢𑀼𑀁 𑀆𑀭𑀤𑁆𑀥𑁂. 𑀦 𑀤𑀸𑀦𑀺 𑀲𑀼𑀓𑀭𑀁 𑀢𑀣𑀸𑀢𑀺 𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀤𑀼𑀮𑁆𑀮𑀪𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀤𑀼𑀮𑁆𑀮𑀪𑀲𑀧𑁆𑀧𑀸𑀬𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂 𑀘 𑀓𑀸𑀮𑁂 𑀬𑀣𑀸 𑀲𑀢𑁆𑀣𑀭𑀺 𑀥𑀭𑀦𑁆𑀢𑁂 𑀅𑀨𑀼𑀲𑀺𑀢𑀁 𑀅𑀨𑀼𑀝𑁆𑀞𑀁, 𑀅𑀦𑀥𑀺𑀕𑀢𑀁 𑀛𑀸𑀦𑀯𑀺𑀧𑀲𑁆𑀲𑀦𑀁 𑀨𑀼𑀲𑀺𑀢𑀼𑀁 𑀅𑀥𑀺𑀕𑀦𑁆𑀢𑀼𑀁, 𑀨𑀼𑀲𑀺𑀢𑀁 𑀯𑀸 𑀳𑀸𑀦𑀪𑀸𑀕𑀺𑀬𑀁 𑀞𑀺𑀢𑀺𑀪𑀸𑀕𑀺𑀬𑀫𑁂𑀯 𑀯𑀸 𑀅𑀳𑀼𑀢𑁆𑀯𑀸 𑀬𑀣𑀸 𑀯𑀺𑀲𑁂𑀲𑀪𑀸𑀕𑀺𑀬𑀁 𑀳𑁄𑀢𑀺, 𑀢𑀣𑀸 𑀅𑀦𑀼𑀭𑀓𑁆𑀔𑀺𑀢𑀼𑀁 𑀧𑀸𑀮𑁂𑀢𑀼𑀁 𑀲𑀼𑀓𑀭𑀁, 𑀢𑀣𑀸 𑀦 𑀲𑀼𑀓𑀭𑀁, 𑀢𑀣𑀸 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀲𑁆𑀲 𑀆𑀲𑀦𑁆𑀦𑀢𑁆𑀢𑀸 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀑𑀯𑀤𑀦𑁆𑀢𑁄 ‘‘𑀬𑀣𑀸 𑀓𑀡𑁆𑀝𑀓𑀝𑁆𑀞𑀸𑀦𑀫𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀧𑀼𑀭𑀺𑀲𑁄 𑀓𑁂𑀦𑀘𑀺𑀤𑁂𑀯 𑀧𑀬𑁄𑀚𑀦𑁂𑀦 𑀓𑀡𑁆𑀝𑀓𑀦𑀺𑀘𑀺𑀢𑁂 𑀧𑀤𑁂𑀲𑁂 𑀅𑀦𑀼𑀧𑀸𑀳𑀦𑁄 𑀯𑀺𑀘𑀭𑀦𑁆𑀢𑁄 ‘‘𑀫𑀸 𑀫𑀁 𑀓𑀡𑁆𑀝𑀓𑁄 𑀯𑀺𑀚𑁆𑀛𑀻’’𑀢𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀯 𑀯𑀺𑀘𑀭𑀢𑀺, 𑀏𑀯𑀁 𑀓𑀺𑀮𑁂𑀲𑀓𑀡𑁆𑀝𑀓𑀦𑀺𑀘𑀺𑀢𑁂 𑀕𑁄𑀘𑀭𑀕𑀸𑀫𑁂 𑀧𑀬𑁄𑀚𑀦𑁂𑀦 𑀘𑀭𑀦𑁆𑀢𑁄 𑀫𑀼𑀦𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑀬𑀼𑀢𑁆𑀢𑁄 𑀅𑀧𑁆𑀧𑀫𑀢𑁆𑀢𑁄𑀯 𑀘𑀭𑁂𑀬𑁆𑀬 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀓𑁂 𑀬𑁄𑀕𑀻, 𑀢𑁂𑀲𑀁 𑀯𑀢𑁆𑀢𑀫𑀦𑀼𑀲𑁆𑀲𑀭𑀦𑁆𑀢𑀺 𑀧𑀼𑀭𑀺𑀫𑀓𑁂 𑀬𑁄𑀕𑁂 𑀪𑀸𑀯𑀦𑀸𑀬 𑀬𑀼𑀢𑁆𑀢𑀢𑀸𑀬 𑀬𑁄𑀕𑀻 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁂 𑀲𑀭𑀺𑀢𑁆𑀯𑀸 𑀢𑁂𑀲𑀁 𑀯𑀢𑁆𑀢𑀁 𑀆𑀕𑀫𑀸𑀦𑀼𑀲𑀸𑀭𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀪𑀸𑀯𑀦𑀸𑀯𑀺𑀥𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀬𑀣𑀸𑀧𑀝𑀺𑀧𑀚𑁆𑀚𑀦𑁆𑀢𑁄. 𑀓𑀺𑀜𑁆𑀘𑀸𑀧𑀺 𑀧𑀘𑁆𑀙𑀺𑀫𑁄 𑀓𑀸𑀮𑁄𑀢𑀺 𑀬𑀤𑀺𑀧𑀸𑀬𑀁 𑀅𑀢𑀻𑀢𑀲𑀢𑁆𑀣𑀼𑀓𑁄 𑀘𑀭𑀺𑀫𑁄 𑀓𑀸𑀮𑁄, 𑀢𑀣𑀸𑀧𑀺 𑀬𑀣𑀸𑀥𑀫𑁆𑀫𑀫𑁂𑀯 𑀧𑀝𑀺𑀧𑀚𑁆𑀚𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄 𑀨𑀼𑀲𑁂𑀬𑁆𑀬 𑀅𑀫𑀢𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑁂𑀬𑁆𑀬.

𑀇𑀤𑀁 𑀯𑀢𑁆𑀯𑀸𑀢𑀺, 𑀬𑀣𑀸𑀤𑀲𑁆𑀲𑀺𑀢𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑁂𑀲𑀼 𑀇𑀫𑀁 𑀧𑀝𑀺𑀧𑀢𑁆𑀢𑀺𑀯𑀺𑀥𑀺𑀁 𑀓𑀣𑁂𑀢𑁆𑀯𑀸. 𑀅𑀬𑀜𑁆𑀘 𑀑𑀲𑀸𑀦𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀓𑀸𑀲𑁂𑀢𑀼𑀁 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀸𑀭𑀸𑀧𑀭𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀻𑀲𑀢𑀺𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.