𑁮. 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀕𑀘𑁆𑀙𑀁 𑀯𑀤𑁂𑀲𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑁄𑀲𑀮𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀪𑀕𑁆𑀕𑀯𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 𑀲𑀓𑀮𑀦𑀕𑀭𑁂 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀼, 𑀭𑀜𑁆𑀜𑁄 𑀘 𑀫𑀗𑁆𑀕𑀮𑀸𑀯𑀼𑀥𑀁 𑀲𑀬𑀦𑀧𑀻𑀞𑁂 𑀞𑀧𑀺𑀢𑀁 𑀧𑀚𑁆𑀚𑀮𑀺, 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀦𑀺𑀤𑁆𑀤𑀁 𑀦 𑀮𑀪𑀺. 𑀧𑀼𑀭𑁄𑀳𑀺𑀢𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀦𑀓𑁆𑀔𑀢𑁆𑀢𑀬𑁄𑀕𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 ‘‘𑀘𑁄𑀭𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑁄’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀓𑀸𑀲𑀺. 𑀲𑁄 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀢𑁄 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀺. 𑀭𑀸𑀚𑀸 ‘‘𑀓𑀼𑀢𑁄, 𑀆𑀘𑀭𑀺𑀬, 𑀲𑀼𑀔𑀲𑁂𑀬𑁆𑀬𑀁, 𑀭𑀢𑁆𑀢𑀺𑀬𑀁 𑀫𑀬𑁆𑀳𑀁 𑀫𑀗𑁆𑀕𑀮𑀸𑀯𑀼𑀥𑀁 𑀧𑀚𑁆𑀚𑀮𑀺, 𑀢𑀲𑁆𑀲 𑀓𑁄 𑀦𑀼 𑀔𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀖𑀭𑁂 𑀤𑀸𑀭𑀓𑁄 𑀚𑀸𑀢𑁄. 𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀲𑀓𑀮𑀦𑀕𑀭𑁂𑀧𑀺 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀽’’𑀢𑀺. ‘‘𑀓𑀺𑀁 𑀪𑀯𑀺𑀲𑁆𑀲𑀢𑀺, 𑀆𑀘𑀭𑀺𑀬𑀸’’𑀢𑀺? ‘‘𑀤𑀸𑀭𑀓𑁄 𑀘𑁄𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀓𑀺𑀁 𑀏𑀓𑀘𑀸𑀭𑀻 𑀘𑁄𑀭𑁄, 𑀉𑀤𑀸𑀳𑀼 𑀕𑀡𑀚𑁂𑀝𑁆𑀞𑀓𑁄’’𑀢𑀺? ‘‘𑀏𑀓𑀘𑀸𑀭𑀺𑀓𑁄, 𑀤𑁂𑀯’’. ‘‘𑀓𑀺𑀁 𑀦𑀁 𑀫𑀸𑀭𑁂𑀫𑀸’’𑀢𑀺? ‘‘𑀏𑀓𑀘𑀸𑀭𑀺𑀓𑁄 𑀘𑁂, 𑀧𑀝𑀺𑀚𑀕𑁆𑀕𑀣 𑀢𑀸𑀯 𑀦’’𑀦𑁆𑀢𑀺 𑀆𑀳. 𑀢𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀸 𑀬𑀲𑁆𑀫𑀸 𑀚𑀸𑀬𑀫𑀸𑀦𑁄 𑀭𑀜𑁆𑀜𑁄 𑀘𑀺𑀢𑁆𑀢𑀁 𑀯𑀺𑀳𑁂𑀲𑁂𑀦𑁆𑀢𑁄 𑀚𑀸𑀢𑁄, 𑀢𑀲𑁆𑀫𑀸 𑀳𑀺𑀁𑀲𑀓𑁄𑀢𑀺 𑀓𑀢𑁆𑀯𑀸 𑀧𑀘𑁆𑀙𑀸 𑀤𑀺𑀝𑁆𑀞𑀁 𑀅𑀤𑀺𑀝𑁆𑀞𑀦𑁆𑀢𑀺 𑀯𑀺𑀬 𑀅𑀳𑀺𑀁𑀲𑀓𑁄𑀢𑀺 𑀯𑁄𑀳𑀭𑀺𑀁𑀲𑀼.

𑀲𑁄 𑀯𑀬𑀧𑁆𑀧𑀢𑁆𑀢𑁄 𑀧𑀼𑀩𑁆𑀩𑀓𑀫𑁆𑀫𑀩𑀮𑁂𑀦 𑀲𑀢𑁆𑀢𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀢𑀺. 𑀢𑀲𑁆𑀲𑀺𑀤𑀁 𑀧𑀼𑀩𑁆𑀩𑀓𑀫𑁆𑀫𑀁 𑁋 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀓𑀲𑁆𑀲𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀯𑀲𑁆𑀲𑁄𑀤𑀓𑁂𑀦 𑀢𑀺𑀦𑁆𑀢𑀁 𑀅𑀮𑁆𑀮𑀘𑀻𑀯𑀭𑀁 𑀲𑀻𑀢𑀧𑀻𑀴𑀺𑀢𑀁 𑀅𑀢𑁆𑀢𑀦𑁄 𑀔𑁂𑀢𑁆𑀢𑀪𑀽𑀫𑀺𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸 ‘‘𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀫𑁂 𑀉𑀧𑀝𑁆𑀞𑀺𑀢’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀩𑀮𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀣𑀸𑀫𑀚𑀯𑀩𑀮𑀲𑀫𑁆𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀲𑀢𑁆𑀢𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀢𑀺. 𑀲𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀦𑁆𑀢𑁂𑀯𑀸𑀲𑀻 𑀳𑀼𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀢𑁄 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑀁 𑀢𑀲𑁆𑀲 𑀪𑀭𑀺𑀬𑀜𑁆𑀘 𑀲𑀓𑁆𑀓𑀘𑁆𑀘𑀁 𑀧𑀝𑀺𑀚𑀕𑁆𑀕𑀢𑀺. 𑀢𑁂𑀦𑀲𑁆𑀲 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀕𑁂𑀳𑁂 𑀮𑀩𑁆𑀪𑀫𑀸𑀦𑁂𑀦 𑀪𑀢𑁆𑀢𑀸𑀤𑀺𑀦𑀸 𑀲𑀗𑁆𑀕𑀳𑀁 𑀓𑀭𑁄𑀢𑀺. 𑀢𑀁 𑀅𑀲𑀳𑀫𑀸𑀦𑀸 𑀅𑀜𑁆𑀜𑁂 𑀫𑀸𑀡𑀯𑀸 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀪𑁂𑀤𑀁 𑀅𑀓𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑀢𑁂𑀲𑀁 𑀯𑀘𑀦𑀁 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀅𑀲𑀤𑁆𑀤𑀳𑀦𑁆𑀢𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀫𑀳𑀸𑀩𑀮𑁄 𑀫𑀸𑀡𑀯𑁄, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀫𑀸𑀭𑀸𑀧𑁂𑀢𑀼𑀁, 𑀉𑀧𑀸𑀬𑁂𑀦 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀝𑁆𑀞𑀺𑀢𑀲𑀺𑀧𑁆𑀧𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀕𑀦𑁆𑀢𑀼𑀁 𑀆𑀧𑀼𑀘𑁆𑀙𑀦𑁆𑀢𑀁 𑀫𑀸𑀡𑀯𑀁 𑀆𑀳 𑁋 ‘‘𑀢𑀸𑀢 𑀅𑀳𑀺𑀁𑀲𑀓, 𑀦𑀺𑀝𑁆𑀞𑀺𑀢𑀲𑀺𑀧𑁆𑀧𑁂𑀦 𑀦𑀸𑀫 𑀅𑀦𑁆𑀢𑁂𑀯𑀸𑀲𑀺𑀦𑀸 𑀆𑀘𑀭𑀺𑀬𑀲𑁆𑀲 𑀕𑀭𑀼𑀤𑀓𑁆𑀔𑀺𑀡𑀸 𑀤𑀸𑀢𑀩𑁆𑀩𑀸, 𑀢𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺. ‘‘𑀲𑀸𑀥𑀼, 𑀆𑀘𑀭𑀺𑀬, 𑀓𑀺𑀁 𑀤𑀲𑁆𑀲𑀸𑀫𑀻’’𑀢𑀺? ‘‘𑀫𑀦𑀼𑀲𑁆𑀲𑀸𑀦𑀁 𑀲𑀳𑀲𑁆𑀲𑀤𑀓𑁆𑀔𑀺𑀡𑀳𑀢𑁆𑀣𑀗𑁆𑀕𑀮𑀺𑀬𑁄 𑀆𑀦𑁂𑀳𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀺𑀭 𑀅𑀬𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀩𑀳𑀽𑀲𑀼 𑀫𑀸𑀭𑀺𑀬𑀫𑀸𑀦𑁂𑀲𑀼 𑀏𑀓𑀦𑁆𑀢𑀢𑁄 𑀏𑀓𑁄 𑀦𑀁 𑀫𑀸𑀭𑁂𑀬𑁆𑀬𑀸𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀳𑀺𑀁𑀲𑀓𑁄 𑀅𑀢𑁆𑀢𑀦𑁄 𑀘𑀺𑀭𑀧𑀭𑀺𑀘𑀺𑀢𑀁 𑀦𑀺𑀓𑁆𑀓𑀭𑀼𑀡𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄 𑀓𑁄𑀲𑀮𑀭𑀜𑁆𑀜𑁄 𑀯𑀺𑀚𑀺𑀢𑁂 𑀚𑀸𑀮𑀺𑀦𑀁 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑀲𑀫𑀻𑀧𑁂 𑀧𑀩𑁆𑀩𑀢𑀦𑁆𑀢𑀭𑁂 𑀯𑀲𑀦𑁆𑀢𑁄 𑀧𑀩𑁆𑀩𑀢𑀲𑀺𑀔𑀭𑁂 𑀞𑀢𑁆𑀯𑀸 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁂 𑀫𑀦𑀼𑀲𑁆𑀲𑁂 𑀑𑀮𑁄𑀓𑁂𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑁄 𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑀕𑁆𑀕𑁂 𑀑𑀮𑀫𑁆𑀩𑁂𑀲𑀺. 𑀢𑀸 𑀕𑀺𑀚𑁆𑀛𑀸𑀧𑀺 𑀓𑀸𑀓𑀸𑀧𑀺 𑀔𑀸𑀤𑀺𑀁𑀲𑀼, 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸 𑀧𑀽𑀢𑀺𑀪𑀸𑀯𑀁 𑀅𑀕𑀫𑀁𑀲𑀼. 𑀏𑀯𑀁 𑀕𑀡𑀦𑀸𑀬 𑀅𑀧𑀭𑀺𑀧𑀽𑀭𑀫𑀸𑀦𑀸𑀬 𑀮𑀤𑁆𑀥𑀸 𑀮𑀤𑁆𑀥𑀸 𑀅𑀗𑁆𑀕𑀼𑀮𑀺𑀬𑁄 𑀲𑀼𑀢𑁆𑀢𑁂𑀦 𑀕𑀦𑁆𑀣𑀺𑀢𑁆𑀯𑀸 𑀫𑀸𑀮𑀁 𑀓𑀢𑁆𑀯𑀸 𑀬𑀜𑁆𑀜𑁄𑀧𑀘𑀺𑀢𑀁 𑀯𑀺𑀬 𑀅𑀁𑀲𑁂 𑀑𑀮𑀫𑁆𑀩𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀅𑀗𑁆𑀕𑀼𑀮𑀺𑀫𑀸𑀮𑁄𑀢𑁆𑀯𑁂𑀯𑀲𑁆𑀲 𑀲𑀫𑀜𑁆𑀜𑀸 𑀅𑀳𑁄𑀲𑀺.

𑀏𑀯𑀁 𑀢𑀲𑁆𑀫𑀺𑀁 𑀫𑀦𑀼𑀲𑁆𑀲𑁂 𑀫𑀸𑀭𑁂𑀦𑁆𑀢𑁂 𑀫𑀕𑁆𑀕𑁄 𑀅𑀯𑀴𑀜𑁆𑀚𑁄 𑀅𑀳𑁄𑀲𑀺. 𑀲𑁄 𑀫𑀕𑁆𑀕𑁂 𑀫𑀦𑀼𑀲𑁆𑀲𑁂 𑀅𑀮𑀪𑀦𑁆𑀢𑁄 𑀕𑀸𑀫𑀽𑀧𑀘𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀮𑀻𑀬𑀺𑀢𑁆𑀯𑀸 𑀆𑀕𑀢𑀸𑀕𑀢𑁂 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀁 𑀜𑀢𑁆𑀯𑀸 𑀫𑀦𑀼𑀲𑁆𑀲𑀸 𑀕𑀸𑀫𑀢𑁄 𑀅𑀧𑀓𑁆𑀓𑀫𑀺𑀁𑀲𑀼, 𑀕𑀸𑀫𑀸 𑀲𑀼𑀜𑁆𑀜𑀸 𑀅𑀳𑁂𑀲𑀼𑀁, 𑀢𑀣𑀸 𑀦𑀺𑀕𑀫𑀸 𑀚𑀦𑀧𑀤𑀸 𑀘. 𑀏𑀯𑀁 𑀢𑁂𑀦 𑀲𑁄 𑀧𑀤𑁂𑀲𑁄 𑀉𑀩𑁆𑀩𑀸𑀲𑀺𑀢𑁄 𑀅𑀳𑁄𑀲𑀺. 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 𑀘 𑀏𑀓𑀸𑀬 𑀊𑀦𑀸 𑀲𑀳𑀲𑁆𑀲𑀅𑀗𑁆𑀕𑀼𑀮𑀺𑀬𑁄 𑀲𑀗𑁆𑀕𑀳𑀸 𑀅𑀳𑁂𑀲𑀼𑀁. 𑀅𑀣 𑀫𑀦𑀼𑀲𑁆𑀲𑀸 𑀢𑀁 𑀘𑁄𑀭𑀼𑀧𑀤𑁆𑀤𑀯𑀁 𑀓𑁄𑀲𑀮𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀧𑀸𑀢𑁄𑀯 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺, ‘‘𑀲𑀻𑀖𑀁 𑀅𑀗𑁆𑀕𑀼𑀮𑀺𑀫𑀸𑀮𑀘𑁄𑀭𑀁 𑀕𑀡𑁆𑀳𑀸𑀫, 𑀩𑀮𑀓𑀸𑀬𑁄 𑀆𑀕𑀘𑁆𑀙𑀢𑀽’’𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 𑀫𑀸𑀢𑀸 𑀫𑀦𑁆𑀢𑀸𑀡𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀢𑀲𑁆𑀲 𑀧𑀺𑀢𑀭𑀁 𑀆𑀳 𑁋 ‘‘𑀧𑀼𑀢𑁆𑀢𑁄 𑀓𑀺𑀭 𑀢𑁂 𑀘𑁄𑀭𑁄 𑀳𑀼𑀢𑁆𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀢𑀺, 𑀢𑀁 ‘𑀈𑀤𑀺𑀲𑀁 𑀫𑀸 𑀓𑀭𑀻’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀆𑀦𑁂𑀳𑀺, 𑀅𑀜𑁆𑀜𑀣𑀸 𑀦𑀁 𑀭𑀸𑀚𑀸 𑀖𑀸𑀢𑁂𑀬𑁆𑀬𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀦 𑀫𑀬𑁆𑀳𑀁 𑀢𑀸𑀤𑀺𑀲𑁂𑀳𑀺 𑀧𑀼𑀢𑁆𑀢𑁂𑀳𑀺 𑀅𑀢𑁆𑀣𑁄, 𑀭𑀸𑀚𑀸 𑀬𑀁 𑀯𑀸 𑀢𑀁 𑀯𑀸 𑀓𑀭𑁄𑀢𑀽’’𑀢𑀺 𑀆𑀳. 𑀅𑀣 𑀩𑁆𑀭𑀸𑀳𑁆𑀫𑀡𑀻 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀧𑀸𑀣𑁂𑀬𑁆𑀬𑀁 𑀕𑀳𑁂𑀢𑁆𑀯𑀸 ‘‘𑀫𑀫 𑀧𑀼𑀢𑁆𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀪𑀕𑀯𑀸 ‘‘𑀅𑀬𑀁 ‘𑀅𑀗𑁆𑀕𑀼𑀮𑀺𑀫𑀸𑀮𑀁 𑀆𑀦𑁂𑀲𑁆𑀲𑀸𑀫𑀻’𑀢𑀺 𑀕𑀘𑁆𑀙𑀢𑀺, 𑀲𑀘𑁂 𑀲𑀸 𑀕𑀫𑀺𑀲𑁆𑀲𑀢𑀺, 𑀅𑀗𑁆𑀕𑀼𑀮𑀺𑀫𑀸𑀮𑁄 ‘𑀅𑀗𑁆𑀕𑀼𑀮𑀺𑀲𑀳𑀲𑁆𑀲𑀁 𑀧𑀽𑀭𑁂𑀲𑁆𑀲𑀸𑀫𑀻’𑀢𑀺 𑀫𑀸𑀢𑀭𑀫𑁆𑀧𑀺 𑀫𑀸𑀭𑁂𑀲𑁆𑀲𑀢𑀺. 𑀲𑁄 𑀘 𑀧𑀘𑁆𑀙𑀺𑀫𑀪𑀯𑀺𑀓𑁄, 𑀲𑀘𑀸𑀳𑀁 𑀦 𑀕𑀫𑀺𑀲𑁆𑀲𑀁, 𑀫𑀳𑀸𑀚𑀸𑀦𑀺 𑀅𑀪𑀯𑀺𑀲𑁆𑀲𑀸’’𑀢𑀺 𑀜𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀫𑀸𑀮𑀁 𑀉𑀤𑁆𑀤𑀺𑀲𑁆𑀲 𑀢𑀺𑀁𑀲𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀧𑀤𑀲𑀸𑀯 𑀧𑀝𑀺𑀧𑀚𑁆𑀚𑀫𑀸𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑁄𑀧𑀸𑀮𑀓𑀸𑀤𑀻𑀳𑀺 𑀯𑀸𑀭𑀺𑀬𑀫𑀸𑀦𑁄𑀧𑀺 𑀚𑀸𑀮𑀺𑀦𑀁 𑀯𑀦𑀁 𑀉𑀧𑀕𑀘𑁆𑀙𑀺. 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀢𑀲𑁆𑀲 𑀫𑀸𑀢𑀸 𑀢𑁂𑀦 𑀤𑀺𑀝𑁆𑀞𑀸, 𑀲𑁄 𑀫𑀸𑀢𑀭𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 ‘‘𑀫𑀸𑀢𑀭𑀫𑁆𑀧𑀺 𑀫𑀸𑀭𑁂𑀢𑁆𑀯𑀸 𑀅𑀚𑁆𑀚 𑀊𑀦𑀗𑁆𑀕𑀼𑀮𑀺𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀅𑀲𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀥𑀸𑀯𑀺. 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀪𑀕𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀅𑀗𑁆𑀕𑀼𑀮𑀺𑀫𑀸𑀮𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀫𑁂 𑀫𑀸𑀢𑀭𑀁 𑀯𑀥𑀺𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑀸 𑀕𑀳𑀺𑀢𑁂𑀦? 𑀚𑀻𑀯𑀢𑀼 𑀫𑁂 𑀫𑀸𑀢𑀸, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀲𑀫𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀁 𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀅𑀣 𑀔𑁄 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺, 𑀬𑀣𑀸 𑀧𑀓𑀢𑀺𑀇𑀭𑀺𑀬𑀸𑀧𑀣𑁂𑀦 𑀕𑀘𑁆𑀙𑀦𑁆𑀢𑀫𑁆𑀧𑀺 𑀅𑀢𑁆𑀢𑀸𑀦𑀁 𑀅𑀗𑁆𑀕𑀼𑀮𑀺𑀫𑀸𑀮𑁄 𑀲𑀩𑁆𑀩𑀣𑀸𑀫𑁂𑀦 𑀥𑀸𑀯𑀦𑁆𑀢𑁄𑀧𑀺 𑀦 𑀲𑀓𑁆𑀓𑁄𑀢𑀺 𑀲𑀫𑁆𑀧𑀸𑀧𑀼𑀡𑀺𑀢𑀼𑀁. 𑀲𑁄 𑀧𑀭𑀺𑀳𑀻𑀦𑀚𑀯𑁄 𑀖𑀼𑀭𑀼𑀖𑀼𑀭𑀼𑀧𑀲𑁆𑀲𑀸𑀲𑀻 𑀓𑀘𑁆𑀙𑁂𑀳𑀺 𑀲𑁂𑀤𑀁 𑀫𑀼𑀜𑁆𑀘𑀦𑁆𑀢𑁄 𑀧𑀤𑀁 𑀉𑀤𑁆𑀥𑀭𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀔𑀸𑀡𑀼 𑀯𑀺𑀬 𑀞𑀺𑀢𑁄 𑀪𑀕𑀯𑀦𑁆𑀢𑀁 ‘‘𑀢𑀺𑀝𑁆𑀞 𑀢𑀺𑀝𑁆𑀞, 𑀲𑀫𑀡𑀸’’𑀢𑀺 𑀆𑀳. 𑀪𑀕𑀯𑀸 𑀕𑀘𑁆𑀙𑀦𑁆𑀢𑁄𑀯 ‘‘𑀞𑀺𑀢𑁄 𑀅𑀳𑀁, 𑀅𑀗𑁆𑀕𑀼𑀮𑀺𑀫𑀸𑀮, 𑀢𑁆𑀯𑀜𑁆𑀘 𑀢𑀺𑀝𑁆𑀞𑀸’’𑀢𑀺 𑀆𑀳. 𑀲𑁄 ‘‘𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀘𑁆𑀘𑀯𑀸𑀤𑀺𑀦𑁄, 𑀅𑀬𑀁 𑀲𑀫𑀡𑁄 𑀕𑀘𑁆𑀙𑀦𑁆𑀢𑁄𑀬𑁂𑀯 ‘𑀞𑀺𑀢𑁄 𑀅𑀳𑀁, 𑀅𑀗𑁆𑀕𑀼𑀮𑀺𑀫𑀸𑀮, 𑀢𑁆𑀯𑀜𑁆𑀘 𑀢𑀺𑀝𑁆𑀞𑀸’𑀢𑀺 𑀆𑀳, 𑀅𑀳𑀜𑁆𑀘𑀫𑁆𑀳𑀺 𑀞𑀺𑀢𑁄, 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑁄, 𑀧𑀼𑀘𑁆𑀙𑀺𑀢𑁆𑀯𑀸 𑀦𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁮𑁬𑁬. ‘‘𑀕𑀘𑁆𑀙𑀁 𑀯𑀤𑁂𑀲𑀺 𑀲𑀫𑀡 𑀞𑀺𑀢𑁄𑀫𑁆𑀳𑀺, 𑀫𑀫𑀜𑁆𑀘 𑀩𑁆𑀭𑀽𑀲𑀺 𑀞𑀺𑀢𑀫𑀝𑁆𑀞𑀺𑀢𑁄𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀲𑀫𑀡 𑀏𑀢𑀫𑀢𑁆𑀣𑀁, 𑀓𑀣𑀁 𑀞𑀺𑀢𑁄 𑀢𑁆𑀯𑀁 𑀅𑀳𑀫𑀝𑁆𑀞𑀺𑀢𑁄𑀫𑁆𑀳𑀻’’𑀢𑀺.

𑀢𑀢𑁆𑀣 𑀲𑀫𑀡𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺. 𑀫𑀫𑀦𑁆𑀢𑀺 𑀫𑀁. 𑀓𑀣𑀦𑁆𑀢𑀺 𑀓𑁂𑀦𑀸𑀓𑀸𑀭𑁂𑀦. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀲𑀫𑀡, 𑀢𑁆𑀯𑀁 𑀕𑀘𑁆𑀙𑀦𑁆𑀢𑁄𑀯 𑀲𑀫𑀸𑀦𑁄 ‘‘𑀞𑀺𑀢𑁄𑀫𑁆𑀳𑀻’’𑀢𑀺 𑀯𑀤𑁂𑀲𑀺. 𑀫𑀫𑀜𑁆𑀘 𑀞𑀺𑀢𑀁𑀬𑁂𑀯 ‘‘𑀅𑀝𑁆𑀞𑀺𑀢𑁄’’𑀢𑀺 𑀩𑁆𑀭𑀽𑀲𑀺, 𑀯𑀤𑁂𑀲𑀺. 𑀓𑀸𑀭𑀡𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀢𑀁 𑀲𑀫𑀡𑀁 𑀅𑀳𑀁 𑀏𑀯𑀫𑀢𑁆𑀣𑀁 𑀧𑀼𑀘𑁆𑀙𑀸𑀫𑀺. 𑀓𑀣𑀁 𑀓𑁂𑀦𑀸𑀓𑀸𑀭𑁂𑀦 𑀢𑁆𑀯𑀁 𑀞𑀺𑀢𑁄 𑀅𑀳𑁄𑀲𑀺, 𑀅𑀳𑀜𑁆𑀘 𑀅𑀝𑁆𑀞𑀺𑀢𑁄𑀫𑁆𑀳𑀻𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑁋

𑁮𑁬𑁭. ‘‘𑀞𑀺𑀢𑁄 𑀅𑀳𑀁 𑀅𑀗𑁆𑀕𑀼𑀮𑀺𑀫𑀸𑀮 𑀲𑀩𑁆𑀩𑀤𑀸, 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁;

𑀢𑀼𑀯𑀜𑁆𑀘 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑁄𑀲𑀺, 𑀢𑀲𑁆𑀫𑀸 𑀞𑀺𑀢𑁄𑀳𑀁 𑀢𑀼𑀯𑀫𑀝𑁆𑀞𑀺𑀢𑁄𑀲𑀻’’𑀢𑀺. 𑁋

𑀕𑀸𑀣𑀸𑀬 𑀢𑀁 𑀅𑀚𑁆𑀛𑀪𑀸𑀲𑀺.

𑀢𑀢𑁆𑀣 𑀞𑀺𑀢𑁄 𑀅𑀳𑀁, 𑀅𑀗𑁆𑀕𑀼𑀮𑀺𑀫𑀸𑀮, 𑀲𑀩𑁆𑀩𑀤𑀸, 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀦𑁆𑀢𑀺, 𑀅𑀗𑁆𑀕𑀼𑀮𑀺𑀫𑀸𑀮, 𑀅𑀳𑀁 𑀲𑀩𑁆𑀩𑀤𑀸 𑀲𑀩𑁆𑀩𑀓𑀸𑀮𑁂 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀢𑀲𑀣𑀸𑀯𑀭𑀪𑁂𑀤𑁂𑀲𑀼 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀤𑀡𑁆𑀟𑀁 𑀦𑀺𑀥𑀸𑀬 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀢𑀢𑁄 𑀅𑀜𑁆𑀜𑀣𑀸 𑀅𑀯𑀢𑁆𑀢𑀦𑀢𑁄 𑀏𑀯𑀭𑀽𑀧𑁂𑀦𑁂𑀯 𑀞𑀺𑀢𑁄. 𑀢𑀼𑀯𑀜𑁆𑀘 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑁄𑀲𑀻𑀢𑀺 𑀢𑁆𑀯𑀁 𑀧𑀦 𑀲𑀢𑁆𑀢𑁂𑀲𑀼 𑀲𑀜𑁆𑀜𑀫𑀭𑀳𑀺𑀢𑁄 𑀅𑀲𑀺, 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑀳𑀢𑁂 𑀦𑀺𑀯𑀺𑀝𑁆𑀞𑁄 𑀅𑀤𑀬𑀸𑀧𑀦𑁆𑀦𑁄, 𑀢𑀲𑁆𑀫𑀸 𑀅𑀲𑀜𑁆𑀜𑀢𑁄 𑀯𑀺𑀭𑀢𑀺𑀯𑀲𑁂𑀦 𑀅𑀝𑁆𑀞𑀺𑀢𑁄. 𑀢𑀢𑁄 𑀏𑀯 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀧𑀭𑀺𑀩𑁆𑀪𑀫𑀦𑀢𑁄𑀧𑀺 𑀢𑀼𑀯𑀁 𑀇𑀤𑀸𑀦𑀺 𑀇𑀭𑀺𑀬𑀸𑀧𑀣𑁂𑀦 𑀞𑀺𑀢𑁄𑀧𑀺 𑀅𑀝𑁆𑀞𑀺𑀢𑁄 𑀅𑀲𑀺, 𑀅𑀳𑀁 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀞𑀺𑀢𑁄𑀢𑀺. 𑀢𑀢𑁄 𑀅𑀗𑁆𑀕𑀼𑀮𑀺𑀫𑀸𑀮𑁄 𑀬𑀣𑀸𑀪𑀼𑀘𑁆𑀘𑀕𑀼𑀡𑀧𑁆𑀧𑀪𑀸𑀯𑀺𑀢𑀲𑁆𑀲 𑀚𑀮𑀢𑀮𑁂 𑀢𑁂𑀮𑀲𑁆𑀲 𑀯𑀺𑀬 𑀲𑀓𑀮𑀁 𑀮𑁄𑀓𑀁 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀲𑁆𑀲 𑀪𑀕𑀯𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀲𑀼𑀢𑀧𑀼𑀩𑁆𑀩𑀢𑁆𑀢𑀸 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑁆𑀲 𑀘 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 ‘‘𑀅𑀬𑀁 𑀲𑁄 𑀪𑀕𑀯𑀸’’𑀢𑀺 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁄 ‘‘𑀫𑀳𑀸 𑀅𑀬𑀁 𑀲𑀻𑀳𑀦𑀸𑀤𑁄, 𑀫𑀳𑀦𑁆𑀢𑀁 𑀕𑀚𑁆𑀚𑀺𑀢𑀁, 𑀦𑀬𑀺𑀤𑀁 𑀅𑀜𑁆𑀜𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀲𑀫𑀡𑀲𑁆𑀲 𑀫𑀜𑁆𑀜𑁂 𑀕𑁄𑀢𑀫𑀲𑁆𑀲 𑀏𑀢𑀁 𑀕𑀚𑁆𑀚𑀺𑀢𑀁, 𑀤𑀺𑀝𑁆𑀞𑁄 𑀯𑀢𑀫𑁆𑀳𑀺 𑀫𑀳𑁂𑀲𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦, 𑀫𑀬𑁆𑀳𑀁 𑀲𑀗𑁆𑀕𑀳𑀓𑀭𑀡𑀢𑁆𑀣𑀁 𑀪𑀕𑀯𑀸 𑀇𑀥𑀸𑀕𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋

𑁮𑁬𑁮. ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀫𑀳𑀺𑀢𑁄 𑀫𑀳𑁂𑀲𑀻, 𑀫𑀳𑀸𑀯𑀦𑀁 𑀲𑀫𑀡𑁄 𑀧𑀘𑁆𑀘𑀧𑀸𑀤𑀺;

𑀲𑁄𑀳𑀁 𑀘𑀚𑀺𑀲𑁆𑀲𑀸𑀫𑀺 𑀲𑀳𑀲𑁆𑀲𑀧𑀸𑀧𑀁, 𑀲𑀼𑀢𑁆𑀯𑀸𑀦 𑀕𑀸𑀣𑀁 𑀢𑀯 𑀥𑀫𑁆𑀫𑀬𑀼𑀢𑁆𑀢’’𑀦𑁆𑀢𑀺. 𑁋

𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀘𑀺𑀭𑀲𑁆𑀲𑀁 𑀯𑀢𑀸𑀢𑀺 𑀘𑀺𑀭𑀓𑀸𑀮𑁂𑀦 𑀯𑀢. 𑀫𑁂𑀢𑀺 𑀫𑀬𑁆𑀳𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬. 𑀫𑀳𑀺𑀢𑁄𑀢𑀺 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀫𑀳𑀢𑀺𑀬𑀸 𑀧𑀽𑀚𑀸𑀬 𑀧𑀽𑀚𑀺𑀢𑁄. 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑁂 𑀏𑀲𑀺, 𑀕𑀯𑁂𑀲𑀻𑀢𑀺 𑀫𑀳𑁂𑀲𑀻. 𑀫𑀳𑀸𑀯𑀦𑀁 𑀲𑀫𑀡𑁄 𑀧𑀘𑁆𑀘𑀧𑀸𑀤𑀻𑀢𑀺 𑀇𑀫𑀁 𑀫𑀳𑀸𑀭𑀜𑁆𑀜𑀁 𑀲𑀫𑀺𑀢𑀲𑀩𑁆𑀩𑀧𑀸𑀧𑁄 𑀪𑀕𑀯𑀸 𑀧𑀝𑀺𑀧𑀚𑁆𑀚𑀺. 𑀲𑁄𑀳𑀁 𑀘𑀚𑀺𑀲𑁆𑀲𑀸𑀫𑀺 𑀲𑀳𑀲𑁆𑀲𑀧𑀸𑀧𑀁, 𑀲𑀼𑀢𑁆𑀯𑀸𑀦 𑀕𑀸𑀣𑀁 𑀢𑀯 𑀥𑀫𑁆𑀫𑀬𑀼𑀢𑁆𑀢𑀦𑁆𑀢𑀺 𑀲𑁄𑀳𑀁 𑀥𑀫𑁆𑀫𑀬𑀼𑀢𑁆𑀢𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀢𑀯 𑀕𑀸𑀣𑀁 𑀲𑀼𑀡𑀺𑀁. 𑀲𑁄𑀳𑀁 𑀢𑀁 𑀲𑀼𑀢𑁆𑀯𑀸𑀦 ‘‘𑀘𑀺𑀭𑀲𑁆𑀲𑀫𑁆𑀧𑀺 𑀘𑀺𑀭𑀓𑀸𑀮𑁂𑀦𑀧𑀺 𑀲𑀗𑁆𑀕𑀢𑀁 𑀧𑀭𑀺𑀘𑀺𑀢𑀁 𑀧𑀸𑀧𑀲𑀳𑀲𑁆𑀲𑀁 𑀧𑀚𑀳𑀺𑀲𑁆𑀲’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀤𑀸𑀦𑀺 𑀦𑀁 𑀅𑀜𑁆𑀜𑀤𑀢𑁆𑀣𑀼 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀦 𑀯𑀢𑁆𑀯𑀸 𑀬𑀣𑀸 𑀧𑀝𑀺𑀧𑀚𑁆𑀚𑀺, 𑀬𑀣𑀸 𑀘 𑀪𑀕𑀯𑀢𑀸 𑀅𑀦𑀼𑀕𑁆𑀕𑀳𑀺𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑁋

𑁮𑁬𑁯. ‘‘𑀇𑀘𑁆𑀘𑁂𑀯 𑀘𑁄𑀭𑁄 𑀅𑀲𑀺𑀫𑀸𑀯𑀼𑀥𑀜𑁆𑀘, 𑀲𑁄𑀩𑁆𑀪𑁂 𑀧𑀧𑀸𑀢𑁂 𑀦𑀭𑀓𑁂 𑀅𑀦𑁆𑀯𑀓𑀸𑀲𑀺;

𑀅𑀯𑀦𑁆𑀤𑀺 𑀘𑁄𑀭𑁄 𑀲𑀼𑀕𑀢𑀲𑁆𑀲 𑀧𑀸𑀤𑁂, 𑀢𑀢𑁆𑀣𑁂𑀯 𑀧𑀩𑁆𑀩𑀚𑁆𑀚𑀫𑀬𑀸𑀘𑀺 𑀩𑀼𑀤𑁆𑀥𑀁.

𑁮𑁭𑁦. ‘‘𑀩𑀼𑀤𑁆𑀥𑁄 𑀘 𑀔𑁄 𑀓𑀸𑀭𑀼𑀡𑀺𑀓𑁄 𑀫𑀳𑁂𑀲𑀺, 𑀬𑁄 𑀲𑀢𑁆𑀣𑀸 𑀮𑁄𑀓𑀲𑁆𑀲 𑀲𑀤𑁂𑀯𑀓𑀲𑁆𑀲;

𑀢𑀫𑁂𑀳𑀺 𑀪𑀺𑀓𑁆𑀔𑀽𑀢𑀺 𑀢𑀤𑀸 𑀅𑀯𑁄𑀘, 𑀏𑀲𑁂𑀯 𑀢𑀲𑁆𑀲 𑀅𑀳𑀼 𑀪𑀺𑀓𑁆𑀔𑀼𑀪𑀸𑀯𑁄’’𑀢𑀺.

𑀲𑀗𑁆𑀕𑀻𑀢𑀺𑀓𑀸𑀭𑀸 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀞𑀧𑁂𑀲𑀼𑀁.

𑀢𑀢𑁆𑀣 𑀇𑀘𑁆𑀘𑁂𑀯𑀸𑀢𑀺 𑀇𑀢𑀺 𑀏𑀯 𑀏𑀯𑀁 𑀯𑀢𑁆𑀯𑀸 𑀅𑀦𑀦𑁆𑀢𑀭𑀫𑁂𑀯. 𑀘𑁄𑀭𑁄𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑁄. 𑀅𑀲𑀺𑀦𑁆𑀢𑀺 𑀔𑀕𑁆𑀕𑀁. 𑀆𑀯𑀼𑀥𑀦𑁆𑀢𑀺 𑀲𑁂𑀲𑀸𑀯𑀼𑀥𑀁. 𑀲𑁄𑀩𑁆𑀪𑁂𑀢𑀺 𑀲𑀫𑀦𑁆𑀢𑀢𑁄 𑀙𑀺𑀦𑁆𑀦𑀢𑀝𑁂. 𑀧𑀧𑀸𑀢𑁂𑀢𑀺 𑀏𑀓𑀢𑁄 𑀙𑀺𑀦𑁆𑀦𑀢𑀝𑁂. 𑀦𑀭𑀓𑁂𑀢𑀺 𑀪𑀽𑀫𑀺𑀬𑀸 𑀨𑀮𑀺𑀢𑀯𑀺𑀯𑀭𑁂. 𑀇𑀥 𑀧𑀦 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀬𑀢𑁆𑀣 𑀧𑀢𑀺𑀢𑀁 𑀅𑀜𑁆𑀜𑁂𑀦 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀸𑀤𑀺𑀲𑀁 𑀧𑀩𑁆𑀩𑀢𑀦𑁆𑀢𑀭𑀫𑁂𑀯 𑀯𑀤𑀢𑀺. 𑀅𑀦𑁆𑀯𑀓𑀸𑀲𑀻𑀢𑀺 𑀅𑀦𑀼 𑀅𑀓𑀸𑀲𑀺, 𑀧𑀜𑁆𑀘𑀯𑀺𑀥𑀫𑁆𑀧𑀺 𑀅𑀢𑁆𑀢𑀦𑁄 𑀆𑀯𑀼𑀥𑀁 𑀅𑀦𑀼 𑀔𑀺𑀧𑀺 𑀙𑀟𑁆𑀟𑁂𑀲𑀺, 𑀢𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀫𑀁, 𑀪𑀦𑁆𑀢𑁂’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀯𑀦𑁆𑀤𑀺 𑀘𑁄𑀭𑁄 𑀲𑀼𑀕𑀢𑀲𑁆𑀲 𑀧𑀸𑀤𑁂, 𑀢𑀢𑁆𑀣𑁂𑀯 𑀧𑀩𑁆𑀩𑀚𑁆𑀚𑀫𑀬𑀸𑀘𑀺 𑀩𑀼𑀤𑁆𑀥’’𑀦𑁆𑀢𑀺. 𑀏𑀯𑀁 𑀢𑁂𑀦 𑀧𑀩𑁆𑀩𑀚𑁆𑀚𑀸𑀬 𑀬𑀸𑀘𑀺𑀢𑀸𑀬 𑀲𑀢𑁆𑀣𑀸 𑀢𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀁 𑀑𑀮𑁄𑀓𑁂𑀦𑁆𑀢𑁄 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀸𑀬 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑁋 ‘‘𑀏𑀳𑀺, 𑀪𑀺𑀓𑁆𑀔𑀼, 𑀲𑁆𑀯𑀸𑀔𑀸𑀢𑁄 𑀥𑀫𑁆𑀫𑁄, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀆𑀳. 𑀲𑀸 𑀏𑀯 𑀘 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀢𑀫𑁂𑀳𑀺 𑀪𑀺𑀓𑁆𑀔𑀽𑀢𑀺 𑀢𑀤𑀸 𑀅𑀯𑁄𑀘, 𑀏𑀲𑁂𑀯 𑀢𑀲𑁆𑀲 𑀅𑀳𑀼 𑀪𑀺𑀓𑁆𑀔𑀼𑀪𑀸𑀯𑁄’’𑀢𑀺.

𑀏𑀯𑀁 𑀣𑁂𑀭𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀉𑀤𑀸𑀦𑀯𑀲𑁂𑀦 𑁋

𑁮𑁭𑁧. ‘‘𑀬𑁄 𑀘 𑀧𑀼𑀩𑁆𑀩𑁂 𑀧𑀫𑀚𑁆𑀚𑀺𑀢𑁆𑀯𑀸, 𑀧𑀘𑁆𑀙𑀸 𑀲𑁄 𑀦𑀧𑁆𑀧𑀫𑀚𑁆𑀚𑀢𑀺;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸.

𑁮𑁭𑁨. ‘‘𑀬𑀲𑁆𑀲 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀓𑀼𑀲𑀮𑁂𑀦 𑀧𑀺𑀥𑀻𑀬𑀢𑀺;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸.

𑁮𑁭𑁩. ‘‘𑀬𑁄 𑀳𑀯𑁂 𑀤𑀳𑀭𑁄 𑀪𑀺𑀓𑁆𑀔𑀼, 𑀬𑀼𑀜𑁆𑀚𑀢𑀺 𑀩𑀼𑀤𑁆𑀥𑀲𑀸𑀲𑀦𑁂;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺. 𑁋 𑀕𑀸𑀣𑀢𑁆𑀢𑀬𑀁 𑀅𑀪𑀸𑀲𑀺;

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀕𑁆𑀕𑀮𑁄 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑀢𑁄 𑀧𑀼𑀩𑁆𑀩𑁂 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀸 𑀧𑀝𑀺𑀲𑀗𑁆𑀔𑀸𑀦𑀸𑀪𑀸𑀯𑁂𑀦 𑀧𑀫𑀚𑁆𑀚𑀺𑀢𑁆𑀯𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀯𑀸, 𑀧𑀘𑁆𑀙𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑁄 𑀦𑀧𑁆𑀧𑀫𑀚𑁆𑀚𑀢𑀺, 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀧𑀸𑀧𑀼𑀡𑀸𑀢𑀺, 𑀲𑁄 𑀅𑀩𑁆𑀪𑀸𑀤𑀻𑀳𑀺 𑀫𑀼𑀢𑁆𑀢𑁄 𑀘𑀦𑁆𑀤𑁄 𑀯𑀺𑀬 𑀑𑀓𑀸𑀲𑀮𑁄𑀓𑀁 𑀅𑀢𑁆𑀢𑀦𑀸 𑀅𑀥𑀺𑀕𑀢𑀸𑀳𑀺 𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀳𑀺 𑀇𑀫𑀁 𑀔𑀦𑁆𑀥𑀸𑀤𑀺𑀮𑁄𑀓𑀁 𑀑𑀪𑀸𑀲𑁂𑀢𑀻𑀢𑀺.

𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀢𑀁 𑀉𑀧𑀘𑀺𑀢𑀁 𑀧𑀸𑀧𑀓𑀫𑁆𑀫𑀁 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑁂𑀦 𑀅𑀯𑀺𑀧𑀸𑀓𑀸𑀭𑀳𑀪𑀸𑀯𑀲𑁆𑀲 𑀆𑀳𑀭𑀺𑀢𑀢𑁆𑀢𑀸 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂 𑀤𑁆𑀯𑀸𑀭𑀧𑀺𑀥𑀸𑀦𑁂𑀦 𑀧𑀺𑀥𑀻𑀬𑀢𑀺 𑀣𑀓𑀻𑀬𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀳𑀭𑁄𑀢𑀺 𑀢𑀭𑀼𑀡𑁄, 𑀢𑁂𑀦𑀲𑁆𑀲 𑀬𑁄𑀕𑀓𑁆𑀔𑀫𑀲𑀭𑀻𑀭𑀢𑀁 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀉𑀧𑁆𑀧𑀦𑁆𑀦𑀁 𑀯𑀸𑀢𑀸𑀢𑀧𑀧𑀭𑀺𑀲𑁆𑀲𑀬𑀁 𑀅𑀪𑀺𑀪𑀯𑀺𑀢𑁆𑀯𑀸 𑀬𑁄𑀕𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀼𑀜𑁆𑀚𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀲𑀺𑀓𑁆𑀔𑀢𑁆𑀢𑀬𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀳𑁄𑀢𑀺, 𑀲𑀓𑁆𑀓𑀘𑁆𑀘𑀁 𑀲𑀫𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑁄 𑀬𑀤𑀸 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀢𑀤𑀸 𑀅𑀜𑁆𑀜𑁂𑀦𑀧𑀺 𑀔𑀺𑀢𑁆𑀢𑁄 𑀮𑁂𑀟𑁆𑀟𑀼 𑀣𑁂𑀭𑀲𑁆𑀲 𑀓𑀸𑀬𑁂 𑀦𑀺𑀧𑀢𑀢𑀺, 𑀅𑀜𑁆𑀜𑁂𑀦𑀧𑀺 𑀔𑀺𑀢𑁆𑀢𑁄 𑀤𑀡𑁆𑀟𑁄 𑀢𑀲𑁆𑀲𑁂𑀯 𑀓𑀸𑀬𑁂 𑀦𑀺𑀧𑀢𑀢𑀺. 𑀲𑁄 𑀪𑀺𑀦𑁆𑀦𑁂𑀦 𑀧𑀢𑁆𑀢𑁂𑀦 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺. 𑀲𑀢𑁆𑀣𑀸 𑀢𑀁 𑀑𑀯𑀤𑀢𑀺 ‘‘𑀅𑀥𑀺𑀯𑀸𑀲𑁂𑀳𑀺, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀅𑀥𑀺𑀯𑀸𑀲𑁂𑀳𑀺, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀲 𑀔𑁄, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑁂𑀬𑁆𑀬𑀸𑀲𑀺, 𑀢𑀲𑁆𑀲, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀲𑀁𑀯𑁂𑀤𑁂𑀲𑀻’’𑀢𑀺. 𑀅𑀣 𑀣𑁂𑀭𑁄 𑀅𑀦𑁄𑀥𑀺𑀲𑁄 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑁋

𑁮𑁭𑁪. ‘‘𑀤𑀺𑀲𑀸𑀧𑀺 𑀫𑁂 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀼, 𑀤𑀺𑀲𑀸𑀧𑀺 𑀫𑁂 𑀬𑀼𑀜𑁆𑀚𑀦𑁆𑀢𑀼 𑀩𑀼𑀤𑁆𑀥𑀲𑀸𑀲𑀦𑁂;

𑀤𑀺𑀲𑀸𑀧𑀺 𑀫𑁂 𑀢𑁂 𑀫𑀦𑀼𑀚𑁂 𑀪𑀚𑀦𑁆𑀢𑀼, 𑀬𑁂 𑀥𑀫𑁆𑀫𑀫𑁂𑀯𑀸𑀤𑀧𑀬𑀦𑁆𑀢𑀺 𑀲𑀦𑁆𑀢𑁄.

𑁮𑁭𑁫. ‘‘𑀤𑀺𑀲𑀸 𑀳𑀺 𑀫𑁂 𑀔𑀦𑁆𑀢𑀺𑀯𑀸𑀤𑀸𑀦𑀁, 𑀅𑀯𑀺𑀭𑁄𑀥𑀧𑁆𑀧𑀲𑀁𑀲𑀺𑀦𑀁;

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀓𑀸𑀮𑁂𑀦, 𑀢𑀜𑁆𑀘 𑀅𑀦𑀼𑀯𑀺𑀥𑀻𑀬𑀦𑁆𑀢𑀼.

𑁮𑁭𑁬. ‘‘𑀦 𑀳𑀺 𑀚𑀸𑀢𑀼 𑀲𑁄 𑀫𑀫𑀁 𑀳𑀺𑀁𑀲𑁂, 𑀅𑀜𑁆𑀜𑀁 𑀯𑀸 𑀧𑀦 𑀓𑀜𑁆𑀘𑀺 𑀦𑀁;

𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀁, 𑀭𑀓𑁆𑀔𑁂𑀬𑁆𑀬 𑀢𑀲𑀣𑀸𑀯𑀭𑁂.

𑁮𑁭𑁭. ‘‘𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀲𑀼𑀓𑀸𑀭𑀸 𑀤𑀫𑀬𑀦𑁆𑀢𑀺 𑀢𑁂𑀚𑀦𑀁;

𑀤𑀸𑀭𑀼𑀁 𑀤𑀫𑀬𑀦𑁆𑀢𑀺 𑀢𑀘𑁆𑀙𑀓𑀸, 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁮𑁭𑁮. ‘‘𑀤𑀡𑁆𑀟𑁂𑀦𑁂𑀓𑁂 𑀤𑀫𑀬𑀦𑁆𑀢𑀺, 𑀅𑀗𑁆𑀓𑀼𑀲𑁂𑀪𑀺 𑀓𑀲𑀸𑀳𑀺 𑀘;

𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦, 𑀅𑀳𑀁 𑀤𑀦𑁆𑀢𑁄𑀫𑁆𑀳𑀺 𑀢𑀸𑀤𑀺𑀦𑀸.

𑁮𑁭𑁯. ‘‘𑀅𑀳𑀺𑀁𑀲𑀓𑁄𑀢𑀺 𑀫𑁂 𑀦𑀸𑀫𑀁, 𑀳𑀺𑀁𑀲𑀓𑀲𑁆𑀲 𑀧𑀼𑀭𑁂 𑀲𑀢𑁄;

𑀅𑀚𑁆𑀚𑀸𑀳𑀁 𑀲𑀘𑁆𑀘𑀦𑀸𑀫𑁄𑀫𑁆𑀳𑀺, 𑀦 𑀦𑀁 𑀳𑀺𑀁𑀲𑀸𑀫𑀺 𑀓𑀜𑁆𑀘𑀺 𑀦𑀁.

𑁮𑁮𑁦. ‘‘𑀘𑁄𑀭𑁄 𑀅𑀳𑀁 𑀧𑀼𑀭𑁂 𑀆𑀲𑀺𑀁, 𑀅𑀗𑁆𑀕𑀼𑀮𑀺𑀫𑀸𑀮𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀯𑀼𑀬𑁆𑀳𑀫𑀸𑀦𑁄 𑀫𑀳𑁄𑀖𑁂𑀦, 𑀩𑀼𑀤𑁆𑀥𑀁 𑀲𑀭𑀡𑀫𑀸𑀕𑀫𑀁.

𑁮𑁮𑁧. ‘‘𑀮𑁄𑀳𑀺𑀢𑀧𑀸𑀡𑀺 𑀧𑀼𑀭𑁂 𑀆𑀲𑀺𑀁, 𑀅𑀗𑁆𑀕𑀼𑀮𑀺𑀫𑀸𑀮𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀲𑀭𑀡𑀕𑀫𑀦𑀁 𑀧𑀲𑁆𑀲, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁮𑁮𑁨. ‘‘𑀢𑀸𑀤𑀺𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸𑀦, 𑀩𑀳𑀼𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑀁;

𑀨𑀼𑀝𑁆𑀞𑁄 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀦𑀡𑁄 𑀪𑀼𑀜𑁆𑀚𑀸𑀫𑀺 𑀪𑁄𑀚𑀦𑀁.

𑁮𑁮𑁩. ‘‘𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀩𑀸𑀮𑀸 𑀤𑀼𑀫𑁆𑀫𑁂𑀥𑀺𑀦𑁄 𑀚𑀦𑀸;

𑀅𑀧𑁆𑀧𑀫𑀸𑀤𑀜𑁆𑀘 𑀫𑁂𑀥𑀸𑀯𑀻, 𑀥𑀦𑀁 𑀲𑁂𑀝𑁆𑀞𑀁𑀯 𑀭𑀓𑁆𑀔𑀢𑀺.

𑁮𑁮𑁪. ‘‘𑀫𑀸 𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑁂𑀣, 𑀫𑀸 𑀓𑀸𑀫𑀭𑀢𑀺𑀲𑀦𑁆𑀣𑀯𑀁;

𑀅𑀧𑁆𑀧𑀫𑀢𑁆𑀢𑁄 𑀳𑀺 𑀛𑀸𑀬𑀦𑁆𑀢𑁄, 𑀧𑀧𑁆𑀧𑁄𑀢𑀺 𑀧𑀭𑀫𑀁 𑀲𑀼𑀔𑀁.

𑁮𑁮𑁫. ‘‘𑀲𑁆𑀯𑀸𑀕𑀢𑀁 𑀦𑀸𑀧𑀕𑀢𑀁, 𑀦𑁂𑀢𑀁 𑀤𑀼𑀫𑁆𑀫𑀦𑁆𑀢𑀺𑀢𑀁 𑀫𑀫;

𑀲𑀯𑀺𑀪𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀬𑀁 𑀲𑁂𑀝𑁆𑀞𑀁 𑀢𑀤𑀼𑀧𑀸𑀕𑀫𑀁.

𑁮𑁮𑁬. ‘‘𑀲𑁆𑀯𑀸𑀕𑀢𑀁 𑀦𑀸𑀧𑀕𑀢𑀁, 𑀦𑁂𑀢𑀁 𑀤𑀼𑀫𑁆𑀫𑀦𑁆𑀢𑀺𑀢𑀁 𑀫𑀫;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁮𑁭. ‘‘𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀧𑀩𑁆𑀩𑀢𑁂𑀲𑀼 𑀕𑀼𑀳𑀸𑀲𑀼 𑀯𑀸;

𑀢𑀢𑁆𑀣 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺𑀁, 𑀉𑀩𑁆𑀩𑀺𑀕𑁆𑀕𑀫𑀦𑀲𑁄 𑀢𑀤𑀸.

𑁮𑁮𑁮. ‘‘𑀲𑀼𑀔𑀁 𑀲𑀬𑀸𑀫𑀺 𑀞𑀸𑀬𑀸𑀫𑀺, 𑀲𑀼𑀔𑀁 𑀓𑀧𑁆𑀧𑁂𑀫𑀺 𑀚𑀻𑀯𑀺𑀢𑀁;

𑀅𑀳𑀢𑁆𑀣𑀧𑀸𑀲𑁄 𑀫𑀸𑀭𑀲𑁆𑀲, 𑀅𑀳𑁄 𑀲𑀢𑁆𑀣𑀸𑀦𑀼𑀓𑀫𑁆𑀧𑀺𑀢𑁄.

𑁮𑁮𑁯. ‘‘𑀩𑁆𑀭𑀳𑁆𑀫𑀚𑀘𑁆𑀘𑁄 𑀧𑀼𑀭𑁂 𑀆𑀲𑀺𑀁, 𑀉𑀤𑀺𑀘𑁆𑀘𑁄 𑀉𑀪𑀢𑁄 𑀅𑀳𑀼.

𑀲𑁄𑀚𑁆𑀚 𑀧𑀼𑀢𑁆𑀢𑁄 𑀲𑀼𑀕𑀢𑀲𑁆𑀲, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀢𑁆𑀣𑀼𑀦𑁄.

𑁮𑁯𑁦. ‘‘𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄;

𑀅𑀖𑀫𑀽𑀮𑀁 𑀯𑀥𑀺𑀢𑁆𑀯𑀸𑀦, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄.

𑁮𑁯𑁧. ‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀤𑀺𑀲𑀸𑀧𑀻𑀢𑀺 𑀫𑀬𑁆𑀳𑀁 𑀤𑀺𑀲𑀸𑀧𑀺 𑀅𑀫𑀺𑀢𑁆𑀢𑀸 𑀧𑀘𑁆𑀘𑀢𑁆𑀣𑀺𑀓𑀸𑀧𑀺 𑀬𑁂 𑀫𑀁 𑀏𑀯𑀁 𑀉𑀧𑀯𑀤𑀦𑁆𑀢𑀺 ‘‘𑀬𑀣𑀸 𑀫𑀬𑀁 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 𑀯𑀲𑁂𑀦 𑀜𑀸𑀢𑀺𑀯𑀺𑀬𑁄𑀕𑀤𑀼𑀓𑁆𑀔𑀧𑀭𑁂𑀢𑀸 𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀫, 𑀏𑀯𑀁 𑀅𑀗𑁆𑀕𑀼𑀮𑀺𑀫𑀸𑀮𑁄𑀧𑀺 𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀽’’𑀢𑀺. 𑀫𑁂 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀽𑀢𑀺 𑀫𑀬𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀼𑀢𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁 𑀲𑀼𑀡𑀦𑁆𑀢𑀼. 𑀬𑀼𑀜𑁆𑀚𑀦𑁆𑀢𑀽𑀢𑀺 𑀲𑀼𑀢𑁆𑀯𑀸 𑀘 𑀢𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀼. 𑀢𑁂 𑀫𑀦𑀼𑀚𑁂 𑀪𑀚𑀦𑁆𑀢𑀽𑀢𑀺 𑀢𑀸𑀤𑀺𑀲𑁂 𑀲𑀧𑁆𑀧𑀼𑀭𑀺𑀲𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀦𑁆𑀢𑀼 𑀲𑁂𑀯𑀦𑁆𑀢𑀼. 𑀬𑁂 𑀥𑀫𑁆𑀫𑀫𑁂𑀯𑀸𑀤𑀧𑀬𑀦𑁆𑀢𑀺 𑀲𑀦𑁆𑀢𑁄𑀢𑀺 𑀬𑁂 𑀲𑀧𑁆𑀧𑀼𑀭𑀺𑀲𑀸 𑀓𑀼𑀲𑀮𑀥𑀫𑁆𑀫𑀫𑁂𑀯, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀫𑁂𑀯, 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀘 𑀆𑀤𑀧𑁂𑀦𑁆𑀢𑀺 𑀲𑀫𑀸𑀤𑀧𑁂𑀦𑁆𑀢𑀺 𑀕𑀡𑁆𑀳𑀸𑀧𑁂𑀦𑁆𑀢𑀺.

𑀔𑀦𑁆𑀢𑀺𑀯𑀸𑀤𑀸𑀦𑀦𑁆𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀫𑁂𑀯 𑀯𑀤𑀦𑁆𑀢𑀸𑀦𑀁 𑀢𑀢𑁄 𑀏𑀯 𑀅𑀯𑀺𑀭𑁄𑀥𑀧𑁆𑀧𑀲𑀁𑀲𑀺𑀦𑀦𑁆𑀢𑀺 𑀓𑁂𑀦𑀘𑀺 𑀅𑀯𑀺𑀭𑁄𑀥𑀪𑀽𑀢𑀸𑀬 𑀫𑁂𑀢𑁆𑀢𑀸𑀬 𑀏𑀯 𑀧𑀲𑀁𑀲𑀦𑀲𑀻𑀮𑀸𑀦𑀁. 𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑁂 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀼. 𑀢𑀜𑁆𑀘 𑀅𑀦𑀼𑀯𑀺𑀥𑀻𑀬𑀦𑁆𑀢𑀽𑀢𑀺 𑀢𑀜𑁆𑀘 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀲𑀫𑁆𑀫𑀤𑁂𑀯 𑀉𑀕𑁆𑀕𑀳𑀺𑀢𑁆𑀯𑀸 𑀅𑀦𑀼𑀓𑀭𑁄𑀦𑁆𑀢𑀼 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀦𑁆𑀢𑀽𑀢𑀺 𑀅𑀢𑁆𑀣𑁄.

𑀦 𑀳𑀺 𑀚𑀸𑀢𑀼 𑀲𑁄 𑀫𑀫𑀁 𑀳𑀺𑀁𑀲𑁂𑀢𑀺 𑀲𑁄 𑀫𑀬𑁆𑀳𑀁 𑀤𑀺𑀲𑁄 𑀧𑀘𑁆𑀘𑀢𑁆𑀣𑀺𑀓𑁄 𑀚𑀸𑀢𑀼, 𑀏𑀓𑀁𑀲𑁂𑀦𑁂𑀯 𑀫𑀁 𑀦 𑀳𑀺𑀁𑀲𑁂, 𑀦 𑀩𑀸𑀥𑁂𑀬𑁆𑀬. 𑀅𑀜𑁆𑀜𑀁 𑀯𑀸 𑀧𑀦 𑀓𑀜𑁆𑀘𑀺 𑀦𑀦𑁆𑀢𑀺 𑀦 𑀓𑁂𑀯𑀮𑀁 𑀫𑀁𑀬𑁂𑀯, 𑀅𑀜𑁆𑀜𑀁 𑀯𑀸𑀧𑀺 𑀓𑀜𑁆𑀘𑀺 𑀲𑀢𑁆𑀢𑀁 𑀦 𑀳𑀺𑀁𑀲𑁂𑀬𑁆𑀬, 𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀦𑁆𑀢𑀺, 𑀧𑀭𑀫𑀁 𑀉𑀢𑁆𑀢𑀫𑀁 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑁂𑀬𑁆𑀬, 𑀧𑀸𑀧𑀼𑀡𑀺𑀢𑁆𑀯𑀸 𑀘 𑀭𑀓𑁆𑀔𑁂𑀬𑁆𑀬 𑀢𑀲𑀣𑀸𑀯𑀭𑁂𑀢𑀺 𑀲𑀩𑁆𑀩𑁂 𑀘 𑀲𑀢𑁆𑀢𑁂 𑀧𑀭𑀫𑀸𑀬 𑀭𑀓𑁆𑀔𑀸𑀬 𑀭𑀓𑁆𑀔𑁂𑀬𑁆𑀬, 𑀲𑀺𑀲𑁆𑀲𑀁 𑀧𑀼𑀢𑁆𑀢𑀁 𑀯𑀺𑀬 𑀧𑀭𑀺𑀧𑀸𑀮𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀣𑁂𑀭𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀭𑁂 𑀧𑀸𑀧𑀢𑁄 𑀧𑀭𑀺𑀫𑁄𑀘𑁂𑀦𑁆𑀢𑁄 𑀧𑀭𑀺𑀢𑁆𑀢𑀓𑀺𑀭𑀺𑀬𑀁 𑀦𑀸𑀫 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀉𑀤𑀓𑀁 𑀳𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀣𑀯𑀺𑀬𑀸 𑀣𑀮𑀝𑁆𑀞𑀸𑀦𑀁 𑀔𑀡𑀺𑀢𑁆𑀯𑀸 𑀦𑀺𑀦𑁆𑀦𑀝𑁆𑀞𑀸𑀦𑀁 𑀧𑀽𑀭𑁂𑀢𑁆𑀯𑀸 𑀫𑀸𑀢𑀺𑀓𑀁 𑀯𑀸 𑀓𑀢𑁆𑀯𑀸 𑀭𑀼𑀓𑁆𑀔𑀤𑁄𑀡𑀺𑀁 𑀯𑀸 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀓𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀉𑀤𑀓𑀁 𑀦𑁂𑀦𑁆𑀢𑀻𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀤𑀓𑀳𑀸𑀭𑀺𑀦𑁄. 𑀢𑁂𑀚𑀦𑀦𑁆𑀢𑀺 𑀓𑀡𑁆𑀟𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦𑁂𑀢𑁆𑀢𑀺𑀓𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀤𑀓𑀁 𑀦𑀬𑀦𑁆𑀢𑀺, 𑀉𑀲𑀼𑀓𑀸𑀭𑀸𑀧𑀺 𑀢𑀸𑀧𑁂𑀢𑁆𑀯𑀸 𑀯𑀗𑁆𑀓𑀸𑀪𑀸𑀯𑀁 𑀳𑀭𑀦𑁆𑀢𑀸 𑀢𑁂𑀚𑀦𑀁 𑀉𑀲𑀼𑀁 𑀤𑀫𑀬𑀦𑁆𑀢𑀺, 𑀉𑀚𑀼𑀓𑀁 𑀓𑀭𑁄𑀦𑁆𑀢𑀺, 𑀢𑀘𑁆𑀙𑀓𑀸𑀧𑀺 𑀦𑁂𑀫𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀢𑀘𑁆𑀙𑀦𑁆𑀢𑀸 𑀤𑀸𑀭𑀼𑀁 𑀤𑀫𑀬𑀦𑁆𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀚𑀼𑀁 𑀯𑀸 𑀯𑀗𑁆𑀓𑀁 𑀯𑀸 𑀓𑀭𑁄𑀦𑁆𑀢𑀺. 𑀏𑀯𑀁 𑀏𑀢𑁆𑀢𑀓𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀡𑁆𑀟𑀺𑀢𑀸 𑀲𑀧𑁆𑀧𑀜𑁆𑀜𑀸 𑀅𑀭𑀺𑀬𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀅𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑀺, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀧𑀦 𑀏𑀓𑀦𑁆𑀢𑀤𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺.

𑀇𑀤𑀸𑀦𑀺 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺𑀦𑀸 𑀲𑀢𑁆𑀣𑀸𑀭𑀸 𑀅𑀢𑁆𑀢𑀦𑁄 𑀤𑀫𑀺𑀢𑀸𑀓𑀸𑀭𑀁 𑀓𑀢𑀜𑁆𑀜𑀼𑀢𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 ‘‘𑀤𑀡𑁆𑀟𑁂𑀦𑁂𑀓𑁂’’𑀢𑀺𑀆𑀤𑀺𑀓𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀤𑀡𑁆𑀟𑁂𑀦𑁂𑀓𑁂 𑀤𑀫𑀬𑀦𑁆𑀢𑀻𑀢𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀤𑀡𑁆𑀟𑁂𑀦, 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀦𑀸 𑀩𑀮𑀓𑀸𑀬𑁂𑀦 𑀘 𑀧𑀘𑁆𑀘𑀢𑁆𑀣𑀺𑀓𑀸𑀤𑀺𑀓𑁂 𑀤𑀫𑁂𑀦𑁆𑀢𑀺, 𑀕𑁄𑀧𑀸𑀮𑀸𑀤𑀬𑁄 𑀘 𑀕𑀸𑀯𑀸𑀤𑀺𑀓𑁂 𑀤𑀡𑁆𑀟𑁂𑀦 𑀬𑀝𑁆𑀞𑀺𑀬𑀸 𑀤𑀫𑁂𑀦𑁆𑀢𑀺. 𑀳𑀢𑁆𑀣𑀸𑀘𑀭𑀺𑀬𑀸 𑀳𑀢𑁆𑀣𑀺𑀁 𑀅𑀗𑁆𑀓𑀼𑀲𑁂𑀳𑀺, 𑀅𑀲𑁆𑀲𑀸𑀘𑀭𑀺𑀬𑀸 𑀅𑀲𑁆𑀲𑁂 𑀓𑀲𑀸𑀳𑀺 𑀘 𑀤𑀫𑁂𑀦𑁆𑀢𑀺. 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦, 𑀅𑀳𑀁 𑀤𑀦𑁆𑀢𑁄𑀫𑁆𑀳𑀺 𑀢𑀸𑀤𑀺𑀦𑀸𑀢𑀺 𑀅𑀳𑀁 𑀧𑀦 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑀺𑀦𑀸 𑀏𑀯 𑀤𑀡𑁆𑀟𑁂𑀦, 𑀯𑀺𑀦𑀸 𑀲𑀢𑁆𑀣𑁂𑀦, 𑀦𑀺𑀳𑀺𑀢𑀤𑀡𑁆𑀟𑀦𑀺𑀳𑀺𑀢𑀲𑀢𑁆𑀣𑀪𑀸𑀯𑁂𑀦 𑀤𑀦𑁆𑀢𑁄 𑀤𑀫𑀺𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄 𑀕𑀢𑁄 𑀅𑀫𑁆𑀳𑀺.

𑀅𑀳𑀺𑀁𑀲𑀓𑁄𑀢𑀺 𑀫𑁂 𑀦𑀸𑀫𑀁, 𑀳𑀺𑀁𑀲𑀓𑀲𑁆𑀲 𑀧𑀼𑀭𑁂 𑀲𑀢𑁄𑀢𑀺 𑀲𑀢𑁆𑀣𑀸𑀭𑀸 𑀲𑀫𑀸𑀕𑀫𑀢𑁄 𑀧𑀼𑀩𑁆𑀩𑁂 𑀳𑀺𑀁𑀲𑀓𑀲𑁆𑀲 𑀫𑁂 𑀲𑀫𑀸𑀦𑀲𑁆𑀲 𑀅𑀳𑀺𑀁𑀲𑀓𑁄𑀢𑀺 𑀦𑀸𑀫𑀫𑀢𑁆𑀢𑀁 𑀅𑀳𑁄𑀲𑀺. 𑀅𑀚𑁆𑀚𑀸𑀳𑀦𑁆𑀢𑀺 𑀇𑀤𑀸𑀦𑀺 𑀧𑀦𑀸𑀳𑀁 ‘‘𑀅𑀳𑀺𑀁𑀲𑀓𑁄’’𑀢𑀺 𑀲𑀘𑁆𑀘𑀦𑀸𑀫𑁄 𑀅𑀯𑀺𑀢𑀣𑀦𑀸𑀫𑁄 𑀅𑀫𑁆𑀳𑀺. 𑀢𑀲𑁆𑀫𑀸 𑀦 𑀦𑀁 𑀳𑀺𑀁𑀲𑀸𑀫𑀺 𑀓𑀜𑁆𑀘𑀺𑀧𑀺 𑀲𑀢𑁆𑀢𑀁 𑀦 𑀳𑀺𑀁𑀲𑀸𑀫𑀺 𑀦 𑀩𑀸𑀥𑁂𑀫𑀺, 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑀯𑀺𑀲𑁆𑀲𑀼𑀢𑁄𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀻 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀜𑀸𑀢𑁄. 𑀫𑀳𑁄𑀖𑁂𑀦𑀸𑀢𑀺 𑀓𑀸𑀫𑁄𑀖𑀸𑀤𑀺𑀦𑀸 𑀫𑀳𑀢𑀸 𑀑𑀖𑁂𑀦, 𑀢𑀲𑁆𑀲 𑀑𑀖𑀲𑁆𑀲 𑀯𑀺𑀘𑁆𑀙𑁂𑀤𑀓𑀭𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀩𑀼𑀤𑁆𑀥𑀲𑀗𑁆𑀔𑀸𑀢𑀁 𑀲𑀭𑀡𑀁 𑀅𑀕𑀫𑀁 𑀉𑀧𑀕𑀘𑁆𑀙𑀺𑀁.

𑀮𑁄𑀳𑀺𑀢𑀧𑀸𑀡𑀻𑀢𑀺 𑀧𑀸𑀡𑀫𑀢𑀺𑀧𑀸𑀢𑀦𑁂𑀦 𑀧𑀭𑁂𑀲𑀁 𑀮𑁄𑀳𑀺𑀢𑁂𑀦 𑀭𑀼𑀳𑀺𑀭𑁂𑀦 𑀫𑀓𑁆𑀔𑀺𑀢𑀧𑀸𑀡𑀺. 𑀲𑀭𑀡𑀕𑀫𑀦𑀁 𑀧𑀲𑁆𑀲𑀸𑀢𑀺 𑀫𑀳𑀧𑁆𑀨𑀮𑀁 𑀫𑀫 𑀲𑀭𑀡𑀕𑀫𑀦𑀁 𑀧𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀫𑁂𑀯𑀸𑀮𑀧𑀢𑀺.

𑀢𑀸𑀤𑀺𑀲𑀁 𑀓𑀫𑁆𑀫𑀦𑁆𑀢𑀺 𑀅𑀦𑁂𑀓𑀲𑀢𑀧𑀼𑀭𑀺𑀲𑀯𑀥𑀁 𑀤𑀸𑀭𑀼𑀡𑀁 𑀢𑀣𑀸𑀭𑀽𑀧𑀁 𑀧𑀸𑀧𑀓𑀫𑁆𑀫𑀁. 𑀨𑀼𑀝𑁆𑀞𑁄 𑀓𑀫𑁆𑀫𑀯𑀺𑀧𑀸𑀓𑁂𑀦𑀸𑀢𑀺 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀨𑀼𑀝𑁆𑀞𑁄, 𑀲𑀩𑁆𑀩𑀲𑁄 𑀧𑀳𑀻𑀦𑀓𑀫𑁆𑀫𑁄 𑀯𑀺𑀧𑀸𑀓𑀫𑀢𑁆𑀢𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁄. 𑀅𑀣 𑀯𑀸 𑀨𑀼𑀝𑁆𑀞𑁄 𑀓𑀫𑁆𑀫𑀯𑀺𑀧𑀸𑀓𑁂𑀦𑀸𑀢𑀺 𑀉𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑁆𑀲 𑀨𑀮𑀪𑀽𑀢𑁂𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂𑀦, 𑀮𑁄𑀓𑀼𑀢𑁆𑀢𑀭𑀓𑀫𑁆𑀫𑀲𑁆𑀲𑁂𑀯 𑀯𑀸 𑀨𑀮𑁂𑀦 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀨𑀼𑀝𑁆𑀞𑁄. 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀔𑀻𑀡𑀢𑁆𑀢𑀸 𑀅𑀦𑀡𑁄 𑀪𑀼𑀜𑁆𑀚𑀸𑀫𑀺 𑀪𑁄𑀚𑀦𑀁, 𑀪𑁄𑀚𑀦𑀸𑀧𑀤𑁂𑀲𑁂𑀦 𑀘𑀢𑁆𑀢𑀸𑀭𑁄𑀧𑀺 𑀧𑀘𑁆𑀘𑀬𑁂 𑀯𑀤𑀢𑀺.

𑀇𑀤𑀸𑀦𑀺 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀧𑀫𑀸𑀤𑀯𑀺𑀳𑀸𑀭𑀁 𑀕𑀭𑀳𑀸𑀫𑀼𑀔𑁂𑀦 𑀧𑀘𑁆𑀙𑀸 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀁 𑀧𑀲𑀁𑀲𑀦𑁆𑀢𑁄 𑀢𑀢𑁆𑀣 𑀘 𑀧𑀭𑁂𑀲𑀁 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 ‘‘𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀻’’𑀢𑀺𑀆𑀤𑀺𑀓𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀩𑀸𑀮𑀸𑀢𑀺 𑀩𑀸𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀁 𑀅𑀚𑀸𑀦𑀦𑁆𑀢𑀸. 𑀤𑀼𑀫𑁆𑀫𑁂𑀥𑀺𑀦𑁄𑀢𑀺 𑀦𑀺𑀧𑁆𑀧𑀜𑁆𑀜𑀸, 𑀢𑁂 𑀧𑀫𑀸𑀤𑁂 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀧𑀫𑀸𑀤𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀺 𑀧𑀯𑀢𑁆𑀢𑁂𑀦𑁆𑀢𑀺, 𑀧𑀫𑀸𑀤𑁂𑀦𑁂𑀯 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑀺. 𑀫𑁂𑀥𑀸𑀯𑀻𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀦 𑀧𑀡𑁆𑀟𑀺𑀢𑁄 𑀓𑀼𑀮𑀯𑀁𑀲𑀸𑀕𑀢𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀲𑀢𑁆𑀢𑀭𑀢𑀦𑀥𑀦𑀁 𑀯𑀺𑀬 𑀅𑀧𑁆𑀧𑀫𑀸𑀤𑀁 𑀭𑀓𑁆𑀔𑀢𑀺. 𑀬𑀣𑀸 𑀳𑀺 ‘‘𑀉𑀢𑁆𑀢𑀫𑀁 𑀥𑀦𑀁 𑀦𑀺𑀲𑁆𑀲𑀸𑀬 𑀪𑁄𑀕𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫, 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀲𑁆𑀲𑀸𑀫, 𑀲𑀼𑀕𑀢𑀺𑀫𑀕𑁆𑀕𑀁 𑀲𑁄𑀥𑁂𑀲𑁆𑀲𑀸𑀫𑀸’’𑀢𑀺 𑀥𑀦𑁂 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀸 𑀥𑀦𑀁 𑀭𑀓𑁆𑀔𑀦𑁆𑀢𑀺; 𑀏𑀯𑀁 𑀧𑀡𑁆𑀟𑀺𑀢𑁄𑀧𑀺 ‘‘𑀅𑀧𑁆𑀧𑀫𑀸𑀤𑀁 𑀦𑀺𑀲𑁆𑀲𑀸𑀬 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀧𑀝𑀺𑀮𑀪𑀺𑀲𑁆𑀲𑀸𑀫𑀺, 𑀫𑀕𑁆𑀕𑀨𑀮𑀸𑀦𑀺 𑀧𑀸𑀧𑀼𑀡𑀺𑀲𑁆𑀲𑀸𑀫𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀧𑁆𑀧𑀫𑀸𑀤𑁂 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑁄 𑀥𑀦𑀁 𑀲𑁂𑀝𑁆𑀞𑀁𑀯 𑀅𑀧𑁆𑀧𑀫𑀸𑀤𑀁 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄.

𑀫𑀸 𑀧𑀫𑀸𑀤𑀦𑁆𑀢𑀺 𑀧𑀫𑀸𑀤𑀁 𑀫𑀸 𑀅𑀦𑀼𑀬𑀼𑀜𑁆𑀚𑁂𑀣 𑀧𑀫𑀸𑀤𑁂𑀦 𑀓𑀸𑀮𑀁 𑀫𑀸 𑀯𑀻𑀢𑀺𑀦𑀸𑀫𑀬𑀺𑀢𑁆𑀣. 𑀓𑀸𑀫𑀭𑀢𑀺𑀲𑀦𑁆𑀣𑀯𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼, 𑀓𑀺𑀮𑁂𑀲𑀓𑀸𑀫𑁂𑀲𑀼 𑀘 𑀭𑀢𑀺𑀲𑀗𑁆𑀔𑀸𑀢𑀁 𑀢𑀡𑁆𑀳𑀸𑀲𑀦𑁆𑀣𑀯𑀫𑁆𑀧𑀺 𑀫𑀸 𑀅𑀦𑀼𑀬𑀼𑀜𑁆𑀚𑁂𑀣 𑀫𑀸 𑀯𑀺𑀦𑁆𑀤𑀺𑀢𑁆𑀣 𑀫𑀸 𑀧𑀝𑀺𑀮𑀪𑀺𑀢𑁆𑀣. 𑀅𑀧𑁆𑀧𑀫𑀢𑁆𑀢𑁄 𑀳𑀻𑀢𑀺 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀅𑀧𑁆𑀧𑀫𑀢𑁆𑀢𑁄 𑀧𑀼𑀕𑁆𑀕𑀮𑁄 𑀛𑀸𑀬𑀦𑁆𑀢𑁄 𑀛𑀸𑀬𑀦𑀧𑁆𑀧𑀲𑀼𑀢𑁄 𑀧𑀭𑀫𑀁 𑀉𑀢𑁆𑀢𑀫𑀁 𑀦𑀺𑀩𑁆𑀩𑀸𑀦𑀲𑀼𑀔𑀁 𑀧𑀸𑀧𑀼𑀡𑀸𑀢𑀺.

𑀲𑁆𑀯𑀸𑀕𑀢𑀁 𑀦𑀸𑀧𑀕𑀢𑀦𑁆𑀢𑀺 𑀬𑀁 𑀢𑀤𑀸 𑀫𑀫 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀆𑀕𑀢𑀁 𑀆𑀕𑀫𑀦𑀁, 𑀲𑀢𑁆𑀣𑀼 𑀯𑀸 𑀢𑀲𑁆𑀫𑀺𑀁 𑀫𑀳𑀸𑀯𑀦𑁂 𑀆𑀕𑀫𑀦𑀁, 𑀢𑀁 𑀲𑁆𑀯𑀸𑀕𑀢𑀁 𑀲𑁆𑀯𑀸𑀕𑀫𑀦𑀁 𑀦𑀸𑀧𑀕𑀢𑀁, 𑀅𑀢𑁆𑀣𑀢𑁄 𑀅𑀧𑁂𑀢𑀁 𑀯𑀺𑀕𑀢𑀁 𑀦 𑀳𑁄𑀢𑀺. 𑀦𑁂𑀢𑀁 𑀤𑀼𑀫𑁆𑀫𑀦𑁆𑀢𑀺𑀢𑀁 𑀫𑀫𑀸𑀢𑀺 𑀬𑀁 𑀢𑀤𑀸 𑀫𑀬𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀫𑀦𑁆𑀢𑀺𑀢𑀁, 𑀇𑀤𑀫𑁆𑀧𑀺 𑀫𑀫 𑀦 𑀤𑀼𑀫𑁆𑀫𑀦𑁆𑀢𑀺𑀢𑀁, 𑀲𑀼𑀫𑀦𑁆𑀢𑀺𑀢𑀫𑁂𑀯. 𑀓𑀲𑁆𑀫𑀸? 𑀲𑀯𑀺𑀪𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸𑀤𑀺𑀯𑀲𑁂𑀦 𑀧𑀓𑀸𑀭𑀢𑁄 𑀯𑀺𑀪𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀦𑀺𑀩𑁆𑀩𑀸𑀦𑀁. 𑀢𑀤𑀼𑀧𑀸𑀕𑀫𑀁 𑀢𑀤𑁂𑀯 𑀉𑀧𑀕𑀘𑁆𑀙𑀺𑀦𑁆𑀢𑀺 𑀅𑀢𑁆𑀣𑁄.

‘‘𑀢𑀤𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀧𑀬𑁄𑀕𑀸𑀲𑀬𑀯𑀺𑀧𑀦𑁆𑀦𑀢𑀸𑀬 𑀅𑀭𑀜𑁆𑀜𑀸𑀤𑀻𑀲𑀼 𑀤𑀼𑀓𑁆𑀔𑀁 𑀯𑀺𑀳𑀸𑀲𑀺𑀁, 𑀇𑀤𑀸𑀦𑀺 𑀧𑀬𑁄𑀕𑀸𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀢𑀢𑁆𑀣 𑀲𑀼𑀔𑀁 𑀯𑀺𑀳𑀭𑀸𑀫𑀻’’𑀢𑀺 𑀲𑀼𑀔𑀯𑀺𑀳𑀸𑀭𑀪𑀸𑀯𑀜𑁆𑀘𑁂𑀯 ‘‘𑀧𑀼𑀩𑁆𑀩𑁂 𑀚𑀸𑀢𑀺𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑁄, 𑀇𑀤𑀸𑀦𑀺 𑀲𑀢𑁆𑀣𑀼 𑀑𑀭𑀲𑀧𑀼𑀢𑁆𑀢𑀢𑀸𑀬 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀜𑁆𑀜𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀔𑀁 𑀲𑀬𑀸𑀫𑀻𑀢𑀺 𑀲𑀬𑀦𑁆𑀢𑁄𑀧𑀺 𑀲𑀼𑀔𑀁 𑀲𑀼𑀔𑁂𑀦 𑀦𑀺𑀤𑀼𑀓𑁆𑀔𑁂𑀦 𑀘𑀺𑀢𑁆𑀢𑀼𑀢𑁆𑀭𑀸𑀲𑀸𑀤𑀻𑀦𑀁 𑀅𑀪𑀸𑀯𑁂𑀦 𑀘𑁂𑀢𑁄𑀤𑀼𑀓𑁆𑀔𑀭𑀳𑀺𑀢𑁄 𑀲𑀬𑀸𑀫𑀺. 𑀞𑀸𑀬𑀸𑀫𑀻𑀢𑀺 𑀞𑀸𑀫𑀺. 𑀅𑀳𑀢𑁆𑀣𑀧𑀸𑀲𑁄 𑀫𑀸𑀭𑀲𑁆𑀲𑀸𑀢𑀺 𑀓𑀺𑀮𑁂𑀲𑀫𑀸𑀭𑀸𑀤𑀻𑀦𑀁 𑀅𑀕𑁄𑀘𑀭𑁄. 𑀅𑀳𑁄 𑀲𑀢𑁆𑀣𑀸𑀦𑀼𑀓𑀫𑁆𑀧𑀺𑀢𑁄𑀢𑀺 𑀲𑀢𑁆𑀣𑀸𑀭𑀸𑀦𑀼𑀓𑀫𑁆𑀧𑀺𑀢𑁄 𑀅𑀳𑁄.

𑀩𑁆𑀭𑀳𑁆𑀫𑀚𑀘𑁆𑀘𑁄𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑁄. 𑀉𑀤𑀺𑀘𑁆𑀘𑁄 𑀉𑀪𑀢𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀉𑀪𑀢𑁄 𑀉𑀤𑀺𑀢𑁄 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.