𑁭. 𑀓𑀸𑀴𑀺𑀕𑁄𑀥𑀸𑀧𑀼𑀢𑁆𑀢𑀪𑀤𑁆𑀤𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑀸𑀢𑀁 𑀫𑁂 𑀳𑀢𑁆𑀣𑀺𑀕𑀻𑀯𑀸𑀬𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀪𑀤𑁆𑀤𑀺𑀬𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀘𑁆𑀘𑀸𑀓𑀼𑀮𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀸𑀲𑀺. 𑀲𑁄𑀧𑀺 𑀢𑀁 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀉𑀘𑁆𑀘𑀸𑀓𑀼𑀮𑀺𑀓𑀲𑀁𑀯𑀢𑁆𑀢𑀦𑀺𑀓𑀁 𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀓𑀸𑀭𑀸𑀧𑀦𑀁, 𑀥𑀫𑁆𑀫𑀫𑀡𑁆𑀟𑀧𑁂 𑀆𑀲𑀦𑀤𑀸𑀦𑀁, 𑀩𑀻𑀚𑀦𑀻𑀤𑀸𑀦𑀁, 𑀥𑀫𑁆𑀫𑀓𑀣𑀺𑀓𑀸𑀦𑀁 𑀧𑀽𑀚𑀸𑀲𑀓𑁆𑀓𑀸𑀭𑀓𑀭𑀡𑀁, 𑀉𑀧𑁄𑀲𑀣𑀸𑀕𑀸𑀭𑁂 𑀧𑀝𑀺𑀲𑁆𑀲𑀬𑀤𑀸𑀦𑀦𑁆𑀢𑀺 𑀏𑀯𑀫𑀸𑀤𑀺𑀁 𑀬𑀸𑀯𑀚𑀻𑀯𑀁 𑀩𑀳𑀼𑀧𑀼𑀜𑁆𑀜𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀬𑀸 𑀧𑀼𑀭𑁂𑀢𑀭𑀁 𑀩𑀸𑀭𑀸𑀡𑀲𑀺𑀬𑀁 𑀓𑀼𑀝𑀼𑀫𑁆𑀩𑀺𑀬𑀖𑀭𑁂 𑀦𑀺𑀩𑁆𑀩𑀢𑁆𑀢𑁄 𑀲𑀫𑁆𑀩𑀳𑀼𑀮𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑀫𑀸𑀕𑀦𑁆𑀢𑁆𑀯𑀸 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀸𑀲𑀸𑀡𑀨𑀮𑀓𑀸𑀦𑀺 𑀅𑀢𑁆𑀣𑀭𑀺𑀢𑁆𑀯𑀸 𑀧𑀸𑀤𑁄𑀤𑀓𑀸𑀤𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀳𑀺.

𑀲𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀲𑀸𑀓𑀺𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀪𑀤𑁆𑀤𑀺𑀬𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀅𑀦𑀼𑀭𑀼𑀤𑁆𑀥𑀸𑀤𑀻𑀳𑀺 𑀧𑀜𑁆𑀘𑀳𑀺 𑀔𑀢𑁆𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀭𑀺 𑀅𑀦𑀼𑀧𑀺𑀬𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀁 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀉𑀘𑁆𑀘𑀸𑀓𑀼𑀮𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀓𑀸𑀴𑀺𑀕𑁄𑀥𑀸𑀬 𑀧𑀼𑀢𑁆𑀢𑁄 𑀅𑀪𑀺𑀓𑁆𑀔𑀡𑀁 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’𑀦𑁆𑀢𑀺 𑀯𑀤𑀢𑀺, 𑀅𑀦𑀪𑀺𑀭𑀢𑁄 𑀫𑀜𑁆𑀜𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀤𑁆𑀤𑀺𑀬, 𑀅𑀪𑀺𑀓𑁆𑀔𑀡𑀁 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’𑀦𑁆𑀢𑀺 𑀯𑀤𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 ‘‘𑀧𑀼𑀩𑁆𑀩𑁂 𑀫𑁂, 𑀪𑀦𑁆𑀢𑁂, 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀲𑁆𑀲 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑁄 𑀅𑀳𑁄𑀲𑀺𑀁, 𑀢𑀣𑀸𑀧𑀺 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀺𑀢𑁄 𑀯𑀺𑀳𑀸𑀲𑀺𑀁. 𑀇𑀤𑀸𑀦𑀺 𑀧𑀦 𑀧𑀩𑁆𑀩𑀚𑀺𑀢𑁄 𑀅𑀪𑀻𑀢𑁄 𑀅𑀦𑀼𑀩𑁆𑀩𑀺𑀕𑁆𑀕𑁄 𑀅𑀦𑀼𑀲𑁆𑀲𑀗𑁆𑀓𑀺𑀢𑁄 𑀯𑀺𑀳𑀭𑀸𑀫𑀻’’𑀢𑀺 𑀯𑀢𑁆𑀯𑀸 𑁋

𑁮𑁪𑁨. ‘‘𑀬𑀸𑀢𑀁 𑀫𑁂 𑀳𑀢𑁆𑀣𑀺𑀕𑀻𑀯𑀸𑀬, 𑀲𑀼𑀔𑀼𑀫𑀸 𑀯𑀢𑁆𑀣𑀸 𑀧𑀥𑀸𑀭𑀺𑀢𑀸;

𑀲𑀸𑀮𑀻𑀦𑀁 𑀑𑀤𑀦𑁄 𑀪𑀼𑀢𑁆𑀢𑁄, 𑀲𑀼𑀘𑀺𑀫𑀁𑀲𑀽𑀧𑀲𑁂𑀘𑀦𑁄.

𑁮𑁪𑁩. ‘‘𑀲𑁄𑀚𑁆𑀚 𑀪𑀤𑁆𑀤𑁄 𑀲𑀸𑀢𑀢𑀺𑀓𑁄, 𑀉𑀜𑁆𑀙𑀸𑀧𑀢𑁆𑀢𑀸𑀕𑀢𑁂 𑀭𑀢𑁄;

𑀛𑀸𑀬𑀢𑀺 𑀅𑀦𑀼𑀧𑀸𑀤𑀸𑀦𑁄, 𑀧𑀼𑀢𑁆𑀢𑁄 𑀕𑁄𑀥𑀸𑀬 𑀪𑀤𑁆𑀤𑀺𑀬𑁄.

𑁮𑁪𑁪. ‘‘𑀧𑀁𑀲𑀼𑀓𑀽𑀮𑀻 𑀲𑀸𑀢𑀢𑀺𑀓𑁄, 𑀉𑀜𑁆𑀙𑀸𑀧𑀢𑁆𑀢𑀸𑀕𑀢𑁂 𑀭𑀢𑁄;

𑀛𑀸𑀬𑀢𑀺 𑀅𑀦𑀼𑀧𑀸𑀤𑀸𑀦𑁄, 𑀧𑀼𑀢𑁆𑀢𑁄 𑀕𑁄𑀥𑀸𑀬 𑀪𑀤𑁆𑀤𑀺𑀬𑁄.

𑁮𑁪𑁫.

‘‘𑀧𑀺𑀡𑁆𑀟𑀧𑀸𑀢𑀻 𑀲𑀸𑀢𑀢𑀺𑀓𑁄…𑀧𑁂….

𑁮𑁪𑁬. ‘‘𑀢𑁂𑀘𑀻𑀯𑀭𑀻 𑀲𑀸𑀢𑀢𑀺𑀓𑁄…𑀧𑁂….

𑁮𑁪𑁭. ‘‘𑀲𑀧𑀤𑀸𑀦𑀘𑀸𑀭𑀻 𑀲𑀸𑀢𑀢𑀺𑀓𑁄…𑀧𑁂….

𑁮𑁪𑁮. ‘‘𑀏𑀓𑀸𑀲𑀦𑀻 𑀲𑀸𑀢𑀢𑀺𑀓𑁄…𑀧𑁂….

𑁮𑁪𑁯. ‘‘𑀧𑀢𑁆𑀢𑀧𑀺𑀡𑁆𑀟𑀻 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁦. ‘‘𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀻 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁧. ‘‘𑀆𑀭𑀜𑁆𑀜𑀺𑀓𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁨. ‘‘𑀭𑀼𑀓𑁆𑀔𑀫𑀽𑀮𑀺𑀓𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁩. ‘‘𑀅𑀩𑁆𑀪𑁄𑀓𑀸𑀲𑀻 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁪. ‘‘𑀲𑁄𑀲𑀸𑀦𑀺𑀓𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁫. ‘‘𑀬𑀣𑀸𑀲𑀦𑁆𑀣𑀢𑀺𑀓𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁬. ‘‘𑀦𑁂𑀲𑀚𑁆𑀚𑀺𑀓𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁭. ‘‘𑀅𑀧𑁆𑀧𑀺𑀘𑁆𑀙𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁮. ‘‘𑀲𑀦𑁆𑀢𑀼𑀝𑁆𑀞𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁫𑁯. ‘‘𑀧𑀯𑀺𑀯𑀺𑀢𑁆𑀢𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁬𑁦. ‘‘𑀅𑀲𑀁𑀲𑀝𑁆𑀞𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁬𑁧. ‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀲𑀸𑀢𑀢𑀺𑀓𑁄…𑀧𑁂….

𑁮𑁬𑁨. ‘‘𑀳𑀺𑀢𑁆𑀯𑀸 𑀲𑀢𑀧𑀮𑀁 𑀓𑀁𑀲𑀁, 𑀲𑁄𑀯𑀡𑁆𑀡𑀁 𑀲𑀢𑀭𑀸𑀚𑀺𑀓𑀁;

𑀅𑀕𑁆𑀕𑀳𑀺𑀁 𑀫𑀢𑁆𑀢𑀺𑀓𑀸𑀧𑀢𑁆𑀢𑀁, 𑀇𑀤𑀁 𑀤𑀼𑀢𑀺𑀬𑀸𑀪𑀺𑀲𑁂𑀘𑀦𑀁.

𑁮𑁬𑁩. ‘‘𑀉𑀘𑁆𑀘𑁂 𑀫𑀡𑁆𑀟𑀮𑀺𑀧𑀸𑀓𑀸𑀭𑁂, 𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑁂;

𑀭𑀓𑁆𑀔𑀺𑀢𑁄 𑀔𑀕𑁆𑀕𑀳𑀢𑁆𑀣𑁂𑀳𑀺, 𑀉𑀢𑁆𑀢𑀫𑀁 𑀯𑀺𑀳𑀭𑀺𑀁 𑀧𑀼𑀭𑁂.

𑁮𑁬𑁪. ‘‘𑀲𑁄𑀚𑁆𑀚 𑀪𑀤𑁆𑀤𑁄 𑀅𑀦𑀼𑀢𑁆𑀭𑀸𑀲𑀻, 𑀧𑀳𑀻𑀦𑀪𑀬𑀪𑁂𑀭𑀯𑁄;

𑀛𑀸𑀬𑀢𑀺 𑀯𑀦𑀫𑁄𑀕𑀬𑁆𑀳, 𑀧𑀼𑀢𑁆𑀢𑁄 𑀕𑁄𑀥𑀸𑀬 𑀪𑀤𑁆𑀤𑀺𑀬𑁄.

𑁮𑁬𑁫. ‘‘𑀲𑀻𑀮𑀓𑁆𑀔𑀦𑁆𑀥𑁂 𑀧𑀢𑀺𑀝𑁆𑀞𑀸𑀬, 𑀲𑀢𑀺𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀧𑀸𑀧𑀼𑀡𑀺𑀁 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬’’𑀦𑁆𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀲𑀢𑁆𑀣𑀼 𑀧𑀼𑀭𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺.

𑀢𑀢𑁆𑀣 𑀬𑀸𑀢𑀁 𑀫𑁂 𑀳𑀢𑁆𑀣𑀺𑀕𑀻𑀯𑀸𑀬𑀸𑀢𑀺, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀫𑀬𑀸 𑀕𑀘𑁆𑀙𑀦𑁆𑀢𑁂𑀦𑀸𑀧𑀺 𑀳𑀢𑁆𑀣𑀺𑀕𑀻𑀯𑀸𑀬 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀬𑀸𑀢𑀁 𑀘𑀭𑀺𑀢𑀁. 𑀯𑀢𑁆𑀣𑀸𑀦𑀺 𑀧𑀭𑀺𑀳𑀭𑀦𑁆𑀢𑁂𑀦𑀸𑀧𑀺 𑀲𑀼𑀔𑀼𑀫𑀸 𑀲𑀼𑀔𑀲𑀫𑁆𑀨𑀲𑁆𑀲𑀸 𑀓𑀸𑀲𑀺𑀓𑀯𑀢𑁆𑀣𑀯𑀺𑀲𑁂𑀲𑀸 𑀥𑀸𑀭𑀺𑀢𑀸. 𑀑𑀤𑀦𑀁 𑀪𑀼𑀜𑁆𑀚𑀦𑁆𑀢𑁂𑀦𑀸𑀧𑀺 𑀢𑀺𑀯𑀲𑁆𑀲𑀺𑀓𑀸𑀦𑀁 𑀧𑀼𑀭𑀸𑀡𑀕𑀦𑁆𑀥𑀲𑀸𑀮𑀻𑀦𑀁 𑀑𑀤𑀦𑁄 𑀢𑀺𑀢𑁆𑀢𑀺𑀭𑀓𑀧𑀺𑀜𑁆𑀚𑀭𑀸𑀤𑀺𑀦𑀸 𑀲𑀼𑀘𑀺𑀦𑀸 𑀫𑀁𑀲𑁂𑀦 𑀉𑀧𑀲𑀺𑀢𑁆𑀢𑀢𑀸𑀬 𑀲𑀼𑀘𑀺𑀫𑀁𑀲𑀽𑀧𑀲𑁂𑀘𑀦𑁄 𑀪𑀼𑀢𑁆𑀢𑁄, 𑀢𑀣𑀸𑀧𑀺 𑀢𑀁 𑀲𑀼𑀔𑀁 𑀦 𑀫𑀬𑁆𑀳𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀓𑀭𑀁 𑀅𑀳𑁄𑀲𑀺, 𑀬𑀣𑀸 𑀏𑀢𑀭𑀳𑀺 𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄𑀚𑁆𑀚 𑀪𑀤𑁆𑀤𑁄’’𑀢𑀺𑀆𑀤𑀺. 𑀏𑀢𑁆𑀣 𑀘 𑀳𑀢𑁆𑀣𑀺𑀕𑁆𑀕𑀳𑀡𑁂𑀦𑁂𑀯 𑀅𑀲𑁆𑀲𑀭𑀣𑀬𑀸𑀦𑀸𑀦𑀺, 𑀯𑀢𑁆𑀣𑀕𑁆𑀕𑀳𑀡𑁂𑀦 𑀲𑀩𑁆𑀩𑀭𑀸𑀚𑀸𑀮𑀗𑁆𑀓𑀸𑀭𑀸, 𑀑𑀤𑀦𑀕𑁆𑀕𑀳𑀡𑁂𑀦 𑀲𑀩𑁆𑀩𑀪𑁄𑀚𑀦𑀯𑀺𑀓𑀢𑀺 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄𑀚𑁆𑀚𑀸𑀢𑀺 𑀲𑁄 𑀅𑀚𑁆𑀚 𑀏𑀢𑀭𑀳𑀺 𑀧𑀩𑁆𑀩𑀚𑁆𑀚𑀸𑀬𑀁 𑀞𑀺𑀢𑁄. 𑀪𑀤𑁆𑀤𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀪𑀤𑁆𑀤𑁄. 𑀲𑀸𑀢𑀢𑀺𑀓𑁄𑀢𑀺 𑀲𑀫𑀡𑀥𑀫𑁆𑀫𑁂 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁂 𑀲𑀸𑀢𑀘𑁆𑀘𑀬𑀼𑀢𑁆𑀢𑁄. 𑀉𑀜𑁆𑀙𑀸𑀧𑀢𑁆𑀢𑀸𑀕𑀢𑁂 𑀭𑀢𑁄𑀢𑀺 𑀉𑀜𑁆𑀙𑀸𑀘𑀭𑀺𑀬𑀸𑀬 𑀧𑀢𑁆𑀢𑁂 𑀆𑀕𑀢𑁂 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂 𑀅𑀪𑀺𑀭𑀢𑁄, 𑀢𑁂𑀦𑁂𑀯 𑀲𑀦𑁆𑀢𑀼𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀛𑀸𑀬𑀢𑀻𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀛𑀸𑀦𑁂𑀦 𑀛𑀸𑀬𑀢𑀺. 𑀧𑀼𑀢𑁆𑀢𑁄 𑀕𑁄𑀥𑀸𑀬𑀸𑀢𑀺 𑀓𑀸𑀴𑀺𑀕𑁄𑀥𑀸𑀬 𑀦𑀸𑀫 𑀔𑀢𑁆𑀢𑀺𑀬𑀸𑀬 𑀧𑀼𑀢𑁆𑀢𑁄. 𑀪𑀤𑁆𑀤𑀺𑀬𑁄𑀢𑀺 𑀏𑀯𑀁𑀦𑀸𑀫𑁄 𑀅𑀢𑁆𑀢𑀸𑀦𑀫𑁂𑀯 𑀣𑁂𑀭𑁄 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺.

𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀧𑀁𑀲𑀼𑀓𑀽𑀮𑀺𑀓𑁄. 𑀲𑀗𑁆𑀖𑀪𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑁄. 𑀅𑀢𑀺𑀭𑁂𑀓𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀘𑀻𑀯𑀭𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀢𑁂𑀘𑀻𑀯𑀭𑀺𑀓𑁄. 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀲𑀧𑀤𑀸𑀦𑀘𑀸𑀭𑀻. 𑀦𑀸𑀦𑀸𑀲𑀦𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀸𑀲𑀦𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀏𑀓𑀸𑀲𑀦𑀺𑀓𑁄. 𑀤𑀼𑀢𑀺𑀬𑀓𑀪𑀸𑀚𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀧𑀢𑁆𑀢𑀧𑀺𑀡𑁆𑀟𑀺𑀓𑁄. 𑀅𑀢𑀺𑀭𑀺𑀢𑁆𑀢𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄. 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀭𑀜𑁆𑀜𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀆𑀭𑀜𑁆𑀜𑀺𑀓𑁄. 𑀙𑀦𑁆𑀦𑀯𑀸𑀲𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀭𑀼𑀓𑁆𑀔𑀫𑀽𑀮𑀺𑀓𑁄. 𑀙𑀦𑁆𑀦𑀭𑀼𑀓𑁆𑀔𑀫𑀽𑀮𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀅𑀩𑁆𑀪𑁄𑀓𑀸𑀲𑀺𑀓𑁄. 𑀦𑀲𑀼𑀲𑀸𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑁄𑀲𑀸𑀦𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀲𑁄𑀲𑀸𑀦𑀺𑀓𑁄. 𑀲𑁂𑀦𑀸𑀲𑀦𑀮𑁄𑀮𑀼𑀧𑁆𑀧𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀬𑀣𑀸𑀲𑀦𑁆𑀣𑀢𑀺𑀓𑁄. 𑀲𑀬𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑁂𑀲𑀚𑁆𑀚𑀺𑀓𑀗𑁆𑀕𑀲𑀫𑀸𑀤𑀸𑀦𑁂𑀦 𑀦𑁂𑀲𑀚𑁆𑀚𑀺𑀓𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀥𑀼𑀢𑀗𑁆𑀕𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁨 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀸.

𑀉𑀘𑁆𑀘𑁂𑀢𑀺 𑀉𑀘𑁆𑀘𑀸𑀤𑀺𑀝𑁆𑀞𑀸𑀦𑁂, 𑀉𑀧𑀭𑀺𑀧𑀸𑀲𑀸𑀤𑀢𑀸𑀬 𑀯𑀸 𑀉𑀘𑁆𑀘𑁂. 𑀫𑀡𑁆𑀟𑀮𑀺𑀧𑀸𑀓𑀸𑀭𑁂𑀢𑀺 𑀫𑀡𑁆𑀟𑀮𑀸𑀓𑀸𑀭𑁂𑀦 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁂. 𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑁂𑀢𑀺 𑀣𑀺𑀭𑁂𑀳𑀺 𑀅𑀝𑁆𑀝𑀸𑀮𑁂𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁂, 𑀦𑀕𑀭𑁂𑀢𑀺 𑀅𑀢𑁆𑀣𑁄.

𑀲𑀢𑀺𑀁 𑀧𑀜𑁆𑀜𑀜𑁆𑀘𑀸𑀢𑀺 𑀏𑀢𑁆𑀣 𑀲𑀢𑀺𑀲𑀻𑀲𑁂𑀦 𑀲𑀫𑀸𑀥𑀺𑀁 𑀯𑀤𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 ‘‘𑀲𑀢𑀺𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀏𑀯𑀁 𑀣𑁂𑀭𑁄 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀲𑀻𑀳𑀦𑀸𑀤𑀁 𑀦𑀤𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀅𑀪𑀺𑀧𑁆𑀧𑀲𑀦𑁆𑀦𑀸 𑀅𑀳𑁂𑀲𑀼𑀁.

𑀓𑀸𑀴𑀺𑀕𑁄𑀥𑀸𑀧𑀼𑀢𑁆𑀢𑀪𑀤𑁆𑀤𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.