𑁬. 𑀲𑁂𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀭𑀺𑀧𑀼𑀡𑁆𑀡𑀓𑀸𑀬𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑁂𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀕𑀡𑀧𑀸𑀫𑁄𑀓𑁆𑀔𑁄 𑀳𑀼𑀢𑁆𑀯𑀸 𑀢𑀻𑀡𑀺 𑀧𑀼𑀭𑀺𑀲𑀲𑀢𑀸𑀦𑀺 𑀲𑀫𑀸𑀤𑀧𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀁 𑀓𑀸𑀭𑁂𑀢𑁆𑀯𑀸 𑀓𑀢𑀧𑀭𑀺𑀬𑁄𑀲𑀺𑀢𑀸𑀬 𑀕𑀦𑁆𑀥𑀓𑀼𑀝𑀺𑀬𑀸 𑀲𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀕𑀯𑀢𑁄 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀽 𑀘 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀏𑀯 𑀯𑀲𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀆𑀧𑀡𑁂 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑁂𑀮𑁄𑀢𑀺 𑀮𑀤𑁆𑀥𑀦𑀸𑀫𑁄 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀻𑀲𑀼 𑀯𑁂𑀤𑁂𑀲𑀼, 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂𑀲𑀼 𑀘 𑀦𑀺𑀧𑁆𑀨𑀢𑁆𑀢𑀺𑀁 𑀕𑀦𑁆𑀢𑁆𑀯𑀸 𑀢𑀻𑀡𑀺 𑀫𑀸𑀡𑀯𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀦𑁆𑀢𑁄 𑀆𑀧𑀡𑁂 𑀧𑀝𑀺𑀯𑀲𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀟𑁆𑀠𑀢𑁂𑀴𑀲𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀲𑁂𑀮𑀲𑁆𑀲, 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀜𑀸𑀡𑀧𑀭𑀺𑀧𑀸𑀓𑀁 𑀤𑀺𑀲𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀺𑀳𑀭𑀢𑀺. 𑀅𑀣 𑀓𑁂𑀡𑀺𑀬𑁄 𑀦𑀸𑀫 𑀚𑀝𑀺𑀮𑁄 𑀲𑀢𑁆𑀣𑀼 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀢𑁆𑀣𑀸𑀭𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀓𑁂 𑀅𑀲𑁆𑀲𑀫𑁂 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑁂𑀢𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀲𑁂𑀮𑁄 𑀩𑁆𑀭𑀸𑀳𑁆𑀫𑀡𑁄 𑀲𑀤𑁆𑀥𑀺𑀁 𑀢𑀻𑀳𑀺 𑀫𑀸𑀡𑀯𑀓𑀲𑀢𑁂𑀳𑀺 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀯𑀺𑀘𑀭𑀦𑁆𑀢𑁄 𑀓𑁂𑀡𑀺𑀬𑀲𑁆𑀲 𑀅𑀲𑁆𑀲𑀫𑀁 𑀧𑀯𑀺𑀲𑀺𑀢𑁆𑀯𑀸 𑀚𑀝𑀺𑀮𑁂 𑀓𑀝𑁆𑀞𑀨𑀸𑀮𑀦𑀼𑀤𑁆𑀥𑀦𑀲𑀫𑁆𑀧𑀸𑀤𑀦𑀸𑀤𑀺𑀦𑀸 𑀤𑀸𑀦𑀽𑀧𑀓𑀭𑀡𑀁 𑀲𑀚𑁆𑀚𑁂𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀢𑁂, 𑀓𑁂𑀡𑀺𑀬, 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄’’𑀢𑀺𑀆𑀤𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀫𑀬𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸𑀯 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀢𑀸𑀯𑀤𑁂𑀯 𑀫𑀸𑀡𑀯𑀓𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀪𑀕𑀯𑀢𑁄 𑀓𑀸𑀬𑁂 𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀯𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀩𑀼𑀤𑁆𑀥𑁄 𑀯𑀸 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄, 𑀅𑀬𑀁 𑀧𑀦 𑀧𑀩𑁆𑀩𑀚𑀺𑀢𑁄, 𑀦𑁄 𑀘 𑀔𑁄 𑀦𑀁 𑀚𑀸𑀦𑀸𑀫𑀺 ‘𑀩𑀼𑀤𑁆𑀥𑁄 𑀯𑀸, 𑀦𑁄 𑀯𑀸’, 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 ‘𑀬𑁂 𑀢𑁂 𑀪𑀯𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂 𑀲𑀓𑁂 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑁄𑀦𑁆𑀢𑀻’𑀢𑀺 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑁂𑀳𑀺 𑀅𑀪𑀺𑀢𑁆𑀣𑀯𑀻𑀬𑀫𑀸𑀦𑁄 𑀲𑀸𑀭𑀚𑁆𑀚𑀢𑀺 𑀫𑀗𑁆𑀓𑀼𑀪𑀸𑀯𑀁 𑀆𑀧𑀚𑁆𑀚𑀢𑀺 𑀅𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀢𑀸𑀬 𑀅𑀦𑀦𑀼𑀬𑁄𑀕𑀓𑁆𑀔𑀫𑀢𑁆𑀢𑀸, 𑀬𑀁𑀦𑀽𑀦𑀸𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑁋

𑁮𑁧𑁮. ‘‘𑀧𑀭𑀺𑀧𑀼𑀡𑁆𑀡𑀓𑀸𑀬𑁄 𑀲𑀼𑀭𑀼𑀘𑀺, 𑀲𑀼𑀚𑀸𑀢𑁄 𑀘𑀸𑀭𑀼𑀤𑀲𑁆𑀲𑀦𑁄;

𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸, 𑀲𑀼𑀲𑀼𑀓𑁆𑀓𑀤𑀸𑀞𑁄𑀲𑀺 𑀯𑀻𑀭𑀺𑀬𑀯𑀸.

𑁮𑁧𑁯. ‘‘𑀦𑀭𑀲𑁆𑀲 𑀳𑀺 𑀲𑀼𑀚𑀸𑀢𑀲𑁆𑀲, 𑀬𑁂 𑀪𑀯𑀦𑁆𑀢𑀺 𑀯𑀺𑀬𑀜𑁆𑀚𑀦𑀸;

𑀲𑀩𑁆𑀩𑁂 𑀢𑁂 𑀢𑀯 𑀓𑀸𑀬𑀲𑁆𑀫𑀺𑀁, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸.

𑁮𑁨𑁦. ‘‘𑀧𑀲𑀦𑁆𑀦𑀦𑁂𑀢𑁆𑀢𑁄 𑀲𑀼𑀫𑀼𑀔𑁄, 𑀩𑁆𑀭𑀳𑀸 𑀉𑀚𑀼 𑀧𑀢𑀸𑀧𑀯𑀸;

𑀫𑀚𑁆𑀛𑁂 𑀲𑀫𑀡𑀲𑀗𑁆𑀖𑀲𑁆𑀲, 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀲𑀺.

𑁮𑁨𑁧. ‘‘𑀓𑀮𑁆𑀬𑀸𑀡𑀤𑀲𑁆𑀲𑀦𑁄 𑀪𑀺𑀓𑁆𑀔𑀼, 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄;

𑀓𑀺𑀁 𑀢𑁂 𑀲𑀫𑀡𑀪𑀸𑀯𑁂𑀦, 𑀏𑀯𑀁 𑀉𑀢𑁆𑀢𑀫𑀯𑀡𑁆𑀡𑀺𑀦𑁄.

𑁮𑁨𑁨. ‘‘𑀭𑀸𑀚𑀸 𑀅𑀭𑀳𑀲𑀺 𑀪𑀯𑀺𑀢𑀼𑀁, 𑀘𑀓𑁆𑀓𑀯𑀢𑁆𑀢𑀻 𑀭𑀣𑁂𑀲𑀪𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀚𑀫𑁆𑀩𑀼𑀲𑀡𑁆𑀟𑀲𑁆𑀲 𑀇𑀲𑁆𑀲𑀭𑁄.

𑁮𑁨𑁩. ‘‘𑀔𑀢𑁆𑀢𑀺𑀬𑀸 𑀪𑁄𑀕𑀻 𑀭𑀸𑀚𑀸𑀦𑁄, 𑀅𑀦𑀼𑀬𑀦𑁆𑀢𑀸 𑀪𑀯𑀦𑁆𑀢𑀺 𑀢𑁂;

𑀭𑀸𑀚𑀸𑀪𑀺𑀭𑀸𑀚𑀸 𑀫𑀦𑀼𑀚𑀺𑀦𑁆𑀤𑁄, 𑀭𑀚𑁆𑀚𑀁 𑀓𑀸𑀭𑁂𑀳𑀺 𑀕𑁄𑀢𑀫𑀸’’𑀢𑀺. 𑁋

𑀙𑀳𑀺 𑀕𑀸𑀣𑀸𑀳𑀺 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺.

𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀓𑀸𑀬𑁄𑀢𑀺 𑀅𑀪𑀺𑀩𑁆𑀬𑀢𑁆𑀢𑀭𑀽𑀧𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀁 𑀧𑀭𑀺𑀧𑀼𑀡𑁆𑀡𑀢𑀸𑀬 𑀅𑀳𑀻𑀦𑀗𑁆𑀕𑀧𑀘𑁆𑀘𑀗𑁆𑀕𑀢𑀸𑀬 𑀘 𑀧𑀭𑀺𑀧𑀼𑀡𑁆𑀡𑀲𑀭𑀻𑀭𑁄. 𑀲𑀼𑀭𑀼𑀘𑀻𑀢𑀺 𑀲𑀼𑀦𑁆𑀤𑀭𑀲𑀭𑀻𑀭𑀧𑁆𑀧𑀪𑁄. 𑀲𑀼𑀚𑀸𑀢𑁄𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸, 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀼𑀦𑀺𑀩𑁆𑀩𑀢𑁆𑀢𑁄. 𑀘𑀸𑀭𑀼𑀤𑀲𑁆𑀲𑀦𑁄𑀢𑀺 𑀲𑀼𑀘𑀺𑀭𑀫𑁆𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀚𑀦𑀓𑀁 𑀅𑀧𑁆𑀧𑀝𑀺𑀓𑁆𑀓𑀽𑀮𑀁 𑀭𑀫𑀡𑀻𑀬𑀁 𑀘𑀸𑀭𑀼 𑀏𑀯 𑀤𑀲𑁆𑀲𑀦𑀁 𑀅𑀲𑁆𑀲𑀸𑀢𑀺 𑀘𑀸𑀭𑀼𑀤𑀲𑁆𑀲𑀦𑁄. 𑀓𑁂𑀘𑀺 𑀧𑀦𑀸𑀳𑀼 ‘‘𑀘𑀸𑀭𑀼𑀤𑀲𑁆𑀲𑀦𑁄𑀢𑀺 𑀲𑀼𑀦𑁆𑀤𑀭𑀦𑁂𑀢𑁆𑀢𑁄’’𑀢𑀺. 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑁄. 𑀅𑀲𑀻𑀢𑀺 𑀪𑀯𑀲𑀺, 𑀇𑀤𑀁 𑀧𑀤𑀁 ‘‘𑀧𑀭𑀺𑀧𑀼𑀡𑁆𑀡𑀓𑀸𑀬𑁄 𑀅𑀲𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀼𑀲𑀼𑀓𑁆𑀓𑀤𑀸𑀞𑁄𑀢𑀺 𑀲𑀼𑀝𑁆𑀞𑀼 𑀲𑀼𑀓𑁆𑀓𑀤𑀸𑀞𑁄. 𑀪𑀕𑀯𑀢𑁄 𑀳𑀺 𑀤𑀸𑀞𑀸𑀳𑀺 𑀘𑀦𑁆𑀤𑀓𑀺𑀭𑀡𑀸 𑀯𑀺𑀬 𑀥𑀯𑀮𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺. 𑀯𑀻𑀭𑀺𑀬𑀯𑀸𑀢𑀺 𑀯𑀻𑀭𑀺𑀬𑀧𑀸𑀭𑀫𑀻𑀧𑀸𑀭𑀺𑀧𑀽𑀭𑀺𑀬𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑀢𑁄 𑀘𑀢𑀼𑀩𑁆𑀩𑀺𑀥𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀲𑁆𑀲 𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀢𑀺𑀲𑀬𑀬𑀼𑀢𑁆𑀢𑁄.

𑀦𑀭𑀲𑁆𑀲 𑀳𑀺 𑀲𑀼𑀚𑀸𑀢𑀲𑁆𑀲𑀸𑀢𑀺 𑀲𑀫𑀢𑀺𑀁𑀲𑀸𑀬 𑀧𑀸𑀭𑀫𑀻𑀦𑀁, 𑀅𑀭𑀺𑀬𑀲𑁆𑀲 𑀯𑀸 𑀘𑀓𑁆𑀓𑀯𑀢𑁆𑀢𑀻𑀯𑀢𑁆𑀢𑀲𑁆𑀲 𑀧𑀭𑀺𑀧𑀽𑀭𑀺𑀢𑀢𑁆𑀢𑀸 𑀲𑀼𑀝𑁆𑀞𑀼 𑀲𑀫𑁆𑀫𑀤𑁂𑀯 𑀚𑀸𑀢𑀲𑁆𑀲 𑀦𑀭𑀲𑁆𑀲, 𑀫𑀳𑀸𑀧𑀼𑀭𑀺𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂 𑀢𑁂𑀢𑀺 𑀬𑁂 𑀫𑀳𑀸𑀧𑀼𑀭𑀺𑀲𑀪𑀸𑀯𑀁 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀪𑀸𑀯𑀁 𑀩𑁆𑀬𑀜𑁆𑀚𑀬𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀤𑀺𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀗𑁆𑀔𑀸𑀢𑀸 𑀢𑀫𑁆𑀩𑀦𑀔𑀢𑀼𑀗𑁆𑀕𑀦𑀔𑀢𑀸𑀤𑀺𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀲𑀗𑁆𑀔𑀸𑀢𑀸 𑀘 𑀭𑀽𑀧𑀕𑀼𑀡𑀸, 𑀢𑁂 𑀅𑀦𑀯𑀲𑁂𑀲𑀸, 𑀢𑀯 𑀓𑀸𑀬𑀲𑁆𑀫𑀺𑀁 𑀲𑀦𑁆𑀢𑀻𑀢𑀺 𑀯𑀘𑀦𑀲𑁂𑀲𑁄.

𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀸𑀦𑁂𑀯 𑀯𑀘𑀦𑀦𑁆𑀢𑀭𑁂𑀦 𑀦𑀺𑀕𑀫𑁂𑀦𑁆𑀢𑁄 𑀆𑀳.

𑀇𑀤𑀸𑀦𑀺 𑀢𑁂𑀲𑀼 𑀮𑀓𑁆𑀔𑀡𑁂𑀲𑀼 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀦𑁆𑀢𑁄 ‘‘𑀧𑀲𑀦𑁆𑀦𑀦𑁂𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸 𑀳𑀺 𑀧𑀜𑁆𑀘 𑀯𑀡𑁆𑀡𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀦𑁂𑀢𑁆𑀢𑁄. 𑀧𑀭𑀺𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀲𑀤𑀺𑀲𑀫𑀼𑀔𑀢𑀸𑀬 𑀲𑀼𑀫𑀼𑀔𑁄. 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸 𑀩𑁆𑀭𑀳𑀸. 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀢𑀸𑀬 𑀉𑀚𑀼. 𑀚𑀼𑀢𑀺𑀫𑀦𑁆𑀢𑀢𑀸𑀬 𑀧𑀢𑀸𑀧𑀯𑀸.

𑀇𑀤𑀸𑀦𑀺 𑀢𑀫𑁂𑀯 𑀧𑀢𑀸𑀧𑀯𑀦𑁆𑀢𑀢𑀁 𑀆𑀤𑀺𑀘𑁆𑀘𑀽𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀫𑀚𑁆𑀛𑁂 𑀲𑀫𑀡𑀲𑀗𑁆𑀖𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀲𑀻𑀢𑀺 𑀬𑀣𑀸 𑀆𑀤𑀺𑀘𑁆𑀘𑁄 𑀉𑀕𑁆𑀕𑀘𑁆𑀙𑀦𑁆𑀢𑁄 𑀲𑀩𑁆𑀩𑀁 𑀢𑀫𑀕𑀢𑀁 𑀯𑀺𑀥𑀫𑁂𑀢𑁆𑀯𑀸 𑀆𑀮𑁄𑀓𑀁 𑀓𑀭𑁄𑀦𑁆𑀢𑁄 𑀯𑀺𑀭𑁄𑀘𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀅𑀦𑁆𑀢𑁄 𑀘𑁂𑀯 𑀩𑀳𑀺 𑀘 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸𑀢𑀫𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀜𑀸𑀡𑀸𑀮𑁄𑀓𑀁 𑀓𑀭𑁄𑀦𑁆𑀢𑁄 𑀯𑀺𑀭𑁄𑀘𑀲𑀺.

𑀤𑀲𑁆𑀲𑀦𑀻𑀬𑀭𑀽𑀧𑀢𑀸𑀬 𑀅𑀗𑁆𑀕𑀻𑀕𑀢𑀸𑀦𑀁 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀻𑀦𑀁 𑀆𑀯𑀳𑀦𑀢𑁄, 𑀓𑀮𑁆𑀬𑀸𑀡𑁂𑀳𑀺 𑀧𑀜𑁆𑀘𑀳𑀺 𑀤𑀲𑁆𑀲𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀓𑀮𑁆𑀬𑀸𑀡𑀤𑀲𑁆𑀲𑀦𑁄. 𑀉𑀢𑁆𑀢𑀫𑀯𑀡𑁆𑀡𑀺𑀦𑁄𑀢𑀺 𑀉𑀢𑁆𑀢𑀫𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑁆𑀲.

𑀘𑀓𑁆𑀓𑀯𑀢𑁆𑀢𑀻𑀢𑀺 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺, 𑀘𑀢𑀽𑀳𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺 𑀯𑀢𑁆𑀢𑁂𑀢𑀺, 𑀢𑁂𑀳𑀺 𑀘 𑀧𑀭𑁂 𑀯𑀢𑁆𑀢𑁂𑀢𑀺. 𑀧𑀭𑀳𑀺𑀢𑀸𑀬 𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀁 𑀯𑀢𑁆𑀢𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀅𑀣 𑀯𑀸 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀳𑀺 𑀘 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘 𑀲𑀫𑀦𑁆𑀦𑀸𑀕𑀫𑁂𑀦 𑀧𑀭𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀲𑁆𑀲 𑀆𑀡𑀸𑀘𑀓𑁆𑀓𑀲𑁆𑀲 𑀯𑀢𑁆𑀢𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺𑀧𑀺 𑀘𑀓𑁆𑀓𑀯𑀢𑁆𑀢𑀻. 𑀭𑀣𑁂𑀲𑀪𑁄𑀢𑀺 𑀭𑀣𑀺𑀓𑁂𑀲𑀼 𑀆𑀚𑀸𑀦𑀻𑀬𑀉𑀲𑀪𑀧𑀼𑀭𑀺𑀲𑁄, 𑀫𑀳𑀸𑀭𑀣𑀺𑀓𑁄𑀢𑀺 𑀅𑀢𑁆𑀣𑁄. 𑀘𑀸𑀢𑀼𑀭𑀦𑁆𑀢𑁄𑀢𑀺 𑀘𑀢𑀼𑀲𑀫𑀼𑀤𑁆𑀤𑀦𑁆𑀢𑀸𑀬 𑀧𑀣𑀯𑀺𑀬𑀸 𑀇𑀲𑁆𑀲𑀭𑁄. 𑀯𑀺𑀚𑀺𑀢𑀸𑀯𑀻𑀢𑀺 𑀯𑀺𑀚𑀺𑀢𑀯𑀺𑀚𑀬𑁄. 𑀚𑀫𑁆𑀩𑀼𑀲𑀡𑁆𑀟𑀲𑁆𑀲𑀸𑀢𑀺 𑀚𑀫𑁆𑀩𑀼𑀤𑀻𑀧𑀲𑁆𑀲, 𑀧𑀸𑀓𑀝𑁂𑀦 𑀳𑀺 𑀇𑀲𑁆𑀲𑀭𑀺𑀬𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀘𑀓𑁆𑀓𑀯𑀢𑁆𑀢𑀻 𑀧𑀦 𑀲𑀧𑀭𑀺𑀢𑁆𑀢𑀤𑀻𑀧𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀫𑀳𑀸𑀤𑀻𑀧𑀸𑀦𑀁 𑀇𑀲𑁆𑀲𑀭𑁄𑀯.

𑀔𑀢𑁆𑀢𑀺𑀬𑀸𑀢𑀺 𑀚𑀸𑀢𑀺𑀔𑀢𑁆𑀢𑀺𑀬𑀸. 𑀪𑁄𑀕𑀻𑀢𑀺 𑀪𑁄𑀕𑀺𑀬𑀸. 𑀭𑀸𑀚𑀸𑀦𑁄𑀢𑀺 𑀬𑁂 𑀓𑁂𑀘𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀸. 𑀅𑀦𑀼𑀬𑀦𑁆𑀢𑀸𑀢𑀺 𑀅𑀦𑀼𑀕𑀸𑀫𑀺𑀦𑁄 𑀲𑁂𑀯𑀓𑀸. 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀭𑀸𑀚𑀽𑀦𑀁 𑀧𑀽𑀚𑀦𑀻𑀬𑁄 𑀭𑀸𑀚𑀸 𑀳𑀼𑀢𑁆𑀯𑀸, 𑀘𑀓𑁆𑀓𑀯𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑀼𑀚𑀺𑀦𑁆𑀤𑁄𑀢𑀺 𑀫𑀦𑀼𑀲𑁆𑀲𑀸𑀥𑀺𑀧𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀭𑀫𑀺𑀲𑁆𑀲𑀭𑁄𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑁂𑀮𑁂𑀦 𑀯𑀼𑀢𑁆𑀢𑁂 𑀪𑀕𑀯𑀸 ‘‘𑀬𑁂 𑀢𑁂 𑀪𑀯𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂 𑀲𑀓𑁂 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀁 𑀲𑁂𑀮𑀲𑁆𑀲 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑁄 𑁋

𑁮𑁨𑁪. ‘‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮, (𑀲𑁂𑀮𑀸𑀢𑀺 𑀪𑀕𑀯𑀸) 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄;

𑀥𑀫𑁆𑀫𑁂𑀦 𑀘𑀓𑁆𑀓𑀁 𑀯𑀢𑁆𑀢𑁂𑀫𑀺, 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬’’𑀦𑁆𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀫𑀁 𑀢𑁆𑀯𑀁, 𑀲𑁂𑀮, 𑀬𑀸𑀘𑀲𑀺, ‘‘𑀭𑀸𑀚𑀸 𑀅𑀭𑀳𑀲𑀺 𑀪𑀯𑀺𑀢𑀼𑀁 𑀘𑀓𑁆𑀓𑀯𑀢𑁆𑀢𑀻’’𑀢𑀺, 𑀏𑀢𑁆𑀣 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀳𑁄𑀳𑀺, 𑀭𑀸𑀚𑀸𑀳𑀫𑀲𑁆𑀫𑀺, 𑀲𑀢𑀺 𑀘 𑀭𑀸𑀚𑀢𑁆𑀢𑁂 𑀬𑀣𑀸 𑀅𑀜𑁆𑀜𑁄 𑀭𑀸𑀚𑀸 𑀲𑀫𑀸𑀦𑁄𑀧𑀺 𑀬𑁄𑀚𑀦𑀲𑀢𑀁 𑀯𑀸 𑀅𑀦𑀼𑀲𑀸𑀲𑀢𑀺, 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀬𑁄𑀚𑀦𑀲𑀢𑀸𑀦𑀺 𑀯𑀸 𑀬𑁄𑀚𑀦𑀲𑀳𑀲𑁆𑀲𑀁 𑀯𑀸 𑀘𑀓𑁆𑀓𑀯𑀢𑁆𑀢𑀻 𑀳𑀼𑀢𑁆𑀯𑀸𑀧𑀺 𑀘𑀢𑀼𑀤𑀻𑀧𑀧𑀭𑀺𑀬𑀦𑁆𑀢𑀫𑀢𑁆𑀢𑀁 𑀯𑀸, 𑀦𑀸𑀳𑀫𑁂𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀯𑀺𑀲𑀬𑁄. 𑀅𑀳𑀜𑁆𑀳𑀺 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄 𑀪𑀯𑀕𑁆𑀕𑀢𑁄 𑀅𑀯𑀻𑀘𑀺𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀢𑀺𑀭𑀺𑀬𑀁 𑀅𑀧𑀭𑀺𑀫𑁂𑀬𑁆𑀬𑀮𑁄𑀓𑀥𑀸𑀢𑀼𑀬𑁄 𑀅𑀦𑀼𑀲𑀸𑀲𑀸𑀫𑀺. 𑀬𑀸𑀯𑀢𑀸 𑀳𑀺 𑀅𑀧𑀤𑀸𑀤𑀺𑀪𑁂𑀤𑀸 𑀲𑀢𑁆𑀢𑀸, 𑀅𑀳𑀁 𑀢𑁂𑀲𑀁 𑀅𑀕𑁆𑀕𑁄. 𑀦 𑀳𑀺 𑀫𑁂 𑀓𑁄𑀘𑀺 𑀲𑀻𑀮𑁂𑀦 𑀯𑀸…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀯𑀸 𑀲𑀤𑀺𑀲𑁄 𑀦𑀢𑁆𑀣𑀺, 𑀓𑀼𑀢𑁄 𑀪𑀺𑀬𑁆𑀬𑁄. 𑀲𑁆𑀯𑀸𑀳𑀁 𑀏𑀯𑀁 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄, 𑀅𑀦𑀼𑀢𑁆𑀢𑀭𑁂𑀦𑁂𑀯 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀦 𑀘𑀓𑁆𑀓𑀁 𑀯𑀢𑁆𑀢𑁂𑀫𑀺, ‘‘𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 𑀆𑀡𑀸𑀘𑀓𑁆𑀓𑀁. ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁪; 𑀲𑀁. 𑀦𑀺. 𑁫.𑁧𑁦𑁮𑁧) 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀦 𑀥𑀫𑁆𑀫𑀘𑀓𑁆𑀓𑀫𑁂𑀯 𑀯𑀸. 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀬𑀁 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀳𑁄𑀢𑀺 𑀲𑀫𑀡𑁂𑀦 𑀯𑀸…𑀧𑁂… 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀦𑁆𑀢𑀺.

𑀏𑀯𑀁 𑀅𑀢𑁆𑀢𑀸𑀦𑀫𑀸𑀯𑀺𑀓𑀭𑁄𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀲𑁂𑀮𑁄 𑀧𑀼𑀦 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑁋

𑁮𑁨𑁫. ‘‘𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀚𑀸𑀦𑀸𑀲𑀺, (𑀇𑀢𑀺 𑀲𑁂𑀮𑁄 𑀩𑁆𑀭𑀸𑀳𑁆𑀫𑀡𑁄) 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄;

𑀥𑀫𑁆𑀫𑁂𑀦 𑀘𑀓𑁆𑀓𑀁 𑀯𑀢𑁆𑀢𑁂𑀫𑀺, 𑀇𑀢𑀺 𑀪𑀸𑀲𑀣 𑀕𑁄𑀢𑀫.

𑁮𑁨𑁬. ‘‘𑀓𑁄 𑀦𑀼 𑀲𑁂𑀦𑀸𑀧𑀢𑀺 𑀪𑁄𑀢𑁄, 𑀲𑀸𑀯𑀓𑁄 𑀲𑀢𑁆𑀣𑀼𑀭𑀦𑁆𑀯𑀬𑁄;

𑀓𑁄 𑀢𑁂𑀢𑀫𑀦𑀼𑀯𑀢𑁆𑀢𑁂𑀢𑀺, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢’’𑀦𑁆𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳;

𑀢𑀢𑁆𑀣 𑀓𑁄 𑀦𑀼 𑀲𑁂𑀦𑀸𑀧𑀢𑀻𑀢𑀺 𑀥𑀫𑁆𑀫𑀭𑀜𑁆𑀜𑁄 𑀪𑁄𑀢𑁄 𑀥𑀫𑁆𑀫𑁂𑀦 𑀧𑀯𑀢𑁆𑀢𑀺𑀢𑀲𑁆𑀲 𑀘𑀓𑁆𑀓𑀲𑁆𑀲 𑀅𑀦𑀼𑀧𑀯𑀢𑁆𑀢𑀦𑀓𑁄 𑀲𑁂𑀦𑀸𑀧𑀢𑀺 𑀓𑁄 𑀦𑀽𑀢𑀺 𑀧𑀼𑀘𑁆𑀙𑀺.

𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀢𑁄 𑀤𑀓𑁆𑀔𑀺𑀡𑀧𑀲𑁆𑀲𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑀼𑀯𑀡𑁆𑀡𑀧𑀼𑀜𑁆𑀚𑁄 𑀯𑀺𑀬 𑀲𑀺𑀭𑀺𑀬𑀸 𑀲𑁄𑀪𑀫𑀸𑀦𑁄. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑁋

𑁮𑁨𑁭. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁, (𑀲𑁂𑀮𑀸𑀢𑀺 𑀪𑀕𑀯𑀸) 𑀥𑀫𑁆𑀫𑀘𑀓𑁆𑀓𑀁 𑀅𑀦𑀼𑀢𑁆𑀢𑀭𑀁;

𑀲𑀸𑀭𑀺𑀧𑀼𑀢𑁆𑀢𑁄 𑀅𑀦𑀼𑀯𑀢𑁆𑀢𑁂𑀢𑀺, 𑀅𑀦𑀼𑀚𑀸𑀢𑁄 𑀢𑀣𑀸𑀕𑀢’’𑀦𑁆𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀅𑀦𑀼𑀚𑀸𑀢𑁄 𑀢𑀣𑀸𑀕𑀢𑀦𑁆𑀢𑀺, 𑀢𑀣𑀸𑀕𑀢𑀁 𑀅𑀦𑀼𑀚𑀸𑀢𑁄, 𑀢𑀣𑀸 𑀕𑀢𑁂𑀦 𑀳𑁂𑀢𑀼𑀦𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄𑀢𑀺 𑀅𑀢𑁆𑀣𑁄.

𑀏𑀯𑀁 ‘‘𑀓𑁄 𑀦𑀼 𑀲𑁂𑀦𑀸𑀧𑀢𑀺 𑀪𑁄𑀢𑁄’’𑀢𑀺 𑀲𑁂𑀮𑁂𑀦 𑀯𑀼𑀢𑁆𑀢𑀧𑀜𑁆𑀳𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀬𑀁 𑀲𑁂𑀮𑁄 𑀆𑀳 ‘‘𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀚𑀸𑀦𑀸𑀲𑀻’’𑀢𑀺 𑀢𑀢𑁆𑀣 𑀦𑀁 𑀦𑀺𑀓𑁆𑀓𑀗𑁆𑀔𑀁 𑀓𑀸𑀢𑀼𑀓𑀸𑀫𑁄 ‘‘𑀦𑀸𑀳𑀁 𑀧𑀝𑀺𑀜𑁆𑀜𑀸𑀫𑀢𑁆𑀢𑁂𑀦𑁂𑀯 𑀧𑀝𑀺𑀚𑀸𑀦𑀸𑀫𑀺, 𑀅𑀧𑀺 𑀘𑀸𑀳𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀩𑀼𑀤𑁆𑀥𑁄’’𑀢𑀺 𑀜𑀸𑀧𑁂𑀢𑀼𑀁 𑁋

𑁮𑁨𑁮. ‘‘𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀪𑀸𑀯𑁂𑀢𑀩𑁆𑀩𑀜𑁆𑀘 𑀪𑀸𑀯𑀺𑀢𑀁;

𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁 𑀫𑁂, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀘𑀢𑀼𑀦𑁆𑀦𑀜𑁆𑀳𑀺 𑀲𑀘𑁆𑀘𑀸𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀜𑁆𑀘 𑀲𑀸𑀫𑀜𑁆𑀜𑀕𑁆𑀕𑀳𑀡𑀫𑁂𑀢𑀁 𑀬𑀤𑀺𑀤𑀁 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺. 𑀢𑀢𑁆𑀣 𑀅𑀭𑀺𑀬𑀲𑀘𑁆𑀘𑁂𑀲𑀼 𑀬𑀁 𑀪𑀸𑀯𑁂𑀢𑀩𑁆𑀩𑀁 𑀫𑀕𑁆𑀕𑀲𑀘𑁆𑀘𑀁, 𑀬𑀜𑁆𑀘 𑀧𑀳𑀸𑀢𑀩𑁆𑀩𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀤𑀼𑀪𑀬𑀕𑁆𑀕𑀳𑀡𑁂𑀦 𑀢𑁂𑀲𑀁 𑀨𑀮𑀪𑀽𑀢𑀸𑀦𑀺 𑀦𑀺𑀭𑁄𑀥𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺 𑀳𑁂𑀢𑀼𑀕𑁆𑀕𑀳𑀡𑁂𑀦𑁂𑀯 𑀨𑀮𑀲𑀺𑀤𑁆𑀥𑀺𑀢𑁄. 𑀢𑁂𑀦 𑀢𑀢𑁆𑀣 ‘‘𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀇𑀤𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. ‘‘𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢’’𑀦𑁆𑀢𑀺 𑀯𑀸 𑀇𑀫𑀺𑀦𑀸 𑀘 𑀲𑀩𑁆𑀩𑀲𑁆𑀲𑀧𑀺 𑀜𑁂𑀬𑁆𑀬𑀲𑁆𑀲 𑀅𑀪𑀺𑀜𑁆𑀜𑀸𑀢𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀉𑀤𑁆𑀤𑁂𑀲𑀯𑀲𑁂𑀦 𑀧𑀓𑀸𑀲𑁂𑀢𑁆𑀯𑀸 𑀢𑀤𑁂𑀓𑀤𑁂𑀲𑀁 𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀸𑀯𑁂𑀢𑀩𑁆𑀩𑀜𑁆𑀘 𑀪𑀸𑀯𑀺𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 ‘‘𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀜𑀸𑀡𑀧𑀳𑀸𑀦𑀲𑀫𑁆𑀧𑀤𑀸𑀓𑀺𑀢𑁆𑀢𑀦𑀫𑀼𑀔𑁂𑀦 𑀢𑀁𑀫𑀽𑀮𑀓𑀢𑁆𑀢𑀸 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀓𑀺𑀢𑁆𑀢𑀺𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺, 𑀩𑁆𑀭𑀸𑀳𑁆𑀫𑀡𑀸’’𑀢𑀺. 𑀅𑀪𑀺𑀜𑁆𑀜𑁂𑀬𑁆𑀬𑀅𑀪𑀺𑀜𑁆𑀜𑀸𑀢𑀕𑁆𑀕𑀳𑀡𑁂𑀦 𑀳𑀺 𑀲𑀩𑁆𑀩𑀲𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀻𑀦𑀁 𑀕𑀳𑀺𑀢𑀢𑁆𑀢𑀸 𑀲𑀨𑀮𑀁 𑀘𑀢𑀼𑀲𑀘𑁆𑀘𑀪𑀸𑀯𑀁 𑀲𑀤𑁆𑀥𑀺𑀁 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 𑀩𑀼𑀚𑁆𑀛𑀺𑀢𑀩𑁆𑀩𑀁 𑀲𑀩𑁆𑀩𑀁 𑀩𑀼𑀚𑁆𑀛𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄𑀲𑁆𑀫𑀻𑀢𑀺 𑀜𑀸𑀬𑁂𑀦 𑀳𑁂𑀢𑀼𑀦𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀯𑀺𑀪𑀸𑀯𑁂𑀢𑀺.

𑀏𑀯𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑀺𑀢𑁆𑀯𑀸 𑀅𑀢𑁆𑀢𑀦𑀺 𑀓𑀗𑁆𑀔𑀸𑀯𑀺𑀢𑀭𑀡𑀢𑁆𑀣𑀁 𑀩𑁆𑀭𑀸𑀳𑁆𑀫𑀡𑀁 𑀉𑀲𑁆𑀲𑀸𑀳𑁂𑀦𑁆𑀢𑁄 𑁋

𑁮𑁨𑁯. ‘‘𑀯𑀺𑀦𑀬𑀲𑁆𑀲𑀼 𑀫𑀬𑀺 𑀓𑀗𑁆𑀔𑀁, 𑀅𑀥𑀺𑀫𑀼𑀘𑁆𑀘𑀲𑁆𑀲𑀼 𑀩𑁆𑀭𑀸𑀳𑁆𑀫𑀡;

𑀤𑀼𑀮𑁆𑀮𑀪𑀁 𑀤𑀲𑁆𑀲𑀦𑀁 𑀳𑁄𑀢𑀺, 𑀲𑀫𑁆𑀩𑀼𑀤𑁆𑀥𑀸𑀦𑀁 𑀅𑀪𑀺𑀡𑁆𑀳𑀲𑁄.

𑁮𑁩𑁦. ‘‘𑀬𑁂𑀲𑀁 𑀯𑁂 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀧𑀸𑀢𑀼𑀪𑀸𑀯𑁄 𑀅𑀪𑀺𑀡𑁆𑀳𑀲𑁄;

𑀲𑁄𑀳𑀁 𑀩𑁆𑀭𑀸𑀳𑁆𑀫𑀡 𑀩𑀼𑀤𑁆𑀥𑁄𑀲𑁆𑀫𑀺, 𑀲𑀮𑁆𑀮𑀓𑀢𑁆𑀢𑁄 𑀅𑀦𑀼𑀢𑁆𑀢𑀭𑁄.

𑁮𑁩𑁧. ‘‘𑀩𑁆𑀭𑀳𑁆𑀫𑀪𑀽𑀢𑁄 𑀅𑀢𑀺𑀢𑀼𑀮𑁄, 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁄;

𑀲𑀩𑁆𑀩𑀸𑀫𑀺𑀢𑁆𑀢𑁂 𑀯𑀲𑁂 𑀓𑀢𑁆𑀯𑀸, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑁄’’𑀢𑀺. 𑁋 𑀕𑀸𑀣𑀢𑁆𑀢𑀬𑀫𑀸𑀳;

𑀢𑀢𑁆𑀣 𑀯𑀺𑀦𑀬𑀲𑁆𑀲𑀽𑀢𑀺 𑀯𑀺𑀦𑁂𑀳𑀺 𑀙𑀺𑀦𑁆𑀤. 𑀓𑀗𑁆𑀔𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀁. 𑀅𑀥𑀺𑀫𑀼𑀘𑁆𑀘𑀲𑁆𑀲𑀽𑀢𑀺 𑀅𑀥𑀺𑀫𑁄𑀓𑁆𑀔𑀁 𑀓𑀭 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀲𑀤𑁆𑀤𑀳. 𑀤𑀼𑀮𑁆𑀮𑀪𑀁 𑀤𑀲𑁆𑀲𑀦𑀁 𑀳𑁄𑀢𑀺, 𑀲𑀫𑁆𑀩𑀼𑀤𑁆𑀥𑀸𑀦𑀦𑁆𑀢𑀺 𑀬𑀢𑁄 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑁆𑀧𑀺 𑀩𑀼𑀤𑁆𑀥𑀲𑀼𑀜𑁆𑀜𑁄 𑀮𑁄𑀓𑁄 𑀳𑁄𑀢𑀺. 𑀲𑀮𑁆𑀮𑀓𑀢𑁆𑀢𑁄𑀢𑀺, 𑀭𑀸𑀕𑀸𑀤𑀺𑀲𑀮𑁆𑀮𑀓𑀢𑁆𑀢𑀦𑁄. 𑀩𑁆𑀭𑀳𑁆𑀫𑀪𑀽𑀢𑁄𑀢𑀺 𑀲𑁂𑀝𑁆𑀞𑀪𑀽𑀢𑁄. 𑀅𑀢𑀺𑀢𑀼𑀮𑁄𑀢𑀺 𑀢𑀼𑀮𑀁 𑀅𑀢𑀻𑀢𑁄, 𑀦𑀺𑀭𑀼𑀧𑀫𑁄𑀢𑀺 𑀅𑀢𑁆𑀣𑁄. 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁄𑀢𑀺 ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺 (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮; 𑀘𑀽𑀴𑀦𑀺. 𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪𑁭) 𑀏𑀯𑀁 𑀆𑀕𑀢𑀸𑀬 𑀫𑀸𑀭𑀲𑁂𑀦𑀸𑀬 𑀧𑀫𑀤𑁆𑀤𑀦𑁄. 𑀲𑀩𑁆𑀩𑀸𑀫𑀺𑀢𑁆𑀢𑁂𑀢𑀺 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑀗𑁆𑀔𑀸𑀢𑁂 𑀲𑀩𑁆𑀩𑀧𑀘𑁆𑀘𑀢𑁆𑀣𑀺𑀓𑁂. 𑀯𑀲𑁂 𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸. 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑁄𑀢𑀺 𑀓𑀼𑀢𑁄𑀘𑀺 𑀦𑀺𑀩𑁆𑀪𑀬𑁄 𑀲𑀫𑀸𑀥𑀺𑀲𑀼𑀔𑁂𑀦, 𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀫𑁄𑀤𑀸𑀫𑀺.

𑀏𑀯𑀁 𑀯𑀼𑀢𑁆𑀢𑁂 𑀲𑁂𑀮𑁄 𑀩𑁆𑀭𑀸𑀳𑁆𑀫𑀡𑁄 𑀢𑀸𑀯𑀤𑁂𑀯 𑀪𑀕𑀯𑀢𑀺 𑀲𑀜𑁆𑀚𑀸𑀢𑀧𑀲𑀸𑀤𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑁋

𑁮𑁩𑁨. ‘‘𑀇𑀤𑀁 𑀪𑁄𑀦𑁆𑀢𑁄 𑀦𑀺𑀲𑀸𑀫𑁂𑀣, 𑀬𑀣𑀸 𑀪𑀸𑀲𑀢𑀺 𑀘𑀓𑁆𑀔𑀼𑀫𑀸;

𑀲𑀮𑁆𑀮𑀓𑀢𑁆𑀢𑁄 𑀫𑀳𑀸𑀯𑀻𑀭𑁄, 𑀲𑀻𑀳𑁄𑀯 𑀦𑀤𑀢𑀻 𑀯𑀦𑁂.

𑁮𑁩𑁩. ‘‘𑀩𑁆𑀭𑀳𑁆𑀫𑀪𑀽𑀢𑀁 𑀅𑀢𑀺𑀢𑀼𑀮𑀁, 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀁;

𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑁂𑀬𑁆𑀬, 𑀅𑀧𑀺 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄.

𑁮𑁩𑁪. ‘‘𑀬𑁄 𑀫𑀁 𑀇𑀘𑁆𑀙𑀢𑀺 𑀅𑀦𑁆𑀯𑁂𑀢𑀼, 𑀬𑁄 𑀯𑀸 𑀦𑀺𑀘𑁆𑀙𑀢𑀺 𑀕𑀘𑁆𑀙𑀢𑀼;

𑀇𑀥𑀸𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺. 𑁋

𑀕𑀸𑀣𑀢𑁆𑀢𑀬𑀫𑀸𑀳. 𑀬𑀣𑀸 𑀢𑀁 𑀧𑀭𑀺𑀧𑀸𑀓𑀕𑀢𑀸𑀬 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄.

𑀢𑀢𑁆𑀣 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄𑀢𑀺, 𑀦𑀻𑀘𑀚𑀸𑀢𑀺𑀓𑁄, 𑀢𑀫𑁄𑀢𑀫𑀧𑀭𑀸𑀬𑀡𑀪𑀸𑀯𑁂 𑀞𑀺𑀢𑁄.

𑀢𑀢𑁄 𑀢𑁂𑀧𑀺 𑀫𑀸𑀡𑀯𑀓𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 𑀢𑀢𑁆𑀣𑁂𑀯 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑁋

𑁮𑁩𑁫. ‘‘𑀏𑀢𑀁 𑀘𑁂 𑀭𑀼𑀘𑁆𑀘𑀢𑀺 𑀪𑁄𑀢𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁;

𑀫𑀬𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺. 𑁋

𑀕𑀸𑀣𑀫𑀸𑀳𑀁𑀲𑀼, 𑀬𑀣𑀸 𑀢𑀁 𑀢𑁂𑀦 𑀲𑀤𑁆𑀥𑀺𑀁 𑀓𑀢𑀸𑀥𑀺𑀓𑀸𑀭𑀸 𑀓𑀼𑀮𑀧𑀼𑀢𑁆𑀢𑀸.

𑀅𑀣 𑀲𑁂𑀮𑁄 𑀢𑁂𑀲𑀼 𑀫𑀸𑀡𑀯𑀓𑁂𑀲𑀼 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀧𑀩𑁆𑀩𑀚𑁆𑀚𑀜𑁆𑀘 𑀬𑀸𑀘𑀫𑀸𑀦𑁄 𑁋

𑁮𑁩𑁬. ‘‘𑀩𑁆𑀭𑀸𑀳𑁆𑀫𑀡𑀸 𑀢𑀺𑀲𑀢𑀸 𑀇𑀫𑁂, 𑀬𑀸𑀘𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸;

𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫, 𑀪𑀕𑀯𑀸 𑀢𑀯 𑀲𑀦𑁆𑀢𑀺𑀓𑁂’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁄 𑀪𑀕𑀯𑀸 𑀬𑀲𑁆𑀫𑀸 𑀲𑁂𑀮𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀢𑁂𑀲𑀁𑀬𑁂𑀯 𑀢𑀺𑀡𑁆𑀡𑀁 𑀧𑀼𑀭𑀺𑀲𑀲𑀢𑀸𑀦𑀁 𑀕𑀡𑀚𑁂𑀝𑁆𑀞𑁄 𑀳𑀼𑀢𑁆𑀯𑀸 𑀭𑁄𑀧𑀺𑀢𑀓𑀼𑀲𑀮𑀫𑀽𑀮𑁄, 𑀇𑀤𑀸𑀦𑀺 𑀧𑀘𑁆𑀙𑀺𑀫𑀪𑀯𑁂𑀧𑀺 𑀢𑁂𑀲𑀁𑀬𑁂𑀯 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀜𑀸𑀡𑀜𑁆𑀘𑀲𑁆𑀲 𑀢𑁂𑀲𑀜𑁆𑀘 𑀧𑀭𑀺𑀧𑀓𑁆𑀓𑀁, 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀲𑀩𑁆𑀩𑁂𑀯 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀦𑁆𑀢𑁄 𑁋

𑁮𑁩𑁭. ‘‘𑀲𑁆𑀯𑀸𑀔𑀸𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, (𑀲𑁂𑀮𑀸𑀢𑀺 𑀪𑀕𑀯𑀸) 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀬𑀢𑁆𑀣 𑀅𑀫𑁄𑀖𑀸 𑀧𑀩𑁆𑀩𑀚𑁆𑀚𑀸, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀲𑀺𑀓𑁆𑀔𑀢𑁄’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺 𑀧𑀘𑁆𑀘𑀓𑁆𑀔𑀁. 𑀅𑀓𑀸𑀮𑀺𑀓𑀦𑁆𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀼𑀧𑁆𑀧𑀢𑁆𑀢𑀺𑀢𑁄 𑀦 𑀓𑀸𑀮𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀨𑀮𑀁. 𑀬𑀢𑁆𑀣𑀸𑀢𑀺 𑀬𑀁𑀦𑀺𑀫𑀺𑀢𑁆𑀢𑀸. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀦𑀺𑀫𑀺𑀢𑁆𑀢𑀸 𑀳𑀺 𑀧𑀩𑁆𑀩𑀚𑁆𑀚𑀸 𑀅𑀫𑁄𑀖𑀸 𑀅𑀦𑀺𑀧𑁆𑀨𑀮𑀸, 𑀬𑀢𑁆𑀣𑀸𑀢𑀺 𑀯𑀸 𑀬𑀲𑁆𑀫𑀺𑀁 𑀲𑀸𑀲𑀦𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀲𑀢𑀺𑀯𑀺𑀧𑁆𑀧𑀯𑀸𑀲𑀭𑀳𑀺𑀢𑀲𑁆𑀲 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀢𑁄.

𑀏𑀯𑀜𑁆𑀘 𑀯𑀢𑁆𑀯𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘. 𑀢𑀸𑀯𑀤𑁂𑀯 𑀢𑁂 𑀲𑀩𑁆𑀩𑁂 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀳𑀼𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑀸 𑀯𑀺𑀬 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀲𑀼𑀁. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀧𑀭𑀺𑀲𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁪𑁦.𑁨𑁦𑁮-𑁩𑁦𑁩) 𑁋

‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀯𑀻𑀣𑀺𑀲𑀸𑀫𑀻 𑀅𑀳𑁄𑀲𑀳𑀁;

𑀫𑀫 𑀜𑀸𑀢𑀻 𑀲𑀫𑀸𑀦𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁄 𑀅𑀦𑀼𑀢𑁆𑀢𑀭𑁄;

𑀆𑀲𑀺 𑀲𑁄 𑀲𑀩𑁆𑀩𑀮𑁄𑀓𑀲𑁆𑀲, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄.

‘‘𑀔𑀢𑁆𑀢𑀺𑀬𑀸 𑀦𑁂𑀕𑀫𑀸 𑀘𑁂𑀯, 𑀫𑀳𑀸𑀲𑀸𑀮𑀸 𑀘 𑀩𑁆𑀭𑀸𑀳𑁆𑀫𑀡𑀸;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀉𑀕𑁆𑀕𑀸 𑀘 𑀭𑀸𑀚𑀧𑀼𑀢𑁆𑀢𑀸 𑀘, 𑀯𑁂𑀲𑀺𑀬𑀸𑀦𑀸 𑀘 𑀩𑁆𑀭𑀸𑀳𑁆𑀫𑀡𑀸;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀆𑀴𑀸𑀭𑀺𑀓𑀸 𑀓𑀧𑁆𑀧𑀓𑀸 𑀘, 𑀦𑁆𑀳𑀸𑀧𑀓𑀸 𑀫𑀸𑀮𑀓𑀸𑀭𑀓𑀸;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀭𑀚𑀓𑀸 𑀧𑁂𑀲𑀓𑀸𑀭𑀸 𑀘, 𑀘𑀫𑁆𑀫𑀓𑀸𑀭𑀸 𑀘 𑀦𑁆𑀳𑀸𑀧𑀺𑀢𑀸;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀉𑀲𑀼𑀓𑀸𑀭𑀸 𑀪𑀫𑀓𑀸𑀭𑀸, 𑀘𑀫𑁆𑀫𑀓𑀸𑀭𑀸 𑀘 𑀢𑀘𑁆𑀙𑀓𑀸;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀓𑀫𑁆𑀫𑀸𑀭𑀸 𑀲𑁄𑀡𑁆𑀡𑀓𑀸𑀭𑀸 𑀘, 𑀢𑀺𑀧𑀼𑀮𑁄𑀳𑀓𑀭𑀸 𑀢𑀣𑀸;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀪𑀢𑀓𑀸 𑀘𑁂𑀝𑀓𑀸 𑀘𑁂𑀯, 𑀤𑀸𑀲𑀓𑀫𑁆𑀫𑀓𑀭𑀸 𑀩𑀳𑀽;

𑀬𑀣𑀸𑀲𑀓𑁂𑀦 𑀣𑀸𑀫𑁂𑀦, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀉𑀤𑀳𑀸𑀭𑀸 𑀓𑀝𑁆𑀞𑀳𑀸𑀭𑀸, 𑀓𑀲𑁆𑀲𑀓𑀸 𑀢𑀺𑀡𑀳𑀸𑀭𑀓𑀸;

𑀬𑀣𑀸𑀲𑀓𑁂𑀦 𑀣𑀸𑀫𑁂𑀦, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀧𑀼𑀧𑁆𑀨𑀺𑀓𑀸 𑀫𑀸𑀮𑀺𑀓𑀸 𑀘𑁂𑀯, 𑀧𑀡𑁆𑀡𑀺𑀓𑀸 𑀨𑀮𑀳𑀸𑀭𑀓𑀸;

𑀬𑀣𑀸𑀲𑀓𑁂𑀦 𑀣𑀸𑀫𑁂𑀦, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀕𑀡𑀺𑀓𑀸 𑀓𑀼𑀫𑁆𑀪𑀤𑀸𑀲𑀻 𑀘, 𑀧𑀽𑀯𑀺𑀓𑀸 𑀫𑀘𑁆𑀙𑀺𑀓𑀸𑀧𑀺 𑀘;

𑀬𑀣𑀸𑀲𑀓𑁂𑀦 𑀣𑀸𑀫𑁂𑀦, 𑀧𑀽𑀕𑀥𑀫𑁆𑀫𑀁 𑀅𑀓𑀁𑀲𑀼 𑀢𑁂.

‘‘𑀏𑀣 𑀲𑀩𑁆𑀩𑁂 𑀲𑀫𑀸𑀕𑀦𑁆𑀢𑁆𑀯𑀸, 𑀕𑀡𑀁 𑀩𑀦𑁆𑀥𑀸𑀫 𑀏𑀓𑀢𑁄;

𑀅𑀥𑀺𑀓𑀸𑀭𑀁 𑀓𑀭𑀺𑀲𑁆𑀲𑀸𑀫, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂.

‘‘𑀢𑁂 𑀫𑁂 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀕𑀡𑀁 𑀩𑀦𑁆𑀥𑀺𑀁𑀲𑀼 𑀢𑀸𑀯𑀤𑁂;

𑀉𑀧𑀝𑁆𑀞𑀸𑀦𑀲𑀸𑀮𑀁 𑀲𑀼𑀓𑀢𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀸𑀭𑀬𑀼𑀁.

‘‘𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀦 𑀢𑀁 𑀲𑀸𑀮𑀁, 𑀉𑀤𑀕𑁆𑀕𑁄 𑀢𑀼𑀝𑁆𑀞𑀫𑀸𑀦𑀲𑁄;

𑀧𑀭𑁂𑀢𑁄 𑀢𑁂𑀳𑀺 𑀲𑀩𑁆𑀩𑁂𑀳𑀺, 𑀲𑀫𑁆𑀩𑀼𑀤𑁆𑀥𑀫𑀼𑀧𑀲𑀗𑁆𑀓𑀫𑀺𑀁.

‘‘𑀉𑀧𑀲𑀗𑁆𑀓𑀫𑁆𑀫 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀦𑀸𑀣𑀁 𑀦𑀭𑀸𑀲𑀪𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀇𑀫𑁂 𑀢𑀻𑀡𑀺 𑀲𑀢𑀸 𑀯𑀻𑀭, 𑀧𑀼𑀭𑀺𑀲𑀸 𑀏𑀓𑀢𑁄 𑀕𑀡𑀸;

𑀉𑀧𑀝𑁆𑀞𑀸𑀦𑀲𑀸𑀮𑀁 𑀲𑀼𑀓𑀢𑀁, 𑀦𑀺𑀬𑁆𑀬𑀸𑀤𑁂𑀦𑁆𑀢𑀺 𑀢𑀼𑀯𑀁 𑀫𑀼𑀦𑀺.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀼𑀭𑀢𑁄, 𑀲𑀫𑁆𑀧𑀝𑀺𑀘𑁆𑀙𑀢𑁆𑀯 𑀘𑀓𑁆𑀔𑀼𑀫𑀸;

𑀢𑀺𑀡𑁆𑀡𑀁 𑀲𑀢𑀸𑀦𑀁 𑀧𑀼𑀭𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀢𑀺𑀲𑀢𑀸𑀧𑀺 𑀘 𑀚𑁂𑀝𑁆𑀞𑁄 𑀘, 𑀅𑀦𑀼𑀯𑀢𑁆𑀢𑀺𑀁𑀲𑀼 𑀏𑀓𑀢𑁄;

𑀲𑀫𑁆𑀧𑀢𑁆𑀢𑀺𑀜𑁆𑀳𑀺 𑀓𑀭𑀺𑀢𑁆𑀯𑀸𑀦, 𑀲𑀩𑁆𑀩𑁂 𑀅𑀦𑀼𑀪𑀯𑀺𑀲𑁆𑀲𑀣.

‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑀻𑀢𑀺𑀪𑀸𑀯𑀫𑀦𑀼𑀢𑁆𑀢𑀭𑀁;

𑀅𑀚𑀭𑀁 𑀅𑀫𑀢𑀁 𑀲𑀦𑁆𑀢𑀁, 𑀦𑀺𑀩𑁆𑀩𑀸𑀦𑀁 𑀨𑀲𑁆𑀲𑀬𑀺𑀲𑁆𑀲𑀣.

‘‘𑀏𑀯𑀁 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀲𑀩𑁆𑀩𑀜𑁆𑀜𑀽 𑀲𑀫𑀡𑀼𑀢𑁆𑀢𑀭𑁄;

𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀬𑀺𑀁.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁;

𑀤𑁂𑀯𑀸𑀥𑀺𑀧𑁄 𑀧𑀜𑁆𑀘𑀲𑀢𑀁, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀤𑁂𑀯𑀭𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲, 𑀫𑀳𑀸𑀤𑁂𑀯𑀸 𑀅𑀯𑀦𑁆𑀤𑀺𑀲𑀼𑀁.

‘‘𑀇𑀥 𑀫𑀸𑀦𑀼𑀲𑀓𑁂 𑀭𑀚𑁆𑀚𑀁, 𑀧𑀭𑀺𑀲𑀸 𑀳𑁄𑀦𑁆𑀢𑀺 𑀩𑀦𑁆𑀥𑀯𑀸;

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀯𑀸𑀲𑁂𑀝𑁆𑀞𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄.

‘‘𑀅𑀲𑀻𑀢𑀺𑀓𑁄𑀝𑀺 𑀦𑀺𑀘𑀬𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀳𑀁;

𑀲𑁂𑀮𑁄 𑀇𑀢𑀺 𑀫𑀫𑀁 𑀦𑀸𑀫𑀁, 𑀙𑀴𑀗𑁆𑀕𑁂 𑀧𑀸𑀭𑀫𑀺𑀁 𑀕𑀢𑁄.

‘‘𑀚𑀗𑁆𑀖𑀸𑀯𑀺𑀳𑀸𑀭𑀁 𑀯𑀺𑀘𑀭𑀁, 𑀲𑀲𑀺𑀲𑁆𑀲𑁂𑀳𑀺 𑀧𑀼𑀭𑀓𑁆𑀔𑀢𑁄;

𑀚𑀝𑀸𑀪𑀸𑀭𑀺𑀓𑀪𑀭𑀺𑀢𑀁, 𑀓𑁂𑀡𑀺𑀬𑀁 𑀦𑀸𑀫 𑀢𑀸𑀧𑀲𑀁.

‘‘𑀧𑀝𑀺𑀬𑀢𑁆𑀢𑀸𑀳𑀼𑀢𑀺𑀁 𑀤𑀺𑀲𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

𑀆𑀯𑀸𑀳𑁄 𑀯𑀸 𑀯𑀺𑀯𑀸𑀳𑁄 𑀯𑀸, 𑀭𑀸𑀚𑀸 𑀯𑀸 𑀢𑁂 𑀦𑀺𑀫𑀦𑁆𑀢𑀺𑀢𑁄.

‘‘𑀆𑀳𑀼𑀢𑀺𑀁 𑀬𑀺𑀝𑁆𑀞𑀼𑀓𑀸𑀫𑁄𑀳𑀁, 𑀩𑁆𑀭𑀸𑀳𑁆𑀫𑀡𑁂 𑀤𑁂𑀯𑀲𑀫𑁆𑀫𑀢𑁂;

𑀦 𑀦𑀺𑀫𑀦𑁆𑀢𑁂𑀫𑀺 𑀭𑀸𑀚𑀸𑀦𑀁, 𑀆𑀳𑀼𑀢𑀻 𑀫𑁂 𑀦 𑀯𑀺𑀚𑁆𑀚𑀢𑀺.

‘‘𑀦 𑀘𑀢𑁆𑀣𑀺 𑀫𑀬𑁆𑀳𑀫𑀸𑀯𑀸𑀳𑁄, 𑀯𑀺𑀯𑀸𑀳𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀓𑁆𑀬𑀸𑀦𑀁 𑀦𑀦𑁆𑀤𑀺𑀚𑀦𑀦𑁄, 𑀲𑁂𑀝𑁆𑀞𑁄 𑀮𑁄𑀓𑁂 𑀲𑀤𑁂𑀯𑀓𑁂.

‘‘𑀲𑀩𑁆𑀩𑀮𑁄𑀓𑀳𑀺𑀢𑀢𑁆𑀣𑀸𑀬, 𑀲𑀩𑁆𑀩𑀲𑀢𑁆𑀢𑀲𑀼𑀔𑀸𑀯𑀳𑁄;

𑀲𑁄 𑀫𑁂 𑀦𑀺𑀫𑀦𑁆𑀢𑀺𑀢𑁄 𑀅𑀚𑁆𑀚, 𑀢𑀲𑁆𑀲𑁂𑀢𑀁 𑀧𑀝𑀺𑀬𑀸𑀤𑀦𑀁.

‘‘𑀢𑀺𑀫𑁆𑀩𑀭𑀽𑀲𑀓𑀯𑀡𑁆𑀡𑀸𑀪𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀽𑀧𑀫𑁄;

𑀭𑀽𑀧𑁂𑀦𑀸𑀲𑀤𑀺𑀲𑁄 𑀩𑀼𑀤𑁆𑀥𑁄, 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑁄.

‘‘𑀉𑀓𑁆𑀓𑀸𑀫𑀼𑀔𑀧𑀳𑀝𑁆𑀞𑁄𑀯, 𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀦𑀺𑀪𑁄;

𑀯𑀺𑀚𑁆𑀚𑀽𑀧𑀫𑁄 𑀫𑀳𑀸𑀯𑀻𑀭𑁄, 𑀲𑁄 𑀫𑁂 𑀩𑀼𑀤𑁆𑀥𑁄 𑀦𑀺𑀫𑀦𑁆𑀢𑀺𑀢𑁄.

‘‘𑀧𑀩𑁆𑀩𑀢𑀕𑁆𑀕𑁂 𑀬𑀣𑀸 𑀅𑀘𑁆𑀘𑀺, 𑀧𑀼𑀡𑁆𑀡𑀫𑀸𑀬𑁂𑀯 𑀘𑀦𑁆𑀤𑀺𑀫𑀸;

𑀦𑀴𑀕𑁆𑀕𑀺𑀯𑀡𑁆𑀡𑀲𑀗𑁆𑀓𑀸𑀲𑁄, 𑀲𑁄 𑀫𑁂 𑀩𑀼𑀤𑁆𑀥𑁄 𑀦𑀺𑀫𑀦𑁆𑀢𑀺𑀢𑁄.

‘‘𑀅𑀲𑀫𑁆𑀪𑀻𑀢𑁄 𑀪𑀬𑀸𑀢𑀻𑀢𑁄, 𑀪𑀯𑀦𑁆𑀢𑀓𑀭𑀡𑁄 𑀫𑀼𑀦𑀺;

𑀲𑀻𑀳𑀽𑀧𑀫𑁄 𑀫𑀳𑀸𑀯𑀻𑀭𑁄, 𑀲𑁄 𑀫𑁂 𑀩𑀼𑀤𑁆𑀥𑁄 𑀦𑀺𑀫𑀦𑁆𑀢𑀺𑀢𑁄.

‘‘𑀓𑀼𑀲𑀮𑁄 𑀩𑀼𑀤𑁆𑀥𑀥𑀫𑁆𑀫𑁂𑀳𑀺, 𑀅𑀧𑀲𑀬𑁆𑀳𑁄 𑀧𑀭𑁂𑀳𑀺 𑀲𑁄;

𑀦𑀸𑀕𑀽𑀧𑀫𑁄 𑀫𑀳𑀸𑀯𑀻𑀭𑁄, 𑀲𑁄 𑀫𑁂 𑀩𑀼𑀤𑁆𑀥𑁄 𑀦𑀺𑀫𑀦𑁆𑀢𑀺𑀢𑁄.

‘‘𑀲𑀤𑁆𑀥𑀫𑁆𑀫𑀸𑀘𑀸𑀭𑀓𑀼𑀲𑀮𑁄, 𑀩𑀼𑀤𑁆𑀥𑀦𑀸𑀕𑁄 𑀅𑀲𑀸𑀤𑀺𑀲𑁄;

𑀉𑀲𑀪𑀽𑀧𑀫𑁄 𑀫𑀳𑀸𑀯𑀻𑀭𑁄, 𑀲𑁄 𑀫𑁂 𑀩𑀼𑀤𑁆𑀥𑁄 𑀦𑀺𑀫𑀦𑁆𑀢𑀺𑀢𑁄.

‘‘𑀅𑀦𑀦𑁆𑀢𑀯𑀡𑁆𑀡𑁄 𑀅𑀫𑀺𑀢𑀬𑀲𑁄, 𑀯𑀺𑀘𑀺𑀢𑁆𑀢𑀲𑀩𑁆𑀩𑀮𑀓𑁆𑀔𑀡𑁄;

𑀲𑀓𑁆𑀓𑀽𑀧𑀫𑁄 𑀫𑀳𑀸𑀯𑀻𑀭𑁄, 𑀲𑁄 𑀫𑁂 𑀩𑀼𑀤𑁆𑀥𑁄 𑀦𑀺𑀫𑀦𑁆𑀢𑀺𑀢𑁄.

‘‘𑀯𑀲𑀻 𑀕𑀡𑀻 𑀧𑀢𑀸𑀧𑀻 𑀘, 𑀢𑁂𑀚𑀲𑁆𑀲𑀻 𑀘 𑀤𑀼𑀭𑀸𑀲𑀤𑁄;

𑀩𑁆𑀭𑀳𑁆𑀫𑀽𑀧𑀫𑁄 𑀫𑀳𑀸𑀯𑀻𑀭𑁄, 𑀲𑁄 𑀫𑁂 𑀩𑀼𑀤𑁆𑀥𑁄 𑀦𑀺𑀫𑀦𑁆𑀢𑀺𑀢𑁄.

‘‘𑀧𑀢𑁆𑀢𑀥𑀫𑁆𑀫𑁄 𑀤𑀲𑀩𑀮𑁄, 𑀩𑀮𑀸𑀢𑀺𑀩𑀮𑀧𑀸𑀭𑀕𑁄;

𑀥𑀭𑀡𑀽𑀧𑀫𑁄 𑀫𑀳𑀸𑀯𑀻𑀭𑁄, 𑀲𑁄 𑀫𑁂 𑀩𑀼𑀤𑁆𑀥𑁄 𑀦𑀺𑀫𑀦𑁆𑀢𑀺𑀢𑁄.