𑁫. 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀭𑀽𑀧𑀁 𑀤𑀺𑀲𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑁆𑀲 𑀕𑀸𑀣𑀸. 𑀇𑀫𑀲𑁆𑀲 𑀆𑀬𑀲𑁆𑀫𑀢𑁄 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀙𑀓𑁆𑀓𑀦𑀺𑀧𑀸𑀢𑁂 (𑀣𑁂𑀭𑀕𑀸. 𑁩𑁯𑁯 𑀆𑀤𑀬𑁄) 𑀯𑀼𑀢𑁆𑀢𑀫𑁂𑀯. 𑀢𑀸 𑀧𑀦 𑀕𑀸𑀣𑀸 𑀣𑁂𑀭𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁂𑀦 𑀜𑀸𑀢𑀻𑀦𑀁 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀪𑀸𑀲𑀺𑀢𑀸. 𑀇𑀥 𑀧𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺 𑀬𑀸𑀘𑀺𑀢𑁂𑀦 𑀲𑀢𑁆𑀣𑀸𑀭𑀸 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀬𑁂 𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀅𑀤𑀺𑀝𑁆𑀞𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸, 𑀦 𑀘 𑀧𑀲𑁆𑀲𑀲𑀺, 𑀦 𑀘 𑀢𑁂 𑀳𑁄𑀢𑀺 𑀧𑀲𑁆𑀲𑁂𑀬𑁆𑀬𑀦𑁆𑀢𑀺, 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑁂 𑀢𑁂 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦…𑀚𑀺𑀯𑁆𑀳𑀸…𑀓𑀸𑀬…𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀅𑀯𑀺𑀜𑁆𑀜𑀸𑀢𑀸 𑀅𑀯𑀺𑀜𑁆𑀜𑀸𑀢𑀧𑀼𑀩𑁆𑀩𑀸, 𑀦 𑀘 𑀯𑀺𑀚𑀸𑀦𑀸𑀲𑀺, 𑀦 𑀘 𑀢𑁂 𑀳𑁄𑀢𑀺 𑀯𑀺𑀚𑀸𑀦𑁂𑀬𑁆𑀬𑀦𑁆𑀢𑀺, 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀏𑀢𑁆𑀣 𑀘 𑀢𑁂, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂 𑀲𑀼𑀢𑀫𑀢𑁆𑀢𑀁, 𑀫𑀼𑀢𑁂 𑀫𑀼𑀢𑀫𑀢𑁆𑀢𑀁, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀬𑀢𑁄 𑀔𑁄 𑀢𑁂, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁, 𑀲𑀼𑀢𑁂 𑀲𑀼𑀢𑀫𑀢𑁆𑀢𑀁, 𑀫𑀼𑀢𑁂 𑀫𑀼𑀢𑀫𑀢𑁆𑀢𑀁, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦 𑀢𑁂𑀦. 𑀬𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦 𑀢𑁂𑀦, 𑀢𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦 𑀢𑀢𑁆𑀣. 𑀬𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦 𑀢𑀢𑁆𑀣, 𑀢𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦, 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀲𑀁. 𑀦𑀺. 𑁪.𑁯𑁫). 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀸𑀥𑀼𑀓𑀁 𑀉𑀕𑁆𑀕𑀳𑀺𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁂𑀦 𑁋

𑁭𑁯𑁪. ‘‘𑀭𑀽𑀧𑀁 𑀤𑀺𑀲𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁭𑁯𑁫. ‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀭𑀽𑀧𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀫𑀸𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁭𑁯𑁬. ‘‘𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁭𑁯𑁭. ‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀲𑀤𑁆𑀤𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀫𑀸𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁭𑁯𑁮. ‘‘𑀕𑀦𑁆𑀥𑀁 𑀖𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁭𑁯𑁯. ‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀕𑀦𑁆𑀥𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀫𑀸𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁦𑁦. ‘‘𑀭𑀲𑀁 𑀪𑁄𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁦𑁧. ‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀭𑀲𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀫𑀸𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁦𑁨. ‘‘𑀨𑀲𑁆𑀲𑀁 𑀨𑀼𑀲𑁆𑀲 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁦𑁩. ‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀨𑀲𑁆𑀲𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀫𑀸𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁦𑁪. ‘‘𑀥𑀫𑁆𑀫𑀁 𑀜𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁦𑁫. ‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀥𑀫𑁆𑀫𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀫𑀸𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁦𑁬. ‘‘𑀦 𑀲𑁄 𑀭𑀚𑁆𑀚𑀢𑀺 𑀭𑀽𑀧𑁂𑀲𑀼, 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁦𑁭. ‘‘𑀬𑀣𑀸𑀲𑁆𑀲 𑀧𑀲𑁆𑀲𑀢𑁄 𑀭𑀽𑀧𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁦𑁮. ‘‘𑀦 𑀲𑁄 𑀭𑀚𑁆𑀚𑀢𑀺 𑀲𑀤𑁆𑀤𑁂𑀲𑀼, 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁦𑁯. ‘‘𑀬𑀣𑀸𑀲𑁆𑀲 𑀲𑀼𑀡𑀢𑁄 𑀲𑀤𑁆𑀤𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁧𑁦. ‘‘𑀦 𑀲𑁄 𑀭𑀚𑁆𑀚𑀢𑀺 𑀕𑀦𑁆𑀥𑁂𑀲𑀼, 𑀕𑀦𑁆𑀥𑀁 𑀖𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁧𑁧. ‘‘𑀬𑀣𑀸𑀲𑁆𑀲 𑀖𑀸𑀬𑀢𑁄 𑀕𑀦𑁆𑀥𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁧𑁨. ‘‘𑀦 𑀲𑁄 𑀭𑀚𑁆𑀚𑀢𑀺 𑀭𑀲𑁂𑀲𑀼, 𑀭𑀲𑀁 𑀪𑁄𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁧𑁩. ‘‘𑀬𑀣𑀸𑀲𑁆𑀲 𑀲𑀸𑀬𑀢𑁄 𑀭𑀲𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁧𑁪. ‘‘𑀦 𑀲𑁄 𑀭𑀚𑁆𑀚𑀢𑀺 𑀨𑀲𑁆𑀲𑁂𑀲𑀼, 𑀨𑀲𑁆𑀲𑀁 𑀨𑀼𑀲𑁆𑀲 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁧𑁫. ‘‘𑀬𑀣𑀸𑀲𑁆𑀲 𑀨𑀼𑀲𑀢𑁄 𑀨𑀲𑁆𑀲𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺.

𑁮𑁧𑁬. ‘‘𑀦 𑀲𑁄 𑀭𑀚𑁆𑀚𑀢𑀺 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀁 𑀜𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑁮𑁧𑁭. ‘‘𑀬𑀣𑀸𑀲𑁆𑀲 𑀯𑀺𑀚𑀸𑀦𑀢𑁄 𑀥𑀫𑁆𑀫𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 𑀘𑀓𑁆𑀔𑀼𑀤𑁆𑀯𑀸𑀭𑁂𑀦 𑀉𑀧𑀮𑀪𑀺𑀢𑁆𑀯𑀸. 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄𑀢𑀺 𑀢𑀲𑁆𑀫𑀺𑀁 𑀭𑀽𑀧𑁂 𑀤𑀺𑀝𑁆𑀞𑀫𑀢𑁆𑀢𑁂 𑀏𑀯 𑀅𑀝𑁆𑀞𑀢𑁆𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄 𑀲𑀼𑀪𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀅𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑁄 𑀲𑀢𑀺 𑀫𑀼𑀝𑁆𑀞𑀸 𑀳𑁄𑀢𑀺. 𑀢𑀣𑀸 𑀘 𑀲𑀢𑀺 𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺 𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀭𑀢𑁆𑀢𑁄, 𑀕𑀺𑀤𑁆𑀥𑁄, 𑀕𑀥𑀺𑀢𑁄 𑀳𑀼𑀢𑁆𑀯𑀸 𑀅𑀦𑀼𑀪𑀯𑀢𑀺, 𑀅𑀲𑁆𑀲𑀸𑀤𑁂𑀢𑀺, 𑀅𑀪𑀺𑀦𑀦𑁆𑀤𑀢𑀺. 𑀢𑀣𑀸𑀪𑀽𑀢𑁄 𑀘 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀻𑀢𑀺 𑀢𑀜𑁆𑀘 𑀭𑀽𑀧𑀸𑀭𑀫𑁆𑀫𑀡𑀁 𑀅𑀚𑁆𑀛𑁄𑀲𑀸𑀬 ‘‘𑀲𑀼𑀔𑀁 𑀲𑀼𑀔’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀭𑀽𑀧𑀲𑀫𑁆𑀪𑀯𑀸𑀢𑀺 𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀲𑀫𑁆𑀪𑀯𑀸 𑀭𑀽𑀧𑀸𑀭𑀫𑁆𑀫𑀡𑀸 𑀲𑀼𑀔𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀸 𑀯𑁂𑀤𑀦𑀸 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀯𑀟𑁆𑀠𑀦𑁆𑀢𑀺. 𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀻𑀢𑀺 𑀧𑀺𑀬𑀭𑀽𑀧𑁂 𑀲𑀸𑀭𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀅𑀪𑀺𑀚𑁆𑀛𑀸𑀬, 𑀅𑀧𑀺𑀬𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀦𑀯𑀲𑁂𑀦 𑀧𑀺𑀬𑀭𑀽𑀧𑀲𑁆𑀲𑁂𑀯 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀲𑁄𑀓𑀸𑀤𑀺𑀮𑀓𑁆𑀔𑀡𑀸𑀬 𑀯𑀺𑀳𑁂𑀲𑀸𑀬 𑀘 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀉𑀧𑀳𑀜𑁆𑀜𑀢𑀺 𑀩𑀸𑀥𑀻𑀬𑀢𑀺. 𑀏𑀯𑀫𑀸𑀘𑀺𑀦𑀢𑁄 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀢𑀁 𑀢𑀁 𑀯𑁂𑀤𑀦𑀲𑁆𑀲𑀸𑀤𑀯𑀲𑁂𑀦 𑀪𑀯𑀸𑀪𑀺𑀲𑀗𑁆𑀔𑀸𑀭𑀁 𑀆𑀘𑀺𑀦𑀢𑁄 𑀯𑀝𑁆𑀝𑀤𑀼𑀓𑁆𑀔𑀁 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸…𑀧𑁂… 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀯𑀺𑀪. 𑁨𑁨𑁫; 𑀲𑀁. 𑀦𑀺. 𑁨.𑁧). 𑀢𑀣𑀸𑀪𑀽𑀢𑀲𑁆𑀲 𑀆𑀭𑀸 𑀆𑀭𑀓𑀸 𑀤𑀽𑀭𑁂 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀢𑀁 𑀤𑀼𑀮𑁆𑀮𑀪𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺𑀆𑀤𑀺𑀕𑀸𑀣𑀸𑀲𑀼𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀖𑀢𑁆𑀯𑀸𑀢𑀺 𑀖𑀸𑀬𑀺𑀢𑁆𑀯𑀸. 𑀪𑁄𑀢𑁆𑀯𑀸𑀢𑀺 𑀲𑀸𑀬𑀺𑀢𑁆𑀯𑀸. 𑀨𑀼𑀲𑁆𑀲𑀸𑀢𑀺 𑀨𑀼𑀲𑀺𑀢𑁆𑀯𑀸. 𑀥𑀫𑁆𑀫𑀁 𑀜𑀢𑁆𑀯𑀸𑀢𑀺 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀚𑀸𑀦𑀺𑀢𑁆𑀯𑀸.

𑀏𑀯𑀁 𑀙𑀤𑁆𑀯𑀸𑀭𑀕𑁄𑀘𑀭𑁂 𑀲𑀸𑀭𑀚𑁆𑀚𑀦𑁆𑀢𑀲𑁆𑀲 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀯𑀺𑀭𑀚𑁆𑀚𑀦𑁆𑀢𑀲𑁆𑀲 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀲𑁄 𑀭𑀚𑁆𑀚𑀢𑀺 𑀭𑀽𑀧𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀲𑁄 𑀭𑀚𑁆𑀚𑀢𑀺 𑀭𑀽𑀧𑁂𑀲𑀼, 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀝𑀺𑀲𑁆𑀲𑀢𑁄𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀭𑀽𑀧𑀁 𑀤𑀺𑀲𑁆𑀯𑀸 𑀆𑀧𑀸𑀣𑀕𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑁂𑀦 𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀕𑀳𑁂𑀢𑁆𑀯𑀸 𑀘𑀢𑀼𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸𑀬 𑀧𑀝𑀺𑀲𑁆𑀲𑀢𑁄 𑀳𑁄𑀢𑀺, 𑀲𑁄 𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀦 𑀭𑀚𑁆𑀚𑀢𑀺 𑀭𑀸𑀕𑀁 𑀦 𑀚𑀦𑁂𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀭𑀽𑀧𑀸𑀭𑀫𑁆𑀫𑀡𑀫𑁆𑀳𑀺 𑀲𑀫𑀼𑀤𑀬𑀸𑀤𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑁄 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀢𑀁 𑀢𑀢𑁆𑀣𑀼𑀧𑁆𑀧𑀦𑁆𑀦𑀯𑁂𑀤𑀦𑀜𑁆𑀘 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀣𑀸𑀪𑀽𑀢𑁄 𑀘 𑀢𑀜𑁆𑀘 𑀦𑀚𑁆𑀛𑁄𑀲 𑀢𑀺𑀝𑁆𑀞𑀢𑀻𑀢𑀺 𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑁆𑀫𑀤𑁂𑀯 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸𑀬 𑀅𑀚𑁆𑀛𑁄𑀲𑀸𑀬 𑀦 𑀢𑀺𑀝𑁆𑀞𑀢𑀺 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀦𑀸𑀪𑀺𑀦𑀺𑀯𑀺𑀲𑀢𑀺.

𑀬𑀣𑀸𑀲𑁆𑀲 𑀧𑀲𑁆𑀲𑀢𑁄 𑀭𑀽𑀧𑀦𑁆𑀢𑀺 𑀅𑀲𑁆𑀲 𑀬𑁄𑀕𑀺𑀦𑁄 𑀬𑀣𑀸 𑀢𑀢𑁆𑀣 𑀅𑀪𑀺𑀚𑁆𑀛𑀸𑀤𑀬𑁄 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀭𑀽𑀧𑀁 𑀧𑀲𑁆𑀲𑀦𑁆𑀢𑀲𑁆𑀲. 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀦𑁆𑀢𑀺 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀕𑁄𑀘𑀭𑀲𑁂𑀯𑀦𑀸𑀬 𑀲𑁂𑀯𑀢𑁄 𑀘𑀸𑀧𑀺. 𑀔𑀻𑀬𑀢𑀻𑀢𑀺 𑀲𑀩𑁆𑀩𑀁 𑀓𑀺𑀮𑁂𑀲𑀯𑀝𑁆𑀝𑀁 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺. 𑀦𑁄𑀧𑀘𑀻𑀬𑀢𑀻𑀢𑀺 𑀦 𑀉𑀧𑀘𑀺𑀬𑀢𑀺 𑀦 𑀆𑀘𑀬𑀁 𑀕𑀘𑁆𑀙𑀢𑀺. 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄𑀢𑀺 𑀏𑀯𑀁 𑀓𑀺𑀮𑁂𑀲𑀸𑀧𑀦𑀬𑀦𑀧𑀝𑀺𑀧𑀢𑁆𑀢𑀺𑀬𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀘𑀭𑀢𑀺, 𑀯𑀺𑀳𑀭𑀢𑀺. 𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀧𑀘𑀬𑀕𑀸𑀫𑀺𑀦𑀺𑀬𑀸 𑀫𑀕𑁆𑀕𑀧𑀜𑁆𑀜𑀸𑀬 𑀲𑀓𑀮𑀁 𑀯𑀝𑁆𑀝𑀤𑀼𑀓𑁆𑀔𑀁 𑀅𑀧𑀘𑀺𑀦𑀦𑁆𑀢𑀲𑁆𑀲. 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀻𑀢𑀺 𑀲𑀉𑀧𑀸𑀤𑀺𑀲𑁂𑀲𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀲𑀫𑀻𑀧𑁂 𑀏𑀯𑀸𑀢𑀺 𑀯𑀼𑀘𑁆𑀘𑀢𑀺 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀲𑀘𑁆𑀙𑀺𑀓𑀢𑀢𑁆𑀢𑀸. 𑀦 𑀲𑁄 𑀭𑀚𑁆𑀚𑀢𑀺 𑀲𑀤𑁆𑀤𑁂𑀲𑀽𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀣𑁂𑀭𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀲𑀢𑁆𑀣𑀼 𑀑𑀯𑀸𑀤𑀲𑁆𑀲 𑀅𑀢𑁆𑀢𑀦𑀸 𑀉𑀧𑀥𑀸𑀭𑀺𑀢𑀪𑀸𑀯𑀁 𑀧𑀯𑁂𑀤𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑀢𑁄 𑀦𑀘𑀺𑀭𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.