𑁪. 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀲𑁆𑀲 𑀘𑀺𑀢𑁆𑀢𑀓𑀢𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀳𑀁𑀲𑀯𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀺𑀢𑁄 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀓𑀫𑁆𑀫𑀺𑀓𑁂𑀦 𑀤𑀲𑁆𑀲𑀺𑀢𑀁 𑀅𑀧𑀭𑀺𑀫𑀸𑀡𑀁 𑀓𑀼𑀮𑀯𑀁𑀲𑀸𑀦𑀼𑀕𑀢𑀁 𑀥𑀦𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀏𑀢𑁆𑀢𑀓𑀁 𑀥𑀦𑀭𑀸𑀲𑀺𑀁 𑀫𑀬𑁆𑀳𑀁 𑀧𑀺𑀢𑀼𑀅𑀬𑁆𑀬𑀓𑀧𑀬𑁆𑀬𑀓𑀸𑀤𑀬𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀫𑀬𑀸 𑀧𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑁄 𑀅𑀪𑀺𑀜𑁆𑀜𑀸𑀮𑀸𑀪𑀺𑀁 𑀏𑀓𑀁 𑀢𑀸𑀧𑀲𑀁 𑀉𑀧𑀝𑁆𑀞𑀳𑀦𑁆𑀢𑁄 𑀢𑁂𑀦 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑁂 𑀦𑀺𑀬𑁄𑀚𑀺𑀢𑁄 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀓𑀼𑀮𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑀗𑁆𑀔𑀸𑀢𑀁 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀲𑀺. 𑀅𑀣 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀣𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑁄 𑀧𑀲𑀦𑁆𑀦𑀫𑀸𑀦𑀲𑁄 𑀢𑀤𑀢𑁆𑀣𑀸𑀬 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀼𑀢𑀲𑁆𑀲 𑀪𑀕𑀯𑀢𑁄 𑀫𑀳𑀢𑀸 𑀲𑀓𑁆𑀓𑀸𑀭𑁂𑀦 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀇𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀢𑁄 𑀤𑁆𑀯𑁂𑀦𑀯𑀼𑀢𑁂 𑀓𑀧𑁆𑀧𑁂 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑀪𑀸𑀢𑀺𑀓𑁂𑀲𑀼 𑀢𑀻𑀲𑀼 𑀭𑀸𑀚𑀧𑀼𑀢𑁆𑀢𑁂𑀲𑀼 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀢𑁂𑀲𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀓𑀺𑀘𑁆𑀘𑀁 𑀅𑀓𑀸𑀲𑀺.

𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀢𑀁 𑀢𑀁 𑀩𑀳𑀼𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀭𑀼𑀭𑀝𑁆𑀞𑁂 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀦𑀺𑀕𑀫𑁂 𑀭𑀝𑁆𑀞𑀧𑀸𑀮𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀭𑀝𑁆𑀞𑀧𑀸𑀮𑁄𑀢𑀺 𑀯𑀁𑀲𑀸𑀦𑀼𑀕𑀢𑀫𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀬𑁄𑀩𑁆𑀩𑀦𑀧𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑀺𑀢𑁄 𑀫𑀳𑀦𑁆𑀢𑁂 𑀘 𑀬𑀲𑁂 𑀧𑀢𑀺𑀝𑁆𑀞𑀸𑀧𑀺𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀅𑀣 𑀪𑀕𑀯𑀸 𑀓𑀼𑀭𑀼𑀭𑀝𑁆𑀞𑁂 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀁 𑀅𑀦𑀼𑀧𑀸𑀧𑀼𑀡𑀺. 𑀢𑀁 𑀲𑀼𑀢𑁆𑀯𑀸 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀲𑀢𑁆𑀢𑀸𑀳𑀁 𑀪𑀢𑁆𑀢𑀘𑁆𑀙𑁂𑀤𑀁 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀼 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁨.𑁯𑁭-𑁧𑁧𑁧) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀯𑀭𑀦𑀸𑀕𑁄 𑀫𑀬𑀸 𑀤𑀺𑀦𑁆𑀦𑁄, 𑀈𑀲𑀸𑀤𑀦𑁆𑀢𑁄 𑀉𑀭𑀽𑀴𑁆𑀳𑀯𑀸.

‘‘𑀲𑁂𑀢𑀘𑁆𑀙𑀢𑁆𑀢𑁄 𑀧𑀲𑁄𑀪𑀺𑀢𑁄, 𑀲𑀓𑀧𑁆𑀧𑀦𑁄 𑀲𑀳𑀢𑁆𑀣𑀺𑀧𑁄;

𑀅𑀕𑁆𑀖𑀸𑀧𑁂𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁, 𑀲𑀗𑁆𑀖𑀸𑀭𑀸𑀫𑀁 𑀅𑀓𑀸𑀭𑀬𑀺𑀁.

‘‘𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀧𑀸𑀲𑀸𑀤𑁂 𑀓𑀸𑀭𑀬𑀺𑀁 𑀅𑀳𑀁;

𑀫𑀳𑁄𑀖𑀤𑀸𑀦𑀁 𑀓𑀭𑀺𑀢𑁆𑀯𑀸𑀦, 𑀦𑀺𑀬𑁆𑀬𑀸𑀤𑁂𑀲𑀺𑀁 𑀫𑀳𑁂𑀲𑀺𑀦𑁄.

‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀲𑀩𑁆𑀩𑁂 𑀚𑀦𑁂 𑀳𑀸𑀲𑀬𑀦𑁆𑀢𑁄, 𑀤𑁂𑀲𑁂𑀲𑀺 𑀅𑀫𑀢𑀁 𑀧𑀤𑀁.

‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑀮𑀚𑀼𑀢𑁆𑀢𑀭𑀦𑀸𑀫𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀧𑀸𑀲𑀸𑀤𑁂 𑀓𑀸𑀭𑀬𑀻 𑀅𑀬𑀁;

𑀓𑀣𑀬𑀺𑀲𑁆𑀲𑀸𑀫𑀺 𑀯𑀺𑀧𑀸𑀓𑀁, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

‘‘𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺, 𑀓𑀽𑀝𑀸𑀕𑀸𑀭𑀸 𑀪𑀯𑀺𑀲𑁆𑀲𑀭𑁂;

𑀩𑁆𑀬𑀫𑁆𑀳𑀼𑀢𑁆𑀢𑀫𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸, 𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀘 𑀢𑁂.

‘‘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀅𑀟𑁆𑀠𑁂 𑀓𑀼𑀮𑁂 𑀫𑀳𑀸𑀪𑁄𑀕𑁂, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀢𑀸𑀯𑀤𑁂.

‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀭𑀝𑁆𑀞𑀧𑀸𑀮𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

‘‘𑀉𑀝𑁆𑀞𑀸𑀬 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀚𑀳𑀺𑀢𑀸 𑀪𑁄𑀕𑀲𑀫𑁆𑀧𑀤𑀸;

𑀔𑁂𑀴𑀧𑀺𑀡𑁆𑀟𑁂𑀯 𑀪𑁄𑀕𑀫𑁆𑀳𑀺, 𑀧𑁂𑀫𑀁 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺.

‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀢𑀼𑀁 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀁 𑀕𑀦𑁆𑀢𑁆𑀯𑀸, 𑀢𑀢𑁆𑀣 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀮𑀪𑀺𑀢𑁆𑀯𑀸 𑀢𑀁 𑀅𑀫𑀢𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑁄, 𑀧𑀺𑀢𑀭𑀸 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀅𑀥𑀺𑀯𑀸𑀲𑁂𑀢𑁆𑀯𑀸, 𑀤𑀼𑀢𑀺𑀬𑀤𑀺𑀯𑀲𑁂 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀇𑀢𑁆𑀣𑀸𑀕𑀸𑀭𑀚𑀦𑁂 𑀉𑀧𑀕𑀦𑁆𑀢𑁆𑀯𑀸 ‘‘𑀓𑀻𑀤𑀺𑀲𑀸 𑀦𑀸𑀫 𑀢𑀸, 𑀅𑀬𑁆𑀬𑀧𑀼𑀢𑁆𑀢, 𑀅𑀘𑁆𑀙𑀭𑀸𑀬𑁄, 𑀬𑀸𑀲𑀁 𑀢𑁆𑀯𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀻’’𑀢𑀺𑀆𑀤𑀻𑀦𑀺 (𑀫. 𑀦𑀺. 𑁨.𑁩𑁦𑁧) 𑀯𑀢𑁆𑀯𑀸, 𑀧𑀮𑁄𑀪𑀦𑀓𑀫𑁆𑀫𑀁 𑀓𑀸𑀢𑀼𑀁 𑀆𑀭𑀤𑁆𑀥𑁂 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋

𑁭𑁬𑁯. ‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀺.

𑁭𑁭𑁦. ‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀭𑀽𑀧𑀁, 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘;

𑀅𑀝𑁆𑀞𑀺𑀁 𑀢𑀘𑁂𑀦 𑀑𑀦𑀤𑁆𑀥𑀁, 𑀲𑀳 𑀯𑀢𑁆𑀣𑁂𑀳𑀺 𑀲𑁄𑀪𑀢𑀺.

𑁭𑁭𑁧. ‘‘𑀅𑀮𑀢𑁆𑀢𑀓𑀓𑀢𑀸 𑀧𑀸𑀤𑀸, 𑀫𑀼𑀔𑀁 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀁;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁭𑁭𑁨. ‘‘𑀅𑀝𑁆𑀞𑀸𑀧𑀤𑀓𑀢𑀸 𑀓𑁂𑀲𑀸, 𑀦𑁂𑀢𑁆𑀢𑀸 𑀅𑀜𑁆𑀚𑀦𑀫𑀓𑁆𑀔𑀺𑀢𑀸;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁭𑁭𑁩. ‘‘𑀅𑀜𑁆𑀚𑀦𑀻𑀯 𑀦𑀯𑀸 𑀘𑀺𑀢𑁆𑀢𑀸, 𑀧𑀽𑀢𑀺𑀓𑀸𑀬𑁄 𑀅𑀮𑀗𑁆𑀓𑀢𑁄;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁭𑁭𑁪. ‘‘𑀑𑀤𑀳𑀺 𑀫𑀺𑀕𑀯𑁄 𑀧𑀸𑀲𑀁, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀓𑀦𑁆𑀤𑀦𑁆𑀢𑁂 𑀫𑀺𑀕𑀩𑀦𑁆𑀥𑀓𑁂.

𑁭𑁭𑁫. ‘‘𑀙𑀺𑀦𑁆𑀦𑁄 𑀧𑀸𑀲𑁄 𑀫𑀺𑀕𑀯𑀲𑁆𑀲, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀲𑁄𑀘𑀦𑁆𑀢𑁂 𑀫𑀺𑀕𑀮𑀼𑀤𑁆𑀤𑀓𑁂’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀘𑀺𑀢𑁆𑀢𑀓𑀢𑀦𑁆𑀢𑀺 𑀘𑀺𑀢𑁆𑀢𑀁 𑀓𑀢𑀁 𑀘𑀺𑀢𑁆𑀢𑀓𑀢𑀁, 𑀯𑀢𑁆𑀣𑀸𑀪𑀭𑀡𑀫𑀸𑀮𑀸𑀤𑀻𑀳𑀺 𑀯𑀺𑀘𑀺𑀢𑁆𑀢𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀩𑀺𑀫𑁆𑀩𑀦𑁆𑀢𑀺 𑀤𑀻𑀖𑀸𑀤𑀺𑀪𑀸𑀯𑁂𑀦 𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀤𑀻𑀖𑀸𑀤𑀻𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀫𑀡𑁆𑀟𑀺𑀢𑀁 𑀅𑀢𑁆𑀢𑀪𑀸𑀯𑀁. 𑀅𑀭𑀼𑀓𑀸𑀬𑀦𑁆𑀢𑀺 𑀦𑀯𑀦𑁆𑀦𑀁 𑀯𑀡𑀫𑀼𑀔𑀸𑀦𑀁 𑀮𑁄𑀫𑀓𑀽𑀧𑀸𑀦𑀜𑁆𑀘 𑀯𑀲𑁂𑀦 𑀯𑀺𑀲𑁆𑀲𑀦𑁆𑀤𑀫𑀸𑀦𑀅𑀲𑀼𑀘𑀺𑀁, 𑀲𑀩𑁆𑀩𑀲𑁄 𑀘 𑀅𑀭𑀼𑀪𑀽𑀢𑀁 𑀯𑀡𑀪𑀽𑀢𑀁 𑀅𑀭𑀽𑀦𑀁 𑀯𑀸 𑀓𑀸𑀬𑀁. 𑀲𑀫𑀼𑀲𑁆𑀲𑀺𑀢𑀦𑁆𑀢𑀺 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀲𑀫𑀼𑀲𑁆𑀲𑀺𑀢𑀁. 𑀆𑀢𑀼𑀭𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑀸𑀤𑀻𑀳𑀺 𑀧𑀭𑀺𑀳𑀭𑀺𑀢𑀩𑁆𑀩𑀢𑀸𑀬 𑀦𑀺𑀘𑁆𑀘𑀁 𑀕𑀺𑀮𑀸𑀦𑀁. 𑀩𑀳𑀼𑀲𑀗𑁆𑀓𑀧𑁆𑀧𑀦𑁆𑀢𑀺 𑀩𑀸𑀮𑀚𑀦𑁂𑀦 𑀅𑀪𑀽𑀢𑀁 𑀆𑀭𑁄𑀧𑁂𑀢𑁆𑀯𑀸 𑀩𑀳𑀼𑀥𑀸 𑀲𑀗𑁆𑀓𑀧𑁆𑀧𑀺𑀢𑀩𑁆𑀩𑀁. 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀻𑀢𑀺 𑀬𑀲𑁆𑀲 𑀓𑀸𑀬𑀲𑁆𑀲 𑀥𑀼𑀯𑀪𑀸𑀯𑁄 𑀞𑀺𑀢𑀺𑀲𑀪𑀸𑀯𑁄 𑀦𑀢𑁆𑀣𑀺, 𑀏𑀓𑀁𑀲𑀢𑁄 𑀪𑁂𑀤𑀦𑀯𑀺𑀓𑀺𑀭𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄𑀬𑁂𑀯. 𑀢𑀁 𑀧𑀲𑁆𑀲𑀸𑀢𑀺 𑀲𑀫𑀻𑀧𑁂 𑀞𑀺𑀢𑀁 𑀚𑀦𑀁, 𑀅𑀢𑁆𑀢𑀸𑀦𑀫𑁂𑀯 𑀯𑀸 𑀲𑀦𑁆𑀥𑀸𑀬 𑀯𑀤𑀢𑀺.

𑀭𑀽𑀧𑀦𑁆𑀢𑀺 𑀲𑀭𑀻𑀭𑀁. 𑀲𑀭𑀻𑀭𑀫𑁆𑀧𑀺 𑀳𑀺 ‘‘𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘, 𑀦𑁆𑀳𑀸𑀭𑀼𑀜𑁆𑀘 𑀧𑀝𑀺𑀘𑁆𑀘, 𑀫𑀁𑀲𑀜𑁆𑀘 𑀧𑀝𑀺𑀘𑁆𑀘, 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘, 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 ‘𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦𑁬) 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘𑀸𑀢𑀺 𑀲𑀻𑀲𑀽𑀧𑀕𑀸𑀤𑀺𑀆𑀪𑀭𑀡𑀕𑀢𑁂𑀦 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘𑀺𑀢𑁆𑀢𑀓𑀢𑀁. 𑀅𑀝𑁆𑀞𑀺𑀁 𑀢𑀘𑁂𑀦 𑀑𑀦𑀤𑁆𑀥𑀦𑁆𑀢𑀺 𑀅𑀮𑁆𑀮𑀘𑀫𑁆𑀫𑁂𑀦 𑀧𑀭𑀺𑀬𑁄𑀦𑀤𑁆𑀥𑀁 𑀅𑀢𑀺𑀭𑁂𑀓𑀢𑀺𑀲𑀢𑀧𑀪𑁂𑀤𑀁 𑀅𑀝𑁆𑀞𑀺𑀁 𑀧𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀓𑀼𑀡𑁆𑀟𑀮𑁂𑀦 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀲𑁂𑀲𑀸𑀪𑀭𑀡𑀸𑀮𑀗𑁆𑀓𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀳 𑀯𑀢𑁆𑀣𑁂𑀳𑀺 𑀲𑁄𑀪𑀢𑀻𑀢𑀺 𑀢𑀬𑀺𑀤𑀁 𑀭𑀽𑀧𑀁 𑀫𑀡𑀺𑀦𑀸 𑀘𑀺𑀢𑁆𑀢𑀓𑀢𑀫𑁆𑀧𑀺 𑀯𑀢𑁆𑀣𑁂𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑀫𑁂𑀯 𑀲𑁄𑀪𑀢𑀺, 𑀦 𑀅𑀧𑀝𑀺𑀘𑁆𑀙𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀬𑁂 𑀧𑀦 ‘‘𑀅𑀝𑁆𑀞𑀺𑀢𑀘𑁂𑀦𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀅𑀝𑁆𑀞𑀺𑀢𑀘𑁂𑀦𑀁 𑀑𑀦𑀤𑁆𑀥𑀁 𑀲𑁄𑀪𑀢𑀺, 𑀑𑀦𑀤𑁆𑀥𑀢𑁆𑀢𑀸 𑀅𑀝𑁆𑀞𑀺𑀢𑀘𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀮𑀢𑁆𑀢𑀓𑀓𑀢𑀸𑀢𑀺 𑀅𑀮𑀢𑁆𑀢𑀓𑁂𑀦 𑀓𑀢𑀭𑀜𑁆𑀚𑀦𑀸 𑀮𑀸𑀔𑀸𑀬 𑀲𑀁𑀭𑀜𑁆𑀚𑀺𑀢𑀸. 𑀧𑀸𑀤𑀸𑀢𑀺 𑀘𑀭𑀡𑀸. 𑀫𑀼𑀔𑀁 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀦𑁆𑀢𑀺 𑀫𑀼𑀔𑀁 𑀘𑀼𑀡𑁆𑀡𑀓𑁂𑀦 𑀫𑀓𑁆𑀔𑀺𑀢𑀁, 𑀬𑀁 𑀫𑀡𑁆𑀟𑀦𑀫𑀦𑀼𑀬𑀼𑀢𑁆𑀢𑀸 𑀲𑀸𑀲𑀧𑀓𑀓𑁆𑀓𑁂𑀦 𑀫𑀼𑀔𑀧𑀻𑀴𑀓𑀸𑀤𑀻𑀦𑀺 𑀳𑀭𑀺𑀢𑁆𑀯𑀸 𑀮𑁄𑀡𑀫𑀢𑁆𑀢𑀺𑀓𑀸𑀬 𑀤𑀼𑀝𑁆𑀞𑀮𑁄𑀳𑀺𑀢𑀁 𑀳𑀭𑀺𑀢𑁆𑀯𑀸 𑀫𑀼𑀔𑀘𑀼𑀡𑁆𑀡𑀓𑀯𑀺𑀮𑁂𑀧𑀦𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀮𑀦𑁆𑀢𑀺 𑀩𑀸𑀮𑀲𑁆𑀲 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄 𑀯𑀝𑁆𑀝𑀸𑀪𑀺𑀭𑀢𑀲𑁆𑀲 𑀫𑁄𑀳𑀸𑀬 𑀲𑀫𑁆𑀫𑁄𑀳𑀦𑀸𑀬 𑀲𑀫𑀢𑁆𑀣𑀁 𑀢𑀲𑁆𑀲 𑀘𑀺𑀢𑁆𑀢𑀁 𑀫𑁄𑀳𑁂𑀢𑀼𑀁 𑀧𑀭𑀺𑀬𑀢𑁆𑀢𑀁, 𑀧𑀸𑀭𑀕𑀯𑁂𑀲𑀺𑀦𑁄 𑀧𑀦 𑀯𑀺𑀯𑀝𑁆𑀝𑀸𑀪𑀺𑀭𑀢𑀲𑁆𑀲 𑀦𑁄 𑀅𑀮𑀁 𑀦 𑀧𑀭𑀺𑀬𑀢𑁆𑀢𑀁.

𑀅𑀝𑁆𑀞𑀸𑀧𑀤𑀓𑀢𑀸𑀢𑀺 𑀅𑀝𑁆𑀞𑀧𑀤𑀸𑀓𑀸𑀭𑁂𑀦 𑀓𑀢𑀸 𑀲𑀜𑁆𑀘𑀺𑀢𑀸 𑀧𑀼𑀭𑀺𑀫𑀪𑀸𑀕𑁂 𑀓𑁂𑀲𑁂 𑀓𑀧𑁆𑀧𑁂𑀢𑁆𑀯𑀸 𑀦𑀮𑀸𑀝𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀓𑀢𑀸 𑀓𑁂𑀲𑀭𑀘𑀦𑀸 𑀅𑀝𑁆𑀞𑀧𑀤𑀁 𑀦𑀸𑀫, 𑀬𑀁 ‘‘𑀅𑀮𑀓’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀦𑁂𑀢𑁆𑀢𑀸 𑀅𑀜𑁆𑀚𑀦𑀫𑀓𑁆𑀔𑀺𑀢𑀸𑀢𑀺 𑀉𑀪𑁄𑀧𑀺 𑀦𑀬𑀦𑀸𑀦𑀺 𑀅𑀦𑁆𑀢𑁄 𑀤𑁆𑀯𑀻𑀲𑀼 𑀅𑀦𑁆𑀢𑁂𑀲𑀼 𑀘 𑀬𑀣𑀸 𑀅𑀜𑁆𑀚𑀦𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀏𑀯𑀁 𑀅𑀜𑁆𑀚𑀺𑀢𑀜𑁆𑀚𑀦𑀸𑀦𑀺.

𑀅𑀜𑁆𑀚𑀦𑀻𑀯 𑀦𑀯𑀸 𑀘𑀺𑀢𑁆𑀢𑀸, 𑀧𑀽𑀢𑀺𑀓𑀸𑀬𑁄 𑀅𑀮𑀗𑁆𑀓𑀢𑁄𑀢𑀺 𑀬𑀣𑀸 𑀅𑀜𑁆𑀚𑀦𑀻 𑀅𑀜𑁆𑀚𑀦𑀦𑀸𑀴𑀺𑀓𑀸 𑀦𑀯𑀸 𑀅𑀪𑀺𑀦𑀯𑀸 𑀫𑀸𑀮𑀸𑀓𑀫𑁆𑀫𑀫𑀓𑀭𑀤𑀦𑁆𑀢𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀸 𑀩𑀳𑀺 𑀫𑀝𑁆𑀞𑀸 𑀉𑀚𑁆𑀚𑀮𑀸 𑀤𑀲𑁆𑀲𑀦𑀻𑀬𑀸, 𑀅𑀦𑁆𑀢𑁄 𑀧𑀦 𑀦 𑀤𑀲𑁆𑀲𑀦𑀻𑀬𑀸 𑀳𑁄𑀢𑀺, 𑀏𑀯𑀫𑁂𑀯 𑀢𑀸𑀲𑀁 𑀓𑀸𑀬𑁄 𑀦𑁆𑀳𑀸𑀦𑀩𑁆𑀪𑀜𑁆𑀚𑀦𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑁄 𑀩𑀳𑀺 𑀉𑀚𑁆𑀚𑀮𑁄, 𑀅𑀦𑁆𑀢𑁄 𑀧𑀦 𑀧𑀽𑀢𑀺 𑀦𑀸𑀦𑀧𑁆𑀧𑀓𑀸𑀭𑀅𑀲𑀼𑀘𑀻𑀳𑀺 𑀪𑀭𑀺𑀢𑁄 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄.

𑀑𑀤𑀳𑀻𑀢𑀺 𑀑𑀟𑁆𑀟𑁂𑀲𑀺. 𑀫𑀺𑀕𑀯𑁄𑀢𑀺, 𑀫𑀺𑀕𑀮𑀼𑀤𑁆𑀤𑀓𑁄. 𑀧𑀸𑀲𑀦𑁆𑀢𑀺, 𑀤𑀡𑁆𑀟𑀯𑀸𑀕𑀼𑀭𑀁. 𑀦𑀸𑀲𑀤𑀸𑀢𑀺 𑀦 𑀲𑀗𑁆𑀖𑀝𑁆𑀝𑁂𑀲𑀺. 𑀯𑀸𑀕𑀼𑀭𑀦𑁆𑀢𑀺 𑀧𑀸𑀲𑀁. 𑀦𑀺𑀯𑀸𑀧𑀦𑁆𑀢𑀺 𑀫𑀺𑀕𑀸𑀦𑀁 𑀔𑀸𑀤𑀦𑀢𑁆𑀣𑀸𑀬 𑀔𑀺𑀢𑁆𑀢𑀁 𑀢𑀺𑀡𑀸𑀤𑀺𑀖𑀸𑀲𑀁. 𑀉𑀧𑀫𑀸 𑀔𑁄 𑀅𑀬𑀁 𑀣𑁂𑀭𑁂𑀦 𑀓𑀢𑀸 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀫𑀺𑀕𑀸𑀦𑀁 𑀫𑀸𑀭𑀡𑀢𑁆𑀣𑀸𑀬 𑀤𑀡𑁆𑀟𑀯𑀸𑀕𑀼𑀭𑀁 𑀑𑀟𑁆𑀟𑁂𑀢𑁆𑀯𑀸 𑀢𑀢𑁆𑀣 𑀦𑀺𑀯𑀸𑀧𑀁 𑀯𑀺𑀓𑀺𑀭𑀺𑀬 𑀫𑀺𑀕𑀮𑀼𑀤𑁆𑀤𑀓𑁂 𑀦𑀺𑀮𑀻𑀦𑁂 𑀞𑀺𑀢𑁂 𑀢𑀢𑁆𑀣𑁂𑀓𑁄 𑀚𑀯𑀧𑀭𑀓𑁆𑀓𑀫𑀲𑀫𑁆𑀧𑀦𑁆𑀦𑁄 𑀙𑁂𑀓𑁄 𑀫𑀺𑀕𑁄 𑀧𑀸𑀲𑀁 𑀅𑀨𑀼𑀲𑀦𑁆𑀢𑁄 𑀏𑀯 𑀬𑀣𑀸𑀲𑀼𑀔𑀁 𑀦𑀺𑀯𑀸𑀧𑀁 𑀔𑀸𑀤𑀺𑀢𑁆𑀯𑀸, ‘‘𑀯𑀜𑁆𑀘𑁂𑀲𑀺 𑀯𑀢 𑀫𑀺𑀕𑁄’’𑀢𑀺 𑀫𑀺𑀕𑀮𑀼𑀤𑁆𑀤𑀓𑁂 𑀯𑀺𑀭𑀯𑀦𑁆𑀢𑁂 𑀏𑀯 𑀕𑀘𑁆𑀙𑀢𑀺. 𑀅𑀧𑀭𑁄 𑀫𑀺𑀕𑁄 𑀩𑀮𑀯𑀸 𑀙𑁂𑀓𑁄 𑀚𑀯𑀲𑀫𑁆𑀧𑀦𑁆𑀦𑁄𑀯 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀯𑀸𑀧𑀁 𑀔𑀸𑀤𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀸𑀲𑀁 𑀙𑀺𑀦𑁆𑀤𑀺𑀢𑁆𑀯𑀸, ‘‘𑀯𑀜𑁆𑀘𑁂𑀲𑀺 𑀯𑀢 𑀫𑀺𑀕𑁄, 𑀧𑀸𑀲𑁄 𑀙𑀺𑀦𑁆𑀦𑁄’’𑀢𑀺 𑀫𑀺𑀕𑀮𑀼𑀤𑁆𑀤𑀓𑁂 𑀲𑁄𑀘𑀦𑁆𑀢𑁂 𑀏𑀯 𑀕𑀘𑁆𑀙𑀢𑀺, 𑀏𑀯𑀁 𑀫𑀬𑀫𑁆𑀧𑀺 𑀧𑀼𑀩𑁆𑀩𑁂 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀫𑀸𑀢𑀸𑀧𑀺𑀢𑀽𑀳𑀺 𑀆𑀲𑀚𑁆𑀚𑀦𑀢𑁆𑀣𑀸𑀬 𑀦𑀺𑀬𑁆𑀬𑀸𑀤𑀺𑀢𑁂 𑀪𑁄𑀕𑁂 𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀅𑀲𑀚𑁆𑀚𑀫𑀸𑀦𑀸 𑀦𑀺𑀓𑁆𑀔𑀦𑁆𑀢𑀸. 𑀇𑀤𑀸𑀦𑀺 𑀧𑀦 𑀲𑀩𑁆𑀩𑀲𑁄 𑀙𑀺𑀦𑁆𑀦𑀓𑀺𑀮𑁂𑀲𑀸 𑀅𑀧𑀸𑀲𑀸 𑀳𑀼𑀢𑁆𑀯𑀸 𑀞𑀺𑀢𑀸, 𑀢𑁂𑀳𑀺 𑀤𑀺𑀦𑁆𑀦𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂𑀲𑀼 𑀲𑁄𑀘𑀦𑁆𑀢𑁂𑀲𑀼 𑀏𑀯 𑀕𑀘𑁆𑀙𑀸𑀫𑀸𑀢𑀺.

𑀏𑀯𑀁 𑀣𑁂𑀭𑁄 𑀫𑀺𑀕𑀮𑀼𑀤𑁆𑀤𑀓𑀁 𑀯𑀺𑀬 𑀫𑀸𑀢𑀸𑀧𑀺𑀢𑀭𑁄, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀇𑀢𑁆𑀣𑀸𑀕𑀸𑀭𑀜𑁆𑀘 𑀯𑀸𑀕𑀼𑀭𑀚𑀸𑀮𑀁 𑀯𑀺𑀬, 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀪𑀼𑀢𑁆𑀢𑀪𑁄𑀕𑁂 𑀘 𑀇𑀤𑀸𑀦𑀺 𑀪𑀼𑀢𑁆𑀢𑀪𑁄𑀚𑀦𑀜𑁆𑀘 𑀦𑀺𑀯𑀸𑀧𑀢𑀺𑀡𑀁 𑀯𑀺𑀬, 𑀅𑀢𑁆𑀢𑀸𑀦𑀁 𑀫𑀳𑀸𑀫𑀺𑀕𑀁 𑀯𑀺𑀬 𑀘 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀇𑀫𑀸 𑀕𑀸𑀣𑀸 𑀯𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀓𑁄𑀭𑀩𑁆𑀬𑀲𑁆𑀲 𑀫𑀺𑀕𑀸𑀚𑀺𑀦𑀉𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺. 𑀣𑁂𑀭𑀲𑁆𑀲 𑀓𑀺𑀭 𑀧𑀺𑀢𑀸 𑀲𑀢𑁆𑀢𑀲𑀼 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀅𑀕𑁆𑀕𑀴𑀁 𑀤𑀸𑀧𑁂𑀢𑁆𑀯𑀸 𑀫𑀮𑁆𑀮𑁂 𑀆𑀡𑀸𑀧𑁂𑀲𑀺 ‘‘𑀦𑀺𑀓𑁆𑀔𑀫𑀺𑀢𑀼𑀁 𑀫𑀸 𑀤𑁂𑀣, 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑁂𑀢𑀓𑀸𑀦𑀺 𑀦𑀺𑀯𑀸𑀲𑁂𑀣𑀸’’𑀢𑀺, 𑀢𑀲𑁆𑀫𑀸 𑀣𑁂𑀭𑁄 𑀆𑀓𑀸𑀲𑁂𑀦 𑀅𑀕𑀫𑀸𑀲𑀺. 𑀅𑀣 𑀭𑀸𑀚𑀸 𑀓𑁄𑀭𑀩𑁆𑀬𑁄 𑀣𑁂𑀭𑀲𑁆𑀲 𑀢𑀢𑁆𑀣 𑀦𑀺𑀲𑀺𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 ‘‘𑀇𑀥, 𑀪𑁄 𑀭𑀝𑁆𑀞𑀧𑀸𑀮, 𑀧𑀩𑁆𑀩𑀚𑀦𑁆𑀢𑁄 𑀩𑁆𑀬𑀸𑀥𑀺𑀧𑀸𑀭𑀺𑀚𑀼𑀜𑁆𑀜𑀁 𑀯𑀸 𑀚𑀭𑀸𑀪𑁄𑀕𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀁 𑀯𑀸 𑀧𑀢𑁆𑀢𑁄 𑀧𑀩𑁆𑀩𑀚𑀢𑀺. 𑀢𑁆𑀯𑀁 𑀧𑀦 𑀓𑀺𑀜𑁆𑀘𑀺𑀧𑀺 𑀧𑀸𑀭𑀺𑀚𑀼𑀜𑁆𑀜𑀁 𑀅𑀦𑀼𑀧𑀕𑀢𑁄 𑀏𑀯 𑀓𑀲𑁆𑀫𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀣𑁂𑀭𑁄, ‘‘𑀉𑀧𑀦𑀺𑀬𑁆𑀬𑀢𑀺 𑀮𑁄𑀓𑁄 𑀅𑀤𑁆𑀥𑀼𑀯𑁄, 𑀅𑀢𑀸𑀡𑁄 𑀮𑁄𑀓𑁄 𑀅𑀦𑀪𑀺𑀲𑁆𑀲𑀭𑁄, 𑀅𑀲𑁆𑀲𑀓𑁄 𑀮𑁄𑀓𑁄 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁, 𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄’’𑀢𑀺 (𑀫. 𑀦𑀺. 𑁨.𑁩𑁦𑁫) 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀦𑀁 𑀅𑀢𑁆𑀢𑀸𑀦𑀁 𑀯𑀺𑀯𑀺𑀢𑁆𑀢𑀪𑀸𑀯𑀁 𑀓𑀣𑁂𑀢𑁆𑀯𑀸 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀅𑀦𑀼𑀕𑀻𑀢𑀺𑀁 𑀓𑀣𑁂𑀦𑁆𑀢𑁄 𑁋

𑁭𑁭𑁬. ‘‘𑀧𑀲𑁆𑀲𑀸𑀫𑀺 𑀮𑁄𑀓𑁂 𑀲𑀥𑀦𑁂 𑀫𑀦𑀼𑀲𑁆𑀲𑁂, 𑀮𑀤𑁆𑀥𑀸𑀦 𑀯𑀺𑀢𑁆𑀢𑀁 𑀦 𑀤𑀤𑀦𑁆𑀢𑀺 𑀫𑁄𑀳𑀸;

𑀮𑀼𑀤𑁆𑀥𑀸 𑀥𑀦𑀁 𑀲𑀦𑁆𑀦𑀺𑀘𑀬𑀁 𑀓𑀭𑁄𑀦𑁆𑀢𑀺, 𑀪𑀺𑀬𑁆𑀬𑁄𑀯 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑀦𑁆𑀢𑀺.

𑁭𑁭𑁭. ‘‘𑀭𑀸𑀚𑀸 𑀧𑀲𑀬𑁆𑀳𑀧𑁆𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸, 𑀲𑀲𑀸𑀕𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀦𑁆𑀢𑁄;

𑀑𑀭𑀁 𑀲𑀫𑀼𑀤𑁆𑀤𑀲𑁆𑀲 𑀅𑀢𑀺𑀢𑁆𑀢𑀭𑀽𑀧𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲𑀧𑀺 𑀧𑀢𑁆𑀣𑀬𑁂𑀣.

𑁭𑁭𑁮. ‘‘𑀭𑀸𑀚𑀸 𑀘 𑀅𑀜𑁆𑀜𑁂 𑀘 𑀩𑀳𑀽 𑀫𑀦𑀼𑀲𑁆𑀲𑀸, 𑀅𑀯𑀻𑀢𑀢𑀡𑁆𑀳𑀸 𑀫𑀭𑀡𑀁 𑀉𑀧𑁂𑀦𑁆𑀢𑀺;

𑀊𑀦𑀸𑀯 𑀳𑀼𑀢𑁆𑀯𑀸𑀦 𑀚𑀳𑀦𑁆𑀢𑀺 𑀤𑁂𑀳𑀁, 𑀓𑀸𑀫𑁂𑀳𑀺 𑀮𑁄𑀓𑀫𑁆𑀳𑀺 𑀦 𑀳𑀢𑁆𑀣𑀺 𑀢𑀺𑀢𑁆𑀢𑀺.

𑁭𑁭𑁯. ‘‘𑀓𑀦𑁆𑀤𑀦𑁆𑀢𑀺 𑀦𑀁 𑀜𑀸𑀢𑀻 𑀧𑀓𑀺𑀭𑀺𑀬 𑀓𑁂𑀲𑁂, ‘𑀅𑀳𑁄 𑀯𑀢𑀸 𑀦𑁄 𑀅𑀫𑀭𑀸’𑀢𑀺 𑀘𑀸𑀳𑀼;

𑀯𑀢𑁆𑀣𑁂𑀦 𑀦𑀁 𑀧𑀸𑀭𑀼𑀢𑀁 𑀦𑀻𑀳𑀭𑀺𑀢𑁆𑀯𑀸, 𑀘𑀺𑀢𑀁 𑀲𑀫𑁄𑀥𑀸𑀬 𑀢𑀢𑁄 𑀟𑀳𑀦𑁆𑀢𑀺.

𑁭𑁮𑁦. ‘‘𑀲𑁄 𑀟𑀬𑁆𑀳𑀢𑀺 𑀲𑀽𑀮𑁂𑀳𑀺 𑀢𑀼𑀚𑁆𑀚𑀫𑀸𑀦𑁄, 𑀏𑀓𑁂𑀦 𑀯𑀢𑁆𑀣𑁂𑀦 𑀧𑀳𑀸𑀬 𑀪𑁄𑀕𑁂;

𑀦 𑀫𑀻𑀬𑀫𑀸𑀦𑀲𑁆𑀲 𑀪𑀯𑀦𑁆𑀢𑀺 𑀢𑀸𑀡𑀸, 𑀜𑀸𑀢𑀻 𑀘 𑀫𑀺𑀢𑁆𑀢𑀸 𑀅𑀣 𑀯𑀸 𑀲𑀳𑀸𑀬𑀸.

𑁭𑁮𑁧. ‘‘𑀤𑀸𑀬𑀸𑀤𑀓𑀸 𑀢𑀲𑁆𑀲 𑀥𑀦𑀁 𑀳𑀭𑀦𑁆𑀢𑀺, 𑀲𑀢𑁆𑀢𑁄 𑀧𑀦 𑀕𑀘𑁆𑀙𑀢𑀺 𑀬𑁂𑀦𑀓𑀫𑁆𑀫𑀁;

𑀦 𑀫𑀻𑀬𑀫𑀸𑀦𑀁 𑀥𑀦𑀫𑀦𑁆𑀯𑁂𑀢𑀺 𑀓𑀺𑀜𑁆𑀘𑀺, 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀥𑀦𑀜𑁆𑀘 𑀭𑀝𑁆𑀞𑀁.

𑁭𑁮𑁨. ‘‘𑀦 𑀤𑀻𑀖𑀫𑀸𑀬𑀼𑀁 𑀮𑀪𑀢𑁂 𑀥𑀦𑁂𑀦, 𑀦 𑀘𑀸𑀧𑀺 𑀯𑀺𑀢𑁆𑀢𑁂𑀦 𑀚𑀭𑀁 𑀯𑀺𑀳𑀦𑁆𑀢𑀺;

𑀅𑀧𑁆𑀧𑀁 𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸, 𑀅𑀲𑀲𑁆𑀲𑀢𑀁 𑀯𑀺𑀧𑁆𑀧𑀭𑀺𑀡𑀸𑀫𑀥𑀫𑁆𑀫𑀁.

𑁭𑁮𑁩. ‘‘𑀅𑀟𑁆𑀠𑀸 𑀤𑀮𑀺𑀤𑁆𑀤𑀸 𑀘 𑀨𑀼𑀲𑀦𑁆𑀢𑀺 𑀨𑀲𑁆𑀲𑀁, 𑀩𑀸𑀮𑁄 𑀘 𑀥𑀻𑀭𑁄 𑀘 𑀢𑀣𑁂𑀯 𑀨𑀼𑀝𑁆𑀞𑁄;

𑀩𑀸𑀮𑁄 𑀳𑀺 𑀩𑀸𑀮𑁆𑀬𑀸 𑀯𑀥𑀺𑀢𑁄𑀯 𑀲𑁂𑀢𑀺, 𑀥𑀻𑀭𑁄 𑀘 𑀦𑁄 𑀯𑁂𑀥𑀢𑀺 𑀨𑀲𑁆𑀲𑀨𑀼𑀝𑁆𑀞𑁄.

𑁭𑁮𑁪. ‘‘𑀢𑀲𑁆𑀫𑀸 𑀳𑀺 𑀧𑀜𑁆𑀜𑀸𑀯 𑀥𑀦𑁂𑀦 𑀲𑁂𑀬𑁆𑀬𑀸, 𑀬𑀸𑀬 𑀯𑁄𑀲𑀸𑀦𑀫𑀺𑀥𑀸𑀥𑀺𑀕𑀘𑁆𑀙𑀢𑀺;

𑀅𑀩𑁆𑀬𑁄𑀲𑀺𑀢𑀢𑁆𑀢𑀸 𑀳𑀺 𑀪𑀯𑀸𑀪𑀯𑁂𑀲𑀼, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺 𑀫𑁄𑀳𑀸.

𑁭𑁮𑁫. ‘‘𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁, 𑀲𑀁𑀲𑀸𑀭𑀫𑀸𑀧𑀚𑁆𑀚 𑀧𑀭𑀫𑁆𑀧𑀭𑀸𑀬;

𑀢𑀲𑁆𑀲𑀧𑁆𑀧𑀧𑀜𑁆𑀜𑁄 𑀅𑀪𑀺𑀲𑀤𑁆𑀤𑀳𑀦𑁆𑀢𑁄, 𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁.

𑁭𑁮𑁬. ‘‘𑀘𑁄𑀭𑁄 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀻𑀢𑁄, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀧𑀸𑀧𑀥𑀫𑁆𑀫𑁄;

𑀏𑀯𑀁 𑀧𑀚𑀸 𑀧𑁂𑀘𑁆𑀘 𑀧𑀭𑀫𑁆𑀳𑀺 𑀮𑁄𑀓𑁂, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀧𑀸𑀧𑀥𑀫𑁆𑀫𑁄.

𑁭𑁮𑁭. ‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀢𑀲𑁆𑀫𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚.

𑁭𑁮𑁮. ‘‘𑀤𑀼𑀫𑀧𑁆𑀨𑀮𑀸𑀦𑀻𑀯 𑀧𑀢𑀦𑁆𑀢𑀺 𑀫𑀸𑀡𑀯𑀸, 𑀤𑀳𑀭𑀸 𑀘 𑀯𑀼𑀟𑁆𑀠𑀸 𑀘 𑀲𑀭𑀻𑀭𑀪𑁂𑀤𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄.

𑁭𑁮𑁯. ‘‘𑀲𑀤𑁆𑀥𑀸𑀬𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀉𑀧𑁂𑀢𑁄 𑀚𑀺𑀦𑀲𑀸𑀲𑀦𑁂;

𑀅𑀯𑀜𑁆𑀛𑀸 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸, 𑀅𑀦𑀡𑁄 𑀪𑀼𑀜𑁆𑀚𑀸𑀫𑀺 𑀪𑁄𑀚𑀦𑀁.

𑁭𑁯𑁦. ‘‘𑀓𑀸𑀫𑁂 𑀆𑀤𑀺𑀢𑁆𑀢𑀢𑁄 𑀤𑀺𑀲𑁆𑀯𑀸, 𑀚𑀸𑀢𑀭𑀽𑀧𑀸𑀦𑀺 𑀲𑀢𑁆𑀣𑀢𑁄;

𑀕𑀩𑁆𑀪𑀯𑁄𑀓𑁆𑀓𑀦𑁆𑀢𑀺𑀢𑁄 𑀤𑀼𑀓𑁆𑀔𑀁, 𑀦𑀺𑀭𑀬𑁂𑀲𑀼 𑀫𑀳𑀩𑁆𑀪𑀬𑀁.

𑁭𑁯𑁧. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀲𑀁𑀯𑁂𑀕𑀁 𑀅𑀮𑀪𑀺𑀁 𑀢𑀤𑀸;

𑀲𑁄𑀳𑀁 𑀯𑀺𑀤𑁆𑀥𑁄 𑀢𑀤𑀸 𑀲𑀦𑁆𑀢𑁄, 𑀲𑀫𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬𑀁.

𑁭𑁯𑁨. ‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁭𑁯𑁩. ‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀯𑁄𑀘;

𑀢𑀢𑁆𑀣 𑀧𑀲𑁆𑀲𑀸𑀫𑀺 𑀮𑁄𑀓𑁂𑀢𑀺 𑀅𑀳𑀁, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀥𑀦𑁂 𑀥𑀦𑀲𑀫𑁆𑀧𑀦𑁆𑀦𑁂 𑀅𑀟𑁆𑀠𑁂 𑀫𑀦𑀼𑀲𑁆𑀲𑁂 𑀧𑀲𑁆𑀲𑀸𑀫𑀺, 𑀢𑁂 𑀧𑀦 𑀮𑀤𑁆𑀥𑀸𑀦 𑀯𑀺𑀢𑁆𑀢𑀁 𑀥𑀦𑀁 𑀮𑀪𑀺𑀢𑁆𑀯𑀸 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺𑀧𑀺 𑀦 𑀤𑀤𑀦𑁆𑀢𑀺. 𑀓𑀲𑁆𑀫𑀸? 𑀫𑁄𑀳𑀸 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀮𑀼𑀤𑁆𑀥𑀸 𑀮𑁄𑀪𑀸𑀪𑀺𑀪𑀽𑀢𑀸 𑀬𑀣𑀸𑀮𑀤𑁆𑀥𑀁 𑀥𑀦𑀁 𑀲𑀦𑁆𑀦𑀺𑀘𑀬𑀁 𑀲𑀩𑁆𑀩𑀲𑁄 𑀦𑀺𑀘𑁂𑀢𑀩𑁆𑀩𑀁 𑀦𑀺𑀥𑁂𑀢𑀩𑁆𑀩𑀁 𑀓𑀭𑁄𑀦𑁆𑀢𑀺. 𑀪𑀺𑀬𑁆𑀬𑁄𑀯 𑀬𑀣𑀸𑀥𑀺𑀕𑀢𑀓𑀸𑀫𑀢𑁄 𑀉𑀧𑀭𑀺 𑀓𑀸𑀫𑁂 𑀓𑀸𑀫𑀕𑀼𑀡𑁂 ‘‘𑀢𑀣𑀸𑀳𑀁 𑀏𑀤𑀺𑀲𑁂 𑀘 𑀪𑁄𑀕𑁂 𑀧𑀝𑀺𑀮𑀪𑁂𑀬𑁆𑀬’’𑀦𑁆𑀢𑀺 𑀅𑀪𑀺𑀧𑀢𑁆𑀣𑀬𑀦𑁆𑀢𑀺 𑀧𑀘𑁆𑀘𑀸𑀲𑀻𑀲𑀦𑁆𑀢𑀺 𑀢𑀚𑁆𑀚𑀜𑁆𑀘 𑀯𑀸𑀬𑀸𑀫𑀁 𑀓𑀭𑁄𑀦𑁆𑀢𑀺.

𑀪𑀺𑀬𑁆𑀬𑁄 𑀓𑀸𑀫𑀧𑀢𑁆𑀣𑀦𑀸𑀬 𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀲𑀬𑁆𑀳𑀧𑁆𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀁𑀲𑀸𑀦𑀼𑀕𑀢𑀁 𑀧𑀣𑀯𑀺𑀁 𑀩𑀮𑀓𑁆𑀓𑀸𑀭𑁂𑀦 𑀅𑀪𑀺𑀯𑀺𑀚𑀺𑀬. 𑀆𑀯𑀲𑀦𑁆𑀢𑁄𑀢𑀺 𑀧𑀲𑀸𑀲𑁂𑀦𑁆𑀢𑁄. 𑀑𑀭𑀁 𑀲𑀫𑀼𑀤𑁆𑀤𑀲𑁆𑀲𑀸𑀢𑀺 𑀅𑀦𑀯𑀲𑁂𑀲𑀁 𑀲𑀫𑀼𑀤𑁆𑀤𑀲𑁆𑀲 𑀑𑀭𑀪𑀸𑀕𑀁 𑀮𑀪𑀺𑀢𑁆𑀯𑀸𑀧𑀺 𑀢𑁂𑀦 𑀅𑀢𑀺𑀢𑁆𑀢𑀭𑀽𑀧𑁄 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀤𑀻𑀧𑀦𑁆𑀢𑀭𑀫𑁆𑀧𑀺 𑀧𑀢𑁆𑀣𑀬𑁂𑀬𑁆𑀬.

𑀅𑀯𑀻𑀢𑀢𑀡𑁆𑀳𑀸𑀢𑀺 𑀅𑀯𑀺𑀕𑀢𑀢𑀡𑁆𑀳𑀸. 𑀊𑀦𑀸𑀯𑀸𑀢𑀺 𑀅𑀧𑀭𑀺𑀧𑀼𑀡𑁆𑀡𑀫𑀦𑁄𑀭𑀣𑀸𑀯. 𑀓𑀸𑀫𑁂𑀳𑀺 𑀮𑁄𑀓𑀫𑁆𑀳𑀺 𑀦 𑀳𑀢𑁆𑀣𑀺 𑀢𑀺𑀢𑁆𑀢𑀻𑀢𑀺 𑀢𑀡𑁆𑀳𑀸𑀯𑀺𑀧𑀦𑁆𑀦𑀸𑀦𑀁 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀯𑀢𑁆𑀣𑀼𑀓𑀸𑀫𑁂𑀳𑀺 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺.

𑀓𑀦𑁆𑀤𑀦𑁆𑀢𑀺 𑀦𑀦𑁆𑀢𑀺 𑀫𑀢𑀧𑀼𑀭𑀺𑀲𑀁 𑀉𑀤𑁆𑀤𑀺𑀲𑁆𑀲 𑀢𑀲𑁆𑀲 𑀕𑀼𑀡𑁂 𑀓𑀺𑀢𑁆𑀢𑁂𑀦𑁆𑀢𑀸 𑀓𑀦𑁆𑀤𑀦𑀁 𑀓𑀭𑁄𑀦𑁆𑀢𑀺. 𑀅𑀳𑁄 𑀯𑀢𑀸 𑀦𑁄 𑀅𑀫𑀭𑀸𑀢𑀺 𑀘𑀸𑀳𑀽𑀢𑀺 𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀜𑀸𑀢𑀻 𑀅𑀫𑀭𑀸 𑀲𑀺𑀬𑀼𑀦𑁆𑀢𑀺 𑀘 𑀓𑀣𑁂𑀦𑁆𑀢𑀺, 𑀕𑀸𑀣𑀸𑀲𑀼𑀔𑀢𑁆𑀣𑀜𑁆𑀳𑁂𑀢𑁆𑀣 𑀯𑀢𑀸-𑀇𑀢𑀺 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑁄 𑀟𑀬𑁆𑀳𑀢𑀺 𑀲𑀽𑀮𑁂𑀳𑀺 𑀢𑀼𑀚𑁆𑀚𑀫𑀸𑀦𑁄𑀢𑀺 𑀲𑁄 𑀫𑀢𑀲𑀢𑁆𑀢𑁄 𑀙𑀯𑀟𑀸𑀳𑀓𑁂𑀳𑀺 𑀲𑀫𑁆𑀫𑀸 𑀛𑀸𑀧𑁂𑀢𑀼𑀁 𑀲𑀽𑀮𑁂𑀳𑀺 𑀢𑀼𑀚𑁆𑀚𑀫𑀸𑀦𑁄. 𑀢𑀸𑀡𑀸𑀢𑀺 𑀧𑀭𑀺𑀢𑁆𑀢𑀸𑀡𑀓𑀭𑀸.

𑀬𑁂𑀦𑀓𑀫𑁆𑀫𑀦𑁆𑀢𑀺 𑀬𑀣𑀸𑀓𑀫𑁆𑀫𑀁. 𑀥𑀦𑀦𑁆𑀢𑀺 𑀥𑀦𑀸𑀬𑀺𑀢𑀩𑁆𑀩𑀁 𑀬𑀁𑀓𑀺𑀜𑁆𑀘𑀺 𑀯𑀢𑁆𑀣𑀼. 𑀧𑀼𑀦 𑀥𑀦𑀦𑁆𑀢𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀲𑀦𑁆𑀥𑀸𑀬 𑀯𑀤𑀢𑀺.

‘‘𑀦 𑀤𑀻𑀖𑀫𑀸𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀫𑀕𑀼𑀡𑀲𑁆𑀲 𑀚𑀭𑀸𑀬 𑀘 𑀧𑀝𑀺𑀓𑀸𑀭𑀸𑀪𑀸𑀯𑀁 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀏𑀓𑀦𑁆𑀢𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀨𑀼𑀲𑀦𑁆𑀢𑀻𑀢𑀺 𑀅𑀦𑀺𑀝𑁆𑀞𑀨𑀲𑁆𑀲𑀁 𑀨𑀼𑀲𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀢𑀢𑁆𑀣 𑀅𑀟𑁆𑀠𑀤𑀮𑀺𑀤𑁆𑀤𑀢𑀸 𑀅𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀨𑀲𑁆𑀲𑀁 𑀩𑀸𑀮𑁄 𑀘 𑀥𑀻𑀭𑁄 𑀘 𑀢𑀣𑁂𑀯 𑀨𑀼𑀝𑁆𑀞𑁄𑀢𑀺 𑀬𑀣𑀸 𑀩𑀸𑀮𑁄 𑀇𑀝𑁆𑀞𑀸𑀦𑀺𑀝𑁆𑀞𑀲𑀫𑁆𑀨𑀲𑁆𑀲𑀁 𑀨𑀼𑀝𑁆𑀞𑁄, 𑀢𑀣𑁂𑀯 𑀥𑀻𑀭𑁄 𑀇𑀝𑁆𑀞𑀸𑀦𑀺𑀝𑁆𑀞𑀨𑀲𑁆𑀲𑀁 𑀨𑀼𑀝𑁆𑀞𑁄 𑀳𑁄𑀢𑀺, 𑀦 𑀏𑀢𑁆𑀣 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀓𑁄𑀘𑀺 𑀯𑀺𑀲𑁂𑀲𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀩𑀸𑀮𑁄 𑀳𑀺 𑀩𑀸𑀮𑁆𑀬𑀸 𑀯𑀥𑀺𑀢𑁄𑀯 𑀲𑁂𑀢𑀻𑀢𑀺 𑀩𑀸𑀮𑀧𑀼𑀕𑁆𑀕𑀮𑁄 𑀓𑁂𑀦𑀘𑀺 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑁄 𑀲𑁄𑀘𑀦𑁆𑀢𑁄 𑀓𑀺𑀮𑀫𑀦𑁆𑀢𑁄 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑁄 𑀩𑀸𑀮𑀪𑀸𑀯𑁂𑀦 𑀯𑀥𑀺𑀢𑁄 𑀧𑀻𑀴𑀺𑀢𑁄𑀯 𑀳𑀼𑀢𑁆𑀯𑀸 𑀲𑁂𑀢𑀺 𑀲𑀬𑀢𑀺. 𑀇𑀢𑁄 𑀘𑀺𑀢𑁄 𑀘 𑀆𑀯𑀝𑁆𑀝𑀦𑁆𑀢𑁄 𑀯𑀺𑀯𑀝𑁆𑀝𑀦𑁆𑀢𑁄 𑀯𑀺𑀭𑁄𑀥𑁂𑀦𑁆𑀢𑁄 𑀯𑁂𑀥𑀢𑀺 𑀨𑀲𑁆𑀲𑀨𑀼𑀝𑁆𑀞𑁄𑀢𑀺 𑀥𑀻𑀭𑁄 𑀧𑀦 𑀧𑀡𑁆𑀟𑀺𑀢𑁄 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁂𑀦 𑀲𑀫𑁆𑀨𑀼𑀝𑁆𑀞𑁄 𑀦 𑀯𑁂𑀥𑀢𑀺 𑀓𑀫𑁆𑀧𑀦𑀫𑀢𑁆𑀢𑀫𑁆𑀧𑀺 𑀢𑀲𑁆𑀲 𑀦 𑀳𑁄𑀢𑀻𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀮𑁄𑀓𑀥𑀫𑁆𑀫𑁂 𑀏𑀤𑀺𑀲𑀻 𑀧𑀯𑀢𑁆𑀢𑀺, 𑀢𑀲𑁆𑀫𑀸 𑀳𑀺 𑀧𑀜𑁆𑀜𑀸𑀯 𑀥𑀦𑁂𑀦 𑀲𑁂𑀬𑁆𑀬𑀸, 𑀬𑀸𑀬 𑀯𑁄𑀲𑀸𑀦𑀫𑀺𑀥𑀸𑀥𑀺𑀕𑀘𑁆𑀙𑀢𑀻𑀢𑀺 𑀧𑀜𑁆𑀜𑀸𑀯 𑀥𑀦𑀢𑁄 𑀧𑀸𑀲𑀁𑀲𑀢𑀭𑀸, 𑀬𑀸𑀬 𑀧𑀜𑁆𑀜𑀸𑀬 𑀯𑁄𑀲𑀸𑀦𑀁 𑀪𑀯𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑀢𑀺. 𑀅𑀩𑁆𑀬𑁄𑀲𑀺𑀢𑀢𑁆𑀢𑀸 𑀳𑀻𑀢𑀺 𑀅𑀦𑀥𑀺𑀕𑀢𑀦𑀺𑀝𑁆𑀞𑀢𑁆𑀢𑀸. 𑀪𑀯𑀸𑀪𑀯𑁂𑀲𑀽𑀢𑀺 𑀫𑀳𑀦𑁆𑀢𑀸𑀫𑀳𑀦𑁆𑀢𑁂𑀲𑀼 𑀪𑀯𑁂𑀲𑀼.

𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁, 𑀲𑀁𑀲𑀸𑀭𑀫𑀸𑀧𑀚𑁆𑀚 𑀧𑀭𑀫𑁆𑀧𑀭𑀸𑀬𑀸𑀢𑀺 𑀬𑁄 𑀧𑀸𑀧𑀸𑀦𑀺 𑀓𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀁𑀲𑀭𑀡𑀫𑀸𑀧𑀚𑁆𑀚𑀺𑀢𑁆𑀯𑀸 𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁 𑀕𑀩𑁆𑀪𑀲𑁂𑀬𑁆𑀬𑀸𑀬 𑀧𑀭𑀮𑁄𑀓𑀼𑀧𑁆𑀧𑀢𑁆𑀢𑀺𑀬𑀸 𑀘 𑀦 𑀫𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀸𑀧𑀓𑀫𑁆𑀫𑀓𑀸𑀭𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀓𑀺𑀭𑀺𑀬𑀁 𑀅𑀪𑀺𑀲𑀤𑁆𑀤𑀳𑀦𑁆𑀢𑁄 ‘‘𑀅𑀢𑁆𑀢𑀸 𑀘 𑀫𑁂 𑀳𑁄𑀢𑀻’’𑀢𑀺 𑀧𑀢𑁆𑀢𑀺𑀬𑀸𑀬𑀦𑁆𑀢𑁄 𑀅𑀜𑁆𑀜𑁄𑀧𑀺 𑀅𑀧𑁆𑀧𑀧𑀜𑁆𑀜𑁄 𑀩𑀸𑀮𑁄 𑀬𑀣𑀸 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁, 𑀦 𑀢𑀢𑁄 𑀧𑀭𑀺𑀫𑀼𑀘𑁆𑀘𑀢𑀺.

𑀘𑁄𑀭𑁄 𑀬𑀣𑀸𑀢𑀺 𑀬𑀣𑀸 𑀘𑁄𑀭𑁄 𑀧𑀸𑀧𑀥𑀫𑁆𑀫𑁄 𑀖𑀭𑀲𑀦𑁆𑀥𑀺𑀁 𑀙𑀺𑀦𑁆𑀤𑀦𑁆𑀢𑁄 𑀲𑀦𑁆𑀥𑀺𑀫𑀼𑀔𑁂 𑀆𑀭𑀓𑁆𑀔𑀓𑀧𑀼𑀭𑀺𑀲𑁂𑀳𑀺 𑀕𑀳𑀺𑀢𑁄 𑀲𑀓𑀫𑁆𑀫𑀼𑀦𑀸 𑀢𑁂𑀦 𑀅𑀢𑁆𑀢𑀦𑁄 𑀲𑀦𑁆𑀥𑀺𑀘𑁆𑀙𑁂𑀤𑀓𑀫𑁆𑀫𑀼𑀦𑀸 𑀓𑀸𑀭𑀡𑀪𑀽𑀢𑁂𑀦 𑀓𑀲𑀸𑀤𑀻𑀳𑀺 𑀢𑀸𑀴𑀦𑀸𑀤𑀺𑀯𑀲𑁂𑀦 𑀳𑀜𑁆𑀜𑀢𑀺 𑀭𑀸𑀚𑀧𑀼𑀭𑀺𑀲𑁂𑀳𑀺 𑀩𑀸𑀥𑀺𑀬𑁆𑀬𑀢𑀺 𑀩𑀚𑁆𑀛𑀢𑀺 𑀘. 𑀏𑀯𑀁 𑀧𑀚𑀸𑀢𑀺 𑀏𑀯𑀫𑀬𑀁 𑀲𑀢𑁆𑀢𑀮𑁄𑀓𑁄 𑀇𑀥 𑀧𑀸𑀧𑀸𑀦𑀺 𑀓𑀭𑀺𑀢𑁆𑀯𑀸 𑀧𑁂𑀘𑁆𑀘 𑀧𑀢𑁆𑀯𑀸 𑀢𑁂𑀦 𑀓𑀫𑁆𑀫𑀼𑀦𑀸 𑀧𑀭𑀫𑁆𑀳𑀺 𑀮𑁄𑀓𑁂 𑀦𑀺𑀭𑀬𑀸𑀤𑀻𑀲𑀼 𑀳𑀜𑁆𑀜𑀢𑀺, 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀸𑀤𑀺𑀯𑀲𑁂𑀦 𑀩𑀸𑀥𑀺𑀬𑁆𑀬𑀢𑀺.

𑀏𑀯𑀫𑁂𑀢𑀸𑀳𑀺 𑀏𑀓𑀸𑀤𑀲𑀳𑀺 𑀕𑀸𑀣𑀸𑀳𑀺 𑀬𑀣𑀸𑀭𑀳𑀁 𑀘𑀢𑁆𑀢𑀸𑀭𑁄 𑀥𑀫𑁆𑀫𑀼𑀤𑁆𑀤𑁂𑀲𑁂 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀸𑀫𑁂𑀲𑀼 𑀲𑀁𑀲𑀸𑀭𑁂 𑀘 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀲𑀤𑁆𑀥𑀸𑀬 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀪𑀸𑀯𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀲𑁆𑀲 𑀘 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀓𑀸𑀫𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀫𑀸𑀢𑀺 𑀯𑀢𑁆𑀣𑀼𑀓𑀸𑀫𑀸 𑀫𑀦𑀸𑀧𑀺𑀬𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸, 𑀓𑀺𑀮𑁂𑀲𑀓𑀸𑀫𑀸 𑀲𑀩𑁆𑀩𑁂𑀧𑀺 𑀭𑀸𑀕𑀧𑁆𑀧𑀪𑁂𑀤𑀸. 𑀇𑀥 𑀧𑀦 𑀯𑀢𑁆𑀣𑀼𑀓𑀸𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀭𑀽𑀧𑀸𑀤𑀺𑀯𑀲𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀢𑀸𑀬 𑀘𑀺𑀢𑁆𑀭𑀸. 𑀮𑁄𑀓𑀲𑁆𑀲𑀸𑀤𑀯𑀲𑁂𑀦 𑀇𑀝𑁆𑀞𑀸𑀓𑀸𑀭𑀢𑀸𑀬 𑀫𑀥𑀼𑀭𑀸. 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀫𑀦𑀁 𑀭𑀫𑁂𑀦𑁆𑀢𑀻𑀢𑀺 𑀫𑀦𑁄𑀭𑀫𑀸. 𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀯𑀺𑀯𑀺𑀥𑀭𑀽𑀧𑁂𑀦, 𑀅𑀦𑁂𑀓𑀯𑀺𑀥𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂 𑀳𑀺 𑀭𑀽𑀧𑀸𑀤𑀺𑀯𑀲𑁂𑀦 𑀘𑀺𑀢𑁆𑀭𑀸, 𑀦𑀻𑀮𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑀭𑀽𑀧𑀸. 𑀏𑀯𑀁 𑀢𑁂𑀦 𑀯𑀺𑀭𑀽𑀧𑀭𑀽𑀧𑁂𑀦 𑀢𑀣𑀸 𑀢𑀣𑀸 𑀅𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁 𑀧𑀩𑁆𑀩𑀚𑁆𑀚𑀸𑀬 𑀅𑀪𑀺𑀭𑀫𑀺𑀢𑀼𑀁 𑀦 𑀤𑁂𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀧𑁆𑀧𑀲𑁆𑀲𑀸𑀤𑀩𑀳𑀼𑀤𑀼𑀓𑁆𑀔𑀢𑀸𑀤𑀺𑀦𑀸 𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸 𑀢𑀲𑁆𑀫𑀸 𑀢𑀁𑀦𑀺𑀫𑀺𑀢𑁆𑀢𑀁 𑀅𑀳𑀁 𑀧𑀩𑁆𑀩𑀚𑀺𑀢𑁄 𑀅𑀫𑁆𑀳𑀺. 𑀤𑀼𑀫𑀧𑁆𑀨𑀮𑀸𑀦𑀺 𑀧𑀓𑁆𑀓𑀓𑀸𑀮𑁂 𑀅𑀧𑀭𑀺𑀧𑀓𑁆𑀓𑀓𑀸𑀮𑁂 𑀘 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀭𑀽𑀧𑀓𑁆𑀓𑀫𑀢𑁄 𑀲𑀭𑀲𑀢𑁄 𑀯𑀸 𑀧𑀢𑀦𑁆𑀢𑀺, 𑀏𑀯𑀁 𑀲𑀢𑁆𑀢𑀸 𑀤𑀳𑀭𑀸 𑀘 𑀯𑀼𑀟𑁆𑀠𑀸 𑀘 𑀲𑀭𑀻𑀭𑀲𑁆𑀲 𑀪𑁂𑀤𑀸 𑀧𑀢𑀦𑁆𑀢𑀺𑀬𑁂𑀯. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 𑀏𑀯𑀁 𑀅𑀦𑀺𑀘𑁆𑀘𑀢𑀫𑁆𑀧𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸, 𑀦 𑀓𑁂𑀯𑀮𑀁 𑀅𑀧𑁆𑀧𑀲𑁆𑀲𑀸𑀤𑀢𑀸𑀤𑀺𑀢𑀸𑀬 𑀆𑀤𑀻𑀦𑀯𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀡𑁆𑀡𑀓𑀦𑁆𑀢𑀺 𑀅𑀯𑀺𑀭𑀤𑁆𑀥𑀦𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑀫𑀡𑀪𑀸𑀯𑁄𑀯 𑀲𑁂𑀬𑁆𑀬𑁄 𑀉𑀢𑁆𑀢𑀭𑀺𑀢𑀭𑁄.

𑀲𑀤𑁆𑀥𑀸𑀬𑀸𑀢𑀺 𑀓𑀫𑁆𑀫𑀁 𑀓𑀫𑁆𑀫𑀨𑀮𑀁 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸. 𑀉𑀧𑁂𑀢𑁄 𑀚𑀺𑀦𑀲𑀸𑀲𑀦𑁂𑀢𑀺 𑀲𑀢𑁆𑀣𑀼 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀉𑀧𑀕𑀢𑁄. 𑀅𑀯𑀜𑁆𑀛𑀸 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸 𑀅𑀭𑀳𑀢𑁆𑀢𑀲𑁆𑀲 𑀅𑀥𑀺𑀕𑀢𑀢𑁆𑀢𑀸. 𑀢𑀢𑁄 𑀏𑀯 𑀅𑀦𑀡𑁄 𑀪𑀼𑀜𑁆𑀚𑀸𑀫𑀺 𑀪𑁄𑀚𑀦𑀁 𑀦𑀺𑀓𑁆𑀓𑀺𑀮𑁂𑀲𑀯𑀲𑁂𑀦 𑀲𑀸𑀫𑀺𑀪𑀸𑀯𑀢𑁄 𑀲𑀸𑀫𑀺𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑀢𑁄.

𑀓𑀸𑀫𑁂 𑀆𑀤𑀺𑀢𑁆𑀢𑀢𑁄 𑀤𑀺𑀲𑁆𑀯𑀸𑀢𑀺 𑀯𑀢𑁆𑀣𑀼𑀓𑀸𑀫𑁂 𑀓𑀺𑀮𑁂𑀲𑀓𑀸𑀫𑁂 𑀘 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀪𑀸𑀯𑀢𑁄 𑀤𑀺𑀲𑁆𑀯𑀸. 𑀚𑀸𑀢𑀭𑀽𑀧𑀸𑀦𑀺 𑀲𑀢𑁆𑀣𑀢𑁄𑀢𑀺 𑀓𑀢𑀸𑀓𑀢𑀧𑁆𑀧𑀪𑁂𑀤𑀸 𑀲𑀩𑁆𑀩𑀲𑀼𑀯𑀡𑁆𑀡𑀯𑀺𑀓𑀢𑀺𑀬𑁄 𑀅𑀦𑀢𑁆𑀣𑀸𑀯𑀳𑀢𑀸𑀬 𑀦𑀺𑀲𑀺𑀢𑀲𑀢𑁆𑀣𑀢𑁄. 𑀕𑀩𑁆𑀪𑀯𑁄𑀓𑁆𑀓𑀦𑁆𑀢𑀺𑀢𑁄 𑀤𑀼𑀓𑁆𑀔𑀦𑁆𑀢𑀺 𑀕𑀩𑁆𑀪𑀯𑁄𑀓𑁆𑀓𑀦𑁆𑀢𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀁𑀲𑀸𑀭𑀧𑀯𑀢𑁆𑀢𑀺𑀤𑀼𑀓𑁆𑀔𑀁. 𑀦𑀺𑀭𑀬𑁂𑀲𑀼 𑀫𑀳𑀩𑁆𑀪𑀬𑀦𑁆𑀢𑀺 𑀲𑀉𑀲𑁆𑀲𑀤𑁂𑀲𑀼 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀮𑀩𑁆𑀪𑀫𑀸𑀦𑀁 𑀫𑀳𑀸𑀪𑀬𑀜𑁆𑀘 𑀲𑀩𑁆𑀩𑀢𑁆𑀣 𑀤𑀺𑀲𑁆𑀯𑀸𑀢𑀺 𑀬𑁄𑀚𑀦𑀸.

𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸𑀢𑀺 𑀏𑀢𑀁 𑀓𑀸𑀫𑀸𑀦𑀁 𑀆𑀤𑀺𑀢𑁆𑀢𑀢𑀸𑀤𑀺𑀁 𑀲𑀁𑀲𑀸𑀭𑁂 𑀆𑀤𑀻𑀦𑀯𑀁 𑀤𑁄𑀲𑀁 𑀜𑀢𑁆𑀯𑀸. 𑀲𑀁𑀯𑁂𑀕𑀁 𑀅𑀮𑀪𑀺𑀁 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲 𑀲𑀼𑀢𑀓𑀸𑀮𑁂 𑀪𑀯𑀸𑀤𑀺𑀓𑁂 𑀲𑀁𑀯𑁂𑀕𑀁 𑀅𑀮𑀢𑁆𑀣𑀁. 𑀯𑀺𑀤𑁆𑀥𑁄 𑀢𑀤𑀸 𑀲𑀦𑁆𑀢𑁄𑀢𑀺 𑀢𑀲𑁆𑀫𑀺𑀁 𑀕𑀳𑀝𑁆𑀞𑀓𑀸𑀮𑁂 𑀭𑀸𑀕𑀲𑀮𑁆𑀮𑀸𑀤𑀻𑀳𑀺 𑀯𑀺𑀤𑁆𑀥𑁄 𑀲𑀫𑀸𑀦𑁄 𑀇𑀤𑀸𑀦𑀺 𑀲𑀢𑁆𑀣𑀼 𑀲𑀸𑀲𑀦𑀁 𑀆𑀕𑀫𑁆𑀫 𑀲𑀫𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬𑀁, 𑀯𑀺𑀤𑁆𑀥𑁄 𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀧𑀝𑀺𑀯𑀺𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀅𑀦𑁆𑀢𑀭𑀦𑁆𑀢𑀭𑀸𑀤𑀻𑀲𑀼 𑀯𑀼𑀢𑁆𑀢𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀯𑀁 𑀣𑁂𑀭𑁄 𑀭𑀜𑁆𑀜𑁄 𑀓𑁄𑀭𑀩𑁆𑀬𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁂𑀯 𑀕𑀢𑁄. 𑀲𑀢𑁆𑀣𑀸 𑀘 𑀅𑀧𑀭𑀪𑀸𑀕𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.