𑁭. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁯. 𑀲𑀢𑁆𑀢𑀫𑁂 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑁂 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀁 𑀲𑀫𑀸𑀬𑀼𑀢𑁆𑀢𑀲𑁆𑀲. 𑀇𑀢𑀻𑀢𑀺 𑀏𑀯𑀫𑀸𑀳. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀢𑀺𑀲𑁆𑀲𑁄𑀢𑀺 𑀦𑀸𑀫𑀁 𑀢𑀲𑁆𑀲 𑀣𑁂𑀭𑀲𑁆𑀲. 𑀲𑁄𑀧𑀺 𑀳𑀺 𑀢𑀺𑀲𑁆𑀲𑁄𑀢𑀺 𑀦𑀸𑀫𑁂𑀦. 𑀫𑁂𑀢𑁆𑀢𑁂𑀬𑁆𑀬𑁄𑀢𑀺 𑀕𑁄𑀢𑁆𑀢𑀁, 𑀕𑁄𑀢𑁆𑀢𑀯𑀲𑁂𑀦𑁂𑀯 𑀏𑀲 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀲𑁆𑀫𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 (𑀲𑀼. 𑀦𑀺. 𑀅𑀝𑁆𑀞. 𑁨.𑁮𑁨𑁧) 𑀯𑀼𑀢𑁆𑀢𑀁 𑁋 ‘‘𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀸 𑀦𑀸𑀫 𑀤𑁆𑀯𑁂 𑀲𑀳𑀸𑀬𑀸’’𑀢𑀺. 𑀯𑀺𑀖𑀸𑀢𑀦𑁆𑀢𑀺 𑀉𑀧𑀖𑀸𑀢𑀁. 𑀩𑁆𑀭𑀽𑀳𑀻𑀢𑀺 𑀆𑀘𑀺𑀓𑁆𑀔. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁, 𑀦𑀺𑀤𑁆𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀦𑁆𑀢𑀺 𑀢𑀯 𑀯𑀘𑀦𑀁 𑀲𑀼𑀢𑁆𑀯𑀸. 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂𑀢𑀺 𑀲𑀳𑀸𑀬𑀁 𑀆𑀭𑀩𑁆𑀪 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀦𑁆𑀢𑁄 𑀪𑀡𑀢𑀺, 𑀲𑁄 𑀧𑀦 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄𑀬𑁂𑀯.

𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫𑀸𑀢𑀺 𑀇𑀤𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀉𑀧𑀤𑁂𑀲𑀧𑀤𑀁. 𑀅𑀲𑀤𑁆𑀥𑀫𑁆𑀫𑁄𑀢𑀺 𑀅𑀲𑀢𑀁 𑀦𑀻𑀘𑀚𑀦𑀸𑀦𑀁 𑀥𑀫𑁆𑀫𑁄. 𑀕𑀸𑀫𑀥𑀫𑁆𑀫𑁄𑀢𑀺 𑀕𑀸𑀫𑀯𑀸𑀲𑀻𑀦𑀁 𑀲𑁂𑀯𑀦𑀥𑀫𑁆𑀫𑁄. 𑀯𑀲𑀮𑀥𑀫𑁆𑀫𑁄𑀢𑀺 𑀯𑀲𑀮𑀸𑀦𑀁 𑀥𑀫𑁆𑀫𑁄, 𑀓𑀺𑀮𑁂𑀲𑀯𑀲𑁆𑀲𑀦𑀢𑁄 𑀯𑀸 𑀲𑀬𑀫𑁂𑀯 𑀯𑀲𑀮𑁄 𑀥𑀫𑁆𑀫𑁄𑀢𑀺 𑀯𑀲𑀮𑀥𑀫𑁆𑀫𑁄. 𑀤𑀼𑀝𑁆𑀞𑀼𑀮𑁆𑀮𑁄𑀢𑀺 𑀤𑀼𑀝𑁆𑀞𑁄 𑀘 𑀓𑀺𑀮𑁂𑀲𑁂𑀳𑀺 𑀤𑀼𑀝𑁆𑀞𑀢𑁆𑀢𑀸, 𑀣𑀽𑀮𑁄 𑀘 𑀅𑀦𑀺𑀧𑀼𑀡𑀪𑀸𑀯𑀢𑁄𑀢𑀺 𑀤𑀼𑀝𑁆𑀞𑀼𑀮𑁆𑀮𑁄. 𑀬𑀲𑁆𑀫𑀸 𑀘 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀁 𑀤𑀲𑁆𑀲𑀦𑀫𑁆𑀧𑀺 𑀕𑀳𑀡𑀫𑁆𑀧𑀺 𑀆𑀫𑀲𑀦𑀫𑁆𑀧𑀺 𑀨𑀼𑀲𑀦𑀫𑁆𑀧𑀺 𑀖𑀝𑁆𑀝𑀦𑀫𑁆𑀧𑀺 𑀤𑀼𑀝𑁆𑀞𑀼𑀮𑁆𑀮𑀁, 𑀢𑀲𑁆𑀫𑀸𑀧𑀺 𑀤𑀼𑀝𑁆𑀞𑀼𑀮𑁆𑀮𑁄 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄. 𑀑𑀤𑀓𑀦𑁆𑀢𑀺𑀓𑁄𑀢𑀺 𑀉𑀤𑀓𑀁 𑀅𑀲𑁆𑀲 𑀅𑀦𑁆𑀢𑁂 𑀲𑀼𑀤𑁆𑀥𑀢𑁆𑀣𑀁 𑀆𑀤𑀺𑀬𑀢𑀻𑀢𑀺 𑀉𑀤𑀓𑀦𑁆𑀢𑁄, 𑀉𑀤𑀓𑀦𑁆𑀢𑁄𑀬𑁂𑀯 𑀑𑀤𑀓𑀦𑁆𑀢𑀺𑀓𑁄. 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀓𑀢𑁆𑀢𑀩𑁆𑀩𑀢𑀸𑀬 𑀭𑀳𑀲𑁆𑀲𑁄. 𑀯𑀺𑀦𑀬𑁂 𑀧𑀦 ‘‘𑀤𑀼𑀝𑁆𑀞𑀼𑀮𑁆𑀮𑀁 𑀑𑀤𑀓𑀦𑁆𑀢𑀺𑀓𑀁 𑀭𑀳𑀲𑁆𑀲’’𑀦𑁆𑀢𑀺 (𑀧𑀸𑀭𑀸. 𑁩𑁯) 𑀧𑀸𑀞𑁄. 𑀢𑀢𑁆𑀣 𑀢𑀻𑀲𑀼 𑀧𑀤𑁂𑀲𑀼 𑀬𑁄 𑀲𑁄𑀢𑀺 𑀧𑀤𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑀁 𑀢𑀦𑁆𑀢𑀺 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁 ‘‘𑀬𑀁 𑀢𑀁 𑀤𑀼𑀝𑁆𑀞𑀼𑀮𑁆𑀮𑀁, 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄, 𑀬𑀁 𑀢𑀁 𑀑𑀤𑀓𑀦𑁆𑀢𑀺𑀓𑀁 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄, 𑀬𑀁 𑀢𑀁 𑀭𑀳𑀲𑁆𑀲𑀁, 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺. 𑀇𑀥 𑀧𑀦 ‘‘𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄, 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄…𑀧𑁂… 𑀬𑁄 𑀲𑁄 𑀭𑀳𑀲𑁆𑀲𑁄, 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀤𑁆𑀯𑀬𑁂𑀦 𑀤𑁆𑀯𑀬𑁂𑀦 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺. 𑀢𑀢𑁆𑀣 𑀬𑁄𑀚𑀦𑀸 𑁋 𑀬𑀸 𑀲𑀸 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺, 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫𑀸𑀢𑀺. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀓𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁄𑀢𑀺 𑀓𑀣𑀻𑀬𑀢𑀺. 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀭𑀸𑀕𑁂𑀦 𑀭𑀜𑁆𑀚𑀺𑀢𑀸𑀦𑀁. 𑀲𑀸𑀭𑀢𑁆𑀢𑀸𑀦𑀦𑁆𑀢𑀺 𑀯𑀺𑀲𑁂𑀲𑁂𑀦 𑀲𑀼𑀝𑁆𑀞𑀼 𑀭𑀜𑁆𑀚𑀺𑀢𑀸𑀦𑀁. 𑀅𑀯𑀲𑁆𑀲𑀼𑀢𑀸𑀦𑀦𑁆𑀢𑀺 𑀓𑀺𑀮𑁂𑀲𑁂𑀦 𑀢𑀺𑀦𑁆𑀢𑀸𑀦𑀁. 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀦𑁆𑀢𑀺 𑀓𑀼𑀲𑀮𑀸𑀘𑀸𑀭𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀞𑀺𑀢𑀸𑀦𑀁 ‘‘𑀫𑀕𑁆𑀕𑁂 𑀘𑁄𑀭𑀸 𑀧𑀭𑀺𑀬𑀼𑀝𑁆𑀞𑀺𑀢𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀔𑁂𑀧𑁂𑀢𑁆𑀯𑀸 𑀞𑀺𑀢𑀘𑀺𑀢𑁆𑀢𑀸𑀦𑀁. 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀓𑀺𑀮𑁂𑀲𑁂𑀦 𑀲𑀤𑀺𑀲𑀸𑀦𑀁. 𑀥𑀫𑁆𑀫𑁄𑀢𑀺 𑀲𑀪𑀸𑀯𑁄. 𑀢𑀁 𑀓𑀸𑀭𑀡𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀢𑀁 𑀉𑀧𑀫𑀸𑀬 𑀲𑀸𑀥𑁂𑀦𑁆𑀢𑁄 ‘‘𑀉𑀪𑁄 𑀓𑀮𑀳𑀓𑀸𑀭𑀓𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀪𑁄 𑀓𑀮𑀳𑀓𑀸𑀭𑀓𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀓𑀮𑀳𑀓𑀸𑀭𑀓𑀸 𑀤𑁆𑀯𑁂. 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀤𑀺𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀪𑀡𑁆𑀟𑀦𑀓𑀸𑀭𑀓𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀡𑁆𑀟𑀦𑀁 𑀓𑀭𑁄𑀦𑁆𑀢𑀸. 𑀪𑀲𑁆𑀲𑀓𑀸𑀭𑀓𑀸𑀢𑀺 𑀯𑀸𑀘𑀸𑀓𑀮𑀳𑀁 𑀓𑀭𑁄𑀦𑁆𑀢𑀸. 𑀯𑀺𑀯𑀸𑀤𑀓𑀸𑀭𑀓𑀸𑀢𑀺 𑀦𑀸𑀦𑀸𑀯𑀘𑀦𑀁 𑀓𑀭𑁄𑀦𑁆𑀢𑀸. 𑀅𑀥𑀺𑀓𑀭𑀡𑀓𑀸𑀭𑀓𑀸𑀢𑀺 𑀯𑀺𑀦𑀺𑀘𑁆𑀙𑀬𑀧𑀸𑀧𑀼𑀡𑀦𑀯𑀺𑀲𑁂𑀲𑀓𑀸𑀭𑀡𑀁 𑀓𑀭𑁄𑀦𑁆𑀢𑀸. 𑀯𑀸𑀤𑀺𑀦𑁄𑀢𑀺 𑀯𑀸𑀤𑀧𑀝𑀺𑀯𑀸𑀤𑀺𑀦𑁄. 𑀲𑀮𑁆𑀮𑀸𑀧𑀓𑀸𑀢𑀺 𑀯𑀸𑀘𑀁 𑀓𑀣𑁂𑀦𑁆𑀢𑀸 𑀏𑀯𑀫𑁂𑀯𑀦𑁆𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁.

𑀬𑀼𑀢𑁆𑀢𑀲𑁆𑀲𑀸𑀢𑀺 𑀲𑀜𑁆𑀜𑀼𑀢𑁆𑀢𑀲𑁆𑀲. 𑀧𑀬𑀼𑀢𑁆𑀢𑀲𑁆𑀲𑀸𑀢𑀺 𑀆𑀤𑀭𑁂𑀦 𑀬𑀼𑀢𑁆𑀢𑀲𑁆𑀲. 𑀆𑀬𑀼𑀢𑁆𑀢𑀲𑁆𑀲𑀸𑀢𑀺 𑀯𑀺𑀲𑁂𑀲𑁂𑀦 𑀬𑀼𑀢𑁆𑀢𑀲𑁆𑀲. 𑀲𑀫𑀸𑀬𑀼𑀢𑁆𑀢𑀲𑁆𑀲𑀸𑀢𑀺 𑀏𑀓𑀢𑁄 𑀬𑀼𑀢𑁆𑀢𑀲𑁆𑀲. 𑀢𑀘𑁆𑀘𑀭𑀺𑀢𑀲𑁆𑀲𑀸𑀢𑀺 𑀢𑀁𑀘𑀭𑀺𑀢𑀁 𑀓𑀭𑁄𑀦𑁆𑀢𑀲𑁆𑀲. 𑀢𑀩𑁆𑀩𑀳𑀼𑀮𑀲𑁆𑀲𑀸𑀢𑀺 𑀢𑀁𑀩𑀳𑀼𑀮𑀁 𑀓𑀭𑁄𑀦𑁆𑀢𑀲𑁆𑀲. 𑀢𑀕𑁆𑀕𑀭𑀼𑀓𑀲𑁆𑀲𑀸𑀢𑀺 𑀢𑀁𑀕𑀭𑀼𑀁 𑀓𑀭𑁄𑀦𑁆𑀢𑀲𑁆𑀲. 𑀢𑀦𑁆𑀦𑀺𑀦𑁆𑀦𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀦𑀢𑀘𑀺𑀢𑁆𑀢𑀲𑁆𑀲. 𑀢𑀧𑁆𑀧𑁄𑀡𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀦𑀢𑀓𑀸𑀬𑀲𑁆𑀲. 𑀢𑀧𑁆𑀧𑀩𑁆𑀪𑀸𑀭𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀅𑀪𑀺𑀫𑀼𑀔𑀓𑀸𑀬𑀲𑁆𑀲. 𑀢𑀤𑀥𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀅𑀥𑀺𑀳𑀭𑀺𑀢𑀲𑁆𑀲. 𑀢𑀤𑀥𑀺𑀧𑀢𑁂𑀬𑁆𑀬𑀲𑁆𑀲𑀸𑀢𑀺 𑀢𑀁 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀲𑁆𑀲.

𑀯𑀺𑀖𑀸𑀢𑀦𑁆𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀯𑀘𑀦𑀁. 𑀯𑀺𑀖𑀸𑀢𑀦𑁆𑀢𑀺 𑀧𑀻𑀴𑀦𑀁. 𑀉𑀧𑀖𑀸𑀢𑀦𑁆𑀢𑀺 𑀲𑀫𑀻𑀧𑀁 𑀓𑀢𑁆𑀯𑀸 𑀧𑀻𑀴𑀦𑀁. 𑀧𑀻𑀴𑀦𑀦𑁆𑀢𑀺 𑀖𑀝𑁆𑀝𑀦𑀁. 𑀖𑀝𑁆𑀝𑀦𑀦𑁆𑀢𑀺 𑀧𑀻𑀴𑀦𑀁. 𑀲𑀩𑁆𑀩𑀁 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀁. 𑀉𑀧𑀤𑁆𑀤𑀯𑀦𑁆𑀢𑀺 𑀳𑀺𑀁𑀲𑀦𑀁. 𑀉𑀧𑀲𑀕𑁆𑀕𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀉𑀧𑀕𑀦𑁆𑀢𑁆𑀯𑀸 𑀧𑀻𑀴𑀦𑀸𑀓𑀸𑀭𑀁. 𑀩𑁆𑀭𑀽𑀳𑀻𑀢𑀺 𑀓𑀣𑁂𑀳𑀺. 𑀆𑀘𑀺𑀓𑁆𑀔𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀳𑀺. 𑀤𑁂𑀲𑁂𑀳𑀻𑀢𑀺 𑀤𑀲𑁆𑀲𑁂𑀳𑀺. 𑀧𑀜𑁆𑀜𑀧𑁂𑀳𑀻𑀢𑀺 𑀜𑀸𑀧𑁂𑀳𑀺. 𑀧𑀝𑁆𑀞𑀧𑁂𑀳𑀻𑀢𑀺 𑀞𑀧𑁂𑀳𑀺. 𑀯𑀺𑀯𑀭𑀸𑀢𑀺 𑀧𑀸𑀓𑀝𑀁 𑀓𑀭𑁄𑀳𑀺. 𑀯𑀺𑀪𑀚𑀸𑀢𑀺 𑀪𑀸𑀚𑁂𑀳𑀺. 𑀉𑀢𑁆𑀢𑀸𑀦𑀻𑀓𑀭𑁄𑀳𑀻𑀢𑀺 𑀢𑀻𑀭𑀁 𑀧𑀸𑀧𑁂𑀳𑀺. 𑀧𑀓𑀸𑀲𑁂𑀳𑀻𑀢𑀺 𑀧𑀸𑀓𑀝𑀁 𑀓𑀭𑁄𑀳𑀺.

𑀢𑀼𑀬𑁆𑀳𑀁 𑀯𑀘𑀦𑀦𑁆𑀢𑀺 𑀢𑀯 𑀯𑀸𑀘𑀁. 𑀩𑁆𑀬𑀧𑁆𑀧𑀣𑀦𑁆𑀢𑀺 𑀯𑀘𑀦𑀁. 𑀤𑁂𑀲𑀦𑀦𑁆𑀢𑀺 𑀆𑀘𑀺𑀓𑁆𑀔𑀦𑀁. 𑀅𑀦𑀼𑀲𑀸𑀲𑀦𑀦𑁆𑀢𑀺 𑀑𑀯𑀸𑀤𑀁. 𑀅𑀦𑀼𑀲𑀺𑀝𑁆𑀞𑀦𑁆𑀢𑀺 𑀅𑀦𑀼𑀲𑀸𑀲𑀦𑀁. 𑀲𑀼𑀢𑁆𑀯𑀸𑀢𑀺 𑀲𑁄𑀢𑁂𑀦 𑀲𑀼𑀢𑁆𑀯𑀸. 𑀲𑀼𑀡𑀺𑀢𑁆𑀯𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀫𑀸 𑀕𑀳𑁂𑀢𑁆𑀯𑀸. 𑀉𑀧𑀥𑀸𑀭𑀬𑀺𑀢𑁆𑀯𑀸𑀢𑀺 𑀅𑀦𑀸𑀲𑁂𑀢𑁆𑀯𑀸. 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸.

𑁫𑁦. 𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀢𑁄 𑀤𑀼𑀯𑀺𑀥𑀫𑁆𑀧𑀺 𑀲𑀸𑀲𑀦𑀁 𑀦𑀲𑁆𑀲𑀢𑀺. 𑀯𑀸𑀧𑀻𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑀁. 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀭𑀺𑀬𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀏𑀢𑀁 𑀅𑀦𑀭𑀺𑀬𑀁, 𑀬𑀤𑀺𑀤𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀕𑀸𑀭𑀯𑀸𑀥𑀺𑀯𑀘𑀦𑀦𑁆𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼 𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨);

𑀘𑀢𑀼𑀩𑁆𑀩𑀺𑀥𑀁 𑀯𑀸 𑀦𑀸𑀫𑀁 𑀆𑀯𑀢𑁆𑀣𑀺𑀓𑀁, 𑀮𑀺𑀗𑁆𑀕𑀺𑀓𑀁, 𑀦𑁂𑀫𑀺𑀢𑁆𑀢𑀺𑀓𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀸𑀫 𑀮𑁄𑀓𑀺𑀬𑀯𑁄𑀳𑀸𑀭𑁂𑀦 ‘‘𑀬𑀤𑀺𑀘𑁆𑀙𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀯𑀘𑁆𑀙𑁄, 𑀤𑀫𑁆𑀫𑁄, 𑀩𑀮𑀻𑀩𑀤𑁆𑀥𑁄𑀢𑀺 𑀏𑀯𑀫𑀸𑀤𑀺 𑀆𑀯𑀢𑁆𑀣𑀺𑀓𑀁, 𑀤𑀡𑁆𑀟𑀻, 𑀙𑀢𑁆𑀢𑀻, 𑀲𑀺𑀔𑀻, 𑀓𑀭𑀻𑀢𑀺 𑀏𑀯𑀫𑀸𑀤𑀺 𑀮𑀺𑀗𑁆𑀕𑀺𑀓𑀁, 𑀢𑁂𑀯𑀺𑀚𑁆𑀚𑁄, 𑀙𑀴𑀪𑀺𑀜𑁆𑀜𑁄𑀢𑀺 𑀏𑀯𑀫𑀸𑀤𑀺 𑀦𑁂𑀫𑀺𑀢𑁆𑀢𑀺𑀓𑀁, 𑀲𑀺𑀭𑀺𑀯𑀟𑁆𑀠𑀓𑁄, 𑀥𑀦𑀯𑀟𑁆𑀠𑀓𑁄𑀢𑀺 𑀏𑀯𑀫𑀸𑀤𑀺 𑀯𑀘𑀦𑀢𑁆𑀣𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀇𑀤𑀁 𑀧𑀦 𑀪𑀕𑀯𑀸𑀢𑀺 𑀦𑀸𑀫𑀁 𑀦𑁂𑀫𑀺𑀢𑁆𑀢𑀺𑀓𑀁, 𑀦 𑀫𑀳𑀸𑀫𑀸𑀬𑀸𑀬, 𑀦 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦, 𑀦 𑀅𑀲𑀻𑀢𑀺𑀬𑀸 𑀜𑀸𑀢𑀺𑀲𑀳𑀲𑁆𑀲𑁂𑀳𑀺 𑀓𑀢𑀁, 𑀦 𑀲𑀓𑁆𑀓𑀲𑀦𑁆𑀢𑀼𑀲𑀺𑀢𑀸𑀤𑀻𑀳𑀺 𑀤𑁂𑀯𑀢𑀸𑀯𑀺𑀲𑁂𑀲𑁂𑀳𑀺 𑀓𑀢𑀁. 𑀯𑀓𑁆𑀔𑀢𑀺 𑀘 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁…𑀧𑁂… 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸’’𑀢𑀺 (𑀫𑀳𑀸𑀦𑀺. 𑁮𑁪).

‘‘𑀪𑀸𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁪);

𑀢𑀢𑁆𑀣 𑁋

‘‘𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄, 𑀤𑁆𑀯𑁂 𑀘𑀸𑀧𑀭𑁂 𑀯𑀡𑁆𑀡𑀯𑀺𑀓𑀸𑀭𑀦𑀸𑀲𑀸;

𑀥𑀸𑀢𑀽𑀦𑀫𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄, 𑀢𑀤𑀼𑀘𑁆𑀘𑀢𑁂 𑀧𑀜𑁆𑀘𑀯𑀺𑀥𑀁 𑀦𑀺𑀭𑀼𑀢𑁆𑀢𑀺’’𑀦𑁆𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 ‘‘𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦’’𑀦𑁆𑀢𑀺 𑀏𑀢𑁆𑀣 𑀭𑀓𑀸𑀭𑀸𑀕𑀫𑁄 𑀯𑀺𑀬 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀅𑀓𑁆𑀔𑀭𑀲𑁆𑀲 𑀆𑀕𑀫𑁄 𑀯𑀡𑁆𑀡𑀸𑀕𑀫𑁄 𑀦𑀸𑀫. ‘‘𑀳𑀺𑀁𑀲𑀦𑀸, 𑀳𑀺𑀁𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀻𑀳𑁄’’𑀢𑀺 𑀯𑀺𑀬 𑀯𑀺𑀚𑁆𑀚𑀫𑀸𑀦𑀓𑁆𑀔𑀭𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄 𑀦𑀸𑀫. ‘‘𑀦𑀯𑁂 𑀙𑀦𑁆𑀦𑀓𑁂 𑀤𑀸𑀦𑀁 𑀤𑀺𑀬𑁆𑀬𑀢𑀻’’𑀢𑀺 𑀏𑀢𑁆𑀣 𑀅𑀓𑀸𑀭𑀲𑁆𑀲 𑀏𑀓𑀸𑀭𑀸𑀧𑀚𑁆𑀚𑀦𑀢𑀸 𑀯𑀺𑀬 𑀅𑀜𑁆𑀜𑀓𑁆𑀔𑀭𑀲𑁆𑀲 𑀅𑀜𑁆𑀜𑀓𑁆𑀔𑀭𑀸𑀧𑀚𑁆𑀚𑀦𑀢𑀸 𑀯𑀡𑁆𑀡𑀯𑀺𑀓𑀸𑀭𑁄 𑀦𑀸𑀫. ‘‘𑀚𑀻𑀯𑀦𑀲𑁆𑀲 𑀫𑀽𑀢𑁄 𑀚𑀻𑀯𑀦𑀫𑀽𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀚𑀻𑀫𑀽𑀢𑁄’’𑀢𑀺 𑀯𑀓𑀸𑀭𑀦𑀓𑀸𑀭𑀸𑀦𑀁 𑀯𑀺𑀦𑀸𑀲𑁄 𑀯𑀺𑀬 𑀯𑀺𑀚𑁆𑀚𑀫𑀸𑀦𑀓𑁆𑀔𑀭𑀯𑀺𑀦𑀸𑀲𑁄 𑀯𑀡𑁆𑀡𑀯𑀺𑀦𑀸𑀲𑁄 𑀦𑀸𑀫. ‘‘𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀧𑀓𑁆𑀭𑀼𑀩𑁆𑀩𑀫𑀸𑀦𑁄 𑀆𑀲𑀚𑁆𑀚 𑀫𑀁 𑀢𑁆𑀯𑀁 𑀯𑀤𑀲𑀺 𑀓𑀼𑀫𑀸𑀭𑀸’’𑀢𑀺 𑀏𑀢𑁆𑀣 𑀧𑀓𑁆𑀭𑀼𑀩𑁆𑀩𑀫𑀸𑀦𑁄𑀢𑀺 𑀧𑀤𑀲𑁆𑀲 𑀅𑀪𑀺𑀪𑀯𑀫𑀸𑀦𑁄𑀢𑀺 𑀅𑀢𑁆𑀣𑀧𑀝𑀺𑀧𑀸𑀤𑀦𑀁 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀬𑁄𑀕𑀁 𑀯𑀺𑀲𑁂𑀲𑀢𑁆𑀣𑀬𑁄𑀕𑁄 𑀥𑀸𑀢𑀽𑀦𑀁 𑀅𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄 𑀦𑀸𑀫.

𑀏𑀯𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀲𑀤𑁆𑀤𑀦𑀬𑁂𑀦 𑀯𑀸 𑀧𑀺𑀲𑁄𑀤𑀭𑀸𑀤𑀺𑀦𑀺𑀲𑁆𑀲𑀺𑀢𑁄 𑀧𑀢𑀺𑀝𑁆𑀞𑀸𑀦𑀻𑀢𑀺 𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀬𑀲𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑀁 𑀤𑀸𑀦𑀲𑀻𑀮𑀸𑀤𑀺𑀧𑀸𑀭𑀧𑁆𑀧𑀢𑁆𑀢𑀁 𑀪𑀸𑀕𑁆𑀬𑀫𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀪𑀸𑀕𑁆𑀬𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀜𑀸𑀢𑀩𑁆𑀩𑀁.

𑀬𑀲𑁆𑀫𑀸 𑀧𑀦 𑀮𑁄𑀪𑀤𑁄𑀲𑀫𑁄𑀳𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀧𑀴𑀸𑀲𑀇𑀲𑁆𑀲𑀸- 𑀫𑀘𑁆𑀙𑀭𑀺𑀬𑀫𑀸𑀬𑀸𑀲𑀸𑀞𑁂𑀬𑁆𑀬𑀣𑀫𑁆𑀪𑀲𑀸𑀭𑀫𑁆𑀪𑀫𑀸𑀦𑀸𑀢𑀺𑀫𑀸𑀦𑀫𑀤𑀧𑀫𑀸𑀤𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀢𑀺𑀯𑀺𑀥𑀸𑀓𑀼𑀲𑀮𑀫𑀽𑀮𑀤𑀼𑀘𑁆𑀘𑀭𑀺𑀢- 𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀫𑀲𑀜𑁆𑀜𑀸𑀯𑀺𑀢𑀓𑁆𑀓𑀧𑀧𑀜𑁆𑀘𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀆𑀲𑀯𑀕𑀦𑁆𑀣𑀑𑀖𑀬𑁄𑀕𑀅𑀕𑀢𑀺- 𑀢𑀡𑁆𑀳𑀼𑀧𑁆𑀧𑀸𑀤𑀼𑀧𑀸𑀤𑀸𑀦𑀧𑀜𑁆𑀘𑀘𑁂𑀢𑁄𑀔𑀻𑀮𑀯𑀺𑀦𑀺𑀩𑀦𑁆𑀥𑀦𑀻𑀯𑀭𑀡𑀸𑀪𑀺𑀦𑀦𑁆𑀤𑀦𑀙𑀯𑀺𑀯𑀸𑀤𑀫𑀽𑀮𑀢𑀡𑁆𑀳𑀸𑀓𑀸𑀬𑀲𑀢𑁆𑀢𑀸𑀦𑀼𑀲𑀬- 𑀅𑀝𑁆𑀞𑀫𑀺𑀘𑁆𑀙𑀢𑁆𑀢𑀦𑀯𑀢𑀡𑁆𑀳𑀸𑀫𑀽𑀮𑀓𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧𑀪𑁂𑀲𑀩𑁆𑀩𑀤𑀭𑀣- 𑀧𑀭𑀺𑀴𑀸𑀳𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀺, 𑀲𑀗𑁆𑀔𑁂𑀧𑀢𑁄 𑀯𑀸 𑀧𑀜𑁆𑀘 𑀓𑀺𑀮𑁂𑀲𑀔𑀦𑁆𑀥𑀅𑀪𑀺𑀲𑀗𑁆𑀔𑀸𑀭𑀤𑁂𑀯𑀧𑀼𑀢𑁆𑀢𑀫𑀘𑁆𑀘𑀼𑀫𑀸𑀭𑁂 𑀅𑀪𑀜𑁆𑀚𑀺, 𑀢𑀲𑁆𑀫𑀸 𑀪𑀕𑁆𑀕𑀢𑁆𑀢𑀸 𑀏𑀢𑁂𑀲𑀁 𑀧𑀭𑀺𑀲𑁆𑀲𑀬𑀸𑀦𑀁 ‘‘𑀪𑀕𑁆𑀕𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺. 𑀆𑀳 𑀘𑁂𑀢𑁆𑀣 𑁋

‘‘𑀪𑀕𑁆𑀕𑀭𑀸𑀕𑁄 𑀪𑀕𑁆𑀕𑀤𑁄𑀲𑁄, 𑀪𑀕𑁆𑀕𑀫𑁄𑀳𑁄 𑀅𑀦𑀸𑀲𑀯𑁄;

𑀪𑀕𑁆𑀕𑀸𑀲𑁆𑀲 𑀧𑀸𑀧𑀓𑀸 𑀥𑀫𑁆𑀫𑀸, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁯𑁬; 𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁪);

𑀪𑀸𑀕𑁆𑀬𑀯𑀦𑁆𑀢𑀢𑀸𑀬 𑀘𑀲𑁆𑀲 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀯𑀭𑀲𑁆𑀲 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺. 𑀪𑀕𑁆𑀕𑀤𑁄𑀲𑀢𑀸𑀬 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺. 𑀢𑀣𑀸 𑀮𑁄𑀓𑀺𑀬𑀲𑀭𑀺𑀓𑁆𑀔𑀓𑀸𑀦𑀁 𑀩𑀳𑀼𑀫𑀢𑀪𑀸𑀯𑁄, 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀅𑀪𑀺𑀕𑀫𑀦𑀻𑀬𑀢𑀸, 𑀅𑀪𑀺𑀕𑀢𑀸𑀦𑀜𑁆𑀘 𑀦𑁂𑀲𑀁 𑀓𑀸𑀬𑀘𑀺𑀢𑁆𑀢𑀤𑀼𑀓𑁆𑀔𑀸𑀧𑀦𑀬𑀦𑁂 𑀧𑀝𑀺𑀩𑀮𑀪𑀸𑀯𑁄, 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀉𑀧𑀓𑀸𑀭𑀺𑀢𑀸, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀳𑀺 𑀘 𑀲𑀜𑁆𑀜𑁄𑀚𑀦𑀲𑀫𑀢𑁆𑀣𑀢𑀸 𑀤𑀻𑀧𑀺𑀢𑀸 𑀳𑁄𑀢𑀺.

𑀬𑀲𑁆𑀫𑀸 𑀘 𑀮𑁄𑀓𑁂 𑀇𑀲𑁆𑀲𑀭𑀺𑀬𑀥𑀫𑁆𑀫𑀬𑀲𑀲𑀺𑀭𑀺𑀓𑀸𑀫𑀧𑀬𑀢𑁆𑀢𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼 𑀪𑀕𑀲𑀤𑁆𑀤𑁄 𑀧𑀯𑀢𑁆𑀢𑀢𑀺, 𑀧𑀭𑀫𑀜𑁆𑀘𑀲𑁆𑀲 𑀲𑀓𑀘𑀺𑀢𑁆𑀢𑁂 𑀇𑀲𑁆𑀲𑀭𑀺𑀬𑀁, 𑀅𑀡𑀺𑀫𑀸𑀮𑀗𑁆𑀖𑀺𑀫𑀸𑀤𑀺𑀓𑀁 𑀯𑀸 𑀮𑁄𑀓𑀺𑀬𑀲𑀫𑁆𑀫𑀢𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀅𑀢𑁆𑀣𑀺, 𑀢𑀣𑀸 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄, 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑁄 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁄 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀬𑀲𑁄, 𑀭𑀽𑀧𑀓𑀸𑀬𑀤𑀲𑁆𑀲𑀦𑀩𑁆𑀬𑀸𑀯𑀝𑀚𑀦𑀦𑀬𑀦𑀧𑁆𑀧𑀲𑀸𑀤𑀚𑀦𑀦𑀲𑀫𑀢𑁆𑀣𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀺𑀭𑀻, 𑀬𑀁 𑀬𑀁 𑀏𑀢𑁂𑀦 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀅𑀢𑁆𑀢𑀳𑀺𑀢𑀁 𑀧𑀭𑀳𑀺𑀢𑀁 𑀯𑀸, 𑀢𑀲𑁆𑀲 𑀢𑀲𑁆𑀲 𑀢𑀣𑁂𑀯 𑀅𑀪𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀲𑀜𑁆𑀜𑀺𑀢𑁄 𑀓𑀸𑀫𑁄, 𑀲𑀩𑁆𑀩𑀮𑁄𑀓𑀕𑀭𑀼𑀪𑀸𑀯𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑀲𑀗𑁆𑀔𑀸𑀢𑁄 𑀧𑀬𑀢𑁆𑀢𑁄 𑀘 𑀅𑀢𑁆𑀣𑀺, 𑀢𑀲𑁆𑀫𑀸 𑀇𑀫𑁂𑀳𑀺 𑀪𑀕𑁂𑀳𑀺 𑀬𑀼𑀢𑁆𑀢𑀢𑁆𑀢𑀸𑀧𑀺 𑀪𑀕𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀓𑀼𑀲𑀮𑀸𑀤𑀻𑀳𑀺 𑀪𑁂𑀤𑁂𑀳𑀺 𑀲𑀩𑁆𑀩𑀥𑀫𑁆𑀫𑁂, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀳𑀺 𑀯𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑁂, 𑀧𑀻𑀴𑀦𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑁂𑀦 𑀯𑀸 𑀤𑀼𑀓𑁆𑀔𑀫𑀭𑀺𑀬𑀲𑀘𑁆𑀘𑀁, 𑀆𑀬𑀽𑀳𑀦𑀦𑀺𑀤𑀸𑀦𑀲𑀁𑀬𑁄𑀕𑀧𑀮𑀺𑀩𑁄𑀥𑀝𑁆𑀞𑁂𑀦 𑀲𑀫𑀼𑀤𑀬𑀁, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸𑀲𑀗𑁆𑀔𑀢𑀅𑀫𑀢𑀝𑁆𑀞𑁂𑀦 𑀦𑀺𑀭𑁄𑀥𑀁, 𑀦𑀺𑀬𑁆𑀬𑀸𑀦𑀺𑀓𑀳𑁂𑀢𑀼𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀫𑀕𑁆𑀕𑀁 𑀯𑀺𑀪𑀢𑁆𑀢𑀯𑀸, 𑀯𑀺𑀪𑀚𑀺𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀤𑁂𑀲𑀺𑀢𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀯𑀺𑀪𑀢𑁆𑀢𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀘 𑀏𑀲 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂 𑀲𑀼𑀜𑁆𑀜𑀢𑀧𑁆𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂 𑀅𑀜𑁆𑀜𑁂 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀺, 𑀢𑀲𑁆𑀫𑀸 ‘‘𑀪𑀢𑁆𑀢𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀢𑀻𑀲𑀼 𑀪𑀯𑁂𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦𑀁 𑀅𑀦𑁂𑀦 𑀯𑀦𑁆𑀢𑀁, 𑀢𑀲𑁆𑀫𑀸 ‘‘𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀪𑀯𑀲𑀤𑁆𑀤𑀢𑁄 𑀪𑀓𑀸𑀭𑀁 𑀕𑀫𑀦𑀲𑀤𑁆𑀤𑀢𑁄 𑀕𑀓𑀸𑀭𑀁 𑀯𑀦𑁆𑀢𑀲𑀤𑁆𑀤𑀢𑁄 𑀯𑀓𑀸𑀭𑀜𑁆𑀘 𑀤𑀻𑀖𑀁 𑀓𑀢𑁆𑀯𑀸 𑀆𑀤𑀸𑀬 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀮𑁄𑀓𑁂 ‘‘𑀫𑁂𑀳𑀦𑀲𑁆𑀲 𑀔𑀲𑁆𑀲 𑀫𑀸𑀮𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑁂𑀔𑀮𑀸’’𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀦 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 ‘‘𑀅𑀧𑀺 𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀕𑁆𑀕𑁄 𑀭𑀸𑀕𑁄 𑀅𑀲𑁆𑀲𑀸𑀢𑀺 𑀪𑀕𑁆𑀕𑀭𑀸𑀕𑁄. 𑀪𑀕𑁆𑀕𑀤𑁄𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀡𑁆𑀟𑀓𑁄𑀢𑀺 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦 𑀓𑀺𑀮𑁂𑀲𑀸 𑀏𑀯. 𑀪𑀚𑀻𑀢𑀺 𑀉𑀤𑁆𑀤𑁂𑀲𑀯𑀲𑁂𑀦 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀪𑀸𑀚𑁂𑀲𑀺. 𑀯𑀺𑀪𑀚𑀻𑀢𑀺 𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀯𑀺𑀥𑀸 𑀪𑀸𑀚𑁂𑀲𑀺. 𑀧𑀯𑀺𑀪𑀚𑀻𑀢𑀺 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀧𑀓𑀸𑀭𑁂𑀦 𑀯𑀺𑀪𑀚𑀺. 𑀉𑀕𑁆𑀖𑀝𑀺𑀢𑀜𑁆𑀜𑀽𑀦𑀁 𑀯𑀲𑁂𑀦 𑀪𑀚𑀺. 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑀁 𑀯𑀲𑁂𑀦 𑀯𑀺𑀪𑀚𑀺. 𑀦𑁂𑀬𑁆𑀬𑀸𑀦𑀁 𑀯𑀲𑁂𑀦 𑀧𑀯𑀺𑀪𑀚𑀺.

𑀥𑀫𑁆𑀫𑀭𑀢𑀦𑀦𑁆𑀢𑀺 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩) 𑁋

𑀏𑀯𑀁 𑀯𑀡𑁆𑀡𑀺𑀢𑀁 𑀥𑀫𑁆𑀫𑀭𑀢𑀦𑀁 𑀢𑀺𑀯𑀺𑀥𑁂𑀦 𑀪𑀸𑀚𑁂𑀲𑀺. 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀓𑀸𑀫𑀪𑀯𑀸𑀤𑀻𑀦𑀁 𑀦𑀯𑀦𑁆𑀦𑀁 𑀪𑀯𑀸𑀦𑀁 𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀬𑀦𑁆𑀢𑀁 𑀧𑀭𑀺𑀯𑀝𑀼𑀫𑀁 𑀓𑀸𑀭𑀓𑁄. 𑀪𑀸𑀯𑀺𑀢𑀓𑀸𑀬𑁄𑀢𑀺 𑀯𑀟𑁆𑀠𑀺𑀢𑀓𑀸𑀬𑁄. 𑀢𑀣𑀸 𑀇𑀢𑀭𑁂𑀲𑀼𑀧𑀺. 𑀪𑀚𑀻𑀢𑀺 𑀲𑁂𑀯𑀺. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀕𑀸𑀫𑀲𑁆𑀲 𑀯𑀸 𑀦𑀕𑀭𑀲𑁆𑀲 𑀯𑀸 𑀇𑀦𑁆𑀤𑀔𑀻𑀮𑀢𑁄 𑀩𑀳𑀺 𑀅𑀭𑀜𑁆𑀜𑀁. 𑀯𑀦𑀧𑀢𑁆𑀣𑀸𑀦𑀺 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀢𑀺𑀓𑁆𑀓𑀦𑁆𑀢𑀸𑀦𑀺 𑀯𑀦𑀲𑀡𑁆𑀟𑀸𑀦𑀺. 𑀧𑀦𑁆𑀢𑀸𑀦𑀻𑀢𑀺 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀦 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀺 𑀤𑀽𑀭𑀸𑀦𑀺 𑀲𑁂𑀦𑀸𑀲𑀦𑀸𑀦𑀺. 𑀓𑁂𑀘𑀺 𑀧𑀦 ‘‘𑀯𑀦𑀧𑀢𑁆𑀢𑀸𑀦𑀻𑀢𑀺 𑀬𑀲𑁆𑀫𑀸 𑀬𑀢𑁆𑀣 𑀩𑁆𑀬𑀕𑁆𑀖𑀸𑀤𑀬𑁄 𑀅𑀢𑁆𑀣𑀺, 𑀢𑀁 𑀯𑀦𑀁 𑀢𑁂 𑀧𑀸𑀮𑀬𑀦𑁆𑀢𑀺 𑀭𑀓𑁆𑀔𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀳𑀺 𑀭𑀓𑁆𑀔𑀺𑀢𑀢𑁆𑀢𑀸 𑀯𑀦𑀧𑀢𑁆𑀢𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀲𑁂𑀦𑀸𑀲𑀦𑀸𑀦𑀻𑀢𑀺 𑀲𑁂𑀢𑀺 𑀘𑁂𑀯 𑀆𑀲𑀢𑀺 𑀘 𑀏𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀸𑀦𑀺. 𑀅𑀧𑁆𑀧𑀲𑀤𑁆𑀤𑀸𑀦𑀻𑀢𑀺 𑀯𑀘𑀦𑀲𑀤𑁆𑀤𑁂𑀦 𑀅𑀧𑁆𑀧𑀲𑀤𑁆𑀤𑀸𑀦𑀺. 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀻𑀢𑀺 𑀕𑀸𑀫𑀦𑀕𑀭𑀦𑀺𑀕𑁆𑀖𑁄𑀲𑀲𑀤𑁆𑀤𑁂𑀦 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺. 𑀯𑀺𑀚𑀦𑀯𑀸𑀢𑀸𑀦𑀻𑀢𑀺 𑀅𑀦𑁆𑀢𑁄𑀲𑀜𑁆𑀘𑀭𑀡𑀚𑀦𑀲𑁆𑀲 𑀲𑀭𑀻𑀭𑀯𑀸𑀢𑁂𑀦 𑀯𑀺𑀭𑀳𑀺𑀢𑀸𑀦𑀺. ‘‘𑀯𑀺𑀚𑀦𑀯𑀸𑀤𑀸𑀦𑀻’’𑀢𑀺𑀧𑀺 𑀧𑀸𑀞𑁄, ‘‘𑀅𑀦𑁆𑀢𑁄𑀚𑀦𑀯𑀸𑀤𑁂𑀦 𑀯𑀺𑀭𑀳𑀺𑀢𑀸𑀦𑀻’’𑀢𑀺 𑀅𑀢𑁆𑀣𑁄. ‘‘𑀯𑀺𑀚𑀦𑀧𑀸𑀢𑀸𑀦𑀻’’𑀢𑀺𑀧𑀺 𑀧𑀸𑀞𑁄, ‘‘𑀚𑀦𑀲𑀜𑁆𑀘𑀸𑀭𑀯𑀺𑀭𑀳𑀺𑀢𑀸𑀦𑀻’’𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀭𑀳𑀲𑁆𑀲𑀓𑀭𑀡𑀝𑁆𑀞𑀸𑀦𑀸𑀦𑀺. 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀯𑀺𑀯𑁂𑀓𑀸𑀦𑀼𑀭𑀽𑀧𑀸𑀦𑀺. 𑀪𑀸𑀕𑀻 𑀯𑀸𑀢𑀺 ‘‘𑀪𑀸𑀕𑁄 𑀘𑀻𑀯𑀭𑀸𑀤𑀺𑀓𑁄𑀝𑁆𑀞𑀸𑀲𑁄 𑀅𑀲𑁆𑀲 𑀅𑀢𑁆𑀣𑀻’’𑀢𑀺 𑀪𑀸𑀕𑀻. ‘‘𑀧𑀝𑀺𑀮𑀸𑀪𑀯𑀲𑁂𑀦 𑀅𑀢𑁆𑀣𑀭𑀲𑀸𑀤𑀺𑀪𑀸𑀕𑁄 𑀅𑀲𑁆𑀲 𑀅𑀢𑁆𑀣𑀻’’𑀢𑀺 𑀪𑀸𑀕𑀻. 𑀅𑀢𑁆𑀣𑀭𑀲𑀲𑁆𑀲𑀸𑀢𑀺 𑀳𑁂𑀢𑀼𑀨𑀮𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀭𑀲𑀲𑁆𑀲. 𑀥𑀫𑁆𑀫𑀭𑀲𑀲𑁆𑀲𑀸𑀢𑀺 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀭𑀲𑀲𑁆𑀲. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁦). 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲𑀸𑀢𑀺 𑀨𑀮𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀓𑀺𑀘𑁆𑀘𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦, 𑀭𑀲𑁄 𑀦𑀸𑀫 𑀧𑀯𑀼𑀘𑁆𑀘𑀢𑀻’’𑀢𑀺 (𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁨 𑀫𑀸𑀢𑀺𑀓𑀸𑀯𑀡𑁆𑀡𑀦𑀸; 𑀯𑀺𑀲𑀼𑀤𑁆𑀥𑀺. 𑁧.𑁮).

𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁. 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀦𑁆𑀢𑀺 𑀫𑁂𑀢𑁆𑀢𑀸𑀤𑀻𑀦𑀁 𑀨𑀭𑀡𑀧𑁆𑀧𑀫𑀸𑀡𑀯𑀺𑀭𑀳𑀺𑀢𑀸𑀦𑀁 𑀘𑀢𑀼𑀦𑁆𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁. 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁. 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀦𑁆𑀢𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁨𑁪𑁮) 𑀦𑀬𑁂𑀦 𑀯𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀯𑀺𑀫𑀼𑀢𑁆𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁. 𑀅𑀪𑀺𑀪𑀸𑀬𑀢𑀦𑀸𑀦𑀦𑁆𑀢𑀺 𑀏𑀢𑁆𑀣 𑀅𑀪𑀺𑀪𑀽𑀢𑀸𑀦𑀺 𑀆𑀬𑀢𑀦𑀸𑀦𑀺 𑀏𑀢𑁂𑀲𑀁 𑀛𑀸𑀦𑀸𑀦𑀦𑁆𑀢𑀺 𑀅𑀪𑀺𑀪𑀸𑀬𑀢𑀦𑀸𑀦𑀺, 𑀛𑀸𑀦𑀸𑀦𑀺. 𑀆𑀬𑀢𑀦𑀸𑀦𑀻𑀢𑀺 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀲𑀗𑁆𑀔𑀸𑀢𑀸𑀦𑀺 𑀓𑀲𑀺𑀡𑀸𑀭𑀫𑁆𑀫𑀡𑀸𑀦𑀺. 𑀜𑀸𑀡𑀼𑀢𑁆𑀢𑀭𑀺𑀓𑁄 𑀳𑀺 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄𑀢𑀺 𑀓𑀺𑀁 𑀏𑀢𑁆𑀣 𑀆𑀭𑀫𑁆𑀫𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀦 𑀫𑀬𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀓𑀭𑀡𑁂 𑀪𑀸𑀭𑁄 𑀅𑀢𑁆𑀣𑀻𑀢𑀺 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺. 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀉𑀧𑁆𑀧𑀸𑀤𑀺𑀢𑀸𑀦𑀺 𑀛𑀸𑀦𑀸𑀦𑀺 𑀅𑀪𑀺𑀪𑀸𑀬𑀢𑀦𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁. 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀼𑀩𑁆𑀩𑀁 𑀧𑀼𑀩𑁆𑀩𑀁 𑀅𑀦𑀼 𑀅𑀦𑀼𑀧𑀼𑀩𑁆𑀩𑀁, 𑀅𑀦𑀼𑀧𑀼𑀩𑁆𑀩𑀁 𑀯𑀺𑀳𑀭𑀺𑀢𑀩𑁆𑀩𑀢𑁄 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺, 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄, 𑀢𑀸𑀲𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁. 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀦𑁆𑀢𑀺 𑀕𑀺𑀭𑀺𑀫𑀸𑀦𑀦𑁆𑀤𑀲𑀼𑀢𑁆𑀢𑁂 (𑀅. 𑀦𑀺. 𑁧𑁦.𑁬𑁦) 𑀆𑀕𑀢𑀸𑀦𑀁 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁. 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀲𑀓𑀮𑀝𑁆𑀞𑁂𑀦 𑀓𑀲𑀺𑀡𑀲𑀗𑁆𑀔𑀸𑀢𑀸𑀦𑀁 𑀧𑀣𑀯𑀻𑀓𑀲𑀺𑀡𑀚𑁆𑀛𑀸𑀦𑀸𑀤𑀻𑀦𑀁 𑀤𑀲𑀦𑁆𑀦𑀁 𑀛𑀸𑀦𑀸𑀦𑀁. 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲𑀸𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀲𑁆𑀲. 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀅𑀲𑀼𑀪𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸. 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀦𑁆𑀢𑀺 𑀤𑀲𑀩𑀮𑀩𑀮𑀸𑀦𑀁 𑀤𑀲𑀦𑁆𑀦𑀁. 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀦𑁆𑀢𑀺 𑀯𑀺𑀲𑀸𑀭𑀤𑀪𑀸𑀯𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁. 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀁 𑀘𑀢𑀼𑀦𑁆𑀦𑀁. 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀡𑀸𑀦𑀁. 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 ‘‘𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀦𑁂𑀢𑁆𑀢𑀺. 𑁧𑁫) 𑀦𑀬𑁂𑀦 𑀉𑀧𑀭𑀺 𑀆𑀕𑀢𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀁.

𑀢𑀢𑁆𑀣 𑀘𑀻𑀯𑀭𑀸𑀤𑀬𑁄 𑀪𑀸𑀕𑁆𑀬𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀸. 𑀅𑀢𑁆𑀣𑀭𑀲𑀢𑀺𑀓𑁄 𑀧𑀝𑀺𑀯𑁂𑀥𑀯𑀲𑁂𑀦 𑀯𑀼𑀢𑁆𑀢𑁄. 𑀅𑀥𑀺𑀲𑀻𑀮𑀢𑀺𑀓𑁄 𑀧𑀝𑀺𑀧𑀢𑁆𑀢𑀺𑀯𑀲𑁂𑀦. 𑀛𑀸𑀦𑀢𑁆𑀢𑀺𑀓𑁄 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀯𑀲𑁂𑀦. 𑀯𑀺𑀫𑁄𑀓𑁆𑀔𑀢𑁆𑀢𑀺𑀓𑁄 𑀲𑀫𑀸𑀧𑀢𑁆𑀢𑀺𑀯𑀲𑁂𑀦. 𑀲𑀜𑁆𑀜𑀸𑀘𑀢𑀼𑀓𑁆𑀓𑁄 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦. 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀯𑀲𑁂𑀦. 𑀢𑀣𑀸𑀕𑀢𑀩𑀮𑀸𑀦𑀦𑁆𑀢𑀺𑀆𑀤𑀬𑁄 𑀆𑀯𑁂𑀡𑀺𑀓𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀢𑁄 𑀧𑀭𑀁 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀦𑁆𑀢𑀺𑀆𑀤𑀺 ‘‘𑀅𑀢𑁆𑀣𑀫𑀦𑀼𑀕𑀢𑀸 𑀅𑀬𑀁 𑀧𑀜𑁆𑀜𑀢𑁆𑀢𑀻’’𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀡𑀸 𑀧𑀩𑁆𑀩𑀚𑁆𑀚𑀼𑀧𑀕𑀢𑀸. 𑀩𑁆𑀭𑀸𑀳𑁆𑀫𑀡𑀸 𑀪𑁄𑀯𑀸𑀤𑀺𑀦𑁄 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀸 𑀯𑀸. 𑀤𑁂𑀯𑀢𑀸 𑀲𑀓𑁆𑀓𑀸𑀤𑀬𑁄 𑀩𑁆𑀭𑀳𑁆𑀫𑀸𑀦𑁄 𑀘. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀦𑁆𑀢𑀺 𑀯𑀺𑀫𑁄𑀓𑁆𑀔𑁄 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀯𑀺𑀫𑁄𑀓𑁆𑀔𑀲𑁆𑀲 𑀅𑀦𑁆𑀢𑁄 𑀅𑀭𑀳𑀢𑁆𑀢𑀨𑀮𑀁, 𑀢𑀲𑁆𑀫𑀺𑀁 𑀯𑀺𑀫𑁄𑀓𑁆𑀔𑀦𑁆𑀢𑁂 𑀪𑀯𑀁 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀁 𑀦𑀸𑀫𑀁. 𑀲𑀩𑁆𑀩𑀜𑁆𑀜𑀼𑀪𑀸𑀯𑁄 𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀺, 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁂𑀦 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀪𑀸𑀯𑁄 𑀯𑀺𑀫𑁄𑀓𑁆𑀔𑀦𑁆𑀢𑁂 𑀪𑀯𑁄 𑀳𑁄𑀢𑀺. 𑀢𑀁 𑀦𑁂𑀫𑀺𑀢𑁆𑀢𑀺𑀓𑀫𑁆𑀧𑀺 𑀦𑀸𑀫𑀁 𑀯𑀺𑀫𑁄𑀓𑁆𑀔𑀦𑁆𑀢𑁂 𑀪𑀯𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦’’𑀦𑁆𑀢𑀺. 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸𑀢𑀺 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀬𑀣𑀸𑀯𑀼𑀢𑁆𑀢𑀓𑁆𑀔𑀡𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑁂𑀦 𑀲𑀳. 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀩𑁆𑀩𑀥𑀫𑁆𑀫𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀯𑀸 𑀚𑀸𑀢𑀸 𑀧𑀜𑁆𑀜𑀢𑁆𑀢𑀺. 𑀬𑀤𑀺𑀤𑀁 𑀪𑀕𑀯𑀸𑀢𑀺 𑀬𑀸 𑀅𑀬𑀁 𑀪𑀕𑀯𑀸𑀢𑀺 𑀧𑀜𑁆𑀜𑀢𑁆𑀢𑀺.

𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺. 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀦𑁆𑀢𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁. 𑀧𑀝𑀺𑀧𑀢𑁆𑀢𑀻𑀢𑀺 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀧𑀢𑁆𑀢𑀺. 𑀬𑀁 𑀢𑀲𑁆𑀲 𑀧𑀭𑀺𑀬𑀸𑀧𑀼𑀝𑀦𑁆𑀢𑀺 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀬𑀁 𑀧𑀭𑀺𑀬𑀸𑀧𑀼𑀝𑀁 𑀲𑀚𑁆𑀛𑀸𑀬𑀺𑀢𑀁 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. ‘‘𑀧𑀭𑀺𑀬𑀸𑀧𑀼𑀝𑁆𑀝’’𑀦𑁆𑀢𑀺𑀧𑀺 𑀧𑀸𑀞𑁄. 𑀲𑀼𑀢𑁆𑀢𑀦𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀸, 𑀲𑀼𑀢𑁆𑀢𑀦𑀺𑀧𑀸𑀢𑁂 𑀫𑀗𑁆𑀕𑀮𑀲𑀼𑀢𑁆𑀢- (𑀔𑀼. 𑀧𑀸. 𑁫.𑁧 𑀆𑀤𑀬𑁄; 𑀲𑀼. 𑀦𑀺. 𑁨𑁬𑁧 𑀆𑀤𑀬𑁄) 𑀭𑀢𑀦𑀲𑀼𑀢𑁆𑀢- (𑀔𑀼. 𑀧𑀸. 𑁬.𑁧 𑀆𑀤𑀬𑁄) 𑀢𑀼𑀯𑀝𑀓𑀲𑀼𑀢𑁆𑀢𑀸𑀦𑀺 (𑀲𑀼. 𑀦𑀺. 𑁯𑁨𑁧 𑀆𑀤𑀬𑁄), 𑀅𑀜𑁆𑀜𑀫𑁆𑀧𑀺 𑀘 𑀲𑀼𑀢𑁆𑀢𑀦𑀸𑀫𑀓𑀁 𑀢𑀣𑀸𑀕𑀢𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀕𑁂𑀬𑁆𑀬𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀯𑀺𑀲𑁂𑀲𑁂𑀦 𑀲𑀁𑀬𑀼𑀢𑁆𑀢𑀓𑁂 𑀲𑀓𑀮𑁄𑀧𑀺 𑀲𑀕𑀸𑀣𑀸𑀯𑀕𑁆𑀕𑁄. 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀲𑀓𑀮𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁, 𑀬𑀜𑁆𑀘 𑀅𑀜𑁆𑀜𑀫𑁆𑀧𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁, 𑀢𑀁 ‘‘𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀕𑀸𑀣𑀸𑀢𑀺 𑀥𑀫𑁆𑀫𑀧𑀤𑀁, 𑀣𑁂𑀭𑀕𑀸𑀣𑀸, 𑀣𑁂𑀭𑀻𑀕𑀸𑀣𑀸, 𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑁄𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸 𑀘 ‘‘𑀕𑀸𑀣𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀤𑀸𑀦𑀦𑁆𑀢𑀺 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑁆𑀯𑁂𑀅𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸 ‘‘𑀉𑀤𑀸𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺𑀯𑀼𑀢𑁆𑀢𑀓𑀦𑁆𑀢𑀺 ‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀇𑀢𑀺𑀯𑀼. 𑁧 𑀆𑀤𑀬𑁄) 𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸 ‘‘𑀇𑀢𑀺𑀯𑀼𑀢𑁆𑀢𑀓’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀢𑀓𑀦𑁆𑀢𑀺 𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀻𑀦𑀺 (𑀚𑀸. 𑁧.𑁧.𑁧) 𑀧𑀡𑁆𑀡𑀸𑀲𑀸𑀥𑀺𑀓𑀸𑀦𑀺 𑀧𑀜𑁆𑀘𑀚𑀸𑀢𑀓𑀲𑀢𑀸𑀦𑀺 ‘‘𑀚𑀸𑀢𑀓’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀩𑁆𑀪𑀼𑀢𑀥𑀫𑁆𑀫𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀥𑀫𑁆𑀫𑀸 𑀆𑀦𑀦𑁆𑀤𑁂’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀤𑀻. 𑀦𑀺. 𑁨.𑁨𑁦𑁯; 𑀅. 𑀦𑀺. 𑁪.𑁧𑁨𑁯) 𑀲𑀩𑁆𑀩𑁂𑀧𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀸 ‘‘𑀅𑀩𑁆𑀪𑀼𑀢𑀥𑀫𑁆𑀫’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑁂𑀤𑀮𑁆𑀮𑀦𑁆𑀢𑀺 𑀘𑀽𑀴𑀯𑁂𑀤𑀮𑁆𑀮- (𑀫. 𑀦𑀺. 𑁧.𑁪𑁬𑁦 𑀆𑀤𑀬𑁄) 𑀫𑀳𑀸𑀯𑁂𑀤𑀮𑁆𑀮- (𑀫. 𑀦𑀺. 𑁧.𑁪𑁪𑁯 𑀆𑀤𑀬𑁄) 𑀲𑀫𑁆𑀫𑀸𑀤𑀺𑀝𑁆𑀞𑀺- (𑀫. 𑀦𑀺. 𑁧.𑁮𑁯 𑀆𑀤𑀬𑁄) 𑀲𑀓𑁆𑀓𑀧𑀜𑁆𑀳- (𑀤𑀻. 𑀦𑀺. 𑁨.𑁩𑁪𑁪 𑀆𑀤𑀬𑁄) 𑀲𑀗𑁆𑀔𑀸𑀭𑀪𑀸𑀚𑀦𑀺𑀬𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀸𑀤𑀬𑁄 (𑀫. 𑀦𑀺. 𑁩.𑁮𑁫 𑀆𑀤𑀬𑁄) 𑀲𑀩𑁆𑀩𑁂𑀧𑀺 𑀯𑁂𑀤𑀜𑁆𑀘 𑀢𑀼𑀝𑁆𑀞𑀺𑀜𑁆𑀘 𑀮𑀤𑁆𑀥𑀸 𑀮𑀤𑁆𑀥𑀸 𑀧𑀼𑀘𑁆𑀙𑀺𑀢𑀲𑀼𑀢𑁆𑀢𑀦𑁆𑀢𑀸 ‘‘𑀯𑁂𑀤𑀮𑁆𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀝𑁆𑀞𑁂𑀦 𑀧𑀭𑀺𑀬𑀢𑁆𑀢𑀺, 𑀅𑀦𑀼𑀲𑀸𑀲𑀦𑀝𑁆𑀞𑁂𑀦 𑀲𑀸𑀲𑀦𑀦𑁆𑀢𑀺 𑀓𑀢𑁆𑀯𑀸 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁. 𑀢𑀫𑁆𑀧𑀺 𑀫𑀼𑀲𑁆𑀲𑀢𑀻𑀢𑀺 𑀢𑀫𑁆𑀧𑀺 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁 𑀦𑀲𑁆𑀲𑀢𑀺. 𑀲𑀫𑁆𑀫𑀼𑀲𑁆𑀲𑀢𑀻𑀢𑀺 𑀆𑀤𑀺𑀢𑁄 𑀦𑀲𑁆𑀲𑀢𑀺. 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺 𑀧𑀭𑀫𑁆𑀫𑀼𑀔𑁄 𑀳𑁄𑀢𑀺.

𑀓𑀢𑀫𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀢𑁄 𑀧𑀼𑀩𑁆𑀩𑀪𑀸𑀕𑁄 𑀢𑀤𑀢𑁆𑀣𑀁 𑀧𑀝𑀺𑀧𑀚𑁆𑀚𑀻𑀬𑀢𑀻𑀢𑀺 𑀧𑀝𑀺𑀧𑀢𑁆𑀢𑀺. 𑀲𑀸𑀲𑀻𑀬𑀦𑁆𑀢𑀺 𑀏𑀢𑁆𑀣 𑀯𑁂𑀦𑁂𑀬𑁆𑀬𑀸𑀢𑀺 𑀲𑀸𑀲𑀦𑀁. 𑀲𑀫𑁆𑀫𑀸𑀧𑀝𑀺𑀧𑀤𑀸𑀢𑀺𑀆𑀤𑀬𑁄 𑀯𑀼𑀢𑁆𑀢𑀦𑀬𑀸 𑀏𑀯.

𑀧𑀸𑀡𑀫𑁆𑀧𑀺 𑀳𑀦𑀢𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀖𑀸𑀢𑁂𑀢𑀺. 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀻𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀫𑁆𑀧𑀺 𑀯𑀢𑁆𑀣𑀼𑀁 𑀕𑀡𑁆𑀳𑀸𑀢𑀺. 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀻𑀢𑀺 𑀖𑀭𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺. 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀻𑀢𑀺 𑀕𑀸𑀫𑁂 𑀧𑀳𑀭𑀺𑀢𑁆𑀯𑀸 𑀫𑀳𑀸𑀯𑀺𑀮𑁄𑀧𑀫𑁆𑀧𑀺 𑀓𑀭𑁄𑀢𑀺. 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀻𑀢𑀺 𑀧𑀡𑁆𑀡𑀸𑀲𑀫𑀢𑁆𑀢𑁂𑀳𑀺𑀧𑀺 𑀲𑀝𑁆𑀞𑀺𑀫𑀢𑁆𑀢𑁂𑀳𑀺𑀧𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸𑀧𑀺 𑀥𑀦𑀁 𑀆𑀳𑀭𑀸𑀧𑁂𑀢𑀺. 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀻𑀢𑀺 𑀧𑀦𑁆𑀣𑀤𑀽𑀳𑀦𑀓𑀫𑁆𑀫𑀁 𑀓𑀭𑁄𑀢𑀺. 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀻𑀢𑀺 𑀧𑀭𑀤𑀸𑀭𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀢𑀺. 𑀫𑀼𑀲𑀸𑀧𑀺 𑀪𑀡𑀢𑀻𑀢𑀺 𑀅𑀢𑁆𑀣𑀪𑀜𑁆𑀚𑀦𑀓𑀁 𑀫𑀼𑀲𑀸𑀧𑀺 𑀯𑀤𑀢𑀺. 𑀅𑀦𑀭𑀺𑀬𑀥𑀫𑁆𑀫𑁄𑀢𑀺 𑀅𑀦𑀭𑀺𑀬𑀲𑀪𑀸𑀯𑁄.

𑁫𑁧. 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦𑀸𑀢𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸 𑀧𑀼𑀩𑁆𑀩𑁂 𑀮𑁄𑀓𑁂 𑀯𑀺𑀳𑀭𑀺𑀢𑁆𑀯𑀸. 𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂, 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀦𑁆𑀢𑀺 𑀢𑀁 𑀯𑀺𑀩𑁆𑀪𑀦𑁆𑀢𑀓𑀁 𑀧𑀼𑀕𑁆𑀕𑀮𑀁 𑀬𑀣𑀸 𑀳𑀢𑁆𑀣𑀺𑀬𑀸𑀦𑀸𑀤𑀺𑀬𑀸𑀦𑀁 𑀅𑀤𑀦𑁆𑀢𑀁 𑀯𑀺𑀲𑀫𑀫𑁆𑀧𑀺 𑀆𑀭𑁄𑀳𑀢𑀺, 𑀆𑀭𑁄𑀳𑀦𑀓𑀫𑁆𑀧𑀺 𑀪𑀜𑁆𑀚𑀢𑀺, 𑀧𑀧𑀸𑀢𑁂𑀧𑀺 𑀧𑀧𑀢𑀢𑀺, 𑀏𑀯𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀺𑀲𑀫𑀸𑀭𑁄𑀳𑀦𑁂𑀦 𑀦𑀺𑀭𑀬𑀸𑀤𑀻𑀲𑀼, 𑀅𑀢𑁆𑀣𑀪𑀜𑁆𑀚𑀦𑁂𑀦 𑀚𑀸𑀢𑀺𑀧𑀧𑀸𑀢𑀸𑀤𑀻𑀲𑀼 𑀧𑀧𑀢𑀦𑁂𑀦 𑀘 𑀬𑀸𑀦𑀁 𑀪𑀦𑁆𑀢𑀁𑀯 𑀳𑀻𑀦𑀁 𑀧𑀼𑀣𑀼𑀚𑁆𑀚𑀦𑀜𑁆𑀘 𑀆𑀳𑀽𑀢𑀺.

𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸𑀢𑀺 𑀧𑀩𑁆𑀩𑀚𑁆𑀚𑀸𑀓𑁄𑀝𑁆𑀞𑀸𑀲𑁂𑀦 𑀯𑀸 ‘‘𑀧𑀩𑁆𑀩𑀚𑀺𑀢𑁄 𑀲𑀫𑀡𑁄’’𑀢𑀺 𑀕𑀡𑀦𑀸𑀭𑁄𑀧𑀦𑁂𑀦 𑀯𑀸. 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸.

𑀏𑀓𑁄 𑀧𑀝𑀺𑀓𑁆𑀓𑀫𑀢𑀻𑀢𑀺 𑀏𑀓𑀓𑁄𑀯 𑀕𑀸𑀫𑀢𑁄 𑀦𑀺𑀯𑀢𑁆𑀢𑀢𑀺. 𑀬𑁄 𑀦𑀺𑀲𑁂𑀯𑀢𑀻𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀅𑀧𑀭𑀪𑀸𑀕𑁂. 𑀩𑀼𑀤𑁆𑀥𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀁. 𑀥𑀫𑁆𑀫𑀦𑁆𑀢𑀺 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑀁 𑀥𑀫𑁆𑀫𑀁. 𑀲𑀗𑁆𑀖𑀦𑁆𑀢𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑀁 𑀲𑀗𑁆𑀖𑀁. 𑀲𑀺𑀓𑁆𑀔𑀦𑁆𑀢𑀺 𑀅𑀥𑀺𑀲𑀻𑀮𑀸𑀤𑀺𑀲𑀺𑀓𑁆𑀔𑀺𑀢𑀩𑁆𑀩𑀁 𑀲𑀺𑀓𑁆𑀔𑀁. 𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀩𑀼𑀤𑁆𑀥𑀸𑀤𑀺𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀳𑀻𑀦𑀸𑀬𑀸𑀢𑀺 𑀳𑀻𑀦𑀢𑁆𑀣𑀸𑀬 𑀕𑀺𑀳𑀺𑀪𑀸𑀯𑀸𑀬. 𑀆𑀯𑀢𑁆𑀢𑀺𑀢𑁆𑀯𑀸𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸. 𑀲𑁂𑀯𑀢𑀺 𑀏𑀓𑀯𑀸𑀭𑀁 𑀲𑁂𑀯𑀢𑀺. 𑀦𑀺𑀲𑁂𑀯𑀢𑀺 𑀅𑀦𑁂𑀓𑀯𑀺𑀥𑁂𑀦 𑀲𑁂𑀯𑀢𑀺. 𑀲𑀁𑀲𑁂𑀯𑀢𑀺 𑀅𑀮𑁆𑀮𑀻𑀬𑀺𑀢𑁆𑀯𑀸 𑀲𑁂𑀯𑀢𑀺. 𑀧𑀝𑀺𑀲𑁂𑀯𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑁂𑀯𑀢𑀺.

𑀪𑀦𑁆𑀢𑀦𑁆𑀢𑀺 𑀯𑀺𑀩𑁆𑀪𑀦𑁆𑀢𑀁. 𑀅𑀤𑀦𑁆𑀢𑀦𑁆𑀢𑀺 𑀤𑀦𑁆𑀢𑀪𑀸𑀯𑀁 𑀅𑀦𑀼𑀧𑀦𑀻𑀢𑀁. 𑀅𑀓𑀸𑀭𑀺𑀢𑀦𑁆𑀢𑀺 𑀲𑀼𑀲𑀺𑀓𑁆𑀔𑀺𑀢𑀓𑀺𑀭𑀺𑀬𑀁 𑀅𑀲𑀺𑀓𑁆𑀔𑀸𑀧𑀺𑀢𑀁. 𑀅𑀯𑀺𑀦𑀻𑀢𑀦𑁆𑀢𑀺 𑀦 𑀯𑀺𑀦𑀻𑀢𑀁 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀅𑀲𑀺𑀓𑁆𑀔𑀺𑀢𑀁. 𑀉𑀧𑁆𑀧𑀣𑀁 𑀕𑀡𑁆𑀳𑀸𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀬𑀸𑀦𑀁 𑀅𑀤𑀦𑁆𑀢𑀸𑀢𑀺𑀬𑀼𑀢𑁆𑀢𑀁 𑀪𑀦𑁆𑀢𑀁 𑀯𑀺𑀲𑀫𑀫𑀕𑁆𑀕𑀁 𑀉𑀧𑁂𑀢𑀺. 𑀯𑀺𑀲𑀫𑀁 𑀔𑀸𑀡𑀼𑀫𑁆𑀧𑀺 𑀧𑀸𑀲𑀸𑀡𑀫𑁆𑀧𑀺 𑀅𑀪𑀺𑀭𑀼𑀳𑀢𑀻𑀢𑀺 𑀯𑀺𑀲𑀫𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀔𑀭𑀔𑀸𑀡𑀼𑀫𑁆𑀧𑀺 𑀢𑀣𑀸 𑀧𑀩𑁆𑀩𑀢𑀧𑀸𑀲𑀸𑀡𑀫𑁆𑀧𑀺 𑀆𑀭𑁄𑀳𑀢𑀺. 𑀬𑀸𑀦𑀫𑁆𑀧𑀺 𑀆𑀭𑁄𑀳𑀦𑀓𑀫𑁆𑀧𑀺 𑀪𑀜𑁆𑀚𑀢𑀻𑀢𑀺 𑀯𑀬𑁆𑀳𑀸𑀤𑀺𑀬𑀸𑀦𑀁 𑀆𑀭𑁄𑀳𑀦𑁆𑀢𑀲𑁆𑀲 𑀧𑀸𑀚𑁂𑀦𑁆𑀢𑀲𑁆𑀲 𑀳𑀢𑁆𑀣𑀧𑀸𑀤𑀸𑀤𑀺𑀫𑁆𑀧𑀺 𑀪𑀺𑀦𑁆𑀤𑀢𑀺. 𑀧𑀧𑀸𑀢𑁂𑀧𑀺 𑀧𑀧𑀢𑀢𑀻𑀢𑀺 𑀏𑀓𑀢𑁄𑀘𑁆𑀙𑀺𑀦𑁆𑀦𑀧𑀩𑁆𑀪𑀸𑀭𑀧𑀧𑀸𑀢𑁂𑀧𑀺 𑀧𑀸𑀢𑁂𑀢𑀺. 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄𑀢𑀺 𑀲𑁄 𑀧𑀝𑀺𑀓𑁆𑀓𑀦𑁆𑀢𑀓𑁄. 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄𑀢𑀺 𑀅𑀦𑀯𑀝𑁆𑀞𑀺𑀢𑀬𑀸𑀦𑀲𑀤𑀺𑀲𑁄. 𑀉𑀧𑁆𑀧𑀣𑀁 𑀕𑀡𑁆𑀳𑀸𑀢𑀻𑀢𑀺 𑀓𑀼𑀲𑀮𑀓𑀫𑁆𑀫𑀧𑀣𑀢𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑀸𑀬𑀧𑀣𑀪𑀽𑀢𑀁 𑀉𑀧𑁆𑀧𑀣𑀁 𑀫𑀺𑀘𑁆𑀙𑀸𑀫𑀕𑁆𑀕𑀁 𑀉𑀧𑁂𑀢𑀺. 𑀯𑀺𑀲𑀫𑀁 𑀓𑀸𑀬𑀓𑀫𑁆𑀫𑀁 𑀅𑀪𑀺𑀭𑀼𑀳𑀢𑀻𑀢𑀺 𑀲𑀫𑀲𑁆𑀲 𑀧𑀝𑀺𑀧𑀓𑁆𑀔𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀗𑁆𑀔𑀸𑀢𑀁 𑀯𑀺𑀲𑀫𑀁 𑀓𑀸𑀬𑀓𑀫𑁆𑀫𑀁 𑀆𑀭𑁄𑀳𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀭𑀬𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀻𑀢𑀺 𑀦𑀺𑀭𑀲𑁆𑀲𑀸𑀤𑀲𑀗𑁆𑀔𑀸𑀢𑁂 𑀦𑀺𑀭𑀬𑁂 𑀅𑀢𑁆𑀢𑀪𑀸𑀯𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀢𑀺. 𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀻𑀢𑀺 𑀯𑀺𑀯𑀺𑀥𑀓𑀫𑁆𑀫𑀓𑀸𑀭𑀡𑀯𑀲𑁂𑀦 𑀪𑀜𑁆𑀚𑀢𑀺. 𑀤𑁂𑀯𑀮𑁄𑀓𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀻𑀢𑀺 𑀧𑀺𑀬𑀯𑀺𑀧𑁆𑀧𑀬𑁄𑀕𑀸𑀤𑀺𑀤𑀼𑀓𑁆𑀔𑀯𑀲𑁂𑀦. 𑀚𑀸𑀢𑀺𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀻𑀢𑀺 𑀚𑀸𑀢𑀺𑀧𑀧𑀸𑀢𑁂𑀧𑀺 𑀧𑀸𑀢𑁂𑀢𑀺. 𑀚𑀭𑀸𑀧𑀧𑀸𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀮𑁄𑀓𑀫𑁂𑀯 𑀤𑀲𑁆𑀲𑁂𑀢𑀺.

𑀧𑀼𑀣𑀼𑀚𑁆𑀚𑀦𑀸𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑀸𑀢𑀺 𑁋

𑀧𑀼𑀣𑀽𑀦𑀁 𑀚𑀦𑀦𑀸𑀤𑀻𑀳𑀺, 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄;

𑀧𑀼𑀣𑀼𑀚𑁆𑀚𑀦𑀦𑁆𑀢𑁄𑀕𑀥𑀢𑁆𑀢𑀸, 𑀧𑀼𑀣𑀼𑀯𑀸𑀬𑀁 𑀚𑀦𑁄 𑀇𑀢𑀺.

𑀲𑁄 𑀳𑀺 𑀧𑀼𑀣𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀸𑀤𑀻𑀦𑀁 𑀚𑀦𑀦𑀸𑀤𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀢𑀁 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀳𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀦𑀁 𑀅𑀯𑀺𑀳𑀢𑀢𑁆𑀢𑀸 𑀯𑀸 𑀢𑀸 𑀚𑀦𑁂𑀦𑁆𑀢𑀺, 𑀢𑀸𑀳𑀺 𑀚𑀦𑀺𑀢𑀸𑀢𑀺 𑀯𑀸 𑀧𑀼𑀣𑀼𑀚𑁆𑀚𑀦𑀸. 𑀅𑀯𑀺𑀳𑀢𑀫𑁂𑀯𑀢𑁆𑀣𑀁 𑀚𑀦𑀲𑀤𑁆𑀤𑁄 𑀯𑀤𑀢𑀺. 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀏𑀢𑁆𑀣 𑀧𑀼𑀣𑀽 𑀦𑀸𑀦𑀸𑀚𑀦𑀸 𑀲𑀢𑁆𑀣𑀼𑀧𑀝𑀺𑀜𑁆𑀜𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀢𑀺 𑀯𑀘𑀦𑀢𑁆𑀣𑁄. 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀚𑀦𑁂𑀢𑀩𑁆𑀩𑀸 𑀚𑀦𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀚𑀦𑀸, 𑀕𑀢𑀺𑀬𑁄. 𑀧𑀼𑀣𑀽 𑀚𑀦𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀇𑀢𑁄 𑀧𑀭𑁂 𑀚𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀚𑀦𑀸, 𑀅𑀪𑀺𑀲𑀗𑁆𑀔𑀸𑀭𑀸𑀤𑀬𑁄. 𑀢𑁂 𑀏𑀢𑁂𑀲𑀁 𑀯𑀺𑀚𑁆𑀚𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀅𑀪𑀺𑀲𑀗𑁆𑀔𑀭𑀡𑀸𑀤𑀺𑀅𑀢𑁆𑀣𑁄 𑀏𑀯 𑀯𑀸 𑀚𑀦𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀦𑀸𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀧𑀦𑁆𑀢𑀻𑀢𑀺 𑀭𑀸𑀕𑀕𑁆𑀕𑀺𑀆𑀤𑀬𑁄 𑀲𑀦𑁆𑀢𑀸𑀧𑀸. 𑀢𑁂 𑀏𑀯 𑀯𑀸 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀸 𑀧𑀭𑀺𑀴𑀸𑀳𑀸. 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀽𑀢𑀺 𑀏𑀢𑁆𑀣 𑀚𑀸𑀬𑀢𑀻𑀢𑀺 𑀚𑀦𑁄, 𑀭𑀸𑀕𑁄 𑀕𑁂𑀥𑁄𑀢𑀺 𑀏𑀯𑀫𑀸𑀤𑀺𑀓𑁄, 𑀧𑀼𑀣𑀼 𑀚𑀦𑁄 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀚𑀸𑀢𑀸 𑀭𑀢𑁆𑀢𑀸𑀢𑀺 𑀏𑀯𑀁 𑀭𑀸𑀕𑀸𑀤𑀺𑀅𑀢𑁆𑀣𑁄 𑀏𑀯 𑀯𑀸 𑀚𑀦𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀧𑀮𑀺𑀩𑀼𑀤𑁆𑀥𑀸𑀢𑀺 𑀲𑀫𑁆𑀩𑀤𑁆𑀥𑀸. 𑀆𑀯𑀼𑀢𑀸𑀢𑀺 𑀆𑀯𑀭𑀺𑀢𑀸. 𑀦𑀺𑀯𑀼𑀢𑀸𑀢𑀺 𑀯𑀸𑀭𑀺𑀢𑀸. 𑀑𑀯𑀼𑀢𑀸𑀢𑀺 𑀉𑀧𑀭𑀺𑀢𑁄 𑀧𑀺𑀳𑀺𑀢𑀸. 𑀧𑀺𑀳𑀺𑀢𑀸𑀢𑀺 𑀳𑁂𑀝𑁆𑀞𑀸𑀪𑀸𑀕𑁂𑀦 𑀧𑀺𑀳𑀺𑀢𑀸. 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀅𑀧𑀸𑀓𑀝𑀸. 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀅𑀥𑁄𑀫𑀼𑀔𑀕𑀢𑀸.

𑀅𑀣 𑀯𑀸 𑀧𑀼𑀣𑀽𑀦𑀁 𑀯𑀸 𑀕𑀡𑀦𑀧𑀣𑀫𑀢𑀻𑀢𑀸𑀦𑀁 𑀅𑀭𑀺𑀬𑀥𑀫𑁆𑀫𑀧𑀭𑀫𑁆𑀫𑀼𑀔𑀸𑀦𑀁 𑀦𑀻𑀘𑀥𑀫𑁆𑀫𑀲𑀫𑀸𑀘𑀸𑀭𑀸𑀦𑀁 𑀚𑀦𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸𑀧𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀯𑀸 𑀅𑀬𑀁 𑀯𑀺𑀲𑀼𑀁𑀬𑁂𑀯 𑀲𑀗𑁆𑀔𑀁 𑀕𑀢𑁄, 𑀯𑀺𑀲𑀁𑀲𑀝𑁆𑀞𑁄 𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺 𑀚𑀦𑁄𑀢𑀺𑀧𑀺 𑀧𑀼𑀣𑀼𑀚𑁆𑀚𑀦𑁄.

𑀏𑀯𑀁 𑀬𑁂 𑀢𑁂 𑁋

‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺. 𑁋

𑀤𑁆𑀯𑁂𑀯 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁨. 𑀬𑀲𑁄 𑀓𑀺𑀢𑁆𑀢𑀺 𑀘𑀸𑀢𑀺 𑀮𑀸𑀪𑀲𑀓𑁆𑀓𑀸𑀭𑁄 𑀧𑀲𑀁𑀲𑀸 𑀘. 𑀧𑀼𑀩𑁆𑀩𑁂𑀢𑀺 𑀧𑀩𑁆𑀩𑀚𑀺𑀢𑀪𑀸𑀯𑁂. 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸𑀢𑀺 𑀢𑀲𑁆𑀲 𑀯𑀺𑀩𑁆𑀪𑀦𑁆𑀢𑀓𑀲𑁆𑀲 𑀲𑀢𑁄 𑀲𑁄 𑀘 𑀬𑀲𑁄 𑀲𑀸 𑀘 𑀓𑀺𑀢𑁆𑀢𑀺 𑀳𑀸𑀬𑀢𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 𑀏𑀢𑀫𑁆𑀧𑀺 𑀧𑀼𑀩𑁆𑀩𑁂 𑀬𑀲𑀓𑀺𑀢𑁆𑀢𑀻𑀦𑀁 𑀮𑀸𑀪𑀁 𑀧𑀘𑁆𑀙𑀸 𑀘 𑀳𑀸𑀦𑀺𑀁 𑀤𑀺𑀲𑁆𑀯𑀸. 𑀲𑀺𑀓𑁆𑀔𑁂𑀣 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀲𑀺𑀓𑁆𑀔𑁂𑀣. 𑀓𑀺𑀁 𑀓𑀸𑀭𑀡𑀸? 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂, 𑀫𑁂𑀣𑀼𑀦𑀧𑁆𑀧𑀳𑀸𑀦𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀺𑀢𑁆𑀢𑀺𑀯𑀡𑁆𑀡𑀕𑀢𑁄𑀢𑀺 𑀪𑀕𑀯𑀸 𑀓𑀺𑀢𑁆𑀢𑀺𑀯𑀡𑁆𑀡𑁄, 𑀓𑀺𑀢𑁆𑀢𑀺𑀲𑀤𑁆𑀤𑀜𑁆𑀘𑁂𑀯 𑀕𑀼𑀡𑀜𑁆𑀘 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀤𑀦𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀁 𑀦𑀸𑀦𑀸𑀦𑀬𑁂𑀦 𑀓𑀣𑀦𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑀓𑀣𑀻. 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄.

𑀳𑀸𑀬𑀢𑀻𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀧𑀭𑀺𑀳𑀸𑀬𑀢𑀻𑀢𑀺 𑀲𑀫𑀦𑁆𑀢𑀢𑁄 𑀳𑀸𑀬𑀢𑀺. 𑀧𑀭𑀺𑀥𑀁𑀲𑀢𑀻𑀢𑀺 𑀅𑀥𑁄𑀧𑀣𑀯𑀺𑀁 𑀧𑀢𑀢𑀺. 𑀧𑀭𑀺𑀧𑀢𑀢𑀻𑀢𑀺 𑀲𑀫𑀦𑁆𑀢𑀢𑁄 𑀅𑀧𑀕𑀘𑁆𑀙𑀢𑀺. 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀅𑀤𑀲𑁆𑀲𑀦𑀁 𑀬𑀸𑀢𑀺. 𑀯𑀺𑀧𑁆𑀧𑀮𑀼𑀚𑁆𑀚𑀢𑀻𑀢𑀺 𑀉𑀘𑁆𑀙𑀺𑀚𑁆𑀚𑀢𑀺.

𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀤𑀺. 𑀫𑀳𑀦𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑁄𑀢𑀺 𑀧𑀸𑀭𑀸𑀚𑀺𑀓𑀲𑀁𑀗𑁆𑀖𑀸𑀤𑀺𑀲𑁂𑀲𑁄.

𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀢𑀤𑀗𑁆𑀕𑀸𑀤𑀺𑀧𑀳𑀸𑀦𑁂𑀦 𑀧𑀚𑀳𑀦𑀢𑁆𑀣𑀸𑀬. 𑀯𑀽𑀧𑀲𑀫𑀸𑀬𑀸𑀢𑀺 𑀫𑀮𑀸𑀦𑀁 𑀯𑀽𑀧𑀲𑀫𑀦𑀢𑁆𑀣𑀸𑀬. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬𑀸𑀢𑀺 𑀧𑀓𑁆𑀔𑀦𑁆𑀤𑀦𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑀢𑁆𑀣𑀸𑀬. 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀧𑀝𑀺𑀧𑀲𑁆𑀲𑀤𑁆𑀥𑀺𑀲𑀗𑁆𑀔𑀸𑀢𑀲𑁆𑀲 𑀨𑀮𑀲𑁆𑀲 𑀅𑀢𑁆𑀣𑀸𑀬.

𑁫𑁩. 𑀬𑁄 𑀳𑀺 𑀫𑁂𑀣𑀼𑀦𑀁 𑀦 𑀯𑀺𑀧𑁆𑀧𑀚𑀳𑀢𑀺 𑀲𑀗𑁆𑀓𑀧𑁆𑀧𑁂𑀳𑀺…𑀧𑁂… 𑀢𑀣𑀸𑀯𑀺𑀥𑁄. 𑀢𑀢𑁆𑀣 𑀧𑀭𑁂𑀢𑁄𑀢𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸𑀤𑀻𑀦𑀁 𑀦𑀺𑀦𑁆𑀤𑀸𑀯𑀘𑀦𑀁. 𑀫𑀗𑁆𑀓𑀼 𑀳𑁄𑀢𑀻𑀢𑀺 𑀤𑀼𑀫𑁆𑀫𑀦𑁄 𑀳𑁄𑀢𑀺.

𑀓𑀸𑀫𑀲𑀗𑁆𑀓𑀧𑁆𑀧𑁂𑀦𑀸𑀢𑀺 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀦 𑀯𑀺𑀢𑀓𑁆𑀓𑁂𑀦. 𑀉𑀧𑀭𑀺𑀝𑁆𑀞𑁂𑀧𑀺 𑀏𑀲𑁂𑀯 𑀦𑀬𑁄. 𑀨𑀼𑀝𑁆𑀞𑁄𑀢𑀺 𑀯𑀺𑀢𑀓𑁆𑀓𑁂𑀳𑀺 𑀨𑀼𑀲𑀺𑀢𑁄. 𑀧𑀭𑁂𑀢𑁄𑀢𑀺 𑀅𑀧𑀭𑀺𑀳𑀻𑀦𑁄. 𑀲𑀫𑁄𑀳𑀺𑀢𑁄𑀢𑀺 𑀲𑀫𑁆𑀫𑀸 𑀑𑀳𑀺𑀢𑁄 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄. 𑀓𑀧𑀡𑁄 𑀯𑀺𑀬𑀸𑀢𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀯𑀺𑀬. 𑀫𑀦𑁆𑀤𑁄 𑀯𑀺𑀬𑀸𑀢𑀺 𑀅𑀜𑁆𑀜𑀸𑀡𑀻 𑀯𑀺𑀬. 𑀫𑁄𑀫𑀽𑀳𑁄 𑀯𑀺𑀬𑀸𑀢𑀺 𑀲𑀫𑁆𑀫𑁄𑀳𑀪𑀽𑀢𑁄 𑀯𑀺𑀬. 𑀛𑀸𑀬𑀢𑀻𑀢𑀺 𑀘𑀺𑀦𑁆𑀢𑁂𑀢𑀺. 𑀧𑀚𑁆𑀛𑀸𑀬𑀢𑀻𑀢𑀺 𑀪𑀼𑀲𑀁 𑀘𑀺𑀦𑁆𑀢𑁂𑀢𑀺. 𑀦𑀺𑀚𑁆𑀛𑀸𑀬𑀢𑀻𑀢𑀺 𑀅𑀦𑁂𑀓𑀯𑀺𑀥𑁂𑀦 𑀘𑀺𑀦𑁆𑀢𑁂𑀢𑀺. 𑀅𑀧𑀚𑁆𑀛𑀸𑀬𑀢𑀻𑀢𑀺 𑀢𑀢𑁄 𑀅𑀧𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑁂𑀢𑀺. 𑀉𑀮𑀽𑀓𑁄𑀢𑀺 𑀉𑀮𑀽𑀓𑀲𑀓𑀼𑀡𑁄. 𑀭𑀼𑀓𑁆𑀔𑀲𑀸𑀔𑀸𑀬𑀦𑁆𑀢𑀺 𑀭𑀼𑀓𑁆𑀔𑁂 𑀉𑀝𑁆𑀞𑀺𑀢𑀲𑀸𑀔𑀸𑀬, 𑀯𑀺𑀝𑀧𑁂 𑀯𑀸. 𑀫𑀽𑀲𑀺𑀓𑀁 𑀫𑀕𑀬𑀫𑀸𑀦𑁄𑀢𑀺 𑀫𑀽𑀲𑀺𑀓𑀁 𑀕𑀯𑁂𑀲𑀫𑀸𑀦𑁄, ‘‘𑀫𑀕𑁆𑀕𑀬𑀫𑀸𑀦𑁄’’𑀢𑀺𑀧𑀺 𑀧𑀞𑀦𑁆𑀢𑀺. 𑀓𑁄𑀢𑁆𑀣𑀽𑀢𑀺 𑀲𑀺𑀗𑁆𑀕𑀸𑀮𑁄. 𑀩𑀺𑀴𑀸𑀭𑁄𑀢𑀺 𑀩𑀩𑁆𑀩𑀼. 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀺𑀭𑁂𑀢𑀺 𑀤𑁆𑀯𑀺𑀦𑁆𑀦𑀁 𑀖𑀭𑀸𑀦𑀁 𑀅𑀦𑁆𑀢𑀭𑁂 𑀘 𑀉𑀤𑀓𑀦𑀺𑀤𑁆𑀥𑀫𑀦𑀘𑀺𑀓𑁆𑀔𑀮𑁆𑀮𑀓𑀘𑀯𑀭𑀦𑀺𑀓𑁆𑀔𑀺𑀧𑀦𑀝𑁆𑀞𑀸𑀦𑁂 𑀘 𑀣𑀡𑁆𑀟𑀺𑀮𑁂 𑀘. 𑀯𑀳𑀘𑁆𑀙𑀺𑀦𑁆𑀦𑁄𑀢𑀺 𑀧𑀺𑀝𑁆𑀞𑀺𑀕𑀻𑀯𑀫𑀁𑀲𑀘𑁆𑀙𑀺𑀦𑁆𑀦𑁄. 𑀇𑀢𑁄 𑀧𑀭𑀸 𑀕𑀸𑀣𑀸 𑀧𑀸𑀓𑀝𑀲𑀫𑁆𑀩𑀦𑁆𑀥𑀸 𑀏𑀯.

𑁫𑁪. 𑀢𑀸𑀲𑀼 𑀲𑀢𑁆𑀣𑀸𑀦𑀻𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺. 𑀢𑀸𑀦𑀺 𑀳𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀙𑁂𑀤𑀦𑀝𑁆𑀞𑁂𑀦 ‘‘𑀲𑀢𑁆𑀣𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀲𑀼 𑀯𑀸𑀬𑀁 𑀯𑀺𑀲𑁂𑀲𑁂𑀦 𑀢𑀸𑀯 𑀆𑀤𑀺𑀢𑁄 𑀫𑀼𑀲𑀸𑀯𑀘𑀦𑀲𑀢𑁆𑀣𑀸𑀦𑁂𑀯 𑀓𑀭𑁄𑀢𑀺, ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀳𑀁 𑀯𑀺𑀩𑁆𑀪𑀦𑁆𑀢𑁄’’𑀢𑀺 𑀪𑀡𑀦𑁆𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄, 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀻’’𑀢𑀺. 𑀢𑀢𑁆𑀣 𑀏𑀲 𑀔𑁆𑀯𑀲𑁆𑀲𑀸𑀢𑀺 𑀏𑀲 𑀔𑁄 𑀅𑀲𑁆𑀲. 𑀫𑀳𑀸𑀕𑁂𑀥𑁄𑀢𑀺 𑀫𑀳𑀸𑀩𑀦𑁆𑀥𑀦𑀁. 𑀓𑀢𑀫𑁄𑀢𑀺 𑀘𑁂? 𑀬𑀤𑀺𑀤𑀁 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺, 𑀲𑁆𑀯𑀸𑀬𑀁 𑀫𑀼𑀲𑀸𑀯𑀸𑀤𑀚𑁆𑀛𑁄𑀕𑀸𑀳𑁄 ‘‘𑀫𑀳𑀸𑀕𑁂𑀥𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀻𑀡𑀺 𑀲𑀢𑁆𑀣𑀸𑀦𑀻𑀢𑀺 𑀢𑀬𑁄 𑀙𑁂𑀤𑀓𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀲𑀢𑁆𑀣𑀁. 𑀯𑀘𑀻𑀲𑀢𑁆𑀣𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀁 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀲𑀢𑁆𑀣’’𑀦𑁆𑀢𑀺 𑀆𑀳. 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀻𑀢𑀺 𑀚𑀸𑀦𑀦𑁆𑀢𑁄 𑀢𑀼𑀘𑁆𑀙𑀁 𑀯𑀸𑀘𑀁 𑀪𑀸𑀲𑀢𑀺. 𑀅𑀪𑀺𑀭𑀢𑁄 𑀅𑀳𑀁 𑀪𑀦𑁆𑀢𑁂 𑀅𑀳𑁄𑀲𑀺𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀸𑀬 𑀅𑀦𑀪𑀺𑀭𑀢𑀺𑀯𑀺𑀭𑀳𑀺𑀢𑁄 𑀅𑀳𑀁 𑀆𑀲𑀺𑀁. 𑀫𑀸𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸𑀢𑀺 𑀫𑀸𑀢𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸. 𑀢𑁂𑀦𑀫𑁆𑀳𑀺 𑀯𑀺𑀩𑁆𑀪𑀦𑁆𑀢𑁄𑀢𑀺 𑀪𑀡𑀢𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀧𑀝𑀺𑀓𑁆𑀓𑀦𑁆𑀢𑁄 𑀅𑀲𑁆𑀫𑀻𑀢𑀺𑀧𑀺 𑀓𑀣𑁂𑀢𑀺. 𑀧𑀺𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀲𑁄 𑀢𑀲𑁆𑀲 𑀫𑀳𑀸𑀕𑁂𑀥𑁄𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀲𑁄 𑀫𑀳𑀸𑀩𑀦𑁆𑀥𑁄. 𑀫𑀳𑀸𑀯𑀦𑀦𑁆𑀢𑀺 𑀫𑀳𑀦𑁆𑀢𑀁 𑀤𑀼𑀝𑁆𑀞𑀯𑀦𑀁. 𑀕𑀳𑀦𑀦𑁆𑀢𑀺 𑀤𑀼𑀭𑀢𑀺𑀓𑁆𑀓𑀫𑀁. 𑀓𑀦𑁆𑀢𑀸𑀭𑁄𑀢𑀺 𑀘𑁄𑀭𑀓𑀦𑁆𑀢𑀸𑀭𑀸𑀤𑀺𑀲𑀤𑀺𑀲𑁄. 𑀯𑀺𑀲𑀫𑁄𑀢𑀺 𑀓𑀡𑁆𑀝𑀓𑀯𑀺𑀲𑀫𑁄. 𑀓𑀼𑀝𑀺𑀮𑁄𑀢𑀺 𑀯𑀗𑁆𑀓𑀓𑀝𑀓𑀲𑀤𑀺𑀲𑁄. 𑀧𑀗𑁆𑀓𑁄𑀢𑀺 𑀧𑀮𑁆𑀮𑀮𑀲𑀤𑀺𑀲𑁄. 𑀧𑀮𑀺𑀧𑁄𑀢𑀺 𑀓𑀤𑁆𑀤𑀫𑀲𑀤𑀺𑀲𑁄. 𑀧𑀮𑀺𑀩𑁄𑀥𑁄𑀢𑀺 𑀫𑀳𑀸𑀤𑀼𑀓𑁆𑀔𑁄. 𑀫𑀳𑀸𑀩𑀦𑁆𑀥𑀦𑀦𑁆𑀢𑀺 𑀫𑀳𑀦𑁆𑀢𑀁 𑀤𑀼𑀫𑁄𑀘𑀬𑀩𑀦𑁆𑀥𑀦𑀁. 𑀬𑀤𑀺𑀤𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄𑀢𑀺 𑀬𑁄 𑀅𑀬𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄.

𑀲𑀪𑀕𑁆𑀕𑀢𑁄 𑀯𑀸𑀢𑀺 𑀲𑀪𑀸𑀬𑀁 𑀞𑀺𑀢𑁄 𑀯𑀸. 𑀧𑀭𑀺𑀲𑀕𑁆𑀕𑀢𑁄 𑀯𑀸𑀢𑀺 𑀕𑀸𑀫𑀧𑀭𑀺𑀲𑀸𑀬𑀁 𑀞𑀺𑀢𑁄 𑀯𑀸. 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸𑀢𑀺 𑀤𑀸𑀬𑀸𑀤𑀸𑀦𑀁 𑀫𑀚𑁆𑀛𑁂 𑀞𑀺𑀢𑁄 𑀯𑀸. 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸𑀢𑀺 𑀲𑁂𑀦𑀻𑀦𑀁 𑀫𑀚𑁆𑀛𑁂 𑀞𑀺𑀢𑁄 𑀯𑀸. 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸𑀢𑀺 𑀭𑀸𑀚𑀓𑀼𑀮𑀲𑁆𑀲 𑀫𑀚𑁆𑀛𑁂 𑀫𑀳𑀸𑀯𑀺𑀦𑀺𑀘𑁆𑀙𑀬𑁂 𑀞𑀺𑀢𑁄 𑀯𑀸. 𑀅𑀪𑀺𑀦𑀻𑀢𑁄𑀢𑀺 𑀧𑀼𑀘𑁆𑀙𑀦𑀢𑁆𑀣𑀸𑀬 𑀦𑀻𑀢𑁄. 𑀲𑀓𑁆𑀔𑀺𑀧𑀼𑀝𑁆𑀞𑁄𑀢𑀺 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑁄. 𑀏𑀳𑀫𑁆𑀪𑁄 𑀧𑀼𑀭𑀺𑀲𑀸𑀢𑀺 𑀆𑀮𑀧𑀦𑀫𑁂𑀢𑀁. 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀤𑀸𑀤𑀺𑀳𑁂𑀢𑀼 𑀯𑀸 𑀥𑀦𑀳𑁂𑀢𑀼 𑀯𑀸. 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸𑀢𑀺 𑀏𑀢𑁆𑀣 𑀆𑀫𑀺𑀲𑀦𑁆𑀢𑀺 𑀮𑀸𑀪𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀜𑁆𑀘𑀺𑀓𑁆𑀔𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓𑀁, 𑀅𑀦𑁆𑀢𑀫𑀲𑁄 𑀢𑀺𑀢𑁆𑀢𑀺𑀭𑀯𑀝𑁆𑀝𑀓𑀲𑀧𑁆𑀧𑀺𑀧𑀺𑀡𑁆𑀟𑀦𑀯𑀦𑀻𑀢𑀧𑀺𑀡𑁆𑀟𑀸𑀤𑀺𑀫𑀢𑁆𑀢𑀓𑀲𑁆𑀲𑀧𑀺 𑀮𑀸𑀪𑀲𑁆𑀲 𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀻𑀢𑀺 𑀚𑀸𑀦𑀦𑁆𑀢𑁄𑀬𑁂𑀯 𑀫𑀼𑀲𑀸𑀯𑀸𑀤𑀁 𑀓𑀭𑁄𑀢𑀺.

𑀧𑀼𑀦 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺 𑀘 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺, 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀅𑀗𑁆𑀕𑀪𑀽𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺. 𑀪𑀡𑀦𑁆𑀢𑀲𑁆𑀲 𑀳𑁄𑀢𑀻𑀢𑀺 𑀪𑀡𑀫𑀸𑀦𑀲𑁆𑀲 𑀳𑁄𑀢𑀺. 𑀪𑀡𑀺𑀢𑀲𑁆𑀲 𑀳𑁄𑀢𑀻𑀢𑀺 𑀪𑀡𑀺𑀢𑁂 𑀅𑀲𑁆𑀲 𑀳𑁄𑀢𑀺. 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀡𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀯𑀢𑁄 𑀦𑀺𑀝𑁆𑀞𑀺𑀢𑀯𑀘𑀦𑀲𑁆𑀲 𑀳𑁄𑀢𑀻𑀢𑀺. 𑀬𑁄 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂𑀧𑀺 𑀚𑀸𑀦𑀸𑀢𑀺, 𑀪𑀡𑀦𑁆𑀢𑁄𑀧𑀺 𑀚𑀸𑀦𑀸𑀢𑀺, 𑀧𑀘𑁆𑀙𑀸𑀧𑀺 𑀚𑀸𑀦𑀸𑀢𑀺 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀲𑁄 𑀏𑀯𑀁 𑀯𑀤𑀦𑁆𑀢𑁄 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀓𑀺𑀜𑁆𑀘𑀸𑀧𑀺 𑀤𑀲𑁆𑀲𑀺𑀢𑁄, 𑀅𑀣 𑀔𑁄 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀧𑀼𑀘𑁆𑀙𑀸 𑀢𑀸𑀯 𑀳𑁄𑀢𑀺, ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑁄 𑀅𑀢𑁆𑀣𑀺, ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀧𑀘𑁆𑀙𑀸𑀪𑀸𑀕𑁄 𑀦𑀢𑁆𑀣𑀺. 𑀯𑀼𑀢𑁆𑀢𑀫𑀢𑁆𑀢𑀫𑁂𑀯 𑀳𑀺 𑀓𑁄𑀘𑀺 𑀧𑀫𑀼𑀲𑁆𑀲𑀢𑀺 𑀓𑀺𑀁 𑀢𑀲𑁆𑀲 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀲𑀸 𑀏𑀯𑀁 𑀅𑀝𑁆𑀞𑀓𑀣𑀸𑀲𑀼 𑀯𑀺𑀲𑁆𑀲𑀚𑁆𑀚𑀺𑀢𑀸 𑁋 𑀧𑀼𑀩𑁆𑀩𑀪𑀸𑀕𑁂 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀘, 𑀪𑀡𑀦𑁆𑀢𑀲𑁆𑀲 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀘 𑀚𑀸𑀦𑀢𑁄 𑀧𑀘𑁆𑀙𑀸𑀪𑀸𑀕𑁂 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀦 𑀲𑀓𑁆𑀓𑀸 𑀦 𑀪𑀯𑀺𑀢𑀼𑀁, 𑀲𑀘𑁂𑀧𑀺 𑀦 𑀳𑁄𑀢𑀺, 𑀫𑀼𑀲𑀸𑀯𑀸𑀤𑁄𑀬𑁂𑀯. 𑀧𑀼𑀭𑀺𑀫𑀫𑁂𑀯 𑀳𑀺 𑀅𑀗𑁆𑀕𑀤𑁆𑀯𑀬𑀁 𑀧𑀫𑀸𑀡𑀁. 𑀬𑀲𑁆𑀲𑀸𑀧𑀺 𑀧𑀼𑀩𑁆𑀩𑀪𑀸𑀕𑁂 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀺, 𑀪𑀡𑀦𑁆𑀢𑁄 𑀧𑀦 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀚𑀸𑀦𑀸𑀢𑀺. 𑀪𑀡𑀺𑀢𑁂𑀧𑀺 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀚𑀸𑀦𑀸𑀢𑀺. 𑀲𑁄 𑀫𑀼𑀲𑀸𑀯𑀸𑀤𑁂𑀦 𑀦 𑀓𑀸𑀭𑁂𑀢𑀩𑁆𑀩𑁄. 𑀧𑀼𑀩𑁆𑀩𑀪𑀸𑀕𑁄 𑀳𑀺 𑀧𑀫𑀸𑀡𑀢𑀭𑁄. 𑀢𑀲𑁆𑀫𑀺𑀁 𑀅𑀲𑀢𑀺 𑀤𑀯𑀸 𑀪𑀡𑀺𑀢𑀁 𑀯𑀸, 𑀭𑀯𑀸 𑀪𑀡𑀺𑀢𑀁 𑀯𑀸 𑀳𑁄𑀢𑀻𑀢𑀺.

𑀏𑀢𑁆𑀣 𑀘 𑀢𑀁𑀜𑀸𑀡𑀢𑀸 𑀘 𑀜𑀸𑀡𑀲𑀫𑁄𑀥𑀸𑀦𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁. 𑀢𑀁𑀜𑀸𑀡𑀢𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀚𑀸𑀦𑀸𑀢𑀺, 𑀢𑁂𑀦𑁂𑀯 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀘, ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀘 𑀚𑀸𑀦𑀸𑀢𑀻𑀢𑀺 𑀏𑀯𑀁 𑀏𑀓𑀘𑀺𑀢𑁆𑀢𑁂𑀦𑁂𑀯 𑀢𑀻𑀲𑀼 𑀔𑀡𑁂𑀲𑀼 𑀚𑀸𑀦𑀸𑀢𑀻𑀢𑀺 𑀅𑀬𑀁 𑀢𑀁𑀜𑀸𑀡𑀢𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸. 𑀦 𑀳𑀺 𑀲𑀓𑁆𑀓𑀸 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀢𑀁 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀁, 𑀬𑀣𑀸 𑀦 𑀲𑀓𑁆𑀓𑀸 𑀢𑁂𑀦𑁂𑀯 𑀅𑀲𑀺𑀦𑀸 𑀲𑁄 𑀅𑀲𑀺 𑀙𑀺𑀦𑁆𑀤𑀺𑀢𑀼𑀦𑁆𑀢𑀺. 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀦 𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀣𑀸 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀫𑀸𑀡𑀁 𑀧𑀼𑀩𑁆𑀩𑀪𑀸𑀕𑁄𑀯, 𑀢𑀲𑁆𑀫𑀺𑀁 𑀲𑀢𑀺 𑀦 𑀳𑁂𑀲𑁆𑀲𑀢𑀺;

𑀲𑁂𑀲𑀤𑁆𑀯𑀬𑀦𑁆𑀢𑀺 𑀦𑀢𑁆𑀣𑁂𑀢, 𑀫𑀺𑀢𑀺 𑀯𑀸𑀘𑀸 𑀢𑀺𑀯𑀗𑁆𑀕𑀺𑀓𑀸’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁨.𑁨𑁦𑁦);

𑀜𑀸𑀡𑀲𑀫𑁄𑀥𑀸𑀦𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀦𑁆𑀢𑀺 𑀏𑀢𑀸𑀦𑀺 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀇𑀤𑀜𑁆𑀳𑀺 𑀘𑀺𑀢𑁆𑀢𑀁 𑀦𑀸𑀫 𑁋

‘‘𑀅𑀦𑀺𑀭𑀼𑀤𑁆𑀥𑀫𑁆𑀳𑀺 𑀧𑀞𑀫𑁂, 𑀦 𑀉𑀧𑁆𑀧𑀚𑁆𑀚𑀢𑀺 𑀧𑀘𑁆𑀙𑀺𑀫𑀁;

𑀦𑀺𑀭𑀦𑁆𑀢𑀭𑀼𑀧𑁆𑀧𑀚𑁆𑀚𑀦𑀢𑁄, 𑀏𑀓𑀁 𑀯𑀺𑀬 𑀧𑀓𑀸𑀲𑀢𑀻’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁨.𑁨𑁦𑁦);

𑀇𑀢𑁄 𑀧𑀭𑀁 𑀧𑀦 𑀬𑁆𑀯𑀸𑀬𑀁 𑀅𑀚𑀸𑀦𑀁𑀬𑁂𑀯 ‘‘𑀚𑀸𑀦𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀢𑀺, 𑀬𑀲𑁆𑀫𑀸 𑀲𑁄 ‘‘𑀇𑀤𑀁 𑀅𑀪𑀽𑀢’’𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀳𑀺 𑀅𑀢𑁆𑀣𑁂𑀯 𑀅𑀬𑀁 𑀮𑀤𑁆𑀥𑀺. 𑀢𑀣𑀸 ‘‘𑀇𑀤𑀁 𑀅𑀪𑀽𑀢’’𑀦𑁆𑀢𑀺 𑀏𑀯𑀫𑀲𑁆𑀲 𑀔𑀫𑀢𑀺 𑀘𑁂𑀯 𑀭𑀼𑀘𑁆𑀘𑀢𑀺 𑀘. 𑀏𑀯𑀫𑀲𑁆𑀲 𑀲𑀜𑁆𑀜𑀸, 𑀏𑀯𑀁𑀲𑀪𑀸𑀯𑀫𑁂𑀯 𑀘𑀲𑁆𑀲 𑀘𑀺𑀢𑁆𑀢𑀁 ‘‘𑀇𑀤𑀁 𑀅𑀪𑀽𑀢’’𑀦𑁆𑀢𑀺. 𑀬𑀤𑀸 𑀧𑀦 𑀫𑀼𑀲𑀸 𑀯𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀢𑀁 𑀤𑀺𑀝𑁆𑀞𑀺𑀁 𑀯𑀸 𑀤𑀺𑀝𑁆𑀞𑀺𑀬𑀸 𑀲𑀳 𑀔𑀦𑁆𑀢𑀺𑀁 𑀯𑀸 𑀤𑀺𑀝𑁆𑀞𑀺𑀔𑀦𑁆𑀢𑀻𑀳𑀺 𑀲𑀤𑁆𑀥𑀺𑀁 𑀭𑀼𑀘𑀺𑀁 𑀯𑀸 𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀻𑀳𑀺 𑀲𑀤𑁆𑀥𑀺𑀁 𑀲𑀜𑁆𑀜𑀁 𑀯𑀸 𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀺𑀲𑀜𑁆𑀜𑀸𑀳𑀺 𑀲𑀤𑁆𑀥𑀺𑀁 𑀪𑀸𑀯𑀁 𑀯𑀸 𑀯𑀺𑀦𑀺𑀥𑀸𑀬 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀪𑀽𑀢𑀁 𑀓𑀢𑁆𑀯𑀸 𑀪𑀡𑀢𑀺. 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺𑀯𑀲𑁂𑀦 𑀅𑀗𑁆𑀕𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘 𑀘𑀢𑀽𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀦𑁆𑀢𑀺 𑀩𑀮𑀯𑀥𑀫𑁆𑀫𑀯𑀺𑀦𑀺𑀥𑀸𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀦𑁆𑀢𑀺𑀆𑀤𑀻𑀦𑀺 𑀢𑀢𑁄 𑀤𑀼𑀩𑁆𑀩𑀮𑀤𑀼𑀩𑁆𑀩𑀮𑀸𑀦𑀁 𑀯𑀺𑀦𑀺𑀥𑀸𑀦𑀯𑀲𑁂𑀦. 𑀯𑀺𑀦𑀺𑀥𑀸𑀬 𑀲𑀜𑁆𑀜𑀦𑁆𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀲𑀩𑁆𑀩𑀤𑀼𑀩𑁆𑀩𑀮𑀥𑀫𑁆𑀫𑀯𑀺𑀦𑀺𑀥𑀸𑀦𑀯𑀲𑁂𑀦. 𑀲𑀜𑁆𑀜𑀸𑀫𑀢𑁆𑀢𑀫𑁆𑀧𑀺 𑀦𑀸𑀫 𑀅𑀯𑀺𑀦𑀺𑀥𑀸𑀬 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁫𑁫. 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀻𑀢𑀺 𑀧𑀸𑀡𑀯𑀥𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀢𑀢𑁄𑀦𑀺𑀤𑀸𑀦𑀜𑁆𑀘 𑀤𑀼𑀓𑁆𑀔𑀫𑀦𑀼𑀪𑁄𑀦𑁆𑀢𑁄 𑀪𑁄𑀕𑀧𑀭𑀺𑀬𑁂𑀲𑀦𑀸𑀭𑀓𑁆𑀔𑀡𑀸𑀦𑀺 𑀘 𑀓𑀭𑁄𑀦𑁆𑀢𑁄 𑀫𑁄𑀫𑀽𑀳𑁄 𑀯𑀺𑀬 𑀧𑀭𑀺𑀓𑀺𑀮𑀺𑀲𑁆𑀲𑀢𑀺.

𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑀻𑀢𑀺 𑀦 𑀭𑀸𑀚𑀸𑀦𑁄 𑀓𑀭𑁄𑀦𑁆𑀢𑀺, 𑀭𑀸𑀚𑀸𑀥𑀻𑀦𑀧𑀼𑀭𑀺𑀲𑀸 𑀦𑀸𑀦𑀸𑀯𑀺𑀥𑀸𑀦𑀺 𑀓𑀫𑁆𑀫𑀓𑀸𑀭𑀡𑀸𑀦𑀺 𑀓𑀭𑁄𑀦𑁆𑀢𑀺. 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑀻𑀢𑀺 𑀓𑀲𑀸𑀤𑀡𑁆𑀟𑀓𑁂𑀳𑀺𑀧𑀺 𑀯𑀺𑀢𑀚𑁆𑀚𑁂𑀦𑁆𑀢𑀺. 𑀯𑁂𑀢𑁆𑀢𑁂𑀳𑀻𑀢𑀺 𑀯𑁂𑀢𑁆𑀢𑀮𑀢𑀸𑀳𑀺. 𑀅𑀤𑁆𑀥𑀤𑀡𑁆𑀟𑀓𑁂𑀳𑀻𑀢𑀺 𑀫𑀼𑀕𑁆𑀕𑀭𑁂𑀳𑀺, 𑀧𑀳𑀸𑀭𑀲𑀸𑀥𑀦𑀢𑁆𑀣𑀁 𑀯𑀸 𑀘𑀢𑀼𑀳𑀢𑁆𑀣𑀤𑀡𑁆𑀟𑀁 𑀤𑁆𑀯𑁂𑀥𑀸 𑀙𑁂𑀢𑁆𑀯𑀸 𑀕𑀳𑀺𑀢𑀤𑀡𑁆𑀟𑀓𑁂𑀳𑀺. 𑀩𑀺𑀮𑀗𑁆𑀕𑀣𑀸𑀮𑀺𑀓𑀦𑁆𑀢𑀺 𑀓𑀜𑁆𑀚𑀺𑀬𑀉𑀓𑁆𑀔𑀮𑀺𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀲𑀻𑀲𑀓𑀧𑀸𑀮𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀲𑀡𑁆𑀟𑀸𑀲𑁂𑀦 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀦𑁆𑀢𑀺, 𑀢𑁂𑀦 𑀫𑀢𑁆𑀣𑀮𑀼𑀗𑁆𑀕𑀁 𑀧𑀓𑁆𑀓𑀼𑀝𑁆𑀞𑀺𑀢𑁆𑀯𑀸 𑀉𑀧𑀭𑀺 𑀉𑀢𑁆𑀢𑀭𑀢𑀺. 𑀲𑀗𑁆𑀔𑀫𑀼𑀡𑁆𑀟𑀺𑀓𑀦𑁆𑀢𑀺 𑀲𑀗𑁆𑀔𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀉𑀢𑁆𑀢𑀭𑁄𑀝𑁆𑀞𑀉𑀪𑀢𑁄𑀓𑀡𑁆𑀡𑀘𑀽𑀴𑀺𑀓𑀕𑀮𑀯𑀸𑀝𑀓𑀧𑀭𑀺𑀘𑁆𑀙𑁂𑀤𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀓𑁂𑀲𑁂 𑀏𑀓𑀢𑁄 𑀕𑀡𑁆𑀞𑀺𑀁 𑀓𑀢𑁆𑀯𑀸 𑀤𑀡𑁆𑀟𑀓𑁂𑀦 𑀯𑁂𑀞𑁂𑀢𑁆𑀯𑀸 𑀉𑀧𑁆𑀧𑀸𑀝𑁂𑀦𑁆𑀢𑀺, 𑀲𑀳 𑀓𑁂𑀲𑁂𑀳𑀺 𑀘𑀫𑁆𑀫𑀁 𑀉𑀝𑁆𑀞𑀳𑀢𑀺. 𑀢𑀢𑁄 𑀲𑀻𑀲𑀓𑀝𑀸𑀳𑀁 𑀣𑀽𑀮𑀲𑀓𑁆𑀔𑀭𑀸𑀳𑀺 𑀖𑀁𑀲𑀺𑀢𑁆𑀯𑀸 𑀥𑁄𑀯𑀦𑁆𑀢𑀸 𑀲𑀗𑁆𑀔𑀯𑀡𑁆𑀡𑀁 𑀓𑀭𑁄𑀦𑁆𑀢𑀺. 𑀭𑀸𑀳𑀼𑀫𑀼𑀔𑀦𑁆𑀢𑀺 𑀭𑀸𑀳𑀼𑀫𑀼𑀔𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑁂 𑀤𑀻𑀧𑀁 𑀚𑀸𑀮𑁂𑀦𑁆𑀢𑀺, 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀯𑀸 𑀧𑀝𑁆𑀞𑀸𑀬 𑀫𑀼𑀔𑀁 𑀦𑀺𑀔𑀸𑀤𑀦𑁂𑀦 𑀔𑀦𑀦𑁆𑀢𑀺, 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺𑀢𑁆𑀯𑀸 𑀫𑀼𑀔𑀁 𑀧𑀽𑀭𑁂𑀢𑀺.

𑀚𑁄𑀢𑀺𑀫𑀸𑀮𑀺𑀓𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀢𑁂𑀮𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀆𑀮𑀺𑀫𑁆𑀧𑁂𑀦𑁆𑀢𑀺. 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀦𑁆𑀢𑀺 𑀳𑀢𑁆𑀣𑁂 𑀢𑁂𑀮𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀤𑀻𑀧𑀁 𑀯𑀺𑀬 𑀧𑀚𑁆𑀚𑀸𑀮𑁂𑀦𑁆𑀢𑀺. 𑀏𑀭𑀓𑀯𑀢𑁆𑀢𑀺𑀓𑀦𑁆𑀢𑀺 𑀏𑀭𑀓𑀯𑀢𑁆𑀢𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀳𑁂𑀝𑁆𑀞𑀸𑀕𑀻𑀯𑀢𑁄 𑀧𑀝𑁆𑀞𑀸𑀬 𑀘𑀫𑁆𑀫𑀯𑀝𑁆𑀝𑁂 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂 𑀧𑀸𑀢𑁂𑀦𑁆𑀢𑀺. 𑀅𑀣 𑀦𑀁 𑀬𑁄𑀢𑁆𑀢𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀓𑀟𑁆𑀠𑀦𑁆𑀢𑀺. 𑀲𑁄 𑀅𑀢𑁆𑀢𑀦𑁄 𑀘𑀫𑁆𑀫𑀯𑀝𑁆𑀝𑁂 𑀅𑀓𑁆𑀓𑀫𑀺𑀢𑁆𑀯𑀸 𑀅𑀓𑁆𑀓𑀫𑀺𑀢𑁆𑀯𑀸 𑀧𑀢𑀢𑀺. 𑀘𑀺𑀭𑀓𑀯𑀸𑀲𑀺𑀓𑀦𑁆𑀢𑀺 𑀘𑀺𑀭𑀓𑀯𑀸𑀲𑀺𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀢𑀣𑁂𑀯 𑀘𑀫𑁆𑀫𑀯𑀝𑁆𑀝𑁂 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀁 𑀞𑀧𑁂𑀦𑁆𑀢𑀺, 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀞𑀧𑁂𑀦𑁆𑀢𑀺, 𑀉𑀧𑀭𑀺𑀫𑁂𑀳𑀺 𑀳𑁂𑀝𑁆𑀞𑀺𑀫𑀲𑀭𑀻𑀭𑀁 𑀘𑀺𑀭𑀓𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀁 𑀯𑀺𑀬 𑀳𑁄𑀢𑀺. 𑀏𑀡𑁂𑀬𑁆𑀬𑀓𑀦𑁆𑀢𑀺 𑀏𑀡𑁂𑀬𑁆𑀬𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀉𑀪𑁄𑀲𑀼 𑀓𑀧𑁆𑀧𑀭𑁂𑀲𑀼 𑀘 𑀉𑀪𑁄𑀲𑀼 𑀚𑀡𑁆𑀡𑀼𑀓𑁂𑀲𑀼 𑀘 𑀅𑀬𑀯𑀮𑀬𑀸𑀦𑀺 𑀤𑀢𑁆𑀯𑀸 𑀅𑀬𑀲𑀽𑀮𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀺, 𑀲𑁄 𑀘𑀢𑀽𑀳𑀺 𑀅𑀬𑀲𑀽𑀮𑁂𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀢𑀺. 𑀅𑀣 𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑀺. ‘‘𑀏𑀡𑁂𑀬𑁆𑀬𑀓𑁄 𑀚𑁄𑀢𑀺𑀧𑀭𑀺𑀕𑁆𑀕𑀳𑁄 𑀬𑀣𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀧𑀺 𑀇𑀤𑀫𑁂𑀯 𑀯𑀼𑀢𑁆𑀢𑀁. 𑀢𑀁 𑀲𑀦𑁆𑀥𑀺𑀢𑁄 𑀲𑀦𑁆𑀥𑀺𑀢𑁄 𑀲𑀽𑀮𑀸𑀦𑀺 𑀅𑀧𑀦𑁂𑀢𑁆𑀯𑀸 𑀘𑀢𑀽𑀳𑀺 𑀅𑀝𑁆𑀞𑀺𑀓𑁄𑀝𑀻𑀳𑀺𑀬𑁂𑀯 𑀞𑀧𑁂𑀦𑁆𑀢𑀺. 𑀏𑀯𑀭𑀽𑀧𑀸 𑀓𑀫𑁆𑀫𑀓𑀸𑀭𑀡𑀸 𑀦𑀸𑀫 𑀦𑀢𑁆𑀣𑀺.

𑀩𑀴𑀺𑀲𑀫𑀁𑀲𑀺𑀓𑀦𑁆𑀢𑀺 𑀉𑀪𑀢𑁄𑀫𑀼𑀔𑁂𑀳𑀺 𑀩𑀴𑀺𑀲𑁂𑀳𑀺 𑀧𑀳𑀭𑀺𑀢𑁆𑀯𑀸 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀉𑀧𑁆𑀧𑀸𑀝𑁂𑀦𑁆𑀢𑀺. 𑀓𑀳𑀸𑀧𑀡𑀺𑀓𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀢𑀺𑀡𑁆𑀳𑀸𑀳𑀺 𑀯𑀸𑀲𑀻𑀳𑀺 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀓𑀳𑀸𑀧𑀡𑀫𑀢𑁆𑀢𑀁 𑀓𑀳𑀸𑀧𑀡𑀫𑀢𑁆𑀢𑀁 𑀧𑀸𑀢𑁂𑀦𑁆𑀢𑀸 𑀓𑁄𑀝𑁆𑀝𑁂𑀦𑁆𑀢𑀺. 𑀔𑀸𑀭𑀸𑀧𑀢𑀘𑁆𑀙𑀺𑀓𑀦𑁆𑀢𑀺 𑀲𑀭𑀻𑀭𑀁 𑀢𑀢𑁆𑀣 𑀢𑀢𑁆𑀣 𑀆𑀯𑀼𑀥𑁂𑀳𑀺 𑀧𑀳𑀭𑀺𑀢𑁆𑀯𑀸 𑀓𑁄𑀘𑁆𑀙𑁂𑀳𑀺 𑀔𑀸𑀭𑀁 𑀖𑀁𑀲𑁂𑀦𑁆𑀢𑀺, 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀧𑀕𑁆𑀖𑀭𑀺𑀢𑁆𑀯𑀸 𑀧𑀲𑀯𑀦𑁆𑀢𑀺, 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸𑀯 𑀢𑀺𑀝𑁆𑀞𑀢𑀺. 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀦𑁆𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀓𑀡𑁆𑀡𑀘𑁆𑀙𑀺𑀤𑁆𑀤𑁂𑀦 𑀅𑀬𑀲𑀽𑀮𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀣𑀯𑀺𑀬𑀸 𑀏𑀓𑀸𑀩𑀤𑁆𑀥𑀁 𑀓𑀭𑁄𑀦𑁆𑀢𑀺. 𑀅𑀣 𑀦𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀆𑀯𑀺𑀜𑁆𑀙𑀦𑁆𑀢𑀺. 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀙𑁂𑀓𑀸 𑀓𑀸𑀭𑀡𑀺𑀓𑀸 𑀙𑀯𑀺𑀘𑀫𑁆𑀫𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀲𑀤𑀧𑁄𑀢𑀓𑀸𑀳𑀺 𑀅𑀝𑁆𑀞𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑁆𑀢𑀺, 𑀫𑀁𑀲𑀭𑀸𑀲𑀺𑀬𑁂𑀯 𑀳𑁄𑀢𑀺. 𑀅𑀣 𑀦𑀁 𑀓𑁂𑀲𑁂𑀳𑁂𑀯 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀧𑀮𑀸𑀮𑀧𑀻𑀞𑀁 𑀯𑀺𑀬 𑀓𑀢𑁆𑀯𑀸 𑀧𑀮𑀺𑀯𑁂𑀞𑁂𑀦𑁆𑀢𑀺. 𑀲𑀼𑀦𑀔𑁂𑀳𑀺𑀧𑀻𑀢𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺 𑀆𑀳𑀸𑀭𑀁 𑀅𑀤𑀢𑁆𑀯𑀸 𑀙𑀸𑀢𑀲𑀼𑀦𑀔𑁂𑀳𑀺 𑀔𑀸𑀤𑀸𑀧𑁂𑀦𑁆𑀢𑀺. 𑀢𑁂 𑀫𑀼𑀳𑀼𑀢𑁆𑀢𑁂𑀦 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀫𑁂𑀯 𑀓𑀭𑁄𑀦𑁆𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀻𑀢𑀺 𑀏𑀯𑀫𑁆𑀧𑀺 𑀯𑀺𑀖𑀸𑀢𑀁 𑀧𑀸𑀧𑀼𑀡𑀸𑀢𑀺. 𑀧𑀭𑀺𑀓𑀺𑀲𑁆𑀲𑀢𑀻𑀢𑀺 𑀲𑀩𑁆𑀩𑀪𑀸𑀕𑁂𑀦 𑀯𑀺𑀖𑀸𑀢𑀁 𑀧𑀸𑀧𑀼𑀡𑀸𑀢𑀺. 𑀧𑀭𑀺𑀓𑀺𑀮𑀺𑀲𑁆𑀲𑀢𑀻𑀢𑀺 𑀉𑀧𑀢𑀸𑀧𑀁 𑀧𑀸𑀧𑀼𑀡𑀸𑀢𑀺.

𑀧𑀼𑀦 𑀅𑀜𑁆𑀜𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸 𑀓𑀸𑀫𑀢𑀡𑁆𑀳𑀸𑀬 𑀅𑀪𑀺𑀪𑀽𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀫𑀢𑀡𑁆𑀳𑀸𑀬𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀮𑁄𑀪𑁂𑀦. 𑀅𑀪𑀺𑀪𑀽𑀢𑁄𑀢𑀺 𑀢𑁂𑀦 𑀫𑀤𑁆𑀤𑀺𑀢𑁄. 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄𑀢𑀺 𑀓𑀼𑀲𑀮𑀸𑀘𑀸𑀭𑀁 𑀔𑁂𑀧𑁂𑀢𑁆𑀯𑀸 𑀕𑀳𑀺𑀢𑀘𑀺𑀢𑁆𑀢𑁄. 𑀪𑁄𑀕𑁂 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀥𑀦𑀁 𑀕𑀯𑁂𑀲𑀫𑀸𑀦𑁄. 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀢𑀭𑀡𑀻𑀲𑀗𑁆𑀔𑀸𑀢𑀸𑀬 𑀦𑀸𑀯𑀸𑀬 𑀫𑀳𑀦𑁆𑀢𑀁 𑀮𑁄𑀡𑀲𑀸𑀕𑀭𑀁 𑀧𑀯𑀺𑀲𑀢𑀺. 𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄𑀢𑀺 𑀲𑀻𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸. 𑀉𑀡𑁆𑀳𑀲𑁆𑀲 𑀧𑀼𑀭𑀓𑁆𑀔𑀢𑁄𑀢𑀺 𑀉𑀡𑁆𑀳𑀁 𑀧𑀼𑀭𑀢𑁄 𑀓𑀢𑁆𑀯𑀸. 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀫𑀓𑀲𑀸𑀢𑀺 𑀫𑀓𑀲𑀸 𑀏𑀯. 𑀧𑀻𑀴𑀺𑀬𑀫𑀸𑀦𑁄𑀢𑀺 𑀟𑀁𑀲𑀸𑀤𑀺𑀲𑀫𑁆𑀨𑀲𑁆𑀲𑁂𑀳𑀺 𑀯𑀺𑀳𑁂𑀲𑀺𑀬𑀫𑀸𑀦𑁄. 𑀔𑀼𑀧𑁆𑀧𑀺𑀧𑀸𑀲𑀸𑀬 𑀫𑀺𑀬𑁆𑀬𑀫𑀸𑀦𑁄𑀢𑀺 𑀔𑀼𑀤𑁆𑀤𑀸𑀧𑀺𑀧𑀸𑀲𑀸𑀬 𑀫𑀭𑀫𑀸𑀦𑁄. 𑀢𑀺𑀕𑀼𑀫𑁆𑀩𑀁 𑀕𑀘𑁆𑀙𑀢𑀻𑀢𑀺𑀆𑀤𑀻𑀦𑀺 𑀫𑀽𑀮𑀧𑀤𑀁 𑀕𑀘𑁆𑀙𑀢𑀻𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀺 𑀘𑀢𑀼𑀯𑀻𑀲𑀢𑀺 𑀧𑀤𑀸𑀦𑀺 𑀭𑀝𑁆𑀞𑀦𑀸𑀫𑁂𑀦 𑀯𑀼𑀢𑁆𑀢𑀸𑀦𑀺. 𑀫𑀭𑀼𑀓𑀦𑁆𑀢𑀸𑀭𑀁 𑀕𑀘𑁆𑀙𑀢𑀻𑀢𑀺 𑀯𑀸𑀮𑀼𑀓𑀓𑀦𑁆𑀢𑀸𑀭𑀁 𑀢𑀸𑀭𑀓𑀲𑀜𑁆𑀜𑀸𑀬 𑀕𑀘𑁆𑀙𑀢𑀺. 𑀚𑀡𑁆𑀡𑀼𑀧𑀣𑀦𑁆𑀢𑀺 𑀚𑀸𑀡𑀽𑀳𑀺 𑀕𑀦𑁆𑀢𑀩𑁆𑀩𑀫𑀕𑁆𑀕𑀁. 𑀅𑀚𑀧𑀣𑀦𑁆𑀢𑀺 𑀅𑀚𑁂𑀳𑀺 𑀕𑀦𑁆𑀢𑀩𑁆𑀩𑀫𑀕𑁆𑀕𑀁. 𑀫𑁂𑀡𑁆𑀟𑀧𑀣𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀗𑁆𑀓𑀼𑀧𑀣𑀦𑁆𑀢𑀺 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀢𑁂𑀳𑀺 𑀉𑀕𑁆𑀕𑀫𑀺𑀢𑀩𑁆𑀩𑀁 𑀔𑀸𑀡𑀼𑀫𑀕𑁆𑀕𑀁, 𑀢𑀁 𑀕𑀘𑁆𑀙𑀦𑁆𑀢𑁄 𑀧𑀩𑁆𑀩𑀢𑀧𑀸𑀤𑁂 𑀞𑀢𑁆𑀯𑀸 𑀅𑀬𑀲𑀺𑀗𑁆𑀖𑀸𑀝𑀓𑀁 𑀬𑁄𑀢𑁆𑀢𑁂𑀦 𑀩𑀦𑁆𑀥𑀺𑀢𑁆𑀯𑀸 𑀉𑀤𑁆𑀥𑀁 𑀔𑀺𑀧𑀺𑀢𑁆𑀯𑀸 𑀧𑀩𑁆𑀩𑀢𑁂 𑀮𑀕𑁆𑀕𑀸𑀧𑁂𑀢𑁆𑀯𑀸 𑀬𑁄𑀢𑁆𑀢𑁂𑀦𑀸𑀭𑀼𑀬𑁆𑀳 𑀯𑀚𑀺𑀭𑀕𑁆𑀕𑁂𑀦 𑀮𑁄𑀳𑀤𑀡𑁆𑀟𑁂𑀦 𑀧𑀩𑁆𑀩𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀔𑀸𑀡𑀼𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀞𑀢𑁆𑀯𑀸 𑀲𑀺𑀗𑁆𑀖𑀸𑀝𑀓𑀁 𑀆𑀓𑀟𑁆𑀠𑀺𑀢𑁆𑀯𑀸 𑀧𑀼𑀦 𑀉𑀧𑀭𑀺 𑀮𑀕𑁆𑀕𑀸𑀧𑁂𑀢𑁆𑀯𑀸 𑀢𑀢𑁆𑀣 𑀞𑀺𑀢𑁄 𑀘𑀫𑁆𑀫𑀬𑁄𑀢𑁆𑀢𑀁 𑀑𑀮𑀫𑁆𑀩𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀑𑀢𑀭𑀺𑀢𑁆𑀯𑀸 𑀳𑁂𑀝𑁆𑀞𑀺𑀫𑀔𑀸𑀡𑀼𑀓𑁂 𑀩𑀦𑁆𑀥𑀺𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦 𑀬𑁄𑀢𑁆𑀢𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀫𑀼𑀕𑁆𑀕𑀭𑀁 𑀆𑀤𑀸𑀬 𑀬𑁄𑀢𑁆𑀢𑀁 𑀧𑀳𑀭𑀺𑀢𑁆𑀯𑀸 𑀔𑀸𑀡𑀼𑀓𑀁 𑀦𑀻𑀳𑀭𑀺𑀢𑁆𑀯𑀸 𑀧𑀼𑀦 𑀅𑀪𑀺𑀭𑀼𑀳𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀧𑀩𑁆𑀩𑀢𑀫𑀢𑁆𑀣𑀓𑀁 𑀅𑀪𑀺𑀭𑀼𑀬𑁆𑀳 𑀧𑀭𑀢𑁄 𑀑𑀢𑀭𑀦𑁆𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀞𑀫𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀔𑀸𑀡𑀼𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀘𑀫𑁆𑀫𑀧𑀲𑀺𑀩𑁆𑀩𑀓𑁂 𑀬𑁄𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀔𑀸𑀡𑀼𑀓𑁂 𑀯𑁂𑀞𑁂𑀢𑁆𑀯𑀸 𑀲𑀬𑀁 𑀅𑀦𑁆𑀢𑁄𑀧𑀲𑀺𑀩𑁆𑀩𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀓𑁆𑀓𑀝𑀓𑀸𑀦𑀁 𑀲𑀼𑀢𑁆𑀢𑀯𑀺𑀲𑁆𑀲𑀚𑁆𑀚𑀦𑀸𑀓𑀸𑀭𑁂𑀦 𑀬𑁄𑀢𑁆𑀢𑀁 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀑𑀢𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀢𑁂𑀳𑀺 𑀉𑀕𑁆𑀕𑀫𑀺𑀢𑀩𑁆𑀩𑀁 𑀔𑀸𑀡𑀼𑀫𑀕𑁆𑀕’’𑀦𑁆𑀢𑀺. 𑀙𑀢𑁆𑀢𑀧𑀣𑀦𑁆𑀢𑀺 𑀘𑀫𑁆𑀫𑀙𑀢𑁆𑀢𑁂𑀦 𑀯𑀸𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀓𑀼𑀡𑁂𑀳𑀺 𑀯𑀺𑀬 𑀑𑀢𑀭𑀺𑀢𑀩𑁆𑀩𑀁 𑀫𑀕𑁆𑀕𑀁. 𑀯𑀁𑀲𑀧𑀣𑀦𑁆𑀢𑀺 𑀯𑁂𑀡𑀼𑀕𑀼𑀫𑁆𑀩𑀙𑁂𑀤𑀦𑀲𑀢𑁆𑀣𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀭𑀼𑀓𑁆𑀔𑀁 𑀨𑀭𑀲𑀼𑀦𑀸 𑀓𑁄𑀝𑁆𑀝𑁂𑀢𑁆𑀯𑀸 𑀫𑀕𑁆𑀕𑀁 𑀓𑀭𑁄𑀦𑁆𑀢𑁄 𑀯𑁂𑀴𑀼𑀯𑀦𑁂 𑀦𑀺𑀲𑁆𑀲𑁂𑀡𑀺𑀁 𑀓𑀢𑁆𑀯𑀸 𑀯𑁂𑀴𑀼𑀕𑀼𑀫𑁆𑀩𑁂 𑀆𑀭𑀼𑀬𑁆𑀳 𑀯𑁂𑀴𑀼𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀲𑁆𑀲 𑀯𑁂𑀴𑀼𑀕𑀼𑀫𑁆𑀩𑀲𑁆𑀲 𑀉𑀧𑀭𑀺 𑀧𑀸𑀢𑁂𑀢𑁆𑀯𑀸 𑀯𑁂𑀴𑀼𑀕𑀼𑀫𑁆𑀩𑀫𑀢𑁆𑀣𑀓𑁂𑀦𑁂𑀯 𑀕𑀦𑁆𑀢𑀩𑁆𑀩𑀁 𑀫𑀕𑁆𑀕𑀁 𑀲𑀦𑁆𑀥𑀸𑀬 ‘‘𑀯𑀁𑀲𑀧𑀣𑀁 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀕𑀯𑁂𑀲𑀦𑁆𑀢𑁄 𑀦 𑀯𑀺𑀦𑁆𑀤𑀢𑀺, 𑀅𑀮𑀸𑀪𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀯𑀺𑀦𑁆𑀤𑀦𑀫𑀽𑀮𑀓𑀫𑁆𑀧𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀧𑀝𑀺𑀮𑀪𑀢𑀺.

𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀆𑀭𑀓𑁆𑀔𑀫𑀽𑀮𑀓𑀦𑁆𑀢𑀺 𑀭𑀓𑁆𑀔𑀡𑀫𑀽𑀮𑀓𑀫𑁆𑀧𑀺. 𑀓𑀺𑀦𑁆𑀢𑀺 𑀫𑁂 𑀪𑁄𑀕𑁂𑀢𑀺 𑀓𑁂𑀦 𑀉𑀧𑀸𑀬𑁂𑀦 𑀫𑀫 𑀪𑁄𑀕𑁂. 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼𑀁…𑀧𑁂… 𑀦 𑀅𑀧𑁆𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑁂𑀬𑁆𑀬𑀼𑀦𑁆𑀢𑀺. 𑀕𑁄𑀧𑀬𑀢𑁄𑀢𑀺 𑀫𑀜𑁆𑀚𑀽𑀲𑀸𑀤𑀻𑀳𑀺 𑀕𑁄𑀧𑀬𑀦𑁆𑀢𑀲𑁆𑀲. 𑀯𑀺𑀧𑁆𑀧𑀮𑀼𑀚𑁆𑀚𑀦𑁆𑀢𑀻𑀢𑀺 𑀯𑀺𑀦𑀲𑁆𑀲𑀦𑁆𑀢𑀺.

𑁫𑁬. 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥𑀸𑀢𑀺 𑀏𑀢𑀁 ‘‘𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸’’𑀢𑀺 𑀇𑀢𑁄 𑀧𑀪𑀼𑀢𑀺 𑀯𑀼𑀢𑁆𑀢𑁂 𑀧𑀼𑀩𑁆𑀩𑀸𑀧𑀭𑁂 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀼𑀩𑁆𑀩𑀢𑁄 𑀅𑀧𑀭𑁂 𑀲𑀫𑀡𑀪𑀸𑀯𑀢𑁄 𑀯𑀺𑀩𑁆𑀪𑀦𑁆𑀢𑀓𑀪𑀸𑀯𑁂 𑀆𑀤𑀻𑀦𑀯𑀁 𑀫𑀼𑀦𑀺 𑀜𑀢𑁆𑀯𑀸.

𑀤𑀴𑁆𑀳𑀁 𑀓𑀭𑁂𑀬𑁆𑀬𑀸𑀢𑀺 𑀦𑀺𑀤𑁆𑀤𑁂𑀲𑀧𑀤𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀣𑀺𑀭𑀁 𑀓𑀭𑁂𑀬𑁆𑀬𑀸𑀢𑀺 𑀅𑀲𑀺𑀣𑀺𑀮𑀁 𑀓𑀭𑁂𑀬𑁆𑀬. 𑀤𑀴𑁆𑀳𑀁 𑀲𑀫𑀸𑀤𑀸𑀦𑁄 𑀅𑀲𑁆𑀲𑀸𑀢𑀺 𑀣𑀺𑀭𑀧𑀝𑀺𑀜𑁆𑀜𑁄 𑀪𑀯𑁂𑀬𑁆𑀬. 𑀅𑀯𑀝𑁆𑀞𑀺𑀢𑀲𑀫𑀸𑀤𑀸𑀦𑁄𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀧𑀝𑀺𑀜𑁆𑀜𑁄.

𑁫𑁭. 𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀦𑁆𑀢𑀺 𑀬𑀤𑀺𑀤𑀁 𑀯𑀺𑀯𑁂𑀓𑀘𑀭𑀺𑀬𑀸, 𑀏𑀢𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀉𑀢𑁆𑀢𑀫𑀁. 𑀢𑀲𑁆𑀫𑀸 𑀯𑀺𑀯𑁂𑀓𑀁𑀬𑁂𑀯 𑀲𑀺𑀓𑁆𑀔𑁂𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣𑀸𑀢𑀺 𑀢𑁂𑀦 𑀘 𑀯𑀺𑀯𑁂𑀓𑁂𑀦 𑀅𑀢𑁆𑀢𑀸𑀦𑀁 ‘‘𑀲𑁂𑀝𑁆𑀞𑁄 𑀅𑀳’’𑀦𑁆𑀢𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑁂𑀦 𑀫𑀸𑀦𑀣𑀤𑁆𑀥𑁄 𑀦 𑀪𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀦𑁆𑀦𑀢𑀺𑀦𑁆𑀢𑀺 𑀉𑀲𑁆𑀲𑀸𑀧𑀦𑀁. 𑀉𑀦𑁆𑀦𑀫𑀦𑁆𑀢𑀺 𑀉𑀕𑁆𑀕𑀦𑁆𑀢𑁆𑀯𑀸 𑀧𑀝𑁆𑀞𑀧𑀦𑀁. 𑀫𑀸𑀦𑀦𑁆𑀢𑀺 𑀅𑀳𑀁𑀓𑀸𑀭𑀁. 𑀣𑀸𑀫𑀦𑁆𑀢𑀺 𑀩𑀮𑀓𑁆𑀓𑀸𑀭𑀁. 𑀣𑀫𑁆𑀪𑀦𑁆𑀢𑀺 𑀣𑀤𑁆𑀥𑀓𑀭𑀡𑀁. 𑀣𑀤𑁆𑀥𑁄𑀢𑀺 𑀅𑀫𑀤𑁆𑀤𑀯𑁄. 𑀧𑀢𑁆𑀣𑀤𑁆𑀥𑁄𑀢𑀺 𑀯𑀺𑀲𑁂𑀲𑁂𑀦 𑀅𑀫𑀤𑁆𑀤𑀯𑁄. 𑀧𑀕𑁆𑀕𑀳𑀺𑀢𑀲𑀺𑀭𑁄𑀢𑀺 𑀉𑀝𑁆𑀞𑀺𑀢𑀲𑀻𑀲𑁄. 𑀲𑀸𑀫𑀦𑁆𑀢𑀸𑀢𑀺 𑀦 𑀆𑀭𑀓𑀸. 𑀆𑀲𑀦𑁆𑀦𑁂𑀢𑀺 𑀦 𑀤𑀽𑀭𑁂. 𑀅𑀯𑀺𑀤𑀽𑀭𑁂𑀢𑀺 𑀲𑀫𑀻𑀧𑁂. 𑀉𑀧𑀓𑀝𑁆𑀞𑁂𑀢𑀺 𑀲𑀦𑁆𑀢𑀺𑀓𑁂.

𑁫𑁮. 𑀭𑀺𑀢𑁆𑀢𑀲𑁆𑀲𑀸𑀢𑀺 𑀯𑀺𑀯𑀺𑀢𑁆𑀢𑀲𑁆𑀲, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀯𑀺𑀭𑀳𑀺𑀢𑀲𑁆𑀲. 𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀮𑀕𑁆𑀕𑀸 𑀲𑀢𑁆𑀢𑀸 𑀢𑀲𑁆𑀲 𑀘𑀢𑀼𑀭𑁄𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺 𑀇𑀡𑀸𑀬𑀺𑀓𑀸 𑀯𑀺𑀬 𑀆𑀡𑀡𑁆𑀬𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀭𑀺𑀢𑁆𑀢𑀲𑁆𑀲𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀢𑀼𑀘𑁆𑀙𑀲𑁆𑀲. 𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀲𑀼𑀜𑁆𑀜𑀲𑁆𑀲. 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀏𑀓𑀓𑀲𑁆𑀲. 𑀇𑀤𑀸𑀦𑀺 𑀬𑁂𑀳𑀺 𑀭𑀺𑀢𑁆𑀢𑁄 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀭𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀢𑀺 𑀤𑁆𑀯𑀺𑀥𑀸 𑀭𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀢𑀸𑀯 𑀭𑀸𑀕𑁄 𑀫𑁄𑀳𑁄 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀫𑀤𑁄𑀢𑀺, 𑀇𑀫𑁂𑀳𑀺 𑀙𑀳𑀺 𑀓𑀺𑀮𑁂𑀲𑁂𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀭𑀺𑀢𑁆𑀢𑁄 𑀳𑁄𑀢𑀺; 𑀤𑁄𑀲𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀧𑀫𑀸𑀤𑁄𑀢𑀺, 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀺𑀮𑁂𑀲𑁂𑀳𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀭𑀺𑀢𑁆𑀢𑁄 𑀳𑁄𑀢𑀺; 𑀅𑀢𑀺𑀫𑀸𑀦𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀦𑁆𑀢𑀺, 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀭𑀺𑀢𑁆𑀢𑁄 𑀳𑁄𑀢𑀺.

𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀅𑀢𑀺𑀫𑀸𑀦𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀦𑁆𑀢𑀺; 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀭𑀺𑀢𑁆𑀢𑁄 𑀳𑁄𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀤𑁄𑀲𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀧𑀫𑀸𑀤𑁄𑀢𑀺, 𑀇𑀫𑁂𑀳𑀺 𑀘𑀢𑀽𑀳𑀺 𑀭𑀺𑀢𑁆𑀢𑁄 𑀳𑁄𑀢𑀺; 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀭𑀸𑀕𑁄 𑀫𑁄𑀳𑁄 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀫𑀤𑁄𑀢𑀺, 𑀇𑀫𑁂𑀳𑀺 𑀙𑀳𑀺 𑀭𑀺𑀢𑁆𑀢𑁄 𑀳𑁄𑀢𑀺. 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀯𑀲𑁂𑀲𑀸𑀧𑀺 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸.

𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸𑀢𑀺 𑀢𑁂𑀪𑀽𑀫𑀓𑁂 𑀯𑀢𑁆𑀣𑀼𑀓𑀸𑀫𑁂 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀳𑀺 𑀲𑀫𑀸𑀧𑀦𑀯𑀲𑁂𑀦 𑀚𑀸𑀦𑀺𑀢𑁆𑀯𑀸. 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬𑀸𑀢𑀺 𑀙𑀦𑁆𑀤𑀸𑀤𑀬𑁄 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀚𑀳𑀺𑀢𑁆𑀯𑀸. 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸𑀢𑀺 𑀯𑀺𑀕𑀢𑀦𑁆𑀢𑀁 𑀯𑀺𑀕𑀢𑀓𑁄𑀝𑀺𑀁 𑀓𑀭𑀺𑀢𑁆𑀯𑀸.

𑀓𑀸𑀫𑁄𑀖𑀁 𑀢𑀺𑀡𑁆𑀡𑀲𑁆𑀲𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀯𑀲𑀸𑀦𑀲𑀗𑁆𑀔𑀸𑀢𑀁 𑀓𑀸𑀫𑁄𑀖𑀁 𑀢𑀭𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀪𑀯𑁄𑀖𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀤𑀺𑀝𑁆𑀞𑁄𑀖𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦. 𑀅𑀯𑀺𑀚𑁆𑀚𑁄𑀖𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀲𑀩𑁆𑀩𑀁 𑀲𑀁𑀲𑀸𑀭𑀧𑀣𑀦𑁆𑀢𑀺 𑀲𑀩𑁆𑀩𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀝𑀺𑀧𑀸𑀝𑀺𑀲𑀗𑁆𑀔𑀸𑀢𑀁 𑀧𑀣𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀢𑀭𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀉𑀢𑁆𑀢𑀺𑀡𑁆𑀡𑀲𑁆𑀲. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀦𑀺𑀢𑁆𑀢𑀺𑀡𑁆𑀡𑀲𑁆𑀲. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀓𑀸𑀫𑀥𑀸𑀢𑀼𑀁 𑀅𑀢𑀺𑀓𑁆𑀓𑀦𑁆𑀢𑀲𑁆𑀲. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀪𑀯𑀁 𑀲𑀫𑀢𑀺𑀓𑁆𑀓𑀦𑁆𑀢𑀲𑁆𑀲. 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀻𑀢𑀺𑀯𑀢𑁆𑀢𑀲𑁆𑀲. 𑀧𑀸𑀭𑀁𑀕𑀢𑀲𑁆𑀲𑀸𑀢𑀺𑀆𑀤𑀻𑀦𑀺 𑀦𑀺𑀩𑁆𑀩𑀸𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀬𑀣𑀸 𑀇𑀡𑀸𑀬𑀺𑀓𑀸 𑀆𑀡𑀡𑁆𑀬𑀦𑁆𑀢𑀺 𑀧𑀯𑀟𑁆𑀠𑀓𑀇𑀡𑀁 𑀆𑀤𑀸𑀬 𑀯𑀺𑀘𑀭𑀦𑁆𑀢𑀸 𑀆𑀡𑀡𑁆𑀬𑀁. 𑀧𑀢𑁆𑀣𑁂𑀦𑁆𑀢𑀻𑀢𑀺 𑀧𑀢𑁆𑀣𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀆𑀩𑀸𑀥𑀺𑀓𑀸 𑀆𑀭𑁄𑀕𑁆𑀬𑀦𑁆𑀢𑀺 𑀧𑀺𑀢𑁆𑀢𑀸𑀤𑀺𑀭𑁄𑀕𑀸𑀢𑀼𑀭𑁄 𑀪𑁂𑀲𑀚𑁆𑀚𑀓𑀺𑀭𑀺𑀬𑀸𑀬 𑀢𑀁𑀭𑁄𑀕𑀯𑀽𑀧𑀲𑀫𑀦𑀢𑁆𑀣𑀁 𑀆𑀭𑁄𑀕𑁆𑀬𑀁. 𑀬𑀣𑀸 𑀩𑀦𑁆𑀥𑀦𑀩𑀤𑁆𑀥𑀸𑀢𑀺 𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑀧𑀼𑀭𑀺𑀲𑀸. 𑀬𑀣𑀸 𑀤𑀸𑀲𑀸 𑀪𑀼𑀚𑀺𑀲𑁆𑀲𑀦𑁆𑀢𑀺 𑀬𑀲𑁆𑀫𑀸 𑀪𑀼𑀚𑀺𑀲𑁆𑀲𑀸 𑀧𑀼𑀭𑀺𑀲𑀸 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀓𑀭𑁄𑀦𑁆𑀢𑀺, 𑀦 𑀦𑀁 𑀓𑁄𑀘𑀺 𑀩𑀮𑀓𑁆𑀓𑀸𑀭𑁂𑀦 𑀢𑀢𑁄 𑀦𑀺𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀤𑀸𑀲𑀸 𑀪𑀼𑀚𑀺𑀲𑁆𑀲𑀪𑀸𑀯𑀁 𑀧𑀢𑁆𑀣𑁂𑀦𑁆𑀢𑀺. 𑀬𑀣𑀸 𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀓𑁆𑀔𑀦𑁆𑀤𑀸𑀢𑀺 𑀬𑀲𑁆𑀫𑀸 𑀩𑀮𑀯𑀦𑁆𑀢𑁄 𑀧𑀼𑀭𑀺𑀲𑀸 𑀳𑀢𑁆𑀣𑀪𑀸𑀭𑀁 𑀕𑀳𑁂𑀢𑁆𑀯𑀸 𑀲𑀚𑁆𑀚𑀸𑀯𑀼𑀥𑀸 𑀲𑀧𑀭𑀺𑀯𑀸𑀭𑀸 𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑁂 𑀘𑁄𑀭𑀸 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀮𑀸𑀬𑀦𑁆𑀢𑀺. 𑀢𑁂 𑀲𑁄𑀢𑁆𑀣𑀺𑀦𑀸 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸 𑀔𑁂𑀫𑀦𑁆𑀢𑀁 𑀧𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀓𑀦𑁆𑀢𑀸𑀭𑀧𑀓𑁆𑀔𑀦𑁆𑀤𑀸 𑀔𑁂𑀫𑀦𑁆𑀢𑀪𑀽𑀫𑀺𑀁 𑀧𑀢𑁆𑀣𑁂𑀦𑁆𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑀺𑀲𑁆𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺.

𑀲𑀤𑁆𑀥𑀫𑁆𑀫𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.