𑁮. 𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁯. 𑀅𑀝𑁆𑀞𑀫𑁂 𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀲𑀗𑁆𑀔𑁂𑀧𑁄 𑁋 𑀇𑀫𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬 ‘‘𑀇𑀥𑁂𑀯 𑀲𑀼𑀤𑁆𑀥𑀻’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂𑀲𑀼 𑀧𑀦 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀁 𑀦𑀸𑀳𑀼, 𑀏𑀯𑀁 𑀬𑀁 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀺𑀁 𑀦𑀺𑀲𑁆𑀲𑀺𑀢𑀸, 𑀢𑀢𑁆𑀣𑁂𑀯 ‘‘𑀏𑀲 𑀯𑀸𑀤𑁄 𑀲𑀼𑀪𑁄’’𑀢𑀺 𑀏𑀯𑀁 𑀲𑀼𑀪𑀯𑀸𑀤𑀸 𑀳𑀼𑀢𑁆𑀯𑀸 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀻𑀲𑀼 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀦𑀺𑀯𑀺𑀝𑁆𑀞𑀸.

𑀲𑀩𑁆𑀩𑁂 𑀧𑀭𑀯𑀸𑀤𑁂 𑀔𑀺𑀧𑀦𑁆𑀢𑀻𑀢𑀺 𑀲𑀩𑁆𑀩𑀸 𑀧𑀭𑀮𑀤𑁆𑀥𑀺𑀬𑁄 𑀙𑀟𑁆𑀟𑁂𑀦𑁆𑀢𑀺. 𑀉𑀓𑁆𑀔𑀺𑀧𑀦𑁆𑀢𑀻𑀢𑀺 𑀤𑀽𑀭𑀢𑁄 𑀔𑀺𑀧𑀦𑁆𑀢𑀺. 𑀧𑀭𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀲𑀫𑀦𑁆𑀢𑀢𑁄 𑀔𑀺𑀧𑀦𑁆𑀢𑀺. 𑀲𑀼𑀪𑀯𑀸𑀤𑀸𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀲𑁄𑀪𑀦𑀯𑀸𑀤𑀸𑀢𑀺 ‘‘𑀏𑀢𑀁 𑀲𑀼𑀦𑁆𑀤𑀭’’𑀦𑁆𑀢𑀺 𑀓𑀣𑁂𑀦𑁆𑀢𑀸. 𑀧𑀡𑁆𑀟𑀺𑀢𑀯𑀸𑀤𑀸𑀢𑀺 ‘‘𑀧𑀡𑁆𑀟𑀺𑀢𑀸 𑀫𑀬’’𑀦𑁆𑀢𑀺 𑀏𑀯𑀁 𑀓𑀣𑁂𑀦𑁆𑀢𑀸. 𑀣𑀺𑀭𑀯𑀸𑀤𑀸𑀢𑀺 ‘‘𑀦𑀺𑀤𑁆𑀤𑁄𑀲𑀯𑀸𑀤𑀁 𑀯𑀤𑀸𑀫𑀸’’𑀢𑀺 𑀓𑀣𑁂𑀦𑁆𑀢𑀸. 𑀜𑀸𑀬𑀯𑀸𑀤𑀸𑀢𑀺 ‘‘𑀬𑀼𑀢𑁆𑀢𑀯𑀸𑀤𑀁 𑀯𑀤𑀸𑀫𑀸’’𑀢𑀺 𑀓𑀣𑁂𑀦𑁆𑀢𑀸. 𑀳𑁂𑀢𑀼𑀯𑀸𑀤𑀸𑀢𑀺 ‘‘𑀓𑀸𑀭𑀡𑀲𑀳𑀺𑀢𑀁 𑀯𑀤𑀸𑀫𑀸’’𑀢𑀺 𑀓𑀣𑁂𑀦𑁆𑀢𑀸. 𑀮𑀓𑁆𑀔𑀡𑀯𑀸𑀤𑀸𑀢𑀺 ‘‘𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁 𑀯𑀤𑀸𑀫𑀸’’𑀢𑀺 𑀯𑀤𑀦𑁆𑀢𑀸. 𑀓𑀸𑀭𑀡𑀯𑀸𑀤𑀸𑀢𑀺 ‘‘𑀉𑀤𑀸𑀳𑀭𑀡𑀬𑀼𑀢𑁆𑀢𑀯𑀸𑀤𑀁 𑀯𑀤𑀸𑀫𑀸’’𑀢𑀺 𑀓𑀣𑁂𑀦𑁆𑀢𑀸. 𑀞𑀸𑀦𑀯𑀸𑀤𑀸𑀢𑀺 ‘‘𑀧𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀯𑀸𑀤𑀁 𑀯𑀤𑀸𑀫𑀸’’𑀢𑀺 𑀯𑀤𑀦𑁆𑀢𑀸.

𑀦𑀺𑀯𑀺𑀝𑁆𑀞𑀸𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀸. 𑀧𑀢𑀺𑀝𑁆𑀞𑀺𑀢𑀸𑀢𑀺 𑀢𑀢𑁆𑀣𑁂𑀯 𑀞𑀺𑀢𑀸.

𑁬𑁦. 𑀏𑀯𑀁 𑀦𑀺𑀯𑀺𑀝𑁆𑀞𑀸 𑀘 ‘‘𑀢𑁂 𑀯𑀸𑀤𑀓𑀸𑀫𑀸’’𑀢𑀺 𑀤𑀼𑀢𑀺𑀬𑀕𑀸𑀣𑀸. 𑀢𑀢𑁆𑀣 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 ‘‘𑀅𑀬𑀁 𑀩𑀸𑀮𑁄, 𑀅𑀬𑀁 𑀩𑀸𑀮𑁄’’𑀢𑀺 𑀏𑀯𑀁 𑀤𑁆𑀯𑁂𑀧𑀺 𑀚𑀦𑀸 𑀅𑀜𑁆𑀜𑀫𑀜𑁆𑀜𑀁 𑀩𑀸𑀮𑀁 𑀤𑀳𑀦𑁆𑀢𑀺, 𑀩𑀸𑀮𑀢𑁄 𑀧𑀲𑁆𑀲𑀦𑁆𑀢𑀺. 𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀦𑁆𑀢𑀺 𑀢𑁂 𑀅𑀜𑁆𑀜𑀫𑀜𑁆𑀜𑀲𑀢𑁆𑀣𑀸𑀭𑀸𑀤𑀺𑀦𑀺𑀲𑁆𑀲𑀺𑀢𑀸 𑀓𑀮𑀳𑀁 𑀯𑀤𑀦𑁆𑀢𑀺. 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸𑀢𑀺 𑀧𑀲𑀁𑀲𑀢𑁆𑀣𑀺𑀓𑀸 𑀉𑀪𑁄𑀧𑀺 ‘‘𑀫𑀬𑀁 𑀓𑀼𑀲𑀮𑀸𑀯𑀤𑀸𑀦𑀸 𑀧𑀡𑁆𑀟𑀺𑀢𑀯𑀸𑀤𑀸’’𑀢𑀺 𑀏𑀯𑀁 𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸.

𑀯𑀸𑀤𑀢𑁆𑀣𑀺𑀓𑀸𑀢𑀺 𑀯𑀸𑀤𑁂𑀦 𑀅𑀢𑁆𑀣𑀺𑀓𑀸. 𑀯𑀸𑀤𑀸𑀥𑀺𑀧𑁆𑀧𑀸𑀬𑀸𑀢𑀺 𑀯𑀸𑀤𑀚𑁆𑀛𑀸𑀲𑀬𑀸. 𑀯𑀸𑀤𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀯𑀸𑀤𑀫𑁂𑀯 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀫𑀸𑀦𑀸. 𑀯𑀸𑀤𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑀸𑀢𑀺 𑀯𑀸𑀤𑀫𑁂𑀯 𑀕𑀯𑁂𑀲𑀦𑀁 𑀘𑀭𑀫𑀸𑀦𑀸. 𑀯𑀺𑀕𑀬𑁆𑀳𑀸𑀢𑀺 𑀧𑀯𑀺𑀲𑀺𑀢𑁆𑀯𑀸. 𑀑𑀕𑀬𑁆𑀳𑀸𑀢𑀺 𑀑𑀢𑀭𑀺𑀢𑁆𑀯𑀸. 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸𑀢𑀺 𑀦𑀺𑀫𑀼𑀚𑁆𑀚𑀺𑀢𑁆𑀯𑀸. 𑀧𑀯𑀺𑀲𑀺𑀢𑁆𑀯𑀸𑀢𑀺 𑀅𑀦𑁆𑀢𑁄𑀓𑀢𑁆𑀯𑀸.

𑀅𑀦𑁄𑀚𑀯𑀦𑁆𑀢𑀻𑀢𑀺 𑀦𑀺𑀳𑀻𑀦𑀑𑀚𑀯𑀢𑀻, 𑀢𑁂𑀚𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀸 𑀓𑀣𑀸𑀢𑀺 𑀏𑀲𑀸 𑀯𑀸𑀘𑀸. 𑀓𑀣𑁄𑀚𑁆𑀚𑀁 𑀯𑀤𑀦𑁆𑀢𑀻𑀢𑀺 𑀦𑀺𑀢𑁆𑀢𑁂𑀚𑀁 𑀪𑀡𑀦𑁆𑀢𑀺. 𑀏𑀯𑀁 𑀯𑀤𑀸𑀦𑁂𑀲𑀼 𑀘 𑀢𑁂𑀲𑀼 𑀏𑀓𑁄 𑀦𑀺𑀬𑀫𑀢𑁄 𑀏𑀯.

𑁬𑁧. 𑀬𑀼𑀢𑁆𑀢𑁄 𑀓𑀣𑀸𑀬𑀦𑁆𑀢𑀺 𑀕𑀸𑀣𑀸. 𑀢𑀢𑁆𑀣 𑀬𑀼𑀢𑁆𑀢𑁄 𑀓𑀣𑀸𑀬𑀦𑁆𑀢𑀺 𑀯𑀸𑀤𑀓𑀣𑀸𑀬 𑀉𑀲𑁆𑀲𑀼𑀓𑁆𑀓𑁄. 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺 𑀅𑀢𑁆𑀢𑀦𑁄 𑀧𑀲𑀁𑀲𑀁 𑀇𑀘𑁆𑀙𑀦𑁆𑀢𑁄 ‘‘𑀓𑀣𑀁 𑀦𑀼 𑀔𑁄 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀩𑁆𑀩𑁂𑀯 𑀯𑀸𑀤𑀸 𑀓𑀣𑀁𑀓𑀣𑀻 𑀯𑀺𑀦𑀺𑀖𑀸𑀢𑀻 𑀳𑁄𑀢𑀺. 𑀅𑀧𑀸𑀳𑀢𑀲𑁆𑀫𑀺𑀦𑁆𑀢𑀺 𑀧𑀜𑁆𑀳𑀯𑀻𑀫𑀁𑀲𑀓𑁂𑀳𑀺 ‘‘𑀅𑀢𑁆𑀣𑀸𑀧𑀕𑀢𑀁 𑀢𑁂 𑀪𑀡𑀺𑀢𑀁, 𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀢𑁂 𑀪𑀡𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀧𑀳𑀭𑀺𑀢𑁂 𑀯𑀸𑀤𑁂. 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀻𑀢𑀺 𑀏𑀯𑀁 𑀅𑀧𑀸𑀳𑀢𑀲𑁆𑀫𑀺𑀜𑁆𑀘 𑀯𑀸𑀤𑁂 𑀉𑀧𑁆𑀧𑀦𑁆𑀦𑀸𑀬 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺. 𑀭𑀦𑁆𑀥𑀫𑁂𑀲𑀻𑀢𑀺 𑀬𑀲𑁆𑀲 𑀭𑀦𑁆𑀥𑀫𑁂𑀯 𑀕𑀯𑁂𑀲𑀦𑁆𑀢𑁄.

𑀣𑁄𑀫𑀦𑀦𑁆𑀢𑀺 𑀯𑀡𑁆𑀡𑀪𑀡𑀦𑀁. 𑀓𑀺𑀢𑁆𑀢𑀺𑀦𑁆𑀢𑀺 𑀧𑀸𑀓𑀝𑀓𑀭𑀡𑀁. 𑀯𑀡𑁆𑀡𑀳𑀸𑀭𑀺𑀬𑀦𑁆𑀢𑀺 𑀕𑀼𑀡𑀯𑀟𑁆𑀠𑀦𑀁. 𑀧𑀼𑀩𑁆𑀩𑁂𑀯 𑀲𑀮𑁆𑀮𑀸𑀧𑀸𑀢𑀺 𑀲𑀮𑁆𑀮𑀸𑀧𑀢𑁄 𑀧𑀼𑀭𑁂𑀢𑀭𑀫𑁂𑀯. ‘‘𑀓𑀣𑀫𑀺𑀤𑀁 𑀓𑀣𑀫𑀺𑀤’’𑀦𑁆𑀢𑀺 𑀓𑀣𑀁𑀓𑀣𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀣𑀁𑀓𑀣𑀻. 𑀚𑀬𑁄 𑀦𑀼 𑀔𑁄 𑀫𑁂𑀢𑀺 𑀫𑀫 𑀚𑀬𑁄. 𑀓𑀣𑀁 𑀦𑀺𑀕𑁆𑀕𑀳𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀦𑀺𑀕𑁆𑀕𑀡𑁆𑀳𑀦𑀁. 𑀧𑀝𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀫𑀫 𑀮𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀓𑀭𑀺𑀲𑁆𑀲𑀸𑀫𑀺. 𑀯𑀺𑀲𑁂𑀲𑀦𑁆𑀢𑀺 𑀅𑀢𑀺𑀭𑁂𑀓𑀁. 𑀧𑀝𑀺𑀯𑀺𑀲𑁂𑀲𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑁂𑀲𑀁. 𑀆𑀯𑁂𑀞𑀺𑀬𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀯𑁂𑀞𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀦𑀺𑀩𑁆𑀩𑁂𑀞𑀺𑀬𑀦𑁆𑀢𑀺 𑀫𑀫 𑀦𑀺𑀩𑁆𑀩𑁂𑀞𑀦𑀁 𑀫𑁄𑀘𑀦𑀁 𑀦𑀺𑀓𑁆𑀔𑀫𑀦𑀁. 𑀙𑁂𑀤𑀦𑁆𑀢𑀺 𑀯𑀸𑀤𑀙𑀺𑀦𑁆𑀤𑀦𑀁. 𑀫𑀡𑁆𑀟𑀮𑀦𑁆𑀢𑀺 𑀯𑀸𑀤𑀲𑀗𑁆𑀖𑀸𑀢𑀁. 𑀧𑀸𑀭𑀺𑀲𑀚𑁆𑀚𑀸𑀢𑀺 𑀧𑀭𑀺𑀘𑀸𑀭𑀺𑀓𑀸. 𑀧𑀸𑀲𑀸𑀭𑀺𑀓𑀸𑀢𑀺 𑀓𑀸𑀭𑀡𑀺𑀢𑀸. 𑀅𑀧𑀳𑀭𑀦𑁆𑀢𑀻𑀢𑀺 𑀧𑀝𑀺𑀩𑀸𑀳𑀦𑁆𑀢𑀺.

𑀅𑀢𑁆𑀣𑀸𑀧𑀕𑀢𑀦𑁆𑀢𑀺 𑀅𑀢𑁆𑀣𑀢𑁄 𑀅𑀧𑀕𑀢𑀁, 𑀅𑀢𑁆𑀣𑁄 𑀦𑀢𑁆𑀣𑀻𑀢𑀺. 𑀅𑀢𑁆𑀣𑀢𑁄 𑀅𑀧𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑀫𑁆𑀳𑀸 𑀧𑀝𑀺𑀩𑀸𑀳𑀦𑁆𑀢𑀺. 𑀅𑀢𑁆𑀣𑁄 𑀢𑁂 𑀤𑀼𑀦𑁆𑀦𑀺𑀢𑁄𑀢𑀺 𑀢𑀯 𑀅𑀢𑁆𑀣𑁄 𑀦 𑀲𑀫𑁆𑀫𑀸 𑀉𑀧𑀦𑀻𑀢𑁄. 𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀭𑁄𑀧𑀺𑀢𑀦𑁆𑀢𑀺 𑀢𑀯 𑀩𑁆𑀬𑀜𑁆𑀚𑀦𑀁 𑀤𑀼𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑀁. 𑀦𑀺𑀕𑁆𑀕𑀳𑁄 𑀢𑁂 𑀅𑀓𑀢𑁄𑀢𑀺 𑀢𑀬𑀸 𑀦𑀺𑀕𑁆𑀕𑀳𑁄 𑀦 𑀓𑀢𑁄. 𑀧𑀝𑀺𑀓𑀫𑁆𑀫𑀁 𑀢𑁂 𑀤𑀼𑀓𑁆𑀓𑀝𑀦𑁆𑀢𑀺 𑀢𑀬𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀁 𑀤𑀼𑀝𑁆𑀞𑀼 𑀓𑀢𑀁. 𑀯𑀺𑀲𑀫𑀓𑀣𑀁 𑀤𑀼𑀓𑁆𑀓𑀣𑀺𑀢𑀦𑁆𑀢𑀺 𑀦 𑀲𑀫𑁆𑀫𑀸 𑀓𑀣𑀺𑀢𑀁. 𑀤𑀼𑀩𑁆𑀪𑀡𑀺𑀢𑀦𑁆𑀢𑀺 𑀪𑀡𑀦𑁆𑀢𑁂𑀦𑀧𑀺 𑀤𑀼𑀝𑁆𑀞𑀼 𑀪𑀡𑀺𑀢𑀁. 𑀤𑀼𑀮𑁆𑀮𑀧𑀺𑀢𑀦𑁆𑀢𑀺 𑀦 𑀲𑀫𑁆𑀫𑀸 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀤𑀼𑀭𑀼𑀢𑁆𑀢𑀦𑁆𑀢𑀺 𑀅𑀜𑁆𑀜𑀣𑀸 𑀪𑀡𑀺𑀢𑀁. 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀯𑀺𑀭𑀽𑀧𑀁 𑀪𑀸𑀲𑀺𑀢𑀁.

𑀦𑀺𑀦𑁆𑀤𑀸𑀬𑀸𑀢𑀺 𑀕𑀭𑀳𑀡𑁂𑀦. 𑀕𑀭𑀳𑀸𑀬𑀸𑀢𑀺 𑀤𑁄𑀲𑀓𑀣𑀦𑁂𑀦. 𑀅𑀓𑀺𑀢𑁆𑀢𑀺𑀬𑀸𑀢𑀺 𑀅𑀕𑀼𑀡𑀓𑀣𑀦𑁂𑀦. 𑀅𑀯𑀡𑁆𑀡𑀳𑀸𑀭𑀺𑀓𑀸𑀬𑀸𑀢𑀺 𑀅𑀕𑀼𑀡𑀯𑀟𑁆𑀠𑀦𑁂𑀦.

𑀓𑀼𑀧𑁆𑀧𑀢𑀻𑀢𑀺 𑀧𑀓𑀢𑀺𑀪𑀸𑀯𑀁 𑀚𑀳𑁂𑀢𑁆𑀯𑀸 𑀘𑀮𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀤𑁄𑀲𑀯𑀲𑁂𑀦 𑀧𑀽𑀢𑀺𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀧𑀢𑀺𑀝𑁆𑀞𑀻𑀬𑀢𑀻𑀢𑀺 𑀓𑁄𑀥𑀯𑀲𑁂𑀦 𑀕𑀡𑀪𑀸𑀯𑀁 𑀕𑀘𑁆𑀙𑀢𑀺. 𑀓𑁄𑀧𑀜𑁆𑀘𑀸𑀢𑀺 𑀓𑀼𑀧𑀺𑀢𑀪𑀸𑀯𑀁. 𑀤𑁄𑀲𑀜𑁆𑀘𑀸𑀢𑀺 𑀤𑀽𑀲𑀦𑀁. 𑀅𑀧𑀘𑁆𑀘𑀬𑀜𑁆𑀘𑀸𑀢𑀺 𑀅𑀢𑀼𑀝𑁆𑀞𑀸𑀓𑀸𑀭𑀜𑁆𑀘. 𑀧𑀸𑀢𑀼𑀓𑀭𑁄𑀢𑀻𑀢𑀺 𑀧𑀸𑀓𑀝𑀁 𑀓𑀭𑁄𑀢𑀺. 𑀭𑀦𑁆𑀥𑀫𑁂𑀲𑀻𑀢𑀺 𑀅𑀦𑁆𑀢𑀭𑀕𑀯𑁂𑀲𑀻. 𑀯𑀺𑀭𑀦𑁆𑀥𑀫𑁂𑀲𑀻𑀢𑀺 𑀙𑀺𑀤𑁆𑀤𑀕𑀯𑁂𑀲𑀻. 𑀅𑀧𑀭𑀤𑁆𑀥𑀫𑁂𑀲𑀻𑀢𑀺 𑀕𑀼𑀡𑀁 𑀅𑀧𑀦𑁂𑀢𑁆𑀯𑀸 𑀤𑁄𑀲𑀫𑁂𑀯 𑀕𑀯𑁂𑀲𑀻. 𑀔𑀮𑀺𑀢𑀫𑁂𑀲𑀻𑀢𑀺 𑀧𑀓𑁆𑀔𑀮𑀦𑀕𑀯𑁂𑀲𑀻. 𑀕𑀴𑀺𑀢𑀫𑁂𑀲𑀻𑀢𑀺 𑀧𑀢𑀦𑀕𑀯𑁂𑀲𑀻. ‘‘𑀖𑀝𑁆𑀝𑀺𑀢𑀫𑁂𑀲𑀻’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀧𑀻𑀴𑀦𑀕𑀯𑁂𑀲𑀻𑀢𑀺 𑀅𑀢𑁆𑀣𑁄. 𑀯𑀺𑀯𑀭𑀫𑁂𑀲𑀻𑀢𑀺 𑀤𑁄𑀲𑀕𑀯𑁂𑀲𑀻.

𑁬𑁨. 𑀦 𑀓𑁂𑀯𑀮𑀜𑁆𑀘 𑀲𑁄 𑀓𑀼𑀧𑁆𑀧𑀢𑀺, 𑀅𑀧𑀺𑀘 𑀔𑁄 𑀧𑀦 ‘‘𑀬𑀫𑀲𑁆𑀲 𑀯𑀸𑀤’’𑀦𑁆𑀢𑀺 𑀕𑀸𑀣𑀸. 𑀢𑀢𑁆𑀣 𑀧𑀭𑀺𑀳𑀻𑀦𑀫𑀸𑀳𑀼, 𑀅𑀧𑀸𑀳𑀢𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺𑀢𑁄 𑀅𑀧𑀸𑀳𑀢𑀁 𑀧𑀭𑀺𑀳𑀻𑀦𑀁 𑀯𑀤𑀦𑁆𑀢𑀺. 𑀧𑀭𑀺𑀤𑁂𑀯𑀢𑀻𑀢𑀺 𑀢𑀢𑁄𑀦𑀺𑀫𑀺𑀢𑁆𑀢𑀁 𑀲𑁄 ‘‘𑀅𑀜𑁆𑀜𑀁 𑀫𑀬𑀸 𑀆𑀯𑀚𑁆𑀚𑀺𑀢’’𑀦𑁆𑀢𑀺𑀆𑀤𑀻𑀳𑀺 𑀯𑀺𑀧𑁆𑀧𑀮𑀧𑀢𑀺. 𑀲𑁄𑀘𑀢𑀻𑀢𑀺 ‘‘𑀢𑀲𑁆𑀲 𑀚𑀬𑁄’’𑀢𑀺𑀆𑀤𑀻𑀦𑀺 𑀆𑀭𑀩𑁆𑀪 𑀲𑁄𑀘𑀢𑀺. ‘‘𑀉𑀧𑀘𑁆𑀘𑀕𑀸 𑀫’’𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀻𑀢𑀺 ‘‘𑀲𑁄 𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀅𑀢𑀺𑀓𑁆𑀓𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀼𑀝𑁆𑀞𑀼𑀢𑀭𑀁 𑀯𑀺𑀧𑁆𑀧𑀮𑀧𑀢𑀺.

𑀧𑀭𑀺𑀳𑀸𑀧𑀺𑀢𑀦𑁆𑀢𑀺 𑀦 𑀯𑀟𑁆𑀠𑀺𑀢𑀁. 𑀅𑀜𑁆𑀜𑀁 𑀫𑀬𑀸 𑀆𑀯𑀚𑁆𑀚𑀺𑀢𑀦𑁆𑀢𑀺 𑀅𑀜𑁆𑀜𑀁 𑀓𑀸𑀭𑀡𑀁 𑀫𑀬𑀸 𑀅𑀯𑀦𑀫𑀺𑀢𑀁. 𑀘𑀺𑀦𑁆𑀢𑀺𑀢𑀦𑁆𑀢𑀺 𑀯𑀻𑀫𑀁𑀲𑀺𑀢𑀁. 𑀫𑀳𑀸𑀧𑀓𑁆𑀔𑁄𑀢𑀺 𑀫𑀳𑀦𑁆𑀢𑁄 𑀜𑀸𑀢𑀺𑀧𑀓𑁆𑀔𑁄 𑀏𑀢𑀲𑁆𑀲𑀸𑀢𑀺 𑀫𑀳𑀸𑀧𑀓𑁆𑀔𑁄. 𑀫𑀳𑀸𑀧𑀭𑀺𑀲𑁄𑀢𑀺 𑀫𑀳𑀸𑀧𑀭𑀺𑀘𑀸𑀭𑀺𑀓𑀧𑀭𑀺𑀲𑁄. 𑀫𑀳𑀸𑀧𑀭𑀺𑀯𑀸𑀭𑁄𑀢𑀺 𑀫𑀳𑀸𑀤𑀸𑀲𑀤𑀸𑀲𑀺𑀧𑀭𑀺𑀯𑀸𑀭𑁄. 𑀧𑀭𑀺𑀲𑀸 𑀘𑀸𑀬𑀁 𑀯𑀕𑁆𑀕𑀸𑀢𑀺 𑀅𑀬𑀜𑁆𑀘 𑀧𑀭𑀺𑀲𑀸 𑀯𑀕𑁆𑀕𑀸, 𑀦 𑀏𑀓𑀸. 𑀧𑀼𑀦 𑀪𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀧𑀼𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀺.

𑁬𑁩. 𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀽𑀢𑀺 𑀏𑀢𑁆𑀣 𑀧𑀦 𑀲𑀫𑀡𑀸 𑀯𑀼𑀘𑁆𑀘𑀦𑁆𑀢𑀺 𑀩𑀸𑀳𑀺𑀭𑀧𑀭𑀺𑀩𑁆𑀩𑀸𑀚𑀓𑀸. 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺 𑀏𑀢𑁂𑀲𑀼 𑀯𑀸𑀤𑁂𑀲𑀼 𑀚𑀬𑀧𑀭𑀸𑀚𑀬𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀉𑀕𑁆𑀖𑀸𑀢𑀦𑀺𑀖𑀸𑀢𑀁 𑀯𑀸 𑀧𑀸𑀧𑀼𑀡𑀦𑁆𑀢𑁄 𑀉𑀕𑁆𑀖𑀸𑀢𑀺 𑀘 𑀦𑀺𑀖𑀸𑀢𑀺 𑀘 𑀳𑁄𑀢𑀺. 𑀯𑀺𑀭𑀫𑁂 𑀓𑀣𑁄𑀚𑁆𑀚𑀦𑁆𑀢𑀺 𑀧𑀚𑀳𑁂𑀬𑁆𑀬 𑀓𑀮𑀳𑀁. 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸𑀢𑀺 𑀦 𑀳𑀺 𑀏𑀢𑁆𑀣 𑀧𑀲𑀁𑀲𑀮𑀸𑀪𑀢𑁄 𑀅𑀜𑁆𑀜𑁄 𑀅𑀢𑁆𑀣𑁄 𑀅𑀢𑁆𑀣𑀺. 𑀉𑀢𑁆𑀢𑀸𑀦𑁄 𑀯𑀸𑀢𑀺 𑀦 𑀕𑀫𑁆𑀪𑀻𑀭𑁄𑀢𑀺 𑀅𑀢𑁆𑀣𑁄 ‘‘𑀧𑀜𑁆𑀘𑀺𑀫𑁂 𑀓𑀸𑀫𑀕𑀼𑀡𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁬.𑁬𑁩) 𑀯𑀺𑀬.

𑀕𑀫𑁆𑀪𑀻𑀭𑁄 𑀯𑀸𑀢𑀺 𑀤𑀼𑀧𑁆𑀧𑀯𑁂𑀲𑁄 𑀅𑀧𑁆𑀧𑀢𑀺𑀝𑁆𑀞𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀺𑀬. 𑀕𑀽𑀴𑁆𑀳𑁄 𑀯𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀞𑀺𑀢𑁄 ‘‘𑀅𑀪𑀺𑀭𑀫 𑀦𑀦𑁆𑀤 𑀅𑀳𑀁 𑀢𑁂 𑀧𑀸𑀝𑀺𑀪𑁄𑀕𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁨) 𑀯𑀺𑀬. 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸𑀢𑀺 𑀅𑀧𑀸𑀓𑀝𑁄 ‘‘𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁪; 𑀦𑁂𑀢𑁆𑀢𑀺. 𑁧𑁧𑁩) 𑀯𑀺𑀬. 𑀦𑁂𑀬𑁆𑀬𑁄 𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑁄 ‘‘𑀅𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁯𑁭) 𑀯𑀺𑀬. 𑀦𑀻𑀢𑁄 𑀯𑀸𑀢𑀺 𑀧𑀸𑀴𑀺𑀬𑀸 𑀞𑀺𑀢𑀦𑀺𑀬𑀸𑀫𑁂𑀦 𑀓𑀣𑁂𑀢𑀩𑁆𑀩𑁄 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀯𑀁𑀲𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁨𑁮) 𑀯𑀺𑀬. 𑀅𑀦𑀯𑀚𑁆𑀚𑁄 𑀯𑀸𑀢𑀺 𑀦𑀺𑀤𑁆𑀤𑁄𑀲𑀢𑁆𑀣𑁄 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧) 𑀯𑀺𑀬. 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸𑀢𑀺 𑀓𑀺𑀮𑁂𑀲𑀯𑀺𑀭𑀳𑀺𑀢𑁄 𑀯𑀺𑀧𑀲𑁆𑀲𑀦𑀸 𑀯𑀺𑀬. 𑀯𑁄𑀤𑀸𑀦𑁄𑀯𑀸𑀢𑀺 𑀧𑀭𑀺𑀲𑀼𑀤𑁆𑀥𑁄 𑀮𑁄𑀓𑀼𑀢𑁆𑀢𑀭𑀁 𑀯𑀺𑀬. 𑀧𑀭𑀫𑀢𑁆𑀣𑁄 𑀯𑀸𑀢𑀺 𑀉𑀢𑁆𑀢𑀫𑀢𑁆𑀣𑁄 𑀉𑀢𑁆𑀢𑀫𑀢𑁆𑀣𑀪𑀽𑀢𑁄 𑀅𑀢𑁆𑀣𑁄 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀦𑀺𑀩𑁆𑀩𑀸𑀦𑀸𑀦𑀺 𑀯𑀺𑀬.

𑁬𑁪. 𑀙𑀝𑁆𑀞𑀕𑀸𑀣𑀸𑀬𑀢𑁆𑀣𑁄 𑁋 𑀬𑀲𑁆𑀫𑀸 𑀘 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸, 𑀢𑀲𑁆𑀫𑀸 𑀧𑀭𑀫𑀁 𑀮𑀸𑀪𑀁 𑀮𑀪𑀦𑁆𑀢𑁄𑀧𑀺 ‘‘𑀲𑀼𑀦𑁆𑀤𑀭𑁄 𑀅𑀬’’𑀦𑁆𑀢𑀺 𑀢𑀢𑁆𑀣 𑀤𑀺𑀝𑁆𑀞𑀺𑀬𑀸 𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀳𑁄𑀢𑀻𑀢𑀺 𑀢𑀁 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀤𑀻𑀧𑁂𑀢𑁆𑀯𑀸 𑀢𑀢𑁄 𑀲𑁄 𑀢𑁂𑀦 𑀚𑀬𑀢𑁆𑀣𑁂𑀦 𑀢𑀼𑀝𑁆𑀞𑀺𑀁 𑀯𑀸 𑀤𑀦𑁆𑀢𑀯𑀺𑀤𑀁𑀲𑀓𑀁 𑀯𑀸 𑀆𑀧𑀚𑁆𑀚𑀦𑁆𑀢𑁄 𑀳𑀲𑁆𑀲𑀢𑀺, 𑀫𑀸𑀦𑁂𑀦 𑀘 𑀉𑀦𑁆𑀦𑀫𑀢𑀺. 𑀓𑀺𑀁 𑀓𑀸𑀭𑀡𑀁? 𑀬𑀲𑁆𑀫𑀸 𑀢𑀁 𑀚𑀬𑀢𑁆𑀣𑀁 𑀧𑀧𑁆𑀧𑀼𑀬𑁆𑀬 𑀬𑀣𑀸𑀫𑀦𑁄 𑀚𑀸𑀢𑁄.

𑀣𑀫𑁆𑀪𑀬𑀺𑀢𑁆𑀯𑀸𑀢𑀺 𑀧𑀽𑀭𑁂𑀢𑁆𑀯𑀸. 𑀩𑁆𑀭𑀽𑀳𑀬𑀺𑀢𑁆𑀯𑀸𑀢𑀺 𑀯𑀟𑁆𑀠𑁂𑀢𑁆𑀯𑀸. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄.

𑁬𑁫. 𑀏𑀯𑀁 𑀉𑀦𑁆𑀦𑀫𑀢𑁄 𑀘 ‘‘𑀬𑀸 𑀉𑀦𑁆𑀦𑀢𑀻’’𑀢𑀺 𑀕𑀸𑀣𑀸. 𑀢𑀢𑁆𑀣 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄𑀢𑀺 𑀏𑀲𑁄 𑀧𑀦 𑀢𑀁 𑀉𑀦𑁆𑀦𑀢𑀺𑀁 ‘‘𑀯𑀺𑀖𑀸𑀢𑀪𑀽𑀫𑀻’’𑀢𑀺 𑀅𑀩𑀼𑀚𑁆𑀛𑀫𑀸𑀦𑁄 𑀫𑀸𑀦𑀜𑁆𑀘 𑀅𑀢𑀺𑀫𑀸𑀦𑀜𑁆𑀘 𑀯𑀤𑀢𑀺. 𑀏𑀯𑀁 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄.

𑁬𑁬. 𑀏𑀯𑀁 𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀯𑀸𑀤𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘‘𑀲𑀽𑀭𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀭𑀸𑀚𑀔𑀸𑀤𑀸𑀬𑀸𑀢𑀺 𑀭𑀸𑀚𑀔𑀸𑀤𑀦𑀻𑀬𑁂𑀦, 𑀪𑀢𑁆𑀢𑀯𑁂𑀢𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀦𑁆𑀢𑀺 𑀬𑀣𑀸 𑀲𑁄 𑀧𑀝𑀺𑀲𑀽𑀭𑀁 𑀇𑀘𑁆𑀙𑀦𑁆𑀢𑁄 𑀅𑀪𑀺𑀕𑀚𑁆𑀚𑀦𑁆𑀢𑁄 𑀏𑀢𑀺, 𑀏𑀯𑀁 𑀤𑀺𑀝𑁆𑀞𑀺𑀕𑀢𑀺𑀓𑁄 𑀤𑀺𑀝𑁆𑀞𑀺𑀕𑀢𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀻𑀢𑀺 𑀬𑁂𑀦 𑀲𑁄 𑀢𑀼𑀬𑁆𑀳𑀁 𑀧𑀝𑀺𑀲𑀽𑀭𑁄, 𑀢𑁂𑀦 𑀕𑀘𑁆𑀙. 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬𑀸𑀢𑀺 𑀬𑀁 𑀧𑀦 𑀓𑀺𑀮𑁂𑀲𑀚𑀸𑀢𑀁 𑀬𑀼𑀤𑁆𑀥𑀸𑀬 𑀲𑀺𑀬𑀸, 𑀢𑀁 𑀇𑀥 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺, 𑀩𑁄𑀥𑀺𑀫𑀽𑀮𑁂𑀬𑁂𑀯𑀲𑁆𑀲 𑀧𑀳𑀻𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀽𑀭𑁄𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀲𑀼𑀝𑁆𑀞𑀼 𑀉𑀭𑁄 𑀲𑀽𑀭𑁄, 𑀯𑀺𑀲𑁆𑀲𑀝𑁆𑀞𑀉𑀭𑁄 𑀦𑀺𑀦𑁆𑀦𑀉𑀭𑁄𑀢𑀺 𑀅𑀢𑁆𑀣𑁄. 𑀯𑀻𑀭𑁄𑀢𑀺 𑀧𑀭𑀓𑁆𑀓𑀫𑀯𑀦𑁆𑀢𑁄. 𑀯𑀺𑀓𑁆𑀓𑀦𑁆𑀢𑁄𑀢𑀺 𑀲𑀗𑁆𑀕𑀸𑀫𑀁 𑀧𑀯𑀺𑀲𑀦𑁆𑀢𑁄. 𑀅𑀪𑀻𑀭𑀽𑀢𑀺𑀆𑀤𑀬𑁄 𑀯𑀼𑀢𑁆𑀢𑀦𑀬𑀸 𑀏𑀯. 𑀧𑀼𑀝𑁆𑀞𑁄𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀧𑁄𑀲𑀺𑀢𑁄𑀢𑀺 𑀣𑀽𑀮𑀓𑀢𑁄. 𑀆𑀧𑀸𑀤𑀺𑀢𑁄𑀢𑀺 𑀉𑀧𑀟𑁆𑀠𑀩𑀮𑀺𑀢𑁄 𑀧𑀝𑀺𑀧𑀸𑀤𑀺𑀢𑁄. 𑀯𑀟𑁆𑀠𑀺𑀢𑁄𑀢𑀺 𑀢𑀢𑁄 𑀢𑀢𑁄 𑀪𑀸𑀯𑀺𑀢𑁄.

𑀕𑀚𑁆𑀚𑀦𑁆𑀢𑁄𑀢𑀺 𑀅𑀩𑁆𑀬𑀢𑁆𑀢𑀲𑀭𑁂𑀦 𑀕𑀚𑁆𑀚𑀦𑁆𑀢𑁄. 𑀉𑀕𑁆𑀕𑀚𑁆𑀚𑀦𑁆𑀢𑁄𑀢𑀺 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑁄. 𑀅𑀪𑀺𑀕𑀚𑁆𑀚𑀦𑁆𑀢𑁄𑀢𑀺 𑀲𑀻𑀳𑀦𑀸𑀤𑀁 𑀓𑀭𑁄𑀦𑁆𑀢𑁄. 𑀏𑀢𑀻𑀢𑀺 𑀆𑀕𑀘𑁆𑀙𑀢𑀺. 𑀉𑀧𑁂𑀢𑀻𑀢𑀺 𑀢𑀢𑁄 𑀲𑀫𑀻𑀧𑀁 𑀕𑀘𑁆𑀙𑀢𑀺. 𑀉𑀧𑀕𑀘𑁆𑀙𑀢𑀻𑀢𑀺 𑀢𑀢𑁄 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀦 𑀦𑀺𑀯𑀢𑁆𑀢𑀢𑀺. 𑀧𑀝𑀺𑀲𑀽𑀭𑀦𑁆𑀢𑀺 𑀦𑀺𑀩𑁆𑀪𑀬𑀁. 𑀧𑀝𑀺𑀧𑀼𑀭𑀺𑀲𑀦𑁆𑀢𑀺 𑀲𑀢𑁆𑀢𑀼𑀧𑀼𑀭𑀺𑀲𑀁. 𑀧𑀝𑀺𑀲𑀢𑁆𑀢𑀼𑀦𑁆𑀢𑀺 𑀲𑀢𑁆𑀢𑀼 𑀳𑀼𑀢𑁆𑀯𑀸 𑀅𑀪𑀺𑀫𑀼𑀔𑁂 𑀞𑀺𑀢𑀁. 𑀧𑀝𑀺𑀫𑀮𑁆𑀮𑀦𑁆𑀢𑀺 𑀧𑀝𑀺𑀲𑁂𑀥𑀁 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑀁. 𑀇𑀘𑁆𑀙𑀦𑁆𑀢𑁄𑀢𑀺 𑀆𑀓𑀗𑁆𑀔𑀫𑀸𑀦𑁄.

𑀧𑀮𑁂𑀳𑀻𑀢𑀺 𑀕𑀘𑁆𑀙. 𑀯𑀚𑀸𑀢𑀺 𑀫𑀸 𑀢𑀺𑀝𑁆𑀞. 𑀕𑀘𑁆𑀙𑀸𑀢𑀺 𑀲𑀫𑀻𑀧𑀁 𑀉𑀧𑀲𑀗𑁆𑀓𑀫. 𑀅𑀪𑀺𑀓𑁆𑀓𑀫𑀸𑀢𑀺 𑀧𑀭𑀓𑁆𑀓𑀫𑀁 𑀓𑀭𑁄𑀳𑀺.

𑀩𑁄𑀥𑀺𑀬𑀸 𑀫𑀽𑀮𑁂𑀢𑀺 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂. 𑀬𑁂 𑀧𑀝𑀺𑀲𑁂𑀦𑀺𑀓𑀭𑀸 𑀓𑀺𑀮𑁂𑀲𑀸𑀢𑀺 𑀬𑁂 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀓𑀭𑀸. 𑀧𑀝𑀺𑀮𑁄𑀫𑀓𑀭𑀸𑀢𑀺 𑀧𑀝𑀸𑀡𑀻𑀓𑀭𑀸. 𑀧𑀝𑀺𑀓𑀡𑁆𑀝𑀓𑀓𑀭𑀸𑀢𑀺 𑀯𑀺𑀦𑀺𑀯𑀺𑀚𑁆𑀛𑀦𑀓𑀭𑀸. 𑀧𑀝𑀺𑀧𑀓𑁆𑀔𑀓𑀭𑀸𑀢𑀺 𑀲𑀢𑁆𑀢𑀼𑀓𑀭𑀸.

𑁬𑁭. 𑀇𑀢𑁄 𑀧𑀭𑀁 𑀲𑁂𑀲𑀕𑀸𑀣𑀸 𑀧𑀸𑀓𑀝𑀲𑀫𑁆𑀩𑀦𑁆𑀥𑀸 𑀏𑀯. 𑀢𑀢𑁆𑀣 𑀯𑀺𑀯𑀸𑀤𑀬𑀦𑁆𑀢𑀻𑀢𑀺 𑀯𑀺𑀯𑀤𑀦𑁆𑀢𑀺. 𑀧𑀝𑀺𑀲𑁂𑀦𑀺𑀓𑀢𑁆𑀢𑀸𑀢𑀺 𑀧𑀝𑀺𑀮𑁄𑀫𑀓𑀸𑀭𑀓𑀸. ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀭𑀼𑀤𑁆𑀥𑀯𑀘𑀦𑀁 𑀯𑀺𑀯𑀸𑀤𑁄.

𑀲𑀳𑀺𑀢𑀁 𑀫𑁂𑀢𑀺 𑀫𑀫 𑀯𑀘𑀦𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀅𑀲𑀳𑀺𑀢𑀁 𑀢𑁂𑀢𑀺 𑀢𑀯 𑀯𑀘𑀦𑀁 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀬𑀁 𑀢𑀁 𑀅𑀥𑀺𑀘𑀺𑀡𑁆𑀡𑀁 𑀘𑀺𑀭𑀓𑀸𑀮𑀲𑁂𑀯𑀦𑀯𑀲𑁂𑀦 𑀧𑀕𑀼𑀡𑀁, 𑀢𑀁 𑀫𑀫 𑀯𑀸𑀤𑀁 𑀆𑀕𑀫𑁆𑀫 𑀦𑀺𑀯𑀢𑁆𑀢𑀁. 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄𑀢𑀺 𑀢𑀼𑀬𑁆𑀳𑀁 𑀉𑀧𑀭𑀺 𑀫𑀬𑀸 𑀤𑁄𑀲𑁄 𑀆𑀭𑁄𑀧𑀺𑀢𑁄. 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬𑀸𑀢𑀺 𑀪𑀢𑁆𑀢𑀧𑀼𑀝𑀁 𑀆𑀤𑀸𑀬 𑀢𑀁 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀸𑀤𑀸 𑀧𑀫𑁄𑀓𑁆𑀔𑀢𑁆𑀣𑀸𑀬 𑀉𑀢𑁆𑀢𑀭𑀁 𑀧𑀭𑀺𑀬𑁂𑀲𑀫𑀸𑀦𑁄 𑀯𑀺𑀘𑀭. 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸𑀢𑀺 𑀅𑀣 𑀯𑀸 𑀫𑀬𑀸 𑀆𑀭𑁄𑀧𑀺𑀢𑀤𑁄𑀲𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀳𑀺. 𑀲𑀘𑁂 𑀧𑀳𑁄𑀲𑀻𑀢𑀺 𑀲𑀘𑁂 𑀲𑀓𑁆𑀓𑁄𑀲𑀺.

𑀆𑀯𑁂𑀞𑀺𑀬𑀸𑀬 𑀆𑀯𑁂𑀞𑀺𑀬𑀦𑁆𑀢𑀺 𑀆𑀯𑁂𑀞𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑁂𑀦 𑀦𑀺𑀯𑀢𑁆𑀢𑀦𑀁. 𑀦𑀺𑀩𑁆𑀩𑁂𑀞𑀺𑀬𑀸𑀬 𑀦𑀺𑀩𑁆𑀩𑁂𑀞𑀺𑀬𑀦𑁆𑀢𑀺 𑀤𑁄𑀲𑀢𑁄 𑀫𑁄𑀘𑀦𑁂𑀦 𑀫𑁄𑀘𑀦𑀁. 𑀙𑁂𑀤𑁂𑀦 𑀙𑁂𑀤𑀦𑁆𑀢𑀺 𑀏𑀯𑀫𑀸𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁.

𑁬𑁮. 𑀯𑀺𑀲𑁂𑀦𑀺𑀓𑀢𑁆𑀯𑀸𑀢𑀺 𑀓𑀺𑀮𑁂𑀲𑀲𑁂𑀦𑀁 𑀯𑀺𑀦𑀸𑀲𑁂𑀢𑁆𑀯𑀸. 𑀓𑀺𑀁 𑀮𑀪𑁂𑀣𑀸𑀢𑀺 𑀧𑀝𑀺𑀫𑀮𑁆𑀮𑀁 𑀓𑀺𑀁 𑀮𑀪𑀺𑀲𑁆𑀲𑀲𑀺. 𑀧𑀲𑀽𑀭𑀸𑀢𑀺 𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀮𑀧𑀢𑀺. 𑀬𑁂𑀲𑀻𑀥 𑀦𑀢𑁆𑀣𑀻𑀢𑀺 𑀬𑁂𑀲𑀁 𑀇𑀥 𑀦𑀢𑁆𑀣𑀺. 𑀇𑀫𑀸𑀬𑀧𑀺 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑁬𑁯. 𑀧𑀯𑀺𑀢𑀓𑁆𑀓𑀦𑁆𑀢𑀺 ‘‘𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 𑀯𑀺𑀢𑀓𑁆𑀓𑁂𑀦𑁆𑀢𑁄. 𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸𑀢𑀺 𑀥𑀼𑀢𑀓𑀺𑀮𑁂𑀲𑁂𑀦 𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀁 𑀲𑀫𑀸𑀧𑀦𑁆𑀦𑁄. 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂𑀢𑀺 𑀓𑁄𑀢𑁆𑀣𑀼𑀆𑀤𑀬𑁄 𑀯𑀺𑀬 𑀲𑀻𑀳𑀸𑀤𑀻𑀳𑀺 𑀥𑁄𑀦𑁂𑀦 𑀲𑀳 𑀬𑀼𑀕𑀁 𑀕𑀳𑁂𑀢𑁆𑀯𑀸 𑀏𑀓𑀧𑀤𑀫𑁆𑀧𑀺 𑀲𑀫𑁆𑀧𑀬𑀸𑀢𑀼𑀁 𑀬𑀼𑀕𑀕𑁆𑀕𑀸𑀳𑀫𑁂𑀯 𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀻𑀢𑀺.

𑀫𑀦𑁄𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀁. ‘‘𑀆𑀭𑀫𑁆𑀫𑀡𑀁 𑀫𑀺𑀦𑀫𑀸𑀦𑀁 𑀚𑀸𑀦𑀸𑀢𑀻’’𑀢𑀺 𑀫𑀦𑁄. 𑀫𑀸𑀦𑀲𑀦𑁆𑀢𑀺 𑀫𑀦𑁄 𑀏𑀯. ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄’’𑀢𑀺 (𑀫𑀳𑀸𑀯. 𑁩𑁩; 𑀲𑀁. 𑀦𑀺. 𑁧.𑁧𑁫𑁧) 𑀳𑀺 𑀏𑀢𑁆𑀣 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑁄 𑀫𑀸𑀦𑀲𑁄𑀢𑀺 𑀯𑀼𑀢𑁆𑀢𑁄.

‘‘𑀓𑀣𑀜𑁆𑀳𑀺 𑀪𑀕𑀯𑀸 𑀢𑀼𑀬𑁆𑀳𑀁, 𑀲𑀸𑀯𑀓𑁄 𑀲𑀸𑀲𑀦𑁂 𑀭𑀢𑁄;

𑀅𑀧𑁆𑀧𑀢𑁆𑀢𑀫𑀸𑀦𑀲𑁄 𑀲𑁂𑀓𑁆𑀔𑁄, 𑀓𑀸𑀮𑀁𑀓𑀬𑀺𑀭𑀸 𑀚𑀦𑁂𑀲𑀼𑀢𑀸’’𑀢𑀺. (𑀲𑀁. 𑀦𑀺. 𑁧.𑁧𑁫𑁯) 𑁋

𑀏𑀢𑁆𑀣 𑀅𑀭𑀳𑀢𑁆𑀢𑀁 𑀫𑀸𑀦𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀫𑀦𑁄𑀯 𑀫𑀸𑀦𑀲𑀁, 𑀩𑁆𑀬𑀜𑁆𑀚𑀦𑀯𑀲𑁂𑀦 𑀳𑁂𑀢𑀁 𑀧𑀤𑀁 𑀯𑀟𑁆𑀠𑀺𑀢𑀁.

𑀳𑀤𑀬𑀦𑁆𑀢𑀺 𑀘𑀺𑀢𑁆𑀢𑀁. ‘‘𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀻’’𑀢𑀺 (𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢; 𑀲𑀁. 𑀦𑀺. 𑁧.𑁨𑁩𑁭) 𑀏𑀢𑁆𑀣 𑀉𑀭𑁄 𑀳𑀤𑀬𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀳𑀤𑀬𑀸 𑀳𑀤𑀬𑀁 𑀫𑀜𑁆𑀜𑁂 𑀅𑀜𑁆𑀜𑀸𑀬 𑀢𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁬𑁩) 𑀏𑀢𑁆𑀣 𑀘𑀺𑀢𑁆𑀢𑀁. ‘‘𑀯𑀓𑁆𑀓𑀁 𑀳𑀤𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦; 𑀔𑀼. 𑀧𑀸. 𑁩.𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭) 𑀏𑀢𑁆𑀣 𑀳𑀤𑀬𑀯𑀢𑁆𑀣𑀼. 𑀇𑀥 𑀧𑀦 𑀘𑀺𑀢𑁆𑀢𑀫𑁂𑀯 𑀅𑀩𑁆𑀪𑀦𑁆𑀢𑀭𑀝𑁆𑀞𑁂𑀦 ‘‘𑀳𑀤𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀧𑀡𑁆𑀟𑀭𑀁, 𑀪𑀯𑀗𑁆𑀕𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀣𑀸𑀳 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺 (𑀅. 𑀦𑀺. 𑁧.𑁪𑁯). 𑀢𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀦 𑀅𑀓𑀼𑀲𑀮𑀫𑁆𑀧𑀺 𑀕𑀗𑁆𑀕𑀸𑀬 𑀦𑀺𑀓𑁆𑀔𑀦𑁆𑀢𑀸 𑀦𑀤𑀻 𑀕𑀗𑁆𑀕𑀸 𑀯𑀺𑀬 𑀕𑁄𑀥𑀸𑀯𑀭𑀺𑀢𑁄 𑀦𑀺𑀓𑁆𑀔𑀦𑁆𑀢𑀸 𑀕𑁄𑀥𑀸𑀯𑀭𑀺 𑀯𑀺𑀬 𑀘 ‘‘𑀧𑀡𑁆𑀟𑀭’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁.

𑀫𑀦𑁄 𑀫𑀦𑀸𑀬𑀢𑀦𑀦𑁆𑀢𑀺 𑀇𑀥 𑀧𑀦 𑀫𑀦𑁄𑀕𑀳𑀡𑀁 𑀫𑀦𑀲𑁆𑀲𑁂𑀯 𑀆𑀬𑀢𑀦𑀪𑀸𑀯𑀤𑀻𑀧𑀦𑀢𑁆𑀣𑀁. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 ‘‘𑀦𑀬𑀺𑀤𑀁 𑀤𑁂𑀯𑀸𑀬𑀢𑀦𑀁 𑀯𑀺𑀬 𑀫𑀦𑀲𑁆𑀲 𑀆𑀬𑀢𑀦𑀢𑁆𑀢𑀸 𑀫𑀦𑀸𑀬𑀢𑀦𑀁, 𑀅𑀣 𑀔𑁄 𑀫𑀦𑁄 𑀏𑀯 𑀆𑀬𑀢𑀦𑀁 𑀫𑀦𑀸𑀬𑀢𑀦’’𑀦𑁆𑀢𑀺. 𑀢𑀢𑁆𑀣 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦 𑀘 𑀆𑀬𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀮𑁄𑀓𑁂 ‘‘𑀇𑀲𑁆𑀲𑀭𑀸𑀬𑀢𑀦𑀁 𑀯𑀸𑀲𑀼𑀤𑁂𑀯𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀼𑀯𑀡𑁆𑀡𑀸𑀬𑀢𑀦𑀁 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄. 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁩𑁮) 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁄. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁦𑁨; 𑀫. 𑀦𑀺. 𑁩.𑁧𑁫𑁮) 𑀓𑀸𑀭𑀡𑀁. 𑀇𑀥 𑀧𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦𑀸𑀢𑀺 𑀢𑀺𑀥𑀸𑀧𑀺 𑀯𑀝𑁆𑀝𑀢𑀺.

𑀨𑀲𑁆𑀲𑀸𑀤𑀬𑁄 𑀳𑀺 𑀥𑀫𑁆𑀫𑀸 𑀏𑀢𑁆𑀣 𑀲𑀜𑁆𑀚𑀸𑀬𑀦𑁆𑀢𑀻𑀢𑀺 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦𑀧𑀺 𑀏𑀢𑀁 𑀆𑀬𑀢𑀦𑀁. 𑀩𑀳𑀺𑀤𑁆𑀥𑀸 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀆𑀭𑀫𑁆𑀫𑀡𑀪𑀸𑀯𑁂𑀦𑁂𑀢𑁆𑀣 𑀑𑀲𑀭𑀦𑁆𑀢𑀻𑀢𑀺 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦𑀧𑀺 𑀆𑀬𑀢𑀦𑀁. 𑀨𑀲𑁆𑀲𑀸𑀤𑀻𑀦𑀁 𑀧𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀢𑁆𑀢𑀸 𑀓𑀸𑀭𑀡𑀝𑁆𑀞𑁂𑀦𑀸𑀧𑀺 𑀆𑀬𑀢𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀯𑀺𑀜𑁆𑀜𑀸𑀡𑀫𑁂𑀯 𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀢𑀲𑁆𑀲 𑀭𑀸𑀲𑀺𑀆𑀤𑀺𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 (𑀅. 𑀦𑀺. 𑁪.𑁫𑁧) 𑀏𑀢𑁆𑀣 𑀳𑀺 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑁄 𑀯𑀼𑀢𑁆𑀢𑁄. ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁫𑁫) 𑀕𑀼𑀡𑀝𑁆𑀞𑁂𑀦. ‘‘𑀅𑀤𑁆𑀤𑀲 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁪𑁧) 𑀏𑀢𑁆𑀣 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀝𑁆𑀞𑁂𑀦. 𑀇𑀥 𑀧𑀦 𑀭𑀽𑀴𑁆𑀳𑀺𑀢𑁄 𑀔𑀦𑁆𑀥𑁄 𑀯𑀼𑀢𑁆𑀢𑁄. 𑀭𑀸𑀲𑀝𑁆𑀞𑁂𑀦 𑀳𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀏𑀓𑀤𑁂𑀲𑁄 𑀏𑀓𑀁 𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀸 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀏𑀓𑀤𑁂𑀲𑀁 𑀙𑀺𑀦𑁆𑀤𑀦𑁆𑀢𑁄 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀏𑀓𑀤𑁂𑀲𑀪𑀽𑀢𑀁 𑀏𑀓𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀭𑀽𑀴𑁆𑀳𑀺𑀢𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀯𑀼𑀢𑁆𑀢𑀁.

𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀢𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀤𑁂 𑀏𑀓𑀫𑁂𑀯 𑀘𑀺𑀢𑁆𑀢𑀁 𑀫𑀺𑀦𑀦𑀝𑁆𑀞𑁂𑀦 𑀫𑀦𑁄, 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀁, 𑀲𑀪𑀸𑀯𑀝𑁆𑀞𑁂𑀦 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀯𑀸 𑀥𑀸𑀢𑀽𑀢𑀺 𑀢𑀻𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑀁.

𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀦𑁆𑀢𑀺 𑀏𑀓𑀧𑁆𑀧𑀳𑀸𑀭𑁂𑀦 𑀲𑀤𑁆𑀥𑀺𑀁. 𑀲𑀫𑁆𑀫𑀸𑀕𑀦𑁆𑀢𑁆𑀯𑀸𑀢𑀺 𑀧𑀸𑀧𑀼𑀡𑀺𑀢𑁆𑀯𑀸. 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑁆𑀯𑀸𑀢𑀺 𑀬𑀼𑀕𑀧𑀝𑀺𑀪𑀸𑀕𑀁 𑀕𑀳𑁂𑀢𑁆𑀯𑀸. 𑀲𑀸𑀓𑀘𑁆𑀙𑁂𑀢𑀼𑀦𑁆𑀢𑀺 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁. 𑀲𑀮𑁆𑀮𑀧𑀺𑀢𑀼𑀦𑁆𑀢𑀺 𑀅𑀮𑁆𑀮𑀸𑀧𑀲𑀮𑁆𑀮𑀸𑀧𑀁 𑀓𑀸𑀢𑀼𑀁. 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀺𑀢𑀼𑀦𑁆𑀢𑀺 𑀲𑀤𑁆𑀥𑀺𑀁 𑀓𑀣𑀦𑀁 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀦 𑀧𑀝𑀺𑀩𑀮𑀪𑀸𑀯𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀓𑀺𑀲𑁆𑀲𑀳𑁂𑀢𑀼, 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀳𑀻𑀦𑁄’’𑀢𑀺𑀆𑀤𑀺𑀫𑀸𑀳. 𑀲𑁄 𑀳𑀺 𑀪𑀕𑀯𑀸 𑀅𑀕𑁆𑀕𑁄 𑀘𑀸𑀢𑀺 𑀅𑀲𑀤𑀺𑀲𑀤𑀸𑀦𑀅𑀕𑁆𑀕𑀢𑁆𑀢𑀸 𑀅𑀲𑀫𑀸𑀦𑀧𑀜𑁆𑀜𑀢𑁆𑀢𑀸 𑀅𑀕𑁆𑀕𑁄 𑀘. 𑀲𑁂𑀝𑁆𑀞𑁄 𑀘𑀸𑀢𑀺 𑀲𑀩𑁆𑀩𑀕𑀼𑀡𑁂𑀳𑀺 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀲𑁂𑀝𑁆𑀞𑁄 𑀘. 𑀫𑁄𑀓𑁆𑀔𑁄 𑀘𑀸𑀢𑀺 𑀲𑀯𑀸𑀲𑀦𑁂𑀳𑀺 𑀓𑀺𑀮𑁂𑀲𑁂𑀳𑀺 𑀫𑀼𑀢𑁆𑀢𑀢𑁆𑀢𑀸 𑀫𑁄𑀓𑁆𑀔𑁄 𑀘. 𑀉𑀢𑁆𑀢𑀫𑁄 𑀘𑀸𑀢𑀺 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀯𑀺𑀭𑀳𑀺𑀢𑀢𑁆𑀢𑀸 𑀉𑀢𑁆𑀢𑀫𑁄 𑀘. 𑀧𑀯𑀭𑁄 𑀘𑀸𑀢𑀺 𑀲𑀩𑁆𑀩𑀮𑁄𑀓𑁂𑀦 𑀅𑀪𑀺𑀧𑀢𑁆𑀣𑀦𑀻𑀬𑀢𑁆𑀢𑀸 𑀧𑀯𑀭𑁄 𑀘. 𑀫𑀢𑁆𑀢𑁂𑀦 𑀫𑀸𑀢𑀗𑁆𑀕𑁂𑀦𑀸𑀢𑀺 𑀧𑀪𑀺𑀦𑁆𑀦𑀫𑀤𑁂𑀦 𑀳𑀢𑁆𑀣𑀺𑀦𑀸.

𑀓𑁄𑀢𑁆𑀣𑀼𑀓𑁄𑀢𑀺 𑀚𑀺𑀭𑀡𑀲𑀺𑀗𑁆𑀕𑀸𑀮𑁄. 𑀲𑀻𑀳𑁂𑀦 𑀫𑀺𑀕𑀭𑀜𑁆𑀜𑀸 𑀲𑀤𑁆𑀥𑀺𑀦𑁆𑀢𑀺 𑀓𑁂𑀲𑀭𑀲𑀻𑀳𑁂𑀦 𑀫𑀺𑀕𑀭𑀸𑀚𑁂𑀦 𑀲𑀳. 𑀢𑀭𑀼𑀡𑀓𑁄𑀢𑀺 𑀙𑀸𑀧𑀓𑁄. 𑀥𑁂𑀦𑀼𑀧𑀓𑁄𑀢𑀺 𑀔𑀻𑀭𑀧𑀓𑁄. 𑀉𑀲𑀪𑁂𑀦𑀸𑀢𑀺 𑀫𑀗𑁆𑀕𑀮𑀲𑀫𑁆𑀫𑀢𑁂𑀦 𑀉𑀲𑀪𑁂𑀦. 𑀘𑀮𑀓𑀓𑀼𑀦𑀸 𑀲𑀤𑁆𑀥𑀺𑀦𑁆𑀢𑀺 𑀘𑀮𑀫𑀸𑀦𑀓𑀓𑀼𑀦𑀸 𑀲𑀤𑁆𑀥𑀺𑀁. 𑀥𑀗𑁆𑀓𑁄𑀢𑀺 𑀓𑀸𑀓𑁄. 𑀕𑀭𑀼𑀴𑁂𑀦 𑀯𑁂𑀦𑀢𑁂𑀬𑁆𑀬𑁂𑀦 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣 𑀕𑀭𑀼𑀴𑁂𑀦𑀸𑀢𑀺 𑀚𑀸𑀢𑀺𑀯𑀲𑁂𑀦 𑀦𑀸𑀫𑀁. 𑀯𑁂𑀦𑀢𑁂𑀬𑁆𑀬𑁂𑀦𑀸𑀢𑀺 𑀕𑁄𑀢𑁆𑀢𑀯𑀲𑁂𑀦. 𑀘𑀡𑁆𑀟𑀸𑀮𑁄𑀢𑀺 𑀙𑀯𑀘𑀡𑁆𑀟𑀸𑀮𑁄. 𑀭𑀜𑁆𑀜𑀸 𑀘𑀓𑁆𑀓𑀯𑀢𑁆𑀢𑀺𑀦𑀸𑀢𑀺 𑀘𑀸𑀢𑀼𑀤𑁆𑀤𑀻𑀧𑀺𑀓𑀘𑀓𑁆𑀓𑀯𑀢𑁆𑀢𑀺𑀦𑀸. 𑀧𑀁𑀲𑀼𑀧𑀺𑀲𑀸𑀘𑀓𑁄𑀢𑀺 𑀓𑀘𑀯𑀭𑀙𑀟𑁆𑀟𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀓𑁄 𑀬𑀓𑁆𑀔𑁄. 𑀇𑀦𑁆𑀤𑁂𑀦 𑀤𑁂𑀯𑀭𑀜𑁆𑀜𑀸 𑀲𑀤𑁆𑀥𑀺𑀦𑁆𑀢𑀺 𑀲𑀓𑁆𑀓𑁂𑀦 𑀤𑁂𑀯𑀭𑀸𑀚𑁂𑀦 𑀲𑀳. 𑀲𑁄 𑀳𑀺 𑀪𑀕𑀯𑀸 𑀫𑀳𑀸𑀧𑀜𑁆𑀜𑁄𑀢𑀺𑀆𑀤𑀻𑀦𑀺 𑀙𑀧𑁆𑀧𑀤𑀸𑀦𑀺 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀢𑀢𑁆𑀣 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄𑀢𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀯𑀺𑀓𑀧𑁆𑀧𑁂 𑀧𑀜𑁆𑀜𑀸𑀪𑁂𑀤𑁂 𑀙𑁂𑀓𑁄. 𑀧𑀪𑀺𑀦𑁆𑀦𑀜𑀸𑀡𑁄𑀢𑀺 𑀅𑀦𑀦𑁆𑀢𑀧𑁆𑀧𑀪𑁂𑀤𑀧𑀢𑁆𑀢𑀜𑀸𑀡𑁄. 𑀏𑀢𑁂𑀦 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑀢𑁆𑀢𑁂𑀧𑀺 𑀲𑀢𑀺 𑀢𑀸𑀲𑀁 𑀧𑀜𑁆𑀜𑀸𑀦𑀁 𑀅𑀦𑀦𑁆𑀢𑀪𑁂𑀤𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄𑀢𑀺 𑀧𑀝𑀺𑀮𑀤𑁆𑀥𑀅𑀕𑁆𑀕𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀜𑀸𑀡𑁄. 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄𑀢𑀺 𑀘𑀢𑁆𑀢𑀸𑀭𑀺 𑀯𑀺𑀲𑀸𑀭𑀤𑀪𑀸𑀯𑀲𑀗𑁆𑀔𑀸𑀢𑀸𑀦𑀺 𑀜𑀸𑀡𑀸𑀦𑀺 𑀧𑀢𑁆𑀢𑁄. 𑀬𑀣𑀸𑀳 𑁋

‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 ‘𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’𑀢𑀺, 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀏𑀢𑀫𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀫𑀺𑀢𑁆𑀢𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀔𑁂𑀫𑀧𑁆𑀧𑀢𑁆𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀺.

‘‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 ‘𑀇𑀫𑁂 𑀆𑀲𑀯𑀸 𑀅𑀧𑀭𑀺𑀓𑁆𑀔𑀻𑀡𑀸’𑀢𑀺…𑀧𑁂… ‘𑀬𑁂 𑀔𑁄 𑀧𑀦 𑀢𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺…𑀧𑁂… 𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺, 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀏𑀢𑀫𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀫𑀺𑀢𑁆𑀢𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀔𑁂𑀫𑀧𑁆𑀧𑀢𑁆𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀻’’𑀢𑀺 (𑀅. 𑀦𑀺. 𑁪.𑁮; 𑀫. 𑀦𑀺. 𑁧.𑁧𑁫𑁦).

𑀤𑀲𑀩𑀮𑀩𑀮𑀥𑀸𑀭𑀻𑀢𑀺 𑀤𑀲 𑀩𑀮𑀸𑀦𑀺 𑀏𑀢𑁂𑀲𑀦𑁆𑀢𑀺 𑀤𑀲𑀩𑀮𑀸, 𑀤𑀲𑀩𑀮𑀸𑀦𑀁 𑀩𑀮𑀸𑀦𑀺 𑀤𑀲𑀩𑀮𑀩𑀮𑀸𑀦𑀺, 𑀢𑀸𑀦𑀺 𑀤𑀲𑀩𑀮𑀩𑀮𑀸𑀦𑀺 𑀥𑀸𑀭𑀬𑀢𑀻𑀢𑀺 𑀤𑀲𑀩𑀮𑀩𑀮𑀥𑀸𑀭𑀻, 𑀤𑀲𑀩𑀮𑀜𑀸𑀡𑀩𑀮𑀥𑀸𑀭𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀳𑀺 𑀢𑀻𑀳𑀺 𑀯𑀘𑀦𑁂𑀳𑀺 𑀅𑀦𑀦𑁆𑀢𑀧𑁆𑀧𑀪𑁂𑀤𑀸𑀦𑀁 𑀦𑁂𑀬𑁆𑀬𑀸𑀦𑀁 𑀧𑀪𑁂𑀤𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀲𑁄𑀬𑁂𑀯 𑀧𑀜𑁆𑀜𑀸𑀧𑀬𑁄𑀕𑀯𑀲𑁂𑀦 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀝𑁆𑀞𑁂𑀦 𑀧𑀼𑀭𑀺𑀲𑀸𑀲𑀪𑁄. 𑀅𑀲𑀦𑁆𑀢𑀸𑀲𑀝𑁆𑀞𑁂𑀦 𑀧𑀼𑀭𑀺𑀲𑀲𑀻𑀳𑁄. 𑀫𑀳𑀦𑁆𑀢𑀝𑁆𑀞𑁂𑀦 𑀧𑀼𑀭𑀺𑀲𑀦𑀸𑀕𑁄. 𑀧𑀚𑀸𑀦𑀦𑀝𑁆𑀞𑁂𑀦 𑀧𑀼𑀭𑀺𑀲𑀸𑀚𑀜𑁆𑀜𑁄. 𑀮𑁄𑀓𑀓𑀺𑀘𑁆𑀘𑀥𑀼𑀭𑀯𑀳𑀦𑀝𑁆𑀞𑁂𑀦 𑀧𑀼𑀭𑀺𑀲𑀥𑁄𑀭𑀬𑁆𑀳𑁄.

𑀅𑀣 𑀢𑁂𑀚𑀸𑀤𑀺𑀓𑀁 𑀅𑀦𑀦𑁆𑀢𑀜𑀸𑀡𑀢𑁄 𑀮𑀤𑁆𑀥𑀁 𑀕𑀼𑀡𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀢𑁂𑀲𑀁 𑀢𑁂𑀚𑀸𑀤𑀻𑀦𑀁 𑀅𑀦𑀦𑁆𑀢𑀜𑀸𑀡𑀫𑀽𑀮𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀦𑁆𑀢𑀜𑀸𑀡𑁄’’𑀢𑀺 𑀯𑀢𑁆𑀯𑀸 ‘‘𑀅𑀦𑀦𑁆𑀢𑀢𑁂𑀚𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀦𑁆𑀢𑀜𑀸𑀡𑁄𑀢𑀺 𑀕𑀡𑀦𑀯𑀲𑁂𑀦 𑀘 𑀧𑀪𑀸𑀯𑀯𑀲𑁂𑀦 𑀘 𑀅𑀦𑁆𑀢𑀯𑀺𑀭𑀳𑀺𑀢𑀜𑀸𑀡𑁄. 𑀅𑀦𑀦𑁆𑀢𑀢𑁂𑀚𑁄𑀢𑀺 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀫𑁄𑀳𑀢𑀫𑀯𑀺𑀥𑀫𑀦𑁂𑀦 𑀅𑀦𑀦𑁆𑀢𑀜𑀸𑀡𑀢𑁂𑀚𑁄. 𑀅𑀦𑀦𑁆𑀢𑀬𑀲𑁄𑀢𑀺 𑀧𑀜𑁆𑀜𑀸𑀕𑀼𑀡𑁂𑀳𑁂𑀯 𑀮𑁄𑀓𑀢𑁆𑀢𑀬𑀯𑀺𑀢𑁆𑀣𑀢𑀸𑀦𑀦𑁆𑀢𑀓𑀺𑀢𑁆𑀢𑀺𑀖𑁄𑀲𑁄. 𑀅𑀟𑁆𑀠𑁄𑀢𑀺 𑀧𑀜𑁆𑀜𑀸𑀥𑀦𑀲𑀫𑀺𑀤𑁆𑀥𑀺𑀬𑀸 𑀲𑀫𑀺𑀤𑁆𑀥𑁄. 𑀫𑀳𑀤𑁆𑀥𑀦𑁄𑀢𑀺 𑀧𑀜𑁆𑀜𑀸𑀥𑀦𑀯𑀟𑁆𑀠𑀢𑁆𑀢𑁂𑀧𑀺 𑀧𑀪𑀸𑀯𑀫𑀳𑀢𑁆𑀢𑁂𑀦 𑀫𑀳𑀦𑁆𑀢𑀁 𑀧𑀯𑀢𑁆𑀢𑀧𑀜𑁆𑀜𑀸𑀥𑀦𑀫𑀲𑁆𑀲𑀸𑀢𑀺 𑀫𑀳𑀤𑁆𑀥𑀦𑁄. ‘‘𑀫𑀳𑀸𑀥𑀦𑁄’’𑀢𑀺 𑀯𑀸 𑀧𑀸𑀞𑁄. 𑀥𑀦𑀯𑀸𑀢𑀺 𑀧𑀲𑀁𑀲𑀺𑀢𑀩𑁆𑀩𑀧𑀜𑁆𑀜𑀸𑀥𑀦𑀯𑀢𑁆𑀢𑀸 𑀦𑀺𑀘𑁆𑀘𑀬𑀼𑀢𑁆𑀢𑀧𑀜𑁆𑀜𑀸𑀥𑀦𑀯𑀢𑁆𑀢𑀸 𑀅𑀢𑀺𑀲𑀬𑀪𑀸𑀯𑁂𑀦 𑀧𑀜𑁆𑀜𑀸𑀥𑀦𑀯𑀢𑁆𑀢𑀸 𑀥𑀦𑀯𑀸. 𑀏𑀢𑁂𑀲𑀼𑀧𑀺 𑀳𑀺 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀇𑀤𑀁 𑀯𑀘𑀦𑀁 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀺.

𑀏𑀯𑀁 𑀧𑀜𑁆𑀜𑀸𑀕𑀼𑀡𑁂𑀦 𑀪𑀕𑀯𑀢𑁄 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀧𑀜𑁆𑀜𑀸𑀕𑀼𑀡𑁂𑀦𑁂𑀯 𑀮𑁄𑀓𑀳𑀺𑀢𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑁂𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀦𑁂𑀬𑁆𑀬𑁂 𑀲𑀁𑀲𑀸𑀭𑀲𑀗𑁆𑀔𑀸𑀢𑀪𑀬𑀝𑁆𑀞𑀸𑀦𑀢𑁄 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀔𑁂𑀫𑀝𑁆𑀞𑀸𑀦𑀁 𑀦𑁂𑀢𑀸. 𑀢𑀢𑁆𑀣 𑀦𑀬𑀦𑀓𑀸𑀮𑁂 𑀏𑀯 𑀲𑀁𑀯𑀭𑀯𑀺𑀦𑀬𑀧𑀳𑀸𑀦𑀯𑀺𑀦𑀬𑀯𑀲𑁂𑀦 𑀯𑁂𑀦𑁂𑀬𑁆𑀬𑁂 𑀯𑀺𑀦𑁂𑀢𑀸. 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀏𑀯 𑀲𑀁𑀲𑀬𑀘𑁆𑀙𑁂𑀤𑀦𑁂𑀦 𑀅𑀦𑀼𑀦𑁂𑀢𑀸. 𑀲𑀁𑀲𑀬𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀜𑁆𑀜𑀸𑀧𑁂𑀢𑀩𑁆𑀩𑀁 𑀅𑀢𑁆𑀣𑀁 𑀧𑀜𑁆𑀜𑀸𑀧𑁂𑀢𑀸. 𑀢𑀣𑀸 𑀧𑀜𑁆𑀜𑀸𑀧𑀺𑀢𑀸𑀦𑀁 𑀦𑀺𑀘𑁆𑀙𑀬𑀓𑀭𑀡𑁂𑀦 𑀦𑀺𑀚𑁆𑀛𑀸𑀧𑁂𑀢𑀸. 𑀢𑀣𑀸 𑀦𑀺𑀚𑁆𑀛𑀸𑀧𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀝𑀺𑀧𑀢𑁆𑀢𑀺𑀧𑀬𑁄𑀚𑀦𑀯𑀲𑁂𑀦 𑀧𑁂𑀓𑁆𑀔𑁂𑀢𑀸. 𑀢𑀣𑀸𑀧𑀝𑀺𑀧𑀦𑁆𑀦𑁂 𑀧𑀝𑀺𑀧𑀢𑁆𑀢𑀺𑀩𑀮𑁂𑀦 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸𑀢𑀺 𑀏𑀢𑁆𑀣 𑀳𑀺-𑀓𑀸𑀭𑁄 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀓𑀸𑀭𑀡𑁄𑀧𑀤𑁂𑀲𑁂 𑀦𑀺𑀧𑀸𑀢𑁄.

𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸𑀢𑀺 𑀲𑀓𑀲𑀦𑁆𑀢𑀸𑀦𑁂 𑀦𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀲𑁆𑀲 𑀙𑀅𑀲𑀸𑀥𑀸𑀭𑀡𑀜𑀸𑀡𑀳𑁂𑀢𑀼𑀪𑀽𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀩𑁄𑀥𑀺𑀫𑀽𑀮𑁂 𑀮𑁄𑀓𑀳𑀺𑀢𑀢𑁆𑀣𑀁 𑀲𑀓𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀢𑀸. 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸𑀢𑀺 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀅𑀲𑀜𑁆𑀚𑀸𑀢𑀧𑀼𑀩𑁆𑀩𑀲𑁆𑀲 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀳𑁂𑀢𑀼𑀪𑀽𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄 𑀧𑀪𑀼𑀢𑀺 𑀬𑀸𑀯𑀚𑁆𑀚𑀓𑀸𑀮𑀸 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀲𑀜𑁆𑀚𑀦𑁂𑀢𑀸. 𑀲𑀸𑀯𑀓𑀯𑁂𑀦𑁂𑀬𑁆𑀬𑀸𑀦𑀫𑁆𑀧𑀺 𑀳𑀺 𑀲𑀦𑁆𑀢𑀸𑀦𑁂 𑀪𑀕𑀯𑀢𑀸 𑀯𑀼𑀢𑁆𑀢𑀯𑀘𑀦𑁂𑀦𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑀦𑀢𑁄 𑀪𑀕𑀯𑀸 𑀲𑀜𑁆𑀚𑀦𑁂𑀢𑀸 𑀦𑀸𑀫 𑀳𑁄𑀢𑀺. 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸𑀢𑀺 𑀅𑀝𑁆𑀞𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸𑀦𑀁 𑀩𑀼𑀤𑁆𑀥𑀪𑀸𑀯𑀸𑀬 𑀓𑀣𑀸𑀪𑀺𑀦𑀻𑀳𑀸𑀭𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑀼𑀤𑁆𑀥𑀪𑀸𑀯𑀸𑀬 𑀩𑁆𑀬𑀸𑀓𑀭𑀡𑀁 𑀤𑀢𑁆𑀯𑀸 𑀅𑀦𑀓𑁆𑀔𑀸𑀢𑀧𑀼𑀩𑁆𑀩𑀲𑁆𑀲 𑀧𑀸𑀭𑀫𑀺𑀢𑀸𑀫𑀕𑁆𑀕𑀲𑁆𑀲 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀡𑀫𑀢𑁆𑀢𑁂𑀦𑁂𑀯 𑀩𑁄𑀥𑀺𑀫𑀽𑀮𑁂 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸. 𑀅𑀬𑀁 𑀦𑀬𑁄 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀩𑁆𑀬𑀸𑀓𑀭𑀡𑁂𑀧𑀺 𑀮𑀩𑁆𑀪𑀢𑀺𑀬𑁂𑀯. 𑀫𑀕𑁆𑀕𑀜𑁆𑀜𑀽𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑁂𑀦 𑀅𑀢𑁆𑀢𑀦𑁄 𑀉𑀧𑁆𑀧𑀸𑀤𑀺𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀜𑀸𑀢𑀸. 𑀫𑀕𑁆𑀕𑀯𑀺𑀤𑀽𑀢𑀺 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀚𑀦𑁂𑀢𑀩𑁆𑀩𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀓𑀼𑀲𑀮𑁄. 𑀫𑀕𑁆𑀕𑀓𑁄𑀯𑀺𑀤𑁄𑀢𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀓𑁆𑀔𑀸𑀢𑀩𑁆𑀩𑀫𑀕𑁆𑀕𑁂 𑀯𑀺𑀘𑀓𑁆𑀔𑀡𑁄. 𑀅𑀣 𑀯𑀸 𑀅𑀪𑀺𑀲𑀫𑁆𑀩𑁄𑀥𑀺𑀧𑀝𑀺𑀧𑀢𑁆𑀢𑀺 𑀫𑀕𑁆𑀕𑀜𑁆𑀜𑀽, 𑀧𑀘𑁆𑀘𑁂𑀓𑀩𑁄𑀥𑀺𑀧𑀝𑀺𑀧𑀢𑁆𑀢𑀺 𑀫𑀕𑁆𑀕𑀯𑀺𑀤𑀽, 𑀲𑀸𑀯𑀓𑀩𑁄𑀥𑀺𑀧𑀝𑀺𑀧𑀢𑁆𑀢𑀺 𑀫𑀕𑁆𑀕𑀓𑁄𑀯𑀺𑀤𑁄. 𑀅𑀣 𑀯𑀸 𑁋

‘‘𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂,

𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺. (𑀲𑀁. 𑀦𑀺. 𑁫.𑁪𑁦𑁯) 𑁋

𑀯𑀘𑀦𑀢𑁄 𑀬𑀣𑀸𑀬𑁄𑀕𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀫𑀕𑁆𑀕𑀯𑀲𑁂𑀦 𑀘 𑀲𑀼𑀜𑁆𑀜𑀢𑀸𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀯𑀲𑁂𑀦 𑀘 𑀉𑀕𑁆𑀖𑀝𑀺𑀢𑀜𑁆𑀜𑀽𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀁 𑀫𑀕𑁆𑀕𑀯𑀲𑁂𑀦 𑀘 𑀬𑀣𑀸𑀓𑁆𑀓𑀫𑁂𑀦𑁂𑀢𑁆𑀣 𑀬𑁄𑀚𑀦𑀁 𑀓𑀭𑁄𑀦𑁆𑀢𑀺. 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦𑀲𑁆𑀲𑀸𑀢𑀺 𑀪𑀕𑀯𑀢𑁄 𑀕𑀢𑀫𑀕𑁆𑀕𑀸𑀦𑀼𑀕𑀸𑀫𑀺𑀦𑁄 𑀳𑀼𑀢𑁆𑀯𑀸. 𑀏𑀢𑁆𑀣 𑀘-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀏𑀢𑁂𑀦 𑀘 𑀪𑀕𑀯𑀢𑀸 𑀫𑀕𑁆𑀕𑀼𑀧𑁆𑀧𑀸𑀤𑀦𑀸𑀤𑀺𑀕𑀼𑀡𑀸𑀥𑀺𑀕𑀫𑀸𑀬 𑀳𑁂𑀢𑀼 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀦-𑀲𑀤𑁆𑀤𑁄 𑀓𑀢𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀪𑀕𑀯𑀢𑀸 𑀓𑀢𑀫𑀕𑁆𑀕𑀓𑀭𑀡𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀧𑀞𑀫𑀁 𑀕𑀢𑀲𑁆𑀲 𑀪𑀕𑀯𑀢𑁄 𑀧𑀘𑁆𑀙𑀸 𑀲𑀻𑀮𑀸𑀤𑀺𑀕𑀼𑀡𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀇𑀢𑀺 𑀣𑁂𑀭𑁄 ‘‘𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’’𑀢𑀺𑀆𑀤𑀻𑀳𑀺 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀪𑀕𑀯𑀢𑁄 𑀲𑀻𑀮𑀸𑀤𑀬𑁄 𑀕𑀼𑀡𑀸 𑀅𑀭𑀳𑀢𑁆𑀢𑀫𑀕𑁆𑀕𑀫𑁂𑀯 𑀦𑀺𑀲𑁆𑀲𑀸𑀬 𑀆𑀕𑀢𑀸, 𑀢𑀲𑁆𑀫𑀸 𑀅𑀭𑀳𑀢𑁆𑀢𑀫𑀕𑁆𑀕𑀫𑁂𑀯 𑀦𑀺𑀲𑁆𑀲𑀸𑀬 𑀕𑀼𑀡𑀁 𑀓𑀣𑁂𑀲𑀺.

𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀁 𑀚𑀸𑀦𑀸𑀢𑀺, 𑀲𑀩𑁆𑀩𑀜𑁆𑀜𑀼𑀢𑀸𑀬 𑀬𑀁𑀓𑀺𑀜𑁆𑀘𑀺 𑀧𑀜𑁆𑀜𑀸𑀬 𑀚𑀸𑀦𑀺𑀢𑀩𑁆𑀩𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀧𑀜𑁆𑀘𑀦𑁂𑀬𑁆𑀬𑀧𑀣𑀪𑀽𑀢𑀁 𑀧𑀜𑁆𑀜𑀸𑀬 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀢𑀁𑀬𑁂𑀯 𑀦𑁂𑀬𑁆𑀬𑀧𑀣𑀁 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁 𑀯𑀺𑀬 𑀓𑀭𑁄𑀦𑁆𑀢𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀯𑀸 𑀏𑀓𑀘𑁆𑀘𑁄 𑀯𑀺𑀧𑀭𑀻𑀢𑀁 𑀕𑀡𑁆𑀳𑀦𑁆𑀢𑁄 𑀚𑀸𑀦𑀦𑁆𑀢𑁄𑀧𑀺 𑀦 𑀚𑀸𑀦𑀸𑀢𑀺, 𑀧𑀲𑁆𑀲𑀦𑁆𑀢𑁄𑀧𑀺 𑀦 𑀧𑀲𑁆𑀲𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀬𑀣𑀸𑀲𑀪𑀸𑀯𑀁 𑀕𑀡𑁆𑀳𑀦𑁆𑀢𑁄 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺𑀬𑁂𑀯, 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀺𑀬𑁂𑀯. 𑀲𑁆𑀯𑀸𑀬𑀁 𑀦𑀬𑀦 𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼𑀪𑀽𑀢𑁄. 𑀯𑀺𑀤𑀺𑀢𑀢𑀸𑀤𑀺𑀅𑀢𑁆𑀣𑁂𑀦 𑀜𑀸𑀡𑀪𑀽𑀢𑁄. 𑀅𑀯𑀺𑀧𑀭𑀻𑀢𑀲𑀪𑀸𑀯𑀝𑁆𑀞𑁂𑀦 𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑀯𑀢𑁆𑀢𑀦𑀢𑁄 𑀳𑀤𑀬𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸𑀘𑀸𑀬 𑀦𑀺𑀘𑁆𑀙𑀸𑀭𑀺𑀢𑀥𑀫𑁆𑀫𑀫𑀬𑁄𑀢𑀺 𑀯𑀸 𑀥𑀫𑁆𑀫𑀪𑀽𑀢𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑁄. 𑀅𑀣 𑀯𑀸 𑀘𑀓𑁆𑀔𑀼 𑀯𑀺𑀬 𑀪𑀽𑀢𑁄𑀢𑀺 𑀘𑀓𑁆𑀔𑀼𑀪𑀽𑀢𑁄. 𑀜𑀸𑀡𑀁 𑀯𑀺𑀬 𑀪𑀽𑀢𑁄𑀢𑀺 𑀜𑀸𑀡𑀪𑀽𑀢𑁄. 𑀅𑀯𑀺𑀧𑀭𑀻𑀢𑀥𑀫𑁆𑀫𑁄 𑀯𑀺𑀬 𑀪𑀽𑀢𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀩𑁆𑀭𑀳𑁆𑀫𑀸 𑀯𑀺𑀬 𑀪𑀽𑀢𑁄𑀢𑀺 𑀩𑁆𑀭𑀳𑁆𑀫𑀪𑀽𑀢𑁄. 𑀬𑁆𑀯𑀸𑀬𑀁 𑀥𑀫𑁆𑀫𑀲𑁆𑀲 𑀯𑀘𑀦𑀢𑁄 𑀯𑀢𑁆𑀢𑀦𑀢𑁄 𑀯𑀸 𑀯𑀢𑁆𑀢𑀸. 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀘𑀦𑀢𑁄 𑀯𑀢𑁆𑀢𑀦𑀢𑁄 𑀯𑀸 𑀧𑀯𑀢𑁆𑀢𑀸. 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀦𑀢𑁄 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸. 𑀅𑀫𑀢𑀸𑀥𑀺𑀕𑀫𑀸𑀬 𑀧𑀝𑀺𑀧𑀢𑁆𑀢𑀺𑀤𑁂𑀲𑀦𑀢𑁄, 𑀅𑀫𑀢𑀧𑁆𑀧𑀓𑀸𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀫𑀢𑀲𑁆𑀲 𑀅𑀥𑀺𑀕𑀫𑀸𑀧𑀦𑀢𑁄 𑀅𑀫𑀢𑀲𑁆𑀲 𑀤𑀸𑀢𑀸. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀺𑀢𑀢𑁆𑀢𑀸 𑀯𑁂𑀦𑁂𑀬𑁆𑀬𑀸𑀦𑀼𑀭𑀽𑀧𑁂𑀦 𑀬𑀣𑀸𑀲𑀼𑀔𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀤𑀸𑀦𑁂𑀦 𑀘 𑀥𑀫𑁆𑀫𑁂𑀲𑀼 𑀇𑀲𑁆𑀲𑀭𑁄𑀢𑀺 𑀥𑀫𑁆𑀫𑀲𑁆𑀲𑀸𑀫𑀻. 𑀢𑀣𑀸𑀕𑀢𑀧𑀤𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀁.

𑀇𑀤𑀸𑀦𑀺 ‘‘𑀚𑀸𑀦𑀁 𑀚𑀸𑀦𑀸𑀢𑀻’’𑀢𑀺𑀆𑀤𑀻𑀳𑀺 𑀯𑀼𑀢𑁆𑀢𑀕𑀼𑀡𑀁 𑀲𑀩𑁆𑀩𑀜𑁆𑀜𑀼𑀢𑀸𑀬 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀲𑀩𑁆𑀩𑀜𑁆𑀜𑀼𑀢𑀁 𑀲𑀸𑀥𑁂𑀦𑁆𑀢𑁄 ‘‘𑀦𑀢𑁆𑀣𑀻’’𑀢𑀺𑀆𑀤𑀺𑀫𑀸𑀳. 𑀏𑀯𑀁𑀪𑀽𑀢𑀲𑁆𑀲 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀧𑀸𑀭𑀫𑀺𑀢𑀸𑀧𑀼𑀜𑁆𑀜𑀨𑀮𑀧𑁆𑀧𑀪𑀸𑀯𑀦𑀺𑀧𑁆𑀨𑀦𑁆𑀦𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀲𑀯𑀸𑀲𑀦𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀯𑀺𑀳𑀢𑀢𑁆𑀢𑀸 𑀅𑀲𑀫𑁆𑀫𑁄𑀳𑀢𑁄 𑀲𑀩𑁆𑀩𑀥𑀫𑁆𑀫𑀸𑀦𑀁 𑀜𑀸𑀢𑀢𑁆𑀢𑀸 𑀅𑀜𑁆𑀜𑀸𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑀣𑁂𑀯 𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀘𑀓𑁆𑀔𑀼𑀦𑀸 𑀯𑀺𑀬 𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀢𑁆𑀢𑀸 𑀅𑀤𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀺. 𑀜𑀸𑀡𑁂𑀦 𑀧𑀢𑁆𑀢𑀢𑁆𑀢𑀸 𑀅𑀯𑀺𑀤𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀅𑀲𑀫𑁆𑀫𑁄𑀳𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀘𑁆𑀙𑀺𑀓𑀢𑀢𑁆𑀢𑀸 𑀅𑀲𑀘𑁆𑀙𑀺𑀓𑀢𑀁 𑀦𑀸𑀫 𑀦𑀢𑁆𑀣𑀺. 𑀅𑀲𑀫𑁆𑀫𑁄𑀳𑀧𑀜𑁆𑀜𑀸𑀬 𑀨𑀼𑀝𑁆𑀞𑀢𑁆𑀢𑀸 𑀧𑀜𑁆𑀜𑀸𑀬 𑀅𑀨𑀲𑁆𑀲𑀺𑀢𑀁 𑀦𑀸𑀫 𑀦𑀢𑁆𑀣𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀓𑀸𑀮𑀁 𑀯𑀸 𑀥𑀫𑁆𑀫𑀁 𑀯𑀸. 𑀉𑀧𑀸𑀤𑀸𑀬𑀸𑀢𑀺 𑀆𑀤𑀸𑀬, 𑀅𑀦𑁆𑀢𑁄𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀸𑀬𑀯𑀘𑀦𑁂𑀦𑁂𑀯 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺. ‘‘𑀅𑀢𑀻𑀢𑀸’’𑀤𑀺𑀯𑀘𑀦𑀸𑀦𑀺 𑀘 ‘‘𑀦𑀢𑁆𑀣𑀻’’𑀢𑀺𑀆𑀤𑀺𑀯𑀘𑀦𑁂𑀦𑁂𑀯 𑀖𑀝𑀺𑀬𑀦𑁆𑀢𑀺, ‘‘𑀲𑀩𑁆𑀩𑁂’’𑀢𑀺𑀆𑀤𑀺𑀯𑀘𑀦𑁂𑀦 𑀯𑀸. 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀲𑀩𑁆𑀩𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑀧𑀭𑀺𑀬𑀸𑀤𑀸𑀦𑀁. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀲𑀩𑁆𑀩𑀥𑀫𑁆𑀫𑁂𑀲𑀼 𑀏𑀓𑁂𑀓𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀅𑀦𑀺𑀘𑁆𑀘𑀸𑀓𑀸𑀭𑀸𑀤𑀺𑀲𑀩𑁆𑀩𑀸𑀓𑀸𑀭𑀧𑀭𑀺𑀬𑀸𑀤𑀸𑀦𑀁. 𑀜𑀸𑀡𑀫𑀼𑀔𑁂𑀢𑀺 𑀜𑀸𑀡𑀸𑀪𑀺𑀫𑀼𑀔𑁂. 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀑𑀲𑀭𑀡𑀁 𑀉𑀧𑁂𑀦𑁆𑀢𑀺. 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀧𑀤𑀁 𑀦𑁂𑀬𑁆𑀬𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀢𑁆𑀣𑀁 𑀯𑀼𑀢𑁆𑀢𑀁.

𑀅𑀢𑁆𑀢𑀢𑁆𑀣𑁄 𑀯𑀸𑀢𑀺𑀆𑀤𑀻𑀲𑀼 𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀅𑀢𑁆𑀢𑀢𑁆𑀣𑁄𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑁄. 𑀧𑀭𑀢𑁆𑀣𑁄𑀢𑀺 𑀧𑀭𑁂𑀲𑀁 𑀢𑀺𑀡𑁆𑀡𑀁 𑀮𑁄𑀓𑀸𑀦𑀁 𑀅𑀢𑁆𑀣𑁄. 𑀉𑀪𑀬𑀢𑁆𑀣𑁄𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘𑀸𑀢𑀺 𑀲𑀓𑀺𑀁𑀬𑁂𑀯 𑀉𑀪𑀺𑀦𑁆𑀦𑀁 𑀅𑀢𑁆𑀣𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀬𑀼𑀢𑁆𑀢𑁄, 𑀤𑀺𑀝𑁆𑀞𑀥𑀫𑁆𑀫𑀧𑁆𑀧𑀬𑁄𑀚𑀦𑁄 𑀯𑀸 𑀅𑀢𑁆𑀣𑁄. 𑀲𑀫𑁆𑀧𑀭𑀸𑀬𑁂 𑀦𑀺𑀬𑀼𑀢𑁆𑀢𑁄, 𑀲𑀫𑁆𑀧𑀭𑀸𑀬𑀧𑁆𑀧𑀬𑁄𑀚𑀦𑁄 𑀯𑀸 𑀲𑀫𑁆𑀧𑀭𑀸𑀬𑀺𑀓𑁄. 𑀉𑀢𑁆𑀢𑀸𑀦𑁄𑀢𑀺𑀆𑀤𑀻𑀲𑀼 𑀯𑁄𑀳𑀸𑀭𑀯𑀲𑁂𑀦 𑀯𑀢𑁆𑀢𑀩𑁆𑀩𑁄 𑀲𑀼𑀔𑀧𑀢𑀺𑀝𑁆𑀞𑀢𑁆𑀢𑀸 𑀉𑀢𑁆𑀢𑀸𑀦𑁄. 𑀯𑁄𑀳𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀤𑀼𑀓𑁆𑀔𑀧𑀢𑀺𑀝𑁆𑀞𑀢𑁆𑀢𑀸 𑀕𑀫𑁆𑀪𑀻𑀭𑁄. 𑀮𑁄𑀓𑀼𑀢𑁆𑀢𑀭𑁄 𑀅𑀘𑁆𑀘𑀦𑁆𑀢𑀢𑀺𑀭𑁄𑀓𑁆𑀔𑀢𑁆𑀢𑀸 𑀕𑀽𑀴𑁆𑀳𑁄. 𑀅𑀦𑀺𑀘𑁆𑀘𑀢𑀸𑀤𑀺𑀓𑁄 𑀖𑀦𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀧𑀝𑀺𑀘𑁆𑀙𑀦𑁆𑀦𑁄. 𑀅𑀧𑀘𑀼𑀭𑀯𑁄𑀳𑀸𑀭𑁂𑀦 𑀯𑀢𑁆𑀢𑀩𑁆𑀩𑁄 𑀬𑀣𑀸𑀭𑀼𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀲𑁆𑀲 𑀦𑁂𑀢𑀩𑁆𑀩𑀢𑁄 𑀦𑁂𑀬𑁆𑀬𑁄. 𑀧𑀘𑀼𑀭𑀯𑁄𑀳𑀸𑀭𑁂𑀦 𑀯𑀢𑁆𑀢𑀩𑁆𑀩𑁄 𑀯𑀘𑀦𑀫𑀢𑁆𑀢𑁂𑀦𑁂𑀯 𑀅𑀥𑀺𑀧𑁆𑀧𑀸𑀬𑀲𑁆𑀲 𑀦𑀻𑀢𑀢𑁆𑀢𑀸 𑀦𑀻𑀢𑁄. 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀢𑁆𑀣𑁄 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀚𑁆𑀚𑀯𑀺𑀭𑀳𑀺𑀢𑀢𑁆𑀢𑀸 𑀅𑀦𑀯𑀚𑁆𑀚𑁄. 𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑀦𑀢𑁄 𑀅𑀭𑀺𑀬𑀫𑀕𑁆𑀕𑀢𑁆𑀣𑁄 𑀦𑀓𑁆𑀓𑀺𑀮𑁂𑀲𑁄. 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀅𑀭𑀺𑀬𑀨𑀮𑀢𑁆𑀣𑁄 𑀯𑁄𑀤𑀸𑀦𑁄. 𑀲𑀗𑁆𑀔𑀢𑀸𑀲𑀗𑁆𑀔𑀢𑁂𑀲𑀼 𑀅𑀕𑁆𑀕𑀥𑀫𑁆𑀫𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀧𑀭𑀫𑀢𑁆𑀣𑁄. 𑀧𑀭𑀺𑀯𑀢𑁆𑀢𑀢𑀻𑀢𑀺 𑀩𑀼𑀤𑁆𑀥𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀢𑁄 𑀅𑀩𑀳𑀺𑀪𑀽𑀢𑀢𑁆𑀢𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀩𑁆𑀬𑀸𑀧𑀺𑀢𑁆𑀯𑀸 𑀯𑀸 𑀲𑀫𑀦𑁆𑀢𑀸 𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀸 𑀯𑀺𑀲𑁂𑀲𑁂𑀦 𑀯𑀸 𑀯𑀢𑁆𑀢𑀢𑀺.

‘‘𑀲𑀩𑁆𑀩𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀻𑀳𑀺 𑀪𑀕𑀯𑀢𑁄 𑀜𑀸𑀡𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀺. 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺 𑀜𑀸𑀡𑀁 𑀅𑀦𑀼𑀧𑀭𑀺𑀯𑀢𑁆𑀢𑀺, 𑀜𑀸𑀡𑀯𑀺𑀭𑀳𑀺𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀳𑀢𑀦𑁆𑀢𑀺 𑀦𑀺𑀭𑀸𑀯𑀭𑀡𑀢𑀁 𑀤𑀲𑁆𑀲𑁂𑀢𑀺. 𑀧𑀼𑀦 𑀲𑀩𑁆𑀩𑀜𑁆𑀜𑀼𑀢𑀁 𑀉𑀧𑀫𑀸𑀬 𑀲𑀸𑀥𑁂𑀢𑀼𑀓𑀸𑀫𑁄 ‘‘𑀬𑀸𑀯𑀢𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑁄 𑀦𑁂𑀬𑁆𑀬𑀸𑀯𑀲𑀸𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁. 𑀅𑀲𑀩𑁆𑀩𑀜𑁆𑀜𑀽𑀦𑀁 𑀧𑀦 𑀦𑁂𑀬𑁆𑀬𑀸𑀯𑀲𑀸𑀦𑀫𑁂𑀯 𑀦𑀢𑁆𑀣𑀺. 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀫𑀬𑀫𑀓𑁂 𑀯𑀼𑀢𑁆𑀢𑀢𑁆𑀣𑀫𑁂𑀯 𑀇𑀫𑀺𑀦𑀸 𑀬𑀫𑀓𑁂𑀦 𑀯𑀺𑀲𑁂𑀲𑁂𑀢𑁆𑀯𑀸𑀤𑀲𑁆𑀲𑁂𑀢𑀺, 𑀢𑀢𑀺𑀬𑀬𑀫𑀓𑁂𑀦 𑀧𑀝𑀺𑀲𑁂𑀥𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀦𑁂𑀬𑁆𑀬𑀁 𑀜𑀸𑀡𑀲𑁆𑀲 𑀧𑀣𑀢𑁆𑀢𑀸 𑀦𑁂𑀬𑁆𑀬𑀧𑀣𑁄. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄𑀢𑀺 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀔𑁂𑀧𑁂𑀢𑁆𑀯𑀸 𑀞𑀸𑀦𑀢𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀭𑀺𑀬𑀦𑁆𑀢𑁂 𑀞𑀸𑀦𑀲𑀻𑀮𑀸.

𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀸𑀬𑀢𑁆𑀢𑀸, 𑀆𑀯𑀚𑁆𑀚𑀺𑀢𑀸𑀦𑀦𑁆𑀢𑀭𑀫𑁂𑀯 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸𑀢𑀺 𑀭𑀼𑀘𑀺𑀆𑀬𑀢𑁆𑀢𑀸, 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀚𑀯𑀦𑀜𑀸𑀡𑁂𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀭𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀬𑀣𑀸𑀓𑁆𑀓𑀫𑁂𑀦 𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀆𑀲𑀬𑀁 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀆𑀲𑀬𑀦𑁆𑀢𑀺 𑀦𑀺𑀲𑁆𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀲𑀬𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀸𑀫𑀸𑀤𑀻𑀳𑀺 𑀦𑁂𑀓𑁆𑀔𑀫𑁆𑀫𑀸𑀤𑀻𑀳𑀺 𑀯𑀸 𑀧𑀭𑀺𑀪𑀸𑀯𑀺𑀢𑀲𑁆𑀲 𑀲𑀦𑁆𑀢𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀢𑁆𑀢𑀲𑀦𑁆𑀢𑀸𑀦𑀁 𑀅𑀦𑀼𑀲𑁂𑀦𑁆𑀢𑀺 𑀅𑀦𑀼𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀣𑀸𑀫𑀕𑀢𑀸𑀦𑀁 𑀓𑀸𑀫𑀭𑀸𑀕𑀸𑀤𑀻𑀦𑀁𑀯 𑀏𑀢𑀁 𑀅𑀥𑀺𑀯𑀘𑀦𑀁. 𑀅𑀦𑀼𑀲𑀬𑀁 𑀚𑀸𑀦𑀸𑀢𑀻𑀢𑀺 𑀅𑀦𑀼𑀲𑀬𑀓𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯.

𑀘𑀭𑀺𑀢𑀦𑁆𑀢𑀺 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁. 𑀅𑀥𑀺𑀫𑀼𑀢𑁆𑀢𑀺𑀦𑁆𑀢𑀺 𑀲𑀫𑁆𑀧𑀢𑀺 𑀓𑀼𑀲𑀮𑁂 𑀅𑀓𑀼𑀲𑀮𑁂 𑀯𑀸 𑀘𑀺𑀢𑁆𑀢𑀯𑁄𑀲𑀕𑁆𑀕𑁄. 𑀅𑀧𑁆𑀧𑀭𑀚𑀓𑁆𑀔𑁂𑀢𑀺 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑁄 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸. 𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑁄 𑀏𑀢𑁂𑀲𑀦𑁆𑀢𑀺 𑀯𑀸 𑀅𑀧𑁆𑀧𑀭𑀚𑀓𑁆𑀔𑀸, 𑀢𑁂 𑀅𑀧𑁆𑀧𑀭𑀚𑀓𑁆𑀔𑁂. 𑀫𑀳𑀸𑀭𑀚𑀓𑁆𑀔𑁂𑀢𑀺 𑀜𑀸𑀡𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀫𑀳𑀦𑁆𑀢𑀁 𑀭𑀸𑀕𑀸𑀤𑀺𑀭𑀚𑁄 𑀏𑀢𑁂𑀲𑀦𑁆𑀢𑀺 𑀫𑀳𑀸𑀭𑀚𑀓𑁆𑀔𑀸. 𑀫𑀳𑀦𑁆𑀢𑀁 𑀭𑀸𑀕𑀸𑀤𑀺𑀭𑀚𑁄 𑀏𑀢𑁂𑀲𑀦𑁆𑀢𑀺 𑀯𑀸 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀫𑀳𑀸𑀭𑀚𑀓𑁆𑀔𑁂. 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂𑀢𑀺 𑀢𑀺𑀓𑁆𑀔𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀏𑀢𑁂𑀲𑀦𑁆𑀢𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸. 𑀫𑀼𑀤𑀽𑀦𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀏𑀢𑁂𑀲𑀦𑁆𑀢𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑀸. 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂𑀢𑀺 𑀲𑀼𑀦𑁆𑀤𑀭𑀸 𑀲𑀤𑁆𑀥𑀸𑀤𑀬𑁄 𑀆𑀓𑀸𑀭𑀸 𑀓𑁄𑀝𑁆𑀞𑀸𑀲𑀸 𑀏𑀢𑁂𑀲𑀦𑁆𑀢𑀺 𑀲𑁆𑀯𑀸𑀓𑀸𑀭𑀸. 𑀓𑀼𑀘𑁆𑀙𑀺𑀢𑀸 𑀕𑀭𑀳𑀺𑀢𑀸 𑀅𑀲𑀤𑁆𑀥𑀸𑀤𑀬𑁄 𑀆𑀓𑀸𑀭𑀸 𑀓𑁄𑀝𑁆𑀞𑀸𑀲𑀸 𑀏𑀢𑁂𑀲𑀦𑁆𑀢𑀺 𑀤𑁆𑀯𑀸𑀓𑀸𑀭𑀸. 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂𑀢𑀺 𑀬𑁂 𑀓𑀣𑀺𑀢𑀁 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀢𑁂 𑀲𑀼𑀯𑀺𑀜𑁆𑀜𑀸𑀧𑀬𑀸. 𑀢𑀩𑁆𑀩𑀺𑀧𑀭𑀻𑀢𑀸 𑀤𑀼𑀯𑀺𑀜𑁆𑀜𑀸𑀧𑀬𑀸. 𑀪𑀩𑁆𑀩𑀸𑀪𑀩𑁆𑀩𑁂𑀢𑀺 𑀪𑀩𑁆𑀩𑁂 𑀘 𑀅𑀪𑀩𑁆𑀩𑁂 𑀘. 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀻𑀢𑀺 𑀪𑀩𑁆𑀩𑀸. 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀪𑀯𑀺𑀲𑁆𑀲𑀦𑁆𑀢𑀺 𑀚𑀸𑀬𑀺𑀲𑁆𑀲𑀦𑁆𑀢𑀺 𑀯𑀸𑀢𑀺 𑀪𑀩𑁆𑀩𑀸, 𑀪𑀸𑀚𑀦𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀬𑁂 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸, 𑀢𑁂 𑀪𑀩𑁆𑀩𑀸. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀸 𑀅𑀪𑀩𑁆𑀩𑀸.

𑀲𑀢𑁆𑀢𑁂 𑀧𑀚𑀸𑀦𑀸𑀢𑀻𑀢𑀺 𑀭𑀽𑀧𑀸𑀤𑀺𑀓𑁂 𑀆𑀭𑀫𑁆𑀫𑀡𑁂 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀲𑀤𑁂𑀯𑀓𑁄 𑀮𑁄𑀓𑁄𑀢𑀺 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑁄. 𑀲𑀳 𑀫𑀸𑀭𑁂𑀦 𑀲𑀫𑀸𑀭𑀓𑁄. 𑀲𑀳 𑀩𑁆𑀭𑀳𑁆𑀫𑀼𑀦𑀸 𑀲𑀩𑁆𑀭𑀳𑁆𑀫𑀓𑁄. 𑀲𑀳 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻. 𑀧𑀚𑀸𑀢𑀢𑁆𑀢𑀸 𑀧𑀚𑀸. 𑀲𑀳 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀤𑁂𑀯𑀫𑀦𑀼𑀲𑁆𑀲𑀸. ‘‘𑀧𑀚𑀸’’𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀢𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁. 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁. 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀜𑁆𑀘. 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁. 𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀧𑀤𑁂𑀳𑀺 𑀑𑀓𑀸𑀲𑀮𑁄𑀓𑁄. 𑀤𑁆𑀯𑀻𑀳𑀺 𑀧𑀚𑀸𑀯𑀲𑁂𑀦 𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄, 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀮𑁄𑀓𑁄, 𑀲𑀩𑁆𑀭𑀳𑁆𑀫𑀓𑀕𑁆𑀕𑀳𑀡𑁂𑀦 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀮𑁄𑀓𑁄, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀺𑀕𑁆𑀕𑀳𑀡𑁂𑀦 𑀘𑀢𑀼𑀧𑀭𑀺𑀲𑀯𑀲𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄, 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸. 𑀅𑀧𑀺 𑀘𑁂𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀲𑀩𑁆𑀩𑀲𑁆𑀲𑀧𑀺 𑀮𑁄𑀓𑀲𑁆𑀲 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀦𑀪𑀸𑀯𑀁 𑀲𑀸𑀥𑁂𑀢𑀺. 𑀢𑀢𑁄 𑀬𑁂𑀲𑀁 𑀲𑀺𑀬𑀸 ‘‘𑀫𑀸𑀭𑁄 𑀫𑀳𑀸𑀦𑀼𑀪𑀸𑀯𑁄 𑀙𑀓𑀸𑀫𑀸𑀯𑀘𑀭𑀺𑀲𑁆𑀲𑀭𑁄 𑀯𑀲𑀯𑀢𑁆𑀢𑀻, 𑀓𑀺𑀁 𑀲𑁄𑀧𑀺 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀻’’𑀢𑀺. 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑁂𑀦𑁆𑀢𑁄 ‘‘𑀲𑀫𑀸𑀭𑀓𑁄’’𑀢𑀺 𑀆𑀳. 𑀬𑁂𑀲𑀁 𑀧𑀦 𑀲𑀺𑀬𑀸 ‘‘𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄, 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀆𑀮𑁄𑀓𑀁 𑀨𑀭𑀢𑀺. 𑀤𑁆𑀯𑀻𑀳𑀺…𑀧𑁂… 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀆𑀮𑁄𑀓𑀁 𑀨𑀭𑀢𑀺, 𑀅𑀦𑀼𑀢𑁆𑀢𑀭𑀜𑁆𑀘 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀓𑀺𑀁 𑀲𑁄𑀧𑀺 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀻’’𑀢𑀺. 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑁂𑀦𑁆𑀢𑁄 ‘‘𑀲𑀩𑁆𑀭𑀳𑁆𑀫𑀓𑁄’’𑀢𑀺 𑀆𑀳. 𑀢𑀢𑁄 𑀬𑁂𑀲𑀁 𑀲𑀺𑀬𑀸 ‘‘𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸, 𑀓𑀺𑀁 𑀢𑁂𑀧𑀺 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺. 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑁂𑀦𑁆𑀢𑁄 ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸’’𑀢𑀺 𑀆𑀳.

𑀏𑀯𑀁 𑀉𑀓𑁆𑀓𑀝𑁆𑀞𑀸𑀦𑀁 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀦𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀅𑀣 𑀲𑀫𑁆𑀫𑀼𑀢𑀺𑀤𑁂𑀯𑁂 𑀅𑀯𑀲𑁂𑀲𑀫𑀦𑀼𑀲𑁆𑀲𑁂 𑀘 𑀉𑀧𑀸𑀤𑀸𑀬 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑁂𑀲𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀦𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀲𑀤𑁂𑀯𑀫𑀦𑀼𑀲𑁆𑀲𑀸’’𑀢𑀺 𑀆𑀳. 𑀅𑀬𑀫𑁂𑀢𑁆𑀣 𑀅𑀦𑀼𑀲𑀦𑁆𑀥𑀺𑀓𑁆𑀓𑀫𑁄. 𑀧𑁄𑀭𑀸𑀡𑀸 𑀧𑀦𑀸𑀳𑀼 ‘‘𑀲𑀤𑁂𑀯𑀓𑁄𑀢𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑁄. 𑀲𑀫𑀸𑀭𑀓𑁄𑀢𑀺 𑀫𑀸𑀭𑁂𑀦 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑁄. 𑀲𑀩𑁆𑀭𑀳𑁆𑀫𑀓𑁄𑀢𑀺 𑀩𑁆𑀭𑀳𑁆𑀫𑁂𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑁄. 𑀏𑀯𑀁 𑀲𑀩𑁆𑀩𑁂𑀧𑀺 𑀢𑀺𑀪𑀯𑀽𑀧𑀕𑁂 𑀲𑀢𑁆𑀢𑁂 𑀢𑀻𑀳𑀸𑀓𑀸𑀭𑁂𑀳𑀺 𑀢𑀻𑀲𑀼 𑀧𑀤𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀭𑀺𑀬𑀸𑀤𑀸𑀢𑀼𑀁 ‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀜𑁆𑀘𑀳𑀺 𑀧𑀤𑁂𑀳𑀺 𑀢𑁂𑀦 𑀢𑁂𑀦 𑀆𑀓𑀸𑀭𑁂𑀦 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀁 𑀳𑁄𑀢𑀻’’𑀢𑀺.

𑀅𑀦𑁆𑀢𑀫𑀲𑁄𑀢𑀺 𑀉𑀧𑀭𑀺𑀫𑀦𑁆𑀢𑁂𑀦. 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀦𑁆𑀢𑀺 𑀏𑀢𑁆𑀣 𑀢𑀺𑀫𑀺 𑀦𑀸𑀫 𑀏𑀓𑀸 𑀫𑀘𑁆𑀙𑀚𑀸𑀢𑀺, 𑀢𑀺𑀫𑀺𑀁 𑀕𑀺𑀮𑀺𑀢𑀼𑀁 𑀲𑀫𑀢𑁆𑀣𑀸 𑀢𑀢𑁄 𑀫𑀳𑀦𑁆𑀢𑀲𑀭𑀻𑀭𑀸 𑀢𑀺𑀫𑀺𑀗𑁆𑀕𑀮𑀸 𑀦𑀸𑀫 𑀏𑀓𑀸 𑀫𑀘𑁆𑀙𑀚𑀸𑀢𑀺, 𑀢𑀺𑀫𑀺𑀗𑁆𑀕𑀮𑀫𑁆𑀧𑀺 𑀕𑀺𑀮𑀺𑀢𑀼𑀁 𑀲𑀫𑀢𑁆𑀣𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀲𑀭𑀻𑀭𑀸 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀸 𑀦𑀸𑀫 𑀏𑀓𑀸 𑀫𑀘𑁆𑀙𑀚𑀸𑀢𑀺. 𑀇𑀥 𑀚𑀸𑀢𑀺𑀕𑁆𑀕𑀳𑀡𑁂𑀦 𑀏𑀓𑀯𑀘𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀕𑀭𑀼𑀴𑀁 𑀯𑁂𑀦𑀢𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀕𑀭𑀼𑀴𑁄𑀢𑀺 𑀚𑀸𑀢𑀺𑀯𑀲𑁂𑀦 𑀦𑀸𑀫𑀁. 𑀯𑁂𑀦𑀢𑁂𑀬𑁆𑀬𑁄𑀢𑀺 𑀕𑁄𑀢𑁆𑀢𑀯𑀲𑁂𑀦. 𑀧𑀤𑁂𑀲𑁂𑀢𑀺 𑀏𑀓𑀤𑁂𑀲𑁂. 𑀲𑀸𑀭𑀺𑀧𑀼𑀢𑁆𑀢𑀲𑀫𑀸𑀢𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑁂 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀲𑀸𑀯𑀓𑀸 𑀳𑀺 𑀧𑀜𑁆𑀜𑀸𑀬 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑁂𑀦 𑀲𑀫𑀸 𑀦𑀸𑀫 𑀦𑀢𑁆𑀣𑀺. 𑀬𑀣𑀸𑀳 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁮𑁮-𑁧𑁮𑁯). 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀯𑀺𑀲𑀼𑀤𑁆𑀥𑀺. 𑁧.𑁧𑁭𑁧; 𑀧𑀝𑀺. 𑀫. 𑀅𑀝𑁆𑀞. 𑁨.𑁩.𑁫) 𑀯𑀼𑀢𑁆𑀢𑀁 𑁋

‘‘𑀮𑁄𑀓𑀦𑀸𑀣𑀁 𑀞𑀧𑁂𑀢𑁆𑀯𑀸𑀦, 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀧𑀸𑀡𑀺𑀦𑁄;

𑀧𑀜𑁆𑀜𑀸𑀬 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺’’𑀦𑁆𑀢𑀺.

𑀨𑀭𑀺𑀢𑁆𑀯𑀸𑀢𑀺 𑀩𑀼𑀤𑁆𑀥𑀜𑀸𑀡𑀁 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀧𑀜𑁆𑀜𑀁 𑀧𑀸𑀧𑀼𑀡𑀺𑀢𑁆𑀯𑀸 𑀞𑀸𑀦𑀢𑁄 𑀢𑁂𑀲𑀁 𑀧𑀜𑁆𑀜𑀁 𑀨𑀭𑀺𑀢𑁆𑀯𑀸 𑀩𑁆𑀬𑀸𑀧𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀧𑀜𑁆𑀜𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸, 𑀢𑁂𑀲𑀁 𑀅𑀯𑀺𑀲𑀬𑀪𑀽𑀢𑀫𑁆𑀧𑀺 𑀲𑀩𑁆𑀩𑀁 𑀦𑁂𑀬𑁆𑀬𑀁 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄.

𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁩.𑁫) 𑀧𑀦 ‘‘𑀅𑀢𑀺𑀖𑀁𑀲𑀺𑀢𑁆𑀯𑀸’’𑀢𑀺 𑀧𑀸𑀞𑁄, 𑀖𑀁𑀲𑀺𑀢𑁆𑀯𑀸 𑀢𑀼𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀧𑀺 𑀢𑁂𑀢𑀺𑀆𑀤𑀻𑀳𑀺 𑀏𑀯𑀁 𑀨𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀞𑀸𑀦𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀡𑁆𑀟𑀺𑀢𑀸𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀦𑀺𑀧𑀼𑀡𑀸𑀢𑀺 𑀲𑀡𑁆𑀳𑀲𑀼𑀔𑀼𑀫𑀩𑀼𑀤𑁆𑀥𑀺𑀦𑁄 𑀲𑀼𑀔𑀼𑀫𑁂 𑀅𑀢𑁆𑀣𑀦𑁆𑀢𑀭𑁂 𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑀸. 𑀓𑀢𑀧𑀭𑀧𑁆𑀧𑀯𑀸𑀤𑀸𑀢𑀺 𑀯𑀺𑀜𑁆𑀜𑀸𑀢𑀧𑀭𑀧𑁆𑀧𑀯𑀸𑀤𑀸 𑀘𑁂𑀯 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀓𑀢𑀯𑀸𑀤𑀧𑀭𑀺𑀘𑀬𑀸 𑀘. 𑀯𑀸𑀮𑀯𑁂𑀥𑀺𑀭𑀽𑀧𑀸𑀢𑀺 𑀯𑀸𑀮𑀯𑁂𑀥𑀺𑀥𑀦𑀼𑀕𑁆𑀕𑀳𑀲𑀤𑀺𑀲𑀸. 𑀯𑁄 𑀪𑀺𑀦𑁆𑀤𑀦𑁆𑀢𑀸 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀻𑀢𑀺 𑀯𑀸𑀮𑀯𑁂𑀥𑀻 𑀯𑀺𑀬 𑀯𑀸𑀮𑀁 𑀲𑀼𑀔𑀼𑀫𑀸𑀦𑀺𑀧𑀺 𑀧𑀭𑁂𑀲𑀁 𑀤𑀺𑀝𑁆𑀞𑀺𑀕𑀫𑀦𑀸𑀦𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀕𑀫𑀦𑁂𑀦 𑀪𑀺𑀦𑁆𑀤𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁯.𑁧𑁧) 𑀯𑀺𑀬 𑀧𑀜𑁆𑀜𑀸 𑀏𑀯 𑀧𑀜𑁆𑀜𑀸𑀕𑀢𑀁. 𑀤𑀺𑀝𑁆𑀞𑀺𑀬𑁄 𑀏𑀯 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀤𑁆𑀯𑀺𑀧𑀤𑀫𑁆𑀧𑀺 𑀢𑀺𑀧𑀤𑀫𑁆𑀧𑀺 𑀘𑀢𑀼𑀧𑀤𑀫𑁆𑀧𑀺 𑀧𑀼𑀘𑁆𑀙𑀁 𑀭𑀘𑀬𑀺𑀢𑁆𑀯𑀸 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀅𑀢𑀺𑀩𑀳𑀼𑀓𑀢𑁆𑀢𑀸 𑀲𑀩𑁆𑀩𑀲𑀗𑁆𑀕𑀳𑀢𑁆𑀣𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁. 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘 𑀅𑀢𑁆𑀣𑀚𑀸𑀢𑀸𑀦𑀻𑀢𑀺 𑀧𑀸𑀞𑀲𑁂𑀲𑁄. 𑀢𑁂𑀲𑀁 𑀢𑀣𑀸 𑀯𑀺𑀦𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑀸 𑀅𑀪𑀺𑀲𑀗𑁆𑀔𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀏𑀯𑀁 𑀪𑀕𑀯𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀧𑀼𑀘𑁆𑀙𑀸𑀬 𑀑𑀓𑀸𑀲𑀫𑁂𑀯 𑀅𑀤𑀢𑁆𑀯𑀸 𑀪𑀕𑀯𑀸 𑀉𑀧𑀲𑀗𑁆𑀓𑀫𑀦𑁆𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀣𑀸𑀳 𑁋

‘‘𑀢𑁂 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 ‘𑀇𑀫𑀁 𑀫𑀬𑀁 𑀧𑀜𑁆𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫, 𑀲𑀘𑁂 𑀦𑁄 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀁 𑀧𑀼𑀝𑁆𑀞𑁄 𑀏𑀯𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺, 𑀏𑀯𑀫𑀲𑁆𑀲 𑀫𑀬𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫, 𑀏𑀯𑀁 𑀘𑁂𑀧𑀺 𑀦𑁄 𑀧𑀼𑀝𑁆𑀞𑁄 𑀏𑀯𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺, 𑀏𑀯𑀫𑁆𑀧𑀺𑀲𑁆𑀲 𑀫𑀬𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀸’𑀢𑀺. 𑀢𑁂 𑀲𑀼𑀡𑀦𑁆𑀢𑀺 ‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄 𑀅𑀫𑀼𑀓𑀁 𑀦𑀸𑀫 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀑𑀲𑀝𑁄’𑀢𑀺. 𑀢𑁂 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑀺. 𑀢𑁂 𑀲𑀫𑀡𑁄 𑀕𑁄𑀢𑀫𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀦 𑀘𑁂𑀯 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀓𑀼𑀢𑁄𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀲𑀫𑀡𑀲𑁆𑀲𑁂𑀯 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁨𑁮𑁯).

𑀓𑀲𑁆𑀫𑀸 𑀧𑀜𑁆𑀳𑁂 𑀦 𑀧𑀼𑀘𑁆𑀙𑀦𑁆𑀢𑀻𑀢𑀺 𑀘𑁂? 𑀪𑀕𑀯𑀸 𑀓𑀺𑀭 𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑀺, 𑀢𑀢𑁄 𑀧𑀲𑁆𑀲𑀢𑀺 ‘‘𑀇𑀫𑁂 𑀧𑀡𑁆𑀟𑀺𑀢𑀸 𑀕𑀽𑀴𑁆𑀳𑀁 𑀭𑀳𑀲𑁆𑀲𑀁 𑀧𑀜𑁆𑀳𑀁 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸 𑀆𑀕𑀢𑀸’’𑀢𑀺. 𑀲𑁄 𑀢𑁂𑀳𑀺 𑀅𑀧𑀼𑀝𑁆𑀞𑁄𑀬𑁂𑀯 ‘‘𑀧𑀜𑁆𑀳𑀧𑀼𑀘𑁆𑀙𑀸𑀬 𑀏𑀢𑁆𑀢𑀓𑀸 𑀤𑁄𑀲𑀸, 𑀯𑀺𑀲𑁆𑀲𑀚𑁆𑀚𑀦𑁂 𑀏𑀢𑁆𑀢𑀓𑀸, 𑀅𑀢𑁆𑀣𑁂, 𑀧𑀤𑁂, 𑀅𑀓𑁆𑀔𑀭𑁂 𑀏𑀢𑁆𑀢𑀓𑀸𑀢𑀺; 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀏𑀯𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺; 𑀇𑀢𑀺 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸 𑀆𑀦𑀻𑀢𑁂 𑀧𑀜𑁆𑀳𑁂 𑀥𑀫𑁆𑀫𑀓𑀣𑀸𑀬 𑀅𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑁂 𑀧𑀡𑁆𑀟𑀺𑀢𑀸 ‘‘𑀲𑁂𑀬𑁆𑀬𑀸 𑀯𑀢 𑀦𑁄, 𑀬𑁂 𑀫𑀬𑀁 𑀇𑀫𑁂 𑀧𑀜𑁆𑀳𑁂 𑀦 𑀧𑀼𑀘𑁆𑀙𑀺𑀫𑁆𑀳𑀸. 𑀲𑀘𑁂𑀧𑀺 𑀫𑀬𑀁 𑀧𑀼𑀘𑁆𑀙𑁂𑀬𑁆𑀬𑀸𑀫, 𑀅𑀧𑁆𑀧𑀢𑀺𑀝𑁆𑀞𑀺𑀢𑁂 𑀦𑁄 𑀓𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑀔𑀺𑀧𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀫𑀦𑀸 𑀪𑀯𑀦𑁆𑀢𑀺.

𑀅𑀧𑀺 𑀘 𑀩𑀼𑀤𑁆𑀥𑀸 𑀦𑀸𑀫 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀧𑀭𑀺𑀲𑀁 𑀫𑁂𑀢𑁆𑀢𑀸𑀬 𑀨𑀭𑀦𑁆𑀢𑀺. 𑀫𑁂𑀢𑁆𑀢𑀸𑀨𑀭𑀡𑁂𑀦 𑀤𑀲𑀩𑀮𑁂𑀲𑀼 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺. 𑀩𑀼𑀤𑁆𑀥𑀸 𑀦𑀸𑀫 𑀭𑀽𑀧𑀕𑁆𑀕𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸 𑀫𑀥𑀼𑀭𑀲𑁆𑀲𑀭𑀸 𑀫𑀼𑀤𑀼𑀚𑀺𑀯𑁆𑀳𑀸 𑀲𑀼𑀨𑀼𑀲𑀺𑀢𑀤𑀦𑁆𑀢𑀸𑀯𑀭𑀡𑀸, 𑀅𑀫𑀢𑁂𑀦 𑀳𑀤𑀬𑀁 𑀲𑀺𑀜𑁆𑀘𑀦𑁆𑀢𑀸 𑀯𑀺𑀬 𑀥𑀫𑁆𑀫𑀁 𑀓𑀣𑁂𑀦𑁆𑀢𑀺. 𑀢𑀢𑁆𑀭 𑀦𑁂𑀲𑀁 𑀫𑁂𑀢𑁆𑀢𑀸𑀨𑀭𑀡𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀏𑀯𑀭𑀽𑀧𑀁 𑀅𑀤𑁆𑀯𑁂𑀚𑁆𑀛𑀓𑀣𑀁 𑀅𑀫𑁄𑀖𑀓𑀣𑀁 𑀦𑀺𑀬𑁆𑀬𑀸𑀦𑀺𑀓𑀓𑀣𑀁 𑀓𑀣𑁂𑀦𑁆𑀢𑁂𑀦 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀧𑀘𑁆𑀘𑀦𑀻𑀓𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀲𑀦𑁆𑀦𑀪𑀸𑀯𑁂𑀦𑁂𑀯 𑀧𑀜𑁆𑀳𑁂 𑀦 𑀧𑀼𑀘𑁆𑀙𑀦𑁆𑀢𑀻𑀢𑀺.

𑀓𑀣𑀺𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑀸 𑀯𑀸𑀢𑀺 ‘‘𑀏𑀯𑀁 𑀢𑀼𑀫𑁆𑀳𑁂 𑀧𑀼𑀘𑁆𑀙𑀣𑀸’’𑀢𑀺 𑀅𑀧𑀼𑀘𑁆𑀙𑀺𑀢𑀧𑀜𑁆𑀳𑀸𑀦𑀁 𑀉𑀘𑁆𑀘𑀸𑀭𑀡𑁂𑀦 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀓𑀣𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀬𑀣𑀸 𑀘 𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸, 𑀢𑀣𑀸 𑀯𑀺𑀲𑁆𑀲𑀚𑁆𑀚𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀏𑀯𑀁 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀕𑀯𑀢𑀸 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸 𑀏𑀯 𑀳𑁄𑀦𑁆𑀢𑀺 𑀢𑁂 𑀧𑀜𑁆𑀳𑀸. 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘 𑀢𑁂 𑀪𑀕𑀯𑀢𑁄 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀬𑁄 𑀪𑀕𑀯𑀢𑁄 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀪𑀕𑀯𑀢𑁄 𑀲𑀫𑀻𑀧𑁂 𑀔𑀺𑀢𑁆𑀢𑀓𑀸 𑀧𑀓𑁆𑀔𑀺𑀢𑁆𑀢𑀓𑀸 𑀲𑀫𑁆𑀧𑀚𑁆𑀚𑀦𑁆𑀢𑀺; 𑀲𑀸𑀯𑀓𑀸 𑀯𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀉𑀧𑀸𑀲𑀓𑀸 𑀯𑀸𑀢𑀺 𑀅𑀢𑁆𑀣𑁄; 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁 𑀯𑀸 𑀧𑀸𑀧𑀼𑀡𑀦𑁆𑀢𑀺, 𑀉𑀧𑀸𑀲𑀓𑀲𑀫𑁆𑀧𑀢𑁆𑀢𑀺𑀁 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣𑀸𑀢𑀺 𑀅𑀦𑀦𑁆𑀢𑀭𑀢𑁆𑀣𑁂, 𑀢𑁂𑀲𑀁 𑀉𑀧𑀓𑁆𑀔𑀺𑀢𑁆𑀢𑀓𑀲𑀫𑁆𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂, 𑀢𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀯𑀸. 𑀅𑀢𑀺𑀭𑁄𑀘𑀢𑀻𑀢𑀺 𑀅𑀢𑀺𑀯𑀺𑀬 𑀚𑁄𑀢𑀢𑀺 𑀧𑀓𑀸𑀲𑀢𑀺. 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺 𑀬𑀸𑀬𑀁 𑀪𑀕𑀯𑀢𑁄 𑀧𑀜𑁆𑀜𑀸, 𑀢𑀸𑀬 𑀧𑀜𑁆𑀜𑀸𑀬 𑀪𑀕𑀯𑀸𑀯 𑀅𑀢𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄, 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.