𑁯. 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁦. 𑀦𑀯𑀫𑁂 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀸𑀦𑀸𑀭𑀽𑀧𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀅𑀪𑀺𑀓𑀸𑀫𑀁 𑀆𑀕𑀢𑀁 𑀫𑀸𑀭𑀥𑀻𑀢𑀭𑀁 𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘 𑀙𑀦𑁆𑀤𑀫𑀢𑁆𑀢𑀫𑁆𑀧𑀺 𑀫𑁂𑀣𑀼𑀦𑀲𑁆𑀫𑀺𑀁 𑀦𑀸𑀳𑁄𑀲𑀺, 𑀓𑀺𑀫𑁂𑀯𑀺𑀤𑀁 𑀇𑀫𑀺𑀲𑁆𑀲𑀸 𑀤𑀸𑀭𑀺𑀓𑀸𑀬 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀣𑀸 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂, 𑀓𑀼𑀢𑁄𑀦𑁂𑀦 𑀲𑀁𑀯𑀲𑀺𑀢𑀼𑀦𑁆𑀢𑀺.

𑀫𑀼𑀢𑁆𑀢𑀧𑀼𑀡𑁆𑀡𑀦𑁆𑀢𑀺 𑀆𑀳𑀸𑀭𑀉𑀢𑀼𑀯𑀲𑁂𑀦 𑀯𑀢𑁆𑀣𑀺𑀧𑀼𑀝𑀦𑁆𑀢𑀭𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀫𑀼𑀢𑁆𑀢𑁂𑀦 𑀧𑀽𑀭𑀺𑀢𑀁. 𑀓𑀭𑀻𑀲𑀧𑀼𑀡𑁆𑀡𑀦𑁆𑀢𑀺 𑀧𑀓𑁆𑀓𑀸𑀲𑀬𑀲𑀗𑁆𑀔𑀸𑀢𑁂 𑀳𑁂𑀝𑁆𑀞𑀸𑀦𑀸𑀪𑀺𑀧𑀺𑀝𑁆𑀞𑀺𑀓𑀡𑁆𑀝𑀓𑀫𑀽𑀮𑀸𑀦𑀁 𑀅𑀦𑁆𑀢𑀭𑁂 𑀉𑀩𑁆𑀩𑁂𑀥𑁂𑀦 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁂 𑀅𑀦𑁆𑀢𑀸𑀯𑀲𑀸𑀦𑁂 𑀞𑀺𑀢𑀯𑀘𑁆𑀘𑁂𑀦 𑀧𑀼𑀡𑁆𑀡𑀁. 𑀲𑁂𑀫𑁆𑀳𑀧𑀼𑀡𑁆𑀡𑀦𑁆𑀢𑀺 𑀉𑀤𑀭𑀧𑀝𑀮𑁂 𑀞𑀺𑀢𑀏𑀓𑀧𑀢𑁆𑀢𑀧𑁆𑀧𑀫𑀸𑀡𑁂𑀦 𑀲𑁂𑀫𑁆𑀳𑁂𑀦 𑀧𑀽𑀭𑀺𑀢𑀁. 𑀭𑀼𑀳𑀺𑀭𑀧𑀼𑀡𑁆𑀡𑀦𑁆𑀢𑀺 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀳𑀤𑀬𑀯𑀓𑁆𑀓𑀧𑀧𑁆𑀨𑀸𑀲𑀸𑀦𑀁 𑀉𑀧𑀭𑀺 𑀣𑁄𑀓𑀁 𑀣𑁄𑀓𑀁 𑀧𑀕𑁆𑀖𑀭𑀦𑁆𑀢𑁂𑀦 𑀯𑀓𑁆𑀓𑀳𑀤𑀬𑀬𑀓𑀦𑀧𑀧𑁆𑀨𑀸𑀲𑁂 𑀢𑁂𑀫𑀬𑀫𑀸𑀦𑁂𑀦 𑀞𑀺𑀢𑁂𑀦 𑀏𑀓𑀧𑀢𑁆𑀢𑀲𑁆𑀲 𑀧𑀽𑀭𑀡𑀫𑀢𑁆𑀢𑁂𑀦 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀲𑀗𑁆𑀔𑀸𑀢𑁂𑀦 𑀘 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀁 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀜𑁆𑀘𑁂𑀯 𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀜𑁆𑀘 𑀞𑀧𑁂𑀢𑁆𑀯𑀸 𑀥𑀫𑀦𑀻𑀚𑀸𑀮𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀁 𑀉𑀧𑀸𑀤𑀺𑀡𑁆𑀡𑀓𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀞𑀺𑀢𑀲𑀁𑀲𑀭𑀡𑀮𑁄𑀳𑀺𑀢𑀲𑀗𑁆𑀔𑀸𑀢𑁂𑀦 𑀘 𑀤𑀼𑀯𑀺𑀥𑁂𑀦 𑀭𑀼𑀳𑀺𑀭𑁂𑀦 𑀧𑀼𑀡𑁆𑀡𑀁.

𑀅𑀝𑁆𑀞𑀺𑀲𑀗𑁆𑀖𑀸𑀢𑀦𑁆𑀢𑀺 𑀲𑀓𑀮𑀲𑀭𑀻𑀭𑁂 𑀳𑁂𑀝𑁆𑀞𑀸 𑀅𑀝𑁆𑀞𑀻𑀦𑀁 𑀉𑀧𑀭𑀺𑀝𑁆𑀞𑀺𑀢𑀸𑀦𑀺 𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺, 𑀢𑁂𑀳𑀺 𑀅𑀝𑁆𑀞𑀻𑀳𑀺 𑀖𑀝𑀺𑀢𑀁. 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀦𑁆𑀢𑀺 𑀲𑀓𑀮𑀲𑀭𑀻𑀭𑁂 𑀅𑀝𑁆𑀞𑀻𑀦𑀺 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑀸𑀦𑀺 𑀦𑀯 𑀦𑁆𑀳𑀸𑀭𑀼𑀲𑀢𑀸𑀦𑀺, 𑀢𑁂𑀳𑀺 𑀦𑁆𑀳𑀸𑀭𑀽𑀳𑀺 𑀲𑀫𑁆𑀩𑀦𑁆𑀥𑀁 𑀆𑀩𑀦𑁆𑀥𑀁. 𑀭𑀼𑀥𑀺𑀭𑀫𑀁𑀲𑀸𑀯𑀮𑁂𑀧𑀦𑀦𑁆𑀢𑀺 𑀲𑀁𑀲𑀭𑀡𑀮𑁄𑀳𑀺𑀢𑁂𑀦 𑀘 𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀅𑀦𑀼𑀮𑀺𑀫𑁆𑀧𑁂𑀢𑁆𑀯𑀸 𑀞𑀺𑀢𑁂𑀦 𑀦𑀯𑀫𑀁𑀲𑀧𑁂𑀲𑀺𑀲𑀢𑁂𑀦 𑀘 𑀅𑀦𑀼𑀮𑀺𑀢𑁆𑀢𑀁 𑀲𑀭𑀻𑀭𑀁. 𑀘𑀫𑁆𑀫𑀯𑀺𑀦𑀤𑁆𑀥𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀧𑀸𑀓𑀝𑀓𑀺𑀮𑁄𑀫𑀓𑀲𑁆𑀲 𑀉𑀧𑀭𑀺 𑀙𑀯𑀺𑀬𑀸 𑀳𑁂𑀝𑁆𑀞𑀸 𑀞𑀺𑀢𑀁 𑀘𑀫𑁆𑀫𑀁, 𑀢𑁂𑀦 𑀘𑀫𑁆𑀫𑁂𑀦 𑀯𑀺𑀦𑀤𑁆𑀥𑀁 𑀧𑀭𑀺𑀬𑁄𑀦𑀤𑁆𑀥𑀁. ‘‘𑀘𑀫𑁆𑀫𑀸𑀯𑀦𑀤𑁆𑀥’’𑀦𑁆𑀢𑀺𑀧𑀺 𑀧𑀸𑀴𑀺. 𑀙𑀯𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀅𑀢𑀺𑀲𑀼𑀔𑀼𑀫𑀙𑀯𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀁 𑀙𑀸𑀤𑁂𑀢𑁆𑀯𑀸 𑀞𑀺𑀢𑀁. 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀦𑁆𑀢𑀺 𑀅𑀦𑁂𑀓𑀙𑀺𑀤𑁆𑀤𑀁. 𑀉𑀕𑁆𑀖𑀭𑀦𑁆𑀢𑀦𑁆𑀢𑀺 𑀅𑀓𑁆𑀔𑀺𑀫𑀼𑀔𑀸𑀤𑀻𑀳𑀺 𑀉𑀕𑁆𑀖𑀭𑀦𑁆𑀢𑀁. 𑀧𑀕𑁆𑀖𑀭𑀦𑁆𑀢𑀦𑁆𑀢𑀺 𑀅𑀥𑁄𑀪𑀸𑀕𑁂𑀦 𑀧𑀕𑁆𑀖𑀭𑀦𑁆𑀢𑀁. 𑀓𑀺𑀫𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀦𑁆𑀢𑀺 𑀲𑀽𑀘𑀺𑀫𑀼𑀔𑀸𑀤𑀻𑀳𑀺 𑀦𑀸𑀦𑀸𑀧𑀸𑀡𑀓𑀼𑀮𑀲𑀫𑀽𑀳𑁂𑀳𑀺 𑀆𑀲𑁂𑀯𑀺𑀢𑀁. 𑀦𑀸𑀦𑀸𑀓𑀮𑀺𑀫𑀮𑀧𑀭𑀺𑀧𑀽𑀭𑀦𑁆𑀢𑀺 𑀅𑀦𑁂𑀓𑀯𑀺𑀥𑁂𑀳𑀺 𑀅𑀲𑀼𑀘𑀺𑀓𑁄𑀝𑁆𑀞𑀸𑀲𑁂𑀳𑀺 𑀧𑀽𑀭𑀺𑀢𑀁.

𑁭𑁧. 𑀢𑀢𑁄 𑀫𑀸𑀕𑀡𑁆𑀟𑀺𑀬𑁄 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀫𑀸𑀦𑀼𑀲𑀓𑁂 𑀓𑀸𑀫𑁂 𑀧𑀳𑀸𑀬 𑀤𑀺𑀩𑁆𑀩𑀓𑀸𑀫𑀢𑁆𑀣𑀸𑀬 𑀧𑀩𑁆𑀩𑀚𑀦𑁆𑀢𑀺, 𑀅𑀬𑀜𑁆𑀘 𑀤𑀺𑀩𑁆𑀩𑁂𑀧𑀺 𑀓𑀸𑀫𑁂 𑀦 𑀇𑀘𑁆𑀙𑀢𑀺, 𑀇𑀤𑀫𑁆𑀧𑀺 𑀇𑀢𑁆𑀣𑀺𑀭𑀢𑀦𑀁, 𑀓𑀸 𑀦𑀼 𑀅𑀲𑁆𑀲 𑀤𑀺𑀝𑁆𑀞𑀻’’𑀢𑀺 𑀧𑀼𑀘𑁆𑀙𑀺𑀢𑀼𑀁 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀢𑀸𑀤𑀺𑀲𑀁 𑀘𑁂 𑀭𑀢𑀦𑀦𑁆𑀢𑀺 𑀤𑀺𑀩𑁆𑀩𑀺𑀢𑁆𑀣𑀺𑀭𑀢𑀦𑀁 𑀲𑀦𑁆𑀥𑀸𑀬 𑀪𑀡𑀢𑀺. 𑀦𑀸𑀭𑀺𑀦𑁆𑀢𑀺 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀲𑀦𑁆𑀥𑀸𑀬. 𑀤𑀺𑀝𑁆𑀞𑀺𑀕𑀢𑀁 𑀲𑀻𑀮𑀯𑀢𑀁 𑀦𑀼 𑀚𑀻𑀯𑀺𑀢𑀦𑁆𑀢𑀺 𑀤𑀺𑀝𑁆𑀞𑀺𑀜𑁆𑀘 𑀲𑀻𑀮𑀜𑁆𑀘 𑀯𑀢𑀜𑁆𑀘 𑀚𑀻𑀯𑀺𑀢𑀜𑁆𑀘. 𑀪𑀯𑀽𑀧𑀧𑀢𑁆𑀢𑀺𑀜𑁆𑀘 𑀯𑀤𑁂𑀲𑀺 𑀓𑀻𑀤𑀺𑀲𑀦𑁆𑀢𑀺 𑀅𑀢𑁆𑀢𑀦𑁄 𑀪𑀯𑀽𑀧𑀧𑀢𑁆𑀢𑀺𑀁 𑀯𑀸 𑀢𑀼𑀯𑀁 𑀓𑀻𑀤𑀺𑀲𑀁 𑀯𑀤𑁂𑀲𑀺.

𑁭𑁨. 𑀇𑀢𑁄 𑀧𑀭𑀸 𑀤𑁆𑀯𑁂 𑀕𑀸𑀣𑀸 𑀯𑀺𑀲𑁆𑀲𑀚𑁆𑀚𑀦𑀧𑀼𑀘𑁆𑀙𑀸𑀦𑀬𑁂𑀦 𑀧𑀯𑀢𑁆𑀢𑀢𑁆𑀢𑀸 𑀧𑀸𑀓𑀝𑀲𑀫𑁆𑀩𑀦𑁆𑀥𑀸𑀬𑁂𑀯. 𑀢𑀸𑀲𑀼 𑀧𑀞𑀫𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀲𑁆𑀲 𑀫𑀬𑁆𑀳𑀁 𑀫𑀸𑀕𑀡𑁆𑀟𑀺𑀬 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁩.𑁨𑁭, 𑁩𑁦𑁧) 𑀏𑀯𑀁 𑀇𑀤𑀁 𑀯𑀤𑀸𑀫𑀻𑀢𑀺 𑀲𑀫𑀼𑀕𑁆𑀕𑀳𑀻𑀢𑀁 𑀦 𑀳𑁄𑀢𑀺 𑀦𑀢𑁆𑀣𑀺 𑀦 𑀯𑀺𑀚𑁆𑀚𑀢𑀺, 𑀓𑀺𑀁 𑀓𑀸𑀭𑀡𑀸? 𑀅𑀳𑀜𑁆𑀳𑀺 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀓𑀜𑁆𑀘𑀺 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀯𑀺𑀘𑀺𑀦𑀦𑁆𑀢𑁄 𑀅𑀚𑁆𑀛𑀢𑁆𑀢𑀁 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀺𑀪𑀸𑀯𑁂𑀦 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀅𑀤𑁆𑀤𑀲𑀦𑁆𑀢𑀺.

𑀆𑀤𑀻𑀦𑀯𑀦𑁆𑀢𑀺 𑀉𑀧𑀤𑁆𑀤𑀯𑀁. 𑀲𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑁂𑀦 𑀲𑀤𑀼𑀓𑁆𑀔𑀁. 𑀲𑀯𑀺𑀖𑀸𑀢𑀦𑁆𑀢𑀺 𑀘𑁂𑀢𑀲𑀺𑀓𑀤𑀼𑀓𑁆𑀔𑁂𑀦 𑀲𑀳𑀺𑀢𑀁. 𑀲𑀉𑀧𑀸𑀬𑀸𑀲𑀦𑁆𑀢𑀺 𑀉𑀧𑀸𑀬𑀸𑀲𑀲𑀳𑀺𑀢𑀁. 𑀲𑀧𑀭𑀺𑀴𑀸𑀳𑀦𑁆𑀢𑀺 𑀲𑀤𑀭𑀣𑀁. 𑀦 𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀦 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀦 𑀯𑀺𑀭𑀸𑀕𑀸𑀬𑀸𑀢𑀺 𑀦 𑀯𑀝𑁆𑀝𑁂 𑀯𑀺𑀭𑀸𑀕𑀢𑁆𑀣𑀸𑀬. 𑀦 𑀦𑀺𑀭𑁄𑀥𑀸𑀬𑀸𑀢𑀺 𑀦 𑀯𑀝𑁆𑀝𑀲𑁆𑀲 𑀦𑀺𑀭𑁄𑀥𑀢𑁆𑀣𑀸𑀬. 𑀦 𑀉𑀧𑀲𑀫𑀸𑀬𑀸𑀢𑀺 𑀦 𑀯𑀝𑁆𑀝𑀲𑁆𑀲 𑀉𑀧𑀲𑀫𑀢𑁆𑀣𑀸𑀬. 𑀦 𑀅𑀪𑀺𑀜𑁆𑀜𑀸𑀬𑀸𑀢𑀺 𑀦 𑀯𑀝𑁆𑀝𑀲𑁆𑀲 𑀅𑀪𑀺𑀚𑀸𑀦𑀦𑀢𑁆𑀣𑀸𑀬. 𑀦 𑀲𑀫𑁆𑀩𑁄𑀥𑀸𑀬𑀸𑀢𑀺 𑀦 𑀓𑀺𑀮𑁂𑀲𑀦𑀺𑀤𑁆𑀤𑀸𑀯𑀺𑀕𑀫𑁂𑀦 𑀯𑀝𑁆𑀝𑀢𑁄 𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬. 𑀦 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀦 𑀅𑀫𑀢𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀏𑀢𑁆𑀣 𑀧𑀦 ‘‘𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺 𑀯𑀺𑀧𑀲𑁆𑀲𑀦𑀸. ‘‘𑀯𑀺𑀭𑀸𑀕𑀸𑀬𑀸’’𑀢𑀺 𑀫𑀕𑁆𑀕𑁄. ‘‘𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬𑀸’’𑀢𑀺 𑀦𑀺𑀩𑁆𑀩𑀸𑀦𑀁. ‘‘𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬𑀸’’𑀢𑀺 𑀫𑀕𑁆𑀕𑁄. ‘‘𑀦𑀺𑀩𑁆𑀩𑀸𑀦𑀸𑀬𑀸’’𑀢𑀺 𑀦𑀺𑀩𑁆𑀩𑀸𑀦𑀫𑁂𑀯. 𑀏𑀯𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀺𑀧𑀲𑁆𑀲𑀦𑀸, 𑀢𑀻𑀲𑀼 𑀫𑀕𑁆𑀕𑁄, 𑀢𑀻𑀲𑀼 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑀸𑀬𑁂𑀦 𑀧𑀦 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀫𑀕𑁆𑀕𑀯𑁂𑀯𑀘𑀦𑀸𑀦𑀺𑀧𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑀺𑀧𑀺 𑀳𑁄𑀦𑁆𑀢𑀺𑀬𑁂𑀯.

𑀅𑀚𑁆𑀛𑀢𑁆𑀢𑀁 𑀭𑀸𑀕𑀲𑁆𑀲 𑀲𑀦𑁆𑀢𑀺𑀦𑁆𑀢𑀺 𑀅𑀚𑁆𑀛𑀢𑁆𑀢𑀭𑀸𑀕𑀲𑁆𑀲 𑀲𑀦𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀼𑀢𑀪𑀸𑀯𑁂𑀦 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀑𑀮𑁄𑀓𑁂𑀲𑀺𑀁. 𑀤𑁄𑀲𑀲𑁆𑀲 𑀲𑀦𑁆𑀢𑀺𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑀺𑀦𑀦𑁆𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀯𑀺𑀘𑀺𑀦𑀦𑁆𑀢𑁄𑀢𑀺 𑀲𑀘𑁆𑀘𑀸𑀦𑀺 𑀯𑀟𑁆𑀠𑁂𑀦𑁆𑀢𑁄 𑀯𑀺𑀪𑀸𑀯𑁂𑀦𑁆𑀢𑁄. 𑀧𑀯𑀺𑀘𑀺𑀦𑀦𑁆𑀢𑁄𑀢𑀺 𑀢𑀸𑀦𑁂𑀯 𑀧𑀘𑁆𑀘𑁂𑀓𑀁 𑀯𑀺𑀪𑀸𑀯𑁂𑀦𑁆𑀢𑁄. 𑀓𑁂𑀘𑀺 ‘‘𑀕𑀯𑁂𑀲𑀦𑁆𑀢𑁄’’𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀅𑀤𑀲𑁆𑀲𑀦𑁆𑀢𑀺 𑀑𑀮𑁄𑀓𑁂𑀲𑀺𑀁. 𑀅𑀤𑀓𑁆𑀔𑀺𑀦𑁆𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀁. 𑀅𑀨𑀲𑁆𑀲𑀺𑀦𑁆𑀢𑀺 𑀧𑀜𑁆𑀜𑀸𑀬 𑀨𑀼𑀲𑀺𑀁. 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀅𑀓𑀸𑀲𑀺𑀁.

𑁭𑁩. 𑀤𑀼𑀢𑀺𑀬𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀸𑀦𑀺𑀫𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀢𑁂𑀳𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 ‘‘𑀯𑀺𑀦𑀺𑀘𑁆𑀙𑀬𑀸’’𑀢𑀺 𑀘 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀪𑀸𑀯𑀸𑀤𑀺𑀦𑀸 𑀦𑀬𑁂𑀦 ‘‘𑀧𑀓𑀧𑁆𑀧𑀺𑀢𑀸𑀦𑀻’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀯𑁂 𑀫𑀼𑀦𑀻 𑀤𑀺𑀝𑁆𑀞𑀺𑀕𑀢𑀥𑀫𑁆𑀫𑁂 𑀅𑀕𑁆𑀕𑀳𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀬𑀫𑁂𑀢𑀫𑀢𑁆𑀣𑀁 𑀩𑁆𑀭𑀽𑀲𑀺, 𑀆𑀘𑀺𑀓𑁆𑀔 𑀫𑁂, 𑀓𑀣𑀁 𑀦𑀼 𑀥𑀻𑀭𑁂𑀳𑀺 𑀧𑀯𑁂𑀤𑀺𑀢𑀁 𑀢𑀁 𑀓𑀣𑀁 𑀧𑀓𑀸𑀲𑀺𑀢𑀁 𑀥𑀻𑀭𑁂𑀳𑀻𑀢𑀺 𑀯𑀤𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄 𑀞𑀧𑁂𑀢𑁆𑀯𑀸 𑀧𑀭𑀫𑀢𑁆𑀣𑀧𑀤𑀁. 𑀢𑀢𑁆𑀣 𑀬𑀁 𑀧𑀭𑀫𑀢𑁆𑀣𑀦𑁆𑀢𑀺 𑀬𑀁 𑀉𑀢𑁆𑀢𑀫𑀁 𑀦𑀺𑀩𑁆𑀩𑀸𑀦𑀁.

𑁭𑁪. 𑀅𑀣𑀲𑁆𑀲 𑀪𑀕𑀯𑀸 𑀬𑀣𑀸 𑀬𑁂𑀦 𑀉𑀧𑀸𑀬𑁂𑀦 𑀢𑀁 𑀧𑀤𑀁 𑀥𑀻𑀭𑁂𑀳𑀺 𑀧𑀓𑀸𑀲𑀺𑀢𑀁, 𑀢𑀁 𑀉𑀧𑀸𑀬𑀁 𑀲𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀤𑀺𑀝𑁆𑀞𑀺𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀦 𑀤𑀺𑀝𑁆𑀞𑀺𑀬𑀸𑀢𑀺𑀆𑀤𑀻𑀳𑀺 𑀤𑀺𑀝𑁆𑀞𑀺𑀲𑀼𑀢𑀺𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑀩𑀸𑀳𑀺𑀭𑀲𑀻𑀮𑀩𑁆𑀩𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀲𑀼𑀤𑁆𑀥𑀺𑀫𑀸𑀳𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀆𑀳-𑀲𑀤𑁆𑀤𑀁 𑀲𑀩𑁆𑀩𑀢𑁆𑀣 𑀦𑀓𑀸𑀭𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀼𑀭𑀺𑀫𑀧𑀤𑀢𑁆𑀢𑀬𑀁 𑀦𑁂𑀢𑁆𑀯𑀸 ‘‘𑀤𑀺𑀝𑁆𑀞𑀺𑀬𑀸 𑀲𑀼𑀤𑁆𑀥𑀺𑀁 𑀦𑀸𑀳 𑀦 𑀓𑀣𑁂𑀫𑀻’’𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀢𑁆𑀢𑀭𑀧𑀤𑁂𑀲𑀼𑀧𑀺. 𑀢𑀢𑁆𑀣 𑀘 𑀅𑀤𑀺𑀝𑁆𑀞𑀺𑀬𑀸 𑀦𑀸𑀳𑀸𑀢𑀺 𑀤𑀲𑀯𑀢𑁆𑀣𑀼𑀓𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀺𑀦𑀸 𑀦 𑀓𑀣𑁂𑀫𑀺. 𑀢𑀣𑀸 𑀅𑀲𑁆𑀲𑀼𑀢𑀺𑀬𑀸𑀢𑀺 𑀦𑀯𑀗𑁆𑀕𑀁 𑀲𑀯𑀦𑀁 𑀯𑀺𑀦𑀸. 𑀅𑀜𑀸𑀡𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀯𑀺𑀦𑀸. 𑀅𑀲𑀻𑀮𑀢𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁 𑀯𑀺𑀦𑀸. 𑀅𑀩𑁆𑀩𑀢𑀸𑀢𑀺 𑀥𑀼𑀢𑀗𑁆𑀕𑀯𑀢𑀁 𑀯𑀺𑀦𑀸. 𑀦𑁄𑀧𑀺 𑀢𑁂𑀦𑀸𑀢𑀺 𑀢𑁂𑀲𑀼 𑀏𑀓𑀫𑁂𑀓𑁂𑀦 𑀤𑀺𑀝𑁆𑀞𑀺𑀆𑀤𑀺𑀫𑀢𑁆𑀢𑁂𑀦𑀸𑀧𑀺 𑀦 𑀓𑀣𑁂𑀫𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀏𑀢𑁂 𑀘 𑀧𑀼𑀭𑀺𑀫𑀤𑀺𑀝𑁆𑀞𑀺𑀆𑀤𑀺𑀪𑁂𑀤𑁂 𑀓𑀡𑁆𑀳𑀧𑀓𑁆𑀔𑀺𑀓𑁂 𑀥𑀫𑁆𑀫𑁂 𑀲𑀫𑀼𑀕𑁆𑀖𑀸𑀢𑀓𑀭𑀡𑁂𑀦 𑀦𑀺𑀲𑁆𑀲𑀚𑁆𑀚, 𑀧𑀘𑁆𑀙𑀺𑀫𑁂 𑀅𑀤𑀺𑀝𑁆𑀞𑀺𑀆𑀤𑀺𑀪𑁂𑀤𑁂 𑀲𑀼𑀓𑁆𑀓𑀧𑀓𑁆𑀔𑀺𑀓𑁂𑀧𑀺 𑀅𑀢𑀫𑁆𑀫𑀬𑀢𑀸𑀧𑀚𑁆𑀚𑀦𑁂𑀦 𑀅𑀦𑀼𑀕𑁆𑀕𑀳𑀸𑀬. 𑀲𑀦𑁆𑀢𑁄 𑀅𑀦𑀺𑀲𑁆𑀲𑀸𑀬 𑀪𑀯𑀁 𑀦 𑀚𑀧𑁆𑀧𑁂𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀭𑀸𑀕𑀸𑀤𑀺𑀯𑀽𑀧𑀲𑀫𑁂𑀦 𑀲𑀦𑁆𑀢𑁄 𑀘𑀓𑁆𑀔𑀸𑀤𑀻𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀺𑀲𑁆𑀲𑀸𑀬 𑀏𑀓𑀫𑁆𑀧𑀺 𑀪𑀯𑀁 𑀦 𑀚𑀧𑁆𑀧𑁂, 𑀅𑀧𑀺𑀳𑁂𑀢𑀼𑀁 𑀅𑀧𑀢𑁆𑀣𑁂𑀢𑀼𑀁 𑀲𑀫𑀢𑁆𑀣𑁄 𑀲𑀺𑀬𑀸, 𑀅𑀬𑀫𑀲𑁆𑀲 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀯𑀦𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀲𑀼𑀢𑁆𑀢𑀸𑀤𑀺𑀯𑀲𑁂𑀦 𑀲𑀼𑀡𑀦𑀫𑁆𑀧𑀺 𑀆𑀓𑀗𑁆𑀔𑀺𑀢𑀩𑁆𑀩𑀁. 𑀲𑀫𑁆𑀪𑀸𑀭𑀸 𑀇𑀫𑁂 𑀥𑀫𑁆𑀫𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑀸 𑀇𑀫𑁂 𑀥𑀫𑁆𑀫𑀸 𑀉𑀧𑀓𑀸𑀭𑀝𑁆𑀞𑁂𑀦 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺. 𑀓𑀡𑁆𑀳𑀧𑀓𑁆𑀔𑀺𑀓𑀸𑀦𑀦𑁆𑀢𑀺 𑀅𑀓𑀼𑀲𑀮𑀧𑀓𑁆𑀔𑁂 𑀪𑀯𑀸𑀦𑀁. 𑀲𑀫𑀼𑀕𑁆𑀖𑀸𑀢𑀢𑁄 𑀧𑀳𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀫𑀸 𑀳𑀦𑀦𑀢𑁄 𑀲𑀫𑀼𑀘𑁆𑀙𑁂𑀤𑀢𑁄 𑀧𑀳𑀸𑀦𑀁 𑀆𑀓𑀗𑁆𑀔𑀺𑀢𑀩𑁆𑀩𑀁. 𑀢𑁂𑀥𑀸𑀢𑀼𑀓𑁂𑀲𑀼 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀓𑀸𑀫𑀭𑀽𑀧𑀸𑀭𑀽𑀧𑀲𑀗𑁆𑀔𑀸𑀢𑁂𑀲𑀼 𑀢𑁂𑀪𑀽𑀫𑀓𑁂𑀲𑀼 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂𑀲𑀼. 𑀅𑀢𑀫𑁆𑀫𑀬𑀢𑀸𑀢𑀺 𑀦𑀺𑀢𑁆𑀢𑀡𑁆𑀳𑀪𑀸𑀯𑁄.

𑁭𑁫. 𑀏𑀯𑀁 𑀯𑀼𑀢𑁆𑀢𑁂 𑀯𑀘𑀦𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀫𑀸𑀕𑀡𑁆𑀟𑀺𑀬𑁄 ‘‘𑀦𑁄 𑀘𑁂 𑀓𑀺𑀭𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀓𑀡𑁆𑀳𑀧𑀓𑁆𑀔𑀺𑀓𑀸𑀦𑀺𑀬𑁂𑀯 𑀧𑀦 𑀲𑀦𑁆𑀥𑀸𑀬 𑀉𑀪𑀬𑀢𑁆𑀭𑀸𑀧𑀺 𑀆𑀳. 𑀆𑀳-𑀲𑀤𑁆𑀤𑀁 𑀧𑀦 ‘‘𑀦𑁄 𑀘𑁂’’𑀢𑀺 𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀦𑁄 𑀘𑁂 𑀓𑀺𑀭 𑀆𑀳 𑀦𑁄 𑀘𑁂 𑀓𑀺𑀭 𑀓𑀣𑁂𑀲𑀻𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑁄𑀫𑀽𑀳𑀦𑁆𑀢𑀺 𑀅𑀢𑀺𑀫𑀽𑀴𑁆𑀳𑀁, 𑀫𑁄𑀳𑀦𑀁 𑀯𑀸. 𑀧𑀘𑁆𑀘𑁂𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑁄.

𑁭𑁬. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀼𑀘𑁆𑀙𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀤𑀺𑀝𑁆𑀞𑀺𑀜𑁆𑀘 𑀦𑀺𑀲𑁆𑀲𑀸𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁆𑀯𑀁 𑀫𑀸𑀕𑀡𑁆𑀟𑀺𑀬 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀫𑀸𑀦𑁄 𑀬𑀸𑀦𑀺 𑀢𑁂 𑀤𑀺𑀝𑁆𑀞𑀺𑀕𑀢𑀸𑀦𑀺 𑀲𑀫𑀼𑀕𑁆𑀕𑀳𑀺𑀢𑀸𑀦𑀺, 𑀢𑁂𑀲𑁆𑀯𑁂𑀯 𑀲𑀫𑀼𑀕𑁆𑀕𑀳𑀻𑀢𑁂𑀲𑀼 𑀧𑀫𑁄𑀳𑀁 𑀆𑀕𑀢𑁄 𑀢𑁆𑀯𑀁 𑀇𑀢𑁄 𑀘 𑀫𑀬𑀸 𑀯𑀼𑀢𑁆𑀢𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀢𑁄 𑀧𑀝𑀺𑀧𑀢𑁆𑀢𑀺𑀢𑁄 𑀥𑀫𑁆𑀫𑀤𑁂𑀲𑀦𑀢𑁄 𑀯𑀸 𑀅𑀡𑀼𑀫𑁆𑀧𑀺 𑀬𑀼𑀢𑁆𑀢𑀲𑀜𑁆𑀜𑀁 𑀦 𑀧𑀲𑁆𑀲𑀲𑀺, 𑀢𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀁 𑀫𑁄𑀫𑀽𑀳𑀢𑁄 𑀧𑀲𑁆𑀲𑀲𑀻𑀢𑀺.

𑀮𑀕𑁆𑀕𑀦𑀁 𑀦𑀺𑀲𑁆𑀲𑀸𑀬 𑀮𑀕𑁆𑀕𑀦𑀦𑁆𑀢𑀺 𑀤𑀺𑀝𑁆𑀞𑀺𑀮𑀕𑁆𑀕𑀦𑀁 𑀅𑀮𑁆𑀮𑀻𑀬𑀺𑀢𑁆𑀯𑀸 𑀤𑀺𑀝𑁆𑀞𑀺𑀮𑀕𑁆𑀕𑀦𑀁. 𑀩𑀦𑁆𑀥𑀦𑀦𑁆𑀢𑀺 𑀤𑀺𑀝𑁆𑀞𑀺𑀩𑀦𑁆𑀥𑀦𑀁. 𑀧𑀮𑀺𑀩𑁄𑀥𑀦𑁆𑀢𑀺 𑀤𑀺𑀝𑁆𑀞𑀺𑀧𑀮𑀺𑀩𑁄𑀥𑀁.

𑀅𑀦𑁆𑀥𑀓𑀸𑀭𑀁 𑀧𑀓𑁆𑀔𑀦𑁆𑀤𑁄𑀲𑀻𑀢𑀺 𑀩𑀳𑀮𑀦𑁆𑀥𑀓𑀸𑀭𑀁 𑀧𑀯𑀺𑀝𑁆𑀞𑁄𑀲𑀺. 𑀬𑀼𑀢𑁆𑀢𑀲𑀜𑁆𑀜𑀦𑁆𑀢𑀺 𑀲𑀫𑀡𑀥𑀫𑁆𑀫𑁂 𑀬𑀼𑀢𑁆𑀢𑀲𑀜𑁆𑀜𑀁. 𑀧𑀢𑁆𑀢𑀲𑀜𑁆𑀜𑀦𑁆𑀢𑀺 𑀲𑀫𑀡𑀥𑀫𑁆𑀫𑁂 𑀧𑀝𑀺𑀮𑀤𑁆𑀥𑀲𑀜𑁆𑀜𑀁. 𑀮𑀕𑁆𑀕𑀦𑀲𑀜𑁆𑀜𑀦𑁆𑀢𑀺 𑀲𑀜𑁆𑀚𑀸𑀦𑀺𑀢𑀲𑀜𑁆𑀜𑀁. 𑀓𑀸𑀭𑀡𑀲𑀜𑁆𑀜𑀦𑁆𑀢𑀺 𑀳𑁂𑀢𑀼𑀲𑀜𑁆𑀜𑀁. 𑀞𑀸𑀦𑀲𑀜𑁆𑀜𑀦𑁆𑀢𑀺 𑀓𑀸𑀭𑀡𑀲𑀜𑁆𑀜𑀁. 𑀦 𑀧𑀝𑀺𑀮𑀪𑀲𑀻𑀢𑀺 𑀦 𑀯𑀺𑀦𑁆𑀤𑀲𑀺. 𑀓𑀼𑀢𑁄 𑀜𑀸𑀡𑀦𑁆𑀢𑀺 𑀫𑀕𑁆𑀕𑀜𑀸𑀡𑀁 𑀧𑀦 𑀓𑁂𑀦 𑀓𑀸𑀭𑀡𑁂𑀦 𑀮𑀪𑀺𑀲𑁆𑀲𑀲𑀺. 𑀅𑀦𑀺𑀘𑁆𑀘𑀁 𑀯𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀁. 𑀅𑀦𑀺𑀘𑁆𑀘𑀲𑀜𑁆𑀜𑀸𑀦𑀼𑀮𑁄𑀫𑀁 𑀯𑀸𑀢𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸’’𑀢𑀺 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀢𑀸𑀬 𑀲𑀜𑁆𑀜𑀸𑀬 𑀅𑀦𑀼𑀮𑁄𑀫𑀁 𑀅𑀧𑁆𑀧𑀝𑀺𑀓𑁆𑀓𑀽𑀮𑀁 𑀅𑀦𑀺𑀘𑁆𑀘𑀲𑀜𑁆𑀜𑀸𑀦𑀼𑀮𑁄𑀫𑀁. 𑀓𑀺𑀁 𑀢𑀁? 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀤𑁆𑀯𑀺𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀁 𑀤𑀼𑀓𑁆𑀔𑀸𑀦𑀢𑁆𑀢𑀲𑀜𑁆𑀜𑀸𑀦𑀼𑀮𑁄𑀫𑀸𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑁭𑁭. 𑀏𑀯𑀁 𑀲𑀫𑀼𑀕𑁆𑀕𑀳𑀺𑀢𑁂𑀲𑀼 𑀧𑀫𑁄𑀳𑁂𑀦 𑀫𑀸𑀕𑀡𑁆𑀟𑀺𑀬𑀲𑁆𑀲 𑀯𑀺𑀯𑀸𑀤𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀯𑀺𑀕𑀢𑀧𑁆𑀧𑀫𑁄𑀳𑀲𑁆𑀲 𑀅𑀢𑁆𑀢𑀦𑁄 𑀦𑀺𑀩𑁆𑀩𑀺𑀯𑀸𑀤𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁄 𑀯𑀺𑀲𑁂𑀲𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀏𑀯𑀁 𑀢𑀺𑀥𑀸 𑀫𑀸𑀦𑁂𑀦 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸 𑀫𑀜𑁆𑀜𑀢𑀺, 𑀲𑁄 𑀢𑁂𑀦 𑀫𑀸𑀦𑁂𑀦 𑀢𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀢𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀺𑀯𑀤𑁂𑀬𑁆𑀬. 𑀬𑁄 𑀧𑀦 𑀅𑀫𑁆𑀳𑀸𑀤𑀺𑀲𑁄 𑀇𑀫𑀸𑀲𑀼 𑀢𑀻𑀲𑀼 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺, 𑀦 𑀘 𑀳𑀻𑀦𑁄𑀢𑀺 𑀧𑀸𑀞𑀲𑁂𑀲𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑁄𑀯.

𑁭𑁮. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀲𑀘𑁆𑀘𑀦𑁆𑀢𑀺 𑀲𑁄’’𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀏𑀯𑀭𑀽𑀧𑁄 𑀧𑀳𑀻𑀦𑀫𑀸𑀦𑀤𑀺𑀝𑁆𑀞𑀺𑀓𑁄 ‘‘𑀫𑀸𑀤𑀺𑀲𑁄 ‘𑀩𑀸𑀳𑀺𑀢𑀧𑀸𑀧𑀢𑁆𑀢𑀸’𑀤𑀺𑀦𑀸 𑀦𑀬𑁂𑀦 𑀩𑁆𑀭𑀸𑀳𑁆𑀫𑀡𑁄, 𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀓𑀺𑀁 𑀯𑀤𑁂𑀬𑁆𑀬 𑀓𑀺𑀁 𑀯𑀢𑁆𑀣𑀼𑀁 𑀪𑀡𑁂𑀬𑁆𑀬, 𑀓𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀡𑁂𑀬𑁆𑀬, ‘‘𑀫𑀬𑁆𑀳𑀁 𑀲𑀘𑁆𑀘𑀁, 𑀢𑀼𑀬𑁆𑀳𑀁 𑀫𑀼𑀲𑀸’’𑀢𑀺 𑀯𑀸 𑀓𑁂𑀦 𑀫𑀸𑀦𑁂𑀦 𑀤𑀺𑀝𑁆𑀞𑀺𑀬𑀸 𑀧𑀼𑀕𑁆𑀕𑀮𑁂𑀦 𑀯𑀸 𑀯𑀺𑀯𑀤𑁂𑀬𑁆𑀬. 𑀬𑀲𑁆𑀫𑀺𑀁 𑀫𑀸𑀤𑀺𑀲𑁂 𑀔𑀻𑀡𑀸𑀲𑀯𑁂 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀸 𑀲𑀫𑀁 𑀯𑀸, 𑀇𑀢𑀭𑀤𑁆𑀯𑀬𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀲𑀫𑀁 𑀯𑀸 𑀫𑀜𑁆𑀜𑀺𑀢𑀁 𑀦𑀢𑁆𑀣𑀺, 𑀲𑀫𑀸𑀦𑀸𑀤𑀻𑀲𑀼 𑀓𑁂𑀦 𑀯𑀸𑀤𑀁 𑀧𑀝𑀺𑀲𑀁𑀬𑀼𑀚𑁂𑀬𑁆𑀬 𑀧𑀝𑀺𑀧𑁆𑀨𑀭𑁂𑀬𑁆𑀬𑀸𑀢𑀺. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑁄.

𑁭𑁯. 𑀦𑀦𑀼 𑀏𑀓𑀁𑀲𑁂𑀦𑁂𑀯 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄? ‘‘𑀑𑀓𑀁 𑀧𑀳𑀸𑀬𑀸’’𑀢𑀺 𑀕𑀸𑀣𑀸. 𑀢𑀢𑁆𑀣 𑀑𑀓𑀁 𑀧𑀳𑀸𑀬𑀸𑀢𑀺 𑀭𑀽𑀧𑀥𑀸𑀢𑁆𑀯𑀸𑀤𑀺𑀯𑀺𑀜𑁆𑀜𑀸𑀡𑀲𑁆𑀲𑁄𑀓𑀸𑀲𑀁 𑀢𑀢𑁆𑀭 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀙𑀟𑁆𑀟𑁂𑀢𑁆𑀯𑀸. 𑀅𑀦𑀺𑀓𑁂𑀢𑀲𑀸𑀭𑀻𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀸𑀤𑀻𑀦𑀺 𑀢𑀡𑁆𑀳𑀸𑀯𑀲𑁂𑀦 𑀅𑀲𑀭𑀦𑁆𑀢𑁄. 𑀕𑀸𑀫𑁂 𑀅𑀓𑀼𑀩𑁆𑀩𑀁 𑀫𑀼𑀦𑀺 𑀲𑀦𑁆𑀣𑀯𑀸𑀦𑀻𑀢𑀺 𑀕𑀸𑀫𑁂 𑀕𑀺𑀳𑀺𑀲𑀦𑁆𑀣𑀯𑀸𑀦𑀺 𑀅𑀓𑀭𑁄𑀦𑁆𑀢𑁄. 𑀓𑀸𑀫𑁂𑀳𑀺 𑀭𑀺𑀢𑁆𑀢𑁄𑀢𑀺 𑀓𑀸𑀫𑁂𑀲𑀼 𑀙𑀦𑁆𑀤𑀭𑀸𑀕𑀸𑀪𑀸𑀯𑁂𑀦 𑀲𑀩𑁆𑀩𑀓𑀸𑀫𑁂𑀳𑀺 𑀧𑀼𑀣𑀼𑀪𑀽𑀢𑁄. 𑀅𑀧𑀼𑀭𑀓𑁆𑀔𑀭𑀸𑀦𑁄𑀢𑀺 𑀆𑀬𑀢𑀺𑀁 𑀅𑀢𑁆𑀢𑀪𑀸𑀯𑀁 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄. 𑀓𑀣𑀁 𑀦 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀬𑀺𑀭𑀸𑀢𑀺 𑀚𑀦𑁂𑀦 𑀲𑀤𑁆𑀥𑀺𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀦 𑀓𑀣𑁂𑀬𑁆𑀬.

𑀳𑀸𑀮𑀺𑀤𑁆𑀤𑀓𑀸𑀦𑀻𑀢𑀺 𑀏𑀯𑀁𑀦𑀸𑀫𑀓𑁄 𑀕𑀳𑀧𑀢𑀺. 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀬𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑀲𑁆𑀫𑀸 𑀬𑀢𑁆𑀣 𑀫𑀳𑀸𑀓𑀘𑁆𑀘𑀸𑀦𑁄, 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀫𑀳𑀸𑀓𑀘𑁆𑀘𑀸𑀦𑁄 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀫𑀳𑀸𑀓𑀘𑁆𑀘𑀸𑀦𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦, 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬. 𑀉𑀧𑀲𑀗𑁆𑀓𑀫𑀻𑀢𑀺 𑀘 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀏𑀯𑀁 𑀕𑀢𑁄 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸. 𑀇𑀤𑀸𑀦𑀺 𑀬𑁂𑀦𑀢𑁆𑀣𑁂𑀦 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀉𑀧𑀝𑁆𑀞𑀸𑀦𑀁 𑀆𑀕𑀢𑁄, 𑀢𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀦𑀺𑀲𑀺𑀦𑁆𑀦𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀏𑀯𑀁 𑀦𑀺𑀲𑀻𑀤𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀺𑀲𑀻𑀤𑀻𑀢𑀺 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀤𑁂𑀯𑀫𑀦𑀼𑀲𑁆𑀲𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀦𑁆𑀢𑀺. 𑀅𑀬𑀜𑁆𑀘 𑀕𑀳𑀧𑀢𑀺 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀢𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀓𑀣𑀁 𑀦𑀺𑀲𑀺𑀦𑁆𑀦𑁄 𑀘 𑀧𑀦 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺? 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸. 𑀲𑁂𑀬𑁆𑀬𑀣𑀺𑀤𑀁? 𑀅𑀢𑀺𑀤𑀽𑀭𑀁 𑀅𑀘𑁆𑀘𑀸𑀲𑀦𑁆𑀦𑀁 𑀉𑀧𑀭𑀺𑀯𑀸𑀢𑀁 𑀉𑀦𑁆𑀦𑀢𑀧𑁆𑀧𑀤𑁂𑀲𑀁 𑀅𑀢𑀺𑀲𑀫𑁆𑀫𑀼𑀔𑀁 𑀅𑀢𑀺𑀧𑀘𑁆𑀙𑀸𑀢𑀺. 𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀕𑀦𑁆𑀥𑁂𑀦 𑀩𑀸𑀥𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 𑀅𑀕𑀸𑀭𑀯𑀁 𑀧𑀓𑀸𑀲𑁂𑀢𑀺. 𑀅𑀢𑀺𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀏𑀢𑁂 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺.

𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀅𑀯𑁄𑀘. 𑀯𑀼𑀢𑁆𑀢𑀫𑀺𑀤𑀁 𑀪𑀦𑁆𑀢𑁂 𑀓𑀘𑁆𑀘𑀸𑀦 𑀪𑀕𑀯𑀢𑀸 𑀅𑀝𑁆𑀞𑀓𑀯𑀕𑁆𑀕𑀺𑀬𑁂 𑀫𑀸𑀕𑀡𑁆𑀟𑀺𑀬𑀧𑀜𑁆𑀳𑁂𑀢𑀺 𑀅𑀝𑁆𑀞𑀓𑀯𑀕𑁆𑀕𑀺𑀬𑀫𑁆𑀳𑀺 𑀫𑀸𑀕𑀡𑁆𑀟𑀺𑀬𑀧𑀜𑁆𑀳𑁄 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀜𑁆𑀳𑁂.

𑀭𑀽𑀧𑀥𑀸𑀢𑀽𑀢𑀺 𑀭𑀽𑀧𑀓𑁆𑀔𑀦𑁆𑀥𑁄 𑀅𑀥𑀺𑀧𑁆𑀧𑁂𑀢𑁄. 𑀭𑀽𑀧𑀥𑀸𑀢𑀼𑀭𑀸𑀕𑀯𑀺𑀦𑀺𑀩𑀦𑁆𑀥𑀦𑁆𑀢𑀺 𑀭𑀽𑀧𑀥𑀸𑀢𑀼𑀫𑁆𑀳𑀺 𑀭𑀸𑀕𑁂𑀦 𑀯𑀺𑀦𑀺𑀩𑀤𑁆𑀥𑀁. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀑𑀓𑀲𑀸𑀭𑀻𑀢𑀺 𑀕𑁂𑀳𑀲𑀸𑀭𑀻 𑀆𑀮𑀬𑀲𑀸𑀭𑀻. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀯𑀺𑀜𑁆𑀜𑀸𑀡𑀥𑀸𑀢𑀼 𑀔𑁄 𑀕𑀳𑀧𑀢𑀻’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺? 𑀲𑀫𑁆𑀫𑁄𑀳𑀯𑀺𑀖𑀸𑀢𑀢𑁆𑀣𑀁. ‘‘𑀑𑀓𑁄’’𑀢𑀺 𑀳𑀺 𑀅𑀢𑁆𑀣𑀢𑁄 𑀧𑀘𑁆𑀘𑀬𑁄 𑀯𑀼𑀘𑁆𑀘𑀢𑀺, 𑀧𑀼𑀭𑁂𑀚𑀸𑀢𑀜𑁆𑀘 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀧𑀘𑁆𑀙𑀸𑀚𑀸𑀢𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲𑀧𑀺, 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀜𑁆𑀘 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀢𑀭𑀁 𑀦𑀼 𑀔𑁄 𑀇𑀥 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀲𑀫𑁆𑀫𑁄𑀳𑁄 𑀪𑀯𑁂𑀬𑁆𑀬. 𑀢𑀲𑁆𑀲 𑀯𑀺𑀖𑀸𑀢𑀢𑁆𑀣𑀁 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑀸𑀯 𑀤𑁂𑀲𑀦𑀸 𑀓𑀢𑀸𑀢𑀺. 𑀅𑀧𑀺𑀘 𑀯𑀺𑀧𑀸𑀓𑀆𑀭𑀫𑁆𑀫𑀡𑀯𑀲𑁂𑀦 𑀘𑀢𑀲𑁆𑀲𑁄 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 𑀯𑀼𑀢𑁆𑀢𑀸𑀢𑀺 𑀢𑀸 𑀤𑀲𑁆𑀲𑁂𑀢𑀼𑀫𑁆𑀧𑀺 𑀇𑀥 𑀯𑀺𑀜𑁆𑀜𑀸𑀡𑀁 𑀦 𑀕𑀳𑀺𑀢𑀁.

𑀉𑀧𑀬𑀼𑀧𑀸𑀤𑀸𑀦𑀸𑀢𑀺 𑀢𑀡𑁆𑀳𑀽𑀧𑀬𑀤𑀺𑀝𑁆𑀞𑀽𑀧𑀬𑀯𑀲𑁂𑀦 𑀤𑁆𑀯𑁂 𑀉𑀧𑀬𑀸, 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀘. 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑀸 𑀘𑁂𑀯 𑀅𑀪𑀺𑀦𑀺𑀯𑁂𑀲𑀪𑀽𑀢𑀸 𑀘 𑀅𑀦𑀼𑀲𑀬𑀪𑀽𑀢𑀸 𑀘. 𑀢𑀣𑀸𑀕𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀏𑀢𑁂 𑀧𑀳𑀻𑀦𑀸𑀯, 𑀲𑀢𑁆𑀣𑀼 𑀧𑀦 𑀔𑀻𑀡𑀸𑀲𑀯𑀪𑀸𑀯𑁄 𑀮𑁄𑀓𑁂 𑀅𑀢𑀺𑀧𑀸𑀓𑀝𑁄𑀢𑀺 𑀉𑀧𑀭𑀺𑀫𑀓𑁄𑀝𑀺𑀬𑀸 𑀏𑀯𑀁 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 𑀇𑀥 𑀯𑀺𑀜𑁆𑀜𑀸𑀡𑀁 𑀓𑀲𑁆𑀫𑀸 𑀕𑀳𑀺𑀢𑀁? 𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁. 𑀓𑀺𑀮𑁂𑀲𑀸 𑀳𑀺 𑀦 𑀓𑁂𑀯𑀮𑀁 𑀘𑀢𑀽𑀲𑀼𑀬𑁂𑀯 𑀔𑀦𑁆𑀥𑁂𑀲𑀼 𑀧𑀳𑀻𑀦𑀸 𑀧𑀳𑀻𑀬𑀦𑁆𑀢𑀺, 𑀧𑀜𑁆𑀘𑀲𑀼𑀧𑀺 𑀧𑀳𑀻𑀬𑀦𑁆𑀢𑀺𑀬𑁂𑀯𑀸𑀢𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀁. 𑀏𑀯𑀁 𑀔𑁄 𑀕𑀳𑀧𑀢𑀺 𑀅𑀦𑁄𑀓𑀲𑀸𑀭𑀻 𑀳𑁄𑀢𑀻𑀢𑀺 𑀏𑀯𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑁂𑀦 𑀑𑀓𑀁 𑀅𑀲𑀭𑀦𑁆𑀢𑁂𑀦 𑀅𑀦𑁄𑀓𑀲𑀸𑀭𑀻 𑀦𑀸𑀫 𑀳𑁄𑀢𑀺.

𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸𑀢𑀺 𑀭𑀽𑀧𑀫𑁂𑀯 𑀓𑀺𑀮𑁂𑀲𑀸𑀦𑀁 𑀧𑀘𑁆𑀘𑀬𑀝𑁆𑀞𑁂𑀦 𑀦𑀺𑀫𑀺𑀢𑁆𑀢𑀁, 𑀆𑀭𑀫𑁆𑀫𑀡𑀓𑀺𑀭𑀺𑀬𑀲𑀗𑁆𑀔𑀸𑀢𑁂𑀦 𑀦𑀺𑀯𑀸𑀲𑀝𑁆𑀞𑁂𑀦 𑀦𑀺𑀓𑁂𑀢𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀁. 𑀯𑀺𑀲𑀸𑀭𑁄 𑀘 𑀯𑀺𑀦𑀺𑀩𑀦𑁆𑀥𑁄 𑀘 𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸. 𑀉𑀪𑀬𑁂𑀦𑀧𑀺 𑀳𑀺 𑀓𑀺𑀮𑁂𑀲𑀸𑀦𑀁 𑀧𑀢𑁆𑀣𑀝𑀪𑀸𑀯𑁄 𑀘 𑀯𑀺𑀦𑀺𑀩𑀦𑁆𑀥𑀦𑀪𑀸𑀯𑁄 𑀘 𑀯𑀼𑀢𑁆𑀢𑁄, 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑁂 𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸, 𑀢𑀲𑁆𑀫𑀸 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀫𑁆𑀳𑀺 𑀉𑀧𑁆𑀧𑀦𑁆𑀦𑁂𑀦 𑀓𑀺𑀮𑁂𑀲𑀯𑀺𑀲𑀸𑀭𑁂𑀦 𑀘𑁂𑀯 𑀓𑀺𑀮𑁂𑀲𑀯𑀺𑀦𑀺𑀩𑀦𑁆𑀥𑀦𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁂𑀢𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀦𑀺𑀓𑁂𑀢𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀳𑀻𑀦𑀸𑀢𑀺 𑀢𑁂 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑁂 𑀓𑀺𑀮𑁂𑀲𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸 𑀧𑀳𑀻𑀦𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 𑀘 ‘‘𑀑𑀓𑀸’’𑀢𑀺 𑀯𑀼𑀢𑁆𑀢𑀸, 𑀙 𑀆𑀭𑀫𑁆𑀫𑀡𑀸𑀦𑀺 ‘‘𑀦𑀺𑀓𑁂𑀢’’𑀦𑁆𑀢𑀺? 𑀙𑀦𑁆𑀤𑀭𑀸𑀕𑀲𑁆𑀲 𑀩𑀮𑀯𑀤𑀼𑀩𑁆𑀩𑀮𑀢𑀸𑀬. 𑀲𑀫𑀸𑀦𑁂𑀧𑀺 𑀳𑀺 𑀏𑀢𑁂𑀲𑀁 𑀆𑀮𑀬𑀝𑁆𑀞𑁂𑀦 𑀯𑀺𑀲𑀬𑀪𑀸𑀯𑁂 𑀑𑀓𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀼𑀤𑁆𑀥𑀁 𑀕𑁂𑀳𑀫𑁂𑀯 𑀯𑀼𑀘𑁆𑀘𑀢𑀺, 𑀦𑀺𑀓𑁂𑀢𑀦𑁆𑀢𑀺 ‘‘𑀅𑀚𑁆𑀚 𑀅𑀲𑀼𑀓𑀝𑁆𑀞𑀸𑀦𑁂 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀓𑀢𑀲𑀗𑁆𑀓𑁂𑀢𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀉𑀬𑁆𑀬𑀸𑀦𑀸𑀤𑀺. 𑀢𑀢𑁆𑀣 𑀬𑀣𑀸 𑀧𑀼𑀢𑁆𑀢𑀤𑀸𑀭𑀥𑀦𑀥𑀜𑁆𑀜𑀧𑀼𑀡𑁆𑀡𑀕𑁂𑀳𑁂 𑀙𑀦𑁆𑀤𑀭𑀸𑀕𑁄 𑀩𑀮𑀯𑀸 𑀳𑁄𑀢𑀺, 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀔𑀦𑁆𑀥𑁂𑀲𑀼. 𑀬𑀣𑀸 𑀧𑀦 𑀉𑀬𑁆𑀬𑀸𑀦𑀝𑁆𑀞𑀸𑀦𑀸𑀤𑀻𑀲𑀼 𑀢𑀢𑁄 𑀤𑀼𑀩𑁆𑀩𑀮𑀢𑀭𑁄 𑀳𑁄𑀢𑀺, 𑀏𑀯𑀁 𑀩𑀸𑀳𑀺𑀭𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀽𑀢𑀺 𑀙𑀦𑁆𑀤𑀭𑀸𑀕𑀲𑁆𑀲 𑀩𑀮𑀯𑀤𑀼𑀩𑁆𑀩𑀮𑀢𑀸𑀬 𑀏𑀯𑀁 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄𑀢𑀺 𑀉𑀧𑀝𑁆𑀞𑀸𑀓𑁂𑀲𑀼 𑀥𑀦𑀥𑀜𑁆𑀜𑀮𑀸𑀪𑀸𑀤𑀺𑀯𑀲𑁂𑀦 𑀲𑀼𑀔𑀺𑀢𑁂𑀲𑀼 ‘‘𑀇𑀤𑀸𑀦𑀸𑀳𑀁 𑀫𑀦𑀸𑀧𑀁 𑀘𑀻𑀯𑀭𑀁 𑀫𑀦𑀸𑀧𑀁 𑀪𑁄𑀚𑀦𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀕𑁂𑀳𑀲𑁆𑀲𑀺𑀢𑀲𑀼𑀔𑁂𑀦 𑀲𑀼𑀔𑀺𑀢𑁄 𑀳𑁄𑀢𑀺, 𑀢𑁂𑀳𑀺 𑀧𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑀸 𑀅𑀦𑀼𑀪𑀯𑀫𑀸𑀦𑁄 𑀯𑀺𑀬 𑀘𑀭𑀢𑀺. 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄𑀢𑀺 𑀢𑁂𑀲𑀁 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 𑀲𑀬𑀁 𑀤𑁆𑀯𑀺𑀕𑀼𑀡𑁂𑀦 𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄 𑀳𑁄𑀢𑀺. 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀽𑀢𑀺 𑀓𑀺𑀘𑁆𑀘𑀲𑀗𑁆𑀔𑀸𑀢𑁂𑀲𑀼 𑀓𑀭𑀡𑀻𑀬𑁂𑀲𑀼. 𑀯𑁄𑀬𑁄𑀕𑀁 𑀆𑀧𑀚𑁆𑀚𑀢𑀻𑀢𑀺 𑀉𑀧𑀬𑁄𑀕𑀁 𑀲𑀬𑀁 𑀢𑁂𑀲𑀁 𑀓𑀺𑀘𑁆𑀘𑀸𑀦𑀁 𑀓𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺.

𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀏𑀯𑀁 𑀔𑁄 𑀕𑀳𑀧𑀢𑀺 𑀓𑀸𑀫𑁂𑀳𑀺 𑀅𑀭𑀺𑀢𑁆𑀢𑁄 𑀳𑁄𑀢𑀻𑀢𑀺 𑀏𑀯𑀁 𑀓𑀺𑀮𑁂𑀲𑀓𑀸𑀫𑁂𑀳𑀺 𑀅𑀭𑀺𑀢𑁆𑀢𑁄 𑀳𑁄𑀢𑀺.

𑀅𑀦𑁆𑀢𑁄 𑀓𑀸𑀫𑀸𑀦𑀁 𑀪𑀸𑀯𑁂𑀦 𑀅𑀢𑀼𑀘𑁆𑀙𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀢𑁂𑀲𑀁 𑀅𑀪𑀸𑀯𑁂𑀦 𑀭𑀺𑀢𑁆𑀢𑁄 𑀢𑀼𑀘𑁆𑀙𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀭𑀓𑁆𑀔𑀭𑀸𑀦𑁄𑀢𑀺 𑀯𑀝𑁆𑀝𑀁 𑀧𑀼𑀭𑀢𑁄 𑀓𑀼𑀭𑀼𑀫𑀸𑀦𑁄. 𑀏𑀯𑀁𑀭𑀽𑀧𑁄 𑀲𑀺𑀬𑀦𑁆𑀢𑀺𑀆𑀤𑀻𑀲𑀼 𑀤𑀻𑀖𑀭𑀲𑁆𑀲𑀓𑀸𑀴𑁄𑀤𑀸𑀢𑀸𑀤𑀻𑀲𑀼 𑀭𑀽𑀧𑁂𑀲𑀼 𑀏𑀯𑀁𑀭𑀽𑀧𑁄 𑀦𑀸𑀫 𑀪𑀯𑁂𑀬𑁆𑀬𑀦𑁆𑀢𑀺 𑀧𑀢𑁆𑀣𑁂𑀢𑀺. 𑀲𑀼𑀔𑀸𑀤𑀻𑀲𑀼 𑀯𑁂𑀤𑀦𑀸𑀲𑀼 𑀏𑀯𑀁𑀯𑁂𑀤𑀦𑁄 𑀦𑀸𑀫. 𑀦𑀻𑀮𑀲𑀜𑁆𑀜𑀸𑀤𑀻𑀲𑀼 𑀲𑀜𑁆𑀜𑀸𑀲𑀼 𑀏𑀯𑀁𑀲𑀜𑁆𑀜𑁄 𑀦𑀸𑀫. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀲𑀼 𑀲𑀗𑁆𑀔𑀸𑀭𑁂𑀲𑀼 𑀏𑀯𑀁𑀲𑀗𑁆𑀔𑀸𑀭𑁄 𑀦𑀸𑀫. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀯𑀺𑀜𑁆𑀜𑀸𑀡𑁂𑀲𑀼 𑀏𑀯𑀁𑀯𑀺𑀜𑁆𑀜𑀸𑀡𑁄 𑀦𑀸𑀫 𑀪𑀯𑁂𑀬𑁆𑀬𑀦𑁆𑀢𑀺 𑀧𑀢𑁆𑀣𑁂𑀢𑀺.

𑀅𑀧𑀼𑀭𑀓𑁆𑀔𑀭𑀸𑀦𑁄𑀢𑀺 𑀯𑀝𑁆𑀝𑀁 𑀧𑀼𑀭𑀢𑁄 𑀅𑀓𑀼𑀭𑀼𑀫𑀸𑀦𑁄. 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀅𑀲𑀳𑀺𑀢𑀁 𑀅𑀲𑀺𑀮𑀺𑀝𑁆𑀞𑀁, 𑀫𑀬𑁆𑀳𑀁 𑀲𑀳𑀺𑀢𑀁 𑀲𑀺𑀮𑀺𑀝𑁆𑀞𑀁 𑀫𑀥𑀼𑀭𑀁 𑀫𑀥𑀼𑀭𑀧𑀸𑀦𑀲𑀤𑀺𑀲𑀁. 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀬𑀁 𑀢𑀼𑀬𑁆𑀳𑀁 𑀤𑀻𑀖𑁂𑀦 𑀓𑀸𑀮𑁂𑀦 𑀧𑀭𑀺𑀘𑀺𑀢𑀁 𑀲𑀼𑀧𑁆𑀧𑀕𑀼𑀡𑀁, 𑀢𑀁 𑀫𑀫 𑀯𑀸𑀤𑀁 𑀆𑀕𑀫𑁆𑀫 𑀲𑀩𑁆𑀩𑀁 𑀔𑀡𑁂𑀦 𑀯𑀺𑀧𑀭𑀸𑀯𑀢𑁆𑀢𑀁 𑀦𑀺𑀯𑀢𑁆𑀢𑀁. 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄𑀢𑀺 𑀢𑀼𑀬𑁆𑀳𑀁 𑀤𑁄𑀲𑁄 𑀫𑀬𑀸 𑀆𑀭𑁄𑀧𑀺𑀢𑁄. 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬𑀸𑀢𑀺 𑀢𑀁 𑀢𑀁 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀢𑁆𑀢𑀭𑀁 𑀧𑀭𑀺𑀬𑁂𑀲𑀦𑁆𑀢𑁄 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀫𑁄𑀓𑁆𑀔𑀸𑀬 𑀘𑀭 𑀆𑀳𑀺𑀡𑁆𑀟. 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻𑀢𑀺 𑀅𑀣 𑀲𑀬𑀫𑁂𑀯 𑀧𑀳𑁄𑀲𑀺, 𑀇𑀥𑁂𑀯 𑀦𑀺𑀩𑁆𑀩𑁂𑀞𑁂𑀳𑀻𑀢𑀺.

𑁮𑁦. 𑀲𑁄 𑀏𑀯𑀭𑀽𑀧𑁄 ‘‘𑀬𑁂𑀳𑀺 𑀯𑀺𑀯𑀺𑀢𑁆𑀢𑁄’’𑀢𑀺 𑀕𑀸𑀣𑀸. 𑀢𑀢𑁆𑀣 𑀬𑁂𑀳𑀻𑀢𑀺 𑀬𑁂𑀳𑀺 𑀤𑀺𑀝𑁆𑀞𑀺𑀕𑀢𑀸𑀤𑀻𑀳𑀺. 𑀯𑀺𑀯𑀺𑀢𑁆𑀢𑁄 𑀯𑀺𑀘𑀭𑁂𑀬𑁆𑀬𑀸𑀢𑀺 𑀭𑀺𑀢𑁆𑀢𑁄 𑀘𑀭𑁂𑀬𑁆𑀬. 𑀦 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄𑀢𑀺 ‘‘𑀆𑀕𑀼𑀁 𑀦 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀦𑀺. 𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭𑁦; 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀦𑀺𑀤𑁆𑀤𑁂𑀲 𑁧𑁦𑁨) 𑀦𑀬𑁂𑀦 𑀦𑀸𑀕𑁄 𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀦 𑀘𑀭𑁂𑀬𑁆𑀬. 𑀏𑀮𑀫𑁆𑀩𑀼𑀚𑀦𑁆𑀢𑀺 𑀏𑀮𑀲𑀜𑁆𑀜𑀺𑀢𑁂 𑀅𑀫𑁆𑀩𑀼𑀫𑁆𑀳𑀺 𑀚𑀸𑀢𑀁 𑀓𑀡𑁆𑀝𑀓𑀦𑀸𑀴𑀁 𑀯𑀸𑀭𑀺𑀚𑀁, 𑀧𑀤𑀼𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀚𑀮𑁂𑀦 𑀧𑀗𑁆𑀓𑁂𑀦 𑀘𑀦𑀽𑀧𑀮𑀺𑀢𑁆𑀢𑀦𑁆𑀢𑀺 𑀢𑀁 𑀧𑀤𑀼𑀫𑀁 𑀬𑀣𑀸 𑀚𑀮𑁂𑀦 𑀘 𑀧𑀗𑁆𑀓𑁂𑀦 𑀘 𑀅𑀦𑀼𑀧𑀮𑀺𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀫𑀼𑀦𑀺 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀯𑀸𑀤𑁄 𑀫𑀼𑀦𑀺 𑀕𑁂𑀥𑀸𑀪𑀸𑀯𑁂𑀦 𑀅𑀕𑀺𑀤𑁆𑀥𑁄. 𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀅𑀧𑀸𑀬𑀸𑀤𑀺𑀓𑁂 𑀘 𑀮𑁄𑀓𑁂 𑀤𑁆𑀯𑀻𑀳𑀺 𑀲𑀺𑀮𑁂𑀲𑁂𑀳𑀺 𑀅𑀦𑀼𑀧𑀮𑀺𑀢𑁆𑀢𑁄 𑀳𑁄𑀢𑀺.

𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀅𑀓𑀼𑀲𑀮𑀸𑀤𑀺𑀤𑁄𑀲𑀁 𑀦 𑀓𑀭𑁄𑀢𑀺. 𑀦 𑀕𑀘𑁆𑀙𑀢𑀻𑀢𑀺 𑀅𑀕𑀢𑀺𑀯𑀲𑁂𑀦 𑀦 𑀕𑀘𑁆𑀙𑀢𑀺. 𑀦𑀸𑀕𑀘𑁆𑀙𑀢𑀻𑀢𑀺 𑀧𑀳𑀻𑀦𑀓𑀺𑀮𑁂𑀲𑁂 𑀦 𑀉𑀧𑁂𑀢𑀺. 𑀧𑀸𑀧𑀓𑀸𑀢𑀺 𑀮𑀸𑀫𑀓𑀸. 𑀅𑀓𑀼𑀲𑀮𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸. 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀻𑀢𑀺 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀧𑀼𑀦 𑀦 𑀏𑀢𑀺. 𑀦 𑀧𑀘𑁆𑀘𑁂𑀢𑀻𑀢𑀺 𑀧𑀝𑀺 𑀦 𑀉𑀧𑁂𑀢𑀺. 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀧𑀼𑀦 𑀦 𑀦𑀺𑀯𑀢𑁆𑀢𑀢𑀺.

𑀔𑀭𑀤𑀡𑁆𑀟𑁄𑀢𑀺 𑀔𑀭𑀧𑀢𑁆𑀢𑀤𑀡𑁆𑀟𑁄 𑀨𑀭𑀼𑀲𑀤𑀡𑁆𑀟𑁄. 𑀘𑀢𑁆𑀢𑀕𑁂𑀥𑁄𑀢𑀺 𑀯𑀺𑀲𑁆𑀲𑀝𑁆𑀞𑀕𑁂𑀥𑁄. 𑀯𑀦𑁆𑀢𑀕𑁂𑀥𑁄𑀢𑀺 𑀯𑀫𑀺𑀢𑀕𑁂𑀥𑁄. 𑀫𑀼𑀢𑁆𑀢𑀕𑁂𑀥𑁄𑀢𑀺 𑀙𑀺𑀦𑁆𑀦𑀩𑀦𑁆𑀥𑀦𑀕𑁂𑀥𑁄. 𑀧𑀳𑀻𑀦𑀕𑁂𑀥𑁄𑀢𑀺 𑀧𑀚𑀳𑀺𑀢𑀕𑁂𑀥𑁄. 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑁄𑀢𑀺 𑀬𑀣𑀸 𑀦 𑀧𑀼𑀦 𑀘𑀺𑀢𑁆𑀢𑀁 𑀆𑀭𑀼𑀳𑀢𑀺, 𑀏𑀯𑀁 𑀧𑀝𑀺𑀯𑀺𑀲𑁆𑀲𑀚𑁆𑀚𑀺𑀢𑀕𑁂𑀥𑁄. 𑀉𑀧𑀭𑀺 𑀯𑀻𑀢𑀭𑀸𑀕𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀸𑀦𑁂𑀯 𑀢𑀸𑀦𑀺 𑀕𑀳𑀺𑀢𑀕𑁆𑀕𑀳𑀡𑀲𑁆𑀲 𑀯𑀺𑀲𑁆𑀲𑀝𑁆𑀞𑀪𑀸𑀯𑀯𑁂𑀯𑀘𑀦𑀸𑀦𑀺.

𑁮𑁧. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀦 𑀯𑁂𑀤𑀕𑀽’’𑀢𑀺 𑀕𑀸𑀣𑀸. 𑀢𑀢𑁆𑀣 𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸𑀬𑀓𑁄𑀢𑀺 𑀘𑀢𑀼𑀫𑀕𑁆𑀕𑀯𑁂𑀤𑀕𑀽 𑀫𑀸𑀤𑀺𑀲𑁄 𑀤𑀺𑀝𑁆𑀞𑀺𑀬𑀸𑀬𑀓𑁄 𑀦 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸 𑀕𑀘𑁆𑀙𑀦𑁆𑀢𑁄 𑀯𑀸, 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀦𑁆𑀢𑁄 𑀯𑀸 𑀦 𑀳𑁄𑀢𑀺. 𑀢𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀬𑀸𑀬𑀢𑀻𑀢𑀺 𑀬𑀸𑀬𑀓𑁄. 𑀓𑀭𑀡𑀯𑀘𑀦𑁂𑀦 𑀤𑀺𑀝𑁆𑀞𑀺𑀬𑀸 𑀬𑀸𑀬𑀢𑀻𑀢𑀺 𑀤𑀺𑀝𑁆𑀞𑀺𑀬𑀸𑀬𑀓𑁄. 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑁂𑀦𑀧𑀺 𑀤𑀺𑀝𑁆𑀞𑀺𑀬𑀸 𑀬𑀸𑀢𑀻𑀢𑀺𑀧𑀺 𑀤𑀺𑀝𑁆𑀞𑀺𑀬𑀸𑀬𑀓𑁄. 𑀦 𑀫𑀼𑀢𑀺𑀬𑀸 𑀲 𑀫𑀸𑀦𑀫𑁂𑀢𑀻𑀢𑀺 𑀫𑀼𑀢𑀭𑀽𑀧𑀸𑀤𑀺𑀪𑁂𑀤𑀸𑀬 𑀫𑀼𑀢𑀺𑀬𑀸𑀧𑀺 𑀲𑁄 𑀫𑀸𑀦𑀁 𑀦 𑀏𑀢𑀺. 𑀦 𑀳𑀺 𑀢𑀫𑁆𑀫𑀬𑁄 𑀲𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀢𑀫𑁆𑀫𑀬𑁄 𑀳𑁄𑀢𑀺 𑀢𑀧𑁆𑀧𑀭𑀸𑀬𑀡𑁄, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄. 𑀦 𑀓𑀫𑁆𑀫𑀼𑀦𑀸 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀦𑀸 𑀓𑀫𑁆𑀫𑀼𑀦𑀸 𑀯𑀸, 𑀲𑀼𑀢𑀲𑀼𑀤𑁆𑀥𑀺𑀆𑀤𑀺𑀦𑀸 𑀲𑀼𑀢𑁂𑀦 𑀯𑀸 𑀲𑁄 𑀦𑁂𑀢𑀩𑁆𑀩𑁄 𑀦 𑀳𑁄𑀢𑀺. 𑀅𑀦𑀽𑀧𑀦𑀻𑀢𑁄 𑀲 𑀦𑀺𑀯𑁂𑀲𑀦𑁂𑀲𑀽𑀢𑀺 𑀲𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀧𑀬𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑁂𑀲𑀼 𑀅𑀦𑀼𑀧𑀦𑀻𑀢𑁄.

𑀫𑀼𑀢𑀭𑀽𑀧𑁂𑀦 𑀯𑀸𑀢𑀺 𑀏𑀢𑁆𑀣 𑀫𑀼𑀢𑀭𑀽𑀧𑀁 𑀦𑀸𑀫 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑀺. 𑀫𑀸𑀦𑀁 𑀦𑁂𑀢𑀻𑀢𑀺 𑀅𑀲𑁆𑀫𑀺𑀫𑀸𑀦𑀁 𑀦 𑀏𑀢𑀺. 𑀦 𑀉𑀧𑁂𑀢𑀻𑀢𑀺 𑀲𑀫𑀻𑀧𑀁 𑀦 𑀏𑀢𑀺. 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀉𑀧𑀕𑀦𑁆𑀢𑁆𑀯𑀸 𑀦 𑀢𑀺𑀝𑁆𑀞𑀢𑀺. 𑀢𑀫𑁆𑀫𑀬𑁄𑀢𑀺 𑀢𑀧𑁆𑀧𑀓𑀢𑁄.

𑁮𑁨. 𑀢𑀲𑁆𑀲 𑀘 𑀏𑀯𑀁𑀯𑀺𑀥𑀲𑁆𑀲 ‘‘𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲𑀸’’𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲𑀸𑀢𑀺 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀪𑀸𑀯𑀦𑀸𑀬 𑀧𑀳𑀻𑀦𑀓𑀸𑀫𑀸𑀤𑀺𑀲𑀜𑁆𑀜𑀲𑁆𑀲. 𑀇𑀫𑀺𑀦𑀸 𑀧𑀤𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀲𑀫𑀣𑀬𑀸𑀦𑀺𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀪𑀸𑀯𑀦𑀸𑀬 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀲𑁆𑀲. 𑀇𑀫𑀺𑀦𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀬𑁂 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀖𑀝𑁆𑀝𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂𑀢𑀺 𑀬𑁂 𑀧𑀦 𑀓𑀸𑀫𑀲𑀜𑁆𑀜𑀸𑀤𑀺𑀓𑀁 𑀲𑀜𑁆𑀜𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀯𑀺𑀲𑁂𑀲𑀢𑁄 𑀕𑀳𑀝𑁆𑀞𑀸 𑀓𑀸𑀫𑀸𑀥𑀺𑀓𑀭𑀡𑀁, 𑀬𑁂 𑀘 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀯𑀺𑀲𑁂𑀲𑀢𑁄 𑀧𑀩𑁆𑀩𑀚𑀺𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀻𑀢𑀺.

𑀬𑁄 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀲𑀳𑀯𑀺𑀧𑀲𑁆𑀲𑀦𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀧𑀞𑀫𑀁 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀲𑀳𑀯𑀺𑀧𑀲𑁆𑀲𑀦𑀁 𑀅𑀭𑀺𑀬𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀆𑀤𑀺𑀢𑁄𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀞𑀫𑀚𑁆𑀛𑀸𑀦𑀸𑀤𑀺𑀢𑁄. 𑀉𑀧𑀸𑀤𑀸𑀬𑀸𑀢𑀺 𑀧𑀝𑀺𑀘𑁆𑀘 𑀆𑀕𑀫𑁆𑀫. 𑀕𑀦𑁆𑀣𑀸 𑀯𑀺𑀓𑁆𑀔𑀫𑁆𑀪𑀻𑀢𑀸 𑀳𑁄𑀦𑁆𑀢𑀻𑀢𑀺 𑀕𑀦𑁆𑀣𑀸 𑀤𑀽𑀭𑀻𑀓𑀢𑀸 𑀪𑀯𑀦𑁆𑀢𑀺. 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂𑀢𑀺 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀢𑁂. 𑀅𑀭𑀳𑀢𑁄𑀢𑀺 𑀅𑀭𑀳𑀢𑁆𑀢𑀨𑀮𑁂 𑀞𑀺𑀢𑀲𑁆𑀲. 𑀕𑀦𑁆𑀣𑀸 𑀘 𑀫𑁄𑀳𑀸 𑀘𑀸𑀢𑀺𑀆𑀤𑀬𑁄 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺.

𑀬𑁄 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀯𑀺𑀧𑀲𑁆𑀲𑀦𑀁 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀧𑀞𑀫𑀁 𑀯𑀺𑀧𑀲𑁆𑀲𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀲𑀫𑀸𑀥𑀺𑀁 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀆𑀤𑀺𑀢𑁄 𑀉𑀧𑀸𑀤𑀸𑀬𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑀺𑀘𑁆𑀘. 𑀫𑁄𑀳𑀸 𑀯𑀺𑀓𑁆𑀔𑀫𑁆𑀪𑀺𑀢𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀺𑀢𑀸𑀢𑀺 𑀤𑀽𑀭𑀁 𑀧𑀸𑀧𑀺𑀢𑀸 𑀲𑀜𑁆𑀜𑀸𑀯𑀲𑁂𑀦. 𑀖𑀝𑁆𑀝𑁂𑀦𑁆𑀢𑀻𑀢𑀺 𑀬𑁂 𑀓𑀸𑀫𑀲𑀜𑁆𑀜𑀸𑀤𑀺𑀁 𑀕𑀡𑁆𑀳𑀦𑁆𑀢𑀺, 𑀢𑁂 𑀲𑀜𑁆𑀜𑀸𑀯𑀲𑁂𑀦 𑀧𑀻𑀴𑁂𑀦𑁆𑀢𑀺. 𑀲𑀗𑁆𑀖𑀝𑁆𑀝𑁂𑀦𑁆𑀢𑀻𑀢𑀺 𑀢𑀢𑁄 𑀢𑀢𑁄 𑀧𑀻𑀴𑁂𑀦𑁆𑀢𑀺. 𑀇𑀤𑀸𑀦𑀺 𑀖𑀝𑁆𑀝𑁂𑀦𑁆𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀭𑀸𑀚𑀸𑀦𑁄𑀧𑀺 𑀭𑀸𑀚𑀽𑀳𑀺 𑀯𑀺𑀯𑀤𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑁄 𑀯𑀼𑀢𑁆𑀢𑁄. 𑀅𑀜𑁆𑀜𑀫𑀜𑁆𑀜𑀁 𑀧𑀸𑀡𑀻𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀻𑀢𑀺 𑀏𑀢𑁆𑀣 𑀅𑀜𑁆𑀜𑀫𑀜𑁆𑀜𑀁 𑀳𑀢𑁆𑀣𑁂𑀳𑀺 𑀧𑀳𑀭𑀦𑁆𑀢𑀺. 𑀮𑁂𑀟𑁆𑀟𑀽𑀳𑀻𑀢𑀺 𑀓𑀧𑀸𑀮𑀔𑀡𑁆𑀟𑁂𑀳𑀺. 𑀤𑀡𑁆𑀟𑁂𑀳𑀻𑀢𑀺 𑀅𑀟𑁆𑀠𑀤𑀡𑁆𑀟𑀓𑁂𑀳𑀺. 𑀲𑀢𑁆𑀣𑁂𑀳𑀻𑀢𑀺 𑀉𑀪𑀢𑁄𑀥𑀸𑀭𑁂𑀳𑀺 𑀲𑀢𑁆𑀣𑁂𑀳𑀺.

𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑁂𑀦. 𑀕𑀢𑀺𑀬𑀸 𑀖𑀝𑁆𑀝𑁂𑀦𑁆𑀢𑀻𑀢𑀺 𑀕𑀦𑁆𑀢𑀩𑁆𑀩𑀸𑀬 𑀧𑀢𑀺𑀝𑁆𑀞𑀸𑀪𑀽𑀢𑀸𑀬 𑀕𑀢𑀺𑀬𑀸 𑀧𑀻𑀴𑁂𑀦𑁆𑀢𑀺 𑀖𑀝𑁆𑀝𑀦𑀁 𑀆𑀧𑀚𑁆𑀚𑀦𑁆𑀢𑀺. 𑀦𑀺𑀭𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.