𑁧𑁦. 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁩. 𑀤𑀲𑀫𑁂 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀓𑀣𑀁𑀤𑀲𑁆𑀲𑀻𑀢𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀇𑀢𑁄 𑀧𑀭𑁂𑀲𑀜𑁆𑀘 𑀧𑀜𑁆𑀘𑀦𑁆𑀦𑀁 𑀓𑀮𑀳𑀯𑀺𑀯𑀸𑀤𑀘𑀽𑀴𑀩𑁆𑀬𑀽𑀳𑀫𑀳𑀸𑀩𑁆𑀬𑀽𑀳𑀢𑀼𑀯𑀝𑀓𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀸𑀦𑀁 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀲𑀼. 𑀦𑀺. 𑀅𑀝𑁆𑀞. 𑁨.𑁩𑁬𑁨 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀸𑀫𑀜𑁆𑀜𑀢𑁄 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦 𑀬𑀣𑁂𑀯 𑀢𑀲𑁆𑀫𑀺𑀁 𑀫𑀳𑀸𑀲𑀫𑀬𑁂 𑀭𑀸𑀕𑀘𑀭𑀺𑀢𑀤𑁂𑀯𑀢𑀸𑀦𑀁 𑀲𑀧𑁆𑀧𑀸𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀦𑁆𑀢- (𑀲𑀼. 𑀦𑀺. 𑁩𑁬𑁧 𑀆𑀤𑀬𑁄) 𑀫𑀪𑀸𑀲𑀺, 𑀏𑀯𑀁 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀲𑀫𑀬𑁂 ‘‘𑀓𑀺𑀁 𑀦𑀼 𑀔𑁄 𑀧𑀼𑀭𑀸 𑀲𑀭𑀻𑀭𑀪𑁂𑀤𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀢𑀸𑀲𑀁 𑀅𑀦𑀼𑀕𑁆𑀕𑀳𑀢𑁆𑀣𑀁 𑀅𑀟𑁆𑀠𑀢𑁂𑀴𑀲𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑀁 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀆𑀓𑀸𑀲𑁂𑀦 𑀆𑀦𑁂𑀢𑁆𑀯𑀸 𑀢𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀓𑀣𑀁? 𑀩𑀼𑀤𑁆𑀥𑀸 𑀦𑀸𑀫 𑀫𑀳𑀦𑁆𑀢𑀸 𑀏𑀢𑁂 𑀲𑀢𑁆𑀢𑀯𑀺𑀲𑁂𑀲𑀸, 𑀬𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸 𑀦 𑀓𑀺𑀜𑁆𑀘𑀺 𑀓𑀢𑁆𑀣𑀘𑀺 𑀦𑀻𑀮𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀯𑀺𑀪𑀢𑁆𑀢𑀭𑀽𑀧𑀸𑀭𑀫𑁆𑀫𑀡𑀁 𑀯𑀸, 𑀪𑁂𑀭𑀺𑀲𑀤𑁆𑀤𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀁 𑀯𑀸 𑀅𑀢𑁆𑀣𑀺, 𑀬𑀁 𑀏𑀢𑁂𑀲𑀁 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀦𑀸𑀕𑀘𑁆𑀙𑀢𑀺. 𑀬𑀣𑀸𑀳 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑀳𑀁 𑀚𑀸𑀦𑀸𑀫𑀺 𑀢𑀫𑀳𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺 (𑀅. 𑀦𑀺. 𑁪.𑁨𑁪). 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑁄 𑀪𑀕𑀯𑀸 𑀲𑀩𑁆𑀩𑀸𑀧𑀺 𑀢𑀸 𑀤𑁂𑀯𑀢𑀸 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. ‘‘𑀓𑀫𑁆𑀫𑀸𑀯𑀭𑀡𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀸’’𑀢𑀺𑀆𑀤𑀺𑀦𑀸 (𑀧𑀼. 𑀧. 𑁧𑁨) 𑀳𑀺 𑀦𑀬𑁂𑀦 𑀯𑀼𑀢𑁆𑀢𑀸 𑀲𑀢𑁆𑀢𑀸 𑀅𑀪𑀩𑁆𑀩𑀸 𑀦𑀸𑀫. 𑀢𑁂 𑀏𑀓𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀧𑀺 𑀩𑀼𑀤𑁆𑀥𑀸 𑀦 𑀑𑀮𑁄𑀓𑁂𑀦𑁆𑀢𑀺. 𑀯𑀺𑀧𑀭𑀻𑀢𑀸 𑀧𑀦 𑀪𑀩𑁆𑀩𑀸 𑀦𑀸𑀫. 𑀢𑁂 𑀤𑀽𑀭𑁂 𑀯𑀲𑀦𑁆𑀢𑁂𑀧𑀺 𑀕𑀦𑁆𑀢𑁆𑀯𑀸 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀺𑀁 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁂 𑀬𑁂 𑀅𑀪𑀩𑁆𑀩𑀸, 𑀢𑁂 𑀧𑀳𑀸𑀬 𑀪𑀩𑁆𑀩𑁂 𑀧𑀭𑀺𑀕𑁆𑀕𑀳𑁂𑀲𑀺. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀏𑀢𑁆𑀣 𑀭𑀸𑀕𑀘𑀭𑀺𑀢𑀸, 𑀏𑀢𑁆𑀢𑀓𑀸 𑀤𑁄𑀲𑀸𑀤𑀺𑀘𑀭𑀺𑀢𑀸’’𑀢𑀺 𑀘𑀭𑀺𑀬𑀯𑀲𑁂𑀦 𑀙 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀅𑀣 𑀦𑁂𑀲𑀁 𑀲𑀧𑁆𑀧𑀸𑀬𑀥𑀫𑁆𑀫𑀤𑁂𑀲𑀦𑀁 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀭𑀸𑀕𑀘𑀭𑀺𑀢𑀸𑀦𑀁 𑀤𑁂𑀯𑀸𑀦𑀁 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀁 (𑀲𑀼. 𑀦𑀺. 𑁩𑁬𑁧 𑀆𑀤𑀬𑁄) 𑀓𑀣𑁂𑀲𑁆𑀲𑀸𑀫𑀺, 𑀤𑁄𑀲𑀘𑀭𑀺𑀢𑀸𑀦𑀁 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀁 (𑀲𑀼. 𑀦𑀺. 𑁮𑁬𑁮 𑀆𑀤𑀬𑁄), 𑀫𑁄𑀳𑀘𑀭𑀺𑀢𑀸𑀦𑀁 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁦𑁧 𑀆𑀤𑀬𑁄), 𑀯𑀺𑀢𑀓𑁆𑀓𑀘𑀭𑀺𑀢𑀸𑀦𑀁 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀁 (𑀲𑀼. 𑀦𑀺. 𑁮𑁮𑁪 𑀆𑀤𑀬𑁄), 𑀲𑀤𑁆𑀥𑀸𑀘𑀭𑀺𑀢𑀸𑀦𑀁 𑀢𑀼𑀯𑀝𑀓𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁨𑁧 𑀆𑀤𑀬𑁄), 𑀩𑀼𑀤𑁆𑀥𑀺𑀘𑀭𑀺𑀢𑀸𑀦𑀁 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀁 (𑀲𑀼. 𑀦𑀺. 𑁮𑁫𑁪 𑀆𑀤𑀬𑁄) 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀤𑁂𑀲𑀦𑀁 𑀯𑀯𑀢𑁆𑀣𑀸𑀧𑁂𑀢𑁆𑀯𑀸 𑀧𑀼𑀦 𑀢𑀁 𑀧𑀭𑀺𑀲𑀁 𑀫𑀦𑀲𑀸𑀓𑀸𑀲𑀺 ‘‘𑀅𑀢𑁆𑀢𑀚𑁆𑀛𑀸𑀲𑀬𑁂𑀦 𑀦𑀼 𑀔𑁄 𑀚𑀸𑀦𑁂𑀬𑁆𑀬, 𑀧𑀭𑀚𑁆𑀛𑀸𑀲𑀬𑁂𑀦, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁂𑀦, 𑀧𑀼𑀘𑁆𑀙𑀸𑀯𑀲𑁂𑀦𑀸’’𑀢𑀺. 𑀢𑀢𑁄 ‘‘𑀧𑀼𑀘𑁆𑀙𑀸𑀯𑀲𑁂𑀦 𑀚𑀸𑀦𑁂𑀬𑁆𑀬𑀸’’𑀢𑀺 𑀜𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀤𑁂𑀯𑀢𑀸𑀦𑀁 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀘𑀭𑀺𑀬𑀯𑀲𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺 ‘‘𑀢𑁂𑀲𑀼 𑀧𑀜𑁆𑀘𑀲𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑁄𑀧𑀺 𑀦 𑀲𑀓𑁆𑀓𑁄𑀢𑀻’’𑀢𑀺 𑀅𑀤𑁆𑀤𑀲. 𑀢𑀢𑁄 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂, 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀘 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 ‘‘𑀢𑁂𑀧𑀺 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑁂𑀬𑁆𑀬, 𑀲𑀓𑁆𑀓𑀼𑀡𑁂𑀬𑁆𑀬 𑀦𑀼 𑀔𑁄’’𑀢𑀺. ‘‘𑀲𑁄𑀧𑀺 𑀦 𑀲𑀓𑁆𑀓𑀼𑀡𑁂𑀬𑁆𑀬𑁄’’𑀢𑀺 𑀜𑀢𑁆𑀯𑀸 ‘‘𑀲𑀓𑁆𑀓𑀲𑀼𑀬𑀸𑀫𑀸𑀤𑀻𑀲𑀼 𑀓𑁄𑀘𑀺 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺 𑀲𑀫𑀦𑁆𑀦𑀸𑀳𑀭𑀺. 𑀲𑀘𑁂 𑀳𑀺 𑀢𑁂𑀲𑀼 𑀓𑁄𑀘𑀺 𑀲𑀓𑁆𑀓𑀼𑀡𑁂𑀬𑁆𑀬, 𑀢𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀯𑀺𑀲𑁆𑀲𑀚𑁆𑀚𑁂𑀬𑁆𑀬. 𑀦 𑀧𑀦 𑀢𑁂𑀲𑀼𑀧𑀺 𑀓𑁄𑀘𑀺 𑀲𑀓𑁆𑀓𑁄𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀤𑀺𑀲𑁄 𑀩𑀼𑀤𑁆𑀥𑁄𑀬𑁂𑀯 𑀲𑀓𑁆𑀓𑀼𑀡𑁂𑀬𑁆𑀬, 𑀅𑀢𑁆𑀣𑀺 𑀧𑀦 𑀓𑀢𑁆𑀣𑀘𑀺 𑀅𑀜𑁆𑀜𑁄 𑀩𑀼𑀤𑁆𑀥𑁄’’𑀢𑀺 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀜𑀸𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀦 𑀅𑀜𑁆𑀜𑀁 𑀩𑀼𑀤𑁆𑀥𑀁 𑀅𑀤𑁆𑀤𑀲. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀲𑀫𑀁 𑀦 𑀧𑀲𑁆𑀲𑁂𑀬𑁆𑀬, 𑀬𑁄 𑀚𑀸𑀢𑀤𑀺𑀯𑀲𑁂𑀧𑀺 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀦𑀸 𑀲𑀫𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑁨.𑁩𑁧) 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀏𑀯𑀁 𑀅𑀜𑁆𑀜𑀁 𑀅𑀢𑁆𑀢𑀦𑀸 𑀲𑀫𑀁 𑀅𑀧𑀲𑁆𑀲𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀅𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀳𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀁, 𑀏𑀯𑀁 𑀢𑀸 𑀤𑁂𑀯𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀩𑀼𑀤𑁆𑀥𑁂𑀬𑁂𑀯 𑀧𑀼𑀘𑁆𑀙𑀦𑁆𑀢𑁂 𑀫𑀬𑀺 𑀘 𑀯𑀺𑀲𑁆𑀲𑀚𑁆𑀚𑀦𑁆𑀢𑁂 𑀅𑀘𑁆𑀙𑁂𑀭𑀓𑀁 𑀪𑀯𑀺𑀲𑁆𑀲𑀢𑀺, 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀘 𑀤𑁂𑀯𑀢𑀸 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀢𑀲𑁆𑀫𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑀁 𑀆𑀮𑁄𑀓𑀺𑀢𑀁 𑀯𑀺𑀮𑁄𑀓𑀺𑀢𑀁 𑀲𑀫𑀺𑀜𑁆𑀚𑀺𑀢𑀁 𑀧𑀲𑀸𑀭𑀺𑀢𑀜𑁆𑀘 𑀫𑀫 𑀲𑀤𑀺𑀲𑀁𑀬𑁂𑀯 𑀳𑁄𑀢𑀽’’𑀢𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀧𑀸𑀘𑀻𑀦𑀬𑀼𑀕𑀦𑁆𑀥𑀭𑀧𑀭𑀺𑀓𑁆𑀔𑁂𑀧𑀢𑁄 𑀉𑀮𑁆𑀮𑀗𑁆𑀖𑀬𑀫𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁄 𑀯𑀺𑀬 𑀆𑀕𑀘𑁆𑀙𑀢𑀽’’𑀢𑀺 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀲𑀺. 𑀤𑁂𑀯𑀲𑀗𑁆𑀖𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀜𑁆𑀜𑁄𑀧𑀺 𑀦𑀼 𑀔𑁄 𑀪𑁄, 𑀘𑀦𑁆𑀤𑁄 𑀉𑀕𑁆𑀕𑀢𑁄’’𑀢𑀺 𑀆𑀳. 𑀅𑀣 𑀘𑀦𑁆𑀤𑀁 𑀑𑀳𑀸𑀬 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀘𑀦𑁆𑀤𑁄, 𑀲𑀽𑀭𑀺𑀬𑁄 𑀉𑀕𑁆𑀕𑀢𑁄’’𑀢𑀺. 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀲𑀽𑀭𑀺𑀬𑁄, 𑀤𑁂𑀯𑀯𑀺𑀫𑀸𑀦𑀁 𑀏𑀢’’𑀦𑁆𑀢𑀺. 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀤𑁂𑀯𑀯𑀺𑀫𑀸𑀦𑀁, 𑀤𑁂𑀯𑀧𑀼𑀢𑁆𑀢𑁄 𑀏𑀲𑁄’’𑀢𑀺. 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀤𑁂𑀯𑀧𑀼𑀢𑁆𑀢𑁄, 𑀫𑀳𑀸𑀩𑁆𑀭𑀳𑁆𑀫𑀸 𑀏𑀲𑁄’’𑀢𑀺. 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀫𑀳𑀸𑀩𑁆𑀭𑀳𑁆𑀫𑀸, 𑀅𑀧𑀭𑁄𑀧𑀺 𑀪𑁄 𑀩𑀼𑀤𑁆𑀥𑁄 𑀆𑀕𑀢𑁄’’𑀢𑀺 𑀆𑀳.

𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑀤𑁂𑀯𑀢𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀏𑀓𑀩𑀼𑀤𑁆𑀥𑀲𑁆𑀲 𑀢𑀸𑀯 𑀅𑀬𑀁 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄. 𑀤𑁆𑀯𑀺𑀦𑁆𑀦𑀁 𑀓𑀻𑀯𑀫𑀳𑀦𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀭𑀺𑀬𑀤𑁂𑀯𑀢𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀸𑀫 𑀦𑀢𑁆𑀣𑀺, 𑀅𑀤𑁆𑀥𑀸 𑀪𑀕𑀯𑀸 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀜𑁆𑀜𑀁 𑀏𑀓𑀁 𑀩𑀼𑀤𑁆𑀥𑀁 𑀦𑀺𑀫𑁆𑀫𑀺𑀦𑀻’’𑀢𑀺. 𑀅𑀣𑀲𑁆𑀲 𑀤𑁂𑀯𑀲𑀗𑁆𑀖𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁄 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀅𑀯𑀦𑁆𑀤𑀺𑀢𑁆𑀯𑀸𑀯 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀲𑀫𑀲𑀫𑀁 𑀓𑀢𑁆𑀯𑀸 𑀫𑀸𑀧𑀺𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀪𑀕𑀯𑀢𑁄 𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀦𑀺𑀫𑁆𑀫𑀺𑀢𑀲𑁆𑀲𑀸𑀧𑀺, 𑀪𑀕𑀯𑀢𑁄 𑀲𑀭𑀻𑀭𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀺, 𑀦𑀺𑀫𑁆𑀫𑀺𑀢𑀲𑁆𑀲𑀸𑀧𑀺, 𑀪𑀕𑀯𑀢𑁄 𑀲𑀭𑀻𑀭𑀭𑀲𑁆𑀫𑀺𑀬𑁄 𑀦𑀺𑀫𑁆𑀫𑀺𑀢𑀲𑀭𑀻𑀭𑁂 𑀧𑀝𑀺𑀳𑀜𑁆𑀜𑀦𑁆𑀢𑀺, 𑀦𑀺𑀫𑁆𑀫𑀺𑀢𑀲𑁆𑀲 𑀭𑀲𑁆𑀫𑀺𑀬𑁄 𑀪𑀕𑀯𑀢𑁄 𑀓𑀸𑀬𑁂 𑀧𑀝𑀺𑀳𑀜𑁆𑀜𑀦𑁆𑀢𑀺. 𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀢𑁄 𑀉𑀕𑁆𑀕𑀫𑁆𑀫 𑀪𑀯𑀕𑁆𑀕𑀁 𑀆𑀳𑀘𑁆𑀘 𑀢𑀢𑁄 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑁂𑀯𑀢𑀸𑀦𑀁 𑀫𑀢𑁆𑀣𑀓𑀫𑀢𑁆𑀣𑀓𑀧𑀭𑀺𑀬𑀦𑁆𑀢𑁂𑀦 𑀑𑀢𑀭𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀲𑀼𑀯𑀡𑁆𑀡𑀫𑀬𑀯𑀗𑁆𑀓𑀕𑁄𑀧𑀸𑀦𑀲𑀺𑀯𑀺𑀦𑀤𑁆𑀥𑀫𑀺𑀯 𑀘𑁂𑀢𑀺𑀬𑀖𑀭𑀁 𑀯𑀺𑀭𑁄𑀘𑀺𑀢𑁆𑀣. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑁂 𑀭𑀸𑀲𑀺𑀪𑀽𑀢𑀸 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀭𑀲𑁆𑀫𑀺𑀅𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀦𑀺𑀫𑁆𑀫𑀺𑀢𑁄 𑀦𑀺𑀲𑀻𑀤𑀦𑁆𑀢𑁄𑀬𑁂𑀯 ‘‘𑀓𑀣𑀁𑀤𑀲𑁆𑀲𑀻 𑀓𑀣𑀁𑀲𑀻𑀮𑁄, 𑀉𑀧𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀥𑀺𑀧𑀜𑁆𑀜𑀸𑀤𑀺𑀓𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳.

𑀢𑀢𑁆𑀣 𑀧𑀼𑀘𑁆𑀙𑀸𑀬 𑀢𑀸𑀯 𑀲𑁄 𑀦𑀺𑀫𑁆𑀫𑀺𑀢𑁄 𑀓𑀣𑀁𑀤𑀲𑁆𑀲𑀻𑀢𑀺 𑀅𑀥𑀺𑀧𑀜𑁆𑀜𑀁, 𑀓𑀣𑀁𑀲𑀻𑀮𑁄𑀢𑀺 𑀅𑀥𑀺𑀲𑀻𑀮𑀁, 𑀉𑀧𑀲𑀦𑁆𑀢𑁄𑀢𑀺 𑀅𑀥𑀺𑀘𑀺𑀢𑁆𑀢𑀁 𑀧𑀼𑀘𑁆𑀙𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀸𑀤𑀺𑀯𑀺𑀪𑀸𑀯𑀦𑀢𑁆𑀣𑀁 𑀧𑁂𑀝𑀓𑁂 𑁋

‘‘𑀉𑀧𑁂𑀢𑀺 𑀥𑀫𑁆𑀫𑀁 𑀧𑀭𑀺𑀧𑀼𑀘𑁆𑀙𑀫𑀸𑀦𑁄, 𑀓𑀼𑀲𑀮𑀁 𑀅𑀢𑁆𑀣𑀼𑀧𑀲𑀜𑁆𑀳𑀺𑀢𑀁;

𑀦 𑀚𑀻𑀯𑀢𑀺 𑀦 𑀦𑀺𑀩𑁆𑀩𑀼𑀢𑁄 𑀦 𑀫𑀢𑁄, 𑀢𑀁 𑀧𑀼𑀕𑁆𑀕𑀮𑀁 𑀓𑀢𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸. (𑀧𑀭𑀺. 𑁪𑁭𑁯);

‘‘𑀲𑀁𑀲𑀸𑀭𑀔𑀻𑀡𑁄 𑀦 𑀘 𑀯𑀦𑁆𑀢𑀭𑀸𑀕𑁄, 𑀦 𑀘𑀸𑀧𑀺 𑀲𑁂𑀓𑁆𑀔𑁄 𑀦 𑀘 𑀤𑀺𑀝𑁆𑀞𑀥𑀫𑁆𑀫𑁄;

𑀅𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻, 𑀢𑀁 𑀧𑀼𑀕𑁆𑀕𑀮𑀁 𑀓𑀢𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸.

‘‘𑀦 𑀤𑀼𑀓𑁆𑀔𑀲𑀘𑁆𑀘𑁂𑀦 𑀲𑀫𑀗𑁆𑀕𑀺𑀪𑀽𑀢𑁄, 𑀦 𑀫𑀕𑁆𑀕𑀲𑀘𑁆𑀘𑁂𑀦 𑀓𑀼𑀢𑁄 𑀦𑀺𑀭𑁄𑀥𑁄;

𑀲𑀫𑀼𑀤𑀬𑀲𑀘𑁆𑀘𑀢𑁄 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁄, 𑀢𑀁 𑀧𑀼𑀕𑁆𑀕𑀮𑀁 𑀓𑀢𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸.

‘‘𑀅𑀳𑁂𑀢𑀼𑀓𑁄 𑀦𑁄𑀧𑀺 𑀘 𑀭𑀽𑀧𑀦𑀺𑀲𑁆𑀲𑀺𑀢𑁄, 𑀅𑀧𑀘𑁆𑀘𑀬𑁄 𑀦𑁄𑀧𑀺 𑀘 𑀲𑁄 𑀅𑀲𑀗𑁆𑀔𑀢𑁄;

𑀅𑀲𑀗𑁆𑀔𑀢𑀸𑀭𑀫𑁆𑀫𑀡𑁄 𑀦𑁄𑀧𑀺 𑀘 𑀭𑀽𑀧𑀻, 𑀢𑀁 𑀧𑀼𑀕𑁆𑀕𑀮𑀁 𑀓𑀢𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸’’𑀢𑀺. 𑁋

𑀯𑀼𑀢𑁆𑀢𑀁.

𑀢𑀢𑁆𑀣 𑀧𑀞𑀫𑀕𑀸𑀣𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀲𑀦𑁆𑀥𑀸𑀬, 𑀤𑀼𑀢𑀺𑀬𑀕𑀸𑀣𑀸 𑀧𑀘𑁆𑀙𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀁 𑀲𑀦𑁆𑀥𑀸𑀬, 𑀢𑀢𑀺𑀬𑀕𑀸𑀣𑀸 𑀅𑀭𑀳𑀢𑁆𑀢𑀨𑀮𑀝𑁆𑀞𑀁 𑀲𑀦𑁆𑀥𑀸𑀬, 𑀘𑀢𑀼𑀢𑁆𑀣𑀕𑀸𑀣𑀸 𑀅𑀭𑀽𑀧𑁂 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀫𑀦𑁄𑀤𑁆𑀯𑀸𑀭𑀧𑀼𑀭𑁂𑀘𑀸𑀭𑀺𑀓𑀘𑀺𑀢𑁆𑀢𑀲𑀫𑀗𑁆𑀕𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀢𑀺 𑀜𑀸𑀢𑀩𑁆𑀩𑀸. 𑀓𑀻𑀤𑀺𑀲𑁂𑀦 𑀤𑀲𑁆𑀲𑀦𑁂𑀦𑀸𑀢𑀺 𑀓𑀻𑀤𑀺𑀲𑀯𑀲𑁂𑀦 𑀤𑀲𑁆𑀲𑀦𑁂𑀦. 𑀓𑀺𑀁𑀲𑀡𑁆𑀞𑀺𑀢𑁂𑀦𑀸𑀢𑀺 𑀓𑀺𑀁𑀲𑀭𑀺𑀓𑁆𑀔𑁂𑀦. 𑀓𑀺𑀁𑀧𑀓𑀸𑀭𑁂𑀦𑀸𑀢𑀺 𑀓𑀺𑀁𑀯𑀺𑀥𑁂𑀦. 𑀓𑀺𑀁𑀧𑀝𑀺𑀪𑀸𑀕𑁂𑀦𑀸𑀢𑀺 𑀓𑀺𑀁𑀆𑀓𑀸𑀭𑁂𑀦.

𑀬𑀁 𑀧𑀼𑀘𑁆𑀙𑀸𑀫𑀻𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀧𑀼𑀘𑁆𑀙𑀸𑀫𑀺, 𑀢𑀁 𑀫𑀬𑁆𑀳𑀁 𑀯𑀺𑀬𑀸𑀓𑀭𑁄𑀳𑀺. 𑀬𑀸𑀘𑀸𑀫𑀻𑀢𑀺 𑀆𑀬𑀸𑀘𑀸𑀫𑀺. 𑀅𑀚𑁆𑀛𑁂𑀲𑀸𑀫𑀻𑀢𑀺 𑀆𑀡𑀸𑀧𑁂𑀫𑀺. 𑀧𑀲𑀸𑀤𑁂𑀫𑀻𑀢𑀺 𑀢𑀯 𑀲𑀦𑁆𑀢𑀸𑀦𑁂 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀫𑀺. 𑀩𑁆𑀭𑀽𑀳𑀻𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀆𑀘𑀺𑀓𑁆𑀔𑀸𑀢𑀺 𑀤𑁂𑀲𑁂𑀢𑀩𑁆𑀩𑀸𑀦𑀁 ‘‘𑀇𑀫𑀸𑀦𑀺 𑀦𑀸𑀫𑀸𑀦𑀻’’𑀢𑀺 𑀦𑀸𑀫𑀯𑀲𑁂𑀦 𑀓𑀣𑁂𑀳𑀺. 𑀤𑁂𑀲𑁂𑀳𑀻𑀢𑀺 𑀤𑀲𑁆𑀲𑁂𑀳𑀺. 𑀧𑀜𑁆𑀜𑀧𑁂𑀳𑀻𑀢𑀺 𑀚𑀸𑀦𑀸𑀧𑁂𑀳𑀺. 𑀜𑀸𑀡𑀫𑀼𑀔𑀯𑀲𑁂𑀦 𑀳𑀺 𑀅𑀧𑁆𑀧𑀦𑀁 𑀞𑀧𑁂𑀦𑁆𑀢𑁄 ‘‘𑀧𑀜𑁆𑀜𑀧𑁂𑀳𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀝𑁆𑀞𑀧𑁂𑀳𑀻𑀢𑀺 𑀧𑀜𑁆𑀜𑀸𑀧𑁂𑀳𑀺, 𑀧𑀯𑀢𑁆𑀢𑀸𑀧𑁂𑀳𑀻𑀢𑀺 𑀅𑀢𑁆𑀣𑁄. 𑀜𑀸𑀡𑀫𑀼𑀔𑁂 𑀞𑀧𑁂𑀳𑀻𑀢𑀺 𑀯𑀸. 𑀯𑀺𑀯𑀭𑀸𑀢𑀺 𑀯𑀺𑀯𑀝𑀁 𑀓𑀭𑁄𑀳𑀺, 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀯𑀺𑀪𑀚𑀸𑀢𑀺 𑀯𑀺𑀪𑀸𑀕𑀓𑀺𑀭𑀺𑀬𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 𑀤𑀲𑁆𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀸𑀦𑀻𑀓𑀭𑁄𑀳𑀻𑀢𑀺 𑀧𑀸𑀓𑀝𑀪𑀸𑀯𑀁 𑀓𑀭𑁄𑀳𑀺.

𑀅𑀣 𑀯𑀸 𑀆𑀘𑀺𑀓𑁆𑀔𑀸𑀢𑀺 𑀤𑁂𑀲𑀦𑀸𑀤𑀻𑀦𑀁 𑀙𑀦𑁆𑀦𑀁 𑀧𑀤𑀸𑀦𑀁 𑀫𑀽𑀮𑀧𑀤𑀁. 𑀤𑁂𑀲𑀦𑀸𑀤𑀻𑀦𑀺 𑀙 𑀧𑀤𑀸𑀦𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀯𑀭𑀡𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀤𑁂𑀲𑁂𑀳𑀻𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀦𑀁 𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀧𑀞𑀫𑀁 𑀉𑀤𑁆𑀤𑁂𑀲𑀯𑀲𑁂𑀦 𑀤𑁂𑀲𑁂𑀳𑀺. 𑀉𑀕𑁆𑀖𑀝𑀺𑀢𑀜𑁆𑀜𑀽 𑀳𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀧𑀞𑀫𑀁 𑀯𑀼𑀢𑁆𑀢𑀜𑁆𑀘 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀧𑀜𑁆𑀜𑀧𑁂𑀳𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑀁 𑀯𑀲𑁂𑀦 𑀢𑁂𑀲𑀁 𑀘𑀺𑀢𑁆𑀢𑀢𑁄𑀲𑀦𑁂𑀦 𑀩𑀼𑀤𑁆𑀥𑀺𑀦𑀺𑀲𑀸𑀦𑁂𑀦 𑀘 𑀧𑀞𑀫𑀁 𑀲𑀁𑀔𑀺𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀦𑀺𑀤𑁆𑀤𑁂𑀲𑀯𑀲𑁂𑀦𑁂𑀯 𑀧𑀜𑁆𑀜𑀧𑁂𑀳𑀺. 𑀧𑀝𑁆𑀞𑀧𑁂𑀳𑀻𑀢𑀺 𑀢𑁂𑀲𑀁𑀬𑁂𑀯 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀦𑀺𑀤𑁆𑀤𑁂𑀲𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀢𑁆𑀣𑀸𑀭𑀺𑀢𑀯𑀲𑁂𑀦 𑀞𑀧𑁂𑀢𑀺 𑀧𑀝𑁆𑀞𑀧𑁂𑀳𑀺. 𑀯𑀺𑀯𑀭𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑀧𑀺 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑁂𑀦 𑀯𑀺𑀯𑀭𑀸𑀳𑀺. 𑀯𑀺𑀪𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑀲𑁆𑀲𑀸𑀧𑀺 𑀯𑀺𑀪𑀸𑀕𑀓𑀭𑀡𑁂𑀦 𑀯𑀺𑀪𑀚𑀸𑀳𑀺. 𑀉𑀢𑁆𑀢𑀸𑀦𑀻𑀓𑀭𑁄𑀳𑀻𑀢𑀺 𑀯𑀺𑀯𑀝𑀲𑁆𑀲 𑀯𑀺𑀢𑁆𑀣𑀸𑀭𑀢𑀭𑀯𑀘𑀦𑁂𑀦 𑀯𑀺𑀪𑀢𑁆𑀢𑀲𑁆𑀲 𑀘 𑀦𑀺𑀤𑀲𑁆𑀲𑀦𑀯𑀘𑀦𑁂𑀦 𑀉𑀢𑁆𑀢𑀸𑀦𑀺𑀁 𑀓𑀭𑁄𑀳𑀺. 𑀅𑀬𑀁 𑀤𑁂𑀲𑀦𑀸 𑀦𑁂𑀬𑁆𑀬𑀸𑀦𑀫𑁆𑀧𑀺 𑀧𑀝𑀺𑀯𑁂𑀥𑀸𑀬 𑀳𑁄𑀢𑀻𑀢𑀺.

𑁮𑁪. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦 𑀪𑀕𑀯𑀸 𑀲𑀭𑀽𑀧𑁂𑀦 𑀅𑀥𑀺𑀧𑀜𑁆𑀜𑀸𑀤𑀻𑀦𑀺 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀅𑀥𑀺𑀧𑀜𑁆𑀜𑀸𑀤𑀺𑀧𑁆𑀧𑀪𑀸𑀯𑁂𑀦 𑀬𑁂𑀲𑀁 𑀓𑀺𑀮𑁂𑀲𑀸𑀦𑀁 𑀉𑀧𑀲𑀫𑀸 ‘‘𑀉𑀧𑀲𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀦𑀸𑀦𑀸𑀤𑁂𑀯𑀢𑀸𑀦𑀁 𑀆𑀲𑀬𑀸𑀦𑀼𑀮𑁄𑀫𑁂𑀦 𑀢𑁂𑀲𑀁 𑀉𑀧𑀲𑀫𑀫𑁂𑀯 𑀤𑀻𑀧𑁂𑀦𑁆𑀢𑁄 ‘‘𑀯𑀻𑀢𑀢𑀡𑁆𑀳𑁄’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀆𑀤𑀺𑀢𑁄 𑀅𑀝𑁆𑀞𑀦𑁆𑀦𑀁 𑀕𑀸𑀣𑀸𑀦𑀁 ‘‘𑀢𑀁 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀢𑁄 𑀧𑀭𑀸𑀲𑀁 ‘‘𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀧𑀤𑁂𑀦.

𑀅𑀦𑀼𑀧𑀤𑀯𑀡𑁆𑀡𑀦𑀸𑀦𑀬𑁄 𑁋 𑀯𑀻𑀢𑀢𑀡𑁆𑀳𑁄 𑀧𑀼𑀭𑀸𑀪𑁂𑀤𑀸𑀢𑀺 𑀬𑁄 𑀲𑀭𑀻𑀭𑀪𑁂𑀤𑀸 𑀧𑀼𑀩𑁆𑀩𑀫𑁂𑀯 𑀧𑀳𑀻𑀦𑀢𑀡𑁆𑀳𑁄. 𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄𑀢𑀺 𑀅𑀢𑀻𑀢𑀤𑁆𑀥𑀸𑀤𑀺𑀪𑁂𑀤𑀁 𑀧𑀼𑀩𑁆𑀩𑀅𑀦𑁆𑀢𑀁 𑀅𑀦𑀺𑀲𑁆𑀲𑀺𑀢𑁄. 𑀯𑁂𑀫𑀚𑁆𑀛𑁂 𑀦𑀼𑀧𑀲𑀗𑁆𑀔𑁂𑀬𑁆𑀬𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀅𑀤𑁆𑀥𑀦𑀺 ‘‘𑀭𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦 𑀉𑀧𑀲𑀗𑁆𑀔𑀸𑀢𑀩𑁆𑀩𑁄. 𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢𑀦𑁆𑀢𑀺 𑀢𑀲𑁆𑀲 𑀅𑀭𑀳𑀢𑁄 𑀤𑁆𑀯𑀺𑀦𑁆𑀦𑀁 𑀧𑀼𑀭𑁂𑀓𑁆𑀔𑀸𑀭𑀸𑀦𑀁 𑀅𑀪𑀸𑀯𑀸 𑀅𑀦𑀸𑀕𑀢𑁂 𑀅𑀤𑁆𑀥𑀦𑀺 𑀧𑀼𑀭𑀓𑁆𑀔𑀢𑀫𑀧𑀺 𑀦𑀢𑁆𑀣𑀺, 𑀢𑀁 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀧𑀼𑀭𑀸 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀓𑀭𑀚𑀓𑀸𑀬𑀲𑁆𑀲 𑀪𑁂𑀤𑀢𑁄 𑀧𑀼𑀩𑁆𑀩𑁂𑀬𑁂𑀯. 𑀅𑀢𑁆𑀢𑀪𑀸𑀯𑀲𑁆𑀲𑀸𑀢𑀺 𑀲𑀓𑀮𑀢𑁆𑀢𑀪𑀸𑀯𑀲𑁆𑀲. 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑀸𑀢𑀺 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑀢𑁄 𑀲𑀭𑀻𑀭𑀲𑁆𑀲 𑀞𑀧𑀦𑀢𑁄. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀸𑀢𑀺 𑀤𑀼𑀯𑀺𑀥𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀢𑁄 𑀧𑀼𑀩𑁆𑀩𑀫𑁂𑀯.

𑀧𑀼𑀩𑁆𑀩𑀦𑁆𑀢𑁄 𑀯𑀼𑀘𑁆𑀘𑀢𑀺 𑀅𑀢𑀻𑀢𑁄 𑀅𑀤𑁆𑀥𑀸𑀢𑀺 𑀧𑀼𑀩𑁆𑀩𑀲𑀗𑁆𑀔𑀸𑀢𑁄 𑀅𑀦𑁆𑀢𑁄 𑀓𑁄𑀝𑁆𑀞𑀸𑀲𑁄 ‘‘𑀅𑀢𑀻𑀢𑁄 𑀅𑀤𑁆𑀥𑀸𑀢𑀺, 𑀅𑀢𑀺𑀓𑁆𑀓𑀦𑁆𑀢𑁄 𑀓𑀸𑀮𑁄’’𑀢𑀺 𑀓𑀣𑀻𑀬𑀢𑀺. 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪𑀸𑀢𑀺 𑀅𑀢𑀻𑀢𑀓𑀸𑀮𑀁 𑀧𑀝𑀺𑀘𑁆𑀘 𑀢𑀡𑁆𑀳𑀸 𑀧𑀳𑀻𑀦𑀸.

𑀅𑀧𑀭𑀫𑁆𑀧𑀺 𑀪𑀤𑁆𑀤𑁂𑀓𑀭𑀢𑁆𑀢𑀧𑀭𑀺𑀬𑀸𑀬𑀁 (𑀫. 𑀦𑀺. 𑁩.𑁨𑁭𑁨 𑀆𑀤𑀬𑁄) 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀦𑁆𑀢𑀺 𑀓𑀸𑀴𑁄𑀧𑀺 𑀲𑀫𑀸𑀦𑁄 𑀇𑀦𑁆𑀤𑀦𑀻𑀮𑀫𑀡𑀺𑀯𑀡𑁆𑀡𑁄 𑀅𑀳𑁄𑀲𑀺𑀦𑁆𑀢𑀺 𑀏𑀯𑀁 𑀫𑀦𑀼𑀜𑁆𑀜𑀭𑀽𑀧𑀯𑀲𑁂𑀦𑁂𑀯 𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁. 𑀓𑀼𑀲𑀮𑀲𑀼𑀔𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀯𑀲𑁂𑀦𑁂𑀯 𑀏𑀯𑀁𑀯𑁂𑀤𑀦𑁄. 𑀢𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁𑀬𑁂𑀯 𑀲𑀜𑁆𑀜𑀸𑀤𑀻𑀦𑀁 𑀯𑀲𑁂𑀦 𑀏𑀯𑀁𑀲𑀜𑁆𑀜𑁄. 𑀏𑀯𑀁𑀲𑀗𑁆𑀔𑀸𑀭𑁄. 𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀦𑀸𑀦𑁂𑀢𑀻𑀢𑀺 𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀢𑀡𑁆𑀳𑀁 𑀯𑀸 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀤𑀺𑀝𑁆𑀞𑀺𑀁 𑀯𑀸 𑀦𑀸𑀦𑀼𑀧𑀯𑀢𑁆𑀢𑀬𑀢𑀺. 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀫𑀳𑀸𑀓𑀘𑁆𑀘𑀸𑀦𑀪𑀤𑁆𑀤𑁂𑀓𑀭𑀢𑁆𑀢𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸 𑀇𑀢𑀺 𑀫𑁂 𑀘𑀓𑁆𑀔𑀼 𑀅𑀳𑁄𑀲𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀽𑀢𑀺 𑀘𑀓𑁆𑀔𑀼𑀧𑀲𑀸𑀤𑁄. 𑀭𑀽𑀧𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸𑀬𑀢𑀦𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀦𑀺𑀲𑁆𑀲𑀬𑀯𑀺𑀜𑁆𑀜𑀸𑀡𑀁. 𑀦 𑀢𑀤𑀪𑀺𑀦𑀦𑁆𑀤𑀢𑀻𑀢𑀺 𑀢𑀁 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀜𑁆𑀘 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀦𑀸𑀪𑀺𑀦𑀦𑁆𑀤𑀢𑀺. 𑀇𑀢𑀺 𑀫𑁂 𑀫𑀦𑁄 𑀅𑀳𑁄𑀲𑀺 𑀇𑀢𑀺 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀧𑀦 𑀫𑀦𑁄𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀁. 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀻𑀢𑀺 𑀤𑀦𑁆𑀢𑀯𑀺𑀤𑀁𑀲𑀓𑀳𑀲𑀺𑀢𑀜𑁆𑀘 𑀯𑀸𑀘𑀸𑀮𑀧𑀺𑀢𑀜𑁆𑀘 𑀓𑀸𑀬𑀓𑀻𑀴𑀸𑀤𑀺𑀓𑀻𑀴𑀺𑀢𑀜𑁆𑀘𑀸𑀢𑀺 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺. 𑀦 𑀢𑀤𑀲𑁆𑀲𑀸𑀤𑁂𑀢𑀻𑀢𑀺 𑀢𑀸𑀦𑀺 𑀳𑀲𑀺𑀢𑀸𑀤𑀻𑀦𑀺 𑀦𑀸𑀪𑀺𑀦𑀦𑁆𑀤𑀢𑀺. 𑀦 𑀢𑀁 𑀦𑀺𑀓𑀸𑀫𑁂𑀢𑀻𑀢𑀺 𑀓𑀦𑁆𑀢𑀁 𑀦 𑀓𑀭𑁄𑀢𑀺. 𑀦 𑀘 𑀢𑁂𑀦 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀢𑁂𑀦 𑀘 𑀢𑀼𑀝𑁆𑀞𑀺𑀁 𑀦 𑀧𑀸𑀧𑀼𑀡𑀸𑀢𑀺.

𑀢𑀁 𑀢𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀭𑀢𑁆𑀢𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄𑀢𑀺 𑀭𑀸𑀕𑁂𑀦 𑀭𑀢𑁆𑀢𑁄𑀢𑀺 𑀕𑀡𑀦𑀁 𑀦 𑀉𑀧𑀦𑁂𑀢𑀩𑁆𑀩𑁄. 𑀉𑀧𑀭𑀺𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀭𑀽𑀧𑁄 𑀲𑀺𑀬𑀦𑁆𑀢𑀺𑀆𑀤𑀻𑀲𑀼 𑀧𑀡𑀻𑀢𑀫𑀦𑀼𑀜𑁆𑀜𑀭𑀽𑀧𑀸𑀤𑀺𑀯𑀲𑁂𑀦𑁂𑀯 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑀸 𑀦𑀦𑁆𑀤𑀻 𑀲𑀫𑀦𑁆𑀦𑀸𑀦𑀬𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀧𑀡𑀺𑀤𑀳𑀢𑀻𑀢𑀺 𑀧𑀢𑁆𑀣𑀦𑀸𑀯𑀲𑁂𑀦 𑀦 𑀞𑀧𑁂𑀢𑀺. 𑀅𑀧𑁆𑀧𑀡𑀺𑀥𑀸𑀦𑀧𑀘𑁆𑀘𑀬𑀸𑀢𑀺 𑀦 𑀧𑀢𑁆𑀣𑀦𑀸𑀞𑀧𑀦𑀓𑀸𑀭𑀡𑁂𑀦.

𑁮𑁫. 𑀅𑀲𑀦𑁆𑀢𑀸𑀲𑀻𑀢𑀺 𑀢𑁂𑀦 𑀢𑁂𑀦 𑀅𑀮𑀸𑀪𑀢𑁄 𑀅𑀲𑀦𑁆𑀢𑀲𑀦𑁆𑀢𑁄. 𑀅𑀯𑀺𑀓𑀢𑁆𑀣𑀻𑀢𑀺 𑀲𑀻𑀮𑀸𑀤𑀻𑀳𑀺 𑀅𑀯𑀺𑀓𑀢𑁆𑀣𑀦𑀲𑀻𑀮𑁄. 𑀅𑀓𑀼𑀓𑁆𑀓𑀼𑀘𑁄𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀯𑀺𑀭𑀳𑀺𑀢𑁄. 𑀫𑀦𑁆𑀢𑀪𑀸𑀡𑀻𑀢𑀺 𑀫𑀦𑁆𑀢𑀸𑀬 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀸𑀘𑀁 𑀪𑀸𑀲𑀺𑀢𑀸. 𑀅𑀦𑀼𑀤𑁆𑀥𑀢𑁄𑀢𑀺 𑀉𑀤𑁆𑀥𑀘𑁆𑀘𑀯𑀺𑀭𑀳𑀺𑀢𑁄. 𑀲 𑀯𑁂 𑀯𑀸𑀘𑀸𑀬𑀢𑁄𑀢𑀺 𑀲𑁄 𑀯𑀸𑀘𑀸𑀬 𑀬𑀢𑁄 𑀲𑀁𑀬𑀢𑁄 𑀘𑀢𑀼𑀤𑁄𑀲𑀯𑀺𑀭𑀳𑀺𑀢𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

𑀅𑀓𑁆𑀓𑁄𑀥𑀦𑁄𑀢𑀺 𑀬𑀜𑁆𑀳𑀺 𑀔𑁄 𑀯𑀼𑀢𑁆𑀢𑀦𑁆𑀢𑀺 ‘‘𑀦 𑀓𑁄𑀥𑀦𑁄 𑀅𑀓𑁄𑀥𑀦𑁄 𑀓𑁄𑀥𑀯𑀺𑀭𑀳𑀺𑀢𑁄’’𑀢𑀺 𑀬𑀁 𑀓𑀣𑀺𑀢𑀁, 𑀢𑀁 𑀧𑀞𑀫𑀁 𑀢𑀸𑀯 𑀓𑁄𑀥𑀁 𑀓𑀣𑁂𑀢𑀼𑀓𑀸𑀫𑁄 ‘‘𑀅𑀧𑀺𑀘 𑀓𑁄𑀥𑁄 𑀢𑀸𑀯 𑀯𑀢𑁆𑀢𑀩𑁆𑀩𑁄’’𑀢𑀺 𑀆𑀳. 𑀓𑁄𑀥𑁄 𑀢𑀸𑀯 𑀯𑀢𑁆𑀢𑀩𑁆𑀩𑁄𑀢𑀺 𑀧𑀞𑀫𑀁 𑀓𑁄𑀥𑁄 𑀓𑀣𑁂𑀢𑀩𑁆𑀩𑁄. 𑀤𑀲𑀳𑀸𑀓𑀸𑀭𑁂𑀳𑀺 𑀓𑁄𑀥𑁄 𑀚𑀸𑀬𑀢𑀻𑀢𑀺 𑀤𑀲𑀳𑀺 𑀓𑀸𑀭𑀡𑁂𑀳𑀺 𑀓𑁄𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀅𑀯𑀟𑁆𑀠𑀺𑀁 𑀫𑁂 𑀅𑀓𑀸𑀲𑀺, 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀓𑁄𑀥𑁄 𑀚𑀸𑀬𑀢𑀻𑀢𑀺 𑀅𑀓𑀸𑀭𑀡𑁂 𑀓𑁄𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀓𑀘𑁆𑀘𑁄 𑀳𑀺 ‘‘𑀤𑁂𑀯𑁄 𑀅𑀢𑀺𑀯𑀲𑁆𑀲𑀢𑀻’’𑀢𑀺 𑀓𑀼𑀧𑁆𑀧𑀢𑀺, ‘‘𑀦 𑀯𑀲𑁆𑀲𑀢𑀻’’𑀢𑀺 𑀓𑀼𑀧𑁆𑀧𑀢𑀺, ‘‘𑀲𑀽𑀭𑀺𑀬𑁄 𑀢𑀧𑁆𑀧𑀢𑀻’’𑀢𑀺 𑀓𑀼𑀧𑁆𑀧𑀢𑀺, ‘‘𑀦 𑀢𑀧𑁆𑀧𑀢𑀻’’𑀢𑀺 𑀓𑀼𑀧𑁆𑀧𑀢𑀺, 𑀯𑀸𑀢𑁂 𑀯𑀸𑀬𑀦𑁆𑀢𑁂𑀧𑀺 𑀓𑀼𑀧𑁆𑀧𑀢𑀺, 𑀅𑀯𑀸𑀬𑀦𑁆𑀢𑁂𑀧𑀺 𑀓𑀼𑀧𑁆𑀧𑀢𑀺, 𑀲𑀫𑁆𑀫𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀩𑁄𑀥𑀺𑀧𑀡𑁆𑀡𑀸𑀦𑀁 𑀓𑀼𑀧𑁆𑀧𑀢𑀺, 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀸𑀢𑀲𑁆𑀲 𑀓𑀼𑀧𑁆𑀧𑀢𑀺, 𑀉𑀧𑀓𑁆𑀔𑀮𑀺𑀢𑁆𑀯𑀸 𑀔𑀸𑀡𑀼𑀓𑀲𑁆𑀲 𑀓𑀼𑀧𑁆𑀧𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀓𑁄𑀥𑁄 𑀚𑀸𑀬𑀢𑀻’’𑀢𑀺. 𑀢𑀢𑁆𑀣 𑀳𑁂𑀝𑁆𑀞𑀸 𑀦𑀯𑀲𑀼 𑀞𑀸𑀦𑁂𑀲𑀼 𑀲𑀢𑁆𑀢𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀢𑁆𑀢𑀸 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺.

𑀅𑀝𑁆𑀞𑀸𑀦𑀖𑀸𑀢𑁄 𑀧𑀦 𑀲𑀗𑁆𑀔𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑁄 𑀓𑀫𑁆𑀫𑀧𑀣𑀪𑁂𑀤𑀁 𑀦 𑀓𑀭𑁄𑀢𑀺. 𑀘𑀺𑀢𑁆𑀢𑀁 𑀆𑀖𑀸𑀢𑁂𑀦𑁆𑀢𑁄 𑀉𑀧𑁆𑀧𑀦𑁆𑀦𑁄𑀢𑀺 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄. 𑀢𑀢𑁄 𑀩𑀮𑀯𑀢𑀭𑁄 𑀧𑀝𑀺𑀖𑀸𑀢𑁄. 𑀧𑀝𑀺𑀳𑀜𑁆𑀜𑀦𑀯𑀲𑁂𑀦 𑀧𑀝𑀺𑀖𑀁. 𑀧𑀝𑀺𑀯𑀺𑀭𑀼𑀚𑁆𑀛𑀢𑀻𑀢𑀺 𑀧𑀝𑀺𑀯𑀺𑀭𑁄𑀥𑁄. 𑀓𑀼𑀧𑁆𑀧𑀦𑀯𑀲𑁂𑀦 𑀓𑁄𑀧𑁄. 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀤𑀼𑀲𑁆𑀲𑀦𑀯𑀲𑁂𑀦 𑀤𑁄𑀲𑁄. 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀧𑀦𑁆𑀦𑀢𑀸 𑀯𑀺𑀧𑀭𑀺𑀯𑀢𑁆𑀢𑀦𑀸𑀓𑀸𑀭𑁄. 𑀫𑀦𑀁 𑀧𑀤𑀽𑀲𑀬𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀫𑀦𑁄𑀧𑀤𑁄𑀲𑁄. 𑀓𑀼𑀚𑁆𑀛𑀦𑀯𑀲𑁂𑀦 𑀓𑁄𑀥𑁄. 𑀓𑀼𑀚𑁆𑀛𑀦𑀸𑀓𑀸𑀭𑁄 𑀓𑀼𑀚𑁆𑀛𑀦𑀸. 𑀓𑀼𑀚𑁆𑀛𑀺𑀢𑀲𑁆𑀲 𑀪𑀸𑀯𑁄 𑀓𑀼𑀚𑁆𑀛𑀺𑀢𑀢𑁆𑀢𑀁. 𑀤𑀼𑀲𑁆𑀲𑀢𑀻𑀢𑀺 𑀤𑁄𑀲𑁄. 𑀤𑀼𑀲𑁆𑀲𑀦𑀸𑀢𑀺 𑀤𑀼𑀲𑁆𑀲𑀦𑀸𑀓𑀸𑀭𑁄. 𑀤𑀼𑀲𑁆𑀲𑀺𑀢𑀢𑁆𑀢𑀦𑁆𑀢𑀺 𑀤𑀼𑀲𑁆𑀲𑀺𑀢𑀪𑀸𑀯𑁄. 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀝𑁆𑀞𑁂𑀦 𑀩𑁆𑀬𑀸𑀧𑀚𑁆𑀚𑀦𑀁 𑀩𑁆𑀬𑀸𑀧𑀢𑁆𑀢𑀺. 𑀩𑁆𑀬𑀸𑀧𑀚𑁆𑀚𑀦𑀸𑀢𑀺 𑀩𑁆𑀬𑀸𑀧𑀚𑁆𑀚𑀦𑀸𑀓𑀸𑀭𑁄. 𑀯𑀺𑀭𑀼𑀚𑁆𑀛𑀢𑀻𑀢𑀺 𑀯𑀺𑀭𑁄𑀥𑁄. 𑀧𑀼𑀦𑀧𑁆𑀧𑀼𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀧𑀝𑀺𑀯𑀺𑀭𑁄𑀥𑁄. 𑀯𑀺𑀭𑀼𑀤𑁆𑀥𑀸𑀓𑀸𑀭𑀧𑀝𑀺𑀯𑀺𑀭𑀼𑀤𑁆𑀥𑀸𑀓𑀸𑀭𑀯𑀲𑁂𑀦 𑀯𑀸 𑀇𑀤𑀁 𑀯𑀼𑀢𑁆𑀢𑀁. 𑀘𑀡𑁆𑀟𑀺𑀓𑁄 𑀯𑀼𑀘𑁆𑀘𑀢𑀺 𑀘𑀡𑁆𑀟𑁄, 𑀣𑀤𑁆𑀥𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀘𑀡𑁆𑀟𑀺𑀓𑁆𑀓𑀁. 𑀦 𑀏𑀢𑁂𑀦 𑀲𑀼𑀭𑁄𑀧𑀺𑀢𑀁 𑀯𑀘𑀦𑀁 𑀳𑁄𑀢𑀺, 𑀤𑀼𑀭𑀼𑀢𑁆𑀢𑀁 𑀅𑀧𑀭𑀺𑀧𑀼𑀡𑁆𑀡𑀫𑁂𑀯 𑀳𑁄𑀢𑀻𑀢𑀺 𑀅𑀲𑀼𑀭𑁄𑀧𑁄. 𑀓𑀼𑀤𑁆𑀥𑀓𑀸𑀮𑁂 𑀳𑀺 𑀧𑀭𑀺𑀧𑀼𑀡𑁆𑀡𑀯𑀘𑀦𑀁 𑀦𑀸𑀫 𑀦𑀢𑁆𑀣𑀺, 𑀲𑀘𑁂𑀧𑀺 𑀓𑀲𑁆𑀲𑀘𑀺 𑀳𑁄𑀢𑀺, 𑀢𑀁 𑀅𑀧𑁆𑀧𑀫𑀸𑀡𑀁. 𑀅𑀧𑀭𑁂 𑀧𑀦 ‘‘𑀅𑀲𑁆𑀲𑀼𑀚𑀦𑀦𑀝𑁆𑀞𑁂𑀦 𑀅𑀲𑁆𑀲𑀼𑀭𑁄𑀧𑀦𑀢𑁄 𑀅𑀲𑁆𑀲𑀼𑀭𑁄𑀧𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀓𑀸𑀭𑀡𑀁 𑀲𑁄𑀫𑀦𑀲𑁆𑀲𑀲𑁆𑀲𑀸𑀧𑀺 𑀅𑀲𑁆𑀲𑀼𑀚𑀦𑀦𑀢𑁄. 𑀳𑁂𑀝𑁆𑀞𑀸𑀯𑀼𑀢𑁆𑀢𑀅𑀢𑁆𑀢𑀫𑀦𑀢𑀸𑀧𑀝𑀺𑀧𑀓𑁆𑀔𑀢𑁄 𑀦 𑀅𑀢𑁆𑀢𑀫𑀦𑀢𑀸𑀢𑀺 𑀅𑀦𑀢𑁆𑀢𑀫𑀦𑀢𑀸. 𑀲𑀸 𑀧𑀦 𑀬𑀲𑁆𑀫𑀸 𑀘𑀺𑀢𑁆𑀢𑀲𑁆𑀲𑁂𑀯, 𑀦 𑀲𑀢𑁆𑀢𑀲𑁆𑀲, 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑀅𑀥𑀺𑀫𑀢𑁆𑀢𑀧𑀭𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀥𑀺𑀫𑀢𑁆𑀢𑀪𑀸𑀯𑁄 𑀧𑀭𑀺𑀢𑁆𑀢𑀪𑀸𑀯𑁄 𑀘, 𑀩𑀮𑀯𑀪𑀸𑀯𑁄 𑀫𑀦𑁆𑀤𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀺 𑀓𑀸𑀮𑁂𑀢𑀺 𑀏𑀓𑀤𑀸. ‘‘𑀓𑀜𑁆𑀘𑀺 𑀓𑀸𑀮’’𑀦𑁆𑀢𑀺𑀧𑀺 𑀧𑀸𑀞𑁄. 𑀘𑀺𑀢𑁆𑀢𑀸𑀯𑀺𑀮𑀓𑀭𑀡𑀫𑀢𑁆𑀢𑁄 𑀳𑁄𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀆𑀯𑀺𑀮𑀓𑀭𑀡𑀧𑁆𑀧𑀫𑀸𑀡𑁄, 𑀘𑀺𑀢𑁆𑀢𑀓𑀺𑀮𑀺𑀝𑁆𑀞𑀓𑀭𑀡𑀧𑁆𑀧𑀫𑀸𑀡𑁄𑀢𑀺 𑀅𑀢𑁆𑀣𑁄. ‘‘𑀘𑀺𑀢𑁆𑀢𑀸𑀮𑀲𑀓𑀭𑀡𑀫𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄, 𑀢𑀁 𑀦 𑀲𑀼𑀦𑁆𑀤𑀭𑀁. 𑀢𑀲𑁆𑀲 𑀘𑀺𑀢𑁆𑀢𑀓𑀺𑀮𑀫𑀣𑀓𑀭𑀡𑀫𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀦 𑀘 𑀢𑀸𑀯 𑀫𑀼𑀔𑀓𑀼𑀮𑀸𑀦𑀯𑀺𑀓𑀼𑀮𑀸𑀦𑁄 𑀳𑁄𑀢𑀻𑀢𑀺 𑀫𑀼𑀔𑀲𑁆𑀲 𑀲𑀗𑁆𑀓𑁄𑀘𑀦𑀯𑀺𑀲𑀗𑁆𑀓𑁄𑀘𑀦𑁄 𑀦 𑀘 𑀢𑀸𑀯 𑀳𑁄𑀢𑀺. 𑀦 𑀘 𑀢𑀸𑀯 𑀳𑀦𑀼𑀲𑀜𑁆𑀘𑁄𑀧𑀦𑁄 𑀳𑁄𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀳𑀦𑀽𑀦𑀁 𑀅𑀧𑀭𑀸𑀧𑀭𑀁 𑀘𑀮𑀦𑁄 𑀦 𑀘 𑀢𑀸𑀯 𑀳𑁄𑀢𑀺. 𑀦 𑀘 𑀢𑀸𑀯 𑀨𑀭𑀼𑀲𑀯𑀸𑀘𑀁 𑀦𑀺𑀘𑁆𑀙𑀸𑀭𑀡𑁄 𑀳𑁄𑀢𑀻𑀢𑀺 𑀧𑀭𑁂𑀲𑀁 𑀫𑀫𑁆𑀫𑀘𑁆𑀙𑁂𑀤𑀓𑀁 𑀨𑀭𑀼𑀲𑀯𑀸𑀘𑀁 𑀫𑀼𑀔𑀢𑁄 𑀦𑀻𑀳𑀭𑀡𑁂𑀦 𑀩𑀳𑀺 𑀦𑀺𑀓𑁆𑀔𑀫𑀦𑁄 𑀦 𑀘 𑀢𑀸𑀯 𑀳𑁄𑀢𑀺. 𑀦 𑀘 𑀢𑀸𑀯 𑀤𑀺𑀲𑀸𑀯𑀺𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑁄 𑀳𑁄𑀢𑀻𑀢𑀺 𑀧𑀭𑀲𑁆𑀲 𑀅𑀩𑁆𑀪𑀼𑀓𑁆𑀓𑀺𑀭𑀡𑀢𑁆𑀣𑀁 𑀤𑀡𑁆𑀟𑀸𑀤𑀺𑀅𑀢𑁆𑀣𑀸𑀬 𑀤𑀺𑀲𑀜𑁆𑀘 𑀅𑀦𑀼𑀤𑀺𑀲𑀜𑁆𑀘 𑀧𑀼𑀦𑀧𑁆𑀧𑀼𑀦𑀁 𑀯𑀺𑀮𑁄𑀓𑀦𑁄 𑀦 𑀘 𑀢𑀸𑀯 𑀳𑁄𑀢𑀺.

𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑁄 𑀳𑁄𑀢𑀻𑀢𑀺 𑀆𑀖𑀸𑀢𑀦𑀢𑁆𑀣𑀁 𑀤𑀡𑁆𑀟𑀜𑁆𑀘 𑀏𑀓𑀢𑁄𑀥𑀸𑀭𑀸𑀤𑀺𑀲𑀢𑁆𑀣𑀜𑁆𑀘 𑀆𑀤𑀺𑀬𑀦𑁄 𑀦 𑀘 𑀢𑀸𑀯 𑀳𑁄𑀢𑀺. 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀅𑀩𑁆𑀪𑀼𑀓𑁆𑀓𑀺𑀭𑀡𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑀡𑁆𑀟𑀲𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀳𑀭𑀡𑁄 𑀦 𑀘 𑀢𑀸𑀯 𑀳𑁄𑀢𑀺. 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀅𑀪𑀺𑀦𑀺𑀧𑀸𑀢𑀦𑁄 𑀳𑁄𑀢𑀻𑀢𑀺 𑀏𑀢𑀁 𑀤𑀼𑀯𑀺𑀥𑀁 𑀧𑀭𑀲𑁆𑀲 𑀧𑀳𑀭𑀡𑀢𑁆𑀣𑀁 𑀦 𑀘 𑀢𑀸𑀯 𑀔𑀺𑀧𑀦𑁄 𑀳𑁄𑀢𑀺. 𑀦 𑀘 𑀢𑀸𑀯 𑀙𑀺𑀦𑁆𑀦𑀯𑀺𑀘𑁆𑀙𑀺𑀦𑁆𑀦𑀓𑀭𑀡𑁄 𑀳𑁄𑀢𑀻𑀢𑀺 𑀤𑀡𑁆𑀟𑀲𑀢𑁆𑀣𑀸𑀤𑀺𑀔𑀺𑀧𑀦𑁂𑀦 𑀧𑀭𑀲𑀭𑀻𑀭𑀁 𑀤𑁆𑀯𑀺𑀥𑀸𑀓𑀭𑀡𑁄 𑀘 𑀯𑀺𑀯𑀺𑀥𑀸𑀓𑀸𑀭𑁂𑀦 𑀯𑀡𑀓𑀭𑀡𑁄 𑀘 𑀦 𑀢𑀸𑀯 𑀳𑁄𑀢𑀺. ‘‘𑀙𑀺𑀤𑁆𑀤𑀯𑀺𑀘𑁆𑀙𑀺𑀤𑁆𑀤𑀓𑀭𑀡𑁄’’𑀢𑀺𑀧𑀺 𑀧𑀸𑀞𑁄. 𑀦 𑀘 𑀢𑀸𑀯 𑀲𑀫𑁆𑀪𑀜𑁆𑀚𑀦𑀧𑀮𑀺𑀪𑀜𑁆𑀚𑀦𑁄 𑀳𑁄𑀢𑀻𑀢𑀺 𑀲𑀭𑀻𑀭𑀁 𑀪𑀜𑁆𑀚𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀓𑀭𑀡𑁄 𑀦 𑀘 𑀢𑀸𑀯 𑀳𑁄𑀢𑀺. 𑀦 𑀘 𑀢𑀸𑀯 𑀅𑀗𑁆𑀕𑀫𑀗𑁆𑀕𑀅𑀧𑀓𑀟𑁆𑀠𑀦𑁄 𑀳𑁄𑀢𑀻𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀲𑀫𑁆𑀧𑀕𑁆𑀕𑀳𑁂𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀓𑀟𑁆𑀠𑀦𑁄 𑀦 𑀘 𑀢𑀸𑀯 𑀳𑁄𑀢𑀺. 𑀦 𑀘 𑀢𑀸𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁄 𑀳𑁄𑀢𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁄 𑀯𑁄𑀭𑁄𑀧𑀦𑁄 𑀦 𑀘 𑀢𑀸𑀯 𑀳𑁄𑀢𑀺. 𑀦 𑀘 𑀢𑀸𑀯 𑀲𑀩𑁆𑀩𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀬 𑀲𑀡𑁆𑀞𑀺𑀢𑁄 𑀳𑁄𑀢𑀻𑀢𑀺 𑀲𑀩𑁆𑀩𑀁 𑀧𑀭𑀲𑁆𑀲 𑀚𑀻𑀯𑀺𑀢𑀁 𑀦𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀦𑀸𑀲𑀦𑀢𑁆𑀣𑀸𑀬 𑀲𑀡𑁆𑀞𑀺𑀢𑁄 𑀦 𑀘 𑀢𑀸𑀯 𑀳𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀸 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀢𑁆𑀣𑀸𑀬 𑀞𑀺𑀢𑁄, 𑀢𑀤𑀸 𑀲𑀩𑁆𑀩𑀘𑀸𑀕𑀧𑀭𑀺𑀘𑁆𑀘𑀸𑀕𑀸 𑀦𑀸𑀫 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑁄𑀥𑀁 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑁄𑀥𑀁 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑁄𑀥𑀲𑁆𑀲 𑀯𑀺𑀲𑀫𑀽𑀮𑀲𑁆𑀲, 𑀫𑀥𑀼𑀭𑀕𑁆𑀕𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀯𑀥𑀁 𑀅𑀭𑀺𑀬𑀸 𑀧𑀲𑀁𑀲𑀦𑁆𑀢𑀺, 𑀢𑀜𑁆𑀳𑀺 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁮𑁭, 𑁨𑁬𑁭);

𑀬𑀢𑁄𑀢𑀺 𑀬𑀤𑀸. 𑀧𑀭𑀧𑀼𑀕𑁆𑀕𑀮𑀁 𑀖𑀸𑀝𑁂𑀢𑁆𑀯𑀸𑀢𑀺 𑀧𑀭𑀧𑀼𑀕𑁆𑀕𑀮𑀁 𑀦𑀸𑀲𑁂𑀢𑁆𑀯𑀸. 𑀅𑀢𑁆𑀢𑀸𑀦𑀁 𑀖𑀸𑀝𑁂𑀢𑀻𑀢𑀺 𑀅𑀢𑁆𑀢𑀸𑀦𑀁 𑀫𑀸𑀭𑁂𑀢𑀺. 𑀧𑀭𑀫𑀼𑀲𑁆𑀲𑀤𑀕𑀢𑁄𑀢𑀺 𑀅𑀢𑀺𑀩𑀮𑀯𑀪𑀸𑀯𑀁 𑀕𑀢𑁄. 𑀧𑀭𑀫𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄𑀢𑀺 𑀅𑀢𑀺𑀯𑀺𑀧𑀼𑀮𑀪𑀸𑀯𑀁 𑀧𑀢𑁆𑀢𑁄. 𑀓𑁄𑀥𑀲𑁆𑀲 𑀧𑀳𑀻𑀦𑀢𑁆𑀢𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀓𑁄𑀥𑀲𑁆𑀲 𑀧𑀳𑀻𑀦𑀪𑀸𑀯𑁂𑀦. 𑀓𑁄𑀥𑀯𑀢𑁆𑀣𑀼𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸𑀢𑀺 𑀓𑁄𑀥𑀲𑁆𑀲 𑀧𑀢𑀺𑀝𑁆𑀞𑀸𑀪𑀽𑀢𑀲𑁆𑀲 𑀓𑀸𑀭𑀡𑀪𑀽𑀢𑀲𑁆𑀲 𑀧𑀺𑀬𑀸𑀧𑀺𑀬𑀅𑀝𑁆𑀞𑀸𑀦𑀲𑀗𑁆𑀔𑀸𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀳𑀺 𑀩𑁆𑀬𑀸𑀧𑁂𑀢𑁆𑀯𑀸 𑀜𑀸𑀢𑀪𑀸𑀯𑁂𑀦. 𑀓𑁄𑀥𑀳𑁂𑀢𑀼𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀓𑁄𑀥𑀲𑁆𑀲 𑀚𑀦𑀓𑀳𑁂𑀢𑀼𑀦𑁄 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀉𑀘𑁆𑀙𑀺𑀦𑁆𑀦𑀪𑀸𑀯𑁂𑀦.

𑀢𑀸𑀲𑀻𑀢𑀺 𑀪𑀸𑀬𑀦𑀲𑀻𑀮𑁄 𑀳𑁄𑀢𑀺. 𑀉𑀢𑁆𑀢𑀸𑀲𑀻𑀢𑀺 𑀅𑀢𑀺𑀪𑀸𑀬𑀦𑀲𑀻𑀮𑁄. 𑀧𑀭𑀺𑀢𑁆𑀢𑀸𑀲𑀻𑀢𑀺 𑀲𑀫𑀦𑁆𑀢𑀢𑁄 𑀪𑀸𑀬𑀦𑀲𑀻𑀮𑁄. 𑀪𑀸𑀬𑀢𑀻𑀢𑀺 𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀻𑀢𑀺 𑀯𑀺𑀭𑀽𑀧𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀓𑀢𑁆𑀣𑀻 𑀳𑁄𑀢𑀻𑀢𑀺 𑀅𑀢𑁆𑀢𑀦𑁄 𑀯𑀡𑁆𑀡𑀪𑀡𑀦𑀲𑀻𑀮𑁄 𑀳𑁄𑀢𑀺. 𑀯𑀺𑀓𑀢𑁆𑀣𑀻𑀢𑀺 𑀯𑀺𑀯𑀺𑀥𑀸 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀡𑁆𑀡𑀪𑀡𑀦𑀲𑀻𑀮𑁄. 𑀚𑀸𑀢𑀺𑀬𑀸 𑀯𑀸𑀢𑀺 𑀔𑀢𑁆𑀢𑀺𑀬𑀪𑀸𑀯𑀸𑀤𑀺𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀯𑀸. 𑀕𑁄𑀢𑁆𑀢𑁂𑀦 𑀯𑀸𑀢𑀺 𑀕𑁄𑀢𑀫𑀕𑁄𑀢𑁆𑀢𑀸𑀤𑀺𑀦𑀸 𑀉𑀓𑁆𑀓𑀝𑁆𑀞𑀕𑁄𑀢𑁆𑀢𑁂𑀦 𑀯𑀸. 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸𑀢𑀺 𑀫𑀳𑀸𑀓𑀼𑀮𑀪𑀸𑀯𑁂𑀦 𑀯𑀸. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸𑀢𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑀭𑀻𑀭𑀢𑀸𑀬 𑀯𑀸. 𑀲𑀭𑀻𑀭𑀜𑁆𑀳𑀺 ‘‘𑀧𑁄𑀓𑁆𑀔𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀺𑀭𑀽𑀧𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀥𑀦𑁂𑀦 𑀯𑀸𑀢𑀺𑀆𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀢𑀁 𑀧𑀘𑁆𑀙𑀸𑀦𑀼𑀢𑀸𑀧𑀮𑀓𑁆𑀔𑀡𑀁, 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀭𑀲𑀁, 𑀯𑀺𑀧𑁆𑀧𑀝𑀺𑀲𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀢𑀸𑀓𑀢𑀧𑀤𑀝𑁆𑀞𑀸𑀦𑀁, 𑀤𑀸𑀲𑀩𑁆𑀬𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀻𑀢𑀺 𑀳𑀢𑁆𑀣𑁂𑀳𑀺 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁. 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀢𑀺 𑀅𑀘𑁆𑀙𑀫𑀁𑀲𑀁 𑀲𑀽𑀓𑀭𑀫𑀁𑀲𑀦𑁆𑀢𑀺 𑀔𑀸𑀤𑀢𑀺, 𑀤𑀻𑀧𑀺𑀫𑀁𑀲𑀁 𑀫𑀺𑀕𑀫𑀁𑀲𑀦𑁆𑀢𑀺 𑀔𑀸𑀤𑀢𑀺, 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀓𑀧𑁆𑀧𑀺𑀬𑀪𑁄𑀚𑀦𑀦𑁆𑀢𑀺 𑀪𑀼𑀜𑁆𑀚𑀢𑀺, 𑀯𑀺𑀓𑀸𑀮𑁂 𑀓𑀸𑀮𑀲𑀜𑁆𑀜𑀺𑀢𑀸𑀬 𑀪𑀼𑀜𑁆𑀚𑀢𑀺, 𑀅𑀓𑀧𑁆𑀧𑀺𑀬𑀧𑀸𑀦𑀓𑀁 𑀓𑀧𑁆𑀧𑀺𑀬𑀧𑀸𑀦𑀓𑀦𑁆𑀢𑀺 𑀧𑀺𑀯𑀢𑀺. 𑀅𑀬𑀁 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸. 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀢𑀺 𑀲𑀽𑀓𑀭𑀫𑀁𑀲𑀁 𑀅𑀘𑁆𑀙𑀫𑀁𑀲𑀦𑁆𑀢𑀺 𑀔𑀸𑀤𑀢𑀺, 𑀫𑀺𑀕𑀫𑀁𑀲𑀁 𑀤𑀻𑀧𑀺𑀫𑀁𑀲𑀦𑁆𑀢𑀺 𑀔𑀸𑀤𑀢𑀺, 𑀓𑀧𑁆𑀧𑀺𑀬𑀪𑁄𑀚𑀦𑀁 𑀅𑀓𑀧𑁆𑀧𑀺𑀬𑀪𑁄𑀚𑀦𑀦𑁆𑀢𑀺 𑀪𑀼𑀜𑁆𑀚𑀢𑀺, 𑀓𑀸𑀮𑁂 𑀯𑀺𑀓𑀸𑀮𑀲𑀜𑁆𑀜𑀺𑀢𑀸𑀬 𑀪𑀼𑀜𑁆𑀚𑀢𑀺, 𑀓𑀧𑁆𑀧𑀺𑀬𑀧𑀸𑀦𑀓𑀁 𑀅𑀓𑀧𑁆𑀧𑀺𑀬𑀧𑀸𑀦𑀓𑀦𑁆𑀢𑀺 𑀧𑀺𑀯𑀢𑀺. 𑀅𑀬𑀁 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸. 𑀅𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀺𑀢𑀸𑀢𑀺 𑀦𑀺𑀤𑁆𑀤𑁄𑀲𑁂 𑀤𑁄𑀲𑀲𑀜𑁆𑀜𑀺𑀢𑀸. 𑀯𑀚𑁆𑀚𑁂 𑀅𑀯𑀚𑁆𑀚𑀲𑀜𑁆𑀜𑀺𑀢𑀸𑀢𑀺 𑀲𑀤𑁄𑀲𑁂 𑀦𑀺𑀤𑁆𑀤𑁄𑀲𑀲𑀜𑁆𑀜𑀺𑀢𑀸. 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸𑀓𑀸𑀭𑁄. 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀢𑁆𑀢𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀪𑀸𑀯𑁄. 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀭𑀽𑀧𑁄 𑀧𑀝𑀺𑀲𑀭𑀡𑀪𑀸𑀯𑁄. 𑀫𑀦𑁄𑀯𑀺𑀮𑁂𑀔𑁄𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀮𑁂𑀔𑁄.

𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀓𑀢𑀪𑀸𑀯𑁂𑀦 𑀘 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀁 𑀅𑀓𑀢𑀪𑀸𑀯𑁂𑀦 𑀘. 𑀓𑀢𑀁 𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀫𑀬𑀸 𑀓𑀸𑀬𑁂𑀦 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸 𑀤𑀼𑀝𑁆𑀞𑀼 𑀘𑀭𑀺𑀢𑀁 𑀓𑀸𑀬𑁂𑀦 𑀓𑀢𑀁. 𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢𑀦𑁆𑀢𑀺 𑀫𑀬𑀸 𑀓𑀸𑀬𑁂𑀦 𑀲𑀼𑀝𑁆𑀞𑀼 𑀘𑀭𑀺𑀢𑀁 𑀦 𑀓𑀢𑀁. 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀘𑀻𑀲𑀼𑀘𑀭𑀺𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄 𑀦𑀺𑀭𑁄𑀥𑀧𑀭𑀺𑀬𑁄𑀲𑀸𑀦𑁂𑀲𑀼.

𑀘𑀺𑀢𑁆𑀢𑀲𑁆𑀲𑀸𑀢𑀺 𑀦 𑀲𑀢𑁆𑀢𑀲𑁆𑀲 𑀦 𑀧𑁄𑀲𑀲𑁆𑀲. 𑀉𑀤𑁆𑀥𑀘𑁆𑀘𑀦𑁆𑀢𑀺 𑀉𑀤𑁆𑀥𑀢𑀸𑀓𑀸𑀭𑁄. 𑀅𑀯𑀽𑀧𑀲𑀫𑁄𑀢𑀺 𑀦 𑀯𑀽𑀧𑀲𑀫𑁄. 𑀘𑁂𑀢𑁄 𑀯𑀺𑀓𑁆𑀔𑀺𑀧𑀢𑀻𑀢𑀺 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄, 𑀪𑀦𑁆𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑁆𑀲 𑀪𑀦𑁆𑀢𑀪𑀸𑀯𑁄 𑀪𑀦𑁆𑀢𑀬𑀸𑀦𑀪𑀦𑁆𑀢𑀕𑁄𑀡𑀸𑀤𑀻𑀦𑀁 𑀯𑀺𑀬. 𑀇𑀫𑀺𑀦𑀸 𑀏𑀓𑀸𑀭𑀫𑁆𑀫𑀡𑀲𑁆𑀫𑀺𑀁𑀬𑁂𑀯 𑀯𑀺𑀧𑁆𑀨𑀦𑁆𑀤𑀦𑀁 𑀓𑀣𑀺𑀢𑀁. 𑀉𑀤𑁆𑀥𑀘𑁆𑀘𑀜𑁆𑀳𑀺 𑀏𑀓𑀸𑀭𑀫𑁆𑀫𑀡𑁂 𑀯𑀺𑀧𑁆𑀨𑀦𑁆𑀤𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀦𑀸𑀦𑀸𑀭𑀫𑁆𑀫𑀡𑁂𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺 𑀉𑀤𑁆𑀥𑀘𑁆𑀘𑀦𑁆𑀢𑀺 𑀅𑀬𑀁 𑀉𑀤𑁆𑀥𑀢𑀪𑀸𑀯𑁄 𑀓𑀣𑀻𑀬𑀢𑀺.

𑀫𑀼𑀲𑀸𑀯𑀸𑀤𑀁 𑀧𑀳𑀸𑀬𑀸𑀢𑀺 𑀏𑀢𑁆𑀣 𑀫𑀼𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀓𑁄 𑀯𑀘𑀻𑀧𑀬𑁄𑀕𑁄 𑀓𑀸𑀬𑀧𑀬𑁄𑀕𑁄 𑀯𑀸. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦𑀲𑁆𑀲 𑀧𑀭𑀯𑀺𑀲𑀁𑀯𑀸𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄.

𑀅𑀧𑀭𑁄 𑀦𑀬𑁄 𑁋 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼. 𑀯𑀸𑀤𑁄𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑀦𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀢𑀣𑀁 𑀯𑀢𑁆𑀣𑀼𑀁 𑀢𑀣𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄, 𑀢𑀁 𑀫𑀼𑀲𑀸𑀯𑀸𑀤𑀁. 𑀧𑀳𑀸𑀬𑀸𑀢𑀺 𑀇𑀫𑀁 𑀫𑀼𑀲𑀸𑀯𑀸𑀤𑀘𑁂𑀢𑀦𑀸𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀚𑀳𑀺𑀢𑁆𑀯𑀸. 𑀧𑀝𑀺𑀯𑀺𑀭𑀢𑁄𑀢𑀺 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀢𑁄 𑀤𑀼𑀲𑁆𑀲𑀻𑀮𑁆𑀬𑀢𑁄 𑀑𑀭𑀢𑁄 𑀯𑀺𑀭𑀢𑁄𑀯. 𑀦𑀢𑁆𑀣𑀺 𑀢𑀲𑁆𑀲 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸, 𑀧𑀕𑁂𑀯 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀘𑁆𑀘𑀁 𑀯𑀤𑀢𑀻𑀢𑀺 𑀲𑀘𑁆𑀘𑀯𑀸𑀤𑀻. 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀦𑁆𑀤𑀳𑀢𑀺 𑀖𑀝𑁂𑀢𑀻𑀢𑀺 𑀲𑀘𑁆𑀘𑀲𑀦𑁆𑀥𑁄, 𑀦 𑀅𑀦𑁆𑀢𑀭𑀦𑁆𑀢𑀭𑀸 𑀫𑀼𑀲𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀧𑀼𑀭𑀺𑀲𑁄 𑀓𑀤𑀸𑀘𑀺 𑀫𑀼𑀲𑀸 𑀯𑀤𑀢𑀺, 𑀓𑀤𑀸𑀘𑀺 𑀲𑀘𑁆𑀘𑀁, 𑀢𑀲𑁆𑀲 𑀫𑀼𑀲𑀸𑀯𑀸𑀤𑁂𑀦 𑀅𑀦𑁆𑀢𑀭𑀺𑀢𑀢𑁆𑀢𑀸 𑀲𑀘𑁆𑀘𑀁 𑀲𑀘𑁆𑀘𑁂𑀦 𑀦 𑀖𑀝𑀺𑀬𑀢𑀺, 𑀢𑀲𑁆𑀫𑀸 𑀲𑁄 𑀦 𑀲𑀘𑁆𑀘𑀲𑀦𑁆𑀥𑁄, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀫𑀼𑀲𑀸 𑀅𑀯𑀢𑁆𑀯𑀸 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀦𑁆𑀤𑀳𑀢𑀺𑀬𑁂𑀯𑀸𑀢𑀺 𑀲𑀘𑁆𑀘𑀲𑀦𑁆𑀥𑁄.

𑀣𑁂𑀢𑁄𑀢𑀺 𑀣𑀺𑀭𑁄, 𑀣𑀺𑀭𑀓𑀣𑁄𑀢𑀺 𑀅𑀢𑁆𑀣𑁄. 𑀏𑀓𑁄 𑀳𑀺 𑀧𑀼𑀕𑁆𑀕𑀮𑁄 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬, 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀔𑀸𑀢𑀔𑀸𑀡𑀼 𑀯𑀺𑀬, 𑀅𑀲𑁆𑀲𑀧𑀺𑀝𑁆𑀞𑁂 𑀞𑀧𑀺𑀢𑀓𑀼𑀫𑁆𑀪𑀡𑁆𑀟𑀫𑀺𑀯 𑀘 𑀦 𑀣𑀺𑀭𑀓𑀣𑁄 𑀳𑁄𑀢𑀺, 𑀏𑀓𑁄 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬, 𑀇𑀦𑁆𑀤𑀔𑀻𑀮𑀸 𑀯𑀺𑀬 𑀘 𑀣𑀺𑀭𑀓𑀣𑁄 𑀳𑁄𑀢𑀺, 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑁂𑀧𑀺 𑀤𑁆𑀯𑁂 𑀓𑀣𑀸 𑀦 𑀓𑀣𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀣𑁂𑀢𑁄.

𑀧𑀘𑁆𑀘𑀬𑀺𑀓𑁄𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀓𑁄, 𑀲𑀤𑁆𑀥𑀸𑀬𑀺𑀢𑀩𑁆𑀩𑀓𑁄𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁄 𑀳𑀺 𑀧𑀼𑀕𑁆𑀕𑀮𑁄 𑀦 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, ‘‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁, 𑀅𑀲𑀼𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀸 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀏𑀓𑁄 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, ‘‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁, 𑀅𑀲𑀼𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀬𑀤𑀺 𑀢𑁂𑀦 𑀯𑀼𑀢𑁆𑀢𑀁, 𑀇𑀤𑀫𑁂𑀯 𑀧𑀫𑀸𑀡𑀁, 𑀇𑀤𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀯𑀫𑁂𑀯 𑀇𑀤’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀬𑀺𑀓𑁄.

𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲𑀸𑀢𑀺 𑀢𑀸𑀬 𑀲𑀘𑁆𑀘𑀯𑀸𑀤𑀺𑀢𑀸𑀬 𑀮𑁄𑀓𑀁 𑀦 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼 𑀬𑀸𑀬 𑀯𑀸𑀘𑀸𑀬 𑀬𑀲𑁆𑀲 𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀢𑀲𑁆𑀲 𑀳𑀤𑀬𑁂 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺, 𑀲𑀸 𑀧𑀺𑀲𑀼𑀡𑀸 𑀯𑀸𑀘𑀸. 𑀬𑀸𑀬 𑀧𑀦 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀨𑀭𑀼𑀲𑀁 𑀓𑀭𑁄𑀢𑀺, 𑀬𑀸 𑀯𑀸𑀘𑀸 𑀲𑀬𑀫𑁆𑀧𑀺 𑀨𑀭𑀼𑀲𑀸, 𑀦𑁂𑀯 𑀓𑀡𑁆𑀡𑀲𑀼𑀔𑀸 𑀦 𑀳𑀤𑀬𑀗𑁆𑀕𑀫𑀸, 𑀅𑀬𑀁 𑀨𑀭𑀼𑀲𑀸 𑀯𑀸𑀘𑀸. 𑀬𑁂𑀦 𑀲𑀫𑁆𑀨𑀁 𑀧𑀮𑀧𑀢𑀺 𑀦𑀺𑀭𑀢𑁆𑀣𑀓𑀁, 𑀲𑁄 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀬𑀸 𑀢𑁂𑀲𑀁 𑀫𑀽𑀮𑀪𑀽𑀢𑀸 𑀘𑁂𑀢𑀦𑀸𑀧𑀺 𑀧𑀺𑀲𑀼𑀡𑀯𑀸𑀘𑀸𑀤𑀺𑀦𑀸𑀫𑀫𑁂𑀯 𑀮𑀪𑀢𑀺, 𑀲𑀸 𑀏𑀯 𑀘 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀇𑀫𑁂𑀲𑀁 𑀪𑁂𑀤𑀸𑀬𑀸𑀢𑀺 𑀬𑁂𑀲𑀁 𑀇𑀢𑁄 𑀯𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀁, 𑀢𑁂𑀲𑀁 𑀪𑁂𑀤𑀸𑀬. 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸𑀢𑀺 𑀤𑁆𑀯𑀺𑀦𑁆𑀦𑀁 𑀫𑀺𑀢𑁆𑀢𑀸𑀦𑀁 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀻𑀦𑀁 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀪𑀺𑀦𑁆𑀦𑀸𑀦𑀁 𑀏𑀓𑀫𑁂𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀈𑀤𑀺𑀲𑁂 𑀓𑀼𑀮𑁂 𑀚𑀸𑀢𑀸𑀦𑀁 𑀏𑀯𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀇𑀤𑀁 𑀦 𑀬𑀼𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀦𑁆𑀥𑀸𑀦𑀁 𑀓𑀢𑁆𑀢𑀸 𑀅𑀦𑀼𑀓𑀢𑁆𑀢𑀸.

𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸. 𑀤𑁆𑀯𑁂 𑀚𑀦𑁂 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀏𑀯𑀭𑀽𑀧𑁂 𑀓𑀼𑀮𑁂 𑀚𑀸𑀢𑀸𑀦𑀁 𑀏𑀯𑀭𑀽𑀧𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀫𑁂𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁄 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀲𑀫𑀕𑁆𑀕𑀸𑀭𑀸𑀫𑁄, 𑀬𑀢𑁆𑀣 𑀲𑀫𑀕𑁆𑀕𑀸 𑀦𑀢𑁆𑀣𑀺, 𑀢𑀢𑁆𑀣 𑀯𑀲𑀺𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀫𑀕𑁆𑀕𑀭𑀸𑀫𑁄’’𑀢𑀺𑀧𑀺 𑀧𑀸𑀴𑀺, 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄. 𑀲𑀫𑀕𑁆𑀕𑀭𑀢𑁄𑀢𑀺 𑀲𑀫𑀕𑁆𑀕𑁂𑀲𑀼 𑀭𑀢𑁄, 𑀢𑁂 𑀧𑀳𑀸𑀬 𑀅𑀜𑁆𑀜𑀢𑁆𑀭 𑀕𑀦𑁆𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸𑀧𑀺 𑀲𑀼𑀢𑁆𑀯𑀸𑀧𑀺 𑀦𑀦𑁆𑀤𑀢𑀻𑀢𑀺 𑀲𑀫𑀕𑁆𑀕𑀦𑀦𑁆𑀤𑀻. 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀬𑀸 𑀯𑀸𑀘𑀸 𑀲𑀢𑁆𑀢𑁂 𑀲𑀫𑀕𑁆𑀕𑁂𑀬𑁂𑀯 𑀓𑀭𑁄𑀢𑀺, 𑀢𑀁 𑀲𑀸𑀫𑀕𑁆𑀕𑀺𑀕𑀼𑀡𑀧𑀭𑀺𑀤𑀻𑀧𑀺𑀓𑀫𑁂𑀯 𑀯𑀸𑀘𑀁 𑀪𑀸𑀲𑀢𑀺, 𑀦 𑀇𑀢𑀭𑀦𑁆𑀢𑀺.

𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀸 𑀯𑀸𑀘𑀸, 𑀦𑁂𑀮𑀸𑀢𑀺 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀦𑀲𑁆𑀲𑀸 𑀏𑀮𑀦𑁆𑀢𑀺 𑀦𑁂𑀮𑀸, 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄 ‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 𑀏𑀢𑁆𑀣 (𑀉𑀤𑀸. 𑁬𑁫; 𑀧𑁂𑀝𑀓𑁄. 𑁨𑁫) 𑀯𑀼𑀢𑁆𑀢𑀦𑁂𑀮𑀁 𑀯𑀺𑀬. 𑀓𑀡𑁆𑀡𑀲𑀼𑀔𑀸𑀢𑀺 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀓𑀡𑁆𑀡𑀸𑀦𑀁 𑀲𑀼𑀔𑀸, 𑀲𑀽𑀘𑀺𑀯𑀺𑀚𑁆𑀛𑀦𑀁 𑀯𑀺𑀬 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺. 𑀅𑀢𑁆𑀣𑀫𑀥𑀼𑀭𑀢𑀸𑀬 𑀲𑀓𑀮𑀲𑀭𑀻𑀭𑁂 𑀓𑁄𑀧𑀁 𑀅𑀚𑀦𑁂𑀢𑁆𑀯𑀸 𑀧𑁂𑀫𑀁 𑀚𑀦𑁂𑀢𑀻𑀢𑀺 𑀧𑁂𑀫𑀦𑀻𑀬𑀸. 𑀳𑀤𑀬𑀁 𑀕𑀘𑁆𑀙𑀢𑀺 𑀅𑀧𑀝𑀺𑀳𑀜𑁆𑀜𑀫𑀸𑀦𑀸 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀧𑀯𑀺𑀲𑀢𑀻𑀢𑀺 𑀳𑀤𑀬𑀗𑁆𑀕𑀫𑀸. 𑀕𑀼𑀡𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻, 𑀧𑀼𑀭𑁂 𑀲𑀁𑀯𑀟𑁆𑀠𑀦𑀸𑀭𑀻 𑀯𑀺𑀬 𑀲𑀼𑀓𑀼𑀫𑀸𑀭𑀸𑀢𑀺𑀧𑀺 𑀧𑁄𑀭𑀻, 𑀧𑀼𑀭𑀲𑁆𑀲 𑀏𑀲𑀸𑀢𑀺𑀧𑀺 𑀧𑁄𑀭𑀻, 𑀦𑀕𑀭𑀯𑀸𑀲𑀻𑀦𑀁 𑀓𑀣𑀸𑀢𑀺 𑀅𑀢𑁆𑀣𑁄. 𑀦𑀕𑀭𑀯𑀸𑀲𑀺𑀦𑁄 𑀳𑀺 𑀬𑀼𑀢𑁆𑀢𑀓𑀣𑀸 𑀳𑁄𑀦𑁆𑀢𑀺, 𑀧𑀺𑀢𑀺𑀫𑀢𑁆𑀢𑀁 𑀧𑀺𑀢𑀸𑀢𑀺 𑀪𑀸𑀢𑀺𑀫𑀢𑁆𑀢𑀁 𑀪𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀭𑀽𑀧𑀻 𑀓𑀣𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀓𑀦𑁆𑀢𑀸 𑀳𑁄𑀢𑀻𑀢𑀺 𑀩𑀳𑀼𑀚𑀦𑀓𑀦𑁆𑀢𑀸. 𑀓𑀦𑁆𑀢𑀪𑀸𑀯𑁂𑀦𑁂𑀯 𑀩𑀳𑀼𑀦𑁄 𑀚𑀦𑀲𑁆𑀲 𑀫𑀦𑀸𑀧𑀸 𑀘𑀺𑀢𑁆𑀢𑀯𑀼𑀟𑁆𑀠𑀺𑀓𑀭𑀸𑀢𑀺 𑀩𑀳𑀼𑀚𑀦𑀫𑀦𑀸𑀧𑀸.

𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀺𑀓𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀓𑀼𑀲𑀮𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀓𑀸𑀮𑁂𑀦 𑀯𑀤𑀢𑀻𑀢𑀺 𑀓𑀸𑀮𑀯𑀸𑀤𑀻, 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀪𑀽𑀢𑀁 𑀢𑀣𑀁 𑀢𑀘𑁆𑀙𑀁 𑀲𑀪𑀸𑀯𑀫𑁂𑀯 𑀯𑀤𑀢𑀻𑀢𑀺 𑀪𑀽𑀢𑀯𑀸𑀤𑀻. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑀯𑀸𑀤𑀻. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀥𑀫𑁆𑀫𑀯𑀸𑀤𑀻. 𑀲𑀁𑀯𑀭𑀯𑀺𑀦𑀬𑀧𑀳𑀸𑀦𑀯𑀺𑀦𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀯𑀺𑀦𑀬𑀯𑀸𑀤𑀻.

𑀦𑀺𑀥𑀸𑀦𑀁 𑀯𑀼𑀘𑁆𑀘𑀢𑀺 𑀞𑀧𑀦𑁄𑀓𑀸𑀲𑁄, 𑀦𑀺𑀥𑀸𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀦𑀺𑀥𑀸𑀦𑀯𑀢𑀻, 𑀳𑀤𑀬𑁂 𑀦𑀺𑀥𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦𑀸𑀢𑀺 𑀏𑀯𑀭𑀽𑀧𑀺𑀁 𑀪𑀸𑀲𑀫𑀸𑀦𑁄𑀧𑀺 𑀘 ‘‘𑀅𑀳𑀁 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀦 𑀅𑀓𑀸𑀮𑁂𑀦 𑀪𑀸𑀲𑀢𑀺, 𑀬𑀼𑀢𑁆𑀢𑀓𑀸𑀮𑀁 𑀧𑀦 𑀅𑀧𑁂𑀓𑁆𑀔𑀺𑀢𑁆𑀯𑀸𑀯 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀧𑀤𑁂𑀲𑀦𑁆𑀢𑀺 𑀲𑀉𑀧𑀫𑀁, 𑀲𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀦𑁆𑀢𑀯𑀢𑀺𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀬𑀣𑀸𑀲𑁆𑀲𑀸 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀅𑀦𑁂𑀓𑁂𑀳𑀺𑀧𑀺 𑀦𑀬𑁂𑀳𑀺 𑀯𑀺𑀪𑀚𑀦𑁆𑀢𑁂𑀦 𑀧𑀭𑀺𑀬𑀸𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀁 𑀪𑀸𑀲𑀢𑀺. 𑀬𑀁 𑀯𑀸 𑀲𑁄 𑀅𑀢𑁆𑀣𑀯𑀸𑀤𑀻 𑀅𑀢𑁆𑀣𑀁 𑀯𑀤𑀢𑀺, 𑀢𑁂𑀦 𑀅𑀢𑁆𑀣𑁂𑀦 𑀲𑀳𑀺𑀢𑀢𑁆𑀢𑀸 𑀅𑀢𑁆𑀣𑀲𑀁𑀳𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀦 𑀅𑀜𑁆𑀜𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀁 𑀪𑀸𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀢𑀼𑀤𑁆𑀤𑁄𑀲𑀸𑀧𑀕𑀢𑀁 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀘𑀢𑀽𑀳𑀺 𑀤𑁄𑀲𑁂𑀳𑀺 𑀅𑀧𑀕𑀢𑀁 𑀯𑀸𑀘𑀁 𑀪𑀸𑀲𑀢𑀺. 𑀤𑁆𑀯𑀢𑁆𑀢𑀺𑀁𑀲𑀸𑀬 𑀢𑀺𑀭𑀘𑁆𑀙𑀸𑀦𑀓𑀣𑀸𑀬𑀸𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀬 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑀸𑀬 𑀓𑀣𑀸𑀬.

𑀤𑀲 𑀓𑀣𑀸𑀯𑀢𑁆𑀣𑀽𑀦𑀻𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀺 𑀤𑀲 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀬 𑀓𑀣𑀸𑀬 𑀯𑀢𑁆𑀣𑀼𑀪𑀽𑀢𑀸𑀦𑀺 𑀓𑀸𑀭𑀡𑀸𑀦𑀺. 𑀅𑀧𑁆𑀧𑀺𑀘𑁆𑀙𑀓𑀣𑀦𑁆𑀢𑀺 𑀏𑀢𑁆𑀣 𑀅𑀧𑁆𑀧𑀺𑀘𑁆𑀙𑁄𑀢𑀺 𑀇𑀘𑁆𑀙𑀸𑀯𑀺𑀭𑀳𑀺𑀢𑁄 𑀅𑀦𑀺𑀘𑁆𑀙𑁄 𑀦𑀺𑀢𑁆𑀢𑀡𑁆𑀳𑁄. 𑀏𑀢𑁆𑀣 𑀳𑀺 𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬, 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄. 𑀦 𑀳𑀺 𑀔𑀻𑀡𑀸𑀲𑀯𑀲𑁆𑀲 𑀅𑀡𑀼𑀫𑀢𑁆𑀢𑀸𑀧𑀺 𑀇𑀘𑁆𑀙𑀸 𑀦𑀸𑀫 𑀅𑀢𑁆𑀣𑀺.

𑀅𑀧𑀺𑀘𑁂𑀢𑁆𑀣 𑀅𑀢𑁆𑀭𑀺𑀘𑁆𑀙𑀢𑀸 𑀧𑀸𑀧𑀺𑀘𑁆𑀙𑀢𑀸 𑀫𑀳𑀺𑀘𑁆𑀙𑀢𑀸 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀅𑀬𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀢𑀢𑁆𑀣 𑀲𑀓𑀮𑀸𑀪𑁂 𑀅𑀢𑀺𑀢𑁆𑀢𑀲𑁆𑀲 𑀧𑀭𑀮𑀸𑀪𑀧𑀢𑁆𑀣𑀦𑀸 𑀅𑀢𑁆𑀭𑀺𑀘𑁆𑀙𑀢𑀸 𑀦𑀸𑀫, 𑀢𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲 𑀏𑀓𑀪𑀸𑀚𑀦𑁂 𑀧𑀓𑁆𑀓𑀧𑀽𑀯𑁂𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀧𑀢𑀺𑀢𑁂 𑀦 𑀲𑀼𑀧𑀓𑁆𑀓𑁄 𑀯𑀺𑀬 𑀔𑀼𑀤𑁆𑀤𑀓𑁄 𑀯𑀺𑀬 𑀘 𑀔𑀸𑀬𑀢𑀺, 𑀲𑁆𑀯𑁂𑀯 𑀧𑀦 𑀧𑀭𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑁄 𑀲𑀼𑀧𑀓𑁆𑀓𑁄 𑀯𑀺𑀬 𑀫𑀳𑀦𑁆𑀢𑁄 𑀯𑀺𑀬 𑀘 𑀔𑀸𑀬𑀢𑀺. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑀧𑀸𑀧𑀺𑀘𑁆𑀙𑀢𑀸 𑀦𑀸𑀫, 𑀲𑀸 ‘‘𑀇𑀥𑁂𑀓𑀘𑁆𑀘𑁄 𑀅𑀲𑀤𑁆𑀥𑁄 𑀲𑀫𑀸𑀦𑁄 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁫𑁧) 𑀦𑀬𑁂𑀦 𑀅𑀢𑁆𑀭𑁂𑀯 𑀆𑀕𑀢𑀸𑀬𑁂𑀯. 𑀢𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀓𑁄𑀳𑀜𑁆𑀜𑁂 𑀧𑀢𑀺𑀝𑁆𑀞𑀸𑀢𑀺. 𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑀫𑀳𑀺𑀘𑁆𑀙𑀢𑀸 𑀦𑀸𑀫, 𑀲𑀸𑀧𑀺 ‘‘𑀇𑀥𑁂𑀓𑀘𑁆𑀘𑁄 𑀲𑀤𑁆𑀥𑁄 𑀲𑀫𑀸𑀦𑁄 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀇𑀘𑁆𑀙𑀢𑀺, 𑀲𑀻𑀮𑀯𑀸 𑀲𑀫𑀸𑀦𑁄 𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 (𑀯𑀺𑀪. 𑁮𑁫𑁧) 𑀇𑀫𑀺𑀦𑀸 𑀦𑀬𑁂𑀦 𑀆𑀕𑀢𑀸𑀬𑁂𑀯. 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀦𑁆𑀢𑀧𑁆𑀧𑀬𑁄 𑀳𑁄𑀢𑀺, 𑀯𑀺𑀚𑀸𑀢𑀫𑀸𑀢𑀸𑀧𑀺𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀫𑀼𑀤𑁆𑀤𑁄 𑀘, 𑀫𑀳𑀺𑀘𑁆𑀙𑁄 𑀘𑀸𑀧𑀺 𑀧𑀼𑀕𑁆𑀕𑀮𑁄;

𑀲𑀓𑀝𑁂𑀦 𑀧𑀘𑁆𑀘𑀬𑁂 𑀤𑁂𑀢𑀼, 𑀢𑀬𑁄𑀧𑁂𑀢𑁂 𑀅𑀢𑀧𑁆𑀧𑀬𑀸’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁨𑁫𑁨; 𑀅. 𑀦𑀺. 𑀅𑀝𑁆𑀞. 𑁧.𑁧.𑁬𑁩; 𑀉𑀤𑀸. 𑀅𑀝𑁆𑀞. 𑁩𑁧);

𑀲𑀦𑁆𑀢𑀕𑀼𑀡𑀦𑀺𑀕𑀽𑀳𑀦𑀢𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀫𑀢𑁆𑀢𑀜𑁆𑀜𑀼𑀢𑀸 𑀅𑀧𑁆𑀧𑀺𑀘𑁆𑀙𑀢𑀸 𑀦𑀸𑀫, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑀢𑀸𑀬 𑀲𑀤𑁆𑀥𑁄 𑀲𑀫𑀸𑀦𑁄 ‘‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺. 𑀲𑀻𑀮𑀯𑀸… 𑀧𑀯𑀺𑀯𑀺𑀢𑁆𑀢𑁄… 𑀩𑀳𑀼𑀲𑁆𑀲𑀼𑀢𑁄… 𑀆𑀭𑀤𑁆𑀥𑀯𑀻𑀭𑀺𑀬𑁄… 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄… 𑀧𑀜𑁆𑀜𑀯𑀸… 𑀔𑀻𑀡𑀸𑀲𑀯𑁄 𑀲𑀫𑀸𑀦𑁄 ‘‘𑀔𑀻𑀡𑀸𑀲𑀯𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄. 𑀏𑀯𑀁 𑀅𑀧𑁆𑀧𑀺𑀘𑁆𑀙𑁄 𑀘 𑀧𑀦 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀁 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀣𑀸𑀯𑀭𑀁 𑀓𑀭𑁄𑀢𑀺, 𑀤𑀸𑀬𑀓𑀸𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺, 𑀬𑀣𑀸 𑀬𑀣𑀸 𑀳𑀺 𑀲𑁄 𑀅𑀢𑁆𑀢𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺, 𑀢𑀣𑀸 𑀢𑀣𑀸 𑀢𑀲𑁆𑀲 𑀯𑀢𑁆𑀢𑁂 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀩𑀳𑀽 𑀤𑁂𑀦𑁆𑀢𑀺.

𑀅𑀧𑀭𑁄𑀧𑀺 𑀘𑀢𑀼𑀩𑁆𑀩𑀺𑀥𑁄 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄. 𑀲𑁄 𑀤𑀸𑀬𑀓𑀲𑁆𑀲 𑀯𑀲𑀁 𑀚𑀸𑀦𑀸𑀢𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑀁 𑀚𑀸𑀦𑀸𑀢𑀺, 𑀅𑀢𑁆𑀢𑀦𑁄 𑀣𑀸𑀫𑀁 𑀚𑀸𑀦𑀸𑀢𑀺. 𑀬𑀤𑀺 𑀳𑀺 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼 𑀳𑁄𑀢𑀺, 𑀤𑀸𑀬𑀓𑁄 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄 𑀅𑀧𑁆𑀧𑁄, 𑀤𑀸𑀬𑀓𑁄 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀅𑀢𑁆𑀢𑀦𑁄 𑀣𑀸𑀫𑀁 𑀜𑀢𑁆𑀯𑀸 𑀧𑀫𑀸𑀡𑁂𑀦𑁂𑀯 𑀕𑀡𑁆𑀳𑀸𑀢𑀺.

𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀬𑁄 𑀧𑀦 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀦 𑀚𑀸𑀦𑀸𑀧𑁂𑀢𑀼𑀓𑀸𑀫𑁄, 𑀅𑀬𑀁 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀬𑁄 𑀧𑀦 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀳𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀔𑀻𑀡𑀸𑀲𑀯𑁄 𑀧𑀦 𑀅𑀢𑁆𑀭𑀺𑀘𑁆𑀙𑀢𑀁 𑀧𑀸𑀧𑀺𑀘𑁆𑀙𑀢𑀁 𑀫𑀳𑀺𑀘𑁆𑀙𑀢𑀁 𑀧𑀳𑀸𑀬 𑀲𑀩𑁆𑀩𑀲𑁄 𑀇𑀘𑁆𑀙𑀸𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀅𑀮𑁄𑀪𑀲𑀗𑁆𑀔𑀸𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. ‘‘𑀆𑀯𑀼𑀲𑁄, 𑀅𑀢𑁆𑀭𑀺𑀘𑁆𑀙𑀢𑀸 𑀧𑀸𑀧𑀺𑀘𑁆𑀙𑀢𑀸 𑀫𑀳𑀺𑀘𑁆𑀙𑀢𑀸𑀢𑀺, 𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸𑀢𑀺, 𑀢𑁂𑀲𑀼 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀏𑀯𑀭𑀽𑀧𑀁 𑀅𑀧𑁆𑀧𑀺𑀘𑁆𑀙𑀢𑀁 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑁄 𑀅𑀧𑁆𑀧𑀺𑀘𑁆𑀙𑀓𑀣𑀁 𑀓𑀣𑁂𑀢𑀺 𑀦𑀸𑀫.

𑀲𑀦𑁆𑀢𑀼𑀝𑁆𑀞𑀻𑀓𑀣𑀦𑁆𑀢𑀺𑀆𑀤𑀻𑀲𑀼 𑀯𑀺𑀲𑁂𑀲𑀢𑁆𑀣𑀫𑁂𑀯 𑀤𑀻𑀧𑀬𑀺𑀲𑁆𑀲𑀸𑀫, 𑀬𑁄𑀚𑀦𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀢𑀼𑀝𑁆𑀞𑀻𑀓𑀣𑀦𑁆𑀢𑀺 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑀁 𑀦𑀺𑀲𑁆𑀲𑀺𑀢𑀁 𑀓𑀣𑀁. 𑀲𑁄 𑀧𑀦𑁂𑀲 𑀲𑀦𑁆𑀢𑁄𑀲𑁄 𑀤𑁆𑀯𑀸𑀤𑀲𑀯𑀺𑀥𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄, 𑀬𑀣𑀸𑀩𑀮𑀲𑀦𑁆𑀢𑁄𑀲𑁄, 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺 𑀢𑀺𑀯𑀺𑀥𑁄. 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼𑀧𑀺.

𑀢𑀲𑁆𑀲𑀸𑀬𑀁 𑀧𑀪𑁂𑀤𑀯𑀡𑁆𑀡𑀦𑀸 𑁋 𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀮𑀪𑀢𑀺 𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸. 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀬𑁄 𑀧𑀓𑀢𑀺𑀤𑀼𑀩𑁆𑀩𑀮𑁄 𑀯𑀸 𑀳𑁄𑀢𑀺, 𑀆𑀩𑀸𑀥𑀚𑀭𑀸𑀪𑀺𑀪𑀽𑀢𑁄 𑀯𑀸, 𑀕𑀭𑀼𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀓𑀺𑀮𑀫𑀢𑀺. 𑀲𑁄 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀧𑀡𑀻𑀢𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺. 𑀲𑁄 𑀧𑀢𑁆𑀢𑀼𑀡𑁆𑀡𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀫𑀳𑀕𑁆𑀖𑀘𑀻𑀯𑀭𑀁, 𑀩𑀳𑀽𑀦𑀺 𑀯𑀸 𑀧𑀦 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸 ‘‘𑀇𑀤𑀁 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁, 𑀇𑀤𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀼𑀭𑀽𑀧𑀁, 𑀇𑀤𑀁 𑀕𑀺𑀮𑀸𑀦𑀸𑀦𑀁, 𑀇𑀤𑀁 𑀅𑀧𑁆𑀧𑀮𑀸𑀪𑀻𑀦𑀁 𑀳𑁄𑀢𑀽’’𑀢𑀺 𑀤𑀢𑁆𑀯𑀸 𑀢𑁂𑀲𑀁 𑀧𑀼𑀭𑀸𑀡𑀘𑀻𑀯𑀭𑀁 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑁂𑀳𑀺 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀬𑁂𑀦𑀲𑁆𑀲 𑀧𑀭𑀺𑀪𑀼𑀢𑁆𑀢𑁂𑀦 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀩𑀳𑀼𑀁 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀣𑁂𑀭𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀻𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀯𑀸 𑀲𑁂𑀲𑀓𑀁 𑀧𑀺𑀡𑁆𑀟𑀸𑀬 𑀯𑀸 𑀘𑀭𑀺𑀢𑁆𑀯𑀸 𑀫𑀺𑀲𑁆𑀲𑀓𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀮𑀪𑀢𑀺 𑀫𑀦𑀸𑀧𑀁 𑀯𑀸 𑀅𑀫𑀦𑀸𑀧𑀁 𑀯𑀸, 𑀲𑁄 𑀢𑁂𑀦 𑀦𑁂𑀯 𑀲𑁄𑀫𑀦𑀲𑁆𑀲𑀁 𑀦 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀦𑁆𑀢𑀫𑀲𑁄 𑀢𑀺𑀡𑀲𑀦𑁆𑀣𑀸𑀭𑀓𑁂𑀦𑀸𑀧𑀺 𑀬𑀣𑀸𑀮𑀤𑁆𑀥𑁂𑀦𑁂𑀯 𑀢𑀼𑀲𑁆𑀲𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀬𑀢𑁆𑀣𑀲𑁆𑀲 𑀯𑀲𑀢𑁄 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑁂 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄.

𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀮𑁂𑀡𑀫𑀡𑁆𑀟𑀧𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀩𑀳𑀽𑀦𑀺 𑀧𑀡𑀻𑀢𑀲𑁂𑀦𑀸𑀲𑀦𑀸𑀦𑀺 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀣𑁂𑀭𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀻𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀬𑁄𑀧𑀺 ‘‘𑀉𑀢𑁆𑀢𑀫𑀲𑁂𑀦𑀸𑀲𑀦𑀁 𑀦𑀸𑀫 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀦𑀺𑀤𑁆𑀤𑀸𑀪𑀺𑀪𑀽𑀢𑀲𑁆𑀲 𑀧𑀼𑀦 𑀧𑀝𑀺𑀩𑀼𑀚𑁆𑀛𑀢𑁄 𑀧𑀸𑀧𑀯𑀺𑀢𑀓𑁆𑀓𑀸 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸 𑀢𑀸𑀤𑀺𑀲𑀁 𑀲𑁂𑀦𑀸𑀲𑀦𑀁 𑀧𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀲𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀪𑁂𑀲𑀚𑁆𑀚𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀬𑀁 𑀮𑀪𑀢𑀺, 𑀢𑁂𑀦𑁂𑀯 𑀢𑀼𑀲𑁆𑀲𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀢𑁂𑀮𑁂𑀦 𑀅𑀢𑁆𑀣𑀺𑀓𑁄 𑀨𑀸𑀡𑀺𑀢𑀁 𑀮𑀪𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂𑀮𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀤𑁂𑀯 𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄.

𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀩𑀳𑀼𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀧𑀡𑀻𑀢𑀪𑁂𑀲𑀚𑁆𑀚𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀣𑁂𑀭𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀻𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀆𑀪𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀬𑁄 𑀧𑀦 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀘𑀢𑀼𑀫𑀥𑀼𑀭𑀁 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀫𑀼𑀢𑁆𑀢𑀳𑀭𑀻𑀢𑀓𑀁 ‘‘𑀕𑀡𑁆𑀳, 𑀪𑀦𑁆𑀢𑁂, 𑀬𑀤𑀺𑀘𑁆𑀙𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀲𑀘𑀲𑁆𑀲 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀧𑀺 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀣 𑀫𑀼𑀢𑁆𑀢𑀳𑀭𑀻𑀢𑀓𑀁 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢’’𑀦𑁆𑀢𑀺 𑀘𑀢𑀼𑀫𑀥𑀼𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀢𑁆𑀢𑀳𑀭𑀻𑀢𑀓𑁂𑀦 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀇𑀫𑁂𑀲𑀁 𑀧𑀦 𑀧𑀘𑁆𑀘𑁂𑀓𑀧𑀘𑁆𑀘𑀬𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀲𑀦𑁆𑀢𑁄𑀲𑀸𑀦𑀁 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀯 𑀅𑀕𑁆𑀕𑁄. 𑀅𑀭𑀳𑀸 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑁂 𑀇𑀫𑁂𑀳𑀺 𑀢𑀻𑀳𑀺𑀧𑀺 𑀲𑀦𑁆𑀢𑀼𑀝𑁆𑀞𑁄𑀯.

𑀧𑀯𑀺𑀯𑁂𑀓𑀓𑀣𑀦𑁆𑀢𑀺 𑀧𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀓𑀣𑀁. 𑀢𑀬𑁄 𑀳𑀺 𑀯𑀺𑀯𑁂𑀓𑀸 𑀓𑀸𑀬𑀯𑀺𑀯𑁂𑀓𑁄 𑀘𑀺𑀢𑁆𑀢𑀯𑀺𑀯𑁂𑀓𑁄 𑀉𑀧𑀥𑀺𑀯𑀺𑀯𑁂𑀓𑁄𑀢𑀺. 𑀢𑀢𑁆𑀣 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺, 𑀏𑀓𑁄 𑀯𑀺𑀳𑀭𑀢𑀻𑀢𑀺 𑀅𑀬𑀁 𑀓𑀸𑀬𑀯𑀺𑀯𑁂𑀓𑁄 𑀦𑀸𑀫. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀦𑀸𑀫. 𑀦𑀺𑀩𑁆𑀩𑀸𑀦𑀁 𑀉𑀧𑀥𑀺𑀯𑀺𑀯𑁂𑀓𑁄 𑀦𑀸𑀫.

𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁. 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁. 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦’’𑀦𑁆𑀢𑀺 (𑀫𑀳𑀸𑀦𑀺. 𑁫𑁭).

𑀅𑀲𑀁𑀲𑀕𑁆𑀕𑀓𑀣𑀦𑁆𑀢𑀺 𑀏𑀢𑁆𑀣 𑀧𑀦 𑀲𑀯𑀦𑀲𑀁𑀲𑀕𑁆𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀓𑀸𑀬𑀲𑀁𑀲𑀕𑁆𑀕𑁄𑀢𑀺 𑀧𑀜𑁆𑀘𑀯𑀺𑀥𑁄 𑀲𑀁𑀲𑀕𑁆𑀕𑁄. 𑀢𑁂𑀲𑀼 𑀇𑀥 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 ‘‘𑀅𑀫𑀼𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀓𑀼𑀫𑀸𑀭𑀻 𑀯𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸’’𑀢𑀺, 𑀲𑁄 𑀢𑀁 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀏𑀯𑀁 𑀧𑀭𑁂𑀳𑀺 𑀓𑀣𑀺𑀬𑀫𑀸𑀦𑀭𑀽𑀧𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑀸 𑀯𑀸 𑀳𑀲𑀺𑀢𑀮𑀧𑀺𑀢𑀕𑀻𑀢𑀲𑀤𑁆𑀤𑀁 𑀲𑀼𑀡𑀦𑁆𑀢𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀲𑀯𑀦𑀲𑀁𑀲𑀕𑁆𑀕𑁄 𑀦𑀸𑀫.

‘‘𑀇𑀥 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀲𑀼𑀡𑀸𑀢𑀺, 𑀅𑀧𑀺 𑀘 𑀔𑁄 𑀲𑀸𑀫𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀯𑀸 𑀓𑀼𑀫𑀸𑀭𑀺𑀁 𑀯𑀸 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁, 𑀲𑁄 𑀢𑀁 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀏𑀯𑀁 𑀯𑀺𑀲𑀪𑀸𑀕𑀭𑀽𑀧𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀦𑀸𑀫.

𑀅𑀜𑁆𑀜𑀫𑀜𑁆𑀜𑀁 𑀅𑀮𑁆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀧𑀦 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀓𑀁 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑀓𑀭𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀦𑀸𑀫. 𑀳𑀢𑁆𑀣𑀕𑁆𑀕𑀸𑀳𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀧𑀦 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫. 𑀅𑀭𑀳𑀸 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀲𑀁𑀲𑀕𑁆𑀕𑁂𑀳𑀺 𑀘𑀢𑀽𑀳𑀺𑀧𑀺 𑀧𑀭𑀺𑀲𑀸𑀳𑀺 𑀲𑀤𑁆𑀥𑀺𑀁 𑀅𑀲𑀁𑀲𑀝𑁆𑀞𑁄, 𑀕𑀸𑀳𑀫𑀼𑀢𑁆𑀢𑀓𑁄 𑀘𑁂𑀯 𑀲𑀁𑀲𑀕𑁆𑀕𑀫𑀼𑀢𑁆𑀢𑀓𑁄 𑀘. 𑀅𑀲𑀁𑀲𑀕𑁆𑀕𑀲𑁆𑀲 𑀯𑀡𑁆𑀡𑀁 𑀪𑀡𑀦𑁆𑀢𑁄 𑀅𑀲𑀁𑀲𑀕𑁆𑀕𑀓𑀣𑀁 𑀓𑀣𑁂𑀢𑀺 𑀦𑀸𑀫.

𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀦𑁆𑀢𑀺 𑀏𑀢𑁆𑀣 𑀬𑁄 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄 𑀧𑀭𑀺𑀧𑀼𑀡𑁆𑀡𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁄 𑀳𑁄𑀢𑀺, 𑀕𑀫𑀦𑁂 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀁 𑀞𑀸𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀞𑀸𑀦𑁂 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀁 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀁 𑀲𑀬𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀤𑀡𑁆𑀟𑁂𑀦 𑀓𑀡𑁆𑀳𑀲𑀧𑁆𑀧𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀅𑀫𑀺𑀢𑁆𑀢𑀁 𑀕𑀻𑀯𑀸𑀬 𑀅𑀓𑁆𑀓𑀫𑀦𑁆𑀢𑁄 𑀯𑀺𑀬 𑀘 𑀯𑀺𑀘𑀭𑀢𑀺, 𑀢𑀸𑀤𑀺𑀲𑀲𑁆𑀲 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀯𑀡𑁆𑀡𑀁 𑀪𑀡𑀦𑁆𑀢𑁄 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀁 𑀓𑀣𑁂𑀢𑀺 𑀦𑀸𑀫.

𑀲𑀻𑀮𑀓𑀣𑀦𑁆𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀫𑀸𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀧𑀜𑁆𑀜𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑀸𑀡𑀁. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀲𑀻𑀮𑀸𑀤𑀻𑀦𑀁 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀲𑀻𑀮𑀸𑀤𑀺𑀓𑀣𑀁 𑀓𑀣𑁂𑀢𑀺 𑀦𑀸𑀫.

𑀲𑀢𑀺𑀧𑀝𑁆𑀞𑀸𑀦𑀓𑀣𑀦𑁆𑀢𑀺𑀆𑀤𑀻𑀦𑀺 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁮𑁬. 𑀦𑀺𑀭𑀸𑀲𑀢𑁆𑀢𑀻𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀯𑀺𑀯𑁂𑀓𑀤𑀲𑁆𑀲𑀻 𑀨𑀲𑁆𑀲𑁂𑀲𑀽𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀲𑀼 𑀅𑀢𑁆𑀢𑀸𑀤𑀺𑀪𑀸𑀯𑀯𑀺𑀯𑁂𑀓𑀁 𑀧𑀲𑁆𑀲𑀢𑀺. 𑀤𑀺𑀝𑁆𑀞𑀻𑀲𑀼 𑀘 𑀦 𑀦𑀻𑀬𑀢𑀻𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀻𑀲𑀼 𑀓𑀸𑀬𑀘𑀺 𑀤𑀺𑀝𑁆𑀞𑀺𑀬𑀸 𑀦 𑀦𑀻𑀬𑀢𑀺.

𑀯𑀺𑀧𑀭𑀺𑀡𑀢𑀁 𑀯𑀸 𑀯𑀢𑁆𑀣𑀼𑀁 𑀦 𑀲𑁄𑀘𑀢𑀻𑀢𑀺 𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸 𑀦𑀝𑁆𑀞𑁂 𑀓𑀺𑀲𑁆𑀫𑀺𑀜𑁆𑀘𑀺 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀲𑁄𑀓𑀁 𑀆𑀧𑀚𑁆𑀚𑀢𑀺. 𑀯𑀺𑀧𑀭𑀺𑀡𑀢𑀲𑁆𑀫𑀺𑀁 𑀯𑀸𑀢𑀺 𑀯𑀺𑀦𑀲𑁆𑀲𑀫𑀸𑀦𑁂 𑀯𑀢𑁆𑀣𑀼𑀫𑁆𑀳𑀺.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑁄 𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀯, 𑀫𑀦𑁄𑀲𑀫𑁆𑀨𑀲𑁆𑀲𑁄 𑀳𑀤𑀬𑀯𑀢𑁆𑀣𑀼𑀓𑁄𑀧𑀺 𑀅𑀯𑀢𑁆𑀣𑀼𑀓𑁄𑀧𑀺 𑀲𑀩𑁆𑀩𑁄 𑀘𑀢𑀼𑀪𑀽𑀫𑀓𑁄 𑀨𑀲𑁆𑀲𑁄. 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄𑀢𑀺 𑀧𑀭𑀺𑀬𑀸𑀬𑁂𑀦 𑀏𑀢𑀲𑁆𑀲 𑀦𑀸𑀫𑀁 𑀳𑁄𑀢𑀺𑀬𑁂𑀯. 𑀢𑀬𑁄 𑀳𑀺 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀲𑀬𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀲𑀳𑀚𑀸𑀢𑀲𑀫𑁆𑀨𑀲𑁆𑀲𑀲𑁆𑀲 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄𑀢𑀺 𑀦𑀸𑀫𑀁 𑀓𑀭𑁄𑀦𑁆𑀢𑀺. 𑀧𑀝𑀺𑀖𑀲𑀫𑁆𑀨𑀲𑁆𑀲𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀧𑀝𑀺𑀖𑀲𑀫𑁆𑀨𑀲𑁆𑀲𑁄 𑀦𑀸𑀫 𑀧𑀜𑁆𑀘𑀤𑁆𑀯𑀸𑀭𑀺𑀓𑀨𑀲𑁆𑀲𑁄. 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀦𑀸𑀫 𑀫𑀦𑁄𑀤𑁆𑀯𑀸𑀭𑀺𑀓𑀨𑀲𑁆𑀲𑁄. 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄𑀢𑀺 𑀲𑀼𑀔𑀯𑁂𑀤𑀦𑀸𑀬 𑀳𑀺𑀢𑁄 𑀉𑀧𑁆𑀧𑀸𑀤𑀓𑁄 𑀨𑀲𑁆𑀲𑁄. 𑀇𑀢𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀼𑀲𑀮𑁄 𑀨𑀲𑁆𑀲𑁄𑀢𑀺 𑀏𑀓𑀯𑀻𑀲𑀢𑀺𑀓𑀼𑀲𑀮𑀘𑀺𑀢𑁆𑀢𑀲𑀳𑀚𑀸𑀢𑁄 𑀨𑀲𑁆𑀲𑁄. 𑀅𑀓𑀼𑀲𑀮𑁄𑀢𑀺 𑀤𑁆𑀯𑀸𑀤𑀲𑀅𑀓𑀼𑀲𑀮𑀲𑀳𑀚𑀸𑀢𑁄 𑀨𑀲𑁆𑀲𑁄. 𑀅𑀩𑁆𑀬𑀸𑀓𑀢𑁄𑀢𑀺 𑀙𑀧𑁆𑀧𑀜𑁆𑀜𑀸𑀲𑀅𑀩𑁆𑀬𑀸𑀓𑀢𑀲𑀳𑀚𑀸𑀢𑁄 𑀨𑀲𑁆𑀲𑁄. 𑀓𑀸𑀫𑀸𑀯𑀘𑀭𑁄𑀢𑀺 𑀘𑀢𑀼𑀧𑀜𑁆𑀜𑀸𑀲𑀓𑀸𑀫𑀸𑀯𑀘𑀭𑀲𑀳𑀚𑀸𑀢𑁄 𑀨𑀲𑁆𑀲𑁄. 𑀭𑀽𑀧𑀸𑀯𑀘𑀭𑁄𑀢𑀺 𑀓𑀼𑀲𑀮𑀸𑀤𑀺𑀧𑀜𑁆𑀘𑀤𑀲𑀭𑀽𑀧𑀸𑀯𑀘𑀭𑀲𑀫𑁆𑀧𑀬𑀼𑀢𑁆𑀢𑁄. 𑀅𑀭𑀽𑀧𑀸𑀯𑀘𑀭𑁄𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀲𑁂𑀦 𑀤𑁆𑀯𑀸𑀤𑀲𑀅𑀭𑀽𑀧𑀸𑀯𑀘𑀭𑀲𑀫𑁆𑀧𑀬𑀼𑀢𑁆𑀢𑁄.

𑀲𑀼𑀜𑁆𑀜𑀢𑁄𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀫𑀕𑁆𑀕𑁄 𑀲𑀼𑀜𑁆𑀜𑀢𑁄, 𑀢𑁂𑀦 𑀲𑀳𑀚𑀸𑀢𑁄 𑀨𑀲𑁆𑀲𑁄 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄. 𑀇𑀢𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀺𑀫𑀺𑀢𑁆𑀢𑁄𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄. 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀫𑀕𑁆𑀕𑁄 𑀅𑀧𑁆𑀧𑀡𑀺𑀳𑀺𑀢𑁄. 𑀮𑁄𑀓𑀺𑀬𑁄𑀢𑀺 𑀮𑁄𑀓𑁄 𑀯𑀼𑀘𑁆𑀘𑀢𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀯𑀝𑁆𑀝𑁄, 𑀢𑀲𑁆𑀫𑀺𑀁 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀮𑁄𑀓𑁂 𑀦𑀺𑀬𑀼𑀢𑁆𑀢𑁄𑀢𑀺 𑀮𑁄𑀓𑀺𑀬𑁄, 𑀢𑁂𑀪𑀽𑀫𑀓𑁄 𑀥𑀫𑁆𑀫𑁄. 𑀮𑁄𑀓𑀼𑀢𑁆𑀢𑀭𑁄𑀢𑀺 𑀮𑁄𑀓𑀢𑁄 𑀉𑀢𑁆𑀢𑀭𑁄 𑀉𑀢𑁆𑀢𑀺𑀡𑁆𑀡𑁄𑀢𑀺 𑀮𑁄𑀓𑀼𑀢𑁆𑀢𑀭𑁄, 𑀮𑁄𑀓𑁂 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦𑀧𑀺 𑀮𑁄𑀓𑀼𑀢𑁆𑀢𑀭𑁄. 𑀅𑀢𑁆𑀢𑁂𑀦 𑀯𑀸𑀢𑀺 𑀅𑀢𑁆𑀢𑀪𑀸𑀯𑁂𑀦 𑀯𑀸. 𑀅𑀢𑁆𑀢𑀦𑀺𑀬𑁂𑀦 𑀯𑀸𑀢𑀺 𑀅𑀢𑁆𑀢𑀸𑀬𑀢𑁆𑀢𑁂𑀦 𑀯𑀸.

𑁮𑁭. 𑀧𑀢𑀺𑀮𑀻𑀦𑁄𑀢𑀺 𑀭𑀸𑀕𑀸𑀤𑀻𑀦𑀁 𑀧𑀳𑀻𑀦𑀢𑁆𑀢𑀸 𑀢𑀢𑁄 𑀅𑀧𑀕𑀢𑁄. 𑀅𑀓𑀼𑀳𑀓𑁄𑀢𑀺 𑀅𑀯𑀺𑀫𑁆𑀳𑀸𑀧𑀓𑁄 𑀢𑀻𑀳𑀺 𑀓𑀼𑀳𑀦𑀯𑀢𑁆𑀣𑀽𑀳𑀺. 𑀅𑀧𑀺𑀳𑀸𑀮𑀽𑀢𑀺 𑀅𑀧𑀺𑀳𑀦𑀲𑀻𑀮𑁄, 𑀧𑀢𑁆𑀣𑀦𑀸𑀢𑀡𑁆𑀳𑀸𑀬 𑀭𑀳𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀫𑀘𑁆𑀙𑀭𑀻𑀢𑀺 𑀧𑀜𑁆𑀘𑀫𑀘𑁆𑀙𑁂𑀭𑀯𑀺𑀭𑀳𑀺𑀢𑁄. 𑀅𑀧𑁆𑀧𑀕𑀩𑁆𑀪𑁄𑀢𑀺 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀺𑀯𑀺𑀭𑀳𑀺𑀢𑁄. 𑀅𑀚𑁂𑀕𑀼𑀘𑁆𑀙𑁄𑀢𑀺 𑀲𑀫𑁆𑀧𑀦𑁆𑀦𑀲𑀻𑀮𑀸𑀤𑀺𑀢𑀸𑀬 𑀅𑀚𑁂𑀕𑀼𑀘𑁆𑀙𑀦𑀻𑀬𑁄 𑀅𑀲𑁂𑀘𑀦𑀓𑁄 𑀫𑀦𑀸𑀧𑁄. 𑀧𑁂𑀲𑀼𑀡𑁂𑀬𑁆𑀬𑁂 𑀘 𑀦𑁄 𑀬𑀼𑀢𑁄𑀢𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀉𑀧𑀲𑀁𑀳𑀭𑀺𑀢𑀩𑁆𑀩𑁂 𑀧𑀺𑀲𑀼𑀡𑀓𑀫𑁆𑀫𑁂 𑀅𑀬𑀼𑀢𑁆𑀢𑁄.

𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀭𑀸𑀕𑀓𑀺𑀮𑁂𑀲𑀲𑁆𑀲 𑀧𑀳𑀻𑀦𑀪𑀸𑀯𑁂𑀦. 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀳𑁄𑀢𑀻𑀢𑀺 𑀅𑀲𑁆𑀫𑀻𑀢𑀺 𑀉𑀦𑁆𑀦𑀢𑀺𑀫𑀸𑀦𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀻𑀦𑁄 𑀳𑁄𑀢𑀺.

𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀻𑀢𑀺 𑀢𑀻𑀡𑀺 𑀯𑀺𑀫𑁆𑀳𑀸𑀧𑀦𑀓𑀸𑀭𑀡𑀸𑀦𑀺. 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺𑀆𑀤𑀻𑀲𑀼 𑀘𑀻𑀯𑀭𑀸𑀤𑀻𑀳𑀺 𑀦𑀺𑀫𑀦𑁆𑀢𑀺𑀢𑀲𑁆𑀲 𑀢𑀤𑀢𑁆𑀣𑀺𑀓𑀲𑁆𑀲𑁂𑀯 𑀲𑀢𑁄 𑀧𑀸𑀧𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬 𑀧𑀝𑀺𑀓𑁆𑀔𑀺𑀧𑀦𑁂𑀦 𑀢𑁂 𑀘 𑀕𑀳𑀧𑀢𑀺𑀓𑁂 𑀅𑀢𑁆𑀢𑀦𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀲𑀸𑀤𑁂 𑀜𑀢𑁆𑀯𑀸 𑀧𑀼𑀦 𑀢𑁂𑀲𑀁 ‘‘𑀅𑀳𑁄 𑀅𑀬𑁆𑀬𑁄 𑀅𑀧𑁆𑀧𑀺𑀘𑁆𑀙𑁄, 𑀦 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀇𑀘𑁆𑀙𑀢𑀺, 𑀲𑀼𑀮𑀤𑁆𑀥𑀁 𑀯𑀢 𑀦𑁄 𑀅𑀲𑁆𑀲, 𑀲𑀘𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀉𑀧𑀦𑁂𑀦𑁆𑀢𑀸𑀦𑀁 𑀢𑀤𑀦𑀼𑀕𑁆𑀕𑀳𑀓𑀸𑀫𑀢𑀁𑀬𑁂𑀯 𑀅𑀯𑀺𑀓𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑁂𑀦 𑀘 𑀢𑀢𑁄 𑀧𑀪𑀼𑀢𑀺 𑀅𑀧𑀺 𑀲𑀓𑀝𑀪𑀸𑀭𑁂𑀳𑀺 𑀉𑀧𑀦𑀸𑀫𑀦𑀳𑁂𑀢𑀼𑀪𑀽𑀢𑀁 𑀯𑀺𑀫𑁆𑀳𑀸𑀧𑀦𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀧𑀦 𑀲𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀓𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀫𑁆𑀳𑀸𑀧𑀦𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀧𑀦 𑀲𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀧𑀭𑀺𑀤𑀻𑀧𑀦𑀯𑀸𑀘𑀸𑀬 𑀢𑀣𑀸 𑀢𑀣𑀸 𑀯𑀺𑀫𑁆𑀳𑀸𑀧𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀢𑀫𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀦𑁆𑀢𑀺 𑀏𑀢𑁆𑀣 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀦𑁆𑀢𑀺 𑀏𑀯𑀁 𑀲𑀗𑁆𑀔𑀸𑀢𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁. 𑀦𑀺𑀫𑀦𑁆𑀢𑁂𑀦𑁆𑀢𑀻𑀢𑀺 𑀇𑀥 𑀕𑀳𑀧𑀢𑀺𑀓𑀸 ‘‘𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀦𑁆𑀢𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄. ‘‘𑀦𑀺𑀫𑀦𑁆𑀢𑁂𑀢𑀻’’𑀢𑀺 𑀯𑀸 ‘‘𑀯𑀤𑀦𑁆𑀢𑀻’’𑀢𑀺 𑀯𑀸 𑀓𑁂𑀘𑀺 𑀧𑀞𑀦𑁆𑀢𑀺. 𑀢𑀸𑀤𑀺𑀲𑁂 𑀦𑀺𑀫𑀦𑁆𑀢𑀸𑀧𑁂𑀦𑁆𑀢𑀺. 𑀦𑀺𑀫𑀦𑁆𑀢𑁂𑀦𑁆𑀢𑀻𑀢𑀺 𑀧𑀸𑀞𑀲𑁆𑀲 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄. 𑀘𑀻𑀯𑀭𑀁 𑀧𑀘𑁆𑀘𑀓𑁆𑀔𑀸𑀢𑀻𑀢𑀺 𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄𑀢𑀺 𑀬𑀁 𑀘𑀻𑀯𑀭𑀥𑀸𑀭𑀡𑀁 𑀲𑀫𑀡𑁄 𑀓𑀭𑁄𑀢𑀺, 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀅𑀦𑀼𑀘𑁆𑀙𑀯𑀺𑀓𑀁. 𑀧𑀸𑀧𑀡𑀺𑀓𑀸 𑀯𑀸 𑀦𑀦𑁆𑀢𑀓𑀸𑀦𑀻𑀢𑀺 𑀆𑀧𑀡𑀤𑁆𑀯𑀸𑀭𑁂 𑀧𑀢𑀺𑀓𑀸𑀦𑀺 𑀅𑀦𑁆𑀢𑀯𑀺𑀭𑀳𑀺𑀢𑀸𑀦𑀺 𑀧𑀺𑀮𑁄𑀢𑀺𑀓𑀸𑀦𑀺. 𑀉𑀘𑁆𑀘𑀺𑀦𑀺𑀢𑁆𑀯𑀸𑀢𑀺 𑀲𑀁𑀓𑀟𑁆𑀠𑀺𑀢𑁆𑀯𑀸. 𑀉𑀜𑁆𑀙𑀸𑀘𑀭𑀺𑀬𑀸𑀬𑀸𑀢𑀺 𑀪𑀺𑀓𑁆𑀔𑀸𑀘𑀭𑀡𑁂𑀦. 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦𑀸𑀢𑀺 𑀧𑀺𑀡𑁆𑀟𑀁 𑀓𑀢𑁆𑀯𑀸 𑀮𑀤𑁆𑀥𑀆𑀮𑁄𑀧𑁂𑀦. 𑀧𑀽𑀢𑀺𑀫𑀼𑀢𑁆𑀢𑁂𑀦 𑀯𑀸𑀢𑀺 𑀕𑁄𑀫𑀼𑀢𑁆𑀢𑁂𑀦 𑀯𑀸. 𑀑𑀲𑀥𑀁 𑀓𑀭𑁂𑀬𑁆𑀬𑀸𑀢𑀺 𑀪𑁂𑀲𑀚𑁆𑀚𑀓𑀺𑀘𑁆𑀘𑀁 𑀓𑀭𑁂𑀬𑁆𑀬. 𑀢𑀤𑀼𑀧𑀸𑀤𑀸𑀬𑀸𑀢𑀺 𑀢𑀢𑁄 𑀧𑀝𑁆𑀞𑀸𑀬. 𑀥𑀼𑀢𑀯𑀸𑀤𑁄𑀢𑀺 𑀥𑀼𑀢𑀕𑀼𑀡𑀯𑀸𑀤𑀻. 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀦𑀺𑀫𑀦𑁆𑀢𑁂𑀦𑁆𑀢𑀻𑀢𑀺 𑀉𑀧𑀭𑀽𑀧𑀭𑀺 𑀦𑀺𑀫𑀦𑁆𑀢𑁂𑀦𑁆𑀢𑀺. 𑀲𑀫𑁆𑀫𑀼𑀔𑀻𑀪𑀸𑀯𑀸𑀢𑀺 𑀲𑀫𑁆𑀫𑀼𑀔𑀻𑀪𑀸𑀯𑁂𑀦, 𑀯𑀺𑀚𑁆𑀚𑀫𑀸𑀦𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀲𑀯𑀢𑀻𑀢𑀺 𑀧𑀝𑀺𑀮𑀪𑀢𑀺. 𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑁂𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 ‘‘𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀤𑁂𑀬𑁆𑀬𑀥𑀫𑁆𑀫𑀸 𑀲𑀼𑀮𑀪𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀘, 𑀲𑀤𑁆𑀥𑀸 𑀧𑀦 𑀤𑀼𑀮𑁆𑀮𑀪𑀸. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀳𑀺 𑀲𑀤𑁆𑀥𑀸 𑀅𑀣𑀸𑀯𑀭𑀸, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀦𑀸𑀦𑀸 𑀳𑁄𑀢𑀺. 𑀢𑁂𑀦𑁂𑀯𑀲𑁆𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑀤𑀺𑀲𑁄𑀧𑀺 𑀅𑀕𑁆𑀕𑀲𑀸𑀯𑀓𑁄 𑀧𑀸𑀝𑀺𑀪𑁄𑀕𑁄 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀳 ‘‘𑀤𑁆𑀯𑀺𑀦𑁆𑀦𑀁 𑀔𑁄 𑀦𑁂𑀲𑀁 𑀆𑀯𑀼𑀲𑁄 𑀥𑀫𑁆𑀫𑀸𑀦𑀁 𑀧𑀸𑀝𑀺𑀪𑁄𑀕𑁄 𑀪𑁄𑀕𑀸𑀦𑀜𑁆𑀘 𑀚𑀻𑀯𑀺𑀢𑀲𑁆𑀲 𑀘, 𑀲𑀤𑁆𑀥𑀸𑀬 𑀧𑀦 𑀢𑁆𑀯𑀁 𑀧𑀸𑀝𑀺𑀪𑁄𑀕𑁄’’𑀢𑀺.

𑀏𑀯𑀁 𑀢𑀼𑀫𑁆𑀳𑁂 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀣𑀸𑀢𑀺 𑀏𑀢𑁆𑀣 𑀧𑀼𑀜𑁆𑀜𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀧𑀼𑀜𑁆𑀜𑀢𑁄 𑀧𑀭𑀺𑀳𑀻𑀦𑀸 𑀧𑀭𑀫𑁆𑀫𑀼𑀔𑀸 𑀪𑀯𑀺𑀲𑁆𑀲𑀣. 𑀪𑀸𑀓𑀼𑀝𑀺𑀓𑀸𑀢𑀺 𑀫𑀼𑀔𑀸𑀦𑀁 𑀧𑀥𑀸𑀦𑀧𑀼𑀭𑀺𑀫𑀝𑁆𑀞𑀺𑀢𑀪𑀸𑀯𑀤𑀲𑁆𑀲𑀦𑁂𑀦 𑀪𑀸𑀓𑀼𑀝𑀺𑀓𑀭𑀡𑀁, 𑀫𑀼𑀔𑀲𑀗𑁆𑀓𑁄𑀘𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀓𑀼𑀝𑀺𑀓𑀭𑀡𑀁 𑀲𑀻𑀮𑀫𑀲𑁆𑀲𑀸𑀢𑀺 𑀪𑀸𑀓𑀼𑀝𑀺𑀓𑁄, 𑀪𑀸𑀓𑀼𑀝𑀺𑀓𑀲𑁆𑀲 𑀪𑀸𑀯𑁄 𑀪𑀸𑀓𑀼𑀝𑀺𑀬𑀁. 𑀓𑀼𑀳𑀦𑀸𑀢𑀺 𑀯𑀺𑀫𑁆𑀳𑀸𑀧𑀦𑀸. 𑀓𑀼𑀳𑀲𑁆𑀲 𑀆𑀬𑀦𑀸 𑀓𑀼𑀳𑀸𑀬𑀦𑀸. 𑀓𑀼𑀳𑀺𑀢𑀲𑁆𑀲 𑀪𑀸𑀯𑁄 𑀓𑀼𑀳𑀺𑀢𑀢𑁆𑀢𑀁.

𑀧𑀸𑀧𑀺𑀘𑁆𑀙𑁄𑀢𑀺 𑀅𑀲𑀦𑁆𑀢𑀕𑀼𑀡𑀤𑀻𑀧𑀦𑀓𑀸𑀫𑁄. 𑀇𑀘𑁆𑀙𑀸𑀧𑀓𑀢𑁄𑀢𑀺 𑀇𑀘𑁆𑀙𑀸𑀬 𑀅𑀧𑀓𑀢𑁄, 𑀉𑀧𑀤𑁆𑀤𑀼𑀢𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀩𑀳𑀼𑀫𑀸𑀦𑀚𑁆𑀛𑀸𑀲𑀬𑁄. 𑀕𑀫𑀦𑀁 𑀲𑀡𑁆𑀞𑀧𑁂𑀢𑀻𑀢𑀺 𑀅𑀪𑀺𑀓𑁆𑀓𑀫𑀸𑀤𑀺𑀕𑀫𑀦𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀧𑀸𑀲𑀸𑀤𑀺𑀓𑀪𑀸𑀯𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀡𑀺𑀥𑀸𑀬 𑀕𑀘𑁆𑀙𑀢𑀻𑀢𑀺 𑀧𑀢𑁆𑀣𑀦𑀁 𑀞𑀧𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀸𑀳𑀺𑀢𑁄 𑀯𑀺𑀬 𑀕𑀘𑁆𑀙𑀢𑀻𑀢𑀺 𑀉𑀧𑀘𑀸𑀭𑀧𑁆𑀧𑀢𑁆𑀢𑁄 𑀯𑀺𑀬 𑀕𑀘𑁆𑀙𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀧𑀸𑀣𑀓𑀚𑁆𑀛𑀸𑀬𑀻𑀯 𑀳𑁄𑀢𑀻𑀢𑀺 𑀲𑀫𑁆𑀫𑀼𑀔𑀸 𑀆𑀕𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀯𑀺𑀬 𑀲𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀭𑀺𑀬𑀸𑀧𑀣𑀲𑁆𑀲𑀸𑀢𑀺 𑀘𑀢𑀼𑀇𑀭𑀺𑀬𑀸𑀧𑀣𑀲𑁆𑀲. 𑀆𑀞𑀧𑀦𑀸𑀢𑀺 𑀆𑀤𑀺𑀝𑁆𑀞𑀧𑀦𑀸, 𑀆𑀤𑀭𑁂𑀦 𑀯𑀸 𑀞𑀧𑀦𑀸. 𑀞𑀧𑀦𑀸𑀢𑀺 𑀞𑀧𑀦𑀸𑀓𑀸𑀭𑁄. 𑀲𑀡𑁆𑀞𑀧𑀦𑀸𑀢𑀺 𑀅𑀪𑀺𑀲𑀗𑁆𑀔𑀭𑀡𑀁, 𑀧𑀸𑀲𑀸𑀤𑀺𑀓𑀪𑀸𑀯𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀭𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀧𑀝𑀺𑀩𑀤𑁆𑀥𑀁. 𑀓𑀼𑀜𑁆𑀘𑀺𑀓𑀦𑁆𑀢𑀺 𑀅𑀯𑀸𑀧𑀼𑀭𑀡𑀁. 𑀫𑀺𑀢𑁆𑀢𑀸𑀢𑀺 𑀲𑀺𑀦𑁂𑀳𑀯𑀦𑁆𑀢𑁄. 𑀲𑀦𑁆𑀤𑀺𑀝𑁆𑀞𑀸𑀢𑀺 𑀤𑀺𑀝𑁆𑀞𑀫𑀢𑁆𑀢𑀸. 𑀲𑀫𑁆𑀪𑀢𑁆𑀢𑀸𑀢𑀺 𑀤𑀴𑁆𑀳𑀫𑀺𑀢𑁆𑀢𑀸. 𑀉𑀤𑁆𑀤𑀡𑁆𑀟𑁂𑀢𑀺 𑀏𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄.

𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄𑀢𑀺 𑀲𑀗𑁆𑀓𑁄𑀘𑀲𑀗𑁆𑀓𑁄𑀘𑀓𑁄, 𑀅𑀢𑀺𑀲𑀗𑁆𑀓𑁄𑀘𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀓𑁄𑀭𑀘𑀓𑀓𑁄𑀭𑀘𑀓𑁄’’𑀢𑀺 𑀯𑀸 𑀧𑀸𑀞𑁄. 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄𑀢𑀺 𑀅𑀢𑀺𑀯𑀺𑀬 𑀫𑀼𑀔𑀲𑀗𑁆𑀓𑁄𑀘𑀦𑀲𑀻𑀮𑁄. 𑀓𑀼𑀳𑀓𑀓𑀼𑀳𑀓𑁄𑀢𑀺 𑀅𑀢𑀺𑀯𑀺𑀬 𑀯𑀺𑀫𑁆𑀳𑀸𑀧𑀓𑁄. 𑀮𑀧𑀓𑀮𑀧𑀓𑁄𑀢𑀺 𑀅𑀢𑀺𑀯𑀺𑀬 𑀲𑀮𑁆𑀮𑀸𑀧𑀓𑁄. 𑀫𑀼𑀔𑀲𑀫𑁆𑀪𑀸𑀯𑀺𑀓𑁄𑀢𑀺 𑀅𑀢𑁆𑀢𑀦𑁄 𑀫𑀼𑀔𑀯𑀲𑁂𑀦 𑀅𑀜𑁆𑀜𑁂𑀳𑀺 𑀲𑀳 𑀲𑀫𑁆𑀪𑀸𑀯𑀺𑀓𑁄, 𑀅𑀧𑁆𑀧𑀺𑀢𑀘𑀺𑀢𑁆𑀢𑁄𑀢𑀺 𑀏𑀓𑁂. 𑀲𑀦𑁆𑀢𑀸𑀦𑀦𑁆𑀢𑀺 𑀓𑀺𑀮𑁂𑀲𑀲𑀦𑁆𑀢𑀢𑀸𑀬 𑀲𑀦𑁆𑀢𑀸𑀦𑀁. 𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸𑀦𑀁. 𑀕𑀫𑁆𑀪𑀻𑀭𑀦𑁆𑀢𑀺 𑀦𑀺𑀦𑁆𑀦𑀧𑀢𑀺𑀝𑁆𑀞𑀸𑀦𑀁. 𑀕𑀽𑀴𑁆𑀳𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀤𑀼𑀓𑁆𑀔𑀁. 𑀦𑀺𑀧𑀼𑀡𑀦𑁆𑀢𑀺 𑀲𑀼𑀔𑀼𑀫𑀁. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀧𑀤𑀢𑁆𑀣𑁂𑀦 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸𑀥𑀺𑀧𑁆𑀧𑀸𑀬𑀁. 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀥𑀫𑁆𑀫𑀤𑀻𑀧𑀓𑀁. 𑀲𑀼𑀜𑁆𑀜𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀝𑀺𑀲𑀜𑁆𑀜𑀼𑀢𑁆𑀢𑀁. 𑀅𑀣 𑀯𑀸 𑀮𑁄𑀓𑀼𑀢𑁆𑀢𑀭𑀲𑀼𑀜𑁆𑀜𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀪𑀽𑀢𑀦𑀺𑀩𑁆𑀩𑀸𑀦𑀧𑀝𑀺𑀲𑀜𑁆𑀜𑀼𑀢𑁆𑀢𑀁.

𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀦𑁆𑀢𑀺 𑀓𑀸𑀬𑁂 𑀪𑀯𑀁 𑀓𑀸𑀬𑀺𑀓𑀁. 𑀯𑀸𑀘𑀲𑀺𑀓𑀘𑁂𑀢𑀲𑀺𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄𑀢𑀺 𑀩𑀳𑀼𑀫𑀸𑀦𑀓𑀺𑀭𑀺𑀬𑀭𑀳𑀺𑀢𑁄. 𑀅𑀦𑀼𑀧𑀸𑀳𑀦𑀸𑀦𑀁 𑀘𑀗𑁆𑀓𑀫𑀦𑁆𑀢𑀸𑀦𑀦𑁆𑀢𑀺 𑀉𑀧𑀸𑀳𑀦𑀯𑀺𑀭𑀳𑀺𑀢𑀸𑀦𑀁 𑀘𑀗𑁆𑀓𑀫𑀦𑁆𑀢𑀸𑀦𑀁 𑀲𑀫𑀻𑀧𑁂, 𑀅𑀦𑀸𑀤𑀭𑁂 𑀯𑀸 𑀲𑀸𑀫𑀺𑀯𑀘𑀦𑀁. 𑀲𑀉𑀧𑀸𑀳𑀦𑁄𑀢𑀺 𑀉𑀧𑀸𑀳𑀦𑀸𑀭𑀽𑀴𑁆𑀳𑁄 𑀳𑀼𑀢𑁆𑀯𑀸 𑀘𑀗𑁆𑀓𑀫𑀢𑀺. 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑀸𑀦𑀦𑁆𑀢𑀺 𑀅𑀓𑀢𑀧𑀭𑀺𑀘𑁆𑀙𑁂𑀤𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑀦𑁆𑀢𑁂 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀸𑀮𑀼𑀓𑀁 𑀆𑀓𑀺𑀭𑀺𑀢𑁆𑀯𑀸 𑀆𑀮𑀫𑁆𑀩𑀦𑀁 𑀬𑁄𑀚𑁂𑀢𑁆𑀯𑀸 𑀓𑀢𑀘𑀗𑁆𑀓𑀫𑁂 𑀦𑀻𑀘𑁂𑀧𑀺 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂. 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀻𑀢𑀺 𑀇𑀝𑁆𑀞𑀓𑀘𑀬𑀦𑀲𑀫𑁆𑀧𑀦𑁆𑀦𑁂 𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺. 𑀲𑀘𑁂 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀬𑀼𑀢𑁆𑀢𑁄, 𑀧𑀩𑁆𑀩𑀢𑀦𑁆𑀢𑀭𑀯𑀦𑀦𑁆𑀢𑀭𑀪𑀽𑀫𑀦𑁆𑀢𑀭𑀲𑁆𑀲 𑀯𑀸 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀢𑀸𑀤𑀺𑀲𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀧𑀺 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀝𑁆𑀝𑀢𑀺. 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀻𑀢𑀺 𑀅𑀢𑀺𑀲𑀫𑀻𑀧𑁂 𑀢𑀺𑀝𑁆𑀞𑀢𑀺. 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀻𑀢𑀺 𑀧𑀼𑀭𑀢𑁆𑀣𑀺𑀫𑀢𑁄𑀧𑀺 𑀢𑀺𑀝𑁆𑀞𑀢𑀺. 𑀞𑀺𑀢𑀓𑁄𑀧𑀺 𑀪𑀡𑀢𑀻𑀢𑀺 𑀔𑀸𑀡𑀼𑀓𑁄 𑀯𑀺𑀬 𑀅𑀦𑁄𑀦𑀫𑀺𑀢𑁆𑀯𑀸 𑀪𑀡𑀢𑀺. 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀢𑀺 𑀩𑀸𑀳𑀼𑀁 𑀔𑀺𑀧𑀺𑀢𑁆𑀯𑀸 𑀔𑀺𑀧𑀺𑀢𑁆𑀯𑀸 𑀪𑀡𑀢𑀺.

𑀅𑀦𑀼𑀧𑀔𑀚𑁆𑀚𑀸𑀢𑀺 𑀲𑀩𑁆𑀩𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸. 𑀦𑀯𑁂𑀧𑀺 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀻𑀢𑀺 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀅𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀧𑀯𑀺𑀲𑀦𑁆𑀢𑁄 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺 𑀦𑀸𑀫.

𑀅𑀦𑀸𑀧𑀼𑀘𑁆𑀙𑀫𑁆𑀧𑀺 𑀓𑀝𑁆𑀞𑀁 𑀧𑀓𑁆𑀔𑀺𑀧𑀢𑀻𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀅𑀕𑁆𑀕𑀺𑀫𑁆𑀳𑀺 𑀤𑀸𑀭𑀼𑀁 𑀔𑀺𑀧𑀢𑀺. 𑀤𑁆𑀯𑀸𑀭𑀁 𑀧𑀺𑀤𑀳𑀢𑀻𑀢𑀺 𑀚𑀦𑁆𑀢𑀸𑀖𑀭𑁂 𑀧𑀺𑀤𑀳𑀢𑀺.

𑀑𑀢𑀭𑀢𑀻𑀢𑀺 𑀉𑀤𑀓𑀢𑀺𑀢𑁆𑀣𑀁 𑀧𑀯𑀺𑀲𑀢𑀺. 𑀦𑁆𑀳𑀸𑀬𑀢𑀻𑀢𑀺 𑀲𑀭𑀻𑀭𑀁 𑀲𑀺𑀦𑁂𑀳𑁂𑀢𑀺. 𑀉𑀢𑁆𑀢𑀭𑀢𑀻𑀢𑀺 𑀉𑀤𑀓𑀢𑀺𑀢𑁆𑀣𑀢𑁄 𑀢𑀻𑀭𑀁 𑀉𑀕𑁆𑀕𑀘𑁆𑀙𑀢𑀺.

𑀯𑁄𑀓𑁆𑀓𑀫𑁆𑀫𑀸𑀧𑀻𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺. 𑀑𑀯𑀭𑀓𑀸𑀦𑀻𑀢𑀺 𑀕𑀩𑁆𑀪𑁂 𑀧𑀢𑀺𑀝𑁆𑀞𑀺𑀢𑀲𑀬𑀦𑀖𑀭𑀸𑀦𑀺.

𑀕𑀽𑀴𑁆𑀳𑀸𑀦𑀻𑀢𑀺 𑀧𑀝𑀺𑀘𑁆𑀙𑀦𑁆𑀦𑀸𑀦𑀺. 𑀧𑀝𑀺𑀘𑁆𑀙𑀦𑁆𑀦𑀸𑀦𑀻𑀢𑀺 𑀅𑀜𑁆𑀜𑁂𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑀸𑀦𑀺.

𑀅𑀦𑀚𑁆𑀛𑀺𑀝𑁆𑀞𑁄 𑀯𑀸𑀢𑀺 𑀣𑁂𑀭𑁂𑀳𑀺 ‘‘𑀥𑀫𑁆𑀫𑀁 𑀪𑀡𑀸𑀳𑀻’’𑀢𑀺 𑀅𑀦𑀸𑀡𑀢𑁆𑀢𑁄 𑀅𑀦𑀸𑀬𑀸𑀘𑀺𑀢𑁄 𑀘.

𑀧𑀸𑀧𑀥𑀫𑁆𑀫𑁄𑀢𑀺 𑀮𑀸𑀫𑀓𑀥𑀫𑁆𑀫𑁄. 𑀅𑀲𑀼𑀘𑀺𑀲𑀗𑁆𑀓𑀲𑀭𑀲𑀫𑀸𑀘𑀸𑀭𑁄𑀢𑀺 𑀅𑀜𑁆𑀜𑁂𑀳𑀺 ‘‘𑀅𑀬𑀁 𑀤𑀼𑀲𑁆𑀲𑀻𑀮𑁄’’𑀢𑀺 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑁄 𑀆𑀘𑀸𑀭𑁄 𑀲𑀁𑀬𑁄𑀕𑁄 𑀏𑀢𑀲𑁆𑀲𑀸𑀢𑀺 𑀅𑀲𑀼𑀘𑀺𑀲𑀗𑁆𑀓𑀲𑀭𑀲𑀫𑀸𑀘𑀸𑀭𑁄. 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄𑀢𑀺 𑀲𑀓𑀸𑀭𑀁 𑀲𑀁𑀬𑁄𑀕𑀁 𑀓𑀢𑁆𑀯𑀸𑀧𑀺 𑀧𑀞𑀦𑁆𑀢𑀺. 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑀓𑀸𑀬𑀯𑀘𑀻𑀓𑀫𑁆𑀫𑀦𑁆𑀢𑁄. 𑀅𑀲𑁆𑀲𑀫𑀡𑁄𑀢𑀺 𑀦 𑀲𑀫𑀡𑁄. 𑀲𑀫𑀡𑀧𑀝𑀺𑀜𑁆𑀜𑁄𑀢𑀺 ‘‘𑀅𑀳𑀁 𑀲𑀫𑀡𑁄’’𑀢𑀺 𑀧𑀝𑀺𑀚𑀸𑀦𑀦𑁆𑀢𑁄. 𑀅𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀲𑁂𑀝𑁆𑀞𑀘𑀭𑀺𑀬𑀸 𑀯𑀺𑀭𑀳𑀺𑀢𑁄. 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄𑀢𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑁄. 𑀅𑀦𑁆𑀢𑁄𑀧𑀽𑀢𑀻𑀢𑀺 𑀅𑀩𑁆𑀪𑀦𑁆𑀢𑀭𑁂 𑀓𑀼𑀲𑀮𑀥𑀫𑁆𑀫𑀯𑀺𑀭𑀳𑀺𑀢𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑀫𑀸𑀧𑀦𑁆𑀦𑁄. 𑀅𑀯𑀲𑁆𑀲𑀼𑀢𑁄𑀢𑀺 𑀭𑀸𑀕𑁂𑀦 𑀢𑀺𑀦𑁆𑀢𑁄. 𑀓𑀲𑀫𑁆𑀩𑀼𑀚𑀸𑀢𑁄𑀢𑀺 𑀲𑀗𑁆𑀓𑀸𑀭𑀲𑀪𑀸𑀯𑁄. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀲𑀓𑁆𑀓𑀘𑁆𑀘𑀓𑀸𑀭𑀻 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑁄. 𑀏𑀯𑀁 𑀢𑀸𑀯 𑀆𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀕𑁄𑀘𑀭𑁄 𑀧𑀦 𑀢𑀺𑀯𑀺𑀥𑁄 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄 𑀆𑀭𑀓𑁆𑀔𑀕𑁄𑀘𑀭𑁄 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄𑀢𑀺. 𑀢𑀢𑁆𑀣 𑀓𑀢𑀫𑁄 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄? 𑀤𑀲𑀓𑀣𑀸𑀯𑀢𑁆𑀣𑀼𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀬𑀁 𑀦𑀺𑀲𑁆𑀲𑀸𑀬 𑀅𑀲𑁆𑀲𑀼𑀢𑀁 𑀲𑀼𑀡𑀸𑀢𑀺, 𑀲𑀼𑀢𑀁 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀓𑀗𑁆𑀔𑀁 𑀯𑀺𑀢𑀭𑀢𑀺, 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺; 𑀬𑀲𑁆𑀲 𑀯𑀸 𑀧𑀦 𑀅𑀦𑀼𑀲𑀺𑀓𑁆𑀔𑀫𑀸𑀦𑁄 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀲𑀻𑀮𑁂𑀦, 𑀲𑀼𑀢𑁂𑀦, 𑀘𑀸𑀕𑁂𑀦, 𑀧𑀜𑁆𑀜𑀸𑀬 𑀯𑀟𑁆𑀠𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄.

𑀓𑀢𑀫𑁄 𑀆𑀭𑀓𑁆𑀔𑀕𑁄𑀘𑀭𑁄? 𑀇𑀥 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀬𑀼𑀕𑀫𑀢𑁆𑀢𑀤𑀲𑁆𑀲𑀸𑀯𑀻 𑀲𑀼𑀲𑀁𑀯𑀼𑀢𑁄 𑀕𑀘𑁆𑀙𑀢𑀺, 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀲𑁆𑀲𑀁, 𑀦 𑀭𑀣𑀁, 𑀦 𑀧𑀢𑁆𑀢𑀺𑀁, 𑀦 𑀇𑀢𑁆𑀣𑀺𑀁, 𑀦 𑀧𑀼𑀭𑀺𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀦𑁆𑀢𑁄, 𑀦 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀦 𑀤𑀺𑀲𑀸𑀯𑀺𑀤𑀺𑀲𑀁 𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀭𑀓𑁆𑀔𑀕𑁄𑀘𑀭𑁄.

𑀓𑀢𑀫𑁄 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀢𑁆𑀣 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄? 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 (𑀲𑀁. 𑀦𑀺. 𑁫.𑁩𑁭𑁨), 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄𑀢𑀺. 𑀇𑀢𑀺 𑀇𑀫𑀺𑀦𑀸 𑀘 𑀆𑀘𑀸𑀭𑁂𑀦 𑀇𑀫𑀺𑀦𑀸 𑀘 𑀕𑁄𑀘𑀭𑁂𑀦 𑀉𑀧𑁂𑀢𑁄…𑀧𑁂… 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺.

𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀅𑀡𑀼𑀧𑁆𑀧𑀫𑀸𑀡𑁂𑀲𑀼 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀲𑁂𑀔𑀺𑀬𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀦𑀲𑀻𑀮𑁄. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀬𑀁𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀲𑀫𑁆𑀫𑀸 𑀆𑀤𑀸𑀬 𑀲𑀺𑀓𑁆𑀔𑀢𑀺. 𑀏𑀢𑁆𑀣 𑀘 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 𑀏𑀢𑁆𑀢𑀸𑀯𑀢𑀸 𑀘 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀤𑀲𑁆𑀲𑀺𑀢𑀁. ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺 𑀧𑀦 𑀲𑀩𑁆𑀩𑀁 𑀬𑀣𑀸𑀧𑀝𑀺𑀧𑀦𑁆𑀦𑀲𑁆𑀲 𑀢𑀁 𑀲𑀻𑀮𑀁 𑀲𑀫𑁆𑀧𑀚𑁆𑀚𑀢𑀺, 𑀢𑀁 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁮. 𑀲𑀸𑀢𑀺𑀬𑁂𑀲𑀼 𑀅𑀦𑀲𑁆𑀲𑀸𑀯𑀻𑀢𑀺 𑀲𑀸𑀢𑀯𑀢𑁆𑀣𑀽𑀲𑀼 𑀓𑀸𑀫𑀕𑀼𑀡𑁂𑀲𑀼 𑀢𑀡𑁆𑀳𑀸𑀲𑀦𑁆𑀣𑀯𑀯𑀺𑀭𑀳𑀺𑀢𑁄. 𑀲𑀡𑁆𑀳𑁄𑀢𑀺 𑀲𑀡𑁆𑀳𑁂𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀝𑀺𑀪𑀸𑀦𑀯𑀸𑀢𑀺 𑀧𑀭𑀺𑀬𑀢𑁆𑀢𑀺𑀧𑀭𑀺𑀧𑀼𑀘𑁆𑀙𑀸𑀥𑀺𑀕𑀫𑀧𑀝𑀺𑀪𑀸𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀦 𑀲𑀤𑁆𑀥𑁄𑀢𑀺 𑀲𑀸𑀫𑀁 𑀅𑀥𑀺𑀕𑀢𑀥𑀫𑁆𑀫𑀁 𑀦 𑀓𑀲𑁆𑀲𑀘𑀺 𑀲𑀤𑁆𑀤𑀳𑀢𑀺. 𑀦 𑀯𑀺𑀭𑀚𑁆𑀚𑀢𑀻𑀢𑀺 𑀔𑀬𑀸 𑀭𑀸𑀕𑀲𑁆𑀲 𑀯𑀺𑀭𑀢𑁆𑀢𑀢𑁆𑀢𑀸 𑀇𑀤𑀸𑀦𑀺 𑀦 𑀯𑀺𑀭𑀚𑁆𑀚𑀢𑀺.

𑀬𑁂𑀲𑀁 𑀏𑀲𑀸𑀢𑀺 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀲𑀸𑀢𑀯𑀢𑁆𑀣𑀽𑀲𑀼 𑀓𑀸𑀫𑀕𑀼𑀡𑁂𑀲𑀼 𑀇𑀘𑁆𑀙𑀸 𑀢𑀡𑁆𑀳𑀸. 𑀅𑀧𑁆𑀧𑀳𑀻𑀦𑀸𑀢𑀺 𑀲𑀦𑁆𑀣𑀯𑀲𑀫𑁆𑀧𑀬𑀼𑀢𑁆𑀢𑀸 𑀢𑀡𑁆𑀳𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀸. 𑀢𑁂𑀲𑀁 𑀘𑀓𑁆𑀔𑀼𑀢𑁄 𑀭𑀽𑀧𑀢𑀡𑁆𑀳𑀸 𑀲𑀯𑀢𑀻𑀢𑀺 𑀏𑀢𑁂𑀲𑀁 𑀘𑀓𑁆𑀔𑀼𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀚𑀯𑀦𑀯𑀻𑀣𑀺𑀲𑀫𑁆𑀧𑀬𑀼𑀢𑁆𑀢𑀸 𑀭𑀽𑀧𑀸𑀭𑀫𑁆𑀫𑀡𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀺. 𑀆𑀲𑀯𑀢𑀻𑀢𑀺 𑀑𑀓𑀸𑀲𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀥𑀫𑁆𑀫𑀢𑁄 𑀬𑀸𑀯 𑀕𑁄𑀢𑁆𑀭𑀪𑀽 𑀲𑀯𑀢𑀺. 𑀲𑀦𑁆𑀤𑀢𑀻𑀢𑀺 𑀦𑀤𑀻𑀲𑁄𑀢𑀁 𑀯𑀺𑀬 𑀅𑀥𑁄𑀫𑀼𑀔𑀁 𑀲𑀦𑁆𑀤𑀢𑀺. 𑀧𑀯𑀢𑁆𑀢𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀓𑁆𑀓𑀧𑀓𑁆𑀔𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀢𑀡𑁆𑀳𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀼𑀧𑁆𑀧𑀳𑀻𑀦𑀸. 𑀢𑁂𑀲𑀁 𑀘𑀓𑁆𑀔𑀼𑀢𑁄 𑀭𑀽𑀧𑀢𑀡𑁆𑀳𑀸 𑀦 𑀲𑀯𑀢𑀺.

𑀲𑀡𑁆𑀳𑁂𑀦 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀨𑀭𑀼𑀲𑁂𑀦 𑀫𑀼𑀤𑀼𑀦𑀸 𑀓𑀸𑀬𑀓𑀫𑁆𑀫𑁂𑀦 𑀲𑀫𑀗𑁆𑀕𑀻𑀪𑀽𑀢𑁄 𑀏𑀓𑀻𑀪𑀽𑀢𑁄. 𑀯𑀘𑀻𑀓𑀫𑁆𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀡𑁆𑀳𑁂𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀻𑀢𑀺𑀆𑀤𑀻𑀲𑀼 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸. 𑀧𑀭𑀺𑀬𑀸𑀧𑀼𑀡𑀦𑀅𑀢𑁆𑀣𑀸𑀤𑀺𑀧𑀭𑀺𑀧𑀼𑀘𑁆𑀙𑀸𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀥𑀺𑀕𑀫𑀯𑀲𑁂𑀦 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀸 𑀢𑀺𑀲𑁆𑀲𑁄 𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀲𑀗𑁆𑀔𑀸𑀢𑀸 𑀧𑀜𑁆𑀜𑀸 𑀬𑀲𑁆𑀲 𑀅𑀢𑁆𑀣𑀺, 𑀲𑁄 𑀧𑀝𑀺𑀪𑀸𑀦𑀯𑀸. 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀪𑀸𑀬𑀢𑀻𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀁 𑀅𑀮𑁆𑀮𑀻𑀬𑀺𑀢𑁆𑀯𑀸 𑀜𑀸𑀡𑀁 𑀚𑀸𑀬𑀢𑀺 𑀜𑀸𑀡𑀁 𑀅𑀪𑀺𑀫𑀼𑀔𑀁 𑀳𑁄𑀢𑀺. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀯𑀲𑁂𑀦 𑀯𑀼𑀢𑁆𑀢𑀸. 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀯𑀲𑁂𑀦. 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀙 𑀘 𑀅𑀪𑀺𑀜𑁆𑀜𑀸𑀬𑁄 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀜𑀸𑀢𑀩𑁆𑀩𑀸.

𑀢𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄𑀢𑀺 𑀘𑀢𑁆𑀢𑀸𑀭𑁄 𑀜𑀸𑀡𑀧𑁆𑀧𑀪𑁂𑀤𑀸𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀯𑀺𑀥𑀸𑀤𑀺𑀆𑀲𑀯𑀓𑁆𑀔𑀬𑀧𑀭𑀺𑀬𑁄𑀲𑀸𑀦𑀸𑀦𑀺 𑀅𑀥𑀺𑀓𑀸𑀦𑀺 𑀙 𑀜𑀸𑀡𑀸𑀦𑀺. 𑀢𑀲𑁆𑀲𑀸𑀢𑀺 𑀧𑀭𑀲𑁆𑀲, 𑀅𑀢𑁆𑀣𑁄 𑀧𑀝𑀺𑀪𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀣𑁄𑀢𑀺 𑀲𑀗𑁆𑀔𑁂𑀧𑀢𑁄 𑀳𑁂𑀢𑀼𑀨𑀮𑀁. 𑀢𑀜𑁆𑀳𑀺 𑀬𑀲𑁆𑀫𑀸 𑀳𑁂𑀢𑀼𑀅𑀦𑀼𑀲𑀸𑀭𑁂𑀦 𑀅𑀭𑀻𑀬𑀢𑀺 𑀅𑀥𑀺𑀕𑀫𑀻𑀬𑀢𑀺 𑀧𑀸𑀧𑀼𑀡𑀻𑀬𑀢𑀺, 𑀢𑀲𑁆𑀫𑀸 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑀁𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦𑀺𑀩𑁆𑀩𑀸𑀦𑀁 𑀪𑀸𑀲𑀺𑀢𑀢𑁆𑀣𑁄 𑀯𑀺𑀧𑀸𑀓𑁄 𑀓𑀺𑀭𑀺𑀬𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀅𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀁 𑀅𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑁄 𑀅𑀢𑁆𑀣𑁄 𑀧𑀪𑁂𑀤𑀢𑁄 𑀜𑀸𑀢𑁄 𑀧𑀸𑀓𑀝𑁄 𑀳𑁄𑀢𑀺. 𑀥𑀫𑁆𑀫𑁄𑀢𑀺 𑀲𑀗𑁆𑀔𑁂𑀧𑀢𑁄 𑀧𑀘𑁆𑀘𑀬𑁄. 𑀲𑁄 𑀳𑀺 𑀬𑀲𑁆𑀫𑀸 𑀢𑀁 𑀢𑀁 𑀯𑀺𑀤𑀳𑀢𑀺 𑀧𑀯𑀢𑁆𑀢𑁂𑀢𑀺 𑀘𑁂𑀯 𑀧𑀸𑀧𑁂𑀢𑀺 𑀘, 𑀢𑀲𑁆𑀫𑀸 𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑁄 𑀓𑁄𑀘𑀺 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼 𑀅𑀭𑀺𑀬𑀫𑀕𑁆𑀕𑁄 𑀪𑀸𑀲𑀺𑀢𑀁 𑀓𑀼𑀲𑀮𑀁 𑀅𑀓𑀼𑀲𑀮𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀥𑀫𑁆𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑁄 𑀥𑀫𑁆𑀫𑁄 𑀧𑀪𑁂𑀤𑀢𑁄 𑀜𑀸𑀢𑁄 𑀧𑀸𑀓𑀝𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀬𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀅𑀩𑁆𑀬𑀪𑀺𑀘𑀸𑀭𑀻 𑀯𑁄𑀳𑀸𑀭𑁄, 𑀢𑀲𑁆𑀲 𑀅𑀪𑀺𑀮𑀸𑀧𑁂 𑀪𑀸𑀲𑀦𑁂 𑀉𑀤𑀻𑀭𑀡𑁂 𑀢𑀁 𑀮𑀧𑀺𑀢𑀁 𑀪𑀸𑀲𑀺𑀢𑀁 𑀉𑀤𑀻𑀭𑀺𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀸 𑀦𑀺𑀭𑀼𑀢𑁆𑀢𑀺 𑀜𑀸𑀢𑀸 𑀧𑀸𑀓𑀝𑀸 𑀳𑁄𑀢𑀺.

𑀏𑀢𑁆𑀣 𑀅𑀢𑁆𑀣𑁂 𑀜𑀸𑀢𑁂 𑀅𑀢𑁆𑀣𑁄 𑀧𑀝𑀺𑀪𑀸𑀬𑀢𑀻𑀢𑀺 𑀇𑀤𑀸𑀦𑀺 𑀢𑀲𑁆𑀲 𑀲𑀤𑁆𑀤𑀁 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀪𑁂𑀤𑁂 𑀅𑀢𑁆𑀣𑁂 𑀧𑀸𑀓𑀝𑀻𑀪𑀽𑀢𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑁄 𑀅𑀢𑁆𑀣𑁄 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀪𑀸𑀬𑀢𑀺 𑀜𑀸𑀡𑀸𑀪𑀺𑀫𑀼𑀔𑁄 𑀳𑁄𑀢𑀺. 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁄 𑀧𑀝𑀺𑀪𑀸𑀬𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑁂 𑀥𑀫𑁆𑀫𑁂 𑀧𑀸𑀓𑀝𑀻𑀪𑀽𑀢𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑁄 𑀥𑀫𑁆𑀫𑁄 𑀧𑀝𑀺𑀪𑀸𑀬𑀢𑀺. 𑀦𑀺𑀭𑀼𑀢𑁆𑀢𑀺𑀬𑀸 𑀜𑀸𑀢𑀸𑀬 𑀦𑀺𑀭𑀼𑀢𑁆𑀢𑀺 𑀧𑀝𑀺𑀪𑀸𑀬𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀬 𑀦𑀺𑀭𑀼𑀢𑁆𑀢𑀺𑀬𑀸 𑀧𑀸𑀓𑀝𑀸𑀬 𑀯𑀼𑀢𑁆𑀢𑀧𑁆𑀧𑀪𑁂𑀤𑀸 𑀦𑀺𑀭𑀼𑀢𑁆𑀢𑀺 𑀧𑀝𑀺𑀪𑀸𑀬𑀢𑀺. 𑀇𑀫𑁂𑀲𑀼 𑀢𑀻𑀲𑀼 𑀜𑀸𑀡𑁂𑀲𑀼 𑀜𑀸𑀡𑀦𑁆𑀢𑀺 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼 𑀇𑀫𑁂𑀲𑀼 𑀢𑀻𑀲𑀼 𑀲𑀩𑁆𑀩𑀢𑁆𑀣𑀓𑀜𑀸𑀡𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑁂𑀲𑀼 𑀢𑀻𑀲𑀼 𑀜𑀸𑀡𑁂𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁, 𑀬𑀣𑀸𑀯𑀼𑀢𑁆𑀢𑁂𑀲𑀼 𑀯𑀸 𑀢𑁂𑀲𑀼 𑀢𑀻𑀲𑀼 𑀜𑀸𑀡𑁂𑀲𑀼 𑀕𑁄𑀘𑀭𑀓𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀇𑀫𑀸𑀬 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬𑀸𑀢𑀺 𑀇𑀫𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀬𑀣𑀸𑀯𑀼𑀢𑁆𑀢𑀯𑀺𑀢𑁆𑀣𑀸𑀭𑀧𑀜𑁆𑀜𑀸𑀬 𑀉𑀧𑁂𑀢𑁄 𑀳𑁄𑀢𑀺. 𑀲𑁄 𑀯𑀼𑀘𑁆𑀘𑀢𑀺 𑀧𑀝𑀺𑀪𑀸𑀦𑀯𑀸𑀢𑀺 𑀦𑀺𑀕𑀫𑁂𑀦𑁆𑀢𑁄 𑀆𑀳. 𑀬𑀲𑁆𑀲 𑀧𑀭𑀺𑀬𑀢𑁆𑀢𑀺 𑀦𑀢𑁆𑀣𑀻𑀢𑀺 𑀧𑀭𑀺𑀬𑀢𑁆𑀢𑀺 𑀦𑀸𑀫 𑀩𑀼𑀤𑁆𑀥𑀯𑀘𑀦𑀁. 𑀢𑀜𑁆𑀳𑀺 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀭𑀽𑀧𑀸 𑀧𑀭𑀺𑀬𑀢𑁆𑀢𑀺 𑀦𑀢𑁆𑀣𑀺. 𑀧𑀭𑀺𑀧𑀼𑀘𑁆𑀙𑀸 𑀦𑀢𑁆𑀣𑀻𑀢𑀺 𑀧𑀭𑀺𑀧𑀼𑀘𑁆𑀙𑀸 𑀦𑀸𑀫 𑀧𑀸𑀴𑀺𑀅𑀝𑁆𑀞𑀓𑀣𑀸𑀤𑀻𑀲𑀼 𑀕𑀡𑁆𑀞𑀺𑀧𑀤𑀅𑀢𑁆𑀣𑀧𑀤𑀯𑀺𑀦𑀺𑀘𑁆𑀙𑀬𑀓𑀣𑀸. 𑀉𑀕𑁆𑀕𑀳𑀺𑀢𑀧𑀸𑀴𑀺𑀆𑀤𑀻𑀲𑀼 𑀳𑀺 𑀅𑀢𑁆𑀣𑀁 𑀓𑀣𑁂𑀦𑁆𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀅𑀥𑀺𑀕𑀫𑁄 𑀦𑀢𑁆𑀣𑀻𑀢𑀺 𑀅𑀥𑀺𑀕𑀫𑁄 𑀦𑀸𑀫 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺. 𑀅𑀭𑀳𑀢𑁆𑀢𑀜𑁆𑀳𑀺 𑀧𑀢𑁆𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀬𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀢𑀺𑀯𑀺𑀥𑀸 𑀲𑀫𑁆𑀧𑀢𑁆𑀢𑀺 𑀦𑀢𑁆𑀣𑀺. 𑀓𑀺𑀁 𑀢𑀲𑁆𑀲 𑀧𑀝𑀺𑀪𑀸𑀬𑀺𑀲𑁆𑀲𑀢𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀺.

𑀲𑀸𑀫𑀦𑁆𑀢𑀺 𑀲𑀬𑀫𑁂𑀯. 𑀲𑀬𑀁 𑀅𑀪𑀺𑀜𑁆𑀜𑀸𑀢𑀦𑁆𑀢𑀺 𑀲𑀬𑀫𑁂𑀯 𑀢𑁂𑀦 𑀜𑀸𑀡𑁂𑀦 𑀅𑀯𑀕𑀫𑀺𑀢𑀁. 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀥𑀫𑁆𑀫𑀦𑁆𑀢𑀺 𑀅𑀢𑁆𑀢𑀦𑀸 𑀧𑀝𑀺𑀯𑀺𑀚𑁆𑀛𑀺𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀁 𑀥𑀫𑁆𑀫𑀁. 𑀦 𑀓𑀲𑁆𑀲𑀘𑀺 𑀲𑀤𑁆𑀤𑀳𑀢𑀻𑀢𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬 𑀧𑀭𑁂𑀲𑀁 𑀦 𑀲𑀤𑁆𑀤𑀳𑀢𑀺, 𑀲𑀤𑁆𑀥𑀸𑀬 𑀦 𑀕𑀘𑁆𑀙𑀢𑀺. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀺𑀓𑀁 𑀤𑁆𑀯𑀸𑀤𑀲𑀧𑀤𑀺𑀓𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸𑀢𑀺𑀆𑀤𑀬𑁄 𑀲𑀁𑀲𑀸𑀭𑀦𑀺𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀆𑀤𑀺 𑀲𑀘𑁆𑀘𑀤𑀲𑁆𑀲𑀦𑀯𑀲𑁂𑀦. 𑀇𑀫𑁂 𑀆𑀲𑀯𑀸𑀢𑀺𑀆𑀤𑀬𑁄 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀓𑀺𑀮𑁂𑀲𑀯𑀲𑁂𑀦 𑀧𑀘𑁆𑀘𑀬𑀤𑀲𑁆𑀲𑀦𑀯𑀲𑁂𑀦. 𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸𑀢𑀺𑀆𑀤𑀬𑁄 𑀅𑀪𑀺𑀜𑁆𑀜𑁂𑀬𑁆𑀬𑀧𑀭𑀺𑀜𑁆𑀜𑁂𑀬𑁆𑀬𑀧𑀳𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀲𑀘𑁆𑀙𑀺𑀓𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀤𑀲𑁆𑀲𑀦𑀯𑀲𑁂𑀦. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺𑀆𑀤𑀬𑁄 𑀨𑀲𑁆𑀲𑀸𑀬𑀢𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀉𑀧𑀤𑁆𑀤𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀤𑀲𑁆𑀲𑀦𑀯𑀲𑁂𑀦. 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑁂𑀦 𑀉𑀤𑀬𑀜𑁆𑀘 𑀯𑀬𑀜𑁆𑀘, 𑀢𑁂𑀲𑀼 𑀙𑀦𑁆𑀤𑀭𑀸𑀕𑀯𑀲𑁂𑀦 𑀅𑀲𑁆𑀲𑀸𑀤𑀜𑁆𑀘, 𑀢𑁂𑀲𑀁 𑀯𑀺𑀧𑀭𑀺𑀡𑀸𑀫𑀁 𑀆𑀤𑀻𑀦𑀯𑀜𑁆𑀘, 𑀦𑀺𑀲𑁆𑀲𑀭𑀡𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀜𑁆𑀘. 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀯𑀺𑀚𑁆𑀚𑀸𑀤𑀺𑀲𑀫𑀼𑀤𑀬𑀜𑁆𑀘, 𑀅𑀯𑀺𑀚𑁆𑀚𑀸𑀤𑀺𑀦𑀺𑀭𑁄𑀥𑁂 𑀅𑀢𑁆𑀣𑀗𑁆𑀕𑀫𑀜𑁆𑀘 𑀏𑀯𑀫𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀸. 𑀏𑀢𑁂 𑀥𑀫𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀅𑀫𑀢𑁄𑀕𑀥𑀦𑁆𑀢𑀺 𑀦𑀢𑁆𑀣𑀺 𑀏𑀢𑀲𑁆𑀲 𑀫𑀭𑀡𑀲𑀗𑁆𑀔𑀸𑀢𑀁 𑀫𑀢𑀦𑁆𑀢𑀺 𑀅𑀫𑀢𑀁. 𑀓𑀺𑀮𑁂𑀲𑀯𑀺𑀲𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀕𑀤𑀦𑁆𑀢𑀺𑀧𑀺 𑀅𑀫𑀢𑀁. 𑀢𑀲𑁆𑀫𑀺𑀁 𑀦𑀺𑀦𑁆𑀦𑀢𑀸𑀬 𑀅𑀫𑀢𑁄𑀕𑀥𑀁. 𑀅𑀫𑀢𑀧𑀭𑀸𑀬𑀦𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀫𑀢𑀁 𑀧𑀭𑀁 𑀅𑀬𑀦𑀁 𑀕𑀢𑀺 𑀧𑀢𑀺𑀝𑁆𑀞𑀸 𑀅𑀲𑁆𑀲𑀸𑀢𑀺 𑀅𑀫𑀢𑀧𑀭𑀸𑀬𑀦𑀁. 𑀅𑀫𑀢𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀢𑀁 𑀅𑀫𑀢𑀁 𑀲𑀁𑀲𑀸𑀭𑀲𑁆𑀲 𑀦𑀺𑀝𑁆𑀞𑀸𑀪𑀽𑀢𑀢𑁆𑀢𑀸 𑀧𑀭𑀺𑀬𑁄𑀲𑀸𑀦𑀫𑀲𑁆𑀲𑀸𑀢𑀺 𑀅𑀫𑀢𑀧𑀭𑀺𑀬𑁄𑀲𑀸𑀦𑀁.

𑁮𑁯. 𑀮𑀸𑀪𑀓𑀫𑁆𑀬𑀸 𑀦 𑀲𑀺𑀓𑁆𑀔𑀢𑀻𑀢𑀺 𑀮𑀸𑀪𑀧𑀢𑁆𑀣𑀦𑀸𑀬 𑀲𑀼𑀢𑁆𑀢𑀦𑁆𑀢𑀸𑀤𑀻𑀦𑀺 𑀦 𑀲𑀺𑀓𑁆𑀔𑀢𑀺. 𑀅𑀯𑀺𑀭𑀼𑀤𑁆𑀥𑁄 𑀘 𑀢𑀡𑁆𑀳𑀸𑀬, 𑀭𑀲𑁂𑀲𑀼 𑀦𑀸𑀦𑀼𑀕𑀺𑀚𑁆𑀛𑀢𑀻𑀢𑀺 𑀯𑀺𑀭𑁄𑀥𑀸𑀪𑀸𑀯𑁂𑀦 𑀘 𑀅𑀯𑀺𑀭𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀡𑁆𑀳𑀸𑀬 𑀫𑀽𑀮𑀭𑀲𑀸𑀤𑀻𑀲𑀼 𑀕𑁂𑀥𑀁 𑀦𑀸𑀧𑀚𑁆𑀚𑀢𑀺.

𑀓𑁂𑀦 𑀦𑀼 𑀔𑁄𑀢𑀺 𑀮𑀸𑀪𑀧𑀢𑁆𑀣𑀦𑀸𑀬 𑀓𑀸𑀭𑀡𑀘𑀺𑀦𑁆𑀢𑁂𑀦 𑀧𑀺𑀳𑀲𑁆𑀲 𑀧𑀭𑀺𑀬𑁂𑀲𑀦𑁂 𑀦𑀺𑀧𑀸𑀢𑁄. 𑀮𑀸𑀪𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁂𑀦 𑀉𑀧𑁆𑀧𑀢𑁆𑀢𑀺𑀬𑀸. 𑀮𑀸𑀪𑀁 𑀧𑀭𑀺𑀧𑀸𑀘𑁂𑀦𑁆𑀢𑁄𑀢𑀺 𑀧𑀘𑁆𑀘𑀬𑁂 𑀧𑀭𑀺𑀧𑀸𑀘𑀬𑀦𑁆𑀢𑁄.

𑀅𑀢𑁆𑀢𑀤𑀫𑀢𑁆𑀣𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀜𑁆𑀜𑀸𑀬 𑀅𑀢𑁆𑀢𑀦𑁄 𑀤𑀫𑀦𑀢𑁆𑀣𑀸𑀬. 𑀅𑀢𑁆𑀢𑀲𑀫𑀢𑁆𑀣𑀸𑀬𑀸𑀢𑀺 𑀲𑀫𑀸𑀥𑀺𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀜𑁆𑀜𑀸𑀬 𑀅𑀢𑁆𑀢𑀦𑁄 𑀲𑀫𑀸𑀥𑀸𑀦𑀢𑁆𑀣𑀸𑀬. 𑀅𑀢𑁆𑀢𑀧𑀭𑀺𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬𑀸𑀢𑀺 𑀤𑀼𑀯𑀺𑀥𑁂𑀦𑀸𑀧𑀺 𑀜𑀸𑀡𑁂𑀦 𑀅𑀢𑁆𑀢𑀦𑁄 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁 𑀔𑁄 𑀆𑀯𑀼𑀲𑁄 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁨𑁫𑁯). 𑀅𑀧𑁆𑀧𑀺𑀘𑁆𑀙𑀜𑁆𑀜𑁂𑀯 𑀦𑀺𑀲𑁆𑀲𑀸𑀬𑀸𑀢𑀺 𑀏𑀢𑁆𑀣 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄𑀢𑀺 𑀘𑀢𑁆𑀢𑀸𑀭𑁄 𑀅𑀧𑁆𑀧𑀺𑀘𑁆𑀙𑀸, 𑀢𑁂𑀲𑀁 𑀦𑀸𑀦𑀢𑁆𑀣𑀁 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀁 𑀏𑀯, 𑀢𑀁 𑀅𑀧𑁆𑀧𑀺𑀘𑁆𑀙𑀁 𑀅𑀮𑁆𑀮𑀻𑀬𑀺𑀢𑁆𑀯𑀸. 𑀲𑀦𑁆𑀢𑀼𑀝𑁆𑀞𑀺𑀜𑁆𑀜𑁂𑀯𑀸𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀘 𑀢𑀺𑀯𑀺𑀥𑀁 𑀲𑀦𑁆𑀢𑁄𑀲𑀁 𑀅𑀮𑁆𑀮𑀻𑀬𑀺𑀢𑁆𑀯𑀸, 𑀏𑀢𑁂𑀲𑀁 𑀯𑀺𑀪𑀸𑀕𑁄 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯. 𑀲𑀮𑁆𑀮𑁂𑀔𑀜𑁆𑀜𑁂𑀯𑀸𑀢𑀺 𑀓𑀺𑀮𑁂𑀲𑀮𑁂𑀔𑀦𑀁. 𑀇𑀤𑀫𑀢𑁆𑀣𑀺𑀢𑀜𑁆𑀜𑁂𑀯𑀸𑀢𑀺 𑀇𑀫𑁂𑀳𑀺 𑀓𑀼𑀲𑀮𑀥𑀫𑁆𑀫𑁂𑀳𑀺 𑀅𑀢𑁆𑀣𑀺 𑀇𑀤𑀫𑀢𑁆𑀣𑀺, 𑀢𑀲𑁆𑀲 𑀪𑀸𑀯𑁄 𑀇𑀤𑀫𑀢𑁆𑀣𑀺𑀢𑀸, 𑀢𑀁 𑀇𑀤𑀫𑀢𑁆𑀣𑀺𑀢𑀁𑀬𑁂𑀯 𑀦𑀺𑀲𑁆𑀲𑀸𑀬 𑀅𑀮𑁆𑀮𑀻𑀬𑀺𑀢𑁆𑀯𑀸.

𑀭𑀲𑁄𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀫𑀽𑀮𑀭𑀲𑁄𑀢𑀺 𑀬𑀁𑀓𑀺𑀜𑁆𑀘𑀺 𑀫𑀽𑀮𑀁 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑀭𑀲𑁄. 𑀔𑀦𑁆𑀥𑀭𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀫𑁆𑀩𑀺𑀮𑀦𑁆𑀢𑀺 𑀢𑀓𑁆𑀓𑀫𑁆𑀩𑀺𑀮𑀸𑀤𑀺. 𑀫𑀥𑀼𑀭𑀦𑁆𑀢𑀺 𑀏𑀓𑀦𑁆𑀢𑀢𑁄 𑀕𑁄𑀲𑀧𑁆𑀧𑀺𑀆𑀤𑀺. 𑀫𑀥𑀼 𑀧𑀦 𑀓𑀲𑀸𑀯𑀬𑀼𑀢𑁆𑀢𑀁 𑀘𑀺𑀭𑀦𑀺𑀓𑁆𑀔𑀺𑀢𑁆𑀢𑀁 𑀓𑀲𑀸𑀯𑀁 𑀳𑁄𑀢𑀺, 𑀨𑀸𑀡𑀺𑀢𑀁 𑀔𑀸𑀭𑀺𑀬𑀼𑀢𑁆𑀢𑀁 𑀘𑀺𑀭𑀦𑀺𑀓𑁆𑀔𑀺𑀢𑁆𑀢𑀁 𑀔𑀸𑀭𑀺𑀬𑀁 𑀳𑁄𑀢𑀺. 𑀲𑀧𑁆𑀧𑀺 𑀧𑀦 𑀘𑀺𑀭𑀦𑀺𑀓𑁆𑀔𑀺𑀢𑁆𑀢𑀁 𑀯𑀡𑁆𑀡𑀕𑀦𑁆𑀥𑁂 𑀚𑀳𑀦𑁆𑀢𑀫𑁆𑀧𑀺 𑀭𑀲𑀁 𑀦 𑀚𑀳𑀢𑀻𑀢𑀺 𑀢𑀤𑁂𑀯 𑀏𑀓𑀦𑁆𑀢𑀫𑀥𑀼𑀭𑀁. 𑀢𑀺𑀢𑁆𑀢𑀓𑀦𑁆𑀢𑀺 𑀦𑀺𑀫𑁆𑀩𑀧𑀡𑁆𑀡𑀸𑀤𑀺. 𑀓𑀝𑀼𑀓𑀦𑁆𑀢𑀺 𑀲𑀺𑀗𑁆𑀕𑀺𑀯𑁂𑀭𑀫𑀭𑀺𑀘𑀸𑀤𑀺. 𑀮𑁄𑀡𑀺𑀓𑀦𑁆𑀢𑀺 𑀲𑀸𑀫𑀼𑀤𑁆𑀤𑀺𑀓𑀮𑁄𑀡𑀸𑀤𑀺. 𑀔𑀸𑀭𑀺𑀓𑀦𑁆𑀢𑀺 𑀯𑀸𑀢𑀺𑀗𑁆𑀕𑀡𑀓𑀴𑀻𑀭𑀸𑀤𑀺. 𑀮𑀫𑁆𑀩𑀺𑀓𑀦𑁆𑀢𑀺 𑀩𑀤𑀭𑀸𑀫𑀮𑀓𑀓𑀧𑀺𑀝𑁆𑀞𑀲𑀸𑀮𑀯𑀸𑀤𑀺. 𑀓𑀲𑀸𑀯𑀦𑁆𑀢𑀺 𑀳𑀭𑀻𑀢𑀓𑀸𑀤𑀺. 𑀇𑀫𑁂 𑀲𑀩𑁆𑀩𑁂𑀧𑀺 𑀭𑀲𑀸 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀁𑀢𑀁𑀯𑀢𑁆𑀣𑀼𑀓𑁄 𑀧𑀦𑁂𑀢𑁆𑀣 𑀭𑀲𑁄 𑀘 𑀅𑀫𑁆𑀩𑀺𑀮𑀸𑀤𑀻𑀦𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀤𑀽𑀢𑀺 𑀇𑀝𑁆𑀞𑀭𑀲𑁄. 𑀅𑀲𑀸𑀤𑀽𑀢𑀺 𑀅𑀦𑀺𑀝𑁆𑀞𑀭𑀲𑁄. 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀲𑀩𑁆𑀩𑁄𑀧𑀺 𑀭𑀲𑁄 𑀧𑀭𑀺𑀬𑀸𑀤𑀺𑀦𑁆𑀦𑁄. 𑀲𑀻𑀢𑀦𑁆𑀢𑀺 𑀲𑀻𑀢𑀭𑀲𑁄. 𑀉𑀡𑁆𑀳𑀦𑁆𑀢𑀺 𑀉𑀡𑁆𑀳𑀭𑀲𑁄. 𑀏𑀯𑀫𑀬𑀁 𑀫𑀽𑀮𑀭𑀲𑀸𑀤𑀺𑀦𑀸 𑀪𑁂𑀤𑁂𑀦 𑀪𑀺𑀦𑁆𑀦𑁄𑀧𑀺 𑀭𑀲𑁄 𑀮𑀓𑁆𑀔𑀡𑀸𑀤𑀻𑀳𑀺 𑀅𑀪𑀺𑀦𑁆𑀦𑁄𑀬𑁂𑀯. 𑀲𑀩𑁆𑀩𑁄𑀧𑀺 𑀳𑁂𑀲 𑀚𑀺𑀯𑁆𑀳𑀸𑀧𑀝𑀺𑀳𑀦𑀦𑀮𑀓𑁆𑀔𑀡𑁄, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀢𑁂 𑀚𑀺𑀯𑁆𑀳𑀕𑁆𑀕𑁂𑀦 𑀭𑀲𑀕𑁆𑀕𑀸𑀦𑀻𑀢𑀺 𑀏𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀲𑀸𑀤𑀚𑀺𑀯𑁆𑀳𑀕𑁆𑀕𑁂𑀦 𑀉𑀢𑁆𑀢𑀫𑀭𑀲𑀸𑀦𑀺. 𑀧𑀭𑀺𑀬𑁂𑀲𑀦𑁆𑀢𑀸𑀢𑀺 𑀕𑀯𑁂𑀲𑀫𑀸𑀦𑀸. 𑀆𑀳𑀺𑀡𑁆𑀟𑀦𑁆𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑀺. 𑀢𑁂 𑀅𑀫𑁆𑀩𑀺𑀮𑀁 𑀮𑀪𑀺𑀢𑁆𑀯𑀸 𑀅𑀦𑀫𑁆𑀩𑀺𑀮𑀁 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀢𑀓𑁆𑀓𑀸𑀤𑀺𑀅𑀫𑁆𑀩𑀺𑀮𑀁 𑀮𑀤𑁆𑀥𑀸 𑀅𑀦𑀫𑁆𑀩𑀺𑀮𑀁 𑀕𑀯𑁂𑀲𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑁄𑀚𑀺𑀢𑀁.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀻𑀢𑀺 𑀧𑀝𑀺𑀲𑀗𑁆𑀔𑀸𑀦𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀉𑀧𑀸𑀬𑁂𑀦 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀇𑀤𑀸𑀦𑀺 𑀉𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀦𑁂𑀯 𑀤𑀯𑀸𑀬𑀸𑀢𑀺 𑀤𑀯𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺. 𑀢𑀢𑁆𑀣 𑀦𑀝𑀮𑀗𑁆𑀖𑀓𑀸𑀤𑀬𑁄 𑀤𑀯𑀢𑁆𑀣𑀸𑀬 𑀆𑀳𑀸𑀭𑁂𑀦𑁆𑀢𑀺 𑀦𑀸𑀫. 𑀬𑀜𑁆𑀳𑀺 𑀪𑁄𑀚𑀦𑀁 𑀪𑀼𑀢𑁆𑀢𑀲𑁆𑀲 𑀦𑀘𑁆𑀘𑀕𑀻𑀢𑀓𑀩𑁆𑀩𑀲𑀺𑀮𑁄𑀓𑀲𑀗𑁆𑀔𑀸𑀢𑁄 𑀤𑀯𑁄 𑀅𑀢𑀺𑀭𑁂𑀓𑀢𑀭𑁂𑀦 𑀧𑀝𑀺𑀪𑀸𑀢𑀺, 𑀢𑀁 𑀪𑁄𑀚𑀦𑀁 𑀅𑀥𑀫𑁆𑀫𑁂𑀦 𑀯𑀺𑀲𑀫𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀢𑁂 𑀆𑀳𑀸𑀭𑁂𑀦𑁆𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀦 𑀏𑀯𑀫𑀸𑀳𑀸𑀭𑁂𑀢𑀺.

𑀦 𑀫𑀤𑀸𑀬𑀸𑀢𑀺 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀸𑀦𑀁 𑀯𑀟𑁆𑀠𑀦𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺. 𑀢𑀢𑁆𑀣 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀫𑀤𑀢𑁆𑀣𑀸𑀬 𑀆𑀳𑀸𑀭𑁂𑀦𑁆𑀢𑀺 𑀦𑀸𑀫. 𑀢𑁂 𑀳𑀺 𑀅𑀢𑁆𑀢𑀦𑁄 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀸𑀦𑀁 𑀯𑀟𑁆𑀠𑀦𑀢𑁆𑀣𑀸𑀬 𑀧𑀺𑀡𑁆𑀟𑀭𑀲𑀪𑁄𑀚𑀦𑀸𑀤𑀻𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀦𑀸𑀳𑀸𑀭𑁂𑀢𑀺.

𑀦 𑀫𑀡𑁆𑀟𑀦𑀸𑀬𑀸𑀢𑀺 𑀲𑀭𑀻𑀭𑀫𑀡𑁆𑀟𑀦𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺. 𑀢𑀢𑁆𑀣 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄 𑀫𑀸𑀢𑀼𑀕𑀸𑀫𑀸 𑀅𑀦𑁆𑀢𑁂𑀧𑀼𑀭𑀺𑀓𑀸𑀤𑀬𑁄 𑀘 𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀧𑀺𑀯𑀦𑁆𑀢𑀺, 𑀲𑀺𑀦𑀺𑀤𑁆𑀥𑀫𑀼𑀤𑀼𑀫𑀤𑁆𑀤𑀯𑀪𑁄𑀚𑀦𑀁 𑀆𑀳𑀸𑀭𑁂𑀦𑁆𑀢𑀺. 𑀏𑀯𑀁 𑀦𑁄 𑀅𑀗𑁆𑀕𑀮𑀝𑁆𑀞𑀺 𑀲𑀼𑀲𑀡𑁆𑀞𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀲𑀭𑀻𑀭𑁂 𑀙𑀯𑀺𑀯𑀡𑁆𑀡𑁄 𑀧𑀲𑀦𑁆𑀦𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀦 𑀆𑀳𑀸𑀭𑁂𑀢𑀺.

𑀦 𑀯𑀺𑀪𑀽𑀲𑀦𑀸𑀬𑀸𑀢𑀺 𑀲𑀭𑀻𑀭𑁂 𑀫𑀁𑀲𑀯𑀺𑀪𑀽𑀲𑀦𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺. 𑀢𑀢𑁆𑀣 𑀦𑀺𑀩𑁆𑀩𑀼𑀤𑁆𑀥𑀫𑀮𑁆𑀮𑀫𑀼𑀝𑁆𑀞𑀺𑀓𑀫𑀮𑁆𑀮𑀘𑁂𑀝𑀓𑀸𑀤𑀬𑁄 𑀲𑀼𑀲𑀺𑀦𑀺𑀤𑁆𑀥𑁂𑀳𑀺 𑀫𑀘𑁆𑀙𑀫𑀁𑀲𑀸𑀤𑀻𑀳𑀺 𑀲𑀭𑀻𑀭𑀁 𑀧𑀻𑀡𑁂𑀦𑁆𑀢𑀺 ‘‘𑀏𑀯𑀁 𑀦𑁄 𑀫𑀁𑀲𑀁 𑀉𑀲𑁆𑀲𑀤𑀁 𑀪𑀯𑀺𑀲𑁆𑀲𑀢𑀺 𑀧𑀳𑀸𑀭𑀲𑀳𑀦𑀢𑁆𑀣𑀸𑀬𑀸’’𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀲𑀭𑀻𑀭𑁂 𑀫𑀁𑀲𑀯𑀺𑀪𑀽𑀲𑀦𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺.

𑀬𑀸𑀯𑀤𑁂𑀯𑀸𑀢𑀺 𑀆𑀳𑀸𑀭𑀸𑀳𑀭𑀡𑀧𑀬𑁄𑀚𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑀤𑀲𑁆𑀲𑀦𑀁. 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸𑀢𑀺 𑀇𑀫𑀲𑁆𑀲 𑀘𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀭𑀚𑀓𑀸𑀬𑀲𑁆𑀲 𑀞𑀧𑀦𑀢𑁆𑀣𑀸𑀬 𑀆𑀳𑀸𑀭𑁂𑀢𑀺, 𑀇𑀤𑀫𑀲𑁆𑀲 𑀆𑀳𑀸𑀭𑀸𑀳𑀭𑀡𑁂 𑀧𑀬𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀸𑀧𑀦𑀸𑀬𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑀸𑀧𑀦𑀢𑁆𑀣𑀸𑀬 𑀆𑀳𑀸𑀭𑁂𑀢𑀺. 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸𑀢𑀺 𑀯𑀺𑀳𑀺𑀁𑀲𑀸 𑀦𑀸𑀫 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀔𑀼𑀤𑁆𑀤𑀸, 𑀢𑀲𑁆𑀲𑀸 𑀉𑀧𑀭𑀢𑀺𑀬𑀸 𑀯𑀽𑀧𑀲𑀫𑀦𑀢𑁆𑀣𑀸𑀬 𑀆𑀳𑀸𑀭𑁂𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀓𑀮𑀲𑀸𑀲𑀦𑀁, 𑀢𑀲𑁆𑀲 𑀅𑀦𑀼𑀕𑁆𑀕𑀡𑁆𑀳𑀢𑁆𑀣𑀸𑀬 𑀆𑀳𑀸𑀭𑁂𑀢𑀺.

𑀇𑀢𑀻𑀢𑀺 𑀉𑀧𑀸𑀬𑀦𑀺𑀤𑀲𑁆𑀲𑀦𑀁, 𑀇𑀫𑀺𑀦𑀸 𑀉𑀧𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻𑀢𑀺 𑀧𑀼𑀭𑀸𑀡𑀯𑁂𑀤𑀦𑀁 𑀦𑀸𑀫 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸, 𑀢𑀁 𑀧𑀝𑀺𑀳𑀦𑀺𑀲𑁆𑀲𑀸𑀫𑀻𑀢𑀺 𑀆𑀳𑀸𑀭𑁂𑀢𑀺. 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀦𑀯𑀯𑁂𑀤𑀦𑀸 𑀦𑀸𑀫 𑀅𑀢𑀺𑀪𑀼𑀢𑁆𑀢𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸, 𑀦 𑀢𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀆𑀳𑀸𑀭𑁂𑀢𑀺. 𑀅𑀣 𑀯𑀸 𑀦𑀯𑀯𑁂𑀤𑀦𑀸 𑀦𑀸𑀫 𑀪𑀼𑀢𑁆𑀢𑀧𑀘𑁆𑀘𑀬𑀸 𑀦 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸, 𑀢𑀲𑁆𑀲𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀫𑁂𑀯 𑀆𑀳𑀸𑀭𑁂𑀢𑀺.

𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀬𑀸𑀧𑀦𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺. 𑀅𑀦𑀯𑀚𑁆𑀚𑀢𑀸 𑀘𑀸𑀢𑀺 𑀏𑀢𑁆𑀣 𑀅𑀢𑁆𑀣𑀺 𑀲𑀸𑀯𑀚𑁆𑀚𑀁, 𑀅𑀢𑁆𑀣𑀺 𑀅𑀦𑀯𑀚𑁆𑀚𑀁. 𑀢𑀢𑁆𑀣 𑀅𑀥𑀫𑁆𑀫𑀺𑀓𑀧𑀭𑀺𑀬𑁂𑀲𑀦𑀸 𑀅𑀥𑀫𑁆𑀫𑀺𑀓𑀧𑀝𑀺𑀕𑁆𑀕𑀳𑀡𑀁 𑀅𑀥𑀫𑁆𑀫𑁂𑀦 𑀧𑀭𑀺𑀪𑁄𑀕𑁄𑀢𑀺 𑀇𑀤𑀁 𑀲𑀸𑀯𑀚𑁆𑀚𑀁 𑀦𑀸𑀫. 𑀥𑀫𑁆𑀫𑁂𑀦 𑀧𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀥𑀫𑁆𑀫𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀁 𑀅𑀦𑀯𑀚𑁆𑀚𑀁 𑀦𑀸𑀫. 𑀏𑀓𑀘𑁆𑀘𑁄 𑀅𑀦𑀯𑀚𑁆𑀚𑁂𑀬𑁂𑀯 𑀲𑀸𑀯𑀚𑁆𑀚𑀁 𑀓𑀭𑁄𑀢𑀺, ‘‘𑀮𑀤𑁆𑀥𑀁 𑀫𑁂’’𑀢𑀺 𑀓𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀪𑀼𑀜𑁆𑀚𑀢𑀺, 𑀢𑀁 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀤𑁆𑀥𑀁𑀯𑀺𑀭𑁂𑀘𑀦𑀅𑀥𑁄𑀯𑀺𑀭𑁂𑀘𑀦𑀸𑀤𑀻𑀳𑀺 𑀓𑀺𑀮𑀫𑀢𑀺, 𑀲𑀓𑀮𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀢𑀲𑁆𑀲 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀪𑁂𑀲𑀚𑁆𑀚𑀧𑀭𑀺𑀬𑁂𑀲𑀦𑀸𑀤𑀻𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀺, ‘‘𑀓𑀺𑀁 𑀇𑀤’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀲𑀼𑀓𑀲𑁆𑀲 𑀦𑀸𑀫 𑀉𑀤𑀭𑀁 𑀉𑀤𑁆𑀥𑀼𑀫𑀸𑀢’’𑀦𑁆𑀢𑀺𑀆𑀤𑀺𑀁 𑀯𑀤𑀦𑁆𑀢𑀺. ‘‘𑀏𑀲 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀏𑀯𑀁 𑀧𑀓𑀢𑀺𑀓𑁄𑀬𑁂𑀯, 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀧𑁆𑀧𑀫𑀸𑀡𑀁 𑀦𑀸𑀫 𑀦 𑀚𑀸𑀦𑀸𑀢𑀻’’𑀢𑀺 𑀦𑀺𑀦𑁆𑀤𑀦𑁆𑀢𑀺 𑀕𑀭𑀳𑀦𑁆𑀢𑀺. 𑀅𑀬𑀁 𑀅𑀦𑀯𑀚𑁆𑀚𑁂𑀬𑁂𑀯 𑀲𑀸𑀯𑀚𑁆𑀚𑀁 𑀓𑀭𑁄𑀢𑀺 𑀦𑀸𑀫. 𑀏𑀯𑀁 𑀅𑀓𑀢𑁆𑀯𑀸 ‘‘𑀅𑀦𑀯𑀚𑁆𑀚𑀢𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳𑀸𑀭𑁂𑀢𑀺.

𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑀺 𑀨𑀸𑀲𑀼𑀯𑀺𑀳𑀸𑀭𑁄, 𑀅𑀢𑁆𑀣𑀺 𑀦 𑀨𑀸𑀲𑀼𑀯𑀺𑀳𑀸𑀭𑁄. 𑀢𑀢𑁆𑀣 𑀆𑀳𑀭𑀳𑀢𑁆𑀣𑀓𑁄 𑀅𑀮𑀁𑀲𑀸𑀝𑀓𑁄 𑀢𑀢𑁆𑀭𑀯𑀝𑁆𑀝𑀓𑁄 𑀓𑀸𑀓𑀫𑀸𑀲𑀓𑁄 𑀪𑀼𑀢𑁆𑀢𑀯𑀫𑀺𑀢𑀓𑁄𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀚𑀦𑀁 𑀦 𑀨𑀸𑀲𑀼𑀯𑀺𑀳𑀸𑀭𑁄 𑀦𑀸𑀫. 𑀏𑀢𑁂𑀲𑀼 𑀳𑀺 𑀆𑀳𑀭𑀳𑀢𑁆𑀣𑀓𑁄 𑀦𑀸𑀫 𑀩𑀳𑀼𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀆𑀳𑀭 𑀳𑀢𑁆𑀣’’𑀦𑁆𑀢𑀺 𑀯𑀤𑀢𑀺. 𑀅𑀮𑀁𑀲𑀸𑀝𑀓𑁄 𑀦𑀸𑀫 𑀅𑀘𑁆𑀘𑀼𑀤𑁆𑀥𑀼𑀫𑀸𑀢𑀓𑀼𑀘𑁆𑀙𑀺𑀢𑀸𑀬 𑀉𑀝𑁆𑀞𑀺𑀢𑁄𑀧𑀺 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀢𑁆𑀭𑀯𑀝𑁆𑀝𑀓𑁄 𑀦𑀸𑀫 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀭𑁂𑀯 𑀧𑀭𑀺𑀯𑀝𑁆𑀝𑀢𑀺. 𑀓𑀸𑀓𑀫𑀸𑀲𑀓𑁄 𑀦𑀸𑀫 𑀬𑀣𑀸 𑀓𑀸𑀓𑁂𑀳𑀺 𑀆𑀫𑀲𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀁 𑀬𑀸𑀯 𑀫𑀼𑀔𑀤𑁆𑀯𑀸𑀭𑀸 𑀆𑀳𑀸𑀭𑁂𑀢𑀺. 𑀪𑀼𑀢𑁆𑀢𑀯𑀫𑀺𑀢𑀓𑁄 𑀦𑀸𑀫 𑀫𑀼𑀔𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀯𑀫𑀢𑀺. 𑀏𑀯𑀁 𑀅𑀓𑀢𑁆𑀯𑀸 ‘‘𑀨𑀸𑀲𑀼𑀯𑀺𑀳𑀸𑀭𑁄 𑀘 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳𑀸𑀭𑁂𑀢𑀺. 𑀨𑀸𑀲𑀼𑀯𑀺𑀳𑀸𑀭𑁄 𑀦𑀸𑀫 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀆𑀮𑁄𑀧𑁂𑀢𑀺 𑀊𑀦𑀽𑀤𑀭𑀢𑀸. 𑀏𑀢𑁆𑀢𑀓𑀜𑁆𑀳𑀺 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀢𑁄 𑀘𑀢𑁆𑀢𑀸𑀭𑁄 𑀇𑀭𑀺𑀬𑀸𑀧𑀣𑀸 𑀲𑀼𑀔𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀏𑀯𑀫𑀸𑀳 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩; 𑀫𑀺. 𑀧. 𑁬.𑁫.𑁧𑁦);

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀅𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀺. 𑀦𑁂𑀯 𑀤𑀯𑀸𑀬𑀸𑀢𑀺 𑀳𑀺 𑀏𑀓𑀁 𑀅𑀗𑁆𑀕𑀁, 𑀦 𑀫𑀤𑀸𑀬𑀸𑀢𑀺 𑀏𑀓𑀁, 𑀦 𑀫𑀡𑁆𑀟𑀦𑀸𑀬𑀸𑀢𑀺 𑀏𑀓𑀁, 𑀦 𑀯𑀺𑀪𑀽𑀲𑀦𑀸𑀬𑀸𑀢𑀺 𑀏𑀓𑀁, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬𑀸𑀢𑀺 𑀏𑀓𑀁, 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀏𑀓𑀁, 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀏𑀓𑀁, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀏𑀓𑀁 𑀅𑀗𑁆𑀕𑀁, 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀪𑁄𑀚𑀦𑀸𑀦𑀺𑀲𑀁𑀲𑁄.

𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀧𑀝𑀺𑀓𑁆𑀔𑁂𑀧𑁄 𑀦𑀸𑀫, 𑀉𑀧𑀭𑀺 𑀧𑀦 𑀅𑀝𑁆𑀞𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀻’’𑀢𑀺. 𑀢𑀢𑁆𑀣 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸𑀢𑀺 𑀏𑀓𑀁 𑀅𑀗𑁆𑀕𑀁, 𑀬𑀸𑀧𑀦𑀸𑀬𑀸𑀢𑀺 𑀏𑀓𑀁, 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸𑀢𑀺 𑀏𑀓𑀁, 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀏𑀓𑀁, 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻𑀢𑀺 𑀏𑀓𑀁, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀏𑀓𑀁, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀏𑀓𑀁, 𑀅𑀦𑀯𑀚𑁆𑀚𑀢𑀸 𑀘𑀸𑀢𑀺 𑀏𑀓𑀁, 𑀨𑀸𑀲𑀼𑀯𑀺𑀳𑀸𑀭𑁄 𑀧𑀦 𑀪𑁄𑀚𑀦𑀸𑀦𑀺𑀲𑀁𑀲𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺.

𑁯𑁦. 𑀉𑀧𑁂𑀓𑁆𑀔𑀓𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀢𑁄𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀲𑀢𑀺𑀬𑀼𑀢𑁆𑀢𑁄.

𑀉𑀧𑁂𑀓𑁆𑀔𑀓𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀥𑀫𑁆𑀫𑁄 𑀦𑀸𑀫 𑀓𑁄𑀢𑀺? 𑀜𑀸𑀡𑀸𑀤𑀬𑁄. ‘‘𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀓𑀺𑀭𑀺𑀬𑀢𑁄 𑀘𑀢𑁆𑀢𑀸𑀭𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺, ‘‘𑀲𑀢𑀢𑀯𑀺𑀳𑀸𑀭𑁄’’𑀢𑀺 𑀯𑀼𑀢𑁆𑀢𑁂 𑀅𑀝𑁆𑀞 𑀫𑀳𑀸𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺, ‘‘𑀭𑀚𑁆𑀚𑀦𑀤𑀼𑀲𑁆𑀲𑀦𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 𑀤𑀲 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀲𑁄𑀫𑀦𑀲𑁆𑀲𑀁 𑀆𑀲𑁂𑀯𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀓𑀸𑀭𑀡𑀯𑀲𑁂𑀦 𑀘𑀓𑁆𑀔𑀽𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 𑀘𑀓𑁆𑀔𑀼 𑀭𑀽𑀧𑀁 𑀦 𑀧𑀲𑁆𑀲𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀸, 𑀘𑀺𑀢𑁆𑀢𑀫𑁆𑀧𑀺 𑀦 𑀧𑀲𑁆𑀲𑀢𑀺 𑀅𑀘𑀓𑁆𑀔𑀼𑀓𑀢𑁆𑀢𑀸. 𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑁂𑀦 𑀧𑀦 𑀧𑀲𑀸𑀤𑀯𑀢𑁆𑀣𑀼𑀓𑁂𑀦 𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀈𑀤𑀺𑀲𑁂𑀲𑀼 𑀧𑀦 𑀞𑀸𑀦𑁂𑀲𑀼 ‘‘𑀥𑀦𑀼𑀦𑀸 𑀯𑀺𑀚𑁆𑀛𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀲𑀫𑁆𑀪𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄.

𑀦𑁂𑀯 𑀲𑀼𑀫𑀦𑁄 𑀳𑁄𑀢𑀻𑀢𑀺 𑀮𑁄𑀪𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀙𑀦𑁆𑀤𑀭𑀸𑀕𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑁄𑀫𑀦𑀲𑁆𑀲𑁄 𑀦 𑀳𑁄𑀢𑀺. 𑀦 𑀤𑀼𑀫𑁆𑀫𑀦𑁄𑀢𑀺 𑀧𑀝𑀺𑀖𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑀼𑀝𑁆𑀞𑀘𑀺𑀢𑁆𑀢𑁄 𑀦 𑀳𑁄𑀢𑀺. 𑀉𑀧𑁂𑀓𑁆𑀔𑀓𑁄𑀢𑀺 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀓𑁄 𑀳𑁄𑀢𑀺, 𑀅𑀧𑀓𑁆𑀔𑀧𑀢𑀺𑀢𑁄 𑀳𑀼𑀢𑁆𑀯𑀸 𑀇𑀭𑀺𑀬𑀸𑀧𑀣𑀁 𑀧𑀯𑀢𑁆𑀢𑁂𑀢𑀺. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀫𑀸 𑀜𑀸𑀡𑀲𑀫𑁆𑀧𑀦𑁆𑀦𑁄. 𑀫𑀦𑀸𑀧𑀁 𑀦𑀸𑀪𑀺𑀕𑀺𑀚𑁆𑀛𑀢𑀻𑀢𑀺 𑀫𑀦𑀯𑀟𑁆𑀠𑀦𑀓𑀁 𑀇𑀝𑁆𑀞𑀸𑀭𑀫𑁆𑀫𑀡𑀁 𑀦𑀸𑀪𑀺𑀕𑀺𑀚𑁆𑀛𑀢𑀺 𑀦 𑀧𑀢𑁆𑀣𑁂𑀢𑀺. 𑀦𑀸𑀪𑀺𑀳𑀁𑀲𑀢𑀻𑀢𑀺 𑀦 𑀢𑀼𑀲𑁆𑀲𑀢𑀺. 𑀦 𑀭𑀸𑀕𑀁 𑀚𑀦𑁂𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀭𑀜𑁆𑀚𑀦𑀁 𑀦 𑀉𑀧𑁆𑀧𑀸𑀤𑁂𑀢𑀺. 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀘𑀓𑁆𑀔𑀸𑀤𑀺𑀓𑀸𑀬𑁄 𑀓𑀫𑁆𑀧𑀸𑀭𑀳𑀺𑀢𑀢𑁆𑀢𑀸 𑀞𑀺𑀢𑁄 𑀦𑀺𑀘𑁆𑀘𑀮𑁄 𑀳𑁄𑀢𑀺. 𑀅𑀫𑀦𑀸𑀧𑀦𑁆𑀢𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁. 𑀦 𑀫𑀗𑁆𑀓𑀼 𑀳𑁄𑀢𑀻𑀢𑀺 𑀤𑁄𑀫𑀦𑀲𑁆𑀲𑀺𑀢𑁄 𑀦 𑀳𑁄𑀢𑀺. 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀓𑁄𑀥𑀯𑀲𑁂𑀦 𑀞𑀺𑀢𑀫𑀦𑁄 𑀦 𑀳𑁄𑀢𑀺. 𑀅𑀮𑀻𑀦𑀫𑀦𑀲𑁄𑀢𑀺 𑀅𑀮𑀻𑀦𑀘𑀺𑀢𑁆𑀢𑁄. 𑀅𑀩𑁆𑀬𑀸𑀧𑀦𑁆𑀦𑀘𑁂𑀢𑀲𑁄𑀢𑀺 𑀩𑁆𑀬𑀸𑀧𑀸𑀤𑀭𑀳𑀺𑀢𑀘𑀺𑀢𑁆𑀢𑁄.

𑀭𑀚𑀦𑀻𑀬𑁂 𑀦 𑀭𑀚𑁆𑀚𑀢𑀻𑀢𑀺 𑀭𑀚𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑀺. 𑀤𑀼𑀲𑁆𑀲𑀦𑀻𑀬𑁂 𑀦 𑀤𑀼𑀲𑁆𑀲𑀢𑀻𑀢𑀺 𑀤𑁄𑀲𑀼𑀧𑁆𑀧𑀸𑀤𑁂 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀤𑁄𑀲𑀁 𑀉𑀧𑁆𑀧𑀸𑀤𑁂𑀢𑀺. 𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀫𑁄𑀳𑀁 𑀉𑀧𑁆𑀧𑀸𑀤𑁂𑀢𑀺. 𑀓𑁄𑀧𑀦𑀻𑀬𑁂 𑀦 𑀓𑀼𑀧𑁆𑀧𑀢𑀻𑀢𑀺 𑀓𑁄𑀥𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀘𑀮𑀢𑀺. 𑀫𑀤𑀦𑀻𑀬𑁂 𑀦 𑀫𑀚𑁆𑀚𑀢𑀻𑀢𑀺 𑀫𑀤𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀲𑀁𑀲𑀻𑀤𑀢𑀺. 𑀓𑀺𑀮𑁂𑀲𑀦𑀻𑀬𑁂 𑀦 𑀓𑀺𑀮𑀺𑀲𑁆𑀲𑀢𑀻𑀢𑀺 𑀉𑀧𑀢𑀧𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀉𑀧𑀢𑀧𑁆𑀧𑀢𑀺. 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑁄𑀢𑀺 𑀭𑀽𑀧𑀸𑀭𑀫𑁆𑀫𑀡𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑁄. 𑀲𑀼𑀢𑁂 𑀲𑀼𑀢𑀫𑀢𑁆𑀢𑁄𑀢𑀺 𑀲𑀤𑁆𑀤𑀸𑀬𑀢𑀦𑁂 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀲𑀼𑀢𑁂 𑀲𑀼𑀢𑀫𑀢𑁆𑀢𑁄. 𑀫𑀼𑀢𑁂 𑀫𑀼𑀢𑀫𑀢𑁆𑀢𑁄𑀢𑀺 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑁂𑀦 𑀧𑀸𑀧𑀼𑀡𑀺𑀢𑁆𑀯𑀸 𑀕𑀳𑀺𑀢𑁂 𑀕𑀳𑀺𑀢𑀫𑀢𑁆𑀢𑁄. 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑁄𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀜𑀸𑀢𑁂 𑀜𑀸𑀢𑀫𑀢𑁆𑀢𑁄. 𑀤𑀺𑀝𑁆𑀞𑁂 𑀦 𑀮𑀺𑀫𑁆𑀧𑀢𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑁂 𑀭𑀽𑀧𑀸𑀭𑀫𑁆𑀫𑀡𑁂 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑁂𑀦 𑀦 𑀮𑀺𑀫𑁆𑀧𑀢𑀺. 𑀤𑀺𑀝𑁆𑀞𑁂 𑀅𑀦𑀽𑀧𑀬𑁄𑀢𑀺 𑀭𑀽𑀧𑀸𑀭𑀫𑁆𑀫𑀡𑁂 𑀦𑀺𑀢𑁆𑀢𑀡𑁆𑀳𑁄 𑀳𑁄𑀢𑀺. 𑀅𑀦𑀧𑀸𑀬𑁄𑀢𑀺 𑀅𑀧𑀤𑀼𑀝𑁆𑀞𑀘𑀺𑀢𑁆𑀢𑁄.

𑀲𑀁𑀯𑀺𑀚𑁆𑀚𑀢𑀻𑀢𑀺 𑀮𑀩𑁆𑀪𑀢𑀺. 𑀧𑀲𑁆𑀲𑀢𑀻𑀢𑀺 𑀑𑀮𑁄𑀓𑁂𑀢𑀺. 𑀙𑀦𑁆𑀤𑀭𑀸𑀕𑁄𑀢𑀺 𑀲𑀺𑀦𑁂𑀳𑁄. 𑀭𑀽𑀧𑀸𑀭𑀸𑀫𑀦𑁆𑀢𑀺 𑀭𑀽𑀧𑀁 𑀆𑀭𑀸𑀫𑀁 𑀅𑀲𑁆𑀲𑀸𑀢𑀺 𑀭𑀽𑀧𑀸𑀭𑀸𑀫𑀁. 𑀭𑀽𑀧𑁂 𑀭𑀢𑀦𑁆𑀢𑀺 𑀭𑀽𑀧𑀭𑀢𑀁. 𑀭𑀽𑀧𑁂 𑀲𑀦𑁆𑀢𑀼𑀝𑁆𑀞𑀻𑀢𑀺 𑀭𑀽𑀧𑀲𑀫𑁆𑀫𑀼𑀤𑀺𑀢𑀁.

𑀤𑀦𑁆𑀢𑀁 𑀦𑀬𑀦𑁆𑀢𑀺 𑀲𑀫𑀺𑀢𑀺𑀦𑁆𑀢𑀺 𑀉𑀬𑁆𑀬𑀸𑀦𑀓𑀻𑀴𑀸𑀫𑀡𑁆𑀟𑀮𑀸𑀤𑀻𑀲𑀼 𑀫𑀳𑀸𑀚𑀦𑀫𑀚𑁆𑀛𑀁 𑀕𑀘𑁆𑀙𑀦𑁆𑀢𑀸 𑀤𑀦𑁆𑀢𑀫𑁂𑀯 𑀕𑁄𑀡𑀚𑀸𑀢𑀺𑀁 𑀯𑀸 𑀅𑀲𑁆𑀲𑀚𑀸𑀢𑀺𑀁 𑀯𑀸 𑀬𑀸𑀦𑁂 𑀬𑁄𑀚𑁂𑀢𑁆𑀯𑀸 𑀦𑀬𑀦𑁆𑀢𑀺. 𑀭𑀸𑀚𑀸𑀢𑀺 𑀢𑀣𑀸𑀭𑀽𑀧𑀸𑀦𑁂𑀯 𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑁄 𑀭𑀸𑀚𑀸𑀧𑀺 𑀤𑀦𑁆𑀢𑀫𑁂𑀯 𑀅𑀪𑀺𑀭𑀼𑀳𑀢𑀺. 𑀫𑀦𑀼𑀲𑁆𑀲𑁂𑀲𑀽𑀢𑀺 𑀫𑀦𑀼𑀲𑁆𑀲𑁂𑀲𑀼𑀧𑀺 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄𑀯 𑀲𑁂𑀝𑁆𑀞𑁄. 𑀬𑁄𑀢𑀺𑀯𑀸𑀓𑁆𑀬𑀦𑁆𑀢𑀺 𑀬𑁄 𑀏𑀯𑀭𑀽𑀧𑀁 𑀅𑀢𑀺𑀓𑁆𑀓𑀫𑀯𑀘𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀢𑀺𑀢𑀺𑀓𑁆𑀔𑀢𑀺 𑀦 𑀧𑀝𑀺𑀧𑁆𑀨𑀦𑁆𑀤𑀢𑀺 𑀦 𑀯𑀺𑀳𑀜𑁆𑀜𑀢𑀺, 𑀏𑀯𑀭𑀽𑀧𑁄 𑀤𑀦𑁆𑀢𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄.

𑀅𑀲𑁆𑀲𑀢𑀭𑀸𑀢𑀺 𑀯𑀴𑀯𑀸𑀬 𑀕𑀤𑁆𑀭𑀪𑁂𑀦 𑀚𑀸𑀢𑀸. 𑀆𑀚𑀸𑀦𑀻𑀬𑀸𑀢𑀺 𑀬𑀁 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺 𑀓𑀸𑀭𑀡𑀁 𑀓𑀸𑀭𑁂𑀢𑀺, 𑀢𑀲𑁆𑀲 𑀔𑀺𑀧𑁆𑀧𑀁 𑀚𑀸𑀦𑀦𑀲𑀫𑀢𑁆𑀣𑀸. 𑀲𑀺𑀦𑁆𑀥𑀯𑀸𑀢𑀺 𑀲𑀺𑀦𑁆𑀥𑀯𑀭𑀝𑁆𑀞𑁂 𑀚𑀸𑀢𑀸 𑀅𑀲𑁆𑀲𑀸. 𑀫𑀳𑀸𑀦𑀸𑀕𑀸𑀢𑀺 𑀓𑀼𑀜𑁆𑀚𑀭𑀲𑀗𑁆𑀔𑀸𑀢𑀸 𑀫𑀳𑀸𑀳𑀢𑁆𑀣𑀺𑀦𑁄. 𑀅𑀢𑁆𑀢𑀤𑀦𑁆𑀢𑁄𑀢𑀺 𑀏𑀢𑁂 𑀅𑀲𑁆𑀲𑀢𑀭𑀸 𑀯𑀸 𑀆𑀚𑀸𑀦𑀻𑀬𑀸 𑀯𑀸 𑀲𑀺𑀦𑁆𑀥𑀯𑀸 𑀯𑀸 𑀓𑀼𑀜𑁆𑀚𑀭𑀸 𑀯𑀸 𑀯𑀭𑀸 𑀤𑀦𑁆𑀢𑀸, 𑀦 𑀅𑀤𑀦𑁆𑀢𑀸. 𑀬𑁄 𑀧𑀦 𑀘𑀢𑀼𑀫𑀕𑁆𑀕𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀤𑀦𑁆𑀢𑁂𑀦 𑀤𑀦𑁆𑀢𑀢𑀸𑀬 𑀅𑀢𑁆𑀢𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄, 𑀅𑀬𑀁 𑀢𑀢𑁄𑀧𑀺 𑀯𑀭𑀁, 𑀲𑀩𑁆𑀩𑁂𑀳𑀺𑀧𑀺 𑀏𑀢𑁂𑀳𑀺 𑀉𑀢𑁆𑀢𑀭𑀺𑀢𑀭𑁄𑀢𑀺 𑀅𑀢𑁆𑀣𑁄.

𑀦 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀻𑀢𑀺 𑀬𑀸𑀦𑀺 𑀏𑀢𑀸𑀦𑀺 𑀳𑀢𑁆𑀣𑀺𑀬𑀸𑀦𑀸𑀤𑀺𑀬𑀸𑀦𑀸𑀦𑀺, 𑀦 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀺 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀅𑀕𑀢𑀧𑀼𑀩𑁆𑀩𑀢𑁆𑀢𑀸 ‘‘𑀅𑀕𑀢’’𑀦𑁆𑀢𑀺 𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀤𑀺𑀲𑀁, 𑀢𑀁 𑀞𑀸𑀦𑀁 𑀕𑀘𑁆𑀙𑁂𑀬𑁆𑀬. 𑀬𑀣𑀸 𑀧𑀼𑀩𑁆𑀩𑀪𑀸𑀕𑁂 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀤𑀦𑁆𑀢𑁂𑀦 𑀅𑀧𑀭𑀪𑀸𑀕𑁂 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀲𑀼𑀤𑀦𑁆𑀢𑁂𑀦 𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄 𑀲𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀢𑀁 𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀕𑀘𑁆𑀙𑀢𑀺, 𑀤𑀦𑁆𑀢𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀤𑀫𑀦𑀫𑁂𑀯 𑀯𑀭𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀥𑀸𑀲𑀼 𑀦 𑀯𑀺𑀓𑀫𑁆𑀧𑀦𑁆𑀢𑀻𑀢𑀺 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺𑀆𑀤𑀻𑀲𑀼 𑀫𑀸𑀦𑀯𑀺𑀥𑀸𑀲𑀼 𑀦 𑀘𑀮𑀦𑁆𑀢𑀺 𑀦𑀧𑁆𑀧𑀯𑁂𑀥𑀦𑁆𑀢𑀺. 𑀯𑀺𑀧𑁆𑀧𑀫𑀼𑀢𑁆𑀢𑀸 𑀧𑀼𑀦𑀩𑁆𑀪𑀯𑀸𑀢𑀺 𑀧𑀼𑀦𑀩𑁆𑀪𑀯𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀲𑀼𑀝𑁆𑀞𑀼 𑀫𑀼𑀢𑁆𑀢𑀸 𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑀸. 𑀤𑀦𑁆𑀢𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑀸𑀢𑀺 𑀏𑀓𑀦𑁆𑀢𑀤𑀫𑀦𑀁 𑀅𑀭𑀳𑀢𑁆𑀢𑀨𑀮𑀪𑀽𑀫𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀞𑀺𑀢𑀸. 𑀢𑁂 𑀮𑁄𑀓𑁂 𑀯𑀺𑀚𑀺𑀢𑀸𑀯𑀺𑀦𑁄𑀢𑀺 𑀢𑁂 𑀅𑀭𑀳𑀦𑁆𑀢𑁄 𑀲𑀢𑁆𑀢𑀮𑁄𑀓𑁂 𑀯𑀺𑀚𑀺𑀢𑀯𑀺𑀚𑀬𑀸 𑀯𑀺𑀚𑀺𑀢𑀯𑀦𑁆𑀢𑁄 𑀦𑀸𑀫 𑀳𑁄𑀦𑁆𑀢𑀺.

𑀬𑀲𑁆𑀫𑀸 𑀘 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀦𑀺𑀩𑁆𑀪𑀬𑁄 𑀦𑀺𑀩𑁆𑀩𑀺𑀓𑀸𑀭𑁄 𑀤𑀦𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀘𑀓𑁆𑀔𑀸𑀤𑀻𑀦𑀺 𑀙𑀴𑀺𑀦𑁆𑀤𑁆𑀭𑀺𑀬𑀸𑀦𑀺 𑀕𑁄𑀘𑀭𑀪𑀸𑀯𑀦𑀸𑀬 𑀅𑀦𑀺𑀘𑁆𑀘𑀸𑀤𑀺𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑀦𑀸𑀪𑀸𑀯𑀦𑀸𑀬 𑀲𑀢𑀺𑀲𑀫𑁆𑀧𑀚𑀜𑁆𑀜𑀕𑀦𑁆𑀥𑀁 𑀕𑀸𑀳𑀸𑀧𑁂𑀢𑁆𑀯𑀸 𑀪𑀸𑀯𑀺𑀢𑀸𑀦𑀺, 𑀢𑀸𑀦𑀺 𑀘 𑀔𑁄 𑀅𑀚𑁆𑀛𑀢𑁆𑀢𑀕𑁄𑀘𑀭𑀪𑀸𑀯𑀦𑀸𑀬, 𑀏𑀯𑀁 𑀧𑀦 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂𑀢𑀺 𑀬𑀢𑁆𑀣 𑀬𑀢𑁆𑀣 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑁂𑀓𑀮𑁆𑀮𑀢𑀸 𑀯𑁂𑀓𑀮𑁆𑀮𑀢𑁄 𑀯𑀸 𑀲𑀫𑁆𑀪𑀯𑁄, 𑀢𑀢𑁆𑀣 𑀦𑀸𑀪𑀺𑀚𑁆𑀛𑀸𑀤𑀺𑀯𑀲𑁂𑀦 𑀪𑀸𑀯𑀺𑀢𑀸𑀦𑀻𑀢𑀺 𑀏𑀯𑀁 𑀦𑀺𑀩𑁆𑀩𑀺𑀚𑁆𑀛 𑀜𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀇𑀫𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀓𑀲𑀦𑁆𑀢𑀢𑀺𑀔𑀦𑁆𑀥𑀮𑁄𑀓𑀁 𑀧𑀭𑀲𑀦𑁆𑀢𑀢𑀺𑀔𑀦𑁆𑀥𑀮𑁄𑀓𑀜𑁆𑀘 𑀤𑀦𑁆𑀢𑀫𑀭𑀡𑀁 𑀫𑀭𑀺𑀢𑀼𑀓𑀸𑀫𑁄 𑀓𑀸𑀮𑀁 𑀓𑀗𑁆𑀔𑀢𑀺, 𑀚𑀻𑀯𑀺𑀢𑀓𑁆𑀔𑀬𑀓𑀸𑀮𑀁 𑀆𑀕𑀫𑁂𑀢𑀺 𑀧𑀢𑀺𑀫𑀸𑀦𑁂𑀢𑀺, 𑀦 𑀪𑀸𑀬𑀢𑀺 𑀫𑀭𑀡𑀲𑁆𑀲. 𑀬𑀣𑀸𑀳 𑁋

‘‘𑀫𑀭𑀡𑁂 𑀫𑁂 𑀪𑀬𑀁 𑀦𑀢𑁆𑀣𑀺, 𑀦𑀺𑀓𑀦𑁆𑀢𑀺 𑀦𑀢𑁆𑀣𑀻 𑀚𑀻𑀯𑀺𑀢𑁂’’. (𑀣𑁂𑀭𑀕𑀸. 𑁨𑁦);

‘‘𑀦𑀸𑀪𑀺𑀓𑀗𑁆𑀔𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀓𑀗𑁆𑀔𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀢𑀺𑀫𑀸𑀦𑁂𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸’’𑀢𑀺. (𑀣𑁂𑀭𑀕𑀸. 𑁬𑁦𑁬, 𑁬𑁫𑁪, 𑁧𑁦𑁦𑁨; 𑀫𑀺. 𑀧. 𑁨.𑁨.𑁪 𑀣𑁄𑀓𑀁 𑀯𑀺𑀲𑀤𑀺𑀲𑀁);

𑀪𑀸𑀯𑀺𑀢𑁄 𑀲 𑀤𑀦𑁆𑀢𑁄𑀢𑀺 𑀏𑀯𑀁 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀲𑁄 𑀤𑀦𑁆𑀢𑁄.

𑁯𑁧. 𑀦𑀺𑀲𑁆𑀲𑀬𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸. 𑀜𑀢𑁆𑀯𑀸 𑀥𑀫𑁆𑀫𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀻𑀳𑀺 𑀆𑀓𑀸𑀭𑁂𑀳𑀺 𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀏𑀯𑀁 𑀢𑁂𑀳𑀺 𑀦𑀺𑀲𑁆𑀲𑀬𑁂𑀳𑀺 𑀅𑀦𑀺𑀲𑁆𑀲𑀺𑀢𑁄. 𑀢𑁂𑀦 𑀅𑀜𑁆𑀜𑀢𑁆𑀭 𑀥𑀫𑁆𑀫𑀜𑀸𑀡𑀸 𑀦𑀢𑁆𑀣𑀺 𑀦𑀺𑀲𑁆𑀲𑀬𑀸𑀦𑀁 𑀅𑀪𑀸𑀯𑁄𑀢𑀺 𑀤𑀻𑀧𑁂𑀢𑀺. 𑀪𑀯𑀸𑀬 𑀯𑀺𑀪𑀯𑀸𑀬 𑀯𑀸𑀢𑀺 𑀲𑀲𑁆𑀲𑀢𑀸𑀬 𑀉𑀘𑁆𑀙𑁂𑀤𑀸𑀬 𑀯𑀸. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑁄.

𑁯𑁨. 𑀢𑀁 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄𑀢𑀺 𑀢𑀁 𑀏𑀯𑀭𑀽𑀧𑀁 𑀏𑀓𑁂𑀓𑀕𑀸𑀣𑀸𑀬 𑀯𑀼𑀢𑁆𑀢𑀁 𑀉𑀧𑀲𑀦𑁆𑀢𑁄𑀢𑀺 𑀓𑀣𑁂𑀫𑀺. 𑀅𑀢𑀭𑀻 𑀲𑁄 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀲𑁄 𑀇𑀫𑀁 𑀯𑀺𑀲𑀢𑀸𑀤𑀺𑀪𑀸𑀯𑁂𑀦 𑀯𑀺𑀲𑀢𑁆𑀢𑀺𑀓𑀸𑀲𑀗𑁆𑀔𑀸𑀢𑀁 𑀫𑀳𑀸𑀢𑀡𑁆𑀳𑀁 𑀅𑀢𑀭𑀺.

𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀭𑀸𑀕𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄𑀢𑀺 𑀲𑀬𑀁 𑀕𑀳𑀺𑀢𑀤𑀺𑀝𑁆𑀞𑀺𑀬𑀸 𑀭𑀜𑁆𑀚𑀦𑀲𑀗𑁆𑀔𑀸𑀢𑁄 𑀭𑀸𑀕𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄. 𑀧𑀭𑀯𑀸𑀤𑁂𑀲𑀼 𑀆𑀖𑀸𑀢𑁄 𑀅𑀧𑁆𑀧𑀘𑁆𑀘𑀬𑁄𑀢𑀺 𑀧𑀭𑁂𑀲𑀁 𑀯𑀸𑀤𑀧𑀝𑀺𑀯𑀸𑀤𑁂𑀲𑀼 𑀓𑁄𑀧𑁄 𑀘 𑀅𑀢𑀼𑀝𑁆𑀞𑀸𑀓𑀸𑀭𑁄 𑀘 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄. 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀸 𑀯𑀢𑀁 𑀯𑀸𑀢𑀺 𑀲𑀬𑀁 𑀕𑀳𑀺𑀢𑀫𑁂𑀣𑀼𑀦𑀯𑀺𑀭𑀢𑀺𑀲𑀗𑁆𑀔𑀸𑀢𑀁 𑀲𑀻𑀮𑀁 𑀯𑀸 𑀕𑁄𑀯𑀢𑀸𑀤𑀺𑀯𑀢𑀁 𑀯𑀸. 𑀲𑀻𑀮𑀩𑁆𑀩𑀢𑀁 𑀯𑀸𑀢𑀺 𑀢𑀤𑀼𑀪𑀬𑀁 𑀯𑀸. 𑀧𑀭𑀸𑀫𑀸𑀲𑁄𑀢𑀺 𑀇𑀫𑀺𑀦𑀸 𑀲𑀼𑀤𑁆𑀥𑀻𑀢𑀺𑀆𑀤𑀺𑀯𑀲𑁂𑀦 𑀧𑀭𑀢𑁄 𑀆𑀫𑀲𑀢𑀺. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄𑀢𑀺 𑀲𑀬𑀁 𑀕𑀳𑀺𑀢𑀤𑀺𑀝𑁆𑀞𑀺𑀁 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀉𑀤𑀸. 𑁫𑁪; 𑀫. 𑀦𑀺. 𑁩.𑁨𑁭, 𑁩𑁦𑁧) 𑀅𑀬𑁄𑀦𑀺𑀲𑁄 𑀅𑀪𑀺𑀦𑀺𑀯𑁂𑀲𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀕𑀦𑁆𑀣𑀸 𑀢𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀤𑁆𑀯𑁂 𑀤𑀺𑀝𑁆𑀞𑀺𑀕𑀦𑁆𑀣𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀦 𑀲𑀦𑁆𑀢𑀺. 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦. 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦.

𑁯𑁩. 𑀇𑀤𑀸𑀦𑀺 𑀢𑀫𑁂𑀯 𑀉𑀧𑀲𑀦𑁆𑀢𑀁 𑀧𑀲𑀁𑀲𑀦𑁆𑀢𑁄 𑀆𑀳 ‘‘𑀦 𑀢𑀲𑁆𑀲 𑀧𑀼𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀺. 𑀢𑀢𑁆𑀣 𑀧𑀼𑀢𑁆𑀢𑀸 𑀅𑀢𑁆𑀭𑀚𑀸𑀤𑀬𑁄 𑀘𑀢𑁆𑀢𑀸𑀭𑁄. 𑀏𑀢𑁆𑀣 𑀘 𑀧𑀼𑀢𑁆𑀢𑀧𑀭𑀺𑀕𑁆𑀕𑀳𑀸𑀤𑀬𑁄 𑀧𑀼𑀢𑁆𑀢𑀸𑀤𑀺𑀦𑀸𑀫𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀯𑀸 𑀅𑀪𑀸𑀯𑁂𑀦 𑀧𑀼𑀢𑁆𑀢𑀸𑀤𑀬𑁄 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺. 𑀅𑀢𑁆𑀢𑀸𑀢𑀺 ‘‘𑀅𑀢𑁆𑀢𑀸 𑀅𑀢𑁆𑀣𑀻’’𑀢𑀺 𑀕𑀳𑀺𑀢𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀦𑀢𑁆𑀣𑀺. 𑀦𑀺𑀭𑀢𑁆𑀢𑀸𑀢𑀺 ‘‘𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀕𑀳𑀺𑀢𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺.

𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁 𑀦𑀢𑁆𑀣𑀺. 𑀫𑀼𑀜𑁆𑀘𑀺𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀫𑁄𑀘𑁂𑀢𑀩𑁆𑀩𑀁 𑀦𑀢𑁆𑀣𑀺. 𑀬𑀲𑁆𑀲 𑀦𑀢𑁆𑀣𑀺 𑀕𑀳𑀺𑀢𑀦𑁆𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁 𑀦 𑀯𑀺𑀚𑁆𑀚𑀢𑀺. 𑀢𑀲𑁆𑀲 𑀦𑀢𑁆𑀣𑀺 𑀫𑀼𑀜𑁆𑀘𑀺𑀢𑀩𑁆𑀩𑀦𑁆𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀼𑀜𑁆𑀘𑀺𑀢𑀩𑁆𑀩𑀁 𑀦 𑀯𑀺𑀚𑁆𑀚𑀢𑀺. 𑀕𑀸𑀳𑀫𑀼𑀜𑁆𑀘𑀦𑀲𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀕𑀳𑀡𑀜𑁆𑀘 𑀫𑁄𑀘𑀦𑀜𑁆𑀘 𑀯𑀻𑀢𑀺𑀯𑀢𑁆𑀢𑁄. 𑀯𑀼𑀤𑁆𑀥𑀺𑀧𑀭𑀺𑀳𑀸𑀦𑀺𑀯𑀻𑀢𑀺𑀯𑀢𑁆𑀢𑁄𑀢𑀺 𑀯𑀼𑀟𑁆𑀠𑀺𑀜𑁆𑀘 𑀳𑀸𑀦𑀺𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑁄.

𑁯𑁪. 𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀧𑀼𑀣𑀼𑀚𑁆𑀚𑀦𑀸, 𑀅𑀣𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂𑀦 𑀢𑀁 𑀭𑀸𑀕𑀸𑀤𑀺𑀦𑀸 𑀯𑀚𑁆𑀚𑁂𑀦 𑀧𑀼𑀣𑀼𑀚𑁆𑀚𑀦𑀸 𑀲𑀩𑁆𑀩𑁂𑀧𑀺 𑀤𑁂𑀯𑀫𑀦𑀼𑀲𑁆𑀲𑀸 𑀇𑀢𑁄𑀯 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀯𑀤𑁂𑀬𑁆𑀬𑀼𑀁. 𑀢𑀁 𑀢𑀲𑁆𑀲 𑀅𑀧𑀼𑀭𑀓𑁆𑀔𑀢𑀦𑁆𑀢𑀺 𑀢𑀁 𑀭𑀸𑀕𑀸𑀤𑀺𑀯𑀚𑁆𑀚𑀁 𑀢𑀲𑁆𑀲 𑀅𑀭𑀳𑀢𑁄 𑀅𑀧𑀼𑀭𑀓𑁆𑀔𑀢𑀁. 𑀢𑀲𑁆𑀫𑀸 𑀯𑀸𑀤𑁂𑀲𑀼 𑀦𑁂𑀚𑀢𑀻𑀢𑀺 𑀢𑀁𑀓𑀸𑀭𑀡𑀸 𑀦𑀺𑀦𑁆𑀤𑀸𑀯𑀘𑀦𑁂𑀲𑀼 𑀦 𑀓𑀫𑁆𑀧𑀢𑀺.

𑀦𑁂𑀚𑀢𑀻𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀦 𑀇𑀜𑁆𑀚𑀢𑀻𑀢𑀺 𑀘𑀮𑀦𑀁 𑀦 𑀓𑀭𑁄𑀢𑀺. 𑀦 𑀘𑀮𑀢𑀻𑀢𑀺 𑀦 𑀢𑀢𑁆𑀣 𑀦𑀫𑀢𑀺. 𑀦 𑀯𑁂𑀥𑀢𑀻𑀢𑀺 𑀓𑀫𑁆𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀦 𑀨𑀦𑁆𑀤𑀢𑀺. 𑀦𑀧𑁆𑀧𑀯𑁂𑀥𑀢𑀻𑀢𑀺 𑀦 𑀓𑀫𑁆𑀧𑀢𑀺. 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺 𑀦 𑀧𑀭𑀺𑀯𑀢𑁆𑀢𑀢𑀺.

𑁯𑁫. 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂𑀢𑀺 𑀯𑀺𑀲𑀺𑀝𑁆𑀞𑁂𑀲𑀼 𑀅𑀢𑁆𑀢𑀸𑀦𑀁 𑀅𑀦𑁆𑀢𑁄𑀓𑀢𑁆𑀯𑀸 ‘‘𑀅𑀳𑀁 𑀯𑀺𑀲𑀺𑀝𑁆𑀞𑁄’’𑀢𑀺 𑀅𑀢𑀺𑀫𑀸𑀦𑀯𑀲𑁂𑀦 𑀦 𑀯𑀤𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼. 𑀓𑀧𑁆𑀧𑀁 𑀦𑁂𑀢𑀺 𑀅𑀓𑀧𑁆𑀧𑀺𑀬𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀤𑀼𑀯𑀺𑀥𑀫𑁆𑀧𑀺 𑀓𑀧𑁆𑀧𑀁 𑀦 𑀏𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀓𑀧𑁆𑀧𑀺𑀬𑁄, 𑀧𑀳𑀻𑀦𑀓𑀧𑁆𑀧𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑁄𑀯.

𑁯𑁬. 𑀲𑀓𑀦𑁆𑀢𑀺 𑀫𑀬𑁆𑀳𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀁. 𑀅𑀲𑀢𑀸 𑀘 𑀦 𑀲𑁄𑀘𑀢𑀻𑀢𑀺 𑀅𑀯𑀺𑀚𑁆𑀚𑀫𑀸𑀦𑀸𑀤𑀺𑀦𑀸 𑀅𑀲𑀢𑀸 𑀘 𑀦 𑀲𑁄𑀘𑀢𑀺. 𑀥𑀫𑁆𑀫𑁂𑀲𑀼 𑀘 𑀦 𑀕𑀘𑁆𑀙𑀢𑀻𑀢𑀺 𑀲𑀩𑁆𑀩𑀥𑀫𑁆𑀫𑁂𑀲𑀼 𑀙𑀦𑁆𑀤𑀸𑀤𑀺𑀯𑀲𑁂𑀦 𑀦 𑀕𑀘𑁆𑀙𑀢𑀺. 𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀦𑀭𑀼𑀢𑁆𑀢𑀫𑁄 ‘‘𑀲𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑁄𑀯. 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀅𑀳𑁄𑀲𑀺, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀕𑀡𑀦𑀸 𑀦𑀢𑁆𑀣𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.