𑁧𑁧. 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭. 𑀏𑀓𑀸𑀤𑀲𑀫𑁂 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀓𑀼𑀢𑁄𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸𑀢𑀺 𑀓𑀮𑀳𑁄 𑀘 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀯𑀺𑀯𑀸𑀤𑁄 𑀘𑀸𑀢𑀺 𑀇𑀫𑁂 𑀓𑀼𑀢𑁄 𑀚𑀸𑀢𑀸. 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘𑀸𑀢𑀺 𑀧𑀭𑀺𑀤𑁂𑀯𑀲𑁄𑀓𑀸 𑀘 𑀲𑀳𑀫𑀘𑁆𑀙𑀭𑀸 𑀘 𑀓𑀼𑀢𑁄 𑀧𑀳𑀽𑀢𑀸. 𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘𑀸𑀢𑀺 𑀫𑀸𑀦𑀸 𑀘 𑀅𑀢𑀺𑀫𑀸𑀦𑀸 𑀘 𑀧𑁂𑀲𑀼𑀡𑀸 𑀘 𑀓𑀼𑀢𑁄 𑀧𑀳𑀽𑀢𑀸. 𑀢𑁂𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀅𑀝𑁆𑀞 𑀓𑀺𑀮𑁂𑀲𑀥𑀫𑁆𑀫𑀸. 𑀢𑀤𑀺𑀗𑁆𑀖 𑀩𑁆𑀬𑀽𑀳𑀻𑀢𑀺 𑀢𑀁 𑀫𑀬𑀸 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀩𑁆𑀭𑀽𑀳𑀺, 𑀬𑀸𑀘𑀸𑀫𑀺 𑀢𑀁 𑀅𑀳𑀦𑁆𑀢𑀺. 𑀬𑀸𑀘𑀦𑀢𑁆𑀣𑁄 𑀳𑀺 𑀇𑀗𑁆𑀖𑀸𑀢𑀺 𑀦𑀺𑀧𑀸𑀢𑁄.

𑀏𑀓𑁂𑀦 𑀆𑀓𑀸𑀭𑁂𑀦𑀸𑀢𑀺 𑀏𑀓𑁂𑀦 𑀓𑀸𑀭𑀡𑁂𑀦. 𑀅𑀧𑀭𑁂𑀦 𑀆𑀓𑀸𑀭𑁂𑀦𑀸𑀢𑀺 𑀅𑀧𑀭𑁂𑀦 𑀓𑀸𑀭𑀡𑁂𑀦. 𑀆𑀕𑀸𑀭𑀺𑀓𑀸 𑀤𑀡𑁆𑀟𑀧𑀲𑀼𑀢𑀸𑀢𑀺 𑀕𑀳𑀧𑀢𑀺𑀦𑁄 𑀯𑀺𑀳𑁂𑀲𑀫𑀸𑀦𑀸. 𑀧𑀩𑁆𑀩𑀚𑀺𑀢𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀸𑀢𑀺 𑀅𑀦𑀕𑀸𑀭𑀺𑀓𑀸 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀅𑀜𑁆𑀜𑀢𑀭𑀁 𑀆𑀧𑀚𑁆𑀚𑀫𑀸𑀦𑀸.

𑀓𑀼𑀢𑁄𑀧𑀳𑀽𑀢𑀸𑀢𑀺 𑀓𑀼𑀢𑁄𑀪𑀽𑀢𑀸. 𑀓𑀼𑀢𑁄𑀚𑀸𑀢𑀸𑀢𑀺 𑀓𑀼𑀢𑁄 𑀧𑀝𑀺𑀮𑀤𑁆𑀥𑀪𑀸𑀯𑀸. 𑀓𑀼𑀢𑁄𑀲𑀜𑁆𑀚𑀸𑀢𑀸𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑀸𑀢𑀺 𑀓𑀼𑀢𑁄 𑀦𑀺𑀩𑁆𑀩𑀢𑁆𑀢𑀮𑀓𑁆𑀔𑀡𑀁 𑀧𑀢𑁆𑀢𑀸. 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀢𑁄𑀧𑀸𑀢𑀼𑀪𑀽𑀢𑀸𑀢𑀺 𑀓𑀼𑀢𑁄𑀧𑀸𑀓𑀝𑀻𑀪𑀽𑀢𑀸. 𑀓𑀺𑀁 𑀦𑀺𑀤𑀸𑀦𑀸𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑁄 𑀨𑀮𑀁 𑀦𑀺𑀤𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀏𑀢𑀲𑁆𑀫𑀸 𑀨𑀮𑀁 𑀲𑀫𑀼𑀤𑁂𑀢𑀻𑀢𑀺 𑀲𑀫𑀼𑀤𑀬𑁄. 𑀏𑀢𑀲𑁆𑀫𑀸 𑀨𑀮𑀁 𑀚𑀸𑀬𑀢𑀻𑀢𑀺 𑀚𑀸𑀢𑀺. 𑀏𑀢𑀲𑁆𑀫𑀸 𑀨𑀮𑀁 𑀧𑀪𑀯𑀢𑀻𑀢𑀺 𑀧𑀪𑀯𑁄. 𑀫𑀽𑀮𑀁 𑀧𑀼𑀘𑁆𑀙𑀢𑀻𑀢𑀺 𑀓𑀮𑀳𑀲𑁆𑀲 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀓𑀸𑀭𑀡𑀜𑁆𑀳𑀺 𑀧𑀢𑀺𑀝𑁆𑀞𑀝𑁆𑀞𑁂𑀦 𑀫𑀽𑀮𑀁. 𑀅𑀢𑁆𑀢𑀦𑁄 𑀨𑀮𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀻𑀢𑀺 𑀳𑁂𑀢𑀼. ‘‘𑀳𑀦𑁆𑀤 𑀦𑀁 𑀕𑀡𑁆𑀳𑀣𑀸’’𑀢𑀺 𑀤𑀲𑁆𑀲𑁂𑀦𑁆𑀢𑀁 𑀯𑀺𑀬 𑀅𑀢𑁆𑀢𑀦𑁄 𑀨𑀮𑀁 𑀦𑀺𑀤𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀏𑀢𑀲𑁆𑀫𑀸 𑀨𑀮𑀁 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑁄. 𑀧𑀪𑀯𑀢𑀺 𑀨𑀮𑀁 𑀏𑀢𑀲𑁆𑀫𑀸𑀢𑀺 𑀧𑀪𑀯𑁄. 𑀲𑀫𑀼𑀝𑁆𑀞𑀸𑀢𑀺 𑀏𑀢𑁆𑀣 𑀨𑀮𑀁, 𑀏𑀢𑁂𑀦 𑀯𑀸 𑀲𑀫𑀼𑀝𑁆𑀞𑀸𑀢𑀻𑀢𑀺 𑀲𑀫𑀼𑀝𑁆𑀞𑀸𑀦𑀁. 𑀅𑀢𑁆𑀢𑀦𑁄 𑀨𑀮𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀅𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑁂𑀦 𑀅𑀢𑁆𑀢𑀦𑁄 𑀨𑀮𑀁 𑀆𑀭𑀫𑁂𑀢𑀻𑀢𑀺 𑀆𑀭𑀫𑁆𑀫𑀡𑀁. 𑀏𑀢𑀁 𑀧𑀝𑀺𑀘𑁆𑀘 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀨𑀮𑀁 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀘𑁆𑀘𑀬𑁄. 𑀏𑀢𑀲𑁆𑀫𑀸 𑀨𑀮𑀁 𑀲𑀫𑀼𑀤𑁂𑀢𑀻𑀢𑀺 𑀲𑀫𑀼𑀤𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀲𑀦𑁆𑀥𑀸𑀬 ‘‘𑀓𑀮𑀳𑀲𑁆𑀲 𑀘 𑀯𑀺𑀯𑀸𑀤𑀲𑁆𑀲 𑀘 𑀫𑀽𑀮𑀁 𑀧𑀼𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀸 𑀯𑀼𑀢𑁆𑀢𑀸.

𑁯𑁮. 𑀧𑀺𑀬𑀧𑁆𑀧𑀳𑀽𑀢𑀸𑀢𑀺 𑀧𑀺𑀬𑀯𑀢𑁆𑀣𑀼𑀢𑁄 𑀚𑀸𑀢𑀸. 𑀫𑀘𑁆𑀙𑁂𑀭𑀬𑀼𑀢𑁆𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸𑀢𑀺 𑀇𑀫𑀺𑀦𑀸 𑀓𑀮𑀳𑀯𑀺𑀯𑀸𑀤𑀸𑀤𑀻𑀦𑀁 𑀦 𑀓𑁂𑀯𑀮𑀁 𑀧𑀺𑀬𑀯𑀢𑁆𑀣𑀼𑀫𑁂𑀯, 𑀫𑀘𑁆𑀙𑀭𑀺𑀬𑀫𑁆𑀧𑀺 𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑀺. 𑀓𑀮𑀳𑀯𑀺𑀯𑀸𑀤𑀲𑀻𑀲𑁂𑀦 𑀘𑁂𑀢𑁆𑀣 𑀲𑀩𑁆𑀩𑁂𑀧𑀺 𑀢𑁂 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀏𑀢𑁂𑀲𑀁 𑀫𑀘𑁆𑀙𑀭𑀺𑀬𑀁, 𑀢𑀣𑀸 𑀧𑁂𑀲𑀼𑀡𑀸𑀦𑀜𑁆𑀘 𑀯𑀺𑀯𑀸𑀤𑀁. 𑀢𑁂𑀦𑀸𑀳 ‘‘𑀯𑀺𑀯𑀸𑀤𑀚𑀸𑀢𑁂𑀲𑀼 𑀘 𑀧𑁂𑀲𑀼𑀡𑀸𑀦𑀻’’𑀢𑀺. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑁯𑁯. 𑀧𑀺𑀬𑀸 𑀲𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑀸, 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂𑀢𑀺 ‘‘𑀧𑀺𑀬𑀧𑁆𑀧𑀳𑀽𑀢𑀸 𑀓𑀮𑀳𑀸’’𑀢𑀺 𑀬𑁂 𑀏𑀢𑁆𑀣 𑀯𑀼𑀢𑁆𑀢𑀸, 𑀢𑁂 𑀧𑀺𑀬𑀸 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑀸, 𑀦 𑀓𑁂𑀯𑀮𑀜𑁆𑀘 𑀧𑀺𑀬𑀸, 𑀬𑁂 𑀘𑀸𑀧𑀺 𑀔𑀢𑁆𑀢𑀺𑀬𑀸𑀤𑀬𑁄 𑀮𑁄𑀓𑁂 𑀯𑀺𑀘𑀭𑀦𑁆𑀢𑀺 𑀮𑁄𑀪𑀳𑁂𑀢𑀼 𑀮𑁄𑀪𑁂𑀦𑀸𑀪𑀺𑀪𑀽𑀢𑀸 𑀯𑀺𑀘𑀭𑀦𑁆𑀢𑀺, 𑀢𑁂𑀲𑀁 𑀲𑁄 𑀮𑁄𑀪𑁄 𑀘 𑀓𑀼𑀢𑁄𑀦𑀺𑀤𑀸𑀦𑁄𑀢𑀺 𑀤𑁆𑀯𑁂 𑀅𑀢𑁆𑀣𑁂 𑀏𑀓𑀸𑀬 𑀧𑀼𑀘𑁆𑀙𑀸𑀬 𑀧𑀼𑀘𑁆𑀙𑀢𑀺. 𑀓𑀼𑀢𑁄𑀦𑀺𑀤𑀸𑀦𑀸𑀢𑀺 𑀘𑁂𑀢𑁆𑀣 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀳𑁂𑀢𑀼𑀓𑀸𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀢𑁄𑀆𑀤𑁂𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀫𑀸𑀲𑁂 𑀘𑀲𑁆𑀲 𑀮𑁄𑀧𑀸𑀪𑀸𑀯𑁄. 𑀅𑀣 𑀯𑀸 𑀦𑀺𑀤𑀸𑀦𑀸𑀢𑀺 𑀚𑀸𑀢𑀸, 𑀉𑀧𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀓𑀼𑀢𑁄 𑀚𑀸𑀢𑀸 𑀓𑀼𑀢𑁄 𑀉𑀧𑁆𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀲𑀸 𑀘 𑀦𑀺𑀝𑁆𑀞𑀸 𑀘𑀸𑀢𑀺 𑀆𑀲𑀸 𑀘 𑀢𑀲𑁆𑀲𑀸 𑀆𑀲𑀸𑀬 𑀲𑀫𑀺𑀤𑁆𑀥𑀺 𑀘. 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀻𑀢𑀺 𑀬𑁂 𑀦𑀭𑀲𑁆𑀲 𑀲𑀫𑁆𑀧𑀭𑀸𑀬𑀸𑀬 𑀳𑁄𑀦𑁆𑀢𑀺, 𑀧𑀭𑀸𑀬𑀦𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀸 𑀏𑀯𑀸𑀬𑀫𑁆𑀧𑀺 𑀧𑀼𑀘𑁆𑀙𑀸.

𑀤𑀻𑀧𑀸 𑀳𑁄𑀦𑁆𑀢𑀻𑀢𑀺 𑀧𑀢𑀺𑀝𑁆𑀞𑀸 𑀪𑀯𑀦𑁆𑀢𑀺. 𑀲𑀭𑀡𑀸 𑀳𑁄𑀦𑁆𑀢𑀻𑀢𑀺 𑀤𑀼𑀓𑁆𑀔𑀦𑀸𑀲𑀦𑀸 𑀳𑁄𑀦𑁆𑀢𑀺. 𑀦𑀺𑀝𑁆𑀞𑀸𑀧𑀭𑀸𑀬𑀦𑀸 𑀳𑁄𑀦𑁆𑀢𑀻𑀢𑀺 𑀲𑀫𑀺𑀤𑁆𑀥𑀺𑀧𑀭𑀸𑀬𑀦𑀸 𑀳𑁄𑀦𑁆𑀢𑀺.

𑁧𑁦𑁦. 𑀙𑀦𑁆𑀤𑀸𑀦𑀺𑀤𑀸𑀦𑀸𑀦𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀙𑀦𑁆𑀤𑀦𑀺𑀤𑀸𑀦𑀸𑀦𑀺. 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀻𑀢𑀺 𑀬𑁂 𑀘𑀸𑀧𑀺 𑀔𑀢𑁆𑀢𑀺𑀬𑀸𑀤𑀬𑁄 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺, 𑀢𑁂𑀲𑀁 𑀮𑁄𑀪𑁄𑀧𑀺 𑀙𑀦𑁆𑀤𑀦𑀺𑀤𑀸𑀦𑁄𑀢𑀺 𑀤𑁆𑀯𑁂𑀧𑀺 𑀅𑀢𑁆𑀣𑁂 𑀏𑀓𑀢𑁄 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀇𑀢𑁄𑀦𑀺𑀤𑀸𑀦𑀸𑀢𑀺 𑀙𑀦𑁆𑀤𑀦𑀺𑀤𑀸𑀦𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀢𑁄𑀦𑀺𑀤𑀸𑀦𑀸’’𑀢𑀺 𑀳𑀺 𑀙𑀦𑁆𑀤𑀁 𑀲𑀦𑁆𑀥𑀸𑀬𑀸𑀳. 𑀙𑀦𑁆𑀤𑀦𑀺𑀤𑀸𑀦𑀸 𑀳𑀺 𑀮𑁄𑀪𑀸𑀤𑀬𑁄. ‘‘𑀇𑀢𑁄𑀦𑀺𑀤𑀸𑀦𑀸’’𑀢𑀺 𑀲𑀤𑁆𑀤𑀲𑀺𑀤𑁆𑀥𑀺 𑀘𑁂𑀢𑁆𑀣 ‘‘𑀓𑀼𑀢𑁄𑀦𑀺𑀤𑀸𑀦𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀆𑀲𑀸𑀬 𑀲𑀫𑀺𑀤𑁆𑀥𑀺 𑀯𑀼𑀘𑁆𑀘𑀢𑀺 𑀦𑀺𑀝𑁆𑀞𑀸𑀢𑀺 𑀅𑀚𑁆𑀛𑀸𑀲𑀬𑀦𑀺𑀩𑁆𑀩𑀢𑁆𑀢𑀺𑀧𑀝𑀺𑀮𑀸𑀪𑁄 𑀓𑀣𑀻𑀬𑀢𑀺.

𑁧𑁦𑁧. 𑀯𑀺𑀦𑀺𑀘𑁆𑀙𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀸. 𑀬𑁂 𑀘𑀸𑀧𑀺 𑀥𑀫𑁆𑀫𑀸 𑀲𑀫𑀡𑁂𑀦 𑀯𑀼𑀢𑁆𑀢𑀸𑀢𑀺 𑀬𑁂 𑀘 𑀅𑀜𑁆𑀜𑁂𑀧𑀺 𑀓𑁄𑀥𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀣𑀸𑀭𑀽𑀧𑀸 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀩𑀼𑀤𑁆𑀥𑀲𑀫𑀡𑁂𑀦 𑀯𑀼𑀢𑁆𑀢𑀸, 𑀢𑁂 𑀓𑀼𑀢𑁄𑀧𑀳𑀽𑀢𑀸𑀢𑀺.

𑀅𑀜𑁆𑀜𑀚𑀸𑀢𑀺𑀓𑀸𑀢𑀺 𑀅𑀜𑁆𑀜𑀲𑀪𑀸𑀯𑀸. 𑀅𑀜𑁆𑀜𑀯𑀺𑀳𑀺𑀢𑀓𑀸𑀢𑀺 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀞𑀺𑀢𑀸. 𑀲𑀫𑀺𑀢𑀧𑀸𑀧𑁂𑀦𑀸𑀢𑀺 𑀦𑀺𑀩𑁆𑀩𑀸𑀧𑀺𑀢𑀧𑀸𑀧𑁂𑀦. 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑁂𑀦𑀸𑀢𑀺 𑀧𑀳𑀻𑀦𑀮𑀸𑀫𑀓𑀥𑀫𑁆𑀫𑁂𑀦. 𑀪𑀺𑀦𑁆𑀦𑀓𑀺𑀮𑁂𑀲𑀫𑀽𑀮𑁂𑀦𑀸𑀢𑀺 𑀓𑀺𑀮𑁂𑀲𑀫𑀽𑀮𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑁂𑀦. 𑀲𑀩𑁆𑀩𑀸𑀓𑀼𑀲𑀮𑀫𑀽𑀮𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁂𑀦𑀸𑀢𑀺 𑀤𑁆𑀯𑀸𑀤𑀲𑀅𑀓𑀼𑀲𑀮𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀞𑀺𑀢𑁂𑀦. 𑀯𑀼𑀢𑁆𑀢𑀸𑀢𑀺 𑀓𑀣𑀺𑀢𑀸. 𑀧𑀯𑀼𑀢𑁆𑀢𑀸𑀢𑀺 𑀧𑀓𑀸𑀭𑁂𑀦 𑀓𑀣𑀺𑀢𑀸.

𑁧𑁦𑁨. 𑀢𑀫𑀽𑀧𑀦𑀺𑀲𑁆𑀲𑀸𑀬 𑀧𑀳𑁄𑀢𑀺 𑀙𑀦𑁆𑀤𑁄𑀢𑀺 𑀢𑀁 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀁 𑀢𑀤𑀼𑀪𑀬𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀲𑀸𑀢𑀸𑀲𑀸𑀢𑀁 𑀉𑀧𑀦𑀺𑀲𑁆𑀲𑀸𑀬 𑀲𑀁𑀬𑁄𑀕𑀯𑀺𑀬𑁄𑀕𑀧𑀢𑁆𑀣𑀦𑀸𑀯𑀲𑁂𑀦 𑀙𑀦𑁆𑀤𑁄 𑀧𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀙𑀦𑁆𑀤𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄’’𑀢𑀺 𑀅𑀬𑀁 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀭𑀽𑀧𑁂𑀲𑀼 𑀤𑀺𑀲𑁆𑀯𑀸 𑀯𑀺𑀪𑀯𑀁 𑀪𑀯𑀜𑁆𑀘𑀸𑀢𑀺 𑀭𑀽𑀧𑁂𑀲𑀼 𑀯𑀬𑀜𑁆𑀘 𑀉𑀧𑁆𑀧𑀸𑀤𑀜𑁆𑀘 𑀤𑀺𑀲𑁆𑀯𑀸. 𑀯𑀺𑀦𑀺𑀘𑁆𑀙𑀬𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂𑀢𑀺 𑀅𑀧𑀸𑀬𑀸𑀤𑀺𑀓𑁂 𑀮𑁄𑀓𑁂 𑀅𑀬𑀁 𑀚𑀦𑁆𑀢𑀼 𑀪𑁄𑀕𑀸𑀥𑀺𑀕𑀫𑀢𑁆𑀣𑀁 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑀁 ‘‘𑀅𑀢𑁆𑀢𑀸 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀜𑁆𑀘 𑀓𑀼𑀭𑀼𑀢𑁂. 𑀏𑀢𑁆𑀢𑀸𑀯𑀢𑀸 ‘‘𑀯𑀺𑀦𑀺𑀘𑁆𑀙𑀬𑀸 𑀘𑀸𑀧𑀺 𑀓𑀼𑀢𑁄𑀧𑀪𑀽𑀢𑀸’’𑀢𑀺 𑀅𑀬𑀁 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺.

𑀲𑀸𑀢𑀸𑀲𑀸𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀫𑀥𑀼𑀭𑀜𑁆𑀘 𑀅𑀫𑀥𑀼𑀭𑀜𑁆𑀘 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀇𑀝𑁆𑀞𑀸𑀦𑀺𑀝𑁆𑀞𑀦𑁆𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀜𑁆𑀘 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀜𑁆𑀘.

𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀦𑁆𑀢𑀺 𑀏𑀢𑁆𑀣 𑀲𑀼𑀭𑀸𑀢𑀺 𑀧𑀺𑀝𑁆𑀞𑀲𑀼𑀭𑀸 𑀧𑀽𑀯𑀲𑀼𑀭𑀸 𑀑𑀤𑀦𑀲𑀼𑀭𑀸 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘 𑀲𑀼𑀭𑀸. 𑀫𑁂𑀭𑀬𑀦𑁆𑀢𑀺 𑀧𑀼𑀧𑁆𑀨𑀸𑀲𑀯𑁄 𑀨𑀮𑀸𑀲𑀯𑁄 𑀫𑀥𑁆𑀯𑀸𑀲𑀯𑁄 𑀕𑀼𑀴𑀸𑀲𑀯𑁄 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄𑀢𑀺 𑀧𑀜𑁆𑀘 𑀆𑀲𑀯𑀸. 𑀢𑀁 𑀲𑀩𑁆𑀩𑀫𑁆𑀧𑀺 𑀫𑀤𑀓𑀭𑀡𑀯𑀲𑁂𑀦 𑀫𑀚𑁆𑀚𑀁. 𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺 𑀧𑀫𑀸𑀤𑀓𑀸𑀭𑀡𑀁, 𑀬𑀸𑀬 𑀘𑁂𑀢𑀦𑀸𑀬 𑀢𑀁 𑀫𑀚𑁆𑀚𑀁 𑀧𑀺𑀯𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀦𑀼𑀬𑁄𑀕𑀦𑁆𑀢𑀺 𑀢𑀁 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀅𑀦𑀼𑀆𑀬𑁄𑀕𑀁 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁. 𑀬𑀲𑁆𑀫𑀸 𑀘 𑀧𑀦 𑀢𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀫𑁂 𑀉𑀧𑁆𑀧𑀦𑁆𑀦𑀸 𑀘𑁂𑀯 𑀪𑁄𑀕𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸 𑀘 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 ‘‘𑀫𑁂 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀔𑀻𑀡𑀪𑀸𑀯𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀚𑀸𑀦𑀸𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀯𑀺𑀓𑀸𑀮𑀯𑀺𑀲𑀺𑀔𑀸𑀘𑀭𑀺𑀬𑀸𑀦𑀼𑀬𑁄𑀕𑀦𑁆𑀢𑀺 𑀅𑀯𑁂𑀮𑀸𑀬 𑀯𑀺𑀲𑀺𑀔𑀸𑀲𑀼 𑀘𑀭𑀺𑀬𑀸𑀦𑀼𑀬𑀼𑀢𑁆𑀢𑀁. 𑀲𑀫𑀚𑁆𑀚𑀸𑀪𑀺𑀘𑀭𑀡𑀦𑁆𑀢𑀺 𑀦𑀘𑁆𑀘𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀲𑀫𑀚𑁆𑀚𑀸𑀪𑀺𑀕𑀫𑀦𑀁. 𑀆𑀮𑀲𑁆𑀬𑀸𑀦𑀼𑀬𑁄𑀕𑀦𑁆𑀢𑀺 𑀓𑀸𑀬𑀸𑀮𑀲𑀺𑀬𑀢𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀁. 𑀅𑀧𑀸𑀬𑀫𑀼𑀔𑀸𑀦𑀺 𑀦 𑀲𑁂𑀯𑀢𑀻𑀢𑀺 𑀪𑁄𑀕𑀸𑀦𑀁 𑀯𑀺𑀦𑀸𑀲𑀤𑁆𑀯𑀸𑀭𑀸𑀦𑀺 𑀦 𑀲𑁂𑀯𑀢𑀺.

𑀓𑀲𑀺𑀬𑀸 𑀯𑀸𑀢𑀺 𑀓𑀲𑀺𑀓𑀫𑁆𑀫𑁂𑀦 𑀯𑀸. 𑀯𑀡𑀺𑀚𑁆𑀚𑀸𑀬 𑀯𑀸𑀢𑀺 𑀥𑀫𑁆𑀫𑀺𑀓𑀯𑀡𑀺𑀚𑁆𑀚𑀓𑀫𑁆𑀫𑁂𑀦 𑀯𑀸. 𑀕𑁄𑀭𑀓𑁆𑀔𑁂𑀦 𑀯𑀸𑀢𑀺 𑀕𑁄𑀧𑀸𑀮𑀓𑀫𑁆𑀫𑁂𑀦 𑀯𑀸. 𑀇𑀲𑁆𑀲𑀢𑁆𑀣𑁂𑀦 𑀯𑀸𑀢𑀺 𑀥𑀦𑀼𑀲𑀺𑀧𑁆𑀧𑁂𑀦 𑀯𑀸. 𑀭𑀸𑀚𑀧𑁄𑀭𑀺𑀲𑁂𑀦 𑀯𑀸𑀢𑀺 𑀭𑀸𑀚𑀲𑁂𑀯𑀓𑀓𑀫𑁆𑀫𑁂𑀦 𑀯𑀸. 𑀲𑀺𑀧𑁆𑀧𑀜𑁆𑀜𑀢𑀭𑁂𑀦 𑀯𑀸𑀢𑀺 𑀓𑀼𑀫𑁆𑀪𑀓𑀸𑀭𑀸𑀤𑀺𑀲𑀺𑀧𑁆𑀧𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀸. 𑀧𑀝𑀺𑀧𑀚𑁆𑀚𑀢𑀻𑀢𑀺 𑀧𑀬𑁄𑀕𑀁 𑀓𑀭𑁄𑀢𑀺. 𑀘𑀓𑁆𑀔𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀚𑀸𑀦𑀸𑀢𑀻𑀢𑀺 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀚𑀸𑀦𑀸𑀢𑀺. ‘‘𑀅𑀢𑁆𑀢𑀸 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀘𑀓𑁆𑀔𑀼𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂𑀢𑀺 𑀢𑀲𑁆𑀫𑀺𑀁 𑀯𑀺𑀦𑀝𑁆𑀞𑁂. 𑀅𑀢𑁆𑀢𑀸 𑀫𑁂 𑀅𑀦𑁆𑀢𑀭𑀳𑀺𑀢𑁄𑀢𑀺 ‘‘𑀫𑀫 𑀅𑀢𑁆𑀢𑀸 𑀯𑀺𑀦𑀝𑁆𑀞𑁄’’𑀢𑀺 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀯𑀺𑀕𑀢𑁄 𑀫𑁂 𑀅𑀢𑁆𑀢𑀸𑀢𑀺 𑀯𑀻𑀢𑀺𑀓𑁆𑀓𑀦𑁆𑀢𑁄 𑀫𑀫 𑀅𑀢𑁆𑀢𑀸. 𑀲𑁄𑀢𑀲𑁆𑀫𑀺𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁦𑁩. 𑀏𑀢𑁂𑀧𑀺 𑀥𑀫𑁆𑀫𑀸 𑀤𑁆𑀯𑀬𑀫𑁂𑀯 𑀲𑀦𑁆𑀢𑁂𑀢𑀺 𑀏𑀢𑁂 𑀓𑁄𑀥𑀸𑀤𑀬𑁄 𑀥𑀫𑁆𑀫𑀸 𑀲𑀸𑀢𑀸𑀲𑀸𑀢𑀤𑁆𑀯𑀬𑁂 𑀲𑀦𑁆𑀢𑁂 𑀏𑀯 𑀳𑁄𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀢𑀢𑀺𑀬𑀧𑀜𑁆𑀳𑁄𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀇𑀤𑀸𑀦𑀺 𑀬𑁄 𑀏𑀯𑀁 𑀯𑀺𑀲𑁆𑀲𑀚𑁆𑀚𑀺𑀢𑁂𑀲𑀼 𑀏𑀢𑁂𑀲𑀼 𑀧𑀜𑁆𑀳𑁂𑀲𑀼 𑀓𑀣𑀁𑀓𑀣𑀻 𑀪𑀯𑁂𑀬𑁆𑀬, 𑀢𑀲𑁆𑀲 𑀓𑀣𑀁𑀓𑀣𑀸𑀧𑀳𑀸𑀦𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀣𑀁𑀓𑀣𑀻 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂’’𑀢𑀺, 𑀜𑀸𑀡𑀤𑀲𑁆𑀲𑀦𑀜𑀸𑀡𑀸𑀥𑀺𑀕𑀫𑀦𑀢𑁆𑀣𑀁 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁𑀓𑀸𑀭𑀡𑀸? 𑀜𑀢𑁆𑀯𑀸 𑀧𑀯𑀼𑀢𑁆𑀢𑀸 𑀲𑀫𑀡𑁂𑀦 𑀥𑀫𑁆𑀫𑀸. 𑀩𑀼𑀤𑁆𑀥𑀲𑀫𑀡𑁂𑀦 𑀳𑀺 𑀜𑀢𑁆𑀯𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀦𑀢𑁆𑀣𑀺 𑀢𑀲𑁆𑀲 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁, 𑀅𑀢𑁆𑀢𑀦𑁄 𑀧𑀦 𑀜𑀸𑀡𑀸𑀦𑀼𑀪𑀸𑀯𑁂𑀦 𑀢𑁂 𑀅𑀚𑀸𑀦𑀦𑁆𑀢𑁄 𑀦 𑀚𑀸𑀦𑁂𑀬𑁆𑀬, 𑀦 𑀤𑁂𑀲𑀦𑀸𑀤𑁄𑀲𑁂𑀦. 𑀢𑀲𑁆𑀫𑀸 𑀓𑀣𑀁𑀓𑀣𑀻 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂, 𑀜𑀢𑁆𑀯𑀸 𑀧𑀯𑀼𑀢𑁆𑀢𑀸 𑀲𑀫𑀡𑁂𑀦 𑀥𑀫𑁆𑀫𑀸𑀢𑀺.

𑀧𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 𑀩𑀤𑁆𑀥𑁄𑀢𑀺 𑀦𑀸𑀕𑀭𑀺𑀓𑀩𑀦𑁆𑀥𑁂𑀦 𑀩𑀤𑁆𑀥𑁄. 𑀧𑀭𑀺𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸𑀢𑀺 𑀯𑀢𑀺𑀧𑀭𑀺𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸. 𑀕𑀸𑀫𑀩𑀦𑁆𑀥𑀦𑁂𑀦𑀸𑀢𑀺𑀆𑀤𑀻𑀲𑀼 𑀢𑀲𑁆𑀫𑀸 𑀢𑀲𑁆𑀫𑀸 𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀦𑁆𑀢𑁄 𑀕𑀸𑀫𑀩𑀦𑁆𑀥𑀦𑀸𑀤𑀻𑀳𑀺 𑀩𑀤𑁆𑀥𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀲 𑀩𑀦𑁆𑀥𑀦𑀲𑁆𑀲 𑀫𑁄𑀓𑁆𑀔𑀢𑁆𑀣𑀸𑀬𑀸𑀢𑀺 𑀏𑀢𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀩𑀦𑁆𑀥𑀦𑀲𑁆𑀲 𑀫𑁄𑀘𑀦𑀢𑁆𑀣𑀁.

𑀜𑀸𑀡𑀫𑁆𑀧𑀺 𑀜𑀸𑀡𑀧𑀣𑁄𑀢𑀺 𑀧𑀼𑀭𑁂 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀲𑁆𑀲 𑀜𑀸𑀡𑀫𑁆𑀧𑀺 𑀜𑀸𑀡𑀲𑁆𑀲 𑀲𑀜𑁆𑀘𑀭𑀡𑀫𑀕𑁆𑀕𑁄𑀢𑀺 𑀜𑀸𑀡𑀫𑁆𑀧𑀺 𑀜𑀸𑀡𑀧𑀣𑁄. 𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 𑀜𑀸𑀡𑀧𑀣𑁄𑀢𑀺 𑀜𑀸𑀡𑀲𑁆𑀲 𑀧𑀘𑁆𑀘𑀬𑁄𑀧𑀺 𑀢𑀁 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀢𑁄 𑀜𑀸𑀡𑀧𑀣𑁄. 𑀜𑀸𑀡𑀲𑀳𑀪𑀼𑀦𑁄𑀧𑀺 𑀥𑀫𑁆𑀫𑀸 𑀜𑀸𑀡𑀧𑀣𑁄𑀢𑀺 𑀜𑀸𑀡𑁂𑀦 𑀲𑀳𑀼𑀧𑁆𑀧𑀦𑁆𑀦𑀸 𑀅𑀯𑀲𑁂𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀧𑀺 𑀜𑀸𑀡𑀧𑀣𑁄. 𑀇𑀤𑀸𑀦𑀺 𑀉𑀧𑀫𑀸𑀬 𑀲𑀸𑀥𑁂𑀦𑁆𑀢𑁄 ‘‘𑀬𑀣𑀸 𑀅𑀭𑀺𑀬𑀫𑀕𑁆𑀕𑁄 𑀅𑀭𑀺𑀬𑀧𑀣𑁄’’𑀢𑀺𑀆𑀤𑀺𑀫𑀸𑀳.

𑀓𑀣𑀁𑀓𑀣𑀻 𑀧𑀼𑀕𑁆𑀕𑀮𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀯𑀦𑁆𑀢𑁄 𑀧𑀼𑀕𑁆𑀕𑀮𑁄. 𑀲𑀓𑀗𑁆𑀔𑁄𑀢𑀺 𑀲𑀤𑁆𑀯𑁂𑀴𑁆𑀳𑀓𑁄. 𑀲𑀯𑀺𑀮𑁂𑀔𑁄𑀢𑀺 𑀘𑀺𑀢𑁆𑀢𑀭𑀸𑀚𑀺𑀯𑀦𑁆𑀢𑁄. 𑀲𑀤𑁆𑀯𑁂𑀴𑁆𑀳𑀓𑁄𑀢𑀺 𑀓𑀗𑁆𑀔𑀸𑀯𑀦𑁆𑀢𑁄. 𑀲𑀯𑀺𑀘𑀺𑀓𑀺𑀘𑁆𑀙𑁄𑀢𑀺 𑀲𑀦𑁆𑀤𑁂𑀳𑀯𑀦𑁆𑀢𑁄. 𑀜𑀸𑀡𑀸𑀥𑀺𑀕𑀫𑀸𑀬𑀸𑀢𑀺 𑀜𑀸𑀡𑀧𑀝𑀺𑀮𑀸𑀪𑀢𑁆𑀣𑀸𑀬. 𑀜𑀸𑀡𑀨𑀼𑀲𑀦𑀸𑀬𑀸𑀢𑀺 𑀜𑀸𑀡𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬. 𑀅𑀣 𑀯𑀸 𑀜𑀸𑀡𑀯𑀺𑀦𑁆𑀤𑀦𑀢𑁆𑀣𑀸𑀬. 𑀜𑀸𑀡𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀜𑀸𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀸𑀬. 𑀲𑀦𑀺𑀤𑀸𑀦𑀸𑀳𑀦𑁆𑀢𑀺 𑀅𑀳𑀁 𑀲𑀦𑀺𑀤𑀸𑀦𑀁 𑀲𑀧𑀘𑁆𑀘𑀬𑀁 𑀓𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀫𑀺. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸. 𑀦𑁄 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀅𑀓𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀫𑀺.

𑁧𑁦𑁪. 𑀲𑀸𑀢𑀁 𑀅𑀲𑀸𑀢𑀜𑁆𑀘 𑀓𑀼𑀢𑁄𑀦𑀺𑀤𑀸𑀦𑀸𑀢𑀺 𑀏𑀢𑁆𑀣 𑀲𑀸𑀢𑀸𑀲𑀸𑀢𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸. 𑀦 𑀪𑀯𑀦𑁆𑀢𑀺 𑀳𑁂𑀢𑁂𑀢𑀺 𑀦 𑀪𑀯𑀦𑁆𑀢𑀺 𑀏𑀢𑁂. 𑀯𑀺𑀪𑀯𑀁 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀁, 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀲𑀸𑀢𑀸𑀲𑀸𑀢𑀸𑀦𑀁 𑀯𑀺𑀪𑀯𑀁 𑀪𑀯𑀜𑁆𑀘 𑀏𑀢𑀫𑁆𑀧𑀺 𑀬𑀁 𑀅𑀢𑁆𑀣𑀁. 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁄 𑀏𑀢𑁆𑀣 𑀓𑀢𑁄. 𑀇𑀤𑀁 𑀧𑀦 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀸𑀢𑀸𑀲𑀸𑀢𑀸𑀦𑀁 𑀯𑀺𑀪𑀯𑁄 𑀪𑀯𑁄 𑀘𑀸𑀢𑀺 𑀬𑁄 𑀏𑀲 𑀅𑀢𑁆𑀣𑁄, 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀢𑁄𑀦𑀺𑀤𑀸𑀦𑀦𑁆𑀢𑀺. 𑀏𑀢𑁆𑀣 𑀘 𑀲𑀸𑀢𑀸𑀲𑀸𑀢𑀸𑀦𑀁 𑀯𑀺𑀪𑀯𑀪𑀯𑀯𑀢𑁆𑀣𑀼𑀓𑀸 𑀯𑀺𑀪𑀯𑀪𑀯𑀤𑀺𑀝𑁆𑀞𑀺𑀬𑁄 𑀏𑀯 𑀯𑀺𑀪𑀯𑀪𑀯𑀸𑀢𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀧𑀓𑁆𑀔𑁂 ‘‘𑀪𑀯𑀤𑀺𑀝𑁆𑀞𑀺𑀧𑀺 𑀨𑀲𑁆𑀲𑀦𑀺𑀤𑀸𑀦𑀸, 𑀯𑀺𑀪𑀯𑀤𑀺𑀝𑁆𑀞𑀺𑀧𑀺 𑀨𑀲𑁆𑀲𑀦𑀺𑀤𑀸𑀦𑀸’’𑀢𑀺 𑀉𑀧𑀭𑀺 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧𑁦𑁫) 𑀯𑀓𑁆𑀔𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁧𑁦𑁫. 𑀇𑀢𑁄𑀦𑀺𑀤𑀸𑀦𑀦𑁆𑀢𑀺 𑀨𑀲𑁆𑀲𑀦𑀺𑀤𑀸𑀦𑀁. 𑀇𑀫𑀸𑀬𑀧𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁧𑁦𑁬. 𑀓𑀺𑀲𑁆𑀫𑀺𑀁 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸𑀢𑀺 𑀓𑀺𑀲𑁆𑀫𑀺𑀁 𑀯𑀻𑀢𑀺𑀯𑀢𑁆𑀢𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀧𑀜𑁆𑀘 𑀨𑀲𑁆𑀲𑀸 𑀦 𑀨𑀼𑀲𑀦𑁆𑀢𑀺. 𑀇𑀫𑀸𑀬𑀧𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁧𑁦𑁭. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀦𑀸𑀫𑀜𑁆𑀘 𑀯𑀢𑁆𑀣𑀸𑀭𑀫𑁆𑀫𑀡𑀭𑀽𑀧𑀜𑁆𑀘 𑀧𑀝𑀺𑀘𑁆𑀘. 𑀭𑀽𑀧𑁂 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸𑀢𑀺 𑀭𑀽𑀧𑁂 𑀯𑀻𑀢𑀺𑀯𑀢𑁆𑀢𑁂 𑀧𑀜𑁆𑀘 𑀨𑀲𑁆𑀲𑀸 𑀦 𑀨𑀼𑀲𑀦𑁆𑀢𑀺.

𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀭𑀽𑀧𑀯𑀺𑀜𑁆𑀜𑀸𑀡𑀸𑀦𑀁 𑀢𑀺𑀡𑁆𑀡𑀦𑁆𑀦𑀁 𑀲𑀗𑁆𑀕𑀢𑀺𑀬𑀸 𑀨𑀲𑁆𑀲𑁄 𑀚𑀸𑀬𑀢𑀺. 𑀘𑀓𑁆𑀔𑀼 𑀘 𑀭𑀽𑀧𑀸 𑀘 𑀭𑀽𑀧𑀲𑁆𑀫𑀺𑀦𑁆𑀢𑀺 𑀧𑀲𑀸𑀤𑀘𑀓𑁆𑀔𑀼𑀜𑁆𑀘 𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀘 𑀭𑀽𑀧𑀪𑀸𑀕𑁂 𑀭𑀽𑀧𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀞𑀧𑁂𑀢𑁆𑀯𑀸𑀢𑀺 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺𑀬𑀸 𑀉𑀧𑁆𑀧𑀦𑁆𑀦𑀨𑀲𑁆𑀲𑀁 𑀫𑀼𑀜𑁆𑀘𑀺𑀢𑁆𑀯𑀸. 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀦𑀸𑀫𑀲𑁆𑀫𑀺𑀦𑁆𑀢𑀺 𑀅𑀯𑀲𑁂𑀲𑀸 𑀯𑁂𑀤𑀦𑀸𑀤𑀬𑁄 𑀨𑀲𑁆𑀲𑁂𑀦 𑀲𑀳𑀚𑀸𑀢𑀸 𑀥𑀫𑁆𑀫𑀸 𑀦𑀸𑀫𑀪𑀸𑀕𑁂. 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀘𑀢𑀽𑀳𑀸𑀓𑀸𑀭𑁂𑀳𑀺 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀻𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀭𑀽𑀧𑀁 𑀯𑀻𑀢𑀺𑀯𑀢𑁆𑀢𑀁 𑀳𑁄𑀢𑀺. 𑀜𑀸𑀢𑀯𑀺𑀪𑀽𑀢𑁂𑀦𑀸𑀢𑀺 𑀧𑀸𑀓𑀝𑀁 𑀓𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑁂𑀦. 𑀢𑀻𑀭𑀡𑀯𑀺𑀪𑀽𑀢𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀢𑀻𑀭𑀬𑀺𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑁂𑀦. 𑀧𑀳𑀸𑀦𑀯𑀺𑀪𑀽𑀢𑁂𑀦𑀸𑀢𑀺 𑀙𑀦𑁆𑀤𑀭𑀸𑀕𑀧𑀳𑀸𑀦𑀢𑁄 𑀯𑀻𑀢𑀺𑀯𑀢𑁆𑀢𑁂𑀦. 𑀲𑀫𑀢𑀺𑀓𑁆𑀓𑀫𑀯𑀺𑀪𑀽𑀢𑁂𑀦𑀸𑀢𑀺 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀧𑀝𑀺𑀮𑀸𑀪𑀯𑀲𑁂𑀦 𑀯𑀻𑀢𑀺𑀯𑀢𑁆𑀢𑁂𑀦.

𑁧𑁦𑁮. 𑀓𑀣𑀁 𑀲𑀫𑁂𑀢𑀲𑁆𑀲𑀸𑀢𑀺 𑀓𑀣𑀁 𑀧𑀝𑀺𑀧𑀦𑁆𑀦𑀲𑁆𑀲. 𑀯𑀺𑀪𑁄𑀢𑀺 𑀭𑀽𑀧𑀦𑁆𑀢𑀺 𑀭𑀽𑀧𑀁 𑀯𑀺𑀪𑀯𑀢𑀺, 𑀦 𑀪𑀯𑁂𑀬𑁆𑀬 𑀯𑀸. 𑀲𑀼𑀔𑀁 𑀤𑀼𑀔𑀜𑁆𑀘𑀸𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀭𑀽𑀧𑀫𑁂𑀯 𑀧𑀼𑀘𑁆𑀙𑀢𑀺.

𑀚𑀸𑀦𑁂𑀬𑁆𑀬𑀸𑀫𑀸𑀢𑀺 𑀚𑀸𑀦𑀺𑀲𑁆𑀲𑀸𑀫. 𑀆𑀚𑀸𑀦𑁂𑀬𑁆𑀬𑀸𑀫𑀸𑀢𑀺 𑀯𑀺𑀲𑁂𑀲𑁂𑀦 𑀚𑀸𑀦𑀺𑀲𑁆𑀲𑀸𑀫. 𑀯𑀺𑀚𑀸𑀦𑁂𑀬𑁆𑀬𑀸𑀫𑀸𑀢𑀺 𑀅𑀦𑁂𑀓𑀯𑀺𑀥𑁂𑀦 𑀚𑀸𑀦𑀺𑀲𑁆𑀲𑀸𑀫. 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀸𑀫𑀸𑀢𑀺 𑀲𑀫𑁆𑀫𑀸 𑀚𑀸𑀦𑀺𑀲𑁆𑀲𑀸𑀫. 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀫𑀸𑀢𑀺 𑀘𑀺𑀢𑁆𑀢𑁂𑀦 𑀩𑀼𑀚𑁆𑀛𑀺𑀲𑁆𑀲𑀸𑀫.

𑁧𑁦𑁯. 𑀦 𑀲𑀜𑁆𑀜𑀲𑀜𑁆𑀜𑀻𑀢𑀺 𑀬𑀣𑀸 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀁, 𑀲𑁄 𑀧𑀓𑀢𑀺𑀲𑀜𑁆𑀜𑀸𑀬 𑀲𑀜𑁆𑀜𑀻𑀧𑀺 𑀦 𑀳𑁄𑀢𑀺. 𑀦 𑀯𑀺𑀲𑀜𑁆𑀜𑀲𑀜𑁆𑀜𑀻𑀢𑀺 𑀯𑀺𑀲𑀜𑁆𑀜𑀸𑀬𑀧𑀺 𑀯𑀺𑀭𑀽𑀧𑀸𑀬 𑀲𑀜𑁆𑀜𑀸𑀬 𑀯𑀺𑀲𑀜𑁆𑀜𑀻 𑀦 𑀳𑁄𑀢𑀺 𑀉𑀫𑁆𑀫𑀢𑁆𑀢𑀓𑁄 𑀯𑀸 𑀔𑀺𑀢𑁆𑀢𑀘𑀺𑀢𑁆𑀢𑁄 𑀯𑀸. 𑀦𑁄𑀧𑀺 𑀅𑀲𑀜𑁆𑀜𑀻𑀢𑀺 𑀲𑀜𑁆𑀜𑀸𑀯𑀺𑀭𑀳𑀺𑀢𑁄𑀧𑀺 𑀦 𑀳𑁄𑀢𑀺 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀯𑀸 𑀅𑀲𑀜𑁆𑀜𑀲𑀢𑁆𑀢𑁄 𑀯𑀸. 𑀦 𑀯𑀺𑀪𑀽𑀢𑀲𑀜𑁆𑀜𑀻𑀢𑀺 ‘‘𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁦𑁮) 𑀦𑀬𑁂𑀦 𑀲𑀫𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻𑀧𑀺 𑀦 𑀳𑁄𑀢𑀺 𑀅𑀭𑀽𑀧𑀚𑁆𑀛𑀸𑀦𑀮𑀸𑀪𑀻. 𑀏𑀯𑀁 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀦𑁆𑀢𑀺 𑀏𑀢𑀲𑁆𑀫𑀺𑀁 𑀲𑀜𑁆𑀜𑀲𑀜𑁆𑀜𑀺𑀢𑀸𑀤𑀺𑀪𑀸𑀯𑁂 𑀅𑀝𑁆𑀞𑀢𑁆𑀯𑀸 𑀬𑀤𑁂𑀢𑀁 𑀯𑀼𑀢𑁆𑀢𑀁 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀻’’𑀢𑀺, 𑀏𑀯𑀁 𑀲𑀫𑁂𑀢𑀲𑁆𑀲 𑀅𑀭𑀽𑀧𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀯𑀺𑀪𑁄𑀢𑀺 𑀭𑀽𑀧𑀁. 𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀘 𑀬𑀸 𑀲𑀜𑁆𑀜𑀸, 𑀢𑀁𑀦𑀺𑀤𑀸𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀧𑀜𑁆𑀘𑀸𑀲𑁆𑀲 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀲𑀜𑁆𑀜𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀢𑀺 𑀲𑀜𑁆𑀜𑀸𑀯𑁂𑀤𑀦𑀸 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀲𑀜𑁆𑀜𑀸𑀪𑀸𑀯𑁂𑀦 𑀅𑀲𑀜𑁆𑀜𑀺𑀦𑁄𑀢𑀺 𑀓𑀣𑀻𑀬𑀦𑁆𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀜𑁆𑀜𑀸𑀪𑀸𑀯𑁂𑀦 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑀸.

𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺 𑀢𑀢𑁆𑀣 𑀲𑁄𑀢𑀺 𑀲𑁄 𑀪𑀺𑀓𑁆𑀔𑀼. 𑀏𑀯𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀓𑀫𑀦𑀺𑀤𑀲𑁆𑀲𑀦𑀫𑁂𑀢𑀁, 𑀇𑀫𑀺𑀦𑀸 𑀓𑀫𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑁂𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀧𑀭𑀺𑀲𑀼𑀤𑁆𑀥𑁂𑀢𑀺𑀆𑀤𑀻𑀲𑀼 𑀧𑀦 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀧𑀭𑀺𑀬𑁄𑀤𑀸𑀢𑁂, 𑀧𑀪𑀲𑁆𑀲𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀖𑀸𑀢𑁂𑀦 𑀯𑀺𑀳𑀢𑀭𑀸𑀕𑀸𑀤𑀺𑀅𑀗𑁆𑀕𑀡𑀢𑁆𑀢𑀸 𑀅𑀦𑀗𑁆𑀕𑀡𑁂. 𑀅𑀦𑀗𑁆𑀕𑀡𑀢𑁆𑀢𑀸 𑀏𑀯 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂. 𑀅𑀗𑁆𑀕𑀡𑁂𑀦 𑀳𑀺 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀺. 𑀲𑀼𑀪𑀸𑀯𑀺𑀢𑀢𑁆𑀢𑀸 𑀫𑀼𑀤𑀼𑀪𑀽𑀢𑁂, 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑁂 𑀯𑀢𑁆𑀢𑀫𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀫𑀼𑀤𑀽𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀤𑀼𑀢𑁆𑀢𑀸𑀬𑁂𑀯 𑀘 𑀓𑀫𑁆𑀫𑀦𑀺𑀬𑁂, 𑀓𑀫𑁆𑀫𑀓𑁆𑀔𑀫𑁂 𑀓𑀫𑁆𑀫𑀬𑁄𑀕𑁆𑀕𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼 𑀳𑀺 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑀲𑀼𑀤𑁆𑀥𑀦𑁆𑀢𑀫𑀺𑀯 𑀲𑀼𑀯𑀡𑁆𑀡𑀁. 𑀢𑀤𑀼𑀪𑀬𑀫𑁆𑀧𑀺 𑀘 𑀲𑀼𑀪𑀸𑀯𑀺𑀢𑀢𑁆𑀢𑀸𑀬𑁂𑀯. 𑀬𑀣𑀸𑀳 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁨𑁨).

𑀏𑀢𑁂𑀲𑀼 𑀳𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀤𑀻𑀲𑀼 𑀞𑀺𑀢𑀢𑁆𑀢𑀸 𑀞𑀺𑀢𑁂. 𑀞𑀺𑀢𑀢𑁆𑀢𑀸𑀬𑁂𑀯 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀅𑀘𑀮𑁂 𑀦𑀺𑀭𑀺𑀜𑁆𑀚𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑀢𑁆𑀢𑀸 𑀞𑀺𑀢𑁂. 𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂. 𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀜𑁆𑀳𑀺 𑀘𑀺𑀢𑁆𑀢𑀁 𑀅𑀲𑁆𑀲𑀤𑁆𑀥𑀺𑀬𑁂𑀦 𑀦 𑀇𑀜𑁆𑀚𑀢𑀺, 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀁 𑀓𑁄𑀲𑀚𑁆𑀚𑁂𑀦 𑀦 𑀇𑀜𑁆𑀚𑀢𑀺, 𑀲𑀢𑀺𑀧𑀭𑀺𑀕𑁆𑀕𑀳𑀺𑀢𑀁 𑀧𑀫𑀸𑀤𑁂𑀦 𑀦 𑀇𑀜𑁆𑀚𑀢𑀺, 𑀲𑀫𑀸𑀥𑀺𑀧𑀭𑀺𑀕𑁆𑀕𑀳𑀺𑀢𑀁 𑀉𑀤𑁆𑀥𑀘𑁆𑀘𑁂𑀦 𑀦 𑀇𑀜𑁆𑀚𑀢𑀺, 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀁 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀺, 𑀑𑀪𑀸𑀲𑀕𑀢𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀦 𑀦 𑀇𑀜𑁆𑀚𑀢𑀺. 𑀇𑀫𑁂𑀳𑀺 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀼𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬.

𑀅𑀧𑀭𑁄 𑀦𑀬𑁄 𑁋 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂. 𑀯𑀺𑀢𑀓𑁆𑀓𑀸𑀤𑀺𑀲𑀫𑀢𑀺𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀸𑀢𑁂. 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀺𑀓𑀸𑀦𑀁 𑀧𑀸𑀧𑀓𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀜𑁆𑀘 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑁂. 𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀬 𑀅𑀯𑀘𑀭𑀸𑀦𑀁, 𑀇𑀘𑁆𑀙𑀸𑀯𑀲𑁂𑀦 𑀑𑀢𑀺𑀡𑁆𑀡𑀸𑀦𑀁 𑀧𑀯𑀢𑁆𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑁄𑀧𑀅𑀧𑁆𑀧𑀘𑁆𑀘𑀬𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀘𑀺𑀢𑁆𑀢𑀽𑀧𑀓𑁆𑀓𑀺𑀮𑁂𑀲𑀸𑀦𑀁 𑀯𑀺𑀕𑀫𑁂𑀦 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀗𑁆𑀕𑀡𑀲𑀼𑀢𑁆𑀢𑀯𑀢𑁆𑀣𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 (𑀫. 𑀦𑀺. 𑁧.𑁫𑁭 𑀆𑀤𑀬𑁄, 𑁭𑁦 𑀆𑀤𑀬𑁄) 𑀯𑁂𑀤𑀺𑀢𑀩𑁆𑀩𑀁. 𑀯𑀲𑀺𑀧𑁆𑀧𑀢𑁆𑀢𑀺𑀬𑀸 𑀫𑀼𑀤𑀼𑀪𑀽𑀢𑁂. 𑀇𑀤𑁆𑀥𑀺𑀧𑀸𑀤𑀪𑀸𑀯𑀽𑀧𑀕𑀫𑀦𑁂𑀦 𑀓𑀫𑁆𑀫𑀦𑀺𑀬𑁂. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀡𑀻𑀢𑀪𑀸𑀯𑀽𑀧𑀕𑀫𑁂𑀦 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂, 𑀬𑀣𑀸 𑀆𑀦𑁂𑀜𑁆𑀚𑀪𑀸𑀯𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀸𑀤𑀓𑀁 𑀧𑀤𑀝𑁆𑀞𑀸𑀦𑀪𑀽𑀢𑀁.

𑀆𑀭𑀼𑀧𑁆𑀧𑀫𑀕𑁆𑀕𑀲𑀫𑀗𑁆𑀕𑀻𑀢𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀕𑀫𑀦𑀫𑀕𑁆𑀕𑁂𑀦 𑀅𑀧𑀭𑀺𑀳𑀻𑀦𑁄. 𑀧𑀧𑀜𑁆𑀘𑀸𑀬𑁂𑀯 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀢𑀡𑁆𑀳𑀸𑀤𑀺𑀧𑀧𑀜𑁆𑀘𑀸𑀬𑁂𑀯 𑀧𑀧𑀜𑁆𑀘𑀲𑀗𑁆𑀔𑀸.

𑁧𑁧𑁦. 𑀏𑀢𑁆𑀢𑀸𑀯𑀢𑀕𑁆𑀕𑀁 𑀦𑀼 𑀯𑀤𑀦𑁆𑀢𑀺 𑀳𑁂𑀓𑁂, 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂. 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀯𑀤𑀦𑁆𑀢𑀺 𑀏𑀢𑁆𑀢𑁄𑀢𑀺 𑀏𑀢𑁆𑀢𑀸𑀯𑀢𑀸 𑀦𑀼 𑀇𑀥 𑀧𑀡𑁆𑀟𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀕𑁆𑀕𑀁 𑀲𑀼𑀤𑁆𑀥𑀺𑀁 𑀲𑀢𑁆𑀢𑀲𑁆𑀲 𑀯𑀤𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀏𑀢𑁆𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀅𑀥𑀺𑀓𑀜𑁆𑀘 𑀯𑀤𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺.

𑀏𑀢𑁆𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄𑀢𑀺 𑀏𑀢𑀲𑁆𑀫𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄.

𑁧𑁧𑁧. 𑀏𑀢𑁆𑀢𑀸𑀯𑀢𑀕𑁆𑀕𑀫𑁆𑀧𑀺 𑀯𑀤𑀦𑁆𑀢𑀺 𑀳𑁂𑀓𑁂𑀢𑀺 𑀏𑀓𑁂 𑀲𑀲𑁆𑀲𑀢𑀯𑀸𑀤𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄 𑀏𑀢𑁆𑀢𑀸𑀯𑀢𑀸𑀧𑀺 𑀅𑀕𑁆𑀕𑀁 𑀲𑀼𑀤𑁆𑀥𑀺𑀁 𑀯𑀤𑀦𑁆𑀢𑀺. 𑀢𑁂𑀲𑀁 𑀧𑀦𑁂𑀓𑁂 𑀲𑀫𑀬𑀁 𑀯𑀤𑀦𑁆𑀢𑀻𑀢𑀺 𑀢𑁂𑀲𑀜𑁆𑀜𑁂𑀯 𑀏𑀓𑁂 𑀉𑀘𑁆𑀙𑁂𑀤𑀯𑀸𑀤𑀸 𑀲𑀫𑀬𑀁 𑀉𑀘𑁆𑀙𑁂𑀤𑀁 𑀯𑀤𑀦𑁆𑀢𑀺. 𑀅𑀦𑀼𑀧𑀸𑀤𑀺𑀲𑁂𑀲𑁂 𑀓𑀼𑀲𑀮𑀸𑀯𑀤𑀸𑀦𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑁂 𑀓𑀼𑀲𑀮𑀯𑀸𑀤𑀸 𑀲𑀫𑀸𑀦𑀸.

𑀪𑀯𑀢𑀚𑁆𑀚𑀺𑀢𑀸𑀢𑀺 𑀪𑀯𑀢𑁄 𑀪𑀻𑀢𑀸. 𑀯𑀺𑀪𑀯𑀁 𑀅𑀪𑀺𑀦𑀦𑁆𑀤𑀦𑁆𑀢𑀻𑀢𑀺 𑀉𑀘𑁆𑀙𑁂𑀤𑀁 𑀧𑀝𑀺𑀘𑁆𑀘 𑀢𑀼𑀲𑁆𑀲𑀦𑁆𑀢𑀺. 𑀢𑁂 𑀲𑀢𑁆𑀢𑀲𑁆𑀲 𑀲𑀫𑀦𑁆𑀢𑀺 𑀢𑁂 𑀉𑀘𑁆𑀙𑁂𑀤𑀯𑀸𑀤𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀲𑀫𑀁 𑀅𑀦𑀼𑀧𑁆𑀧𑀢𑁆𑀢𑀺𑀁 𑀯𑀤𑀦𑁆𑀢𑀺. 𑀉𑀧𑀲𑀫𑀦𑁆𑀢𑀺 𑀅𑀢𑀻𑀯 𑀲𑀫𑀁. 𑀯𑀽𑀧𑀲𑀫𑀦𑁆𑀢𑀺 𑀲𑀦𑁆𑀢𑀁. 𑀦𑀺𑀭𑁄𑀥𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀁. 𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑁆𑀢𑀺 𑀅𑀧𑀼𑀦𑀼𑀧𑁆𑀧𑀢𑁆𑀢𑀺𑀁.

𑁧𑁧𑁨. 𑀏𑀢𑁂 𑀘 𑀜𑀢𑁆𑀯𑀸 𑀉𑀧𑀦𑀺𑀲𑁆𑀲𑀺𑀢𑀸𑀢𑀺 𑀏𑀢𑁂 𑀘 𑀤𑀺𑀝𑁆𑀞𑀺𑀕𑀢𑀺𑀓𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸. 𑀜𑀢𑁆𑀯𑀸 𑀫𑀼𑀦𑀻 𑀦𑀺𑀲𑁆𑀲𑀬𑁂 𑀲𑁄 𑀯𑀻𑀫𑀁𑀲𑀻𑀢𑀺 𑀦𑀺𑀲𑁆𑀲𑀬𑁂 𑀘 𑀜𑀢𑁆𑀯𑀸 𑀲𑁄 𑀯𑀻𑀫𑀁𑀲𑀻 𑀧𑀡𑁆𑀟𑀺𑀢𑁄 𑀩𑀼𑀤𑁆𑀥𑀫𑀼𑀦𑀺. 𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑁄𑀢𑀺 𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀤𑀺𑀢𑁄 𑀥𑀫𑁆𑀫𑁂 𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀪𑀯𑀸𑀪𑀯𑀸𑀬 𑀦 𑀲𑀫𑁂𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀢𑁆𑀢𑀺𑀬𑀸 𑀦 𑀲𑀫𑀸𑀕𑀘𑁆𑀙𑀢𑀺. 𑀅𑀧𑀭𑀸𑀫𑀲𑀦𑁆𑀢𑀺 𑀅𑀧𑀭𑀸𑀫𑀲𑀦𑁆𑀢𑁄. 𑀧𑀭𑀸𑀫𑀸𑀲𑀁 𑀦𑀸𑀧𑀚𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.