𑁧𑁨. 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀫𑁂 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀲𑀓𑀁𑀲𑀓𑀁𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺 𑀇𑀤𑀫𑁆𑀧𑀺 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀲𑀫𑀬𑁂 ‘‘𑀲𑀩𑁆𑀩𑁂𑀧𑀺𑀫𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 ‘𑀲𑀸𑀥𑀼𑀭𑀽𑀧𑀸𑀫𑁆𑀳𑀸’𑀢𑀺 𑀪𑀡𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀲𑀸𑀥𑀼𑀭𑀽𑀧𑀸𑀯 𑀇𑀫𑁂 𑀅𑀢𑁆𑀢𑀦𑁄 𑀏𑀯 𑀤𑀺𑀝𑁆𑀞𑀺𑀬𑀸 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁.

𑁧𑁧𑁩. 𑀢𑀢𑁆𑀣 𑀆𑀤𑀺𑀢𑁄 𑀤𑁆𑀯𑁂𑀧𑀺 𑀕𑀸𑀣𑀸 𑀧𑀼𑀘𑁆𑀙𑀸𑀕𑀸𑀣𑀸𑀬𑁂𑀯. 𑀢𑀸𑀲𑀼 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀯𑀲𑀫𑀸𑀦𑀸. 𑀯𑀺𑀕𑁆𑀕𑀬𑁆𑀳 𑀦𑀸𑀦𑀸 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺 𑀢𑀁 𑀤𑀺𑀝𑁆𑀞𑀺𑀁 𑀩𑀮𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 ‘‘𑀢𑀢𑁆𑀣 𑀓𑀼𑀲𑀮𑀸𑀫𑁆𑀳𑀸’’𑀢𑀺 𑀧𑀝𑀺𑀚𑀸𑀦𑀫𑀸𑀦𑀸 𑀧𑀼𑀣𑀼 𑀧𑀼𑀣𑀼 𑀯𑀤𑀦𑁆𑀢𑀺, 𑀏𑀓𑀁 𑀦 𑀯𑀤𑀦𑁆𑀢𑀺. 𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀲 𑀯𑁂𑀤𑀺 𑀥𑀫𑁆𑀫𑀁, 𑀇𑀤𑀁 𑀧𑀝𑀺𑀓𑁆𑀓𑁄𑀲𑀫𑀓𑁂𑀯𑀮𑀻 𑀲𑁄𑀢𑀺 𑀢𑀜𑁆𑀘 𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬 𑀬𑁄 𑀏𑀯𑀁 𑀚𑀸𑀦𑀸𑀢𑀺, 𑀲𑁄 𑀥𑀫𑁆𑀫𑀁 𑀯𑁂𑀤𑀺𑀬𑀺. 𑀇𑀤𑀁 𑀧𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑁄 𑀳𑀻𑀦𑁄 𑀳𑁄𑀢𑀻𑀢𑀺 𑀘 𑀯𑀤𑀦𑁆𑀢𑀺.

𑀦𑀸𑀦𑀸 𑀯𑀤𑀦𑁆𑀢𑀻𑀢𑀺 𑀦𑀸𑀦𑀸𑀓𑀸𑀭𑀡𑀁 𑀪𑀡𑀦𑁆𑀢𑀺. 𑀯𑀺𑀯𑀺𑀥𑀁 𑀯𑀤𑀦𑁆𑀢𑀻𑀢𑀺 𑀦𑀸𑀦𑀸𑀯𑀺𑀥𑀁 𑀪𑀡𑀦𑁆𑀢𑀺. 𑀅𑀜𑁆𑀜𑁄𑀜𑁆𑀜𑀁 𑀯𑀤𑀦𑁆𑀢𑀻𑀢𑀺 𑀏𑀓𑀁 𑀅𑀯𑀢𑁆𑀯𑀸 𑀅𑀜𑁆𑀜𑀁 𑀅𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀅𑀓𑁂𑀯𑀮𑀻 𑀲𑁄𑀢𑀺 𑀬𑁄 𑀅𑀓𑀼𑀲𑀮𑁄 𑀅𑀬𑀁. 𑀅𑀲𑀫𑀢𑁆𑀢𑁄𑀢𑀺 𑀦 𑀧𑀭𑀺𑀧𑀽𑀭𑁄. 𑀅𑀧𑀭𑀺𑀧𑀼𑀡𑁆𑀡𑁄𑀢𑀺 𑀦 𑀲𑀫𑁆𑀧𑀼𑀡𑁆𑀡𑁄.

𑁧𑁧𑁪. 𑀩𑀸𑀮𑁄𑀢𑀺 𑀳𑀻𑀦𑁄. 𑀅𑀓𑁆𑀓𑀼𑀲𑀮𑁄𑀢𑀺 𑀅𑀯𑀺𑀤𑁆𑀯𑀸.

𑁧𑁧𑁫. 𑀇𑀤𑀸𑀦𑀺 𑀢𑀺𑀲𑁆𑀲𑁄 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸 𑀳𑁄𑀦𑁆𑀢𑀻𑀢𑀺. 𑀢𑀸 𑀧𑀼𑀭𑀺𑀫𑀟𑁆𑀠𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀧𑀘𑁆𑀙𑀺𑀫𑀟𑁆𑀠𑁂𑀦 𑀧𑀝𑀺𑀩𑁆𑀬𑀽𑀳𑀺𑀢𑁆𑀯𑀸 𑀞𑀺𑀢𑀸. 𑀢𑁂𑀦 𑀩𑁆𑀬𑀽𑀳𑁂𑀦 𑀉𑀢𑁆𑀢𑀭𑀲𑀼𑀢𑁆𑀢𑀢𑁄 𑀘 𑀅𑀧𑁆𑀧𑀓𑀢𑁆𑀢𑀸 𑀇𑀤𑀁 𑀲𑀼𑀢𑁆𑀢𑀁 ‘‘𑀘𑀽𑀴𑀩𑁆𑀬𑀽𑀳’’𑀦𑁆𑀢𑀺 𑀦𑀸𑀫𑀁 𑀮𑀪𑀺. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 𑀢𑀸𑀯 𑀧𑀭𑀲𑁆𑀲 𑀘𑁂 𑀥𑀫𑁆𑀫𑀦𑁆𑀢𑀺 𑀧𑀭𑀲𑁆𑀲 𑀤𑀺𑀝𑁆𑀞𑀺𑀁. 𑀲𑀩𑁆𑀩𑁂𑀯𑀺𑀫𑁂 𑀩𑀸𑀮𑀸𑀢𑀺 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂𑀯 𑀇𑀫𑁂 𑀩𑀸𑀮𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁𑀓𑀸𑀭𑀡𑀸? 𑀲𑀩𑁆𑀩𑁂𑀯𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺.

𑁧𑁧𑁬. 𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂𑀯 𑀦 𑀯𑀻𑀯𑀤𑀸𑀢𑀸, 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸 𑀫𑀼𑀢𑀻𑀫𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀦𑀯𑀻𑀯𑀤𑀸𑀢𑀸 𑀅𑀯𑁄𑀤𑀸𑀢𑀸 𑀲𑀁𑀓𑀺𑀮𑀺𑀝𑁆𑀞𑀸𑀯 𑀲𑀫𑀸𑀦𑀸 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀘 𑀓𑀼𑀲𑀮𑀸 𑀘 𑀫𑀼𑀢𑀺𑀫𑀦𑁆𑀢𑁄 𑀘 𑀢𑁂 𑀳𑁄𑀦𑁆𑀢𑀺 𑀘𑁂. 𑀅𑀣 𑀯𑀸 ‘‘𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂 𑀯𑀤𑀸𑀢𑀸’’𑀢𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑁋 𑀲𑀓𑀸𑀬 𑀧𑀦 𑀤𑀺𑀝𑁆𑀞𑀺𑀬𑀸 𑀯𑁄𑀤𑀸𑀢𑀸 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸 𑀫𑀼𑀢𑀺𑀫𑀦𑁆𑀢𑁄 𑀳𑁄𑀦𑁆𑀢𑀺 𑀘𑁂, 𑀦 𑀢𑁂𑀲𑀁 𑀓𑁄𑀘𑀻𑀢𑀺 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀏𑀓𑁄𑀧𑀺 𑀦𑀺𑀳𑀻𑀦𑀧𑀜𑁆𑀜𑁄 𑀦 𑀳𑁄𑀢𑀺, 𑀓𑀺𑀁𑀓𑀸𑀭𑀡𑀸? 𑀤𑀺𑀝𑁆𑀞𑀻 𑀳𑀺 𑀢𑁂𑀲𑀫𑁆𑀧𑀺 𑀢𑀣𑀸 𑀲𑀫𑀢𑁆𑀢𑀸, 𑀬𑀣𑀸 𑀇𑀢𑀭𑁂𑀲𑀦𑁆𑀢𑀺.

𑁧𑁧𑁭. 𑀦 𑀯𑀸𑀳𑀫𑁂𑀢𑀦𑁆𑀢𑀺 𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀁 𑀢𑁂 𑀫𑀺𑀣𑀼 𑀤𑁆𑀯𑁂 𑀤𑁆𑀯𑁂 𑀚𑀦𑀸 𑀅𑀜𑁆𑀜𑀫𑀜𑁆𑀜𑀁 ‘‘𑀩𑀸𑀮𑁄’’𑀢𑀺 𑀆𑀳𑀼, 𑀅𑀳𑀁 𑀏𑀢𑀁 𑀢𑀣𑀺𑀬𑀦𑁆𑀢𑀺 𑀢𑀘𑁆𑀙𑀦𑁆𑀢𑀺 𑀦𑁂𑀯 𑀩𑁆𑀭𑀽𑀫𑀺. 𑀓𑀺𑀁𑀓𑀸𑀭𑀡𑀸? 𑀬𑀲𑁆𑀫𑀸 𑀲𑀩𑁆𑀩𑁂𑀯 𑀢𑁂 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀁 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀓𑀁𑀲𑀼, 𑀢𑁂𑀦 𑀘 𑀓𑀸𑀭𑀡𑁂𑀦 𑀧𑀭𑀁 ‘‘𑀩𑀸𑀮𑁄’’𑀢𑀺 𑀤𑀳𑀦𑁆𑀢𑀺. 𑀏𑀢𑁆𑀣 𑀘 𑀢𑀣𑀺𑀬𑀁, 𑀢𑀣𑁂𑀯𑀦𑁆𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁨.𑁮𑁮𑁯) 𑀤𑁆𑀯𑁂𑀧𑀺 𑀧𑀸𑀞𑀸.

𑀢𑀘𑁆𑀙𑀦𑁆𑀢𑀺 𑀅𑀢𑀼𑀘𑁆𑀙𑀁. 𑀢𑀣𑀦𑁆𑀢𑀺 𑀅𑀯𑀺𑀧𑀭𑀻𑀢𑀁, 𑀪𑀽𑀢𑀦𑁆𑀢𑀺 𑀲𑀦𑁆𑀢𑀁. 𑀬𑀸𑀣𑀸𑀯𑀦𑁆𑀢𑀺 𑀲𑀁𑀯𑀺𑀚𑁆𑀚𑀫𑀸𑀦𑀁. 𑀅𑀯𑀺𑀧𑀭𑀺𑀢𑀦𑁆𑀢𑀺 𑀦 𑀯𑀺𑀲𑀗𑁆𑀓𑁂𑀢𑀁.

𑁧𑁧𑁮. 𑀬𑀫𑀸𑀳𑀽𑀢𑀺 𑀧𑀼𑀘𑁆𑀙𑀸𑀕𑀸𑀣𑀸𑀬 ‘‘𑀬𑀁 𑀤𑀺𑀝𑁆𑀞𑀺𑀲𑀘𑁆𑀘𑀁 𑀢𑀣𑀺𑀬’’𑀦𑁆𑀢𑀺 𑀏𑀓𑁂 𑀆𑀳𑀼.

𑁧𑁧𑁯. 𑀏𑀓𑀜𑁆𑀳𑀺 𑀲𑀘𑁆𑀘𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬 𑀏𑀓𑀁 𑀲𑀘𑁆𑀘𑀁 𑀦𑀺𑀭𑁄𑀥𑁄 𑀫𑀕𑁆𑀕𑁄 𑀯𑀸. 𑀬𑀲𑁆𑀫𑀺𑀁 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦𑀦𑁆𑀢𑀺 𑀬𑀫𑁆𑀳𑀺 𑀲𑀘𑁆𑀘𑁂 𑀧𑀚𑀸𑀦𑀦𑁆𑀢𑁄 𑀧𑀚𑀸 𑀦𑁄 𑀯𑀺𑀯𑀤𑁂𑀬𑁆𑀬𑀼𑀁. 𑀲𑀬𑀁 𑀣𑀼𑀦𑀦𑁆𑀢𑀻𑀢𑀺 𑀅𑀢𑁆𑀢𑀦𑀸 𑀯𑀤𑀦𑁆𑀢𑀺.

𑁧𑁨𑁦. 𑀓𑀲𑁆𑀫𑀸 𑀦𑀽𑀢𑀺 𑀧𑀼𑀘𑁆𑀙𑀸𑀕𑀸𑀣𑀸𑀬 𑀧𑀯𑀸𑀤𑀺𑀬𑀸𑀲𑁂𑀢𑀺 𑀯𑀸𑀤𑀺𑀦𑁄. 𑀉𑀤𑀸𑀳𑀼 𑀢𑁂 𑀢𑀓𑁆𑀓𑀫𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀢𑁂 𑀯𑀸𑀤𑀺𑀦𑁄 𑀉𑀤𑀸𑀳𑀼 𑀅𑀢𑁆𑀢𑀦𑁄 𑀢𑀓𑁆𑀓𑀫𑀢𑁆𑀢𑀁 𑀅𑀦𑀼𑀕𑀘𑁆𑀙𑀦𑁆𑀢𑀺.

𑀢𑀓𑁆𑀓𑀧𑀭𑀺𑀬𑀸𑀳𑀢𑀦𑁆𑀢𑀺 𑀯𑀺𑀢𑀓𑁆𑀓𑁂𑀦 𑀲𑀫𑀦𑁆𑀢𑀢𑁄 𑀆𑀳𑀢𑀁. 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀺𑀢𑀧𑀜𑁆𑀜𑀸𑀬 𑀯𑀺𑀘𑀭𑀺𑀢𑀁. 𑀲𑀬𑀁𑀧𑀝𑀺𑀪𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁.

𑁧𑁨𑁧. 𑀦 𑀳𑁂𑀯𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀦𑀺𑀘𑁆𑀘𑀸𑀦𑀻𑀢𑀺 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀫𑀢𑁆𑀢𑁂𑀦 𑀦𑀺𑀘𑁆𑀘𑀦𑁆𑀢𑀺 𑀕𑀳𑀺𑀢𑀕𑁆𑀕𑀳𑀡𑀸𑀦𑀺. 𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀦𑀺𑀘𑁆𑀘𑀲𑀗𑁆𑀓𑀧𑁆𑀧𑀫𑀢𑁆𑀢𑀁 𑀤𑀺𑀝𑁆𑀞𑀻𑀲𑀼 𑀚𑀦𑁂𑀢𑁆𑀯𑀸.

𑀬𑀲𑁆𑀫𑀸 𑀧𑀦 𑀤𑀺𑀝𑁆𑀞𑀻𑀲𑀼 𑀯𑀺𑀢𑀓𑁆𑀓𑀁 𑀚𑀦𑁂𑀦𑁆𑀢𑀸 𑀤𑀺𑀝𑁆𑀞𑀺𑀬𑁄 𑀲𑀜𑁆𑀚𑀦𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀺𑀕𑀢𑀸𑀦𑀺 𑀚𑀦𑁂𑀦𑁆𑀢𑀺 𑀲𑀜𑁆𑀚𑀦𑁂𑀦𑁆𑀢𑀻’’𑀢𑀺𑀆𑀤𑀺. 𑀚𑀦𑁂𑀦𑁆𑀢𑀻𑀢𑀺 𑀉𑀧𑀭𑀽𑀧𑀭𑀺 𑀤𑀺𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀚𑀦𑁂𑀦𑁆𑀢𑀺. 𑀲𑀜𑁆𑀚𑀦𑁂𑀦𑁆𑀢𑀻𑀢𑀺𑀆𑀤𑀻𑀦𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀫𑀬𑁆𑀳𑀁 𑀲𑀘𑁆𑀘𑀦𑁆𑀢𑀺 𑀫𑀫 𑀯𑀘𑀦𑀁 𑀢𑀘𑁆𑀙𑀁.

𑁧𑁨𑁨. 𑀇𑀤𑀸𑀦𑀺 𑀏𑀯𑀁 𑀦𑀸𑀦𑀸𑀲𑀘𑁆𑀘𑁂𑀲𑀼 𑀅𑀲𑀦𑁆𑀢𑁂𑀲𑀼 𑀢𑀓𑁆𑀓𑀫𑀢𑁆𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑁂 𑀲𑀼𑀢𑁂’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀤𑀺𑀝𑁆𑀞𑁂𑀢𑀺 𑀤𑀺𑀝𑁆𑀞𑀁, 𑀤𑀺𑀝𑁆𑀞𑀲𑀼𑀤𑁆𑀥𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀲𑀼𑀢𑀸𑀤𑀻𑀲𑀼. 𑀏𑀢𑁂 𑀘 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀤𑀲𑁆𑀲𑀻𑀢𑀺 𑀏𑀢𑁂 𑀤𑀺𑀝𑁆𑀞𑀺𑀥𑀫𑁆𑀫𑁂 𑀦𑀺𑀲𑁆𑀲𑀬𑀺𑀢𑁆𑀯𑀸 𑀲𑀼𑀤𑁆𑀥𑀺𑀪𑀸𑀯𑀲𑀗𑁆𑀔𑀸𑀢𑀁 𑀯𑀺𑀫𑀸𑀦𑀁 𑀅𑀲𑀫𑁆𑀫𑀸𑀦𑀁 𑀧𑀲𑁆𑀲𑀦𑁆𑀢𑁄𑀧𑀺. 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄, 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳𑀸𑀢𑀺 𑀏𑀯𑀁 𑀯𑀺𑀫𑀸𑀦𑀤𑀲𑁆𑀲𑀻𑀧𑀺 𑀢𑀲𑁆𑀫𑀺𑀁 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀢𑀼𑀝𑁆𑀞𑀺𑀚𑀸𑀢𑁄 𑀳𑀸𑀲𑀚𑀸𑀢𑁄 𑀳𑀼𑀢𑁆𑀯𑀸 𑀧𑀭𑁄 ‘‘𑀳𑀻𑀦𑁄 𑀘 𑀅𑀯𑀺𑀤𑁆𑀯𑀸 𑀘𑀸’’𑀢𑀺 𑀏𑀯𑀁 𑀯𑀤𑀢𑀺𑀬𑁂𑀯.

𑀦 𑀲𑀫𑁆𑀫𑀸𑀦𑁂𑀢𑀻𑀢𑀺𑀧𑀺 𑀯𑀺𑀫𑀸𑀦𑀤𑀲𑁆𑀲𑀻𑀢𑀺 𑀦 𑀩𑀳𑀼𑀫𑀸𑀦𑀁 𑀓𑀭𑁄𑀢𑀻𑀢𑀺 𑀏𑀯𑀫𑁆𑀧𑀺 𑀯𑀺𑀫𑀸𑀦𑀤𑀲𑁆𑀲𑀻 𑀦 𑀩𑀳𑀼𑀫𑀸𑀦𑀤𑀲𑁆𑀲𑀻. 𑀤𑁄𑀫𑀦𑀲𑁆𑀲𑀁 𑀚𑀦𑁂𑀢𑀻𑀢𑀺 𑀧𑀞𑀫𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀅𑀮𑁆𑀮𑀻𑀬𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀁 𑀧𑀢𑁆𑀯𑀸 𑀧𑀘𑁆𑀙𑀸 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁂 𑀞𑀺𑀢𑀓𑀸𑀮𑁂 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀦𑀺𑀘𑁆𑀙𑀬𑀤𑀺𑀝𑁆𑀞𑀺𑀬𑀸 𑀞𑀢𑁆𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀕𑀳𑀺𑀢𑀤𑀺𑀝𑁆𑀞𑀺𑀬𑀸 𑀞𑀢𑁆𑀯𑀸.

𑁧𑁨𑁩. 𑀏𑀯𑀁 𑀲𑀦𑁆𑀢𑁂 𑀬𑁂𑀦𑁂𑀯𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀬𑀫𑀢𑁆𑀢𑀦𑀸𑀢𑀺 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁. 𑀯𑀺𑀫𑀸𑀦𑁂𑀢𑀻𑀢𑀺 𑀕𑀭𑀳𑀢𑀺. 𑀢𑀤𑁂𑀯 𑀧𑀸𑀯𑀸𑀢𑀺 𑀢𑀤𑁂𑀯 𑀯𑀘𑀦𑀁 𑀤𑀺𑀝𑁆𑀞𑀺𑀁 𑀯𑀤𑀢𑀺, 𑀢𑀁 𑀯𑀸 𑀧𑀼𑀕𑁆𑀕𑀮𑀁.

𑁧𑁨𑁪. 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸𑀢𑀺 𑀕𑀸𑀣𑀸𑀬𑀢𑁆𑀣𑁄 𑁋 𑀲𑁄 𑀏𑀯𑀁 𑀢𑀸𑀬 𑀮𑀓𑁆𑀔𑀡𑀸𑀢𑀺𑀲𑀸𑀭𑀺𑀦𑀺𑀬𑀸 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 𑀲𑀫𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑁄 𑀉𑀤𑁆𑀥𑀼𑀫𑀸𑀢𑁄, 𑀢𑁂𑀦 𑀘 𑀤𑀺𑀝𑁆𑀞𑀺𑀫𑀸𑀦𑁂𑀦 𑀫𑀢𑁆𑀢𑁄 ‘‘𑀧𑀭𑀺𑀧𑀼𑀡𑁆𑀡𑁄 𑀅𑀳𑀁 𑀓𑁂𑀯𑀮𑀻’’𑀢𑀺 𑀏𑀯𑀁 𑀧𑀭𑀺𑀧𑀼𑀡𑁆𑀡𑀫𑀸𑀦𑀻. 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀫𑀦𑀲𑀸 ‘‘𑀅𑀳𑀁 𑀧𑀡𑁆𑀟𑀺𑀢𑁄’’𑀢𑀺 𑀅𑀪𑀺𑀲𑀺𑀜𑁆𑀘𑀢𑀺. 𑀓𑀺𑀁𑀓𑀸𑀭𑀡𑀸? 𑀤𑀺𑀝𑁆𑀞𑀻 𑀳𑀺 𑀲𑀸 𑀢𑀲𑁆𑀲 𑀢𑀣𑀸 𑀲𑀫𑀢𑁆𑀢𑀸𑀢𑀺.

𑀲𑀩𑁆𑀩𑀸 𑀢𑀸 𑀤𑀺𑀝𑁆𑀞𑀺𑀬𑁄 𑀮𑀓𑁆𑀔𑀡𑀸𑀢𑀺𑀓𑁆𑀓𑀦𑁆𑀢𑀸𑀢𑀺 𑀢𑀸 𑀲𑀩𑁆𑀩𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄 𑀮𑀓𑁆𑀔𑀡𑀁 𑀅𑀢𑀻𑀢𑀸 𑀅𑀢𑀺𑀲𑀭𑀦𑁆𑀢𑀻𑀢𑀺 𑀅𑀢𑀺𑀓𑁆𑀓𑀦𑁆𑀢𑀸. 𑀅𑀦𑁄𑀫𑁄𑀢𑀺 𑀅𑀦𑀽𑀦𑁄.

𑁧𑁨𑁫. 𑀧𑀭𑀲𑁆𑀲 𑀘𑁂𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀬𑁄 𑀲𑁄 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄 ‘‘𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄’’𑀢𑀺 𑀘𑀸𑀳, 𑀢𑀲𑁆𑀲 𑀧𑀭𑀲𑁆𑀲 𑀘𑁂 𑀳𑀺 𑀯𑀘𑀲𑀸 𑀲𑁄 𑀢𑁂𑀦 𑀯𑀼𑀘𑁆𑀘𑀫𑀸𑀦𑁄 𑀦𑀺𑀳𑀻𑀦𑁄 𑀳𑁄𑀢𑀺, 𑀢𑀼𑀫𑁄 𑀲𑀳𑀸 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄, 𑀲𑁄𑀧𑀺 𑀢𑁂𑀦𑁂𑀯 𑀲𑀳 𑀦𑀺𑀳𑀻𑀦𑀧𑀜𑁆𑀜𑁄 𑀳𑁄𑀢𑀺. 𑀲𑁄𑀧𑀺 𑀳𑀺 𑀢𑀁 ‘‘𑀩𑀸𑀮𑁄’’𑀢𑀺 𑀯𑀤𑀢𑀺. 𑀅𑀣 𑀢𑀲𑁆𑀲 𑀯𑀘𑀦𑀁 𑀅𑀧𑁆𑀧𑀫𑀸𑀡𑀁, 𑀲𑁄 𑀧𑀦 𑀲𑀬𑀫𑁂𑀯 𑀯𑁂𑀤𑀕𑀽 𑀘 𑀥𑀻𑀭𑁄 𑀘 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂 𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀺. 𑀲𑀩𑁆𑀩𑁂𑀧𑀺 𑀳𑀺 𑀢𑁂 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀧𑀡𑁆𑀟𑀺𑀢𑀸.

𑀯𑀸𑀘𑀸𑀬𑀸𑀢𑀺 𑀓𑀣𑀦𑁂𑀦. 𑀯𑀘𑀦𑁂𑀦𑀸𑀢𑀺 𑀪𑀸𑀲𑀺𑀢𑁂𑀦. 𑀦𑀺𑀦𑁆𑀤𑀺𑀢𑀓𑀸𑀭𑀡𑀸𑀢𑀺 𑀕𑀭𑀳𑀳𑁂𑀢𑀼𑀦𑀸. 𑀕𑀭𑀳𑀺𑀢𑀓𑀸𑀭𑀡𑀸𑀢𑀺 𑀅𑀯𑀜𑁆𑀜𑀸𑀢𑀳𑁂𑀢𑀼𑀦𑀸. 𑀉𑀧𑀯𑀤𑀺𑀢𑀓𑀸𑀭𑀡𑀸𑀢𑀺 𑀉𑀧𑀯𑀸𑀤𑀳𑁂𑀢𑀼𑀦𑀸.

𑁧𑁨𑁬. 𑀅𑀜𑁆𑀜𑀁 𑀇𑀢𑁄𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 ‘‘𑀅𑀣 𑀘𑁂 𑀲𑀬𑀁 𑀯𑁂𑀤𑀕𑀽 𑀳𑁄𑀢𑀺 𑀥𑀻𑀭𑁄. 𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀻’’𑀢𑀺 𑀏𑀯𑀜𑁆𑀳𑀺 𑀯𑀼𑀢𑁆𑀢𑁂𑀧𑀺 𑀲𑀺𑀬𑀸 𑀓𑀲𑁆𑀲𑀘𑀺 ‘‘𑀓𑀲𑁆𑀫𑀸’’𑀢𑀺. 𑀢𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀬𑀲𑁆𑀫𑀸 𑀅𑀜𑁆𑀜𑀁 𑀇𑀢𑁄 𑀬𑀸𑀪𑀺𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀅𑀧𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀓𑁂𑀯𑀮𑀻 𑀢𑁂. 𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀺, 𑀬𑁂 𑀇𑀢𑁄 𑀅𑀜𑁆𑀜𑀁 𑀤𑀺𑀝𑁆𑀞𑀺𑀁 𑀅𑀪𑀺𑀯𑀤𑀦𑁆𑀢𑀺, 𑀢𑁂 𑀅𑀧𑀭𑀤𑁆𑀥𑀸 𑀯𑀺𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀕𑁆𑀕𑀁, 𑀅𑀓𑁂𑀯𑀮𑀺𑀦𑁄 𑀘 𑀢𑁂𑀢𑀺 𑀏𑀯𑀁 𑀧𑀼𑀣𑀼𑀢𑀺𑀢𑁆𑀣𑀺𑀬𑀸 𑀬𑀲𑁆𑀫𑀸 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀯𑀁 𑀯𑀤𑀦𑁆𑀢𑀻𑀢𑀺 𑀘𑁂? 𑀲𑀦𑁆𑀤𑀺𑀝𑁆𑀞𑀺𑀭𑀸𑀕𑁂𑀦 𑀳𑀺 𑀢𑁂𑀪𑀺𑀭𑀢𑁆𑀢𑀸, 𑀬𑀲𑁆𑀫𑀸 𑀲𑀓𑁂𑀦 𑀤𑀺𑀝𑁆𑀞𑀺𑀭𑀸𑀕𑁂𑀦 𑀢𑁂 𑀅𑀪𑀺𑀭𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑁂 𑀲𑀼𑀤𑁆𑀥𑀺𑀫𑀕𑁆𑀕𑀦𑁆𑀢𑀺 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀅𑀓𑀺𑀮𑀺𑀝𑁆𑀞𑀫𑀕𑁆𑀕𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀦𑁆𑀢𑀺 𑀦𑀺𑀤𑁆𑀤𑁄𑀲𑀫𑀕𑁆𑀕𑀁. 𑀧𑀭𑀺𑀲𑀼𑀤𑁆𑀥𑀺𑀫𑀕𑁆𑀕𑀦𑁆𑀢𑀺 𑀲𑀼𑀓𑁆𑀓𑀫𑀕𑁆𑀕𑀁. 𑀯𑁄𑀤𑀸𑀢𑀫𑀕𑁆𑀕𑀦𑁆𑀢𑀺 𑀧𑀡𑁆𑀟𑀭𑀫𑀕𑁆𑀕𑀁. 𑀧𑀭𑀺𑀬𑁄𑀤𑀸𑀢𑀫𑀕𑁆𑀕𑀦𑁆𑀢𑀺 𑀧𑀪𑀸𑀯𑀦𑁆𑀢𑀫𑀕𑁆𑀕𑀁. 𑀯𑀺𑀭𑀤𑁆𑀥𑀸𑀢𑀺 𑀯𑀼𑀢𑁆𑀢𑀯𑀺𑀥𑀺𑀦𑀸 𑀫𑀕𑁆𑀕𑁂𑀦 𑀯𑀺𑀭𑀚𑁆𑀛𑀺𑀢𑁆𑀯𑀸 𑀞𑀺𑀢𑀸. 𑀅𑀧𑀭𑀤𑁆𑀥𑀸𑀢𑀺 𑀅𑀧𑀭𑀚𑁆𑀛𑀺𑀢𑁆𑀯𑀸 𑀞𑀺𑀢𑀸. 𑀔𑀮𑀺𑀢𑀸𑀢𑀺 𑀧𑀭𑀺𑀳𑀻𑀦𑀸. 𑀕𑀮𑀺𑀢𑀸𑀢𑀺 𑀢𑀢𑁄 𑀪𑀝𑁆𑀞𑀸. 𑀅𑀜𑁆𑀜𑀸𑀬𑀸𑀢𑀺 𑀅𑀜𑁆𑀜𑀸𑀡𑁂𑀦. 𑀅𑀧𑀭𑀤𑁆𑀥𑀸𑀢𑀺 𑀧𑀭𑀸𑀚𑀬𑀫𑀸𑀧𑀦𑁆𑀦𑀸. 𑀅𑀣 𑀯𑀸 ‘‘𑀜𑀸𑀬𑀸𑀧𑀭𑀤𑁆𑀥𑀸’’𑀢𑀺𑀧𑀺 𑀧𑀸𑀞𑁄. 𑀜𑀸𑀬𑁂𑀦 𑀫𑀕𑁆𑀕𑁂𑀦 𑀯𑀺𑀭𑀤𑁆𑀥𑀸𑀢𑀺 𑀅𑀢𑁆𑀣𑁄.

𑁧𑁨𑁭. 𑀏𑀯𑀁 𑀅𑀪𑀺𑀭𑀢𑁆𑀢𑀸 𑀘 𑁋 𑀇𑀥𑁂𑀯 𑀲𑀼𑀤𑁆𑀥𑀺𑀦𑁆𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀓𑀸𑀬𑀦𑁂𑀢𑀺 𑀲𑀓𑀫𑀕𑁆𑀕𑁂. 𑀤𑀴𑁆𑀳𑀁 𑀯𑀤𑀸𑀦𑀸𑀢𑀺 𑀤𑀴𑁆𑀳𑀯𑀸𑀤𑀸.

𑀣𑀺𑀭𑀯𑀸𑀤𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀯𑀸𑀤𑀸. 𑀩𑀮𑀺𑀓𑀯𑀸𑀤𑀸𑀢𑀺 𑀩𑀮𑀯𑀦𑁆𑀢𑀯𑀸𑀤𑀸. 𑀅𑀯𑀝𑁆𑀞𑀺𑀢𑀯𑀸𑀤𑀸𑀢𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀓𑀣𑀺𑀢𑀯𑀸𑀤𑀸.

𑁧𑁨𑁮. 𑀬𑁂 𑀏𑀯𑀜𑁆𑀘 𑀤𑀴𑁆𑀳𑀯𑀸𑀤𑀸, 𑀢𑁂𑀲𑀼 𑀬𑁄 𑀓𑁄𑀘𑀺 𑀢𑀺𑀢𑁆𑀣𑀺𑀬𑁄 𑀲𑀓𑀸𑀬𑀦𑁂 𑀯𑀸𑀧𑀺 𑀤𑀴𑁆𑀳𑀁 𑀯𑀤𑀸𑀦𑁄 𑀓𑀫𑁂𑀢𑁆𑀣 𑀩𑀸𑀮𑁄𑀢𑀺 𑀧𑀭𑀁 𑀤𑀳𑁂𑀬𑁆𑀬, 𑀲𑀗𑁆𑀔𑁂𑀧𑀢𑁄 𑀢𑀢𑁆𑀣 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑁂 𑀯𑀺𑀢𑁆𑀣𑀸𑀭𑀢𑁄 𑀦𑀢𑁆𑀣𑀺𑀓𑀇𑀲𑁆𑀲𑀭𑀓𑀸𑀭𑀓𑀦𑀺𑀬𑀢𑀺𑀆𑀤𑀺𑀪𑁂𑀤𑁂 𑀲𑀓𑁂 𑀅𑀬𑀦𑁂 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀤𑀴𑁆𑀳𑀁 𑀯𑀤𑀸𑀦𑁄 𑀓𑀁 𑀧𑀭𑀁 𑀏𑀢𑁆𑀣 𑀤𑀺𑀝𑁆𑀞𑀺𑀕𑀢𑁂 ‘‘𑀩𑀸𑀮𑁄’’𑀢𑀺 𑀲𑀳 𑀥𑀫𑁆𑀫𑁂𑀦 𑀧𑀲𑁆𑀲𑁂𑀬𑁆𑀬, 𑀦𑀦𑀼 𑀲𑀩𑁆𑀩𑁄𑀧𑀺 𑀢𑀲𑁆𑀲 𑀫𑀢𑁂𑀦 𑀧𑀡𑁆𑀟𑀺𑀢𑁄 𑀏𑀯 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀏𑀯 𑀘. 𑀏𑀯𑀁 𑀲𑀦𑁆𑀢𑁂 𑀲𑀬𑀫𑁂𑀯 𑀲𑁄 𑀫𑁂𑀥𑀕𑀫𑀸𑀯𑀳𑁂𑀬𑁆𑀬, 𑀧𑀭𑀁 𑀯𑀤𑀁 𑀩𑀸𑀮𑀫𑀲𑀼𑀤𑁆𑀥𑀺𑀥𑀫𑁆𑀫𑀁. 𑀲𑁄𑀧𑀺 𑀧𑀭𑀁 ‘‘𑀩𑀸𑀮𑁄 𑀘 𑀅𑀲𑀼𑀤𑁆𑀥𑀺𑀥𑀫𑁆𑀫𑁄 𑀘 𑀅𑀬’’𑀦𑁆𑀢𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑀸𑀯 𑀓𑀮𑀳𑀁 𑀆𑀯𑀳𑁂𑀬𑁆𑀬. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀩𑁆𑀩𑁄𑀧𑀺 𑀢𑀲𑁆𑀲 𑀫𑀢𑁂𑀦 𑀧𑀡𑁆𑀟𑀺𑀢𑁄𑀬𑁂𑀯 𑀲𑀼𑀧𑁆𑀧𑀝𑀺𑀧𑀦𑁆𑀦𑁄𑀬𑁂𑀯 𑀘.

𑁧𑁨𑁯. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀲𑀬𑀁 𑀧𑀫𑀸𑀬, 𑀉𑀤𑁆𑀥𑀁 𑀲 𑀮𑁄𑀓𑀲𑁆𑀫𑀺𑀁 𑀯𑀺𑀯𑀸𑀤𑀫𑁂𑀢𑀻𑀢𑀺 𑀤𑀺𑀝𑁆𑀞𑀺𑀬𑀸 𑀞𑀢𑁆𑀯𑀸 𑀲𑀬𑀜𑁆𑀘 𑀲𑀢𑁆𑀣𑀸𑀭𑀸𑀤𑀺𑀁 𑀫𑀺𑀦𑀺𑀢𑁆𑀯𑀸 𑀲𑁄 𑀪𑀺𑀬𑁆𑀬𑁄 𑀯𑀺𑀯𑀸𑀤𑀫𑁂𑀢𑀻𑀢𑀺. 𑀏𑀯𑀁 𑀧𑀦 𑀯𑀺𑀦𑀺𑀘𑁆𑀙𑀬𑁂𑀲𑀼 𑀆𑀤𑀻𑀦𑀯𑀁 𑀜𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀳𑀺𑀢𑁆𑀯𑀸𑀦 𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀸𑀦𑀺, 𑀦 𑀫𑁂𑀥𑀕𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀲𑀬𑀁 𑀧𑀫𑀸𑀬𑀸𑀢𑀺 𑀅𑀢𑁆𑀢𑀦𑀸 𑀫𑀺𑀦𑀺𑀢𑁆𑀯𑀸. 𑀧𑀫𑀺𑀦𑀺𑀢𑁆𑀯𑀸𑀢𑀺 𑀧𑀫𑀸𑀡𑀁 𑀓𑀢𑁆𑀯𑀸. ‘‘𑀧𑀯𑀺𑀦𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀢𑀁 𑀦 𑀲𑀼𑀦𑁆𑀤𑀭𑀁. 𑀉𑀤𑁆𑀥𑀁 𑀯𑀸𑀤𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑀭𑀺 𑀓𑀣𑁂𑀦𑁆𑀢𑁂𑀦 𑀲𑀳. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑁂 (𑀫𑀳𑀸𑀦𑀺. 𑁮𑁩) 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀅𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.