𑁧𑁩. 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁦. 𑀢𑁂𑀭𑀲𑀫𑁂 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀬𑁂 𑀓𑁂𑀘𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺 𑀇𑀤𑀫𑁆𑀧𑀺 ‘‘𑀓𑀺𑀁 𑀦𑀼 𑀔𑁄 𑀇𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸 𑀯𑀺𑀜𑁆𑀜𑀽𑀦𑀁 𑀲𑀦𑁆𑀢𑀺𑀓𑀸 𑀦𑀺𑀦𑁆𑀤𑀫𑁂𑀯 𑀮𑀪𑀦𑁆𑀢𑀺, 𑀉𑀤𑀸𑀳𑀼 𑀧𑀲𑀁𑀲𑀫𑁆𑀧𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑀫𑀢𑁆𑀣𑀁 𑀆𑀯𑀺𑀓𑀸𑀢𑀼𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑁆𑀯𑀸𑀦𑀬𑀦𑁆𑀢𑀻𑀢𑀺 𑀅𑀦𑀼 𑀆𑀦𑀬𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀳𑀭𑀦𑁆𑀢𑀺.

𑀦𑀺𑀦𑁆𑀤𑀫𑁂𑀯 𑀅𑀦𑁆𑀯𑁂𑀦𑁆𑀢𑀻𑀢𑀺 𑀕𑀭𑀳𑀫𑁂𑀯 𑀉𑀧𑀕𑀘𑁆𑀙𑀦𑁆𑀢𑀺.

𑁧𑁩𑁧. 𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀯𑀤𑀦𑁆𑀢𑀸𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀯𑀸𑀤𑀺𑀦𑁄 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺, 𑀬𑀁 𑀏𑀢𑀁 𑀧𑀲𑀁𑀲𑀸𑀲𑀗𑁆𑀔𑀸𑀢𑀁 𑀯𑀸𑀤𑀨𑀮𑀁, 𑀢𑀁 𑀅𑀧𑁆𑀧𑀁, 𑀭𑀸𑀕𑀸𑀤𑀻𑀦𑀁 𑀲𑀫𑀸𑀬 𑀲𑀫𑀢𑁆𑀣𑀁 𑀦 𑀳𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀤𑀼𑀢𑀺𑀬𑁂 𑀦𑀺𑀦𑁆𑀤𑀸𑀨𑀮𑁂, 𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀢𑀸𑀯 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀁 𑀆𑀳 ‘‘𑀅𑀧𑁆𑀧𑀜𑁆𑀳𑀺 𑀏𑀢𑀁 𑀦 𑀅𑀮𑀁 𑀲𑀫𑀸𑀬, 𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀺 𑀩𑁆𑀭𑀽𑀫𑀻’’𑀢𑀺. 𑀢𑀢𑁆𑀣 𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀻𑀢𑀺 𑀦𑀺𑀦𑁆𑀤𑀸 𑀘 𑀧𑀲𑀁𑀲𑀸 𑀘 𑀚𑀬𑀧𑀭𑀸𑀚𑀬𑀸𑀤𑀻𑀦𑀺 𑀯𑀸 𑀢𑀁𑀲𑀪𑀸𑀕𑀸𑀦𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 ‘‘𑀦𑀺𑀦𑁆𑀤𑀸 𑀅𑀦𑀺𑀝𑁆𑀞𑀸 𑀏𑀯, 𑀧𑀲𑀁𑀲𑀸 𑀦𑀸𑀮𑀁 𑀲𑀫𑀸𑀬𑀸’’𑀢𑀺 𑀏𑀢𑀫𑁆𑀧𑀺 𑀯𑀺𑀯𑀸𑀤𑀨𑀮𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸. 𑀔𑁂𑀫𑀸𑀪𑀺𑀧𑀲𑁆𑀲𑀁 𑀅𑀯𑀺𑀯𑀸𑀤𑀪𑀽𑀫𑀺𑀦𑁆𑀢𑀺 𑀅𑀯𑀺𑀯𑀸𑀤𑀪𑀽𑀫𑀺𑀁 𑀦𑀺𑀩𑁆𑀩𑀸𑀦𑀁 𑀔𑁂𑀫𑀦𑁆𑀢𑀺 𑀧𑀲𑁆𑀲𑀫𑀸𑀦𑁄.

𑀅𑀧𑁆𑀧𑀓𑀦𑁆𑀢𑀺 𑀫𑀦𑁆𑀤𑀁. 𑀧𑀭𑀺𑀢𑁆𑀢𑀓𑀦𑁆𑀢𑀺 𑀣𑁄𑀓𑀁. 𑀑𑀫𑀓𑀦𑁆𑀢𑀺 𑀳𑁂𑀝𑁆𑀞𑀺𑀫𑀓𑀁. 𑀮𑀸𑀫𑀓𑀦𑁆𑀢𑀺 𑀧𑀸𑀧𑀓𑀁. 𑀲𑀫𑀸𑀬𑀸𑀢𑀺 𑀭𑀸𑀕𑀸𑀤𑀻𑀦𑀁 𑀲𑀫𑀦𑀢𑁆𑀣𑀸𑀬. 𑀉𑀧𑀲𑀫𑀸𑀬𑀸𑀢𑀺 𑀉𑀧𑀭𑀽𑀧𑀭𑀺 𑀲𑀫𑀦𑀢𑁆𑀣𑀸𑀬. 𑀯𑀽𑀧𑀲𑀫𑀸𑀬𑀸𑀢𑀺 𑀲𑀦𑁆𑀦𑀺𑀲𑀻𑀤𑀸𑀧𑀦𑀢𑁆𑀣𑀸𑀬. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬𑀸𑀢𑀺 𑀫𑀕𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀦𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬. 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀨𑀮𑁂𑀦 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀸𑀬 𑀦𑀸𑀮𑀁.

𑁧𑁩𑁨. 𑀏𑀯𑀜𑁆𑀳𑀺 𑀅𑀯𑀺𑀯𑀸𑀤𑀫𑀸𑀦𑁄 𑁋 𑀬𑀸 𑀓𑀸𑀘𑀺𑀫𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀬𑁄. 𑀧𑀼𑀣𑀼𑀚𑁆𑀚𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑀫𑁆𑀪𑀯𑀸. 𑀲𑁄 𑀉𑀧𑀬𑀁 𑀓𑀺𑀫𑁂𑀬𑁆𑀬𑀸𑀢𑀺 𑀲𑁄 𑀉𑀧𑀕𑀦𑁆𑀢𑀩𑁆𑀩𑀝𑁆𑀞𑁂𑀦 𑀉𑀧𑀬𑀁 𑀭𑀽𑀧𑀸𑀤𑀻𑀲𑀼 𑀏𑀓𑀫𑁆𑀧𑀺 𑀥𑀫𑁆𑀫𑀁 𑀓𑀺𑀁 𑀉𑀧𑁂𑀬𑁆𑀬, 𑀓𑁂𑀦 𑀯𑀸 𑀓𑀸𑀭𑀡𑁂𑀦 𑀉𑀧𑁂𑀬𑁆𑀬. 𑀤𑀺𑀝𑁆𑀞𑁂 𑀲𑀼𑀢𑁂 𑀔𑀦𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄𑀢𑀺 𑀤𑀺𑀝𑁆𑀞𑀲𑀼𑀢𑀲𑀼𑀤𑁆𑀥𑀻𑀲𑀼 𑀧𑁂𑀫𑀁 𑀅𑀓𑀭𑁄𑀦𑁆𑀢𑁄.

𑀧𑀼𑀣𑀼𑀚𑁆𑀚𑀦𑁂𑀳𑀺 𑀚𑀦𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀉𑀧𑁆𑀧𑀸𑀤𑀺𑀢𑀸. 𑀲𑀫𑁆𑀫𑀼𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀬𑁄. 𑀧𑀼𑀣𑀼 𑀦𑀸𑀦𑀸𑀚𑀦𑁂𑀳𑀺 𑀚𑀦𑀺𑀢𑀸 𑀯𑀸𑀢𑀺 𑀅𑀦𑁂𑀓𑀯𑀺𑀥𑁂𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀉𑀧𑁆𑀧𑀸𑀤𑀺𑀢𑀸 𑀯𑀸. 𑀦𑁂𑀢𑀻𑀢𑀺 𑀦 𑀏𑀢𑀺. 𑀦 𑀉𑀧𑁂𑀢𑀻𑀢𑀺 𑀲𑀫𑀻𑀧𑀁 𑀦 𑀏𑀢𑀺. 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀦𑀺𑀯𑀢𑁆𑀢𑀢𑀺. 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺 𑀧𑀯𑀺𑀲𑀺𑀢𑁆𑀯𑀸 𑀦𑀧𑁆𑀧𑀢𑀺𑀝𑁆𑀞𑀢𑀺.

𑁧𑁩𑁩. 𑀇𑀢𑁄 𑀩𑀸𑀳𑀺𑀭𑀸 𑀧𑀦 𑁋 𑀲𑀻𑀮𑀼𑀢𑁆𑀢𑀫𑀸𑀢𑀺 𑀕𑀸𑀣𑀸 𑀢𑀲𑁆𑀲𑀢𑁆𑀣𑁄 𑁋 𑀲𑀻𑀮𑀁𑀬𑁂𑀯 ‘‘𑀉𑀢𑁆𑀢𑀫’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀲𑀻𑀮𑀼𑀢𑁆𑀢𑀫𑀸𑀢𑀺 𑀏𑀓𑁂 𑀪𑁄𑀦𑁆𑀢𑁄 𑀲𑀁𑀬𑀫𑀫𑀢𑁆𑀢𑁂𑀦 𑀲𑀼𑀤𑁆𑀥𑀺𑀁 𑀯𑀤𑀦𑁆𑀢𑀺, 𑀳𑀢𑁆𑀣𑀺𑀯𑀢𑀸𑀤𑀺𑀜𑁆𑀘 𑀯𑀢𑀁 𑀲𑀫𑀸𑀤𑀸𑀬 𑀉𑀧𑀝𑁆𑀞𑀺𑀢𑀸𑀲𑁂. 𑀇𑀥𑁂𑀯 𑀤𑀺𑀝𑁆𑀞𑀺𑀬𑀁 𑀅𑀲𑁆𑀲 𑀲𑀢𑁆𑀣𑀼𑀦𑁄 𑀲𑀼𑀤𑁆𑀥𑀺𑀁 𑀪𑀯𑀽𑀧𑀦𑀻𑀢𑀸 𑀪𑀯𑀚𑁆𑀛𑁄𑀲𑀺𑀢𑀸 𑀲𑀫𑀸𑀦𑀸 𑀯𑀤𑀦𑁆𑀢𑀺, 𑀅𑀧𑀺 𑀘 𑀢𑁂 𑀓𑀼𑀲𑀮𑀸𑀯𑀤𑀸𑀦𑀸 ‘‘𑀓𑀼𑀲𑀮𑀸 𑀫𑀬’’𑀦𑁆𑀢𑀺 𑀏𑀯𑀁𑀯𑀸𑀤𑀸.

𑁧𑁩𑁪. 𑀏𑀯𑀁 𑀲𑀻𑀮𑀼𑀢𑁆𑀢𑀫𑁂𑀲𑀼 𑀘 𑀢𑁂𑀲𑀼 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀬𑁄 𑀓𑁄𑀘𑀺 𑁋 𑀲𑀘𑁂 𑀘𑀼𑀢𑁄𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀢𑀢𑁄 𑀲𑀻𑀮𑀯𑀢𑀢𑁄 𑀧𑀭𑀯𑀺𑀘𑁆𑀙𑀺𑀦𑁆𑀤𑀦𑁂𑀦 𑀯𑀸 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀯𑀸 𑀘𑀼𑀢𑁄 𑀳𑁄𑀢𑀺, 𑀲𑁄 𑀢𑀁 𑀲𑀻𑀮𑀩𑁆𑀩𑀢𑀓𑀫𑁆𑀫𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑀫𑁆𑀫𑀁 𑀯𑀸 𑀯𑀺𑀭𑀸𑀥𑀬𑀺𑀢𑁆𑀯𑀸 𑀯𑁂𑀥𑀢𑀻. 𑀦 𑀓𑁂𑀯𑀮𑀜𑁆𑀘 𑀯𑁂𑀥𑀢𑀺, 𑀅𑀧𑀺 𑀘 𑀔𑁄 𑀢𑀁 𑀲𑀻𑀮𑀩𑁆𑀩𑀢𑀲𑀼𑀤𑁆𑀥𑀺𑀁 𑀧𑀚𑀧𑁆𑀧𑀢𑀻 𑀘 𑀯𑀺𑀧𑁆𑀧𑀮𑀧𑀢𑀺 𑀘 𑀧𑀢𑁆𑀣𑀬𑀢𑀻 𑀘. 𑀓𑀺𑀫𑀺𑀯? 𑀲𑀢𑁆𑀣𑀸𑀯 𑀳𑀻𑀦𑁄 𑀧𑀯𑀲𑀁 𑀖𑀭𑀫𑁆𑀳𑀸, 𑀖𑀭𑀫𑁆𑀳𑀸 𑀧𑀯𑀲𑀦𑁆𑀢𑁄 𑀲𑀢𑁆𑀣𑀢𑁄 𑀳𑀻𑀦𑁄 𑀬𑀣𑀸 𑀢𑀁 𑀖𑀭𑀁 𑀯𑀸 𑀲𑀢𑁆𑀣𑀁 𑀯𑀸 𑀧𑀢𑁆𑀣𑀬𑀢𑀻𑀢𑀺.

𑀧𑀭𑀯𑀺𑀘𑁆𑀙𑀺𑀦𑁆𑀤𑀦𑀸𑀬 𑀯𑀸𑀢𑀺 𑀧𑀭𑁂𑀦 𑀯𑀸𑀭𑀺𑀬𑀫𑀸𑀦𑁄 𑀯𑀸. 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀯𑀸𑀢𑀺 𑀢𑀁 𑀧𑀝𑀺𑀧𑀢𑁆𑀢𑀺𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑁄 𑀯𑀸.

𑀅𑀜𑁆𑀜𑀸𑀬 𑀅𑀧𑀭𑀤𑁆𑀥𑁄𑀢𑀺 𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀳𑀻𑀦𑁄 𑀫𑀕𑁆𑀕𑀢𑁄 𑀯𑀸. 𑀢𑀁 𑀯𑀸 𑀲𑀢𑁆𑀣𑀁 𑀅𑀦𑀼𑀩𑀦𑁆𑀥𑀢𑀻𑀢𑀺 𑀢𑀁 𑀯𑀸 𑀲𑀢𑁆𑀣𑀁 𑀲𑀩𑁆𑀩𑀢𑁆𑀣 𑀧𑀘𑁆𑀙𑀢𑁄 𑀕𑀘𑁆𑀙𑀢𑀺.

𑁧𑁩𑁫. 𑀏𑀯𑀁 𑀧𑀦 𑀲𑀻𑀮𑀼𑀢𑁆𑀢𑀫𑀸𑀦𑀁 𑀧𑀯𑁂𑀥𑀦𑀓𑀸𑀭𑀡𑀁 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀦𑁆𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀦𑁆𑀢𑀺 𑀲𑀩𑁆𑀩𑀸𑀓𑀼𑀲𑀮𑀁 𑀮𑁄𑀓𑀺𑀬𑀓𑀼𑀲𑀮𑀜𑁆𑀘. 𑀏𑀢𑀁 𑀲𑀼𑀤𑁆𑀥𑀺𑀁 𑀅𑀲𑀼𑀤𑁆𑀥𑀺𑀦𑁆𑀢𑀺 𑀅𑀧𑀢𑁆𑀣𑀬𑀸𑀦𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀺𑀪𑁂𑀤𑀁 𑀲𑀼𑀤𑁆𑀥𑀺𑀁 𑀅𑀓𑀼𑀲𑀮𑀸𑀤𑀺𑀪𑁂𑀤𑀁 𑀅𑀲𑀼𑀤𑁆𑀥𑀺𑀜𑁆𑀘 𑀅𑀧𑀢𑁆𑀣𑀬𑀫𑀸𑀦𑁄. 𑀯𑀺𑀭𑀢𑁄 𑀘𑀭𑁂𑀢𑀺 𑀲𑀼𑀤𑁆𑀥𑀺𑀬𑀸 𑀅𑀲𑀼𑀤𑁆𑀥𑀺𑀬𑀸 𑀘 𑀯𑀺𑀭𑀢𑁄 𑀘𑀭𑁂𑀬𑁆𑀬. 𑀲𑀦𑁆𑀢𑀺 𑀫𑀦𑀼𑀕𑁆𑀕𑀳𑀸𑀬𑀸𑀢𑀺 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀢𑁆𑀯𑀸.

𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀦𑁆𑀢𑀺 𑀅𑀓𑀼𑀲𑀮𑀓𑀫𑁆𑀫𑀁 𑀅𑀓𑀼𑀲𑀮𑀯𑀺𑀧𑀸𑀓𑀤𑀸𑀬𑀓𑀁. 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀁 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀲𑀼𑀓𑁆𑀓𑀯𑀺𑀧𑀸𑀓𑀤𑀸𑀬𑀓𑀁.

𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀦𑁆𑀢𑀺 𑀫𑀕𑁆𑀕𑀧𑀯𑀺𑀲𑀦𑀁. 𑀲𑁂𑀓𑁆𑀔𑀸𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀅𑀕𑁆𑀕𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀫𑀥𑀫𑁆𑀫𑀁, 𑀅𑀭𑀳𑀢𑁆𑀢𑀨𑀮𑀁.

𑁧𑁩𑁬. 𑀏𑀯𑀁 𑀇𑀢𑁄 𑀩𑀸𑀳𑀺𑀭𑀓𑁂 𑀲𑀻𑀮𑀼𑀢𑁆𑀢𑀫𑁂 𑀲𑀁𑀬𑀫𑁂𑀦 𑀯𑀺𑀲𑀼𑀤𑁆𑀥𑀺𑀯𑀸𑀤𑁂 𑀢𑁂𑀲𑀜𑁆𑀘 𑀯𑀺𑀧𑀸𑀓𑀁 𑀲𑀻𑀮𑀩𑁆𑀩𑀢𑀧𑀳𑀸𑀬𑀺𑀦𑁄 𑀅𑀭𑀳𑀢𑁄 𑀘 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀲𑀼𑀤𑁆𑀥𑀺𑀯𑀸𑀤𑁂 𑀩𑀸𑀳𑀺𑀭𑀓𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀫𑀽𑀧𑀦𑀺𑀲𑁆𑀲𑀸𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀦𑁆𑀢𑀜𑁆𑀜𑁂𑀧𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀢𑁂 𑀚𑀺𑀕𑀼𑀘𑁆𑀙𑀺𑀢𑀁 𑀅𑀫𑀭𑀦𑁆𑀢𑀧𑀁 𑀯𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀆𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀉𑀧𑀦𑀺𑀲𑁆𑀲𑀸𑀬𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀬𑀸 𑀯𑀸 𑀉𑀤𑁆𑀥𑀁𑀲𑀭𑀸 𑀳𑀼𑀢𑁆𑀯𑀸 𑀪𑀯𑀸𑀪𑀯𑁂𑀲𑀼 𑀅𑀯𑀻𑀢𑀢𑀡𑁆𑀳𑀸 𑀲𑀼𑀤𑁆𑀥𑀺’𑀫𑀦𑀼𑀢𑁆𑀣𑀼𑀦𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀻𑀢𑀺.

𑀢𑀧𑁄𑀚𑀺𑀕𑀼𑀘𑁆𑀙𑀯𑀸𑀤𑀸𑀢𑀺 𑀓𑀸𑀬𑀧𑀻𑀴𑀦𑀸𑀤𑀺𑀢𑀧𑁂𑀦 𑀧𑀸𑀧𑀳𑀺𑀭𑀻𑀬𑀦𑀯𑀸𑀤𑀸. 𑀢𑀧𑁄𑀚𑀺𑀕𑀼𑀘𑁆𑀙𑀲𑀸𑀭𑀸𑀢𑀺 𑀢𑁂𑀦𑁂𑀯 𑀢𑀧𑁂𑀦 𑀳𑀺𑀭𑀻𑀬𑀦𑀲𑀸𑀭𑀯𑀦𑁆𑀢𑁄. 𑀉𑀤𑁆𑀥𑀁𑀲𑀭𑀸𑀯𑀸𑀤𑀸𑀢𑀺 𑀲𑀁𑀲𑀸𑀭𑁂𑀦 𑀲𑀼𑀤𑁆𑀥𑀺𑀁 𑀓𑀣𑀬𑀦𑁆𑀢𑀸.

𑁧𑁩𑁭. 𑀏𑀯𑀁 𑀢𑁂𑀲𑀁 𑀅𑀯𑀻𑀢𑀢𑀡𑁆𑀳𑀸𑀦𑀁 𑀲𑀼𑀤𑁆𑀥𑀺𑀁 𑀅𑀦𑀼𑀢𑁆𑀣𑀼𑀦𑀦𑁆𑀢𑀸𑀦𑀁 𑀬𑁄𑀧𑀺 𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀫𑁂𑀯 𑀅𑀢𑁆𑀢𑀸𑀦𑀁 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀲𑀸𑀧𑀺 𑀅𑀯𑀻𑀢𑀢𑀡𑁆𑀳𑀢𑁆𑀢𑀸 𑀪𑀯𑀸𑀪𑀯𑁂𑀲𑀼 𑀢𑀁 𑀢𑀁 𑀯𑀢𑁆𑀣𑀼𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀳𑀺 𑀚𑀧𑁆𑀧𑀺𑀢𑀸𑀦𑀺 𑀧𑀼𑀦𑀧𑁆𑀧𑀼𑀦𑀁 𑀳𑁄𑀦𑁆𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀡𑁆𑀳𑀸 𑀳𑀺 𑀆𑀲𑁂𑀯𑀺𑀢𑀸 𑀢𑀡𑁆𑀳𑀁 𑀯𑀟𑁆𑀠𑀬𑀢𑁂𑀯, 𑀦 𑀓𑁂𑀯𑀮𑀜𑁆𑀘 𑀚𑀧𑁆𑀧𑀺𑀢𑀸𑀦𑀺, 𑀧𑀯𑁂𑀥𑀺𑀢𑀁 𑀯𑀸𑀧𑀺 𑀧𑀓𑀧𑁆𑀧𑀺𑀢𑁂𑀲𑀼, 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀘𑀲𑁆𑀲 𑀧𑀓𑀧𑁆𑀧𑀺𑀢𑁂𑀲𑀼 𑀯𑀢𑁆𑀣𑀽𑀲𑀼 𑀧𑀯𑁂𑀥𑀺𑀢𑀫𑁆𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀯𑀸𑀪𑀯𑁂𑀲𑀼 𑀧𑀦 𑀯𑀻𑀢𑀢𑀡𑁆𑀳𑀢𑁆𑀢𑀸 𑀆𑀬𑀢𑀺𑀁 𑀘𑀼𑀢𑀽𑀧𑀧𑀸𑀢𑁄 𑀇𑀥 𑀬𑀲𑁆𑀲 𑀦𑀢𑁆𑀣𑀺, 𑀲 𑀓𑁂𑀦 𑀯𑁂𑀥𑁂𑀬𑁆𑀬 𑀓𑀼𑀳𑀺𑀁 𑀯 𑀚𑀧𑁆𑀧𑁂𑀢𑀺 𑀅𑀬𑀫𑁂𑀢𑀺𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄.

𑀆𑀕𑀫𑀦𑀦𑁆𑀢𑀺 𑀧𑀼𑀦 𑀆𑀕𑀫𑀦𑀁. 𑀕𑀫𑀦𑀦𑁆𑀢𑀺 𑀇𑀢𑁄 𑀅𑀜𑁆𑀜𑀢𑁆𑀣 𑀕𑀫𑀦𑀁. 𑀕𑀫𑀦𑀸𑀕𑀫𑀦𑀦𑁆𑀢𑀺 𑀇𑀢𑁄 𑀕𑀦𑁆𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀦𑀁. 𑀓𑀸𑀮𑀦𑁆𑀢𑀺 𑀫𑀭𑀡𑀁. 𑀕𑀢𑀻𑀢𑀺 𑀕𑀫𑀦𑀯𑀲𑁂𑀦 𑀕𑀢𑀺𑀬𑀸 𑀕𑀦𑁆𑀢𑀩𑁆𑀩𑀁.

𑁧𑁩𑁮. 𑀬𑀫𑀸𑀳𑀼 𑀥𑀫𑁆𑀫𑀦𑁆𑀢𑀺 𑀧𑀼𑀘𑁆𑀙𑀸𑀕𑀸𑀣𑀸.

𑁧𑁩𑁯. 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀓𑁄𑀧𑀺 𑀏𑀢𑁆𑀣 𑀯𑀸𑀤𑁄 𑀲𑀘𑁆𑀘𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀤𑀺𑀝𑁆𑀞𑀺𑀫𑀢𑁆𑀢𑀓𑁂𑀦 𑀳𑀺 𑀢𑁂 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀓𑀁 𑀳𑀻’’𑀢𑀺 𑀇𑀫𑀁 𑀢𑀸𑀯 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀦𑁆𑀢𑀺 𑀤𑀺𑀝𑁆𑀞𑀺𑀁. 𑀅𑀦𑁄𑀫𑀦𑁆𑀢𑀺 𑀅𑀦𑀽𑀦𑀁.

𑁧𑁪𑁦. 𑀏𑀯𑀫𑁂𑀢𑁂𑀲𑀼 𑀲𑀓𑀁 𑀥𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀁 𑀩𑁆𑀭𑀽𑀯𑀦𑁆𑀢𑁂𑀲𑀼 𑀅𑀜𑁆𑀜𑀲𑁆𑀲 𑀥𑀫𑁆𑀫𑀁 𑀧𑀦 𑀳𑀻𑀦𑀦𑁆𑀢𑀺 𑀯𑀤𑀦𑁆𑀢𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑁋 𑀧𑀭𑀲𑁆𑀲 𑀘𑁂 𑀯𑀫𑁆𑀪𑀬𑀺𑀢𑁂𑀦 𑀳𑀻𑀦𑁄𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀧𑀭𑀲𑁆𑀲 𑀦𑀺𑀦𑁆𑀤𑀺𑀢𑀓𑀸𑀭𑀡𑀸 𑀳𑀻𑀦𑁄 𑀪𑀯𑁂𑀬𑁆𑀬, 𑀦 𑀓𑁄𑀘𑀺 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀕𑁆𑀕𑁄 𑀪𑀯𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀧𑀼𑀣𑀽 𑀳𑀺 𑀅𑀜𑁆𑀜𑀲𑁆𑀲 𑀯𑀤𑀦𑁆𑀢𑀺 𑀥𑀫𑁆𑀫𑀁 𑀦𑀺𑀳𑀻𑀦𑀢𑁄 𑀲𑀩𑁆𑀩𑁂𑀯 𑀢𑁂 𑀲𑀫𑁆𑀳𑀺 𑀤𑀴𑁆𑀳𑀁 𑀯𑀤𑀸𑀦𑀸𑀲𑀓𑀥𑀫𑁆𑀫𑁂 𑀤𑀴𑁆𑀳𑀯𑀸𑀤𑀸 𑀏𑀯.

𑀯𑀫𑁆𑀪𑀬𑀺𑀢𑀓𑀸𑀭𑀡𑀸𑀢𑀺 𑀥𑀁𑀲𑀺𑀢𑀓𑀸𑀭𑀡𑀸. 𑀕𑀭𑀳𑀺𑀢𑀓𑀸𑀭𑀡𑀸𑀢𑀺 𑀮𑀸𑀫𑀓𑀓𑀢𑀓𑀸𑀭𑀡𑀸. 𑀉𑀧𑀯𑀤𑀺𑀢𑀓𑀸𑀭𑀡𑀸𑀢𑀺 𑀅𑀓𑁆𑀓𑁄𑀲𑀺𑀢𑀓𑀸𑀭𑀡𑀸. 𑀲𑀓𑀸𑀬𑀦𑀦𑁆𑀢𑀺 𑀲𑀓𑀫𑀕𑁆𑀕𑀁.

𑁧𑁪𑁧. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀤𑁆𑀥𑀫𑁆𑀫𑀧𑀽𑀚𑀸𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀢𑁂 𑀘 𑀢𑀺𑀢𑁆𑀣𑀺𑀬𑀸 𑀬𑀣𑀸 𑀧𑀲𑀁𑀲𑀦𑁆𑀢𑀺 𑀲𑀓𑀸𑀬𑀦𑀸𑀦𑀺, 𑀲𑀤𑁆𑀥𑀫𑁆𑀫𑀧𑀽𑀚𑀸𑀧𑀺 𑀦𑁂𑀲𑀁 𑀢𑀣𑁂𑀯 𑀯𑀢𑁆𑀢𑀢𑀺. 𑀢𑁂 𑀳𑀺 𑀅𑀢𑀺𑀯𑀺𑀬 𑀲𑀢𑁆𑀣𑀸𑀭𑀸𑀤𑀻𑀦𑀺 𑀲𑀢𑁆𑀢𑀭𑁄𑀦𑁆𑀢𑀺. 𑀢𑀢𑁆𑀣 𑀬𑀤𑀺 𑀢𑁂 𑀧𑀫𑀸𑀡𑀸 𑀲𑀺𑀬𑀼𑀁, 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂𑀯 𑀯𑀸𑀤𑀸 𑀢𑀣𑀺𑀬𑀸 𑀪𑀯𑁂𑀬𑁆𑀬𑀼𑀁. 𑀓𑀺𑀁𑀓𑀸𑀭𑀡𑀸? 𑀲𑀼𑀤𑁆𑀥𑀻 𑀳𑀺 𑀦𑁂𑀲𑀁 𑀧𑀘𑁆𑀘𑀢𑁆𑀢𑀫𑁂𑀯. 𑀦 𑀲𑀸 𑀅𑀜𑁆𑀜𑀢𑁆𑀣 𑀲𑀺𑀚𑁆𑀛𑀢𑀺, 𑀦𑀸𑀧𑀺 𑀧𑀭𑀫𑀢𑁆𑀣𑀢𑁄. 𑀅𑀢𑁆𑀢𑀦𑀺 𑀤𑀺𑀝𑁆𑀞𑀺𑀕𑀸𑀳𑀫𑀢𑁆𑀢𑀫𑁂𑀯 𑀳𑀺 𑀢𑀁 𑀢𑁂𑀲𑀁 𑀧𑀭𑀧𑀘𑁆𑀘𑀬𑀦𑁂𑀬𑁆𑀬𑀩𑀼𑀤𑁆𑀥𑀻𑀦𑀁. 𑀧𑀘𑁆𑀘𑀢𑁆𑀢𑀫𑁂𑀯𑀸𑀢𑀺 𑀧𑀸𑀝𑁂𑀓𑁆𑀓𑀫𑁂𑀯.

𑁧𑁪𑁨. 𑀬𑁄 𑀧𑀦 𑀯𑀺𑀧𑀭𑀻𑀢𑀢𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀢𑀲𑁆𑀲 𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀫𑀢𑁆𑀣𑀻𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀼𑀤𑀺𑀝𑁆𑀞𑀢𑁆𑀢𑀸 𑀧𑀭𑁂𑀦 𑀦𑁂𑀢𑀩𑁆𑀩𑀁 𑀜𑀸𑀡𑀁 𑀦𑀢𑁆𑀣𑀺. 𑀤𑀺𑀝𑁆𑀞𑀺𑀥𑀫𑁆𑀫𑁂𑀲𑀼 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀼𑀫𑀕𑁆𑀕𑀳𑀻𑀢𑀫𑁆𑀧𑀺 𑀦𑀢𑁆𑀣𑀺. 𑀢𑀁𑀓𑀸𑀭𑀡𑀸 𑀲𑁄 𑀤𑀺𑀝𑁆𑀞𑀺𑀓𑀮𑀳𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑁄, 𑀦 𑀳𑀺 𑀲𑁄 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜𑀁 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀳𑀺.

𑀦 𑀧𑀭𑀦𑁂𑀬𑁆𑀬𑁄𑀢𑀺 𑀧𑀭𑁂𑀦 𑀦𑁂𑀢𑀩𑁆𑀩𑁄 𑀚𑀸𑀦𑀸𑀧𑁂𑀢𑀩𑁆𑀩𑁄 𑀦 𑀳𑁄𑀢𑀺. 𑀦 𑀧𑀭𑀧𑀢𑁆𑀢𑀺𑀬𑁄 𑀦 𑀧𑀭𑀧𑀘𑁆𑀘𑀬𑁄𑀢𑀺 𑀧𑀭𑁂𑀲𑀁 𑀧𑀘𑁆𑀘𑁂𑀢𑀩𑁆𑀩𑁄 𑀦 𑀳𑁄𑀢𑀺. 𑀦 𑀧𑀭𑀧𑀝𑀺𑀩𑀤𑁆𑀥𑀕𑀽𑀢𑀺 𑀧𑀭𑁂𑀲𑀁 𑀧𑀝𑀺𑀩𑀤𑁆𑀥𑀕𑀫𑀦𑁄 𑀦 𑀳𑁄𑀢𑀺.

𑁧𑁪𑁩. 𑀚𑀸𑀦𑀸𑀫𑀻𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀏𑀯𑀁 𑀢𑀸𑀯 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄 𑀦 𑀳𑀺 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜𑀁, 𑀅𑀜𑁆𑀜𑁂 𑀧𑀦 𑀢𑀺𑀢𑁆𑀣𑀺𑀬𑀸 𑀧𑀭𑀘𑀺𑀢𑁆𑀢𑀜𑀸𑀡𑀸𑀤𑀻𑀳𑀺 𑀚𑀸𑀦𑀦𑁆𑀢𑀸𑀧𑀺 𑀧𑀲𑁆𑀲𑀦𑁆𑀢𑀸𑀧𑀺 ‘‘𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢’’𑀦𑁆𑀢𑀺 𑀏𑀯𑀁 𑀯𑀤𑀦𑁆𑀢𑀸𑀧𑀺 𑀘 𑀤𑀺𑀝𑁆𑀞𑀺𑀬𑀸 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑁂𑀲𑀼 𑀏𑀓𑁄𑀧𑀺 𑀅𑀤𑀓𑁆𑀔𑀺 𑀘𑁂 𑀅𑀤𑁆𑀤𑀲 𑀘𑁂𑀧𑀺 𑀢𑁂𑀦 𑀧𑀭𑀘𑀺𑀢𑁆𑀢𑀜𑀸𑀡𑀸𑀤𑀺𑀦𑀸 𑀬𑀣𑀸𑀪𑀽𑀢𑀫𑀢𑁆𑀣𑀁, 𑀓𑀺𑀜𑁆𑀳𑀺 𑀢𑀼𑀫𑀲𑁆𑀲 𑀢𑁂𑀦 𑀢𑀲𑁆𑀲 𑀢𑁂𑀦 𑀤𑀲𑁆𑀲𑀦𑁂𑀦 𑀓𑀺𑀁 𑀓𑀢𑀁, 𑀓𑀺𑀁 𑀤𑀼𑀓𑁆𑀔𑀧𑀭𑀺𑀜𑁆𑀜𑀸 𑀲𑀸𑀥𑀺𑀢𑀸, 𑀉𑀤𑀸𑀳𑀼 𑀲𑀫𑀼𑀤𑀬𑀧𑁆𑀧𑀳𑀸𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀁, 𑀬𑀢𑁄 𑀲𑀩𑁆𑀩𑀣𑀸𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀢𑁂 𑀢𑀺𑀢𑁆𑀣𑀺𑀬𑀸 𑀅𑀜𑁆𑀜𑁂𑀦𑁂𑀯 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸 𑀢𑁂 𑀢𑀺𑀢𑁆𑀣𑀺𑀬𑁂 𑀩𑀼𑀤𑁆𑀥𑀸𑀤𑀬𑁄 𑀅𑀜𑁆𑀜𑁂𑀦𑁂𑀯 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺.

𑁧𑁪𑁪. 𑀧𑀲𑁆𑀲𑀁 𑀦𑀭𑁄𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀬𑁆𑀯𑀸𑀬𑀁 𑀧𑀭𑀘𑀺𑀢𑁆𑀢𑀜𑀸𑀡𑀸𑀤𑀻𑀳𑀺 𑀅𑀤𑁆𑀤𑀓𑁆𑀔𑀺, 𑀲𑁄 𑀧𑀲𑁆𑀲𑀁 𑀦𑀭𑁄 𑀤𑀓𑁆𑀔𑀢𑀺 𑀦𑀸𑀫𑀭𑀽𑀧𑀁, 𑀦 𑀢𑀢𑁄 𑀧𑀭𑀁, 𑀤𑀺𑀲𑁆𑀯𑀸𑀦 𑀯𑀸 𑀜𑀲𑁆𑀲𑀢𑀺 𑀢𑀸𑀦𑀺𑀫𑁂𑀯 𑀦𑀸𑀫𑀭𑀽𑀧𑀸𑀦𑀺 𑀦𑀺𑀘𑁆𑀘𑀢𑁄 𑀲𑀼𑀔𑀢𑁄 𑀯𑀸, 𑀦 𑀅𑀜𑁆𑀜𑀣𑀸; 𑀲𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀓𑀸𑀫𑀁 𑀩𑀳𑀼𑀁 𑀧𑀲𑁆𑀲𑀢𑀼 𑀅𑀧𑁆𑀧𑀓𑀁 𑀯𑀸 𑀦𑀸𑀫𑀭𑀽𑀧𑀁 𑀦𑀺𑀘𑁆𑀘𑀢𑁄 𑀲𑀼𑀔𑀢𑁄 𑀘 𑀅𑀣𑀲𑁆𑀲 𑀏𑀯𑀭𑀽𑀧𑁂𑀦 𑀤𑀲𑁆𑀲𑀦𑁂𑀦 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑁧𑁪𑁫. 𑀦𑀺𑀯𑀺𑀲𑁆𑀲𑀯𑀸𑀤𑀻𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀢𑁂𑀦 𑀘 𑀤𑀲𑁆𑀲𑀦𑁂𑀦 𑀲𑀼𑀤𑁆𑀥𑀺𑀬𑀸 𑀅𑀲𑀢𑀺𑀬𑀸𑀧𑀺 𑀬𑁄 ‘‘𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢’’𑀦𑁆𑀢𑀺 𑀏𑀯𑀁 𑀦𑀺𑀯𑀺𑀲𑁆𑀲𑀯𑀸𑀤𑀻, 𑀏𑀢𑀁 𑀯𑀸 𑀤𑀲𑁆𑀲𑀦𑀁 𑀧𑀝𑀺𑀘𑁆𑀘 𑀤𑀺𑀝𑁆𑀞𑀺𑀬𑀸 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀦𑁆𑀢𑁄 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀏𑀯𑀁 𑀦𑀺𑀯𑀺𑀲𑁆𑀲𑀯𑀸𑀤𑀻, 𑀲𑁄 𑀲𑀼𑀩𑁆𑀩𑀺𑀦𑀬𑁄 𑀦 𑀳𑁄𑀢𑀺 𑀢𑀁 𑀢𑀣𑀸 𑀧𑀓𑀧𑁆𑀧𑀺𑀢𑀁 𑀅𑀪𑀺𑀲𑀗𑁆𑀔𑀢𑀁 𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀭𑀸𑀦𑁄. 𑀲𑁄 𑀳𑀺 𑀬𑀁 𑀲𑀢𑁆𑀣𑀸𑀭𑀸𑀤𑀺𑀁 𑀦𑀺𑀲𑁆𑀲𑀺𑀢𑁄, 𑀢𑀢𑁆𑀣𑁂𑀯 𑀲𑀼𑀪𑀁 𑀯𑀤𑀸𑀦𑁄 𑀲𑀼𑀤𑁆𑀥𑀺𑀁 𑀯𑀤𑁄, ‘‘𑀧𑀭𑀺𑀲𑀼𑀤𑁆𑀥𑀺𑀯𑀸𑀤𑁄 𑀧𑀭𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑁄 𑀯𑀸 𑀅𑀳’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀫𑀜𑁆𑀜𑀫𑀸𑀦𑁄 𑀢𑀢𑁆𑀣 𑀢𑀣𑀤𑁆𑀤𑀲𑀸 𑀲𑁄, 𑀢𑀢𑁆𑀣 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀯𑀺𑀧𑀭𑀻𑀢𑀫𑁂𑀯 𑀲𑁄 𑀅𑀤𑁆𑀤𑀲. 𑀬𑀣𑀸 𑀲𑀸 𑀤𑀺𑀝𑁆𑀞𑀺 𑀧𑀯𑀢𑁆𑀢𑀢𑀺, 𑀢𑀣𑁂𑀯 𑀢𑀁 𑀅𑀤𑁆𑀤𑀲, 𑀦 𑀅𑀜𑁆𑀜𑀣𑀸 𑀧𑀲𑁆𑀲𑀺𑀢𑀼𑀁 𑀇𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀯𑀺𑀲𑁆𑀲𑀯𑀸𑀤𑀻𑀢𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀓𑀣𑁂𑀦𑁆𑀢𑁄. 𑀤𑀼𑀩𑁆𑀩𑀺𑀦𑀬𑁄𑀢𑀺 𑀯𑀺𑀦𑁂𑀢𑀼𑀁 𑀤𑀼𑀓𑁆𑀔𑁄. 𑀤𑀼𑀧𑁆𑀧𑀜𑁆𑀜𑀸𑀧𑀬𑁄𑀢𑀺 𑀜𑀸𑀧𑁂𑀢𑀼𑀁 𑀘𑀺𑀢𑁆𑀢𑁂𑀦 𑀮𑀩𑁆𑀪𑀸𑀧𑁂𑀢𑀼𑀁 𑀤𑀼𑀓𑁆𑀔𑁄. 𑀤𑀼𑀦𑁆𑀦𑀺𑀚𑁆𑀛𑀸𑀧𑀬𑁄𑀢𑀺 𑀘𑀺𑀢𑁆𑀢𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑀡𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀦𑀺𑀚𑁆𑀛𑀸𑀧𑀬𑀺𑀢𑀼𑀁 𑀤𑀼𑀓𑁆𑀔𑁄. 𑀤𑀼𑀧𑁆𑀧𑁂𑀓𑁆𑀔𑀸𑀧𑀬𑁄𑀢𑀺 𑀇𑀓𑁆𑀔𑀸𑀧𑀬𑀺𑀢𑀼𑀁 𑀤𑀼𑀓𑁆𑀔𑁄. 𑀤𑀼𑀧𑁆𑀧𑀲𑀸𑀤𑀬𑁄𑀢𑀺 𑀘𑀺𑀢𑁆𑀢𑁂 𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀢𑀼𑀁 𑀤𑀼𑀓𑁆𑀔𑁄.

𑀅𑀧𑁆𑀧𑀲𑁆𑀲𑀻𑀢𑀺 𑀜𑀸𑀡𑁂𑀦 𑀧𑀝𑀺𑀯𑁂𑀥𑀁 𑀧𑀸𑀧𑀼𑀡𑀺. 𑀧𑀝𑀺𑀯𑀺𑀚𑁆𑀛𑀻𑀢𑀺 𑀘𑀺𑀢𑁆𑀢𑁂𑀦 𑀅𑀯𑀩𑁄𑀥𑀁 𑀧𑀸𑀧𑀼𑀡𑀺.

𑁧𑁪𑁬. 𑀏𑀯𑀁 𑀧𑀓𑀧𑁆𑀧𑀺𑀢𑀁 𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀭𑀸𑀦𑁂𑀲𑀼 𑀢𑀺𑀢𑁆𑀣𑀺𑀬𑁂𑀲𑀼 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀓𑀧𑁆𑀧𑀫𑀼𑀧𑁂𑀢𑀺 𑀲𑀗𑁆𑀔𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀗𑁆𑀔𑀸𑀢𑀺 𑀲𑀗𑁆𑀔𑀸𑀬, 𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀧𑀺 𑀜𑀸𑀡𑀩𑀦𑁆𑀥𑀽𑀢𑀺 𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀤𑀺𑀦𑀸 𑀅𑀓𑀢𑀢𑀡𑁆𑀳𑀸𑀤𑀺𑀝𑁆𑀞𑀺𑀩𑀦𑁆𑀥𑀼. 𑀢𑀢𑁆𑀣 𑀯𑀺𑀕𑁆𑀕𑀳𑁄 𑁋 𑀦𑀸𑀧𑀺 𑀅𑀲𑁆𑀲 𑀜𑀸𑀡𑁂𑀦 𑀓𑀢𑁄 𑀩𑀦𑁆𑀥𑀼 𑀅𑀢𑁆𑀣𑀻𑀢𑀺 𑀦𑀧𑀺 𑀜𑀸𑀡𑀩𑀦𑁆𑀥𑀼. 𑀲𑀫𑁆𑀫𑀼𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀲𑀫𑁆𑀫𑀼𑀢𑀺𑀬𑁄. 𑀧𑀼𑀣𑀼𑀚𑁆𑀚𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑀫𑁆𑀪𑀯𑀸. 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂𑀢𑀺 𑀉𑀕𑁆𑀕𑀳𑀡𑀦𑁆𑀢𑀺 𑀅𑀜𑁆𑀜𑁂, 𑀅𑀜𑁆𑀜𑁂 𑀢𑀸 𑀲𑀫𑁆𑀫𑀼𑀢𑀺𑀬𑁄 𑀉𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀧𑁂𑀓𑁆𑀔𑀢𑀻𑀢𑀺 𑀉𑀧𑀧𑀢𑁆𑀢𑀺𑀢𑁄 𑀅𑀧𑀓𑁆𑀔𑀧𑀢𑀺𑀢𑁄 𑀳𑀼𑀢𑁆𑀯𑀸 𑀧𑀲𑁆𑀲𑀢𑀺.

𑁧𑁪𑁭. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀯𑀺𑀲𑁆𑀲𑀚𑁆𑀚 𑀕𑀦𑁆𑀣𑀸𑀦𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀅𑀦𑀼𑀕𑁆𑀕𑀳𑁄𑀢𑀺 𑀉𑀕𑁆𑀕𑀳𑀡𑀯𑀺𑀭𑀳𑀺𑀢𑁄, 𑀲𑁄𑀧𑀺 𑀦𑀸𑀲𑁆𑀲 𑀉𑀕𑁆𑀕𑀳𑁄𑀢𑀺 𑀅𑀦𑀼𑀕𑁆𑀕𑀳𑁄. 𑀦 𑀯𑀸 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 𑀅𑀦𑀼𑀕𑁆𑀕𑀳𑁄.

𑀕𑀦𑁆𑀣𑁂 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀅𑀪𑀺𑀚𑁆𑀛𑀸𑀤𑀺𑀓𑁂 𑀕𑀦𑁆𑀣𑁂 𑀘𑀚𑀺𑀢𑁆𑀯𑀸. 𑀯𑀺𑀲𑁆𑀲𑀚𑁆𑀚𑀸𑀢𑀺 𑀧𑀼𑀦 𑀅𑀦𑀸𑀤𑀺𑀬𑀦𑀯𑀲𑁂𑀦 𑀚𑀳𑀺𑀢𑁆𑀯𑀸. 𑀕𑀥𑀺𑀢𑁂𑀢𑀺 𑀖𑀝𑀺𑀢𑁂. 𑀕𑀦𑁆𑀣𑀺𑀢𑁂𑀢𑀺 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑁂 𑀯𑀺𑀬 𑀕𑀦𑁆𑀣𑀺𑀢𑁂. 𑀩𑀦𑁆𑀥𑁂𑀢𑀺 𑀲𑀼𑀝𑁆𑀞𑀼 𑀩𑀦𑁆𑀥𑁂. 𑀯𑀺𑀩𑀦𑁆𑀥𑁂𑀢𑀺 𑀯𑀺𑀯𑀺𑀥𑀸 𑀩𑀦𑁆𑀥𑁂. 𑀧𑀮𑀺𑀩𑀼𑀤𑁆𑀥𑁂𑀢𑀺 𑀲𑀫𑀦𑁆𑀢𑀢𑁄 𑀩𑀦𑁆𑀥𑀦𑁂𑀦 𑀩𑀦𑁆𑀥𑁂. 𑀩𑀦𑁆𑀥𑀦𑁂𑀢𑀺 𑀓𑀺𑀮𑁂𑀲𑀩𑀦𑁆𑀥𑀦𑁂. 𑀨𑁄𑀝𑀬𑀺𑀢𑁆𑀯𑀸𑀢𑀺 𑀧𑀧𑁆𑀨𑁄𑀝𑁂𑀢𑁆𑀯𑀸. 𑀲𑀘𑁆𑀘𑀁 𑀯𑀺𑀲𑁆𑀲𑀚𑁆𑀚𑀁 𑀓𑀭𑁄𑀦𑁆𑀢𑀻𑀢𑀺 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀧𑀭𑀺𑀪𑁄𑀕𑀁 𑀓𑀭𑁄𑀦𑁆𑀢𑀺. 𑀯𑀺𑀓𑁄𑀧𑁂𑀦𑁆𑀢𑀻𑀢𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑀺.

𑁧𑁪𑁮. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑁄 𑀏𑀯𑀭𑀽𑀧𑁄 𑁋 𑀧𑀼𑀩𑁆𑀩𑀸𑀲𑀯𑁂𑀢𑀺 𑀕𑀸𑀣𑀸. 𑀢𑀢𑁆𑀣 𑀧𑀼𑀩𑁆𑀩𑀸𑀲𑀯𑁂𑀢𑀺 𑀅𑀢𑀻𑀢𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀓𑀺𑀮𑁂𑀲𑁂. 𑀦𑀯𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑁂. 𑀦 𑀙𑀦𑁆𑀤𑀕𑀽𑀢𑀺 𑀙𑀦𑁆𑀤𑀸𑀤𑀺𑀯𑀲𑁂𑀦 𑀦 𑀕𑀘𑁆𑀙𑀢𑀺. 𑀅𑀦𑀢𑁆𑀢𑀕𑀭𑀳𑀻𑀢𑀺 𑀓𑀢𑀸𑀓𑀢𑀯𑀲𑁂𑀦 𑀅𑀢𑁆𑀢𑀸𑀦𑀁 𑀅𑀕𑀭𑀳𑀦𑁆𑀢𑁄.

𑁧𑁪𑁯. 𑀏𑀯𑀁 𑀅𑀦𑀢𑁆𑀢𑀕𑀭𑀳𑀻 𑀘 𑁋 𑀲 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀥𑀫𑁆𑀫𑁂𑀲𑀼 ‘‘𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯𑀸’’𑀢𑀺 𑀏𑀯𑀁𑀧𑀪𑁂𑀤𑁂𑀲𑀼. 𑀧𑀦𑁆𑀦𑀪𑀸𑀭𑁄𑀢𑀺 𑀧𑀢𑀺𑀢𑀪𑀸𑀭𑁄. 𑀦 𑀓𑀧𑁆𑀧𑁂𑀢𑀻𑀢𑀺 𑀦 𑀓𑀧𑁆𑀧𑀺𑀬𑁄, 𑀤𑀼𑀯𑀺𑀥𑀫𑁆𑀧𑀺 𑀓𑀧𑁆𑀧𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀽𑀧𑀭𑀢𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁂𑀓𑁆𑀔𑀸 𑀯𑀺𑀬 𑀉𑀧𑀭𑀢𑀺𑀲𑀫𑀗𑁆𑀕𑀻𑀧𑀺 𑀦𑁄 𑀳𑁄𑀢𑀺. 𑀦 𑀧𑀢𑁆𑀣𑀺𑀬𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀢𑀡𑁆𑀳𑀸 𑀳𑀺 𑀧𑀢𑁆𑀣𑀬𑀢𑀻𑀢𑀺 𑀧𑀢𑁆𑀣𑀺𑀬𑀸, 𑀦𑀸𑀲𑁆𑀲 𑀧𑀢𑁆𑀣𑀺𑀬𑀸𑀢𑀺 𑀦 𑀧𑀢𑁆𑀣𑀺𑀬𑁄. 𑀇𑀢𑁄 𑀧𑀭𑀜𑁆𑀘 𑀳𑁂𑀝𑁆𑀞𑀸 𑀘 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀏𑀯𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑁂 (𑀫𑀳𑀸𑀦𑀺. 𑁮𑁩) 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀅𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.