𑁧𑁪. 𑀢𑀼𑀯𑀝𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁫𑁦. 𑀘𑀼𑀤𑁆𑀤𑀲𑀫𑁂 𑀢𑀼𑀯𑀝𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀇𑀤𑀫𑁆𑀧𑀺 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀲𑀫𑀬𑁂 ‘‘𑀓𑀸 𑀦𑀼 𑀔𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀢𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀢𑀢𑁆𑀣 𑀆𑀤𑀺𑀧𑀼𑀘𑁆𑀙𑀸𑀕𑀸𑀣𑀸𑀬 𑀢𑀸𑀯 𑀧𑀼𑀘𑁆𑀙𑀸𑀫𑀻𑀢𑀺 𑀏𑀢𑁆𑀣 𑀅𑀤𑀺𑀝𑁆𑀞𑀚𑁄𑀢𑀦𑀸𑀤𑀺𑀯𑀲𑁂𑀦 𑀧𑀼𑀘𑁆𑀙𑀸 𑀯𑀺𑀪𑀚𑀺𑀢𑀸. 𑀆𑀤𑀺𑀘𑁆𑀘𑀩𑀦𑁆𑀥𑀽𑀢𑀺 𑀆𑀤𑀺𑀘𑁆𑀘𑀲𑁆𑀲 𑀕𑁄𑀢𑁆𑀢𑀩𑀦𑁆𑀥𑀼. 𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘𑀸𑀢𑀺 𑀯𑀺𑀯𑁂𑀓𑀜𑁆𑀘 𑀲𑀦𑁆𑀢𑀺𑀧𑀤𑀜𑁆𑀘. 𑀓𑀣𑀁 𑀤𑀺𑀲𑁆𑀯𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀤𑀺𑀲𑁆𑀯𑀸, 𑀓𑀣𑀁 𑀧𑀯𑀢𑁆𑀢𑀤𑀲𑁆𑀲𑀦𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀺𑀲𑁆𑀲𑁄 𑀧𑀼𑀘𑁆𑀙𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀤𑀺𑀝𑁆𑀞𑀚𑁄𑀢𑀦𑀸𑀢𑀺 𑀬𑀁 𑀦 𑀤𑀺𑀝𑁆𑀞𑀁 𑀦 𑀧𑀝𑀺𑀯𑀺𑀤𑁆𑀥𑀁, 𑀢𑀲𑁆𑀲 𑀧𑀸𑀓𑀝𑀓𑀭𑀡𑀢𑁆𑀣𑀸𑀬 𑀧𑀼𑀘𑁆𑀙𑀸. 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀢𑀺 𑀬𑀁 𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁, 𑀢𑀲𑁆𑀲 𑀖𑀝𑀦𑀢𑁆𑀣𑀸𑀬. 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀢𑀺 𑀬𑀸 𑀓𑀗𑁆𑀔𑀸, 𑀢𑀲𑁆𑀲𑀸𑀘𑁆𑀙𑁂𑀤𑀦𑀢𑁆𑀣𑀁. 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀦𑁆𑀢𑀺 𑀥𑀫𑁆𑀫𑀸𑀦𑀁 𑀢𑀣𑀮𑀓𑁆𑀔𑀡𑀁 𑀧𑀓𑀢𑀺𑀬𑀸 𑀦 𑀜𑀸𑀢𑀁. 𑀅𑀤𑀺𑀝𑁆𑀞𑀦𑁆𑀢𑀺 𑀦 𑀤𑀺𑀝𑁆𑀞𑀁. ‘‘𑀦 𑀦𑀺𑀝𑁆𑀞’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀢𑀼𑀮𑀺𑀢𑀦𑁆𑀢𑀺 𑀢𑀼𑀮𑀸𑀬 𑀢𑀼𑀮𑀺𑀢𑀁 𑀯𑀺𑀬 𑀦 𑀢𑀼𑀮𑀺𑀢𑀁. 𑀅𑀢𑀻𑀭𑀺𑀢𑀦𑁆𑀢𑀺 𑀢𑀻𑀭𑀡𑀸𑀬 𑀦 𑀢𑀻𑀭𑀺𑀢𑀁. 𑀅𑀯𑀺𑀪𑀽𑀢𑀦𑁆𑀢𑀺 𑀦 𑀧𑀸𑀓𑀝𑀁. 𑀅𑀯𑀺𑀪𑀸𑀯𑀺𑀢𑀦𑁆𑀢𑀺 𑀧𑀜𑁆𑀜𑀸𑀬 𑀦 𑀯𑀟𑁆𑀠𑀺𑀢𑀁. 𑀢𑀲𑁆𑀲 𑀜𑀸𑀡𑀸𑀬𑀸𑀢𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀮𑀓𑁆𑀔𑀡𑀚𑀸𑀦𑀦𑀢𑁆𑀣𑀸𑀬. 𑀤𑀲𑁆𑀲𑀦𑀸𑀬𑀸𑀢𑀺 𑀤𑀲𑁆𑀲𑀦𑀢𑁆𑀣𑀸𑀬. 𑀢𑀼𑀮𑀦𑀸𑀬𑀸𑀢𑀺 𑀢𑀼𑀮𑀦𑀢𑁆𑀣𑀸𑀬. 𑀢𑀻𑀭𑀡𑀸𑀬𑀸𑀢𑀺 𑀢𑀻𑀭𑀡𑀢𑁆𑀣𑀸𑀬. 𑀯𑀺𑀪𑀸𑀯𑀦𑀸𑀬𑀸𑀢𑀺 𑀯𑀺𑀪𑀸𑀕𑀓𑀭𑀡𑀢𑁆𑀣𑀸𑀬. 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀻𑀢𑀺 𑀅𑀜𑁆𑀜𑁂𑀳𑀺 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁂𑀳𑀺. 𑀲𑀁𑀲𑀬𑀧𑀓𑁆𑀔𑀦𑁆𑀤𑁄𑀢𑀺 𑀲𑀦𑁆𑀤𑁂𑀳𑀁 𑀧𑀯𑀺𑀝𑁆𑀞𑁄.

𑀫𑀦𑀼𑀲𑁆𑀲𑀧𑀼𑀘𑁆𑀙𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀧𑀼𑀘𑁆𑀙𑀸. 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸𑀢𑀺 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀧𑀼𑀘𑁆𑀙𑀸. 𑀕𑀳𑀝𑁆𑀞𑀸𑀢𑀺 𑀅𑀯𑀲𑁂𑀲𑀕𑀳𑀝𑁆𑀞𑀸. 𑀧𑀩𑁆𑀩𑀚𑀺𑀢𑀸𑀢𑀺 𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸. 𑀦𑀸𑀕𑀸𑀢𑀺 𑀲𑀼𑀨𑀲𑁆𑀲𑀸𑀤𑀬𑁄 𑀦𑀸𑀕𑀸. 𑀲𑀼𑀧𑀡𑁆𑀡𑀸𑀢𑀺 𑀲𑀼𑀧𑀡𑁆𑀡𑀲𑀁𑀬𑀼𑀢𑁆𑀢𑀯𑀲𑁂𑀦 (𑀲𑀁. 𑀦𑀺. 𑁩.𑁩𑁯𑁨 𑀆𑀤𑀬𑁄). 𑀬𑀓𑁆𑀔𑀸𑀢𑀺 𑀬𑀓𑁆𑀔𑀲𑀁𑀬𑀼𑀢𑁆𑀢𑀯𑀲𑁂𑀦 (𑀲𑀁. 𑀦𑀺. 𑁧𑁦.𑁨𑁩𑁫 𑀆𑀤𑀬𑁄) 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀲𑀼𑀭𑀸𑀢𑀺 𑀧𑀳𑀸𑀭𑀸𑀤𑀸𑀤𑀬𑁄. 𑀕𑀦𑁆𑀥𑀩𑁆𑀩𑀸𑀢𑀺 𑀧𑀜𑁆𑀘𑀲𑀺𑀔𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑀸𑀤𑀬𑁄. 𑀫𑀳𑀸𑀭𑀸𑀚𑀸𑀦𑁄𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄. 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀲𑀡𑁆𑀞𑀸𑀦𑀯𑀲𑁂𑀦 𑀅𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀁. 𑀲𑁄 𑀦𑀺𑀫𑁆𑀫𑀺𑀢𑁄𑀢𑀺 𑀲𑁄 𑀪𑀕𑀯𑀢𑀸 𑀦𑀺𑀫𑁆𑀫𑀺𑀢𑁄 𑀩𑀼𑀤𑁆𑀥𑁄.

𑀯𑁄𑀤𑀸𑀦𑀢𑁆𑀣𑀧𑀼𑀘𑁆𑀙𑀸𑀢𑀺 𑀯𑀺𑀲𑁂𑀲𑀥𑀫𑁆𑀫𑀧𑀼𑀘𑁆𑀙𑀸. 𑀅𑀢𑀻𑀢𑀧𑀼𑀘𑁆𑀙𑀸𑀢𑀺 𑀅𑀢𑀻𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀧𑀼𑀘𑁆𑀙𑀸. 𑀅𑀦𑀸𑀕𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀼𑀲𑀮𑀧𑀼𑀘𑁆𑀙𑀸𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀧𑀼𑀘𑁆𑀙𑀸. 𑀅𑀓𑀼𑀲𑀮𑀧𑀼𑀘𑁆𑀙𑀸𑀢𑀺 𑀲𑀸𑀯𑀚𑁆𑀚𑀥𑀫𑁆𑀫𑀧𑀼𑀘𑁆𑀙𑀸. 𑀅𑀩𑁆𑀬𑀸𑀓𑀢𑀧𑀼𑀘𑁆𑀙𑀸𑀢𑀺 𑀢𑀤𑀼𑀪𑀬𑀯𑀺𑀧𑀭𑀻𑀢𑀥𑀫𑁆𑀫𑀧𑀼𑀘𑁆𑀙𑀸.

𑀅𑀚𑁆𑀛𑁂𑀲𑀸𑀫𑀺 𑀢𑀦𑁆𑀢𑀺 𑀢𑀁 𑀆𑀡𑀸𑀧𑁂𑀫𑀺. 𑀓𑀣𑀬𑀲𑁆𑀲𑀼 𑀫𑁂𑀢𑀺 𑀫𑀬𑁆𑀳𑀁 𑀓𑀣𑁂𑀳𑀺. 𑀕𑁄𑀢𑁆𑀢𑀜𑀸𑀢𑀓𑁄𑀢𑀺 𑀕𑁄𑀢𑁆𑀢𑁂𑀦 𑀜𑀸𑀢𑀓𑁄. 𑀕𑁄𑀢𑁆𑀢𑀩𑀦𑁆𑀥𑀽𑀢𑀺 𑀕𑁄𑀢𑁆𑀢𑀚𑁆𑀛𑀢𑁆𑀢𑀺𑀓𑁄. 𑀏𑀓𑁂𑀦𑀸𑀓𑀸𑀭𑁂𑀦𑀸𑀢𑀺 𑀏𑀓𑁂𑀦 𑀓𑁄𑀝𑁆𑀞𑀸𑀲𑁂𑀦.

𑀲𑀦𑁆𑀢𑀺𑀧𑀤𑀦𑁆𑀢𑀺 𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀧𑀤𑀁. 𑀬𑁂 𑀥𑀫𑁆𑀫𑀸 𑀲𑀦𑁆𑀢𑀸𑀥𑀺𑀕𑀫𑀸𑀬𑀸𑀢𑀺 𑀬𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀥𑀫𑁆𑀫𑀸 𑀦𑀺𑀩𑁆𑀩𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬. 𑀲𑀦𑁆𑀢𑀺𑀨𑀼𑀲𑀦𑀸𑀬𑀸𑀢𑀺 𑀜𑀸𑀡𑀨𑀲𑁆𑀲𑁂𑀦 𑀦𑀺𑀩𑁆𑀩𑀸𑀦𑀨𑀼𑀲𑀦𑀢𑁆𑀣𑀸𑀬. 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀸𑀬. 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀦𑁆𑀢𑀺 𑀫𑀳𑀦𑁆𑀢𑀁 𑀲𑀻𑀮𑀭𑀸𑀲𑀺𑀁. 𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀮𑁄𑀓𑀺𑀬𑀫𑁂𑀯.

𑀢𑀫𑁄𑀓𑀸𑀬𑀲𑁆𑀲 𑀧𑀤𑀸𑀮𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀭𑀸𑀲𑀺𑀲𑁆𑀲 𑀯𑀺𑀤𑁆𑀥𑀁𑀲𑀦𑀁. 𑀯𑀺𑀧𑀮𑁆𑀮𑀸𑀲𑀲𑁆𑀲 𑀪𑁂𑀤𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀯𑀺𑀧𑀮𑁆𑀮𑀸𑀲𑀲𑁆𑀲 𑀪𑁂𑀤𑀦𑀁. 𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀅𑀩𑁆𑀩𑀼𑀳𑀦𑀦𑁆𑀢𑀺 𑀢𑀡𑁆𑀳𑀸𑀓𑀡𑁆𑀝𑀓𑀲𑁆𑀲 𑀮𑀼𑀜𑁆𑀘𑀦𑀁. 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀽𑀧𑀲𑀫𑀦𑁆𑀢𑀺 𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀦𑀺𑀩𑁆𑀩𑀸𑀧𑀦𑀁. 𑀪𑀸𑀭𑀲𑁆𑀲 𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀭𑀲𑁆𑀲 𑀞𑀧𑀦𑀁. 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑀦𑀦𑁆𑀢𑀺 𑀲𑀁𑀲𑀸𑀭𑀧𑀯𑀢𑁆𑀢𑀲𑁆𑀲 𑀙𑁂𑀤𑀦𑀁. 𑀲𑀦𑁆𑀢𑀸𑀧𑀲𑁆𑀲 𑀦𑀺𑀩𑁆𑀩𑀸𑀧𑀦𑀦𑁆𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀧𑀲𑁆𑀲 𑀦𑀺𑀩𑁆𑀩𑀼𑀢𑀺. 𑀧𑀭𑀺𑀴𑀸𑀳𑀲𑁆𑀲 𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑁆𑀢𑀺 𑀓𑀺𑀮𑁂𑀲𑀤𑀭𑀣𑀲𑁆𑀲 𑀲𑀦𑁆𑀦𑀺𑀲𑀻𑀤𑀦𑀁. 𑀤𑁂𑀯𑀤𑁂𑀯𑁄𑀢𑀺 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄.

𑁧𑁫𑁧. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀬𑀣𑀸 𑀧𑀲𑁆𑀲𑀦𑁆𑀢𑁄 𑀓𑀺𑀮𑁂𑀲𑁂 𑀉𑀧𑀭𑀼𑀦𑁆𑀥𑀢𑀺, 𑀢𑀣𑀸 𑀤𑀺𑀲𑁆𑀯𑀸 𑀢𑀣𑀸 𑀧𑀯𑀢𑁆𑀢𑀤𑀲𑁆𑀲𑀦𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀢𑀁 𑀤𑁂𑀯𑀧𑀭𑀺𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬𑀸’’𑀢𑀺 𑀆𑀭𑀪𑀺𑀢𑁆𑀯𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀆𑀤𑀺𑀕𑀸𑀣𑀸𑀬 𑀢𑀸𑀯 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀧𑀧𑀜𑁆𑀘𑀸𑀢𑀺 𑀲𑀗𑁆𑀔𑀸𑀢𑀢𑁆𑀢𑀸 𑀧𑀧𑀜𑁆𑀘𑀸 𑀏𑀯 𑀧𑀧𑀜𑁆𑀘𑀲𑀗𑁆𑀔𑀸. 𑀢𑀲𑁆𑀲𑀸 𑀅𑀯𑀺𑀚𑁆𑀚𑀸𑀤𑀬𑁄 𑀓𑀺𑀮𑁂𑀲𑀸 𑀫𑀽𑀮𑀁, 𑀢𑀁 𑀧𑀧𑀜𑁆𑀘𑀲𑀗𑁆𑀔𑀸𑀬 𑀫𑀽𑀮𑀁 𑀅𑀲𑁆𑀫𑀻𑀢𑀺 𑀧𑀯𑀢𑁆𑀢𑀫𑀸𑀦𑀜𑁆𑀘 𑀲𑀩𑁆𑀩𑀁 𑀫𑀦𑁆𑀢𑀸𑀬 𑀉𑀧𑀭𑀼𑀦𑁆𑀥𑁂. 𑀬𑀸 𑀓𑀸𑀘𑀺 𑀅𑀚𑁆𑀛𑀢𑁆𑀢𑀁 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀢𑀸𑀲𑀁 𑀯𑀺𑀦𑀬𑀸𑀬 𑀧𑀳𑀸𑀦𑀸𑀬 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑀼𑀢𑁆𑀯𑀸 𑀲𑀺𑀓𑁆𑀔𑁂𑀬𑁆𑀬𑀸𑀢𑀺.

𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀸𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀸 𑀯𑀸. 𑀧𑀼𑀭𑁂𑀪𑀢𑁆𑀢𑀦𑁆𑀢𑀺 𑀤𑀺𑀯𑀸𑀪𑀢𑁆𑀢𑀢𑁄 𑀧𑀼𑀭𑁂𑀓𑀸𑀮𑀁. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀅𑀢𑁆𑀣𑀢𑁄 𑀧𑀦 𑀪𑀼𑀫𑁆𑀫𑀫𑁂𑀯 𑀧𑀼𑀭𑁂𑀪𑀢𑁆𑀢𑁂𑀢𑀺, 𑀏𑀲 𑀦𑀬𑁄 𑀧𑀘𑁆𑀙𑀸𑀪𑀢𑁆𑀢𑀸𑀤𑀻𑀲𑀼. 𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀤𑀺𑀯𑀸𑀪𑀢𑁆𑀢𑀢𑁄 𑀧𑀘𑁆𑀙𑀸𑀓𑀸𑀮𑀁. 𑀧𑀼𑀭𑀺𑀫𑀁 𑀬𑀸𑀫𑀦𑁆𑀢𑀺 𑀭𑀢𑁆𑀢𑀺𑀬𑀸 𑀧𑀞𑀫𑀓𑁄𑀝𑁆𑀞𑀸𑀲𑀁. 𑀫𑀚𑁆𑀛𑀺𑀫𑀁 𑀬𑀸𑀫𑀦𑁆𑀢𑀺 𑀭𑀢𑁆𑀢𑀺𑀬𑀸 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑀁. 𑀧𑀘𑁆𑀙𑀺𑀫𑀁 𑀬𑀸𑀫𑀦𑁆𑀢𑀺 𑀭𑀢𑁆𑀢𑀺𑀬𑀸 𑀢𑀢𑀺𑀬𑀓𑁄𑀝𑁆𑀞𑀸𑀲𑀁. 𑀓𑀸𑀴𑁂𑀢𑀺 𑀓𑀸𑀴𑀧𑀓𑁆𑀔𑁂. 𑀚𑀼𑀡𑁆𑀳𑁂𑀢𑀺 𑀲𑀼𑀓𑁆𑀓𑀧𑀓𑁆𑀔𑁂. 𑀯𑀲𑁆𑀲𑁂𑀢𑀺 𑀘𑀢𑁆𑀢𑀸𑀭𑁄 𑀯𑀲𑁆𑀲𑀸𑀦𑀫𑀸𑀲𑁂. 𑀳𑁂𑀫𑀦𑁆𑀢𑁂𑀢𑀺 𑀘𑀢𑁆𑀢𑀸𑀭𑁄 𑀳𑁂𑀫𑀦𑁆𑀢𑀫𑀸𑀲𑁂. 𑀕𑀺𑀫𑁆𑀳𑁂𑀢𑀺 𑀘𑀢𑁆𑀢𑀸𑀭𑁄 𑀕𑀺𑀫𑁆𑀳𑀸𑀦𑀫𑀸𑀲𑁂. 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂𑀢𑀺 𑀧𑀞𑀫𑁂 𑀯𑀬𑁄𑀓𑁄𑀝𑁆𑀞𑀸𑀲𑁂, 𑀧𑀞𑀫𑀯𑀬𑁂𑀢𑀺 𑀅𑀢𑁆𑀣𑁄. 𑀢𑀻𑀲𑀼 𑀘 𑀯𑀬𑁂𑀲𑀼 𑀯𑀲𑁆𑀲𑀲𑀢𑀸𑀬𑀼𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀯𑀬𑁂 𑀘𑀢𑀼𑀫𑀸𑀲𑀸𑀥𑀺𑀓𑀸𑀦𑀺 𑀢𑁂𑀢𑁆𑀢𑀺𑀁𑀲 𑀯𑀲𑁆𑀲𑀸𑀦𑀺 𑀳𑁄𑀦𑁆𑀢𑀺.

𑁧𑁫𑁨. 𑀏𑀯𑀁 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀢𑀻𑀳𑀺 𑀲𑀺𑀓𑁆𑀔𑀸𑀳𑀺 𑀬𑀼𑀢𑁆𑀢𑀁 𑀤𑁂𑀲𑀦𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑁂𑀢𑁆𑀯𑀸 𑀧𑀼𑀦 𑀫𑀸𑀦𑀧𑁆𑀧𑀳𑀸𑀦𑀯𑀲𑁂𑀦 𑀤𑁂𑀲𑁂𑀢𑀼𑀁 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀫𑀪𑀺𑀚𑀜𑁆𑀜𑀸 𑀅𑀚𑁆𑀛𑀢𑁆𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀉𑀘𑁆𑀘𑀸𑀓𑀼𑀮𑀻𑀦𑀢𑀸𑀤𑀺𑀓𑀁 𑀅𑀢𑁆𑀢𑀦𑁄 𑀕𑀼𑀡𑀁 𑀚𑀸𑀦𑁂𑀬𑁆𑀬. 𑀅𑀣 𑀯𑀸𑀧𑀺 𑀩𑀳𑀺𑀤𑁆𑀥𑀸𑀢𑀺 𑀅𑀣 𑀯𑀸 𑀩𑀳𑀺𑀤𑁆𑀥𑀸𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀕𑀼𑀡𑀁 𑀚𑀸𑀦𑁂𑀬𑁆𑀬. 𑀦 𑀢𑁂𑀦 𑀣𑀸𑀫𑀁 𑀓𑀼𑀩𑁆𑀩𑁂𑀣𑀸𑀢𑀺 𑀢𑁂𑀦 𑀕𑀼𑀡𑁂𑀦 𑀫𑀸𑀦𑀁 𑀦 𑀓𑀭𑁂𑀬𑁆𑀬.

𑀲𑀢𑀸𑀦𑀦𑁆𑀢𑀺 𑀲𑀦𑁆𑀢𑀕𑀼𑀡𑀯𑀦𑁆𑀢𑀸𑀦𑀁. 𑀲𑀦𑁆𑀢𑀸𑀦𑀦𑁆𑀢𑀺 𑀦𑀺𑀩𑁆𑀩𑀼𑀢𑀲𑀦𑁆𑀢𑀸𑀦𑀁. 𑀦 𑀯𑀼𑀢𑁆𑀢𑀸𑀢𑀺 𑀦 𑀓𑀣𑀺𑀢𑀸. 𑀦𑀧𑁆𑀧𑀯𑀼𑀢𑁆𑀢𑀸𑀢𑀺 𑀦 𑀯𑀺𑀲𑁆𑀲𑀚𑁆𑀚𑀺𑀢𑀸.

𑁧𑁫𑁩. 𑀇𑀤𑀸𑀦𑀺𑀲𑁆𑀲 𑀅𑀓𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀬𑁆𑀬𑁄 𑀦 𑀢𑁂𑀦𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁂𑀦 𑀘 𑀫𑀸𑀦𑁂𑀦 ‘‘𑀲𑁂𑀬𑁆𑀬𑁄𑀳’’𑀦𑁆𑀢𑀺 𑀯𑀸 ‘‘𑀦𑀻𑀘𑁄𑀳’’𑀦𑁆𑀢𑀺 𑀯𑀸 ‘‘𑀲𑀭𑀺𑀓𑁆𑀔𑁄𑀳’’𑀦𑁆𑀢𑀺 𑀯𑀸𑀧𑀺 𑀦 𑀫𑀜𑁆𑀜𑁂𑀬𑁆𑀬. 𑀢𑁂𑀳𑀺 𑀘 𑀉𑀘𑁆𑀘𑀸𑀓𑀼𑀮𑀻𑀦𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀨𑀼𑀝𑁆𑀞𑁄 𑀅𑀦𑁂𑀓𑀭𑀽𑀧𑁂𑀳𑀺 ‘‘𑀅𑀳𑀁 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀸𑀦𑀁 𑀯𑀺𑀓𑀧𑁆𑀧𑁂𑀦𑁆𑀢𑁄 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺.

𑁧𑁫𑁪. 𑀏𑀯𑀁 𑀫𑀸𑀦𑀧𑁆𑀧𑀳𑀸𑀦𑀯𑀲𑁂𑀦𑀧𑀺 𑀤𑁂𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑀓𑀺𑀮𑁂𑀲𑀽𑀧𑀲𑀫𑀯𑀲𑁂𑀦 𑀤𑁂𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢𑀫𑁂𑀯𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀫𑁂𑀯𑀼𑀧𑀲𑀫𑁂𑀢𑀺 𑀅𑀢𑁆𑀢𑀦𑀺 𑀏𑀯 𑀭𑀸𑀕𑀸𑀤𑀺𑀲𑀩𑁆𑀩𑀓𑀺𑀮𑁂𑀲𑁂 𑀉𑀧𑀲𑀫𑁂𑀬𑁆𑀬. 𑀦 𑀅𑀜𑁆𑀜𑀢𑁄 𑀪𑀺𑀓𑁆𑀔𑀼 𑀲𑀦𑁆𑀢𑀺𑀫𑁂𑀲𑁂𑀬𑁆𑀬𑀸𑀢𑀺 𑀞𑀧𑁂𑀢𑁆𑀯𑀸 𑀘 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀺 𑀅𑀜𑁆𑀜𑁂𑀦 𑀉𑀧𑀸𑀬𑁂𑀦 𑀲𑀦𑁆𑀢𑀺𑀁 𑀦 𑀧𑀭𑀺𑀬𑁂𑀲𑁂𑀬𑁆𑀬. 𑀓𑀼𑀢𑁄 𑀦𑀺𑀭𑀢𑁆𑀢𑀸 𑀯𑀸𑀢𑀺 𑀦𑀺𑀭𑀢𑁆𑀢𑀸 𑀓𑀼𑀢𑁄𑀬𑁂𑀯.

𑀦 𑀏𑀲𑁂𑀬𑁆𑀬𑀸𑀢𑀺 𑀲𑀻𑀮𑀩𑁆𑀩𑀢𑀸𑀤𑀻𑀳𑀺 𑀦 𑀫𑀕𑁆𑀕𑁂𑀬𑁆𑀬. 𑀦 𑀕𑀯𑁂𑀲𑁂𑀬𑁆𑀬𑀸𑀢𑀺 𑀦 𑀑𑀮𑁄𑀓𑁂𑀬𑁆𑀬. 𑀦 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦 𑀇𑀓𑁆𑀔𑁂𑀬𑁆𑀬.

𑁧𑁫𑁫. 𑀇𑀤𑀸𑀦𑀺 𑀅𑀚𑁆𑀛𑀢𑁆𑀢𑀁 𑀉𑀧𑀲𑀦𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀢𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀚𑁆𑀛𑁂 𑀬𑀣𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀺𑀳𑁂𑀝𑁆𑀞𑀺𑀫𑀪𑀸𑀕𑀸𑀦𑀁 𑀯𑁂𑀫𑀚𑁆𑀛𑀲𑀗𑁆𑀔𑀸𑀢𑁂 𑀘𑀢𑀼𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁂 𑀫𑀚𑁆𑀛𑁂 𑀧𑀩𑁆𑀩𑀢𑀦𑁆𑀢𑀭𑁂 𑀞𑀺𑀢𑀲𑁆𑀲 𑀯𑀸 𑀫𑀚𑁆𑀛𑁂 𑀲𑀫𑀼𑀤𑁆𑀤𑀲𑁆𑀲 𑀊𑀫𑀺 𑀦𑁄 𑀚𑀸𑀬𑀢𑀺, 𑀞𑀺𑀢𑁄𑀯 𑀲𑁄 𑀳𑁄𑀢𑀺 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀏𑀯𑀁 𑀅𑀦𑁂𑀚𑁄 𑀔𑀻𑀡𑀸𑀲𑀯𑁄 𑀮𑀸𑀪𑀸𑀤𑀻𑀲𑀼 𑀞𑀺𑀢𑁄 𑀅𑀲𑁆𑀲 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑁄 𑀢𑀸𑀤𑀺𑀲𑁄 𑀭𑀸𑀕𑀸𑀤𑀺𑀉𑀲𑁆𑀲𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀻𑀢𑀺.

𑀉𑀩𑁆𑀩𑁂𑀥𑁂𑀦𑀸𑀢𑀺 𑀳𑁂𑀝𑁆𑀞𑀸𑀪𑀸𑀕𑁂𑀦. 𑀕𑀫𑁆𑀪𑀻𑀭𑁄𑀢𑀺 𑀉𑀤𑀓𑀧𑀺𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀕𑀫𑁆𑀪𑀻𑀭𑁄. ‘‘𑀉𑀩𑁆𑀩𑁂𑀥𑁄’’𑀢𑀺𑀧𑀺 𑀧𑀸𑀞𑁄, 𑀢𑀁 𑀦 𑀲𑀼𑀦𑁆𑀤𑀭𑀁. 𑀳𑁂𑀝𑁆𑀞𑀸𑀢𑀺 𑀅𑀦𑁆𑀢𑁄𑀉𑀤𑀓𑀁. 𑀉𑀧𑀭𑀻𑀢𑀺 𑀉𑀤𑁆𑀥𑀁𑀉𑀤𑀓𑀁. 𑀫𑀚𑁆𑀛𑁂𑀢𑀺 𑀯𑁂𑀫𑀚𑁆𑀛𑁂. 𑀦 𑀓𑀫𑁆𑀧𑀢𑀻𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀦 𑀘𑀮𑀢𑀺. 𑀦 𑀯𑀺𑀓𑀫𑁆𑀧𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀦 𑀘𑀮𑀢𑀺. 𑀦 𑀘𑀮𑀢𑀻𑀢𑀺 𑀦𑀺𑀘𑁆𑀘𑀮𑀁 𑀳𑁄𑀢𑀺. 𑀦 𑀯𑁂𑀥𑀢𑀻𑀢𑀺 𑀦 𑀨𑀦𑁆𑀤𑀢𑀺. 𑀦𑀧𑁆𑀧𑀯𑁂𑀥𑀢𑀻𑀢𑀺 𑀦 𑀧𑀭𑀺𑀯𑀢𑁆𑀢𑀢𑀺. 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺 𑀦 𑀧𑀭𑀺𑀩𑁆𑀪𑀫𑀢𑀺. 𑀅𑀦𑁂𑀭𑀺𑀢𑁄𑀢𑀺 𑀦 𑀏𑀭𑀺𑀢𑁄. 𑀅𑀖𑀝𑁆𑀝𑀺𑀢𑁄𑀢𑀺 𑀅𑀓𑁆𑀔𑁄𑀪𑁄. 𑀅𑀘𑀮𑀺𑀢𑁄𑀢𑀺 𑀦 𑀓𑀫𑁆𑀧𑀺𑀢𑁄. 𑀅𑀮𑀼𑀴𑀺𑀢𑁄𑀢𑀺 𑀦 𑀓𑀮𑀮𑀻𑀪𑀽𑀢𑁄. 𑀢𑀢𑁆𑀭 𑀊𑀫𑀺 𑀦𑁄 𑀚𑀸𑀬𑀢𑀻𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀻𑀘𑀺 𑀦 𑀉𑀧𑁆𑀧𑀚𑁆𑀚𑀢𑀺.

𑀲𑀢𑁆𑀢𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀺𑀓𑀸𑀲𑀽𑀢𑀺 𑀬𑀼𑀕𑀦𑁆𑀥𑀭𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸. 𑀲𑀻𑀤𑀦𑁆𑀢𑀭𑀸𑀢𑀺 𑀅𑀦𑁆𑀢𑀫𑀲𑁄 𑀲𑀺𑀫𑁆𑀩𑀮𑀻𑀢𑀽𑀮𑀫𑁆𑀧𑀺 𑀢𑁂𑀲𑀼 𑀧𑀢𑀺𑀢𑀧𑀢𑀺𑀢𑀁 𑀲𑀻𑀤𑀢𑀻𑀢𑀺 𑀲𑀻𑀤𑀸, 𑀧𑀩𑁆𑀩𑀢𑀦𑁆𑀢𑀭𑁂 𑀚𑀸𑀢𑀢𑁆𑀢𑀸 𑀅𑀦𑁆𑀢𑀭𑀸. ‘‘𑀅𑀦𑁆𑀢𑀭𑀲𑀻𑀤𑀸’’𑀢𑀺𑀧𑀺 𑀧𑀸𑀞𑁄.

𑁧𑁫𑁬. 𑀇𑀤𑀸𑀦𑀺 𑀏𑀯𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀤𑁂𑀲𑀦𑀁 𑀅𑀩𑁆𑀪𑀸𑀦𑀼𑀫𑁄𑀤𑁂𑀦𑁆𑀢𑁄 𑀢𑀲𑁆𑀲 𑀘 𑀅𑀭𑀳𑀢𑁆𑀢𑀲𑁆𑀲 𑀆𑀤𑀺𑀧𑀝𑀺𑀧𑀤𑀁 𑀧𑀼𑀘𑁆𑀙𑀦𑁆𑀢𑁄 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁄 ‘‘𑀅𑀓𑀺𑀢𑁆𑀢𑀬𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀓𑀺𑀢𑁆𑀢𑀬𑀻𑀢𑀺 𑀆𑀘𑀺𑀓𑁆𑀔𑀺. 𑀯𑀺𑀯𑀝𑀘𑀓𑁆𑀔𑀽𑀢𑀺 𑀯𑀺𑀯𑀝𑁂𑀳𑀺 𑀅𑀦𑀸𑀯𑀭𑀡𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀓𑁆𑀔𑀺𑀥𑀫𑁆𑀫𑀦𑁆𑀢𑀺 𑀲𑀓𑀸𑀬𑀢𑁆𑀢𑀁 𑀲𑀬𑀁 𑀅𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀥𑀫𑁆𑀫𑀁. 𑀧𑀭𑀺𑀲𑁆𑀲𑀬𑀯𑀺𑀦𑀬𑀦𑁆𑀢𑀺 𑀧𑀭𑀺𑀲𑁆𑀲𑀬𑀯𑀺𑀦𑀬𑀦𑀁. 𑀧𑀝𑀺𑀧𑀤𑀁 𑀯𑀤𑁂𑀳𑀻𑀢𑀺 𑀇𑀤𑀸𑀦𑀺 𑀧𑀝𑀺𑀧𑀢𑁆𑀢𑀺𑀁 𑀯𑀤𑁂𑀳𑀺. 𑀪𑀤𑁆𑀤𑀦𑁆𑀢𑁂𑀢𑀺 𑀪𑀤𑁆𑀤𑀁 𑀢𑀯 𑀅𑀢𑁆𑀣𑀽𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑁄 𑀆𑀳. 𑀅𑀣 𑀯𑀸 𑀪𑀤𑁆𑀤𑀁 𑀲𑀼𑀦𑁆𑀤𑀭𑀁 𑀢𑀯 𑀧𑀝𑀺𑀧𑀤𑀁 𑀯𑀤𑁂𑀳𑀻𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀢𑀺𑀫𑁄𑀓𑁆𑀔𑀁 𑀅𑀣 𑀯𑀸𑀧𑀺 𑀲𑀫𑀸𑀥𑀺𑀦𑁆𑀢𑀺 𑀢𑀫𑁂𑀯 𑀧𑀝𑀺𑀧𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀢𑀺. 𑀧𑀝𑀺𑀧𑀤𑀦𑁆𑀢𑀺 𑀏𑀢𑁂𑀦 𑀯𑀸 𑀫𑀕𑁆𑀕𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁂𑀳𑀺 𑀲𑀻𑀮𑀁 𑀲𑀫𑀸𑀥𑀺𑀜𑁆𑀘 𑀧𑀼𑀘𑁆𑀙𑀢𑀺.

𑀫𑀁𑀲𑀘𑀓𑁆𑀔𑀼𑀦𑀸𑀧𑀻𑀢𑀺 𑀲𑀲𑀫𑁆𑀪𑀸𑀭𑀺𑀓𑀫𑀁𑀲𑀘𑀓𑁆𑀔𑀼𑀦𑀸𑀧𑀺. 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀻𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁. 𑀤𑁂𑀯𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀁 𑀤𑀺𑀩𑁆𑀩𑀁 𑀧𑀲𑀸𑀤𑀘𑀓𑁆𑀔𑀼 𑀳𑁄𑀢𑀺. 𑀇𑀤𑀜𑁆𑀘𑀸𑀧𑀺 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀁 𑀜𑀸𑀡𑀘𑀓𑁆𑀔𑀼 𑀢𑀸𑀤𑀺𑀲𑀫𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁. 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼, 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀼, 𑀤𑀺𑀩𑁆𑀩𑀜𑁆𑀘 𑀢𑀁 𑀘𑀓𑁆𑀔𑀼 𑀘𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼. 𑀢𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼. 𑀇𑀤𑀸𑀦𑀺 𑀧𑀜𑁆𑀘𑀯𑀺𑀥𑀁 𑀘𑀓𑁆𑀔𑀼𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑀼𑀁 ‘‘𑀓𑀣𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺𑀯𑀺𑀯𑀝𑀘𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳. 𑀫𑀁𑀲𑀘𑀓𑁆𑀔𑀼𑀫𑁆𑀳𑀺 𑀪𑀕𑀯𑀢𑁄 𑀧𑀜𑁆𑀘𑀯𑀡𑁆𑀡𑀸 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀲𑀲𑀫𑁆𑀪𑀸𑀭𑀸𑀤𑀺𑀓𑀘𑀓𑁆𑀔𑀼𑀫𑁆𑀳𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀜𑁆𑀘 𑀓𑁄𑀝𑁆𑀞𑀸𑀲𑀸 𑀧𑀘𑁆𑀘𑁂𑀓𑀁 𑀧𑀘𑁆𑀘𑁂𑀓𑀁 𑀉𑀧𑀮𑀩𑁆𑀪𑀦𑁆𑀢𑀺.

𑀦𑀻𑀮𑁄 𑀘 𑀯𑀡𑁆𑀡𑁄𑀢𑀺 𑀉𑀫𑀸𑀧𑀼𑀧𑁆𑀨𑀯𑀡𑁆𑀡𑁄. 𑀧𑀻𑀢𑀓𑁄 𑀘 𑀯𑀡𑁆𑀡𑁄𑀢𑀺 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑁄. 𑀮𑁄𑀳𑀺𑀢𑀓𑁄 𑀘 𑀯𑀡𑁆𑀡𑁄𑀢𑀺 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑁄. 𑀓𑀡𑁆𑀳𑁄 𑀘 𑀯𑀡𑁆𑀡𑁄𑀢𑀺 𑀅𑀜𑁆𑀚𑀦𑀯𑀡𑁆𑀡𑁄. 𑀑𑀤𑀸𑀢𑁄 𑀘 𑀯𑀡𑁆𑀡𑁄𑀢𑀺 𑀑𑀲𑀥𑀺𑀢𑀸𑀭𑀓𑀯𑀡𑁆𑀡𑁄. 𑀬𑀢𑁆𑀣 𑀘 𑀅𑀓𑁆𑀔𑀺𑀮𑁄𑀫𑀸𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀓𑁆𑀔𑀺𑀮𑁄𑀫𑀸𑀦𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀝𑁆𑀞𑀺𑀢𑀸𑀦𑀺. 𑀢𑀁 𑀦𑀻𑀮𑀁 𑀳𑁄𑀢𑀺 𑀲𑀼𑀦𑀻𑀮𑀦𑁆𑀢𑀺 𑀏𑀢𑁆𑀣 𑀦𑀻𑀮𑀦𑁆𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀦𑀻𑀮𑀦𑁆𑀢𑀺 𑀅𑀦𑁆𑀢𑀭𑀯𑀺𑀭𑀳𑀺𑀢𑀁 𑀲𑀼𑀝𑁆𑀞𑀼 𑀦𑀻𑀮𑀁. 𑀧𑀸𑀲𑀸𑀤𑀺𑀓𑀦𑁆𑀢𑀺 𑀧𑀲𑀸𑀤𑀚𑀦𑀓𑀁. 𑀤𑀲𑁆𑀲𑀦𑁂𑀬𑁆𑀬𑀦𑁆𑀢𑀺 𑀤𑀲𑁆𑀲𑀦𑀻𑀬𑀁. 𑀉𑀫𑀸𑀧𑀼𑀧𑁆𑀨𑀲𑀫𑀸𑀦𑀦𑁆𑀢𑀺 𑀤𑀓𑀲𑀻𑀢𑀮𑀧𑀼𑀧𑁆𑀨𑀲𑀤𑀺𑀲𑀁. 𑀢𑀲𑁆𑀲 𑀧𑀭𑀢𑁄𑀢𑀺 𑀢𑀲𑁆𑀲 𑀲𑀫𑀦𑁆𑀢𑀸 𑀩𑀸𑀳𑀺𑀭𑀧𑀲𑁆𑀲𑁂. 𑀧𑀻𑀢𑀓𑀦𑁆𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀁. 𑀲𑀼𑀧𑀻𑀢𑀓𑀦𑁆𑀢𑀺 𑀅𑀦𑁆𑀢𑀭𑀯𑀺𑀭𑀳𑀺𑀢𑀁 𑀲𑀼𑀝𑁆𑀞𑀼 𑀧𑀻𑀢𑀓𑀁. 𑀉𑀪𑀬𑀢𑁄 𑀘 𑀅𑀓𑁆𑀔𑀺𑀓𑀽𑀝𑀸𑀦𑀻𑀢𑀺 𑀤𑁆𑀯𑁂 𑀘 𑀅𑀓𑁆𑀔𑀺𑀓𑁄𑀝𑀺𑀬𑁄. 𑀮𑁄𑀳𑀺𑀢𑀓𑀸𑀦𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀮𑁄𑀳𑀺𑀢𑀓𑀸𑀦𑀻𑀢𑀺 𑀅𑀧𑀜𑁆𑀜𑀸𑀬𑀫𑀸𑀦𑀯𑀺𑀯𑀭𑀸𑀦𑀺 𑀲𑀼𑀝𑁆𑀞𑀼 𑀮𑁄𑀳𑀺𑀢𑀓𑀸𑀦𑀺. 𑀫𑀚𑁆𑀛𑁂 𑀓𑀡𑁆𑀳𑀦𑁆𑀢𑀺 𑀅𑀓𑁆𑀔𑀻𑀦𑀁 𑀫𑀚𑁆𑀛𑀺𑀫𑀝𑁆𑀞𑀸𑀦𑀁 𑀅𑀜𑁆𑀚𑀦𑀲𑀤𑀺𑀲𑀁 𑀓𑀡𑁆𑀳𑀁. 𑀲𑀼𑀓𑀡𑁆𑀳𑀦𑁆𑀢𑀺 𑀅𑀦𑁆𑀢𑀭𑀯𑀺𑀭𑀳𑀺𑀢𑀁 𑀲𑀼𑀝𑁆𑀞𑀼 𑀓𑀡𑁆𑀳𑀁. 𑀅𑀮𑀽𑀔𑀦𑁆𑀢𑀺 𑀧𑀸𑀲𑀸𑀤𑀺𑀓𑀁. 𑀲𑀺𑀦𑀺𑀤𑁆𑀥𑀦𑁆𑀢𑀺 𑀧𑀡𑀻𑀢𑀁. 𑀪𑀤𑁆𑀤𑀸𑀭𑀺𑀝𑁆𑀞𑀓𑀲𑀫𑀸𑀦𑀦𑁆𑀢𑀺 𑀅𑀧𑀦𑀻𑀢𑀢𑀘𑀪𑀤𑁆𑀤𑀸𑀭𑀺𑀝𑁆𑀞𑀓𑀨𑀮𑀲𑀤𑀺𑀲𑀁. ‘‘𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑀫𑀸𑀦’’𑀦𑁆𑀢𑀺𑀧𑀺 𑀧𑀸𑀴𑀺, 𑀢𑀲𑁆𑀲𑀸 𑀢𑀺𑀦𑁆𑀢𑀓𑀸𑀓𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀑𑀤𑀸𑀢𑀦𑁆𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀑𑀤𑀸𑀢𑀦𑁆𑀢𑀺 𑀅𑀦𑁆𑀢𑀭𑀯𑀺𑀭𑀳𑀺𑀢𑀁 𑀭𑀚𑀢𑀫𑀡𑁆𑀟𑀮𑀲𑀤𑀺𑀲𑀁 𑀲𑀼𑀝𑁆𑀞𑀼 𑀑𑀤𑀸𑀢𑀁. 𑀲𑁂𑀢𑀁 𑀧𑀡𑁆𑀟𑀭𑀦𑁆𑀢𑀺 𑀤𑁆𑀯𑀻𑀳𑀺𑀧𑀺 𑀅𑀢𑀺𑀑𑀤𑀸𑀢𑀢𑀁 𑀤𑀲𑁆𑀲𑁂𑀢𑀺. 𑀧𑀸𑀓𑀢𑀺𑀓𑁂𑀦 𑀫𑀁𑀲𑀘𑀓𑁆𑀔𑀼𑀦𑀸𑀢𑀺 𑀧𑀓𑀢𑀺𑀫𑀁𑀲𑀘𑀓𑁆𑀔𑀼𑀦𑀸. 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁂𑀦𑀸𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀺𑀢𑁂𑀦. 𑀧𑀼𑀭𑀺𑀫𑀲𑀼𑀘𑀭𑀺𑀢𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑀸𑀢𑀺 𑀧𑀼𑀭𑀺𑀫𑁂𑀲𑀼 𑀢𑀢𑁆𑀣 𑀢𑀢𑁆𑀣𑀼𑀧𑁆𑀧𑀦𑁆𑀦𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀓𑀫𑁆𑀫𑀼𑀦𑀸 𑀉𑀧𑁆𑀧𑀸𑀤𑀺𑀢𑁂𑀦. 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀻𑀢𑀺 𑀲𑀫𑀦𑁆𑀢𑀢𑁄 𑀘𑀢𑀼𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀬𑁄𑀚𑀦𑁂 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀁 𑀭𑀽𑀧𑀁 𑀆𑀯𑀭𑀡𑀯𑀺𑀭𑀳𑀺𑀢𑀁 𑀧𑀓𑀢𑀺𑀫𑀁𑀲𑀘𑀓𑁆𑀔𑀼𑀦𑀸 𑀤𑀓𑁆𑀔𑀢𑀺.

𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘𑀸𑀢𑀺 𑀤𑀺𑀯𑀲𑀪𑀸𑀕𑁂 𑀘 𑀭𑀢𑁆𑀢𑀺𑀪𑀸𑀕𑁂 𑀘. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀭𑀺𑀧𑀼𑀡𑁆𑀡𑀅𑀦𑁆𑀥𑀓𑀸𑀭𑁄 𑀆𑀮𑁄𑀓𑀯𑀺𑀭𑀳𑀺𑀢𑁄. 𑀲𑀽𑀭𑀺𑀬𑁄 𑀯𑀸 𑀅𑀢𑁆𑀣𑀗𑁆𑀕𑀢𑁄𑀢𑀺 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑁄 𑀉𑀝𑁆𑀞𑀺𑀢𑁄 𑀲𑀽𑀭𑀺𑀬𑁄 𑀯𑀺𑀕𑀢𑁄. 𑀓𑀸𑀴𑀧𑀓𑁆𑀔𑁄 𑀘 𑀉𑀧𑁄𑀲𑀣𑁄𑀢𑀺 𑀓𑀸𑀴𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀻𑀉𑀧𑁄𑀲𑀣𑀤𑀺𑀯𑀲𑁄 𑀘. 𑀢𑀺𑀩𑁆𑀩𑁄 𑀘 𑀯𑀦𑀲𑀡𑁆𑀟𑁄𑀢𑀺 𑀕𑀳𑀦𑁄 𑀘 𑀭𑀼𑀓𑁆𑀔𑀭𑀸𑀲𑀺. 𑀫𑀳𑀸 𑀘 𑀓𑀸𑀴𑀫𑁂𑀖𑁄 𑀅𑀩𑁆𑀪𑀼𑀝𑁆𑀞𑀺𑀢𑁄𑀢𑀺 𑀫𑀳𑀦𑁆𑀢𑁄 𑀓𑀸𑀴𑀫𑁂𑀖𑁄 𑀅𑀩𑁆𑀪𑀧𑀝𑀮𑁄 𑀘 𑀉𑀝𑁆𑀞𑀺𑀢𑁄 𑀳𑁄𑀢𑀺. 𑀓𑀼𑀝𑁆𑀝𑁄 𑀯𑀸𑀢𑀺 𑀇𑀝𑁆𑀞𑀓𑀸𑀘𑀬𑁄 𑀯𑀸. 𑀓𑀯𑀸𑀝𑀁 𑀯𑀸𑀢𑀺 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀺𑀓𑀯𑀸𑀝𑀁 𑀯𑀸. 𑀧𑀸𑀓𑀸𑀭𑁄 𑀯𑀸𑀢𑀺 𑀫𑀢𑁆𑀢𑀺𑀓𑀸𑀤𑀺𑀧𑀸𑀓𑀸𑀭𑁄 𑀯𑀸. 𑀧𑀩𑁆𑀩𑀢𑁄 𑀯𑀸𑀢𑀺 𑀧𑀁𑀲𑀼𑀧𑀩𑁆𑀩𑀢𑀸𑀤𑀺𑀧𑀩𑁆𑀩𑀢𑁄 𑀯𑀸. 𑀕𑀘𑁆𑀙𑀁 𑀯𑀸𑀢𑀺 𑀢𑀭𑀼𑀡𑀕𑀘𑁆𑀙𑀸𑀤𑀺𑀕𑀘𑁆𑀙𑀁 𑀯𑀸. 𑀮𑀢𑀸 𑀯𑀸𑀢𑀺 𑀓𑀭𑀯𑀺𑀦𑁆𑀤𑀸𑀤𑀺 𑀮𑀢𑀸 𑀯𑀸. 𑀆𑀯𑀭𑀡𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬𑀸𑀢𑀺 𑀭𑀽𑀧𑀸𑀭𑀫𑁆𑀫𑀡𑀸𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀧𑀝𑀺𑀲𑁂𑀥𑀁 𑀦𑀢𑁆𑀣𑀺. 𑀏𑀓𑀜𑁆𑀘𑁂 𑀢𑀺𑀮𑀨𑀮𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸𑀢𑀺 𑀲𑀘𑁂 𑀏𑀓𑀁 𑀢𑀺𑀮𑀩𑀻𑀚𑀁 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸. 𑀢𑀺𑀮𑀯𑀸𑀳𑁂 𑀧𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀤𑁆𑀯𑁂 𑀲𑀓𑀝𑁂 𑀢𑀺𑀮𑀭𑀸𑀲𑀺𑀫𑁆𑀳𑀺 𑀔𑀺𑀧𑁂𑀬𑁆𑀬. 𑀓𑁂𑀘𑀺 𑀧𑀦 ‘‘𑀯𑀸𑀳𑁄 𑀦𑀸𑀫 𑀓𑀼𑀫𑁆𑀪𑀸𑀢𑀺𑀭𑁂𑀓𑀤𑁆𑀯𑁂𑀲𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀜𑁆𑀜𑁂𑀯 𑀢𑀺𑀮𑀨𑀮𑀁 𑀉𑀤𑁆𑀥𑀭𑁂𑀬𑁆𑀬𑀸𑀢𑀺 𑀢𑀁𑀦𑀺𑀫𑀺𑀢𑁆𑀢𑀓𑀢𑀁 𑀢𑀺𑀮𑀩𑀻𑀚𑀁𑀬𑁂𑀯 𑀉𑀤𑁆𑀥𑀭𑀺𑀢𑁆𑀯𑀸 𑀕𑀡𑁆𑀳𑁂𑀬𑁆𑀬.

𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀢𑀺 𑀇𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀯𑀺𑀲𑀼𑀤𑁆𑀥𑁂𑀦𑀸𑀢𑀺 𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥𑁂𑀦. 𑀬𑁄 𑀳𑀺 𑀘𑀼𑀢𑀺𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺 𑀦 𑀉𑀧𑀧𑀸𑀢𑀁, 𑀲𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀉𑀧𑀧𑀸𑀢𑀫𑁂𑀯 𑀧𑀲𑁆𑀲𑀢𑀺 𑀦 𑀘𑀼𑀢𑀺𑀁, 𑀲𑁄 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀢𑀤𑀼𑀪𑀬𑀁 𑀧𑀲𑁆𑀲𑀢𑀺, 𑀲𑁄 𑀬𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀅𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸𑀲𑁆𑀲 𑀢𑀁 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼 𑀳𑁄𑀢𑀺, 𑀉𑀪𑀬𑀜𑁆𑀘𑁂𑀢𑀁 𑀩𑀼𑀤𑁆𑀥𑀧𑀼𑀢𑁆𑀢𑀸 𑀧𑀲𑁆𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥’’𑀦𑁆𑀢𑀺. 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁, 𑀫𑀸𑀦𑀼𑀲𑀓𑀁 𑀯𑀸 𑀫𑀁𑀲𑀘𑀓𑁆𑀔𑀼𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀦 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀻𑀢𑀺 𑀫𑀦𑀼𑀲𑁆𑀲𑀫𑀁𑀲𑀘𑀓𑁆𑀔𑀼𑀦𑀸 𑀯𑀺𑀬 𑀲𑀢𑁆𑀢𑁂 𑀑𑀮𑁄𑀓𑁂𑀢𑀺. 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂𑀢𑀺 𑀏𑀢𑁆𑀣 𑀘𑀼𑀢𑀺𑀓𑁆𑀔𑀡𑁂 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸. 𑀬𑁂 𑀧𑀦 𑀆𑀲𑀦𑁆𑀦𑀘𑀼𑀢𑀺𑀓𑀸 𑀇𑀤𑀸𑀦𑀺 𑀘𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀘𑀯𑀫𑀸𑀦𑀸. 𑀬𑁂 𑀘 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀲𑀫𑁆𑀧𑀢𑀺𑀦𑀺𑀩𑁆𑀩𑀢𑁆𑀢𑀸𑀯, 𑀢𑁂 𑀉𑀧𑀧𑀚𑁆𑀚𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀏𑀯𑀭𑀽𑀧𑁂 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀘 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀦𑁂𑀢𑀺 𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀳𑀻𑀦𑁂. 𑀢𑀩𑁆𑀩𑀺𑀧𑀭𑀻𑀢𑁂 𑀧𑀡𑀻𑀢𑁂. 𑀲𑀼𑀯𑀡𑁆𑀡𑁂𑀢𑀺 𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂. 𑀢𑀩𑁆𑀩𑀺𑀧𑀭𑀻𑀢𑁂 𑀤𑀼𑀩𑁆𑀩𑀡𑁆𑀡𑁂, 𑀅𑀪𑀺𑀭𑀽𑀧𑁂 𑀯𑀺𑀭𑀽𑀧𑁂𑀢𑀺 𑀅𑀢𑁆𑀣𑁄. 𑀲𑀼𑀕𑀢𑁂𑀢𑀺 𑀲𑀼𑀕𑀢𑀺𑀕𑀢𑁂, 𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂. 𑀤𑀼𑀕𑁆𑀕𑀢𑁂𑀢𑀺 𑀤𑀼𑀕𑁆𑀕𑀢𑀺𑀕𑀢𑁂, 𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑁂. 𑀬𑀣𑀸𑀓𑀫𑁆𑀫𑀽𑀧𑀕𑁂𑀢𑀺 𑀬𑀁 𑀬𑀁 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀢𑁂𑀦 𑀢𑁂𑀦 𑀉𑀧𑀕𑀢𑁂. 𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 ‘‘𑀘𑀯𑀫𑀸𑀦𑁂’’𑀢𑀺𑀆𑀤𑀻𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀓𑀺𑀘𑁆𑀘𑀁.

𑀢𑀲𑁆𑀲 𑀘 𑀜𑀸𑀡𑀲𑁆𑀲 𑀅𑀬𑀫𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑁋 𑀇𑀥 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸𑀦𑀺𑀭𑀬𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑁂𑀭𑀬𑀺𑀓𑁂 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀫𑀸𑀦𑁂, 𑀢𑀁 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯. 𑀲𑁄 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀺 ‘‘𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀏𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺, 𑀅𑀣𑀲𑁆𑀲 ‘‘𑀇𑀤𑀁 𑀦𑀸𑀫 𑀓𑀢𑁆𑀯𑀸’’𑀢𑀺 𑀢𑀁 𑀓𑀫𑁆𑀫𑀸𑀭𑀫𑁆𑀫𑀡𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀉𑀧𑀭𑀺𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑀦𑁆𑀤𑀦𑀯𑀦 𑀫𑀺𑀲𑁆𑀲𑀓𑀯𑀦 𑀨𑀸𑀭𑀼𑀲𑀓𑀯𑀦𑀸𑀤𑀻𑀲𑀼 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂. 𑀢𑀫𑁆𑀧𑀺 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯. 𑀲𑁄 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀺 ‘‘𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺. 𑀅𑀣𑀲𑁆𑀲 ‘‘𑀇𑀤𑀁 𑀦𑀸𑀫 𑀓𑀢𑁆𑀯𑀸’’𑀢𑀺 𑀢𑀁 𑀓𑀫𑁆𑀫𑀸𑀭𑀫𑁆𑀫𑀡𑀁 𑀜𑀸𑀡𑀫𑀼𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀁 𑀦𑀸𑀫. 𑀇𑀫𑀲𑁆𑀲 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀘 𑀇𑀫𑀲𑁆𑀲, 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀸𑀧𑀺. 𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀸𑀦𑁂𑀯 𑀳𑀺 𑀇𑀫𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀳𑁂𑀯 𑀇𑀚𑁆𑀛𑀦𑁆𑀢𑀺.

𑀇𑀫𑁂 𑀯𑀢 𑀪𑁄𑀦𑁆𑀢𑁄𑀢𑀺𑀆𑀤𑀻𑀲𑀼 𑀇𑀫𑁂𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀸𑀦𑀁 𑀦𑀺𑀤𑀲𑁆𑀲𑀦𑀯𑀘𑀦𑀁. 𑀯𑀢𑀸𑀢𑀺 𑀅𑀦𑀼𑀲𑁄𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀪𑁄𑀦𑁆𑀢𑁄𑀢𑀺 𑀪𑀯𑀦𑁆𑀢𑁄. 𑀤𑀼𑀝𑁆𑀞𑀼 𑀘𑀭𑀺𑀢𑀁, 𑀤𑀼𑀝𑁆𑀞𑀼𑀁 𑀯𑀸 𑀘𑀭𑀺𑀢𑀁 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸𑀢𑀺 𑀤𑀼𑀘𑁆𑀘𑀭𑀺𑀢𑀁; 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀗𑁆𑀕𑀻𑀪𑀽𑀢𑀸.

𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀭𑀺𑀬𑀸𑀦𑀁 𑀅𑀦𑁆𑀢𑀫𑀲𑁄 𑀕𑀺𑀳𑀺𑀲𑁄𑀢𑀸𑀧𑀦𑁆𑀦𑀸𑀦𑀫𑁆𑀧𑀺 𑀅𑀦𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀯𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀯𑀸 𑀉𑀧𑀯𑀸𑀤𑀓𑀸, 𑀅𑀓𑁆𑀓𑁄𑀲𑀓𑀸 𑀕𑀭𑀳𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀲𑀫𑀡𑀥𑀫𑁆𑀫𑁄, 𑀅𑀲𑁆𑀲𑀫𑀡𑀸 𑀏𑀢𑁂’’𑀢𑀺 𑀯𑀤𑀦𑁆𑀢𑁄 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀉𑀧𑀯𑀤𑀢𑀺. ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀛𑀸𑀦𑀁 𑀯𑀸 𑀯𑀺𑀫𑁄𑀓𑁆𑀔𑁄 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀉𑀧𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀛𑀸𑀦𑀁 𑀯𑀸 𑀉𑀧𑀯𑀤𑁂𑀬𑁆𑀬 𑀅𑀛𑀸𑀦𑀁 𑀯𑀸, 𑀉𑀪𑀬𑀣𑀸𑀧𑀺 𑀅𑀭𑀺𑀬𑀽𑀧𑀯𑀸𑀤𑁄𑀯 𑀳𑁄𑀢𑀺; 𑀅𑀢𑀺𑀪𑀸𑀭𑀺𑀬𑀁 𑀓𑀫𑁆𑀫𑀁, 𑀅𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑀤𑀺𑀲𑀁, 𑀲𑀕𑁆𑀕𑀸𑀯𑀭𑀡𑀁 𑀫𑀕𑁆𑀕𑀸𑀯𑀭𑀡𑀜𑁆𑀘, 𑀲𑀢𑁂𑀓𑀺𑀘𑁆𑀙𑀁 𑀧𑀦 𑀳𑁄𑀢𑀺. 𑀢𑀲𑁆𑀫𑀸 𑀬𑁄 𑀅𑀭𑀺𑀬𑀁 𑀉𑀧𑀯𑀤𑀢𑀺, 𑀢𑁂𑀦 𑀕𑀦𑁆𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀔𑀫𑀸𑀳𑀻’’𑀢𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀦𑀯𑀓𑀢𑀭𑁄 𑀳𑁄𑀢𑀺, 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀔𑀫𑀣𑀸’’𑀢𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑁄 𑀦𑀓𑁆𑀔𑀫𑀢𑀺, 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺, 𑀲𑀬𑀁 𑀯𑀸 𑀕𑀦𑁆𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀯𑀸 𑀧𑁂𑀲𑁂𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀦𑀸𑀧𑀺 𑀕𑀦𑁆𑀢𑀼𑀁 𑀦 𑀧𑁂𑀲𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀬𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀦𑀯𑀓𑀢𑀭𑀸 𑀳𑁄𑀦𑁆𑀢𑀺, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀘𑁂 𑀯𑀼𑀟𑁆𑀠𑀢𑀭𑀸, 𑀯𑀼𑀟𑁆𑀠𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀔𑀫𑀢𑀼 𑀫𑁂 𑀲𑁄 𑀆𑀬𑀲𑁆𑀫𑀸’’𑀢𑀺 𑀯𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀫𑁆𑀫𑀼𑀔𑀸 𑀅𑀔𑀫𑀦𑁆𑀢𑁂𑀧𑀺 𑀏𑀢𑀤𑁂𑀯 𑀓𑀸𑀢𑀩𑁆𑀩𑀁. 𑀲𑀘𑁂 𑀏𑀓𑀘𑀸𑀭𑀺𑀓𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁂𑀯 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀦 𑀕𑀢𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀏𑀓𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀅𑀦𑀼𑀲𑁆𑀲𑀭𑀢𑁄 𑀅𑀦𑀼𑀲𑁆𑀲𑀭𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀳𑁄𑀢𑀺, 𑀓𑀺𑀁 𑀓𑀭𑁄𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁄 𑀯𑀓𑁆𑀔𑀢𑀺 ‘‘𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀣𑁂𑀭𑁄 𑀢𑀼𑀫𑁆𑀳𑀸𑀓𑀁 𑀔𑀫𑀢𑀺, 𑀘𑀺𑀢𑁆𑀢𑀁 𑀯𑀽𑀧𑀲𑀫𑁂𑀣𑀸’’𑀢𑀺. 𑀢𑁂𑀦𑀧𑀺 𑀅𑀭𑀺𑀬𑀲𑁆𑀲 𑀕𑀢𑀤𑀺𑀲𑀸𑀪𑀺𑀫𑀼𑀔𑁂𑀦 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀔𑀫𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀤𑀺 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑀫𑀜𑁆𑀘𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀸𑀯 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸𑀧𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀓𑀢𑁂 𑀦𑁂𑀯 𑀲𑀕𑁆𑀕𑀸𑀯𑀭𑀡𑀁 𑀦 𑀫𑀕𑁆𑀕𑀸𑀯𑀭𑀡𑀁 𑀳𑁄𑀢𑀺, 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀻𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀦𑀸𑀦𑀸𑀯𑀺𑀥𑀓𑀫𑁆𑀫𑀸, 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀽𑀮𑀓𑁂𑀲𑀼 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀅𑀜𑁆𑀜𑁂𑀧𑀺 𑀲𑀫𑀸𑀤𑀧𑁂𑀦𑁆𑀢𑀺. 𑀏𑀢𑁆𑀣 𑀘 𑀯𑀘𑀻𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦𑁂𑀯 𑀅𑀭𑀺𑀬𑀽𑀧𑀯𑀸𑀤𑁂, 𑀫𑀦𑁄𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀗𑁆𑀕𑀳𑀺𑀢𑀸𑀬𑀧𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀦𑀯𑀘𑀦𑀁 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀲𑀸𑀯𑀚𑁆𑀚𑁄 𑀳𑀺 𑀅𑀭𑀺𑀬𑀽𑀧𑀯𑀸𑀤𑁄 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀁 𑀆𑀭𑀸𑀥𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀤𑀸𑀫𑀺. 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’’𑀢𑀺 (𑀫. 𑀦𑀺. 𑁧.𑁧𑁪𑁯).

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 𑀘 𑀫𑀳𑀸𑀲𑀸𑀯𑀚𑁆𑀚𑀢𑀭𑀁 𑀦𑀸𑀫 𑀅𑀜𑁆𑀜𑀁 𑀦𑀢𑁆𑀣𑀺. 𑀬𑀣𑀸𑀳 𑁋

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁𑀫𑀳𑀸𑀲𑀸𑀯𑀚𑁆𑀚𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀸𑀯𑀚𑁆𑀚𑀸𑀦𑀻’’𑀢𑀺 (𑀅. 𑀦𑀺. 𑁧.𑁩𑁧𑁦).

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸. 𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑁂. 𑀅𑀣 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑀸. 𑀧𑀭𑀁 𑀫𑀭𑀡𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀉𑀤𑁆𑀥𑀁. 𑀅𑀧𑀸𑀬𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦𑀺𑀭𑀬𑀯𑁂𑀯𑀘𑀦𑀫𑁂𑀯. 𑀦𑀺𑀭𑀬𑁄 𑀳𑀺 𑀲𑀕𑁆𑀕𑀫𑁄𑀓𑁆𑀔𑀳𑁂𑀢𑀼𑀪𑀽𑀢𑀸 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸 𑀅𑀧𑁂𑀢𑀢𑁆𑀢𑀸, 𑀲𑀼𑀔𑀸𑀦𑀁 𑀯𑀸 𑀆𑀬𑀲𑁆𑀲 𑀅𑀪𑀸𑀯𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺, 𑀤𑁄𑀲𑀩𑀳𑀼𑀮𑀢𑀸𑀬 𑀯𑀸 𑀤𑀼𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀸 𑀕𑀢𑀻𑀢𑀺 𑀤𑀼𑀕𑁆𑀕𑀢𑀺. 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀺 𑀢𑀢𑁆𑀣 𑀤𑀼𑀓𑁆𑀓𑀝𑀓𑀸𑀭𑀺𑀦𑁄𑀢𑀺 𑀯𑀺𑀦𑀺𑀧𑀸𑀢𑁄, 𑀯𑀺𑀦𑀲𑁆𑀲𑀦𑁆𑀢𑀸 𑀯𑀸 𑀏𑀢𑁆𑀣 𑀦𑀺𑀧𑀢𑀦𑁆𑀢𑀺 𑀲𑀫𑁆𑀪𑀺𑀚𑁆𑀚𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀸𑀢𑀺𑀧𑀺 𑀯𑀺𑀦𑀺𑀧𑀸𑀢𑁄. 𑀦𑀢𑁆𑀣𑀺 𑀏𑀢𑁆𑀣 𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄𑀢𑀺 𑀦𑀺𑀭𑀬𑁄.

𑀅𑀣 𑀯𑀸 𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀳𑀺 𑀅𑀧𑀸𑀬𑁄 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸. 𑀦 𑀤𑀼𑀕𑁆𑀕𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀦𑀸𑀕𑀭𑀸𑀚𑀸𑀤𑀻𑀦𑀁 𑀲𑀫𑁆𑀪𑀯𑀢𑁄. 𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑀁 𑀤𑀻𑀧𑁂𑀢𑀺, 𑀲𑁄 𑀳𑀺 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀼𑀔𑀢𑁄 𑀅𑀧𑁂𑀢𑀢𑁆𑀢𑀸 𑀤𑀼𑀓𑁆𑀔𑀲𑁆𑀲 𑀘 𑀕𑀢𑀺𑀪𑀽𑀢𑀢𑁆𑀢𑀸, 𑀦 𑀢𑀼 𑀯𑀺𑀦𑀺𑀧𑀸𑀢𑁄, 𑀅𑀲𑀼𑀭𑀓𑀸𑀬𑀲𑀤𑀺𑀲𑀁 𑀅𑀯𑀺𑀦𑀺𑀧𑀢𑀺𑀢𑀢𑁆𑀢𑀸. 𑀯𑀺𑀦𑀺𑀧𑀸𑀢𑀕𑁆𑀕𑀳𑀡𑁂𑀦 𑀅𑀲𑀼𑀭𑀓𑀸𑀬𑀁 𑀤𑀻𑀧𑁂𑀢𑀺. 𑀲𑁄 𑀳𑀺 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀩𑁆𑀩𑀲𑀫𑀼𑀲𑁆𑀲𑀬𑁂𑀳𑀺 𑀘 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀬𑀕𑁆𑀕𑀳𑀡𑁂𑀦 𑀅𑀯𑀻𑀘𑀺𑀆𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀁 𑀦𑀺𑀭𑀬𑀫𑁂𑀯 𑀤𑀻𑀧𑁂𑀢𑀻𑀢𑀺. 𑀉𑀧𑀧𑀦𑁆𑀦𑀸𑀢𑀺 𑀉𑀧𑀕𑀢𑀸, 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀲𑀕𑁆𑀕𑀕𑁆𑀕𑀳𑀡𑁂𑀦 𑀤𑁂𑀯𑀕𑀢𑀺𑀬𑁂𑀯. 𑀢𑀢𑁆𑀣 𑀲𑀼𑀦𑁆𑀤𑀭𑀸 𑀕𑀢𑀻𑀢𑀺 𑀲𑀼𑀕𑀢𑀺. 𑀭𑀽𑀧𑀸𑀤𑀻𑀳𑀺 𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄. 𑀲𑁄 𑀲𑀩𑁆𑀩𑁄𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀬𑀁 𑀯𑀘𑀦𑀢𑁆𑀣𑁄. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀕𑀫𑀦𑀯𑀘𑀦𑀁.

𑀏𑀯𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀧𑀭𑀺𑀢𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀯𑀲𑁂𑀦 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸𑀢𑀻𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀯𑀲𑁂𑀦 𑀧𑀜𑁆𑀘𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀫𑀕𑁆𑀕𑀅𑀦𑀸𑀕𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀯𑀲𑁂𑀦 𑀅𑀝𑁆𑀞𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀻𑀢𑀺.

𑀆𑀓𑀗𑁆𑀔𑀫𑀸𑀦𑁄 𑀘 𑀪𑀕𑀯𑀸𑀢𑀺 𑀪𑀕𑀯𑀸 𑀇𑀘𑁆𑀙𑀫𑀸𑀦𑁄. 𑀏𑀓𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬𑀸𑀢𑀺 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀑𑀮𑁄𑀓𑁂𑀬𑁆𑀬. 𑀲𑀳𑀲𑁆𑀲𑀺𑀫𑁆𑀧𑀺 𑀘𑀽𑀴𑀦𑀺𑀓𑀦𑁆𑀢𑀺 𑀏𑀢𑁆𑀣 𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺, 𑀤𑀺𑀲𑀸 𑀪𑀸𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸, 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀏𑀲𑀸 𑀲𑀳𑀲𑁆𑀲𑀺𑀘𑀽𑀴𑀦𑀺𑀓𑀸 𑀦𑀸𑀫. 𑀘𑀽𑀴𑀦𑀺𑀓𑀦𑁆𑀢𑀺 𑀔𑀼𑀤𑁆𑀤𑀓𑀁. 𑀤𑁆𑀯𑀺𑀲𑀳𑀲𑁆𑀲𑀺𑀫𑁆𑀧𑀺 𑀫𑀚𑁆𑀛𑀺𑀫𑀺𑀓𑀁 𑀮𑁄𑀓𑀥𑀸𑀢𑀼𑀦𑁆𑀢𑀺 𑀏𑀢𑁆𑀣 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀁 𑀲𑀳𑀲𑁆𑀲𑀪𑀸𑀕𑁂𑀦 𑀕𑀡𑁂𑀢𑁆𑀯𑀸 𑀤𑀲𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀫𑀸𑀡𑀸 𑀤𑁆𑀯𑀺𑀲𑀳𑀲𑁆𑀲𑀻 𑀫𑀚𑁆𑀛𑀺𑀫𑀺𑀓𑀸 𑀮𑁄𑀓𑀥𑀸𑀢𑀼 𑀦𑀸𑀫. 𑀏𑀢𑁆𑀢𑀓𑁂𑀦 𑀩𑀼𑀤𑁆𑀥𑀸𑀦𑀁 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀧𑀘𑁆𑀙𑀺𑀫𑀪𑀯𑁂 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀘 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀘 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀘 𑀲𑀫𑁆𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀲𑀼 𑀘 𑀏𑀢𑁆𑀢𑀓𑀁 𑀞𑀸𑀦𑀁 𑀓𑀫𑁆𑀧𑀢𑀺.

𑀢𑀺𑀲𑀳𑀲𑁆𑀲𑀺𑀫𑁆𑀧𑀺. 𑀫𑀳𑀸𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀦𑁆𑀢𑀺 𑀲𑀳𑀲𑁆𑀲𑀺𑀢𑁄 𑀧𑀝𑁆𑀞𑀸𑀬 𑀢𑀢𑀺𑀬𑀸𑀢𑀺 𑀢𑀺𑀲𑀳𑀲𑁆𑀲𑀻, 𑀧𑀞𑀫𑀲𑀳𑀲𑁆𑀲𑀺𑀁 𑀲𑀳𑀲𑁆𑀲𑀥𑀸 𑀓𑀢𑁆𑀯𑀸 𑀕𑀡𑀺𑀢𑀁 𑀫𑀚𑁆𑀛𑀺𑀫𑀺𑀓𑀁 𑀲𑀳𑀲𑁆𑀲𑀥𑀸 𑀓𑀢𑁆𑀯𑀸 𑀕𑀡𑀺𑀢𑀢𑁆𑀢𑀸 𑀫𑀳𑀦𑁆𑀢𑁂𑀳𑀺 𑀲𑀳𑀲𑁆𑀲𑁂𑀳𑀺 𑀕𑀡𑀺𑀢𑀸𑀢𑀺 𑀫𑀳𑀸𑀲𑀳𑀲𑁆𑀲𑀻. 𑀏𑀢𑁆𑀢𑀸𑀯𑀢𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀫𑀸𑀡𑁄 𑀮𑁄𑀓𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀕𑀡𑀓𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 𑀏𑀯𑀫𑀸𑀳 𑁋 ‘‘𑀦 𑀳𑀺 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀏𑀢𑀁 𑀧𑀭𑀺𑀫𑀸𑀡𑀁. 𑀇𑀤𑀜𑁆𑀳𑀺 𑀆𑀘𑀭𑀺𑀬𑀸𑀦𑀁 𑀲𑀚𑁆𑀛𑀸𑀬𑀫𑀽𑀮𑀓𑀁 𑀯𑀸𑀘𑀸𑀬 𑀧𑀭𑀺𑀳𑀻𑀦𑀝𑁆𑀞𑀸𑀦𑀁, 𑀤𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀫𑀸𑀡𑀁 𑀧𑀦 𑀞𑀸𑀦𑀁 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀦𑀸𑀫𑀸’’𑀢𑀺. 𑀏𑀢𑁆𑀢𑀸𑀯𑀢𑀸 𑀳𑀺 𑀪𑀕𑀯𑀢𑁄 𑀆𑀡𑀸𑀓𑁆𑀔𑁂𑀢𑁆𑀢𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢- (𑀤𑀻. 𑀦𑀺. 𑁩.𑁨𑁭𑁫 𑀆𑀤𑀬𑁄) 𑀇𑀲𑀺𑀕𑀺𑀮𑀺𑀧𑀭𑀺𑀢𑁆𑀢- (𑀫. 𑀦𑀺. 𑁩.𑁧𑁩𑁩 𑀆𑀤𑀬𑁄) 𑀥𑀚𑀕𑁆𑀕𑀧𑀭𑀺𑀢𑁆𑀢- (𑀲𑀁. 𑀦𑀺. 𑁧.𑁨𑁪𑁯) 𑀩𑁄𑀚𑁆𑀛𑀗𑁆𑀕𑀧𑀭𑀺𑀢𑁆𑀢𑀔𑀦𑁆𑀥𑀧𑀭𑀺𑀢𑁆𑀢- (𑀅. 𑀦𑀺. 𑁪.𑁬𑁭) 𑀫𑁄𑀭𑀧𑀭𑀺𑀢𑁆𑀢- (𑀚𑀸. 𑁧.𑁨.𑁧𑁭-𑁧𑁮) 𑀫𑁂𑀢𑁆𑀢𑀧𑀭𑀺𑀢𑁆𑀢- (𑀔𑀼. 𑀧𑀸. 𑁯.𑁧 𑀆𑀤𑀬𑁄; 𑀲𑀼. 𑀦𑀺. 𑁧𑁪𑁩 𑀆𑀤𑀬𑁄) 𑀭𑀢𑀦𑀧𑀭𑀺𑀢𑁆𑀢𑀸𑀦𑀁 (𑀔𑀼. 𑀧𑀸. 𑁬.𑁧 𑀆𑀤𑀬𑁄; 𑀲𑀼. 𑀦𑀺. 𑁨𑁨𑁪 𑀆𑀤𑀬𑁄) 𑀆𑀡𑀸 𑀨𑀭𑀢𑀺.

𑀬𑀸𑀯𑀢𑀓𑀁 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸𑀢𑀺 𑀬𑀢𑁆𑀢𑀓𑀁 𑀯𑀸 𑀇𑀘𑁆𑀙𑁂𑀬𑁆𑀬. 𑀇𑀫𑀺𑀦𑀸 𑀯𑀺𑀲𑀬𑀓𑁆𑀔𑁂𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀯𑀺𑀲𑀬𑀓𑁆𑀔𑁂𑀢𑁆𑀢𑀲𑁆𑀲 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀦𑀢𑁆𑀣𑀺𑀓𑀪𑀸𑀯𑁂 𑀘𑀲𑁆𑀲 𑀇𑀫𑀁 𑀉𑀧𑀫𑀁 𑀆𑀳𑀭𑀦𑁆𑀢𑀺 𑁋 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀫𑁆𑀳𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀸𑀲𑀧𑁂𑀳𑀺 𑀧𑀽𑀭𑁂𑀢𑁆𑀯𑀸 𑀲𑀘𑁂 𑀓𑁄𑀘𑀺 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀘𑀓𑁆𑀓𑀯𑀸𑀴𑁂 𑀏𑀓𑀁 𑀲𑀸𑀲𑀧𑀁 𑀧𑀓𑁆𑀔𑀺𑀧𑀦𑁆𑀢𑁄 𑀆𑀕𑀘𑁆𑀙𑁂𑀬𑁆𑀬, 𑀲𑀩𑁆𑀩𑁂𑀧𑀺 𑀢𑁂 𑀲𑀸𑀲𑀧𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑁂𑀬𑁆𑀬𑀼𑀁. 𑀦 𑀢𑁆𑀯𑁂𑀯 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀘𑀓𑁆𑀓𑀯𑀸𑀴𑀸𑀦𑀺. 𑀤𑀓𑁆𑀔𑀺𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀩𑀼𑀤𑁆𑀥𑀸𑀦𑀁 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺. 𑀢𑀸𑀯𑀢𑀓𑀁 𑀧𑀲𑁆𑀲𑁂𑀬𑁆𑀬𑀸𑀢𑀺 𑀢𑀢𑁆𑀢𑀓𑀁 𑀑𑀮𑁄𑀓𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀓𑀣𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀽𑀢𑀺 𑀓𑁂𑀦𑀧𑁆𑀧𑀓𑀸𑀭𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀧𑀺𑀳𑀺𑀢𑀘𑀓𑁆𑀔𑀼? 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄𑀢𑀺𑀆𑀤𑀺𑀓𑀁 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺 𑀧𑀭𑀺𑀬𑁄𑀲𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦 𑀘 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀘. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀩𑀼𑀤𑁆𑀥𑀘𑀓𑁆𑀔𑀽𑀢𑀺 𑀦𑀸𑀫𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀫𑀦𑁆𑀢𑀘𑀓𑁆𑀔𑀽𑀢𑀺, 𑀢𑀺𑀡𑁆𑀡𑀁 𑀫𑀕𑁆𑀕𑀜𑀸𑀡𑀸𑀦𑀁 𑀥𑀫𑁆𑀫𑀘𑀓𑁆𑀔𑀽𑀢𑀺. 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀢𑁆𑀢𑁂𑀢𑀺 𑀲𑀢𑁆𑀢𑁂 𑀅𑀤𑁆𑀤𑀓𑁆𑀔𑀺. 𑀅𑀧𑁆𑀧𑀭𑀚𑀓𑁆𑀔𑁂𑀢𑀺𑀆𑀤𑀻𑀲𑀼 𑀬𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀜𑀸𑀘𑀓𑁆𑀔𑀼𑀫𑁆𑀳𑀺 𑀭𑀸𑀕𑀸𑀤𑀺𑀭𑀚𑀁 𑀅𑀧𑁆𑀧𑀁, 𑀢𑁂 𑀅𑀧𑁆𑀧𑀭𑀚𑀓𑁆𑀔𑀸. 𑀬𑁂𑀲𑀁 𑀢𑀁 𑀫𑀳𑀦𑁆𑀢𑀁, 𑀢𑁂 𑀫𑀳𑀸𑀭𑀚𑀓𑁆𑀔𑀸. 𑀬𑁂𑀲𑀁 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺, 𑀢𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑀸𑀦𑀺 𑀫𑀼𑀤𑀽𑀦𑀺, 𑀢𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑁂𑀬𑁂𑀯 𑀲𑀤𑁆𑀥𑀸𑀤𑀬𑁄 𑀆𑀓𑀸𑀭𑀸 𑀲𑀼𑀦𑁆𑀤𑀭𑀸, 𑀢𑁂 𑀲𑁆𑀯𑀸𑀓𑀸𑀭𑀸. 𑀬𑁂 𑀓𑀣𑀺𑀢𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁 𑀢𑁂 𑀲𑀼𑀯𑀺𑀜𑁆𑀜𑀸𑀧𑀬𑀸. 𑀬𑁂 𑀧𑀭𑀮𑁄𑀓𑀜𑁆𑀘𑁂𑀯 𑀯𑀚𑁆𑀚𑀜𑁆𑀘 𑀪𑀬𑀢𑁄 𑀧𑀲𑁆𑀲𑀦𑁆𑀢𑀺, 𑀢𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀦𑀸𑀫.

𑀉𑀧𑁆𑀧𑀮𑀺𑀦𑀺𑀬𑀦𑁆𑀢𑀺 𑀉𑀧𑁆𑀧𑀮𑀯𑀦𑁂. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀻𑀢𑀺 𑀬𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀸𑀦𑁂𑀯 𑀧𑁄𑀲𑀺𑀬𑀦𑁆𑀢𑀺. 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀢𑀺𑀝𑁆𑀞𑀦𑁆𑀢𑀻𑀢𑀺 𑀉𑀤𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁆𑀣 𑀬𑀸𑀦𑀺 𑀬𑀸𑀦𑀺 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀁 𑀆𑀕𑀫𑀬𑀫𑀸𑀦𑀸𑀦𑀺 𑀞𑀺𑀢𑀸𑀦𑀺 𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀉𑀤𑀓𑀸 𑀅𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀢𑀸𑀦𑀺 𑀢𑀢𑀺𑀬𑀤𑀺𑀯𑀲𑁂𑀯 𑀧𑀼𑀧𑁆𑀨𑀦𑀓𑀸𑀦𑀺. 𑀉𑀤𑀓𑀸 𑀧𑀦 𑀅𑀦𑀼𑀕𑁆𑀕𑀢𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀲𑀭𑁄𑀕𑀉𑀧𑁆𑀧𑀮𑀸𑀦𑀺 𑀦𑀸𑀫 𑀅𑀢𑁆𑀣𑀺, 𑀬𑀸𑀦𑀺 𑀦𑁂𑀯 𑀧𑀼𑀧𑁆𑀨𑀺𑀲𑁆𑀲𑀦𑁆𑀢𑀺, 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸𑀦𑁂𑀯 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀸𑀦𑀺 𑀧𑀸𑀴𑀺𑀁 𑀦𑀸𑀭𑀽𑀴𑁆𑀳𑀸𑀦𑀺, 𑀆𑀳𑀭𑀺𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑀸𑀦𑀻𑀢𑀺 𑀤𑀻𑀧𑀺𑀢𑀸𑀦𑀺.

𑀬𑀣𑁂𑀯 𑀳𑀺 𑀢𑀸𑀦𑀺 𑀘𑀢𑀼𑀩𑁆𑀩𑀺𑀥𑀧𑀼𑀧𑁆𑀨𑀸𑀦𑀺, 𑀏𑀯𑀫𑁂𑀯 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄 𑀧𑀤𑀧𑀭𑀫𑁄𑀢𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀤𑀸𑀳𑀝𑀯𑁂𑀮𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀻𑀬𑀫𑀸𑀦𑁂 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀢𑁄 𑀧𑀭𑀺𑀧𑀼𑀘𑁆𑀙𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀫𑁆𑀧𑀺 𑀲𑀼𑀡𑀢𑁄 𑀩𑀳𑀼𑀫𑁆𑀧𑀺 𑀪𑀡𑀢𑁄 𑀩𑀳𑀼𑀫𑁆𑀧𑀺 𑀥𑀸𑀭𑀬𑀢𑁄 𑀩𑀳𑀼𑀫𑁆𑀧𑀺 𑀯𑀸𑀘𑀢𑁄 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀤𑀧𑀭𑀫𑁄. 𑀢𑀢𑁆𑀣 𑀪𑀕𑀯𑀸 𑀉𑀧𑁆𑀧𑀮𑀯𑀦𑀸𑀤𑀺𑀲𑀤𑀺𑀲𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀢𑀺 𑀏𑀯𑀁 𑀲𑀩𑁆𑀩𑀸𑀓𑀸𑀭𑀢𑁄 𑀘 𑀅𑀤𑁆𑀤𑀲. 𑀢𑀢𑁆𑀣 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀣𑀁 𑀲𑀸𑀥𑁂𑀢𑀺, 𑀧𑀤𑀧𑀭𑀫𑀸𑀦𑀁 𑀅𑀦𑀸𑀕𑀢𑀢𑁆𑀣𑀸𑀬 𑀯𑀸𑀲𑀦𑀸 𑀳𑁄𑀢𑀺.

𑀭𑀸𑀕𑀘𑀭𑀺𑀢𑁄𑀢𑀺𑀆𑀤𑀻𑀲𑀼 𑀭𑀚𑁆𑀚𑀦𑀯𑀲𑁂𑀦 𑀆𑀭𑀫𑁆𑀫𑀡𑁂 𑀘𑀭𑀡𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀭𑀸𑀕𑀘𑀭𑀺𑀢𑁄. 𑀤𑀼𑀲𑁆𑀲𑀦𑀯𑀲𑁂𑀦 𑀆𑀭𑀫𑁆𑀫𑀡𑁂 𑀘𑀭𑀡𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀤𑁄𑀲𑀘𑀭𑀺𑀢𑁄. 𑀫𑀼𑀬𑁆𑀳𑀦𑀯𑀲𑁂𑀦 𑀆𑀭𑀫𑁆𑀫𑀡𑁂 𑀘𑀭𑀡𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁄𑀳𑀘𑀭𑀺𑀢𑁄. 𑀯𑀺𑀢𑀓𑁆𑀓𑀦𑀯𑀲𑁂𑀦 𑀊𑀳𑀦𑀯𑀲𑁂𑀦 𑀆𑀭𑀫𑁆𑀫𑀡𑁂 𑀘𑀭𑀡𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀢𑀓𑁆𑀓𑀘𑀭𑀺𑀢𑁄. 𑀑𑀓𑀧𑁆𑀧𑀦𑀲𑀤𑁆𑀥𑀸𑀯𑀲𑁂𑀦 𑀆𑀭𑀫𑁆𑀫𑀡𑁂 𑀘𑀭𑀡𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀤𑁆𑀥𑀸𑀘𑀭𑀺𑀢𑁄. 𑀜𑀸𑀡𑀫𑁂𑀯 𑀘𑀭𑀡𑀁, 𑀜𑀸𑀡𑁂𑀦 𑀯𑀸 𑀘𑀭𑀡𑀁, 𑀜𑀸𑀡𑀲𑁆𑀲 𑀯𑀸 𑀘𑀭𑀡𑀁, 𑀜𑀸𑀡𑀢𑁄 𑀯𑀸 𑀘𑀭𑀡𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀜𑀸𑀡𑀘𑀭𑀺𑀢𑁄. 𑀭𑀸𑀕𑀘𑀭𑀺𑀢𑀲𑁆𑀲𑀸𑀢𑀺 𑀭𑀸𑀕𑀼𑀲𑁆𑀲𑀤𑀲𑁆𑀲 𑀭𑀸𑀕𑀩𑀳𑀼𑀮𑀲𑁆𑀲. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄.

𑀅𑀲𑀼𑀪𑀓𑀣𑀁 𑀓𑀣𑁂𑀢𑀻𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀤𑀲𑀯𑀺𑀥𑀁 𑀅𑀲𑀼𑀪𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀁 𑀆𑀘𑀺𑀓𑁆𑀔𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀅. 𑀦𑀺. 𑁯.𑁧). 𑀫𑁂𑀢𑁆𑀢𑀸𑀪𑀸𑀯𑀦𑀁 𑀆𑀘𑀺𑀓𑁆𑀔𑀢𑀻𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀁 𑀘𑀺𑀢𑁆𑀢𑀲𑀺𑀦𑁂𑀳𑀦𑀁 𑀓𑀣𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺. 𑀉𑀤𑁆𑀤𑁂𑀲𑁂𑀢𑀺 𑀲𑀚𑁆𑀛𑀸𑀬𑀦𑁂. 𑀧𑀭𑀺𑀧𑀼𑀘𑁆𑀙𑀸𑀬𑀸𑀢𑀺 𑀅𑀝𑁆𑀞𑀓𑀣𑀸𑀬. 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂 𑀉𑀢𑁆𑀢𑀭𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀯𑀦𑁂. 𑀥𑀫𑁆𑀫𑀲𑀸𑀓𑀘𑁆𑀙𑀸𑀬𑀸𑀢𑀺 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀲𑀸𑀓𑀘𑁆𑀙𑀸𑀬. 𑀕𑀭𑀼𑀲𑀁𑀯𑀸𑀲𑁂𑀢𑀺 𑀕𑀭𑀽𑀦𑀁 𑀧𑀬𑀺𑀭𑀼𑀧𑀸𑀲𑀦𑁂. 𑀦𑀺𑀯𑁂𑀲𑁂𑀢𑀻𑀢𑀺 𑀆𑀘𑀭𑀺𑀬𑀸𑀦𑀁 𑀲𑀦𑁆𑀢𑀺𑀓𑁂 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀆𑀘𑀺𑀓𑁆𑀔𑀢𑀻𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸’’𑀢𑀺 (𑀅. 𑀦𑀺. 𑁯.𑁧). 𑀧𑀲𑀸𑀤𑀦𑀻𑀬𑀁 𑀦𑀺𑀫𑀺𑀢𑁆𑀢𑀁 𑀆𑀘𑀺𑀓𑁆𑀔𑀢𑀻𑀢𑀺 𑀘𑀽𑀴𑀯𑁂𑀤𑀮𑁆𑀮- (𑀫. 𑀦𑀺. 𑁧.𑁪𑁬𑁦 𑀆𑀤𑀬𑁄) 𑀫𑀳𑀸𑀯𑁂𑀤𑀮𑁆𑀮𑀸- (𑀫. 𑀦𑀺. 𑁧.𑁪𑁪𑁯 𑀆𑀤𑀬𑁄) 𑀤𑀺𑀧𑀲𑀸𑀤𑀚𑀦𑀓𑀁 𑀲𑀼𑀢𑁆𑀢𑀁 𑀓𑀣𑁂𑀢𑀺. 𑀩𑀼𑀤𑁆𑀥𑀲𑀼𑀩𑁄𑀥𑀺𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀩𑀼𑀤𑁆𑀥𑀢𑁆𑀢𑀧𑀝𑀺𑀯𑁂𑀥𑀁. 𑀥𑀫𑁆𑀫𑀲𑀼𑀥𑀫𑁆𑀫𑀢𑀦𑁆𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀁. 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀅𑀝𑁆𑀞𑀯𑀺𑀥𑀅𑀭𑀺𑀬𑀲𑀗𑁆𑀖𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀲𑀼𑀝𑁆𑀞𑀼𑀧𑀝𑀺𑀧𑀢𑁆𑀢𑀺𑀁. 𑀲𑀻𑀮𑀸𑀦𑀺 𑀘 𑀅𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑀻𑀮𑀸𑀦𑀺 𑀘. 𑀆𑀘𑀺𑀓𑁆𑀔𑀢𑀺 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀤𑀬𑀩𑁆𑀩𑀬𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑁂𑀢𑀺. 𑀅𑀦𑀺𑀘𑁆𑀘𑀸𑀓𑀸𑀭𑀦𑁆𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑀁. 𑀤𑀼𑀓𑁆𑀔𑀸𑀓𑀸𑀭𑀦𑁆𑀢𑀺 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀸𑀓𑀸𑀭𑀁. 𑀅𑀦𑀢𑁆𑀢𑀸𑀓𑀸𑀭𑀦𑁆𑀢𑀺 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑀁.

𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄𑀢𑀺 𑀲𑁂𑀮𑀫𑀬𑁂 𑀏𑀓𑀕𑁆𑀖𑀦𑁂 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀞𑀺𑀢𑁄𑀯, 𑀦 𑀳𑀺 𑀢𑀢𑁆𑀣 𑀞𑀺𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀅𑀪𑀺𑀫𑀼𑀔𑁂 𑀕𑀻𑀯𑀼𑀓𑁆𑀔𑀺𑀧𑀦𑀧𑀲𑀸𑀭𑀡𑀸𑀤𑀺𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀢𑀣𑀽𑀧𑀫𑀦𑁆𑀢𑀺 𑀢𑀧𑁆𑀧𑀝𑀺𑀪𑀸𑀕𑀁 𑀲𑁂𑀮𑀧𑀩𑁆𑀩𑀢𑀽𑀧𑀫𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀲𑁂𑀮𑀧𑀩𑁆𑀩𑀢𑀫𑀼𑀤𑁆𑀥𑀦𑁆𑀢𑀺 𑀞𑀺𑀢𑁄𑀯 𑀘𑀓𑁆𑀔𑀼𑀦𑀸 𑀧𑀼𑀭𑀺𑀲𑁄 𑀲𑀫𑀦𑁆𑀢𑀢𑁄 𑀚𑀦𑀢𑀁 𑀧𑀲𑁆𑀲𑁂𑀬𑁆𑀬. 𑀲𑀼𑀫𑁂𑀥 𑀲𑀼𑀦𑁆𑀤𑀭𑀧𑀜𑁆𑀜 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀫𑀦𑁆𑀢𑀘𑀓𑁆𑀔𑀼 𑀪𑀕𑀯𑀸 𑀥𑀫𑁆𑀫𑀫𑀬𑀁 𑀧𑀜𑁆𑀜𑀸𑀫𑀬𑀁 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀬𑀁 𑀅𑀧𑁂𑀢𑀲𑁄𑀓𑁄 𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀜𑁆𑀘 𑀚𑀦𑀢𑀁 𑀅𑀯𑁂𑀓𑁆𑀔𑀲𑁆𑀲𑀼 𑀉𑀧𑀥𑀸𑀭𑀬𑀢𑀼 𑀉𑀧𑀧𑀭𑀺𑀓𑁆𑀔𑀢𑀼.

𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀳𑀺 𑀧𑀩𑁆𑀩𑀢𑀧𑀸𑀤𑀲𑀸𑀫𑀦𑁆𑀢𑀸 𑀫𑀳𑀦𑁆𑀢𑀁 𑀔𑁂𑀢𑁆𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀓𑁂𑀤𑀸𑀭𑀧𑀸𑀴𑀻𑀲𑀼 𑀓𑀼𑀝𑀺𑀬𑁄 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀅𑀕𑁆𑀕𑀺𑀁 𑀚𑀸𑀮𑁂𑀬𑁆𑀬, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀜𑁆𑀘 𑀅𑀦𑁆𑀥𑀓𑀸𑀭𑀁 𑀅𑀲𑁆𑀲, 𑀅𑀣 𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀫𑀢𑁆𑀣𑀓𑁂 𑀞𑀢𑁆𑀯𑀸 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀪𑀽𑀫𑀺𑀁 𑀑𑀮𑁄𑀓𑀬𑀢𑁄 𑀦𑁂𑀯 𑀔𑁂𑀢𑁆𑀢𑀁 𑀦 𑀓𑁂𑀤𑀸𑀭𑀧𑀸𑀴𑀺𑀬𑁄 𑀦 𑀓𑀼𑀝𑀺𑀬𑁄 𑀦 𑀢𑀢𑁆𑀣 𑀲𑀬𑀺𑀢𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑁂𑀬𑁆𑀬𑀼𑀁, 𑀓𑀼𑀝𑀺𑀓𑀸𑀲𑀼 𑀧𑀦 𑀅𑀕𑁆𑀕𑀺𑀚𑀸𑀮𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑁂𑀬𑁆𑀬. 𑀏𑀯𑀁 𑀥𑀫𑁆𑀫𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀲𑀢𑁆𑀢𑀓𑀸𑀬𑀁 𑀑𑀮𑁄𑀓𑀬𑀢𑁄 𑀢𑀣𑀸𑀕𑀢𑀲𑁆𑀲 𑀬𑁂 𑀢𑁂 𑀅𑀓𑀢𑀓𑀮𑁆𑀬𑀸𑀡𑀸 𑀲𑀢𑁆𑀢𑀸, 𑀢𑁂 𑀏𑀓𑀯𑀺𑀳𑀸𑀭𑁂 𑀤𑀓𑁆𑀔𑀺𑀡𑀚𑀸𑀡𑀼𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀸𑀧𑀺 𑀩𑀼𑀤𑁆𑀥𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀦𑀸𑀕𑀘𑁆𑀙𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀲𑀭𑀸 𑀯𑀺𑀬 𑀳𑁄𑀦𑁆𑀢𑀺. 𑀬𑁂 𑀧𑀦 𑀓𑀢𑀓𑀮𑁆𑀬𑀸𑀡𑀸 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸, 𑀢𑁂 𑀏𑀯𑀲𑁆𑀲 𑀤𑀽𑀭𑁂𑀧𑀺 𑀞𑀺𑀢𑀸 𑀆𑀧𑀸𑀣𑀁 𑀕𑀘𑁆𑀙𑀦𑁆𑀢𑀺, 𑀢𑁂 𑀏𑀯 𑀅𑀕𑁆𑀕𑀺 𑀯𑀺𑀬 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄 𑀯𑀺𑀬 𑀘. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸’’𑀢𑀺. (𑀥. 𑀧. 𑁩𑁦𑁪; 𑀦𑁂𑀢𑁆𑀢𑀺. 𑁧𑁧);

𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀦𑁂𑀬𑁆𑀬𑀧𑀣𑀧𑁆𑀧𑀪𑁂𑀤𑀁 𑀲𑀩𑁆𑀩𑀁 𑀅𑀜𑁆𑀜𑀸𑀲𑀻𑀢𑀺 𑀲𑀩𑁆𑀩𑀜𑁆𑀜𑀽. 𑀲𑀗𑁆𑀔𑀢𑀸𑀲𑀗𑁆𑀔𑀢𑀸𑀤𑀺𑀪𑁂𑀤𑀸 𑀲𑀩𑁆𑀩𑀥𑀫𑁆𑀫𑀸 𑀳𑀺 𑀲𑀗𑁆𑀔𑀸𑀭𑁄 𑀯𑀺𑀓𑀸𑀭𑁄 𑀮𑀓𑁆𑀔𑀡𑀁 𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀢𑁆𑀢𑀻𑀢𑀺 𑀧𑀜𑁆𑀘𑁂𑀯 𑀦𑁂𑀬𑁆𑀬𑀧𑀣𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀜𑁆𑀜𑀼𑀲𑁆𑀲 𑀪𑀸𑀯𑁄 𑀲𑀩𑁆𑀩𑀜𑁆𑀜𑀼𑀢𑀸, 𑀲𑀩𑁆𑀩𑀜𑁆𑀜𑀼𑀢𑀸 𑀏𑀯 𑀜𑀸𑀡𑀁 ‘‘𑀲𑀩𑁆𑀩𑀜𑁆𑀜𑀼𑀢𑀸𑀜𑀸𑀡’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀜𑁆𑀜𑀽𑀢𑀺 𑀘 𑀓𑀫𑀲𑀩𑁆𑀩𑀜𑁆𑀜𑀽 𑀲𑀓𑀺𑀁𑀲𑀩𑁆𑀩𑀜𑁆𑀜𑀽 𑀲𑀢𑀢𑀲𑀩𑁆𑀩𑀜𑁆𑀜𑀽 𑀲𑀢𑁆𑀢𑀺𑀲𑀩𑁆𑀩𑀜𑁆𑀜𑀽 𑀜𑀸𑀢𑀲𑀩𑁆𑀩𑀜𑁆𑀜𑀽𑀢𑀺 𑀧𑀜𑁆𑀘𑀯𑀺𑀥𑀸 𑀲𑀩𑁆𑀩𑀜𑁆𑀜𑀼𑀦𑁄 𑀲𑀺𑀬𑀼𑀁. 𑀢𑁂𑀲𑀼 𑀓𑀫𑁂𑀦 𑀲𑀩𑁆𑀩𑀚𑀸𑀦𑀦𑀓𑀸𑀮𑀸𑀲𑀫𑁆𑀪𑀯𑀢𑁄 𑀓𑀫𑀲𑀩𑁆𑀩𑀜𑁆𑀜𑀼𑀢𑀸 𑀦 𑀳𑁄𑀢𑀺, 𑀲𑀓𑀺𑀁 𑀲𑀩𑁆𑀩𑀸𑀭𑀫𑁆𑀫𑀡𑀕𑁆𑀕𑀳𑀡𑀸𑀪𑀸𑀯𑀢𑁄 𑀲𑀓𑀺𑀁𑀲𑀩𑁆𑀩𑀜𑁆𑀜𑀼𑀢𑀸 𑀦 𑀳𑁄𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑀫𑁆𑀪𑀯𑀢𑁄 𑀪𑀯𑀗𑁆𑀕𑀘𑀺𑀢𑁆𑀢𑀯𑀺𑀭𑁄𑀥𑀢𑁄 𑀬𑀼𑀢𑁆𑀢𑀺𑀅𑀪𑀸𑀯𑀢𑁄 𑀘 𑀲𑀢𑀢𑀲𑀩𑁆𑀩𑀜𑁆𑀜𑀼𑀢𑀸 𑀦 𑀳𑁄𑀢𑀺, 𑀧𑀭𑀺𑀲𑁂𑀲𑀢𑁄 𑀲𑀩𑁆𑀩𑀚𑀸𑀦𑀦𑀲𑀫𑀢𑁆𑀣𑀢𑀸𑀬 𑀲𑀢𑁆𑀢𑀺𑀲𑀩𑁆𑀩𑀜𑁆𑀜𑀼𑀢𑀸 𑀯𑀸 𑀲𑀺𑀬𑀸, 𑀯𑀺𑀤𑀺𑀢𑀲𑀩𑁆𑀩𑀥𑀫𑁆𑀫𑀢𑁆𑀢𑀸 𑀜𑀸𑀢𑀲𑀩𑁆𑀩𑀜𑁆𑀜𑀼𑀢𑀸 𑀯𑀸, 𑀲𑀢𑁆𑀢𑀺𑀲𑀩𑁆𑀩𑀜𑁆𑀜𑀼𑀦𑁄 𑀲𑀩𑁆𑀩𑀚𑀸𑀦𑀦𑀢𑁆𑀢𑀁 𑀦𑀢𑁆𑀣𑀻𑀢𑀺 𑀢𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺, ‘‘𑀦 𑀢𑀲𑁆𑀲 𑀅𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺…𑀧𑁂… 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀜𑀸𑀢𑀲𑀩𑁆𑀩𑀜𑁆𑀜𑀼𑀢𑀸 𑀏𑀯 𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀓𑀺𑀘𑁆𑀘𑀢𑁄 𑀅𑀲𑀫𑁆𑀫𑁄𑀳𑀢𑁄 𑀓𑀸𑀭𑀡𑀲𑀺𑀤𑁆𑀥𑀺𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀢𑁄 𑀲𑀩𑁆𑀩𑀜𑁆𑀜𑀼𑀢𑀫𑁂𑀯 𑀳𑁄𑀢𑀻𑀢𑀺. 𑀢𑁂𑀦 𑀜𑀸𑀡𑁂𑀦𑀸𑀢𑀺 𑀢𑁂𑀦 𑀲𑀩𑁆𑀩𑀚𑀸𑀦𑀦𑀜𑀸𑀡𑁂𑀦.

𑀧𑀼𑀦 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀲𑀩𑁆𑀩𑀜𑁆𑀜𑀼𑀪𑀸𑀯𑀲𑀸𑀥𑀦𑀢𑁆𑀣𑀁 ‘‘𑀦 𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀦 𑀢𑀲𑁆𑀲 𑀅𑀤𑁆𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀇𑀥 𑀇𑀫𑀲𑁆𑀫𑀺𑀁 𑀢𑁂𑀥𑀸𑀢𑀼𑀓𑁂 𑀮𑁄𑀓𑁂 𑀇𑀫𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀤𑀺𑀝𑁆𑀞𑀁 𑀦𑀸𑀫 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀦 𑀅𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺. 𑀅𑀢𑁆𑀣𑀻𑀢𑀺 𑀇𑀤𑀁 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑀁 𑀆𑀔𑁆𑀬𑀸𑀢𑀧𑀤𑀁, 𑀇𑀫𑀺𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀲𑁆𑀲 𑀲𑀩𑁆𑀩𑀥𑀫𑁆𑀫𑀲𑁆𑀲 𑀜𑀸𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀦𑁂𑀢𑁆𑀣 𑀤-𑀓𑀸𑀭𑁄 𑀧𑀬𑀼𑀢𑁆𑀢𑁄. 𑀅𑀣𑁄 𑀅𑀯𑀺𑀜𑁆𑀜𑀸𑀢𑀦𑁆𑀢𑀺 𑀏𑀢𑁆𑀣 𑀅𑀣𑁄𑀢𑀺 𑀯𑀘𑀦𑁄𑀧𑀸𑀤𑀸𑀦𑁂 𑀦𑀺𑀧𑀸𑀢𑁄. 𑀅𑀯𑀺𑀜𑁆𑀜𑀸𑀢𑀦𑁆𑀢𑀺 𑀅𑀢𑀻𑀢𑀓𑀸𑀮𑀺𑀓𑀁 𑀅𑀯𑀺𑀜𑁆𑀜𑀸𑀢𑀁 𑀦𑀸𑀫 𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁 𑀦𑀸𑀳𑁄𑀲𑀻𑀢𑀺 𑀧𑀸𑀞𑀲𑁂𑀲𑁄. 𑀅𑀩𑁆𑀬𑀬𑀪𑀽𑀢𑀲𑁆𑀲 𑀅𑀢𑁆𑀣𑀺-𑀲𑀤𑁆𑀤𑀲𑁆𑀲 𑀕𑀳𑀡𑁂 𑀧𑀸𑀞𑀲𑁂𑀲𑀁 𑀯𑀺𑀦𑀸𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀇𑀫𑀺𑀦𑀸 𑀅𑀢𑀻𑀢𑀓𑀸𑀮𑀺𑀓𑀲𑁆𑀲 𑀲𑀩𑁆𑀩𑀥𑀫𑁆𑀫𑀲𑁆𑀲 𑀜𑀸𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀦𑀸𑀕𑀢𑀓𑀸𑀮𑀺𑀓𑀁 𑀅𑀚𑀸𑀦𑀺𑀢𑀩𑁆𑀩𑀁 𑀦𑀸𑀫 𑀥𑀫𑁆𑀫𑀚𑀸𑀢𑀁 𑀦 𑀪𑀯𑀺𑀲𑁆𑀲𑀢𑀺 𑀦𑀢𑁆𑀣𑀻𑀢𑀺. 𑀇𑀫𑀺𑀦𑀸 𑀅𑀦𑀸𑀕𑀢𑀓𑀸𑀮𑀺𑀓𑀲𑁆𑀲 𑀲𑀩𑁆𑀩𑀥𑀫𑁆𑀫𑀲𑁆𑀲 𑀜𑀸𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀚𑀸𑀦𑀦𑀓𑀺𑀭𑀺𑀬𑀸𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀸 𑀏𑀢𑁆𑀣 𑀅-𑀓𑀸𑀭𑁄. 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀬𑀁 𑀢𑁂𑀓𑀸𑀮𑀺𑀓𑀁 𑀯𑀸 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀁 𑀯𑀸 𑀦𑁂𑀬𑁆𑀬𑀁 𑀚𑀸𑀦𑀺𑀢𑀩𑁆𑀩𑀁 𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀢𑀣𑀸𑀕𑀢𑁄 𑀅𑀪𑀺𑀜𑁆𑀜𑀸𑀲𑀺 𑀅𑀥𑀺𑀓𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀺 𑀧𑀝𑀺𑀯𑀺𑀚𑁆𑀛𑀺, 𑀏𑀢𑁆𑀣 𑀅𑀢𑁆𑀣𑀺-𑀲𑀤𑁆𑀤𑁂𑀦 𑀢𑁂𑀓𑀸𑀮𑀺𑀓𑀲𑁆𑀲 𑀓𑀸𑀮𑀯𑀺𑀫𑀼𑀢𑁆𑀢𑀲𑁆𑀲 𑀘 𑀕𑀳𑀡𑀸 𑀅𑀢𑁆𑀣𑀺-𑀲𑀤𑁆𑀤𑁄 𑀅𑀩𑁆𑀬𑀬𑀪𑀽𑀢𑁄𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀓𑀸𑀮𑀯𑀲𑁂𑀦 𑀑𑀓𑀸𑀲𑀯𑀲𑁂𑀦 𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀸 𑀲𑀫𑀦𑁆𑀢𑀸 𑀲𑀩𑁆𑀩𑀢𑁄 𑀧𑀯𑀢𑁆𑀢𑀁 𑀜𑀸𑀡𑀘𑀓𑁆𑀔𑀼 𑀅𑀲𑁆𑀲𑀸𑀢𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀲𑀫𑀦𑁆𑀢𑀘𑀓𑁆𑀔𑀼 𑀲𑀩𑁆𑀩𑀜𑁆𑀜𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀸𑀥𑀺𑀢𑀁.

𑀦 𑀇𑀢𑀺𑀳𑀺𑀢𑀺𑀳𑀦𑁆𑀢𑀺 ‘‘𑀏𑀯𑀁 𑀓𑀺𑀭 𑀆𑀲𑀺, 𑀏𑀯𑀁 𑀓𑀺𑀭 𑀆𑀲𑀻’’𑀢𑀺 𑀦 𑀳𑁄𑀢𑀺. 𑀦 𑀇𑀢𑀺𑀓𑀺𑀭𑀸𑀬𑀸𑀢𑀺 ‘‘𑀏𑀯𑀁 𑀓𑀺𑀭 𑀏𑀢’’𑀦𑁆𑀢𑀺 𑀦 𑀳𑁄𑀢𑀺. 𑀦 𑀧𑀭𑀫𑁆𑀧𑀭𑀸𑀬𑀸𑀢𑀺 𑀧𑀭𑀫𑁆𑀧𑀭𑀓𑀣𑀸𑀬𑀸𑀧𑀺 𑀦 𑀳𑁄𑀢𑀺. 𑀦 𑀧𑀺𑀝𑀓𑀲𑀫𑁆𑀧𑀤𑀸𑀬𑀸𑀢𑀺 𑀅𑀫𑁆𑀳𑀸𑀓𑀁 𑀧𑀺𑀝𑀓𑀢𑀦𑁆𑀢𑀺𑀬𑀸 𑀲𑀤𑁆𑀥𑀺𑀁 𑀲𑀫𑁂𑀢𑀻𑀢𑀺 𑀦 𑀳𑁄𑀢𑀺. 𑀦 𑀢𑀓𑁆𑀓𑀳𑁂𑀢𑀽𑀢𑀺 𑀢𑀓𑁆𑀓𑀕𑁆𑀕𑀸𑀳𑁂𑀦𑀧𑀺 𑀦 𑀳𑁄𑀢𑀺. 𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦𑀸𑀢𑀺 ‘‘𑀲𑀼𑀦𑁆𑀤𑀭𑀫𑀺𑀤𑀁 𑀓𑀸𑀭𑀡’’𑀦𑁆𑀢𑀺 𑀏𑀯𑀁 𑀓𑀸𑀭𑀡𑀧𑀭𑀺𑀯𑀺𑀢𑀓𑁆𑀓𑁂𑀦𑀧𑀺 𑀦 𑀳𑁄𑀢𑀺. 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸𑀢𑀺 𑀅𑀫𑁆𑀳𑀸𑀓𑀁 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀔𑀫𑀺𑀢𑁆𑀯𑀸 𑀕𑀳𑀺𑀢𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀲𑀫𑁂𑀢𑀻𑀢𑀺𑀧𑀺 𑀦 𑀳𑁄𑀢𑀺.

𑀅𑀣 𑀯𑀸𑀧𑀺 𑀲𑀫𑀸𑀥𑀺𑀦𑁆𑀢𑀺 𑀏𑀢𑁆𑀣 𑀲𑀫𑀸𑀥𑀺𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑀸𑀥𑀺. 𑀓𑁂𑀦𑀝𑁆𑀞𑁂𑀦 𑀲𑀫𑀸𑀥𑀻𑀢𑀺? 𑀲𑀫𑀸𑀥𑀸𑀦𑀝𑁆𑀞𑁂𑀦. 𑀓𑀺𑀫𑀺𑀤𑀁 𑀲𑀫𑀸𑀥𑀸𑀦𑀁 𑀦𑀸𑀫? 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀁 𑀲𑀫𑁆𑀫𑀸 𑀘 𑀆𑀥𑀸𑀦𑀁, 𑀞𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀲𑀫𑀁 𑀲𑀫𑁆𑀫𑀸 𑀘 𑀅𑀯𑀺𑀓𑁆𑀔𑀺𑀧𑁆𑀧𑀫𑀸𑀦𑀸 𑀅𑀯𑀺𑀧𑁆𑀧𑀓𑀺𑀡𑁆𑀡𑀸 𑀘 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀇𑀤𑀁 𑀲𑀫𑀸𑀥𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀔𑁄 𑀧𑀦 𑀲𑀫𑀸𑀥𑀺𑀲𑁆𑀲 𑁋

‘‘𑀮𑀓𑁆𑀔𑀡𑀁 𑀢𑀼 𑀅𑀯𑀺𑀓𑁆𑀔𑁂𑀧𑁄, 𑀯𑀺𑀓𑁆𑀔𑁂𑀧𑀤𑁆𑀥𑀁𑀲𑀦𑀁 𑀭𑀲𑁄;

𑀅𑀓𑀫𑁆𑀧𑀦𑀫𑀼𑀧𑀝𑁆𑀞𑀸𑀦𑀁, 𑀧𑀤𑀝𑁆𑀞𑀸𑀦𑀁 𑀲𑀼𑀔𑀁 𑀧𑀦’’. (𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁩);

𑀲𑀫𑀸𑀥𑀺 𑀅𑀦𑀸𑀯𑀺𑀮𑀅𑀘𑀮𑀪𑀸𑀯𑁂𑀦 𑀆𑀭𑀫𑁆𑀫𑀡𑁂 𑀢𑀺𑀝𑁆𑀞𑀢𑀻𑀢𑀺 𑀞𑀺𑀢𑀺. 𑀧𑀭𑀢𑁄 𑀧𑀤𑀤𑁆𑀯𑀬𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀅𑀧𑀺 𑀘 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑀫𑁆𑀳𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀲𑀡𑁆𑀞𑀺𑀢𑀺. 𑀆𑀭𑀫𑁆𑀫𑀡𑀁 𑀑𑀕𑀸𑀳𑁂𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀅𑀯𑀝𑁆𑀞𑀺𑀢𑀺. 𑀓𑀼𑀲𑀮𑀧𑀓𑁆𑀔𑀲𑁆𑀫𑀺𑀜𑁆𑀳𑀺 𑀘𑀢𑁆𑀢𑀸𑀭𑁄𑀯 𑀥𑀫𑁆𑀫𑀸 𑀆𑀭𑀫𑁆𑀫𑀡𑀁 𑀑𑀕𑀸𑀳𑀦𑁆𑀢𑀺 𑀲𑀤𑁆𑀥𑀸 𑀲𑀢𑀺 𑀲𑀫𑀸𑀥𑀺 𑀧𑀜𑁆𑀜𑀸𑀢𑀺. 𑀢𑁂𑀦𑁂𑀯 𑀲𑀤𑁆𑀥𑀸 ‘‘𑀑𑀓𑀧𑁆𑀧𑀦𑀸’’𑀢𑀺 𑀯𑀼𑀢𑁆𑀢𑀸, 𑀲𑀢𑀺 ‘‘𑀅𑀧𑀺𑀮𑀸𑀧𑀦𑀢𑀸’’𑀢𑀺, 𑀲𑀫𑀸𑀥𑀺 ‘‘𑀅𑀯𑀝𑁆𑀞𑀺𑀢𑀻’’𑀢𑀺, 𑀧𑀜𑁆𑀜𑀸 ‘‘𑀧𑀭𑀺𑀬𑁄𑀕𑀸𑀳𑀦𑀸’’𑀢𑀺. 𑀅𑀓𑀼𑀲𑀮𑀧𑀓𑁆𑀔𑁂 𑀧𑀦 𑀢𑀬𑁄 𑀥𑀫𑁆𑀫𑀸 𑀆𑀭𑀫𑁆𑀫𑀡𑀁 𑀑𑀕𑀸𑀳𑀦𑁆𑀢𑀺 𑀢𑀡𑁆𑀳𑀸 𑀤𑀺𑀝𑁆𑀞𑀺 𑀅𑀯𑀺𑀚𑁆𑀚𑀸𑀢𑀺. 𑀢𑁂𑀦𑁂𑀯𑁂𑀢𑁂 ‘‘𑀑𑀖𑀸’’𑀢𑀺 𑀯𑀼𑀢𑁆𑀢𑀸. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀧𑀦𑁂𑀢𑁆𑀣 𑀦 𑀩𑀮𑀯𑀢𑀻 𑀳𑁄𑀢𑀺. 𑀬𑀣𑀸 𑀳𑀺 𑀭𑀚𑀼𑀝𑁆𑀞𑀸𑀦𑀝𑁆𑀞𑀸𑀦𑁂 𑀉𑀤𑀓𑁂𑀦 𑀲𑀺𑀜𑁆𑀘𑀺𑀢𑁆𑀯𑀸 𑀲𑀫𑁆𑀫𑀝𑁆𑀞𑁂 𑀣𑁄𑀓𑀫𑁂𑀯 𑀓𑀸𑀮𑀁 𑀭𑀚𑁄 𑀲𑀦𑁆𑀦𑀺𑀲𑀻𑀤𑀢𑀺, 𑀲𑀼𑀓𑁆𑀔𑀦𑁆𑀢𑁂 𑀲𑀼𑀓𑁆𑀔𑀦𑁆𑀢𑁂 𑀧𑀼𑀦 𑀧𑀓𑀢𑀺𑀪𑀸𑀯𑁂𑀦𑁂𑀯 𑀯𑀼𑀝𑁆𑀞𑀸𑀢𑀺, 𑀏𑀯𑀫𑁂𑀯 𑀅𑀓𑀼𑀲𑀮𑀧𑀓𑁆𑀔𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦 𑀩𑀮𑀯𑀢𑀻 𑀳𑁄𑀢𑀺.

𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀯𑀺𑀲𑀸𑀳𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀅𑀯𑀺𑀲𑀸𑀳𑀸𑀭𑁄. 𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦𑁂𑀯 𑀕𑀘𑁆𑀙𑀦𑁆𑀢𑀁 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺 𑀦𑀸𑀫. 𑀅𑀬𑀁 𑀧𑀦 𑀢𑀣𑀸𑀯𑀺𑀥𑁄 𑀯𑀺𑀓𑁆𑀔𑁂𑀧𑁄 𑀦 𑀳𑁄𑀢𑀻𑀢𑀺 𑀅𑀯𑀺𑀓𑁆𑀔𑁂𑀧𑁄. 𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦𑁂𑀯 𑀘𑀺𑀢𑁆𑀢𑀁 𑀯𑀺𑀲𑀸𑀳𑀝𑀁 𑀦𑀸𑀫 𑀳𑁄𑀢𑀺, 𑀇𑀢𑁄 𑀘𑀺𑀢𑁄 𑀘 𑀳𑀭𑀻𑀬𑀢𑀺, 𑀅𑀬𑀁 𑀧𑀦 𑀏𑀯𑀁 𑀅𑀯𑀺𑀲𑀸𑀳𑀝𑀫𑀸𑀦𑀲𑀲𑁆𑀲 𑀪𑀸𑀯𑁄𑀢𑀺 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸. 𑀲𑀫𑀣𑁄𑀢𑀺 𑀢𑀺𑀯𑀺𑀥𑁄 𑀲𑀫𑀣𑁄 𑀘𑀺𑀢𑁆𑀢𑀲𑀫𑀣𑁄 𑀅𑀥𑀺𑀓𑀭𑀡𑀲𑀫𑀣𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺. 𑀢𑀢𑁆𑀣 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘𑀺𑀢𑁆𑀢𑀲𑀫𑀣𑁄 𑀦𑀸𑀫. 𑀢𑀜𑁆𑀳𑀺 𑀆𑀕𑀫𑁆𑀫 𑀘𑀺𑀢𑁆𑀢𑀘𑀮𑀦𑀁 𑀘𑀺𑀢𑁆𑀢𑀯𑀺𑀧𑁆𑀨𑀦𑁆𑀤𑀺𑀢𑀁 𑀲𑀫𑁆𑀫𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀢𑀲𑁆𑀫𑀸 𑀲𑁄 ‘‘𑀘𑀺𑀢𑁆𑀢𑀲𑀫𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀺𑀲𑀢𑁆𑀢𑀯𑀺𑀥𑁄 𑀲𑀫𑀣𑁄 𑀅𑀥𑀺𑀓𑀭𑀡𑀲𑀫𑀣𑁄 𑀦𑀸𑀫. 𑀢𑀜𑁆𑀳𑀺 𑀆𑀕𑀫𑁆𑀫 𑀢𑀸𑀦𑀺 𑀢𑀸𑀦𑀺 𑀅𑀥𑀺𑀓𑀭𑀡𑀸𑀦𑀺 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀲𑁄 ‘‘𑀅𑀥𑀺𑀓𑀭𑀡𑀲𑀫𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀢𑀁 ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀘𑀺𑀢𑁆𑀢𑀲𑀫𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀫𑀸𑀥𑀺𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀸𑀥𑀺𑀩𑀮𑀁. 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀬𑀸𑀣𑀸𑀯𑀲𑀫𑀸𑀥𑀺 𑀦𑀺𑀬𑁆𑀬𑀸𑀦𑀺𑀓𑀲𑀫𑀸𑀥𑀺.

𑁧𑁫𑁭. 𑀅𑀣𑀲𑁆𑀲 𑀪𑀕𑀯𑀸 𑀬𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀲𑀻𑀮𑀲𑁆𑀲 𑀭𑀓𑁆𑀔𑀸, 𑀬𑀲𑁆𑀫𑀸 𑀯𑀸 𑀇𑀫𑀺𑀦𑀸𑀦𑀼𑀓𑁆𑀓𑀫𑁂𑀦 𑀤𑁂𑀲𑀺𑀬𑀫𑀸𑀦𑀸 𑀅𑀬𑀁 𑀤𑁂𑀲𑀦𑀸 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀲𑀧𑁆𑀧𑀸𑀬𑀸, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀢𑁄 𑀧𑀪𑀼𑀢𑀺 𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀽𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑁄. 𑀢𑀢𑁆𑀣 𑀘𑀓𑁆𑀔𑀽𑀳𑀺 𑀦𑁂𑀯 𑀮𑁄𑀮𑀲𑁆𑀲𑀸𑀢𑀺 𑀅𑀤𑀺𑀝𑁆𑀞𑀤𑀓𑁆𑀔𑀺𑀢𑀩𑁆𑀩𑀸𑀤𑀺𑀯𑀲𑁂𑀦 𑀘𑀓𑁆𑀔𑀽𑀳𑀺 𑀮𑁄𑀮𑁄 𑀦𑁂𑀯 𑀅𑀲𑁆𑀲. 𑀕𑀸𑀫𑀓𑀣𑀸𑀬 𑀆𑀯𑀭𑀬𑁂 𑀲𑁄𑀢𑀦𑁆𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀲𑁄𑀢𑀁 𑀆𑀯𑀭𑁂𑀬𑁆𑀬.

𑀘𑀓𑁆𑀔𑀼𑀮𑁄𑀮𑀺𑀬𑁂𑀦𑀸𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀮𑁄𑀮𑀯𑀲𑁂𑀦 𑀘𑀓𑁆𑀔𑀼𑀮𑁄𑀮𑀺𑀬𑁂𑀦. 𑀅𑀤𑀺𑀝𑁆𑀞𑀁 𑀤𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀭𑀽𑀧𑀸𑀭𑀫𑁆𑀫𑀡𑀁 𑀧𑀲𑁆𑀲𑀺𑀢𑀼𑀁 𑀬𑀼𑀢𑁆𑀢𑀁. 𑀤𑀺𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀤𑀺𑀝𑁆𑀞𑀧𑀼𑀩𑁆𑀩𑀭𑀽𑀧𑀸𑀭𑀫𑁆𑀫𑀡𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀁. 𑀆𑀭𑀸𑀫𑁂𑀦 𑀆𑀭𑀸𑀫𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑀸𑀤𑀺𑀆𑀭𑀸𑀫𑁂𑀦 𑀨𑀮𑀸𑀭𑀸𑀫𑀸𑀤𑀺𑀁 𑀯𑀸 𑀧𑀼𑀧𑁆𑀨𑀸𑀭𑀸𑀫𑀸𑀤𑀺𑀁 𑀯𑀸. 𑀤𑀻𑀖𑀘𑀸𑀭𑀺𑀓𑀦𑁆𑀢𑀺 𑀤𑀻𑀖𑀘𑀭𑀡𑀁. 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀦𑁆𑀢𑀺 𑀅𑀲𑀦𑁆𑀦𑀺𑀝𑁆𑀞𑀸𑀦𑀘𑀭𑀡𑀁. 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺 𑀭𑀽𑀧𑀤𑀲𑁆𑀲𑀦𑀸𑀬𑀸𑀢𑀺 𑀭𑀽𑀧𑀸𑀭𑀫𑁆𑀫𑀡𑀤𑀲𑁆𑀲𑀦𑀢𑁆𑀣𑀸𑀬 𑀧𑀼𑀦𑀧𑁆𑀧𑀼𑀦𑀁 𑀬𑀼𑀢𑁆𑀢𑁄 𑀳𑁄𑀢𑀺.

𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄𑀢𑀺 𑀉𑀫𑁆𑀫𑀸𑀭𑀩𑁆𑀪𑀦𑁆𑀢𑀭𑀁 𑀧𑀯𑀺𑀝𑁆𑀞𑁄. 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄𑀢𑀺 𑀅𑀦𑁆𑀢𑀭𑀯𑀻𑀣𑀺𑀁 𑀑𑀢𑀺𑀡𑁆𑀡𑁄. 𑀖𑀭𑀫𑀼𑀔𑀸𑀦𑀺 𑀑𑀮𑁄𑀓𑁂𑀦𑁆𑀢𑁄𑀢𑀺 𑀖𑀭𑀤𑁆𑀯𑀸𑀭𑀸𑀦𑀺 𑀅𑀯𑀮𑁄𑀓𑁂𑀦𑁆𑀢𑁄. 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀦𑁆𑀢𑁄𑀢𑀺 𑀉𑀧𑀭𑀺𑀤𑀺𑀲𑀁 𑀉𑀤𑁆𑀥𑀁𑀫𑀼𑀔𑁄 𑀳𑀼𑀢𑁆𑀯𑀸 𑀯𑀺𑀮𑁄𑀓𑁂𑀦𑁆𑀢𑁄.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀓𑀸𑀭𑀡𑀯𑀲𑁂𑀦 𑀘𑀓𑁆𑀔𑀽𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 ‘‘𑀘𑀓𑁆𑀔𑀼 𑀭𑀽𑀧𑀁 𑀦 𑀧𑀲𑁆𑀲𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀸, 𑀘𑀺𑀢𑁆𑀢𑀁 𑀦 𑀧𑀲𑁆𑀲𑀢𑀺 𑀅𑀘𑀓𑁆𑀔𑀼𑀓𑀢𑁆𑀢𑀸. 𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑁂 𑀧𑀦 𑀧𑀲𑀸𑀤𑀯𑀢𑁆𑀣𑀼𑀓𑁂𑀦 𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀈𑀤𑀺𑀲𑀻 𑀧𑀦𑁂𑀲𑀸 ‘𑀥𑀦𑀼𑀦𑀸 𑀯𑀺𑀚𑁆𑀛𑀢𑀻’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀲𑀫𑁆𑀪𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄’’𑀢𑀺. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀁 𑀦𑀺𑀫𑀺𑀢𑁆𑀢𑀁 𑀙𑀦𑁆𑀤𑀭𑀸𑀕𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀦 𑀲𑀡𑁆𑀞𑀸𑀢𑀺. 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻𑀢𑀺 𑀓𑀺𑀮𑁂𑀲𑀸𑀦𑀁 𑀅𑀦𑀼𑀅𑀦𑀼𑀩𑁆𑀬𑀜𑁆𑀚𑀦𑀢𑁄 𑀧𑀸𑀓𑀝𑀪𑀸𑀯𑀓𑀭𑀡𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀳𑀢𑁆𑀣𑀧𑀸𑀤𑀲𑀺𑀢𑀳𑀲𑀺𑀢𑀓𑀣𑀺𑀢𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀪𑁂𑀤𑀁 𑀆𑀓𑀸𑀭𑀁 𑀕𑀡𑁆𑀳𑀸𑀢𑀺. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀦𑁆𑀢𑀺𑀆𑀤𑀺𑀫𑁆𑀳𑀺 𑀬𑀁𑀓𑀸𑀭𑀡𑀸 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼 𑀏𑀢𑀁 𑀧𑀼𑀕𑁆𑀕𑀮𑀁 𑀲𑀢𑀺𑀓𑀯𑀸𑀝𑁂𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀅𑀧𑀺𑀳𑀺𑀢𑀘𑀓𑁆𑀔𑀼𑀤𑁆𑀯𑀸𑀭𑀁 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀁 𑀏𑀢𑁂 𑀅𑀪𑀺𑀚𑁆𑀛𑀸𑀤𑀬𑁄 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀬𑁆𑀬𑀼𑀁 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬𑀼𑀁. 𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀢𑁆𑀣𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀁𑀪𑀽𑀢𑁄𑀬𑁂𑀯 𑀘 𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁. 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀦𑀢𑁆𑀣𑀺. 𑀦 𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀲𑀢𑀺 𑀯𑀸 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀧𑀺𑀘 𑀬𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀢𑀤𑀸 𑀪𑀯𑀗𑁆𑀕𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁, 𑀢𑀢𑁄 𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁, 𑀢𑀢𑁄 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁, 𑀢𑀢𑁄 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀤𑀦𑀦𑁆𑀢𑀭𑀁 𑀚𑀯𑀦𑀁 𑀚𑀯𑀢𑀺.

𑀢𑀢𑁆𑀭𑀸𑀧𑀺 𑀦𑁂𑀯 𑀪𑀯𑀗𑁆𑀕𑀲𑀫𑀬𑁂 𑀦 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀫𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀅𑀢𑁆𑀣𑀺. 𑀚𑀯𑀦𑀓𑁆𑀔𑀡𑁂 𑀧𑀦 𑀲𑀘𑁂 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀯𑀸 𑀅𑀜𑁆𑀜𑀸𑀡𑀁 𑀯𑀸 𑀅𑀓𑁆𑀔𑀦𑁆𑀢𑀺 𑀯𑀸 𑀓𑁄𑀲𑀚𑁆𑀚𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀲𑀁𑀯𑀭𑁄 𑀳𑁄𑀢𑀺. 𑀏𑀯𑀁 𑀳𑁄𑀦𑁆𑀢𑁄 𑀧𑀦 𑀲𑁄 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀅𑀲𑀁𑀯𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀕𑀭𑁂 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀕𑀩𑁆𑀪𑀸𑀤𑀬𑁄 𑀲𑀁𑀯𑀼𑀢𑀸, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀅𑀭𑀓𑁆𑀔𑀺𑀢𑀁 𑀅𑀕𑁄𑀧𑀺𑀢𑀫𑁂𑀯 𑀳𑁄𑀢𑀺. 𑀦𑀕𑀭𑀤𑁆𑀯𑀸𑀭𑁂𑀦 𑀳𑀺 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀬𑀤𑀺𑀘𑁆𑀙𑀦𑁆𑀢𑀺 𑀢𑀁 𑀓𑀭𑁂𑀬𑁆𑀬𑀼𑀁, 𑀏𑀯𑀫𑁂𑀯 𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺.

𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀻𑀢𑀺 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀇𑀥𑀮𑁄𑀓𑀜𑁆𑀘 𑀧𑀭𑀮𑁄𑀓𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀤𑀺𑀦𑁆𑀦𑀸𑀦𑀺. ‘‘𑀅𑀬𑀁 𑀫𑁂 𑀜𑀸𑀢𑀻𑀢𑀺 𑀯𑀸, 𑀫𑀺𑀢𑁆𑀢𑁄𑀢𑀺 𑀯𑀸, 𑀇𑀤𑀁 𑀯𑀸 𑀧𑀝𑀺𑀓𑀭𑀺𑀲𑁆𑀲𑀢𑀺, 𑀇𑀤𑀁 𑀯𑀸𑀦𑁂𑀦 𑀓𑀢𑀧𑀼𑀩𑁆𑀩’’𑀦𑁆𑀢𑀺 𑀯𑀸 𑀏𑀯𑀁 𑀦 𑀤𑀺𑀦𑁆𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀤𑀺𑀦𑁆𑀦𑀸𑀦𑀺 𑀳𑀺 𑀦 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀪𑁄𑀚𑀦𑀸𑀦𑀻𑀢𑀺 𑀘 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀫𑁂𑀢𑀁, 𑀅𑀢𑁆𑀣𑀢𑁄 𑀧𑀦 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀘𑀻𑀯𑀭𑀸𑀦𑀺 𑀧𑀸𑀭𑀼𑀧𑀺𑀢𑁆𑀯𑀸 𑀲𑁂𑀦𑀸𑀲𑀦𑀸𑀦𑀺 𑀲𑁂𑀯𑀫𑀸𑀦𑀸 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑀸𑀢𑀺 𑀲𑀩𑁆𑀩𑀫𑁂𑀢𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄. 𑀢𑀲𑁆𑀲𑀢𑁆𑀣𑁄, 𑀓𑀢𑀫𑁄 𑀳𑁄𑀢𑀺. 𑀦𑀘𑁆𑀘𑀁 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀦𑀘𑁆𑀘𑀁, 𑀢𑀁 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦𑀸𑀧𑀺 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀤𑀝𑁆𑀞𑀼𑀁 𑀦 𑀯𑀝𑁆𑀝𑀢𑀺. 𑀕𑀻𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑀻𑀢𑀁. 𑀯𑀸𑀤𑀺𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀯𑀸𑀤𑀺𑀢𑀁. 𑀧𑁂𑀓𑁆𑀔𑀦𑁆𑀢𑀺 𑀦𑀝𑀲𑀫𑀚𑁆𑀚𑀁. 𑀅𑀓𑁆𑀔𑀸𑀦𑀦𑁆𑀢𑀺 𑀪𑀸𑀭𑀢𑀭𑀸𑀫𑀸𑀬𑀦𑀸𑀤𑀺𑀓𑀁. 𑀬𑀲𑁆𑀫𑀺𑀁 𑀞𑀸𑀦𑁂 𑀓𑀣𑀻𑀬𑀢𑀺, 𑀢𑀢𑁆𑀣 𑀕𑀦𑁆𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀸𑀡𑀺𑀲𑁆𑀲𑀭𑀦𑁆𑀢𑀺 𑀓𑀁𑀲𑀢𑀸𑀴𑀁, ‘‘𑀧𑀸𑀡𑀺𑀢𑀸𑀴’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀯𑁂𑀢𑀸𑀴𑀦𑁆𑀢𑀺 𑀖𑀦𑀢𑀸𑀴𑀁, ‘‘𑀫𑀦𑁆𑀢𑁂𑀦 𑀫𑀢𑀲𑀭𑀻𑀭𑀼𑀝𑁆𑀞𑀸𑀧𑀦’’𑀦𑁆𑀢𑀺𑀧𑀺 𑀏𑀓𑁂. 𑀓𑀼𑀫𑁆𑀪𑀣𑀽𑀡𑀦𑁆𑀢𑀺 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀓𑀢𑀸𑀴𑀁, ‘‘𑀓𑀼𑀫𑁆𑀪𑀲𑀤𑁆𑀤’’𑀦𑁆𑀢𑀺𑀧𑀺 𑀏𑀓𑁂. 𑀲𑁄𑀪𑀦𑀓𑀦𑁆𑀢𑀺 𑀦𑀝𑀸𑀦𑀁 𑀅𑀩𑁆𑀪𑁄𑀓𑁆𑀓𑀺𑀭𑀡𑀁; 𑀲𑁄𑀪𑀦𑀓𑀭𑀁 𑀯𑀸, 𑀧𑀝𑀺𑀪𑀸𑀦𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀡𑁆𑀟𑀸𑀮𑀦𑁆𑀢𑀺 𑀅𑀬𑁄𑀕𑀼𑀴𑀓𑀻𑀴𑀸, ‘‘𑀘𑀡𑁆𑀟𑀸𑀮𑀸𑀦𑀁 𑀲𑀸𑀡𑀥𑁄𑀯𑀦𑀓𑀻𑀴𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀁𑀲𑀦𑁆𑀢𑀺 𑀯𑁂𑀡𑀼𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀓𑀻𑀴𑀦𑀁.

𑀥𑁄𑀯𑀦𑀦𑁆𑀢𑀺 𑀅𑀝𑁆𑀞𑀺𑀥𑁄𑀯𑀦𑀁, 𑀏𑀓𑀘𑁆𑀘𑁂𑀲𑀼 𑀓𑀺𑀭 𑀚𑀦𑀧𑀤𑁂𑀲𑀼 𑀓𑀸𑀮𑀗𑁆𑀓𑀢𑁂 𑀜𑀸𑀢𑀓𑁂 𑀦 𑀛𑀸𑀧𑁂𑀦𑁆𑀢𑀺, 𑀦𑀺𑀔𑀡𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀅𑀣 𑀢𑁂𑀲𑀁 𑀧𑀽𑀢𑀺𑀪𑀽𑀢𑀁 𑀓𑀸𑀬𑀁 𑀜𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀅𑀝𑁆𑀞𑀻𑀦𑀺 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑁂𑀳𑀺 𑀫𑀓𑁆𑀔𑁂𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀢𑁂 𑀦𑀓𑁆𑀔𑀢𑁆𑀢𑀓𑀸𑀮𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀅𑀝𑁆𑀞𑀻𑀦𑀺 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀼𑀭𑀸𑀤𑀻𑀦𑀺 𑀞𑀧𑁂𑀢𑁆𑀯𑀸 𑀭𑁄𑀤𑀦𑁆𑀢𑀸 𑀧𑀭𑀺𑀤𑁂𑀯𑀦𑁆𑀢𑀸 𑀲𑀼𑀭𑀁 𑀧𑀺𑀯𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀤𑀓𑁆𑀔𑀺𑀡𑁂𑀲𑀼 𑀚𑀦𑀧𑀤𑁂𑀲𑀼 𑀥𑁄𑀯𑀦𑀁 𑀦𑀸𑀫, 𑀢𑀢𑁆𑀣 𑀳𑁄𑀢𑀺 𑀅𑀦𑁆𑀦𑀫𑁆𑀧𑀺 𑀧𑀸𑀦𑀫𑁆𑀧𑀺 𑀔𑀚𑁆𑀚𑀫𑁆𑀧𑀺 𑀪𑁄𑀚𑁆𑀚𑀫𑁆𑀧𑀺 𑀮𑁂𑀬𑁆𑀬𑀫𑁆𑀧𑀺 𑀧𑁂𑀬𑁆𑀬𑀫𑁆𑀧𑀺 𑀦𑀘𑁆𑀘𑀫𑁆𑀧𑀺 𑀕𑀻𑀢𑀫𑁆𑀧𑀺 𑀯𑀸𑀤𑀺𑀢𑀫𑁆𑀧𑀺. 𑀅𑀢𑁆𑀣𑁂𑀓𑀁 𑀪𑀺𑀓𑁆𑀔𑀯𑁂 𑀥𑁄𑀯𑀦𑀁, 𑀦𑁂𑀢𑀁 𑀦𑀢𑁆𑀣𑀻𑀢𑀺 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁧𑁦.𑁧𑁦𑁭). 𑀏𑀓𑀘𑁆𑀘𑁂 𑀧𑀦 ‘‘𑀇𑀦𑁆𑀤𑀚𑀸𑀮𑁂𑀦 𑀅𑀝𑁆𑀞𑀺𑀥𑁄𑀯𑀦𑀁 𑀥𑁄𑀯𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀳𑀢𑁆𑀣𑀺𑀬𑀼𑀤𑁆𑀥𑀸𑀤𑀻𑀲𑀼 𑀪𑀺𑀓𑁆𑀔𑀼𑀦𑁄 𑀦𑁂𑀯 𑀳𑀢𑁆𑀣𑀺𑀆𑀤𑀻𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑀼𑀁, 𑀦 𑀢𑁂 𑀬𑀼𑀚𑁆𑀛𑀸𑀧𑁂𑀢𑀼𑀁, 𑀦 𑀬𑀼𑀚𑁆𑀛𑀦𑁆𑀢𑁂 𑀤𑀝𑁆𑀞𑀼𑀁 𑀯𑀝𑁆𑀝𑀢𑀺. 𑀦𑀺𑀩𑁆𑀩𑀼𑀤𑁆𑀥𑀦𑁆𑀢𑀺 𑀫𑀮𑁆𑀮𑀬𑀼𑀤𑁆𑀥𑀁. 𑀉𑀬𑁆𑀬𑁄𑀥𑀺𑀓𑀦𑁆𑀢𑀺 𑀬𑀢𑁆𑀣 𑀲𑀫𑁆𑀧𑀳𑀸𑀭𑁄 𑀤𑀺𑀬𑁆𑀬𑀢𑀺. 𑀩𑀮𑀕𑁆𑀕𑀦𑁆𑀢𑀺 𑀩𑀮𑀕𑀡𑀦𑀝𑁆𑀞𑀸𑀦𑀁. 𑀲𑁂𑀦𑀸𑀩𑁆𑀬𑀽𑀳𑀦𑁆𑀢𑀺 𑀲𑁂𑀦𑀸𑀦𑀺𑀯𑁂𑀲𑁄, 𑀲𑀓𑀝𑀩𑁆𑀬𑀽𑀳𑀸𑀤𑀺𑀯𑀲𑁂𑀦 𑀲𑁂𑀦𑀸𑀬 𑀦𑀺𑀯𑁂𑀲𑀦𑀁. 𑀅𑀦𑀻𑀓𑀤𑀲𑁆𑀲𑀦𑀦𑁆𑀢𑀺 ‘‘𑀢𑀬𑁄 𑀳𑀢𑁆𑀣𑀻 𑀧𑀘𑁆𑀙𑀺𑀫𑀁 𑀳𑀢𑁆𑀣𑀸𑀦𑀻𑀓’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁩𑁨𑁪) 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀅𑀦𑀻𑀓𑀲𑁆𑀲 𑀤𑀲𑁆𑀲𑀦𑀁.

𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻𑀢𑀺 𑀙𑀦𑁆𑀤𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀫𑀺𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺. 𑀏𑀯𑀁 𑀲𑁂𑀲𑀧𑀤𑀸𑀦𑀺𑀧𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀘 𑀳𑁂𑀝𑁆𑀞𑀸 𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 𑀢𑀲𑁆𑀫𑀺𑀁 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀕𑀭𑀤𑁆𑀯𑀸𑀭𑁂𑀲𑀼 𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀸𑀤𑀬𑁄 𑀅𑀲𑀁𑀯𑀼𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀲𑀼𑀭𑀓𑁆𑀔𑀺𑀢𑀁 𑀲𑀼𑀕𑁄𑀧𑀺𑀢𑀫𑁂𑀯 𑀳𑁄𑀢𑀺, 𑀦𑀕𑀭𑀤𑁆𑀯𑀸𑀭𑁂𑀲𑀼 𑀧𑀺𑀳𑀺𑀢𑁂𑀲𑀼 𑀘𑁄𑀭𑀸𑀦𑀁 𑀧𑀯𑁂𑀲𑁄 𑀦𑀢𑁆𑀣𑀺. 𑀏𑀯𑀫𑁂𑀯 𑀚𑀯𑀦𑁂 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄’’𑀢𑀺 𑀯𑀼𑀢𑁆𑀢𑁄. 𑀇𑀢𑁄 𑀧𑀭𑀁 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑀽𑀓𑀤𑀲𑁆𑀲𑀦𑀸𑀢𑀺 𑀧𑀝𑀸𑀡𑀻𑀤𑀲𑁆𑀲𑀦𑀢𑁄. 𑀕𑀸𑀫𑀓𑀣𑀸𑀢𑀺 𑀕𑀸𑀫𑀯𑀸𑀲𑀻𑀦𑀁 𑀓𑀣𑀸. 𑀩𑀸𑀢𑁆𑀢𑀺𑀁𑀲𑀸𑀢𑀺 𑀤𑁆𑀯𑀢𑁆𑀢𑀺𑀁𑀲. 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀸𑀦𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑀸 𑀓𑀣𑀸𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀸. 𑀢𑀢𑁆𑀣 𑀭𑀸𑀚𑀸𑀦𑀁 𑀆𑀭𑀩𑁆𑀪 ‘‘𑀫𑀳𑀸𑀲𑀫𑁆𑀫𑀢𑁄 𑀫𑀦𑁆𑀥𑀸𑀢𑀸 𑀥𑀫𑁆𑀫𑀸𑀲𑁄𑀓𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀭𑀸𑀚𑀓𑀣𑀸. 𑀏𑀲 𑀦𑀬𑁄 𑀘𑁄𑀭𑀓𑀣𑀸𑀤𑀻𑀲𑀼. 𑀢𑁂𑀲𑀼 ‘‘𑀅𑀲𑀼𑀓𑁄 𑀭𑀸𑀚𑀸 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑁂𑀳𑀲𑁆𑀲𑀺𑀢𑀓𑀣𑀸𑀯 𑀢𑀺𑀭𑀘𑁆𑀙𑀸𑀦𑀓𑀣𑀸 𑀳𑁄𑀢𑀺. ‘‘𑀲𑁄𑀧𑀺 𑀦𑀸𑀫 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀔𑀬𑀁 𑀕𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀦 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂 𑀢𑀺𑀝𑁆𑀞𑀢𑀺. 𑀘𑁄𑀭𑁂𑀲𑀼𑀧𑀺 ‘‘𑀫𑀽𑀮𑀤𑁂𑀯𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄, 𑀫𑁂𑀖𑀫𑀸𑀮𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀢𑁂𑀲𑀁 𑀓𑀫𑁆𑀫𑀁 𑀧𑀝𑀺𑀘𑁆𑀘 ‘‘𑀅𑀳𑁄 𑀲𑀽𑀭𑀸’’𑀢𑀺 𑀕𑁂𑀳𑀲𑁆𑀲𑀺𑀢𑀓𑀣𑀸𑀯 𑀢𑀺𑀭𑀘𑁆𑀙𑀸𑀦𑀓𑀣𑀸. 𑀬𑀼𑀤𑁆𑀥𑁂𑀧𑀺 𑀪𑀸𑀭𑀢𑀬𑀼𑀤𑁆𑀥𑀸𑀤𑀻𑀲𑀼 ‘‘𑀅𑀲𑀼𑀓𑁂𑀦 𑀅𑀲𑀼𑀓𑁄 𑀏𑀯𑀁 𑀫𑀸𑀭𑀺𑀢𑁄 𑀏𑀯𑀁 𑀯𑀺𑀤𑁆𑀥𑁄’’𑀢𑀺 𑀓𑀸𑀫𑀲𑁆𑀲𑀸𑀤𑀯𑀲𑁂𑀦𑁂𑀯 𑀓𑀣𑀸 𑀢𑀺𑀭𑀘𑁆𑀙𑀸𑀦𑀓𑀣𑀸. ‘‘𑀢𑁂𑀧𑀺 𑀦𑀸𑀫 𑀔𑀬𑀁 𑀕𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀦 𑀲𑀩𑁆𑀩𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀳𑁄𑀢𑀺.

𑀅𑀧𑀺 𑀘 𑀅𑀦𑁆𑀦𑀸𑀤𑀻𑀲𑀼 ‘‘𑀏𑀯𑀁 𑀯𑀡𑁆𑀡𑀯𑀦𑁆𑀢𑀁 𑀕𑀦𑁆𑀥𑀯𑀦𑁆𑀢𑀁 𑀭𑀲𑀯𑀦𑁆𑀢𑀁 𑀨𑀲𑁆𑀲𑀲𑀫𑁆𑀧𑀦𑁆𑀦𑀁 𑀔𑀸𑀤𑀺𑀫𑁆𑀳 𑀪𑀼𑀜𑁆𑀚𑀺𑀫𑁆𑀳 𑀧𑀺𑀯𑀺𑀫𑁆𑀳 𑀧𑀭𑀺𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 ‘‘𑀧𑀼𑀩𑁆𑀩𑁂 𑀏𑀯𑀁 𑀯𑀡𑁆𑀡𑀸𑀤𑀺𑀲𑀫𑁆𑀧𑀦𑁆𑀦𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀲𑀬𑀦𑀁 𑀫𑀸𑀮𑀁 𑀕𑀦𑁆𑀥𑀁 𑀲𑀻𑀮𑀯𑀦𑁆𑀢𑀸𑀦𑀁 𑀅𑀤𑀫𑁆𑀳, 𑀘𑁂𑀢𑀺𑀬𑀧𑀽𑀚𑀁 𑀅𑀓𑀭𑀺𑀫𑁆𑀳𑀸’’𑀢𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀜𑀸𑀢𑀺𑀓𑀣𑀸𑀤𑀻𑀲𑀼 𑀧𑀦 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀓𑀸 𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀯𑀸, ‘‘𑀧𑀼𑀩𑁆𑀩𑁂 𑀫𑀬𑀁 𑀏𑀯𑀁 𑀯𑀺𑀘𑀺𑀢𑁆𑀭𑁂𑀳𑀺 𑀬𑀸𑀦𑁂𑀳𑀺 𑀯𑀺𑀘𑀭𑀺𑀫𑁆𑀳𑀸’’𑀢𑀺 𑀯𑀸 𑀅𑀲𑁆𑀲𑀸𑀤𑀯𑀲𑁂𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 ‘‘𑀢𑁂𑀧𑀺 𑀦𑁄 𑀜𑀸𑀢𑀓𑀸 𑀔𑀬𑀁 𑀕𑀢𑀸’’𑀢𑀺 𑀯𑀸, ‘‘𑀧𑀼𑀩𑁆𑀩𑁂 𑀫𑀬𑀁 𑀏𑀯𑀭𑀽𑀧𑀸 𑀉𑀧𑀸𑀳𑀦𑀸 𑀲𑀗𑁆𑀖𑀲𑁆𑀲 𑀅𑀤𑀫𑁆𑀳𑀸’’𑀢𑀺 𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀕𑀸𑀫𑀓𑀣𑀸𑀧𑀺 𑀲𑀼𑀦𑀺𑀯𑀺𑀝𑁆𑀞𑀤𑀼𑀦𑁆𑀦𑀺𑀯𑀺𑀝𑁆𑀞𑀲𑀼𑀪𑀺𑀓𑁆𑀔𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀯𑀲𑁂𑀦 ‘‘𑀅𑀲𑀼𑀓𑀕𑀸𑀫𑀯𑀸𑀲𑀺𑀦𑁄 𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀯𑀸 𑀏𑀯𑀁 𑀅𑀲𑁆𑀲𑀸𑀤𑀯𑀲𑁂𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺 𑀯𑀸, ‘‘𑀔𑀬𑀯𑀬𑀁 𑀕𑀢𑀸’’𑀢𑀺 𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀦𑀺𑀕𑀫𑀦𑀕𑀭𑀚𑀦𑀧𑀤𑀓𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑁆𑀣𑀺𑀓𑀣𑀸𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀦𑀺 𑀧𑀝𑀺𑀘𑁆𑀘 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺, ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀔𑀬𑀯𑀬𑀁 𑀕𑀢𑀸’’𑀢𑀺 𑀏𑀯𑀫𑁂𑀯 𑀯𑀝𑁆𑀝𑀢𑀺. 𑀲𑀽𑀭𑀓𑀣𑀸𑀧𑀺 ‘‘𑀦𑀦𑁆𑀤𑀺𑀫𑀺𑀢𑁆𑀢𑁄 𑀦𑀸𑀫 𑀬𑁄𑀥𑁄 𑀲𑀽𑀭𑁄 𑀅𑀳𑁄𑀲𑀻’’𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺. ‘‘𑀲𑀤𑁆𑀥𑁄 𑀅𑀳𑁄𑀲𑀺, 𑀔𑀬𑀯𑀬𑀁 𑀕𑀢𑁄’’𑀢𑀺 𑀏𑀯𑀫𑁂𑀯 𑀯𑀝𑁆𑀝𑀢𑀺. 𑀯𑀺𑀲𑀺𑀔𑀸𑀓𑀣𑀸𑀧𑀺 ‘‘𑀅𑀲𑀼𑀓𑀸 𑀯𑀺𑀲𑀺𑀔𑀸 𑀲𑀼𑀦𑀺𑀯𑀺𑀝𑁆𑀞𑀸 𑀤𑀼𑀦𑁆𑀦𑀺𑀯𑀺𑀝𑁆𑀞𑀸 𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺. ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀔𑀬𑀯𑀬𑀁 𑀕𑀢𑀸’’𑀇𑀘𑁆𑀘𑁂𑀯 𑀯𑀝𑁆𑀝𑀢𑀺.

𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀸𑀢𑀺 𑀉𑀤𑀓𑀝𑁆𑀞𑀸𑀦𑀓𑀣𑀸, ‘‘𑀉𑀤𑀓𑀢𑀺𑀢𑁆𑀣𑀓𑀣𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀓𑀼𑀫𑁆𑀪𑀤𑀸𑀲𑀺𑀓𑀣𑀸 𑀯𑀸. 𑀲𑀸𑀧𑀺 ‘‘𑀧𑀸𑀲𑀸𑀤𑀺𑀓𑀸, 𑀦𑀘𑁆𑀘𑀺𑀢𑀼𑀁 𑀕𑀸𑀬𑀺𑀢𑀼𑀁 𑀙𑁂𑀓𑀸’’𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺, ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀝𑁆𑀝𑀢𑀺. 𑀧𑀼𑀩𑁆𑀩𑀧𑁂𑀢𑀓𑀣𑀸𑀢𑀺 𑀅𑀢𑀻𑀢𑀜𑀸𑀢𑀺𑀓𑀣𑀸. 𑀢𑀢𑁆𑀣 𑀯𑀢𑁆𑀢𑀫𑀸𑀦𑀜𑀸𑀢𑀺𑀓𑀣𑀸𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀦𑀸𑀦𑀢𑁆𑀢𑀓𑀣𑀸𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀣𑀸𑀳𑀺 𑀯𑀺𑀫𑀼𑀢𑁆𑀢𑀸 𑀅𑀯𑀲𑁂𑀲𑀸 𑀦𑀸𑀦𑀸𑀲𑀪𑀸𑀯𑀸 𑀦𑀺𑀭𑀢𑁆𑀣𑀓𑀓𑀣𑀸. 𑀮𑁄𑀓𑀓𑁆𑀔𑀸𑀬𑀺𑀓𑀸𑀢𑀺 ‘‘𑀅𑀬𑀁 𑀮𑁄𑀓𑁄 𑀓𑁂𑀦 𑀦𑀺𑀫𑁆𑀫𑀺𑀢𑁄? 𑀅𑀲𑀼𑀓𑁂𑀦 𑀦𑀸𑀫 𑀦𑀺𑀫𑁆𑀫𑀺𑀢𑁄. 𑀓𑀸𑀓𑁄 𑀲𑁂𑀢𑁄 𑀅𑀝𑁆𑀞𑀻𑀦𑀁 𑀲𑁂𑀢𑀢𑁆𑀢𑀸, 𑀩𑀮𑀸𑀓𑀸 𑀭𑀢𑁆𑀢𑀸 𑀮𑁄𑀳𑀺𑀢𑀲𑁆𑀲 𑀭𑀢𑁆𑀢𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀺𑀓𑀸 𑀮𑁄𑀓𑀸𑀬𑀢𑀯𑀺𑀢𑀡𑁆𑀟𑀲𑀮𑁆𑀮𑀸𑀧𑀓𑀣𑀸.

𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀸 𑀦𑀸𑀫 𑀓𑀲𑁆𑀫𑀸 𑀲𑀫𑀼𑀤𑁆𑀤𑁄 𑀲𑀸𑀕𑀭𑁄? 𑀲𑀸𑀕𑀭𑀤𑁂𑀯𑁂𑀦 𑀔𑀢𑀢𑁆𑀢𑀸 𑀲𑀸𑀕𑀭𑁄, ‘‘𑀔𑀢𑁄 𑀫𑁂’’𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀬𑀁 𑀦𑀺𑀯𑁂𑀤𑀺𑀢𑀢𑁆𑀢𑀸 𑀲𑀫𑀼𑀤𑁆𑀤𑁄𑀢𑀺 𑀏𑀯𑀫𑀸𑀤𑀺𑀓𑀸 𑀦𑀺𑀭𑀢𑁆𑀣𑀓𑀸 𑀲𑀫𑀼𑀤𑁆𑀤𑀓𑁆𑀔𑀸𑀦𑀓𑀣𑀸. 𑀪𑀯𑁄𑀢𑀺 𑀯𑀼𑀤𑁆𑀥𑀺. 𑀅𑀪𑀯𑁄𑀢𑀺 𑀳𑀸𑀦𑀺. 𑀇𑀢𑀺 𑀪𑀯𑁄 𑀇𑀢𑀺 𑀅𑀪𑀯𑁄𑀢𑀺 𑀬𑀁 𑀯𑀸 𑀢𑀁 𑀯𑀸 𑀦𑀺𑀭𑀢𑁆𑀣𑀓𑀓𑀸𑀭𑀡𑀁 𑀯𑀢𑁆𑀯𑀸 𑀧𑀯𑀢𑁆𑀢𑀺𑀢𑀓𑀣𑀸 𑀇𑀢𑀺𑀪𑀯𑀸𑀪𑀯𑀓𑀣𑀸.

𑀆𑀯𑀭𑁂𑀬𑁆𑀬𑀸𑀢𑀺 𑀆𑀯𑀭𑀡𑀁 𑀓𑀭𑁂𑀬𑁆𑀬. 𑀦𑀺𑀯𑀸𑀭𑁂𑀬𑁆𑀬𑀸𑀢𑀺 𑀆𑀭𑀫𑁆𑀫𑀡𑀢𑁄 𑀯𑀸𑀭𑁂𑀬𑁆𑀬. 𑀲𑀁𑀯𑀭𑁂𑀬𑁆𑀬𑀸𑀢𑀺 𑀲𑀫𑁆𑀫𑀸 𑀦𑀺𑀲𑁆𑀲𑁂𑀲𑀁 𑀓𑀢𑁆𑀯𑀸 𑀯𑀸𑀭𑁂𑀬𑁆𑀬. 𑀭𑀓𑁆𑀔𑁂𑀬𑁆𑀬𑀸𑀢𑀺 𑀭𑀓𑁆𑀔𑀁 𑀓𑀭𑁂𑀬𑁆𑀬. 𑀕𑁄𑀧𑁂𑀬𑁆𑀬𑀸𑀢𑀺 𑀲𑀁𑀕𑁄𑀧𑁂𑀬𑁆𑀬. 𑀧𑀺𑀤𑀳𑁂𑀬𑁆𑀬𑀸𑀢𑀺 𑀧𑀺𑀤𑀳𑀦𑀁 𑀓𑀭𑁂𑀬𑁆𑀬. 𑀧𑀘𑁆𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑁄𑀢𑀁 𑀙𑀺𑀦𑁆𑀤𑁂𑀬𑁆𑀬.

𑀢𑁂𑀦 𑀢𑁂𑀦 𑀦 𑀢𑀼𑀲𑁆𑀲𑀦𑁆𑀢𑀻𑀢𑀺 𑀢𑁂𑀦 𑀢𑁂𑀦 𑀅𑀫𑁆𑀩𑀺𑀮𑀸𑀤𑀺𑀦𑀸 𑀭𑀲𑁂𑀦 𑀦 𑀲𑀦𑁆𑀢𑁄𑀲𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀧𑀭𑀸𑀧𑀭𑀁 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀉𑀧𑀭𑀽𑀧𑀭𑀺 𑀕𑀯𑁂𑀲𑀦𑁆𑀢𑀺.

𑁧𑁫𑁮. 𑀨𑀲𑁆𑀲𑁂𑀦𑀸𑀢𑀺 𑀭𑁄𑀕𑀨𑀲𑁆𑀲𑁂𑀦. 𑀪𑀯𑀜𑁆𑀘 𑀦𑀸𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀸𑀬 𑀓𑀸𑀫𑀪𑀯𑀸𑀤𑀺𑀪𑀯𑀜𑁆𑀘 𑀦 𑀧𑀢𑁆𑀣𑁂𑀬𑁆𑀬. 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬𑀸𑀢𑀺 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑀪𑀽𑀢𑁂𑀲𑀼 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀲𑀼 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬, 𑀅𑀯𑀲𑁂𑀲𑁂𑀲𑀼 𑀯𑀸 𑀖𑀸𑀦𑀺𑀦𑁆𑀤𑁆𑀭𑀺𑀬𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑁂𑀲𑀼 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬. 𑀏𑀯𑀁 𑀧𑀭𑀺𑀧𑀽𑀭𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀘 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀼𑀭𑀺𑀫𑁂𑀳𑀺 𑀯𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀺𑀦𑀸 ‘‘𑀅𑀭𑀜𑁆𑀜𑁂 𑀯𑀲𑀢𑀸 𑀪𑁂𑀭𑀯𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀦𑀧𑁆𑀧𑀯𑁂𑀥𑀺𑀢𑀩𑁆𑀩’’𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀏𑀓𑁂𑀦𑀸𑀓𑀸𑀭𑁂𑀦𑀸𑀢𑀺 𑀏𑀓𑁂𑀦 𑀓𑀸𑀭𑀡𑁂𑀦. 𑀪𑀬𑀫𑁆𑀧𑀺 𑀪𑁂𑀭𑀯𑀫𑁆𑀧𑀺 𑀢𑀜𑁆𑀜𑁂𑀯𑀸𑀢𑀺 𑀪𑀬𑀦𑁆𑀢𑀺 𑀘 𑀪𑁂𑀭𑀯𑀦𑁆𑀢𑀺 𑀘 𑀔𑀼𑀤𑁆𑀤𑀓𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺 𑀉𑀢𑁆𑀢𑀸𑀲𑀦𑀺𑀫𑀺𑀢𑁆𑀢𑀫𑁂𑀯. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀪𑀬𑀦𑁆𑀢𑀺 𑀢𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀪𑀬𑀁. 𑀪𑀬𑀸𑀦𑀓𑀦𑁆𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀪𑀬𑀯𑀲𑁂𑀦 𑀕𑀢𑁆𑀢𑀘𑀮𑀦𑀁. 𑀮𑁄𑀫𑀳𑀁𑀲𑁄𑀢𑀺 𑀮𑁄𑀫𑀸𑀦𑀁 𑀳𑀁𑀲𑀦𑀁 𑀉𑀤𑁆𑀥𑀕𑁆𑀕𑀪𑀸𑀯𑁄. 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀓𑀺𑀘𑁆𑀘𑀢𑁄 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 ‘‘𑀘𑁂𑀢𑀲𑁄 𑀉𑀩𑁆𑀩𑁂𑀕𑁄 𑀉𑀢𑁆𑀭𑀸𑀲𑁄’’𑀢𑀺 𑀲𑀪𑀸𑀯𑀢𑁄 𑀤𑀲𑁆𑀲𑁂𑀢𑀺. 𑀉𑀩𑁆𑀩𑁂𑀕𑁆𑀕𑁄𑀢𑀺 𑀪𑀻𑀭𑀼𑀓𑁄, 𑀉𑀢𑁆𑀭𑀸𑀲𑁄𑀢𑀺 𑀘𑀺𑀢𑁆𑀢𑀓𑁆𑀔𑁄𑀪𑁄. 𑀚𑀸𑀢𑀺𑀪𑀬𑀦𑁆𑀢𑀺 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀪𑀬𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀭𑀸𑀚𑀢𑁄 𑀉𑀧𑁆𑀧𑀦𑁆𑀦𑀪𑀬𑀁 𑀭𑀸𑀚𑀪𑀬𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀦𑁆𑀢𑀺 𑀧𑀸𑀧𑀓𑀫𑁆𑀫𑀺𑀦𑁄 𑀅𑀢𑁆𑀢𑀸𑀦𑀁 𑀅𑀦𑀼𑀯𑀤𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀧𑀭𑀸𑀦𑀼𑀯𑀸𑀤𑀪𑀬𑀦𑁆𑀢𑀺 𑀧𑀭𑀲𑁆𑀲 𑀅𑀦𑀼𑀯𑀸𑀤𑀢𑁄 𑀉𑀧𑁆𑀧𑀚𑁆𑀚𑀦𑀓𑀪𑀬𑀁.

𑀤𑀡𑁆𑀟𑀪𑀬𑀦𑁆𑀢𑀺 𑀆𑀕𑀸𑀭𑀺𑀓𑀲𑁆𑀲 𑀭𑀜𑁆𑀜𑀸 𑀧𑀯𑀢𑁆𑀢𑀺𑀢𑀤𑀡𑁆𑀟𑀁, 𑀅𑀦𑀸𑀕𑀸𑀭𑀺𑀓𑀲𑁆𑀲 𑀯𑀺𑀦𑀬𑀤𑀡𑁆𑀟𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀊𑀫𑀺𑀪𑀬𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀑𑀭𑁄𑀳𑀦𑁆𑀢𑀲𑁆𑀲 𑀧𑀯𑀢𑁆𑀢𑀪𑀬𑀁. 𑀫𑀳𑀸𑀲𑀫𑀼𑀤𑁆𑀤𑁂 𑀓𑀺𑀭 𑀫𑀳𑀺𑀦𑁆𑀤𑀯𑀻𑀘𑀺 𑀦𑀸𑀫 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀉𑀕𑁆𑀕𑀘𑁆𑀙𑀢𑀺, 𑀢𑀭𑀗𑁆𑀕𑀯𑀻𑀘𑀺 𑀦𑀸𑀫 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺, 𑀭𑁄𑀳𑀡𑀯𑀻𑀘𑀺 𑀦𑀸𑀫 𑀘𑀢𑁆𑀢𑀸𑀮𑀻𑀲 𑀬𑁄𑀚𑀦𑀸𑀦𑀺 𑀉𑀕𑁆𑀕𑀘𑁆𑀙𑀢𑀺. 𑀏𑀯𑀭𑀽𑀧𑀸 𑀊𑀫𑀺𑀬𑁄 𑀧𑀝𑀺𑀘𑁆𑀘 𑀧𑀯𑀢𑁆𑀢𑀁 𑀊𑀫𑀺𑀪𑀬𑀁. 𑀓𑀼𑀫𑁆𑀪𑀻𑀮𑀢𑁄 𑀧𑀯𑀢𑁆𑀢𑀁 𑀪𑀬𑀁 𑀓𑀼𑀫𑁆𑀪𑀻𑀮𑀪𑀬𑀁. 𑀉𑀤𑀓𑀸𑀯𑀝𑁆𑀝𑀢𑁄 𑀪𑀬𑀁 𑀆𑀯𑀝𑁆𑀝𑀪𑀬𑀁. 𑀲𑀼𑀲𑀼𑀓𑀸 𑀯𑀼𑀘𑁆𑀘𑀢𑀺 𑀘𑀡𑁆𑀟𑀫𑀘𑁆𑀙𑁄, 𑀢𑀢𑁄 𑀪𑀬𑀁 𑀲𑀼𑀲𑀼𑀓𑀸𑀪𑀬𑀁. 𑀆𑀚𑀻𑀯𑀺𑀓𑀪𑀬𑀦𑁆𑀢𑀺 𑀚𑀻𑀯𑀺𑀢𑀯𑀼𑀢𑁆𑀢𑀺𑀢𑁄 𑀪𑀬𑀁 𑀆𑀚𑀻𑀯𑀺𑀓𑀪𑀬𑀁. 𑀅𑀲𑀺𑀮𑁄𑀓𑀪𑀬𑀦𑁆𑀢𑀺 𑀕𑀭𑀳𑀢𑁄 𑀪𑀬𑀁.

𑁧𑁫𑁯. 𑀮𑀤𑁆𑀥𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸𑀢𑀺 𑀏𑀢𑁂𑀲𑀁 𑀅𑀦𑁆𑀦𑀸𑀤𑀻𑀦𑀁 𑀬𑀁𑀓𑀺𑀜𑁆𑀘𑀺 𑀥𑀫𑁆𑀫𑁂𑀦 𑀮𑀪𑀺𑀢𑁆𑀯𑀸 ‘‘𑀅𑀭𑀜𑁆𑀜𑁂 𑀘 𑀲𑁂𑀦𑀸𑀲𑀦𑁂 𑀯𑀲𑀢𑀸 𑀤𑀼𑀮𑁆𑀮𑀪’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀦𑁆𑀦𑀺𑀥𑀺𑀁 𑀦 𑀓𑀭𑁂𑀬𑁆𑀬.

𑀑𑀤𑀦𑁄𑀢𑀺 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀕𑁄𑀥𑀼𑀫𑁄 𑀓𑀗𑁆𑀕𑀼 𑀯𑀭𑀓𑁄 𑀓𑀼𑀤𑁆𑀭𑀽𑀲𑀓𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀥𑀜𑁆𑀜𑀸𑀦𑀼𑀮𑁄𑀫𑀸𑀦𑀜𑁆𑀘 𑀢𑀡𑁆𑀟𑀼𑀮𑁂𑀳𑀺 𑀦𑀺𑀩𑁆𑀩𑀢𑁆𑀢𑁄. 𑀓𑀼𑀫𑁆𑀫𑀸𑀲𑁄𑀢𑀺 𑀬𑀯𑁂𑀳𑀺 𑀦𑀺𑀩𑁆𑀩𑀢𑁆𑀢𑁄. 𑀲𑀢𑁆𑀢𑀽𑀢𑀺 𑀲𑀸𑀮𑀺𑀆𑀤𑀻𑀳𑀺 𑀓𑀢𑀲𑀢𑁆𑀢𑀼. 𑀫𑀘𑁆𑀙𑁄 𑀤𑀓𑀲𑀫𑁆𑀪𑀯𑁄. 𑀫𑀁𑀲𑀁 𑀧𑀸𑀓𑀝𑀫𑁂𑀯. 𑀅𑀫𑁆𑀩𑀧𑀸𑀦𑀦𑁆𑀢𑀺 𑀆𑀫𑁂𑀳𑀺 𑀯𑀸 𑀧𑀓𑁆𑀓𑁂𑀳𑀺 𑀯𑀸 𑀅𑀫𑁆𑀩𑁂𑀳𑀺 𑀓𑀢𑀧𑀸𑀦𑀁. 𑀢𑀢𑁆𑀣 𑀆𑀫𑁂𑀳𑀺 𑀓𑀭𑁄𑀦𑁆𑀢𑁂𑀦 𑀅𑀫𑁆𑀩𑀢𑀭𑀼𑀡𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀢𑀧𑁂 𑀆𑀤𑀺𑀘𑁆𑀘𑀧𑀸𑀓𑁂𑀦 𑀧𑀘𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑁂𑀳𑀺 𑀫𑀥𑀼𑀲𑀓𑁆𑀓𑀭𑀓𑀧𑁆𑀧𑀽𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀚𑀫𑁆𑀩𑀼𑀧𑀸𑀦𑀦𑁆𑀢𑀺 𑀚𑀫𑁆𑀩𑀼𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀘𑁄𑀘𑀧𑀸𑀦𑀦𑁆𑀢𑀺 𑀅𑀝𑁆𑀞𑀺𑀓𑁂𑀳𑀺 𑀓𑀤𑀮𑀺𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀫𑁄𑀘𑀧𑀸𑀦𑀦𑁆𑀢𑀺 𑀅𑀦𑀝𑁆𑀞𑀺𑀓𑁂𑀳𑀺 𑀓𑀤𑀮𑀺𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀫𑀥𑀼𑀓𑀧𑀸𑀦𑀦𑁆𑀢𑀺 𑀫𑀥𑀼𑀓𑀸𑀦𑀁 𑀚𑀸𑀢𑀺𑀭𑀲𑁂𑀦 𑀓𑀢𑀧𑀸𑀦𑀁. 𑀢𑀁 𑀧𑀦 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀯𑀝𑁆𑀝𑀢𑀺, 𑀲𑀼𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀫𑀼𑀤𑁆𑀤𑀺𑀓𑀧𑀸𑀦𑀦𑁆𑀢𑀺 𑀫𑀼𑀤𑁆𑀤𑀺𑀓𑀸 𑀉𑀤𑀓𑁂 𑀫𑀤𑁆𑀤𑀺𑀢𑁆𑀯𑀸 𑀅𑀫𑁆𑀩𑀧𑀸𑀦𑀁 𑀯𑀺𑀬 𑀓𑀢𑀧𑀸𑀦𑀁. 𑀲𑀸𑀮𑀽𑀓𑀧𑀸𑀦𑀦𑁆𑀢𑀺 𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀁 𑀲𑀸𑀮𑀽𑀓𑁂 𑀫𑀤𑁆𑀤𑀺𑀢𑁆𑀯𑀸 𑀓𑀢𑀧𑀸𑀦𑀁. 𑀨𑀸𑀭𑀼𑀲𑀓𑀧𑀸𑀦𑀦𑁆𑀢𑀺 𑀨𑀸𑀭𑀼𑀲𑀓𑁂𑀳𑀺 𑀅𑀫𑁆𑀩𑀧𑀸𑀦𑀁 𑀯𑀺𑀬 𑀓𑀢𑀧𑀸𑀦𑀁. 𑀓𑁄𑀲𑀫𑁆𑀩𑀧𑀸𑀦𑀦𑁆𑀢𑀺 𑀓𑁄𑀲𑀫𑁆𑀩𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀓𑁄𑀮𑀧𑀸𑀦𑀦𑁆𑀢𑀺 𑀓𑁄𑀮𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀩𑀤𑀭𑀧𑀸𑀦𑀦𑁆𑀢𑀺 𑀫𑀳𑀸𑀓𑁄𑀮𑀨𑀮𑁂𑀳𑀺 𑀅𑀫𑁆𑀩𑀧𑀸𑀦𑀁 𑀯𑀺𑀬 𑀓𑀢𑀧𑀸𑀦𑀁. 𑀇𑀫𑀸𑀦𑀺 𑀏𑀓𑀸𑀤𑀲 𑀧𑀸𑀦𑀸𑀦𑀺, 𑀢𑀸𑀦𑀺𑀧𑀺 𑀆𑀤𑀺𑀘𑁆𑀘𑀧𑀸𑀓𑀸𑀦𑀺 𑀯𑀝𑁆𑀝𑀦𑁆𑀢𑀺.

𑀖𑀢𑀧𑀸𑀦𑀦𑁆𑀢𑀺 𑀲𑀧𑁆𑀧𑀺𑀧𑀸𑀦𑀁. 𑀢𑁂𑀮𑀧𑀸𑀦𑀦𑁆𑀢𑀺 𑀢𑀺𑀮𑀢𑁂𑀮𑀸𑀤𑀻𑀦𑀁 𑀧𑀸𑀦𑀁. 𑀧𑀬𑁄𑀧𑀸𑀦𑀦𑁆𑀢𑀺 𑀔𑀻𑀭𑀧𑀸𑀦𑀁. 𑀬𑀸𑀕𑀼𑀧𑀸𑀦𑀦𑁆𑀢𑀺 𑀲𑀻𑀢𑀮𑀸𑀤𑀺𑀬𑀸𑀕𑀼𑀧𑀸𑀦𑀁. 𑀭𑀲𑀧𑀸𑀦𑀦𑁆𑀢𑀺 𑀲𑀸𑀓𑀸𑀤𑀺𑀭𑀲𑀧𑀸𑀦𑀁. 𑀧𑀺𑀝𑁆𑀞𑀔𑀚𑁆𑀚𑀓𑀦𑁆𑀢𑀺 𑀲𑀢𑁆𑀢𑀦𑁆𑀦𑀁 𑀢𑀸𑀯 𑀥𑀜𑁆𑀜𑀸𑀦𑀁 𑀥𑀜𑁆𑀜𑀸𑀦𑀼𑀮𑁄𑀫𑀸𑀦𑀁 𑀅𑀧𑀭𑀡𑁆𑀡𑀸𑀦𑀜𑁆𑀘 𑀧𑀺𑀝𑁆𑀞𑀁 𑀧𑀦𑀲𑀧𑀺𑀝𑁆𑀞𑀁 𑀮𑀩𑀼𑀚𑀧𑀺𑀝𑁆𑀞𑀁 𑀅𑀫𑁆𑀩𑀸𑀝𑀓𑀧𑀺𑀝𑁆𑀞𑀁 𑀲𑀸𑀮𑀧𑀺𑀝𑁆𑀞𑀁 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞𑀜𑁆𑀘𑀸𑀢𑀺 𑀏𑀯𑀫𑀸𑀤𑀻𑀦𑀁 𑀧𑀺𑀝𑁆𑀞𑁂𑀳𑀺 𑀓𑀢𑀁 𑀧𑀺𑀝𑁆𑀞𑀔𑀚𑁆𑀚𑀓𑀁. 𑀧𑀽𑀯𑀔𑀚𑁆𑀚𑀓𑀫𑁆𑀧𑀺 𑀏𑀢𑁂𑀳𑀺𑀬𑁂𑀯 𑀓𑀢𑀁. 𑀫𑀽𑀮𑀔𑀚𑁆𑀚𑀓𑀦𑁆𑀢𑀺 𑀫𑀽𑀮𑀓𑀫𑀽𑀮𑀁 𑀔𑀸𑀭𑀓𑀫𑀽𑀮𑀁 𑀘𑀼𑀘𑁆𑀘𑀼𑀫𑀽𑀮𑀦𑁆𑀢𑀺 𑀏𑀯𑀫𑀸𑀤𑀺. 𑀢𑀘𑀔𑀚𑁆𑀚𑀓𑀦𑁆𑀢𑀺 𑀉𑀘𑁆𑀙𑀼𑀢𑀘𑀸𑀤𑀬𑁄. 𑀧𑀢𑁆𑀢𑀔𑀚𑁆𑀚𑀓𑀦𑁆𑀢𑀺 𑀦𑀺𑀫𑁆𑀩𑀧𑀡𑁆𑀡𑀓𑀼𑀝𑀚𑀧𑀡𑁆𑀡𑀧𑀝𑁄𑀮𑀧𑀡𑁆𑀡𑀲𑀼𑀮𑀲𑀧𑀡𑁆𑀡𑀸𑀤𑀬𑁄. 𑀧𑀼𑀧𑁆𑀨𑀔𑀚𑁆𑀚𑀓𑀦𑁆𑀢𑀺 𑀫𑀽𑀮𑀓𑀧𑀼𑀧𑁆𑀨𑀔𑀸𑀭𑀓𑀧𑀼𑀧𑁆𑀨𑀲𑁂𑀢𑀯𑀭𑀡𑀲𑀺𑀕𑁆𑀕𑀼𑀉𑀧𑁆𑀧𑀮𑀧𑀤𑀼𑀫𑀓𑀸𑀤𑀬𑁄. 𑀨𑀮𑀔𑀚𑁆𑀚𑀓𑀦𑁆𑀢𑀺 𑀧𑀦𑀲𑀮𑀩𑀼𑀚𑀢𑀸𑀮𑀦𑀸𑀴𑀺𑀓𑁂𑀭𑀅𑀫𑁆𑀩𑀸𑀝𑀓𑀢𑀺𑀦𑁆𑀢𑀺𑀡𑀺𑀓𑀫𑀸𑀢𑀼𑀮𑀼𑀗𑁆𑀕𑀓𑀧𑀺𑀝𑁆𑀞𑀨𑀮𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀨𑀼𑀲𑁆𑀲- 𑀨𑀮𑀢𑀺𑀫𑁆𑀩𑀭𑀽𑀲𑀓𑀢𑀺𑀮𑀯𑀸𑀢𑀺𑀗𑁆𑀕𑀡𑀘𑁄𑀘𑀫𑁄𑀘𑀫𑀥𑀼𑀓𑀸𑀤𑀻𑀦𑀁 𑀨𑀮𑀸𑀦𑀁 𑀔𑀚𑁆𑀚𑀓𑀁.

𑀦 𑀓𑀼𑀳𑀦𑀸𑀬𑀸𑀢𑀺 𑀦 𑀯𑀺𑀫𑁆𑀳𑀸𑀧𑀦𑀸𑀬. 𑀦 𑀮𑀧𑀦𑀸𑀬𑀸𑀢𑀺 𑀧𑀘𑁆𑀘𑀬𑀢𑁆𑀣𑀁 𑀦 𑀮𑀧𑀦𑀸𑀬. 𑀯𑀺𑀳𑀸𑀭𑀁 𑀆𑀕𑀢𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀓𑀺𑀫𑀢𑁆𑀣𑀸𑀬 𑀪𑁄𑀦𑁆𑀢𑁄 𑀆𑀕𑀢𑀸’’𑀢𑀺 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑀼𑀦𑁆𑀢𑀺. ‘‘𑀬𑀤𑀺 𑀏𑀯𑀁 𑀕𑀘𑁆𑀙𑀣, 𑀅𑀳𑀁 𑀧𑀘𑁆𑀙𑀢𑁄 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀦 𑀮𑀧𑀦𑀸𑀬. 𑀅𑀣 𑀯𑀸 𑀅𑀢𑁆𑀢𑀸𑀦𑀁 𑀉𑀧𑀦𑁂𑀢𑁆𑀯𑀸 ‘‘𑀅𑀳𑀁 𑀢𑀺𑀲𑁆𑀲𑁄, 𑀫𑀬𑀺 𑀭𑀸𑀚𑀸 𑀧𑀲𑀦𑁆𑀦𑁄, 𑀫𑀬𑀺 𑀅𑀲𑀼𑀓𑁄 𑀭𑀸𑀚𑀸 𑀅𑀲𑀼𑀓𑁄 𑀘 𑀭𑀸𑀚𑀫𑀳𑀸𑀫𑀢𑁆𑀢𑁄 𑀧𑀲𑀦𑁆𑀦𑁄’’𑀢𑀺 𑀏𑀯𑀁 𑀦 𑀮𑀧𑀦𑀸𑀬. 𑀦 𑀦𑁂𑀫𑀺𑀢𑁆𑀢𑀺𑀓𑀢𑀸𑀬𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀭𑁂𑀲𑀁 𑀧𑀘𑁆𑀘𑀬𑀤𑀸𑀦𑀲𑀜𑁆𑀜𑀸𑀚𑀦𑀓𑁂𑀦 𑀓𑀸𑀬𑀯𑀘𑀻𑀓𑀫𑁆𑀫𑁂𑀦 𑀦 𑀦𑁂𑀫𑀺𑀢𑁆𑀢𑀺𑀓𑀢𑀸𑀬. 𑀦 𑀦𑀺𑀧𑁆𑀧𑁂𑀲𑀺𑀓𑀢𑀸𑀬𑀸𑀢𑀺 𑀬𑀸 𑀧𑀭𑁂𑀲𑀁 𑀅𑀓𑁆𑀓𑁄𑀲𑀦𑀸𑀤𑀺𑀓𑀺𑀭𑀺𑀬𑀸 𑀬𑀲𑁆𑀫𑀸 𑀯𑁂𑀴𑀼𑀧𑁂𑀲𑀺𑀓𑀸 𑀯𑀺𑀬 𑀅𑀩𑁆𑀪𑀗𑁆𑀕𑀁 𑀧𑀭𑀲𑁆𑀲 𑀕𑀼𑀡𑀁 𑀦𑀺𑀧𑁆𑀧𑁂𑀲𑁂𑀢𑀺 𑀦𑀺𑀧𑀼𑀜𑁆𑀙𑀢𑀺, 𑀬𑀲𑁆𑀫𑀸 𑀯𑀸 𑀕𑀦𑁆𑀥𑀚𑀸𑀢𑀁 𑀦𑀺𑀧𑀺𑀲𑀺𑀢𑁆𑀯𑀸 𑀕𑀦𑁆𑀥𑀫𑀕𑁆𑀕𑀦𑀸 𑀯𑀺𑀬 𑀧𑀭𑀕𑀼𑀡𑁂 𑀦𑀺𑀧𑀺𑀲𑀺𑀢𑁆𑀯𑀸 𑀯𑀺𑀘𑀼𑀡𑁆𑀡𑁂𑀢𑁆𑀯𑀸 𑀏𑀲𑀸 𑀮𑀸𑀪𑀫𑀕𑁆𑀕𑀦𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀦𑀺𑀧𑁆𑀧𑁂𑀲𑀺𑀓𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀦 𑀏𑀯𑀭𑀽𑀧𑀸𑀬 𑀦𑀺𑀧𑁆𑀧𑁂𑀲𑀺𑀓𑀢𑀸𑀬. 𑀦 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀬𑀸𑀢𑀺 𑀏𑀢𑁆𑀣 𑀦𑀺𑀚𑀺𑀕𑀻𑀲𑀦𑀢𑀸𑀢𑀺 𑀫𑀕𑁆𑀕𑀦𑀸, 𑀅𑀜𑁆𑀜𑀢𑁄 𑀮𑀤𑁆𑀥𑀜𑁆𑀳𑀺 𑀅𑀜𑁆𑀜𑀢𑁆𑀣 𑀳𑀭𑀡𑀯𑀲𑁂𑀦 𑀮𑀸𑀪𑁂𑀦 𑀮𑀸𑀪𑀫𑀕𑁆𑀕𑀦𑀸 𑀦𑀸𑀫 𑀳𑁄𑀢𑀺. 𑀦 𑀏𑀯𑀭𑀽𑀧𑀸𑀬 𑀮𑀸𑀪𑁂𑀦 𑀮𑀸𑀪𑀫𑀕𑁆𑀕𑀦𑀸𑀬.

𑀦 𑀤𑀸𑀭𑀼𑀤𑀸𑀦𑁂𑀦𑀸𑀢𑀺 𑀦 𑀧𑀘𑁆𑀘𑀬𑀳𑁂𑀢𑀼𑀓𑁂𑀦 𑀤𑀸𑀭𑀼𑀤𑀸𑀦𑁂𑀦 𑀯𑀺𑀳𑀸𑀭𑁂 𑀉𑀝𑁆𑀞𑀺𑀢𑀜𑁆𑀳𑀺 𑀅𑀭𑀜𑁆𑀜𑀢𑁄 𑀯𑀸 𑀆𑀳𑀭𑀺𑀢𑁆𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀤𑀸𑀭𑀼𑀁 ‘‘𑀏𑀯𑀁 𑀫𑁂 𑀧𑀘𑁆𑀘𑀬𑀁 𑀤𑀲𑁆𑀲𑀦𑁆𑀢𑀻’’𑀢𑀺 𑀉𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀅𑀦𑁂𑀲𑀦𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀢𑀺, 𑀲𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀭𑀳𑀁 𑀧𑀸𑀧𑀼𑀡𑀸𑀢𑀺, 𑀲𑀫𑁆𑀧𑀭𑀸𑀬𑁂 𑀘 𑀅𑀧𑀸𑀬𑀧𑀭𑀺𑀧𑀽𑀭𑀓𑁄 𑀳𑁄𑀢𑀺. 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀁 𑀤𑀸𑀭𑀼𑀁 𑀓𑀼𑀲𑀮𑀗𑁆𑀕𑀳𑀢𑁆𑀣𑀸𑀬 𑀤𑀤𑀦𑁆𑀢𑁄 𑀓𑀼𑀮𑀤𑀽𑀲𑀓𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀧𑀭𑀧𑀼𑀕𑁆𑀕𑀮𑀺𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑀤𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀗𑁆𑀖𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀢𑀁 𑀇𑀲𑁆𑀲𑀭𑀢𑀸𑀬 𑀤𑁂𑀢𑀺, 𑀕𑀭𑀼𑀪𑀡𑁆𑀟𑀯𑀺𑀲𑁆𑀲𑀚𑁆𑀚𑀦𑀁 𑀆𑀧𑀚𑁆𑀚𑀢𑀺. 𑀓𑀢𑀭𑀁 𑀧𑀦 𑀤𑀸𑀭𑀼 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀓𑀢𑀭𑀁 𑀦 𑀳𑁄𑀢𑀻𑀢𑀺? 𑀬𑀁 𑀢𑀸𑀯 𑀅𑀭𑁄𑀧𑀺𑀫𑀁 𑀲𑀬𑀁𑀚𑀸𑀢𑀁, 𑀢𑀁 𑀲𑀗𑁆𑀖𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀕𑀭𑀼𑀪𑀡𑁆𑀟𑀁, 𑀢𑀢𑁄 𑀧𑀭𑀁 𑀦 𑀕𑀭𑀼𑀪𑀡𑁆𑀟𑀁. 𑀭𑁄𑀧𑀺𑀫𑀝𑁆𑀞𑀸𑀦𑁂 𑀘 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀕𑀭𑀼𑀪𑀡𑁆𑀟𑀁, 𑀧𑀫𑀸𑀡𑀢𑁄 𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑀁 𑀕𑀭𑀼𑀪𑀡𑁆𑀟𑀁.

𑀦 𑀯𑁂𑀴𑀼𑀤𑀸𑀦𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀦 𑀯𑁂𑀴𑀼𑀤𑀸𑀦𑁂𑀦𑀸𑀢𑀺 𑀦 𑀧𑀘𑁆𑀘𑀬𑀳𑁂𑀢𑀼𑀓𑁂𑀦 𑀯𑁂𑀴𑀼𑀤𑀸𑀦𑁂𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀦 𑀤𑀸𑀭𑀼𑀤𑀸𑀦𑁂𑀦𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑁂𑀴𑀼 𑀧𑀦 𑀧𑀫𑀸𑀡𑀢𑁄 𑀢𑁂𑀮𑀦𑀸𑀴𑀺𑀧𑁆𑀧𑀫𑀸𑀡𑁄 𑀕𑀭𑀼𑀪𑀡𑁆𑀟𑀁, 𑀦 𑀢𑀢𑁄 𑀳𑁂𑀝𑁆𑀞𑀸. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑁂𑀴𑀼𑀁 𑀬𑀸𑀘𑀦𑁆𑀢𑀺, 𑀪𑀺𑀓𑁆𑀔𑀽 ‘‘𑀲𑀗𑁆𑀖𑀺𑀓𑁄’’𑀢𑀺 𑀤𑀸𑀢𑀼𑀁 𑀦 𑀯𑀺𑀲𑀳𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑁆𑀢𑀺 𑀯𑀸 𑀢𑀚𑁆𑀚𑁂𑀦𑁆𑀢𑀺 𑀯𑀸, 𑀢𑀤𑀸 𑀪𑀺𑀓𑁆𑀔𑀽𑀳𑀺 ‘‘𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀯𑁂𑀴𑀼𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. 𑀲𑀘𑁂 𑀢𑁂 𑀤𑀡𑁆𑀟𑀓𑀫𑁆𑀫𑀢𑁆𑀣𑀸𑀬 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀺 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑁂𑀦𑁆𑀢𑀺, 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀤𑀟𑁆𑀠𑀕𑁂𑀳𑀸 𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀲𑀗𑁆𑀖𑀲𑁆𑀲 𑀯𑁂𑀴𑀼𑀕𑀼𑀫𑁆𑀩𑁂 𑀯𑁂𑀴𑀼𑀤𑀽𑀲𑀺𑀓𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀓𑁄𑀝𑁆𑀝𑀸𑀧𑁂𑀦𑁆𑀢𑀸𑀦𑀁 𑀯𑁂𑀴𑀼 𑀦𑀲𑁆𑀲𑀢𑀺. ‘‘𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀪𑀺𑀓𑁆𑀔𑀸𑀘𑀸𑀭𑁂 𑀫𑀦𑀼𑀲𑁆𑀲𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀝𑁂𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, ‘‘𑀲𑀫𑀁 𑀪𑀸𑀕𑀁 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀸. 𑀦 𑀇𑀘𑁆𑀙𑀦𑁆𑀢𑀺𑀬𑁂𑀯, ‘‘𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀸. 𑀏𑀯𑀫𑁆𑀧𑀺 𑀅𑀦𑀺𑀘𑁆𑀙𑀦𑁆𑀢𑁂𑀲𑀼 𑀦𑀝𑁆𑀞𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, ‘‘𑀢𑀼𑀫𑁆𑀳𑀸𑀓𑀁 𑀔𑀡𑁂 𑀲𑀢𑀺 𑀤𑀡𑁆𑀟𑀓𑀫𑁆𑀫𑀁 𑀓𑀭𑀺𑀲𑁆𑀲𑀣, 𑀓𑁄𑀝𑁆𑀝𑁂𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀸, 𑀯𑁂𑀴𑀼𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. 𑀯𑁂𑀴𑀼𑀕𑀼𑀫𑁆𑀩𑁂 𑀅𑀕𑁆𑀕𑀺𑀫𑁆𑀳𑀺 𑀉𑀝𑁆𑀞𑀺𑀢𑁂𑀧𑀺 𑀉𑀤𑀓𑁂𑀦 𑀯𑀼𑀬𑁆𑀳𑀫𑀸𑀦𑀯𑁂𑀴𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀧𑀢𑁆𑀢𑀤𑀸𑀦𑁂 𑀕𑀭𑀼𑀪𑀡𑁆𑀟𑀢𑀸𑀬 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀧𑀢𑁆𑀢𑀫𑁆𑀧𑀺 𑀳𑀺 𑀬𑀢𑁆𑀣 𑀯𑀺𑀓𑁆𑀓𑀸𑀬𑀢𑀺, 𑀕𑀦𑁆𑀥𑀓𑀸𑀭𑀸𑀤𑀬𑁄 𑀕𑀦𑁆𑀥𑀧𑀮𑀺𑀯𑁂𑀞𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀺, 𑀢𑀸𑀤𑀺𑀲𑁂 𑀤𑀼𑀮𑁆𑀮𑀪𑀝𑁆𑀞𑀸𑀦𑁂𑀬𑁂𑀯 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀏𑀲 𑀢𑀸𑀯 𑀓𑀺𑀁𑀲𑀼𑀓𑀧𑀢𑁆𑀢𑀓𑀡𑁆𑀡𑀧𑀺𑀴𑀦𑁆𑀥𑀦𑀢𑀸𑀮𑀧𑀢𑁆𑀢𑀸𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁄. 𑀢𑀸𑀮𑀧𑀡𑁆𑀡𑀫𑁆𑀧𑀺 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀓𑀣𑁂𑀢𑀩𑁆𑀩𑀁 𑁋 𑀢𑀸𑀮𑀧𑀡𑁆𑀡𑀫𑁆𑀧𑀺 𑀳𑀺 𑀲𑀬𑀁𑀚𑀸𑀢𑁂 𑀢𑀸𑀮𑀯𑀦𑁂 𑀲𑀗𑁆𑀖𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀕𑀭𑀼𑀪𑀡𑁆𑀟𑀁, 𑀦 𑀢𑀢𑁄 𑀧𑀭𑀁, 𑀭𑁄𑀧𑀺𑀫𑀢𑀸𑀮𑁂𑀲𑀼 𑀲𑀩𑁆𑀩𑀫𑁆𑀧𑀺 𑀕𑀭𑀼𑀪𑀡𑁆𑀟𑀁, 𑀢𑀲𑁆𑀲 𑀧𑀫𑀸𑀡𑀁 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀧𑀺 𑀭𑀺𑀢𑁆𑀢𑀧𑁄𑀢𑁆𑀣𑀓𑁄. 𑀢𑀺𑀡𑀫𑁆𑀧𑀺 𑀏𑀢𑁆𑀣𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀬𑀢𑁆𑀣 𑀧𑀦 𑀢𑀺𑀡𑀁 𑀦𑀢𑁆𑀣𑀺, 𑀢𑀢𑁆𑀣 𑀢𑀸𑀮𑀦𑀸𑀴𑀺𑀓𑁂𑀭𑀧𑀡𑁆𑀡𑀸𑀤𑀻𑀳𑀺𑀧𑀺 𑀙𑀸𑀤𑁂𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺𑀧𑀺 𑀢𑀺𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸𑀦𑀺. 𑀇𑀢𑀺 𑀫𑀼𑀜𑁆𑀚𑀧𑀮𑀸𑀮𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀁 𑀢𑀺𑀡𑀁. 𑀦𑀸𑀴𑀺𑀓𑁂𑀭𑀧𑀡𑁆𑀡𑀸𑀤𑀻𑀲𑀼 𑀘 𑀏𑀓𑀧𑀡𑁆𑀡𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀯𑀸 𑀢𑀢𑁆𑀣 𑀚𑀸𑀢𑀁 𑀯𑀸 𑀩𑀳𑀺𑀆𑀭𑀸𑀫𑁂 𑀲𑀗𑁆𑀖𑀲𑁆𑀲 𑀢𑀺𑀡𑀯𑀢𑁆𑀣𑀼𑀫𑁆𑀳𑀺 𑀚𑀸𑀢𑀢𑀺𑀡𑀁 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀯𑀸 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀢𑀁 𑀧𑀦 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂 𑀅𑀢𑀺𑀭𑁂𑀓𑀁 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀤𑀸𑀭𑀼𑀯𑁂𑀴𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀧𑀼𑀧𑁆𑀨𑀤𑀸𑀦𑁂 ‘‘𑀏𑀢𑁆𑀢𑀓𑁂𑀲𑀼 𑀭𑀼𑀓𑁆𑀔𑁂𑀲𑀼 𑀧𑀼𑀧𑁆𑀨𑀸𑀦𑀺 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀢𑁆𑀣𑀸𑀬 𑀉𑀧𑀦𑁂𑀦𑁆𑀢𑀼, 𑀏𑀢𑁆𑀢𑀓𑁂𑀲𑀼 𑀲𑁂𑀦𑀸𑀲𑀦𑀧𑀝𑀺𑀲𑀗𑁆𑀔𑀭𑀡𑁂 𑀉𑀧𑀦𑁂𑀦𑁆𑀢𑀽’’𑀢𑀺 𑀏𑀯𑀁 𑀦𑀺𑀬𑀫𑀺𑀢𑀝𑁆𑀞𑀸𑀦𑁂𑀬𑁂𑀯 𑀧𑀼𑀧𑁆𑀨𑀸𑀦𑀺 𑀕𑀭𑀼𑀪𑀡𑁆𑀟𑀸𑀦𑀺 𑀳𑁄𑀦𑁆𑀢𑀺. 𑀬𑀤𑀺 𑀲𑀸𑀫𑀡𑁂𑀭𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺, 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀧𑀼𑀧𑁆𑀨𑀪𑀸𑀚𑀓𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀡𑁂𑀢𑁆𑀯𑀸 𑀓𑁄𑀝𑁆𑀞𑀸𑀲𑁂 𑀓𑀭𑁄𑀢𑀺. 𑀲𑁄 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀲𑀗𑁆𑀖𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀤𑀸𑀢𑀼𑀁 𑀮𑀪𑀢𑀺. 𑀅𑀲𑀫𑁆𑀫𑀢𑁂𑀦 𑀧𑀦 𑀆𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑁄 𑀧𑀦 𑀓𑀲𑁆𑀲 𑀧𑀼𑀧𑁆𑀨𑀸𑀦𑀺 𑀤𑀸𑀢𑀼𑀁 𑀮𑀩𑁆𑀪𑀢𑀺, 𑀓𑀲𑁆𑀲 𑀦 𑀮𑀩𑁆𑀪𑀢𑀻𑀢𑀺? 𑀫𑀸𑀢𑀸𑀧𑀺𑀢𑀽𑀦𑀁 𑀕𑁂𑀳𑀁 𑀳𑀭𑀺𑀢𑁆𑀯𑀸𑀧𑀺 𑀕𑁂𑀳𑀢𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀧𑀺 ‘‘𑀯𑀢𑁆𑀣𑀼𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀤𑀸𑀢𑀼𑀁 𑀮𑀩𑁆𑀪𑀢𑀺, 𑀧𑀺𑀴𑀦𑁆𑀥𑀦𑀢𑁆𑀣𑀸𑀬 𑀦 𑀮𑀩𑁆𑀪𑀢𑀺. 𑀲𑁂𑀲𑀜𑀸𑀢𑀻𑀦𑀁 𑀧𑀦 𑀳𑀭𑀺𑀢𑁆𑀯𑀸 𑀦 𑀤𑀸𑀢𑀩𑁆𑀩𑀁, 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀽𑀚𑀦𑀢𑁆𑀣𑀸𑀬 𑀤𑀸𑀢𑀩𑁆𑀩𑀁. 𑀲𑁂𑀲𑀚𑀦𑀲𑁆𑀲 𑀧𑀽𑀚𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀲𑁆𑀲 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀤𑀸𑀢𑀩𑁆𑀩𑀁, 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺.

𑀯𑀺𑀳𑀸𑀭𑁂 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀦𑁆𑀢𑀺, 𑀪𑀺𑀓𑁆𑀔𑀼𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀦 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀯𑀺𑀳𑀸𑀭𑁂 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀧𑀽𑀚𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀯𑀘𑀦𑀫𑀢𑁆𑀢𑁂 𑀤𑁄𑀲𑁄 𑀦𑀢𑁆𑀣𑀺, ‘‘𑀫𑀦𑀼𑀲𑁆𑀲𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀆𑀤𑀸𑀬 𑀆𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀢𑁆𑀢𑁂𑀦 𑀧𑀦 𑀦 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀤𑀢𑀺, 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 ‘‘𑀯𑀺𑀳𑀸𑀭𑁂 𑀧𑀼𑀧𑁆𑀨𑀸𑀦𑀺 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀤𑀺𑀯𑀲𑁂 𑀯𑀺𑀳𑀸𑀭𑀁 𑀆𑀕𑀫𑀺𑀲𑁆𑀲𑀸𑀫, 𑀲𑀸𑀫𑀡𑁂𑀭𑀸𑀦𑀁 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑀼𑀁 𑀫𑀸 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀼 𑀲𑀸𑀫𑀡𑁂𑀭𑀸𑀦𑀁 𑀓𑀣𑁂𑀢𑀼𑀁 𑀧𑀫𑀼𑀝𑁆𑀞𑁄, 𑀲𑀸𑀫𑀡𑁂𑀭𑁂𑀳𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀢𑀸𑀦𑀺, 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀅𑀲𑀼𑀓𑀤𑀺𑀯𑀲𑁂 𑀏𑀯𑀁 𑀆𑀭𑁄𑀘𑀬𑀺𑀫𑁆𑀳 ‘‘𑀲𑀸𑀫𑀡𑁂𑀭𑀸𑀦𑀁 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑀼𑀁 𑀫𑀸 𑀤𑁂𑀣𑀸’’𑀢𑀺, 𑀓𑀲𑁆𑀫𑀸 𑀦 𑀯𑀸𑀭𑀬𑀺𑀢𑁆𑀣𑀸𑀢𑀺? ‘‘𑀲𑀢𑀺 𑀫𑁂 𑀧𑀫𑀼𑀝𑁆𑀞𑀸, 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑀫𑀢𑁆𑀢𑀸𑀦𑁂𑀯, 𑀦 𑀢𑀸𑀯 𑀧𑀽𑀚𑀸 𑀓𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀕𑀡𑁆𑀳𑀣 𑀧𑀽𑀚𑁂𑀣𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀤𑀢𑀺, 𑀆𑀫𑀺𑀲𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀧𑀭𑁄 𑀪𑀺𑀓𑁆𑀔𑀼 𑀲𑀸𑀫𑀡𑁂𑀭𑀸𑀦𑀁 𑀆𑀘𑀺𑀓𑁆𑀔𑀢𑀺 ‘‘𑀅𑀲𑀼𑀓𑀕𑀸𑀫𑀯𑀸𑀲𑀺𑀦𑁄 ‘𑀧𑀼𑀧𑁆𑀨𑀸𑀦𑀺 𑀫𑀸 𑀑𑀘𑀺𑀦𑀺𑀢𑁆𑀣𑀸’𑀢𑀺 𑀆𑀳𑀁𑀲𑀽’’𑀢𑀺 𑀫𑀦𑀼𑀲𑁆𑀲𑀸𑀧𑀺 𑀆𑀫𑀺𑀲𑀁 𑀆𑀳𑀭𑀺𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀯𑀤𑀦𑁆𑀢𑀺 ‘‘𑀅𑀫𑁆𑀳𑀸𑀓𑀁 𑀫𑀦𑀼𑀲𑁆𑀲𑀸 𑀦 𑀩𑀳𑀼𑀓𑀸, 𑀲𑀸𑀫𑀡𑁂𑀭𑁂 𑀅𑀫𑁆𑀳𑁂𑀳𑀺 𑀲𑀳 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑀼𑀁 𑀆𑀡𑀸𑀧𑁂𑀣𑀸’’𑀢𑀺. ‘‘𑀲𑀸𑀫𑀡𑁂𑀭𑁂𑀳𑀺 𑀪𑀺𑀓𑁆𑀔𑀸 𑀮𑀤𑁆𑀥𑀸. 𑀬𑁂 𑀪𑀺𑀓𑁆𑀔𑀸𑀘𑀸𑀭𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂 𑀲𑀬𑀫𑁂𑀯 𑀚𑀸𑀦𑀺𑀲𑁆𑀲𑀦𑁆𑀢𑀺 𑀉𑀧𑀸𑀲𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀢𑀓𑀁 𑀦𑀬𑀁 𑀮𑀪𑀺𑀢𑁆𑀯𑀸 𑀲𑀸𑀫𑀡𑁂𑀭𑁂 𑀧𑀼𑀢𑁆𑀢𑁂 𑀯𑀸 𑀪𑀸𑀢𑀺𑀓𑁂 𑀯𑀸 𑀓𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀸𑀧𑁂𑀢𑀼𑀁 𑀤𑁄𑀲𑁄 𑀦𑀢𑁆𑀣𑀺, 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺.

𑀨𑀮𑀤𑀸𑀦𑁂 𑀨𑀮𑀫𑁆𑀧𑀺 𑀧𑀼𑀧𑁆𑀨𑀁 𑀯𑀺𑀬 𑀦𑀺𑀬𑀫𑀺𑀢𑀫𑁂𑀯 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀯𑀺𑀳𑀸𑀭𑁂 𑀩𑀳𑀼𑀓𑀲𑁆𑀫𑀺𑀁 𑀨𑀮𑀸𑀨𑀮𑁂 𑀲𑀢𑀺 𑀅𑀨𑀸𑀲𑀼𑀓𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀬𑀸𑀘𑀦𑁆𑀢𑀺, 𑀪𑀺𑀓𑁆𑀔𑀽 ‘‘𑀲𑀗𑁆𑀖𑀺𑀓’’𑀦𑁆𑀢𑀺 𑀤𑀸𑀢𑀼𑀁 𑀦 𑀉𑀲𑁆𑀲𑀳𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀨𑀮𑁂𑀳𑀺 𑀯𑀸 𑀭𑀼𑀓𑁆𑀔𑁂𑀳𑀺 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑀺𑀓𑀸 𑀓𑀸𑀢𑀩𑁆𑀩𑀸 ‘‘𑀅𑀲𑀼𑀓𑁂 𑀘 𑀭𑀼𑀓𑁆𑀔𑁂 𑀅𑀲𑀼𑀓𑁂 𑀘 𑀭𑀼𑀓𑁆𑀔𑁂 𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀕𑀡𑁆𑀳𑀦𑁆𑀢𑀸, 𑀏𑀢𑁆𑀢𑀓𑁂𑀲𑀼 𑀯𑀸 𑀭𑀼𑀓𑁆𑀔𑁂𑀲𑀼 𑀨𑀮𑀸𑀦𑀺 𑀕𑀡𑁆𑀳𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸’’𑀢𑀺. 𑀘𑁄𑀭𑀸 𑀯𑀸 𑀇𑀲𑁆𑀲𑀭𑀸 𑀯𑀸 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸. 𑀓𑀼𑀤𑁆𑀥𑀸 𑀳𑀺 𑀢𑁂 𑀲𑀓𑀮𑀯𑀺𑀳𑀸𑀭𑀫𑁆𑀧𑀺 𑀦𑀸𑀲𑁂𑀬𑁆𑀬𑀼𑀁, 𑀆𑀤𑀻𑀦𑀯𑁄 𑀧𑀦 𑀓𑀣𑁂𑀢𑀩𑁆𑀩𑁄𑀢𑀺.

𑀲𑀺𑀦𑀸𑀦𑀤𑀸𑀦𑁂 𑀲𑀺𑀦𑀸𑀦𑀘𑀼𑀡𑁆𑀡𑀸𑀦𑀺 𑀓𑁄𑀝𑁆𑀝𑀺𑀢𑀸𑀦𑀺 𑀦 𑀕𑀭𑀼𑀪𑀡𑁆𑀟𑀸𑀦𑀺, 𑀅𑀓𑁄𑀝𑁆𑀝𑀺𑀢𑁄 𑀭𑀼𑀓𑁆𑀔𑁂 𑀞𑀺𑀢𑁄𑀯 𑀭𑀼𑀓𑁆𑀔𑀢𑀘𑁄 𑀕𑀭𑀼𑀪𑀡𑁆𑀟𑀁, 𑀘𑀼𑀡𑁆𑀡𑀁 𑀧𑀦 𑀅𑀕𑀺𑀮𑀸𑀦𑀲𑁆𑀲 𑀭𑀚𑀦𑀦𑀺𑀧𑀓𑁆𑀓𑀁 𑀯𑀝𑁆𑀝𑀢𑀺. 𑀕𑀺𑀮𑀸𑀦𑀲𑁆𑀲 𑀬𑀁𑀓𑀺𑀜𑁆𑀘𑀺 𑀘𑀼𑀡𑁆𑀡𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀦 𑀘𑀼𑀡𑁆𑀡𑀤𑀸𑀦𑁂𑀦𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀺𑀭𑀻𑀲𑀘𑀼𑀡𑁆𑀡𑀸𑀤𑀻𑀦𑀁 𑀤𑀸𑀦𑁂𑀦. 𑀫𑀢𑁆𑀢𑀺𑀓𑀸𑀤𑀸𑀦𑁂𑀫𑀢𑁆𑀢𑀺𑀓𑀸 𑀳𑀺 𑀬𑀢𑁆𑀣 𑀤𑀼𑀮𑁆𑀮𑀪𑀸 𑀳𑁄𑀢𑀺, 𑀢𑀢𑁆𑀣𑁂𑀯 𑀕𑀭𑀼𑀪𑀡𑁆𑀟𑀁. 𑀲𑀸𑀧𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑁆𑀧𑀫𑀸𑀡𑀸𑀯, 𑀢𑀢𑁄 𑀳𑁂𑀝𑁆𑀞𑀸 𑀦 𑀕𑀭𑀼𑀪𑀡𑁆𑀟𑀦𑁆𑀢𑀺.

𑀤𑀦𑁆𑀢𑀓𑀝𑁆𑀞𑀤𑀸𑀦𑁂 𑀤𑀦𑁆𑀢𑀓𑀝𑁆𑀞𑀁 𑀅𑀘𑁆𑀙𑀺𑀦𑁆𑀦𑀓𑀫𑁂𑀯 𑀕𑀭𑀼𑀪𑀡𑁆𑀟𑀁. 𑀬𑁂𑀲𑀁 𑀲𑀸𑀫𑀡𑁂𑀭𑀸𑀦𑀁 𑀲𑀗𑁆𑀖𑀢𑁄 𑀤𑀦𑁆𑀢𑀓𑀝𑁆𑀞𑀯𑀸𑀭𑁄 𑀧𑀸𑀧𑀼𑀡𑀸𑀢𑀺, 𑀢𑁂 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀧𑀸𑀝𑀺𑀬𑁂𑀓𑁆𑀓𑀁 𑀤𑀸𑀢𑀼𑀁 𑀦 𑀮𑀪𑀦𑁆𑀢𑀺. 𑀬𑁂𑀳𑀺 𑀧𑀦 ‘‘𑀏𑀢𑁆𑀢𑀓𑀸𑀦𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 𑀆𑀳𑀭𑀺𑀢𑀩𑁆𑀩𑀸𑀦𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀸𑀭𑀸 𑀕𑀳𑀺𑀢𑀸, 𑀢𑁂 𑀅𑀢𑀺𑀭𑁂𑀓𑀸𑀦𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀤𑀸𑀢𑀼𑀁 𑀮𑀪𑀦𑁆𑀢𑀺. 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑀢𑁄 𑀩𑀳𑀽𑀦𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺, 𑀤𑁂𑀯𑀲𑀺𑀓𑀁 𑀏𑀓𑁂𑀓𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀧𑀸𑀝𑀺𑀬𑁂𑀓𑁆𑀓𑀁 𑀯𑀲𑀦𑁆𑀢𑁂𑀦𑀸𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀡𑀬𑀺𑀢𑁆𑀯𑀸 𑀬𑀢𑁆𑀢𑀓𑀸𑀦𑀺 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑁆𑀢𑀺, 𑀢𑀢𑁆𑀢𑀓𑀸𑀦𑁂𑀯 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀦𑁆𑀢𑀭𑀸 𑀆𑀕𑀦𑁆𑀢𑀼𑀓𑁂𑀲𑀼 𑀯𑀸 𑀆𑀕𑀢𑁂𑀲𑀼 𑀤𑀺𑀲𑀁 𑀯𑀸 𑀧𑀓𑁆𑀓𑀫𑀦𑁆𑀢𑁂𑀲𑀼 𑀆𑀳𑀭𑀺𑀢𑁆𑀯𑀸 𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀢𑀩𑁆𑀩𑀸𑀦𑀺. 𑀦 𑀫𑀼𑀔𑁄𑀤𑀓𑀤𑀸𑀦𑁂𑀦𑀸𑀢𑀺 𑀦 𑀫𑀼𑀔𑀥𑁄𑀯𑀦𑀉𑀤𑀓𑀤𑀸𑀦𑁂𑀦.

𑀦 𑀘𑀸𑀝𑀼𑀓𑀫𑁆𑀬𑀢𑀸𑀬𑀸𑀢𑀺𑀆𑀤𑀻𑀲𑀼 𑀘𑀸𑀝𑀼𑀓𑀫𑁆𑀬𑀢𑀸 𑀯𑀼𑀘𑁆𑀘𑀢𑀺 𑀅𑀢𑁆𑀢𑀸𑀦𑀁 𑀤𑀸𑀲𑀁 𑀯𑀺𑀬 𑀦𑀻𑀘𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀭𑀲𑁆𑀲 𑀔𑀮𑀺𑀢𑀯𑀘𑀦𑀫𑁆𑀧𑀺 𑀲𑀡𑁆𑀞𑀧𑁂𑀢𑁆𑀯𑀸 𑀧𑀺𑀬𑀓𑀸𑀫𑀢𑀸𑀬 𑀧𑀕𑁆𑀕𑀬𑁆𑀳𑀯𑀘𑀦𑀁. 𑀦 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀬𑀸𑀢𑀺 𑀦 𑀫𑀼𑀕𑁆𑀕𑀲𑀽𑀧𑀲𑀫𑀸𑀦𑀢𑀸𑀬. 𑀫𑀼𑀕𑁆𑀕𑀲𑀽𑀧𑀲𑀫𑀸𑀦𑀢𑀸𑀢𑀺 𑀲𑀘𑁆𑀘𑀸𑀮𑀺𑀓𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑀦𑀢𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸 𑀳𑀺 𑀫𑀼𑀕𑁆𑀕𑀲𑀽𑀧𑁂 𑀧𑀘𑁆𑀘𑀦𑁆𑀢𑁂 𑀩𑀳𑀽 𑀫𑀼𑀕𑁆𑀕𑀸 𑀧𑀸𑀓𑀁 𑀕𑀘𑁆𑀙𑀦𑁆𑀢𑀺 𑀣𑁄𑀓𑀸 𑀦 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀲𑀘𑁆𑀘𑀸𑀮𑀺𑀓𑁂𑀦 𑀚𑀻𑀯𑀺𑀓𑀓𑀧𑁆𑀧𑀓𑁂 𑀧𑀼𑀕𑁆𑀕𑀮𑁂 𑀩𑀳𑀼 𑀅𑀮𑀺𑀓𑀁 𑀳𑁄𑀢𑀺, 𑀅𑀧𑁆𑀧𑀓𑀁 𑀲𑀘𑁆𑀘𑀁. 𑀬𑀣𑀸 𑀯𑀸 𑀫𑀼𑀕𑁆𑀕𑀲𑀽𑀧𑀲𑁆𑀲 𑀅𑀧𑀯𑀺𑀲𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀏𑀯𑀫𑁂𑀯 𑀲𑀘𑁆𑀘𑀸𑀮𑀺𑀓𑀯𑀼𑀢𑁆𑀢𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀢𑀺𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀲𑀺𑀗𑁆𑀖𑀸𑀝𑀓𑀁 𑀯𑀺𑀬 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀲𑁆𑀲 𑀧𑀢𑀺𑀝𑁆𑀞𑀸𑀢𑀺. 𑀢𑁂𑀦𑀲𑁆𑀲 𑀲𑀸 𑀫𑀼𑀲𑀸𑀯𑀸𑀤𑀺𑀢𑀸 ‘‘𑀫𑀼𑀕𑁆𑀕𑀲𑀽𑀧𑁆𑀬𑀢𑀸’’𑀢𑀺 𑀯𑀼𑀢𑁆𑀢𑀸. 𑀦 𑀧𑀸𑀭𑀺𑀪𑀝𑁆𑀬𑀢𑀸𑀬𑀸𑀢𑀺 𑀦 𑀧𑀭𑀺𑀪𑀝𑀓𑀫𑁆𑀫𑀪𑀸𑀯𑁂𑀦. 𑀧𑀭𑀺𑀪𑀝𑀲𑁆𑀲 𑀳𑀺 𑀓𑀫𑁆𑀫𑀁 𑀧𑀸𑀭𑀺𑀪𑀝𑁆𑀬𑀁, 𑀢𑀲𑁆𑀲 𑀪𑀸𑀯𑁄 𑀧𑀸𑀭𑀺𑀪𑀝𑁆𑀬𑀢𑀸, 𑀅𑀮𑀗𑁆𑀓𑀸𑀭𑀓𑀭𑀡𑀸𑀤𑀻𑀳𑀺 𑀤𑀸𑀭𑀓𑀓𑀻𑀴𑀸𑀧𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦 𑀧𑀻𑀞𑀫𑀤𑁆𑀤𑀺𑀓𑀢𑀸𑀬𑀸𑀢𑀺 𑀦 𑀲𑀳𑀲𑀸 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀻𑀞𑀓𑁂 𑀦𑀺𑀲𑀻𑀤𑀦𑀓𑀢𑀸𑀬.

𑀦 𑀯𑀢𑁆𑀣𑀼𑀯𑀺𑀚𑁆𑀚𑀸𑀬𑀸𑀢𑀺𑀆𑀤𑀻𑀲𑀼 𑀯𑀢𑁆𑀣𑀼𑀯𑀺𑀚𑁆𑀚𑀸 𑀦𑀸𑀫 𑀕𑀸𑀫𑀦𑀺𑀕𑀫𑀦𑀕𑀭𑀸𑀤𑀻𑀦𑀁 𑀲𑀼𑀦𑀺𑀯𑀺𑀝𑁆𑀞𑀤𑀼𑀦𑁆𑀦𑀺𑀯𑀺𑀝𑁆𑀞𑀚𑀸𑀦𑀦𑀲𑀢𑁆𑀣𑀁. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸 𑀦𑀸𑀫 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀸𑀦𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑀸 𑀅𑀗𑁆𑀕𑀲𑀢𑁆𑀣𑀦𑀺𑀫𑀺𑀢𑁆𑀢𑀸𑀤𑀺𑀓𑀸 𑀅𑀯𑀲𑁂𑀲𑀯𑀺𑀚𑁆𑀚𑀸. 𑀅𑀗𑁆𑀕𑀯𑀺𑀚𑁆𑀚𑀸 𑀦𑀸𑀫 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀲𑀼𑀪𑀕𑀤𑀼𑀩𑁆𑀪𑀕𑀮𑀓𑁆𑀔𑀡𑀚𑀸𑀦𑀦𑀁. 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀁 𑀬𑁄𑀕𑀚𑀸𑀦𑀦𑀲𑀢𑁆𑀣𑀁.

𑀦 𑀤𑀽𑀢𑀕𑀫𑀦𑁂𑀦𑀸𑀢𑀺 𑀦 𑀤𑀽𑀢𑁂𑀬𑁆𑀬𑀁 𑀓𑀢𑁆𑀯𑀸 𑀕𑀫𑀦𑁂𑀦. 𑀦 𑀧𑀳𑀺𑀡𑀕𑀫𑀦𑁂𑀦𑀸𑀢𑀺 𑀦 𑀕𑀺𑀳𑀻𑀦𑀁 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀖𑀭𑀸 𑀖𑀭𑀁 𑀧𑀳𑀺𑀢𑀲𑁆𑀲 𑀕𑀫𑀦𑁂𑀦. 𑀦 𑀚𑀗𑁆𑀖𑀧𑁂𑀲𑀦𑀺𑀬𑁂𑀦𑀸𑀢𑀺 𑀕𑀸𑀫𑀦𑁆𑀢𑀭𑀤𑁂𑀲𑀦𑁆𑀢𑀭𑀸𑀤𑀻𑀲𑀼 𑀢𑁂𑀲𑀁 𑀢𑁂𑀲𑀁 𑀕𑀺𑀳𑀻𑀦𑀁 𑀲𑀸𑀲𑀦𑀧𑀝𑀺𑀲𑀸𑀲𑀦𑀁 𑀳𑀭𑀡𑁂𑀦. 𑀇𑀤𑀜𑁆𑀳𑀺 𑀚𑀗𑁆𑀖𑀧𑁂𑀲𑀦𑀺𑀬𑀁 𑀦𑀸𑀫 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀽𑀦𑀁, 𑀬𑁂 𑀘𑀸𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀲𑀁 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀓𑀢𑁆𑀣𑀘𑀺 𑀕𑀫𑀦𑀯𑀲𑁂𑀦 𑀯𑀝𑁆𑀝𑀢𑀺. 𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀯𑀟𑁆𑀠𑀓𑀻𑀦𑀫𑁆𑀧𑀺 𑀲𑀸𑀲𑀦𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀦𑀼𑀲𑁆𑀲𑀸 ‘‘𑀤𑀸𑀦𑀁 𑀤𑀲𑁆𑀲𑀸𑀫, 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀘𑀺𑀓𑁆𑀔𑀣𑀸’’𑀢𑀺 𑀘 𑀯𑀤𑀦𑁆𑀢𑀺; ‘‘𑀅𑀲𑀼𑀓𑀢𑁆𑀣𑁂𑀭𑀲𑁆𑀲 𑀦𑀸𑀫 𑀤𑁂𑀣𑀸’’𑀢𑀺 𑀧𑀺𑀡𑁆𑀟𑀧𑀸𑀢𑀁 𑀯𑀸 𑀪𑁂𑀲𑀚𑁆𑀚𑀁 𑀯𑀸 𑀘𑀻𑀯𑀭𑀁 𑀯𑀸 𑀤𑁂𑀦𑁆𑀢𑀺, ‘‘𑀯𑀺𑀳𑀸𑀭𑁂 𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀦𑀺 𑀯𑀸 𑀥𑀚𑀧𑀝𑀸𑀓𑀸𑀤𑀻𑀦𑀺 𑀯𑀸 𑀦𑀺𑀬𑁆𑀬𑀸𑀢𑁂𑀦𑁆𑀢𑀺. 𑀲𑀩𑁆𑀩𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀚𑀗𑁆𑀖𑀧𑁂𑀲𑀦𑀺𑀬𑀁 𑀦𑀸𑀫 𑀦 𑀳𑁄𑀢𑀺. 𑀲𑁂𑀲𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑁄𑀲𑁄.

𑀦 𑀯𑁂𑀚𑁆𑀚𑀓𑀫𑁆𑀫𑁂𑀦𑀸𑀢𑀺 𑀦 𑀯𑁂𑀚𑁆𑀚𑁂𑀦 𑀳𑀼𑀢𑁆𑀯𑀸 𑀓𑀸𑀬𑀢𑀺𑀓𑀺𑀘𑁆𑀙𑀦𑀸𑀤𑀺𑀪𑁂𑀲𑀚𑁆𑀚𑀓𑀭𑀡𑁂𑀦. 𑀪𑁂𑀲𑀚𑁆𑀚𑀁 𑀧𑀦 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀓𑀸𑀢𑀩𑁆𑀩𑀁 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸. 𑀲𑀫𑀲𑀻𑀮𑀲𑀤𑁆𑀥𑀸𑀧𑀜𑁆𑀜𑀸𑀦𑀜𑁆𑀳𑀺 𑀏𑀢𑁂𑀲𑀁 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀬𑀼𑀢𑁆𑀢𑀸𑀦𑀁 𑀪𑁂𑀲𑀚𑁆𑀚𑀁 𑀅𑀓𑀸𑀢𑀼𑀁 𑀦 𑀮𑀩𑁆𑀪𑀢𑀺. 𑀫𑀸𑀢𑀸𑀧𑀺𑀢𑀽𑀦𑀁 𑀢𑀤𑀼𑀧𑀝𑁆𑀞𑀸𑀓𑀸𑀦𑀁 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀧𑀡𑁆𑀟𑀼𑀧𑀮𑀸𑀲𑀲𑁆𑀲𑀸𑀢𑀺 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀚𑁂𑀝𑁆𑀞𑀪𑀸𑀢𑀼, 𑀓𑀦𑀺𑀝𑁆𑀞𑀪𑀸𑀢𑀼, 𑀚𑁂𑀝𑁆𑀞𑀪𑀕𑀺𑀦𑀺𑀬𑀸, 𑀓𑀦𑀺𑀝𑁆𑀞𑀪𑀕𑀺𑀦𑀺𑀬𑀸, 𑀘𑀽𑀴𑀫𑀸𑀢𑀼𑀬𑀸, 𑀫𑀳𑀸𑀫𑀸𑀢𑀼𑀬𑀸, 𑀘𑀽𑀴𑀧𑀺𑀢𑀼𑀦𑁄, 𑀫𑀳𑀸𑀧𑀺𑀢𑀼𑀦𑁄, 𑀧𑀺𑀢𑀼𑀘𑁆𑀙𑀸𑀬, 𑀫𑀸𑀢𑀼𑀘𑁆𑀙𑀸𑀬𑀸𑀢𑀺 𑀏𑀢𑁂𑀲𑀁 𑀧𑀦 𑀤𑀲𑀦𑁆𑀦𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀢𑁂𑀲𑀁𑀬𑁂𑀯 𑀲𑀦𑁆𑀢𑀓𑀁 𑀪𑁂𑀲𑀚𑁆𑀚𑀁 𑀕𑀳𑁂𑀢𑁆𑀯𑀸 𑀓𑁂𑀯𑀮𑀁 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀦𑀧𑁆𑀧𑀳𑁄𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀢𑀸𑀯𑀓𑀸𑀮𑀺𑀓𑀁 𑀤𑀸𑀢𑀩𑁆𑀩𑀁. 𑀏𑀢𑁂𑀲𑀁 𑀧𑀼𑀢𑁆𑀢𑀧𑀭𑀫𑁆𑀧𑀭𑀸 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸, 𑀢𑀸𑀯 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀅𑀓𑀢𑀯𑀺𑀜𑁆𑀜𑀢𑁆𑀢𑀺 𑀯𑀸, 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲 𑀯𑁂𑀚𑁆𑀚𑀓𑀫𑁆𑀫𑀁 𑀯𑀸, 𑀓𑀼𑀮𑀤𑀽𑀲𑀓𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀺.

𑀦 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑁂𑀦𑀸𑀢𑀺 𑀏𑀢𑁆𑀣 𑀧𑀺𑀡𑁆𑀟𑀧𑀸𑀢𑁄 𑀓𑀲𑁆𑀲 𑀤𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀤𑀸𑀢𑀩𑁆𑀩𑁄? 𑀫𑀸𑀢𑀸𑀧𑀺𑀢𑀽𑀦𑀁 𑀢𑀤𑀼𑀧𑀝𑁆𑀞𑀸𑀓𑀸𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀧𑀡𑁆𑀟𑀼𑀧𑀮𑀸𑀲𑀲𑁆𑀲 𑀲𑀫𑁆𑀧𑀢𑁆𑀢𑀲𑁆𑀲 𑀤𑀸𑀫𑀭𑀺𑀓𑀘𑁄𑀭𑀲𑁆𑀲 𑀇𑀲𑁆𑀲𑀭𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑁄. 𑀏𑀢𑁂𑀲𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀮𑀤𑁆𑀥𑀫𑁆𑀧𑀺 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀁 𑀦𑀸𑀫 𑀦 𑀳𑁄𑀢𑀺. 𑀦 𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀤𑀺𑀦𑁆𑀦𑀓𑀸𑀦𑀁 𑀦 𑀧𑀼𑀦 𑀤𑀸𑀦𑁂𑀦. 𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀁. 𑀲𑀫𑁂𑀦𑀸𑀢𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀦𑀸. 𑀮𑀤𑁆𑀥𑀸𑀢𑀺 𑀓𑀸𑀬𑁂𑀦 𑀮𑀤𑁆𑀥𑀸. 𑀮𑀪𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑁂𑀦 𑀧𑀸𑀧𑀼𑀡𑀺𑀢𑁆𑀯𑀸. 𑀅𑀥𑀺𑀕𑀦𑁆𑀢𑁆𑀯𑀸𑀢𑀺 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸. 𑀯𑀺𑀦𑁆𑀤𑀺𑀢𑁆𑀯𑀸𑀢𑀺 𑀜𑀸𑀡𑁂𑀦 𑀯𑀺𑀦𑁆𑀤𑀺𑀢𑁆𑀯𑀸. 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀮𑀪𑀺𑀢𑁆𑀯𑀸.

𑀅𑀦𑁆𑀦𑀲𑀦𑁆𑀦𑀺𑀥𑀺𑀦𑁆𑀢𑀺 𑀏𑀢𑁆𑀣 𑀤𑀼𑀯𑀺𑀥𑀸 𑀅𑀦𑁆𑀦𑀓𑀣𑀸 𑀯𑀺𑀦𑀬𑀯𑀲𑁂𑀦 𑀘 𑀲𑀮𑁆𑀮𑁂𑀔𑀯𑀲𑁂𑀦 𑀘. 𑀯𑀺𑀦𑀬𑀯𑀲𑁂𑀦 𑀢𑀸𑀯 𑀬𑀁𑀓𑀺𑀜𑁆𑀘𑀺 𑀅𑀦𑁆𑀦𑀁 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀁 𑀅𑀧𑀭𑀚𑁆𑀚𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀳𑁄𑀢𑀺, 𑀢𑀲𑁆𑀲 𑀧𑀭𑀺𑀪𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀦 𑀲𑀸𑀫𑀡𑁂𑀭𑀸𑀦𑀁 𑀤𑀢𑁆𑀯𑀸 𑀢𑁂𑀳𑀺 𑀮𑀤𑁆𑀥𑀁 𑀞𑀧𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀮𑁆𑀮𑁂𑀔𑁄 𑀧𑀦 𑀦 𑀳𑁄𑀢𑀺.

𑀧𑀸𑀦𑀲𑀦𑁆𑀦𑀺𑀥𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀸𑀦𑀁 𑀦𑀸𑀫 𑀅𑀫𑁆𑀩𑀧𑀸𑀦𑀸𑀤𑀻𑀦𑀺 𑀅𑀝𑁆𑀞 𑀧𑀸𑀦𑀸𑀦𑀺, 𑀬𑀸𑀦𑀺 𑀘𑁂 𑀢𑁂𑀲𑀁 𑀅𑀦𑀼𑀮𑁄𑀫𑀸𑀦𑀺.

𑀯𑀢𑁆𑀣𑀲𑀦𑁆𑀦𑀺𑀥𑀺𑀦𑁆𑀢𑀺𑀆𑀤𑀺𑀫𑁆𑀳𑀺 𑀅𑀦𑀥𑀺𑀝𑁆𑀞𑀺𑀢𑀸𑀯𑀺𑀓𑀧𑁆𑀧𑀺𑀢𑀁 𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺 𑀲𑀮𑁆𑀮𑁂𑀔𑀜𑁆𑀘 𑀓𑁄𑀧𑁂𑀢𑀺. 𑀅𑀬𑀁 𑀧𑀭𑀺𑀬𑀸𑀬 𑀓𑀣𑀸𑀯, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀢𑀺𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑁂𑀦 𑀪𑀯𑀺𑀢𑀩𑁆𑀩𑀁, 𑀘𑀢𑀼𑀢𑁆𑀣𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁. 𑀲𑀘𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑀲𑁆𑀲 𑀧𑀦 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀲𑁄 𑀉𑀤𑁆𑀤𑁂𑀲𑀢𑁆𑀣𑀸𑀬 𑀯𑀸 𑀧𑀭𑀺𑀧𑀼𑀘𑁆𑀙𑀢𑁆𑀣𑀸𑀬 𑀯𑀸 𑀕𑀢𑁄, 𑀆𑀕𑀢𑀫𑀢𑁆𑀢𑁂 𑀤𑀸𑀢𑀩𑁆𑀩𑀁, 𑀅𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀘𑀻𑀯𑀭𑁂 𑀧𑀦 𑀅𑀧𑁆𑀧𑀳𑁄𑀦𑁆𑀢𑁂 𑀲𑀢𑀺𑀬𑀸 𑀧𑀘𑁆𑀘𑀸𑀲𑀸𑀬 𑀅𑀦𑀼𑀜𑁆𑀜𑀸𑀢𑀓𑀸𑀮𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀽𑀘𑀺𑀲𑀼𑀢𑁆𑀢𑀘𑀻𑀯𑀭𑀓𑀸𑀭𑀓𑀸𑀦𑀁 𑀅𑀮𑀸𑀪𑁂𑀦 𑀢𑀢𑁄 𑀧𑀭𑀫𑁆𑀧𑀺 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀇𑀫𑀲𑁆𑀫𑀺𑀁 𑀚𑀺𑀡𑁆𑀡𑁂 𑀧𑀼𑀦 𑀈𑀤𑀺𑀲𑀁 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺, 𑀲𑀮𑁆𑀮𑁂𑀔𑀜𑁆𑀘 𑀯𑀺𑀓𑁄𑀧𑁂𑀢𑀺.

𑀬𑀸𑀦𑀲𑀦𑁆𑀦𑀺𑀥𑀺𑀫𑁆𑀳𑀺 𑀬𑀸𑀦𑀁 𑀦𑀸𑀫 𑀯𑀬𑁆𑀳𑀁 𑀭𑀣𑁄 𑀲𑀓𑀝𑀁 𑀲𑀦𑁆𑀤𑀫𑀸𑀦𑀺𑀓𑀸 𑀲𑀺𑀯𑀺𑀓𑀸 𑀧𑀸𑀝𑀗𑁆𑀓𑀻𑀢𑀺 𑀦𑁂𑀢𑀁 𑀧𑀩𑁆𑀩𑀚𑀺𑀢𑀲𑁆𑀲 𑀬𑀸𑀦𑀁. 𑀉𑀧𑀸𑀳𑀦𑀸 𑀧𑀦 𑀧𑀩𑁆𑀩𑀚𑀺𑀢𑀲𑁆𑀲 𑀬𑀸𑀦𑀁𑀬𑁂𑀯. 𑀏𑀓𑀪𑀺𑀓𑁆𑀔𑀼𑀲𑁆𑀲 𑀳𑀺 𑀏𑀓𑁄 𑀅𑀭𑀜𑁆𑀜𑀢𑁆𑀣𑀸𑀬, 𑀏𑀓𑀸 𑀥𑁄𑀢𑀧𑀸𑀤𑀓𑀢𑁆𑀣𑀸𑀬𑀸𑀢𑀺 𑀉𑀓𑁆𑀓𑀁𑀲𑀢𑁄 𑀤𑁆𑀯𑁂 𑀉𑀧𑀸𑀳𑀦𑀲𑀗𑁆𑀖𑀸𑀝𑀸 𑀯𑀝𑁆𑀝𑀦𑁆𑀢𑀺, 𑀢𑀢𑀺𑀬𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑁄, ‘‘𑀇𑀫𑀲𑁆𑀫𑀺𑀁 𑀚𑀺𑀡𑁆𑀡𑁂 𑀅𑀜𑁆𑀜𑀁 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀳𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺, 𑀲𑀮𑁆𑀮𑁂𑀔𑀜𑁆𑀘 𑀯𑀺𑀓𑁄𑀧𑁂𑀢𑀺.

𑀲𑀬𑀦𑀲𑀦𑁆𑀦𑀺𑀥𑀺𑀫𑁆𑀳𑀺 𑀲𑀬𑀦𑀦𑁆𑀢𑀺 𑀫𑀜𑁆𑀘𑁄. 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑁄 𑀕𑀩𑁆𑀪𑁂 𑀏𑀓𑁄 𑀤𑀺𑀯𑀸𑀝𑁆𑀞𑀸𑀦𑁂𑀢𑀺 𑀉𑀓𑁆𑀓𑀁𑀲𑀢𑁄 𑀤𑁆𑀯𑁂 𑀫𑀜𑁆𑀘𑀸 𑀯𑀝𑁆𑀝𑀦𑁆𑀢𑀺, 𑀢𑀢𑁄 𑀉𑀢𑁆𑀢𑀭𑀺 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀸 𑀕𑀡𑀲𑁆𑀲 𑀯𑀸 𑀤𑀸𑀢𑀩𑁆𑀩𑁄, 𑀅𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀦𑁆𑀦𑀺𑀥𑀺 𑀘𑁂𑀯 𑀳𑁄𑀢𑀺, 𑀲𑀮𑁆𑀮𑁂𑀔𑀜𑁆𑀘 𑀓𑁄𑀧𑁂𑀢𑀺.

𑀕𑀦𑁆𑀥𑀲𑀦𑁆𑀦𑀺𑀥𑀺𑀫𑁆𑀳𑀺 𑀪𑀺𑀓𑁆𑀔𑀼𑀦𑁄 𑀓𑀡𑁆𑀟𑀼𑀓𑀘𑁆𑀙𑀼𑀙𑀯𑀺𑀤𑁄𑀲𑀸𑀤𑀺𑀆𑀩𑀸𑀥𑁂 𑀲𑀢𑀺 𑀕𑀦𑁆𑀥𑁄 𑀯𑀝𑁆𑀝𑀢𑀺. 𑀢𑁂𑀦 𑀕𑀦𑁆𑀥𑁂𑀦 𑀢𑀲𑁆𑀫𑀺𑀁 𑀭𑁄𑀕𑁂 𑀯𑀽𑀧𑀲𑀦𑁆𑀢𑁂 𑀅𑀜𑁆𑀜𑁂𑀲𑀁 𑀯𑀸 𑀆𑀩𑀸𑀥𑀺𑀓𑀸𑀦𑀁 𑀤𑀸𑀢𑀩𑁆𑀩𑁄. 𑀤𑁆𑀯𑀸𑀭𑁂 𑀧𑀜𑁆𑀘𑀗𑁆𑀕𑀼𑀮𑀖𑀭𑀥𑀽𑀧𑀦𑀸𑀤𑀻𑀲𑀼 𑀯𑀸 𑀉𑀧𑀦𑁂𑀢𑀩𑁆𑀩𑁄. ‘‘𑀧𑀼𑀦 𑀭𑁄𑀕𑁂 𑀲𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀕𑀦𑁆𑀥𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺, 𑀲𑀮𑁆𑀮𑁂𑀔𑀜𑁆𑀘 𑀓𑁄𑀧𑁂𑀢𑀺.

𑀆𑀫𑀺𑀲𑀦𑁆𑀢𑀺 𑀅𑀦𑁆𑀦𑀸𑀤𑀺𑀯𑀼𑀢𑁆𑀢𑀸𑀯𑀲𑁂𑀲𑀁𑀯 𑀤𑀝𑁆𑀞𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 ‘‘𑀢𑀣𑀸𑀭𑀽𑀧𑁂 𑀓𑀸𑀮𑁂 𑀉𑀧𑀓𑀸𑀭𑀸𑀬 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀺𑀮𑀢𑀡𑁆𑀟𑀼𑀮𑀫𑀼𑀕𑁆𑀕𑀫𑀸𑀲𑀦𑀸𑀴𑀺𑀓𑁂𑀭𑀮𑁄𑀡𑀫𑀘𑁆𑀙𑀫𑀁𑀲𑀯𑀮𑁆𑀮𑀽𑀭𑀲𑀧𑁆𑀧𑀺𑀢𑁂𑀮𑀕𑀼𑀴- 𑀪𑀸𑀚𑀦𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀲𑁄 𑀯𑀲𑁆𑀲𑀓𑀸𑀮𑁂 𑀓𑀸𑀮𑀲𑁆𑀲𑁂𑀯 𑀲𑀸𑀫𑀡𑁂𑀭𑁂𑀳𑀺 𑀬𑀸𑀕𑀼𑀁 𑀧𑀘𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 ‘‘𑀲𑀸𑀫𑀡𑁂𑀭 𑀉𑀤𑀓𑀓𑀤𑁆𑀤𑀫𑁂 𑀤𑀼𑀓𑁆𑀔𑀁 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁, 𑀕𑀘𑁆𑀙 𑀅𑀲𑀼𑀓𑀓𑀼𑀮𑀁 𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑀪𑀸𑀯𑀁 𑀆𑀭𑁄𑀘𑁂𑀳𑀺, 𑀅𑀲𑀼𑀓𑀓𑀼𑀮𑀢𑁄 𑀤𑀥𑀺𑀆𑀤𑀻𑀦𑀺 𑀆𑀳𑀭𑀸’’𑀢𑀺 𑀧𑁂𑀲𑁂𑀢𑀺. 𑀪𑀺𑀓𑁆𑀔𑀽𑀳𑀺 ‘‘𑀓𑀺𑀁, 𑀪𑀦𑁆𑀢𑁂, 𑀕𑀸𑀫𑀁 𑀧𑀯𑀺𑀲𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀤𑀼𑀧𑁆𑀧𑀯𑁂𑀲𑁄 𑀆𑀯𑀼𑀲𑁄 𑀇𑀤𑀸𑀦𑀺 𑀕𑀸𑀫𑁄’’𑀢𑀺 𑀯𑀤𑀢𑀺. 𑀢𑁂 ‘‘𑀳𑁄𑀢𑀼, 𑀪𑀦𑁆𑀢𑁂, 𑀅𑀘𑁆𑀙𑀣 𑀢𑀼𑀫𑁆𑀳𑁂, 𑀫𑀬𑀁 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀣 𑀲𑀸𑀫𑀡𑁂𑀭𑁄𑀧𑀺 𑀤𑀥𑀺𑀆𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀉𑀧𑀦𑁂𑀢𑀺, 𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯 𑀉𑀧𑀝𑁆𑀞𑀸𑀓𑀸 𑀪𑀢𑁆𑀢𑀁 𑀧𑀳𑀺𑀡𑀦𑁆𑀢𑀺, 𑀢𑀢𑁄𑀧𑀺 𑀫𑀦𑀸𑀧𑀁 𑀫𑀦𑀸𑀧𑀁 𑀪𑀼𑀜𑁆𑀚𑀢𑀺. 𑀅𑀣 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺, 𑀢𑀢𑁄𑀧𑀺 𑀫𑀦𑀸𑀧𑀁 𑀫𑀦𑀸𑀧𑀁 𑀕𑀻𑀯𑀸𑀬𑀸𑀫𑀓𑀁 𑀪𑀼𑀜𑁆𑀚𑀢𑀺𑀬𑁂𑀯. 𑀏𑀯𑀁 𑀘𑀢𑀼𑀫𑀸𑀲𑀫𑁆𑀧𑀺 𑀯𑀻𑀢𑀺𑀦𑀸𑀫𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀼 ‘‘𑀫𑀼𑀡𑁆𑀟𑀓𑀼𑀝𑀼𑀫𑁆𑀩𑀺𑀓𑀚𑀻𑀯𑀺𑀓𑀁 𑀚𑀻𑀯𑀢𑀺, 𑀦 𑀲𑀫𑀡𑀚𑀻𑀯𑀺𑀓’’𑀦𑁆𑀢𑀺. 𑀏𑀯𑀭𑀽𑀧𑁄 𑀆𑀫𑀺𑀲𑀲𑀦𑁆𑀦𑀺𑀥𑀺 𑀦𑀸𑀫 𑀳𑁄𑀢𑀺.

𑀪𑀺𑀓𑁆𑀔𑀼𑀦𑁄 𑀧𑀦 𑀯𑀲𑀦𑀝𑁆𑀞𑀸𑀦𑁂 𑀏𑀓𑀸 𑀢𑀡𑁆𑀟𑀼𑀮𑀦𑀸𑀴𑀺 𑀏𑀓𑁄 𑀕𑀼𑀴𑀧𑀺𑀡𑁆𑀟𑁄 𑀘𑀢𑀼𑀪𑀸𑀕𑀫𑀢𑁆𑀢𑀁 𑀲𑀧𑁆𑀧𑀻𑀢𑀺 𑀏𑀢𑁆𑀢𑀓𑀁 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀺 𑀅𑀓𑀸𑀮𑁂 𑀲𑀫𑁆𑀧𑀢𑁆𑀢𑀘𑁄𑀭𑀸𑀦𑀁 𑀅𑀢𑁆𑀣𑀸𑀬. 𑀢𑁂 𑀳𑀺 𑀏𑀢𑁆𑀢𑀓𑀫𑁆𑀧𑀺 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑀁 𑀅𑀮𑀪𑀦𑁆𑀢𑀸 𑀚𑀻𑀯𑀺𑀢𑀸𑀧𑀺 𑀯𑁄𑀭𑁄𑀧𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀲𑀘𑁂𑀧𑀺 𑀏𑀢𑁆𑀢𑀓𑀁 𑀦𑀢𑁆𑀣𑀺, 𑀆𑀳𑀭𑀸𑀧𑁂𑀢𑁆𑀯𑀸𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀨𑀸𑀲𑀼𑀓𑀓𑀸𑀮𑁂 𑀘 𑀬𑀤𑁂𑀢𑁆𑀣 𑀓𑀧𑁆𑀧𑀺𑀬𑀁, 𑀢𑀁 𑀅𑀢𑁆𑀢𑀦𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀧𑀦 𑀩𑀳𑀼𑀁 𑀞𑀧𑁂𑀦𑁆𑀢𑀲𑁆𑀲𑀸𑀧𑀺 𑀲𑀦𑁆𑀦𑀺𑀥𑀺 𑀦𑀸𑀫 𑀦𑀢𑁆𑀣𑀺.

𑁧𑁬𑁦. 𑀛𑀸𑀬𑀻 𑀦 𑀧𑀸𑀤𑀮𑁄𑀮𑀲𑁆𑀲𑀸𑀢𑀺 𑀛𑀸𑀦𑀸𑀪𑀺𑀭𑀢𑁄 𑀘 𑀦 𑀘 𑀧𑀸𑀤𑀮𑁄𑀮𑁄 𑀅𑀲𑁆𑀲. 𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀬𑁆𑀬, 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀘𑁂𑀢𑁆𑀣 𑀦𑀧𑁆𑀧𑀫𑀚𑁆𑀚𑁂𑀬𑁆𑀬.

𑀏𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄𑀢𑀺 𑀏𑀓𑀻𑀪𑀸𑀯𑀁 𑀅𑀦𑀼𑀬𑀼𑀢𑁆𑀢𑁄. 𑀧𑀭𑀫𑀢𑁆𑀣𑀕𑀭𑀼𑀓𑁄𑀢𑀺 𑀉𑀢𑁆𑀢𑀫𑀢𑁆𑀣𑀕𑀭𑀼𑀓𑁄. ‘‘𑀲𑀓𑀢𑁆𑀣𑀕𑀭𑀼𑀓𑁄’’𑀢𑀺 𑀯𑀸 𑀧𑀸𑀞𑁄.

𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄𑀢𑀺 𑀆𑀭𑀫𑀡𑀁 𑀆𑀭𑀸𑀫𑁄, 𑀢𑀢𑁄 𑀢𑀢𑁄 𑀆𑀭𑀫𑁆𑀫𑀡𑀢𑁄 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀏𑀓𑀻𑀪𑀸𑀯𑁂 𑀧𑀝𑀺𑀲𑀮𑁆𑀮𑀸𑀦𑁂 𑀆𑀭𑀸𑀫𑁄 𑀬𑀲𑁆𑀲 𑀲𑁄 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀢𑀲𑁆𑀫𑀺𑀁 𑀭𑀢𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀭𑀢𑁄. 𑀏𑀢𑁂𑀳𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀏𑀓𑀕𑁆𑀕𑀢𑀸𑀧𑀺 𑀦 𑀲𑀫𑁆𑀧𑀚𑁆𑀚𑀢𑀺. 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀫𑀣𑁂 𑀬𑀼𑀢𑁆𑀢𑁄. 𑀏𑀢𑁆𑀣 𑀳𑀺 𑀅𑀚𑁆𑀛𑀢𑁆𑀢𑀦𑁆𑀢𑀺 𑀯𑀸 𑀅𑀢𑁆𑀢𑀦𑁄𑀢𑀺 𑀯𑀸 𑀏𑀢𑀁 𑀏𑀓𑀢𑁆𑀣𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀪𑀼𑀫𑁆𑀫𑀢𑁆𑀣𑁂 𑀧𑀦𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀦𑀽𑀢𑀺 𑀇𑀫𑀺𑀦𑀸 𑀉𑀧𑀲𑀕𑁆𑀕𑁂𑀦 𑀬𑁄𑀕𑁂 𑀲𑀺𑀤𑁆𑀥𑀁.

𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄𑀢𑀺 𑀩𑀳𑀺 𑀅𑀦𑀺𑀳𑀢𑀚𑁆𑀛𑀸𑀦𑁄 𑀅𑀯𑀺𑀦𑀸𑀲𑀺𑀢𑀚𑁆𑀛𑀸𑀦𑁄 𑀯𑀸. 𑀦𑀻𑀳𑀭𑀡𑀯𑀺𑀦𑀸𑀲𑀢𑁆𑀣𑀜𑁆𑀳𑀺 𑀇𑀤𑀁 𑀦𑀺𑀭𑀸𑀓𑀭𑀡𑀁 𑀦𑀸𑀫. ‘‘𑀣𑀫𑁆𑀪𑀁 𑀦𑀺𑀭𑀁𑀓𑀢𑁆𑀯𑀸 𑀦𑀺𑀯𑀸𑀢𑀯𑀼𑀢𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁩𑁨𑁮) 𑀘𑀲𑁆𑀲 𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀢𑁆𑀢𑀯𑀺𑀥𑀸𑀬 𑀅𑀦𑀼𑀧𑀲𑁆𑀲𑀦𑀸𑀬 𑀬𑀼𑀢𑁆𑀢𑁄. 𑀲𑀢𑁆𑀢𑀯𑀺𑀥𑀸 𑀅𑀦𑀼𑀧𑀲𑁆𑀲𑀦𑀸 𑀦𑀸𑀫 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀢𑀺. 𑀢𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁭𑁪𑁧 𑀆𑀤𑀬𑁄, 𑁮𑁪𑁯 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀸. 𑀩𑁆𑀬𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀦𑁆𑀢𑀺 𑀯𑀟𑁆𑀠𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁. 𑀏𑀢𑁆𑀣 𑀘 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀫𑀸𑀦𑁄 𑀪𑀺𑀓𑁆𑀔𑀼 ‘‘𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀪𑀽𑀫𑀓𑀸𑀤𑀺𑀪𑁂𑀤𑁂 𑀧𑀸𑀲𑀸𑀤𑁂 𑀓𑀼𑀭𑀼𑀫𑀸𑀦𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀁 𑀩𑁆𑀭𑀽𑀳𑁂𑀢𑀸𑀢𑀺 𑀤𑀝𑁆𑀞𑀩𑁆𑀩𑁄.

𑀲𑀓𑁆𑀓𑀘𑁆𑀘𑀓𑀸𑀭𑀻𑀢𑀺𑀆𑀤𑀻𑀲𑀼 𑀤𑀸𑀦𑀸𑀤𑀻𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀸 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀯𑀲𑁂𑀦 𑀲𑀓𑁆𑀓𑀘𑁆𑀘𑀓𑀸𑀭𑀻. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀲𑀢𑀢𑀪𑀸𑀯𑁄 𑀲𑀸𑀢𑀘𑁆𑀘𑀁, 𑀲𑀸𑀢𑀘𑁆𑀘𑀓𑀸𑀭𑀺𑀢𑀸𑀯𑀲𑁂𑀦 𑀲𑀸𑀢𑀘𑁆𑀘𑀓𑀸𑀭𑀻. 𑀦𑀺𑀭𑀦𑁆𑀢𑀭𑀓𑀸𑀭𑀺𑀢𑀸𑀬 𑀅𑀝𑁆𑀞𑀺𑀢𑀓𑀸𑀭𑀻. 𑀬𑀣𑀸 𑀦𑀸𑀫 𑀓𑀓𑀡𑁆𑀝𑀓𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀣𑁄𑀓𑀁 𑀢𑀺𑀝𑁆𑀞𑀢𑀺, 𑀦 𑀦𑀺𑀭𑀦𑁆𑀢𑀭𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀬𑁄 𑀧𑀼𑀕𑁆𑀕𑀮𑁄 𑀏𑀓𑀤𑀺𑀯𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀽𑀚𑀁 𑀯𑀸 𑀓𑀢𑁆𑀯𑀸 𑀥𑀫𑁆𑀫𑀁 𑀯𑀸 𑀲𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀯𑀸 𑀓𑀢𑁆𑀯𑀸 𑀧𑀼𑀦 𑀘𑀺𑀭𑀲𑁆𑀲𑀁 𑀓𑀭𑁄𑀢𑀺, 𑀢𑀁 𑀦 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀺. 𑀲𑁄 ‘‘𑀅𑀲𑀸𑀢𑀘𑁆𑀘𑀓𑀸𑀭𑀻, 𑀞𑀺𑀢𑀓𑀸𑀭𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀦 𑀏𑀯𑀁 𑀦 𑀳𑁄𑀢𑀺, 𑀲𑁄 𑀅𑀝𑁆𑀞𑀺𑀢𑀓𑀸𑀭𑀻. 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄𑀢𑀺 𑀦𑀺𑀭𑀦𑁆𑀢𑀭𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑁆𑀨𑀸𑀭𑀲𑁆𑀲 𑀅𑀢𑁆𑀣𑀺𑀢𑀸𑀬 𑀦 𑀑𑀮𑀻𑀦𑀯𑀼𑀢𑁆𑀢𑀺𑀓𑁄. 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑁄𑀢𑀺 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀻𑀭𑀺𑀬𑀘𑁆𑀙𑀦𑁆𑀤𑀲𑁆𑀲 𑀅𑀦𑀺𑀓𑁆𑀔𑀺𑀢𑁆𑀢𑀪𑀸𑀯𑁂𑀦 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄𑀢𑀺 𑀯𑀻𑀭𑀺𑀬𑀥𑀼𑀭𑀲𑁆𑀲 𑀅𑀦𑁄𑀭𑁄𑀧𑀓𑁄, 𑀅𑀦𑁄𑀲𑀓𑁆𑀓𑀺𑀢𑀫𑀸𑀦𑀲𑁄𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀝𑀺𑀯𑀸𑀦𑀻𑀢𑀺 𑀅𑀦𑀺𑀯𑀢𑁆𑀢𑀦𑀁. 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀓𑀼𑀲𑀮𑀓𑀭𑀡𑁂 𑀧𑀢𑀺𑀝𑁆𑀞𑀸𑀪𑀸𑀯𑁄. 𑀅𑀦𑀼𑀬𑁄𑀕𑁄𑀢𑀺 𑀅𑀦𑀼𑀬𑀼𑀜𑁆𑀚𑀦𑀁. 𑀅𑀧𑁆𑀧𑀫𑀸𑀤𑁄𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄.

𑁧𑁬𑁧. 𑀢𑀦𑁆𑀤𑀺𑀁 𑀫𑀸𑀬𑀁 𑀳𑀲𑁆𑀲𑀁 𑀔𑀺𑀟𑁆𑀟𑀦𑁆𑀢𑀺 𑀆𑀮𑀲𑀺𑀬𑀜𑁆𑀘 𑀫𑀸𑀬𑀜𑁆𑀘 𑀳𑀲𑁆𑀲𑀜𑁆𑀘 𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀁 𑀔𑀺𑀟𑁆𑀟𑀜𑁆𑀘. 𑀲𑀯𑀺𑀪𑀽𑀲𑀦𑁆𑀢𑀺 𑀲𑀤𑁆𑀥𑀺𑀁 𑀯𑀺𑀪𑀽𑀲𑀸𑀬.

𑀭𑀢𑁆𑀢𑀺𑀦𑁆𑀤𑀺𑀯𑀁 𑀙𑀓𑁄𑀝𑁆𑀞𑀸𑀲𑀁 𑀓𑀭𑀺𑀢𑁆𑀯𑀸𑀢𑀺 𑀧𑀼𑀭𑀺𑀫𑀬𑀸𑀫𑀫𑀚𑁆𑀛𑀺𑀫𑀬𑀸𑀫𑀧𑀘𑁆𑀙𑀺𑀫𑀬𑀸𑀫𑀯𑀲𑁂𑀦 𑀭𑀢𑁆𑀢𑀺𑀁 𑀢𑀬𑁄 𑀢𑀣𑀸 𑀤𑀺𑀯𑀸𑀢𑀺 𑀙𑀩𑁆𑀩𑀺𑀥𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸. 𑀧𑀜𑁆𑀘𑀓𑁄𑀝𑁆𑀞𑀸𑀲𑀁 𑀧𑀝𑀺𑀚𑀕𑁆𑀕𑁂𑀬𑁆𑀬𑀸𑀢𑀺 𑀭𑀢𑁆𑀢𑀺𑀁 𑀫𑀚𑁆𑀛𑀺𑀫𑀬𑀸𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀧𑀜𑁆𑀘𑀓𑁄𑀝𑁆𑀞𑀸𑀲𑁂𑀲𑀼 𑀦 𑀦𑀺𑀤𑁆𑀤𑀁 𑀑𑀓𑁆𑀓𑀫𑁂𑀬𑁆𑀬. 𑀏𑀓𑀓𑁄𑀝𑁆𑀞𑀸𑀲𑀁 𑀦𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓𑀁 𑀫𑀚𑁆𑀛𑀺𑀫𑀬𑀸𑀫𑀓𑁄𑀝𑁆𑀞𑀸𑀲𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑁂𑀬𑁆𑀬.

𑀇𑀥 𑀪𑀺𑀓𑁆𑀔𑀼 𑀤𑀺𑀯𑀲𑀫𑁆𑀧𑀺 𑀧𑀼𑀩𑁆𑀩𑀡𑁆𑀳𑁂 𑀫𑀚𑁆𑀛𑀦𑁆𑀳𑁂 𑀲𑀸𑀬𑀦𑁆𑀳𑁂𑀢𑀺 𑀢𑀬𑁄𑀧𑀺 𑀤𑀺𑀯𑀲𑀓𑁄𑀝𑁆𑀞𑀸𑀲𑀸 𑀕𑀳𑀺𑀢𑀸. 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬𑀸𑀢𑀺 𑀲𑀓𑀮𑀁 𑀤𑀺𑀯𑀲𑀁 𑀇𑀫𑀺𑀦𑀸 𑀇𑀭𑀺𑀬𑀸𑀧𑀣𑀤𑁆𑀯𑀬𑁂𑀦𑁂𑀯 𑀯𑀺𑀳𑀭𑀦𑁆𑀢𑁄 𑀘𑀺𑀢𑁆𑀢𑀲𑁆𑀲 𑀆𑀯𑀭𑀡𑀢𑁄 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑀥𑀫𑁆𑀫𑁂𑀳𑀺 𑀯𑀸. 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀬𑁆𑀬𑀸𑀢𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀯𑀺𑀲𑁄𑀥𑁂𑀬𑁆𑀬. 𑀞𑀸𑀦𑀁 𑀧𑀦𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀕𑀳𑀺𑀢𑀁, 𑀘𑀗𑁆𑀓𑀫𑀦𑀺𑀲𑀚𑁆𑀚𑀸𑀲𑀦𑁆𑀦𑀺𑀲𑁆𑀲𑀺𑀢𑀁 𑀧𑀦 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀫𑁂𑀯. 𑀧𑀞𑀫𑀁 𑀬𑀸𑀫𑀦𑁆𑀢𑀺 𑀲𑀓𑀮𑀲𑁆𑀫𑀺𑀫𑁆𑀧𑀺 𑀧𑀞𑀫𑀬𑀸𑀫𑁂.

𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀓𑀸𑀫𑀪𑁄𑀕𑀻𑀲𑁂𑀬𑁆𑀬𑀸 𑀧𑁂𑀢𑀲𑁂𑀬𑁆𑀬𑀸 𑀲𑀻𑀳𑀲𑁂𑀬𑁆𑀬𑀸 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀘𑀢𑀲𑁆𑀲𑁄 𑀲𑁂𑀬𑁆𑀬𑀸. 𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀓𑀸𑀫𑀪𑁄𑀕𑀻 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁧.𑁪𑁨𑁪𑁬) 𑀅𑀬𑀁 𑀓𑀸𑀫𑀪𑁄𑀕𑀻𑀲𑁂𑀬𑁆𑀬𑀸. 𑀢𑁂𑀲𑀼 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀸𑀦𑁄 𑀦𑀸𑀫 𑀦𑀢𑁆𑀣𑀺. ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀧𑁂𑀢𑀸 𑀉𑀢𑁆𑀢𑀸𑀦𑀸 𑀲𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀧𑁂𑀢𑀲𑁂𑀬𑁆𑀬𑀸. 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀳𑀺 𑀅𑀝𑁆𑀞𑀺𑀲𑀗𑁆𑀖𑀸𑀝𑀖𑀝𑁆𑀝𑀺𑀢𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀉𑀢𑁆𑀢𑀸𑀦𑀸𑀯 𑀲𑁂𑀦𑁆𑀢𑀺. ‘‘𑀲𑀻𑀳𑁄, 𑀪𑀺𑀓𑁆𑀔𑀯𑁂, 𑀫𑀺𑀕𑀭𑀸𑀚𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺…𑀧𑁂… 𑀅𑀢𑁆𑀢𑀫𑀦𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀲𑀻𑀳𑀲𑁂𑀬𑁆𑀬𑀸. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀧𑀘𑁆𑀙𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀧𑀘𑁆𑀙𑀺𑀫𑀧𑀸𑀤𑀦𑀗𑁆𑀕𑀼𑀝𑁆𑀞𑀸𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀫𑀧𑀸𑀤𑀸𑀦𑀁 𑀫𑀢𑁆𑀣𑀓𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀲𑀬𑀢𑀺. 𑀤𑀺𑀯𑀲𑀫𑁆𑀧𑀺 𑀲𑀬𑀺𑀢𑁆𑀯𑀸 𑀧𑀩𑀼𑀚𑁆𑀛𑀫𑀸𑀦𑁄 𑀦 𑀉𑀢𑁆𑀭𑀲𑁆𑀢𑁄 𑀧𑀩𑀼𑀚𑁆𑀛𑀢𑀺, 𑀲𑀻𑀲𑀁 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀸𑀤𑀻𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀲𑀘𑁂 𑀓𑀺𑀜𑁆𑀘𑀺 𑀞𑀸𑀦𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, ‘‘𑀦𑀬𑀺𑀤𑀁 𑀢𑀼𑀬𑁆𑀳𑀁 𑀚𑀸𑀢𑀺𑀬𑀸, 𑀦 𑀲𑀽𑀭𑀪𑀸𑀯𑀲𑁆𑀲 𑀅𑀦𑀼𑀭𑀽𑀧’’𑀦𑁆𑀢𑀺 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀢𑀺, 𑀦 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂 𑀧𑀦 ‘‘𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀘 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧𑀫𑀺𑀤’’𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀉𑀝𑁆𑀞𑀸𑀬 𑀲𑀻𑀳𑀯𑀺𑀚𑀫𑁆𑀪𑀺𑀢𑀁 𑀯𑀺𑀚𑀫𑁆𑀪𑀺𑀢𑁆𑀯𑀸 𑀓𑁂𑀲𑀭𑀪𑀸𑀭𑀁 𑀯𑀺𑀥𑀼𑀦𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁂𑀬𑁆𑀬𑀸 𑀧𑀦 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀲𑀼 𑀇𑀥 𑀲𑀻𑀳𑀲𑁂𑀬𑁆𑀬𑀸 𑀆𑀕𑀢𑀸. 𑀅𑀬𑀜𑁆𑀳𑀺 𑀢𑁂𑀚𑀼𑀲𑁆𑀲𑀤𑀇𑀭𑀺𑀬𑀸𑀧𑀣𑀢𑁆𑀢𑀸 𑀉𑀢𑁆𑀢𑀫𑀲𑁂𑀬𑁆𑀬𑀸 𑀦𑀸𑀫.

𑀧𑀸𑀤𑁂 𑀧𑀸𑀤𑀦𑁆𑀢𑀺 𑀤𑀓𑁆𑀔𑀺𑀡𑀧𑀸𑀤𑁂 𑀯𑀸𑀫𑀧𑀸𑀤𑀁. 𑀅𑀘𑁆𑀘𑀸𑀥𑀸𑀬𑀸𑀢𑀺 𑀅𑀢𑀺𑀆𑀥𑀸𑀬 𑀈𑀲𑀓𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑁆𑀯𑀸. 𑀕𑁄𑀧𑁆𑀨𑀓𑁂𑀦 𑀳𑀺 𑀕𑁄𑀧𑁆𑀨𑀓𑁂, 𑀚𑀸𑀡𑀼𑀦𑀸 𑀯𑀸 𑀚𑀸𑀡𑀼𑀫𑁆𑀳𑀺 𑀲𑀗𑁆𑀖𑀝𑁆𑀝𑀺𑀬𑀫𑀸𑀦𑁂 𑀅𑀪𑀺𑀡𑁆𑀳𑀁 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀳𑁄𑀢𑀺, 𑀲𑁂𑀬𑁆𑀬𑀸 𑀅𑀨𑀸𑀲𑀼 𑀳𑁄𑀢𑀺. 𑀬𑀣𑀸 𑀧𑀦 𑀦 𑀲𑀗𑁆𑀖𑀝𑁆𑀝𑁂𑀢𑀺, 𑀏𑀯𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑀺𑀢𑁂 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀲𑁂𑀬𑁆𑀬𑀸 𑀨𑀸𑀲𑀼 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬𑀸’’𑀢𑀺. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀬𑀸 𑀘𑁂𑀯 𑀲𑀫𑁆𑀧𑀚𑀸𑀦𑀧𑀜𑁆𑀜𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸. 𑀇𑀫𑀺𑀦𑀸 𑀲𑀼𑀧𑀭𑀺𑀕𑁆𑀕𑀸𑀳𑀓𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀓𑀣𑀺𑀢𑀁. 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸𑀢𑀺 ‘‘𑀅𑀲𑀼𑀓𑀯𑁂𑀮𑀸𑀬 𑀦𑀸𑀫 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀉𑀝𑁆𑀞𑀸𑀦𑀯𑁂𑀮𑀸𑀧𑀭𑀺𑀘𑁆𑀙𑁂𑀤𑀓𑀁 𑀉𑀝𑁆𑀞𑀸𑀦𑀲𑀜𑁆𑀜𑀁 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸. 𑀏𑀯𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀬𑁂𑀯 𑀉𑀝𑁆𑀞𑀸𑀢𑀺.

𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀘𑁂𑀢𑀲𑀺𑀓𑁄𑀢𑀺 𑀇𑀤𑀁 𑀯𑀻𑀭𑀺𑀬𑀲𑁆𑀲 𑀦𑀺𑀬𑀫𑀢𑁄 𑀘𑁂𑀢𑀲𑀺𑀓𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀇𑀤𑀜𑁆𑀳𑀺 𑀯𑀻𑀭𑀺𑀬𑀁 ‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀺𑀓𑀁 𑀯𑀻𑀭𑀺𑀬𑀁, 𑀢𑀤𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀘𑁂𑀢𑀲𑀺𑀓𑀁 𑀯𑀻𑀭𑀺𑀬𑀁, 𑀢𑀤𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺. 𑀇𑀢𑀺𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 (𑀲𑀁. 𑀦𑀺. 𑁫.𑁨𑁩𑁩) 𑀘𑀗𑁆𑀓𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑀸𑀬 𑀓𑀸𑀬𑀺𑀓𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀓𑀸𑀬𑀯𑀺𑀜𑁆𑀜𑀸𑀡𑀁 𑀯𑀺𑀬 𑀓𑀸𑀬𑀺𑀓𑀁 𑀦𑀸𑀫 𑀦𑀢𑁆𑀣𑀺, 𑀘𑁂𑀢𑀲𑀺𑀓𑀫𑁂𑀯 𑀧𑀦𑁂𑀢𑀦𑁆𑀢𑀺 𑀤𑀻𑀧𑁂𑀢𑀼𑀁 ‘‘𑀘𑁂𑀢𑀲𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀯𑀻𑀭𑀺𑀬𑀸𑀭𑀫𑁆𑀪𑁄𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀢𑁄 𑀆𑀭𑀫𑁆𑀪𑁄. 𑀅𑀬𑀜𑁆𑀳𑀺 𑀆𑀭𑀫𑁆𑀪𑀲𑀤𑁆𑀤𑁄 𑀓𑀫𑁆𑀫𑁂 𑀆𑀧𑀢𑁆𑀢𑀺𑀬𑀁 𑀓𑀺𑀭𑀺𑀬𑀸𑀬𑀁 𑀯𑀻𑀭𑀺𑀬𑁂 𑀳𑀺𑀁𑀲𑀸𑀬𑀁 𑀯𑀺𑀓𑁄𑀧𑀦𑁂𑀢𑀺 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀆𑀕𑀢𑁄.

‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀆𑀭𑀫𑁆𑀪𑀧𑀘𑁆𑀘𑀬𑀸;

𑀆𑀭𑀫𑁆𑀪𑀸𑀦𑀁 𑀦𑀺𑀭𑁄𑀥𑁂𑀦, 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄’’𑀢𑀺. (𑀲𑀼. 𑀦𑀺. 𑁭𑁪𑁯) 𑁋

𑀏𑀢𑁆𑀣 𑀳𑀺 𑀓𑀫𑁆𑀫𑀁 𑀆𑀭𑀫𑁆𑀪𑁄𑀢𑀺 𑀆𑀕𑀢𑀁. ‘‘𑀆𑀭𑀫𑁆𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁪𑁨; 𑀧𑀼. 𑀧. 𑁧𑁯𑁧) 𑀏𑀢𑁆𑀣 𑀆𑀧𑀢𑁆𑀢𑀺. ‘‘𑀫𑀳𑀸𑀬𑀜𑁆𑀜𑀸 𑀫𑀳𑀸𑀭𑀫𑁆𑀪𑀸, 𑀦 𑀢𑁂 𑀳𑁄𑀦𑁆𑀢𑀺 𑀫𑀳𑀧𑁆𑀨𑀮𑀸’’𑀢𑀺 (𑀅. 𑀦𑀺. 𑁪.𑁩𑁯; 𑀲𑀁. 𑀦𑀺. 𑁧.𑁧𑁨𑁦) 𑀏𑀢𑁆𑀣 𑀬𑀽𑀧𑀼𑀲𑁆𑀲𑀸𑀧𑀦𑀸𑀤𑀺𑀓𑀺𑀭𑀺𑀬𑀸. ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺 (𑀲𑀁. 𑀦𑀺. 𑁧.𑁧𑁮𑁫; 𑀓𑀣𑀸. 𑁩𑁩𑁩; 𑀦𑁂𑀢𑁆𑀢𑀺. 𑁨𑁯; 𑀧𑁂𑀝𑀓𑁄. 𑁩𑁮; 𑀫𑀺. 𑀧. 𑁫.𑁧.𑁪) 𑀏𑀢𑁆𑀣 𑀯𑀻𑀭𑀺𑀬𑀁. ‘‘𑀲𑀫𑀡𑀁 𑀕𑁄𑀢𑀫𑀁 𑀉𑀤𑁆𑀤𑀺𑀲𑁆𑀲 𑀧𑀸𑀡𑀁 𑀆𑀭𑀫𑁆𑀪𑀦𑁆𑀢𑀻’’𑀢𑀺 (𑀫. 𑀦𑀺. 𑁨.𑁫𑁧) 𑀏𑀢𑁆𑀣 𑀳𑀺𑀁𑀲𑀸. ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦; 𑀫. 𑀦𑀺. 𑁧.𑁨𑁯𑁩) 𑀏𑀢𑁆𑀣 𑀙𑁂𑀤𑀦𑀪𑀜𑁆𑀚𑀦𑀸𑀤𑀺𑀓𑀁 𑀯𑀺𑀓𑁄𑀧𑀦𑀁. 𑀇𑀥 𑀧𑀦 𑀯𑀻𑀭𑀺𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀯𑀻𑀭𑀺𑀬𑀸𑀭𑀫𑁆𑀪𑁄𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀢𑁄 𑀆𑀭𑀫𑁆𑀪𑁄’’𑀢𑀺. 𑀯𑀻𑀭𑀺𑀬𑀜𑁆𑀳𑀺 𑀆𑀭𑀫𑁆𑀪𑀦𑀯𑀲𑁂𑀦 𑀆𑀭𑀫𑁆𑀪𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑀲𑁆𑀲 𑀲𑀪𑀸𑀯𑀧𑀤𑀁. 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀫𑀦𑀯𑀲𑁂𑀦 𑀦𑀺𑀓𑁆𑀓𑀫𑁄. 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀯𑀲𑁂𑀦 𑀧𑀭𑀓𑁆𑀓𑀫𑁄. 𑀉𑀕𑁆𑀕𑀦𑁆𑀢𑁆𑀯𑀸 𑀬𑀫𑀦𑀯𑀲𑁂𑀦 𑀉𑀬𑁆𑀬𑀸𑀫𑁄. 𑀯𑀸𑀬𑀫𑀦𑀯𑀲𑁂𑀦 𑀯𑀸𑀬𑀸𑀫𑁄. 𑀉𑀲𑁆𑀲𑀳𑀦𑀯𑀲𑁂𑀦 𑀉𑀲𑁆𑀲𑀸𑀳𑁄. 𑀅𑀥𑀺𑀫𑀢𑁆𑀢𑀼𑀲𑁆𑀲𑀳𑀦𑀯𑀲𑁂𑀦 𑀉𑀲𑁆𑀲𑁄𑀴𑁆𑀳𑀻. 𑀣𑀺𑀭𑀪𑀸𑀯𑀝𑁆𑀞𑁂𑀦 𑀣𑀸𑀫𑁄. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀸𑀭𑀡𑀯𑀲𑁂𑀦 𑀅𑀯𑀺𑀘𑁆𑀙𑁂𑀤𑀢𑁄 𑀯𑀸 𑀧𑀯𑀢𑁆𑀢𑀦𑀯𑀲𑁂𑀦 𑀓𑀼𑀲𑀮𑀲𑀦𑁆𑀢𑀸𑀦𑀁 𑀥𑀸𑀭𑁂𑀢𑀻𑀢𑀺 𑀥𑀺𑀢𑀺.

𑀅𑀧𑀭𑁄 𑀦𑀬𑁄 𑁋 𑀦𑀺𑀓𑁆𑀓𑀫𑁄 𑀘𑁂𑀲𑁄 𑀓𑀸𑀫𑀸𑀦𑀁 𑀧𑀦𑀼𑀤𑀦𑀸𑀬. 𑀧𑀭𑀓𑁆𑀓𑀫𑁄 𑀘𑁂𑀲𑁄 𑀩𑀦𑁆𑀥𑀦𑀘𑁆𑀙𑁂𑀤𑀸𑀬. 𑀉𑀬𑁆𑀬𑀸𑀫𑁄 𑀘𑁂𑀲𑁄 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀸𑀬. 𑀯𑀸𑀬𑀸𑀫𑁄 𑀘𑁂𑀲𑁄 𑀧𑀸𑀭𑀁 𑀕𑀫𑀦𑀝𑁆𑀞𑁂𑀦. 𑀉𑀲𑁆𑀲𑀸𑀳𑁄 𑀘𑁂𑀲𑁄 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦. 𑀉𑀲𑁆𑀲𑁄𑀴𑁆𑀳𑀻 𑀘𑁂𑀲𑁄 𑀅𑀥𑀺𑀫𑀢𑁆𑀢𑀝𑁆𑀞𑁂𑀦. 𑀣𑀸𑀫𑁄 𑀘𑁂𑀲𑁄 𑀧𑀮𑀺𑀖𑀼𑀕𑁆𑀖𑀸𑀝𑀦𑀢𑀸𑀬. 𑀥𑀺𑀢𑀺 𑀘𑁂𑀲𑁄 𑀅𑀝𑁆𑀞𑀺𑀢𑀓𑀸𑀭𑀺𑀢𑀸𑀬𑀸𑀢𑀺.

‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀽’’𑀢𑀺 (𑀅. 𑀦𑀺. 𑁨.𑁫) 𑀏𑀯𑀁 𑀧𑀯𑀢𑁆𑀢𑀺𑀓𑀸𑀮𑁂 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀯𑀲𑁂𑀦 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸, 𑀣𑀺𑀭𑀧𑀭𑀓𑁆𑀓𑀫𑁄 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦𑁂𑀢𑀁 𑀯𑀻𑀭𑀺𑀬𑀁 𑀓𑀼𑀲𑀮𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑁂 𑀙𑀦𑁆𑀤𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀦 𑀑𑀢𑀸𑀭𑁂𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀦𑁄𑀲𑀓𑁆𑀓𑀺𑀢𑀫𑀸𑀦𑀲𑀢𑀁 𑀆𑀯𑀳𑀢𑀺, 𑀢𑀲𑁆𑀫𑀸 ‘‘𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀧𑀦 𑀢𑀚𑁆𑀚𑀸𑀢𑀺𑀓𑁂 𑀉𑀤𑀓𑀲𑀫𑁆𑀪𑀺𑀦𑁆𑀦𑀝𑁆𑀞𑀸𑀦𑁂 𑀥𑀼𑀭𑀯𑀸𑀳𑀕𑁄𑀡𑀁 ‘‘𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀲𑁄 𑀚𑀸𑀡𑀼𑀦𑀸 𑀪𑀽𑀫𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸𑀧𑀺 𑀥𑀼𑀭𑀁 𑀯𑀳𑀢𑀺, 𑀪𑀽𑀫𑀺𑀬𑀁 𑀧𑀢𑀺𑀢𑀼𑀁 𑀦 𑀤𑁂𑀢𑀺, 𑀏𑀯𑀫𑁂𑀯 𑀯𑀻𑀭𑀺𑀬𑀁 𑀓𑀼𑀲𑀮𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑁂 𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀢𑀺 𑀧𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 ‘‘𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑁄’’𑀢𑀺 𑀯𑀼𑀢𑁆𑀢𑀁. 𑀧𑀕𑁆𑀕𑀳𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀓𑁄𑀲𑀚𑁆𑀚𑁂 𑀦 𑀓𑀫𑁆𑀧𑀢𑀻𑀢𑀺 𑀯𑀻𑀭𑀺𑀬𑀩𑀮𑀁. 𑀬𑀸𑀣𑀸𑀯𑀦𑀺𑀬𑁆𑀬𑀸𑀦𑀺𑀓𑀓𑀼𑀲𑀮𑀯𑀸𑀬𑀸𑀫𑀢𑀸𑀬 𑀲𑀫𑁆𑀫𑀸𑀯𑀸𑀬𑀸𑀫𑁄.

𑀢𑀦𑁆𑀤𑀻𑀢𑀺 𑀚𑀸𑀢𑀺𑀆𑀮𑀲𑀺𑀬𑀁. 𑀢𑀦𑁆𑀤𑀺𑀬𑀦𑀸𑀢𑀺 𑀢𑀦𑁆𑀤𑀺𑀬𑀦𑀸𑀓𑀸𑀭𑁄. 𑀢𑀦𑁆𑀤𑀺𑀫𑀦𑀓𑀢𑀸𑀢𑀺 𑀢𑀦𑁆𑀤𑀺𑀬𑀸 𑀅𑀪𑀺𑀪𑀽𑀢𑀘𑀺𑀢𑁆𑀢𑀢𑀸. 𑀅𑀮𑀲𑀲𑁆𑀲 𑀪𑀸𑀯𑁄 𑀆𑀮𑀲𑁆𑀬𑀁, 𑀆𑀮𑀲𑁆𑀬𑀸𑀬𑀦𑀸𑀓𑀸𑀭𑁄 𑀆𑀮𑀲𑁆𑀬𑀸𑀬𑀦𑀸. 𑀆𑀮𑀲𑁆𑀬𑀸𑀬𑀺𑀢𑀲𑁆𑀲 𑀪𑀸𑀯𑁄 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁. 𑀇𑀢𑀺 𑀲𑀩𑁆𑀩𑁂𑀳𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀺𑀮𑁂𑀲𑀯𑀲𑁂𑀦 𑀓𑀸𑀬𑀸𑀮𑀲𑀺𑀬𑀁 𑀓𑀣𑀺𑀢𑀁.

𑀯𑀜𑁆𑀘𑀦𑀺𑀓𑀸 𑀘𑀭𑀺𑀬𑀸𑀢𑀺 𑀯𑀜𑁆𑀘𑀦𑀺𑀓𑀸 𑀓𑀺𑀭𑀺𑀬𑀸. 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀚𑀸𑀦𑀁𑀬𑁂𑀯 𑀧𑀡𑁆𑀡𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀪𑀺𑀓𑁆𑀔𑀼 𑀪𑀸𑀭𑀺𑀬𑀁 𑀓𑀭𑁄𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀯𑀻𑀢𑀺𑀓𑁆𑀓𑀫𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀉𑀧𑀲𑀦𑁆𑀢𑁄 𑀯𑀺𑀬 𑀪𑀸𑀲𑀢𑀺. 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀻𑀢𑀺 ‘‘𑀫𑀬𑀸 𑀓𑀢𑀁 𑀇𑀤𑀁 𑀧𑀸𑀧𑀓𑀫𑁆𑀫𑀁 𑀫𑀸 𑀓𑁂𑀘𑀺 𑀚𑀸𑀦𑀺𑀁𑀲𑀽’’𑀢𑀺 𑀓𑀸𑀬𑁂𑀦 𑀯𑀢𑁆𑀢𑀁 𑀓𑀭𑁄𑀢𑀺. 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀢𑁄 𑀘𑀓𑁆𑀔𑀼𑀫𑁄𑀳𑀦𑀫𑀸𑀬𑀸 𑀯𑀺𑀬𑀸𑀢𑀺 𑀫𑀸𑀬𑀸, 𑀫𑀸𑀬𑀸𑀯𑀺𑀦𑁄 𑀪𑀸𑀯𑁄 𑀫𑀸𑀬𑀸𑀯𑀺𑀢𑀸. 𑀓𑀢𑁆𑀯𑀸 𑀧𑀸𑀧𑀁 𑀧𑀼𑀦 𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀢𑀺 𑀅𑀲𑁆𑀲𑀭𑀢𑀺 𑀏𑀢𑀸𑀬 𑀲𑀢𑁆𑀢𑁄𑀢𑀺 𑀅𑀘𑁆𑀘𑀲𑀭𑀸. 𑀓𑀸𑀬𑀯𑀸𑀘𑀸𑀓𑀺𑀭𑀺𑀬𑀸𑀳𑀺 𑀅𑀜𑁆𑀜𑀣𑀸 𑀤𑀲𑁆𑀲𑀦𑀢𑁄 𑀯𑀜𑁆𑀘𑁂𑀢𑀻𑀢𑀺 𑀯𑀜𑁆𑀘𑀦𑀸. 𑀏𑀢𑀸𑀬 𑀲𑀢𑁆𑀢𑀸 𑀦𑀺𑀓𑀭𑁄𑀦𑁆𑀢𑀻𑀢𑀺 𑀦𑀺𑀓𑀢𑀺, 𑀫𑀺𑀘𑁆𑀙𑀸 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀦𑀸𑀳𑀁 𑀏𑀯𑀁 𑀓𑀭𑁄𑀫𑀻’’𑀢𑀺 𑀧𑀸𑀧𑀸𑀦𑀁 𑀦𑀺𑀓𑁆𑀔𑀺𑀧𑀦𑀢𑁄 𑀦𑀺𑀓𑀺𑀭𑀡𑀸. ‘‘𑀦𑀸𑀳𑀁 𑀏𑀯𑀁 𑀓𑀭𑁄𑀫𑀻’’𑀢𑀺 𑀧𑀭𑀺𑀯𑀚𑁆𑀚𑀦𑀢𑁄 𑀧𑀭𑀺𑀳𑀭𑀡𑀸. 𑀓𑀸𑀬𑀸𑀤𑀻𑀳𑀺 𑀲𑀁𑀯𑀭𑀡𑀢𑁄 𑀕𑀽𑀳𑀦𑀸. 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀕𑀽𑀳𑀦𑀸 𑀧𑀭𑀺𑀕𑀽𑀳𑀦𑀸. 𑀢𑀺𑀡𑀧𑀡𑁆𑀡𑁂𑀳𑀺 𑀯𑀺𑀬 𑀕𑀽𑀣𑀁 𑀓𑀸𑀬𑀯𑀘𑀻𑀓𑀫𑁆𑀫𑁂𑀳𑀺 𑀧𑀸𑀧𑀁 𑀙𑀸𑀤𑀺𑀬𑀢𑀻𑀢𑀺 𑀙𑀸𑀤𑀦𑀸. 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀙𑀸𑀤𑀦𑀸 𑀧𑀭𑀺𑀘𑁆𑀙𑀸𑀤𑀦𑀸. 𑀦 𑀉𑀢𑁆𑀢𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀁. 𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀦𑀸𑀯𑀺𑀓𑀫𑁆𑀫𑀁. 𑀲𑀼𑀝𑁆𑀞𑀼 𑀙𑀸𑀤𑀦𑀸 𑀯𑁄𑀘𑁆𑀙𑀸𑀤𑀦𑀸. 𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀧𑀼𑀦𑀧𑀺 𑀧𑀸𑀧𑀲𑁆𑀲 𑀓𑀭𑀡𑀢𑁄 𑀧𑀸𑀧𑀓𑀺𑀭𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀓𑀢𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀲𑁆𑀫𑀸𑀧𑀝𑀺𑀘𑁆𑀙𑀦𑁆𑀦𑁄 𑀯𑀺𑀬 𑀅𑀗𑁆𑀕𑀸𑀭𑁄, 𑀉𑀤𑀓𑀧𑀝𑀺𑀘𑁆𑀙𑀦𑁆𑀦𑁄 𑀯𑀺𑀬 𑀔𑀸𑀡𑀼, 𑀧𑀺𑀮𑁄𑀢𑀺𑀓𑀸𑀬 𑀧𑀮𑀺𑀯𑁂𑀞𑀺𑀢𑀁 𑀯𑀺𑀬 𑀘 𑀲𑀢𑁆𑀣𑀁 𑀳𑁄𑀢𑀺. 𑀅𑀢𑀺𑀯𑁂𑀮𑀁 𑀤𑀦𑁆𑀢𑀯𑀺𑀤𑀁𑀲𑀓𑀁 𑀳𑀲𑀢𑀻𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀤𑀦𑁆𑀢𑀁 𑀯𑀺𑀯𑀭𑀺𑀢𑁆𑀯𑀸 𑀧𑀭𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀳𑀸𑀲𑀁 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀳𑀲𑀢𑀺.

𑀓𑀸𑀬𑀺𑀓𑀸 𑀘 𑀔𑀺𑀟𑁆𑀟𑀸𑀢𑀺 𑀓𑀸𑀬𑁂𑀦 𑀧𑀯𑀢𑁆𑀢𑀸 𑀓𑀻𑀴𑀸. 𑀏𑀲𑁂𑀯 𑀦𑀬𑁄 𑀯𑀸𑀘𑀲𑀺𑀓𑀸𑀬𑀧𑀺. 𑀳𑀢𑁆𑀣𑀻𑀳𑀺𑀧𑀺 𑀓𑀻𑀴𑀦𑁆𑀢𑀻𑀢𑀺 𑀳𑀢𑁆𑀣𑀻𑀳𑀺 𑀓𑀻𑀴𑀺𑀢𑀢𑁆𑀣𑀸𑀬 𑀧𑀼𑀭𑀢𑁄 𑀥𑀸𑀯𑀦𑀆𑀥𑀸𑀯𑀦𑀧𑀺𑀝𑁆𑀞𑀦𑀺𑀲𑀻𑀤𑀦𑀸𑀤𑀺𑀓𑀻𑀝𑁆𑀞𑀸𑀬 𑀓𑀻𑀴𑀦𑁆𑀢𑀺. 𑀏𑀲𑁂𑀯 𑀦𑀬𑁄 𑀅𑀲𑁆𑀲𑀭𑀣𑁂𑀲𑀼𑀧𑀺. 𑀅𑀝𑁆𑀞𑀧𑀤𑁂𑀧𑀺 𑀓𑀻𑀴𑀦𑁆𑀢𑀻𑀢𑀺 𑀏𑀓𑁂𑀓𑀸𑀬 𑀧𑀦𑁆𑀢𑀺𑀬𑀸 𑀅𑀝𑁆𑀞 𑀅𑀝𑁆𑀞 𑀧𑀤𑀸𑀦𑀺 𑀅𑀲𑁆𑀲𑀸𑀢𑀺 𑀅𑀝𑁆𑀞𑀧𑀤𑀁, 𑀢𑀲𑁆𑀫𑀺𑀁 𑀅𑀝𑁆𑀞𑀧𑀤𑁂. 𑀤𑀲𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀓𑀸𑀲𑁂𑀧𑀻𑀢𑀺 𑀅𑀝𑁆𑀞𑀧𑀤𑀤𑀲𑀧𑀤𑁂𑀲𑀼 𑀯𑀺𑀬 𑀆𑀓𑀸𑀲𑁂𑀬𑁂𑀯 𑀓𑀻𑀴𑀦𑁆𑀢𑀺. 𑀧𑀭𑀺𑀳𑀸𑀭𑀧𑀣𑁂𑀧𑀻𑀢𑀺 𑀪𑀽𑀫𑀺𑀬𑀁 𑀦𑀸𑀦𑀸𑀧𑀣𑀫𑀡𑁆𑀟𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀭𑀺𑀳𑀭𑀺𑀢𑀩𑁆𑀩𑀧𑀣𑀁 𑀧𑀭𑀺𑀳𑀭𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀻𑀢𑀺 𑀲𑀦𑁆𑀢𑀺𑀓𑀓𑀻𑀴𑀸𑀬 𑀓𑀻𑀴𑀦𑁆𑀢𑀺, 𑀏𑀓𑀚𑁆𑀛𑀁 𑀞𑀧𑀺𑀢𑀸 𑀲𑀸𑀭𑀺𑀬𑁄 𑀯𑀸 𑀧𑀸𑀲𑀸𑀡𑀲𑀓𑁆𑀔𑀭𑀸𑀬𑁄 𑀯𑀸 𑀅𑀘𑀸𑀮𑁂𑀦𑁆𑀢𑀸 𑀦𑀔𑁂𑀦𑁂𑀯 𑀅𑀧𑀦𑁂𑀦𑁆𑀢𑀺 𑀘 𑀉𑀧𑀦𑁂𑀦𑁆𑀢𑀺 𑀘. 𑀲𑀘𑁂 𑀢𑀢𑁆𑀣 𑀓𑀸𑀘𑀺 𑀘𑀮𑀢𑀺, 𑀧𑀭𑀸𑀚𑀬𑁄 𑀳𑁄𑀢𑀻𑀢𑀺.

𑀔𑀮𑀺𑀓𑀸𑀬𑀸𑀢𑀺 𑀚𑀽𑀢𑀨𑀮𑀓𑁂 𑀧𑀸𑀲𑀓𑀓𑀻𑀴𑀸𑀬 𑀓𑀻𑀴𑀦𑁆𑀢𑀺. 𑀖𑀝𑀺𑀓𑀸𑀬𑀸𑀢𑀺 𑀖𑀝𑀺𑀓𑀸 𑀯𑀼𑀘𑁆𑀘𑀢𑀺 𑀤𑀻𑀖𑀤𑀡𑁆𑀟𑀓𑁂𑀦 𑀭𑀲𑁆𑀲𑀤𑀡𑁆𑀟𑀓𑀁 𑀧𑀳𑀭𑀡𑀓𑀻𑀴𑀸, 𑀢𑀸𑀬 𑀓𑀻𑀴𑀦𑁆𑀢𑀺. 𑀲𑀮𑀸𑀓𑀳𑀢𑁆𑀣𑁂𑀦𑀸𑀢𑀺 𑀮𑀸𑀔𑀸𑀬 𑀯𑀸 𑀫𑀜𑁆𑀚𑀝𑁆𑀞𑀺𑀬𑀸 𑀯𑀸 𑀧𑀺𑀝𑁆𑀞𑁄𑀤𑀓𑁂𑀦 𑀯𑀸 𑀲𑀮𑀸𑀓𑀳𑀢𑁆𑀣𑀁 𑀢𑁂𑀫𑁂𑀢𑁆𑀯𑀸 ‘‘𑀓𑀺𑀁 𑀳𑁄𑀢𑀽’’𑀢𑀺 𑀪𑀽𑀫𑀺𑀬𑀁 𑀯𑀸 𑀪𑀺𑀢𑁆𑀢𑀺𑀬𑀁 𑀯𑀸 𑀢𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀭𑀽𑀧𑀸𑀦𑀺 𑀤𑀲𑁆𑀲𑁂𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀅𑀓𑁆𑀔𑁂𑀦𑀸𑀢𑀺 𑀕𑀼𑀴𑁂𑀦. 𑀧𑀗𑁆𑀓𑀘𑀻𑀭𑁂𑀦𑀸𑀢𑀺 𑀧𑀗𑁆𑀓𑀘𑀻𑀭𑀁 𑀯𑀼𑀘𑁆𑀘𑀢𑀺 𑀧𑀡𑁆𑀡𑀦𑀸𑀴𑀺𑀓𑀸, 𑀢𑀁 𑀥𑀫𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀯𑀗𑁆𑀓𑀓𑁂𑀦𑀸𑀢𑀺 𑀕𑀸𑀫𑀤𑀸𑀭𑀓𑀸𑀦𑀁 𑀓𑀻𑀴𑀦𑀓𑁂𑀦 𑀔𑀼𑀤𑁆𑀤𑀓𑀦𑀗𑁆𑀕𑀮𑁂𑀦. 𑀫𑁄𑀓𑁆𑀔𑀘𑀺𑀓𑀸𑀬𑀸𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑀓𑀓𑀻𑀴𑀸𑀬, 𑀆𑀓𑀸𑀲𑁂 𑀯𑀸 𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀯𑀸 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀼𑀧𑀭𑀺𑀬𑀪𑀸𑀯𑁂𑀦 𑀧𑀭𑀺𑀯𑀢𑁆𑀢𑀦𑁆𑀢𑀸 𑀓𑀻𑀴𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀗𑁆𑀕𑀼𑀮𑀓𑁂𑀦𑀸𑀢𑀺 𑀘𑀺𑀗𑁆𑀕𑀼𑀮𑀓𑀁 𑀯𑀼𑀘𑁆𑀘𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀓𑀢𑀁 𑀯𑀸𑀢𑀧𑁆𑀧𑀳𑀸𑀭𑁂𑀦 𑀧𑀭𑀺𑀩𑁆𑀪𑀫𑀦𑀘𑀓𑁆𑀓𑀁, 𑀢𑁂𑀦 𑀓𑀻𑀴𑀦𑁆𑀢𑀺. 𑀧𑀢𑁆𑀢𑀸𑀴𑁆𑀳𑀓𑁂𑀦𑀸𑀢𑀺 𑀧𑀢𑁆𑀢𑀸𑀴𑁆𑀳𑀓𑀁 𑀯𑀼𑀘𑁆𑀘𑀢𑀺 𑀧𑀡𑁆𑀡𑀦𑀸𑀴𑀺, 𑀢𑀸𑀬 𑀯𑀸𑀮𑀺𑀓𑀸𑀤𑀻𑀦𑀺 𑀫𑀺𑀦𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀭𑀣𑀓𑁂𑀦𑀸𑀢𑀺 𑀔𑀼𑀤𑁆𑀤𑀓𑀭𑀣𑁂𑀦. 𑀥𑀦𑀼𑀓𑁂𑀦𑀸𑀢𑀺 𑀔𑀼𑀤𑁆𑀤𑀓𑀥𑀦𑀼𑀦𑀸. 𑀅𑀓𑁆𑀔𑀭𑀺𑀓𑀸𑀬𑀸𑀢𑀺 𑀅𑀓𑁆𑀔𑀭𑀺𑀓𑀸 𑀯𑀼𑀘𑁆𑀘𑀢𑀺 𑀆𑀓𑀸𑀲𑁂 𑀯𑀸 𑀧𑀺𑀝𑁆𑀞𑀺𑀬𑀁 𑀯𑀸 𑀅𑀓𑁆𑀔𑀭𑀚𑀸𑀦𑀦𑀓𑀻𑀴𑀸, 𑀢𑀸𑀬 𑀓𑀻𑀴𑀦𑁆𑀢𑀺. 𑀫𑀦𑁂𑀲𑀺𑀓𑀸𑀬𑀸𑀢𑀺 𑀫𑀦𑁂𑀲𑀺𑀓𑀸 𑀯𑀼𑀘𑁆𑀘𑀢𑀺 𑀫𑀦𑀲𑀸 𑀘𑀺𑀦𑁆𑀢𑀺𑀢𑀚𑀸𑀦𑀦𑀓𑀻𑀴𑀸, 𑀢𑀸𑀬 𑀓𑀻𑀴𑀦𑁆𑀢𑀺. 𑀬𑀣𑀸𑀯𑀚𑁆𑀚𑁂𑀦𑀸𑀢𑀺 𑀬𑀣𑀸𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀓𑀸𑀡𑀓𑀼𑀡𑀺𑀔𑀼𑀚𑁆𑀚𑀸𑀤𑀻𑀦𑀁 𑀬𑀁 𑀬𑀁 𑀯𑀚𑁆𑀚𑀁, 𑀢𑀁 𑀢𑀁 𑀧𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀦𑀓𑀻𑀴𑀸, 𑀢𑀸𑀬 𑀓𑀻𑀴𑀦𑁆𑀢𑀺. 𑀫𑀼𑀔𑀪𑁂𑀭𑀺𑀓𑀦𑁆𑀢𑀺 𑀫𑀼𑀔𑀲𑀤𑁆𑀤𑁂𑀦 𑀪𑁂𑀭𑀻 𑀯𑀺𑀬 𑀯𑀸𑀤𑀦𑀁. 𑀫𑀼𑀔𑀸𑀮𑀫𑁆𑀩𑀭𑀦𑁆𑀢𑀺 𑀫𑀼𑀔𑀸𑀦𑀼𑀮𑀺𑀢𑁆𑀢𑀪𑁂𑀭𑀺𑀲𑀤𑁆𑀤𑀓𑀭𑀡𑀁. 𑀫𑀼𑀔𑀟𑀺𑀡𑁆𑀟𑀺𑀫𑀓𑀦𑁆𑀢𑀺 𑀫𑀼𑀔𑁂𑀦 𑀧𑀳𑀢𑀪𑁂𑀭𑀺𑀲𑀤𑁆𑀤𑀓𑀭𑀡𑀁. 𑀫𑀼𑀔𑀯𑀮𑀺𑀫𑀓𑀦𑁆𑀢𑀺 𑀑𑀝𑁆𑀞𑀫𑀁𑀲𑀁 𑀚𑀺𑀫𑁆𑀳𑀁 𑀓𑀢𑁆𑀯𑀸 𑀲𑀤𑁆𑀤𑀓𑀭𑀡𑀁. ‘‘𑀫𑀼𑀔𑀢𑀮𑀺𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀫𑀼𑀔𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀥𑀫𑀦𑀁. 𑀫𑀼𑀔𑀪𑁂𑀭𑀼𑀴𑀓𑀦𑁆𑀢𑀺 𑀫𑀼𑀔𑁂𑀦 𑀪𑁂𑀭𑀺𑀯𑀸𑀤𑀦𑀁. 𑀦𑀸𑀝𑀓𑀦𑁆𑀢𑀺 𑀅𑀪𑀺𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀧𑀦𑀁. ‘‘𑀦𑀝𑁆𑀝𑀓’’𑀦𑁆𑀢𑀺𑀧𑀺 𑀧𑀸𑀞𑁄. 𑀮𑀸𑀧𑀦𑁆𑀢𑀺 𑀉𑀓𑁆𑀓𑀼𑀝𑁆𑀞𑀺𑀢𑀓𑀭𑀡𑀁. 𑀕𑀻𑀢𑀦𑁆𑀢𑀺 𑀕𑀸𑀬𑀦𑀁. 𑀤𑀯𑀓𑀫𑁆𑀫𑀦𑁆𑀢𑀺 𑀳𑀲𑁆𑀲𑀓𑀻𑀴𑀸𑀓𑀭𑀡𑀁. 𑀅𑀬𑀁 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸𑀢𑀺 𑀅𑀬𑀁 𑀓𑀻𑀴𑀸 𑀯𑀸𑀘𑀸𑀬 𑀚𑀸𑀢𑀸 𑀯𑀘𑀻𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸.

𑀓𑁂𑀲𑀸 𑀘 𑀫𑀲𑁆𑀲𑀼 𑀘𑀸𑀢𑀺𑀆𑀤𑀻𑀲𑀼 𑀓𑁂𑀲𑀸𑀦𑀁 𑀓𑀢𑁆𑀢𑀭𑀺𑀓𑀸𑀬 𑀞𑀸𑀦𑀸𑀢𑀺𑀭𑀺𑀢𑁆𑀢𑀸𑀦𑀺 𑀅𑀓𑀢𑁆𑀯𑀸 𑀓𑀢𑁆𑀢𑀭𑀺𑀓𑀸𑀬 𑀙𑁂𑀤𑀦𑀁 𑀫𑀲𑁆𑀲𑀽𑀦𑀁 𑀤𑀸𑀞𑀺𑀓𑀁 𑀞𑀧𑁂𑀢𑁆𑀯𑀸 𑀓𑀧𑁆𑀧𑀸𑀲𑀦𑀜𑁆𑀘 𑀏𑀓𑀢𑁄𑀯𑀡𑁆𑀟𑀺𑀓𑀸𑀤𑀺𑀫𑀸𑀮𑀸 𑀘 𑀫𑀽𑀮𑀕𑀦𑁆𑀥𑀸𑀤𑀺𑀕𑀦𑁆𑀥𑀸 𑀘 𑀙𑀯𑀺𑀓𑀭𑀡𑀯𑀺𑀮𑁂𑀧𑀦𑀸 𑀘. 𑀕𑀻𑀯𑀸𑀤𑀻𑀲𑀼 𑀧𑀺𑀴𑀦𑁆𑀥𑀦𑀆𑀪𑀭𑀡𑀸 𑀘 𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀦𑀧𑀲𑀸𑀥𑀦𑀧𑀺𑀴𑀦𑁆𑀥𑀦𑀸 𑀘 𑀲𑀭𑀻𑀭𑀦𑀺𑀯𑀸𑀲𑀦𑀯𑀺𑀘𑀺𑀢𑁆𑀭𑀯𑀢𑁆𑀣𑀸 𑀘 𑀲𑀁𑀯𑁂𑀮𑁆𑀮𑀺𑀬𑀩𑀦𑁆𑀥𑀦𑀧𑀲𑀸𑀥𑀦𑀜𑁆𑀘. ‘‘𑀧𑀭𑀸𑀲𑀦’’𑀦𑁆𑀢𑀺𑀧𑀺 𑀧𑀸𑀞𑁄. 𑀲𑀻𑀲𑀯𑁂𑀞𑀦𑀧𑀝𑀲𑀗𑁆𑀔𑀸𑀢𑀯𑁂𑀞𑀦𑀜𑁆𑀘.

𑀉𑀘𑁆𑀙𑀸𑀤𑀦𑀸𑀤𑀻𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀤𑀸𑀭𑀓𑀸𑀦𑀁 𑀲𑀭𑀻𑀭𑀕𑀦𑁆𑀥𑁄 𑀤𑁆𑀯𑀸𑀤𑀲𑀫𑀢𑁆𑀢𑀯𑀲𑁆𑀲𑀓𑀸𑀮𑁂 𑀦𑀲𑁆𑀲𑀢𑀺, 𑀢𑁂𑀲𑀁 𑀲𑀭𑀻𑀭𑀕𑀦𑁆𑀥𑀳𑀭𑀡𑀢𑁆𑀣𑀸𑀬 𑀕𑀦𑁆𑀥𑀘𑀼𑀡𑁆𑀡𑀸𑀤𑀻𑀳𑀺 𑀉𑀘𑁆𑀙𑀸𑀤𑁂𑀦𑁆𑀢𑀺, 𑀏𑀯𑀭𑀽𑀧𑀁 𑀉𑀘𑁆𑀙𑀸𑀤𑀦𑀁 𑀦 𑀯𑀝𑁆𑀝𑀢𑀺. 𑀧𑀼𑀜𑁆𑀜𑀯𑀦𑁆𑀢𑁂 𑀧𑀦 𑀤𑀸𑀭𑀓𑁂 𑀊𑀭𑀽𑀲𑀼 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀊𑀭𑀼𑀦𑀸𑀪𑀺𑀆𑀤𑀻𑀦𑀁 𑀲𑀡𑁆𑀞𑀸𑀦𑀲𑀫𑁆𑀧𑀸𑀤𑀦𑀢𑁆𑀣𑀁 𑀧𑀭𑀺𑀫𑀤𑁆𑀤𑀦𑁆𑀢𑀺, 𑀏𑀯𑀭𑀽𑀧𑀁 𑀧𑀭𑀺𑀫𑀤𑁆𑀤𑀦𑀁 𑀦 𑀯𑀝𑁆𑀝𑀢𑀺.

𑀦𑁆𑀳𑀸𑀧𑀦𑀦𑁆𑀢𑀺 𑀢𑁂𑀲𑀁𑀬𑁂𑀯 𑀤𑀸𑀭𑀓𑀸𑀦𑀁 𑀕𑀦𑁆𑀥𑀸𑀤𑀻𑀳𑀺 𑀦𑁆𑀳𑀸𑀧𑀦𑀁. 𑀲𑀫𑁆𑀩𑀸𑀳𑀦𑀦𑁆𑀢𑀺 𑀫𑀳𑀸𑀫𑀮𑁆𑀮𑀸𑀦𑀁 𑀯𑀺𑀬 𑀳𑀢𑁆𑀣𑀧𑀸𑀤𑁂 𑀫𑀼𑀕𑁆𑀕𑀭𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸 𑀩𑀸𑀳𑀼𑀯𑀟𑁆𑀠𑀦𑀁. 𑀆𑀤𑀸𑀲𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀆𑀤𑀸𑀲𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀚𑀦𑀁 𑀅𑀮𑀗𑁆𑀓𑀸𑀭𑀜𑁆𑀚𑀦𑀫𑁂𑀯. 𑀫𑀸𑀮𑀸𑀢𑀺 𑀩𑀤𑁆𑀥𑀫𑀸𑀮𑀸 𑀯𑀸 𑀅𑀩𑀤𑁆𑀥𑀫𑀸𑀮𑀸 𑀯𑀸. 𑀯𑀺𑀮𑁂𑀧𑀦𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀙𑀯𑀺𑀭𑀸𑀕𑀓𑀭𑀡𑀁. 𑀫𑀼𑀔𑀘𑀼𑀡𑁆𑀡𑀓𑀁 𑀫𑀼𑀔𑀮𑁂𑀧𑀦𑀦𑁆𑀢𑀺 𑀫𑀼𑀔𑁂 𑀓𑀸𑀴𑀧𑀻𑀴𑀓𑀸𑀤𑀻𑀦𑀁 𑀳𑀭𑀡𑀢𑁆𑀣𑀸𑀬 𑀫𑀢𑁆𑀢𑀺𑀓𑀸𑀓𑀓𑁆𑀓𑀁 𑀤𑁂𑀦𑁆𑀢𑀺. 𑀢𑁂𑀦 𑀮𑁄𑀳𑀺𑀢𑁂 𑀘𑀮𑀺𑀢𑁂 𑀲𑀸𑀲𑀧𑀓𑀓𑁆𑀓𑀁 𑀤𑁂𑀦𑁆𑀢𑀺, 𑀢𑁂𑀦 𑀤𑁄𑀲𑁂 𑀔𑀸𑀤𑀺𑀢𑁂 𑀢𑀺𑀮𑀓𑀓𑁆𑀓𑀁 𑀤𑁂𑀦𑁆𑀢𑀺, 𑀢𑁂𑀦 𑀮𑁄𑀳𑀺𑀢𑁂 𑀲𑀦𑁆𑀦𑀺𑀲𑀺𑀦𑁆𑀦𑁂 𑀳𑀮𑀺𑀤𑁆𑀤𑀺𑀓𑀓𑁆𑀓𑀁 𑀤𑁂𑀦𑁆𑀢𑀺, 𑀢𑁂𑀦 𑀙𑀯𑀺𑀯𑀡𑁆𑀡𑁂 𑀆𑀭𑀽𑀴𑁆𑀳𑁂 𑀫𑀼𑀔𑀘𑀼𑀡𑁆𑀡𑀓𑁂𑀦 𑀫𑀼𑀔𑀁 𑀘𑀼𑀡𑁆𑀡𑁂𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺.

𑀳𑀢𑁆𑀣𑀩𑀦𑁆𑀥𑀸𑀤𑀻𑀲𑀼 𑀳𑀢𑁆𑀣𑁂 𑀯𑀺𑀘𑀺𑀢𑁆𑀭𑀲𑀗𑁆𑀔𑀓𑀧𑀸𑀮𑀸𑀤𑀻𑀦𑀺 𑀩𑀦𑁆𑀥𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀢𑀁 𑀯𑀸 𑀅𑀜𑁆𑀜𑀁 𑀯𑀸 𑀲𑀩𑁆𑀩𑀫𑁆𑀧𑀺 𑀳𑀢𑁆𑀣𑀸𑀪𑀭𑀡𑀁 𑀦 𑀯𑀝𑁆𑀝𑀢𑀺. 𑀅𑀧𑀭𑁂 𑀲𑀺𑀔𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀲𑀼𑀯𑀡𑁆𑀡𑀘𑀻𑀭𑀓𑀫𑀼𑀢𑁆𑀢𑀸𑀯𑀴𑀺𑀆𑀤𑀻𑀳𑀺 𑀘 𑀢𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺. 𑀅𑀧𑀭𑁂 𑀘𑀢𑀼𑀳𑀢𑁆𑀣𑀤𑀡𑁆𑀟𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀦 𑀅𑀮𑀗𑁆𑀓𑀢𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀢𑀣𑀸 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀸𑀤𑀺𑀯𑀺𑀘𑀺𑀢𑁆𑀢𑀁 𑀪𑁂𑀲𑀚𑁆𑀚𑀦𑀸𑀴𑀺𑀓𑀁 𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀸𑀫𑀧𑀲𑁆𑀲𑁂 𑀑𑀮𑀕𑁆𑀕𑁂𑀦𑁆𑀢𑀺, 𑀅𑀧𑀭𑁂 𑀅𑀦𑁂𑀓𑀘𑀺𑀢𑁆𑀭𑀓𑁄𑀲𑀁 𑀅𑀢𑀺𑀢𑀺𑀔𑀺𑀡𑀁 𑀅𑀲𑀺𑀁, 𑀧𑀜𑁆𑀘𑀯𑀡𑁆𑀡𑀲𑀼𑀢𑁆𑀢𑀲𑀺𑀩𑁆𑀩𑀺𑀢𑀁 𑀫𑀓𑀭𑀤𑀦𑁆𑀢𑀓𑀸𑀤𑀺𑀯𑀺𑀘𑀺𑀢𑁆𑀢𑀁 𑀙𑀢𑁆𑀢𑀁, 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸 𑀫𑁄𑀭𑀧𑀺𑀜𑁆𑀙𑀸𑀤𑀺𑀧𑀭𑀺𑀓𑁆𑀔𑀺𑀢𑁆𑀢𑀸 𑀉𑀧𑀸𑀳𑀦𑀸, 𑀓𑁂𑀘𑀺 𑀭𑀢𑀦𑀫𑀢𑁆𑀢𑀸𑀬𑀸𑀫𑀁 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀓𑁂𑀲𑀦𑁆𑀢𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀫𑁂𑀖𑀫𑀼𑀔𑁂 𑀯𑀺𑀚𑁆𑀚𑀼𑀮𑀢𑀁 𑀯𑀺𑀬 𑀦𑀮𑀸𑀝𑁂 𑀉𑀡𑁆𑀳𑀻𑀲𑀧𑀝𑁆𑀝𑀁 𑀩𑀦𑁆𑀥𑀺𑀢𑁆𑀯𑀸 𑀘𑀽𑀴𑀸𑀫𑀡𑀺𑀁 𑀥𑀸𑀭𑁂𑀦𑁆𑀢𑀺, 𑀘𑀸𑀫𑀭𑀯𑀸𑀮𑀩𑀻𑀚𑀦𑀺𑀁 𑀥𑀸𑀭𑁂𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺.

𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲𑀸𑀢𑀺 𑀇𑀫𑀲𑁆𑀲 𑀘𑀸𑀢𑀼𑀫𑀳𑀸𑀪𑀽𑀢𑀫𑀬𑀲𑁆𑀲 𑀓𑀼𑀡𑀧𑀲𑀭𑀻𑀭𑀲𑁆𑀲. 𑀓𑁂𑀴𑀦𑀸𑀢𑀺 𑀓𑀻𑀴𑀸𑀧𑀦𑀸. 𑀧𑀭𑀺𑀓𑁂𑀴𑀦𑀸𑀢𑀺 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀓𑀻𑀴𑀸𑀧𑀦𑀸. 𑀕𑁂𑀥𑀺𑀢𑀢𑀸𑀢𑀺 𑀅𑀪𑀺𑀓𑀗𑁆𑀔𑀺𑀢𑀢𑀸. 𑀕𑁂𑀥𑀺𑀢𑀢𑁆𑀢𑀦𑁆𑀢𑀺 𑀕𑀺𑀤𑁆𑀥𑀪𑀸𑀯𑁄 𑀅𑀪𑀺𑀓𑀗𑁆𑀔𑀺𑀢𑀪𑀸𑀯𑁄. 𑀘𑀧𑀮𑀢𑀸𑀢𑀺 𑀅𑀮𑀗𑁆𑀓𑀸𑀭𑀓𑀭𑀡𑀁. 𑀘𑀸𑀧𑀮𑁆𑀬𑀦𑁆𑀢𑀺 𑀘𑀧𑀮𑀪𑀸𑀯𑀁.

𑀲𑀯𑀺𑀪𑀽𑀲𑀦𑁆𑀢𑀺𑀆𑀤𑀻𑀲𑀼 𑀯𑀺𑀪𑀽𑀲𑀸𑀬 𑀲𑀳 𑀲𑀯𑀺𑀪𑀽𑀲𑀁. 𑀙𑀯𑀺𑀭𑀸𑀕𑀓𑀭𑀡𑀲𑀗𑁆𑀔𑀸𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀳 𑀲𑀧𑀭𑀺𑀯𑀸𑀭𑀁. 𑀧𑀭𑀺𑀪𑀡𑁆𑀟𑁂𑀦 𑀲𑀳 𑀲𑀧𑀭𑀺𑀪𑀡𑁆𑀟𑀁. 𑀧𑀭𑀺𑀓𑁆𑀔𑀸𑀭𑁂𑀦 𑀲𑀳 𑀲𑀧𑀭𑀺𑀓𑁆𑀔𑀸𑀭𑀁.

𑁧𑁬𑁨. 𑀆𑀣𑀩𑁆𑀩𑀡𑀦𑁆𑀢𑀺 𑀆𑀣𑀩𑁆𑀩𑀡𑀺𑀓𑀫𑀦𑁆𑀢𑀧𑁆𑀧𑀬𑁄𑀕𑀁. 𑀲𑀼𑀧𑀺𑀦𑀦𑁆𑀢𑀺 𑀲𑀼𑀧𑀺𑀦𑀲𑀢𑁆𑀣𑀁. 𑀮𑀓𑁆𑀔𑀡𑀦𑁆𑀢𑀺 𑀫𑀡𑀺𑀮𑀓𑁆𑀔𑀡𑀸𑀤𑀺𑀁. 𑀦𑁄 𑀯𑀺𑀤𑀳𑁂𑀢𑀺 𑀦𑀧𑁆𑀧𑀬𑁄𑀚𑁂𑀬𑁆𑀬. 𑀯𑀺𑀭𑀼𑀢𑀜𑁆𑀘𑀸𑀢𑀺 𑀫𑀺𑀕𑀸𑀤𑀻𑀦𑀁 𑀯𑀝𑁆𑀝𑁂𑀢𑁆𑀯𑀸 𑀯𑀲𑁆𑀲𑀺𑀢𑀁.

𑀆𑀣𑀩𑁆𑀩𑀡𑀺𑀓𑀸𑀢𑀺 𑀧𑀭𑀽𑀧𑀖𑀸𑀢𑀫𑀦𑁆𑀢𑀚𑀸𑀦𑀦𑀓𑀸. 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀦𑁆𑀢𑀻𑀢𑀺 𑀆𑀣𑀩𑁆𑀩𑀡𑀺𑀓𑀸 𑀓𑀺𑀭 𑀲𑀢𑁆𑀢𑀸𑀳𑀁 𑀅𑀮𑁄𑀡𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀤𑀩𑁆𑀩𑁂 𑀅𑀢𑁆𑀣𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀲𑀬𑀫𑀸𑀦𑀸 𑀢𑀧𑀁 𑀘𑀭𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀼𑀲𑀸𑀦𑀪𑀽𑀫𑀺𑀁 𑀲𑀚𑁆𑀚𑁂𑀢𑁆𑀯𑀸 𑀲𑀢𑁆𑀢𑀫𑁂 𑀧𑀤𑁂 𑀞𑀢𑁆𑀯𑀸 𑀳𑀢𑁆𑀣𑀁 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀫𑀼𑀔𑁂𑀦 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑀦𑁆𑀢𑀺, 𑀅𑀣 𑀢𑁂𑀲𑀁 𑀓𑀫𑁆𑀫𑀁 𑀲𑀫𑀺𑀚𑁆𑀛𑀢𑀺. 𑀏𑀯𑀭𑀽𑀧𑀁 𑀲𑀦𑁆𑀥𑀸𑀬 ‘‘𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀦𑁆𑀢𑀻’’𑀢𑀺 𑀆𑀳. 𑀢𑀢𑁆𑀣 𑀧𑀬𑁄𑀚𑁂𑀦𑁆𑀢𑀻𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀦𑀕𑀭𑁂 𑀯𑀸 𑀭𑀼𑀤𑁆𑀥𑁂𑀢𑀺 𑀦𑀕𑀭𑁂 𑀲𑀫𑀦𑁆𑀢𑀢𑁄 𑀭𑀼𑀦𑁆𑀥𑀺𑀢𑁆𑀯𑀸 𑀆𑀯𑀭𑀺𑀢𑁆𑀯𑀸 𑀕𑀳𑀺𑀢𑁂. 𑀲𑀗𑁆𑀕𑀸𑀫𑁂 𑀯𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀢𑀺 𑀭𑀡𑁂 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑁂. 𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀧𑀘𑁆𑀘𑀸𑀫𑀺𑀢𑁆𑀢𑁂𑀲𑀽𑀢𑀺 𑀧𑀝𑀸𑀡𑀻𑀪𑀽𑀢𑁂𑀲𑀼 𑀯𑁂𑀭𑀻𑀲𑀼. 𑀈𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀲𑀭𑀻𑀭𑀘𑀮𑀦𑀁 𑀓𑀫𑁆𑀧𑀦𑀁, 𑀢𑀲𑁆𑀲 𑀉𑀧𑁆𑀧𑀸𑀤𑀦𑀁 𑀓𑀭𑁄𑀦𑁆𑀢𑀺. 𑀉𑀧𑀤𑁆𑀤𑀯𑀦𑁆𑀢𑀺 𑀓𑀸𑀬𑀧𑀻𑀴𑀦𑀁 𑀓𑀭𑁄𑀦𑁆𑀢𑀺. 𑀭𑁄𑀕𑀦𑁆𑀢𑀺 𑀩𑁆𑀬𑀸𑀥𑀺𑀁. 𑀧𑀚𑁆𑀚𑀭𑀓𑀦𑁆𑀢𑀺 𑀚𑀭𑀁. 𑀲𑀽𑀮𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀁. 𑀯𑀺𑀲𑀽𑀘𑀺𑀓𑀦𑁆𑀢𑀺 𑀯𑀺𑀚𑁆𑀛𑀦𑀁. 𑀧𑀓𑁆𑀔𑀦𑁆𑀤𑀺𑀓𑀦𑁆𑀢𑀺 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀁. 𑀓𑀭𑁄𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑁂𑀦𑁆𑀢𑀺.

𑀲𑀼𑀧𑀺𑀦𑀧𑀸𑀞𑀓𑀸𑀢𑀺 𑀲𑀼𑀧𑀺𑀦𑀩𑁆𑀬𑀸𑀓𑀭𑀡𑀓𑀸. 𑀆𑀤𑀺𑀲𑀦𑁆𑀢𑀻𑀢𑀺 𑀩𑁆𑀬𑀸𑀓𑀭𑁄𑀦𑁆𑀢𑀺. 𑀬𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻𑀢𑀺𑀆𑀤𑀻𑀲𑀼 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁, 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀺𑀧𑀸𑀓𑁄 𑀳𑁄𑀢𑀻𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀯𑀲𑁂𑀦 𑀏𑀯𑀭𑀽𑀧𑁄 𑀯𑀺𑀧𑀸𑀓𑁄 𑀳𑁄𑀢𑀺. 𑀅𑀯𑀓𑀼𑀚𑁆𑀚 𑀦𑀺𑀧𑀦𑁆𑀦𑁄𑀢𑀺 𑀅𑀥𑁄𑀫𑀼𑀔𑁄 𑀳𑀼𑀢𑁆𑀯𑀸 𑀦𑀺𑀧𑀦𑁆𑀦𑁄 𑀧𑀲𑁆𑀲𑀢𑀺. 𑀏𑀯𑀁 𑀲𑀼𑀧𑀺𑀦𑀧𑀸𑀞𑀓𑀸 𑀲𑀼𑀧𑀺𑀦𑀁 𑀆𑀤𑀺𑀲𑀦𑁆𑀢𑀺.

𑀢𑀜𑁆𑀘 𑀧𑀦 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀲𑁆𑀲𑀢𑀺 𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀯𑀸 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀯𑀸𑀢𑀺. 𑀢𑀢𑁆𑀣 𑀧𑀺𑀢𑁆𑀢𑀸𑀤𑀻𑀦𑀁 𑀔𑁄𑀪𑀓𑀭𑀡𑀧𑀘𑁆𑀘𑀬𑀬𑁄𑀕𑁂𑀦 𑀔𑀼𑀪𑀺𑀢𑀥𑀸𑀢𑀼𑀓𑁄 𑀥𑀸𑀢𑀼𑀓𑁆𑀔𑁄𑀪𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀧𑀲𑁆𑀲𑀦𑁆𑀢𑁄 𑀘 𑀦𑀸𑀦𑀸𑀯𑀺𑀥𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀩𑁆𑀩𑁂 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁 𑀧𑀲𑁆𑀲𑀢𑀺. 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀦𑁆𑀢𑁄 𑀤𑁂𑀯𑀢𑀸𑀦𑀁 𑀆𑀦𑀼𑀪𑀸𑀯𑁂𑀦 𑀆𑀭𑀫𑁆𑀫𑀡𑀸𑀦𑀺 𑀧𑀲𑁆𑀲𑀢𑀺. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸 𑀅𑀦𑀢𑁆𑀣𑀲𑁆𑀲 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀢𑀢𑁆𑀣 𑀬𑀁 𑀥𑀸𑀢𑀼𑀓𑁆𑀔𑁄𑀪𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀘 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀲𑀘𑁆𑀘𑀁 𑀳𑁄𑀢𑀺. 𑀬𑀁 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀢𑀺, 𑀢𑀁 𑀲𑀘𑁆𑀘𑀁 𑀯𑀸 𑀳𑁄𑀢𑀺 𑀅𑀮𑀺𑀓𑀁 𑀯𑀸. 𑀓𑀼𑀤𑁆𑀥𑀸 𑀳𑀺 𑀤𑁂𑀯𑀢𑀸 𑀉𑀧𑀸𑀬𑁂𑀦 𑀯𑀺𑀦𑀸𑀲𑁂𑀢𑀼𑀓𑀸𑀫𑀸 𑀯𑀺𑀧𑀭𑀻𑀢𑀫𑁆𑀧𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀬𑀁 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀢𑀺, 𑀢𑀁 𑀏𑀓𑀦𑁆𑀢𑀲𑀘𑁆𑀘𑀫𑁂𑀯 𑀳𑁄𑀢𑀺. 𑀏𑀢𑁂𑀲𑀁 𑀘𑀢𑀼𑀦𑁆𑀦𑀁 𑀫𑀽𑀮𑀓𑀸𑀭𑀡𑀸𑀦𑀁 𑀲𑀁𑀲𑀕𑁆𑀕𑀪𑁂𑀤𑀢𑁄𑀧𑀺 𑀲𑀼𑀧𑀺𑀦𑀪𑁂𑀤𑁄 𑀳𑁄𑀢𑀺𑀬𑁂𑀯. 𑀢𑀜𑁆𑀘 𑀧𑀦𑁂𑀢𑀁 𑀘𑀢𑀼𑀩𑁆𑀩𑀺𑀥𑀁 𑀲𑀼𑀧𑀺𑀦𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀯 𑀧𑀲𑁆𑀲𑀦𑁆𑀢𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸. 𑀅𑀲𑁂𑀓𑁆𑀔𑀸 𑀦 𑀧𑀲𑁆𑀲𑀦𑁆𑀢𑀺 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸.

𑀓𑀺𑀁 𑀧𑀦𑁂𑀢𑀁 𑀧𑀲𑁆𑀲𑀦𑁆𑀢𑁄 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀉𑀤𑀸𑀳𑀼 𑀧𑀝𑀺𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀅𑀪𑀺𑀥𑀫𑁆𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀳𑀺 𑀲𑀼𑀧𑀢𑀺, 𑀢𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀦 𑀳𑁄𑀢𑀺, 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀘 𑀈𑀤𑀺𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀯𑀺𑀦𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀬𑀜𑁆𑀳𑀺 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀢𑀁 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺, 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀘 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁂𑀦 𑀧𑀦 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀏𑀓𑀦𑁆𑀢𑀁 𑀅𑀦𑀸𑀧𑀢𑁆𑀢𑀺 𑀏𑀯. 𑀅𑀣 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀓𑁄 𑀦𑀸𑀫 𑀧𑀲𑁆𑀲𑀢𑀺. 𑀏𑀯𑀜𑁆𑀘 𑀲𑀢𑀺 𑀲𑀼𑀧𑀺𑀦𑀲𑁆𑀲 𑀅𑀪𑀸𑀯𑁄𑀯 𑀆𑀧𑀚𑁆𑀚𑀢𑀺, 𑀦 𑀅𑀪𑀸𑀯𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀓𑀧𑀺𑀦𑀺𑀤𑁆𑀤𑀸𑀧𑀭𑁂𑀢𑁄 𑀧𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀫𑀚𑁆𑀛𑀽𑀧𑀕𑀢𑁄, 𑀫𑀳𑀸𑀭𑀸𑀚, 𑀓𑀧𑀺𑀦𑀺𑀤𑁆𑀤𑀸𑀧𑀭𑁂𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺 (𑀫𑀺. 𑀧. 𑁫.𑁩.𑁫).

𑀓𑀧𑀺𑀦𑀺𑀤𑁆𑀤𑀸𑀧𑀭𑁂𑀢𑁄𑀢𑀺 𑀫𑀓𑁆𑀓𑀝𑀦𑀺𑀤𑁆𑀤𑀸𑀬 𑀬𑀼𑀢𑁆𑀢𑁄. 𑀬𑀣𑀸 𑀳𑀺 𑀫𑀓𑁆𑀓𑀝𑀲𑁆𑀲 𑀦𑀺𑀤𑁆𑀤𑀸 𑀮𑀳𑀼𑀧𑀭𑀺𑀯𑀢𑁆𑀢𑀸 𑀳𑁄𑀢𑀺, 𑀏𑀯𑀁 𑀬𑀸 𑀦𑀺𑀤𑁆𑀤𑀸 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀯𑁄𑀓𑀺𑀡𑁆𑀡𑀢𑁆𑀢𑀸 𑀮𑀳𑀼𑀯𑀺𑀧𑀭𑀺𑀯𑀢𑁆𑀢𑀸. 𑀬𑀲𑁆𑀲𑀸 𑀧𑀯𑀢𑁆𑀢𑀺𑀬𑀁 𑀧𑀼𑀦𑀧𑁆𑀧𑀼𑀦𑀁 𑀪𑀯𑀗𑁆𑀕𑀢𑁄 𑀉𑀢𑁆𑀢𑀭𑀡𑀁 𑀳𑁄𑀢𑀺, 𑀢𑀸𑀬 𑀬𑀼𑀢𑁆𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀢𑁂𑀦𑀸𑀬𑀁 𑀲𑀼𑀧𑀺𑀦𑁄 𑀓𑀼𑀲𑀮𑁄𑀧𑀺 𑀳𑁄𑀢𑀺 𑀅𑀓𑀼𑀲𑀮𑁄𑀧𑀺 𑀅𑀩𑁆𑀬𑀸𑀓𑀢𑁄𑀧𑀺. 𑀢𑀢𑁆𑀣 𑀲𑀼𑀧𑀺𑀦𑀦𑁆𑀢𑁂 𑀘𑁂𑀢𑀺𑀬𑀯𑀦𑁆𑀤𑀦𑀥𑀫𑁆𑀫𑀲𑁆𑀲𑀯𑀦𑀥𑀫𑁆𑀫𑀤𑁂𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀓𑀼𑀲𑀮𑁄, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀅𑀓𑀼𑀲𑀮𑁄, 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀓𑁆𑀔𑀡𑁂 𑀅𑀩𑁆𑀬𑀸𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸 𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀅𑀲𑀫𑀢𑁆𑀣𑁄, 𑀧𑀯𑀢𑁆𑀢𑁂 𑀧𑀦 𑀅𑀜𑁆𑀜𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑁄 𑀯𑀺𑀧𑀸𑀓𑀁 𑀤𑁂𑀢𑀺.

𑀫𑀡𑀺𑀮𑀓𑁆𑀔𑀡𑀸𑀤𑀻𑀲𑀼 𑀏𑀯𑀭𑀽𑀧𑁄 𑀫𑀡𑀺 𑀧𑀲𑀢𑁆𑀣𑁄, 𑀏𑀯𑀭𑀽𑀧𑁄 𑀅𑀧𑀲𑀢𑁆𑀣𑁄, 𑀲𑀸𑀫𑀺𑀦𑁄 𑀆𑀭𑁄𑀕𑁆𑀬𑀇𑀲𑁆𑀲𑀭𑀺𑀬𑀸𑀤𑀻𑀦𑀁 𑀳𑁂𑀢𑀼 𑀳𑁄𑀢𑀺, 𑀦 𑀳𑁄𑀢𑀻𑀢𑀺 𑀏𑀯𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀫𑀡𑀺𑀆𑀤𑀻𑀦𑀁 𑀮𑀓𑁆𑀔𑀡𑀁 𑀆𑀤𑀺𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀆𑀯𑀼𑀥𑀮𑀓𑁆𑀔𑀡𑀦𑁆𑀢𑀺 𑀞𑀧𑁂𑀢𑁆𑀯𑀸 𑀅𑀲𑀺𑀆𑀤𑀻𑀦𑀺 𑀅𑀯𑀲𑁂𑀲𑀁 𑀆𑀯𑀼𑀥𑀁. 𑀇𑀢𑁆𑀣𑀺𑀮𑀓𑁆𑀔𑀡𑀸𑀤𑀻𑀦𑀺𑀧𑀺 𑀬𑀫𑁆𑀳𑀺 𑀓𑀼𑀮𑁂 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀬𑁄 𑀯𑀲𑀦𑁆𑀢𑀺, 𑀢𑀲𑁆𑀲 𑀯𑀼𑀤𑁆𑀥𑀺𑀳𑀸𑀦𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀚𑀮𑀓𑁆𑀔𑀡𑀸𑀤𑀻𑀲𑀼 𑀧𑀦 ‘‘𑀏𑀯𑀭𑀽𑀧𑀸𑀦𑀁 𑀅𑀚𑀸𑀤𑀻𑀦𑀁 𑀫𑀁𑀲𑀁 𑀔𑀸𑀤𑀺𑀢𑀩𑁆𑀩𑀁, 𑀏𑀯𑀭𑀽𑀧𑀸𑀦𑀁 𑀦 𑀔𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺 𑀘𑁂𑀢𑁆𑀣 𑀕𑁄𑀥𑀸𑀬 𑀮𑀓𑁆𑀔𑀡𑁂 𑀘𑀺𑀢𑁆𑀢𑀓𑀫𑁆𑀫𑀧𑀺𑀴𑀦𑁆𑀥𑀦𑀸𑀤𑀻𑀲𑀼𑀧𑀺 ‘‘𑀏𑀯𑀭𑀽𑀧𑀸𑀬 𑀕𑁄𑀥𑀸𑀬 𑀲𑀢𑀺 𑀇𑀤𑀁 𑀦𑀸𑀫 𑀳𑁄𑀢𑀻’’𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀡𑁆𑀡𑀺𑀓𑀸𑀮𑀓𑁆𑀔𑀡𑀁 𑀧𑀺𑀴𑀦𑁆𑀥𑀦𑀓𑀡𑁆𑀡𑀺𑀓𑀸𑀬𑀧𑀺 𑀕𑁂𑀳𑀓𑀡𑁆𑀡𑀺𑀓𑀸𑀬𑀧𑀺 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀓𑀘𑁆𑀙𑀧𑀮𑀓𑁆𑀔𑀡𑀫𑁆𑀧𑀺 𑀕𑁄𑀥𑀮𑀓𑁆𑀔𑀡𑀲𑀤𑀺𑀲𑀫𑁂𑀯. 𑀫𑀺𑀕𑀮𑀓𑁆𑀔𑀡𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀁 𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀯𑀁 𑀮𑀓𑁆𑀔𑀡𑀧𑀸𑀞𑀓𑀸 𑀮𑀓𑁆𑀔𑀡𑀁 𑀆𑀤𑀺𑀲𑀦𑁆𑀢𑀻𑀢𑀺 𑀏𑀯𑀁 𑀮𑀓𑁆𑀔𑀡𑀲𑀢𑁆𑀣𑀯𑀸𑀘𑀓𑀸 𑀮𑀓𑁆𑀔𑀡𑀁 𑀆𑀤𑀺𑀲𑀦𑁆𑀢𑀺 𑀓𑀣𑁂𑀦𑁆𑀢𑀺.

𑀦𑀓𑁆𑀔𑀢𑁆𑀢𑀸𑀦𑀻𑀢𑀺 𑀓𑀢𑁆𑀢𑀺𑀓𑀸𑀤𑀻𑀦𑀺 𑀅𑀝𑁆𑀞𑀯𑀻𑀲𑀢𑀺 𑀦𑀓𑁆𑀔𑀢𑁆𑀢𑀸𑀦𑀺. 𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀖𑀭𑀧𑁆𑀧𑀯𑁂𑀲𑁄 𑀓𑀸𑀢𑀩𑁆𑀩𑁄𑀢𑀺 𑀕𑁂𑀳𑀧𑁆𑀧𑀯𑁂𑀲𑀫𑀗𑁆𑀕𑀮𑀁 𑀓𑀸𑀢𑀩𑁆𑀩𑀁. 𑀫𑀓𑀼𑀝𑀁 𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀧𑀲𑀸𑀥𑀦𑀫𑀗𑁆𑀕𑀮𑀁 𑀓𑀸𑀢𑀩𑁆𑀩𑀁. 𑀯𑀸𑀭𑁂𑀬𑁆𑀬𑀦𑁆𑀢𑀺 ‘‘𑀇𑀫𑀲𑁆𑀲 𑀤𑀸𑀭𑀓𑀲𑁆𑀲 𑀅𑀲𑀼𑀓𑀓𑀼𑀮𑀢𑁄 𑀅𑀲𑀼𑀓𑀦𑀓𑁆𑀔𑀢𑁆𑀢𑁂𑀦 𑀤𑀸𑀭𑀺𑀓𑀁 𑀆𑀦𑁂𑀣𑀸’’𑀢𑀺 𑀆𑀯𑀸𑀳𑀓𑀭𑀡𑀜𑁆𑀘 ‘‘𑀇𑀫𑀁 𑀤𑀸𑀭𑀺𑀓𑀁 𑀅𑀲𑀼𑀓𑀲𑁆𑀲 𑀦𑀸𑀫 𑀤𑀸𑀭𑀓𑀲𑁆𑀲 𑀅𑀲𑀼𑀓𑀦𑀓𑁆𑀔𑀢𑁆𑀢𑁂𑀦 𑀤𑁂𑀣, 𑀏𑀯𑀁 𑀏𑀢𑁂𑀲𑀁 𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀺𑀯𑀸𑀳𑀓𑀭𑀡𑀜𑁆𑀘 𑀯𑀢𑁆𑀯𑀸 𑀯𑀸𑀭𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀯𑀸𑀳𑀯𑀺𑀯𑀸𑀳𑀫𑀗𑁆𑀕𑀮𑀁 𑀓𑀸𑀢𑀩𑁆𑀩𑀦𑁆𑀢𑀺 𑀆𑀤𑀺𑀲𑀦𑁆𑀢𑀺. 𑀩𑀻𑀚𑀦𑀻𑀳𑀸𑀭𑁄𑀢𑀺 𑀩𑀻𑀚𑀸𑀦𑀁 𑀯𑀧𑁆𑀧𑀢𑁆𑀣𑀸𑀬 𑀩𑀳𑀺 𑀦𑀻𑀳𑀭𑀡𑀁. ‘‘𑀦𑀺𑀳𑀭𑁄’’𑀢𑀺𑀧𑀺 𑀧𑀸𑀴𑀺. 𑀫𑀺𑀕𑀯𑀸𑀓𑁆𑀓𑀦𑁆𑀢𑀺 𑀇𑀤𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑀸𑀫𑀁, 𑀲𑀩𑁆𑀩𑀲𑀓𑀼𑀡𑀘𑀢𑀼𑀧𑁆𑀧𑀤𑀸𑀦𑀁 𑀭𑀼𑀢𑀜𑀸𑀡𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀫𑀺𑀕𑀯𑀸𑀓𑁆𑀓𑀧𑀸𑀞𑀓𑀸𑀢𑀺 𑀲𑀓𑀼𑀦𑁆𑀢𑀘𑀢𑀼𑀧𑁆𑀧𑀤𑀸𑀦𑀁 𑀲𑀤𑁆𑀤𑀩𑁆𑀬𑀸𑀓𑀭𑀡𑀓𑀸. 𑀫𑀺𑀕𑀯𑀸𑀓𑁆𑀓𑀁 𑀆𑀤𑀺𑀲𑀦𑁆𑀢𑀻𑀢𑀺 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀩𑁆𑀬𑀸𑀓𑀭𑁄𑀦𑁆𑀢𑀺. 𑀭𑀼𑀢𑀦𑁆𑀢𑀺 𑀲𑀤𑁆𑀤𑀁. ‘‘𑀭𑀼𑀤’’𑀦𑁆𑀢𑀺 𑀯𑀸 𑀧𑀸𑀴𑀺. 𑀯𑀲𑁆𑀲𑀺𑀢𑀦𑁆𑀢𑀺 𑀯𑀸𑀘𑀁. 𑀕𑀩𑁆𑀪𑀓𑀭𑀡𑀻𑀬𑀸𑀢𑀺 𑀯𑀺𑀦𑀲𑁆𑀲𑀫𑀸𑀦𑀲𑁆𑀲 𑀕𑀩𑁆𑀪𑀲𑁆𑀲 𑀧𑀼𑀦 𑀅𑀯𑀺𑀦𑀸𑀲𑀸𑀬 𑀑𑀲𑀥𑀤𑀸𑀦𑁂𑀦 𑀕𑀩𑁆𑀪𑀲𑀡𑁆𑀞𑀸𑀦𑀓𑀸𑀭𑀓𑀸. 𑀕𑀩𑁆𑀪𑁄 𑀳𑀺 𑀯𑀸𑀢𑁂𑀦 𑀧𑀸𑀡𑀓𑁂𑀳𑀺 𑀓𑀫𑁆𑀫𑀼𑀦𑀸 𑀘𑀸𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀦𑀲𑁆𑀲𑀢𑀺. 𑀢𑀢𑁆𑀣 𑀯𑀸𑀢𑁂𑀦 𑀯𑀺𑀦𑀲𑁆𑀲𑀦𑁆𑀢𑁂 𑀯𑀸𑀢𑀯𑀺𑀦𑀸𑀲𑀦𑀁 𑀲𑀻𑀢𑀮𑀁 𑀪𑁂𑀲𑀚𑁆𑀚𑀁 𑀤𑁂𑀢𑀺. 𑀧𑀸𑀡𑀓𑁂𑀳𑀺 𑀯𑀺𑀦𑀲𑁆𑀲𑀦𑁆𑀢𑁂 𑀧𑀸𑀡𑀓𑀸𑀦𑀁 𑀧𑀝𑀺𑀓𑀫𑁆𑀫𑀁 𑀓𑀭𑁄𑀢𑀺. 𑀓𑀫𑁆𑀫𑀼𑀦𑀸 𑀯𑀺𑀦𑀲𑁆𑀲𑀦𑁆𑀢𑁂 𑀧𑀦 𑀩𑀼𑀤𑁆𑀥𑀸𑀧𑀺 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀦 𑀢𑀁 𑀇𑀥 𑀕𑀳𑀺𑀢𑀁. 𑀲𑀸𑀮𑀸𑀓𑀺𑀬𑀦𑁆𑀢𑀺 𑀲𑀮𑀸𑀓𑀯𑁂𑀚𑁆𑀚𑀓𑀫𑁆𑀫𑀁. 𑀲𑀮𑁆𑀮𑀓𑀢𑁆𑀢𑀺𑀬𑀦𑁆𑀢𑀺 𑀲𑀮𑁆𑀮𑀓𑀢𑁆𑀢𑀯𑁂𑀚𑁆𑀚𑀓𑀫𑁆𑀫𑀁. 𑀓𑀸𑀬𑀢𑀺𑀓𑀺𑀘𑁆𑀙𑀦𑁆𑀢𑀺 𑀫𑀽𑀮𑀪𑁂𑀲𑀚𑁆𑀚𑀸𑀤𑀻𑀦𑀺 𑀬𑁄𑀚𑁂𑀢𑁆𑀯𑀸 𑀓𑀸𑀬𑀢𑀺𑀓𑀺𑀘𑁆𑀙𑀯𑁂𑀚𑁆𑀚𑀓𑀫𑁆𑀫𑀁. 𑀪𑀽𑀢𑀺𑀬𑀦𑁆𑀢𑀺 𑀪𑀽𑀢𑀯𑁂𑀚𑁆𑀚𑀓𑀫𑁆𑀫𑀁. 𑀓𑁄𑀫𑀸𑀭𑀪𑀘𑁆𑀘𑀦𑁆𑀢𑀺 𑀓𑁄𑀫𑀸𑀭𑀓𑀯𑁂𑀚𑁆𑀚𑀓𑀫𑁆𑀫𑀁. 𑀓𑀼𑀳𑀸𑀢𑀺 𑀯𑀺𑀫𑁆𑀳𑀸𑀧𑀓𑀸. 𑀣𑀤𑁆𑀥𑀸𑀢𑀺 𑀤𑀸𑀭𑀼𑀓𑁆𑀔𑀦𑁆𑀥𑀁 𑀯𑀺𑀬 𑀣𑀤𑁆𑀥𑀲𑀭𑀻𑀭𑀸. 𑀮𑀧𑀸𑀢𑀺 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀘𑀦𑀓𑀸. 𑀲𑀺𑀗𑁆𑀕𑀺𑀢𑀺 𑀫𑀡𑁆𑀟𑀦𑀧𑀓𑀢𑀺𑀓𑀸. 𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀫𑀸𑀦𑀦𑀴𑀸. 𑀅𑀲𑀫𑀸𑀳𑀺𑀢𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀺𑀭𑀳𑀺𑀢𑀸.

𑀦 𑀕𑀡𑁆𑀳𑁂𑀬𑁆𑀬𑀸𑀢𑀺𑀆𑀤𑀻𑀲𑀼 𑀉𑀤𑁆𑀤𑁂𑀲𑀕𑁆𑀕𑀳𑀡𑀯𑀲𑁂𑀦 𑀦 𑀕𑀡𑁆𑀳𑁂𑀬𑁆𑀬. 𑀲𑀚𑁆𑀛𑀸𑀬𑀯𑀲𑁂𑀦 𑀦 𑀉𑀕𑁆𑀕𑀡𑁆𑀳𑁂𑀬𑁆𑀬. 𑀘𑀺𑀢𑁆𑀢𑁂 𑀞𑀧𑀦𑀯𑀲𑁂𑀦 𑀦 𑀥𑀸𑀭𑁂𑀬𑁆𑀬. 𑀲𑀫𑀻𑀧𑀁 𑀓𑀢𑁆𑀯𑀸 𑀞𑀧𑀦𑀯𑀲𑁂𑀦 𑀦 𑀉𑀧𑀥𑀸𑀭𑁂𑀬𑁆𑀬. 𑀉𑀧𑀧𑀭𑀺𑀓𑁆𑀔𑀸𑀯𑀲𑁂𑀦 𑀦 𑀉𑀧𑀮𑀓𑁆𑀔𑁂𑀬𑁆𑀬. 𑀅𑀜𑁆𑀜𑁂𑀲𑀁 𑀯𑀸𑀘𑀦𑀯𑀲𑁂𑀦 𑀦𑀧𑁆𑀧𑀬𑁄𑀚𑁂𑀬𑁆𑀬.

𑁧𑁬𑁩. 𑀧𑁂𑀲𑀼𑀡𑀺𑀬𑀦𑁆𑀢𑀺 𑀧𑁂𑀲𑀼𑀜𑁆𑀜𑀁. 𑀲𑁂𑀲𑀦𑀺𑀤𑁆𑀤𑁂𑀲𑁄 𑀘 𑀯𑀼𑀢𑁆𑀢𑀢𑁆𑀣𑁄𑀬𑁂𑀯.

𑁧𑁬𑁪. 𑀓𑀬𑀯𑀺𑀓𑁆𑀓𑀬𑁂𑀢𑀺 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀤𑁆𑀥𑀺𑀁 𑀯𑀜𑁆𑀘𑀦𑀯𑀲𑁂𑀦 𑀯𑀸 𑀉𑀤𑀬𑀧𑀢𑁆𑀣𑀦𑀸𑀯𑀲𑁂𑀦 𑀯𑀸 𑀦 𑀢𑀺𑀝𑁆𑀞𑁂𑀬𑁆𑀬. 𑀉𑀧𑀯𑀸𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬𑀸𑀢𑀺 𑀉𑀧𑀯𑀸𑀤𑀓𑀭𑁂 𑀓𑀺𑀮𑁂𑀲𑁂 𑀅𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀅𑀢𑁆𑀢𑀦𑀺 𑀧𑀭𑁂𑀳𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀉𑀧𑀯𑀸𑀤𑀁 𑀦 𑀚𑀦𑁂𑀬𑁆𑀬. 𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬𑀸𑀢𑀺 𑀕𑀸𑀫𑁂 𑀘 𑀕𑀺𑀳𑀺𑀲𑀁𑀲𑀕𑁆𑀕𑀸𑀤𑀻𑀳𑀺 𑀦𑀸𑀪𑀺𑀲𑀚𑁆𑀚𑁂𑀬𑁆𑀬. 𑀮𑀸𑀪𑀓𑀫𑁆𑀬𑀸 𑀚𑀦𑀁 𑀦 𑀮𑀧𑀬𑁂𑀬𑁆𑀬𑀸𑀢𑀺 𑀮𑀸𑀪𑀓𑀸𑀫𑀢𑀸𑀬 𑀚𑀦𑀁 𑀦 𑀮𑀧𑀬𑁂𑀬𑁆𑀬.

𑀬𑁂 𑀓𑀬𑀯𑀺𑀓𑁆𑀓𑀬𑀸 𑀯𑀺𑀦𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀬𑁂 𑀤𑀸𑀦𑀧𑀝𑀺𑀕𑁆𑀕𑀳𑀡𑀯𑀲𑁂𑀦 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁫𑁯𑁩 𑀆𑀤𑀬𑁄) 𑀦 𑀯𑀝𑁆𑀝𑀢𑀻𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀇𑀥𑀸𑀥𑀺𑀧𑁆𑀧𑁂𑀢𑀁 𑀓𑀬𑀯𑀺𑀓𑁆𑀓𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀦𑁆𑀦𑀁 𑀲𑀤𑁆𑀥𑀺𑀁 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀲𑀤𑁆𑀥𑀺𑀦𑁆𑀢𑀺 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀳. 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑀸 𑀦𑀸𑀫 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀬𑁄. 𑀯𑀜𑁆𑀘𑀦𑀺𑀬𑀁 𑀯𑀸𑀢𑀺 𑀧𑀝𑀺𑀭𑀽𑀧𑀓𑀁 𑀤𑀲𑁆𑀲𑁂𑀢𑁆𑀯𑀸 𑀯𑀜𑁆𑀘𑀦𑀺𑀬𑀁 𑀯𑀸. 𑀉𑀤𑀬𑀁 𑀯𑀸 𑀧𑀢𑁆𑀣𑀬𑀦𑁆𑀢𑁄𑀢𑀺 𑀯𑀼𑀟𑁆𑀠𑀺𑀁 𑀧𑀢𑁆𑀣𑁂𑀦𑁆𑀢𑁄 𑀯𑀸. 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀢𑀺.

𑀇𑀤𑁆𑀥𑀺𑀫𑀦𑁆𑀢𑁄𑀢𑀺 𑀇𑀚𑁆𑀛𑀦𑀧𑀪𑀸𑀯𑀯𑀦𑁆𑀢𑁄. 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀜𑀸𑀡𑀘𑀓𑁆𑀔𑀼𑀓𑀸. 𑀅𑀣 𑀯𑀸 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀬𑁂𑀦 𑀮𑀤𑁆𑀥𑀜𑀸𑀡𑀘𑀓𑁆𑀔𑀼𑀓𑀸. 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀧𑀭𑁂𑀲𑀁 𑀘𑀺𑀢𑁆𑀢𑀚𑀸𑀦𑀦𑀓𑀸. 𑀢𑁂 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀻𑀢𑀺 𑀏𑀓𑀬𑁄𑀚𑀦𑀢𑁄𑀧𑀺 𑀬𑁄𑀚𑀦𑀲𑀢𑀢𑁄𑀧𑀺 𑀬𑁄𑀚𑀦𑀲𑀳𑀲𑁆𑀲𑀢𑁄𑀧𑀺 𑀬𑁄𑀚𑀦𑀲𑀢𑀲𑀳𑀲𑁆𑀲𑀢𑁄𑀧𑀺 𑀘𑀓𑁆𑀓𑀯𑀸𑀴𑀢𑁄𑀧𑀺 𑀤𑁆𑀯𑁂𑀢𑀻𑀡𑀺𑀘𑀢𑁆𑀢𑀸𑀭𑀺𑀧𑀜𑁆𑀘𑀤𑀲𑀯𑀻𑀲𑀢𑀺𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀢𑁄𑀧𑀺 𑀢𑀢𑁄 𑀅𑀢𑀺𑀭𑁂𑀓𑀢𑁄𑀧𑀺 𑀘𑀓𑁆𑀓𑀯𑀸𑀴𑀢𑁄 𑀧𑀲𑁆𑀲𑀦𑁆𑀢𑀺 𑀤𑀓𑁆𑀔𑀦𑁆𑀢𑀺. 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑀻𑀧𑁂 𑀞𑀺𑀢𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀧𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦𑀸𑀧𑀺 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀧𑀚𑀸𑀦𑀦𑁆𑀢𑀺. 𑀤𑁂𑀯𑀢𑀸𑀧𑀺 𑀔𑁄 𑀲𑀦𑁆𑀢𑀺 𑀇𑀤𑁆𑀥𑀺𑀫𑀦𑁆𑀢𑀺𑀦𑀺𑀬𑁄𑀢𑀺 𑀤𑁂𑀯𑀢𑀸𑀧𑀺 𑀏𑀯𑀁 𑀲𑀁𑀯𑀺𑀚𑁆𑀚𑀦𑁆𑀢𑀺 𑀇𑀚𑁆𑀛𑀦𑀧𑀪𑀸𑀯𑀯𑀦𑁆𑀢𑀺𑀦𑀺𑀬𑁄. 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄𑀢𑀺 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀺𑀬𑁄. 𑀑𑀴𑀸𑀭𑀺𑀓𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀻𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑁂𑀳𑀺 𑀯𑀸 𑀉𑀧𑀢𑀸𑀧𑁂𑀳𑀺. 𑀫𑀚𑁆𑀛𑀺𑀫𑁂𑀳𑀺 𑀯𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂𑀳𑀺 𑀯𑀸. 𑀲𑀼𑀔𑀼𑀫𑁂𑀳𑀺 𑀯𑀸𑀢𑀺 𑀜𑀸𑀢𑀺𑀯𑀺𑀢𑀓𑁆𑀓𑀸𑀤𑀺𑀓𑁂𑀳𑀺 𑀯𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀓𑀫𑁆𑀫𑀧𑀣𑀯𑀲𑁂𑀦, 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀯𑀝𑁆𑀝𑀫𑀽𑀮𑀓𑀓𑀺𑀮𑁂𑀲𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀜𑀸𑀢𑀺𑀯𑀺𑀢𑀓𑁆𑀓𑀸𑀤𑀻𑀲𑀼 ‘‘𑀫𑀬𑁆𑀳𑀁 𑀜𑀸𑀢𑀬𑁄 𑀲𑀼𑀔𑀚𑀻𑀯𑀺𑀦𑁄 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸’’𑀢𑀺 𑀏𑀯𑀁 𑀧𑀜𑁆𑀘𑀓𑀸𑀫𑀕𑀼𑀡𑀲𑀦𑁆𑀦𑀺𑀲𑁆𑀲𑀺𑀢𑁂𑀦 𑀕𑁂𑀳𑀲𑀦𑁆𑀦𑀺𑀲𑁆𑀲𑀺𑀢𑀧𑁂𑀫𑁂𑀦 𑀜𑀸𑀢𑀓𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄 𑀜𑀸𑀢𑀺𑀯𑀺𑀢𑀓𑁆𑀓𑁄. ‘‘𑀫𑀬𑁆𑀳𑀁 𑀜𑀸𑀢𑀬𑁄 𑀔𑀬𑀁 𑀕𑀢𑀸 𑀯𑀬𑀁 𑀕𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀧𑀦 𑀜𑀸𑀢𑀺𑀯𑀺𑀢𑀓𑁆𑀓𑁄 𑀦𑀸𑀫 𑀦 𑀳𑁄𑀢𑀺.

‘‘𑀅𑀫𑁆𑀳𑀸𑀓𑀁 𑀚𑀦𑀧𑀤𑁄 𑀲𑀼𑀪𑀺𑀓𑁆𑀔𑁄 𑀲𑀫𑁆𑀧𑀦𑁆𑀦𑀲𑀲𑁆𑀲𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀲𑁆𑀲 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄 𑀚𑀦𑀧𑀤𑀯𑀺𑀢𑀓𑁆𑀓𑁄. ‘‘𑀅𑀫𑁆𑀳𑀸𑀓𑀁 𑀚𑀦𑀧𑀤𑁂 𑀫𑀦𑀼𑀲𑁆𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀔𑀬𑀁 𑀕𑀢𑀸 𑀯𑀬𑀁 𑀕𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀧𑀦 𑀚𑀦𑀧𑀤𑀯𑀺𑀢𑀓𑁆𑀓𑁄 𑀦𑀸𑀫 𑀦 𑀳𑁄𑀢𑀺.

𑀅𑀫𑀭𑀢𑁆𑀢𑀸𑀬 𑀯𑀺𑀢𑀓𑁆𑀓𑁄, 𑀅𑀫𑀭𑁄 𑀯𑀸 𑀯𑀺𑀢𑀓𑁆𑀓𑁄𑀢𑀺 𑀅𑀫𑀭𑀯𑀺𑀢𑀓𑁆𑀓𑁄. 𑀢𑀢𑁆𑀣 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀳𑀺 𑀤𑀼𑀓𑁆𑀔𑁂 𑀦𑀺𑀚𑀺𑀡𑁆𑀡𑁂 𑀲𑀫𑁆𑀧𑀭𑀸𑀬𑁂 𑀅𑀢𑁆𑀢𑀸 𑀲𑀼𑀔𑀻 𑀳𑁄𑀢𑀺. 𑀅𑀫𑀭𑁄𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑀲𑁆𑀲 𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀫𑀭𑀢𑁆𑀢𑀸𑀬 𑀯𑀺𑀢𑀓𑁆𑀓𑁄 𑀦𑀸𑀫. 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀦 ‘‘𑀲𑀲𑁆𑀲𑀢𑀁 𑀯𑀤𑁂𑀲𑀻’’𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁄 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑁄 𑀤𑀺𑀝𑁆𑀞𑀺𑀕𑀢𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀬𑀣𑀸 𑀅𑀫𑀭𑁄 𑀦𑀸𑀫 𑀫𑀘𑁆𑀙𑁄 𑀉𑀤𑀓𑁂 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑀸, 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀢𑀺 𑀕𑀸𑀳𑀁 𑀦 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀅𑀲𑀡𑁆𑀞𑀳𑀦𑀢𑁄 𑀦 𑀫𑀭𑀢𑀻𑀢𑀺 𑀅𑀫𑀭𑁄 𑀦𑀸𑀫 𑀳𑁄𑀢𑀺, 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 ‘‘𑀅𑀫𑀭𑀯𑀺𑀢𑀓𑁆𑀓𑁄’’𑀢𑀺 𑀯𑀼𑀢𑁆𑀢𑀁.

𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑁄𑀢𑀺 𑀅𑀦𑀼𑀤𑁆𑀤𑀬𑀢𑀸𑀧𑀝𑀺𑀭𑀽𑀧𑀓𑁂𑀦 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄. 𑀉𑀧𑀝𑁆𑀞𑀸𑀓𑁂𑀲𑀼 𑀦𑀦𑁆𑀤𑀓𑁂𑀲𑀼 𑀲𑁄𑀘𑀦𑁆𑀢𑁂𑀲𑀼 𑀘 𑀢𑁂𑀳𑀺 𑀲𑀤𑁆𑀥𑀺𑀁 𑀤𑀺𑀕𑀼𑀡𑀁 𑀦𑀦𑁆𑀤𑀢𑀺 𑀤𑀺𑀕𑀼𑀡𑀁 𑀲𑁄𑀘𑀢𑀺, 𑀢𑁂𑀲𑀼 𑀲𑀼𑀔𑀺𑀢𑁂𑀲𑀼 𑀤𑀺𑀕𑀼𑀡𑀁 𑀲𑀼𑀔𑀺𑀢𑁄 𑀳𑁄𑀢𑀺, 𑀤𑀼𑀓𑁆𑀔𑀺𑀢𑁂𑀲𑀼 𑀤𑀺𑀕𑀼𑀡𑀁 𑀤𑀼𑀓𑁆𑀔𑀺𑀢𑁄 𑀳𑁄𑀢𑀺. 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀯𑁄𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀢𑀸𑀦𑀺 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀦𑁆𑀢𑁄 𑀧𑀜𑁆𑀜𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀲𑀮𑁆𑀮𑁂𑀔𑀁 𑀓𑁄𑀧𑁂𑀢𑀺. 𑀬𑁄 𑀢𑀲𑁆𑀫𑀺𑀁 𑀲𑀁𑀲𑀝𑁆𑀞𑀯𑀺𑀳𑀸𑀭𑁂 𑀢𑀲𑁆𑀫𑀺𑀁 𑀯𑀸 𑀯𑁄𑀬𑁄𑀕𑀸𑀧𑀚𑁆𑀚𑀦𑁂 𑀕𑁂𑀳𑀲𑁆𑀲𑀺𑀢𑁄 𑀯𑀺𑀢𑀓𑁆𑀓𑁄, 𑀅𑀬𑀁 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑀸𑀫.

𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀜𑁆𑀜𑀼𑀢𑁆𑀢𑁄𑀢𑀺 𑀘𑀻𑀯𑀭𑀸𑀤𑀺𑀮𑀸𑀪𑁂𑀦 𑀘𑁂𑀯 𑀲𑀓𑁆𑀓𑀸𑀭𑁂𑀦 𑀘 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀘 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀝𑀺𑀲𑀜𑁆𑀜𑀼𑀢𑁆𑀢𑁄. 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀜𑁆𑀜𑀼𑀢𑁆𑀢𑁄𑀢𑀺 ‘‘𑀅𑀳𑁄 𑀯𑀢 𑀫𑀁 𑀧𑀭𑁂 𑀦 𑀅𑀯𑀚𑀸𑀦𑁂𑀬𑁆𑀬𑀼𑀁, 𑀦 𑀲𑁄𑀥𑁂𑀢𑁆𑀯𑀸 𑀯𑀺𑀲𑁄𑀥𑁂𑀢𑁆𑀯𑀸 𑀓𑀣𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀅𑀦𑀯𑀜𑁆𑀜𑀸𑀢𑀪𑀸𑀯𑀧𑀢𑁆𑀣𑀦𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀦𑀓𑀯𑀺𑀢𑀓𑁆𑀓𑁄. 𑀲𑁄 𑀢𑀲𑁆𑀫𑀺𑀁 ‘‘𑀫𑀸 𑀫𑀁 𑀧𑀭𑁂 𑀅𑀯𑀚𑀸𑀦𑀺𑀁𑀲𑀽’’𑀢𑀺 𑀉𑀧𑁆𑀧𑀦𑁆𑀦𑁂 𑀯𑀺𑀢𑀓𑁆𑀓𑁂 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀕𑁂𑀳𑀦𑀺𑀲𑁆𑀲𑀺𑀢𑁄 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀢𑀓𑁆𑀓𑁄.