𑁧𑁫. 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁭𑁦. 𑀧𑀦𑁆𑀦𑀭𑀲𑀫𑁂 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀦𑁆𑀢𑀺 𑀧𑀞𑀫𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀬𑀁 𑀮𑁄𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀯𑀸 𑀲𑀫𑁆𑀧𑀭𑀸𑀬𑀺𑀓𑀁 𑀯𑀸 𑀪𑀬𑀁 𑀚𑀸𑀢𑀁, 𑀢𑀁 𑀲𑀩𑁆𑀩𑀁 𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀁 𑀅𑀢𑁆𑀢𑀦𑁄 𑀤𑀼𑀘𑁆𑀘𑀭𑀺𑀢𑀓𑀸𑀭𑀡𑀸 𑀚𑀸𑀢𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁, 𑀇𑀫𑀁 𑀲𑀸𑀓𑀺𑀬𑀸𑀤𑀺𑀚𑀦𑀁 𑀧𑀲𑁆𑀲𑀣 𑀅𑀜𑁆𑀜𑀫𑀜𑁆𑀜𑀁 𑀫𑁂𑀥𑀕𑀁 𑀳𑀺𑀁𑀲𑀓𑀁 𑀩𑀸𑀥𑀓𑀦𑁆𑀢𑀺. 𑀏𑀯𑀁 𑀢𑀁 𑀧𑀝𑀺𑀯𑀺𑀭𑀼𑀤𑁆𑀥𑀁 𑀯𑀺𑀧𑁆𑀧𑀝𑀺𑀧𑀦𑁆𑀦𑀁 𑀚𑀦𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀢𑀲𑁆𑀲 𑀲𑀁𑀯𑁂𑀕𑀁 𑀚𑀦𑁂𑀢𑀼𑀁 𑀆𑀳 ‘‘𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸’’𑀢𑀺. 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑁂𑀦𑁂𑀯 𑀲𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀬𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀤𑀡𑁆𑀟𑀸𑀢𑀺 𑀤𑀼𑀘𑁆𑀘𑀭𑀺𑀢𑀸. 𑀓𑀸𑀬𑀤𑀡𑁆𑀟𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀯𑀘𑀻𑀤𑀡𑁆𑀟𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀸𑀬𑀢𑁄 𑀧𑀯𑀢𑁆𑀢𑀁 𑀤𑀼𑀝𑁆𑀞𑀼𑀁 𑀘𑀭𑀺𑀢𑀁, 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸 𑀯𑀸 𑀤𑀼𑀝𑁆𑀞𑀼 𑀘𑀭𑀺𑀢𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀢𑀺𑀯𑀺𑀥𑀁 𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀫𑀼𑀲𑀸𑀯𑀸𑀤𑀸𑀤𑀺𑀘𑀢𑀼𑀩𑁆𑀩𑀺𑀥𑀁. 𑀢𑀺𑀯𑀺𑀥𑀦𑁆𑀢𑀺 𑀅𑀪𑀺𑀚𑁆𑀛𑀸𑀤𑀺𑀢𑀺𑀯𑀺𑀥𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀦𑁆𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀧𑀝𑀺𑀲𑀁𑀯𑁂𑀤𑀦𑀻𑀬𑀁. 𑀲𑀫𑁆𑀧𑀭𑀸𑀬𑀺𑀓𑀦𑁆𑀢𑀺 𑀅𑀦𑀸𑀕𑀢𑁂 𑀅𑀢𑁆𑀢𑀪𑀸𑀯𑁂 𑀧𑀝𑀺𑀲𑀁𑀯𑁂𑀤𑀦𑀻𑀬𑀁. 𑀆𑀕𑀼𑀘𑀸𑀭𑀻𑀢𑀺 𑀧𑀸𑀧𑀓𑀸𑀭𑀻 𑀅𑀧𑀭𑀸𑀥𑀓𑀸𑀭𑀻. 𑀢𑀫𑁂𑀦𑀁 𑀭𑀸𑀚𑀸 𑀧𑀭𑀺𑀪𑀸𑀲𑀢𑀻𑀢𑀺 𑀧𑀸𑀧𑀓𑀸𑀭𑀺𑀁 𑀭𑀸𑀚𑀸 𑀧𑀭𑀺𑀪𑀸𑀲𑀢𑀺, 𑀪𑀬𑀁 𑀉𑀧𑁆𑀧𑀸𑀤𑁂𑀢𑀺. 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀁 𑀤𑁄𑀫𑀦𑀲𑁆𑀲𑀁 𑀯𑀺𑀦𑁆𑀤𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀦𑁆𑀢𑀺 𑀏𑀯𑀭𑀽𑀧𑀁 𑀪𑀬𑀜𑁆𑀘 𑀤𑀼𑀓𑁆𑀔𑀜𑁆𑀘 𑀤𑁄𑀫𑀦𑀲𑁆𑀲𑀜𑁆𑀘. 𑀓𑀼𑀢𑁄 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀘𑁄𑀭𑀲𑁆𑀲 𑀓𑀼𑀢𑁄 𑀉𑀧𑁆𑀧𑀦𑁆𑀦𑀁. 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑀤𑀼𑀘𑁆𑀘𑀭𑀺𑀢𑀢𑁄 𑀉𑀧𑁆𑀧𑀦𑁆𑀦𑀁.

𑀅𑀦𑁆𑀢𑀫𑀲𑁄𑀢𑀺 𑀳𑁂𑀝𑁆𑀞𑀺𑀫𑀢𑁄. 𑀲𑀯𑀘𑀦𑀻𑀬𑀫𑁆𑀧𑀺 𑀓𑀭𑁄𑀢𑀺 ‘‘𑀦 𑀢𑁂 𑀮𑀩𑁆𑀪𑀸 𑀇𑀢𑁄 𑀧𑀓𑁆𑀓𑀫𑀺𑀢𑀼’’𑀦𑁆𑀢𑀺 𑀇𑀢𑁄 𑀇𑀫𑀫𑁆𑀳𑀸 𑀕𑀸𑀫𑀸𑀤𑀺𑀦𑀸 𑀕𑀦𑁆𑀢𑀼𑀁 𑀦 𑀮𑀩𑁆𑀪𑀸. 𑀦 𑀲𑀓𑁆𑀓𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀦𑁆𑀢𑀺 𑀧𑀮𑀺𑀩𑁄𑀥𑀁 𑀲𑀗𑁆𑀕𑀁 𑀓𑀭𑁄𑀢𑀺. 𑀥𑀦𑀚𑀸𑀦𑀺𑀧𑀘𑁆𑀘𑀬𑀸𑀧𑀻𑀢𑀺 𑀥𑀦𑀧𑀭𑀺𑀳𑀸𑀦𑀺𑀓𑀸𑀭𑀡𑀸𑀧𑀺. 𑀭𑀸𑀚𑀸 𑀢𑀲𑁆𑀲 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑀸𑀧𑁂𑀢𑀺. 𑀓𑀲𑀸𑀳𑀺𑀧𑀺 𑀢𑀸𑀴𑁂𑀢𑀻𑀢𑀺 𑀓𑀲𑀸𑀤𑀡𑁆𑀟𑀓𑁂𑀳𑀺 𑀧𑁄𑀣𑁂𑀢𑀺. 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀢𑀻𑀢𑀺 𑀲𑀓𑀡𑁆𑀝𑀓𑀯𑁂𑀢𑁆𑀢𑀮𑀢𑀸𑀳𑀺 𑀧𑁄𑀣𑁂𑀢𑀺. 𑀅𑀟𑁆𑀠𑀤𑀡𑁆𑀟𑀓𑁂𑀳𑀻𑀢𑀺𑀆𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀬𑁂𑀯. 𑀲𑀼𑀦𑀔𑁂𑀳𑀺𑀧𑀺𑀔𑀸𑀤𑀸𑀧𑁂𑀢𑀻𑀢𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺 𑀆𑀳𑀸𑀭𑁂 𑀅𑀤𑀢𑁆𑀯𑀸 𑀙𑀸𑀢𑀲𑀼𑀦𑀔𑁂𑀳𑀺 𑀔𑀸𑀤𑀸𑀧𑁂𑀢𑀺. 𑀢𑁂 𑀫𑀼𑀳𑀼𑀢𑁆𑀢𑁂𑀦 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀫𑁂𑀯 𑀓𑀭𑁄𑀢𑀺. 𑀲𑀽𑀮𑁂 𑀉𑀢𑁆𑀢𑀸𑀲𑁂𑀢𑀻𑀢𑀺 𑀲𑀽𑀮𑀁 𑀆𑀭𑁄𑀧𑁂𑀢𑀺. 𑀭𑀸𑀚𑀸 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀤𑀡𑁆𑀟𑀸𑀦𑀁 𑀇𑀲𑁆𑀲𑀭𑁄𑀢𑀺 𑀇𑀫𑀸𑀲𑀁 𑀘𑀢𑀼𑀦𑁆𑀦𑀁 𑀆𑀡𑀸𑀦𑀁 𑀓𑀸𑀢𑀼𑀁 𑀭𑀸𑀚𑀸 𑀲𑀫𑀢𑁆𑀣𑁄.

𑀲𑀓𑁂𑀦 𑀓𑀫𑁆𑀫𑁂𑀦𑀸𑀢𑀺 𑀲𑀬𑀁𑀓𑀢𑁂𑀦 𑀓𑀫𑁆𑀫𑁂𑀦. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸𑀢𑀺 𑀏𑀢𑁆𑀣 𑀏𑀓𑀘𑁆𑀘𑁂 𑀣𑁂𑀭𑀸 ‘‘𑀦𑀺𑀭𑀬𑀧𑀸𑀮𑀸 𑀦𑀸𑀫 𑀦𑀢𑁆𑀣𑀺, 𑀬𑀦𑁆𑀢𑀭𑀽𑀧𑀁 𑀯𑀺𑀬 𑀓𑀫𑁆𑀫𑀫𑁂𑀯 𑀓𑀸𑀭𑀡𑀁 𑀓𑀸𑀭𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀢𑀁 ‘‘𑀅𑀢𑁆𑀣𑀺 𑀦𑀺𑀭𑀬𑁂𑀲𑀼 𑀦𑀺𑀭𑀬𑀧𑀸𑀮𑀸𑀢𑀺, 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀘 𑀓𑀸𑀭𑀡𑀺𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 (𑀓𑀣𑀸. 𑁮𑁬𑁬 𑀆𑀤𑀬𑁄) 𑀧𑀝𑀺𑀲𑁂𑀥𑀺𑀢𑀫𑁂𑀯. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑀮𑁄𑀓𑁂 𑀓𑀫𑁆𑀫𑀓𑀸𑀭𑀡𑀓𑀸𑀭𑀓𑀸 𑀅𑀢𑁆𑀣𑀺, 𑀏𑀯𑀫𑁂𑀯 𑀦𑀺𑀭𑀬𑁂𑀲𑀼 𑀦𑀺𑀭𑀬𑀧𑀸𑀮𑀸 𑀅𑀢𑁆𑀣𑀻𑀢𑀺. 𑀢𑀢𑁆𑀢𑀁 𑀅𑀬𑁄𑀔𑀺𑀮𑀦𑁆𑀢𑀺 𑀢𑀺𑀕𑀸𑀯𑀼𑀢𑀁 𑀅𑀢𑁆𑀢𑀪𑀸𑀯𑀁 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀉𑀢𑁆𑀢𑀸𑀦𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂 𑀢𑀸𑀮𑀧𑁆𑀧𑀫𑀸𑀡𑀁 𑀅𑀬𑀲𑀽𑀮𑀁 𑀧𑀯𑁂𑀲𑁂𑀦𑁆𑀢𑀺, 𑀢𑀣𑀸 𑀯𑀸𑀫𑀳𑀢𑁆𑀣𑀸𑀤𑀻𑀲𑀼. 𑀬𑀣𑀸 𑀘 𑀉𑀢𑁆𑀢𑀸𑀦𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀏𑀯𑀁 𑀉𑀭𑁂𑀦𑀧𑀺 𑀯𑀸𑀫𑀧𑀲𑁆𑀲𑁂𑀦𑀧𑀺 𑀤𑀓𑁆𑀔𑀺𑀡𑀧𑀲𑁆𑀲𑁂𑀦𑀧𑀺 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀁 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀦𑁆𑀢𑀺𑀬𑁂𑀯.

𑀲𑀁𑀯𑁂𑀲𑁂𑀢𑁆𑀯𑀸𑀢𑀺 𑀚𑀮𑀺𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀢𑀺𑀕𑀸𑀯𑀼𑀢𑀁 𑀅𑀢𑁆𑀢𑀪𑀸𑀯𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸. 𑀓𑀼𑀞𑀸𑀭𑀻𑀳𑀻𑀢𑀺 𑀫𑀳𑀢𑀻𑀳𑀺 𑀕𑁂𑀳𑀘𑁆𑀙𑀸𑀤𑀦𑀲𑁆𑀲 𑀏𑀓𑀧𑀓𑁆𑀔𑀫𑀢𑁆𑀢𑀸𑀳𑀺 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑁂𑀦𑁆𑀢𑀺, 𑀮𑁄𑀳𑀺𑀢𑀁 𑀦𑀤𑀻 𑀳𑀼𑀢𑁆𑀯𑀸 𑀲𑀦𑁆𑀤𑀢𑀺, 𑀮𑁄𑀳𑀧𑀣𑀯𑀺𑀢𑁄 𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀢𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀡𑁆𑀳𑀸𑀢𑀺, 𑀫𑀳𑀸𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀘𑁆𑀙𑀦𑁆𑀢𑀸 𑀧𑀦 𑀲𑀼𑀢𑁆𑀢𑀸𑀳𑀢𑀁 𑀓𑀭𑀺𑀢𑁆𑀯𑀸 𑀤𑀸𑀭𑀼 𑀯𑀺𑀬 𑀅𑀝𑁆𑀞𑀁𑀲𑀫𑁆𑀧𑀺 𑀙𑀴𑀁𑀲𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀯𑀸𑀲𑀻𑀳𑀻𑀢𑀺 𑀫𑀳𑀸𑀲𑀼𑀧𑁆𑀧𑀧𑀫𑀸𑀡𑀸𑀳𑀺 𑀯𑀸𑀲𑀻𑀳𑀺. 𑀭𑀣𑁂 𑀬𑁄𑀚𑁂𑀢𑁆𑀯𑀸𑀢𑀺 𑀲𑀤𑁆𑀥𑀺𑀁 𑀬𑀼𑀕𑀬𑁄𑀢𑁆𑀢𑀉𑀧𑀓𑁆𑀔𑀭𑀘𑀓𑁆𑀓𑀓𑀼𑀩𑁆𑀩𑀭𑀧𑀸𑀚𑀦𑁂𑀳𑀺 𑀲𑀩𑁆𑀩𑀢𑁄 𑀧𑀚𑁆𑀚𑀮𑀺𑀢𑁂 𑀭𑀣𑁂 𑀬𑁄𑀚𑁂𑀢𑁆𑀯𑀸. 𑀫𑀳𑀦𑁆𑀢𑀦𑁆𑀢𑀺 𑀫𑀳𑀸𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁. 𑀆𑀭𑁄𑀧𑁂𑀦𑁆𑀢𑀻𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑁂𑀳𑀺 𑀅𑀬𑀫𑀼𑀕𑁆𑀕𑀭𑁂𑀳𑀺 𑀧𑁄𑀣𑁂𑀦𑁆𑀢𑀸 𑀆𑀭𑁄𑀧𑁂𑀦𑁆𑀢𑀺. 𑀲𑀓𑀺𑀫𑁆𑀧𑀺 𑀉𑀤𑁆𑀥𑀦𑁆𑀢𑀺 𑀲𑀼𑀧𑀓𑁆𑀓𑀼𑀢𑁆𑀣𑀺𑀢𑀸𑀬 𑀉𑀓𑁆𑀔𑀮𑀺𑀬𑀸 𑀧𑀓𑁆𑀔𑀺𑀢𑁆𑀢𑀢𑀡𑁆𑀟𑀼𑀮𑀁 𑀯𑀺𑀬 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘 𑀕𑀘𑁆𑀙𑀢𑀺. 𑀫𑀳𑀸𑀦𑀺𑀭𑀬𑁂𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀫𑁆𑀳𑀺.

𑀘𑀢𑀼𑀓𑁆𑀓𑀡𑁆𑀡𑁄𑀢𑀺 𑀘𑀢𑀼𑀭𑀲𑁆𑀲𑀫𑀜𑁆𑀚𑀽𑀲𑀸𑀲𑀤𑀺𑀲𑁄. 𑀯𑀺𑀪𑀢𑁆𑀢𑁄𑀢𑀺 𑀘𑀢𑀼𑀤𑁆𑀯𑀸𑀭𑀯𑀲𑁂𑀦 𑀯𑀺𑀪𑀢𑁆𑀢𑁄. 𑀪𑀸𑀕𑀲𑁄 𑀫𑀺𑀢𑁄𑀢𑀺 𑀤𑁆𑀯𑀸𑀭𑀯𑀻𑀣𑀻𑀦𑀁 𑀯𑀲𑁂𑀦 𑀪𑀸𑀕𑁂 𑀞𑀧𑁂𑀢𑁆𑀯𑀸 𑀞𑀧𑁂𑀢𑁆𑀯𑀸 𑀯𑀺𑀪𑀢𑁆𑀢𑁄. 𑀧𑀭𑀺𑀬𑀦𑁆𑀢𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀅𑀬𑀲𑀸𑀢𑀺 𑀉𑀧𑀭𑀺 𑀦𑀯𑀬𑁄𑀚𑀦𑀺𑀓𑁂𑀦 𑀅𑀬𑀧𑀢𑁆𑀢𑁂𑀦 𑀙𑀸𑀤𑀺𑀢𑁄. 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀏𑀯𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀬𑀣𑀸 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀅𑀓𑁆𑀔𑀻𑀦𑀺 𑀬𑀫𑀓𑀕𑁄𑀴𑀓𑀸 𑀯𑀺𑀬 𑀦𑀺𑀓𑁆𑀔𑀫𑀦𑁆𑀢𑀺. 𑀓𑀤𑀭𑀺𑀬𑀸𑀢𑀧𑀦𑀸𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀉𑀲𑁆𑀲𑀤𑁂𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞 𑀫𑀳𑀸𑀦𑀺𑀭𑀬𑀸 𑀓𑀤𑀭𑀺𑀬𑀸 𑀦𑀺𑀘𑁆𑀘𑀁 𑀢𑀧𑀦𑁆𑀢𑀻𑀢𑀺 𑀓𑀤𑀭𑀺𑀬𑀸𑀢𑀧𑀦𑀸. 𑀩𑀮𑀯𑀤𑀼𑀓𑁆𑀔𑀢𑀸𑀬 𑀖𑁄𑀭𑀸. 𑀓𑀧𑁆𑀧𑀝𑁆𑀞𑀺𑀓𑀸𑀦𑀁 𑀅𑀘𑁆𑀘𑀻𑀦𑀁 𑀅𑀢𑁆𑀣𑀺𑀢𑀸𑀬 𑀅𑀘𑁆𑀘𑀺𑀫𑀦𑁆𑀢𑁄. 𑀆𑀲𑀸𑀤𑁂𑀢𑀼𑀁 𑀖𑀝𑁆𑀝𑁂𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀤𑀼𑀭𑀸𑀲𑀤𑀸. 𑀤𑀺𑀝𑁆𑀞𑀫𑀢𑁆𑀢𑀸 𑀯𑀸 𑀲𑀼𑀢𑀫𑀢𑁆𑀢𑀸 𑀯𑀸 𑀮𑁄𑀫𑀸𑀦𑀺 𑀳𑀁𑀲𑁂𑀦𑁆𑀢𑀻𑀢𑀺 𑀮𑁄𑀫𑀳𑀁𑀲𑀦𑀭𑀽𑀧𑀸. 𑀪𑀻𑀲𑀦𑀢𑀸𑀬 𑀪𑀺𑀲𑁆𑀫𑀸. 𑀪𑀬𑀚𑀦𑀦𑀢𑀸𑀬 𑀧𑀝𑀺𑀪𑀬𑀸. 𑀲𑀼𑀔𑀸𑀪𑀸𑀯𑁂𑀦 𑀤𑀼𑀔𑀸.

𑀧𑀼𑀭𑀢𑁆𑀣𑀺𑀫𑀸𑀬 𑀪𑀺𑀢𑁆𑀢𑀺𑀬𑀸𑀢𑀺𑀆𑀤𑀺𑀕𑀸𑀣𑀸𑀦𑀁 𑀏𑀯𑀁 𑀅𑀯𑀻𑀘𑀺𑀦𑀺𑀭𑀬𑁄𑀢𑀺 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀕𑁆𑀕𑀺𑀚𑀸𑀮𑀸𑀦𑀁 𑀯𑀸 𑀧𑀦 𑀲𑀢𑁆𑀢𑀸𑀦𑀁 𑀯𑀸 𑀢𑁂𑀲𑀁 𑀤𑀼𑀓𑁆𑀔𑀲𑁆𑀲 𑀯𑀸 𑀯𑀻𑀘𑀺 𑀅𑀦𑁆𑀢𑀭𑀁 𑀦𑀢𑁆𑀣𑀺 𑀏𑀢𑁆𑀣𑀸𑀢𑀺 𑀅𑀯𑀻𑀘𑀺. 𑀢𑀢𑁆𑀭 𑀳𑀺 𑀧𑀼𑀭𑀢𑁆𑀣𑀺𑀫𑀸𑀤𑀻𑀳𑀺 𑀪𑀺𑀢𑁆𑀢𑀻𑀳𑀺 𑀚𑀸𑀮𑀸𑀭𑀸𑀲𑀺 𑀉𑀝𑁆𑀞𑀳𑀺𑀢𑁆𑀯𑀸 𑀧𑀸𑀧𑀓𑀫𑁆𑀫𑀺𑀦𑁄 𑀧𑀼𑀕𑁆𑀕𑀮𑁂 𑀛𑀸𑀧𑁂𑀦𑁆𑀢𑁄 𑀧𑀘𑁆𑀙𑀺𑀫𑀸𑀤𑀻𑀲𑀼 𑀪𑀺𑀢𑁆𑀢𑀻𑀲𑀼 𑀧𑀝𑀺𑀳𑀜𑁆𑀜𑀢𑀺 𑀧𑀳𑀭𑀢𑀺, 𑀢𑀸 𑀘 𑀪𑀺𑀢𑁆𑀢𑀺𑀬𑁄 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀢𑁄 𑀬𑁄𑀚𑀦𑀲𑀢𑀁 𑀕𑀡𑁆𑀳𑀸𑀢𑀺, 𑀳𑁂𑀝𑁆𑀞𑀸 𑀉𑀝𑁆𑀞𑀺𑀢𑀸 𑀉𑀧𑀭𑀺 𑀧𑀝𑀺𑀳𑀜𑁆𑀜𑀢𑀺, 𑀉𑀧𑀭𑀺 𑀉𑀝𑁆𑀞𑀺𑀢𑀸 𑀳𑁂𑀝𑁆𑀞𑀸 𑀧𑀝𑀺𑀳𑀜𑁆𑀜𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀚𑀸𑀮𑀸𑀦𑀁 𑀯𑀻𑀘𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀧𑀦 𑀅𑀦𑁆𑀢𑁄 𑀬𑁄𑀚𑀦𑀲𑀢𑀝𑁆𑀞𑀸𑀦𑀁 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞𑀲𑁆𑀲 𑀧𑀽𑀭𑀺𑀢𑀦𑀸𑀴𑀺 𑀯𑀺𑀬 𑀲𑀢𑁆𑀢𑁂𑀳𑀺 𑀦𑀺𑀭𑀦𑁆𑀢𑀭𑀁 𑀧𑀽𑀭𑀺𑀢𑀁 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀘𑁆𑀘𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀺, 𑀲𑀓𑀲𑀓𑀝𑁆𑀞𑀸𑀦𑁂𑀬𑁂𑀯 𑀧𑀘𑁆𑀘𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀲𑀢𑁆𑀢𑀸𑀦𑀁 𑀯𑀻𑀘𑀺 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀚𑀺𑀯𑁆𑀳𑀕𑁆𑀕𑁂 𑀙 𑀫𑀥𑀼𑀩𑀺𑀦𑁆𑀤𑀽𑀦𑀺 𑀲𑀢𑁆𑀢𑀫𑀲𑁆𑀲 𑀢𑀫𑁆𑀩𑀮𑁄𑀳𑀩𑀺𑀦𑁆𑀤𑀼𑀦𑁄 𑀅𑀦𑀼𑀤𑀳𑀦𑀩𑀮𑀯𑀢𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀢𑀢𑁆𑀣 𑀅𑀦𑀼𑀤𑀳𑀦𑀩𑀮𑀯𑀢𑀸𑀬 𑀲𑁂𑀲𑀸 𑀙 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑁂𑀓𑁆𑀔𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀺, 𑀤𑀼𑀓𑁆𑀔𑀫𑁂𑀯 𑀦𑀺𑀭𑀦𑁆𑀢𑀭𑀁 𑀧𑀜𑁆𑀜𑀸𑀬𑀢𑀺. 𑀏𑀯𑀫𑁂𑀢𑁆𑀣 𑀤𑀼𑀓𑁆𑀔𑀲𑁆𑀲 𑀯𑀻𑀘𑀺 𑀦𑀸𑀫 𑀦𑀢𑁆𑀣𑀺. 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀦𑀺𑀭𑀬𑁄.

𑀢𑀢𑁆𑀣 𑀲𑀢𑁆𑀢𑀸 𑀫𑀳𑀸𑀮𑀼𑀤𑁆𑀤𑀸𑀢𑀺 𑀢𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀢𑀸 𑀫𑀳𑀦𑁆𑀢𑀸 𑀮𑀼𑀤𑁆𑀤𑀸. 𑀫𑀳𑀸𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑁄𑀢𑀺 𑀫𑀳𑀦𑁆𑀢𑀤𑀸𑀭𑀼𑀡𑀓𑀫𑁆𑀫𑀓𑀸𑀭𑀺𑀦𑁄. 𑀅𑀘𑁆𑀘𑀦𑁆𑀢𑀧𑀸𑀧𑀓𑀫𑁆𑀫𑀦𑁆𑀢𑀸𑀢𑀺 𑀏𑀓𑀁𑀲𑁂𑀦 𑀧𑀸𑀧𑀓𑀫𑁆𑀫𑀺𑀦𑁄. 𑀧𑀘𑁆𑀘𑀦𑁆𑀢𑀺 𑀦 𑀘 𑀫𑀺𑀬𑁆𑀬𑀭𑁂𑀢𑀺 𑀙𑀦𑁆𑀦𑀁 𑀚𑀸𑀮𑀸𑀦𑀫𑀦𑁆𑀢𑀭𑁂 𑀧𑀘𑁆𑀘𑀦𑁆𑀢𑀺, 𑀦 𑀘 𑀫𑀺𑀬𑁆𑀬𑀦𑁆𑀢𑀺. 𑀚𑀸𑀢𑀯𑁂𑀤𑀲𑀫𑁄 𑀓𑀸𑀬𑁄𑀢𑀺 𑀢𑁂𑀲𑀁 𑀲𑀭𑀻𑀭𑀁 𑀅𑀕𑁆𑀕𑀺𑀲𑀤𑀺𑀲𑀁. 𑀢𑁂𑀲𑀁 𑀦𑀺𑀭𑀬𑀯𑀸𑀲𑀺𑀦𑀦𑁆𑀢𑀺 𑀢𑁂𑀲𑀁 𑀧𑀸𑀧𑀓𑀫𑁆𑀫𑀸𑀦𑀁 𑀦𑀺𑀭𑀬𑀯𑀸𑀲𑀻𑀦𑀁. 𑀧𑀲𑁆𑀲 𑀓𑀫𑁆𑀫𑀸𑀦𑀁 𑀤𑀴𑁆𑀳𑀢𑁆𑀢𑀦𑁆𑀢𑀺 𑀧𑀸𑀧𑀓𑀫𑁆𑀫𑀸𑀦𑀁 𑀣𑀺𑀭𑀪𑀸𑀯𑀁 𑀑𑀮𑁄𑀓𑁂𑀳𑀺. 𑀦 𑀪𑀲𑁆𑀫𑀸 𑀳𑁄𑀢𑀺 𑀦𑀧𑀻 𑀫𑀲𑀻𑀢𑀺 𑀙𑀸𑀭𑀺𑀓𑀸𑀧𑀺 𑀦 𑀳𑁄𑀢𑀺 𑀅𑀗𑁆𑀕𑀸𑀭𑁄𑀧𑀺. 𑀧𑀼𑀭𑀢𑁆𑀣𑀺𑀫𑁂𑀦𑀸𑀢𑀺 𑀬𑀤𑀸 𑀢𑀁 𑀤𑁆𑀯𑀸𑀭𑀁 𑀅𑀧𑀸𑀭𑀼𑀢𑀁 𑀳𑁄𑀢𑀺, 𑀅𑀣 𑀢𑀤𑀪𑀺𑀫𑀼𑀔𑀸 𑀥𑀸𑀯𑀦𑁆𑀢𑀺, 𑀢𑁂𑀲𑀁 𑀢𑀢𑁆𑀣 𑀙𑀯𑀺𑀆𑀤𑀻𑀦𑀺 𑀛𑀸𑀬𑀦𑁆𑀢𑀺. 𑀤𑁆𑀯𑀸𑀭𑀲𑀫𑀻𑀧𑀁 𑀧𑀢𑁆𑀢𑀸𑀦𑀜𑁆𑀘 𑀢𑁂𑀲𑀁 𑀢𑀁 𑀧𑀻𑀥𑀻𑀬𑀢𑀺, 𑀧𑀘𑁆𑀙𑀺𑀫𑀁 𑀅𑀧𑀸𑀭𑀼𑀢𑀁 𑀯𑀺𑀬 𑀔𑀸𑀬𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀪𑀺𑀦𑀺𑀓𑁆𑀔𑀫𑀺𑀢𑀸𑀲𑀸 𑀢𑁂𑀢𑀺 𑀦𑀺𑀭𑀬𑀸 𑀦𑀺𑀓𑁆𑀔𑀫𑀺𑀢𑀼𑀁 𑀆𑀲𑀸 𑀏𑀢𑁂𑀲𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑀸𑀲𑀸. 𑀫𑁄𑀓𑁆𑀔𑀕𑀯𑁂𑀲𑀺𑀦𑁄𑀢𑀺 𑀫𑀼𑀜𑁆𑀘𑀦𑀼𑀧𑀸𑀬𑀁 𑀏𑀲𑀦𑁆𑀢𑀸 𑀕𑀯𑁂𑀲𑀦𑁆𑀢𑀸𑀧𑀺. 𑀦 𑀢𑁂 𑀢𑀢𑁄 𑀦𑀺𑀓𑁆𑀔𑀫𑀺𑀢𑀼𑀁, 𑀮𑀪𑀦𑁆𑀢𑀺 𑀓𑀫𑁆𑀫𑀧𑀘𑁆𑀘𑀬𑀸𑀢𑀺 𑀢𑁂 𑀲𑀢𑁆𑀢𑀸 𑀦𑀺𑀭𑀬𑀢𑁄 𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀁 𑀧𑀸𑀧𑀓𑀫𑁆𑀫𑀧𑀘𑁆𑀘𑀬𑀸 𑀦𑀸𑀥𑀺𑀕𑀘𑁆𑀙𑀦𑁆𑀢𑀺. 𑀢𑁂𑀲𑀜𑁆𑀘 𑀧𑀸𑀧𑀓𑀫𑁆𑀫𑀦𑁆𑀢𑀁, 𑀅𑀯𑀺𑀧𑀓𑁆𑀓𑀁 𑀓𑀢𑀁 𑀩𑀳𑀼𑀦𑁆𑀢𑀺 𑀢𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀮𑀸𑀫𑀓𑀁 𑀤𑀸𑀭𑀼𑀡𑀓𑀫𑁆𑀫𑀁 𑀅𑀯𑀺𑀧𑀸𑀓𑀁 𑀩𑀳𑀼𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀁 𑀅𑀤𑀺𑀦𑁆𑀦𑀯𑀺𑀧𑀸𑀓𑀁 𑀓𑀢𑀁 𑀉𑀧𑀘𑀺𑀢𑀁 𑀅𑀢𑁆𑀣𑀺.

𑀲𑀁𑀯𑁂𑀕𑀦𑁆𑀢𑀺 𑀯𑀺𑀦𑀺𑀮𑀦𑀁. 𑀉𑀩𑁆𑀩𑁂𑀕𑀦𑁆𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀕𑀫𑀦𑀁. 𑀉𑀢𑁆𑀭𑀸𑀲𑀦𑁆𑀢𑀺 𑀉𑀩𑁆𑀩𑁂𑀚𑀦𑀁 𑀅𑀲𑀦𑁆𑀦𑀺𑀝𑁆𑀞𑀸𑀦𑀁. 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀦𑀁. 𑀧𑀻𑀴𑀦𑀦𑁆𑀢𑀺 𑀖𑀝𑁆𑀝𑀦𑀁. 𑀖𑀝𑁆𑀝𑀦𑀦𑁆𑀢𑀺 𑀧𑀻𑀴𑀸𑀓𑀭𑀡𑀁. 𑀉𑀧𑀤𑁆𑀤𑀯𑀦𑁆𑀢𑀺 𑀈𑀢𑀺𑀁. 𑀉𑀧𑀲𑀕𑁆𑀕𑀦𑁆𑀢𑀺 𑀭𑀼𑀦𑁆𑀥𑀦𑀁.

𑁧𑁭𑁧. 𑀇𑀤𑀸𑀦𑀺 𑀬𑀣𑀸𑀦𑁂𑀦 𑀲𑀁𑀯𑀺𑀚𑀺𑀢𑀁, 𑀢𑀁 𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀨𑀦𑁆𑀤𑀫𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀦𑁆𑀤𑀫𑀸𑀦𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀓𑀫𑁆𑀧𑀫𑀸𑀦𑀁. 𑀅𑀧𑁆𑀧𑁄𑀤𑀓𑁂𑀢𑀺 𑀅𑀧𑁆𑀧𑁂 𑀉𑀤𑀓𑁂. 𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀸𑀭𑀼𑀤𑁆𑀥𑁂 𑀤𑀺𑀲𑁆𑀯𑀸𑀢𑀺 𑀦𑀸𑀦𑀸𑀲𑀢𑁆𑀢𑁂 𑀘 𑀅𑀜𑁆𑀜𑀫𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀯𑀺𑀭𑀼𑀤𑁆𑀥𑁂 𑀤𑀺𑀲𑁆𑀯𑀸. 𑀫𑀁 𑀪𑀬𑀫𑀸𑀯𑀺𑀲𑀻𑀢𑀺 𑀫𑀁 𑀪𑀬𑀁 𑀧𑀯𑀺𑀝𑁆𑀞𑀁.

𑀓𑀺𑀮𑁂𑀲𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀦𑁆𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀘𑀮𑀦𑀸𑀬 𑀘𑀮𑀫𑀸𑀦𑀁. 𑀧𑀬𑁄𑀕𑁄𑀢𑀺 𑀓𑀸𑀬𑀯𑀘𑀻𑀫𑀦𑁄𑀧𑀬𑁄𑀕𑁄.

𑀯𑀺𑀭𑀼𑀤𑁆𑀥𑀸𑀢𑀺 𑀯𑀺𑀭𑁄𑀥𑀫𑀸𑀧𑀦𑁆𑀦𑀸. 𑀧𑀝𑀺𑀯𑀺𑀭𑀼𑀤𑁆𑀥𑀸𑀢𑀺 𑀧𑀝𑀺𑀫𑀼𑀔𑀁 𑀳𑀼𑀢𑁆𑀯𑀸 𑀯𑀺𑀭𑁄𑀥𑀫𑀸𑀧𑀦𑁆𑀦𑀸, 𑀲𑀼𑀝𑁆𑀞𑀼 𑀯𑀺𑀭𑀼𑀤𑁆𑀥𑀸 𑀯𑀸. 𑀆𑀳𑀢𑀸𑀢𑀺 𑀓𑁄𑀥𑁂𑀦 𑀆𑀳𑀢𑀸 𑀧𑀳𑀢𑀸. 𑀧𑀘𑁆𑀘𑀸𑀳𑀢𑀸𑀢𑀺 𑀧𑀝𑀺𑀫𑀮𑁆𑀮𑀸 𑀳𑀼𑀢𑁆𑀯𑀸 𑀆𑀳𑀢𑀸. 𑀆𑀖𑀸𑀢𑀺𑀢𑀸𑀢𑀺 𑀖𑀝𑁆𑀝𑀺𑀢𑀸. 𑀧𑀘𑁆𑀘𑀸𑀖𑀸𑀢𑀺𑀢𑀸𑀢𑀺 𑀯𑀺𑀲𑁂𑀲𑁂𑀦 𑀖𑀝𑁆𑀝𑀺𑀢𑀸. 𑀧𑀸𑀡𑀻𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀻𑀢𑀺 𑀳𑀢𑁆𑀣𑁂𑀳𑀺𑀧𑀺 𑀧𑀳𑀭𑀦𑁆𑀢𑀺.

𑁧𑁭𑁨. 𑀲𑀫𑀦𑁆𑀢𑀫𑀲𑀸𑀭𑁄 𑀮𑁄𑀓𑁄𑀢𑀺 𑀦𑀺𑀭𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀫𑀦𑁆𑀢𑀢𑁄 𑀮𑁄𑀓𑁄 𑀅𑀲𑀸𑀭𑁄 𑀦𑀺𑀘𑁆𑀘𑀲𑀸𑀭𑀸𑀤𑀺𑀭𑀳𑀺𑀢𑁄. 𑀤𑀺𑀲𑀸 𑀲𑀩𑁆𑀩𑀸 𑀲𑀫𑁂𑀭𑀺𑀢𑀸𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀅𑀦𑀺𑀘𑁆𑀘𑀢𑀸𑀬 𑀓𑀫𑁆𑀧𑀺𑀢𑀸. 𑀇𑀘𑁆𑀙𑀁 𑀪𑀯𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀢𑀸𑀡𑀁 𑀇𑀘𑁆𑀙𑀦𑁆𑀢𑁄. 𑀦𑀸𑀤𑁆𑀤𑀲𑀸𑀲𑀺𑀁 𑀅𑀦𑁄𑀲𑀺𑀢𑀦𑁆𑀢𑀺 𑀓𑀺𑀜𑁆𑀘𑀺 𑀞𑀸𑀦𑀁 𑀚𑀭𑀸𑀤𑀻𑀳𑀺 𑀅𑀦𑀚𑁆𑀛𑀸𑀯𑀼𑀝𑁆𑀞𑀁 𑀦𑀸𑀤𑁆𑀤𑀓𑁆𑀔𑀺𑀦𑁆𑀢𑀺.

𑀅𑀲𑀸𑀭𑁄𑀢𑀺 𑀦 𑀲𑀸𑀭𑁄, 𑀲𑀸𑀭𑀯𑀺𑀭𑀳𑀺𑀢𑁄 𑀯𑀸. 𑀦𑀺𑀲𑁆𑀲𑀸𑀭𑁄𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀭𑀯𑀺𑀭𑀳𑀺𑀢𑁄. 𑀲𑀸𑀭𑀸𑀧𑀕𑀢𑁄𑀢𑀺 𑀲𑀸𑀭𑀢𑁄 𑀅𑀧𑀕𑀢𑁄. 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸𑀢𑀺 𑀲𑀢𑀢𑀲𑀸𑀭𑀲𑀗𑁆𑀔𑀸𑀢𑁂𑀦 𑀲𑀸𑀭𑁂𑀦 𑀯𑀸. 𑀉𑀧𑀭𑀺𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀗𑁆𑀔𑀸𑀭𑀸𑀢𑀺 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀓𑀢𑀸 𑀲𑀗𑁆𑀔𑀸𑀭𑀸. 𑀢𑁂𑀧𑀺 𑀏𑀭𑀺𑀢𑀸𑀢𑀺 𑀢𑁂𑀧𑀺 𑀲𑀗𑁆𑀔𑀸𑀭𑀸 𑀓𑀫𑁆𑀧𑀺𑀢𑀸. 𑀲𑀫𑁂𑀭𑀺𑀢𑀸𑀢𑀺 𑀲𑀫𑁆𑀫𑀸 𑀓𑀫𑁆𑀧𑀺𑀢𑀸. 𑀘𑀮𑀺𑀢𑀸𑀢𑀺 𑀘𑀮𑀦𑀁 𑀕𑀢𑀸. 𑀖𑀝𑁆𑀝𑀺𑀢𑀸𑀢𑀺 𑀉𑀤𑀬𑀩𑁆𑀩𑀬𑁂𑀦 𑀧𑀻𑀴𑀺𑀢𑀸. 𑀅𑀦𑀺𑀘𑁆𑀘𑀢𑀸𑀬𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑀸𑀬. 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀦𑀼𑀧𑀯𑀺𑀝𑁆𑀞𑀸. 𑀚𑀭𑀸𑀬 𑀅𑀦𑀼𑀲𑀝𑀸𑀢𑀺 𑀧𑀭𑀺𑀧𑀓𑁆𑀓𑀢𑀸𑀬 𑀅𑀦𑀼𑀧𑀢𑁆𑀣𑀝𑀸. 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸𑀢𑀺 𑀘𑀸𑀢𑀼𑀯𑀺𑀲𑀫𑁂𑀦 𑀉𑀧𑁆𑀧𑀦𑁆𑀦𑀩𑁆𑀬𑀸𑀥𑀺𑀦𑀸 𑀅𑀚𑁆𑀛𑁄𑀢𑁆𑀣𑀝𑀸. 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸𑀢𑀺 𑀫𑀘𑁆𑀘𑀼𑀦𑀸 𑀅𑀪𑀺𑀆𑀳𑀢𑀸 𑀧𑀳𑀢𑀸. 𑀅𑀢𑀸𑀡𑀸𑀢𑀺 𑀭𑀓𑁆𑀔𑀯𑀺𑀭𑀳𑀺𑀢𑀸. 𑀅𑀮𑁂𑀡𑀸𑀢𑀺 𑀮𑁂𑀡𑀯𑀺𑀭𑀳𑀺𑀢𑀸. 𑀅𑀲𑀭𑀡𑀸𑀢𑀺 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀭𑀡𑀦𑁆𑀢𑀺 𑀅𑀲𑀭𑀡𑀸. 𑀅𑀲𑀭𑀡𑀻𑀪𑀽𑀢𑀸𑀢𑀺 𑀲𑀬𑀁 𑀲𑀭𑀡𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀲𑀭𑀡𑀻𑀪𑀽𑀢𑀸.

𑀅𑀢𑁆𑀢𑀦𑁄 𑀪𑀯𑀦𑀦𑁆𑀢𑀺 𑀦𑀺𑀤𑁆𑀤𑁂𑀲𑀧𑀤𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀢𑀸𑀡𑀦𑁆𑀢𑀺 𑀧𑀸𑀮𑀦𑀁. 𑀮𑁂𑀡𑀦𑁆𑀢𑀺 𑀮𑁂𑀡𑀝𑁆𑀞𑀸𑀦𑀁. 𑀲𑀭𑀡𑀦𑁆𑀢𑀺 𑀤𑀼𑀓𑁆𑀔𑀦𑀸𑀲𑀦𑀁. 𑀕𑀢𑀺𑀦𑁆𑀢𑀺 𑀧𑀢𑀺𑀝𑁆𑀞𑀁. 𑀧𑀭𑀸𑀬𑀦𑀦𑁆𑀢𑀺 𑀧𑀭𑀁 𑀅𑀬𑀦𑀁. 𑀅𑀚𑁆𑀛𑁄𑀲𑀺𑀢𑀁𑀬𑁂𑀯 𑀅𑀤𑁆𑀤𑀲𑀦𑁆𑀢𑀺 𑀚𑀭𑀸𑀤𑀻𑀳𑀺 𑀫𑀤𑁆𑀤𑀺𑀢𑀁𑀬𑁂𑀯 𑀅𑀤𑁆𑀤𑀓𑁆𑀔𑀺𑀁. 𑀲𑀩𑁆𑀩𑀁 𑀬𑁄𑀩𑁆𑀩𑀜𑁆𑀜𑀦𑁆𑀢𑀺 𑀬𑁄𑀩𑁆𑀩𑀦𑀪𑀸𑀯𑁄 𑀬𑁄𑀩𑁆𑀩𑀜𑁆𑀜𑀁, 𑀲𑀘𑁂𑀢𑀦𑀸𑀦𑀁 𑀲𑀩𑁆𑀩𑀁 𑀬𑁄𑀩𑁆𑀩𑀜𑁆𑀜𑀁. 𑀚𑀭𑀸𑀬 𑀑𑀲𑀺𑀢𑀦𑁆𑀢𑀺 𑀧𑀭𑀺𑀧𑀸𑀓𑀸𑀬 𑀚𑀭𑀸𑀬 𑀅𑀯𑀲𑀺𑀢𑀁 𑀫𑀤𑁆𑀤𑀺𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣.

𑁧𑁭𑁩. 𑀑𑀲𑀸𑀦𑁂 𑀢𑁆𑀯𑁂𑀯 𑀩𑁆𑀬𑀸𑀭𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀫𑁂 𑀅𑀭𑀢𑀻 𑀅𑀳𑀽𑀢𑀺 𑀬𑁄𑀩𑁆𑀩𑀜𑁆𑀜𑀸𑀤𑀻𑀦𑀁 𑀑𑀲𑀸𑀦𑁂𑀬𑁂𑀯 𑀅𑀦𑁆𑀢𑀕𑀫𑀓𑁂 𑀏𑀯 𑀯𑀺𑀦𑀸𑀲𑀓𑁂 𑀏𑀯 𑀚𑀭𑀸𑀤𑀻𑀳𑀺 𑀩𑁆𑀬𑀸𑀭𑀼𑀤𑁆𑀥𑁂 𑀆𑀳𑀢𑀘𑀺𑀢𑁆𑀢𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀅𑀭𑀢𑀺 𑀫𑁂 𑀅𑀳𑁄𑀲𑀺. 𑀅𑀣𑁂𑀢𑁆𑀣 𑀲𑀮𑁆𑀮𑀦𑁆𑀢𑀺 𑀅𑀣 𑀏𑀢𑁂𑀲𑀼 𑀲𑀢𑁆𑀢𑁂𑀲𑀼 𑀭𑀸𑀕𑀸𑀤𑀺𑀲𑀮𑁆𑀮𑀁. 𑀳𑀤𑀬𑀲𑁆𑀲𑀺𑀢𑀦𑁆𑀢𑀺 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀁.

𑀬𑁄𑀩𑁆𑀩𑀜𑁆𑀜𑀁 𑀚𑀭𑀸 𑀑𑀲𑀸𑀧𑁂𑀢𑀻𑀢𑀺 𑀚𑀭𑀸 𑀅𑀢𑁆𑀣𑀗𑁆𑀕𑀫𑁂𑀢𑀺 𑀯𑀺𑀦𑀸𑀲𑁂𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣.

𑁧𑁭𑁪. ‘‘𑀓𑀣𑀁 𑀆𑀦𑀼𑀪𑀸𑀯𑀁 𑀲𑀮𑁆𑀮’’𑀦𑁆𑀢𑀺 𑀘𑁂? 𑀬𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄𑀢𑀺 𑀕𑀸𑀣𑀸. 𑀢𑀢𑁆𑀣 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀥𑀸𑀯𑀢𑀻𑀢𑀺 𑀲𑀩𑁆𑀩𑀸 𑀤𑀼𑀘𑁆𑀘𑀭𑀺𑀢𑀤𑀺𑀲𑀸𑀧𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀧𑀺 𑀯𑀺𑀤𑀺𑀲𑀸𑀧𑀺 𑀥𑀸𑀯𑀢𑀺. 𑀢𑀫𑁂𑀯 𑀲𑀮𑁆𑀮𑀫𑀩𑁆𑀩𑀼𑀬𑁆𑀳, 𑀦 𑀥𑀸𑀯𑀢𑀺 𑀦 𑀲𑀻𑀤𑀢𑀻𑀢𑀺 𑀢𑀫𑁂𑀯 𑀲𑀮𑁆𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀸 𑀘 𑀤𑀺𑀲𑀸 𑀦 𑀥𑀸𑀯𑀢𑀺, 𑀘𑀢𑀼𑀭𑁄𑀖𑁂 𑀘 𑀦 𑀲𑀻𑀤𑀢𑀺.

𑀅𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀜𑀸𑀡𑀤𑀲𑁆𑀲𑀦𑀧𑀝𑀺𑀧𑀓𑁆𑀔𑀢𑁄 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁. 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀦 𑀲𑀫𑁂𑀢𑀺 𑀦 𑀲𑀫𑀸𑀕𑀘𑁆𑀙𑀢𑀻𑀢𑀺 𑀅𑀦𑀪𑀺𑀲𑀫𑀬𑁄. 𑀅𑀦𑀼𑀭𑀽𑀧𑀢𑁄 𑀥𑀫𑁆𑀫𑁂 𑀩𑀼𑀚𑁆𑀛𑀢𑀻𑀢𑀺 𑀅𑀦𑀼𑀩𑁄𑀥𑁄. 𑀢𑀧𑁆𑀧𑀝𑀺𑀧𑀓𑁆𑀔𑀢𑀸𑀬 𑀅𑀦𑀦𑀼𑀩𑁄𑀥𑁄. 𑀅𑀦𑀺𑀘𑁆𑀘𑀸𑀤𑀻𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀦 𑀩𑀼𑀚𑁆𑀛𑀢𑀻𑀢𑀺 𑀅𑀲𑀫𑁆𑀩𑁄𑀥𑁄. 𑀅𑀲𑀦𑁆𑀢𑀁 𑀅𑀲𑀫𑀜𑁆𑀘 𑀩𑀼𑀚𑁆𑀛𑀢𑀻𑀢𑀺𑀧𑀺 𑀅𑀲𑀫𑁆𑀩𑁄𑀥𑁄. 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀧𑁆𑀧𑀝𑀺𑀯𑁂𑀥𑁄. 𑀭𑀽𑀧𑀸𑀤𑀻𑀲𑀼 𑀏𑀓𑀥𑀫𑁆𑀫𑀫𑁆𑀧𑀺 𑀅𑀦𑀺𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀢𑁄 𑀦 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀅𑀲𑀗𑁆𑀕𑀸𑀳𑀡𑀸. 𑀢𑀫𑁂𑀯 𑀥𑀫𑁆𑀫𑀁 𑀦 𑀧𑀭𑀺𑀬𑁄𑀕𑀸𑀳𑀢𑀻𑀢𑀺 𑀅𑀧𑀭𑀺𑀬𑁄𑀕𑀸𑀳𑀡𑀸. 𑀦 𑀲𑀫𑀁 𑀧𑁂𑀓𑁆𑀔𑀢𑀻𑀢𑀺 𑀅𑀲𑀫𑀧𑁂𑀓𑁆𑀔𑀦𑀸. 𑀥𑀫𑁆𑀫𑀸𑀦𑀁 𑀲𑀪𑀸𑀯𑀁 𑀧𑀢𑀺 𑀦 𑀅𑀧𑁂𑀓𑁆𑀔𑀢𑀻𑀢𑀺 𑀅𑀧𑀘𑁆𑀘𑀯𑁂𑀓𑁆𑀔𑀡𑀸.

𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑁂𑀲𑀼 𑀯𑀺𑀧𑀭𑀻𑀢𑀯𑀼𑀢𑁆𑀢𑀺𑀬𑀸 𑀲𑀪𑀸𑀯𑀕𑀳𑀡𑀸𑀪𑀸𑀯𑁂𑀦 𑀯𑀸 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀏𑀢𑀲𑁆𑀲 𑀧𑀘𑁆𑀘𑀓𑁆𑀔𑀁 𑀦𑀢𑁆𑀣𑀺, 𑀲𑀬𑀁 𑀯𑀸 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀧𑀘𑁆𑀘𑀓𑁆𑀔𑀓𑀫𑁆𑀫𑀁. 𑀬𑀁 𑀏𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀫𑁂𑀚𑁆𑀛𑀁 𑀪𑀯𑁂𑀬𑁆𑀬 𑀲𑀼𑀘𑀺 𑀯𑁄𑀤𑀸𑀦𑀁, 𑀢𑀁 𑀤𑀼𑀝𑁆𑀞𑀼𑀁 𑀫𑁂𑀚𑁆𑀛𑀁 𑀇𑀫𑀺𑀦𑀸𑀢𑀺 𑀤𑀼𑀫𑁆𑀫𑁂𑀚𑁆𑀛𑀁. 𑀩𑀸𑀮𑀸𑀦𑀁 𑀪𑀸𑀯𑁄 𑀩𑀸𑀮𑁆𑀬𑀁. 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑁄. 𑀩𑀮𑀯𑀢𑀭𑁄 𑀫𑁄𑀳𑁄 𑀧𑀫𑁄𑀳𑁄. 𑀲𑀫𑀦𑁆𑀢𑀢𑁄 𑀫𑀼𑀬𑁆𑀳𑀢𑀻𑀢𑀺 𑀲𑀫𑁆𑀫𑁄𑀳𑁄. 𑀯𑀺𑀚𑁆𑀚𑀸𑀬 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀦 𑀯𑀺𑀚𑁆𑀚𑀸𑀢𑀺 𑀅𑀯𑀺𑀚𑁆𑀚𑀸. 𑀑𑀖𑀬𑁄𑀕𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀣𑀸𑀫𑀕𑀢𑀝𑁆𑀞𑁂𑀦 𑀅𑀦𑀼𑀲𑁂𑀢𑀻𑀢𑀺 𑀅𑀦𑀼𑀲𑀬𑁄. 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺 𑀅𑀪𑀺𑀪𑀯𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀳𑀺𑀢𑀕𑁆𑀕𑀳𑀡𑀸𑀪𑀸𑀯𑁂𑀦 𑀳𑀺𑀢𑀸𑀪𑀺𑀫𑀼𑀔𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀜𑁆𑀜𑀤𑀢𑁆𑀣𑀼 𑀮𑀗𑁆𑀕𑀢𑀺𑀬𑁂𑀯𑀸𑀢𑀺 𑀮𑀗𑁆𑀕𑀻, 𑀔𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀭𑀼𑀕𑁆𑀖𑀸𑀝𑀦𑀝𑁆𑀞𑁂𑀦 𑀯𑀸 𑀮𑀗𑁆𑀕𑀻. 𑀬𑀣𑀸 𑀳𑀺 𑀫𑀳𑀸𑀧𑀮𑀺𑀖𑀲𑀗𑁆𑀔𑀸𑀢𑀸 𑀮𑀗𑁆𑀕𑀻 𑀤𑀼𑀭𑀼𑀕𑁆𑀖𑀸𑀝𑀸 𑀳𑁄𑀢𑀺, 𑀏𑀯𑀫𑀬𑀫𑁆𑀧𑀺 𑀮𑀗𑁆𑀕𑀻 𑀯𑀺𑀬𑀸𑀢𑀺 𑀮𑀗𑁆𑀕𑀻. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀬𑀸 𑀏𑀯𑀭𑀽𑀧𑀸 𑀓𑀗𑁆𑀔𑀸𑀢𑀺 𑀏𑀢𑁆𑀣 𑀓𑀗𑁆𑀔𑀦𑀯𑀲𑁂𑀦 𑀓𑀗𑁆𑀔𑀸. 𑀓𑀗𑁆𑀔𑀁 𑀆𑀦𑀬𑀢𑀻𑀢𑀺 𑀓𑀗𑁆𑀔𑀸𑀬𑀦𑀸. 𑀧𑀼𑀭𑀺𑀫𑀓𑀗𑁆𑀔𑀸 𑀳𑀺 𑀉𑀢𑁆𑀢𑀭𑀓𑀗𑁆𑀔𑀁 𑀆𑀦𑀬𑀢𑀺 𑀦𑀸𑀫. 𑀆𑀓𑀸𑀭𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀓𑀗𑁆𑀔𑀸𑀲𑀫𑀗𑁆𑀕𑀺𑀘𑀺𑀢𑁆𑀢𑀁 𑀓𑀗𑁆𑀔𑀸𑀬 𑀆𑀬𑀺𑀢𑀢𑁆𑀢𑀸 𑀓𑀗𑁆𑀔𑀸𑀬𑀺𑀢𑀁 𑀦𑀸𑀫. 𑀢𑀲𑁆𑀲 𑀪𑀸𑀯𑁄 𑀓𑀗𑁆𑀔𑀸𑀬𑀺𑀢𑀢𑁆𑀢𑀁. 𑀯𑀺𑀫𑀢𑀻𑀢𑀺 𑀯𑀺𑀕𑀢𑀸 𑀫𑀢𑀺 𑀯𑀺𑀫𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀪𑀸𑀯𑀁 𑀯𑀸 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺 𑀓𑀺𑀮𑀫𑀢𑀺 𑀏𑀢𑀸𑀬𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀲𑀁𑀲𑀬𑀮𑀓𑁆𑀔𑀡𑀸, 𑀓𑀫𑁆𑀧𑀦𑀭𑀲𑀸, 𑀅𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀦𑁂𑀓𑀁𑀲𑀕𑁆𑀕𑀸𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀸, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀫𑁆𑀧𑀦𑀝𑁆𑀞𑁂𑀦 𑀤𑁆𑀯𑀺𑀥𑀸 𑀏𑀴𑀬𑀢𑀻𑀢𑀺 𑀤𑁆𑀯𑁂𑀴𑁆𑀳𑀓𑀁. 𑀧𑀝𑀺𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀤𑁆𑀯𑀺𑀥𑀸𑀧𑀣𑁄 𑀯𑀺𑀬𑀸𑀢𑀺 𑀤𑁆𑀯𑁂𑀥𑀸𑀧𑀣𑁄. ‘‘𑀦𑀺𑀘𑁆𑀘𑀁 𑀯𑀸 𑀇𑀤𑀁 𑀅𑀦𑀺𑀘𑁆𑀘𑀁 𑀯𑀸’’𑀢𑀺𑀆𑀤𑀺𑀧𑀯𑀢𑁆𑀢𑀺𑀬𑀸 𑀏𑀓𑀲𑁆𑀫𑀺𑀁 𑀆𑀓𑀸𑀭𑁂 𑀲𑀡𑁆𑀞𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀲𑀫𑀦𑁆𑀢𑀢𑁄 𑀲𑁂𑀢𑀻𑀢𑀺 𑀲𑀁𑀲𑀬𑁄. 𑀏𑀓𑀁𑀲𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦 𑀏𑀓𑀁𑀲𑀕𑁆𑀕𑀸𑀳𑁄𑀢𑀺 𑀅𑀦𑁂𑀓𑀁𑀲𑀕𑁆𑀕𑀸𑀳𑁄. 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀆𑀭𑀫𑁆𑀫𑀡𑀢𑁄 𑀑𑀲𑀓𑁆𑀓𑀢𑀻𑀢𑀺 𑀆𑀲𑀧𑁆𑀧𑀦𑀸. 𑀑𑀕𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀭𑀺𑀲𑀫𑀦𑁆𑀢𑀢𑁄 𑀲𑀧𑁆𑀧𑀢𑀻𑀢𑀺 𑀧𑀭𑀺𑀲𑀧𑁆𑀧𑀦𑀸. 𑀧𑀭𑀺𑀬𑁄𑀕𑀸𑀳𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀧𑀭𑀺𑀬𑁄𑀕𑀸𑀳𑀡𑀸. 𑀦𑀺𑀘𑁆𑀙𑀬𑀯𑀲𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲, 𑀣𑀤𑁆𑀥𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀯𑀺𑀘𑀺𑀓𑀺𑀘𑁆𑀙𑀸 𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀁 𑀣𑀤𑁆𑀥𑀁 𑀓𑀭𑁄𑀢𑀺, 𑀬𑀲𑁆𑀫𑀸 𑀧𑀦 𑀲𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀫𑀦𑀁 𑀯𑀺𑀮𑀺𑀔𑀦𑁆𑀢𑀻 𑀯𑀺𑀬, 𑀢𑀲𑁆𑀫𑀸 𑀫𑀦𑁄𑀯𑀺𑀮𑁂𑀔𑁄𑀢𑀺 𑀯𑀼𑀢𑁆𑀢𑀸.

𑀯𑀺𑀤𑁆𑀥𑁄𑀢𑀺 𑀲𑀮𑁆𑀮𑁂𑀦 𑀮𑀤𑁆𑀥𑀧𑁆𑀧𑀳𑀸𑀭𑁄. 𑀨𑀼𑀝𑁆𑀞𑁄𑀢𑀺 𑀖𑀝𑁆𑀝𑀺𑀢𑁄. 𑀧𑀭𑁂𑀢𑁄𑀢𑀺 𑀧𑀻𑀴𑀺𑀢𑁄. 𑀥𑀸𑀯𑀢𑀻𑀢𑀺 𑀧𑀼𑀭𑀢𑁄 𑀕𑀘𑁆𑀙𑀢𑀺. 𑀯𑀺𑀥𑀸𑀯𑀢𑀻𑀢𑀺 𑀅𑀦𑁂𑀓𑀯𑀺𑀥𑁂𑀦 𑀕𑀘𑁆𑀙𑀢𑀺. 𑀲𑀦𑁆𑀥𑀸𑀯𑀢𑀻𑀢𑀺 𑀯𑁂𑀕𑁂𑀦 𑀥𑀸𑀯𑀢𑀺. 𑀲𑀁𑀲𑀭𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀘𑀭𑀢𑀺.

𑀅𑀘𑁂𑀮𑀓𑁄𑀢𑀺 𑀦𑀺𑀘𑁆𑀘𑁄𑀮𑁄, 𑀦𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑀸𑀘𑀸𑀭𑁄𑀢𑀺 𑀯𑀺𑀲𑀝𑁆𑀞𑀸𑀘𑀸𑀭𑁄, 𑀉𑀘𑁆𑀘𑀸𑀭𑀓𑀫𑁆𑀫𑀸𑀤𑀻𑀲𑀼 𑀮𑁄𑀓𑀺𑀬𑀓𑀼𑀮𑀧𑀼𑀢𑁆𑀢𑀸𑀘𑀸𑀭𑁂𑀦 𑀯𑀺𑀭𑀳𑀺𑀢𑁄 𑀞𑀺𑀢𑀓𑁄𑀯 𑀉𑀘𑁆𑀘𑀸𑀭𑀁 𑀓𑀭𑁄𑀢𑀺, 𑀧𑀲𑁆𑀲𑀸𑀯𑀁 𑀓𑀭𑁄𑀢𑀺, 𑀔𑀸𑀤𑀢𑀺 𑀪𑀼𑀜𑁆𑀚𑀢𑀺. 𑀳𑀢𑁆𑀣𑀸𑀧𑀮𑁂𑀔𑀦𑁄𑀢𑀺 𑀳𑀢𑁆𑀣𑁂 𑀧𑀺𑀡𑁆𑀟𑀫𑁆𑀳𑀺 𑀞𑀺𑀢𑁂 𑀚𑀺𑀯𑁆𑀳𑀸𑀬 𑀳𑀢𑁆𑀣𑀁 𑀅𑀧𑀮𑀺𑀔𑀢𑀺, 𑀉𑀘𑁆𑀘𑀸𑀭𑀁 𑀯𑀸 𑀓𑀢𑁆𑀯𑀸 𑀳𑀢𑁆𑀣𑀫𑁆𑀳𑀺𑀬𑁂𑀯 𑀤𑀡𑁆𑀟𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀳𑀢𑁆𑀣𑁂𑀦 𑀅𑀧𑀮𑀺𑀔𑀢𑀺. 𑀢𑁂 𑀓𑀺𑀭 𑀤𑀡𑁆𑀟𑀓𑀁 ‘‘𑀲𑀢𑁆𑀢𑁄’’𑀢𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀪𑀺𑀓𑁆𑀔𑀸𑀕𑀳𑀡𑀢𑁆𑀣𑀁 ‘‘𑀏𑀳𑀺 𑀪𑀤𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁄 𑀦 𑀏𑀢𑀻𑀢𑀺 𑀦 𑀏𑀳𑀺𑀪𑀤𑀦𑁆𑀢𑀺𑀓𑁄. 𑀢𑁂𑀦 𑀳𑀺 ‘‘𑀢𑀺𑀝𑁆𑀞 𑀪𑀤𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁄𑀧𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀦 𑀢𑀺𑀝𑁆𑀞𑀪𑀤𑀦𑁆𑀢𑀺𑀓𑁄. 𑀢𑀤𑀼𑀪𑀬𑀫𑁆𑀧𑀺 𑀓𑀺𑀭 𑀲𑁄 ‘‘𑀏𑀢𑀲𑁆𑀲 𑀯𑀘𑀦𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦 𑀓𑀭𑁄𑀢𑀺.

𑀅𑀪𑀺𑀳𑀝𑀦𑁆𑀢𑀺 𑀧𑀼𑀭𑁂𑀢𑀭𑀁 𑀕𑀳𑁂𑀢𑁆𑀯𑀸 𑀆𑀳𑀝𑀁 𑀪𑀺𑀓𑁆𑀔𑀁. 𑀉𑀤𑁆𑀤𑀺𑀲𑁆𑀲𑀓𑀢𑀦𑁆𑀢𑀺 ‘‘𑀇𑀤𑀁 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀓𑀢’’𑀦𑁆𑀢𑀺 𑀏𑀯𑀁 𑀆𑀭𑁄𑀘𑀺𑀢𑀁 𑀪𑀺𑀓𑁆𑀔𑀁. 𑀦 𑀦𑀺𑀫𑀦𑁆𑀢𑀦𑀦𑁆𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀯𑀸 𑀯𑀻𑀣𑀺𑀁 𑀯𑀸 𑀕𑀸𑀫𑀁 𑀯𑀸 𑀧𑀯𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀫𑁆𑀧𑀺 𑀦 𑀲𑀸𑀤𑀺𑀬𑀢𑀺 𑀦 𑀕𑀡𑁆𑀳𑀸𑀢𑀺. 𑀦 𑀓𑀼𑀫𑁆𑀪𑀺𑀫𑀼𑀔𑀸𑀢𑀺 𑀓𑀼𑀫𑁆𑀪𑀺𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀸𑀢𑀺. 𑀦 𑀓𑀴𑁄𑀧𑀺𑀫𑀼𑀔𑀸𑀢𑀺 𑀓𑀴𑁄𑀧𑀻𑀢𑀺 𑀉𑀓𑁆𑀔𑀮𑀺 𑀯𑀸 𑀧𑀘𑁆𑀙𑀺 𑀯𑀸, 𑀢𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀓𑀼𑀫𑁆𑀪𑀺𑀓𑀴𑁄𑀧𑀺𑀬𑁄 𑀫𑀁 𑀦𑀺𑀲𑁆𑀲𑀸𑀬 𑀓𑀝𑀘𑁆𑀙𑀼𑀦𑀸 𑀧𑀳𑀸𑀭𑀁 𑀮𑀪𑀦𑁆𑀢𑀻𑀢𑀺. 𑀦 𑀏𑀴𑀓𑀫𑀦𑁆𑀢𑀭𑀦𑁆𑀢𑀺 𑀉𑀫𑁆𑀫𑀸𑀭𑀁 𑀅𑀦𑁆𑀢𑀭𑀁 𑀓𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀅𑀬𑀁 𑀫𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑀭𑀓𑀭𑀡𑀁 𑀮𑀪𑀢𑀻𑀢𑀺. 𑀤𑀡𑁆𑀟𑀫𑀼𑀲𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦 𑀤𑁆𑀯𑀺𑀦𑁆𑀦𑀦𑁆𑀢𑀺 𑀤𑁆𑀯𑀻𑀲𑀼 𑀪𑀼𑀜𑁆𑀚𑀫𑀸𑀦𑁂𑀲𑀼 𑀏𑀓𑀲𑁆𑀫𑀺𑀁 𑀉𑀝𑁆𑀞𑀸𑀬 𑀤𑁂𑀦𑁆𑀢𑁂 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀓𑀩𑀴𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺. 𑀦 𑀕𑀩𑁆𑀪𑀺𑀦𑀺𑀬𑀸𑀢𑀺𑀆𑀤𑀻𑀲𑀼 𑀧𑀦 ‘‘𑀕𑀩𑁆𑀪𑀺𑀦𑀺𑀬𑀸 𑀓𑀼𑀘𑁆𑀙𑀺𑀬𑀁 𑀤𑀸𑀭𑀓𑁄 𑀓𑀺𑀮𑀫𑀢𑀻’’𑀢𑀺, 𑀧𑀸𑀬𑀦𑁆𑀢𑀺𑀬𑀸 𑀤𑀸𑀭𑀓𑀲𑁆𑀲 𑀔𑀻𑀭𑀦𑁆𑀢𑀭𑀸𑀬𑁄 𑀳𑁄𑀢𑀻’’𑀢𑀺, ‘‘𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬 𑀭𑀢𑀺𑀅𑀦𑁆𑀢𑀭𑀸𑀬𑁄 𑀳𑁄𑀢𑀻’’𑀢𑀺 𑀦 𑀕𑀡𑁆𑀳𑀸𑀢𑀺. 𑀦 𑀲𑀁𑀓𑀺𑀢𑁆𑀢𑀻𑀲𑀽𑀢𑀺 𑀲𑀁𑀓𑀺𑀢𑁆𑀢𑁂𑀢𑁆𑀯𑀸 𑀓𑀢𑀪𑀢𑁆𑀢𑁂𑀲𑀼. 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 𑀓𑀺𑀭 𑀅𑀘𑁂𑀮𑀓𑀲𑀸𑀯𑀓𑀸 𑀅𑀘𑁂𑀮𑀓𑀸𑀦𑀫𑀢𑁆𑀣𑀸𑀬 𑀢𑀢𑁄 𑀢𑀢𑁄 𑀢𑀡𑁆𑀟𑀼𑀮𑀸𑀤𑀻𑀦𑀺 𑀲𑀫𑀸𑀤𑀧𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀦𑁆𑀢𑀺, 𑀉𑀓𑁆𑀓𑀝𑁆𑀞𑁄 𑀅𑀘𑁂𑀮𑀓𑁄 𑀢𑀢𑁄𑀧𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀦 𑀬𑀢𑁆𑀣 𑀲𑀸𑀢𑀺 𑀬𑀢𑁆𑀣 𑀲𑀼𑀦𑀔𑁄 ‘‘𑀧𑀺𑀡𑁆𑀟𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀢𑀢𑁆𑀣 𑀢𑀲𑁆𑀲 𑀅𑀤𑀢𑁆𑀯𑀸 𑀆𑀳𑀝𑀁 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀏𑀢𑀲𑁆𑀲 𑀧𑀺𑀡𑁆𑀟𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺. 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻𑀢𑀺 𑀲𑀫𑀽𑀳𑀲𑀫𑀽𑀳𑀘𑀸𑀭𑀺𑀦𑀻. 𑀲𑀘𑁂 𑀳𑀺 𑀅𑀘𑁂𑀮𑀓𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸’’𑀢𑀺 𑀫𑀦𑀼𑀲𑁆𑀲𑀸 𑀪𑀢𑁆𑀢𑀕𑁂𑀳𑀁 𑀧𑀯𑀺𑀲𑀦𑁆𑀢𑀺, 𑀢𑁂𑀲𑀼 𑀘 𑀧𑀯𑀺𑀲𑀦𑁆𑀢𑁂𑀲𑀼 𑀓𑀴𑁄𑀧𑀺𑀫𑀼𑀔𑀸𑀤𑀻𑀲𑀼 𑀦𑀺𑀮𑀻𑀦𑀸 𑀫𑀓𑁆𑀔𑀺𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀲𑀡𑁆𑀟𑀲𑀡𑁆𑀟𑀸 𑀘𑀭𑀦𑁆𑀢𑀺. 𑀢𑀢𑁄 𑀆𑀳𑀝𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀫𑀁 𑀦𑀺𑀲𑁆𑀲𑀸𑀬 𑀫𑀓𑁆𑀔𑀺𑀓𑀸𑀦𑀁 𑀕𑁄𑀘𑀭𑀦𑁆𑀢𑀭𑀸𑀬𑁄 𑀚𑀸𑀢𑁄𑀢𑀺. 𑀣𑀼𑀲𑁄𑀤𑀓𑀦𑁆𑀢𑀺 𑀲𑀩𑁆𑀩𑀲𑀲𑁆𑀲𑀲𑀫𑁆𑀪𑀸𑀭𑁂𑀳𑀺 𑀓𑀢𑀁 𑀲𑁄𑀯𑀻𑀭𑀓𑀁. 𑀏𑀢𑁆𑀣 𑀘 𑀲𑀼𑀭𑀸𑀧𑀸𑀦𑀫𑁂𑀯 𑀲𑀸𑀯𑀚𑁆𑀚𑀁, 𑀅𑀬𑀁 𑀧𑀦 𑀲𑀩𑁆𑀩𑁂𑀲𑀼𑀧𑀺 𑀲𑀸𑀯𑀚𑁆𑀚𑀲𑀜𑁆𑀜𑀻.

𑀏𑀓𑀸𑀕𑀸𑀭𑀺𑀓𑁄𑀢𑀺 𑀬𑁄 𑀏𑀓𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀪𑀺𑀓𑁆𑀔𑀁 𑀮𑀪𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀏𑀓𑀸𑀮𑁄𑀧𑀺𑀓𑁄𑀢𑀺 𑀬𑁄 𑀏𑀓𑁂𑀦𑁂𑀯 𑀆𑀮𑁄𑀧𑁂𑀦 𑀬𑀸𑀧𑁂𑀢𑀺. 𑀤𑁆𑀯𑀸𑀕𑀸𑀭𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸𑀢𑀺 𑀏𑀓𑀸𑀬 𑀤𑀢𑁆𑀢𑀺𑀬𑀸. 𑀤𑀢𑁆𑀢𑀺 𑀦𑀸𑀫 𑀏𑀓𑀸 𑀔𑀼𑀤𑁆𑀤𑀓𑀧𑀸𑀢𑀺 𑀳𑁄𑀢𑀺, 𑀬𑀢𑁆𑀣 𑀅𑀕𑁆𑀕𑀪𑀺𑀓𑁆𑀔𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀏𑀓𑀸𑀳𑀺𑀓𑀦𑁆𑀢𑀺 𑀏𑀓𑀤𑀺𑀯𑀲𑀦𑁆𑀢𑀭𑀺𑀓𑀁. 𑀅𑀟𑁆𑀠𑀫𑀸𑀲𑀺𑀓𑀦𑁆𑀢𑀺 𑀅𑀟𑁆𑀠𑀫𑀸𑀲𑀦𑁆𑀢𑀭𑀺𑀓𑀁. 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀦𑁆𑀢𑀺 𑀯𑀸𑀭𑀪𑀢𑁆𑀢𑀪𑁄𑀚𑀦𑀁, 𑀏𑀓𑀸𑀳𑀯𑀸𑀭𑁂𑀦 𑀤𑁆𑀯𑀻𑀳𑀯𑀸𑀭𑁂𑀦 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀟𑁆𑀠𑀫𑀸𑀲𑀯𑀸𑀭𑁂𑀦𑀸𑀢𑀺 𑀏𑀯𑀁 𑀤𑀺𑀯𑀲𑀯𑀸𑀭𑁂𑀦 𑀆𑀪𑀢𑀁 𑀪𑀢𑁆𑀢𑀪𑁄𑀚𑀦𑀁.

𑀲𑀸𑀓𑀪𑀓𑁆𑀔𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀉𑀩𑁆𑀪𑀝𑁆𑀞𑀓𑁄𑀢𑀺 𑀉𑀤𑁆𑀥𑀁 𑀞𑀺𑀢𑀓𑁄. 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄𑀢𑀺 𑀉𑀓𑁆𑀓𑀼𑀝𑀺𑀓𑀁 𑀯𑀻𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄. 𑀕𑀘𑁆𑀙𑀦𑁆𑀢𑁄𑀧𑀺 𑀉𑀓𑁆𑀓𑀼𑀝𑀺𑀓𑁄𑀯 𑀳𑀼𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀢𑀺 𑀅𑀬𑀓𑀡𑁆𑀝𑀓𑁂 𑀯𑀸 𑀧𑀓𑀢𑀺𑀓𑀡𑁆𑀝𑀓𑁂 𑀯𑀸 𑀪𑀽𑀫𑀺𑀬𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑀸𑀤𑀻𑀦𑀺 𑀓𑀭𑁄𑀢𑀺. 𑀲𑁂𑀬𑁆𑀬𑀦𑁆𑀢𑀺 𑀲𑀬𑀦𑁆𑀢𑁄𑀧𑀺 𑀢𑀢𑁆𑀣𑁂𑀯 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀨𑀮𑀓𑀲𑁂𑀬𑁆𑀬𑀦𑁆𑀢𑀺 𑀭𑀼𑀓𑁆𑀔𑀨𑀮𑀓𑁂 𑀲𑁂𑀬𑁆𑀬𑀁. 𑀣𑀡𑁆𑀟𑀺𑀮𑀲𑁂𑀬𑁆𑀬𑀦𑁆𑀢𑀺 𑀣𑀡𑁆𑀟𑀺𑀮𑁂 𑀉𑀘𑁆𑀘𑁂 𑀪𑀽𑀫𑀺𑀝𑁆𑀞𑀸𑀦𑁂 𑀲𑁂𑀬𑁆𑀬𑀁. 𑀏𑀓𑀧𑀲𑁆𑀲𑀬𑀺𑀓𑁄𑀢𑀺 𑀏𑀓𑀧𑀲𑁆𑀲𑁂𑀦𑁂𑀯 𑀲𑀬𑀢𑀺. 𑀭𑀚𑁄𑀚𑀮𑁆𑀮𑀥𑀭𑁄𑀢𑀺 𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀭𑀚𑀼𑀝𑁆𑀞𑀸𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀅𑀣𑀲𑁆𑀲 𑀲𑀭𑀻𑀭𑁂 𑀭𑀚𑁄𑀚𑀮𑁆𑀮𑀁 𑀮𑀕𑁆𑀕𑀢𑀺, 𑀢𑀁 𑀥𑀸𑀭𑁂𑀢𑀺. 𑀬𑀣𑀸𑀲𑀦𑁆𑀣𑀢𑀺𑀓𑁄𑀢𑀺 𑀮𑀤𑁆𑀥𑀁 𑀆𑀲𑀦𑀁 𑀅𑀓𑁄𑀧𑁂𑀢𑁆𑀯𑀸 𑀬𑀤𑁂𑀯 𑀮𑀪𑀢𑀺, 𑀢𑀢𑁆𑀣𑁂𑀯 𑀦𑀺𑀲𑀻𑀤𑀦𑀲𑀻𑀮𑁄. 𑀯𑁂𑀓𑀝𑀺𑀓𑁄𑀢𑀺 𑀯𑀺𑀓𑀝𑀔𑀸𑀤𑀦𑀲𑀻𑀮𑁄, 𑀯𑀺𑀓𑀝𑀦𑁆𑀢𑀺 𑀕𑀽𑀣𑀁 𑀯𑀼𑀘𑁆𑀘𑀢𑀺. 𑀅𑀧𑀸𑀦𑀓𑁄𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑀻𑀢𑀼𑀤𑀓𑀧𑀸𑀦𑁄. 𑀲𑀸𑀬𑀁 𑀢𑀢𑀺𑀬𑀁 𑀅𑀲𑁆𑀲𑀸𑀢𑀺 𑀲𑀸𑀬𑀢𑀢𑀺𑀬𑀓𑀁. 𑀧𑀸𑀢𑁄 𑀫𑀚𑁆𑀛𑀦𑁆𑀳𑀺𑀓𑁂 𑀲𑀸𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 ‘‘𑀧𑀸𑀧𑀁 𑀧𑀯𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺.

𑀢𑁂 𑀲𑀮𑁆𑀮𑁂 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀢𑁂 𑀭𑀸𑀕𑀸𑀤𑀺𑀲𑀢𑁆𑀢𑀲𑀮𑁆𑀮𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄. 𑀲𑀮𑁆𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸𑀢𑀺 𑀲𑀮𑁆𑀮𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀧𑀦𑀓𑀸𑀭𑀡𑀸. 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀥𑀸𑀯𑀢𑀻𑀢𑀺 𑀧𑀼𑀭𑀺𑀫𑀁 𑀤𑀺𑀲𑀁 𑀕𑀘𑁆𑀙𑀢𑀺. 𑀢𑁂 𑀲𑀮𑁆𑀮𑀸𑀪𑀺𑀲𑀗𑁆𑀔𑀸𑀭𑀸 𑀅𑀧𑁆𑀧𑀳𑀻𑀦𑀸𑀢𑀺 𑀏𑀢𑁂 𑀭𑀸𑀕𑀸𑀤𑀺𑀲𑀮𑁆𑀮𑀸 𑀧𑀬𑁄𑀕𑀸 𑀦𑀧𑁆𑀧𑀳𑀻𑀦𑀸. 𑀲𑀮𑁆𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀲𑀮𑁆𑀮𑀧𑀬𑁄𑀕𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑁂𑀦. 𑀕𑀢𑀺𑀬𑀸 𑀥𑀸𑀯𑀢𑀻𑀢𑀺 𑀕𑀢𑀺𑀬𑀁 𑀥𑀸𑀯𑀢𑀺. 𑀕𑀢𑀺𑀬𑀸 𑀕𑀢𑀺𑀦𑁆𑀢𑀺 𑀕𑀢𑀺𑀢𑁄 𑀕𑀢𑀺𑀁.

𑀦 𑀲𑀻𑀤𑀢𑀻𑀢𑀺 𑀦 𑀦𑀺𑀫𑀼𑀚𑁆𑀚𑀢𑀺. 𑀦 𑀲𑀁𑀲𑀻𑀤𑀢𑀻𑀢𑀺 𑀦 𑀲𑀫𑀦𑁆𑀢𑀢𑁄 𑀫𑀼𑀚𑁆𑀚𑀢𑀺. 𑀦 𑀑𑀲𑀻𑀤𑀢𑀻𑀢𑀺 𑀦 𑀑𑀲𑀓𑁆𑀓𑀢𑀺. 𑀦 𑀅𑀯𑀲𑀻𑀤𑀢𑀻𑀢𑀺 𑀦 𑀧𑀘𑁆𑀘𑁄𑀲𑀓𑁆𑀓𑀢𑀺. 𑀦 𑀅𑀯𑀕𑀘𑁆𑀙𑀢𑀻𑀢𑀺 𑀦 𑀳𑁂𑀝𑁆𑀞𑀸 𑀕𑀘𑁆𑀙𑀢𑀺.

𑁧𑁭𑁫. 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁂𑀲𑀼 𑀘 𑀲𑀢𑁆𑀢𑁂𑀲𑀼 𑁋 𑀢𑀢𑁆𑀣 𑀲𑀺𑀓𑁆𑀔𑀸𑀦𑀼𑀕𑀻𑀬𑀦𑁆𑀢𑀺, 𑀬𑀸𑀦𑀺 𑀮𑁄𑀓𑁂 𑀕𑀥𑀺𑀢𑀸𑀦𑀻𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀮𑁄𑀓𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀧𑀝𑀺𑀮𑀸𑀪𑀸𑀬 𑀕𑀺𑀚𑁆𑀛𑀦𑁆𑀢𑀻𑀢𑀺 𑀓𑀢𑁆𑀯𑀸 ‘‘𑀕𑀥𑀺𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀘𑀺𑀭𑀓𑀸𑀮𑀲𑁂𑀯𑀺𑀢𑀢𑁆𑀢𑀸 𑀯𑀸 ‘‘𑀕𑀥𑀺𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀢𑀁 𑀦𑀺𑀫𑀺𑀢𑁆𑀢𑀁 𑀳𑀢𑁆𑀣𑀺𑀲𑀺𑀓𑁆𑀔𑀸𑀤𑀺𑀓𑀸 𑀅𑀦𑁂𑀓𑀸 𑀲𑀺𑀓𑁆𑀔𑀸 𑀓𑀣𑀻𑀬𑀦𑁆𑀢𑀺, 𑀉𑀕𑁆𑀕𑀬𑁆𑀳𑀦𑁆𑀢𑀺 𑀯𑀸. 𑀧𑀲𑁆𑀲𑀣 𑀬𑀸𑀯 𑀲𑀫𑀢𑁆𑀣𑁄 𑀯𑀸𑀬𑀁 𑀮𑁄𑀓𑁄, 𑀬𑀢𑁄 𑀧𑀡𑁆𑀟𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀢𑁂𑀲𑀼 𑀯𑀸 𑀕𑀥𑀺𑀢𑁂𑀲𑀼 𑀢𑀸𑀲𑀼 𑀯𑀸 𑀲𑀺𑀓𑁆𑀔𑀸𑀲𑀼 𑀅𑀥𑀺𑀫𑀼𑀢𑁆𑀢𑁄 𑀦 𑀲𑀺𑀬𑀸, 𑀅𑀜𑁆𑀜𑀤𑀢𑁆𑀣𑀼 𑀅𑀦𑀺𑀘𑁆𑀘𑀸𑀤𑀺𑀤𑀲𑁆𑀲𑀦𑁂𑀦 𑀦𑀺𑀩𑁆𑀩𑀺𑀚𑁆𑀛 𑀲𑀩𑁆𑀩𑀲𑁄 𑀓𑀸𑀫𑁂. 𑀅𑀢𑁆𑀢𑀦𑁄 𑀦𑀺𑀩𑁆𑀩𑀸𑀦𑀫𑁂𑀯 𑀲𑀺𑀓𑁆𑀔𑁂𑀢𑀺.

𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀜𑀸𑀡𑁂𑀦 𑀦𑀺𑀓𑁆𑀔𑀫𑁂𑀢𑁆𑀯𑀸 𑀯𑀸 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀯𑀸.

𑁧𑁭𑁬. 𑀇𑀤𑀸𑀦𑀺 𑀬𑀣𑀸 𑀦𑀺𑀩𑁆𑀩𑀸𑀦𑀸𑀬 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁆𑀘𑁄 𑀲𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁆𑀘𑁄𑀢𑀺 𑀯𑀸𑀘𑀸𑀲𑀘𑁆𑀘𑁂𑀦 𑀜𑀸𑀡𑀲𑀘𑁆𑀘𑁂𑀦 𑀫𑀕𑁆𑀕𑀲𑀘𑁆𑀘𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀭𑀺𑀢𑁆𑀢𑀧𑁂𑀲𑀼𑀡𑁄𑀢𑀺 𑀧𑀳𑀻𑀦𑀧𑁂𑀲𑀼𑀡𑁄. 𑀯𑁂𑀯𑀺𑀘𑁆𑀙𑀦𑁆𑀢𑀺 𑀫𑀘𑁆𑀙𑀭𑀺𑀬𑀁.

𑁧𑁭𑁭. 𑀦𑀺𑀤𑁆𑀤𑀁 𑀢𑀦𑁆𑀤𑀺𑀁 𑀲𑀳𑁂 𑀣𑀻𑀦𑀦𑁆𑀢𑀺 𑀧𑀘𑀮𑀸𑀬𑀺𑀓𑀜𑁆𑀘 𑀓𑀸𑀬𑀸𑀮𑀲𑀺𑀬𑀜𑁆𑀘 𑀘𑀺𑀢𑁆𑀢𑀸𑀮𑀲𑀺𑀬𑀜𑁆𑀘𑀸𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑁂 𑀅𑀪𑀺𑀪𑀯𑁂𑀬𑁆𑀬. 𑀦𑀺𑀩𑁆𑀩𑀸𑀦𑀫𑀸𑀦𑀲𑁄𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀘𑀺𑀢𑁆𑀢𑁄.

𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸𑀢𑀺 𑀔𑀦𑁆𑀥𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲 𑀦𑀸𑀫𑀓𑀸𑀬𑀲𑁆𑀲 𑀕𑀺𑀮𑀸𑀦𑀪𑀸𑀯𑁄. 𑀕𑀺𑀮𑀸𑀦𑁄 𑀳𑀺 𑀅𑀓𑀮𑁆𑀮𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀦𑀬𑁂𑀧𑀺 (𑀧𑀸𑀭𑀸. 𑁧𑁫𑁧) 𑀯𑀼𑀢𑁆𑀢𑀁 𑁋 ‘‘𑀦𑀸𑀳𑀁, 𑀪𑀦𑁆𑀢𑁂, 𑀅𑀓𑀮𑁆𑀮𑀓𑁄’’𑀢𑀺. 𑀅𑀓𑀫𑁆𑀫𑀜𑁆𑀜𑀢𑀸𑀢𑀺 𑀓𑀸𑀬𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑁄 𑀅𑀓𑀫𑁆𑀫𑀜𑁆𑀜𑀢𑀸𑀓𑀸𑀭𑁄. 𑀫𑁂𑀖𑁄 𑀯𑀺𑀬 𑀆𑀓𑀸𑀲𑀁 𑀓𑀸𑀬𑀁 𑀑𑀦𑀬𑁆𑀳𑀢𑀻𑀢𑀺 𑀑𑀦𑀸𑀳𑁄. 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄. 𑀅𑀩𑁆𑀪𑀦𑁆𑀢𑀭𑁂 𑀲𑀫𑁄𑀭𑀼𑀦𑁆𑀥𑀢𑀻𑀢𑀺 𑀅𑀦𑁆𑀢𑁄𑀲𑀫𑁄𑀭𑁄𑀥𑁄. 𑀫𑁂𑀥𑀢𑀻𑀢𑀺 𑀫𑀺𑀤𑁆𑀥𑀁, 𑀅𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀺𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀧𑀦𑁆𑀢𑀺 𑀢𑁂𑀦𑀸𑀢𑀺 𑀲𑀼𑀧𑁆𑀧𑀁. 𑀅𑀓𑁆𑀔𑀺𑀤𑀮𑀸𑀤𑀻𑀦𑀁 𑀧𑀘𑀮𑀪𑀸𑀯𑀁 𑀓𑀭𑁄𑀢𑀻𑀢𑀺 𑀧𑀘𑀮𑀸𑀬𑀺𑀓𑀸. 𑀲𑀼𑀧𑁆𑀧𑀦𑀸 𑀲𑀼𑀧𑁆𑀧𑀺𑀢𑀢𑁆𑀢𑀦𑁆𑀢𑀺 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀑𑀮𑀻𑀬𑀦𑀸𑀢𑀺 𑀑𑀮𑀻𑀬𑀦𑀸𑀓𑀸𑀭𑁄. 𑀤𑀼𑀢𑀺𑀬𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀮𑀻𑀦𑀦𑁆𑀢𑀺 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀧𑀝𑀺𑀓𑀼𑀝𑀺𑀓𑀁. 𑀇𑀢𑀭𑁂 𑀤𑁆𑀯𑁂 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀣𑀺𑀦𑀦𑁆𑀢𑀺 𑀲𑀧𑁆𑀧𑀺𑀧𑀺𑀡𑁆𑀟𑁄 𑀯𑀺𑀬 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀖𑀦𑀪𑀸𑀯𑁂𑀦 𑀞𑀺𑀢𑀁. 𑀣𑀺𑀬𑀦𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀣𑀺𑀬𑀺𑀢𑀲𑁆𑀲 𑀪𑀸𑀯𑁄 𑀣𑀺𑀬𑀺𑀢𑀢𑁆𑀢𑀁, 𑀅𑀯𑀺𑀧𑁆𑀨𑀸𑀭𑀯𑀲𑁂𑀦 𑀣𑀤𑁆𑀥𑀢𑀸𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀲𑀗𑁆𑀔𑀸𑀭𑀥𑀸𑀢𑀼𑀬𑀸𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀫𑀸𑀦𑀲𑁄 𑀲𑀩𑁆𑀩𑀢𑁂𑀪𑀽𑀫𑀺𑀓𑀲𑀗𑁆𑀔𑀸𑀢𑀥𑀸𑀢𑀼𑀬𑀸. 𑀘𑀺𑀢𑁆𑀢𑀁 𑀧𑀝𑀺𑀯𑀸𑀧𑁂𑀢𑁆𑀯𑀸𑀢𑀺 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸. 𑀏𑀢𑀁 𑀲𑀦𑁆𑀢𑀦𑁆𑀢𑀺 𑀏𑀢𑀁 𑀦𑀺𑀩𑁆𑀩𑀸𑀦𑀁. 𑀓𑀺𑀮𑁂𑀲𑀲𑀦𑁆𑀢𑀢𑀸𑀬 𑀲𑀦𑁆𑀢𑀁. 𑀅𑀢𑀧𑁆𑀧𑀓𑀝𑁆𑀞𑁂𑀦 𑀧𑀡𑀻𑀢𑀁.

𑀦 𑀧𑀡𑁆𑀟𑀺𑀢𑀸 𑀉𑀧𑀥𑀺𑀲𑀼𑀔𑀲𑁆𑀲 𑀳𑁂𑀢𑀽𑀢𑀺 𑀤𑀩𑁆𑀩𑀚𑀸𑀢𑀺𑀓𑀸 𑀓𑀸𑀫𑀲𑀼𑀔𑀲𑁆𑀲 𑀓𑀸𑀭𑀡𑀸 𑀤𑀸𑀦𑀸𑀦𑀺 𑀦 𑀤𑁂𑀦𑁆𑀢𑀺. 𑀓𑀸𑀫𑀜𑁆𑀘 𑀢𑁂 𑀉𑀧𑀥𑀺𑀧𑀭𑀺𑀓𑁆𑀔𑀬𑀸𑀬𑀸𑀢𑀺 𑀏𑀓𑀁𑀲𑁂𑀦 𑀢𑁂 𑀧𑀡𑁆𑀟𑀺𑀢𑀸 𑀓𑀸𑀫𑀓𑁆𑀔𑀬𑀸𑀬 𑀓𑀸𑀫𑀓𑁆𑀔𑁂𑀧𑀦𑀢𑁆𑀣𑀁 𑀤𑀸𑀦𑀸𑀦𑀺 𑀤𑁂𑀦𑁆𑀢𑀺. 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀛𑀸𑀦𑀸𑀦𑀺 𑀪𑀸𑀯𑁂𑀦𑁆𑀢𑀻𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀯𑀟𑁆𑀠𑁂𑀦𑁆𑀢𑀺. 𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀧𑀼𑀦𑀩𑁆𑀪𑀯𑀓𑀸𑀭𑀡𑀸. 𑀢𑁂 𑀧𑀡𑁆𑀟𑀺𑀢𑀸 𑀦𑀺𑀩𑁆𑀩𑀸𑀦𑀁 𑀅𑀪𑀺𑀫𑀼𑀔𑀁 𑀳𑀼𑀢𑁆𑀯𑀸 𑀤𑀸𑀦𑀁 𑀤𑀤𑀦𑁆𑀢𑀺.

𑁧𑁭𑁮. 𑀲𑀸𑀳𑀲𑀸𑀢𑀺 𑀭𑀢𑁆𑀢𑀲𑁆𑀲 𑀭𑀸𑀕𑀘𑀭𑀺𑀢𑀸𑀤𑀺𑀪𑁂𑀤𑀸 𑀲𑀸𑀳𑀲𑀸𑀓𑀸𑀭𑀡𑀸. 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑁧𑁭𑁯. 𑀧𑀼𑀭𑀸𑀡𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬𑀸𑀢𑀺 𑀅𑀢𑀻𑀢𑀁 𑀭𑀽𑀧𑀸𑀤𑀺𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬. 𑀦𑀯𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂. 𑀳𑀻𑀬𑀫𑀸𑀦𑁂𑀢𑀺 𑀯𑀺𑀦𑀲𑁆𑀲𑀫𑀸𑀦𑁂. 𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸𑀢𑀺 𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑁄 𑀦 𑀪𑀯𑁂𑀬𑁆𑀬. 𑀢𑀡𑁆𑀳𑀸 𑀳𑀺 𑀭𑀽𑀧𑀸𑀤𑀻𑀦𑀁 𑀆𑀓𑀸𑀲𑀦𑀢𑁄 ‘‘𑀆𑀓𑀸𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀯𑁂𑀫𑀸𑀦𑁂𑀢𑀺 𑀅𑀪𑀯𑀫𑀸𑀦𑁂. 𑀯𑀺𑀕𑀘𑁆𑀙𑀫𑀸𑀦𑁂𑀢𑀺 𑀅𑀧𑀕𑀘𑁆𑀙𑀫𑀸𑀦𑁂.

‘‘𑀆𑀓𑀸𑀲𑀢𑀻’’𑀢𑀺 ‘‘𑀆𑀓𑀲𑁆𑀲𑀢𑀻’’𑀢𑀺 𑀘 𑀤𑀼𑀯𑀺𑀥𑁄 𑀧𑀸𑀞𑁄.

𑁧𑁮𑁦. 𑀓𑀺𑀁 𑀓𑀸𑀭𑀡𑀸 𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸𑀢𑀺 𑀘𑁂? 𑀕𑁂𑀥𑀁 𑀩𑁆𑀭𑀽𑀫𑀻𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀅𑀳𑀜𑁆𑀳𑀺 𑀇𑀫𑀁 𑀆𑀓𑀸𑀲𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀭𑀽𑀧𑀸𑀤𑀻𑀲𑀼 𑀕𑀺𑀚𑁆𑀛𑀦𑀢𑁄 𑀕𑁂𑀥𑀁 𑀩𑁆𑀭𑀽𑀫𑀺 ‘‘𑀕𑁂𑀥𑁄’’𑀢𑀺 𑀯𑀤𑀸𑀫𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀯𑀳𑀦𑀦𑀝𑁆𑀞𑁂𑀦 ‘‘𑀑𑀖𑁄’’𑀢𑀺 𑀘 𑀆𑀚𑀯𑀦𑀝𑁆𑀞𑁂𑀦 ‘‘𑀆𑀚𑀯’’𑀦𑁆𑀢𑀺 𑀘 ‘‘𑀇𑀤𑀁 𑀫𑀬𑁆𑀳𑀁, 𑀇𑀤𑀁 𑀫𑀬𑁆𑀳’’𑀦𑁆𑀢𑀺 𑀚𑀧𑁆𑀧𑀓𑀸𑀭𑀡𑀢𑁄 ‘‘𑀚𑀧𑁆𑀧𑀦’’𑀦𑁆𑀢𑀺 𑀘 𑀤𑀼𑀫𑁆𑀫𑀼𑀜𑁆𑀘𑀦𑀝𑁆𑀞𑁂𑀦 ‘‘𑀆𑀭𑀫𑁆𑀫𑀡’’𑀦𑁆𑀢𑀺 𑀘 𑀓𑀫𑁆𑀧𑀓𑀭𑀡𑀝𑁆𑀞𑁂𑀦 ‘‘𑀓𑀫𑁆𑀧𑀦’’𑀦𑁆𑀢𑀺 𑀘 𑀩𑁆𑀭𑀽𑀫𑀺, 𑀏𑀲𑀸𑀯 𑀮𑁄𑀓𑀲𑁆𑀲 𑀧𑀮𑀺𑀩𑁄𑀥𑀝𑁆𑀞𑁂𑀦 𑀤𑀼𑀭𑀢𑀺𑀓𑁆𑀓𑀫𑀦𑀻𑀬𑀝𑁆𑀞𑁂𑀦 𑀘 ‘‘𑀓𑀸𑀫𑀧𑀗𑁆𑀓𑁄 𑀤𑀼𑀭𑀘𑁆𑀘𑀬𑁄’’𑀢𑀺.

𑀆𑀚𑀯𑀦𑁆𑀢𑀺 𑀆𑀧𑀝𑀺𑀲𑀦𑁆𑀥𑀺𑀢𑁄 𑀚𑀯𑀢𑀺 𑀥𑀸𑀯𑀢𑀻𑀢𑀺 𑀆𑀚𑀯𑀁, 𑀯𑀝𑁆𑀝𑀫𑀽𑀮𑀢𑀸𑀬 𑀧𑀼𑀦𑀩𑁆𑀪𑀯𑁂 𑀧𑀝𑀺𑀲𑀦𑁆𑀥𑀺𑀤𑀸𑀦𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀚𑀧𑁆𑀧𑀦𑀦𑁆𑀢𑀺 𑀧𑀢𑁆𑀣𑀦𑀸, 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀆𑀭𑀫𑁆𑀫𑀡𑀫𑁆𑀧𑀺 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸𑀢𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀦𑁆𑀦𑀢𑀡𑁆𑀳𑀸 𑀫𑀼𑀘𑁆𑀘𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑁂𑀦 𑀆𑀭𑀫𑁆𑀫𑀡𑀸𑀢𑀺 𑀓𑀣𑀻𑀬𑀢𑀺. 𑀓𑀸𑀫𑀧𑀗𑁆𑀓𑁄𑀢𑀺 𑀑𑀲𑀻𑀤𑀦𑀝𑁆𑀞𑁂𑀦 𑀓𑀮𑀮𑀁. 𑀓𑀤𑁆𑀤𑀫𑁄𑀢𑀺 𑀲𑀗𑁆𑀕𑀝𑁆𑀞𑁂𑀦 𑀓𑀤𑁆𑀤𑀫𑁄. 𑀢𑀸𑀧𑀦𑀝𑁆𑀞𑁂𑀦 𑀓𑀺𑀮𑁂𑀲𑁄. 𑀦𑀺𑀬𑁆𑀬𑀸𑀲𑀁 𑀯𑀺𑀬 𑀮𑀕𑁆𑀕𑀸𑀧𑀦𑀝𑁆𑀞𑁂𑀦 𑀧𑀮𑀺𑀧𑁄. 𑀭𑀼𑀦𑁆𑀥𑀺𑀢𑁆𑀯𑀸 𑀥𑀸𑀭𑀡𑀝𑁆𑀞𑁂𑀦 𑀧𑀮𑀺𑀭𑁄𑀥𑁄. 𑀏𑀯𑀫𑁂𑀢𑀁 𑀕𑁂𑀥𑀸𑀤𑀺𑀧𑀭𑀺𑀬𑀸𑀬𑀁 𑀆𑀓𑀸𑀲𑀁 𑀅𑀦𑀺𑀲𑁆𑀲𑀺𑀢𑁄.

𑁧𑁮𑁧. 𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑀦𑁆𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀢𑀺𑀯𑀺𑀥𑀸𑀧𑀺 𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑀁 𑀫𑁄𑀦𑁂𑀬𑁆𑀬𑀧𑀢𑁆𑀢𑀺𑀬𑀸 𑀫𑀼𑀦𑀻𑀢𑀺 𑀲𑀗𑁆𑀔𑀁 𑀕𑀢𑁄 𑀦𑀺𑀩𑁆𑀩𑀸𑀦𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀲 𑀯𑁂𑀏𑀯𑀭𑀽𑀧𑁄 𑀲𑀩𑁆𑀩𑀸𑀦𑀺 𑀆𑀬𑀢𑀦𑀸𑀦𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 ‘‘𑀲𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀤𑁆𑀤𑁂𑀲𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁧𑁮𑁨. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲 𑀯𑁂 𑀯𑀺𑀤𑁆𑀯𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀜𑀢𑁆𑀯𑀸 𑀥𑀫𑁆𑀫𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀦𑀬𑁂𑀦 𑀲𑀗𑁆𑀔𑀢𑀥𑀫𑁆𑀫𑀁 𑀅𑀜𑁆𑀜𑀸𑀬. 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀸𑀦𑁄𑀢𑀺 𑀅𑀲𑀫𑁆𑀫𑀸𑀇𑀭𑀺𑀬𑀦𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀫𑀸𑀦𑁄.

𑁧𑁮𑁩. 𑀏𑀯𑀁 𑀅𑀧𑀺𑀳𑁂𑀦𑁆𑀢𑁄 𑀘 𑁋 𑀬𑁄𑀥 𑀓𑀸𑀫𑁂𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀗𑁆𑀕𑀦𑁆𑀢𑀺 𑀲𑀢𑁆𑀢𑀯𑀺𑀥𑀁 𑀲𑀗𑁆𑀕𑀁 𑀬𑁄 𑀅𑀘𑁆𑀘𑀢𑀭𑀺. 𑀦𑀸𑀚𑁆𑀛𑁂𑀢𑀻𑀢𑀺 𑀦 𑀅𑀪𑀺𑀚𑁆𑀛𑀸𑀬𑀢𑀺.

𑁧𑁮𑁪. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀲𑀼𑀧𑀺 𑀬𑁄 𑀏𑀯𑀭𑀽𑀧𑁄 𑀳𑁄𑀢𑀼𑀁 𑀇𑀘𑁆𑀙𑀢𑀺, 𑀢𑀁 𑀯𑀤𑀸𑀫𑀺 𑁋 𑀬𑀁 𑀧𑀼𑀩𑁆𑀩𑁂𑀢𑀺 𑀕𑀸𑀣𑀸. 𑀢𑀢𑁆𑀣 𑀬𑀁 𑀧𑀼𑀩𑁆𑀩𑁂𑀢𑀺 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀁 𑀓𑀺𑀮𑁂𑀲𑀚𑀸𑀢𑀁 𑀅𑀢𑀻𑀢𑀁 𑀓𑀫𑁆𑀫𑀜𑁆𑀘. 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀦𑁆𑀢𑀺 𑀅𑀦𑀸𑀕𑀢𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀁 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁 𑀫𑀸 𑀅𑀳𑀼. 𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀤𑀺𑀥𑀫𑁆𑀫𑁂𑀧𑀺 𑀦 𑀕𑀳𑁂𑀲𑁆𑀲𑀲𑀺 𑀘𑁂. 𑀏𑀯𑀁 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑀅𑀩𑀻𑀚𑀁 𑀓𑀭𑁄𑀳𑀻𑀢𑀺 𑀫𑀕𑁆𑀕𑀜𑀸𑀡𑁂𑀦 𑀦 𑀩𑀻𑀚𑀁 𑀓𑀭𑁄𑀳𑀺. 𑀭𑀸𑀕𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀨𑀦𑁆𑀤𑀦𑀁. 𑀤𑁄𑀲𑀓𑀺𑀜𑁆𑀘𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁮𑁫. 𑀏𑀯𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀳𑀢𑁄 𑀣𑀼𑀢𑀺𑀯𑀲𑁂𑀦 𑀇𑀢𑁄 𑀧𑀭𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀲𑀩𑁆𑀩𑀲𑁄𑀢𑀺 𑀕𑀸𑀣𑀸𑀬 𑀫𑀫𑀸𑀬𑀺𑀢𑀦𑁆𑀢𑀺 𑀫𑀫𑀢𑁆𑀢𑀓𑀭𑀡𑀁. ‘‘𑀫𑀫 𑀇𑀤’’𑀦𑁆𑀢𑀺 𑀕𑀳𑀺𑀢𑀁 𑀯𑀸 𑀯𑀢𑁆𑀣𑀼. 𑀅𑀲𑀢𑀸 𑀘 𑀦 𑀲𑁄𑀘𑀢𑀻𑀢𑀺 𑀅𑀯𑀺𑀚𑁆𑀚𑀫𑀸𑀦𑀓𑀸𑀭𑀡𑀸 𑀅𑀲𑀦𑁆𑀢𑀓𑀸𑀭𑀡𑀸 𑀦 𑀲𑁄𑀘𑀢𑀺. 𑀦 𑀚𑀻𑀬𑀢𑀻𑀢𑀺 𑀚𑀸𑀦𑀺𑀁 𑀦𑀸𑀥𑀺𑀕𑀘𑁆𑀙𑀢𑀺.

𑀅𑀳𑀼 𑀯𑀢 𑀫𑁂𑀢𑀺 𑀫𑀬𑁆𑀳𑀁 𑀅𑀳𑁄𑀲𑀺 𑀯𑀢. 𑀢𑀁 𑀯𑀢 𑀫𑁂 𑀦𑀢𑁆𑀣𑀻𑀢𑀺 𑀬𑀁 𑀅𑀢𑀻𑀢𑁂 𑀅𑀳𑁄𑀲𑀺, 𑀢𑀁 𑀫𑀬𑁆𑀳𑀁 𑀇𑀤𑀸𑀦𑀺 𑀦 𑀲𑀦𑁆𑀢𑀺. 𑀲𑀺𑀬𑀸 𑀯𑀢 𑀫𑁂𑀢𑀺 𑀬𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀯𑀢𑀸𑀳𑀁 𑀦 𑀮𑀪𑀸𑀫𑀻𑀢𑀺 𑀇𑀤𑀸𑀦𑀺 𑀅𑀳𑀁 𑀏𑀓𑀁𑀲𑁂𑀦 𑀦 𑀧𑀸𑀧𑀼𑀡𑀸𑀫𑀺.

𑁧𑁮𑁬. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀲𑁆𑀲 𑀦𑀢𑁆𑀣𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀺 𑀭𑀽𑀧𑀸𑀤𑀺𑀥𑀫𑁆𑀫𑀚𑀸𑀢𑀁.

𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀓𑀫𑁆𑀫𑁂𑀦 𑀲𑀗𑁆𑀔𑀭𑀺𑀢𑀁. 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀘𑀺𑀢𑁆𑀢𑁂𑀦 𑀭𑀸𑀲𑀺𑀓𑀢𑀁. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯𑀸𑀢𑀺 𑀅𑀯𑀺𑀚𑁆𑀚𑀸𑀬 𑀢𑀼 𑀏𑀯. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀦𑀺𑀭𑀯𑀲𑁂𑀲𑀦𑀺𑀭𑁄𑀥𑀸.

𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽𑀢𑀺 𑀅𑀯𑀲𑀯𑀢𑁆𑀢𑀺𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀯𑀸 𑀢𑀼𑀘𑁆𑀙𑀲𑀗𑁆𑀔𑀸𑀭𑀲𑀫𑀦𑀼𑀧𑀲𑁆𑀲𑀦𑀯𑀲𑁂𑀦 𑀯𑀸𑀢𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀧𑀲𑁆𑀲. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘𑀸𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸𑀢𑀺 𑀏𑀯𑀁 𑀫𑀭𑀡𑀲𑁆𑀲 𑀢𑀭𑀡𑁄 𑀪𑀯𑁂𑀬𑁆𑀬. 𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀦𑁆𑀢𑀺 𑀏𑀯𑀁 𑀔𑀦𑁆𑀥𑀮𑁄𑀓𑀁 𑀧𑀲𑁆𑀲𑀦𑁆𑀢𑀁. 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻𑀢𑀺 𑀫𑀭𑀡𑀭𑀸𑀚𑀸 𑀦 𑀑𑀮𑁄𑀓𑁂𑀢𑀺 𑀦 𑀤𑀓𑁆𑀔𑀢𑀺.

𑀦𑀸𑀜𑁆𑀜𑀁 𑀧𑀢𑁆𑀣𑀬𑀢𑁂 𑀓𑀺𑀜𑁆𑀘𑀻𑀢𑀺 𑀅𑀜𑁆𑀜𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀦 𑀧𑀢𑁆𑀣𑀬𑀢𑀺 𑀦 𑀧𑀺𑀳𑀬𑀢𑀺. 𑀅𑀜𑁆𑀜𑀢𑁆𑀭 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑀸𑀢𑀺 𑀦𑀺𑀩𑁆𑀩𑀸𑀦𑀁 𑀞𑀧𑁂𑀢𑁆𑀯𑀸. ‘‘𑀅𑀜𑁆𑀜𑀢𑁆𑀭𑀧𑁆𑀧𑀝𑀺𑀲𑀦𑁆𑀥𑀺𑀬𑀸’’𑀢𑀺 𑀏𑀓𑀧𑀤𑀁 𑀓𑀢𑁆𑀯𑀸𑀧𑀺 𑀧𑀞𑀦𑁆𑀢𑀺.

𑁧𑁮𑁭. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀦𑀺𑀝𑁆𑀞𑀼𑀭𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀅𑀦𑀺𑀝𑁆𑀞𑀼𑀭𑀻𑀢𑀺 𑀅𑀦𑀺𑀲𑁆𑀲𑀼𑀓𑀻. ‘‘𑀅𑀦𑀺𑀝𑁆𑀞𑀭𑀻’’𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀲𑀩𑁆𑀩𑀥𑀻 𑀲𑀫𑁄𑀢𑀺 𑀲𑀩𑁆𑀩𑀢𑁆𑀣 𑀲𑀫𑁄, 𑀉𑀧𑁂𑀓𑁆𑀔𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁄 𑀲𑁄 ‘‘𑀦𑀢𑁆𑀣𑀺 𑀫𑁂’’𑀢𑀺 𑀦 𑀲𑁄𑀘𑀢𑀺, 𑀢𑀫𑀳𑀁 𑀅𑀯𑀺𑀓𑀫𑁆𑀧𑀺𑀦𑀁 𑀧𑀼𑀕𑁆𑀕𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀦𑀺𑀝𑁆𑀞𑀼𑀭𑀻 𑀅𑀦𑀦𑀼𑀕𑀺𑀤𑁆𑀥𑁄, 𑀅𑀦𑁂𑀚𑁄 𑀲𑀩𑁆𑀩𑀥𑀻 𑀲𑀫𑁄𑀢𑀺 𑀇𑀫𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀘𑀢𑀼𑀩𑁆𑀩𑀺𑀥𑀁 𑀆𑀦𑀺𑀲𑀁𑀲𑀁 𑀩𑁆𑀭𑀽𑀫𑀻𑀢𑀺.

𑀦𑀺𑀝𑁆𑀞𑀼𑀭𑀺𑀬𑁄𑀢𑀺 𑀇𑀲𑁆𑀲𑀼𑀓𑀻. 𑀦𑀺𑀝𑁆𑀞𑀼𑀭𑀪𑀸𑀯𑁄 𑀦𑀺𑀝𑁆𑀞𑀼𑀭𑀺𑀬𑀁, 𑀢𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀻𑀢𑀺 𑀔𑁂𑀴𑀧𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀝𑁆𑀞𑀼𑀭𑀺𑀬𑀓𑀫𑁆𑀫𑀦𑁆𑀢𑀺 𑀦𑀺𑀝𑁆𑀞𑀼𑀭𑀺𑀬𑀓𑀭𑀡𑀁. 𑀕𑀳𑀝𑁆𑀞𑁄 𑀯𑀸 𑀳𑀺 𑀕𑀳𑀝𑁆𑀞𑀁 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀓𑀼𑀚𑁆𑀛𑀺𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀻𑀢𑀺 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸 𑀧𑀸𑀤𑁂𑀦 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀦𑀺𑀝𑁆𑀞𑀼𑀭𑀺𑀬𑀁 𑀦𑀸𑀫 𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀓𑀫𑁆𑀫𑀁 ‘‘𑀦𑀺𑀝𑁆𑀞𑀼𑀭𑀺𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀲𑁆𑀲𑀸𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀢𑀢𑁄 𑀧𑀭𑀸 𑀤𑁆𑀯𑁂 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀇𑀢𑀭𑀢𑁆𑀢𑀬𑀁 𑀧𑀭𑀺𑀬𑀸𑀬𑀯𑀘𑀦𑀁. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦𑀁 𑀉𑀲𑀽𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸; 𑀢𑀢𑁆𑀣 𑀘 𑀅𑀦𑀪𑀺𑀭𑀢𑀺𑀭𑀲𑀸; 𑀢𑀢𑁄 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸; 𑀧𑀭𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀸.

𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀻𑀢𑀺 𑀧𑀘𑁆𑀘𑀬𑀮𑀸𑀪𑁂 𑀦 𑀘𑀮𑀢𑀺. 𑀅𑀮𑀸𑀪𑁂𑀧𑀻𑀢𑀺 𑀧𑀘𑁆𑀘𑀬𑀸𑀦𑀁 𑀅𑀮𑀸𑀪𑁂𑀧𑀺.

𑁧𑁮𑁮. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀦𑁂𑀚𑀲𑁆𑀲𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀦𑀺𑀲𑀗𑁆𑀔𑀢𑀻𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀲𑀗𑁆𑀔𑀸𑀭𑁄. 𑀲𑁄 𑀳𑀺 𑀬𑀲𑁆𑀫𑀸 𑀦𑀺𑀲𑀗𑁆𑀔𑀭𑀺𑀬𑀢𑀺, 𑀦𑀺𑀲𑀗𑁆𑀔𑀭𑁄𑀢𑀺 𑀯𑀸, 𑀢𑀲𑁆𑀫𑀸 ‘‘𑀦𑀺𑀲𑀗𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀬𑀸𑀭𑀫𑁆𑀪𑀸𑀢𑀺 𑀯𑀺𑀯𑀺𑀥𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑀸 𑀆𑀭𑀫𑁆𑀪𑀸. 𑀔𑁂𑀫𑀁 𑀧𑀲𑁆𑀲𑀢𑀺 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀢𑁆𑀣 𑀅𑀪𑀬𑀫𑁂𑀯 𑀧𑀲𑁆𑀲𑀢𑀺.

𑀆𑀭𑀫𑁆𑀪𑀸𑀢𑀺 𑀓𑀫𑁆𑀫𑀸𑀦𑀁 𑀧𑀞𑀫𑀸𑀭𑀫𑁆𑀪𑀸. 𑀯𑀺𑀬𑀸𑀭𑀫𑁆𑀪𑀸𑀢𑀺 𑀉𑀧𑀭𑀽𑀧𑀭𑀺 𑀯𑀺𑀯𑀺𑀥𑀆𑀭𑀫𑁆𑀪𑀦𑀯𑀲𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑀸. 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀚𑀦𑀓𑀓𑀫𑁆𑀫𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀯𑀺𑀬𑀸𑀭𑀫𑁆𑀪𑀸 𑀆𑀭𑀢𑁄.

𑁧𑁮𑁯. 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀦 𑀲𑀫𑁂𑀲𑀽𑀢𑀺 𑀕𑀸𑀣𑀸. 𑀢𑀢𑁆𑀣 𑀦 𑀯𑀤𑀢𑁂𑀢𑀺 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀫𑀸𑀦𑀯𑀲𑁂𑀦 𑀲𑀫𑁂𑀲𑀼𑀧𑀺 𑀅𑀢𑁆𑀢𑀸𑀦𑀁 𑀦 𑀯𑀤𑀢𑀺 𑀑𑀫𑁂𑀲𑀼𑀧𑀺 𑀉𑀲𑁆𑀲𑁂𑀲𑀼𑀧𑀺. 𑀦𑀸𑀤𑁂𑀢𑀺 𑀦 𑀦𑀺𑀭𑀲𑁆𑀲𑀢𑀻𑀢𑀺 𑀭𑀽𑀧𑀸𑀤𑀻𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀦 𑀕𑀡𑁆𑀳𑀸𑀢𑀺 𑀦 𑀦𑀺𑀲𑁆𑀲𑀚𑁆𑀚𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯. 𑀏𑀯𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.