𑁧𑁬. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁦. 𑀲𑁄𑀴𑀲𑀫𑁂 𑀦 𑀫𑁂 𑀤𑀺𑀝𑁆𑀞𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄. 𑀢𑀢𑁆𑀣 𑀇𑀢𑁄 𑀧𑀼𑀩𑁆𑀩𑁂𑀢𑀺 𑀇𑀢𑁄 𑀲𑀗𑁆𑀓𑀲𑁆𑀲𑀦𑀕𑀭𑁂 𑀑𑀢𑀭𑀡𑀢𑁄 𑀧𑀼𑀩𑁆𑀩𑁂. 𑀯𑀕𑁆𑀕𑀼𑀯𑀤𑁄𑀢𑀺 𑀲𑀼𑀦𑁆𑀤𑀭𑀯𑀤𑁄. 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄𑀢𑀺 𑀢𑀼𑀲𑀺𑀢𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀆𑀕𑀢𑀢𑁆𑀢𑀸 𑀢𑀼𑀲𑀺𑀢𑀸 𑀆𑀕𑀢𑁄. 𑀕𑀡𑀸𑀘𑀭𑀺𑀬𑀢𑁆𑀢𑀸 𑀕𑀡𑀻. 𑀲𑀦𑁆𑀢𑀼𑀝𑁆𑀞𑀝𑁆𑀞𑁂𑀦 𑀯𑀸 𑀢𑀼𑀲𑀺𑀢𑀲𑀗𑁆𑀔𑀸𑀢𑀸 𑀤𑁂𑀯𑀮𑁄𑀓𑀸 𑀕𑀡𑀺𑀁 𑀆𑀕𑀢𑁄, 𑀢𑀼𑀲𑀺𑀢𑀸𑀦𑀁 𑀯𑀸 𑀅𑀭𑀳𑀦𑁆𑀢𑀸𑀦𑀁 𑀕𑀡𑀺𑀁 𑀆𑀕𑀢𑁄𑀢𑀺.

𑀇𑀫𑀺𑀦𑀸 𑀘𑀓𑁆𑀔𑀼𑀦𑀸𑀢𑀺 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁂𑀦 𑀧𑀓𑀢𑀺𑀫𑀁𑀲𑀘𑀓𑁆𑀔𑀼𑀦𑀸. 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦𑀸𑀢𑀺 𑀇𑀫𑀺𑀦𑀸 𑀧𑀘𑁆𑀙𑀺𑀫𑁂𑀦 𑀅𑀢𑁆𑀢𑀪𑀸𑀯𑁂𑀦. 𑀢𑀸𑀯𑀢𑀺𑀁𑀲𑀪𑀯𑀦𑁂𑀢𑀺 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂. 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂𑀢𑀺 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸. 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀦𑁆𑀢𑀺 𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀧𑀸𑀲𑀸𑀡𑀧𑀺𑀝𑁆𑀞𑁂. 𑀯𑀲𑁆𑀲𑀁 𑀯𑀼𑀝𑁆𑀞𑁄𑀢𑀺 𑀯𑀼𑀝𑁆𑀞𑀯𑀲𑁆𑀲𑁄. 𑀤𑁂𑀯𑀕𑀡𑀧𑀭𑀺𑀯𑀼𑀢𑁄𑀢𑀺 𑀤𑁂𑀯𑀲𑀗𑁆𑀖𑁂𑀦 𑀧𑀭𑀺𑀯𑀸𑀭𑀺𑀢𑁄. 𑀑𑀢𑀺𑀡𑁆𑀡𑁄𑀢𑀺 𑀅𑀯𑀢𑀺𑀡𑁆𑀡𑁄. 𑀇𑀫𑀁 𑀤𑀲𑁆𑀲𑀦𑀁 𑀧𑀼𑀩𑁆𑀩𑁂𑀢𑀺 𑀅𑀜𑁆𑀜𑀢𑁆𑀭 𑀇𑀫𑀫𑁆𑀳𑀸 𑀤𑀲𑁆𑀲𑀦𑀸 𑀧𑀼𑀩𑁆𑀩𑁂. 𑀦 𑀤𑀺𑀝𑁆𑀞𑁄𑀢𑀺 𑀅𑀜𑁆𑀜𑀤𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄.

𑀔𑀢𑁆𑀢𑀺𑀬𑀲𑁆𑀲 𑀯𑀸𑀢𑀺 𑀔𑀢𑁆𑀢𑀺𑀬𑀲𑁆𑀲 𑀯𑀤𑀦𑁆𑀢𑀲𑁆𑀲 𑀦 𑀲𑀼𑀢𑁄. 𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀫𑀥𑀼𑀭𑀯𑀤𑁄𑀢𑀺𑀆𑀤𑀻𑀲𑀼 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀫𑀥𑀼𑀭𑀁 𑀯𑀤𑀢𑀻𑀢𑀺 𑀫𑀥𑀼𑀭𑀯𑀤𑁄. 𑀧𑁂𑀫𑀚𑀦𑀓𑀁 𑀧𑁂𑀫𑀸𑀭𑀳𑀁 𑀯𑀤𑀢𑀻𑀢𑀺 𑀧𑁂𑀫𑀦𑀻𑀬𑀯𑀤𑁄. 𑀳𑀤𑀬𑀗𑁆𑀕𑀫𑀘𑀺𑀢𑁆𑀢𑁂 𑀞𑀧𑀦𑀬𑁄𑀕𑁆𑀬𑀁 𑀯𑀤𑀢𑀻𑀢𑀺 𑀳𑀤𑀬𑀗𑁆𑀕𑀫𑀯𑀤𑁄. 𑀓𑀭𑀯𑀻𑀓𑀲𑀓𑀼𑀡𑀲𑀤𑁆𑀤𑁄 𑀯𑀺𑀬 𑀫𑀥𑀼𑀭𑀖𑁄𑀲𑁄 𑀅𑀲𑁆𑀲𑀸𑀢𑀺 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀖𑁄𑀲𑁄. 𑀯𑀺𑀲𑁆𑀲𑀝𑁆𑀞𑁄 𑀘𑀸𑀢𑀺 𑀅𑀧𑀮𑀺𑀩𑀼𑀤𑁆𑀥𑁄 𑀢𑀢𑁆𑀣 𑀢𑀢𑁆𑀣 𑀅𑀧𑀓𑁆𑀔𑀮𑀦𑁄. 𑀯𑀺𑀜𑁆𑀜𑁂𑀬𑁆𑀬𑁄 𑀘𑀸𑀢𑀺 𑀲𑀼𑀯𑀺𑀚𑀸𑀦𑁂𑀬𑁆𑀬𑁄 𑀘. 𑀫𑀜𑁆𑀚𑀼 𑀘𑀸𑀢𑀺 𑀫𑀥𑀼𑀭𑁄 𑀘. 𑀲𑀯𑀦𑀻𑀬𑁄 𑀘𑀸𑀢𑀺 𑀓𑀡𑁆𑀡𑀲𑀼𑀔𑁄 𑀘. 𑀩𑀺𑀦𑁆𑀤𑀼 𑀘𑀸𑀢𑀺 𑀖𑀦𑁄 𑀘. 𑀅𑀯𑀺𑀲𑀸𑀭𑀻 𑀘𑀸𑀢𑀺 𑀦 𑀧𑀢𑁆𑀣𑀝𑁄 𑀘. 𑀕𑀫𑁆𑀪𑀻𑀭𑁄 𑀘𑀸𑀢𑀺 𑀦 𑀉𑀢𑁆𑀢𑀸𑀦𑁄 𑀘. 𑀦𑀺𑀦𑁆𑀦𑀸𑀤𑀺 𑀘𑀸𑀢𑀺 𑀖𑁄𑀲𑀯𑀦𑁆𑀢𑁄 𑀘. 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀲𑀢𑁆𑀣𑀼𑀦𑁄. 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬𑀸𑀢𑀺 𑀧𑀭𑀺𑀲𑀢𑁄 𑀩𑀳𑀺. 𑀦 𑀦𑀺𑀘𑁆𑀙𑀭𑀢𑀻𑀢𑀺 𑀦 𑀦𑀺𑀓𑁆𑀔𑀫𑀢𑀺. 𑀓𑀺𑀁𑀓𑀸𑀭𑀡𑀸? 𑀏𑀯𑀭𑀽𑀧𑁄 𑀫𑀥𑀼𑀭𑀲𑀤𑁆𑀤𑁄 𑀦𑀺𑀓𑁆𑀓𑀸𑀭𑀡𑀸 𑀫𑀸 𑀯𑀺𑀦𑀲𑁆𑀲𑀢𑀽𑀢𑀺. 𑀩𑁆𑀭𑀳𑁆𑀫𑀲𑁆𑀲𑀭𑁄𑀢𑀺 𑀅𑀜𑁆𑀜𑁂 𑀙𑀺𑀦𑁆𑀦𑀲𑁆𑀲𑀭𑀸𑀧𑀺 𑀪𑀺𑀦𑁆𑀦𑀲𑁆𑀲𑀭𑀸𑀧𑀺 𑀓𑀸𑀓𑀲𑁆𑀲𑀭𑀸𑀧𑀺 𑀳𑁄𑀦𑁆𑀢𑀺, 𑀅𑀬𑀁 𑀧𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀲𑀤𑀺𑀲𑁂𑀦 𑀲𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀳𑀺 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀲𑀭𑁄 𑀯𑀺𑀲𑀼𑀤𑁆𑀥𑁄 𑀳𑁄𑀢𑀺, 𑀪𑀕𑀯𑀢𑀸𑀧𑀺 𑀓𑀢𑀓𑀫𑁆𑀫𑀁 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺, 𑀯𑀢𑁆𑀣𑀼𑀦𑁄 𑀲𑀼𑀤𑁆𑀥𑀢𑁆𑀢𑀸 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀲𑀫𑀼𑀝𑁆𑀞𑀳𑀦𑁆𑀢𑁄 𑀲𑀭𑁄 𑀯𑀺𑀲𑀼𑀤𑁆𑀥𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀯 𑀲𑀫𑀼𑀝𑁆𑀞𑀸𑀢𑀺. 𑀓𑀭𑀯𑀻𑀓𑁄 𑀯𑀺𑀬 𑀪𑀡𑀢𑀻𑀢𑀺 𑀓𑀭𑀯𑀻𑀓𑀪𑀸𑀡𑀻, 𑀫𑀢𑁆𑀢𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀖𑁄𑀲𑁄𑀢𑀺 𑀅𑀢𑁆𑀣𑁄.

𑀢𑀸𑀭𑁂𑀢𑀻𑀢𑀺 𑀅𑀔𑁂𑀫𑀦𑁆𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀉𑀢𑁆𑀢𑀸𑀭𑁂𑀢𑀻𑀢𑀺 𑀔𑁂𑀫𑀦𑁆𑀢𑀪𑀽𑀫𑀺𑀁 𑀉𑀧𑀦𑁂𑀦𑁆𑀢𑁄 𑀢𑀸𑀭𑁂𑀢𑀺. 𑀦𑀺𑀢𑁆𑀢𑀸𑀭𑁂𑀢𑀻𑀢𑀺 𑀅𑀔𑁂𑀫𑀦𑁆𑀢𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀸𑀫𑁂𑀦𑁆𑀢𑁄 𑀢𑀸𑀭𑁂𑀢𑀺. 𑀧𑀢𑀸𑀭𑁂𑀢𑀻𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀭𑁂𑀢𑀺, 𑀳𑀢𑁆𑀣𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀬 𑀢𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁆𑀧𑁂𑀢𑀁 𑀢𑀸𑀭𑀡𑀼𑀢𑁆𑀢𑀸𑀭𑀡𑀸𑀤𑀺𑀔𑁂𑀫𑀦𑁆𑀢𑀝𑁆𑀞𑀸𑀦𑁂 𑀞𑀧𑀦𑀫𑁂𑀯𑀸𑀢𑀺 𑀆𑀳 𑁋 ‘‘𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀻’’𑀢𑀺. 𑀲𑀢𑁆𑀢𑁂𑀢𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑁂. 𑀫𑀳𑀸𑀕𑀳𑀦𑀢𑀸𑀬 𑀫𑀳𑀸𑀦𑀢𑁆𑀣𑀢𑀸𑀬 𑀤𑀼𑀦𑁆𑀦𑀺𑀢𑁆𑀢𑀭𑀺𑀬𑀢𑀸𑀬 𑀘 𑀚𑀸𑀢𑀺𑀬𑁂𑀯 𑀓𑀦𑁆𑀢𑀸𑀭𑁄 𑀚𑀸𑀢𑀺𑀓𑀦𑁆𑀢𑀸𑀭𑁄, 𑀢𑀁 𑀚𑀸𑀢𑀺𑀓𑀦𑁆𑀢𑀸𑀭𑀁.

𑀕𑀡𑀲𑁆𑀲 𑀲𑀼𑀲𑁆𑀲𑀽𑀲𑀢𑀻𑀢𑀺 𑀕𑀡𑁄 𑀅𑀲𑁆𑀲 𑀯𑀘𑀦𑀁 𑀲𑀼𑀲𑁆𑀲𑀽𑀲𑀢𑀺 𑀲𑀼𑀡𑀸𑀢𑀺 𑀉𑀧𑀮𑀓𑁆𑀔𑁂𑀢𑀺. 𑀲𑁄𑀢𑀁 𑀑𑀤𑀳𑀢𑀻𑀢𑀺 𑀲𑁄𑀢𑀼𑀓𑀸𑀫𑀢𑀸𑀬 𑀲𑁄𑀢𑀁 𑀅𑀯𑀤𑀳𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀻𑀢𑀺 𑀜𑀸𑀢𑀼𑀓𑀸𑀫𑀁 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺. 𑀕𑀡𑀁 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀚𑀦𑀲𑀫𑀽𑀳𑀁 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸 𑀅𑀓𑀼𑀲𑀮𑀸 𑀉𑀝𑁆𑀞𑀸𑀧𑁂𑀢𑁆𑀯𑀸. 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂 𑀓𑀼𑀲𑀮𑁂 𑀞𑀧𑁂𑀢𑀺. 𑀲𑀗𑁆𑀖𑀻𑀢𑀺 𑀭𑀸𑀲𑀺𑀯𑀲𑁂𑀦 𑀲𑀗𑁆𑀖𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀗𑁆𑀖𑀻. 𑀧𑀭𑀺𑀲𑀯𑀲𑁂𑀦 𑀕𑀡𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀕𑀡𑀻. 𑀕𑀡𑀲𑁆𑀲 𑀆𑀘𑀭𑀺𑀬𑁄𑀢𑀺 𑀕𑀡𑀸𑀘𑀭𑀺𑀬𑁄.

𑁧𑁯𑁧. 𑀤𑀼𑀢𑀺𑀬𑀕𑀸𑀣𑀸𑀬 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀬𑀣𑀸 𑀤𑀺𑀲𑁆𑀲𑀢𑀻𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀯𑀺𑀬 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀤𑀺𑀲𑁆𑀲𑀢𑀺. 𑀬𑀣𑀸 𑀯𑀸 𑀤𑀺𑀲𑁆𑀲𑀢𑀻𑀢𑀺 𑀢𑀘𑁆𑀙𑀢𑁄 𑀅𑀯𑀺𑀧𑀭𑀻𑀢𑀢𑁄 𑀤𑀺𑀲𑁆𑀲𑀢𑀺. 𑀘𑀓𑁆𑀔𑀼𑀫𑀸𑀢𑀺 𑀉𑀢𑁆𑀢𑀫𑀘𑀓𑁆𑀔𑀼𑀫𑀸. 𑀏𑀓𑁄𑀢𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑀸𑀤𑀻𑀳𑀺 𑀏𑀓𑁄. 𑀭𑀢𑀺𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀭𑀢𑀺𑀆𑀤𑀺𑀁.

𑀧𑀢𑀺𑀭𑀽𑀧𑀓𑁄𑀢𑀺 𑀲𑀼𑀯𑀡𑁆𑀡𑀧𑀢𑀺𑀭𑀽𑀧𑀓𑁄 𑀓𑀼𑀡𑁆𑀟𑀮𑁄. 𑀫𑀢𑁆𑀢𑀺𑀓𑀸𑀓𑀼𑀡𑁆𑀟𑀮𑁄𑀯𑀸𑀢𑀺 𑀫𑀢𑁆𑀢𑀺𑀓𑀸𑀬 𑀓𑀢𑀓𑀼𑀡𑁆𑀟𑀮𑁄 𑀯𑀺𑀬. 𑀮𑁄𑀳𑀟𑁆𑀠𑀫𑀸𑀲𑁄𑀯 𑀲𑀼𑀯𑀡𑁆𑀡𑀙𑀦𑁆𑀦𑁄𑀢𑀺 𑀲𑀼𑀯𑀡𑁆𑀡𑁂𑀦 𑀧𑀝𑀺𑀘𑁆𑀙𑀦𑁆𑀦𑁄 𑀮𑁄𑀳𑀫𑀸𑀲𑀓𑁄 𑀯𑀺𑀬. 𑀧𑀭𑀺𑀯𑀸𑀭𑀙𑀦𑁆𑀦𑀸𑀢𑀺 𑀧𑀭𑀺𑀯𑀸𑀭𑁂𑀦 𑀙𑀸𑀤𑀺𑀢𑀸. 𑀅𑀦𑁆𑀢𑁄 𑀅𑀲𑀼𑀤𑁆𑀥𑀸𑀢𑀺 𑀅𑀩𑁆𑀪𑀦𑁆𑀢𑀭𑀢𑁄 𑀭𑀸𑀕𑀸𑀤𑀻𑀳𑀺 𑀅𑀧𑀭𑀺𑀲𑀼𑀤𑁆𑀥𑀸. 𑀩𑀳𑀺 𑀲𑁄𑀪𑀫𑀸𑀦𑀸𑀢𑀺 𑀘𑀻𑀯𑀭𑀸𑀤𑀻𑀳𑀺 𑀩𑀸𑀳𑀺𑀭𑀢𑁄 𑀲𑀼𑀦𑁆𑀤𑀭𑀸.

𑀅𑀓𑀧𑁆𑀧𑀺𑀢𑀇𑀭𑀺𑀬𑀸𑀧𑀣𑀸 𑀘𑀸𑀢𑀺 𑀅𑀲𑀚𑁆𑀚𑀺𑀢𑀇𑀭𑀺𑀬𑀸𑀧𑀣𑀸. 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑀧𑀢𑁆𑀣𑀦𑀸.

𑀯𑀺𑀲𑀼𑀤𑁆𑀥𑀲𑀤𑁆𑀤𑁄𑀢𑀺 𑀧𑀭𑀺𑀲𑀼𑀤𑁆𑀥𑀓𑀺𑀢𑁆𑀢𑀺𑀲𑀤𑁆𑀤𑁄, 𑀬𑀣𑀸𑀪𑀽𑀢𑀣𑀼𑀢𑀺𑀖𑁄𑀲𑁄𑀢𑀺 𑀅𑀢𑁆𑀣𑁄. 𑀕𑀢𑀓𑀺𑀢𑁆𑀢𑀺𑀲𑀤𑁆𑀤𑀲𑀺𑀮𑁄𑀓𑁄𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑀜𑁆𑀘 𑀲𑀺𑀮𑁄𑀓𑀜𑁆𑀘 𑀕𑀳𑁂𑀢𑁆𑀯𑀸 𑀘𑀭𑀡𑀲𑀻𑀮𑁄. 𑀓𑀢𑁆𑀣 𑀯𑀺𑀲𑀼𑀤𑁆𑀥𑀲𑀤𑁆𑀤𑁄𑀢𑀺 𑀘𑁂? ‘‘𑀦𑀸𑀕𑀪𑀯𑀦𑁂 𑀘 𑀲𑀼𑀧𑀡𑁆𑀡𑀪𑀯𑀦𑁂 𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀝𑁆𑀞𑀸𑀦𑁂. 𑀢𑀢𑁄 𑀘 𑀪𑀺𑀬𑁆𑀬𑁄𑀢𑀺 𑀢𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀘 𑀯𑁂𑀦𑁂𑀬𑁆𑀬𑀯𑀲𑁂𑀦 𑀅𑀢𑀺𑀭𑁂𑀓𑀢𑀭𑁄𑀧𑀺 𑀤𑀺𑀲𑁆𑀲𑀢𑀺.

𑀲𑀩𑁆𑀩𑀁 𑀭𑀸𑀕𑀢𑀫𑀦𑁆𑀢𑀺 𑀲𑀓𑀮𑀁 𑀭𑀸𑀕𑀦𑁆𑀥𑀓𑀸𑀭𑀁. 𑀤𑁄𑀲𑀢𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀥𑀓𑀭𑀡𑀦𑁆𑀢𑀺 𑀧𑀜𑁆𑀜𑀸𑀮𑁄𑀓𑀦𑀺𑀯𑀸𑀭𑀡𑀓𑀭𑀡𑀁. 𑀅𑀘𑀓𑁆𑀔𑀼𑀓𑀭𑀡𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀓𑀭𑀡𑀁. 𑀅𑀜𑁆𑀜𑀸𑀡𑀓𑀭𑀡𑀦𑁆𑀢𑀺 𑀜𑀸𑀡𑁂𑀦 𑀅𑀚𑀸𑀦𑀦𑀓𑀭𑀡𑀁. 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀦𑁆𑀢𑀺 𑀧𑀜𑁆𑀜𑀸𑀦𑀬𑀦𑀦𑀸𑀲𑀓𑀁. 𑀯𑀺𑀖𑀸𑀢𑀧𑀓𑁆𑀔𑀺𑀓𑀦𑁆𑀢𑀺 𑀧𑀻𑀴𑀸𑀓𑁄𑀝𑁆𑀞𑀸𑀲𑀺𑀓𑀁. 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀅𑀧𑀘𑁆𑀘𑀬𑀅𑀫𑀢𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀦𑀺𑀓𑀁.

𑀲𑀩𑁆𑀩𑀁 𑀢𑀁 𑀢𑁂𑀦 𑀩𑁄𑀥𑀺𑀜𑀸𑀡𑁂𑀦 𑀩𑀼𑀚𑁆𑀛𑀻𑀢𑀺 𑀢𑀁 𑀲𑀓𑀮𑀁 𑀢𑁂𑀦 𑀘𑀢𑀼𑀫𑀕𑁆𑀕𑀜𑀸𑀡𑀯𑀲𑁂𑀦 𑀩𑀼𑀚𑁆𑀛𑀺. 𑀧𑀞𑀫𑀫𑀕𑁆𑀕𑀯𑀲𑁂𑀦 𑀚𑀸𑀦𑀺 𑀅𑀦𑀼𑀩𑀼𑀚𑁆𑀛𑀺. 𑀤𑀼𑀢𑀺𑀬𑀫𑀕𑁆𑀕𑀯𑀲𑁂𑀦 𑀧𑀼𑀦 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀢𑀢𑀺𑀬𑀫𑀕𑁆𑀕𑀯𑀲𑁂𑀦 𑀧𑀝𑀺𑀯𑁂𑀥𑀁 𑀧𑀸𑀧𑀼𑀡𑀺 𑀲𑀫𑁆𑀩𑀼𑀚𑁆𑀛𑀺. 𑀘𑀢𑀼𑀢𑁆𑀣𑀫𑀕𑁆𑀕𑀯𑀲𑁂𑀦 𑀦𑀺𑀲𑁆𑀲𑁂𑀲𑀧𑀝𑀺𑀯𑁂𑀥𑁂𑀦 𑀲𑀫𑁆𑀫𑀸𑀩𑀼𑀚𑁆𑀛𑀺. 𑀅𑀥𑀺𑀕𑀘𑁆𑀙𑀺 𑀨𑀲𑁆𑀲𑁂𑀲𑀺 𑀲𑀘𑁆𑀙𑀸𑀓𑀸𑀲𑀻𑀢𑀺 𑀏𑀢𑀁 𑀢𑀬𑀁 𑀨𑀮𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀧𑀞𑀫𑀤𑀼𑀢𑀺𑀬𑀯𑀲𑁂𑀦 𑀧𑀝𑀺𑀮𑀪𑀺. 𑀢𑀢𑀺𑀬𑀯𑀲𑁂𑀦 𑀜𑀸𑀡𑀨𑀲𑁆𑀲𑁂𑀦 𑀨𑀼𑀲𑀺. 𑀘𑀢𑀼𑀢𑁆𑀣𑀯𑀲𑁂𑀦 𑀧𑀘𑁆𑀘𑀓𑁆𑀔𑀁 𑀅𑀓𑀸𑀲𑀺. 𑀅𑀣 𑀯𑀸 𑀏𑀓𑁂𑀓𑀨𑀮𑀲𑁆𑀲 𑀢𑀬𑁄𑀧𑀺 𑀮𑀩𑁆𑀪𑀦𑁆𑀢𑀺 𑀏𑀯.

𑀦𑁂𑀓𑁆𑀔𑀫𑁆𑀫𑀭𑀢𑀺𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀭𑀢𑀺𑀁. 𑀯𑀺𑀯𑁂𑀓𑀭𑀢𑀺𑀦𑁆𑀢𑀺 𑀓𑀸𑀬𑀯𑀺𑀯𑁂𑀓𑀸𑀤𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑀭𑀢𑀺𑀁. 𑀉𑀧𑀲𑀫𑀭𑀢𑀺𑀦𑁆𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑁂 𑀭𑀢𑀺𑀁. 𑀲𑀫𑁆𑀩𑁄𑀥𑀺𑀭𑀢𑀺𑀦𑁆𑀢𑀺 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀭𑀢𑀺𑀁.

𑁧𑁯𑁨. 𑀢𑀢𑀺𑀬𑀕𑀸𑀣𑀸𑀬 𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀦𑁆𑀢𑀺 𑀇𑀥 𑀩𑀳𑀽𑀦𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀲𑀺𑀲𑁆𑀲𑀸𑀦𑀁. 𑀲𑀺𑀲𑁆𑀲𑀸 𑀳𑀺 𑀆𑀘𑀭𑀺𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁆𑀢𑀸 ‘‘𑀩𑀤𑁆𑀥𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺 𑀅𑀢𑁆𑀣𑀺𑀓𑁄 𑀧𑀜𑁆𑀳𑁂𑀦 𑀆𑀕𑀢𑁄𑀫𑁆𑀳𑀺, 𑀅𑀢𑁆𑀣𑀺𑀓𑀸𑀦𑀁 𑀯𑀸 𑀧𑀜𑁆𑀳𑁂𑀦 𑀆𑀕𑀫𑀦𑀁, 𑀧𑀜𑁆𑀳𑁂𑀦 𑀅𑀢𑁆𑀣𑀺 𑀆𑀕𑀫𑀦𑀁 𑀯𑀸𑀢𑀺.

𑀩𑀼𑀤𑁆𑀥𑁄𑀢𑀺 𑀧𑀤𑀲𑁆𑀲 𑀅𑀪𑀸𑀯𑁂𑀧𑀺 𑀢𑀁 𑀩𑀼𑀤𑁆𑀥𑀦𑁆𑀢𑀺 𑀧𑀤𑁂 𑀬𑁄 𑀲𑁄 𑀩𑀼𑀤𑁆𑀥𑁄, 𑀢𑀁 𑀦𑀺𑀤𑁆𑀤𑀺𑀲𑀺𑀢𑀼𑀓𑀸𑀫𑁂𑀦 ‘‘𑀩𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀬𑀫𑁆𑀪𑀽𑀢𑀺 𑀉𑀧𑀤𑁂𑀲𑀁 𑀯𑀺𑀦𑀸 𑀲𑀬𑀫𑁂𑀯 𑀪𑀽𑀢𑁄. 𑀅𑀦𑀸𑀘𑀭𑀺𑀬𑀓𑁄𑀢𑀺 𑀲𑀬𑀫𑁆𑀪𑀽𑀧𑀤𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀁. 𑀬𑁄 𑀳𑀺 𑀆𑀘𑀭𑀺𑀬𑀁 𑀯𑀺𑀦𑀸 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀲𑁄 𑀲𑀬𑀫𑁆𑀪𑀽 𑀦𑀸𑀫 𑀳𑁄𑀢𑀻𑀢𑀺. 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀽𑀢𑀺𑀆𑀤𑀺 𑀅𑀦𑀸𑀘𑀭𑀺𑀬𑀓𑀪𑀸𑀯𑀲𑁆𑀲 𑀅𑀢𑁆𑀣𑀧𑁆𑀧𑀓𑀸𑀲𑀦𑀁. 𑀅𑀦𑀦𑀼𑀲𑁆𑀲𑀼𑀢𑁂𑀲𑀽𑀢𑀺 𑀆𑀘𑀭𑀺𑀬𑀢𑁄 𑀅𑀦𑀦𑀼𑀲𑁆𑀲𑀼𑀢𑁂𑀲𑀼. 𑀲𑀸𑀫𑀦𑁆𑀢𑀺 𑀲𑀬𑀫𑁂𑀯. 𑀅𑀪𑀺𑀲𑀫𑁆𑀩𑀼𑀚𑁆𑀛𑀻𑀢𑀺 𑀪𑀼𑀲𑀁 𑀲𑀫𑁆𑀫𑀸 𑀧𑀝𑀺𑀯𑀺𑀚𑁆𑀛𑀺. 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀻𑀢𑀺 𑀢𑁂𑀲𑀼 𑀘 𑀲𑀘𑁆𑀘𑁂𑀲𑀼 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀧𑀸𑀧𑀼𑀡𑀺. 𑀬𑀣𑀸 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀸 𑀲𑀩𑁆𑀩𑀜𑁆𑀜𑀼𑀦𑁄 𑀳𑁄𑀦𑁆𑀢𑀺, 𑀢𑀣𑀸 𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀦𑁆𑀢𑀺 𑀤𑀲𑀲𑀼 𑀘 𑀢𑀣𑀸𑀕𑀢𑀩𑀮𑁂𑀲𑀼 𑀇𑀲𑁆𑀲𑀭𑀪𑀸𑀯𑀁 𑀧𑀸𑀧𑀼𑀡𑀺. 𑀬𑁄 𑀲𑁄 𑀏𑀯𑀁 𑀪𑀽𑀢𑁄, 𑀲𑁄 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀦𑀺𑀫𑀺𑀢𑁆𑀢𑀸𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑀧𑀭𑀺𑀪𑀸𑀯𑀺𑀢𑀔𑀦𑁆𑀥𑀲𑀦𑁆𑀢𑀸𑀦𑀁 𑀉𑀧𑀸𑀤𑀸𑀬 𑀧𑀡𑁆𑀡𑀢𑁆𑀢𑀺𑀓𑁄, 𑀲𑀩𑁆𑀩𑀜𑁆𑀜𑀼𑀢𑀧𑀤𑀝𑁆𑀞𑀸𑀦𑀁 𑀯𑀸 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀺𑀫𑀼𑀧𑀸𑀤𑀸𑀬 𑀧𑀡𑁆𑀡𑀢𑁆𑀢𑀺𑀓𑁄 𑀲𑀢𑁆𑀢𑀯𑀺𑀲𑁂𑀲𑁄 𑀩𑀼𑀤𑁆𑀥𑁄. 𑀏𑀢𑁆𑀢𑀸𑀯𑀢𑀸 𑀅𑀢𑁆𑀣𑀢𑁄 𑀩𑀼𑀤𑁆𑀥𑀯𑀺𑀪𑀸𑀯𑀦𑀸 𑀓𑀢𑀸 𑀳𑁄𑀢𑀺.

𑀇𑀤𑀸𑀦𑀺 𑀩𑁆𑀬𑀜𑁆𑀚𑀦𑀢𑁄 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀩𑀼𑀤𑁆𑀥𑁄𑀢𑀺 𑀓𑁂𑀦𑀝𑁆𑀞𑁂𑀦 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀮𑁄𑀓𑁂 𑀅𑀯𑀕𑀦𑁆𑀢𑀸 ‘‘𑀅𑀯𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄. 𑀬𑀣𑀸 𑀧𑀡𑁆𑀡𑀲𑁄𑀲𑀸 𑀯𑀸𑀢𑀸 ‘‘𑀧𑀡𑁆𑀡𑀲𑀼𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄. 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀥𑀫𑁆𑀫𑀩𑀼𑀚𑁆𑀛𑀦𑀲𑀫𑀢𑁆𑀣𑀸𑀬 𑀩𑀼𑀤𑁆𑀥𑀺𑀬𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄𑀢𑀺 𑀅𑀜𑁆𑀜𑁂𑀦 𑀅𑀩𑁄𑀥𑀦𑀻𑀬𑀢𑁄 𑀲𑀬𑀫𑁂𑀯 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄𑀢𑀺 𑀦𑀸𑀦𑀸𑀕𑀼𑀡𑀯𑀺𑀓𑀲𑀦𑀢𑁄 𑀧𑀤𑀼𑀫𑀫𑀺𑀯 𑀯𑀺𑀓𑀲𑀦𑀝𑁆𑀞𑁂𑀦 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄𑀢𑀺𑀆𑀤𑀻𑀳𑀺 𑀙𑀳𑀺 𑀧𑀭𑀺𑀬𑀸𑀬𑁂𑀳𑀺 𑀘𑀺𑀢𑁆𑀢𑀲𑀗𑁆𑀓𑁄𑀘𑀓𑀭𑀥𑀫𑁆𑀫𑀧𑁆𑀧𑀳𑀸𑀦𑁂𑀦 𑀦𑀺𑀤𑁆𑀤𑀸𑀬 𑀯𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀯𑀺𑀬 𑀲𑀩𑁆𑀩𑀓𑀺𑀮𑁂𑀲𑀦𑀺𑀤𑁆𑀤𑀸𑀬 𑀯𑀺𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀔𑀸 𑀲𑀗𑁆𑀔𑀸𑀢𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸 𑀲𑀗𑁆𑀔𑀸𑀢𑁂𑀦𑀸𑀢𑀺 𑀯𑀘𑀦𑀲𑁆𑀲 𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀮𑁂𑀧𑀤𑀺𑀝𑁆𑀞𑀺𑀮𑁂𑀧𑀸𑀪𑀸𑀯𑁂𑀦 𑀦𑀺𑀭𑀼𑀧𑀮𑁂𑀧𑀲𑀗𑁆𑀔𑀸𑀢𑁂𑀦 𑀲𑀯𑀸𑀲𑀦𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀘𑀦𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀭𑀸𑀕𑀤𑁄𑀲𑀫𑁄𑀳𑀸𑀯𑀲𑁂𑀲𑁂𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀓𑁆𑀓𑀺𑀮𑁂𑀲𑁄.

𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄𑀢𑀺 𑀕𑀫𑀦𑀢𑁆𑀣𑀸𑀦𑀁 𑀥𑀸𑀢𑀽𑀦𑀁 𑀩𑀼𑀚𑁆𑀛𑀦𑀢𑁆𑀣𑀢𑁆𑀢𑀸 𑀩𑀼𑀚𑁆𑀛𑀦𑀢𑁆𑀣𑀸𑀧𑀺 𑀥𑀸𑀢𑀼𑀬𑁄 𑀕𑀫𑀦𑀢𑁆𑀣𑀸 𑀳𑁄𑀦𑁆𑀢𑁂𑀯, 𑀢𑀲𑁆𑀫𑀸 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀸𑀬𑀦𑀫𑀕𑁆𑀕𑁄 𑀘𑁂𑀢𑁆𑀣 𑁋

‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀽 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄’’𑀢𑀺. (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁧) 𑁋

𑀫𑀕𑁆𑀕𑀲𑁆𑀲 𑀩𑀳𑀽𑀲𑀼 𑀦𑀸𑀫𑁂𑀲𑀼 𑀅𑀬𑀦𑀦𑀸𑀫𑁂𑀦 𑀯𑀼𑀢𑁆𑀢𑀫𑀕𑁆𑀕𑀦𑀸𑀫𑁂𑀦 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀏𑀓𑀫𑀕𑁆𑀕𑀪𑀽𑀢𑁄 𑀫𑀕𑁆𑀕𑁄, 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀏𑀓𑁂𑀦 𑀅𑀬𑀺𑀢𑀩𑁆𑀩𑁄 𑀫𑀕𑁆𑀕𑁄𑀢𑀺 𑀏𑀓𑀸𑀬𑀦𑀫𑀕𑁆𑀕𑁄. 𑀏𑀓𑁂𑀦𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀧𑀯𑀺𑀯𑀺𑀢𑁆𑀢𑁂𑀦. 𑀅𑀬𑀺𑀢𑀩𑁆𑀩𑁄𑀢𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄, 𑀅𑀬𑀦𑁆𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀅𑀬𑀦𑁄, 𑀲𑀁𑀲𑀸𑀭𑀢𑁄 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀓𑁂𑀲𑀁 𑀅𑀬𑀦𑁄𑀢𑀺 𑀏𑀓𑀸𑀬𑀦𑁄. 𑀏𑀓𑁂𑀲𑀦𑁆𑀢𑀺 𑀲𑁂𑀝𑁆𑀞𑀸𑀦𑀁. 𑀲𑀩𑁆𑀩𑀲𑀢𑁆𑀢𑀲𑁂𑀝𑁆𑀞𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑀲𑁆𑀫𑀸 𑀏𑀓𑁂𑀲𑀁 𑀫𑀕𑁆𑀕𑀪𑀽𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀅𑀬𑀦𑀪𑀽𑀢𑁄 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀢𑀻𑀢𑀺 𑀯𑀸 𑀅𑀬𑀦𑁄, 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀅𑀬𑀦𑁄 𑀫𑀕𑁆𑀕𑁄𑀢𑀺 𑀏𑀓𑀸𑀬𑀦𑀫𑀕𑁆𑀕𑁄. 𑀏𑀓𑀲𑁆𑀫𑀺𑀁𑀬𑁂𑀯 𑀩𑀼𑀤𑁆𑀥𑀲𑀸𑀲𑀦𑁂 𑀧𑀯𑀢𑁆𑀢𑀫𑀸𑀦𑁄 𑀫𑀕𑁆𑀕𑁄, 𑀦 𑀅𑀜𑁆𑀜𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀺 𑀘 𑀏𑀓𑀁 𑀅𑀬𑀢𑀻𑀢𑀺 𑀏𑀓𑀸𑀬𑀦𑁄. 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀫𑀼𑀔𑀪𑀸𑀯𑀦𑀸𑀦𑀬𑀧𑁆𑀧𑀯𑀢𑁆𑀢𑁄𑀧𑀺 𑀅𑀧𑀭𑀪𑀸𑀕𑁂 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑀸𑀬𑀦𑀫𑀕𑁆𑀕𑁄𑀢𑀺 𑀏𑀓𑀦𑀺𑀩𑁆𑀩𑀸𑀦𑀕𑀫𑀦𑀫𑀕𑁆𑀕𑁄𑀢𑀺 𑀅𑀢𑁆𑀣𑁄.

𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀦 𑀧𑀭𑁂𑀳𑀺 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄, 𑀓𑀺𑀦𑁆𑀢𑀼 𑀲𑀬𑀫𑁂𑀯 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀺 𑀩𑀼𑀤𑁆𑀥𑀁 𑀩𑁄𑀥𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀢𑀢𑁆𑀣 𑀬𑀣𑀸 ‘‘𑀦𑀻𑀮𑀭𑀢𑁆𑀢𑀕𑀼𑀡𑀬𑁄𑀕𑀸 𑀦𑀻𑀮𑁄 𑀧𑀝𑁄, 𑀭𑀢𑁆𑀢𑁄 𑀧𑀝𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀤𑁆𑀥𑀕𑀼𑀡𑀬𑁄𑀕𑀸 ‘‘𑀩𑀼𑀤𑁆𑀥𑁄’’𑀢𑀺 𑀜𑀸𑀧𑁂𑀢𑀼𑀁 𑀯𑀼𑀢𑁆𑀢𑀁.

𑀢𑀢𑁄 𑀧𑀭𑀁 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀦𑁆𑀢𑀺𑀆𑀤𑀺 ‘‘𑀅𑀢𑁆𑀣𑀫𑀦𑀼𑀕𑀢𑀸 𑀅𑀬𑀁 𑀧𑀜𑁆𑀜𑀢𑁆𑀢𑀻’’𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀺𑀢𑁆𑀢𑀸 𑀲𑀳𑀸𑀬𑀸. 𑀅𑀫𑀘𑁆𑀘𑀸 𑀪𑀘𑁆𑀘𑀸. 𑀜𑀸𑀢𑀻 𑀧𑀺𑀢𑀼𑀧𑀓𑁆𑀔𑀺𑀓𑀸. 𑀲𑀸𑀮𑁄𑀳𑀺𑀢𑀸 𑀫𑀸𑀢𑀼𑀧𑀓𑁆𑀔𑀺𑀓𑀸. 𑀲𑀫𑀡𑀸 𑀧𑀩𑁆𑀩𑀚𑁆𑀚𑀼𑀧𑀕𑀢𑀸. 𑀩𑁆𑀭𑀸𑀳𑁆𑀫𑀡𑀸 𑀪𑁄𑀯𑀸𑀤𑀺𑀦𑁄, 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀸 𑀯𑀸. 𑀤𑁂𑀯𑀢𑀸 𑀲𑀓𑁆𑀓𑀸𑀤𑀬𑁄 𑀩𑁆𑀭𑀳𑁆𑀫𑀸𑀦𑁄 𑀘. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀦𑁆𑀢𑀺 𑀯𑀺𑀫𑁄𑀓𑁆𑀔𑁄 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀯𑀺𑀫𑁄𑀓𑁆𑀔𑀲𑁆𑀲 𑀅𑀦𑁆𑀢𑁄 𑀅𑀭𑀳𑀢𑁆𑀢𑀨𑀮𑀁, 𑀢𑀲𑁆𑀫𑀺𑀁 𑀯𑀺𑀫𑁄𑀓𑁆𑀔𑀦𑁆𑀢𑁂 𑀪𑀯𑀁 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀁 𑀦𑀸𑀫𑀁. 𑀲𑀩𑁆𑀩𑀜𑁆𑀜𑀼𑀪𑀸𑀯𑁄 𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀺, 𑀅𑀭𑀳𑀢𑁆𑀢𑀨𑀮𑁄𑀤𑀬𑁂 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀪𑀸𑀯𑁄 𑀯𑀺𑀫𑁄𑀓𑁆𑀔𑀦𑁆𑀢𑁂 𑀪𑀯𑁄 𑀳𑁄𑀢𑀺. 𑀢𑀁 𑀦𑁂𑀫𑀺𑀢𑁆𑀢𑀺𑀓𑀫𑁆𑀧𑀺 𑀦𑀸𑀫𑀁 𑀯𑀺𑀫𑁄𑀓𑁆𑀔𑀦𑁆𑀢𑁂 𑀪𑀯𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦’’𑀦𑁆𑀢𑀺. 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸𑀢𑀺 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀬𑀣𑀸𑀯𑀼𑀢𑁆𑀢𑀓𑁆𑀔𑀡𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑁂𑀦 𑀲𑀳. 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀩𑁆𑀩𑀥𑀫𑁆𑀫𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀯𑀸 𑀚𑀸𑀢𑀸 𑀧𑀜𑁆𑀜𑀢𑁆𑀢𑀺. 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺 𑀧𑀜𑁆𑀜𑀢𑁆𑀢𑀺. 𑀅𑀬𑀁 𑀩𑁆𑀬𑀜𑁆𑀚𑀦𑀢𑁄 𑀩𑀼𑀤𑁆𑀥𑀯𑀺𑀪𑀸𑀯𑀦𑀸. 𑀇𑀢𑁄 𑀧𑀭𑀁 𑀯𑀳𑀲𑁆𑀲𑁂𑀢𑀁 𑀪𑀸𑀭𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺.

𑁧𑁯𑁩. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀯𑀺𑀚𑀺𑀕𑀼𑀘𑁆𑀙𑀢𑁄𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀝𑁆𑀝𑀻𑀬𑀢𑁄. 𑀭𑀺𑀢𑁆𑀢𑀫𑀸𑀲𑀦𑀦𑁆𑀢𑀺 𑀯𑀺𑀯𑀺𑀢𑁆𑀢𑀁 𑀫𑀜𑁆𑀘𑀧𑀻𑀞𑀁. 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸𑀢𑀺 𑀧𑀩𑁆𑀩𑀢𑀕𑀼𑀳𑀸𑀲𑀼 𑀯𑀸 𑀭𑀺𑀢𑁆𑀢𑀫𑀸𑀲𑀦𑀁 𑀪𑀚𑀢𑁄𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀚𑀸𑀢𑀺𑀬𑀸 𑀯𑀺𑀚𑀺𑀕𑀼𑀘𑁆𑀙𑀢𑁄𑀢𑀺 𑀚𑀸𑀢𑀺𑀁 𑀯𑀺𑀚𑀺𑀕𑀼𑀘𑁆𑀙𑀢𑁄. 𑀚𑀭𑀸𑀬. 𑀩𑁆𑀬𑀸𑀥𑀺𑀦𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀚𑀢𑁄𑀢𑀺 𑀏𑀯𑀫𑀸𑀤𑀻𑀲𑀼 𑀪𑀚𑀢𑁄𑀢𑀺 𑀪𑀚𑀦𑁆𑀢𑀲𑁆𑀲. 𑀲𑁂𑀯𑀢𑁄𑀢𑀺 𑀲𑁂𑀯𑀦𑁆𑀢𑀲𑁆𑀲. 𑀦𑀺𑀲𑁂𑀯𑀢𑁄𑀢𑀺 𑀲𑀫𑁆𑀫𑀸 𑀲𑁂𑀯𑀦𑁆𑀢𑀲𑁆𑀲. 𑀲𑀁𑀲𑁂𑀯𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑁂𑀯𑀦𑁆𑀢𑀲𑁆𑀲. 𑀧𑀝𑀺𑀲𑁂𑀯𑀢𑁄𑀢𑀺 𑀉𑀧𑀕𑀦𑁆𑀢𑁆𑀯𑀸 𑀲𑁂𑀯𑀦𑁆𑀢𑀲𑁆𑀲. 𑀧𑀩𑁆𑀩𑀢𑀧𑀩𑁆𑀪𑀸𑀭𑀸𑀢𑀺 𑀧𑀩𑁆𑀩𑀢𑀓𑀼𑀘𑁆𑀙𑀺𑀬𑁄.

𑁧𑁯𑁪. 𑀧𑀜𑁆𑀘𑀫𑀕𑀸𑀣𑀸𑀬 𑀉𑀘𑁆𑀘𑀸𑀯𑀘𑁂𑀲𑀽𑀢𑀺 𑀳𑀻𑀦𑀧𑀡𑀻𑀢𑁂𑀲𑀼. 𑀲𑀬𑀦𑁂𑀲𑀽𑀢𑀺 𑀯𑀺𑀳𑀸𑀭𑀸𑀤𑀻𑀲𑀼 𑀲𑁂𑀦𑀸𑀲𑀦𑁂𑀲𑀼. 𑀓𑀻𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸𑀢𑀺 𑀓𑀺𑀢𑁆𑀢𑀓𑀸 𑀢𑀢𑁆𑀣 𑀪𑀬𑀓𑀸𑀭𑀡𑀸. ‘‘𑀓𑀼𑀯𑀦𑁆𑀢𑁄’’𑀢𑀺𑀧𑀺 𑀧𑀸𑀞𑁄, 𑀓𑀽𑀚𑀦𑁆𑀢𑁄𑀢𑀺 𑀘𑀲𑁆𑀲 𑀅𑀢𑁆𑀣𑁄.

𑀓𑀼𑀯𑀦𑁆𑀢𑁄𑀢𑀺 𑀲𑀤𑁆𑀤𑀸𑀬𑀦𑁆𑀢𑁄. 𑀓𑀽𑀚𑀦𑁆𑀢𑁄𑀢𑀺 𑀅𑀩𑁆𑀬𑀢𑁆𑀢𑀲𑀤𑁆𑀤𑀁 𑀓𑀭𑁄𑀦𑁆𑀢𑁄. 𑀦𑀤𑀦𑁆𑀢𑁄𑀢𑀺 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑁄. 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄𑀢𑀺 𑀯𑀸𑀘𑀁 𑀪𑀸𑀲𑀦𑁆𑀢𑁄. 𑀓𑀢𑀻𑀢𑀺 𑀧𑀼𑀘𑁆𑀙𑀸. 𑀓𑀺𑀢𑁆𑀢𑀓𑀸𑀢𑀺 𑀧𑀫𑀸𑀡𑀧𑀼𑀘𑁆𑀙𑀸. 𑀓𑀻𑀯𑀢𑀓𑀸𑀢𑀺 𑀧𑀭𑀺𑀘𑁆𑀙𑁂𑀤𑀧𑀼𑀘𑁆𑀙𑀸. 𑀓𑀻𑀯𑀩𑀳𑀼𑀓𑀸𑀢𑀺 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑀧𑀼𑀘𑁆𑀙𑀸. 𑀢𑁂 𑀪𑁂𑀭𑀯𑀸𑀢𑀺 𑀏𑀢𑁂 𑀪𑀬𑀚𑀦𑀦𑀼𑀧𑀤𑁆𑀤𑀯𑀸 𑀪𑀬𑀸𑀭𑀫𑁆𑀫𑀡𑀸. 𑀓𑀻𑀯𑀩𑀳𑀼𑀓𑀸𑀢𑀺 𑀧𑀼𑀘𑁆𑀙𑀺𑀢𑁂 𑀆𑀭𑀫𑁆𑀫𑀡𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻’’𑀢𑀺𑀆𑀤𑀻𑀳𑀺 𑀯𑀺𑀲𑁆𑀲𑀚𑁆𑀚𑁂𑀢𑀺.

𑁧𑁯𑁫. 𑀙𑀝𑁆𑀞𑀕𑀸𑀣𑀸𑀬 𑀓𑀢𑀺 𑀧𑀭𑀺𑀲𑁆𑀲𑀬𑀸𑀢𑀺 𑀓𑀺𑀢𑁆𑀢𑀓𑀸 𑀉𑀧𑀤𑁆𑀤𑀯𑀸. 𑀅𑀕𑀢𑀁 𑀤𑀺𑀲𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀅𑀕𑀢𑀧𑀼𑀩𑁆𑀩𑀢𑁆𑀢𑀸 𑀅𑀕𑀢𑀁, 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀤𑀺𑀲𑀸 𑀘𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀕𑀢𑀁 𑀤𑀺𑀲’’𑀦𑁆𑀢𑀺. 𑀅𑀫𑀢𑀁 𑀤𑀺𑀲’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀪𑀺𑀲𑀫𑁆𑀪𑀯𑁂𑀢𑀺 𑀅𑀪𑀺𑀲𑀫𑁆𑀪𑀯𑁂𑀬𑁆𑀬. 𑀧𑀦𑁆𑀢𑀫𑁆𑀳𑀻𑀢𑀺 𑀧𑀭𑀺𑀬𑀦𑁆𑀢𑁂.

𑀅𑀕𑀢𑀧𑀼𑀩𑁆𑀩𑀸 𑀲𑀸 𑀤𑀺𑀲𑀸𑀢𑀺 𑀬𑀸 𑀤𑀺𑀲𑀸 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀦 𑀕𑀢𑀧𑀼𑀩𑁆𑀩𑀸. 𑀦 𑀲𑀸 𑀤𑀺𑀲𑀸 𑀕𑀢𑀧𑀼𑀩𑁆𑀩𑀸𑀢𑀺 𑀏𑀲𑀸 𑀤𑀺𑀲𑀸 𑀯𑀼𑀢𑁆𑀢𑀦𑀬𑁂𑀦 𑀦 𑀕𑀢𑀧𑀼𑀩𑁆𑀩𑀸. 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸𑀢𑀺 𑀅𑀦𑁂𑀦 𑀤𑀻𑀖𑀓𑀸𑀮𑁂𑀦.

𑀲𑀫𑀢𑀺𑀢𑁆𑀢𑀺𑀓𑀦𑁆𑀢𑀺 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀁 𑀧𑀸𑀧𑁂𑀢𑁆𑀯𑀸 𑀲𑀫𑀪𑀭𑀺𑀢𑀁. 𑀅𑀦𑀯𑀲𑁂𑀓𑀦𑁆𑀢𑀺 𑀅𑀦𑀯𑀲𑀺𑀜𑁆𑀘𑀦𑀓𑀁 𑀅𑀧𑀭𑀺𑀲𑀺𑀜𑁆𑀘𑀦𑀓𑀁 𑀓𑀢𑁆𑀯𑀸. 𑀢𑁂𑀮𑀧𑀢𑁆𑀢𑀦𑁆𑀢𑀺 𑀧𑀓𑁆𑀔𑀺𑀢𑁆𑀢𑀢𑁂𑀮𑀁 𑀢𑁂𑀮𑀧𑀢𑁆𑀢𑀁. 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀳𑀭𑁂𑀬𑁆𑀬 𑀆𑀤𑀸𑀬 𑀕𑀘𑁆𑀙𑁂𑀬𑁆𑀬. 𑀏𑀯𑀁 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂𑀢𑀺 𑀢𑀁 𑀢𑁂𑀮𑀪𑀭𑀺𑀢𑀁 𑀧𑀢𑁆𑀢𑀁 𑀯𑀺𑀬 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀕𑁄𑀘𑀭𑁂 𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀲𑀢𑀺𑀬𑀸 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀩𑀳𑀺𑀤𑁆𑀥𑀸 𑀕𑁄𑀘𑀭𑁂 𑀦 𑀯𑀺𑀓𑁆𑀔𑀺𑀧𑀢𑀺, 𑀢𑀣𑀸 𑀧𑀡𑁆𑀟𑀺𑀢𑁄 𑀬𑁄𑀕𑀸𑀯𑀘𑀭𑁄 𑀭𑀓𑁆𑀔𑁂𑀬𑁆𑀬 𑀕𑁄𑀧𑀬𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀏𑀢𑀲𑁆𑀲 𑀳𑀺 𑁋

‘‘𑀤𑀼𑀦𑁆𑀦𑀺𑀕𑁆𑀕𑀳𑀲𑁆𑀲 𑀮𑀳𑀼𑀦𑁄, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑁄;

𑀘𑀺𑀢𑁆𑀢𑀲𑁆𑀲 𑀤𑀫𑀣𑁄 𑀲𑀸𑀥𑀼, 𑀘𑀺𑀢𑁆𑀢𑀁 𑀤𑀦𑁆𑀢𑀁 𑀲𑀼𑀔𑀸𑀯𑀳𑀁’’. (𑀥. 𑀧. 𑁩𑁫);

𑀢𑀲𑁆𑀫𑀸 𑁋

‘‘𑀲𑀼𑀤𑀼𑀤𑁆𑀤𑀲𑀁 𑀲𑀼𑀦𑀺𑀧𑀼𑀡𑀁, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑀁;

𑀘𑀺𑀢𑁆𑀢𑀁 𑀭𑀓𑁆𑀔𑁂𑀣 𑀫𑁂𑀥𑀸𑀯𑀻, 𑀘𑀺𑀢𑁆𑀢𑀁 𑀕𑀼𑀢𑁆𑀢𑀁 𑀲𑀼𑀔𑀸𑀯𑀳𑀁’’. (𑀥. 𑀧. 𑁩𑁬);

𑀇𑀤𑀜𑁆𑀳𑀺 𑁋

‘‘𑀤𑀽𑀭𑀗𑁆𑀕𑀫𑀁 𑀏𑀓𑀘𑀭𑀁, 𑀅𑀲𑀭𑀻𑀭𑀁 𑀕𑀼𑀳𑀸𑀲𑀬𑀁;

𑀬𑁂 𑀘𑀺𑀢𑁆𑀢𑀁 𑀲𑀁𑀬𑀫𑁂𑀲𑁆𑀲𑀦𑁆𑀢𑀺, 𑀫𑁄𑀓𑁆𑀔𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀸’’. (𑀥. 𑀧. 𑁩𑁭);

𑀇𑀢𑀭𑀲𑁆𑀲 𑀧𑀦 𑁋

‘‘𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑁄;

𑀧𑀭𑀺𑀧𑁆𑀮𑀯𑀧𑀲𑀸𑀤𑀲𑁆𑀲, 𑀧𑀜𑁆𑀜𑀸 𑀦 𑀧𑀭𑀺𑀧𑀽𑀭𑀢𑀺’’. (𑀥. 𑀧. 𑁩𑁮);

𑀣𑀺𑀭𑀓𑀫𑁆𑀫𑀝𑁆𑀞𑀸𑀦𑀲𑀳𑀸𑀬𑀲𑁆𑀲 𑀧𑀦 𑁋

‘‘𑀅𑀦𑀯𑀲𑁆𑀲𑀼𑀢𑀘𑀺𑀢𑁆𑀢𑀲𑁆𑀲, 𑀅𑀦𑀦𑁆𑀯𑀸𑀳𑀢𑀘𑁂𑀢𑀲𑁄;

𑀧𑀼𑀜𑁆𑀜𑀧𑀸𑀧𑀧𑀳𑀻𑀦𑀲𑁆𑀲, 𑀦𑀢𑁆𑀣𑀺 𑀚𑀸𑀕𑀭𑀢𑁄 𑀪𑀬𑀁’’. (𑀥. 𑀧. 𑁩𑁯);

𑀢𑀲𑁆𑀫𑀸 𑀏𑀢𑀁 𑁋

‘‘𑀨𑀦𑁆𑀤𑀦𑀁 𑀘𑀧𑀮𑀁 𑀘𑀺𑀢𑁆𑀢𑀁, 𑀤𑀽𑀭𑀓𑁆𑀔𑀁 𑀤𑀼𑀦𑁆𑀦𑀺𑀯𑀸𑀭𑀬𑀁;

𑀉𑀚𑀼𑀁 𑀓𑀭𑁄𑀢𑀺 𑀫𑁂𑀥𑀸𑀯𑀻, 𑀉𑀲𑀼𑀓𑀸𑀭𑁄𑀯 𑀢𑁂𑀚𑀦𑀁’’. (𑀥. 𑀧. 𑁩𑁩);

𑀏𑀯𑀁 𑀉𑀚𑀼𑀁 𑀓𑀭𑁄𑀦𑁆𑀢𑁄 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂.

𑀧𑀢𑁆𑀣𑀬𑀸𑀦𑁄 𑀤𑀺𑀲𑀁 𑀅𑀕𑀢𑀧𑀼𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂 𑀓𑀫𑁆𑀫𑀁 𑀆𑀭𑀪𑀺𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀧𑀢𑁆𑀣𑁂𑀦𑁆𑀢𑁄 𑀯𑀼𑀢𑁆𑀢𑀦𑀬𑁂𑀦 𑀲𑀓𑀁 𑀘𑀺𑀢𑁆𑀢𑀁 𑀭𑀓𑁆𑀔𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀸 𑀧𑀦𑁂𑀲𑀸 𑀤𑀺𑀲𑀸 𑀦𑀸𑀫 𑁋

‘‘𑀫𑀸𑀢𑀸𑀧𑀺𑀢𑀸 𑀤𑀺𑀲𑀸 𑀧𑀼𑀩𑁆𑀩𑀸, 𑀆𑀘𑀭𑀺𑀬𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸;

𑀧𑀼𑀢𑁆𑀢𑀤𑀸𑀭𑀸 𑀤𑀺𑀲𑀸 𑀧𑀘𑁆𑀙𑀸, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀉𑀢𑁆𑀢𑀭𑀸.

‘‘𑀤𑀸𑀲𑀓𑀫𑁆𑀫𑀓𑀭𑀸 𑀳𑁂𑀝𑁆𑀞𑀸, 𑀉𑀤𑁆𑀥𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀏𑀢𑀸 𑀤𑀺𑀲𑀸 𑀦𑀫𑀲𑁆𑀲𑁂𑀬𑁆𑀬, 𑀅𑀮𑀫𑀢𑁆𑀢𑁄 𑀓𑀼𑀮𑁂 𑀕𑀺𑀳𑀻’’𑀢𑀺. (𑀤𑀻. 𑀦𑀺. 𑁩.𑁨𑁭𑁩) 𑁋

𑀏𑀢𑁆𑀣 𑀢𑀸𑀯 𑀫𑀸𑀢𑀸𑀧𑀺𑀢𑀸𑀤𑀬𑁄 ‘‘𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀸.

‘‘𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀓𑀢𑀫𑀁 𑀤𑀺𑀲𑀁 𑀢𑀺𑀝𑁆𑀞𑀢𑀺 𑀦𑀸𑀕𑀭𑀸𑀚𑀸, 𑀬𑀫𑀤𑁆𑀤𑀲𑀸 𑀲𑀼𑀧𑀺𑀦𑁂 𑀙𑀩𑁆𑀩𑀺𑀲𑀸𑀡’’𑀦𑁆𑀢𑀺. (𑀚𑀸. 𑁧.𑁧𑁬.𑁧𑁦𑁪) 𑁋

𑀏𑀢𑁆𑀣 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀤𑀺𑀲𑀸𑀯 ‘‘𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀸.

‘‘𑀅𑀕𑀸𑀭𑀺𑀦𑁄 𑀅𑀦𑁆𑀦𑀤𑀧𑀸𑀦𑀯𑀢𑁆𑀣𑀤𑀸, 𑀅𑀯𑁆𑀳𑀸𑀬𑀺𑀓𑀸 𑀢𑀫𑁆𑀧𑀺 𑀤𑀺𑀲𑀁 𑀯𑀤𑀦𑁆𑀢𑀺;

𑀏𑀲𑀸 𑀤𑀺𑀲𑀸 𑀧𑀭𑀫𑀸 𑀲𑁂𑀢𑀓𑁂𑀢𑀼, 𑀬𑀁 𑀧𑀢𑁆𑀯𑀸 𑀤𑀼𑀓𑁆𑀔𑀻 𑀲𑀼𑀔𑀺𑀦𑁄 𑀪𑀯𑀦𑁆𑀢𑀻’’𑀢𑀺 . (𑀚𑀸. 𑁧.𑁬.𑁯) 𑁋

𑀏𑀢𑁆𑀣 𑀦𑀺𑀩𑁆𑀩𑀸𑀦𑀁 ‘‘𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀢𑀤𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑀡𑁆𑀳𑀓𑁆𑀔𑀬𑀁 𑀯𑀺𑀭𑀸𑀕𑀦𑁆𑀢𑀺𑀆𑀤𑀻𑀳𑀺 𑀤𑀺𑀲𑁆𑀲𑀢𑀺 𑀅𑀧𑀤𑀺𑀲𑁆𑀲𑀢𑀺 𑀢𑀲𑁆𑀫𑀸 ‘‘𑀤𑀺𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀫𑀢𑀕𑁆𑀕𑁂 𑀧𑀦 𑀲𑀁𑀲𑀸𑀭𑁂 𑀓𑁂𑀦𑀘𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑁂𑀦 𑀲𑀼𑀧𑀺𑀦𑁂𑀦𑀧𑀺 𑀅𑀕𑀢𑀧𑀼𑀩𑁆𑀩𑀢𑀸𑀬 ‘‘𑀅𑀕𑀢𑀧𑀼𑀩𑁆𑀩𑀸 𑀤𑀺𑀲𑀸 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀢𑁆𑀣𑀬𑀦𑁆𑀢𑁂𑀦 𑀓𑀸𑀬𑀕𑀢𑀸𑀲𑀢𑀺𑀬𑀸 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺. 𑀯𑀚𑀢𑁄𑀢𑀺𑀆𑀤𑀻𑀲𑀼 𑀏𑀢𑁆𑀣 𑀫𑀕𑁆𑀕𑀼𑀧𑁆𑀧𑀸𑀤𑀢𑁄 𑀲𑀫𑀻𑀧𑀁 𑀯𑀚𑀢𑁄. 𑀞𑀺𑀢𑀺𑀓𑁆𑀔𑀡𑁂 𑀕𑀘𑁆𑀙𑀢𑁄. 𑀨𑀮𑁄𑀤𑀬𑀢𑁄 𑀅𑀢𑀺𑀓𑁆𑀓𑀫𑀢𑁄.

𑀅𑀦𑁆𑀢𑁂𑀢𑀺 𑀅𑀦𑁆𑀢𑀫𑁆𑀳𑀺 𑀞𑀺𑀢𑁂. 𑀧𑀦𑁆𑀢𑁂𑀢𑀺 𑀯𑀦𑀕𑀳𑀦𑀕𑀫𑁆𑀪𑀻𑀭𑁂 𑀞𑀺𑀢𑁂. 𑀧𑀭𑀺𑀬𑀦𑁆𑀢𑁂𑀢𑀺 𑀤𑀽𑀭𑀪𑀸𑀯𑁂𑀦 𑀧𑀭𑀺𑀬𑀦𑁆𑀢𑁂 𑀞𑀺𑀢𑁂. 𑀲𑁂𑀮𑀦𑁆𑀢𑁂𑀢𑀺 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑁂. 𑀯𑀦𑀦𑁆𑀢𑁂𑀢𑀺 𑀯𑀦𑀖𑀝𑀸𑀦𑀁 𑀅𑀦𑁆𑀢𑁂. 𑀦𑀤𑀦𑁆𑀢𑁂𑀢𑀺 𑀦𑀤𑀻𑀦𑀁 𑀅𑀦𑁆𑀢𑁂. 𑀉𑀤𑀓𑀦𑁆𑀢𑁂𑀢𑀺 𑀉𑀤𑀓𑀸𑀦𑀁 𑀧𑀭𑀺𑀬𑀦𑁆𑀢𑁂. 𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑀻𑀬𑀢𑀻𑀢𑀺 𑀬𑀲𑁆𑀫𑀺𑀁 𑀓𑀲𑀦𑀜𑁆𑀘 𑀯𑀧𑀦𑀜𑁆𑀘 𑀦 𑀓𑀭𑀻𑀬𑀢𑀺. 𑀚𑀦𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁂. 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑁂𑀢𑀺 𑀓𑀲𑀦𑀯𑀧𑀦𑀯𑀲𑁂𑀦 𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀧𑀘𑀭𑀺𑀢𑀩𑁆𑀩𑁂 𑀲𑁂𑀦𑀸𑀲𑀦𑁂.

𑁧𑁯𑁬. 𑀲𑀢𑁆𑀢𑀫𑀕𑀸𑀣𑀸𑀬 𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄 𑀅𑀲𑁆𑀲𑀽𑀢𑀺 𑀓𑀺𑀤𑀺𑀲𑀸𑀦𑀺 𑀢𑀲𑁆𑀲 𑀯𑀘𑀦𑀸𑀦𑀺 𑀅𑀲𑁆𑀲𑀼.

𑀫𑀼𑀲𑀸𑀯𑀸𑀤𑀁 𑀧𑀳𑀸𑀬𑀸𑀢𑀺 𑀏𑀢𑁆𑀣 𑀫𑀼𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀦𑀓𑁄 𑀯𑀘𑀻𑀧𑀬𑁄𑀕𑁄 𑀓𑀸𑀬𑀧𑀬𑁄𑀕𑁄 𑀯𑀸. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦𑀲𑁆𑀲 𑀧𑀭𑀯𑀺𑀲𑀁𑀯𑀸𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀅𑀧𑀭𑁄 𑀦𑀬𑁄 𑁋 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼, 𑀯𑀸𑀤𑁄𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑀦𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀢𑀣𑀁 𑀯𑀢𑁆𑀣𑀼𑀁 𑀢𑀣𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑁄 𑀬𑀫𑀢𑁆𑀣𑀁 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀧𑁆𑀧𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀅𑀧𑀺 𑀘 𑀕𑀳𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 ‘‘𑀦𑀢𑁆𑀣𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀓𑁆𑀔𑀺𑀦𑀸 𑀳𑀼𑀢𑁆𑀯𑀸 𑀅𑀢𑁆𑀣𑀪𑀜𑁆𑀚𑀦𑀢𑁆𑀣𑀁 𑀯𑀼𑀢𑁆𑀢𑁄 𑀫𑀳𑀸𑀲𑀸𑀯𑀚𑁆𑀚𑁄. 𑀧𑀩𑁆𑀩𑀚𑀺𑀢𑀸𑀦𑀁 𑀅𑀧𑁆𑀧𑀓𑀫𑁆𑀧𑀺 𑀢𑁂𑀮𑀁 𑀯𑀸 𑀲𑀧𑁆𑀧𑀺𑀁 𑀯𑀸 𑀮𑀪𑀺𑀢𑁆𑀯𑀸 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 ‘‘𑀅𑀚𑁆𑀚 𑀕𑀸𑀫𑁂 𑀢𑁂𑀮𑀁 𑀦𑀤𑀻 𑀫𑀜𑁆𑀜𑁂 𑀲𑀦𑁆𑀤𑀢𑀻’’𑀢𑀺 𑀧𑀽𑀭𑀡𑀓𑀣𑀸𑀦𑀬𑁂𑀦 𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀅𑀤𑀺𑀝𑁆𑀞𑀁𑀬𑁂𑀯 𑀧𑀦 𑀤𑀺𑀝𑁆𑀞𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀤𑀦𑁆𑀢𑀸𑀦𑀁 𑀫𑀳𑀸𑀲𑀸𑀯𑀚𑁆𑀚𑁄.

𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀅𑀢𑀣𑀁 𑀯𑀢𑁆𑀣𑀼 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁 𑀢𑀚𑁆𑀚𑁄 𑀯𑀸𑀬𑀸𑀫𑁄 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀯. 𑀲𑁄 𑀘 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀭𑀯𑀺𑀲𑀁𑀯𑀸𑀤𑀓𑀓𑀺𑀭𑀺𑀬𑀸𑀓𑀭𑀡𑁂 𑀤𑀝𑁆𑀞𑀩𑁆𑀩𑁄. 𑀢𑀸𑀬 𑀘𑁂 𑀓𑀺𑀭𑀺𑀬𑀸𑀬 𑀧𑀭𑁄 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀅𑀬𑀁 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺.

𑀲𑀘𑁆𑀘𑀁 𑀯𑀤𑀢𑀻𑀢𑀺 𑀲𑀘𑁆𑀘𑀯𑀸𑀤𑀻. 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀦𑁆𑀤𑀳𑀢𑀺 𑀖𑀝𑁂𑀢𑀻𑀢𑀺 𑀲𑀘𑁆𑀘𑀲𑀦𑁆𑀥𑁄, 𑀦 𑀅𑀦𑁆𑀢𑀭𑀦𑁆𑀢𑀭𑀸 𑀫𑀼𑀲𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀧𑀼𑀭𑀺𑀲𑁄 𑀓𑀤𑀸𑀘𑀺 𑀫𑀼𑀲𑀸 𑀯𑀤𑀢𑀺, 𑀓𑀤𑀸𑀘𑀺 𑀲𑀘𑁆𑀘𑀁, 𑀢𑀲𑁆𑀲 𑀫𑀼𑀲𑀸𑀯𑀸𑀤𑁂𑀦 𑀅𑀦𑁆𑀢𑀭𑀺𑀓𑀢𑀸𑀬 𑀲𑀘𑁆𑀘𑀁 𑀲𑀘𑁆𑀘𑁂𑀦 𑀦 𑀖𑀝𑀺𑀬𑀢𑀺, 𑀢𑀲𑁆𑀫𑀸 𑀦 𑀲𑁄 𑀲𑀘𑁆𑀘𑀲𑀦𑁆𑀥𑁄. 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀫𑀼𑀲𑀸 𑀅𑀯𑀢𑁆𑀯𑀸 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀦𑁆𑀤𑀳𑀢𑀺𑀬𑁂𑀯𑀸𑀢𑀺 𑀲𑀘𑁆𑀘𑀲𑀦𑁆𑀥𑁄.

𑀣𑁂𑀢𑁄𑀢𑀺 𑀣𑀺𑀭𑁄, 𑀣𑀺𑀭𑀓𑀣𑁄𑀢𑀺 𑀅𑀢𑁆𑀣𑁄. 𑀏𑀓𑁄 𑀧𑀼𑀕𑁆𑀕𑀮𑁄 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀔𑀸𑀢𑀔𑀸𑀡𑀼 𑀯𑀺𑀬 𑀅𑀲𑁆𑀲𑀧𑀺𑀝𑁆𑀞𑁂 𑀞𑀧𑀺𑀢𑀓𑀼𑀫𑁆𑀪𑀡𑁆𑀟𑀫𑀺𑀯 𑀘 𑀦 𑀣𑀺𑀭𑀓𑀣𑁄 𑀳𑁄𑀢𑀺. 𑀏𑀓𑁄 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀘 𑀣𑀺𑀭𑀓𑀣𑁄 𑀳𑁄𑀢𑀺, 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑁂𑀧𑀺 𑀤𑁆𑀯𑁂𑀓𑀣𑀸 𑀦 𑀓𑀣𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀣𑁂𑀢𑁄.

𑀧𑀘𑁆𑀘𑀬𑀺𑀓𑁄𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑁄, 𑀲𑀤𑁆𑀥𑀸𑀬𑀺𑀢𑀩𑁆𑀩𑀓𑁄𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁄 𑀳𑀺 𑀧𑀼𑀕𑁆𑀕𑀮𑁄 𑀦 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, ‘‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁, 𑀅𑀲𑀼𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀸 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀏𑀓𑁄 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, ‘‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁, 𑀅𑀲𑀼𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀬𑀤𑀺 𑀢𑁂𑀦 𑀯𑀼𑀢𑁆𑀢𑀁, 𑀇𑀤𑀫𑁂𑀯 𑀧𑀫𑀸𑀡𑀁, 𑀇𑀤𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀯𑀫𑁂𑀯 𑀇𑀤’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀬𑀺𑀓𑁄. 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲𑀸𑀢𑀺 𑀢𑀸𑀬 𑀲𑀘𑁆𑀘𑀯𑀸𑀤𑀺𑀢𑀸𑀬 𑀮𑁄𑀓𑀁 𑀦 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼 𑀬𑀸𑀬 𑀯𑀸𑀘𑀸𑀬 𑀬𑀲𑁆𑀲 𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀢𑀲𑁆𑀲 𑀳𑀤𑀬𑁂 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺, 𑀲𑀸 𑀧𑀺𑀲𑀼𑀡𑀯𑀸𑀘𑀸. 𑀬𑀸𑀬 𑀧𑀦 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀨𑀭𑀼𑀲𑀁 𑀓𑀭𑁄𑀢𑀺, 𑀬𑀸 𑀯𑀸𑀘𑀸 𑀲𑀬𑀫𑁆𑀧𑀺 𑀨𑀭𑀼𑀲𑀸, 𑀦𑁂𑀯 𑀓𑀡𑁆𑀡𑀲𑀼𑀔𑀸 𑀦 𑀳𑀤𑀬𑀗𑁆𑀕𑀫𑀸, 𑀅𑀬𑀁 𑀨𑀭𑀼𑀲𑀯𑀸𑀘𑀸. 𑀬𑁂𑀦 𑀲𑀫𑁆𑀨𑀁 𑀧𑀮𑀧𑀢𑀺 𑀦𑀺𑀭𑀢𑁆𑀣𑀓𑀁, 𑀲𑁄 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀢𑁂𑀲𑀁 𑀫𑀽𑀮𑀪𑀽𑀢𑀸𑀧𑀺 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸𑀤𑀺𑀦𑀸𑀫𑀫𑁂𑀯 𑀮𑀪𑀢𑀺, 𑀲𑀸 𑀏𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺.

𑀢𑀢𑁆𑀣 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀭𑁂𑀲𑀁 𑀯𑀸 𑀪𑁂𑀤𑀸𑀬 𑀅𑀢𑁆𑀢𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸. 𑀲𑀸 𑀬𑀲𑁆𑀲 𑀪𑁂𑀤𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸.

𑀢𑀲𑁆𑀲𑀸 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀪𑀺𑀦𑁆𑀤𑀺𑀢𑀩𑁆𑀩𑁄 𑀧𑀭𑁄, ‘‘𑀇𑀢𑀺 𑀇𑀫𑁂 𑀦𑀸𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸 𑀯𑀸, ‘‘𑀇𑀢𑀺 𑀅𑀳𑀁 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀧𑀺𑀬𑀓𑀫𑁆𑀬𑀢𑀸 𑀯𑀸, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀢𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺.

𑀇𑀫𑁂𑀲𑀁 𑀪𑁂𑀤𑀸𑀬𑀸𑀢𑀺 𑀬𑁂𑀲𑀁 𑀇𑀢𑁄𑀢𑀺 𑀯𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀁, 𑀢𑁂𑀲𑀁 𑀪𑁂𑀤𑀸𑀬. 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸𑀢𑀺 𑀤𑁆𑀯𑀺𑀦𑁆𑀦𑀁 𑀫𑀺𑀢𑁆𑀢𑀸𑀦𑀁 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀻𑀦𑀁 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀪𑀺𑀦𑁆𑀦𑀸𑀦𑀁 𑀏𑀓𑀫𑁂𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀈𑀤𑀺𑀲𑁂 𑀓𑀼𑀮𑁂 𑀚𑀸𑀢𑀸𑀦𑀁 𑀏𑀯𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀇𑀤𑀁 𑀦 𑀬𑀼𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀦𑁆𑀥𑀸𑀦𑀁 𑀓𑀢𑁆𑀢𑀸. 𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸, 𑀤𑁆𑀯𑁂 𑀚𑀦𑁂 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀏𑀯𑀭𑀽𑀧𑁂 𑀓𑀼𑀮𑁂 𑀚𑀸𑀢𑀸𑀦𑀁 𑀏𑀯𑀭𑀽𑀧𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀫𑁂𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀲𑀫𑀕𑁆𑀕𑁄 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀲𑀫𑀕𑁆𑀕𑀸𑀭𑀸𑀫𑁄, 𑀬𑀢𑁆𑀣 𑀲𑀫𑀕𑁆𑀕𑀸 𑀦𑀢𑁆𑀣𑀺, 𑀢𑀢𑁆𑀣 𑀯𑀲𑀺𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀫𑀕𑁆𑀕𑀭𑀸𑀫𑁄’’𑀢𑀺𑀧𑀺 𑀧𑀸𑀴𑀺, 𑀅𑀬𑀫𑁂𑀯𑀢𑁆𑀣𑁄. 𑀲𑀫𑀕𑁆𑀕𑀭𑀢𑁄𑀢𑀺 𑀲𑀫𑀕𑁆𑀕𑁂𑀲𑀼 𑀭𑀢𑁄, 𑀢𑁂 𑀧𑀳𑀸𑀬 𑀅𑀜𑁆𑀜𑀢𑁆𑀭 𑀕𑀦𑁆𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸𑀧𑀺 𑀲𑀼𑀢𑁆𑀯𑀸𑀧𑀺 𑀦𑀦𑁆𑀤𑀢𑀻𑀢𑀺 𑀲𑀫𑀕𑁆𑀕𑀦𑀦𑁆𑀤𑀻. 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀬𑀸 𑀯𑀸𑀘𑀸 𑀲𑀢𑁆𑀢𑁂 𑀲𑀫𑀕𑁆𑀕𑁂𑀬𑁂𑀯 𑀓𑀭𑁄𑀢𑀺, 𑀢𑀁 𑀲𑀸𑀫𑀕𑁆𑀕𑀺𑀕𑀼𑀡𑀧𑀭𑀺𑀤𑀻𑀧𑀓𑀫𑁂𑀯 𑀯𑀸𑀘𑀁 𑀪𑀸𑀲𑀢𑀺, 𑀦 𑀇𑀢𑀭𑀦𑁆𑀢𑀺.

𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸. 𑀫𑀫𑁆𑀫𑀘𑁆𑀙𑁂𑀤𑀓𑁄𑀧𑀺 𑀧𑀬𑁄𑀕𑁄 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀓𑀤𑀸𑀘𑀺 𑀧𑀼𑀢𑁆𑀢𑀓𑁂 𑀏𑀯𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀘𑁄𑀭𑀸 𑀯𑁄 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑀽’’𑀢𑀺, 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀘 𑀦𑁂𑀲𑀁 𑀉𑀧𑀭𑀺 𑀧𑀢𑀦𑁆𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘 𑀓𑀤𑀸𑀘𑀺 𑀦𑀺𑀲𑁆𑀲𑀺𑀢𑀓𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑀺𑀁 𑀇𑀫𑁂 𑀅𑀳𑀺𑀭𑀺𑀓𑀸 𑀅𑀦𑁄𑀢𑁆𑀢𑀧𑁆𑀧𑀺𑀦𑁄 𑀘𑀭𑀦𑁆𑀢𑀺, 𑀦𑀺𑀤𑁆𑀥𑀫𑀣 𑀦𑁂’’𑀢𑀺. 𑀅𑀣 𑀘 𑀦𑁂𑀲𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀺. 𑀬𑀣𑀸 𑀘 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺, 𑀏𑀯𑀁 𑀯𑀘𑀦𑀲𑀡𑁆𑀳𑀢𑀸𑀬 𑀅𑀨𑀭𑀼𑀲𑀯𑀸𑀘𑀸𑀧𑀺 𑀦 𑀳𑁄𑀢𑀺. 𑀦 𑀳𑀺 𑀫𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 ‘‘𑀇𑀫𑀁 𑀲𑀼𑀔𑀁 𑀲𑀬𑀸𑀧𑁂𑀣𑀸’’𑀢𑀺 𑀯𑀘𑀦𑀁 𑀅𑀨𑀭𑀼𑀲𑀯𑀸𑀘𑀸 𑀳𑁄𑀢𑀺, 𑀘𑀺𑀢𑁆𑀢𑀨𑀭𑀼𑀲𑀢𑀸𑀬 𑀧𑀦𑁂𑀲𑀸 𑀨𑀭𑀼𑀲𑀯𑀸𑀘𑀸𑀯, 𑀲𑀸 𑀬𑀁 𑀲𑀦𑁆𑀥𑀸𑀬 𑀧𑀯𑀢𑁆𑀢𑀺𑀢𑀸. 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀢𑀬𑁄 𑀲𑀫𑁆𑀪𑀸𑀭𑀸 𑁋 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑁄 𑀓𑀼𑀧𑀺𑀢𑀘𑀺𑀢𑁆𑀢𑀁 𑀅𑀓𑁆𑀓𑁄𑀲𑀦𑀸𑀢𑀺.

𑀦𑁂𑀮𑀸𑀢𑀺 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀦𑀸𑀲𑁆𑀲𑀸 𑀏𑀮𑀦𑁆𑀢𑀺 𑀦𑁂𑀮𑀸, 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄. ‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 (𑀉𑀤𑀸. 𑁬𑁫; 𑀧𑁂𑀝𑀓𑁄. 𑁨𑁫) 𑀏𑀢𑁆𑀣 𑀯𑀼𑀢𑁆𑀢𑀦𑁂𑀮𑀁 𑀯𑀺𑀬. 𑀓𑀡𑁆𑀡𑀲𑀼𑀔𑀸𑀢𑀺 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀓𑀡𑁆𑀡𑀸𑀦𑀁 𑀲𑀼𑀔𑀸, 𑀲𑀽𑀘𑀺𑀯𑀺𑀚𑁆𑀛𑀦𑀁 𑀯𑀺𑀬 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺. 𑀅𑀢𑁆𑀣𑀫𑀥𑀼𑀭𑀢𑀸𑀬 𑀲𑀓𑀮𑀲𑀭𑀻𑀭𑁂 𑀓𑁄𑀧𑀁 𑀅𑀚𑀦𑁂𑀢𑁆𑀯𑀸 𑀧𑁂𑀫𑀁 𑀚𑀦𑁂𑀢𑀻𑀢𑀺 𑀧𑁂𑀫𑀦𑀺𑀬𑀸. 𑀳𑀤𑀬𑀁 𑀕𑀘𑁆𑀙𑀢𑀺 𑀅𑀧𑀝𑀺𑀳𑀜𑁆𑀜𑀫𑀸𑀦𑀸 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀧𑀯𑀺𑀲𑀢𑀻𑀢𑀺 𑀳𑀤𑀬𑀗𑁆𑀕𑀫𑀸. 𑀕𑀼𑀡𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻. 𑀧𑀼𑀭𑁂 𑀲𑀁𑀯𑀤𑁆𑀥𑀦𑀸𑀭𑀻 𑀯𑀺𑀬 𑀲𑀼𑀓𑀼𑀫𑀸𑀭𑀸𑀢𑀺𑀧𑀺 𑀧𑁄𑀭𑀻. 𑀧𑀼𑀭𑀲𑁆𑀲 𑀏𑀲𑀸𑀢𑀺𑀧𑀺 𑀧𑁄𑀭𑀻, 𑀦𑀕𑀭𑀯𑀸𑀲𑀻𑀦𑀁 𑀓𑀣𑀸𑀢𑀺 𑀅𑀢𑁆𑀣𑁄. 𑀦𑀕𑀭𑀯𑀸𑀲𑀺𑀦𑁄 𑀳𑀺 𑀬𑀼𑀢𑁆𑀢𑀓𑀣𑀸 𑀳𑁄𑀦𑁆𑀢𑀺, 𑀧𑀺𑀢𑀺𑀫𑀢𑁆𑀢𑀁 𑀧𑀺𑀢𑀸𑀢𑀺 𑀪𑀸𑀢𑀺𑀫𑀢𑁆𑀢𑀁 𑀪𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀭𑀽𑀧𑀻 𑀓𑀣𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀓𑀦𑁆𑀢𑀸 𑀳𑁄𑀢𑀻𑀢𑀺 𑀩𑀳𑀼𑀚𑀦𑀓𑀦𑁆𑀢𑀸. 𑀓𑀦𑁆𑀢𑀪𑀸𑀯𑁂𑀦𑁂𑀯 𑀩𑀳𑀼𑀦𑁄 𑀚𑀦𑀲𑁆𑀲 𑀫𑀦𑀸𑀧𑀸 𑀘𑀺𑀢𑁆𑀢𑀯𑀼𑀟𑁆𑀠𑀺𑀓𑀭𑀸𑀢𑀺 𑀩𑀳𑀼𑀚𑀦𑀫𑀦𑀸𑀧𑀸.

𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀺𑀓𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀓𑀼𑀲𑀮𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀲𑁄 𑀆𑀲𑁂𑀯𑀦𑀫𑀦𑁆𑀤𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀆𑀲𑁂𑀯𑀦𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀦𑀺𑀭𑀢𑁆𑀣𑀓𑀓𑀣𑀸 𑀧𑀼𑀭𑁂𑀓𑁆𑀔𑀸𑀭𑀢𑀸, 𑀢𑀣𑀸𑀭𑀽𑀧𑀻𑀓𑀣𑀸𑀓𑀣𑀦𑀜𑁆𑀘.

𑀓𑀸𑀮𑁂𑀦 𑀯𑀤𑀢𑀻𑀢𑀺 𑀓𑀸𑀮𑀯𑀸𑀤𑀻, 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀪𑀽𑀢𑀁 𑀢𑀘𑁆𑀙𑀁 𑀲𑀪𑀸𑀯𑀫𑁂𑀯 𑀯𑀤𑀢𑀻𑀢𑀺 𑀪𑀽𑀢𑀯𑀸𑀤𑀻. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑀯𑀸𑀤𑀻. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀥𑀫𑁆𑀫𑀯𑀸𑀤𑀻. 𑀲𑀁𑀯𑀭𑀯𑀺𑀦𑀬𑀧𑀳𑀸𑀦𑀯𑀺𑀦𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀯𑀺𑀦𑀬𑀯𑀸𑀤𑀻. 𑀦𑀺𑀥𑀸𑀦𑀁 𑀯𑀼𑀘𑁆𑀘𑀢𑀺 𑀞𑀧𑀦𑁄𑀓𑀸𑀲𑁄, 𑀦𑀺𑀥𑀸𑀦𑀫𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀥𑀸𑀦𑀯𑀢𑀻, 𑀳𑀤𑀬𑁂 𑀦𑀺𑀥𑀸𑀢𑀩𑁆𑀩𑀬𑀼𑀢𑁆𑀢𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦𑀸𑀢𑀺 𑀏𑀯𑀭𑀽𑀧𑀺𑀁 𑀪𑀸𑀲𑀫𑀸𑀦𑁄𑀧𑀺 𑀘 ‘‘𑀅𑀳𑀁 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀦 𑀅𑀓𑀸𑀮𑁂𑀦 𑀪𑀸𑀲𑀢𑀺, 𑀬𑀼𑀢𑁆𑀢𑀓𑀸𑀮𑀁 𑀧𑀦 𑀅𑀧𑁂𑀓𑁆𑀔𑀺𑀢𑁆𑀯𑀸𑀯 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀧𑀤𑁂𑀲𑀦𑁆𑀢𑀺 𑀲𑀉𑀧𑀫𑀁, 𑀲𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀦𑁆𑀢𑀯𑀢𑀺𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀬𑀣𑀸𑀲𑁆𑀲𑀸 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀅𑀦𑁂𑀓𑁂𑀳𑀺 𑀦𑀬𑁂𑀳𑀺 𑀯𑀺𑀪𑀚𑀦𑁆𑀢𑁂𑀦 𑀧𑀭𑀺𑀬𑀸𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀁. 𑀬𑀁 𑀯𑀸 𑀲𑁄 𑀅𑀢𑁆𑀣𑀯𑀸𑀤𑀻 𑀅𑀢𑁆𑀣𑀁 𑀯𑀤𑀢𑀺, 𑀢𑁂𑀦 𑀅𑀢𑁆𑀣𑁂𑀦 𑀲𑀳𑀺𑀢𑀢𑁆𑀢𑀸 𑀅𑀢𑁆𑀣𑀲𑀁𑀳𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀦 𑀅𑀜𑁆𑀜𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀁 𑀪𑀸𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀘𑀢𑀽𑀳𑀺 𑀯𑀘𑀻𑀲𑀼𑀘𑀭𑀺𑀢𑁂𑀳𑀻𑀢𑀺 ‘‘𑀫𑀼𑀲𑀸𑀯𑀸𑀤𑀁 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀳𑀺 𑀘𑀢𑀽𑀳𑀺 𑀯𑀸𑀘𑀸𑀳𑀺 𑀬𑀼𑀢𑁆𑀢𑁂𑀳𑀺 𑀲𑀼𑀝𑁆𑀞𑀼 𑀘𑀭𑀺𑀢𑁂𑀳𑀺. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀧𑀭𑀺𑀳𑀻𑀦𑁄. 𑀘𑀢𑀼𑀤𑁄𑀲𑀸𑀧𑀕𑀢𑀁 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀅𑀧𑁆𑀧𑀺𑀬𑀸𑀤𑀻𑀳𑀺 𑀘𑀢𑀽𑀳𑀺 𑀤𑁄𑀲𑁂𑀳𑀺 𑀅𑀧𑀕𑀢𑀁 𑀧𑀭𑀺𑀳𑀻𑀦𑀁 𑀯𑀸𑀘𑀁 𑀪𑀸𑀲𑀢𑀺.

𑀅𑀢𑁆𑀣𑀺 𑀅𑀕𑁄𑀘𑀭𑁄𑀢𑀺 𑀓𑀺𑀜𑁆𑀘𑀸𑀧𑀺 𑀣𑁂𑀭𑁄 𑀲𑀫𑀡𑀸𑀘𑀸𑀭𑀁 𑀲𑀫𑀡𑀕𑁄𑀘𑀭𑀁 𑀓𑀣𑁂𑀢𑀼𑀓𑀸𑀫𑁄 ‘‘𑀅𑀢𑁆𑀣𑀺 𑀅𑀕𑁄𑀘𑀭𑁄, 𑀅𑀢𑁆𑀣𑀺 𑀕𑁄𑀘𑀭𑁄’’𑀢𑀺 𑀧𑀤𑀁 𑀉𑀤𑁆𑀥𑀭𑀺, 𑀬𑀣𑀸 𑀧𑀦 𑀫𑀕𑁆𑀕𑀓𑀼𑀲𑀮𑁄 𑀧𑀼𑀭𑀺𑀲𑁄 𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀯𑀸𑀫𑀁 𑀫𑀼𑀜𑁆𑀘, 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’’𑀢𑀺 𑀧𑀞𑀫𑀁 𑀫𑀼𑀜𑁆𑀘𑀺𑀢𑀩𑁆𑀩𑀁 𑀲𑀪𑀬𑀫𑀕𑁆𑀕𑀁 𑀉𑀧𑁆𑀧𑀣𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀺, 𑀧𑀘𑁆𑀙𑀸 𑀕𑀳𑁂𑀢𑀩𑁆𑀩𑀁 𑀔𑁂𑀫𑀫𑀕𑁆𑀕𑀁 𑀉𑀚𑀼𑀫𑀕𑁆𑀕𑀁, 𑀏𑀯𑀫𑁂𑀯 𑀫𑀕𑁆𑀕𑀓𑀼𑀲𑀮𑀧𑀼𑀭𑀺𑀲𑀲𑀤𑀺𑀲𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀞𑀫𑀁 𑀧𑀳𑀸𑀢𑀩𑁆𑀩𑀁 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀁 𑀅𑀕𑁄𑀘𑀭𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀸 𑀕𑁄𑀘𑀭𑀁 𑀆𑀘𑀺𑀓𑁆𑀔𑀺𑀢𑀼𑀓𑀸𑀫𑁄 ‘‘𑀓𑀢𑀫𑁄 𑀅𑀕𑁄𑀘𑀭𑁄’’𑀢𑀺𑀆𑀤𑀺𑀫𑀸𑀳. 𑀧𑀼𑀭𑀺𑀲𑁂𑀦 𑀳𑀺 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑁄 𑀲𑀫𑁆𑀧𑀚𑁆𑀚𑁂𑀬𑁆𑀬 𑀯𑀸 𑀦 𑀯𑀸, 𑀢𑀣𑀸𑀕𑀢𑁂𑀦 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑁄 𑀅𑀧𑀡𑁆𑀡𑀓𑁄 𑀇𑀦𑁆𑀤𑀯𑀺𑀲𑁆𑀲𑀝𑁆𑀞𑀁 𑀯𑀚𑀺𑀭𑀁 𑀯𑀺𑀬 𑀅𑀯𑀺𑀭𑀚𑁆𑀛𑀦𑀓𑁄 𑀦𑀺𑀩𑁆𑀩𑀸𑀦𑀦𑀕𑀭𑀁𑀬𑁂𑀯 𑀲𑀫𑁄𑀲𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄𑀢𑀺 𑀔𑁄 𑀢𑀺𑀲𑁆𑀲 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀲𑀁. 𑀦𑀺. 𑁩.𑁮𑁪).

𑀬𑀲𑁆𑀫𑀸 𑀯𑀸 𑀲𑀲𑀻𑀲𑀁 𑀦𑁆𑀳𑀸𑀦𑁂𑀦 𑀧𑀳𑀻𑀦𑀲𑁂𑀤𑀫𑀮𑀚𑀮𑁆𑀮𑀺𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀯𑀺𑀪𑀽𑀲𑀦𑀯𑀺𑀥𑀸𑀦𑀁 𑀯𑀺𑀬 𑀧𑀳𑀻𑀦𑀧𑀸𑀧𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀥𑀫𑁆𑀫𑀲𑀫𑀸𑀬𑁄𑀕𑁄 𑀲𑀫𑁆𑀧𑀦𑁆𑀦𑀭𑀽𑀧𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁂𑀤𑀫𑀮𑀚𑀮𑁆𑀮𑀺𑀓𑀁 𑀯𑀺𑀬 𑀧𑀳𑀸𑀢𑀩𑁆𑀩𑀁 𑀧𑀞𑀫𑀁 𑀅𑀕𑁄𑀘𑀭𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀳𑀻𑀦𑀲𑁂𑀤𑀫𑀮𑀚𑀮𑁆𑀮𑀺𑀓𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀯𑀺𑀪𑀽𑀲𑀦𑀯𑀺𑀥𑀸𑀦𑀁 𑀯𑀺𑀬 𑀧𑀘𑁆𑀙𑀸 𑀕𑁄𑀘𑀭𑀁 𑀆𑀘𑀺𑀓𑁆𑀔𑀺𑀢𑀼𑀓𑀸𑀫𑁄𑀧𑀺 ‘‘𑀓𑀢𑀫𑁄 𑀅𑀕𑁄𑀘𑀭𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀕𑁄𑀘𑀭𑁄𑀢𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀁. 𑀅𑀬𑀼𑀢𑁆𑀢𑀝𑁆𑀞𑀸𑀦𑀁 𑀅𑀕𑁄𑀘𑀭𑁄. 𑀯𑁂𑀲𑀺𑀬𑀸 𑀕𑁄𑀘𑀭𑁄 𑀅𑀲𑁆𑀲𑀸𑀢𑀺 𑀯𑁂𑀲𑀺𑀬𑀸𑀕𑁄𑀘𑀭𑁄, 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀯𑁂𑀲𑀺𑀬𑀸 𑀦𑀸𑀫 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄 𑀬𑁂𑀦 𑀓𑁂𑀦𑀘𑀺𑀤𑁂𑀯 𑀲𑀼𑀮𑀪𑀚𑁆𑀛𑀸𑀘𑀸𑀭𑀢𑀸 𑀫𑀺𑀢𑁆𑀢𑀲𑀦𑁆𑀣𑀯𑀲𑀺𑀦𑁂𑀳𑀯𑀲𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑁄 𑀯𑁂𑀲𑀺𑀬𑀸𑀕𑁄𑀘𑀭𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀺𑀁𑀓𑀸𑀭𑀡𑀸? 𑀆𑀭𑀓𑁆𑀔𑀯𑀺𑀧𑀢𑁆𑀢𑀺𑀢𑁄. 𑀏𑀯𑀁 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲 𑀳𑀺 𑀘𑀺𑀭𑀭𑀓𑁆𑀔𑀺𑀢𑀕𑁄𑀧𑀺𑀢𑁄𑀧𑀺 𑀲𑀫𑀡𑀥𑀫𑁆𑀫𑁄 𑀓𑀢𑀺𑀧𑀸𑀳𑁂𑀦𑁂𑀯 𑀦𑀲𑁆𑀲𑀢𑀺. 𑀲𑀘𑁂𑀧𑀺 𑀦 𑀦𑀲𑁆𑀲𑀢𑀺, 𑀕𑀭𑀳𑀁 𑀮𑀪𑀢𑀺. 𑀤𑀓𑁆𑀔𑀺𑀡𑀸𑀯𑀲𑁂𑀦 𑀧𑀦 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁.

𑀯𑀺𑀥𑀯𑀸 𑀯𑀼𑀘𑁆𑀘𑀦𑁆𑀢𑀺 𑀫𑀢𑀧𑀢𑀺𑀓𑀸 𑀯𑀸 𑀧𑀯𑀼𑀝𑁆𑀞𑀧𑀢𑀺𑀓𑀸 𑀯𑀸. 𑀣𑀼𑀮𑁆𑀮𑀓𑀼𑀫𑀸𑀭𑀺𑀬𑁄𑀢𑀺 𑀫𑀳𑀮𑁆𑀮𑀺𑀓𑀸 𑀅𑀦𑀺𑀩𑁆𑀩𑀺𑀤𑁆𑀥𑀓𑀼𑀫𑀸𑀭𑀺𑀬𑁄. 𑀧𑀡𑁆𑀟𑀓𑀸𑀢𑀺 𑀮𑁄𑀓𑀸𑀫𑀺𑀲𑀦𑀺𑀲𑁆𑀲𑀺𑀢𑀓𑀣𑀸𑀩𑀳𑀼𑀮𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀅𑀯𑀽𑀧𑀲𑀦𑁆𑀢𑀧𑀭𑀺𑀴𑀸𑀳𑀸 𑀦𑀧𑀼𑀁𑀲𑀓𑀸. 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀉𑀧𑀲𑀗𑁆𑀓𑀫𑀦𑁂 𑀆𑀤𑀻𑀦𑀯𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀪𑀺𑀓𑁆𑀔𑀼𑀦𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺 𑀘 𑀪𑀺𑀓𑁆𑀔𑀽 𑀦𑀸𑀫 𑀉𑀲𑁆𑀲𑀦𑁆𑀦𑀩𑁆𑀭𑀳𑁆𑀫𑀘𑀭𑀺𑀬𑀸 𑀳𑁄𑀦𑁆𑀢𑀺, 𑀢𑀣𑀸 𑀪𑀺𑀓𑁆𑀔𑀼𑀦𑀺𑀬𑁄. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀦𑁆𑀣𑀯𑀯𑀲𑁂𑀦 𑀓𑀢𑀺𑀧𑀸𑀳𑁂𑀦𑁂𑀯 𑀭𑀓𑁆𑀔𑀺𑀢𑀕𑁄𑀧𑀺𑀢𑀲𑀫𑀡𑀥𑀫𑁆𑀫𑀁 𑀦𑀸𑀲𑁂𑀦𑁆𑀢𑀺. 𑀕𑀺𑀮𑀸𑀦𑀧𑀼𑀘𑁆𑀙𑀓𑁂𑀦 𑀧𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀸 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀧𑀽𑀚𑀦𑀢𑁆𑀣𑀸𑀬𑀧𑀺 𑀑𑀯𑀸𑀤𑀤𑀸𑀦𑀢𑁆𑀣𑀸𑀬𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀧𑀸𑀦𑀸𑀕𑀸𑀭𑀦𑁆𑀢𑀺 𑀲𑀼𑀭𑀸𑀧𑀸𑀦𑀖𑀭𑀁, 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀓𑀭𑁂𑀳𑀺 𑀲𑀼𑀭𑀸𑀲𑁄𑀡𑁆𑀟𑁂𑀳𑀺 𑀅𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀳𑀲𑁄𑀡𑁆𑀟𑀯𑀲𑁂𑀦 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀻𑀢𑀺𑀆𑀤𑀻𑀲𑀼 𑀭𑀸𑀚𑀸𑀦𑁄𑀢𑀺 𑀅𑀪𑀺𑀲𑀺𑀢𑁆𑀢𑀸 𑀯𑀸 𑀳𑁄𑀦𑁆𑀢𑀼 𑀅𑀦𑀪𑀺𑀲𑀺𑀢𑁆𑀢𑀸 𑀯𑀸, 𑀬𑁂 𑀭𑀚𑁆𑀚𑀫𑀦𑀼𑀲𑀸𑀲𑀦𑁆𑀢𑀺. 𑀭𑀸𑀚𑀫𑀳𑀸𑀫𑀢𑁆𑀢𑀸𑀢𑀺 𑀭𑀸𑀚𑀽𑀦𑀁 𑀇𑀲𑁆𑀲𑀭𑀺𑀬𑀲𑀤𑀺𑀲𑀸𑀬 𑀫𑀳𑀢𑀺𑀬𑀸 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀢𑀺𑀢𑁆𑀣𑀺𑀬𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸 𑀩𑀸𑀳𑀺𑀭𑀧𑀭𑀺𑀩𑁆𑀩𑀸𑀚𑀓𑀸. 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀢𑀺 𑀪𑀢𑁆𑀢𑀺𑀯𑀲𑁂𑀦 𑀢𑁂𑀲𑀁 𑀧𑀘𑁆𑀘𑀬𑀤𑀸𑀬𑀓𑀸, 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀚𑀸𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦𑀸𑀢𑀺 𑀅𑀦𑀦𑀼𑀮𑁄𑀫𑀺𑀓𑀲𑀁𑀲𑀕𑁆𑀕𑁄 𑀦𑀸𑀫 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀅𑀦𑀦𑀼𑀮𑁄𑀫𑁄 𑀧𑀘𑁆𑀘𑀦𑀻𑀓𑀲𑀁𑀲𑀕𑁆𑀕𑁄. 𑀬𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀧𑀜𑁆𑀜𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀲𑀮𑁆𑀮𑁂𑀔𑀧𑀭𑀺𑀳𑀸𑀦𑀺𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀲𑁂𑀬𑁆𑀬𑀣𑀺𑀤𑀁? 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀳𑀲𑁄𑀓𑀺𑀢𑀸 𑀲𑀳𑀦𑀦𑁆𑀤𑀺𑀢𑀸 𑀲𑀫𑀲𑀼𑀔𑀤𑀼𑀓𑁆𑀔𑀢𑀸 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀬𑁄𑀕𑀁 𑀆𑀧𑀚𑁆𑀚𑀦𑀢𑀸 𑀢𑀺𑀢𑁆𑀣𑀺𑀬𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀭𑀼𑀘𑀺𑀲𑀫𑀸𑀘𑀸𑀭𑀢𑀸 𑀏𑀓𑀘𑁆𑀙𑀦𑁆𑀤𑀭𑀼𑀘𑀺𑀲𑀫𑀸𑀘𑀸𑀭𑀪𑀸𑀯𑀸𑀯𑀳𑁄 𑀯𑀸 𑀲𑀺𑀦𑁂𑀳𑀩𑀳𑀼𑀫𑀸𑀦𑀲𑀦𑁆𑀣𑀯𑁄. 𑀢𑀢𑁆𑀣 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀓𑀭𑁄, 𑀇𑀢𑀭𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀢𑁂𑀲𑀁 𑀮𑀤𑁆𑀥𑀺𑀕𑁆𑀕𑀳𑀡𑀁. 𑀢𑁂𑀲𑀁 𑀧𑀦 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀕𑀡𑁆𑀳𑀸𑀧𑁂𑀢𑀼𑀁 𑀲𑀫𑀢𑁆𑀣𑁂𑀦 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺.

𑀇𑀤𑀸𑀦𑀺 𑀅𑀧𑀭𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀅𑀕𑁄𑀘𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀲𑁆𑀲𑀤𑁆𑀥𑀸𑀦𑀻𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀤𑁆𑀥𑀸𑀯𑀺𑀭𑀳𑀺𑀢𑀸𑀦𑀺. 𑀢𑀸𑀦𑀺 ‘‘𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀲𑀗𑁆𑀖𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺 𑀦 𑀲𑀤𑁆𑀤𑀳𑀦𑁆𑀢𑀺. 𑀅𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀘𑀺𑀢𑁆𑀢𑀁 𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀸𑀦𑀻𑀢𑀺 𑀅𑀓𑁆𑀓𑁄𑀲𑀓𑀸𑀦𑀺 𑀘𑁂𑀯 𑀧𑀭𑀺𑀪𑀸𑀲𑀓𑀸𑀦𑀺 𑀘. ‘‘𑀘𑁄𑀭𑁄𑀲𑀺, 𑀩𑀸𑀮𑁄𑀲𑀺, 𑀫𑀽𑀴𑁆𑀳𑁄𑀲𑀺, 𑀑𑀝𑁆𑀞𑁄𑀲𑀺, 𑀕𑁄𑀡𑁄𑀲𑀺, 𑀕𑀤𑁆𑀭𑀪𑁄𑀲𑀺, 𑀆𑀧𑀸𑀬𑀺𑀓𑁄𑀲𑀺, 𑀦𑁂𑀭𑀬𑀺𑀓𑁄𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀲𑀼𑀕𑀢𑀺, 𑀤𑀼𑀕𑁆𑀕𑀢𑀺𑀬𑁂𑀯 𑀢𑀼𑀬𑁆𑀳𑀁 𑀧𑀸𑀝𑀺𑀓𑀗𑁆𑀔𑀸’’𑀢𑀺 𑀏𑀯𑀁 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀺. ‘‘𑀳𑁄𑀢𑀼, 𑀇𑀤𑀸𑀦𑀺 𑀢𑀁 𑀧𑀳𑀭𑀺𑀲𑁆𑀲𑀸𑀫, 𑀩𑀦𑁆𑀥𑀺𑀲𑁆𑀲𑀸𑀫, 𑀯𑀥𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀪𑀬𑀤𑀲𑁆𑀲𑀦𑁂𑀦 𑀧𑀭𑀺𑀪𑀸𑀲𑀦𑁆𑀢𑀺 𑀘𑀸𑀢𑀺 𑀅𑀢𑁆𑀣𑁄.

𑀅𑀦𑀢𑁆𑀣𑀓𑀸𑀫𑀸𑀦𑀻𑀢𑀺 𑀅𑀢𑁆𑀣𑀁 𑀦 𑀇𑀘𑁆𑀙𑀦𑁆𑀢𑀺, 𑀅𑀦𑀢𑁆𑀣𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀅𑀳𑀺𑀢𑀓𑀸𑀫𑀸𑀦𑀻𑀢𑀺 𑀅𑀳𑀺𑀢𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀳𑀺𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀅𑀨𑀸𑀲𑀼𑀓𑀸𑀫𑀸𑀦𑀻𑀢𑀺 𑀨𑀸𑀲𑀼𑀓𑀁 𑀦 𑀇𑀘𑁆𑀙𑀦𑁆𑀢𑀺, 𑀅𑀨𑀸𑀲𑀼𑀓𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀻𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀁 𑀦𑀺𑀩𑁆𑀪𑀬𑀁 𑀦 𑀇𑀘𑁆𑀙𑀦𑁆𑀢𑀺, 𑀲𑀪𑀬𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀪𑀺𑀓𑁆𑀔𑀽𑀦𑀦𑁆𑀢𑀺 𑀏𑀢𑁆𑀣 𑀲𑀸𑀫𑀡𑁂𑀭𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀪𑀺𑀓𑁆𑀔𑀼𑀦𑀻𑀦𑀦𑁆𑀢𑀺 𑀏𑀢𑁆𑀣 𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀺𑀬𑁄𑀧𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀸𑀦𑀜𑁆𑀘𑁂𑀯 𑀲𑀭𑀡𑀕𑀢𑀸𑀦𑀜𑁆𑀘 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀢𑀸𑀦𑀺 𑀅𑀦𑀢𑁆𑀣𑀓𑀸𑀫𑀸𑀦𑀺𑀬𑁂𑀯. 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀻𑀢𑀺 𑀏𑀯𑀭𑀽𑀧𑀸𑀦𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀦𑀺 𑀓𑀼𑀮𑀸𑀦𑀺. 𑀲𑁂𑀯𑀢𑀻𑀢𑀺 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺. 𑀪𑀚𑀢𑀻𑀢𑀺 𑀉𑀧𑀲𑀗𑁆𑀓𑀫𑀢𑀺. 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑀲𑀗𑁆𑀓𑀫𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀯𑁂𑀲𑀺𑀬𑀸𑀤𑀺𑀕𑁄𑀘𑀭𑀲𑁆𑀲 𑀯𑁂𑀲𑀺𑀬𑀸𑀤𑀺𑀓𑁄 𑀭𑀸𑀚𑀸𑀤𑀺𑀲𑀁𑀲𑀝𑁆𑀞𑀲𑁆𑀲 𑀭𑀸𑀚𑀸𑀤𑀺𑀓𑁄 𑀅𑀲𑁆𑀲𑀤𑁆𑀥𑀓𑀼𑀮𑀸𑀤𑀺𑀲𑁂𑀯𑀓𑀲𑁆𑀲 𑀅𑀲𑁆𑀲𑀤𑁆𑀥𑀓𑀼𑀮𑀸𑀤𑀺𑀓𑁄 𑀘𑀸𑀢𑀺 𑀢𑀺𑀧𑁆𑀧𑀓𑀸𑀭𑁄𑀧𑀺 𑀅𑀬𑀼𑀢𑁆𑀢𑀕𑁄𑀘𑀭𑁄 ‘‘𑀅𑀕𑁄𑀘𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀲 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀅𑀕𑁄𑀘𑀭𑀢𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀯𑁂𑀲𑀺𑀬𑀸𑀤𑀺𑀓𑁄 𑀢𑀸𑀯 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀲𑁆𑀲𑀬𑀢𑁄 𑀅𑀕𑁄𑀘𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑁋 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄, 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺. 𑀭𑀸𑀚𑀸𑀤𑀺𑀓𑁄 𑀛𑀸𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀧𑀦𑀺𑀲𑁆𑀲𑀬𑀢𑁄 𑀮𑀸𑀪𑀲𑀓𑁆𑀓𑀸𑀭𑀸𑀲𑀦𑀺𑀘𑀓𑁆𑀓𑀦𑀺𑀧𑁆𑀨𑀸𑀤𑀦𑀢𑁄 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀳𑁂𑀢𑀼𑀢𑁄 𑀘, 𑀅𑀲𑁆𑀲𑀤𑁆𑀥𑀓𑀼𑀮𑀸𑀤𑀺𑀓𑁄 𑀲𑀤𑁆𑀥𑀸𑀳𑀸𑀦𑀺𑀘𑀺𑀢𑁆𑀢𑀧𑀤𑁄𑀲𑀸𑀯𑀳𑀦𑀢𑁄 𑀅𑀕𑁄𑀘𑀭𑁄.

𑀅𑀦𑁆𑀢𑀭𑀖𑀭𑀧𑁆𑀧𑀯𑁂𑀲𑀸𑀤𑀺𑀓𑁄 𑀘 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀸𑀤𑀺𑀓𑁄 𑀘 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀲𑀽𑀓𑀤𑀲𑁆𑀲𑀦𑀸𑀦𑀼𑀬𑁄𑀕𑁄 𑀘 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑁄𑀧𑀺 𑀧𑀦 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀅𑀕𑁄𑀘𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀫𑀸 𑀪𑀺𑀓𑁆𑀔𑀯𑁂 𑀅𑀕𑁄𑀘𑀭𑁂 𑀘𑀭𑀣𑀸𑀢𑀺 𑀘𑀭𑀺𑀢𑀼𑀁 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀫𑀸 𑀘𑀭𑀣. 𑀧𑀭𑀯𑀺𑀲𑀬𑁂𑀢𑀺 𑀲𑀢𑁆𑀢𑀼𑀯𑀺𑀲𑀬𑁂. 𑀅𑀕𑁄𑀘𑀭𑁂 𑀪𑀺𑀓𑁆𑀔𑀯𑁂 𑀘𑀭𑀢𑀦𑁆𑀢𑀺 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀘𑀭𑀦𑁆𑀢𑀸𑀦𑀁. ‘‘𑀘𑀭’’𑀦𑁆𑀢𑀺𑀧𑀺 𑀧𑀸𑀞𑁄. 𑀮𑀘𑁆𑀙𑀢𑀻𑀢𑀺 𑀮𑀪𑀺𑀲𑁆𑀲𑀢𑀺 𑀧𑀲𑁆𑀲𑀺𑀲𑁆𑀲𑀢𑀺. 𑀫𑀸𑀭𑁄𑀢𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑁄𑀧𑀺 𑀫𑀘𑁆𑀘𑀼𑀫𑀸𑀭𑁄𑀧𑀺. 𑀑𑀢𑀸𑀭𑀦𑁆𑀢𑀺 𑀭𑀦𑁆𑀥𑀁 𑀙𑀺𑀤𑁆𑀤𑀁 𑀯𑀺𑀯𑀭𑀁.

𑀕𑁄𑀘𑀭𑀦𑀺𑀤𑁆𑀤𑁂𑀲𑁂 𑀦 𑀯𑁂𑀲𑀺𑀬𑀸𑀕𑁄𑀘𑀭𑁄 𑀳𑁄𑀢𑀻𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀕𑁄𑀘𑀭𑁄𑀢𑀺 𑀘𑀭𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀯𑀲𑁂𑀦 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸 𑀕𑁄𑀘𑀭𑁄. 𑀲𑀓𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂. 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂𑀢𑀺 𑀧𑀺𑀢𑀺𑀢𑁄 𑀆𑀕𑀢𑀯𑀺𑀲𑀬𑁂.

𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀢𑀺 𑀲𑀫𑁆𑀫𑀸𑀉𑀧𑀝𑁆𑀞𑀺𑀢𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀯𑀦𑁆𑀢𑀲𑁆𑀲. 𑀣𑀸𑀫𑀕𑀢𑀲𑁆𑀲𑀸𑀢𑀺 𑀩𑀮𑀧𑁆𑀧𑀢𑁆𑀢𑀲𑁆𑀲. 𑀤𑀴𑁆𑀳𑀧𑀭𑀓𑁆𑀓𑀫𑀲𑁆𑀲𑀸𑀢𑀺 𑀣𑀺𑀭𑀯𑀻𑀭𑀺𑀬𑀲𑁆𑀲. 𑀬𑀲𑁆𑀲𑀢𑁆𑀣𑀸𑀬 𑀧𑁂𑀲𑀺𑀢𑁄𑀢𑀺 𑀬𑁂𑀦 𑀅𑀭𑀳𑀢𑁆𑀢𑀢𑁆𑀣𑀸𑀬 𑀅𑀢𑁆𑀢𑀪𑀸𑀯𑁄 𑀧𑀭𑀺𑀘𑁆𑀘𑀢𑁆𑀢𑁄. 𑀅𑀢𑁆𑀢𑀢𑁆𑀣𑁂 𑀘𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑁂 𑀅𑀭𑀳𑀢𑁆𑀢𑀨𑀮𑁂 𑀘. 𑀜𑀸𑀬𑁂 𑀘𑀸𑀢𑀺 𑀅𑀭𑀺𑀬𑁂 𑀅𑀝𑁆𑀞𑀗𑁆𑀕𑀺𑀓𑁂 𑀫𑀕𑁆𑀕𑁂 𑀘. 𑀮𑀓𑁆𑀔𑀡𑁂 𑀘𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀧𑀝𑀺𑀯𑁂𑀥𑁂 𑀘. 𑀓𑀸𑀭𑀡𑁂 𑀘𑀸𑀢𑀺 𑀳𑁂𑀢𑀼𑀫𑁆𑀳𑀺 𑀘. 𑀞𑀸𑀦𑀸𑀞𑀸𑀦𑁂 𑀘𑀸𑀢𑀺 𑀞𑀸𑀦𑁂 𑀘 𑀅𑀝𑁆𑀞𑀸𑀦𑁂 𑀘, 𑀓𑀸𑀭𑀡𑀸𑀓𑀸𑀭𑀡𑁂 𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳.

𑁧𑁯𑁭. 𑀅𑀝𑁆𑀞𑀫𑀕𑀸𑀣𑀸𑀬 𑀏𑀓𑁄𑀤𑀺 𑀦𑀺𑀧𑀓𑁄𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄 𑀧𑀡𑁆𑀟𑀺𑀢𑁄.

𑀚𑀸𑀢𑀭𑀽𑀧𑀲𑁆𑀲 𑀑𑀴𑀸𑀭𑀺𑀓𑀫𑁆𑀧𑀺 𑀫𑀮𑀁 𑀥𑀫𑀢𑀻𑀢𑀺 𑀲𑀼𑀯𑀡𑁆𑀡𑀲𑁆𑀲 𑀣𑀽𑀮𑀁 𑀚𑀮𑁆𑀮𑀁 𑀅𑀕𑁆𑀕𑀺𑀲𑀁𑀬𑁄𑀕𑁂𑀦 𑀦𑀻𑀳𑀭𑀢𑀺. 𑀲𑀦𑁆𑀥𑀫𑀢𑀻𑀢𑀺 𑀲𑀫𑁆𑀫𑀸 𑀦𑀻𑀳𑀭𑀢𑀺. 𑀦𑀺𑀤𑁆𑀥𑀫𑀢𑀻𑀢𑀺 𑀅𑀧𑀼𑀦𑀪𑀯𑀧𑁆𑀧𑀢𑁆𑀢𑀺𑀓𑀁 𑀓𑀢𑁆𑀯𑀸 𑀦𑀻𑀳𑀭𑀢𑀺. ‘‘𑀛𑀸𑀧𑁂𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀫𑀚𑁆𑀛𑀺𑀫𑀓𑀫𑁆𑀧𑀻𑀢𑀺 𑀢𑀢𑁄 𑀲𑀼𑀔𑀼𑀫𑀢𑀭𑀫𑁆𑀧𑀺. 𑀲𑀼𑀔𑀼𑀫𑀓𑀫𑁆𑀧𑀻𑀢𑀺 𑀅𑀢𑀺𑀲𑀼𑀔𑀼𑀫𑀢𑀭𑀫𑁆𑀧𑀺. 𑀏𑀯𑀫𑁂𑀯𑀸𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀅𑀢𑁆𑀢𑀦𑁄 𑀑𑀴𑀸𑀭𑀺𑀓𑁂𑀧𑀺 𑀓𑀺𑀮𑁂𑀲𑁂 𑀥𑀫𑀢𑀻𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑁂 𑀣𑀽𑀮𑀓𑀺𑀮𑁂𑀲𑁂 𑀯𑀻𑀭𑀺𑀬𑀸𑀢𑀧𑁂𑀦 𑀦𑀻𑀳𑀭𑀢𑀺. 𑀫𑀚𑁆𑀛𑀺𑀫𑀓𑁂𑀧𑀺 𑀓𑀺𑀮𑁂𑀲𑁂𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀦𑀁 𑀫𑀚𑁆𑀛𑀺𑀫𑀓𑁂𑀧𑀺. 𑀲𑀼𑀔𑀼𑀫𑀓𑁂𑀧𑀻𑀢𑀺 𑀜𑀸𑀢𑀺𑀯𑀺𑀢𑀓𑁆𑀓𑀸𑀤𑀺𑀓𑁂 𑀅𑀢𑀺𑀲𑀡𑁆𑀳𑀓𑁂𑀧𑀺 𑀓𑀺𑀮𑁂𑀲𑁂. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀥𑀫𑀢𑀻𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀧𑀭𑀻𑀢𑀲𑀗𑁆𑀔𑀸𑀢𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦𑀻𑀳𑀭𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁯𑁮. 𑀏𑀯𑀁 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀢𑀻𑀳𑀺 𑀕𑀸𑀣𑀸𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑁆𑀯𑀸 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀧𑀜𑁆𑀘𑀲𑀢𑀸𑀦𑀁 𑀲𑀺𑀲𑁆𑀲𑀸𑀦𑀫𑀢𑁆𑀣𑀸𑀬 𑀘 𑀲𑁂𑀦𑀸𑀲𑀦𑀕𑁄𑀘𑀭𑀲𑀻𑀮𑀯𑀢𑀸𑀤𑀻𑀦𑀺 𑀧𑀼𑀘𑁆𑀙𑀺𑀢𑁄 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀫𑀸𑀭𑀤𑁆𑀥𑀁. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯𑀢𑁆𑀣𑁄 𑁋 𑀚𑀸𑀢𑀺𑀆𑀤𑀻𑀳𑀺 𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲 𑀭𑀺𑀢𑁆𑀢𑀸𑀲𑀦𑀁 𑀲𑀬𑀦𑀁 𑀲𑁂𑀯𑀢𑁄 𑀯𑁂 𑀲𑀫𑁆𑀩𑁄𑀥𑀺𑀓𑀸𑀫𑀲𑁆𑀲 𑀲𑀸𑀭𑀺𑀧𑀼𑀢𑁆𑀢 𑀪𑀺𑀓𑁆𑀔𑀼𑀦𑁄 𑀬𑀤𑀺𑀤𑀁 𑀨𑀸𑀲𑀼 𑀬𑁄 𑀨𑀸𑀲𑀼𑀯𑀺𑀳𑀸𑀭𑁄 𑀬𑀣𑀸𑀦𑀼𑀥𑀫𑁆𑀫𑀁 𑀬𑁄 𑀘 𑀅𑀦𑀼𑀥𑀫𑁆𑀫𑁄, 𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁 𑀬𑀣𑀸 𑀧𑀚𑀸𑀦𑀦𑁆𑀢𑁄 𑀯𑀤𑁂𑀬𑁆𑀬, 𑀏𑀯𑀁 𑀯𑀤𑀸𑀫𑀻𑀢𑀺. 𑀬𑀁 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀺 𑀬𑀁 𑀲𑀼𑀔𑀯𑀺𑀳𑀸𑀭𑀁. 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑁂𑀦𑀸𑀢𑀺 𑀇𑀢𑁆𑀣𑀺𑀭𑀽𑀧𑀸𑀤𑀺𑀲𑀫𑀡𑀸𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑁂𑀦. 𑀢𑀁 𑀩𑁄𑀥𑀺𑀁 𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀢𑀁 𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀩𑁄𑀥𑀺𑀁 𑀩𑀼𑀚𑁆𑀛𑀺𑀢𑀼𑀁 𑀇𑀘𑁆𑀙𑀦𑁆𑀢𑀲𑁆𑀲. 𑀅𑀦𑀼𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀅𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲. 𑀧𑀝𑀺𑀯𑀺𑀚𑁆𑀛𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀅𑀪𑀺𑀫𑀼𑀔𑁂 𑀓𑀢𑁆𑀯𑀸 𑀦𑀺𑀩𑁆𑀩𑀺𑀚𑁆𑀛𑀺𑀢𑀼𑀓𑀸𑀫𑀲𑁆𑀲. 𑀲𑀫𑁆𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀧𑀳𑀻𑀦𑀓𑀺𑀮𑁂𑀲𑁂 𑀅𑀧𑀘𑁆𑀘𑀸𑀕𑀫𑀦𑀯𑀲𑁂𑀦 𑀲𑀫𑁆𑀫𑀸 𑀩𑀼𑀚𑁆𑀛𑀺𑀢𑀼𑀁 𑀇𑀘𑁆𑀙𑀦𑁆𑀢𑀲𑁆𑀲. 𑀅𑀥𑀺𑀕𑀦𑁆𑀢𑀼𑀓𑀸𑀫𑀲𑁆𑀲𑀸𑀢𑀺 𑀧𑀸𑀧𑀼𑀡𑀺𑀢𑀼𑀓𑀸𑀫𑀲𑁆𑀲. 𑀲𑀘𑁆𑀙𑀺𑀓𑀸𑀢𑀼𑀓𑀸𑀫𑀲𑁆𑀲𑀸𑀢𑀺 𑀧𑀝𑀺𑀮𑀸𑀪𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀢𑁆𑀢𑀼𑀓𑀸𑀫𑀲𑁆𑀲. 𑀅𑀣 𑀯𑀸 𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀁 𑀜𑀸𑀢𑀼𑀓𑀸𑀫𑀲𑁆𑀲. 𑀅𑀦𑀼𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑀁 𑀧𑀼𑀦 𑀜𑀸𑀢𑀼𑀓𑀸𑀫𑀲𑁆𑀲. 𑀧𑀝𑀺𑀯𑀺𑀚𑁆𑀛𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑀁 𑀧𑀝𑀺𑀯𑁂𑀥𑀯𑀲𑁂𑀦 𑀜𑀸𑀢𑀼𑀓𑀸𑀫𑀲𑁆𑀲. 𑀲𑀫𑁆𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀲𑀫𑁆𑀫𑀸 𑀜𑀸𑀢𑀼𑀓𑀸𑀫𑀲𑁆𑀲. 𑀅𑀥𑀺𑀕𑀦𑁆𑀢𑀼𑀓𑀸𑀫𑀲𑁆𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀥𑀺𑀕𑀦𑁆𑀢𑀼𑀓𑀸𑀫𑀲𑁆𑀲. 𑀨𑀲𑁆𑀲𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀜𑀸𑀡𑀨𑀼𑀲𑀦𑀸𑀬 𑀨𑀼𑀲𑀺𑀢𑀼𑀓𑀸𑀫𑀲𑁆𑀲. 𑀲𑀘𑁆𑀙𑀺𑀓𑀸𑀢𑀼𑀓𑀸𑀫𑀲𑁆𑀲𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀢𑀼𑀓𑀸𑀫𑀲𑁆𑀲.

𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂 𑀉𑀧𑁆𑀧𑀦𑁆𑀦𑀉𑀤𑀬𑀩𑁆𑀩𑀬𑀸𑀤𑀺𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺.

𑁧𑁯𑁯. 𑀤𑀼𑀢𑀺𑀬𑀕𑀸𑀣𑀸𑀬 𑀲𑀧𑀭𑀺𑀬𑀦𑁆𑀢𑀘𑀸𑀭𑀻𑀢𑀺 𑀲𑀻𑀮𑀸𑀤𑀻𑀲𑀼 𑀘𑀢𑀽𑀲𑀼 𑀧𑀭𑀺𑀬𑀦𑁆𑀢𑁂𑀲𑀼 𑀘𑀭𑀫𑀸𑀦𑁄. 𑀟𑀁𑀲𑀸𑀥𑀺𑀧𑀸𑀢𑀸𑀦𑀦𑁆𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀦𑀜𑁆𑀘 𑀲𑁂𑀲𑀫𑀓𑁆𑀔𑀺𑀓𑀸𑀦𑀜𑁆𑀘. 𑀢𑁂 𑀳𑀺 𑀢𑀢𑁄 𑀢𑀢𑁄 𑀅𑀥𑀺𑀧𑀢𑀺𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀥𑀺𑀧𑀸𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀦𑀼𑀲𑁆𑀲𑀨𑀲𑁆𑀲𑀸𑀦𑀦𑁆𑀢𑀺 𑀘𑁄𑀭𑀸𑀤𑀺𑀨𑀲𑁆𑀲𑀸𑀦𑀁.

𑀘𑀢𑁆𑀢𑀸𑀭𑁄 𑀧𑀭𑀺𑀬𑀦𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀫𑀭𑀺𑀬𑀸𑀤𑀸 𑀧𑀭𑀺𑀘𑁆𑀙𑁂𑀤𑀸. 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀓𑀼𑀘𑁆𑀙𑀺𑀢𑀪𑀸𑀯𑀁 𑀲𑀻𑀮𑀯𑀺𑀭𑀳𑀺𑀢𑀪𑀸𑀯𑀁 𑀑𑀮𑁄𑀓𑀬𑀫𑀸𑀦𑁄. 𑀅𑀦𑁆𑀢𑁄 𑀲𑀻𑀮𑀲𑀁𑀯𑀭𑀧𑀭𑀺𑀬𑀦𑁆𑀢𑁂 𑀘𑀭𑀢𑀻𑀢𑀺 𑀲𑀻𑀮𑀲𑀁𑀯𑀭𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀘𑀭𑀢𑀺 𑀯𑀺𑀘𑀭𑀢𑀺. 𑀫𑀭𑀺𑀬𑀸𑀤𑀁 𑀦 𑀪𑀺𑀦𑁆𑀤𑀢𑀻𑀢𑀺 𑀲𑀻𑀮𑀫𑀭𑀺𑀬𑀸𑀤𑀁 𑀲𑀻𑀮𑀧𑀭𑀺𑀘𑁆𑀙𑁂𑀤𑀁 𑀦 𑀓𑁄𑀧𑁂𑀢𑀺.

𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄𑀢𑀺 𑀆𑀤𑀺𑀢𑁆𑀢𑀤𑁂𑀲𑀦𑀁 (𑀫𑀳𑀸𑀯. 𑁫𑁪; 𑀲𑀁. 𑀦𑀺. 𑁩.𑁬𑁧; 𑁪.𑁨𑁮) 𑀑𑀮𑁄𑀓𑁂𑀦𑁆𑀢𑁄. 𑀅𑀓𑁆𑀔𑀩𑁆𑀪𑀜𑁆𑀚𑀦𑀯𑀡𑀧𑀝𑀺𑀘𑁆𑀙𑀸𑀤𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄𑀢𑀺 𑀲𑀸𑀓𑀝𑀺𑀓𑀲𑁆𑀲 𑀅𑀓𑁆𑀔𑀩𑁆𑀪𑀜𑁆𑀚𑀦𑀉𑀧𑀫𑀜𑁆𑀘, 𑀓𑀼𑀝𑁆𑀞𑀩𑁆𑀬𑀸𑀥𑀺𑀦𑁄 𑀯𑀡𑀸𑀦𑀁 𑀧𑀝𑀺𑀘𑁆𑀙𑀸𑀤𑀦𑀢𑁂𑀮𑀧𑀺𑀮𑁄𑀢𑀺𑀓𑀉𑀧𑀫𑀜𑁆𑀘, 𑀓𑀦𑁆𑀢𑀸𑀭𑀧𑀝𑀺𑀧𑀦𑁆𑀦𑀸𑀦𑀁 𑀚𑀸𑀬𑀫𑁆𑀧𑀢𑀺𑀓𑀸𑀦𑀁 𑀧𑀼𑀢𑁆𑀢𑀫𑀁𑀲𑀔𑀸𑀤𑀦𑀉𑀧𑀫𑀜𑁆𑀘 (𑀲𑀁. 𑀦𑀺. 𑁨.𑁬𑁩; 𑀫𑀺. 𑀧. 𑁬.𑁧.𑁨) 𑀑𑀮𑁄𑀓𑁂𑀦𑁆𑀢𑁄. 𑀪𑀤𑁆𑀤𑁂𑀓𑀭𑀢𑁆𑀢𑀯𑀺𑀳𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄𑀢𑀺 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀢𑀁 𑀯𑁂 ‘𑀪𑀤𑁆𑀤𑁂𑀓𑀭𑀢𑁆𑀢𑁄’𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺. (𑀫. 𑀦𑀺. 𑁩.𑁨𑁮𑁦; 𑀦𑁂𑀢𑁆𑀢𑀺. 𑁧𑁦𑁩) 𑁋

𑀏𑀯𑀁 𑀯𑀼𑀢𑁆𑀢𑀁 𑀪𑀤𑁆𑀤𑁂𑀓𑀭𑀢𑁆𑀢𑀯𑀺𑀳𑀸𑀭𑀁 𑀑𑀮𑁄𑀓𑁂𑀦𑁆𑀢𑁄. 𑀢𑀸 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀔𑀸𑀤𑀦𑁆𑀢𑀻𑀢𑀺 𑀦𑀺𑀧𑁆𑀧𑀢𑀺𑀢𑁆𑀯𑀸 𑀦𑀺𑀧𑁆𑀧𑀢𑀺𑀢𑁆𑀯𑀸 𑀔𑀸𑀤𑀦𑁆𑀢𑀺.

𑁨𑁦𑁦. 𑀢𑀢𑀺𑀬𑀕𑀸𑀣𑀸𑀬 𑀧𑀭𑀥𑀫𑁆𑀫𑀺𑀓𑀸 𑀦𑀸𑀫 𑀲𑀢𑁆𑀢𑀲𑀳𑀥𑀫𑁆𑀫𑀺𑀓𑀯𑀚𑁆𑀚𑀸 𑀲𑀩𑁆𑀩𑁂𑀧𑀺 𑀢𑁂 𑀩𑀸𑀳𑀺𑀭𑀓𑀸. 𑀓𑀼𑀲𑀮𑀸𑀦𑀼𑀏𑀲𑀻𑀢𑀺 𑀓𑀼𑀲𑀮𑀥𑀫𑁆𑀫𑁂 𑀅𑀦𑁆𑀯𑁂𑀲𑀫𑀸𑀦𑁄.

𑀲𑀢𑁆𑀢 𑀲𑀳𑀥𑀫𑁆𑀫𑀺𑀓𑁂 𑀞𑀧𑁂𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀻𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄 𑀯𑀚𑁆𑀚𑁂𑀢𑁆𑀯𑀸. 𑀅𑀣𑀸𑀧𑀭𑀸𑀦𑀺𑀧𑀺 𑀅𑀢𑁆𑀣𑀺 𑀅𑀪𑀺𑀲𑀫𑁆𑀪𑁄𑀢𑀩𑁆𑀩𑀸𑀦𑀻𑀢𑀺 𑀅𑀧𑀭𑀸𑀦𑀺𑀧𑀺 𑀫𑀤𑁆𑀤𑀺𑀢𑀩𑁆𑀩𑀸𑀦𑀺 𑀅𑀢𑁆𑀣𑀺 𑀲𑀁𑀯𑀺𑀚𑁆𑀚𑀦𑁆𑀢𑀺.

𑁨𑁦𑁧. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀆𑀢𑀗𑁆𑀓𑀨𑀲𑁆𑀲𑁂𑀦𑀸𑀢𑀺 𑀭𑁄𑀕𑀨𑀲𑁆𑀲𑁂𑀦. 𑀲𑀻𑀢𑀁 𑀅𑀣𑀼𑀡𑁆𑀳𑀦𑁆𑀢𑀺 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘. 𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄 𑀩𑀳𑀼𑀥𑀸𑀢𑀺 𑀲𑁄 𑀢𑁂𑀳𑀺 𑀆𑀢𑀗𑁆𑀓𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄. 𑀅𑀦𑁄𑀓𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑁄𑀓𑀸𑀲𑀪𑀽𑀢𑁄. 𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀧𑀓𑁄𑀧𑀯𑀲𑁂𑀦 𑀯𑀸𑀢𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀆𑀧𑁄𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀅𑀜𑁆𑀜𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸. 𑀉𑀡𑁆𑀳𑀦𑁆𑀢𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀢𑁂𑀚𑁄𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀉𑀡𑁆𑀳𑀁 𑀪𑀯𑀢𑀺. 𑀅𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲. 𑀑𑀓𑀸𑀲𑀁 𑀦 𑀓𑀭𑁄𑀢𑀻𑀢𑀺 𑀅𑀯𑀓𑀸𑀲𑀁 𑀧𑀢𑀺𑀝𑁆𑀞𑀁 𑀦 𑀓𑀭𑁄𑀢𑀺. 𑀅𑀯𑀢𑁆𑀣𑀺𑀢𑀲𑀫𑀸𑀤𑀸𑀦𑁄𑀢𑀺 𑀑𑀢𑀭𑀺𑀢𑁆𑀯𑀸 𑀕𑀸𑀳𑀓𑁄.

𑁨𑁦𑁨. 𑀏𑀯𑀁 ‘‘𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄’’𑀢𑀺𑀆𑀤𑀻𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀧𑀼𑀝𑁆𑀞𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀣𑁂𑀬𑁆𑀬𑀁 𑀦 𑀓𑀸𑀭𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀲𑁆𑀲𑁂𑀢𑀺 𑀨𑀼𑀲𑁂𑀬𑁆𑀬. 𑀬𑀤𑀸𑀯𑀺𑀮𑀢𑁆𑀢𑀁 𑀫𑀦𑀲𑁄 𑀯𑀺𑀚𑀜𑁆𑀜𑀸𑀢𑀺 𑀬𑀁 𑀘𑀺𑀢𑁆𑀢𑀲𑁆𑀲 𑀆𑀯𑀺𑀮𑀢𑁆𑀢𑀁 𑀯𑀺𑀚𑀸𑀦𑁂𑀬𑁆𑀬, 𑀢𑀁 𑀲𑀩𑁆𑀩𑀁 ‘‘𑀓𑀡𑁆𑀳𑀲𑁆𑀲 𑀧𑀓𑁆𑀔𑁄’’𑀢𑀺 𑀯𑀺𑀦𑁄𑀤𑀬𑁂𑀬𑁆𑀬.

𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬𑀸𑀢𑀺 𑀏𑀢𑁆𑀣 𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀧𑀭𑀲𑀁𑀳𑀭𑀡𑀁, 𑀣𑁂𑀬𑁆𑀬𑀁 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀅𑀤𑀺𑀦𑁆𑀦𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀬𑀢𑁆𑀣 𑀧𑀭𑁄 𑀬𑀣𑀸𑀓𑀸𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀦𑁆𑀢𑁄 𑀅𑀤𑀡𑁆𑀟𑀸𑀭𑀳𑁄 𑀅𑀦𑀼𑀧𑀯𑀚𑁆𑀚𑁄 𑀘 𑀳𑁄𑀢𑀺; 𑀢𑀲𑁆𑀫𑀺𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀢𑀁 𑀳𑀻𑀦𑁂 𑀧𑀭𑀲𑁆𑀲 𑀲𑀦𑁆𑀢𑀓𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀧𑀡𑀻𑀢𑁂 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀲𑁆𑀫𑀸? 𑀯𑀢𑁆𑀣𑀼𑀧𑀡𑀻𑀢𑀢𑀸𑀬. 𑀯𑀢𑁆𑀣𑀼𑀲𑀫𑀢𑁆𑀢𑁂 𑀲𑀢𑀺 𑀕𑀼𑀡𑀸𑀥𑀺𑀓𑀸𑀦𑀁 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀲𑀸𑀯𑀚𑁆𑀚𑀁, 𑀢𑀁 𑀢𑀁 𑀕𑀼𑀡𑀸𑀥𑀺𑀓𑀁 𑀉𑀧𑀸𑀤𑀸𑀬 𑀢𑀢𑁄 𑀢𑀢𑁄 𑀳𑀻𑀦𑀕𑀼𑀡𑀲𑁆𑀲 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑁆𑀧𑀲𑀸𑀯𑀚𑁆𑀚𑀁.

𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸, 𑀣𑁂𑀬𑁆𑀬𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁄, 𑀢𑁂𑀦 𑀳𑀭𑀡𑀦𑁆𑀢𑀺. 𑀧𑀳𑀸𑀬𑀸𑀢𑀺 𑀇𑀫𑀁 𑀅𑀤𑀺𑀦𑁆𑀦𑀸𑀤𑀸𑀦𑀘𑁂𑀢𑀦𑀸𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀚𑀳𑀺𑀢𑁆𑀯𑀸. 𑀧𑀝𑀺𑀯𑀺𑀭𑀢𑁄𑀢𑀺 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀢𑁄 𑀤𑀼𑀲𑁆𑀲𑀻𑀮𑁆𑀬𑀢𑁄 𑀑𑀭𑀢𑁄 𑀯𑀺𑀭𑀢𑁄𑀯. 𑀤𑀺𑀦𑁆𑀦𑀫𑁂𑀯 𑀆𑀤𑀺𑀬𑀢𑀻𑀢𑀺 𑀤𑀺𑀦𑁆𑀦𑀸𑀤𑀸𑀬𑀻. 𑀘𑀺𑀢𑁆𑀢𑁂𑀦𑀧𑀺 𑀤𑀺𑀦𑁆𑀦𑀫𑁂𑀯 𑀧𑀝𑀺𑀓𑀗𑁆𑀔𑀢𑀻𑀢𑀺 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻. 𑀣𑁂𑀦𑁂𑀢𑀻𑀢𑀺 𑀣𑁂𑀦𑁄, 𑀦 𑀣𑁂𑀦𑁂𑀦 𑀅𑀣𑁂𑀦𑁂𑀦. 𑀅𑀣𑁂𑀦𑀢𑁆𑀢𑀸𑀬𑁂𑀯 𑀲𑀼𑀘𑀺𑀪𑀽𑀢𑁂𑀦. 𑀅𑀢𑁆𑀢𑀦𑀸𑀢𑀺 𑀅𑀢𑁆𑀢𑀪𑀸𑀯𑁂𑀦, 𑀅𑀣𑁂𑀦𑀁 𑀲𑀼𑀘𑀺𑀪𑀽𑀢𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀫𑁂𑀢𑁆𑀢𑀺. 𑀫𑁂𑀢𑁆𑀢𑀸𑀓𑀸𑀭𑁄 𑀫𑁂𑀢𑁆𑀢𑀸𑀬𑀦𑀸. 𑀫𑁂𑀢𑁆𑀢𑀸𑀬 𑀅𑀬𑀺𑀢𑀲𑁆𑀲 𑀫𑁂𑀢𑁆𑀢𑀸𑀲𑀫𑀗𑁆𑀕𑀺𑀦𑁄 𑀘𑀺𑀢𑁆𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁. 𑀅𑀦𑀼𑀤𑀬𑀢𑀻𑀢𑀺 𑀅𑀦𑀼𑀤𑀬𑀸, 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀤𑀬𑀸𑀓𑀸𑀭𑁄 𑀅𑀦𑀼𑀤𑀬𑀦𑀸. 𑀅𑀦𑀼𑀤𑀬𑀺𑀢𑀲𑁆𑀲 𑀪𑀸𑀯𑁄 𑀅𑀦𑀼𑀤𑀬𑀺𑀢𑀢𑁆𑀢𑀁. 𑀳𑀺𑀢𑀲𑁆𑀲 𑀏𑀲𑀦𑀯𑀲𑁂𑀦 𑀳𑀺𑀢𑁂𑀲𑀺𑀢𑀸. 𑀅𑀦𑀼𑀓𑀫𑁆𑀧𑀦𑀯𑀲𑁂𑀦 𑀅𑀦𑀼𑀓𑀫𑁆𑀧𑀸. 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀯 𑀫𑁂𑀢𑁆𑀢𑀸 𑀯𑀼𑀢𑁆𑀢𑀸. 𑀯𑀺𑀧𑀼𑀮𑁂𑀦𑀸𑀢𑀺 𑀏𑀢𑁆𑀣 𑀨𑀭𑀡𑀯𑀲𑁂𑀦 𑀯𑀺𑀧𑀼𑀮𑀢𑀸 𑀤𑀝𑁆𑀞𑀩𑁆𑀩𑀸. 𑀪𑀽𑀫𑀺𑀯𑀲𑁂𑀦 𑀧𑀦 𑀢𑀁 𑀫𑀳𑀕𑁆𑀕𑀢𑀁. 𑀧𑀕𑀼𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀁. 𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀘 𑀅𑀧𑁆𑀧𑀫𑀸𑀡𑀁. 𑀩𑁆𑀬𑀸𑀧𑀸𑀤𑀧𑀘𑁆𑀘𑀢𑁆𑀣𑀺𑀓𑀧𑁆𑀧𑀳𑀸𑀦𑁂𑀦 𑀅𑀯𑁂𑀭𑀁. 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑀢𑁄 𑀅𑀩𑁆𑀬𑀸𑀧𑀚𑁆𑀚𑀁, 𑀦𑀺𑀤𑁆𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀆𑀯𑀺𑀮𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀁. 𑀮𑀼𑀴𑀺𑀢𑀦𑁆𑀢𑀺 𑀓𑀮𑀮𑀁. 𑀏𑀭𑀺𑀢𑀦𑁆𑀢𑀺 𑀅𑀲𑀦𑁆𑀦𑀺𑀝𑁆𑀞𑀸𑀦𑀁. 𑀖𑀝𑁆𑀝𑀺𑀢𑀦𑁆𑀢𑀺 𑀆𑀭𑀫𑁆𑀫𑀡𑁂𑀦 𑀖𑀝𑁆𑀝𑀦𑀫𑀸𑀧𑀸𑀤𑀺𑀢𑀁. 𑀘𑀮𑀺𑀢𑀦𑁆𑀢𑀺 𑀓𑀫𑁆𑀧𑀫𑀸𑀦𑀁. 𑀪𑀦𑁆𑀢𑀦𑁆𑀢𑀺 𑀯𑀺𑀩𑁆𑀪𑀦𑁆𑀢𑀁. 𑀅𑀯𑀽𑀧𑀲𑀦𑁆𑀢𑀦𑁆𑀢𑀺 𑀅𑀦𑀺𑀩𑁆𑀩𑀼𑀢𑀁.

𑀬𑁄 𑀲𑁄 𑀫𑀸𑀭𑁄𑀢𑀺 𑀏𑀯𑀫𑀸𑀤𑀻𑀲𑀼 𑀫𑀳𑀸𑀚𑀦𑀁 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀢𑁆𑀯𑀸 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀓𑀡𑁆𑀳𑀓𑀫𑁆𑀫𑀢𑁆𑀢𑀸 𑀓𑀡𑁆𑀳𑁄. 𑀓𑀸𑀫𑀸𑀯𑀘𑀭𑀺𑀲𑁆𑀲𑀭𑀢𑁆𑀢𑀸 𑀅𑀥𑀺𑀧𑀢𑀺. 𑀫𑀭𑀡𑀁 𑀧𑀸𑀧𑀦𑀢𑁄 𑀅𑀦𑁆𑀢𑀕𑀽. 𑀫𑀼𑀜𑁆𑀘𑀺𑀢𑀼𑀁 𑀅𑀧𑁆𑀧𑀤𑀸𑀦𑀝𑁆𑀞𑁂𑀦 𑀦𑀫𑀼𑀘𑀺. 𑀫𑀸𑀭𑀲𑁆𑀲 𑀩𑀴𑀺𑀲𑀦𑁆𑀢𑀺 𑀫𑀸𑀭𑀩𑀴𑀺𑀲𑀁. 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀝𑁆𑀞𑁂𑀦 𑀫𑀸𑀭𑀲𑁆𑀲 𑀆𑀫𑀺𑀲𑀦𑁆𑀢𑀺 𑀫𑀸𑀭𑀸𑀫𑀺𑀲𑀁. 𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀫𑀸𑀭𑀲𑁆𑀲 𑀯𑀺𑀲𑀬𑁄𑀢𑀺 𑀫𑀸𑀭𑀯𑀺𑀲𑀬𑁄. 𑀕𑁄𑀘𑀭𑀝𑁆𑀞𑁂𑀦 𑀫𑀸𑀭𑀲𑁆𑀲 𑀦𑀺𑀯𑀸𑀲𑁄𑀢𑀺 𑀫𑀸𑀭𑀦𑀺𑀯𑀸𑀲𑁄. 𑀓𑀸𑀫𑀘𑀸𑀭𑀁 𑀘𑀭𑀝𑁆𑀞𑁂𑀦 𑀫𑀸𑀭𑀲𑁆𑀲 𑀕𑁄𑀘𑀭𑁄𑀢𑀺 𑀫𑀸𑀭𑀕𑁄𑀘𑀭𑁄. 𑀤𑀼𑀧𑁆𑀧𑀫𑀼𑀜𑁆𑀘𑀦𑀝𑁆𑀞𑁂𑀦 𑀫𑀸𑀭𑀲𑁆𑀲 𑀩𑀦𑁆𑀥𑀦𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀁. 𑀤𑀼𑀓𑁆𑀔𑀼𑀤𑁆𑀤𑀬𑁄𑀢𑀺 𑀤𑀼𑀓𑁆𑀔𑀩𑀦𑁆𑀥𑀦𑁄.

𑁨𑁦𑁩. 𑀫𑀽𑀮𑀫𑁆𑀧𑀺 𑀢𑁂𑀲𑀁 𑀧𑀮𑀺𑀔𑀜𑁆𑀜 𑀢𑀺𑀝𑁆𑀞𑁂𑀢𑀺 𑀢𑁂𑀲𑀁 𑀓𑁄𑀥𑀸𑀢𑀺𑀫𑀸𑀦𑀸𑀦𑀁 𑀬𑀁 𑀅𑀯𑀺𑀚𑁆𑀚𑀸𑀤𑀺𑀓𑀁 𑀫𑀽𑀮𑀁, 𑀢𑀫𑁆𑀧𑀺 𑀧𑀮𑀺𑀔𑀡𑀺𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬. 𑀅𑀤𑁆𑀥𑀸 𑀪𑀯𑀦𑁆𑀢𑁄 𑀅𑀪𑀺𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀏𑀢𑀁 𑀧𑀺𑀬𑀸𑀧𑀺𑀬𑀁 𑀅𑀪𑀺𑀪𑀯𑀦𑁆𑀢𑁄 𑀏𑀓𑀁𑀲𑁂𑀦𑁂𑀯 𑀅𑀪𑀺𑀪𑀯𑁂𑀬𑁆𑀬, 𑀦 𑀢𑀢𑁆𑀣 𑀲𑀺𑀣𑀺𑀮𑀁 𑀧𑀭𑀓𑁆𑀓𑀫𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀯𑀺𑀚𑁆𑀚𑀸 𑀫𑀽𑀮𑀦𑁆𑀢𑀺𑀆𑀤𑀬𑁄 𑀅𑀯𑀺𑀚𑁆𑀚𑀸 𑀓𑁄𑀥𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀫𑀽𑀮𑀁 𑀳𑁄𑀢𑀺. 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄 𑀘 𑀅𑀲𑁆𑀫𑀺𑀫𑀸𑀦𑁄 𑀘 𑀇𑀫𑁂 𑀤𑁆𑀯𑁂 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯. 𑀅𑀳𑀺𑀭𑀺𑀓𑀅𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀸 𑀇𑀫𑁂 𑀢𑀬𑁄 𑀉𑀧𑀦𑀺𑀲𑁆𑀲𑀬𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀫𑀽𑀮𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀅𑀢𑀺𑀫𑀸𑀦𑀲𑁆𑀲𑀸𑀧𑀺.

𑁨𑁦𑁪. 𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀧𑀜𑁆𑀜𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸. 𑀓𑀮𑁆𑀬𑀸𑀡𑀧𑀻𑀢𑀻𑀢𑀺 𑀓𑀮𑁆𑀬𑀸𑀡𑀧𑀻𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀘𑀢𑀼𑀭𑁄 𑀲𑀳𑁂𑀣 𑀧𑀭𑀺𑀤𑁂𑀯𑀥𑀫𑁆𑀫𑁂𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 𑀯𑀼𑀘𑁆𑀘𑀫𑀸𑀦𑁂 𑀧𑀭𑀺𑀤𑁂𑀯𑀦𑀻𑀬𑀥𑀫𑁆𑀫𑁂 𑀲𑀳𑁂𑀬𑁆𑀬.

𑀯𑀺𑀘𑀬𑀩𑀳𑀼𑀮𑁄𑀢𑀺 𑀧𑀭𑀺𑀯𑀻𑀫𑀁𑀲𑀦𑀩𑀳𑀼𑀮𑁄. 𑀧𑀯𑀺𑀘𑀬𑀩𑀳𑀼𑀮𑁄𑀢𑀺 𑀯𑀺𑀲𑁂𑀲𑁂𑀦 𑀯𑀻𑀫𑀁𑀲𑀦𑀩𑀳𑀼𑀮𑁄. 𑀧𑁂𑀓𑁆𑀔𑀸𑀬𑀦𑀩𑀳𑀼𑀮𑁄𑀢𑀺 𑀇𑀓𑁆𑀔𑀡𑀩𑀳𑀼𑀮𑁄. 𑀲𑀫𑁂𑀓𑁆𑀔𑀸𑀬𑀦𑀩𑀳𑀼𑀮𑁄𑀢𑀺 𑀏𑀲𑀦𑀩𑀳𑀼𑀮𑁄. 𑀯𑀺𑀪𑀽𑀢𑀯𑀺𑀳𑀸𑀭𑀻𑀢𑀺 𑀧𑀸𑀓𑀝𑀁 𑀓𑀢𑁆𑀯𑀸 𑀜𑀸𑀢𑀯𑀺𑀳𑀸𑀭𑀻.

𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺 𑀏𑀢𑁆𑀣 𑀢𑀸𑀯 𑀅𑀪𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀕𑀫𑀦𑀁. 𑀧𑀝𑀺𑀓𑁆𑀓𑀦𑁆𑀢𑀁 𑀦𑀺𑀯𑀢𑁆𑀢𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀮𑀩𑁆𑀪𑀢𑀺. 𑀕𑀫𑀦𑁂 𑀢𑀸𑀯 𑀧𑀼𑀭𑀢𑁄 𑀓𑀸𑀬𑀁 𑀅𑀪𑀺𑀳𑀭𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫. 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀞𑀸𑀦𑁂𑀧𑀺 𑀞𑀺𑀢𑀓𑁄𑀯 𑀓𑀸𑀬𑀁 𑀧𑀼𑀭𑀢𑁄 𑀑𑀦𑀫𑁂𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫. 𑀧𑀘𑁆𑀙𑀢𑁄 𑀅𑀧𑀦𑀸𑀫𑁂𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀦𑀺𑀲𑀚𑁆𑀚𑀸𑀬𑀧𑀺 𑀦𑀺𑀲𑀺𑀦𑁆𑀦𑀓𑁄𑀯 𑀆𑀲𑀦𑀲𑁆𑀲 𑀧𑀼𑀭𑀺𑀫𑀅𑀗𑁆𑀕𑀸𑀪𑀺𑀫𑀼𑀔𑁄 𑀲𑀁𑀲𑀭𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫. 𑀧𑀘𑁆𑀙𑀺𑀫𑀅𑀗𑁆𑀕𑀧𑁆𑀧𑀤𑁂𑀲𑀁 𑀧𑀘𑁆𑀙𑀸 𑀲𑀁𑀲𑀭𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀦𑀺𑀧𑀚𑁆𑀚𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻, 𑀲𑀫𑁆𑀧𑀚𑀜𑁆𑀜𑀫𑁂𑀯 𑀯𑀸 𑀓𑀸𑀭𑀻 𑀳𑁄𑀢𑀺. 𑀲𑁄 𑀳𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀫𑁆𑀧𑀚𑀜𑁆𑀜𑀁 𑀓𑀭𑁄𑀢𑁂𑀯, 𑀦 𑀓𑀢𑁆𑀣𑀘𑀺 𑀲𑀫𑁆𑀧𑀚𑀜𑁆𑀜𑀯𑀺𑀭𑀳𑀺𑀢𑁄 𑀳𑁄𑀢𑀺. 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂𑀢𑀺 𑀏𑀢𑁆𑀣 𑀧𑀦 𑀆𑀮𑁄𑀓𑀺𑀢𑀁 𑀦𑀸𑀫 𑀧𑀼𑀭𑀢𑁄 𑀧𑁂𑀓𑁆𑀔𑀦𑀁. 𑀯𑀺𑀮𑁄𑀓𑀺𑀢𑀁 𑀦𑀸𑀫 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦𑀁. 𑀅𑀜𑁆𑀜𑀸𑀦𑀺𑀧𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀧𑀘𑁆𑀙𑀢𑁄 𑀧𑁂𑀓𑁆𑀔𑀦𑀯𑀲𑁂𑀦 𑀑𑀮𑁄𑀓𑀺𑀢𑀉𑀮𑁆𑀮𑁄𑀓𑀺𑀢𑀅𑀧𑀮𑁄𑀓𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 𑀇𑀥 𑀦 𑀕𑀳𑀺𑀢𑀸𑀦𑀺. 𑀲𑀸𑀭𑀼𑀧𑁆𑀧𑀯𑀲𑁂𑀦 𑀧𑀦 𑀇𑀫𑀸𑀦𑁂𑀯 𑀤𑁆𑀯𑁂 𑀕𑀳𑀺𑀢𑀸𑀦𑀺, 𑀇𑀫𑀺𑀦𑀸 𑀯𑀸 𑀫𑀼𑀔𑁂𑀦 𑀲𑀩𑁆𑀩𑀸𑀦𑀺 𑀕𑀳𑀺𑀢𑀸𑀦𑁂𑀯𑀸𑀢𑀺.

𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂𑀢𑀺 𑀧𑀩𑁆𑀩𑀸𑀦𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑁂. 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂𑀢𑀺 𑀏𑀢𑁆𑀣 𑀲𑀗𑁆𑀖𑀸𑀝𑀺𑀘𑀻𑀯𑀭𑀸𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦, 𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀸𑀧𑀝𑀺𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑁄 𑀥𑀸𑀭𑀡𑀁 𑀦𑀸𑀫. 𑀅𑀲𑀺𑀢𑀸𑀤𑀻𑀲𑀼 𑀅𑀲𑀺𑀢𑁂𑀢𑀺 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑁂. 𑀧𑀻𑀢𑁂𑀢𑀺 𑀬𑀸𑀕𑀼𑀆𑀤𑀺𑀧𑀸𑀦𑁂. 𑀔𑀸𑀬𑀺𑀢𑁂𑀢𑀺 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀺𑀔𑀸𑀤𑀦𑁂. 𑀲𑀸𑀬𑀺𑀢𑁂𑀢𑀺 𑀫𑀥𑀼𑀨𑀸𑀡𑀺𑀢𑀸𑀤𑀺𑀲𑀸𑀬𑀦𑁂. 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂𑀢𑀺 𑀉𑀘𑁆𑀘𑀸𑀭𑀲𑁆𑀲 𑀘 𑀧𑀲𑁆𑀲𑀸𑀯𑀲𑁆𑀲 𑀘 𑀓𑀭𑀡𑁂. 𑀕𑀢𑀸𑀤𑀻𑀲𑀼 𑀕𑀢𑁂𑀢𑀺 𑀕𑀫𑀦𑁂. 𑀞𑀺𑀢𑁂𑀢𑀺 𑀞𑀸𑀦𑁂. 𑀦𑀺𑀲𑀺𑀦𑁆𑀦𑁂𑀢𑀺 𑀦𑀺𑀲𑀚𑁆𑀚𑀸𑀬.

𑀲𑀼𑀢𑁆𑀢𑁂𑀢𑀺 𑀲𑀬𑀦𑁂. 𑀚𑀸𑀕𑀭𑀺𑀢𑁂𑀢𑀺 𑀚𑀸𑀕𑀭𑀡𑁂. 𑀪𑀸𑀲𑀺𑀢𑁂𑀢𑀺 𑀓𑀣𑀦𑁂. 𑀢𑀢𑁆𑀣 𑀉𑀧𑀸𑀤𑀸𑀭𑀽𑀧𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀅𑀧𑁆𑀧𑀯𑀢𑁆𑀢𑁂 𑀲𑀢𑀺 𑀪𑀸𑀲𑀺𑀢𑀸 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀯𑀢𑁆𑀢𑀦𑁆𑀢𑁂 𑀳𑁄𑀢𑀻𑀢𑀺 𑀧𑀭𑀺𑀕𑁆𑀕𑀸𑀳𑀓𑁄 𑀪𑀺𑀓𑁆𑀔𑀼 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀧𑀺 𑀩𑀸𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀁 𑀧𑀳𑀸𑀬 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀢𑀼𑀡𑁆𑀳𑀻𑀪𑀸𑀯𑁂𑀢𑀺 𑀅𑀓𑀣𑀦𑁂. 𑀢𑀢𑁆𑀣 𑀉𑀧𑀸𑀤𑀸𑀭𑀽𑀧𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀧𑀯𑀢𑁆𑀢𑀺𑀬𑀁 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀅𑀧𑁆𑀧𑀯𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀧𑀭𑀺𑀕𑁆𑀕𑀸𑀳𑀓𑁄 𑀪𑀺𑀓𑁆𑀔𑀼 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀅𑀝𑁆𑀞𑀢𑀺𑀁𑀲𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀧𑀺 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀏𑀢𑁆𑀣 𑀘 𑀏𑀓𑁄 𑀇𑀭𑀺𑀬𑀸𑀧𑀣𑁄 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀆𑀕𑀢𑁄. 𑀲𑁄 𑀳𑁂𑀝𑁆𑀞𑀸 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺 𑀏𑀢𑁆𑀣 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑀁 𑀕𑀘𑁆𑀙𑀢𑁄 𑀆𑀕𑀘𑁆𑀙𑀢𑁄 𑀘 𑀅𑀤𑁆𑀥𑀸𑀦𑀕𑀫𑀦𑀯𑀲𑁂𑀦 𑀓𑀣𑀺𑀢𑁄. 𑀕𑀢𑁂 𑀞𑀺𑀢𑁂𑀢𑀺 𑀏𑀢𑁆𑀣 𑀯𑀺𑀳𑀸𑀭𑁂 𑀘𑀼𑀡𑁆𑀡𑀺𑀓𑀧𑀸𑀤𑀼𑀤𑁆𑀥𑀸𑀭𑀯𑀲𑁂𑀦 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦𑀸𑀢𑀺𑀆𑀤𑀬𑁄 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀺𑀢𑀸 𑀏𑀯.

𑀅𑀭𑀢𑀻𑀢𑀺 𑀭𑀢𑀺𑀧𑀝𑀺𑀓𑁆𑀔𑁂𑀧𑁄. 𑀅𑀭𑀢𑀺𑀢𑀸𑀢𑀺 𑀅𑀭𑀫𑀦𑀸𑀓𑀸𑀭𑁄. 𑀅𑀦𑀪𑀺𑀭𑀢𑀻𑀢𑀺 𑀅𑀦𑀪𑀺𑀭𑀢𑀪𑀸𑀯𑁄. 𑀅𑀦𑀪𑀺𑀭𑀫𑀦𑀸𑀢𑀺 𑀅𑀦𑀪𑀺𑀭𑀫𑀦𑀸𑀓𑀸𑀭𑁄. 𑀉𑀓𑁆𑀓𑀡𑁆𑀞𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀦𑀸𑀓𑀸𑀭𑁄. 𑀧𑀭𑀺𑀢𑀲𑁆𑀲𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀦𑀯𑀲𑁂𑀦𑁂𑀯 𑀧𑀭𑀺𑀢𑀲𑁆𑀲𑀦𑀸.

𑁨𑁦𑁫. 𑀓𑀺𑀁 𑀲𑀽 𑀅𑀲𑀺𑀲𑁆𑀲𑀦𑁆𑀢𑀺 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀺. 𑀓𑀼𑀯 𑀯𑀸 𑀅𑀲𑀺𑀲𑁆𑀲𑀦𑁆𑀢𑀺 𑀓𑀼𑀳𑀺𑀁 𑀯𑀸 𑀅𑀲𑀺𑀲𑁆𑀲𑀸𑀫𑀺. 𑀤𑀼𑀓𑁆𑀔𑀁 𑀯𑀢 𑀲𑁂𑀢𑁆𑀣 𑀓𑀼𑀯𑀚𑁆𑀚 𑀲𑁂𑀲𑁆𑀲𑀦𑁆𑀢𑀺 𑀇𑀫𑀁 𑀭𑀢𑁆𑀢𑀺𑀁 𑀤𑀼𑀓𑁆𑀔𑀁 𑀲𑀬𑀺𑀁, 𑀅𑀚𑁆𑀚 𑀆𑀕𑀫𑀦𑀭𑀢𑁆𑀢𑀺𑀁 𑀓𑀢𑁆𑀣 𑀲𑀬𑀺𑀲𑁆𑀲𑀁. 𑀏𑀢𑁂 𑀯𑀺𑀢𑀓𑁆𑀓𑁂𑀢𑀺 𑀏𑀢𑁂 𑀧𑀺𑀡𑁆𑀟𑀧𑀸𑀢𑀦𑀺𑀲𑁆𑀲𑀺𑀢𑁂 𑀤𑁆𑀯𑁂, 𑀲𑁂𑀦𑀸𑀲𑀦𑀦𑀺𑀲𑁆𑀲𑀺𑀢𑁂 𑀤𑁆𑀯𑁂𑀢𑀺 𑀘𑀢𑁆𑀢𑀸𑀭𑁄 𑀯𑀺𑀢𑀓𑁆𑀓𑁂. 𑀅𑀦𑀺𑀓𑁂𑀢𑀘𑀸𑀭𑀻𑀢𑀺 𑀅𑀧𑀮𑀺𑀩𑁄𑀥𑀘𑀸𑀭𑀻 𑀦𑀺𑀢𑁆𑀢𑀡𑁆𑀳𑀘𑀸𑀭𑀻.

𑀨𑀮𑀓𑁂 𑀯𑀸𑀢𑀺 𑀯𑀗𑁆𑀓𑀸𑀤𑀺𑀨𑀮𑀓𑀧𑀻𑀞𑁂 𑀘. 𑀆𑀕𑀸𑀫𑀺𑀭𑀢𑁆𑀢𑀺𑀦𑁆𑀢𑀺 𑀆𑀕𑀫𑀦𑀺𑀭𑀢𑁆𑀢𑀺𑀬𑀁. 𑀆𑀤𑁂𑀯𑀦𑁂𑀬𑁆𑀬𑁂𑀢𑀺 𑀯𑀺𑀲𑁂𑀲𑁂𑀦 𑀤𑁂𑀯𑀦𑀺𑀬𑁆𑀬𑁂. 𑀧𑀭𑀺𑀤𑁂𑀯𑀦𑁂𑀬𑁆𑀬𑁂𑀢𑀺 𑀲𑀫𑀦𑁆𑀢𑀢𑁄 𑀤𑁂𑀯𑀦𑀺𑀬𑁆𑀬𑁂.

𑁨𑁦𑁬. 𑀓𑀸𑀮𑁂𑀢𑀺 𑀧𑀺𑀡𑁆𑀟𑀧𑀸𑀢𑀓𑀸𑀮𑁂 𑀧𑀺𑀡𑁆𑀟𑀧𑀸𑀢𑀲𑀗𑁆𑀔𑀸𑀢𑀁 𑀅𑀦𑁆𑀦𑀁 𑀯𑀸, 𑀘𑀻𑀯𑀭𑀓𑀸𑀮𑁂 𑀘𑀻𑀯𑀭𑀲𑀗𑁆𑀔𑀸𑀢𑀁 𑀯𑀲𑀦𑀁 𑀯𑀸 𑀮𑀤𑁆𑀥𑀸 𑀥𑀫𑁆𑀫𑁂𑀦 𑀲𑀫𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀢𑁆𑀢𑀁 𑀲 𑀚𑀜𑁆𑀜𑀸𑀢𑀺 𑀧𑀭𑀺𑀕𑁆𑀕𑀳𑁂 𑀘 𑀧𑀭𑀺𑀪𑁄𑀕𑁂 𑀘 𑀲𑁄 𑀧𑀫𑀸𑀡𑀁 𑀚𑀸𑀦𑁂𑀬𑁆𑀬. 𑀇𑀥𑀸𑀢𑀺 𑀲𑀸𑀲𑀦𑁂, 𑀦𑀺𑀧𑀸𑀢𑀫𑀢𑁆𑀢𑀫𑁂𑀯 𑀯𑀸 𑀏𑀢𑀁. 𑀢𑁄𑀲𑀦𑀢𑁆𑀣𑀦𑁆𑀢𑀺 𑀲𑀦𑁆𑀢𑁄𑀲𑀢𑁆𑀣𑀁, 𑀏𑀢𑀤𑀢𑁆𑀣𑀁 𑀫𑀢𑁆𑀢𑀁 𑀚𑀸𑀦𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄𑀢𑀺 𑀲𑁄 𑀪𑀺𑀓𑁆𑀔𑀼 𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀕𑀼𑀢𑁆𑀢𑁄. 𑀬𑀢𑀘𑀸𑀭𑀻𑀢𑀺 𑀲𑀜𑁆𑀜𑀢𑀯𑀺𑀳𑀸𑀭𑁄, 𑀭𑀓𑁆𑀔𑀺𑀢𑀇𑀭𑀺𑀬𑀸𑀧𑀣𑁄 𑀭𑀓𑁆𑀔𑀺𑀢𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀬𑀢𑀺𑀘𑀸𑀭𑀻’’𑀢𑀺𑀧𑀺 𑀧𑀸𑀞𑁄, 𑀏𑀲𑁄𑀬𑁂𑀯𑀢𑁆𑀣𑁄. 𑀭𑀼𑀲𑀺𑀢𑁄𑀢𑀺 𑀭𑁄𑀲𑀺𑀢𑁄. 𑀖𑀝𑁆𑀝𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀫𑀢𑁆𑀢𑀁 𑀚𑀸𑀦𑁂𑀬𑁆𑀬𑀸𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀧𑀫𑀸𑀡𑀁 𑀚𑀸𑀦𑁂𑀬𑁆𑀬. 𑀧𑀝𑀺𑀕𑁆𑀕𑀳𑀡𑀢𑁄 𑀯𑀸𑀢𑀺 𑀧𑀭𑁂𑀳𑀺 𑀤𑀺𑀬𑁆𑀬𑀫𑀸𑀦𑀕𑁆𑀕𑀳𑀡𑀓𑀸𑀮𑀢𑁄 𑀯𑀸. 𑀧𑀭𑀺𑀪𑁄𑀕𑀢𑁄 𑀯𑀸𑀢𑀺 𑀧𑀭𑀺𑀪𑀼𑀜𑁆𑀚𑀦𑀓𑀸𑀮𑀢𑁄 𑀯𑀸. 𑀣𑁄𑀓𑁂𑀧𑀺 𑀤𑀺𑀬𑁆𑀬𑀫𑀸𑀦𑁂𑀢𑀺 𑀅𑀧𑁆𑀧𑀓𑁂𑀧𑀺 𑀤𑀺𑀬𑁆𑀬𑀫𑀸𑀦𑁂. 𑀓𑀼𑀮𑀸𑀦𑀼𑀤𑀬𑀸𑀬𑀸𑀢𑀺 𑀓𑀼𑀮𑀸𑀦𑀁 𑀅𑀦𑀼𑀤𑀬𑀢𑀸𑀬. 𑀓𑀼𑀮𑀸𑀦𑀼𑀭𑀓𑁆𑀔𑀸𑀬𑀸𑀢𑀺 𑀓𑀼𑀮𑀸𑀦𑀁 𑀅𑀦𑀼𑀭𑀓𑁆𑀔𑀡𑀢𑁆𑀣𑀸𑀬. 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀣𑁄𑀓𑀫𑁆𑀧𑀺 𑀕𑀡𑁆𑀳𑀸𑀢𑀺. 𑀩𑀳𑀼𑀓𑁂𑀧𑀺 𑀤𑀺𑀬𑁆𑀬𑀫𑀸𑀦𑁂𑀢𑀺 𑀅𑀦𑀧𑁆𑀧𑀓𑁂𑀧𑀺 𑀤𑀺𑀬𑁆𑀬𑀫𑀸𑀦𑁂. 𑀓𑀸𑀬𑀧𑀭𑀺𑀳𑀸𑀭𑀺𑀓𑀁 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀏𑀢𑁆𑀣 𑀓𑀸𑀬𑀁 𑀧𑀭𑀺𑀳𑀭𑀢𑀺 𑀧𑁄𑀲𑁂𑀢𑀻𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑀁. 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀦𑁆𑀢𑀺 𑀓𑀼𑀘𑁆𑀙𑀺𑀁 𑀧𑀭𑀺𑀳𑀭𑀢𑀺 𑀧𑁄𑀲𑁂𑀢𑀻𑀢𑀺 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀁. 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸 𑀯𑀝𑁆𑀝𑀦𑁆𑀢𑀺 𑀢𑀻𑀡𑀺 𑀘𑀻𑀯𑀭𑀸𑀦𑀺 𑀧𑀢𑁆𑀢𑁄 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀺 𑀏𑀓𑀸 𑀲𑀽𑀘𑀺 𑀓𑀸𑀬𑀩𑀦𑁆𑀥𑀦𑀁 𑀧𑀭𑀺𑀲𑁆𑀲𑀸𑀯𑀦𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁫; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁪; 𑁨.𑁩𑁪𑁯; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁮);

𑀢𑁂 𑀲𑀩𑁆𑀩𑁂 𑀓𑀸𑀬𑀧𑀭𑀺𑀳𑀸𑀭𑀺𑀓𑀸𑀧𑀺 𑀳𑁄𑀦𑁆𑀢𑀺 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀸𑀧𑀺. 𑀓𑀣𑀁? 𑀢𑀺𑀘𑀻𑀯𑀭𑀁 𑀢𑀸𑀯 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀯𑀺𑀘𑀭𑀡𑀓𑀸𑀮𑁂 𑀓𑀸𑀬𑀁 𑀧𑀭𑀺𑀳𑀭𑀢𑀺 𑀧𑁄𑀲𑁂𑀢𑀻𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑀁 𑀳𑁄𑀢𑀺. 𑀘𑀻𑀯𑀭𑀓𑀡𑁆𑀡𑁂𑀦 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀺𑀯𑀦𑀓𑀸𑀮𑁂 𑀔𑀸𑀤𑀺𑀢𑀩𑁆𑀩𑀨𑀮𑀸𑀨𑀮𑀕𑁆𑀕𑀳𑀡𑀓𑀸𑀮𑁂 𑀘 𑀓𑀼𑀘𑁆𑀙𑀺𑀁 𑀧𑀭𑀺𑀳𑀭𑀢𑀺 𑀧𑁄𑀲𑁂𑀢𑀻𑀢𑀺 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀁 𑀳𑁄𑀢𑀺.

𑀧𑀢𑁆𑀢𑁄𑀧𑀺 𑀢𑁂𑀦 𑀉𑀤𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀦𑁆𑀳𑀸𑀦𑀓𑀸𑀮𑁂 𑀓𑀼𑀝𑀺𑀧𑀭𑀺𑀪𑀡𑁆𑀟𑀓𑀭𑀡𑀓𑀸𑀮𑁂 𑀘 𑀓𑀸𑀬𑀧𑀭𑀺𑀳𑀸𑀭𑀺𑀓𑁄 𑀳𑁄𑀢𑀺. 𑀆𑀳𑀸𑀭𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑀓𑀸𑀮𑁂 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁄. 𑀯𑀸𑀲𑀺𑀧𑀺 𑀢𑀸𑀬 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀓𑀸𑀮𑁂 𑀫𑀜𑁆𑀘𑀧𑀻𑀞𑀸𑀦𑀁 𑀅𑀗𑁆𑀕𑀧𑀸𑀤𑀘𑀻𑀯𑀭𑀓𑀼𑀝𑀺𑀤𑀡𑁆𑀟𑀓𑀲𑀚𑁆𑀚𑀦𑀓𑀸𑀮𑁂 𑀘 𑀓𑀸𑀬𑀧𑀭𑀺𑀳𑀸𑀭𑀺𑀓𑀸 𑀳𑁄𑀢𑀺. 𑀉𑀘𑁆𑀙𑀼𑀘𑁆𑀙𑁂𑀤𑀦𑀦𑀸𑀴𑀺𑀓𑁂𑀭𑀸𑀤𑀺𑀢𑀘𑁆𑀙𑀦𑀓𑀸𑀮𑁂 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀸. 𑀲𑀽𑀘𑀺 𑀘𑀻𑀯𑀭𑀲𑀺𑀩𑁆𑀩𑀦𑀓𑀸𑀮𑁂 𑀓𑀸𑀬𑀧𑀭𑀺𑀳𑀸𑀭𑀺𑀓𑀸 𑀳𑁄𑀢𑀺. 𑀧𑀽𑀯𑀁 𑀯𑀸 𑀨𑀮𑀁 𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀔𑀸𑀤𑀦𑀓𑀸𑀮𑁂 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀸. 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀓𑀸𑀬𑀧𑀭𑀺𑀳𑀸𑀭𑀺𑀓𑀁. 𑀉𑀘𑁆𑀙𑀼𑀆𑀤𑀻𑀦𑀺 𑀩𑀦𑁆𑀥𑀺𑀢𑁆𑀯𑀸 𑀕𑀳𑀡𑀓𑀸𑀮𑁂 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀁. 𑀧𑀭𑀺𑀲𑁆𑀲𑀸𑀯𑀦𑀁 𑀢𑁂𑀦 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀦𑁆𑀳𑀸𑀦𑀓𑀸𑀮𑁂 𑀲𑁂𑀦𑀸𑀲𑀦𑀧𑀭𑀺𑀪𑀡𑁆𑀟𑀓𑀭𑀡𑀓𑀸𑀮𑁂 𑀘 𑀓𑀸𑀬𑀧𑀭𑀺𑀳𑀸𑀭𑀺𑀓𑀁, 𑀧𑀸𑀦𑀻𑀬𑀧𑀸𑀡𑀓𑀧𑀭𑀺𑀲𑁆𑀲𑀸𑀯𑀦𑀓𑀸𑀮𑁂 𑀢𑁂𑀦𑁂𑀯 𑀢𑀺𑀮𑀢𑀡𑁆𑀟𑀼𑀮𑀧𑀼𑀣𑀼𑀓𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀔𑀸𑀤𑀦𑀓𑀸𑀮𑁂 𑀘 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀁.

𑀧𑀝𑀺𑀲𑀗𑁆𑀔𑀸𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑁂𑀦 𑀧𑀣𑁂𑀦 𑀧𑀝𑀺𑀲𑀗𑁆𑀔𑀸𑀬 𑀜𑀢𑁆𑀯𑀸, 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀫𑁂𑀯 𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀘𑀻𑀯𑀭𑀦𑁆𑀢𑀺 𑀅𑀦𑁆𑀢𑀭𑀯𑀸𑀲𑀓𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺. 𑀧𑀝𑀺𑀲𑁂𑀯𑀢𑀻𑀢𑀺 𑀧𑀭𑀺𑀪𑀼𑀜𑁆𑀚𑀢𑀺 𑀦𑀺𑀯𑀸𑀲𑁂𑀢𑀺 𑀯𑀸 𑀧𑀸𑀭𑀼𑀧𑀢𑀺 𑀯𑀸. 𑀬𑀸𑀯𑀤𑁂𑀯𑀸𑀢𑀺 𑀧𑀬𑁄𑀚𑀦𑀸𑀯𑀥𑀺𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑀯𑀘𑀦𑀁. 𑀏𑀢𑁆𑀢𑀓𑀫𑁂𑀯 𑀳𑀺 𑀬𑁄𑀕𑀺𑀦𑁄 𑀘𑀻𑀯𑀭𑀧𑀝𑀺𑀲𑁂𑀯𑀦𑁂 𑀧𑀬𑁄𑀚𑀦𑀁, 𑀬𑀤𑀺𑀤𑀁 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸𑀢𑀺𑀆𑀤𑀺, 𑀦 𑀇𑀢𑁄 𑀪𑀺𑀬𑁆𑀬𑁄. 𑀲𑀻𑀢𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀸 𑀉𑀢𑀼𑀧𑀭𑀺𑀡𑀸𑀫𑀦𑀯𑀲𑁂𑀦 𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀻𑀢𑀲𑁆𑀲.

𑀧𑀝𑀺𑀖𑀸𑀢𑀸𑀬𑀸𑀢𑀺 𑀧𑀝𑀺𑀳𑀦𑀦𑀢𑁆𑀣𑀁. 𑀬𑀣𑀸 𑀲𑀭𑀻𑀭𑁂 𑀆𑀩𑀸𑀥𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁. 𑀲𑀻𑀢𑀩𑁆𑀪𑀸𑀳𑀢𑁂 𑀳𑀺 𑀲𑀭𑀻𑀭𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀬𑁄𑀦𑀺𑀲𑁄 𑀧𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬 𑀘𑀻𑀯𑀭𑀁 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀪𑀕𑀯𑀸 𑀅𑀦𑀼𑀜𑁆𑀜𑀸𑀲𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀉𑀡𑁆𑀳𑀲𑁆𑀲𑀸𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑁆𑀲, 𑀢𑀲𑁆𑀲 𑀯𑀦𑀤𑀸𑀳𑀸𑀤𑀻𑀲𑀼 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀟𑀁𑀲𑀸𑀢𑀺 𑀟𑀁𑀲𑀦𑀫𑀓𑁆𑀔𑀺𑀓𑀸. ‘‘𑀅𑀦𑁆𑀥𑀫𑀓𑁆𑀔𑀺𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀓𑀲𑀸𑀢𑀺 𑀫𑀓𑀲𑀸 𑀏𑀯. 𑀯𑀸𑀢𑀸𑀢𑀺 𑀲𑀭𑀚𑀅𑀭𑀚𑀸𑀤𑀺𑀪𑁂𑀤𑀸. 𑀆𑀢𑀧𑁄𑀢𑀺 𑀲𑀽𑀭𑀺𑀬𑀸𑀢𑀧𑁄. 𑀲𑀭𑀻𑀲𑀧𑀸𑀢𑀺 𑀬𑁂 𑀓𑁂𑀘𑀺 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀻𑀖𑀚𑀸𑀢𑀺𑀓𑀸 𑀲𑀧𑁆𑀧𑀸𑀤𑀬𑁄, 𑀢𑁂𑀲𑀁 𑀤𑀝𑁆𑀞𑀲𑀫𑁆𑀨𑀲𑁆𑀲𑁄 𑀘 𑀨𑀼𑀝𑁆𑀞𑀲𑀫𑁆𑀨𑀲𑁆𑀲𑁄 𑀘𑀸𑀢𑀺 𑀤𑀼𑀯𑀺𑀥𑁄 𑀲𑀫𑁆𑀨𑀲𑁆𑀲𑁄; 𑀲𑁄𑀧𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀦 𑀩𑀸𑀥𑀢𑀺. 𑀢𑀲𑁆𑀫𑀸 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀧𑀝𑀺𑀲𑁂𑀯𑀢𑀺. 𑀬𑀸𑀯𑀤𑁂𑀯𑀸𑀢𑀺 𑀧𑀼𑀦 𑀏𑀢𑀲𑁆𑀲 𑀯𑀘𑀦𑀁 𑀦𑀺𑀬𑀢𑀧𑀬𑁄𑀚𑀦𑀸𑀯𑀥𑀺𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁. 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀦𑁆𑀢𑀺 𑀦𑀺𑀬𑀢𑀧𑀬𑁄𑀚𑀦𑀁, 𑀇𑀢𑀭𑀸𑀦𑀺 𑀓𑀤𑀸𑀘𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀳𑀺𑀭𑀺𑀓𑁄𑀧𑀻𑀦𑀦𑁆𑀢𑀺 𑀢𑀁 𑀢𑀁 𑀲𑀫𑁆𑀩𑀸𑀥𑀝𑁆𑀞𑀸𑀦𑀁. 𑀬𑀲𑁆𑀫𑀺𑀁 𑀬𑀲𑁆𑀫𑀺𑀜𑁆𑀳𑀺 𑀅𑀗𑁆𑀕𑁂 𑀯𑀺𑀯𑀭𑀺𑀬𑀫𑀸𑀦𑁂 𑀳𑀺𑀭𑀻 𑀓𑀼𑀧𑁆𑀧𑀢𑀺 𑀯𑀺𑀦𑀲𑁆𑀲𑀢𑀺, 𑀢𑀁 𑀢𑀁 𑀳𑀺𑀭𑀺𑀁 𑀓𑁄𑀧𑀦𑀢𑁄 𑀳𑀺𑀭𑀺𑀓𑁄𑀧𑀻𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀘 𑀳𑀺𑀭𑀺𑀓𑁄𑀧𑀻𑀦𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀦𑁆𑀢𑀺 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. ‘‘𑀳𑀺𑀭𑀺𑀓𑁄𑀧𑀻𑀦𑀁 𑀧𑀝𑀺𑀘𑁆𑀙𑀸𑀤𑀦𑀢𑁆𑀣’’𑀦𑁆𑀢𑀺𑀧𑀺 𑀧𑀸𑀞𑁄.

𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀆𑀳𑀸𑀭𑀁. 𑀬𑁄 𑀳𑀺 𑀓𑁄𑀘𑀺 𑀆𑀳𑀸𑀭𑁄 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑁄𑀮𑁆𑀬𑁂𑀦 𑀧𑀢𑁆𑀢𑁂 𑀧𑀢𑀺𑀢𑀢𑁆𑀢𑀸 ‘‘𑀧𑀺𑀡𑁆𑀟𑀧𑀸𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀺𑀡𑁆𑀟𑀸𑀦𑀁 𑀯𑀸 𑀧𑀸𑀢𑁄 𑀧𑀺𑀡𑁆𑀟𑀧𑀸𑀢𑁄, 𑀢𑀢𑁆𑀣 𑀢𑀢𑁆𑀣 𑀮𑀤𑁆𑀥𑀸𑀦𑀁 𑀪𑀺𑀓𑁆𑀔𑀸𑀦𑀁 𑀲𑀦𑁆𑀦𑀺𑀧𑀸𑀢𑁄, 𑀲𑀫𑀽𑀳𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀲𑁂𑀦𑀸𑀲𑀦𑀦𑁆𑀢𑀺 𑀲𑀬𑀦𑀜𑁆𑀘 𑀆𑀲𑀦𑀜𑁆𑀘. 𑀬𑀢𑁆𑀣 𑀬𑀢𑁆𑀣 𑀳𑀺 𑀲𑁂𑀢𑀺 𑀯𑀺𑀳𑀸𑀭𑁂 𑀯𑀸 𑀅𑀟𑁆𑀠𑀬𑁄𑀕𑀸𑀤𑀺𑀫𑁆𑀳𑀺 𑀯𑀸, 𑀢𑀁 𑀲𑁂𑀦𑀁. 𑀬𑀢𑁆𑀣 𑀬𑀢𑁆𑀣 𑀆𑀲𑀢𑀺 𑀦𑀺𑀲𑀻𑀤𑀢𑀺, 𑀢𑀁 𑀆𑀲𑀦𑀁, 𑀢𑀁 𑀏𑀓𑀢𑁄 𑀓𑀢𑁆𑀯𑀸 ‘‘𑀲𑁂𑀦𑀸𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀦𑁆𑀢𑀺 𑀧𑀭𑀺𑀲𑀳𑀦𑀝𑁆𑀞𑁂𑀦 𑀉𑀢𑀼𑀬𑁂𑀯 𑀉𑀢𑀼𑀧𑀭𑀺𑀲𑁆𑀲𑀬𑁄. 𑀉𑀢𑀼𑀧𑀭𑀺𑀲𑁆𑀲𑀬𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀜𑁆𑀘 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀜𑁆𑀘. 𑀬𑁄 𑀲𑀭𑀻𑀭𑀸𑀩𑀸𑀥𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀓𑀭𑁄 𑀅𑀲𑀧𑁆𑀧𑀸𑀬𑁄 𑀉𑀢𑀼 𑀲𑁂𑀦𑀸𑀲𑀦𑀧𑀝𑀺𑀲𑁂𑀯𑀦𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁 𑀏𑀓𑀻𑀪𑀸𑀯𑀲𑀼𑀔𑀢𑁆𑀣𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀫𑀜𑁆𑀘 𑀲𑀻𑀢𑀧𑀝𑀺𑀖𑀸𑀢𑀸𑀤𑀺𑀦𑀸𑀯 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀁 𑀯𑀼𑀢𑁆𑀢𑀫𑁂𑀯. 𑀬𑀣𑀸 𑀧𑀦 𑀘𑀻𑀯𑀭𑀧𑀝𑀺𑀲𑁂𑀯𑀦𑁂 ‘‘𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀁 𑀦𑀺𑀬𑀢𑀧𑀬𑁄𑀚𑀦𑀁, 𑀇𑀢𑀭𑀸𑀦𑀺 𑀓𑀤𑀸𑀘𑀺 𑀓𑀤𑀸𑀘𑀺 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀦𑀺𑀬𑀢𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀅𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀉𑀢𑀼 𑀉𑀢𑀼𑀬𑁂𑀯. 𑀧𑀭𑀺𑀲𑁆𑀲𑀬𑁄 𑀧𑀦 𑀤𑀼𑀯𑀺𑀥𑁄 𑀧𑀸𑀓𑀝𑀧𑀭𑀺𑀲𑁆𑀲𑀬𑁄 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁄 𑀘. 𑀢𑀢𑁆𑀣 𑀧𑀸𑀓𑀝𑀧𑀭𑀺𑀲𑁆𑀲𑀬𑁄 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄, 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁄 𑀭𑀸𑀕𑀤𑁄𑀲𑀸𑀤𑀬𑁄. 𑀢𑁂 𑀬𑀢𑁆𑀣 𑀅𑀧𑀭𑀺𑀕𑀼𑀢𑁆𑀢𑀺𑀬𑀸 𑀘 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀘 𑀆𑀩𑀸𑀥𑀁 𑀦 𑀓𑀭𑁄𑀦𑁆𑀢𑀺, 𑀢𑀁 𑀲𑁂𑀦𑀸𑀲𑀦𑀁 𑀏𑀯𑀁 𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀲𑁂𑀯𑀦𑁆𑀢𑁄 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑁂𑀦𑀸𑀲𑀦𑀁 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀧𑀝𑀺𑀲𑁂𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀏𑀢𑁆𑀣 𑀭𑁄𑀕𑀲𑁆𑀲 𑀧𑀝𑀺𑀅𑀬𑀦𑀝𑁆𑀞𑁂𑀦 𑀧𑀘𑁆𑀘𑀬𑁄, 𑀧𑀘𑁆𑀘𑀦𑀻𑀓𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀧𑁆𑀧𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀺𑀲𑀓𑁆𑀓𑀲𑁆𑀲 𑀓𑀫𑁆𑀫𑀁 𑀢𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀪𑁂𑀲𑀚𑁆𑀚𑀁. 𑀕𑀺𑀮𑀸𑀦𑀧𑀘𑁆𑀘𑀬𑁄𑀯 𑀪𑁂𑀲𑀚𑁆𑀚𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁, 𑀬𑀁 𑀓𑀺𑀜𑁆𑀘𑀺 𑀕𑀺𑀮𑀸𑀦𑀲𑁆𑀲 𑀲𑀧𑁆𑀧𑀸𑀬𑀁 𑀪𑀺𑀲𑀓𑁆𑀓𑀓𑀫𑁆𑀫𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀓𑁆𑀔𑀸𑀭𑁄𑀢𑀺 𑀧𑀦 ‘‘𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁬𑁭) 𑀧𑀭𑀺𑀯𑀸𑀭𑁄 𑀯𑀼𑀘𑁆𑀘𑀢𑀺. ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄, 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪) 𑀅𑀮𑀗𑁆𑀓𑀸𑀭𑁄. ‘‘𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯𑁧-𑁧𑁯𑁨) 𑀲𑀫𑁆𑀪𑀸𑀭𑁄. 𑀇𑀥 𑀧𑀦 𑀲𑀫𑁆𑀪𑀸𑀭𑁄𑀧𑀺 𑀧𑀭𑀺𑀯𑀸𑀭𑁄𑀧𑀺 𑀯𑀝𑁆𑀝𑀢𑀺. 𑀢𑀜𑁆𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁 𑀚𑀻𑀯𑀺𑀢𑀲𑁆𑀲 𑀧𑀭𑀺𑀯𑀸𑀭𑁄𑀧𑀺 𑀳𑁄𑀢𑀺, 𑀚𑀻𑀯𑀺𑀢𑀦𑀸𑀲𑀓𑀸𑀩𑀸𑀥𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀁 𑀅𑀤𑀢𑁆𑀯𑀸 𑀭𑀓𑁆𑀔𑀡𑀢𑁄 𑀲𑀫𑁆𑀪𑀸𑀭𑁄𑀧𑀺. 𑀬𑀣𑀸𑀘𑀺𑀭𑀁 𑀧𑀯𑀢𑁆𑀢𑀢𑀺, 𑀏𑀯𑀫𑀲𑁆𑀲 𑀓𑀸𑀭𑀡𑀪𑀸𑀯𑀢𑁄; 𑀢𑀲𑁆𑀫𑀸 ‘‘𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀜𑁆𑀘 𑀢𑀁 𑀧𑀭𑀺𑀓𑁆𑀔𑀸𑀭𑁄 𑀘𑀸𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄, 𑀢𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀕𑀺𑀮𑀸𑀦𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀲𑀧𑁆𑀧𑀸𑀬𑀁 𑀪𑀺𑀲𑀓𑁆𑀓𑀸𑀦𑀼𑀜𑁆𑀜𑀸𑀢𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀚𑀸𑀢𑀸𑀦𑀁 𑀪𑀽𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀦𑁆𑀢𑀺 𑀏𑀢𑁆𑀣 𑀩𑁆𑀬𑀸𑀩𑀸𑀥𑁄𑀢𑀺 𑀥𑀸𑀢𑀼𑀓𑁆𑀔𑁄𑀪𑁄 𑀢𑀁𑀲𑀫𑀼𑀝𑁆𑀞𑀸𑀦𑀸 𑀘 𑀓𑀼𑀝𑁆𑀞𑀕𑀡𑁆𑀟𑀧𑀻𑀴𑀓𑀸𑀤𑀬𑁄, 𑀩𑁆𑀬𑀸𑀩𑀸𑀥𑀢𑁄 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑁂𑀬𑁆𑀬𑀸𑀩𑀸𑀥𑀺𑀓𑀸. 𑀯𑁂𑀤𑀦𑀸𑀦𑀦𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸, 𑀅𑀓𑀼𑀲𑀮𑀯𑀺𑀧𑀸𑀓𑀯𑁂𑀤𑀦𑀸, 𑀢𑀸𑀲𑀁 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀁 𑀯𑁂𑀤𑀦𑀸𑀦𑀁. 𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑀢𑀸𑀬𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀧𑀭𑀫𑀢𑀸𑀬. 𑀬𑀸𑀯 𑀢𑀁 𑀤𑀼𑀓𑁆𑀔𑀁 𑀲𑀩𑁆𑀩𑀁 𑀧𑀳𑀻𑀦𑀁 𑀳𑁄𑀢𑀺, 𑀢𑀸𑀯𑀸𑀢𑀺 𑀅𑀢𑁆𑀣𑁄.

𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺. 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦𑀸𑀢𑀺 𑀣𑀽𑀮𑀲𑀼𑀔𑀼𑀫𑀮𑀽𑀔𑀧𑀡𑀻𑀢𑀣𑀺𑀭𑀚𑀺𑀡𑁆𑀡𑀸𑀦𑀁 𑀬𑁂𑀦 𑀓𑁂𑀦𑀘𑀺. 𑀅𑀣 𑀔𑁄 𑀬𑀣𑀸𑀮𑀤𑁆𑀥𑀸𑀤𑀻𑀦𑀁 𑀇𑀢𑀭𑀻𑀢𑀭𑁂𑀦 𑀬𑁂𑀦 𑀓𑁂𑀦𑀘𑀺 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀲𑁆𑀫𑀺𑀜𑁆𑀳𑀺 𑀢𑀬𑁄 𑀲𑀦𑁆𑀢𑁄𑀲𑀸 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺. 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀡𑁆𑀡𑀯𑀸𑀤𑀻𑀢𑀺 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀦 𑀓𑀣𑁂𑀢𑀺, 𑀏𑀓𑁄 𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺, 𑀏𑀓𑁄 𑀦𑁂𑀯 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀦 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺, 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀘 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑁂𑀲𑀦𑀦𑁆𑀢𑀺 𑀤𑀽𑀢𑁂𑀬𑁆𑀬𑀧𑀳𑀻𑀦𑀕𑀫𑀦𑀸𑀦𑀼𑀬𑁄𑀕𑀧𑁆𑀧𑀪𑁂𑀤𑀁 𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑁂𑀲𑀦𑀁. 𑀅𑀧𑁆𑀧𑀢𑀺𑀭𑀽𑀧𑀦𑁆𑀢𑀺 𑀅𑀬𑀼𑀢𑁆𑀢𑀁. 𑀅𑀮𑀤𑁆𑀥𑀸 𑀘𑀸𑀢𑀺 𑀅𑀮𑀪𑀺𑀢𑁆𑀯𑀸. 𑀬𑀣𑀸 𑀏𑀓𑀘𑁆𑀘𑁄 ‘‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀜𑁆𑀜𑀯𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑁄𑀳𑀜𑁆𑀜𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀲𑁆𑀲𑀢𑀺 𑀧𑀭𑀺𑀢𑀲𑁆𑀲𑀢𑀺, 𑀲𑀦𑁆𑀢𑀼𑀝𑁆𑀞𑁄 𑀪𑀺𑀓𑁆𑀔𑀼 𑀏𑀯𑀁 𑀅𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀮𑀤𑁆𑀥𑀸 𑀘𑀸𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀪𑀺𑀢𑁆𑀯𑀸. 𑀅𑀕𑀥𑀺𑀢𑁄𑀢𑀺 𑀯𑀺𑀕𑀢𑀮𑁄𑀪𑀯𑀦𑁆𑀢𑁄. 𑀅𑀫𑀼𑀘𑁆𑀙𑀺𑀢𑁄𑀢𑀺 𑀅𑀥𑀺𑀫𑀢𑁆𑀢𑀢𑀡𑁆𑀳𑀸𑀬 𑀫𑀼𑀘𑁆𑀙𑀁 𑀅𑀦𑀸𑀧𑀦𑁆𑀦𑁄. 𑀅𑀦𑀚𑁆𑀛𑀸𑀧𑀦𑁆𑀦𑁄𑀢𑀺 𑀢𑀡𑁆𑀳𑀸𑀬 𑀅𑀦𑁄𑀢𑁆𑀣𑀝𑁄 𑀅𑀧𑀭𑀺𑀬𑁄𑀦𑀤𑁆𑀥𑁄. 𑀆𑀤𑀻𑀦𑀯𑀤𑀲𑁆𑀲𑀸𑀯𑀻𑀢𑀺 𑀅𑀦𑁂𑀲𑀦𑀸𑀧𑀢𑁆𑀢𑀺𑀬𑀜𑁆𑀘 𑀕𑀥𑀺𑀢𑀧𑀭𑀺𑀪𑁄𑀕𑁂 𑀘 𑀆𑀤𑀻𑀦𑀯𑀁 𑀧𑀲𑁆𑀲𑀫𑀸𑀦𑁄. 𑀦𑀺𑀲𑁆𑀲𑀭𑀡𑀧𑀜𑁆𑀜𑁄𑀢𑀺 ‘‘𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀫. 𑀦𑀺. 𑁧.𑁨𑁩) 𑀯𑀼𑀢𑁆𑀢𑀁 𑀦𑀺𑀲𑁆𑀲𑀭𑀡𑀁 𑀏𑀯 𑀧𑀚𑀸𑀦𑀦𑁆𑀢𑁄. 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀘𑀻𑀯𑀭𑁂𑀦 𑀲𑀦𑁆𑀢𑀼𑀝𑁆𑀞𑀺𑀬𑀸. 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀻𑀢𑀺 ‘‘𑀅𑀳𑀁 𑀧𑀁𑀲𑀼𑀓𑀽𑀮𑀺𑀓𑁄, 𑀫𑀬𑀸 𑀉𑀧𑀲𑀫𑁆𑀧𑀤𑀫𑀸𑀴𑁂𑀬𑁂𑀯 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀕𑀳𑀺𑀢𑀁, 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀁 𑀦 𑀓𑀭𑁄𑀢𑀺. 𑀦 𑀧𑀭𑀁 𑀯𑀫𑁆𑀪𑁂𑀢𑀻𑀢𑀺 ‘‘𑀇𑀫𑁂 𑀧𑀦𑀜𑁆𑀜𑁂 𑀪𑀺𑀓𑁆𑀔𑀽 𑀦 𑀧𑀁𑀲𑀼𑀓𑀽𑀮𑀺𑀓𑀸’’𑀢𑀺 𑀯𑀸 ‘‘𑀧𑀁𑀲𑀼𑀓𑀽𑀮𑀺𑀓𑀫𑀢𑁆𑀢𑀫𑁆𑀧𑀺 𑀏𑀢𑁂𑀲𑀁 𑀦𑀢𑁆𑀣𑀻’’𑀢𑀺 𑀯𑀸 𑀏𑀯𑀁 𑀧𑀭𑀁 𑀦 𑀯𑀫𑁆𑀪𑁂𑀢𑀺.

𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄𑀢𑀺 𑀬𑁄 𑀢𑀲𑁆𑀫𑀺𑀁 𑀘𑀻𑀯𑀭𑀲𑀦𑁆𑀢𑁄𑀲𑁂 𑀯𑀡𑁆𑀡𑀯𑀸𑀤𑀻, 𑀢𑀸𑀲𑀼 𑀯𑀸 𑀤𑀓𑁆𑀔𑁄 𑀙𑁂𑀓𑁄 𑀩𑁆𑀬𑀢𑁆𑀢𑁄. 𑀅𑀦𑀮𑀲𑁄𑀢𑀺 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀆𑀮𑀲𑀺𑀬𑀯𑀺𑀭𑀳𑀺𑀢𑁄. 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄𑀢𑀺 𑀲𑀫𑁆𑀧𑀚𑀸𑀦𑀧𑀜𑁆𑀜𑀸𑀬 𑀘𑁂𑀯 𑀲𑀢𑀺𑀬𑀸 𑀘 𑀬𑀼𑀢𑁆𑀢𑁄. 𑀧𑁄𑀭𑀸𑀡𑁂𑀢𑀺 𑀦 𑀅𑀥𑀼𑀦𑀼𑀧𑁆𑀧𑀢𑁆𑀢𑀺𑀓𑁂. 𑀅𑀕𑁆𑀕𑀜𑁆𑀜𑁂𑀢𑀺 ‘‘𑀅𑀕𑁆𑀕𑁄’’𑀢𑀺 𑀚𑀸𑀦𑀺𑀢𑀩𑁆𑀩𑁂. 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄𑀢𑀺 𑀅𑀭𑀺𑀬𑀸𑀦𑀁 𑀯𑀁𑀲𑁂 𑀧𑀢𑀺𑀝𑁆𑀞𑀺𑀢𑁄. 𑀅𑀭𑀺𑀬𑀯𑀁𑀲𑁄𑀢𑀺 𑀘 𑀬𑀣𑀸 𑀳𑀺 𑀔𑀢𑁆𑀢𑀺𑀬𑀯𑀁𑀲𑁄 𑀩𑁆𑀭𑀸𑀳𑁆𑀫𑀡𑀯𑀁𑀲𑁄 𑀯𑁂𑀲𑁆𑀲𑀯𑀁𑀲𑁄 𑀲𑀼𑀤𑁆𑀤𑀯𑀁𑀲𑁄 𑀲𑀫𑀡𑀯𑀁𑀲𑁄 𑀓𑀼𑀮𑀯𑀁𑀲𑁄 𑀭𑀸𑀚𑀯𑀁𑀲𑁄, 𑀏𑀯𑀁 𑀅𑀬𑀫𑁆𑀧𑀺 𑀅𑀝𑁆𑀞𑀫𑁄 𑀅𑀭𑀺𑀬𑀯𑀁𑀲𑁄 𑀅𑀭𑀺𑀬𑀢𑀦𑁆𑀢𑀺 𑀅𑀭𑀺𑀬𑀧𑀯𑁂𑀡𑀻 𑀦𑀸𑀫 𑀳𑁄𑀢𑀺. 𑀲𑁄 𑀔𑁄 𑀧𑀦𑀸𑀬𑀁 𑀅𑀭𑀺𑀬𑀯𑀁𑀲𑁄 𑀇𑀫𑁂𑀲𑀁 𑀯𑀁𑀲𑀸𑀦𑀁 𑀫𑀽𑀮𑀕𑀦𑁆𑀥𑀸𑀤𑀻𑀦𑀁 𑀓𑀸𑀴𑀸𑀦𑀼𑀲𑀸𑀭𑀺𑀕𑀦𑁆𑀥𑀸𑀤𑀬𑁄 𑀯𑀺𑀬 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑁂 𑀧𑀦 𑀢𑁂 𑀅𑀭𑀺𑀬𑀸 𑀬𑁂𑀲𑀁 𑀏𑀲𑁄 𑀯𑀁𑀲𑁄𑀢𑀺? 𑀅𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀢𑀣𑀸𑀕𑀢𑀲𑀸𑀯𑀓𑀸 𑀘, 𑀏𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑁄. 𑀇𑀢𑁄 𑀧𑀼𑀩𑁆𑀩𑁂 𑀳𑀺 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀤𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀢𑀡𑁆𑀳𑀗𑁆𑀓𑀭𑁄 𑀫𑁂𑀗𑁆𑀓𑁂𑀭𑁄 𑀲𑀭𑀡𑀗𑁆𑀓𑀭𑁄 𑀤𑀻𑀧𑀗𑁆𑀓𑀭𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀢𑁂 𑀅𑀭𑀺𑀬𑀸, 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑁄. 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀧𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄…𑀧𑁂… 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀓𑀲𑁆𑀲𑀧𑁄 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀕𑁄𑀢𑀫𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑁄. 𑀅𑀧𑀺 𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀭𑀺𑀬𑀸𑀦𑀁 𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑁄, 𑀢𑀲𑁆𑀫𑀺𑀁 𑀅𑀭𑀺𑀬𑀯𑀁𑀲𑁂 𑀧𑀢𑀺𑀝𑁆𑀞𑀺𑀢𑁄.

𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁂𑀦𑀸𑀲𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀬𑀢𑀦𑁂𑀲𑀽𑀢𑀺 𑀘𑀓𑁆𑀔𑀸𑀤𑀻𑀲𑀼 𑀆𑀬𑀢𑀦𑁂𑀲𑀼.

𑀬𑀢𑁄𑀢𑀺 𑀲𑀜𑁆𑀜𑀢𑁄. 𑀬𑀢𑁆𑀢𑁄𑀢𑀺 𑀬𑀢𑁆𑀢𑀯𑀸. 𑀧𑀝𑀺𑀬𑀢𑁆𑀢𑁄𑀢𑀺 𑀅𑀢𑀺𑀯𑀺𑀬 𑀬𑀢𑁆𑀢𑀯𑀸. 𑀕𑀼𑀢𑁆𑀢𑁄𑀢𑀺 𑀭𑀓𑁆𑀔𑀺𑀢𑁄. 𑀕𑁄𑀧𑀺𑀢𑁄𑀢𑀺 𑀫𑀜𑁆𑀚𑀽𑀲𑀸𑀬 𑀯𑀺𑀬 𑀧𑀝𑁆𑀞𑀧𑀺𑀢𑁄. 𑀭𑀓𑁆𑀔𑀺𑀢𑁄𑀢𑀺 𑀧𑀝𑀺𑀲𑀸𑀫𑀺𑀢𑁄. 𑀲𑀁𑀯𑀼𑀢𑁄𑀢𑀺 𑀤𑁆𑀯𑀸𑀭𑀲𑀁𑀯𑀭𑀡𑁂𑀦 𑀧𑀺𑀳𑀺𑀢𑁄. 𑀔𑀼𑀁𑀲𑀺𑀢𑁄𑀢𑀺 𑀕𑀭𑀳𑀺𑀢𑁄. 𑀯𑀫𑁆𑀪𑀺𑀢𑁄𑀢𑀺 𑀅𑀧𑀲𑀸𑀤𑀺𑀢𑁄. 𑀖𑀝𑁆𑀝𑀺𑀢𑁄𑀢𑀺 𑀖𑀝𑁆𑀝𑀦𑀫𑀸𑀧𑀸𑀤𑀺𑀢𑁄. 𑀕𑀭𑀳𑀺𑀢𑁄𑀢𑀺 𑀅𑀯𑀫𑀜𑁆𑀜𑀺𑀢𑁄. 𑀉𑀧𑀯𑀤𑀺𑀢𑁄𑀢𑀺 𑀅𑀓𑁆𑀓𑁄𑀲𑀺𑀢𑁄.

𑀨𑀭𑀼𑀲𑁂𑀦𑀸𑀢𑀺 𑀫𑀫𑁆𑀫𑀘𑁆𑀙𑁂𑀤𑀦𑀯𑀘𑀦𑁂𑀦. 𑀓𑀓𑁆𑀔𑀴𑁂𑀦𑀸𑀢𑀺 𑀤𑀸𑀭𑀼𑀡𑁂𑀦. 𑀦𑀧𑁆𑀧𑀝𑀺𑀯𑀚𑁆𑀚𑀸𑀢𑀺 𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀦 𑀓𑀣𑁂𑀬𑁆𑀬.

𑁨𑁦𑁭. 𑀛𑀸𑀦𑀸𑀦𑀼𑀬𑀼𑀢𑁆𑀢𑁄𑀢𑀺 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀦𑁂𑀦 𑀉𑀧𑁆𑀧𑀦𑁆𑀦𑀲𑁂𑀯𑀦𑁂𑀦 𑀘 𑀛𑀸𑀦𑁂𑀦 𑀅𑀦𑀼𑀬𑀼𑀢𑁆𑀢𑁄. 𑀉𑀧𑁂𑀓𑁆𑀔𑀫𑀸𑀭𑀩𑁆𑀪 𑀲𑀫𑀸𑀳𑀺𑀢𑀢𑁆𑀢𑁄𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑁄. 𑀢𑀓𑁆𑀓𑀸𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘𑀼𑀧𑀘𑁆𑀙𑀺𑀦𑁆𑀤𑁂𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀺𑀢𑀓𑁆𑀓𑀜𑁆𑀘 𑀓𑀸𑀫𑀲𑀜𑁆𑀜𑀸𑀤𑀺𑀓𑀁 𑀯𑀺𑀢𑀓𑁆𑀓𑀲𑁆𑀲 𑀆𑀲𑀬𑀜𑁆𑀘 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀉𑀧𑀘𑁆𑀙𑀺𑀦𑁆𑀤𑁂𑀬𑁆𑀬.

𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬𑀸𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀳𑀻𑀦𑀲𑁆𑀲 𑀯𑀸 𑀧𑀞𑀫𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀦𑀢𑁆𑀣𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀝𑀺𑀮𑀸𑀪𑀢𑁆𑀣𑀁. 𑀉𑀧𑁆𑀧𑀦𑁆𑀦𑀁 𑀯𑀸 𑀧𑀞𑀫𑀁 𑀛𑀸𑀦𑀁 𑀆𑀲𑁂𑀯𑀢𑀻𑀢𑀺𑀆𑀤𑀻𑀲𑀼 𑀏𑀢𑁆𑀣 𑀆𑀤𑀭𑁂𑀦 𑀲𑁂𑀯𑀢𑀺 𑀧𑀕𑀼𑀡𑀁 𑀓𑀭𑁄𑀢𑀺 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀢𑀺.

𑀉𑀧𑁂𑀓𑁆𑀔𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀉𑀧𑁆𑀧𑀦𑁆𑀦𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸. 𑀉𑀧𑁂𑀓𑁆𑀔𑀸𑀢𑀺 𑀲𑀪𑀸𑀯𑀧𑀤𑀁. 𑀉𑀧𑁂𑀓𑁆𑀔𑀦𑀸𑀢𑀺 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀦𑀸𑀓𑀸𑀭𑁄. 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀢𑀺 𑀅𑀥𑀺𑀓𑀸 𑀳𑀼𑀢𑁆𑀯𑀸 𑀇𑀓𑁆𑀔𑀦𑀸. 𑀘𑀺𑀢𑁆𑀢𑀲𑀫𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀲𑀫𑀢𑀸 𑀘𑀺𑀢𑁆𑀢𑀲𑁆𑀲 𑀊𑀦𑀸𑀢𑀺𑀭𑀺𑀢𑁆𑀢𑀢𑀁 𑀯𑀚𑁆𑀚𑁂𑀢𑁆𑀯𑀸 𑀲𑀫𑀪𑀸𑀯𑁄. 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀅𑀧𑁆𑀧𑀕𑀩𑁆𑀪𑀢𑀸, 𑀅𑀣𑀤𑁆𑀥𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀫𑀚𑁆𑀛𑀢𑁆𑀢𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑀦 𑀲𑀢𑁆𑀢𑀲𑁆𑀲 𑀦 𑀧𑁄𑀲𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀫𑀚𑁆𑀛𑀢𑁆𑀢𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀉𑀧𑁂𑀓𑁆𑀔𑀁 𑀆𑀭𑀩𑁆𑀪𑀸𑀢𑀺 𑀘𑀢𑀼𑀢𑁆𑀣𑀲𑁆𑀫𑀺𑀁 𑀛𑀸𑀦𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀁 𑀧𑀝𑀺𑀘𑁆𑀘. 𑀏𑀓𑀕𑁆𑀕𑀘𑀺𑀢𑁆𑀢𑁄𑀢𑀺 𑀏𑀓𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀘𑀺𑀢𑁆𑀢𑁄. 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺 𑀉𑀤𑁆𑀥𑀘𑁆𑀘𑀯𑀺𑀭𑀳𑀺𑀢𑁄 𑀦 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄.

𑀦𑀯 𑀯𑀺𑀢𑀓𑁆𑀓𑀸 𑀯𑀼𑀢𑁆𑀢𑀦𑀬𑀸 𑀏𑀯. 𑀓𑀸𑀫𑀯𑀺𑀢𑀓𑁆𑀓𑀸𑀦𑀁 𑀓𑀸𑀫𑀲𑀜𑁆𑀜𑀸𑀲𑀬𑁄𑀢𑀺 𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀓𑀸𑀫𑀲𑀜𑁆𑀜𑀸 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀆𑀲𑀬𑁄 𑀯𑀲𑀦𑁄𑀓𑀸𑀲𑁄𑀢𑀺 𑀓𑀸𑀫𑀲𑀜𑁆𑀜𑀸𑀲𑀬𑁄. 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁦𑁮. 𑀘𑀼𑀤𑀺𑀢𑁄 𑀯𑀘𑀻𑀪𑀺 𑀲𑀢𑀺𑀫𑀸𑀪𑀺𑀦𑀦𑁆𑀤𑁂𑀢𑀺 𑀉𑀧𑀚𑁆𑀛𑀸𑀬𑀸𑀤𑀻𑀳𑀺 𑀯𑀸𑀘𑀸𑀳𑀺 𑀘𑁄𑀤𑀺𑀢𑁄 𑀲𑀫𑀸𑀦𑁄 𑀲𑀢𑀺𑀫𑀸 𑀳𑀼𑀢𑁆𑀯𑀸 𑀢𑀁 𑀘𑁄𑀤𑀦𑀁 𑀅𑀪𑀺𑀦𑀦𑁆𑀤𑁂𑀬𑁆𑀬. 𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀦𑁆𑀢𑀺 𑀜𑀸𑀡𑀲𑀫𑀼𑀝𑁆𑀞𑀺𑀢𑀁 𑀯𑀸𑀘𑀁 𑀧𑀫𑀼𑀜𑁆𑀘𑁂𑀬𑁆𑀬. 𑀦𑀸𑀢𑀺𑀯𑁂𑀮𑀦𑁆𑀢𑀺 𑀅𑀢𑀺𑀯𑁂𑀮𑀁 𑀧𑀦 𑀯𑀸𑀘𑀁 𑀓𑀸𑀮𑀯𑁂𑀮𑀜𑁆𑀘 𑀲𑀻𑀮𑀯𑁂𑀮𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑀁 𑀦𑀧𑁆𑀧𑀫𑀼𑀜𑁆𑀘𑁂𑀬𑁆𑀬. 𑀚𑀦𑀯𑀸𑀤𑀥𑀫𑁆𑀫𑀸𑀬𑀸𑀢𑀺 𑀚𑀦𑀧𑀭𑀺𑀯𑀸𑀤𑀓𑀣𑀸𑀬. 𑀦 𑀘𑁂𑀢𑀬𑁂𑀬𑁆𑀬𑀸𑀢𑀺 𑀘𑁂𑀢𑀦𑀁 𑀦 𑀉𑀧𑁆𑀧𑀸𑀤𑁂𑀬𑁆𑀬.

𑀇𑀤𑀁 𑀢𑁂 𑀅𑀧𑁆𑀧𑀢𑁆𑀢𑀦𑁆𑀢𑀺 𑀇𑀤𑀁 𑀢𑀯 𑀦 𑀧𑀢𑁆𑀢𑀁. 𑀅𑀲𑀸𑀭𑀼𑀧𑁆𑀧𑀦𑁆𑀢𑀺 𑀢𑀯 𑀧𑀬𑁄𑀕𑀁 𑀅𑀲𑀸𑀭𑀼𑀧𑁆𑀧𑀁. 𑀅𑀲𑀻𑀮𑀝𑁆𑀞𑀦𑁆𑀢𑀺 𑀢𑀯 𑀧𑀬𑁄𑀕𑀁 𑀦 𑀲𑀻𑀮𑁂 𑀧𑀢𑀺𑀝𑁆𑀞𑀦𑁆𑀢𑀺 𑀅𑀲𑀻𑀮𑀝𑁆𑀞𑀁, 𑀲𑀻𑀮𑁂 𑀞𑀺𑀢𑀲𑁆𑀲 𑀧𑀬𑁄𑀕𑀁 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀘𑀺 ‘‘𑀅𑀲𑀺𑀮𑀺𑀝𑁆𑀞’’𑀦𑁆𑀢𑀺 𑀧𑀞𑀦𑁆𑀢𑀺, 𑀅𑀫𑀝𑁆𑀞𑀯𑀘𑀦𑀦𑁆𑀢𑀺 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺.

𑀦𑀺𑀥𑀻𑀦𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸𑀦𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀧𑀽𑀭𑀸𑀦𑀁 𑀦𑀺𑀥𑀺𑀓𑀼𑀫𑁆𑀪𑀻𑀦𑀁. 𑀧𑀯𑀢𑁆𑀢𑀸𑀭𑀦𑁆𑀢𑀺 𑀓𑀺𑀘𑁆𑀙𑀚𑀻𑀯𑀺𑀓𑁂 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁂 𑀅𑀦𑀼𑀓𑀫𑁆𑀧𑀁 𑀓𑀢𑁆𑀯𑀸 ‘‘𑀏𑀳𑀺 𑀲𑀼𑀔𑁂𑀦 𑀢𑁂 𑀚𑀻𑀯𑀦𑀼𑀧𑀸𑀬𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀥𑀺𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀲𑀼𑀔𑀁 𑀚𑀻𑀯𑀸’’𑀢𑀺 𑀆𑀘𑀺𑀓𑁆𑀔𑀺𑀢𑀸𑀭𑀁 𑀯𑀺𑀬. 𑀯𑀚𑁆𑀚𑀤𑀲𑁆𑀲𑀺𑀦𑀦𑁆𑀢𑀺 𑀤𑁆𑀯𑁂 𑀯𑀚𑁆𑀚𑀤𑀲𑁆𑀲𑀺𑀦𑁄 ‘‘𑀇𑀫𑀺𑀦𑀸 𑀦𑀁 𑀅𑀲𑀸𑀭𑀼𑀧𑁆𑀧𑁂𑀦 𑀯𑀸 𑀔𑀮𑀺𑀢𑁂𑀦 𑀯𑀸 𑀲𑀗𑁆𑀖𑀫𑀚𑁆𑀛𑁂 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀦𑁆𑀥𑀕𑀯𑁂𑀲𑀓𑁄 𑀘 𑀅𑀜𑁆𑀜𑀸𑀢𑀁 𑀜𑀸𑀧𑀦𑀢𑁆𑀣𑀸𑀬 𑀜𑀸𑀢𑀁 𑀅𑀦𑀼𑀕𑁆𑀕𑀡𑁆𑀳𑀢𑁆𑀣𑀸𑀬 𑀲𑀻𑀮𑀸𑀤𑀺𑀦𑀸 𑀘𑀲𑁆𑀲 𑀯𑀼𑀤𑁆𑀥𑀺𑀓𑀸𑀫𑀢𑀸𑀬 𑀢𑀁 𑀢𑀁 𑀯𑀚𑁆𑀚𑀁 𑀑𑀮𑁄𑀓𑀦𑁂𑀦 𑀉𑀮𑁆𑀮𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁄 𑀘. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀳𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀧𑁄𑀝𑁆𑀞𑁂𑀢𑁆𑀯𑀸𑀧𑀺 𑀦𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁂 𑀓𑁄𑀧𑀁 𑀦 𑀓𑀭𑁄𑀢𑀺, 𑀧𑀫𑀼𑀤𑀺𑀢𑁄𑀯 𑀳𑁄𑀢𑀺, 𑀏𑀯𑀫𑁂𑀯 𑀏𑀯𑀭𑀽𑀧𑁂 𑀧𑀼𑀕𑁆𑀕𑀮𑁂 𑀅𑀲𑀸𑀭𑀼𑀧𑁆𑀧𑀁 𑀯𑀸 𑀔𑀮𑀺𑀢𑀁 𑀯𑀸 𑀤𑀺𑀲𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑁂 𑀓𑁄𑀧𑁄 𑀦 𑀓𑀸𑀢𑀩𑁆𑀩𑁄, 𑀢𑀼𑀝𑁆𑀞𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. ‘‘𑀪𑀦𑁆𑀢𑁂 𑀫𑀳𑀦𑁆𑀢𑀁 𑀯𑁄 𑀓𑀢𑀁 𑀓𑀫𑁆𑀫𑀁, 𑀫𑀬𑁆𑀳𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀑𑀯𑀤𑀦𑁆𑀢𑁂𑀳𑀺 𑀧𑀼𑀦𑀧𑀺 𑀫𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀧𑀯𑀸𑀭𑁂𑀢𑀩𑁆𑀩𑀫𑁂𑀯. 𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀦𑁆𑀢𑀺 𑀏𑀓𑀘𑁆𑀘𑁄 𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀅𑀲𑀸𑀭𑀼𑀧𑁆𑀧𑀁 𑀯𑀸 𑀔𑀮𑀺𑀢𑀁 𑀯𑀸 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑁂 𑀫𑀼𑀔𑁄𑀤𑀓𑀤𑀸𑀦𑀸𑀤𑀻𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀢𑀺, 𑀲𑀘𑁂 𑀦𑀁 𑀯𑀓𑁆𑀔𑀸𑀫𑀺, 𑀦 𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀺, 𑀏𑀯𑀁 𑀫𑀫 𑀧𑀭𑀺𑀳𑀸𑀦𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀦 𑀦𑀺𑀕𑁆𑀕𑀬𑁆𑀳𑀯𑀸𑀤𑀻 𑀦𑀸𑀫 𑀳𑁄𑀢𑀺, 𑀲𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀘𑀯𑀭𑀁 𑀆𑀓𑀺𑀭𑀢𑀺. 𑀬𑁄 𑀧𑀦 𑀢𑀣𑀸𑀭𑀽𑀧𑀁 𑀯𑀚𑁆𑀚𑀁 𑀤𑀺𑀲𑁆𑀯𑀸 𑀯𑀚𑁆𑀚𑀸𑀦𑀼𑀭𑀽𑀧𑀁 𑀢𑀚𑁆𑀚𑁂𑀢𑁆𑀯𑀸 𑀧𑀡𑀸𑀫𑁂𑀦𑁆𑀢𑁄 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀳𑀸𑀭𑀸 𑀦𑀻𑀳𑀭𑀦𑁆𑀢𑁄 𑀲𑀺𑀓𑁆𑀔𑀸𑀧𑁂𑀢𑀺, 𑀅𑀬𑀁 𑀦𑀺𑀕𑁆𑀕𑀬𑁆𑀳𑀯𑀸𑀤𑀻 𑀦𑀸𑀫 𑀲𑁂𑀬𑁆𑀬𑀣𑀸𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦𑀺𑀕𑁆𑀕𑀬𑁆𑀳 𑀦𑀺𑀕𑁆𑀕𑀬𑁆𑀳𑀸𑀳𑀁, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀧𑀯𑀬𑁆𑀳 𑀧𑀯𑀬𑁆𑀳𑀸𑀳𑀁, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀬𑁄 𑀲𑀸𑀭𑁄 𑀲𑁄 𑀞𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁩.𑁧𑁯𑁬). 𑀫𑁂𑀥𑀸𑀯𑀺𑀦𑁆𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀧𑀡𑁆𑀟𑀺𑀢𑀁 𑀪𑀚𑁂𑀬𑁆𑀬 𑀧𑀬𑀺𑀭𑀼𑀧𑀸𑀲𑁂𑀬𑁆𑀬. 𑀢𑀸𑀤𑀺𑀲𑀜𑁆𑀳𑀺 𑀆𑀘𑀭𑀺𑀬𑀁 𑀪𑀚𑀫𑀸𑀦𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀲𑁂𑀬𑁆𑀬𑁄𑀯 𑀳𑁄𑀢𑀺, 𑀦 𑀧𑀸𑀧𑀺𑀬𑁄, 𑀯𑀼𑀟𑁆𑀠𑀺𑀬𑁂𑀯 𑀳𑁄𑀢𑀺, 𑀦𑁄 𑀧𑀭𑀺𑀳𑀸𑀦𑀻𑀢𑀺.

𑀑𑀯𑀤𑁂𑀬𑁆𑀬𑀸𑀢𑀺 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑀤𑀦𑁆𑀢𑁄 𑀑𑀯𑀤𑀢𑀺 𑀦𑀸𑀫, 𑀅𑀦𑀼𑀧𑁆𑀧𑀦𑁆𑀦𑁂 ‘‘𑀅𑀬𑀲𑁄𑀧𑀺 𑀢𑁂 𑀲𑀺𑀬𑀸’’𑀢𑀺𑀆𑀤𑀺𑀯𑀲𑁂𑀦 𑀅𑀦𑀸𑀕𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑁄𑀧𑀺 𑀑𑀯𑀤𑀢𑀺 𑀦𑀸𑀫, 𑀧𑀭𑀫𑁆𑀫𑀼𑀔𑀸 𑀤𑀽𑀢𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀲𑀓𑀺𑀁 𑀯𑀤𑀦𑁆𑀢𑁄𑀧𑀺 𑀑𑀯𑀤𑀢𑀺 𑀦𑀸𑀫, 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀑𑀯𑀤𑀦𑁆𑀢𑁄 𑀏𑀯 𑀯𑀸 𑀅𑀦𑀼𑀲𑀸𑀲𑀢𑀺 𑀦𑀸𑀫𑀸𑀢𑀺 𑀏𑀯𑀁 𑀑𑀯𑀤𑁂𑀬𑁆𑀬 𑀅𑀦𑀼𑀲𑀸𑀲𑁂𑀬𑁆𑀬. 𑀅𑀲𑀩𑁆𑀪𑀸𑀢𑀺 𑀅𑀓𑀼𑀲𑀮𑀥𑀫𑁆𑀫𑀸 𑀦𑀺𑀯𑀸𑀭𑁂𑀬𑁆𑀬, 𑀓𑀼𑀲𑀮𑀥𑀫𑁆𑀫𑁂 𑀧𑀢𑀺𑀝𑁆𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑀸𑀤𑀻𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺. 𑀬𑁂 𑀧𑀦 𑀅𑀤𑀺𑀝𑁆𑀞𑀥𑀫𑁆𑀫𑀸 𑀅𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀸 𑀆𑀫𑀺𑀲𑀘𑀓𑁆𑀔𑀼𑀓𑀸 𑀚𑀻𑀯𑀺𑀓𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀢𑁂𑀲𑀁 𑀅𑀲𑀢𑀁 𑀲𑁄 𑀑𑀯𑀸𑀤𑀓𑁄 𑀅𑀦𑀼𑀲𑀸𑀲𑀓𑁄 ‘‘𑀦 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄, 𑀦 𑀆𑀘𑀭𑀺𑀬𑁄, 𑀓𑀲𑁆𑀫𑀸 𑀅𑀫𑁆𑀳𑀸𑀓𑀁 𑀑𑀯𑀤𑀲𑀻’’𑀢𑀺 𑀏𑀯𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀚𑁆𑀛𑀦𑁆𑀢𑀸𑀦𑀁 𑀅𑀧𑁆𑀧𑀺𑀬𑁄 𑀳𑁄𑀢𑀻𑀢𑀺.

𑀏𑀓𑀓𑀫𑁆𑀫𑀦𑁆𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀺𑀓𑀁 𑀏𑀓𑀓𑀫𑁆𑀫𑀁. 𑀏𑀓𑀼𑀤𑁆𑀤𑁂𑀲𑁄𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑀸𑀤𑀺𑀓𑁄 𑀏𑀓𑀼𑀤𑁆𑀤𑁂𑀲𑁄. 𑀲𑀫𑀲𑀺𑀓𑁆𑀔𑀢𑀸𑀢𑀺 𑀲𑀫𑀸𑀦𑀲𑀺𑀓𑁆𑀔𑀢𑀸. 𑀆𑀳𑀢𑀘𑀺𑀢𑁆𑀢𑀢𑀦𑁆𑀢𑀺 𑀓𑁄𑀥𑁂𑀦 𑀧𑀳𑀢𑀘𑀺𑀢𑁆𑀢𑀪𑀸𑀯𑀁. 𑀔𑀺𑀮𑀚𑀸𑀢𑀢𑀦𑁆𑀢𑀺 𑀣𑀤𑁆𑀥𑀪𑀸𑀯𑀁. 𑀧𑀜𑁆𑀘𑀧𑀺 𑀘𑁂𑀢𑁄𑀔𑀺𑀮𑁂𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀺𑀓𑁆𑀔𑀸𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀧𑀜𑁆𑀘𑀲𑀼𑀧𑀺 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁂.

𑀜𑀸𑀡𑀲𑀫𑀼𑀝𑁆𑀞𑀺𑀢𑀁 𑀯𑀸𑀘𑀦𑁆𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀉𑀧𑁆𑀧𑀸𑀤𑀺𑀢𑀁 𑀯𑀸𑀓𑁆𑀬𑀁. 𑀫𑀼𑀜𑁆𑀘𑁂𑀬𑁆𑀬𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀬𑁆𑀬. 𑀅𑀢𑁆𑀣𑀽𑀧𑀲𑀁𑀳𑀺𑀢𑀦𑁆𑀢𑀺 𑀅𑀢𑁆𑀣𑀲𑀳𑀺𑀢𑀁 𑀓𑀸𑀭𑀡𑀲𑀳𑀺𑀢𑀁. 𑀥𑀫𑁆𑀫𑀽𑀧𑀲𑀁𑀳𑀺𑀢𑀦𑁆𑀢𑀺 𑀥𑀫𑁆𑀫𑁂𑀦 𑀬𑀼𑀢𑁆𑀢𑀁. 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀁 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬𑀸𑀢𑀺 𑀓𑀸𑀮𑀸𑀢𑀻𑀢𑀁 𑀯𑀸𑀘𑀁 𑀦 𑀓𑀣𑁂𑀬𑁆𑀬 𑀢𑀲𑁆𑀲 𑀓𑀸𑀮𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀯𑁂𑀮𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀫𑀭𑀺𑀬𑀸𑀤𑀸𑀢𑀻𑀢𑀁 𑀯𑀘𑀦𑀁 𑀦 𑀪𑀡𑁂𑀬𑁆𑀬 𑀯𑀘𑀦𑀫𑀭𑀺𑀬𑀸𑀤𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀉𑀪𑀬𑀯𑀲𑁂𑀦 𑀓𑀸𑀮𑀯𑁂𑀮𑀸.

𑀬𑁄 𑀯𑁂 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀯𑀘𑀦𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂. 𑀅𑀢𑀺𑀯𑁂𑀮𑀦𑁆𑀢𑀺 𑀯𑁂𑀮𑀸𑀢𑀺𑀓𑁆𑀓𑀦𑁆𑀢𑀁 𑀓𑀢𑁆𑀯𑀸 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀁 𑀪𑀸𑀲𑀢𑀺. 𑀦𑀺𑀳𑀢𑁄 𑀲𑁂𑀢𑀻𑀢𑀺 𑀦𑀺𑀕𑁆𑀖𑀸𑀢𑀺𑀢𑁄 𑀲𑀬𑀢𑀺. 𑀓𑁄𑀓𑀺𑀮𑀸𑀬𑁂𑀯 𑀅𑀢𑁆𑀭𑀚𑁄𑀢𑀺 𑀓𑀸𑀓𑀺𑀬𑀸 𑀧𑀝𑀺𑀚𑀕𑁆𑀕𑀺𑀢𑁄 𑀓𑁄𑀓𑀺𑀮𑀸𑀬 𑀅𑀩𑁆𑀪𑀦𑁆𑀢𑀭𑁂 𑀚𑀸𑀢𑁄 𑀓𑁄𑀓𑀺𑀮𑀧𑁄𑀢𑀓𑁄 𑀯𑀺𑀬.

𑁨𑁦𑁯. 𑀅𑀣𑀸𑀧𑀭𑀦𑁆𑀢𑀺 𑀅𑀣 𑀇𑀤𑀸𑀦𑀺 𑀇𑀢𑁄 𑀧𑀭𑀫𑁆𑀧𑀺. 𑀧𑀜𑁆𑀘 𑀭𑀚𑀸𑀦𑀻𑀢𑀺 𑀭𑀽𑀧𑀭𑀸𑀕𑀸𑀤𑀻𑀦𑀺 𑀧𑀜𑁆𑀘 𑀭𑀚𑀸𑀦𑀺. 𑀬𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀢𑀺 𑀬𑁂𑀲𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑀼𑀢𑁆𑀯𑀸𑀯 𑀯𑀺𑀦𑀬𑀦𑀢𑁆𑀣𑀁 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑁂𑀬𑁆𑀬. 𑀏𑀯𑀁 𑀲𑀺𑀓𑁆𑀔𑀦𑁆𑀢𑁄 𑀳𑀺 𑀭𑀽𑀧𑁂𑀲𑀼…𑀧𑁂… 𑀨𑀲𑁆𑀲𑁂𑀲𑀼 𑀲𑀳𑁂𑀣 𑀭𑀸𑀕𑀁, 𑀦 𑀅𑀜𑁆𑀜𑁂𑀢𑀺.