𑁬. 𑀚𑀭𑀸𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁯. 𑀙𑀝𑁆𑀞𑁂 𑀚𑀭𑀸𑀲𑀼𑀢𑁆𑀢𑁂 𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀦𑁆𑀢𑀺 𑀇𑀤𑀁 𑀯𑀢 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀁 𑀅𑀧𑁆𑀧𑀓𑀁 𑀧𑀭𑀺𑀢𑁆𑀢𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀲𑀭𑀲𑀧𑀭𑀺𑀢𑁆𑀢𑀢𑀸𑀬𑀸𑀢𑀺 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑁂𑀧𑀺 𑀯𑀼𑀢𑁆𑀢𑀦𑀬𑀫𑁂𑀢𑀁. 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀻𑀢𑀺 𑀯𑀲𑁆𑀲𑀲𑀢𑀸 𑀑𑀭𑀁 𑀓𑀮𑀮𑀸𑀤𑀺𑀓𑀸𑀮𑁂𑀧𑀺 𑀫𑀺𑀬𑁆𑀬𑀢𑀺. 𑀅𑀢𑀺𑀘𑁆𑀘𑀸𑀢𑀺 𑀯𑀲𑁆𑀲𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀻𑀢𑀺 𑀚𑀭𑀸𑀬 𑀫𑀺𑀬𑁆𑀬𑀢𑀺. 𑀇𑀢𑁄 𑀧𑀭𑀁 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀅𑀧𑁆𑀧𑀦𑁆𑀢𑀺 𑀫𑀦𑁆𑀤𑀁. 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄𑀢𑀺 𑀧𑀭𑀮𑁄𑀓𑁄 𑀕𑀦𑁆𑀢𑀩𑁆𑀩𑁄. 𑀓𑀮𑀮𑀓𑀸𑀮𑁂𑀧𑀻𑀢𑀺 𑀏𑀢𑁆𑀣 𑀓𑀮𑀮𑀓𑀸𑀮𑀁 𑀦𑀸𑀫 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀻𑀳𑀺 𑀚𑀸𑀢𑀺𑀉𑀡𑁆𑀡𑀁𑀲𑀽𑀳𑀺 𑀓𑀢𑀲𑀼𑀢𑁆𑀢𑀕𑁆𑀕𑁂 𑀞𑀺𑀢𑀢𑁂𑀮𑀩𑀺𑀦𑁆𑀤𑀼𑀧𑁆𑀧𑀫𑀸𑀡𑀁 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀓𑀮𑀮𑀁 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀢𑀺𑀮𑀢𑁂𑀮𑀲𑁆𑀲 𑀬𑀣𑀸 𑀩𑀺𑀦𑁆𑀤𑀼, 𑀲𑀧𑁆𑀧𑀺𑀫𑀡𑁆𑀟𑁄 𑀅𑀦𑀸𑀯𑀺𑀮𑁄;

𑀏𑀯𑀁 𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀁, 𑀓𑀮𑀮𑀁 𑀲𑀫𑁆𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁫; 𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸);

𑀢𑀲𑁆𑀫𑀺𑀁 𑀓𑀮𑀮𑀓𑀸𑀮𑁂𑀧𑀺. 𑀘𑀯𑀢𑀻𑀢𑀺 𑀚𑀻𑀯𑀺𑀢𑀁 𑀕𑀴𑀢𑀺. 𑀫𑀭𑀢𑀻𑀢𑀺 𑀚𑀻𑀯𑀺𑀢𑀯𑀺𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀅𑀤𑀲𑁆𑀲𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀧𑁆𑀧𑀮𑀼𑀚𑁆𑀚𑀢𑀻𑀢𑀺 𑀙𑀺𑀚𑁆𑀚𑀢𑀺. ‘‘𑀅𑀡𑁆𑀟𑀚𑀬𑁄𑀦𑀺𑀬𑀸 𑀘𑀯𑀢𑀺. 𑀚𑀮𑀸𑀩𑀼𑀚𑀬𑁄𑀦𑀺𑀬𑀸 𑀫𑀭𑀢𑀺. 𑀲𑀁𑀲𑁂𑀤𑀚𑀬𑁄𑀦𑀺𑀬𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀸 𑀯𑀺𑀧𑁆𑀧𑀮𑀼𑀚𑁆𑀚𑀢𑀻’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺. 𑀅𑀩𑁆𑀩𑀼𑀤𑀓𑀸𑀮𑁂𑀧𑀻𑀢𑀺 𑀅𑀩𑁆𑀩𑀼𑀤𑀁 𑀦𑀸𑀫 𑀓𑀮𑀮𑀢𑁄 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀫𑀁𑀲𑀥𑁄𑀯𑀦𑀉𑀤𑀓𑀯𑀡𑁆𑀡𑀁 𑀳𑁄𑀢𑀺, 𑀓𑀮𑀮𑀦𑁆𑀢𑀺 𑀦𑀸𑀫𑀁 𑀅𑀦𑁆𑀢𑀭𑀥𑀸𑀬𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀢𑁆𑀢𑀸𑀳𑀁 𑀓𑀮𑀮𑀁 𑀳𑁄𑀢𑀺, 𑀧𑀭𑀺𑀧𑀓𑁆𑀓𑀁 𑀲𑀫𑀽𑀳𑀢𑀁;

𑀯𑀺𑀯𑀝𑁆𑀝𑀫𑀸𑀦𑀁 𑀢𑀩𑁆𑀪𑀸𑀯𑀁, 𑀅𑀩𑁆𑀩𑀼𑀤𑀁 𑀦𑀸𑀫 𑀚𑀸𑀬𑀢𑀻’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁫);

𑀢𑀲𑁆𑀫𑀺𑀁 𑀅𑀩𑁆𑀩𑀼𑀤𑀓𑀸𑀮𑁂𑀧𑀺. 𑀧𑁂𑀲𑀺𑀓𑀸𑀮𑁂𑀧𑀻𑀢𑀺 𑀢𑀲𑁆𑀫𑀸𑀧𑀺 𑀅𑀩𑁆𑀩𑀼𑀤𑀸 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀯𑀺𑀮𑀻𑀦𑀢𑀺𑀧𑀼𑀲𑀤𑀺𑀲𑀸 𑀧𑁂𑀲𑀺 𑀦𑀸𑀫 𑀲𑀜𑁆𑀚𑀸𑀬𑀢𑀺. 𑀲𑀸 𑀫𑀭𑀺𑀘𑀨𑀸𑀡𑀺𑀢𑁂𑀦 𑀤𑀻𑀧𑁂𑀢𑀩𑁆𑀩𑀸. 𑀕𑀸𑀫𑀤𑀸𑀭𑀺𑀓𑀸 𑀳𑀺 𑀲𑀼𑀧𑀓𑁆𑀓𑀸𑀦𑀺 𑀫𑀭𑀺𑀘𑀸𑀦𑀺 𑀕𑀳𑁂𑀢𑁆𑀯𑀸 𑀲𑀸𑀝𑀓𑀦𑁆𑀢𑁂 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀫𑀡𑁆𑀟𑀁 𑀆𑀤𑀸𑀬 𑀓𑀧𑀸𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀢𑀧𑁂 𑀞𑀧𑁂𑀦𑁆𑀢𑀺, 𑀢𑀁 𑀲𑀼𑀓𑁆𑀔𑀫𑀸𑀦𑀁 𑀲𑀩𑁆𑀩𑀪𑀸𑀕𑁂𑀳𑀺 𑀫𑀼𑀘𑁆𑀘𑀢𑀺. 𑀏𑀯𑀭𑀽𑀧𑀸 𑀧𑁂𑀲𑀺 𑀳𑁄𑀢𑀺, 𑀅𑀩𑁆𑀩𑀼𑀤𑀦𑁆𑀢𑀺 𑀦𑀸𑀫𑀁 𑀅𑀦𑁆𑀢𑀭𑀥𑀸𑀬𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀢𑁆𑀢𑀸𑀳𑀁 𑀅𑀩𑁆𑀩𑀼𑀤𑀁 𑀳𑁄𑀢𑀺, 𑀧𑀭𑀺𑀧𑀓𑁆𑀓𑀁 𑀲𑀫𑀽𑀳𑀢𑀁;

𑀯𑀺𑀯𑀝𑁆𑀝𑀫𑀸𑀦𑀁 𑀢𑀩𑁆𑀪𑀸𑀯𑀁, 𑀧𑁂𑀲𑀺 𑀦𑀸𑀫 𑀧𑀚𑀸𑀬𑀢𑀻’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁫);

𑀢𑀲𑁆𑀫𑀺𑀁 𑀧𑁂𑀲𑀺𑀓𑀸𑀮𑁂𑀧𑀺. 𑀖𑀦𑀓𑀸𑀮𑁂𑀧𑀻𑀢𑀺 𑀢𑀢𑁄𑀧𑀺 𑀧𑁂𑀲𑀺𑀢𑁄 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀓𑀼𑀓𑁆𑀓𑀼𑀝𑀡𑁆𑀟𑀲𑀡𑁆𑀞𑀸𑀦𑁄 𑀖𑀦𑁄 𑀦𑀸𑀫 𑀫𑀁𑀲𑀧𑀺𑀡𑁆𑀟𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀧𑁂𑀲𑀻𑀢𑀺 𑀦𑀸𑀫𑀁 𑀅𑀦𑁆𑀢𑀭𑀥𑀸𑀬𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀢𑁆𑀢𑀸𑀳𑀁 𑀧𑁂𑀲𑀺 𑀪𑀯𑀢𑀺, 𑀧𑀭𑀺𑀧𑀓𑁆𑀓𑀁 𑀲𑀫𑀽𑀳𑀢𑀁;

𑀯𑀺𑀯𑀝𑁆𑀝𑀫𑀸𑀦𑀁 𑀢𑀩𑁆𑀪𑀸𑀯𑀁, 𑀖𑀦𑁄𑀢𑀺 𑀦𑀸𑀫 𑀚𑀸𑀬𑀢𑀺.

‘‘𑀬𑀣𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀁, 𑀲𑀫𑀦𑁆𑀢𑀸 𑀧𑀭𑀺𑀫𑀡𑁆𑀟𑀮𑀁;

𑀏𑀯𑀁 𑀖𑀦𑀲𑁆𑀲 𑀲𑀡𑁆𑀞𑀸𑀦𑀁, 𑀦𑀺𑀩𑁆𑀩𑀢𑁆𑀢𑀁 𑀓𑀫𑁆𑀫𑀧𑀘𑁆𑀘𑀬𑀸’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁫);

𑀢𑀲𑁆𑀫𑀺𑀁 𑀖𑀦𑀓𑀸𑀮𑁂𑀧𑀺. 𑀧𑀲𑀸𑀔𑀓𑀸𑀮𑁂𑀧𑀻𑀢𑀺 𑀧𑀜𑁆𑀘𑀫𑁂 𑀲𑀢𑁆𑀢𑀸𑀳𑁂 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀳𑀢𑁆𑀣𑀧𑀸𑀤𑀸𑀦𑀁 𑀲𑀻𑀲𑀲𑁆𑀲 𑀘𑀢𑁆𑀣𑀸𑀬 𑀧𑀜𑁆𑀘 𑀧𑀻𑀴𑀓𑀸 𑀚𑀸𑀬𑀦𑁆𑀢𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀘𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑁂 𑀧𑀜𑁆𑀘 𑀧𑀻𑀴𑀓𑀸 𑀲𑀡𑁆𑀞𑀳𑀦𑁆𑀢𑀺 𑀓𑀫𑁆𑀫𑀢𑁄’’𑀢𑀺. 𑀢𑀲𑁆𑀫𑀺𑀁 𑀧𑀲𑀸𑀔𑀓𑀸𑀮𑁂𑀧𑀺. 𑀢𑀢𑁄 𑀧𑀭𑀁 𑀙𑀝𑁆𑀞𑀲𑀢𑁆𑀢𑀫𑀸𑀤𑀻𑀦𑀺 𑀲𑀢𑁆𑀢𑀸𑀳𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀤𑁂𑀲𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀲𑀢𑁆𑀢𑀸𑀳𑁂 𑀧𑀭𑀺𑀡𑀢𑀓𑀸𑀮𑁂 𑀓𑁂𑀲𑀮𑁄𑀫𑀦𑀔𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘. 𑀢𑀲𑁆𑀲 𑀘 𑀦𑀸𑀪𑀺𑀢𑁄 𑀉𑀝𑁆𑀞𑀺𑀢𑁄 𑀦𑀸𑀴𑁄 𑀫𑀸𑀢𑀼 𑀉𑀤𑀭𑀧𑀝𑀮𑁂𑀦 𑀏𑀓𑀸𑀩𑀤𑁆𑀥𑁄 𑀳𑁄𑀢𑀺, 𑀲𑁄 𑀉𑀧𑁆𑀧𑀮𑀤𑀡𑁆𑀟𑀓𑁄 𑀯𑀺𑀬 𑀙𑀺𑀤𑁆𑀤𑁄, 𑀢𑁂𑀦 𑀆𑀳𑀸𑀭𑀭𑀲𑁄 𑀲𑀁𑀲𑀭𑀺𑀢𑁆𑀯𑀸 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀲𑁄 𑀤𑀲𑀫𑀸𑀲𑁂 𑀬𑀸𑀧𑁂𑀢𑀺, 𑀢𑀁 𑀲𑀩𑁆𑀩𑀁 𑀅𑀯𑀢𑁆𑀯𑀸 ‘‘𑀲𑀽𑀢𑀺𑀖𑀭𑁂’’𑀢𑀺 𑀆𑀳. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀓𑁂𑀲𑀸 𑀮𑁄𑀫𑀸 𑀦𑀔𑀸𑀦𑀺 𑀘’’;

‘‘𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑀻 𑀫𑀸𑀢𑀸, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀦𑀭𑁄’’𑀢𑀺. (𑀲𑀁. 𑀦𑀺. 𑁧.𑁨𑁩𑁫; 𑀓𑀣𑀸. 𑁬𑁯𑁨);

𑀢𑀢𑁆𑀣 𑀲𑀽𑀢𑀺𑀖𑀭𑁂𑀢𑀺 𑀲𑀽𑀢𑀺𑀓𑀖𑀭𑁂, 𑀯𑀺𑀚𑀸𑀬𑀦𑀖𑀭𑁂𑀢𑀺 𑀅𑀢𑁆𑀣𑁄. ‘‘𑀲𑀽𑀢𑀺𑀓𑀸𑀖𑀭𑁂’’𑀢𑀺 𑀯𑀸 𑀧𑀸𑀞𑁄, 𑀲𑀽𑀢𑀺𑀓𑀸𑀬𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀤𑁆𑀥𑀫𑀸𑀲𑀺𑀓𑁄𑀧𑀻𑀢𑀺 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀤𑁆𑀥𑀫𑀸𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀤𑁆𑀥𑀫𑀸𑀲𑀺𑀓𑁄. 𑀤𑁆𑀯𑁂𑀫𑀸𑀲𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀓𑀁 𑀲𑀁𑀯𑀘𑁆𑀙𑀭𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀁𑀯𑀘𑁆𑀙𑀭𑀺𑀓𑁄. 𑀉𑀧𑀭𑀺 𑀤𑁆𑀯𑁂𑀯𑀲𑁆𑀲𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑀤𑀸 𑀚𑀺𑀡𑁆𑀡𑁄 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀚𑀭𑀸𑀚𑀺𑀡𑁆𑀡𑁄 𑀪𑀯𑀢𑀺 𑀚𑀚𑁆𑀚𑀭𑀻𑀪𑀽𑀢𑁄. 𑀯𑀼𑀤𑁆𑀥𑁄𑀢𑀺 𑀯𑀬𑁄𑀯𑀼𑀤𑁆𑀥𑁄. 𑀫𑀳𑀮𑁆𑀮𑀓𑁄𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑁄. 𑀅𑀤𑁆𑀥𑀕𑀢𑁄𑀢𑀺 𑀢𑀬𑁄 𑀅𑀤𑁆𑀥𑁂 𑀅𑀢𑀺𑀓𑁆𑀓𑀦𑁆𑀢𑁄. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀢𑀢𑀺𑀬𑀁 𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀔𑀡𑁆𑀟𑀤𑀦𑁆𑀢𑁄𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀧𑀢𑀺𑀢𑀸 𑀤𑀦𑁆𑀢𑀸 𑀨𑀸𑀮𑀺𑀢𑀸 𑀘 𑀚𑀭𑀸𑀦𑀼𑀪𑀸𑀯𑁂𑀦 𑀔𑀡𑁆𑀟𑀸 𑀤𑀦𑁆𑀢𑀸 𑀚𑀸𑀢𑀸 𑀅𑀲𑁆𑀲𑀸𑀢𑀺 𑀔𑀡𑁆𑀟𑀤𑀦𑁆𑀢𑁄. 𑀧𑀮𑀺𑀢𑀓𑁂𑀲𑁄𑀢𑀺 𑀧𑀡𑁆𑀟𑀭𑀓𑁂𑀲𑁄. 𑀯𑀺𑀮𑀽𑀦𑀦𑁆𑀢𑀺 𑀮𑀼𑀜𑁆𑀘𑀺𑀢𑁆𑀯𑀸 𑀕𑀳𑀺𑀢𑀓𑁂𑀲𑀸 𑀯𑀺𑀬 𑀔𑀮𑁆𑀮𑀸𑀝𑀲𑀻𑀲𑁄. 𑀔𑀮𑀺𑀢𑀲𑀺𑀭𑁄𑀢𑀺 𑀫𑀳𑀸𑀔𑀮𑁆𑀮𑀸𑀝𑀲𑀻𑀲𑁄. 𑀯𑀮𑀺𑀦𑀦𑁆𑀢𑀺 𑀲𑀜𑁆𑀚𑀸𑀢𑀯𑀮𑀺. 𑀢𑀺𑀮𑀓𑀸𑀳𑀢𑀕𑀢𑁆𑀢𑁄𑀢𑀺 𑀲𑁂𑀢𑀢𑀺𑀮𑀓𑀓𑀸𑀴𑀢𑀺𑀮𑀓𑁂𑀳𑀺 𑀯𑀺𑀓𑀺𑀡𑁆𑀡𑀲𑀭𑀻𑀭𑁄. 𑀪𑁄𑀕𑁆𑀕𑁄𑀢𑀺 𑀪𑀕𑁆𑀕𑁄, 𑀇𑀫𑀺𑀦𑀸𑀧𑀺𑀲𑁆𑀲 𑀯𑀗𑁆𑀓𑀪𑀸𑀯𑀁 𑀤𑀻𑀧𑁂𑀢𑀺. 𑀤𑀡𑁆𑀟𑀧𑀭𑀸𑀬𑀡𑁄𑀢𑀺 𑀤𑀡𑁆𑀟𑀧𑀝𑀺𑀲𑁆𑀲𑀭𑀡𑁄 𑀤𑀡𑁆𑀟𑀤𑀼𑀢𑀺𑀬𑁄. 𑀲𑁄 𑀚𑀭𑀸𑀬𑀧𑀻𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀚𑀭𑀸𑀬𑀧𑀺 𑀅𑀪𑀺𑀪𑀽𑀢𑁄 𑀫𑀭𑀢𑀺. 𑀦𑀢𑁆𑀣𑀺 𑀫𑀭𑀡𑀫𑁆𑀳𑀸 𑀫𑁄𑀓𑁆𑀔𑁄𑀢𑀺 𑀫𑀭𑀡𑀢𑁄 𑀫𑀼𑀜𑁆𑀘𑀦𑀼𑀧𑀸𑀬𑁄 𑀦𑀢𑁆𑀣𑀺 𑀦𑀼𑀧𑀮𑀩𑁆𑀪𑀢𑀺.

𑀨𑀮𑀸𑀦𑀫𑀺𑀯 𑀧𑀓𑁆𑀓𑀸𑀦𑀁, 𑀧𑀸𑀢𑁄 𑀧𑀢𑀦𑀢𑁄 𑀪𑀬𑀦𑁆𑀢𑀺 𑀧𑀭𑀺𑀧𑀸𑀓𑀕𑀢𑀸𑀦𑀁 𑀲𑀺𑀣𑀺𑀮𑀯𑀡𑁆𑀝𑀸𑀦𑀁 𑀧𑀦𑀲𑀨𑀮𑀸𑀤𑀺𑀧𑀓𑁆𑀓𑀸𑀦𑀁 𑀧𑀘𑁆𑀘𑀽𑀲𑀓𑀸𑀮𑁂 𑀅𑀯𑀲𑁆𑀲𑀁 𑀧𑀢𑀺𑀲𑁆𑀲𑀦𑁆𑀢𑀻𑀢𑀺 𑀨𑀮𑀲𑀸𑀫𑀺𑀓𑀸𑀦𑀁 𑀪𑀸𑀬𑀫𑀸𑀦𑀸𑀦𑀁 𑀯𑀺𑀬. 𑀏𑀯𑀁 𑀚𑀸𑀢𑀸𑀦 𑀫𑀘𑁆𑀘𑀸𑀦𑀁, 𑀦𑀺𑀘𑁆𑀘𑀁 𑀫𑀭𑀡𑀢𑁄 𑀪𑀬𑀦𑁆𑀢𑀺 𑀏𑀯𑀫𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀫𑀘𑁆𑀘𑀼𑀲𑀗𑁆𑀔𑀸𑀢𑀫𑀭𑀡𑀢𑁄 𑀲𑀢𑀢𑀁 𑀓𑀸𑀮𑀁 𑀪𑀬𑀁.

𑀬𑀣𑀸𑀧𑀺 𑀓𑀼𑀫𑁆𑀪𑀓𑀸𑀭𑀲𑁆𑀲𑀸𑀢𑀺 𑀬𑀣𑀸 𑀦𑀸𑀫 𑀫𑀢𑁆𑀢𑀺𑀓𑀸𑀪𑀸𑀚𑀦𑀁 𑀓𑀭𑁄𑀦𑁆𑀢𑀲𑁆𑀲. 𑀓𑀢𑀁 𑀫𑀢𑁆𑀢𑀺𑀓𑀪𑀸𑀚𑀦𑀦𑁆𑀢𑀺 (𑀲𑀼. 𑀦𑀺. 𑁫𑁮𑁨) 𑀢𑁂𑀦 𑀦𑀺𑀝𑁆𑀞𑀸𑀧𑀺𑀢𑀪𑀸𑀚𑀦𑀁. 𑀲𑀩𑁆𑀩𑀁 𑀪𑁂𑀤𑀦𑀧𑀭𑀺𑀬𑀦𑁆𑀢𑀦𑁆𑀢𑀺 𑀧𑀓𑁆𑀓𑀸𑀧𑀓𑁆𑀓𑀁 𑀲𑀩𑁆𑀩𑀁 𑀪𑁂𑀤𑀦𑀁 𑀪𑀺𑀚𑁆𑀚𑀧𑀭𑀺𑀬𑀦𑁆𑀢𑀁 𑀅𑀯𑀲𑀸𑀦𑀁 𑀅𑀲𑁆𑀲𑀸𑀢𑀺 𑀪𑁂𑀤𑀦𑀧𑀭𑀺𑀬𑀦𑁆𑀢𑀁. 𑀏𑀯𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀦𑁆𑀢𑀺 𑀏𑀯𑀫𑁂𑀯 𑀲𑀢𑁆𑀢𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀁.

𑀤𑀳𑀭𑀸 𑀘 𑀫𑀳𑀦𑁆𑀢𑀸 𑀘𑀸𑀢𑀺 𑀢𑀭𑀼𑀡𑀸 𑀘 𑀫𑀳𑀮𑁆𑀮𑀓𑀸 𑀘. 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸𑀢𑀺 𑀬𑁂 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀬𑀢𑁆𑀢𑀸 𑀚𑀻𑀯𑀺𑀢𑀸 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸 𑀩𑀼𑀤𑁆𑀥𑀸𑀤𑀬𑁄. 𑀲𑀩𑁆𑀩𑁂 𑀫𑀘𑁆𑀘𑀼𑀯𑀲𑀁 𑀬𑀦𑁆𑀢𑀻𑀢𑀺 𑀏𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀤𑀳𑀭𑀸𑀤𑀬𑁄 𑀲𑀩𑁆𑀩𑁂 𑀫𑀘𑁆𑀘𑀼𑀦𑁄 𑀇𑀲𑁆𑀲𑀭𑀺𑀬𑀁 𑀉𑀧𑀕𑀘𑁆𑀙𑀦𑁆𑀢𑀺.

𑀢𑁂𑀲𑀁 𑀫𑀘𑁆𑀘𑀼𑀧𑀭𑁂𑀢𑀸𑀦𑀦𑁆𑀢𑀺 𑀏𑀢𑁂𑀲𑀁 𑀫𑀘𑁆𑀘𑀼𑀦𑀸 𑀧𑀭𑀺𑀯𑀸𑀭𑀺𑀢𑀸𑀦𑀁. 𑀕𑀘𑁆𑀙𑀢𑀁 𑀧𑀭𑀮𑁄𑀓𑀢𑁄𑀢𑀺 𑀇𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸𑀦𑀁. 𑀦 𑀧𑀺𑀢𑀸 𑀢𑀸𑀬𑀢𑁂 𑀧𑀼𑀢𑁆𑀢𑀦𑁆𑀢𑀺 𑀧𑀺𑀢𑀸 𑀧𑀼𑀢𑁆𑀢𑀁 𑀦 𑀭𑀓𑁆𑀔𑀢𑀺. 𑀜𑀸𑀢𑀻 𑀯𑀸 𑀧𑀦 𑀜𑀸𑀢𑀓𑁂𑀢𑀺 𑀫𑀸𑀢𑀸𑀧𑀺𑀢𑀺𑀧𑀓𑁆𑀔𑀺𑀓𑀸 𑀜𑀸𑀢𑀻 𑀯𑀸 𑀢𑁂𑀬𑁂𑀯 𑀜𑀸𑀢𑀓𑁂 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺.

𑀧𑁂𑀓𑁆𑀔𑀢𑀜𑁆𑀜𑁂𑀯 𑀜𑀸𑀢𑀻𑀦𑀦𑁆𑀢𑀺 𑀯𑀼𑀢𑁆𑀢𑀯𑀺𑀥𑀸𑀦𑀁𑀬𑁂𑀯 𑀜𑀸𑀢𑀻𑀦𑀁 𑀧𑁂𑀓𑁆𑀔𑀦𑁆𑀢𑀸𑀦𑀁𑀬𑁂𑀯 𑀑𑀮𑁄𑀓𑁂𑀦𑁆𑀢𑀸𑀦𑀁𑀬𑁂𑀯. 𑀧𑀲𑁆𑀲 𑀮𑀸𑀮𑀧𑁆𑀧𑀢𑀁 𑀧𑀼𑀣𑀽𑀢𑀺 𑀧𑀲𑁆𑀲𑀸𑀢𑀺 𑀆𑀮𑀧𑀦𑀁. 𑀮𑀸𑀮𑀧𑀦𑁆𑀢𑀸𑀦𑀁 𑀯𑀺𑀮𑀧𑀦𑁆𑀢𑀸𑀦𑀁 𑀧𑀼𑀣𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁. 𑀏𑀓𑀫𑁂𑀓𑁄𑀯 𑀫𑀘𑁆𑀘𑀸𑀦𑀁, 𑀕𑁄𑀯𑀚𑁆𑀛𑁄 𑀯𑀺𑀬 𑀦𑀺𑀬𑁆𑀬𑀢𑀻𑀢𑀺 𑀲𑀢𑁆𑀢𑀸𑀦𑀁 𑀏𑀓𑀫𑁂𑀓𑁄 𑀯𑀥𑀸𑀬 𑀦𑀺𑀬𑁆𑀬𑀫𑀸𑀦𑀕𑁄𑀡𑁄 𑀯𑀺𑀬 𑀫𑀭𑀡𑀸𑀬 𑀦𑀺𑀬𑁆𑀬𑀢𑀺 𑀧𑀸𑀧𑀼𑀡𑀻𑀬𑀢𑀺. 𑀏𑀯𑀫𑀩𑁆𑀪𑀸𑀳𑀢𑁄 𑀮𑁄𑀓𑁄𑀢𑀺 𑀏𑀯𑀫𑁂𑀯 𑀲𑀢𑁆𑀢𑀮𑁄𑀓𑁄 𑀪𑀼𑀲𑀁 𑀆𑀳𑀢𑁄. 𑀫𑀘𑁆𑀘𑀼𑀦𑀸 𑀘 𑀚𑀭𑀸𑀬 𑀘𑀸𑀢𑀺 𑀫𑀭𑀡𑁂𑀦 𑀘 𑀚𑀭𑀸𑀬 𑀘 𑀅𑀪𑀺𑀪𑀽𑀢𑁄.

𑁪𑁦. 𑀫𑀫𑀸𑀬𑀺𑀢𑁂𑀢𑀺 𑀫𑀫𑀸𑀬𑀺𑀢𑀯𑀢𑁆𑀣𑀼𑀓𑀸𑀭𑀡𑀸. 𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀦𑁆𑀢𑀺 𑀲𑀦𑁆𑀢𑀁 𑀯𑀺𑀚𑁆𑀚𑀫𑀸𑀦𑀁 𑀯𑀺𑀦𑀸𑀪𑀸𑀯𑀫𑁂𑀯 𑀇𑀤𑀁, 𑀦 𑀲𑀓𑁆𑀓𑀸 𑀅𑀯𑀺𑀦𑀸𑀪𑀸𑀯𑁂𑀦 𑀪𑀯𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑁄𑀘𑀦𑁆𑀢𑀻𑀢𑀺 𑀘𑀺𑀢𑁆𑀢𑁂𑀦 𑀲𑁄𑀘𑀦𑀁 𑀓𑀭𑁄𑀦𑁆𑀢𑀺. 𑀓𑀺𑀮𑀫𑀦𑁆𑀢𑀻𑀢𑀺 𑀓𑀸𑀬𑁂𑀦 𑀓𑀺𑀮𑀫𑀣𑀁 𑀧𑀸𑀧𑀼𑀡𑀦𑁆𑀢𑀺. 𑀧𑀭𑀺𑀤𑁂𑀯𑀦𑁆𑀢𑀻𑀢𑀺 𑀦𑀸𑀦𑀸𑀯𑀺𑀥𑀁 𑀯𑀸𑀘𑀸𑀯𑀺𑀮𑀸𑀧𑀁 𑀪𑀡𑀦𑁆𑀢𑀺. 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑀻𑀢𑀺 𑀉𑀭𑀁 𑀢𑀸𑀴𑁂𑀢𑁆𑀯𑀸 𑀢𑀸𑀴𑁂𑀢𑁆𑀯𑀸 𑀓𑀦𑁆𑀤𑀦𑁆𑀢𑀺. 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀫𑁄𑀳𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺.

𑀅𑀦𑀺𑀘𑁆𑀘𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦. 𑀲𑀗𑁆𑀔𑀢𑁄𑀢𑀺 𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀫𑁆𑀫 𑀓𑀢𑁄. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀧𑀝𑀺𑀘𑁆𑀘 𑀦 𑀧𑀘𑁆𑀘𑀓𑁆𑀔𑀸𑀬 𑀲𑀳 𑀲𑀫𑁆𑀫𑀸 𑀘 𑀉𑀧𑁆𑀧𑀦𑁆𑀦𑁄. 𑀔𑀬𑀥𑀫𑁆𑀫𑁄𑀢𑀺 𑀔𑀬𑀁 𑀕𑀫𑀦𑀲𑀪𑀸𑀯𑁄. 𑀯𑀬𑀥𑀫𑁆𑀫𑁄𑀢𑀺 𑀯𑀬𑀁 𑀕𑀫𑀦𑀲𑀪𑀸𑀯𑁄, 𑀪𑀗𑁆𑀕𑀯𑀲𑁂𑀦 𑀪𑀗𑁆𑀕𑀕𑀫𑀦𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀯𑀺𑀭𑀸𑀕𑀥𑀫𑁆𑀫𑁄𑀢𑀺 𑀯𑀺𑀭𑀚𑁆𑀚𑀦𑀲𑀪𑀸𑀯𑁄. 𑀦𑀺𑀭𑁄𑀥𑀥𑀫𑁆𑀫𑁄𑀢𑀺 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑁄. 𑀬𑁆𑀯𑀸𑀬𑀁 𑀧𑀭𑀺𑀕𑁆𑀕𑀳𑁄𑀢𑀺 𑀬𑁄 𑀅𑀬𑀁 𑀧𑀭𑀺𑀕𑁆𑀕𑀳𑁄. ‘‘𑀬𑀸𑀬 𑀧𑀭𑀺𑀕𑁆𑀕𑀳𑁄’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯 𑀧𑀤𑀘𑁆𑀙𑁂𑀤𑁄. 𑀦𑀺𑀘𑁆𑀘𑁄𑀢𑀺 𑀲𑀢𑀢𑀓𑀸𑀮𑀺𑀓𑁄. 𑀥𑀼𑀯𑁄𑀢𑀺 𑀣𑀺𑀭𑁄. 𑀲𑀲𑁆𑀲𑀢𑁄𑀢𑀺 𑀅𑀘𑀯𑀦𑁄. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀧𑀓𑀢𑀺𑀅𑀚𑀳𑀦𑀲𑀪𑀸𑀯𑁄. 𑀲𑀲𑁆𑀲𑀢𑀺 𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻𑀢𑀺 𑀘𑀦𑁆𑀤𑀲𑀽𑀭𑀺𑀬𑀲𑀺𑀦𑁂𑀭𑀼𑀫𑀳𑀸𑀲𑀫𑀼𑀤𑁆𑀤𑀧𑀣𑀯𑀻𑀧𑀩𑁆𑀩𑀢𑀸𑀤𑀬𑁄 𑀯𑀺𑀬 𑀢𑀺𑀝𑁆𑀞𑁂𑀬𑁆𑀬.

𑀦𑀸𑀦𑀸𑀪𑀸𑀯𑁄𑀢𑀺 𑀚𑀸𑀢𑀺𑀬𑀸 𑀦𑀸𑀦𑀸𑀪𑀸𑀯𑁄. 𑀯𑀺𑀦𑀸𑀪𑀸𑀯𑁄𑀢𑀺 𑀫𑀭𑀡𑁂𑀦 𑀯𑀺𑀬𑁄𑀕𑀪𑀸𑀯𑁄. 𑀅𑀜𑁆𑀜𑀣𑀸𑀪𑀸𑀯𑁄𑀢𑀺 𑀲𑀩𑁆𑀪𑀸𑀯𑀢𑁄 𑀅𑀜𑁆𑀜𑀣𑀸𑀪𑀸𑀯𑁄. 𑀧𑀼𑀭𑀺𑀫𑀸𑀦𑀁 𑀧𑀼𑀭𑀺𑀫𑀸𑀦𑀁 𑀔𑀦𑁆𑀥𑀸𑀦𑀦𑁆𑀢𑀺 𑀅𑀦𑀦𑁆𑀢𑀭𑁂 𑀧𑀼𑀭𑁂 𑀉𑀧𑁆𑀧𑀦𑁆𑀦𑀸𑀦𑀁 𑀔𑀦𑁆𑀥𑀸𑀦𑀁. 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸𑀢𑀺 𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸 𑀅𑀜𑁆𑀜𑀣𑀸𑀪𑀸𑀯𑁂𑀦. 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀔𑀦𑁆𑀥𑀸𑀤𑀬𑁄 𑀧𑀯𑀢𑁆𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀦𑁆𑀢𑀺 𑀲𑀓𑀮𑀁 𑀕𑀺𑀳𑀺𑀪𑀸𑀯𑀚𑀝𑀁. 𑀜𑀸𑀢𑀺𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀦𑁆𑀢𑀺 𑀫𑀸𑀢𑀸𑀧𑀺𑀢𑀼𑀧𑀓𑁆𑀔𑀺𑀓𑀸 𑀜𑀸𑀢𑀻, 𑀫𑀺𑀢𑁆𑀢𑀸 𑀲𑀳𑀸𑀬𑀸, 𑀅𑀫𑀘𑁆𑀘𑀸 𑀪𑀘𑁆𑀘𑀸. 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀦𑁆𑀢𑀺 𑀦𑀺𑀥𑀸𑀦𑀚𑀝𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸𑀢𑀺 𑀓𑁂𑀲𑁂 𑀘 𑀫𑀲𑁆𑀲𑀽𑀦𑀺 𑀘 𑀑𑀭𑁄𑀧𑀬𑀺𑀢𑁆𑀯𑀸. 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀻𑀢𑀺 𑀓𑀲𑀸𑀬𑀭𑀲𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀺.

𑁪𑁧. 𑀫𑀸𑀫𑀓𑁄𑀢𑀺 𑀫𑀫 𑀉𑀧𑀸𑀲𑀓𑁄 𑀪𑀺𑀓𑁆𑀔𑀼 𑀯𑀸𑀢𑀺 𑀲𑀗𑁆𑀔𑀁 𑀕𑀢𑁄, 𑀩𑀼𑀤𑁆𑀥𑀸𑀤𑀻𑀦𑀺 𑀯𑀸 𑀯𑀢𑁆𑀣𑀽𑀦𑀺 𑀫𑀫𑀸𑀬𑀫𑀸𑀦𑁄.

𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀦𑁆𑀢𑀺 𑀅𑀦𑁂𑀓𑁂𑀲𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄. ‘‘𑀬𑀜𑁆𑀜𑀤𑀢𑁆𑀢𑀲𑁆𑀲 𑀫𑀭𑀡𑀁, 𑀲𑁄𑀫𑀤𑀢𑁆𑀢𑀲𑁆𑀲 𑀫𑀭𑀡’’𑀦𑁆𑀢𑀺 𑀏𑀯𑀜𑁆𑀳𑀺 𑀤𑀺𑀯𑀲𑀫𑁆𑀧𑀺 𑀓𑀣𑀺𑀬𑀫𑀸𑀦𑁂 𑀦𑁂𑀯 𑀲𑀢𑁆𑀢𑀸 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀦 𑀲𑀩𑁆𑀩𑀁 𑀅𑀧𑀭𑀢𑁆𑀢𑀤𑀻𑀧𑀦𑀁 𑀲𑀺𑀚𑁆𑀛𑀢𑀺. 𑀇𑀫𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦 𑀓𑁄𑀘𑀺 𑀲𑀢𑁆𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑁄 𑀳𑁄𑀢𑀺, 𑀦 𑀓𑀺𑀜𑁆𑀘𑀺 𑀅𑀧𑀭𑀢𑁆𑀢𑀸𑀤𑀻𑀧𑀦𑀁 𑀦 𑀲𑀺𑀚𑁆𑀛𑀢𑀺. 𑀢𑀫𑁆𑀳𑀸 𑀢𑀫𑁆𑀳𑀸𑀢𑀺 𑀅𑀬𑀁 𑀕𑀢𑀺𑀯𑀲𑁂𑀦 𑀅𑀦𑁂𑀓𑁂𑀲𑀁 𑀦𑀺𑀓𑀸𑀬𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄. 𑀲𑀢𑁆𑀢𑀦𑀺𑀓𑀸𑀬𑀸𑀢𑀺 𑀲𑀢𑁆𑀢𑀸𑀦𑀁 𑀦𑀺𑀓𑀸𑀬𑀸, 𑀲𑀢𑁆𑀢𑀖𑀝𑀸 𑀲𑀢𑁆𑀢𑀲𑀫𑀽𑀳𑀸𑀢𑀺 𑀅𑀢𑁆𑀣𑁄. 𑀘𑀼𑀢𑀻𑀢𑀺 𑀘𑀯𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀸𑀬 𑀘𑀼𑀢𑀺𑀬𑀸 𑀲𑀸𑀫𑀜𑁆𑀜𑀯𑀘𑀦𑀫𑁂𑀢𑀁. 𑀘𑀯𑀦𑀢𑀸𑀢𑀺 𑀪𑀸𑀯𑀯𑀘𑀦𑁂𑀦 𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀁. 𑀪𑁂𑀤𑁄𑀢𑀺 𑀘𑀼𑀢𑀺𑀔𑀦𑁆𑀥𑀸𑀦𑀁 𑀪𑀗𑁆𑀕𑀼𑀧𑁆𑀧𑀢𑁆𑀢𑀺𑀧𑀭𑀺𑀤𑀻𑀧𑀦𑀁. 𑀅𑀦𑁆𑀢𑀭𑀥𑀸𑀦𑀦𑁆𑀢𑀺 𑀖𑀝𑀲𑁆𑀲 𑀯𑀺𑀬 𑀪𑀺𑀦𑁆𑀦𑀲𑁆𑀲 𑀪𑀺𑀦𑁆𑀦𑀸𑀦𑀁 𑀔𑀦𑁆𑀥𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀞𑀸𑀦𑀸𑀪𑀸𑀯𑀧𑀭𑀺𑀤𑀻𑀧𑀦𑀁. 𑀫𑀘𑁆𑀘𑀼𑀫𑀭𑀡𑀦𑁆𑀢𑀺 𑀫𑀘𑁆𑀘𑀼𑀲𑀗𑁆𑀔𑀸𑀢𑀁 𑀫𑀭𑀡𑀁, 𑀦 𑀔𑀡𑀺𑀓𑀫𑀭𑀡𑀁. 𑀓𑀸𑀮𑁄 𑀦𑀸𑀫 𑀅𑀦𑁆𑀢𑀓𑁄, 𑀢𑀲𑁆𑀲 𑀓𑀺𑀭𑀺𑀬𑀸𑀢𑀺 𑀓𑀸𑀮𑀁𑀓𑀺𑀭𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀼𑀢𑀺𑀫𑀭𑀡𑀁 𑀤𑀻𑀧𑀺𑀢𑀁. 𑀇𑀤𑀸𑀦𑀺 𑀧𑀭𑀫𑀢𑁆𑀣𑁂𑀦 𑀤𑀻𑀧𑁂𑀢𑀼𑀁 ‘‘𑀔𑀦𑁆𑀥𑀸𑀦𑀁 𑀪𑁂𑀤𑁄’’𑀢𑀺𑀆𑀤𑀺𑀫𑀸𑀳. 𑀧𑀭𑀫𑀢𑁆𑀣𑁂𑀦 𑀳𑀺 𑀔𑀦𑁆𑀥𑀸𑀬𑁂𑀯 𑀪𑀺𑀚𑁆𑀚𑀦𑁆𑀢𑀺, 𑀦 𑀲𑀢𑁆𑀢𑁄 𑀦𑀸𑀫 𑀓𑁄𑀘𑀺 𑀫𑀭𑀢𑀺. 𑀔𑀦𑁆𑀥𑁂𑀲𑀼 𑀧𑀦 𑀪𑀺𑀚𑁆𑀚𑀫𑀸𑀦𑁂𑀲𑀼 𑀲𑀢𑁆𑀢𑁄 𑀫𑀭𑀢𑀺, 𑀪𑀺𑀦𑁆𑀦𑁂𑀲𑀼 ‘‘𑀫𑀢𑁄’’𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺.

𑀏𑀢𑁆𑀣 𑀘 𑀘𑀢𑀼𑀯𑁄𑀓𑀸𑀭𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀏𑀓𑀯𑁄𑀓𑀸𑀭𑀯𑀲𑁂𑀦 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀘𑀢𑀼𑀯𑁄𑀓𑀸𑀭𑀯𑀲𑁂𑀦 𑀯𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀲𑁂𑀲𑀤𑁆𑀯𑀬𑀯𑀲𑁂𑀦 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀓𑀸𑀫𑀭𑀽𑀧𑀪𑀯𑀤𑁆𑀯𑀬𑁂𑀧𑀺 𑀭𑀽𑀧𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀓𑀴𑁂𑀯𑀭𑀲𑁆𑀲 𑀲𑀩𑁆𑀪𑀸𑀯𑀢𑁄. 𑀬𑀲𑁆𑀫𑀸 𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀔𑀦𑁆𑀥𑀸 𑀪𑀺𑀚𑁆𑀚𑀦𑁆𑀢𑁂𑀯, 𑀦 𑀓𑀺𑀜𑁆𑀘𑀺 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀫𑀦𑀼𑀲𑁆𑀲𑀸𑀤𑀻𑀲𑀼 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀏𑀢𑁆𑀣 𑀘 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑀓𑀭𑀡𑀢𑁄 𑀫𑀭𑀡𑀁 ‘‘𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀢𑁆𑀢𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑁄𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲𑁂𑀯 𑀫𑀭𑀡𑀁 𑀦𑀸𑀫 𑀳𑁄𑀢𑀺, 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀫𑀭𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀲𑁆𑀲𑀁 𑀫𑀢𑀁, 𑀭𑀼𑀓𑁆𑀔𑁄 𑀫𑀢𑁄’’𑀢𑀺 𑀇𑀤𑀁 𑀧𑀦 𑀯𑁄𑀳𑀸𑀭𑀫𑀢𑁆𑀢𑀫𑁂𑀯. 𑀅𑀢𑁆𑀣𑀢𑁄 𑀧𑀦 𑀏𑀯𑀭𑀽𑀧𑀸𑀦𑀺 𑀯𑀘𑀦𑀸𑀦𑀺 𑀲𑀲𑁆𑀲𑀸𑀤𑀻𑀦𑀁 𑀔𑀬𑀯𑀬𑀪𑀸𑀯𑀫𑁂𑀯 𑀤𑀻𑀧𑁂𑀦𑁆𑀢𑀺. 𑀭𑀽𑀧𑀕𑀢𑀦𑁆𑀢𑀺 𑀭𑀽𑀧𑀫𑁂𑀯 𑀭𑀽𑀧𑀕𑀢𑀁. 𑀯𑁂𑀤𑀦𑀸𑀕𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀧𑀼𑀩𑁆𑀩𑁂𑀯 𑀫𑀘𑁆𑀘𑀦𑁆𑀢𑀺 𑀫𑀘𑁆𑀘𑀁 𑀯𑀸 𑀪𑁄𑀕𑀸 𑀧𑀼𑀩𑁆𑀩𑁂𑀯 𑀧𑀞𑀫𑀢𑀭𑀜𑁆𑀜𑁂𑀯 𑀯𑀺𑀚𑀳𑀦𑁆𑀢𑀺. 𑀫𑀘𑁆𑀘𑁄 𑀯𑀸 𑀢𑁂 𑀪𑁄𑀕𑁂 𑀧𑀼𑀩𑁆𑀩𑀢𑀭𑀁 𑀚𑀳𑀢𑀺. 𑀓𑀸𑀫𑀓𑀸𑀫𑀻𑀢𑀺 𑀘𑁄𑀭𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀅𑀫𑁆𑀪𑁄 𑀓𑀸𑀫𑁂 𑀓𑀸𑀫𑀬𑀫𑀸𑀦 𑀓𑀸𑀫𑀓𑀸𑀫𑀺 𑀪𑁄𑀕𑀺𑀦𑁄 𑀦𑀸𑀫 𑀮𑁄𑀓𑁂 𑀅𑀲𑀲𑁆𑀲𑀢𑀸, 𑀪𑁄𑀕𑁂𑀲𑀼 𑀯𑀸 𑀦𑀝𑁆𑀞𑁂𑀲𑀼 𑀚𑀻𑀯𑀫𑀸𑀦𑀸 𑀘 𑀅𑀪𑁄𑀕𑀺𑀦𑁄 𑀳𑁄𑀦𑁆𑀢𑀺. 𑀪𑁄𑀕𑁂 𑀯𑀸 𑀧𑀳𑀸𑀬 𑀲𑀬𑀁 𑀦𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀅𑀳𑀁 𑀫𑀳𑀸𑀚𑀦𑀲𑁆𑀲 𑀲𑁄𑀓𑀓𑀸𑀮𑁂𑀧𑀺 𑀦 𑀲𑁄𑀘𑀸𑀫𑀻𑀢𑀺 𑀅𑀢𑁆𑀣𑁄.

𑀯𑀺𑀤𑀺𑀢𑀸 𑀫𑀬𑀸 𑀲𑀢𑁆𑀢𑀼𑀓 𑀮𑁄𑀓𑀥𑀫𑁆𑀫𑀸𑀢𑀺 𑀘𑁄𑀭𑀭𑀸𑀚𑀸𑀦𑀁 𑀆𑀮𑀧𑀦𑁆𑀢𑁄 𑀆𑀳. 𑀅𑀫𑁆𑀪𑁄 𑀲𑀢𑁆𑀢𑀼𑀓 𑀫𑀬𑀸 𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄𑀢𑀺𑀆𑀤𑀬𑁄 𑀮𑁄𑀓𑀥𑀫𑁆𑀫𑀸 𑀯𑀺𑀤𑀺𑀢𑀸. 𑀬𑀣𑁂𑀯 𑀳𑀺 𑀘𑀦𑁆𑀤𑁄 𑀉𑀤𑁂𑀢𑀺 𑀘 𑀧𑀽𑀭𑀢𑀺 𑀘 𑀧𑀼𑀦 𑀘 𑀔𑀻𑀬𑀢𑀺, 𑀬𑀣𑀸 𑀘 𑀲𑀽𑀭𑀺𑀬𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑁄 𑀫𑀳𑀦𑁆𑀢𑀁 𑀮𑁄𑀓𑀧𑁆𑀧𑀤𑁂𑀲𑀁 𑀢𑀧𑀺𑀢𑁆𑀯𑀸𑀦 𑀧𑀼𑀦 𑀲𑀸𑀬𑀁 𑀅𑀢𑁆𑀣𑀁 𑀧𑀮𑁂𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀦 𑀤𑀺𑀲𑁆𑀲𑀢𑀺, 𑀏𑀯𑀫𑁂𑀯 𑀪𑁄𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀯𑀺𑀦𑀲𑁆𑀲𑀦𑁆𑀢𑀺 𑀘, 𑀢𑀢𑁆𑀣 𑀓𑀺𑀁 𑀲𑁄𑀓𑁂𑀦, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀻𑀢𑀺 𑀅𑀢𑁆𑀣𑁄.

𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻𑀢𑀺 𑀢𑀡𑁆𑀳𑀸𑀬 𑀚𑀦𑀺𑀢𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀫𑀸𑀦𑀁 𑀓𑀭𑁄𑀢𑀺 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬𑀸𑀢𑀺 𑀤𑀺𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀬 𑀫𑀜𑁆𑀜𑀦𑀸𑀬. 𑀫𑀸𑀦𑀫𑀜𑁆𑀜𑀦𑀸𑀬𑀸𑀢𑀺 𑀲𑀳𑀚𑀸𑀢𑀫𑀸𑀦𑀫𑀜𑁆𑀜𑀦𑀸𑀬. 𑀓𑀺𑀮𑁂𑀲𑀫𑀜𑁆𑀜𑀦𑀸𑀬𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀉𑀧𑀢𑀸𑀧𑀦𑀝𑁆𑀞𑁂𑀦 𑀓𑀺𑀮𑁂𑀲𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺.

𑀓𑀼𑀳𑀸𑀢𑀺 𑀯𑀺𑀫𑁆𑀳𑀸𑀧𑀓𑀸. 𑀣𑀤𑁆𑀥𑀸𑀢𑀺 𑀔𑀸𑀡𑀼 𑀯𑀺𑀬 𑀣𑀤𑁆𑀥𑀸. 𑀮𑀧𑀸𑀢𑀺 𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑁂𑀦 𑀮𑀧𑀦𑀓𑀸.

𑁪𑁨. 𑀲𑀗𑁆𑀕𑀢𑀦𑁆𑀢𑀺 𑀲𑀫𑀸𑀕𑀢𑀁, 𑀤𑀺𑀝𑁆𑀞𑀁 𑀨𑀼𑀝𑁆𑀞𑀁 𑀯𑀸. 𑀧𑀺𑀬𑀸𑀬𑀺𑀢𑀦𑁆𑀢𑀺 𑀧𑀺𑀬𑀓𑀢𑀁.

𑀲𑀗𑁆𑀕𑀢𑀦𑁆𑀢𑀺 𑀲𑀫𑁆𑀫𑀼𑀔𑀻𑀪𑀽𑀢𑀁. 𑀲𑀫𑀸𑀕𑀢𑀦𑁆𑀢𑀺 𑀲𑀫𑀻𑀧𑀁 𑀆𑀕𑀢𑀁. 𑀲𑀫𑀸𑀳𑀺𑀢𑀦𑁆𑀢𑀺 𑀏𑀓𑀻𑀪𑀽𑀢𑀁. 𑀲𑀦𑁆𑀦𑀺𑀧𑀢𑀺𑀢𑀦𑁆𑀢𑀺 𑀧𑀺𑀡𑁆𑀟𑀺𑀢𑀁. 𑀲𑀼𑀧𑀺𑀦𑀕𑀢𑁄𑀢𑀺 𑀲𑀼𑀧𑀺𑀦𑀁 𑀧𑀯𑀺𑀝𑁆𑀞𑁄. 𑀲𑁂𑀦𑀸𑀩𑁆𑀬𑀽𑀳𑀁 𑀧𑀲𑁆𑀲𑀢𑀻𑀢𑀺 𑀲𑁂𑀦𑀸𑀲𑀦𑁆𑀦𑀺𑀯𑁂𑀲𑀁 𑀤𑀓𑁆𑀔𑀢𑀺. 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑀸𑀤𑀻𑀦𑀁 𑀭𑀫𑀡𑀻𑀬𑀪𑀸𑀯𑀁. 𑀯𑀦𑀭𑀸𑀫𑀡𑁂𑀬𑁆𑀬𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑁂𑀢𑀦𑁆𑀢𑀺 𑀇𑀢𑁄 𑀧𑀭𑀮𑁄𑀓𑀁 𑀕𑀢𑀁. 𑀓𑀸𑀮𑀗𑁆𑀓𑀢𑀦𑁆𑀢𑀺 𑀫𑀢𑀁.

𑁪𑁩. 𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺, 𑀅𑀓𑁆𑀔𑁂𑀬𑁆𑀬𑀦𑁆𑀢𑀺 𑀲𑀩𑁆𑀩𑀁 𑀭𑀽𑀧𑀸𑀤𑀺𑀥𑀫𑁆𑀫𑀚𑀸𑀢𑀁 𑀧𑀳𑀻𑀬𑀢𑀺, 𑀦𑀸𑀫𑀫𑀢𑁆𑀢𑀫𑁂𑀯 𑀢𑀼 𑀅𑀯𑀲𑀺𑀲𑁆𑀲𑀢𑀺 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀏𑀯𑀁 𑀅𑀓𑁆𑀔𑀸𑀢𑀼𑀁 𑀓𑀣𑁂𑀢𑀼𑀁.

𑀬𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀪𑀺𑀲𑀫𑁆𑀪𑀽𑀢𑀸𑀢𑀺 𑀬𑁂 𑀲𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀅𑀪𑀺𑀲𑀫𑁆𑀪𑀽𑀢𑀸 𑀭𑀸𑀲𑀺𑀓𑀢𑀸 𑀤𑀺𑀝𑁆𑀞𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀸 𑀭𑀽𑀧𑀸. 𑀲𑁄𑀢𑀯𑀺𑀜𑁆𑀜𑀸𑀡𑀸𑀪𑀺𑀲𑀫𑁆𑀪𑀽𑀢𑀸𑀢𑀺 𑀧𑀭𑀢𑁄𑀖𑁄𑀲𑁂𑀦 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀭𑀸𑀲𑀺𑀓𑀢𑀸 𑀲𑀼𑀢𑀸 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸 𑀲𑀤𑁆𑀤𑀸.

𑁪𑁪. 𑀫𑀼𑀦𑀬𑁄𑀢𑀺 𑀔𑀻𑀡𑀸𑀲𑀯𑀫𑀼𑀦𑀬𑁄. 𑀔𑁂𑀫𑀤𑀲𑁆𑀲𑀺𑀦𑁄𑀢𑀺 𑀦𑀺𑀩𑁆𑀩𑀸𑀦𑀤𑀲𑁆𑀲𑀺𑀦𑁄.

𑀲𑁄𑀓𑁄𑀢𑀺 𑀲𑁄𑀓𑀦𑀺𑀤𑁆𑀤𑁂𑀲𑁂 𑁋 𑀩𑁆𑀬𑀲𑀢𑀻𑀢𑀺 𑀩𑁆𑀬𑀲𑀦𑀁, 𑀳𑀺𑀢𑀲𑀼𑀔𑀁 𑀔𑀺𑀧𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀜𑀸𑀢𑀺𑀩𑁆𑀬𑀲𑀦𑀁, 𑀘𑁄𑀭𑀭𑁄𑀕𑀪𑀬𑀸𑀤𑀻𑀳𑀺 𑀜𑀸𑀢𑀺𑀓𑁆𑀔𑀬𑁄 𑀜𑀸𑀢𑀺𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀜𑀸𑀢𑀺𑀩𑁆𑀬𑀲𑀦𑁂𑀦. 𑀨𑀼𑀝𑁆𑀞𑀲𑁆𑀲𑀸𑀢𑀺 𑀅𑀚𑁆𑀛𑁄𑀢𑁆𑀣𑀝𑀲𑁆𑀲, 𑀅𑀪𑀺𑀪𑀽𑀢𑀲𑁆𑀲 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀪𑁄𑀕𑀸𑀦𑀁 𑀩𑁆𑀬𑀲𑀦𑀁 𑀪𑁄𑀕𑀩𑁆𑀬𑀲𑀦𑀁, 𑀭𑀸𑀚𑀘𑁄𑀭𑀸𑀤𑀺𑀯𑀲𑁂𑀦 𑀪𑁄𑀕𑀓𑁆𑀔𑀬𑁄 𑀪𑁄𑀕𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀭𑁄𑀕𑁄𑀬𑁂𑀯 𑀩𑁆𑀬𑀲𑀦𑀁 𑀭𑁄𑀕𑀩𑁆𑀬𑀲𑀦𑀁. 𑀭𑁄𑀕𑁄 𑀳𑀺 𑀆𑀭𑁄𑀕𑁆𑀬𑀁 𑀩𑁆𑀬𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀩𑁆𑀬𑀲𑀦𑀁. 𑀲𑀻𑀮𑀲𑁆𑀲 𑀩𑁆𑀬𑀲𑀦𑀁 𑀲𑀻𑀮𑀩𑁆𑀬𑀲𑀦𑀁, 𑀤𑀼𑀲𑁆𑀲𑀺𑀮𑁆𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀺𑀦𑀸𑀲𑀬𑀫𑀸𑀦𑀸 𑀉𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺𑀬𑁂𑀯 𑀩𑁆𑀬𑀲𑀦𑀁 𑀤𑀺𑀝𑁆𑀞𑀺𑀩𑁆𑀬𑀲𑀦𑀁. 𑀏𑀢𑁆𑀣 𑀘 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀅𑀦𑀺𑀧𑁆𑀨𑀦𑁆𑀦𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀺 𑀦𑀺𑀧𑁆𑀨𑀦𑁆𑀦𑀸𑀦𑀺 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀸𑀦𑀺. 𑀧𑀼𑀭𑀺𑀫𑀸𑀦𑀺 𑀘 𑀢𑀻𑀡𑀺 𑀦𑁂𑀯 𑀓𑀼𑀲𑀮𑀸𑀦𑀺 𑀦𑀸𑀓𑀼𑀲𑀮𑀸𑀦𑀺, 𑀲𑀻𑀮𑀤𑀺𑀝𑁆𑀞𑀺𑀩𑁆𑀬𑀲𑀦𑀤𑁆𑀯𑀬𑀁 𑀅𑀓𑀼𑀲𑀮𑀁.

𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦𑀸𑀢𑀺 𑀕𑀳𑀺𑀢𑁂𑀲𑀼 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀕𑁆𑀕𑀳𑀺𑀢𑁂𑀲𑀼 𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀩𑁆𑀬𑀲𑀦𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺. 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀲𑀫𑀦𑀼𑀩𑀦𑁆𑀥𑀲𑁆𑀲 𑀅𑀧𑀭𑀺𑀫𑀼𑀘𑁆𑀘𑀫𑀸𑀦𑀲𑁆𑀲. 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀲𑁄𑀓𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀦𑀸. 𑀲𑁄𑀓𑁄𑀢𑀺 𑀲𑁄𑀘𑀦𑀓𑀯𑀲𑁂𑀦 𑀲𑁄𑀓𑁄. 𑀇𑀤𑀁 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀚𑁆𑀚𑀦𑀓𑀲𑁄𑀓𑀲𑁆𑀲 𑀲𑀪𑀸𑀯𑀧𑀘𑁆𑀘𑀢𑁆𑀢𑀁. 𑀲𑁄𑀘𑀦𑀸𑀢𑀺 𑀲𑁄𑀘𑀦𑀸𑀓𑀸𑀭𑁄. 𑀲𑁄𑀘𑀺𑀢𑀢𑁆𑀢𑀦𑁆𑀢𑀺 𑀲𑁄𑀘𑀺𑀢𑀪𑀸𑀯𑁄. 𑀅𑀦𑁆𑀢𑁄𑀲𑁄𑀓𑁄𑀢𑀺 𑀅𑀩𑁆𑀪𑀦𑁆𑀢𑀭𑀲𑁄𑀓𑁄. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀁. 𑀲𑁄 𑀳𑀺 𑀅𑀩𑁆𑀪𑀦𑁆𑀢𑀭𑀁 𑀲𑀼𑀓𑁆𑀔𑀸𑀧𑁂𑀦𑁆𑀢𑁄 𑀯𑀺𑀬 𑀧𑀭𑀺𑀲𑀼𑀓𑁆𑀔𑀸𑀧𑁂𑀦𑁆𑀢𑁄 𑀯𑀺𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 ‘‘𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑁆𑀢𑁄𑀤𑀸𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑀤𑀸𑀳𑁄. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀁. 𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀬𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀛𑀸𑀦𑀦𑀸𑀓𑀸𑀭𑁄. 𑀲𑁄𑀓𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀕𑁆𑀕𑀺 𑀯𑀺𑀬 𑀘𑀺𑀢𑁆𑀢𑀁 𑀛𑀸𑀧𑁂𑀢𑀺 𑀤𑀳𑀢𑀺, ‘‘𑀘𑀺𑀢𑁆𑀢𑀁 𑀫𑁂 𑀛𑀸𑀫𑀁, 𑀦 𑀫𑁂 𑀓𑀺𑀜𑁆𑀘𑀺 𑀧𑀝𑀺𑀪𑀸𑀢𑀻’’𑀢𑀺 𑀯𑀤𑀸𑀧𑁂𑀢𑀺. 𑀤𑀼𑀓𑁆𑀔𑀺𑀢𑁄 𑀫𑀦𑁄 𑀤𑀼𑀫𑁆𑀫𑀦𑁄, 𑀢𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀲𑁄𑀓𑁄𑀯 𑀲𑀮𑁆𑀮𑀦𑁆𑀢𑀺 𑀲𑁄𑀓𑀲𑀮𑁆𑀮𑀁.

𑀧𑀭𑀺𑀤𑁂𑀯𑀦𑀺𑀤𑁆𑀤𑁂𑀲𑁂 𑁋 ‘‘𑀫𑀬𑁆𑀳𑀁 𑀥𑀻𑀢𑀸, 𑀫𑀬𑁆𑀳𑀁 𑀧𑀼𑀢𑁆𑀢𑁄’’𑀢𑀺 𑀏𑀯𑀁 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀤𑁂𑀯𑀦𑁆𑀢𑀺 𑀭𑁄𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀤𑁂𑀯𑁄. 𑀢𑀁 𑀢𑀁 𑀯𑀡𑁆𑀡𑀁 𑀧𑀭𑀺𑀓𑀺𑀢𑁆𑀢𑁂𑀢𑁆𑀯𑀸 𑀧𑀭𑀺𑀓𑀺𑀢𑁆𑀢𑁂𑀢𑁆𑀯𑀸 𑀤𑁂𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀤𑁂𑀯𑁄. 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺 𑀧𑀼𑀭𑀺𑀫𑀤𑁆𑀯𑀬𑀲𑁆𑀲𑁂𑀯 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀯𑀸𑀘𑀸𑀢𑀺 𑀯𑀘𑀦𑀁. 𑀧𑀮𑀸𑀧𑁄𑀢𑀺 𑀢𑀼𑀘𑁆𑀙𑀁 𑀦𑀺𑀭𑀢𑁆𑀣𑀓𑀯𑀘𑀦𑀁. 𑀉𑀧𑁆𑀧𑀟𑁆𑀠𑀪𑀡𑀺𑀢𑀅𑀜𑁆𑀜𑀪𑀡𑀺𑀢𑀸𑀤𑀺𑀯𑀲𑁂𑀦 𑀯𑀺𑀭𑀽𑀧𑁄 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄. 𑀮𑀸𑀮𑀧𑁆𑀧𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀮𑀧𑀦𑀁. 𑀮𑀸𑀮𑀧𑁆𑀧𑀦𑀸𑀓𑀸𑀭𑁄 𑀮𑀸𑀮𑀧𑁆𑀧𑀦𑀸. 𑀮𑀸𑀮𑀧𑁆𑀧𑀺𑀢𑀲𑁆𑀲 𑀪𑀸𑀯𑁄 𑀮𑀸𑀮𑀧𑁆𑀧𑀺𑀢𑀢𑁆𑀢𑀁. 𑀫𑀘𑁆𑀙𑀭𑀺𑀬𑀸𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁪𑁫. 𑀲𑀢𑁆𑀢𑀫𑀕𑀸𑀣𑀸 𑀏𑀯𑀁 𑀫𑀭𑀡𑀩𑁆𑀪𑀸𑀳𑀢𑁂 𑀮𑁄𑀓𑁂 𑀅𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀢𑀺𑀮𑀻𑀦𑀘𑀭𑀲𑁆𑀲𑀸𑀢𑀺 𑀢𑀢𑁄 𑀢𑀢𑁄 𑀧𑀢𑀺𑀮𑀻𑀦𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸 𑀘𑀭𑀦𑁆𑀢𑀲𑁆𑀲. 𑀪𑀺𑀓𑁆𑀔𑀼𑀦𑁄𑀢𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀸 𑀲𑁂𑀓𑁆𑀔𑀲𑁆𑀲 𑀯𑀸. 𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂𑀢𑀺 𑀢𑀲𑁆𑀲𑁂𑀢𑀁 𑀧𑀢𑀺𑀭𑀽𑀧𑀫𑀸𑀳𑀼, 𑀬𑁄 𑀏𑀯𑀁𑀧𑀝𑀺𑀧𑀦𑁆𑀦𑁄 𑀦𑀺𑀭𑀬𑀸𑀤𑀺𑀪𑁂𑀤𑁂 𑀪𑀯𑀦𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑀬𑁂. 𑀏𑀯𑀜𑁆𑀳𑀺 𑀲𑁄 𑀇𑀫𑀫𑁆𑀳𑀸 𑀫𑀭𑀡𑀸 𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀢𑀺𑀮𑀻𑀦𑀘𑀭𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀢𑀢𑁄 𑀢𑀢𑁄 𑀮𑀻𑀦𑀘𑀺𑀢𑁆𑀢𑀸𑀘𑀸𑀭𑀸 𑀓𑀣𑀻𑀬𑀦𑁆𑀢𑀺. 𑀲𑀢𑁆𑀢 𑀲𑁂𑀓𑁆𑀔𑀸𑀢𑀺 𑀅𑀥𑀺𑀲𑀻𑀮𑀸𑀤𑀻𑀲𑀼 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸 𑀲𑀢𑁆𑀢 𑀲𑁂𑀓𑁆𑀔𑀸. 𑀅𑀭𑀳𑀸𑀢𑀺 𑀨𑀮𑀝𑁆𑀞𑁄. 𑀲𑁄 𑀦𑀺𑀝𑁆𑀞𑀺𑀢𑀘𑀺𑀢𑁆𑀢𑀢𑁆𑀢𑀸 𑀧𑀢𑀺𑀮𑀻𑀦𑁄. 𑀲𑁂𑀓𑁆𑀔𑀸𑀦𑀁 𑀧𑀢𑀺𑀮𑀻𑀦𑀘𑀭𑀡𑀪𑀸𑀯𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀓𑀸𑀭𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑁂 𑀢𑀢𑁄 𑀢𑀢𑁄𑀢𑀺 𑀢𑁂 𑀲𑀢𑁆𑀢 𑀲𑁂𑀓𑁆𑀔𑀸 𑀢𑁂𑀳𑀺 𑀢𑁂𑀳𑀺 𑀆𑀭𑀫𑁆𑀫𑀡𑁂𑀳𑀺 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀦𑀺𑀮𑀻𑀦𑁂𑀦𑁆𑀢𑀸. 𑀧𑀢𑀺𑀓𑀼𑀝𑁂𑀦𑁆𑀢𑀸𑀢𑀺 𑀲𑀗𑁆𑀓𑁄𑀘𑁂𑀦𑁆𑀢𑀸. 𑀧𑀢𑀺𑀯𑀝𑁆𑀝𑁂𑀦𑁆𑀢𑀸𑀢𑀺 𑀓𑀝𑀲𑀸𑀭𑀓𑀁 𑀯𑀺𑀬 𑀆𑀪𑀼𑀚𑁂𑀦𑁆𑀢𑀸. 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸𑀢𑀺 𑀲𑀦𑁆𑀦𑀺𑀭𑀼𑀚𑁆𑀛𑀦𑁆𑀢𑀸. 𑀲𑀦𑁆𑀦𑀺𑀕𑀡𑁆𑀳𑀦𑁆𑀢𑀸𑀢𑀺 𑀦𑀺𑀕𑁆𑀕𑀳𑀁 𑀓𑀼𑀭𑀼𑀫𑀸𑀦𑀸. 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸𑀢𑀺 𑀯𑀸𑀭𑀬𑀫𑀸𑀦𑀸. 𑀭𑀓𑁆𑀔𑀦𑁆𑀢𑀸𑀢𑀺 𑀭𑀓𑁆𑀔𑀁 𑀓𑀼𑀭𑀼𑀫𑀸𑀦𑀸. 𑀕𑁄𑀧𑁂𑀦𑁆𑀢𑀸𑀢𑀺 𑀘𑀺𑀢𑁆𑀢𑀫𑀜𑁆𑀚𑀽𑀲𑀸𑀬 𑀕𑁄𑀧𑀬𑀫𑀸𑀦𑀸.

𑀇𑀤𑀸𑀦𑀺 𑀤𑁆𑀯𑀸𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀼𑀤𑁆𑀯𑀸𑀭𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼𑀤𑁆𑀯𑀸𑀭𑁂𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑁂. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀺𑀓𑁆𑀔𑀼𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄, 𑀲𑁂𑀓𑁆𑀔𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄𑀢𑀺 𑀪𑀺𑀓𑁆𑀔𑀼𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑀁 𑀅𑀯𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀪𑀺𑀓𑁆𑀔𑀼𑀬𑁂𑀯 𑀤𑀲𑁆𑀲𑀺𑀢𑁄. 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑁄 𑀘 𑀲𑁄 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸, 𑀓𑀮𑁆𑀬𑀸𑀡𑁄 𑀘 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀼𑀢𑁆𑀢𑀢𑁆𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑁄𑀯 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄, 𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲. 𑀅𑀥𑀺𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄, 𑀢𑀲𑁆𑀲 𑀲𑁂𑀓𑁆𑀔𑀲𑁆𑀲 𑀯𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀯𑀸 𑀲𑀓𑀤𑀸𑀕𑀸𑀫𑀺𑀦𑁄 𑀯𑀸 𑀅𑀦𑀸𑀕𑀸𑀫𑀺𑀦𑁄 𑀯𑀸.

𑀆𑀲𑀦𑁆𑀢𑀺 𑀦𑀺𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀁. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀫𑀜𑁆𑀘𑀧𑀻𑀞𑀸𑀤𑀻𑀲𑀼. 𑀫𑀜𑁆𑀘𑁄𑀢𑀺𑀆𑀤𑀻𑀦𑀺 𑀆𑀲𑀦𑀲𑁆𑀲 𑀧𑀪𑁂𑀤𑀯𑀘𑀦𑀸𑀦𑀺. 𑀫𑀜𑁆𑀘𑁄𑀧𑀺 𑀳𑀺 𑀦𑀺𑀲𑀚𑁆𑀚𑀸𑀬𑀧𑀺 𑀑𑀓𑀸𑀲𑀢𑁆𑀢𑀸 𑀇𑀥 𑀆𑀲𑀦𑁂𑀲𑀼 𑀯𑀼𑀢𑁆𑀢𑁄, 𑀲𑁄 𑀧𑀦 𑀫𑀲𑀸𑀭𑀓𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑀓𑀼𑀴𑀻𑀭𑀧𑀸𑀤𑀓𑀆𑀳𑀘𑁆𑀘𑀧𑀸𑀤𑀓𑀸𑀦𑀁 𑀅𑀜𑁆𑀜𑀢𑀭𑁄. 𑀧𑀻𑀞𑀫𑁆𑀧𑀺 𑀢𑁂𑀲𑀁 𑀅𑀜𑁆𑀜𑀢𑀭𑀫𑁂𑀯. 𑀪𑀺𑀲𑀻𑀢𑀺 𑀉𑀡𑁆𑀡𑀪𑀺𑀲𑀺 𑀘𑁄𑀴𑀪𑀺𑀲𑀺 𑀯𑀸𑀓𑀪𑀺𑀲𑀺 𑀢𑀺𑀡𑀪𑀺𑀲𑀺 𑀧𑀡𑁆𑀡𑀪𑀺𑀲𑀻𑀦𑀁 𑀅𑀜𑁆𑀜𑀢𑀭𑀸. 𑀢𑀝𑁆𑀝𑀺𑀓𑀸𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀯𑀺𑀦𑀺𑀢𑁆𑀯𑀸 𑀓𑀢𑀸. 𑀘𑀫𑁆𑀫𑀔𑀡𑁆𑀟𑁄𑀢𑀺 𑀦𑀺𑀲𑀚𑁆𑀚𑀸𑀭𑀳𑁄 𑀬𑁄 𑀓𑁄𑀘𑀺 𑀘𑀫𑁆𑀫𑀔𑀡𑁆𑀟𑁄. 𑀢𑀺𑀡𑀲𑀦𑁆𑀣𑀸𑀭𑀸𑀤𑀬𑁄 𑀢𑀺𑀡𑀸𑀤𑀻𑀦𑀺 𑀕𑀼𑀫𑁆𑀩𑁂𑀢𑁆𑀯𑀸 𑀓𑀢𑀸. 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑁂𑀦𑀸𑀢𑀺 𑀅𑀲𑀧𑁆𑀧𑀸𑀬𑀸𑀦𑀁 𑀇𑀝𑁆𑀞𑀭𑀽𑀧𑀸𑀦𑀁 𑀑𑀮𑁄𑀓𑀦𑁂𑀦. 𑀭𑀺𑀢𑁆𑀢𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀢𑁄 𑀢𑀼𑀘𑁆𑀙𑀁. 𑀯𑀺𑀯𑀺𑀢𑁆𑀢𑀦𑁆𑀢𑀺 𑀩𑀳𑀺𑀤𑁆𑀥𑀸𑀧𑀯𑁂𑀲𑀦𑁂𑀦 𑀲𑀼𑀜𑁆𑀜𑀁. 𑀧𑀯𑀺𑀯𑀺𑀢𑁆𑀢𑀦𑁆𑀢𑀺 𑀓𑁄𑀘𑀺 𑀕𑀳𑀝𑁆𑀞𑁄 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀅𑀢𑀺𑀭𑁂𑀓𑁂𑀦 𑀲𑀼𑀜𑁆𑀜𑀁. 𑀅𑀲𑀧𑁆𑀧𑀸𑀬𑀲𑀤𑁆𑀤𑀲𑁆𑀲𑀯𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀻𑀢𑀺 𑀇𑀢𑁆𑀣𑀺𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀧𑀜𑁆𑀘 𑀓𑀸𑀫𑀕𑀼𑀡𑀸 𑀮𑁄𑀓𑁂, 𑀇𑀢𑁆𑀣𑀺𑀭𑀽𑀧𑀲𑁆𑀫𑀺𑀁 𑀤𑀺𑀲𑁆𑀲𑀭𑁂’’𑀢𑀺. (𑀅. 𑀦𑀺. 𑁫.𑁫𑁫);

𑀪𑀚𑀢𑁄𑀢𑀺 𑀘𑀺𑀢𑁆𑀢𑁂𑀦 𑀲𑁂𑀯𑀦𑀁 𑀓𑀭𑁄𑀦𑁆𑀢𑀲𑁆𑀲. 𑀲𑀫𑁆𑀪𑀚𑀢𑁄𑀢𑀺 𑀲𑀫𑁆𑀫𑀸 𑀲𑁂𑀯𑀦𑁆𑀢𑀲𑁆𑀲. 𑀲𑁂𑀯𑀢𑁄𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲. 𑀦𑀺𑀲𑁂𑀯𑀢𑁄𑀢𑀺 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀲𑁂𑀯𑀦𑁆𑀢𑀲𑁆𑀲. 𑀲𑀁𑀲𑁂𑀯𑀢𑁄𑀢𑀺 𑀲𑀼𑀝𑁆𑀞𑀼 𑀲𑁂𑀯𑀦𑁆𑀢𑀲𑁆𑀲. 𑀧𑀝𑀺𑀲𑁂𑀯𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲.

𑀕𑀡𑀲𑀸𑀫𑀕𑁆𑀕𑀻𑀢𑀺 𑀲𑀫𑀡𑀸𑀦𑀁 𑀏𑀓𑀻𑀪𑀸𑀯𑁄 𑀲𑀫𑀕𑁆𑀕𑀪𑀸𑀯𑁄. 𑀥𑀫𑁆𑀫𑀲𑀸𑀫𑀕𑁆𑀕𑀻𑀢𑀺 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀲𑀫𑀽𑀳𑀪𑀸𑀯𑁄. 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀸𑀫𑀕𑁆𑀕𑀻𑀢𑀺 𑀅𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑀽𑀳𑁄. 𑀲𑀫𑀕𑁆𑀕𑀸𑀢𑀺 𑀓𑀸𑀬𑁂𑀦 𑀅𑀯𑀺𑀬𑁄𑀕𑀸. 𑀲𑀫𑁆𑀫𑁄𑀤𑀫𑀸𑀦𑀸𑀢𑀺 𑀘𑀺𑀢𑁆𑀢𑁂𑀦 𑀲𑀼𑀝𑁆𑀞𑀼 𑀫𑁄𑀤𑀫𑀸𑀦𑀸 𑀢𑀼𑀲𑁆𑀲𑀫𑀸𑀦𑀸. 𑀅𑀯𑀺𑀯𑀤𑀫𑀸𑀦𑀸𑀢𑀺 𑀯𑀸𑀘𑀸𑀬 𑀯𑀺𑀯𑀸𑀤𑀁 𑀅𑀓𑀼𑀭𑀼𑀫𑀸𑀦𑀸. 𑀔𑀻𑀭𑁄𑀤𑀓𑀻𑀪𑀽𑀢𑀸𑀢𑀺 𑀔𑀻𑀭𑁂𑀦 𑀲𑀁𑀲𑀝𑁆𑀞𑀉𑀤𑀓𑀲𑀤𑀺𑀲𑀸.

𑀢𑁂 𑀏𑀓𑀢𑁄 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀢𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀏𑀓𑀁 𑀆𑀭𑀫𑁆𑀫𑀡𑀁 𑀧𑀯𑀺𑀲𑀦𑁆𑀢𑀺. 𑀧𑀲𑀻𑀤𑀦𑁆𑀢𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀧𑀲𑀸𑀤𑀫𑀸𑀧𑀚𑁆𑀚𑀦𑁆𑀢𑀺. 𑀅𑀦𑀼𑀧𑀸𑀤𑀺𑀲𑁂𑀲𑀸𑀬𑀸𑀢𑀺 𑀉𑀧𑀸𑀤𑀺𑀯𑀺𑀭𑀳𑀺𑀢𑀸𑀬.

𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸. 𑀊𑀦𑀢𑁆𑀢𑀁 𑀯𑀸𑀢𑀺 𑀏𑀢𑁆𑀣 𑀉𑀦𑀪𑀸𑀯𑁄 𑀊𑀦𑀢𑁆𑀢𑀁, 𑀅𑀧𑀭𑀺𑀧𑀼𑀡𑁆𑀡𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀧𑀼𑀡𑁆𑀡𑀢𑁆𑀢𑀁 𑀯𑀸𑀢𑀺 𑀧𑀭𑀺𑀧𑀼𑀡𑁆𑀡𑀪𑀸𑀯𑁄 𑀧𑀼𑀡𑁆𑀡𑀢𑁆𑀢𑀁, 𑀧𑀼𑀡𑁆𑀡𑀪𑀸𑀯𑁄 𑀯𑀸 𑀦 𑀧𑀜𑁆𑀜𑀸𑀬𑀢𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀦𑁂𑀭𑀬𑀺𑀓𑀸𑀦𑀦𑁆𑀢𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀓𑀓𑀫𑁆𑀫𑀸𑀦𑀁 𑀅𑀢𑁆𑀣𑀺𑀪𑀸𑀯𑁂𑀦. 𑀦𑀺𑀭𑀬𑀁 𑀅𑀭𑀳𑀦𑁆𑀢𑀻𑀢𑀺 𑀦𑁂𑀭𑀬𑀺𑀓𑀸, 𑀢𑁂𑀲𑀁 𑀦𑁂𑀭𑀬𑀺𑀓𑀸𑀦𑀁. 𑀦𑀺𑀭𑀬𑁄 𑀪𑀯𑀦𑀦𑁆𑀢𑀺 𑀦𑀺𑀭𑀬𑁄 𑀏𑀯 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀖𑀭𑀁. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀲𑁂𑀲𑀸 𑀲𑀸𑀫𑀕𑁆𑀕𑀻𑀢𑀺 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀏𑀲𑀸 𑀦𑀺𑀩𑁆𑀩𑀸𑀦𑀲𑀸𑀫𑀕𑁆𑀕𑀻. 𑀏𑀢𑀁 𑀙𑀦𑁆𑀦𑀦𑁆𑀢𑀺 𑀏𑀢𑀁 𑀅𑀦𑀼𑀘𑁆𑀙𑀯𑀺𑀓𑀁. 𑀧𑀢𑀺𑀭𑀽𑀧𑀦𑁆𑀢𑀺 𑀲𑀤𑀺𑀲𑀁 𑀧𑀝𑀺𑀪𑀸𑀕𑀁, 𑀅𑀲𑀤𑀺𑀲𑀁 𑀅𑀧𑁆𑀧𑀝𑀺𑀪𑀸𑀕𑀁 𑀦 𑀳𑁄𑀢𑀺. 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀏𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀸𑀲𑀦𑀥𑀫𑁆𑀫𑀸𑀦𑀁 𑀯𑀸 𑀅𑀦𑀼𑀘𑁆𑀙𑀯𑀺𑀓𑀁. 𑀢𑁂𑀲𑀁 𑀙𑀯𑀺𑀁 𑀙𑀸𑀬𑀁 𑀲𑀼𑀦𑁆𑀤𑀭𑀪𑀸𑀯𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺, 𑀅𑀣 𑀔𑁄 𑀲𑀦𑁆𑀢𑀺𑀓𑀸𑀯 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀏𑀯 𑀘 𑀅𑀦𑀼𑀮𑁄𑀫𑀁. 𑀢𑁂𑀲𑀜𑁆𑀘 𑀅𑀦𑀼𑀮𑁄𑀫𑁂𑀢𑀺, 𑀅𑀣 𑀔𑁄 𑀦 𑀯𑀺𑀮𑁄𑀫𑀁 𑀦 𑀧𑀘𑁆𑀘𑀦𑀻𑀓𑀪𑀸𑀯𑁂 𑀞𑀺𑀢𑀁.

𑁪𑁬. 𑀇𑀤𑀸𑀦𑀺 ‘‘𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂’’𑀢𑀺 𑀏𑀯𑀁 𑀔𑀻𑀡𑀸𑀲𑀯𑁄 𑀯𑀺𑀪𑀸𑀯𑀺𑀢𑁄, 𑀢𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀢𑁄 𑀧𑀭𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀆𑀳. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀲𑀩𑁆𑀩𑀢𑁆𑀣𑀸𑀢𑀺 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼. 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀦𑁆𑀢𑀺 𑀦𑀺𑀤𑁆𑀤𑁂𑀲𑁂 𑀧𑀺𑀬𑀸𑀢𑀺 𑀘𑀺𑀢𑁆𑀢𑁂 𑀧𑀻𑀢𑀺𑀓𑀭𑀸. 𑀢𑁂 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀢𑀫𑁂 𑀲𑀢𑁆𑀢𑀸 𑀧𑀺𑀬𑀸, 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀻’’𑀢𑀺 𑀆𑀳. 𑀢𑀢𑁆𑀣 𑀬𑀲𑁆𑀲 𑀢𑁂𑀢𑀺 𑀬𑁂 𑀅𑀲𑁆𑀲 𑀢𑁂. 𑀳𑁄𑀦𑁆𑀢𑀻𑀢𑀺 𑀪𑀯𑀦𑁆𑀢𑀺. 𑀅𑀢𑁆𑀣𑀓𑀸𑀫𑀸𑀢𑀺 𑀯𑀟𑁆𑀠𑀺𑀓𑀸𑀫𑀸. 𑀳𑀺𑀢𑀓𑀸𑀫𑀸𑀢𑀺 𑀲𑀼𑀔𑀓𑀸𑀫𑀸. 𑀨𑀸𑀲𑀼𑀓𑀸𑀫𑀸𑀢𑀺 𑀲𑀼𑀔𑀯𑀺𑀳𑀸𑀭𑀓𑀸𑀫𑀸. 𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀁 𑀦𑀺𑀩𑁆𑀪𑀬𑀁 𑀓𑀸𑀫𑀸. 𑀫𑀫𑀸𑀬𑀢𑀻𑀢𑀺 𑀫𑀸𑀢𑀸. 𑀧𑀺𑀬𑀸𑀬𑀢𑀻𑀢𑀺 𑀧𑀺𑀢𑀸. 𑀪𑀚𑀢𑀻𑀢𑀺 𑀪𑀸𑀢𑀸. 𑀪𑀕𑀺𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀁 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀧𑀼𑀢𑁆𑀢𑁄. 𑀓𑀼𑀮𑀯𑀁𑀲𑀁 𑀥𑀸𑀭𑁂𑀢𑀻𑀢𑀺 𑀥𑀻𑀢𑀸. 𑀫𑀺𑀢𑁆𑀢𑀸 𑀲𑀳𑀸𑀬𑀸. 𑀅𑀫𑀘𑁆𑀘𑀸 𑀪𑀘𑁆𑀘𑀸. 𑀜𑀸𑀢𑀻 𑀧𑀺𑀢𑀼𑀧𑀓𑁆𑀔𑀺𑀓𑀸. 𑀲𑀸𑀮𑁄𑀳𑀺𑀢𑀸 𑀫𑀸𑀢𑀺𑀧𑀓𑁆𑀔𑀺𑀓𑀸. 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀸𑀢𑀺 𑀇𑀫𑁂 𑀲𑀢𑁆𑀢𑀸 𑀧𑀻𑀢𑀺𑀚𑀦𑀓𑀸. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀬𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁭. 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸𑀢𑀺 𑀏𑀢𑁆𑀣 𑀧𑀦 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁, 𑀏𑀢𑁆𑀣 𑀯𑀸 𑀫𑀼𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼; 𑀏𑀯𑀁 𑀫𑀼𑀦𑀺 𑀦 𑀉𑀧𑀮𑀺𑀫𑁆𑀧𑀢𑀻𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀤𑀓𑀣𑁂𑀯𑁄𑀢𑀺 𑀉𑀤𑀓𑀲𑁆𑀲 𑀣𑁂𑀯𑁄. ‘‘𑀉𑀤𑀓𑀢𑁆𑀣𑁂𑀯𑀓𑁄’’𑀢𑀺𑀧𑀺 𑀧𑀸𑀞𑁄. 𑀧𑀤𑀼𑀫𑀧𑀢𑁆𑀢𑁂𑀢𑀺 𑀧𑀤𑀼𑀫𑀺𑀦𑀺𑀧𑀢𑁆𑀢𑁂.

𑁪𑁮. 𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸𑀢𑀺 𑀅𑀢𑁆𑀭𑀸𑀧𑀺 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁, 𑀢𑁂𑀦 𑀯𑀢𑁆𑀣𑀼𑀦𑀸 𑀦 𑀫𑀜𑁆𑀜𑀢𑀺, 𑀫𑀼𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀦 𑀫𑀜𑁆𑀜𑀢𑀻𑀢𑀺 𑀏𑀯𑀫𑁂𑀯 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀲𑁄 𑀭𑀚𑁆𑀚𑀢𑀺, 𑀦𑁄 𑀯𑀺𑀭𑀚𑁆𑀚𑀢𑀻𑀢𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑁄 𑀯𑀺𑀬 𑀦 𑀭𑀚𑁆𑀚𑀢𑀺, 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀸 𑀯𑀺𑀬 𑀦 𑀯𑀺𑀭𑀚𑁆𑀚𑀢𑀺, 𑀭𑀸𑀕𑀲𑁆𑀲 𑀔𑀻𑀡𑀢𑁆𑀢𑀸 ‘‘𑀯𑀺𑀭𑀢𑁆𑀢𑁄’’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀢𑀸𑀬 𑀧𑀜𑁆𑀜𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀼𑀩𑁆𑀩𑀪𑀸𑀕𑀸𑀬𑁂𑀯 𑀯𑀸 𑀧𑀜𑁆𑀜𑀸𑀬 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀬𑁄𑀕𑀻 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀥𑀼𑀦𑀸𑀢𑀺. 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀯𑀺𑀧𑀦𑁆𑀦𑀥𑀫𑁆𑀫𑀁 𑀤𑁂𑀲𑀦𑀸𑀥𑀫𑁆𑀫𑁂𑀲𑀼 𑀥𑀼𑀦𑀦𑁆𑀢𑁂𑀲𑀼 𑀢𑀁𑀥𑀫𑁆𑀫𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄𑀧𑀺 𑀥𑀼𑀦𑀸𑀢𑀺 𑀦𑀸𑀫. 𑀢𑁂 𑀘 𑀥𑀫𑁆𑀫𑁂 𑀧𑀜𑁆𑀜𑀸𑀬 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂 𑀥𑀼𑀦𑀺𑀢𑀼𑀫𑀸𑀭𑀤𑁆𑀥𑁄 𑀥𑀼𑀢𑀸𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀪𑀼𑀜𑁆𑀚𑀺𑀢𑀼𑀫𑀸𑀭𑀤𑁆𑀥𑁄 𑀪𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀥𑀼𑀢𑀦𑁆𑀢𑀺 𑀓𑀢𑁆𑀢𑀼𑀲𑀸𑀥𑀦𑀁. 𑀥𑀼𑀢𑀁 𑀧𑀞𑀫𑀫𑀕𑁆𑀕𑁂𑀦. 𑀥𑁄𑀢𑀁 𑀤𑀼𑀢𑀺𑀬𑀫𑀕𑁆𑀕𑁂𑀦. 𑀲𑀦𑁆𑀥𑁄𑀢𑀁 𑀢𑀢𑀺𑀬𑀫𑀕𑁆𑀕𑁂𑀦. 𑀦𑀺𑀤𑁆𑀥𑁄𑀢𑀁 𑀘𑀢𑀼𑀢𑁆𑀣𑀫𑀕𑁆𑀕𑁂𑀦.

𑀥𑁄𑀦𑁄 𑀤𑀺𑀝𑁆𑀞𑀁 𑀦 𑀫𑀜𑁆𑀜𑀢𑀻𑀢𑀺 𑀅𑀭𑀳𑀸 𑀫𑀁𑀲𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁 𑀭𑀽𑀧𑀸𑀬𑀢𑀦𑀁 𑀦 𑀫𑀜𑁆𑀜𑀢𑀺 𑀢𑀻𑀳𑀺 𑀫𑀜𑁆𑀜𑀦𑀸𑀳𑀺, 𑀓𑀣𑀁? 𑀭𑀽𑀧𑀸𑀬𑀢𑀦𑀁 𑀲𑀼𑀪𑀲𑀜𑁆𑀜𑀸𑀬 𑀲𑀼𑀔𑀲𑀜𑁆𑀜𑀸𑀬 𑀘 𑀧𑀲𑁆𑀲𑀦𑁆𑀢𑁄 𑀦 𑀢𑀢𑁆𑀣 𑀙𑀦𑁆𑀤𑀭𑀸𑀕𑀁 𑀚𑀦𑁂𑀢𑀺 𑀦 𑀢𑀁 𑀅𑀲𑁆𑀲𑀸𑀤𑁂𑀢𑀺 𑀦𑀸𑀪𑀺𑀦𑀦𑁆𑀤𑀢𑀺, 𑀏𑀯𑀁 𑀤𑀺𑀝𑁆𑀞𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀦 𑀫𑀜𑁆𑀜𑀢𑀺. ‘‘𑀇𑀢𑀺 𑀫𑁂 𑀭𑀽𑀧𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀯𑀸 𑀧𑀦𑁂𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀦𑀸𑀦𑁂𑀢𑀺. 𑀭𑀽𑀧𑀲𑀫𑁆𑀧𑀤𑀁 𑀯𑀸 𑀆𑀓𑀗𑁆𑀔𑀫𑀸𑀦𑁄 𑀤𑀸𑀦𑀁 𑀦 𑀤𑁂𑀢𑀺, 𑀲𑀻𑀮𑀁 𑀦 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀯𑀫𑁆𑀧𑀺 𑀤𑀺𑀝𑁆𑀞𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀦 𑀫𑀜𑁆𑀜𑀢𑀺, 𑀅𑀢𑁆𑀢𑀦𑁄 𑀧𑀦 𑀧𑀭𑀲𑁆𑀲 𑀘 𑀭𑀽𑀧𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀦 𑀚𑀦𑁂𑀢𑀺. ‘‘𑀇𑀫𑀺𑀦𑀸𑀳𑀁 𑀲𑁂𑀬𑁆𑀬𑁄𑀲𑁆𑀫𑀻𑀢𑀺 𑀯𑀸, 𑀲𑀤𑀺𑀲𑁄𑀲𑁆𑀫𑀻𑀢𑀺 𑀯𑀸, 𑀳𑀻𑀦𑁄𑀲𑁆𑀫𑀻𑀢𑀺 𑀯𑀸’’𑀢𑀺 𑀏𑀯𑀁 𑀤𑀺𑀝𑁆𑀞𑀁 𑀫𑀸𑀦𑀫𑀜𑁆𑀜𑀦𑀸𑀬 𑀦 𑀫𑀜𑁆𑀜𑀢𑀺. 𑀭𑀽𑀧𑀸𑀬𑀢𑀦𑀁 𑀧𑀦 ‘‘𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢’’𑀦𑁆𑀢𑀺 𑀦 𑀫𑀜𑁆𑀜𑀢𑀺. 𑀅𑀢𑁆𑀢𑀸𑀦𑀁 ‘‘𑀅𑀢𑁆𑀢𑀦𑀺𑀬’’𑀦𑁆𑀢𑀺 𑀦 𑀫𑀜𑁆𑀜𑀢𑀺. 𑀫𑀗𑁆𑀕𑀮𑀁 ‘‘𑀅𑀫𑀗𑁆𑀕𑀮’’𑀦𑁆𑀢𑀺 𑀦 𑀫𑀜𑁆𑀜𑀢𑀺. 𑀏𑀯𑀁 𑀤𑀺𑀝𑁆𑀞𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀦 𑀫𑀜𑁆𑀜𑀢𑀺. 𑀤𑀺𑀝𑁆𑀞𑀲𑁆𑀫𑀺𑀁 𑀦 𑀫𑀜𑁆𑀜𑀢𑀻𑀢𑀺 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀦𑀬𑁂𑀦 𑀅𑀫𑀜𑁆𑀜𑀦𑁆𑀢𑁄 𑀤𑀺𑀝𑁆𑀞𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺. 𑀬𑀣𑀸 𑀯𑀸 𑀣𑀦𑁂 𑀣𑀜𑁆𑀜𑀁, 𑀏𑀯𑀁 𑀭𑀽𑀧𑀲𑁆𑀫𑀺𑀁 𑀭𑀸𑀕𑀸𑀤𑀬𑁄𑀢𑀺 𑀅𑀫𑀜𑁆𑀜𑀦𑁆𑀢𑁄𑀧𑀺 𑀤𑀺𑀝𑁆𑀞𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀧𑀦𑀲𑁆𑀲 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀅𑀫𑀜𑁆𑀜𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀦𑁂𑀳𑀁 𑀫𑀸𑀦𑀜𑁆𑀘 𑀦 𑀉𑀧𑁆𑀧𑀸𑀤𑀬𑀢𑁄 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀤𑀺𑀝𑁆𑀞𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺. 𑀤𑀺𑀝𑁆𑀞𑀢𑁄 𑀦 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀧𑀦 𑀤𑀺𑀝𑁆𑀞𑀢𑁄𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀢𑀲𑁆𑀫𑀸 𑀲𑀉𑀧𑀓𑀸𑀭𑀡𑀲𑁆𑀲 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀢𑁄 𑀤𑀺𑀝𑁆𑀞𑀢𑁄 𑀉𑀧𑀧𑀢𑁆𑀢𑀺 𑀯𑀸 𑀦𑀺𑀕𑁆𑀕𑀫𑀦𑀁 𑀯𑀸 𑀤𑀺𑀝𑁆𑀞𑀢𑁄 𑀯𑀸 𑀅𑀜𑁆𑀜𑁄 𑀅𑀢𑁆𑀢𑀸𑀢𑀺 𑀅𑀫𑀜𑁆𑀜𑀫𑀸𑀦𑁄 𑀤𑀺𑀝𑁆𑀞𑀢𑁄 𑀦 𑀫𑀜𑁆𑀜𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑀲𑁆𑀲 𑀦 𑀤𑀺𑀝𑁆𑀞𑀺𑀫𑀜𑁆𑀜𑀦𑀸. 𑀢𑀲𑁆𑀫𑀺𑀁𑀬𑁂𑀯 𑀧𑀦𑀲𑁆𑀲 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀅𑀫𑀜𑁆𑀜𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀦𑁂𑀳𑀁 𑀫𑀸𑀦𑀜𑁆𑀘 𑀦 𑀉𑀧𑁆𑀧𑀸𑀤𑀬𑀢𑁄 𑀦 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀤𑀺𑀝𑁆𑀞𑀸 𑀫𑁂𑀢𑀺 𑀦 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀧𑀦 ‘‘𑀏𑀢𑀁 𑀫𑀫𑀸’’𑀢𑀺 𑀢𑀡𑁆𑀳𑀸𑀯𑀲𑁂𑀦 𑀅𑀫𑀫𑀸𑀬𑀫𑀸𑀦𑁄 𑀤𑀺𑀝𑁆𑀞𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀦 𑀫𑀜𑁆𑀜𑀢𑀺. 𑀲𑀼𑀢𑀦𑁆𑀢𑀺 𑀫𑀁𑀲𑀲𑁄𑀢𑁂𑀦𑀧𑀺 𑀲𑀼𑀢𑀁, 𑀤𑀺𑀩𑁆𑀩𑀲𑁄𑀢𑁂𑀦𑀧𑀺 𑀲𑀼𑀢𑀁, 𑀲𑀤𑁆𑀤𑀸𑀬𑀢𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀼𑀢𑀦𑁆𑀢𑀺 𑀫𑀼𑀢𑁆𑀯𑀸 𑀫𑀼𑀦𑀺𑀢𑁆𑀯𑀸 𑀘 𑀕𑀳𑀺𑀢𑀁 𑀆𑀳𑀘𑁆𑀘 𑀉𑀧𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀲𑀁𑀓𑀺𑀮𑁂𑀲𑁂 𑀯𑀺𑀜𑁆𑀜𑀸𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀜𑁆𑀜𑀸𑀢𑀦𑁆𑀢𑀺 𑀫𑀦𑀲𑀸 𑀯𑀺𑀜𑁆𑀜𑀸𑀢𑀁, 𑀲𑁂𑀲𑀸𑀦𑀁 𑀲𑀢𑁆𑀢𑀸𑀦𑀁 𑀆𑀬𑀢𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀯𑀸, 𑀇𑀥 𑀧𑀦 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀮𑀩𑁆𑀪𑀢𑀺. 𑀯𑀺𑀢𑁆𑀣𑀸𑀭𑁄 𑀧𑀦𑁂𑀢𑁆𑀣 𑀤𑀺𑀝𑁆𑀞𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀪𑀕𑀯𑀢𑀸 𑀯𑀼𑀢𑁆𑀢𑀲𑀼𑀢𑁆𑀢𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁆𑀫𑀻𑀢𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑁆𑀫𑀻𑀢𑀺 𑀪𑀯𑀸𑀫𑀺, 𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀜𑁆𑀜𑀺𑀢𑀫𑁂𑀢𑀦𑁆𑀢𑀺 𑀤𑀺𑀝𑁆𑀞𑀺𑀓𑀧𑁆𑀧𑀦𑀁 𑀏𑀢𑀁. 𑀅𑀬𑀫𑀳𑀫𑀲𑁆𑀫𑀻𑀢𑀺 𑀅𑀬𑀁 𑀅𑀳𑀁 𑀅𑀲𑁆𑀫𑀺 𑀪𑀯𑀸𑀫𑀺.

𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀻𑀢𑀺 𑀞𑀧𑁂𑀢𑁆𑀯𑀸 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑁂.

𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀭𑀚𑁆𑀚𑀦𑁆𑀢𑀻𑀢𑀺 𑀲𑀓𑀮𑀸 𑀅𑀦𑁆𑀥𑀩𑀸𑀮𑀸 𑀦𑀸𑀦𑀸𑀚𑀦𑀸 𑀮𑀕𑁆𑀕𑀦𑁆𑀢𑀺. 𑀲𑀢𑁆𑀢 𑀲𑁂𑀓𑁆𑀔𑀸 𑀯𑀺𑀭𑀚𑁆𑀚𑀦𑁆𑀢𑀻𑀢𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀲𑀢𑁆𑀢 𑀅𑀭𑀺𑀬𑀚𑀦𑀸 𑀯𑀺𑀭𑀸𑀕𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀭𑀳𑀸 𑀦𑁂𑀯 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀻𑀢𑀺 𑀓𑀺𑀮𑁂𑀲𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀉𑀪𑀬𑀫𑁆𑀧𑀺 𑀦 𑀓𑀭𑁄𑀢𑀺. 𑀔𑀬𑀸 𑀭𑀸𑀕𑀲𑁆𑀲𑀸𑀢𑀺𑀆𑀤𑀬𑁄 𑀢𑀺𑀯𑀺𑀥𑀸𑀧𑀺 𑀦𑀺𑀩𑁆𑀩𑀸𑀦𑀫𑁂𑀯.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀚𑀭𑀸𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.