𑁫. 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁧. 𑀧𑀜𑁆𑀘𑀫𑁂 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑁂 𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄𑀢𑀺 𑀇𑀤𑀁 𑀧𑀭𑀫𑀦𑁆𑀢𑀺 𑀕𑀳𑁂𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀫𑀸𑀦𑁄. 𑀬𑀤𑀼𑀢𑁆𑀢𑀭𑀺𑀁 𑀓𑀼𑀭𑀼𑀢𑁂𑀢𑀺 𑀬𑀁 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀺𑀁 𑀲𑁂𑀝𑁆𑀞𑀁 𑀓𑀭𑁄𑀢𑀺. 𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳𑀸𑀢𑀺 𑀢𑀁 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀺𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑁂 𑀲𑀩𑁆𑀩𑁂 ‘‘𑀳𑀻𑀦𑀸 𑀇𑀫𑁂’’𑀢𑀺 𑀆𑀳. 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀲𑁄 𑀤𑀺𑀝𑁆𑀞𑀺𑀓𑀮𑀳𑁂 𑀅𑀯𑀻𑀢𑀺𑀯𑀢𑁆𑀢𑁄𑀯 𑀳𑁄𑀢𑀺.

𑀯𑀲𑀦𑁆𑀢𑀻𑀢𑀺 𑀧𑀞𑀫𑀼𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀯𑀲𑁂𑀦 𑀯𑀲𑀦𑁆𑀢𑀺. 𑀧𑀯𑀲𑀦𑁆𑀢𑀻𑀢𑀺 𑀧𑀯𑀺𑀲𑀺𑀢𑁆𑀯𑀸 𑀯𑀲𑀦𑁆𑀢𑀺. 𑀆𑀯𑀲𑀦𑁆𑀢𑀻𑀢𑀺 𑀯𑀺𑀲𑁂𑀲𑁂𑀦 𑀯𑀲𑀦𑁆𑀢𑀺. 𑀧𑀭𑀺𑀯𑀲𑀦𑁆𑀢𑀻𑀢𑀺 𑀲𑀩𑁆𑀩𑀪𑀸𑀕𑁂𑀦 𑀯𑀲𑀦𑁆𑀢𑀺. 𑀢𑀁 𑀉𑀧𑀫𑀸𑀬 𑀲𑀸𑀥𑁂𑀦𑁆𑀢𑁄 ‘‘𑀬𑀣𑀸 𑀆𑀕𑀸𑀭𑀺𑀓𑀸 𑀯𑀸’’𑀢𑀺𑀆𑀤𑀺𑀫𑀸𑀳. 𑀆𑀕𑀸𑀭𑀺𑀓𑀸 𑀯𑀸𑀢𑀺 𑀖𑀭𑀲𑀸𑀫𑀺𑀓𑀸. 𑀖𑀭𑁂𑀲𑀼 𑀯𑀲𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀖𑀭𑁂𑀲𑀼 𑀆𑀲𑀗𑁆𑀓𑀯𑀺𑀭𑀳𑀺𑀢𑀸 𑀳𑀼𑀢𑁆𑀯𑀸 𑀦𑀺𑀯𑀲𑀦𑁆𑀢𑀺. 𑀲𑀸𑀧𑀢𑁆𑀢𑀺𑀓𑀸 𑀯𑀸𑀢𑀺 𑀆𑀧𑀢𑁆𑀢𑀺𑀩𑀳𑀼𑀮𑀸. 𑀲𑀓𑀺𑀮𑁂𑀲𑀸 𑀯𑀸𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀩𑀳𑀼𑀮𑀸. 𑀉𑀢𑁆𑀢𑀭𑀺𑀁 𑀓𑀭𑁄𑀢𑀻𑀢𑀺 𑀅𑀢𑀺𑀭𑁂𑀓𑀁 𑀓𑀭𑁄𑀢𑀺. 𑀅𑀬𑀁 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀽𑀢𑀺 ‘𑀅𑀬𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀲𑀩𑁆𑀩𑀁 𑀚𑀸𑀦𑀸𑀢𑀺’.

𑀲𑀩𑁆𑀩𑁂 𑀧𑀭𑀧𑁆𑀧𑀯𑀸𑀤𑁂 𑀔𑀺𑀧𑀢𑀻𑀢𑀺 𑀲𑀩𑁆𑀩𑀸 𑀧𑀭𑀮𑀤𑁆𑀥𑀺𑀬𑁄 𑀙𑀟𑁆𑀟𑁂𑀢𑀺. 𑀉𑀓𑁆𑀔𑀺𑀧𑀢𑀻𑀢𑀺 𑀦𑀻𑀳𑀭𑀢𑀺. 𑀧𑀭𑀺𑀓𑁆𑀔𑀺𑀧𑀢𑀻𑀢𑀺 𑀧𑀭𑀫𑁆𑀫𑀼𑀔𑁂 𑀓𑀭𑁄𑀢𑀺. 𑀤𑀺𑀝𑁆𑀞𑀺𑀫𑁂𑀥𑀕𑀸𑀦𑀻𑀢𑀺 𑀤𑀺𑀝𑁆𑀞𑀺𑀯𑀺𑀳𑁂𑀲𑀓𑀸𑀦𑀺.

𑁩𑁨. 𑀤𑀼𑀢𑀺𑀬𑀕𑀸𑀣𑀸𑀬𑀢𑁆𑀣𑁄 𑁋 𑀏𑀯𑀁 𑀅𑀯𑀻𑀢𑀺𑀯𑀢𑁆𑀢𑁄 𑀘 𑀬𑀁 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀯𑀢𑁆𑀣𑀽𑀲𑀼 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀆𑀦𑀺𑀲𑀁𑀲𑀁 𑀧𑀲𑁆𑀲𑀢𑀺, 𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀆𑀦𑀺𑀲𑀁𑀲𑀁 ‘‘𑀇𑀤𑀁 𑀲𑁂𑀝𑁆𑀞’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀁 𑀲𑀩𑁆𑀩𑀁 𑀧𑀭𑀲𑀢𑁆𑀣𑀸𑀭𑀸𑀤𑀺𑀓𑀁 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺.

𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀻𑀢𑀺 𑀤𑁆𑀯𑁂 𑀕𑀼𑀡𑁂 𑀑𑀮𑁄𑀓𑁂𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑀸𑀢𑀺 𑀤𑀺𑀝𑁆𑀞𑁂 𑀧𑀘𑁆𑀘𑀓𑁆𑀔𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀘𑁆𑀘𑀦𑀓𑀭𑀡𑀁. 𑀲𑀫𑁆𑀧𑀭𑀸𑀬𑀺𑀓𑀜𑁆𑀘𑀸𑀢𑀺 𑀧𑀭𑀮𑁄𑀓𑁂 𑀧𑀝𑀺𑀮𑀪𑀺𑀢𑀩𑁆𑀩𑀕𑀼𑀡𑀜𑁆𑀘. 𑀬𑀁𑀤𑀺𑀝𑁆𑀞𑀺𑀓𑁄 𑀲𑀢𑁆𑀣𑀸𑀢𑀺 𑀬𑀁𑀮𑀤𑁆𑀥𑀺𑀓𑁄 𑀢𑀺𑀢𑁆𑀣𑀸𑀬𑀢𑀦𑀲𑀸𑀫𑀺𑀓𑁄. 𑀅𑀮𑀁 𑀦𑀸𑀕𑀢𑁆𑀢𑀸𑀬 𑀯𑀸𑀢𑀺 𑀦𑀸𑀕𑀭𑀸𑀚𑀪𑀸𑀯𑀸𑀬 𑀯𑀸 𑀧𑀭𑀺𑀬𑀢𑁆𑀢𑀁. 𑀲𑀼𑀧𑀡𑁆𑀡𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁂𑀯𑀢𑁆𑀢𑀸𑀬 𑀯𑀸𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸𑀤𑀺𑀪𑀸𑀯𑀸𑀬. 𑀆𑀬𑀢𑀺𑀁 𑀨𑀮𑀧𑀸𑀝𑀺𑀓𑀗𑁆𑀔𑀻 𑀳𑁄𑀢𑀻𑀢𑀺 𑀅𑀦𑀸𑀕𑀢𑁂 𑀯𑀺𑀧𑀸𑀓𑀨𑀮𑀁 𑀧𑀢𑁆𑀣𑀬𑀸𑀦𑁄 𑀳𑁄𑀢𑀺. 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑀭𑀽𑀧𑀸𑀬𑀢𑀦𑀲𑁆𑀲 𑀯𑀲𑁂𑀦 𑀲𑀼𑀤𑁆𑀥𑀺𑀬𑀸 𑀳𑁂𑀢𑀼𑀢𑁆𑀢𑀸𑀧𑀺 𑀅𑀢𑁆𑀢𑀦𑁄 𑀕𑀳𑀺𑀢𑀕𑀳𑀡𑁂𑀦 𑀤𑁆𑀯𑁂 𑀕𑀼𑀡𑁂 𑀑𑀮𑁄𑀓𑁂𑀢𑀺. 𑀲𑀼𑀢𑀲𑀼𑀤𑁆𑀥𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁩. 𑀢𑀢𑀺𑀬𑀕𑀸𑀣𑀸𑀬𑀢𑁆𑀣𑁄 𑁋 𑀏𑀯𑀁 𑀧𑀲𑁆𑀲𑀢𑁄 𑀘 𑀬𑀁 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀺𑀁 𑀦𑀺𑀲𑁆𑀲𑀺𑀢𑁄 𑀅𑀜𑁆𑀜𑀁 𑀧𑀭𑀲𑀢𑁆𑀣𑀸𑀭𑀸𑀤𑀺𑀁 𑀳𑀻𑀦𑀁 𑀧𑀲𑁆𑀲𑀢𑀺, 𑀢𑀁 𑀧𑀦 𑀤𑀲𑁆𑀲𑀦𑀁 𑀕𑀦𑁆𑀣𑀫𑁂𑀯 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀩𑀦𑁆𑀥𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀏𑀢𑀤𑁂𑀯, 𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬, 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀼𑀲𑀮𑀸𑀢𑀺 𑀔𑀦𑁆𑀥𑀸𑀤𑀺𑀚𑀸𑀦𑀦𑁂 𑀙𑁂𑀓𑀸. 𑀔𑀦𑁆𑀥𑀓𑀼𑀲𑀮𑀸𑀢𑀺 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀓𑀼𑀲𑀮𑀸. 𑀥𑀸𑀢𑀼𑀆𑀬𑀢𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀫𑀕𑁆𑀕𑀓𑀼𑀲𑀮𑀸𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼. 𑀨𑀮𑀓𑀼𑀲𑀮𑀸𑀢𑀺 𑀘𑀢𑀽𑀲𑀼 𑀨𑀮𑁂𑀲𑀼. 𑀦𑀺𑀩𑁆𑀩𑀸𑀦𑀓𑀼𑀲𑀮𑀸𑀢𑀺 𑀤𑀼𑀯𑀺𑀥𑁂 𑀦𑀺𑀩𑁆𑀩𑀸𑀦𑁂 𑀙𑁂𑀓𑀸. 𑀢𑁂 𑀓𑀼𑀲𑀮𑀸𑀢𑀺 𑀢𑁂 𑀏𑀢𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀙𑁂𑀓𑀸. 𑀏𑀯𑀁 𑀯𑀤𑀦𑁆𑀢𑀻𑀢𑀺 𑀏𑀯𑀁 𑀓𑀣𑁂𑀦𑁆𑀢𑀺. 𑀕𑀦𑁆𑀣𑁄 𑀏𑀲𑁄𑀢𑀺 𑀧𑀲𑁆𑀲𑀢𑁄 𑀘 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀤𑀺𑀦𑀺𑀲𑁆𑀲𑀺𑀢𑀜𑁆𑀘 𑀅𑀜𑁆𑀜𑀁 𑀧𑀭𑀲𑀢𑁆𑀣𑀸𑀭𑀸𑀤𑀺𑀁 𑀳𑀻𑀦𑀢𑁄 𑀤𑀲𑁆𑀲𑀦𑀜𑁆𑀘 𑀕𑀦𑁆𑀣𑁄 𑀩𑀦𑁆𑀥𑀦𑁄 𑀏𑀲𑁄𑀢𑀺 𑀯𑀤𑀦𑁆𑀢𑀺. 𑀮𑀕𑁆𑀕𑀦𑀁 𑀏𑀢𑀦𑁆𑀢𑀺 𑀏𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀸𑀕𑀤𑀦𑁆𑀢𑁂 𑀮𑀕𑁆𑀕𑀺𑀢𑀁 𑀯𑀺𑀬 𑀅𑀥𑁄𑀮𑀫𑁆𑀩𑀦𑀁. 𑀩𑀦𑁆𑀥𑀦𑀁 𑀏𑀢𑀦𑁆𑀢𑀺 𑀦𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀤𑀼𑀓𑁆𑀔𑀝𑁆𑀞𑁂𑀦 𑀲𑀗𑁆𑀔𑀮𑀺𑀓𑀸𑀤𑀺𑀩𑀦𑁆𑀥𑀦𑀁 𑀯𑀺𑀬 𑀏𑀢𑀁 𑀩𑀦𑁆𑀥𑀦𑀁. 𑀧𑀮𑀺𑀩𑁄𑀥𑁄 𑀏𑀲𑁄𑀢𑀺 𑀲𑀁𑀲𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑀼𑀁 𑀅𑀧𑁆𑀧𑀤𑀸𑀦𑀝𑁆𑀞𑁂𑀦 𑀏𑀲𑁄 𑀧𑀮𑀺𑀩𑁄𑀥𑁄.

𑁩𑁪. 𑀘𑀢𑀼𑀢𑁆𑀣𑀕𑀸𑀣𑀸𑀬𑀢𑁆𑀣𑁄 𑁋 𑀦 𑀓𑁂𑀯𑀮𑀁 𑀤𑀺𑀝𑁆𑀞𑀲𑀼𑀢𑀸𑀤𑀻𑀲𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬, 𑀅𑀧𑀺𑀘 𑀔𑁄 𑀧𑀦 𑀅𑀲𑀜𑁆𑀚𑀸𑀢𑀁 𑀉𑀧𑀭𑀽𑀧𑀭𑀺 𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀦 𑀚𑀦𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀻𑀤𑀺𑀲𑀁? 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺, 𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀤𑀺𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸 𑀬𑀸 𑀓𑀧𑁆𑀧𑀺𑀬𑀢𑀺, 𑀏𑀢𑀁 𑀤𑀺𑀝𑁆𑀞𑀺𑀁 𑀦 𑀓𑀧𑁆𑀧𑁂𑀬𑁆𑀬. 𑀦 𑀓𑁂𑀯𑀮𑀜𑁆𑀘 𑀤𑀺𑀝𑁆𑀞𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀅𑀧𑀺𑀘 𑀔𑁄 𑀧𑀦 𑀫𑀸𑀦𑁂𑀦𑀧𑀺 𑀚𑀸𑀢𑀺𑀆𑀤𑀻𑀳𑀺 𑀯𑀢𑁆𑀣𑀽𑀳𑀺 𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬, 𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀻𑀢𑀺.

𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀜𑀸𑀬 𑀯𑀸. 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸𑀢𑀺 𑀮𑁄𑀓𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀜𑀸𑀬 𑀯𑀸. 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸𑀢𑀺 𑀯𑀺𑀧𑀭𑀻𑀢𑀲𑀪𑀸𑀯𑁂𑀦 𑀧𑀯𑀢𑁆𑀢𑀸𑀬 𑀧𑀜𑁆𑀜𑀸𑀬 𑀅𑀫𑀼𑀢𑁆𑀢𑁂 𑀫𑀼𑀢𑁆𑀢𑀁 𑀧𑀲𑁆𑀲𑀸𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑁂𑀦 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸.

𑁩𑁫. 𑀧𑀜𑁆𑀘𑀫𑀕𑀸𑀣𑀸𑀬𑀢𑁆𑀣𑁄 𑁋 𑀏𑀯𑀜𑁆𑀳𑀺 𑀤𑀺𑀝𑁆𑀞𑀺𑀁 𑀅𑀓𑀧𑁆𑀧𑁂𑀦𑁆𑀢𑁄 𑀅𑀫𑀜𑁆𑀜𑀫𑀸𑀦𑁄 𑀘 𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄 𑀬𑀁 𑀧𑀼𑀩𑁆𑀩𑁂 𑀕𑀳𑀺𑀢𑀁, 𑀢𑀁 𑀧𑀳𑀸𑀬 𑀧𑀭𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀢𑀲𑁆𑀫𑀺𑀫𑁆𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀜𑀸𑀡𑁂 𑀤𑀼𑀯𑀺𑀥𑀁 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺, 𑀅𑀓𑀭𑁄𑀦𑁆𑀢𑁄 𑀘 𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦𑀸𑀦𑀸𑀤𑀺𑀝𑁆𑀞𑀺𑀯𑀲𑁂𑀦 𑀪𑀺𑀦𑁆𑀦𑁂𑀲𑀼 𑀲𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀕𑀘𑁆𑀙𑀦𑀥𑀫𑁆𑀫𑁄 𑀳𑀼𑀢𑁆𑀯𑀸 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀻𑀲𑀼 𑀓𑀺𑀜𑁆𑀘𑀺 𑀤𑀺𑀝𑁆𑀞𑀺𑀁 𑀦 𑀧𑀘𑁆𑀘𑁂𑀢𑀺, 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀳𑀺 𑀘𑀢𑀽𑀳𑀺 𑀪𑀼𑀲𑀁 𑀕𑀳𑀡𑁂𑀳𑀺 𑀲 𑀯𑁂 𑀯𑀺𑀬𑀢𑁆𑀢𑁂𑀲𑀽𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀦𑀺𑀘𑁆𑀙𑀺𑀢𑁂𑀲𑀼. 𑀪𑀺𑀦𑁆𑀦𑁂𑀲𑀽𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀦𑁂𑀲𑀼.

𑁩𑁬. 𑀇𑀤𑀸𑀦𑀺 𑀬𑁄 𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀯𑀼𑀢𑁆𑀢𑁄 𑀔𑀻𑀡𑀸𑀲𑀯𑁄, 𑀢𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 ‘‘𑀬𑀲𑁆𑀲𑀽𑀪𑀬𑀦𑁆𑀢𑁂’’𑀢𑀺𑀆𑀤𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀆𑀳. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀬𑀲𑁆𑀲𑀽𑀪𑀬𑀦𑁆𑀢𑁂𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂 𑀨𑀲𑁆𑀲𑀸𑀤𑀺𑀪𑁂𑀤𑁂. 𑀧𑀡𑀺𑀥𑀻𑀢𑀺 𑀢𑀡𑁆𑀳𑀸. 𑀪𑀯𑀸𑀪𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀪𑀯𑀸𑀬. 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀲𑀓𑀢𑁆𑀢𑀪𑀸𑀯𑀸𑀤𑀺𑀪𑁂𑀤𑁂 𑀇𑀥 𑀯𑀸 𑀧𑀭𑀢𑁆𑀢𑀪𑀸𑀯𑀸𑀤𑀺𑀪𑁂𑀤𑁂 𑀧𑀭𑀢𑁆𑀣 𑀯𑀸.

𑀨𑀲𑁆𑀲𑁄 𑀏𑀓𑁄 𑀅𑀦𑁆𑀢𑁄𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀏𑀓𑁄 𑀓𑁄𑀝𑁆𑀞𑀸𑀲𑁄. 𑀨𑀲𑁆𑀲𑀲𑀫𑀼𑀤𑀬𑁄𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑁄. 𑀬𑀢𑁄 𑀲𑀫𑀼𑀤𑁂𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀲𑀫𑀼𑀤𑀬𑁄. 𑀤𑀼𑀢𑀺𑀬𑁄 𑀅𑀦𑁆𑀢𑁄𑀢𑀺 𑀤𑀼𑀢𑀺𑀬𑁄 𑀓𑁄𑀝𑁆𑀞𑀸𑀲𑁄. 𑀅𑀢𑀻𑀢𑀦𑁆𑀢𑀺 𑀅𑀢𑀺 𑀇𑀢𑀁 𑀅𑀢𑀻𑀢𑀁, 𑀅𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀸𑀕𑀢𑀦𑁆𑀢𑀺 𑀦 𑀆𑀕𑀢𑀁, 𑀅𑀦𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀔𑀸 𑀯𑁂𑀤𑀦𑀸𑀤𑀬𑁄 𑀯𑀺𑀲𑀪𑀸𑀕𑀯𑀲𑁂𑀦. 𑀦𑀸𑀫𑀭𑀽𑀧𑀤𑀼𑀓𑀁 𑀦𑀫𑀦𑀭𑀼𑀧𑁆𑀧𑀦𑀯𑀲𑁂𑀦. 𑀅𑀚𑁆𑀛𑀢𑁆𑀢𑀺𑀓𑀸𑀤𑀬𑁄 𑀅𑀚𑁆𑀛𑀢𑁆𑀢𑀩𑀸𑀳𑀺𑀭𑀯𑀲𑁂𑀦. 𑀲𑀓𑁆𑀓𑀸𑀬𑀸𑀤𑀬𑁄 𑀔𑀦𑁆𑀥𑀧𑀜𑁆𑀘𑀓𑀸𑀦𑀁 𑀧𑀯𑀢𑁆𑀢𑀺𑀲𑀫𑀼𑀤𑀬𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀓𑀢𑁆𑀢𑀪𑀸𑀯𑁄𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑁄. 𑀧𑀭𑀢𑁆𑀢𑀪𑀸𑀯𑁄𑀢𑀺 𑀧𑀭𑀲𑁆𑀲 𑀅𑀢𑁆𑀢𑀪𑀸𑀯𑁄.

𑁩𑁭. 𑀤𑀼𑀢𑀺𑀬𑀕𑀸𑀣𑀸𑀬 𑀤𑀺𑀝𑁆𑀞𑁂 𑀯𑀸𑀢𑀺 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸 𑀯𑀸. 𑀏𑀲 𑀦𑀬𑁄 𑀲𑀼𑀢𑀸𑀤𑀻𑀲𑀼. 𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀲𑀫𑀼𑀝𑁆𑀞𑀸𑀧𑀺𑀓𑀸 𑀤𑀺𑀝𑁆𑀞𑀺.

𑀅𑀧𑀭𑀸𑀫𑀲𑀦𑁆𑀢𑀦𑁆𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀦 𑀧𑀭𑀸𑀫𑀲𑀦𑁆𑀢𑀁. 𑀅𑀦𑀪𑀺𑀦𑀺𑀯𑁂𑀲𑀦𑁆𑀢𑀦𑁆𑀢𑀺 𑀢𑁂𑀳𑁂𑀯 𑀅𑀦𑀪𑀺𑀦𑀺𑀯𑀺𑀲𑀦𑁆𑀢𑀁.

‘‘𑀯𑀺𑀦𑀺𑀩𑀤𑁆𑀥𑁄’’𑀢𑀺 𑀯𑀸𑀢𑀺 𑀫𑀸𑀦𑁂𑀦 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸. ‘‘𑀧𑀭𑀸𑀫𑀝𑁆𑀞𑁄’’𑀢𑀺 𑀯𑀸𑀢𑀺 𑀧𑀭𑀢𑁄 𑀦𑀺𑀘𑁆𑀘𑀲𑀼𑀔𑀲𑀼𑀪𑀸𑀤𑀻𑀳𑀺 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸. 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀉𑀤𑁆𑀥𑀘𑁆𑀘𑀯𑀲𑁂𑀦. 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦. 𑀣𑀸𑀫𑀕𑀢𑁄𑀢𑀺 𑀅𑀦𑀼𑀲𑀬𑀯𑀲𑁂𑀦. 𑀕𑀢𑀺𑀬𑀸𑀢𑀺 𑀕𑀦𑁆𑀢𑀩𑁆𑀩𑀯𑀲𑁂𑀦.

𑁩𑁮. 𑀢𑀢𑀺𑀬𑀕𑀸𑀣𑀸𑀬 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀥𑀫𑁆𑀫𑀸𑀧𑀺 𑀢𑁂𑀲𑀁 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀉𑀤𑀸. 𑁫𑁪) 𑀏𑀯𑀁 𑀦 𑀧𑀝𑀺𑀘𑁆𑀙𑀺𑀢𑀸. 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻𑀢𑀺 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀢𑁄 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀦 𑀦𑀸𑀕𑀘𑁆𑀙𑀢𑀺 𑀧𑀜𑁆𑀘𑀳𑀺 𑀘 𑀆𑀓𑀸𑀭𑁂𑀳𑀺 𑀢𑀸𑀤𑀻 𑀳𑁄𑀢𑀻𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀢𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁧𑁩𑁨) 𑀦𑀬𑁂𑀦 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀘𑀢𑀽𑀳𑀺 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀢𑀺𑀝𑁆𑀞𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑁂 𑀓𑀸𑀬𑁂 𑀤𑀺𑀝𑁆𑀞𑀺. 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀥. 𑀲. 𑁧𑁨𑁨𑁧) 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀻𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀫. 𑀦𑀺. 𑁩.𑁨𑁭) 𑀏𑀓𑁂𑀓𑀁 𑀅𑀦𑁆𑀢𑀁 𑀅𑀢𑁆𑀣𑀻𑀢𑀺 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀻𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀏𑀓𑀽𑀦𑀯𑀻𑀲𑀧𑀤𑀸𑀦𑀁 𑀲𑀸𑀥𑀸𑀭𑀡𑀁 𑀫𑀽𑀮𑀧𑀤𑀁. 𑀬𑀸 𑀤𑀺𑀝𑁆𑀞𑀺, 𑀢𑀤𑁂𑀯 𑀤𑀺𑀝𑁆𑀞𑀺𑀕𑀢𑀁; 𑀬𑀸 𑀤𑀺𑀝𑁆𑀞𑀺, 𑀢𑀤𑁂𑀯 𑀤𑀺𑀝𑁆𑀞𑀺𑀕𑀳𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄. 𑀬𑀸 𑀅𑀬𑀸𑀣𑀸𑀯𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺, 𑀢𑀤𑁂𑀯 𑀤𑀺𑀝𑁆𑀞𑀻𑀲𑀼 𑀕𑀢𑀁 𑀤𑀲𑁆𑀲𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑀸 𑀅𑀦𑁆𑀢𑁄𑀕𑀢𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀳𑁂𑀝𑁆𑀞𑀸𑀧𑀺𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯.

𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀸𑀦𑀁 𑀏𑀓𑀦𑁆𑀢𑀕𑀢𑀢𑁆𑀢𑀸𑀢𑀺𑀧𑀺 𑀤𑀺𑀝𑁆𑀞𑀺𑀕𑀢𑀁. 𑀢𑀢𑁆𑀣 𑀲𑀲𑁆𑀲𑀢𑁄𑀢𑀺 𑀦𑀺𑀘𑁆𑀘𑁄. 𑀮𑁄𑀓𑁄𑀢𑀺 𑀅𑀢𑁆𑀢𑀸. ‘‘𑀇𑀥 𑀲𑀭𑀻𑀭𑀁𑀬𑁂𑀯 𑀦𑀲𑁆𑀲𑀢𑀺, 𑀅𑀢𑁆𑀢𑀸 𑀧𑀦 𑀇𑀥 𑀧𑀭𑀢𑁆𑀣 𑀘 𑀲𑁄𑀬𑁂𑀯𑀸’’𑀢𑀺 𑀫𑀜𑁆𑀜𑀦𑁆𑀢𑀺. 𑀲𑁄 𑀳𑀺 𑀲𑀸𑀫𑀜𑁆𑀜𑁂𑀯 𑀆𑀮𑁄𑀓𑁂𑀢𑀻𑀢𑀺 𑀓𑀢𑁆𑀯𑀸 𑀮𑁄𑀓𑁄𑀢𑀺 𑀫𑀜𑁆𑀜𑀢𑀺. 𑀅𑀲𑀲𑁆𑀲𑀢𑁄𑀢𑀺 𑀅𑀦𑀺𑀘𑁆𑀘𑁄. 𑀅𑀢𑁆𑀢𑀸 𑀲𑀭𑀻𑀭𑁂𑀦𑁂𑀯 𑀲𑀳 𑀦𑀲𑁆𑀲𑀢𑀻𑀢𑀺 𑀫𑀜𑁆𑀜𑀦𑁆𑀢𑀺. 𑀅𑀦𑁆𑀢𑀯𑀸𑀢𑀺 𑀧𑀭𑀺𑀢𑁆𑀢𑁂 𑀓𑀲𑀺𑀡𑁂 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀭𑀺𑀢𑁆𑀢𑀓𑀲𑀺𑀡𑀸𑀭𑀫𑁆𑀫𑀡𑀁 𑀘𑁂𑀢𑀦𑀁 ‘‘𑀲𑀧𑀭𑀺𑀬𑀦𑁆𑀢𑁄 𑀅𑀢𑁆𑀢𑀸’’𑀢𑀺 𑀫𑀜𑁆𑀜𑀦𑁆𑀢𑀺. 𑀅𑀦𑀦𑁆𑀢 𑀯𑀸𑀢𑀺 𑀦 𑀅𑀦𑁆𑀢𑀯𑀸 𑀅𑀧𑁆𑀧𑀫𑀸𑀡𑁂 𑀓𑀲𑀺𑀡𑁂 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀅𑀧𑁆𑀧𑀫𑀸𑀡𑀓𑀲𑀺𑀡𑀸𑀭𑀫𑁆𑀫𑀡𑀁 𑀘𑁂𑀢𑀦𑀁 ‘‘𑀅𑀧𑀭𑀺𑀬𑀦𑁆𑀢𑁄 𑀅𑀢𑁆𑀢𑀸’’𑀢𑀺 𑀫𑀜𑁆𑀜𑀦𑁆𑀢𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀚𑀻𑀯𑁄 𑀘 𑀲𑀭𑀻𑀭𑀜𑁆𑀘 𑀢𑀁𑀬𑁂𑀯. 𑀚𑀻𑀯𑁄𑀢𑀺 𑀅𑀢𑁆𑀢𑀸, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀦𑀧𑀼𑀁𑀲𑀓𑀯𑀘𑀦𑀁 𑀓𑀢𑀁. 𑀲𑀭𑀻𑀭𑀦𑁆𑀢𑀺 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀧𑀜𑁆𑀘𑀓𑀁. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀅𑀜𑁆𑀜𑁄 𑀚𑀻𑀯𑁄 𑀅𑀜𑁆𑀜𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀔𑀦𑁆𑀥𑀸 𑀇𑀥𑁂𑀯 𑀯𑀺𑀦𑀲𑁆𑀲𑀦𑁆𑀢𑀺, 𑀲𑀢𑁆𑀢𑁄 𑀫𑀭𑀡𑀢𑁄 𑀧𑀭𑀁 𑀳𑁄𑀢𑀺 𑀯𑀺𑀚𑁆𑀚𑀢𑀺 𑀦 𑀦𑀲𑁆𑀲𑀢𑀺, 𑀢𑀣𑀸𑀕𑀢𑁄𑀢𑀺 𑀘𑁂𑀢𑀁 𑀲𑀢𑁆𑀢𑀸𑀥𑀺𑀯𑀘𑀦𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀢𑀣𑀸𑀕𑀢𑁄𑀢𑀺 𑀅𑀭𑀳𑀸’’𑀢𑀺 𑀯𑀤𑀦𑁆𑀢𑀺. 𑀇𑀫𑁂 𑀦 𑀳𑁄𑀢𑀻𑀢𑀺 𑀧𑀓𑁆𑀔𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀏𑀯𑀁 𑀕𑀡𑁆𑀳𑀦𑁆𑀢𑀺. 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀔𑀦𑁆𑀥𑀸𑀧𑀺 𑀇𑀥𑁂𑀯 𑀦𑀲𑁆𑀲𑀦𑁆𑀢𑀺, 𑀢𑀣𑀸𑀕𑀢𑁄 𑀘 𑀫𑀭𑀡𑀢𑁄 𑀧𑀭𑀁 𑀦 𑀳𑁄𑀢𑀺 𑀉𑀘𑁆𑀙𑀺𑀚𑁆𑀚𑀢𑀺. 𑀇𑀫𑁂 𑀳𑁄𑀢𑀻𑀢𑀺 𑀧𑀓𑁆𑀔𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀏𑀯𑀁 𑀕𑀡𑁆𑀳𑀦𑁆𑀢𑀺. 𑀳𑁄𑀢𑀺 𑀘 𑀦 𑀘 𑀳𑁄𑀢𑀻𑀢𑀺 𑀇𑀫𑁂 𑀏𑀓𑁂𑀓𑀧𑀓𑁆𑀔𑀧𑀭𑀺𑀕𑁆𑀕𑀳𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀉𑀪𑀬𑀧𑀓𑁆𑀔𑀁 𑀕𑀡𑁆𑀳𑀦𑁆𑀢𑀺. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀻𑀢𑀺 𑀇𑀫𑁂 𑀉𑀪𑀬𑀧𑀓𑁆𑀔𑀧𑀭𑀺𑀕𑁆𑀕𑀳𑁂 𑀉𑀪𑀬𑀤𑁄𑀲𑀸𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀳𑁄𑀢𑀺 𑀘 𑀦 𑀳𑁄𑀢𑀻’’𑀢𑀺 𑀘 ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀻’’𑀢𑀺 𑀘 𑀅𑀫𑀭𑀸𑀯𑀺𑀓𑁆𑀔𑁂𑀧𑀧𑀓𑁆𑀔𑀁 𑀕𑀡𑁆𑀳𑀦𑁆𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀦𑀬𑁄 (𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁧𑁩) 𑁋 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸𑀢𑀺𑀆𑀤𑀻𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 𑀤𑀺𑀝𑁆𑀞𑀺𑀧𑀪𑁂𑀤𑁄𑀯 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑀲𑁆𑀲𑀢𑁄𑀮𑁄𑀓𑁄𑀢𑀺 𑀘 𑀔𑀦𑁆𑀥𑀧𑀜𑁆𑀘𑀓𑀁 𑀮𑁄𑀓𑁄𑀢𑀺 𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀮𑁄𑀓𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀩𑁆𑀩𑀓𑀸𑀮𑀺𑀓𑁄’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀲𑀲𑁆𑀲𑀢𑀦𑁆𑀢𑀺 𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀅𑀲𑀲𑁆𑀲𑀢𑁄𑀢𑀺 𑀢𑀫𑁂𑀯 𑀮𑁄𑀓𑀁 ‘‘𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀉𑀘𑁆𑀙𑁂𑀤𑀕𑁆𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀯𑀸𑀢𑀺 𑀧𑀭𑀺𑀢𑁆𑀢𑀓𑀲𑀺𑀡𑀮𑀸𑀪𑀺𑀦𑁄 𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸 𑀓𑀲𑀺𑀡𑁂 𑀲𑀫𑀸𑀧𑀦𑁆𑀦𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀮𑁄𑀓𑁄’’𑀢𑀺 𑀘 𑀓𑀲𑀺𑀡𑀧𑀭𑀺𑀘𑁆𑀙𑁂𑀤𑀦𑁆𑀢𑁂𑀦 ‘‘𑀅𑀦𑁆𑀢𑀯𑀸’’𑀢𑀺 𑀘 𑀕𑀡𑁆𑀳𑀦𑁆𑀢𑀲𑁆𑀲 ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀧𑀺 𑀳𑁄𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀧𑀺. 𑀯𑀺𑀧𑀼𑀮𑀓𑀲𑀺𑀡𑀮𑀸𑀪𑀺𑀦𑁄 𑀧𑀦 𑀢𑀲𑁆𑀫𑀺𑀁 𑀓𑀲𑀺𑀡𑁂 𑀲𑀫𑀸𑀧𑀦𑁆𑀦𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀮𑁄𑀓𑁄’’𑀢𑀺 𑀘 𑀓𑀲𑀺𑀡𑀧𑀭𑀺𑀘𑁆𑀙𑁂𑀤𑀦𑁆𑀢𑁂𑀦 𑀘 ‘‘𑀅𑀦𑀦𑁆𑀢𑁄’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 ‘‘𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀳𑁄𑀢𑀺, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀧𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀪𑁂𑀤𑀦𑀥𑀫𑁆𑀫𑀲𑁆𑀲 𑀲𑀭𑀻𑀭𑀲𑁆𑀲𑁂𑀯 ‘‘𑀚𑀻𑀯’’𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 ‘‘𑀲𑀭𑀻𑀭𑁂 𑀉𑀘𑁆𑀙𑀺𑀚𑁆𑀚𑀫𑀸𑀦𑁂 𑀚𑀻𑀯𑀫𑁆𑀧𑀺 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀉𑀘𑁆𑀙𑁂𑀤𑀕𑁆𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀤𑀼𑀢𑀺𑀬𑀧𑀤𑁂𑀦 𑀲𑀭𑀻𑀭𑀢𑁄 𑀅𑀜𑁆𑀜𑀲𑁆𑀲 𑀚𑀻𑀯𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀲𑀭𑀻𑀭𑁂 𑀘 𑀉𑀘𑁆𑀙𑀺𑀚𑁆𑀚𑀫𑀸𑀦𑁂𑀧𑀺 𑀚𑀻𑀯𑀁 𑀦 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀲𑀲𑁆𑀲𑀢𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀳𑁄𑀢𑀺 𑀢𑀣𑀸𑀕𑀢𑁄𑀢𑀺𑀆𑀤𑀻𑀲𑀼 ‘‘𑀲𑀢𑁆𑀢𑁄 𑀢𑀣𑀸𑀕𑀢𑁄 𑀦𑀸𑀫, 𑀲𑁄 𑀧𑀭𑀁 𑀫𑀭𑀡𑀸 𑀳𑁄𑀢𑀻’’𑀢𑀺 𑀕𑀡𑁆𑀳𑀢𑁄 𑀧𑀞𑀫𑀸 𑀲𑀲𑁆𑀲𑀢𑀤𑀺𑀝𑁆𑀞𑀺. ‘‘𑀦 𑀳𑁄𑀢𑀻’’𑀢𑀺 𑀕𑀡𑁆𑀳𑀢𑁄 𑀤𑀼𑀢𑀺𑀬𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀻’’𑀢𑀺 𑀕𑀡𑁆𑀳𑀢𑁄 𑀢𑀢𑀺𑀬𑀸 𑀏𑀓𑀘𑁆𑀘𑀲𑀲𑁆𑀲𑀢𑀤𑀺𑀝𑁆𑀞𑀺. ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀻’’𑀢𑀺 𑀕𑀡𑁆𑀳𑀢𑁄 𑀘𑀢𑀼𑀢𑁆𑀣𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀤𑀺𑀝𑁆𑀞𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀤𑀲𑀯𑀺𑀥𑀸 𑀤𑀺𑀝𑁆𑀞𑀺. 𑀬𑀣𑀸𑀬𑁄𑀕𑀁 𑀪𑀯𑀤𑀺𑀝𑁆𑀞𑀺 𑀘 𑀯𑀺𑀪𑀯𑀤𑀺𑀝𑁆𑀞𑀺 𑀘𑀸𑀢𑀺 𑀤𑁆𑀯𑀺𑀥𑀸 𑀳𑁄𑀢𑀺. 𑀢𑀸𑀲𑀼 𑀏𑀓𑀸𑀧𑀺 𑀢𑁂𑀲𑀁 𑀔𑀻𑀡𑀸𑀲𑀯𑀸𑀦𑀁 𑀦 𑀧𑀝𑀺𑀘𑁆𑀙𑀺𑀢𑀸𑀢𑀺 𑀅𑀢𑁆𑀣𑁄.

𑀬𑁂 𑀓𑀺𑀮𑁂𑀲𑀸𑀢𑀺 𑀬𑁂 𑀓𑀺𑀮𑁂𑀲𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂. 𑀦 𑀧𑀼𑀦𑁂𑀢𑀻𑀢𑀺 𑀦 𑀧𑀼𑀦 𑀏𑀢𑀺. 𑀦 𑀧𑀘𑁆𑀘𑁂𑀢𑀻𑀢𑀺 𑀧𑀼𑀦 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦 𑀧𑀝𑀺𑀏𑀢𑀺, 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀧𑀘𑁆𑀘𑀪𑀯𑁂 𑀦𑀸𑀕𑀘𑁆𑀙𑀢𑀺. 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀯𑀸 𑀲𑀤𑀺𑀲𑁄. 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀘 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀘 𑀅𑀦𑀼𑀦𑀬𑀧𑀝𑀺𑀖𑀁 𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀤𑁆𑀯𑀻𑀲𑀼 𑀲𑀤𑀺𑀲𑁄. 𑀘𑀢𑁆𑀢𑀸𑀯𑀻𑀢𑀺 𑀓𑀺𑀮𑁂𑀲𑁂 𑀘𑀚𑀺𑀢𑀯𑀸. 𑀢𑀺𑀡𑁆𑀡𑀸𑀯𑀻𑀢𑀺 𑀲𑀁𑀲𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑀯𑀸. 𑀫𑀼𑀢𑁆𑀢𑀸𑀯𑀻𑀢𑀺 𑀭𑀸𑀕𑀸𑀤𑀺𑀢𑁄 𑀫𑀼𑀢𑁆𑀢𑀯𑀸. 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻𑀢𑀺 𑀢𑁂𑀦 𑀢𑁂𑀦 𑀲𑀻𑀮𑀲𑀤𑁆𑀥𑀸𑀤𑀺𑀦𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀢𑁄 𑀲𑀤𑀺𑀲𑁄.

𑀢𑀁 𑀧𑀜𑁆𑀘𑀯𑀺𑀥𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀼𑀓𑀸𑀫𑁄 ‘‘𑀓𑀣𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑀸𑀪𑁂𑀧𑀻𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀮𑀸𑀪𑁂𑀧𑀺. 𑀅𑀮𑀸𑀪𑁂𑀧𑀻𑀢𑀺 𑀢𑁂𑀲𑀁 𑀅𑀮𑀸𑀪𑁂𑀧𑀺. 𑀬𑀲𑁂𑀧𑀻𑀢𑀺 𑀧𑀭𑀺𑀯𑀸𑀭𑁂𑀧𑀺. 𑀅𑀬𑀲𑁂𑀧𑀻𑀢𑀺 𑀧𑀭𑀺𑀯𑀸𑀭𑀯𑀺𑀧𑀢𑁆𑀢𑀺𑀬𑀸𑀧𑀺. 𑀧𑀲𑀁𑀲𑀸𑀬𑀧𑀻𑀢𑀺 𑀯𑀡𑁆𑀡𑀪𑀡𑀦𑀸𑀬𑀧𑀺. 𑀦𑀺𑀦𑁆𑀤𑀸𑀬𑀧𑀻𑀢𑀺 𑀕𑀭𑀳𑀸𑀬𑀧𑀺. 𑀲𑀼𑀔𑁂𑀧𑀻𑀢𑀺 𑀓𑀸𑀬𑀺𑀓𑀲𑀼𑀔𑁂𑀧𑀺. 𑀤𑀼𑀓𑁆𑀔𑁂𑀧𑀻𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑁂𑀧𑀺. 𑀏𑀓𑀜𑁆𑀘𑁂 𑀩𑀸𑀳𑀁 𑀕𑀦𑁆𑀥𑁂𑀦 𑀮𑀺𑀫𑁆𑀧𑁂𑀬𑁆𑀬𑀼𑀦𑁆𑀢𑀺 𑀲𑀘𑁂 𑀏𑀓𑀁 𑀩𑀸𑀳𑀁 𑀘𑀢𑀼𑀚𑀸𑀢𑀺𑀬𑀕𑀦𑁆𑀥𑁂𑀦 𑀮𑁂𑀧𑀁 𑀉𑀧𑀭𑀽𑀧𑀭𑀺 𑀤𑀤𑁂𑀬𑁆𑀬𑀼𑀁. 𑀯𑀸𑀲𑀺𑀬𑀸 𑀢𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀬𑀤𑀺 𑀏𑀓𑀁 𑀩𑀸𑀳𑀁 𑀯𑀟𑁆𑀠𑀓𑀻 𑀯𑀸𑀲𑀺𑀬𑀸 𑀢𑀘𑁆𑀙𑁂𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀢𑀦𑀼𑀁 𑀓𑀭𑁂𑀬𑁆𑀬𑀼𑀁. 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀭𑀸𑀕𑁄𑀢𑀺 𑀅𑀫𑀼𑀲𑁆𑀫𑀺𑀁 𑀕𑀦𑁆𑀥𑀮𑁂𑀧𑀦𑁂 𑀲𑀺𑀦𑁂𑀳𑁄 𑀦𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺. 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀧𑀝𑀺𑀖𑀦𑁆𑀢𑀺 𑀅𑀫𑀼𑀲𑁆𑀫𑀺𑀁 𑀯𑀸𑀲𑀺𑀬𑀸 𑀢𑀘𑁆𑀙𑀦𑁂 𑀧𑀝𑀺𑀳𑀦𑀦𑀲𑀗𑁆𑀔𑀸𑀢𑀁 𑀧𑀝𑀺𑀖𑀁 𑀓𑁄𑀧𑀁 𑀦𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺. 𑀅𑀦𑀼𑀦𑀬𑀧𑀝𑀺𑀖𑀯𑀺𑀧𑁆𑀧𑀳𑀻𑀦𑁄𑀢𑀺 𑀲𑀺𑀦𑁂𑀳𑀜𑁆𑀘 𑀓𑁄𑀧𑀜𑁆𑀘 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄. 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺𑀯𑀻𑀢𑀺𑀯𑀢𑁆𑀢𑁄𑀢𑀺 𑀅𑀦𑀼𑀦𑀬𑀯𑀲𑁂𑀦 𑀅𑀦𑀼𑀕𑁆𑀕𑀳𑀜𑁆𑀘 𑀧𑀝𑀺𑀖𑀯𑀲𑁂𑀦 𑀦𑀺𑀕𑁆𑀕𑀳𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀅𑀦𑀼𑀭𑁄𑀥𑀯𑀺𑀭𑁄𑀥𑀲𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀅𑀦𑀼𑀦𑀬𑀜𑁆𑀘 𑀧𑀝𑀺𑀖𑀜𑁆𑀘 𑀲𑀫𑁆𑀫𑀸 𑀅𑀢𑀺𑀓𑁆𑀓𑀦𑁆𑀢𑁄.

𑀲𑀻𑀮𑁂 𑀲𑀢𑀻𑀢𑀺 𑀲𑀻𑀮𑁂 𑀲𑀁𑀯𑀺𑀚𑁆𑀚𑀫𑀸𑀦𑁂. 𑀲𑀻𑀮𑀯𑀸𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄. 𑀢𑁂𑀦 𑀦𑀺𑀤𑁆𑀤𑁂𑀲𑀁 𑀓𑀣𑀦𑀁 𑀮𑀪𑀢𑀻𑀢𑀺 𑀢𑀸𑀤𑀻. 𑀲𑀤𑁆𑀥𑀸𑀬 𑀲𑀢𑀺 𑀲𑀤𑁆𑀥𑁄𑀢𑀺 𑀏𑀯𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.