𑁪. 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩. 𑀘𑀢𑀼𑀢𑁆𑀣𑁂 𑀲𑀼𑀤𑁆𑀥𑀝𑁆𑀞𑀓𑁂 𑀧𑀞𑀫𑀕𑀸𑀣𑀸𑀬 𑀢𑀸𑀯𑀢𑁆𑀣𑁄 𑁋 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂𑀦 𑀤𑀲𑁆𑀲𑀦𑁂𑀦 𑀲𑀼𑀤𑁆𑀥𑀺 𑀳𑁄𑀢𑀺, 𑀅𑀧𑀺 𑀘 𑀔𑁄 𑀓𑀺𑀮𑁂𑀲𑀫𑀮𑀻𑀦𑀢𑁆𑀢𑀸 𑀅𑀲𑀼𑀤𑁆𑀥𑀁, 𑀓𑀺𑀮𑁂𑀲𑀭𑁄𑀕𑀸𑀦𑀁 𑀅𑀥𑀺𑀕𑀫𑀸 𑀲𑀭𑁄𑀕𑀫𑁂𑀯 𑀘𑀦𑁆𑀤𑀸𑀪𑀁 𑀩𑁆𑀭𑀸𑀳𑁆𑀫𑀡𑀁, 𑀅𑀜𑁆𑀜𑀁 𑀯𑀸 𑀏𑀯𑀭𑀽𑀧𑀁 𑀤𑀺𑀲𑁆𑀯𑀸 𑀤𑀺𑀝𑁆𑀞𑀺𑀕𑀢𑀺𑀓𑁄 𑀩𑀸𑀮𑁄 𑀅𑀪𑀺𑀚𑀸𑀦𑀸𑀢𑀺 ‘‘𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁, 𑀢𑁂𑀦 𑀘 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀤𑀲𑁆𑀲𑀦𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀻’’𑀢𑀺, 𑀲𑁄 𑀏𑀯𑀁 𑀅𑀪𑀺𑀚𑀸𑀦𑀦𑁆𑀢𑁄 𑀢𑀁 𑀤𑀲𑁆𑀲𑀦𑀁 ‘‘𑀧𑀭𑀫’’𑀦𑁆𑀢𑀺 𑀜𑀢𑁆𑀯𑀸 𑀢𑀲𑁆𑀫𑀺𑀁 𑀤𑀲𑁆𑀲𑀦𑁂 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻 𑀲𑀫𑀸𑀦𑁄 𑀢𑀁 𑀤𑀲𑁆𑀲𑀦𑀁 ‘‘𑀫𑀕𑁆𑀕𑀜𑀸𑀡’’𑀦𑁆𑀢𑀺 𑀧𑀘𑁆𑀘𑁂𑀢𑀺. 𑀢𑀁 𑀧𑀦 𑀫𑀕𑁆𑀕𑀜𑀸𑀡𑀁 𑀦 𑀳𑁄𑀢𑀺.

𑀧𑀭𑀫𑀁 𑀆𑀭𑁄𑀕𑁆𑀬𑀧𑁆𑀧𑀢𑁆𑀢𑀦𑁆𑀢𑀺 𑀉𑀢𑁆𑀢𑀫𑀁 𑀦𑀺𑀩𑁆𑀬𑀸𑀥𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀞𑀺𑀢𑀁. 𑀢𑀸𑀡𑀧𑁆𑀧𑀢𑁆𑀢𑀦𑁆𑀢𑀺 𑀢𑀣𑀸 𑀧𑀸𑀮𑀦𑀧𑁆𑀧𑀢𑁆𑀢𑀁. 𑀮𑁂𑀡𑀧𑁆𑀧𑀢𑁆𑀢𑀦𑁆𑀢𑀺 𑀦𑀺𑀮𑀻𑀬𑀦𑀧𑁆𑀧𑀢𑁆𑀢𑀁.𑀲𑀭𑀡𑀧𑁆𑀧𑀢𑁆𑀢𑀦𑁆𑀢𑀺 𑀧𑀢𑀺𑀝𑁆𑀞𑀸𑀧𑀢𑁆𑀢𑀁, 𑀤𑀼𑀓𑁆𑀔𑀦𑀸𑀲𑀦𑀁 𑀯𑀸 𑀧𑀢𑁆𑀢𑀁. 𑀅𑀪𑀬𑀧𑁆𑀧𑀢𑁆𑀢𑀦𑁆𑀢𑀺 𑀦𑀺𑀩𑁆𑀪𑀬𑀪𑀸𑀯𑀧𑁆𑀧𑀢𑁆𑀢𑀁. 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀮𑀪𑀸𑀯𑀁 𑀧𑀢𑁆𑀢𑀁. 𑀅𑀫𑀢𑀧𑁆𑀧𑀢𑁆𑀢𑀦𑁆𑀢𑀺 𑀅𑀫𑀢𑀁 𑀫𑀳𑀸𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀁. 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀦𑁆𑀢𑀺 𑀯𑀸𑀦𑀯𑀺𑀭𑀳𑀺𑀢𑀁 𑀧𑀢𑁆𑀢𑀁.

𑀅𑀪𑀺𑀚𑀸𑀦𑀦𑁆𑀢𑁄𑀢𑀺 𑀯𑀺𑀲𑁂𑀲𑁂𑀦 𑀚𑀸𑀦𑀦𑁆𑀢𑁄. 𑀆𑀚𑀸𑀦𑀦𑁆𑀢𑁄𑀢𑀺 𑀆𑀚𑀸𑀦𑀫𑀸𑀦𑁄. 𑀯𑀺𑀚𑀸𑀦𑀦𑁆𑀢𑁄𑀢𑀺 𑀅𑀦𑁂𑀓𑀯𑀺𑀥𑁂𑀦 𑀚𑀸𑀦𑀫𑀸𑀦𑁄. 𑀧𑀝𑀺𑀯𑀺𑀚𑀸𑀦𑀦𑁆𑀢𑁄𑀢𑀺 𑀢𑀁 𑀢𑀁 𑀧𑀝𑀺𑀘𑁆𑀘 𑀯𑀺𑀚𑀸𑀦𑀫𑀸𑀦𑁄. 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀢𑀺 𑀳𑀤𑀬𑁂 𑀓𑀼𑀭𑀼𑀫𑀸𑀦𑁄.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀤𑀲𑁆𑀲𑀦𑁂𑀦𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀤𑀲𑁆𑀲𑀦𑀁. 𑀜𑀸𑀡𑀦𑁆𑀢𑀺 𑀧𑀘𑁆𑀘𑁂𑀢𑀻𑀢𑀺 𑀧𑀜𑁆𑀜𑀸 𑀇𑀢𑀺 𑀲𑀤𑁆𑀤𑀳𑀢𑀺. 𑀫𑀕𑁆𑀕𑁄𑀢𑀺 𑀧𑀘𑁆𑀘𑁂𑀢𑀻𑀢𑀺 ‘‘𑀉𑀧𑀸𑀬𑁄’’𑀢𑀺 𑀲𑀤𑁆𑀤𑀳𑀢𑀺. 𑀧𑀣𑁄𑀢𑀺 𑀲𑀜𑁆𑀘𑀸𑀭𑁄. 𑀦𑀻𑀬𑀸𑀦𑀦𑁆𑀢𑀺 𑀕𑀳𑁂𑀢𑁆𑀯𑀸 𑀬𑀸𑀢𑀻𑀢𑀺 𑀦𑀻𑀬𑀸𑀦𑀁. ‘‘𑀦𑀺𑀬𑁆𑀬𑀸𑀦’’𑀦𑁆𑀢𑀺 𑀯𑀸 𑀧𑀸𑀞𑁄.

𑁨𑁪. ‘‘𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀻’’𑀢𑀺 𑀤𑀼𑀢𑀺𑀬𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀢𑁂𑀦 𑀭𑀽𑀧𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑁂𑀦 𑀬𑀤𑀺 𑀓𑀺𑀮𑁂𑀲𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺, 𑀢𑁂𑀦 𑀯𑀸 𑀜𑀸𑀡𑁂𑀦 𑀲𑁄 𑀬𑀤𑀺 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀧𑀚𑀳𑀸𑀢𑀺, 𑀏𑀯𑀁 𑀲𑀦𑁆𑀢𑁂 𑀅𑀭𑀺𑀬𑀫𑀕𑁆𑀕𑀢𑁄 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦𑁂𑀯 𑀲𑁄 𑀲𑀼𑀚𑁆𑀛𑀢𑀺, 𑀭𑀸𑀕𑀸𑀤𑀻𑀳𑀺 𑀉𑀧𑀥𑀻𑀳𑀺 𑀲𑀉𑀧𑀥𑀺𑀓𑁄 𑀏𑀯 𑀲𑀫𑀸𑀦𑁄 𑀲𑀼𑀚𑁆𑀛𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀦𑁆𑀦𑁄 𑀳𑁄𑀢𑀺, 𑀦 𑀘 𑀏𑀯𑀁𑀯𑀺𑀥𑁄 𑀲𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀁, 𑀲𑀸 𑀦𑀁 𑀤𑀺𑀝𑁆𑀞𑀺𑀬𑁂𑀯 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀅𑀬’’𑀦𑁆𑀢𑀺 𑀓𑀣𑁂𑀢𑀺, 𑀤𑀺𑀝𑁆𑀞𑀺𑀅𑀦𑀼𑀭𑀽𑀧𑀁 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀣𑀸 𑀢𑀣𑀸 𑀯𑀤𑀢𑀻𑀢𑀺.

𑀭𑀸𑀕𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀭𑀸𑀕𑁄, 𑀭𑀸𑀕𑀯𑀸𑀢𑀺 𑀅𑀢𑁆𑀣𑁄. 𑀲𑀤𑁄𑀲𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁫. 𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀢𑀢𑀺𑀬𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀲𑁄 𑀫𑀕𑁆𑀕𑁂𑀦 𑀅𑀥𑀺𑀕𑀢𑀸𑀲𑀯𑀓𑁆𑀔𑀬𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀅𑀭𑀺𑀬𑀫𑀕𑁆𑀕𑀜𑀸𑀡𑀢𑁄 𑀅𑀜𑁆𑀜𑁂𑀦 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀭𑀽𑀧𑀲𑀗𑁆𑀔𑀸𑀢𑁂 𑀤𑀺𑀝𑁆𑀞𑁂, 𑀢𑀣𑀸𑀯𑀺𑀥𑀲𑀤𑁆𑀤𑀲𑀗𑁆𑀔𑀸𑀢𑁂 𑀲𑀼𑀢𑁂, 𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂 𑀲𑀻𑀮𑁂, 𑀳𑀢𑁆𑀣𑀺𑀯𑀢𑀸𑀤𑀺𑀪𑁂𑀤𑁂 𑀯𑀢𑁂, 𑀧𑀣𑀯𑀺𑀆𑀤𑀺𑀪𑁂𑀤𑁂 𑀫𑀼𑀢𑁂 𑀘 𑀉𑀧𑁆𑀧𑀦𑁆𑀦𑁂𑀦 𑀫𑀺𑀘𑁆𑀙𑀸𑀜𑀸𑀡𑁂𑀦 𑀲𑀼𑀤𑁆𑀥𑀺𑀁 𑀦 𑀆𑀳𑀸𑀢𑀺. 𑀲𑁂𑀲𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀡𑁆𑀡𑀪𑀡𑀦𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀢𑁂𑀥𑀸𑀢𑀼𑀓𑀧𑀼𑀜𑁆𑀜𑁂 𑀲𑀩𑁆𑀩𑀲𑁆𑀫𑀺𑀜𑁆𑀘 𑀧𑀸𑀧𑁂 𑀅𑀦𑀽𑀧𑀮𑀺𑀢𑁆𑀢𑁄, 𑀓𑀲𑁆𑀫𑀸? 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 𑀢𑀲𑁆𑀲 𑀅𑀢𑁆𑀢𑀤𑀺𑀝𑁆𑀞𑀺𑀬𑀸, 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀸 𑀕𑀳𑀡𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀢𑁆𑀢𑀜𑁆𑀚𑀳𑁄, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀓𑀭𑀡𑀢𑁄 ‘‘𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀦𑀁 𑀏𑀯𑀁 𑀧𑀲𑀁𑀲𑀦𑁆𑀢𑁄 𑀆𑀳. 𑀲𑀩𑁆𑀩𑀲𑁆𑀲𑁂𑀯 𑀘𑀲𑁆𑀲 𑀧𑀼𑀭𑀺𑀫𑀧𑀸𑀤𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳𑀸𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄𑀢𑀺 𑀦 𑀇𑀢𑀺 𑀧𑀝𑀺𑀲𑁂𑀥𑁄.

𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀻𑀢𑀺 𑀕𑀸𑀣𑀸𑀬𑀢𑁆𑀣𑁄 𑁋 𑀬𑁄 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀺 𑀞𑀺𑀢𑀢𑁆𑀢𑁄 𑀞𑀺𑀢𑁄𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀏𑀯 𑀘 𑀯𑀺𑀫𑀮𑁄 𑀯𑀺𑀫𑀮𑀪𑀸𑀯𑀁 𑀩𑁆𑀭𑀳𑁆𑀫𑀪𑀸𑀯𑀁 𑀲𑁂𑀝𑁆𑀞𑀪𑀸𑀯𑀁 𑀧𑀢𑁆𑀢𑁄, 𑀧𑀝𑀺𑀦𑀺𑀲𑁆𑀲𑀝𑁆𑀞𑀲𑀫𑀸𑀥𑀺𑀯𑀺𑀓𑁆𑀔𑁂𑀧𑀓𑀭𑀓𑀺𑀮𑁂𑀲𑀫𑀮𑁂𑀦 𑀅𑀕𑁆𑀕𑀫𑀕𑁆𑀕𑀨𑀮𑀲𑀫𑀸𑀥𑀺𑀦𑀸 𑀲𑀸𑀥𑀼𑀲𑀫𑀸𑀳𑀺𑀢𑁄, 𑀲𑀁𑀲𑀸𑀭𑀳𑁂𑀢𑀼𑀲𑀫𑀢𑀺𑀓𑁆𑀓𑀫𑁂𑀦 𑀲𑀁𑀲𑀸𑀭𑀫𑀢𑀺𑀘𑁆𑀘 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑀸𑀬 𑀓𑁂𑀯𑀮𑀻𑀢𑀺 𑀘, 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀦𑀺𑀲𑁆𑀲𑀺𑀢𑁄𑀢𑀺 𑀘, 𑀮𑁄𑀓𑀥𑀫𑁆𑀫𑁂𑀳𑀺 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑀸 𑀢𑀸𑀤𑀻𑀢𑀺 𑀘 𑀧𑀯𑀼𑀘𑁆𑀘𑀢𑀺. 𑀏𑀯𑀁 𑀣𑀼𑀢𑀺𑀭𑀳𑁄 𑀲 𑀩𑁆𑀭𑀳𑁆𑀫𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄𑀢𑀺.

𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀻𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀫𑀼𑀜𑁆𑀘𑀺𑀢𑁆𑀯𑀸. 𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀏𑀓𑀘𑁆𑀘𑁂 𑀮𑁄𑀓𑀲𑀗𑁆𑀓𑁂𑀢𑁂𑀦 ‘‘𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀸 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀤𑀺𑀝𑁆𑀞𑀲𑀼𑀤𑁆𑀥𑀺𑀓𑀸𑀢𑀺 𑀤𑀺𑀝𑁆𑀞𑁂𑀦 𑀲𑀼𑀤𑁆𑀥𑀺𑀁 𑀇𑀘𑁆𑀙𑀫𑀸𑀦𑀸. 𑀢𑁂 𑀏𑀓𑀘𑁆𑀘𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀦𑁆𑀢𑀺 𑀏𑀢𑁂 𑀤𑀺𑀝𑁆𑀞𑀲𑀼𑀤𑁆𑀥𑀺𑀓𑀸 𑀏𑀢𑁂𑀲𑀁 𑀭𑀽𑀧𑀸𑀭𑀫𑁆𑀫𑀡𑀸𑀦𑀁 𑀑𑀮𑁄𑀓𑀦𑀁. 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀻𑀢𑀺 𑀇𑀤𑁆𑀥𑀺𑀓𑀸𑀭𑀡𑀁 𑀩𑀼𑀤𑁆𑀥𑀺𑀓𑀸𑀭𑀡𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺. 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀻𑀢𑀺 𑀅𑀦𑀺𑀤𑁆𑀥𑀺𑀓𑀸𑀭𑀡𑀁 𑀦 𑀩𑀼𑀤𑁆𑀥𑀺𑀓𑀸𑀭𑀡𑀁 𑀦 𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺. 𑀢𑁂 𑀓𑀸𑀮𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀏𑀢𑁂 𑀤𑀺𑀝𑁆𑀞𑀸𑀤𑀺𑀫𑀗𑁆𑀕𑀮𑀺𑀓𑀸 𑀧𑀼𑀭𑁂𑀢𑀭𑀫𑁂𑀯 𑀉𑀝𑁆𑀞𑀳𑀺𑀢𑁆𑀯𑀸. 𑀅𑀪𑀺𑀫𑀗𑁆𑀕𑀮𑀕𑀢𑀸𑀦𑀻𑀢𑀺 𑀯𑀺𑀲𑁂𑀲𑁂𑀦 𑀯𑀼𑀟𑁆𑀠𑀺𑀓𑀸𑀭𑀡𑀕𑀢𑀸𑀦𑀺. 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀻𑀢𑀺 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀤𑀓𑁆𑀔𑀦𑁆𑀢𑀺. 𑀘𑀸𑀝𑀓𑀲𑀓𑀼𑀡𑀦𑁆𑀢𑀺 𑀏𑀯𑀁𑀦𑀸𑀫𑀓𑀁. 𑀨𑀼𑀲𑁆𑀲𑀯𑁂𑀴𑀼𑀯𑀮𑀝𑁆𑀞𑀺𑀦𑁆𑀢𑀺 𑀨𑀼𑀲𑁆𑀲𑀦𑀓𑁆𑀔𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀁 𑀢𑀭𑀼𑀡𑀩𑁂𑀴𑀼𑀯𑀮𑀝𑁆𑀞𑀺𑀁. 𑀕𑀩𑁆𑀪𑀺𑀦𑀺𑀢𑁆𑀣𑀺𑀦𑁆𑀢𑀺 𑀲𑀕𑀩𑁆𑀪𑀁 𑀇𑀢𑁆𑀣𑀺𑀁. 𑀓𑀼𑀫𑀸𑀭𑀓𑀁 𑀔𑀦𑁆𑀥𑁂 𑀆𑀭𑁄𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀦𑁆𑀢𑀺 𑀢𑀭𑀼𑀡𑀤𑀸𑀭𑀓𑀁 𑀅𑀁𑀲𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀘𑁆𑀙𑀫𑀸𑀦𑀁. 𑀧𑀼𑀡𑁆𑀡𑀖𑀝𑀦𑁆𑀢𑀺 𑀉𑀤𑀓𑀧𑀼𑀡𑁆𑀡𑀖𑀝𑀁. 𑀭𑁄𑀳𑀺𑀢𑀫𑀘𑁆𑀙𑀦𑁆𑀢𑀺 𑀭𑀢𑁆𑀢𑀭𑁄𑀳𑀺𑀢𑀫𑀘𑁆𑀙𑀁. 𑀆𑀚𑀜𑁆𑀜𑀭𑀣𑀦𑁆𑀢𑀺 𑀲𑀺𑀦𑁆𑀥𑀯𑀬𑀼𑀢𑁆𑀢𑀭𑀣𑀁. 𑀉𑀲𑀪𑀦𑁆𑀢𑀺 𑀫𑀗𑁆𑀕𑀮𑀉𑀲𑀪𑀁. 𑀕𑁄𑀓𑀧𑀺𑀮𑀦𑁆𑀢𑀺 𑀓𑀧𑀺𑀮𑀕𑀸𑀯𑀺𑀁.

𑀧𑀮𑀸𑀮𑀧𑀼𑀜𑁆𑀚𑀦𑁆𑀢𑀺 𑀣𑀼𑀲𑀭𑀸𑀲𑀺𑀁. 𑀢𑀓𑁆𑀓𑀖𑀝𑀦𑁆𑀢𑀺 𑀕𑁄𑀢𑀓𑁆𑀓𑀸𑀤𑀺𑀧𑀽𑀭𑀺𑀢𑀘𑀸𑀝𑀺𑀁. 𑀭𑀺𑀢𑁆𑀢𑀖𑀝𑀦𑁆𑀢𑀺 𑀢𑀼𑀘𑁆𑀙𑀖𑀝𑀁. 𑀦𑀝𑀦𑁆𑀢𑀺 𑀦𑀝𑀓𑀸𑀤𑀺𑀁. ‘‘𑀥𑀼𑀢𑁆𑀢𑀓𑀺𑀭𑀺𑀬’’𑀦𑁆𑀢𑀺 𑀏𑀓𑁂. 𑀦𑀕𑁆𑀕𑀲𑀫𑀡𑀓𑀦𑁆𑀢𑀺 𑀦𑀺𑀘𑁆𑀘𑁄𑀴𑀲𑀫𑀡𑀁. 𑀔𑀭𑀦𑁆𑀢𑀺 𑀕𑀤𑁆𑀭𑀪𑀁. 𑀔𑀭𑀬𑀸𑀦𑀦𑁆𑀢𑀺 𑀕𑀤𑁆𑀭𑀪𑀬𑀼𑀢𑁆𑀢𑀁 𑀯𑀬𑁆𑀳𑀸𑀤𑀺𑀓𑀁. 𑀏𑀓𑀬𑀼𑀢𑁆𑀢𑀬𑀸𑀦𑀦𑁆𑀢𑀺 𑀏𑀓𑁂𑀦 𑀯𑀸𑀳𑀦𑁂𑀦 𑀲𑀁𑀬𑀼𑀢𑁆𑀢𑀁 𑀬𑀸𑀦𑀁. 𑀓𑀸𑀡𑀦𑁆𑀢𑀺 𑀏𑀓𑀓𑁆𑀔𑀺𑀉𑀪𑀬𑀓𑁆𑀔𑀺𑀓𑀸𑀡𑀁. 𑀓𑀼𑀡𑀺𑀦𑁆𑀢𑀺 𑀳𑀢𑁆𑀣𑀓𑀼𑀡𑀺𑀁. 𑀔𑀜𑁆𑀚𑀦𑁆𑀢𑀺 𑀔𑀜𑁆𑀚𑀧𑀸𑀤𑀁 𑀢𑀺𑀭𑀺𑀬𑀕𑀢𑀧𑀸𑀤𑀁. 𑀧𑀓𑁆𑀔𑀳𑀢𑀦𑁆𑀢𑀺 𑀧𑀻𑀞𑀲𑀧𑁆𑀧𑀺𑀁. 𑀚𑀺𑀡𑁆𑀡𑀓𑀦𑁆𑀢𑀺 𑀚𑀭𑀸𑀚𑀺𑀡𑁆𑀡𑀁. 𑀩𑁆𑀬𑀸𑀥𑀺𑀓𑀦𑁆𑀢𑀺 𑀩𑁆𑀬𑀸𑀥𑀺𑀧𑀻𑀴𑀺𑀢𑀁. 𑀫𑀢𑀦𑁆𑀢𑀺 𑀓𑀸𑀮𑀗𑁆𑀓𑀢𑀁.

𑀲𑀼𑀢𑀲𑀼𑀤𑁆𑀥𑀺𑀓𑀸𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀲𑀼𑀢𑁂𑀦 𑀲𑀼𑀤𑁆𑀥𑀺𑀁 𑀇𑀘𑁆𑀙𑀫𑀸𑀦𑀸. 𑀲𑀤𑁆𑀤𑀸𑀦𑀁 𑀲𑀯𑀦𑀦𑁆𑀢𑀺 𑀲𑀤𑁆𑀤𑀸𑀭𑀫𑁆𑀫𑀡𑀸𑀦𑀁 𑀲𑀯𑀦𑀁. 𑀯𑀟𑁆𑀠𑀸𑀢𑀺 𑀯𑀸𑀢𑀺𑀆𑀤𑀬𑁄 𑀮𑁄𑀓𑁂 𑀧𑀯𑀢𑁆𑀢𑀲𑀤𑁆𑀤𑀫𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀫𑀗𑁆𑀕𑀮𑀁 𑀧𑀦 ‘‘𑀓𑀸𑀡𑁄’’𑀢𑀺𑀆𑀤𑀺𑀦𑀸 𑀢𑁂𑀦 𑀢𑁂𑀦 𑀦𑀸𑀫𑁂𑀦 𑀯𑀼𑀢𑁆𑀢𑀲𑀤𑁆𑀤𑀸𑀬𑁂𑀯. ‘‘𑀙𑀺𑀦𑁆𑀤’’𑀦𑁆𑀢𑀺 𑀯𑀸𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀸. ‘‘𑀪𑀺𑀦𑁆𑀤’’𑀦𑁆𑀢𑀺 𑀯𑀸𑀢𑀺 𑀲𑀻𑀲𑀸𑀤𑀺𑀪𑀺𑀦𑁆𑀦𑀦𑁆𑀢𑀺 𑀯𑀸. ‘‘𑀤𑀟𑁆𑀠’’𑀦𑁆𑀢𑀺 𑀯𑀸𑀢𑀺 𑀅𑀕𑁆𑀕𑀺𑀦𑀸 𑀛𑀸𑀧𑀺𑀢𑀦𑁆𑀢𑀺 𑀯𑀸. ‘‘𑀦𑀝𑁆𑀞’’𑀦𑁆𑀢𑀺 𑀯𑀸𑀢𑀺 𑀘𑁄𑀭𑀸𑀤𑀻𑀳𑀺 𑀯𑀺𑀦𑀸𑀲𑀺𑀢𑀦𑁆𑀢𑀺 𑀯𑀸. ‘‘𑀦𑀢𑁆𑀣𑀻’’𑀢𑀺 𑀯𑀸𑀢𑀺 𑀦 𑀯𑀺𑀚𑁆𑀚𑀢𑀻𑀢𑀺 𑀯𑀸.

𑀲𑀻𑀮𑀲𑀼𑀤𑁆𑀥𑀺𑀓𑀸𑀢𑀺 𑀲𑀻𑀮𑁂𑀦 𑀯𑀺𑀲𑀼𑀤𑁆𑀥𑀺𑀁 𑀇𑀘𑁆𑀙𑀦𑀓𑀸. 𑀲𑀻𑀮𑀫𑀢𑁆𑀢𑁂𑀦𑀸𑀢𑀺 𑀲𑀁𑀯𑀭𑀡𑀫𑀢𑁆𑀢𑁂𑀦. 𑀲𑀁𑀬𑀫𑀫𑀢𑁆𑀢𑁂𑀦𑀸𑀢𑀺 𑀉𑀧𑀭𑀫𑀫𑀢𑁆𑀢𑁂𑀦. 𑀲𑀁𑀯𑀭𑀫𑀢𑁆𑀢𑁂𑀦𑀸𑀢𑀺 𑀤𑁆𑀯𑀸𑀭𑀣𑀓𑀦𑀫𑀢𑁆𑀢𑁂𑀦. 𑀅𑀯𑀻𑀢𑀺𑀓𑁆𑀓𑀫𑀫𑀢𑁆𑀢𑁂𑀦𑀸𑀢𑀺 𑀦 𑀅𑀢𑀺𑀓𑁆𑀓𑀫𑀺𑀢𑀫𑀢𑁆𑀢𑁂𑀦. 𑀲𑀫𑀡𑁄 𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄𑀢𑀺 𑀫𑀸𑀢𑀺𑀢𑁄 𑀮𑀤𑁆𑀥𑀦𑀸𑀫𑀁. 𑀲𑀫𑁆𑀧𑀦𑁆𑀦𑀓𑀼𑀲𑀮𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀓𑀼𑀲𑀮𑀁. 𑀧𑀭𑀫𑀓𑀼𑀲𑀮𑀦𑁆𑀢𑀺 𑀉𑀢𑁆𑀢𑀫𑀓𑀼𑀲𑀮𑀁. 𑀉𑀢𑁆𑀢𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑀦𑁆𑀢𑀺 𑀉𑀢𑁆𑀢𑀫𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀩𑁆𑀩𑀢𑀁 𑀧𑀢𑁆𑀯𑀸 𑀞𑀺𑀢𑀁. 𑀅𑀬𑁄𑀚𑁆𑀚𑀦𑁆𑀢𑀺 𑀧𑀭𑀸𑀚𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀲𑀫𑀡𑀁.

𑀯𑀢𑀲𑀼𑀤𑁆𑀥𑀺𑀓𑀸𑀢𑀺 𑀲𑀫𑀸𑀤𑀸𑀦𑁂𑀦 𑀯𑀢𑁂𑀦 𑀲𑀼𑀤𑁆𑀥𑀺𑀁 𑀇𑀘𑁆𑀙𑀦𑀓𑀸. 𑀳𑀢𑁆𑀣𑀺𑀯𑀢𑀺𑀓𑀸 𑀯𑀸𑀢𑀺 𑀲𑀫𑀸𑀤𑀺𑀦𑁆𑀦𑀁 𑀳𑀢𑁆𑀣𑀺𑀯𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀳𑀢𑁆𑀣𑀺𑀯𑀢𑀺𑀓𑀸, 𑀲𑀩𑁆𑀩𑀳𑀢𑁆𑀣𑀺𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀁? ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀳𑀢𑁆𑀣𑀻𑀳𑀺 𑀓𑀸𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸 𑀳𑀢𑁆𑀣𑀻𑀦𑀁 𑀕𑀫𑀦𑀸𑀓𑀸𑀭𑀁 𑀢𑀺𑀝𑁆𑀞𑀦𑀸𑀓𑀸𑀭𑀁 𑀦𑀺𑀲𑀻𑀤𑀦𑀸𑀓𑀸𑀭𑀁 𑀲𑀬𑀦𑀸𑀓𑀸𑀭𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀭𑀡𑀸𑀓𑀸𑀭𑀁, 𑀅𑀜𑁆𑀜𑁂 𑀳𑀢𑁆𑀣𑀻 𑀤𑀺𑀲𑁆𑀯𑀸 𑀲𑁄𑀡𑁆𑀟𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀫𑀦𑀸𑀓𑀸𑀭𑀜𑁆𑀘 𑀲𑀩𑁆𑀩𑀁 𑀓𑀭𑁄𑀦𑁆𑀢𑀻𑀢𑀺 𑀳𑀢𑁆𑀣𑀺𑀯𑀢𑀺𑀓𑀸. 𑀅𑀲𑁆𑀲𑀯𑀢𑀺𑀓𑀸𑀤𑀻𑀲𑀼𑀧𑀺 𑀮𑀩𑁆𑀪𑀫𑀸𑀦𑀯𑀲𑁂𑀦 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀲𑀼 𑀅𑀯𑀲𑀸𑀦𑁂 𑀤𑀺𑀲𑀸𑀯𑀢𑀺𑀓𑀸 𑀯𑀸𑀢𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀦𑀁 𑀦𑀫𑀲𑁆𑀲𑀦𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀤𑀺𑀲𑀸𑀯𑀢𑀺𑀓𑀸, 𑀏𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢𑀲𑀫𑀸𑀤𑀸𑀦𑀁 𑀲𑀫𑁆𑀧𑀚𑁆𑀚𑀫𑀸𑀦𑀁 𑀳𑀢𑁆𑀣𑀺𑀆𑀤𑀻𑀦𑀁 𑀲𑀳𑀩𑁆𑀬𑀢𑀁 𑀉𑀧𑀦𑁂𑀢𑀺. 𑀲𑀘𑁂 𑀔𑁄 𑀧𑀦𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑀯𑀢𑀲𑀫𑀸𑀤𑀸𑀦𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀤𑁂𑀯𑁄 𑀯𑀸 𑀤𑁂𑀯𑀜𑁆𑀜𑀢𑀭𑁄 𑀯𑀸 𑀳𑁄𑀫𑀻’’𑀢𑀺 𑀘𑀺𑀦𑁆𑀢𑀬𑀦𑁆𑀢𑀲𑁆𑀲 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀻𑀦𑀁 𑀅𑀜𑁆𑀜𑀢𑀭𑁄 𑀳𑁄𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 (𑀫. 𑀦𑀺. 𑁨.𑁭𑁯) 𑁋

‘‘𑀇𑀥, 𑀧𑀼𑀡𑁆𑀡, 𑀏𑀓𑀘𑁆𑀘𑁄 𑀓𑀼𑀓𑁆𑀓𑀼𑀭𑀯𑀢𑀁 𑀪𑀸𑀯𑁂𑀢𑀺 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀩𑁄𑀓𑀺𑀡𑁆𑀡𑀁, 𑀓𑀼𑀓𑁆𑀓𑀼𑀭𑀲𑀻𑀮𑀁 𑀪𑀸𑀯𑁂𑀢𑀺 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀩𑁄𑀓𑀺𑀡𑁆𑀡𑀁, 𑀓𑀼𑀓𑁆𑀓𑀼𑀭𑀘𑀺𑀢𑁆𑀢𑀁 𑀪𑀸𑀯𑁂𑀢𑀺 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀩𑁄𑀓𑀺𑀡𑁆𑀡𑀁, 𑀓𑀼𑀓𑁆𑀓𑀼𑀭𑀸𑀓𑀧𑁆𑀧𑀁 𑀪𑀸𑀯𑁂𑀢𑀺 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀩𑁄𑀓𑀺𑀡𑁆𑀡𑀁. 𑀲𑁄 𑀓𑀼𑀓𑁆𑀓𑀼𑀭𑀯𑀢𑀁 𑀪𑀸𑀯𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀩𑁄𑀓𑀺𑀡𑁆𑀡𑀁, 𑀓𑀼𑀓𑁆𑀓𑀼𑀭𑀲𑀻𑀮𑀁 𑀪𑀸𑀯𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀩𑁄𑀓𑀺𑀡𑁆𑀡𑀁, 𑀓𑀼𑀓𑁆𑀓𑀼𑀭𑀘𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀩𑁄𑀓𑀺𑀡𑁆𑀡𑀁, 𑀓𑀼𑀓𑁆𑀓𑀼𑀭𑀸𑀓𑀧𑁆𑀧𑀁 𑀪𑀸𑀯𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀓𑀼𑀓𑁆𑀓𑀼𑀭𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀲𑀘𑁂 𑀔𑁄 𑀧𑀦𑀲𑁆𑀲 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 ‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’𑀢𑀺, 𑀲𑀸𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲 𑀔𑁄 𑀅𑀳𑀁, 𑀧𑀼𑀡𑁆𑀡, 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸. 𑀇𑀢𑀺 𑀔𑁄, 𑀧𑀼𑀡𑁆𑀡, 𑀲𑀫𑁆𑀧𑀚𑁆𑀚𑀫𑀸𑀦𑀁 𑀓𑀼𑀓𑁆𑀓𑀼𑀭𑀯𑀢𑀁 𑀓𑀼𑀓𑁆𑀓𑀼𑀭𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀦𑁂𑀢𑀺, 𑀯𑀺𑀧𑀚𑁆𑀚𑀫𑀸𑀦𑀁 𑀦𑀺𑀭𑀬’’𑀦𑁆𑀢𑀺.

𑀕𑀦𑁆𑀥𑀩𑁆𑀩𑀯𑀢𑀺𑀓𑀸𑀤𑀬𑁄 𑀕𑀦𑁆𑀥𑀩𑁆𑀩𑀸𑀤𑀻𑀦𑀁 𑀲𑀳𑀩𑁆𑀬𑀢𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀢𑁆𑀢𑀸 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀫𑁂𑀯 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑁄.

𑀫𑀼𑀢𑀲𑀼𑀤𑁆𑀥𑀺𑀓𑀸𑀢𑀺 𑀨𑀼𑀲𑀺𑀢𑁂𑀦 𑀲𑀼𑀤𑁆𑀥𑀺𑀓𑀸. 𑀧𑀣𑀯𑀺𑀁 𑀆𑀫𑀲𑀦𑁆𑀢𑀻𑀢𑀺 𑀲𑀲𑀫𑁆𑀪𑀸𑀭𑀺𑀓𑀁 𑀫𑀳𑀸𑀧𑀣𑀯𑀺𑀁 𑀓𑀸𑀬𑁂𑀦 𑀨𑀼𑀲𑀦𑁆𑀢𑀺. 𑀳𑀭𑀺𑀢𑀦𑁆𑀢𑀺 𑀅𑀮𑁆𑀮𑀦𑀻𑀮𑀲𑀤𑁆𑀤𑀮𑀁. 𑀕𑁄𑀫𑀬𑀦𑁆𑀢𑀺 𑀕𑀯𑀸𑀤𑀺𑀕𑁄𑀫𑀬𑀁. 𑀓𑀘𑁆𑀙𑀧𑀦𑁆𑀢𑀺 𑀅𑀝𑁆𑀞𑀺𑀓𑀘𑁆𑀙𑀧𑀸𑀤𑀺𑀅𑀦𑁂𑀓𑀯𑀺𑀥𑀁. 𑀨𑀸𑀮𑀁 𑀅𑀓𑁆𑀓𑀫𑀦𑁆𑀢𑀻𑀢𑀺 𑀅𑀬𑀨𑀸𑀮𑀁 𑀫𑀤𑁆𑀤𑀦𑁆𑀢𑀺. 𑀢𑀺𑀮𑀯𑀸𑀳𑀦𑁆𑀢𑀺 𑀢𑀺𑀮𑀲𑀓𑀝𑀁 𑀢𑀺𑀮𑀭𑀸𑀲𑀺𑀁 𑀯𑀸. 𑀨𑀼𑀲𑁆𑀲𑀢𑀺𑀮𑀁 𑀔𑀸𑀤𑀦𑁆𑀢𑀻𑀢𑀺 𑀫𑀗𑁆𑀕𑀮𑀧𑀝𑀺𑀲𑀁𑀬𑀼𑀢𑁆𑀢𑀁 𑀢𑀺𑀮𑀁 𑀔𑀸𑀤𑀦𑁆𑀢𑀺. 𑀨𑀼𑀲𑁆𑀲𑀢𑁂𑀮𑀁 𑀫𑀓𑁆𑀔𑁂𑀦𑁆𑀢𑀻𑀢𑀺 𑀢𑀣𑀸𑀭𑀽𑀧𑀁 𑀢𑀺𑀮𑀢𑁂𑀮𑀁 𑀲𑀭𑀻𑀭𑀩𑁆𑀪𑀜𑁆𑀚𑀦𑀁 𑀓𑀭𑁄𑀦𑁆𑀢𑀺. 𑀤𑀦𑁆𑀢𑀓𑀝𑁆𑀞𑀦𑁆𑀢𑀺 𑀤𑀦𑁆𑀢𑀧𑁄𑀡𑀁. 𑀫𑀢𑁆𑀢𑀺𑀓𑀸𑀬 𑀦𑁆𑀳𑀸𑀬𑀦𑁆𑀢𑀻𑀢𑀺 𑀓𑀼𑀗𑁆𑀓𑀼𑀝𑁆𑀞𑀸𑀤𑀺𑀓𑀸𑀬 𑀲𑀡𑁆𑀳𑀫𑀢𑁆𑀢𑀺𑀓𑀸𑀬 𑀲𑀭𑀻𑀭𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀺. 𑀲𑀸𑀝𑀓𑀁 𑀦𑀺𑀯𑀸𑀲𑁂𑀦𑁆𑀢𑀻𑀢𑀺 𑀫𑀗𑁆𑀕𑀮𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀢𑁆𑀣𑀁 𑀧𑀭𑀺𑀤𑀳𑀦𑁆𑀢𑀺. 𑀯𑁂𑀞𑀦𑀁 𑀯𑁂𑀞𑁂𑀦𑁆𑀢𑀻𑀢𑀺 𑀲𑀻𑀲𑀯𑁂𑀞𑀦𑀁 𑀧𑀢𑁆𑀢𑀼𑀡𑁆𑀡𑀸𑀤𑀺𑀧𑀝𑀁 𑀲𑀻𑀲𑁂 𑀞𑀧𑁂𑀦𑁆𑀢𑀺 𑀧𑀝𑀺𑀫𑀼𑀘𑁆𑀘𑀦𑁆𑀢𑀺.

𑀢𑁂𑀥𑀸𑀢𑀼𑀓𑀁 𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀦𑁆𑀢𑀺 𑀓𑀸𑀫𑀥𑀸𑀢𑀼𑀭𑀽𑀧𑀥𑀸𑀢𑀼𑀅𑀭𑀽𑀧𑀥𑀸𑀢𑀽𑀲𑀼 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀁 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀁 𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀸𑀭𑀁. 𑀲𑀩𑁆𑀩𑀁 𑀅𑀓𑀼𑀲𑀮𑀦𑁆𑀢𑀺 𑀤𑁆𑀯𑀸𑀤𑀲𑀯𑀺𑀥𑀁 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀁 𑀅𑀓𑀼𑀲𑀮𑀁. 𑀬𑀢𑁄𑀢𑀺 𑀬𑀤𑀸. 𑀢𑁂 𑀤𑀲𑀯𑀺𑀥𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘, 𑀤𑁆𑀯𑀸𑀤𑀲𑀯𑀺𑀥𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘, 𑀘𑀢𑀼𑀩𑁆𑀩𑀺𑀥𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘 𑀬𑀣𑀸𑀦𑀼𑀭𑀽𑀧𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑀸 𑀳𑁄𑀦𑁆𑀢𑀺. 𑀅𑀢𑁆𑀢𑀤𑀺𑀝𑁆𑀞𑀺𑀚𑀳𑁄𑀢𑀺 ‘‘𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀕𑀳𑀺𑀢𑀤𑀺𑀝𑁆𑀞𑀺𑀁 𑀚𑀳𑁄. 𑀕𑀸𑀳𑀁 𑀚𑀳𑁄𑀢𑀺 ‘‘𑀏𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀕𑀳𑀡𑀁 𑀚𑀳𑁄. 𑀧𑀼𑀦 𑀅𑀢𑁆𑀢𑀜𑁆𑀚𑀳𑁄𑀢𑀺 ‘‘𑀏𑀢𑀁 𑀫𑀫𑀸’’𑀢𑀺 𑀢𑀡𑁆𑀳𑀸𑀕𑀳𑀡𑀯𑀲𑁂𑀦 𑀘 𑀤𑀺𑀝𑁆𑀞𑀺𑀕𑀳𑀡𑀯𑀲𑁂𑀦 𑀘 𑀧𑀭𑀸𑀫𑀲𑀺𑀢𑁆𑀯𑀸 𑀕𑀳𑀺𑀢𑀁, 𑀧𑀭𑀢𑁄 𑀆𑀫𑀝𑁆𑀞𑀜𑁆𑀘, 𑀢𑀲𑁆𑀫𑀺𑀁 𑀅𑀪𑀺𑀦𑀺𑀯𑀺𑀝𑁆𑀞𑀜𑁆𑀘, 𑀩𑀮𑀯𑀢𑀡𑁆𑀳𑀸𑀯𑀲𑁂𑀦 𑀕𑀺𑀮𑀺𑀢𑁆𑀯𑀸 𑀅𑀚𑁆𑀛𑁄𑀲𑀺𑀢𑀜𑁆𑀘, 𑀩𑀮𑀯𑀫𑀼𑀘𑁆𑀙𑀺𑀢𑀜𑁆𑀘. 𑀲𑀩𑁆𑀩𑀁 𑀢𑀁 𑀘𑀢𑁆𑀢𑀁 𑀳𑁄𑀢𑀻𑀢𑀺𑀆𑀤𑀬𑁄 𑀯𑀼𑀢𑁆𑀢𑀦𑀬𑀸𑀬𑁂𑀯.

𑁨𑁬. 𑀏𑀯𑀁 ‘‘𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳𑀸’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀁 𑀩𑁆𑀭𑀼𑀯𑀦𑁆𑀢𑀺, 𑀢𑁂𑀲𑀁 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀦𑀺𑀩𑁆𑀩𑀸𑀳𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀭𑀺𑀫𑀁 𑀧𑀳𑀸𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁂𑀳𑀺 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀯𑀸𑀤𑀸 𑀲𑀫𑀸𑀦𑀸𑀧𑀺 𑀬𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀳𑀻𑀦𑀢𑁆𑀢𑀸 𑀕𑀳𑀡𑀫𑀼𑀜𑁆𑀘𑀦𑀁 𑀳𑁄𑀢𑀺, 𑀢𑀸𑀬 𑀧𑀼𑀭𑀺𑀫𑀁 𑀲𑀢𑁆𑀣𑀸𑀭𑀸𑀤𑀺𑀁 𑀧𑀳𑀸𑀬 𑀅𑀧𑀭𑀁 𑀦𑀺𑀲𑁆𑀲𑀺𑀢𑀸, 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀦𑀼𑀕𑀢𑀸 𑀅𑀪𑀺𑀪𑀽𑀢𑀸 𑀭𑀸𑀕𑀸𑀤𑀺𑀪𑁂𑀤𑀁 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁, 𑀢𑀜𑁆𑀘 𑀅𑀢𑀭𑀦𑁆𑀢𑀸 𑀢𑀁 𑀢𑀁 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀦𑁆𑀢𑀺 𑀘 𑀦𑀺𑀭𑀲𑁆𑀲𑀚𑀦𑁆𑀢𑀺 𑀘 𑀫𑀓𑁆𑀓𑀝𑁄𑀯 𑀲𑀸𑀔𑀦𑁆𑀢𑀺.

𑀧𑀼𑀭𑀺𑀫𑀁 𑀲𑀢𑁆𑀣𑀸𑀭𑀁 𑀧𑀳𑀸𑀬𑀸𑀢𑀺 𑀧𑀼𑀭𑀺𑀫𑀕𑀳𑀺𑀢𑀁 𑀲𑀢𑁆𑀣𑀼𑀧𑀝𑀺𑀜𑁆𑀜𑀁 𑀯𑀚𑁆𑀚𑁂𑀢𑁆𑀯𑀸. 𑀧𑀭𑀁 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀺𑀢𑀸𑀢𑀺 𑀅𑀜𑁆𑀜𑀁 𑀲𑀢𑁆𑀣𑀼𑀧𑀝𑀺𑀜𑁆𑀜𑀁 𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸. 𑀧𑀼𑀭𑀺𑀫𑀁 𑀥𑀫𑁆𑀫𑀓𑁆𑀔𑀸𑀦𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀚𑀸𑀦𑀼𑀕𑀸𑀢𑀺 𑀢𑀡𑁆𑀳𑀸𑀬 𑀅𑀦𑀼𑀕𑀸. 𑀏𑀚𑀸𑀦𑀼𑀕𑀢𑀸𑀢𑀺 𑀢𑀡𑁆𑀳𑀸𑀬 𑀅𑀦𑀼𑀕𑀢𑀸. 𑀏𑀚𑀸𑀦𑀼𑀲𑀝𑀸𑀢𑀺 𑀢𑀡𑁆𑀳𑀸𑀬 𑀅𑀦𑀼𑀲𑀝𑀸 𑀧𑀓𑁆𑀔𑀦𑁆𑀤𑀸 𑀯𑀸. 𑀏𑀚𑀸𑀬 𑀧𑀦𑁆𑀦𑀸 𑀧𑀢𑀺𑀢𑀸𑀢𑀺 𑀢𑀡𑁆𑀳𑀸𑀬 𑀦𑀺𑀫𑀼𑀕𑁆𑀕𑀸 𑀘 𑀦𑀺𑀓𑁆𑀔𑀺𑀧𑀺𑀢𑀸 𑀘.

𑀫𑀓𑁆𑀓𑀝𑁄𑀢𑀺 𑀯𑀸𑀦𑀭𑁄. 𑀅𑀭𑀜𑁆𑀜𑁂𑀢𑀺 𑀯𑀺𑀧𑀺𑀦𑁂. 𑀧𑀯𑀦𑁂𑀢𑀺 𑀫𑀳𑀸𑀯𑀦𑁂. 𑀘𑀭𑀫𑀸𑀦𑁄𑀢𑀺 𑀕𑀘𑁆𑀙𑀫𑀸𑀦𑁄. 𑀏𑀯𑀫𑁂𑀯𑀸𑀢𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁. 𑀧𑀼𑀣𑀽𑀢𑀺 𑀦𑀸𑀦𑀸. 𑀧𑀼𑀣𑀼𑀤𑀺𑀝𑁆𑀞𑀺𑀕𑀢𑀸𑀦𑀻𑀢𑀺 𑀦𑀸𑀦𑀸𑀯𑀺𑀥𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀕𑀡𑁆𑀳𑀦𑁆𑀢𑀺 𑀘 𑀫𑀼𑀜𑁆𑀘𑀦𑁆𑀢𑀺 𑀘𑀸𑀢𑀺 𑀕𑀳𑀡𑀯𑀲𑁂𑀦 𑀕𑀡𑁆𑀳𑀦𑁆𑀢𑀺 𑀘 𑀘𑀚𑀦𑀯𑀲𑁂𑀦 𑀫𑀼𑀜𑁆𑀘𑀦𑁆𑀢𑀺 𑀘. 𑀆𑀤𑀺𑀬𑀦𑁆𑀢𑀺 𑀘 𑀦𑀺𑀭𑀲𑁆𑀲𑀚𑀦𑁆𑀢𑀺 𑀘𑀸𑀢𑀺 𑀧𑀮𑀺𑀩𑁄𑀥𑀁 𑀓𑀭𑁄𑀦𑁆𑀢𑀺 𑀘 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺 𑀘 𑀔𑀺𑀧𑀦𑁆𑀢𑀺 𑀘.

𑁨𑁭. 𑀧𑀜𑁆𑀘𑀫𑀕𑀸𑀣𑀸𑀬 𑀘 𑀲𑀫𑁆𑀩𑀦𑁆𑀥𑁄 𑁋 𑀬𑁄 𑀘 𑀲𑁄 ‘‘𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄, 𑀲𑁄 𑀲𑀬𑀁 𑀲𑀫𑀸𑀤𑀸𑀬𑀸𑀢𑀺. 𑀢𑀢𑁆𑀣 𑀲𑀬𑀦𑁆𑀢𑀺 𑀲𑀸𑀫𑀁. 𑀲𑀫𑀸𑀤𑀸𑀬𑀸𑀢𑀺 𑀕𑀳𑁂𑀢𑁆𑀯𑀸. 𑀯𑀢𑀸𑀦𑀻𑀢𑀺 𑀳𑀢𑁆𑀣𑀺𑀯𑀢𑀸𑀤𑀻𑀦𑀺. 𑀉𑀘𑁆𑀘𑀸𑀯𑀘𑀦𑁆𑀢𑀺 𑀅𑀧𑀭𑀸𑀧𑀭𑀁, 𑀳𑀻𑀦𑀧𑀡𑀻𑀢𑀁 𑀯𑀸 𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀸𑀤𑀺𑀁. 𑀲𑀜𑁆𑀜𑀲𑀢𑁆𑀢𑁄𑀢𑀺 𑀓𑀸𑀫𑀲𑀜𑁆𑀜𑀸𑀤𑀻𑀲𑀼 𑀮𑀕𑁆𑀕𑁄. 𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺 𑀧𑀭𑀫𑀢𑁆𑀣𑀯𑀺𑀤𑁆𑀯𑀸 𑀘 𑀅𑀭𑀳𑀸 𑀘𑀢𑀽𑀳𑀺 𑀫𑀕𑁆𑀕𑀜𑀸𑀡𑀯𑁂𑀤𑁂𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀲𑀸𑀫𑀁 𑀲𑀫𑀸𑀤𑀸𑀬𑀸𑀢𑀺 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸. 𑀆𑀤𑀸𑀬𑀸𑀢𑀺 𑀆𑀤𑀺𑀬𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸. 𑀲𑀫𑀸𑀤𑀸𑀬𑀸𑀢𑀺 𑀲𑀫𑁆𑀫𑀸 𑀆𑀤𑀸𑀬. 𑀆𑀤𑀺𑀬𑀺𑀢𑁆𑀯𑀸𑀢𑀺 𑀧𑀮𑀺𑀩𑁄𑀥𑀁 𑀓𑀢𑁆𑀯𑀸. 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀲𑀫𑁆𑀫𑀸 𑀧𑀮𑀺𑀩𑁄𑀥𑀁 𑀓𑀢𑁆𑀯𑀸. 𑀕𑀡𑁆𑀳𑀺𑀢𑁆𑀯𑀸𑀢𑀺 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀧𑀭𑀸𑀫𑀲𑀺𑀢𑁆𑀯𑀸𑀢𑀺 𑀤𑀲𑁆𑀲𑀺𑀢𑁆𑀯𑀸. 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸. 𑀓𑀸𑀫𑀲𑀜𑁆𑀜𑀸𑀤𑀬𑁄 𑀯𑀼𑀢𑁆𑀢𑀦𑀬𑀸 𑀏𑀯.

𑀯𑀺𑀤𑁆𑀯𑀸𑀢𑀺 𑀫𑁂𑀥𑀸𑀯𑀻. 𑀯𑀺𑀚𑁆𑀚𑀸𑀕𑀢𑁄𑀢𑀺 𑀯𑀺𑀚𑀸𑀦𑀦𑀪𑀸𑀯𑀁 𑀕𑀢𑁄. 𑀜𑀸𑀡𑀻𑀢𑀺 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄. 𑀯𑀺𑀪𑀸𑀯𑀻𑀢𑀺 𑀜𑀸𑀡𑁂𑀦 𑀯𑀻𑀫𑀁𑀲𑀓𑁄. 𑀫𑁂𑀥𑀸𑀯𑀻𑀢𑀺 𑀅𑀦𑀺𑀘𑁆𑀘𑀸𑀤𑀻𑀳𑀺 𑀢𑀼𑀮𑀺𑀢𑀜𑀸𑀡𑁄. 𑀧𑀜𑁆𑀜𑀸𑀢𑀺𑀆𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀬𑁂𑀯. 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀺𑀘𑀺𑀦𑀸𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀩𑁄𑀚𑁆𑀛𑀗𑁆𑀕𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀯𑀻𑀫𑀁𑀲𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀯𑀺𑀘𑀺𑀦𑀦𑀸 𑀧𑀜𑁆𑀜𑀸𑀯. ‘‘𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸’’𑀢𑀺 𑀳𑀺 𑀯𑀼𑀢𑁆𑀢𑀸. 𑀯𑀺𑀧𑀲𑁆𑀲𑀦𑀸𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀯𑀺𑀥𑀸𑀓𑀸𑀭𑁂𑀦 𑀧𑀲𑁆𑀲𑀦𑀸 𑀧𑀜𑁆𑀜𑀸𑀯. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀲𑁄𑀪𑀦𑀸 𑀧𑀲𑀝𑁆𑀞𑀸 𑀲𑀼𑀦𑁆𑀤𑀭𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑁂𑀳𑀺 𑀯𑁂𑀤𑁂𑀳𑀻𑀢𑀺 𑀏𑀢𑁂𑀳𑁂𑀯 𑀘𑀢𑀽𑀳𑀺 𑀫𑀕𑁆𑀕𑀜𑀸𑀡𑁂𑀳𑀺. 𑀅𑀦𑁆𑀢𑀕𑀢𑁄𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄. 𑀓𑁄𑀝𑀺𑀕𑀢𑁄𑀢𑀺𑀆𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀯. 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀚𑀸𑀦𑀺𑀢𑀩𑁆𑀩𑀸𑀦𑀁 𑀅𑀯𑀲𑀸𑀦𑀧𑁆𑀧𑀢𑁆𑀢𑁄. 𑀯𑁂𑀤𑁂𑀳𑀺 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀘𑀢𑀽𑀳𑀺 𑀫𑀕𑁆𑀕𑀜𑀸𑀡𑀯𑁂𑀤𑁂𑀳𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑀪𑀸𑀯𑁂𑀦 𑀅𑀦𑁆𑀢𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄. 𑀯𑀺𑀤𑀺𑀢𑀢𑁆𑀢𑀸𑀢𑀺 𑀯𑀺𑀤𑀺𑀢𑀪𑀸𑀯𑁂𑀦 𑀚𑀸𑀦𑀺𑀢𑀪𑀸𑀯𑁂𑀦.

𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀻𑀢𑀺 𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀬𑁄 𑀘𑀢𑀽𑀳𑀺 𑀫𑀕𑁆𑀕𑀜𑀸𑀡𑀯𑁂𑀤𑁂𑀳𑀺 𑀓𑀺𑀮𑁂𑀲𑀓𑁆𑀔𑀬𑀁 𑀓𑀭𑁄𑀦𑁆𑀢𑁄 𑀕𑀢𑁄, 𑀲𑁄 𑀧𑀭𑀫𑀢𑁆𑀣𑀢𑁄 𑀯𑁂𑀤𑀕𑀽 𑀦𑀸𑀫 𑀳𑁄𑀢𑀺. 𑀲𑁄𑀯 𑀲𑀩𑁆𑀩𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀢𑁆𑀣𑀲𑀜𑁆𑀜𑀺𑀢𑀸𑀦𑀺 𑀯𑁂𑀤𑀸𑀦𑀺 𑀢𑀸𑀬𑁂𑀯 𑀫𑀕𑁆𑀕𑀪𑀸𑀯𑀦𑀸𑀬 𑀓𑀺𑀘𑁆𑀘𑀢𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀘𑁂𑀬𑁆𑀬. 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀢𑀫𑁂𑀯 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀬𑀸𑀧𑀺 𑀯𑁂𑀤𑀧𑀘𑁆𑀘𑀬𑀸, 𑀅𑀜𑁆𑀜𑀣𑀸 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑁂𑀤𑀦𑀸, 𑀢𑀸𑀲𑀼 𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀧𑀢𑁆𑀢𑀺𑀦𑀫𑀸𑀳𑀼 𑀯𑁂𑀤𑀕𑀼’’𑀦𑁆𑀢𑀺 (𑀲𑀼. 𑀦𑀺. 𑁫𑁩𑁩) 𑀧𑀼𑀝𑁆𑀞𑁄 ‘‘𑀇𑀤𑀁 𑀧𑀢𑁆𑀢𑀺𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬…𑀧𑁂… 𑀯𑁂𑀤𑀕𑀽 𑀲𑁄’’𑀢𑀺 𑀆𑀳. 𑀬𑀲𑁆𑀫𑀸 𑀯𑀸 𑀬𑁄 𑀧𑀯𑀺𑀘𑀬𑀧𑀜𑁆𑀜𑀸𑀬 𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬, 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑀢𑁆𑀢𑀢𑀺. 𑀲𑁄 𑀲𑀢𑁆𑀣𑀲𑀜𑁆𑀜𑀺𑀢𑀸𑀦𑀺 𑀯𑁂𑀤𑀸𑀦𑀺 𑀕𑀢𑁄 𑀜𑀸𑀢𑁄 𑀅𑀢𑀺𑀓𑁆𑀓𑀦𑁆𑀢𑁄𑀯 𑀳𑁄𑀢𑀺. 𑀬𑁄 𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄, 𑀲𑁄𑀧𑀺 𑀯𑁂𑀤𑀦𑀸𑀲𑀜𑁆𑀜𑀺𑀢𑀸𑀦𑀺 𑀯𑁂𑀤𑀸𑀦𑀺 𑀕𑀢𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀅𑀢𑀺𑀯𑁂𑀤𑀦𑀁 𑀕𑀢𑁄𑀢𑀺𑀧𑀺 𑀯𑁂𑀤𑀕𑀽. 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀧𑀢𑁆𑀢𑀺𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬…𑀧𑁂… 𑀯𑁂𑀤𑀕𑀽 𑀲𑁄’’𑀢𑀺 𑀆𑀳.

𑀲𑀫𑁂𑀘𑁆𑀘𑀸𑀢𑀺 𑀜𑀸𑀡𑁂𑀦 𑀲𑀫𑀸𑀕𑀦𑁆𑀢𑁆𑀯𑀸. 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀥𑀫𑁆𑀫𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀲𑀩𑁆𑀩𑁂 𑀲𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸. 𑀢𑁂 𑀳𑀺 𑀲𑀗𑁆𑀔𑀢𑀲𑀗𑁆𑀔𑀸𑀭𑀸 𑀦𑀸𑀫. 𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀫𑁆𑀫 𑀓𑀭𑀻𑀬𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸, 𑀢𑁂 𑀏𑀯𑀁 𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀫𑁆𑀫 𑀓𑀢𑀢𑁆𑀢𑀸 ‘‘𑀲𑀗𑁆𑀔𑀢𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸. ‘‘𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀢𑁂𑀪𑀽𑀫𑀓𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀪𑀺𑀲𑀗𑁆𑀔𑀢𑀲𑀗𑁆𑀔𑀸𑀭𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁫𑁮𑁭) 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸. 𑀢𑁂𑀧𑀺 ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁨𑁧, 𑁨𑁭𑁨; 𑀲𑀁. 𑀦𑀺. 𑁧.𑁧𑁮𑁬) 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. ‘‘𑀅𑀯𑀺𑀚𑁆𑀚𑀸𑀕𑀢𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑀜𑁆𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁫𑁧) 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀯 𑀆𑀕𑀢𑀸. 𑀢𑁂𑀪𑀽𑀫𑀺𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑀸 𑀦𑀸𑀫. ‘‘𑀬𑀸𑀯𑀢𑀺𑀓𑀸 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀕𑀢𑀺, 𑀢𑀸𑀯𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀓𑁆𑀔𑀸𑀳𑀢𑀁 𑀫𑀜𑁆𑀜𑁂 𑀅𑀝𑁆𑀞𑀸𑀲𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁫) 𑀆𑀕𑀢𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀧𑀬𑁄𑀕𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀪𑀺𑀓𑁆𑀔𑀼𑀦𑁄 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺 𑀯𑀘𑀻𑀲𑀗𑁆𑀔𑀸𑀭𑁄, 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀢𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁬𑁪) 𑀆𑀕𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀸𑀘𑀁 𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀯𑀘𑀻𑀲𑀗𑁆𑀔𑀸𑀭𑀸, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑀸, 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑀺𑀢𑁆𑀢𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀸. 𑀇𑀥 𑀧𑀦 𑀲𑀗𑁆𑀔𑀢𑀲𑀗𑁆𑀔𑀸𑀭𑀸 𑀅𑀥𑀺𑀧𑁆𑀧𑁂𑀢𑀸. 𑀅𑀦𑀺𑀘𑁆𑀘𑀸 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦. 𑀤𑀼𑀓𑁆𑀔𑀸 𑀧𑀝𑀺𑀧𑀻𑀴𑀦𑀝𑁆𑀞𑁂𑀦. 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀦𑀺𑀩𑁆𑀩𑀸𑀦𑀫𑁆𑀧𑀺 𑀅𑀦𑁆𑀢𑁄𑀓𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀦𑀢𑁆𑀢𑀸 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀏𑀢𑁆𑀣 𑀬𑀁 𑀧𑀝𑀺𑀘𑁆𑀘 𑀨𑀮𑀫𑁂𑀢𑀺, 𑀲𑁄 𑀧𑀘𑁆𑀘𑀬𑁄. 𑀧𑀝𑀺𑀘𑁆𑀘𑀸𑀢𑀺 𑀦 𑀯𑀺𑀦𑀸, 𑀅𑀧𑀘𑁆𑀘𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑀻𑀢𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀉𑀧𑀓𑀸𑀭𑀓𑀝𑁆𑀞𑁄 𑀧𑀘𑁆𑀘𑀬𑀝𑁆𑀞𑁄. 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸. 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀯𑀁 𑀲𑀫𑁆𑀪𑀯𑀦𑁆𑀢𑀺𑀲𑀤𑁆𑀤𑀲𑁆𑀲 𑀲𑁂𑀲𑀧𑀤𑁂𑀳𑀺𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁. 𑀓𑀢𑀫𑁂 𑀲𑀗𑁆𑀔𑀸𑀭𑀸? 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄, 𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀘𑀢𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀜𑁆𑀘𑁂𑀢𑀦𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀇𑀫𑁂 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺? 𑀅𑀯𑀺𑀚𑁆𑀚𑀸𑀪𑀸𑀯𑁂 𑀪𑀸𑀯𑀢𑁄. 𑀬𑀲𑁆𑀲 𑀳𑀺 𑀤𑀼𑀓𑁆𑀔𑀸𑀤𑀻𑀲𑀼 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀅𑀜𑁆𑀜𑀸𑀡𑀁 𑀅𑀧𑁆𑀧𑀳𑀻𑀦𑀁 𑀳𑁄𑀢𑀺, 𑀲𑁄 𑀤𑀼𑀓𑁆𑀔𑁂 𑀢𑀸𑀯 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘 𑀅𑀜𑁆𑀜𑀸𑀡𑁂𑀦 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀼𑀔𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀢𑀲𑁆𑀲𑁂𑀯 𑀳𑁂𑀢𑀼𑀪𑀽𑀢𑁂 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀺. 𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑀳𑁂𑀢𑀼𑀪𑀽𑀢𑁂𑀧𑀺 𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑁂 𑀲𑀗𑁆𑀔𑀸𑀭𑁂 𑀲𑀼𑀔𑀳𑁂𑀢𑀼𑀢𑁄 𑀫𑀜𑁆𑀜𑀫𑀸𑀦𑁄 𑀆𑀭𑀪𑀢𑀺. 𑀦𑀺𑀭𑁄𑀥𑁂 𑀧𑀦 𑀫𑀕𑁆𑀕𑁂 𑀘 𑀅𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑀲𑁆𑀲 𑀅𑀦𑀺𑀭𑁄𑀥𑀪𑀽𑀢𑁂𑀧𑀺 𑀕𑀢𑀺𑀯𑀺𑀲𑁂𑀲𑁂 𑀤𑀼𑀓𑁆𑀔𑀦𑀺𑀭𑁄𑀥𑀲𑀜𑁆𑀜𑀻 𑀳𑀼𑀢𑁆𑀯𑀸 𑀦𑀺𑀭𑁄𑀥𑀲𑁆𑀲 𑀘 𑀅𑀫𑀕𑁆𑀕𑀪𑀽𑀢𑁂𑀲𑀼𑀧𑀺 𑀬𑀜𑁆𑀜𑀸𑀫𑀭𑀢𑀧𑀸𑀤𑀻𑀲𑀼 𑀦𑀺𑀭𑁄𑀥𑀫𑀕𑁆𑀕𑀲𑀜𑁆𑀜𑀻 𑀳𑀼𑀢𑁆𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑀁 𑀧𑀢𑁆𑀣𑀬𑀫𑀸𑀦𑁄 𑀬𑀜𑁆𑀜𑀸𑀫𑀭𑀢𑀧𑀸𑀤𑀺𑀫𑀼𑀔𑁂𑀦 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀺.

𑀅𑀧𑀺 𑀘 𑀲𑁄 𑀢𑀸𑀬 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑀢𑀸𑀬 𑀯𑀺𑀲𑁂𑀲𑀢𑁄 𑀚𑀸𑀢𑀺𑀚𑀭𑀸𑀭𑁄𑀕𑀫𑀭𑀡𑀸𑀤𑀺𑀅𑀦𑁂𑀓𑀸𑀤𑀻𑀦𑀯𑀯𑁄𑀓𑀺𑀡𑁆𑀡𑀫𑁆𑀧𑀺 𑀧𑀼𑀜𑁆𑀜𑀨𑀮𑀲𑀗𑁆𑀔𑀸𑀢𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀢𑁄 𑀅𑀚𑀸𑀦𑀦𑁆𑀢𑁄 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀪𑁂𑀤𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀤𑁂𑀯𑀘𑁆𑀙𑀭𑀓𑀸𑀫𑀓𑁄 𑀯𑀺𑀬 𑀫𑀭𑀼𑀧𑁆𑀧𑀧𑀸𑀢𑀁. 𑀲𑀼𑀔𑀲𑀫𑁆𑀫𑀢𑀲𑁆𑀲𑀸𑀧𑀺 𑀘 𑀢𑀲𑁆𑀲 𑀧𑀼𑀜𑁆𑀜𑀨𑀮𑀲𑁆𑀲 𑀅𑀦𑁆𑀢𑁂 𑀫𑀳𑀸𑀧𑀭𑀺𑀴𑀸𑀳𑀚𑀦𑀺𑀓𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀁 𑀅𑀧𑁆𑀧𑀲𑁆𑀲𑀸𑀤𑀢𑀜𑁆𑀘 𑀅𑀧𑀲𑁆𑀲𑀦𑁆𑀢𑁄𑀧𑀺 𑀢𑀧𑁆𑀧𑀘𑁆𑀘𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀲𑀮𑀪𑁄 𑀯𑀺𑀬 𑀤𑀻𑀧𑀲𑀺𑀔𑀸𑀪𑀺𑀦𑀺𑀧𑀸𑀢𑀁, 𑀫𑀥𑀼𑀩𑀺𑀦𑁆𑀤𑀼𑀕𑀺𑀤𑁆𑀥𑁄 𑀯𑀺𑀬 𑀘 𑀫𑀥𑀼𑀮𑀺𑀢𑁆𑀢𑀲𑀢𑁆𑀣𑀥𑀸𑀭𑀸𑀮𑁂𑀳𑀦𑀁.

𑀓𑀸𑀫𑀼𑀧𑀲𑁂𑀯𑀦𑀸𑀤𑀻𑀲𑀼 𑀘 𑀲𑀯𑀺𑀧𑀸𑀓𑁂𑀲𑀼 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀸𑀬 𑀘𑁂𑀯 𑀓𑀺𑀮𑁂𑀲𑀸𑀪𑀺𑀪𑀽𑀢𑀢𑀸𑀬 𑀘 𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀯𑀢𑁆𑀢𑀫𑁆𑀧𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀩𑀸𑀮𑁄 𑀯𑀺𑀬 𑀕𑀽𑀣𑀓𑀻𑀴𑀦𑀁, 𑀫𑀭𑀺𑀢𑀼𑀓𑀸𑀫𑁄 𑀯𑀺𑀬 𑀘 𑀯𑀺𑀲𑀔𑀸𑀤𑀦𑀁. 𑀆𑀭𑀼𑀧𑁆𑀧𑀯𑀺𑀧𑀸𑀓𑁂𑀲𑀼 𑀘𑀸𑀧𑀺 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀁 𑀅𑀦𑀯𑀩𑀼𑀚𑁆𑀛𑀫𑀸𑀦𑁄 𑀲𑀲𑁆𑀲𑀢𑀸𑀤𑀺𑀯𑀺𑀧𑀮𑁆𑀮𑀸𑀲𑁂𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑀪𑀽𑀢𑀁 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀤𑀺𑀲𑀸𑀫𑀽𑀴𑁆𑀳𑁄 𑀯𑀺𑀬 𑀧𑀺𑀲𑀸𑀘𑀦𑀕𑀭𑀸𑀪𑀺𑀫𑀼𑀔𑀫𑀕𑁆𑀕𑀕𑀫𑀦𑀁. 𑀏𑀯𑀁 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀪𑀸𑀯𑀢𑁄𑀯 𑀲𑀗𑁆𑀔𑀸𑀭𑀪𑀸𑀯𑁄, 𑀦 𑀅𑀪𑀸𑀯𑀢𑁄. 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 ‘‘𑀇𑀫𑁂 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺.

𑀏𑀢𑁆𑀣𑀸𑀳 𑁋 𑀕𑀡𑁆𑀳𑀸𑀫 𑀢𑀸𑀯 𑀏𑀢𑀁 ‘‘𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄’’𑀢𑀺, 𑀓𑀺𑀁 𑀧𑀦𑀸𑀬𑀫𑁂𑀓𑀸𑀯 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀧𑀘𑁆𑀘𑀬𑀸 𑀲𑀦𑁆𑀢𑀻𑀢𑀺? 𑀓𑀺𑀁 𑀧𑀦𑁂𑀢𑁆𑀣 𑀬𑀤𑀺 𑀢𑀸𑀯 𑀏𑀓𑀸𑀯, 𑀏𑀓𑀓𑀸𑀭𑀡𑀯𑀸𑀤𑁄 𑀆𑀧𑀚𑁆𑀚𑀢𑀺. 𑀅𑀣 𑀅𑀜𑁆𑀜𑁂𑀧𑀺 𑀲𑀦𑁆𑀢𑀺, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀓𑀓𑀸𑀭𑀡𑀦𑀺𑀤𑁆𑀤𑁂𑀲𑁄 𑀦𑀼𑀧𑀧𑀚𑁆𑀚𑀢𑀻𑀢𑀺? 𑀦 𑀦𑀼𑀧𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑁋

‘‘𑀏𑀓𑀁 𑀦 𑀏𑀓𑀢𑁄 𑀇𑀥, 𑀦𑀸𑀦𑁂𑀓𑀫𑀦𑁂𑀓𑀢𑁄𑀧𑀺 𑀦𑁄 𑀏𑀓𑀁;

𑀨𑀮𑀫𑀢𑁆𑀣𑀺 𑀅𑀢𑁆𑀣𑀺 𑀧𑀦 𑀏𑀓-𑀳𑁂𑀢𑀼𑀨𑀮𑀤𑀻𑀧𑀦𑁂 𑀅𑀢𑁆𑀣𑁄’’. (𑀯𑀺𑀪. 𑀅𑀝𑁆𑀞. 𑁨𑁨𑁬, 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁧𑁦𑁫; 𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁭);

𑀪𑀕𑀯𑀸 𑀳𑀺 𑀓𑀢𑁆𑀣𑀘𑀺 𑀧𑀥𑀸𑀦𑀢𑁆𑀢𑀸, 𑀓𑀢𑁆𑀣𑀘𑀺 𑀧𑀸𑀓𑀝𑀢𑁆𑀢𑀸, 𑀓𑀢𑁆𑀣𑀘𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑀲𑁆𑀲 𑀘 𑀯𑁂𑀦𑁂𑀬𑁆𑀬𑀸𑀦𑀜𑁆𑀘 𑀅𑀦𑀼𑀭𑀽𑀧𑀢𑁄 𑀏𑀓𑀫𑁂𑀯 𑀳𑁂𑀢𑀼𑀁 𑀯𑀸 𑀨𑀮𑀁 𑀯𑀸 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀅𑀬𑀫𑀺𑀥 𑀅𑀯𑀺𑀚𑁆𑀚𑀸 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀯𑀢𑁆𑀣𑀸𑀭𑀫𑁆𑀫𑀡𑀲𑀳𑀚𑀸𑀢𑀥𑀫𑁆𑀫𑀸𑀤𑀻𑀲𑀼 𑀲𑀗𑁆𑀔𑀸𑀭𑀓𑀸𑀭𑀡𑁂𑀲𑀼 ‘‘𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁨) 𑀘, ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀆𑀲𑀯𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁪) 𑀘 𑀯𑀘𑀦𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀢𑀡𑁆𑀳𑀸𑀤𑀻𑀦𑀁 𑀲𑀗𑁆𑀔𑀸𑀭𑀳𑁂𑀢𑀽𑀦𑀁 𑀳𑁂𑀢𑀽𑀢𑀺 𑀧𑀥𑀸𑀦𑀢𑁆𑀢𑀸, ‘‘𑀅𑀯𑀺𑀤𑁆𑀯𑀸, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀕𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺 𑀧𑀸𑀓𑀝𑀢𑁆𑀢𑀸, 𑀅𑀲𑀸𑀥𑀸𑀭𑀡𑀢𑁆𑀢𑀸 𑀘 𑀲𑀗𑁆𑀔𑀸𑀭𑀸𑀦𑀁 𑀳𑁂𑀢𑀼𑀪𑀸𑀯𑁂𑀦 𑀤𑀻𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀦𑁂𑀯 𑀘 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑀧𑀭𑀺𑀳𑀸𑀭𑀯𑀘𑀦𑁂𑀦 𑀲𑀩𑁆𑀩𑀢𑁆𑀣 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑁂 𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀏𑀯𑀁 𑀲𑀦𑁆𑀢𑁂𑀧𑀺 𑀏𑀓𑀦𑁆𑀢𑀸𑀦𑀺𑀝𑁆𑀞𑀨𑀮𑀸𑀬 𑀲𑀸𑀯𑀚𑁆𑀚𑀸𑀬 𑀅𑀯𑀺𑀚𑁆𑀚𑀸𑀬 𑀓𑀣𑀁 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀢𑁆𑀢𑀁 𑀬𑀼𑀚𑁆𑀚𑀢𑀺? 𑀦 𑀳𑀺 𑀦𑀺𑀫𑁆𑀩𑀩𑀻𑀚𑀢𑁄 𑀉𑀘𑁆𑀙𑀼 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀓𑀣𑀁 𑀦 𑀬𑀼𑀚𑁆𑀚𑀺𑀲𑁆𑀲𑀢𑀺? 𑀮𑁄𑀓𑀲𑁆𑀫𑀺𑀜𑁆𑀳𑀺 𑁋

‘‘𑀯𑀺𑀭𑀼𑀤𑁆𑀥𑁄 𑀘𑀸 𑀯𑀺𑀭𑀼𑀤𑁆𑀥𑁄 𑀘, 𑀲𑀤𑀺𑀲𑀸𑀲𑀤𑀺𑀲𑁄 𑀢𑀣𑀸;

𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀲𑀺𑀤𑁆𑀥𑁄, 𑀯𑀺𑀧𑀸𑀓𑀸 𑀏𑀯 𑀢𑁂 𑀘 𑀦’’.

𑀇𑀢𑀺 𑀅𑀬𑀁 𑀅𑀯𑀺𑀚𑁆𑀚𑀸 𑀯𑀺𑀧𑀸𑀓𑀯𑀲𑁂𑀦 𑀏𑀓𑀦𑁆𑀢𑀸𑀦𑀺𑀝𑁆𑀞𑀨𑀮𑀸, 𑀲𑀪𑀸𑀯𑀯𑀲𑁂𑀦 𑀘 𑀲𑀸𑀯𑀚𑁆𑀚𑀸𑀧𑀺 𑀲𑀫𑀸𑀦𑀸 𑀲𑀩𑁆𑀩𑁂𑀲𑀫𑁆𑀧𑀺 𑀏𑀢𑁂𑀲𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀬𑀣𑀸𑀦𑀼𑀭𑀽𑀧𑀁 𑀞𑀸𑀦𑀓𑀺𑀘𑁆𑀘𑀲𑀪𑀸𑀯𑀯𑀺𑀭𑀼𑀤𑁆𑀥𑀸𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑀯𑀲𑁂𑀦, 𑀲𑀤𑀺𑀲𑀸𑀲𑀤𑀺𑀲𑀧𑀘𑁆𑀘𑀬𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺 𑀘 𑀅𑀬𑀁 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄 𑁋

‘‘𑀘𑀼𑀢𑀽𑀧𑀧𑀸𑀢𑁂 𑀲𑀁𑀲𑀸𑀭𑁂, 𑀲𑀗𑁆𑀔𑀸𑀭𑀸𑀦𑀜𑁆𑀘 𑀮𑀓𑁆𑀔𑀡𑁂;

𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦-𑀥𑀫𑁆𑀫𑁂𑀲𑀼 𑀘 𑀯𑀺𑀫𑀼𑀬𑁆𑀳𑀢𑀺.

‘‘𑀅𑀪𑀺𑀲𑀗𑁆𑀔𑀭𑁄𑀢𑀺 𑀲𑁄 𑀏𑀢𑁂, 𑀲𑀗𑁆𑀔𑀸𑀭𑁂 𑀢𑀺𑀯𑀺𑀥𑁂 𑀬𑀢𑁄;

𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄 𑀢𑁂𑀲𑀁, 𑀢𑀺𑀯𑀺𑀥𑀸𑀦𑀫𑁆𑀧𑀬𑀁 𑀢𑀢𑁄.

‘‘𑀬𑀣𑀸𑀧𑀺 𑀦𑀸𑀫 𑀚𑀘𑁆𑀘𑀦𑁆𑀥𑁄, 𑀦𑀭𑁄 𑀅𑀧𑀭𑀺𑀡𑀸𑀬𑀓𑁄;

𑀏𑀓𑀤𑀸 𑀬𑀸𑀢𑀺 𑀫𑀕𑁆𑀕𑁂𑀦, 𑀉𑀫𑁆𑀫𑀕𑁆𑀕𑁂𑀦𑀸𑀧𑀺 𑀏𑀓𑀤𑀸.

‘‘𑀲𑀁𑀲𑀸𑀭𑁂 𑀲𑀁𑀲𑀭𑀁 𑀩𑀸𑀮𑁄, 𑀢𑀣𑀸 𑀅𑀧𑀭𑀺𑀡𑀸𑀬𑀓𑁄;

𑀓𑀭𑁄𑀢𑀺 𑀏𑀓𑀤𑀸 𑀧𑀼𑀜𑁆𑀜𑀁, 𑀅𑀧𑀼𑀜𑁆𑀜𑀫𑀧𑀺 𑀏𑀓𑀤𑀸.

‘‘𑀬𑀤𑀸 𑀘 𑀜𑀢𑁆𑀯𑀸 𑀲𑁄 𑀥𑀫𑁆𑀫𑀁, 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀲𑁆𑀲𑀢𑀺;

𑀢𑀤𑀸 𑀅𑀯𑀺𑀚𑁆𑀚𑀽𑀧𑀲𑀫𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀢𑀻’’𑀢𑀺.

𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀙𑀯𑀺𑀜𑁆𑀜𑀸𑀡𑀓𑀸𑀬𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀖𑀸𑀦𑀯𑀺𑀜𑁆𑀜𑀸𑀡𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺. 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀦 𑀤𑁆𑀯𑁂 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑁄, 𑀢𑀺𑀲𑁆𑀲𑁄 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀅𑀝𑁆𑀞 𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀻𑀢𑀺 𑀩𑀸𑀯𑀻𑀲𑀢𑀺𑀯𑀺𑀥𑀁. 𑀇𑀢𑀺 𑀲𑀩𑁆𑀩𑀸𑀦𑀺 𑀩𑀸𑀢𑁆𑀢𑀺𑀁𑀲𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀇𑀤𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀳𑁄𑀢𑀻’’𑀢𑀺? 𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀯𑀺𑀧𑀸𑀓𑀸𑀪𑀸𑀯𑀢𑁄. 𑀯𑀺𑀧𑀸𑀓𑀜𑁆𑀳𑁂𑀢𑀁, 𑀯𑀺𑀧𑀸𑀓𑀜𑁆𑀘 𑀦 𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀉𑀧𑁆𑀧𑀚𑁆𑀚𑀢𑀺, 𑀬𑀤𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀩𑁆𑀩𑁂𑀲𑀁 𑀲𑀩𑁆𑀩𑀯𑀺𑀧𑀸𑀓𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦 𑀘 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀇𑀤𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻’’𑀢𑀺. 𑀲𑀩𑁆𑀩𑀫𑁂𑀯 𑀳𑀺 𑀇𑀤𑀁 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀤𑁆𑀯𑁂𑀥𑀸 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀤𑁆𑀯𑁂 𑀫𑀦𑁄𑀥𑀸𑀢𑀼𑀬𑁄, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀇𑀫𑀸𑀦𑀺 𑀢𑁂𑀭𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀯𑀢𑁆𑀢𑀺𑀬𑀁𑀬𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀲𑁂𑀲𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀬𑀣𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀺𑀬𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀯𑀢𑁆𑀢𑀦𑁆𑀢𑀺.

‘‘𑀮𑀤𑁆𑀥𑀧𑁆𑀧𑀘𑁆𑀘𑀬𑀫𑀺𑀢𑀺 𑀥𑀫𑁆𑀫-𑀫𑀢𑁆𑀢𑀫𑁂𑀢𑀁 𑀪𑀯𑀦𑁆𑀢𑀭𑀫𑀼𑀧𑁂𑀢𑀺;

𑀦𑀸𑀲𑁆𑀲 𑀢𑀢𑁄 𑀲𑀗𑁆𑀓𑀦𑁆𑀢𑀺, 𑀦 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀳𑁄𑀢𑀺’’.

𑀇𑀢𑀺 𑀳𑁂𑀢𑀁 𑀮𑀤𑁆𑀥𑀧𑁆𑀧𑀘𑁆𑀘𑀬𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 ‘‘𑀪𑀯𑀦𑁆𑀢𑀭𑀫𑀼𑀧𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀲𑀢𑁆𑀢𑁄 𑀦 𑀚𑀻𑀯𑁄. 𑀢𑀲𑁆𑀲 𑀘 𑀦𑀸𑀧𑀺 𑀅𑀢𑀻𑀢𑀪𑀯𑀢𑁄 𑀇𑀥 𑀲𑀗𑁆𑀓𑀦𑁆𑀢𑀺 𑀅𑀢𑁆𑀣𑀺, 𑀦𑀸𑀧𑀺 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀇𑀥 𑀧𑀸𑀢𑀼𑀪𑀸𑀯𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀁 𑀘𑀯𑀦𑀢𑁄 𑀘𑀼𑀢𑀺, 𑀧𑀘𑁆𑀙𑀺𑀫𑀁 𑀪𑀯𑀦𑁆𑀢𑀭𑀸𑀤𑀺𑀧𑀝𑀺𑀲𑀦𑁆𑀥𑀸𑀦𑀢𑁄 𑀧𑀝𑀺𑀲𑀦𑁆𑀥𑀻𑀢𑀺 𑀯𑀼𑀘𑁆𑀘𑀢𑀺.

𑀏𑀢𑁆𑀣𑀸𑀳 𑁋 𑀦𑀦𑀼 𑀏𑀯𑀁 𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂 𑀲𑀢𑀺 𑀬𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀔𑀦𑁆𑀥𑀸, 𑀢𑁂𑀲𑀁 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀨𑀮𑀧𑀘𑁆𑀘𑀬𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀢𑀢𑁆𑀣 𑀅𑀕𑀫𑀦𑀢𑁄, 𑀅𑀜𑁆𑀜𑀲𑁆𑀲 𑀅𑀜𑁆𑀜𑀢𑁄 𑀘 𑀢𑀁 𑀨𑀮𑀁 𑀲𑀺𑀬𑀸, 𑀉𑀧𑀪𑀼𑀜𑁆𑀚𑀓𑁂 𑀘 𑀅𑀲𑀢𑀺 𑀓𑀲𑁆𑀲 𑀢𑀁 𑀨𑀮𑀁 𑀲𑀺𑀬𑀸, 𑀢𑀲𑁆𑀫𑀸 𑀦 𑀲𑀼𑀦𑁆𑀤𑀭𑀫𑀺𑀤𑀁 𑀯𑀺𑀥𑀸𑀦𑀦𑁆𑀢𑀺? 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀦𑁆𑀢𑀸𑀦𑁂 𑀬𑀁 𑀨𑀮𑀁 𑀏𑀢𑀁, 𑀦𑀸𑀜𑁆𑀜𑀲𑁆𑀲 𑀦 𑀘 𑀅𑀜𑁆𑀜𑀢𑁄;

𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑁄.

‘‘𑀨𑀮𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀏𑀯, 𑀲𑀺𑀤𑁆𑀥𑀸 𑀪𑀼𑀜𑁆𑀚𑀓𑀲𑀫𑁆𑀫𑀼𑀢𑀺;

𑀨𑀮𑀼𑀧𑁆𑀧𑀸𑀤𑁂𑀦 𑀭𑀼𑀓𑁆𑀔𑀲𑁆𑀲, 𑀬𑀣𑀸 𑀨𑀮𑀢𑀺 𑀲𑀫𑁆𑀫𑀼𑀢𑀻’’𑀢𑀺.

𑀬𑁄𑀧𑀺 𑀯𑀤𑁂𑀬𑁆𑀬 ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀏𑀢𑁂 𑀲𑀗𑁆𑀔𑀸𑀭𑀸 𑀯𑀺𑀚𑁆𑀚𑀫𑀸𑀦𑀸 𑀯𑀸 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀲𑀺𑀬𑀼𑀁, 𑀅𑀯𑀺𑀚𑁆𑀚𑀫𑀸𑀦𑀸 𑀯𑀸. 𑀬𑀤𑀺 𑀘 𑀯𑀺𑀚𑁆𑀚𑀫𑀸𑀦𑀸, 𑀧𑀯𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀦𑁂𑀲𑀁 𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀣 𑀅𑀯𑀺𑀚𑁆𑀚𑀫𑀸𑀦𑀸, 𑀧𑀯𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀘 𑀦𑀺𑀘𑁆𑀘𑀁 𑀨𑀮𑀸𑀯𑀳𑀸 𑀲𑀺𑀬𑀼’’𑀦𑁆𑀢𑀺. 𑀲𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 𑁋

‘‘𑀓𑀢𑀢𑁆𑀢𑀸 𑀧𑀘𑁆𑀘𑀬𑀸 𑀏𑀢𑁂, 𑀦 𑀘 𑀦𑀺𑀘𑁆𑀘𑀁 𑀨𑀮𑀸𑀯𑀳𑀸;

𑀧𑀸𑀝𑀺𑀪𑁄𑀕𑀸𑀤𑀺𑀓𑀁 𑀢𑀢𑁆𑀣, 𑀯𑁂𑀤𑀺𑀢𑀩𑁆𑀩𑀁 𑀦𑀺𑀤𑀲𑁆𑀲𑀦’’𑀦𑁆𑀢𑀺.

𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀇𑀥 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸 𑀦𑀸𑀫𑀁, 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀁 𑀭𑀽𑀧𑀁. 𑀅𑀪𑀸𑀯𑀓𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀅𑀡𑁆𑀟𑀚𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀤𑀲𑀓𑀁 𑀓𑀸𑀬𑀤𑀲𑀓𑀦𑁆𑀢𑀺 𑀯𑀻𑀲𑀢𑀺 𑀭𑀽𑀧𑀭𑀽𑀧𑀸𑀦𑀺, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀏𑀢𑁂 𑀢𑁂𑀯𑀻𑀲𑀢𑀺 𑀥𑀫𑁆𑀫𑀸 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀪𑀸𑀯𑀓𑀸𑀦𑀁 𑀪𑀸𑀯𑀤𑀲𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀢𑁆𑀢𑀺𑀁𑀲, 𑀑𑀧𑀧𑀸𑀢𑀺𑀓𑀲𑀢𑁆𑀢𑁂𑀲𑀼 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀤𑀲𑀓𑀸𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀯𑀓𑀜𑁆𑀘𑀸𑀢𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀭𑀽𑀧𑀭𑀽𑀧𑀸𑀦𑀺, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀏𑀢𑁂 𑀩𑀸𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀪𑀯𑁂 𑀧𑀦 𑀲𑁂𑀲𑀑𑀧𑀧𑀸𑀢𑀺𑀓𑀸𑀦𑀁, 𑀲𑀁𑀲𑁂𑀤𑀚𑀸𑀦𑀁 𑀯𑀸 𑀲𑀪𑀸𑀯𑀓𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀪𑀸𑀯𑀤𑀲𑀓𑀸𑀦𑀻𑀢𑀺 𑀲𑀢𑁆𑀢𑀢𑀺 𑀭𑀽𑀧𑀭𑀽𑀧𑀸𑀦𑀺, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀏𑀢𑁂 𑀢𑁂𑀲𑀢𑁆𑀢𑀢𑀺 𑀥𑀫𑁆𑀫𑀸 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀉𑀓𑁆𑀓𑀁𑀲𑁄, 𑀅𑀯𑀓𑀁𑀲𑁂𑀦 𑀧𑀦 𑀢𑀁𑀢𑀁𑀤𑀲𑀓𑀯𑀺𑀓𑀮𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀳𑀸𑀧𑁂𑀢𑁆𑀯𑀸 𑀳𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀬𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀲𑀗𑁆𑀔𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀽𑀧𑀻𑀦𑀁 𑀧𑀦 𑀢𑀬𑁄𑀯 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀅𑀲𑀜𑁆𑀜𑀻𑀦𑀁 𑀭𑀽𑀧𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀯𑀓𑀫𑁂𑀯𑀸𑀢𑀺. 𑀏𑀲 𑀢𑀸𑀯 𑀧𑀝𑀺𑀲𑀦𑁆𑀥𑀺𑀬𑀁 𑀦𑀬𑁄.

𑀧𑀯𑀢𑁆𑀢𑁂 𑀧𑀦 𑀲𑀩𑁆𑀩𑀢𑁆𑀣 𑀭𑀽𑀧𑀧𑀯𑀢𑁆𑀢𑀺𑀤𑁂𑀲𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳 𑀧𑀯𑀢𑁆𑀢𑀉𑀢𑀼𑀢𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀲𑀼𑀤𑁆𑀥𑀝𑁆𑀞𑀓𑀁 𑀧𑀸𑀢𑀼𑀪𑀯𑀢𑀺. 𑀧𑀞𑀫𑀪𑀯𑀗𑁆𑀕𑀢𑁄 𑀧𑀪𑀼𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀼𑀤𑁆𑀥𑀝𑁆𑀞𑀓𑀁, 𑀲𑀤𑁆𑀤𑀧𑀸𑀢𑀼𑀪𑀸𑀯𑀓𑀸𑀮𑁂 𑀉𑀢𑀼𑀢𑁄 𑀘𑁂𑀯 𑀘𑀺𑀢𑁆𑀢𑀢𑁄 𑀘 𑀲𑀤𑁆𑀤𑀦𑀯𑀓𑀁, 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀚𑀻𑀯𑀻𑀦𑀁 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀲𑀼𑀤𑁆𑀥𑀝𑁆𑀞𑀓𑀦𑁆𑀢𑀺 𑀏𑀯𑀁 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲, 𑀲𑀼𑀤𑁆𑀥𑀝𑁆𑀞𑀓𑀲𑁆𑀲, 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀦𑀯𑀓𑀸𑀦𑀁 𑀯𑀲𑁂𑀦 𑀙𑀩𑁆𑀩𑀻𑀲𑀢𑀺𑀯𑀺𑀥𑀁, 𑀏𑀓𑁂𑀓𑀘𑀺𑀢𑁆𑀢𑁂 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀼𑀢𑁆𑀢𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀜𑁆𑀘 𑀲𑀢𑁆𑀢𑀢𑀺𑀯𑀺𑀥𑀦𑁆𑀢𑀺 𑀙𑀦𑁆𑀦𑀯𑀼𑀢𑀺𑀯𑀺𑀥𑀁 𑀭𑀽𑀧𑀁, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀦𑀯𑀦𑀯𑀼𑀢𑀺𑀥𑀫𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀳𑁄𑀢𑀻’’𑀢𑀺? 𑀲𑀼𑀢𑁆𑀢𑀢𑁄 𑀬𑀼𑀢𑁆𑀢𑀺𑀢𑁄 𑀘. 𑀲𑀼𑀢𑁆𑀢𑁂 𑀳𑀺 ‘‘𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁬𑁨) 𑀦𑀬𑁂𑀦 𑀩𑀳𑀼𑀥𑀸 𑀯𑁂𑀤𑀦𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀲𑀺𑀤𑁆𑀥𑀸. 𑀬𑀼𑀢𑁆𑀢𑀺𑀢𑁄 𑀧𑀦 𑁋

‘‘𑀘𑀺𑀢𑁆𑀢𑀚𑁂𑀦 𑀳𑀺 𑀭𑀽𑀧𑁂𑀦, 𑀇𑀥 𑀤𑀺𑀝𑁆𑀞𑁂𑀦 𑀲𑀺𑀚𑁆𑀛𑀢𑀺;

𑀅𑀤𑀺𑀝𑁆𑀞𑀲𑁆𑀲𑀸𑀧𑀺 𑀭𑀽𑀧𑀲𑁆𑀲, 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀇𑀢𑀻’’𑀢𑀺.

𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺 𑀦𑀸𑀫𑀁 𑀯𑀼𑀢𑁆𑀢𑀫𑁂𑀯. 𑀇𑀥 𑀧𑀦 𑀭𑀽𑀧𑀁 𑀦𑀺𑀬𑀫𑀢𑁄 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀙 𑀯𑀢𑁆𑀣𑀽𑀦𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀓𑀸𑀤𑀲𑀯𑀺𑀥𑀁. 𑀲𑀴𑀸𑀬𑀢𑀦𑀁 𑀧𑀦 𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑀸𑀬𑀢𑀦𑀁.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄’’𑀢𑀺? 𑀦𑀸𑀫𑀭𑀽𑀧𑀪𑀸𑀯𑁂 𑀪𑀸𑀯𑀢𑁄. 𑀢𑀲𑁆𑀲 𑀢𑀲𑁆𑀲 𑀳𑀺 𑀦𑀸𑀫𑀲𑁆𑀲 𑀭𑀽𑀧𑀲𑁆𑀲 𑀘 𑀪𑀸𑀯𑁂 𑀢𑀁 𑀢𑀁 𑀆𑀬𑀢𑀦𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺.

𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑁋

‘‘𑀙𑀴𑁂𑀯 𑀨𑀲𑁆𑀲𑀸 𑀲𑀗𑁆𑀔𑁂𑀧𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀆𑀤𑀬𑁄;

𑀯𑀺𑀜𑁆𑀜𑀸𑀡𑀫𑀺𑀯 𑀩𑀸𑀢𑁆𑀢𑀺𑀁𑀲, 𑀯𑀺𑀢𑁆𑀣𑀸𑀭𑁂𑀦 𑀪𑀯𑀦𑁆𑀢𑀺 𑀢𑁂’’.

𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺 𑁋

‘‘𑀤𑁆𑀯𑀸𑀭𑀢𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀓𑀸;

𑀙𑀴𑁂𑀯 𑀢𑀸 𑀧𑀪𑁂𑀤𑁂𑀦, 𑀇𑀥 𑀩𑀸𑀢𑁆𑀢𑀺𑀁𑀲 𑀯𑁂𑀤𑀦𑀸’’.

𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺 𑁋

‘‘𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑁂𑀦, 𑀙 𑀢𑀡𑁆𑀳𑀸 𑀇𑀥 𑀤𑀻𑀧𑀺𑀢𑀸;

𑀏𑀓𑁂𑀓𑀸 𑀢𑀺𑀯𑀺𑀥𑀸 𑀢𑀢𑁆𑀣, 𑀧𑀯𑀢𑁆𑀢𑀸𑀓𑀸𑀭𑀢𑁄 𑀫𑀢𑀸.

‘‘𑀤𑀼𑀓𑁆𑀔𑀻 𑀲𑀼𑀔𑀁 𑀧𑀢𑁆𑀣𑀬𑀢𑀺, 𑀲𑀼𑀔𑀻 𑀪𑀺𑀬𑁆𑀬𑁄𑀧𑀺 𑀇𑀘𑁆𑀙𑀢𑀺;

𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸.

‘‘𑀢𑀡𑁆𑀳𑀸𑀬 𑀧𑀘𑁆𑀘𑀬𑀸 𑀢𑀲𑁆𑀫𑀸, 𑀳𑁄𑀦𑁆𑀢𑀺 𑀢𑀺𑀲𑁆𑀲𑁄𑀧𑀺 𑀯𑁂𑀤𑀦𑀸;

𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀇𑀢𑀺 𑀯𑀼𑀢𑁆𑀢𑀸 𑀫𑀳𑁂𑀲𑀺𑀦𑀸’’𑀢𑀺.

𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀓𑀸𑀫𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺 𑀇𑀥 𑀓𑀫𑁆𑀫𑀪𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀉𑀧𑀧𑀢𑁆𑀢𑀺𑀪𑀯𑁄 𑀧𑀦 𑀧𑀤𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑁄. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺 𑀓𑀫𑁆𑀫𑀪𑀯𑀧𑀘𑁆𑀘𑀬𑀸 𑀚𑀸𑀢𑀺 𑀧𑀝𑀺𑀲𑀦𑁆𑀥𑀺𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀯𑁄.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄’’𑀢𑀺 𑀘𑁂? 𑀩𑀸𑀳𑀺𑀭𑀧𑀘𑁆𑀘𑀬𑀲𑀫𑀢𑁆𑀢𑁂𑀧𑀺 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁄. 𑀩𑀸𑀳𑀺𑀭𑀸𑀦𑀜𑁆𑀳𑀺 𑀚𑀦𑀓𑀚𑀦𑀦𑀺𑀲𑀼𑀓𑁆𑀓𑀲𑁄𑀡𑀺𑀢𑀸𑀳𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀲𑀫𑀢𑁆𑀢𑁂𑀧𑀺 𑀲𑀢𑁆𑀢𑀸𑀦𑀁 𑀬𑀫𑀓𑀸𑀦𑀫𑁆𑀧𑀺 𑀲𑀢𑀁 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀲𑁄 𑀘 𑀦 𑀅𑀳𑁂𑀢𑀼𑀓𑁄 𑀲𑀩𑁆𑀩𑀤𑀸 𑀘 𑀲𑀩𑁆𑀩𑁂𑀲𑀜𑁆𑀘 𑀅𑀪𑀸𑀯𑀢𑁄, 𑀦 𑀓𑀫𑁆𑀫𑀪𑀯𑀢𑁄 𑀅𑀜𑁆𑀜𑀳𑁂𑀢𑀼𑀓𑁄 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀓𑀲𑀢𑁆𑀢𑀸𑀦𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀅𑀜𑁆𑀜𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄𑀢𑀺 𑀓𑀫𑁆𑀫𑀪𑀯𑀳𑁂𑀢𑀼𑀓𑁄𑀯. 𑀓𑀫𑁆𑀫𑀜𑁆𑀳𑀺 𑀲𑀢𑁆𑀢𑀸𑀦𑀁 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑀲𑁆𑀲 𑀳𑁂𑀢𑀼. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀫𑁆𑀫𑀁 𑀲𑀢𑁆𑀢𑁂 𑀯𑀺𑀪𑀚𑀢𑀺 𑀬𑀤𑀺𑀤𑀁 𑀳𑀻𑀦𑀧𑀡𑀻𑀢𑀢𑀸𑀬𑀸’’𑀢𑀺 (𑀫. 𑀦𑀺. 𑁩.𑁨𑁮𑁯). 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 ‘‘𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄’’𑀢𑀺.

𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀅𑀲𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀜𑁆𑀘𑁂𑀯 𑀲𑁄𑀓𑀸𑀤𑀬𑁄 𑀘 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀺, 𑀚𑀸𑀢𑀺𑀬𑀸 𑀧𑀦 𑀲𑀢𑀺 𑀚𑀭𑀸𑀫𑀭𑀡𑀜𑁆𑀘𑁂𑀯 𑀚𑀭𑀸𑀫𑀭𑀡𑀲𑀗𑁆𑀔𑀸𑀢𑀤𑀼𑀓𑁆𑀔𑀥𑀫𑁆𑀫𑀨𑀼𑀝𑁆𑀞𑀲𑁆𑀲 𑀩𑀸𑀮𑀲𑁆𑀲 𑀚𑀭𑀸𑀫𑀭𑀡𑀸𑀤𑀺𑀲𑀫𑁆𑀩𑀦𑁆𑀥𑀸 𑀯𑀸 𑀢𑁂𑀦 𑀢𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀅𑀦𑀪𑀺𑀲𑀫𑁆𑀩𑀦𑁆𑀥𑀸 𑀯𑀸 𑀲𑁄𑀓𑀸𑀤𑀬𑁄 𑀘 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺. 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺 𑀜𑀸𑀡𑁂𑀦 𑀲𑀫𑀸𑀕𑀦𑁆𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸.

𑀏𑀯𑀁 𑀤𑁆𑀯𑀸𑀤𑀲𑀧𑀤𑀺𑀓𑀁 𑀧𑀘𑁆𑀘𑀬𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀯𑀝𑁆𑀝𑀯𑀲𑁂𑀦 𑀅𑀯𑀺𑀚𑁆𑀚𑀸𑀤𑀻𑀦𑀁 𑀦𑀺𑀭𑁄𑀥𑀤𑀲𑁆𑀲𑀦𑀢𑁆𑀣𑀁 ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸𑀢𑀺 𑀅𑀯𑀺𑀚𑁆𑀚𑀸𑀬 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸 𑀧𑀼𑀦 𑀅𑀧𑁆𑀧𑀯𑀢𑁆𑀢𑀺𑀦𑀺𑀭𑁄𑀥𑁂𑀦. 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀺. 𑀏𑀯𑀁 𑀲𑁂𑀲𑀧𑀤𑁂𑀲𑀼𑀧𑀺. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀆𑀤𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸 𑀏𑀯. 𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸𑀢𑀺 𑀇𑀫𑁂 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀲𑀪𑀸𑀯𑀮𑀓𑁆𑀔𑀡𑀸𑀯𑀩𑁄𑀥𑀯𑀲𑁂𑀦 𑀲𑁄𑀪𑀦𑀸𑀓𑀸𑀭𑁂𑀦, 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀯𑀸 𑀲𑀪𑀸𑀯𑀢𑁄 𑀚𑀸𑀦𑀺𑀢𑀩𑁆𑀩𑀸. 𑀧𑀭𑀺𑀜𑁆𑀜𑁂𑀬𑁆𑀬𑀸𑀢𑀺 𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀯𑀩𑁄𑀥𑀯𑀲𑁂𑀦, 𑀓𑀺𑀘𑁆𑀘𑀲𑀫𑀸𑀧𑀦𑀯𑀲𑁂𑀦 𑀘 𑀩𑁆𑀬𑀸𑀧𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸𑀢𑀺 𑀇𑀫𑁂 𑀲𑀫𑀼𑀤𑀬𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀢𑁂𑀦 𑀢𑁂𑀦 𑀕𑀼𑀡𑀗𑁆𑀕𑁂𑀦 𑀧𑀳𑀸𑀢𑀩𑁆𑀩𑀸. 𑀪𑀸𑀯𑁂𑀢𑀩𑁆𑀩𑀸𑀢𑀺 𑀯𑀟𑁆𑀠𑁂𑀢𑀩𑁆𑀩𑀸. 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀸𑀢𑀩𑁆𑀩𑀸. 𑀤𑀼𑀯𑀺𑀥𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀧𑀝𑀺𑀮𑀸𑀪𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀆𑀭𑀫𑁆𑀫𑀡𑀲𑀘𑁆𑀙𑀺𑀓𑀺𑀭𑀺𑀬𑀸 𑀘. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁. 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘𑀸𑀢𑀺 𑀉𑀧𑁆𑀧𑀸𑀤𑀜𑁆𑀘 𑀦𑀺𑀭𑁄𑀥𑀜𑁆𑀘.

𑀪𑀽𑀭𑀺𑀧𑀜𑁆𑀜𑁄𑀢𑀺 𑀪𑀽𑀭𑀺 𑀯𑀺𑀬𑀸𑀢𑀺 𑀪𑀽𑀭𑀺, 𑀢𑀸𑀬 𑀪𑀽𑀭𑀺𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀽𑀭𑀺𑀧𑀜𑁆𑀜𑁄. 𑀫𑀳𑀸𑀧𑀜𑁆𑀜𑁄𑀢𑀺𑀆𑀤𑀻𑀲𑀼 𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀺𑀤𑀁 𑀫𑀳𑀸𑀧𑀜𑁆𑀜𑀸𑀤𑀻𑀦𑀁 𑀦𑀸𑀦𑀢𑁆𑀢𑀁 𑁋 𑀓𑀢𑀫𑀸 𑀫𑀳𑀸𑀧𑀜𑁆𑀜𑀸? 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀥𑀫𑁆𑀫𑁂…𑀧𑁂… 𑀫𑀳𑀦𑁆𑀢𑀸 𑀦𑀺𑀭𑀼𑀢𑁆𑀢𑀺𑀬𑁄… 𑀫𑀳𑀦𑁆𑀢𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂…𑀧𑁂… 𑀧𑀜𑁆𑀜𑀸𑀓𑁆𑀔𑀦𑁆𑀥𑁂… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀞𑀸𑀦𑀸𑀞𑀸𑀦𑀸𑀦𑀺…𑀧𑁂… 𑀫𑀳𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄… 𑀫𑀳𑀦𑁆𑀢𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺… 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂… 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀇𑀤𑁆𑀥𑀺𑀧𑀸𑀤𑁂… 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 … 𑀩𑀮𑀸𑀦𑀺… 𑀩𑁄𑀚𑁆𑀛𑀗𑁆𑀕𑀸𑀦𑀺… 𑀫𑀳𑀦𑁆𑀢𑁂 𑀅𑀭𑀺𑀬𑀫𑀕𑁆𑀕𑁂… 𑀫𑀳𑀦𑁆𑀢𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺… 𑀫𑀳𑀸𑀅𑀪𑀺𑀜𑁆𑀜𑀸𑀬𑁄… 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸.

𑀓𑀢𑀫𑀸 𑀧𑀼𑀣𑀼𑀧𑀜𑁆𑀜𑀸? 𑀧𑀼𑀣𑀼𑀦𑀸𑀦𑀸𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀥𑀸𑀢𑀽𑀲𑀼…𑀧𑁂… 𑀧𑀼𑀣𑀼𑀦𑀸𑀦𑀸𑀆𑀬𑀢𑀦𑁂𑀲𑀼… 𑀧𑀼𑀣𑀼𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼… 𑀧𑀼𑀣𑀼𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀼… 𑀧𑀼𑀣𑀼𑀦𑀸𑀦𑀸𑀅𑀢𑁆𑀣𑁂𑀲𑀼… 𑀥𑀫𑁆𑀫𑁂𑀲𑀼… 𑀦𑀺𑀭𑀼𑀢𑁆𑀢𑀻𑀲𑀼… 𑀧𑀝𑀺𑀪𑀸𑀦𑁂𑀲𑀼… 𑀧𑀼𑀣𑀼𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀼… 𑀧𑀼𑀣𑀼𑀦𑀸𑀦𑀸𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀲𑀼… 𑀧𑀼𑀣𑀼𑀦𑀸𑀦𑀸𑀞𑀸𑀦𑀸𑀞𑀸𑀦𑁂𑀲𑀼… 𑀧𑀼𑀣𑀼𑀦𑀸𑀦𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼… 𑀧𑀼𑀣𑀼𑀦𑀸𑀦𑀸𑀅𑀭𑀺𑀬𑀲𑀘𑁆𑀘𑁂𑀲𑀼… 𑀧𑀼𑀣𑀼𑀦𑀸𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀲𑀼… 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼… 𑀇𑀤𑁆𑀥𑀺𑀧𑀸𑀤𑁂𑀲𑀼… 𑀇𑀦𑁆𑀤𑁆𑀭𑀺𑀬𑁂𑀲𑀼… 𑀩𑀮𑁂𑀲𑀼… 𑀩𑁄𑀚𑁆𑀛𑀗𑁆𑀕𑁂𑀲𑀼… 𑀧𑀼𑀣𑀼𑀦𑀸𑀦𑀸𑀅𑀭𑀺𑀬𑀫𑀕𑁆𑀕𑁂𑀲𑀼… 𑀲𑀸𑀫𑀜𑁆𑀜𑀨𑀮𑁂𑀲𑀼… 𑀅𑀪𑀺𑀜𑁆𑀜𑀸𑀲𑀼… 𑀧𑀼𑀣𑀼𑀦𑀸𑀦𑀸𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫 𑀧𑀭𑀫𑀢𑁆𑀣𑁂 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸.

𑀓𑀢𑀫𑀸 𑀳𑀸𑀲𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁…𑀧𑁂… 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁… 𑀲𑀻𑀮𑀓𑁆𑀔𑀦𑁆𑀥𑀁… 𑀲𑀫𑀸𑀥𑀺𑀓𑁆𑀔𑀦𑁆𑀥𑀁… 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄…𑀧𑁂… 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀞𑀸𑀦𑀸𑀞𑀸𑀦𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀇𑀤𑁆𑀥𑀺𑀧𑀸𑀤𑁂… 𑀇𑀦𑁆𑀤𑁆𑀭𑀺𑀬𑀸𑀦𑀺… 𑀩𑀮𑀸𑀦𑀺… 𑀩𑁄𑀚𑁆𑀛𑀗𑁆𑀕𑁂… 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸, 𑀳𑀸𑀲𑀩𑀳𑀼𑀮𑁄 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀳𑀸𑀲𑀧𑀜𑁆𑀜𑀸, 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸, 𑀳𑀸𑀲𑀩𑀳𑀼𑀮𑁄 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀳𑀸𑀲𑀧𑀜𑁆𑀜𑀸.

𑀓𑀢𑀫𑀸 𑀚𑀯𑀦𑀧𑀜𑁆𑀜𑀸? 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄… 𑀤𑀼𑀓𑁆𑀔𑀢𑁄… 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀢𑁄… 𑀤𑀼𑀓𑁆𑀔𑀢𑁄… 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸.

𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀭𑀽𑀧𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀢𑀼𑀮𑀬𑀺𑀢𑁆𑀯𑀸…𑀧𑁂… 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸.

𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀢𑀼𑀮𑀬𑀺𑀢𑁆𑀯𑀸…𑀧𑁂… 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀭𑀽𑀧𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁…𑀧𑁂… 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀢𑀼𑀮𑀬𑀺𑀢𑁆𑀯𑀸…𑀧𑁂… 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸.

𑀓𑀢𑀫𑀸 𑀢𑀺𑀓𑁆𑀔𑀧𑀜𑁆𑀜𑀸? 𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺. 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁… 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂… 𑀉𑀧𑁆𑀧𑀦𑁆𑀦𑀁 𑀭𑀸𑀕𑀁… 𑀉𑀧𑁆𑀧𑀦𑁆𑀦𑀁 𑀤𑁄𑀲𑀁… 𑀫𑁄𑀳𑀁… 𑀓𑁄𑀥𑀁… 𑀉𑀧𑀦𑀸𑀳𑀁… 𑀫𑀓𑁆𑀔𑀁… 𑀧𑀴𑀸𑀲𑀁… 𑀇𑀲𑁆𑀲𑀁… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀁… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑀁… 𑀲𑀸𑀭𑀫𑁆𑀪𑀁… 𑀫𑀸𑀦𑀁… 𑀅𑀢𑀺𑀫𑀸𑀦𑀁… 𑀫𑀤𑀁… 𑀧𑀫𑀸𑀤𑀁… 𑀲𑀩𑁆𑀩𑁂 𑀓𑀺𑀮𑁂𑀲𑁂… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂… 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀏𑀓𑀫𑁆𑀳𑀺 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸𑀬𑁄, 𑀙 𑀅𑀪𑀺𑀜𑁆𑀜𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬𑀸𑀢𑀺 𑀢𑀺𑀓𑁆𑀔𑀧𑀜𑁆𑀜𑀸.

𑀓𑀢𑀫𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀺 𑀉𑀢𑁆𑀢𑀸𑀲𑀩𑀳𑀼𑀮𑁄 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄 𑀅𑀭𑀢𑀺𑀩𑀳𑀼𑀮𑁄 𑀅𑀦𑀪𑀺𑀭𑀢𑀺𑀩𑀳𑀼𑀮𑁄 𑀩𑀳𑀺𑀫𑀼𑀔𑁄 𑀦 𑀭𑀫𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼, 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀤𑁄𑀲𑀓𑁆𑀔𑀦𑁆𑀥𑀁…𑀧𑁂… 𑀫𑁄𑀳𑀓𑁆𑀔𑀦𑁆𑀥𑀁… 𑀓𑁄𑀥𑀁… 𑀉𑀧𑀦𑀸𑀳𑀁…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸.

𑁨𑁮. 𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸𑀢𑀺 𑀲𑁄 𑀪𑀽𑀭𑀺𑀧𑀜𑁆𑀜𑁄 𑀔𑀻𑀡𑀸𑀲𑀯𑁄 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑀫𑀼𑀢𑀁 𑀯𑀸 𑀢𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀼 𑀫𑀸𑀭𑀲𑁂𑀦𑀁 𑀯𑀺𑀦𑀸𑀲𑁂𑀢𑁆𑀯𑀸 𑀞𑀺𑀢𑀪𑀸𑀯𑁂𑀦 𑀯𑀺𑀲𑁂𑀦𑀺𑀪𑀽𑀢𑁄. 𑀢𑀫𑁂𑀯 𑀤𑀲𑁆𑀲𑀺𑀦𑁆𑀢𑀺 𑀢𑀁 𑀏𑀯 𑀯𑀺𑀲𑀼𑀤𑁆𑀥𑀤𑀲𑁆𑀲𑀺𑀁. 𑀯𑀺𑀯𑀝𑀁 𑀘𑀭𑀦𑁆𑀢𑀦𑁆𑀢𑀺 𑀢𑀡𑁆𑀳𑀸𑀙𑀤𑀦𑀸𑀤𑀺𑀯𑀺𑀕𑀫𑁂𑀦 𑀯𑀺𑀯𑀝𑀁 𑀳𑀼𑀢𑁆𑀯𑀸 𑀘𑀭𑀦𑁆𑀢𑀁. 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺 𑀯𑀺𑀓𑀧𑁆𑀧𑀬𑁂𑀬𑁆𑀬𑀸𑀢𑀺 𑀓𑁂𑀦 𑀇𑀥 𑀮𑁄𑀓𑁂 𑀢𑀡𑁆𑀳𑀸𑀓𑀧𑁆𑀧𑁂𑀦 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑁂𑀦 𑀯𑀸 𑀓𑁄𑀘𑀺 𑀯𑀺𑀓𑀧𑁆𑀧𑁂𑀬𑁆𑀬, 𑀢𑁂𑀲𑀁 𑀯𑀸 𑀧𑀳𑀻𑀦𑀢𑁆𑀢𑀸 𑀭𑀸𑀕𑀸𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑀸𑀢𑀺.

𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀕𑀸𑀣𑀸𑀲𑀼 𑀅𑀬𑀫𑀢𑁆𑀣𑁄 𑁋 𑀬𑀲𑁆𑀫𑀸 𑀆𑀤𑀺𑀢𑁄𑀯 𑀅𑀕𑀸𑀭𑀺𑀬𑀪𑀽𑀢𑁂 𑀲𑀢𑁆𑀢𑁂 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑀸 𑀫𑁄𑀳𑀬𑀦𑁆𑀢𑀺, 𑀢𑁂 𑀅𑀪𑀺𑀪𑀼𑀬𑁆𑀬 𑀅𑀦𑀕𑀸𑀭𑀺𑀬𑀪𑀸𑀯𑀁 𑀉𑀧𑀕𑀢𑀸𑀦𑀁 𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋 ‘‘𑀧𑀩𑁆𑀩𑀚𑀺𑀢𑁂𑀦 𑀔𑁄, 𑀆𑀯𑀼𑀲𑁄, 𑀅𑀪𑀺𑀭𑀢𑀺 𑀤𑀼𑀓𑁆𑀓𑀭𑀸’’𑀢𑀺 (𑀲𑀁. 𑀦𑀺. 𑁪.𑁩𑁩𑁧). 𑀢𑀢𑁄 𑀢𑁂 𑀧𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀔𑀼𑀧𑁆𑀧𑀺𑀧𑀸𑀲𑀸 𑀩𑀸𑀥𑁂𑀢𑀺, 𑀢𑀸𑀬 𑀩𑀸𑀥𑀺𑀢𑀸𑀦𑀁 𑀧𑀭𑀺𑀬𑁂𑀲𑀦𑀢𑀡𑁆𑀳𑀸 𑀘𑀺𑀢𑁆𑀢𑀁 𑀓𑀺𑀮𑀫𑀬𑀢𑀺, 𑀅𑀣 𑀦𑁂𑀲𑀁 𑀓𑀺𑀮𑀦𑁆𑀢𑀘𑀺𑀢𑁆𑀢𑀸𑀦𑀁 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺 𑀢𑀢𑁄 𑀯𑀺𑀲𑁂𑀲𑀫𑀦𑀥𑀺𑀕𑀘𑁆𑀙𑀦𑁆𑀢𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑁂𑀲𑀼 𑀅𑀭𑀜𑁆𑀜𑀯𑀦𑀧𑀢𑁆𑀣𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀢𑀁 𑀉𑀢𑁆𑀭𑀸𑀲𑀲𑀜𑁆𑀜𑀺𑀢𑀸 𑀪𑀻𑀭𑀼 𑀚𑀸𑀬𑀢𑀺, 𑀢𑁂𑀲𑀁 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀁 𑀤𑀻𑀖𑀭𑀢𑁆𑀢𑀁 𑀯𑀺𑀯𑁂𑀓𑀭𑀲𑀫𑀦𑀲𑁆𑀲𑀸𑀤𑀬𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 ‘‘𑀦 𑀲𑀺𑀬𑀸 𑀦𑀼 𑀔𑁄 𑀏𑀲 𑀫𑀕𑁆𑀕𑁄’’𑀢𑀺 𑀧𑀝𑀺𑀧𑀢𑁆𑀢𑀺𑀬𑀁 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀳𑀭𑀢𑀁 𑀅𑀧𑁆𑀧𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀫𑀸𑀦𑀫𑀓𑁆𑀔𑀣𑀫𑁆𑀪𑀸 𑀚𑀸𑀬𑀦𑁆𑀢𑀺, 𑀢𑁂𑀧𑀺 𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀳𑀭𑀢𑀁 𑀢𑀢𑁄 𑀅𑀥𑀺𑀓𑀢𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀦𑀺𑀲𑁆𑀲𑀸𑀬 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀮𑀸𑀪𑀸𑀤𑀺𑀫𑀼𑀘𑁆𑀙𑀺𑀢𑀸 𑀥𑀫𑁆𑀫𑀧𑀝𑀺𑀭𑀽𑀧𑀓𑀸𑀦𑀺 𑀧𑀓𑀸𑀲𑁂𑀦𑁆𑀢𑀸 𑀫𑀺𑀘𑁆𑀙𑀸𑀬𑀲𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀢𑁆𑀣 𑀞𑀺𑀢𑀸 𑀚𑀸𑀢𑀺𑀆𑀤𑀻𑀳𑀺 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑀺, 𑀧𑀭𑀁 𑀯𑀫𑁆𑀪𑁂𑀦𑁆𑀢𑀺. 𑀢𑀲𑁆𑀫𑀸 𑀓𑀸𑀫𑀸𑀤𑀻𑀦𑀁 𑀧𑀞𑀫𑀲𑁂𑀦𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑁂𑀢𑀁 𑀤𑀲𑀯𑀺𑀥𑀁 𑀲𑁂𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀬𑀲𑁆𑀫𑀸 𑀲𑀸 𑀓𑀡𑁆𑀳𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀓𑀡𑁆𑀳𑀲𑁆𑀲 𑀦𑀫𑀼𑀘𑀺𑀦𑁄 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀦𑀁 ‘‘𑀢𑀯 𑀲𑁂𑀦𑀸’’𑀢𑀺 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 𑁋 ‘‘𑀏𑀲𑀸 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻’’𑀢𑀺. 𑀢𑀢𑁆𑀣 𑀅𑀪𑀺𑀧𑁆𑀧𑀳𑀸𑀭𑀺𑀦𑀻𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀖𑀸𑀢𑀺𑀦𑀻 𑀦𑀺𑀧𑁆𑀧𑁄𑀣𑀺𑀦𑀻, 𑀅𑀦𑁆𑀢𑀭𑀸𑀬𑀓𑀭𑀻𑀢𑀺 𑀅𑀢𑁆𑀣𑁄. 𑀦 𑀦𑀁 𑀅𑀲𑀽𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸𑀯 𑀮𑀪𑀢𑁂 𑀲𑀼𑀔𑀦𑁆𑀢𑀺 𑀏𑀯𑀁 𑀢𑀯 𑀲𑁂𑀦𑀁 𑀅𑀲𑀽𑀭𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀲𑀸𑀧𑁂𑀓𑁆𑀔𑁄 𑀧𑀼𑀭𑀺𑀲𑁄 𑀦 𑀚𑀺𑀦𑀸𑀢𑀺, 𑀲𑀽𑀭𑁄 𑀧𑀦 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸𑀯 𑀫𑀕𑁆𑀕𑀲𑀼𑀔𑀁 𑀨𑀮𑀲𑀼𑀔𑀜𑁆𑀘 𑀅𑀥𑀺𑀕𑀘𑁆𑀙𑀢𑀺.

𑀬𑀢𑁄 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀻𑀢𑀺 𑀬𑀤𑀸 𑀘𑀢𑀽𑀳𑀺 𑀦𑀺𑀤𑁆𑀤𑁄𑀲𑀦𑀺𑀩𑁆𑀩𑀸𑀦𑀫𑀕𑁆𑀕𑀦𑀲𑀗𑁆𑀔𑀸𑀢𑁂𑀳𑀺 𑀫𑀕𑁆𑀕𑁂𑀳𑀺. 𑀫𑀸𑀭𑀲𑁂𑀦𑀸𑀢𑀺 𑀫𑀸𑀭𑀲𑁆𑀲 𑀲𑁂𑀦𑀸 𑀯𑀘𑀦𑀓𑀭𑀸 𑀓𑀺𑀮𑁂𑀲𑀸. 𑀧𑀝𑀺𑀲𑁂𑀦𑀺𑀓𑀭𑀸𑀢𑀺 𑀧𑀝𑀺𑀧𑀓𑁆𑀔𑀓𑀭𑀸. 𑀚𑀺𑀢𑀸 𑀘𑀸𑀢𑀺 𑀧𑀭𑀸𑀚𑀬𑀫𑀸𑀦𑀸 𑀳𑀦𑀺𑀢𑀸 𑀘. 𑀧𑀭𑀸𑀚𑀺𑀢𑀸 𑀘𑀸𑀢𑀺 𑀦𑀺𑀕𑁆𑀕𑀳𑀺𑀢𑀸 𑀘. 𑀪𑀕𑁆𑀕𑀸𑀢𑀺 𑀪𑀺𑀦𑁆𑀦𑀸. 𑀯𑀺𑀧𑁆𑀧𑀮𑀼𑀕𑁆𑀕𑀸𑀢𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸. 𑀧𑀭𑀫𑁆𑀫𑀼𑀔𑀸𑀢𑀺 𑀯𑀺𑀫𑀼𑀔𑀪𑀸𑀯𑀁 𑀧𑀸𑀧𑀺𑀢𑀸. 𑀯𑀺𑀲𑁂𑀦𑀺𑀪𑀽𑀢𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑁄 𑀳𑀼𑀢𑁆𑀯𑀸 𑀞𑀺𑀢𑁄.

𑀯𑁄𑀤𑀸𑀢𑀤𑀲𑁆𑀲𑀺𑀦𑁆𑀢𑀺 𑀩𑁆𑀬𑀯𑀤𑀸𑀢𑀤𑀲𑁆𑀲𑀺𑀁. 𑀢𑀸𑀦𑀺 𑀙𑀤𑀦𑀸𑀦𑀻𑀢𑀺 𑀏𑀢𑀸𑀦𑀺 𑀢𑀡𑁆𑀳𑀸𑀤𑀺𑀓𑀺𑀮𑁂𑀲𑀙𑀤𑀦𑀸𑀦𑀺. 𑀯𑀺𑀯𑀝𑀸𑀦𑀻𑀢𑀺 𑀧𑀸𑀓𑀝𑀻𑀓𑀢𑀸𑀦𑀺. 𑀯𑀺𑀤𑁆𑀥𑀁𑀲𑀺𑀢𑀸𑀦𑀻𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀳𑀢𑀸𑀦𑀺. 𑀉𑀕𑁆𑀖𑀸𑀝𑀺𑀢𑀸𑀦𑀻𑀢𑀺 𑀉𑀧𑁆𑀧𑀸𑀝𑀺𑀢𑀸𑀦𑀺. 𑀲𑀫𑀼𑀕𑁆𑀖𑀸𑀝𑀺𑀢𑀸𑀦𑀻𑀢𑀺 𑀯𑀺𑀲𑁂𑀲𑁂𑀦 𑀉𑀧𑁆𑀧𑀸𑀝𑀺𑀢𑀸𑀦𑀺.

𑁨𑁯. 𑀦 𑀓𑀧𑁆𑀧𑀬𑀦𑁆𑀢𑀻𑀢𑀺 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁄 𑀘 𑁋 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀢𑁂 𑀳𑀺 𑀢𑀸𑀤𑀺𑀲𑀸 𑀲𑀦𑁆𑀢𑁄 𑀤𑁆𑀯𑀺𑀦𑁆𑀦𑀁 𑀓𑀧𑁆𑀧𑀸𑀦𑀁 𑀧𑀼𑀭𑁂𑀓𑁆𑀔𑀸𑀭𑀸𑀦𑀜𑁆𑀘 𑀓𑁂𑀦𑀘𑀺 𑀦 𑀓𑀧𑁆𑀧𑀬𑀦𑁆𑀢𑀺, 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺. 𑀧𑀭𑀫𑀢𑁆𑀣𑀁 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀁 𑀅𑀥𑀺𑀕𑀢𑀢𑁆𑀢𑀸 𑀅𑀦𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀁𑀬𑁂𑀯 𑀅𑀓𑀺𑀭𑀺𑀬𑀲𑀲𑁆𑀲𑀢𑀤𑀺𑀝𑁆𑀞𑀺𑀁 ‘‘𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻’’𑀢𑀺 𑀦 𑀢𑁂 𑀯𑀤𑀦𑁆𑀢𑀺. 𑀆𑀤𑀸𑀦𑀕𑀦𑁆𑀣𑀁 𑀕𑀢𑀺𑀢𑀁 𑀯𑀺𑀲𑀚𑁆𑀚𑀸𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀭𑀽𑀧𑀸𑀤𑀻𑀦𑀁 𑀆𑀤𑀸𑀬𑀓𑀢𑁆𑀢𑀸 𑀆𑀤𑀸𑀦𑀕𑀦𑁆𑀣𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀕𑀣𑀺𑀢𑀁 𑀩𑀤𑁆𑀥𑀁 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀯𑀺𑀲𑁆𑀲𑀚𑁆𑀚 𑀙𑀺𑀦𑁆𑀤𑀺𑀢𑁆𑀯𑀸. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀦𑁆𑀢𑀺 𑀅𑀘𑁆𑀘𑀦𑁆𑀢𑀁 𑀧𑀭𑀫𑀢𑁆𑀣𑀁 𑀲𑀼𑀤𑁆𑀥𑀺𑀁. 𑀲𑀁𑀲𑀸𑀭𑀲𑀼𑀤𑁆𑀥𑀺𑀦𑁆𑀢𑀺 𑀲𑀁𑀲𑀸𑀭𑀢𑁄 𑀲𑀼𑀤𑁆𑀥𑀺𑀁. 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀦𑁆𑀢𑀺 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀦𑁆𑀢𑀺 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁. 𑀲𑀲𑁆𑀲𑀢𑀯𑀸𑀤𑀦𑁆𑀢𑀺 ‘‘𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄’’𑀢𑀺 𑀯𑀘𑀦𑀁. 𑀦 𑀯𑀤𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺.

𑀕𑀦𑁆𑀣𑀸𑀢𑀺 𑀦𑀸𑀫𑀓𑀸𑀬𑀁 𑀕𑀦𑁆𑀣𑁂𑀦𑁆𑀢𑀺, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀖𑀝𑁂𑀦𑁆𑀢𑀻𑀢𑀺 𑀕𑀦𑁆𑀣𑀸. 𑀅𑀪𑀺𑀚𑁆𑀛𑀸 𑀘 𑀲𑀸 𑀦𑀸𑀫𑀓𑀸𑀬𑀖𑀝𑀦𑀯𑀲𑁂𑀦 𑀕𑀦𑁆𑀣𑁄 𑀘𑀸𑀢𑀺 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄. 𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑀬𑀢𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀩𑁆𑀬𑀸𑀧𑀸𑀤𑁄 𑀘 𑀲𑁄 𑀯𑀼𑀢𑁆𑀢𑀦𑀬𑁂𑀦 𑀕𑀦𑁆𑀣𑁄 𑀘𑀸𑀢𑀺 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄. 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄𑀢𑀺 ‘‘𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺 (𑀥. 𑀲. 𑁧𑁧𑁪𑁩, 𑁧𑁨𑁨𑁨) 𑀧𑀭𑀢𑁄 𑀆𑀫𑀸𑀲𑁄. 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄𑀢𑀺 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀥. 𑀲. 𑁧𑁧𑁪𑁪) 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑁂𑀲𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀭𑀸𑀕𑁄𑀢𑀺 𑀅𑀢𑁆𑀢𑀦𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀕𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀙𑀦𑁆𑀤𑀭𑀸𑀕𑁄. 𑀧𑀭𑀯𑀸𑀤𑁂𑀲𑀼 𑀆𑀖𑀸𑀢𑁄𑀢𑀺 𑀧𑀭𑀲𑁆𑀲 𑀯𑀘𑀦𑁂𑀲𑀼 𑀓𑁄𑀧𑁄. 𑀅𑀧𑁆𑀧𑀘𑁆𑀘𑀬𑁄𑀢𑀺 𑀅𑀢𑀼𑀝𑁆𑀞𑀸𑀓𑀸𑀭𑁄. 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀸𑀢𑀺 𑀅𑀢𑁆𑀢𑀦𑀸 𑀲𑀫𑀸𑀤𑀺𑀦𑁆𑀦𑀁 𑀕𑁄𑀲𑀻𑀮𑀸𑀤𑀺𑀲𑀻𑀮𑀁 𑀯𑀸. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀻𑀢𑀺 𑀅𑀢𑁆𑀢𑀦𑀸 𑀕𑀳𑀺𑀢𑀸 𑀧𑀭𑀸𑀫𑀝𑁆𑀞𑀸 𑀤𑀺𑀝𑁆𑀞𑀺. 𑀢𑁂𑀳𑀺 𑀕𑀦𑁆𑀣𑁂𑀳𑀻𑀢𑀺 𑀏𑀢𑁂𑀳𑀺 𑀯𑀼𑀢𑁆𑀢𑁂𑀳𑀺 𑀦𑀸𑀫𑀓𑀸𑀬𑀖𑀝𑀦𑁂𑀳𑀺. 𑀭𑀽𑀧𑀁 𑀆𑀤𑀺𑀬𑀦𑁆𑀢𑀻𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀽𑀧𑀸𑀭𑀫𑁆𑀫𑀡𑀁 𑀆𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺. 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀉𑀧𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀺 𑀢𑀡𑁆𑀳𑀸𑀕𑀳𑀡𑁂𑀦. 𑀧𑀭𑀸𑀫𑀲𑀦𑁆𑀢𑀺 𑀤𑀺𑀝𑁆𑀞𑀺𑀕𑀳𑀡𑁂𑀦. 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀫𑀸𑀦𑀕𑀳𑀡𑁂𑀦. 𑀯𑀝𑁆𑀝𑀦𑁆𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀕𑀦𑁆𑀣𑁂𑀢𑀺 𑀩𑀦𑁆𑀥𑀦𑁂.

𑀯𑁄𑀲𑀚𑁆𑀚𑀺𑀢𑁆𑀯𑀸 𑀯𑀸𑀢𑀺 𑀲𑀫𑁆𑀫𑀸 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑀸. 𑀕𑀣𑀺𑀢𑁂𑀢𑀺 𑀩𑀦𑁆𑀥𑀦𑁂. 𑀕𑀦𑁆𑀣𑀺𑀢𑁂𑀢𑀺 𑀕𑀦𑁆𑀣𑀦𑁂𑀦 𑀕𑀦𑁆𑀣𑀺𑀢𑁂. 𑀯𑀺𑀩𑀦𑁆𑀥𑁂𑀢𑀺 𑀯𑀺𑀲𑁂𑀲𑁂𑀦 𑀩𑀦𑁆𑀥𑁂. 𑀆𑀩𑀦𑁆𑀥𑁂𑀢𑀺 𑀅𑀦𑁂𑀓𑀯𑀺𑀥𑁂𑀦 𑀩𑀦𑁆𑀥𑁂. 𑀧𑀮𑀺𑀩𑀼𑀤𑁆𑀥𑁂𑀢𑀺 𑀅𑀫𑀼𑀜𑁆𑀘𑀺𑀢𑁂. 𑀩𑀦𑁆𑀥𑀦𑁂 𑀧𑁄𑀝𑀬𑀺𑀢𑁆𑀯𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀩𑀦𑁆𑀥𑀦𑀸𑀦𑀺 𑀧𑀧𑁆𑀧𑁄𑀝𑀬𑀺𑀢𑁆𑀯𑀸. 𑀯𑀺𑀲𑀚𑁆𑀚𑀸𑀢𑀺 𑀘𑀚𑀺𑀢𑁆𑀯𑀸.

𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀕𑀦𑁆𑀣𑁂 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸𑀧𑀺 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀧𑀺 𑁋 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀬𑀢𑀺, 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺. 𑀏𑀢𑁂 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀕𑀦𑁆𑀣𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀕𑀦𑁆𑀣𑀸. 𑀢𑁂 𑀘𑀢𑀼𑀧𑁆𑀧𑀪𑁂𑀤𑀸 𑀅𑀪𑀺𑀚𑁆𑀛𑀸𑀬𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀅𑀪𑀺𑀚𑁆𑀛𑀸𑀬𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀅𑀪𑀺𑀚𑁆𑀛𑀸. 𑀮𑁄𑀪𑁄𑀬𑁂𑀯 𑀦𑀸𑀫𑀓𑀸𑀬𑀁 𑀕𑀦𑁆𑀣𑁂𑀢𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀖𑀝𑁂𑀢𑀻𑀢𑀺 𑀓𑀸𑀬𑀕𑀦𑁆𑀣𑁄. 𑀩𑁆𑀬𑀸𑀧𑀚𑁆𑀚𑀢𑀺 𑀢𑁂𑀦 𑀘𑀺𑀢𑁆𑀢𑀁 𑀧𑀽𑀢𑀺𑀪𑀸𑀯𑀁 𑀕𑀘𑁆𑀙𑀢𑀺, 𑀩𑁆𑀬𑀸𑀧𑀸𑀤𑀬𑀢𑀺 𑀯𑀸 𑀯𑀺𑀦𑀬𑀸𑀘𑀸𑀭𑀭𑀽𑀧𑀲𑀫𑁆𑀧𑀢𑁆𑀢𑀺𑀳𑀺𑀢𑀲𑀼𑀔𑀸𑀤𑀻𑀦𑀻𑀢𑀺 𑀩𑁆𑀬𑀸𑀧𑀸𑀤𑁄. ‘‘𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺 𑀧𑀭𑀸𑀫𑀲𑀦𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄. 𑀬𑀣𑀸 𑀯𑀬𑁆𑀳𑀁 𑀯𑀸𑀢𑀺𑀆𑀤𑀺𑀁 𑀯𑀬𑁆𑀳𑀸𑀤𑀺𑀯𑀺𑀲𑀗𑁆𑀔𑀭𑀡𑀁 𑀕𑀦𑁆𑀣𑀸𑀦𑀁 𑀯𑀺𑀬𑁄𑀕𑀓𑀭𑀡𑁂 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳.

𑀦 𑀚𑀦𑁂𑀦𑁆𑀢𑀻𑀢𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀦 𑀲𑀜𑁆𑀚𑀦𑁂𑀦𑁆𑀢𑀻𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀦 𑀲𑀜𑁆𑀚𑀦𑁂𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀁. 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀺𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁩𑁦. 𑀲𑀻𑀫𑀸𑀢𑀺𑀕𑁄𑀢𑀺 𑀕𑀸𑀣𑀸 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀯𑀼𑀢𑁆𑀢𑀸. 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀧𑀦𑀲𑁆𑀲𑀸 𑀲𑀫𑁆𑀩𑀦𑁆𑀥𑁄, 𑀲𑁄 𑀏𑀯𑀁 𑀅𑀢𑁆𑀣𑀯𑀡𑁆𑀡𑀦𑀸𑀬 𑀲𑀤𑁆𑀥𑀺𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀲𑁄 𑀈𑀤𑀺𑀲𑁄 𑀪𑀽𑀭𑀺𑀧𑀜𑁆𑀜𑁄 𑀘𑀢𑀼𑀦𑁆𑀦𑀁 𑀓𑀺𑀮𑁂𑀲𑀲𑀻𑀫𑀸𑀦𑀁 𑀅𑀢𑀻𑀢𑀢𑁆𑀢𑀸 𑀲𑀻𑀫𑀸𑀢𑀺𑀕𑁄, 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀘 𑀩𑁆𑀭𑀸𑀳𑁆𑀫𑀡𑁄, 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀘 𑀢𑀲𑁆𑀲 𑀦𑀢𑁆𑀣𑀺, 𑀧𑀭𑀘𑀺𑀢𑁆𑀢𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀳𑀺 𑀜𑀢𑁆𑀯𑀸 𑀯𑀸 𑀫𑀁𑀲𑀤𑀺𑀩𑁆𑀩𑀘𑀓𑁆𑀔𑀽𑀳𑀺 𑀤𑀺𑀲𑁆𑀯𑀸 𑀯𑀸 𑀓𑀺𑀜𑁆𑀘𑀺 𑀲𑀫𑀼𑀕𑁆𑀕𑀳𑀻𑀢𑀁, 𑀅𑀪𑀺𑀦𑀺𑀯𑀺𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀘 𑀓𑀸𑀫𑀭𑀸𑀕𑀸𑀪𑀸𑀯𑀢𑁄 𑀦 𑀭𑀸𑀕𑀭𑀸𑀕𑀻 𑀭𑀽𑀧𑀸𑀭𑀽𑀧𑀭𑀸𑀕𑀸𑀪𑀸𑀯𑀢𑁄 𑀦 𑀯𑀺𑀭𑀸𑀕𑀭𑀢𑁆𑀢𑁄, 𑀬𑀢𑁄 𑀏𑀯𑀁𑀯𑀺𑀥𑀲𑁆𑀲 𑀢𑀲𑁆𑀲 ‘‘𑀇𑀤𑀁 𑀧𑀭𑀫’’𑀦𑁆𑀢𑀺 𑀓𑀺𑀜𑁆𑀘𑀺 𑀇𑀥 𑀉𑀕𑁆𑀕𑀳𑀻𑀢𑀁 𑀦𑀢𑁆𑀣𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀘𑀢𑀲𑁆𑀲𑁄 𑀲𑀻𑀫𑀸𑀬𑁄𑀢𑀺 𑀘𑀢𑁆𑀢𑀸𑀭𑁄 𑀧𑀭𑀺𑀘𑁆𑀙𑁂𑀤𑀸. 𑀤𑀺𑀝𑁆𑀞𑀸𑀦𑀼𑀲𑀬𑁄𑀢𑀺 𑀤𑀺𑀝𑁆𑀞𑀺 𑀘 𑀲𑀸 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑁄 𑀘𑀸𑀢𑀺 𑀤𑀺𑀝𑁆𑀞𑀸𑀦𑀼𑀲𑀬𑁄. 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀦𑀝𑁆𑀞𑁂𑀦 𑀅𑀦𑀼𑀲𑀬𑀸? 𑀅𑀦𑀼𑀲𑀬𑀦𑀝𑁆𑀞𑁂𑀦. 𑀓𑁄 𑀏𑀲 𑀅𑀦𑀼𑀲𑀬𑀝𑁆𑀞𑁄 𑀦𑀸𑀫𑀸𑀢𑀺? 𑀅𑀧𑁆𑀧𑀳𑀻𑀦𑀝𑁆𑀞𑁄. 𑀏𑀢𑁂 𑀳𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀢𑀲𑁆𑀲 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀦𑁆𑀢𑀺 𑀦𑀸𑀫, 𑀢𑀲𑁆𑀫𑀸 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀸𑀧𑀺 𑀲𑀺𑀬𑀸 𑁋 𑀅𑀦𑀼𑀲𑀬𑀝𑁆𑀞𑁄 𑀦𑀸𑀫 𑀅𑀧𑁆𑀧𑀳𑀻𑀦𑀸𑀓𑀸𑀭𑁄, 𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀘 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀦 𑀅𑀦𑀼𑀲𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀢𑀢𑁆𑀭𑀺𑀤𑀁 𑀧𑀝𑀺𑀯𑀘𑀦𑀁 𑁋 𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀅𑀦𑀼𑀲𑀬𑁄, 𑀅𑀦𑀼𑀲𑀬𑁄𑀢𑀺 𑀧𑀦 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀸 𑀓𑀺𑀮𑁂𑀲𑀸 𑀯𑀼𑀘𑁆𑀘𑀦𑁆𑀢𑀺. 𑀲𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄 𑀲𑀸𑀭𑀫𑁆𑀫𑀡𑁄 𑀲𑀧𑁆𑀧𑀘𑁆𑀘𑀬𑀝𑁆𑀞𑁂𑀦 𑀲𑀳𑁂𑀢𑀼𑀓𑁄 𑀏𑀓𑀦𑁆𑀢𑀸𑀓𑀼𑀲𑀮𑁄 𑀅𑀢𑀻𑀢𑁄𑀧𑀺 𑀳𑁄𑀢𑀺 𑀅𑀦𑀸𑀕𑀢𑁄𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀧𑀺, 𑀢𑀲𑁆𑀫𑀸 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀢𑀢𑁆𑀭𑀺𑀤𑀁 𑀧𑀫𑀸𑀡𑀁 𑁋 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀢𑀸𑀯 𑀅𑀪𑀺𑀲𑀫𑀬𑀓𑀣𑀸𑀬𑀁 (𑀧𑀝𑀺. 𑀫. 𑁩.𑁨𑁧) ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑀼𑀲𑀬𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀲𑁆𑀲 𑀅𑀢𑁆𑀣𑀺𑀢𑀸𑀬 ‘‘𑀣𑀸𑀫𑀕𑀢𑁄 𑀅𑀦𑀼𑀲𑀬𑀁 𑀧𑀚𑀳𑀢𑀻’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀫𑁄𑀳𑀲𑁆𑀲 𑀧𑀤𑀪𑀸𑀚𑀦𑁂 (𑀥. 𑀲. 𑁩𑁯𑁦) ‘‘𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁, 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁄𑀳𑁄 𑀳𑁄𑀢𑀻’’𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑁄 𑀯𑀼𑀢𑁆𑀢𑁄. 𑀓𑀣𑀸𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀦𑀼𑀲𑀬𑀸 𑀅𑀩𑁆𑀬𑀸𑀓𑀢𑀸 𑀅𑀦𑀼𑀲𑀬𑀸 𑀅𑀳𑁂𑀢𑀼𑀓𑀸 𑀅𑀦𑀼𑀲𑀬𑀸 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 (𑀓𑀣𑀸. 𑁬𑁦𑁫) 𑀲𑀩𑁆𑀩𑁂 𑀯𑀸𑀤𑀸 𑀧𑀝𑀺𑀲𑁂𑀥𑀺𑀢𑀸. 𑀅𑀦𑀼𑀲𑀬𑀬𑀫𑀓𑁂 𑀲𑀢𑁆𑀢𑀦𑁆𑀦𑀁 𑀫𑀳𑀸𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀦𑀯𑀸𑀭𑁂 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀢𑀦𑁆𑀢𑀺𑀧𑁆𑀧𑀫𑀸𑀡𑁂𑀦 𑀲𑀼𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀫𑁆𑀧𑀺 ‘‘𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄 𑀲𑀸𑀭𑀫𑁆𑀫𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀫𑁂𑀯. 𑀅𑀦𑀼𑀲𑀬𑁄 𑀳𑀺 𑀦𑀸𑀫𑁂𑀲 𑀧𑀭𑀺𑀦𑀺𑀧𑁆𑀨𑀦𑁆𑀦𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄 𑀅𑀓𑀼𑀲𑀮𑀥𑀫𑁆𑀫𑁄𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂, 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀤𑁆𑀯𑀸𑀤𑀲𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀲𑀳𑀚𑀸𑀢𑀯𑀲𑁂𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘; 𑀢𑀬𑁄𑀧𑀺 𑀅𑀯𑀲𑁂𑀲𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀫𑁄𑀳𑀸. 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘𑁂𑀢𑁆𑀣 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀲𑀳𑀚𑀸𑀢𑀯𑀲𑁂𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘, 𑀫𑀦𑀸𑀧𑁂𑀲𑀼 𑀅𑀯𑀲𑁂𑀲𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀮𑁄𑀪𑁄. 𑀧𑀝𑀺𑀖𑀸𑀦𑀼𑀲𑀬𑁄 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀲𑀳𑀚𑀸𑀢𑀯𑀲𑁂𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘, 𑀅𑀫𑀦𑀸𑀧𑁂𑀲𑀼 𑀅𑀯𑀲𑁂𑀲𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑁄 𑀤𑁄𑀲𑁄. 𑀫𑀸𑀦𑀸𑀦𑀼𑀲𑀬𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀲𑀳𑀚𑀸𑀢𑀯𑀲𑁂𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘, 𑀤𑀼𑀓𑁆𑀔𑀯𑁂𑀤𑀦𑀸𑀯𑀚𑁆𑀚𑁂𑀲𑀼 𑀅𑀯𑀲𑁂𑀲𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼 𑀘 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑁄 𑀫𑀸𑀦𑁄. 𑀪𑀯𑀭𑀸𑀕𑀸𑀦𑀼𑀲𑀬𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀲𑀳𑀚𑀸𑀢𑀯𑀲𑁂𑀦 𑀯𑀼𑀢𑁆𑀢𑁄. 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀧𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀮𑁄𑀪𑁄 𑀯𑀼𑀢𑁆𑀢𑁄.

𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄𑀢𑀺 𑀤𑁆𑀯𑀸𑀲𑀝𑁆𑀞𑀺𑀯𑀺𑀥𑀸 𑀤𑀺𑀝𑁆𑀞𑀺. 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄𑀢𑀺 𑀅𑀝𑁆𑀞𑀯𑀢𑁆𑀣𑀼𑀓𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸𑀢𑀺 𑀲𑀳𑀚𑁂𑀓𑀝𑁆𑀞𑀯𑀲𑁂𑀦 𑀤𑀺𑀝𑁆𑀞𑀺𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬, 𑀲𑀳𑀚𑁂𑀓𑀝𑁆𑀞𑀯𑀲𑁂𑀦 𑀏𑀓𑀢𑁄 𑀞𑀺𑀢𑀸. 𑀫𑀸𑀦𑀸𑀦𑀼𑀲𑀬𑁄𑀢𑀺 𑀦𑀯𑀯𑀺𑀥𑀫𑀸𑀦𑁄. 𑀧𑀭𑀫𑀢𑁆𑀣𑀜𑀸𑀡𑁂𑀦 𑀯𑀸 𑀜𑀢𑁆𑀯𑀸𑀢𑀺 𑀧𑀭𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀚𑀸𑀦𑀦𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸, 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀯𑀸𑀢𑀺 𑀅𑀢𑀻𑀢𑁂 𑀦𑀺𑀯𑀼𑀝𑁆𑀞𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸𑀢𑀺 𑀧𑀓𑀢𑀺𑀘𑀓𑁆𑀔𑀼𑀦𑀸. 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑁂𑀦 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑁂𑀦 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑁆𑀯𑀸. 𑀭𑀸𑀕𑀭𑀢𑁆𑀢𑀸𑀢𑀺 𑀭𑀸𑀕𑁂𑀦 𑀭𑀜𑁆𑀚𑀺𑀢𑀸. 𑀬𑁂 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀽𑀢𑀺 𑀬𑁂 𑀧𑀜𑁆𑀘𑀲𑀼 𑀭𑀽𑀧𑀸𑀤𑀺𑀯𑀢𑁆𑀣𑀼𑀓𑀸𑀫𑀓𑁄𑀝𑁆𑀞𑀸𑀲𑁂𑀲𑀼. 𑀯𑀺𑀭𑀸𑀕𑀭𑀢𑁆𑀢𑀸𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑀸𑀲𑀼 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀻𑀲𑀼 𑀅𑀢𑀺𑀭𑀢𑁆𑀢𑀸 𑀅𑀮𑁆𑀮𑀻𑀦𑀸. 𑀬𑀢𑁄 𑀓𑀸𑀫𑀭𑀸𑀕𑁄 𑀘𑀸𑀢𑀺 𑀬𑀤𑀸 𑀓𑀸𑀫𑀪𑀯𑁂 𑀭𑀸𑀕𑁄 𑀘. 𑀭𑀽𑀧𑀸𑀭𑀽𑀧𑀭𑀸𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.