𑁩. 𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁫. 𑀤𑀼𑀝𑁆𑀞𑀝𑁆𑀞𑀓𑁂 𑀧𑀞𑀫𑀕𑀸𑀣𑀸𑀬𑀁 𑀢𑀸𑀯 𑀢𑀢𑁆𑀣 𑀯𑀤𑀦𑁆𑀢𑀻𑀢𑀺 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀉𑀧𑀯𑀤𑀦𑁆𑀢𑀺. 𑀤𑀼𑀝𑁆𑀞𑀫𑀦𑀸𑀧𑀺 𑀏𑀓𑁂, 𑀅𑀣𑁄𑀧𑀺 𑀯𑁂 𑀲𑀘𑁆𑀘𑀫𑀦𑀸𑀢𑀺 𑀏𑀓𑀘𑁆𑀘𑁂 𑀤𑀼𑀝𑁆𑀞𑀘𑀺𑀢𑁆𑀢𑀸, 𑀏𑀓𑀘𑁆𑀘𑁂 𑀢𑀣𑀲𑀜𑁆𑀜𑀺𑀦𑁄𑀧𑀺 𑀳𑀼𑀢𑁆𑀯𑀸 𑀢𑀺𑀢𑁆𑀣𑀺𑀬𑀸 𑀢𑀼𑀝𑁆𑀞𑀘𑀺𑀢𑁆𑀢𑀸, 𑀬𑁂 𑀢𑁂𑀲𑀁 𑀲𑀼𑀢𑁆𑀯𑀸 𑀲𑀤𑁆𑀤𑀳𑀺𑀁𑀲𑀼, 𑀢𑁂 𑀲𑀘𑁆𑀘𑀫𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀸𑀤𑀜𑁆𑀘 𑀚𑀸𑀢𑀦𑁆𑀢𑀺 𑀏𑀢𑀁 𑀅𑀓𑁆𑀓𑁄𑀲𑀯𑀸𑀤𑀁 𑀉𑀧𑁆𑀧𑀦𑁆𑀦𑀁. 𑀫𑀼𑀦𑀺 𑀦𑁄 𑀉𑀧𑁂𑀢𑀻𑀢𑀺 𑀅𑀓𑀸𑀭𑀓𑀢𑀸𑀬 𑀘 𑀅𑀓𑀼𑀧𑁆𑀧𑀦𑀢𑀸𑀬 𑀘 𑀩𑀼𑀤𑁆𑀥𑀫𑀼𑀦𑀺 𑀦 𑀉𑀧𑁂𑀢𑀺. 𑀢𑀲𑁆𑀫𑀸 𑀫𑀼𑀦𑀻 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀅𑀬𑀁 𑀫𑀼𑀦𑀺, 𑀭𑀸𑀕𑀸𑀤𑀺𑀔𑀺𑀮𑁂𑀳𑀺 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀝𑁆𑀞𑀫𑀦𑀸𑀢𑀺 𑀉𑀧𑁆𑀧𑀦𑁆𑀦𑁂𑀳𑀺 𑀤𑁄𑀲𑁂𑀳𑀺 𑀤𑀽𑀲𑀺𑀢𑀘𑀺𑀢𑁆𑀢𑀸. 𑀯𑀺𑀭𑀼𑀤𑁆𑀥𑀫𑀦𑀸𑀢𑀺 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀓𑀼𑀲𑀮𑀲𑁆𑀲 𑀤𑁆𑀯𑀸𑀭𑀁 𑀅𑀤𑀢𑁆𑀯𑀸 𑀆𑀯𑀭𑀺𑀢𑀘𑀺𑀢𑁆𑀢𑀸. 𑀧𑀝𑀺𑀯𑀺𑀭𑀼𑀤𑁆𑀥𑀫𑀦𑀸𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀆𑀳𑀢𑀫𑀦𑀸𑀢𑀺 𑀧𑀝𑀺𑀖𑁂𑀦 𑀆𑀳𑀢𑀁 𑀘𑀺𑀢𑁆𑀢𑀁 𑀏𑀢𑁂𑀲𑀦𑁆𑀢𑀺 𑀆𑀳𑀢𑀫𑀦𑀸. 𑀧𑀘𑁆𑀘𑀸𑀳𑀢𑀫𑀦𑀸𑀢𑀺 𑀉𑀧𑀲𑀕𑁆𑀕𑀯𑀲𑁂𑀦𑁂𑀯. 𑀆𑀖𑀸𑀢𑀺𑀢𑀫𑀦𑀸𑀢𑀺 𑀯𑀺𑀳𑀺𑀁𑀲𑀸𑀯𑀲𑁂𑀦 𑀆𑀖𑀸𑀢𑀺𑀢𑀁 𑀫𑀦𑀁 𑀏𑀢𑁂𑀲𑀦𑁆𑀢𑀺 𑀆𑀖𑀸𑀢𑀺𑀢𑀫𑀦𑀸. 𑀧𑀘𑁆𑀘𑀸𑀖𑀸𑀢𑀺𑀢𑀫𑀦𑀸𑀢𑀺 𑀉𑀧𑀲𑀕𑁆𑀕𑀯𑀲𑁂𑀦𑁂𑀯. 𑀅𑀣 𑀯𑀸 ‘‘𑀓𑁄𑀥𑀯𑀲𑁂𑀦 𑀤𑀼𑀝𑁆𑀞𑀫𑀦𑀸, 𑀉𑀧𑀦𑀸𑀳𑀯𑀲𑁂𑀦 𑀧𑀤𑀼𑀝𑁆𑀞𑀫𑀦𑀸, 𑀫𑀓𑁆𑀔𑀯𑀲𑁂𑀦 𑀯𑀺𑀭𑀼𑀤𑁆𑀥𑀫𑀦𑀸, 𑀧𑀴𑀸𑀲𑀯𑀲𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑀫𑀦𑀸, 𑀤𑁄𑀲𑀯𑀲𑁂𑀦 𑀆𑀳𑀢𑀧𑀘𑁆𑀘𑀸𑀳𑀢𑀫𑀦𑀸, 𑀩𑁆𑀬𑀸𑀧𑀸𑀤𑀯𑀲𑁂𑀦 𑀆𑀖𑀸𑀢𑀺𑀢𑀧𑀘𑁆𑀘𑀸𑀖𑀸𑀢𑀺𑀢𑀫𑀦𑀸. 𑀧𑀘𑁆𑀘𑀬𑀸𑀦𑀁 𑀅𑀮𑀸𑀪𑁂𑀦 𑀤𑀼𑀝𑁆𑀞𑀫𑀦𑀸 𑀧𑀤𑀼𑀝𑁆𑀞𑀫𑀦𑀸, 𑀅𑀬𑀲𑁂𑀦 𑀯𑀺𑀭𑀼𑀤𑁆𑀥𑀫𑀦𑀸 𑀧𑀝𑀺𑀯𑀺𑀭𑀼𑀤𑁆𑀥𑀫𑀦𑀸, 𑀕𑀭𑀳𑁂𑀦 𑀆𑀳𑀢𑀧𑀘𑁆𑀘𑀸𑀳𑀢𑀫𑀦𑀸, 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻𑀪𑀸𑀯𑁂𑀦 𑀆𑀖𑀸𑀢𑀺𑀢𑀧𑀘𑁆𑀘𑀸𑀖𑀸𑀢𑀺𑀢𑀫𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀏𑀓𑁂 𑀯𑀡𑁆𑀡𑀬𑀦𑁆𑀢𑀺. 𑀉𑀧𑀯𑀤𑀦𑁆𑀢𑀻𑀢𑀺 𑀕𑀭𑀳𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀅𑀪𑀽𑀢𑁂𑀦𑀸𑀢𑀺 𑀅𑀲𑀁𑀯𑀺𑀚𑁆𑀚𑀫𑀸𑀦𑁂𑀦.

𑀲𑀤𑁆𑀤𑀳𑀦𑁆𑀢𑀸𑀢𑀺 𑀧𑀲𑀸𑀤𑀯𑀲𑁂𑀦 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀦𑁆𑀢𑀸. 𑀑𑀓𑀧𑁆𑀧𑁂𑀦𑁆𑀢𑀸𑀢𑀺 𑀕𑀼𑀡𑀯𑀲𑁂𑀦 𑀑𑀢𑀭𑀺𑀢𑁆𑀯𑀸 𑀅𑀯𑀓𑀧𑁆𑀧𑀬𑀦𑁆𑀢𑀸. 𑀅𑀥𑀺𑀫𑀼𑀘𑁆𑀘𑀦𑁆𑀢𑀸𑀢𑀺 𑀲𑀫𑁆𑀧𑀲𑀸𑀤𑀦𑀯𑀲𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑁂𑀲𑀁 𑀓𑀣𑀁 𑀅𑀥𑀺𑀯𑀸𑀲𑁂𑀦𑁆𑀢𑀸. 𑀲𑀘𑁆𑀘𑀫𑀦𑀸𑀢𑀺 𑀢𑀘𑁆𑀙𑀫𑀦𑀸. 𑀲𑀘𑁆𑀘𑀲𑀜𑁆𑀜𑀺𑀦𑁄𑀢𑀺 𑀢𑀘𑁆𑀙𑀲𑀜𑁆𑀜𑀺𑀦𑁄. 𑀢𑀣𑀫𑀦𑀸𑀢𑀺 𑀅𑀯𑀺𑀧𑀭𑀻𑀢𑀫𑀦𑀸. 𑀪𑀽𑀢𑀫𑀦𑀸𑀢𑀺 𑀪𑀽𑀢𑀢𑁆𑀣𑀫𑀦𑀸. 𑀬𑀸𑀣𑀸𑀯𑀫𑀦𑀸𑀢𑀺 𑀦𑀺𑀘𑁆𑀘𑀮𑀫𑀦𑀸. 𑀅𑀯𑀺𑀧𑀭𑀻𑀢𑀫𑀦𑀸𑀢𑀺 𑀦𑀺𑀘𑁆𑀙𑀬𑀫𑀦𑀸. 𑀢𑀢𑁆𑀣 ‘‘𑀲𑀘𑁆𑀘𑀫𑀦𑀸 𑀲𑀘𑁆𑀘𑀲𑀜𑁆𑀜𑀺𑀦𑁄’’𑀢𑀺 𑀲𑀘𑁆𑀘𑀯𑀸𑀤𑀺𑀕𑀼𑀡𑀁, ‘‘𑀢𑀣𑀫𑀦𑀸 𑀢𑀣𑀲𑀜𑁆𑀜𑀺𑀦𑁄’’𑀢𑀺 𑀲𑀘𑁆𑀘𑀲𑀤𑁆𑀥𑀸𑀕𑀼𑀡𑀁, ‘‘𑀪𑀽𑀢𑀫𑀦𑀸 𑀪𑀽𑀢𑀲𑀜𑁆𑀜𑀺𑀦𑁄’’𑀢𑀺 𑀞𑀺𑀢𑀕𑀼𑀡𑀁, ‘‘𑀬𑀸𑀣𑀸𑀯𑀫𑀦𑀸 𑀬𑀸𑀣𑀸𑀯𑀲𑀜𑁆𑀜𑀺𑀦𑁄’’𑀢𑀺 𑀧𑀘𑁆𑀘𑀬𑀺𑀓𑀕𑀼𑀡𑀁, ‘‘𑀅𑀯𑀺𑀧𑀭𑀻𑀢𑀫𑀦𑀸 𑀅𑀯𑀺𑀧𑀭𑀻𑀢𑀲𑀜𑁆𑀜𑀺𑀦𑁄’’𑀢𑀺 𑀅𑀯𑀺𑀲𑀁𑀯𑀸𑀤𑀕𑀼𑀡𑀁 𑀓𑀣𑀺𑀢𑀦𑁆𑀢𑀺 𑀜𑀸𑀢𑀩𑁆𑀩𑀁.

𑀧𑀭𑀢𑁄𑀖𑁄𑀲𑁄𑀢𑀺 𑀅𑀜𑁆𑀜𑁂𑀲𑀁 𑀲𑀦𑁆𑀢𑀺𑀓𑀸 𑀉𑀧𑁆𑀧𑀦𑁆𑀦𑀲𑀤𑁆𑀤𑁄. 𑀅𑀓𑁆𑀓𑁄𑀲𑁄𑀢𑀺 𑀚𑀸𑀢𑀺𑀆𑀤𑀻𑀲𑀼 𑀤𑀲𑀲𑀼 𑀅𑀓𑁆𑀓𑁄𑀲𑁂𑀲𑀼 𑀅𑀜𑁆𑀜𑀢𑀭𑁄. 𑀬𑁄 𑀯𑀸𑀤𑀁 𑀉𑀧𑁂𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀉𑀧𑀯𑀸𑀤𑀁 𑀉𑀧𑀕𑀘𑁆𑀙𑀢𑀺. 𑀓𑀸𑀭𑀓𑁄 𑀯𑀸𑀢𑀺 𑀓𑀢𑀤𑁄𑀲𑁄 𑀯𑀸. 𑀓𑀸𑀭𑀓𑀢𑀸𑀬𑀸𑀢𑀺 𑀤𑁄𑀲𑀲𑁆𑀲 𑀓𑀢𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄𑀢𑀺 𑀓𑀣𑀺𑀬𑀫𑀸𑀦𑁄. 𑀉𑀧𑀯𑀤𑀺𑀬𑀫𑀸𑀦𑁄𑀢𑀺 𑀤𑁄𑀲𑀁 𑀉𑀧𑀯𑀚𑁆𑀚𑀫𑀸𑀦𑁄. 𑀓𑀼𑀧𑁆𑀧𑀢𑀻𑀢𑀺 𑀓𑁄𑀧𑀁 𑀓𑀭𑁄𑀢𑀺.

𑀔𑀻𑀮𑀚𑀸𑀢𑀢𑀸𑀧𑀺 𑀦𑀢𑁆𑀣𑀻𑀢𑀺 𑀘𑀺𑀢𑁆𑀢𑀩𑀦𑁆𑀥𑀪𑀸𑀯𑀘𑀺𑀢𑁆𑀢𑀓𑀘𑀯𑀭𑀪𑀸𑀯𑀲𑀗𑁆𑀔𑀸𑀢𑀁 𑀧𑀝𑀺𑀖𑀔𑀺𑀮𑀁 𑀚𑀸𑀢𑀁 𑀅𑀲𑁆𑀲𑀸𑀢𑀺 𑀔𑀺𑀮𑀚𑀸𑀢𑁄, 𑀢𑀲𑁆𑀲 𑀪𑀸𑀯𑁄 𑀔𑀺𑀮𑀚𑀸𑀢𑀢𑀸, 𑀢𑀸𑀧𑀺 𑀦𑀢𑁆𑀣𑀺 𑀦 𑀲𑀦𑁆𑀢𑀺. 𑀧𑀜𑁆𑀘𑀧𑀺 𑀘𑁂𑀢𑁄𑀔𑀺𑀮𑀸𑀢𑀺 𑀓𑀸𑀫𑁂 𑀅𑀯𑀻𑀢𑀭𑀸𑀕𑁄, 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄, 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄, 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺, 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 (𑀫. 𑀦𑀺. 𑁧.𑁧𑁮𑁬) 𑀏𑀯𑀭𑀽𑀧𑀸 𑀧𑀜𑁆𑀘𑀧𑀺 𑀘𑀺𑀢𑁆𑀢𑀲𑁆𑀲 𑀩𑀦𑁆𑀥𑀪𑀸𑀯𑀓𑀘𑀯𑀭𑀪𑀸𑀯𑀲𑀗𑁆𑀔𑀸𑀢𑀸 𑀘𑁂𑀢𑁄𑀔𑀺𑀮𑀸 𑀦𑀢𑁆𑀣𑀺.

𑁧𑁬. 𑀇𑀫𑀜𑁆𑀘 𑀕𑀸𑀣𑀁 𑀯𑀢𑁆𑀯𑀸 𑀪𑀕𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀏𑀯𑀁 𑀔𑀼𑀁𑀲𑁂𑀢𑁆𑀯𑀸 𑀯𑀫𑁆𑀪𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀪𑀺𑀓𑁆𑀔𑀽, 𑀆𑀦𑀦𑁆𑀤, 𑀓𑀺𑀁 𑀯𑀤𑀦𑁆𑀢𑀻’’𑀢𑀺, ‘‘𑀦 𑀓𑀺𑀜𑁆𑀘𑀺 𑀪𑀕𑀯𑀸’’𑀢𑀺. ‘‘𑀦, 𑀆𑀦𑀦𑁆𑀤, ‘𑀅𑀳𑀁 𑀲𑀻𑀮𑀯𑀸’𑀢𑀺 𑀲𑀩𑁆𑀩𑀢𑁆𑀣 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀁. 𑀮𑁄𑀓𑁂 𑀳𑀺 𑀦𑀸𑀪𑀸𑀲𑀫𑀸𑀦𑀁 𑀚𑀸𑀦𑀦𑁆𑀢𑀺, 𑀫𑀺𑀲𑁆𑀲𑀁 𑀩𑀸𑀮𑁂𑀳𑀺 𑀧𑀡𑁆𑀟𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁪𑁧) 𑀯𑀢𑁆𑀯𑀸 ‘‘𑀪𑀺𑀓𑁆𑀔𑀽, 𑀆𑀦𑀦𑁆𑀤, 𑀢𑁂 𑀫𑀦𑀼𑀲𑁆𑀲𑁂 𑀏𑀯𑀁 𑀧𑀝𑀺𑀘𑁄𑀤𑁂𑀦𑁆𑀢𑀽’’𑀢𑀺 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 ‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀻’’𑀢𑀺 (𑀥. 𑀧. 𑁩𑁦𑁬; 𑀉𑀤𑀸. 𑁩𑁮; 𑀇𑀢𑀺𑀯𑀼. 𑁪𑁮; 𑀲𑀼. 𑀦𑀺. 𑁬𑁬𑁬) 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺. 𑀣𑁂𑀭𑁄 𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀳 𑁋 ‘‘𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑁂𑀳𑀺 𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀘𑁄𑀤𑁂𑀢𑀩𑁆𑀩𑀸’’𑀢𑀺. 𑀪𑀺𑀓𑁆𑀔𑀽 𑀢𑀣𑀸 𑀅𑀓𑀁𑀲𑀼. 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀭𑀸𑀚𑀸𑀧𑀺 𑀭𑀸𑀚𑀧𑀼𑀭𑀺𑀲𑁂 𑀲𑀩𑁆𑀩𑀢𑁆𑀣 𑀧𑁂𑀲𑁂𑀢𑁆𑀯𑀸 𑀬𑁂𑀲𑀁 𑀥𑀼𑀢𑁆𑀢𑀸𑀦𑀁 𑀮𑀜𑁆𑀚𑀁 𑀤𑀢𑁆𑀯𑀸 𑀢𑀺𑀢𑁆𑀣𑀺𑀬𑀸 𑀢𑀁 𑀫𑀸𑀭𑀸𑀧𑁂𑀲𑀼𑀁, 𑀢𑁂 𑀕𑀳𑁂𑀢𑁆𑀯𑀸 𑀦𑀺𑀕𑁆𑀕𑀬𑁆𑀳 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀢𑀺𑀢𑁆𑀣𑀺𑀬𑁂 𑀧𑀭𑀺𑀪𑀸𑀲𑀺. 𑀫𑀦𑀼𑀲𑁆𑀲𑀸𑀧𑀺 𑀢𑀺𑀢𑁆𑀣𑀺𑀬𑁂 𑀤𑀺𑀲𑁆𑀯𑀸 𑀮𑁂𑀟𑁆𑀟𑀼𑀦𑀸 𑀳𑀦𑀦𑁆𑀢𑀺, 𑀧𑀁𑀲𑀼𑀦𑀸 𑀑𑀓𑀺𑀭𑀦𑁆𑀢𑀺 ‘‘𑀪𑀕𑀯𑀢𑁄 𑀅𑀬𑀲𑀁 𑀉𑀧𑁆𑀧𑀸𑀤𑁂𑀲𑀼’’𑀦𑁆𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺, 𑀪𑀕𑀯𑀸 𑀣𑁂𑀭𑀲𑁆𑀲 𑀇𑀫𑀁 𑀕𑀸𑀣𑀫𑀪𑀸𑀲𑀺 ‘‘𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁…𑀧𑁂… 𑀯𑀤𑁂𑀬𑁆𑀬𑀸’’𑀢𑀺.

𑀢𑀲𑁆𑀲 𑀅𑀢𑁆𑀣𑁄 𑁋 𑀬𑀸𑀬𑀁 𑀤𑀺𑀝𑁆𑀞𑀺 𑀢𑀺𑀢𑁆𑀣𑀺𑀬𑀚𑀦𑀲𑁆𑀲 ‘‘𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀅𑀯𑀡𑁆𑀡𑀁 𑀧𑀓𑀸𑀲𑁂𑀢𑁆𑀯𑀸 𑀏𑀢𑁂𑀦𑀼𑀧𑀸𑀬𑁂𑀦 𑀮𑀤𑁆𑀥𑀁 𑀲𑀓𑁆𑀓𑀸𑀭𑀁 𑀲𑀸𑀤𑀺𑀬𑀺𑀲𑁆𑀲𑀸𑀫𑀸’’𑀢𑀺 𑀲𑁄 𑀢𑀁 𑀤𑀺𑀝𑁆𑀞𑀺𑀁 𑀓𑀣𑀁 𑀅𑀢𑀺𑀓𑁆𑀓𑀫𑁂𑀬𑁆𑀬? 𑀅𑀣 𑀔𑁄 𑀲𑁄 𑀅𑀬𑀲𑁄 𑀢𑀫𑁂𑀯 𑀢𑀺𑀢𑁆𑀣𑀺𑀬𑀚𑀦𑀁 𑀧𑀘𑁆𑀘𑀸𑀕𑀢𑁄 𑀢𑀁 𑀤𑀺𑀝𑁆𑀞𑀺𑀁 𑀅𑀘𑁆𑀘𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁. 𑀬𑁄 𑀯𑀸 𑀲𑀲𑁆𑀲𑀢𑀸𑀤𑀺𑀯𑀸𑀤𑀻, 𑀲𑁄𑀧𑀺 𑀲𑀓𑀁 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬, 𑀢𑁂𑀦 𑀤𑀺𑀝𑁆𑀞𑀺𑀙𑀦𑁆𑀤𑁂𑀦 𑀅𑀦𑀼𑀦𑀻𑀢𑁄 𑀢𑀸𑀬 𑀘 𑀤𑀺𑀝𑁆𑀞𑀺𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄, 𑀅𑀧𑀺 𑀘 𑀔𑁄 𑀧𑀦 𑀲𑀬𑀁 𑀲𑀫𑀢𑁆𑀢𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄 𑀅𑀢𑁆𑀢𑀦𑀸𑀯 𑀧𑀭𑀺𑀧𑀼𑀡𑁆𑀡𑀸𑀦𑀺 𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀓𑀭𑁄𑀦𑁆𑀢𑁄 𑀬𑀣𑀸 𑀚𑀸𑀦𑁂𑀬𑁆𑀬, 𑀢𑀣𑁂𑀯 𑀯𑀤𑁂𑀬𑁆𑀬𑀸𑀢𑀺.

𑀅𑀯𑀡𑁆𑀡𑀁 𑀧𑀓𑀸𑀲𑀬𑀺𑀢𑁆𑀯𑀸𑀢𑀺 𑀅𑀕𑀼𑀡𑀁 𑀧𑀸𑀓𑀝𑀁 𑀓𑀢𑁆𑀯𑀸. 𑀲𑀓𑁆𑀓𑀸𑀭𑀦𑁆𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀲𑀓𑁆𑀓𑀘𑁆𑀘𑀓𑀭𑀡𑀁. 𑀲𑀫𑁆𑀫𑀸𑀦𑀦𑁆𑀢𑀺 𑀘𑀺𑀢𑁆𑀢𑁂𑀦 𑀩𑀳𑀼𑀫𑀸𑀦𑀦𑀁. 𑀧𑀘𑁆𑀘𑀸𑀳𑀭𑀺𑀲𑁆𑀲𑀸𑀫𑀸𑀢𑀺 𑀏𑀢𑀁 𑀮𑀸𑀪𑀸𑀤𑀺𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫. 𑀏𑀯𑀁𑀤𑀺𑀝𑁆𑀞𑀺𑀓𑀸𑀢𑀺 𑀏𑀯𑀁𑀮𑀤𑁆𑀥𑀺𑀓𑀸. 𑀬𑀣𑀸 𑀢𑀁 ‘‘𑀮𑀸𑀪𑀸𑀤𑀺𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀅𑀬𑀁 𑀮𑀤𑁆𑀥𑀺 𑀢𑁂𑀲𑀁 𑀅𑀢𑁆𑀣𑀺, 𑀢𑀣𑀸 ‘‘𑀅𑀢𑁆𑀣𑀺 𑀫𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀥𑀫𑁆𑀫𑁄’’𑀢𑀺 𑀏𑀢𑁂𑀲𑀁 𑀔𑀫𑀢𑀺 𑀘𑁂𑀯 𑀭𑀼𑀘𑁆𑀘𑀢𑀺 𑀘, 𑀏𑀯𑀁𑀲𑀪𑀸𑀯𑀫𑁂𑀯 𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 ‘‘𑀅𑀢𑁆𑀣𑀺 𑀫𑁂 𑀘𑀺𑀢𑁆𑀢’’𑀦𑁆𑀢𑀺. 𑀢𑀤𑀸 𑀢𑁂𑀲𑀁 𑀤𑀺𑀝𑁆𑀞𑀺 𑀯𑀸, 𑀤𑀺𑀝𑁆𑀞𑀺𑀬𑀸 𑀲𑀳 𑀔𑀦𑁆𑀢𑀺 𑀯𑀸, 𑀤𑀺𑀝𑁆𑀞𑀺𑀔𑀦𑁆𑀢𑀻𑀳𑀺 𑀲𑀤𑁆𑀥𑀺𑀁 𑀭𑀼𑀘𑀺 𑀯𑀸, 𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀻𑀳𑀺 𑀲𑀤𑁆𑀥𑀺𑀁 𑀮𑀤𑁆𑀥𑀺 𑀯𑀸, 𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀺𑀮𑀤𑁆𑀥𑀻𑀳𑀺 𑀲𑀤𑁆𑀥𑀺𑀁 𑀅𑀚𑁆𑀛𑀸𑀲𑀬𑁄 𑀯𑀸, 𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀺𑀮𑀤𑁆𑀥𑀺𑀅𑀚𑁆𑀛𑀸𑀲𑀬𑁂𑀳𑀺 𑀲𑀤𑁆𑀥𑀺𑀁 𑀅𑀥𑀺𑀧𑁆𑀧𑀸𑀬𑁄 𑀯𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁𑀤𑀺𑀝𑁆𑀞𑀺𑀓𑀸…𑀧𑁂… 𑀏𑀯𑀁𑀅𑀥𑀺𑀧𑁆𑀧𑀸𑀬𑀸’’𑀢𑀺 𑀆𑀳. 𑀲𑀓𑀁 𑀤𑀺𑀝𑁆𑀞𑀺𑀦𑁆𑀢𑀺 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁. 𑀲𑀓𑀁 𑀔𑀦𑁆𑀢𑀺𑀦𑁆𑀢𑀺 𑀅𑀢𑁆𑀢𑀦𑁄 𑀲𑀳𑀦𑀁. 𑀲𑀓𑀁 𑀭𑀼𑀘𑀺𑀦𑁆𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀁. 𑀲𑀓𑀁 𑀮𑀤𑁆𑀥𑀺𑀦𑁆𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁. 𑀲𑀓𑀁 𑀅𑀚𑁆𑀛𑀸𑀲𑀬𑀦𑁆𑀢𑀺 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁. 𑀲𑀓𑀁 𑀅𑀥𑀺𑀧𑁆𑀧𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀪𑀸𑀯𑀁. 𑀅𑀢𑀺𑀓𑁆𑀓𑀫𑀺𑀢𑀼𑀦𑁆𑀢𑀺 𑀲𑀫𑀢𑀺𑀓𑁆𑀓𑀫𑀺𑀢𑀼𑀁. 𑀅𑀣 𑀔𑁄 𑀲𑁆𑀯𑁂𑀯 𑀅𑀬𑀲𑁄𑀢𑀺 𑀲𑁄 𑀏𑀯 𑀅𑀬𑀲𑁄 𑀏𑀓𑀁𑀲𑁂𑀦. 𑀢𑁂 𑀧𑀘𑁆𑀘𑀸𑀕𑀢𑁄𑀢𑀺 𑀢𑁂𑀲𑀁 𑀧𑀢𑀺𑀆𑀕𑀢𑁄. 𑀢𑁂𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁.

𑀅𑀣 𑀯𑀸𑀢𑀺 𑀅𑀢𑁆𑀣𑀦𑁆𑀢𑀭𑀤𑀲𑁆𑀲𑀦𑀁. 𑀲𑀲𑁆𑀲𑀢𑁄𑀢𑀺 𑀦𑀺𑀘𑁆𑀘𑁄 𑀥𑀼𑀯𑁄. 𑀮𑁄𑀓𑁄𑀢𑀺 𑀅𑀢𑁆𑀢𑀪𑀸𑀯𑁄. 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀤𑀁 𑀏𑀯 𑀢𑀘𑁆𑀙𑀁 𑀢𑀣𑀁, 𑀅𑀜𑁆𑀜𑀁 𑀢𑀼𑀘𑁆𑀙𑀁. 𑀲𑀫𑀢𑁆𑀢𑀸𑀢𑀺 𑀲𑀫𑁆𑀧𑀼𑀡𑁆𑀡𑀸. 𑀲𑀫𑀸𑀤𑀺𑀦𑁆𑀦𑀸𑀢𑀺 𑀲𑀫𑁆𑀫𑀸 𑀆𑀤𑀺𑀦𑁆𑀦𑀸. 𑀕𑀳𑀺𑀢𑀸𑀢𑀺 𑀉𑀧𑀕𑀦𑁆𑀢𑁆𑀯𑀸 𑀕𑀳𑀺𑀢𑀸.

𑀧𑀭𑀸𑀫𑀝𑁆𑀞𑀸𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 𑀕𑀳𑀺𑀢𑀸. 𑀅𑀪𑀺𑀦𑀺𑀯𑀺𑀝𑁆𑀞𑀸𑀢𑀺 𑀯𑀺𑀲𑁂𑀲𑁂𑀦 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑀸. 𑀅𑀲𑀲𑁆𑀲𑀢𑁄𑀢𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀅𑀦𑁆𑀢𑀯𑀸𑀢𑀺 𑀲𑀅𑀦𑁆𑀢𑁄. 𑀅𑀦𑀦𑁆𑀢𑀯𑀸𑀢𑀺 𑀯𑀼𑀤𑁆𑀥𑀺𑀅𑀦𑀦𑁆𑀢𑀯𑀸. 𑀢𑀁 𑀚𑀻𑀯𑀦𑁆𑀢𑀺 𑀲𑁄 𑀚𑀻𑀯𑁄, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄. 𑀚𑀻𑀯𑁄𑀢𑀺 𑀘 𑀅𑀢𑁆𑀢𑀸𑀬𑁂𑀯. 𑀢𑀣𑀸𑀕𑀢𑁄𑀢𑀺 𑀲𑀢𑁆𑀢𑁄, ‘‘𑀅𑀭𑀳’’𑀦𑁆𑀢𑀺 𑀏𑀓𑁂. 𑀧𑀭𑀁 𑀫𑀭𑀡𑀸𑀢𑀺 𑀫𑀭𑀡𑀢𑁄 𑀉𑀤𑁆𑀥𑀁, 𑀧𑀭𑀮𑁄𑀓𑁂𑀢𑀺 𑀅𑀢𑁆𑀣𑁄. 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀫𑀭𑀡𑀢𑁄 𑀉𑀤𑁆𑀥𑀁 𑀦 𑀳𑁄𑀢𑀺. 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀫𑀭𑀡𑀢𑁄 𑀉𑀤𑁆𑀥𑀁 𑀳𑁄𑀢𑀺 𑀘 𑀦 𑀳𑁄𑀢𑀺 𑀘. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀉𑀘𑁆𑀙𑁂𑀤𑀯𑀲𑁂𑀦 𑀦𑁂𑀯 𑀳𑁄𑀢𑀺, 𑀢𑀓𑁆𑀓𑀺𑀓𑀯𑀲𑁂𑀦 𑀦 𑀦 𑀳𑁄𑀢𑀺.

𑀲𑀓𑀸𑀬 𑀤𑀺𑀝𑁆𑀞𑀺𑀬𑀸𑀢𑀺𑀆𑀤𑀬𑁄 𑀓𑀭𑀡𑀯𑀘𑀦𑀁. 𑀅𑀮𑁆𑀮𑀻𑀦𑁄𑀢𑀺 𑀏𑀓𑀻𑀪𑀽𑀢𑁄.

𑀲𑀬𑀁 𑀲𑀫𑀢𑁆𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑀸 𑀊𑀦𑀪𑀸𑀯𑀁 𑀫𑁄𑀘𑁂𑀢𑁆𑀯𑀸 𑀲𑀫𑁆𑀫𑀸 𑀅𑀢𑁆𑀢𑀁 𑀲𑀫𑀢𑁆𑀢𑀁 𑀓𑀭𑁄𑀢𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀢𑀺𑀭𑁂𑀓𑀤𑁄𑀲𑀁 𑀫𑁄𑀘𑁂𑀢𑁆𑀯𑀸 𑀲𑀫𑁆𑀧𑀼𑀡𑁆𑀡𑀁. 𑀅𑀦𑁄𑀫𑀦𑁆𑀢𑀺 𑀳𑀻𑀦𑀤𑁄𑀲𑀁 𑀫𑁄𑀘𑁂𑀢𑁆𑀯𑀸 𑀅𑀮𑀸𑀫𑀓𑀁. 𑀅𑀕𑁆𑀕𑀦𑁆𑀢𑀺 𑀆𑀤𑀺𑀁. 𑀲𑁂𑀝𑁆𑀞𑀦𑁆𑀢𑀺 𑀧𑀥𑀸𑀦𑀁 𑀦𑀺𑀤𑁆𑀤𑁄𑀲𑀁. 𑀯𑀺𑀲𑁂𑀲𑀦𑁆𑀢𑀺 𑀚𑁂𑀝𑁆𑀞𑀓𑀁. 𑀧𑀸𑀫𑁄𑀓𑁆𑀔𑀦𑁆𑀢𑀺 𑀅𑀥𑀺𑀓𑀁. 𑀉𑀢𑁆𑀢𑀫𑀦𑁆𑀢𑀺 𑀯𑀺𑀲𑁂𑀲𑀁 𑀦 𑀳𑁂𑀝𑁆𑀞𑀺𑀫𑀁. 𑀧𑀯𑀭𑀁 𑀓𑀭𑁄𑀢𑀻𑀢𑀺 𑀅𑀢𑀺𑀭𑁂𑀓𑁂𑀦 𑀉𑀢𑁆𑀢𑀫𑀁 𑀓𑀭𑁄𑀢𑀺. 𑀅𑀣 𑀯𑀸 ‘‘𑀆𑀲𑀬𑀤𑁄𑀲𑀫𑁄𑀘𑀦𑁂𑀦 𑀅𑀕𑁆𑀕𑀁, 𑀲𑀁𑀓𑀺𑀮𑁂𑀲𑀤𑁄𑀲𑀫𑁄𑀘𑀦𑁂𑀦 𑀲𑁂𑀝𑁆𑀞𑀁, 𑀉𑀧𑀓𑁆𑀓𑀺𑀮𑁂𑀲𑀤𑁄𑀲𑀫𑁄𑀘𑀦𑁂𑀦 𑀯𑀺𑀲𑁂𑀲𑀁, 𑀧𑀫𑀢𑁆𑀢𑀤𑁄𑀲𑀫𑁄𑀘𑀦𑁂𑀦 𑀧𑀸𑀫𑁄𑀓𑁆𑀔𑀁, 𑀫𑀚𑁆𑀛𑀺𑀫𑀤𑁄𑀲𑀫𑁄𑀘𑀦𑁂𑀦 𑀉𑀢𑁆𑀢𑀫𑀁, 𑀉𑀢𑁆𑀢𑀫𑀫𑀚𑁆𑀛𑀺𑀫𑀤𑁄𑀲𑀫𑁄𑀘𑀦𑁂𑀦 𑀧𑀯𑀭𑀁 𑀓𑀭𑁄𑀢𑀻’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺. 𑀅𑀬𑀁 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀽𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀲𑀩𑁆𑀩𑀚𑀸𑀦𑀦𑀯𑀲𑁂𑀦 𑀲𑀩𑁆𑀩𑀜𑁆𑀜𑀽. 𑀅𑀬𑀁 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀥𑀫𑁆𑀫𑁄 𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑁄. 𑀅𑀬𑀁 𑀕𑀡𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀕𑀡𑁄 𑀲𑀼𑀝𑁆𑀞𑀼 𑀧𑀝𑀺𑀧𑀦𑁆𑀦𑁄. 𑀅𑀬𑀁 𑀤𑀺𑀝𑁆𑀞𑀺 𑀪𑀤𑁆𑀤𑀺𑀓𑀸𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀮𑀤𑁆𑀥𑀺 𑀲𑀼𑀦𑁆𑀤𑀭𑀸. 𑀅𑀬𑀁 𑀧𑀝𑀺𑀧𑀤𑀸 𑀲𑀼𑀧𑀜𑁆𑀜𑀢𑁆𑀢𑀸𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀧𑀼𑀩𑁆𑀩𑀪𑀸𑀕𑀸 𑀅𑀢𑁆𑀢𑀦𑁆𑀢 𑀧𑀸𑀤𑀺𑀧𑀝𑀺𑀧𑀤𑀸 𑀲𑀼𑀝𑁆𑀞𑀼 𑀧𑀜𑁆𑀜𑀢𑁆𑀢𑀸. 𑀅𑀬𑀁 𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀦𑀺𑀬𑁆𑀬𑀸𑀫𑁄𑀓𑁆𑀓𑀦𑁆𑀢𑀺𑀓𑁄 𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀲𑀬𑀁 𑀲𑀫𑀢𑁆𑀢𑀁 𑀓𑀭𑁄𑀢𑀺.

𑀓𑀣𑁂𑀬𑁆𑀬 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺. 𑀪𑀡𑁂𑀬𑁆𑀬 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺. 𑀤𑀻𑀧𑁂𑀬𑁆𑀬 ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺. 𑀯𑁄𑀳𑀭𑁂𑀬𑁆𑀬 𑀦𑀸𑀦𑀸𑀯𑀺𑀥𑁂𑀦 𑀕𑀡𑁆𑀳𑀸𑀧𑁂𑀬𑁆𑀬 ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀻’’𑀢𑀺.

𑁧𑁭. 𑀅𑀣 𑀭𑀸𑀚𑀸 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀢𑀁 𑀓𑀼𑀡𑀧𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀆𑀳 𑁋 ‘‘𑀦𑀦𑀼, 𑀪𑀦𑁆𑀢𑁂, 𑀈𑀤𑀺𑀲𑁂 𑀅𑀬𑀲𑁂 𑀉𑀧𑁆𑀧𑀦𑁆𑀦𑁂 𑀫𑀬𑁆𑀳𑀫𑁆𑀧𑀺 𑀆𑀭𑁄𑀘𑁂𑀢𑀩𑁆𑀩𑀁 𑀲𑀺𑀬𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 ‘‘𑀦, 𑀫𑀳𑀸𑀭𑀸𑀚, ‘𑀅𑀳𑀁 𑀲𑀻𑀮𑀯𑀸 𑀕𑀼𑀡𑀲𑀫𑁆𑀧𑀦𑁆𑀦𑁄’𑀢𑀺 𑀧𑀭𑁂𑀲𑀁 𑀆𑀭𑁄𑀘𑁂𑀢𑀼𑀁 𑀅𑀭𑀺𑀬𑀸𑀦𑀁 𑀧𑀝𑀺𑀭𑀽𑀧’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 ‘‘𑀬𑁄 𑀅𑀢𑁆𑀢𑀦𑁄 𑀲𑀻𑀮𑀯𑀢𑀸𑀦𑀻𑀢𑀺 𑀅𑀯𑀲𑁂𑀲𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀲𑀻𑀮𑀯𑀢𑀸𑀦𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀸𑀤𑀻𑀦𑀺 𑀲𑀻𑀮𑀸𑀦𑀺, 𑀆𑀭𑀜𑁆𑀜𑀺𑀓𑀸𑀤𑀻𑀦𑀺 𑀥𑀼𑀢𑀗𑁆𑀕𑀯𑀢𑀸𑀦𑀺 𑀘. 𑀅𑀦𑀸𑀦𑀼𑀧𑀼𑀝𑁆𑀞𑁄𑀢𑀺 𑀅𑀧𑀼𑀘𑁆𑀙𑀺𑀢𑁄. 𑀧𑀸𑀯𑀸𑀢𑀺 𑀯𑀤𑀢𑀺. 𑀅𑀦𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀢𑀫𑀸𑀳𑀼, 𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯𑀸𑀢𑀺 𑀬𑁄 𑀏𑀯𑀁 𑀅𑀢𑁆𑀢𑀸𑀦𑀁 𑀲𑀬𑀫𑁂𑀯 𑀯𑀤𑀢𑀺, 𑀢𑀲𑁆𑀲 𑀢𑀁 𑀯𑀸𑀤𑀁 ‘‘𑀅𑀦𑀭𑀺𑀬𑀥𑀫𑁆𑀫𑁄 𑀏𑀲𑁄’’𑀢𑀺 𑀓𑀼𑀲𑀮𑀸 𑀏𑀯𑀁 𑀓𑀣𑁂𑀦𑁆𑀢𑀺.

𑀅𑀢𑁆𑀣𑀺 𑀲𑀻𑀮𑀜𑁆𑀘𑁂𑀯 𑀯𑀢𑀜𑁆𑀘𑀸𑀢𑀺 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀜𑁆𑀘𑁂𑀯 𑀅𑀢𑁆𑀣𑀺, 𑀲𑀫𑀸𑀤𑀸𑀦𑀝𑁆𑀞𑁂𑀦 𑀯𑀢𑀜𑁆𑀘 𑀅𑀢𑁆𑀣𑀺, 𑀯𑀢𑀁 𑀦 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀢𑁆𑀣𑁂𑀦 𑀯𑀢𑀁 𑀅𑀢𑁆𑀣𑀺, 𑀢𑀁 𑀦 𑀲𑀻𑀮𑀁. 𑀓𑀢𑀫𑀦𑁆𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸𑀢𑀺𑀆𑀤𑀬𑁄 𑀯𑀼𑀢𑁆𑀢𑀦𑀬𑀸 𑀏𑀯. 𑀲𑀁𑀯𑀭𑀝𑁆𑀞𑁂𑀦𑀸𑀢𑀺 𑀲𑀁𑀯𑀭𑀡𑀝𑁆𑀞𑁂𑀦, 𑀯𑀻𑀢𑀺𑀓𑁆𑀓𑀫𑀤𑁆𑀯𑀸𑀭𑀁 𑀧𑀺𑀤𑀳𑀦𑀝𑁆𑀞𑁂𑀦. 𑀲𑀫𑀸𑀤𑀸𑀦𑀝𑁆𑀞𑁂𑀦𑀸𑀢𑀺 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑁆𑀫𑀸 𑀆𑀤𑀸𑀦𑀝𑁆𑀞𑁂𑀦. 𑀆𑀭𑀜𑁆𑀜𑀺𑀓𑀗𑁆𑀕𑀦𑁆𑀢𑀺 𑀅𑀭𑀜𑁆𑀜𑁂 𑀦𑀺𑀯𑀸𑀲𑁄 𑀲𑀻𑀮𑀁 𑀅𑀲𑁆𑀲𑀸𑀢𑀺 𑀆𑀭𑀜𑁆𑀜𑀺𑀓𑁄, 𑀢𑀲𑁆𑀲 𑀅𑀗𑁆𑀕𑀁 𑀆𑀭𑀜𑁆𑀜𑀺𑀓𑀗𑁆𑀕𑀁. 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀦𑁆𑀢𑀺 𑀪𑀺𑀓𑁆𑀔𑀸𑀲𑀗𑁆𑀔𑀸𑀢𑀸𑀦𑀁 𑀧𑀭𑀆𑀫𑀺𑀲𑀧𑀺𑀡𑁆𑀟𑀸𑀦𑀁 𑀧𑀸𑀢𑁄 𑀧𑀺𑀡𑁆𑀟𑀧𑀸𑀢𑁄, 𑀧𑀭𑁂𑀳𑀺 𑀤𑀺𑀦𑁆𑀦𑀸𑀦𑀁 𑀧𑀺𑀡𑁆𑀟𑀸𑀦𑀁 𑀧𑀢𑁆𑀢𑁂 𑀦𑀺𑀧𑀢𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀉𑀜𑁆𑀙𑀢𑀺 𑀢𑀁 𑀢𑀁 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀕𑀯𑁂𑀲𑀢𑀻𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄, 𑀧𑀺𑀡𑁆𑀟𑀸𑀬 𑀯𑀸 𑀧𑀢𑀺𑀢𑀼𑀁 𑀯𑀢𑀫𑁂𑀢𑀲𑁆𑀲𑀸𑀢𑀺 𑀧𑀺𑀡𑁆𑀟𑀧𑀸𑀢𑀻. 𑀧𑀢𑀺𑀢𑀼𑀦𑁆𑀢𑀺 𑀘𑀭𑀺𑀢𑀼𑀁. 𑀧𑀺𑀡𑁆𑀟𑀧𑀸𑀢𑀻 𑀏𑀯 𑀧𑀺𑀡𑁆𑀟𑀧𑀸𑀢𑀺𑀓𑁄, 𑀢𑀲𑁆𑀲 𑀅𑀗𑁆𑀕𑀁 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁. 𑀅𑀗𑁆𑀕𑀦𑁆𑀢𑀺 𑀓𑀸𑀭𑀡𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀬𑁂𑀦 𑀲𑀫𑀸𑀤𑀸𑀦𑁂𑀦 𑀲𑁄 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀦𑁂𑀯 𑀦𑀬𑁂𑀦 𑀭𑀣𑀺𑀓𑀸𑀲𑀼𑀲𑀸𑀦𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀁𑀲𑀽𑀦𑀁 𑀉𑀧𑀭𑀺 𑀞𑀺𑀢𑀢𑁆𑀢𑀸 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀢𑁂𑀲𑀼 𑀧𑀁𑀲𑀼𑀓𑀽𑀮𑀫𑀺𑀯𑀸𑀢𑀺 𑀧𑀁𑀲𑀼𑀓𑀽𑀮𑀁. 𑀅𑀣 𑀯𑀸 𑀧𑀁𑀲𑀼 𑀯𑀺𑀬 𑀓𑀼𑀘𑁆𑀙𑀺𑀢𑀪𑀸𑀯𑀁 𑀉𑀮𑀢𑀻𑀢𑀺 𑀧𑀁𑀲𑀼𑀓𑀽𑀮𑀁, 𑀓𑀼𑀘𑁆𑀙𑀺𑀢𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀮𑀤𑁆𑀥𑀦𑀺𑀩𑁆𑀩𑀘𑀦𑀲𑁆𑀲 𑀧𑀁𑀲𑀼𑀓𑀽𑀮𑀲𑁆𑀲 𑀥𑀸𑀭𑀡𑀁 𑀧𑀁𑀲𑀼𑀓𑀽𑀮𑀁, 𑀧𑀁𑀲𑀼𑀓𑀽𑀮𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁄, 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀅𑀗𑁆𑀕𑀁 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁. 𑀲𑀗𑁆𑀖𑀸𑀝𑀺𑀉𑀢𑁆𑀢𑀭𑀸𑀲𑀗𑁆𑀕𑀅𑀦𑁆𑀢𑀭𑀯𑀸𑀲𑀓𑀲𑀗𑁆𑀔𑀸𑀢𑀁 𑀢𑀺𑀘𑀻𑀯𑀭𑀁 𑀲𑀻𑀮𑀫𑀲𑁆𑀲𑀸𑀢𑀺 𑀢𑁂𑀘𑀻𑀯𑀭𑀺𑀓𑁄, 𑀢𑁂𑀘𑀻𑀯𑀭𑀺𑀓𑀲𑁆𑀲 𑀅𑀗𑁆𑀕𑀁 𑀢𑁂𑀘𑀻𑀯𑀭𑀺𑀓𑀗𑁆𑀕𑀁. 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀦𑁆𑀢𑀺 𑀤𑀸𑀦𑀁 𑀯𑀼𑀘𑁆𑀘𑀢𑀺 𑀅𑀯𑀔𑀡𑁆𑀟𑀦𑀁, 𑀅𑀧𑁂𑀢𑀁 𑀤𑀸𑀦𑀢𑁄 𑀅𑀧𑀤𑀸𑀦𑀁, 𑀅𑀦𑀯𑀔𑀡𑁆𑀟𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀳 𑀅𑀧𑀤𑀸𑀦𑁂𑀦 𑀲𑀧𑀤𑀸𑀦𑀁, 𑀅𑀯𑀔𑀡𑁆𑀟𑀦𑀯𑀺𑀭𑀳𑀺𑀢𑀁, 𑀅𑀦𑀼𑀖𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀧𑀤𑀸𑀦𑀁 𑀘𑀭𑀺𑀢𑀼𑀁 𑀇𑀤𑀫𑀲𑁆𑀲 𑀲𑀻𑀮𑀦𑁆𑀢𑀺 𑀲𑀧𑀤𑀸𑀦𑀘𑀸𑀭𑀻, 𑀲𑀧𑀤𑀸𑀦𑀘𑀸𑀭𑀻𑀬𑁂𑀯 𑀲𑀧𑀤𑀸𑀦𑀘𑀸𑀭𑀺𑀓𑁄, 𑀢𑀲𑁆𑀲 𑀅𑀗𑁆𑀕𑀁 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁. 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀦𑁆𑀢𑀺 𑀔𑀮𑀽𑀢𑀺 𑀧𑀝𑀺𑀲𑁂𑀥𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀯𑀸𑀭𑀺𑀢𑁂𑀦 𑀲𑀢𑀸 𑀧𑀘𑁆𑀙𑀸 𑀮𑀤𑁆𑀥𑀁 𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀦𑀸𑀫, 𑀢𑀲𑁆𑀲 𑀧𑀘𑁆𑀙𑀸𑀪𑀢𑁆𑀢𑀲𑁆𑀲 𑀪𑁄𑀚𑀦𑀁 𑀧𑀘𑁆𑀙𑀸𑀪𑀢𑁆𑀢𑀪𑁄𑀚𑀦𑀁, 𑀢𑀲𑁆𑀫𑀺𑀁 𑀧𑀘𑁆𑀙𑀸𑀪𑀢𑁆𑀢𑀪𑁄𑀚𑀦𑁂 𑀧𑀘𑁆𑀙𑀸𑀪𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀘𑁆𑀙𑀸𑀪𑀢𑁆𑀢𑀺𑀓𑁄, 𑀦 𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄, 𑀲𑀫𑀸𑀤𑀸𑀦𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺𑀭𑀺𑀢𑁆𑀢𑀪𑁄𑀚𑀦𑀲𑁆𑀲𑁂𑀢𑀁 𑀦𑀸𑀫𑀁, 𑀢𑀲𑁆𑀲 𑀅𑀗𑁆𑀕𑀁 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁. 𑀦𑁂𑀲𑀚𑁆𑀚𑀺𑀓𑀗𑁆𑀕𑀦𑁆𑀢𑀺 𑀲𑀬𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀚𑁆𑀚𑀸𑀬 𑀯𑀺𑀳𑀭𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀦𑁂𑀲𑀚𑁆𑀚𑀺𑀓𑁄, 𑀢𑀲𑁆𑀲 𑀅𑀗𑁆𑀕𑀁 𑀦𑁂𑀲𑀚𑁆𑀚𑀺𑀓𑀗𑁆𑀕𑀁. 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀦𑁆𑀢𑀺 𑀬𑀤𑁂𑀯 𑀲𑀦𑁆𑀣𑀢𑀁 𑀬𑀣𑀸𑀲𑀦𑁆𑀣𑀢𑀁, ‘‘𑀇𑀤𑀁 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀯𑀁 𑀧𑀞𑀫𑀁 𑀉𑀤𑁆𑀤𑀺𑀝𑁆𑀞𑀲𑁂𑀦𑀸𑀲𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀺𑀁 𑀬𑀣𑀸𑀲𑀦𑁆𑀣𑀢𑁂 𑀯𑀺𑀳𑀭𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀬𑀣𑀸𑀲𑀦𑁆𑀣𑀢𑀺𑀓𑁄, 𑀢𑀲𑁆𑀲 𑀅𑀗𑁆𑀕𑀁 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁. 𑀲𑀩𑁆𑀩𑀸𑀦𑁂𑀯 𑀧𑀦𑁂𑀢𑀸𑀦𑀺 𑀢𑁂𑀦 𑀢𑁂𑀦 𑀲𑀫𑀸𑀤𑀸𑀦𑁂𑀦 𑀥𑀼𑀢𑀓𑀺𑀮𑁂𑀲𑀢𑁆𑀢𑀸 𑀥𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀦𑀺, 𑀓𑀺𑀮𑁂𑀲𑀥𑀼𑀦𑀦𑀢𑁄 𑀯𑀸 𑀥𑀼𑀢𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀜𑀸𑀡𑀁 𑀅𑀗𑁆𑀕𑀁 𑀏𑀢𑁂𑀲𑀦𑁆𑀢𑀺 𑀥𑀼𑀢𑀗𑁆𑀕𑀸𑀦𑀺. 𑀅𑀣 𑀯𑀸 𑀥𑀼𑀢𑀸𑀦𑀺 𑀘 𑀢𑀸𑀦𑀺 𑀧𑀝𑀺𑀧𑀓𑁆𑀔𑀸𑀦𑀁 𑀥𑀼𑀦𑀦𑀢𑁄 𑀅𑀗𑁆𑀕𑀸𑀦𑀺 𑀘 𑀧𑀝𑀺𑀧𑀢𑁆𑀢𑀺𑀬𑀸𑀢𑀺𑀧𑀺 𑀥𑀼𑀢𑀗𑁆𑀕𑀸𑀦𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀲𑀫𑀸𑀤𑀸𑀦𑀘𑁂𑀢𑀦𑀸𑀮𑀓𑁆𑀔𑀡𑀸𑀦𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑁄 𑀲𑀫𑀸𑀤𑀺𑀬𑀢𑀺, 𑀲𑁄 𑀧𑀼𑀕𑁆𑀕𑀮𑁄. 𑀬𑁂𑀦 𑀲𑀫𑀸𑀤𑀺𑀬𑀢𑀺, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀏𑀢𑁂 𑀥𑀫𑁆𑀫𑀸. 𑀬𑀸 𑀲𑀫𑀸𑀤𑀸𑀦𑀘𑁂𑀢𑀦𑀸, 𑀢𑀁 𑀥𑀼𑀢𑀗𑁆𑀕𑀁. 𑀬𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀁 𑀯𑀢𑁆𑀣𑀼’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁩).

𑀲𑀩𑁆𑀩𑀸𑀦𑁂𑀯 𑀘 𑀮𑁄𑀮𑀼𑀧𑁆𑀧𑀯𑀺𑀤𑁆𑀥𑀁𑀲𑀦𑀭𑀲𑀸𑀦𑀺, 𑀦𑀺𑀮𑁆𑀮𑁄𑀮𑀼𑀧𑁆𑀧𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺, 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀅𑀭𑀺𑀬𑀥𑀫𑁆𑀫𑀧𑀤𑀝𑁆𑀞𑀸𑀦𑀸𑀦𑀺. 𑀏𑀯𑀫𑁂𑀢𑁆𑀣 𑀮𑀓𑁆𑀔𑀡𑀸𑀤𑀻𑀳𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀻𑀭𑀺𑀬𑀲𑀫𑀸𑀤𑀸𑀦𑀫𑁆𑀧𑀻𑀢𑀺 𑀯𑀻𑀭𑀺𑀬𑀕𑁆𑀕𑀳𑀡𑀫𑁆𑀧𑀺. 𑀓𑀸𑀫𑀦𑁆𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀘𑁄 𑀘 𑀦𑁆𑀳𑀸𑀭𑀼 𑀘𑀸𑀢𑀺 𑀙𑀯𑀺 𑀘 𑀦𑁆𑀳𑀸𑀭𑀼𑀯𑀮𑁆𑀮𑀺𑀬𑁄 𑀘. 𑀅𑀝𑁆𑀞𑀺 𑀘𑀸𑀢𑀺 𑀲𑀩𑁆𑀩𑀸 𑀅𑀝𑁆𑀞𑀺𑀬𑁄 𑀘. 𑀅𑀯𑀲𑀺𑀲𑁆𑀲𑀢𑀽𑀢𑀺 𑀢𑀺𑀝𑁆𑀞𑀢𑀼. 𑀉𑀧𑀲𑀼𑀲𑁆𑀲𑀢𑀼 𑀫𑀁𑀲𑀮𑁄𑀳𑀺𑀢𑀦𑁆𑀢𑀺 𑀲𑀩𑁆𑀩𑀁 𑀫𑀁𑀲𑀜𑁆𑀘 𑀮𑁄𑀳𑀺𑀢𑀜𑁆𑀘 𑀲𑀼𑀓𑁆𑀔𑀢𑀼. ‘‘𑀢𑀘𑁄’’𑀢𑀺 𑀏𑀓𑀁 𑀅𑀗𑁆𑀕𑀁, ‘‘𑀦𑁆𑀳𑀸𑀭𑀽’’𑀢𑀺 𑀏𑀓𑀁, ‘‘𑀅𑀝𑁆𑀞𑀻’’𑀢𑀺 𑀏𑀓𑀁, ‘‘𑀉𑀧𑀲𑀼𑀲𑁆𑀲𑀢𑀼 𑀫𑀁𑀲𑀮𑁄𑀳𑀺𑀢’’𑀦𑁆𑀢𑀺 𑀏𑀓𑀁 𑀅𑀗𑁆𑀕𑀁. 𑀬𑀁 𑀢𑀦𑁆𑀢𑀺 𑀉𑀧𑀭𑀺 𑀯𑀢𑁆𑀢𑀩𑁆𑀩𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀲𑀣𑀸𑀫𑁂𑀦𑀸𑀢𑀺 𑀧𑀼𑀭𑀺𑀲𑀲𑁆𑀲 𑀓𑀸𑀬𑀺𑀓𑁂𑀦 𑀩𑀮𑁂𑀦, 𑀩𑀮𑁂𑀦𑀸𑀢𑀺 𑀜𑀸𑀡𑀩𑀮𑁂𑀦. 𑀯𑀻𑀭𑀺𑀬𑁂𑀦𑀸𑀢𑀺 𑀘𑁂𑀢𑀲𑀺𑀓𑀜𑀸𑀡𑀯𑀻𑀭𑀺𑀬𑀢𑁂𑀚𑁂𑀦. 𑀧𑀭𑀓𑁆𑀓𑀫𑁂𑀦𑀸𑀢𑀺 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑁂𑀦 𑀉𑀲𑁆𑀲𑀸𑀳𑀧𑁆𑀧𑀢𑁆𑀢𑀯𑀻𑀭𑀺𑀬𑁂𑀦. 𑀧𑀢𑁆𑀢𑀩𑁆𑀩𑀦𑁆𑀢𑀺 𑀬𑀁 𑀢𑀁 𑀧𑀸𑀧𑀼𑀡𑀺𑀢𑀩𑁆𑀩𑀁. 𑀦 𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀢𑀁 𑀧𑀢𑁆𑀢𑀩𑁆𑀩𑀁 𑀅𑀧𑁆𑀧𑀢𑁆𑀯𑀸. 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀯𑀻𑀭𑀺𑀬𑀲𑁆𑀲 𑀲𑀺𑀣𑀺𑀮𑀢𑁆𑀢𑀁 𑀑𑀲𑀻𑀤𑀦𑀁 𑀦 𑀪𑀯𑀺𑀲𑁆𑀲𑀢𑀺. ‘‘𑀧𑀝𑁆𑀞𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀘𑀺𑀢𑁆𑀢𑀁 𑀉𑀲𑁆𑀲𑀸𑀳𑀁 𑀕𑀡𑁆𑀳𑀸𑀧𑁂𑀢𑀺. 𑀧𑀤𑀳𑀢𑀻𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺.

𑀦𑀸𑀲𑀺𑀲𑁆𑀲𑀦𑁆𑀢𑀺 𑀦 𑀔𑀸𑀤𑀺𑀲𑁆𑀲𑀸𑀫𑀺 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀺. 𑀦 𑀧𑀺𑀯𑀺𑀲𑁆𑀲𑀸𑀫𑀻𑀢𑀺 𑀬𑀸𑀕𑀼𑀧𑀸𑀦𑀸𑀤𑀻𑀦𑀺 𑀦 𑀧𑀺𑀯𑀺𑀲𑁆𑀲𑀸𑀫𑀺. 𑀯𑀺𑀳𑀸𑀭𑀢𑁄 𑀦 𑀦𑀺𑀓𑁆𑀔𑀫𑁂𑀢𑀺 𑀲𑁂𑀦𑀸𑀲𑀦𑀢𑁄 𑀩𑀳𑀺 𑀦 𑀦𑀺𑀓𑁆𑀔𑀫𑁂𑀬𑁆𑀬𑀁. 𑀦𑀧𑀺 𑀧𑀲𑁆𑀲𑀁 𑀦𑀺𑀧𑀸𑀢𑁂𑀲𑁆𑀲𑀦𑁆𑀢𑀺 𑀧𑀲𑁆𑀲𑀁 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀪𑀽𑀫𑀺𑀬𑀁 𑀯𑀸 𑀓𑀝𑀲𑀦𑁆𑀣𑀭𑀓𑁂 𑀯𑀸 𑀧𑀸𑀢𑀦𑀁 𑀞𑀧𑀦𑀁 𑀦 𑀓𑀭𑀺𑀲𑁆𑀲𑀸𑀫𑀺. 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑁂 𑀓𑀡𑁆𑀟𑁂 𑀅𑀦𑀼𑀤𑁆𑀥𑀝𑁂, 𑀅𑀯𑀺𑀕𑀢𑁂𑀢𑀺 𑀅𑀢𑁆𑀣𑁄.

𑀇𑀫𑀁 𑀧𑀮𑁆𑀮𑀗𑁆𑀓𑀦𑁆𑀢𑀺 𑀲𑀫𑀦𑁆𑀢𑀢𑁄 𑀆𑀪𑀼𑀚𑀺𑀢𑀁 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀦 𑀯𑀺𑀚𑀳𑀺𑀲𑁆𑀲𑀸𑀫𑀺. 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬𑀸𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀕𑀳𑀡𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀆𑀲𑀯𑁂𑀳𑀻𑀢𑀺 𑀓𑀸𑀫𑀸𑀲𑀯𑀸𑀤𑀻𑀳𑀺 𑀘𑀢𑀽𑀳𑀺 𑀆𑀲𑀯𑁂𑀳𑀺. 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀦 𑀫𑀼𑀘𑁆𑀘𑀺𑀲𑁆𑀲𑀢𑀺. 𑀦 𑀢𑀸𑀯𑀸𑀳𑀁 𑀇𑀫𑀫𑁆𑀳𑀸 𑀆𑀲𑀦𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀭𑀼𑀓𑁆𑀔𑀫𑀽𑀮𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻𑀢𑀺 𑀑𑀓𑀸𑀲𑀯𑀲𑁂𑀦 𑀯𑀼𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀭𑀺𑀬𑀥𑀫𑁆𑀫𑀁 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀕𑀺𑀫𑁆𑀳𑁂𑀢𑀺 𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀸. 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂𑀢𑀺𑀆𑀤𑀬𑁄 𑀯𑀬𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀆𑀲𑀦𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀦𑀺𑀲𑀺𑀦𑁆𑀦𑀸𑀲𑀦𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀺. 𑀅𑀟𑁆𑀠𑀬𑁄𑀕𑀸𑀢𑀺 𑀦𑀺𑀓𑀼𑀡𑁆𑀟𑀕𑁂𑀳𑀸. 𑀧𑀸𑀲𑀸𑀤𑀸𑀢𑀺 𑀤𑀻𑀖𑀧𑀸𑀲𑀸𑀤𑀸. 𑀳𑀫𑁆𑀫𑀺𑀬𑀸𑀢𑀺 𑀫𑀼𑀡𑁆𑀟𑀘𑁆𑀙𑀤𑀦𑀕𑁂𑀳𑀸. 𑀕𑀼𑀳𑀸𑀬𑀸𑀢𑀺 𑀧𑀁𑀲𑀼𑀕𑀼𑀳𑀸𑀬. 𑀮𑁂𑀡𑀸𑀢𑀺 𑀫𑀭𑀺𑀬𑀸𑀤𑀙𑀺𑀦𑁆𑀦𑀘𑁆𑀙𑀺𑀤𑁆𑀤𑀸 𑀧𑀩𑁆𑀩𑀢𑀮𑁂𑀡𑀸. 𑀓𑀼𑀝𑀺𑀬𑀸𑀢𑀺 𑀉𑀮𑁆𑀮𑀺𑀢𑁆𑀢𑀸𑀤𑀺𑀓𑀼𑀝𑀺𑀬𑀸. 𑀓𑀽𑀝𑀸𑀕𑀸𑀭𑀸𑀢𑀺 𑀓𑀡𑁆𑀡𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀕𑁂𑀳𑀢𑁄. 𑀅𑀝𑁆𑀝𑀸𑀢𑀺 𑀤𑁆𑀯𑀸𑀭𑀝𑁆𑀝𑀸𑀮𑀓𑀸. 𑀫𑀸𑀴𑀸𑀢𑀺 𑀯𑀝𑁆𑀝𑀕𑁂𑀳𑀸. 𑀉𑀤𑁆𑀤𑀡𑁆𑀟𑁄 𑀦𑀸𑀫 𑀏𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. ‘‘𑀢𑀺𑀙𑀤𑀦𑀕𑁂𑀳𑁄’’𑀢𑀺𑀧𑀺 𑀏𑀓𑁂. 𑀉𑀧𑀝𑁆𑀞𑀸𑀦𑀲𑀸𑀮𑀸𑀢𑀺 𑀲𑀦𑁆𑀦𑀺𑀧𑀸𑀢𑀲𑀸𑀮𑀸 𑀪𑁄𑀚𑀦𑀲𑀸𑀮𑀸 𑀯𑀸. 𑀫𑀡𑁆𑀟𑀧𑀸𑀤𑀬𑁄 𑀧𑀸𑀓𑀝𑀸𑀬𑁂𑀯. 𑀅𑀭𑀺𑀬𑀥𑀫𑁆𑀫𑀦𑁆𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀁, 𑀅𑀭𑀺𑀬𑀸𑀦𑀁 𑀯𑀸 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀥𑀫𑁆𑀫𑀁. 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀫𑀫 𑀘𑀺𑀢𑁆𑀢𑀲𑀫𑀻𑀧𑀁 𑀆𑀦𑀬𑀺𑀲𑁆𑀲𑀸𑀫𑀺 𑀲𑀻𑀮𑁂𑀦. 𑀲𑀫𑀸𑀳𑀭𑀺𑀲𑁆𑀲𑀸𑀫𑀻𑀢𑀺 𑀯𑀺𑀲𑁂𑀲𑁂𑀦 𑀆𑀦𑀬𑀺𑀲𑁆𑀲𑀸𑀫𑀺 𑀲𑀫𑀸𑀥𑀺𑀦𑀸. 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀮𑀸𑀪𑀯𑀲𑁂𑀦 𑀕𑀫𑀺𑀲𑁆𑀲𑀸𑀫𑀺 𑀢𑀤𑀗𑁆𑀕𑁂𑀦. 𑀨𑀲𑁆𑀲𑀬𑀺𑀲𑁆𑀲𑀸𑀫𑀻𑀢𑀺 𑀨𑀼𑀲𑀺𑀲𑁆𑀲𑀸𑀫𑀺 𑀫𑀕𑁆𑀕𑁂𑀦. 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑀧𑀘𑁆𑀘𑀓𑁆𑀔𑀁 𑀓𑀭𑀺𑀲𑁆𑀲𑀸𑀫𑀺 𑀨𑀮𑁂𑀦. 𑀅𑀣 𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀆𑀳𑀭𑀺𑀲𑁆𑀲𑀸𑀫𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀸𑀳𑀭𑀺𑀲𑁆𑀲𑀸𑀫𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀺, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀨𑀲𑁆𑀲𑀬𑀺𑀲𑁆𑀲𑀸𑀫𑀺, 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀺. 𑀤𑁆𑀯𑀻𑀲𑀼𑀧𑀺 𑀦𑀬𑁂𑀲𑀼 𑀨𑀲𑁆𑀲𑀬𑀺𑀲𑁆𑀲𑀸𑀫𑀻𑀢𑀺 𑀦𑀸𑀫𑀓𑀸𑀬𑁂𑀦 𑀦𑀺𑀩𑁆𑀩𑀸𑀦𑀁 𑀨𑀼𑀲𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀅𑀧𑀼𑀝𑁆𑀞𑁄𑀢𑀺 𑀫𑀽𑀮𑀧𑀤𑀁, 𑀢𑀲𑁆𑀲 𑀅𑀧𑀼𑀘𑁆𑀙𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀼𑀘𑁆𑀙𑀺𑀢𑁄𑀢𑀺 𑀅𑀚𑀸𑀦𑀸𑀧𑀺𑀢𑁄. 𑀅𑀬𑀸𑀘𑀺𑀢𑁄𑀢𑀺 𑀅𑀦𑀸𑀬𑀸𑀘𑀺𑀢𑁄. 𑀅𑀦𑀚𑁆𑀛𑁂𑀲𑀺𑀢𑁄𑀢𑀺 𑀅𑀦𑀸𑀡𑀸𑀧𑀺𑀢𑁄, ‘‘𑀦 𑀇𑀘𑁆𑀙𑀺𑀢𑁄’’𑀢𑀺 𑀏𑀓𑁂. 𑀅𑀧𑀲𑀸𑀤𑀺𑀢𑁄𑀢𑀺 𑀦 𑀧𑀲𑀸𑀤𑀸𑀧𑀺𑀢𑁄. 𑀧𑀸𑀯𑀤𑀢𑀻𑀢𑀺 𑀓𑀣𑀬𑀢𑀺. 𑀅𑀳𑀫𑀲𑁆𑀫𑀻𑀢𑀺 𑀅𑀳𑀁 𑀅𑀲𑁆𑀫𑀺 𑀪𑀯𑀸𑀫𑀺. 𑀚𑀸𑀢𑀺𑀬𑀸 𑀯𑀸𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀸 𑀯𑀸. 𑀕𑁄𑀢𑁆𑀢𑁂𑀦 𑀯𑀸𑀢𑀺 𑀕𑁄𑀢𑀫𑀸𑀤𑀺𑀕𑁄𑀢𑁆𑀢𑁂𑀦 𑀯𑀸. 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸𑀢𑀺 𑀓𑀼𑀮𑀧𑀼𑀢𑁆𑀢𑀪𑀸𑀯𑁂𑀦 𑀯𑀸. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸𑀢𑀺 𑀲𑀭𑀻𑀭𑀲𑀼𑀦𑁆𑀤𑀭𑀢𑀸𑀬 𑀯𑀸. 𑀥𑀦𑁂𑀦 𑀯𑀸𑀢𑀺 𑀥𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑀸. 𑀅𑀚𑁆𑀛𑁂𑀦𑁂𑀦 𑀯𑀸𑀢𑀺 𑀅𑀚𑁆𑀛𑀸𑀬𑀓𑀭𑀡𑁂𑀦 𑀯𑀸. 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸𑀢𑀺 𑀓𑀫𑁆𑀫𑀫𑁂𑀯 𑀓𑀫𑁆𑀫𑀸𑀬𑀢𑀦𑀁, 𑀢𑁂𑀦 𑀓𑀫𑁆𑀫𑀸𑀬𑀢𑀦𑁂𑀦, 𑀓𑀲𑀺𑀕𑁄𑀭𑀓𑁆𑀔𑀓𑀫𑁆𑀫𑀸𑀤𑀺𑀦𑀸 𑀯𑀸. 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸𑀢𑀺 𑀥𑀦𑀼𑀲𑀺𑀧𑁆𑀧𑀸𑀤𑀺𑀦𑀸 𑀯𑀸. 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸𑀢𑀺 𑀅𑀝𑁆𑀞𑀸𑀭𑀲𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸. 𑀲𑀼𑀢𑁂𑀦 𑀯𑀸𑀢𑀺 𑀩𑀳𑀼𑀲𑁆𑀲𑀼𑀢𑀕𑀼𑀡𑁂𑀦 𑀯𑀸. 𑀧𑀝𑀺𑀪𑀸𑀦𑁂𑀦 𑀯𑀸𑀢𑀺 𑀓𑀸𑀭𑀡𑀸𑀓𑀸𑀭𑀡𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀜𑀸𑀡𑁂𑀦 𑀯𑀸. 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑀚𑀸𑀢𑀺𑀆𑀤𑀻𑀦𑀁 𑀏𑀓𑁂𑀓𑁂𑀦 𑀯𑀢𑁆𑀣𑀼𑀦𑀸 𑀯𑀸.

𑀉𑀘𑁆𑀘𑀸 𑀓𑀼𑀮𑀸𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑀸, 𑀏𑀢𑁂𑀦 𑀚𑀸𑀢𑀺𑀕𑁄𑀢𑁆𑀢𑀫𑀳𑀢𑁆𑀢𑀁 𑀤𑀻𑀧𑁂𑀢𑀺. 𑀫𑀳𑀸𑀪𑁄𑀕𑀓𑀼𑀮𑀸𑀢𑀺 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀸, 𑀏𑀢𑁂𑀦 𑀅𑀟𑁆𑀠𑀫𑀳𑀢𑁆𑀢𑀁 𑀤𑀻𑀧𑁂𑀢𑀺. 𑀉𑀴𑀸𑀭𑀪𑁄𑀕𑀓𑀼𑀮𑀸𑀢𑀺 𑀅𑀯𑀲𑁂𑀲𑀯𑁂𑀲𑁆𑀲𑀸𑀤𑀺𑀓𑀼𑀮𑀸, 𑀏𑀢𑁂𑀦 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸𑀤𑀺𑀁 𑀤𑀻𑀧𑁂𑀢𑀺. 𑀘𑀡𑁆𑀟𑀸𑀮𑀸𑀧𑀺 𑀳𑀺 𑀉𑀴𑀸𑀭𑀪𑁄𑀕𑀸 𑀳𑁄𑀦𑁆𑀢𑀺. 𑀜𑀸𑀢𑁄𑀢𑀺 𑀧𑀸𑀓𑀝𑁄. 𑀬𑀲𑁆𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄. 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀲𑀼𑀢𑁆𑀢𑀦𑁆𑀢𑁂 𑀦𑀺𑀬𑀼𑀢𑁆𑀢𑁄. 𑀯𑀺𑀦𑀬𑀥𑀭𑁄𑀢𑀺 𑀯𑀺𑀦𑀬𑀧𑀺𑀝𑀓𑀥𑀭𑁄. 𑀥𑀫𑁆𑀫𑀓𑀣𑀺𑀓𑁄𑀢𑀺 𑀆𑀪𑀺𑀥𑀫𑁆𑀫𑀺𑀓𑁄. 𑀆𑀭𑀜𑁆𑀜𑀺𑀓𑁄𑀢𑀺𑀆𑀤𑀬𑁄 𑀥𑀼𑀢𑀗𑁆𑀕𑀧𑀼𑀩𑁆𑀩𑀗𑁆𑀕𑀫𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺𑀆𑀤𑀬𑁄 𑀭𑀽𑀧𑀸𑀭𑀽𑀧𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀯𑁂𑀥𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀸. 𑀧𑀸𑀯𑀤𑀢𑀻𑀢𑀺 𑀫𑀽𑀮𑀧𑀤𑀁. 𑀓𑀣𑁂𑀢𑀻𑀢𑀺 ‘‘𑀧𑀺𑀝𑀓𑀸𑀘𑀭𑀺𑀬𑁄𑀲𑁆𑀫𑀻’’𑀢𑀺 𑀓𑀣𑀬𑀢𑀺. 𑀪𑀡𑀢𑀻𑀢𑀺 ‘‘𑀥𑀼𑀢𑀗𑁆𑀕𑀺𑀓𑁄𑀫𑁆𑀳𑀻’’𑀢𑀺 𑀧𑀸𑀓𑀝𑀁 𑀓𑀭𑁄𑀢𑀺. 𑀤𑀻𑀧𑀬𑀢𑀻𑀢𑀺 ‘‘𑀭𑀽𑀧𑀚𑁆𑀛𑀸𑀦𑀁 𑀮𑀸𑀪𑀻𑀫𑁆𑀳𑀻’’𑀢𑀺 𑀧𑀭𑀺𑀤𑀻𑀧𑀬𑀢𑀺. 𑀯𑁄𑀳𑀭𑀢𑀻𑀢𑀺 ‘‘𑀅𑀭𑀽𑀧𑀚𑁆𑀛𑀸𑀦𑀁 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀸𑀓𑁆𑀬𑀪𑁂𑀤𑀁 𑀓𑀭𑁄𑀢𑀺.

𑀔𑀦𑁆𑀥𑀓𑀼𑀲𑀮𑀸𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀲𑀼 𑀙𑁂𑀓𑀸, 𑀜𑀸𑀢𑀢𑀻𑀭𑀡𑀧𑀳𑀸𑀦𑀯𑀲𑁂𑀦 𑀓𑀼𑀲𑀮𑀸𑀢𑀺 𑀅𑀢𑁆𑀣𑁄. 𑀥𑀸𑀢𑀼𑀆𑀬𑀢𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀩𑁆𑀩𑀸𑀦𑀓𑀼𑀲𑀮𑀸𑀢𑀺 𑀦𑀺𑀩𑁆𑀩𑀸𑀦𑁂 𑀙𑁂𑀓𑀸. 𑀅𑀦𑀭𑀺𑀬𑀸𑀦𑀦𑁆𑀢𑀺 𑀦 𑀅𑀭𑀺𑀬𑀸𑀦𑀁. 𑀏𑀲𑁄 𑀥𑀫𑁆𑀫𑁄𑀢𑀺 𑀏𑀲𑁄 𑀲𑀪𑀸𑀯𑁄. 𑀩𑀸𑀮𑀸𑀦𑀦𑁆𑀢𑀺 𑀅𑀧𑀡𑁆𑀟𑀺𑀢𑀸𑀦𑀁. 𑀅𑀲𑀧𑁆𑀧𑀼𑀭𑀺𑀲𑀸𑀦𑀦𑁆𑀢𑀺 𑀦 𑀲𑁄𑀪𑀦𑀧𑀼𑀭𑀺𑀲𑀸𑀦𑀁. 𑀅𑀢𑁆𑀢𑀸𑀢𑀺 𑀅𑀢𑁆𑀢𑀸𑀦𑀁.

𑁧𑁮. 𑀲𑀦𑁆𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀽𑀧𑀲𑀫𑁂𑀦 𑀲𑀦𑁆𑀢𑁄. 𑀢𑀣𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄. 𑀇𑀢𑀺’𑀳𑀦𑁆𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄𑀢𑀺 ‘‘𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄, 𑀲𑀻𑀮𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀯𑀸𑀘𑀁 𑀅𑀪𑀸𑀲𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀫𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺 𑀢𑀲𑁆𑀲 𑀢𑀁 𑀅𑀓𑀢𑁆𑀣𑀦𑀁 ‘‘𑀅𑀭𑀺𑀬𑀥𑀫𑁆𑀫𑁄 𑀏𑀲𑁄’’𑀢𑀺 𑀩𑀼𑀤𑁆𑀥𑀸𑀤𑀬𑁄 𑀔𑀦𑁆𑀥𑀸𑀤𑀺𑀓𑀼𑀲𑀮𑀸 𑀯𑀤𑀦𑁆𑀢𑀺. 𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺 𑀬𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀭𑀸𑀕𑀸𑀤𑀬𑁄 𑀲𑀢𑁆𑀢𑀼𑀲𑁆𑀲𑀤𑀸 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂 𑀦𑀢𑁆𑀣𑀺. 𑀢𑀲𑁆𑀲 𑀢𑀁 𑀅𑀓𑀢𑁆𑀣𑀦𑀁 ‘‘𑀅𑀭𑀺𑀬𑀥𑀫𑁆𑀫𑁄 𑀏𑀲𑁄’’𑀢𑀺 𑀏𑀯𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀦𑁆𑀢𑁄𑀢𑀺 𑀫𑀽𑀮𑀧𑀤𑀁. 𑀭𑀸𑀕𑀲𑁆𑀲 𑀲𑀫𑀺𑀢𑀢𑁆𑀢𑀸𑀢𑀺 𑀭𑀜𑁆𑀚𑀦𑀮𑀓𑁆𑀔𑀡𑀲𑁆𑀲 𑀭𑀸𑀕𑀲𑁆𑀲 𑀲𑀫𑀺𑀢𑀪𑀸𑀯𑁂𑀦. 𑀤𑁄𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀚𑁆𑀛𑀸𑀢𑀢𑁆𑀢𑀸𑀢𑀺 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁 𑀛𑀸𑀧𑀺𑀢𑀢𑁆𑀢𑀸. 𑀦𑀺𑀩𑁆𑀩𑀼𑀢𑀢𑁆𑀢𑀸𑀢𑀺 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁 𑀦𑀺𑀩𑁆𑀩𑀸𑀧𑀺𑀢𑀪𑀸𑀯𑁂𑀦. 𑀯𑀺𑀕𑀢𑀢𑁆𑀢𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀯𑀺𑀕𑀢𑀪𑀸𑀯𑁂𑀦 𑀤𑀽𑀭𑀪𑀸𑀯𑁂𑀦. 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀪𑀸𑀯𑁂𑀦. 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀽𑀢𑀺 𑀉𑀧𑀭𑀺 𑀯𑀢𑁆𑀢𑀩𑁆𑀩𑀸𑀦𑀁 𑀲𑀢𑁆𑀢𑀥𑀫𑁆𑀫𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀪𑀸𑀯𑁂𑀦 𑀪𑀺𑀓𑁆𑀔𑀼. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄𑀢𑀺 𑀇𑀫𑁂 𑀢𑀬𑁄 𑀓𑀺𑀮𑁂𑀲𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀪𑀺𑀦𑁆𑀦𑀸, 𑀭𑀸𑀕𑁄 𑀤𑁄𑀲𑁄𑀢𑀺 𑀇𑀫𑁂 𑀤𑁆𑀯𑁂 𑀓𑀺𑀮𑁂𑀲𑀸 𑀑𑀴𑀸𑀭𑀺𑀓𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀪𑀺𑀦𑁆𑀦𑀸, 𑀢𑁂 𑀏𑀯 𑀅𑀡𑀼𑀲𑀳𑀕𑀢𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀪𑀺𑀦𑁆𑀦𑀸, 𑀫𑁄𑀳𑁄 𑀫𑀸𑀦𑁄𑀢𑀺 𑀇𑀫𑁂 𑀤𑁆𑀯𑁂 𑀓𑀺𑀮𑁂𑀲𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀺𑀦𑁆𑀦𑀸. 𑀅𑀯𑀲𑁂𑀲𑁂 𑀓𑀺𑀮𑁂𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀦𑁆𑀦𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀆𑀳. 𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑀓𑀺𑀮𑁂𑀲𑀧𑀘𑁆𑀘𑀬𑀸. 𑀧𑁄𑀦𑁄𑀪𑀯𑀺𑀓𑀸𑀢𑀺 𑀧𑀼𑀦𑀩𑁆𑀪𑀯𑀤𑀸𑀬𑀺𑀓𑀸. 𑀲𑀤𑀭𑀸𑀢𑀺 𑀓𑀺𑀮𑁂𑀲𑀤𑀭𑀣𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀲𑀤𑀭𑀸. ‘‘𑀲𑀤𑁆𑀤𑀭𑀸’’𑀢𑀺𑀧𑀺 𑀧𑀸𑀞𑁄, 𑀲𑀳𑀤𑀭𑀣𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀯𑀺𑀧𑀸𑀓𑀸𑀢𑀺 𑀨𑀮𑀓𑀸𑀮𑁂 𑀤𑀼𑀓𑁆𑀔𑀤𑀸𑀬𑀺𑀓𑀸. 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸𑀢𑀺 𑀅𑀦𑀸𑀕𑀢𑁂 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀸.

𑀧𑀚𑁆𑀚𑁂𑀦 𑀓𑀢𑁂𑀦 𑀅𑀢𑁆𑀢𑀦𑀸𑀢𑀺 𑀕𑀸𑀣𑀸𑀬 𑀅𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀬𑁄 𑀅𑀢𑁆𑀢𑀦𑀸 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀁 𑀕𑀢𑁄, 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑀢𑁆𑀢𑀸 𑀏𑀯 𑀘 𑀯𑀺𑀢𑀺𑀡𑁆𑀡𑀓𑀗𑁆𑀔𑁄, 𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀳𑀸𑀦𑀺𑀯𑀼𑀤𑁆𑀥𑀺𑀉𑀘𑁆𑀙𑁂𑀤𑀲𑀲𑁆𑀲𑀢𑀅𑀧𑀼𑀜𑁆𑀜𑀧𑀼𑀜𑁆𑀜𑀧𑁆𑀧𑀪𑁂𑀤𑀁 𑀪𑀯𑀜𑁆𑀘 𑀯𑀺𑀪𑀯𑀜𑁆𑀘 𑀯𑀺𑀧𑁆𑀧𑀳𑀸𑀬 𑀫𑀕𑁆𑀕𑀯𑀸𑀲𑀁 𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄𑀢𑀺 𑀏𑀢𑁂𑀲𑀁 𑀣𑀼𑀢𑀺𑀯𑀘𑀦𑀸𑀦𑀁 𑀅𑀭𑀳𑁄 𑀲𑁄 𑀪𑀺𑀓𑁆𑀔𑀽𑀢𑀺.

𑀇𑀢𑀺𑀳𑀦𑁆𑀢𑀺, 𑀇𑀤𑀳𑀦𑁆𑀢𑀻𑀢𑀺 𑀤𑀼𑀯𑀺𑀥𑁄 𑀧𑀸𑀞𑁄. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺𑀆𑀤𑀬𑁄 𑀲𑀦𑁆𑀥𑀸𑀬 ‘‘𑀇𑀤𑀳’’𑀦𑁆𑀢𑀺 𑀧𑀸𑀞𑀁 𑀦 𑀭𑁄𑀘𑁂𑀦𑁆𑀢𑀺. 𑀢𑀢𑁆𑀣 𑀇𑀢𑀻𑀢𑀺 𑀬𑀁 𑀯𑀼𑀢𑁆𑀢𑀁. 𑀧𑀤𑀲𑀦𑁆𑀥𑀻𑀢𑀺 𑀧𑀤𑀸𑀦𑀁 𑀲𑀦𑁆𑀥𑀺 𑀧𑀤𑀲𑀦𑁆𑀥𑀺, 𑀧𑀤𑀖𑀝𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀤𑀲𑀁𑀲𑀕𑁆𑀕𑁄𑀢𑀺 𑀧𑀤𑀸𑀦𑀁 𑀏𑀓𑀻𑀪𑀸𑀯𑁄. 𑀧𑀤𑀧𑀸𑀭𑀺𑀧𑀽𑀭𑀻𑀢𑀺 𑀧𑀤𑀸𑀦𑀁 𑀧𑀭𑀺𑀧𑀽𑀭𑀡𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀏𑀓𑀻𑀪𑀸𑀯𑁄. 𑀅𑀓𑁆𑀔𑀭𑀲𑀫𑀯𑀸𑀬𑁄𑀢𑀺 𑀏𑀓𑀻𑀪𑀽𑀢𑁄𑀧𑀺 𑀅𑀧𑀭𑀺𑀧𑀼𑀡𑁆𑀡𑁄𑀧𑀺 𑀳𑁄𑀢𑀺, 𑀅𑀬𑀁 𑀦 𑀏𑀯𑀁. 𑀅𑀓𑁆𑀔𑀭𑀸𑀦𑀁 𑀲𑀫𑀯𑀸𑀬𑁄 𑀲𑀦𑁆𑀦𑀺𑀧𑀸𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀓𑁆𑀔𑀭𑀲𑀫𑀯𑀸𑀬𑁄’’𑀢𑀺 𑀆𑀳. 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀢𑀺 𑀩𑁆𑀬𑀜𑁆𑀚𑀦𑀲𑀫𑀼𑀘𑁆𑀘𑀬𑁄 𑀧𑀤𑀫𑀻𑀢𑀺 𑀯𑀼𑀢𑁆𑀢𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀅𑀢𑁆𑀣𑀩𑁆𑀬𑀢𑁆𑀢𑀺𑀓𑀸𑀭𑀡𑀸𑀦𑀁 𑀯𑀸 𑀫𑀥𑀼𑀭𑀪𑀸𑀯𑀢𑁆𑀢𑀸 𑀧𑀸𑀞𑀲𑁆𑀲 𑀫𑀼𑀤𑀼𑀪𑀸𑀯𑁄. 𑀧𑀤𑀸𑀦𑀼𑀧𑀼𑀩𑁆𑀩𑀢𑀸 𑀫𑁂𑀢𑀦𑁆𑀢𑀺 𑀧𑀤𑀸𑀦𑀁 𑀅𑀦𑀼𑀧𑀼𑀩𑁆𑀩𑀪𑀸𑀯𑁄 𑀧𑀤𑀸𑀦𑀼𑀧𑀼𑀩𑁆𑀩𑀢𑀸, 𑀧𑀤𑀧𑀝𑀺𑀧𑀸𑀝𑀺𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀫𑁂𑀢𑀦𑁆𑀢𑀺 𑀏𑀢𑀁. 𑀓𑀢𑀫𑀦𑁆𑀢𑀺 𑀘𑁂? 𑀇𑀢𑀻𑀢𑀺 𑀇𑀤𑀁. 𑀫𑁂𑀢𑀦𑁆𑀢𑀺 𑀏𑀢𑁆𑀣 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀓𑀢𑁆𑀣𑀻 𑀳𑁄𑀢𑀻𑀢𑀺 ‘‘𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀢𑁆𑀯𑀸 𑀓𑀣𑀦𑀲𑀻𑀮𑁄 𑀳𑁄𑀢𑀺. 𑀓𑀢𑁆𑀣𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀓𑀣𑀬𑀢𑀺. 𑀯𑀺𑀓𑀢𑁆𑀣𑀢𑀻𑀢𑀺 𑀯𑀺𑀯𑀺𑀥𑀸 𑀓𑀣𑀬𑀢𑀺. 𑀓𑀢𑁆𑀣𑀦𑀸𑀢𑀺 𑀓𑀣𑀦𑀸. 𑀆𑀭𑀢𑁄𑀢𑀺 𑀤𑀽𑀭𑀢𑁄 𑀭𑀢𑁄. 𑀯𑀺𑀭𑀢𑁄𑀢𑀺 𑀞𑀸𑀦𑀲𑀗𑁆𑀓𑀦𑁆𑀢𑀺𑀯𑀲𑁂𑀦 𑀯𑀺𑀕𑀢𑀪𑀸𑀯𑁂𑀦 𑀭𑀢𑁄. 𑀧𑀝𑀺𑀯𑀺𑀭𑀢𑁄𑀢𑀺 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀭𑀢𑁄. 𑀢𑀢𑁆𑀣 𑀧𑀺𑀲𑀸𑀘𑀁 𑀯𑀺𑀬 𑀤𑀺𑀲𑁆𑀯𑀸 𑀧𑀮𑀸𑀢𑁄 𑀆𑀭𑀢𑁄. 𑀳𑀢𑁆𑀣𑀺𑀫𑁆𑀳𑀺 𑀫𑀤𑁆𑀤𑀦𑁆𑀢𑁂 𑀯𑀺𑀬 𑀧𑀭𑀺𑀥𑀸𑀯𑀺𑀢𑁆𑀯𑀸 𑀕𑀢𑁄 𑀯𑀺𑀭𑀢𑁄. 𑀬𑁄𑀥𑀲𑀫𑁆𑀧𑀳𑀸𑀭𑀁 𑀯𑀺𑀬 𑀧𑁄𑀣𑁂𑀢𑁆𑀯𑀸 𑀫𑀤𑁆𑀤𑁂𑀢𑁆𑀯𑀸 𑀕𑀢𑁄 𑀧𑀝𑀺𑀯𑀺𑀭𑀢𑁄.

𑀔𑀻𑀡𑀸𑀲𑀯𑀲𑁆𑀲𑀸𑀢𑀺 𑀔𑀻𑀡𑀓𑀺𑀮𑁂𑀲𑀸𑀲𑀯𑀲𑁆𑀲. 𑀓𑀫𑁆𑀫𑀼𑀲𑁆𑀲𑀤𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀸𑀦𑀁 𑀓𑀫𑁆𑀫𑀸𑀦𑀁 𑀉𑀲𑁆𑀲𑀤𑁄 𑀉𑀲𑁆𑀲𑀦𑁆𑀦𑀢𑀸. 𑀬𑀲𑁆𑀲𑀺𑀫𑁂𑀢𑀺 𑀬𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀇𑀫𑁂 𑀉𑀲𑁆𑀲𑀤𑀸.

𑁧𑁯. 𑀏𑀯𑀁 𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀧𑀝𑀺𑀧𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸’’𑀢𑀺. 𑀢𑀢𑁆𑀣 𑀧𑀓𑀧𑁆𑀧𑀺𑀢𑀸𑀢𑀺 𑀧𑀭𑀺𑀓𑀧𑁆𑀧𑀺𑀢𑀸. 𑀲𑀗𑁆𑀔𑀢𑀸𑀢𑀺 𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀢𑀸. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲. 𑀥𑀫𑁆𑀫𑀸𑀢𑀺 𑀤𑀺𑀝𑁆𑀞𑀺𑀬𑁄. 𑀧𑀼𑀭𑀓𑁆𑀔𑀢𑀸𑀢𑀺 𑀧𑀼𑀭𑀢𑁄 𑀓𑀢𑀸. 𑀲𑀦𑁆𑀢𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀅𑀯𑀻𑀯𑀤𑀸𑀢𑀸𑀢𑀺 𑀅𑀯𑁄𑀤𑀸𑀢𑀸. 𑀬𑀤𑀢𑁆𑀢𑀦𑀺 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀢𑀁 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺𑀦𑁆𑀢𑀺 𑀬𑀲𑁆𑀲𑁂𑀢𑁂 𑀤𑀺𑀝𑁆𑀞𑀺𑀥𑀫𑁆𑀫𑀸 ‘𑀧𑀼𑀭𑀓𑁆𑀔𑀢𑀸 𑀅𑀯𑁄𑀤𑀸𑀢𑀸 𑀲𑀦𑁆𑀢𑀺, 𑀲𑁄 𑀏𑀯𑀁𑀯𑀺𑀥𑁄 𑀬𑀲𑁆𑀫𑀸 𑀅𑀢𑁆𑀢𑀦𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀲𑀓𑁆𑀓𑀸𑀭𑀸𑀤𑀺𑀁, 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀕𑀢𑀺𑀯𑀺𑀲𑁂𑀲𑀸𑀤𑀺𑀁 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀜𑁆𑀘 𑀆𑀦𑀺𑀲𑀁𑀲𑀁, 𑀢𑀜𑁆𑀘 𑀓𑀼𑀧𑁆𑀧𑀢𑀸𑀬 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸𑀬 𑀘 𑀲𑀫𑁆𑀫𑀼𑀢𑀺𑀲𑀦𑁆𑀢𑀺𑀢𑀸𑀬 𑀘 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀺𑀢𑁄 𑀘 𑀳𑁄𑀢𑀺. 𑀲𑁄 𑀢𑀁 𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀢𑁆𑀢𑀸𑀦𑀁 𑀯𑀸 𑀉𑀓𑁆𑀓𑀁𑀲𑁂𑀬𑁆𑀬, 𑀧𑀭𑁂 𑀯𑀸 𑀯𑀫𑁆𑀪𑁂𑀬𑁆𑀬 𑀅𑀪𑀽𑀢𑁂𑀳𑀺𑀧𑀺 𑀕𑀼𑀡𑀤𑁄𑀲𑁂𑀳𑀺.

𑀲𑀗𑁆𑀔𑀢𑀸𑀢𑀺 𑀫𑀽𑀮𑀧𑀤𑀁. 𑀲𑀗𑁆𑀔𑀢𑀸𑀢𑀺 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀸. 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀅𑀪𑀺𑀲𑀗𑁆𑀔𑀢𑀸𑀢𑀺 𑀧𑀘𑁆𑀘𑀬𑁂𑀳𑀺 𑀅𑀪𑀺𑀓𑀢𑀸. 𑀲𑀡𑁆𑀞𑀧𑀺𑀢𑀸𑀢𑀺 𑀧𑀘𑁆𑀘𑀬𑀯𑀲𑁂𑀦𑁂𑀯 𑀲𑀫𑁆𑀫𑀸 𑀞𑀧𑀺𑀢𑀸. 𑀅𑀦𑀺𑀘𑁆𑀘𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑁂𑀦. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸. 𑀔𑀬𑀥𑀫𑁆𑀫𑀸𑀢𑀺 𑀓𑀫𑁂𑀦 𑀔𑀬𑀲𑀪𑀸𑀯𑀸. 𑀯𑀬𑀥𑀫𑁆𑀫𑀸𑀢𑀺 𑀧𑀯𑀢𑁆𑀢𑀺𑀯𑀲𑁂𑀦 𑀧𑀭𑀺𑀳𑀸𑀬𑀦𑀲𑀪𑀸𑀯𑀸. 𑀯𑀺𑀭𑀸𑀕𑀥𑀫𑁆𑀫𑀸𑀢𑀺 𑀅𑀦𑀺𑀯𑀢𑁆𑀢𑀻 𑀳𑀼𑀢𑁆𑀯𑀸 𑀯𑀺𑀕𑀘𑁆𑀙𑀦𑀲𑀪𑀸𑀯𑀸. 𑀦𑀺𑀭𑁄𑀥𑀥𑀫𑁆𑀫𑀸𑀢𑀺 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀸, 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀸 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲𑀸𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑀲𑁆𑀲.

𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀧𑀼𑀭𑁂 𑀓𑀢𑀸. 𑀢𑀡𑁆𑀳𑀸𑀥𑀚𑁄𑀢𑀺 𑀉𑀲𑁆𑀲𑀸𑀧𑀺𑀢𑀝𑁆𑀞𑁂𑀦 𑀢𑀡𑁆𑀳𑀸𑀥𑀚𑁄, 𑀢𑀡𑁆𑀳𑀸𑀧𑀝𑀸𑀓𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀡𑁆𑀳𑀸𑀥𑀚𑁄. 𑀧𑀼𑀭𑁂𑀘𑀸𑀭𑀺𑀓𑀝𑁆𑀞𑁂𑀦 𑀢𑀡𑁆𑀳𑀸 𑀏𑀯 𑀓𑁂𑀢𑀼 𑀅𑀲𑁆𑀲𑀸𑀢𑀺 𑀢𑀡𑁆𑀳𑀸𑀓𑁂𑀢𑀼. 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁄𑀢𑀺 𑀙𑀦𑁆𑀤𑀸𑀥𑀺𑀧𑀢𑀺𑀯𑀲𑁂𑀦, 𑀢𑀡𑁆𑀳𑀸 𑀅𑀥𑀺𑀧𑀢𑀺𑀢𑁄 𑀆𑀕𑀢𑀸𑀢𑀺 𑀯𑀸 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁄, 𑀢𑀡𑁆𑀳𑀸𑀥𑀺𑀧𑀢𑀺 𑀯𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁄. 𑀤𑀺𑀝𑁆𑀞𑀺𑀥𑀚𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑁄𑀤𑀸𑀢𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑀸. 𑀲𑀁𑀓𑀺𑀮𑀺𑀝𑁆𑀞𑀸𑀢𑀺 𑀲𑀬𑀁 𑀓𑀺𑀮𑀺𑀝𑁆𑀞𑀸. 𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑀢𑀧𑀦𑀻𑀬𑀸.

𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀻𑀢𑀺 𑀤𑁆𑀯𑁂 𑀕𑀼𑀡𑁂 𑀤𑀓𑁆𑀔𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀆𑀦𑀺𑀲𑀁𑀲𑀦𑁆𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀧𑀘𑁆𑀘𑀓𑁆𑀔𑀥𑀫𑁆𑀫𑀸𑀦𑀺𑀲𑀁𑀲𑀜𑁆𑀘. 𑀲𑀫𑁆𑀧𑀭𑀸𑀬𑀺𑀓𑀦𑁆𑀢𑀺 𑀧𑀭𑀮𑁄𑀓𑁂 𑀧𑀢𑁆𑀢𑀩𑁆𑀩𑀁 𑀆𑀦𑀺𑀲𑀁𑀲𑀜𑁆𑀘. 𑀬𑀁𑀤𑀺𑀝𑁆𑀞𑀺𑀓𑁄 𑀲𑀢𑁆𑀣𑀸 𑀳𑁄𑀢𑀻𑀢𑀺 𑀲𑀢𑁆𑀣𑀸 𑀬𑀣𑀸𑀮𑀤𑁆𑀥𑀺𑀓𑁄 𑀪𑀯𑀢𑀺. 𑀢𑀁𑀤𑀺𑀝𑁆𑀞𑀺𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀻𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀼𑀡𑀦𑁆𑀢𑀸 𑀲𑀸𑀯𑀓𑀸𑀧𑀺 𑀢𑀣𑀸𑀮𑀤𑁆𑀥𑀺𑀓𑀸 𑀳𑁄𑀦𑁆𑀢𑀺. 𑀲𑀓𑁆𑀓𑀭𑁄𑀦𑁆𑀢𑀻𑀢𑀺 𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑀁 𑀓𑀭𑁄𑀦𑁆𑀢𑀺. 𑀕𑀭𑀼𑀁 𑀓𑀭𑁄𑀦𑁆𑀢𑀻𑀢𑀺 𑀕𑀭𑀼𑀓𑀸𑀭𑀧𑁆𑀧𑀢𑁆𑀢𑀁 𑀓𑀭𑁄𑀦𑁆𑀢𑀺. 𑀫𑀸𑀦𑁂𑀦𑁆𑀢𑀻𑀢𑀺 𑀫𑀦𑀲𑀸 𑀧𑀺𑀬𑀸𑀬𑀦𑁆𑀢𑀺. 𑀧𑀽𑀚𑁂𑀦𑁆𑀢𑀻𑀢𑀺 𑀘𑀢𑀼𑀧𑀘𑁆𑀘𑀬𑀸𑀪𑀺𑀳𑀸𑀭𑀧𑀽𑀚𑀸𑀬 𑀧𑀽𑀚𑁂𑀦𑁆𑀢𑀺. 𑀅𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑀻𑀢𑀺 𑀅𑀧𑀘𑀺𑀢𑀺𑀧𑁆𑀧𑀢𑁆𑀢𑀁 𑀓𑀭𑁄𑀦𑁆𑀢𑀺. 𑀢𑀢𑁆𑀣 𑀬𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀓𑁆𑀓𑀭𑀺𑀢𑁆𑀯𑀸 𑀲𑀼𑀅𑀪𑀺𑀲𑀗𑁆𑀔𑀢𑁂 𑀧𑀡𑀻𑀢𑁂 𑀓𑀢𑁆𑀯𑀸 𑀤𑁂𑀦𑁆𑀢𑀺, 𑀲𑁄 𑀲𑀓𑁆𑀓𑀢𑁄. 𑀬𑀲𑁆𑀫𑀺𑀁 𑀕𑀭𑀼𑀪𑀸𑀯𑀁 𑀧𑀝𑁆𑀞𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀲𑁄 𑀕𑀭𑀼𑀓𑀢𑁄. 𑀬𑀁 𑀫𑀦𑀲𑀸 𑀧𑀺𑀬𑀸𑀬𑀦𑁆𑀢𑀺, 𑀲𑁄 𑀫𑀸𑀦𑀺𑀢𑁄. 𑀬𑀲𑁆𑀲 𑀲𑀩𑁆𑀩𑀫𑁆𑀧𑁂𑀢𑀁 𑀓𑀭𑁄𑀦𑁆𑀢𑀺, 𑀲𑁄 𑀧𑀽𑀚𑀺𑀢𑁄. 𑀬𑀲𑁆𑀲 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀲𑁄 𑀅𑀧𑀘𑀺𑀢𑁄. 𑀓𑁂𑀘𑀺 ‘‘𑀲𑀓𑁆𑀓𑀭𑁄𑀦𑁆𑀢𑀺 𑀓𑀸𑀬𑁂𑀦, 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀯𑀸𑀘𑀸𑀬, 𑀫𑀸𑀦𑁂𑀦𑁆𑀢𑀺 𑀘𑀺𑀢𑁆𑀢𑁂𑀦, 𑀧𑀽𑀚𑁂𑀦𑁆𑀢𑀺 𑀮𑀸𑀪𑁂𑀦𑀸’’𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀅𑀮𑀁 𑀦𑀸𑀕𑀢𑁆𑀢𑀸𑀬 𑀯𑀸𑀢𑀺 𑀦𑀸𑀕𑀪𑀸𑀯𑀸𑀬 𑀦𑀸𑀕𑀭𑀸𑀚𑀪𑀸𑀯𑀸𑀬 𑀯𑀸 𑀅𑀮𑀁 𑀧𑀭𑀺𑀬𑀢𑁆𑀢𑀁. 𑀲𑀼𑀧𑀡𑁆𑀡𑀢𑁆𑀢𑀸𑀬 𑀯𑀸𑀢𑀺 𑀲𑀼𑀧𑀡𑁆𑀡𑀭𑀸𑀚𑀪𑀸𑀯𑀸𑀬. 𑀬𑀓𑁆𑀔𑀢𑁆𑀢𑀸𑀬 𑀯𑀸𑀢𑀺 𑀬𑀓𑁆𑀔𑀲𑁂𑀦𑀸𑀧𑀢𑀺𑀪𑀸𑀯𑀸𑀬. 𑀅𑀲𑀼𑀭𑀢𑁆𑀢𑀸𑀬 𑀯𑀸𑀢𑀺 𑀅𑀲𑀼𑀭𑀪𑀸𑀯𑀸𑀬. 𑀕𑀦𑁆𑀥𑀩𑁆𑀩𑀢𑁆𑀢𑀸𑀬 𑀯𑀸𑀢𑀺 𑀕𑀦𑁆𑀥𑀩𑁆𑀩𑀤𑁂𑀯𑀖𑀝𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀸𑀬. 𑀫𑀳𑀸𑀭𑀸𑀚𑀢𑁆𑀢𑀸𑀬 𑀯𑀸𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀅𑀜𑁆𑀜𑀢𑀭𑀪𑀸𑀯𑀸𑀬. 𑀇𑀦𑁆𑀤𑀢𑁆𑀢𑀸𑀬 𑀯𑀸𑀢𑀺 𑀲𑀓𑁆𑀓𑀪𑀸𑀯𑀸𑀬. 𑀩𑁆𑀭𑀳𑁆𑀫𑀢𑁆𑀢𑀸𑀬 𑀯𑀸𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀪𑀸𑀯𑀸𑀬. 𑀤𑁂𑀯𑀢𑁆𑀢𑀸𑀬 𑀯𑀸𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸𑀤𑀻𑀦𑀁 𑀅𑀜𑁆𑀜𑀢𑀭𑀪𑀸𑀯𑀸𑀬. 𑀲𑀼𑀤𑁆𑀥𑀺𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀬 𑀅𑀮𑀁 𑀧𑀭𑀺𑀬𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀲𑀩𑁆𑀩𑀫𑀮𑀭𑀳𑀺𑀢𑀅𑀘𑁆𑀘𑀦𑁆𑀢𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀬. 𑀧𑀭𑀺𑀲𑀼𑀤𑁆𑀥𑀺𑀬𑀸𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀬.

𑀢𑀢𑁆𑀣 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀅𑀥𑀺𑀧𑀘𑁆𑀘𑀢𑁆𑀢𑀁 𑀲𑀼𑀤𑁆𑀥𑀺𑀬𑀸. 𑀤𑁂𑀯𑀮𑁄𑀓𑁂 𑀅𑀥𑀺𑀧𑀘𑁆𑀘𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀬𑀸. 𑀩𑁆𑀭𑀳𑁆𑀫𑀮𑁄𑀓𑁂 𑀅𑀥𑀺𑀧𑀘𑁆𑀘𑀢𑁆𑀢𑀁 𑀧𑀭𑀺𑀲𑀼𑀤𑁆𑀥𑀺𑀬𑀸. 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀼𑀘𑁆𑀘𑀦𑀢𑁆𑀣𑀁 𑀫𑀼𑀢𑁆𑀢𑀺𑀬𑀸. 𑀅𑀦𑁆𑀢𑀭𑀸𑀬𑀸𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁆𑀣𑀁 𑀯𑀺𑀫𑀼𑀢𑁆𑀢𑀺𑀬𑀸. 𑀲𑀩𑁆𑀩𑀸𑀓𑀸𑀭𑁂𑀦 𑀫𑀼𑀢𑁆𑀢𑀺𑀬𑀸 𑀧𑀭𑀺𑀫𑀼𑀢𑁆𑀢𑀺𑀬𑀸. 𑀲𑀼𑀚𑁆𑀛𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀩𑁆𑀩𑀚𑀺𑀢𑀪𑀸𑀯𑁂𑀦 𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀦𑁆𑀢𑀺. 𑀯𑀺𑀲𑀼𑀚𑁆𑀛𑀦𑁆𑀢𑀻𑀢𑀺 𑀧𑀩𑁆𑀩𑀚𑁆𑀚𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀪𑀸𑀯𑁂𑀦 𑀯𑀺𑀯𑀺𑀥𑁂𑀦 𑀲𑀼𑀚𑁆𑀛𑀦𑁆𑀢𑀺. 𑀧𑀭𑀺𑀲𑀼𑀚𑁆𑀛𑀦𑁆𑀢𑀻𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀲𑀼𑀚𑁆𑀛𑀦𑁆𑀢𑀺. 𑀫𑀼𑀘𑁆𑀘𑀦𑁆𑀢𑀺 𑀢𑁂𑀲𑀁 𑀲𑀫𑀬𑀦𑁆𑀢𑀭𑀥𑀫𑁆𑀫𑁂𑀦. 𑀯𑀺𑀫𑀼𑀘𑁆𑀘𑀦𑁆𑀢𑀺 𑀏𑀢𑀲𑁆𑀲 𑀲𑀢𑁆𑀣𑀼𑀦𑁄 𑀑𑀯𑀸𑀤𑁂𑀦. 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀏𑀢𑀲𑁆𑀲 𑀲𑀢𑁆𑀣𑀼𑀦𑁄 𑀅𑀦𑀼𑀲𑀸𑀲𑀦𑁂𑀦. 𑀲𑀼𑀚𑁆𑀛𑀺𑀲𑁆𑀲𑀸𑀫𑀻𑀢𑀺𑀆𑀤𑀬𑁄 𑀅𑀦𑀸𑀕𑀢𑀯𑀲𑁂𑀦 𑀯𑀼𑀢𑁆𑀢𑀸. 𑀆𑀬𑀢𑀺𑀁 𑀨𑀮𑀧𑀸𑀝𑀺𑀓𑀗𑁆𑀔𑀻𑀢𑀺 𑀅𑀦𑀸𑀕𑀢𑁂 𑀯𑀺𑀧𑀸𑀓𑀨𑀮𑀫𑀸𑀓𑀗𑁆𑀔𑀫𑀸𑀦𑁄. 𑀇𑀤𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀇𑀘𑁆𑀙𑀸𑀫𑀢𑁆𑀢𑀁. 𑀤𑀺𑀝𑁆𑀞𑀺𑀕𑀢𑀜𑁆𑀳𑀺 𑀇𑀚𑁆𑀛𑀫𑀸𑀦𑀁 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀦𑀺𑀧𑁆𑀨𑀸𑀤𑁂𑀢𑀺.

𑀅𑀘𑁆𑀘𑀦𑁆𑀢𑀲𑀦𑁆𑀢𑀻𑀢𑀺 𑀅𑀢𑀺𑀅𑀦𑁆𑀢𑀦𑀺𑀲𑁆𑀲𑀭𑀡𑀲𑀦𑁆𑀢𑀺. 𑀢𑀤𑀗𑁆𑀕𑀲𑀦𑁆𑀢𑀻𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀕𑀼𑀡𑀗𑁆𑀕𑁂𑀦 𑀦𑀻𑀯𑀭𑀡𑀸𑀤𑀺𑀅𑀕𑀼𑀡𑀗𑁆𑀕𑀁 𑀲𑀫𑁂𑀢𑀻𑀢𑀺 𑀛𑀸𑀦𑀁 𑀢𑀤𑀗𑁆𑀕𑀲𑀦𑁆𑀢𑀺. 𑀲𑀫𑁆𑀫𑀼𑀢𑀺𑀲𑀦𑁆𑀢𑀻𑀢𑀺 𑀲𑀫𑀸𑀳𑀸𑀭𑀯𑀲𑁂𑀦 𑀤𑀺𑀝𑁆𑀞𑀺𑀲𑀦𑁆𑀢𑀺. 𑀢𑀸 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑀸 𑀅𑀘𑁆𑀘𑀦𑁆𑀢𑀲𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀫𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦𑀻𑀯𑀭𑀡𑀸 𑀲𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀏𑀯𑀫𑀸𑀤𑀬𑁄 𑀅𑀦𑁆𑀢𑁄 𑀅𑀧𑁆𑀧𑀦𑀸𑀬𑀁 𑀅𑀢𑀺𑀲𑀬𑀯𑀲𑁂𑀦 𑀯𑀼𑀢𑁆𑀢𑀸. 𑀅𑀧𑀺 𑀘 𑀲𑀫𑁆𑀫𑀼𑀢𑀺𑀲𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸, 𑀲𑀦𑁆𑀢𑀻𑀢𑀺 𑀇𑀢𑀭𑁂 𑀤𑁆𑀯𑁂 𑀲𑀦𑁆𑀢𑀺𑀬𑁄 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑁆𑀫𑀼𑀢𑀺𑀲𑀦𑁆𑀢𑀺𑀫𑁂𑀯 𑀤𑀻𑀧𑁂𑀢𑀺. 𑀓𑀼𑀧𑁆𑀧𑀲𑀦𑁆𑀢𑀺𑀦𑁆𑀢𑀺 𑀯𑀺𑀧𑀸𑀓𑀚𑀦𑀓𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀘𑀮𑀲𑀦𑁆𑀢𑀺𑀁. 𑀧𑀓𑀼𑀧𑁆𑀧𑀲𑀦𑁆𑀢𑀺𑀦𑁆𑀢𑀺 𑀯𑀺𑀲𑁂𑀲𑁂𑀦 𑀘𑀮𑀲𑀦𑁆𑀢𑀺𑀁. 𑀏𑀭𑀺𑀢𑀲𑀦𑁆𑀢𑀺𑀦𑁆𑀢𑀺 𑀓𑀫𑁆𑀧𑀦𑀲𑀦𑁆𑀢𑀺𑀁. 𑀲𑀫𑁂𑀭𑀺𑀢𑀲𑀦𑁆𑀢𑀺𑀦𑁆𑀢𑀺 𑀯𑀺𑀲𑁂𑀲𑁂𑀦 𑀓𑀫𑁆𑀧𑀺𑀢𑀲𑀦𑁆𑀢𑀺𑀁. 𑀘𑀮𑀺𑀢𑀲𑀦𑁆𑀢𑀺𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀖𑀝𑁆𑀝𑀺𑀢𑀲𑀦𑁆𑀢𑀺𑀦𑁆𑀢𑀺 𑀧𑀻𑀴𑀺𑀢𑀲𑀦𑁆𑀢𑀺𑀁. 𑀲𑀦𑁆𑀢𑀺𑀁 𑀦𑀺𑀲𑁆𑀲𑀺𑀢𑁄𑀢𑀺 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀲𑀦𑁆𑀢𑀺𑀁 𑀦𑀺𑀲𑁆𑀲𑀺𑀢𑁄. 𑀅𑀲𑁆𑀲𑀺𑀢𑁄𑀢𑀺 𑀆𑀲𑀺𑀢𑁄 𑀯𑀺𑀲𑁂𑀲𑁂𑀦 𑀦𑀺𑀲𑁆𑀲𑀺𑀢𑁄. 𑀅𑀮𑁆𑀮𑀻𑀦𑁄𑀢𑀺 𑀏𑀓𑀻𑀪𑀽𑀢𑁄.

𑁨𑁦. 𑀏𑀯𑀁 𑀦𑀺𑀲𑁆𑀲𑀺𑀢𑁂 𑀢𑀸𑀯 ‘‘𑀤𑀺𑀝𑁆𑀞𑀻𑀦𑀺𑀯𑁂𑀲𑀸…𑀧𑁂… 𑀆𑀤𑀺𑀬𑀢𑀻 𑀘 𑀥𑀫𑁆𑀫’’𑀦𑁆𑀢𑀺 𑀢𑀢𑁆𑀣 𑀤𑀺𑀝𑁆𑀞𑀻𑀦𑀺𑀯𑁂𑀲𑀸𑀢𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀲𑀗𑁆𑀔𑀸𑀢𑀸𑀦𑀺 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸𑀦𑀺. 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸𑀢𑀺 𑀲𑀼𑀔𑁂𑀦 𑀅𑀢𑀺𑀯𑀢𑁆𑀢𑀺𑀢𑀩𑁆𑀩𑀸 𑀦 𑀳𑁄𑀦𑁆𑀢𑀺. 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑁂𑀲𑀼 𑀢𑀁 𑀢𑀁 𑀲𑀫𑀼𑀕𑁆𑀕𑀳𑀺𑀢𑀁 𑀅𑀪𑀺𑀦𑀺𑀯𑀺𑀝𑁆𑀞𑀥𑀫𑁆𑀫𑀁 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀼, 𑀦𑀺𑀭𑀲𑁆𑀲𑀢𑀻 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀦𑁆𑀢𑀺 𑀬𑀲𑁆𑀫𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸, 𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼𑀬𑁂𑀯 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑁂𑀲𑀼 𑀅𑀚𑀲𑀻𑀮𑀕𑁄𑀲𑀻𑀮𑀓𑀼𑀓𑁆𑀓𑀼𑀭𑀲𑀻𑀮𑀧𑀜𑁆𑀘𑀸𑀢𑀧𑀫𑀭𑀼𑀧𑁆𑀧𑀧𑀸𑀢𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀓𑀡𑁆𑀝𑀓𑀸𑀧𑀲𑁆𑀲𑀬𑀸𑀤𑀺𑀪𑁂𑀤𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀸𑀤𑀺𑀪𑁂𑀤𑀜𑁆𑀘 𑀢𑀁 𑀢𑀁 𑀥𑀫𑁆𑀫𑀁 𑀦𑀺𑀭𑀲𑁆𑀲𑀢𑀺 𑀘 𑀆𑀤𑀺𑀬𑀢𑀺 𑀘 𑀚𑀳𑀢𑀺 𑀘 𑀕𑀡𑁆𑀳𑀸𑀢𑀺 𑀘 𑀯𑀦𑀫𑀓𑁆𑀓𑀝𑁄 𑀯𑀺𑀬 𑀢𑀁 𑀢𑀁 𑀲𑀸𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀦𑀺𑀭𑀲𑁆𑀲𑀦𑁆𑀢𑁄 𑀘 𑀆𑀤𑀺𑀬𑀦𑁆𑀢𑁄 𑀘 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑁆𑀢𑀸 𑀅𑀲𑀦𑁆𑀢𑁂𑀳𑀺𑀧𑀺 𑀕𑀼𑀡𑀤𑁄𑀲𑁂𑀳𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀬𑀲𑀸𑀬𑀲𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀤𑀼𑀭𑀢𑀺𑀯𑀢𑁆𑀢𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑀼𑀁 𑀤𑀼𑀓𑁆𑀔𑀸. 𑀤𑀼𑀢𑁆𑀢𑀭𑀸𑀢𑀺 𑀤𑀼𑀉𑀢𑁆𑀢𑀭𑀸. 𑀤𑀼𑀧𑁆𑀧𑀢𑀭𑀸 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑀸 𑀤𑀼𑀩𑁆𑀩𑀺𑀦𑀺𑀯𑀢𑁆𑀢𑀸𑀢𑀺 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀸.

𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀢𑀺 𑀲𑀲𑁆𑀲𑀢𑀯𑀲𑁂𑀦 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸. 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀢𑀺 𑀅𑀢𑁆𑀢𑀯𑀲𑁂𑀦 𑀦𑀸𑀦𑀸𑀯𑀺𑀥𑁂𑀦 𑀯𑀺𑀦𑀺𑀘𑁆𑀙𑀬𑀁 𑀓𑀢𑁆𑀯𑀸. 𑀯𑀺𑀘𑀺𑀦𑀺𑀢𑁆𑀯𑀸𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸. 𑀧𑀯𑀺𑀘𑀺𑀦𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑀺𑀬𑀯𑀲𑁂𑀦 𑀲𑀩𑁆𑀩𑀸𑀓𑀸𑀭𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸. ‘‘𑀦𑀺𑀘𑀺𑀦𑀺𑀢𑁆𑀯𑀸 𑀯𑀺𑀘𑁆𑀘𑀺𑀦𑀺𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄. 𑀑𑀥𑀺𑀕𑁆𑀕𑀸𑀳𑁄𑀢𑀺 𑀅𑀯𑀥𑀺𑀬𑀺𑀢𑁆𑀯𑀸 𑀕𑀸𑀳𑁄. 𑀩𑀺𑀮𑀕𑁆𑀕𑀸𑀳𑁄𑀢𑀺 𑀓𑁄𑀝𑁆𑀞𑀸𑀲𑀯𑀲𑁂𑀦 𑀕𑀸𑀳𑁄 ‘‘𑀩𑀺𑀮𑀲𑁄 𑀯𑀺𑀪𑀚𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁮; 𑀫. 𑀦𑀺. 𑁧.𑁧𑁧𑁧) 𑀯𑀺𑀬. 𑀯𑀭𑀕𑁆𑀕𑀸𑀳𑁄𑀢𑀺 𑀉𑀢𑁆𑀢𑀫𑀕𑀸𑀳𑁄. 𑀓𑁄𑀝𑁆𑀞𑀸𑀲𑀕𑁆𑀕𑀸𑀳𑁄𑀢𑀺 𑀅𑀯𑀬𑀯𑀯𑀲𑁂𑀦 𑀕𑀸𑀳𑁄. 𑀉𑀘𑁆𑀘𑀬𑀕𑁆𑀕𑀸𑀳𑁄𑀢𑀺 𑀭𑀸𑀲𑀺𑀯𑀲𑁂𑀦 𑀕𑀸𑀳𑁄. 𑀲𑀫𑀼𑀘𑁆𑀘𑀬𑀕𑁆𑀕𑀸𑀳𑁄𑀢𑀺 𑀓𑁄𑀝𑁆𑀞𑀸𑀲𑀯𑀲𑁂𑀦 𑀭𑀸𑀲𑀺𑀯𑀲𑁂𑀦 𑀘 𑀕𑀸𑀳𑁄. 𑀇𑀤𑀁 𑀲𑀘𑁆𑀘𑀦𑁆𑀢𑀺 𑀇𑀤𑀫𑁂𑀯 𑀲𑀪𑀸𑀯𑀁. 𑀢𑀘𑁆𑀙𑀦𑁆𑀢𑀺 𑀢𑀣𑀪𑀸𑀯𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀁. 𑀢𑀣𑀦𑁆𑀢𑀺 𑀯𑀺𑀧𑀭𑀺𑀡𑀸𑀫𑀭𑀳𑀺𑀢𑀁. 𑀪𑀽𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀁. 𑀬𑀸𑀣𑀸𑀯𑀦𑁆𑀢𑀺 𑀬𑀣𑀸𑀲𑀪𑀸𑀯𑀁. 𑀅𑀯𑀺𑀧𑀭𑀻𑀢𑀦𑁆𑀢𑀺 𑀦 𑀯𑀺𑀧𑀭𑀻𑀢𑀁.

𑀦𑀺𑀭𑀲𑁆𑀲𑀢𑀻𑀢𑀺 𑀦𑀺𑀅𑀲𑁆𑀲𑀢𑀺 𑀯𑀺𑀓𑁆𑀔𑀺𑀧𑀢𑀺. 𑀧𑀭𑀯𑀺𑀘𑁆𑀙𑀺𑀦𑁆𑀤𑀦𑀸𑀬 𑀯𑀸𑀢𑀺 𑀧𑀭𑁂𑀳𑀺 𑀯𑀺𑀲𑁆𑀲𑀚𑁆𑀚𑀸𑀧𑀦𑁂𑀦. 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀯𑀸𑀢𑀺 𑀅𑀲𑀫𑁆𑀧𑀸𑀧𑀼𑀡𑀦𑁆𑀢𑁄 𑀯𑀸 𑀅𑀲𑀓𑁆𑀓𑁄𑀦𑁆𑀢𑁄 𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀧𑀭𑁄 𑀯𑀺𑀘𑁆𑀙𑀺𑀦𑁆𑀤𑁂𑀢𑀻𑀢𑀺 𑀅𑀜𑁆𑀜𑁄 𑀯𑀺𑀬𑁄𑀕𑀁 𑀓𑀭𑁄𑀢𑀺. 𑀦𑀢𑁆𑀣𑁂𑀢𑁆𑀣𑀸𑀢𑀺 𑀦𑀢𑁆𑀣𑀺 𑀏𑀢𑁆𑀣. 𑀲𑀻𑀮𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄𑀢𑀺 𑀲𑀻𑀮𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑁄. 𑀲𑀻𑀮𑀁 𑀦𑀺𑀭𑀲𑁆𑀲𑀢𑀻𑀢𑀺 𑀲𑀻𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁧. 𑀬𑁄 𑀧𑀦𑀸𑀬𑀁 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀸𑀤𑀺𑀤𑁄𑀲𑀥𑀼𑀦𑀦𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀥𑁄𑀦𑁄, 𑀢𑀲𑁆𑀲 𑀥𑁄𑀦𑀲𑁆𑀲 𑀳𑀺…𑀧𑁂… 𑀅𑀦𑀽𑀧𑀬𑁄 𑀲𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀥𑁄𑀦𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑀸 𑀥𑁄𑀦𑀲𑁆𑀲 𑀥𑀼𑀢𑀲𑀩𑁆𑀩𑀧𑀸𑀧𑀲𑁆𑀲 𑀅𑀭𑀳𑀢𑁄 𑀓𑀢𑁆𑀣𑀘𑀺 𑀮𑁄𑀓𑁂 𑀢𑁂𑀲𑀼 𑀢𑁂𑀲𑀼 𑀪𑀯𑁂𑀲𑀼 𑀲𑀁𑀓𑀧𑁆𑀧𑀦𑀸 𑀤𑀺𑀝𑁆𑀞𑀺 𑀦𑀢𑁆𑀣𑀺. 𑀲𑁄 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑀸, 𑀬𑀸𑀬 𑀘 𑀅𑀢𑁆𑀢𑀦𑀸 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀸 𑀢𑀺𑀢𑁆𑀣𑀺𑀬𑀸 𑀫𑀸𑀬𑀸𑀬 𑀯𑀸 𑀫𑀸𑀦𑁂𑀦 𑀯𑀸 𑀏𑀯𑀁 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀫𑁆𑀧𑀺 𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄 𑀭𑀸𑀕𑀸𑀤𑀻𑀦𑀁 𑀤𑁄𑀲𑀸𑀦𑀁 𑀓𑁂𑀦 𑀕𑀘𑁆𑀙𑁂𑀬𑁆𑀬, 𑀤𑀺𑀝𑁆𑀞𑀥𑀫𑁆𑀫𑁂 𑀲𑀫𑁆𑀧𑀭𑀸𑀬𑁂 𑀯𑀸 𑀦𑀺𑀭𑀬𑀸𑀤𑀻𑀲𑀼 𑀕𑀢𑀺𑀯𑀺𑀲𑁂𑀲𑁂𑀲𑀼 𑀓𑁂𑀦 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬, 𑀅𑀦𑀽𑀧𑀬𑁄 𑀲𑁄, 𑀲𑁄 𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀉𑀧𑀬𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀪𑀸𑀯𑁂𑀦 𑀅𑀦𑀽𑀧𑀬𑁄𑀢𑀺.

𑀓𑀺𑀁 𑀓𑀸𑀭𑀡𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸𑀢𑀺 𑀥𑁄𑀦𑀸 𑀇𑀢𑀺 𑀓𑀺𑀁𑀓𑀸𑀭𑀡𑀸 𑀧𑀜𑁆𑀜𑀸 𑀓𑀣𑀻𑀬𑀢𑀺. 𑀢𑀸𑀬 𑀧𑀜𑁆𑀜𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀢𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀜𑁆𑀜𑀸𑀬 𑀓𑀸𑀬𑀢𑁄 𑀧𑀯𑀢𑁆𑀢𑀁 𑀤𑀼𑀝𑁆𑀞𑀼 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸 𑀯𑀸 𑀘𑀭𑀺𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀥𑀽𑀢𑀜𑁆𑀘 𑀥𑁄𑀢𑀜𑁆𑀘𑀸𑀢𑀺 𑀓𑀫𑁆𑀧𑀺𑀢𑀜𑁆𑀘 𑀥𑁄𑀯𑀺𑀢𑀜𑁆𑀘. 𑀲𑀦𑁆𑀥𑁄𑀢𑀜𑁆𑀘𑀸𑀢𑀺 𑀲𑀫𑁆𑀫𑀸 𑀥𑁄𑀯𑀺𑀢𑀜𑁆𑀘. 𑀦𑀺𑀤𑁆𑀥𑁄𑀢𑀜𑁆𑀘𑀸𑀢𑀺 𑀯𑀺𑀲𑁂𑀲𑁂𑀦 𑀲𑀼𑀝𑁆𑀞𑀼 𑀦𑀺𑀤𑁆𑀥𑁄𑀢𑀜𑁆𑀘. 𑀭𑀸𑀕𑁄 𑀥𑀼𑀢𑁄 𑀘𑀸𑀢𑀺𑀆𑀤𑀬𑁄 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸.

𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀥𑀼𑀢𑀸 𑀘𑀸𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀓𑀫𑁆𑀧𑀺𑀢𑀸 𑀘𑀮𑀺𑀢𑀸 𑀥𑁄𑀯𑀺𑀢𑀸. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀻’’𑀢𑀺 𑀲𑀼𑀢𑁆𑀢𑀁 (𑀅. 𑀦𑀺. 𑁧𑁦.𑁧𑁦𑁬; 𑀤𑀻. 𑀦𑀺. 𑁩.𑁩𑁬𑁦) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀲𑀫𑁆𑀫𑀸𑀜𑀸𑀡𑁂𑀦𑀸𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑁂𑀦, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀯𑀸. 𑀫𑀺𑀘𑁆𑀙𑀸𑀜𑀸𑀡𑀦𑁆𑀢𑀺 𑀯𑀺𑀧𑀭𑀻𑀢𑀜𑀸𑀡𑀁 𑀅𑀬𑀸𑀣𑀸𑀯𑀜𑀸𑀡𑀁, 𑀧𑀸𑀧𑀓𑀺𑀭𑀺𑀬𑀸𑀲𑀼 𑀉𑀧𑀘𑀺𑀦𑁆𑀢𑀸𑀯𑀲𑁂𑀦 𑀧𑀸𑀧𑀁 𑀓𑀢𑁆𑀯𑀸 ‘‘𑀲𑀼𑀓𑀢𑀁 𑀫𑀬𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑁂𑀦 𑀘 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀧𑀭𑀻𑀢𑀸 𑀅𑀬𑀸𑀣𑀸𑀯𑀯𑀺𑀫𑀼𑀢𑁆𑀢𑀺𑀬𑁂𑀯 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀢𑀸.

𑀅𑀭𑀳𑀸 𑀇𑀫𑁂𑀳𑀺 𑀥𑁄𑀦𑁂𑀬𑁆𑀬𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀭𑀸𑀕𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺 𑀤𑀽𑀭𑁂 𑀞𑀺𑀢𑁄 𑀅𑀭𑀳𑀸 𑀇𑀫𑁂𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀓𑀺𑀮𑁂𑀲𑀥𑁄𑀯𑀦𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑁄 𑀳𑁄𑀢𑀺. 𑀥𑁄𑀦𑁄𑀢𑀺 𑀥𑁄𑀦𑁄 𑀧𑀼𑀕𑁆𑀕𑀮𑁄, 𑀢𑁂𑀦𑁂𑀯 ‘‘𑀲𑁄 𑀥𑀼𑀢𑀭𑀸𑀕𑁄’’𑀢𑀺𑀆𑀤𑀬𑁄 𑀆𑀳.

𑀫𑀸𑀬𑀸 𑀯𑀼𑀘𑁆𑀘𑀢𑀺 𑀯𑀜𑁆𑀘𑀦𑀺𑀓𑀸𑀘𑀭𑀺𑀬𑀸𑀢𑀺 𑀯𑀜𑁆𑀘𑀦𑀓𑀺𑀭𑀺𑀬𑀁 𑀯𑀜𑁆𑀘𑀦𑀓𑀭𑀡𑀁 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀯𑀜𑁆𑀘𑀦𑀺𑀓𑀸𑀘𑀭𑀺𑀬𑀸. 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀽𑀢𑀺 𑀢𑁂𑀲𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀅𑀧𑁆𑀧𑀓𑀸𑀲𑀦𑀓𑀸𑀭𑀡𑀸. 𑀧𑀸𑀧𑀺𑀓𑀁 𑀇𑀘𑁆𑀙𑀁 𑀧𑀡𑀺𑀤𑀳𑀢𑀻𑀢𑀺 𑀮𑀸𑀫𑀓𑀁 𑀧𑀢𑁆𑀣𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀇𑀘𑁆𑀙𑀢𑀻𑀢𑀺 ‘‘𑀫𑀬𑁆𑀳𑀁 𑀓𑀢𑀁 𑀧𑀸𑀧𑀁 𑀧𑀭𑁂 𑀫𑀸 𑀚𑀸𑀦𑀺𑀁𑀲𑀽’’𑀢𑀺 𑀧𑀘𑁆𑀘𑀸𑀲𑀻𑀲𑀢𑀺. 𑀲𑀗𑁆𑀓𑀧𑁆𑀧𑁂𑀢𑀻𑀢𑀺 𑀯𑀺𑀢𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑀺. 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀚𑀸𑀦𑀁𑀬𑁂𑀯 𑀧𑀡𑁆𑀡𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀪𑀺𑀓𑁆𑀔𑀼 𑀪𑀸𑀭𑀺𑀬𑀁 𑀓𑀭𑁄𑀢𑀺. ‘‘𑀅𑀫𑁆𑀳𑀸𑀓𑀁 𑀯𑀻𑀢𑀺𑀓𑁆𑀓𑀫𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀉𑀧𑀲𑀦𑁆𑀢𑁄 𑀯𑀺𑀬 𑀪𑀸𑀲𑀢𑀺. 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀻𑀢𑀺 ‘‘𑀫𑀬𑀸 𑀓𑀢𑀁 𑀇𑀤𑀁 𑀧𑀸𑀧𑀓𑀫𑁆𑀫𑀁 𑀫𑀸 𑀓𑁂𑀘𑀺 𑀚𑀸𑀦𑀺𑀁𑀲𑀽’’𑀢𑀺 𑀓𑀸𑀬𑁂𑀦 𑀯𑀢𑁆𑀢𑀁 𑀓𑀭𑁄𑀢𑀺. 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀢𑁄 𑀘𑀓𑁆𑀔𑀼𑀫𑁄𑀳𑀦𑀫𑀸𑀬𑀸 𑀅𑀲𑁆𑀲𑀸𑀢𑀺 𑀫𑀸𑀬𑀸𑀯𑀻, 𑀫𑀸𑀬𑀸𑀯𑀺𑀦𑁄 𑀪𑀸𑀯𑁄 𑀫𑀸𑀬𑀸𑀯𑀺𑀢𑀸. 𑀓𑀢𑁆𑀯𑀸 𑀧𑀸𑀧𑀁 𑀧𑀼𑀦 𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀢𑀺𑀘𑁆𑀘 𑀅𑀲𑁆𑀲𑀭𑀢𑀺 𑀏𑀢𑀸𑀬 𑀲𑀢𑁆𑀢𑁄𑀢𑀺 𑀅𑀘𑁆𑀘𑀲𑀭𑀸. 𑀓𑀸𑀬𑀯𑀸𑀘𑀸𑀓𑀺𑀭𑀺𑀬𑀸𑀳𑀺 𑀅𑀜𑁆𑀜𑀣𑀸 𑀤𑀲𑁆𑀲𑀦𑀢𑁄 𑀯𑀜𑁆𑀘𑁂𑀢𑀻𑀢𑀺 𑀯𑀜𑁆𑀘𑀦𑀸. 𑀏𑀢𑀸𑀬 𑀲𑀢𑁆𑀢𑀸 𑀦𑀺𑀓𑀭𑁄𑀦𑁆𑀢𑀻𑀢𑀺 𑀦𑀺𑀓𑀢𑀺, 𑀫𑀺𑀘𑁆𑀙𑀸 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀦𑀸𑀳𑀁 𑀏𑀯𑀁 𑀓𑀭𑁄𑀫𑀻’’𑀢𑀺 𑀧𑀸𑀧𑀸𑀦𑀁 𑀯𑀺𑀓𑁆𑀔𑀺𑀧𑀦𑀢𑁄 𑀦𑀺𑀓𑀺𑀭𑀡𑀸. ‘‘𑀦𑀸𑀳𑀁 𑀏𑀯𑀁 𑀓𑀭𑁄𑀫𑀻’’𑀢𑀺 𑀧𑀭𑀺𑀯𑀚𑁆𑀚𑀦𑀢𑁄 𑀧𑀭𑀺𑀳𑀭𑀡𑀸. 𑀓𑀸𑀬𑀸𑀤𑀻𑀳𑀺 𑀲𑀁𑀳𑀭𑀡𑀢𑁄 𑀕𑀽𑀳𑀦𑀸. 𑀲𑀫𑀪𑀸𑀕𑁂𑀦 𑀕𑀽𑀳𑀦𑀸 𑀧𑀭𑀺𑀕𑀽𑀳𑀦𑀸. 𑀢𑀺𑀡𑀧𑀡𑁆𑀡𑁂𑀳𑀺 𑀯𑀺𑀬 𑀕𑀽𑀣𑀁 𑀓𑀸𑀬𑀯𑀘𑀻𑀓𑀫𑁆𑀫𑁂𑀳𑀺 𑀧𑀸𑀧𑀁 𑀙𑀸𑀤𑁂𑀢𑀻𑀢𑀺 𑀙𑀸𑀤𑀦𑀸. 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀙𑀸𑀤𑀦𑀸 𑀧𑀭𑀺𑀘𑁆𑀙𑀸𑀤𑀦𑀸. 𑀦 𑀉𑀢𑁆𑀢𑀸𑀦𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀦𑀼𑀢𑁆𑀢𑀸𑀦𑀺𑀓𑀫𑁆𑀫𑀁. 𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀦𑀸𑀯𑀺𑀓𑀫𑁆𑀫𑀁. 𑀲𑀼𑀝𑁆𑀞𑀼 𑀙𑀸𑀤𑀦𑀸 𑀯𑁄𑀘𑁆𑀙𑀸𑀤𑀦𑀸. 𑀓𑀢𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀧𑀼𑀦𑀧𑀺 𑀧𑀸𑀧𑀲𑁆𑀲 𑀓𑀭𑀡𑀢𑁄 𑀧𑀸𑀧𑀓𑀺𑀭𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀓𑀢𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸 𑀦𑀸𑀫 𑀯𑀼𑀘𑁆𑀘𑀢𑀺, 𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀲𑁆𑀫𑀧𑀝𑀺𑀘𑁆𑀙𑀦𑁆𑀦𑁄 𑀯𑀺𑀬 𑀅𑀗𑁆𑀕𑀸𑀭𑁄, 𑀉𑀤𑀓𑀧𑀝𑀺𑀘𑁆𑀙𑀦𑁆𑀦𑁄 𑀯𑀺𑀬 𑀔𑀸𑀡𑀼, 𑀧𑀺𑀮𑁄𑀢𑀺𑀓𑀧𑀮𑀺𑀯𑁂𑀞𑀺𑀢𑀁 𑀯𑀺𑀬 𑀘 𑀲𑀢𑁆𑀣𑀁 𑀳𑁄𑀢𑀺.

𑀏𑀓𑀯𑀺𑀥𑁂𑀦 𑀫𑀸𑀦𑁄𑀢𑀺 𑀏𑀓𑀧𑀭𑀺𑀘𑁆𑀙𑁂𑀤𑁂𑀦 𑀏𑀓𑀓𑁄𑀝𑁆𑀞𑀸𑀲𑁂𑀦 𑀫𑀸𑀦𑁄. 𑀬𑀸 𑀘𑀺𑀢𑁆𑀢𑀲𑁆𑀲 𑀉𑀦𑁆𑀦𑀢𑀻𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀩𑁆𑀪𑀼𑀲𑁆𑀲𑀸𑀧𑀦𑀸, 𑀅𑀬𑀁 𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀫𑀸𑀦𑁄𑀯 𑀯𑀼𑀢𑁆𑀢𑁄.

𑀅𑀢𑁆𑀢𑀼𑀓𑁆𑀓𑀁𑀲𑀦𑀫𑀸𑀦𑁄𑀢𑀺 𑀅𑀢𑁆𑀢𑀸𑀦𑀁 𑀉𑀧𑀭𑀺 𑀞𑀧𑀦𑀫𑀸𑀦𑁄. 𑀧𑀭𑀯𑀫𑁆𑀪𑀦𑀫𑀸𑀦𑁄𑀢𑀺 𑀧𑀭𑁂 𑀮𑀸𑀫𑀓𑀓𑀭𑀡𑀫𑀸𑀦𑁄. 𑀇𑀫𑁂 𑀤𑁆𑀯𑁂 𑀫𑀸𑀦𑀸 𑀬𑁂𑀪𑀼𑀬𑁆𑀬𑁂𑀦 𑀢𑀣𑀸 𑀧𑀯𑀢𑁆𑀢𑀸𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀸.

‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄𑀢𑀺 𑀚𑀸𑀢𑀺𑀆𑀤𑀻𑀦𑀺 𑀦𑀺𑀲𑁆𑀲𑀸𑀬 ‘‘𑀅𑀳𑀫𑀲𑁆𑀫𑀺 𑀲𑁂𑀬𑁆𑀬𑁄’’𑀢𑀺 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄. 𑀲𑀤𑀺𑀲𑀫𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑀺𑀫𑁂𑀧𑀺 𑀢𑀬𑁄 𑀫𑀸𑀦𑀸 𑀧𑀼𑀕𑁆𑀕𑀮𑀯𑀺𑀲𑁂𑀲𑀁 𑀅𑀦𑀺𑀲𑁆𑀲𑀸𑀬 𑀢𑀣𑀸 𑀧𑀯𑀢𑁆𑀢𑀸𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀸. 𑀢𑁂𑀲𑀼 𑀏𑀓𑁂𑀓𑁄 𑀢𑀺𑀡𑁆𑀡𑀫𑁆𑀧𑀺 𑀲𑁂𑀬𑁆𑀬𑀲𑀤𑀺𑀲𑀳𑀻𑀦𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑀲𑁂𑀬𑁆𑀬𑀲𑁆𑀲𑁂𑀯 𑀬𑀸𑀣𑀸𑀯𑀫𑀸𑀦𑁄, 𑀲𑁂𑀲𑀸𑀦𑀁 𑀅𑀬𑀸𑀣𑀸𑀯𑀫𑀸𑀦𑁄. ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑀲𑀤𑀺𑀲𑀲𑁆𑀲𑁂𑀯 𑀬𑀸𑀣𑀸𑀯𑀫𑀸𑀦𑁄, 𑀲𑁂𑀲𑀸𑀦𑀁 𑀅𑀬𑀸𑀣𑀸𑀯𑀫𑀸𑀦𑁄. ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑀳𑀻𑀦𑀲𑁆𑀲𑁂𑀯 𑀬𑀸𑀣𑀸𑀯𑀫𑀸𑀦𑁄, 𑀲𑁂𑀲𑀸𑀦𑀁 𑀅𑀬𑀸𑀣𑀸𑀯𑀫𑀸𑀦𑁄.

𑀘𑀢𑀼𑀩𑁆𑀩𑀺𑀥𑁂𑀦 𑀫𑀸𑀦𑁄 𑀮𑁄𑀓𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑁄. 𑀧𑀜𑁆𑀘𑀯𑀺𑀥𑁂𑀦 𑀫𑀸𑀦𑁄 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀯𑀼𑀢𑁆𑀢𑁄. 𑀙𑀩𑁆𑀩𑀺𑀥𑁂𑀦 𑀫𑀸𑀦𑁄 𑀘𑀓𑁆𑀔𑀸𑀤𑀺𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀢𑁆𑀣 𑀫𑀸𑀦𑀁 𑀚𑀦𑁂𑀢𑀻𑀢𑀺 𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑀺.

𑀲𑀢𑁆𑀢𑀯𑀺𑀥𑁂𑀦 𑀫𑀸𑀦𑀦𑀺𑀤𑁆𑀤𑁂𑀲𑁂 𑀫𑀸𑀦𑁄𑀢𑀺 𑀉𑀦𑁆𑀦𑀫𑁄. 𑀅𑀢𑀺𑀫𑀸𑀦𑁄𑀢𑀺 ‘‘𑀚𑀸𑀢𑀺𑀆𑀤𑀻𑀳𑀺 𑀫𑀬𑀸 𑀲𑀤𑀺𑀲𑁄 𑀦𑀢𑁆𑀣𑀻’’𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄. 𑀫𑀸𑀦𑀸𑀢𑀺𑀫𑀸𑀦𑁄𑀢𑀺 ‘‘𑀅𑀬𑀁 𑀧𑀼𑀩𑁆𑀩𑁂 𑀫𑀬𑀸 𑀲𑀤𑀺𑀲𑁄, 𑀇𑀤𑀸𑀦𑀺 𑀅𑀳𑀁 𑀲𑁂𑀝𑁆𑀞𑁄, 𑀅𑀬𑀁 𑀳𑀻𑀦𑀢𑀭𑁄’’𑀢𑀺 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄. 𑀅𑀬𑀁 𑀪𑀸𑀭𑀸𑀢𑀺𑀪𑀸𑀭𑁄 𑀯𑀺𑀬 𑀧𑀼𑀭𑀺𑀫𑀁 𑀲𑀤𑀺𑀲𑀫𑀸𑀦𑀁 𑀉𑀧𑀸𑀤𑀸𑀬 𑀫𑀸𑀦𑀸𑀢𑀺𑀫𑀸𑀦𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀦𑀸𑀢𑀺𑀫𑀸𑀦𑁄’’𑀢𑀺 𑀆𑀳. 𑀑𑀫𑀸𑀦𑁄𑀢𑀺 𑀳𑀻𑀦𑀫𑀸𑀦𑁄. 𑀬𑁄 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑀦𑀸𑀫 𑀯𑀼𑀢𑁆𑀢𑁄, 𑀅𑀬𑀁 𑀑𑀫𑀸𑀦𑁄 𑀦𑀸𑀫. 𑀅𑀧𑀺 𑀘𑁂𑀢𑁆𑀣 ‘‘𑀢𑁆𑀯𑀁 𑀚𑀸𑀢𑀺𑀫𑀸, 𑀓𑀸𑀓𑀚𑀸𑀢𑀺 𑀯𑀺𑀬 𑀢𑁂 𑀚𑀸𑀢𑀺. 𑀢𑁆𑀯𑀁 𑀕𑁄𑀢𑁆𑀢𑀯𑀸, 𑀘𑀡𑁆𑀟𑀸𑀮𑀕𑁄𑀢𑁆𑀢𑀁 𑀯𑀺𑀬 𑀢𑁂 𑀕𑁄𑀢𑁆𑀢𑀁. 𑀢𑀼𑀬𑁆𑀳𑀁 𑀲𑀭𑁄 𑀅𑀢𑁆𑀣𑀺, 𑀓𑀸𑀓𑀲𑀭𑁄 𑀯𑀺𑀬 𑀢𑁂 𑀲𑀭𑁄’’𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀧𑀯𑀢𑁆𑀢𑀦𑀯𑀲𑁂𑀦 𑀅𑀬𑀁 ‘‘𑀑𑀫𑀸𑀦𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀥𑀺𑀫𑀸𑀦𑁄𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀧𑁆𑀧𑀢𑁆𑀯𑀸 𑀧𑀢𑁆𑀢𑀲𑀜𑁆𑀜𑀺𑀲𑁆𑀲, 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑁂 𑀓𑀺𑀘𑁆𑀘𑁂 𑀅𑀓𑀢𑁂𑀬𑁂𑀯 𑀓𑀢𑀲𑀜𑁆𑀜𑀺𑀲𑁆𑀲, 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀺𑀲𑁆𑀲, 𑀅𑀭𑀳𑀢𑁆𑀢𑁂 𑀅𑀲𑀘𑁆𑀙𑀺𑀓𑀢𑁂 𑀲𑀘𑁆𑀙𑀺𑀓𑀢𑀲𑀜𑁆𑀜𑀺𑀲𑁆𑀲 𑀉𑀧𑁆𑀧𑀦𑁆𑀦𑁄 𑀅𑀥𑀺𑀕𑀢𑀫𑀸𑀦𑁄 𑀅𑀥𑀺𑀫𑀸𑀦𑁄 𑀦𑀸𑀫. 𑀅𑀬𑀁 𑀧𑀦 𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀲 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀸𑀯 𑀦 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀳𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀓𑀺𑀮𑁂𑀲𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀅𑀭𑀺𑀬𑀕𑀼𑀡𑀧𑀝𑀺𑀯𑁂𑀥𑁂 𑀦𑀺𑀓𑁆𑀓𑀗𑁆𑀔𑁄, 𑀢𑀲𑁆𑀫𑀸 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 ‘‘𑀅𑀳𑀁 𑀲𑀓𑀤𑀸𑀕𑀸𑀫𑀻’’𑀢𑀺𑀆𑀤𑀺𑀯𑀲𑁂𑀦 𑀫𑀸𑀦𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀲𑁆𑀲𑀻𑀮𑀲𑁆𑀲 𑀘 𑀦 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀳𑀺 𑀅𑀭𑀺𑀬𑀕𑀼𑀡𑀸𑀥𑀺𑀕𑀫𑁂 𑀦𑀺𑀭𑀸𑀲𑁄𑀯. 𑀲𑀻𑀮𑀯𑀢𑁄𑀧𑀺 𑀧𑀭𑀺𑀘𑁆𑀘𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀦𑀺𑀤𑁆𑀤𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀲𑁆𑀲 𑀦 𑀉𑀧𑁆𑀧𑀚𑁆𑀚𑀢𑀺, 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀯𑀺𑀢𑀺𑀡𑁆𑀡𑀓𑀗𑁆𑀔𑀲𑁆𑀲 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁂 𑀘 𑀲𑀼𑀤𑁆𑀥𑀲𑀫𑀣𑀮𑀸𑀪𑀻 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀯𑀸 𑀅𑀦𑁆𑀢𑀭𑀸 𑀞𑀧𑁂𑀢𑀺. 𑀲𑁄 𑀳𑀺 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀻𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀢𑀺𑀁𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀅𑀲𑀻𑀢𑀺𑀧𑀺 𑀯𑀲𑁆𑀲𑀸𑀦𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀳𑀁 𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀸 ‘‘𑀲𑀓𑀤𑀸𑀕𑀸𑀫𑀻’’𑀢𑀺 𑀯𑀸 ‘‘𑀅𑀦𑀸𑀕𑀸𑀫𑀻’’𑀢𑀺 𑀯𑀸 𑀫𑀜𑁆𑀜𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀧𑀦 𑀅𑀭𑀳𑀢𑁆𑀢𑁂𑀬𑁂𑀯 𑀞𑀧𑁂𑀢𑀺. 𑀢𑀲𑁆𑀲 𑀳𑀺 𑀲𑀫𑀸𑀥𑀺𑀩𑀮𑁂𑀦 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀲𑀗𑁆𑀔𑀸𑀭𑀸 𑀲𑀼𑀧𑀭𑀺𑀕𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀲𑀝𑁆𑀞𑀺𑀧𑀺 𑀯𑀲𑁆𑀲𑀸𑀦𑀺 𑀅𑀲𑀻𑀢𑀺𑀧𑀺 𑀯𑀲𑁆𑀲𑀸𑀦𑀺 𑀯𑀲𑁆𑀲𑀲𑀢𑀫𑁆𑀧𑀺 𑀓𑀺𑀮𑁂𑀲𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀔𑀻𑀡𑀸𑀲𑀯𑀲𑁆𑀲𑁂𑀯 𑀘𑀺𑀢𑁆𑀢𑀸𑀘𑀸𑀭𑁄 𑀳𑁄𑀢𑀺. 𑀲𑁄 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀅𑀦𑁆𑀢𑀭𑀸 𑀅𑀝𑁆𑀞𑀢𑁆𑀯𑀸𑀯 ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀫𑀜𑁆𑀜𑀢𑀺.

𑀅𑀲𑁆𑀫𑀺𑀫𑀸𑀦𑁄𑀢𑀺 𑀭𑀽𑀧𑁂 𑀅𑀲𑁆𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 ‘‘𑀅𑀳𑀁 𑀭𑀽𑀧𑀸𑀤𑀬𑁄’’𑀢𑀺 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄. 𑀫𑀺𑀘𑁆𑀙𑀸𑀫𑀸𑀦𑁄𑀢𑀺 𑀧𑀸𑀧𑀓𑁂𑀳𑀺 𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀲𑀼𑀢𑀧𑀝𑀺𑀪𑀸𑀦𑀲𑀻𑀮𑀩𑁆𑀩𑀢𑁂𑀳𑀺, 𑀧𑀸𑀧𑀺𑀓𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄. 𑀢𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀸𑀬𑀢𑀦𑀁 𑀦𑀸𑀫 𑀓𑁂𑀯𑀝𑁆𑀝𑀫𑀘𑁆𑀙𑀩𑀦𑁆𑀥𑀦𑁂𑀲𑀸𑀤𑀸𑀦𑀁 𑀓𑀫𑁆𑀫𑀁. 𑀧𑀸𑀧𑀓𑀁 𑀲𑀺𑀧𑁆𑀧𑀸𑀬𑀢𑀦𑀁 𑀦𑀸𑀫 𑀫𑀘𑁆𑀙𑀚𑀸𑀮𑀔𑀺𑀧𑀓𑀼𑀫𑀻𑀦𑀓𑀭𑀡𑁂𑀲𑀼 𑀘𑁂𑀯 𑀧𑀸𑀲𑀑𑀟𑁆𑀟𑀦𑀲𑀽𑀮𑀸𑀭𑁄𑀧𑀦𑀸𑀤𑀻𑀲𑀼 𑀘 𑀙𑁂𑀓𑀢𑀸. 𑀧𑀸𑀧𑀓𑀁 𑀯𑀺𑀚𑁆𑀚𑀸𑀝𑁆𑀞𑀸𑀦𑀁 𑀦𑀸𑀫 𑀬𑀸 𑀓𑀸𑀘𑀺 𑀧𑀭𑀽𑀧𑀖𑀸𑀢𑀯𑀺𑀚𑁆𑀚𑀸. 𑀧𑀸𑀧𑀓𑀁 𑀲𑀼𑀢𑀁 𑀦𑀸𑀫 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁. 𑀧𑀸𑀧𑀓𑀁 𑀧𑀝𑀺𑀪𑀸𑀦𑀁 𑀦𑀸𑀫 𑀤𑀼𑀩𑁆𑀪𑀸𑀲𑀺𑀢𑀬𑀼𑀢𑁆𑀢𑀁 𑀓𑀧𑁆𑀧𑀦𑀸𑀝𑀓𑀯𑀺𑀮𑀧𑁆𑀧𑀦𑀸𑀤𑀺𑀧𑀝𑀺𑀪𑀸𑀦𑀁. 𑀧𑀸𑀧𑀓𑀁 𑀲𑀻𑀮𑀁 𑀦𑀸𑀫 𑀅𑀚𑀲𑀻𑀮𑀁 𑀕𑁄𑀲𑀻𑀮𑀁. 𑀯𑀢𑀫𑁆𑀧𑀺 𑀅𑀚𑀯𑀢𑀕𑁄𑀯𑀢𑀫𑁂𑀯. 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀦 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀲𑀼 𑀬𑀸𑀓𑀸𑀘𑀺 𑀤𑀺𑀝𑁆𑀞𑀺. 𑀅𑀝𑁆𑀞𑀯𑀺𑀥𑀫𑀸𑀦𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑀦𑀯𑀯𑀺𑀥𑁂𑀦 𑀫𑀸𑀦𑀦𑀺𑀤𑁆𑀤𑁂𑀲𑁂 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀬𑁄 𑀦𑀯 𑀫𑀸𑀦𑀸 𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀸. 𑀏𑀢𑁆𑀣 𑀧𑀦 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑀭𑀸𑀚𑀸𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀭𑀸𑀚𑀸 𑀳𑀺 ‘‘𑀭𑀝𑁆𑀞𑁂𑀦 𑀯𑀸 𑀥𑀦𑀯𑀸𑀳𑀦𑁂𑀳𑀺 𑀯𑀸 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 ‘‘𑀲𑀻𑀮𑀥𑀼𑀢𑀗𑁆𑀕𑀸𑀤𑀻𑀳𑀺 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑀲𑁂𑀬𑁆𑀬𑀲𑁆𑀲 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄𑀧𑀺 𑀏𑀢𑁂𑀲𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀭𑀸𑀚𑀸 𑀳𑀺 ‘‘𑀭𑀝𑁆𑀞𑁂𑀦 𑀯𑀸 𑀥𑀦𑀯𑀸𑀳𑀦𑁂𑀳𑀺 𑀯𑀸 𑀅𑀜𑁆𑀜𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 ‘‘𑀲𑀻𑀮𑀥𑀼𑀢𑀗𑁆𑀕𑀸𑀤𑀻𑀳𑀺 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀫𑀬𑁆𑀳𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑀲𑁂𑀬𑁆𑀬𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄𑀧𑀺 𑀏𑀢𑁂𑀲𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀳𑀺 𑀭𑀜𑁆𑀜𑁄 𑀭𑀝𑁆𑀞𑀁 𑀯𑀸 𑀥𑀦𑀯𑀸𑀳𑀦𑀸𑀤𑀻𑀦𑀺 𑀯𑀸 𑀦𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀲𑁄 ‘‘𑀫𑀬𑁆𑀳𑀁 𑀭𑀸𑀚𑀸𑀢𑀺 𑀯𑁄𑀳𑀸𑀭𑀲𑀼𑀔𑀫𑀢𑁆𑀢𑀓𑀫𑁂𑀯, 𑀓𑀺𑀁 𑀭𑀸𑀚𑀸 𑀦𑀸𑀫 𑀅𑀳’’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 𑀅𑀧𑁆𑀧𑀮𑀸𑀪𑀲𑀓𑁆𑀓𑀸𑀭𑁄 ‘‘𑀅𑀳𑀁 𑀥𑀫𑁆𑀫𑀓𑀣𑀺𑀓𑁄, 𑀩𑀳𑀼𑀲𑁆𑀲𑀼𑀢𑁄, 𑀫𑀳𑀸𑀣𑁂𑀭𑁄𑀢𑀺 𑀓𑀣𑀸𑀫𑀢𑁆𑀢𑀫𑁂𑀯, 𑀓𑀺𑀁 𑀥𑀫𑁆𑀫𑀓𑀣𑀺𑀓𑁄 𑀦𑀸𑀫𑀸𑀳𑀁, 𑀓𑀺𑀁 𑀩𑀳𑀼𑀲𑁆𑀲𑀼𑀢𑁄 𑀦𑀸𑀫𑀸𑀳𑀁, 𑀓𑀺𑀁 𑀫𑀳𑀸𑀣𑁂𑀭𑁄 𑀦𑀸𑀫𑀸𑀳𑀁, 𑀬𑀲𑁆𑀲 𑀫𑁂 𑀮𑀸𑀪𑀲𑀓𑁆𑀓𑀸𑀭𑁄 𑀦𑀢𑁆𑀣𑀻’’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑀲𑀤𑀺𑀲𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀸𑀤𑀬𑁄 𑀅𑀫𑀘𑁆𑀘𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀫𑀘𑁆𑀘𑁄 𑀯𑀸 𑀳𑀺 𑀭𑀝𑁆𑀞𑀺𑀬𑁄 𑀯𑀸 ‘‘𑀪𑁄𑀕𑀬𑀸𑀦𑀯𑀸𑀳𑀦𑀸𑀤𑀻𑀳𑀺 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀭𑀸𑀚𑀧𑀼𑀭𑀺𑀲𑁄 𑀅𑀢𑁆𑀣𑀻’’𑀢𑀺 𑀯𑀸, ‘‘𑀫𑀬𑁆𑀳𑀁 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀯𑀸, ‘‘𑀅𑀫𑀘𑁆𑀘𑁄𑀢𑀺 𑀦𑀸𑀫𑀫𑁂𑀯 𑀫𑀬𑁆𑀳𑀁, 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀫𑁂 𑀦𑀢𑁆𑀣𑀺, 𑀓𑀺𑀁 𑀅𑀫𑀘𑁆𑀘𑁄 𑀦𑀸𑀫𑀸𑀳’’𑀦𑁆𑀢𑀺 𑀯𑀸 𑀏𑀢𑁂 𑀫𑀸𑀦𑁂 𑀓𑀭𑁄𑀢𑀺.

𑀳𑀻𑀦𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀸𑀤𑀬𑁄 𑀤𑀸𑀲𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑀸𑀲𑁄 𑀳𑀺 ‘‘𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀤𑀸𑀲𑁄 𑀦𑀸𑀫 𑀅𑀢𑁆𑀣𑀺, 𑀅𑀜𑁆𑀜𑁂 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀓𑀼𑀘𑁆𑀙𑀺𑀳𑁂𑀢𑀼 𑀤𑀸𑀲𑀸 𑀦𑀸𑀫 𑀚𑀸𑀢𑀸, 𑀅𑀳𑀁 𑀧𑀦 𑀧𑀯𑁂𑀡𑀻𑀆𑀕𑀢𑀢𑁆𑀢𑀸 𑀲𑁂𑀬𑁆𑀬𑁄’’𑀢𑀺 𑀯𑀸, ‘‘𑀧𑀯𑁂𑀡𑀻𑀆𑀕𑀢𑀪𑀸𑀯𑁂𑀦 𑀉𑀪𑀢𑁄𑀲𑀼𑀤𑁆𑀥𑀺𑀓𑀤𑀸𑀲𑀢𑁆𑀢𑁂𑀦 𑀅𑀲𑀼𑀓𑀤𑀸𑀲𑁂𑀦 𑀦𑀸𑀫 𑀲𑀤𑁆𑀥𑀺𑀁 𑀓𑀺 𑀫𑀬𑁆𑀳𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀯𑀸, ‘‘𑀓𑀼𑀘𑁆𑀙𑀺𑀯𑀲𑁂𑀦𑀸𑀳𑀁 𑀤𑀸𑀲𑀩𑁆𑀬𑀁 𑀉𑀧𑀕𑀢𑁄, 𑀫𑀸𑀢𑀸𑀧𑀺𑀢𑀼𑀓𑁄𑀝𑀺𑀬𑀸 𑀧𑀦 𑀫𑁂 𑀤𑀸𑀲𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀓𑀺𑀁 𑀤𑀸𑀲𑁄 𑀦𑀸𑀫 𑀅𑀳’’𑀦𑁆𑀢𑀺 𑀯𑀸 𑀏𑀢𑁂 𑀫𑀸𑀦𑁂 𑀓𑀭𑁄𑀢𑀺. 𑀬𑀣𑀸 𑀘 𑀤𑀸𑀲𑁄, 𑀏𑀯𑀁 𑀧𑀼𑀓𑁆𑀓𑀼𑀲𑀘𑀡𑁆𑀟𑀸𑀮𑀸𑀤𑀬𑁄𑀧𑀺 𑀏𑀢𑁂 𑀫𑀸𑀦𑁂 𑀓𑀭𑁄𑀦𑁆𑀢𑀺𑀬𑁂𑀯.

𑀏𑀢𑁆𑀣 𑀘 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄, 𑀇𑀢𑀭𑁂 𑀤𑁆𑀯𑁂 𑀅𑀬𑀸𑀣𑀸𑀯𑀫𑀸𑀦𑀸. 𑀢𑀣𑀸 𑀲𑀤𑀺𑀲𑀲𑁆𑀲 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺, 𑀳𑀻𑀦𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄, 𑀇𑀢𑀭𑁂 𑀤𑁆𑀯𑁂 𑀅𑀬𑀸𑀣𑀸𑀯𑀫𑀸𑀦𑀸. 𑀢𑀢𑁆𑀣 𑀬𑀸𑀣𑀸𑀯𑀫𑀸𑀦𑀸 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸, 𑀅𑀬𑀸𑀣𑀸𑀯𑀫𑀸𑀦𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀸.

𑀏𑀢𑁆𑀣 𑀘 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑀉𑀢𑁆𑀢𑀫𑀲𑁆𑀲 𑀉𑀢𑁆𑀢𑀫𑀝𑁆𑀞𑁂𑀦 ‘‘𑀅𑀳𑀁 𑀲𑁂𑀬𑁆𑀬𑁄’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑀉𑀢𑁆𑀢𑀫𑀲𑁆𑀲 𑀲𑀫𑀝𑁆𑀞𑁂𑀦 ‘‘𑀅𑀳𑀁 𑀲𑀤𑀺𑀲𑁄’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁄. 𑀲𑁂𑀬𑁆𑀬𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑀉𑀢𑁆𑀢𑀫𑀲𑁆𑀲 𑀮𑀸𑀫𑀓𑀝𑁆𑀞𑁂𑀦 ‘‘𑀅𑀳𑀁 𑀳𑀻𑀦𑁄’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁄. 𑀏𑀯𑀁 𑀲𑁂𑀬𑁆𑀬𑀫𑀸𑀦𑁄 𑀲𑀤𑀺𑀲𑀫𑀸𑀦𑁄 𑀳𑀻𑀦𑀫𑀸𑀦𑁄𑀢𑀺 𑀇𑀫𑁂 𑀢𑀬𑁄 𑀫𑀸𑀦𑀸 𑀲𑁂𑀬𑁆𑀬𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀤𑀺𑀲𑀲𑁆𑀲𑀸𑀧𑀺 𑀅𑀳𑀁 𑀲𑁂𑀬𑁆𑀬𑁄, 𑀲𑀤𑀺𑀲𑁄, 𑀳𑀻𑀦𑁄𑀢𑀺 𑀢𑀬𑁄 𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀳𑀻𑀦𑀲𑁆𑀲𑀸𑀧𑀺 𑀅𑀳𑀁 𑀳𑀻𑀦𑁄, 𑀲𑀤𑀺𑀲𑁄, 𑀲𑁂𑀬𑁆𑀬𑁄𑀢𑀺 𑀢𑀬𑁄 𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀤𑀲𑀯𑀺𑀥𑀫𑀸𑀦𑀦𑀺𑀤𑁆𑀤𑁂𑀲𑁂 𑀇𑀥𑁂𑀓𑀘𑁆𑀘𑁄 𑀫𑀸𑀦𑀁 𑀚𑀦𑁂𑀢𑀻𑀢𑀺 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀫𑀸𑀦𑀁 𑀚𑀦𑀬𑀢𑀺. 𑀚𑀸𑀢𑀺𑀬𑀸 𑀯𑀸𑀢𑀺 𑀔𑀢𑁆𑀢𑀺𑀬𑀪𑀸𑀯𑀸𑀤𑀺𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀯𑀸. 𑀕𑁄𑀢𑁆𑀢𑁂𑀦 𑀯𑀸𑀢𑀺 𑀕𑁄𑀢𑀫𑀕𑁄𑀢𑁆𑀢𑀸𑀤𑀺𑀦𑀸 𑀉𑀓𑁆𑀓𑀝𑁆𑀞𑀕𑁄𑀢𑁆𑀢𑁂𑀦 𑀯𑀸. 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸𑀢𑀺 𑀫𑀳𑀸𑀓𑀼𑀮𑀪𑀸𑀯𑁂𑀦 𑀯𑀸. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸𑀢𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑀭𑀻𑀭𑀢𑀸𑀬 𑀯𑀸. 𑀲𑀭𑀻𑀭𑀜𑁆𑀳𑀺 ‘‘𑀧𑁄𑀓𑁆𑀔𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀺𑀭𑀽𑀧𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀥𑀦𑁂𑀦 𑀯𑀸𑀢𑀺 𑀥𑀦𑀲𑀫𑁆𑀧𑀦𑁆𑀦𑀪𑀸𑀯𑁂𑀦 𑀯𑀸, 𑀫𑀬𑁆𑀳𑀁 𑀦𑀺𑀥𑀸𑀦𑀕𑀢𑀲𑁆𑀲 𑀥𑀦𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀚𑁆𑀛𑁂𑀦𑁂𑀦 𑀯𑀸𑀢𑀺 𑀅𑀚𑁆𑀛𑀸𑀬𑀦𑀯𑀲𑁂𑀦 𑀯𑀸. 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸𑀢𑀺 ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀙𑀺𑀦𑁆𑀦𑀧𑀓𑁆𑀔𑀓𑀸𑀓𑀲𑀤𑀺𑀲𑀸, 𑀅𑀳𑀁 𑀧𑀦 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀯𑀸, ‘‘𑀅𑀳𑀁 𑀬𑀁 𑀬𑀁 𑀓𑀫𑁆𑀫𑀁 𑀓𑀭𑁄𑀫𑀺, 𑀢𑀁 𑀢𑀁 𑀲𑀫𑀺𑀚𑁆𑀛𑀢𑀻’’𑀢𑀺 𑀯𑀸 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸. 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸𑀢𑀺 ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀦𑀺𑀲𑀺𑀧𑁆𑀧𑀸, 𑀅𑀳𑀁 𑀲𑀺𑀧𑁆𑀧𑀯𑀸’’𑀢𑀺 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸. 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸𑀢𑀺 𑀇𑀤𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀼𑀢𑁂𑀦 𑀯𑀸𑀢𑀺 ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀅𑀳𑀁 𑀧𑀦 𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀏𑀯𑀫𑀸𑀤𑀺𑀲𑀼𑀢𑁂𑀦 𑀯𑀸. 𑀧𑀝𑀺𑀪𑀸𑀦𑁂𑀦 𑀯𑀸𑀢𑀺 ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀪𑀸𑀦𑀸, 𑀫𑀬𑁆𑀳𑀁 𑀧𑀦 𑀧𑀝𑀺𑀪𑀸𑀦𑀧𑁆𑀧𑀫𑀸𑀡𑀁 𑀦𑀢𑁆𑀣𑀻’’𑀢𑀺 𑀏𑀯𑀫𑀸𑀤𑀺𑀧𑀝𑀺𑀪𑀸𑀦𑁂𑀦 𑀯𑀸. 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑀅𑀯𑀼𑀢𑁆𑀢𑁂𑀦 𑀅𑀜𑁆𑀜𑁂𑀦 𑀯𑀢𑁆𑀣𑀼𑀦𑀸 𑀯𑀸. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄𑀢𑀺 𑀫𑀸𑀦𑀓𑀭𑀡𑀯𑀲𑁂𑀦 𑀫𑀸𑀦𑁄. 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀦𑁆𑀢𑀺 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑁄. 𑀉𑀲𑁆𑀲𑀺𑀢𑀝𑁆𑀞𑁂𑀦 𑀉𑀦𑁆𑀦𑀢𑀺. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀉𑀦𑁆𑀦𑀸𑀫𑁂𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀢𑀻𑀢𑀺 𑀉𑀦𑁆𑀦𑀸𑀫𑁄. 𑀲𑀫𑀼𑀲𑁆𑀲𑀺𑀢𑀝𑁆𑀞𑁂𑀦 𑀥𑀚𑁄. 𑀉𑀓𑁆𑀔𑀺𑀧𑀦𑀝𑁆𑀞𑁂𑀦 𑀘𑀺𑀢𑁆𑀢𑀁 𑀲𑀫𑁆𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀧𑀕𑁆𑀕𑀸𑀳𑁄. 𑀓𑁂𑀢𑀼 𑀯𑀼𑀘𑁆𑀘𑀢𑀺 𑀩𑀳𑀽𑀲𑀼 𑀥𑀚𑁂𑀲𑀼 𑀅𑀘𑁆𑀘𑀼𑀕𑁆𑀕𑀢𑀥𑀚𑁄. 𑀫𑀸𑀦𑁄𑀧𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀧𑀭𑀸𑀧𑀭𑁂 𑀉𑀧𑀸𑀤𑀸𑀬 𑀅𑀘𑁆𑀘𑀼𑀕𑁆𑀕𑀢𑀝𑁆𑀞𑁂𑀦 𑀓𑁂𑀢𑀼 𑀯𑀺𑀬𑀸𑀢𑀺 𑀓𑁂𑀢𑀼, 𑀢𑀁 𑀓𑁂𑀢𑀼𑀁 𑀇𑀘𑁆𑀙𑀢𑀻𑀢𑀺 𑀓𑁂𑀢𑀼𑀓𑀫𑁆𑀬𑀁, 𑀢𑀲𑁆𑀲 𑀪𑀸𑀯𑁄 𑀓𑁂𑀢𑀼𑀓𑀫𑁆𑀬𑀢𑀸. 𑀲𑀸 𑀧𑀦 𑀘𑀺𑀢𑁆𑀢𑀲𑁆𑀲, 𑀦 𑀅𑀢𑁆𑀢𑀦𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺. 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀳𑀺 𑀘𑀺𑀢𑁆𑀢𑀁 𑀓𑁂𑀢𑀼𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀪𑀸𑀯𑁄, 𑀓𑁂𑀢𑀼𑀲𑀗𑁆𑀔𑀸𑀢𑁄 𑀫𑀸𑀦𑁄𑀢𑀺. 𑀥𑁄𑀦𑁄 𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀬𑁄 𑀲𑁄 𑀥𑁄𑀦𑁄 𑀅𑀭𑀳𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑁄𑀤𑀦𑀩𑁆𑀬𑀦𑁆𑀢𑀺𑀓𑀭𑀡𑀸𑀤𑀺𑀯𑀲𑁂𑀦 𑀓𑀺𑀮𑁂𑀲𑁂 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄, 𑀲𑁄 𑀢𑁂𑀦 𑀭𑀸𑀕𑀸𑀤𑀺𑀦𑀸 𑀓𑀺𑀮𑁂𑀲𑁂𑀦 𑀕𑀘𑁆𑀙𑁂𑀬𑁆𑀬.

𑀦𑁂𑀭𑀬𑀺𑀓𑁄𑀢𑀺 𑀯𑀸𑀢𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀓𑀲𑀢𑁆𑀢𑁄𑀢𑀺 𑀯𑀸. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁄 𑀳𑁂𑀢𑀼 𑀦𑀢𑁆𑀣𑀻𑀢𑀺 𑀬𑁂𑀦 𑀚𑀦𑀓𑀳𑁂𑀢𑀼𑀦𑀸 𑀕𑀢𑀺𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀲𑁄 𑀳𑁂𑀢𑀼 𑀦𑀢𑁆𑀣𑀺. 𑀧𑀘𑁆𑀘𑀬𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑀸𑀭𑀡𑀦𑁆𑀢𑀺 𑀞𑀸𑀦𑀁. 𑀓𑀸𑀭𑀡𑀜𑁆𑀳𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀬𑁂𑀦 𑀳𑁂𑀢𑀼𑀦𑀸 𑀬𑁂𑀦 𑀧𑀘𑁆𑀘𑀬𑁂𑀦 𑀕𑀢𑀺𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑀁 𑀓𑀸𑀭𑀡𑀁 𑀦𑀢𑁆𑀣𑀺.

𑁨𑁨. 𑀬𑁄 𑀧𑀦 𑀦𑁂𑀲𑀁 𑀤𑁆𑀯𑀺𑀦𑁆𑀦𑀁 𑀉𑀧𑀬𑀸𑀦𑀁 𑀪𑀸𑀯𑁂𑀦 𑀉𑀧𑀬𑁄 𑀳𑁄𑀢𑀺, 𑀲𑁄 𑀉𑀧𑀬𑁄 𑀳𑀺…𑀧𑁂… 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀉𑀧𑀬𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑁄. 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀦𑁆𑀢𑀺 ‘‘𑀭𑀢𑁆𑀢𑁄’’𑀢𑀺 𑀯𑀸 ‘‘𑀤𑀼𑀝𑁆𑀞𑁄’’𑀢𑀺 𑀯𑀸 𑀏𑀯𑀁 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀁. 𑀅𑀦𑀽𑀧𑀬𑀁 𑀓𑁂𑀦 𑀓𑀣𑀁 𑀯𑀤𑁂𑀬𑁆𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑁂𑀦 𑀧𑀦 𑀅𑀦𑀽𑀧𑀬𑀁 𑀔𑀻𑀡𑀸𑀲𑀯𑀁 𑀓𑁂𑀦 𑀭𑀸𑀕𑁂𑀦 𑀯𑀸 𑀤𑁄𑀲𑁂𑀦 𑀯𑀸 𑀓𑀣𑀁 ‘‘𑀭𑀢𑁆𑀢𑁄’’𑀢𑀺 𑀯𑀸 ‘‘𑀤𑀼𑀝𑁆𑀞𑁄’’𑀢𑀺 𑀯𑀸 𑀯𑀤𑁂𑀬𑁆𑀬. 𑀏𑀯𑀁 𑀅𑀦𑀼𑀧𑀯𑀚𑁆𑀚𑁄 𑀘 𑀲𑁄 𑀓𑀺𑀁 𑀢𑀺𑀢𑁆𑀣𑀺𑀬𑀸 𑀯𑀺𑀬 𑀓𑀢𑀧𑀝𑀺𑀘𑁆𑀙𑀸𑀤𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀢𑀸 𑀦𑀺𑀭𑀢𑁆𑀢𑀸 𑀦 𑀳𑀺 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀲𑁆𑀲 𑀳𑀺 𑀅𑀢𑁆𑀢𑀤𑀺𑀝𑁆𑀞𑀺 𑀯𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀯𑀸 𑀦𑀢𑁆𑀣𑀺, 𑀕𑀳𑀡𑀫𑀼𑀜𑁆𑀘𑀦𑀁 𑀯𑀸𑀧𑀺 𑀅𑀢𑁆𑀢𑀦𑀺𑀭𑀢𑁆𑀢𑀲𑀜𑁆𑀜𑀺𑀢𑀁 𑀦𑀢𑁆𑀣𑀺. 𑀓𑀺𑀁 𑀓𑀸𑀭𑀡𑀸 𑀦𑀢𑁆𑀣𑀻𑀢𑀺 𑀘𑁂? 𑀅𑀥𑁄𑀲𑀺 𑀲𑁄 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀦𑁆𑀢𑀺. 𑀬𑀲𑁆𑀫𑀸 𑀲𑁄 𑀇𑀥𑁂𑀯 𑀅𑀢𑁆𑀢𑀪𑀸𑀯𑁂 𑀜𑀸𑀡𑀫𑁆𑀩𑀼𑀦𑀸 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀁 𑀅𑀥𑁄𑀲𑀺 𑀧𑀚𑀳𑀺 𑀯𑀺𑀦𑁄𑀤𑁂𑀲𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀢𑁆𑀢𑀫𑀦𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀭𑀢𑁆𑀢𑁄𑀢𑀺 𑀯𑀸𑀢𑀺 𑀭𑀸𑀕𑁂𑀦 𑀭𑀢𑁆𑀢𑁄𑀢𑀺 𑀯𑀸. 𑀤𑀼𑀝𑁆𑀞𑁄𑀢𑀺 𑀯𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀅𑀧𑁆𑀧𑀳𑀻𑀦𑀸𑀢𑀺 𑀬𑁂 𑀧𑀼𑀜𑁆𑀜𑀸𑀧𑀼𑀜𑁆𑀜𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸, 𑀢𑁂 𑀅𑀧𑁆𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀦 𑀧𑀳𑀻𑀦𑀪𑀸𑀯𑁂𑀦. 𑀕𑀢𑀺𑀬𑀸 𑀯𑀸𑀤𑀁 𑀉𑀧𑁂𑀢𑀻𑀢𑀺 𑀧𑀜𑁆𑀘𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀸𑀬 𑀓𑀣𑀦𑀁 𑀉𑀧𑀕𑀘𑁆𑀙𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀦𑁂𑀭𑀬𑀺𑀓𑁄𑀢𑀺 𑀯𑀸…𑀧𑁂… 𑀯𑀸𑀤𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻’’𑀢𑀺. 𑀯𑀤𑁂𑀬𑁆𑀬𑀸𑀢𑀺 𑀓𑀣𑁂𑀬𑁆𑀬. 𑀕𑀳𑀺𑀢𑀁 𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁 𑀦𑀢𑁆𑀣𑀺. 𑀫𑀼𑀜𑁆𑀘𑀺𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀫𑁄𑀘𑁂𑀢𑀩𑁆𑀩𑀁 𑀦𑀢𑁆𑀣𑀺.

𑀬𑀲𑁆𑀲𑀢𑁆𑀣𑀺 𑀕𑀳𑀺𑀢𑀦𑁆𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 ‘‘𑀅𑀳𑀁 𑀫𑀫𑀸’’𑀢𑀺 𑀕𑀳𑀺𑀢𑀁 𑀅𑀢𑁆𑀣𑀺. 𑀢𑀲𑁆𑀲𑀢𑁆𑀣𑀺 𑀫𑀼𑀜𑁆𑀘𑀺𑀢𑀩𑁆𑀩𑀦𑁆𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑁄𑀘𑁂𑀢𑀩𑁆𑀩𑀁 𑀅𑀢𑁆𑀣𑀺. 𑀉𑀧𑀭𑀺 𑀧𑀤𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀕𑀳𑀡𑀁 𑀫𑀼𑀜𑁆𑀘𑀦𑀸 𑀲𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀕𑀳𑀡𑀫𑁄𑀘𑀦𑀸 𑀅𑀭𑀳𑀸 𑀅𑀢𑀺𑀓𑁆𑀓𑀦𑁆𑀢𑁄. 𑀩𑀼𑀤𑁆𑀥𑀺𑀧𑀭𑀺𑀳𑀸𑀦𑀺𑀯𑀻𑀢𑀺𑀯𑀢𑁆𑀢𑁄𑀢𑀺 𑀯𑀟𑁆𑀠𑀺𑀜𑁆𑀘 𑀧𑀭𑀺𑀳𑀸𑀦𑀺𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄𑀢𑀺𑀆𑀤𑀺𑀁 𑀓𑀢𑁆𑀯𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀻𑀢𑀺 𑀧𑀭𑀺𑀬𑁄𑀲𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀥𑁄𑀲𑀻𑀢𑀺 𑀓𑀦𑁆𑀢𑁂𑀲𑀺. 𑀥𑀼𑀦𑀺 𑀲𑀦𑁆𑀥𑀼𑀦𑀺 𑀦𑀺𑀤𑁆𑀥𑀼𑀦𑀻𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬

𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.