𑁨. 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭. 𑀤𑀼𑀢𑀺𑀬𑁂 𑁋 𑀲𑀢𑁆𑀢𑁄𑀢𑀺 𑀮𑀕𑁆𑀕𑁄. 𑀕𑀼𑀳𑀸𑀬𑀦𑁆𑀢𑀺 𑀓𑀸𑀬𑁂. 𑀓𑀸𑀬𑁄 𑀳𑀺 𑀭𑀸𑀕𑀸𑀤𑀻𑀦𑀁 𑀯𑀸𑀴𑀸𑀦𑀁 𑀯𑀲𑀦𑁄𑀓𑀸𑀲𑀢𑁄 ‘‘𑀕𑀼𑀳𑀸’’𑀢𑀺 𑀯𑀼𑀘𑁆𑀘𑀢𑀺. 𑀩𑀳𑀼𑀦𑀸𑀪𑀺𑀙𑀦𑁆𑀦𑁄𑀢𑀺 𑀩𑀳𑀼𑀦𑀸 𑀭𑀸𑀕𑀸𑀤𑀺𑀓𑀺𑀮𑁂𑀲𑀚𑀸𑀢𑁂𑀦 𑀅𑀪𑀺𑀘𑁆𑀙𑀦𑁆𑀦𑁄. 𑀏𑀢𑁂𑀦 𑀅𑀚𑁆𑀛𑀢𑁆𑀢𑀩𑀦𑁆𑀥𑀦𑀁 𑀯𑀼𑀢𑁆𑀢𑀁. 𑀢𑀺𑀝𑁆𑀞𑀦𑁆𑀢𑀺 𑀭𑀸𑀕𑀸𑀤𑀺𑀯𑀲𑁂𑀦 𑀢𑀺𑀝𑁆𑀞𑀦𑁆𑀢𑁄. 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄𑀢𑀺 𑀫𑁄𑀳𑀦𑀁 𑀯𑀼𑀘𑁆𑀘𑀢𑀺 𑀓𑀸𑀫𑀕𑀼𑀡𑁄. 𑀏𑀢𑁆𑀣 𑀳𑀺 𑀤𑁂𑀯𑀫𑀦𑀼𑀲𑁆𑀲𑀸 𑀫𑀼𑀬𑁆𑀳𑀦𑁆𑀢𑀺 𑀢𑁂𑀲𑀼 𑀅𑀚𑁆𑀛𑁄𑀕𑀸𑀴𑁆𑀳𑀸 𑀳𑀼𑀢𑁆𑀯𑀸; 𑀏𑀢𑁂𑀦 𑀩𑀸𑀳𑀺𑀭𑀩𑀦𑁆𑀥𑀦𑀁 𑀯𑀼𑀢𑁆𑀢𑀁. 𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄 𑀲𑁄𑀢𑀺 𑀲𑁄 𑀢𑀣𑀸𑀭𑀽𑀧𑁄 𑀦𑀭𑁄 𑀢𑀺𑀯𑀺𑀥𑀸𑀧𑀺 𑀓𑀸𑀬𑀯𑀺𑀯𑁂𑀓𑀸𑀤𑀺𑀯𑀺𑀯𑁂𑀓𑀸 𑀤𑀽𑀭𑁂, 𑀅𑀦𑀸𑀲𑀦𑁆𑀦𑁂. 𑀓𑀺𑀁𑀓𑀸𑀭𑀡𑀸? 𑀓𑀸𑀫𑀸 𑀳𑀺 𑀮𑁄𑀓𑁂 𑀦 𑀳𑀺 𑀲𑀼𑀧𑁆𑀧𑀳𑀸𑀬𑀸𑀢𑀺 𑀬𑀲𑁆𑀫𑀸 𑀮𑁄𑀓𑁂 𑀓𑀸𑀫𑀸 𑀲𑀼𑀧𑁆𑀧𑀳𑀸𑀬𑀸 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀢𑁆𑀢𑁄𑀢𑀺 𑀳𑀺 𑀔𑁄 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀢𑁆𑀢𑁄, 𑀦𑀭𑁄, 𑀫𑀸𑀦𑀯𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀓𑀣𑀺𑀢𑁄𑀬𑁂𑀯. 𑀕𑀼𑀳𑀸 𑀢𑀸𑀯 𑀯𑀢𑁆𑀢𑀩𑁆𑀩𑀸𑀢𑀺 𑀕𑀼𑀳𑀸 𑀢𑀸𑀯 𑀓𑀣𑁂𑀢𑀩𑁆𑀩𑀸. 𑀓𑀸𑀬𑁄𑀢𑀺 𑀯𑀸𑀢𑀺𑀆𑀤𑀻𑀲𑀼 𑀅𑀬𑀁 𑀢𑀸𑀯 𑀧𑀤𑀬𑁄𑀚𑀦𑀸 𑁋 𑀓𑀸𑀬𑁄 𑀇𑀢𑀺 𑀯𑀸 𑀕𑀼𑀳𑀸 𑀇𑀢𑀺 𑀯𑀸…𑀧𑁂… 𑀓𑀼𑀫𑁆𑀪𑁄 𑀇𑀢𑀺 𑀯𑀸𑀢𑀺. 𑀢𑀢𑁆𑀣 𑀓𑀸𑀬𑁄𑀢𑀺 ‘‘𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀲𑀢𑀺𑀧𑀝𑁆𑀞𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀭𑀸𑀕𑀸𑀤𑀺𑀯𑀸𑀴𑀸𑀦𑀁 𑀯𑀲𑀦𑁄𑀓𑀸𑀲𑀝𑁆𑀞𑁂𑀦 𑀕𑀼𑀳𑀸, ‘‘𑀧𑀝𑀺𑀘𑁆𑀙𑀸𑀤𑀦𑀝𑁆𑀞𑁂𑀦𑀸’’𑀢𑀺𑀧𑀺 𑀏𑀓𑁂. ‘‘𑀤𑀽𑀭𑀗𑁆𑀕𑀫𑀁 𑀏𑀓𑀘𑀭𑀁, 𑀅𑀲𑀭𑀻𑀭𑀁 𑀕𑀼𑀳𑀸𑀲𑀬’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁩𑁭) 𑀯𑀺𑀬. 𑀭𑀸𑀕𑀸𑀤𑀻𑀳𑀺 𑀛𑀸𑀧𑀦𑀝𑁆𑀞𑁂𑀦 𑀤𑁂𑀳𑁄 ‘‘𑀢𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁩𑁨 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀯𑀺𑀬. 𑀧𑀫𑀢𑁆𑀢𑀓𑀭𑀡𑀝𑁆𑀞𑁂𑀦 𑀲𑀦𑁆𑀤𑁂𑀳𑁄 ‘‘𑀪𑀺𑀚𑁆𑀚𑀢𑀺 𑀧𑀽𑀢𑀺𑀲𑀦𑁆𑀤𑁂𑀳𑁄, 𑀫𑀭𑀡𑀦𑁆𑀢𑀜𑁆𑀳𑀺 𑀚𑀻𑀯𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁧𑁪𑁮) 𑀯𑀺𑀬. 𑀲𑀁𑀲𑀸𑀭𑁂 𑀲𑀜𑁆𑀘𑀭𑀡𑀝𑁆𑀞𑁂𑀦 𑀦𑀸𑀯𑀸 ‘‘𑀲𑀺𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀦𑀸𑀯𑀁, 𑀲𑀺𑀢𑁆𑀢𑀸 𑀢𑁂 𑀮𑀳𑀼𑀫𑁂𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀥. 𑀧. 𑁩𑁬𑁯) 𑀯𑀺𑀬. 𑀇𑀭𑀺𑀬𑀸𑀧𑀣𑀲𑁆𑀲 𑀅𑀢𑁆𑀣𑀺𑀪𑀸𑀯𑀝𑁆𑀞𑁂𑀦 𑀭𑀣𑁄 ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄, 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪) 𑀯𑀺𑀬. 𑀅𑀘𑁆𑀘𑀼𑀕𑁆𑀕𑀢𑀝𑁆𑀞𑁂𑀦 𑀥𑀚𑁄 ‘‘𑀥𑀚𑁄 𑀭𑀣𑀲𑁆𑀲 𑀧𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁧𑁮𑁪𑁧) 𑀯𑀺𑀬.

𑀓𑀺𑀫𑀺𑀓𑀼𑀮𑀸𑀦𑀁 𑀆𑀯𑀸𑀲𑀪𑀸𑀯𑁂𑀦 𑀯𑀫𑁆𑀫𑀺𑀓𑁄 ‘‘𑀯𑀫𑁆𑀫𑀺𑀓𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀇𑀫𑀲𑁆𑀲𑁂𑀢𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁫𑁧) 𑀯𑀺𑀬. 𑀬𑀣𑁂𑀯 𑀳𑀺 𑀩𑀸𑀳𑀺𑀭𑀓𑁄 𑀯𑀫𑁆𑀫𑀺𑀓𑁄, 𑀯𑀫𑀢𑀺 𑀯𑀦𑁆𑀢𑀓𑁄 𑀯𑀦𑁆𑀢𑀼𑀲𑁆𑀲𑀬𑁄 𑀯𑀦𑁆𑀢𑀲𑀺𑀦𑁂𑀳𑀲𑀫𑁆𑀩𑀤𑁆𑀥𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 ‘‘𑀯𑀫𑁆𑀫𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀅𑀳𑀺𑀦𑀓𑀼𑀮𑀉𑀦𑁆𑀤𑀽𑀭𑀖𑀭𑀕𑁄𑀴𑀺𑀓𑀸𑀤𑀬𑁄 𑀦𑀸𑀦𑀧𑁆𑀧𑀓𑀸𑀭𑁂 𑀧𑀸𑀡𑀓𑁂 𑀯𑀫𑀢𑀻𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀓𑁄𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀫𑀺𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀳𑀺 𑀉𑀓𑁆𑀔𑀺𑀢𑁆𑀢𑀧𑀁𑀲𑀼𑀘𑀼𑀡𑁆𑀡𑁂𑀦 𑀓𑀝𑀺𑀧𑁆𑀧𑀫𑀸𑀡𑁂𑀦𑀧𑀺 𑀧𑁄𑀭𑀺𑀲𑀧𑁆𑀧𑀫𑀸𑀡𑁂𑀦𑀧𑀺 𑀉𑀲𑁆𑀲𑀺𑀢𑁄𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀔𑁂𑀴𑀲𑀺𑀦𑁂𑀳𑁂𑀦 𑀆𑀩𑀤𑁆𑀥𑀢𑀸𑀬 𑀲𑀢𑁆𑀢𑀲𑀢𑁆𑀢𑀸𑀳𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀧𑀺 𑀦 𑀯𑀺𑀧𑁆𑀧𑀓𑀺𑀭𑀻𑀬𑀢𑀺, 𑀦𑀺𑀤𑀸𑀖𑁂𑀧𑀺 𑀢𑀢𑁄 𑀧𑀁𑀲𑀼𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀼𑀝𑁆𑀞𑀺𑀦𑀸 𑀧𑀻𑀴𑀺𑀬𑀫𑀸𑀦𑁂 𑀲𑀺𑀦𑁂𑀳𑁄 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀯𑀦𑁆𑀢𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄𑀢𑀺 𑀯𑀫𑁆𑀫𑀺𑀓𑁄. 𑀏𑀯𑀫𑀬𑀁 𑀓𑀸𑀬𑁄𑀧𑀺 ‘‘𑀅𑀓𑁆𑀔𑀺𑀫𑁆𑀳𑀸 𑀅𑀕𑁆𑀕𑀺𑀕𑀽𑀣𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀼𑀘𑀺𑀓𑀮𑀺𑀫𑀮𑀁 𑀯𑀫𑀢𑀻𑀢𑀺 𑀯𑀫𑁆𑀫𑀺𑀓𑁄. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑁂𑀦 𑀅𑀢𑁆𑀢𑀪𑀸𑀯𑀁 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸𑀢𑀺 𑀅𑀭𑀺𑀬𑁂𑀳𑀺 𑀯𑀦𑁆𑀢𑀓𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. 𑀬𑁂𑀳𑀺 𑀘𑀸𑀬𑀁 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀉𑀲𑁆𑀲𑀺𑀢𑁄 𑀦𑀳𑀸𑀭𑀼𑀲𑀫𑁆𑀩𑀤𑁆𑀥𑁄 𑀫𑀁𑀲𑀸𑀯𑀮𑁂𑀧𑀦𑁄 𑀅𑀮𑁆𑀮𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁄 𑀙𑀯𑀺𑀭𑀜𑁆𑀚𑀺𑀢𑁄 𑀲𑀢𑁆𑀢𑁂 𑀯𑀜𑁆𑀘𑁂𑀢𑀺, 𑀢𑀁 𑀲𑀩𑁆𑀩𑀁 𑀅𑀭𑀺𑀬𑁂𑀳𑀺 𑀯𑀦𑁆𑀢𑀫𑁂𑀯𑀸𑀢𑀺 𑀯𑀦𑁆𑀢𑀼𑀲𑁆𑀲𑀬𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀻’’𑀢𑀺 (𑀲𑀁. 𑀦𑀺. 𑁧.𑁫𑁫-𑁫𑁭) 𑀏𑀯𑀁 𑀢𑀡𑁆𑀳𑀸𑀬 𑀚𑀦𑀺𑀢𑀢𑁆𑀢𑀸 𑀅𑀭𑀺𑀬𑁂𑀳𑀺 𑀯𑀦𑁆𑀢𑁂𑀦𑁂𑀯 𑀢𑀡𑁆𑀳𑀸𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄 𑀅𑀬𑀦𑁆𑀢𑀺 𑀯𑀦𑁆𑀢𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. 𑀬𑀣𑀸 𑀘 𑀯𑀫𑁆𑀫𑀺𑀓𑀲𑁆𑀲 𑀅𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑀸 𑀧𑀸𑀡𑀓𑀸 𑀢𑀢𑁆𑀣𑁂𑀯 𑀚𑀸𑀬𑀦𑁆𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀺, 𑀕𑀺𑀮𑀸𑀦𑀸 𑀲𑀬𑀦𑁆𑀢𑀺, 𑀫𑀢𑀸 𑀦𑀺𑀧𑀢𑀦𑁆𑀢𑀺. 𑀇𑀢𑀺 𑀲𑁄 𑀢𑁂𑀲𑀁 𑀲𑀽𑀢𑀺𑀖𑀭𑀁 𑀯𑀘𑁆𑀘𑀓𑀼𑀝𑀺 𑀕𑀺𑀮𑀸𑀦𑀲𑀸𑀮𑀸 𑀲𑀼𑀲𑀸𑀦𑀜𑁆𑀘 𑀳𑁄𑀢𑀺. 𑀏𑀯𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀫𑁆𑀧𑀺 𑀓𑀸𑀬𑁄 ‘‘𑀅𑀬𑀁 𑀕𑁄𑀧𑀺𑀢𑀭𑀓𑁆𑀔𑀺𑀢𑁄 𑀫𑀡𑁆𑀟𑀺𑀢𑀧𑀲𑀸𑀤𑀺𑀢𑁄 𑀫𑀳𑀸𑀦𑀼𑀪𑀸𑀯𑀸𑀦𑀁 𑀓𑀸𑀬𑁄’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀙𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀘𑀫𑁆𑀫𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀫𑀁𑀲𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀦𑀳𑀸𑀭𑀼𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀅𑀝𑁆𑀞𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀅𑀝𑁆𑀞𑀺𑀫𑀺𑀜𑁆𑀚𑀦𑀺𑀲𑁆𑀲𑀺𑀢𑀸 𑀧𑀸𑀡𑀸𑀢𑀺 𑀏𑀯𑀁 𑀓𑀼𑀮𑀕𑀡𑀦𑀸𑀬 𑀅𑀲𑀻𑀢𑀺𑀫𑀢𑁆𑀢𑀸𑀦𑀺 𑀓𑀺𑀫𑀺𑀓𑀼𑀮𑀲𑀳𑀲𑁆𑀲𑀸𑀦𑀺 𑀅𑀦𑁆𑀢𑁄𑀓𑀸𑀬𑀲𑁆𑀫𑀺𑀁𑀬𑁂𑀯 𑀚𑀸𑀬𑀦𑁆𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀺, 𑀕𑁂𑀮𑀜𑁆𑀜𑁂𑀦 𑀆𑀢𑀼𑀭𑀺𑀢𑀸𑀦𑀺 𑀲𑀬𑀦𑁆𑀢𑀺, 𑀫𑀢𑀸𑀫𑀢𑀸 𑀦𑀺𑀧𑀢𑀦𑁆𑀢𑀺. 𑀇𑀢𑀺 𑀅𑀬𑀫𑁆𑀧𑀺 𑀢𑁂𑀲𑀁 𑀧𑀸𑀡𑀸𑀦𑀁 𑀲𑀽𑀢𑀺𑀖𑀭𑀁 𑀯𑀘𑁆𑀘𑀓𑀼𑀝𑀺 𑀕𑀺𑀮𑀸𑀦𑀲𑀸𑀮𑀸 𑀲𑀼𑀲𑀸𑀦𑀜𑁆𑀘 𑀳𑁄𑀢𑀻𑀢𑀺 ‘‘𑀯𑀫𑁆𑀫𑀺𑀓𑁄’’𑀢𑀺 𑀲𑀗𑁆𑀔𑀁 𑀕𑀢𑁄.

𑀫𑀦𑀸𑀧𑀸𑀫𑀦𑀸𑀧𑀧𑀢𑀦𑀝𑁆𑀞𑁂𑀦 𑀦𑀕𑀭𑀁 ‘‘𑀲𑀓𑁆𑀓𑀸𑀬𑀦𑀕𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀭𑁄𑀕𑀸𑀤𑀻𑀦𑀁 𑀦𑀻𑀴𑀪𑀸𑀯𑁂𑀦 𑀓𑀼𑀮𑀸𑀯𑀓𑀪𑀸𑀯𑁂𑀦 𑀦𑀻𑀴𑀁 ‘‘𑀭𑁄𑀕𑀦𑀻𑀴𑀁 𑀧𑀪𑀗𑁆𑀕𑀼𑀭’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁧𑁪𑁮) 𑀯𑀺𑀬. 𑀧𑀝𑀺𑀲𑀦𑁆𑀥𑀺𑀬𑀸 𑀦𑀺𑀯𑀸𑀲𑀕𑁂𑀳𑀝𑁆𑀞𑁂𑀦 𑀓𑀼𑀝𑀺 ‘‘𑀧𑀜𑁆𑀘𑀤𑁆𑀯𑀸𑀭𑀸𑀬𑀁 𑀓𑀼𑀝𑀺𑀓𑀸𑀬𑀁 𑀧𑀲𑀓𑁆𑀓𑀺𑀬𑀸’’𑀢𑀺𑀆𑀤𑀻𑀲𑀼 (𑀣𑁂𑀭𑀕𑀸. 𑁧𑁨𑁫) 𑀯𑀺𑀬. 𑀧𑀽𑀢𑀺𑀪𑀸𑀯𑁂𑀦 𑀕𑀡𑁆𑀟𑁄 ‘‘𑀭𑁄𑀕𑁄𑀢𑀺 𑀪𑀺𑀓𑁆𑀔𑀯𑁂, 𑀕𑀡𑁆𑀟𑁄𑀢𑀺 𑀪𑀺𑀓𑁆𑀔𑀯𑁂, 𑀲𑀮𑁆𑀮𑁄𑀢𑀺 𑀪𑀺𑀓𑁆𑀔𑀯𑁂, 𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁯.𑁧𑁫) 𑀯𑀺𑀬. 𑀪𑀺𑀚𑁆𑀚𑀦𑀝𑁆𑀞𑁂𑀦 𑀓𑀼𑀫𑁆𑀪𑁄 ‘‘𑀓𑀼𑀫𑁆𑀪𑀽𑀧𑀫𑀁 𑀓𑀸𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁪𑁦) 𑀯𑀺𑀬. 𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀘𑀢𑀼𑀫𑀳𑀸𑀪𑀽𑀢𑀫𑀬𑀲𑁆𑀲 𑀓𑀼𑀘𑁆𑀙𑀺𑀢𑀥𑀫𑁆𑀫𑀸𑀦𑀁 𑀆𑀬𑀲𑁆𑀲 𑀅𑀥𑀺𑀯𑀘𑀦𑀁, 𑀓𑀣𑀦𑀦𑁆𑀢𑀺 𑀅𑀢𑁆𑀣𑁄. 𑀕𑀼𑀳𑀸𑀬𑀦𑁆𑀢𑀺 𑀲𑀭𑀻𑀭𑀲𑁆𑀫𑀺𑀁. 𑀲𑀢𑁆𑀢𑁄𑀢𑀺 𑀅𑀮𑁆𑀮𑀻𑀦𑁄. 𑀯𑀺𑀲𑀢𑁆𑀢𑁄𑀢𑀺 𑀯𑀡𑁆𑀡𑀭𑀸𑀕𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑁄 𑀅𑀮𑁆𑀮𑀻𑀦𑁄. 𑀲𑀡𑁆𑀞𑀸𑀦𑀭𑀸𑀕𑀯𑀲𑁂𑀦 𑀆𑀲𑀢𑁆𑀢𑁄. 𑀢𑀢𑁆𑀣𑁂𑀯 ‘‘𑀲𑀼𑀪𑀁 𑀲𑀼𑀔’’𑀦𑁆𑀢𑀺 𑀕𑀳𑀡𑀯𑀲𑁂𑀦 𑀮𑀕𑁆𑀕𑁄. 𑀅𑀢𑁆𑀢𑀕𑁆𑀕𑀳𑀡𑀯𑀲𑁂𑀦 𑀮𑀕𑁆𑀕𑀺𑀢𑁄. 𑀧𑀮𑀺𑀩𑀼𑀤𑁆𑀥𑁄𑀢𑀺 𑀨𑀲𑁆𑀲𑀭𑀸𑀕𑀯𑀲𑁂𑀦 𑀅𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑁄. 𑀪𑀺𑀢𑁆𑀢𑀺𑀔𑀺𑀮𑁂𑀢𑀺 𑀪𑀺𑀢𑁆𑀢𑀺𑀬𑀁 𑀆𑀓𑁄𑀝𑀺𑀢𑀔𑀸𑀡𑀼𑀓𑁂. 𑀦𑀸𑀕𑀤𑀦𑁆𑀢𑁂𑀢𑀺 𑀢𑀣𑁂𑀯 𑀳𑀢𑁆𑀣𑀺𑀤𑀦𑁆𑀢𑀲𑀤𑀺𑀲𑁂 𑀯𑀗𑁆𑀓𑀤𑀡𑁆𑀟𑀓𑁂. 𑀲𑀢𑁆𑀢𑀦𑁆𑀢𑀺 𑀪𑀺𑀢𑁆𑀢𑀺𑀔𑀺𑀮𑁂 𑀮𑀕𑁆𑀕𑀁. 𑀯𑀺𑀲𑀢𑁆𑀢𑀦𑁆𑀢𑀺 𑀦𑀸𑀕𑀤𑀦𑁆𑀢𑁂 𑀮𑀕𑁆𑀕𑀁. 𑀆𑀲𑀢𑁆𑀢𑀦𑁆𑀢𑀺 𑀘𑀻𑀯𑀭𑀯𑀁𑀲𑁂 𑀮𑀕𑁆𑀕𑀁. 𑀮𑀕𑁆𑀕𑀦𑁆𑀢𑀺 𑀘𑀻𑀯𑀭𑀭𑀚𑁆𑀚𑀼𑀬𑀸 𑀮𑀕𑁆𑀕𑀁. 𑀮𑀕𑁆𑀕𑀺𑀢𑀦𑁆𑀢𑀺 𑀧𑀻𑀞𑀧𑀸𑀤𑁂 𑀮𑀕𑁆𑀕𑀁. 𑀧𑀮𑀺𑀩𑀼𑀤𑁆𑀥𑀦𑁆𑀢𑀺 𑀫𑀜𑁆𑀘𑀧𑀸𑀤𑁂 𑀮𑀕𑁆𑀕𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀮𑀕𑁆𑀕𑀦𑀸𑀥𑀺𑀯𑀘𑀦𑀦𑁆𑀢𑀺 𑀯𑀺𑀲𑁂𑀲𑁂𑀦 𑀅𑀮𑁆𑀮𑀻𑀬𑀦𑀓𑀣𑀦𑀁. 𑀙𑀦𑁆𑀦𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀓𑀺𑀮𑁂𑀲𑁂𑀳𑀺 𑀙𑀸𑀤𑀺𑀢𑁄. 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀉𑀧𑀭𑀽𑀧𑀭𑀺 𑀙𑀦𑁆𑀦𑁄𑀢𑀺 𑀉𑀘𑁆𑀙𑀦𑁆𑀦𑁄. 𑀆𑀯𑀼𑀢𑁄𑀢𑀺 𑀆𑀯𑀭𑀺𑀢𑁄. 𑀦𑀺𑀯𑀼𑀢𑁄𑀢𑀺 𑀯𑀸𑀭𑀺𑀢𑁄. 𑀑𑀨𑀼𑀢𑁄𑀢𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀙𑀸𑀤𑀺𑀢𑁄. 𑀧𑀺𑀳𑀺𑀢𑁄𑀢𑀺 𑀪𑀸𑀚𑀦𑁂𑀦 𑀉𑀓𑁆𑀔𑀮𑀺𑀫𑀼𑀔𑀁 𑀯𑀺𑀬 𑀧𑀮𑀺𑀕𑀼𑀡𑁆𑀞𑀺𑀢𑁄. 𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀆𑀯𑀝𑁄. 𑀧𑀝𑀺𑀓𑀼𑀚𑁆𑀚𑀺𑀢𑁄𑀢𑀺 𑀅𑀥𑁄𑀫𑀼𑀔𑀁 𑀞𑀧𑀺𑀢𑁄. 𑀢𑀢𑁆𑀣 𑀢𑀺𑀡𑀧𑀡𑁆𑀡𑀸𑀤𑀻𑀳𑀺 𑀙𑀸𑀤𑀺𑀢𑀁 𑀯𑀺𑀬 𑀙𑀦𑁆𑀦𑁄. 𑀉𑀘𑁆𑀙𑀦𑁆𑀦𑁄 𑀦𑀤𑀺𑀁 𑀆𑀯𑀭𑀡𑀲𑁂𑀢𑀼 𑀯𑀺𑀬. 𑀆𑀯𑀼𑀢𑁄 𑀚𑀦𑀲𑀜𑁆𑀘𑀭𑀡𑀫𑀕𑁆𑀕𑀸𑀯𑀭𑀡𑀁 𑀯𑀺𑀬.

𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀯𑀲𑁂𑀦𑀸𑀢𑀺 𑀦𑀸𑀦𑀸𑀯𑀺𑀥𑁂𑀦 𑀫𑀸𑀦𑀸𑀢𑀺𑀫𑀸𑀦𑀯𑀲𑁂𑀦 𑀦𑀸𑀦𑀸𑀯𑀺𑀥𑁂 𑀆𑀭𑀫𑁆𑀫𑀡𑁂 𑀩𑀤𑁆𑀥𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀧𑀭𑀸𑀫𑀝𑁆𑀞𑁄 𑀆𑀫𑀲𑀺𑀢𑁆𑀯𑀸 𑀕𑀳𑀺𑀢𑁄. 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑁂 𑀅𑀲𑀦𑁆𑀢𑀺𑀝𑁆𑀞𑀦𑀯𑀲𑁂𑀦 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀁 𑀧𑀢𑁆𑀢𑁄 𑀉𑀧𑀕𑀢𑁄. 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦𑀸𑀢𑀺 𑀭𑀢𑀦𑀢𑁆𑀢𑀬𑀸𑀤𑀻𑀲𑀼 𑀓𑀗𑁆𑀔𑀸𑀲𑀗𑁆𑀔𑀸𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑀲𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀅𑀧𑁆𑀧𑀢𑁆𑀢𑁄. 𑀣𑀸𑀫𑀕𑀢𑁄 𑀅𑀦𑀼𑀲𑀬𑀯𑀲𑁂𑀦𑀸𑀢𑀺 𑀤𑀼𑀦𑁆𑀦𑀻𑀳𑀭𑀡𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀯𑀲𑁂𑀦 𑀣𑀺𑀭𑀪𑀸𑀯𑀁 𑀧𑀢𑁆𑀢𑁄 𑀉𑀧𑀕𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀭𑀽𑀧𑀽𑀧𑀬𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀽𑀧𑀬𑀯𑀲𑁂𑀦 𑀭𑀽𑀧𑀁 𑀉𑀧𑀕𑀦𑁆𑀢𑁆𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀻𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀭𑀽𑀧𑀸𑀭𑀫𑁆𑀫𑀡𑀁 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀦𑁆𑀢𑀁 𑀢𑀺𑀝𑁆𑀞𑀢𑀺. 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀧𑀢𑀺𑀝𑁆𑀞𑀦𑁆𑀢𑀺 𑀭𑀽𑀧𑀫𑁂𑀯 𑀆𑀭𑀫𑁆𑀫𑀡𑀁 𑀆𑀮𑀫𑁆𑀩𑀺𑀢𑁆𑀯𑀸 𑀭𑀽𑀧𑀫𑁂𑀯 𑀧𑀢𑀺𑀝𑁆𑀞𑀁 𑀓𑀢𑁆𑀯𑀸. 𑀦𑀦𑁆𑀤𑀽𑀧𑀲𑁂𑀘𑀦𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑁄𑀤𑀓𑁂𑀦 𑀆𑀲𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀁. 𑀯𑀼𑀤𑁆𑀥𑀺𑀦𑁆𑀢𑀺 𑀯𑀼𑀤𑁆𑀥𑀺𑀪𑀸𑀯𑀁. 𑀯𑀺𑀭𑀽𑀴𑁆𑀳𑀺𑀦𑁆𑀢𑀺 𑀚𑀯𑀦𑀯𑀲𑁂𑀦 𑀉𑀧𑀭𑀺𑀢𑁄 𑀯𑀺𑀭𑀽𑀴𑁆𑀳𑀺𑀪𑀸𑀯𑀁. 𑀯𑁂𑀧𑀼𑀮𑁆𑀮𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀯𑁂𑀧𑀼𑀮𑁆𑀮𑀁.

𑀅𑀢𑁆𑀣𑀺 𑀭𑀸𑀕𑁄𑀢𑀺𑀆𑀤𑀻𑀦𑀺 𑀮𑁄𑀪𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀲𑁄 𑀳𑀺 𑀭𑀜𑁆𑀚𑀦𑀯𑀲𑁂𑀦 𑀭𑀸𑀕𑁄, 𑀦𑀦𑁆𑀤𑀦𑀯𑀲𑁂𑀦 𑀦𑀦𑁆𑀤𑀻, 𑀢𑀡𑁆𑀳𑀸𑀬𑀦𑀯𑀲𑁂𑀦 𑀢𑀡𑁆𑀳𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀦𑁆𑀢𑀺 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀬 𑀧𑀢𑀺𑀝𑁆𑀞𑀺𑀢𑀜𑁆𑀘𑁂𑀯 𑀯𑀺𑀭𑀽𑀴𑁆𑀳𑀜𑁆𑀘. 𑀬𑀢𑁆𑀣𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑁂 𑀪𑀼𑀫𑁆𑀫𑀁. 𑀲𑀩𑁆𑀩𑀢𑁆𑀣 𑀯𑀸 𑀧𑀼𑀭𑀺𑀫𑀧𑀤𑁂 𑀏𑀢𑀁 𑀪𑀼𑀫𑁆𑀫𑀁. 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀻𑀢𑀺 𑀇𑀤𑀁 𑀇𑀫𑀲𑁆𑀫𑀺𑀁 𑀯𑀺𑀧𑀸𑀓𑀯𑀝𑁆𑀝𑁂 𑀞𑀺𑀢𑀲𑁆𑀲 𑀆𑀬𑀢𑀺𑀁 𑀯𑀝𑁆𑀝𑀳𑁂𑀢𑀼𑀓𑁂 𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀢𑁆𑀣𑀺. 𑀢𑀢𑁆𑀣 𑀧𑀼𑀭𑀺𑀫𑀲𑀼𑀢𑁆𑀢𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀮𑀕𑁆𑀕𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀲𑀼𑀢𑁆𑀢𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀅𑀪𑀺𑀦𑀦𑁆𑀤𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀢𑀺𑀬𑀁 𑀯𑀺𑀜𑁆𑀜𑀸𑀡𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀘𑀢𑀼𑀢𑁆𑀣𑀁 𑀘𑀢𑀼𑀩𑁆𑀩𑀺𑀥𑀆𑀳𑀸𑀭𑀯𑀲𑁂𑀦, 𑀓𑀼𑀲𑀮𑀸𑀓𑀼𑀲𑀮𑀯𑀺𑀜𑁆𑀜𑀸𑀡𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀜𑀸𑀢𑀩𑁆𑀩𑀁.

𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀧𑀸𑀬𑁂𑀦. 𑀫𑀼𑀬𑁆𑀳𑀦𑁆𑀢𑀻𑀢𑀺 𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀺. 𑀲𑀫𑁆𑀫𑀼𑀬𑁆𑀳𑀦𑁆𑀢𑀻𑀢𑀺 𑀯𑀺𑀲𑁂𑀲𑁂𑀦 𑀫𑀼𑀬𑁆𑀳𑀦𑁆𑀢𑀺. 𑀲𑀫𑁆𑀧𑀫𑀼𑀬𑁆𑀳𑀦𑁆𑀢𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀫𑀼𑀬𑁆𑀳𑀦𑁆𑀢𑀺. 𑀅𑀣 𑀯𑀸 𑀭𑀽𑀧𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀫𑀼𑀬𑁆𑀳𑀦𑁆𑀢𑀺, 𑀲𑀤𑁆𑀤𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀲𑀫𑁆𑀫𑀼𑀬𑁆𑀳𑀦𑁆𑀢𑀺, 𑀫𑀼𑀢𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀲𑀫𑁆𑀧𑀫𑀼𑀬𑁆𑀳𑀦𑁆𑀢𑀺. 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑀸𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀸𑀬 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑀸. ‘‘𑀕𑀢𑀸’’𑀢𑀺 𑀯𑀸 𑀧𑀸𑀞𑁄, 𑀅𑀦𑁆𑀥𑀪𑀸𑀯𑀁 𑀉𑀧𑀕𑀢𑀸𑀢𑀺 𑀅𑀢𑁆𑀣𑁄. 𑀧𑀕𑀸𑀴𑁆𑀳𑁄𑀢𑀺 𑀧𑀯𑀺𑀝𑁆𑀞𑁄. 𑀑𑀕𑀸𑀴𑁆𑀳𑁄𑀢𑀺 𑀳𑁂𑀝𑁆𑀞𑀸𑀪𑀸𑀕𑀁 𑀧𑀯𑀺𑀝𑁆𑀞𑁄. 𑀅𑀚𑁆𑀛𑁄𑀕𑀸𑀴𑁆𑀳𑁄𑀢𑀺 𑀅𑀥𑀺𑀑𑀕𑀸𑀳𑀺𑀢𑁆𑀯𑀸 𑀅𑀯𑀢𑁆𑀣𑀭𑀺𑀢𑁆𑀯𑀸 𑀯𑀺𑀲𑁂𑀲𑁂𑀦 𑀧𑀯𑀺𑀝𑁆𑀞𑁄 𑀦𑀺𑀫𑀼𑀕𑁆𑀕𑁄𑀢𑀺 𑀅𑀥𑁄𑀫𑀼𑀔𑀁 𑀳𑀼𑀢𑁆𑀯𑀸 𑀧𑀯𑀺𑀝𑁆𑀞𑁄. 𑀅𑀣 𑀯𑀸 𑀤𑀲𑁆𑀲𑀦𑀲𑀁𑀲𑀕𑁆𑀕𑁂𑀦 𑀑𑀕𑀸𑀴𑁆𑀳𑁄. 𑀲𑀯𑀦𑀲𑀁𑀲𑀕𑁆𑀕𑁂𑀦 𑀅𑀚𑁆𑀛𑁄𑀕𑀸𑀴𑁆𑀳𑁄. 𑀯𑀘𑀦𑀲𑀁𑀲𑀕𑁆𑀕𑁂𑀦 𑀦𑀺𑀫𑀼𑀕𑁆𑀕𑁄. 𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑀯𑀺𑀭𑀳𑀺𑀢𑁄 𑀯𑀸 𑀑𑀕𑀸𑀴𑁆𑀳𑁄. 𑀲𑀤𑁆𑀥𑀫𑁆𑀫𑀲𑁂𑀯𑀦𑀯𑀺𑀭𑀳𑀺𑀢𑁄 𑀯𑀸 𑀅𑀚𑁆𑀛𑁄𑀕𑀸𑀴𑁆𑀳𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀯𑀺𑀭𑀳𑀺𑀢𑁄 𑀯𑀸 𑀦𑀺𑀫𑀼𑀕𑁆𑀕𑁄.

𑀯𑀺𑀯𑁂𑀓𑀸𑀢𑀺 𑀯𑀺𑀯𑀺𑀢𑁆𑀢𑀺, 𑀯𑀺𑀯𑀺𑀘𑁆𑀘𑀦𑀁 𑀯𑀸 𑀯𑀺𑀯𑁂𑀓𑁄. 𑀢𑀬𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀓𑀸𑀬𑀯𑀺𑀯𑁂𑀓𑁄𑀢𑀺 𑀓𑀸𑀬𑁂𑀦 𑀯𑀺𑀯𑀺𑀢𑁆𑀢𑀺, 𑀯𑀺𑀦𑀸 𑀅𑀧𑀲𑀓𑁆𑀓𑀦𑀁. 𑀘𑀺𑀢𑁆𑀢𑀯𑀺𑀯𑁂𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀦𑀢𑁄 𑀪𑀺𑀓𑁆𑀔𑀼. 𑀯𑀺𑀯𑀺𑀢𑁆𑀢𑀦𑁆𑀢𑀺 𑀲𑀼𑀜𑁆𑀜𑀁, 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀤𑁂𑀯 𑀳𑀺 𑀲𑀦𑁆𑀥𑀸𑀬 𑀯𑀺𑀪𑀗𑁆𑀕𑁂 ‘‘𑀯𑀺𑀯𑀺𑀢𑁆𑀢𑀦𑁆𑀢𑀺 𑀲𑀦𑁆𑀢𑀺𑀓𑁂 𑀘𑁂𑀧𑀺 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀢𑀜𑁆𑀘 𑀅𑀦𑀸𑀓𑀺𑀡𑁆𑀡𑀁 𑀕𑀳𑀝𑁆𑀞𑁂𑀳𑀺 𑀧𑀩𑁆𑀩𑀚𑀺𑀢𑁂𑀳𑀺, 𑀢𑁂𑀦 𑀢𑀁 𑀯𑀺𑀯𑀺𑀢𑁆𑀢’’𑀦𑁆𑀢𑀺 (𑀯𑀺𑀪. 𑁫𑁨𑁬) 𑀯𑀼𑀢𑁆𑀢𑀁. 𑀲𑁂𑀢𑀺 𑀘𑁂𑀯 𑀆𑀲𑀢𑀺 𑀘 𑀏𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀁, 𑀫𑀜𑁆𑀘𑀧𑀻𑀞𑀸𑀤𑀻𑀦𑀫𑁂𑀢𑀫𑀥𑀺𑀯𑀘𑀦𑀁. 𑀢𑁂𑀦𑀸𑀳 𑁋

‘‘𑀲𑁂𑀦𑀸𑀲𑀦𑀦𑁆𑀢𑀺 𑀫𑀜𑁆𑀘𑁄𑀧𑀺 𑀲𑁂𑀦𑀸𑀲𑀦𑀁, 𑀧𑀻𑀞𑀫𑁆𑀧𑀺… 𑀪𑀺𑀲𑀺𑀧𑀺… 𑀩𑀺𑀩𑁆𑀩𑁄𑀳𑀦𑀫𑁆𑀧𑀺… 𑀯𑀺𑀳𑀸𑀭𑁄𑀧𑀺… 𑀅𑀟𑁆𑀠𑀬𑁄𑀕𑁄𑀧𑀺… 𑀧𑀸𑀲𑀸𑀤𑁄𑀧𑀺… 𑀅𑀝𑁆𑀝𑁄𑀧𑀺… 𑀫𑀸𑀴𑁄𑀧𑀺… 𑀮𑁂𑀡𑀫𑁆𑀧𑀺… 𑀕𑀼𑀳𑀸𑀧𑀺… 𑀭𑀼𑀓𑁆𑀔𑀫𑀽𑀮𑀫𑁆𑀧𑀺… 𑀯𑁂𑀴𑀼𑀕𑀼𑀫𑁆𑀩𑁄𑀧𑀺… 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀲𑁂𑀦𑀸𑀲𑀦’’𑀦𑁆𑀢𑀺 (𑀯𑀺𑀪. 𑁫𑁨𑁭).

𑀅𑀧𑀺 𑀘 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸𑀢𑀺 𑀇𑀤𑀁 𑀯𑀺𑀳𑀸𑀭𑀲𑁂𑀦𑀸𑀲𑀦𑀁 𑀦𑀸𑀫. 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀩𑀺𑀩𑁆𑀩𑁄𑀳𑀦𑀦𑁆𑀢𑀺 𑀇𑀤𑀁 𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀁 𑀦𑀸𑀫. 𑀘𑀺𑀫𑀺𑀮𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄𑀢𑀺 𑀇𑀤𑀁 𑀲𑀦𑁆𑀣𑀢𑀲𑁂𑀦𑀸𑀲𑀦𑀁 𑀦𑀸𑀫. 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀇𑀤𑀁 𑀑𑀓𑀸𑀲𑀲𑁂𑀦𑀸𑀲𑀦𑀁 𑀦𑀸𑀫𑀸𑀢𑀺 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀲𑁂𑀦𑀸𑀲𑀦𑀁 𑀳𑁄𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀲𑁂𑀦𑀸𑀲𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯.

𑀇𑀥 𑀧𑀦𑀲𑁆𑀲 𑀲𑀓𑀼𑀡𑀲𑀤𑀺𑀲𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀘𑁆𑀙𑀯𑀺𑀓𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀭𑀜𑁆𑀜𑀦𑁆𑀢𑀺 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀇𑀤𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀆𑀕𑀢𑀁. ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀇𑀤𑀁 𑀧𑀦 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑀁. 𑀢𑀲𑁆𑀲 𑀮𑀓𑁆𑀔𑀡𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁧) 𑀯𑀼𑀢𑁆𑀢𑀁. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀲𑀦𑁆𑀢𑀘𑁆𑀙𑀸𑀬𑀁 𑀯𑀺𑀯𑀺𑀢𑁆𑀢𑀁 𑀭𑀼𑀓𑁆𑀔𑀫𑀽𑀮𑀁. 𑀧𑀩𑁆𑀩𑀢𑀦𑁆𑀢𑀺 𑀲𑁂𑀮𑀁. 𑀢𑀢𑁆𑀣 𑀳𑀺 𑀉𑀤𑀓𑀲𑁄𑀡𑁆𑀟𑀻𑀲𑀼 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀻𑀢𑀸𑀬 𑀭𑀼𑀓𑁆𑀔𑀘𑁆𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀦𑀸𑀦𑀸𑀤𑀺𑀲𑀸𑀲𑀼 𑀔𑀸𑀬𑀫𑀸𑀦𑀸𑀲𑀼 𑀲𑀻𑀢𑁂𑀦 𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀓𑀦𑁆𑀤𑀭𑀦𑁆𑀢𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀤𑀸𑀭𑀺𑀢𑀁, 𑀉𑀤𑀓𑁂𑀦 𑀪𑀺𑀦𑁆𑀦𑀁 𑀧𑀩𑁆𑀩𑀢𑀧𑀤𑁂𑀲𑀁. 𑀬𑀁 ‘‘𑀦𑀤𑀻𑀢𑀼𑀫𑁆𑀩’’𑀦𑁆𑀢𑀺𑀧𑀺 ‘‘𑀦𑀤𑀻𑀓𑀼𑀜𑁆𑀚’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀳𑀺 𑀭𑀚𑀢𑀧𑀝𑁆𑀝𑀲𑀤𑀺𑀲𑀸 𑀯𑀸𑀮𑀼𑀓𑀸 𑀳𑁄𑀢𑀺, 𑀫𑀢𑁆𑀣𑀓𑁂 𑀫𑀡𑀺𑀯𑀺𑀢𑀸𑀦𑀁 𑀯𑀺𑀬 𑀯𑀦𑀕𑀳𑀦𑀁, 𑀫𑀡𑀺𑀔𑀦𑁆𑀥𑀲𑀤𑀺𑀲𑀁 𑀉𑀤𑀓𑀁 𑀲𑀦𑁆𑀤𑀢𑀺. 𑀏𑀯𑀭𑀽𑀧𑀁 𑀓𑀦𑁆𑀤𑀭𑀁 𑀑𑀭𑀼𑀬𑁆𑀳 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀢𑁆𑀢𑀸𑀦𑀺 𑀲𑀻𑀢𑀸𑀦𑀺 𑀓𑀢𑁆𑀯𑀸 𑀯𑀸𑀮𑀼𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀕𑀺𑀭𑀺𑀕𑀼𑀳𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀁, 𑀏𑀓𑀲𑁆𑀫𑀺𑀁𑀬𑁂𑀯 𑀯𑀸 𑀉𑀫𑀗𑁆𑀕𑀲𑀤𑀺𑀲𑀁 𑀫𑀳𑀸𑀯𑀺𑀯𑀭𑀁. 𑀲𑀼𑀲𑀸𑀦𑀮𑀓𑁆𑀔𑀡𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁪) 𑀯𑀼𑀢𑁆𑀢𑀁.

𑀯𑀦𑀧𑀢𑁆𑀣𑀦𑁆𑀢𑀺 𑀕𑀸𑀫𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀁 𑀬𑀢𑁆𑀣 𑀦 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀤𑀽𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀺 (𑀯𑀺𑀪. 𑁫𑁩𑁧). 𑀅𑀩𑁆𑀪𑁄𑀓𑀸𑀲𑀦𑁆𑀢𑀺 𑀅𑀘𑁆𑀙𑀦𑁆𑀦𑀁. 𑀆𑀓𑀗𑁆𑀔𑀫𑀸𑀦𑁄 𑀧𑀦𑁂𑀢𑁆𑀣 𑀘𑀻𑀯𑀭𑀓𑀼𑀝𑀺𑀁 𑀓𑀢𑁆𑀯𑀸 𑀯𑀲𑀢𑀺. 𑀧𑀮𑀸𑀮𑀧𑀼𑀜𑁆𑀚𑀦𑁆𑀢𑀺 𑀧𑀮𑀸𑀮𑀭𑀸𑀲𑀺𑀁. 𑀫𑀳𑀸𑀧𑀮𑀸𑀮𑀧𑀼𑀜𑁆𑀚𑀢𑁄 𑀳𑀺 𑀧𑀮𑀸𑀮𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁂 𑀆𑀮𑀬𑁂 𑀓𑀭𑁄𑀦𑁆𑀢𑀺, 𑀕𑀘𑁆𑀙𑀕𑀼𑀫𑁆𑀩𑀸𑀤𑀻𑀦𑀫𑁆𑀧𑀺 𑀉𑀧𑀭𑀺 𑀧𑀮𑀸𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀲𑀩𑁆𑀩𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀸𑀬𑁂𑀦 𑀯𑀺𑀯𑀺𑀢𑁆𑀢𑁄 𑀯𑀺𑀳𑀭𑀢𑀻’’𑀢𑀺𑀆𑀤𑀺. 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺 𑀧𑀯𑀢𑁆𑀢𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀭𑀺𑀬𑀢𑀻𑀢𑀺 𑀇𑀭𑀺𑀬𑀸𑀧𑀣𑀁 𑀯𑀢𑁆𑀢𑀬𑀢𑀺. 𑀯𑀢𑁆𑀢𑀢𑀻𑀢𑀺 𑀇𑀭𑀺𑀬𑀸𑀧𑀣𑀯𑀼𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀧𑀸𑀮𑁂𑀢𑀻𑀢𑀺 𑀇𑀭𑀺𑀬𑀸𑀧𑀣𑀁 𑀭𑀓𑁆𑀔𑀢𑀺. 𑀬𑀧𑁂𑀢𑀻𑀢𑀺 𑀬𑀧𑀬𑀢𑀺. 𑀬𑀸𑀧𑁂𑀢𑀻𑀢𑀺 𑀬𑀸𑀧𑀬𑀢𑀺.

𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀓𑀼𑀲𑀮𑀚𑁆𑀛𑀸𑀦𑀲𑀫𑀗𑁆𑀕𑀺𑀲𑁆𑀲. 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀦𑁆𑀢𑀺 𑀉𑀧𑀘𑀸𑀭𑁂𑀦 𑀦𑀻𑀯𑀭𑀡𑁂𑀳𑀺 𑀯𑀺𑀯𑀺𑀢𑁆𑀢𑀫𑁆𑀧𑀺 𑀲𑀫𑀸𑀦𑀁 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁 𑀲𑀼𑀝𑁆𑀞𑀼 𑀯𑀺𑀯𑀺𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀤𑀼𑀓𑁆𑀔𑁂𑀳𑀺 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀲𑀫𑀸𑀧𑀦𑁆𑀦𑀸𑀦𑀦𑁆𑀢𑀺. 𑀭𑀽𑀧𑀲𑀜𑁆𑀜𑀸𑀬𑀸𑀢𑀺 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀧𑀜𑁆𑀘𑀤𑀲𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀲𑀜𑁆𑀜𑀸𑀬. 𑀧𑀝𑀺𑀖𑀲𑀜𑁆𑀜𑀸𑀬𑀸𑀢𑀺 𑀘𑀓𑁆𑀔𑀼𑀭𑀽𑀧𑀸𑀤𑀺𑀲𑀗𑁆𑀖𑀝𑁆𑀝𑀦𑁂𑀦 𑀉𑀧𑁆𑀧𑀦𑁆𑀦𑀸𑀬 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀘. 𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀬 𑀘𑀢𑀼𑀘𑀢𑁆𑀢𑀸𑀮𑀻𑀲𑀓𑀸𑀫𑀸𑀯𑀘𑀭𑀲𑀜𑁆𑀜𑀸𑀬 𑀘 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺 𑀲𑀼𑀜𑁆𑀜𑀁 𑀳𑁄𑀢𑀺.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀏𑀢𑁆𑀣 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁, 𑀆𑀓𑀸𑀲𑀁 𑀅𑀦𑀦𑁆𑀢𑀁 𑀆𑀓𑀸𑀲𑀸𑀦𑀦𑁆𑀢𑀁, 𑀆𑀓𑀸𑀲𑀸𑀦𑀦𑁆𑀢𑀫𑁂𑀯 𑀆𑀓𑀸𑀲𑀸𑀦𑀜𑁆𑀘𑀁, 𑀢𑀁 𑀆𑀓𑀸𑀲𑀸𑀦𑀜𑁆𑀘𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀫𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀫𑀺𑀯𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀸𑀭𑀫𑁆𑀫𑀡𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀓𑀼𑀲𑀮𑀓𑀺𑀭𑀺𑀬𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲. 𑀭𑀽𑀧𑀲𑀜𑁆𑀜𑀸𑀬𑀸𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀢𑁄 𑀘𑁂𑀯 𑀢𑀤𑀸𑀭𑀫𑁆𑀫𑀡𑀢𑁄 𑀘. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁆𑀧𑀺 𑀳𑀺 ‘‘𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁨𑁦𑁯), 𑀢𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺𑀆𑀤𑀻𑀲𑀼𑀧𑀺 (𑀧𑀝𑀺. 𑀫. 𑁧.𑁨𑁦𑁯). 𑀢𑀲𑁆𑀫𑀸 𑀇𑀥 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸𑀢𑀺 𑀏𑀯𑀁 𑀲𑀜𑁆𑀜𑀸𑀲𑀻𑀲𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀭𑀽𑀧𑁂 𑀲𑀜𑁆𑀜𑀸 𑀅𑀲𑁆𑀲𑀸𑀢𑀺 𑀭𑀽𑀧𑀲𑀜𑁆𑀜𑀁, 𑀭𑀽𑀧𑀫𑀲𑁆𑀲 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀪𑁂𑀤𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀸𑀬 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀧𑀜𑁆𑀘𑀤𑀲𑀯𑀺𑀥𑀸𑀬 𑀛𑀸𑀦𑀲𑀗𑁆𑀔𑀸𑀢𑀸𑀬 𑀭𑀽𑀧𑀲𑀜𑁆𑀜𑀸𑀬. 𑀏𑀢𑀸𑀬 𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀯𑀲𑁂𑀦 𑀅𑀝𑁆𑀞𑀯𑀺𑀥𑀸𑀬 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀸𑀬 𑀭𑀽𑀧𑀲𑀜𑁆𑀜𑀸𑀬.

𑀧𑀝𑀺𑀖𑀲𑀜𑁆𑀜𑀸𑀬𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀧𑀝𑀺𑀖𑀸𑀢𑁂𑀦 𑀲𑀫𑀼𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸, 𑀭𑀽𑀧𑀲𑀜𑁆𑀜𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀸 𑀧𑀝𑀺𑀖𑀲𑀜𑁆𑀜𑀸? 𑀭𑀽𑀧𑀲𑀜𑁆𑀜𑀸 𑀲𑀤𑁆𑀤𑀲𑀜𑁆𑀜𑀸 𑀕𑀦𑁆𑀥𑀲𑀜𑁆𑀜𑀸 𑀭𑀲𑀲𑀜𑁆𑀜𑀸 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀖𑀲𑀜𑁆𑀜𑀸𑀬𑁄’’𑀢𑀺 (𑀯𑀺𑀪. 𑁬𑁦𑁩). 𑀢𑀸 𑀓𑀼𑀲𑀮𑀯𑀺𑀧𑀸𑀓𑀸 𑀧𑀜𑁆𑀘 𑀅𑀓𑀼𑀲𑀮𑀯𑀺𑀧𑀸𑀓𑀸 𑀧𑀜𑁆𑀘𑀸𑀢𑀺 𑀏𑀢𑀸𑀬 𑀧𑀝𑀺𑀖𑀲𑀜𑁆𑀜𑀸𑀬.

𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑀸𑀢𑀺 𑀦𑀸𑀦𑀢𑁆𑀢𑁂 𑀕𑁄𑀘𑀭𑁂 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬, 𑀦𑀸𑀦𑀢𑁆𑀢𑀸𑀬 𑀯𑀸 𑀲𑀜𑁆𑀜𑀸𑀬. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸? 𑀅𑀲𑀫𑀸𑀧𑀦𑁆𑀦𑀲𑁆𑀲 𑀫𑀦𑁄𑀥𑀸𑀢𑀼𑀲𑀫𑀗𑁆𑀕𑀺𑀲𑁆𑀲 𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑀗𑁆𑀕𑀺𑀲𑁆𑀲 𑀯𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑁄’’𑀢𑀺 (𑀯𑀺𑀪. 𑁬𑁦𑁪) 𑀏𑀯𑀁 𑀯𑀺𑀪𑀗𑁆𑀕𑁂 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀸. 𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀅𑀲𑀫𑀸𑀧𑀦𑁆𑀦𑀲𑁆𑀲 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀕𑀳𑀺𑀢𑀸 𑀲𑀜𑁆𑀜𑀸 𑀭𑀽𑀧𑀲𑀤𑁆𑀤𑀸𑀤𑀺𑀪𑁂𑀤𑁂 𑀦𑀸𑀦𑀢𑁆𑀢𑁂 𑀦𑀸𑀦𑀸𑀲𑀪𑀸𑀯𑁂 𑀕𑁄𑀘𑀭𑁂 𑀧𑀯𑀢𑁆𑀢𑀦𑁆𑀢𑀺. 𑀬𑀲𑁆𑀫𑀸 𑀘𑁂𑀲𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀤𑁆𑀯𑁂 𑀅𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑀜𑁆𑀜𑀸𑀢𑀺 𑀏𑀯𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀲𑀜𑁆𑀜𑀸 𑀦𑀸𑀦𑀢𑁆𑀢𑀸 𑀦𑀸𑀦𑀸𑀲𑀪𑀸𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀸, 𑀢𑀲𑁆𑀫𑀸 ‘‘𑀦𑀸𑀦𑀢𑁆𑀢𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸, 𑀢𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬.

𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀻𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸𑀧𑀝𑀺𑀖𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀜𑁆𑀜𑀸𑀲𑀗𑁆𑀔𑀸𑀢𑀸𑀳𑀺 𑀲𑀜𑁆𑀜𑀸𑀳𑀺 𑀛𑀸𑀦𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺 𑀯𑀺𑀦𑀸 𑀳𑁄𑀢𑀺 𑀅𑀧𑀲𑀓𑁆𑀓𑀦𑀁 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁆𑀢𑀺 𑀏𑀢𑀤𑁂𑀯 𑀯𑀺𑀜𑁆𑀜𑀸𑀡𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀫𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁, 𑀆𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀲𑁆𑀲 𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀓𑀺𑀜𑁆𑀘𑀦𑀦𑁆𑀢𑀺 𑀅𑀓𑀺𑀜𑁆𑀘𑀦𑀁, 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀲𑁆𑀲 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀺𑀜𑁆𑀘𑀦𑀲𑁆𑀲 𑀪𑀸𑀯𑁄 𑀆𑀓𑀺𑀜𑁆𑀘𑀜𑁆𑀜𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀸𑀧𑀕𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀆𑀓𑀺𑀜𑁆𑀘𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀫𑀲𑁆𑀲𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀧𑀕𑀫𑀸𑀭𑀫𑁆𑀫𑀡𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀢𑀸𑀬 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀸𑀬 𑀲𑀜𑁆𑀜𑀸𑀬 𑀪𑀸𑀯𑀢𑁄 𑀢𑀁 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸𑀧𑀝𑀺𑀧𑀦𑁆𑀦𑀲𑁆𑀲 𑀲𑀸 𑀲𑀜𑁆𑀜𑀸 𑀳𑁄𑀢𑀺, 𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀯𑀺𑀪𑀗𑁆𑀕𑁂 (𑀯𑀺𑀪. 𑁬𑁨𑁦) ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀢𑀜𑁆𑀜𑁂𑀯 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀻𑀢𑀺 ‘‘𑀲𑀦𑁆𑀢𑁄𑀯𑀢𑀸𑀬𑀁 𑀲𑀫𑀸𑀧𑀢𑁆𑀢𑀺, 𑀬𑀢𑁆𑀭 𑀳𑀺 𑀦𑀸𑀫 𑀦𑀢𑁆𑀣𑀺𑀪𑀸𑀯𑀫𑁆𑀧𑀺 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀯𑀲𑀢𑀻’’𑀢𑀺 𑀏𑀯𑀁 𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬 𑀦𑀁 ‘‘𑀲𑀦𑁆𑀢𑀸’’𑀢𑀺 𑀫𑀦𑀲𑀺 𑀓𑀭𑁄𑀢𑀺. 𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀢𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀛𑀸𑀦𑀘𑀺𑀢𑁆𑀢𑀁 𑀲𑀼𑀜𑁆𑀜𑀁 𑀳𑁄𑀢𑀺.

𑀲𑁄𑀢𑀸𑀧𑀦𑁆𑀦𑀲𑁆𑀲𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀲𑁆𑀲. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸𑀢𑀺 𑀯𑀻𑀲𑀢𑀺𑀯𑀢𑁆𑀣𑀼𑀓𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸. 𑀯𑀺𑀘𑀺𑀓𑀺𑀘𑁆𑀙𑀸𑀬𑀸𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀓𑀗𑁆𑀔𑀸𑀬. 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸𑀢𑀺 ‘‘𑀲𑀻𑀮𑁂𑀦 𑀲𑀼𑀤𑁆𑀥𑀺, 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺 𑀧𑀭𑀸𑀫𑀲𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀤𑀺𑀝𑁆𑀞𑀺. 𑀤𑀺𑀝𑁆𑀞𑀸𑀦𑀼𑀲𑀬𑀸𑀢𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀓𑀸 𑀤𑀺𑀝𑁆𑀞𑀸𑀦𑀼𑀲𑀬𑀸. 𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸. 𑀢𑀤𑁂𑀓𑀝𑁆𑀞𑁂𑀳𑀺 𑀘𑀸𑀢𑀺 𑀢𑁂𑀳𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀳𑀺 𑀏𑀓𑀢𑁄 𑀞𑀺𑀢𑁂𑀳𑀺 𑀘. 𑀉𑀧𑀢𑀸𑀧𑁂𑀦𑁆𑀢𑀺 𑀯𑀺𑀩𑀸𑀥𑁂𑀦𑁆𑀢𑀺 𑀘𑀸𑀢𑀺 𑀓𑀺𑀮𑁂𑀲𑀸, 𑀢𑁂𑀳𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸𑀤𑀺𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀲𑀼𑀜𑁆𑀜𑀁 𑀳𑁄𑀢𑀺. 𑀏𑀢𑁆𑀣 ‘‘𑀢𑀤𑁂𑀓𑀝𑁆𑀞’’𑀦𑁆𑀢𑀺 𑀤𑀼𑀯𑀺𑀥𑀁 𑀏𑀓𑀝𑁆𑀞𑀁 𑀧𑀳𑀸𑀦𑁂𑀓𑀝𑁆𑀞𑀁 𑀲𑀳𑀚𑁂𑀓𑀝𑁆𑀞𑀜𑁆𑀘. 𑀅𑀧𑀸𑀬𑀕𑀫𑀦𑀻𑀬𑀸 𑀳𑀺 𑀓𑀺𑀮𑁂𑀲𑀸 𑀬𑀸𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀦 𑀧𑀳𑀻𑀬𑀦𑁆𑀢𑀺, 𑀢𑀸𑀯 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀳𑀺 𑀲𑀳 𑀏𑀓𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀞𑀺𑀢𑀸𑀢𑀺 𑀧𑀳𑀸𑀦𑁂𑀓𑀝𑁆𑀞𑀸. 𑀤𑀲𑀲𑀼 𑀳𑀺 𑀓𑀺𑀮𑁂𑀲𑁂𑀲𑀼 𑀇𑀥 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀏𑀯 𑀆𑀕𑀢𑀸. 𑀅𑀦𑀼𑀲𑀬𑁂𑀲𑀼 𑀤𑀺𑀝𑁆𑀞𑀸𑀦𑀼𑀲𑀬𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 𑀆𑀕𑀢𑀸. 𑀲𑁂𑀲𑀸 𑀧𑀦 𑀅𑀧𑀸𑀬𑀕𑀫𑀦𑀻𑀬𑁄 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀅𑀝𑁆𑀞 𑀓𑀺𑀮𑁂𑀲𑀸 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀳𑀺 𑀲𑀳 𑀧𑀳𑀸𑀦𑁂𑀓𑀝𑁆𑀞𑀸 𑀳𑀼𑀢𑁆𑀯𑀸 𑀤𑁆𑀯𑀻𑀳𑀺 𑀅𑀦𑀼𑀲𑀬𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀭𑀸𑀕𑀤𑁄𑀲𑀫𑁄𑀳𑀧𑀫𑀼𑀔𑁂𑀲𑀼 𑀯𑀸 𑀤𑀺𑀬𑀟𑁆𑀠𑁂𑀲𑀼 𑀓𑀺𑀮𑁂𑀲𑀲𑀳𑀲𑁆𑀲𑁂𑀲𑀼 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀬𑀸 𑀧𑀳𑀻𑀬𑀫𑀸𑀦𑀸𑀬 𑀤𑀺𑀝𑁆𑀞𑀺𑀬𑀸 𑀲𑀳 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸, 𑀤𑀺𑀝𑁆𑀞𑀸𑀦𑀼𑀲𑀬𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁂𑀳𑀺 𑀲𑀳 𑀅𑀧𑀸𑀬𑀕𑀫𑀦𑀻𑀬𑀸 𑀲𑀩𑁆𑀩𑀓𑀺𑀮𑁂𑀲𑀸 𑀧𑀳𑀸𑀦𑁂𑀓𑀝𑁆𑀞𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀲𑀳𑀚𑁂𑀓𑀝𑁆𑀞𑀸 𑀧𑀦 𑀤𑀺𑀝𑁆𑀞𑀺𑀬𑀸 𑀲𑀳 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘 𑀲𑀳 𑀏𑀓𑁂𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀞𑀺𑀢𑀸 𑀅𑀯𑀲𑁂𑀲𑀓𑀺𑀮𑁂𑀲𑀸.

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀳𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀲𑀳𑀕𑀢𑀸𑀦𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀜𑁆𑀘𑀸𑀢𑀺 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀢𑀢𑁆𑀣 𑀤𑁆𑀯𑀻𑀲𑀼 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀲𑀼 𑀧𑀳𑀻𑀬𑀫𑀸𑀦𑁂𑀲𑀼 𑀢𑁂𑀳𑀺 𑀲𑀳𑀚𑀸𑀢𑁄 𑀮𑁄𑀪𑁄 𑀫𑁄𑀳𑁄 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀓𑀺𑀮𑁂𑀲𑀸 𑀲𑀳𑀚𑁂𑀓𑀝𑁆𑀞𑀯𑀲𑁂𑀦 𑀧𑀳𑀻𑀬𑀦𑁆𑀢𑀺, 𑀤𑁆𑀯𑀻𑀲𑀼 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀲𑀼 𑀧𑀳𑀻𑀬𑀫𑀸𑀦𑁂𑀲𑀼 𑀢𑁂𑀳𑀺 𑀲𑀳𑀚𑀸𑀢𑁄 𑀮𑁄𑀪𑁄 𑀫𑁄𑀳𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀓𑀺𑀮𑁂𑀲𑀸 𑀲𑀳𑀚𑁂𑀓𑀝𑁆𑀞𑀯𑀲𑁂𑀦 𑀧𑀳𑀻𑀬𑀦𑁆𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀘𑀺𑀢𑁆𑀢𑁂 𑀧𑀳𑀻𑀬𑀫𑀸𑀦𑁂 𑀢𑁂𑀦 𑀲𑀳𑀚𑀸𑀢𑁄 𑀫𑁄𑀳𑁄 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀓𑀺𑀮𑁂𑀲𑀸 𑀲𑀳𑀚𑁂𑀓𑀝𑁆𑀞𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀢𑁂𑀳𑀺 𑀤𑀼𑀯𑀺𑀥𑁂𑀓𑀝𑁆𑀞𑁂𑀳𑀺 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀻𑀢𑀺 𑀫𑀕𑁆𑀕𑀘𑀺𑀢𑁆𑀢𑀁 𑀯𑀺𑀯𑀺𑀘𑁆𑀘𑀢𑀺, 𑀨𑀮𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀯𑀺𑀬𑀼𑀢𑁆𑀢𑀁 𑀅𑀧𑀲𑀓𑁆𑀓𑀺𑀢𑀁 𑀲𑀼𑀜𑁆𑀜𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀓𑀤𑀸𑀕𑀸𑀫𑀺𑀲𑁆𑀲 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸𑀢𑀺 𑀑𑀴𑀸𑀭𑀺𑀓𑀪𑀽𑀢𑀸 𑀓𑀸𑀬𑀤𑁆𑀯𑀸𑀭𑁂 𑀯𑀻𑀢𑀺𑀓𑁆𑀓𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀣𑀽𑀮𑀪𑀽𑀢𑀸 𑀫𑁂𑀣𑀼𑀦𑀭𑀸𑀕𑀲𑀗𑁆𑀔𑀸𑀢𑀸 𑀲𑀜𑁆𑀜𑁄𑀚𑀦𑀸. 𑀲𑁄 𑀳𑀺 𑀓𑀸𑀫𑀪𑀯𑁂 𑀲𑀜𑁆𑀜𑁄𑀚𑁂𑀢𑀻𑀢𑀺 ‘‘𑀲𑀜𑁆𑀜𑁄𑀚𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀖𑀲𑀜𑁆𑀜𑁄𑀚𑀦𑀸𑀢𑀺 𑀩𑁆𑀬𑀸𑀧𑀸𑀤𑀲𑀜𑁆𑀜𑁄𑀚𑀦𑀸. 𑀲𑁄 𑀳𑀺 𑀆𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀢𑀻𑀢𑀺 ‘‘𑀧𑀝𑀺𑀖’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀏𑀯 𑀣𑀸𑀫𑀕𑀢𑀝𑁆𑀞𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸. 𑀅𑀡𑀼𑀲𑀳𑀕𑀢𑀸𑀢𑀺 𑀲𑀼𑀔𑀼𑀫𑀪𑀽𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀅𑀡𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸𑀢𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀦𑀯𑀲𑁂𑀦 𑀲𑀼𑀔𑀼𑀫𑀪𑀽𑀢𑀸 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸. 𑀢𑀤𑁂𑀓𑀝𑁆𑀞𑁂𑀳𑀺 𑀘𑀸𑀢𑀺 𑀯𑀼𑀢𑁆𑀢𑀢𑁆𑀣𑁂𑀳𑀺 𑀤𑀼𑀯𑀺𑀥𑁂𑀓𑀝𑁆𑀞𑁂𑀳𑀺 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀲𑀼𑀜𑁆𑀜𑀁 𑀳𑁄𑀢𑀺.

𑀅𑀭𑀳𑀢𑁄𑀢𑀺 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸 ‘‘𑀅𑀭𑀳𑀸’’𑀢𑀺 𑀮𑀤𑁆𑀥𑀦𑀸𑀫𑀲𑁆𑀲. 𑀭𑀽𑀧𑀭𑀸𑀕𑀸𑀢𑀺 𑀭𑀽𑀧𑀪𑀯𑁂 𑀙𑀦𑁆𑀤𑀭𑀸𑀕𑀸. 𑀅𑀭𑀽𑀧𑀭𑀸𑀕𑀸𑀢𑀺 𑀅𑀭𑀽𑀧𑀪𑀯𑁂 𑀙𑀦𑁆𑀤𑀭𑀸𑀕𑀸. 𑀫𑀸𑀦𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸 𑀫𑀸𑀦𑀸 𑀏𑀯. 𑀢𑀣𑀸 𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀫𑀸𑀦𑀸𑀦𑀼𑀲𑀬𑀸𑀤𑀬𑁄 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸. 𑀏𑀢𑁂𑀲𑀼 𑀉𑀡𑁆𑀡𑀢𑀺𑀮𑀓𑁆𑀔𑀡𑁄 𑀫𑀸𑀦𑁄. 𑀅𑀯𑀽𑀧𑀲𑀫𑀮𑀓𑁆𑀔𑀡𑀁 𑀉𑀤𑁆𑀥𑀘𑁆𑀘𑀁. 𑀅𑀦𑁆𑀥𑀪𑀸𑀯𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸. 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀯𑀲𑁂𑀦 𑀧𑀯𑀢𑁆𑀢𑀸 𑀪𑀯𑀭𑀸𑀕𑀸𑀦𑀼𑀲𑀬𑀸. 𑀢𑀤𑁂𑀓𑀝𑁆𑀞𑁂𑀳𑀺 𑀘𑀸𑀢𑀺 𑀢𑁂𑀳𑀺 𑀏𑀓𑀢𑁄 𑀞𑀺𑀢𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺. 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀻𑀢𑀺 𑀅𑀚𑁆𑀛𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀅𑀓𑀼𑀲𑀮𑀓𑁆𑀔𑀦𑁆𑀥𑁂 𑀉𑀧𑀸𑀤𑀸𑀬 ‘‘𑀩𑀳𑀺𑀤𑁆𑀥𑀸’’𑀢𑀺 𑀲𑀗𑁆𑀔𑀁 𑀕𑀢𑁂𑀳𑀺 𑀅𑀚𑁆𑀛𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀯𑀢𑁆𑀢𑁂𑀳𑀺 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑁂𑀳𑀺 𑀫𑀕𑁆𑀕𑀘𑀺𑀢𑁆𑀢𑀁 𑀯𑀺𑀯𑀺𑀘𑁆𑀘𑀢𑀺 𑀯𑀺𑀦𑀸 𑀳𑁄𑀢𑀺 𑀅𑀧𑀲𑀓𑁆𑀓𑀢𑀺, 𑀨𑀮𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀯𑀺𑀬𑀼𑀢𑁆𑀢𑀁 𑀅𑀧𑀲𑀓𑁆𑀓𑀺𑀢𑀁 𑀳𑁄𑀢𑀺.

𑀢𑀢𑁆𑀣 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀘𑀸𑀢𑀺 𑀤𑁆𑀯𑀺𑀥𑀸 𑀅𑀦𑀼𑀲𑀬𑀸𑀦𑀁 𑀅𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀳𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀧𑀝𑀺𑀖𑀸𑀦𑀼𑀲𑀬𑀸𑀦𑀁 𑀢𑀢𑀺𑀬𑀫𑀕𑁆𑀕𑁂𑀦 𑀅𑀪𑀸𑀯𑁄 𑀳𑁄𑀢𑀺, 𑀫𑀸𑀦𑀸𑀦𑀼𑀲𑀬𑀲𑁆𑀲 𑀘𑀢𑀼𑀢𑁆𑀣𑀫𑀕𑁆𑀕𑁂𑀦, 𑀤𑀺𑀝𑁆𑀞𑀸𑀦𑀼𑀲𑀬𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀁 𑀧𑀞𑀫𑀫𑀕𑁆𑀕𑁂𑀦, 𑀪𑀯𑀭𑀸𑀕𑀸𑀦𑀼𑀲𑀬𑀸𑀯𑀺𑀚𑁆𑀚𑀸𑀦𑀼𑀲𑀬𑀸𑀦𑀁 𑀘𑀢𑀼𑀢𑁆𑀣𑀫𑀕𑁆𑀕𑁂𑀦𑁂𑀯. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀧𑀦 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀁 𑀅𑀪𑀸𑀯𑁄 𑀳𑁄𑀢𑀺, 𑀤𑀼𑀢𑀺𑀬𑀫𑀕𑁆𑀕𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑀧𑀝𑀺𑀖𑀸𑀦𑀼𑀲𑀬𑀸𑀦𑀁 𑀢𑀦𑀼𑀪𑀸𑀯𑁄, 𑀢𑀢𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀅𑀪𑀸𑀯𑁄, 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀫𑀸𑀦𑀸𑀦𑀼𑀲𑀬𑀪𑀯𑀭𑀸𑀕𑀸𑀦𑀼𑀲𑀬𑀸𑀯𑀺𑀚𑁆𑀚𑀸𑀦𑀼𑀲𑀬𑀸𑀦𑀁 𑀅𑀪𑀸𑀯𑁄 𑀳𑁄𑀢𑀺. 𑀘𑀺𑀢𑁆𑀢𑀯𑀺𑀯𑁂𑀓𑁄𑀢𑀺 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀁 𑀓𑀺𑀮𑁂𑀲𑁂𑀳𑀺 𑀲𑀼𑀜𑁆𑀜𑀪𑀸𑀯𑁄, 𑀢𑀼𑀘𑁆𑀙𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀉𑀧𑀥𑀺𑀯𑀺𑀯𑁂𑀓𑁄𑀢𑀺 𑀓𑀺𑀮𑁂𑀲𑀓𑁆𑀔𑀦𑁆𑀥𑀅𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀸𑀦𑀁 𑀉𑀧𑀥𑀻𑀦𑀁 𑀲𑀼𑀜𑁆𑀜𑀪𑀸𑀯𑁄. 𑀉𑀧𑀥𑀺𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀥𑀺 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀭𑀸𑀕𑀸𑀤𑀬𑁄 𑀬𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀉𑀧𑀢𑀸𑀧𑁂𑀦𑁆𑀢𑀺 𑀯𑀺𑀩𑀸𑀥𑁂𑀦𑁆𑀢𑀻𑀢𑀺 𑀓𑀺𑀮𑁂𑀲𑀸 𑀘. 𑀉𑀧𑀸𑀤𑀸𑀦𑀕𑁄𑀘𑀭𑀸 𑀭𑀽𑀧𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀘. 𑀉𑀧𑀸𑀤𑀸𑀦𑀲𑀫𑁆𑀪𑀽𑀢𑀸 𑀧𑀼𑀜𑁆𑀜𑀸𑀧𑀼𑀜𑁆𑀜𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀘. 𑀅𑀫𑀢𑀦𑁆𑀢𑀺 𑀦𑀢𑁆𑀣𑀺 𑀏𑀢𑀲𑁆𑀲 𑀫𑀭𑀡𑀲𑀗𑁆𑀔𑀸𑀢𑀁 𑀫𑀢𑀦𑁆𑀢𑀺 𑀅𑀫𑀢𑀁, 𑀓𑀺𑀮𑁂𑀲𑀯𑀺𑀲𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀕𑀤𑀦𑁆𑀢𑀺𑀧𑀺 𑀅𑀫𑀢𑀁. 𑀲𑀁𑀲𑀸𑀭𑀬𑁄𑀦𑀺𑀕𑀢𑀺𑀉𑀧𑀧𑀢𑁆𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀁𑀲𑀺𑀩𑁆𑀩𑀢𑀺 𑀯𑀺𑀦𑀢𑀻𑀢𑀺 𑀢𑀡𑁆𑀳𑀸 ‘‘𑀯𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀦𑀺𑀩𑁆𑀩𑀸𑀦𑀁. 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀬 𑀅𑀧𑀕𑀢𑀲𑀭𑀻𑀭𑀸𑀦𑀁. 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑁂 𑀓𑀸𑀫𑀸𑀤𑀺𑀢𑁄 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑁂 𑀅𑀪𑀺𑀭𑀢𑀸𑀦𑀁 𑀢𑀦𑁆𑀦𑀺𑀦𑁆𑀦𑀸𑀦𑀁. 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀉𑀢𑁆𑀢𑀫𑀧𑀭𑀺𑀲𑀼𑀤𑁆𑀥𑀪𑀸𑀯𑀨𑀮𑀁 𑀧𑀸𑀧𑀼𑀡𑀺𑀢𑁆𑀯𑀸 𑀞𑀺𑀢𑀸𑀦𑀁. ‘‘𑀉𑀧𑀓𑁆𑀓𑀺𑀮𑁂𑀲𑀸𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁, 𑀓𑀺𑀮𑁂𑀲𑁂𑀳𑀺 𑀫𑀼𑀢𑁆𑀢𑀪𑀸𑀯𑁂𑀦 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁. 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦’’𑀦𑁆𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺. 𑀦𑀺𑀭𑀽𑀧𑀥𑀻𑀦𑀦𑁆𑀢𑀺 𑀯𑀺𑀕𑀢𑀽𑀧𑀥𑀻𑀦𑀁. 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀦𑁆𑀢𑀺 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀘𑀚𑀺𑀢𑁆𑀯𑀸 𑀯𑀺𑀕𑀢𑀲𑀗𑁆𑀔𑀸𑀭𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀉𑀧𑀕𑀢𑀸𑀦𑀁. 𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣𑀧𑀺 𑀳𑀺 𑀦𑀺𑀩𑁆𑀩𑀸𑀦𑀫𑁂𑀯 ‘‘𑀯𑀺𑀲𑀗𑁆𑀔𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁.

𑀯𑀺𑀤𑀽𑀭𑁂𑀢𑀺 𑀯𑀺𑀯𑀺𑀥𑁂 𑀤𑀽𑀭𑁂. 𑀲𑀼𑀯𑀺𑀤𑀽𑀭𑁂𑀢𑀺 𑀲𑀼𑀝𑁆𑀞𑀼 𑀯𑀺𑀤𑀽𑀭𑁂. 𑀦 𑀲𑀦𑁆𑀢𑀺𑀓𑁂𑀢𑀺 𑀦 𑀲𑀫𑀻𑀧𑁂. 𑀦 𑀲𑀸𑀫𑀦𑁆𑀢𑀸𑀢𑀺 𑀦 𑀏𑀓𑀧𑀲𑁆𑀲𑁂. 𑀅𑀦𑀸𑀲𑀦𑁆𑀦𑁂𑀢𑀺 𑀅𑀦𑀘𑁆𑀘𑀦𑁆𑀢𑀲𑀫𑀻𑀧𑁂. 𑀯𑀺𑀯𑁂𑀓𑀝𑁆𑀞𑁂𑀢𑀺 𑀅𑀢𑀺𑀤𑀽𑀭𑁂, 𑀯𑀺𑀕𑀢𑁂𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑁄𑀢𑀺 𑀢𑀁𑀲𑀤𑀺𑀲𑁄. 𑀢𑀲𑁆𑀲𑀡𑁆𑀞𑀺𑀢𑁄𑀢𑀺 𑀢𑁂𑀦 𑀆𑀓𑀸𑀭𑁂𑀦 𑀞𑀺𑀢𑁄. 𑀢𑀧𑁆𑀧𑀓𑀸𑀭𑁄𑀢𑀺 𑀢𑁂𑀦 𑀧𑀓𑀸𑀭𑁂𑀦 𑀞𑀺𑀢𑁄. 𑀢𑀧𑁆𑀧𑀝𑀺𑀪𑀸𑀕𑁄𑀢𑀺 𑀢𑀁𑀓𑁄𑀝𑁆𑀞𑀸𑀲𑀺𑀓𑁄. 𑀅𑀣 𑀯𑀸 ‘‘𑀅𑀢𑁆𑀢𑀪𑀸𑀯𑀕𑀼𑀳𑀸𑀬 𑀮𑀕𑁆𑀕𑀪𑀸𑀯𑁂𑀦 𑀢𑀸𑀤𑀺𑀲𑁄. 𑀓𑀺𑀮𑁂𑀲𑁂𑀳𑀺 𑀙𑀦𑁆𑀦𑀪𑀸𑀯𑁂𑀦 𑀢𑀲𑁆𑀲𑀡𑁆𑀞𑀺𑀢𑁄. 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑀪𑀸𑀯𑁂𑀦 𑀢𑀧𑁆𑀧𑀓𑀸𑀭𑁄. 𑀢𑀻𑀳𑀺 𑀯𑀺𑀯𑁂𑀓𑁂𑀳𑀺 𑀤𑀽𑀭𑀪𑀸𑀯𑁂𑀦 𑀢𑀧𑁆𑀧𑀝𑀺𑀪𑀸𑀕𑁄𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀤𑀼𑀧𑁆𑀧𑀳𑀸𑀬𑀸𑀢𑀺 𑀲𑀼𑀔𑁂𑀦 𑀧𑀳𑀸𑀢𑀩𑁆𑀩𑀸 𑀦 𑀳𑁄𑀦𑁆𑀢𑀺. 𑀤𑀼𑀘𑁆𑀘𑀚𑁆𑀚𑀸𑀢𑀺 𑀲𑀼𑀔𑁂𑀦 𑀚𑀳𑀺𑀢𑀼𑀁 𑀦 𑀲𑀓𑁆𑀓𑀸. 𑀤𑀼𑀧𑁆𑀧𑀭𑀺𑀘𑁆𑀘𑀚𑁆𑀚𑀸𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀚𑀳𑀺𑀢𑀼𑀁 𑀦 𑀲𑀓𑁆𑀓𑀸. 𑀤𑀼𑀦𑁆𑀦𑀺𑀫𑁆𑀫𑀤𑀬𑀸𑀢𑀺 𑀦𑀺𑀫𑁆𑀫𑀤𑀁 𑀅𑀫𑀤𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀤𑀼𑀩𑁆𑀩𑀺𑀦𑀺𑀯𑁂𑀞𑀬𑀸𑀢𑀺 𑀯𑀺𑀦𑀺𑀯𑁂𑀞𑀦𑀁 𑀫𑁄𑀘𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀤𑀼𑀢𑁆𑀢𑀭𑀸𑀢𑀺 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀼𑀁 𑀦 𑀲𑀓𑁆𑀓𑀸. 𑀤𑀼𑀧𑁆𑀧𑀢𑀭𑀸𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀢𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑀸𑀢𑀺 𑀤𑀼𑀓𑁆𑀔𑁂𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸. 𑀤𑀼𑀩𑁆𑀩𑀺𑀦𑀺𑀯𑀢𑁆𑀢𑀸𑀢𑀺 𑀦𑀺𑀯𑀢𑁆𑀢𑁂𑀢𑀼𑀁 𑀤𑀼𑀓𑁆𑀔𑀸. 𑀅𑀣 𑀯𑀸 ‘‘𑀧𑀓𑀢𑀺𑀯𑀲𑁂𑀦 𑀤𑀼𑀧𑁆𑀧𑀭𑀺𑀘𑁆𑀘𑀚𑁆𑀚𑀸. 𑀕𑁄𑀡𑀧𑀢𑀸𑀲𑀁 𑀯𑀺𑀬 𑀤𑀼𑀦𑁆𑀦𑀺𑀫𑁆𑀫𑀤𑀬𑀸. 𑀦𑀸𑀕𑀧𑀸𑀲𑀁 𑀯𑀺𑀬 𑀤𑀼𑀩𑁆𑀩𑀺𑀦𑀺𑀯𑁂𑀞𑀬𑀸. 𑀕𑀺𑀫𑁆𑀳𑀲𑀫𑀬𑁂 𑀫𑀭𑀼𑀓𑀦𑁆𑀢𑀸𑀭𑀁 𑀯𑀺𑀬 𑀤𑀼𑀢𑁆𑀢𑀭𑀸 𑀤𑀼𑀧𑁆𑀧𑀢𑀭𑀸. 𑀩𑁆𑀬𑀕𑁆𑀖𑀧𑀭𑀺𑀕𑁆𑀕𑀳𑀺𑀢𑀸 𑀅𑀝𑀯𑀻 𑀯𑀺𑀬 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑀸. 𑀲𑀫𑀼𑀤𑁆𑀤𑀯𑀻𑀘𑀺 𑀯𑀺𑀬 𑀤𑀼𑀩𑁆𑀩𑀺𑀦𑀺𑀯𑀢𑁆𑀢𑀸𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑁮. 𑀏𑀯𑀁 𑀧𑀞𑀫𑀕𑀸𑀣𑀸𑀬 ‘‘𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄’’𑀢𑀺 𑀲𑀸𑀥𑁂𑀢𑁆𑀯𑀸 𑀧𑀼𑀦 𑀢𑀣𑀸𑀯𑀺𑀥𑀸𑀦𑀁 𑀲𑀢𑁆𑀢𑀸𑀦𑀁 𑀥𑀫𑁆𑀫𑀢𑀁 𑀆𑀯𑀺 𑀓𑀭𑁄𑀦𑁆𑀢𑁄 ‘‘𑀇𑀘𑁆𑀙𑀸𑀦𑀺𑀤𑀸𑀦𑀸’’𑀢𑀺𑀆𑀤𑀺𑀕𑀸𑀣𑀫𑀸𑀳. 𑀢𑀢𑁆𑀣 𑀇𑀘𑁆𑀙𑀸𑀦𑀺𑀤𑀸𑀦𑀸𑀢𑀺 𑀢𑀡𑁆𑀳𑀸𑀳𑁂𑀢𑀼𑀓𑀸. 𑀪𑀯𑀲𑀸𑀢𑀩𑀤𑁆𑀥𑀸𑀢𑀺 𑀲𑀼𑀔𑀯𑁂𑀤𑀦𑀸𑀤𑀺𑀫𑁆𑀳𑀺 𑀪𑀯𑀲𑀸𑀢𑁂𑀦 𑀩𑀤𑁆𑀥𑀸. 𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸𑀢𑀺 𑀢𑁂 𑀪𑀯𑀲𑀸𑀢𑀯𑀢𑁆𑀣𑀼𑀪𑀽𑀢𑀸 𑀥𑀫𑁆𑀫𑀸. 𑀢𑁂 𑀯𑀸 𑀢𑀢𑁆𑀣 𑀩𑀤𑁆𑀥𑀸 𑀇𑀘𑁆𑀙𑀸𑀦𑀺𑀤𑀸𑀦𑀸 𑀲𑀢𑁆𑀢𑀸 𑀤𑀼𑀧𑁆𑀧𑀫𑁄𑀘𑀬𑀸. 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸𑀢𑀺 𑀅𑀜𑁆𑀜𑁂 𑀘 𑀫𑁄𑀘𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀓𑀸𑀭𑀡𑀯𑀘𑀦𑀁 𑀯𑀸 𑀏𑀢𑀁. 𑀢𑁂 𑀲𑀢𑁆𑀢𑀸 𑀤𑀼𑀧𑁆𑀧𑀫𑀼𑀜𑁆𑀘𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀜𑁆𑀜𑁂𑀦 𑀫𑁄𑀘𑁂𑀢𑀩𑁆𑀩𑀸 𑀦 𑀳𑁄𑀦𑁆𑀢𑀺. 𑀬𑀤𑀺 𑀲𑀢𑁆𑀢𑀸 𑀫𑀼𑀜𑁆𑀘𑁂𑀬𑁆𑀬𑀼𑀁, 𑀲𑀓𑁂𑀦 𑀣𑀸𑀫𑁂𑀦 𑀫𑀼𑀜𑁆𑀘𑁂𑀬𑁆𑀬𑀼𑀦𑁆𑀢𑀺 𑀅𑀬𑀫𑀲𑁆𑀲 𑀅𑀢𑁆𑀣𑁄. 𑀧𑀘𑁆𑀙𑀸 𑀧𑀼𑀭𑁂 𑀯𑀸𑀧𑀺 𑀅𑀧𑁂𑀓𑁆𑀔𑀫𑀸𑀦𑀸𑀢𑀺 𑀅𑀦𑀸𑀕𑀢𑁂 𑀅𑀢𑀻𑀢𑁂 𑀯𑀸 𑀓𑀸𑀫𑁂 𑀅𑀧𑁂𑀓𑁆𑀔𑀫𑀸𑀦𑀸. 𑀇𑀫𑁂 𑀯 𑀓𑀸𑀫𑁂 𑀧𑀼𑀭𑀺𑀫𑁂 𑀯 𑀚𑀧𑁆𑀧𑀦𑁆𑀢𑀺 𑀇𑀫𑁂 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀸𑀫𑁂 𑀧𑀼𑀭𑀺𑀫𑁂 𑀯𑀸 𑀤𑀼𑀯𑀺𑀥𑁂𑀧𑀺 𑀅𑀢𑀻𑀢𑀸𑀦𑀸𑀕𑀢𑁂 𑀩𑀮𑀯𑀢𑀡𑁆𑀳𑀸𑀬 𑀧𑀢𑁆𑀣𑀬𑀫𑀸𑀦𑀸. 𑀇𑀫𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 ‘‘𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸’’𑀢𑀺 𑀇𑀫𑀺𑀦𑀸𑀯 𑀲𑀳 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀭𑀣𑀸 𑀅𑀧𑁂𑀓𑁆𑀔𑀫𑀸𑀦𑀸 𑀚𑀧𑁆𑀧𑀁 𑀓𑀺𑀁 𑀓𑀭𑁄𑀦𑁆𑀢𑀺, 𑀓𑀺𑀁 𑀯𑀸 𑀓𑀢𑀸𑀢𑀺 𑀦 𑀧𑀜𑁆𑀜𑀸𑀬𑁂𑀬𑁆𑀬𑀼𑀁.

𑀪𑀯𑀲𑀸𑀢𑀩𑀤𑁆𑀥𑀸𑀢𑀺 𑀪𑀯𑁂 𑀲𑀸𑀢𑀁 𑀪𑀯𑀲𑀸𑀢𑀁, 𑀢𑁂𑀦 𑀪𑀯𑀲𑀸𑀢𑁂𑀦 𑀲𑀼𑀔𑀲𑁆𑀲𑀸𑀤𑁂𑀦 𑀩𑀤𑁆𑀥𑀸 𑀳𑀼𑀢𑁆𑀯𑀸 𑀞𑀺𑀢𑀸. 𑀢𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁 𑀪𑀯𑀲𑀸𑀢𑀁 𑁋 𑀲𑀼𑀔𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑁄𑀩𑁆𑀩𑀦𑀪𑀸𑀯𑁄 𑀬𑁄𑀩𑁆𑀩𑀜𑁆𑀜𑀁. 𑀅𑀭𑁄𑀕𑀪𑀸𑀯𑁄 𑀆𑀭𑁄𑀕𑁆𑀬𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀪𑀸𑀯𑁄 𑀚𑀻𑀯𑀺𑀢𑀁. 𑀮𑀸𑀪𑁄𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀮𑀸𑀪𑁄. 𑀬𑀲𑁄𑀢𑀺 𑀧𑀭𑀺𑀯𑀸𑀭𑁄. 𑀧𑀲𑀁𑀲𑀸𑀢𑀺 𑀓𑀺𑀢𑁆𑀢𑀺. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀲𑀼𑀔𑀁. 𑀫𑀦𑀸𑀧𑀺𑀓𑀸 𑀭𑀽𑀧𑀸𑀢𑀺 𑀫𑀦𑀯𑀟𑁆𑀠𑀦𑀓𑀸 𑀭𑀽𑀧𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀘𑀓𑁆𑀔𑀼𑀲𑀫𑁆𑀧𑀤𑀸𑀢𑀺 𑀘𑀓𑁆𑀔𑀼𑀲𑁆𑀲 𑀲𑀫𑁆𑀧𑀤𑀸. ‘‘𑀫𑀬𑁆𑀳𑀁 𑀘𑀓𑁆𑀔𑀼 𑀲𑀫𑁆𑀧𑀦𑁆𑀦𑀁 𑀫𑀡𑀺𑀯𑀺𑀫𑀸𑀦𑁂 𑀉𑀕𑁆𑀖𑀸𑀝𑀺𑀢𑀲𑀻𑀳𑀧𑀜𑁆𑀚𑀭𑀁 𑀯𑀺𑀬 𑀔𑀸𑀬𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀁 𑀲𑀼𑀔𑀲𑁆𑀲𑀸𑀤𑀁 𑀲𑀦𑁆𑀥𑀸𑀬 ‘‘𑀘𑀓𑁆𑀔𑀼𑀲𑀫𑁆𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀲𑁄𑀢𑀲𑀫𑁆𑀧𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀸𑀢𑀩𑀤𑁆𑀥𑀸…𑀧𑁂… 𑀯𑀺𑀩𑀤𑁆𑀥𑀸𑀢𑀺 𑀯𑀺𑀯𑀺𑀥𑀸𑀓𑀸𑀭𑁂𑀦 𑀩𑀤𑁆𑀥𑀸. 𑀆𑀩𑀤𑁆𑀥𑀸𑀢𑀺 𑀯𑀺𑀲𑁂𑀲𑁂𑀦 𑀆𑀤𑀺𑀢𑁄 𑀩𑀤𑁆𑀥𑀸. 𑀮𑀕𑁆𑀕𑀸𑀢𑀺 𑀆𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀅𑀧𑁆𑀧𑀺𑀢𑀸. 𑀮𑀕𑁆𑀕𑀺𑀢𑀸𑀢𑀺 𑀦𑀸𑀕𑀤𑀦𑁆𑀢𑁂 𑀨𑀸𑀡𑀺𑀢𑀯𑀸𑀭𑀓𑁄 𑀯𑀺𑀬 𑀮𑀕𑁆𑀕𑀺𑀢𑀸. 𑀬𑀫𑁂𑀢𑁆𑀣 𑀘 𑀅𑀯𑀼𑀢𑁆𑀢𑀁, 𑀢𑀁 𑀲𑀢𑁆𑀢𑁄 𑀯𑀺𑀲𑀢𑁆𑀢𑁄𑀢𑀺𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁.

𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸𑀢𑀺 𑀦 𑀧𑀭𑁂𑀳𑀺 𑀫𑁄𑀓𑁆𑀔𑀸. 𑀢𑁂 𑀯𑀸 𑀪𑀯𑀲𑀸𑀢𑀯𑀢𑁆𑀣𑀽 𑀤𑀼𑀧𑁆𑀧𑀫𑀼𑀜𑁆𑀘𑀸𑀢𑀺 𑀪𑀯𑁂 𑀲𑀼𑀔𑀲𑁆𑀲𑀸𑀤𑀯𑀢𑁆𑀣𑀼𑀪𑀽𑀢𑀸 𑀥𑀫𑁆𑀫𑀸 𑀢𑁂 𑀫𑀼𑀜𑁆𑀘𑀺𑀢𑀼𑀁 𑀤𑀼𑀓𑁆𑀔𑀸. 𑀲𑀢𑁆𑀢𑀸 𑀯𑀸 𑀏𑀢𑁆𑀢𑁄 𑀤𑀼𑀫𑁆𑀫𑁄𑀘𑀬𑀸𑀢𑀺 𑀲𑀢𑁆𑀢𑀸 𑀏𑀯 𑀯𑀸 𑀏𑀢𑀲𑁆𑀫𑀸 𑀪𑀯𑀲𑀸𑀢𑀯𑀢𑁆𑀣𑀼𑀢𑁄 𑀫𑁄𑀘𑁂𑀢𑀼𑀁 𑀤𑀼𑀓𑁆𑀔𑀸.

𑀤𑀼𑀭𑀼𑀤𑁆𑀥𑀭𑀸𑀢𑀺 𑀉𑀤𑁆𑀥𑀭𑀺𑀢𑀼𑀁 𑀤𑀼𑀓𑁆𑀔𑀸. 𑀤𑀼𑀲𑁆𑀲𑀫𑀼𑀤𑁆𑀥𑀭𑀸𑀢𑀺 𑀲𑀫𑀦𑁆𑀢𑀢𑁄 𑀙𑀺𑀦𑁆𑀦𑀢𑀝𑁂 𑀦𑀭𑀓𑀸𑀯𑀸𑀝𑁂 𑀧𑀢𑀺𑀢𑁄 𑀯𑀺𑀬 𑀉𑀤𑁆𑀥𑀁 𑀓𑀢𑁆𑀯𑀸 𑀉𑀤𑁆𑀥𑀭𑀺𑀢𑀼𑀁 𑀤𑀼𑀓𑁆𑀔𑀸. 𑀤𑀼𑀩𑁆𑀩𑀼𑀝𑁆𑀞𑀸𑀧𑀬𑀸𑀢𑀺 𑀉𑀝𑁆𑀞𑀸𑀧𑁂𑀢𑀼𑀁 𑀤𑀼𑀓𑁆𑀔𑀸. 𑀤𑀼𑀲𑁆𑀲𑀫𑀼𑀝𑁆𑀞𑀸𑀧𑀬𑀸𑀢𑀺 𑀲𑀼𑀔𑀼𑀫𑀅𑀢𑁆𑀢𑀪𑀸𑀯𑀁 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀧𑀦𑀁 𑀯𑀺𑀬 𑀉𑀲𑁆𑀲𑀸𑀧𑁂𑀢𑀼𑀁 𑀅𑀢𑀺𑀯𑀺𑀬 𑀤𑀼𑀓𑁆𑀔𑀸.

𑀢𑁂 𑀅𑀢𑁆𑀢𑀦𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑀸𑀢𑀺 𑀕𑀫𑁆𑀪𑀻𑀭𑀓𑀤𑁆𑀤𑀫𑁂 𑀬𑀸𑀯 𑀲𑀻𑀲𑀢𑁄 𑀦𑀺𑀫𑀼𑀕𑁆𑀕𑀸 𑀦 𑀲𑀓𑁆𑀓𑁄𑀦𑁆𑀢𑀺. 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀢𑀼𑀦𑁆𑀢𑀺 𑀅𑀧𑀭𑀁 𑀢𑀣𑁂𑀯 𑀦𑀺𑀫𑀼𑀕𑁆𑀕𑀁 𑀳𑀢𑁆𑀣𑁂 𑀯𑀸 𑀲𑀻𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑁄 𑀯𑀢 𑀘𑀼𑀦𑁆𑀤𑀸𑀢𑀺 𑀲𑁄𑀢𑀺 𑀯𑀢𑁆𑀢𑀩𑁆𑀩𑀸𑀓𑀸𑀭𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄. 𑀢𑀲𑁆𑀲 ‘‘𑀬𑁄’’𑀢𑀺 𑀇𑀫𑀁 𑀉𑀤𑁆𑀤𑁂𑀲𑀯𑀘𑀦𑀁 𑀆𑀳𑀭𑀺𑀢𑁆𑀯𑀸 𑀬𑁄 𑀅𑀢𑁆𑀢𑀦𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑁄, 𑀲𑁄 𑀯𑀢, 𑀘𑀼𑀦𑁆𑀤, 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀲𑁂𑀲𑀧𑀤𑁂𑀲𑀼 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀮𑀺𑀧𑀧𑀮𑀺𑀧𑀦𑁆𑀦𑁄𑀢𑀺 𑀕𑀫𑁆𑀪𑀻𑀭𑀓𑀤𑁆𑀤𑀫𑁂 𑀦𑀺𑀫𑀼𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀬𑀣𑀸, 𑀘𑀼𑀦𑁆𑀤, 𑀓𑁄𑀘𑀺 𑀧𑀼𑀭𑀺𑀲𑁄 𑀬𑀸𑀯 𑀲𑀻𑀲𑀢𑁄 𑀕𑀫𑁆𑀪𑀻𑀭𑀓𑀤𑁆𑀤𑀫𑁂 𑀦𑀺𑀫𑀼𑀕𑁆𑀕𑁄, 𑀧𑀭𑀫𑁆𑀧𑀺 𑀢𑀣𑁂𑀯 𑀦𑀺𑀫𑀼𑀕𑁆𑀕𑀁 𑀳𑀢𑁆𑀣𑁂 𑀯𑀸 𑀲𑀻𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦 𑀳𑀺 𑀢𑀁 𑀓𑀸𑀭𑀡𑀫𑀢𑁆𑀣𑀺, 𑀬𑁂𑀦 𑀲𑁄 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀸𑀢𑀺. 𑀅𑀤𑀦𑁆𑀢𑁄 𑀅𑀯𑀺𑀦𑀻𑀢𑁄 𑀅𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀏𑀢𑁆𑀣 𑀧𑀦 𑀅𑀦𑀺𑀩𑁆𑀩𑀺𑀲𑁂𑀯𑀦𑀢𑀸𑀬 𑀅𑀤𑀦𑁆𑀢𑁄. 𑀅𑀲𑀺𑀓𑁆𑀔𑀺𑀢𑀯𑀺𑀦𑀬𑀢𑀸𑀬 𑀅𑀯𑀺𑀦𑀻𑀢𑁄. 𑀅𑀦𑀺𑀩𑁆𑀩𑀼𑀢𑀓𑀺𑀮𑁂𑀲𑀢𑀸𑀬 𑀅𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀢𑀸𑀤𑀺𑀲𑁄 𑀧𑀭𑀁 𑀤𑀫𑁂𑀲𑁆𑀲𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀭𑀺𑀲𑁆𑀲𑀢𑀺, 𑀯𑀺𑀦𑁂𑀲𑁆𑀲𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀸𑀧𑁂𑀲𑁆𑀲𑀢𑀺. 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀺 𑀢𑀲𑁆𑀲 𑀓𑀺𑀮𑁂𑀲𑁂 𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀺.

𑀦𑀢𑁆𑀣𑀜𑁆𑀜𑁄 𑀓𑁄𑀘𑀻𑀢𑀺 𑀅𑀜𑁆𑀜𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀫𑁄𑀘𑁂𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀺. 𑀲𑀓𑁂𑀦 𑀣𑀸𑀫𑁂𑀦𑀸𑀢𑀺 𑀅𑀢𑁆𑀢𑀦𑁄 𑀜𑀸𑀡𑀣𑀸𑀫𑁂𑀦. 𑀩𑀮𑁂𑀦𑀸𑀢𑀺 𑀜𑀸𑀡𑀩𑀮𑁂𑀦. 𑀯𑀻𑀭𑀺𑀬𑁂𑀦𑀸𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦. 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦𑀸𑀢𑀺 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑁂𑀦 𑀫𑀳𑀦𑁆𑀢𑀯𑀻𑀭𑀺𑀬𑁂𑀦.

𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀻𑀢𑀺 𑀅𑀳𑀁 𑀦 𑀲𑀳𑀺𑀲𑁆𑀲𑀸𑀫𑀺 𑀦 𑀲𑀓𑁆𑀓𑁄𑀫𑀺, 𑀦 𑀯𑀸𑀬𑀫𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀫𑁄𑀘𑀦𑀸𑀬𑀸𑀢𑀺 𑀧𑀫𑁄𑀘𑁂𑀢𑀼𑀁. 𑀓𑀣𑀁𑀓𑀣𑀺𑀦𑁆𑀢𑀺 𑀲𑀓𑀗𑁆𑀔𑀁. 𑀥𑁄𑀢𑀓𑀸𑀢𑀺 𑀆𑀮𑀧𑀦𑀁. 𑀢𑀭𑁂𑀲𑀻𑀢𑀺 𑀢𑀭𑁂𑀬𑁆𑀬𑀸𑀲𑀺.

‘‘𑀅𑀢𑁆𑀢𑀦𑀸 𑀳𑀺 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸 𑀲𑀁𑀓𑀺𑀮𑀺𑀲𑁆𑀲𑀢𑀺;

𑀅𑀢𑁆𑀢𑀦𑀸 𑀅𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀢𑀺;

𑀲𑀼𑀤𑁆𑀥𑀻 𑀅𑀲𑀼𑀤𑁆𑀥𑀺 𑀧𑀘𑁆𑀘𑀢𑁆𑀢𑀁, 𑀦𑀸𑀜𑁆𑀜𑁄 𑀅𑀜𑁆𑀜𑀁 𑀯𑀺𑀲𑁄𑀥𑀬𑁂’’𑀢𑀺. (𑀥. 𑀧. 𑁧𑁬𑁫; 𑀓𑀣𑀸. 𑁭𑁪𑁩) 𑁋

𑀏𑀢𑁆𑀣𑀸𑀬𑀫𑀢𑁆𑀣𑁄 𑁋 𑀬𑁂𑀦 𑀅𑀢𑁆𑀢𑀦𑀸 𑀅𑀓𑀼𑀲𑀮𑀁 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀲𑁄 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 𑀅𑀢𑁆𑀢𑀦𑀸𑀯 𑀲𑀁𑀓𑀺𑀮𑀺𑀲𑁆𑀲𑀢𑀺. 𑀬𑁂𑀦 𑀧𑀦 𑀅𑀢𑁆𑀢𑀦𑀸 𑀅𑀓𑀢𑀁 𑀧𑀸𑀧𑀁, 𑀲𑁄 𑀲𑀼𑀕𑀢𑀺𑀜𑁆𑀘𑁂𑀯 𑀅𑀕𑀢𑀺𑀜𑁆𑀘 𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀢𑀺. 𑀓𑀼𑀲𑀮𑀓𑀫𑁆𑀫𑀲𑀗𑁆𑀔𑀸𑀢𑀸 𑀲𑀼𑀤𑁆𑀥𑀺 𑀅𑀓𑀼𑀲𑀮𑀓𑀫𑁆𑀫𑀲𑀗𑁆𑀔𑀸𑀢𑀸 𑀘 𑀅𑀲𑀼𑀤𑁆𑀥𑀺 𑀧𑀘𑁆𑀘𑀢𑁆𑀢𑀁 𑀓𑀸𑀭𑀓𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑀺𑀬𑁂𑀯 𑀯𑀺𑀧𑀘𑁆𑀘𑀢𑀺. 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀅𑀜𑁆𑀜𑀁 𑀧𑀼𑀕𑁆𑀕𑀮𑀁 𑀦 𑀯𑀺𑀲𑁄𑀥𑀬𑁂 𑀦𑁂𑀯 𑀯𑀺𑀲𑁄𑀥𑁂𑀢𑀺, 𑀦 𑀓𑀺𑀮𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀺𑀝𑁆𑀞𑀢𑁂𑀯 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀢𑀺𑀝𑁆𑀞𑀢𑀺𑀬𑁂𑀯. 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑁄𑀢𑀺 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀢𑁄 𑀧𑀝𑁆𑀞𑀸𑀬 𑀅𑀭𑀺𑀬𑀫𑀕𑁆𑀕𑁄. 𑀢𑀺𑀝𑁆𑀞𑀸𑀫𑀳𑀁 𑀲𑀫𑀸𑀤𑀧𑁂𑀢𑀸𑀢𑀺 𑀅𑀳𑀁 𑀕𑀡𑁆𑀳𑀸𑀧𑁂𑀢𑀸 𑀧𑀢𑀺𑀝𑁆𑀞𑀸𑀧𑁂𑀢𑀸 𑀢𑀺𑀝𑁆𑀞𑀸𑀫𑀺. 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀢𑀺 𑀫𑀬𑀸 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸. 𑀏𑀢𑁆𑀣 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑀤𑀦𑁆𑀢𑁄 𑀑𑀯𑀤𑀢𑀺 𑀦𑀸𑀫, 𑀅𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀲𑀸𑀲𑀦𑁆𑀢𑁄 ‘‘𑀅𑀬𑀲𑁄𑀧𑀺 𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀯𑀲𑁂𑀦 𑀅𑀦𑀸𑀕𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑁄𑀧𑀺 𑀑𑀯𑀤𑀢𑀺 𑀦𑀸𑀫, 𑀧𑀭𑀫𑁆𑀫𑀼𑀔𑀸 𑀤𑀽𑀢𑀲𑀸𑀲𑀦𑀁 𑀯𑀸 𑀧𑁂𑀲𑁂𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀲𑀓𑀺𑀁 𑀯𑀤𑀦𑁆𑀢𑁄𑀧𑀺 𑀑𑀯𑀤𑀢𑀺 𑀦𑀸𑀫, 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀑𑀯𑀤𑀦𑁆𑀢𑁄 𑀏𑀯 𑀯𑀸 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀅𑀧𑁆𑀧𑁂𑀓𑀘𑁆𑀘𑁂𑀢𑀺 𑀅𑀧𑀺 𑀏𑀓𑀘𑁆𑀘𑁂, 𑀏𑀓𑁂𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀦𑁆𑀢𑀻𑀢𑀺 𑀔𑀬𑀯𑀬𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀅𑀢𑀻𑀢𑀦𑁆𑀢𑀺 𑀅𑀘𑁆𑀘𑀦𑁆𑀢𑀁, 𑀅𑀘𑁆𑀘𑀦𑁆𑀢𑀜𑁆𑀘 𑀢𑀁 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁆𑀢𑀸 𑀦𑀺𑀝𑁆𑀞𑀜𑁆𑀘𑀸𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁, 𑀏𑀓𑀦𑁆𑀢𑀦𑀺𑀝𑁆𑀞𑀁, 𑀲𑀢𑀢𑀦𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀅𑀘𑁆𑀘𑀦𑁆𑀢𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀦𑁆𑀢𑀺 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀦𑀸𑀭𑀸𑀥𑁂𑀦𑁆𑀢𑀻𑀢𑀺 𑀦 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀦 𑀧𑀝𑀺𑀮𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀓𑁆𑀬𑀸𑀳𑀦𑁆𑀢𑀺 𑀏𑀢𑁂𑀲𑀼 𑀓𑀺𑀁 𑀅𑀳𑀁, 𑀓𑀺𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀓𑁆𑀔𑀸𑀬𑀻𑀢𑀺 𑀧𑀝𑀺𑀧𑀤𑀸𑀫𑀕𑁆𑀕𑀓𑁆𑀔𑀸𑀬𑀻. 𑀆𑀘𑀺𑀓𑁆𑀔𑀢𑀺 𑀓𑀣𑁂𑀢𑀺. 𑀅𑀢𑁆𑀢𑀦𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 𑀫𑀼𑀜𑁆𑀘𑁂𑀬𑁆𑀬𑀼𑀦𑁆𑀢𑀺 𑀧𑀝𑀺𑀧𑀚𑁆𑀚𑀦𑁆𑀢𑀸 𑀫𑀬𑀁 𑀫𑀼𑀜𑁆𑀘𑁂𑀬𑁆𑀬𑀼𑀁.

𑀅𑀢𑀻𑀢𑀁 𑀉𑀧𑀸𑀤𑀸𑀬𑀸𑀢𑀺 𑀅𑀢𑀻𑀢𑀁 𑀧𑀝𑀺𑀘𑁆𑀘. 𑀓𑀣𑀁 𑀧𑀼𑀭𑁂 𑀅𑀧𑁂𑀓𑁆𑀔𑀁 𑀓𑀭𑁄𑀢𑀻𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀇𑀓𑁆𑀔𑀁 𑀑𑀮𑁄𑀓𑀦𑀁 𑀓𑀭𑁄𑀢𑀺. 𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀦𑁆𑀢𑀺 𑀤𑀻𑀖𑀭𑀲𑁆𑀲𑀅𑀡𑀼𑀓𑀣𑀽𑀮𑀸𑀤𑀺𑀯𑀲𑁂𑀦 𑀏𑀯𑀁𑀚𑀸𑀢𑀺𑀓𑁄 𑀏𑀯𑀭𑀽𑀧𑁄 𑀅𑀪𑀯𑀺𑀁. 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀻𑀢𑀺 𑀢𑀲𑁆𑀫𑀺𑀁 𑀭𑀽𑀧𑀸𑀭𑀫𑁆𑀫𑀡𑁂 𑀢𑀡𑁆𑀳𑀁 𑀲𑀫𑁆𑀫𑀸 𑀆𑀦𑀬𑀢𑀺 𑀉𑀧𑀦𑁂𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

‘‘𑀇𑀢𑀺 𑀫𑁂 𑀘𑀓𑁆𑀔𑀽’’𑀢𑀺𑀆𑀤𑀬𑁄 𑀯𑀢𑁆𑀣𑀼𑀆𑀭𑀫𑁆𑀫𑀡𑀯𑀲𑁂𑀦 𑀢𑀡𑁆𑀳𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀇𑀢𑀺 𑀭𑀽𑀧𑀸𑀢𑀻𑀢𑀺 𑀏𑀯𑀁 𑀭𑀽𑀧𑀸 𑀇𑀢𑀺. 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀦𑁆𑀢𑀺 𑀢𑁂𑀲𑀼 𑀘𑀓𑁆𑀔𑀼𑀭𑀽𑀧𑁂𑀲𑀼 𑀤𑀼𑀩𑁆𑀩𑀮𑀲𑀗𑁆𑀔𑀸𑀢𑁄 𑀙𑀦𑁆𑀤𑁄 𑀘 𑀩𑀮𑀯𑀲𑀗𑁆𑀔𑀸𑀢𑁄 𑀭𑀸𑀕𑁄 𑀘, 𑀢𑁂𑀦 𑀙𑀦𑁆𑀤𑀭𑀸𑀕𑁂𑀦 𑀧𑀝𑀺𑀩𑀤𑁆𑀥𑀁 𑀅𑀮𑁆𑀮𑀻𑀦𑀁. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀚𑀯𑀦𑀘𑀺𑀢𑁆𑀢𑀁. 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀢𑀲𑁆𑀲 𑀚𑀯𑀦𑀯𑀺𑀜𑁆𑀜𑀸𑀡𑀲𑁆𑀲 𑀙𑀦𑁆𑀤𑀭𑀸𑀕𑁂𑀦 𑀩𑀤𑁆𑀥𑀪𑀸𑀯𑀸. 𑀢𑀤𑀪𑀺𑀦𑀦𑁆𑀤𑀢𑀻𑀢𑀺 𑀢𑀁 𑀆𑀭𑀫𑁆𑀫𑀡𑀁 𑀢𑀡𑁆𑀳𑀸𑀯𑀲𑁂𑀦 𑀅𑀪𑀺𑀦𑀦𑁆𑀤𑀢𑀺.

𑀬𑀸𑀦𑀺𑀲𑁆𑀲 𑀢𑀸𑀦𑀻𑀢𑀺 𑀬𑀸𑀦𑀺 𑀅𑀲𑁆𑀲 𑀢𑀸𑀦𑀺. 𑀧𑀼𑀩𑁆𑀩𑁂𑀢𑀺 𑀅𑀢𑀻𑀢𑁂. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀻𑀢𑀺 𑀤𑀦𑁆𑀢𑀯𑀺𑀤𑀁𑀲𑀸𑀤𑀺𑀳𑀲𑀺𑀢𑀸𑀦𑀺 𑀘, 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀮𑀧𑀺𑀢𑀸𑀦𑀺 𑀘, 𑀓𑀸𑀬𑀔𑀺𑀟𑁆𑀟𑀸𑀤𑀺𑀓𑀻𑀴𑀺𑀢𑀸𑀦𑀺 𑀘. 𑀢𑀤𑀲𑁆𑀲𑀸𑀤𑁂𑀢𑀻𑀢𑀺 𑀢𑀁 𑀅𑀲𑁆𑀲𑀸𑀤𑀬𑀢𑀺 𑀅𑀲𑁆𑀲𑀸𑀤𑀁 𑀯𑀺𑀦𑁆𑀤𑀢𑀺 𑀲𑀸𑀤𑀺𑀬𑀢𑀺. 𑀢𑀁 𑀦𑀺𑀓𑀸𑀫𑁂𑀢𑀻𑀢𑀺 𑀢𑀁 𑀦𑀺𑀓𑀸𑀫𑀬𑀢𑀺 𑀧𑀘𑁆𑀘𑀸𑀲𑀻𑀲𑀢𑀺. 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀢𑀼𑀝𑁆𑀞𑀺𑀁 𑀧𑀸𑀧𑀼𑀡𑀸𑀢𑀺.

𑀲𑀺𑀬𑀦𑁆𑀢𑀺 𑀪𑀯𑁂𑀬𑁆𑀬𑀁. 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬𑀸𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀸𑀧𑀼𑀡𑀦𑀢𑁆𑀣𑀸𑀬. 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀻𑀢𑀺 𑀘𑀺𑀢𑁆𑀢𑀁 𑀞𑀧𑁂𑀢𑀺. 𑀘𑁂𑀢𑀲𑁄 𑀧𑀡𑀺𑀥𑀸𑀦𑀧𑀘𑁆𑀘𑀬𑀸𑀢𑀺 𑀘𑀺𑀢𑁆𑀢𑀲𑁆𑀲 𑀞𑀧𑀦𑀓𑀸𑀭𑀡𑀸.

𑀲𑀻𑀮𑁂𑀦 𑀯𑀸𑀢𑀺 𑀧𑀜𑁆𑀘𑀲𑀻𑀮𑀸𑀤𑀺𑀲𑀻𑀮𑁂𑀦 𑀯𑀸. 𑀯𑀢𑁂𑀦 𑀯𑀸𑀢𑀺 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑁂𑀦 𑀯𑀸. 𑀢𑀧𑁂𑀦 𑀯𑀸𑀢𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑁂𑀦 𑀯𑀸. 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀬𑀸 𑀯𑀸. 𑀤𑁂𑀯𑁄 𑀯𑀸𑀢𑀺 𑀫𑀳𑀸𑀦𑀼𑀪𑀸𑀯𑁄 𑀤𑁂𑀯𑀭𑀸𑀚𑀸 𑀯𑀸. 𑀤𑁂𑀯𑀜𑁆𑀜𑀢𑀭𑁄 𑀯𑀸𑀢𑀺 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀯𑀸.

𑀚𑀧𑁆𑀧𑀦𑁆𑀢𑀸𑀢𑀺 𑀕𑀼𑀡𑀯𑀲𑁂𑀦 𑀓𑀣𑁂𑀦𑁆𑀢𑀸. 𑀧𑀚𑀧𑁆𑀧𑀦𑁆𑀢𑀸𑀢𑀺 𑀧𑀓𑀸𑀭𑁂𑀦 𑀓𑀣𑁂𑀦𑁆𑀢𑀸. 𑀅𑀪𑀺𑀚𑀧𑁆𑀧𑀦𑁆𑀢𑀸𑀢𑀺 𑀯𑀺𑀲𑁂𑀲𑁂𑀦 𑀓𑀣𑁂𑀦𑁆𑀢𑀸, 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀯𑀟𑁆𑀠𑀺𑀢𑀁.

𑁯. 𑀏𑀯𑀁 𑀧𑀞𑀫𑀕𑀸𑀣𑀸𑀬 ‘‘𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄’’𑀢𑀺 𑀲𑀸𑀥𑁂𑀢𑁆𑀯𑀸 𑀤𑀼𑀢𑀺𑀬𑀕𑀸𑀣𑀸𑀬 𑀘 𑀢𑀣𑀸𑀯𑀺𑀥𑀸𑀦𑀁 𑀥𑀫𑁆𑀫𑀢𑀁 𑀆𑀯𑀺 𑀓𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀧𑀸𑀧𑀓𑀭𑀡𑀁 𑀆𑀯𑀺 𑀓𑀭𑁄𑀦𑁆𑀢𑁄 ‘‘𑀓𑀸𑀫𑁂𑀲𑀼 𑀕𑀺𑀤𑁆𑀥𑀸’’𑀢𑀺 𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀢𑁂 𑀲𑀢𑁆𑀢𑀸 𑀓𑀸𑀫𑁂𑀲𑀼 𑀧𑀭𑀺𑀪𑁄𑀕𑀢𑀡𑁆𑀳𑀸𑀬 𑀕𑀺𑀤𑁆𑀥𑀸, 𑀧𑀭𑀺𑀬𑁂𑀲𑀦𑀸𑀤𑀺𑀫𑀦𑀼𑀬𑀼𑀢𑁆𑀢𑀢𑁆𑀢𑀸 𑀧𑀲𑀼𑀢𑀸, 𑀲𑀫𑁆𑀫𑁄𑀳𑀫𑀸𑀧𑀦𑁆𑀦𑀢𑁆𑀢𑀸 𑀧𑀫𑀽𑀴𑁆𑀳𑀸, 𑀅𑀯𑀕𑀫𑀦𑀢𑀸𑀬 𑀫𑀘𑁆𑀙𑀭𑀺𑀬𑀢𑀸𑀬 𑀩𑀼𑀤𑁆𑀥𑀸𑀤𑀻𑀦𑀁 𑀯𑀘𑀦𑀁 𑀅𑀦𑀸𑀤𑀺𑀬𑀢𑀸𑀬 𑀘 𑀅𑀯𑀤𑀸𑀦𑀺𑀬𑀸, 𑀓𑀸𑀬𑀯𑀺𑀲𑀫𑀸𑀤𑀺𑀫𑁆𑀳𑀺 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸, 𑀅𑀦𑁆𑀢𑀓𑀸𑀮𑁂 𑀫𑀭𑀡𑀤𑀼𑀓𑁆𑀔𑀽𑀧𑀦𑀻𑀢𑀸, ‘‘𑀓𑀺𑀁𑀲𑀼 𑀪𑀯𑀺𑀲𑁆𑀲𑀸𑀫 𑀇𑀢𑁄 𑀘𑀼𑀢𑀸𑀲𑁂’’𑀢𑀺 𑀧𑀭𑀺𑀤𑁂𑀯𑀬𑀦𑁆𑀢𑀻𑀢𑀺.

𑀕𑀺𑀤𑁆𑀥𑀸𑀢𑀺 𑀓𑀸𑀫𑀭𑀸𑀕𑁂𑀦 𑀕𑀺𑀤𑁆𑀥𑀸. 𑀕𑀥𑀺𑀢𑀸𑀢𑀺 𑀲𑀗𑁆𑀓𑀧𑁆𑀧𑀭𑀸𑀕𑁂𑀦 𑀧𑀘𑁆𑀘𑀸𑀲𑀻𑀲𑀫𑀸𑀦𑀸 𑀳𑀼𑀢𑁆𑀯𑀸 𑀕𑀥𑀺𑀢𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀓𑀸𑀫𑀢𑀡𑁆𑀳𑀸𑀬 𑀫𑀼𑀘𑁆𑀙𑀸𑀧𑀭𑁂𑀢𑀸. 𑀅𑀚𑁆𑀛𑁄𑀲𑀦𑁆𑀦𑀸𑀢𑀺 𑀓𑀸𑀫𑀦𑀦𑁆𑀤𑀺𑀬𑀸 𑀅𑀥𑀺𑀑𑀲𑀦𑁆𑀦𑀸 𑀅𑀚𑁆𑀛𑁄𑀢𑁆𑀣𑀝𑀸. 𑀮𑀕𑁆𑀕𑀸𑀢𑀺 𑀓𑀸𑀫𑀲𑀺𑀦𑁂𑀳𑁂𑀦 𑀅𑀮𑁆𑀮𑀻𑀦𑀸. 𑀮𑀕𑁆𑀕𑀺𑀢𑀸𑀢𑀺 𑀓𑀸𑀫𑀧𑀭𑀺𑀴𑀸𑀳𑁂𑀦 𑀏𑀓𑀻𑀪𑀽𑀢𑀸. 𑀧𑀮𑀺𑀩𑀼𑀤𑁆𑀥𑀸𑀢𑀺 𑀓𑀸𑀫𑀲𑀜𑁆𑀜𑀸𑀬 𑀆𑀯𑀝𑁆𑀝𑀺𑀢𑀸. 𑀅𑀣 𑀯𑀸 ‘‘𑀤𑀺𑀝𑁆𑀞𑀺𑀤𑀲𑁆𑀲𑀦𑁂 𑀕𑀺𑀤𑁆𑀥𑀸. 𑀅𑀪𑀺𑀡𑁆𑀳𑀤𑀲𑁆𑀲𑀦𑁂 𑀕𑀥𑀺𑀢𑀸. 𑀲𑀁𑀲𑀕𑁆𑀕𑀓𑀺𑀭𑀺𑀬𑀲𑁆𑀫𑀺𑀁 𑀫𑀼𑀘𑁆𑀙𑀺𑀢𑀸. 𑀯𑀺𑀲𑁆𑀲𑀸𑀲𑀓𑀺𑀭𑀺𑀬𑀲𑁆𑀫𑀺𑀁 𑀅𑀚𑁆𑀛𑁄𑀲𑀦𑁆𑀦𑀸. 𑀲𑀺𑀦𑁂𑀳𑀯𑀴𑀜𑁆𑀚𑀲𑁆𑀫𑀺𑀁 𑀮𑀕𑁆𑀕𑀸. 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀫𑁆𑀳𑀺 𑀮𑀕𑁆𑀕𑀺𑀢𑀸. 𑀅𑀧𑀭𑀸𑀧𑀭𑀁 𑀅𑀫𑀼𑀜𑁆𑀘𑀫𑀸𑀦𑀸 𑀳𑀼𑀢𑁆𑀯𑀸 𑀧𑀮𑀺𑀩𑀼𑀤𑁆𑀥𑀸’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀏𑀲𑀦𑁆𑀢𑀻𑀢𑀺 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀕𑀯𑁂𑀲𑀦𑁆𑀢𑀻𑀢𑀺 𑀫𑀕𑁆𑀕𑀬𑀦𑁆𑀢𑀺. 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀇𑀘𑁆𑀙𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺. 𑀅𑀣 𑀯𑀸 𑀤𑀺𑀝𑁆𑀞𑀸𑀭𑀫𑁆𑀫𑀡𑁂 𑀲𑀼𑀪𑀸𑀲𑀼𑀪𑀁 𑀅𑀢𑁆𑀣𑀺, 𑀦𑀢𑁆𑀣𑀻𑀢𑀺 𑀏𑀲𑀦𑁆𑀢𑀺. 𑀲𑀼𑀪𑀸𑀲𑀼𑀪𑀸𑀭𑀫𑁆𑀫𑀡𑁂 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀯𑀴𑀜𑁆𑀚𑀦𑀢𑁆𑀣𑀸𑀬 𑀧𑀺𑀬𑀁 𑀓𑀭𑁄𑀦𑁆𑀢𑀸 𑀕𑀯𑁂𑀲𑀦𑁆𑀢𑀺. 𑀘𑀺𑀢𑁆𑀢𑀯𑀲𑁂𑀦 𑀏𑀲𑀦𑁆𑀢𑀺. 𑀧𑀬𑁄𑀕𑀯𑀲𑁂𑀦 𑀕𑀯𑁂𑀲𑀦𑁆𑀢𑀺. 𑀓𑀭𑀡𑀯𑀲𑁂𑀦 𑀧𑀭𑀺𑀬𑁂𑀲𑀦𑁆𑀢𑀺. 𑀢𑁂 𑀤𑀼𑀯𑀺𑀥𑁂 𑀓𑀸𑀫𑁂 𑀧𑀝𑀺𑀘𑁆𑀘 𑀑𑀢𑀭𑀺𑀢𑁆𑀯𑀸 𑀘𑀭𑀦𑁆𑀢𑀻𑀢𑀺 𑀢𑀘𑁆𑀘𑀭𑀺𑀢𑀸. 𑀢𑁂 𑀘 𑀓𑀸𑀫𑁂 𑀩𑀳𑀼𑀮𑀁 𑀬𑁂𑀪𑀼𑀬𑁆𑀬𑁂𑀦 𑀯𑀟𑁆𑀠𑁂𑀦𑁆𑀢𑀺 𑀧𑀯𑀢𑁆𑀢𑀬𑀦𑁆𑀢𑀻𑀢𑀺 𑀢𑀩𑁆𑀩𑀳𑀼𑀮𑀸. 𑀢𑁂 𑀘 𑀓𑀸𑀫𑁂 𑀕𑀭𑀼𑀁 𑀓𑀢𑁆𑀯𑀸 𑀭𑀳𑀦𑁆𑀢𑀻𑀢𑀺 𑀢𑀕𑁆𑀕𑀭𑀼𑀓𑀸. 𑀢𑁂𑀲𑀼 𑀓𑀸𑀫𑁂𑀲𑀼 𑀦𑀺𑀦𑁆𑀦𑀸 𑀦𑀫𑀺𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀢𑀦𑁆𑀦𑀺𑀦𑁆𑀦𑀸. 𑀢𑁂𑀲𑀼 𑀓𑀸𑀫𑁂𑀲𑀼 𑀲𑀦𑁆𑀦𑀺𑀦𑁆𑀦𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀢𑀧𑁆𑀧𑁄𑀡𑀸. 𑀢𑁂𑀲𑀼 𑀓𑀸𑀫𑁂𑀲𑀼 𑀅𑀯𑀮𑀫𑁆𑀩𑀺𑀢𑀸 𑀳𑀼𑀢𑁆𑀯𑀸 𑀢𑁂𑀲𑀼𑀬𑁂𑀯 𑀦𑀫𑀺𑀢𑀸 𑀯𑀲𑀦𑁆𑀢𑀻𑀢𑀺 𑀢𑀧𑁆𑀧𑀩𑁆𑀪𑀸𑀭𑀸. 𑀢𑁂𑀲𑀼 𑀓𑀸𑀫𑁂𑀲𑀼 𑀅𑀯𑀢𑁆𑀣𑀭𑀺𑀢𑁆𑀯𑀸 𑀫𑀼𑀘𑁆𑀙𑀸𑀧𑀭𑁂𑀢𑀧𑁆𑀧𑀲𑀗𑁆𑀕𑀸 𑀳𑀼𑀢𑁆𑀯𑀸 𑀯𑀤𑀦𑁆𑀢𑀻𑀢𑀺 𑀢𑀤𑀥𑀺𑀫𑀼𑀢𑁆𑀢𑀸. 𑀢𑁂 𑀘 𑀓𑀸𑀫𑁂 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀢𑀤𑀥𑀺𑀧𑀢𑁂𑀬𑁆𑀬𑀸. 𑀅𑀣 𑀯𑀸 ‘‘𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀪𑀸𑀯𑁂𑀦 𑀢𑀘𑁆𑀘𑀭𑀺𑀢𑀸. 𑀆𑀭𑀫𑁆𑀫𑀡𑀲𑁆𑀲 𑀓𑀦𑁆𑀢𑀪𑀸𑀯𑁂𑀦 𑀢𑀩𑁆𑀩𑀳𑀼𑀮𑀸. 𑀆𑀭𑀫𑁆𑀫𑀡𑀲𑁆𑀲 𑀫𑀦𑀸𑀧𑀪𑀸𑀯𑁂𑀦 𑀢𑀕𑁆𑀕𑀭𑀼𑀓𑀸. 𑀆𑀭𑀫𑁆𑀫𑀡𑀲𑁆𑀲 𑀧𑀺𑀬𑀪𑀸𑀯𑁂𑀦 𑀢𑀦𑁆𑀦𑀺𑀦𑁆𑀦𑀸. 𑀆𑀭𑀫𑁆𑀫𑀡𑀲𑁆𑀲 𑀓𑀸𑀫𑀼𑀧𑀲𑀁𑀳𑀺𑀢𑀪𑀸𑀯𑁂𑀦 𑀢𑀧𑁆𑀧𑁄𑀡𑀸. 𑀆𑀭𑀫𑁆𑀫𑀡𑀲𑁆𑀲 𑀭𑀚𑀦𑀻𑀬𑀪𑀸𑀯𑁂𑀦 𑀢𑀧𑁆𑀧𑀩𑁆𑀪𑀸𑀭𑀸. 𑀆𑀭𑀫𑁆𑀫𑀡𑀲𑁆𑀲 𑀫𑀼𑀘𑁆𑀙𑀦𑀻𑀬𑀪𑀸𑀯𑁂𑀦 𑀢𑀤𑀥𑀺𑀫𑀼𑀢𑁆𑀢𑀸. 𑀆𑀭𑀫𑁆𑀫𑀡𑀲𑁆𑀲 𑀩𑀦𑁆𑀥𑀦𑀻𑀬𑀪𑀸𑀯𑁂𑀦 𑀢𑀤𑀥𑀺𑀧𑀢𑁂𑀬𑁆𑀬𑀸’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀭𑀽𑀧𑁂 𑀧𑀭𑀺𑀬𑁂𑀲𑀦𑁆𑀢𑀻𑀢𑀺𑀆𑀤𑀻𑀲𑀼 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀅𑀮𑀤𑁆𑀥𑀲𑁆𑀲 𑀮𑀸𑀪𑀸𑀬 𑀏𑀲𑀦𑀯𑀲𑁂𑀦. 𑀧𑀝𑀺𑀮𑀪𑀦𑁆𑀢𑀻𑀢𑀺 𑀳𑀢𑁆𑀣𑀕𑀢𑀯𑀲𑁂𑀦. 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀯𑀴𑀜𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀜𑀸𑀢𑀩𑁆𑀩𑀁. 𑀓𑀮𑀳𑀁 𑀯𑀺𑀯𑀸𑀤𑀁 𑀓𑀭𑁄𑀢𑀻𑀢𑀺 𑀓𑀮𑀳𑀓𑀸𑀭𑀓𑁄. 𑀢𑀲𑁆𑀫𑀺𑀁 𑀦𑀺𑀬𑀼𑀢𑁆𑀢𑁄𑀢𑀺 𑀓𑀮𑀳𑀧𑀲𑀼𑀢𑁄. 𑀓𑀫𑁆𑀫𑀓𑀸𑀭𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑁄𑀘𑀭𑁂 𑀘𑀭𑀦𑁆𑀢𑁄𑀢𑀺 𑀯𑁂𑀲𑀺𑀬𑀸𑀤𑀺𑀕𑁄𑀘𑀭𑁂, 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀕𑁄𑀘𑀭𑁂 𑀯𑀸 𑀘𑀭𑀫𑀸𑀦𑁄. 𑀢𑁂𑀲𑀼 𑀦𑀺𑀬𑀼𑀢𑁆𑀢𑁄 𑀕𑁄𑀘𑀭𑀧𑀲𑀼𑀢𑁄. 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀯𑀲𑁂𑀦 𑀛𑀸𑀦𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀛𑀸𑀬𑀻. 𑀢𑀲𑁆𑀫𑀺𑀁 𑀦𑀺𑀬𑀼𑀢𑁆𑀢𑁄 𑀛𑀸𑀦𑀧𑀲𑀼𑀢𑁄.

𑀅𑀯𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑀸𑀬𑀁 𑀕𑀘𑁆𑀙𑀦𑁆𑀢𑀺. 𑀫𑀘𑁆𑀙𑀭𑀺𑀦𑁄𑀢𑀺 𑀲𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀕𑀼𑀳𑀦𑁆𑀢𑀸. 𑀯𑀘𑀦𑀦𑁆𑀢𑀺 𑀓𑀣𑀦𑀁. 𑀩𑁆𑀬𑀧𑀣𑀦𑁆𑀢𑀺 𑀯𑀸𑀓𑁆𑀬𑀧𑀣𑀁. 𑀤𑁂𑀲𑀦𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀑𑀯𑀸𑀤𑀁. 𑀅𑀦𑀼𑀲𑀺𑀝𑁆𑀞𑀺𑀦𑁆𑀢𑀺 𑀅𑀦𑀼𑀲𑀸𑀲𑀦𑀺𑀁. 𑀦𑀸𑀤𑀺𑀬𑀦𑁆𑀢𑀻𑀢𑀺 𑀦 𑀕𑀡𑁆𑀳𑀦𑁆𑀢𑀺 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀺. ‘‘𑀦 𑀧𑀝𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀧𑀸𑀞𑁄, 𑀲𑁄𑀬𑁂𑀯 𑀅𑀢𑁆𑀣𑁄. 𑀯𑀢𑁆𑀣𑀼𑀢𑁄 𑀫𑀘𑁆𑀙𑀭𑀺𑀬𑀤𑀲𑁆𑀲𑀦𑀢𑁆𑀣𑀁 ‘‘𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑀆𑀯𑀸𑀲𑀫𑀘𑁆𑀙𑀭𑀺𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀯𑀸𑀲𑁂 𑀫𑀘𑁆𑀙𑀭𑀺𑀬𑀁 𑀆𑀯𑀸𑀲𑀫𑀘𑁆𑀙𑀭𑀺𑀬𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀯𑀸𑀲𑁄 𑀦𑀸𑀫 𑀲𑀓𑀮𑀸𑀭𑀸𑀫𑁄𑀧𑀺 𑀧𑀭𑀺𑀯𑁂𑀡𑀫𑁆𑀧𑀺 𑀏𑀓𑁄𑀯𑀭𑀓𑁄𑀧𑀺 𑀭𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀦𑀺𑀧𑀺. 𑀢𑁂𑀲𑀼 𑀯𑀲𑀦𑁆𑀢𑀸 𑀲𑀼𑀔𑀁 𑀯𑀲𑀦𑁆𑀢𑀺, 𑀧𑀘𑁆𑀘𑀬𑁂 𑀮𑀪𑀦𑁆𑀢𑀺. 𑀏𑀓𑁄 𑀪𑀺𑀓𑁆𑀔𑀼 𑀯𑀢𑁆𑀢𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀧𑁂𑀲𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀢𑁆𑀣 𑀆𑀕𑀫𑀦𑀁 𑀦 𑀇𑀘𑁆𑀙𑀢𑀺, 𑀆𑀕𑀢𑁄𑀧𑀺 ‘‘𑀔𑀺𑀧𑁆𑀧𑀁 𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀇𑀤𑀁 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀦𑀸𑀫. 𑀪𑀡𑁆𑀟𑀦𑀓𑀸𑀭𑀓𑀸𑀤𑀻𑀦𑀁 𑀧𑀦 𑀢𑀢𑁆𑀣 𑀯𑀸𑀲𑀁 𑀅𑀦𑀺𑀘𑁆𑀙𑀢𑁄 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦 𑀳𑁄𑀢𑀺.

𑀓𑀼𑀮𑀦𑁆𑀢𑀺 𑀉𑀧𑀝𑁆𑀞𑀸𑀓𑀓𑀼𑀮𑀫𑁆𑀧𑀺 𑀜𑀸𑀢𑀺𑀓𑀼𑀮𑀫𑁆𑀧𑀺. 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀅𑀦𑀺𑀘𑁆𑀙𑀢𑁄 𑀓𑀼𑀮𑀫𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀧𑀸𑀧𑀧𑀼𑀕𑁆𑀕𑀮𑀲𑁆𑀲 𑀧𑀦 𑀉𑀧𑀲𑀗𑁆𑀓𑀫𑀦𑀁 𑀅𑀦𑀺𑀘𑁆𑀙𑀢𑁄𑀧𑀺 𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦 𑀳𑁄𑀢𑀺. 𑀲𑁄 𑀳𑀺 𑀢𑁂𑀲𑀁 𑀧𑀲𑀸𑀤𑀪𑁂𑀤𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀧𑀲𑀸𑀤𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑁂𑀯 𑀧𑀦 𑀪𑀺𑀓𑁆𑀔𑀼𑀦𑁄 𑀢𑀢𑁆𑀣 𑀉𑀧𑀲𑀗𑁆𑀓𑀫𑀦𑀁 𑀅𑀦𑀺𑀘𑁆𑀙𑀢𑁄 𑀫𑀘𑁆𑀙𑀭𑀺𑀬𑀁 𑀦𑀸𑀫 𑀳𑁄𑀢𑀺.

𑀮𑀸𑀪𑁄𑀢𑀺 𑀘𑀢𑀼𑀧𑀘𑁆𑀘𑀬𑀮𑀸𑀪𑁄𑀯. 𑀢𑀁 𑀅𑀜𑁆𑀜𑀲𑁆𑀫𑀺𑀁 𑀲𑀻𑀮𑀯𑀦𑁆𑀢𑁂𑀬𑁂𑀯 𑀮𑀪𑀦𑁆𑀢𑁂 ‘‘𑀫𑀸 𑀮𑀪𑀢𑀽’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀮𑀸𑀪𑀫𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀬𑁄 𑀧𑀦 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺, 𑀅𑀧𑀭𑀺𑀪𑁄𑀕𑀤𑀼𑀧𑁆𑀧𑀭𑀺𑀪𑁄𑀕𑀸𑀤𑀺𑀯𑀲𑁂𑀦 𑀯𑀺𑀦𑀸𑀲𑁂𑀢𑀺, 𑀧𑀽𑀢𑀺𑀪𑀸𑀯𑀁 𑀕𑀘𑁆𑀙𑀦𑁆𑀢𑀫𑁆𑀧𑀺 𑀅𑀜𑁆𑀜𑀲𑁆𑀲 𑀦 𑀤𑁂𑀢𑀺, 𑀢𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀇𑀫𑀁 𑀏𑀲 𑀦 𑀮𑀪𑁂𑀬𑁆𑀬, 𑀅𑀜𑁆𑀜𑁄 𑀲𑀻𑀮𑀯𑀸 𑀮𑀪𑁂𑀬𑁆𑀬, 𑀧𑀭𑀺𑀪𑁄𑀕𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦𑀢𑁆𑀣𑀺.

𑀯𑀡𑁆𑀡𑁄 𑀦𑀸𑀫 𑀲𑀭𑀻𑀭𑀯𑀡𑁆𑀡𑁄𑀧𑀺 𑀕𑀼𑀡𑀯𑀡𑁆𑀡𑁄𑀧𑀺. 𑀢𑀢𑁆𑀣 𑀲𑀭𑀻𑀭𑀯𑀡𑁆𑀡𑁂 𑀫𑀘𑁆𑀙𑀭𑀻 ‘‘𑀧𑀭𑁄 𑀧𑀸𑀲𑀸𑀤𑀺𑀓𑁄 𑀭𑀽𑀧𑀯𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀦 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀕𑀼𑀡𑀯𑀡𑁆𑀡𑀫𑀘𑁆𑀙𑀭𑀻 𑀧𑀭𑀲𑁆𑀲 𑀲𑀻𑀮𑁂𑀦 𑀥𑀼𑀢𑀗𑁆𑀕𑁂𑀦 𑀧𑀝𑀺𑀧𑀤𑀸𑀬 𑀆𑀘𑀸𑀭𑁂𑀦 𑀯𑀡𑁆𑀡𑀁 𑀦 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺.

𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀘 𑀧𑀝𑀺𑀯𑁂𑀥𑀥𑀫𑁆𑀫𑁄 𑀘. 𑀢𑀢𑁆𑀣 𑀅𑀭𑀺𑀬𑀲𑀸𑀯𑀓𑀸 𑀧𑀝𑀺𑀯𑁂𑀥𑀥𑀫𑁆𑀫𑀁 𑀦 𑀫𑀘𑁆𑀙𑀭𑀸𑀬𑀦𑁆𑀢𑀺, 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑁂 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀝𑀺𑀯𑁂𑀥𑀁 𑀇𑀘𑁆𑀙𑀦𑁆𑀢𑀺. 𑀢𑀁 𑀧𑀦 𑀧𑀝𑀺𑀯𑁂𑀥𑀁 ‘‘𑀧𑀭𑁂 𑀚𑀸𑀦𑀦𑁆𑀢𑀽’’𑀢𑀺 𑀇𑀘𑁆𑀙𑀦𑁆𑀢𑀺, 𑀢𑀦𑁆𑀢𑀺𑀥𑀫𑁆𑀫𑁂𑀬𑁂𑀯 𑀧𑀦 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀬𑀁 𑀕𑀼𑀴𑁆𑀳𑀁 𑀕𑀦𑁆𑀣𑀁 𑀯𑀸 𑀓𑀣𑀸𑀫𑀕𑁆𑀕𑀁 𑀯𑀸 𑀚𑀸𑀦𑀸𑀢𑀺, 𑀢𑀁 𑀅𑀜𑁆𑀜𑁂 𑀦 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀬𑁄 𑀧𑀦 𑀧𑀼𑀕𑁆𑀕𑀮𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀥𑀫𑁆𑀫𑀁 𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀼𑀕𑁆𑀕𑀮𑀸𑀦𑀼𑀕𑁆𑀕𑀳𑁂𑀦 𑀦 𑀤𑁂𑀢𑀺, 𑀅𑀬𑀁 𑀥𑀫𑁆𑀫𑀫𑀘𑁆𑀙𑀭𑀻 𑀦𑀸𑀫 𑀦 𑀳𑁄𑀢𑀺. 𑀢𑀢𑁆𑀣 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀮𑁄𑀮𑁄 𑀳𑁄𑀢𑀺, 𑀓𑀸𑀮𑁂𑀦 𑀲𑀫𑀡𑁄 𑀳𑁄𑀢𑀺, 𑀓𑀸𑀮𑁂𑀦 𑀩𑁆𑀭𑀸𑀳𑁆𑀫𑀡𑁄, 𑀓𑀸𑀮𑁂𑀦 𑀦𑀺𑀕𑀡𑁆𑀞𑁄. 𑀬𑁄 𑀳𑀺 𑀪𑀺𑀓𑁆𑀔𑀼 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀧𑀯𑁂𑀡𑀺𑀆𑀕𑀢𑀁 𑀢𑀦𑁆𑀢𑀺𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀆𑀮𑀼𑀴𑁂𑀲𑁆𑀲𑀢𑀻’’𑀢𑀺 𑀦 𑀤𑁂𑀢𑀺, 𑀅𑀬𑀁 𑀧𑀼𑀕𑁆𑀕𑀮𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀦 𑀤𑁂𑀢𑀺 𑀦𑀸𑀫. 𑀬𑁄 𑀧𑀦 ‘‘𑀅𑀬𑀁 𑀥𑀫𑁆𑀫𑁄 𑀲𑀡𑁆𑀳𑁄 𑀲𑀼𑀔𑀼𑀫𑁄, 𑀲𑀘𑀸𑀬𑀁 𑀧𑀼𑀕𑁆𑀕𑀮𑁄 𑀕𑀡𑁆𑀳𑀺𑀲𑁆𑀲𑀢𑀺, 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀆𑀯𑀺 𑀓𑀢𑁆𑀯𑀸 𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀦 𑀤𑁂𑀢𑀺, 𑀅𑀬𑀁 𑀥𑀫𑁆𑀫𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀼𑀕𑁆𑀕𑀮𑀸𑀦𑀼𑀕𑁆𑀕𑀳𑁂𑀦 𑀦 𑀤𑁂𑀢𑀺 𑀦𑀸𑀫. 𑀬𑁄 𑀧𑀦 ‘‘𑀲𑀘𑀸𑀬𑀁 𑀇𑀫𑀁 𑀥𑀫𑁆𑀫𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀲𑀫𑀬𑀁 𑀪𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦 𑀤𑁂𑀢𑀺, 𑀅𑀬𑀁 𑀥𑀫𑁆𑀫𑀫𑀘𑁆𑀙𑀭𑀻 𑀦𑀸𑀫 𑀳𑁄𑀢𑀺.

𑀇𑀫𑁂𑀲𑀼 𑀧𑀜𑁆𑀘𑀲𑀼 𑀫𑀘𑁆𑀙𑀭𑀺𑀬𑁂𑀲𑀼 𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀢𑀸𑀯 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀳𑀼𑀢𑁆𑀯𑀸 𑀢𑀲𑁆𑀲𑁂𑀯 𑀆𑀯𑀸𑀲𑀲𑁆𑀲 𑀲𑀗𑁆𑀓𑀸𑀭𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀢𑀺. 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀢𑀲𑁆𑀫𑀺𑀁 𑀓𑀼𑀮𑁂 𑀅𑀜𑁆𑀜𑁂𑀲𑀁 𑀤𑀸𑀦𑀫𑀸𑀦𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀪𑀺𑀦𑁆𑀦𑀁 𑀯𑀢𑀺𑀤𑀁 𑀓𑀼𑀮𑀁 𑀫𑀫𑀸’’𑀢𑀺 𑀘𑀺𑀦𑁆𑀢𑀬𑀢𑁄 𑀮𑁄𑀳𑀺𑀢𑀫𑁆𑀧𑀺 𑀫𑀼𑀔𑀢𑁄 𑀉𑀕𑁆𑀕𑀘𑁆𑀙𑀢𑀺, 𑀓𑀼𑀘𑁆𑀙𑀺𑀯𑀺𑀭𑁂𑀘𑀦𑀫𑁆𑀧𑀺 𑀳𑁄𑀢𑀺, 𑀅𑀦𑁆𑀢𑀸𑀦𑀺𑀧𑀺 𑀔𑀡𑁆𑀟𑀸𑀔𑀡𑁆𑀟𑀸𑀦𑀺 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀲𑀦𑁆𑀢𑀓𑁂 𑀮𑀸𑀪𑁂 𑀫𑀘𑁆𑀙𑀭𑀸𑀬𑀺𑀢𑁆𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀫𑀳𑀸𑀅𑀚𑀕𑀭𑁄 𑀯𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀲𑀭𑀻𑀭𑀯𑀡𑁆𑀡𑀕𑀼𑀡𑀯𑀡𑁆𑀡𑀫𑀘𑁆𑀙𑀭𑁂𑀦 𑀧𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀘 𑀅𑀢𑁆𑀢𑀦𑁄𑀯 𑀯𑀡𑁆𑀡𑀁 𑀯𑀡𑁆𑀡𑁂𑀢𑀺, 𑀧𑀭𑁂𑀲𑀁 𑀯𑀡𑁆𑀡𑁂 ‘‘𑀓𑀺𑀁 𑀯𑀡𑁆𑀡𑁄 𑀏𑀲𑁄’’𑀢𑀺 𑀢𑀁 𑀢𑀁 𑀤𑁄𑀲𑀁 𑀯𑀤𑀦𑁆𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀜𑁆𑀘 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑁂𑀦𑁆𑀢𑁄 𑀤𑀼𑀩𑁆𑀩𑀡𑁆𑀡𑁄 𑀘𑁂𑀯 𑀏𑀴𑀫𑀽𑀕𑁄 𑀘 𑀳𑁄𑀢𑀺.

𑀅𑀧𑀺 𑀘 𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀮𑁄𑀳𑀕𑁂𑀳𑁂 𑀧𑀘𑁆𑀘𑀢𑀺, 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀅𑀧𑁆𑀧𑀮𑀸𑀪𑁄 𑀳𑁄𑀢𑀺, 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀕𑀽𑀣𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀯𑀡𑁆𑀡𑀫𑀘𑁆𑀙𑀭𑀺𑀬𑁂𑀦 𑀪𑀯𑁂 𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀯𑀡𑁆𑀡𑁄 𑀦𑀸𑀫 𑀦 𑀳𑁄𑀢𑀺, 𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀓𑀼𑀓𑁆𑀓𑀼𑀴𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺.

𑀫𑀘𑁆𑀙𑀭𑀸𑀬𑀦𑀯𑀲𑁂𑀦 𑀫𑀘𑁆𑀙𑀭𑀺𑀬𑀁. 𑀫𑀘𑁆𑀙𑀭𑀸𑀬𑀦𑀸𑀓𑀸𑀭𑁄 𑀫𑀘𑁆𑀙𑀭𑀸𑀬𑀦𑀸. 𑀫𑀘𑁆𑀙𑀭𑁂𑀦 𑀅𑀬𑀺𑀢𑀲𑁆𑀲 𑀫𑀘𑁆𑀙𑁂𑀭𑀲𑀫𑀗𑁆𑀕𑀺𑀦𑁄 𑀪𑀸𑀯𑁄 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁. ‘‘𑀫𑀬𑁆𑀳𑀫𑁂𑀯 𑀳𑁄𑀦𑁆𑀢𑀼, 𑀫𑀸 𑀅𑀜𑁆𑀜𑀲𑁆𑀲𑀸’’𑀢𑀺 𑀲𑀩𑁆𑀩𑀸𑀧𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑁄 𑀩𑁆𑀬𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀻𑀢𑀺 𑀯𑀺𑀯𑀺𑀘𑁆𑀙𑁄, 𑀯𑀺𑀯𑀺𑀘𑁆𑀙𑀲𑁆𑀲 𑀪𑀸𑀯𑁄 𑀯𑁂𑀯𑀺𑀘𑁆𑀙𑀁, 𑀫𑀼𑀤𑀼𑀫𑀘𑁆𑀙𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀓𑀤𑀭𑀺𑀬𑁄 𑀯𑀼𑀘𑁆𑀘𑀢𑀺 𑀅𑀦𑀸𑀤𑀭𑁄, 𑀢𑀲𑁆𑀲 𑀪𑀸𑀯𑁄 𑀓𑀤𑀭𑀺𑀬𑀁, 𑀣𑀤𑁆𑀥𑀫𑀘𑁆𑀙𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀢𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀧𑀭𑀫𑁆𑀧𑀺 𑀧𑀭𑁂𑀲𑀁 𑀤𑀤𑀫𑀸𑀦𑀁 𑀦𑀺𑀯𑀸𑀭𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀓𑀤𑀭𑀺𑀬𑁄 𑀧𑀸𑀧𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀅𑀦𑀸𑀤𑀭𑁄;

𑀤𑀤𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀬𑀸𑀘𑀫𑀸𑀦𑀸𑀦 𑀪𑁄𑀚𑀦’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁩𑁨);

𑀬𑀸𑀘𑀓𑁂 𑀤𑀺𑀲𑁆𑀯𑀸 𑀓𑀝𑀼𑀓𑀪𑀸𑀯𑁂𑀦 𑀘𑀺𑀢𑁆𑀢𑀁 𑀅𑀜𑁆𑀘𑀢𑀺 𑀲𑀗𑁆𑀓𑁄𑀘𑁂𑀢𑀻𑀢𑀺 𑀓𑀝𑀼𑀓𑀜𑁆𑀘𑀼𑀓𑁄, 𑀢𑀲𑁆𑀲 𑀪𑀸𑀯𑁄 𑀓𑀝𑀼𑀓𑀜𑁆𑀘𑀼𑀓𑀢𑀸. 𑀅𑀧𑀭𑁄 𑀦𑀬𑁄 𑁋 𑀓𑀝𑀼𑀓𑀜𑁆𑀘𑀼𑀓𑀢𑀸 𑀯𑀼𑀘𑁆𑀘𑀢𑀺 𑀓𑀝𑀘𑁆𑀙𑀼𑀕𑁆𑀕𑀸𑀳𑁄. 𑀲𑀫𑀢𑀺𑀢𑁆𑀢𑀺𑀓𑀧𑀼𑀡𑁆𑀡𑀸𑀬 𑀳𑀺 𑀉𑀓𑁆𑀔𑀮𑀺𑀬𑀸 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀲𑀩𑁆𑀩𑀢𑁄𑀪𑀸𑀕𑁂𑀦 𑀲𑀗𑁆𑀓𑀼𑀝𑀺𑀢𑁂𑀦 𑀅𑀕𑁆𑀕𑀓𑀝𑀘𑁆𑀙𑀼𑀦𑀸 𑀕𑀡𑁆𑀳𑀸𑀢𑀺 𑀧𑀽𑀭𑁂𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀫𑀘𑁆𑀙𑀭𑀺𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀲𑀗𑁆𑀓𑀼𑀘𑀢𑀺, 𑀢𑀲𑁆𑀫𑀺𑀁 𑀲𑀗𑁆𑀓𑀼𑀘𑀺𑀢𑁂 𑀓𑀸𑀬𑁄𑀧𑀺 𑀢𑀣𑁂𑀯 𑀲𑀗𑁆𑀓𑀼𑀘𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀦𑀺𑀯𑀝𑁆𑀝𑀢𑀺 𑀦 𑀲𑀫𑁆𑀧𑀲𑀸𑀭𑀻𑀬𑀢𑀻𑀢𑀺 𑀫𑀘𑁆𑀙𑁂𑀭𑀁 ‘‘𑀓𑀝𑀼𑀓𑀜𑁆𑀘𑀼𑀓𑀢𑀸’’𑀢𑀺 𑀯𑀼𑀢𑁆𑀢𑀁.

𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲𑀸𑀢𑀺 𑀧𑀭𑁂𑀲𑀁 𑀉𑀧𑀓𑀸𑀭𑀓𑀭𑀡𑁂 𑀤𑀸𑀦𑀸𑀤𑀺𑀦𑀸 𑀆𑀓𑀸𑀭𑁂𑀦 𑀬𑀣𑀸 𑀦 𑀲𑀫𑁆𑀧𑀲𑀸𑀭𑀻𑀬𑀢𑀺, 𑀏𑀯𑀁 𑀆𑀯𑀭𑀺𑀢𑁆𑀯𑀸 𑀕𑀳𑀺𑀢𑀪𑀸𑀯𑁄 𑀘𑀺𑀢𑁆𑀢𑀲𑁆𑀲. 𑀬𑀲𑁆𑀫𑀸 𑀧𑀦 𑀫𑀘𑁆𑀙𑀭𑀺𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑁂𑀲𑀁 𑀅𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀭𑀲𑀦𑁆𑀢𑀓𑀁 𑀕𑀡𑁆𑀳𑀺𑀢𑀼𑀓𑀸𑀫𑁄. 𑀢𑀲𑁆𑀫𑀸 ‘‘𑀇𑀤𑀁 𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑀫𑁂𑀯 𑀳𑁄𑀢𑀼, 𑀫𑀸 𑀅𑀜𑁆𑀜𑀲𑁆𑀲𑀸’’𑀢𑀺 𑀧𑀯𑀢𑁆𑀢𑀺𑀯𑀲𑁂𑀦𑀲𑁆𑀲 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀢𑀸 𑀧𑀭𑀲𑀫𑁆𑀧𑀢𑁆𑀢𑀺𑀕𑁆𑀕𑀳𑀡𑀮𑀓𑁆𑀔𑀡𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀦𑁆𑀢𑀺 𑀅𑀢𑁆𑀢𑀦𑁄 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀉𑀧𑀧𑀢𑁆𑀢𑀺𑀪𑀯𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 ‘‘𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑀫𑁂𑀯 𑀳𑁄𑀢𑀼, 𑀫𑀸 𑀅𑀜𑁆𑀜𑀲𑁆𑀲𑀸’’𑀢𑀺 𑀧𑀯𑀢𑁆𑀢𑀁 𑀫𑀘𑁆𑀙𑀭𑀺𑀬𑀁 𑀔𑀦𑁆𑀥𑀫𑀘𑁆𑀙𑀭𑀺𑀬𑀁 𑀦𑀸𑀫. 𑀥𑀸𑀢𑀼𑀆𑀬𑀢𑀦𑀫𑀘𑁆𑀙𑀭𑀺𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀳𑁄𑀢𑀺 𑀕𑀸𑀳𑀦𑀺𑀘𑁆𑀙𑀬𑀯𑀲𑁂𑀦 𑀕𑀳𑀡𑀁. 𑀅𑀯𑀤𑀜𑁆𑀜𑀼𑀢𑀸𑀬𑀸𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀫𑁆𑀧𑀺 𑀓𑀣𑀺𑀢𑀁 𑀅𑀚𑀸𑀦𑀦𑀪𑀸𑀯𑁂𑀦. 𑀬𑀸𑀘𑀓𑀸𑀦𑀁 𑀅𑀤𑀤𑀫𑀸𑀦𑁄 𑀳𑀺 𑀢𑁂𑀳𑀺 𑀓𑀣𑀺𑀢𑀁 𑀦 𑀚𑀸𑀦𑀸𑀢𑀺 𑀦𑀸𑀫. 𑀚𑀦𑀸 𑀧𑀫𑀢𑁆𑀢𑀸𑀢𑀺 𑀲𑀢𑀺𑀯𑀺𑀧𑁆𑀧𑀯𑀸𑀲𑀸 𑀚𑀦𑀸. 𑀯𑀘𑀦𑀦𑁆𑀢𑀺 𑀲𑀗𑁆𑀔𑁂𑀧𑀯𑀘𑀦𑀁. 𑀩𑁆𑀬𑀧𑁆𑀧𑀣𑀦𑁆𑀢𑀺 𑀯𑀺𑀢𑁆𑀣𑀸𑀭𑀯𑀘𑀦𑀁. 𑀤𑁂𑀲𑀦𑀦𑁆𑀢𑀺 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑀯𑀘𑀦𑀁. 𑀅𑀦𑀼𑀲𑀺𑀝𑁆𑀞𑀺𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀁𑀮𑀓𑁆𑀔𑀸𑀧𑀦𑀯𑀘𑀦𑀁. 𑀅𑀣 𑀯𑀸 𑀤𑀲𑁆𑀲𑁂𑀢𑁆𑀯𑀸 𑀓𑀣𑀦𑀁 𑀯𑀘𑀦𑀁 𑀦𑀸𑀫. 𑀕𑀡𑁆𑀳𑀸𑀧𑁂𑀢𑁆𑀯𑀸 𑀓𑀣𑀦𑀁 𑀩𑁆𑀬𑀧𑁆𑀧𑀣𑀁 𑀦𑀸𑀫. 𑀢𑁄𑀲𑁂𑀢𑁆𑀯𑀸 𑀓𑀣𑀦𑀁 𑀤𑁂𑀲𑀦𑀁 𑀦𑀸𑀫. 𑀧𑀤𑀲𑁆𑀲𑁂𑀢𑁆𑀯𑀸 𑀓𑀣𑀦𑀁 𑀅𑀦𑀼𑀲𑀺𑀝𑁆𑀞𑀺 𑀦𑀸𑀫. 𑀅𑀣 𑀯𑀸 𑀧𑀭𑀺𑀢𑀸𑀧𑀤𑀼𑀓𑁆𑀔𑀁 𑀦𑀸𑀲𑁂𑀢𑁆𑀯𑀸 𑀓𑀣𑀦𑀁 𑀯𑀘𑀦𑀁 𑀦𑀸𑀫. 𑀧𑀭𑀺𑀴𑀸𑀳𑀤𑀼𑀓𑁆𑀔𑀁 𑀦𑀸𑀲𑁂𑀢𑁆𑀯𑀸 𑀓𑀣𑀦𑀁 𑀩𑁆𑀬𑀧𑁆𑀧𑀣𑀁 𑀦𑀸𑀫. 𑀅𑀧𑀸𑀬𑀤𑀼𑀓𑁆𑀔𑀁 𑀦𑀸𑀲𑁂𑀢𑁆𑀯𑀸 𑀓𑀣𑀦𑀁 𑀤𑁂𑀲𑀦𑀁 𑀦𑀸𑀫. 𑀪𑀯𑀤𑀼𑀓𑁆𑀔𑀁 𑀦𑀸𑀲𑁂𑀢𑁆𑀯𑀸 𑀓𑀣𑀦𑀁 𑀅𑀦𑀼𑀲𑀺𑀝𑁆𑀞𑀺 𑀦𑀸𑀫. 𑀅𑀣 𑀯𑀸 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑀬𑀼𑀢𑁆𑀢𑀁 𑀯𑀘𑀦𑀁. 𑀲𑀫𑀼𑀤𑀬𑀲𑀘𑁆𑀘𑀧𑀳𑀸𑀦𑀧𑀝𑀺𑀯𑁂𑀥𑀬𑀼𑀢𑁆𑀢𑀁 𑀩𑁆𑀬𑀧𑁆𑀧𑀣𑀁. 𑀦𑀺𑀭𑁄𑀥𑀲𑀘𑁆𑀘𑀲𑀘𑁆𑀙𑀺𑀓𑀺𑀭𑀺𑀬𑀧𑀝𑀺𑀯𑁂𑀥𑀬𑀼𑀢𑁆𑀢𑀁 𑀤𑁂𑀲𑀦𑀁. 𑀫𑀕𑁆𑀕𑀲𑀘𑁆𑀘𑀪𑀸𑀯𑀦𑀸𑀧𑀝𑀺𑀯𑁂𑀥𑀬𑀼𑀢𑁆𑀢𑀁 𑀅𑀦𑀼𑀲𑀺𑀝𑁆𑀞𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀏𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀦 𑀲𑀼𑀲𑁆𑀲𑀼𑀲𑀦𑁆𑀢𑀻𑀢𑀺 𑀦 𑀲𑀼𑀡𑀦𑁆𑀢𑀺. 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀻𑀢𑀺 𑀲𑀯𑀦𑀢𑁆𑀣𑀁 𑀓𑀡𑁆𑀡𑀲𑁄𑀢𑀁 𑀦 𑀞𑀧𑁂𑀦𑁆𑀢𑀺. 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀻𑀢𑀺 𑀚𑀸𑀦𑀦𑀢𑁆𑀣𑀁 𑀘𑀺𑀢𑁆𑀢𑀁 𑀦 𑀧𑀢𑀺𑀝𑁆𑀞𑀧𑁂𑀦𑁆𑀢𑀺. 𑀅𑀦𑀲𑁆𑀲𑀯𑀸𑀢𑀺 𑀑𑀯𑀸𑀤𑀁 𑀅𑀲𑀼𑀡𑀫𑀸𑀦𑀸. 𑀅𑀯𑀘𑀦𑀓𑀭𑀸𑀢𑀺 𑀲𑀼𑀡𑀫𑀸𑀦𑀸𑀧𑀺 𑀯𑀘𑀦𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀯𑀘𑀦𑀓𑀭𑀸. 𑀧𑀝𑀺𑀮𑁄𑀫𑀯𑀼𑀢𑁆𑀢𑀺𑀦𑁄𑀢𑀺 𑀧𑀝𑀸𑀡𑀻 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑀓𑀸. 𑀅𑀜𑁆𑀜𑁂𑀦𑁂𑀯 𑀫𑀼𑀔𑀁 𑀓𑀭𑁄𑀦𑁆𑀢𑀻𑀢𑀺 𑀓𑀭𑁄𑀦𑁆𑀢𑀸𑀧𑀺 𑀫𑀼𑀔𑀁 𑀦 𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀲𑀫𑁂𑀢𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀲𑀫𑁆𑀫𑀢𑀲𑁆𑀲 𑀲𑀫𑀲𑁆𑀲 𑀧𑀝𑀺𑀧𑀓𑁆𑀔𑀢𑁆𑀢𑀸 𑀯𑀺𑀲𑀫𑀁, 𑀢𑀲𑁆𑀫𑀺𑀁 𑀯𑀺𑀲𑀫𑁂. 𑀦𑀺𑀯𑀺𑀝𑁆𑀞𑀸𑀢𑀺 𑀧𑀯𑀺𑀝𑁆𑀞𑀸 𑀤𑀼𑀦𑁆𑀦𑀻𑀳𑀭𑀸. 𑀓𑀸𑀬𑀓𑀫𑁆𑀫𑁂𑀢𑀺 𑀓𑀸𑀬𑀢𑁄 𑀧𑀯𑀢𑁆𑀢𑁂, 𑀓𑀸𑀬𑁂𑀦 𑀯𑀸 𑀧𑀯𑀢𑁆𑀢𑁂 𑀓𑀸𑀬𑀓𑀫𑁆𑀫𑁂. 𑀯𑀘𑀻𑀓𑀫𑁆𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀫𑀦𑁄𑀓𑀫𑁆𑀫𑀸𑀦𑀺 𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀯𑀺𑀪𑀢𑁆𑀢𑀸𑀦𑀺, 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀯𑀺𑀪𑀢𑁆𑀢𑀸𑀢𑀺 𑀜𑀸𑀢𑀩𑁆𑀩𑀁. 𑀅𑀬𑀁 𑀢𑀸𑀯𑁂𑀢𑁆𑀣 𑀲𑀸𑀥𑀸𑀭𑀡𑀧𑀤𑀯𑀡𑁆𑀡𑀦𑀸, 𑀅𑀲𑀸𑀥𑀸𑀭𑀡𑁂𑀲𑀼 𑀧𑀦 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀡𑁄𑀢𑀺 𑀘𑁂𑀢𑁆𑀣 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀫𑀺𑀁 𑀧𑀦 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀢𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀲𑁄 𑀕𑀼𑀡𑀯𑀺𑀭𑀳𑀺𑀢𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀲𑀼 𑀧𑀸𑀡𑁂𑀲𑀼 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀲𑀭𑀻𑀭𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬, 𑀧𑀬𑁄𑀕𑀲𑀫𑀢𑁆𑀢𑁂𑀧𑀺 𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀬. 𑀕𑀼𑀡𑀯𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑀸𑀤𑀻𑀲𑀼 𑀅𑀧𑁆𑀧𑀕𑀼𑀡𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀕𑀼𑀡𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀲𑀭𑀻𑀭𑀕𑀼𑀡𑀸𑀦𑀁 𑀧𑀦 𑀲𑀫𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀸𑀡𑁄 𑀧𑀸𑀡𑀲𑀜𑁆𑀜𑀺𑀢𑀸 𑀯𑀥𑀓𑀘𑀺𑀢𑁆𑀢𑀁 𑀉𑀧𑀓𑁆𑀓𑀫𑁄 𑀢𑁂𑀦 𑀫𑀭𑀡𑀦𑁆𑀢𑀺. 𑀙𑀧𑁆𑀧𑀬𑁄𑀕𑀸 𑁋 𑀲𑀸𑀳𑀢𑁆𑀣𑀺𑀓𑁄 𑀆𑀡𑀢𑁆𑀢𑀺𑀓𑁄 𑀦𑀺𑀲𑁆𑀲𑀕𑁆𑀕𑀺𑀬𑁄 𑀣𑀸𑀯𑀭𑁄 𑀯𑀺𑀚𑁆𑀚𑀸𑀫𑀬𑁄 𑀇𑀤𑁆𑀥𑀺𑀫𑀬𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 𑀅𑀢𑀺𑀧𑀧𑀜𑁆𑀘𑁄 𑀳𑁄𑀢𑀺, 𑀢𑀲𑁆𑀫𑀸 𑀦𑀁 𑀦 𑀯𑀺𑀢𑁆𑀣𑀸𑀭𑀬𑀺𑀲𑁆𑀲𑀸𑀫. 𑀅𑀜𑁆𑀜𑀜𑁆𑀘 𑀏𑀯𑀭𑀽𑀧𑀁, 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀯𑀺𑀦𑀬𑀝𑁆𑀞𑀓𑀣𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨) 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀧𑀭𑀲𑁆𑀲 𑀳𑀭𑀡𑀁 𑀣𑁂𑀬𑁆𑀬𑀁 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀅𑀤𑀺𑀦𑁆𑀦𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀬𑀢𑁆𑀣 𑀧𑀭𑁄 𑀬𑀣𑀸𑀓𑀸𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀦𑁆𑀢𑁄 𑀅𑀤𑀡𑁆𑀟𑀸𑀭𑀳𑁄 𑀅𑀦𑀼𑀧𑀯𑀚𑁆𑀚𑁄 𑀘 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀢𑀁 𑀳𑀻𑀦𑁂 𑀧𑀭𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀧𑀡𑀻𑀢𑁂 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀲𑁆𑀫𑀸? 𑀯𑀢𑁆𑀣𑀼𑀧𑀡𑀻𑀢𑀢𑀸𑀬, 𑀯𑀢𑁆𑀣𑀼𑀲𑀫𑀢𑁆𑀢𑁂 𑀲𑀢𑀺 𑀕𑀼𑀡𑀸𑀥𑀺𑀓𑀸𑀦𑀁 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀲𑀸𑀯𑀚𑁆𑀚𑀁. 𑀢𑀁 𑀢𑀁 𑀕𑀼𑀡𑀸𑀥𑀺𑀓𑀁 𑀉𑀧𑀸𑀤𑀸𑀬 𑀢𑀢𑁄 𑀢𑀢𑁄 𑀳𑀻𑀦𑀕𑀼𑀡𑀲𑁆𑀲 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑁆𑀧𑀲𑀸𑀯𑀚𑁆𑀚𑀁.

𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑀓𑁆𑀓𑀫𑁄 𑀢𑁂𑀦 𑀳𑀭𑀡𑀦𑁆𑀢𑀺. 𑀙𑀧𑁆𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀓𑀸𑀤𑀬𑁄𑀯. 𑀢𑁂 𑀘 𑀔𑁄 𑀬𑀣𑀸𑀦𑀼𑀭𑀽𑀧𑀁 𑀣𑁂𑀬𑁆𑀬𑀸𑀯𑀳𑀸𑀭𑁄 𑀧𑀲𑀬𑁆𑀳𑀸𑀯𑀳𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀓𑀼𑀲𑀸𑀯𑀳𑀸𑀭𑁄𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀯𑀳𑀸𑀭𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄.

𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀏𑀢𑁆𑀣 𑀧𑀦 𑀓𑀸𑀫𑁂𑀲𑀽𑀢𑀺 𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀼. 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀏𑀓𑀦𑁆𑀢𑀦𑀺𑀦𑁆𑀤𑀺𑀢𑁄 𑀮𑀸𑀫𑀓𑀸𑀘𑀸𑀭𑁄. 𑀮𑀓𑁆𑀔𑀡𑀢𑁄 𑀧𑀦 𑀅𑀲𑀤𑁆𑀥𑀫𑁆𑀫𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄.

𑀢𑀢𑁆𑀣 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑀧𑀼𑀭𑀺𑀲𑀸𑀦𑀁 𑀢𑀸𑀯 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀸𑀭𑀓𑁆𑀔𑀸 𑀲𑀧𑀭𑀺𑀤𑀡𑁆𑀟𑀸𑀢𑀺 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀬𑁄 𑀤𑀲, 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀪𑁄𑀕𑀯𑀸𑀲𑀺𑀦𑀻 𑀧𑀝𑀯𑀸𑀲𑀺𑀦𑀻 𑀑𑀤𑀧𑀢𑁆𑀢𑀓𑀺𑀦𑀻 𑀑𑀪𑀢𑀘𑀼𑀫𑁆𑀩𑀝𑀓𑀸 𑀤𑀸𑀲𑀻 𑀘 𑀪𑀭𑀺𑀬𑀸 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀥𑀚𑀸𑀳𑀝𑀸 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀏𑀢𑀸 𑀥𑀦𑀓𑁆𑀓𑀻𑀢𑀸𑀤𑀬𑁄 𑀤𑀲𑀸𑀢𑀺 𑀯𑀻𑀲𑀢𑀺 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀻𑀲𑀼 𑀧𑀦 𑀤𑁆𑀯𑀻𑀦𑁆𑀦𑀁 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁 𑀤𑀲𑀦𑁆𑀦𑀜𑁆𑀘 𑀥𑀦𑀓𑁆𑀓𑀻𑀢𑀸𑀤𑀻𑀦𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀅𑀜𑁆𑀜𑁂 𑀧𑀼𑀭𑀺𑀲𑀸, 𑀇𑀤𑀁 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫.

𑀲𑁄 𑀧𑀦𑁂𑀲 𑀫𑀺𑀘𑁆𑀙𑀸𑀘𑀸𑀭𑁄 𑀲𑀻𑀮𑀸𑀤𑀺𑀕𑀼𑀡𑀭𑀳𑀺𑀢𑁂 𑀅𑀕𑀫𑀦𑀻𑀬𑀝𑁆𑀞𑀸𑀦𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑁋 𑀅𑀕𑀫𑀦𑀻𑀬𑀯𑀢𑁆𑀣𑀼 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀁 𑀲𑁂𑀯𑀦𑀧𑀬𑁄𑀕𑁄 𑀫𑀕𑁆𑀕𑁂𑀦 𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄 𑀏𑀯.

𑀫𑀼𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀦𑀓𑁄 𑀯𑀘𑀻𑀧𑀬𑁄𑀕𑁄 𑀓𑀸𑀬𑀧𑀬𑁄𑀕𑁄 𑀯𑀸. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦𑀲𑁆𑀲 𑀧𑀭𑀯𑀺𑀲𑀁𑀯𑀸𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀅𑀧𑀭𑁄 𑀦𑀬𑁄 𑁋 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼. 𑀯𑀸𑀤𑁄𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑀦𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀢𑀣𑀁 𑀯𑀢𑁆𑀣𑀼𑀁 𑀢𑀣𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑁄 𑀬𑀫𑀢𑁆𑀣𑀁 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀧𑁆𑀧𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀅𑀧𑀺 𑀘 𑀕𑀳𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 ‘‘𑀦𑀢𑁆𑀣𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀓𑁆𑀔𑀺𑀦𑀸 𑀳𑀼𑀢𑁆𑀯𑀸 𑀅𑀢𑁆𑀣𑀪𑀜𑁆𑀚𑀦𑀢𑁆𑀣𑀁 𑀯𑀼𑀢𑁆𑀢𑁄 𑀫𑀳𑀸𑀲𑀸𑀯𑀚𑁆𑀚𑁄. 𑀧𑀩𑁆𑀩𑀚𑀺𑀢𑀸𑀦𑀁 𑀅𑀧𑁆𑀧𑀓𑀫𑁆𑀧𑀺 𑀢𑁂𑀮𑀁 𑀯𑀸 𑀲𑀧𑁆𑀧𑀺𑀁 𑀯𑀸 𑀮𑀪𑀺𑀢𑁆𑀯𑀸 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 ‘‘𑀅𑀚𑁆𑀚 𑀕𑀸𑀫𑁂 𑀢𑁂𑀮𑀁 𑀦𑀤𑀻 𑀫𑀜𑁆𑀜𑁂 𑀲𑀦𑁆𑀤𑀢𑀻’’𑀢𑀺 𑀧𑀽𑀭𑀡𑀓𑀣𑀸𑀦𑀬𑁂𑀦 𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀅𑀤𑀺𑀝𑁆𑀞𑀁𑀬𑁂𑀯 𑀧𑀦 𑀤𑀺𑀝𑁆𑀞𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀤𑀦𑁆𑀢𑀸𑀦𑀁 𑀫𑀳𑀸𑀲𑀸𑀯𑀚𑁆𑀚𑁄.

𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀅𑀢𑀣𑀁 𑀯𑀢𑁆𑀣𑀼 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁 𑀢𑀚𑁆𑀚𑁄 𑀯𑀸𑀬𑀸𑀫𑁄 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀯. 𑀲𑁄 𑀘 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀭𑀯𑀺𑀲𑀁𑀯𑀸𑀤𑀓𑀓𑀺𑀭𑀺𑀬𑀸𑀓𑀭𑀡𑁂 𑀤𑀝𑁆𑀞𑀩𑁆𑀩𑁄. 𑀢𑀸𑀬 𑀘𑁂 𑀓𑀺𑀭𑀺𑀬𑀸𑀬 𑀧𑀭𑁄 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀅𑀬𑀁 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺.

𑀧𑀺𑀲𑀼𑀡𑀯𑀸𑀘𑀸𑀢𑀺𑀆𑀤𑀻𑀲𑀼 𑀬𑀸𑀬 𑀯𑀸𑀘𑀸𑀬 𑀬𑀲𑁆𑀲 𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀢𑀲𑁆𑀲 𑀳𑀤𑀬𑁂 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺, 𑀲𑀸 𑀧𑀺𑀲𑀼𑀡𑀯𑀸𑀘𑀸. 𑀬𑀸𑀬 𑀧𑀦 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀨𑀭𑀼𑀲𑀁 𑀓𑀭𑁄𑀢𑀺, 𑀬𑀸 𑀯𑀸𑀘𑀸 𑀲𑀬𑀫𑁆𑀧𑀺 𑀨𑀭𑀼𑀲𑀸 𑀦𑁂𑀯 𑀓𑀡𑁆𑀡𑀲𑀼𑀔𑀸 𑀦 𑀳𑀤𑀬𑀗𑁆𑀕𑀫𑀸, 𑀅𑀬𑀁 𑀨𑀭𑀼𑀲𑀯𑀸𑀘𑀸. 𑀬𑁂𑀦 𑀲𑀫𑁆𑀨𑀁 𑀧𑀮𑀧𑀢𑀺 𑀦𑀺𑀭𑀢𑁆𑀣𑀓𑀁, 𑀲𑁄 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀢𑁂𑀲𑀁 𑀫𑀽𑀮𑀪𑀽𑀢𑀸𑀧𑀺 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸𑀤𑀺𑀦𑀸𑀫𑀫𑁂𑀯 𑀮𑀪𑀢𑀺, 𑀲𑀸 𑀏𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺.

𑀢𑀢𑁆𑀣 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀭𑁂𑀲𑀁 𑀯𑀸 𑀪𑁂𑀤𑀸𑀬 𑀅𑀢𑁆𑀢𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸. 𑀲𑀸 𑀬𑀲𑁆𑀲 𑀪𑁂𑀤𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸.

𑀢𑀲𑁆𑀲𑀸 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀪𑀺𑀦𑁆𑀤𑀺𑀢𑀩𑁆𑀩𑁄 𑀧𑀭𑁄 ‘‘𑀇𑀢𑀺 𑀇𑀫𑁂 𑀦𑀸𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸 𑀯𑀸, ‘‘𑀇𑀢𑀺 𑀅𑀳𑀁 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀯𑀺𑀬𑀓𑀫𑁆𑀬𑀢𑀸 𑀯𑀸, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀢𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺.

𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸. 𑀫𑀫𑁆𑀫𑀘𑁆𑀙𑁂𑀤𑀓𑁄𑀧𑀺 𑀧𑀬𑁄𑀕𑁄 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀓𑀤𑀸𑀘𑀺 𑀧𑀼𑀢𑁆𑀢𑀓𑁂 𑀏𑀯𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀘𑁄𑀭𑀸 𑀯𑁄 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑀽’’𑀢𑀺, 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀘 𑀦𑁂𑀲𑀁 𑀉𑀧𑀭𑀺 𑀧𑀢𑀦𑁆𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘 𑀓𑀤𑀸𑀘𑀺 𑀦𑀺𑀲𑁆𑀲𑀺𑀢𑀓𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑀺𑀁 𑀇𑀫𑁂 𑀅𑀳𑀺𑀭𑀺𑀓𑀸 𑀅𑀦𑁄𑀢𑁆𑀢𑀧𑁆𑀧𑀺𑀦𑁄 𑀘𑀭𑀦𑁆𑀢𑀺, 𑀦𑀺𑀤𑁆𑀥𑀫𑀣 𑀦𑁂’’𑀢𑀺. 𑀅𑀣 𑀘 𑀦𑁂𑀲𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀺. 𑀬𑀣𑀸 𑀘 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺, 𑀏𑀯𑀁 𑀯𑀘𑀦𑀲𑀡𑁆𑀳𑀢𑀸𑀬 𑀅𑀨𑀭𑀼𑀲𑀯𑀸𑀘𑀸𑀧𑀺 𑀦 𑀳𑁄𑀢𑀺. 𑀦 𑀳𑀺 𑀫𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 ‘‘𑀇𑀫𑀁 𑀲𑀼𑀔𑀁 𑀲𑀬𑀸𑀧𑁂𑀣𑀸’’𑀢𑀺 𑀯𑀘𑀦𑀁 𑀅𑀨𑀭𑀼𑀲𑀯𑀸𑀘𑀸 𑀳𑁄𑀢𑀺, 𑀘𑀺𑀢𑁆𑀢𑀨𑀭𑀼𑀲𑀢𑀸𑀬 𑀧𑀦𑁂𑀲𑀸 𑀨𑀭𑀼𑀲𑀯𑀸𑀘𑀸𑀯, 𑀲𑀸 𑀬𑀁 𑀲𑀦𑁆𑀥𑀸𑀬 𑀧𑀯𑀢𑁆𑀢𑀺𑀢𑀸. 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀢𑀬𑁄 𑀲𑀫𑁆𑀪𑀸𑀭𑀸 𑁋 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑁄 𑀓𑀼𑀧𑀺𑀢𑀘𑀺𑀢𑁆𑀢𑀁 𑀅𑀓𑁆𑀓𑁄𑀲𑀦𑀦𑁆𑀢𑀺.

𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀺𑀓𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀓𑀼𑀲𑀮𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀲𑁄 𑀆𑀲𑁂𑀯𑀦𑀫𑀦𑁆𑀤𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀆𑀲𑁂𑀯𑀦𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀦𑀺𑀭𑀢𑁆𑀣𑀓𑀓𑀣𑀸𑀧𑀼𑀭𑁂𑀓𑁆𑀔𑀸𑀭𑀢𑀸 𑀢𑀣𑀸𑀭𑀽𑀧𑀻𑀓𑀣𑀸𑀓𑀣𑀦𑀜𑁆𑀘𑀸𑀢𑀺.

𑀅𑀪𑀺𑀚𑁆𑀛𑀸𑀬𑀢𑀻𑀢𑀺 𑀅𑀪𑀺𑀚𑁆𑀛𑀸, 𑀧𑀭𑀪𑀡𑁆𑀟𑀸𑀪𑀺𑀫𑀼𑀔𑀻 𑀳𑀼𑀢𑁆𑀯𑀸 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀸 ‘‘𑀅𑀳𑁄 𑀯𑀢 𑀇𑀤𑀁 𑀫𑀫𑀸𑀲𑁆𑀲𑀸’’𑀢𑀺 𑀏𑀯𑀁 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀸. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀢𑀲𑁆𑀲𑀸 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀭𑀪𑀡𑁆𑀟𑀁 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀜𑁆𑀘𑀸𑀢𑀺. 𑀧𑀭𑀪𑀡𑁆𑀟𑀯𑀢𑁆𑀣𑀼𑀓𑁂 𑀳𑀺 𑀮𑁄𑀪𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀬𑀸𑀯 ‘‘𑀅𑀳𑁄 𑀯𑀢𑀺𑀤𑀁 𑀫𑀫𑀸𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀦 𑀧𑀭𑀺𑀡𑀸𑀫𑁂𑀢𑀺.

𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑀬𑀢𑀻𑀢𑀺 𑀩𑁆𑀬𑀸𑀧𑀸𑀤𑁄, 𑀲𑁄 𑀧𑀭𑀯𑀺𑀦𑀸𑀲𑀸𑀬 𑀫𑀦𑁄𑀧𑀤𑁄𑀲𑀮𑀓𑁆𑀔𑀡𑁄. 𑀨𑀭𑀼𑀲𑀯𑀸𑀘𑀸 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑁄 𑀫𑀳𑀸𑀲𑀸𑀯𑀚𑁆𑀚𑁄 𑀘. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀭𑀲𑀢𑁆𑀢𑁄 𑀘 𑀢𑀲𑁆𑀲 𑀘 𑀯𑀺𑀦𑀸𑀲𑀘𑀺𑀦𑁆𑀢𑀸𑀢𑀺. 𑀧𑀭𑀲𑀢𑁆𑀢𑀯𑀢𑁆𑀣𑀼𑀓𑁂 𑀳𑀺 𑀓𑁄𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀬𑀸𑀯 ‘‘𑀅𑀳𑁄 𑀯𑀢𑀸𑀬𑀁 𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀯𑀺𑀦𑀸𑀲𑀁 𑀦 𑀘𑀺𑀦𑁆𑀢𑁂𑀲𑀺.

𑀬𑀣𑀸𑀪𑀼𑀘𑁆𑀘𑀕𑀳𑀡𑀸𑀪𑀸𑀯𑁂𑀦 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀤𑀲𑁆𑀲𑀦𑀮𑀓𑁆𑀔𑀡𑀸. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘.

𑀲𑀜𑁆𑀜𑀻, 𑀅𑀲𑀜𑁆𑀜𑀻, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲𑀸𑀫𑀸𑀢𑀺 𑀭𑀽𑀧𑀸𑀤𑀺𑀯𑀲𑁂𑀦 𑀓𑀗𑁆𑀔𑀦𑁆𑀢𑀺. 𑀪𑀯𑀺𑀲𑁆𑀲𑀸𑀫 𑀦𑀼 𑀔𑁄 𑀫𑀬𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀢𑀸𑀦𑀁 𑀓𑀗𑁆𑀔𑀦𑁆𑀢𑀺. 𑀢𑀢𑁆𑀣 𑀪𑀯𑀺𑀲𑁆𑀲𑀸𑀫 𑀦𑀼 𑀔𑁄. 𑀦 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀢𑀲𑁆𑀲 𑀲𑀲𑁆𑀲𑀢𑀸𑀓𑀸𑀭𑀜𑁆𑀘 𑀉𑀘𑁆𑀙𑁂𑀤𑀸𑀓𑀸𑀭𑀜𑁆𑀘 𑀦𑀺𑀲𑁆𑀲𑀸𑀬 𑀅𑀦𑀸𑀕𑀢𑁂 𑀅𑀢𑁆𑀢𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀓𑀗𑁆𑀔𑀦𑁆𑀢𑀺. 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀚𑀸𑀢𑀺𑀮𑀺𑀗𑁆𑀕𑀼𑀧𑀧𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 ‘‘𑀔𑀢𑁆𑀢𑀺𑀬𑀸 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫, 𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀢𑀭𑀸’’𑀢𑀺 𑀓𑀗𑁆𑀔𑀦𑁆𑀢𑀺. 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀡𑁆𑀞𑀸𑀦𑀸𑀓𑀸𑀭𑀁 𑀦𑀺𑀲𑁆𑀲𑀸𑀬 ‘‘𑀤𑀻𑀖𑀸 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫, 𑀭𑀲𑁆𑀲𑀑𑀤𑀸𑀢𑀓𑀡𑁆𑀳𑀧𑀫𑀸𑀡𑀺𑀓𑀅𑀧𑁆𑀧𑀫𑀸𑀡𑀺𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀸’’𑀢𑀺 𑀓𑀗𑁆𑀔𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 ‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀪𑀯𑀺𑀲𑁆𑀲𑀸𑀫𑀸’𑀢𑀺 𑀳𑁂𑀢𑀼𑀢𑁄 𑀓𑀗𑁆𑀔𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫 𑀦𑀼 𑀔𑁄 𑀫𑀬𑀦𑁆𑀢𑀺 𑀚𑀸𑀢𑀺𑀆𑀤𑀻𑀦𑀺 𑀦𑀺𑀲𑁆𑀲𑀸𑀬 ‘‘𑀔𑀢𑁆𑀢𑀺𑀬𑀸 𑀳𑀼𑀢𑁆𑀯𑀸 𑀦𑀼 𑀔𑁄 𑀩𑁆𑀭𑀸𑀳𑁆𑀫𑀡𑀸 𑀪𑀯𑀺𑀲𑁆𑀲𑀸𑀫…𑀧𑁂… 𑀤𑁂𑀯𑀸 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀧𑀭𑀫𑁆𑀧𑀭𑀁 𑀓𑀗𑁆𑀔𑀦𑁆𑀢𑀺. 𑀲𑀩𑁆𑀩𑀢𑁆𑀣𑁂𑀯 𑀧𑀦 𑀅𑀤𑁆𑀥𑀸𑀦𑀦𑁆𑀢𑀺 𑀓𑀸𑀮𑀸𑀥𑀺𑀯𑀘𑀦𑀫𑁂𑀢𑀁.

𑁧𑁦. 𑀬𑀲𑁆𑀫𑀸 𑀏𑀢𑀤𑁂𑀯 𑀢𑀲𑁆𑀫𑀸 𑀳𑀺 𑀲𑀺𑀓𑁆𑀔𑁂𑀣…𑀧𑁂… 𑀆𑀳𑀼 𑀥𑀻𑀭𑀸𑀢𑀺. 𑀢𑀢𑁆𑀣 𑀲𑀺𑀓𑁆𑀔𑁂𑀣𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀆𑀯𑀚𑁆𑀚𑁂𑀬𑁆𑀬. 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂. 𑀢𑀢𑁆𑀣 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀲𑀺𑀓𑁆𑀔𑀸. 𑀢𑀺𑀲𑁆𑀲𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀢𑀺 𑀅𑀥𑀺𑀓𑀁 𑀉𑀢𑁆𑀢𑀫𑀁 𑀲𑀻𑀮𑀦𑁆𑀢𑀺 𑀅𑀥𑀺𑀲𑀻𑀮𑀁, 𑀅𑀥𑀺𑀲𑀻𑀮𑀜𑁆𑀘 𑀢𑀁 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀺𑀓𑁆𑀔𑀸 𑀘𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀏𑀲 𑀦𑀬𑁄 𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀼.

𑀓𑀢𑀫𑀁 𑀧𑀦𑁂𑀢𑁆𑀣 𑀲𑀻𑀮𑀁, 𑀓𑀢𑀫𑀁 𑀅𑀥𑀺𑀲𑀻𑀮𑀁, 𑀓𑀢𑀫𑀁 𑀘𑀺𑀢𑁆𑀢𑀁, 𑀓𑀢𑀫𑀁 𑀅𑀥𑀺𑀘𑀺𑀢𑁆𑀢𑀁, 𑀓𑀢𑀫𑀸 𑀧𑀜𑁆𑀜𑀸, 𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀜𑁆𑀘𑀗𑁆𑀕𑀤𑀲𑀗𑁆𑀕𑀲𑀻𑀮𑀁 𑀢𑀸𑀯 𑀲𑀻𑀮𑀫𑁂𑀯. 𑀢𑀜𑁆𑀳𑀺 𑀩𑀼𑀤𑁆𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀮𑁄𑀓𑁂 𑀧𑀯𑀢𑁆𑀢𑀢𑀺. 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀲𑁆𑀫𑀺𑀁 𑀲𑀻𑀮𑁂 𑀩𑀼𑀤𑁆𑀥𑀸𑀧𑀺 𑀲𑀸𑀯𑀓𑀸𑀧𑀺 𑀫𑀳𑀸𑀚𑀦𑀁 𑀲𑀫𑀸𑀤𑀧𑁂𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀓𑀫𑁆𑀫𑀯𑀸𑀤𑀺𑀦𑁄 𑀘 𑀥𑀫𑁆𑀫𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘 𑀘𑀓𑁆𑀓𑀯𑀢𑁆𑀢𑀻 𑀘 𑀫𑀳𑀸𑀭𑀸𑀚𑀸𑀦𑁄 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘 𑀲𑀫𑀸𑀤𑀧𑁂𑀦𑁆𑀢𑀺, 𑀲𑀸𑀫𑀫𑁆𑀧𑀺 𑀧𑀡𑁆𑀟𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑀸𑀤𑀺𑀬𑀦𑁆𑀢𑀺. 𑀢𑁂 𑀢𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀦𑁆𑀢𑀺.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀧𑀦 ‘‘𑀅𑀥𑀺𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀲𑀽𑀭𑀺𑀬𑁄 𑀯𑀺𑀬 𑀧𑀚𑁆𑀚𑁄𑀢𑀸𑀦𑀁 𑀲𑀺𑀦𑁂𑀭𑀼 𑀯𑀺𑀬 𑀧𑀩𑁆𑀩𑀢𑀸𑀦𑀁 𑀲𑀩𑁆𑀩𑀮𑁄𑀓𑀺𑀬𑀲𑀻𑀮𑀸𑀦𑀁 𑀅𑀥𑀺𑀓𑀜𑁆𑀘𑁂𑀯 𑀉𑀢𑁆𑀢𑀫𑀜𑁆𑀘, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀘 𑀧𑀯𑀢𑁆𑀢𑀢𑀺, 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸. 𑀦 𑀳𑀺 𑀢𑀁 𑀧𑀜𑁆𑀜𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑁄 𑀲𑀢𑁆𑀢𑁄 𑀞𑀧𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀩𑀼𑀤𑁆𑀥𑀸𑀬𑁂𑀯 𑀧𑀦 𑀲𑀩𑁆𑀩𑀲𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑀅𑀚𑁆𑀛𑀸𑀘𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀢𑀁 𑀲𑀻𑀮𑀲𑀁𑀯𑀭𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀢𑁄𑀧𑀺 𑀘 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀻𑀮𑀁 𑀅𑀥𑀺𑀲𑀻𑀮𑀁.

𑀓𑀸𑀫𑀸𑀯𑀘𑀭𑀸𑀦𑀺 𑀧𑀦 𑀅𑀝𑁆𑀞 𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀮𑁄𑀓𑀺𑀬𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀸𑀦𑀺 𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀘𑀺𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀩𑀼𑀤𑁆𑀥𑀼𑀧𑁆𑀧𑀸𑀤𑀸𑀦𑀼𑀧𑁆𑀧𑀸𑀤𑁂 𑀘𑀲𑁆𑀲 𑀧𑀯𑀢𑁆𑀢𑀺, 𑀲𑀫𑀸𑀤𑀧𑀦𑀁 𑀲𑀫𑀸𑀤𑀸𑀦𑀜𑁆𑀘 𑀲𑀻𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀦 ‘‘𑀅𑀥𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀅𑀥𑀺𑀲𑀻𑀮𑀁 𑀯𑀺𑀬 𑀲𑀻𑀮𑀸𑀦𑀁, 𑀲𑀩𑁆𑀩𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀁 𑀅𑀥𑀺𑀓𑀜𑁆𑀘𑁂𑀯 𑀉𑀢𑁆𑀢𑀫𑀜𑁆𑀘, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀘 𑀳𑁄𑀢𑀺, 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸. 𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀅𑀥𑀺𑀘𑀺𑀢𑁆𑀢𑀁.

‘‘𑀅𑀢𑁆𑀣𑀺 𑀤𑀺𑀦𑁆𑀦𑀁 𑀅𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀫. 𑀦𑀺. 𑁨.𑁯𑁪) 𑀧𑀦 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀧𑀜𑁆𑀜𑀸. 𑀲𑀸 𑀳𑀺 𑀩𑀼𑀤𑁆𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀮𑁄𑀓𑁂 𑀧𑀯𑀢𑁆𑀢𑀢𑀺. 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀩𑀼𑀤𑁆𑀥𑀸𑀧𑀺 𑀲𑀸𑀯𑀓𑀸𑀧𑀺 𑀫𑀳𑀸𑀚𑀦𑀁 𑀲𑀫𑀸𑀤𑀧𑁂𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀓𑀫𑁆𑀫𑀯𑀸𑀤𑀺𑀦𑁄 𑀘 𑀥𑀫𑁆𑀫𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘 𑀘𑀓𑁆𑀓𑀯𑀢𑁆𑀢𑀻 𑀘 𑀫𑀳𑀸𑀭𑀸𑀚𑀸𑀦𑁄 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘 𑀲𑀫𑀸𑀤𑀧𑁂𑀦𑁆𑀢𑀺, 𑀲𑀸𑀫𑀫𑁆𑀧𑀺 𑀧𑀡𑁆𑀟𑀺𑀢𑀸 𑀲𑀢𑁆𑀢𑀸 𑀲𑀫𑀸𑀤𑀺𑀬𑀦𑁆𑀢𑀺. 𑀢𑀣𑀸 𑀳𑀺 𑀅𑀗𑁆𑀓𑀼𑀭𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀯𑁂𑀮𑀸𑀫𑁄 𑀯𑁂𑀲𑁆𑀲𑀦𑁆𑀢𑀭𑁄 𑀅𑀜𑁆𑀜𑁂 𑀘 𑀩𑀳𑀽 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀫𑀳𑀸𑀤𑀸𑀦𑀸𑀦𑀺 𑀅𑀤𑀁𑀲𑀼. 𑀢𑁂 𑀢𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀁𑀲𑀼.

𑀢𑀺𑀮𑀓𑁆𑀔𑀡𑀸𑀓𑀸𑀭𑀧𑀭𑀺𑀘𑁆𑀙𑁂𑀤𑀓𑀁 𑀧𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 ‘‘𑀅𑀥𑀺𑀧𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀳𑀺 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀸𑀦𑀺 𑀯𑀺𑀬 𑀲𑀻𑀮𑀘𑀺𑀢𑁆𑀢𑀸𑀦𑀁, 𑀲𑀩𑁆𑀩𑀮𑁄𑀓𑀺𑀬𑀧𑀜𑁆𑀜𑀸𑀦𑀁 𑀅𑀥𑀺𑀓𑀸 𑀘𑁂𑀯 𑀉𑀢𑁆𑀢𑀫𑀸 𑀘, 𑀦 𑀘 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸 𑀮𑁄𑀓𑁂 𑀧𑀯𑀢𑁆𑀢𑀢𑀺. 𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀧𑀜𑁆𑀜𑀸𑀯 𑀅𑀥𑀺𑀧𑀜𑁆𑀜𑀸.

𑀇𑀤𑀸𑀦𑀺 𑀏𑀓𑁂𑀓𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑁋 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀫𑀸𑀳. 𑀇𑀥𑀸𑀢𑀺 𑀯𑀘𑀦𑀁 𑀧𑀼𑀩𑁆𑀩𑀪𑀸𑀕𑀓𑀭𑀡𑀻𑀬𑀲𑀫𑁆𑀧𑀤𑀸𑀬 𑀲𑀫𑁆𑀧𑀦𑁆𑀦𑀲𑁆𑀲 𑀲𑀩𑁆𑀩𑀧𑀓𑀸𑀭𑀲𑀻𑀮𑀧𑀭𑀺𑀧𑀽𑀭𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑀁, 𑀅𑀜𑁆𑀜𑀲𑀸𑀲𑀦𑀲𑁆𑀲 𑀘 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁩𑁯-𑁧𑁪𑁦). 𑀪𑀺𑀓𑁆𑀔𑀽𑀢𑀺 𑀢𑀲𑁆𑀲 𑀲𑀻𑀮𑀲𑁆𑀲 𑀧𑀭𑀺𑀧𑀽𑀭𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀤𑀻𑀧𑀦𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀇𑀤𑀫𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁. 𑀯𑀺𑀳𑀭𑀢𑀻𑀢𑀺 𑀇𑀤𑀫𑀲𑁆𑀲 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀇𑀤𑀫𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲 𑀉𑀧𑀓𑀸𑀭𑀓𑀥𑀫𑁆𑀫𑀧𑀭𑀺𑀤𑀻𑀧𑀦𑀁. 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀇𑀤𑀫𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀢𑁄 𑀅𑀘𑀯𑀦𑀥𑀫𑁆𑀫𑀢𑀸𑀧𑀭𑀺𑀤𑀻𑀧𑀦𑀁. 𑀲𑀫𑀸𑀤𑀸𑀬𑀸𑀢𑀺 𑀇𑀤𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀯𑀲𑁂𑀲𑀢𑁄 𑀆𑀤𑀸𑀦𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀢𑀻𑀢𑀺 𑀇𑀤𑀫𑀲𑁆𑀲 𑀲𑀺𑀓𑁆𑀔𑀸𑀬 𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀇𑀤𑀫𑀲𑁆𑀲 𑀲𑀺𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀧𑀭𑀺𑀤𑀻𑀧𑀦𑀁.

𑀢𑀢𑁆𑀣 𑀪𑀺𑀓𑁆𑀔𑀽𑀢𑀺 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀼. 𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸𑀢𑀺 𑀏𑀢𑁆𑀣 𑀲𑀻𑀮𑀦𑁆𑀢𑀺 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁. 𑀓𑀺𑀫𑀺𑀤𑀁 𑀲𑀻𑀮𑀦𑀁 𑀦𑀸𑀫? 𑀲𑀫𑀸𑀥𑀸𑀦𑀁 𑀯𑀸, 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀉𑀧𑀥𑀸𑀭𑀡𑀁 𑀯𑀸, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀯𑀲𑁂𑀦 𑀆𑀥𑀸𑀭𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀏𑀢𑀤𑁂𑀯 𑀳𑀺 𑀏𑀢𑁆𑀣 𑀅𑀢𑁆𑀣𑀤𑁆𑀯𑀬𑀁 𑀲𑀤𑁆𑀤𑀮𑀓𑁆𑀔𑀡𑀯𑀺𑀤𑀽 𑀅𑀦𑀼𑀚𑀸𑀦𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘‘𑀅𑀥𑀺𑀲𑁂𑀯𑀦𑀝𑁆𑀞𑁂𑀦 𑀆𑀘𑀸𑀭𑀝𑁆𑀞𑁂𑀦 𑀲𑀻𑀮𑀦𑀝𑁆𑀞𑁂𑀦 𑀲𑀺𑀭𑀝𑁆𑀞𑁂𑀦 𑀲𑀻𑀢𑀮𑀝𑁆𑀞𑁂𑀦 𑀲𑀺𑀯𑀝𑁆𑀞𑁂𑀦 𑀲𑀻𑀮’’𑀦𑁆𑀢𑀺 𑀯𑀡𑁆𑀡𑀬𑀦𑁆𑀢𑀺.

𑀲𑀻𑀮𑀦𑀁 𑀮𑀓𑁆𑀔𑀡𑀁 𑀢𑀲𑁆𑀲, 𑀪𑀺𑀦𑁆𑀦𑀲𑁆𑀲𑀸𑀧𑀺 𑀅𑀦𑁂𑀓𑀥𑀸;

𑀲𑀦𑀺𑀤𑀲𑁆𑀲𑀦𑀢𑁆𑀢𑀁 𑀭𑀽𑀧𑀲𑁆𑀲, 𑀬𑀣𑀸 𑀪𑀺𑀦𑁆𑀦𑀲𑁆𑀲𑀦𑁂𑀓𑀥𑀸.

𑀬𑀣𑀸 𑀳𑀺 𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑁂𑀦𑀦𑁂𑀓𑀥𑀸 𑀪𑀺𑀦𑁆𑀦𑀲𑁆𑀲𑀸𑀧𑀺 𑀭𑀽𑀧𑀸𑀬𑀢𑀦𑀲𑁆𑀲 𑀲𑀦𑀺𑀤𑀲𑁆𑀲𑀦𑀢𑁆𑀢𑀁 𑀮𑀓𑁆𑀔𑀡𑀁 𑀦𑀻𑀮𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀲𑁆𑀲𑀸𑀧𑀺 𑀲𑀦𑀺𑀤𑀲𑁆𑀲𑀦𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄. 𑀢𑀣𑀸 𑀲𑀻𑀮𑀲𑁆𑀲 𑀘𑁂𑀢𑀦𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀥𑀸 𑀪𑀺𑀦𑁆𑀦𑀲𑁆𑀲𑀸𑀧𑀺 𑀬𑀤𑁂𑀢𑀁 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀫𑀸𑀥𑀸𑀦𑀯𑀲𑁂𑀦, 𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀯𑀲𑁂𑀦 𑀯𑀼𑀢𑁆𑀢𑀁 𑀲𑀻𑀮𑀦𑀁, 𑀢𑀤𑁂𑀯 𑀮𑀓𑁆𑀔𑀡𑀁 𑀘𑁂𑀢𑀦𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀲𑁆𑀲𑀸𑀧𑀺 𑀲𑀫𑀸𑀥𑀸𑀦𑀧𑀢𑀺𑀝𑁆𑀞𑀸𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄. 𑀏𑀯𑀁 𑀮𑀓𑁆𑀔𑀡𑀲𑁆𑀲 𑀧𑀦𑀲𑁆𑀲 𑁋

𑀤𑀼𑀲𑁆𑀲𑀻𑀮𑁆𑀬𑀯𑀺𑀤𑁆𑀥𑀁𑀲𑀦𑀢𑀸, 𑀅𑀦𑀯𑀚𑁆𑀚𑀕𑀼𑀡𑁄 𑀢𑀣𑀸;

𑀓𑀺𑀘𑁆𑀘𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦, 𑀭𑀲𑁄 𑀦𑀸𑀫 𑀧𑀯𑀼𑀘𑁆𑀘𑀢𑀺.

𑀢𑀲𑁆𑀫𑀸 𑀇𑀤𑀁 𑀲𑀻𑀮𑀁 𑀦𑀸𑀫 𑀓𑀺𑀘𑁆𑀘𑀝𑁆𑀞𑁂𑀦 𑀭𑀲𑁂𑀦 𑀤𑀼𑀲𑁆𑀲𑀻𑀮𑁆𑀬𑀯𑀺𑀤𑁆𑀥𑀁𑀲𑀦𑀭𑀲𑀁, 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀭𑀲𑁂𑀦 𑀅𑀦𑀯𑀚𑁆𑀚𑀭𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀢𑀬𑀺𑀤𑀁 𑀢𑀲𑁆𑀲 𑀯𑀺𑀜𑁆𑀜𑀼𑀪𑀺;

𑀑𑀢𑁆𑀢𑀧𑁆𑀧𑀜𑁆𑀘 𑀳𑀺𑀭𑀻 𑀘𑁂𑀯, 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀡𑁆𑀡𑀺𑀢𑀁.

𑀢𑀜𑁆𑀳𑀺𑀤𑀁 𑀲𑀻𑀮𑀁 ‘‘𑀓𑀸𑀬𑀲𑁄𑀘𑁂𑀬𑁆𑀬𑀁 𑀯𑀘𑀻𑀲𑁄𑀘𑁂𑀬𑁆𑀬𑀁 𑀫𑀦𑁄𑀲𑁄𑀘𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑁄𑀘𑁂𑀬𑁆𑀬𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺 𑀕𑀳𑀡𑀪𑀸𑀯𑀁 𑀕𑀘𑁆𑀙𑀢𑀺. 𑀳𑀺𑀭𑁄𑀢𑁆𑀢𑀧𑁆𑀧𑀜𑁆𑀘 𑀧𑀦 𑀢𑀲𑁆𑀲 𑀯𑀺𑀜𑁆𑀜𑀽𑀳𑀺 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀡𑁆𑀡𑀺𑀢𑀁, 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀳𑀺𑀭𑁄𑀢𑁆𑀢𑀧𑁆𑀧𑁂 𑀳𑀺 𑀲𑀢𑀺 𑀲𑀻𑀮𑀁 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀢𑀺𑀝𑁆𑀞𑀢𑀺 𑀘, 𑀅𑀲𑀢𑀺 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀦 𑀢𑀺𑀝𑁆𑀞𑀢𑀺 𑀘𑀸𑀢𑀺 𑀏𑀯𑀁𑀯𑀺𑀥𑁂𑀦 𑀲𑀻𑀮𑁂𑀦 𑀲𑀻𑀮𑀯𑀸 𑀳𑁄𑀢𑀺. 𑀏𑀢𑀁 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀸 𑀯𑀺𑀭𑀫𑀦𑁆𑀢𑀲𑁆𑀲, 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀤𑀬𑁄 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀓𑀺𑀁 𑀲𑀻𑀮𑀦𑁆𑀢𑀺? 𑀘𑁂𑀢𑀦𑀸 𑀲𑀻𑀮𑀁, 𑀘𑁂𑀢𑀲𑀺𑀓𑀁 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮’’𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁯).

𑀢𑀢𑁆𑀣 𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀸 𑀯𑀺𑀭𑀫𑀦𑁆𑀢𑀲𑁆𑀲 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸. 𑀘𑁂𑀢𑀲𑀺𑀓𑀁 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀯𑀺𑀭𑀢𑀺. 𑀅𑀧𑀺 𑀘 𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀚𑀳𑀦𑁆𑀢𑀲𑁆𑀲 𑀲𑀢𑁆𑀢𑀓𑀫𑁆𑀫𑀧𑀣𑀘𑁂𑀢𑀦𑀸. 𑀘𑁂𑀢𑀲𑀺𑀓𑀁 𑀲𑀻𑀮𑀁 𑀦𑀸𑀫 ‘‘𑀅𑀪𑀺𑀚𑁆𑀛𑀁 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁧𑁭) 𑀦𑀬𑁂𑀦 𑀲𑀁𑀬𑀼𑀢𑁆𑀢𑀫𑀳𑀸𑀯𑀕𑁆𑀕𑁂 𑀯𑀼𑀢𑁆𑀢𑀸 𑀅𑀦𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀺𑀝𑁆𑀞𑀺𑀥𑀫𑁆𑀫𑀸. 𑀲𑀁𑀯𑀭𑁄 𑀲𑀻𑀮𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀯𑀺𑀥𑁂𑀦 𑀲𑀁𑀯𑀭𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀲𑀁𑀯𑀭𑁄 𑀔𑀦𑁆𑀢𑀺𑀲𑀁𑀯𑀭𑁄 𑀯𑀻𑀭𑀺𑀬𑀲𑀁𑀯𑀭𑁄. 𑀢𑀲𑁆𑀲 𑀦𑀸𑀦𑀸𑀓𑀭𑀡𑀁 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀦𑁆𑀢𑀺 𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. 𑀏𑀢𑁆𑀣 𑀘 𑀲𑀁𑀯𑀭𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀲𑀻𑀮𑀦𑁆𑀢𑀺 𑀇𑀤𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀻𑀮𑀁. 𑀘𑁂𑀢𑀦𑀸𑀲𑀻𑀮𑀁, 𑀘𑁂𑀢𑀲𑀺𑀓𑀁 𑀲𑀻𑀮𑀦𑁆𑀢𑀺 𑀧𑀭𑀺𑀬𑀸𑀬𑀢𑁄 𑀲𑀻𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀲𑀻𑀮𑀁. 𑀢𑀜𑁆𑀳𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀺, 𑀢𑀲𑁆𑀫𑀸 ‘‘𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀆𑀘𑀸𑀭𑁂𑀦 𑀘𑁂𑀯 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑁄. 𑀅𑀡𑀼𑀫𑀢𑁆𑀢𑁂𑀲𑀽𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀲𑀼. 𑀯𑀚𑁆𑀚𑁂𑀲𑀽𑀢𑀺 𑀅𑀓𑀼𑀲𑀮𑀥𑀫𑁆𑀫𑁂𑀲𑀼. 𑀪𑀬𑀤𑀲𑁆𑀲𑀸𑀯𑀻𑀢𑀺 𑀪𑀬𑀤𑀲𑁆𑀲𑀻. 𑀲𑀫𑀸𑀤𑀸𑀬𑀸𑀢𑀺 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸. 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀢𑀺. 𑀅𑀧𑀺 𑀘 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀬𑀁𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁 𑀓𑀸𑀬𑀺𑀓𑀁 𑀯𑀸 𑀘𑁂𑀢𑀲𑀺𑀓𑀁 𑀯𑀸, 𑀢𑀁 𑀲𑀩𑁆𑀩𑀁 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺.

𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺𑀲𑀸𑀯𑀲𑁂𑀲𑁄 𑀲𑀻𑀮𑀓𑁆𑀔𑀦𑁆𑀥𑁄. 𑀫𑀳𑀦𑁆𑀢𑁄𑀢𑀺 𑀧𑀸𑀭𑀸𑀚𑀺𑀓𑀸𑀤𑀺𑀦𑀺𑀭𑀯𑀲𑁂𑀲𑁄. 𑀬𑀲𑁆𑀫𑀸 𑀧𑀦 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑁂𑀦 𑀪𑀺𑀓𑁆𑀔𑀼 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀺 𑀦𑀸𑀫, 𑀢𑀲𑁆𑀫𑀸 𑀢𑀁 ‘‘𑀧𑀢𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑀁. 𑀧𑀢𑀺𑀝𑁆𑀞𑀳𑀢𑀺 𑀯𑀸 𑀏𑀢𑁆𑀣 𑀪𑀺𑀓𑁆𑀔𑀼, 𑀓𑀼𑀲𑀮𑀸 𑀥𑀫𑁆𑀫𑀸 𑀏𑀯 𑀯𑀸 𑀏𑀢𑁆𑀣 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀧𑀢𑀺𑀝𑁆𑀞𑀸. 𑀅𑀬𑀫𑀢𑁆𑀣𑁄 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄’’𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨) 𑀘, ‘‘𑀧𑀢𑀺𑀝𑁆𑀞𑀸𑀦𑀮𑀓𑁆𑀔𑀡𑀁, 𑀫𑀳𑀸𑀭𑀸𑀚, 𑀲𑀻𑀮𑀁 𑀲𑀩𑁆𑀩𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 (𑀫𑀺. 𑀧. 𑁨.𑁧.𑁯) 𑀘, ‘‘𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀔𑁄, 𑀫𑀳𑀸𑀭𑀸𑀚…𑀧𑁂… 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 (𑀫𑀺. 𑀧. 𑁨.𑁧.𑁯) 𑀘 𑀆𑀤𑀺𑀲𑀼𑀢𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀢𑀤𑁂𑀢𑀁 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀆𑀤𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀉𑀢𑁆𑀢𑀺𑀬 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺 (𑀲𑀁. 𑀦𑀺. 𑁫.𑁩𑁮𑁨). 𑀬𑀣𑀸 𑀳𑀺 𑀦𑀕𑀭𑀯𑀟𑁆𑀠𑀓𑀻 𑀦𑀕𑀭𑀁 𑀫𑀸𑀧𑁂𑀢𑀼𑀓𑀸𑀫𑁄 𑀧𑀞𑀫𑀁 𑀦𑀕𑀭𑀝𑁆𑀞𑀸𑀦𑀁 𑀲𑁄𑀥𑁂𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀯𑀻𑀣𑀺𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀓𑀸𑀤𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸𑀯 𑀦𑀕𑀭𑀁 𑀫𑀸𑀧𑁂𑀢𑀺. 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑁄 𑀆𑀤𑀺𑀢𑁄 𑀲𑀻𑀮𑀁 𑀯𑀺𑀲𑁄𑀥𑁂𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀣𑀸 𑀯𑀸 𑀧𑀦 𑀭𑀚𑀓𑁄 𑀧𑀞𑀫𑀁 𑀢𑀻𑀳𑀺 𑀔𑀸𑀭𑁂𑀳𑀺 𑀯𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁂 𑀯𑀢𑁆𑀣𑁂 𑀬𑀤𑀺𑀘𑁆𑀙𑀓𑀁 𑀭𑀗𑁆𑀕𑀚𑀸𑀢𑀁 𑀉𑀧𑀦𑁂𑀢𑀺, 𑀬𑀣𑀸 𑀯𑀸 𑀧𑀦 𑀙𑁂𑀓𑁄 𑀘𑀺𑀢𑁆𑀢𑀓𑀸𑀭𑁄 𑀭𑀽𑀧𑀁 𑀮𑀺𑀔𑀺𑀢𑀼𑀓𑀸𑀫𑁄 𑀆𑀤𑀺𑀢𑁄𑀯 𑀪𑀺𑀢𑁆𑀢𑀺𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑁄 𑀆𑀤𑀺𑀢𑁄𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀬𑁄 𑀥𑀫𑁆𑀫𑁂 𑀲𑀘𑁆𑀙𑀺𑀓𑀭𑁄𑀢𑀺. 𑀢𑀲𑁆𑀫𑀸 𑀲𑀻𑀮𑀁 ‘‘𑀆𑀤𑀻’’𑀢𑀺 𑀯𑀼𑀢𑁆𑀢𑀁.

𑀢𑀤𑁂𑀢𑀁 𑀘𑀭𑀡𑀲𑀭𑀺𑀓𑁆𑀔𑀢𑀸𑀬 𑀘𑀭𑀡𑀁. 𑀘𑀭𑀡𑀸𑀢𑀺 𑀳𑀺 𑀧𑀸𑀤𑀸 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸 𑀳𑀺 𑀙𑀺𑀦𑁆𑀦𑀘𑀭𑀡𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀺𑀲𑀁 𑀕𑀫𑀦𑀸𑀪𑀺𑀲𑀗𑁆𑀔𑀸𑀭𑁄 𑀦 𑀚𑀸𑀬𑀢𑀺, 𑀧𑀭𑀺𑀧𑀼𑀡𑁆𑀡𑀧𑀸𑀤𑀲𑁆𑀲𑁂𑀯 𑀚𑀸𑀬𑀢𑀺, 𑀏𑀯𑀫𑁂𑀯 𑀬𑀲𑁆𑀲 𑀲𑀻𑀮𑀁 𑀪𑀺𑀦𑁆𑀦𑀁 𑀳𑁄𑀢𑀺 𑀔𑀡𑁆𑀟𑀁 𑀅𑀧𑀭𑀺𑀧𑀼𑀡𑁆𑀡𑀁, 𑀢𑀲𑁆𑀲 𑀦𑀺𑀩𑁆𑀩𑀸𑀦𑀕𑀫𑀦𑀸𑀬 𑀜𑀸𑀡𑀕𑀫𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀧𑀦 𑀢𑀁 𑀅𑀪𑀺𑀦𑁆𑀦𑀁 𑀳𑁄𑀢𑀺 𑀅𑀔𑀡𑁆𑀟𑀁 𑀧𑀭𑀺𑀧𑀼𑀡𑁆𑀡𑀁, 𑀢𑀲𑁆𑀲 𑀦𑀺𑀩𑁆𑀩𑀸𑀦𑀕𑀫𑀦𑀸𑀬 𑀜𑀸𑀡𑀕𑀫𑀦𑀁 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀲𑀻𑀮𑀁 ‘‘𑀘𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀤𑁂𑀢𑀁 𑀲𑀁𑀬𑀫𑀦𑀯𑀲𑁂𑀦 𑀲𑀁𑀬𑀫𑁄. 𑀲𑀁𑀯𑀭𑀡𑀯𑀲𑁂𑀦 𑀲𑀁𑀯𑀭𑁄𑀢𑀺 𑀉𑀪𑀬𑁂𑀦𑀸𑀧𑀺 𑀲𑀻𑀮𑀲𑀁𑀬𑀫𑁄 𑀘𑁂𑀯 𑀲𑀻𑀮𑀲𑀁𑀯𑀭𑁄 𑀘 𑀓𑀣𑀺𑀢𑁄. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀲𑀁𑀬𑀫𑁂𑀢𑀺 𑀯𑀻𑀢𑀺𑀓𑁆𑀓𑀫𑀯𑀺𑀧𑁆𑀨𑀦𑁆𑀤𑀦𑀁, 𑀧𑀼𑀕𑁆𑀕𑀮𑀁 𑀯𑀸 𑀲𑀁𑀬𑀫𑁂𑀢𑀺 𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀢𑀲𑁆𑀲 𑀯𑀺𑀧𑁆𑀨𑀦𑁆𑀤𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀲𑀁𑀬𑀫𑁄. 𑀯𑀻𑀢𑀺𑀓𑁆𑀓𑀫𑀲𑁆𑀲 𑀧𑀯𑁂𑀲𑀦𑀤𑁆𑀯𑀸𑀭𑀁 𑀲𑀁𑀯𑀭𑀢𑀺 𑀧𑀺𑀤𑀳𑀢𑀻𑀢𑀺 𑀲𑀁𑀯𑀭𑁄.

𑀫𑁄𑀓𑁆𑀔𑀦𑁆𑀢𑀺 𑀉𑀢𑁆𑀢𑀫𑀁 𑀫𑀼𑀔𑀪𑀽𑀢𑀁 𑀯𑀸. 𑀬𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀘𑀢𑀼𑀩𑁆𑀩𑀺𑀥𑁄 𑀆𑀳𑀸𑀭𑁄 𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀗𑁆𑀕𑀫𑀗𑁆𑀕𑀸𑀦𑀺 𑀨𑀭𑀢𑀺, 𑀏𑀯𑀁 𑀬𑁄𑀕𑀺𑀦𑁄𑀧𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀁 𑀲𑀻𑀮𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀣𑀲𑀺𑀤𑁆𑀥𑀺𑀁 𑀲𑀫𑁆𑀧𑀸𑀤𑁂𑀢𑀺. 𑀢𑁂𑀦 ‘‘𑀫𑁄𑀓𑁆𑀔’’𑀦𑁆𑀢𑀺. 𑀧𑀫𑀼𑀔𑁂 𑀲𑀸𑀥𑀽𑀢𑀺 𑀧𑀸𑀫𑁄𑀓𑁆𑀔𑀁, 𑀧𑀼𑀩𑁆𑀩𑀗𑁆𑀕𑀫𑀁 𑀲𑁂𑀝𑁆𑀞𑀁 𑀧𑀥𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀸𑀫𑁄𑀓𑁆𑀔𑀁 𑀧𑀼𑀩𑁆𑀩𑀗𑁆𑀕𑀫𑀁 𑀲𑁂𑀝𑁆𑀞𑀁 𑀧𑀥𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀯𑀺𑀦𑀸 𑀳𑀼𑀢𑁆𑀯𑀸 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀬𑁄 𑀧𑀦𑀸𑀬𑀫𑁂𑀢𑁆𑀣 𑀏𑀯𑀓𑀸𑀭𑁄, 𑀲𑁄 𑀦𑀺𑀬𑀫𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀦𑀺𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀲𑀫𑀬𑁂 𑀅𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀓𑀸𑀫𑀸𑀦𑀁 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀁 𑀓𑀸𑀫𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑀁 𑀤𑀻𑀧𑁂𑀢𑀺. 𑀓𑀣𑀁? ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀏𑀯𑀜𑁆𑀳𑀺 𑀦𑀺𑀬𑀫𑁂 𑀓𑀭𑀺𑀬𑀫𑀸𑀦𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺, 𑀦𑀽𑀦𑀺𑀫𑀲𑁆𑀲 𑀛𑀸𑀦𑀲𑁆𑀲 𑀓𑀸𑀫𑀸 𑀧𑀝𑀺𑀧𑀓𑁆𑀔𑀪𑀽𑀢𑀸, 𑀬𑁂𑀲𑀼 𑀲𑀢𑀺 𑀇𑀤𑀁 𑀦 𑀧𑀯𑀢𑁆𑀢𑀢𑀺 𑀅𑀦𑁆𑀥𑀓𑀸𑀭𑁂 𑀲𑀢𑀺 𑀧𑀤𑀻𑀧𑁄𑀪𑀸𑀲𑁄 𑀯𑀺𑀬, 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑁄 𑀳𑁄𑀢𑀺 𑀑𑀭𑀺𑀫𑀢𑀻𑀭𑀧𑀭𑀺𑀘𑁆𑀘𑀸𑀕𑁂𑀦 𑀧𑀸𑀭𑀺𑀫𑀢𑀻𑀭𑀲𑁆𑀲𑁂𑀯. 𑀢𑀲𑁆𑀫𑀸 𑀦𑀺𑀬𑀫𑀁 𑀓𑀭𑁄𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 ‘‘𑀓𑀲𑁆𑀫𑀸 𑀧𑀦𑁂𑀲 𑀧𑀼𑀩𑁆𑀩𑀧𑀤𑁂𑀬𑁂𑀯 𑀯𑀼𑀢𑁆𑀢𑁄 𑀦 𑀉𑀢𑁆𑀢𑀭𑀧𑀤𑁂, 𑀓𑀺𑀁 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘𑀸𑀧𑀺 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑀁𑀦𑀺𑀲𑁆𑀲𑀭𑀡𑀢𑁄 𑀳𑀺 𑀧𑀼𑀩𑁆𑀩𑀧𑀤𑁂 𑀏𑀯 𑀏𑀲 𑀯𑀼𑀢𑁆𑀢𑁄. 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑁄 𑀳𑀺 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑁄 𑀘 𑀇𑀤𑀁 𑀛𑀸𑀦𑀁 𑀓𑀸𑀫𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀁. 𑀬𑀣𑀸𑀳 𑁋 ‘‘𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 (𑀇𑀢𑀺𑀯𑀼. 𑁭𑁨). 𑀉𑀢𑁆𑀢𑀭𑀧𑀤𑁂𑀧𑀺 𑀧𑀦 𑀬𑀣𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯) 𑀏𑀢𑁆𑀣 𑀏𑀯𑀓𑀸𑀭𑁄 𑀆𑀦𑁂𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀢𑁆𑀢𑀩𑁆𑀩𑁄. 𑀦 𑀳𑀺 𑀲𑀓𑁆𑀓𑀸 𑀇𑀢𑁄 𑀅𑀜𑁆𑀜𑁂𑀳𑀺𑀧𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀢𑀲𑁆𑀫𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑁂𑀯 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀏𑀯𑀁 𑀧𑀤𑀤𑁆𑀯𑀬𑁂𑀧𑀺 𑀏𑀲 𑀤𑀝𑁆𑀞𑀩𑁆𑀩𑁄. 𑀧𑀤𑀤𑁆𑀯𑀬𑁂𑀧𑀺 𑀘 𑀓𑀺𑀜𑁆𑀘𑀸𑀧𑀺 𑀯𑀺𑀯𑀺𑀘𑁆𑀘𑀸𑀢𑀺 𑀇𑀫𑀺𑀦𑀸 𑀲𑀸𑀥𑀸𑀭𑀡𑀯𑀘𑀦𑁂𑀦 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀬𑁄 𑀓𑀸𑀬𑀯𑀺𑀯𑁂𑀓𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀯𑀺𑀯𑁂𑀓𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑀣𑀸𑀧𑀺 𑀧𑀼𑀩𑁆𑀩𑀪𑀸𑀕𑁂 𑀓𑀸𑀬𑀯𑀺𑀯𑁂𑀓𑀘𑀺𑀢𑁆𑀢𑀯𑀺𑀯𑁂𑀓𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑀸 𑀤𑀝𑁆𑀞𑀩𑁆𑀩𑀸. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀓𑀸𑀬𑀯𑀺𑀯𑁂𑀓𑀘𑀺𑀢𑁆𑀢𑀯𑀺𑀯𑁂𑀓𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸.

𑀓𑀸𑀫𑁂𑀳𑀻𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑁂 𑀘 𑀇𑀥 ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸 𑀫𑀦𑀸𑀧𑀺𑀓𑀸 𑀭𑀽𑀧𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀣𑀼𑀓𑀸𑀫𑀸 𑀯𑀼𑀢𑁆𑀢𑀸, 𑀬𑁂 𑀘 𑀇𑀥𑁂𑀯 𑀯𑀺𑀪𑀗𑁆𑀕𑁂 ‘‘𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄’’𑀢𑀺 𑀏𑀯𑀁 𑀓𑀺𑀮𑁂𑀲𑀓𑀸𑀫𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀲𑀗𑁆𑀕𑀳𑀺𑀢𑀸 𑀇𑀘𑁆𑀘𑁂𑀯 𑀤𑀝𑁆𑀞𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀺 𑀯𑀺𑀯𑀺𑀘𑁆𑀘𑁂𑀯𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀯𑀸 𑀯𑀺𑀯𑀺𑀘𑁆𑀘𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀼𑀭𑀺𑀫𑁂𑀦 𑀘𑁂𑀢𑁆𑀣 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄 𑀏𑀯 𑀓𑀸𑀫𑀲𑀼𑀔𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄 𑀦𑁂𑀓𑁆𑀔𑀫𑁆𑀫𑀲𑀼𑀔𑀧𑀭𑀺𑀕𑁆𑀕𑀳𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺. 𑀏𑀯𑀁 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀯𑀺𑀯𑁂𑀓𑀯𑀘𑀦𑀢𑁄𑀬𑁂𑀯 𑀘 𑀏𑀢𑁂𑀲𑀁 𑀧𑀞𑀫𑁂𑀦 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀧𑁆𑀧𑀳𑀸𑀦𑀁, 𑀤𑀼𑀢𑀺𑀬𑁂𑀦 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀧𑀞𑀫𑁂𑀦 𑀮𑁄𑀮𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀩𑀸𑀮𑀪𑀸𑀯𑀲𑁆𑀲. 𑀧𑀞𑀫𑁂𑀦 𑀘 𑀧𑀬𑁄𑀕𑀲𑀼𑀤𑁆𑀥𑀺, 𑀤𑀼𑀢𑀺𑀬𑁂𑀦 𑀆𑀲𑀬𑀧𑁄𑀲𑀦𑀁 𑀯𑀺𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀏𑀲 𑀢𑀸𑀯 𑀦𑀬𑁄 ‘‘𑀓𑀸𑀫𑁂𑀳𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀫𑁂𑀲𑀼 𑀯𑀢𑁆𑀣𑀼𑀓𑀸𑀫𑀧𑀓𑁆𑀔𑁂.

𑀓𑀺𑀮𑁂𑀲𑀓𑀸𑀫𑀧𑀓𑁆𑀔𑁂 𑀧𑀦 𑀙𑀦𑁆𑀤𑁄𑀢𑀺 𑀘 𑀭𑀸𑀕𑁄𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑀪𑁂𑀤𑁄 𑀓𑀸𑀫𑀘𑁆𑀙𑀦𑁆𑀤𑁄𑀯 ‘‘𑀓𑀸𑀫𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀘 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑁄𑀧𑀺 𑀲𑀫𑀸𑀦𑁄 ‘‘𑀢𑀢𑁆𑀣 𑀓𑀢𑀫𑁄 𑀓𑀸𑀫𑀘𑁆𑀙𑀦𑁆𑀤𑁄, 𑀓𑀸𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀛𑀸𑀦𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀁 𑀯𑀼𑀢𑁆𑀢𑁄. 𑀓𑀺𑀮𑁂𑀲𑀓𑀸𑀫𑀢𑁆𑀢𑀸 𑀯𑀸 𑀧𑀼𑀭𑀺𑀫𑀧𑀤𑁂 𑀯𑀼𑀢𑁆𑀢𑁄, 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀼𑀢𑀺𑀬𑀧𑀤𑁂. 𑀅𑀦𑁂𑀓𑀪𑁂𑀤𑀢𑁄 𑀘𑀲𑁆𑀲 𑀓𑀸𑀫𑀢𑁄𑀢𑀺 𑀅𑀯𑀢𑁆𑀯𑀸 𑀓𑀸𑀫𑁂𑀳𑀻𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀫𑁆𑀧𑀺 𑀘 𑀥𑀫𑁆𑀫𑀸𑀦𑀁 𑀅𑀓𑀼𑀲𑀮𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑁂 ‘‘𑀢𑀢𑁆𑀣 𑀓𑀢𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁬𑁪) 𑀉𑀧𑀭𑀺𑀛𑀸𑀦𑀗𑁆𑀕𑀸𑀦𑀁 𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀦𑀻𑀯𑀭𑀡𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀦𑀻𑀯𑀭𑀡𑀸𑀦𑀺 𑀳𑀺 𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀸𑀦𑀺 𑀢𑁂𑀲𑀁 𑀛𑀸𑀦𑀗𑁆𑀕𑀸𑀦𑁂𑀯 𑀧𑀝𑀺𑀧𑀓𑁆𑀔𑀸𑀦𑀺, 𑀯𑀺𑀤𑁆𑀥𑀁𑀲𑀓𑀸𑀦𑀺 𑀯𑀺𑀖𑀸𑀢𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 ‘‘𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀧𑀻𑀢𑀺 𑀩𑁆𑀬𑀸𑀧𑀸𑀤𑀲𑁆𑀲, 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲, 𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲, 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬𑀸’’𑀢𑀺 𑀧𑁂𑀝𑀓𑁂 𑀯𑀼𑀢𑁆𑀢𑀁.

𑀏𑀯𑀫𑁂𑀢𑁆𑀣 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀇𑀫𑀺𑀦𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀇𑀫𑀺𑀦𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀻𑀯𑀭𑀡𑀸𑀦𑀁. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀧𑀞𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲, 𑀤𑀼𑀢𑀺𑀬𑁂𑀦 𑀲𑁂𑀲𑀦𑀻𑀯𑀭𑀡𑀸𑀦𑀁. 𑀢𑀣𑀸 𑀧𑀞𑀫𑁂𑀦 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀪𑁂𑀤𑀯𑀺𑀲𑀬𑀲𑁆𑀲 𑀮𑁄𑀪𑀲𑁆𑀲, 𑀤𑀼𑀢𑀺𑀬𑁂𑀦 𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀸𑀤𑀺𑀯𑀺𑀲𑀬𑀸𑀦𑀁 𑀤𑁄𑀲𑀫𑁄𑀳𑀸𑀦𑀁. 𑀑𑀖𑀸𑀤𑀻𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀧𑀞𑀫𑁂𑀦 𑀓𑀸𑀫𑁄𑀖𑀓𑀸𑀫𑀬𑁄𑀕𑀓𑀸𑀫𑀸𑀲𑀯𑀓𑀸𑀫𑀼𑀧𑀸𑀤𑀸𑀦𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀦𑀁, 𑀤𑀼𑀢𑀺𑀬𑁂𑀦 𑀅𑀯𑀲𑁂𑀲𑀑𑀖𑀬𑁄𑀕𑀸𑀲𑀯𑀉𑀧𑀸𑀤𑀸𑀦𑀕𑀦𑁆𑀣𑀲𑀁𑀬𑁄𑀚𑀦𑀸𑀦𑀁. 𑀧𑀞𑀫𑁂𑀦 𑀘 𑀢𑀡𑁆𑀳𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘, 𑀤𑀼𑀢𑀺𑀬𑁂𑀦 𑀅𑀯𑀺𑀚𑁆𑀚𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘. 𑀅𑀧𑀺 𑀘 𑀧𑀞𑀫𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀅𑀝𑁆𑀞𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁, 𑀤𑀼𑀢𑀺𑀬𑁂𑀦 𑀲𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 𑀘 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑁄𑀕𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄, 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄 𑀯𑀺𑀘𑀸𑀭𑁄. 𑀲𑀦𑁆𑀢𑁂𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀬𑁄𑀕𑁂 𑀑𑀴𑀸𑀭𑀺𑀓𑀝𑁆𑀞𑁂𑀦 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀘 𑀖𑀡𑁆𑀟𑀸𑀪𑀺𑀖𑀸𑀢𑁄 𑀯𑀺𑀬 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄, 𑀲𑀼𑀔𑀼𑀫𑀝𑁆𑀞𑁂𑀦 𑀅𑀦𑀼𑀫𑀚𑁆𑀚𑀦𑀲𑀪𑀸𑀯𑁂𑀦 𑀘 𑀖𑀡𑁆𑀟𑀸𑀦𑀼𑀭𑀯𑁄 𑀯𑀺𑀬 𑀅𑀦𑀼𑀧𑀩𑀦𑁆𑀥𑁄 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸 𑀘𑁂𑀢𑁆𑀣 𑀯𑀺𑀢𑀓𑁆𑀓𑁄 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀧𑀭𑀺𑀧𑁆𑀨𑀦𑁆𑀤𑀦𑀪𑀽𑀢𑁄 𑀘𑀺𑀢𑁆𑀢𑀲𑁆𑀲, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬, 𑀧𑀤𑀼𑀫𑀸𑀪𑀺𑀫𑀼𑀔𑀧𑀸𑀢𑁄 𑀯𑀺𑀬 𑀘 𑀕𑀦𑁆𑀥𑀸𑀦𑀼𑀩𑀦𑁆𑀥𑀘𑁂𑀢𑀲𑁄 𑀪𑀫𑀭𑀲𑁆𑀲. 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀦𑀸𑀢𑀺𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄 𑀘𑀺𑀢𑁆𑀢𑀲𑁆𑀲, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀘 𑀧𑀤𑀼𑀫𑀸𑀪𑀺𑀫𑀼𑀔𑀧𑀢𑀺𑀢𑀲𑁆𑀲 𑀪𑀫𑀭𑀲𑁆𑀲 𑀧𑀤𑀼𑀫𑀲𑁆𑀲 𑀉𑀧𑀭𑀺𑀪𑀸𑀕𑁂.

𑀤𑀼𑀓𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀆𑀓𑀸𑀲𑁂 𑀕𑀘𑁆𑀙𑀢𑁄 𑀫𑀳𑀸𑀲𑀓𑀼𑀡𑀲𑁆𑀲 𑀉𑀪𑁄𑀳𑀺 𑀧𑀓𑁆𑀔𑁂𑀳𑀺 𑀯𑀸𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀔𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀯𑀸𑀢𑀕𑁆𑀕𑀳𑀡𑀢𑁆𑀣𑀁 𑀧𑀓𑁆𑀔𑁂 𑀨𑀦𑁆𑀤𑀸𑀧𑀬𑀫𑀸𑀦𑀲𑁆𑀲 𑀕𑀫𑀦𑀁 𑀯𑀺𑀬 𑀅𑀦𑀼𑀫𑀚𑁆𑀚𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀘𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀺. 𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀸𑀓𑀝𑁄 𑀳𑁄𑀢𑀺. 𑀅𑀧𑀺 𑀘 𑀫𑀮𑀕𑁆𑀕𑀳𑀺𑀢𑀁 𑀓𑀁𑀲𑀪𑀸𑀚𑀦𑀁 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀘𑀼𑀡𑁆𑀡𑀢𑁂𑀮𑀯𑀸𑀮𑀡𑁆𑀟𑀼𑀧𑀓𑁂𑀦 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀤𑀴𑁆𑀳𑀕𑁆𑀕𑀳𑀡𑀳𑀢𑁆𑀣𑁄 𑀯𑀺𑀬 𑀯𑀺𑀢𑀓𑁆𑀓𑁄. 𑀧𑀭𑀺𑀫𑀚𑁆𑀚𑀦𑀳𑀢𑁆𑀣𑁄 𑀯𑀺𑀬 𑀯𑀺𑀘𑀸𑀭𑁄. 𑀢𑀣𑀸 𑀓𑀼𑀫𑁆𑀪𑀓𑀸𑀭𑀲𑁆𑀲 𑀤𑀡𑁆𑀟𑀧𑁆𑀧𑀳𑀸𑀭𑁂𑀦 𑀘𑀓𑁆𑀓𑀁 𑀪𑀫𑀬𑀺𑀢𑁆𑀯𑀸 𑀪𑀸𑀚𑀦𑀁 𑀓𑀭𑁄𑀦𑁆𑀢𑀲𑁆𑀲 𑀉𑀧𑁆𑀧𑀻𑀴𑀦𑀳𑀢𑁆𑀣𑁄 𑀯𑀺𑀬 𑀯𑀺𑀢𑀓𑁆𑀓𑁄. 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀳𑀢𑁆𑀣𑁄 𑀯𑀺𑀬 𑀯𑀺𑀘𑀸𑀭𑁄. 𑀢𑀣𑀸 𑀫𑀡𑁆𑀟𑀮𑀁 𑀓𑀭𑁄𑀦𑁆𑀢𑀲𑁆𑀲 𑀫𑀚𑁆𑀛𑁂 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀞𑀺𑀢𑀓𑀡𑁆𑀝𑀓𑁄 𑀯𑀺𑀬 𑀅𑀪𑀺𑀦𑀺𑀭𑁄𑀧𑀦𑁄 𑀯𑀺𑀢𑀓𑁆𑀓𑁄. 𑀩𑀳𑀺 𑀧𑀭𑀺𑀩𑁆𑀪𑀫𑀦𑀓𑀡𑁆𑀝𑀓𑁄 𑀯𑀺𑀬 𑀅𑀦𑀼𑀫𑀚𑁆𑀚𑀫𑀸𑀦𑁄 𑀯𑀺𑀘𑀸𑀭𑁄. 𑀇𑀢𑀺 𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀇𑀫𑀺𑀦𑀸 𑀘 𑀯𑀺𑀘𑀸𑀭𑁂𑀦 𑀲𑀳 𑀯𑀢𑁆𑀢𑀢𑀺 𑀭𑀼𑀓𑁆𑀔𑁄 𑀯𑀺𑀬 𑀧𑀼𑀧𑁆𑀨𑁂𑀦 𑀘 𑀨𑀮𑁂𑀦 𑀘𑀸𑀢𑀺 𑀇𑀤𑀁 𑀛𑀸𑀦𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀯𑀺𑀯𑁂𑀓𑀚𑀦𑁆𑀢𑀺 𑀏𑀢𑁆𑀣 𑀯𑀺𑀯𑀺𑀢𑁆𑀢𑀺 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀕𑀫𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀢𑁆𑀢𑁄𑀢𑀺 𑀯𑀸 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀯𑀺𑀢𑁆𑀢𑁄 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀯𑀺𑀯𑁂𑀓𑀸, 𑀢𑀲𑁆𑀫𑀺𑀁 𑀯𑀸 𑀯𑀺𑀯𑁂𑀓𑁂 𑀚𑀸𑀢𑀦𑁆𑀢𑀺 𑀯𑀺𑀯𑁂𑀓𑀚𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀺𑀡𑀬𑀢𑀻𑀢𑀺 𑀧𑀻𑀢𑀺, 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸. 𑀲𑀸 𑀧𑀦𑁂𑀲𑀸 𑀔𑀼𑀤𑁆𑀤𑀺𑀓𑀸𑀧𑀻𑀢𑀺, 𑀔𑀡𑀺𑀓𑀸𑀧𑀻𑀢𑀺, 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺, 𑀉𑀩𑁆𑀩𑁂𑀕𑀸𑀧𑀻𑀢𑀺, 𑀨𑀭𑀡𑀸𑀧𑀻𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺.

𑀢𑀢𑁆𑀣 𑀔𑀼𑀤𑁆𑀤𑀺𑀓𑀸𑀧𑀻𑀢𑀺 𑀲𑀭𑀻𑀭𑁂 𑀮𑁄𑀫𑀳𑀁𑀲𑀫𑀢𑁆𑀢𑀫𑁂𑀯 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀔𑀡𑀺𑀓𑀸𑀧𑀻𑀢𑀺 𑀔𑀡𑁂 𑀔𑀡𑁂 𑀯𑀺𑀚𑁆𑀚𑀼𑀧𑁆𑀧𑀸𑀤𑀲𑀤𑀺𑀲𑀸 𑀳𑁄𑀢𑀺. 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺 𑀲𑀫𑀼𑀤𑁆𑀤𑀢𑀻𑀭𑀁 𑀯𑀻𑀘𑀺 𑀯𑀺𑀬, 𑀓𑀸𑀬𑀁 𑀑𑀓𑁆𑀓𑀫𑀺𑀢𑁆𑀯𑀸 𑀑𑀓𑁆𑀓𑀫𑀺𑀢𑁆𑀯𑀸 𑀪𑀺𑀚𑁆𑀚𑀢𑀺. 𑀉𑀩𑁆𑀩𑁂𑀕𑀸𑀧𑀻𑀢𑀺 𑀩𑀮𑀯𑀢𑀻 𑀳𑁄𑀢𑀺, 𑀓𑀸𑀬𑀁 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀮𑀗𑁆𑀖𑀸𑀧𑀦𑀧𑁆𑀧𑀫𑀸𑀡𑀧𑀢𑁆𑀢𑀸.

𑀨𑀭𑀡𑀸𑀧𑀻𑀢𑀺 𑀅𑀢𑀺𑀩𑀮𑀯𑀢𑀻 𑀳𑁄𑀢𑀺. 𑀢𑀸𑀬 𑀳𑀺 𑀉𑀧𑁆𑀧𑀦𑁆𑀦𑀸𑀬 𑀲𑀓𑀮𑀲𑀭𑀻𑀭𑀁 𑀥𑀫𑀺𑀢𑁆𑀯𑀸 𑀧𑀽𑀭𑀺𑀢𑀯𑀢𑁆𑀣𑀺 𑀯𑀺𑀬 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀧𑀓𑁆𑀔𑀦𑁆𑀤𑀧𑀩𑁆𑀩𑀢𑀓𑀼𑀘𑁆𑀙𑀺 𑀯𑀺𑀬 𑀘 𑀅𑀦𑀼𑀧𑀭𑀺𑀧𑁆𑀨𑀼𑀝𑀁 𑀳𑁄𑀢𑀺. 𑀲𑀸 𑀧𑀦𑁂𑀲𑀸 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀻 𑀤𑀼𑀯𑀺𑀥𑀁 𑀧𑀲𑁆𑀲𑀤𑁆𑀥𑀺𑀁 𑀧𑀭𑀺𑀧𑀽𑀭𑁂𑀢𑀺 𑀓𑀸𑀬𑀧𑀲𑁆𑀲𑀤𑁆𑀥𑀺𑀜𑁆𑀘 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀜𑁆𑀘, 𑀧𑀲𑁆𑀲𑀤𑁆𑀥𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀻 𑀤𑀼𑀯𑀺𑀥𑀫𑁆𑀧𑀺 𑀲𑀼𑀔𑀁 𑀧𑀭𑀺𑀧𑀽𑀭𑁂𑀢𑀺 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘, 𑀲𑀼𑀔𑀁 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀁 𑀢𑀺𑀯𑀺𑀥𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺 𑀔𑀡𑀺𑀓𑀲𑀫𑀸𑀥𑀺𑀁 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀜𑁆𑀘𑀸𑀢𑀺. 𑀢𑀸𑀲𑀼 𑀬𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀫𑀽𑀮𑀁 𑀳𑀼𑀢𑁆𑀯𑀸 𑀯𑀟𑁆𑀠𑀫𑀸𑀦𑀸 𑀲𑀫𑀸𑀥𑀺𑀲𑀫𑁆𑀧𑀬𑁄𑀕𑀗𑁆𑀕𑀢𑀸 𑀨𑀭𑀡𑀸𑀧𑀻𑀢𑀺, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀧𑀻𑀢𑀻𑀢𑀺.

𑀇𑀢𑀭𑀁 𑀧𑀦 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁, 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀼𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀔𑀦𑀁 𑀯𑀸 𑀲𑀼𑀔𑀁, 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺 𑀔𑀡𑀢𑀺 𑀘 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀦𑁆𑀢𑀺 𑀲𑀼𑀔𑀁, 𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀬𑁂𑀢𑀁 𑀦𑀸𑀫𑀁. 𑀢𑀁 𑀲𑀸𑀢𑀮𑀓𑁆𑀔𑀡𑀁. 𑀲𑀦𑁆𑀢𑁂𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂 𑀇𑀝𑁆𑀞𑀸𑀭𑀫𑁆𑀫𑀡𑀧𑀝𑀺𑀮𑀸𑀪𑀢𑀼𑀝𑁆𑀞𑀺 𑀧𑀻𑀢𑀺, 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀁 𑀲𑀼𑀔𑀁. 𑀬𑀢𑁆𑀣 𑀧𑀻𑀢𑀺, 𑀢𑀢𑁆𑀣 𑀲𑀼𑀔𑀁, 𑀬𑀢𑁆𑀣 𑀲𑀼𑀔𑀁, 𑀢𑀢𑁆𑀣 𑀦 𑀦𑀺𑀬𑀫𑀢𑁄 𑀧𑀻𑀢𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸 𑀧𑀻𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀁 𑀲𑀼𑀔𑀁. 𑀓𑀦𑁆𑀢𑀸𑀭𑀔𑀺𑀦𑁆𑀦𑀲𑁆𑀲 𑀯𑀦𑀦𑁆𑀢𑁄𑀤𑀓𑀤𑀲𑁆𑀲𑀦𑀲𑀯𑀦𑁂𑀲𑀼 𑀯𑀺𑀬 𑀧𑀻𑀢𑀺, 𑀯𑀦𑀘𑁆𑀙𑀸𑀬𑀧𑁆𑀧𑀯𑁂𑀲𑀦𑀉𑀤𑀓𑀧𑀭𑀺𑀪𑁄𑀕𑁂𑀲𑀼 𑀯𑀺𑀬 𑀲𑀼𑀔𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀓𑀝𑀪𑀸𑀯𑀢𑁄 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀅𑀬𑀜𑁆𑀘 𑀧𑀻𑀢𑀺 𑀇𑀤𑀜𑁆𑀘 𑀲𑀼𑀔𑀁 𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀇𑀤𑀁 𑀛𑀸𑀦𑀁 ‘‘𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀣 𑀯𑀸 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀧𑀻𑀢𑀺𑀲𑀼𑀔𑀁 𑀥𑀫𑁆𑀫𑀯𑀺𑀦𑀬𑀸𑀤𑀬𑁄 𑀯𑀺𑀬. 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀏𑀯𑀫𑁆𑀧𑀺 𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔𑀁. 𑀬𑀣𑁂𑀯 𑀳𑀺 𑀛𑀸𑀦𑀁, 𑀏𑀯𑀁 𑀧𑀻𑀢𑀺𑀲𑀼𑀔𑀫𑁆𑀧𑁂𑀢𑁆𑀣 𑀯𑀺𑀯𑁂𑀓𑀚𑀫𑁂𑀯 𑀳𑁄𑀢𑀺, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀮𑁄𑀧𑀲𑀫𑀸𑀲𑀁 𑀓𑀢𑁆𑀯𑀸 𑀏𑀓𑀧𑀤𑁂𑀦𑁂𑀯 ‘‘𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀧𑀞𑀫𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀧𑀞𑀫𑀁, 𑀇𑀤𑀁 𑀧𑀞𑀫𑀁 𑀉𑀧𑁆𑀧𑀦𑁆𑀦𑀦𑁆𑀢𑀺𑀧𑀺 𑀧𑀞𑀫𑀁. 𑀛𑀸𑀦𑀦𑁆𑀢𑀺 𑀤𑀼𑀯𑀺𑀥𑀁 𑀛𑀸𑀦𑀁 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀜𑁆𑀘𑀸𑀢𑀺. 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀣𑀯𑀻𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀻𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀧𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀦𑀸𑀫. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀲𑁆𑀲 𑀉𑀧𑀦𑀺𑀚𑁆𑀛𑀸𑀦𑀢𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁. 𑀯𑀺𑀧𑀲𑁆𑀲𑀦𑀸𑀬 𑀓𑀢𑀓𑀺𑀘𑁆𑀘𑀲𑁆𑀲 𑀫𑀕𑁆𑀕𑁂𑀦 𑀇𑀚𑁆𑀛𑀦𑀢𑁄 𑀫𑀕𑁆𑀕𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁, 𑀨𑀮𑀁 𑀧𑀦 𑀦𑀺𑀭𑁄𑀥𑀲𑀘𑁆𑀘𑀁 𑀢𑀣𑀮𑀓𑁆𑀔𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁. 𑀢𑁂𑀲𑀼 𑀇𑀥 𑀧𑀼𑀩𑁆𑀩𑀪𑀸𑀕𑁂 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀸 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀘 𑀛𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀉𑀧𑀕𑀦𑁆𑀢𑁆𑀯𑀸, 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀫𑁆𑀧𑀸𑀤𑀬𑀺𑀢𑁆𑀯𑀸 𑀯𑀸, 𑀦𑀺𑀧𑁆𑀨𑀸𑀤𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀳𑀭𑀢𑀻𑀢𑀺 𑀢𑀤𑀦𑀼𑀭𑀽𑀧𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀇𑀭𑀺𑀬𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑀲𑁆𑀲 𑀇𑀭𑀺𑀬𑀦𑀁 𑀯𑀼𑀢𑁆𑀢𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺.

𑀢𑀁 𑀧𑀦𑁂𑀢𑀁 𑀧𑀞𑀫𑀚𑁆𑀛𑀸𑀦𑀁 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁, 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁. 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀣𑀺𑀦𑀫𑀺𑀤𑁆𑀥𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀯𑀲𑁂𑀦 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀏𑀢𑁂𑀲𑀼 𑀅𑀧𑁆𑀧𑀳𑀻𑀦𑁂𑀲𑀼 𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀲𑁆𑀲𑁂𑀢𑀸𑀦𑀺 𑀧𑀳𑀸𑀦𑀗𑁆𑀕𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀛𑀸𑀦𑀓𑁆𑀔𑀡𑁂 𑀅𑀜𑁆𑀜𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺, 𑀢𑀣𑀸𑀧𑀺 𑀏𑀢𑀸𑀦𑁂𑀯 𑀯𑀺𑀲𑁂𑀲𑁂𑀦 𑀛𑀸𑀦𑀦𑁆𑀢𑀭𑀸𑀬𑀓𑀭𑀸𑀦𑀺. 𑀓𑀸𑀫𑀘𑁆𑀙𑀦𑁆𑀤𑁂𑀦 𑀳𑀺 𑀦𑀸𑀦𑀸𑀯𑀺𑀲𑀬𑀧𑁆𑀧𑀮𑁄𑀪𑀺𑀢𑀁 𑀘𑀺𑀢𑁆𑀢𑀁 𑀦 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀸𑀥𑀺𑀬𑀢𑀺, 𑀓𑀸𑀫𑀘𑁆𑀙𑀦𑁆𑀤𑀸𑀪𑀺𑀪𑀽𑀢𑀁 𑀯𑀸, 𑀢𑀁 𑀦 𑀓𑀸𑀫𑀥𑀸𑀢𑀼𑀧𑁆𑀧𑀳𑀸𑀦𑀸𑀬 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀢𑀺. 𑀩𑁆𑀬𑀸𑀧𑀸𑀤𑁂𑀦 𑀯𑀸 𑀆𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀫𑀸𑀦𑀁 𑀦 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀢𑀺. 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑀁 𑀅𑀓𑀫𑁆𑀫𑀜𑁆𑀜𑀁 𑀳𑁄𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑀁 𑀅𑀯𑀽𑀧𑀲𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀧𑀭𑀺𑀩𑁆𑀪𑀫𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑀳𑀢𑀁 𑀛𑀸𑀦𑀸𑀥𑀺𑀕𑀫𑀲𑀸𑀥𑀺𑀓𑀁 𑀧𑀝𑀺𑀧𑀤𑀁 𑀦𑀸𑀭𑁄𑀳𑀢𑀺. 𑀇𑀢𑀺 𑀯𑀺𑀲𑁂𑀲𑁂𑀦 𑀛𑀸𑀦𑀦𑁆𑀢𑀭𑀸𑀬𑀓𑀭𑀢𑁆𑀢𑀸 𑀏𑀢𑀸𑀦𑁂𑀯 𑀧𑀳𑀸𑀦𑀗𑁆𑀕𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺.

𑀬𑀲𑁆𑀫𑀸 𑀧𑀦 𑀯𑀺𑀢𑀓𑁆𑀓𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀯𑀺𑀘𑀸𑀭𑁄 𑀅𑀦𑀼𑀧𑀩𑀦𑁆𑀥𑀢𑀺, 𑀢𑁂𑀳𑀺 𑀅𑀯𑀺𑀓𑁆𑀔𑁂𑀧𑀸𑀬 𑀲𑀫𑁆𑀧𑀸𑀤𑀺𑀢𑀧𑀬𑁄𑀕𑀲𑁆𑀲 𑀘𑁂𑀢𑀲𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀸 𑀧𑀻𑀢𑀺 𑀧𑀻𑀡𑀦𑀁 𑀲𑀼𑀔𑀜𑁆𑀘 𑀉𑀧𑀩𑁆𑀭𑀽𑀳𑀦𑀁 𑀓𑀭𑁄𑀢𑀺. 𑀅𑀣𑀲𑁆𑀲 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀏𑀢𑁂𑀳𑀺 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀩𑀦𑁆𑀥𑀦𑀧𑀻𑀡𑀦𑀼𑀧𑀩𑁆𑀭𑀽𑀳𑀦𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀏𑀓𑀕𑁆𑀕𑀢𑀸 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀁 𑀲𑀫𑁆𑀫𑀸 𑀘 𑀆𑀥𑀺𑀬𑀢𑀺. 𑀢𑀲𑁆𑀫𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁆𑀧𑀦𑁆𑀦𑁂𑀲𑀼 𑀳𑀺 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀛𑀸𑀦𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑀲𑁆𑀲 𑀏𑀢𑀸𑀦𑀺 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀦 𑀏𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀜𑁆𑀜𑀤𑁂𑀯 𑀛𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀧𑀦 𑀅𑀗𑁆𑀕𑀫𑀢𑁆𑀢𑀯𑀲𑁂𑀦𑁂𑀯 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀁, 𑀅𑀝𑁆𑀞𑀗𑁆𑀕𑀺𑀓𑁄 𑀘 𑀫𑀕𑁆𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀅𑀗𑁆𑀕𑀫𑀢𑁆𑀢𑀯𑀲𑁂𑀦𑁂𑀯 𑀧𑀜𑁆𑀘𑀗𑁆𑀕𑀺𑀓𑀦𑁆𑀢𑀺 𑀯𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑀸𑀦𑀺 𑀘 𑀧𑀜𑁆𑀘𑀗𑁆𑀕𑀸𑀦𑀺 𑀓𑀺𑀜𑁆𑀘𑀸𑀧𑀺 𑀉𑀧𑀘𑀸𑀭𑀓𑁆𑀔𑀡𑁂𑀧𑀺 𑀅𑀢𑁆𑀣𑀺, 𑀅𑀣 𑀔𑁄 𑀉𑀧𑀘𑀸𑀭𑁂 𑀧𑀓𑀢𑀺𑀘𑀺𑀢𑁆𑀢𑀢𑁄 𑀩𑀮𑀯𑀢𑀭𑀸𑀦𑀺. 𑀇𑀥 𑀧𑀦 𑀉𑀧𑀘𑀸𑀭𑀢𑁄𑀧𑀺 𑀩𑀮𑀯𑀢𑀭𑀸𑀦𑀺 𑀭𑀽𑀧𑀸𑀯𑀘𑀭𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀦𑀺 𑀦𑀺𑀧𑁆𑀨𑀦𑁆𑀦𑀸𑀦𑀺. 𑀏𑀢𑁆𑀣 𑀳𑀺 𑀯𑀺𑀢𑀓𑁆𑀓𑁄 𑀲𑀼𑀯𑀺𑀲𑀤𑁂𑀦 𑀆𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑀬𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀘𑀸𑀭𑁄 𑀅𑀢𑀺𑀯𑀺𑀬 𑀆𑀭𑀫𑁆𑀫𑀡𑀁 𑀅𑀦𑀼𑀫𑀚𑁆𑀚𑀫𑀸𑀦𑁄. 𑀧𑀻𑀢𑀺𑀲𑀼𑀔𑀁 𑀲𑀩𑁆𑀩𑀸𑀯𑀦𑁆𑀢𑀫𑁆𑀧𑀺 𑀓𑀸𑀬𑀁 𑀨𑀭𑀫𑀸𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁨𑁬). 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀧𑀺 𑀳𑁂𑀝𑁆𑀞𑀺𑀫𑀫𑁆𑀳𑀺 𑀲𑀫𑀼𑀕𑁆𑀕𑀧𑀝𑀮𑁂 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀯𑀺𑀬 𑀆𑀭𑀫𑁆𑀫𑀡𑁂𑀲𑀼 𑀨𑀼𑀲𑀺𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀫𑁂𑀢𑁂𑀲𑀁 𑀇𑀢𑀭𑁂𑀳𑀺 𑀯𑀺𑀲𑁂𑀲𑁄. 𑀢𑀢𑁆𑀣 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀓𑀺𑀜𑁆𑀘𑀸𑀧𑀺 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂 𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀣𑀸𑀧𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁬𑁫) ‘‘𑀛𑀸𑀦𑀦𑁆𑀢𑀺 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀢𑁆𑀢𑀸 𑀅𑀗𑁆𑀕𑀫𑁂𑀯. 𑀬𑁂𑀦 𑀳𑀺 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑀸 𑀉𑀤𑁆𑀤𑁂𑀲𑁄 𑀓𑀢𑁄, 𑀲𑁄𑀬𑁂𑀯 𑀢𑁂𑀦 𑀯𑀺𑀪𑀗𑁆𑀕𑁂 𑀧𑀓𑀸𑀲𑀺𑀢𑁄𑀢𑀺.

𑀢𑀺𑀯𑀺𑀥𑀓𑀮𑁆𑀬𑀸𑀡𑀁

𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸. 𑀢𑁂𑀲𑀁𑀬𑁂𑀯 𑀘 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀁 𑀮𑀓𑁆𑀔𑀡𑀯𑀲𑁂𑀦 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺. 𑀆𑀤𑀺𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀆𑀤𑀺𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑁋 𑀬𑁄 𑀢𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀬𑀜𑁆𑀘 𑀧𑀭𑀺𑀧𑀦𑁆𑀣𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀬𑀜𑁆𑀘 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀬𑀜𑁆𑀘 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀆𑀤𑀺𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀞𑀫𑀁 𑀛𑀸𑀦𑀁 𑀆𑀤𑀺𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘𑀸’𑀢𑀺.

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂. 𑀫𑀚𑁆𑀛𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀫𑀚𑁆𑀛𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑁋 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀬𑀜𑁆𑀘 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀫𑀚𑁆𑀛𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀞𑀫𑀁 𑀛𑀸𑀦𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘𑀸’𑀢𑀺.

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀭𑀺𑀬𑁄𑀲𑀸𑀦𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀧𑀭𑀺𑀬𑁄𑀲𑀸𑀦𑀲𑁆𑀲 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀸𑀲𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀭𑀺𑀬𑁄𑀲𑀸𑀦𑀲𑁆𑀲 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘𑀧𑀞𑀫𑀁 𑀛𑀸𑀦𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀘𑀢𑀼𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘𑀸’’’𑀢𑀺 (𑀧𑀝𑀺. 𑀫. 𑁧.𑁧𑁫𑁮).

‘‘𑀢𑀢𑁆𑀭 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀦𑀸𑀫 𑀲𑀲𑀫𑁆𑀪𑀸𑀭𑀺𑀓𑁄 𑀉𑀧𑀘𑀸𑀭𑁄. 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀦𑀸𑀫 𑀅𑀧𑁆𑀧𑀦𑀸. 𑀲𑀫𑁆𑀧𑀳𑀁𑀲𑀦𑀸 𑀦𑀸𑀫 𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺. 𑀬𑀲𑁆𑀫𑀸 𑀧𑀦 ‘‘𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀦𑁆𑀤𑀜𑁆𑀘𑁂𑀯 𑀳𑁄𑀢𑀺 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀺𑀢𑀜𑁆𑀘 𑀜𑀸𑀡𑁂𑀦 𑀘 𑀲𑀫𑁆𑀧𑀳𑀁𑀲𑀺𑀢’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀫𑁂𑀯 𑀆𑀕𑀫𑀦𑀯𑀲𑁂𑀦 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀯𑀲𑁂𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸, 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀪𑀸𑀯𑀲𑀸𑀥𑀦𑁂𑀦 𑀧𑀭𑀺𑀬𑁄𑀤𑀸𑀧𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀲𑀫𑁆𑀧𑀳𑀁𑀲𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀓𑀣𑀁? 𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀬𑁄 𑀦𑀻𑀯𑀭𑀡𑀲𑀗𑁆𑀔𑀸𑀢𑁄 𑀓𑀺𑀮𑁂𑀲𑀕𑀡𑁄 𑀢𑀲𑁆𑀲 𑀛𑀸𑀦𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺. 𑀯𑀺𑀲𑀼𑀤𑁆𑀥𑀢𑁆𑀢𑀸 𑀆𑀯𑀭𑀡𑀯𑀺𑀭𑀳𑀺𑀢𑀁 𑀳𑀼𑀢𑁆𑀯𑀸 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺. 𑀫𑀚𑁆𑀛𑀺𑀫𑀲𑀫𑀣𑀦𑀺𑀫𑀺𑀢𑁆𑀢𑀁 𑀦𑀸𑀫 𑀲𑀫𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀦𑀸𑀲𑀫𑀸𑀥𑀺𑀬𑁂𑀯. 𑀢𑀤𑀦𑀦𑁆𑀢𑀭𑀁 𑀧𑀦 𑀧𑀼𑀭𑀺𑀫𑀘𑀺𑀢𑁆𑀢𑀁 𑀏𑀓𑀲𑀦𑁆𑀢𑀢𑀺𑀧𑀭𑀺𑀡𑀸𑀫𑀦𑀬𑁂𑀦 𑀢𑀣𑀢𑁆𑀢𑀁 𑀉𑀧𑀕𑀘𑁆𑀙𑀫𑀸𑀦𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫, 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀣𑀢𑁆𑀢𑀼𑀧𑀕𑀫𑀦𑁂𑀦 𑀢𑀢𑁆𑀣 𑀧𑀓𑁆𑀔𑀦𑁆𑀤𑀢𑀺 𑀦𑀸𑀫. 𑀏𑀯𑀁 𑀢𑀸𑀯 𑀧𑀼𑀭𑀺𑀫𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑀦𑀺𑀧𑁆𑀨𑀸𑀤𑀺𑀓𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀆𑀕𑀫𑀦𑀯𑀲𑁂𑀦 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀯𑀺𑀲𑀼𑀤𑁆𑀥𑀲𑁆𑀲 𑀧𑀦 𑀢𑀲𑁆𑀲 𑀧𑀼𑀦 𑀯𑀺𑀲𑁄𑀥𑁂𑀢𑀩𑁆𑀩𑀸𑀪𑀸𑀯𑀢𑁄 𑀯𑀺𑀲𑁄𑀥𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀲𑀫𑀣𑀪𑀸𑀯𑀽𑀧𑀕𑀫𑀦𑁂𑀦 𑀲𑀫𑀣𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀦 𑀲𑀫𑀸𑀥𑀸𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀲𑀫𑀣𑀧𑀝𑀺𑀧𑀦𑁆𑀦𑀪𑀸𑀯𑀢𑁄 𑀏𑀯 𑀘𑀲𑁆𑀲 𑀓𑀺𑀮𑁂𑀲𑀲𑀁𑀲𑀕𑁆𑀕𑀁 𑀧𑀳𑀸𑀬 𑀏𑀓𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀲𑁆𑀲 𑀧𑀼𑀦 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀏𑀯𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀯𑀲𑁂𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀬𑁂 𑀧𑀦𑁂𑀢𑁂 𑀏𑀯𑀁 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀺𑀢𑁂 𑀢𑀢𑁆𑀣 𑀚𑀸𑀢𑀸 𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀬𑀼𑀕𑀦𑀤𑁆𑀥𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀢𑀺𑀯𑀢𑁆𑀢𑀫𑀸𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸, 𑀬𑀸𑀦𑀺 𑀘 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀦𑀸𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀭𑀲𑁂𑀦 𑀏𑀓𑀭𑀲𑀸𑀦𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸𑀦𑀺, 𑀬𑀜𑁆𑀘𑁂𑀲 𑀢𑀤𑀼𑀧𑀕𑀁 𑀢𑁂𑀲𑀁 𑀅𑀦𑀢𑀺𑀯𑀢𑁆𑀢𑀦𑀏𑀓𑀭𑀲𑀪𑀸𑀯𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀯𑀻𑀭𑀺𑀬𑀁 𑀯𑀸𑀳𑀬𑀢𑀺, 𑀬𑀸 𑀘𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀧𑀯𑀢𑁆𑀢𑀸 𑀆𑀲𑁂𑀯𑀦𑀸, 𑀲𑀩𑁆𑀩𑁂𑀧𑀺 𑀢𑁂 𑀆𑀓𑀸𑀭𑀸 𑀬𑀲𑁆𑀫𑀸 𑀜𑀸𑀡𑁂𑀦 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑁂𑀲𑀼 𑀢𑀁 𑀢𑀁 𑀆𑀤𑀻𑀦𑀯𑀜𑁆𑀘 𑀆𑀦𑀺𑀲𑀁𑀲𑀜𑁆𑀘 𑀤𑀺𑀲𑁆𑀯𑀸 𑀢𑀣𑀸 𑀢𑀣𑀸 𑀲𑀫𑁆𑀧𑀳𑀁𑀲𑀺𑀢𑀢𑁆𑀢𑀸 𑀯𑀺𑀲𑁄𑀥𑀺𑀢𑀢𑁆𑀢𑀸 𑀧𑀭𑀺𑀬𑁄𑀤𑀸𑀧𑀺𑀢𑀢𑁆𑀢𑀸 𑀦𑀺𑀧𑁆𑀨𑀦𑁆𑀦𑀸𑀯, 𑀢𑀲𑁆𑀫𑀸 ‘‘𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀪𑀸𑀯𑀲𑀸𑀥𑀦𑁂𑀦 𑀧𑀭𑀺𑀬𑁄𑀤𑀸𑀧𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀲𑀫𑁆𑀧𑀳𑀁𑀲𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀯𑀺𑀢𑀓𑁆𑀓𑀲𑁆𑀲 𑀘 𑀯𑀺𑀘𑀸𑀭𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀽𑀧𑀲𑀫𑀸 𑀲𑀫𑀢𑀺𑀓𑁆𑀓𑀫𑀸, 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀅𑀧𑀸𑀢𑀼𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀩𑁆𑀩𑁂𑀧𑀺 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸 𑀦 𑀲𑀦𑁆𑀢𑀺, 𑀅𑀜𑁆𑀜𑁂𑀬𑁂𑀯 𑀳𑀺 𑀧𑀞𑀫𑀚𑁆𑀛𑀸𑀦𑁂 𑀨𑀲𑁆𑀲𑀸𑀤𑀬𑁄, 𑀅𑀜𑁆𑀜𑁂 𑀇𑀥. 𑀑𑀴𑀸𑀭𑀺𑀓𑀲𑁆𑀲 𑀧𑀦 𑀑𑀴𑀸𑀭𑀺𑀓𑀲𑁆𑀲 𑀅𑀗𑁆𑀕𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀅𑀥𑀺𑀕𑀫𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀇𑀥 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀯𑀺𑀪𑀗𑁆𑀕𑁂 𑀧𑀦 ‘‘𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢’’𑀦𑁆𑀢𑀺 (𑀯𑀺𑀪. 𑁫𑁭𑁩) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀅𑀢𑁆𑀢𑀦𑀺 𑀚𑀸𑀢𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑀦𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸. 𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄 𑀛𑀸𑀦𑀫𑁆𑀧𑀺 𑀲𑀫𑁆𑀧𑀲𑀸𑀤𑀦𑀁, 𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬. 𑀬𑀲𑁆𑀫𑀸 𑀯𑀸 𑀢𑀁 𑀛𑀸𑀦𑀁 𑀲𑀫𑁆𑀧𑀲𑀸𑀤𑀦𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀽𑀧𑀲𑀫𑀦𑁂𑀦 𑀘 𑀘𑁂𑀢𑁄 𑀲𑀫𑁆𑀧𑀲𑀸𑀤𑀬𑀢𑀺, 𑀢𑀲𑁆𑀫𑀸𑀧𑀺 ‘‘𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄𑀢𑀺 𑀏𑀯𑀁 𑀧𑀤𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀘𑁂𑀢𑀲𑁄𑀢𑀺 𑀏𑀢𑀁 𑀏𑀓𑁄𑀤𑀺𑀪𑀸𑀯𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀏𑀓𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀦𑀚𑁆𑀛𑀸𑀭𑀽𑀴𑁆𑀳𑀢𑁆𑀢𑀸 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀳𑀼𑀢𑁆𑀯𑀸 𑀉𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑁄𑀧𑀺 𑀳𑀺 𑀮𑁄𑀓𑁂 𑀏𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀺𑀭𑀳𑀺𑀢𑁄 𑀯𑀸 𑀏𑀓𑁄 𑀅𑀲𑀳𑀸𑀬𑁄 𑀳𑀼𑀢𑁆𑀯𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀉𑀤𑀸𑀬𑀢𑀻𑀢𑀺 𑀉𑀤𑀺, 𑀉𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀏𑀓𑁄 𑀘 𑀲𑁄 𑀉𑀤𑀺 𑀘𑀸𑀢𑀺 𑀏𑀓𑁄𑀤𑀺, 𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑀺 𑀇𑀫𑀁 𑀏𑀓𑁄𑀤𑀺𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀇𑀤𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀏𑀓𑁄𑀤𑀺𑀪𑀸𑀯𑀁. 𑀲𑁄 𑀧𑀦𑀸𑀬𑀁 𑀏𑀓𑁄𑀤𑀺 𑀬𑀲𑁆𑀫𑀸 𑀘𑁂𑀢𑀲𑁄, 𑀦 𑀲𑀢𑁆𑀢𑀲𑁆𑀲, 𑀦 𑀚𑀻𑀯𑀲𑁆𑀲. 𑀢𑀲𑁆𑀫𑀸 𑀏𑀢𑀁 ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀦𑀼 𑀘𑀸𑀬𑀁 𑀲𑀤𑁆𑀥𑀸 𑀧𑀞𑀫𑀚𑁆𑀛𑀸𑀦𑁂𑀧𑀺 𑀅𑀢𑁆𑀣𑀺, 𑀅𑀬𑀜𑁆𑀘 𑀏𑀓𑁄𑀤𑀺𑀦𑀸𑀫𑀓𑁄 𑀲𑀫𑀸𑀥𑀺, 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 ‘‘𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀤𑀼𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑁂𑀦 𑀯𑀻𑀘𑀺𑀢𑀭𑀗𑁆𑀕𑀲𑀫𑀸𑀓𑀼𑀮𑀫𑀺𑀯 𑀚𑀮𑀁 𑀦 𑀲𑀼𑀧𑁆𑀧𑀲𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀢𑀺𑀬𑀸𑀧𑀺 𑀲𑀤𑁆𑀥𑀸𑀬 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀦 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸𑀬𑁂𑀯 𑀘𑁂𑀢𑁆𑀣 𑀲𑀫𑀸𑀥𑀺𑀧𑀺 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄, 𑀢𑀲𑁆𑀫𑀸 𑀏𑀓𑁄𑀤𑀺𑀪𑀸𑀯𑀦𑁆𑀢𑀺𑀧𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀛𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀮𑀺𑀩𑁄𑀥𑀸𑀪𑀸𑀯𑁂𑀦 𑀮𑀤𑁆𑀥𑁄𑀓𑀸𑀲𑀸 𑀩𑀮𑀯𑀢𑀻 𑀲𑀤𑁆𑀥𑀸, 𑀩𑀮𑀯𑀲𑀤𑁆𑀥𑀸𑀲𑀳𑀸𑀬𑀧𑀝𑀺𑀮𑀸𑀪𑁂𑀦𑁂𑀯 𑀘 𑀲𑀫𑀸𑀥𑀺𑀧𑀺 𑀧𑀸𑀓𑀝𑁄. 𑀢𑀲𑁆𑀫𑀸 𑀇𑀤𑀫𑁂𑀯 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀦𑁆𑀢𑀺 𑀪𑀸𑀯𑀦𑀸𑀬 𑀧𑀳𑀻𑀦𑀢𑁆𑀢𑀸 𑀏𑀢𑀲𑁆𑀫𑀺𑀁, 𑀏𑀢𑀲𑁆𑀲 𑀯𑀸 𑀯𑀺𑀢𑀓𑁆𑀓𑁄 𑀦𑀢𑁆𑀣𑀻𑀢𑀺 𑀅𑀯𑀺𑀢𑀓𑁆𑀓𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀯𑀺𑀘𑀸𑀭𑀁. 𑀏𑀢𑁆𑀣𑀸𑀳 ‘‘𑀦𑀦𑀼 𑀘 ‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’𑀢𑀺 𑀇𑀫𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄. 𑀅𑀣 𑀓𑀲𑁆𑀫𑀸 𑀧𑀼𑀦 𑀯𑀼𑀢𑁆𑀢𑀁 ‘𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’’𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀯𑀫𑁂𑀢𑀁, 𑀲𑀺𑀤𑁆𑀥𑁄𑀯𑀸𑀬𑀫𑀢𑁆𑀣𑁄. 𑀦 𑀧𑀦𑁂𑀢𑀁 𑀢𑀤𑀢𑁆𑀣𑀤𑀻𑀧𑀓𑀁, 𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀑𑀴𑀸𑀭𑀺𑀓𑀲𑁆𑀲 𑀧𑀦 𑀑𑀴𑀸𑀭𑀺𑀓𑀲𑁆𑀲 𑀅𑀗𑁆𑀕𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀲𑀫𑀥𑀺𑀕𑀫𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’𑀢𑀺 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺.

𑀅𑀧𑀺 𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀇𑀤𑀁 𑀲𑀫𑁆𑀧𑀲𑀸𑀤𑀦𑀁, 𑀦 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀲𑁆𑀲. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸 𑀏𑀓𑁄𑀤𑀺𑀪𑀸𑀯𑀁, 𑀦 𑀉𑀧𑀘𑀸𑀭𑀚𑁆𑀛𑀸𑀦𑀫𑀺𑀯 𑀦𑀻𑀯𑀭𑀡𑀧𑁆𑀧𑀳𑀸𑀦𑀸, 𑀦 𑀧𑀞𑀫𑀚𑁆𑀛𑀸𑀦𑀫𑀺𑀯 𑀘 𑀅𑀗𑁆𑀕𑀧𑀸𑀢𑀼𑀪𑀸𑀯𑀸𑀢𑀺 𑀏𑀯𑀁 𑀲𑀫𑁆𑀧𑀲𑀸𑀤𑀦𑀏𑀓𑁄𑀤𑀺𑀪𑀸𑀯𑀸𑀦𑀁 𑀳𑁂𑀢𑀼𑀧𑀭𑀺𑀤𑀻𑀧𑀓𑀫𑀺𑀤𑀁 𑀯𑀘𑀦𑀁. 𑀢𑀣𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀇𑀤𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀦 𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀯𑀺𑀬 𑀘 𑀅𑀪𑀸𑀯𑀸𑀢𑀺, 𑀏𑀯𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀤𑀻𑀧𑀓𑀜𑁆𑀘, 𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀓𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀓𑀫𑁂𑀯 𑀧𑀦 ‘‘𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀇𑀤𑀁 𑀯𑀘𑀦𑀁. 𑀢𑀲𑁆𑀫𑀸 𑀧𑀼𑀭𑀺𑀫𑀁 𑀯𑀢𑁆𑀯𑀸𑀧𑀺 𑀧𑀼𑀦 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺.

𑀲𑀫𑀸𑀥𑀺𑀚𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀢𑁄 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀯𑀸 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀞𑀫𑀫𑁆𑀧𑀺 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀚𑀸𑀢𑀁, 𑀅𑀣 𑀔𑁄 𑀅𑀬𑀫𑁂𑀯 𑀲𑀫𑀸𑀥𑀺 ‘‘𑀲𑀫𑀸𑀥𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀺𑀭𑀳𑁂𑀦 𑀅𑀢𑀺𑀯𑀺𑀬 𑀅𑀘𑀮𑀢𑁆𑀢𑀸 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸 𑀘. 𑀢𑀲𑁆𑀫𑀸 𑀇𑀫𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀤𑀫𑁂𑀯 ‘‘𑀲𑀫𑀸𑀥𑀺𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀤𑀼𑀢𑀺𑀬𑀁. 𑀇𑀤𑀁 𑀤𑀼𑀢𑀺𑀬𑀁 𑀉𑀧𑁆𑀧𑀦𑁆𑀦𑀦𑁆𑀢𑀺𑀧𑀺 𑀤𑀼𑀢𑀺𑀬𑀁.

𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸𑀢𑀺 𑀯𑀺𑀭𑀸𑀕𑁄 𑀦𑀸𑀫 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀻𑀢𑀺𑀬𑀸 𑀚𑀺𑀕𑀼𑀘𑁆𑀙𑀦𑀁 𑀯𑀸 𑀲𑀫𑀢𑀺𑀓𑁆𑀓𑀫𑁄 𑀯𑀸. 𑀉𑀪𑀺𑀦𑁆𑀦𑀁 𑀧𑀦 𑀅𑀦𑁆𑀢𑀭𑀸 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀲𑁄 𑀯𑀽𑀧𑀲𑀫𑀁 𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀁 𑀯𑀸. 𑀢𑀢𑁆𑀣 𑀬𑀤𑀸 𑀯𑀽𑀧𑀲𑀫𑀫𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑀤𑀸 𑀧𑀻𑀢𑀺𑀬𑀸 𑀯𑀺𑀭𑀸𑀕𑀸 𑀘, 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀯𑀽𑀧𑀲𑀫𑀸 𑀘𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀲𑁆𑀲𑀸 𑀘 𑀬𑁄𑀚𑀦𑀸𑀬 𑀯𑀺𑀭𑀸𑀕𑁄 𑀚𑀺𑀕𑀼𑀘𑁆𑀙𑀦𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀻𑀢𑀺𑀬𑀸 𑀚𑀺𑀕𑀼𑀘𑁆𑀙𑀦𑀸 𑀘 𑀲𑀫𑀢𑀺𑀓𑁆𑀓𑀫𑀸 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀸 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑀤𑀸 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸, 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀲𑁆𑀲𑀸 𑀘 𑀬𑁄𑀚𑀦𑀸𑀬 𑀯𑀺𑀭𑀸𑀕𑁄 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀻𑀢𑀺𑀬𑀸 𑀘 𑀲𑀫𑀢𑀺𑀓𑁆𑀓𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀸𑀫𑀜𑁆𑀘𑁂𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀯𑀽𑀧𑀲𑀦𑁆𑀢𑀸, 𑀇𑀫𑀲𑁆𑀲 𑀧𑀦 𑀛𑀸𑀦𑀲𑁆𑀲 𑀫𑀕𑁆𑀕𑀧𑀭𑀺𑀤𑀻𑀧𑀦𑀢𑁆𑀣𑀁 𑀯𑀡𑁆𑀡𑀪𑀡𑀦𑀢𑁆𑀣𑀜𑁆𑀘𑁂𑀢𑀁 𑀯𑀼𑀢𑁆𑀢𑀁. ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺 ‘‘𑀦𑀽𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑁄 𑀫𑀕𑁆𑀕𑁄 𑀇𑀫𑀲𑁆𑀲 𑀛𑀸𑀦𑀲𑁆𑀲𑀸’’𑀢𑀺. 𑀬𑀣𑀸 𑀘 𑀢𑀢𑀺𑀬𑁂 𑀅𑀭𑀺𑀬𑀫𑀕𑁆𑀕𑁂 𑀅𑀧𑁆𑀧𑀳𑀻𑀦𑀸𑀦𑀫𑁆𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸’’𑀢𑀺 (𑀫. 𑀦𑀺. 𑁨.𑁧𑁩𑁨-𑁧𑁩𑁩) 𑀏𑀯𑀁 𑀧𑀳𑀸𑀦𑀁 𑀯𑀼𑀘𑁆𑀘𑀫𑀸𑀦𑀁 𑀯𑀡𑁆𑀡𑀪𑀡𑀦𑀁 𑀳𑁄𑀢𑀺, 𑀢𑀤𑀥𑀺𑀕𑀫𑀸𑀬 𑀉𑀲𑁆𑀲𑀼𑀓𑁆𑀓𑀸𑀦𑀁 𑀉𑀲𑁆𑀲𑀸𑀳𑀚𑀦𑀓𑀁, 𑀏𑀯𑀫𑁂𑀯 𑀇𑀥 𑀅𑀯𑀽𑀧𑀲𑀦𑁆𑀢𑀸𑀦𑀫𑁆𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀯𑀼𑀘𑁆𑀘𑀫𑀸𑀦𑁄 𑀯𑀡𑁆𑀡𑀪𑀡𑀦𑀁 𑀳𑁄𑀢𑀺, 𑀢𑁂𑀦𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀧𑀻𑀢𑀺𑀬𑀸 𑀘 𑀲𑀫𑀢𑀺𑀓𑁆𑀓𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸’’𑀢𑀺.