𑁧. 𑀓𑀸𑀫𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀢𑀢𑁆𑀣 𑀓𑀸𑀫𑀲𑀼𑀢𑁆𑀢𑀁 𑀆𑀤𑀺. 𑀢𑀲𑁆𑀫𑀺𑀫𑁆𑀧𑀺 ‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸’’𑀢𑀺 𑀕𑀸𑀣𑀸 𑀆𑀤𑀺. 𑀲𑀸 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀢𑀺𑀥𑀸 𑀞𑀺𑀢𑀸. ‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀺 𑀉𑀤𑁆𑀤𑁂𑀲𑁄. ‘‘𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘𑀸’’𑀢𑀺 𑀦𑀺𑀤𑁆𑀤𑁂𑀲𑁄. ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸’’𑀢𑀺 𑀏𑀯𑀫𑀸𑀤𑀺 𑀧𑀝𑀺𑀦𑀺𑀤𑁆𑀤𑁂𑀲𑁄.

𑁧. 𑀢𑀢𑁆𑀣 𑀓𑀸𑀫𑀦𑁆𑀢𑀺 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀢𑁂𑀪𑀽𑀫𑀓𑀥𑀫𑁆𑀫𑀲𑀗𑁆𑀔𑀸𑀢𑀁 𑀯𑀢𑁆𑀣𑀼𑀓𑀸𑀫𑀁. 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀇𑀘𑁆𑀙𑀫𑀸𑀦𑀲𑁆𑀲. 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀻𑀢𑀺 𑀢𑀲𑁆𑀲 𑀓𑀸𑀫𑀬𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲 𑀢𑀁 𑀓𑀸𑀫𑀲𑀗𑁆𑀔𑀸𑀢𑀁 𑀯𑀢𑁆𑀣𑀼 𑀲𑀫𑀺𑀚𑁆𑀛𑀢𑀺 𑀘𑁂, 𑀲𑀘𑁂 𑀲𑁄 𑀢𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀻𑀢𑀺 𑀏𑀓𑀁𑀲𑀁 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑁄𑀢𑀺. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀫𑀘𑁆𑀘𑁄𑀢𑀺 𑀲𑀢𑁆𑀢𑁄. 𑀬𑀤𑀺𑀘𑁆𑀙𑀢𑀻𑀢𑀺 𑀬𑀁 𑀇𑀘𑁆𑀙𑀢𑀺. 𑀇𑀤𑀁 𑀧𑀦 𑀲𑀗𑁆𑀔𑁂𑀧𑀢𑁄 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑀫𑀢𑁆𑀢𑀫𑁂𑀯, 𑀯𑀺𑀢𑁆𑀣𑀸𑀭𑁄 𑀧𑀦 𑀉𑀧𑀭𑀺 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀇𑀫𑀲𑁆𑀫𑀺𑀁, 𑀏𑀯𑀁 𑀇𑀢𑁄 𑀧𑀭𑀁 𑀲𑀩𑁆𑀩𑁂𑀲𑀼𑀧𑀻𑀢𑀺.

𑀓𑀸𑀫𑀸𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑀧𑀤𑀁. 𑀉𑀤𑁆𑀤𑀸𑀦𑀢𑁄𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑀤𑀁. 𑀉𑀤𑁆𑀤𑀸𑀦𑀢𑁄𑀢𑀺 𑀯𑀕𑁆𑀕𑀯𑀲𑁂𑀦 ‘‘𑀫𑀘𑁆𑀙𑀼𑀤𑁆𑀤𑀸𑀦𑀁 𑀓𑀺𑀦𑁂𑀬𑁆𑀬𑀸’’𑀢𑀺 𑀆𑀤𑀻𑀲𑀼 𑀯𑀺𑀬. 𑀅𑀣 𑀯𑀸 𑀉𑀧𑀭𑀽𑀧𑀭𑀺 𑀤𑀸𑀦𑀢𑁄 𑀉𑀤𑁆𑀤𑀸𑀦𑀁, 𑀉𑀤𑁆𑀥𑀁 𑀉𑀤𑁆𑀥𑀁 𑀲𑁄𑀥𑀦𑀢𑁄 𑀩𑁆𑀬𑀯𑀤𑀸𑀦𑀝𑁆𑀞𑁂𑀦 𑀯𑁄𑀤𑀸𑀦𑀁 𑀯𑀺𑀬. 𑀯𑀺𑀢𑁆𑀣𑀸𑀭𑀓𑀭𑀡𑀪𑀸𑀯𑁂𑀦 𑀯𑀸. 𑀓𑀸𑀫𑀸 𑀇𑀢𑀺 𑀧𑀸𑀞𑀲𑁂𑀲𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀤𑁆𑀯𑁂𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀦 𑀏𑀓𑀁, 𑀦 𑀢𑀬𑁄. 𑀯𑀢𑁆𑀣𑀼𑀓𑀸𑀫𑀸 𑀘𑀸𑀢𑀺 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀯𑀢𑁆𑀣𑀼𑀓𑀸𑀫𑀸 𑀘. 𑀉𑀧𑀢𑀸𑀧𑀦𑀝𑁆𑀞𑁂𑀦 𑀯𑀺𑀩𑀸𑀥𑀦𑀝𑁆𑀞𑁂𑀦 𑀘 𑀓𑀺𑀮𑁂𑀲𑀓𑀸𑀫𑀸 𑀘. 𑀢𑁂𑀲𑀼 𑀯𑀢𑁆𑀣𑀼𑀓𑀸𑀫𑁄 𑀧𑀭𑀺𑀜𑁆𑀜𑁂𑀬𑁆𑀬𑁄, 𑀓𑀺𑀮𑁂𑀲𑀓𑀸𑀫𑁄 𑀧𑀳𑀸𑀢𑀩𑁆𑀩𑁄. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑁄 𑀓𑀺𑀮𑁂𑀲𑀓𑀸𑀫𑁂𑀦 𑀧𑀢𑁆𑀣𑀬𑀺𑀢𑀩𑁆𑀩𑁄𑀢𑀺 𑀓𑀸𑀫𑀻𑀬𑀢𑀻𑀢𑀺 𑀓𑀸𑀫𑁄. 𑀓𑀺𑀮𑁂𑀲𑀓𑀸𑀫𑁄 𑀯𑀢𑁆𑀣𑀼𑀓𑀸𑀫𑀸𑀦𑀁 𑀧𑀘𑁆𑀘𑀸𑀲𑀻𑀲𑀦𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀓𑀸𑀫𑀻𑀬𑀢𑁂 𑀅𑀦𑁂𑀦𑀸𑀢𑀺 𑀓𑀸𑀫𑁄. 𑀢𑀢𑁆𑀣 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑁄 𑀯𑀢𑁆𑀣𑀼𑀓𑀸𑀫𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑁄 𑀓𑀺𑀮𑁂𑀲𑀓𑀸𑀫𑁄. 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀚𑀸𑀦𑀺𑀢𑀩𑁆𑀩𑁄 𑀯𑀢𑁆𑀣𑀼𑀓𑀸𑀫𑁄, 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑁄 𑀓𑀺𑀮𑁂𑀲𑀓𑀸𑀫𑁄. 𑀓𑀺𑀮𑁂𑀲𑀸𑀦𑀁 𑀧𑀢𑀺𑀝𑁆𑀞𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦 𑀆𑀭𑀫𑁆𑀫𑀡𑀝𑁆𑀞𑁂𑀦 𑀘 𑀯𑀢𑁆𑀣𑀼𑀓𑀸𑀫𑁄.

‘‘𑀦𑁂𑀢𑁂 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂, 𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄;

𑀢𑀺𑀝𑁆𑀞𑀦𑁆𑀢𑀺 𑀘𑀺𑀢𑁆𑀭𑀸𑀦𑀺 𑀢𑀣𑁂𑀯 𑀮𑁄𑀓𑁂, 𑀅𑀣𑁂𑀢𑁆𑀣 𑀥𑀻𑀭𑀸 𑀯𑀺𑀦𑀬𑀦𑁆𑀢𑀺 𑀙𑀦𑁆𑀤’’𑀦𑁆𑀢𑀺. (𑀅. 𑀦𑀺. 𑁬.𑁬𑁩);

𑀦𑀦𑁆𑀤𑀫𑀸𑀡𑀯𑀓- (𑀥. 𑀧. 𑀅𑀝𑁆𑀞. 𑁧.𑁬𑁮 𑀉𑀧𑁆𑀧𑀮𑀯𑀡𑁆𑀡𑀢𑁆𑀣𑁂𑀭𑀻𑀯𑀢𑁆𑀣𑀼) 𑀲𑁄𑀭𑁂𑀬𑁆𑀬𑀲𑁂𑀝𑁆𑀞𑀺𑀧𑀼𑀢𑁆𑀢𑀸𑀤𑀻𑀦𑀁 (𑀥. 𑀧. 𑁪𑁩) 𑀯𑀢𑁆𑀣𑀽𑀦𑀺 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀓𑀺𑀮𑁂𑀲𑀓𑀸𑀫𑁄 𑀢𑀸𑀧𑀦𑀝𑁆𑀞𑁂𑀦 𑀩𑀸𑀥𑀦𑀝𑁆𑀞𑁂𑀦 𑀘 𑀲𑀬𑀁 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀻’’𑀢𑀺 𑀘 ‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀻’’𑀢𑀺 (𑀅. 𑀦𑀺. 𑁩.𑁫𑁪) 𑀘 𑀏𑀯𑀫𑀸𑀤𑀺 𑀦𑀺𑀤𑀲𑁆𑀲𑀦𑀁.

𑀢𑀫𑁂𑀯 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑁄 𑁋 ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀢𑀫𑁂𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀧𑀜𑁆𑀘𑀯𑀺𑀥𑀸 𑀳𑀺 𑀧𑀼𑀘𑁆𑀙𑀸, 𑀢𑀸𑀲𑀁 𑀯𑀺𑀪𑀸𑀕𑁄 𑀉𑀧𑀭𑀺 𑀧𑀸𑀴𑀺𑀬𑀁𑀬𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀸𑀲𑀼 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀢𑀢𑁆𑀣 𑀫𑀦𑀸𑀧𑀺𑀓𑀸𑀢𑀺 𑀫𑀦𑀁 𑀅𑀧𑁆𑀧𑀸𑀬𑀦𑁆𑀢𑀺 𑀯𑀤𑁆𑀥𑁂𑀦𑁆𑀢𑀻𑀢𑀺 𑀫𑀦𑀸𑀧𑀸, 𑀫𑀦𑀸𑀧𑀸 𑀏𑀯 𑀫𑀦𑀸𑀧𑀺𑀓𑀸. 𑀭𑀽𑀧𑀸𑀢𑀺 𑀓𑀫𑁆𑀫𑀘𑀺𑀢𑁆𑀢𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀸 𑀭𑀽𑀧𑀸𑀭𑀫𑁆𑀫𑀡𑀸. 𑀭𑀽𑀧𑀬𑀦𑁆𑀢𑀻𑀢𑀺 𑀭𑀽𑀧𑀸, 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀸 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀭𑀽𑀧𑀦𑁆𑀢𑀺? 𑀭𑀼𑀧𑁆𑀧𑀦𑀝𑁆𑀞𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀯𑀤𑁂𑀣? 𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀚𑀺𑀖𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀧𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦𑀧𑀺 𑀭𑀼𑀧𑁆𑀧𑀢𑀺. 𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯).

𑀢𑀢𑁆𑀣 𑀭𑀼𑀧𑁆𑀧𑀢𑀻𑀢𑀺 𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀺, 𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀢𑁂𑀦 𑀢𑀸𑀯 𑀭𑀼𑀧𑁆𑀧𑀦𑀁 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁂 𑀧𑀸𑀓𑀝𑀁. 𑀫𑀳𑀺𑀁𑀲𑀓𑀭𑀝𑁆𑀞𑀸𑀤𑀻𑀲𑀼𑀧𑀺 𑀳𑀺𑀫𑀧𑀸𑀢𑀲𑀻𑀢𑀮𑁂𑀲𑀼 𑀧𑀤𑁂𑀲𑁂𑀲𑀼 𑀏𑀢𑀁 𑀧𑀸𑀓𑀝𑀫𑁂𑀯. 𑀢𑀢𑁆𑀣 𑀳𑀺 𑀲𑀢𑁆𑀢𑀸 𑀲𑀻𑀢𑁂𑀦 𑀪𑀺𑀦𑁆𑀦𑀙𑀺𑀦𑁆𑀦𑀲𑀭𑀻𑀭𑀸 𑀚𑀻𑀯𑀺𑀢𑀓𑁆𑀔𑀬𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺.

𑀉𑀡𑁆𑀳𑁂𑀦 𑀭𑀼𑀧𑁆𑀧𑀦𑀁 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀧𑀸𑀓𑀝𑀁. 𑀢𑀢𑁆𑀣 𑀳𑀺 𑀢𑀢𑁆𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀓𑀭𑀡𑀓𑀸𑀮𑁂 𑀲𑀢𑁆𑀢𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺.

𑀚𑀺𑀖𑀘𑁆𑀙𑀸𑀬 𑀭𑀼𑀧𑁆𑀧𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀘𑁂𑀯 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀘 𑀧𑀸𑀓𑀝𑀁. 𑀧𑁂𑀢𑁆𑀢𑀺𑀯𑀺𑀲𑀬𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀸 𑀤𑁆𑀯𑁂 𑀢𑀻𑀡𑀺 𑀩𑀼𑀤𑁆𑀥𑀦𑁆𑀢𑀭𑀸𑀦𑀺 𑀓𑀺𑀜𑁆𑀘𑀺𑀤𑁂𑀯 𑀆𑀫𑀺𑀲𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀦𑁆𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀉𑀤𑀭𑀁 𑀆𑀤𑀺𑀢𑁆𑀢𑀲𑀼𑀲𑀺𑀭𑀭𑀼𑀓𑁆𑀔𑁄 𑀯𑀺𑀬 𑀳𑁄𑀢𑀺. 𑀤𑀼𑀩𑁆𑀪𑀺𑀓𑁆𑀔𑁂 𑀓𑀜𑁆𑀚𑀺𑀓𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀫𑀭𑀡𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺.

𑀧𑀺𑀧𑀸𑀲𑀸𑀬 𑀭𑀼𑀧𑁆𑀧𑀦𑀁 𑀓𑀸𑀮𑀓𑀜𑁆𑀚𑀺𑀓𑀸𑀤𑀻𑀲𑀼 𑀧𑀸𑀓𑀝𑀁. 𑀢𑀢𑁆𑀣 𑀳𑀺 𑀲𑀢𑁆𑀢𑀸 𑀤𑁆𑀯𑁂 𑀢𑀻𑀡𑀺 𑀩𑀼𑀤𑁆𑀥𑀦𑁆𑀢𑀭𑀸𑀦𑀺 𑀳𑀤𑀬𑀢𑁂𑀫𑀦𑀫𑀢𑁆𑀢𑀁 𑀯𑀸 𑀚𑀺𑀯𑁆𑀳𑀸𑀢𑁂𑀫𑀦𑀫𑀢𑁆𑀢𑀁 𑀯𑀸 𑀉𑀤𑀓𑀩𑀺𑀦𑁆𑀤𑀼𑀫𑁆𑀧𑀺 𑀮𑀤𑁆𑀥𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. ‘‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺 𑀦𑀤𑀺𑀁 𑀕𑀢𑀸𑀦𑀁 𑀚𑀮𑀁 𑀯𑀸𑀮𑀼𑀓𑀸𑀢𑀮𑀁 𑀲𑀫𑁆𑀧𑀚𑁆𑀚𑀢𑀺. 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀢𑀸𑀦𑀫𑁆𑀧𑀺 𑀲𑀫𑀼𑀤𑁆𑀤𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄𑀬𑁂𑀯 𑀳𑁄𑀢𑀺. 𑀢𑁂 𑀲𑀼𑀲𑁆𑀲𑀦𑁆𑀢𑀸 𑀩𑀮𑀯𑀤𑀼𑀓𑁆𑀔𑀧𑀻𑀴𑀺𑀢𑀸 𑀯𑀺𑀭𑀯𑀦𑁆𑀢𑀺. 𑀟𑀁𑀲𑀸𑀤𑀻𑀳𑀺 𑀭𑀼𑀧𑁆𑀧𑀦𑀁 𑀟𑀁𑀲𑀫𑀓𑁆𑀔𑀺𑀓𑀸𑀤𑀺𑀩𑀳𑀼𑀮𑁂𑀲𑀼 𑀧𑀤𑁂𑀲𑁂𑀲𑀼 𑀧𑀸𑀓𑀝𑀁. 𑀢𑀁 𑀧𑀦 𑁋 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁? 𑀲𑀧𑁆𑀧𑀝𑀺𑀖’’𑀦𑁆𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁬𑁫𑁬, 𑁬𑁫𑁮) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀲𑀧𑁆𑀧𑀦𑁆𑀢𑀻𑀢𑀺 𑀲𑀤𑁆𑀤𑀸, 𑀉𑀤𑀸𑀳𑀭𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀢𑀼𑀘𑀺𑀢𑁆𑀢𑀯𑀲𑁂𑀦 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸 𑀲𑀤𑁆𑀤𑀸. 𑀕𑀦𑁆𑀥𑀬𑀦𑁆𑀢𑀻𑀢𑀺 𑀕𑀦𑁆𑀥𑀸, 𑀅𑀢𑁆𑀢𑀦𑁄 𑀯𑀢𑁆𑀣𑀽𑀦𑀺 𑀲𑀽𑀘𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀭𑀲𑀦𑁆𑀢𑀺 𑀢𑁂 𑀲𑀢𑁆𑀢𑀸𑀢𑀺 𑀭𑀲𑀸, 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀨𑀼𑀲𑀻𑀬𑀦𑁆𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀸. 𑀏𑀢𑁂 𑀕𑀦𑁆𑀥𑀸𑀤𑀬𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀸𑀯. 𑀢𑁂𑀲𑀁 𑀯𑀺𑀪𑀸𑀕𑁄 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁬𑁨𑁨-𑁬𑁨𑁪) 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯.

𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀬𑀦𑁆𑀢𑀻𑀢𑀺 𑀅𑀢𑁆𑀣𑀭𑀡𑀸. 𑀲𑀭𑀻𑀭𑀁 𑀯𑁂𑀞𑁂𑀢𑁆𑀯𑀸 𑀧𑀸𑀭𑀼𑀧𑀻𑀬𑀦𑁆𑀢𑀻𑀢𑀺 𑀧𑀸𑀯𑀼𑀭𑀡𑀸. 𑀅𑀦𑁆𑀢𑁄𑀚𑀸𑀢𑀸𑀤𑀬𑁄 𑀘𑀢𑁆𑀢𑀸𑀭𑁄 𑀤𑀸𑀲𑀻 𑀘 𑀤𑀸𑀲𑁄 𑀘 𑀤𑀸𑀲𑀺𑀤𑀸𑀲𑀸. 𑀔𑁂𑀢𑁆𑀢𑀁 𑀦𑀸𑀫 𑀬𑀲𑁆𑀫𑀺𑀁 𑀧𑀼𑀩𑁆𑀩𑀡𑁆𑀡𑀁 𑀭𑀼𑀳𑀢𑀺. 𑀯𑀢𑁆𑀣𑀼 𑀦𑀸𑀫 𑀬𑀲𑁆𑀫𑀺𑀁 𑀅𑀧𑀭𑀡𑁆𑀡𑀁 𑀭𑀼𑀳𑀢𑀺. 𑀬𑀢𑁆𑀣 𑀯𑀸 𑀉𑀪𑀬𑀫𑁆𑀧𑀺 𑀭𑀼𑀳𑀢𑀺, 𑀢𑀁 𑀔𑁂𑀢𑁆𑀢𑀁. 𑀢𑀤𑀢𑁆𑀣𑀸𑀬 𑀓𑀢𑀪𑀽𑀫𑀺𑀪𑀸𑀕𑁄 𑀯𑀢𑁆𑀣𑀼. 𑀔𑁂𑀢𑁆𑀢𑀯𑀢𑁆𑀣𑀼𑀲𑀻𑀲𑁂𑀦 𑀘𑁂𑀢𑁆𑀣 𑀯𑀸𑀧𑀻𑀢𑀴𑀸𑀓𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀳𑀺𑀭𑀜𑁆𑀜𑀦𑁆𑀢𑀺 𑀓𑀳𑀸𑀧𑀡𑁄. 𑀲𑀼𑀯𑀡𑁆𑀡𑀦𑁆𑀢𑀺 𑀚𑀸𑀢𑀭𑀽𑀧𑀁. 𑀢𑁂𑀲𑀁 𑀕𑀳𑀡𑁂𑀦 𑀮𑁄𑀳𑀫𑀸𑀲𑀓𑁄 𑀚𑀢𑀼𑀫𑀸𑀲𑀓𑁄 𑀤𑀸𑀭𑀼𑀫𑀸𑀲𑀓𑁄𑀢𑀺 𑀲𑀩𑁆𑀩𑁂𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄𑀢𑀺 𑀏𑀓𑀓𑀼𑀝𑀺𑀓𑀸𑀤𑀺 𑀕𑀸𑀫𑁄. 𑀆𑀧𑀡𑀬𑀼𑀢𑁆𑀢𑁄 𑀦𑀺𑀕𑀫𑁄. 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀭𑀸𑀚𑀥𑀸𑀦𑀻. 𑀭𑀝𑁆𑀞𑀦𑁆𑀢𑀺 𑀚𑀦𑀧𑀤𑁂𑀓𑀤𑁂𑀲𑀁. 𑀚𑀦𑀧𑀤𑁄𑀢𑀺 𑀓𑀸𑀲𑀺𑀓𑁄𑀲𑀮𑀸𑀤𑀺𑀚𑀦𑀧𑀤𑁄. 𑀓𑁄𑀲𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀓𑁄𑀲𑁄 𑁋 𑀳𑀢𑁆𑀣𑀻 𑀅𑀲𑁆𑀲𑁄 𑀭𑀣𑁄 𑀧𑀢𑁆𑀢𑀺. 𑀓𑁄𑀝𑁆𑀞𑀸𑀕𑀸𑀭𑀦𑁆𑀢𑀺 𑀢𑀺𑀯𑀺𑀥𑀁 𑀓𑁄𑀝𑁆𑀞𑀸𑀕𑀸𑀭𑀁 𑁋 𑀥𑀦𑀓𑁄𑀝𑁆𑀞𑀸𑀕𑀸𑀭𑀁 𑀥𑀜𑁆𑀜𑀓𑁄𑀝𑁆𑀞𑀸𑀕𑀸𑀭𑀁 𑀯𑀢𑁆𑀣𑀓𑁄𑀝𑁆𑀞𑀸𑀕𑀸𑀭𑀁. 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀘𑀦𑀁. 𑀭𑀚𑀦𑀻𑀬𑀦𑁆𑀢𑀺 𑀭𑀜𑁆𑀚𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑁂𑀦.

𑀇𑀢𑁄 𑀧𑀭𑀁 𑀢𑀺𑀓𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀅𑀢𑀻𑀢𑀢𑁆𑀢𑀺𑀓𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑀳𑀻𑀦𑀢𑁆𑀢𑀺𑀓𑀑𑀓𑀸𑀲𑀢𑁆𑀢𑀺𑀓𑀲𑀁𑀬𑁄𑀕𑀢𑁆𑀢𑀺𑀓𑀓𑀸𑀫𑀸𑀯𑀘𑀭𑀢𑁆𑀢𑀺𑀓𑀯𑀲𑁂𑀦 𑀙𑀢𑁆𑀢𑀺𑀓𑁂 𑀆𑀳. 𑀢𑀢𑁆𑀣 𑀅𑀢𑀻𑀢𑀢𑁆𑀢𑀺𑀓𑁂 𑀢𑀸𑀯 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀉𑀧𑁆𑀧𑀸𑀤𑀸𑀤𑀺𑀓𑁆𑀔𑀡𑀁 𑀯𑀸 𑀧𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀻𑀢𑀸. 𑀢𑀤𑀼𑀪𑀬𑀫𑁆𑀧𑀺 𑀦 𑀆𑀕𑀢𑀸𑀢𑀺 𑀅𑀦𑀸𑀕𑀢𑀸. 𑀢𑀁 𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀇𑀤𑀁 𑀪𑀯𑁂𑀦 𑀧𑀭𑀺𑀘𑁆𑀙𑀦𑁆𑀦𑀁. 𑀧𑀝𑀺𑀲𑀦𑁆𑀥𑀺𑀢𑁄 𑀳𑀺 𑀧𑀝𑁆𑀞𑀸𑀬 𑀅𑀢𑀻𑀢𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀅𑀦𑀦𑁆𑀢𑀭𑀪𑀯𑁂 𑀯𑀸 𑀦𑀺𑀩𑁆𑀩𑀢𑁆𑀢𑀸 𑀳𑁄𑀦𑁆𑀢𑀼 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀯𑀸, 𑀲𑀩𑁆𑀩𑁂 𑀅𑀢𑀻𑀢𑀸𑀬𑁂𑀯 𑀦𑀸𑀫. 𑀘𑀼𑀢𑀺𑀢𑁄 𑀧𑀝𑁆𑀞𑀸𑀬 𑀅𑀦𑀸𑀕𑀢𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑀓𑀸 𑀓𑀸𑀫𑀸 𑀅𑀦𑀦𑁆𑀢𑀭𑀪𑀯𑁂 𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀼 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀯𑀸, 𑀲𑀩𑁆𑀩𑁂 𑀅𑀦𑀸𑀕𑀢𑀸𑀬𑁂𑀯 𑀦𑀸𑀫. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀅𑀦𑁆𑀢𑀭𑁂 𑀧𑀯𑀢𑁆𑀢𑀸 𑀓𑀸𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀸𑀫.

𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 ‘‘𑀏𑀯𑀁 𑀧𑀯𑀢𑁆𑀢𑀫𑀸𑀦𑀸 𑀫𑀬𑀁 𑀅𑀢𑁆𑀢𑀸𑀢𑀺 𑀕𑀳𑀡𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀇𑀫𑀺𑀦𑀸 𑀯𑀺𑀬 𑀅𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀓𑀸𑀫𑀸 𑀅𑀚𑁆𑀛𑀢𑁆𑀢𑀸 𑀓𑀸𑀫𑀸 𑀦𑀸𑀫. 𑀢𑀢𑁄 𑀩𑀳𑀺𑀪𑀽𑀢𑀸 𑀧𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀯𑀸 𑀩𑀳𑀺𑀤𑁆𑀥𑀸 𑀦𑀸𑀫. 𑀢𑀢𑀺𑀬𑀧𑀤𑀁 𑀢𑀤𑀼𑀪𑀬𑀯𑀲𑁂𑀦 𑀯𑀼𑀢𑁆𑀢𑀁.

𑀳𑀻𑀦𑀢𑁆𑀢𑀺𑀓𑁂 𑀳𑀻𑀦𑀸𑀢𑀺 𑀮𑀸𑀫𑀓𑀸. 𑀫𑀚𑁆𑀛𑀺𑀫𑀸𑀢𑀺 𑀳𑀻𑀦𑀧𑀡𑀻𑀢𑀸𑀦𑀁 𑀫𑀚𑁆𑀛𑁂 𑀪𑀯𑀸𑀢𑀺 𑀫𑀚𑁆𑀛𑀺𑀫𑀸. 𑀅𑀯𑀲𑁂𑀲𑀸 𑀉𑀢𑁆𑀢𑀫𑀝𑁆𑀞𑁂𑀦 𑀧𑀡𑀻𑀢𑀸. 𑀅𑀧𑀺 𑀘 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦𑁂𑀭𑀬𑀺𑀓𑀸𑀦𑀜𑁆𑀳𑀺 𑀓𑀸𑀫𑀸 𑀓𑁄𑀝𑀺𑀧𑁆𑀧𑀢𑁆𑀢𑀸 𑀳𑀻𑀦𑀸 𑀦𑀸𑀫. 𑀢𑁂 𑀉𑀧𑀸𑀤𑀸𑀬 𑀢𑀺𑀭𑀘𑁆𑀙𑀸𑀦𑁂𑀲𑀼 𑀦𑀸𑀕𑀲𑀼𑀧𑀡𑁆𑀡𑀸𑀦𑀁 𑀓𑀸𑀫𑀸 𑀧𑀡𑀻𑀢𑀸 𑀦𑀸𑀫. 𑀲𑁂𑀲𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀦𑀸𑀫. 𑀢𑁂𑀲𑀫𑁆𑀧𑀺 𑀓𑀸𑀫𑀸 𑀳𑀻𑀦𑀸. 𑀢𑁂 𑀉𑀧𑀸𑀤𑀸𑀬 𑀫𑀳𑁂𑀲𑀓𑁆𑀔𑀧𑁂𑀢𑀸𑀦𑀁 𑀓𑀸𑀫𑀸 𑀧𑀡𑀻𑀢𑀸 𑀦𑀸𑀫. 𑀅𑀯𑀲𑁂𑀲𑀸𑀦𑀁 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀸. 𑀢𑁂 𑀉𑀧𑀸𑀤𑀸𑀬 𑀚𑀸𑀦𑀧𑀤𑀸𑀦𑀁 𑀓𑀸𑀫𑀸 𑀧𑀡𑀻𑀢𑀸 𑀦𑀸𑀫. 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀸. 𑀢𑁂 𑀉𑀧𑀸𑀤𑀸𑀬 𑀕𑀸𑀫𑀪𑁄𑀚𑀓𑀸𑀦𑀁 𑀓𑀸𑀫𑀸 𑀧𑀡𑀻𑀢𑀸 𑀦𑀸𑀫. 𑀢𑁂𑀲𑀁 𑀧𑀭𑀺𑀘𑀸𑀭𑀺𑀓𑀸𑀦𑀁 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀸. 𑀢𑁂 𑀉𑀧𑀸𑀤𑀸𑀬 𑀚𑀦𑀧𑀤𑀲𑀸𑀫𑀺𑀓𑀸𑀦𑀁 𑀓𑀸𑀫𑀸 𑀧𑀡𑀻𑀢𑀸 𑀦𑀸𑀫. 𑀢𑁂𑀲𑀁 𑀧𑀭𑀺𑀘𑀸𑀭𑀺𑀓𑀸𑀦𑀁 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀸. 𑀢𑁂 𑀉𑀧𑀸𑀤𑀸𑀬 𑀧𑀤𑁂𑀲𑀭𑀸𑀚𑀽𑀦𑀁 𑀓𑀸𑀫𑀸 𑀧𑀡𑀻𑀢𑀸 𑀦𑀸𑀫. 𑀢𑁂𑀲𑀁 𑀅𑀫𑀘𑁆𑀘𑀸𑀦𑀁 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀸. 𑀢𑁂 𑀉𑀧𑀸𑀤𑀸𑀬 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀓𑀸𑀫𑀸 𑀧𑀡𑀻𑀢𑀸 𑀦𑀸𑀫. 𑀢𑀲𑁆𑀲 𑀅𑀫𑀘𑁆𑀘𑀸𑀦𑀁 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀦𑀸𑀫. 𑀢𑀲𑁆𑀲𑀧𑀺 𑀳𑀻𑀦𑀸. 𑀢𑁂 𑀉𑀧𑀸𑀤𑀸𑀬 𑀪𑀼𑀫𑁆𑀫𑀤𑁂𑀯𑀸𑀦𑀁 𑀓𑀸𑀫𑀸 𑀧𑀡𑀻𑀢𑀸 𑀦𑀸𑀫. 𑀢𑁂𑀲𑀁 𑀧𑀭𑀺𑀘𑀸𑀭𑀺𑀓𑀸𑀦𑀁 𑀤𑁂𑀯𑀸𑀦𑀁 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀸. 𑀢𑁂 𑀉𑀧𑀸𑀤𑀸𑀬 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀓𑀸𑀫𑀸 𑀧𑀡𑀻𑀢𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀤𑁂𑀯𑀸𑀦𑀁 𑀓𑀸𑀫𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀧𑀡𑀻𑀢𑀸 𑀦𑀸𑀫. 𑀏𑀯𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀑𑀓𑀸𑀲𑀢𑁆𑀢𑀺𑀓𑁂 𑀆𑀧𑀸𑀬𑀺𑀓𑀸 𑀓𑀸𑀫𑀸𑀢𑀺 𑀅𑀯𑀟𑁆𑀠𑀺𑀲𑀗𑁆𑀔𑀸𑀢𑁂𑀲𑀼 𑀅𑀧𑀕𑀢𑀅𑀬𑁂𑀲𑀼 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀸𑀫𑀸 𑀆𑀧𑀸𑀬𑀺𑀓𑀸. 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀸𑀫𑀸 𑀫𑀸𑀦𑀼𑀲𑀺𑀓𑀸. 𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀸𑀫𑀸 𑀤𑀺𑀩𑁆𑀩𑀸.

𑀲𑀁𑀬𑁄𑀕𑀢𑁆𑀢𑀺𑀓𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀁 𑀓𑀸𑀫𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑀢𑁄 𑀞𑀧𑁂𑀢𑁆𑀯𑀸 𑀦𑁂𑀭𑀬𑀺𑀓𑁂 𑀲𑁂𑀲𑀅𑀧𑀸𑀬𑀲𑀢𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀤𑁂𑀯𑁂 𑀉𑀧𑀸𑀤𑀸𑀬 𑀬𑀸𑀯 𑀢𑀼𑀲𑀺𑀢𑀓𑀸𑀬𑀺𑀓𑀸𑀦𑀜𑁆𑀘 𑀤𑁂𑀯𑀸𑀦𑀁 𑀓𑀸𑀫𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀓𑀸𑀫𑀸 𑀦𑀸𑀫. 𑀧𑀓𑀢𑀺𑀧𑀝𑀺𑀬𑀢𑁆𑀢𑀸𑀭𑀫𑁆𑀫𑀡𑀢𑁄 𑀅𑀢𑀺𑀭𑁂𑀓𑁂𑀦 𑀭𑀫𑀺𑀢𑀼𑀓𑀸𑀫𑀢𑀸𑀓𑀸𑀮𑁂 𑀬𑀣𑀸𑀭𑀼𑀘𑀺𑀢𑀁 𑀆𑀭𑀫𑁆𑀫𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀭𑀫𑀦𑁆𑀢𑀻𑀢𑀺 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀓𑀸𑀫𑀸 𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀦𑀸𑀫. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀧𑀭𑁂𑀳𑀺 𑀦𑀺𑀫𑁆𑀫𑀺𑀢𑁂 𑀆𑀭𑀫𑁆𑀫𑀡𑁂 𑀲𑁂𑀯𑀦𑁆𑀢𑀻𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀓𑀸𑀫𑀸 𑀧𑀭𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀦𑀸𑀫. 𑀧𑀭𑀺𑀕𑁆𑀕𑀳𑀺𑀢𑀸𑀢𑀺 ‘‘𑀫𑀬𑁆𑀳𑀁 𑀏𑀢’’𑀦𑁆𑀢𑀺 𑀕𑀳𑀺𑀢𑀸 𑀓𑀸𑀫𑀸. 𑀅𑀧𑀭𑀺𑀕𑁆𑀕𑀳𑀺𑀢𑀸𑀢𑀺 𑀢𑀣𑀸 𑀅𑀧𑀭𑀺𑀕𑁆𑀕𑀳𑀺𑀢𑀸 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀓𑀸𑀫𑀸. 𑀫𑀫𑀸𑀬𑀺𑀢𑀸𑀢𑀺 𑀢𑀡𑁆𑀳𑀸𑀯𑀲𑁂𑀦 ‘‘𑀫𑀫 𑀏𑀢’’𑀦𑁆𑀢𑀺 𑀕𑀳𑀺𑀢𑀸. 𑀅𑀫𑀫𑀸𑀬𑀺𑀢𑀸𑀢𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀸.

𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸𑀢𑀺 ‘‘𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁮𑁭) 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀸. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸, 𑀯𑀢𑁆𑀣𑀼𑀓𑀸𑀫𑁄 𑀘 𑀓𑀺𑀮𑁂𑀲𑀓𑀸𑀫𑁄 𑀘𑀸𑀢𑀺. 𑀢𑀢𑁆𑀣 𑀓𑀺𑀮𑁂𑀲𑀓𑀸𑀫𑁄 𑀅𑀢𑁆𑀣𑀢𑁄 𑀙𑀦𑁆𑀤𑀭𑀸𑀕𑁄. 𑀯𑀢𑁆𑀣𑀼𑀓𑀸𑀫𑁄 𑀢𑁂𑀪𑀽𑀫𑀓𑀁 𑀯𑀝𑁆𑀝𑀁. 𑀓𑀺𑀮𑁂𑀲𑀓𑀸𑀫𑁄 𑀘𑁂𑀢𑁆𑀣 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄. 𑀇𑀢𑀭𑁄 𑀓𑀸𑀫𑀻𑀬𑀢𑀻𑀢𑀺. 𑀬𑀲𑁆𑀫𑀺𑀁 𑀧𑀦 𑀧𑀤𑁂𑀲𑁂 𑀤𑀼𑀯𑀺𑀥𑁄𑀧𑁂𑀲𑁄 𑀓𑀸𑀫𑁄 𑀧𑀯𑀢𑁆𑀢𑀺𑀯𑀲𑁂𑀦 𑀅𑀯𑀘𑀭𑀢𑀺, 𑀲𑁄 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀙𑀦𑁆𑀦𑀜𑁆𑀘 𑀤𑁂𑀯𑀮𑁄𑀓𑀸𑀦𑀁 𑀯𑀲𑁂𑀦 𑀏𑀓𑀸𑀤𑀲𑀯𑀺𑀥𑁄 𑀧𑀤𑁂𑀲𑁄 𑀓𑀸𑀫𑁄 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑁄. 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑁂 𑀲𑀦𑁆𑀥𑀸𑀬 ‘‘𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸𑀢𑀺 ‘‘𑀳𑁂𑀝𑁆𑀞𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀅𑀓𑀦𑀺𑀝𑁆𑀞𑁂 𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁮𑁯) 𑀦𑀬𑁂𑀦 𑀯𑀼𑀢𑁆𑀢𑀸𑀦𑀁 𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀦𑀁 𑀯𑀲𑁂𑀦 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸. 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸𑀢𑀺 ‘‘𑀳𑁂𑀝𑁆𑀞𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀼𑀧𑀕𑁂 𑀤𑁂𑀯𑁂 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀼𑀧𑀕𑁂 𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁯𑁧) 𑀦𑀬𑁂𑀦 𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸. 𑀢𑀢𑁆𑀣 𑀭𑀽𑀧𑁂 𑀅𑀯𑀘𑀭𑀦𑁆𑀢𑀻𑀢𑀺 𑀭𑀽𑀧𑀸𑀯𑀘𑀭𑀸. 𑀅𑀭𑀽𑀧𑁂 𑀅𑀯𑀘𑀭𑀦𑁆𑀢𑀻𑀢𑀺 𑀅𑀭𑀽𑀧𑀸𑀯𑀘𑀭𑀸. 𑀢𑀡𑁆𑀳𑀸𑀯𑀢𑁆𑀣𑀼𑀓𑀸𑀢𑀺 𑀧𑀢𑀺𑀝𑁆𑀞𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦 𑀘 𑀢𑀡𑁆𑀳𑀸𑀬 𑀯𑀢𑁆𑀣𑀼𑀪𑀽𑀢𑀸. 𑀢𑀡𑁆𑀳𑀸𑀭𑀫𑁆𑀫𑀡𑀸𑀢𑀺 𑀢𑀡𑁆𑀳𑀸𑀧𑀯𑀢𑁆𑀢𑀺𑀯𑀲𑁂𑀦 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀪𑀽𑀢𑀸. 𑀓𑀸𑀫𑀦𑀻𑀬𑀝𑁆𑀞𑁂𑀦𑀸𑀢𑀺 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀝𑁆𑀞𑁂𑀦. 𑀭𑀚𑀦𑀻𑀬𑀝𑁆𑀞𑁂𑀦𑀸𑀢𑀺 𑀭𑀜𑁆𑀚𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑁂𑀦. 𑀫𑀤𑀦𑀻𑀬𑀝𑁆𑀞𑁂𑀦𑀸𑀢𑀺 𑀓𑀼𑀮𑀫𑀤𑀸𑀤𑀺𑀫𑀤𑀁 𑀉𑀧𑁆𑀧𑀸𑀤𑀦𑀻𑀬𑀝𑁆𑀞𑁂𑀦.

𑀢𑀢𑁆𑀣 ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸’’𑀢𑀺𑀆𑀤𑀺𑀁 𑀓𑀢𑁆𑀯𑀸 ‘‘𑀬𑀁 𑀓𑀺𑀜𑁆𑀘𑀺 𑀭𑀚𑀦𑀻𑀬𑀁 𑀯𑀢𑁆𑀣𑀽’’𑀢𑀺 𑀧𑀭𑀺𑀬𑁄𑀲𑀸𑀦𑀁 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀯𑀲𑁂𑀲𑀁 𑀏𑀓𑀘𑀢𑀼𑀓𑁆𑀓𑀸𑀤𑀺𑀓𑀙𑀢𑁆𑀢𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀯𑀢𑁆𑀣𑀼𑀓𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑁂 𑀓𑀺𑀮𑁂𑀲𑀓𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀙𑀦𑁆𑀤𑁄𑀢𑀺 𑀤𑀼𑀩𑁆𑀩𑀮𑀭𑀸𑀕𑁄. 𑀭𑀸𑀕𑁄𑀢𑀺 𑀢𑀢𑁄 𑀩𑀮𑀯𑀢𑀭𑁄. 𑀉𑀧𑀭𑀺 𑀢𑀬𑁄𑀧𑀺 𑀭𑀸𑀕𑀸 𑀇𑀫𑁂𑀳𑀺 𑀩𑀮𑀯𑀢𑀭𑀸. 𑀓𑀸𑀫𑁂𑀲𑀽𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼. 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀓𑀸𑀫𑀲𑀗𑁆𑀔𑀸𑀢𑁄 𑀙𑀦𑁆𑀤𑁄, 𑀦 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄, 𑀦 𑀥𑀫𑁆𑀫𑀘𑁆𑀙𑀦𑁆𑀤𑁄. 𑀓𑀸𑀫𑀦𑀯𑀲𑁂𑀦 𑀭𑀚𑁆𑀚𑀦𑀯𑀲𑁂𑀦 𑀘 𑀓𑀸𑀫𑁄𑀬𑁂𑀯 𑀭𑀸𑀕𑁄 𑀓𑀸𑀫𑀭𑀸𑀕𑁄. 𑀓𑀸𑀫𑀦𑀯𑀲𑁂𑀦 𑀦𑀦𑁆𑀤𑀦𑀯𑀲𑁂𑀦 𑀘 𑀓𑀸𑀫𑁄𑀬𑁂𑀯 𑀦𑀦𑁆𑀤𑀻 𑀓𑀸𑀫𑀦𑀦𑁆𑀤𑀻. 𑀏𑀯𑀁 𑀲𑀩𑁆𑀩𑀢𑁆𑀣 𑀓𑀸𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀓𑀸𑀫𑀢𑀡𑁆𑀳𑀸. 𑀲𑀺𑀦𑁂𑀳𑀦𑀝𑁆𑀞𑁂𑀦 𑀓𑀸𑀫𑀲𑁆𑀦𑁂𑀳𑁄. 𑀧𑀭𑀺𑀟𑀬𑁆𑀳𑀦𑀝𑁆𑀞𑁂𑀦 𑀓𑀸𑀫𑀧𑀭𑀺𑀴𑀸𑀳𑁄. 𑀫𑀼𑀘𑁆𑀙𑀦𑀝𑁆𑀞𑁂𑀦 𑀓𑀸𑀫𑀫𑀼𑀘𑁆𑀙𑀸. 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑀝𑁆𑀞𑁂𑀦 𑀓𑀸𑀫𑀚𑁆𑀛𑁄𑀲𑀸𑀦𑀁. 𑀯𑀝𑁆𑀝𑀲𑁆𑀫𑀺𑀁 𑀑𑀖𑁂𑀳𑀺 𑀑𑀲𑀻𑀤𑀸𑀧𑁂𑀢𑀻𑀢𑀺 𑀓𑀸𑀫𑁄𑀖𑁄. 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀢𑀻𑀢𑀺 𑀓𑀸𑀫𑀬𑁄𑀕𑁄. 𑀤𑀴𑁆𑀳𑀯𑀲𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑀁 𑀉𑀧𑀸𑀤𑀸𑀦𑀁. 𑀘𑀺𑀢𑁆𑀢𑀁 𑀦𑀻𑀯𑀭𑀢𑀺 𑀧𑀭𑀺𑀬𑁄𑀦𑀦𑁆𑀥𑀢𑀻𑀢𑀺 𑀦𑀻𑀯𑀭𑀡𑀁.

𑀅𑀤𑁆𑀤𑀲𑀦𑁆𑀢𑀺 𑀅𑀤𑁆𑀤𑀓𑁆𑀔𑀺𑀁. 𑀓𑀸𑀫𑀸𑀢𑀺 𑀆𑀮𑀧𑀦𑀁. 𑀢𑁂𑀢𑀺 𑀢𑀯. 𑀫𑀽𑀮𑀦𑁆𑀢𑀺 𑀧𑀢𑀺𑀝𑁆𑀞𑀁. 𑀲𑀗𑁆𑀓𑀧𑁆𑀧𑀸𑀢𑀺 𑀧𑀭𑀺𑀓𑀧𑁆𑀧𑁂𑀦. 𑀦 𑀢𑀁 𑀲𑀗𑁆𑀓𑀧𑁆𑀧𑀬𑀺𑀲𑁆𑀲𑀸𑀫𑀻𑀢𑀺 𑀢𑀁 𑀧𑀭𑀺𑀓𑀧𑁆𑀧𑀦𑀁 𑀦 𑀓𑀭𑀺𑀲𑁆𑀲𑀸𑀫𑀺. 𑀦 𑀳𑁄𑀳𑀺𑀲𑀻𑀢𑀺 𑀦 𑀪𑀯𑀺𑀲𑁆𑀲𑀲𑀺.

𑀇𑀘𑁆𑀙𑀫𑀸𑀦𑀲𑁆𑀲𑀸𑀢𑀺 𑀧𑀘𑁆𑀘𑀸𑀲𑀻𑀲𑀦𑁆𑀢𑀲𑁆𑀲. 𑀲𑀸𑀤𑀺𑀬𑀫𑀸𑀦𑀲𑁆𑀲𑀸𑀢𑀺 𑀅𑀲𑁆𑀲𑀸𑀤𑀺𑀬𑀫𑀸𑀦𑀲𑁆𑀲. 𑀧𑀢𑁆𑀣𑀬𑀫𑀸𑀦𑀲𑁆𑀲𑀸𑀢𑀺 𑀧𑀢𑁆𑀣𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀧𑀺𑀳𑀬𑀫𑀸𑀦𑀲𑁆𑀲𑀸𑀢𑀺 𑀧𑀸𑀧𑀼𑀡𑀺𑀢𑀼𑀁 𑀇𑀘𑁆𑀙𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀅𑀪𑀺𑀚𑀧𑁆𑀧𑀫𑀸𑀦𑀲𑁆𑀲𑀸𑀢𑀺 𑀢𑀡𑁆𑀳𑀸𑀯𑀲𑁂𑀦 𑀢𑀺𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀅𑀣 𑀯𑀸 𑀅𑀪𑀺𑀯𑀤𑀦𑁆𑀢𑀲𑁆𑀲.

𑀔𑀢𑁆𑀢𑀺𑀬𑀲𑁆𑀲 𑀯𑀸𑀢𑀺𑀆𑀤𑀺 𑀘𑀢𑀼𑀚𑁆𑀚𑀸𑀢𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸𑀢𑀺 𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸𑀢𑀺 𑀉𑀧𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀚𑁆𑀛𑀢𑀻𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀲𑀫𑀺𑀚𑁆𑀛𑀢𑀻𑀢𑀺 𑀲𑀫𑁆𑀫𑀸 𑀦𑀺𑀧𑁆𑀨𑀚𑁆𑀚𑀢𑀺. 𑀇𑀚𑁆𑀛𑀢𑀺 𑀯𑀺𑀲𑁂𑀲𑀭𑀽𑀧𑀧𑀝𑀺𑀮𑀸𑀪𑀯𑀲𑁂𑀦. 𑀮𑀪𑀢𑀺 𑀤𑀲𑁆𑀲𑀦𑀻𑀬𑀭𑀽𑀧𑀧𑀝𑀺𑀮𑀸𑀪𑀯𑀲𑁂𑀦. 𑀧𑀝𑀺𑀮𑀪𑀢𑀺 𑀧𑀲𑀸𑀤𑀦𑀻𑀬𑀭𑀽𑀧𑀧𑀝𑀺𑀮𑀸𑀪𑀯𑀲𑁂𑀦. 𑀅𑀥𑀺𑀕𑀘𑁆𑀙𑀢𑀺 𑀲𑀡𑁆𑀞𑀸𑀦𑀭𑀽𑀧𑀧𑀝𑀺𑀮𑀸𑀪𑀯𑀲𑁂𑀦. 𑀯𑀺𑀦𑁆𑀤𑀢𑀺 𑀙𑀯𑀺𑀧𑁆𑀧𑀲𑀸𑀤𑀭𑀽𑀧𑀧𑀝𑀺𑀮𑀸𑀪𑀯𑀲𑁂𑀦. 𑀅𑀣 𑀯𑀸 𑀧𑀼𑀜𑁆𑀜𑀫𑀳𑀢𑁆𑀢𑁂𑀦 𑀇𑀚𑁆𑀛𑀢𑀺. 𑀚𑀸𑀢𑀺𑀫𑀳𑀢𑁆𑀢𑁂𑀦 𑀮𑀪𑀢𑀺. 𑀇𑀲𑁆𑀲𑀭𑀺𑀬𑀫𑀳𑀢𑁆𑀢𑁂𑀦 𑀧𑀝𑀺𑀮𑀪𑀢𑀺. 𑀲𑀼𑀔𑀫𑀳𑀢𑁆𑀢𑁂𑀦 𑀅𑀥𑀺𑀕𑀘𑁆𑀙𑀢𑀺. 𑀲𑀫𑁆𑀧𑀢𑁆𑀢𑀺𑀫𑀳𑀢𑁆𑀢𑁂𑀦 𑀯𑀺𑀦𑁆𑀤𑀢𑀻𑀢𑀺.

𑀏𑀓𑀁𑀲𑀯𑀘𑀦𑀦𑁆𑀢𑀺 𑀏𑀓𑀓𑁄𑀝𑁆𑀞𑀸𑀲𑀯𑀘𑀦𑀁. ‘‘𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 (𑀧𑀸𑀭𑀸. 𑁩𑁪𑁯, 𑁩𑁬𑁭), 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁧𑁨; 𑀅. 𑀦𑀺. 𑁪.𑁪𑁨) 𑀯𑀺𑀬 𑀅𑀦𑁂𑀓𑀁𑀲𑀕𑀳𑀡𑀧𑀝𑀺𑀓𑁆𑀔𑁂𑀧𑁄. 𑀦𑀺𑀲𑁆𑀲𑀁𑀲𑀬𑀯𑀘𑀦𑀦𑁆𑀢𑀺 𑀲𑀁𑀲𑀬𑀯𑀺𑀭𑀳𑀺𑀢𑀯𑀘𑀦𑀁, 𑀲𑀦𑁆𑀤𑁂𑀳𑀧𑀝𑀺𑀓𑁆𑀔𑁂𑀧𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀓𑀗𑁆𑀔𑀸𑀯𑀘𑀦𑀦𑁆𑀢𑀺 ‘‘𑀓𑀣𑀫𑀺𑀤𑀁 𑀓𑀣𑀫𑀺𑀤’’𑀦𑁆𑀢𑀺 𑀓𑀗𑁆𑀔𑀸𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀅𑀤𑁆𑀯𑁂𑀚𑁆𑀛𑀯𑀘𑀦𑀦𑁆𑀢𑀺 𑀤𑁆𑀯𑀺𑀥𑀸𑀪𑀸𑀯𑀁 𑀤𑁆𑀯𑁂𑀚𑁆𑀛𑀁, 𑀢𑀁𑀅𑀪𑀸𑀯𑁂𑀦 𑀅𑀤𑁆𑀯𑁂𑀚𑁆𑀛𑀯𑀘𑀦𑀁. 𑀤𑁆𑀯𑀺𑀥𑀸𑀪𑀸𑀯𑀯𑀺𑀭𑀳𑀺𑀢𑀁 ‘‘𑀅𑀤𑁆𑀯𑁂𑀚𑁆𑀛𑀯𑀘𑀦𑀸 𑀩𑀼𑀤𑁆𑀥𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀯𑀺𑀫𑀢𑀺𑀧𑀝𑀺𑀓𑁆𑀔𑁂𑀧𑁄. 𑀅𑀤𑁆𑀯𑁂𑀴𑁆𑀳𑀓𑀯𑀘𑀦𑀦𑁆𑀢𑀺 𑀤𑁆𑀯𑀺𑀳𑀤𑀬𑀸𑀪𑀸𑀯𑁂𑀦 𑀅𑀤𑁆𑀯𑁂𑀴𑁆𑀳𑀓𑀁. ‘‘𑀇𑀢𑀺𑀳𑀸𑀲, 𑀇𑀢𑀺𑀳𑀸𑀲𑀸’’𑀢𑀺 𑀤𑁆𑀯𑁂𑀴𑁆𑀳𑀓𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀦𑀺𑀬𑁄𑀕𑀯𑀘𑀦𑀦𑁆𑀢𑀺 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀤𑁆𑀯𑁂 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀦𑀺𑀬𑁄𑀕𑀯𑀘𑀦𑀁 𑀤𑁆𑀯𑀺𑀥𑀸𑀧𑀣𑀧𑀝𑀺𑀓𑁆𑀔𑁂𑀧𑁄. 𑀅𑀜𑁆𑀜𑀢𑁆𑀣 𑀧𑀦 ‘‘𑀦𑀺𑀬𑁄𑀕𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀦𑀢𑁆𑀣𑀻’’𑀢𑀺 𑀆𑀕𑀢𑀁. 𑀅𑀧𑀡𑁆𑀡𑀓𑀯𑀘𑀦𑀦𑁆𑀢𑀺 𑀧𑀮𑀸𑀲𑀭𑀳𑀺𑀢𑀁 𑀲𑀸𑀭𑀯𑀘𑀦𑀁 𑀅𑀯𑀺𑀭𑀤𑁆𑀥𑀓𑀸𑀭𑀡𑀁 ‘‘𑀅𑀧𑀡𑁆𑀡𑀓𑀁 𑀞𑀸𑀦𑀫𑁂𑀓𑁂’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁧) 𑀯𑀺𑀬, 𑀅𑀧𑀡𑁆𑀡𑀓𑀫𑀡𑀺 𑀯𑀺𑀬 𑀲𑀧𑁆𑀧𑀢𑀺𑀝𑁆𑀞𑀯𑀘𑀦𑀁. 𑀅𑀯𑀢𑁆𑀣𑀸𑀧𑀦𑀯𑀘𑀦𑀫𑁂𑀢𑀦𑁆𑀢𑀺 𑀏𑀢𑀁 𑀯𑀘𑀦𑀁 𑀑𑀢𑀭𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀁 𑀲𑀦𑁆𑀢𑀺𑀝𑁆𑀞𑀸𑀧𑀦𑀁 𑀞𑀧𑀦𑀁.

𑀬𑀸𑀦𑀺 𑀇𑀫𑀲𑁆𑀫𑀺𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑀺𑀢𑀸𑀦𑀺 𑀧𑀤𑀸𑀦𑀺, 𑀢𑀸𑀦𑀺 𑀯𑀺𑀪𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀸𑀦𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀪𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀦𑀸𑀦𑀸 𑀳𑁄𑀦𑁆𑀢𑀸𑀦𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀸𑀦𑀸 𑀪𑀯𑀦𑁆𑀢𑀺. 𑀅𑀧𑀭𑀤𑀻𑀧𑀦𑀸 𑀧𑀦𑁂𑀢𑁆𑀣 𑀤𑁆𑀯𑁂 𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑀺. 𑀓𑀣𑀁? 𑀢𑀸𑀦𑀺 𑀳𑀺 𑀩𑁆𑀬𑀜𑁆𑀚𑀦𑀯𑀲𑁂𑀦 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 𑀯𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀪𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 ‘‘𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁, 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢’’𑀦𑁆𑀢𑀺 (𑀥. 𑀲. 𑁧𑁦𑁬𑁬) 𑀏𑀯𑀁 𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀺𑀪𑀢𑁆𑀢𑀺𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀏𑀓𑁄𑀯 𑀓𑁄𑀥𑁄 𑀩𑁆𑀬𑀜𑁆𑀚𑀦𑀯𑀲𑁂𑀦 𑀏𑀯𑀁 𑀯𑀺𑀪𑀢𑁆𑀢𑀺𑀁 𑀮𑀪𑀢𑀺. ‘‘𑀇𑀚𑁆𑀛𑀢𑀺 𑀲𑀫𑀺𑀚𑁆𑀛𑀢𑀺 𑀮𑀪𑀢𑀺 𑀧𑀝𑀺𑀮𑀪𑀢𑀺 𑀕𑀘𑁆𑀙𑀢𑀺 𑀅𑀥𑀺𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀧𑀦 𑀉𑀧𑀲𑀕𑁆𑀕𑀯𑀲𑁂𑀦 𑀯𑀺𑀪𑀢𑁆𑀢𑀺𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸’’𑀢𑀺 (𑀥. 𑀲. 𑁧𑁬) 𑀏𑀯𑀁 𑀅𑀢𑁆𑀣𑀯𑀲𑁂𑀦 𑀯𑀺𑀪𑀢𑁆𑀢𑀺𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀲𑀼 𑀧𑀻𑀢𑀺𑀧𑀤𑀦𑀺𑀤𑁆𑀤𑁂𑀲𑁂 𑀢𑀸𑀯 𑀇𑀫𑀸 𑀢𑀺𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀺. 𑀧𑀻𑀢𑀺 𑀧𑀸𑀫𑁄𑀚𑁆𑀚𑀦𑁆𑀢𑀺 𑀳𑀺 𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀺𑀪𑀢𑁆𑀢𑀺𑀕𑀫𑀦𑀁 𑀳𑁄𑀢𑀺. 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸 𑀧𑀳𑀸𑀲𑁄𑀢𑀺 𑀉𑀧𑀲𑀕𑁆𑀕𑀯𑀲𑁂𑀦. 𑀯𑀺𑀢𑁆𑀢𑀺 𑀢𑀼𑀝𑁆𑀞𑀺 𑀑𑀤𑀕𑁆𑀬𑀁 𑀅𑀢𑁆𑀢𑀫𑀦𑀢𑀸𑀢𑀺 𑀅𑀢𑁆𑀣𑀯𑀲𑁂𑀦. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑀦𑀺𑀤𑁆𑀤𑁂𑀲𑁂𑀲𑀼 𑀯𑀺𑀪𑀢𑁆𑀢𑀺𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀦𑀸𑀦𑀸 𑀳𑁄𑀦𑁆𑀢𑀸𑀦𑀺𑀧𑀺 𑀦𑀸𑀫𑀦𑀸𑀦𑀢𑁆𑀢𑁂𑀦 𑀮𑀓𑁆𑀔𑀡𑀦𑀸𑀦𑀢𑁆𑀢𑁂𑀦 𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦 𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀸𑀦𑀸 𑀳𑁄𑀦𑁆𑀢𑀺. 𑀢𑀢𑁆𑀣 ‘‘𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁆𑀬𑀸𑀧𑀸𑀤𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁄𑀲𑁄 𑀤𑀼𑀲𑁆𑀲𑀦𑀸’’𑀢𑀺 𑀏𑀢𑁆𑀣 𑀩𑁆𑀬𑀸𑀧𑀸𑀤𑁄𑀢𑀺 𑀯𑀸 𑀤𑁄𑀲𑁄𑀢𑀺 𑀯𑀸 𑀤𑁆𑀯𑁂𑀧𑀺 𑀏𑀢𑁂 𑀓𑁄𑀥𑁄 𑀏𑀯, 𑀦𑀸𑀫𑁂𑀦 𑀧𑀦 𑀦𑀸𑀦𑀢𑁆𑀢𑀁 𑀕𑀢𑀸𑀢𑀺 𑀏𑀯𑀁 𑀦𑀸𑀫𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀸𑀲𑀝𑁆𑀞𑁂𑀦 𑀘 𑀧𑀜𑁆𑀘𑀧𑀺 𑀔𑀦𑁆𑀥𑀸 𑀏𑀓𑁄𑀯 𑀔𑀦𑁆𑀥𑁄 𑀳𑁄𑀢𑀺. 𑀏𑀢𑁆𑀣 𑀧𑀦 𑀭𑀽𑀧𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀁, 𑀯𑁂𑀤𑀦𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀘𑁂𑀢𑀦𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀦𑁆𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑀦𑀸𑀦𑀢𑁆𑀢𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺. 𑀏𑀯𑀁 𑀮𑀓𑁆𑀔𑀡𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑁋 𑀇𑀥 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬…𑀧𑁂… 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀻’’𑀢𑀺 (𑀯𑀺𑀪. 𑁩𑁯𑁦; 𑀤𑀻. 𑀦𑀺. 𑁨.𑁪𑁦𑁨) 𑀏𑀓𑀫𑁂𑀯 𑀯𑀻𑀭𑀺𑀬𑀁 𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀆𑀕𑀢𑀁. 𑀏𑀯𑀁 𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀘𑀢𑁆𑀢𑀸𑀭𑁄 𑀅𑀲𑀤𑁆𑀥𑀫𑁆𑀫𑀸 𑀓𑁄𑀥𑀕𑀭𑀼𑀢𑀸, 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀫𑀓𑁆𑀔𑀕𑀭𑀼𑀢𑀸, 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀮𑀸𑀪𑀕𑀭𑀼𑀢𑀸, 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀲𑀓𑁆𑀓𑀸𑀭𑀕𑀭𑀼𑀢𑀸, 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁪𑁪) 𑀧𑀦 𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀦𑀸𑀦𑀢𑁆𑀢𑀸𑀦𑀺 𑀦 𑀧𑀻𑀢𑀺𑀬𑀸𑀬𑁂𑀯 𑀮𑀩𑁆𑀪𑀦𑁆𑀢𑀺, 𑀲𑀩𑁆𑀩𑁂𑀲𑀼𑀧𑀺 𑀬𑀣𑀸𑀮𑀸𑀪𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀧𑀻𑀢𑀺𑀬𑀸 𑀳𑀺 𑀧𑀻𑀢𑀻𑀢𑀺 𑀦𑀸𑀫𑀁, 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀦𑀸𑀫𑀁. 𑀧𑀻𑀢𑀺 𑀘 𑀨𑀭𑀡𑀮𑀓𑁆𑀔𑀡𑀸, 𑀯𑁂𑀤𑀦𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀘𑁂𑀢𑀦𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀁.

𑀢𑀣𑀸 𑀧𑀻𑀢𑀺 𑀨𑀭𑀡𑀓𑀺𑀘𑁆𑀘𑀸, 𑀯𑁂𑀤𑀦𑀸 𑀅𑀦𑀼𑀪𑀯𑀦𑀓𑀺𑀘𑁆𑀘𑀸, 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀓𑀺𑀘𑁆𑀘𑀸, 𑀘𑁂𑀢𑀦𑀸 𑀘𑁂𑀢𑀬𑀺𑀢𑀓𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑀓𑀺𑀘𑁆𑀘𑀦𑁆𑀢𑀺 𑀏𑀯𑀁 𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑀁 𑀧𑀻𑀢𑀺𑀧𑀤𑁂 𑀦𑀢𑁆𑀣𑀺.

𑀅𑀮𑁄𑀪𑀸𑀤𑀺𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀅𑀮𑁄𑀪𑁄 𑀅𑀮𑀼𑀩𑁆𑀪𑀦𑀸 𑀅𑀮𑀼𑀩𑁆𑀪𑀺𑀢𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁩𑁫) 𑀦𑀬𑁂𑀦 𑀮𑀩𑁆𑀪𑀢𑀻𑀢𑀺 𑀏𑀯𑀁 𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀩𑁆𑀩𑀧𑀤𑀦𑀺𑀤𑁆𑀤𑁂𑀲𑁂𑀲𑀼 𑀮𑀩𑁆𑀪𑀫𑀸𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑀤𑀻𑀧𑀦𑀸 𑀧𑀦 𑀧𑀤𑀢𑁆𑀣𑀼𑀢𑀺 𑀯𑀸 𑀳𑁄𑀢𑀺 𑀤𑀴𑁆𑀳𑀻𑀓𑀫𑁆𑀫𑀁 𑀯𑀸𑀢𑀺 𑀏𑀯𑀁 𑀤𑁆𑀯𑁂 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀬𑀝𑁆𑀞𑀺𑀓𑁄𑀝𑀺𑀬𑀸 𑀉𑀧𑁆𑀧𑀻𑀴𑁂𑀦𑁆𑀢𑁂𑀦 𑀯𑀺𑀬 𑀳𑀺 𑀲𑀓𑀺𑀫𑁂𑀯 ‘‘𑀧𑀻𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀢𑀁 𑀧𑀤𑀁 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀯𑀺𑀪𑀽𑀲𑀺𑀢𑀁 𑀦𑀸𑀫 𑀦 𑀳𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀩𑁆𑀬𑀜𑁆𑀚𑀦𑀯𑀲𑁂𑀦 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 ‘‘𑀧𑀻𑀢𑀺 𑀧𑀸𑀫𑁄𑀚𑁆𑀚𑀁 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸 𑀳𑀸𑀲𑁄 𑀧𑀳𑀸𑀲𑁄 𑀯𑀺𑀢𑁆𑀢𑀻’’𑀢𑀺 (𑀥. 𑀲. 𑁯) 𑀯𑀼𑀢𑁆𑀢𑁂 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀯𑀺𑀪𑀽𑀲𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑀣𑀸 𑀳𑀺 𑀤𑀳𑀭𑀓𑀼𑀫𑀸𑀭𑀁 𑀦𑀳𑀸𑀧𑁂𑀢𑁆𑀯𑀸 𑀫𑀦𑁄𑀭𑀫𑀁 𑀯𑀢𑁆𑀣𑀁 𑀧𑀭𑀺𑀤𑀳𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀅𑀜𑁆𑀚𑁂𑀢𑁆𑀯𑀸 𑀅𑀣𑀲𑁆𑀲 𑀦𑀮𑀸𑀝𑁂 𑀏𑀓𑀫𑁂𑀯 𑀫𑀦𑁄𑀲𑀺𑀮𑀸𑀩𑀺𑀦𑁆𑀤𑀼𑀁 𑀓𑀭𑁂𑀬𑁆𑀬, 𑀦 𑀢𑀲𑁆𑀲 𑀏𑀢𑁆𑀢𑀸𑀯𑀢𑀸 𑀘𑀺𑀢𑁆𑀢𑀢𑀺𑀮𑀓𑁄 𑀦𑀸𑀫 𑀳𑁄𑀢𑀺, 𑀦𑀸𑀦𑀸𑀯𑀡𑁆𑀡𑁂𑀳𑀺 𑀧𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 𑀩𑀺𑀦𑁆𑀤𑀽𑀲𑀼 𑀓𑀢𑁂𑀲𑀼 𑀘𑀺𑀢𑁆𑀢𑀢𑀺𑀮𑀓𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀤𑀢𑁆𑀣𑀼𑀢𑀺 𑀦𑀸𑀫.

𑀩𑁆𑀬𑀜𑁆𑀚𑀦𑀯𑀲𑁂𑀦 𑀧𑀦 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 𑀘 𑀧𑀼𑀦𑀧𑁆𑀧𑀼𑀦𑀁 𑀪𑀡𑀦𑀫𑁂𑀯 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫. 𑀬𑀣𑀸 𑀳𑀺 ‘‘𑀆𑀯𑀼𑀲𑁄’’𑀢𑀺 𑀯𑀸 ‘‘𑀪𑀦𑁆𑀢𑁂’’𑀢𑀺 𑀯𑀸 ‘‘𑀬𑀓𑁆𑀔𑁄’’𑀢𑀺 𑀯𑀸 ‘‘𑀲𑀧𑁆𑀧𑁄’’𑀢𑀺 𑀯𑀸 𑀯𑀼𑀢𑁆𑀢𑁂 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺, ‘‘𑀆𑀯𑀼𑀲𑁄 𑀆𑀯𑀼𑀲𑁄, 𑀪𑀦𑁆𑀢𑁂 𑀪𑀦𑁆𑀢𑁂, 𑀬𑀓𑁆𑀔𑁄 𑀬𑀓𑁆𑀔𑁄, 𑀲𑀧𑁆𑀧𑁄 𑀲𑀧𑁆𑀧𑁄’’𑀢𑀺 𑀯𑀼𑀢𑁆𑀢𑁂 𑀧𑀦 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺, 𑀏𑀯𑀫𑁂𑀯 𑀲𑀓𑀺𑀁𑀤𑁂𑀯 𑀬𑀝𑁆𑀞𑀺𑀓𑁄𑀝𑀺𑀬𑀸 𑀉𑀧𑁆𑀧𑀻𑀴𑁂𑀦𑁆𑀢𑁂𑀦 𑀯𑀺𑀬 ‘‘𑀧𑀻𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀩𑁆𑀬𑀜𑁆𑀚𑀦𑀯𑀲𑁂𑀦 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 ‘‘𑀧𑀻𑀢𑀺 𑀧𑀸𑀫𑁄𑀚𑁆𑀚𑀁 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸 𑀳𑀸𑀲𑁄 𑀧𑀳𑀸𑀲𑁄 𑀯𑀺𑀢𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀯𑀁 𑀅𑀧𑀭𑀤𑀻𑀧𑀦𑀸 𑀤𑁆𑀯𑁂 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀏𑀢𑀺𑀲𑁆𑀲𑀸𑀧𑀺 𑀯𑀲𑁂𑀦 𑀮𑀩𑁆𑀪𑀫𑀸𑀦𑀓𑀧𑀤𑀦𑀺𑀤𑁆𑀤𑁂𑀲𑁂𑀲𑀼 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀧𑀻𑀦𑀬𑀢𑀻𑀢𑀺 𑀧𑀻𑀢𑀺. 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀧𑀻𑀡𑀦𑀭𑀲𑀸 𑀨𑀭𑀡𑀭𑀲𑀸 𑀯𑀸, 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀬𑀸 𑀧𑀜𑁆𑀘𑀓𑀸𑀫𑀕𑀼𑀡𑀧𑀝𑀺𑀲𑀜𑁆𑀜𑀼𑀢𑁆𑀢𑀸𑀢𑀺 𑀬𑀸 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀓𑁄𑀝𑁆𑀞𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸 𑀧𑀻𑀢𑀺, 𑀲𑀸 𑀧𑀻𑀦𑀬𑀢𑀻𑀢𑀺 𑀧𑀻𑀢𑀺, 𑀇𑀤𑀁 𑀲𑀪𑀸𑀯𑀧𑀤𑀁. 𑀧𑀫𑀼𑀤𑀺𑀢𑀲𑁆𑀲 𑀪𑀸𑀯𑁄 𑀧𑀸𑀫𑁄𑀚𑁆𑀚𑀁. 𑀆𑀫𑁄𑀤𑀦𑀸𑀓𑀸𑀭𑁄 𑀆𑀫𑁄𑀤𑀦𑀸. 𑀧𑀫𑁄𑀤𑀦𑀸𑀓𑀸𑀭𑁄 𑀧𑀫𑁄𑀤𑀦𑀸. 𑀬𑀣𑀸 𑀯𑀸 𑀪𑁂𑀲𑀚𑁆𑀚𑀸𑀦𑀁 𑀯𑀸 𑀢𑁂𑀮𑀸𑀦𑀁 𑀯𑀸 𑀉𑀡𑁆𑀳𑁄𑀤𑀓𑀲𑀻𑀢𑁄𑀤𑀓𑀸𑀦𑀁 𑀯𑀸 𑀏𑀓𑀢𑁄 𑀓𑀭𑀡𑀁 ‘‘𑀫𑁄𑀤𑀦𑀸’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀬𑀫𑁆𑀧𑀺 𑀧𑀻𑀢𑀺𑀥𑀫𑁆𑀫𑀸𑀦𑀁 𑀏𑀓𑀢𑁄 𑀓𑀭𑀡𑁂𑀦 𑀫𑁄𑀤𑀦𑀸. 𑀉𑀧𑀲𑀕𑁆𑀕𑀯𑀲𑁂𑀦 𑀧𑀦 𑀫𑀡𑁆𑀟𑁂𑀢𑁆𑀯𑀸 ‘‘𑀆𑀫𑁄𑀤𑀦𑀸 𑀧𑀫𑁄𑀤𑀦𑀸’’𑀢𑀺 𑀯𑀼𑀢𑁆𑀢𑀸.

𑀳𑀸𑀲𑁂𑀢𑀻𑀢𑀺 𑀳𑀸𑀲𑁄. 𑀧𑀳𑀸𑀲𑁂𑀢𑀻𑀢𑀺 𑀧𑀳𑀸𑀲𑁄, 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀢𑁆𑀢𑀻𑀢𑀺 𑀯𑀺𑀢𑁆𑀢𑀁, 𑀥𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀬𑀁 𑀧𑀦 𑀲𑁄𑀫𑀦𑀲𑁆𑀲𑀧𑀘𑁆𑀘𑀬𑀢𑁆𑀢𑀸 𑀯𑀺𑀢𑁆𑀢𑀺𑀲𑀭𑀺𑀓𑁆𑀔𑀢𑀸𑀬 𑀯𑀺𑀢𑁆𑀢𑀺. 𑀬𑀣𑀸 𑀳𑀺 𑀥𑀦𑀺𑀦𑁄 𑀥𑀦𑀁 𑀧𑀝𑀺𑀘𑁆𑀘 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀧𑀻𑀢𑀺𑀫𑀢𑁄𑀧𑀺 𑀧𑀻𑀢𑀺𑀁 𑀧𑀝𑀺𑀘𑁆𑀘 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 ‘‘𑀯𑀺𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀢𑀼𑀝𑁆𑀞𑀻𑀢𑀺 𑀲𑀪𑀸𑀯𑀲𑀡𑁆𑀞𑀺𑀢𑀸𑀬 𑀧𑀻𑀢𑀺𑀬𑀸 𑀏𑀢𑀁 𑀦𑀸𑀫𑀁. 𑀧𑀻𑀢𑀺𑀫𑀸 𑀧𑀦 𑀧𑀼𑀕𑁆𑀕𑀮𑁄 𑀓𑀸𑀬𑀘𑀺𑀢𑁆𑀢𑀸𑀦𑀁 𑀉𑀕𑁆𑀕𑀢𑀢𑁆𑀢𑀸 𑀅𑀩𑁆𑀪𑀼𑀕𑁆𑀕𑀢𑀢𑁆𑀢𑀸 ‘‘𑀉𑀤𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺, 𑀉𑀤𑀕𑁆𑀕𑀲𑁆𑀲 𑀪𑀸𑀯𑁄 𑀑𑀤𑀕𑁆𑀬𑀁.

𑀅𑀢𑁆𑀢𑀦𑁄 𑀫𑀦𑀢𑀸 𑀅𑀢𑁆𑀢𑀫𑀦𑀢𑀸. 𑀅𑀦𑀪𑀺𑀭𑀤𑁆𑀥𑀲𑁆𑀲 𑀳𑀺 𑀫𑀦𑁄 𑀤𑀼𑀓𑁆𑀔𑀧𑀤𑀝𑁆𑀞𑀸𑀦𑀢𑁆𑀢𑀸 𑀦 𑀅𑀢𑁆𑀢𑀦𑁄 𑀫𑀦𑁄 𑀦𑀸𑀫 𑀳𑁄𑀢𑀺, 𑀅𑀪𑀺𑀭𑀤𑁆𑀥𑀲𑁆𑀲 𑀲𑀼𑀔𑀧𑀤𑀝𑁆𑀞𑀸𑀦𑀢𑁆𑀢𑀸 𑀅𑀢𑁆𑀢𑀦𑁄 𑀫𑀦𑁄 𑀦𑀸𑀫 𑀳𑁄𑀢𑀺, 𑀇𑀢𑀺 𑀅𑀢𑁆𑀢𑀦𑁄 𑀫𑀦𑀢𑀸 𑀅𑀢𑁆𑀢𑀫𑀦𑀢𑀸, 𑀲𑀓𑀫𑀦𑀢𑀸, 𑀲𑀓𑀫𑀦𑀲𑁆𑀲 𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀬𑀲𑁆𑀫𑀸 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀢𑀦𑁄 𑀫𑀦𑀢𑀸, 𑀘𑀺𑀢𑁆𑀢𑀲𑁆𑀲𑁂𑀯 𑀧𑀦𑁂𑀲𑀸 𑀪𑀸𑀯𑁄 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄, 𑀢𑀲𑁆𑀫𑀸 ‘‘𑀅𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀸.

𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀁. 𑀆𑀭𑀫𑁆𑀫𑀡𑀁 𑀫𑀺𑀦𑀫𑀸𑀦𑀁 𑀚𑀸𑀦𑀸𑀢𑀻𑀢𑀺 𑀫𑀦𑁄. 𑀫𑀸𑀦𑀲𑀦𑁆𑀢𑀺 𑀫𑀦𑁄 𑀏𑀯, ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄’’𑀢𑀺 (𑀫𑀳𑀸𑀯. 𑁩𑁩; 𑀲𑀁. 𑀦𑀺. 𑁧.𑁧𑁫𑁧) 𑀳𑀺 𑀏𑀢𑁆𑀣 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑁄 ‘‘𑀫𑀸𑀦𑀲𑁄’’𑀢𑀺 𑀯𑀼𑀢𑁆𑀢𑁄.

‘‘𑀓𑀣𑀜𑁆𑀳𑀺 𑀪𑀕𑀯𑀸 𑀢𑀼𑀬𑁆𑀳𑀁, 𑀲𑀸𑀯𑀓𑁄 𑀲𑀸𑀲𑀦𑁂 𑀭𑀢𑁄;

𑀅𑀧𑁆𑀧𑀢𑁆𑀢𑀫𑀸𑀦𑀲𑁄 𑀲𑁂𑀓𑁆𑀔𑁄, 𑀓𑀸𑀮𑀁𑀓𑀬𑀺𑀭𑀸 𑀚𑀦𑁂 𑀲𑀼𑀢𑀸’’𑀢𑀺. (𑀲𑀁. 𑀦𑀺. 𑁧.𑁧𑁫𑁯) 𑁋

𑀏𑀢𑁆𑀣 𑀅𑀭𑀳𑀢𑁆𑀢𑀁 ‘‘𑀫𑀸𑀦𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀫𑀦𑁄 𑀏𑀯 𑀫𑀸𑀦𑀲𑀁, 𑀩𑁆𑀬𑀜𑁆𑀚𑀦𑀯𑀲𑁂𑀦 𑀳𑁂𑀢𑀁 𑀧𑀤𑀁 𑀯𑀟𑁆𑀠𑀺𑀢𑀁.

𑀳𑀤𑀬𑀦𑁆𑀢𑀺 𑀘𑀺𑀢𑁆𑀢𑀁. ‘‘𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀻’’𑀢𑀺 (𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢𑀁; 𑀲𑀁. 𑀦𑀺. 𑁧.𑁨𑁩𑁭; 𑁨𑁪𑁬) 𑀏𑀢𑁆𑀣 𑀉𑀭𑁄 ‘‘𑀳𑀤𑀬’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀳𑀤𑀬𑀸 𑀳𑀤𑀬𑀁 𑀫𑀜𑁆𑀜𑁂 𑀅𑀜𑁆𑀜𑀸𑀬 𑀢𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁬𑁩) 𑀏𑀢𑁆𑀣 𑀘𑀺𑀢𑁆𑀢𑀁. ‘‘𑀯𑀓𑁆𑀓𑀁 𑀳𑀤𑀬’’𑀦𑁆𑀢𑀺 (𑀔𑀼. 𑀧𑀸. 𑁩.𑀤𑁆𑀯𑀢𑀺𑀁𑀲𑀸𑀓𑀸𑀭𑁄; 𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦) 𑀏𑀢𑁆𑀣 𑀳𑀤𑀬𑀯𑀢𑁆𑀣𑀼. 𑀇𑀥 𑀧𑀦 𑀘𑀺𑀢𑁆𑀢𑀫𑁂𑀯 𑀅𑀩𑁆𑀪𑀦𑁆𑀢𑀭𑀝𑁆𑀞𑁂𑀦 ‘‘𑀳𑀤𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀧𑀡𑁆𑀟𑀭𑀁, 𑀪𑀯𑀗𑁆𑀕𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀣𑀸𑀳 𑁋 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺 (𑀅. 𑀦𑀺. 𑁧.𑁪𑁯). 𑀢𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀦 𑀅𑀓𑀼𑀲𑀮𑀫𑁆𑀧𑀺 𑀕𑀗𑁆𑀕𑀸𑀬 𑀦𑀺𑀓𑁆𑀔𑀦𑁆𑀢𑀸 𑀦𑀤𑀻 𑀕𑀗𑁆𑀕𑀸 𑀯𑀺𑀬 𑀕𑁄𑀥𑀸𑀯𑀭𑀺𑀢𑁄 𑀦𑀺𑀓𑁆𑀔𑀦𑁆𑀢𑀸 𑀕𑁄𑀥𑀸𑀯𑀭𑀻 𑀯𑀺𑀬 𑀘 ‘‘𑀧𑀡𑁆𑀟𑀭’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁.

𑀫𑀦𑁄 𑀫𑀦𑀸𑀬𑀢𑀦𑀦𑁆𑀢𑀺 𑀇𑀥 𑀧𑀦 𑀫𑀦𑁄𑀕𑁆𑀕𑀳𑀡𑀁 𑀫𑀦𑀲𑁆𑀲𑁂𑀯 𑀆𑀬𑀢𑀦𑀪𑀸𑀯𑀤𑀻𑀧𑀦𑀢𑁆𑀣𑀁. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 ‘‘𑀦𑀬𑀺𑀤𑀁 𑀤𑁂𑀯𑀸𑀬𑀢𑀦𑀁 𑀯𑀺𑀬 𑀫𑀦𑀲𑁆𑀲 𑀆𑀬𑀢𑀦𑀢𑁆𑀢𑀸 𑀫𑀦𑀸𑀬𑀢𑀦𑀁, 𑀅𑀣 𑀔𑁄 𑀫𑀦𑁄 𑀏𑀯 𑀆𑀬𑀢𑀦𑀁 𑀫𑀦𑀸𑀬𑀢𑀦’’𑀦𑁆𑀢𑀺. 𑀢𑀢𑁆𑀣 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦 𑀘 𑀆𑀬𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀮𑁄𑀓𑁂 ‘‘𑀇𑀲𑁆𑀲𑀭𑀸𑀬𑀢𑀦𑀁, 𑀯𑀸𑀲𑀼𑀤𑁂𑀯𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑀁 ‘‘𑀆𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀼𑀯𑀡𑁆𑀡𑀸𑀬𑀢𑀦𑀁, 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄. 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀪𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁩𑁮) 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁄. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁦𑁨; 𑁫.𑁨𑁩; 𑀫. 𑀦𑀺. 𑁩.𑁧𑁫𑁮) 𑀓𑀸𑀭𑀡𑀁. 𑀇𑀥 𑀧𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀲𑀫𑁄𑀲𑀭𑀡𑀞𑀸𑀦𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦𑀸𑀢𑀺 𑀢𑀺𑀥𑀸𑀧𑀺 𑀯𑀝𑁆𑀝𑀢𑀺.

𑀨𑀲𑁆𑀲𑀸𑀤𑀬𑁄 𑀳𑀺 𑀥𑀫𑁆𑀫𑀸 𑀏𑀢𑁆𑀣 𑀲𑀜𑁆𑀚𑀸𑀬𑀦𑁆𑀢𑀻𑀢𑀺 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦𑀧𑀺 𑀏𑀢𑀁 𑀆𑀬𑀢𑀦𑀁. 𑀩𑀳𑀺𑀤𑁆𑀥𑀸 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀆𑀭𑀫𑁆𑀫𑀡𑀪𑀸𑀯𑁂𑀦𑁂𑀢𑁆𑀣 𑀑𑀲𑀭𑀦𑁆𑀢𑀻𑀢𑀺 𑀲𑀫𑁄𑀲𑀭𑀡𑀞𑀸𑀦𑀝𑁆𑀞𑁂𑀦𑀧𑀺 𑀆𑀬𑀢𑀦𑀁. 𑀨𑀲𑁆𑀲𑀸𑀤𑀻𑀦𑀁 𑀧𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀢𑁆𑀢𑀸 𑀓𑀸𑀭𑀡𑀝𑁆𑀞𑁂𑀦𑀧𑀺 𑀆𑀬𑀢𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀤𑁂𑀯 𑀫𑀦𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁, 𑀫𑀦𑁄 𑀏𑀯 𑀇𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁.

𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀯𑀺𑀜𑁆𑀜𑀸𑀡𑀫𑁂𑀯 𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀢𑀲𑁆𑀲 𑀭𑀸𑀲𑀺𑀆𑀤𑀺𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 (𑀅. 𑀦𑀺. 𑁪.𑁫𑁧) 𑀏𑀢𑁆𑀣 𑀳𑀺 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑁄 𑀯𑀼𑀢𑁆𑀢𑁄. ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁫𑁫𑁫) 𑀕𑀼𑀡𑀝𑁆𑀞𑁂𑀦. ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁪𑁧-𑁨𑁪𑁨) 𑀏𑀢𑁆𑀣 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀝𑁆𑀞𑁂𑀦. 𑀇𑀥 𑀧𑀦 𑀭𑀼𑀴𑁆𑀳𑀺𑀢𑁄 𑀔𑀦𑁆𑀥𑁄 𑀯𑀼𑀢𑁆𑀢𑁄. 𑀭𑀸𑀲𑀝𑁆𑀞𑁂𑀦 𑀳𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀏𑀓𑀤𑁂𑀲𑁄 𑀏𑀓𑀁 𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀸 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀏𑀓𑀤𑁂𑀲𑀁 𑀙𑀺𑀦𑁆𑀤𑀦𑁆𑀢𑁄 ‘‘𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀏𑀓𑀤𑁂𑀲𑀪𑀽𑀢𑀁 𑀏𑀓𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀭𑀽𑀴𑁆𑀳𑀺𑀢𑁄 ‘‘𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁.

𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀢𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀤𑁂 𑀏𑀓𑀫𑁂𑀯 𑀘𑀺𑀢𑁆𑀢𑀁 𑀫𑀺𑀦𑀦𑀝𑁆𑀞𑁂𑀦 𑀫𑀦𑁄, 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀁, 𑀲𑀪𑀸𑀯𑀝𑁆𑀞𑁂𑀦 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀯𑀸 𑀥𑀸𑀢𑀽𑀢𑀺 𑀢𑀻𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑀁. 𑀲𑀳𑀕𑀢𑁄𑀢𑀺 𑀅𑀯𑀺𑀚𑀳𑀺𑀢𑁄. 𑀲𑀳𑀚𑀸𑀢𑁄𑀢𑀺 𑀲𑀤𑁆𑀥𑀺𑀁 𑀦𑀺𑀕𑁆𑀕𑀢𑁄. 𑀲𑀁𑀲𑀝𑁆𑀞𑁄𑀢𑀺 𑀲𑀁𑀲𑀕𑁆𑀕𑁄 𑀳𑀼𑀢𑁆𑀯𑀸 𑀞𑀺𑀢𑁄. 𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑁄. 𑀓𑀢𑀫𑁂𑀳𑀺 𑀧𑀓𑀸𑀭𑁂𑀳𑀻𑀢𑀺? 𑀏𑀓𑀼𑀧𑁆𑀧𑀸𑀤𑀸𑀤𑀻𑀳𑀺. 𑀦𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀆𑀫𑀦𑁆𑀢𑀸. 𑀇𑀢𑀺 𑀳𑀺 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀧𑀝𑀺𑀓𑁆𑀔𑁂𑀧𑁂 ‘‘𑀦𑀦𑀼 𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀳𑀕𑀢𑀸 𑀲𑀳𑀚𑀸𑀢𑀸 𑀲𑀁𑀲𑀝𑁆𑀞𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸’’𑀢𑀺 (𑀓𑀣𑀸. 𑁪𑁭𑁩) 𑀏𑀯𑀁 𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀦𑀁 𑀯𑀲𑁂𑀦 𑀲𑀫𑁆𑀧𑀬𑁄𑀕𑀢𑁆𑀣𑁄 𑀯𑀼𑀢𑁆𑀢𑁄. 𑀇𑀢𑀺 𑀇𑀫𑁂𑀳𑀺 𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀳𑀺 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑁄. 𑀏𑀓𑀼𑀧𑁆𑀧𑀸𑀤𑁄𑀢𑀺 𑀏𑀓𑀢𑁄 𑀉𑀧𑁆𑀧𑀦𑁆𑀦𑁄, 𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀦𑀺𑀭𑁄𑀥𑁄𑀢𑀺 𑀏𑀓𑀢𑁄 𑀦𑀺𑀭𑁄𑀥𑁄. 𑀏𑀓𑀯𑀢𑁆𑀣𑀼𑀓𑁄𑀢𑀺 𑀳𑀤𑀬𑀯𑀢𑁆𑀣𑀼𑀯𑀲𑁂𑀦 𑀏𑀓𑀯𑀢𑁆𑀣𑀼𑀓𑁄. 𑀏𑀓𑀸𑀭𑀫𑁆𑀫𑀡𑁄𑀢𑀺 𑀭𑀽𑀧𑀸𑀤𑀺𑀯𑀲𑁂𑀦 𑀏𑀓𑀸𑀭𑀫𑁆𑀫𑀡𑁄.

𑀏𑀢𑁆𑀣 𑀲𑀳𑀕𑀢𑀲𑀤𑁆𑀤𑁄 𑀢𑀩𑁆𑀪𑀸𑀯𑁂, 𑀯𑁄𑀓𑀺𑀡𑁆𑀡𑁂, 𑀆𑀭𑀫𑁆𑀫𑀡𑁂, 𑀦𑀺𑀲𑁆𑀲𑀬𑁂, 𑀲𑀁𑀲𑀝𑁆𑀞𑁂𑀢𑀺 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺 𑀚𑀺𑀦𑀯𑀘𑀦𑁂. ‘‘𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺 (𑀫𑀳𑀸𑀯. 𑁧𑁪; 𑀯𑀺𑀪. 𑁨𑁦𑁩; 𑀫. 𑀦𑀺. 𑁩.𑁩𑁭𑁪; 𑀲𑀁. 𑀦𑀺. 𑁫.𑁧𑁦𑁮𑁧; 𑀧𑀝𑀺. 𑀫. 𑁨.𑁩𑁦) 𑀏𑀢𑁆𑀣 𑀢𑀩𑁆𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑁄, 𑀦𑀦𑁆𑀤𑀺𑀭𑀸𑀕𑀪𑀽𑀢𑀸𑀢𑀺 𑀅𑀢𑁆𑀣𑁄. ‘‘𑀬𑀸, 𑀪𑀺𑀓𑁆𑀔𑀯𑁂, 𑀯𑀻𑀫𑀁𑀲𑀸 𑀓𑁄𑀲𑀚𑁆𑀚𑀲𑀳𑀕𑀢𑀸 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁫.𑁮𑁩𑁨) 𑀏𑀢𑁆𑀣 𑀯𑁄𑀓𑀺𑀡𑁆𑀡𑁂, 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀓𑁄𑀲𑀚𑁆𑀚𑁂𑀦 𑀯𑁄𑀓𑀺𑀡𑁆𑀡𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. ‘‘𑀮𑀸𑀪𑀻 𑀳𑁄𑀢𑀺 𑀭𑀽𑀧𑀲𑀳𑀕𑀢𑀸𑀦𑀁 𑀯𑀸 𑀲𑀫𑀸𑀧𑀢𑁆𑀢𑀻𑀦𑀁 𑀅𑀭𑀽𑀧𑀲𑀳𑀕𑀢𑀸𑀦𑀁 𑀯𑀸 𑀲𑀫𑀸𑀧𑀢𑁆𑀢𑀻𑀦’’𑀦𑁆𑀢𑀺 (𑀧𑀼. 𑀧. 𑁩-𑁬) 𑀏𑀢𑁆𑀣 𑀆𑀭𑀫𑁆𑀫𑀡𑁂, 𑀭𑀽𑀧𑀸𑀭𑀫𑁆𑀫𑀡𑀸𑀦𑀁 𑀅𑀭𑀽𑀧𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀝𑁆𑀞𑀺𑀓𑀲𑀜𑁆𑀜𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁮) 𑀏𑀢𑁆𑀣 𑀦𑀺𑀲𑁆𑀲𑀬𑁂, 𑀅𑀝𑁆𑀞𑀺𑀓𑀲𑀜𑁆𑀜𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀺𑀓𑀲𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. ‘‘𑀇𑀤𑀁 𑀲𑀼𑀔𑀁 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 (𑀯𑀺𑀪. 𑁫𑁭𑁮) 𑀏𑀢𑁆𑀣 𑀲𑀁𑀲𑀝𑁆𑀞𑁂, 𑀲𑀁𑀫𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀲𑀁𑀲𑀝𑁆𑀞𑁂 𑀆𑀕𑀢𑁄.

𑀲𑀳𑀚𑀸𑀢𑀲𑀤𑁆𑀤𑁄 ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀁 𑀧𑀘𑁆𑀙𑀸𑀚𑀸𑀢’’𑀦𑁆𑀢𑀺 (𑀧𑀝𑁆𑀞. 𑁧.𑁧.𑁪𑁩𑁫) 𑀏𑀢𑁆𑀣 𑀯𑀺𑀬 𑀲𑀳𑀚𑀸𑀢𑁂. 𑀲𑀁𑀲𑀝𑁆𑀞𑀲𑀤𑁆𑀤𑁄 ‘‘𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄’’𑀢𑀺 𑀘, ‘‘𑀏𑀯𑀁 𑀲𑀁𑀲𑀝𑁆𑀞𑁄, 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁩.𑁩) 𑀘𑀸𑀢𑀺 𑀏𑀯𑀫𑀸𑀤𑀻𑀲𑀼 𑀲𑀁𑀲𑀕𑁆𑀕𑁂. ‘‘𑀓𑀺𑀲𑁂 𑀣𑀽𑀮𑁂 𑀯𑀺𑀯𑀚𑁆𑀚𑁂𑀢𑁆𑀯𑀸 𑀲𑀁𑀲𑀝𑁆𑀞𑀸 𑀬𑁄𑀚𑀺𑀢𑀸 𑀳𑀬𑀸’’𑀢𑀺 (𑀚𑀸. 𑁨.𑁨𑁨.𑁭𑁦) 𑀏𑀢𑁆𑀣 𑀲𑀤𑀺𑀲𑁂.

‘‘𑀧𑀼𑀘𑀺𑀫𑀦𑁆𑀤𑀧𑀭𑀺𑀯𑀸𑀭𑁄, 𑀅𑀫𑁆𑀩𑁄 𑀢𑁂 𑀤𑀥𑀺𑀯𑀸𑀳𑀦;

𑀫𑀽𑀮𑀁 𑀫𑀽𑀮𑁂𑀦 𑀲𑀁𑀲𑀝𑁆𑀞𑀁, 𑀲𑀸𑀔𑀸 𑀲𑀸𑀔𑀸 𑀦𑀺𑀲𑁂𑀯𑀭𑁂’’𑀢𑀺. (𑀚𑀸. 𑁧.𑁨.𑁭𑁨) 𑁋

𑀏𑀢𑁆𑀣 𑀉𑀧𑀘𑀺𑀢𑁂. ‘‘𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁫𑁯) 𑀏𑀢𑁆𑀣 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂. 𑀇𑀥 𑀧𑀦 𑀬𑁄 𑀨𑀮𑀧𑁆𑀧𑀤𑀸𑀦𑁂 𑀅𑀯𑀺𑀬𑁄𑀕𑀥𑀫𑁆𑀫𑁄 𑀯𑀺𑀦𑀺𑀩𑁆𑀪𑁄𑀕𑀁 𑀅𑀓𑀢𑁆𑀯𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀥𑀫𑁆𑀫𑁄 𑀳𑀼𑀢𑁆𑀯𑀸 ‘‘𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀯𑀺𑀲𑀬𑁄. 𑀅𑀣 𑀯𑀸 ‘‘𑀲𑀳𑀕𑀢𑁄’’𑀢𑀺 𑀯𑀢𑁆𑀯𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀆𑀕𑀢𑀲𑀼𑀢𑁆𑀢𑁂𑀦 𑀯𑀺𑀬 𑀲𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀚𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀓𑀢𑁄 𑀉𑀧𑁆𑀧𑀦𑁆𑀦𑀭𑀽𑀧𑀸𑀭𑀽𑀧𑀁 𑀯𑀺𑀬 𑀲𑁄𑀧𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀲𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀁.

𑀔𑀻𑀭𑁄𑀤𑀓𑀁 𑀯𑀺𑀬 𑀘 𑀲𑁄𑀧𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀺𑀩𑁆𑀪𑁄𑀕𑀁 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑁂𑀦 𑀳𑀺 𑀲𑀳𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀅𑀢𑁆𑀣𑀺 𑀔𑀻𑀭𑀢𑁂𑀮𑀁 𑀯𑀺𑀬. 𑀢𑀣𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺 𑀔𑀻𑀭𑀢𑁄 𑀅𑀧𑀦𑀻𑀢𑀁 𑀦𑀯𑀦𑀻𑀢𑀁 𑀯𑀺𑀬. 𑀏𑀯𑀁 𑀮𑀓𑁆𑀔𑀡𑀲𑀫𑁆𑀧𑀬𑀼𑀢𑁆𑀢𑁄 𑀏𑀓𑀼𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑁄𑀬𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀼𑀧𑁆𑀧𑀸𑀤𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀏𑀓𑀼𑀧𑁆𑀧𑀸𑀤𑀲𑀳𑀚𑀸𑀢𑀸𑀦𑀁 𑀓𑀺𑀁 𑀦𑀸𑀦𑀢𑁆𑀢𑀁? 𑀉𑀧𑁆𑀧𑀸𑀤𑁂 𑀅𑀦𑁆𑀢𑀭𑀯𑀺𑀭𑀳𑀺𑀢𑁄 𑀏𑀓𑀼𑀧𑁆𑀧𑀸𑀤𑁄. 𑀔𑀻𑀭𑀓𑀸𑀮𑀫𑀼𑀢𑁆𑀢𑀲𑁆𑀲𑀸𑀧𑀺 𑀤𑀥𑀺𑀦𑁄 𑀫𑀣𑀦𑁂 𑀫𑀣𑀦𑁂 𑀧𑀸𑀓𑀝𑀁 𑀦𑀯𑀦𑀻𑀢𑀁 𑀯𑀺𑀬 𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀯𑀲𑁂𑀦 𑀏𑀓𑀤𑀺𑀯𑀲𑀫𑁂𑀯 𑀚𑀸𑀢𑁄 𑀯𑀺𑀬 𑀲𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀏𑀓𑀓𑁆𑀔𑀡𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀲𑀳𑀚𑀸𑀢𑁄. 𑀏𑀓𑀯𑀢𑁆𑀣𑀼𑀓𑁄𑀢𑀺 𑀧𑀢𑀺𑀝𑁆𑀞𑀝𑁆𑀞𑁂𑀦 𑀏𑀓𑀧𑀭𑀺𑀘𑁆𑀙𑁂𑀤𑁂𑀦 𑀏𑀓𑀯𑀢𑁆𑀣𑀼𑀓𑁄, 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀏𑀓𑀯𑀢𑁆𑀣𑀼𑀓𑀢𑀸 𑀯𑀺𑀬 𑀞𑀸𑀦𑀦𑁆𑀢𑀭𑀯𑀺𑀭𑀳𑀺𑀢𑁄. 𑀏𑀓𑀸𑀭𑀫𑁆𑀫𑀡𑁄𑀢𑀺 𑀅𑀦𑀺𑀬𑀢𑁂𑀓𑀸𑀭𑀫𑁆𑀫𑀡𑁄 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬𑀸𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀫𑀘𑁆𑀘𑁄𑀢𑀺 𑀫𑀽𑀮𑀧𑀤𑀁. 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄𑀢𑀺 𑀲𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀢𑁆𑀢𑁄 𑀲𑀢𑁆𑀢𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, ‘𑀲𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀭𑀽𑀧𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀢𑁆𑀭 𑀲𑀢𑁆𑀢𑁄 𑀢𑀢𑁆𑀭 𑀯𑀺𑀲𑀢𑁆𑀢𑁄, 𑀢𑀲𑁆𑀫𑀸 ‘𑀲𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁩.𑁧𑁬𑁧; 𑀫𑀳𑀸𑀦𑀺. 𑁭). 𑀲𑀢𑁆𑀢𑀬𑁄𑀕𑁂𑀦 𑀯𑀸 𑀲𑀢𑁆𑀢𑁄. 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀁 𑀦𑀭𑀢𑀻𑀢𑀺 𑀦𑀭𑁄. 𑀫𑀦𑀼𑀦𑁄 𑀧𑀼𑀢𑁆𑀢𑁄𑀢𑀺 𑀫𑀸𑀦𑀯𑁄. 𑀉𑀧𑀓𑀭𑀡𑁂𑀦 𑀲𑀬𑀁 𑀧𑁄𑀲𑀬𑀢𑀻𑀢𑀺 𑀧𑁄𑀲𑁄. 𑀧𑀼𑀁 𑀯𑀼𑀘𑁆𑀘𑀢𑀺 𑀦𑀺𑀭𑀬𑁄, 𑀢𑀁 𑀕𑀮𑀢𑀻𑀢𑀺 𑀧𑀼𑀕𑁆𑀕𑀮𑁄. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀥𑀸𑀭𑁂𑀢𑀻𑀢𑀺 𑀚𑀻𑀯𑁄. 𑀘𑀼𑀢𑀺𑀢𑁄 𑀚𑀸𑀢𑀺𑀁 𑀕𑀘𑁆𑀙𑀢𑀻𑀢𑀺 𑀚𑀸𑀕𑀼. 𑀚𑀺𑀬𑀢𑀻𑀢𑀺 𑀚𑀦𑁆𑀢𑀼. 𑀇𑀦𑁆𑀤𑁆𑀭𑀺𑀬𑁂𑀦 𑀕𑀘𑁆𑀙𑀢𑀻𑀢𑀺 𑀇𑀦𑁆𑀤𑀕𑀼. 𑀅𑀣 𑀯𑀸 𑀇𑀦𑁆𑀤𑀪𑀽𑀢𑁂𑀦 𑀓𑀫𑁆𑀫𑀼𑀦𑀸 𑀕𑀘𑁆𑀙𑀢𑀻𑀢𑀺 𑀇𑀦𑁆𑀤𑀕𑀼. ‘‘𑀳𑀺𑀦𑁆𑀤𑀕𑀽’’𑀢𑀺𑀧𑀺 𑀧𑀸𑀴𑀺. 𑀳𑀺𑀦𑁆𑀤𑀦𑁆𑀢𑀺 𑀫𑀭𑀡𑀁, 𑀢𑀁 𑀕𑀘𑁆𑀙𑀢𑀻𑀢𑀺 𑀳𑀺𑀦𑁆𑀤𑀕𑀼. 𑀫𑀦𑀼𑀢𑁄 𑀚𑀸𑀢𑁄𑀢𑀺 𑀫𑀦𑀼𑀚𑁄. 𑀬𑀁 𑀲𑀸𑀤𑀺𑀬𑀢𑀻𑀢𑀺 𑀬𑀁 𑀭𑀽𑀧𑀸𑀤𑀺𑀁 𑀅𑀲𑁆𑀲𑀸𑀤𑀺𑀬𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲…𑀧𑁂… 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺;

𑀇𑀢𑁄 𑀧𑀭𑀁 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑁨. 𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀸𑀫𑁂 𑀇𑀘𑁆𑀙𑀫𑀸𑀦𑀲𑁆𑀲, 𑀓𑀸𑀫𑁂𑀦 𑀯𑀸 𑀬𑀸𑀬𑀫𑀸𑀦𑀲𑁆𑀲. 𑀙𑀦𑁆𑀤𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀢𑀡𑁆𑀳𑀲𑁆𑀲. 𑀚𑀦𑁆𑀢𑀼𑀦𑁄𑀢𑀺 𑀲𑀢𑁆𑀢𑀲𑁆𑀲. 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺 𑀘𑁂. 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻𑀢𑀺 𑀅𑀣 𑀲𑁄 𑀅𑀬𑁄𑀫𑀬𑀸𑀤𑀺𑀦𑀸 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀯𑀺𑀬 𑀧𑀻𑀴𑀻𑀬𑀢𑀺. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀼𑀢𑁆𑀢𑁂𑀲𑀼 𑀬𑀁 𑀬𑀁 𑀅𑀦𑀼𑀢𑁆𑀢𑀸𑀦𑀁, 𑀢𑀁 𑀢𑀤𑁂𑀯 𑀓𑀣𑀬𑀺𑀲𑁆𑀲𑀸𑀫𑀺.

𑀘𑀓𑁆𑀔𑀼𑀧𑀻𑀡𑀦𑀁 𑀆𑀭𑀫𑁆𑀫𑀡𑀁 𑀧𑀸𑀧𑀼𑀡𑀦𑀯𑀲𑁂𑀦 𑀬𑀸𑀬𑀢𑀺 𑀕𑀘𑁆𑀙𑀢𑀺. 𑀤𑀲𑁆𑀲𑀦𑀻𑀬𑀯𑀲𑁂𑀦 𑀧𑀺𑀬𑀢𑁆𑀢𑀁 𑀆𑀭𑀫𑁆𑀫𑀡𑀯𑀲𑁂𑀦 𑀅𑀧𑁆𑀧𑀸𑀧𑁂𑀢𑀻𑀢𑀺 𑀦𑀺𑀬𑁆𑀬𑀢𑀺. 𑀲𑀯𑀦𑀻𑀬𑀁 𑀳𑀼𑀢𑁆𑀯𑀸 𑀓𑀡𑁆𑀡𑀲𑁄𑀢𑀧𑀻𑀡𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀧𑀭𑀺𑀓𑀟𑁆𑀠𑀢𑀻𑀢𑀺 𑀯𑀼𑀬𑁆𑀳𑀢𑀺. 𑀲𑀭𑀺𑀢𑀩𑁆𑀩𑀁 𑀳𑀼𑀢𑁆𑀯𑀸 𑀘𑀺𑀢𑁆𑀢𑀧𑀻𑀡𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀕𑀳𑁂𑀢𑁆𑀯𑀸 𑀉𑀧𑀲𑀁𑀳𑀭𑀻𑀬𑀢𑀻𑀢𑀺 𑀲𑀁𑀳𑀭𑀻𑀬𑀢𑀺. 𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀳𑀢𑁆𑀣𑀺𑀦𑀸 𑀬𑀸𑀬𑀢𑀺 𑀕𑀘𑁆𑀙𑀢𑀻𑀢𑀺 𑀳𑀢𑁆𑀣𑀺𑀬𑀸𑀦𑁂𑀦 𑀯𑀸, 𑀯𑀸𑀇𑀢𑀺 𑀯𑀺𑀓𑀧𑁆𑀧𑀢𑁆𑀣𑁂. 𑀅𑀲𑁆𑀲𑁂𑀦 𑀬𑀸𑀬𑀢𑀺 𑀕𑀘𑁆𑀙𑀢𑀻𑀢𑀺 𑀅𑀲𑁆𑀲𑀬𑀸𑀦𑁂𑀦 𑀯𑀸. 𑀕𑁄𑀬𑀼𑀢𑁆𑀢𑀁 𑀯𑀬𑁆𑀳𑀸𑀤𑀺𑀬𑀸𑀦𑀁 𑀕𑁄𑀬𑀸𑀦𑀁, 𑀢𑁂𑀦 𑀕𑁄𑀬𑀸𑀦𑁂𑀦. 𑀅𑀚𑀬𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀝𑁆𑀞𑀯𑀲𑁂𑀦 𑀚𑀸𑀢𑁄 𑀲𑀜𑁆𑀚𑀸𑀢𑁄.

𑀆𑀭𑀫𑁆𑀫𑀡𑀧𑀺𑀬𑀢𑁆𑀢𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁄. 𑀆𑀭𑀫𑁆𑀫𑀡𑀫𑀦𑀸𑀧𑀪𑀸𑀯𑁂𑀦 𑀧𑀸𑀢𑀼𑀪𑀽𑀢𑁄. 𑀅𑀣 𑀯𑀸 𑀓𑀸𑀫𑀭𑀸𑀕𑀯𑀲𑁂𑀦 𑀚𑀸𑀢𑁄 𑀲𑀜𑁆𑀚𑀸𑀢𑁄. 𑀓𑀸𑀫𑀦𑀦𑁆𑀤𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁄. 𑀓𑀸𑀫𑀢𑀡𑁆𑀳𑀸𑀯𑀲𑁂𑀦 𑀓𑀸𑀫𑀲𑀺𑀦𑁂𑀳𑀯𑀲𑁂𑀦 𑀓𑀸𑀫𑀘𑁆𑀙𑀦𑁆𑀤𑀯𑀲𑁂𑀦 𑀓𑀸𑀫𑀧𑀭𑀺𑀴𑀸𑀳𑀯𑀲𑁂𑀦 𑀘 𑀧𑀸𑀢𑀼𑀪𑀽𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑁂 𑀯𑀸 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀢𑁂 𑀯𑀢𑁆𑀣𑀼𑀓𑀸𑀫𑀸𑀤𑀬𑁄 𑀧𑀭𑀺𑀳𑀸𑀬𑀦𑁆𑀢𑀺 𑀯𑀺𑀕𑀘𑁆𑀙𑀦𑁆𑀢𑀺. 𑀲𑁄 𑀯𑀸 𑀓𑀸𑀫𑁂𑀳𑀺 𑀧𑀭𑀺𑀳𑀸𑀬𑀢𑀻𑀢𑀺 𑀏𑀲𑁄 𑀔𑀢𑁆𑀢𑀺𑀬𑀸𑀤𑀺𑀧𑀼𑀕𑁆𑀕𑀮𑁄 𑀯𑀢𑁆𑀣𑀼𑀓𑀸𑀫𑀸𑀤𑀺𑀓𑀸𑀫𑁂𑀳𑀺 𑀧𑀭𑀺𑀳𑀸𑀬𑀢𑀺 𑀯𑀺𑀕𑀘𑁆𑀙𑀢𑀺 ‘‘𑀧𑀼𑀩𑁆𑀩𑁂𑀯 𑀫𑀘𑁆𑀘𑀁 𑀯𑀺𑀚𑀳𑀦𑁆𑀢𑀺 𑀪𑁄𑀕𑀸, 𑀫𑀘𑁆𑀘𑁄 𑀥𑀦𑁂 𑀧𑀼𑀩𑁆𑀩𑀢𑀭𑀁 𑀚𑀳𑀸𑀢𑀻’’𑀢𑀺 (𑀚𑀸. 𑁧.𑁫.𑁨) 𑀏𑀯𑀫𑀸𑀤𑀻𑀲𑀼 𑀯𑀺𑀬. 𑀓𑀣𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦. 𑀢𑀺𑀝𑁆𑀞𑀦𑁆𑀢𑀲𑁆𑀲𑁂𑀯𑀸𑀢𑀺 𑀥𑀭𑀦𑁆𑀢𑀲𑁆𑀲𑁂𑀯. 𑀢𑁂 𑀪𑁄𑀕𑁂𑀢𑀺 𑀢𑁂 𑀯𑀢𑁆𑀣𑀼𑀓𑀸𑀫𑀸𑀤𑀬𑁄 𑀪𑁄𑀕𑁂. 𑀭𑀸𑀚𑀸𑀦𑁄 𑀯𑀸𑀢𑀺 𑀧𑀣𑀩𑁆𑀬𑀸𑀤𑀺𑀭𑀸𑀚𑀸𑀦𑁄. 𑀳𑀭𑀦𑁆𑀢𑀻𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀧𑀳𑀭𑀦𑁆𑀢𑀺 𑀯𑀸. 𑀘𑁄𑀭𑀸 𑀯𑀸𑀢𑀺 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀓𑀸. 𑀅𑀕𑁆𑀕𑀺 𑀯𑀸𑀢𑀺 𑀤𑀸𑀯𑀕𑁆𑀕𑀺𑀆𑀤𑀺. 𑀤𑀳𑀢𑀻𑀢𑀺 𑀛𑀸𑀧𑁂𑀢𑀺 𑀪𑀲𑁆𑀫𑀁 𑀓𑀭𑁄𑀢𑀺. 𑀉𑀤𑀓𑀁 𑀯𑀸𑀢𑀺 𑀑𑀖𑀸𑀤𑀺𑀉𑀤𑀓𑀁. 𑀯𑀳𑀢𑀻𑀢𑀺 𑀕𑀳𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑁂𑀢𑀺. 𑀅𑀧𑁆𑀧𑀺𑀬𑀸 𑀯𑀸𑀢𑀺 𑀅𑀓𑀦𑁆𑀢𑀸 𑀅𑀫𑀦𑀸𑀧𑀸. 𑀤𑀸𑀬𑀸𑀤𑀸 𑀳𑀭𑀦𑁆𑀢𑀻𑀢𑀺 𑀤𑀸𑀬𑀚𑁆𑀚𑀯𑀺𑀭𑀳𑀺𑀢𑀸 𑀅𑀲𑁆𑀲𑀸𑀫𑀺𑀓𑀸 𑀳𑀭𑀦𑁆𑀢𑀺. 𑀦𑀺𑀳𑀺𑀢𑀁 𑀯𑀸𑀢𑀺 𑀦𑀺𑀥𑀸𑀦𑀁 𑀓𑀢𑁆𑀯𑀸 𑀞𑀧𑀺𑀢𑀁. 𑀦𑀸𑀥𑀺𑀕𑀘𑁆𑀙𑀢𑀻𑀢𑀺 𑀦 𑀯𑀺𑀦𑁆𑀤𑀢𑀺 𑀦 𑀧𑀝𑀺𑀮𑀪𑀢𑀺, 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀧𑁆𑀧𑀬𑀼𑀢𑁆𑀢𑀸𑀢𑀺 𑀯𑀺𑀲𑀫𑀧𑀬𑁄𑀕𑁂𑀦 𑀬𑁄𑀚𑀺𑀢𑀸 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀦𑁆𑀢𑀸. 𑀪𑀺𑀚𑁆𑀚𑀦𑁆𑀢𑀻𑀢𑀺 𑀪𑁂𑀤𑀁 𑀧𑀸𑀧𑀼𑀡𑀦𑁆𑀢𑀺, 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀪𑀜𑁆𑀚𑀦𑁆𑀢𑀺 𑀭𑀣𑀁 𑀅𑀬𑀸𑀦𑀓𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁧.𑁨𑁯𑁬) 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀼𑀮𑁂 𑀯𑀸 𑀓𑀼𑀮𑀗𑁆𑀕𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑁂 𑀓𑀼𑀮𑀛𑀸𑀧𑀓𑁄 𑀓𑀼𑀮𑁂 𑀅𑀦𑁆𑀢𑀺𑀫𑀧𑀼𑀭𑀺𑀲𑁄 𑀦𑀺𑀩𑁆𑀩𑀢𑁆𑀢𑀢𑀺. ‘‘𑀓𑀼𑀮𑀗𑁆𑀓𑀭𑁄’’𑀢𑀺𑀧𑀺 𑀧𑀸𑀴𑀺. 𑀬𑁄 𑀢𑁂 𑀪𑁄𑀕𑁂 𑀯𑀺𑀓𑀺𑀭𑀢𑀻𑀢𑀺 𑀬𑁄 𑀏𑀲𑁄 𑀓𑀼𑀮𑁂 𑀧𑀘𑁆𑀙𑀺𑀫𑀓𑁄 𑀢𑁂 𑀳𑀺𑀭𑀜𑁆𑀜𑀸𑀤𑀺𑀓𑁂 𑀪𑁄𑀕𑁂 𑀔𑁂𑀧𑁂𑀢𑀺. 𑀯𑀺𑀥𑀫𑀢𑀻𑀢𑀺 𑀯𑀺𑀬𑁄𑀕𑀁 𑀓𑀭𑁄𑀢𑀺, 𑀤𑀽𑀭𑁂 𑀔𑀺𑀧𑀢𑀺. 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀦𑀸𑀲𑁂𑀢𑀺 𑀅𑀤𑀲𑁆𑀲𑀦𑀁 𑀕𑀫𑁂𑀢𑀺. 𑀅𑀣 𑀯𑀸 𑀇𑀢𑁆𑀣𑀺𑀥𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀓𑀺𑀭𑀢𑀺. 𑀲𑀼𑀭𑀸𑀥𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀥𑀫𑀢𑀺. 𑀅𑀓𑁆𑀔𑀥𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀤𑁆𑀥𑀁𑀲𑁂𑀢𑀺. 𑀯𑀺𑀓𑀺𑀭𑀢𑀺 𑀯𑀸 𑀉𑀧𑁆𑀧𑀦𑁆𑀦𑀁 𑀆𑀬𑀁 𑀅𑀚𑀸𑀦𑀦𑁂𑀦. 𑀯𑀺𑀥𑀫𑀢𑀺 𑀯𑀺𑀲𑁆𑀲𑀚𑁆𑀚𑀦𑀫𑀼𑀔𑀁 𑀅𑀚𑀸𑀦𑀦𑁂𑀦. 𑀯𑀺𑀤𑁆𑀥𑀁𑀲𑁂𑀢𑀺 𑀞𑀧𑀺𑀢𑀝𑁆𑀞𑀸𑀦𑁂 𑀆𑀭𑀓𑁆𑀔𑀁 𑀅𑀲𑀁𑀯𑀺𑀥𑀸𑀦𑁂𑀦𑀸𑀢𑀺 𑀏𑀯𑀫𑀸𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀅𑀦𑀺𑀘𑁆𑀘𑀢𑀸𑀬𑁂𑀯 𑀅𑀝𑁆𑀞𑀫𑀻𑀢𑀺 𑀯𑀺𑀦𑀸𑀲𑀪𑀸𑀯𑁄 𑀏𑀯 𑀅𑀝𑁆𑀞𑀫𑁄. 𑀳𑀸𑀬𑀦𑁆𑀢𑀻𑀢𑀺 𑀅𑀤𑀲𑁆𑀲𑀦𑀁 𑀬𑀦𑁆𑀢𑀺. 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀦 𑀧𑀼𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀧𑀭𑀺𑀥𑀁𑀲𑁂𑀦𑁆𑀢𑀻𑀢𑀺 𑀞𑀸𑀦𑀢𑁄 𑀅𑀧𑀕𑀘𑁆𑀙𑀦𑁆𑀢𑀺. 𑀧𑀭𑀺𑀧𑀢𑀦𑁆𑀢𑀻𑀢𑀺 𑀧𑀕𑁆𑀖𑀭𑀦𑁆𑀢𑀺. 𑀅𑀦𑁆𑀢𑀭𑀥𑀸𑀬𑀦𑁆𑀢𑀻𑀢𑀺 𑀅𑀦𑁆𑀢𑀭𑀥𑀸𑀦𑀁 𑀅𑀤𑀲𑁆𑀲𑀦𑀁 𑀕𑀘𑁆𑀙𑀦𑁆𑀢𑀺. 𑀯𑀺𑀧𑁆𑀧𑀮𑀼𑀚𑁆𑀚𑀦𑁆𑀢𑀻𑀢𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀧𑀕𑀘𑁆𑀙𑀦𑁆𑀢𑀺.

𑀢𑀺𑀝𑁆𑀞𑀦𑁆𑀢𑁂𑀯 𑀢𑁂 𑀪𑁄𑀕𑁂𑀢𑀺 𑀢𑁂𑀲𑀁 𑀥𑀦𑀸𑀦𑀁 𑀞𑀺𑀢𑀓𑀸𑀮𑁂 ‘‘𑀢𑀺𑀝𑁆𑀞𑀦𑁆𑀢𑁂 𑀦𑀺𑀩𑁆𑀩𑀼𑀢𑁂 𑀘𑀸𑀧𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀯𑀺. 𑀯. 𑁮𑁦𑁬) 𑀯𑀺𑀬. 𑀲𑁄𑀢𑀺 𑀲𑁄 𑀪𑁄𑀕𑀲𑀸𑀫𑀺𑀓𑁄 𑀧𑀼𑀕𑁆𑀕𑀮𑁄. 𑀘𑀯𑀢𑀺 𑀤𑁂𑀯𑀮𑁄𑀓𑀢𑁄. 𑀫𑀭𑀢𑀺 𑀫𑀦𑀼𑀲𑁆𑀲𑀮𑁄𑀓𑀢𑁄. 𑀯𑀺𑀧𑁆𑀧𑀮𑀼𑀚𑁆𑀚𑀢𑀺 𑀦𑀸𑀕𑀲𑀼𑀧𑀡𑁆𑀡𑀸𑀤𑀺𑀮𑁄𑀓𑀢𑁄. 𑀅𑀣 𑀯𑀸 𑀳𑀸𑀬𑀢𑀺 𑀥𑀜𑁆𑀜𑀓𑁄𑀝𑁆𑀞𑀸𑀕𑀸𑀭𑀯𑀲𑁂𑀦. 𑀧𑀭𑀺𑀳𑀸𑀬𑀢𑀺 𑀥𑀦𑀓𑁄𑀝𑁆𑀞𑀸𑀕𑀸𑀭𑀯𑀲𑁂𑀦. 𑀧𑀭𑀺𑀥𑀁𑀲𑀢𑀺 𑀩𑀮𑀺𑀩𑀤𑁆𑀤𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀯𑀲𑁂𑀦. 𑀧𑀭𑀺𑀧𑀢𑀢𑀺 𑀤𑀸𑀲𑀺𑀤𑀸𑀲𑀯𑀲𑁂𑀦. 𑀅𑀦𑁆𑀢𑀭𑀥𑀸𑀬𑀢𑀺 𑀤𑀸𑀭𑀸𑀪𑀭𑀡𑀯𑀲𑁂𑀦. 𑀦𑀲𑁆𑀲𑀢𑀺 𑀉𑀤𑀓𑀸𑀤𑀺𑀯𑀲𑁂𑀦𑀸𑀢𑀺 𑀏𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀅𑀬𑁄𑀫𑀬𑁂𑀦𑀸𑀢𑀺 𑀓𑀸𑀴𑀮𑁄𑀳𑀸𑀤𑀺𑀦𑀺𑀩𑁆𑀩𑀢𑁆𑀢𑁂𑀦. 𑀲𑀮𑁆𑀮𑁂𑀦𑀸𑀢𑀺 𑀓𑀡𑁆𑀟𑁂𑀦. 𑀅𑀝𑁆𑀞𑀺𑀫𑀬𑁂𑀦𑀸𑀢𑀺 𑀫𑀦𑀼𑀲𑁆𑀲𑀝𑁆𑀞𑀺𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂𑀦. 𑀤𑀦𑁆𑀢𑀫𑀬𑁂𑀦𑀸𑀢𑀺 𑀳𑀢𑁆𑀣𑀺𑀤𑀦𑁆𑀢𑀸𑀤𑀺𑀦𑀸. 𑀯𑀺𑀲𑀸𑀡𑀫𑀬𑁂𑀦𑀸𑀢𑀺 𑀕𑁄𑀯𑀺𑀲𑀸𑀡𑀸𑀤𑀺𑀦𑀸. 𑀓𑀝𑁆𑀞𑀫𑀬𑁂𑀦𑀸𑀢𑀺 𑀯𑁂𑀴𑀼𑀓𑀝𑁆𑀞𑀸𑀤𑀺𑀦𑀸. 𑀯𑀺𑀤𑁆𑀥𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀮𑁆𑀮𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀧𑀳𑀝𑁄. 𑀭𑀼𑀧𑁆𑀧𑀢𑀻𑀢𑀺 𑀯𑀺𑀓𑀺𑀭𑀢𑀺, 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀺. 𑀓𑀼𑀧𑁆𑀧𑀢𑀻𑀢𑀺 𑀘𑀮𑀢𑀺, 𑀓𑁄𑀧𑀁 𑀉𑀧𑁆𑀧𑀸𑀤𑁂𑀢𑀺. 𑀖𑀝𑁆𑀝𑀻𑀬𑀢𑀻𑀢𑀺 𑀖𑀝𑁆𑀝𑀺𑀢𑁄 𑀳𑁄𑀢𑀺. 𑀧𑀻𑀴𑀻𑀬𑀢𑀻𑀢𑀺 𑀧𑀻𑀴𑀺𑀢𑁄 𑀳𑁄𑀢𑀺, 𑀮𑀤𑁆𑀥𑀧𑁆𑀧𑀳𑀸𑀭𑁄 𑀓𑀼𑀧𑁆𑀧𑀢𑀺. ‘‘𑀢𑀢𑀺𑀬𑀤𑀺𑀯𑀲𑁂 𑀲𑀮𑀸𑀓𑀁 𑀧𑀯𑁂𑀲𑁂𑀢𑁆𑀯𑀸 𑀥𑁄𑀯𑀦𑀓𑀸𑀮𑁂 𑀖𑀝𑁆𑀝𑀻𑀬𑀢𑀺. 𑀔𑀸𑀭𑀧𑁆𑀧𑀤𑀸𑀦𑁂 𑀧𑀻𑀴𑀻𑀬𑀢𑀺. 𑀧𑀳𑀸𑀭𑀥𑁄𑀯𑀦𑁂 𑀯𑀸 𑀭𑀼𑀧𑁆𑀧𑀢𑀺. 𑀢𑀲𑁆𑀫𑀺𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑁂 𑀓𑀼𑀧𑁆𑀧𑀢𑀺. 𑀲𑀮𑀸𑀓𑀧𑀯𑁂𑀲𑀦𑁂 𑀧𑀻𑀴𑀻𑀬𑀢𑀺. 𑀔𑀸𑀭𑀧𑁆𑀧𑀤𑀸𑀦𑁂 𑀖𑀝𑁆𑀝𑀻𑀬𑀢𑀻’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀩𑁆𑀬𑀸𑀥𑀺𑀢𑁄𑀢𑀺 𑀮𑀤𑁆𑀥𑀧𑁆𑀧𑀳𑀸𑀭𑁄 𑀳𑀼𑀢𑁆𑀯𑀸 𑀧𑀻𑀴𑀺𑀢𑁄. 𑀤𑁄𑀫𑀦𑀲𑁆𑀲𑀺𑀢𑁄𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄. 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸𑀢𑀺 𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸 𑀅𑀜𑁆𑀜𑀣𑀸𑀪𑀸𑀯𑀁 𑀉𑀧𑀦𑀻𑀢𑁂𑀦, 𑀅𑀦𑁆𑀢𑁄𑀲𑁄𑀲𑀸𑀤𑀺 𑀲𑁄𑀓𑁄 𑀘 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑁄 𑀧𑀭𑀺𑀤𑁂𑀯𑁄 𑀘 𑀓𑀸𑀬𑀧𑀻𑀴𑀦𑀸𑀤𑀺 𑀤𑀼𑀓𑁆𑀔𑀜𑁆𑀘 𑀘𑀺𑀢𑁆𑀢𑀧𑀻𑀴𑀦𑀸𑀤𑀺 𑀤𑁄𑀫𑀦𑀲𑁆𑀲𑀜𑁆𑀘 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄 𑀘. 𑀏𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑁄𑀓𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀫𑀼𑀤𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀺.

𑁩. 𑀢𑀢𑀺𑀬𑀕𑀸𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀧𑀦 𑀇𑀫𑁂 𑀓𑀸𑀫𑁂 𑀢𑀢𑁆𑀣 𑀙𑀦𑁆𑀤𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀸 𑀲𑀫𑀼𑀘𑁆𑀙𑁂𑀤𑁂𑀦 𑀯𑀸 𑀅𑀢𑁆𑀢𑀦𑁄 𑀧𑀸𑀤𑁂𑀦 𑀲𑀧𑁆𑀧𑀲𑁆𑀲 𑀲𑀺𑀭𑀁 𑀯𑀺𑀬 𑀧𑀭𑀺𑀯𑀚𑁆𑀚𑁂𑀢𑀺, 𑀲𑁄 𑀪𑀺𑀓𑁆𑀔𑀼 𑀲𑀩𑁆𑀩𑀮𑁄𑀓𑀁 𑀯𑀺𑀧𑁆𑀨𑀸𑀭𑁂𑀢𑁆𑀯𑀸 𑀞𑀺𑀢𑀢𑁆𑀢𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀲𑀢𑁄 𑀳𑀼𑀢𑁆𑀯𑀸 𑀲𑀫𑀢𑀺𑀯𑀢𑁆𑀢𑀢𑀻𑀢𑀺.

𑀬𑁄𑀢𑀺 𑀯𑀺𑀪𑀚𑀺𑀢𑀩𑁆𑀩𑀁 𑀧𑀤𑀁. 𑀬𑁄 𑀬𑀸𑀤𑀺𑀲𑁄𑀢𑀺𑀆𑀤𑀻𑀦𑀺 𑀢𑀲𑁆𑀲 𑀯𑀺𑀪𑀚𑀦𑀧𑀤𑀸𑀦𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀬𑁄𑀢𑀺 𑀅𑀢𑁆𑀣𑀧𑀤𑀁. 𑀢𑀜𑁆𑀘 𑀅𑀦𑀺𑀬𑀫𑁂𑀦 𑀧𑀼𑀕𑁆𑀕𑀮𑀁 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀺𑀬𑀫𑁂𑀦 𑀧𑀼𑀕𑁆𑀕𑀮𑀤𑀻𑀧𑀓𑀁 𑀬𑁄-𑀲𑀤𑁆𑀤𑀫𑁂𑀯 𑀆𑀳. 𑀢𑀲𑁆𑀫𑀸 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄𑀢𑀺 𑀬𑁄 𑀓𑁄𑀘𑀻𑀢𑀺. 𑀬𑀲𑁆𑀫𑀸 𑀬𑁄 𑀬𑁄 𑀓𑁄𑀘𑀺 𑀦𑀸𑀫, 𑀲𑁄 𑀅𑀯𑀲𑁆𑀲𑀁 𑀬𑀣𑀸𑀮𑀺𑀗𑁆𑀕𑀬𑀣𑀸𑀬𑀼𑀢𑁆𑀢𑀬𑀣𑀸𑀯𑀺𑀳𑀺𑀢𑀬𑀣𑀸𑀧𑁆𑀧𑀓𑀸𑀭𑀬𑀁𑀞𑀸𑀦𑀧𑀢𑁆𑀢𑀬𑀁𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀯𑀲𑁂𑀦 𑀏𑀓𑁂𑀦𑀸𑀓𑀸𑀭𑁂𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀁 𑀢𑀢𑁆𑀣 𑀜𑀸𑀧𑁂𑀢𑀼𑀁 𑀢𑀁 𑀪𑁂𑀤𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀬𑀸𑀤𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀤𑀺𑀲𑁄𑀢𑀺 𑀮𑀺𑀗𑁆𑀕𑀯𑀲𑁂𑀦 𑀬𑀸𑀤𑀺𑀲𑁄 𑀯𑀸 𑀢𑀸𑀤𑀺𑀲𑁄 𑀯𑀸 𑀳𑁄𑀢𑀼, 𑀤𑀻𑀖𑁄 𑀯𑀸 𑀭𑀲𑁆𑀲𑁄 𑀯𑀸 𑀓𑀸𑀴𑁄 𑀯𑀸 𑀑𑀤𑀸𑀢𑁄 𑀯𑀸 𑀫𑀗𑁆𑀕𑀼𑀭𑀘𑁆𑀙𑀯𑀺 𑀯𑀸 𑀓𑀺𑀲𑁄 𑀯𑀸 𑀣𑀽𑀮𑁄 𑀯𑀸𑀢𑀺 𑀅𑀢𑁆𑀣𑁄.

𑀬𑀣𑀸𑀬𑀼𑀢𑁆𑀢𑁄𑀢𑀺 𑀬𑁄𑀕𑀯𑀲𑁂𑀦 𑀬𑁂𑀦 𑀯𑀸 𑀢𑁂𑀦 𑀯𑀸 𑀬𑀼𑀢𑁆𑀢𑁄 𑀳𑁄𑀢𑀼, 𑀦𑀯𑀓𑀫𑁆𑀫𑀬𑀼𑀢𑁆𑀢𑁄 𑀯𑀸 𑀉𑀤𑁆𑀤𑁂𑀲𑀬𑀼𑀢𑁆𑀢𑁄 𑀯𑀸 𑀯𑀸𑀲𑀥𑀼𑀭𑀬𑀼𑀢𑁆𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀺𑀳𑀺𑀢𑁄𑀢𑀺 𑀬𑀣𑀸𑀞𑀧𑀺𑀢𑁄 𑀦𑀯𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀺𑀓𑀸𑀤𑀺𑀯𑀲𑁂𑀦. 𑀬𑀣𑀸𑀧𑀓𑀸𑀭𑁄𑀢𑀺 𑀬𑀣𑀸𑀧𑀓𑀸𑀭𑁂𑀦 𑀧𑀢𑀺𑀝𑁆𑀞𑀺𑀢𑁄 𑀧𑀤𑀻𑀧𑀦𑀸𑀬𑀓𑀸𑀤𑀺𑀯𑀲𑁂𑀦. 𑀬𑀁𑀞𑀸𑀦𑀧𑁆𑀧𑀢𑁆𑀢𑁄𑀢𑀺 𑀬𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀲𑁂𑀦𑀸𑀧𑀢𑀺𑀲𑁂𑀝𑁆𑀞𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦. 𑀬𑀁𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀉𑀧𑀸𑀕𑀢𑁄 𑀥𑀼𑀢𑀗𑁆𑀕𑀸𑀤𑀺𑀯𑀲𑁂𑀦.

𑀯𑀺𑀓𑁆𑀔𑀫𑁆𑀪𑀦𑀢𑁄 𑀯𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀻𑀢𑀺 𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀓𑀭𑀡𑀢𑁄 𑀯𑀸 𑀖𑀝𑀧𑁆𑀧𑀳𑀸𑀭𑁂𑀦 𑀲𑁂𑀯𑀸𑀮𑀸𑀦𑀁 𑀯𑀺𑀬. 𑀲𑀫𑀼𑀘𑁆𑀙𑁂𑀤𑀢𑁄 𑀯𑀸𑀢𑀺 𑀧𑀼𑀦 𑀅𑀧𑁆𑀧𑀯𑀢𑁆𑀢𑀺𑀁 𑀓𑀢𑁆𑀯𑀸 𑀅𑀘𑁆𑀘𑀦𑁆𑀢𑀢𑁄 𑀫𑀕𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀢𑁄 𑀧𑀳𑀸𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀢𑁄 𑀯𑀸. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸𑀢𑀺𑀆𑀤𑀻𑀦𑀺 𑀏𑀓𑀸𑀤𑀲 𑀧𑀤𑀸𑀦𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀻𑀢𑀺𑀆𑀤𑀻𑀦𑀺 𑀙 𑀧𑀤𑀸𑀦𑀺 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀻𑀢𑀺 𑀇𑀫𑀸𑀦𑀺 𑀘 𑀉𑀧𑀘𑀸𑀭𑀚𑁆𑀛𑀸𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺, 𑀓𑀸𑀬𑀕𑀢𑀸𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺, 𑀧𑀞𑀫𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀻𑀢𑀺𑀆𑀤𑀻𑀦𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀻𑀢𑀺 𑀧𑀭𑀺𑀬𑁄𑀲𑀸𑀦𑀸𑀦𑀺 𑀅𑀧𑁆𑀧𑀦𑀸𑀚𑁆𑀛𑀸𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸𑀢𑀺 𑀲𑀼𑀦𑀺𑀓𑁆𑀓𑀦𑁆𑀢𑀁 𑀦𑀺𑀓𑁆𑀓𑀦𑁆𑀢𑀁 𑀦𑀺𑀫𑁆𑀫𑀁𑀲𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀅𑀝𑁆𑀞𑀺𑀓𑀗𑁆𑀓𑀮𑀁 𑀉𑀧𑀫𑀸 𑀏𑀢𑁂𑀲𑀁 𑀓𑀸𑀫𑀸𑀦𑀦𑁆𑀢𑀺 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸. 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦𑀸𑀢𑀺 ‘‘𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀲𑀼𑀔𑀲𑁆𑀲𑀸𑀤𑀁 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’’𑀢𑀺 𑀤𑀲𑁆𑀲𑀦𑀝𑁆𑀞𑁂𑀦. 𑀧𑀲𑁆𑀲𑀦𑁆𑀢𑁄𑀢𑀺 ‘‘𑀬𑀸𑀯𑀤𑁂𑀯 𑀧𑀦 𑀲𑁄 𑀓𑀼𑀓𑁆𑀓𑀼𑀭𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁄. 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀤𑀽𑀭𑀗𑁆𑀕𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀓𑀼𑀓𑁆𑀓𑀼𑀭𑁄 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀭𑁂𑀢𑁄 𑀕𑁄𑀖𑀸𑀢𑀓𑀲𑀽𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀲𑁆𑀲, 𑀢𑀫𑁂𑀦𑀁 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸 𑀕𑁄𑀖𑀸𑀢𑀓𑀦𑁆𑀢𑁂𑀯𑀸𑀲𑀻 𑀯𑀸 𑀅𑀝𑁆𑀞𑀺𑀓𑀗𑁆𑀓𑀮𑀁 𑀲𑀼𑀦𑀺𑀓𑁆𑀓𑀦𑁆𑀢𑀁 𑀦𑀺𑀓𑁆𑀓𑀦𑁆𑀢𑀁 𑀦𑀺𑀫𑁆𑀫𑀁𑀲𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀉𑀧𑀲𑀼𑀫𑁆𑀪𑁂𑀬𑁆𑀬. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀅𑀧𑀺 𑀦𑀼 𑀔𑁄 𑀲𑁄 𑀓𑀼𑀓𑁆𑀓𑀼𑀭𑁄 𑀅𑀫𑁆𑀳𑀁 𑀅𑀝𑁆𑀞𑀺𑀓𑀗𑁆𑀓𑀮𑀁 𑀲𑀼𑀦𑀺𑀓𑁆𑀓𑀦𑁆𑀢𑀁 𑀦𑀺𑀓𑁆𑀓𑀦𑁆𑀢𑀁 𑀦𑀺𑀫𑁆𑀫𑀁𑀲𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀧𑀮𑁂𑀳𑀦𑁆𑀢𑁄 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀁 𑀧𑀝𑀺𑀯𑀺𑀦𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀤𑀼𑀜𑁆𑀳𑀺, 𑀪𑀦𑁆𑀢𑁂, 𑀅𑀝𑁆𑀞𑀺𑀓𑀗𑁆𑀓𑀮𑀁 𑀲𑀼𑀦𑀺𑀓𑁆𑀓𑀦𑁆𑀢𑀁 𑀦𑀺𑀓𑁆𑀓𑀦𑁆𑀢𑀁 𑀦𑀺𑀫𑁆𑀫𑀁𑀲𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁, 𑀬𑀸𑀯𑀤𑁂𑀯 𑀧𑀦 𑀲𑁄 𑀓𑀼𑀓𑁆𑀓𑀼𑀭𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’𑀢𑀺. 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸, 𑀢𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸, 𑀬𑀢𑁆𑀣 𑀲𑀩𑁆𑀩𑀲𑁄 𑀮𑁄𑀓𑀸𑀫𑀺𑀲𑀼𑀧𑀸𑀤𑀸𑀦𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀻’’𑀢𑀺 (𑀫. 𑀦𑀺. 𑁨.𑁪𑁨).

𑀕𑀺𑀚𑁆𑀛𑀸𑀤𑀻𑀳𑀺 𑀲𑀸𑀥𑀸𑀭𑀡𑀸 𑀫𑀁𑀲𑀧𑁂𑀲𑀺 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀫𑀁𑀲𑀧𑁂𑀲𑀽𑀧𑀫𑀸. 𑀩𑀳𑀽𑀦𑀁 𑀲𑀸𑀥𑀸𑀭𑀡𑀝𑁆𑀞𑁂𑀦 𑀩𑀳𑀼𑀲𑀸𑀥𑀸𑀭𑀡𑀸. 𑀆𑀤𑀺𑀢𑁆𑀢𑀁 𑀢𑀺𑀡𑀼𑀓𑁆𑀓𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀢𑀺𑀡𑀼𑀓𑁆𑀓𑀽𑀧𑀫𑀸. 𑀅𑀦𑀼𑀤𑀳𑀦𑀝𑁆𑀞𑁂𑀦𑀸𑀢𑀺 𑀳𑀢𑁆𑀣𑀸𑀤𑀺𑀛𑀸𑀧𑀦𑀝𑁆𑀞𑁂𑀦. 𑀲𑀸𑀥𑀺𑀓𑀧𑁄𑀭𑀺𑀲𑀧𑁆𑀧𑀫𑀸𑀡𑀸 𑀯𑀻𑀢𑀘𑁆𑀘𑀺𑀓𑀸𑀦𑀁 𑀯𑀻𑀢𑀥𑀽𑀫𑀸𑀦𑀁 𑀅𑀗𑁆𑀕𑀸𑀭𑀸𑀦𑀁 𑀧𑀽𑀭𑀸 𑀅𑀗𑁆𑀕𑀸𑀭𑀓𑀸𑀲𑀼 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸. 𑀫𑀳𑀸𑀧𑀭𑀺𑀴𑀸𑀳𑀝𑁆𑀞𑁂𑀦𑀸𑀢𑀺 𑀫𑀳𑀦𑁆𑀢𑀧𑀭𑀺𑀢𑀸𑀧𑀦𑀝𑁆𑀞𑁂𑀦. 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀸𑀤𑀺𑀓𑀁 𑀲𑀼𑀧𑀺𑀦𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀲𑀼𑀧𑀺𑀦𑀓𑀽𑀧𑀫𑀸. 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀅𑀧𑁆𑀧𑀢𑁆𑀯𑀸, 𑀦 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀦𑀝𑁆𑀞𑁂𑀦. 𑀬𑀸𑀘𑀺𑀢𑁂𑀦 𑀮𑀤𑁆𑀥𑀁 𑀬𑀸𑀦𑀸𑀤𑀺𑀪𑀡𑁆𑀟𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀬𑀸𑀘𑀺𑀢𑀓𑀽𑀧𑀫𑀸. 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦𑀸𑀢𑀺 𑀅𑀦𑀺𑀩𑀦𑁆𑀥𑀦𑀝𑁆𑀞𑁂𑀦. 𑀲𑀫𑁆𑀧𑀦𑁆𑀦𑀨𑀮𑀭𑀼𑀓𑁆𑀔𑁄 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀭𑀼𑀓𑁆𑀔𑀨𑀮𑀽𑀧𑀫𑀸. 𑀲𑀫𑁆𑀪𑀜𑁆𑀚𑀦𑀧𑀭𑀺𑀪𑀜𑁆𑀚𑀦𑀝𑁆𑀞𑁂𑀦𑀸𑀢𑀺 𑀲𑀸𑀔𑀸𑀪𑀜𑁆𑀚𑀦𑀝𑁆𑀞𑁂𑀦 𑀘𑁂𑀯 𑀲𑀫𑀦𑁆𑀢𑀢𑁄 𑀪𑀜𑁆𑀚𑀺𑀢𑁆𑀯𑀸 𑀭𑀼𑀓𑁆𑀔𑀧𑀸𑀢𑀦𑀝𑁆𑀞𑁂𑀦 𑀘. 𑀅𑀲𑀺 𑀘 𑀲𑀽𑀦𑀸 𑀘 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀅𑀲𑀺𑀲𑀽𑀦𑀽𑀧𑀫𑀸. 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦𑀸𑀢𑀺 𑀙𑀺𑀦𑁆𑀤𑀦𑀝𑁆𑀞𑁂𑀦. 𑀲𑀢𑁆𑀢𑀺𑀲𑀽𑀮𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀲𑀢𑁆𑀢𑀺𑀲𑀽𑀮𑀽𑀧𑀫𑀸. 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦𑀸𑀢𑀺 𑀦𑀺𑀧𑀢𑁂𑀢𑁆𑀯𑀸 𑀕𑀫𑀦𑀝𑁆𑀞𑁂𑀦. 𑀪𑀬𑀚𑀦𑀦𑀝𑁆𑀞𑁂𑀦 𑀲𑀧𑁆𑀧𑀲𑀺𑀭𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀲𑀧𑁆𑀧𑀲𑀺𑀭𑀽𑀧𑀫𑀸. 𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦𑀸𑀢𑀺 𑀲𑀳 𑀅𑀪𑀺𑀫𑀼𑀔𑁂 𑀪𑀬𑀝𑁆𑀞𑁂𑀦. 𑀤𑀼𑀓𑁆𑀔𑀚𑀦𑀦𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀸. 𑀫𑀳𑀸𑀪𑀺𑀢𑀸𑀧𑀦𑀝𑁆𑀞𑁂𑀦𑀸𑀢𑀺 𑀫𑀳𑀦𑁆𑀢𑀅𑀪𑀺𑀢𑀸𑀧𑀓𑀸𑀬𑀧𑀻𑀴𑀸𑀉𑀧𑁆𑀧𑀸𑀤𑀦𑀝𑁆𑀞𑁂𑀦𑀸𑀢𑀺 𑀓𑀸𑀫𑀁 𑀧𑀭𑀺𑀯𑀚𑁆𑀚𑁂𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀕𑀺𑀚𑁆𑀛𑁄 𑀯𑀸 𑀓𑀗𑁆𑀓𑁄 𑀯𑀸 𑀓𑀼𑀮𑀮𑁄 𑀯𑀸 𑀫𑀁𑀲𑀧𑁂𑀲𑀺𑀁 𑀆𑀤𑀸𑀬 𑀉𑀟𑁆𑀟𑀻𑀬𑁂𑀬𑁆𑀬, 𑀢𑀫𑁂𑀦𑀁 𑀕𑀺𑀚𑁆𑀛𑀸𑀧𑀺 𑀓𑀗𑁆𑀓𑀸𑀧𑀺 𑀓𑀼𑀮𑀮𑀸𑀧𑀺 𑀅𑀦𑀼𑀧𑀢𑀺𑀢𑁆𑀯𑀸 𑀅𑀦𑀼𑀧𑀢𑀺𑀢𑁆𑀯𑀸 𑀯𑀺𑀢𑀘𑁆𑀙𑁂𑀬𑁆𑀬𑀼𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀼𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀲𑀘𑁂 𑀲𑁄 𑀕𑀺𑀚𑁆𑀛𑁄 𑀯𑀸 𑀓𑀗𑁆𑀓𑁄 𑀯𑀸 𑀓𑀼𑀮𑀮𑁄 𑀯𑀸 𑀢𑀁 𑀫𑀁𑀲𑀧𑁂𑀲𑀺𑀁 𑀦 𑀔𑀺𑀧𑁆𑀧𑀫𑁂𑀯 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬, 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬, 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’’𑀦𑁆𑀢𑀺 ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀁 𑀢𑀺𑀡𑀼𑀓𑁆𑀓𑀁 𑀆𑀤𑀸𑀬 𑀧𑀝𑀺𑀯𑀸𑀢𑀁 𑀕𑀘𑁆𑀙𑁂𑀬𑁆𑀬. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀲𑀘𑁂 𑀲𑁄 𑀧𑀼𑀭𑀺𑀲𑁄 𑀢𑀁 𑀆𑀤𑀺𑀢𑁆𑀢𑀁 𑀢𑀺𑀡𑀼𑀓𑁆𑀓𑀁 𑀦 𑀔𑀺𑀧𑁆𑀧𑀫𑁂𑀯 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀲𑀸 𑀆𑀤𑀺𑀢𑁆𑀢𑀸 𑀢𑀺𑀡𑀼𑀓𑁆𑀓𑀸 𑀳𑀢𑁆𑀣𑀁 𑀯𑀸 𑀤𑀳𑁂𑀬𑁆𑀬, 𑀩𑀸𑀳𑀼𑀁 𑀯𑀸 𑀤𑀳𑁂𑀬𑁆𑀬, 𑀅𑀜𑁆𑀜𑀢𑀭𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀤𑀳𑁂𑀬𑁆𑀬, 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬, 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸…𑀧𑁂… 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀅𑀗𑁆𑀕𑀸𑀭𑀓𑀸𑀲𑀼 𑀲𑀸𑀥𑀺𑀓𑀧𑁄𑀭𑀺𑀲𑀸 𑀧𑀽𑀭𑀸 𑀅𑀗𑁆𑀕𑀸𑀭𑀸𑀦𑀁 𑀯𑀻𑀢𑀘𑁆𑀘𑀺𑀓𑀸𑀦𑀁 𑀯𑀻𑀢𑀥𑀽𑀫𑀸𑀦𑀁. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑁆𑀧𑀝𑀺𑀓𑁆𑀓𑀽𑀮𑁄, 𑀢𑀫𑁂𑀦𑀁 𑀤𑁆𑀯𑁂 𑀩𑀮𑀯𑀦𑁆𑀢𑁄 𑀧𑀼𑀭𑀺𑀲𑀸 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀁 𑀉𑀧𑀓𑀟𑁆𑀠𑁂𑀬𑁆𑀬𑀼𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀕𑀳𑀧𑀢𑀺, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀇𑀢𑀺 𑀘𑀺𑀢𑀺 𑀘𑁂𑀯 𑀓𑀸𑀬𑀁 𑀲𑀦𑁆𑀦𑀸𑀫𑁂𑀬𑁆𑀬𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲𑀳𑁂𑀢𑀼’’? ‘‘𑀯𑀺𑀤𑀺𑀢𑀜𑁆𑀳𑀺, 𑀪𑀦𑁆𑀢𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 ‘𑀇𑀫𑀜𑁆𑀘 𑀅𑀳𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀧𑀧𑀢𑀺𑀲𑁆𑀲𑀸𑀫𑀺, 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀺𑀲𑁆𑀲𑀸𑀫𑀺 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄 𑀕𑀳𑀧𑀢𑀺 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀧𑀼𑀭𑀺𑀲𑁄 𑀲𑀼𑀧𑀺𑀦𑀓𑀁 𑀧𑀲𑁆𑀲𑁂𑀬𑁆𑀬 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑁄𑀓𑁆𑀔𑀭𑀡𑀺𑀭𑀸𑀫𑀡𑁂𑀬𑁆𑀬𑀓𑀁, 𑀲𑁄 𑀧𑀝𑀺𑀩𑀼𑀤𑁆𑀥𑁄 𑀦 𑀓𑀺𑀜𑁆𑀘𑀺 𑀧𑀝𑀺𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀧𑀼𑀭𑀺𑀲𑁄 𑀬𑀸𑀘𑀺𑀢𑀓𑀁 𑀪𑁄𑀕𑀁 𑀬𑀸𑀘𑀺𑀢𑁆𑀯𑀸 𑀬𑀸𑀦𑀁 𑀯𑀸 𑀧𑁄𑀭𑀺𑀲𑁂𑀬𑁆𑀬𑀁 𑀧𑀯𑀭𑀫𑀡𑀺𑀓𑀼𑀡𑁆𑀟𑀮𑀁. 𑀲𑁄 𑀢𑁂𑀳𑀺 𑀬𑀸𑀘𑀺𑀢𑀓𑁂𑀳𑀺 𑀪𑁄𑀕𑁂𑀳𑀺 𑀧𑀼𑀭𑀓𑁆𑀔𑀢𑁄 𑀧𑀭𑀺𑀯𑀼𑀢𑁄 𑀅𑀦𑁆𑀢𑀭𑀸𑀧𑀡𑀁 𑀧𑀝𑀺𑀧𑀚𑁆𑀚𑁂𑀬𑁆𑀬. 𑀢𑀫𑁂𑀦𑀁 𑀚𑀦𑁄 𑀤𑀺𑀲𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀪𑁄𑀕𑀻 𑀯𑀢 𑀪𑁄 𑀧𑀼𑀭𑀺𑀲𑁄, 𑀏𑀯𑀁 𑀓𑀺𑀭 𑀪𑁄 𑀪𑁄𑀕𑀺𑀦𑁄 𑀪𑁄𑀕𑀸𑀦𑀺 𑀪𑀼𑀜𑁆𑀚𑀦𑁆𑀢𑀻’𑀢𑀺. 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀬𑀢𑁆𑀣 𑀬𑀢𑁆𑀣𑁂𑀯 𑀢𑀸𑀦𑀺 𑀧𑀲𑁆𑀲𑁂𑀬𑁆𑀬𑀼𑀁, 𑀢𑀢𑁆𑀣 𑀢𑀢𑁆𑀣𑁂𑀯 𑀢𑀸𑀦𑀺 𑀳𑀭𑁂𑀬𑁆𑀬𑀼𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀅𑀮𑀁 𑀦𑀼 𑀔𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲𑀳𑁂𑀢𑀼’’? ‘‘𑀲𑀸𑀫𑀺𑀦𑁄 𑀳𑀺, 𑀪𑀦𑁆𑀢𑁂, 𑀢𑀸𑀦𑀺 𑀳𑀭𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀳𑀧𑀢𑀺, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀢𑀺𑀩𑁆𑀩𑁄 𑀯𑀦𑀲𑀡𑁆𑀟𑁄, 𑀢𑀢𑁆𑀭𑀲𑁆𑀲 𑀭𑀼𑀓𑁆𑀔𑁄 𑀲𑀫𑁆𑀧𑀦𑁆𑀦𑀨𑀮𑁄 𑀘 𑀉𑀧𑀧𑀦𑁆𑀦𑀨𑀮𑁄 𑀘. 𑀦 𑀘𑀲𑁆𑀲𑀼 𑀓𑀸𑀦𑀺𑀘𑀺 𑀨𑀮𑀸𑀦𑀺 𑀪𑀽𑀫𑀺𑀬𑀁 𑀧𑀢𑀺𑀢𑀸𑀦𑀺. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀨𑀮𑀢𑁆𑀣𑀺𑀓𑁄 𑀨𑀮𑀕𑀯𑁂𑀲𑀻 𑀨𑀮𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄. 𑀲𑁄 𑀢𑀁 𑀯𑀦𑀲𑀡𑁆𑀟𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀧𑀲𑁆𑀲𑁂𑀬𑁆𑀬 𑀲𑀫𑁆𑀧𑀦𑁆𑀦𑀨𑀮𑀜𑁆𑀘 𑀉𑀧𑀧𑀦𑁆𑀦𑀨𑀮𑀜𑁆𑀘. 𑀢𑀲𑁆𑀲 𑀏𑀯𑀫𑀲𑁆𑀲 ‘𑀅𑀬𑀁 𑀔𑁄 𑀭𑀼𑀓𑁆𑀔𑁄 𑀲𑀫𑁆𑀧𑀦𑁆𑀦𑀨𑀮𑁄 𑀘 𑀉𑀧𑀧𑀦𑁆𑀦𑀨𑀮𑁄 𑀘, 𑀦𑀢𑁆𑀣𑀺 𑀘 𑀓𑀸𑀦𑀺𑀘𑀺 𑀨𑀮𑀸𑀦𑀺 𑀪𑀽𑀫𑀺𑀬𑀁 𑀧𑀢𑀺𑀢𑀸𑀦𑀺, 𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁 𑀭𑀼𑀓𑁆𑀔𑀁 𑀆𑀭𑁄𑀧𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀭𑀼𑀓𑁆𑀔𑀁 𑀆𑀭𑁄𑀳𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀜𑁆𑀘 𑀔𑀸𑀤𑁂𑀬𑁆𑀬𑀁, 𑀉𑀘𑁆𑀙𑀗𑁆𑀕𑀜𑁆𑀘 𑀧𑀽𑀭𑁂𑀬𑁆𑀬’𑀦𑁆𑀢𑀺? 𑀲𑁄 𑀢𑀁 𑀭𑀼𑀓𑁆𑀔𑀁 𑀆𑀭𑁄𑀳𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀜𑁆𑀘 𑀔𑀸𑀤𑁂𑀬𑁆𑀬, 𑀉𑀘𑁆𑀙𑀗𑁆𑀕𑀜𑁆𑀘 𑀧𑀽𑀭𑁂𑀬𑁆𑀬. 𑀅𑀣 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀨𑀮𑀢𑁆𑀣𑀺𑀓𑁄 𑀨𑀮𑀕𑀯𑁂𑀲𑀻 𑀨𑀮𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀢𑀺𑀡𑁆𑀳𑀁 𑀓𑀼𑀞𑀸𑀭𑀺𑀁 𑀆𑀤𑀸𑀬. 𑀲𑁄 𑀢𑀁 𑀯𑀦𑀲𑀡𑁆𑀟𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀧𑀲𑁆𑀲𑁂𑀬𑁆𑀬 𑀲𑀫𑁆𑀧𑀦𑁆𑀦𑀨𑀮𑀜𑁆𑀘 𑀉𑀧𑀧𑀦𑁆𑀦𑀨𑀮𑀜𑁆𑀘. 𑀢𑀲𑁆𑀲 𑀏𑀯𑀫𑀲𑁆𑀲 ‘𑀅𑀬𑀁 𑀔𑁄 𑀭𑀼𑀓𑁆𑀔𑁄 𑀲𑀫𑁆𑀧𑀦𑁆𑀦𑀨𑀮𑁄 𑀘 𑀉𑀧𑀧𑀦𑁆𑀦𑀨𑀮𑁄 𑀘, 𑀦𑀢𑁆𑀣𑀺 𑀘 𑀓𑀸𑀦𑀺𑀘𑀺 𑀨𑀮𑀸𑀦𑀺 𑀪𑀽𑀫𑀺𑀬𑀁 𑀧𑀢𑀺𑀢𑀸𑀦𑀺, 𑀦 𑀔𑁄 𑀧𑀦𑀸𑀳𑀁 𑀚𑀸𑀦𑀸𑀫𑀺 𑀭𑀼𑀓𑁆𑀔𑀁 𑀆𑀭𑁄𑀳𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀭𑀼𑀓𑁆𑀔𑀁 𑀫𑀽𑀮𑀢𑁄 𑀙𑁂𑀢𑁆𑀯𑀸 𑀬𑀸𑀯𑀤𑀢𑁆𑀣𑀜𑁆𑀘 𑀔𑀸𑀤𑁂𑀬𑁆𑀬𑀁, 𑀉𑀘𑁆𑀙𑀗𑁆𑀕𑀜𑁆𑀘 𑀧𑀽𑀭𑁂𑀬𑁆𑀬’𑀦𑁆𑀢𑀺. 𑀲𑁄 𑀢𑀁 𑀭𑀼𑀓𑁆𑀔𑀁 𑀫𑀽𑀮𑀢𑁄𑀯 𑀙𑀺𑀦𑁆𑀤𑁂𑀬𑁆𑀬. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀅𑀫𑀼𑀓𑁄 𑀲𑁄 𑀧𑀼𑀭𑀺𑀲𑁄 𑀧𑀞𑀫𑀁 𑀭𑀼𑀓𑁆𑀔𑀁 𑀆𑀭𑀽𑀴𑁆𑀳𑁄, 𑀲𑀘𑁂 𑀲𑁄 𑀦 𑀔𑀺𑀧𑁆𑀧𑀫𑁂𑀯 𑀑𑀭𑁄𑀳𑁂𑀬𑁆𑀬, 𑀢𑀲𑁆𑀲 𑀲𑁄 𑀭𑀼𑀓𑁆𑀔𑁄 𑀧𑀧𑀢𑀦𑁆𑀢𑁄 𑀳𑀢𑁆𑀣𑀁 𑀯𑀸 𑀪𑀜𑁆𑀚𑁂𑀬𑁆𑀬 𑀧𑀸𑀤𑀁 𑀯𑀸 𑀪𑀜𑁆𑀚𑁂𑀬𑁆𑀬 𑀅𑀜𑁆𑀜𑀢𑀭𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀪𑀜𑁆𑀚𑁂𑀬𑁆𑀬, 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬, 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯 𑀔𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’𑀢𑀺. 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸, 𑀢𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸. 𑀬𑀢𑁆𑀣 𑀲𑀩𑁆𑀩𑀲𑁄 𑀮𑁄𑀓𑀸𑀫𑀺𑀲𑀽𑀧𑀸𑀤𑀸𑀦𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀻’’𑀢𑀺 (𑀫. 𑀦𑀺. 𑁨.𑁪𑁩-𑁪𑁮).

𑀏𑀯𑀁 𑀅𑀝𑁆𑀞𑀺𑀓𑀗𑁆𑀓𑀮𑀸𑀤𑀺𑀓𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀧𑀭𑀺𑀬𑁄𑀲𑀸𑀦𑀢𑁄 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑀘𑀸𑀭𑀲𑀫𑀸𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀲𑀢𑀺 𑀏𑀯 𑀅𑀦𑀼𑀲𑁆𑀲𑀢𑀺. 𑀧𑀯𑀢𑁆𑀢𑀺𑀢𑀩𑁆𑀩𑀝𑁆𑀞𑀸𑀦𑀫𑁆𑀳𑀺𑀬𑁂𑀯 𑀘 𑀧𑀯𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀅𑀦𑀼𑀭𑀽𑀧𑀸 𑀲𑀢𑀻𑀢𑀺𑀧𑀺 𑀅𑀦𑀼𑀲𑁆𑀲𑀢𑀺. 𑀩𑀼𑀤𑁆𑀥𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺. 𑀅𑀭𑀳𑀢𑀸𑀤𑀺𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁. 𑀪𑀸𑀯𑁂𑀦𑁆𑀢𑁄𑀢𑀺 𑀯𑀟𑁆𑀠𑁂𑀦𑁆𑀢𑁄 𑀩𑁆𑀬𑀽𑀳𑁂𑀦𑁆𑀢𑁄. 𑀥𑀫𑁆𑀫𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺, 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀥𑀫𑁆𑀫𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀗𑁆𑀖𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺, 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀲𑀗𑁆𑀖𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀻𑀮𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀅𑀔𑀡𑁆𑀟𑀢𑀸𑀤𑀺𑀲𑀻𑀮𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀘𑀸𑀕𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀫𑀼𑀢𑁆𑀢𑀘𑀸𑀕𑀢𑀸𑀤𑀺𑀘𑀸𑀕𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀤𑁂𑀯𑀢𑀸 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀺, 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀆𑀦𑀸𑀧𑀸𑀦𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀆𑀦𑀸𑀧𑀸𑀦𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀫𑀭𑀡𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀲𑀢𑀺 𑀫𑀭𑀡𑀲𑁆𑀲𑀢𑀺, 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀲𑀗𑁆𑀔𑀸𑀢𑀫𑀭𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀧𑀝𑀺𑀓𑁆𑀓𑀽𑀮𑀸𑀦𑀁 𑀆𑀬𑀢𑁆𑀢𑀸 𑀆𑀓𑀭𑀢𑁆𑀢𑀸 𑀓𑀸𑀬𑁄𑀢𑀺 𑀲𑀗𑁆𑀔𑀁 𑀕𑀢𑁂 𑀲𑀭𑀻𑀭𑁂 𑀕𑀢𑀸 𑀧𑀯𑀢𑁆𑀢𑀸 𑀲𑀢𑀺 𑀓𑀸𑀬𑀕𑀢𑀸𑀲𑀢𑀺, 𑀢𑀸𑀤𑀺𑀲𑀁 𑀯𑀸 𑀓𑀸𑀬𑀁 𑀕𑀢𑀸 𑀲𑀢𑀺 ‘‘𑀓𑀸𑀬𑀕𑀢𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑀁 𑀅𑀓𑀢𑁆𑀯𑀸 ‘‘𑀓𑀸𑀬𑀕𑀢𑀸𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑁂𑀲𑀸𑀤𑀺𑀓𑁂𑀲𑀼 𑀓𑀸𑀬𑀓𑁄𑀝𑁆𑀞𑀸𑀲𑁂𑀲𑀼 𑀧𑀝𑀺𑀓𑁆𑀓𑀽𑀮𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀉𑀧𑀲𑀫𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺. 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀲𑀩𑁆𑀩𑀤𑀼𑀓𑁆𑀔𑀽𑀧𑀲𑀫𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑁂𑀦𑁆𑀢𑁄. 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀪𑀸𑀯𑁂𑀦𑁆𑀢𑁄. 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀚𑁆𑀛𑀸𑀦𑀁 𑀪𑀸𑀯𑁂𑀦𑁆𑀢𑁄. 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀪𑀸𑀯𑁂𑀦𑁆𑀢𑁄…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀪𑀸𑀯𑁂𑀦𑁆𑀢𑁄𑀧𑀺 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺.

𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑀼𑀘𑁆𑀙𑁂𑀤𑁂𑀦 𑀓𑀸𑀫𑀸𑀦𑀁 𑀧𑀳𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀕𑁆𑀕𑀲𑁄𑀢𑀲𑁆𑀲 𑀆𑀧𑀚𑁆𑀚𑀦𑀁 𑀲𑁄𑀢𑀸𑀧𑀢𑁆𑀢𑀺, 𑀲𑁄𑀢𑀸𑀧𑀢𑁆𑀢𑀺𑀬𑀸 𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄. 𑀅𑀧𑀸𑀬𑀕𑀫𑀦𑀻𑀬𑁂 𑀓𑀸𑀫𑁂𑀢𑀺 𑀬𑁂𑀳𑀺 𑀅𑀧𑀸𑀬𑀁 𑀕𑀘𑁆𑀙𑀦𑁆𑀢𑀺, 𑀢𑁂 𑀅𑀧𑀸𑀬𑀕𑀫𑀦𑀻𑀬𑁂 𑀓𑀸𑀫𑁂 𑀲𑀫𑀼𑀘𑁆𑀙𑁂𑀤𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀧𑀭𑀺𑀯𑀚𑁆𑀚𑁂𑀢𑀺. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀓𑀺𑀁𑀬𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻, 𑀢𑀲𑁆𑀲 𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄. 𑀢𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄. 𑀑𑀴𑀸𑀭𑀺𑀓𑁂𑀢𑀺 𑀧𑀭𑀺𑀴𑀸𑀳𑀧𑁆𑀧𑀢𑁆𑀢𑁂. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯 𑀓𑀸𑀫𑀪𑀯𑀁 𑀦𑀸𑀕𑀘𑁆𑀙𑀢𑀻𑀢𑀺 𑀅𑀦𑀸𑀕𑀸𑀫𑀻, 𑀢𑀲𑁆𑀲 𑀫𑀕𑁆𑀕𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁄. 𑀢𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄. 𑀅𑀦𑀼𑀲𑀳𑀕𑀢𑁂𑀢𑀺 𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑁂. 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸, 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸, 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁 𑀳𑀢𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸 𑀘 𑀅𑀭𑀳𑀁, 𑀅𑀭𑀳𑀢𑁄 𑀪𑀸𑀯𑁄 𑀅𑀭𑀳𑀢𑁆𑀢𑀁. 𑀓𑀺𑀁 𑀢𑀁? 𑀅𑀭𑀳𑀢𑁆𑀢𑀨𑀮𑀁. 𑀅𑀭𑀳𑀢𑁆𑀢𑀲𑁆𑀲 𑀫𑀕𑁆𑀕𑁄 𑀅𑀭𑀳𑀢𑁆𑀢𑀫𑀕𑁆𑀕𑁄. 𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄. 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑁂𑀦𑀸𑀓𑀸𑀭𑁂𑀦 𑀲𑀩𑁆𑀩𑀁. 𑀲𑀩𑁆𑀩𑀣𑀸 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑀁. 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀦𑁆𑀢𑀺 𑀦𑀺𑀭𑀯𑀲𑁂𑀲𑀁 𑀕𑀦𑁆𑀥𑀫𑀢𑁆𑀢𑀫𑁆𑀧𑀺 𑀅𑀝𑁆𑀞𑀧𑁂𑀢𑁆𑀯𑀸. 𑀅𑀣 𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀽𑀮𑀯𑀲𑁂𑀦. 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀆𑀓𑀸𑀭𑀦𑀺𑀧𑁆𑀧𑀤𑁂𑀲𑀯𑀲𑁂𑀦. 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀪𑀸𑀯𑀦𑀸𑀦𑀺𑀧𑁆𑀧𑀤𑁂𑀲𑀯𑀲𑁂𑀦. 𑀢𑀣𑀸 𑀧𑀼𑀭𑀺𑀫𑁂𑀦 𑀤𑀼𑀘𑁆𑀘𑀭𑀺𑀢𑀸𑀪𑀸𑀯𑁂𑀦. 𑀤𑀼𑀢𑀺𑀬𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀸𑀯𑁂𑀦. 𑀢𑀢𑀺𑀬𑁂𑀦 𑀅𑀦𑀼𑀲𑀬𑀸𑀪𑀸𑀯𑁂𑀦 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀲𑀧𑁆𑀧𑁄 𑀯𑀼𑀘𑁆𑀘𑀢𑀺 𑀅𑀳𑀻𑀢𑀺 𑀬𑁄 𑀓𑁄𑀘𑀺 𑀲𑀭𑀦𑁆𑀢𑁄 𑀕𑀘𑁆𑀙𑀢𑀺. 𑀓𑁂𑀦𑀝𑁆𑀞𑁂𑀦𑀸𑀢𑀺 𑀓𑁂𑀦 𑀅𑀢𑁆𑀣𑁂𑀦. 𑀲𑀁𑀲𑀧𑁆𑀧𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀬𑀲𑁆𑀫𑀸 𑀲𑀫𑁆𑀫𑀸 𑀲𑀁𑀲𑀭𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀲𑀧𑁆𑀧𑁄. 𑀪𑀼𑀚𑀦𑁆𑀢𑁄𑀢𑀺 𑀯𑀗𑁆𑀓𑀯𑀗𑁆𑀓𑁄 𑀳𑀼𑀢𑁆𑀯𑀸. 𑀧𑀦𑁆𑀦𑀲𑀺𑀭𑁄𑀢𑀺 𑀦𑀺𑀧𑀦𑁆𑀦𑀲𑀻𑀲𑁄 𑀳𑀼𑀢𑁆𑀯𑀸. 𑀲𑀺𑀭𑁂𑀦 𑀲𑀼𑀧𑀢𑀻𑀢𑀺 𑀲𑀻𑀲𑀁 𑀪𑁄𑀕𑀦𑁆𑀢𑀭𑁂 𑀓𑀢𑁆𑀯𑀸 𑀲𑀼𑀧𑀦𑀪𑀸𑀯𑁂𑀦 𑀲𑀺𑀭𑀲𑀸 𑀲𑀼𑀧𑀢𑀻𑀢𑀺 𑀲𑀭𑀻𑀲𑀧𑁄. 𑀩𑀺𑀮𑁂 𑀲𑀬𑀢𑀻𑀢𑀺 𑀩𑀺𑀮𑀸𑀲𑀬𑁄. ‘‘𑀩𑀺𑀮𑀲𑀬𑁄’’𑀢𑀺𑀧𑀺 𑀧𑀸𑀴𑀺, 𑀢𑀁 𑀲𑀼𑀦𑁆𑀤𑀭𑀁. 𑀕𑀼𑀳𑀸𑀬𑀁 𑀲𑁂𑀢𑀻𑀢𑀺 𑀕𑀼𑀳𑀸𑀲𑀬𑁄. 𑀤𑀸𑀞𑀸 𑀢𑀲𑁆𑀲 𑀆𑀯𑀼𑀥𑁄𑀢𑀺 𑀢𑀲𑁆𑀲 𑀲𑀧𑁆𑀧𑀲𑁆𑀲 𑀤𑀼𑀯𑁂 𑀤𑀸𑀞𑀸 𑀧𑀳𑀭𑀡𑀲𑀢𑁆𑀣𑀲𑀗𑁆𑀔𑀸𑀢𑁄 𑀆𑀯𑀼𑀥𑁄. 𑀯𑀺𑀲𑀁 𑀢𑀲𑁆𑀲 𑀖𑁄𑀭𑀦𑁆𑀢𑀺 𑀢𑀲𑁆𑀲 𑀲𑀧𑁆𑀧𑀲𑁆𑀲 𑀩𑁆𑀬𑀸𑀧𑀓𑀲𑀗𑁆𑀔𑀸𑀢𑀁 𑀯𑀺𑀲𑀁 𑀤𑀸𑀭𑀼𑀡𑀁 𑀓𑀓𑁆𑀔𑀴𑀁. 𑀚𑀺𑀯𑁆𑀳𑀸 𑀢𑀲𑁆𑀲 𑀤𑀼𑀯𑀺𑀥𑀸𑀢𑀺 𑀢𑀲𑁆𑀲 𑀲𑀧𑁆𑀧𑀲𑁆𑀲 𑀤𑁆𑀯𑁂𑀥𑀸 𑀚𑀺𑀯𑁆𑀳𑀸. 𑀤𑁆𑀯𑀻𑀳𑀺 𑀚𑀺𑀯𑁆𑀳𑀸𑀳𑀺 𑀭𑀲𑀁 𑀲𑀸𑀬𑀢𑀻𑀢𑀺 𑀤𑀼𑀯𑀺𑀥𑀸𑀳𑀺 𑀚𑀺𑀯𑁆𑀳𑀸𑀳𑀺 𑀭𑀲𑀁 𑀚𑀸𑀦𑀸𑀢𑀺 𑀅𑀲𑁆𑀲𑀸𑀤𑀁 𑀯𑀺𑀦𑁆𑀤𑀢𑀺 𑀲𑀸𑀤𑀺𑀬𑀢𑀻𑀢𑀺. 𑀚𑀻𑀯𑀺𑀢𑀼𑀁 𑀓𑀸𑀫𑀬𑀢𑀻𑀢𑀺 𑀚𑀻𑀯𑀺𑀢𑀼𑀓𑀸𑀫𑁄. 𑀅𑀫𑀭𑀺𑀢𑀼𑀁 𑀓𑀸𑀫𑀬𑀢𑀻𑀢𑀺 𑀅𑀫𑀭𑀺𑀢𑀼𑀓𑀸𑀫𑁄. 𑀲𑀼𑀔𑀁 𑀓𑀸𑀫𑀬𑀢𑀻𑀢𑀺 𑀲𑀼𑀔𑀓𑀸𑀫𑁄. 𑀤𑀼𑀓𑁆𑀔𑀧𑁆𑀧𑀝𑀺𑀓𑁆𑀓𑀽𑀮𑁄𑀢𑀺 𑀤𑀼𑀓𑁆𑀔𑀁 𑀅𑀦𑀺𑀘𑁆𑀙𑀫𑀸𑀦𑁄. 𑀧𑀸𑀤𑁂𑀦𑀸𑀢𑀺 𑀅𑀢𑁆𑀢𑀦𑁄 𑀧𑀸𑀤𑁂𑀦. 𑀲𑀧𑁆𑀧𑀲𑀺𑀭𑀦𑁆𑀢𑀺 𑀲𑀧𑁆𑀧𑀲𑁆𑀲 𑀲𑀻𑀲𑀁. 𑀯𑀚𑁆𑀚𑁂𑀬𑁆𑀬𑀸𑀢𑀺 𑀤𑀽𑀭𑀢𑁄 𑀯𑀚𑁆𑀚𑁂𑀬𑁆𑀬. 𑀯𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑀢𑀲𑁆𑀲 𑀧𑀫𑀸𑀡𑁂𑀦. 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑀦𑁆𑀢𑀢𑁄. 𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑀘𑀢𑀼𑀢𑁆𑀣𑀧𑁆𑀧𑀫𑀸𑀡𑁂𑀦. 𑀅𑀣 𑀯𑀸 𑀧𑀼𑀭𑀺𑀫𑁂𑀦 𑀲𑀻𑀲𑀢𑁄. 𑀤𑀼𑀢𑀺𑀬𑀢𑀢𑀺𑀬𑁂𑀦 𑀤𑁆𑀯𑀻𑀳𑀺 𑀧𑀲𑁆𑀲𑁂𑀳𑀺. 𑀘𑀢𑀼𑀢𑁆𑀣𑁂𑀦 𑀧𑀘𑁆𑀙𑀢𑁄. ‘‘𑀓𑀸𑀫𑁂 𑀧𑀦 𑀅𑀧𑁆𑀧𑀢𑁆𑀢𑀲𑁆𑀲 𑀧𑀭𑀺𑀬𑁂𑀲𑀦𑀫𑀽𑀮𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑁂𑀦 𑀯𑀚𑁆𑀚𑁂𑀬𑁆𑀬. 𑀧𑀢𑁆𑀢𑀲𑁆𑀲 𑀆𑀭𑀓𑁆𑀔𑀫𑀽𑀮𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑁂𑀦 𑀯𑀺𑀯𑀚𑁆𑀚𑁂𑀬𑁆𑀬. 𑀅𑀜𑁆𑀜𑀸𑀡𑀧𑀭𑀺𑀴𑀸𑀳𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑁂𑀦 𑀧𑀭𑀺𑀯𑀚𑁆𑀚𑁂𑀬𑁆𑀬. 𑀯𑀺𑀦𑀸𑀲𑀫𑀼𑀔𑁂 𑀧𑀺𑀬𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑁂𑀦 𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬𑀸’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀭𑀜𑁆𑀚𑀦𑀯𑀲𑁂𑀦 𑀭𑀸𑀕𑁄. 𑀩𑀮𑀯𑀭𑀜𑁆𑀚𑀦𑀝𑁆𑀞𑁂𑀦 𑀲𑀸𑀭𑀸𑀕𑁄. 𑀯𑀺𑀲𑀬𑁂 𑀲𑀢𑁆𑀢𑀸𑀦𑀁 𑀅𑀦𑀼 𑀅𑀦𑀼 𑀦𑀬𑀦𑀢𑁄 𑀅𑀦𑀼𑀦𑀬𑁄. 𑀅𑀦𑀼𑀭𑀼𑀚𑁆𑀛𑀢𑀻𑀢𑀺 𑀅𑀦𑀼𑀭𑁄𑀥𑁄, 𑀓𑀸𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀯𑁂 𑀲𑀢𑁆𑀢𑀸 𑀏𑀢𑀸𑀬 𑀦𑀦𑁆𑀤𑀦𑁆𑀢𑀻𑀢𑀺 𑀦𑀦𑁆𑀤𑀻, 𑀲𑀬𑀁 𑀯𑀸 𑀦𑀦𑁆𑀤𑀢𑀻𑀢𑀺 𑀦𑀦𑁆𑀤𑀻. 𑀦𑀦𑁆𑀤𑀻 𑀘 𑀲𑀸 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄 𑀘𑀸𑀢𑀺 𑀦𑀦𑁆𑀤𑀺𑀭𑀸𑀕𑁄. 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸 𑀦𑀦𑁆𑀤𑀻, 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀦𑀦𑁆𑀤𑀺𑀭𑀸𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄𑀢𑀺 𑀬𑁄 𑀳𑁂𑀝𑁆𑀞𑀸 ‘‘𑀩𑀮𑀯𑀭𑀜𑁆𑀚𑀦𑀝𑁆𑀞𑁂𑀦 𑀲𑀸𑀭𑀸𑀕𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀦 𑀲𑀢𑁆𑀢𑀲𑁆𑀲, 𑀘𑀺𑀢𑁆𑀢𑀲𑁆𑀲𑁂𑀯 𑀲𑀸𑀭𑀸𑀕𑁄𑀢𑀺 𑀅𑀢𑁆𑀣𑁄.

𑀇𑀘𑁆𑀙𑀦𑁆𑀢𑀺 𑀏𑀢𑀸𑀬 𑀆𑀭𑀫𑁆𑀫𑀡𑀸𑀦𑀻𑀢𑀺 𑀇𑀘𑁆𑀙𑀸. 𑀩𑀳𑀮𑀓𑀺𑀮𑁂𑀲𑀪𑀸𑀯𑁂𑀦 𑀫𑀼𑀘𑁆𑀙𑀦𑁆𑀢𑀺 𑀏𑀢𑀸𑀬 𑀧𑀸𑀡𑀺𑀦𑁄𑀢𑀺 𑀫𑀼𑀘𑁆𑀙𑀸. 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀡𑀯𑀲𑁂𑀦 𑀅𑀚𑁆𑀛𑁄𑀲𑀸𑀦𑀁. 𑀇𑀫𑀺𑀦𑀸 𑀲𑀢𑁆𑀢𑀸 𑀕𑀺𑀚𑁆𑀛𑀦𑁆𑀢𑀺 𑀕𑁂𑀥𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀕𑁂𑀥𑁄. 𑀩𑀳𑀮𑀝𑁆𑀞𑁂𑀦 𑀯𑀸 𑀕𑁂𑀥𑁄. ‘‘𑀕𑁂𑀥𑀁 𑀯𑀸 𑀧𑀦 𑀧𑀯𑀦𑀲𑀡𑁆𑀟’’𑀦𑁆𑀢𑀺 𑀳𑀺 𑀩𑀳𑀮𑀝𑁆𑀞𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀭𑀧𑀤𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁, 𑀲𑀩𑁆𑀩𑀢𑁄𑀪𑀸𑀕𑁂𑀦 𑀯𑀸 𑀕𑁂𑀥𑁄𑀢𑀺 𑀧𑀮𑀺𑀕𑁂𑀥𑁄. 𑀲𑀚𑁆𑀚𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀗𑁆𑀕𑁄. 𑀮𑀕𑁆𑀕𑀦𑀝𑁆𑀞𑁂𑀦 𑀯𑀸 𑀲𑀗𑁆𑀕𑁄. 𑀑𑀲𑀻𑀤𑀦𑀝𑁆𑀞𑁂𑀦 𑀧𑀗𑁆𑀓𑁄. 𑀆𑀓𑀟𑁆𑀠𑀦𑀯𑀲𑁂𑀦 𑀏𑀚𑀸. ‘‘𑀏𑀚𑀸 𑀇𑀫𑀁 𑀧𑀼𑀭𑀺𑀲𑀁 𑀧𑀭𑀺𑀓𑀟𑁆𑀠𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀯𑀜𑁆𑀘𑀦𑀝𑁆𑀞𑁂𑀦 𑀫𑀸𑀬𑀸. 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑀸𑀦𑀁 𑀚𑀦𑀦𑀝𑁆𑀞𑁂𑀦 𑀚𑀦𑀺𑀓𑀸. ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀻’’𑀢𑀺 (𑀲𑀁. 𑀦𑀺. 𑁧.𑁫𑁫) 𑀳𑀺 𑀯𑀼𑀢𑁆𑀢𑀁. 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑁂 𑀤𑀼𑀓𑁆𑀔𑁂𑀦 𑀲𑀁𑀬𑁄𑀚𑀬𑀫𑀸𑀦𑀸 𑀚𑀦𑁂𑀢𑀻𑀢𑀺 𑀲𑀜𑁆𑀚𑀦𑀦𑀻. 𑀖𑀝𑀦𑀝𑁆𑀞𑁂𑀦 𑀲𑀺𑀩𑁆𑀩𑀺𑀦𑀻. 𑀅𑀬𑀜𑁆𑀳𑀺 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑁂 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀺𑀩𑁆𑀩𑀢𑀺 𑀖𑀝𑁂𑀢𑀺 𑀢𑀼𑀦𑁆𑀦𑀓𑀸𑀭𑁄 𑀯𑀺𑀬 𑀧𑀺𑀮𑁄𑀢𑀺𑀓𑀸𑀬 𑀧𑀺𑀮𑁄𑀢𑀺𑀓𑀁, 𑀢𑀲𑁆𑀫𑀸 ‘‘𑀖𑀝𑀦𑀝𑁆𑀞𑁂𑀦 𑀲𑀺𑀩𑁆𑀩𑀺𑀦𑀻’’𑀢𑀺 𑀯𑀼𑀢𑁆𑀢𑀸. 𑀅𑀦𑁂𑀓𑀧𑁆𑀧𑀓𑀸𑀭𑀁 𑀯𑀺𑀲𑀬𑀚𑀸𑀮𑀁 𑀢𑀡𑁆𑀳𑀸𑀯𑀺𑀧𑁆𑀨𑀦𑁆𑀤𑀺𑀢𑀦𑀺𑀯𑁂𑀲𑀲𑀗𑁆𑀔𑀸𑀢𑀁 𑀯𑀸 𑀚𑀸𑀮𑀫𑀲𑁆𑀲𑀸 𑀅𑀢𑁆𑀣𑀻𑀢𑀺 𑀚𑀸𑀮𑀺𑀦𑀻.

𑀆𑀓𑀟𑁆𑀠𑀦𑀝𑁆𑀞𑁂𑀦 𑀲𑀻𑀖𑀲𑁄𑀢𑀸 𑀲𑀭𑀺𑀢𑀸 𑀯𑀺𑀬𑀸𑀢𑀺 𑀲𑀭𑀺𑀢𑀸. 𑀅𑀮𑁆𑀮𑀝𑁆𑀞𑁂𑀦 𑀯𑀸 𑀲𑀭𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀭𑀺𑀢𑀸𑀦𑀺 𑀲𑀺𑀦𑁂𑀳𑀺𑀢𑀸𑀦𑀺 𑀘 𑀲𑁄𑀫𑀦𑀲𑁆𑀲𑀸𑀦𑀺 𑀪𑀯𑀦𑁆𑀢𑀺 𑀚𑀦𑁆𑀢𑀼𑀦𑁄’’𑀢𑀺 (𑀥. 𑀧. 𑁩𑁪𑁧). 𑀅𑀮𑁆𑀮𑀸𑀦𑀺 𑀘𑁂𑀯 𑀲𑀺𑀦𑀺𑀤𑁆𑀥𑀸𑀦𑀺 𑀘𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀦𑀬𑀩𑁆𑀬𑀲𑀦𑀸𑀧𑀸𑀤𑀦𑀝𑁆𑀞𑁂𑀦 𑀓𑀼𑀫𑁆𑀫𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀓𑀁 𑀯𑀺𑀬𑀸𑀢𑀺 𑀲𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀼𑀢𑁆𑀢𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀺𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁯). 𑀭𑀽𑀧𑀸𑀤𑀻𑀲𑀼 𑀯𑀺𑀢𑁆𑀣𑀢𑀝𑁆𑀞𑁂𑀦 𑀯𑀺𑀲𑀢𑀸. 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀮𑀸𑀪𑀢𑁆𑀣𑀸𑀬 𑀲𑀢𑁆𑀢𑁂 𑀆𑀬𑀽𑀳𑀸𑀧𑁂𑀢𑀻𑀢𑀺 𑀆𑀬𑀽𑀳𑀺𑀦𑀻. 𑀉𑀓𑁆𑀓𑀡𑁆𑀞𑀺𑀢𑀼𑀁 𑀅𑀧𑀤𑀸𑀦𑀢𑁄 𑀲𑀳𑀸𑀬𑀝𑁆𑀞𑁂𑀦 𑀤𑀼𑀢𑀺𑀬𑀸. 𑀅𑀬𑀜𑁆𑀳𑀺 𑀲𑀢𑁆𑀢𑀸𑀦𑀁 𑀯𑀝𑁆𑀝𑀲𑁆𑀫𑀺𑀁 𑀉𑀓𑁆𑀓𑀡𑁆𑀞𑀺𑀢𑀼𑀁 𑀦 𑀤𑁂𑀢𑀺, 𑀕𑀢𑀕𑀢𑀝𑁆𑀞𑀸𑀦𑁂 𑀧𑀺𑀬𑀲𑀳𑀸𑀬𑁄 𑀯𑀺𑀬 𑀅𑀪𑀺𑀭𑀫𑀸𑀧𑁂𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺. (𑀇𑀢𑀺𑀯𑀼. 𑁧𑁫; 𑀅. 𑀦𑀺. 𑁪.𑁯; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀧𑀸𑀬𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁭);

𑀧𑀡𑀺𑀥𑀸𑀦𑀓𑀯𑀲𑁂𑀦 𑀧𑀡𑀺𑀥𑀺. 𑀪𑀯𑀦𑁂𑀢𑁆𑀢𑀻𑀢𑀺 𑀪𑀯𑀭𑀚𑁆𑀚𑀼. 𑀏𑀢𑀸𑀬 𑀳𑀺 𑀲𑀢𑁆𑀢𑀸 𑀭𑀚𑁆𑀚𑀼𑀬𑀸 𑀕𑀻𑀯𑀸𑀬𑀁 𑀩𑀤𑁆𑀥𑀸 𑀕𑁄𑀡𑀸 𑀯𑀺𑀬 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀦𑀺𑀬𑁆𑀬𑀦𑁆𑀢𑀺. 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀯𑀦𑀢𑀺 𑀪𑀚𑀢𑀺 𑀅𑀮𑁆𑀮𑀻𑀬𑀢𑀻𑀢𑀺 𑀯𑀦𑀁, 𑀯𑀦𑀢𑀺 𑀬𑀸𑀘𑀢𑀻𑀢𑀺 𑀯𑀸 𑀯𑀦𑀁. 𑀯𑀦𑀣𑁄𑀢𑀺 𑀩𑁆𑀬𑀜𑁆𑀚𑀦𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀅𑀦𑀢𑁆𑀣𑀤𑀼𑀓𑁆𑀔𑀸𑀦𑀁 𑀯𑀸 𑀲𑀫𑀼𑀝𑁆𑀞𑀸𑀧𑀦𑀝𑁆𑀞𑁂𑀦 𑀕𑀳𑀦𑀝𑁆𑀞𑁂𑀦 𑀘 𑀯𑀦𑀁 𑀯𑀺𑀬𑀸𑀢𑀺 𑀯𑀦𑀁. 𑀩𑀮𑀯𑀢𑀡𑁆𑀳𑀸𑀬𑁂𑀢𑀁 𑀦𑀸𑀫𑀁. 𑀕𑀳𑀦𑀢𑀭𑀝𑁆𑀞𑁂𑀦 𑀧𑀦 𑀢𑀢𑁄 𑀩𑀮𑀯𑀢𑀭𑀸 𑀯𑀦𑀣𑁄 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀯𑀦𑀁 𑀙𑀺𑀦𑁆𑀤𑀣 𑀫𑀸 𑀭𑀼𑀓𑁆𑀔𑀁, 𑀯𑀦𑀢𑁄 𑀚𑀸𑀬𑀢𑁂 𑀪𑀬𑀁;

𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀜𑁆𑀘, 𑀦𑀺𑀩𑁆𑀩𑀦𑀸 𑀳𑁄𑀣 𑀪𑀺𑀓𑁆𑀔𑀯𑁄’’𑀢𑀺. (𑀥. 𑀧. 𑁨𑁮𑁩);

𑀲𑀦𑁆𑀣𑀯𑀦𑀯𑀲𑁂𑀦 𑀲𑀦𑁆𑀣𑀯𑁄, 𑀲𑀁𑀲𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀲𑁄 𑀤𑀼𑀯𑀺𑀥𑁄 𑁋 𑀢𑀡𑁆𑀳𑀸𑀲𑀦𑁆𑀣𑀯𑁄 𑀫𑀺𑀢𑁆𑀢𑀲𑀦𑁆𑀣𑀯𑁄 𑀘. 𑀢𑁂𑀲𑀼 𑀇𑀥 𑀢𑀡𑁆𑀳𑀸𑀲𑀦𑁆𑀣𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀺𑀦𑁂𑀳𑀯𑀲𑁂𑀦 𑀲𑁆𑀦𑁂𑀳𑁄. 𑀆𑀮𑀬𑀓𑀭𑀡𑀯𑀲𑁂𑀦 𑀓𑀫𑁆𑀧𑀫𑀸𑀦𑀸 𑀅𑀧𑁂𑀓𑁆𑀔𑀢𑀻𑀢𑀺 𑀅𑀧𑁂𑀓𑁆𑀔𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀇𑀫𑀸𑀦𑀺 𑀢𑁂 𑀤𑁂𑀯 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺, 𑀏𑀢𑁆𑀣 𑀤𑁂𑀯 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁬𑁬). 𑀆𑀮𑀬𑀁 𑀓𑀭𑁄𑀳𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀧𑀸𑀝𑀺𑀬𑁂𑀓𑁆𑀓𑁂 𑀧𑀸𑀝𑀺𑀬𑁂𑀓𑁆𑀓𑁂 𑀆𑀭𑀫𑁆𑀫𑀡𑁂 𑀩𑀦𑁆𑀥𑀢𑀻𑀢𑀺 𑀧𑀝𑀺𑀩𑀦𑁆𑀥𑀼, 𑀜𑀸𑀢𑀓𑀝𑁆𑀞𑁂𑀦 𑀯𑀸 𑀧𑀸𑀝𑀺𑀬𑁂𑀓𑁆𑀓𑁄 𑀩𑀦𑁆𑀥𑀽𑀢𑀺𑀧𑀺 𑀧𑀝𑀺𑀩𑀦𑁆𑀥𑀼. 𑀦𑀺𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀝𑁆𑀞𑁂𑀦𑀧𑀺 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀫𑁄 𑀩𑀦𑁆𑀥𑀼 𑀦𑀸𑀫 𑀦𑀢𑁆𑀣𑀺. 𑀆𑀭𑀫𑁆𑀫𑀡𑀸𑀦𑀁 𑀅𑀲𑀦𑀢𑁄 𑀆𑀲𑀸. 𑀅𑀚𑁆𑀛𑁄𑀢𑁆𑀣𑀭𑀡𑀢𑁄 𑀘𑁂𑀯 𑀢𑀺𑀢𑁆𑀢𑀺𑀁 𑀅𑀦𑀼𑀕𑀦𑁆𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀦𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀆𑀲𑀻𑀲𑀦𑀯𑀲𑁂𑀦 𑀆𑀲𑀻𑀲𑀦𑀸. 𑀆𑀲𑀻𑀲𑀺𑀢𑀲𑁆𑀲 𑀪𑀸𑀯𑁄 𑀆𑀲𑀻𑀲𑀺𑀢𑀢𑁆𑀢𑀁.

𑀇𑀤𑀸𑀦𑀺 𑀢𑀲𑁆𑀲𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀲𑀻𑀲𑀦𑀯𑀲𑁂𑀦 𑀆𑀲𑀸𑀢𑀺 𑀆𑀲𑀸𑀬 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀭𑀽𑀧𑁂 𑀆𑀲𑀸 𑀭𑀽𑀧𑀸𑀲𑀸. 𑀏𑀯𑀁 𑀦𑀯𑀧𑀺 𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀧𑀭𑀺𑀓𑁆𑀔𑀸𑀭𑀮𑁄𑀪𑀯𑀲𑁂𑀦 𑀙𑀝𑁆𑀞𑀁. 𑀢𑀁 𑀯𑀺𑀲𑁂𑀲𑀢𑁄 𑀧𑀩𑁆𑀩𑀚𑀺𑀢𑀸𑀦𑀁, 𑀢𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀅𑀢𑀺𑀢𑁆𑀢𑀺𑀬𑀯𑀢𑁆𑀣𑀼𑀯𑀲𑁂𑀦 𑀕𑀳𑀝𑁆𑀞𑀸𑀦𑀁. 𑀦 𑀳𑀺 𑀢𑁂𑀲𑀁 𑀥𑀦𑀧𑀼𑀢𑁆𑀢𑀚𑀻𑀯𑀺𑀢𑁂𑀳𑀺 𑀅𑀜𑁆𑀜𑀁 𑀧𑀺𑀬𑀢𑀭𑀁 𑀅𑀢𑁆𑀣𑀺. ‘‘𑀇𑀤𑀁 𑀫𑀬𑁆𑀳𑀁, 𑀇𑀤𑀁 𑀫𑀬𑁆𑀳’’𑀦𑁆𑀢𑀺 𑀯𑀸 ‘‘𑀅𑀲𑀼𑀓𑁂𑀦 𑀫𑁂 𑀇𑀤𑀁 𑀤𑀺𑀦𑁆𑀦𑀁, 𑀇𑀤𑀁 𑀤𑀺𑀦𑁆𑀦’’𑀦𑁆𑀢𑀺 𑀯𑀸 𑀏𑀯𑀁 𑀲𑀢𑁆𑀢𑁂 𑀚𑀧𑁆𑀧𑀸𑀧𑁂𑀢𑀻𑀢𑀺 𑀚𑀧𑁆𑀧𑀸. 𑀧𑀭𑀢𑁄 𑀤𑁆𑀯𑁂 𑀧𑀤𑀸𑀦𑀺 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀸𑀦𑀺, 𑀢𑀢𑁄 𑀧𑀭𑀁 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀯𑀺𑀪𑀚𑀺𑀢𑀼𑀁 𑀆𑀭𑀤𑁆𑀥𑀢𑁆𑀢𑀸 𑀧𑀼𑀦 ‘‘𑀚𑀧𑁆𑀧𑀸’’𑀢𑀺 𑀯𑀼𑀢𑁆𑀢𑀁. 𑀚𑀧𑁆𑀧𑀦𑀸𑀓𑀸𑀭𑁄 𑀚𑀧𑁆𑀧𑀦𑀸. 𑀚𑀧𑁆𑀧𑀺𑀢𑀲𑁆𑀲 𑀪𑀸𑀯𑁄 𑀚𑀧𑁆𑀧𑀺𑀢𑀢𑁆𑀢𑀁. 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀬𑁂 𑀮𑀼𑀫𑁆𑀧𑀢𑀺 𑀆𑀓𑀟𑁆𑀠𑀢𑀻𑀢𑀺 𑀮𑁄𑀮𑀼𑀧𑁄, 𑀮𑁄𑀮𑀼𑀧𑀲𑁆𑀲 𑀪𑀸𑀯𑁄 𑀮𑁄𑀮𑀼𑀧𑁆𑀧𑀁. 𑀮𑁄𑀮𑀼𑀧𑁆𑀧𑀦𑀸𑀓𑀸𑀭𑁄 𑀮𑁄𑀮𑀼𑀧𑁆𑀧𑀸𑀬𑀦𑀸. 𑀮𑁄𑀮𑀼𑀧𑁆𑀧𑀲𑀫𑀗𑁆𑀕𑀺𑀦𑁄 𑀪𑀸𑀯𑁄 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁.

𑀧𑀼𑀘𑁆𑀙𑀜𑁆𑀚𑀺𑀓𑀢𑀸𑀢𑀺 𑀬𑀸𑀬 𑀢𑀡𑁆𑀳𑀸𑀬 𑀮𑀸𑀪𑀝𑁆𑀞𑀸𑀦𑁂𑀲𑀼 𑀧𑀼𑀘𑁆𑀙𑀁 𑀘𑀸𑀮𑀬𑀫𑀸𑀦𑀸 𑀲𑀼𑀦𑀔𑀸 𑀯𑀺𑀬 𑀓𑀫𑁆𑀧𑀫𑀸𑀦𑀸 𑀯𑀺𑀘𑀭𑀦𑁆𑀢𑀺, 𑀢𑀁 𑀢𑀲𑁆𑀲𑀸 𑀓𑀫𑁆𑀧𑀦𑀢𑀡𑁆𑀳𑀸𑀬 𑀦𑀸𑀫𑀁. 𑀲𑀸𑀥𑀼 𑀫𑀦𑀸𑀧𑀫𑀦𑀸𑀧𑁂 𑀯𑀺𑀲𑀬𑁂 𑀓𑀸𑀫𑁂𑀢𑀻𑀢𑀺 𑀲𑀸𑀥𑀼𑀓𑀸𑀫𑁄, 𑀢𑀲𑁆𑀲 𑀪𑀸𑀯𑁄 𑀲𑀸𑀥𑀼𑀓𑀫𑁆𑀬𑀢𑀸. 𑀫𑀸𑀢𑀸𑀫𑀸𑀢𑀼𑀘𑁆𑀙𑀸𑀢𑀺𑀆𑀤𑀺𑀓𑁂 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀭𑀸𑀕𑁄𑀢𑀺 𑀅𑀥𑀫𑁆𑀫𑀭𑀸𑀕𑁄. 𑀬𑀼𑀢𑁆𑀢𑀝𑁆𑀞𑀸𑀦𑁂𑀧𑀺 𑀩𑀮𑀯𑀸 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑁄 𑀮𑁄𑀪𑁄 𑀯𑀺𑀲𑀫𑀮𑁄𑀪𑁄. ‘‘𑀭𑀸𑀕𑁄 𑀯𑀺𑀲𑀫’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁯𑁨𑁪) 𑀯𑀸 𑀬𑀼𑀢𑁆𑀢𑀝𑁆𑀞𑀸𑀦𑁂 𑀯𑀸 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀯𑀸 𑀉𑀧𑁆𑀧𑀦𑁆𑀦𑁄 𑀙𑀦𑁆𑀤𑀭𑀸𑀕𑁄 𑀅𑀥𑀫𑁆𑀫𑀝𑁆𑀞𑁂𑀦 𑀅𑀥𑀫𑁆𑀫𑀭𑀸𑀕𑁄. 𑀯𑀺𑀲𑀫𑀝𑁆𑀞𑁂𑀦 𑀯𑀺𑀲𑀫𑀮𑁄𑀪𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀸𑀦𑀁 𑀦𑀺𑀓𑀸𑀫𑀦𑀯𑀲𑁂𑀦 𑀦𑀺𑀓𑀦𑁆𑀢𑀺. 𑀦𑀺𑀓𑀸𑀫𑀦𑀸𑀓𑀸𑀭𑁄 𑀦𑀺𑀓𑀸𑀫𑀦𑀸. 𑀧𑀢𑁆𑀣𑀬𑀦𑀯𑀲𑁂𑀦 𑀧𑀢𑁆𑀣𑀦𑀸. 𑀧𑀺𑀳𑀸𑀬𑀦𑀯𑀲𑁂𑀦 𑀧𑀺𑀳𑀦𑀸. 𑀲𑀼𑀝𑁆𑀞𑀼 𑀧𑀢𑁆𑀣𑀦𑀸 𑀲𑀫𑁆𑀧𑀢𑁆𑀣𑀦𑀸. 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀢𑀡𑁆𑀳𑀸 𑀪𑀯𑀢𑀡𑁆𑀳𑀸. 𑀉𑀘𑁆𑀙𑁂𑀤𑀲𑀗𑁆𑀔𑀸𑀢𑁂 𑀯𑀺𑀪𑀯𑁂 𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸. 𑀲𑀼𑀤𑁆𑀥𑁂 𑀭𑀽𑀧𑀪𑀯𑀲𑁆𑀫𑀺𑀁𑀬𑁂𑀯 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸. 𑀅𑀭𑀽𑀧𑀪𑀯𑁂 𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄, 𑀦𑀺𑀭𑁄𑀥𑁂 𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸. 𑀭𑀽𑀧𑁂 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸. 𑀲𑀤𑁆𑀤𑁂 𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸. 𑀕𑀦𑁆𑀥𑀢𑀡𑁆𑀳𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀑𑀖𑀸𑀤𑀬𑁄 𑀯𑀼𑀢𑁆𑀢𑀢𑁆𑀣𑀸𑀯.

𑀓𑀼𑀲𑀮𑀥𑀫𑁆𑀫𑁂 𑀆𑀯𑀭𑀢𑀻𑀢𑀺 𑀆𑀯𑀭𑀡𑀁. 𑀙𑀸𑀤𑀦𑀯𑀲𑁂𑀦 𑀙𑀤𑀦𑀁. 𑀲𑀢𑁆𑀢𑁂 𑀯𑀝𑁆𑀝𑀲𑁆𑀫𑀺𑀁 𑀩𑀦𑁆𑀥𑀢𑀻𑀢𑀺 𑀩𑀦𑁆𑀥𑀦𑀁. 𑀘𑀺𑀢𑁆𑀢𑀁 𑀉𑀧𑀳𑀦𑁆𑀢𑁆𑀯𑀸 𑀓𑀺𑀮𑀺𑀲𑁆𑀲𑀢𑀺 𑀲𑀁𑀓𑀺𑀮𑀺𑀝𑁆𑀞𑀁 𑀓𑀭𑁄𑀢𑀻𑀢𑀺 𑀉𑀧𑀓𑁆𑀓𑀺𑀮𑁂𑀲𑁄. 𑀣𑀸𑀫𑀕𑀢𑀝𑁆𑀞𑁂𑀦 𑀅𑀦𑀼 𑀅𑀦𑀼 𑀲𑁂𑀢𑀻𑀢𑀺 𑀅𑀦𑀼𑀲𑀬𑁄. 𑀉𑀧𑁆𑀧𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑀤𑀸𑀦𑁂𑀦 𑀓𑀼𑀲𑀮𑀯𑀸𑀭𑀁 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. ‘‘𑀘𑁄𑀭𑀸 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀁𑀲𑀼, 𑀥𑀼𑀢𑁆𑀢𑀸 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀁𑀲𑀽’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁪𑁩𑁦) 𑀳𑀺 𑀫𑀕𑁆𑀕𑀁 𑀕𑀡𑁆𑀳𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀏𑀯𑀫𑀺𑀥𑀸𑀧𑀺 𑀕𑀳𑀡𑀝𑁆𑀞𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀮𑀺𑀯𑁂𑀞𑀦𑀝𑁆𑀞𑁂𑀦 𑀮𑀢𑀸 𑀯𑀺𑀬𑀸𑀢𑀺 𑀮𑀢𑀸. ‘‘𑀮𑀢𑀸 𑀉𑀧𑁆𑀧𑀚𑁆𑀚 𑀢𑀺𑀝𑁆𑀞𑀢𑀻’’𑀢𑀺 (𑀥. 𑀧. 𑁩𑁪𑁦) 𑀆𑀕𑀢𑀝𑁆𑀞𑀸𑀦𑁂𑀧𑀺 𑀅𑀬𑀁 𑀢𑀡𑁆𑀳𑀸 𑀮𑀢𑀸𑀢𑀺 𑀯𑀼𑀢𑁆𑀢𑀸. 𑀯𑀺𑀯𑀺𑀥𑀸𑀦𑀺 𑀯𑀢𑁆𑀣𑀽𑀦𑀺 𑀇𑀘𑁆𑀙𑀢𑀻𑀢𑀺 𑀯𑁂𑀯𑀺𑀘𑁆𑀙𑀁. 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀫𑀽𑀮𑀦𑁆𑀢𑀺 𑀤𑀼𑀓𑁆𑀔𑀫𑀽𑀮𑀁. 𑀢𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀦𑁆𑀢𑀺 𑀤𑀼𑀓𑁆𑀔𑀦𑀺𑀤𑀸𑀦𑀁. 𑀢𑀁 𑀤𑀼𑀓𑁆𑀔𑀁 𑀇𑀢𑁄 𑀧𑀪𑀯𑀢𑀻𑀢𑀺 𑀤𑀼𑀓𑁆𑀔𑀧𑁆𑀧𑀪𑀯𑁄. 𑀩𑀦𑁆𑀥𑀦𑀝𑁆𑀞𑁂𑀦 𑀧𑀸𑀲𑁄 𑀯𑀺𑀬𑀸𑀢𑀺 𑀧𑀸𑀲𑁄, 𑀫𑀸𑀭𑀲𑁆𑀲 𑀧𑀸𑀲𑁄 𑀫𑀸𑀭𑀧𑀸𑀲𑁄. 𑀤𑀼𑀭𑀼𑀕𑁆𑀕𑀺𑀮𑀦𑀝𑁆𑀞𑁂𑀦 𑀩𑀴𑀺𑀲𑀁 𑀯𑀺𑀬𑀸𑀢𑀺 𑀩𑀴𑀺𑀲𑀁, 𑀫𑀸𑀭𑀲𑁆𑀲 𑀩𑀴𑀺𑀲𑀁 𑀫𑀸𑀭𑀩𑀴𑀺𑀲𑀁. 𑀢𑀡𑁆𑀳𑀸𑀪𑀺𑀪𑀽𑀢𑀸 𑀫𑀸𑀭𑀲𑁆𑀲 𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀉𑀧𑀭𑀺 𑀫𑀸𑀭𑁄 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀫𑀸𑀭𑀲𑁆𑀲 𑀯𑀺𑀲𑀬𑁄𑀢𑀺 𑀫𑀸𑀭𑀯𑀺𑀲𑀬𑁄. 𑀲𑀦𑁆𑀤𑀦𑀝𑁆𑀞𑁂𑀦 𑀢𑀡𑁆𑀳𑀸𑀯 𑀦𑀤𑀻 𑀢𑀡𑁆𑀳𑀸𑀦𑀤𑀻. 𑀅𑀚𑁆𑀛𑁄𑀢𑁆𑀣𑀭𑀡𑀝𑁆𑀞𑁂𑀦 𑀢𑀡𑁆𑀳𑀸𑀯 𑀚𑀸𑀮𑀁 𑀢𑀡𑁆𑀳𑀸𑀚𑀸𑀮𑀁. 𑀬𑀣𑀸 𑀲𑀼𑀦𑀔𑀸 𑀕𑀤𑁆𑀤𑀽𑀮𑀩𑀤𑁆𑀥𑀸 𑀬𑀤𑀺𑀘𑁆𑀙𑀓𑀁 𑀦𑀺𑀬𑁆𑀬𑀦𑁆𑀢𑀺, 𑀏𑀯𑀁 𑀢𑀡𑁆𑀳𑀸𑀩𑀤𑁆𑀥𑀸 𑀲𑀢𑁆𑀢𑀸𑀢𑀺 𑀤𑀴𑁆𑀳𑀩𑀦𑁆𑀥𑀦𑀝𑁆𑀞𑁂𑀦 𑀕𑀤𑁆𑀤𑀽𑀮𑀁 𑀯𑀺𑀬𑀸𑀢𑀺 𑀕𑀤𑁆𑀤𑀽𑀮𑀁, 𑀢𑀡𑁆𑀳𑀸𑀯 𑀕𑀤𑁆𑀤𑀽𑀮𑀁 𑀢𑀡𑁆𑀳𑀸𑀕𑀤𑁆𑀤𑀽𑀮𑀁. 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦 𑀢𑀡𑁆𑀳𑀸𑀯 𑀲𑀫𑀼𑀤𑁆𑀤𑁄 𑀢𑀡𑁆𑀳𑀸𑀲𑀫𑀼𑀤𑁆𑀤𑁄. 𑀅𑀪𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀅𑀪𑀺𑀚𑁆𑀛𑀸. 𑀮𑀼𑀩𑁆𑀪𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀮𑁄𑀪𑁄. 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀧𑀢𑀺𑀝𑁆𑀞𑀝𑁆𑀞𑁂𑀦 𑀫𑀽𑀮𑀁.

𑀯𑀺𑀲𑀢𑁆𑀢𑀺𑀓𑀸𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸 𑀇𑀢𑀺. 𑀓𑁂𑀦𑀝𑁆𑀞𑁂𑀦𑀸𑀢𑀺 𑀓𑁂𑀦 𑀲𑀪𑀸𑀯𑁂𑀦. 𑀯𑀺𑀲𑀢𑀸𑀢𑀺 𑀯𑀺𑀢𑁆𑀣𑀝𑀸 𑀭𑀽𑀧𑀸𑀤𑀻𑀲𑀼. 𑀯𑀺𑀲𑀸𑀮𑀸𑀢𑀺 𑀯𑀺𑀧𑀼𑀮𑀸. 𑀯𑀺𑀲𑀝𑀸𑀢𑀺 𑀢𑁂𑀪𑀽𑀫𑀓𑀩𑁆𑀬𑀸𑀧𑀓𑀯𑀲𑁂𑀦 𑀯𑀺𑀲𑀝𑀸. 𑀧𑀼𑀭𑀺𑀫𑀯𑀘𑀦𑀫𑁂𑀯 𑀢𑀓𑀸𑀭𑀲𑁆𑀲 𑀝𑀓𑀸𑀭𑀁 𑀓𑀢𑁆𑀯𑀸 𑀩𑁆𑀬𑀜𑁆𑀚𑀦𑀯𑀺𑀪𑀸𑀕𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀲𑀓𑁆𑀓𑀢𑀻𑀢𑀺 𑀧𑀭𑀺𑀲𑀧𑁆𑀧𑀢𑀺 𑀲𑀳𑀢𑀺 𑀯𑀸. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀢𑁆𑀣𑀼𑀦𑀸 𑀧𑀸𑀤𑁂𑀦 𑀢𑀸𑀴𑀺𑀬𑀫𑀸𑀦𑁄𑀧𑀺 𑀲𑀳𑀢𑀺. 𑀑𑀲𑀓𑁆𑀓𑀦𑀁 𑀯𑀺𑀧𑁆𑀨𑀦𑁆𑀤𑀦𑀁 𑀯𑀸 ‘‘𑀯𑀺𑀲𑀓𑁆𑀓𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀢𑀻’’𑀢𑀺 𑀓𑁂𑀘𑀺 𑀯𑀡𑁆𑀡𑀬𑀦𑁆𑀢𑀺. 𑀯𑀺𑀲𑀁𑀳𑀭𑀢𑀻𑀢𑀺 𑀢𑀣𑀸 𑀢𑀣𑀸 𑀓𑀸𑀫𑁂𑀲𑀼 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀻 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀺𑀢𑁄 𑀘𑀺𑀢𑁆𑀢𑀁 𑀲𑀁𑀳𑀭𑀢𑀺 𑀲𑀗𑁆𑀔𑀺𑀧𑀢𑀺, 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀁, 𑀢𑀁 𑀳𑀭𑀢𑀺, 𑀯𑀳𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀁 𑀦𑀺𑀘𑁆𑀘𑀸𑀤𑀺𑀢𑁄 𑀕𑀡𑁆𑀳𑀦𑁆𑀢𑀻 𑀯𑀺𑀲𑀁𑀯𑀸𑀤𑀺𑀓𑀸 𑀳𑁄𑀢𑀺. 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑀫𑀽𑀮𑀸, 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀺𑀪𑀽𑀢𑀸 𑀯𑁂𑀤𑀦𑀸 𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀫𑀽𑀮𑀸. 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀸 𑀯𑀺𑀲𑀁 𑀨𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀨𑀮𑀸. 𑀬𑀸𑀬 𑀢𑀡𑁆𑀳𑀸𑀬 𑀭𑀽𑀧𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲𑁂𑀯 𑀧𑀭𑀺𑀪𑁄𑀕𑁄 𑀳𑁄𑀢𑀺, 𑀦 𑀅𑀫𑀢𑀲𑁆𑀲𑀸𑀢𑀺 𑀲𑀸 ‘‘𑀯𑀺𑀲𑀧𑀭𑀺𑀪𑁄𑀕𑀸’’𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀲𑁆𑀲𑀸 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑀸𑀮𑀸 𑀯𑀸 𑀧𑀦𑀸𑀢𑀺 𑀫𑀳𑀦𑁆𑀢𑀻 𑀏𑀯 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀢𑀡𑁆𑀳𑀸, 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑀸. 𑀓𑀼𑀮𑁂 𑀕𑀡𑁂𑀢𑀺𑀆𑀤𑀻𑀦𑀺 𑀏𑀓𑀸𑀤𑀲 𑀧𑀤𑀸𑀦𑀺 𑀮𑁄𑀮𑀼𑀧𑁆𑀧𑀸𑀤𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀓𑀸𑀫𑀥𑀸𑀢𑀼𑀢𑁆𑀢𑀺𑀓𑁄 𑀓𑀫𑁆𑀫𑀯𑀝𑁆𑀝𑀯𑀲𑁂𑀦 𑀯𑀺𑀪𑀢𑁆𑀢𑁄, 𑀓𑀸𑀫𑀪𑀯𑀢𑁆𑀢𑀺𑀓𑁄 𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀯𑀺𑀪𑀢𑁆𑀢𑁄, 𑀲𑀜𑁆𑀜𑀸𑀪𑀯𑀢𑁆𑀢𑀺𑀓𑁄 𑀲𑀜𑁆𑀜𑀸𑀯𑀲𑁂𑀦 𑀯𑀺𑀪𑀢𑁆𑀢𑁄, 𑀏𑀓𑀯𑁄𑀓𑀸𑀭𑀪𑀯𑀢𑁆𑀢𑀺𑀓𑁄 𑀔𑀦𑁆𑀥𑀯𑀲𑁂𑀦 𑀯𑀺𑀪𑀢𑁆𑀢𑁄. 𑀅𑀢𑀻𑀢𑀢𑁆𑀢𑀺𑀓𑁄 𑀓𑀸𑀮𑀯𑀲𑁂𑀦, 𑀤𑀺𑀝𑁆𑀞𑀘𑀢𑀼𑀓𑁆𑀓𑁄 𑀆𑀭𑀫𑁆𑀫𑀡𑀯𑀲𑁂𑀦, 𑀅𑀧𑀸𑀬𑀢𑁆𑀢𑀺𑀓𑁄 𑀑𑀓𑀸𑀲𑀯𑀲𑁂𑀦, 𑀔𑀦𑁆𑀥𑀢𑁆𑀢𑀺𑀓𑁄 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀯𑀲𑁂𑀦 𑀯𑀺𑀪𑀢𑁆𑀢𑁄𑀢𑀺 𑀜𑀸𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑁂𑀦 𑀅𑀢𑁆𑀣𑀤𑀻𑀧𑀦𑀸 𑀯𑀺𑀪𑀸𑀯𑀦𑀸 𑀘 𑁋

‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑀥𑀸𑀢𑀼? 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼’’ (𑀥. 𑀲. 𑁧𑁨𑁮𑁭).

‘‘𑀢𑀢𑁆𑀣 𑀓𑀢𑀫𑀸 𑀭𑀽𑀧𑀥𑀸𑀢𑀼? 𑀳𑁂𑀝𑁆𑀞𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀅𑀓𑀦𑀺𑀝𑁆𑀞𑁂 𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀥𑀸𑀢𑀼’’ (𑀥. 𑀲. 𑁧𑁨𑁮𑁯).

‘‘𑀢𑀢𑁆𑀣 𑀓𑀢𑀫𑀸 𑀅𑀭𑀽𑀧𑀥𑀸𑀢𑀼? 𑀳𑁂𑀝𑁆𑀞𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀼𑀧𑀕𑁂 𑀤𑁂𑀯𑁂 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀼𑀧𑀕𑁂 𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀭𑀽𑀧𑀥𑀸𑀢𑀽’’𑀢𑀺 (𑀥. 𑀲. 𑁧𑁨𑁯𑁧). 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀸𑀫𑀥𑀸𑀢𑀽𑀢𑀺 𑀓𑀸𑀫𑀪𑀯𑁄, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀮𑀩𑁆𑀪𑀦𑁆𑀢𑀺. 𑀭𑀽𑀧𑀥𑀸𑀢𑀽𑀢𑀺 𑀭𑀽𑀧𑀪𑀯𑁄, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀮𑀩𑁆𑀪𑀦𑁆𑀢𑀺. 𑀅𑀭𑀽𑀧𑀥𑀸𑀢𑀽𑀢𑀺 𑀅𑀭𑀽𑀧𑀪𑀯𑁄, 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀣 𑀯𑀸 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀬𑀼𑀢𑁆𑀢𑀸 𑀥𑀸𑀢𑀼 𑀓𑀸𑀫𑀥𑀸𑀢𑀼, 𑀓𑀸𑀫𑀲𑀗𑁆𑀔𑀸𑀢𑀸 𑀯𑀸 𑀥𑀸𑀢𑀼 𑀓𑀸𑀫𑀥𑀸𑀢𑀼. 𑀓𑀸𑀫𑀁 𑀧𑀳𑀸𑀬 𑀭𑀽𑀧𑁂𑀦 𑀬𑀼𑀢𑁆𑀢𑀸 𑀥𑀸𑀢𑀼 𑀭𑀽𑀧𑀥𑀸𑀢𑀼, 𑀭𑀽𑀧𑀲𑀗𑁆𑀔𑀸𑀢𑀸 𑀯𑀸 𑀥𑀸𑀢𑀼 𑀭𑀽𑀧𑀥𑀸𑀢𑀼. 𑀓𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀳𑀸𑀬 𑀅𑀭𑀽𑀧𑁂𑀦 𑀬𑀼𑀢𑁆𑀢𑀸 𑀥𑀸𑀢𑀼 𑀅𑀭𑀽𑀧𑀥𑀸𑀢𑀼, 𑀅𑀭𑀽𑀧𑀲𑀗𑁆𑀔𑀸𑀢𑀸 𑀯𑀸 𑀥𑀸𑀢𑀼 𑀅𑀭𑀽𑀧𑀥𑀸𑀢𑀼. 𑀢𑀸 𑀏𑀯 𑀥𑀸𑀢𑀼𑀬𑁄 𑀧𑀼𑀦 𑀪𑀯𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸. 𑀪𑀯𑀦𑁆𑀢𑀻𑀢𑀺 𑀳𑀺 𑀪𑀯𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀜𑁆𑀜𑀸𑀬 𑀬𑀼𑀢𑁆𑀢𑁄 𑀪𑀯𑁄, 𑀲𑀜𑁆𑀜𑀸𑀯𑀢𑀁 𑀯𑀸 𑀪𑀯𑁄, 𑀲𑀜𑁆𑀜𑀸 𑀯𑀸 𑀏𑀢𑁆𑀣 𑀪𑀯𑁂 𑀅𑀢𑁆𑀣𑀻𑀢𑀺 𑀲𑀜𑁆𑀜𑀸𑀪𑀯𑁄. 𑀲𑁄 𑀓𑀸𑀫𑀪𑀯𑁄 𑀘 𑀅𑀲𑀜𑁆𑀜𑀸𑀪𑀯𑀫𑀼𑀢𑁆𑀢𑁄 𑀭𑀽𑀧𑀪𑀯𑁄 𑀘 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀫𑀼𑀢𑁆𑀢𑁄 𑀅𑀭𑀽𑀧𑀪𑀯𑁄 𑀘 𑀳𑁄𑀢𑀺.

𑀦 𑀲𑀜𑁆𑀜𑀸𑀪𑀯𑁄 𑀅𑀲𑀜𑁆𑀜𑀸𑀪𑀯𑁄, 𑀲𑁄 𑀭𑀽𑀧𑀪𑀯𑁂𑀓𑀤𑁂𑀲𑁄. 𑀑𑀴𑀸𑀭𑀺𑀓𑀢𑁆𑀢𑀸𑀪𑀸𑀯𑀢𑁄 𑀦𑁂𑀯𑀲𑀜𑁆𑀜𑀸, 𑀲𑀼𑀔𑀼𑀫𑀢𑁆𑀢𑁂𑀦 𑀲𑀩𑁆𑀪𑀸𑀯𑀢𑁄 𑀦𑀸𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸, 𑀢𑀸𑀬 𑀬𑀼𑀢𑁆𑀢𑁄 𑀪𑀯𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄. 𑀅𑀣 𑀯𑀸 𑀑𑀴𑀸𑀭𑀺𑀓𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀸 𑀲𑀼𑀔𑀼𑀫𑀸𑀬 𑀘 𑀪𑀸𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀅𑀲𑁆𑀫𑀺𑀁 𑀪𑀯𑁂𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄, 𑀲𑁄 𑀅𑀭𑀽𑀧𑀪𑀯𑁂𑀓𑀤𑁂𑀲𑁄. 𑀏𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑁄𑀓𑀺𑀡𑁆𑀡𑁄 𑀪𑀯𑁄, 𑀏𑀓𑁄 𑀯𑀸 𑀯𑁄𑀓𑀸𑀭𑁄, 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀏𑀓𑀯𑁄𑀓𑀸𑀭𑀪𑀯𑁄, 𑀲𑁄 𑀅𑀲𑀜𑁆𑀜𑀸𑀪𑀯𑁄𑀯. 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀯𑁄𑀓𑀺𑀡𑁆𑀡𑁄 𑀪𑀯𑁄, 𑀘𑀢𑁆𑀢𑀸𑀭𑁄 𑀯𑀸 𑀯𑁄𑀓𑀸𑀭𑀸 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀲𑁄 𑀅𑀭𑀽𑀧𑀪𑀯𑁄 𑀏𑀯. 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑁄𑀓𑀺𑀡𑁆𑀡𑁄 𑀪𑀯𑁄, 𑀧𑀜𑁆𑀘 𑀯𑀸 𑀯𑁄𑀓𑀸𑀭𑀸 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁄, 𑀲𑁄 𑀓𑀸𑀫𑀪𑀯𑁄 𑀘 𑀭𑀽𑀧𑀪𑀯𑁂𑀓𑀤𑁂𑀲𑁄 𑀘 𑀳𑁄𑀢𑀺. 𑀅𑀢𑀻𑀢𑀢𑁆𑀢𑀺𑀓𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁄𑀯. 𑀤𑀺𑀝𑁆𑀞𑀦𑁆𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀽𑀧𑀸𑀭𑀫𑁆𑀫𑀡𑀁. 𑀲𑀼𑀢𑀦𑁆𑀢𑀺 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀁 𑀲𑀤𑁆𑀤𑀸𑀭𑀫𑁆𑀫𑀡𑀁. 𑀫𑀼𑀢𑀦𑁆𑀢𑀺 𑀨𑀼𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀦𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀸𑀦𑀺 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸𑀦𑀺. 𑀯𑀺𑀜𑁆𑀜𑀸𑀢𑀩𑁆𑀩𑀁 𑀦𑀸𑀫 𑀫𑀦𑀲𑀸 𑀚𑀸𑀦𑀺𑀢𑀩𑁆𑀩𑀁 𑀥𑀫𑁆𑀫𑀸𑀭𑀫𑁆𑀫𑀡𑀁. 𑀢𑁂𑀲𑀼 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼. 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀫𑀳𑀦𑁆𑀢𑀸 𑀧𑀢𑁆𑀣𑀝𑀸.

𑀅𑀧𑀸𑀬𑀮𑁄𑀓𑁂𑀢𑀺 𑀯𑀟𑁆𑀠𑀺𑀲𑀗𑁆𑀔𑀸𑀢𑀲𑁆𑀲 𑀅𑀬𑀲𑁆𑀲 𑀅𑀪𑀸𑀯𑁂𑀦 𑀅𑀧𑀸𑀬𑁄, 𑀢𑀲𑁆𑀫𑀺𑀁 𑀅𑀧𑀸𑀬𑀮𑁄𑀓𑁂. 𑀔𑀦𑁆𑀥𑀮𑁄𑀓𑁂𑀢𑀺 𑀭𑀸𑀲𑀝𑁆𑀞𑁂𑀦 𑀭𑀽𑀧𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀏𑀯 𑀮𑁄𑀓𑁄. 𑀥𑀸𑀢𑀼𑀮𑁄𑀓𑁂𑀢𑀺 𑀲𑀼𑀜𑁆𑀜𑀢𑀝𑁆𑀞𑁂𑀦 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀏𑀯 𑀮𑁄𑀓𑁄. 𑀆𑀬𑀢𑀦𑀮𑁄𑀓𑁂𑀢𑀺 𑀆𑀬𑀢𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀏𑀯 𑀮𑁄𑀓𑁄. 𑀲𑀩𑁆𑀩𑁂𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀮𑁄𑀓𑁂 𑀯𑀺𑀲𑀝𑀸 𑀯𑀺𑀢𑁆𑀣𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀲𑀢𑁄𑀢𑀺 𑀲𑀭𑀢𑀻𑀢𑀺 𑀲𑀢𑁄, 𑀧𑀼𑀕𑁆𑀕𑀮𑁂𑀦 𑀲𑀢𑀺 𑀯𑀼𑀢𑁆𑀢𑀸.

𑀢𑀢𑁆𑀣 𑀲𑀭𑀡𑀮𑀓𑁆𑀔𑀡𑀸 𑀲𑀢𑀺. 𑀲𑀭𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀲𑀭𑀢𑀺, 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀢𑀺. 𑀲𑀸 𑀧𑀦𑁂𑀲𑀸 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸, 𑀅𑀲𑀫𑁆𑀫𑁄𑀲𑀦𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸, 𑀓𑀸𑀬𑀸𑀤𑀺𑀲𑀢𑀺𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀯𑀸. 𑀆𑀭𑀫𑁆𑀫𑀡𑁂 𑀤𑀴𑁆𑀳𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀧𑀦 𑀏𑀲𑀺𑀓𑀸 𑀯𑀺𑀬, 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀁 𑀭𑀓𑁆𑀔𑀡𑀢𑁄 𑀤𑁄𑀯𑀸𑀭𑀺𑀓𑁄 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸.

𑀢𑀲𑁆𑀲𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀢𑀼𑀩𑁆𑀩𑀺𑀥𑀁 𑀲𑀢𑀺𑀧𑀝𑁆𑀞𑀸𑀦𑀫𑀸𑀳. 𑀢𑀢𑁆𑀣 𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂. 𑀭𑀽𑀧𑀓𑀸𑀬𑁄 𑀳𑀺 𑀇𑀥 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀓𑁂𑀲𑀸𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀲𑀫𑀽𑀳𑀝𑁆𑀞𑁂𑀦 𑀳𑀢𑁆𑀣𑀺𑀓𑀸𑀬𑀭𑀣𑀓𑀸𑀬𑀸𑀤𑀬𑁄 𑀯𑀺𑀬 ‘‘𑀓𑀸𑀬𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀘 𑀲𑀫𑀽𑀳𑀝𑁆𑀞𑁂𑀦, 𑀏𑀯𑀁 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑀝𑁆𑀞𑁂𑀦. 𑀓𑀼𑀘𑁆𑀙𑀺𑀢𑀸𑀦𑀜𑁆𑀳𑀺 𑀧𑀭𑀫𑀚𑁂𑀕𑀼𑀘𑁆𑀙𑀸𑀦𑀁 𑀲𑁄 𑀆𑀬𑁄𑀢𑀺𑀧𑀺 𑀓𑀸𑀬𑁄. 𑀆𑀬𑁄𑀢𑀺 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀆𑀬𑀦𑁆𑀢𑀺 𑀢𑀢𑁄𑀢𑀺 𑀆𑀬𑁄. 𑀓𑁂 𑀆𑀬𑀦𑁆𑀢𑀻𑀢𑀺? 𑀓𑀼𑀘𑁆𑀙𑀺𑀢𑀸 𑀓𑁂𑀲𑀸𑀤𑀬𑁄. 𑀇𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀆𑀬𑁄𑀢𑀺 𑀓𑀸𑀬𑁄.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑀓𑀸𑀬𑀲𑁆𑀲 𑀅𑀦𑀼𑀧𑀲𑁆𑀲𑀦𑀸, 𑀓𑀸𑀬𑀁 𑀯𑀸 𑀅𑀦𑀼𑀧𑀲𑁆𑀲𑀦𑀸, ‘‘𑀓𑀸𑀬𑁂’’𑀢𑀺 𑀘 𑀯𑀢𑁆𑀯𑀸𑀧𑀺 𑀧𑀼𑀦 ‘‘𑀓𑀸𑀬𑀸𑀦𑀼𑀧𑀲𑁆𑀲𑀦𑀸’’𑀢𑀺 𑀤𑀼𑀢𑀺𑀬𑀁 𑀓𑀸𑀬𑀕𑁆𑀕𑀳𑀡𑀁 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀦 𑀦 𑀓𑀸𑀬𑁂 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀯𑀸, 𑀅𑀣 𑀔𑁄 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑁂𑀯𑀸𑀢𑀺 𑀓𑀸𑀬𑀲𑀗𑁆𑀔𑀸𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀓𑀸𑀭𑀲𑁆𑀲𑁂𑀯 𑀤𑀲𑁆𑀲𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺, 𑀢𑀣𑀸 𑀦 𑀓𑀸𑀬𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸, 𑀦𑀸𑀧𑀺 𑀓𑁂𑀲𑀮𑁄𑀫𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀼𑀧𑀲𑁆𑀲𑀦𑀸. 𑀬𑁄𑀧𑀺 𑀘𑁂𑀢𑁆𑀣 𑀓𑁂𑀲𑀮𑁄𑀫𑀸𑀤𑀺𑀓𑁄 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑁄 𑀓𑀸𑀬𑁄, 𑀢𑀢𑁆𑀣𑀸𑀧𑀺 𑀦 𑀪𑀽𑀢𑀼𑀧𑀸𑀤𑀸𑀬𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸, 𑀅𑀣 𑀔𑁄 𑀭𑀣𑀲𑀫𑁆𑀪𑀸𑀭𑀸𑀦𑀼𑀧𑀲𑁆𑀲𑀓𑀲𑁆𑀲 𑀯𑀺𑀬 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑀽𑀳𑀸𑀦𑀼𑀧𑀲𑁆𑀲𑀦𑀸, 𑀦𑀕𑀭𑀸𑀯𑀬𑀯𑀸𑀦𑀼𑀧𑀲𑁆𑀲𑀓𑀲𑁆𑀲 𑀯𑀺𑀬 𑀓𑁂𑀲𑀮𑁄𑀫𑀸𑀤𑀺𑀲𑀫𑀽𑀳𑀸𑀦𑀼𑀧𑀲𑁆𑀲𑀦𑀸, 𑀓𑀤𑀮𑀺𑀓𑁆𑀔𑀦𑁆𑀥𑀧𑀢𑁆𑀢𑀯𑀝𑁆𑀝𑀺𑀯𑀺𑀦𑀺𑀪𑀼𑀚𑀦𑀓𑀲𑁆𑀲 𑀯𑀺𑀬 𑀭𑀺𑀢𑁆𑀢𑀫𑀼𑀝𑁆𑀞𑀺𑀯𑀺𑀦𑀺𑀯𑁂𑀞𑀓𑀲𑁆𑀲 𑀯𑀺𑀬 𑀘 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀸𑀦𑀼𑀧𑀲𑁆𑀲𑀦𑀸𑀬𑁂𑀯𑀸𑀢𑀺 𑀲𑀫𑀽𑀳𑀯𑀲𑁂𑀦𑁂𑀯 𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀯𑀢𑁆𑀣𑀼𑀦𑁄 𑀦𑀸𑀦𑀧𑁆𑀧𑀓𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀦 𑀳𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀲𑀫𑀽𑀳𑀯𑀺𑀦𑀺𑀫𑀼𑀢𑁆𑀢𑁄 𑀓𑀸𑀬𑁄 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀥𑀫𑁆𑀫𑁄 𑀤𑀺𑀲𑁆𑀲𑀢𑀺, 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑀫𑀢𑁆𑀢𑁂𑀬𑁂𑀯 𑀧𑀦 𑀢𑀣𑀸 𑀢𑀣𑀸 𑀲𑀢𑁆𑀢𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀁 𑀧𑀲𑁆𑀲𑀢𑀺 𑀦 𑀢𑀁 𑀤𑀺𑀝𑁆𑀞𑀁, 𑀬𑀁 𑀤𑀺𑀝𑁆𑀞𑀁 𑀢𑀁 𑀦 𑀧𑀲𑁆𑀲𑀢𑀺;

𑀅𑀧𑀲𑁆𑀲𑀁 𑀩𑀚𑁆𑀛𑀢𑁂 𑀫𑀽𑀴𑁆𑀳𑁄, 𑀩𑀚𑁆𑀛𑀫𑀸𑀦𑁄 𑀦 𑀫𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬);

𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀏𑀢𑀲𑁆𑀫𑀺𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑁂𑀯, 𑀦 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸. 𑀬𑀣𑀸 𑀅𑀦𑀼𑀤𑀓𑀪𑀽𑀢𑀸𑀬𑀧𑀺 𑀫𑀭𑀻𑀘𑀺𑀬𑀸 𑀉𑀤𑀓𑀸𑀦𑀼𑀧𑀲𑁆𑀲𑀦𑀸 𑀳𑁄𑀢𑀺, 𑀦 𑀏𑀯𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀸𑀲𑀼𑀪𑀪𑀽𑀢𑁂𑀬𑁂𑀯 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀦𑀺𑀘𑁆𑀘𑀲𑀼𑀔𑀢𑁆𑀢𑀲𑀼𑀪𑀪𑀸𑀯𑀸𑀦𑀼𑀧𑀲𑁆𑀲𑀦𑀸, 𑀅𑀣 𑀔𑁄 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀸𑀲𑀼𑀪𑀸𑀓𑀸𑀭𑀲𑀫𑀽𑀳𑀸𑀦𑀼𑀧𑀲𑁆𑀲𑀦𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀯𑀸 𑀬𑁆𑀯𑀸𑀬𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸…𑀧𑁂… 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁪; 𑀫. 𑀦𑀺. 𑁧.𑁧𑁦𑁭) 𑀦𑀬𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀘𑀼𑀡𑁆𑀡𑀺𑀓𑀚𑀸𑀢𑀅𑀝𑁆𑀞𑀺𑀓𑀧𑀭𑀺𑀬𑁄𑀲𑀸𑀦𑁄 𑀓𑀸𑀬𑁄 𑀯𑀼𑀢𑁆𑀢𑁄, 𑀬𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀲𑀢𑀺𑀧𑀝𑁆𑀞𑀸𑀦𑀓𑀣𑀸𑀬𑀁 ‘‘𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀸𑀬𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺. 𑀆𑀧𑁄𑀓𑀸𑀬𑀁. 𑀢𑁂𑀚𑁄𑀓𑀸𑀬𑀁. 𑀯𑀸𑀬𑁄𑀓𑀸𑀬𑀁. 𑀓𑁂𑀲𑀓𑀸𑀬𑀁. 𑀮𑁄𑀫𑀓𑀸𑀬𑀁. 𑀙𑀯𑀺𑀓𑀸𑀬𑀁. 𑀘𑀫𑁆𑀫𑀓𑀸𑀬𑀁. 𑀫𑀁𑀲𑀓𑀸𑀬𑀁. 𑀭𑀼𑀳𑀺𑀭𑀓𑀸𑀬𑀁. 𑀦𑁆𑀳𑀸𑀭𑀼𑀓𑀸𑀬𑀁. 𑀅𑀝𑁆𑀞𑀺𑀓𑀸𑀬𑀁. 𑀅𑀝𑁆𑀞𑀺𑀫𑀺𑀜𑁆𑀚𑀓𑀸𑀬’’𑀦𑁆𑀢𑀺 𑀓𑀸𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀇𑀫𑀲𑁆𑀫𑀺𑀁𑀬𑁂𑀯 𑀓𑀸𑀬𑁂 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀣 𑀯𑀸 𑀓𑀸𑀬𑁂 ‘‘𑀅𑀳’’𑀦𑁆𑀢𑀺 𑀯𑀸 ‘‘𑀫𑀫’’𑀦𑁆𑀢𑀺 𑀯𑀸 𑀏𑀯𑀁 𑀕𑀳𑁂𑀢𑀩𑁆𑀩𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀦𑀼𑀧𑀲𑁆𑀲𑀦𑀢𑁄 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀦 𑀓𑁂𑀲𑀮𑁄𑀫𑀸𑀤𑀺𑀓𑀲𑁆𑀲 𑀦𑀸𑀦𑀸𑀥𑀫𑁆𑀫𑀲𑀫𑀽𑀳𑀲𑁆𑀲 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑁂𑀲𑀸𑀤𑀺𑀲𑀫𑀽𑀳𑀲𑀗𑁆𑀔𑀸𑀢𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀧𑀺 𑀘 ‘‘𑀇𑀫𑀲𑁆𑀫𑀺𑀁 𑀓𑀸𑀬𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁩𑁫) 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀆𑀕𑀢𑀦𑀬𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀺𑀦𑁄 𑀆𑀓𑀸𑀭𑀲𑀫𑀽𑀳𑀲𑀗𑁆𑀔𑀸𑀢𑀲𑁆𑀲 𑀓𑀸𑀬𑀲𑁆𑀲 𑀅𑀦𑀼𑀧𑀲𑁆𑀲𑀦𑀢𑁄𑀧𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀧𑀦 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀲𑀸𑀥𑀸𑀭𑀡𑁄 𑀅𑀢𑁆𑀣𑁄.

𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀢𑀺𑀕𑁄𑀘𑀭𑁄𑀧𑀺, 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀖𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸𑀧𑀺, 𑀲𑀢𑀺𑀧𑀺. ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣…𑀧𑁂… 𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄? 𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑀫𑀼𑀤𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪𑁦𑁮) 𑀳𑀺 𑀲𑀢𑀺𑀕𑁄𑀘𑀭𑁄 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 ‘‘𑀓𑀸𑀬𑁄 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺, 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘𑀸’’𑀢𑀺𑀆𑀤𑀻𑀲𑀼𑀧𑀺 (𑀧𑀝𑀺. 𑀫. 𑁩.𑁩𑁫). 𑀢𑀲𑁆𑀲𑀢𑁆𑀣𑁄 𑁋 𑀧𑀢𑀺𑀝𑁆𑀞𑀸𑀢𑀺 𑀅𑀲𑁆𑀫𑀺𑀦𑁆𑀢𑀺 𑀧𑀝𑁆𑀞𑀸𑀦𑀁. 𑀓𑀸 𑀧𑀢𑀺𑀝𑁆𑀞𑀸𑀢𑀺? 𑀲𑀢𑀺. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀧𑀥𑀸𑀦𑀝𑁆𑀞𑀸𑀦𑀦𑁆𑀢𑀺 𑀯𑀸 𑀧𑀝𑁆𑀞𑀸𑀦𑀁, 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀳𑀢𑁆𑀣𑀺𑀝𑁆𑀞𑀸𑀦𑀅𑀲𑁆𑀲𑀝𑁆𑀞𑀸𑀦𑀸𑀤𑀻𑀦𑀺 𑀯𑀺𑀬.

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀻’’𑀢𑀺 (𑀫. 𑀦𑀺. 𑁩.𑁩𑁦𑁪, 𑁩𑁧𑁧) 𑀏𑀢𑁆𑀣 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀖𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀲𑀢𑁆𑀣𑁄 𑁋 𑀧𑀝𑁆𑀞𑀧𑁂𑀢𑀩𑁆𑀩𑀢𑁄 𑀧𑀝𑁆𑀞𑀸𑀦𑀁, 𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀦 𑀧𑀝𑁆𑀞𑀧𑁂𑀢𑀩𑁆𑀩𑁄𑀢𑀺? 𑀲𑀢𑀺𑀬𑀸, 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁪𑁭) 𑀧𑀦 𑀲𑀢𑀺𑀬𑁂𑀯 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀢𑀺 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀢𑀺𑀬𑁂𑀯 𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀣 𑀯𑀸 𑀲𑀭𑀡𑀝𑁆𑀞𑁂𑀦 𑀲𑀢𑀺, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁. 𑀇𑀢𑀺 𑀲𑀢𑀺 𑀘 𑀲𑀸 𑀧𑀝𑁆𑀞𑀸𑀦𑀜𑁆𑀘𑀸𑀢𑀺𑀧𑀺 𑀲𑀢𑀺𑀧𑀝𑁆𑀞𑀸𑀦𑀁. 𑀇𑀤𑀫𑀺𑀥 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀪𑀸𑀯𑁂𑀦𑁆𑀢𑁄𑀢𑀺 𑀯𑀟𑁆𑀠𑁂𑀦𑁆𑀢𑁄. 𑀏𑀢𑁆𑀣 𑀘 𑀬𑀁 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀖𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀕𑀳𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀻’’𑀢𑀺 (𑀫. 𑀦𑀺. 𑁩.𑁩𑁦𑁪, 𑁩𑁧𑁧) 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀇𑀥, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 ‘‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼 𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀬𑀤𑀭𑀺𑀬𑁄…𑀧𑁂… 𑀫𑀭𑀳𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸…𑀧𑁂… 𑀇𑀤𑀁 𑀯𑁄 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼 𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀦 𑀘 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀦𑀢𑁆𑀢𑀫𑀦𑀢𑀸 𑀘 𑀅𑀢𑁆𑀢𑀫𑀦𑀢𑀸 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁…𑀧𑁂….

‘‘𑀧𑀼𑀦 𑀘𑀧𑀭𑀁…𑀧𑁂… 𑀇𑀤𑀁 𑀯𑁄 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀢𑁆𑀢𑀫𑀦𑁄 𑀘𑁂𑀯 𑀳𑁄𑀢𑀺, 𑀅𑀢𑁆𑀢𑀫𑀦𑀢𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀢𑀢𑀺𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁧𑁧).

𑀏𑀯𑀁 𑀧𑀝𑀺𑀖𑀸𑀦𑀼𑀦𑀬𑁂𑀳𑀺 𑀅𑀦𑀯𑀲𑁆𑀲𑀼𑀢𑀢𑀸 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀢𑀤𑀼𑀪𑀬𑀁 𑀯𑀻𑀢𑀺𑀯𑀢𑁆𑀢𑀢𑀸 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀦𑀫𑁂𑀯 𑀓𑀺𑀭 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑀢𑀺𑀢𑀸 𑀳𑁄𑀢𑀺, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀦𑀦𑁆𑀢𑀺.

𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀢𑀺𑀆𑀤𑀻𑀲𑀼 𑀯𑁂𑀤𑀦𑀸𑀤𑀻𑀦𑀁 𑀧𑀼𑀦 𑀯𑀘𑀦𑁂 𑀧𑀬𑁄𑀚𑀦𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀲𑀸𑀥𑀸𑀭𑀡𑀢𑁆𑀣𑁄. 𑀲𑀼𑀔𑀸𑀤𑀻𑀲𑀼 𑀅𑀦𑁂𑀓𑀧𑁆𑀧𑀪𑁂𑀤𑀸𑀲𑀼 𑀯𑁂𑀤𑀦𑀸𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀏𑀓𑁂𑀓𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸. 𑀲𑀭𑀸𑀕𑀸𑀤𑀺𑀓𑁂 𑀲𑁄𑀴𑀲𑀧𑁆𑀧𑀪𑁂𑀤𑁂 𑀘𑀺𑀢𑁆𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀏𑀓𑁂𑀓𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀏𑀓𑁂𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀦𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀢𑀺. 𑀏𑀢𑁆𑀣 𑀘 𑀓𑀸𑀬𑁂𑀢𑀺 𑀏𑀓𑀯𑀘𑀦𑀁, 𑀲𑀭𑀻𑀭𑀲𑁆𑀲 𑀏𑀓𑀢𑁆𑀢𑀸. 𑀘𑀺𑀢𑁆𑀢𑁂𑀢𑀺 𑀏𑀓𑀯𑀘𑀦𑀁, 𑀘𑀺𑀢𑁆𑀢𑀲𑁆𑀲 𑀲𑀪𑀸𑀯𑀪𑁂𑀤𑀸𑀪𑀸𑀯𑀢𑁄 𑀚𑀸𑀢𑀺𑀕𑁆𑀕𑀳𑀡𑁂𑀦 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀯𑁂𑀤𑀦𑀸𑀤𑀬𑁄 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸, 𑀢𑀣𑀸𑀦𑀼𑀧𑀲𑁆𑀲𑀦𑁆𑀢𑁄 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀯𑁂𑀤𑀦𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸? 𑀲𑀼𑀔𑀸 𑀢𑀸𑀯 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀮𑁆𑀮𑀢𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀬𑀣𑀸𑀳 𑁋

‘‘𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄;

𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀧𑀭𑀺𑀚𑀸𑀦𑀸𑀢𑀺 𑀯𑁂𑀤𑀦𑀸’’𑀢𑀺. (𑀲𑀁. 𑀦𑀺. 𑁪.𑁨𑁫𑁩);

𑀲𑀩𑁆𑀩𑀸 𑀏𑀯 𑀘𑁂𑀢𑀸 𑀤𑀼𑀓𑁆𑀔𑀢𑁄𑀧𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁯). 𑀲𑀼𑀔𑀤𑀼𑀓𑁆𑀔𑀢𑁄𑀧𑀺 𑀘 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀬𑀣𑀸𑀳 ‘‘𑀲𑀼𑀔𑀸 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀞𑀺𑀢𑀺𑀤𑀼𑀓𑁆𑀔𑀸, 𑀯𑀺𑀧𑀭𑀺𑀡𑀸𑀫𑀲𑀼𑀔𑀸. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀜𑀸𑀡𑀲𑀼𑀔𑀸, 𑀅𑀜𑁆𑀜𑀸𑀡𑀤𑀼𑀓𑁆𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫). 𑀅𑀧𑀺 𑀘 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀧𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀘𑀺𑀢𑁆𑀢𑀥𑀫𑁆𑀫𑁂𑀲𑀼𑀧𑀺 𑀘𑀺𑀢𑁆𑀢𑀁 𑀢𑀸𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑀳𑀚𑀸𑀢𑀪𑀽𑀫𑀺𑀓𑀫𑁆𑀫𑀯𑀺𑀧𑀸𑀓𑀓𑀺𑀭𑀺𑀬𑀸𑀤𑀺𑀦𑀸𑀦𑀢𑁆𑀢𑀪𑁂𑀤𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀁 𑀲𑀭𑀸𑀕𑀸𑀤𑀺𑀲𑁄𑀴𑀲𑀪𑁂𑀤𑀸𑀦𑀜𑁆𑀘 𑀯𑀲𑁂𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁. 𑀥𑀫𑁆𑀫𑀸 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦𑀁 𑀲𑀼𑀜𑁆𑀜𑀢𑀥𑀫𑁆𑀫𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀁 𑀲𑀦𑁆𑀢𑀸𑀲𑀦𑁆𑀢𑀸𑀤𑀻𑀦𑀜𑁆𑀘 𑀯𑀲𑁂𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸.

𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀺. 𑀅𑀜𑁆𑀜𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀓𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀅𑀜𑁆𑀜𑁂𑀦 𑀯𑁂𑀤𑀦𑀁, 𑀅𑀜𑁆𑀜𑁂𑀦 𑀘𑀺𑀢𑁆𑀢𑀁, 𑀅𑀜𑁆𑀜𑁂𑀦 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑁂𑀬𑁂𑀯 𑀮𑀩𑁆𑀪𑀦𑁆𑀢𑀻𑀢𑀺. 𑀆𑀤𑀺𑀢𑁄 𑀳𑀺 𑀓𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀸𑀫, 𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀦𑀸𑀫. 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀧𑀢𑁆𑀢𑀲𑁆𑀲 𑀫𑀕𑁆𑀕𑀓𑁆𑀔𑀡𑁂 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀸𑀫, 𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀦𑀸𑀫.

𑀯𑁂𑀤𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀸𑀫, 𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀦𑀸𑀫. 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀧𑀢𑁆𑀢𑀲𑁆𑀲 𑀫𑀕𑁆𑀕𑀓𑁆𑀔𑀡𑁂 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀸𑀫, 𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀦𑀸𑀫, 𑀏𑀯𑀁 𑀢𑀸𑀯 𑀤𑁂𑀲𑀦𑀸 𑀧𑀼𑀕𑁆𑀕𑀮𑁂 𑀢𑀺𑀝𑁆𑀞𑀢𑀺, 𑀓𑀸𑀬𑁂 𑀧𑀦 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀸 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀯𑁂𑀤𑀦𑀸𑀬 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀸 𑀯𑁂𑀤𑀦𑀸𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀘𑀺𑀢𑁆𑀢𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀸 𑀘𑀺𑀢𑁆𑀢𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀥𑀫𑁆𑀫𑁂𑀲𑀼 ‘‘𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀸 𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀇𑀢𑀺 𑀏𑀓𑀸𑀯 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑁂𑀬𑁂𑀯 𑀮𑀩𑁆𑀪𑀦𑁆𑀢𑀻’’𑀢𑀺.

𑀧𑀼𑀦 𑀉𑀧𑀓𑀸𑀭𑀯𑀲𑁂𑀦 𑀘 𑀅𑀧𑀭𑀺𑀳𑀻𑀦𑀯𑀲𑁂𑀦 𑀘 𑀕𑀼𑀡𑀯𑀲𑁂𑀦 𑀘 𑀅𑀧𑀭𑁂 𑀢𑀬𑁄 𑀘𑀢𑀼𑀓𑁆𑀓𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀅𑀲𑀢𑀺𑀧𑀭𑀺𑀯𑀚𑁆𑀚𑀦𑀸𑀬𑀸𑀢𑀺 𑀦 𑀲𑀢𑀺 𑀅𑀲𑀢𑀺, 𑀲𑀢𑀺 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀯𑀸 𑀅𑀲𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀧𑀭𑀺𑀯𑀚𑁆𑀚𑀦𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀯𑀚𑁆𑀚𑀦𑁂𑀦. 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑀲𑀤𑀺𑀲𑁂 𑀳𑀺 𑀫𑀼𑀝𑁆𑀞𑀲𑀢𑀺𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀦𑁂𑀦 𑀉𑀧𑀝𑁆𑀞𑀺𑀢𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑁂𑀦 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀢𑀺𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸𑀬 𑀘 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀲𑀢𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀲𑀢𑀺𑀬𑀸 𑀓𑀸𑀢𑀩𑁆𑀩𑀸𑀦𑀁 𑀥𑀫𑁆𑀫𑀸𑀦𑀁. 𑀓𑀢𑀢𑁆𑀢𑀸𑀢𑀺 𑀓𑀢𑀪𑀸𑀯𑁂𑀦. 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀓𑀢𑀢𑁆𑀢𑀸, 𑀪𑀸𑀯𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀧𑀭𑀺𑀩𑀦𑁆𑀥𑀸𑀦𑀁 𑀥𑀫𑁆𑀫𑀸𑀦𑀁 𑀳𑀢𑀢𑁆𑀢𑀸𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀦𑀸𑀲𑀺𑀢𑀪𑀸𑀯𑁂𑀦. 𑀲𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑁆𑀫𑀼𑀝𑁆𑀞𑀢𑁆𑀢𑀸𑀢𑀺 𑀲𑀢𑀺𑀬𑀸 𑀓𑀸𑀭𑀡𑀸𑀦𑀁 𑀓𑀸𑀬𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀅𑀦𑀝𑁆𑀞𑀪𑀸𑀯𑁂𑀦.

𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸𑀢𑀺 𑀲𑀢𑀺𑀬𑀸 𑀲𑀫𑁆𑀫𑀸 𑀆𑀕𑀢𑀢𑁆𑀢𑀸 𑀅𑀧𑀭𑀺𑀳𑀻𑀦𑀢𑁆𑀢𑀸 𑀘. 𑀯𑀲𑀺𑀢𑀢𑁆𑀢𑀸𑀢𑀺 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑁂𑀦. 𑀧𑀸𑀕𑀼𑀜𑁆𑀜𑀢𑀸𑀬𑀸𑀢𑀺 𑀧𑀕𑀼𑀡𑀪𑀸𑀯𑁂𑀦. 𑀅𑀧𑀘𑁆𑀘𑁄𑀭𑁄𑀳𑀡𑀢𑀸𑀬𑀸𑀢𑀺 𑀅𑀦𑀺𑀯𑀢𑁆𑀢𑀦𑀪𑀸𑀯𑁂𑀦 𑀅𑀧𑀘𑁆𑀘𑁄𑀲𑀓𑁆𑀓𑀦𑀪𑀸𑀯𑁂𑀦.

𑀲𑀢𑁆𑀢𑀢𑁆𑀢𑀸𑀢𑀺 𑀲𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀲𑀦𑁆𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀼𑀢𑀲𑀪𑀸𑀯𑀢𑁆𑀢𑀸. 𑀲𑀫𑀺𑀢𑀢𑁆𑀢𑀸𑀢𑀺 𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑀺𑀢𑀪𑀸𑀯𑀢𑁆𑀢𑀸. 𑀲𑀦𑁆𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸𑀢𑀺 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂𑀳𑀺 𑀅𑀧𑀭𑀺𑀳𑀻𑀦𑀢𑁆𑀢𑀸. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸 𑀏𑀯. 𑀲𑀭𑀡𑀓𑀯𑀲𑁂𑀦 𑀲𑀢𑀺, 𑀇𑀤𑀁 𑀲𑀢𑀺𑀬𑀸 𑀲𑀪𑀸𑀯𑀧𑀤𑀁. 𑀧𑀼𑀦𑀧𑁆𑀧𑀼𑀦𑀁 𑀲𑀭𑀡𑀢𑁄 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀅𑀦𑀼𑀲𑁆𑀲𑀢𑀺. 𑀅𑀪𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀯𑀺𑀬 𑀲𑀭𑀡𑀢𑁄 𑀧𑀝𑀺𑀲𑀭𑀡𑀯𑀲𑁂𑀦 𑀧𑀝𑀺𑀲𑁆𑀲𑀢𑀺. 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀯𑀟𑁆𑀠𑀺𑀢𑀫𑀢𑁆𑀢𑀫𑁂𑀯. 𑀲𑀭𑀡𑀸𑀓𑀸𑀭𑁄 𑀲𑀭𑀡𑀢𑀸. 𑀬𑀲𑁆𑀫𑀸 𑀧𑀦 𑀲𑀭𑀡𑀢𑀸𑀢𑀺 𑀢𑀺𑀡𑁆𑀡𑀁 𑀲𑀭𑀡𑀸𑀦𑀫𑁆𑀧𑀺 𑀦𑀸𑀫𑀁, 𑀢𑀲𑁆𑀫𑀸 𑀢𑀁 𑀧𑀝𑀺𑀲𑁂𑀥𑁂𑀢𑀼𑀁 𑀧𑀼𑀦 𑀲𑀢𑀺𑀕𑁆𑀕𑀳𑀡𑀁 𑀓𑀢𑀁. 𑀲𑀢𑀺𑀲𑀗𑁆𑀔𑀸𑀢𑀸 𑀲𑀭𑀡𑀢𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀲𑀼𑀢𑀧𑀭𑀺𑀬𑀢𑁆𑀢𑀲𑁆𑀲 𑀥𑀸𑀭𑀡𑀪𑀸𑀯𑀢𑁄 𑀥𑀸𑀭𑀡𑀢𑀸. 𑀅𑀦𑀼𑀧𑀯𑀺𑀲𑀦𑀲𑀗𑁆𑀔𑀸𑀢𑁂𑀦 𑀑𑀕𑀸𑀳𑀦𑀝𑁆𑀞𑁂𑀦 𑀅𑀧𑀺𑀮𑀸𑀧𑀦𑀪𑀸𑀯𑁄 𑀅𑀧𑀺𑀮𑀸𑀧𑀦𑀢𑀸. 𑀬𑀣𑀸 𑀳𑀺 𑀉𑀤𑀓𑁂 𑀮𑀸𑀩𑀼𑀓𑀝𑀸𑀳𑀸𑀤𑀻𑀦𑀺 𑀧𑀮𑀯𑀦𑁆𑀢𑀺, 𑀦 𑀅𑀦𑀼𑀧𑀯𑀺𑀲𑀦𑁆𑀢𑀺, 𑀦 𑀢𑀣𑀸 𑀆𑀭𑀫𑁆𑀫𑀡𑁂 𑀲𑀢𑀺. 𑀆𑀭𑀫𑁆𑀫𑀡𑀜𑁆𑀳𑀺 𑀏𑀲𑀸 𑀅𑀦𑀼𑀧𑀯𑀺𑀲𑀢𑀺, 𑀢𑀲𑁆𑀫𑀸 ‘‘𑀅𑀧𑀺𑀮𑀸𑀧𑀦𑀢𑀸’’𑀢𑀺 𑀯𑀼𑀢𑁆𑀢𑀸. 𑀘𑀺𑀭𑀓𑀢𑀘𑀺𑀭𑀪𑀸𑀲𑀺𑀢𑀸𑀦𑀁 𑀦 𑀲𑀫𑁆𑀫𑀼𑀲𑁆𑀲𑀦𑀪𑀸𑀯𑀢𑁄 𑀅𑀲𑀫𑁆𑀫𑀼𑀲𑁆𑀲𑀦𑀢𑀸. 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁂 𑀚𑁄𑀢𑀦𑀮𑀓𑁆𑀔𑀡𑁂 𑀘 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁, 𑀲𑀢𑀺𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀧𑀫𑀸𑀤𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀢𑀺𑀩𑀮𑀁. 𑀬𑀸𑀣𑀸𑀯𑀲𑀢𑀺 𑀦𑀺𑀬𑁆𑀬𑀸𑀦𑀲𑀢𑀺 𑀓𑀼𑀲𑀮𑀲𑀢𑀻𑀢𑀺 𑀲𑀫𑁆𑀫𑀸𑀲𑀢𑀺. 𑀩𑀼𑀚𑁆𑀛𑀦𑀓𑀲𑁆𑀲 𑀅𑀗𑁆𑀕𑁄𑀢𑀺 𑀩𑁄𑀚𑁆𑀛𑀗𑁆𑀕𑁄, 𑀧𑀲𑀝𑁆𑀞𑁄 𑀲𑀼𑀦𑁆𑀤𑀭𑁄 𑀯𑀸 𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀲𑀢𑀺𑀬𑁂𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄.

𑀏𑀓𑀸𑀬𑀦𑀫𑀕𑁆𑀕𑁄𑀢𑀺 𑀏𑀓𑀫𑀕𑁆𑀕𑁄, 𑀅𑀬𑀁 𑀫𑀕𑁆𑀕𑁄 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀏𑀓𑁂𑀦 𑀅𑀬𑀺𑀢𑀩𑁆𑀩𑁄𑀢𑀺 𑀏𑀓𑀸𑀬𑀦𑁄. 𑀏𑀓𑁂𑀦𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀯𑀽𑀧𑀓𑀝𑁆𑀞𑁂𑀦 𑀧𑀯𑀺𑀯𑀺𑀢𑁆𑀢𑀘𑀺𑀢𑁆𑀢𑁂𑀦. 𑀅𑀬𑀺𑀢𑀩𑁆𑀩𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄, 𑀅𑀬𑀦𑁆𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀅𑀬𑀦𑁄, 𑀲𑀁𑀲𑀸𑀭𑀢𑁄 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲 𑀅𑀬𑀦𑁄 𑀏𑀓𑀸𑀬𑀦𑁄. 𑀏𑀓𑀲𑁆𑀲𑀸𑀢𑀺 𑀲𑁂𑀝𑁆𑀞𑀲𑁆𑀲. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑁂𑀝𑁆𑀞𑁄𑀯 𑀪𑀕𑀯𑀸, 𑀢𑀲𑁆𑀫𑀸 ‘‘𑀪𑀕𑀯𑀢𑁄’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀢𑁂𑀦 𑀅𑀜𑁆𑀜𑁂𑀧𑀺 𑀅𑀬𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀕𑀯𑀢𑁄𑀯 𑀲𑁄 𑀅𑀬𑀦𑁄 𑀢𑁂𑀦 𑀉𑀧𑁆𑀧𑀸𑀤𑀺𑀢𑀢𑁆𑀢𑀸. 𑀬𑀣𑀸𑀳 ‘‘𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁨𑁧𑁫; 𑀧𑀝𑀺. 𑀫. 𑁩.𑁫; 𑀫. 𑀦𑀺. 𑁩.𑁭𑁯). 𑀅𑀬𑀢𑀻𑀢𑀺 𑀯𑀸 𑀅𑀬𑀦𑁄, 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀅𑀬𑀦𑁄 𑀏𑀓𑀸𑀬𑀦𑁄. 𑀇𑀫𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑀯𑀺𑀦𑀬𑁂 𑀧𑀯𑀢𑁆𑀢𑀢𑀺, 𑀦 𑀅𑀜𑁆𑀜𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀇𑀫𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪). 𑀤𑁂𑀲𑀦𑀸𑀪𑁂𑀤𑁄𑀬𑁂𑀯 𑀳𑁂𑀲𑁄, 𑀅𑀢𑁆𑀣𑀢𑁄 𑀧𑀦 𑀏𑀓𑁄𑀯. 𑀅𑀧𑀺 𑀘 𑀏𑀓𑀁 𑀅𑀬𑀢𑀻𑀢𑀺 𑀏𑀓𑀸𑀬𑀦𑁄. 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀫𑀼𑀔𑀪𑀸𑀯𑀦𑀸𑀦𑀬𑁂𑀦 𑀧𑀯𑀢𑁆𑀢𑁄𑀧𑀺 𑀅𑀧𑀭𑀪𑀸𑀕𑁂 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑁋

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺. (𑀲𑀁. 𑀦𑀺. 𑁫.𑁩𑁮𑁪, 𑁪𑁦𑁯);

𑀫𑀕𑁆𑀕𑁄𑀢𑀺 𑀓𑁂𑀦𑀝𑁆𑀞𑁂𑀦 𑀫𑀕𑁆𑀕𑁄? 𑀦𑀺𑀩𑁆𑀩𑀸𑀦𑀁 𑀕𑀫𑀦𑀝𑁆𑀞𑁂𑀦, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀦𑀻𑀬𑀝𑁆𑀞𑁂𑀦 𑀘. 𑀉𑀧𑁂𑀢𑁄𑀢𑀺 𑀆𑀲𑀦𑁆𑀦𑀁 𑀕𑀢𑁄. 𑀲𑀫𑀼𑀧𑁂𑀢𑁄𑀢𑀺 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀕𑀢𑁄. 𑀉𑀪𑀬𑁂𑀦𑀧𑀺 𑀲𑀢𑀺𑀬𑀸 𑀅𑀧𑀭𑀺𑀳𑀻𑀦𑁄𑀢𑀺 𑀅𑀢𑁆𑀣𑁄. 𑀉𑀧𑀕𑀢𑁄𑀢𑀺 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑁄. 𑀲𑀫𑀼𑀧𑀕𑀢𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀞𑀺𑀢𑁄. ‘‘𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄’’𑀢𑀺𑀧𑀺 𑀧𑀸𑀴𑀺. 𑀉𑀪𑀬𑁂𑀦𑀸𑀧𑀺 𑀲𑀢𑀺𑀲𑀫𑀻𑀧𑀁 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀧𑀦𑁆𑀦𑁄𑀢𑀺 𑀅𑀯𑀺𑀬𑁄𑀕𑀸𑀧𑀦𑁆𑀦𑁄. 𑀲𑀫𑀼𑀧𑀧𑀦𑁆𑀦𑁄𑀢𑀺 𑀧𑀭𑀺𑀧𑀼𑀡𑁆𑀡𑁄. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀯𑀺𑀓𑀮𑁄 𑀯𑀺𑀚𑁆𑀚𑀫𑀸𑀦𑁄. ‘‘𑀉𑀧𑁂𑀢𑁄 𑀲𑀫𑀼𑀧𑁂𑀢𑁄𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀯𑀢𑁆𑀢𑀁 𑀓𑀣𑀺𑀢𑀁. 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀝𑀺𑀯𑁂𑀥𑁄. 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀧𑀝𑀺𑀮𑀸𑀪𑁄 𑀓𑀣𑀺𑀢𑁄’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀮𑁄𑀓𑁂 𑀯𑀸 𑀲𑀸 𑀯𑀺𑀲𑀢𑁆𑀢𑀺𑀓𑀸𑀢𑀺 𑀬𑀸 𑀏𑀲𑀸 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀯𑀼𑀢𑁆𑀢𑀸 𑀯𑀺𑀲𑀢𑁆𑀢𑀺𑀓𑀸, 𑀲𑀸 𑀔𑀦𑁆𑀥𑀮𑁄𑀓𑁂 𑀏𑀯, 𑀦 𑀅𑀜𑁆𑀜𑀢𑁆𑀭 𑀔𑀦𑁆𑀥𑁂𑀳𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀮𑁄𑀓𑁂 𑀯𑀸 𑀢𑀁 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀔𑀦𑁆𑀥𑀮𑁄𑀓𑁂 𑀏𑀯 𑀧𑀯𑀢𑁆𑀢𑀁 𑀏𑀢𑀁 𑀯𑀺𑀲𑀢𑁆𑀢𑀺𑀓𑀲𑀗𑁆𑀔𑀸𑀢𑀁 𑀢𑀡𑁆𑀳𑀁. 𑀢𑀭𑀢𑀺 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑁄. 𑀉𑀢𑁆𑀢𑀭𑀢𑀺 𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄. 𑀧𑀢𑀭𑀢𑀺 𑀢𑁂𑀲𑀁 𑀧𑀢𑀺𑀝𑁆𑀞𑀸𑀳𑁂𑀢𑀼𑀁 𑀙𑀺𑀦𑁆𑀤𑀦𑁆𑀢𑁄. 𑀲𑀫𑀢𑀺𑀓𑁆𑀓𑀫𑀢𑀺 𑀲𑀁𑀲𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑁄. 𑀯𑀻𑀢𑀺𑀯𑀢𑁆𑀢𑀢𑀺 𑀧𑀝𑀺𑀲𑀦𑁆𑀥𑀺𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀓𑀭𑁄𑀦𑁆𑀢𑁄. 𑀅𑀣 𑀯𑀸 𑀢𑀭𑀢𑀺 𑀉𑀢𑁆𑀢𑀭𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑁂𑀦. 𑀧𑀢𑀭𑀢𑀺 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑁂𑀦. 𑀲𑀫𑀢𑀺𑀓𑁆𑀓𑀫𑀢𑀺 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑁂𑀦. 𑀅𑀣 𑀯𑀸 𑀢𑀭𑀢𑀺 𑀲𑀻𑀮𑁂𑀦. 𑀉𑀢𑁆𑀢𑀭𑀢𑀺 𑀲𑀫𑀸𑀥𑀺𑀦𑀸. 𑀧𑀢𑀭𑀢𑀺 𑀯𑀺𑀧𑀲𑁆𑀲𑀦𑀸𑀬. 𑀲𑀫𑀢𑀺𑀓𑁆𑀓𑀫𑀢𑀺 𑀫𑀕𑁆𑀕𑁂𑀦. 𑀯𑀻𑀢𑀺𑀯𑀢𑁆𑀢𑀢𑀺 𑀨𑀮𑁂𑀦𑀸𑀢𑀺 𑀏𑀯𑀫𑀸𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑁪. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀏𑀓𑀁 𑀲𑀸𑀮𑀺𑀔𑁂𑀢𑁆𑀢𑀸𑀤𑀺𑀔𑁂𑀢𑁆𑀢𑀁 𑀯𑀸 𑀖𑀭𑀯𑀢𑁆𑀣𑀸𑀤𑀺𑀯𑀢𑁆𑀣𑀼𑀁 𑀯𑀸 𑀓𑀳𑀸𑀧𑀡𑀲𑀗𑁆𑀔𑀸𑀢𑀁 𑀳𑀺𑀭𑀜𑁆𑀜𑀁 𑀯𑀸 𑀕𑁄𑀅𑀲𑁆𑀲𑀸𑀤𑀺𑀪𑁂𑀤𑀁 𑀕𑀯𑀸𑀲𑁆𑀲𑀁 𑀯𑀸 𑀅𑀦𑁆𑀢𑁄𑀚𑀸𑀢𑀸𑀤𑀺𑀤𑀸𑀲𑁂 𑀯𑀸 𑀪𑀢𑀓𑀸𑀤𑀺𑀓𑀫𑁆𑀫𑀓𑀭𑁂 𑀯𑀸 𑀇𑀢𑁆𑀣𑀺𑀲𑀜𑁆𑀜𑀺𑀢𑀸 𑀣𑀺𑀬𑁄 𑀯𑀸 𑀜𑀸𑀢𑀺𑀩𑀦𑁆𑀥𑀯𑀸𑀤𑀺𑀩𑀦𑁆𑀥𑀽 𑀯𑀸 𑀅𑀜𑁆𑀜𑁂 𑀯𑀸 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀓𑁂 𑀧𑀼𑀣𑀼𑀓𑀸𑀫𑁂 𑀅𑀦𑀼𑀕𑀺𑀚𑁆𑀛𑀢𑀻𑀢𑀺. 𑀲𑀸𑀮𑀺𑀓𑁆𑀔𑁂𑀢𑁆𑀢𑀦𑁆𑀢𑀺 𑀬𑀢𑁆𑀣 𑀲𑀸𑀮𑀺𑀬𑁄 𑀯𑀺𑀭𑀼𑀳𑀦𑁆𑀢𑀺. 𑀯𑀻𑀳𑀺𑀓𑁆𑀔𑁂𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀻𑀳𑀻𑀢𑀺 𑀅𑀯𑀲𑁂𑀲𑀯𑀻𑀳𑀬𑁄. 𑀫𑁄𑀤𑀬𑀢𑀻𑀢𑀺 𑀫𑀼𑀕𑁆𑀕𑁄. 𑀖𑀭𑀯𑀢𑁆𑀣𑀼𑀦𑁆𑀢𑀺 𑀖𑀭𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀓𑀢𑀸𑀓𑀢𑀪𑀽𑀫𑀺𑀪𑀸𑀕𑁄. 𑀓𑁄𑀝𑁆𑀞𑀓𑀯𑀢𑁆𑀣𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁄𑀝𑁆𑀞𑀓𑁄𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀸𑀤𑀺. 𑀧𑀼𑀭𑁂𑀢𑀺 𑀖𑀭𑀲𑁆𑀲 𑀧𑀼𑀭𑀢𑁄. 𑀧𑀘𑁆𑀙𑀸𑀢𑀺 𑀖𑀭𑀲𑁆𑀲 𑀧𑀘𑁆𑀙𑀢𑁄. 𑀏𑀢𑁆𑀣 𑀆𑀭𑀸𑀫𑁂𑀦𑁆𑀢𑀺 𑀘𑀺𑀢𑁆𑀢𑀁 𑀢𑁄𑀲𑁂𑀦𑁆𑀢𑀻𑀢𑀺 𑀆𑀭𑀸𑀫𑁄, 𑀧𑀼𑀧𑁆𑀨𑁂𑀦𑀧𑀺 𑀨𑀮𑁂𑀦𑀧𑀺 𑀙𑀸𑀬𑀸𑀬𑀧𑀺 𑀤𑀓𑁂𑀦𑀧𑀺 𑀭𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀧𑀲𑀼𑀓𑀸𑀤𑀬𑁄𑀢𑀺 𑀏𑀴𑀓𑀸𑀤𑀬𑁄. 𑀅𑀦𑁆𑀢𑁄𑀚𑀸𑀢𑀓𑁄𑀢𑀺 𑀅𑀦𑁆𑀢𑁄𑀖𑀭𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑁄. 𑀥𑀦𑀓𑁆𑀓𑀻𑀢𑀓𑁄𑀢𑀺 𑀥𑀦𑁂𑀦 𑀓𑀻𑀡𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑀺𑀢𑁄. 𑀲𑀸𑀫𑀁 𑀯𑀸𑀢𑀺 𑀲𑀬𑀁 𑀯𑀸. 𑀤𑀸𑀲𑀩𑁆𑀬𑀦𑁆𑀢𑀺 𑀤𑀸𑀲𑀲𑁆𑀲 𑀪𑀸𑀯𑁄 𑀤𑀸𑀲𑀩𑁆𑀬𑀁, 𑀢𑀁 𑀤𑀸𑀲𑀩𑁆𑀬𑀁. 𑀉𑀧𑁂𑀢𑀻𑀢𑀺 𑀉𑀧𑀕𑀘𑁆𑀙𑀢𑀺. 𑀅𑀓𑀸𑀫𑀓𑁄 𑀯𑀸𑀢𑀺 𑀅𑀢𑁆𑀢𑀦𑁄 𑀅𑀭𑀼𑀘𑀺𑀬𑀸 𑀯𑀸 𑀓𑀭𑀫𑀭𑀸𑀦𑀻𑀢𑁄.

𑀢𑁂 𑀘𑀢𑁆𑀢𑀸𑀭𑁄 𑀧𑀼𑀦𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀫𑀸𑀬 𑀤𑀸𑀲𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂’’𑀢𑀺 𑀆𑀳. 𑀆𑀫𑀸𑀬 𑀤𑀸𑀲𑀸𑀢𑀺 𑀅𑀦𑁆𑀢𑁄𑀚𑀸𑀢𑀤𑀸𑀲𑀸. ‘‘𑀬𑀢𑁆𑀣 𑀤𑀸𑀲𑁄 𑀆𑀫𑀚𑀸𑀢𑁄 𑀞𑀺𑀢𑁄 𑀣𑀼𑀮𑁆𑀮𑀸𑀦𑀺 𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀢𑁂𑀯 𑀯𑀼𑀢𑁆𑀢𑀸. 𑀥𑀦𑁂𑀦 𑀓𑀻𑀢𑀸𑀢𑀺 𑀥𑀦𑀤𑀸𑀲𑀸. 𑀲𑀸𑀫𑀜𑁆𑀘 𑀏𑀓𑁂𑀢𑀺 𑀲𑀬𑀁 𑀤𑀸𑀲𑀸. 𑀪𑀬𑀸𑀧𑀡𑀼𑀦𑁆𑀦𑀸𑀢𑀺 𑀅𑀓𑀸𑀫𑀤𑀸𑀲𑀸. 𑀪𑀬𑁂𑀦 𑀧𑀡𑀼𑀦𑁆𑀦𑀸 𑀔𑀺𑀧𑀺𑀢𑀸.

𑀪𑀢𑀓𑀸𑀢𑀺 𑀪𑀢𑀺𑀬𑀸 𑀚𑀻𑀯𑀦𑀓𑀸. 𑀓𑀲𑀺𑀓𑀫𑁆𑀫𑀸𑀤𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺 𑀓𑀫𑁆𑀫𑀓𑀭𑀸. 𑀉𑀧𑀚𑀻𑀯𑀺𑀦𑁄𑀢𑀺 𑀲𑀫𑁆𑀫𑀦𑁆𑀢𑀦𑀸𑀤𑀺𑀦𑀸 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑀻𑀢𑀺 𑀉𑀧𑀚𑀻𑀯𑀺𑀦𑁄.

𑀇𑀢𑁆𑀣𑀻𑀢𑀺 𑀣𑀺𑀬𑀢𑀺 𑀏𑀢𑀺𑀲𑁆𑀲𑀁 𑀕𑀩𑁆𑀪𑁄𑀢𑀺 𑀇𑀢𑁆𑀣𑀻. 𑀧𑀭𑀺𑀕𑁆𑀕𑀳𑁄𑀢𑀺 𑀲𑀳𑀸𑀬𑀻 𑀲𑀲𑁆𑀲𑀸𑀫𑀺𑀓𑀸. 𑀫𑀸𑀢𑀸𑀧𑀺𑀢𑀺𑀩𑀦𑁆𑀥𑀯𑀸𑀧𑀺 𑀜𑀸𑀢𑀺𑀩𑀦𑁆𑀥𑀼. 𑀲𑀕𑁄𑀢𑁆𑀢𑁄 𑀕𑁄𑀢𑁆𑀢𑀩𑀦𑁆𑀥𑀼. 𑀏𑀓𑀸𑀘𑀭𑀺𑀬𑀓𑀼𑀮𑁂 𑀯𑀸 𑀏𑀓𑀚𑀸𑀢𑀺𑀫𑀦𑁆𑀢𑀁 𑀯𑀸 𑀉𑀕𑁆𑀕𑀳𑀺𑀢𑀫𑀦𑁆𑀢𑁄 𑀫𑀦𑁆𑀢𑀩𑀦𑁆𑀥𑀼. 𑀥𑀦𑀼𑀲𑀺𑀧𑁆𑀧𑀸𑀤𑀺𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀓𑁄 𑀲𑀺𑀧𑁆𑀧𑀩𑀦𑁆𑀥𑀼. ‘‘𑀫𑀺𑀢𑁆𑀢𑀩𑀦𑁆𑀥𑀯𑀸𑀢𑀺𑀧𑀺 𑀩𑀦𑁆𑀥𑀽’’𑀢𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀧𑀸𑀞𑁄 𑀤𑀺𑀲𑁆𑀲𑀢𑀺.

𑀕𑀺𑀚𑁆𑀛𑀢𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀧𑀢𑁆𑀣𑁂𑀢𑀺. 𑀅𑀦𑀼𑀕𑀺𑀚𑁆𑀛𑀢𑀻𑀢𑀺 𑀅𑀦𑀼 𑀅𑀦𑀼 𑀕𑀺𑀚𑁆𑀛𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀢𑁆𑀣𑁂𑀢𑀺. 𑀧𑀮𑀺𑀕𑀺𑀚𑁆𑀛𑀢𑀻𑀢𑀺 𑀲𑀫𑀦𑁆𑀢𑀢𑁄 𑀧𑀢𑁆𑀣𑁂𑀢𑀺. 𑀧𑀮𑀺𑀩𑀚𑁆𑀛𑀢𑀻𑀢𑀺 𑀯𑀺𑀲𑁂𑀲𑁂𑀦 𑀧𑀢𑁆𑀣𑁂𑀢𑀺. ‘‘𑀑𑀴𑀸𑀭𑀺𑀓𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀕𑀺𑀚𑁆𑀛𑀢𑀺, 𑀅𑀦𑀼𑀕𑀺𑀚𑁆𑀛𑀢𑀺, 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀯𑀲𑁂𑀦 𑀧𑀮𑀺𑀕𑀺𑀚𑁆𑀛𑀢𑀺, 𑀧𑀮𑀺𑀩𑀚𑁆𑀛𑀢𑀻’’𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀺.

𑁫. 𑀧𑀜𑁆𑀘𑀫𑀕𑀸𑀣𑀸𑀬𑀁 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀁 𑀧𑀼𑀕𑁆𑀕𑀮𑀁 𑀅𑀩𑀮𑀔𑁆𑀬𑀸 𑀓𑀺𑀮𑁂𑀲𑀸 𑀩𑀮𑀻𑀬𑀦𑁆𑀢𑀺 𑀲𑀳𑀦𑁆𑀢𑀺 𑀫𑀤𑁆𑀤𑀦𑁆𑀢𑀺. 𑀲𑀤𑁆𑀥𑀸𑀩𑀮𑀸𑀤𑀺𑀯𑀺𑀭𑀳𑁂𑀦 𑀯𑀸 𑀅𑀩𑀮𑀁 𑀢𑀁 𑀧𑀼𑀕𑁆𑀕𑀮𑀁 𑀅𑀩𑀮𑀸 𑀓𑀺𑀮𑁂𑀲𑀸 𑀩𑀮𑀻𑀬𑀦𑁆𑀢𑀺, 𑀅𑀩𑀮𑀢𑁆𑀢𑀸 𑀩𑀮𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀁 𑀓𑀸𑀫𑀕𑀺𑀤𑁆𑀥𑀁 𑀓𑀸𑀫𑀭𑀢𑁆𑀢𑀁 𑀓𑀸𑀫𑀧𑀭𑀺𑀬𑁂𑀲𑀦𑁆𑀢𑀜𑁆𑀘 𑀲𑀻𑀳𑀸𑀤𑀬𑁄 𑀘 𑀧𑀸𑀓𑀝𑀧𑀭𑀺𑀲𑁆𑀲𑀬𑀸, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀅𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀫𑀤𑁆𑀤𑀦𑁆𑀢𑀺. 𑀢𑀢𑁄 𑀅𑀧𑀸𑀓𑀝𑀧𑀭𑀺𑀲𑁆𑀲𑀬𑁂𑀳𑀺 𑀅𑀪𑀺𑀪𑀽𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀪𑀺𑀦𑁆𑀦𑀁 𑀦𑀸𑀯𑀁 𑀉𑀤𑀓𑀁 𑀯𑀺𑀬 𑀅𑀦𑁆𑀯𑁂𑀢𑀺.

𑀅𑀩𑀮𑀸𑀢𑀺 𑀦𑀢𑁆𑀣𑀺 𑀏𑀢𑁂𑀲𑀁 𑀩𑀮𑀦𑁆𑀢𑀺 𑀅𑀩𑀮𑀸, 𑀩𑀮𑀯𑀺𑀭𑀳𑀺𑀢𑀸. 𑀤𑀼𑀩𑁆𑀩𑀮𑀸𑀢𑀺 𑀫𑀦𑁆𑀤𑀧𑀬𑁄𑀕𑀸𑀩𑀮𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀯𑀺𑀭𑀳𑀺𑀢𑀸. 𑀅𑀧𑁆𑀧𑀩𑀮𑀸𑀢𑀺 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀏𑀢𑁂𑀲𑀁 𑀩𑀮𑀦𑁆𑀢𑀺 𑀅𑀧𑁆𑀧𑀩𑀮𑀸, 𑀬𑀼𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀸. 𑀅𑀧𑁆𑀧𑀣𑀸𑀫𑀓𑀸𑀢𑀺 𑀅𑀧𑁆𑀧𑁄 𑀧𑀭𑀺𑀢𑁆𑀢𑁄 𑀣𑀸𑀫𑁄 𑀏𑀢𑁂𑀲𑀁 𑀯𑀸𑀬𑀸𑀫𑁄 𑀉𑀲𑁆𑀲𑀸𑀳𑁄𑀢𑀺 𑀅𑀧𑁆𑀧𑀣𑀸𑀫𑀓𑀸. 𑀳𑀻𑀦𑀸 𑀦𑀺𑀳𑀻𑀦𑀸 𑀧𑀬𑁄𑀕𑀳𑀻𑀦𑁂𑀦. 𑀑𑀫𑀓𑀸 𑀣𑀸𑀫𑀳𑀻𑀦𑁂𑀦. 𑀮𑀸𑀫𑀓𑀸 𑀧𑀘𑁆𑀘𑀬𑀳𑀻𑀦𑁂𑀦. 𑀙𑀢𑀼𑀓𑁆𑀓𑀸 𑀅𑀚𑁆𑀛𑀸𑀲𑀬𑀳𑀻𑀦𑁂𑀦. 𑀧𑀭𑀺𑀢𑁆𑀢𑀸 𑀧𑀢𑁆𑀢𑀺𑀳𑀻𑀦𑁂𑀦. 𑀲𑀳𑀦𑁆𑀢𑀻𑀢𑀺 𑀫𑀤𑁆𑀤𑀦𑁆𑀢𑀺 𑀖𑀝𑁆𑀝𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀧𑀭𑀺𑀲𑀳𑀦𑁆𑀢𑀻𑀢𑀺 𑀲𑀩𑁆𑀩𑀢𑁄 𑀫𑀤𑁆𑀤𑀦𑁆𑀢𑀺. 𑀅𑀪𑀺𑀪𑀯𑀦𑁆𑀢𑀺 𑀅𑀧𑀭𑀸𑀧𑀭𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦. 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦. 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀲𑀼𑀲𑁆𑀲𑁄𑀲𑁂𑀢𑁆𑀯𑀸 𑀞𑀸𑀦𑁂𑀦. 𑀫𑀤𑁆𑀤𑀦𑁆𑀢𑀺 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦.

𑀲𑀤𑁆𑀥𑀸𑀩𑀮𑀦𑁆𑀢𑀺 𑀲𑀤𑁆𑀤𑀳𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀲𑀤𑁆𑀤𑀳𑀢𑀺, 𑀲𑀤𑁆𑀤𑀳𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀤𑁆𑀥𑀸. 𑀲𑀸 𑀲𑀤𑁆𑀤𑀳𑀦𑀮𑀓𑁆𑀔𑀡𑀸, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸, 𑀲𑀫𑁆𑀧𑀲𑀸𑀤𑀦𑀭𑀲𑀸 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬. 𑀧𑀓𑁆𑀔𑀦𑁆𑀤𑀦𑀭𑀲𑀸 𑀯𑀸 𑀑𑀖𑀼𑀢𑁆𑀢𑀭𑀡𑁄 𑀯𑀺𑀬. 𑀅𑀓𑀸𑀮𑀼𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸. 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸, 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀸 𑀯𑀸. 𑀲𑀸 𑀳𑀢𑁆𑀣𑀯𑀺𑀢𑁆𑀢𑀩𑀻𑀚𑀸𑀦𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀅𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀤𑁆𑀥𑀸𑀩𑀮𑀁. 𑀯𑀻𑀭𑀺𑀬𑀩𑀮𑀦𑁆𑀢𑀺 𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬𑀁, 𑀯𑀻𑀭𑀸𑀦𑀁 𑀯𑀸 𑀓𑀫𑁆𑀫𑀁 𑀯𑀻𑀭𑀺𑀬𑀁, 𑀯𑀺𑀥𑀺𑀦𑀸 𑀯𑀸 𑀦𑀬𑁂𑀦 𑀉𑀧𑀸𑀬𑁂𑀦 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑀬𑀺𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁. 𑀢𑀁 𑀧𑀦𑁂𑀢𑀁 𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀜𑁆𑀘 𑀧𑀕𑁆𑀕𑀳𑀡𑀮𑀓𑁆𑀔𑀡𑀜𑁆𑀘 𑀯𑀻𑀭𑀺𑀬𑀁, 𑀲𑀳𑀚𑀸𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, ‘‘𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻’’𑀢𑀺 𑀯𑀘𑀦𑀢𑁄 (𑀅. 𑀦𑀺. 𑁪.𑁧𑁧𑁩) 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁, 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁 𑀯𑀸. 𑀲𑀫𑁆𑀫𑀸 𑀆𑀭𑀤𑁆𑀥𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁄𑀲𑀚𑁆𑀚𑁂 𑀦 𑀓𑀫𑁆𑀧𑀢𑀻𑀢𑀺 𑀯𑀻𑀭𑀺𑀬𑀩𑀮𑀁. 𑀲𑀢𑀺𑀬𑀸 𑀮𑀓𑁆𑀔𑀡𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑁂𑀯.

𑀫𑀼𑀝𑁆𑀞𑀲𑁆𑀲𑀘𑁆𑀘𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀢𑀺𑀩𑀮𑀁. 𑀲𑀳𑀚𑀸𑀢𑀸𑀦𑀺 𑀲𑀫𑁆𑀫𑀸 𑀆𑀥𑀻𑀬𑀢𑀺 𑀞𑀧𑁂𑀢𑀻𑀢𑀺 𑀲𑀫𑀸𑀥𑀺. 𑀲𑁄 𑀧𑀸𑀫𑁄𑀓𑁆𑀔𑀮𑀓𑁆𑀔𑀡𑁄 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀯𑀸, 𑀲𑀳𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑁂 𑀲𑀫𑁆𑀧𑀺𑀡𑁆𑀟𑀦𑀭𑀲𑁄 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀦𑀁 𑀉𑀤𑀓𑀁 𑀯𑀺𑀬, 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀜𑀸𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸. ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀢𑁄 𑀲𑀼𑀔𑀧𑀤𑀝𑁆𑀞𑀸𑀦𑁄 𑀦𑀺𑀯𑀸𑀢𑁂 𑀧𑀤𑀻𑀧𑀘𑁆𑀘𑀻𑀦𑀁 𑀞𑀺𑀢𑀺 𑀯𑀺𑀬 𑀘𑁂𑀢𑀲𑁄 𑀞𑀺𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀸𑀥𑀺𑀩𑀮𑀁. 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀓𑀺𑀁 𑀧𑀚𑀸𑀦𑀸𑀢𑀺? ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁫) 𑀦𑀬𑁂𑀦 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀲𑀸 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸, 𑀅𑀓𑁆𑀔𑀮𑀺𑀢𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀔𑀺𑀢𑁆𑀢𑀉𑀲𑀼𑀧𑀝𑀺𑀯𑁂𑀥𑁄 𑀯𑀺𑀬, 𑀯𑀺𑀲𑀬𑁄𑀪𑀸𑀲𑀦𑀭𑀲𑀸 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬. 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀧𑀜𑁆𑀜𑀸𑀩𑀮𑀁. 𑀳𑀺𑀭𑀺𑀩𑀮𑀁 𑀑𑀢𑁆𑀢𑀧𑁆𑀧𑀩𑀮𑀦𑁆𑀢𑀺 𑀅𑀳𑀺𑀭𑀺𑀓𑁂 𑀦 𑀓𑀫𑁆𑀧𑀢𑀻𑀢𑀺 𑀳𑀺𑀭𑀺𑀩𑀮𑀁. 𑀅𑀦𑁄𑀢𑁆𑀢𑀧𑁆𑀧𑁂 𑀦 𑀓𑀫𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀩𑀮𑀁. 𑀅𑀬𑀁 𑀉𑀪𑀬𑀯𑀲𑁂𑀦 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀻𑀬𑀢𑀻𑀢𑀺 𑀳𑀺𑀭𑀻, 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀺 𑀏𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁, 𑀧𑀸𑀧𑀢𑁄 𑀉𑀩𑁆𑀩𑁂𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀢𑁂𑀲𑀁 𑀦𑀸𑀦𑀸𑀓𑀭𑀡𑀤𑀻𑀧𑀦𑀢𑁆𑀣𑀁 𑁋 ‘‘𑀲𑀫𑀼𑀝𑁆𑀞𑀸𑀦𑀁 𑀅𑀥𑀺𑀧𑀢𑀺, 𑀮𑀚𑁆𑀚𑀸𑀤𑀺𑀮𑀓𑁆𑀔𑀡𑁂𑀦 𑀘𑀸’’𑀢𑀺 𑀇𑀫𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀬𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀼𑀢𑁆𑀢𑀸 𑁋 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻 𑀦𑀸𑀫, 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫. 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻 𑀦𑀸𑀫, 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁 𑀦𑀸𑀫. 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸 𑀳𑀺𑀭𑀻 𑀦𑀸𑀫, 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫. 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀸 𑀳𑀺𑀭𑀻 𑀦𑀸𑀫, 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫.

𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑀺𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀺 𑁋 𑀚𑀸𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀲𑀽𑀭𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀩𑀸𑀳𑀼𑀲𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀓𑀣𑀁? ‘‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀦 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀁, 𑀳𑀻𑀦𑀚𑀘𑁆𑀘𑀸𑀦𑀁 𑀓𑁂𑀯𑀝𑁆𑀝𑀸𑀤𑀻𑀦𑀁 𑀇𑀤𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀢𑀸𑀯 𑀚𑀸𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀤𑀳𑀭𑁂𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀯𑀬𑁂 𑀞𑀺𑀢𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀤𑀼𑀩𑁆𑀩𑀮𑀚𑀸𑀢𑀺𑀓𑀸𑀦𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀲𑀽𑀭𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀲𑀽𑀭𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀅𑀦𑁆𑀥𑀩𑀸𑀮𑀸𑀦𑀁 𑀓𑀫𑁆𑀫𑀁, 𑀦 𑀧𑀡𑁆𑀟𑀺𑀢𑀸𑀦𑀁. 𑀫𑀸𑀤𑀺𑀲𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀩𑀸𑀳𑀼𑀲𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑀺𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀘 𑀧𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀳𑀺𑀭𑀺𑀁 𑀧𑀯𑁂𑀲𑁂𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻 𑀦𑀸𑀫 𑀳𑁄𑀢𑀺. 𑀓𑀣𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫? ‘‘𑀲𑀘𑁂 𑀢𑁆𑀯𑀁 𑀧𑀸𑀧𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺, 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀕𑀭𑀳𑀧𑁆𑀧𑀢𑁆𑀢𑁄 𑀪𑀯𑀺𑀲𑁆𑀲𑀲𑀺 𑁋

‘‘𑀕𑀭𑀳𑀺𑀲𑁆𑀲𑀦𑁆𑀢𑀺 𑀢𑀁 𑀯𑀺𑀜𑁆𑀜𑀽, 𑀅𑀲𑀼𑀘𑀺𑀁 𑀦𑀸𑀕𑀭𑀺𑀓𑁄 𑀬𑀣𑀸;

𑀯𑀚𑁆𑀚𑀺𑀢𑁄 𑀲𑀻𑀮𑀯𑀦𑁆𑀢𑁂𑀳𑀺, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻’’𑀢𑀺. (𑀥. 𑀲. 𑀅𑀝𑁆𑀞. 𑁧 𑀓𑀸𑀫𑀸𑀯𑀘𑀭𑀓𑀼𑀲𑀮 𑀥𑀫𑁆𑀫𑀼𑀤𑁆𑀤𑁂𑀲𑀓𑀣𑀸) 𑁋

𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀳𑀺 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀺𑀢𑁂𑀦 𑀑𑀢𑁆𑀢𑀧𑁆𑀧𑁂𑀦 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀏𑀯𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫 𑀳𑁄𑀢𑀺.

𑀓𑀣𑀁 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻 𑀦𑀸𑀫? 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 ‘‘𑀫𑀸𑀤𑀺𑀲𑀲𑁆𑀲 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀥𑀼𑀢𑀗𑁆𑀕𑀥𑀭𑀲𑁆𑀲 𑀦 𑀬𑀼𑀢𑁆𑀢𑀁 𑀧𑀸𑀧𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺 𑀧𑀸𑀧𑀁 𑀦 𑀓𑀭𑁄𑀢𑀺. 𑀏𑀯𑀁 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑁄 𑀅𑀢𑁆𑀢𑀸𑀦𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧 𑀓𑀸𑀫𑀸𑀯𑀘𑀭𑀓𑀼𑀲𑀮 𑀥𑀫𑁆𑀫𑀼𑀤𑁆𑀤𑁂𑀲𑀓𑀣𑀸; 𑀅. 𑀦𑀺. 𑁩.𑁪𑁦).

𑀓𑀣𑀁 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁 𑀦𑀸𑀫? 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄 𑀮𑁄𑀓𑀁 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀬𑀣𑀸𑀳 𑁋