𑁯. 𑀅𑀧𑀸𑀬𑀺𑀫𑁆𑀳𑀯𑀕𑁆𑀕𑁄

[𑁮𑁧] 𑁧. 𑀲𑀼𑀭𑀸𑀧𑀸𑀦𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀸𑀬𑀺𑀫𑁆𑀳 𑀅𑀦𑀘𑁆𑀘𑀺𑀫𑁆𑀳𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀓𑁄𑀲𑀫𑁆𑀩𑀺𑀁 𑀉𑀧𑀦𑀺𑀲𑁆𑀲𑀸𑀬 𑀖𑁄𑀲𑀺𑀢𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀸𑀕𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀪𑀕𑀯𑀢𑀺 𑀳𑀺 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸𑀕𑀫𑀦𑁂𑀦 𑀪𑀤𑁆𑀤𑀯𑀢𑀺𑀓𑀁 𑀦𑀸𑀫 𑀦𑀺𑀕𑀫𑀁 𑀲𑀫𑁆𑀧𑀢𑁆𑀢𑁂 𑀕𑁄𑀧𑀸𑀮𑀓𑀸 𑀧𑀲𑀼𑀧𑀸𑀮𑀓𑀸 𑀓𑀲𑁆𑀲𑀓𑀸 𑀧𑀣𑀸𑀯𑀺𑀦𑁄 𑀘 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀸, 𑀪𑀦𑁆𑀢𑁂, 𑀪𑀕𑀯𑀸 𑀅𑀫𑁆𑀩𑀢𑀺𑀢𑁆𑀣𑀁 𑀅𑀕𑀫𑀸𑀲𑀺, 𑀅𑀫𑁆𑀩𑀢𑀺𑀢𑁆𑀣𑁂 𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑁂 𑀅𑀫𑁆𑀩𑀢𑀺𑀢𑁆𑀣𑀓𑁄 𑀦𑀸𑀫 𑀦𑀸𑀕𑁄 𑀆𑀲𑀻𑀯𑀺𑀲𑁄 𑀖𑁄𑀭𑀯𑀺𑀲𑁄, 𑀲𑁄 𑀪𑀕𑀯𑀦𑁆𑀢𑀁 𑀯𑀺𑀳𑁂𑀞𑁂𑀬𑁆𑀬𑀸’’𑀢𑀺 𑀯𑀸𑀭𑀬𑀺𑀁𑀲𑀼. 𑀪𑀕𑀯𑀸𑀧𑀺 𑀢𑁂𑀲𑀁 𑀓𑀣𑀁 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀢𑁂𑀲𑀼 𑀬𑀸𑀯𑀢𑀢𑀺𑀬𑀁 𑀯𑀸𑀭𑀬𑀫𑀸𑀦𑁂𑀲𑀼𑀧𑀺 𑀅𑀕𑀫𑀸𑀲𑀺𑀬𑁂𑀯.

𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀪𑀤𑁆𑀤𑀯𑀢𑀺𑀓𑀸𑀬 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀺𑀳𑀭𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀼𑀤𑁆𑀥𑀽𑀧𑀝𑁆𑀞𑀸𑀓𑁄 𑀲𑀸𑀕𑀢𑁄 𑀦𑀸𑀫 𑀣𑁂𑀭𑁄 𑀧𑁄𑀣𑀼𑀚𑁆𑀚𑀦𑀺𑀓𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀢𑀁 𑀅𑀲𑁆𑀲𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀢𑀺𑀡𑀲𑀦𑁆𑀣𑀸𑀭𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀦𑀸𑀕𑁄 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀥𑀽𑀫𑀸𑀬𑀺, 𑀣𑁂𑀭𑁄𑀧𑀺 𑀥𑀽𑀫𑀸𑀬𑀺. 𑀦𑀸𑀕𑁄 𑀧𑀚𑁆𑀚𑀮𑀺, 𑀣𑁂𑀭𑁄𑀧𑀺 𑀧𑀚𑁆𑀚𑀮𑀺. 𑀦𑀸𑀕𑀲𑁆𑀲 𑀢𑁂𑀚𑁄 𑀣𑁂𑀭𑀁 𑀦 𑀩𑀸𑀥𑀢𑀺, 𑀣𑁂𑀭𑀲𑁆𑀲 𑀢𑁂𑀚𑁄 𑀦𑀸𑀕𑀁 𑀩𑀸𑀥𑀢𑀺. 𑀏𑀯𑀁 𑀲𑁄 𑀔𑀡𑁂𑀦 𑀢𑀁 𑀦𑀸𑀕𑀭𑀸𑀚𑀸𑀦𑀁 𑀤𑀫𑁂𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀪𑀤𑁆𑀤𑀯𑀢𑀺𑀓𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀁 𑀅𑀕𑀫𑀸𑀲𑀺. 𑀲𑀸𑀕𑀢𑀢𑁆𑀣𑁂𑀭𑁂𑀦 𑀦𑀸𑀕𑀲𑁆𑀲 𑀤𑀫𑀺𑀢𑀪𑀸𑀯𑁄 𑀲𑀓𑀮𑀚𑀦𑀧𑀤𑀁 𑀧𑀢𑁆𑀣𑀭𑀺. 𑀓𑁄𑀲𑀫𑁆𑀩𑀺𑀦𑀕𑀭𑀯𑀸𑀲𑀺𑀦𑁄 𑀲𑀢𑁆𑀣𑀼 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀸𑀕𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀏𑀯𑀫𑀸𑀳𑀁𑀲𑀼 ‘‘𑀪𑀦𑁆𑀢𑁂, 𑀬𑀁 𑀢𑀼𑀫𑁆𑀳𑀸𑀓𑀁 𑀤𑀼𑀮𑁆𑀮𑀪𑀁, 𑀢𑀁 𑀯𑀤𑁂𑀬𑁆𑀬𑀸𑀣, 𑀢𑀤𑁂𑀯 𑀫𑀬𑀁 𑀧𑀝𑀺𑀬𑀸𑀤𑁂𑀲𑁆𑀲𑀸𑀫𑀸’’𑀢𑀺. 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀧𑀦𑀸𑀳𑀁𑀲𑀼 ‘‘𑀆𑀯𑀼𑀲𑁄, 𑀧𑀩𑁆𑀩𑀚𑀺𑀢𑀸𑀦𑀁 𑀦𑀸𑀫 𑀓𑀸𑀧𑁄𑀢𑀺𑀓𑀸 𑀲𑀼𑀭𑀸 𑀤𑀼𑀮𑁆𑀮𑀪𑀸 𑀘𑁂𑀯 𑀫𑀦𑀸𑀧𑀸 𑀘. 𑀲𑀘𑁂 𑀢𑀼𑀫𑁆𑀳𑁂 𑀣𑁂𑀭𑀲𑁆𑀲 𑀧𑀲𑀦𑁆𑀦𑀸, 𑀓𑀸𑀧𑁄𑀢𑀺𑀓𑀁 𑀲𑀼𑀭𑀁 𑀧𑀝𑀺𑀬𑀸𑀤𑁂𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑁂 ‘‘𑀣𑁂𑀭𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀓𑀸𑀧𑁄𑀢𑀺𑀓𑀁 𑀲𑀼𑀭𑀁 𑀧𑀲𑀦𑁆𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀣𑁂𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀖𑀭𑁂 𑀖𑀭𑁂 𑀧𑀲𑀦𑁆𑀦𑀁 𑀲𑀼𑀭𑀁 𑀅𑀤𑀁𑀲𑀼. 𑀣𑁂𑀭𑁄 𑀧𑀺𑀯𑀺𑀢𑁆𑀯𑀸 𑀲𑀼𑀭𑀸𑀫𑀤𑀫𑀢𑁆𑀢𑁄 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀤𑁆𑀯𑀸𑀭𑀦𑁆𑀢𑀭𑁂 𑀧𑀢𑀺𑀢𑁆𑀯𑀸 𑀯𑀺𑀮𑀧𑀫𑀸𑀦𑁄 𑀦𑀺𑀧𑀚𑁆𑀚𑀺.

𑀲𑀢𑁆𑀣𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀦𑀕𑀭𑀸 𑀦𑀺𑀓𑁆𑀔𑀫𑀦𑁆𑀢𑁄 𑀣𑁂𑀭𑀁 𑀢𑁂𑀦𑀸𑀓𑀸𑀭𑁂𑀦 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀲𑀸𑀕𑀢’’𑀦𑁆𑀢𑀺 𑀕𑀸𑀳𑀸𑀧𑁂𑀢𑁆𑀯𑀸 𑀆𑀭𑀸𑀫𑀁 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀲𑀻𑀲𑀁 𑀢𑀣𑀸𑀕𑀢𑀲𑁆𑀲 𑀧𑀸𑀤𑀫𑀽𑀮𑁂 𑀓𑀢𑁆𑀯𑀸 𑀢𑀁 𑀦𑀺𑀧𑀚𑁆𑀚𑀸𑀧𑁂𑀲𑀼𑀁, 𑀲𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀤𑁂 𑀢𑀣𑀸𑀕𑀢𑀸𑀪𑀺𑀫𑀼𑀔𑁂 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 ‘‘𑀓𑀺𑀁 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀧𑀼𑀩𑁆𑀩𑁂 𑀲𑀸𑀕𑀢𑀲𑁆𑀲 𑀫𑀬𑀺 𑀕𑀸𑀭𑀯𑀁, 𑀢𑀁 𑀇𑀤𑀸𑀦𑀺 𑀅𑀢𑁆𑀣𑀻’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀪𑀺𑀓𑁆𑀔𑀯𑁂, 𑀅𑀫𑁆𑀩𑀢𑀺𑀢𑁆𑀣𑀓𑀁 𑀦𑀸𑀕𑀭𑀸𑀚𑀸𑀦𑀁 𑀓𑁄 𑀤𑀫𑁂𑀲𑀻’’𑀢𑀺. ‘‘𑀲𑀸𑀕𑀢𑁄, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦𑁂𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀲𑀸𑀕𑀢𑁄 𑀉𑀤𑀓𑀤𑁂𑀟𑁆𑀟𑀽𑀪𑀓𑀫𑁆𑀧𑀺 𑀤𑀫𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺. ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀅𑀧𑀺 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀧𑀸𑀢𑀼𑀁 𑀬𑀼𑀢𑁆𑀢𑀁, 𑀬𑀁 𑀧𑀺𑀯𑀺𑀢𑁆𑀯𑀸 𑀏𑀯𑀁𑀯𑀺𑀲𑀜𑁆𑀜𑀻 𑀳𑁄𑀢𑀻’’𑀢𑀺. ‘‘𑀅𑀬𑀼𑀢𑁆𑀢𑀁, 𑀪𑀦𑁆𑀢𑁂’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀣𑁂𑀭𑀁 𑀕𑀭𑀳𑀺𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀼𑀭𑀸𑀫𑁂𑀭𑀬𑀧𑀸𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁩𑁨𑁭) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺.

𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 𑀲𑀼𑀭𑀸𑀧𑀸𑀦𑀲𑁆𑀲 𑀅𑀯𑀡𑁆𑀡𑀁 𑀓𑀣𑀬𑀺𑀁𑀲𑀼 ‘‘𑀬𑀸𑀯 𑀫𑀳𑀸𑀤𑁄𑀲𑀜𑁆𑀘𑁂𑀢𑀁, 𑀆𑀯𑀼𑀲𑁄, 𑀲𑀼𑀭𑀸𑀧𑀸𑀦𑀁 𑀦𑀸𑀫, 𑀢𑀸𑀯 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀁 𑀦𑀸𑀫 𑀇𑀤𑁆𑀥𑀺𑀫𑀦𑁆𑀢𑀁 𑀲𑀸𑀕𑀢𑀁 𑀬𑀣𑀸 𑀲𑀢𑁆𑀣𑀼 𑀕𑀼𑀡𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀢𑀣𑀸 𑀅𑀓𑀸𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀯𑀺𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀳𑁂𑀲𑀼𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀯𑀲𑀢𑀺 𑀧𑀜𑁆𑀘𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄. 𑀅𑀣 𑀦𑀁 𑀯𑀲𑁆𑀲𑀸𑀦𑀲𑀫𑀬𑁂 𑀲𑀫𑁆𑀧𑀢𑁆𑀢𑁂 𑀅𑀦𑁆𑀢𑁂𑀯𑀸𑀲𑀺𑀓𑀸 𑀆𑀳𑀁𑀲𑀼 ‘‘𑀆𑀘𑀭𑀺𑀬, 𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀁 𑀲𑁂𑀯𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀸’’𑀢𑀺. ‘‘𑀆𑀯𑀼𑀲𑁄, 𑀅𑀳𑀁 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀧𑀦 𑀕𑀦𑁆𑀢𑁆𑀯𑀸 𑀲𑀭𑀻𑀭𑀁 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀯𑀲𑁆𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀩𑀳𑀺𑀤𑁆𑀯𑀸𑀭𑀕𑀸𑀫𑁂𑀬𑁂𑀯 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀲𑀼𑀳𑀺𑀢𑀸 𑀳𑀼𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀪𑀺𑀓𑁆𑀔𑀁 𑀅𑀤𑀁𑀲𑀼. 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀘 𑀭𑀜𑁆𑀜𑁄𑀧𑀺 𑀆𑀭𑁄𑀘𑁂𑀲𑀼𑀁 ‘‘𑀤𑁂𑀯, 𑀳𑀺𑀫𑀯𑀦𑁆𑀢𑀢𑁄 𑀧𑀜𑁆𑀘𑀲𑀢𑀸 𑀇𑀲𑀬𑁄 𑀆𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀦𑁆𑀢𑀺 𑀖𑁄𑀭𑀢𑀧𑀸 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑀸 𑀲𑀻𑀮𑀯𑀦𑁆𑀢𑁄’’𑀢𑀺. 𑀭𑀸𑀚𑀸 𑀢𑁂𑀲𑀁 𑀕𑀼𑀡𑁂 𑀲𑀼𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀯𑀲𑁆𑀲𑀸𑀦𑀁 𑀘𑀢𑀼𑀫𑀸𑀲𑀁 𑀢𑀢𑁆𑀣𑁂𑀯 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑁂𑀲𑀺, 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀕𑁂𑀳𑁂𑀬𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀦𑀕𑀭𑁂 𑀲𑀼𑀭𑀸𑀦𑀓𑁆𑀔𑀢𑁆𑀢𑀁 𑀦𑀸𑀫 𑀅𑀳𑁄𑀲𑀺. 𑀭𑀸𑀚𑀸 ‘‘𑀧𑀩𑁆𑀩𑀚𑀺𑀢𑀸𑀦𑀁 𑀲𑀼𑀭𑀸 𑀤𑀼𑀮𑁆𑀮𑀪𑀸’’𑀢𑀺 𑀩𑀳𑀼𑀁 𑀉𑀢𑁆𑀢𑀫𑀲𑀼𑀭𑀁 𑀤𑀸𑀧𑁂𑀲𑀺. 𑀢𑀸𑀧𑀲𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀼𑀭𑀸𑀫𑀤𑀫𑀢𑁆𑀢𑀸 𑀳𑀼𑀢𑁆𑀯𑀸 𑀏𑀓𑀘𑁆𑀘𑁂 𑀉𑀝𑁆𑀞𑀸𑀬 𑀦𑀘𑁆𑀘𑀺𑀁𑀲𑀼, 𑀏𑀓𑀘𑁆𑀘𑁂 𑀕𑀸𑀬𑀺𑀁𑀲𑀼, 𑀦𑀘𑁆𑀘𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀔𑀸𑀭𑀺𑀓𑀸𑀤𑀻𑀦𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀲𑀼𑀭𑀸𑀫𑀤𑁂 𑀙𑀺𑀦𑁆𑀦𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀦 𑀅𑀫𑁆𑀳𑁂𑀳𑀺 𑀧𑀩𑁆𑀩𑀚𑀺𑀢𑀲𑀸𑀭𑀼𑀧𑁆𑀧𑀁 𑀓𑀢’’𑀦𑁆𑀢𑀺 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 ‘‘𑀫𑀬𑀁 𑀆𑀘𑀭𑀺𑀬𑁂𑀦 𑀯𑀺𑀦𑀸𑀪𑀽𑀢𑀢𑁆𑀢𑀸 𑀏𑀯𑀭𑀽𑀧𑀁 𑀧𑀸𑀧𑀓𑀫𑁆𑀫𑀁 𑀓𑀭𑀺𑀫𑁆𑀳𑀸’’𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀉𑀬𑁆𑀬𑀸𑀦𑀁 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀸𑀫𑀺𑀢𑀧𑀭𑀺𑀓𑁆𑀔𑀸𑀭𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀢𑀸𑀢𑀸, 𑀫𑀦𑀼𑀲𑁆𑀲𑀧𑀣𑁂 𑀪𑀺𑀓𑁆𑀔𑀸𑀬 𑀅𑀓𑀺𑀮𑀫𑀫𑀸𑀦𑀸 𑀲𑀼𑀔𑀁 𑀯𑀲𑀺𑀢𑁆𑀣, 𑀲𑀫𑀕𑁆𑀕𑀯𑀸𑀲𑀜𑁆𑀘 𑀧𑀦 𑀯𑀲𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀆𑀘𑀭𑀺𑀬, 𑀲𑀼𑀔𑀁 𑀯𑀲𑀺𑀫𑁆𑀳, 𑀅𑀧𑀺𑀘 𑀔𑁄 𑀧𑀦 𑀫𑀬𑀁 𑀅𑀧𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀺𑀯𑀺𑀢𑁆𑀯𑀸 𑀯𑀺𑀲𑀜𑁆𑀜𑀻𑀪𑀽𑀢𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀦𑀘𑁆𑀘𑀺𑀫𑁆𑀳 𑀘𑁂𑀯 𑀕𑀸𑀬𑀺𑀫𑁆𑀳 𑀘𑀸’’𑀢𑀺 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀦𑁆𑀢𑀸 𑀇𑀫𑀁 𑀕𑀸𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀆𑀳𑀁𑀲𑀼 𑁋

𑁮𑁧. ‘‘𑀅𑀧𑀸𑀬𑀺𑀫𑁆𑀳 𑀅𑀦𑀘𑁆𑀘𑀺𑀫𑁆𑀳, 𑀅𑀕𑀸𑀬𑀺𑀫𑁆𑀳 𑀭𑀼𑀤𑀺𑀫𑁆𑀳 𑀘;

𑀯𑀺𑀲𑀜𑁆𑀜𑀻𑀓𑀭𑀡𑀺𑀁 𑀧𑀺𑀢𑁆𑀯𑀸, 𑀤𑀺𑀝𑁆𑀞𑀸 𑀦𑀸𑀳𑀼𑀫𑁆𑀳 𑀯𑀸𑀦𑀭𑀸’’𑀢𑀺.

𑀢𑀢𑁆𑀣 𑀅𑀧𑀸𑀬𑀺𑀫𑁆𑀳𑀸𑀢𑀺 𑀲𑀼𑀭𑀁 𑀧𑀺𑀯𑀺𑀫𑁆𑀳. 𑀅𑀦𑀘𑁆𑀘𑀺𑀫𑁆𑀳𑀸𑀢𑀺 𑀢𑀁 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀮𑀸𑀴𑁂𑀦𑁆𑀢𑀸 𑀦𑀘𑁆𑀘𑀺𑀫𑁆𑀳. 𑀅𑀕𑀸𑀬𑀺𑀫𑁆𑀳𑀸𑀢𑀺 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀆𑀬𑀢𑀓𑁂𑀦 𑀲𑀭𑁂𑀦 𑀕𑀸𑀬𑀺𑀫𑁆𑀳. 𑀭𑀼𑀤𑀺𑀫𑁆𑀳 𑀘𑀸𑀢𑀺 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 ‘‘𑀏𑀯𑀭𑀽𑀧𑀁 𑀦𑀸𑀫 𑀅𑀫𑁆𑀳𑁂𑀳𑀺 𑀓𑀢’’𑀦𑁆𑀢𑀺 𑀭𑁄𑀤𑀺𑀫𑁆𑀳 𑀘. 𑀯𑀺𑀲𑀜𑁆𑀜𑀻𑀓𑀭𑀡𑀺𑀁 𑀧𑀺𑀢𑁆𑀯𑀸, 𑀤𑀺𑀝𑁆𑀞𑀸 𑀦𑀸𑀳𑀼𑀫𑁆𑀳 𑀯𑀸𑀦𑀭𑀸𑀢𑀺 𑀏𑀯𑀭𑀽𑀧𑀁 𑀲𑀜𑁆𑀜𑀸𑀯𑀺𑀦𑀸𑀲𑀦𑀢𑁄 𑀯𑀺𑀲𑀜𑁆𑀜𑀻𑀓𑀭𑀡𑀺𑀁 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 ‘‘𑀏𑀢𑀤𑁂𑀯 𑀲𑀸𑀥𑀼, 𑀬𑀁 𑀯𑀸𑀦𑀭𑀸 𑀦𑀸𑀳𑀼𑀫𑁆𑀳𑀸’’𑀢𑀺. 𑀏𑀯𑀁 𑀢𑁂 𑀅𑀢𑁆𑀢𑀦𑁄 𑀅𑀕𑀼𑀡𑀁 𑀓𑀣𑁂𑀲𑀼𑀁.

𑀩𑁄𑀥𑀺𑀲𑀢𑁆𑀢𑁄 ‘‘𑀕𑀭𑀼𑀲𑀁𑀯𑀸𑀲𑀭𑀳𑀺𑀢𑀸𑀦𑀁 𑀦𑀸𑀫 𑀏𑀯𑀭𑀽𑀧𑀁 𑀳𑁄𑀢𑀺𑀬𑁂𑀯𑀸’’𑀢𑀺 𑀢𑁂 𑀢𑀸𑀧𑀲𑁂 𑀕𑀭𑀳𑀺𑀢𑁆𑀯𑀸 ‘‘𑀧𑀼𑀦 𑀏𑀯𑀭𑀽𑀧𑀁 𑀫𑀸𑀓𑀭𑀺𑀢𑁆𑀣𑀸’’𑀢𑀺 𑀢𑁂𑀲𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀇𑀢𑁄 𑀧𑀝𑁆𑀞𑀸𑀬 𑀳𑀺 ‘‘𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸’’𑀢𑀺 𑀇𑀤𑀫𑁆𑀧𑀺 𑀦 𑀯𑀓𑁆𑀔𑀸𑀫. 𑀢𑀤𑀸 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀼𑀭𑀸𑀧𑀸𑀦𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁮𑁨] 𑁨. 𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀢𑀺𑀓𑁆𑀓𑀫𑁆𑀫 𑀭𑀫𑀡𑀓𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀇𑀫𑀲𑁆𑀲 𑀧𑀦 𑀚𑀸𑀢𑀓𑀲𑁆𑀲 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑀺𑀓𑀁 𑀯𑀢𑁆𑀣𑀼, 𑀢𑀁 𑀤𑀲𑀓𑀦𑀺𑀧𑀸𑀢𑁂 𑀫𑀳𑀸𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑁂 (𑀚𑀸. 𑁧.𑁧.𑁮𑁨; 𑁧.𑁫.𑁧𑁦𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁨. ‘‘𑀅𑀢𑀺𑀓𑁆𑀓𑀫𑁆𑀫 𑀭𑀫𑀡𑀓𑀁, 𑀲𑀤𑀸𑀫𑀢𑁆𑀢𑀜𑁆𑀘 𑀤𑀽𑀪𑀓𑀁;

𑀲𑁆𑀯𑀸𑀲𑀺 𑀧𑀸𑀲𑀸𑀡𑀫𑀸𑀲𑀻𑀦𑁄, 𑀬𑀲𑁆𑀫𑀸 𑀚𑀻𑀯𑀁 𑀦 𑀫𑁄𑀓𑁆𑀔𑀲𑀻’’𑀢𑀺.

𑀢𑀢𑁆𑀣 𑀭𑀫𑀡𑀓𑀦𑁆𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀨𑀮𑀺𑀓𑀲𑁆𑀲 𑀦𑀸𑀫𑀁, 𑀨𑀮𑀺𑀓𑀧𑀸𑀲𑀸𑀤𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑁄𑀲𑀻𑀢𑀺 𑀤𑀻𑀧𑁂𑀢𑀺. 𑀲𑀤𑀸𑀫𑀢𑁆𑀢𑀜𑁆𑀘𑀸𑀢𑀺 𑀭𑀚𑀢𑀲𑁆𑀲 𑀦𑀸𑀫𑀁, 𑀭𑀚𑀢𑀧𑀸𑀲𑀸𑀤𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑁄𑀲𑀻𑀢𑀺 𑀤𑀻𑀧𑁂𑀢𑀺. 𑀤𑀽𑀪𑀓𑀦𑁆𑀢𑀺 𑀫𑀡𑀺𑀦𑁄 𑀦𑀸𑀫𑀁, 𑀫𑀡𑀺𑀧𑀸𑀲𑀸𑀤𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑁄𑀲𑀻𑀢𑀺 𑀤𑀻𑀧𑁂𑀢𑀺. 𑀲𑁆𑀯𑀸𑀲𑀻𑀢𑀺 𑀲𑁄 𑀅𑀲𑀺 𑀢𑁆𑀯𑀁. 𑀧𑀸𑀲𑀸𑀡𑀫𑀸𑀲𑀻𑀦𑁄𑀢𑀺 𑀔𑀼𑀭𑀘𑀓𑁆𑀓𑀁 𑀦𑀸𑀫 𑀧𑀸𑀲𑀸𑀡𑀫𑀬𑀁 𑀯𑀸 𑀳𑁄𑀢𑀺 𑀭𑀚𑀢𑀫𑀬𑀁 𑀯𑀸 𑀫𑀡𑀺𑀫𑀬𑀁 𑀯𑀸, 𑀢𑀁 𑀧𑀦 𑀧𑀸𑀲𑀸𑀡𑀫𑀬𑀫𑁂𑀯. 𑀲𑁄 𑀘 𑀢𑁂𑀦 𑀆𑀲𑀻𑀦𑁄 𑀅𑀢𑀺𑀦𑀺𑀯𑀺𑀝𑁆𑀞𑁄 𑀅𑀚𑁆𑀛𑁄𑀢𑁆𑀣𑀝𑁄. 𑀢𑀲𑁆𑀫𑀸 𑀧𑀸𑀲𑀸𑀡𑁂𑀦 𑀆𑀲𑀻𑀦𑀢𑁆𑀢𑀸 ‘‘𑀧𑀸𑀲𑀸𑀡𑀸𑀲𑀻𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 𑀫𑀓𑀸𑀭𑀁 𑀆𑀤𑀸𑀬 ‘‘𑀧𑀸𑀲𑀸𑀡𑀫𑀸𑀲𑀻𑀦𑁄’’𑀢𑀺 𑀯𑀼𑀢𑁆𑀢𑀁. 𑀧𑀸𑀲𑀸𑀡𑀁 𑀯𑀸 𑀆𑀲𑀻𑀦𑁄, 𑀢𑀁 𑀔𑀼𑀭𑀘𑀓𑁆𑀓𑀁 𑀆𑀲𑀚𑁆𑀚 𑀧𑀸𑀧𑀼𑀡𑀺𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀚𑀻𑀯𑀁 𑀦 𑀫𑁄𑀓𑁆𑀔𑀲𑀻𑀢𑀺 𑀬𑀲𑁆𑀫𑀸 𑀔𑀼𑀭𑀘𑀓𑁆𑀓𑀸 𑀬𑀸𑀯 𑀢𑁂 𑀧𑀸𑀧𑀁 𑀦 𑀔𑀻𑀬𑀢𑀺, 𑀢𑀸𑀯 𑀚𑀻𑀯𑀦𑁆𑀢𑁄𑀬𑁂𑀯 𑀦 𑀫𑀼𑀘𑁆𑀘𑀺𑀲𑁆𑀲𑀲𑀺, 𑀢𑀁 𑀆𑀲𑀻𑀦𑁄𑀲𑀻𑀢𑀺.

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁𑀬𑁂𑀯 𑀕𑀢𑁄. 𑀫𑀺𑀢𑁆𑀢𑀯𑀺𑀦𑁆𑀤𑀓𑁄𑀧𑀺 𑀔𑀼𑀭𑀘𑀓𑁆𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀫𑀸𑀦𑁄 𑀧𑀸𑀧𑀓𑀫𑁆𑀫𑁂 𑀧𑀭𑀺𑀓𑁆𑀔𑀻𑀡𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀤𑁂𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁮𑁩] 𑁩. 𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀯𑀡𑁆𑀡𑀦𑀸

𑀫𑀺𑀢𑁆𑀢𑁄 𑀳𑀯𑁂 𑀲𑀢𑁆𑀢𑀧𑀤𑁂𑀦 𑀳𑁄𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀫𑀺𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀲𑀤𑁆𑀥𑀺𑀁 𑀲𑀳𑀧𑀁𑀲𑀼𑀓𑀻𑀴𑀺𑀓𑁄 𑀏𑀓𑀸𑀘𑀭𑀺𑀬𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀦𑀸𑀫𑁂𑀦 𑀓𑀸𑀴𑀓𑀡𑁆𑀡𑀻 𑀦𑀸𑀫. 𑀲𑁄 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀤𑀼𑀕𑁆𑀕𑀢𑁄 𑀳𑀼𑀢𑁆𑀯𑀸 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀝𑀼𑀫𑁆𑀩𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀲𑁄 𑀲𑁂𑀝𑁆𑀞𑀺𑀦𑁄 𑀉𑀧𑀓𑀸𑀭𑀓𑁄 𑀳𑀼𑀢𑁆𑀯𑀸 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀢𑀁 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑀓𑀸𑀮𑁂 ‘‘𑀢𑀺𑀝𑁆𑀞, 𑀓𑀸𑀴𑀓𑀡𑁆𑀡𑀺, 𑀦𑀺𑀲𑀻𑀤, 𑀓𑀸𑀴𑀓𑀡𑁆𑀡𑀺, 𑀪𑀼𑀜𑁆𑀚 𑀓𑀸𑀴𑀓𑀡𑁆𑀡𑀻’’𑀢𑀺 𑀯𑀤𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁂𑀝𑁆𑀞𑀺𑀦𑁄 𑀫𑀺𑀢𑁆𑀢𑀸𑀫𑀘𑁆𑀘𑀸 𑀲𑁂𑀝𑁆𑀞𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 ‘‘𑀫𑀳𑀸𑀲𑁂𑀝𑁆𑀞𑀺, 𑀫𑀸 𑀏𑀢𑀁 𑀢𑀯 𑀲𑀦𑁆𑀢𑀺𑀓𑁂 𑀓𑀭𑀺, ‘𑀢𑀺𑀝𑁆𑀞, 𑀓𑀸𑀴𑀓𑀡𑁆𑀡𑀺, 𑀦𑀺𑀲𑀻𑀤 𑀓𑀸𑀴𑀓𑀡𑁆𑀡𑀺, 𑀪𑀼𑀜𑁆𑀚 𑀓𑀸𑀴𑀓𑀡𑁆𑀡𑀻’𑀢𑀺 𑀳𑀺 𑀇𑀫𑀺𑀦𑀸 𑀲𑀤𑁆𑀤𑁂𑀦 𑀬𑀓𑁆𑀔𑁄𑀧𑀺 𑀧𑀮𑀸𑀬𑁂𑀬𑁆𑀬, 𑀦 𑀘𑁂𑀲 𑀢𑀬𑀸 𑀲𑀫𑀸𑀦𑁄, 𑀤𑀼𑀕𑁆𑀕𑀢𑁄 𑀤𑀼𑀭𑀽𑀧𑁂𑀢𑁄, 𑀓𑀺𑀁 𑀢𑁂 𑀇𑀫𑀺𑀦𑀸’’𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀦𑀸𑀫𑀁 𑀦𑀸𑀫 𑀯𑁄𑀳𑀸𑀭𑀫𑀢𑁆𑀢𑀁, 𑀦 𑀢𑀁 𑀧𑀡𑁆𑀟𑀺𑀢𑀸 𑀧𑀫𑀸𑀡𑀁 𑀓𑀭𑁄𑀦𑁆𑀢𑀺, 𑀲𑀼𑀢𑀫𑀗𑁆𑀕𑀮𑀺𑀓𑁂𑀦 𑀦𑀸𑀫 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀦 𑀲𑀓𑁆𑀓𑀸 𑀫𑀬𑀸 𑀦𑀸𑀫𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀲𑀳𑀧𑀁𑀲𑀼𑀓𑀻𑀴𑀺𑀓𑀁 𑀲𑀳𑀸𑀬𑀁 𑀧𑀭𑀺𑀘𑁆𑀘𑀚𑀺𑀢𑀼’’𑀦𑁆𑀢𑀺 𑀢𑁂𑀲𑀁 𑀯𑀘𑀦𑀁 𑀅𑀦𑀸𑀤𑀸𑀬 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀪𑁄𑀕𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀕𑁂𑀳𑀭𑀓𑁆𑀔𑀓𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺.

𑀘𑁄𑀭𑀸 ‘‘𑀲𑁂𑀝𑁆𑀞𑀺 𑀓𑀺𑀭 𑀪𑁄𑀕𑀕𑀸𑀫𑀁 𑀕𑀢𑁄, 𑀕𑁂𑀳𑀫𑀲𑁆𑀲 𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀸’’𑀢𑀺 𑀦𑀸𑀦𑀸𑀯𑀼𑀥𑀳𑀢𑁆𑀣𑀸 𑀭𑀢𑁆𑀢𑀺𑀪𑀸𑀕𑁂 𑀆𑀕𑀦𑁆𑀢𑁆𑀯𑀸 𑀕𑁂𑀳𑀁 𑀧𑀭𑀺𑀯𑀸𑀭𑁂𑀲𑀼𑀁. 𑀇𑀢𑀭𑁄𑀧𑀺 𑀘𑁄𑀭𑀸𑀦𑀜𑁆𑀜𑁂𑀯 𑀆𑀕𑀫𑀦𑀁 𑀆𑀲𑀗𑁆𑀓𑀫𑀸𑀦𑁄 𑀅𑀦𑀺𑀤𑁆𑀤𑀸𑀬𑀦𑁆𑀢𑁄𑀯 𑀦𑀺𑀲𑀻𑀤𑀺. 𑀲𑁄 𑀘𑁄𑀭𑀸𑀦𑀁 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀩𑁄𑀥𑁂𑀢𑀼𑀁 ‘‘𑀢𑁆𑀯𑀁 𑀲𑀗𑁆𑀔𑀁 𑀥𑀫, 𑀢𑁆𑀯𑀁 𑀫𑀼𑀤𑀺𑀗𑁆𑀕𑀁 𑀯𑀸𑀤𑁂𑀳𑀻’’𑀢𑀺 𑀫𑀳𑀸𑀲𑀫𑀚𑁆𑀚𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀲𑀓𑀮𑀦𑀺𑀯𑁂𑀲𑀦𑀁 𑀏𑀓𑀲𑀤𑁆𑀤𑀁 𑀓𑀸𑀭𑁂𑀲𑀺. 𑀘𑁄𑀭𑀸 ‘‘𑀲𑀼𑀜𑁆𑀜𑀁 𑀕𑁂𑀳𑀦𑁆𑀢𑀺 𑀤𑀼𑀲𑁆𑀲𑀼𑀢𑀁 𑀅𑀫𑁆𑀳𑁂𑀳𑀺, 𑀅𑀢𑁆𑀣𑁂𑀯 𑀇𑀥 𑀫𑀳𑀸𑀲𑁂𑀝𑁆𑀞𑀻’’𑀢𑀺 𑀧𑀸𑀲𑀸𑀡𑀫𑀼𑀕𑁆𑀕𑀭𑀸𑀤𑀻𑀦𑀺 𑀢𑀢𑁆𑀣𑁂𑀯 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼.

𑀧𑀼𑀦𑀤𑀺𑀯𑀲𑁂 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀢𑀢𑁆𑀣 𑀙𑀟𑁆𑀟𑀺𑀢𑁂 𑀧𑀸𑀲𑀸𑀡𑀫𑀼𑀕𑁆𑀕𑀭𑀸𑀤𑀬𑁄 𑀤𑀺𑀲𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀲𑀘𑁂 𑀅𑀚𑁆𑀚 𑀏𑀯𑀭𑀽𑀧𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀖𑀭𑀯𑀺𑀘𑀸𑀭𑀓𑁄 𑀦𑀸𑀪𑀯𑀺𑀲𑁆𑀲, 𑀘𑁄𑀭𑁂𑀳𑀺 𑀬𑀣𑀸𑀭𑀼𑀘𑀺𑀬𑀸 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀁 𑀕𑁂𑀳𑀁 𑀯𑀺𑀮𑀼𑀢𑁆𑀢𑀁 𑀅𑀲𑁆𑀲, 𑀇𑀫𑀁 𑀤𑀴𑁆𑀳𑀫𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀲𑁂𑀝𑁆𑀞𑀺𑀦𑁄 𑀯𑀼𑀟𑁆𑀠𑀺 𑀚𑀸𑀢𑀸’’𑀢𑀺 𑀢𑀁 𑀧𑀲𑀁𑀲𑀺𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀪𑁄𑀕𑀕𑀸𑀫𑀢𑁄 𑀆𑀕𑀢𑀓𑀸𑀮𑁂 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑀬𑀺𑀁𑀲𑀼. 𑀅𑀣 𑀦𑁂 𑀲𑁂𑀝𑁆𑀞𑀺 𑀅𑀯𑁄𑀘 ‘‘𑀢𑀼𑀫𑁆𑀳𑁂 𑀏𑀯𑀭𑀽𑀧𑀁 𑀫𑀫 𑀕𑁂𑀳𑀭𑀓𑁆𑀔𑀓𑀁 𑀫𑀺𑀢𑁆𑀢𑀁 𑀦𑀺𑀓𑁆𑀓𑀟𑁆𑀠𑀸𑀧𑁂𑀣, 𑀲𑀘𑀸𑀬𑀁 𑀢𑀼𑀫𑁆𑀳𑀸𑀓𑀁 𑀯𑀘𑀦𑁂𑀦 𑀫𑀬𑀸 𑀦𑀺𑀓𑁆𑀓𑀟𑁆𑀠𑀺𑀢𑁄 𑀅𑀲𑁆𑀲, 𑀅𑀚𑁆𑀚 𑀫𑁂 𑀓𑀼𑀝𑀼𑀫𑁆𑀩𑀁 𑀓𑀺𑀜𑁆𑀘𑀺 𑀦𑀸𑀪𑀯𑀺𑀲𑁆𑀲, 𑀦𑀸𑀫𑀁 𑀦𑀸𑀫 𑀅𑀧𑁆𑀧𑀫𑀸𑀡𑀁, 𑀳𑀺𑀢𑀘𑀺𑀢𑁆𑀢𑀫𑁂𑀯 𑀧𑀫𑀸𑀡’’𑀦𑁆𑀢𑀺 𑀢𑀲𑁆𑀲 𑀉𑀢𑁆𑀢𑀭𑀺𑀢𑀭𑀁 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 ‘‘𑀅𑀢𑁆𑀣𑀺 𑀤𑀸𑀦𑀺 𑀫𑁂 𑀇𑀤𑀁 𑀓𑀣𑀸𑀧𑀸𑀪𑀢’’𑀦𑁆𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀕𑀳𑀧𑀢𑀺, 𑀇𑀤𑀸𑀦𑁂𑀯 𑀓𑀸𑀴𑀓𑀡𑁆𑀡𑀺𑀫𑀺𑀢𑁆𑀢𑁄 𑀅𑀢𑁆𑀢𑀦𑁄 𑀫𑀺𑀢𑁆𑀢𑀲𑁆𑀲 𑀖𑀭𑁂 𑀓𑀼𑀝𑀼𑀫𑁆𑀩𑀁 𑀭𑀓𑁆𑀔𑀢𑀺, 𑀧𑀼𑀩𑁆𑀩𑁂𑀧𑀺 𑀭𑀓𑁆𑀔𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀬𑀲𑁄 𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀢𑀲𑁆𑀲 𑀓𑀸𑀴𑀓𑀡𑁆𑀡𑀻 𑀦𑀸𑀫 𑀫𑀺𑀢𑁆𑀢𑁄𑀢𑀺 𑀲𑀩𑁆𑀩𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀩𑁄𑀥𑀺𑀲𑀢𑁆𑀢𑁄 𑀪𑁄𑀕𑀕𑀸𑀫𑀢𑁄 𑀆𑀕𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀲𑀘𑁂 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀯𑀘𑀦𑁂𑀦 𑀏𑀯𑀭𑀽𑀧𑁄 𑀫𑀺𑀢𑁆𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑁄 𑀅𑀲𑁆𑀲, 𑀅𑀚𑁆𑀚 𑀫𑁂 𑀓𑀼𑀝𑀼𑀫𑁆𑀩𑀁 𑀓𑀺𑀜𑁆𑀘𑀺 𑀦𑀸𑀪𑀯𑀺𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁩. ‘‘𑀫𑀺𑀢𑁆𑀢𑁄 𑀳𑀯𑁂 𑀲𑀢𑁆𑀢𑀧𑀤𑁂𑀦 𑀳𑁄𑀢𑀺, 𑀲𑀳𑀸𑀬𑁄 𑀧𑀦 𑀤𑁆𑀯𑀸𑀤𑀲𑀓𑁂𑀦 𑀳𑁄𑀢𑀺;

𑀫𑀸𑀲𑀟𑁆𑀠𑀫𑀸𑀲𑁂𑀦 𑀘 𑀜𑀸𑀢𑀺 𑀳𑁄𑀢𑀺, 𑀢𑀢𑀼𑀢𑁆𑀢𑀭𑀺𑀁 𑀅𑀢𑁆𑀢𑀲𑀫𑁄𑀧𑀺 𑀳𑁄𑀢𑀺;

𑀲𑁄𑀳𑀁 𑀓𑀣𑀁 𑀅𑀢𑁆𑀢𑀲𑀼𑀔𑀲𑁆𑀲 𑀳𑁂𑀢𑀼, 𑀘𑀺𑀭𑀲𑀦𑁆𑀣𑀼𑀢𑀁 𑀓𑀸𑀴𑀓𑀡𑁆𑀡𑀺𑀁 𑀚𑀳𑁂𑀬𑁆𑀬’’𑀦𑁆𑀢𑀺.

𑀢𑀢𑁆𑀣 𑀳𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀫𑁂𑀢𑁆𑀢𑀸𑀬𑀢𑀻𑀢𑀺 𑀫𑀺𑀢𑁆𑀢𑁄, 𑀫𑁂𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺, 𑀲𑀺𑀦𑁂𑀳𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑁂𑀲 𑀲𑀢𑁆𑀢𑀧𑀤𑁂𑀦 𑀳𑁄𑀢𑀺, 𑀏𑀓𑀢𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀕𑀫𑀦𑀫𑀢𑁆𑀢𑁂𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀳𑀸𑀬𑁄 𑀧𑀦 𑀤𑁆𑀯𑀸𑀤𑀲𑀓𑁂𑀦 𑀳𑁄𑀢𑀻𑀢𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀏𑀓𑀢𑁄 𑀓𑀭𑀡𑀯𑀲𑁂𑀦 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀳 𑀕𑀘𑁆𑀙𑀢𑀻𑀢𑀺 𑀲𑀳𑀸𑀬𑁄. 𑀲𑁄 𑀧𑀦𑁂𑀲 𑀤𑁆𑀯𑀸𑀤𑀲𑀓𑁂𑀦 𑀳𑁄𑀢𑀺, 𑀤𑁆𑀯𑀸𑀤𑀲𑀸𑀳𑀁 𑀏𑀓𑀢𑁄 𑀦𑀺𑀯𑀸𑀲𑁂𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀸𑀲𑀟𑁆𑀠𑀫𑀸𑀲𑁂𑀦 𑀘𑀸𑀢𑀺 𑀫𑀸𑀲𑁂𑀦 𑀯𑀸 𑀅𑀟𑁆𑀠𑀫𑀸𑀲𑁂𑀦 𑀯𑀸. 𑀜𑀸𑀢𑀺 𑀳𑁄𑀢𑀻𑀢𑀺 𑀜𑀸𑀢𑀺𑀲𑀫𑁄 𑀳𑁄𑀢𑀺. 𑀢𑀢𑀼𑀢𑁆𑀢𑀭𑀺𑀦𑁆𑀢𑀺 𑀢𑀢𑁄 𑀉𑀢𑁆𑀢𑀭𑀺𑀁 𑀏𑀓𑀢𑁄 𑀯𑀸𑀲𑁂𑀦 𑀅𑀢𑁆𑀢𑀲𑀫𑁄𑀧𑀺 𑀳𑁄𑀢𑀺𑀬𑁂𑀯. 𑀚𑀳𑁂𑀬𑁆𑀬𑀦𑁆𑀢𑀺 ‘‘𑀏𑀯𑀭𑀽𑀧𑀁 𑀲𑀳𑀸𑀬𑀁 𑀓𑀣𑀁 𑀚𑀳𑁂𑀬𑁆𑀬’’𑀦𑁆𑀢𑀺 𑀫𑀺𑀢𑁆𑀢𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀓𑁄𑀘𑀺 𑀢𑀲𑁆𑀲 𑀅𑀦𑁆𑀢𑀭𑁂 𑀯𑀢𑁆𑀢𑀸 𑀦𑀸𑀫 𑀦𑀸𑀳𑁄𑀲𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀸𑀴𑀓𑀡𑁆𑀡𑀻 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁮𑁪] 𑁪. 𑀅𑀢𑁆𑀣𑀲𑁆𑀲𑀤𑁆𑀯𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀆𑀭𑁄𑀕𑁆𑀬𑀫𑀺𑀘𑁆𑀙𑁂 𑀧𑀭𑀫𑀜𑁆𑀘 𑀮𑀸𑀪𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀢𑁆𑀣𑀓𑀼𑀲𑀮𑀁 𑀓𑀼𑀮𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀏𑀓𑀲𑁆𑀲 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄 𑀧𑀜𑁆𑀜𑀯𑀸 𑀅𑀢𑁆𑀣𑀓𑀼𑀲𑀮𑁄. 𑀲𑁄 𑀏𑀓𑀤𑀺𑀯𑀲𑀁 𑀧𑀺𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀧𑀜𑁆𑀳𑀁 𑀦𑀸𑀫 𑀧𑀼𑀘𑁆𑀙𑀺, 𑀲𑁄 𑀢𑀁 𑀦 𑀚𑀸𑀦𑀸𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀬𑀁 𑀧𑀜𑁆𑀳𑁄 𑀅𑀢𑀺𑀲𑀼𑀔𑀼𑀫𑁄, 𑀞𑀧𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀁 𑀅𑀜𑁆𑀜𑁄 𑀉𑀧𑀭𑀺 𑀪𑀯𑀕𑁆𑀕𑁂𑀦, 𑀳𑁂𑀝𑁆𑀞𑀸 𑀘 𑀅𑀯𑀻𑀘𑀺𑀦𑀸 𑀧𑀭𑀺𑀘𑁆𑀙𑀺𑀦𑁆𑀦𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀏𑀢𑀁 𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀲𑁄 𑀧𑀼𑀢𑁆𑀢𑀫𑀸𑀤𑀸𑀬 𑀩𑀳𑀼𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀬𑀁, 𑀪𑀦𑁆𑀢𑁂, 𑀤𑀸𑀭𑀓𑁄 𑀧𑀜𑁆𑀜𑀯𑀸 𑀅𑀢𑁆𑀣𑀓𑀼𑀲𑀮𑁄 𑀫𑀁 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀧𑀜𑁆𑀳𑀁 𑀦𑀸𑀫 𑀧𑀼𑀘𑁆𑀙𑀺, 𑀅𑀳𑀁 𑀢𑀁 𑀧𑀜𑁆𑀳𑀁 𑀅𑀚𑀸𑀦𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀁 𑀧𑀜𑁆𑀳𑀁 𑀓𑀣𑁂𑀢𑀽’’𑀢𑀺. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀸𑀳𑀁, 𑀉𑀧𑀸𑀲𑀓, 𑀇𑀫𑀺𑀦𑀸 𑀓𑀼𑀫𑀸𑀭𑀓𑁂𑀦𑁂𑀢𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄, 𑀫𑀬𑀸 𑀘𑀲𑁆𑀲 𑀓𑀣𑀺𑀢𑁄, 𑀢𑀤𑀸 𑀦𑀁 𑀏𑀲 𑀚𑀸𑀦𑀸𑀢𑀺, 𑀇𑀤𑀸𑀦𑀺 𑀧𑀦 𑀪𑀯𑀲𑀗𑁆𑀔𑁂𑀧𑀕𑀢𑀢𑁆𑀢𑀸 𑀦 𑀲𑀮𑁆𑀮𑀓𑁆𑀔𑁂𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀅𑀣𑀲𑁆𑀲 𑀧𑀼𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀚𑀸𑀢𑀺𑀬𑀸 𑀧𑀜𑁆𑀜𑀯𑀸 𑀅𑀢𑁆𑀣𑀓𑀼𑀲𑀮𑁄. 𑀲𑁄 𑀏𑀓𑀤𑀺𑀯𑀲𑀁 𑀧𑀺𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀸𑀢, 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀁 𑀦𑀸𑀫 𑀓𑀺’’𑀦𑁆𑀢𑀺 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀧𑀺𑀢𑀸 𑀢𑀁 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁪. ‘‘𑀆𑀭𑁄𑀕𑁆𑀬𑀫𑀺𑀘𑁆𑀙𑁂 𑀧𑀭𑀫𑀜𑁆𑀘 𑀮𑀸𑀪𑀁, 𑀲𑀻𑀮𑀜𑁆𑀘 𑀯𑀼𑀤𑁆𑀥𑀸𑀦𑀼𑀫𑀢𑀁 𑀲𑀼𑀢𑀜𑁆𑀘;

𑀥𑀫𑁆𑀫𑀸𑀦𑀼𑀯𑀢𑁆𑀢𑀻 𑀘 𑀅𑀮𑀻𑀦𑀢𑀸 𑀘, 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀸 𑀧𑀫𑀼𑀔𑀸 𑀙𑀴𑁂𑀢𑁂’’𑀢𑀺.

𑀢𑀢𑁆𑀣 𑀆𑀭𑁄𑀕𑁆𑀬𑀫𑀺𑀘𑁆𑀙𑁂 𑀧𑀭𑀫𑀜𑁆𑀘 𑀮𑀸𑀪𑀦𑁆𑀢𑀺 𑀘-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀸𑀢, 𑀧𑀞𑀫𑀫𑁂𑀯 𑀆𑀭𑁄𑀕𑁆𑀬𑀲𑀗𑁆𑀔𑀸𑀢𑀁 𑀧𑀭𑀫𑀁 𑀮𑀸𑀪𑀁 𑀇𑀘𑁆𑀙𑁂𑀬𑁆𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀆𑀭𑁄𑀕𑁆𑀬𑀁 𑀦𑀸𑀫 𑀲𑀭𑀻𑀭𑀲𑁆𑀲 𑀘𑁂𑀯 𑀘𑀺𑀢𑁆𑀢𑀲𑁆𑀲 𑀘 𑀅𑀭𑁄𑀕𑀪𑀸𑀯𑁄 𑀅𑀦𑀸𑀢𑀼𑀭𑀢𑀸. 𑀲𑀭𑀻𑀭𑁂 𑀳𑀺 𑀭𑁄𑀕𑀸𑀢𑀼𑀭𑁂 𑀦𑁂𑀯 𑀅𑀮𑀤𑁆𑀥𑀁 𑀪𑁄𑀕𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀮𑀤𑁆𑀥𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀅𑀦𑀸𑀢𑀼𑀭𑁂 𑀧𑀦 𑀉𑀪𑀬𑀫𑁆𑀧𑁂𑀢𑀁 𑀲𑀓𑁆𑀓𑁄𑀢𑀺. 𑀘𑀺𑀢𑁆𑀢𑁂 𑀘 𑀓𑀺𑀮𑁂𑀲𑀸𑀢𑀼𑀭𑁂 𑀦𑁂𑀯 𑀅𑀮𑀤𑁆𑀥𑀁 𑀛𑀸𑀦𑀸𑀤𑀺𑀪𑁂𑀤𑀁 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀮𑀤𑁆𑀥𑀁 𑀧𑀼𑀦 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀏𑀢𑀲𑁆𑀫𑀺𑀁 𑀅𑀦𑀸𑀭𑁄𑀕𑁆𑀬𑁂 𑀲𑀢𑀺 𑀅𑀮𑀤𑁆𑀥𑁄𑀧𑀺 𑀮𑀸𑀪𑁄 𑀦 𑀮𑀩𑁆𑀪𑀢𑀺, 𑀮𑀤𑁆𑀥𑁄𑀧𑀺 𑀦𑀺𑀭𑀢𑁆𑀣𑀓𑁄 𑀳𑁄𑀢𑀺, 𑀅𑀲𑀢𑀺 𑀧𑀦𑁂𑀢𑀲𑁆𑀫𑀺𑀁 𑀅𑀮𑀤𑁆𑀥𑁄𑀧𑀺 𑀮𑀸𑀪𑁄 𑀮𑀩𑁆𑀪𑀢𑀺, 𑀮𑀤𑁆𑀥𑁄𑀧𑀺 𑀲𑀸𑀢𑁆𑀣𑀓𑁄 𑀳𑁄𑀢𑀻𑀢𑀺 𑀆𑀭𑁄𑀕𑁆𑀬𑀁 𑀧𑀭𑀫𑁄 𑀮𑀸𑀪𑁄 𑀦𑀸𑀫. 𑀢𑀁 𑀲𑀩𑁆𑀩𑀧𑀞𑀫𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀇𑀤𑀫𑁂𑀓𑀁 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑀻𑀮𑀜𑁆𑀘𑀸𑀢𑀺 𑀆𑀘𑀸𑀭𑀲𑀻𑀮𑀁. 𑀇𑀫𑀺𑀦𑀸 𑀮𑁄𑀓𑀘𑀸𑀭𑀺𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀯𑀼𑀤𑁆𑀥𑀸𑀦𑀼𑀫𑀢𑀦𑁆𑀢𑀺 𑀕𑀼𑀡𑀯𑀼𑀤𑁆𑀥𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀅𑀦𑀼𑀫𑀢𑀁. 𑀇𑀫𑀺𑀦𑀸 𑀜𑀸𑀡𑀲𑀫𑁆𑀧𑀦𑁆𑀦𑀸𑀦𑀁 𑀕𑀭𑀽𑀦𑀁 𑀑𑀯𑀸𑀤𑀁 𑀤𑀲𑁆𑀲𑁂𑀢𑀺. 𑀲𑀼𑀢𑀜𑁆𑀘𑀸𑀢𑀺 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀲𑀼𑀢𑀁. 𑀇𑀫𑀺𑀦𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀩𑀸𑀳𑀼𑀲𑀘𑁆𑀘𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀸𑀦𑀼𑀯𑀢𑁆𑀢𑀻 𑀘𑀸𑀢𑀺 𑀢𑀺𑀯𑀺𑀥𑀲𑁆𑀲 𑀲𑀼𑀘𑀭𑀺𑀢𑀥𑀫𑁆𑀫𑀲𑁆𑀲 𑀅𑀦𑀼𑀯𑀢𑁆𑀢𑀦𑀁. 𑀇𑀫𑀺𑀦𑀸 𑀤𑀼𑀘𑁆𑀘𑀭𑀺𑀢𑀥𑀫𑁆𑀫𑀁 𑀯𑀚𑁆𑀚𑁂𑀢𑁆𑀯𑀸 𑀲𑀼𑀘𑀭𑀺𑀢𑀥𑀫𑁆𑀫𑀲𑁆𑀲 𑀅𑀦𑀼𑀯𑀢𑁆𑀢𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀮𑀻𑀦𑀢𑀸 𑀘𑀸𑀢𑀺 𑀘𑀺𑀢𑁆𑀢𑀲𑁆𑀲 𑀅𑀮𑀻𑀦𑀢𑀸 𑀅𑀦𑀻𑀘𑀢𑀸. 𑀇𑀫𑀺𑀦𑀸 𑀘𑀺𑀢𑁆𑀢𑀲𑁆𑀲 𑀅𑀲𑀗𑁆𑀓𑁄𑀘𑀢𑀁 𑀧𑀡𑀻𑀢𑀪𑀸𑀯𑀁 𑀉𑀢𑁆𑀢𑀫𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀸 𑀧𑀫𑀼𑀔𑀸 𑀙𑀴𑁂𑀢𑁂𑀢𑀺 𑀅𑀢𑁆𑀣𑁄 𑀦𑀸𑀫 𑀯𑀼𑀟𑁆𑀠𑀺, 𑀢𑀲𑁆𑀲 𑀯𑀼𑀟𑁆𑀠𑀺𑀲𑀗𑁆𑀔𑀸𑀢𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑁆𑀲 𑀅𑀢𑁆𑀣𑀲𑁆𑀲 𑀏𑀢𑁂 𑀧𑀫𑀼𑀔𑀸 𑀉𑀢𑁆𑀢𑀫𑀸 𑀙 𑀤𑁆𑀯𑀸𑀭𑀸 𑀉𑀧𑀸𑀬𑀸 𑀅𑀥𑀺𑀕𑀫𑀫𑀼𑀔𑀸𑀦𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀧𑀜𑁆𑀳𑀁 𑀓𑀣𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼 𑀯𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀼𑀢𑁆𑀢𑁄𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀼𑀢𑁆𑀢𑁄, 𑀫𑀳𑀸𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀢𑁆𑀣𑀲𑁆𑀲𑀤𑁆𑀯𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁮𑁫] 𑁫. 𑀓𑀺𑀁𑀧𑀓𑁆𑀓𑀚𑀸𑀢𑀓𑀯𑀡𑁆𑀡𑀦𑀸

𑀆𑀬𑀢𑀺𑀁 𑀤𑁄𑀲𑀁 𑀦𑀸𑀜𑁆𑀜𑀸𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀜𑁆𑀜𑀢𑀭𑁄 𑀓𑀺𑀭 𑀓𑀼𑀮𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀏𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀁 𑀅𑀮𑀗𑁆𑀓𑀢𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀉𑀓𑁆𑀓𑀡𑁆𑀞𑀺. 𑀅𑀣 𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀦𑀬𑀺𑀁𑀲𑀼. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀧𑀜𑁆𑀘 𑀓𑀸𑀫𑀕𑀼𑀡𑀸 𑀦𑀸𑀫𑁂𑀢𑁂 𑀪𑀺𑀓𑁆𑀔𑀼 𑀧𑀭𑀺𑀪𑁄𑀕𑀓𑀸𑀮𑁂 𑀭𑀫𑀡𑀻𑀬𑀸. 𑀲𑁄 𑀧𑀦 𑀢𑁂𑀲𑀁 𑀧𑀭𑀺𑀪𑁄𑀕𑁄 𑀦𑀺𑀭𑀬𑀸𑀤𑀻𑀲𑀼 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀢𑁆𑀢𑀸 𑀓𑀺𑀁𑀧𑀓𑁆𑀓𑀨𑀮𑀧𑀭𑀺𑀪𑁄𑀕𑀲𑀤𑀺𑀲𑁄 𑀳𑁄𑀢𑀺. 𑀓𑀺𑀁𑀧𑀓𑁆𑀓𑀨𑀮𑀁 𑀦𑀸𑀫 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀁, 𑀔𑀸𑀤𑀺𑀢𑀁 𑀧𑀦 𑀅𑀦𑁆𑀢𑀸𑀦𑀺 𑀔𑀡𑁆𑀟𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑀺. 𑀧𑀼𑀩𑁆𑀩𑁂 𑀩𑀳𑀽 𑀩𑀸𑀮𑀚𑀦𑀸 𑀢𑀲𑁆𑀲 𑀤𑁄𑀲𑀁 𑀅𑀤𑀺𑀲𑁆𑀯𑀸 𑀯𑀡𑁆𑀡𑀕𑀦𑁆𑀥𑀭𑀲𑁂𑀲𑀼 𑀩𑀚𑁆𑀛𑀺𑀢𑁆𑀯𑀸 𑀢𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀢𑁆𑀣𑀯𑀸𑀳𑁄 𑀳𑀼𑀢𑁆𑀯𑀸 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀕𑀘𑁆𑀙𑀦𑁆𑀢𑁄 𑀅𑀝𑀯𑀺𑀫𑀼𑀔𑀁 𑀧𑀢𑁆𑀯𑀸 𑀫𑀦𑀼𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀅𑀝𑀯𑀺𑀬𑀸 𑀯𑀺𑀲𑀭𑀼𑀓𑁆𑀔𑀸 𑀦𑀸𑀫 𑀅𑀢𑁆𑀣𑀺, 𑀫𑀸 𑀔𑁄 𑀫𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀩𑁆𑀩𑁂 𑀅𑀔𑀸𑀤𑀺𑀢𑀧𑀼𑀩𑁆𑀩𑀸𑀦𑀺 𑀨𑀮𑀸𑀨𑀮𑀸𑀦𑀺 𑀔𑀸𑀤𑀺𑀢𑁆𑀣𑀸’’𑀢𑀺 𑀑𑀯𑀤𑀺. 𑀫𑀦𑀼𑀲𑁆𑀲𑀸 𑀅𑀝𑀯𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀝𑀯𑀺𑀫𑀼𑀔𑁂 𑀏𑀓𑀁 𑀓𑀺𑀁𑀧𑀓𑁆𑀓𑀭𑀼𑀓𑁆𑀔𑀁 𑀨𑀮𑀪𑀸𑀭𑀑𑀡𑀫𑀺𑀢𑀲𑀸𑀔𑀁 𑀅𑀤𑁆𑀤𑀲𑀁𑀲𑀼. 𑀢𑀲𑁆𑀲 𑀔𑀦𑁆𑀥𑀲𑀸𑀔𑀸𑀧𑀢𑁆𑀢𑀨𑀮𑀸𑀦𑀺 𑀲𑀡𑁆𑀞𑀸𑀦𑀯𑀡𑁆𑀡𑀭𑀲𑀕𑀦𑁆𑀥𑁂𑀳𑀺 𑀅𑀫𑁆𑀩𑀲𑀤𑀺𑀲𑀸𑀦𑁂𑀯. 𑀢𑁂𑀲𑀼 𑀏𑀓𑀘𑁆𑀘𑁂 𑀯𑀡𑁆𑀡𑀕𑀦𑁆𑀥𑀭𑀲𑁂𑀲𑀼 𑀩𑀚𑁆𑀛𑀺𑀢𑁆𑀯𑀸 𑀅𑀫𑁆𑀩𑀨𑀮𑀲𑀜𑁆𑀜𑀸𑀬 𑀨𑀮𑀸𑀦𑀺 𑀔𑀸𑀤𑀺𑀁𑀲𑀼, 𑀏𑀓𑀘𑁆𑀘𑁂 ‘‘𑀲𑀢𑁆𑀣𑀯𑀸𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀕𑀳𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀬𑁂 𑀕𑀳𑁂𑀢𑁆𑀯𑀸 𑀞𑀺𑀢𑀸, 𑀢𑁂 𑀨𑀮𑀸𑀦𑀺 𑀙𑀟𑁆𑀟𑀸𑀧𑁂𑀢𑁆𑀯𑀸, 𑀬𑁂 𑀔𑀸𑀤𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀢𑁂 𑀯𑀫𑀦𑀁 𑀓𑀸𑀭𑁂𑀢𑁆𑀯𑀸 𑀢𑁂𑀲𑀁 𑀪𑁂𑀲𑀚𑁆𑀚𑀁 𑀅𑀤𑀸𑀲𑀺. 𑀢𑁂𑀲𑀼 𑀏𑀓𑀘𑁆𑀘𑁂 𑀅𑀭𑁄𑀕𑀸 𑀚𑀸𑀢𑀸, 𑀧𑀞𑀫𑀫𑁂𑀯 𑀔𑀸𑀤𑀺𑀢𑁆𑀯𑀸 𑀞𑀺𑀢𑀸 𑀧𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀲𑁄𑀢𑁆𑀣𑀺𑀦𑀸 𑀕𑀦𑁆𑀢𑁆𑀯𑀸 𑀮𑀸𑀪𑀁 𑀮𑀪𑀺𑀢𑁆𑀯𑀸 𑀧𑀼𑀦 𑀲𑀓𑀝𑁆𑀞𑀸𑀦𑀫𑁂𑀯 𑀆𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀢𑀁 𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁫. ‘‘𑀆𑀬𑀢𑀺𑀁 𑀤𑁄𑀲𑀁 𑀦𑀸𑀜𑁆𑀜𑀸𑀬, 𑀬𑁄 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺;

𑀯𑀺𑀧𑀸𑀓𑀦𑁆𑀢𑁂 𑀳𑀦𑀦𑁆𑀢𑀺 𑀦𑀁, 𑀓𑀺𑀁𑀧𑀓𑁆𑀓𑀫𑀺𑀯 𑀪𑀓𑁆𑀔𑀺𑀢’’𑀦𑁆𑀢𑀺.

𑀢𑀢𑁆𑀣 𑀆𑀬𑀢𑀺𑀁 𑀤𑁄𑀲𑀁 𑀦𑀸𑀜𑁆𑀜𑀸𑀬𑀸𑀢𑀺 𑀅𑀦𑀸𑀕𑀢𑁂 𑀤𑁄𑀲𑀁 𑀦 𑀅𑀜𑁆𑀜𑀸𑀬, 𑀅𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁄 𑀓𑀸𑀫𑁂 𑀧𑀝𑀺𑀲𑁂𑀯𑀢𑀻𑀢𑀺 𑀬𑁄 𑀯𑀢𑁆𑀣𑀼𑀓𑀸𑀫𑁂 𑀘 𑀓𑀺𑀮𑁂𑀲𑀓𑀸𑀫𑁂 𑀘 𑀧𑀝𑀺𑀲𑁂𑀯𑀢𑀺. 𑀯𑀺𑀧𑀸𑀓𑀦𑁆𑀢𑁂 𑀳𑀦𑀦𑁆𑀢𑀺 𑀦𑀦𑁆𑀢𑀺 𑀢𑁂 𑀓𑀸𑀫𑀸 𑀢𑀁 𑀧𑀼𑀭𑀺𑀲𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑀗𑁆𑀔𑀸𑀢𑁂 𑀅𑀦𑁆𑀢𑁂 𑀦𑀺𑀭𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀁 𑀦𑀸𑀦𑀧𑁆𑀧𑀓𑀸𑀭𑁂𑀦 𑀤𑀼𑀓𑁆𑀔𑁂𑀦 𑀲𑀁𑀬𑁄𑀚𑀬𑀫𑀸𑀦𑀸 𑀳𑀦𑀦𑁆𑀢𑀺. 𑀓𑀣𑀁? 𑀓𑀺𑀁𑀧𑀓𑁆𑀓𑀫𑀺𑀯 𑀪𑀓𑁆𑀔𑀺𑀢𑀦𑁆𑀢𑀺, 𑀬𑀣𑀸 𑀧𑀭𑀺𑀪𑁄𑀕𑀓𑀸𑀮𑁂 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀢𑁆𑀢𑀺𑀬𑀸 𑀫𑀦𑀸𑀧𑀁 𑀓𑀺𑀁𑀧𑀓𑁆𑀓𑀨𑀮𑀁 𑀅𑀦𑀸𑀕𑀢𑀤𑁄𑀲𑀁 𑀅𑀤𑀺𑀲𑁆𑀯𑀸 𑀪𑀓𑁆𑀔𑀺𑀢𑀁 𑀅𑀦𑁆𑀢𑁂 𑀳𑀦𑀢𑀺, 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑀺, 𑀏𑀯𑀁 𑀧𑀭𑀺𑀪𑁄𑀕𑀓𑀸𑀮𑁂 𑀫𑀦𑀸𑀧𑀸𑀧𑀺 𑀓𑀸𑀫𑀸 𑀯𑀺𑀧𑀸𑀓𑀓𑀸𑀮𑁂 𑀳𑀦𑀦𑁆𑀢𑀻𑀢𑀺 𑀤𑁂𑀲𑀦𑀁 𑀬𑀣𑀸𑀦𑀼𑀲𑀦𑁆𑀥𑀺𑀁 𑀧𑀸𑀧𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀲𑁂𑀲𑀧𑀭𑀺𑀲𑀸𑀬𑀧𑀺 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁.

𑀲𑀢𑁆𑀣𑀸𑀧𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀲𑀢𑁆𑀣𑀯𑀸𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀺𑀁𑀧𑀓𑁆𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁮𑁬] 𑁬. 𑀲𑀻𑀮𑀯𑀻𑀫𑀁𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀻𑀮𑀯𑀻𑀫𑀁𑀲𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀓𑁄𑀲𑀮𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺 𑀢𑀺𑀲𑀭𑀡𑀁 𑀕𑀢𑁄 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽. 𑀭𑀸𑀚𑀸 ‘‘𑀅𑀬𑀁 𑀲𑀻𑀮𑀯𑀸’’𑀢𑀺 𑀢𑀲𑁆𑀲 𑀅𑀢𑀺𑀭𑁂𑀓𑀲𑀫𑁆𑀫𑀸𑀦𑀁 𑀓𑀭𑁄𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀭𑀸𑀚𑀸 𑀫𑀬𑁆𑀳𑀁 𑀅𑀜𑁆𑀜𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀅𑀢𑀺𑀭𑁂𑀓𑀲𑀫𑁆𑀫𑀸𑀦𑀁 𑀓𑀭𑁄𑀢𑀺, 𑀅𑀢𑀺𑀯𑀺𑀬 𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺, 𑀓𑀺𑀁 𑀦𑀼 𑀔𑁄 𑀏𑀲 𑀫𑀫 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑁆𑀧𑀤𑁂𑀲𑀲𑀺𑀧𑁆𑀧𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀲𑀫𑁆𑀫𑀸𑀦𑀁 𑀓𑀭𑁄𑀢𑀺, 𑀉𑀤𑀸𑀳𑀼 𑀲𑀻𑀮𑀲𑀫𑁆𑀧𑀢𑁆𑀢𑀺𑀁, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯𑀸’’𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀭𑀸𑀚𑀽𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀖𑀭𑀁 𑀆𑀕𑀘𑁆𑀙𑀦𑁆𑀢𑁄 𑀏𑀓𑀲𑁆𑀲 𑀳𑁂𑀭𑀜𑁆𑀜𑀺𑀓𑀲𑁆𑀲 𑀨𑀮𑀓𑀢𑁄 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀁 𑀓𑀳𑀸𑀧𑀡𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺, 𑀳𑁂𑀭𑀜𑁆𑀜𑀺𑀓𑁄 𑀩𑁆𑀭𑀸𑀳𑁆𑀫𑀡𑁂 𑀕𑀭𑀼𑀪𑀸𑀯𑁂𑀦 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀦𑀺𑀲𑀻𑀤𑀺. 𑀧𑀼𑀦𑀤𑀺𑀯𑀲𑁂 𑀤𑁆𑀯𑁂 𑀓𑀳𑀸𑀧𑀡𑁂 𑀕𑀡𑁆𑀳𑀺, 𑀳𑁂𑀭𑀜𑁆𑀜𑀺𑀓𑁄 𑀢𑀣𑁂𑀯 𑀅𑀥𑀺𑀯𑀸𑀲𑁂𑀲𑀺. 𑀢𑀢𑀺𑀬𑀤𑀺𑀯𑀲𑁂 𑀓𑀳𑀸𑀧𑀡𑀫𑀼𑀝𑁆𑀞𑀺𑀁 𑀅𑀕𑁆𑀕𑀳𑁂𑀲𑀺, 𑀅𑀣 𑀦𑀁 𑀳𑁂𑀭𑀜𑁆𑀜𑀺𑀓𑁄 ‘‘𑀅𑀚𑁆𑀚 𑀢𑁂 𑀢𑀢𑀺𑀬𑁄 𑀤𑀺𑀯𑀲𑁄 𑀭𑀸𑀚𑀓𑀼𑀝𑀼𑀫𑁆𑀩𑀁 𑀯𑀺𑀮𑀼𑀫𑁆𑀧𑀦𑁆𑀢𑀲𑁆𑀲𑀸’’𑀢𑀺 ‘‘𑀭𑀸𑀚𑀓𑀼𑀝𑀼𑀫𑁆𑀩𑀯𑀺𑀮𑀼𑀫𑁆𑀧𑀓𑀘𑁄𑀭𑁄 𑀫𑁂 𑀕𑀳𑀺𑀢𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀭𑀯𑀺. 𑀅𑀣 𑀦𑀁 𑀫𑀦𑀼𑀲𑁆𑀲𑀸 𑀇𑀢𑁄 𑀘𑀺𑀢𑁄 𑀘 𑀆𑀕𑀦𑁆𑀢𑁆𑀯𑀸 ‘‘𑀘𑀺𑀭𑀁𑀤𑀸𑀦𑀺 𑀢𑁆𑀯𑀁 𑀲𑀻𑀮𑀯𑀸 𑀯𑀺𑀬 𑀯𑀺𑀘𑀭𑀻’’𑀢𑀺 𑀤𑁆𑀯𑁂 𑀢𑀬𑁄 𑀧𑀳𑀸𑀭𑁂 𑀤𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁.

𑀭𑀸𑀚𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 ‘‘𑀓𑀲𑁆𑀫𑀸, 𑀩𑁆𑀭𑀸𑀳𑁆𑀫𑀡, 𑀏𑀯𑀭𑀽𑀧𑀁 𑀤𑀼𑀲𑁆𑀲𑀻𑀮𑀓𑀫𑁆𑀫𑀁 𑀓𑀭𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀲𑁆𑀲 𑀭𑀸𑀚𑀸𑀡𑀁 𑀓𑀭𑁄𑀣𑀸’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 ‘‘𑀦𑀸𑀳𑀁, 𑀫𑀳𑀸𑀭𑀸𑀚, 𑀘𑁄𑀭𑁄’’𑀢𑀺 𑀆𑀳. 𑀅𑀣 ‘‘𑀓𑀲𑁆𑀫𑀸 𑀭𑀸𑀚𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀨𑀮𑀓𑀢𑁄 𑀓𑀳𑀸𑀧𑀡𑁂 𑀕𑀡𑁆𑀳𑀻’’𑀢𑀺? ‘‘𑀏𑀢𑀁 𑀫𑀬𑀸 𑀢𑀬𑀺 𑀫𑀫 𑀅𑀢𑀺𑀲𑀫𑁆𑀫𑀸𑀦𑀁 𑀓𑀭𑁄𑀦𑁆𑀢𑁂 ‘𑀓𑀺𑀁 𑀦𑀼 𑀔𑁄 𑀭𑀸𑀚𑀸 𑀫𑀫 𑀚𑀸𑀢𑀺𑀆𑀤𑀻𑀦𑀺 𑀦𑀺𑀲𑁆𑀲𑀸𑀬 𑀅𑀢𑀺𑀲𑀫𑁆𑀫𑀸𑀦𑀁 𑀓𑀭𑁄𑀢𑀺, 𑀉𑀤𑀸𑀳𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬𑀸’𑀢𑀺 𑀯𑀻𑀫𑀁𑀲𑀦𑀢𑁆𑀣𑀸𑀬 𑀓𑀢𑀁, 𑀇𑀤𑀸𑀦𑀺 𑀧𑀦 𑀫𑀬𑀸 𑀏𑀓𑀁𑀲𑁂𑀦 𑀜𑀸𑀢𑀁. 𑀬𑀣𑀸 𑀲𑀻𑀮𑀫𑁂𑀯 𑀦𑀺𑀲𑁆𑀲𑀸𑀬 𑀢𑀬𑀸 𑀫𑀫 𑀲𑀫𑁆𑀫𑀸𑀦𑁄 𑀓𑀢𑁄, 𑀦 𑀚𑀸𑀢𑀺𑀆𑀤𑀻𑀦𑀺. 𑀢𑀣𑀸 𑀳𑀺 𑀫𑁂 𑀇𑀤𑀸𑀦𑀺 𑀭𑀸𑀚𑀸𑀡𑀁 𑀓𑀸𑀭𑁂𑀲𑀺, 𑀲𑁆𑀯𑀸𑀳𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 ‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀻𑀮𑀫𑁂𑀯 𑀉𑀢𑁆𑀢𑀫𑀁 𑀲𑀻𑀮𑀁 𑀧𑀫𑀼𑀔’𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀢𑁄. 𑀇𑀫𑀲𑁆𑀲 𑀧𑀦𑀸𑀳𑀁 𑀲𑀻𑀮𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀭𑁄𑀦𑁆𑀢𑁄 𑀕𑁂𑀳𑁂 𑀞𑀺𑀢𑁄 𑀓𑀺𑀮𑁂𑀲𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀓𑀸𑀢𑀼𑀁, 𑀅𑀚𑁆𑀚𑁂𑀯 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑁆𑀚𑀁 𑀫𑁂 𑀤𑁂𑀣, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀭𑀸𑀚𑀸𑀦𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀅𑀣 𑀦𑀁 𑀜𑀸𑀢𑀺𑀲𑀼𑀳𑀚𑁆𑀚𑀩𑀦𑁆𑀥𑀯𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸 𑀫𑀢𑁆𑀣𑀓𑀁 𑀧𑀢𑁆𑀢𑀸’’𑀢𑀺 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀢𑀁 𑀅𑀜𑁆𑀜𑀩𑁆𑀬𑀸𑀓𑀭𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀁 𑀚𑀸𑀢𑀁. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀭𑀜𑁆𑀜𑁄 𑀉𑀧𑀝𑁆𑀞𑀸𑀓𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀢𑀲𑁆𑀲 𑀕𑀼𑀡𑀁 𑀓𑀣𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺 𑀅𑀬𑀫𑁂𑀯 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀅𑀓𑀸𑀲𑀺, 𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀸 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺 𑀤𑀸𑀦𑀸𑀥𑀺𑀫𑀼𑀢𑁆𑀢𑁄 𑀲𑀻𑀮𑀚𑁆𑀛𑀸𑀲𑀬𑁄 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑁄. 𑀭𑀸𑀚𑀸 𑀲𑁂𑀲𑀩𑁆𑀭𑀸𑀳𑁆𑀫𑀡𑁂𑀳𑀺 𑀅𑀢𑀺𑀭𑁂𑀓𑀁 𑀢𑀲𑁆𑀲 𑀲𑀫𑁆𑀫𑀸𑀦𑀁 𑀓𑀭𑁄𑀢𑀻𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀩𑁄𑀥𑀺𑀲𑀢𑁆𑀢𑁂 𑀧𑀦 𑀩𑀦𑁆𑀥𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑀻𑀬𑀫𑀸𑀦𑁂 𑀅𑀳𑀺𑀢𑀼𑀡𑁆𑀟𑀺𑀓𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀲𑀧𑁆𑀧𑀁 𑀓𑀻𑀴𑀸𑀧𑁂𑀦𑁆𑀢𑀸 𑀦𑀗𑁆𑀕𑀼𑀝𑁆𑀞𑁂 𑀕𑀡𑁆𑀳𑀦𑁆𑀢𑀺, 𑀕𑀻𑀯𑀸𑀬 𑀕𑀡𑁆𑀳𑀦𑁆𑀢𑀺, 𑀕𑀮𑁂 𑀯𑁂𑀞𑁂𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀤𑀺𑀲𑁆𑀯𑀸 ‘‘𑀫𑀸, 𑀢𑀸𑀢𑀸, 𑀏𑀯𑀁 𑀲𑀧𑁆𑀧𑀁 𑀦𑀗𑁆𑀕𑀼𑀝𑁆𑀞𑁂 𑀕𑀡𑁆𑀳𑀣, 𑀫𑀸 𑀕𑀻𑀯𑀸𑀬 𑀕𑀡𑁆𑀳𑀣, 𑀫𑀸 𑀕𑀮𑁂 𑀯𑁂𑀞𑁂𑀣. 𑀅𑀬𑀜𑁆𑀳𑀺 𑀯𑁄 𑀟𑀁𑀲𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀬𑁆𑀬𑀸’’𑀢𑀺 𑀆𑀳. 𑀅𑀳𑀺𑀢𑀼𑀡𑁆𑀟𑀺𑀓𑀸 ‘‘𑀅𑀬𑀁, 𑀩𑁆𑀭𑀸𑀳𑁆𑀫𑀡, 𑀲𑀧𑁆𑀧𑁄 𑀲𑀻𑀮𑀯𑀸 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀢𑀸𑀤𑀺𑀲𑁄 𑀤𑀼𑀲𑁆𑀲𑀻𑀮𑁄 𑀦 𑀳𑁄𑀢𑀺, 𑀢𑁆𑀯𑀁 𑀧𑀦 𑀅𑀢𑁆𑀢𑀦𑁄 𑀤𑀼𑀲𑁆𑀲𑀻𑀮𑀢𑀸𑀬 𑀅𑀦𑀸𑀘𑀸𑀭𑁂𑀦 𑀭𑀸𑀚𑀓𑀼𑀝𑀼𑀫𑁆𑀩𑀯𑀺𑀮𑀼𑀫𑁆𑀧𑀓𑀘𑁄𑀭𑁄𑀢𑀺 𑀩𑀦𑁆𑀥𑀺𑀢𑁆𑀯𑀸 𑀦𑀻𑀬𑀲𑀻’’𑀢𑀺 𑀆𑀳𑀁𑀲𑀼.

𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀧𑁆𑀧𑀸𑀧𑀺 𑀢𑀸𑀯 𑀅𑀟𑀁𑀲𑀦𑁆𑀢𑀸 𑀅𑀯𑀺𑀳𑁂𑀞𑁂𑀦𑁆𑀢𑀸 ‘𑀲𑀻𑀮𑀯𑀦𑁆𑀢𑁄’𑀢𑀺 𑀦𑀸𑀫𑀁 𑀮𑀪𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀦𑀼𑀲𑁆𑀲𑀪𑀽𑀢𑀸. 𑀲𑀻𑀮𑀫𑁂𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀉𑀢𑁆𑀢𑀫𑀁, 𑀦𑀢𑁆𑀣𑀺 𑀢𑀢𑁄 𑀉𑀢𑁆𑀢𑀭𑀺𑀢𑀭’’𑀦𑁆𑀢𑀺. 𑀅𑀣 𑀦𑀁 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 ‘‘𑀓𑀺𑀁 𑀇𑀤𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀭𑀸𑀚𑀓𑀼𑀝𑀼𑀫𑁆𑀩𑀯𑀺𑀮𑀼𑀫𑁆𑀧𑀓𑁄 𑀘𑁄𑀭𑁄, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺𑀲𑁆𑀲 𑀭𑀸𑀚𑀸𑀡𑀁 𑀓𑀭𑁄𑀣𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀦𑀸𑀳𑀁, 𑀫𑀳𑀸𑀭𑀸𑀚, 𑀘𑁄𑀭𑁄’’𑀢𑀺 𑀆𑀳. ‘‘𑀅𑀣 𑀓𑀲𑁆𑀫𑀸 𑀓𑀳𑀸𑀧𑀡𑁂 𑀅𑀕𑁆𑀕𑀳𑁂𑀲𑀻’’𑀢𑀺 𑀘 𑀯𑀼𑀢𑁆𑀢𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀁 𑀆𑀭𑁄𑀘𑁂𑀦𑁆𑀢𑁄 ‘‘𑀲𑁆𑀯𑀸𑀳𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 ‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀻𑀮𑀫𑁂𑀯 𑀉𑀢𑁆𑀢𑀫𑀁, 𑀲𑀻𑀮𑀁 𑀧𑀸𑀫𑁄𑀓𑁆𑀔’𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀢𑁄’’𑀢𑀺 𑀯𑀢𑁆𑀯𑀸 ‘‘𑀢𑀺𑀝𑁆𑀞𑀢𑀼 𑀢𑀸𑀯 𑀇𑀤𑀁, 𑀆𑀲𑀻𑀯𑀺𑀲𑁄𑀧𑀺 𑀢𑀸𑀯 𑀅𑀟𑀁𑀲𑀦𑁆𑀢𑁄 𑀅𑀯𑀺𑀳𑁂𑀞𑁂𑀦𑁆𑀢𑁄 ‘𑀲𑀻𑀮𑀯𑀸’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀲𑀻𑀮𑀫𑁂𑀯 𑀉𑀢𑁆𑀢𑀫𑀁, 𑀲𑀻𑀮𑀁 𑀧𑀯𑀭’’𑀦𑁆𑀢𑀺 𑀲𑀻𑀮𑀁 𑀯𑀡𑁆𑀡𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁬. ‘‘𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡𑀁, 𑀲𑀻𑀮𑀁 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁;

𑀧𑀲𑁆𑀲 𑀖𑁄𑀭𑀯𑀺𑀲𑁄 𑀦𑀸𑀕𑁄, 𑀲𑀻𑀮𑀯𑀸𑀢𑀺 𑀦 𑀳𑀜𑁆𑀜𑀢𑀻’’𑀢𑀺.

𑀢𑀢𑁆𑀣 𑀲𑀻𑀮𑀁 𑀓𑀺𑀭𑁂𑀯𑀸𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀆𑀘𑀸𑀭𑀲𑀻𑀮𑀫𑁂𑀯. 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀯𑀤𑀢𑀺. 𑀓𑀮𑁆𑀬𑀸𑀡𑀦𑁆𑀢𑀺 𑀲𑀼𑀦𑁆𑀤𑀭𑀢𑀭𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀚𑁂𑀝𑁆𑀞𑀓𑀁 𑀲𑀩𑁆𑀩𑀕𑀼𑀡𑀤𑀸𑀬𑀓𑀁. 𑀧𑀲𑁆𑀲𑀸𑀢𑀺 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁 𑀅𑀪𑀺𑀫𑀼𑀔𑀁 𑀓𑀭𑁄𑀦𑁆𑀢𑁄 𑀓𑀣𑁂𑀢𑀺. 𑀲𑀻𑀮𑀯𑀸𑀢𑀺 𑀦 𑀳𑀜𑁆𑀜𑀢𑀻𑀢𑀺 𑀖𑁄𑀭𑀯𑀺𑀲𑁄𑀧𑀺 𑀲𑀫𑀸𑀦𑁄 𑀅𑀟𑀁𑀲𑀦𑀅𑀯𑀺𑀳𑁂𑀞𑀦𑀫𑀢𑁆𑀢𑀓𑁂𑀦 𑀲𑀻𑀮𑀯𑀸𑀢𑀺 𑀧𑀲𑀁𑀲𑀁 𑀮𑀪𑀢𑀺, 𑀦 𑀳𑀜𑁆𑀜𑀢𑀺 𑀦 𑀯𑀺𑀳𑀜𑁆𑀜𑀢𑀻𑀢𑀺. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀲𑀻𑀮𑀫𑁂𑀯 𑀉𑀢𑁆𑀢𑀫𑀦𑁆𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀸𑀚𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀧𑀼𑀭𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀻𑀮𑀯𑀻𑀫𑀁𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁮𑁭] 𑁭. 𑀫𑀗𑁆𑀕𑀮𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑁆𑀲 𑀫𑀗𑁆𑀕𑀮𑀸 𑀲𑀫𑀽𑀳𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀸𑀝𑀓𑀮𑀓𑁆𑀔𑀡𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀭𑀸𑀚𑀕𑀳𑀯𑀸𑀲𑀺𑀓𑁄 𑀓𑀺𑀭𑁂𑀓𑁄 𑀩𑁆𑀭𑀸𑀳𑁆𑀫𑀡𑁄 𑀓𑁄𑀢𑀼𑀳𑀮𑀫𑀗𑁆𑀕𑀮𑀺𑀓𑁄 𑀢𑀻𑀲𑀼 𑀭𑀢𑀦𑁂𑀲𑀼 𑀅𑀧𑁆𑀧𑀲𑀦𑁆𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄, 𑀢𑀲𑁆𑀲 𑀲𑀫𑀼𑀕𑁆𑀕𑁂 𑀞𑀧𑀺𑀢𑀁 𑀲𑀸𑀝𑀓𑀬𑀼𑀕𑀁 𑀫𑀽𑀲𑀺𑀓𑀸 𑀔𑀸𑀤𑀺𑀁𑀲𑀼. 𑀅𑀣𑀲𑁆𑀲 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 ‘‘𑀲𑀸𑀝𑀓𑁂 𑀆𑀳𑀭𑀣𑀸’’𑀢𑀺 𑀯𑀼𑀢𑁆𑀢𑀓𑀸𑀮𑁂 𑀫𑀽𑀲𑀺𑀓𑀸𑀬 𑀔𑀸𑀤𑀺𑀢𑀪𑀸𑀯𑀁 𑀆𑀭𑁄𑀘𑀬𑀺𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀇𑀤𑀁 𑀫𑀽𑀲𑀺𑀓𑀸𑀤𑀝𑁆𑀞𑀁 𑀲𑀸𑀝𑀓𑀬𑀼𑀕𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀪𑀯𑀺𑀲𑁆𑀲𑀢𑀺, 𑀫𑀳𑀸𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺. 𑀇𑀤𑀜𑁆𑀳𑀺 𑀅𑀯𑀫𑀗𑁆𑀕𑀮𑀁 𑀓𑀸𑀴𑀓𑀡𑁆𑀡𑀺𑀲𑀤𑀺𑀲𑀁 𑀧𑀼𑀢𑁆𑀢𑀥𑀻𑀢𑀸𑀤𑀻𑀦𑀁 𑀯𑀸 𑀤𑀸𑀲𑀓𑀫𑁆𑀫𑀓𑀭𑀸𑀤𑀻𑀦𑀁 𑀯𑀸 𑀦 𑀲𑀓𑁆𑀓𑀸 𑀤𑀸𑀢𑀼𑀁. 𑀬𑁄 𑀳𑀺 𑀇𑀤𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀲𑀩𑁆𑀩𑀲𑁆𑀲 𑀫𑀳𑀸𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀆𑀫𑀓𑀲𑀼𑀲𑀸𑀦𑁂 𑀢𑀁 𑀙𑀟𑁆𑀟𑀸𑀧𑁂𑀲𑁆𑀲𑀸𑀫𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 𑀤𑀸𑀲𑀓𑀫𑁆𑀫𑀓𑀭𑀸𑀤𑀻𑀦𑀁 𑀳𑀢𑁆𑀣𑁂 𑀤𑀸𑀢𑀼𑀁. 𑀢𑁂 𑀳𑀺 𑀏𑀢𑁆𑀣 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀇𑀫𑀁 𑀕𑀳𑁂𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑁂𑀬𑁆𑀬𑀼𑀁, 𑀧𑀼𑀢𑁆𑀢𑀲𑁆𑀲 𑀢𑀁 𑀳𑀢𑁆𑀣𑁂 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑁆𑀯𑀫𑁆𑀧𑀺 𑀦𑀁, 𑀢𑀸𑀢, 𑀳𑀢𑁆𑀣𑁂𑀦 𑀅𑀨𑀼𑀲𑀺𑀢𑁆𑀯𑀸 𑀤𑀡𑁆𑀟𑀓𑁂𑀦 𑀕𑀳𑁂𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑁂𑀢𑁆𑀯𑀸 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀏𑀳𑀻’’𑀢𑀺 𑀧𑁂𑀲𑁂𑀲𑀺.

𑀲𑀢𑁆𑀣𑀸𑀧𑀺 𑀔𑁄 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀇𑀫𑁂𑀲𑀁 𑀧𑀺𑀢𑀸𑀧𑀼𑀢𑁆𑀢𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀫𑀺𑀕𑀯𑀻𑀣𑀺𑀁 𑀕𑀳𑁂𑀢𑁆𑀯𑀸 𑀫𑀺𑀕𑀮𑀼𑀤𑁆𑀤𑀓𑁄 𑀯𑀺𑀬 𑀕𑀦𑁆𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑀤𑁆𑀯𑀸𑀭𑁂 𑀦𑀺𑀲𑀻𑀤𑀺 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀫𑀸𑀡𑀯𑁄𑀧𑀺 𑀧𑀺𑀢𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀚𑀕𑀭𑀲𑀧𑁆𑀧𑀁 𑀯𑀺𑀬 𑀢𑀁 𑀬𑀼𑀕𑀲𑀸𑀝𑀓𑀁 𑀬𑀝𑁆𑀞𑀺𑀓𑁄𑀝𑀺𑀬𑀸 𑀕𑀳𑁂𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀓𑀭𑁄𑀲𑀺 𑀫𑀸𑀡𑀯𑀸’’𑀢𑀺 𑀆𑀳. ‘‘𑀪𑁄 𑀕𑁄𑀢𑀫, 𑀇𑀤𑀁 𑀲𑀸𑀝𑀓𑀬𑀼𑀕𑀁 𑀫𑀽𑀲𑀺𑀓𑀸𑀤𑀝𑁆𑀞𑀁 𑀓𑀸𑀴𑀓𑀡𑁆𑀡𑀺𑀲𑀤𑀺𑀲𑀁 𑀳𑀮𑀸𑀳𑀮𑀯𑀺𑀲𑀽𑀧𑀫𑀁, 𑀫𑀫 𑀧𑀺𑀢𑀸 ‘𑀅𑀜𑁆𑀜𑁄 𑀏𑀢𑀁 𑀙𑀟𑁆𑀟𑁂𑀦𑁆𑀢𑁄 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀸’𑀢𑀺 𑀪𑀬𑁂𑀦 𑀫𑀁 𑀧𑀳𑀺𑀡𑀺, 𑀅𑀳𑀫𑁂𑀢𑀁 𑀙𑀟𑁆𑀟𑁂𑀢𑁆𑀯𑀸 𑀲𑀻𑀲𑀁 𑀦𑁆𑀳𑀸𑀬𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄𑀫𑁆𑀳𑀺, 𑀪𑁄 𑀕𑁄𑀢𑀫𑀸’’𑀢𑀺. ‘‘𑀢𑁂𑀦 𑀳𑀺 𑀙𑀟𑁆𑀟𑁂𑀳𑀻’’𑀢𑀺. 𑀫𑀸𑀡𑀯𑁄 𑀙𑀟𑁆𑀟𑁂𑀲𑀺, 𑀲𑀢𑁆𑀣𑀸 ‘‘𑀅𑀫𑁆𑀳𑀸𑀓𑀁 𑀤𑀸𑀦𑀺 𑀯𑀝𑁆𑀝𑀢𑀻’’𑀢𑀺 𑀢𑀲𑁆𑀲 𑀲𑀫𑁆𑀫𑀼𑀔𑀸𑀯 𑀕𑀡𑁆𑀳𑀺. ‘‘𑀅𑀯𑀫𑀗𑁆𑀕𑀮𑀁, 𑀪𑁄 𑀕𑁄𑀢𑀫, 𑀏𑀢𑀁 𑀓𑀸𑀴𑀓𑀡𑁆𑀡𑀺𑀲𑀤𑀺𑀲𑀁, 𑀫𑀸 𑀕𑀡𑁆𑀳𑀺 𑀫𑀸 𑀕𑀡𑁆𑀳𑀻’’𑀢𑀺 𑀢𑀲𑁆𑀫𑀺𑀁 𑀯𑀸𑀭𑀬𑀫𑀸𑀦𑁂𑀬𑁂𑀯 𑀢𑀁 𑀕𑀳𑁂𑀢𑁆𑀯𑀸 𑀯𑁂𑀴𑀼𑀯𑀦𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀫𑀸𑀡𑀯𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀧𑀺𑀢𑀼 𑀆𑀭𑁄𑀘𑁂𑀲𑀺 ‘‘𑀢𑀸𑀢, 𑀫𑀬𑀸 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀁 𑀲𑀸𑀝𑀓𑀬𑀼𑀕𑀁 𑀲𑀫𑀡𑁄 𑀕𑁄𑀢𑀫𑁄 ‘𑀅𑀫𑁆𑀳𑀸𑀓𑀁 𑀯𑀝𑁆𑀝𑀢𑀻’𑀢𑀺 𑀫𑀬𑀸 𑀯𑀸𑀭𑀺𑀬𑀫𑀸𑀦𑁄𑀧𑀺 𑀕𑀳𑁂𑀢𑁆𑀯𑀸 𑀯𑁂𑀴𑀼𑀯𑀦𑀁 𑀕𑀢𑁄’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 ‘‘𑀢𑀁 𑀲𑀸𑀝𑀓𑀬𑀼𑀕𑀁 𑀅𑀯𑀫𑀗𑁆𑀕𑀮𑀁 𑀓𑀸𑀴𑀓𑀡𑁆𑀡𑀺𑀲𑀤𑀺𑀲𑀁, 𑀢𑀁 𑀯𑀴𑀜𑁆𑀚𑁂𑀦𑁆𑀢𑁄 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀦𑀲𑁆𑀲𑀺𑀲𑁆𑀲𑀢𑀺, 𑀯𑀺𑀳𑀸𑀭𑁄𑀧𑀺 𑀦𑀲𑁆𑀲𑀺𑀲𑁆𑀲𑀢𑀺, 𑀢𑀢𑁄 𑀅𑀫𑁆𑀳𑀸𑀓𑀁 𑀕𑀭𑀳𑀸 𑀪𑀯𑀺𑀲𑁆𑀲𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀜𑁆𑀜𑁂 𑀩𑀳𑀽 𑀲𑀸𑀝𑀓𑁂 𑀤𑀢𑁆𑀯𑀸 𑀢𑀁 𑀙𑀟𑁆𑀟𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀩𑀳𑀽 𑀲𑀸𑀝𑀓𑁂 𑀕𑀸𑀳𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀏𑀯𑀫𑀸𑀳 ‘‘𑀲𑀘𑁆𑀘𑀁 𑀓𑀺𑀭 𑀯𑁄, 𑀪𑁄 𑀕𑁄𑀢𑀫, 𑀆𑀫𑀓𑀲𑀼𑀲𑀸𑀦𑁂 𑀲𑀸𑀝𑀓𑀬𑀼𑀕𑀁 𑀕𑀳𑀺𑀢’’𑀦𑁆𑀢𑀺? ‘‘𑀲𑀘𑁆𑀘𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺. ‘‘𑀪𑁄 𑀕𑁄𑀢𑀫, 𑀢𑀁 𑀲𑀸𑀝𑀓𑀬𑀼𑀕𑀁 𑀅𑀯𑀫𑀗𑁆𑀕𑀮𑀁, 𑀢𑀼𑀫𑁆𑀳𑁂 𑀢𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑀸 𑀦𑀲𑁆𑀲𑀺𑀲𑁆𑀲𑀣, 𑀲𑀓𑀮𑀯𑀺𑀳𑀸𑀭𑁄𑀧𑀺 𑀦𑀲𑁆𑀲𑀺𑀲𑁆𑀲𑀢𑀺. 𑀲𑀘𑁂 𑀯𑁄 𑀦𑀺𑀯𑀸𑀲𑀦𑀁 𑀯𑀸 𑀧𑀸𑀭𑀼𑀧𑀦𑀁 𑀯𑀸 𑀦𑀧𑁆𑀧𑀳𑁄𑀢𑀺, 𑀇𑀫𑁂 𑀲𑀸𑀝𑀓𑁂 𑀕𑀳𑁂𑀢𑁆𑀯𑀸 𑀢𑀁 𑀙𑀟𑁆𑀟𑀸𑀧𑁂𑀣𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀫𑀬𑀁 𑀩𑁆𑀭𑀸𑀳𑁆𑀫𑀡 𑀧𑀩𑁆𑀩𑀚𑀺𑀢𑀸 𑀦𑀸𑀫, 𑀅𑀫𑁆𑀳𑀸𑀓𑀁 𑀆𑀫𑀓𑀲𑀼𑀲𑀸𑀦𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀦𑁆𑀳𑀸𑀦𑀢𑀺𑀢𑁆𑀣𑁂 𑀫𑀳𑀸𑀫𑀕𑁆𑀕𑁂𑀢𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀙𑀟𑁆𑀟𑀺𑀢𑀸 𑀯𑀸 𑀧𑀢𑀺𑀢𑀸 𑀯𑀸 𑀧𑀺𑀮𑁄𑀢𑀺𑀓𑀸 𑀯𑀝𑁆𑀝𑀢𑀺, 𑀢𑁆𑀯𑀁 𑀧𑀦 𑀦 𑀇𑀤𑀸𑀦𑁂𑀯 𑀏𑀯𑀁𑀮𑀤𑁆𑀥𑀺𑀓𑁄, 𑀧𑀼𑀩𑁆𑀩𑁂𑀧𑀺 𑀏𑀯𑀁𑀮𑀤𑁆𑀥𑀺𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑁂 𑀭𑀸𑀚𑀕𑀳𑀦𑀕𑀭𑁂 𑀥𑀫𑁆𑀫𑀺𑀓𑁄 𑀫𑀕𑀥𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀫𑀸𑀦𑁄 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀳𑀺𑀫𑀯𑀦𑁆𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀕𑀳𑀦𑀕𑀭𑁂 𑀭𑀸𑀚𑀼𑀬𑁆𑀬𑀸𑀦𑀁 𑀧𑀢𑁆𑀯𑀸 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀦𑀕𑀭𑀁 𑀧𑀸𑀯𑀺𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀸𑀲𑀸𑀤𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀉𑀬𑁆𑀬𑀸𑀦𑁂𑀬𑁂𑀯 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂 𑀪𑀼𑀜𑁆𑀚𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀭𑀸𑀚𑀕𑀳𑀦𑀕𑀭𑁂 𑀤𑀼𑀲𑁆𑀲𑀮𑀓𑁆𑀔𑀡𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀲𑀫𑀼𑀕𑁆𑀕𑁂 𑀞𑀧𑀺𑀢𑀁 𑀲𑀸𑀝𑀓𑀬𑀼𑀕𑀦𑁆𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀫𑀸𑀡𑀯𑁂 𑀧𑀦 𑀲𑀼𑀲𑀸𑀦𑀁 𑀕𑀘𑁆𑀙𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀲𑀼𑀲𑀸𑀦𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀦 𑀙𑀟𑁆𑀟𑀺𑀢𑀁 𑀲𑀸𑀝𑀓𑀬𑀼𑀕𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀫𑀸𑀡𑀯𑁄 𑀕𑀦𑁆𑀢𑁆𑀯𑀸 𑀧𑀺𑀢𑀼 𑀆𑀭𑁄𑀘𑁂𑀲𑀺. 𑀧𑀺𑀢𑀸 ‘‘𑀭𑀸𑀚𑀓𑀼𑀮𑀽𑀧𑀓𑁄 𑀢𑀸𑀧𑀲𑁄 𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑀸𑀧𑀲, 𑀢𑀬𑀸 𑀕𑀳𑀺𑀢𑀲𑀸𑀝𑀓𑁂 𑀙𑀟𑁆𑀟𑁂𑀳𑀺, 𑀫𑀸 𑀦𑀲𑁆𑀲𑀻’’𑀢𑀺 𑀆𑀳. 𑀢𑀸𑀧𑀲𑁄 ‘‘𑀅𑀫𑁆𑀳𑀸𑀓𑀁 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀧𑀺𑀮𑁄𑀢𑀺𑀓𑀸 𑀯𑀝𑁆𑀝𑀢𑀺, 𑀦 𑀫𑀬𑀁 𑀓𑁄𑀢𑀼𑀳𑀮𑀫𑀗𑁆𑀕𑀮𑀺𑀓𑀸, 𑀓𑁄𑀢𑀼𑀳𑀮𑀫𑀗𑁆𑀕𑀮𑀁 𑀦𑀸𑀫𑁂𑀢𑀁 𑀦 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑁄𑀥𑀺𑀲𑀢𑁆𑀢𑁂𑀳𑀺 𑀯𑀡𑁆𑀡𑀺𑀢𑀁, 𑀢𑀲𑁆𑀫𑀸 𑀧𑀡𑁆𑀟𑀺𑀢𑁂𑀦 𑀦𑀸𑀫 𑀓𑁄𑀢𑀼𑀳𑀮𑀫𑀗𑁆𑀕𑀮𑀺𑀓𑁂𑀦 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀲𑀭𑀡𑀁 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸𑀧𑀺 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁭. ‘‘𑀬𑀲𑁆𑀲 𑀫𑀗𑁆𑀕𑀮𑀸 𑀲𑀫𑀽𑀳𑀢𑀸, 𑀉𑀧𑁆𑀧𑀸𑀢𑀸 𑀲𑀼𑀧𑀺𑀦𑀸 𑀘 𑀮𑀓𑁆𑀔𑀡𑀸 𑀘;

𑀲𑁄 𑀫𑀗𑁆𑀕𑀮𑀤𑁄𑀲𑀯𑀻𑀢𑀺𑀯𑀢𑁆𑀢𑁄, 𑀬𑀼𑀕𑀬𑁄𑀕𑀸𑀥𑀺𑀕𑀢𑁄 𑀦 𑀚𑀸𑀢𑀼𑀫𑁂𑀢𑀻’’𑀢𑀺.

𑀢𑀢𑁆𑀣 𑀬𑀲𑁆𑀲 𑀫𑀗𑁆𑀕𑀮𑀸 𑀲𑀫𑀽𑀳𑀢𑀸𑀢𑀺 𑀬𑀲𑁆𑀲 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲 𑀤𑀺𑀝𑁆𑀞𑀫𑀗𑁆𑀕𑀮𑀁, 𑀲𑀼𑀢𑀫𑀗𑁆𑀕𑀮𑀁, 𑀫𑀼𑀢𑀫𑀗𑁆𑀕𑀮𑀦𑁆𑀢𑀺 𑀏𑀢𑁂 𑀫𑀗𑁆𑀕𑀮𑀸 𑀲𑀫𑀼𑀘𑁆𑀙𑀺𑀦𑁆𑀦𑀸. 𑀉𑀧𑁆𑀧𑀸𑀢𑀸 𑀲𑀼𑀧𑀺𑀦𑀸 𑀘 𑀮𑀓𑁆𑀔𑀡𑀸 𑀘𑀸𑀢𑀺 ‘‘𑀏𑀯𑀭𑀽𑀧𑁄 𑀘𑀦𑁆𑀤𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀭𑀽𑀧𑁄 𑀲𑀽𑀭𑀺𑀬𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀭𑀽𑀧𑁄 𑀦𑀓𑁆𑀔𑀢𑁆𑀢𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀭𑀽𑀧𑁄 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀭𑀽𑀧𑁄 𑀤𑀺𑀲𑀸𑀟𑀸𑀳𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑁂 𑀧𑀜𑁆𑀘 𑀫𑀳𑀸𑀉𑀧𑁆𑀧𑀸𑀢𑀸, 𑀦𑀸𑀦𑀧𑁆𑀧𑀓𑀸𑀭𑀸 𑀲𑀼𑀧𑀺𑀦𑀸, 𑀲𑀼𑀪𑀕𑀮𑀓𑁆𑀔𑀡𑀁, 𑀤𑀼𑀩𑁆𑀪𑀕𑀮𑀓𑁆𑀔𑀡𑀁, 𑀇𑀢𑁆𑀣𑀺𑀮𑀓𑁆𑀔𑀡𑀁, 𑀧𑀼𑀭𑀺𑀲𑀮𑀓𑁆𑀔𑀡𑀁, 𑀤𑀸𑀲𑀺𑀮𑀓𑁆𑀔𑀡𑀁, 𑀤𑀸𑀲𑀮𑀓𑁆𑀔𑀡𑀁, 𑀅𑀲𑀺𑀮𑀓𑁆𑀔𑀡𑀁, 𑀳𑀢𑁆𑀣𑀺𑀮𑀓𑁆𑀔𑀡𑀁, 𑀅𑀲𑁆𑀲𑀮𑀓𑁆𑀔𑀡𑀁, 𑀉𑀲𑀪𑀮𑀓𑁆𑀔𑀡𑀁, 𑀆𑀯𑀼𑀥𑀮𑀓𑁆𑀔𑀡𑀁, 𑀯𑀢𑁆𑀣𑀮𑀓𑁆𑀔𑀡𑀦𑁆𑀢𑀺 𑀏𑀯𑀫𑀸𑀤𑀺𑀓𑀸𑀦𑀺 𑀮𑀓𑁆𑀔𑀡𑀸𑀦𑀺 𑀇𑀫𑁂 𑀘 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀬𑀲𑁆𑀲 𑀲𑀫𑀽𑀳𑀢𑀸, 𑀦 𑀏𑀢𑁂𑀳𑀺 𑀉𑀧𑁆𑀧𑀸𑀢𑀸𑀤𑀻𑀳𑀺 𑀅𑀢𑁆𑀢𑀦𑁄 𑀫𑀗𑁆𑀕𑀮𑀁 𑀯𑀸 𑀅𑀯𑀫𑀗𑁆𑀕𑀮𑀁 𑀯𑀸 𑀧𑀘𑁆𑀘𑁂𑀢𑀺. 𑀲𑁄 𑀫𑀗𑁆𑀕𑀮𑀤𑁄𑀲𑀯𑀻𑀢𑀺𑀯𑀢𑁆𑀢𑁄𑀢𑀺 𑀲𑁄 𑀔𑀻𑀡𑀸𑀲𑀯𑁄 𑀲𑀩𑁆𑀩𑀫𑀗𑁆𑀕𑀮𑀤𑁄𑀲𑁂 𑀯𑀻𑀢𑀺𑀯𑀢𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄. 𑀬𑀼𑀕𑀬𑁄𑀕𑀸𑀥𑀺𑀕𑀢𑁄𑀢𑀺 ‘‘𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘, 𑀫𑀓𑁆𑀔𑁄 𑀘 𑀧𑀴𑀸𑀲𑁄 𑀘𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁩𑁩) 𑀦𑀬𑁂𑀦 𑀤𑁆𑀯𑁂 𑀤𑁆𑀯𑁂 𑀏𑀓𑀢𑁄 𑀆𑀕𑀢𑀓𑀺𑀮𑁂𑀲𑀸 𑀬𑀼𑀕𑀸 𑀦𑀸𑀫. 𑀓𑀸𑀫𑀬𑁄𑀕𑁄, 𑀪𑀯𑀬𑁄𑀕𑁄, 𑀤𑀺𑀝𑁆𑀞𑀺𑀬𑁄𑀕𑁄, 𑀅𑀯𑀺𑀚𑁆𑀚𑀸𑀬𑁄𑀕𑁄𑀢𑀺 𑀇𑀫𑁂 𑀲𑀁𑀲𑀸𑀭𑁂 𑀬𑁄𑀚𑀦𑀪𑀸𑀯𑀢𑁄 𑀘𑀢𑁆𑀢𑀸𑀭𑁄 𑀬𑁄𑀕𑀸 𑀦𑀸𑀫. 𑀢𑁂 𑀬𑀼𑀕𑁂 𑀘 𑀬𑁄𑀕𑁂 𑀘𑀸𑀢𑀺 𑀬𑀼𑀕𑀬𑁄𑀕𑁂 𑀅𑀥𑀺𑀕𑀢𑁄 𑀅𑀪𑀺𑀪𑀯𑀺𑀢𑁆𑀯𑀸 𑀕𑀢𑁄 𑀯𑀻𑀢𑀺𑀯𑀢𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼. 𑀦 𑀚𑀸𑀢𑀼𑀫𑁂𑀢𑀻𑀢𑀺 𑀧𑀼𑀦 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀏𑀓𑀁𑀲𑁂𑀦𑁂𑀯 𑀇𑀫𑀁 𑀮𑁄𑀓𑀁 𑀦 𑀏𑀢𑀺 𑀦𑀸𑀕𑀘𑁆𑀙𑀢𑀻𑀢𑀺.

𑀏𑀯𑀁 𑀲𑀢𑁆𑀣𑀸 𑀇𑀫𑀸𑀬 𑀕𑀸𑀣𑀸𑀬 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀏𑀢𑁂𑀯 𑀧𑀺𑀢𑀸𑀧𑀼𑀢𑁆𑀢𑀸 𑀇𑀤𑀸𑀦𑀺 𑀧𑀺𑀢𑀸𑀧𑀼𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀗𑁆𑀕𑀮𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁮𑁮] 𑁮. 𑀲𑀸𑀭𑀫𑁆𑀪𑀚𑀸𑀢𑀓𑀯𑀡𑁆𑀡𑀦𑀸

𑀓𑀮𑁆𑀬𑀸𑀡𑀺𑀫𑁂𑀯 𑀫𑀼𑀜𑁆𑀘𑁂𑀬𑁆𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁧𑁫) 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺 𑀳𑁂𑀝𑁆𑀞𑀸 𑀦𑀦𑁆𑀤𑀺𑀯𑀺𑀲𑀸𑀮𑀚𑀸𑀢𑀓𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀸𑀭𑀫𑁆𑀪𑁄 𑀦𑀸𑀫 𑀩𑀮𑀺𑀩𑀤𑁆𑀤𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀇𑀤𑀁 𑀅𑀢𑀻𑀢𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁮. ‘‘𑀓𑀮𑁆𑀬𑀸𑀡𑀺𑀫𑁂𑀯 𑀫𑀼𑀜𑁆𑀘𑁂𑀬𑁆𑀬, 𑀦 𑀳𑀺 𑀫𑀼𑀜𑁆𑀘𑁂𑀬𑁆𑀬 𑀧𑀸𑀧𑀺𑀓𑀁;

𑀫𑁄𑀓𑁆𑀔𑁄 𑀓𑀮𑁆𑀬𑀸𑀡𑀺𑀬𑀸 𑀲𑀸𑀥𑀼, 𑀫𑀼𑀢𑁆𑀯𑀸 𑀢𑀧𑁆𑀧𑀢𑀺 𑀧𑀸𑀧𑀺𑀓’’𑀦𑁆𑀢𑀺.

𑀢𑀢𑁆𑀣 𑀓𑀮𑁆𑀬𑀸𑀡𑀺𑀫𑁂𑀯 𑀫𑀼𑀜𑁆𑀘𑁂𑀬𑁆𑀬𑀸𑀢𑀺 𑀘𑀢𑀼𑀤𑁄𑀲𑀯𑀺𑀦𑀺𑀫𑀼𑀢𑁆𑀢𑀁 𑀓𑀮𑁆𑀬𑀸𑀡𑀺𑀁 𑀲𑀼𑀦𑁆𑀤𑀭𑀁 𑀅𑀦𑀯𑀚𑁆𑀚𑀁 𑀯𑀸𑀘𑀫𑁂𑀯 𑀫𑀼𑀜𑁆𑀘𑁂𑀬𑁆𑀬 𑀯𑀺𑀲𑁆𑀲𑀚𑁆𑀚𑁂𑀬𑁆𑀬 𑀓𑀣𑁂𑀬𑁆𑀬. 𑀦 𑀳𑀺 𑀫𑀼𑀜𑁆𑀘𑁂𑀬𑁆𑀬 𑀧𑀸𑀧𑀺𑀓𑀦𑁆𑀢𑀺 𑀧𑀸𑀧𑀺𑀓𑀁 𑀮𑀸𑀫𑀺𑀓𑀁 𑀧𑀭𑁂𑀲𑀁 𑀅𑀧𑁆𑀧𑀺𑀬𑀁 𑀅𑀫𑀦𑀸𑀧𑀁 𑀦 𑀫𑀼𑀜𑁆𑀘𑁂𑀬𑁆𑀬 𑀦 𑀓𑀣𑁂𑀬𑁆𑀬. 𑀫𑁄𑀓𑁆𑀔𑁄 𑀓𑀮𑁆𑀬𑀸𑀡𑀺𑀬𑀸 𑀲𑀸𑀥𑀽𑀢𑀺 𑀓𑀮𑁆𑀬𑀸𑀡𑀯𑀸𑀘𑀸𑀬 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀸𑀥𑀼 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁. 𑀫𑀼𑀢𑁆𑀯𑀸 𑀢𑀧𑁆𑀧𑀢𑀺 𑀧𑀸𑀧𑀺𑀓𑀦𑁆𑀢𑀺 𑀧𑀸𑀧𑀺𑀓𑀁 𑀨𑀭𑀼𑀲𑀯𑀸𑀘𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀣𑁂𑀢𑁆𑀯𑀸 𑀲𑁄 𑀧𑀼𑀕𑁆𑀕𑀮𑁄 𑀢𑀧𑁆𑀧𑀢𑀺 𑀲𑁄𑀘𑀢𑀺 𑀓𑀺𑀮𑀫𑀢𑀻𑀢𑀺.

𑀏𑀯𑀁 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀲𑀸𑀭𑀫𑁆𑀪𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀸𑀭𑀫𑁆𑀪𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁮𑁯] 𑁯. 𑀓𑀼𑀳𑀓𑀚𑀸𑀢𑀓𑀯𑀡𑁆𑀡𑀦𑀸

𑀯𑀸𑀘𑀸𑀯 𑀓𑀺𑀭 𑀢𑁂 𑀆𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑀼𑀳𑀓𑀯𑀢𑁆𑀣𑀼 𑀉𑀤𑁆𑀤𑀸𑀮𑀓𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑀁 𑀕𑀸𑀫𑀓𑀁 𑀉𑀧𑀦𑀺𑀲𑁆𑀲𑀸𑀬 𑀏𑀓𑁄 𑀓𑀽𑀝𑀚𑀝𑀺𑀮𑁄 𑀓𑀼𑀳𑀓𑀢𑀸𑀧𑀲𑁄 𑀯𑀲𑀢𑀺. 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀢𑀲𑁆𑀲 𑀅𑀭𑀜𑁆𑀜𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀦𑀁 𑀯𑀸𑀲𑁂𑀦𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑁂 𑀧𑀡𑀻𑀢𑀸𑀳𑀸𑀭𑁂𑀦 𑀧𑀝𑀺𑀚𑀕𑁆𑀕𑀢𑀺. 𑀲𑁄 𑀢𑀁 𑀓𑀽𑀝𑀚𑀝𑀺𑀮𑀁 ‘‘𑀲𑀻𑀮𑀯𑀸 𑀏𑀲𑁄’’𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀘𑁄𑀭𑀪𑀬𑁂𑀦 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀢𑀁 𑀢𑀲𑁆𑀲 𑀧𑀡𑁆𑀡𑀲𑀸𑀮𑀁 𑀦𑁂𑀢𑁆𑀯𑀸 𑀪𑀽𑀫𑀺𑀕𑀢𑀁 𑀓𑀢𑁆𑀯𑀸 ‘‘𑀇𑀤𑀁 𑀑𑀮𑁄𑀓𑁂𑀬𑁆𑀬𑀸𑀲𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀅𑀣 𑀦𑀁 𑀢𑀸𑀧𑀲𑁄 ‘‘𑀧𑀩𑁆𑀩𑀚𑀺𑀢𑀸𑀦𑀁 𑀦𑀸𑀫, 𑀆𑀯𑀼𑀲𑁄, 𑀏𑀯𑀭𑀽𑀧𑀁 𑀓𑀣𑁂𑀢𑀼𑀁, 𑀦 𑀯𑀝𑁆𑀝𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀧𑀭𑀲𑀦𑁆𑀢𑀓𑁂 𑀮𑁄𑀪𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀤𑀼𑀝𑁆𑀞𑀢𑀸𑀧𑀲𑁄 ‘‘𑀲𑀓𑁆𑀓𑀸 𑀏𑀢𑁆𑀢𑀓𑁂𑀦 𑀚𑀻𑀯𑀺𑀢𑀼’’𑀦𑁆𑀢𑀺 𑀓𑀢𑀺𑀧𑀸𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀁 𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬𑀫𑁂𑀯 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀲𑁆𑀲 𑀕𑁂𑀳𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀏𑀯𑀫𑀸𑀳 ‘‘𑀆𑀯𑀼𑀲𑁄, 𑀫𑀬𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀘𑀺𑀭𑀁 𑀯𑀲𑀺𑀫𑁆𑀳, 𑀅𑀢𑀺𑀘𑀺𑀭𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄 𑀳𑁄𑀢𑀺, 𑀲𑀁𑀲𑀕𑁆𑀕𑁄 𑀘 𑀦𑀸𑀫 𑀧𑀩𑁆𑀩𑀚𑀺𑀢𑀸𑀦𑀁 𑀫𑀮𑀁, 𑀢𑀲𑁆𑀫𑀸 𑀕𑀘𑁆𑀙𑀸𑀫𑀳’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀦𑀺𑀯𑀢𑁆𑀢𑀺𑀢𑀼𑀁 𑀦 𑀇𑀘𑁆𑀙𑀺. 𑀅𑀣 𑀦𑀁 𑀲𑁄 ‘‘𑀏𑀯𑀁 𑀲𑀦𑁆𑀢𑁂 𑀕𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀬𑀸𑀯 𑀕𑀸𑀫𑀤𑁆𑀯𑀸𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀢𑀸𑀧𑀲𑁄𑀧𑀺 𑀣𑁄𑀓𑀁 𑀕𑀦𑁆𑀢𑁆𑀯𑀸𑀯 ‘‘𑀇𑀫𑀁 𑀓𑀼𑀝𑀼𑀫𑁆𑀩𑀺𑀓𑀁 𑀫𑀬𑀸 𑀯𑀜𑁆𑀘𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀚𑀝𑀸𑀦𑀁 𑀅𑀦𑁆𑀢𑀭𑁂 𑀢𑀺𑀡𑀁 𑀞𑀧𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺. 𑀓𑀼𑀝𑀼𑀫𑁆𑀩𑀺𑀓𑁄 ‘‘𑀓𑀺𑀁, 𑀪𑀦𑁆𑀢𑁂, 𑀦𑀺𑀯𑀢𑁆𑀢𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀆𑀯𑀼𑀲𑁄 𑀢𑀼𑀫𑁆𑀳𑀸𑀓𑀁 𑀕𑁂𑀳𑀘𑁆𑀙𑀤𑀦𑀢𑁄 𑀫𑁂 𑀚𑀝𑀸𑀲𑀼 𑀏𑀓𑀢𑀺𑀡𑀁 𑀮𑀕𑁆𑀕𑀁, 𑀅𑀤𑀺𑀦𑁆𑀦𑀸𑀤𑀸𑀦𑀜𑁆𑀘 𑀦𑀸𑀫 𑀧𑀩𑁆𑀩𑀚𑀺𑀢𑀸𑀦𑀁 𑀦 𑀯𑀝𑁆𑀝𑀢𑀺, 𑀢𑀁 𑀆𑀤𑀸𑀬 𑀆𑀕𑀢𑁄𑀫𑁆𑀳𑀻𑀢𑀺. 𑀓𑀼𑀝𑀼𑀫𑁆𑀩𑀺𑀓𑁄 ‘‘𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀢𑀺𑀡𑀲𑀮𑀸𑀓𑀫𑁆𑀧𑀺 𑀦𑀸𑀫 𑀧𑀭𑀲𑀦𑁆𑀢𑀓𑀁 𑀦 𑀕𑀡𑁆𑀳𑀸𑀢𑀺, 𑀅𑀳𑁄 𑀓𑀼𑀓𑁆𑀓𑀼𑀘𑁆𑀘𑀓𑁄 𑀫𑁂 𑀅𑀬𑁆𑀬𑁄’’𑀢𑀺 𑀧𑀲𑀻𑀤𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.

𑀢𑀤𑀸 𑀧𑀦 𑀩𑁄𑀥𑀺𑀲𑀢𑁆𑀢𑁂𑀦 𑀪𑀡𑁆𑀟𑀢𑁆𑀣𑀸𑀬 𑀧𑀘𑁆𑀘𑀦𑁆𑀢𑀁 𑀕𑀘𑁆𑀙𑀦𑁆𑀢𑁂𑀦 𑀢𑀲𑁆𑀫𑀺𑀁 𑀦𑀺𑀯𑁂𑀲𑀦𑁂 𑀦𑀺𑀯𑀸𑀲𑁄 𑀕𑀳𑀺𑀢𑁄 𑀳𑁄𑀢𑀺. 𑀲𑁄 𑀢𑀸𑀧𑀲𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸𑀯 ‘‘𑀅𑀤𑁆𑀥𑀸 𑀇𑀫𑀺𑀦𑀸 𑀤𑀼𑀝𑁆𑀞𑀢𑀸𑀧𑀲𑁂𑀦 𑀇𑀫𑀲𑁆𑀲 𑀓𑀺𑀜𑁆𑀘𑀺 𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀝𑀼𑀫𑁆𑀩𑀺𑀓𑀁 𑀧𑀼𑀘𑁆𑀙𑀺 ‘‘𑀅𑀢𑁆𑀣𑀺 𑀧𑀦 𑀢𑁂, 𑀲𑀫𑁆𑀫, 𑀓𑀺𑀜𑁆𑀘𑀺 𑀏𑀢𑀲𑁆𑀲 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀅𑀢𑁆𑀣𑀺, 𑀲𑀫𑁆𑀫, 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀢’’𑀦𑁆𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙, 𑀢𑀁 𑀉𑀧𑀥𑀸𑀭𑁂𑀳𑀻’’𑀢𑀺. 𑀲𑁄 𑀧𑀡𑁆𑀡𑀲𑀸𑀮𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀤𑀺𑀲𑁆𑀯𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 ‘‘𑀦𑀢𑁆𑀣𑀺, 𑀲𑀫𑁆𑀫𑀸’’𑀢𑀺 𑀆𑀳. ‘‘𑀦 𑀢𑁂 𑀲𑀼𑀯𑀡𑁆𑀡𑀁 𑀅𑀜𑁆𑀜𑁂𑀦 𑀕𑀳𑀺𑀢𑀁, 𑀢𑁂𑀦𑁂𑀯 𑀓𑀼𑀳𑀓𑀢𑀸𑀧𑀲𑁂𑀦 𑀕𑀳𑀺𑀢𑀁, 𑀏𑀳𑀺, 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀫𑀸’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀓𑀽𑀝𑀢𑀸𑀧𑀲𑀁 𑀕𑀡𑁆𑀳𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑁄𑀣𑁂𑀢𑁆𑀯𑀸 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀲𑀼𑀯𑀡𑁆𑀡𑀁 𑀤𑀺𑀲𑁆𑀯𑀸 ‘‘𑀦𑀺𑀓𑁆𑀔𑀲𑀢𑀁 𑀳𑀭𑀫𑀸𑀦𑁄 𑀅𑀲𑀚𑁆𑀚𑀺𑀢𑁆𑀯𑀸 𑀢𑀺𑀡𑀫𑀢𑁆𑀢𑁂 𑀲𑀢𑁆𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀕𑀭𑀳𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁯. ‘‘𑀯𑀸𑀘𑀸𑀯 𑀓𑀺𑀭 𑀢𑁂 𑀆𑀲𑀺, 𑀲𑀡𑁆𑀳𑀸 𑀲𑀔𑀺𑀮𑀪𑀸𑀡𑀺𑀦𑁄;

𑀢𑀺𑀡𑀫𑀢𑁆𑀢𑁂 𑀅𑀲𑀚𑁆𑀚𑀺𑀢𑁆𑀣𑁄, 𑀦𑁄 𑀘 𑀦𑀺𑀓𑁆𑀔𑀲𑀢𑀁 𑀳𑀭’’𑀦𑁆𑀢𑀺.

𑀢𑀢𑁆𑀣 𑀯𑀸𑀘𑀸𑀯 𑀓𑀺𑀭 𑀢𑁂 𑀆𑀲𑀺, 𑀲𑀡𑁆𑀳𑀸 𑀲𑀔𑀺𑀮𑀪𑀸𑀡𑀺𑀦𑁄𑀢𑀺 ‘‘𑀧𑀩𑁆𑀩𑀚𑀺𑀢𑀸𑀦𑀁 𑀢𑀺𑀡𑀫𑀢𑁆𑀢𑀫𑁆𑀧𑀺 𑀅𑀤𑀺𑀦𑁆𑀦𑀁 𑀆𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀲𑀔𑀺𑀮𑀁 𑀫𑀼𑀤𑀼𑀯𑀘𑀦𑀁 𑀯𑀤𑀦𑁆𑀢𑀲𑁆𑀲 𑀯𑀸𑀘𑀸 𑀏𑀯 𑀓𑀺𑀭 𑀢𑁂 𑀲𑀡𑁆𑀳𑀸 𑀆𑀲𑀺, 𑀯𑀘𑀦𑀫𑀢𑁆𑀢𑀫𑁂𑀯 𑀫𑀝𑁆𑀞𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀢𑀺𑀡𑀫𑀢𑁆𑀢𑁂 𑀅𑀲𑀚𑁆𑀚𑀺𑀢𑁆𑀣𑁄𑀢𑀺 𑀓𑀽𑀝𑀚𑀝𑀺𑀮 𑀏𑀓𑀺𑀲𑁆𑀲𑀸 𑀢𑀺𑀡𑀲𑀮𑀸𑀓𑀸𑀬 𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀭𑀼𑀫𑀸𑀦𑁄 𑀢𑁆𑀯𑀁 𑀲𑀢𑁆𑀢𑁄 𑀆𑀲𑀢𑁆𑀢𑁄 𑀮𑀕𑁆𑀕𑁄 𑀅𑀳𑁄𑀲𑀺. 𑀦𑁄 𑀘 𑀦𑀺𑀓𑁆𑀔𑀲𑀢𑀁 𑀳𑀭𑀦𑁆𑀢𑀺 𑀇𑀫𑀁 𑀧𑀦 𑀦𑀺𑀓𑁆𑀔𑀲𑀢𑀁 𑀳𑀭𑀦𑁆𑀢𑁄 𑀅𑀲𑀢𑁆𑀢𑁄 𑀦𑀺𑀮𑁆𑀮𑀕𑁆𑀕𑁄𑀯 𑀚𑀸𑀢𑁄𑀲𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀕𑀭𑀳𑀺𑀢𑁆𑀯𑀸 ‘‘𑀫𑀸 𑀧𑀼𑀦, 𑀓𑀽𑀝𑀚𑀝𑀺𑀮, 𑀏𑀯𑀭𑀽𑀧𑀫𑀓𑀸𑀲𑀻’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀪𑀺𑀓𑁆𑀔𑀼 𑀓𑀼𑀳𑀓𑁄, 𑀧𑀼𑀩𑁆𑀩𑁂𑀧𑀺 𑀓𑀼𑀳𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀽𑀝𑀢𑀸𑀧𑀲𑁄 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀳𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁯𑁦] 𑁧𑁦. 𑀅𑀓𑀢𑀜𑁆𑀜𑀼𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀓𑀺𑀭𑁂𑀓𑁄 𑀧𑀘𑁆𑀘𑀦𑁆𑀢𑀯𑀸𑀲𑀺𑀓𑁄 𑀲𑁂𑀝𑁆𑀞𑀺 𑀅𑀤𑀺𑀝𑁆𑀞𑀲𑀳𑀸𑀬𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀸 𑀧𑀘𑁆𑀘𑀦𑁆𑀢𑁂 𑀉𑀝𑁆𑀞𑀸𑀦𑀓𑀪𑀡𑁆𑀟𑀲𑁆𑀲 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀓𑀫𑁆𑀫𑀦𑁆𑀢𑀺𑀓𑀫𑀦𑀼𑀲𑁆𑀲𑁂 𑀆𑀳 𑁋 ‘‘𑀕𑀘𑁆𑀙𑀣, 𑀪𑁄, 𑀇𑀫𑀁 𑀪𑀡𑁆𑀟𑀁 𑀲𑀸𑀯𑀢𑁆𑀣𑀺𑀁 𑀦𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀳𑀸𑀬𑀓𑀲𑁆𑀲 𑀅𑀦𑀸𑀣𑀧𑀺𑀡𑁆𑀟𑀺𑀓𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀧𑀘𑁆𑀘𑀕𑁆𑀖𑁂𑀦 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀝𑀺𑀪𑀡𑁆𑀟𑀁 𑀆𑀳𑀭𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑁂𑀝𑁆𑀞𑀺𑀁 𑀤𑀺𑀲𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀫𑀳𑀸𑀲𑁂𑀝𑁆𑀞𑀺 ‘‘𑀲𑁆𑀯𑀸𑀕𑀢𑀁 𑀯𑁄’’𑀢𑀺 𑀢𑁂𑀲𑀁 𑀆𑀯𑀸𑀲𑀜𑁆𑀘 𑀧𑀭𑀺𑀩𑁆𑀩𑀬𑀜𑁆𑀘 𑀤𑀸𑀧𑁂𑀢𑁆𑀯𑀸 𑀲𑀳𑀸𑀬𑀓𑀲𑁆𑀲 𑀲𑀼𑀔𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀝𑀺𑀪𑀡𑁆𑀟𑀁 𑀤𑀸𑀧𑁂𑀲𑀺. 𑀢𑁂 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀅𑀢𑁆𑀢𑀦𑁄 𑀲𑁂𑀝𑁆𑀞𑀺𑀲𑁆𑀲 𑀆𑀭𑁄𑀘𑁂𑀲𑀼𑀁.

𑀅𑀧𑀭𑀪𑀸𑀕𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀧𑀺 𑀢𑀣𑁂𑀯 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀢𑀢𑁆𑀣 𑀧𑁂𑀲𑁂𑀲𑀺. 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀧𑀘𑁆𑀘𑀦𑁆𑀢𑀯𑀸𑀲𑀺𑀓𑀲𑁂𑀝𑁆𑀞𑀺𑀁 𑀧𑀲𑁆𑀲𑀺𑀁𑀲𑀼. 𑀲𑁄 ‘‘𑀓𑀼𑀢𑁄 𑀆𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀸𑀯𑀢𑁆𑀣𑀺𑀢𑁄 𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑀓𑀲𑁆𑀲 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀲𑀦𑁆𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀢𑀺 𑀓𑀲𑁆𑀲𑀘𑀺 𑀧𑀼𑀭𑀺𑀲𑀲𑁆𑀲 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀳𑀸𑀲𑀁 𑀓𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀉𑀬𑁆𑀬𑁄𑀚𑁂𑀲𑀺, 𑀦𑁂𑀯 𑀦𑀺𑀯𑀸𑀲𑀁, 𑀦 𑀧𑀭𑀺𑀩𑁆𑀩𑀬𑀁 𑀤𑀸𑀧𑁂𑀲𑀺. 𑀢𑁂 𑀲𑀬𑀫𑁂𑀯 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀝𑀺𑀪𑀡𑁆𑀟𑀁 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀲𑁄 𑀧𑀘𑁆𑀘𑀦𑁆𑀢𑀯𑀸𑀲𑀻 𑀧𑀼𑀦𑀧𑀺 𑀏𑀓𑀯𑀸𑀭𑀁 𑀢𑀣𑁂𑀯 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀲𑀸𑀯𑀢𑁆𑀣𑀺𑀁 𑀧𑁂𑀲𑁂𑀲𑀺, 𑀫𑀦𑀼𑀲𑁆𑀲𑀸 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀫𑀳𑀸𑀲𑁂𑀝𑁆𑀞𑀺𑀁 𑀧𑀲𑁆𑀲𑀺𑀁𑀲𑀼. 𑀢𑁂 𑀧𑀦 𑀤𑀺𑀲𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀫𑀦𑀼𑀲𑁆𑀲𑀸 ‘‘𑀫𑀬𑀁, 𑀲𑀸𑀫𑀺, 𑀏𑀢𑁂𑀲𑀁 𑀦𑀺𑀯𑀸𑀲𑀜𑁆𑀘 𑀪𑀢𑁆𑀢𑀜𑁆𑀘 𑀧𑀭𑀺𑀩𑁆𑀩𑀬𑀜𑁆𑀘 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀲𑀓𑀝𑀸𑀦𑀺 𑀩𑀳𑀺𑀦𑀕𑀭𑁂 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀫𑁄𑀘𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀇𑀥𑁂𑀯 𑀯𑀲𑀣, 𑀅𑀫𑁆𑀳𑀸𑀓𑀁 𑀯𑁄 𑀖𑀭𑁂 𑀬𑀸𑀕𑀼𑀪𑀢𑁆𑀢𑀜𑁆𑀘 𑀧𑀭𑀺𑀩𑁆𑀩𑀬𑁄 𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺𑀧𑀺 𑀦𑁂𑀲𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑁄𑀡𑁂 𑀧𑀮𑀸𑀧𑁂𑀢𑁆𑀯𑀸 𑀲𑀓𑀝𑀸𑀦𑀺 𑀯𑀺𑀘𑀓𑁆𑀓𑀸𑀦𑀺 𑀓𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀘𑀓𑁆𑀓𑀸𑀦𑀺𑀧𑀺 𑀕𑀡𑁆𑀳𑀺𑀢𑁆𑀯𑀸𑀯 𑀅𑀕𑀫𑀁𑀲𑀼. 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀦𑀺𑀯𑀸𑀲𑀦𑀫𑀢𑁆𑀢𑀲𑁆𑀲𑀧𑀺 𑀲𑀸𑀫𑀺𑀓𑀸 𑀅𑀳𑀼𑀢𑁆𑀯𑀸 𑀪𑀻𑀢𑀸 𑀯𑁂𑀕𑁂𑀦 𑀧𑀮𑀸𑀬𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀫𑁂𑀯 𑀕𑀢𑀸. 𑀲𑁂𑀝𑁆𑀞𑀺𑀫𑀦𑀼𑀲𑁆𑀲𑀸𑀧𑀺 𑀢𑀫𑀢𑁆𑀣𑀁 𑀫𑀳𑀸𑀲𑁂𑀝𑁆𑀞𑀺𑀦𑁄 𑀆𑀭𑁄𑀘𑁂𑀲𑀼𑀁. 𑀲𑁄 ‘‘𑀅𑀢𑁆𑀣𑀺 𑀤𑀸𑀦𑀺𑀤𑀁 𑀓𑀣𑀸𑀧𑀸𑀪𑀢’’𑀦𑁆𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀕𑀳𑀧𑀢𑀺, 𑀲𑁄 𑀧𑀘𑁆𑀘𑀦𑁆𑀢𑀯𑀸𑀲𑀻 𑀇𑀤𑀸𑀦𑁂𑀯 𑀏𑀯𑀁𑀲𑀻𑀮𑁄, 𑀧𑀼𑀩𑁆𑀩𑁂𑀧𑀺 𑀏𑀯𑀁𑀲𑀻𑀮𑁄𑀬𑁂𑀯 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀢𑀲𑁆𑀲𑁂𑀓𑁄 𑀧𑀘𑁆𑀘𑀦𑁆𑀢𑀯𑀸𑀲𑀺𑀓𑁄 𑀲𑁂𑀝𑁆𑀞𑀺 𑀅𑀤𑀺𑀝𑁆𑀞𑀲𑀳𑀸𑀬𑁄 𑀅𑀳𑁄𑀲𑀺. 𑀲𑀩𑁆𑀩𑀁 𑀅𑀢𑀻𑀢𑀯𑀢𑁆𑀣𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀲𑀤𑀺𑀲𑀫𑁂𑀯 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀅𑀢𑁆𑀢𑀦𑁄 𑀫𑀦𑀼𑀲𑁆𑀲𑁂𑀳𑀺 ‘‘𑀅𑀚𑁆𑀚 𑀅𑀫𑁆𑀳𑁂𑀳𑀺 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀆𑀭𑁄𑀘𑀺𑀢𑁂 ‘‘𑀧𑀞𑀫𑀁 𑀅𑀢𑁆𑀢𑀦𑁄 𑀓𑀢𑀁 𑀉𑀧𑀓𑀸𑀭𑀁 𑀅𑀚𑀸𑀦𑀦𑁆𑀢𑀸 𑀧𑀘𑁆𑀙𑀸 𑀏𑀯𑀭𑀽𑀧𑀁 𑀮𑀪𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁦. ‘‘𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀓𑀢𑀢𑁆𑀣𑁄 𑀦𑀸𑀯𑀩𑀼𑀚𑁆𑀛𑀢𑀺;

𑀧𑀘𑁆𑀙𑀸 𑀓𑀺𑀘𑁆𑀘𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀓𑀢𑁆𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀧𑀼𑀩𑁆𑀩𑁂 𑀧𑀞𑀫𑀢𑀭𑀁 𑀅𑀜𑁆𑀜𑁂𑀦 𑀓𑀢𑀓𑀮𑁆𑀬𑀸𑀡𑁄 𑀓𑀢𑀽𑀧𑀓𑀸𑀭𑁄 𑀓𑀢𑀢𑁆𑀣𑁄 𑀦𑀺𑀧𑁆𑀨𑀸𑀤𑀺𑀢𑀓𑀺𑀘𑁆𑀘𑁄 𑀳𑀼𑀢𑁆𑀯𑀸 𑀢𑀁 𑀧𑀭𑁂𑀦 𑀅𑀢𑁆𑀢𑀦𑀺 𑀓𑀢𑀁 𑀓𑀮𑁆𑀬𑀸𑀡𑀜𑁆𑀘𑁂𑀯 𑀅𑀢𑁆𑀣𑀜𑁆𑀘 𑀦 𑀚𑀸𑀦𑀸𑀢𑀺, 𑀲𑁄 𑀧𑀘𑁆𑀙𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀲𑀫𑀼𑀧𑁆𑀧𑀦𑁆𑀦𑁂 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑁆𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀢𑀺 𑀦 𑀮𑀪𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀘𑁆𑀘𑀦𑁆𑀢𑀯𑀸𑀲𑀻 𑀇𑀤𑀸𑀦𑀻𑀧𑀺 𑀧𑀘𑁆𑀘𑀦𑁆𑀢𑀯𑀸𑀲𑀻𑀬𑁂𑀯, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀓𑀢𑀜𑁆𑀜𑀼𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀅𑀧𑀸𑀬𑀺𑀫𑁆𑀳𑀯𑀕𑁆𑀕𑁄 𑀦𑀯𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀼𑀭𑀸𑀧𑀸𑀦𑀁 𑀫𑀺𑀢𑁆𑀢𑀯𑀺𑀦𑁆𑀤𑀁, 𑀓𑀸𑀴𑀓𑀡𑁆𑀡𑀻 𑀅𑀢𑁆𑀣𑀤𑁆𑀯𑀸𑀭𑀁;

𑀓𑀺𑀁𑀧𑀓𑁆𑀓𑀲𑀻𑀮𑀯𑀻𑀫𑀁𑀲𑀁, 𑀫𑀗𑁆𑀕𑀮𑀜𑁆𑀘𑀸𑀧𑀺 𑀲𑀸𑀭𑀫𑁆𑀪𑀁;

𑀓𑀼𑀳𑀓𑀁 𑀅𑀓𑀢𑀜𑁆𑀜𑀽 𑀘𑀸𑀢𑀺.